لحن الأمل الجزء 43

تتمة 1

للمرة الثانية كاتلخص بكلامها معاناتها بحرقة للمرة الثانية كاتقول اسبابها والفرق ان هنا زادت تعمقات فحجم الألم والأسباب...هي كاتعااود وشوفاتها كايبانو عاديين ولكن المشاكل الي ذكرات مبينين حجم الاأم بدون ماتحتاج تعبر بملامحها...بدون ما تذرف ولا دمعة...كاتعاود وهي حامدة الله...كاتقول وهي راضية بالي قسمو الله...كاتشرح وهي باغية الي يفهم...ومصطفى كايسمع وقلبو كايتعصر اكثر واكثر...بقات فيه ختو والمعانات الي عاشتها وبقات فيه مريم اكثر من شنو دازت...تكرفصات بزاف وتكرفصات هي وماماها اكثر ومن الي تزادت وهي وسط المشاكيل...نهار كبرات ولقات استقرارها مع ماماها تسلط عليها شيطان فهيئة انسان...عيشها المرار الي ماعمرو كان يطيح فبالها...

مصطفى"حدر راسو وعينيه وحجبانو معقودين بتأثر...مريم سكتات من اخر كلمة وعم الصمت مصطفى كايحاول يستوعب كلامها وهي كاتحاول ترتاح من شنو قالت...تنهد تنهيدة طويلة وهز راسو شايف فيها...

مصطفى : لا حول ولا قوة الا بالله..."رجع سكت كيشوف فيها وكمل كلامو"...بغيتي نهضر معاك حتى انا ولا نسمع ليك وندعي معاك...

مريم : قول الي بغيتي مانوقفكش ومانقمعكش...ودعيي معايا...

مصطفى : الي وقع ليك وواقع ليك امريم ماشي غير نتي وحدك تفرزتي وحط عليك الله سبحانه المكتاب...منك بزاااف ومنك عايش ماكثر من هادشي الي عشتي نتي...نعطيك مثال السيدة الي توفات ديك المرة الي كانت جارتكم نسيت سميتها...

مريم"تنهدات" : مي الغالية...

مصطفى : ايييه الغالية الله يرحمها..."ركز معاها بعينيه"...داكشي الي عاشتو مكانش عادي...تغدرات من اقرب الناس ليها... الي الفطرة علاش تزادينا كاتقول هادوك محرمين عليها ولد خوها كااع الي ماعمرها كانت تقول راه يطمع فيها..."نزلات عينيها وكمشات حجبانها من السيرة"... غادي تگولي ليا صبرات حتى عيات وماتت بالفقصة !؟...كون لقات الي يوقف معاها كون لقات حبابها حداها...كانت تصبر ولا مكانش يوقع ليها الي يوقع...لقات غا خو واحد والباقي لايحينها...ماعندها واليدين ماعندها الي يشوفها بالاحترام...مالقاتش فرصة مالقاتش الي يجبرها...بقات حتى كبرات وتغدرات...

مريم"الصمت"...

مصطفى : نتي وقعو ليك المشاكيل تعداو عليك ولاد لحرام...ولكن لقيتي حبابك ونتي باقي صغيرة...لقيتي الي يوقف معاك والي يطبطب عليك ويخاف عليك...فايت گلتي ليا هادشي ممولفاهش !! ولكن ماتنكريش راه ريحك وعجبك ولقيتي باب الامل تفتح فوجهك بسباب واحد الدعوة دعيتيها وربي استاجب ليك...ياك شحال من مرة فاش كنتي مشدودة كاتهزي كفوفك لله وتدعي ربي يحل ليك بيبان الخير ويوقف فطريقك ولاد الحلال...ياك درتيها ولا غير توقعت كذوب ؟؟ "تنهدات وحركات راسها" مزيااان......تال هنا وفهمتي ياك ؟!...

مريم"حركات راسها"...

مصطفى : واحد التجربة عشتيها خايبة ماكتعنيش را كلشي غايكون خايب...مكاتعنيش راه نتي وليتي خايبة وتخطط عليك بستيلو كحل وقالو راه مابقات تصلاح لحد...كي گلت ليك بزاف عاشو كثر منك وعاشو بحالك يعني ابنتي ماشي نتي لولة وماغاديش تكوني لاخرة...هادي هي الدنيا فيها الناس خايبيين وقلوب كحلة مافيهاش الرحمة ولكن راه مكايعنيش راه مافيهاش ولاد الناس وولاد الخير...سمعتيني ياك ؟..

مريم"حركت راسها بدون رد"...

مصطفى : مازن ابنتي.... نهار بغاك مجاش وبغاك حيث باغي يعاونك من المشاكيل وحيث بقيتي فيه...مازن باغيك بمشاكيلك...بغا يتزوج بيك فوقت الشدة والحزة...باغي تفكو المشكيل بجوج وتحلو العقدة بجوج...باغي يوريك راه كاين الي باغيك كيما نتي...حيث هو ماشي برهوش الي باغي يتفلى وعاارف هادشي راه ماطاحش فبالك عارف...وماشي نهار شافك قال بغيتها حيث شفتها وعجباتني...نهار عجبتيه راه دوز وقت طوييييل تا فكر وضرب وقيس وعرف اش لي ليه والي عليه وفكر فالقدام والحاضر وحتى الماضي ديالك…وعااارف راه صعيب الخدمة تعطيه الموافقة وماهموش كثر ماهماتو الموافقة ديالك نتي والباقي كايبقى غير وراق وسنية بستيلو ونوض نايض واخا كايشد شوية الوقت...وعرف شكون نتي وعاش معاك تحت سقف واحد...ماشي رعواني باش نهار تكوني نتي وياه تحت سقف واحد بجوج يشوف الضرب الي فايدك وينفر منك...راه شارب عقلو 41 عام تعطيك الخبار...وماشي حيث ولد ختي نجي من جيهتو راه تانتي بنت ختي ولكن حيث كنعرف مازن وكانعرفوو مزيااان وعارف تفكيرو الي ثقيييل وماكيقرر حتى كايدوز وقت وتقولي هذا را صافي نسى وموحال باقي عاقل.... وشايفو باغي معاك الحلال...وماشي حاضيكم...ولكن شايفك فعينيه...مريم بنتي هو ماباغيش يبزز عليك بغيتي مرحبا مابغيتيش الله يسهل عليك.."سكت وهو يتنهد ورجع كمل"...مافيها باس شي نهار هزي تيليفون وسمعي للراديو ولا سيري ليوتيب وتفرجي فالعيالات الي عاشو مشاكيل فحياتهم الزوجية وسمعي بوذنيك راه ماشي نتي لولة ولا لاخرة...سمعي وتعلمي واستافدي من تجاربهم...ماشي كنگوليك راك حاسة براسك عايشة هادشي غير نتي وحدك وكايبان ليك…. بغيتك تفرجي باش تنفسي عليك وترتاحي حيث ماشي وحدك وكيف كيقولو "اذا عمت هانت" ههههه...صافي ابنتي ؟!...

تبسمات ليه وحركات راسها...وهو ينوض طبطب عليها ودعا معاها بالشفاء وخرج من البيت مخلي هضرتو فراسها كاتعاود وتعاود...

يوم جديييد....

السابعة والنصف صباحا...

جالسين فقاع الدار مع داك الصباح الباكر... حطات ليه كاس القهوة سخووون... وجدو ليه هو اللول حيث خاصو يمشي لخدمتو اما هما معندهمش مشكيل وقتما فطرو...

خديجة : نزيدك الخبز ؟...

مصطفى : الا يا براكة غا هاد المسمن..."شاف فساعتو" غا رتاحي باقي الحال...

مينة : مايفطرش بزاف لا عجباتو شي حاجة يشد فيها راك شفتيه فالدار كيداير...

خديجة : بغيناه يفطر مزيان غادي شاد الطريق وكان هههه...

مصطفى : مالي غادي لكازا….ها فاس غا فالدورة...بركي بركي..

يلاه جلسات وهو يتحل الباب ديال بيت النعاس وخرجات مريم كاتمشي بشوية شادة فجنبها...مبدلة بيجامتها على ديال البارح وجامعة شعرها...ناضت خديجة بغات تمشي لعندها وهي توقفها...

مريم : بلاش اماما بلاش قادة نمشي...

مينة : اش مفيقك بكري...

مريم : الي فيقكم فيقني..."قربات بشوية"...الولف وصافي...

مصطفى : كي صبحتي اليوم شوية...

مريم"جلسات بشويي وشافت فيه" : الحمد لله...شوية...

مينة : بايتة نااعسة البارح...شربتي الدوا وجبدتي عليه...

خديجة : فيقك الصداع ياك...

مريم : لا مابقاش صداع بزاف غير الى تحركت بزربة ولا درت شي حركة ماهياش وصافي...غير ولفت نفيق بكري وشهاتني جماعتكم قلت نخرج عندكم...البيت خنقني شويش...

ناضت خديجة ومينة جابو الفطور ومصطفى بقى جالس مع مريم كايهضرو عادي حتى وصل عليه الوقت وناض سلم عليها وخرج لخدمتو...في نفس التوقيت في فاس...اول ما صونات ليه الغيڤيي طفاها وناض من فراشو جمعو وحل الشرجم يتهوى البيت وخرج للدوش غسل وجهو وحك سنانو ورجع لبيت جبد حوايجو من الماريو...سروال دجين وتيشرت بلوماغين...لبسهم مشط شعرو ورش بارفانو...لبس تقاشرو وداز لكوافوز هز بزطامو وسوارت طوموبيل...وهز الباوربانك برونشاه مع التيليفون خلاه كايتشارجا فايدو...وخشا رجليه فبانطوفة حتى لعند الباب هز جاكيط خفيفة معلقة...يلاه خرج من بيتو وهو يتحل الباب وخرج ادم...شافو وحرك ليه راسو...

ادم : مال حبك متمر عالصباح...

طه"ضار خنزر فيه" : سير بسع مني...صباحات الله...

ادم مشى ليه ودور ليه راسو طواه تحت باطو وطه حيث هاز تيليفون وسوارت خارج مجرتل حيث فيه قاعدة كايتم غادي ويكمل لباسو ويخشي لوازمو فالجيب وهو نازل ماكيوصل لتحت حتى كيوصل ناضي..

طه"عض لسانو" : غاطلق ولا نخشي لزبور مك راسك فلاشاص...

ادم : باش نخشيه لمك فالزبل....

طه : واا طلق الله ينعل الطاسيلة ديال بني عمك...

ادم : الله يغبر ليك الشقف...

طه : والله يح/فر لبوك الغرس طلق...

ادم : بغيت لجد بوك السينتة...

طه : تمشي الدعوة وترجع على بوك بالكساح...وطلق القوا//ااد طلق...

ادم : قول ديزولي ادم...

طه : خصية مدورة......

ادم : على ماشي مربعة....

طه : وطلق راك خنقتي عدو ربي الحبس طلق...

ادم : قووول سمح لي ا ادم...

طه : واطلق لا نبقنن مك...طلللللق...

ادم : بغيت ليك الجهل الحبس...

طه : بغيت لجد والديك العگر ديال الدوام...وطلق راك عنفجتيني وعدو جد مي الي يخربق ليا كسااتي...والحبس طللااااق...

على صوت غواتهم خرج زيد تاهو لابس وهاز شكارتو...شافهم مشابكين كي المقص الواحلة فيه فرشيط....

زيد : ياك لباس عالصباح مالكم...

طه : قولييييه يطلق راه فقصني..وااا صفر الهيضورة لا طحتي فايدي نحيد لمك البطانة....طلق...

ادم : بلاتي...

زيد : تا مالك صابح ناشب عالصباح طلق منو راه عواج العوراج....

طه : العوراج ؟!...المحامي سير سير صباح هذا سير قلب على شي واحد ظلمو راك شحال هادي مادخلتي الفلوس يلاه هادي فرصة ومناسبة فين طيح الباطل على شي حد وربح القضية...

زيد"عض لسانو وقرب ليه مع حاكمو ادم...شدو من شعرو جرو ليه وطه قت/لييييييه وماتشديهش من شعرو تنتفيه...عض شنايفو مغيييز عليهم....

زيد : مانبداش بيك نتا نيت نطيح على والدين باباك واحد الباطل مكاينش و...

ماجا فين يكمل تا تهز طه بهزة وحدة دفعهم بزوج تا تدفع زيد وتعكل مالقى فاش يشد وهو يجي لارض بشكارتو وادم تكرفط لهيييييه لصق مع الحايط...مشى طه يجري لواحد الرخامة يحط داكشي ادم نقز تنقيزة وحدة وطار يجري نزل يدردب مع دروج مالقى مايشد فيه...زيد بقى مخرج عينيه يلاه غايهضر وهو يمشي طه لديك شكارة حلها وشتت ليه ضواصا تا غوت زيد...

طه"وجهو تجيف وجناوح منخرو تشتتو وفرفرو" : وهاهي السبة نييييت يلاه قول بسم الله...

زيد بالصدمة بقى غير حال فمو ماعرف باش تبلى...طه ضار كاينهج هز حوايجو ورجع البيت تاااني مشط شعرو وقادو...عاد خرج لقاه كايجمع فالشكارة...هما عارفين طه الى فات حتى جعر مكايلقاو مايجمعو...زيد راه يدور فيه ولكن حيث عارف راسو اش داير مادواش وراه ساااير يجمع فقشو...نزل طه مع الدروج ودخل لدار لتحت مشى نيشان لكوزينة يلاه غايعرعر وهو يلقى مازن جالس شاد الجريدة كايقرا فيها وحداه ادم كايدور فعينيه...

طه : ن نعماس صباح الخير...

مازن"هز عينيه شاف فيه يلاه غايحرك راسو وهو يبان ليه وجهو مزير" : مالك ؟!...

طه"تنهد" : وااالو...غا كنت كانجري من هنا وهنا ونزلت كنزرب فالدروج...

حرك راسو ونزل عينيه للجريدة...وطه شاف فادم الي فرنس ليه...شوية وهو يدخل زيد...الفطور يلاه ناويين يتعاونو عليه...

طه : تگعد عاوني فالفطور...

ادم : راه درت الما يطيب غا دابا صبر...

طه : عمر البراد بعدا..."شاف فيهم" بغيتو لمسمن ؟!..

ادم : يلاه جبت الكومير وكرواصة وخبز الشعير لمازن...بلاش...

هما كايهضرو ومازن دوز لخط لمريم وناض خرج من الكوزينة باش يهضر معاها بخاطرو....

كانت جالسة حداهم فقاع الدار من بعد ما مشى مصطفى حطو فطورهم كامل حيث مصطفى حطو ليه غير كاس القهوة ومسمنة وفرماج فطر بيهم حيث هو خاصو يمشي بكري شوية...شادة كويس اتاي فايديها وكاتاكل شوي بشوي...تيليفونها صونا باسم "خويا مازن" كاتباه ليه بالعربية باش كاتقراه...ماسمعاتوش حيث كان فالبيت والبيت بابو مسدود...صونا مرة وحدة ملي ماجاوباتوش قال راه ناعسة...وباش يطمن عليها صونا لمينة الي عارفها كاتكون فايقة هاد الوقت...

مينة : تيليفوني..."ساست ايديها وناضت جابتو مصغرة عينيها" هذا مازن ولدي...الو صباح الخير اولدي...

مازن"بنبرة ثقيلة" : السلام عليكم...مي..هانية ..

مينة : الحمد لله….صبحتي مزيان ؟ خوتك ؟...

مازن : الحمد لله...نتوما مزيان ؟...مريم ؟...

مينة"شافت فيها" : لواه الحمد لله صبحات مزيان هاهي حدايا كتفطر معانا...

مازن"جمع حجبانو" : مزيان...شربات دواها ؟!...

مينة : تفطر وتشربو...المهم را صبحات بيخير اليوم...

مازن : مممم..."حك لحيتو وحرك راسو مثقل"...مزيان...تهلاي ليا فراسك امي...السلام عليكم...

مينة : الله يرضي عليك...

قطعات معاه وحطات التيليفون...رجعو كايفطرو ويهضرو حتى سالاو فطورهم...وناضت مريم بشوية للبيت هزات دواها لانتيبيوتيك شرباتو...وتكات شوية تاني تعطي الراحة لراسها...هزات تيليفونها تشوف فيه حتى لقات اتصالو...كاع ماسمعاتو ملي صونا ولقات راسها ناقصة ليه الصوت...ماعرفاتش علاش لقات راسها داخلة لواتساب بغات تصيفط ليه اوديو وهي تدخل خديجة...

خديجة : مريم هاني مشيت انا وخالتك لمحل باش نسيقو بالخف فالعشية غايجي طه مع الكاميو يجيبو ليا الماعن الي بقاو عندهم فالكراج باش نعمرو...

مريم : واخا انا شوية ونخرج لقاع دار نتفرج "زفرات" قنطت شوية...

خديجة: نعسي ابنتي فين تخرجي را طه وصى وعاود خاصك تبقاي متكية واحد السيمانة باش مايتحلوش الغراز...

حركات ليها راسها ماعندها جهد تقول شي حاجة...هزات خديجة جلابتها لبساتها ودخلات مينة تاهي لبسات عليها وخرجو بزوجات....تنهدات وهي ترجع شعلات تيليفونها لقاتو باقي فالباج ديال الكونفيغساسيون بينها وبين مازن...عضات شفايفها شحااال وهي تفتح الاوديو...

مريم"بصوت متعب" : السلام عليكم...لباس عليك ؟!...سمح لي مجاوبتكش ماسمعتوش خليتو فالبيت وخرجت لقاع الدار...انا بيخير اليوم حسن من البارح الحمد لله...ربي يخليك ويسول فيك الخير والرباح...

سالات وصيفطاتو ليه...كان هو جالس حدا خوتو كايفطر معاهم حتى سمع صوت الميساج كان حاط تيليفونو بينو وبين طه الي غير سمع صوت التيليفون وحس بالفيبرور نزل راسو يشوف شنو بان ليه تيليفون مازن وشاعل على ميساج من "Maryam"...صغر عينيه وااحد التصغيرة يلاه هز راسو باش يخمم ويلاقي ويفصل (وشفناه طول كثر من سعدي) وهو يلقى مازن كيشوف فيه عاقد حجبانو...

مازن : مالك ؟!...

طه : ااا ؟...ماماليش...شي تيليفون صونا ! ديالك ؟ تيليفونك صونا ماعرفتش شكون...

مازن"كيشوف فيه"...

طه"خشا الدغمة في فمو وضار لهيه كايهضر مع زيد الي مكانش كايهضر معاه اصلا غا دوا معاه وصافي…اما مريم صيفطات الاوديو وحطات التيليفون حداها وهي تكى فسريرها باش تعطي شوية الراحة لراسها...بقات هكاك متكية تا نعساات ودازت شي ساعة وهو يصوني تيليفونها خلاها تحل عينيها ودورات راسها هزاتو لقات نمرة اخرى طلقات الخط وقالت "الو" بصوت ضعيف...

نضال : بونجوغ...مريم...

مريم"حكات عينيها" : اهلا مدام نضال...

نضاال : صافا حبيبة ؟ كيف بقيتي شوية ؟!...

مريم : الحمد لله امدام...

نضال : الحمد لله...ياكما ناعسة ؟!...

مريم : لا لا غير متكية ...

نضال : هاكاك...المهم اتصلت بيك احبيبتي غير باش نسول فيك...الحمد لله على سلامتك...وبغيت تعطيني العنوان ديال داركم الي بدلتي غير نلقى وقيت وندوز عندك انا والاخت ديالي والبنات ياسمين وقمر...

مريم : ايه مرحبا...

عطاتها العنوان وهي تقطع معاها...بان ليها ميساج من مازن دخلت ليه لقاتو مصيفط اوديو فيه ثانية وحدة كيقول "ماشي مشكيل"...

للحظة رجعات لهضرة خالها عليه...ماعرفتش علاش عاودت كلام خالها فراسها وهي تنهد نفضات راسها من هضرتو طفات التيليفون وناضت من فراشها بشوييي وخرجت من البيت كادور فالدار وتمشى بشوي تا مشات للصالون وجلسات حدا الشرجم كتشوف فالدنيا تما والناس غادية جايا...وهكا دوزات نهارها حتى جات ماماها وخالتها رجعو من المحل من بعد ما سيقوه...وهكا دوزو يومهم عادي حتى لعشية جا طه مع الكاميو جابو لخديجة الماترييل...رتباتو هي ومينة وطه خلص الكاميو ومشى فحالو ومشى معاهم طه تا شاف مريم ورجع فحالو تاهو...

دازت يومين ومريم نهار على نهار كاتماثل للشفاء حيث لاقية العناية والاهتمام...من ماماها خالتها وخالها ودراري فاش كايجيو...الا مازن الي ماجاش كاع حيث تشغل فالخدمة وتزيرات عندو الدعوة نيت سول عليها غير فالتيليفون وكل نهار كايصيفط ليها ولا يتاصل بيها...

اليوم حاسة براسها شوية ماشي كيف قبل...دخلات خديجة تلبس جلابيتها تمشي لمحل وهي تلقاها رامية عليها الكاب وهازة تيليفونها وواقفة تسنى...

خديجة : فين غادية ويلي...

مريم : بغيت نمشي معاك لمحل نشوفو..."بغات تهضر" ماما عافاك خليني نتحرك معاكم شويش قنطت ماندير والو ...المحال غير هنا عند القهوة..ماشي بعيد ومعاك نجاة تما ترجعني هي وبقاو نتوما...

مينة"من قاع الدار" : صافي خليها تمشي اخديجة تفوج شوية وترجع راه تعيا فالدار ماعليش...

تنهدات خديجة بقلة حيلة ولبسات جلابيتها وشالها وخرجات شادة فيها او بالاحرى مريم تأبطت دراعها وخرجو من الدار شدات فيها مينة وتمات غادية متوسطاهم شوية بشوية معاها تا وصلو لمحل...الي كان على القد ما صغير ما كبير...جابت ليه كاع داكشي الي كان فالمحل القديم...وخرجات الطويبلة برا وكراسا صغار...تبسمات مريم حيث توحشات هاد التفاصيل الصغار الي كانت كدير ماماها...لقات نجاة فالمحل كاتمسح فالكونطوار...شافتها وضحكت...

نجاة : قز/يبتك احبيبتي ماهازاكش...

مريم : الله يمسخك ويلي...

مينة : هههههه الى ماخصرت الهضرة مايبرد ليها الجوف..

خديجة : سيري تخدمي دابا يجي ليا عثمان...

نجاة : ماخداماش اليوم ا خديجة راني قولتها ليك ويلي...

خديجة : ماشي مشكيل غا خدمي واخا ماخداماش..

نجاة : والله لا مشيت...

مينة : هههههه انا راضية عليك هكاك خلي قشابتك واسعة...

خديجة : ويلي يا مينة يا خيتي نسيييت الدقيق خليتو عند السيد الي حدا الجزار...

مينة : على هو غا دگيگ...زيدي زيدي نمشي معاك..

خديجة : لواه غير جلسي من الصباح ونتي تجري معايا..

مينة : زيييدي قدامي انا باغا غا نخرج ونسرح رجليا...ها مريم معاها نجاة...

خرجات خديجة هي ومينة وبقات مريم مع نجاة كاتهضر معاها وتضحك مجمعين...جرات ليها سداري صغير جلسات فيه وجلسات حداها عاطين بضهرهم وجرات الخامية الفاصلة بين لداخل والكونطوار...

نجاة : واربييي قولي ليا داك الراجل الي كان داك النهار ضار ف عبد الله الجزار ولد خالتك...

مريم"تنهدات بقلة حيلة" : ااه انجاة اه علاش ؟!...

نجاة : راه عاد تفكرت جا عندي واحد الصباح على بونبر لقاني يلاه كنطيب فالحرشة راه شراها كلها...بقيت كنقول فاين شفتو فاين حتى تفكرت...ماحسابنيش غادي لعندكم...اربي مالو دار لعبد الله هكاك خرج عبد الله مزير كون ما ختي خديجة طلباتو كون ضار فيه هو غير ضحك اخيتي...

مريم : يمكن كان معصب...الله يحسن العوان وعبد الله مالقى امتى يقولي مريامة حتى كانو مجموعين وكاين خالي...وهو مكايحملش دوك الخصايل الناقصة حتى مع مو مكايبغيش الي يعيط ليها عوج...وهو حاسبني ختو...

نجاة"بقات تشوووف فيها وهي تصغر عينيها" : هاديك الجعرة اخيتي الي دار ماشي ديال الاخوة هاديك ديال الاحوة..."غمزاتها"...ملي جلسنا وهو عينيه عليك كاااع هادي معزة ومحبة واخوة !!...انا خويا ايه عزيزة عليه ولكن عمرو شاف وجهي كندوز من حداه نشير ليه مكايشوفنيش كي العمى...وكانقيل واقفة حداه فالمحل وكمارتي فكمارتو...قالت لك اخووة...

مريم"زفرات" : الله يهديك انجاة ويلي...قولي اعوذ بالله...

نجاة : حيدي عليا...وليني بيني وبينك واخا زييين تبارك الله ولكن راه وقفتو وسگيطتو كاتخلع هو كلو كايخلع بشوفاتوو ووجهو وليت بغيت غانخرج فحالي.. المخزن اخيتي خايب ومهيب..ناري هادي الي غادي تزوج بيه لا فات تا طاحت تحتو مع تبارك الله غير من الشوفة خيرو باين قداااش هادشي ماتحدينيش فيه...

مريم وسعات عينيها بغات تسكتها وهي حلفات لا سكتات...

مريم : نجاة ويلي سكتي من الهضرة الخاسرة واش حماقيتي...

نجاة : هههههه خليني نهضر ويلي غا كنصحك ولكن اخيتي كلام الحق صدرو مبودر بزاف وكتافو عراض باينة باقلو كبار غا من ديك التعزيلة البارح جالس وباين داكشي قداش ههننن امييمتي لا تزوج مرتو موحال يدخلو فيها كلو...النص وهالعار...يشدها يمحنها تمحااان...

نجاة كاتهضر وهي تبعد الخامية بغات تشوف واش جايا مينة وخديجة حتى بان ليها واقف عاقد حجبانو بطريقة كاتخلع..وسعات عينيها تا شهقات بجهد… وهي دور مريم وشافتو...وسعات عينيها على عينيها حتى حسات بالضبابة طاحت عليهم…

مازن : تحركي فحالك...

تتمة 2

هو جا تقريبا فنص الحديث ديالهم وكان شاد تيليفونو كايشوف فشي حاجة وصلاتو على الخدمة كان رقم هاتف ومعلومات على مولاه...وصل للمحل وهو كيقرا ووقف حيت طبيعتو كايتم جاي بالحس وبخطوات ثقاال...وقف كيقرا حتى تسلل الحديث لمسامعو الشي الي خلا حجبانو يتكمشو تقاسيمهم وهو كايسمع فالهضرةة...اخر حديث لمريم وهي كاتعاتب نجاة واخر حديث لنجاة الي كانت كدوي بالزربة بدون ماتعطي فرصة ولا تعطي راحة للسانها ولا حتى لحلقها...

موقف مايتمنى حتى واحد يطيح فيه من كثر ماهو جد مخجل ويُندى له الجبين...ولاكثر شخص هنا هو مريم الي حساات بالحرارة طلعات معاها حتى هرب اللون من وجهها وعينيها وسعاتهم...حيت هو ماشي حنحن ولا دق وانما بالصدفة نجاة حيدات الخامية باش تشوف واش جايا خديجة ومينة حتى لقاتو واقف وضاربها بغوباشة تهد الركابي...والشهقة ديالها كملات الباقي....حسات مريم بالضبابة بين عينيها وراسها زند عليها ماكرهاتش تشق لارض وتبلعها ولا تبلع نجاة الي خارج عليها فمها وهاهي گدماتها معاها بلا موجب شرع...ماكرهاتش لو جا الزلزال وغبر عليها مازن براسو ولا تكون كاتحلم ولا يكون مكيعرفهاش كااع...تمنات شحاال من حاجة الا انه تحط فهاد الموقف...واخا ماعرفاتوش واش سمع نيييت كلشي ولا سمع شي حاجة ولكن ملي حيدات نجاة الخامية ولقاتو واقف بلا حس اذن راه سمع وتعابير وجهو أكدو...والجملة الي قال لمريم دارت ليها الطابع وسنات...

مازن : تحركي فحالك...

نجاة غير سمعات صوتو ناضت وقفات ومشات بغات تخرج بان ليها وهي ترجع ودايرة ايدها على فمها بغات تبكي...وجلسات عطاتو بالظهر...اما مريم غمضات عينيها تا عصراتهم بغات تاكل راسها وهي تحلهم وشافت فنجاة بواااحد الشوفة تموو_*ت نجاة و ماتنساها ...طولات فيها الشوفة حتى سمعو صوتو الي قفز نجاة من بلاصتها واخا راه دوا غير بشوي وبثقالة...

مازن : مريم...

مريم"صرطات ريقها وهي حادرة عينيها لا لوجه رجع شاف فيه ولا بقى ليه فين يشوف فيه...نطقات" : غ غير سبق للدار انا جايا بيدما جات ماما وخالتي...

مازن : منين ؟..

مريم : هاهما غير فالمارشي راه ق قبالتنا...علاين يكونو هنا نساو غير شي سخرة..

بقى واقف كايشووف فيها...نجاة قلبها بغا يسكت واكثر حاجة هي شوفة مريم ليها هدات ليها الركابي كثر...عض على قنانفو شحاال وهو يدور عطاهم بالظهر ومشى...هزات مريم راسها عند بالها باقي حتى بان ليها مشى...تنهدات وهي تشد فجناب التليق باش تنوض بغات تعاونها نجاة وهي تبعد ليها ايدها بالجهد...

مريم"بصوت منفخ" : حيدي عليا عافاك...

نجاة : خاااي الله الى ما سمحي ليا...سمحي ليا الله يخلي ليك ختي خديجة...

وقفات وضارت لعندها بعينين غاضبين بحال النا*ر الحا*مية على الموقف الي حطاتها فيه وهي عيات تقوليها سكتي...ولاو عينين مريم يخلعو...

مريم : شنووو نسمح شنووو ؟...على فمك الي ماكايتسدش ولا لسانك الي حالف بالحلوف مايرجع للحلق ولا هضرتك الي ساوية الرخا من كثرة ماهي خاسرة ؟ على شنو نسمح وانا كنقيل نقولك سكتي الله يهديك نقي لسانك وصايبي كلامك...مابغيتيش مابغيتيييييش انجاة توبي من هضرتك مابغيتي تسكتي واسكتيييي سكتيييييي...وتهدني ونتي كلامك غير على المسخ ومايجي منو...

نجاة"صقلت من وجه مريم الغاضب"...

مريم : واش نتي شوية لباس ؟...كانعرفك كاضحكي وخاطرك واسع ولكن كلامك نصو خاسر والنص لاخر حتى هو خاسر...مالقيت ليك طريق مالقيت منين نجيك منين نخليك تنقصي الجهد...شوفي اش درتي ماعرفتو سمع كلشي ولا سمع النص...وغير شوفتو بينات راه سمع...فين حطيتينا وفين نحط وجهي معاه فييييين...جمعي راسك شوية ونقصي من الجهد ديال الهضرة الخاسرة... كنقيل نقولك الله يهديك ماشي كنضحك معاك كنقولها بصح...جمعي راسك وجمعي لسانك ونقيه...

نجاة : ياك اختي مريم ياااك...

مريم : هضرة المعقول هي هادي ماغاديش تعجبك وترجعني انا الي خايبة ماعنديش مشكيل غير نخياب الى كان كلامي معقول..."دارت ايدها على جبينها كاتحك عليه بغات تلوح راسها على الموقف الي تحطات فيه"...ويييلي فاين نحط وجهي فااااين...

نجاة"حدرت راسها" : سمحي ليا والله ماقصدت بغيت غير نضحك معاك وانا ضحكي خاسر...اش غاندير هادشي الي عطا الله...هذا هو ضحكي الله يعفو عليا منو والله ماناوية نخسر ليك وجهك مع شي حد...

مريم : عافاك سكتي سكتيييي...

صرطات نجاة الحروف الي كانو على طرف لسانها وضربات الطم...قلبها بغا يخرج من بلاصتو خلعها الموقف وخلعاتها مريم وخلعها مازن اكثر من هادشي باقي تخنزيرتو بين عينيها...شوية وهي تهز مريم عينيها وبعدات الخامية بانت ليها ماماها جايا هي ومينة ووراهم واحد الولد طالب معاشو جار الكروسة هاز ليهم الدقيق والسلعة...وقفو حتى دخل ليهم داكشي وخلصوه وهما يدخلو...خديجة هزات عينيها فمريم...

خديجة : مالك "شافت فنجاة الي نزلو دموعها" ويلي استغفر الله مالكم...

مريم"ضارت شافت فنجاة" : كاطيحيهم بالجغامي ونتي الي عاملاها لراسك ؟!..."شافت فماماها ودوات بحرقة غضب"...بقاي تدوي معاها تجمع لسانها شويش من الهضرة الخاسرة...بقاي حيت هادشي ممسلكش..."زفرات وشافت فمينة" خالتي سيري للدار خويا مازن جا...

مينة : وايلي...

خديجة : عندك ساروتك ؟!..

مينة : لا خليتو فالدار...

خديجة : هاكي ديالي "مداتو ليها" سيري نتي ومريم..انا غير يجي الولد نعطيه فلوسو ولحق عليكم...

مريم : لا غير سيري معاها انا نبقى هنا...

امثال "نجاة" موجوودين فواقعنا...عندهم الضحك بشتى المواضيع واكثر المواضيع كايبغيو يضحكو بيها هي المواضيع الخاسرة...وكايكونو عفويين بزاف ولكن بعض المرات العفوية مالايقاش...والهضرة الخاسرة كاين الي كايتقبلها وكاين الي مكيبغيهاش...وفالاخير تعتبر "قلة ادب"...

تلفات مريم كاتحس بالوجه مابقاش عندها الي يشوفو بيه...موقف ماعمرو كاين يطيح فبالها تاهو طيح فيه معاه بوجود مواقف مخجلة فايت جمعاتهم...واخا عارفاه جاي على قبلها ماقدراتش تمشي...

خديجة : ويلي اش غاتبقاي تسناي هنا !؟...سيري مع خالتك حلو على الراجل حشومة يبقى عند الباب...

مينة : يلاه امريم براكة عليك خاصك ترتاحي ابنتي...

بقات كتشوف مريم ماعندها حتى خيار من غير تمشي معاها...ماكرهاتش كون جيـ_*فات نجاة وصفاتها ليها...ماكرهاتش ترجع لوقت وتسكتها بشي مقلة...حناكها تزنگو تا بانت عليها...تنهدات بقلة حيلة وهي تخرج...شدات فدراع مينة وتمو غادييين وهي ماكرهات تطواااال ديك الطريق ولا يوصلو يلقاوه مشى لكن للاسف غير وصلو لقاو سيارتو واقفة عند الباب وهو جالس فيها باين دراعو من الشرجم كايهضر فالتيليفون...طلقات من مينة ووقفات عند الباب ومينة مشات لعندو وقفات عليه...حتى كمل تيليفونو وهز فيها راسو...

مازن : رجليك خفافو ا مي...

مينة : هههه لقيت السيبة...

دور راسو يقلب عليها وهي تبان ليه واقفة حادرة راسها ماقادرة حتى تشوف فيه...رجع جمع حجبانو وهو يهز الساشية الي حداه فالطوموبيل و نزل من السيارة باس راس مينة وايديها...وعنقها جنبو ومشاو لعندها...حلات مينة الباب وهي تسبق مريم عاطياه بالظهر...كون لقات تبقى عاطية بالظهر عالدوام...كون لقات تحيد ليه وجهو هو كاع هههه...شي افكار كايطيحو على الواحد فبحال هاد المواقف غرييبة عجيبة...بانت ليه غادية لكوزينة وهو يوقفها...

مازن : ششش...مريم...

مريم : هااا..."ضارت عندو والشوفة ماشافتها فيه" نعام...

مازن"طول الشوفة والسكات عاد نطق" : فين غاديا ؟!...

مريم : نو "حنحنت حيت تبحبح صوتها"...نوجد قهيوة..

مازن"جمع حجبانو وشاف جيهة الصالون" : لا...دخلي ريحي..

مينة : دخلي ترتاحي اشمن قهوة بغيتي ديري...هاني دروك نصايبها ليه...

شافت تا عيات وهي تحرك راسها ماعندها مهرب...دخلات للصالون وجلسات جامعة رجليها وحاطة ايديها شابكتهم كاتلعب فصباعها بتوتر...دخل لكوزينة مع مينة حتى حط ديك الساشية وخرج...وقف عند باب الصالون...حيد صباطو سمى الله ودخل ريح فبلاصتو...الشيطان الحرامي الي مامخلي لا انسان ولا جان...غير جلس وهي تفكر مريم هضرة نجاة على جلستو...وسعات عينيها وهي تلعن الشيطان الي جا فهيئة نجاة واستافرات الله دغيا نفضات داكشي وزفرات عاقدة حجبانها مارداتش ليه البال الي كان جالس جلستو وداير مرفقو على المخدة جنبو...وصباعو على لحيتو ومسطاجو وكيشوف فيها وفتعابير وجهها...حتى سمعات صوتو...

مازن : شوية اليوم ؟!...

مريم"حركات راسها" : شوية الحمد لله...

مازن : مازال فيك الصداع ؟!..

مريم : شوية ماشي بزاف...

مازن سكت كيشوف فيها حادرة راسها وعينيها والشوفة فيه ماشافت...بقى ساكت وهي كاتسنى جوابو...حتى نطق بنبرة ثقيلة...

مازن : كاين شي مشكيل ؟

مريم : فاش ؟!..

مازن"بنفس وضعيتو باش جالس وداير صباعو على لحيتو مسند عليهم " : معايا...

مريم : معاك ؟ م مافهمتش...

مازن"عض شنايفو شحال وهو ينطق" : هزي راسك وشوفي فيا...

مريم هادشي الي مابغاتش خصوصا فهاد اللحظة...ماعندها لا عينين لا وجه يشوفو فيه وهو عارفها حشمانة وعارف الموقف علاش لا وهو سمع الي مايتسمع...هزات راسها بشوية وبزز وشافت فيه جوج ثواني ورجعات شتتات الشوفة...

مازن : علاش ماعاطياش الراحة لراسك ؟!...

مريم : قنطت من الدار...

مازن : عضي فالصبر حتى يدوز الوقت شوية...جر*حك مازال جديد امريم...

مريم : كانحاول غير قنطاتني الدار وكثير شي ملي ماما وخالتي كايخرجو وكنبقى وحدي...ممولفاش ونتا عارف هادشي ومجرب...حتى نتا واحد الوقت تضربتي وماصبرتيش...

مازن : مولف ا مريم "هزات راسها فيه"...داكشي فايت عليا بحال شريب الما...

مريم : حتى انا مولفة...ماشي اول مرة نتضرب ونمشي للطبيب...شي راك حضرتي ليه وشي ماحضرتيش ليه...

شافت فيه وتبسمات بخفوت ورجعات حدرات عينيها...شوية وهي تدخل مينة هازة صينية فيها كاس القهوة كحلة والما...حطاتها ليه...

مينة"شافت فمريم" : جاب ليك مازن الديسير...اشمن عصير كايعجبك ابنيتي ؟!...

مريم"شافت فيها وشافت فيه" : علاش محنتي راسك..

مازن"هز كاس القهوة رشف منو وحرك راسو غير مبالي بهضرتها"...

مينة : ومالو اش جايب ابنتي تانتي...قولي نديرو ليك ينفعك...

مريم : مابغيت والو دابا غير جلسي معانا...

مينة : لا خليني ندير ليك العصير قاليك مابغيت والو...انا ندير ليك واحد الكاس گعدي بيك داتك شوية ونجي...

خلاتهم وخرجات...رجعات حدرات راسها تا سمعات صوت الكاس تحط...وصوته الاجش نطق...

مازن : الشوفة ممزگياهاش فيا...الكلام ناقص وراسك محني وانا كاين...

مريم : ماكاين والو غير كايبان ليك....يمكن حيت معصبة شويش..."تنهدات" ماعرفتش..."حكات جبينها بتوتر كبيير تا بانو ليه صباعها كايترعدو"...عافاك سمح لي والله مالقيت مانقول...

مازن"هز الكاس من جديد شرب منو وحطو بشوييا وشاف فيها" : طاحن الطريگ امريم باش نشوف وجهك ماشي گفاك...نساي عليا داكشي..."جاها نيشان" ماعندي مانگجدر بتعاويد العيالات... "حناكها شوكو فهاد اللحظة"....

لجم ليها الفم بهاد الهضرة ماخلا ليها ماتقول...هو واخا الهضرة الي سمع ماعجباتوش بالمرة...اكره نوع عندو هو يشوف امراة كاتخسر الهضرة...وطلع ليه الد_*م ولكن ملي شاف مريم كيفاش تحرجات بزاااف مابغاش يحكر ولا يجبد الموضوع اصلا...هو عارف مريم ماشي ديال الهضرة الخاسرة وعارف طبعها الثقيل والرزين....عارف لسانها الى ماخرج العسل يخرج المعقول....

حركات راسها مالقات ماتقول...شوية وهما يسمعو صوت المولينيكس كاتطحن...حتى دخلات خديجة...قالت السلام ودخلات سلمات على مازن وجلسات حداه...شوية وهي تدخل مينة هازة كاس ديال العصير كبير وحداه طبيسيل فيه حلوة لاكريم ديال الشوكولا ووحدة ديال بيسطاش...

مينة : اجي قربي تشربي...

مريم"تبسمات" : لهلا يخطيك اخالتي...

مينة : بصحتك بصحتك...

قربات مريم جلسات حدا خديجة مدات ليها الكاس ديال العصير شربات منو...شوية وهو يصوني تيليفون مينة سمعاتو وخرجات حيت كان محطوط فقاع دار...ريحات تما وجاوبات...

خديجة : عذبتي راسك اولدي..."شافت فالحلوة والعصير" الله يعطيك الخير...

حدو حرك راسو...حتى صونا ليه تيليفونو دور عينيه ليه شاف المتصل...حط القهوة وهزو وناض مخليهم جالسين وخرج من الدار حل الطوموبيل وركب فيها وسد عليه عاد جاوب...

خديجة : خليت نجاة تبكي خمسة ستة دموع العين...

مريم"غوبشات" : شغلها هذاك...ماعندي ماندير ليها...قلبات على خلا عشتها ولقاتو...على الله تنقص من الهضرة الخاسرة الي ماعندها فايدة...

خديجة"زفرات" : عاوداات ليا شنو وقع...بغيت ندور فيها ومانخلي فيها غير الي نسيت لقيتك قضيتي الغراض...هذا لله معاها وبقات فيا عاود...

مريم : مابغيتهاش تبقى فيا...عرفتي على تحشيمة دارت ليا مع السيد...ماعرفت فاين نحط وجهي...اويلي وجا يشوفني مالقى حتى وجه الي يشوفو هو نيت...حتى ولا يقولي علاش مكتشوفيش فيا.. فاش غانشوف فاش...خاصني سيمانة ولا كتر يلاه نقدر نسى..خاصني بزاااف...ماباقيش مازال غادي نهضر معاها حتى تقاد هضرتها...ولا عمري باقي ندوي معاها...

خديجة : الله يهديها...هذا منقول...(كايهضرو وهي تدخل مينة)...

مينة : امييمتي الهضرة ماتسالي مع الحباب...

خديجة : الدراري...

مينة : لا عمة الدراري...جايين بعد غذا ان شاء الله...خاصني نكون تما..."شافت فيهم بترجي"...بغيتكم تمشيو معايا غير شي يومين ورجعو...

خديجة : والله ماعرفت مانقوليك...راك شفتي يلاه فتحت المحال...ومريم عيانة...

مينة : يومين ثلاثة مادارت والو...غايبقى بالي مع مريم والصراحة ماكرهتش تونسوني...

خديجة"شافت فمريم ومينة تاهي...

مريم"شافتهم كيشوفو فيها" : غير عفيني اخالتي والله ماكرهت..ها ماما تمشي معاك انا ماعليش نبقى هنا...

مينة : كيفاش تخليك وحدك ؟...لا بنتي ماتخليكش وحدك وخاص الي يداوي ليك الجرحة ماماك ماتعرفش...يلاه معايا نداوي ليك تما غير شي يومين ورجعي..."شافتها ساكتة مجاوباتش وهي تستسلم "...اش غانقوليك ابنتي الي بغيتي...غذا غانمشي انا نشوف الدار وشنو خاص...

شافتها مريم حدرات عينيها وبحال الى بقى فيها الحال...تزيرات ومالقات حتى حل وهي تنهد...

مريم : واخا ان شاء الله...

مينة : ان شاء الله اش ؟!..

مريم"تبسمات واخا ماباغياش تمشي ولكن على قبل خالتها" : غانمشيو معاك...ماعليش...

مينة : ههههه الله يرضي عليك...

بالفرحة صيفطات ليها بوسة فالهواء خلات مريم تضحك وخديجة حتى هي...ضارت خديجة شافت فمريم وتبسمات ليها ودارت ايدها ورا ظهرها طبطبات عليها برضى...شوية ماشي بزااف وهو يدخل مازن...ريح بلاصتو...

مينة : تغذا معانا ؟!..

مازن"شاف فساعتو" : لا...ماعنديش الوقت شوي ونتحرك...

مينة : ولباس لقيتي لينا وقت وجيتي لهنا هنهه...

مازن"شاف فمريم الي شافتو وهي تحدر عينيها لكاسها" : ضروري..."شاف فمينة"...مازال مطولة هنا نتي ؟!...

خديجة : هههه اش بغيتيها ياك كبرتو وخدمتو خليوها ترتاح تاهي...

مينة : هههههه والله ماكرهت نبقى عايشة معاهم وليني ضروري نرجع تانا لدويرتي وللدراري واخا مانخافش عليهم مايصيبوش بلا بيا...شفتهم ساكتين واقيلة غا حشمو منك اما راك شتي غا سيمانة لا كثرت يقوى عليا العياط من عندهم...غير حيت دابا عارفيني عندكم راهم هانيين شوية...

خديجة : الله يخليهم ليك ويخليك ليهم...مرضيين ورجال تبارك الله...

مينة : اميين اميين..."شافت فمازن"...بعد غذا جايا عمتك وعمك وبنتها غزلان...

مازن"حرك راسو"...

مينة : غذا غانجي للدار ان شاء الله..."شافت فمريم وخديجة بفرحة"...غادي تجي معايا خديجة ومريم يبركو معايا شي يومين ولا ثلاثة بينما مشاو الناس...

مازن"هز عينيه شاف فخديجة وشاف فمريم" : مرحبا...

حط الكاس وناض كايقاد فكمايم الفيستة...

مازن"شاف فمريم" : ردي البال شوية لراسك...عطي الراحة امريم بالجهد...

مريم"حنحنت" : واخا ان شاء الله...يجيك الخير...

حرك راسو وقال "الله يشافي" وهو يخرج...تبعاتو مينة حتى لبرا هزات الشال لاحتو على راسها وخرجات معاه حتى لعند الباب...

مينة : كون غا بقيتي اولدي حتى تغذا...

مازن : ممساليش ا مي عندي مايدار...

مينة : والي بان ليك...

مازن"باس راسها ومشى ركب فالطوموبيل بقات واقفة حتى ديمارا ومشى وهي تدخل عليهم…لاحت الشال وجلسات…

مينة : مزية جايا بنت ولد مباركة "شافت فخديجة"…تبارك الله كاتقرا فالسطات را قربات تكمل عامها لاخر…

خديجة : ديك الي وراتنا فالتصويرة داك نهار…غزالة تبارك الله كاتحمق…

مينة : ايييه هههه سميتها جيهان "تگعدات فالجلسة كتنقر فوق الطابلة بتفكير واستشارة منهم"…جايباها مباركة باش يشوفها مازن…دويت معاها وقلتها ليه شحال هادي….

خديجة : علاياش ؟!…

مينة"تنهدات": ولدي كبر اخديجة…خوتو حالفين مايتجوجو الى مارجع تزوج ودار دارو…ملي تخاصم مع مرتو وناض الصداع بيناتهم وتفارقو بحال الى خافو حتى واحد ماباغي…ادام باقي صغير طه حالو وحدو هذاك…زيد باقي ليه شهرين ويدخل فالربعين…وهو مابقاش ليه ويدخل ف 42….حتى لامتى ؟! انا منشوفهم هانيين منشوف ولادهم ؟!…

مريم"حسات باللقوة ضربتها معرفتش علاش"…

خديجة : والى هو ماباغيش اش ديري..

مينة : ملي شفتو داك النهار فاش قلت ليه امتى نشوفك داير دارك قاليا ان شاء الله وهو كنت غانجبد ليه الهضرة بالضحك يا يقطع الحس يا يدور فيا…ايوى ملي برد الخاطر نهضر معاه…انا مكنبغيش ندخل فيهم ولكن راه بزااف اخديجة حتى واحد مابغى يدير دارو ؟ انا عييت نبقى هازة الهم كبرتهم وخدمو خاصني نرتاح اختي…"شافت فمريم"…اش بان ليك ابنتي ياكما غالطة…

مريم"الصمت"…

خديجة : ماغالطة والو…ماعليش…اش غاديري ؟

مينة : غادي نهضر معاه ونزيدو يشوف البنت الي جايا…بغيت ليه جيهان للزواج…

يتبع...

تتمة 3

مينة حالها حال اي أم كاتبغي تفرح بولادها كيف ماكانو...كاتبغي تشوفهم قارييين خداميين برزقهم وحتى بديورهم ووليداتهم...يعني يكونو مستقرين وترتاح عليهم وترتاح حتى هي ملي تحس براسها كملات رسالتها ودورها كأم...اي وحدة بلاصتها غاتبغي تشوف ولدها كايفكر فالاستقرار بالزواج...

هي ماشي باغية تفرض عليه يتزوج...عمرها ما فرضات عليه وعمرها دير هاد الخطوة...هي فقط باغية تعاونو بهاد الحركة وباغية تشجعو ويشوف لهفتها عليه انه يتزوج ويستقر فحياتو...يمكن بغات تخليه يبدل الفكرة ويرجع يفتح قلبو لشي بنت الناس وتغير ليه مفهوم انه داز من تجربة فاشلة سابقا خلاتو يضرب على حس الزواج والعيالاات ومايجي منهم...

هي من قبل كانت كتقول ليه امتى نشوفك مزوج...امتى ترجع تحل باب الزواج من جديد...كانت ديما كاتسمع الرفض من فمو...وكانت كتخليه وتدعي الله يحنن قلبو ويفتح باب الزواج...لكن ملي سمعاتو قال "ان شاء الله" عطاها أمل...انه بدا يفكر فالموضوع...وهي بهاد الطريقة بغات تشجعو بحكم عارفاه من الناس الي ماعندهمش مشكيل زواج تقليدي والدليل "عبير" الي تزوجها تقليدي واخا هو الي شافها وعجباتو ماخذاش وقت كثير وتزوجها...وهادشي الي حاولات تشرحو لخديجة حاليا...

مينة : قلت يشوفها البنية كاتحمق بالزين تبارك الله...

خديجة : والبنت باغية ؟!..

مينة : وهي ماعارفاش وليني سولت غزلان قالت ليا تبغي حيت باها مايبغيش تعطل فالزواج شارط عليها لا بغات تقرا تقرا وليني الزواج ماتوصلش لثلاثين...راكي عارفاها هي بنتو الي عندو وسط الدراري...وهو الوحيد عند باه راجل مباركة هو كي شتي راه ربيب مباركة لوستي...(يعني جهان بنت ربيب مباركة الي هي عمة مازن)...

مريم"غير حادرة عينيها وكتسمع"...

خديجة : اييه راني عرفت وعقلت عليه فعرس مباركة كان باقي صغير تبارك الله...

مينة : رباتو مباركة حتى كبر وجوجاتو...نص فبناتها غا من نسابو هو جيهة مرتو هههه...

خديجة : ايه والبنية شحال فعمرها...

مينة : واقيلة خمسة وعشرين ولا كثر...

خديجة : تبارك الله على الصورة الي وراتنا مرات علي را زيينة...

مينة : وازييينة تبارك الله كلهم زوينات...كون ما غزلان جاها سعدها كون قلت ليه يشوف معاها...وليني غزلان جاها رزقها هههه زيد دوا مع مباركة على شي وكيل الملك صاحبو بغا يتجوج من العروبية وقاليه عليها وقاليه اش كاين وبلي مطلقة لقى ماعندوش مشكيل...وراه دوا مع مباركة وباها... تايشد الكونجي ويمشي يخطبها نيشان...

خديجة : وهااانتي تبارك الله...الله يصوب ليها ياربي...زوينة ديك غزلان...

مينة : زوييينة وتاهي زهرها مكوز حاشاك...فاللول مابغات كاع... كرهات تاهي الجواج ومايجي منو...."تنهدات" الله يصاوب ليها ويصاوب ليك ابنيتي امريم...ياربي يحنن قلبك ويعطيك ماتمناي ويفرجها عليك ابنيتي...الله ينقي طريقك من الشوك...(حطات ايدها على صدرها وكملات بحرقة)...ديما داعية معاك حتى نتي يسهل عليك ويفك وحايلك وعلاش لا ياربي يعطيك سعد يعوضك وينسيك همك ياربي...

مريم كانت كاتسمع فجأة انعقدو حواجبها وتكمشو تقاسيمهم...مدواتش فقط رد فعل من تعابير وجهها...شنو حسات ؟!...شنو هاد الانزعاج الي خالجها...اخر كلمة او اخر دعوة كملات ليها الباقي...مينة وخديجة ملي شافوها دارت لحجبانها هكاك عند بالهم راه اي حاجة متعلقة بالزواج كاتخليها تغير...حيت عارفين شنو موقفها من الزواج ومايجي منو...ماعارفينش هي دابا بشنو كاتحس...لخبطة على حقد على كره...على انزعاج...تضارب فالمشاعر والاحاسيس الي خلاها ممرتاحاش دابا...باغية تهضر باغية تدعي ولكن حاسة باللقوة ضرباتها...

مينة : حتى نتي كاتحمقي بالزين وفايتاهم بالفعل والصواب والرزانة...الله يصاوب ليك ابنتي ويحنن قلبك..."تنهدات" ويحنن قلبك...

دعوة تعاودات شحال من مرة...تقولي مينة حاسة بيها...حاسة بشنو جاري...

خديجة"حدرات عينيها وتنهدات ومينة نطقات بغات تبدل الموضوع حيت شافتهم تطفاو"...

مينة : البنية شكراتها مباركة وعاودت...وتا مباركة فراسها بلي بغينا نلاقيوها بيه عالله يفكر...

خديجة : عنداك تبززي عليه امينة لا يتقلق...

مينة : لا مانبزز والو...لا مابغاش الله يهديه...مباركة تعاوني هي عارفة اش كاين قلت ليها كلشي باش البنية ماطمعش وفلاخر يتهرس خاطرها...وعمو نيت را يدوي معاه هو وخالو شوية بشوية حتى يفكر "هزات كفوفها للسما" ياااربي ماتخيبنيش ياربي تهديه ياربي راني بغيتو يدير وليداتو ياربي راني شهوتي فبنية هي اللولة ماعطانيش ربي البنات يعطيهم ليا فالحفاد...واخا غا نمشط ليها ونظفر ليها الشعورات ونلبسها كسيوات وقفيطنات وجليليبات "شافت فيهم" ماضحكووشاي عليا وليني لهفتي على البنات بحالاش هههه...

خديجة بقات تشوف حتى جابت ليها الضحك. حيت كتدعي من نيتها وباينة لهفتها فعينيها...

خديجة : الله يعطيك مانويتي هههه

مينة : امييين "شافت فمريم" مريم !! ماسمعناش صوتك..."شافت فيها" اش بان ليك...

مريم"طولات الشوفة مدة وهي تحنحن منظفة حلقها ونطقات بصوت منخفض" : ماعرفت ماعرفتش اخالتي شنو غانقولك الله يفرحك بوليداتك بسعد حسن منهم عليهم...

هادي هي الدعوة الوحيدة الي خرجات بلسان مريم...من وراها سكتات...شنو غاتقول ليها ؟! راه ولدك بغاني للزواج !! ياك هي رفضات وعطاتو جوابها القطعي...اذن خاصها تسكت متقول والو والموضوع يتطوا حيت فعلا خاصو يتسد...

بقاو جالسين كايهضرو جابدين موضوع جيهان ومجية عائلة بات مازن و الدراري...مريم مابقاتش هضرات ولقات راسها ماباغياش تدوي مخلياهم كايهضرو وهي كتسمع...مالاقية ماتقول...اما مينة لهفتها انه يتحقق مرادها وتخلي مازن يفكر فالزواج كانت كبيييرة وباينة فعينيها...شوية وهو يصوني تيليفونها بان ليها ادم...

مينة : ادم هذا !! يااااربي السلامة اش دارو فديك الدار..."طلقات الخط"...السلام عليكم...مالك

ادم"كمش حجبانو" : حوووبي...تي كيفاش مالك...

مينة : تعيييطة ماهياش...

ادم : لا بغيت نعيط خاص يكون مالي ؟!..ياك امينة ؟!..

مينة : لقيتيني بعيدة اما نوريك مينة اش ساوية...

ادم : ماساااويااااش مينة قيمتها ماعندهاش ثمن كبييرة بزاااف الكويين ديال رية قلبي...

مينة"جاب ليها الضحك" : نعل والديك هههه...فينك فالدار ؟!..

ادم : لا باقي فالخدمة غا عيطت نسول فيك...

مينة : الله يرضي عليك...وهاني غذا جايا فالصباح ان شاء الله...

ادم"ولاو فعينيه القلوبة" : هااااربي...الله شحال توحشت ريحتك فالدويرة...

مينة : واشنو راه جايين ناس مزاب...

ادم"النجووم فعينيه" : هاااربي هي الزروود...مرحبااا مرحباا...قطعي قطعي نعلم زرگ القوادس...

مينة : اش هاد الهضرة البغل ؟! اويلي...

ادم : وتي متحكريييش...

مينة : ياك الدار مزيانة مادرتو حتى عيب معيط غا هكاك ؟!...

ادم : وتي لا غا بغيت نسول فالقطينة ديال قلبي...وهو غا بغيت نسولو وبغيت نبرگگ...

مينة"وذنيها طنشو" : اش كاين...

ادم : تنقي طريقي !!...

مينة : هز من كعب الغزال شحال ما بغيتي...

ادم : كاانبغيييك...ماعلينا طه البارح حط فطبسيل الطاوس الزرق الي معلقة الفوووق...

مينة"عينيها خرجو وقلبها طاح" : ااااويلي اويلي على الكيدار اويلي اش قربو لييييه وصباعو مفافيييين فيهم بوفاااالج اش قربوو ليييه وهو الي عندي هو الي عندييي...

ادم"مابقاش بغى كعب غزال كاع ندماتو" : وتي راه محطش فيه غا ضحكت...صافي بسلامة...

قطع عليها خلاها كاترمش ووجهها دغيا تزنگ حيت بيضة بزاف دغيا كاتبان فيها التزنيگة...

مينة : غالي يغفل عليهم غالي يغفللللل...

خديجة : هههههه الله يهديك راهم بعقلهم تبارك الله عليهم حادگين ماخفتي والو...

مينة : وراهم حادگين ولا مشيت منخافش من الوسخ نرجع نلقاها تشعل كتر من الي كنخليها وليني راهم يطيرو الماعن الي نوصيهم ميقربوش ليهم هما الي كايمشيو ليهم...ودابا مشى ليا لطبسيل الطاوس الزرق تعقلي عليه الي كان عزيز على مي الله يرحمها شاريه ليها باها فعرسها...

نزلات خديجة عينيها الي فجأة حمارو بالدموع الي دغيا تحجرو فيهم...تنهدات ومينة حبسات الهضرة واستغفرات الله...نسات راسها ونسات جرح خديجة من جيهة واليديها قداش...ماحسات خديجة غير بايد تحطات على ايدها ايد ناعمة ورطيبة وحنينة...هزات راسها وشافت فيها لقاتها مبتاسمة فيها ابتسامة خافتة حنونة...طبطبات عليها ومينة تنهدات..

مينة : الله يرحمهم ياربي...

وصلات العشية...كانت مريم فالبيت ناعسة حيت حسات بشوية صداع فجنبها المضروب ونعسات...جا مصطفى من الخدمة داز على مينة وخديجة سلم عليهم وجاو معاه من بعد ما سدو المحل...لقاو مريم ناعسة كانت مينة داوات ليها عاد خرجات هي وخديجة...دوزو عشية عادي مينة قالت لمصطفى شكون جاي ولكن ماقالتش ليه شنو كاين...

أصبحنا واصبح الملك لله...

يوم جديد يوم جايب معاه مكاتيب الله...ماعرفناها خير ماعرفناها شر...

واقفة مينة كاتشوف فاخر حاجة حطات خديجة فالصاك ومريم جالسة فقاع الدار مع مصطفى كايفطرو حيت شربات لانتيبيوتيك وخاصها تسنى شوية عاد تاكل...مينة وخديجة كانو فطرووو باش يجمعو الحوايج ومينة تجمع حويجاتها...

مينة : صافي براكة...الدوا ديال مريم راه فلاتروس تما...

خديجة : صافي كلشي هو هذاك "وقفات وشافت فيها" راني جمعت داك الملوي والمسمن فالقفة...ومسمن تريد تاهو...

مينة : مزياان نيت مباركة جايبة شي دجيجات بلديات...

خديجة : والله كون ما مريم مريضة كون هي الي وجداتو ياربي كاتوجدو كايحمق ومتيييول من داكشي...

مينة : ياا بنتي انا المباركة والهنية عليا غير الي راجعة و ترجع تنورني فالدار ماطيب مادير والو تبقى غير مرتاحة راك شفتي البارح ضلات نهار كلو غير فالبيت وجنبها يصادعها بحرا لقات راحتها...

مصطفى : توما ماناوينش تحركو من تم...

مينة : هاحنا جاييين...دخل هز الصيكان على گلبك...

خرجو من البيت ومصطفى ناض من حدا مريم توجه للبيت وبدا يهز فالصيكان يدي فيهم للكوفر ديال السيارة...مشات خديجة سدات الحصار ديال الدار فيها قاعدة كاتخاف لا شي روبيني يتبوشا من وراها وتعمر بالما كاتسدو وتهنى...ناضت مريم بشوية تا تأبطات دراع مينة الي وقفات ليها بحماس وفرحة حيت غايمشيو معاها...طلي على قزيبتها تلقايها كاتصفق...تبسمات ليها مريم بخفوت وتمو خارجين..تأكدات خديجة ان كلشي هو هذاك وتبعاتهم...وصلات بيها عند باب السيارة وحلات ليها الباب القدامي...

مينة : ركبي ابنتي هنا متيسع على اللور..."شافتها بغات تعارض" والله حتى تركبي...

تنهدات وركبات القدام...ركبات مينة وخديجة ومصطفى صونا ليه تيليفونو شاف شكون وضار لهيه مبعد شوية...

مصطفى : سعادة العميد...

مازن: السلام عليكم..."شاف فالساعة" مازال تم ؟!...

مصطفى : لا هاحنا عند الباب غادين خارجين...

مازن"حرك راسو كانو عينيه عالطريق وهو يدورهم ناحية الشاشة" : مريم ؟!..

مصطفى : ههههه "شاف جيهتها كانت متكية راسها عالزاج"...هاهي جايا جايا...

مسافة الطريق الرابطة بين فاس ومولاي يعقوب...كانو واصلين لمدينة فاس...راجعين مبتاسمين ومجمعين فالسيارة الا "مريم" الي كانت غير ساكتة الى شاركات تشارك بكلمة ولا ابتسامة خفيفة...لاحظ مصطفى انه ماشي هي هاديك...يمكن حس بلي ماباغياش تجي للدار ويمكن بيها شي حاجة...اما هي كانت غير ساهية كاتفرج فالشوارع الي كايدوزو منهم...كاتعاود تشوف الطريق الي واحد الوقت كانت هي طريقها...ماعارفاش علاش غادية...غير دايرة لخاطر لخالتها الي ماشافت منها غير الخير والحب والحنان والاهتمام بحال شي أم مع بنتها...عز عليها تكسر بخاطرها وتحسسها انه ماباغياش تجي عندها...هي ماشي ماباغياش ولكن هي باغية غير التيقار باغية تخلق مساحة ومسافة بينها وبين مازن باش ينساها ويشوف فجيهة اخرى...ولكن...علاش هي دابا رجعات تفكر فيه علاش هو السبب الرئيسي الي فراسها...علاش هي ماشي باغية تخرج تكري باش تستقر وتخلي دار خالتها الي فيها الرجال...علاش كدور وترجع للسبب تربطو بمازن...

تنهدات وهي تغمض عينيها كتسوس شنو فراسها ورجعات حلاتهم كاتشوف من جديد وساهية حتى وقفات الطوموبيل ولقات راسها قدام الدار...ماحسات حتى سمعات مصطفى كيقول...

مصطفى : مازن كاين !!...

دورات عينيها وهي تبان ليها طوموبيلتو...ضحكات مينة ونزلات هي وخديجة...ونزل مصطفى ومريم ماجات فين تحل الباب وتنزل تا تحل الباب وخرج طه وادم...

طه : حييييد خليني نبوووس الحوووب...

مشى لمينة تلاح عليها بتعنيقة تا هزها هكاك واخا غليضة رجليها ولاو يلعبو وضرب فيه يطلقها...ماطلقها تا تجيفات...وادم تلاح عليها يعنق ويبوس كاع جرتلوها..

مينة : ياوييلي كي ردوني...

طه : زيييد بوس تاني..."بقج ليها الحنك" هاااح...

مينة : هرستي طبسيل الطاوس ؟!...

طه وسع عينيه وهو يدور بالزربة شاف فادم الي دار فررر وطلع يجري تا خالتو بغا يسلم عليها ماسلم هههه

طه : والله ماهرستو بالله...راه رديتو لبلاصتو ولكن ناوي نشاااعلاه نهرس صفر الجلدة...ابلاتي..."شاف فمريم" مريوووومة وعاااش من شافك اختي فهاد الدار...

تبسمات ليه وقرب سلم عليها وسلم على خديجة وخالو...كلهم فرحانين كانو غير هما الي نزلو...سماو الله ودخلو واول خطوة غادير مريم هي هادي من بعد ما مشات هاهي راجعة...تنهدات وسمات الله وهي تدخل طالعة بشوية بشوية وهما سابقينها وهي شادة فالشبيك حتى وصلات لفوق...يلاه غاتدخل تا سمعو صوت تحنحينتو وقال "السلام عليكم" الشي الي خلاهم يوقفو ويدورو عندو الا مريم الي كانت حادرة راسها...عينيه مشاو نيشان ليها حتى نزل ووقف...سلم على مو هي اللولة وخالتو...وشاف فمريم...

مازن : على سلامتك.."هزات راسها وتبسمات ابتسامة باهتة"...

مريم : الله يسلمك...

مازن : مارجعش ليك الصداع اليوم ؟!...

مريم"حنحنات وصرطات ريقها" : لا الحمد لله شوية...

بقى كيشوف فيها...كانت شادة فالشبيك والايد لاخرى مكمشة ليها صباعها...عاضة على شنايفها ومشتتة شوفتها تقدر تشوف فكلشي الا هو هاد الساعة...باين عليها بيها شي حاجة وباين شي حاجة متمكنة من بالها وشاغلة تفكيرها...حرك راسو وضار شاف فخالتو...

مازن : مرحبا...

خديجة : ترحب بيك الجنة اولدي...

مازن : امين..."شاف فمينة وشير ليها براسو"...ديها لبيت ا مي ترتاح شوي...

مينة : ايييه لقيتينا داخلين...خارج ؟!..

مازن"حرك راسو" : السلام عليكم...

خلاهم وتم غادي داز من حداها رجع ضربو عطرها لنيوفو خلاو حجبانو يتكمشو من الوسط...نزل مخليهم داخلين للدار...وهو تيسر لخدمتو...

مشاو لسيجور فين كايجلسو لقاو الدراري جالسين او نقولو طه شانق على ادم مافكهم غا مصطفى بالكشيفة.....لقاو طه ناصب ليهم طاجين من داكشي وشلاضة وجايب المونادة...العشية جا زيد تاهو فرح بوجودهم...مينة النهار كلو وهي توجد مع خديجة والي خصات تصيفط ادم ولا طه ولا زيد يتقداو تا تعذبو بالتسخار...حيت هما غايجيو الغذ ليه مع الصباح داكشي باش كاتوجد...مازن هاديك غطستو حتى هو شداتو الخدمة حيت باااقين كايطحنو باش يعرفو شكون الي كان السبب فدخول هادوك الي تسببو فكارثة المؤتمر...حدو جا من ورا العشا لقاهم باقين فايقين الا مريم الي شربات الدوا ونعسات ترتاح...كان باغي يشوفها ولكن لقاها ناعسة...

الصباح عندهم فالدار ديال هاد النهار مكانش صباح عادي...من الي فاقت مينة للفجر هي وخديجة وهما داخلين لكوزينة وجدو الفطور حيدوه عليهم عاد بداو توجاد الغذا ..شوية وهي تبان مريم داخلة….

مريم : صباح الخير..."شافتهم" كاين فاش نعاونكم...

مينة : مكاين والو هاد الساعة جلسي تفطري ابنتي..

مريم : واخا...

شوية وهما ينزلو الدراري الي بداو يشمو فالروايح...طه عينيه حوالو وادم ترماحتو كاتصفق وزيد كايفكر يقدم استقالتو باش يتفرغ للزرود الي قواو عليه...

طه : نبيع الصيدلية على جااال هاد الرويحة...

مينة : تبيع رزقك على كرشك ؟...دوز دوز تفطر...

ادم : انا غانخدم غير فشونتييي و 12 نجي...

.

زيد : انا اليوم نسالي غير المحكمة عندي مع التسعود ونجي...عندي خدمة غا فالمكتب منمشيش باغي نيت نرتاح...ونزرد...

جابو لخديجة ومريم الضحك...شوية انضم ليهم مصطفى هو خدام وغايحااول ياخذ الاذن ومايمشيش لافاك غاتجي نيشان الجمعة والسبت والأحد يلاه يقوم بالترحيب بالناس...تجمعو على الفطور...فطرو وتيسرو باش يحيدو عليهم اشغالهم اما طه مامشاش باش يشوف مينة اش خاصها كايخدم غير بالتيليفون خصص اليوم على قبل باش يوقف ويتسخر...

مازن حدو دخل فالصباح بكري قبل ماتفيق مريم فطر وخرج بكري لخدمتو ماعارفينوش واش يجي ولا حتى لليل..وصلات الحداش وشي حاجة طه خرج باش يتلقى ليهم فراس الدرب حيت عارفين الدار جاو شحال من مرة ونيت جا سالم فاش تضرب مازن غير طل عليه فالسبيطار وجا للدار ورجع دغيا فالعشية...طلقات مينة العود القماري فالمبيخرة وخلاتو يفوح فالدار الي تشعل بريحة النقاوة والي دخل ليها يتبهض بالصليح الي فيها...شوية وهما يسمعو لانتيرفون ومشات تزرب شافت طه واقف حيت ماداش الساروت حلات عليه...وهي تمشي لعند الباب ديال الدار الفوق ووقفات هي وخديجة ومريم...وزيد الي نزل من الفوق كان يلاه جا...تاهو وقف تا سمعو صوت الهضرة وضحك طه وعمو واصل لخميس زمامرة...ومباركة وراهم هي وغزلان ومعاها واحد البنية...

مينة : مرحبااااا بيكم مرحبا مرحبااا...نورات الدار بالحباب هعهه...

سالم : واشنو راه تريكة بني عقيل هادي..."سلم عليها بايدو وحادر راسو وعينيه باحترام" مرت خويا لباس...

مينة : الحمد لله...اهلا مباركة...

سلمات عليها ورحبات بيها وسلمات على غزلان والبنت الي جات...دخلو كاملين سلمو عليهم ودخلو الرجال للصالون...والعيالات كملو التسلام وصلات مريم للبنت...

مينة : جيهان مرحبا بيك...هادي مريم بنت ختي...

جيهان"تبسمات ليها ومريم كذلك" : متشرفين اختي...

مريم"بابتسامة" : مرحبا بيك...

تبسمات ليها وحدرات راسها تا تسرسب شعرها الي كان طوييل فايت كتافها لتحت...اسود لااامع...كانت زوينة زينها عربي بحال شي خيَّالة هاربة من مسلسل عربي كايهضر على العرب الرُّحل...بعينيها السوداوتين وفمها المنتفخ والخالة الي فوق منو...حجبانها الكحليين وعينيها البنيين عاكسين اللون خلاو جمالها يلفت...هادشي كلو سكاناتو مريم الي ماتنكرش عجبها زين هاد البنت...حيدات الصباط ودخلات تابعة مرات جدها (مباركة حيت بابات جيهان ربيب مباركة)...جلسو مجموعين حتى شوية وهما يسمعو صوتو حيت ماسمعوهش ملي دخل وامتى جا...

مازن : مي...

سالم"غا سمع صوتو وهو يوقف هو ومباركة" : وتا دخل اسعادة العميد...ههه…دخل اولدي…

مينة : ههههه ولدي غا دخل كاينين خوتك..

تحدر حتى دخل حيت طويل على الباب...حيد صباطو وخشا رجليه فبانطوفة ودخل لعندهم للصالون ووقف قايل "السلام عليكم" بصوتو الغليض...حادر عينيه...حتى ناضت عمتو سلمات عليه وعمو تاهو وناضت غزلان هي وجيهان الي كانت حادرة عينيها ومبتاسمة ضربات فيها ريحتو الي كانت فايحة...ومريم كاتشوف فيهم نايضين يسلمو عليه...غزلان حدها حطات ايدها على صدرها مسلمة حيت عارفاه مكيسلمش على العيالات...اما جيهان ماعارفاش مسكينة مدات ايدها تحت شوفات مريم وهو يحرك راسو ودار ايدو على صدرو...

خلا ايدها ممدودة حتى نغزاتها غزلان ورجعات لبلاصتها وجهها مزنگ...مريم عضات شفايفها من المنظر...ماعرفاتش هاد الاحساس الي جاها..ماقدراتش تسيطر عليه...حدرات راسها وعينيها...فجأة...محيط شفايفها بداو تقاسيمو كايتجعدو…ابتسامة بدأت تتشكل رويدا رويدا، وكأن الموقف انتزع منها ابتسامة ماكانتش ناوية عليها…القدر على شكل موقف خلاها تتشكل…واخة خفيفة كانت عفوية ماواخذاش الاذن وماكانتش على البال…حتى دارت صباعها على فمها ملي وعات وهي تجمعها...

يتبع...