لحن الأمل

لحن الأمل الجزء 50

من تأليف سناء بوعبيد
قصة فطور الكتابة

13 دقيقة للقراءة 43 تعليق

محتوى القصة

100%
المحاذاة
تباعد السطور
الهوامش
رواية لحن الأمل

ماشي ديما الحياة فصفنا...ماشي ديما القدر ينصفنا...ماشي ديما غانعيشو داكشي الي بغينا....كاين الي مكتب عليه يعيش مرتاح واخا يكونو بعض المشاكل الطفيفة والعراقيل وكاين الي مكتب عليه عمرو يرتاح...مهما كتاب علينا خاصنا نحمدو الله على ما اعطانا بخيرو وشرو..نرضاو بالي تقسم علينا...نحاولو ما امكن نتحلاو بالصبر فعز الازمة الى مكانش عندنا سلا/ح باش نحاربو..لان الصبر كايبقى هو مفتاح الفرج....هادي هي الدنيا وهذا هو زماننا...

مريم من الناس الي ما نصفهمش القدر...من الناس الي كتاب عليهم المشاكيل من نعومة الاضافر...مريم ماعاشتش حياة عادية كيف اغلب الناس،، عاشت وسط المشاكيل وكبرات فيهم داكشي علاش كان اكبر طموحها هو ترتاح من هاد القضية وتخرج براءة وتعيش مرتاحة البال حيت عمرها عاشت مرتاحة فبالها...

ومريم ماهي الا مثال للنساء الي عاشو حياة ماشي عادلة…انما هي حياة مكتابة عليهم لحكمة لا يعلمها الا الله...يقدر تنصفهم الحياة من بعد ويقدر لا...الفرق ان كل واحد وكيفاش تقبلها ومريم تقبلاتها بالصبر الي عاطيها الله...بالشخصية الحديدية الي تزرعات فيها انه فكل محنة كاتقول ماخاصنيش نبكي خاصني نصبر ونزيد حيت كاين أمل...كاتواجه مشاكيلها بصبر وكفاح وماكتبكيش على الاطلال حيت ببساطة البكا ماكايفيدهاش من غير زوج دمعات ثلاثة وتحل عينيها وتلقى نفس الحاجة باقية ومافادها البكا بوالو...هادي هي شخصيتها وهادي هي مريم الي عرفنا من نهار بدات القصة وهي وراء القضبان الحديدية الي ماتمناها لحد من غير الي ظالم وماشي المظلوم....

لحن الأمل...

بعد مرور سنة....

من بعد اذان الفجر كيف العادة صلات صلاتها ورجعات للبيت هزات المصحف ديالها دارت نضاضرها دالشوف وهزات الستيلو الالكتروني وبدات تبع مسار الايات وهو كايقرا ليها وهي كاتبع معاه بشفايفها...حتى وصلات الستة ونص ديال الصباح...مازالهم فايام العيد ديال رمضان لهاد السنة...(راكم عارفين ماشي كل عام رمضان كيكون فنفس الوقت باش تفهمو)...سدات المصحف وباستو ورجعاتو لبلاصتو فين محطوط بحفظ...حيدات نضاضرها وناضت من فراشها...خرجات من البيت وهو يتحل الباب وخرج طه كايلبس فجاكيطتو الخفيفة...شافها وتبسم بخفوت...

طه : صباح الخير..."باس راسها"...

مينة : صباح الخير...فين غادي ؟!..

طه : نمشي نتقدا لفطور...اش خاص من غير داكشي الي قلتي ليا البارح ؟!...

مينة : لا بان ليك شي عطار حال فالطريق جيب ليا النافع بقى غا شوية مانديرو فالحسوة...

طه : ماتبقايش ديري ليها نفس الحسوة...نوعي شوية..

مينة : ندير ديال الذرة ؟!..

طه : الي بان ليك الذرة مزيانة...والنافع دابا نجيبو...صافي ؟!..

مينة"تنهدات وحركات راسها...طبطب عليها وباس راسها وهما ينزلو هي توجهات للدار لتحت وهو كمل طريقو وخرج...مشات لبيت النعاس حلات الباب شوية وهي ترجع ومشات لكوزينة بدات توجد الفطور...شوية وهو يصوني تيليفونها...طلات عليه كان فوق الطابلة فين حطاتو ملي دخلات...بان ليها مصطفى...

مينة : الو...صباح الخير...

مصطفى : صباح الخير...كي صبحتو ؟!..

مينة : الحمد لله...

مصطفى : كي صبحات خديجة...واحد مريم لباس عليها..

مينة : الحمد لله...نتا لباس عليك...كي بقيتي نزلات ليك السخانة شوية...

مصطفى : لا الحمد لله...

مينة : مازال ماناويش تجي !؟..

مصطفى : نهار السبت عندي الطيارة...نجي راني خدام امينة مالي غانعرس هنا...

مينة : وادم ؟!...

مصطفى : مازال شوية هنا تايكمل السطاج الي عندو...الشهر جاي يسالي..."شاف فساعتو"...مازن ماكاينش حداك ؟!..

مينة : راك عارفو ملي كايصلي الفجر كايزيد من تم فين باقي كايفطر معايا...

مصطفى"تنهد" : لا حول ولا قوة إلا بالله...اش غاديري هادي خدمتو وهذاك طبعو (ماعرف مايقول ليها)...صونيت ليه قبل مانعيط ليك ماجاوبنيش...المهم انا غادي نمشي نقضي واحد الغراض...لا خصاتك شي حاجة صيفطي ليا فاوديو باش نبقى عاقل غذا فالصباح غانمشي نتقدا باش نجيبو معايا راني مخلص الكيلوات وغانزيد يمكن...

قطعات معاه المكالمة...هز عينيه كايشوف قدامو كان قدام واحد النهر مسند عالسياج ديالو...ساهي حتى هو وغوباشتو معقودة دوز على جبهتو بتعب وتنهيدة...شاف تا عيا وهو يستغفر الله ومشى من تما...بينما مينة حطات التيليفون ورجعات كاتكمل الفطور...حتى رجع طه هاز فايديه المياكي حطهم ليها...

طه : كاين فاش نعاون...

مينة : دي هادشي لبيت...

طه : وااخا...

بدا يهز الفطور كان غير قليل حيت غير هي وياه الي غايفطرو تقريبا...ادم ومصطفى مسافرين لفرنسا وزيد ماكاينش ومازن من الفجر مشى لخدمتو...

مينة : جاوبك زيد ؟!...

طه : لا خليت ليه ميساج فواتساب تايدخل ويجاوبني...

حركات راسها وهي تمشي لبيت النعاس...حلات الباب ودخلات لعندها حساب ليها غاتكون ناعسة حتى لقاتها حالة عينيها...تبسمات ووقربات حداها...

مينة : صباح الخير...يلاه باش تفطري...(هزات زيف جمعات ليها شعرها بيه وضارت جيهة الباب) طه اجي اولدي...

شوية وهو يدخل شافها وتبسم...صبح عليها وتحنى هزها بين ايديه خرجها لفين كايفطرو حطها فبلاصتها شافت فيه وحركات راسها...فمها عواج لجنب..وإيد عواجت حتى هي...شدها ليها طه حركها شوية وشاف فيها مبتسم...

طه : صبحتي اليوم شوي ؟!...(دار ليها حركات بايدها)...مازال خاصك الترويض...فطري باش نديك للسونطر...

مينة : نمشي معاك...

طه : كاينة الفرملية مكلفة بيها...نحطها تما نضرب تالصيدلية ونرجع ليها...

هزات مينة الزلافة فايدها ديال الحسوة باقي سخونة ديال الذرة..تعودات طيلة هاد السنة وهي مهتمة بختها خديجة...ملي طاحت مرضات وهي الي مقابلاها حتى من الاهتمام بالنظافة الشخصية هي الي مكلفة بيها وفالحمام كاتجيب ليها كسالة تعومها من غير الوضوء هي الي كتوضيها شخصيا مكتخليش شي وحدة تشوف عو*رتها من غيرها هي...شافت فيها وتبسمات بحنية... هزات من الحسوة معيلقة نفخات فيها باش تبرد وقرباتها ليها شرباتها بشويي واخا كاتفلت ليها من الجناب محاولة معاها بعدا مابقاتش بحال قبل...شافت فيها وتبسمات...

مينة : بدلت ليك الحسوة هادي تعجبك طه الي وصا ليك عليها هههه...

خديجة"هزات فيها عينيها وحركات راسها وشافت فطه" : يضي علييك (الله يرضي عليك)...

طه : هااا اللسان بدا يتسرح...اامين...

مينة : ياك غادية شوية...

طه : وراه ميسرة...السونطر الي وليت نديها ليه ديال السيد كنعرفو ماكايجيبش الي كان ، عندو ناس ناضيين..

حركات راسها كاتحاول تطمئن لوضع ختها...بغات اي حاجة تسمعها تكون ايجابية في صحة خديجة...واخا غير أمل بسييط طفييف يقوليها راه غاتولي لباس...كملات ليها الحسوة ومسحات ليها فمها...وهزات بيض اومليط عطاتو ليها شوي بشوي كاتركز ليها على الماكلة الساهلة...واخا فمها ماشي عوج كاامل ولكن الاعوجاج الي عندها بسباب الشلل مخلي الماكلة ماتاكلهاش كيفهم خاصها المساعدة واخا لايد لاخرى مزيانة هي والرجل لاخرى حيت عندها شلل نصفي...

خديجة"هزات ايدها ووقفاتها" : كل ل رراسي...

مينة : كوولي الله اودي...بسم الله...

عطاتها المعيلقة وبدات تاكل ومينة حاضياها كاتلقى صعووبة باش دير في فمها ومينة هزات كاسها دالقهوة مخلطة كاتشرب منو وبدات تفطر وفنفس الوقت حاضياها هي وطه لا طيح الماكلة ولا ماتعرفش...يلاه هاد الاسبوعين الاخيرة الي ولات كاتحاول تعاون براسها...حالتها النفسية كانت صعيبة...كل نهار أمل انه يكون احسن...

طه : انا راااضي عليك...كملي هكا نبغيك...

مينة"قربات راسها لعندها باستو بفرحة" : هادي هي ختي الصغيرة الي كانعرف...هكاك كولي باش تبراي ليا ولمرياامة...

خديجة غير سمعات مريامة وهي تحس بقلبها تكمش فثانية تهز ورجع لبلاصتو بضيم طايح عليه وحزن تكب عليها من جديد حتى وقفات ايدها وطاحت المعيلقة...وعينيها غرغروووو بالجهد...حتى بدا صدرها كايطلع وينزل وقرجوطتها كاتحرك...غمضات عينيها ونزلو دوك الدمووع يجريييو...تنهدات مينة وجراتها من كتافها حطات ليها راسها على صدرها مخلياها تبكي وطه مالقى مايقول...جمع حجبانو وضار لهيه...مريم بالنسبة ليه ماشي غير بنت الخالة مريم كانت هي الانسانة الي دخلات لخاطرو حس بيها ختو...معزتها كبييرة وخاصة...هي الوحيدة الي قدر يفتح ليها قلبو ويعاود ليها على معاناتو...كانت احسن مستمع...

مسحات ليها دموعها وبزز باش سكتاتها حيت ماخاصهاش تزيد تبكي وتضيم ماشي فصالحها ولا فصالح صحتها النفسية ولا مرضها...كملات فطورها وناض طه طلع الفوق بدل حوايجو...وفطريقو صونا ليه تيليفونو...كان "مازن" المتصل...

طه : السلام عليكم...اخويا...لقيتيني نازل نديها للترويض...اه لا معاها البنت...ايه واخا شحال بغيتي تصيفط !؟...لا ماشي هكاك واخا دوز ليا فالحساب ونخرج نصيفطو فكاش بليس...صافي كون هاني...الليلة يروحو الفلوس فايدها...

كان نازل وكايهضر معاه ويخشي فلوازمو الشخصية فجيبو...نزل وتوجه للطوموبيل هي اللولة حط فيها اغراضو عاد دخل جر الكرسي المتحرك كان مطوي دارو فالكوفر عاد طلع لقى مينة لبساتها جلابيتها ودارت شالها...

مينة : نوجد الغذا...

طه"بقى يشووف بتفكير" : عرفتي شنو غانجيبها نصوني ليك وجدي راسك باش نديكم نغديكم برا...مكاين ماتبقاو فالدار...زيد ماكاينش اصلا ومازن ماكايجي تال الليل سير فين يوصل لويكاند يجلس معانا ديك الشوية...ونيت هو الي وصاني عليكم غا دابا دوا معايا

مينة : ياك...ايوى صافي...واخا ولدي ..."تنهدات محركة راسها" الله يرضي عليك...

هز خديجة بين ايديه كايحاول يضحكها...ويتمازح معاها يخلق جو باش تنسى...هبطها لتحت ومينة تابعاهم تا ركبها فالسيارة قادها فبلاصتها ودار ليها سانتيغ عاد مشى ركب هو...شير لمينة ومشى وهي بقات واقفة حتى مشاو وسدات الباب وطلعات للدار...

فنفس الوقت لكن ماشي نفس المكان...لاح الملف بالزعاف وزفر بالجهد مدوز بايدو على وجهو وشعرو...عاقد غوباشتو لاقصى حد...هز الفيكس دوز الخط طلب شي حد يجي لعندو وقطع...رجع راسو اللور مسند وهز عينيه للسقف...مشابك صباع ايديه وكايتسنى...حتى شوي تدق الباب عطا الاذن وهو يدخل..عطاه التحية وحرك ليه راسو...

مازن : شنو ديك الروينة لتحت ؟!..

الشرطي : شي وحدين جاو بتهمة السكر العلني...

مازن : شحاال ؟!...

هو : عشرة...ضاربين الكاو كايدخلو ويخرجو فالهضرة...ستة الدراري وربعة البنات...

حرك راسو وهو ينوض...خرج من المكتب ونزل لتحت لقى الروينة نايضة...العميد الي تكلف وشدهم واقف عليهم شادينهم واحد كايصمك فيهم داو منهم بقاو زوج ماباغينش يدخلو...واحد البنت كاتسب وجهها مجلخ بين عكر ومساكارا سايحة لابسة كسوة بلومارين مقزبة ومزييرة.. ولاخور مكشكش...ضار العميد وهو يلقى مازن وراه گردف ليه وكحاز...ومازن بقى يشوف فهذاك مكشكش ولاخرى الي كاتمسح في فمها دايز بالريوگ..

هي : علاش كايضربو فالدراري...حنا ماردنا والو اصلا ماساكنينش فالمغرب جينا غير زيارة وعاملين حفلة بيناتنا...شنو هاد الحالة...

العميد : سكتينا من الصباح ونتي تروني علينا بالهضرة.. فين ساكنة ؟!...

هي : اسبانيا...

العميد : اووولا تشيكا...وا بزعط زيدي قدامي من الهضرة...

بقى مازن يشوووف فيهم وفيها سمع ليها تا كملات هي والعميد وهذاك كايسب..كايقوليهم جات عندي ضايفة وهما مكيعرفوش لهادشي...والحالة...واش هاد الاستقبال...مادواش معاه خلاه تا كمل وهو يهز ايدو خبطو زوج خبطات بانو ليه الضواو...تا كان غايطيح كون ماشدو البوليسي ودفعو هو والبنت الي صقلت ملي شافت الصفعاات الملاح...ورجع للمكتب ديالو وهو كايتوعد مايبقاوش يجيبو ليهم سكايرية لكوميسارية...حيت شي نهار غايصفيها لشي حد ويخرج على راسو وخدمتو...طلع لمكتب مخزز...ماتبعو حد حيت عارفين غايسمعو السبان ديال بصح...

النفس مرضات ومازن نفسيتو تبدلات...غير مازاد تكفس مابقاش عندو گرام ديال الخاطر الشوية بزز مسلك بيه مع الدار...حس براسو بحال الى متقبلش الوضع ولكن ماكايبينش يعني مستحيل تلقايه كايبكي ولا يندب ولا يشكي...هادشي كااامل مترجم فالعصبية ومترجم فالسكات وغير ملاهي مع الخدمة ومبرد غدايدو فيها...كايحاول ما امكن مايديرش شي حاجة تخليه يرجع باللور...كايحاول يعض فالنفس باش يزيد القدام وحسابو فراسو...

اما مينة بقات فالدار وحدها...شعلات التلفازة دارت فيها القران وخلاتو مطلوق...ومشات تجمع الدنيا...حاليا غير هي وطه وخديجة فالدار ومازن راه غير الخدمة ولا خارج...رجع شغل راسو كثر من اللازم والعادة...وزيد مسافر هاد الآونة الاخيرة...جمعات الدنيا وبقات جالسة حتى عيط ليها زيد دوا معاها غير شوية وقطع تنهدات لحالتو اول مرة تشوفو عايش بحال هاد الحالة...سالات وهي تجلس فالبيت دايرة ايدها على حنكها وكاتشوف فالشرجم...هذا العيد الثاني الي كايدوز عندهم مكفس...بقات ساهية وتنهد...كون ما طه مهرس شوية الجو كون تكرفصات مع نفسية ختها اما حتى المساعدة را قايمة بيها...الي شاف خديجة وحالتها غايقول خديجة هي الكبيرة فخوتها...ناسيين ان الهم والزمان المدمر كايخلي الواحد يبان كبر من عمرو بكثرة تراكم الهموم...شافت راسها غير ساهية تاني بلا فايدة ودابا عام مازال ماكاين حتى حل...هزات تيليفونها كاتفرج فالفيديوات حتى وصل الوقت وهو يعيط ليها طه باش توجد راسها...لقاتها من الجنة والناس تلاهى شوية وتبدل الجو...مشات لبيت لبسات جلابيتها فالبيج مع شال فالمسكي ورمات كاب گرونة على كتافها حيت عارفة الفيرما باردة...وهزات كاب اضافي لخديجة وهزات ليها صويكها الي فيه الدوا ديالها ديال السكري والطونسيون...وباكية لانجيت معقمة ديالها...ومجموعة من الپاي باش كتشربها الما واخذينهم ليها ديال البلاستيك الي شربات بيه كاترميه ودير واحد جديد...وجدات كلشي وحطاتهم فوق الرخامة ديال الصالون...ورجعات هزات صاكها دارت فيه حكيك نيفيا ذهنات بيه ايديها وخلاتو باش تذهن لخديجة ايديها...تفكرات بابيي جينيك وهي تمشي هزات واحد دارتو ليها فصويكها بقات واقفة كاتفكر شنو خاص لقات كلشي هو هذاك حتى الى نسات شي حاجة يجيبها طه من تم...صونا ليها طه وهي تهز داكشي ونزلات لتحت لقاتو جاي داخل حيت عارفها غادي تكون هازة شي حاجة نيت صاك خديجة...هزو عليها وخرجو بزوج ركبو فالسيارة...

مينة : امضرا شوية اليوم...

خديجة : مممم مدوو لله...

مينة : الحمد لله...

طه : الرجل شوية...لايد باقي معكسة..."شاف فخديجة" خديديج شادة معانا العكس...

خديجة"نزلات عينيها"..

مينة"طبطبات ليها على كتفها حيت مينة ركبات لور وخديجة بقات لقدام فبلاصتها..." : ماشي مشكيل شوية بشوية...الله يشافيها...

طه"كسيرا وشد الطريق" : اش نقوليك ادم فلت عليه زردة من داااكشي...

مينة : فييين هو كبيدتي راه ملهي لهيه...

طه : خلييه يتبرد...صافي غا تخرج يجلس لارض ؟ حساب ليك الهندسة ساهلة...

مينة : الله يعاونو ويسهل عليه..."تنهدات وشافت فيه من المراية هز عينيه وهي تغمزو ونطقات بين شفايفها "مريم"...حرك راسو وغمض عينيه زعما من بعد...حركات راسها وسكتات كاتشوف فالطريق ومرة تجمع مع خديجة باش تهضر و يتطلق لسانها شوية بحال الترويض...اليوم صبحات شوية كاتشارك معاهم ومابغاوش يبينو فرحتهم باش ماترجعش تنكس مخلينها بكاامل خاطر خاطرها...مرة يضحكها طه كايلقى غير الابتسامة بدون حياة باهتة واكلة الشحط...وصلو لواحد الفيرما غير الي كانو مشاو ليها باش ماتفكرش خديجة مريم...كوموندا ليهم غذا من داكشي...قادت ليها مينة الكاب على كتافها واخا لداخل كان سخون...ومشات بحجة غادية لطواليط...خرجات هي وطه ووقفات...

مينة : اش درتي...

طه : صيفط ليا مازن لفلوس رسلتهم ليها ف كاش بليس...

مينة : الله يرضي عليك..."تنهدات وضارت تشوف لهيه حتى طبطب عليها"...

طه : ان شاء الله يكون خير الواليدة ماتخميش...

مينة"عينيها غرغرو ونطقات بحرقة" : اااولدي عام ديال العذا*ب عام على گدو...مابانش ليا الدقة تهزات وداتها مولاتها...الشحط كلو نزل عليها...

طه : كاتهضري على شي حد خور اما الي كانعرف صبارة...

مينة : شحال جهد هاد الصبر ؟!...راها بنادم اولدي "مسحات عينيها كاتنهد"...الله يفرج...يلاه دخل خليت خالتك وحدها...

حرك راسو عنقها جنبو ودخلو لداخل لقاوها كاتشوف لهيييه فواحد الشرجم حاضية الدنيا برا ولكن العقل ساااهي...ماحسات حتى حط طه فمو على راسها بايسو ليها...غمضات عينيها ونزلو دوك الدموع يجريييو...مسحاتهم ليها مينة بالسكاات مبتاسمة فوجهها ولكن لداخل كايبكيي د_*ممم على ختها وبنت ختها...

يوم جديد...

سجن بوركايز...

الساعة العاشرة صباحا...وصل بسيارتو للمكان...بقى شحااال وهو واقف كايشوف فهاد البلاصة شهدات على شحال من حاجة...شي ربع ساعة وهو واقف وصباعو كاينقرو فالفولون...حتى صونا ليه تيليفونو وهزو بدون مايشوف شكون عينيه على الباب ديال السجن...طلق الخط وسمع المتصل حتى كمل وقطع...حط تيليفونو غير تما ونزل من السيارة...لابس لباس عادي...قميجة بلومارين وسروال توب بيج...حل الباب لوراني هز الفيستة فلون السروال لبسها قاد الهندام مزيان وتوجه للباب وفطريقو سد السيارة بالكونطاكت...غادي متوجه وعاقد غوباشتو..تا وصل عند الباب وهو يتحل شافو العساس ديال تما (موظف ادارة السجون)...التعليمات جات من عند المدير...حل ليه الباب الي كايتسمع صوتو مجهد...طاااق طراااق الزكروم الكبير ملي كايتحل والقفل...عطاه تحية خفيفة وهو يدخل تابع الطريق الي ولف يمشي فيها...حتى وصل لداخل للمكتب ديال المدير...غير شافو وهو يوقف مبتاسم...

المدير : سي عقيل لباس..تفضل

مازن"حرك راسو وجلس فالفوطوي تما مقابل مع المكتب..حط رجل فوق رجل" : هانية الوقت ؟!..

المدير : هانية وما هانية..."شافو غوبش كثر" غير شي مشاكيل بين السجينات...ماتخافش ماشي الشومبر ديال الاخت مريم...

حرك ليه راسو مرتاح...رجع لمدير لبلاصتو دوز الخط فالفيكس حيت تيليفونات ممنوعين...علم المرابية تجيبها بالاسم...شي ربع ساعة والزيادة جابو ليهم قهوة كحلة...يلاه غايهز الفنجان يشرب منو..تسمعات دقة خفيفة فالباب عطا المدير الاذن وهي تدخل الحارسة...

المدير : فين الاخت مريم ؟!..

هي"شافت فمازن ورجعات شافت فالمدير" : قالت لي مابقاتش بغات تشوف شي حد...

(وكالة تحويل الاموال ولات فالصجن فين كايصيفطو للمساجين الفلوس مابقاوش كايعطيوها ليهم فايديهم والماكلة ممنوعة كلشي ولا داخل اسوار السجن ♥️)

يتبع...

التعليقات 43

  • F
    Fatima

    هاويلي وانا جالسة كنتسنا يكون غير حلم صدق بصح

    • ب
      بدون إسم

      Awili hta ana lahyarbi hta glna rah t9ado l2omor

  • ب
    بدون إسم

    ختي اويلي من نيتك بغيت غير نعرف فين قارية هاد القانون لي ضارباها بخمس سنين

    • M
      Mimi

      ههههه نفس السؤال

    • ن
      ندا

      انا عقلي حبس والله كيبالي مغنبقاش، متبعة عاد القصة

      • ب
        بدون إسم

        والله ايلا حتى انا

    • ب
      بدون إسم

      راه قانون التزوير يقدر يوصل فيه الحكم حتال 10 سنين أختي

      • ت
        تتت

        وهي اشنو زورات باش تا خدها هي دارت بيها المشكل راه عندها شهود مها والتصاور + هي مكانش فراسها نهائيا هذا بحد داتو دليل على براءتها

      • ب
        بدون إسم

        حبيبة متافقة معاك ولكن هاد شي لي كتقولي في حالة تبت عليك ++ هي ضحية او زيد عطا بزاااف ديال الدلائل على برائتها ++ راه تزوير عقد مشي نفس تزوير شيك اولا عقد بيع راني محفيا راسي في المحاكم مكندويش من فراغ

  • ب
    بدون إسم

    اش هاد التخربيق كيفاش دخلات على شي حاجة اصلا ما دارتهاذ الكاتباب ديال القصص بقاو تشاورو مع اهل الاختصاص اعطيوكم معلومات على ضومين مقريتوش عليه باش متبقاوش ديرو شي حاجة غير منطقية

    • ن
      نادية

      وراه انتف راسي بالفقصة عندي ماستر في القانو او كاتبة ضبط او عمري شفت هاد المهزلة

      • R
        Rima

        هانتي تشوفي اختي كون سولات شات جيبيتي قبل ما تكتب هاد الهبلة كون قال ليها راه مستحيل خمس سنين على هاد التهمة لي هي أصلا باينة فيها ضحية

      • M
        Mimi

        هههه عندهم احترام عقل القارئ عندهم غا إشاعة

      • ب
        بدون إسم

        والله ايلا

    • ن
      نادية

      وراه انتف راسي بالفقصة عندي ماستر في القانو او كاتبة ضبط او عمري شفت هاد المهزلة

      • ن
        ندا

        هههه ناري ضحكتيني وخق للله انا صافي عقلي حبس

    • ب
      بدون إسم

      والله ايلا عندك الصح

  • ب
    بدون إسم

    ختي واش مريضة إلى كنتي مريضة سيري تعالجي متمرضيناش معاك الله يرحم باك راك خرتي عى الوقت فوق القياس اولي

    • ب
      بدون إسم

      والله ايلا اختي جابت لينا الاكتئاب بهاد الأحداث غير الحزن والبكاء

  • ب
    بدون إسم

    ختي زينب واش في نظرك هذا شي معقول 5 أيام وحنا نتسنو وفي الاخير هذا الجزء الصغير أنا من جيهتي خليت لكم الراحة نتلاقو العام الجاي بينما تكمل القصة إن شاءالله

  • ن
    ندا

    انا عقلي حبس تكيفاش الخبس تشهادشي وبكيت اعباد الله بكييت 💔😭😭😭 ختي كاتبة والله الا راني مريضة ويحالك وكتر كاع راني ازمتيك ربي واش بصح ولا حلم 😢😢😢

  • M
    Mimi

    العلاقة ديال مازن ومريم سالات قبل ما تبدا وبصفة نهائية اي حاجة غا دار من بعد هادشي غتكون غير منطقية

    • ب
      بدون إسم

      مستحيل ترجع مكينش كيفاش را هاد ألكاتبة مريضة اويلي مريم أصلا معقدة او كتشوف راسها قل منو دابا را صااافي اويلي منتزعة بالعاصاب

  • ب
    بدون إسم

    خربقتيها والله كانت زوينة 🥺🥺🥺🥺

  • ز
    زينوشة

    مع كامل احترامي تخربيقة ولات الصراحة سناء قصصها واعرين و لكن هادي هربت على الواقع خمس سنين غير منطقية و غير واقعية. فقدت الشغف اخر حزء نقراه

  • ب
    بدون إسم

    ختي هادشي كيعصب والله عارفة بلي رواية خاص يكون فيها احداث زوينة و خايبة ماشي كولشي يكون مثالي ولكن ماشي بحال هاكا خربقتيها 5 سنين راه غير منطقية ابدا كنتي تقدري تحيدي هاد الحدث ديال السجن و تبرإي مريم و تزيدي شي حاجة مثلا طرف ثالث شي شخصية جديدة و لا رجعي راجلها ينتاقم

    • ن
      نادية

      ختي فين بانو ليك هاد الاحداث الزوينة او هيا نهار فارحنا هجراتو لينال عرفتي شحال او انا كنتسنا في للحدث ديال رمضاهن في الخر ضربات كولشي في زيرو تفو كرهتها والله

    • ن
      نادية

      ختي فين بانو ليك هاد الاحداث الزوينة او هيا نهار فرحنا هجراتو لينا عرفتي شحال او انا كنتسنا في للحدث ديال رمضان في الخر ضربات كولشي في زيرو تفو كرهتها والله

  • ب
    بدون إسم

    كنتمى تفكري تمسحي هاد الجزء و حنا غنديرو راسنا مقرينا والو

    • ب
      بدون إسم

      والله ايلا رأيي حتى انا بحالك

  • R
    Rima

    مع كامل احترامي ليك و أنا من محبين كتاباتك وقصصك كاملين قريتهم و عاودتهم ولكن هادشي لي قريت دابا عبارة على تخربيق لو كنتي بغيتي دخليها نيت الحبس دخليها ولكن بطريقة منطقية حسن من هاد الهبلة لي درتي خسارة الوقت لي دوزت وانا كنقرى هادشي .

  • ب
    بدون إسم

    كنتمنى إتبدل عنوان القصة ما بان لي بو أمل

    • ب
      بدون إسم

      والله غير الاكتئاب والحزن ملي بدات القصة خاصها تولي فقدان الأمل

  • ن
    ندا

    وختي كاتبة تكيفاش خمس سنين هيا مالها شدايرة راه قصة بدات كتبسال

  • ب
    بدون إسم

    مع احترامي لكاتبة خاص تسمى القصة بدون أمل دبا حتى الا بغاو يتجمعو ميمكنش بوليس ميوفقوش على طلب زواج

    • F
      Fatima

      والله العظيم ، مفهمتش اش هاد المهزلة

  • ب
    بدون إسم

    القصة اخذت منحى حامض ومامفهومش وقصيرة مهم كانت فالاول زوينة دبا انا أعلن إعتزالي لحموضة الحوار ولحموضة الاحدات غير متناسقة وماشي منطقية بتاتا مع السلامة.

    • ب
      بدون إسم

      اتفق وهدا راي كاع الناس للي كايقراوها

  • ب
    بدون إسم

    الكاتبة مرة دارت تسريب بلي مازن راح يكون مع مراة اخرى جياحة والله القصة كانت شابة ومتميزة بطريقة السرد وترابط الأحداث بصح دوكا ماولاتش منطقية 5 سنين حبس لقاوها تهرب فالكوكايين !!؟

  • ب
    بدون إسم

    بعد خمس سنوات سجن نافذة فقضية تزوير امبعد يعطوها قبول بالزواج من عميد إقليمي في الشرطة هنا لي تولي صح القصة ماشي واقعية كيفاش راح تسلكها الكاتبة ؟! مريم ومازن طريقهم مسدود فالأول القصة كانت واقعية لكن دوكا راهي درامية اكثر من كونها واقعية

    • ب
      بدون إسم

      هاد الشي لي بغيت نفهم حتى أنا كيفاش غدير ليها ناوية واقلة من بعد تزوجهم بالفاتحة اما البوليس راه مستحيل يعطيوهم الموافقة هاد الشي إلا كانت هاد المريضة ناوية تجمعهم

  • ب
    بدون إسم

    هاد الكاتبة لا تحترم عقول القراء ايه حنا كنقراو ومتبعين القصص لكن تكون أحداث منطقية ويتقبلها العقل ومن ناحية اخرى كنفكر كيفاش غادي تزطط راسها من مورا هاد البارت

    • ب
      بدون إسم

      عندها حل واحد هي تكول كاميرة خفية اولا مثلا تكول هاد الشي لي كان ايطرا كون تحكمات مريم ولكن مبانش ليا