قصة عروس الجحيم الجزء الأول

‏"لا شيء يؤذي الروح أكثر من بقائها عالقة في مكانٍ لا تنتمي إليه." 💀🌩️

عروس الجحيم.. احداثها مستخلصة من الواقع والخيال...اغلب الاحداث غانقول واقعيين لكن مهرسة بشوية الخيال باش منطيحوش ان شاء الله فالملل...وغاتكون مركزة بشكل كبيييير على البادية وخا كاينة المدينة 🌳

"الزواج بالنية والحرث بالنية”

عناو بيها ناس زمان بالي الزواج الى كانت حاضرة فيه النية الزينة غايكون كيما قسمو رب العالمين...

وقاليك ثاني...

"كَيّلْ زرع بلادك واخا يكون شعير”

وهنا المعنى قد ماجلستي وشحال مادرتي وشكون ما جربتي وعشتي ومعامن تعاشرتي...فلاخر دي بنت بلادك كتبقى حسن من البرانية...

وقاليك “فرحي يا موكة بلارج دار العرس”

ومعناه أن لكل شخص نصيب في الزواج، فسواء الجميل أو القبيح، ..و كايقول واحد المثل عمييييق...وليه معنى كبير..رمى سهامو ونتا وماجادت بيه فهامتك...“العروسة فوق الكرسي ما عرفها حد فين ترسي”

والمعنى يا الفاهم ان المراة الي تدخل بيت الزوجية، لا هي عارفة زواجها كامل وزين ولا كامل وعامر بالشين"الخايب"...ولا مكاملش گاااع من بين هاد الاثنين...

وفالاخير زواج قسمة ونصيب...نتا ومعامن لاقاك ربي وجمعك بيه...كان زين ولا خايب راه مكاتيب...

ولكن ماشي كاع المكاتيب زينة..

وانا كنقول..“حل عينيك قبل الزواج أما بعده غير غمضهم..والى عطاك العاطي ماتحرث ماتواطي"...

اهلا بكم في قصة عروس الجحيم 💀🌩️👰🏻

المدينة الحمراء مراكش

الرميلة المدينة القديمة...

7:00 صباحا شهر يوليو الحراارة المفرطة كيف العادة فهاد الفصل فمراكش...حلات عينيها من بعد ساعة ديال النوم مورا الفجر..مدات ايدها لطابل دونوي عند راسها شعلات التيليفون شافت ساعة واستغفرات مولاها وناضت كتفوه وتجمع فشعرها بقراصة حيث كطلقو فالنعاس وفالاصل قصير...سمعات صوت تقرقيب عرفاتو الحاج حيث من الفجر كيبقى فايق...دخلات لدوش غسلات وجهها وجددات الوضوء وخرجات صلات زوج ركعات الصبح سلمات وتحات وناضت كطوي فالسجادة حتى تم داخل شاد تسبيح فايدو بوجهو البشوش كيف عادتو ضراعية فالگرونة كمايمها مخزانيين حد المرفق وتوبها بارد مع صهد مراكش ...وطاقية فنفس لونها..لحيتو الي متخللها الشيب والنور الي عاطيه ربي فداك الوجه يخليك تدخليه لخاطرك صحة واخا هو انسان صارم و عصامي....الهيبة والقبول من عند الله...لون بشرتو الي سمارت بتمارة الخدمة فالمحلات والجلود ودار الدباغ والحمام...وكيِّل من هنا وتسنى هذا وجيب هذا وشموشات تا دا منو زمان نييييت...شاف فيها وبابتسامة صبح عليها....

"صباح الخير الحاجة ناديا...تعطلتي مامولفة ليك هههه"

ناديا مراتو او الزوجة الثانية من بعد ماتوفات اللولة الي عاش معاها سنيييين لكن الاجل وصل...حزن على مراتو وعلاش لا وهي كانت رفيقتو لكن ربي بغى امانتو وسالات معاها رفاگتو...عامين ديال العدة الي عطا لراسو من جيهتها وبين فلان وفلان وتدخل الواليدين والاحباب وبين اقناع واقناع يا فلان را خاصك تزوج..صبرتي مع فلانة بلا ولاد عطيتيها حقها من رفاگة(العشرة اي الرفقة).. وصبرتي ونتا بلا ولاد ها ربي كتب عليك المكتاب وعطاك فرصة دير ولادك و دير ليك سلالة تبعك تكون من دمك ولحمك الى بغى الله...حتى قنعوه صحابو من رجال الدين وكيف ممعروف عليه انسان ملتزم بدينو صلاة ماتفوتو وحق مايضيعو...عطا الكلمة وكلف ختو تقلب ليه..وفداك الوقت كان كلامها كالتالي :..

هي : مولاي حفيظ....فيك مايدير الاجر فسبيل الله "حيث هي امرأة حقانية وعقلانية ونيتها زينة "..دي الي من د.مك ومنها دير الخير...

مولاي حفيظ : شكون اختي لطيفة...

لطيفة : بنت عم با ناديا يتيمة الواليدين الي عند خالتها عايشة...راك عارف الحالة..كسب فيها لاجر...و بلا منفهمك الى بغيتي تستر ربي يسترك ويحسبها ليك عندو اجر يوقف معاك غذا يوم الدين...

مولاي حفيظ"قاطع كلامها هاز ايدو بلا متكمل حيث عارف بنت عمو اش كانت كدير.." : كلامك هو الكبير اختي الكبيرة..الي لازم ديريه والي خصك"ضرب قفاه" ضربيه على حسابي...من غذا فالصباح رسلي ليا عزوز راجلك نرسليك معاه شي بركة..منها نشوفو نيت...

الحاجة حبيبة : الله يرضي عليك اولدي..وهادي ترابينا وربي مايخيبنا...

لطيفة : على الراس والعين"هزات البراد تالفوق وسط دار اشبه برياض قديم..دار الورثة...حدا الحوض ديال لغرس..انذاك كان حوض اما دابا رجعو سقاية بالالوان وفسيفساء بتصميم رياضات... وريحة تراب فازگ حيث ساقيين داك الغرسات..كبات ليه كاس اتاي بالرزة...

ناديا"زينها كيفتن وخا شوية تقدمات فالسن.... وكيف كيقولو لا مشى زين كيبقاو حروفو.... عينيها كبار سبحان من زينهم بدوك رموش السوداء...مواتيين مع الحجبان السوداء..فيها من الرومي الي تجلى فلون عينيها الاخضر..زينها باقي شاد وعلاش لا وهي فاواخر الاربعين...واخا شعرها قاسو الشيب الا انها كتصبغو بالاسود..محافظة على راسها ومهلية فراسها...تبسمات ليه ابتسامة حنونة" : عگزاتني نعسة الحلوة الي مورا الفجر هههه...

م.حفيظ(حرك راسو ببطء خااتر) : ماكاين باس ماكاين باس..

ناديا : انا خارجة نرد الفطور اليوم للا رقية غاتجي معطلة من عطلتها...اييه وكاين ايوب لفوق مادخل حتى ل ستة صباح..

م.حفيظ"غوبش" : هاد خدامي العراسات راهم ماعاجبيني اناديا..نهيه قبل مانهيه انا...

ناديا"قربات ربتات ليه على كتفو" : راك عارفو هادشي الي قرا..ومدخل بيه صريف لراسو بالحلال ونتا هادشي الي كتبغي ونهار لول خليتيه يدير اش بغى...

مولاي حفيظ : خليتو يدير الي بغا..مايجيني تالاش من وقت فالفجر مرة الصباح..مرة يومين منشوفوه مسافر لقنات..يخدم غا هنا هاد ساعة...

ناديا : ولا تزيدش فيه الحاج....وزايدون را بطوموبيلتو ماكيتنشر فحتى قنت...

مولاي حفيظ : ماقلناش اناديا ماقلنا والو..را ولد خويا الله يرحمو..وراه ولدك وخو ولادك الي هما ولادي..تربية ايدي ملي كانت عندو ربع سنين...وليني راه باقي صغير الحاجة...راني نخاف عليه كي نخاف على كبدتي..وايلي..وزايدون شكون زيدو ياخذ طوموبيل ؟ ياك انا الي درتها ليه بزز...

ناديا : واخا ميكون غا خاطرك..

خرجات من البيت نيشان لكوزينة بدات توجد فالفطور....اليوم الاثنين كاتكون السيدة الي كتشقى وطيب معاها عطلة الاحد وكاتجي الاثنين معطلة كتبغي دوز لسوق الاسبوعي تقدا لولادها عاد تجي...

سمعات صوت الباب تسد عرفات الحاج خرج يجيب الكومير كيف العادة باش يجي يفطر ويتيسر لمحلاتو...بمجرد ماكملات حطان الفطور كان هو دخل قال السلام وحط دوك الكوميرات باقين يفرفرو بالسخونية هما وكرطونة اخرى..ولقاها حطات الملوي وحطات زيتون مشرمل كحل والبيض..زيت الزيتون..فرماج زبدة دايبة وعسل..الخ

ناديا"طلات على ساشية لقات فيها اميريكان رولز بكريمة الفستق وابتاسمات" : الكرواصون الي كتعجبها...

م.حفيظ"تبسم كيحرك راسو بثقالة" : خليها تاوكان تفيق هي وخوتها و ايوب را الباگيط الي كيبغي وحطيها ليهم هزي لا بغيتي نتي...

ناديا : لا الحلاوة زايدة بلاش..هادشي خليه لايوب وليها و لوردة ومعتز...

سمات الله وكبات ليه كاس اتاي..مدات ليه الكومير..وليها كاس قهوة مخلطة بالحليب معطرة ريحتها فاحت فالدار كاملة..الرياض الي تصميمو نوع القديييييم...وخا صلحوه حافضو ليه على تصميم...بحكم ديال الورثة بقى ساكن فيها غا هو وحتى ختو كتجي عندهم من سمارة دوز معاهم العطل...كانت معاه تا مو وباه وحتى خوه بات ايوب لكن ملي توفاو توخر فيها غا هو...وفالاعياد والمناسبات كيتجمعو كاملين باش يخليو ديك الدار فيها الحياة وريحة الواليدين...

جالسين فدخيلة محطوطين فيها سدادر بتلقانهم ملمطين بالموبرا الستيل اللولاني محفرة...وديك دخيلة سقفها منقوش وحايطها بزليج المغربي البلدي والارض فسيفساء...

م.حفيظ : نهار سبت مع صباح نتيسرو لعرس..عارضين علينا لغذا..

ناديا : اييه فكرتيني خلي ليا لفلوس نجيب داك الكادو الي وصيت عليه...مابقاش عندي ومافيا مايطلع تالبنك نتيري...

م.حفيظ : هزي من الكوفر من فلوس السلعة...غاديا معاك ؟

ناديا : بالكشايف،،مابغاتش تمشي لعروبية..شوية وتفيق خاصها تمشي فين قلتي ليها...

م.حفيظ : تبدل الجو شوية..(ناض وقف)...يلاه اليوم ممساليش عندي المحاسب وغانمشي لحمام تاهو نشوف الكاميو ديال الفيتور (بقايا زيتون الي تطحن فالمعصرة كيسخنو بيه الحمام) وحتى ديال العواد ونشوف معاه الحساب را شحال هادي ماخلصتو...ومن تم لدار دباغ نشوف دراري..

ناديا : وراه صبرو معاك الحاج...

م.حفيظ"تنهد مخرج هم قداش" : داروها بيا الكريديات..هذا هو حال التجار...هادشي الي عطا الله..

"فطر وناض غسل ايديه وفمو وخرج كيذكر الله...تنهد وبدا عقلو يغيب فالي غايواجه برا.."

م.حفيظ : هاني مشيت...عمر غايجيب ليك المقدية..انا مزيرة عندي الوقت...وغايجي الحسبن عشية بطوموبيل يديكم فين بغيتو...لاساليت ندوي معاك دوزو عندي لمحل فالسمارين...

"حركات ليه راسها وهز سوارت طوموبيل وتيسر لواحد من محلاتو الي واحد فالقنارية(بلاصة حدا سمارين) ...والحمام العمومي رجال ونساء الي فالمحاميد ومحل البازار ديال جلود وزرابي فالسمارين لداخل...بالاضافة لمحلات اخرى فگيليز كاريهم وهادشي كامل هو مكلف بيه حيث ديالو وديال خوتو...

الحداش ديال نهار..وصلات المقدية على بكري وبدا الغذا كايتنصب..جات السيدة الي كتعاون ناديا فالشقا والطياب،،

ناديا : للا رقية طلي على الخبز و.شوفي داك زعلوك خلطيه باش يجي عمر يدي الغذا لحاج ويدي ليه تا دواه را نساه...انا طالعة الفوق نفيق ايوب....

خلاتها وطلعات كاتقاد فشعرها بالقراصة حيث كانت دايرة زيف فالكوزينة فاش كتكون فيها كديرو كاتخاف ييطيح شعر على الماكلة..نقية فماكلتها فلباسها فتاويلها فدارها خصوصا هاد رياض مرجعاه يشعل وراقي ففراشو الهماوي....باقي شاد فالاصالة ديالو باقي بنفس ديزاين رياضات القدااام ماشي ديال دابا الي بدايزن لوطيلات...نفس زليج الفسيفساء فالصالونات تبدلات غير صباغة الي دارو الي جددوها وصلحو بعض البيوت...وبعض البلايص..فنفس الوقت مفرشاه بذوق راقي وبلدي تقليدي. ومن افخم انواع الفراش من طلامط الخريب موبرا وفوطويات الجلد الاصلي وزرابي ها تركية ها رباطية..وتريات البلدية العتيقة والفوانيس فالجناب حتى من الشبيك ديال شراجم بزواقات البلدية..وزاج ديالهم من نوع الزجاج العراقي (بحثو ف غوغل تعرفوه)..علاش لا وهما عائلة قديييمة فمراكش وخا اصلهم ماشي مراكشي...وميسورين الحال مزيان....

..طلعات لفوق اول بيت هو ديال ايوب كاينعس فيه. عايش عندهم ومرة كايمشي عند امو يشوفها ف ايت اورير.... حيث من نهار مات باه اي اخ مولاي حفيظ مشات لدارهم وتزوجات وهو تربى عندهم كيمشي عندها غير فالعطلة حيث كان كيقرا فمراكش...

ناديا"دقات الباب" : ايووب...

ايوب"كااع مكاين فهاد العالم كي وصل نعس فلارض تا الناموسية مابقات بانت ليه..."

ناديا"حلات الباب وطلات عليه براسها تا بان ليها منشور فلارض" : ارسول الله..هذا كيف دار لهاد النعسة !! ايوب !!...."تحنات عندو بدات تفيق فيه"

ناديا : ويلي ايوب..نوض بسم الله عليك...

بقات تشوف فيه....بعدا التنظيم هو التنضيم جا لبس بيجامتو البيتوتية سروال وفوقي ديال ديال كارويات فالبيض وگري وتقيشرات فرجليه العادة ديالو...باش يحافظ على رطوبة رجليه ونقاوتهم الاهتمام بالمضهر ديالو ماتحديهش فيه والنقاوة عشرة لضص..الحمام عندو من سيمانة لسيمانة خلي عليك تدواش كل نهار فهاد الحرارة...شعرو رططططب لدرجة كيبان كيبري وعلاش لا وهو داير ليه الكيراتين...وخا ناقصو بزاف دغيا كيطوال ليه وقهوي مايل لكحولة...لحية مقادها مسطرة...الوجه نقي ويبريييي من كثرة مامهتم بيه.....حل واحد العين فحال الغمزة بنعاس...حيث بدات تفيق فيه وتحرك...

ايوب"هرنط ماشي نطق.." : هنننننننننن...

ناديا : نوض من لارض ويلي استغفر الله..كاع هذا عيا من العرس...

ايوب"نطق بداك صويت رطب من كثرة ما عاشر العيالات فخدمتو" : الباتري اميمتي هنا سكت ليه الحس...اشوا بيتي بيا دابا خليني نعس...

ناديا : قرب الظهر ياذن بغيتي تولي تشرك نهار مع الليل ؟..نوض تگعد تفطر..نوض را سول فيك الصباح وراني سكتو بالكشايف...

ايوب"حل فيها نص عين" : قاليك نهيه قبل منهيه ؟

ناديا : ههههه ياك حفضتيه...

ايوب"هز ايدو كيشالي بيها كي الولية" : ايوى ياختي راه هو الي بيحفضني...ويلي راه رزقي هذاك..راني خدام فلوس كدخل وتخرج...بيتي نجري على رزقي ؟؟... بغاني نجلس حداه نزند لعواد لحمام ولا نش عليهم يزندو ولا نحك سگايط عباد الله !! اععع يخرج الوسخ وانا فرحان حيث خرج الوسخ باش نبرد واحد ثلاثين ولا خمسين درهم ويعطيها بحال خاريها صحة...ديك ثلاثين درهم راني تنبردها فالعرس فدقيقة...وبشااان والمرشان يالالة ويعيطو بايوبينو طلع وايوبينو هبط..وبالمواعيد..ماشي نحك لعباد الله زكا..."كان غايكملها تا تفكر غاتنزل عليه صلية من حيث لا يحتسب" ووو م ومايخسرو عليك تا سمح لينا...

ناديا : علاه باك عندو غير الحمام ؟ الحمام راه مقابلو ليه العرابي..وزبيدة (رجال وعيالات)...باك كثيرتو فالمحلات الي فالمدينة ديال التوب والي فسمارين ودار دباغ...وكرا المحلات لاخرا..را رزقك حتى نت اولدي...(حيث الورثة)..

ايوب : ياك هو كيخدم كثيرتو مع العيالات فمحل تواب ؟ ياك تاهو كيتبدا يتبوزق مع سياح؟ ايوى تانا مع العيالات غا هو تايصلي العشا ويسد وانا تنتسنى الامام يسد الجامع مع الفجر..الفرق غا فتوقيت...ميمة ياا خاليني بينعس يرتاح ليا وجهي وليسيغن مايبانوش ولا نتعقد ليك هنا...

ناديا : ايوووووب "عيطات بواحد الصوت كيفهمو هو وبناتها كيعرفو ماتعاودش الهضرة"...

ايوب"ناض واقف كيقاد فقميجة بيجامة" : نوض ندير روتيني اليومي...تانا بينقول الصباحي ديال وجهي وندوش راني مدوشتش البارح كي جيت بزربة بدلت ونعست...

ناديا : يلاه طلق راسك هاني مشيت نصوني ختك نشوفها اش دارت..."مشات"

ايوب : تاهي قولي ليها سيري خدمي كسالة عند العيالات عاوني للا نجاة العزية...سيري لاما توضرت ليك وسط دوك الكسدات..هانتي قلبي بين فلاقي للا نجاة الكسالة تلقايها تم..."خشا نيفو تحت طابقو كيشم شم ريحة حموضة العرق وهو يخسر سيفت "

ايوبينو : اييييففف..تفووو لصقت فيا ريحة الصنان ديال العيالات فالعرس..كايشطحو مايبدلو سليباتهم صنان ريحة الكراصن العرق ديال الشعر وتلواز عشرة لضص هذا مايحد باباهم فيه حد...

مشى يجري هز حوايجو ولاتخوس ديال برودوي دوجهو وجسمو..وخرج لبرا لدوش الي فالطوالة...

هبطات لتحت لقات رقية كتشقى ودارت اشنو قالت ليها...

ناديا : يالاطيف على ولد ولا هو يكبر.... معتز ووردة...

جات وردة الي هي ومعتز توأم...

وردة : ماما هاني..

ناديا : اش كديرو ؟...

وردة : كنتفرجو ف رسوم انا وحويا معتز...

ناديا : هههه وانتي قادي الحروف..خاااء ماشي حاء..ويلي هادو شي نهار يحطوني بوجهي فشي جماعة...سيري هزي تيليفوني جيبيه ليا نعيط لعمك عمر يجي يدي الماكلة لباباك..يلاه..

بقاو يضحكو عليها الخاء معندهاش مستبدلاه بالحاء.....مزالين كيهضرو حتى هبط ايوب كيغني بدوك الحلوق باقي ليه اغنية فراسو من عرس البارح الي كان خدام فيه...سمعاتو ناديا وبدات دور فراسها اما رقية ترعت فمها بالضحك..من ديما قاتلهم بالضحك مكايتقاداش من الغنا يكون جالس صحة سلام اتايبدا يغني...عارفينو هكاك داير طبعو وهضرتو خصوصا خدمتو مع العيالات كيهضر ويسبل ويحرك ايديه ويعطيك نصائح لبشرتك ولا راسك ولا لباسك..غير حركاتو وهضرتو هكاك اما هو رجولة فالمواقف وكلشي عارف بالي هكاك طبعو وعارفينو ماشي لوبيا او كيف كيقولو زام***...كون مكان عارف عمو المعدن ديالو كون تبرا منو شحال هادي....

ايوب"جا بيناتهم ووبقف معنقهم" : عيالاتي كاين شي مايتحنجر..

ناديا : الحجر...

ايوب : ماعندي ليه سنان الي يندغو وماعندي ليه قاع الي يخرجو "نزلات عليه بدقة لجبهتو تا غوت"

ناديا : الله يقلل حياك..

رقية"عضت فمها بخجل" : ويلي ويلي يعطيه الويل...

ناديا : سير جلس فالبيت تاتفطر..

ايوب"مشى لاماشين دار كبسولة القهوة صييك" : نووو بلاش نشرب هي قهيوة نحل بيها دماغي راسي بيتفرگع...حتى وكان نتغذا معاكم...بان ليا دايرين شي غذا معكرط دايزو الكلام...

ناديا : مادويتيش مع للا فاضمة...

ايوب : دويت معاها..سلمات عليك..مزال ممسالي باش نطلع نشوفها تخوا عندي الدعوة هاد الايام ونضرب تال عندها.....

شرب من قهوتو رشفة حس بيها تسللات ليه مع عروق راسو تا طلق حلوقو

ايوب : واااااا رضاك يا مي را غطاني رضاك يا مي را غطاني..وطيش الشباب وين داني وطيش الشباب وين داني.واا البلية والهم وعدياني....واا مي يا مي راي وشوار..مي يا مي" واحد اللحظة صوتو تطرب ولا قريب لصوت اكرام العبدية...اصلا صوتو زوين..مشى لناديا عنقها حتى هي" ونتي مولاتو..مي يا مي..سواكة لسناني مي يا مي ياا وحنة لگدامي مي يا مي...واااابابابابابابااااااو....

ناديا : ههههههه الله يستر....

رقية : ههههههههه....

ايوب : نغمة نغمة داكشي تعرفيش ليه اناديوش...اححح...اهيااا فين جدرة لاخرى؟!

ناديا : مشات تجيب الباك ديالها ومن تم تشوف سيارة تعليم وتشوف البنات وتجي..

ايوب : وخلاها الواليد تمشي بلا شيفور...ليسي بعيدة الواليدة راها فازلي..

ناديا : مشات فطاكسي...

ايوب : اوى لباس.."شاف فساعتو".. شوية وتوصلني واحد الكوموند ....

يلاه كيهضر تا تسمع صوت الباب تحل وتسد وهي تسبق ريحتها ديال الفانيليا الي كيعرفوها بيها والي مفضلة عندها وشكون فيهم مايعرفهاش وهي كتموت على بارفان tobacco vanille من tom ford واخا عندها تستيفة عطور كلهم غير مستخلصات الفانيليا وكديرهم لكن هو كيبقى مميز عندها...

ايوب : ها حبقلبي جااات...

حساب ليهم غاتجي عندهم اتا سمعوها كاتهضر مع خوتها وتبوس وخطاويها طالعين فررر مع الدروج....وقالت فطريقها "ماما هاني نحط قشي ونازلة"..

ايوب : ها الاكس ديالي مشات "ماشي عنا بيها اكس غير حيث قال حبقلبي ملي كشماتو رجعها اكس ههه..جهد صوته باش تسمعو"...نعليك جدود...

حط فنجانو الي خواه وخرج من الكوزينة تا بدا تيليفونو البروفيسيونيل كايصوني...الناس كتاخذ المواعيد بكثرة من عندو..وعلاش الي ميكون عندو لي كليون وهو معروف بخدمتو المتقونة وايديه الي كيرجعو الفتاة العادية ل اميرة بجمالها...ومن سيدة لملكة على عرشها...قادر يغير ليك الملامح دوجهك وقادر يضيف لمساتو السحرية باش يضيف الجمال...عارف فين يخطط بالكونتور وفين يصغر ويكبر...فين ينحت..فين يورد ويلمع فين يخلي الخشن ناعم والناعم ساحر...والى جمعتو هاد الجمل وهاد الاوصاف غايتوضح ليكم اننا كنحكيو على وضيفة الميكاب ارتيست...عندو صالون ديالو كبييير ف گيليز واحد من محلات الي خلا جدو وتوراثوهم...كيمشي ليه غير الى بغى ياخذ الماتريال او احتاج ليه الباقي كلشي مكلف بيه تما الفريق ديالو الي كياخذ منهم زوج او واحد باش كيمشيو معاه لعرس او شي مناسبة قليل فين كيخدم فالمحل...من نهار وعى وهذا هو حلمو هاد المجال...ملي خذا الباك كيف شرط عليه عمو دخل لمدرسة ديال التجميل والحلاقة تخرج منها وتخصص فالميكاب..سطاجا عند محترفين شحاال حتى كون معارف وكسب الحرفة بامتياز وعطاه عمو من فلوس الورث الي من باه هو الي طلب من حصتو شي بركة وزاد عليها شنو جمع وفتح صالون صغير غير فين يحط ماتريالو ويكون فيه ليكيب ديالو...

فبين شيگلام ومايبيلين..بين سيفورا وفلوغماغ...بين ديور وكيكو...وبين برودويات العناية بالبشرة قبل الميكاب..بين البلاشز والگليترز..وبين گلوص و احمر الشفاه..وبين المرطب والمثبت...وبين موعد وموعد مواعيد...وبين السحر والساحر فعالم الميكاپ...كاين الميكاب ارتيست ايوب المعروف بايوبينو...

يلاه قطع معاها اتا مشا وجا على شوي يجي على فمو...تلاحت عليه تاتعلقات فضهرو كي القشة....حتى حس بقلبو خرج من بلاصتو ورجع..

ايوبينو : امصلي عليك ارسول الله..."هز راسو لسما غوت بالفقصة الي ديما دايراها بيه" واااااااااا القشة وااالقشة...

ياربي بغيت ليها عگر السبعيام....

البؤبؤة خضرة وخضوريتها كتزين العين...والضحكة ب شنايفها كتخطف القلب...

ضحكات ناديا على شقاوتهم ودعاوي ايوب الي معندها لا ساس لا راس...جيب يا فم وقول...والي خرجو اللسان رافضو القلب يعني را دعاويه غا خارجين كيبرد بيهم غدايدو...بقات معنقاه تا رطاب وعنقها وجلسو غير فصالامونجي ديال القصب مقابلة مع سقاية ديال الما الي خدامة عاطية غريبي فهاد الصهد...حط تيليفوناتو يلاه بغى يهضر معاها وهو يصوني ليه تاني تا قندش....

ايوبينو : ايوب الصافي..وي ايوبينو...

هي : خذيت طون نيميغو من باج انسطاغرام...شفت بالي داير باك برومو فيه سوان دفيزاج عندك فالصالون وفيه ميكاب ..واش باقي ؟

ايوبينو : شحاال اليوم ؟ 23 يونيو..وي مزال مي غايسالي غذا...

هي : داكوغ اليوم فالعشية ندوز باش نستافذ منو...

ايوب : الميكاب ماغاديش نديرو ليك انا غاديرو ليك نسرين...انا "هز ايدو كيشوف فضفيراتو ويمسح" عندي روپو..الباك اصلا مداخلش فيه انا دايرو صالون عندي نورمال انا مكنديرش البرومو...الوغ الى نتي انتيغيسي نيت بالپاك دوزي لصالون نوصيهم..عطيهم كود برومو الي شفتي فسطوري وهما يتكلفو..الخلاص باغ كارط بونكيغ مادام...

هي : دوموزيل...

ايوب : ويلي الشهر جاي تولي مدام"دوز صبعو على لسانو وحطو عالطابلة مأكد" وگولي ايوبينو ماقالهاش هههه..

بدات تضحك..كمل معاها الهضرة وقطع وهو يمشي لمود افيون اكتيفاها وحط التيليفون بزعفة وذنيه باقين كيزنزنو من العرس دالبارح...يلاه غايهضر وهو يوصلو ميساج فتيليفونو بيرسونيل لقى ليفرور وصل سمع لانتيرفون وهو يوقف ناديا ومشى بزرررربة حل الباب شد كوموند ديالو سالا اجراءات وتم داخل ضحكتو وصلات لوذنيه...حط الكرطونة فوق طابلة...وهو عينيه فيها هزهز حجبانو وهي بدورها هزهزات ليه حجبانها.....

ايوب : وصلات الامانة وصلااات...ااااحاااوو...

ردات عليه بصوت انثوي فيه بحة رقيقة وحنين فنفس الوقت كتحسي بيه دافي..

هي"هزات حاجبها" : فيها الكادو ديالي ديال نجاح ؟؟؟

ايوب : نوووو

هي : ياااااك "خرجت عينيها"...ديرها فين تجيك..

ايوب : كادو ديالك حتى لغذا عاد يوصل..دابا سكتيني خليني نتنغم فهادشي...

هي : شيگلام ؟!

ايوب : ممممم..." هز راسو فيها" جاني العطش كاين شي عصير ؟

هي : دادااا باقي عصير من البارح ولا درتو واحد جديد" ردات عليها ب اه" عافاك زوج كيسان...وهي خليهم انا نجيبهم احبيبتي..

ايوبينو "بدا يحل فالكرطونة ويحيد ف لصاقة" : packaging (لومبالاج) بعدا مقاااااااواد..

كتبغي تقلب معاه كيبعد ليها ايديها فحال مش من كتقربي ليه على ماكلتو...تا غوبشت فيه...شوية جات للا رقية هازة ناضت شداتو من عندها ومدات ليها شنيفاتها زعما بوسيني...

هي : يخالي ليا دادا ديالي...را قلت ليك انا نجيبهم..

رقية : ههه بصحتك كبيدتي..

جبد داكشي كيقلب فيه حاجة بحاجة. وكايتيستي فايدو...

هي : اش طلبتي من هاد شيگلام نتا...

ايوبينو : واحد الگليتر خرج جديد..و blash ليكيد..ورسلو ليا الپاك جديد ديالهم ديال هاري بوتر...نشوف اش فيه باش ندير كولابوغاسيون (اشهار) ليهم فسطوري انسطا...ففف شافني الله "كيقلب فضفار ايديه" اووو خاصني مينيكير لهاد ضفران ولاو حالتهم بتصاويب لعباد الله...

حركات راسها كضحك عليه..وهي تخرج ناديا هازة ساشية فيها غذا صالح حلات الباب عطاتو لعمر داه ليه ورجعات وقفات حداهم..شافت ف ايوب خارج تغطية والله مايجاوب وهو خدام كيتيستي...

ناديا : حيد هادشي غادي نحطو الغذا.."شافت ف بنتها"...يبرد الحال شوي ونخرجو نتقداو ونجيبو قفطانك الي غاتحضري بيه لعرس لهيه...

هي : خفت غير يتوسخ ليا تما..

ناديا : اويلي مالك غاتجلسي فتراب را تاهما مفرشين ودارهم قد الخلا تبارك الله...من طوموبيل لدار..ونيت غاديين فالصباح عارضين علينا لغذا...

ايوبينو "هز عينيه بزربة" : ويل شيطان وليتي بغيتي تمشي معاها لعرس "حركات ليه راسها"... حبيييبة ؟.....habiba...

بقى يرمش فيها برموشو...مافراسو عرس مافراسو مشيان...هز داكشي من تما تايكمل تيست فبيتو...خشاه فكرطونتهم وحطهم فوق حويط حداهم وربع ايديه كيتسناها تستفسر...

ايوبينو : فين هاد العرس...

حبيبة : قلتها ليك الزمر البارح فواتساب...كنتي فالعرس فاش جا بابا وعلمنا وقالت ليا ماما عيطات ليها شي حاجة اسميتها عيدة...

ناديا"خنزرات فيها" : كنقولو خالتي اا حبيبة خااالتي..تأدبي...

حبيبة : واااخالتييي عيدة هههه...

ايوب"هز عينو فناديا" : ودابا دخلنا عليك بالله عيدة سمية ؟..

"قبل ماتجاوب غمق عليها وضار عند حبيبة..مشات ناديا كتحرك راسها بلا حول.." ماعلينا عرس من...

حبيبة"عوجات شنايفها" : ماعرفتش سولت بابا قاليا دووك الناس الي كيجيونا من بعييييييييد...داك الراجل الكبير الي كيدير ديك اللعيبة فوق راسو... "هزات ايدها الي مزينها كورميط ذهب مضفور معاه گورميط رقييق فيه نجيمات مدليين كانت كادو من باباها بمناسبة نجاحها ف سيزيام"

ايوب : ااه الحاج الرحماني الي كايجيب ليه الكاميوات ديال الفيتور ديال زيتون باش يسخن الحمام فالمحاميد وجلود البگر...قولي تريكة الرحامنة....

حبيبة"حركات راسها" : وووييي...كنتي مشيتي عندهم فاش كنتي صغير قلتيها ليا ديك المرة...

ايوب : اييييه الي ف سيدي بوعثمان...الاطييييف عرس فهاد صهد...والعگارب باتزرد (عندها زردة) هههه..."هز راسو عند ناديا لهيه حيث عارف هي الي غاتجاوبو". اهيا وين شكون مزوج عندهم ؟

ناديا"واقفة على رقية كتقطع فالخبز" : ولد الحاج الرحماني..الي ف برا...رضوان...

ايوب : همممم...

حبيبة : يلاه معانا ونسني مكنعرف حد تما والعروبية ماعنديش معاها وصهد تمشي تخرج ليا شي عقرب ولا حنش...

ايوب : وانا داياني نصيدهم ليك ؟ سيري ابنتي بعدي مني..بحرا داير سوان لوجهي..وضفاري تكرفصو...انا السبت طالع عند الواليدة ندي ليها شي بركة وشي مقدية...

حبيبة"دارت ايديها على حناكها بتافف" : فففف وغاديين فالصباح والعرس ميسالي حتى لاش من وقت وغانباتو تما وافففف...خاصني ندي معايا ليلانجيت معقمين..

ايوب : دي معاك دوش تاهو...

ميقات فيه وناضت كتمختر فمشيتها قصيورة وطلعات لفوق تبدل حوايجها حيث طلعات حطات وراقها وهبطت..قبل ميحطو الغذا خاصها تبدل وتغسل حالتها...

هي البكر ديال ناديا مولاي حفيظ...الي فعمر 18 سنة....وقفات كتشوف بين رموشها الي ساكنين فيهم زوج بؤبؤات كيف اللؤلؤات كيبان لونهم المميز نفس لون عينين ماماها الاخضر غي هي فاتح...نفس الكثافة الي فحجبان امها...الغلاض وخا مبعثرين مقادين انثويين....الزين فوجهها كايحمق ويفتن..وعلاش مايفتن وهي شابهة امها الحسناء الي كانت فواحد الزمن فشبابها عينين رجال مقاتلين عليها وسوقها كان عامر بزاف رغم الضروف الي كانت فيها والي حطات راسها بارادتها فيها...حتى تسترات وولدات الي شبهات ليها فزينها...و الفرق كان فالضروف فقط...

الفم او الشفاه الممتلئة....كل هاد الملامح الفاتنة مزينة وجه دائري وخدود وبشرة بيضاء عادية مايلة شوية لحنطية....بشعرها البني القوي الغامق المايل للسواد..والي واصل وسط ضهرها...حيدات حوايجها باش خرجات ووجدات حوايج اخرين ماتلبس ...بقات بسوتيان ديال بونج بيضين فحال كيلوط.. مشات لمجر هزات حمالات صدر اخرين بلا بونج حيث كتستعملو غير برا..حطاتهم تما ودخلات لدوش الي باب ديالو غير تما فبيتها...توجهت لافابو وحلات المراية جبدات جيل نيطوايون ديال وجهها ديال لاغوش بوزاي ايفاكلار...غسلات بيه وحكات سنانها وخرجات وقفات وضارت كتشوف فالمري الطويلة...كتشوف فراسها قصيرة القامة...عندها لتحت ملفت ليهونش زايدين على لزوم ...وهادشي كتحس بيه عيب خلقي هههه ومسبب ليها شوية الاحراج حيث كايلفت ليها العيون لكن ماكيمنعش انها ماتلبسش الي بغات... شوي لباسها بين وبين...عندها شوي الكريشة..هزات عينيها وعوجات شنايفها فداك الصدر صغير...كتقول كون غير هاد ليهونش زايدين بزاف كون تنقصو وبانو غير فصدرها...وزايدها تا قصر القامة وواخا هكاك فورمتها زوينة رجيلاتها قصيورين وغليوضين ولكن حنا ديما مع الاسف مكنقنعوش...تاففات وجبدات من ماريو بيجامة نص كم عريضة واصلة حد ركابيها فالابيض وبلومارين....بالخف لبستهم دارت ديدورن...هزات تيليفونها ودازت لكوافوز الي على شكل مرايا ضاير بيها عود بيض والبولات بيضين حداها طاجيراتها فجنابها بيضين وتحت مجورة كبار وكرسي مغلف بالجلد بيض من بازار باها تحتو طابية فالگري فيها الفرو رطب....قلبات لعويدات الي فقرعتهم كانو لتحت رجعاتهم لفوق باش يطلقو ريحتهم كمعطر الجو فبيتها وخرجات..نزلت كدردب مع دروج ودندن بصوتها...لقاتهم حطو الغذا وجرات الكرسي وجلسات...

ايوب : وخا نسولك ؟

حبيبة : ممم...

ايوب : تبغي تلبسي واحد طالون داك الي محطوط عندي ديكور فالصالون " حاط طالون ديكور طوييييييل ههه...شافها خنزرت" صافي صافي...ونتي غاديا لرحامنة وديك تريكة اقصر واحد فيهم فيه ميترو وسبعين...

حبيبة : تانا طويلة...

ايوب : ايه القشة ... الي كتحارب الحياة ب ميترو و تسعووود وخمسين...جري جري الواليدة ديك زيتونة لهادجيه...

رقية"جرتها نخششاتها فيها ودارت ليها ندغة فيها اللحم وكلتها" : اهيا وين اش بيتي بيها...تفرق ليا على قشتي...اداك المسلگم..

فارض من اراضي الرحمٰن...و في زمن فاااات...عند ناس جداد نهار فنهار كان عندهم فحال العيد..النهار الي غايولي عيد ميلاد من بعد...نهار الفرحة...اليوم الولادة على مشارف عندهم..صوت غواتها والم المخاض الي هي فيه..العيالات داخلين معاها ورجال على برا يدعيو...ومكانوش داريين انه هاد نهار غايكون من الفرحة ل القرحة...جا من بعد الفرحة وخبار الزينة...

كان طالع شاب فعمر 18 ملامحو خشنة حرشة سابقة عمرها... حتى هو كيضحك وضحكتو فشي شكل....كيزرب لقا باه الي هو راجل المراة الي كتولد فهاد الاثناء ولد او بنتو اخ او اخت الشاب الي طلع عندو...لقاه واقف كيلبس لباس التبوريدة باش يلبسو ويمشي عند الخيالة باش يضرب طلقات للمولود...و حيث الغذ ليه بداية الموسم عندهم تما باش يوجدو ...كيقاد فالعمامة على راسو من بعد ما توضى حيث الخيال خاص يكون على وضوء..واصلا صلى الفجر والصبح وزاد ركعات اخرين دعى مع مرتو الي هي دابا رجل فالدنيا ورجل فلاخرة.....كيقاد ومركز حجبانو غلاااض كحلين جامعهم فحال مغوبش وهي را نظرتو العادية...لحيتو كثيفة هابطة تالتحت كحلة مرشوشة بزغيبات شيب..هو العلام او المقدم ديال الصربة ديال تبوريدة ...المقدم نور الدين...يلاه ضار يهز التُّماك (البوط ديال جلد الخاص بيهم) وهو يهز عينيه لقاه واقف كيقلب فالمكحلة...كاع ماحس بيه امتى دخل...تبسم بافتخار...

نور الدين : عجباتك ولا...ههه (ضحك ضحكة خااترة وجلس تالبس التماك عاد ناض لبس سلهامو كيقاد فيه والبخور مطلوق خلاتو مو فالبيت...ضار عندو كيشوف فولدو مركز مع المكحلة ويقاد فيها طل عليها بعينيه من لداخل جمع حجبانو وهز عينيه فباه وتبسم بشر ووجه ليه المكحلة تا بدا نور الدين يضحك...

نور الدين : بشارة الخير هههه..."جهد صوته فحال الى راه فالميدان ديال تبوريدة" : وحدااا وحداااا...

وقف ولدو وتبند ضار هنا وهنا فحال الى راه فوق الخيل وكيشوف فجنابو باش يتاكد من الامان....وكانو هادو الجمل الي كيتفاهم بيهم المقدم او العلام مع الفرسان الي وراه فالتبوريدة...

نورالدين : التيساع لهيه..."كحاز ولدو" گاد هنا وهناااااا.... (حط المكحلة على الكتف ليسر وعاد الكتف ليمن)

نورالدين : آآآآآ آآآآآآآآآآآآآآآآآآآآ المكاحل....عمروووو....(هزها لفوق عمر وقادها معاه.) خييييييييييييييييل....شاااااااااااااااد...ااااااااااااااا لمكاحل...آآآ حفييييييييييييظ...اااااضرررب.....وبدا يضحك عااادي...هاني مهني الامان راه كاااااين..مطمن....

بشارة الخير ماجوبوش بقى موجهها ليه كيضحك حتى ورك بصبعو وهو يخرج البارود على شكل طلقة نيشان جات لصدر نور الدين للقلب مباشرة...توقف الزمان مع الطلقة عند نور الدين وعند ولدو...وعند حتى صحاب المكان الي تسمعات تال عندهم...وعند ختو الي كانت واقفة فالباب كانت جايبة ليه بنتو يلاه زايدة فوسط مانطتها باش يوذن ليها حيث يلاه تفكات مرتو.....كتشوف فصدر نور الدين فلحظة تغمق وعمر بالد.م...

تحولات الفرحة لقرحة..وتحول اليوم الابيض ليوم الاسود...ويوم تولد فيه انسان مات فيه انسان...وتحول بشارة الخير لبشارة الشر...الشاب فريعان شبابو من مرضي لمسخووط بمعنى الكلمة....

كيف العادة الي مولفينها اغلب الاحيان كايتغذاو يا هما ب زوج يا بثلاثة مع للا رقية يا كلهم حتى م.الحفيظ ف يوم الجمعة الي كيكون عندو روپو...كملو غذاهم ولملمو طابلتهم او جات البنت الي كتشقى فالدار تسيقها وتجمع البيوت وتمسح الغبرة...كاتجي زوج مرات فالسيمانة...لقاوها مغذية وصلات ولبسات حوايج الشقا وبدات بالطابلة مع رقية اما هما كل واحد دخل لبيتو...ناديا لبيتها لتحت وايوب طلع يبدل اصلا خارج و حبيبة دخلات تلهي راسها فشي فيلم او رواية من الي كتقرا...حتى فات العصر بساعة وردات للا رقية القهوة واتاي الگوتي حيث غايخرجو ..بزربة كلاو ورجعات كل وحدة لبيتها تلبس...حبيبة عاود حكات سنانها وخرجات لبسات سروال دجين سليم مطوي حد الكعبة فالبلومارين طالع تالصرة بوهيمين ستيل زاد برز دوك ليهونش..لبسات فوقو بودي نص كم بيض لاصق...مشات لكوافوزها دارت ليپ كلوص مايبيلين فالغوز خفيييف فقط مدارت تاحاجة من غير هادشي..ذهنات ليكخون ديالها ومشات جلسات فجنب ناموسيتها رشات على رجليها سپراي ديال ليكخون صوليغ حيث خارجين وشمس باقي شي شوية ووقفات رشات بارفانها هاد المرة بدلات رشات كوكوشانيل هزات نضاضرها ديور من بواطتهم لان غروب الشمس وشمس كضرها فعينيها حتى كيدمعو ليها بزاف هزات باندة جمعات شعرها لفوق اسفنجة جاها صهد ومافيها مايجلس يدير ليه مشيطات...هزات بارفان صغيور لاحتو فصاكها مشات لواحد الطويويلة صغيرة جبدات صنيديلتها بيج صبع فيها حجيرات لامعين خشات فيها رجيلاتها كيبرييو بلبيوضة والنقاوة وضفارها نقيين علاش لا وهي مهليا فيهم ديما مانيكير عند ايوب...صابغاهم بالغوز باارد...عوجات رجليها كتشوف فيهم تاكد نقيين... خرجات كتفيريفيي فلباسها تاهبطات لتحت...

حبيبة الي يلاه ثلاث ايام باش تعلنات نتيجة نجاحها فالباكالورية ب الثانوية التقنية محمد السادس المتواجدة بازلي مراكش..تخصص اقتصاد بنقطة مستحسن...هي من شخصيات الي عايشين سنهم...عايشين شخصيتهم كيف ترباو...مرة حنينة مرة معصبة وخا الى فات تا تعصبات صعييييب ترجع دغيا خاصها شحال...الي فقلبها على لسانها كيما كانت تخرجها ليك فوجهك....شخصيتها ومزاجها وردود افعالها بحسب سنها وبحسب على شنو ولفات وطبعها.....عزيز عليها تخرج دور تمشي ليكافي مع صحاباتها ولكن اكثر وحدة كتخرج معاها بزاف هي نائلة البنت الي تعرفات عليها من سانكيام.... الي تشهاتها تاخذها....خصوصا مع باها مفششها بلااا قياس تقولي هي الي عندو حيث تولدات من بعد ما كان يقول عمرو يعرف معنى الكبدة خصوصا لان المراة لولة مكانتش كتولد وكان معول وناوي يبقى معاها لو ما الضروف والمرض خذاوها...

هبطات لقات ماماها واقفة بجلابتها المخزانية فالخزي توب بارد وشال لايحاه بعشوائية على راسها المهم مغطي ليها شعرها.. دايرة نظارات شمسية فوق من راسها ايديها مزينيين ببراسليات ذهب ومگانة رقيقة ذهب...وخاتم زواج وليد لاخرى كورميط نفسو الي عند حبيبة غير هذا غليض عليه شوي... وصاكها هازاه فايدها كبير...كتهضر وهي تهز عينيها ف حبيبة طلعتها وهبطتها وتنهدات...وكتهضر فالتيليفون...

ناديا. : واخا الحاج ندوزو هو لول...ماعرفتش سولها...

حبيبة"جاوبتها" : قولي ليه وصلني الفلوس فالكونط غا مابغيتش نقولها ليه حتى نجي نشوفو...

ناديا : يلاه سمعتي...واخا..."قطعات وطلعتها وهبطتها" البنت هاد اللبسة را باباك يشوفها ويتقلق منك وتبداي تهرنني حيث تخاصم معاك....حشمي شوية..

حبيبة"دفعتها شاداها من دراعها تاتمشات ناديا كتقرقب بصندالتها طالون كحلة" : وماماااا تانتي راني عايشة سني...

ناديا : اشمن سن گرانك راهم تزوجو...

حبيبة"خرجات عينيها" : اويلي انا قاصر ماديال زواج...الله يحفظني...

ناديا : قاصر ؟ "حركت راسها" و را قاليك التيساع رحمة والديق نقمة..رحمي راسك وماتقلقيهش منك..."طلات على للا رقية" للا رقية ردي معاك البال غادي نتعطلو شوية برا غير دوشي نتي لوردة ومعتز....الى جاعو عطيهم ياكلو ويطلعو لبيتهم...

حبيبة : علاش منديوهمش معانا !!

ناديا : ويلي بغيتي منقضيو والو معارفاهمش كيتشيطنو فزنقة ؟؟ زيدي دغيا يلاه نبداو بذهايبي ونطلعو عند باباك...

حبيبة : يلاه يلاه توحشتو ماشفتوش من البارح...

حتى تمات غاديا هي وياها وبدات تفكر حبيبة بالي بصح باها مغايعجبوش الحال خصوصا ان لتحت عندها ملفت بزاف واخا لفوق ضعيفة...وهي قصيرة مكملة...وقفاتها وطلعات كتزرب جرات باب بلاكار جيهة ليكاپ هزات واحد بيج باارد معندوش الكمايم لبساتو عليها ونزلات كتجري لحقات عليها خرجو لقاو الشيفور برا خلاو التوام مع للا رقية وركبات هي وياها لور سلمات على الحسين الي رسلو الحاج هو الي يسوق بيهم فين بغاو...

الحسين : الحاجة ذهايبي هو لول ؟

ناديا : ايه اولدي..الله يرضي عليك..

خشات حبيبة وجهها فالتيليفون داخلة لانسطا دخلات لواحد الكونط كتبرگك فيه هادي اكثر من اسبوع وهي كدخل ليه تبرگك وتخرج..بقات هاكاك كتبقشش هنا وهنا عندها غير انسطا فقط...كونط فيس بوك تقريبا من نهار فتحاتو كتدخل ليه مرة فشحال...حتى لقاو راسهم وصلو لملاح وقفهم عند صاحب المجوهرات الي كيعرفوه..خذاو شنو وصاتو عليه ناديا خلصاتو ورجعهم الحسين القنارية بلاصة طوموبيل فباركينغ بعيد شوية تا دخلو على رجليهم...مشاو عند واحد الخياط تما جبد ليهم قفاطنهم خصوصا ديال حبيبة الي تعطل حيث حطاتو معطل مكانتش باغيا تمشي لعرس...

حبيبة : ابابا صافي هاحنا جايين عندك حنا حداك احبيبي...اوكااي..."قطعات وشافت فماماها" بابا كاين هنا فالمحل الي هنا كيتسنا...

كان فالمحل الكبيير ديال تواب الفخمة كيتقداو من عندو غير ناس الميسورة والمعروفة فمراكش وحتى الناس المتوسطة وكيتعامل حتى مع الي مافحالوش فحال العرسان الي مافحالهمش كيتعاون معاهم...دخلات حبيبة هي لولة بان ليها كيتخلص من عند زبونة والمتعلم كيقاد ليها فساشيات...ضارت نيشان دخلات ورا الكونطوار تا كمل وهي تعنقو من لور حطات راسها على ضهرو...

حبيبة : تاج راسي...

م.الحفيظ : فرحتي لولة هههه جيتو ..

حبيبة : لا باقي هاحنا فالدورة قربنا عندك...

م.الحفيظ : الله يمسخك هههه...تزول الجبال ماتزول طبايعك ههه..."شاف فناديا الي كتضحك" مولات العش دخلو دخلو..

غير دخلو لمكتب ديالو الي قدامو فوطويات جلد الاصلي متوسطاهم طبيلة من تصميم الارابيسك...جلسات حبيبة فكرسي المكتب وهو وناديا فوق الفوطوياوت..

ناديا : وصهد هو يا الحاج...

م.الحفيظ : الحمد لله...اش بيديرو دابا...

ناديا : ديار ديار الله...لا كتاب غانعيط للا نجاة الكسالة تخوي لينا الحمام غذا بالليل...بقى غير الفاكية نديروها معانا حتى تاخذها نتا من فحل الزفريتي (بلاصة حدا جامع الفنا)..

م.الحفيظ : وعليه.."شاف ف حبيبة" اقشتي ماشيا برضاك ولا صحة عليك..الي تقلق ليا راحة فرحتي لولة ماعندي مابيت والديها...

حبيبة"تبسمات" : لا لا غاديا معاك ومنرضاش..خايبة خايبة الحبيب ديالي..

ناديا : ياك لوالديك انا غرستك فمحبق ؟..

حبيبة : هههه نتي الحب نتي.."شافت فباباها" واش غانباتو تما ؟

م.الحفيظ : يادلي ويخيلوك تجي..يسبقو ليك الحلوف ونتي يلاه بيتي تحلي فمك تقولي بسلامة هههه..

ناديا : العرس بالعشية سير على مايساليو...نحاولو نرجعو بكري..

حبيبة : عميتو امتى غاتجي ؟ گالت ليا يسالي عيسى الامتحانات وتجي...

م.الحفيظ : حتى يدخل شهر جاي ان شاء الله..

عمتها لطيفة الي عايشة فالسمارة عندها ثلاثة الولاد زوج بنات زوجاتهم وواحد هو الصغير كيقرا فلافاك...كاتجي فالصيف دوزو معاهم ولا الاعياد حيث محافضين على تجمعهم ورابط الاخوة الي بيناتهم وهي سباب زواج م.الحفيظ بناديا هي الي اتقارحاتها عليه باش يتزوج بيها وكيف قالت يستر...حنينة بزاف وحقانية...

بقاو معاه شوية وخرجو مع الشيفور الي داهم تال المحاميد لحمام العمومي فيه جيهة نساء وجيهة رجال كبير وديما تبارك الله عامر...حاط فيه ناس يقابلوه الي منهم الي مقابلين لاكيس والكسالة وفيهم الي كيحضي حوايج ناس اي صحاب رزمة...خلات شيفور معاه حبيبة ودخلات لعند الكسالة واحد المراكشي سمرااء تبارك الله مگدرة الى طحتي فايديها تكردنك وهي الي عزيزة بزاف عند حبيبة حيث كتخرجها تبري هههه...

للا نجاة"شافت ناديا ناضت تزرب وتضحك" : امرحباااا مرحبا ب للا الحاجة...زارتنا البركة..تلعي للا ناديا لفوق تنغمي معانا بكويس تاتاي...

ناديا"ربتات على كتفها" : ربي يخليك اللا نجاة"طلات على الجلسة بانت ليها مطرطقة بناس شي يلبس شي سخفان شي ياكل فالليمون وشي كيحط باغي يدخل" تبارك الله عامر اليووم..

نجاة : ايه دعوة تبارك الله عامرة...ياكما بيتي دخلييي ؟

ناديا : لا الى كان تخويه لينا غذا بالليل قولي مع ديك تمنية ولا تسعود تالليل نجيو...

نجاة : وعليه..دابا نيت بنعلمهم غذا يحبسو التدخال مع الخمسة هي هاديك...شكون بايجي ياكما نتي والحاج ههه..

ناديا : لا غانجي انا ووردة وحبيبة وللا رقية تاهي...قولي للا ربيعة تاهي تكون تعاونك ف وردة وللا رقية وانا خلاص راك نتي الي غاتكلفي بيا اما حبيبة متخطايهاش..

نجاة : ههههه جدرة فالصيف كتنقص من المجي شوية تخليني نتوحشها ههههه...

ناديا : كتعوم هي فالدار تيقيقت والصهودات متقدش عليهم...صافي هو هذا ؟

نجاة : وعليه للا ناديا مع تيسير الواحد القهار..ساعة سعيدة..وبوسي ليا النوارة هههه...

غير خرجات ناديا وهي تجهد نجاة صوتها...

نجاة. : واااللا نزهااااا...وغذا بتحبسي تدخال ناس مع ديك الخمسة الخمسة ونص تالعشية...(ردات عليها من عند لاكيس)

اشاوا كاين !؟ علاااه...

نجاة : بايجيو مالين الشي....

كملو شغالهم برا ورجع بيهم الشيفور لرميلة اي لدار...نزل معاهم المقدية تا هبطو لواحد الدرب تما فالرميلة سميتو درب الراوية...دخل معاهم فدوك دروبة الي اغلبهم تصميم رياضات الي تما كاين اوطيل الي ريسطو مخبية تم...والي ساكنين فيه ناس تما شي مالين البلاد شي نصارى...تا وصل بيهم لدار الي الباب ديالها ديال الخوخة كيف كيقولو ليه ديال العود كبييير وعندو دقاقة على شكل راس اسد ديال النحاس كيدقو بيها يدويا وجنب الباب كاين لانتيرفون بالكاميرا...كيف دخلات حبيبة لقات خوتها كيتفرجو لابسين بيجاماتهم باستهم وطلعات هازا ساشيات ديالها الي فيهم قفطانها والي فيهم شنو خذات من ايفغوشي شي گوماجات وباندوش وحليب الجسم باش تديهم غذا لحمام حيث تقاداو ليها...نيشان بدلات عليها ولبسات بيجامتها ودخلات دارت روتينها ديال الوجه...رتبات داكشي هزات تيليفونها ونزلات لتحت طلات عليهم فالكوزينة لقات رقية كتحرك فالحريرة ديال بلبولة بغات ديرها بالحليب كيبغيها الحاج فالليل او شي حاجة خفيفة باش يتعشى...لقاتو جالس فالجليسة شاد القرآن الكريم كيقرا فيه داير نضيضراتو مهبطهم شوي وغير بتيشرت قطن بيض وسروال قندريسي توبو بارد مهوي..السقاية خدامة وهو كيقرا...جايا شادة فايدها باندة وكتراسل مع ايوب الي قاليها شوي ويدخل باش ميخاصمش عليه حيث ماخدامش هاد اليومين...

حبيبة"جلسات حداه تا شافتو كمل سد المصحف وحط فوقو نضيضرات" : بابا حياتييي...

م.حفيظ : ا قشيشتيييي...اشكاا...

حبيبة"مدات ليه باندة وجات حدا عاطياه بضهرها" : ضفر ليا شعيراتي هههه...

م.حفيظ : ههههه نضفر لكبيداتيييي هههه (بدا يضفر ليها شعرها وهادي عادة عندو معاها يمشط ليها شعرها يغسل ليها وجهها..مقرب ليها بزاااف هو عقلها ومفششها بزااف الي بغاتها مكيقولش لا عمرها عرفت معنى كلمة لا فحياتها..وتاهي مربية على القناعة وخا هكاك)...وا بنتي قربتي ديري وليداتك وبغيتي نبقى هي نضفر ليك...

حبيبة. : انا مابغيتش ندير داري ووليداتي انا بغيت نبقى غير حداك تانضفر شيب...

م.حفيظ. : ايه ونتي من بضفري شيب انا نقي من عضامي دود...انا دايم ليك البالا !!

حبيبة"شدتها غصها فقلبها حتى صوتها تقج..لان كلشي تفكر فيه الا يخطاها باها تحماق..باها عندها شي حاجة محظورة مقدسة..علاقتهم بزااف" : ل لا لا بابا عافاك ماتبقاش تقول هاكا..صافي نسى "عينيها حمارو" ضفر ليا عافاك ضفر...

م.حفيظ "واخا عاطياه بالضهر حس بيها وقلب الموضوع" : وكااان...فين داك جدر ؟ شفتو تعطل...

شوي سمعو صوت الباب كيتحل وهو يدخل حادر راسو متبت تحلفي على باباه ماهو الي كيكون معاهم رطب كايتميزاجورا فالبلاصة فاش كيكون عمو...(م.حفيظ عمو خو باه اشقاااء..بابات ايوب توفى من كانت عند ايوب اربع سنوات كان ديك ساعة ناديا يلاه طاح ليها البيبي لول قبل من حبيبة..رباتو هي وصالح حتى دازت عام عامين هاكاك وحملات ب حبيبة وبقات معزة ايوب هي هي)...

ايوب"تحنى مد ايدو خبط ليه حفيظ فوق ايدو وباسها ليه" : عمي عاش من شافك...(حبيبة حابسة ضحكة)..

م.حفيظ"مغوبش فيه" : عاش من شافك نتا نيت..فين غاطس وخاشي راسك فعراسات ناس..ياك نهيتك ماتشد العراسات البعاد ؟ ياك خليتك تقرا اش بغيتي وحللتي رزقك !؟..لاش كتمشي لعراسات الخلياني..اشمن عرس كنتي فيه ولبارح ؟؟ تكلم ؟

ايوب"حادر راسو" : كاين ف اگافاي...

م.حفيظ (خرج فيه عينيه) : ليوم اگفاي وغذا الواحات !؟..وبعدو داخلة...

ايوب : لاهما كرهت "شافو زاد خنزر فيه" كرهت اعمي..

حبيبة : هههههههههههههههههههه (كون مكان باها كون قبسها تا عنقت الحايط)....

م.حفيظ (كيشوفو حادر راسو هكاك كيعز عليه..حيث يتيم وماعارفش طعم يكون عندو باه وخا رباه وعوضو ببزاف الحاجات) : ياهاد الجدر را لمصلاحتك...ماتكترش دنيا مافيها امان وانا هي خايف عليك...وحاول ترجل شوية عشرة العيالات ترجعك منهم...

ايوب : واخا عمي كون هاني..(قرب باس ليه راسو) منك سماحة منك السماحة...

م.حفيظ : واكل شي ؟!

ايوب : يلاه ناوي نطلع نبدل وندير روتيني اليومي...

حبيبة وسعات عينيها ومولاي الحفيظ مافهم والو...

م.حفيظ : اشنو ؟؟؟

ايوب : نبدل ابا نبدل اعمي تانا..نغسل حالتي ونهبط نحنجر..تانا ناكل..وعمي نقص من تخنزير كتخليني ندخل شكلي فالعكلي والعكلي تالف...اكتخلعني كتفزعني...

حبيبة : وااامي هههههههههههههههههههه

ايوب"بالحس" : تهجريه نتي...

ضار دورة وطلع فررر كي زواق طار من قدام عينيه لا هاد المرة يجبد لوالديه سمطة نيشان لمصاصطو وعارفو يديرها لا زاد فيه هههه..

اما حبيبة ناضت من حدا باها مشات لتيليفونها الي كان محطوط فوق طابلة لهيه...جلسات حدا باها الي هز تاهو تيليفونو كيقرا فالاخبار ديال دنيا...دخلات لانسطا وهي تلقى الكونط لاخور دار ليها متابعة وهي تخرج عينيها..

حبيبة : اوووو عرفني دخلت لكونط ديالو هذا ولا كيفاش ؟ (طلعات معاها واحد مولاتي تزنيگة ديال الفرشة حتى وقفات وهز فيها باها عينيه ورجعات جلسات خافت لا يكون حس بيها تجسسات عليه)...

فلاخر طمنات راسها بالي غير صدفة زعما..ولكن الي فيها ماهناها خاصها تمشي لعشيرها الي طلع الفوق الي الى بانت ليه ياكلها بلا ملحة....رسلات ليه ميساج...

حبيبة : ساليتي دوز ل جليسة لتحت...

ايوب : هاني نازل..اطوندي موا...

شوية تا نزل ضار لقى ناديا حطات لحاج بلاطو ديالو فيه زلافتو دالحريرة وتميرات وكاس الحليب باش يشربو ويمشي ينعس...اما هما عشاهم كيوجد كيبغيو يغلقو...جلس حداها وحط تيليفونو بيرسونيل...

ايوب : اشكا...

حبيبة : قول ليا واش الى دخلتي لبروفايل شي حد فانسطا يقدر يعرفك...

ايوب : كون كاينة هاد لعيبة كون حصلت واحد ميكاب ارتست نقال خراه ميجمعوه شراوط معايا فسطوريات..حق رب المعبود الى شوف تيفي تورينا طلامط دارهم...من لاخر عندمن دخلتي..

حبيبة"لولبت عينيها" : اا ؟ الا مادخلت يا..خرجت..تت مادخلتش ازمر..لاش ندخل ؟ وراه عادي تندخلو نبقششو واصلا انا مكندخلش لبروفيلات ناس "رمات ضفيرتها وراها بغرور" هووما الي تيدخلو...

ايوب "خلاها تا كملت" : دار ليك ابوني اجدرة ؟

حبيبة"بلا متحس" : وي دار ليا ابوني..."خرجااات عينيها تا ضربو فسقاية سلمو عليها ورجعو لوجهها"...

ايوب "هبط راسو مزياااان فوق ايدو الي طاويها وصغر عينيه تا ولاو قد شقات وبدا يدور فراسو" : سوقك عامر وحالك ساهل..والي جا يدرها بيك امول القوس...بلا ميسخف معاك الواحد نية اوجه اللفت نية اكركدانة...بلا متلوني بصح مكايناش تجسس الا اذا كان هاكر..ونوضي احبيبتي نوضي شوفي فين وصلو لينا فداك العشا نحنجرو...السهرة لكم ؟

حبيبة"كتحك فجبهتها" : نووو حاسة فيا نعاس...سهر هي نتا..

هذا هو حالهم وهذا هو مزاحهم...اخوتهم زوينة وعشرتهم افضل...تعشاو وكل قصد بيتو...وسبحان الي بيتها فشان وصبحها فشان...اليوم يوم الخميس...اليوم الي قبل العرس...كيف عادتو صبح هو لول فايق فطر ولكن بقى شوية كيتسنى حتى تدق الباب وناض كيضحك فرحان الي وصلات الكوموند الي جابها ليه شيفور الي هو واحد من متعلمين عندو كل واحد منهم كيشد طوموبيل باش يتحركو بيها مالين دار والي هي عبارة على.4x4 volkswagen tiguan الى كان مشغول اما لاكان مسالي كيخرج معاهم ولا يخرجهم مرة يديرو خريجة ولا كل جمعة يمشيو لمطاعم على برا او يسافرو...حل عليه الباب كيضحك عطاه الساشية...

عمر : هو هذا هههههه...

حرك ليه راسو ودخل لقى ناديا خارجة من دوش كتمسح فايديها لابسة ضراعة فالشيبي فيها رسمة الوسط عريضة مهوية وفنفس الوقت مستورة...شافتو هاز الكرطونة وهي تبسم تا بدات ضحك ودور فراسها...حتى مدها ليها....

م.حفيظ : هاهو كادو ديالها...طلعيه دابا حطيه عند راسها مايصلاح ليا ندخل انا وهي ناعسة (حيث كتكون شبه عريانا وغير هذا كتبقى خصوصية بنت واخا باها)...

حركات راسها كضحك وطلعات كتشوف فيه كرطونة ديال ايفون اخر ماخرج..كادو نجاح ديالها ديال الباك الي فرحاتو بيه..حلات البيت بشوي لقاتها منشورة لابسة شوط قصير بيض قطن فيه وريدات فالغوز وديباردو ديالو حد صرة فلون وريدات (اونسومبل)..شعرها مجموع الفوق والكليما مطلوقة...حطاتو ليها عند راسها وخرجات من البيت نزلات لتحت ودعاتو على امل مايتشاوفو تايجيو من حمام حيث هو مكيجي تايوذن العشاء...خرج هو لقى طوموبيل فالشارع ركب وسمى الله وزاد اول وجهة هي دار الدباغ...البلاصة فين كيغسلو الجلود ديال حيوانات عبر مراحل فالحفاري او المجارير والسواني (سميات الحفاري).عاد مراحل تكراط من زغب عاد عاد...وهي الي عندو فيها بلاصة ديالو حيث شي جلود كيبيعهم فدلالة وشي كيصايبهم فالورشة ديالو حتى كيخرجو منهم صيكان ولا كيبيعهم لشركات ديال ملابس او صحاب الاثاث...دار الدباغ فمراكش الي جات ف طريق سيدي يوسف عين ايطي حدا باب الخميس..كاين باب قشيش عاد باب دباغ هي الي فيها دار دباغ...كيف كدخلي كتعطيك ريحة الجلد وريحة الغسيل...المراحل فين كيدوزو دوك الجلود الي كيتنقعو لاسابيع ابتاء من لمرحلة لولة الي كيتنقع فيها الجلد لمدة اسبوع فمادة البازو المرحلة لولة كيحيدو بيها شعر ورطاب جلد...والثانية كيحولو جلود لحوض اخور فيه روت الحمام اي بزق الحمام لمدة بين يوم حتى لسيمانة على حسب حرارة الجو...يعني كيما كان الجو سخون كتنقص المدة.. المرحلة ثالثة هي فالحوض لاخور كينقعوهم فلاسيد والملح ونخالة...والمرحلة رابعة هي مرحلة دباغة هي فين كيرقدوهم فمواد خاصة لمدة ثلاث اسابيع...وجلد البقر كيكون مختلف على باقي الجلود حيث كيخضع لعملية ازالة شحوم من بطانتو..هو وحدو عندو مرحلة خامسة من بعد رابعة..كيحيدو شحوم بواحد الحديدة ماضية تا كيتكرط مزيااان...عاد كيمشي مع باقي الجلود لورشة تكراط غير تما كل تاجر عندو بيت تم ولا بيت مشروكين فيه تجار ولا الي كيكريه باش يقضيو ولا الي ورث...المهم بيت كتكون فيه مرحلة ازالة شوائب بواحد الالة اسميتها صدرية كيكرطو بيها..كاينة تقنية دباغة جلود بدون ازالة شعر ك جلود الارانب..بخلاصة بزاف الجلود كدوز من تم من ارخصها لاغلاها وهاد طرق باش يخرجو لينا فالاخير سترات جلدية سماطي صنادل كل مايخص جلد اثاث الخ...وعلاش ثمنها غالي مقارنة مع باقي الانسجة حيث كتدوز من مراحل وتمارة وفلوس كتخسر على مواد ديالها. كاين من وراها طاقم الي تعب عليها فحال دوك المعلمية الي فالحفاري او الاحواض الي ايديهم كلاهم لاسيد والما والملح وبزق الحمام وهالي ماتو بديك ريحة وهالي جاه مرض جلدي سرطان...علاش حيث طرف الخبز صعييييييب....

غير وصل طل على المعلمية من بعيد سلم عليهم...وعطاهم صوابهم..وداز لقى المحاسب كيتسناه كان كيحسب تما سلم عليه هز وراق وخرج هو وياه مشاو لمكتب ديالو حيث هو لامين ديال تجار جلد...

م.حفيظ : اش تما دعوة هانيا زاكية ابا سمير...

سمير : هانيا زاكيا..والحسابات مزيانة..حسبت ليك الكريديات اعمي...

م.حفيظ"بدات ضحكتو كتجمع وبداو تنهيدات كيخرجو..حرك ليه راسو مثقل" : گول اولدي اش تما..عطيني علاش بغيتك...

سمير : الموهيم اعمي حساب الضو والما ديال عام هما هادو..(كحز ليه الورقة شدها كيقرا فيها..كانت فيها خمسة المليون) وهادي ديال ضريبة بقات ليك هي ديال هاد العام قبل مايدخل العام جاي ضروري بتخلصها...هاهي ( شدها قراها فيها ضريبة الحمام ضريبة المحالات الي مكريين فكيليز وضريبة البازار ديال سمارين...وضريبة دارو فين ساكن وديور كاينين فديور المساكين فداوديات...و واحد لفيرما صغيرة) هادي تالفيرما الي فاغوطيم طريق تاحناوت...هادي...

مولاي الحفيظ قرا دوك الاوراق والحسابات الي تم...بزاااف ما تلى عليه وشي مسلف من عندو..همو تزاد على هموووم...ايه هادشي ديالو ولكن را ماشي ديالو غير وحدو را ديال ورثة الي خلاو ليه كلشي كيعطيهم الارباح كيقسمها عليه وعلى ختو وايوب..امانات عندو..حاول يقسم الورث وكل يضبر راسو وميهزش المسؤولية ولكن هما مابغاوش حتى من ايوب رفض بغاه يتمتع ويبقى داكشي هاكاك حيث الى تقسم كيف قالت لطيفة...ديك الوقت فاش ماتو الواليدين...انذاك...

~~

لطيفة : الى قمستي لورث تقسمنا...والى تفرق تفرقنا..الورث جامعنتا وريحة والدينيا تما...خليه مجموع ببراكتو تحت براكتك وهاحنا خوت...مالك كااع هانتاا طبيتي فيه هههه وبصحتك وغزيتي يلاه اش بيتي ؟!!

م.حفيظ : لواه اعوذ بالله...مابغيها ربي. ولا عبدو...وخا كاين العبد الي ميخاف ربو بقى غي عبدو هههه....

لطيفة : تانموتو حنا ويتقسم على ولادنا...هادي وصية مي و صيتي تانا مكاين ماحسن من ولد مراكش وولد الحرفة هو الي يتهلى فيه..خير ربي هنا عندنا كثير اللهم لك الحمد وليني خليه مجموع تحت ايديك وحنا نصيبنا فالارباح راك غاتعطيه لينا الى مازدتي لينا فيه راك ماتنقص...

~~

غمض عينيه وتزير خاطرو وهو كيتفكر هاد الهضرة..تنهد تنهيدة طويييييلة الي حتى خرجها لدرجة سمير حدر راسو حيث عارف اش غايزيد عليه وكيفاش يقولها ليه ؟...ماهناه من هاد تلخبيط كيفاش يبدا تا نقص عليه نص وسولو نيشان...

م.حفيظ : الرحماني شحال كيتسال ؟!! "هز ايدو موقفو" نيشان اولدي نيشان...

سمير : احم "كحز ليه الورقة الي فيها طوطال كامل" 100 مليون بين العواد والفيتور وبين جلود لدوك سنوات كاملة الي تم...و 100 الف درهم (عشرة المليون) بقات من كريدي قديم الي خلصتي...

م.حفيظ سكت..سكت نيييييت بقى ساكت وسمير كيشوف فيه وحدر راسو حيث عارف ايخصو يبيع شي حصة من الورث باش يخلص...والى غايبغي يبيع ايخص تدار عدة الورثة ويتجمعو باش يتقسم الورث عاد يخلص منو...والقسيم مابغاهش حيث عاطي الكلمة لختو...مابغيش يشتت شمل ماباغيش شتات باغي لمة تبقى كيف ماهي وكيف طلباتو ختو...اش غايدير ؟ الى باع من شغلو ماعنظوش كلشي ديال الورثة حتى من دار الي ساكن فيها !! تاهي ديال الورثة...

داز الوقت ووصل ظهر خرج من تما ومشى نيشان لسمارين دخل لمكتب لدااخل كان مراد خدام كيهضر بالالمانية مع شي سياح..شير ليه بحركة بمعنى جيب ليا براد اتاي..يلاه جلس وهو يصوني ليه تيليفونو هزو مكمش عينيه كيشوف شكون كان اسم لحبيبة...تبسم ونسى همو الي معندو حل...نساتو فيه كيف ديما...وغير طلق الخط غمض عينيه وبعد تيليفون وبدا يضحك نييييت عرفها شافت تيليفون...

حبيبة : احلى مولاي الحفيظ فيك امراكش ورحامنة...

م.حفيظ : ههههه صمكتي لباك وذنيه...بصحتك واهلي تانتي تستاهلي علاه شكون قرا وحفظ وداها فقرايتو وفرح باباه...

حبيبة : انا هههه...حتى تجي ونعنقك مكافينيش تيليفون..واعر واعر ابابا الله يخليك ليا ياربي ويخليك لينا انا وخوتي...

م.حفيظ : ويخليكم ليا بنتي..بصحتك وبصحتكم (حيث خوتها جاب ليهم كادو قبل منها...مكيفرزش بيناتهم ابدا...غير هو معزة حبيبة زايدة شوي حيث هي البكرة الي جات على عگر سنين من مرتو لولة...وحتى هي مقربة ليه بزاف علاقتهم زوينة بزاف)...

قطع معاها مخليها فرحانة كون لقات تخرج ليه من تيليفون متكرهش...وهاكا رجع لهم ورجع لمشكيل الي مخليه يبات يخمم ويضل يخمم وهادشي لاحضاتو فيه ناديا غير هي مخلياه على خاطرو تا يحطو راس عالراس ويخوي ليها لمزيودة كيف العادة...

تماسى الحال وغربات شمس نهار...فات المغرب والحوايج تجمعو ديال لحمام..كانت فبيتها معاها رقية كتعاونها فجميع..جمعات حوايج بيجامة وكاب فوق منها صافي وفوطة شعرها حيث غاترجع فطوموبيل..واكيد برودوي ديالها اتروس قداش...كلشي تجمع ونزل لتحت دارتهم هي ورقية فكوفر طوموبيل تسناو تا خرج الحاج وناديا من البيت وتمو غادين بقى غير ايوب كيشوف مواعيد عراسات....

حبيبة" قربات ليه" : فكر. ويلاه معايا غذا لسيدي بوعثمان...

ايوب : لا...

حبيبة : يعطيك لوا..."مشات"

ايوب"بدا يشالي بايديه" : ونتي ضربة فالكلوا اوجه ل... " بان ليه لحاج جاي" نوض نصلي الظهر اعمي ؟!..

م.حفيظ : الظهر مع العشاء ؟ "حرك راسو بقلة حيلة" لا حول ولا قوة الا بالله...

ايوب " خرج عينيه وناض كيزرب فدروج داير راسو كيهضر فتيليفون. تا تعكل فدرجة زگل يتكركب" : سيحت القزازب...

فوحدة من بلاد الله..قريب وليس بعيد على مدينة مراكش...منطقة من مناطق الرحامنة والي تعرفات وباقا باسم سيدي بوعثمان ...التابعة لاقليم الرحامنة ومركز الرحامنة...وهي المنطقة الي .وقعت فيها معركة سيدي بوعثمان يوم 6 سبتمبر 1912، وهي أول معركة كبرى خاضها المغرب بعد معاهدة الحماية بقيادة أحمد الهيبة...

بعيدا على الفيلاج بمسافة ربع ساعة فالبيست...واحد الدوار تما معروف بدوار الهاشميي الرحماني.(عنوان وهمي)...دوار فيه غير هما كيجيو لبعضياتهم ها عمي ها ولد عم با ها بن عم مي...شي كيجي لشي ومفرقين كل ودارو كل وبيت تراب هالي صالح نص دار هالي ساكن فيها بالمرطوب...وقريب ليهم واحد المسافة اراضي كلها قداش تما متوسطاهم واحد الفيرما قدااااش جامعة ثلاثة ديور كبار فدار وحدة محاوطها السور بعيييييد وفيها ارض لا بأس بيها وضاير بيها اراضي...تحل الباب الكبيير ودخلات سيارة.audi 4x4 q5 فالكحل...حتى وقفها بعيد ونزل منها رجل كبير فالسن...لابس جلابة سوسدي گري تحت منها سروال قندريسي بيض وفوقي ديالو..وفوق منها سلهام خفيف فالگري..داير عمامة فالصفر وبيض..لحيتو بيضة وحجبانو كحلين الحجبان الي بقاو كحلين...ملامحو حرشة وباين عليه فايام شبابو كان زين غير من ملامحو وطولة ديالو شيباني ومگضر مهيب...عينيه كحليين...هز عينيه بانت ليه دنيا عامرة شي داخل شي خارج وعلى برا كيقادو فالخزاين ديال العرس شادين داك الخلا كااامل تما ويقادو فتراب بطراكس ويرشو فيه ويقادو جناب...ريحة طيابات عاطية حيث تريكة كاملة تكبات عليهم هادي عادتهم...فاذ يكون العرس سيمانة ودار كتبقى تعمر كل نهار جاي شي حد هالي قريب ريحة شحمة فشاقور ولد عمي بن عم با وووو...مكيفوتوش بعضياتهم فالفرح والقرح...مهم يجيو..وعاد فالايام العادية كل نهار يجي شي حد على غفلة وخاص العيالات يكون على قدم وساق فالكوزينة القليلة يعمرو صواني اتاي وطيابات....ساس سلهاموو وضار بغى يدخل لدار...حتى سمع صوت كيعيط ليه فاش سمع با وضار لمصدر الصوت كان واحد الشاب فعمر 30 عام تاهو ملامحو حرشة وسميمر شوي..لحيتو كحلة وحجبانو كثاف كيشبه شوي ليه...لابس تيشرت نص كم ووشورط كحل جاي يجر رجليه فكلاكيط كحلة غير رجليه مشعرين بزاف...شعرو رطب ومخربق...جاي ومبسم...يلاه وصل من طاليان من بعد طريق ثلاث ايام بطوموبيل....تا سرح الشيباني ايديه الي فيهم العكاز...وقال...رضوااان العريس عالسلامة عالسلامة وكاان...

رضوان"سلم عليه وباس ليه راسو وايدو حشمان وحادر راسو" : الله يسلمك ابا...

هو : هي نويتي دير دراري هههه...

رضوان : ههه وفحياتك ابا...

هو : وشفتي العروسة ؟!

رضوان : مزال تاليوم بالليل ان شاء الله...

هو : ياك عجباتك بعدا ولا لا ؟!..

رضوان : وشفتي اصلها ابا والحاجة ومي توريا شافوها وعجباتهم..براكة عليا غا نتوما ورضاكم وربي يكمل علينا بالخير...

هو : لا لا بنت الاصل اولدي راهم ناس اصلهم زين شكون ميعرف التجار المشاوري..وزايدون راها من تريكة مك توريا ومك توريا تعطيك الخبار...

رضوان : والنعم ابا...

هو : معاش وصلتي ؟!

رضوان : مع قرب الفجر ياذن وصلت وطلعت نعست مابغيتش نبرزطهم حدي سلمت على مي عيدة وختي سعيدة...الله الى باگاج باقي ماهبطتو من طوموبيل كنتسنى فحسام يجي من مراكش و زكرياء يعاونوني فيه وخويا سيحمد....

هو : ماعليش ماعليش..."ربت ليه على كتفو" على سلامتك اولدي...تاوكان تسالي ولحگ عليا نذاكرو فامور غذا...جايين نيت شي ناس من مراكش..

حرك ليه راسو خلاه مشى يهضر مع واحد رباع تما..ودخل الحاج عبد القادر الملقب بالحاج الهاشيمي رحماني...وصل لدار لوسط يلاه بغى يدخل لبيتو يحط عكازو وسلهام. باش يدخل يجدد الوضوء حتى سمع صوتها...قايلة...سيدي...هز عينيه...

ع.القادر : توريا بنتي (هابطة امرأة فعمر الخمسينات غير هي باقي حروفها كوحل مافيهاش نقطة شيب..من نوع الي مكيبانش فيه شيب لا فكبر لا ف صغر... لابسة كلشي بيض وشال بيض كلشي)..

توريا"باست ليه ايدو" : سيدي(كتقوليه سيدي حيث شيخها وعندهم شيخ كيقولو ليه سيدي والعگوزة لالة) سولت عليك لالة گالت ليا ماتجي تاليوم...

ع.القادر : اييه ابنتي يلاه سالينا انا وسيحمد شي فياجات ف بني ملال وشدونا دوك ناس...خاصك شي حاجة ابنتي...ولا خاصكم شي لعرس غذا (دار كتروج شي داخل شي خارج كانت نيت مرات ولدو لاخور واقفة تهضر فتيليفون وشافتهم من بعيد)...

توريا : لا اسيدي...الي بغيتو مابغيتو يجيكم غريب وماتعجبو فيه...

ع.القادر : خبار الخير...

توريا : بغيت نمرة و "صوتها مشى واحد لحظة وتقج" نمرة ولدي الحاج "ودورات وجهها لهيه مكمشة حجبانها."...

ع.القادر"جاتو فحال هضرتها غريبة" : ياك عندك...

توريا : لا الحاج...سقت الخبار لشي حوايج ماعجبونيش..مراضياش عليهم...تعطيها ليا ولا نشدها من عند هاشم !؟...

ع.القادر : لاش بغيتيه ؟

توريا : خاصو يجي...

هما كيهضرو حتى سمعو انييين ديال صوت انثوي شوي غادي داك الانين كيتزاد تا ارتافع وضارو كلهم منهم تا سيدة لاخرى الي كانت كتهضر فتيليفون...وحتى ورا واحد الباب الي تا ضار البواني ديالو وبقى مبلوكي...

توريا : الحسنية !!!

الحسنية : انننن ببب باااب ععععع ابب بااب نننن

"كتحرك راسها بهستيريا..كتفيبري بشكل ماشي عادي..وتحرك راسها كترجاهم تا بدات فحال كتغوت حيث بكمة مكتهضرش من كان فعمرها 13 عام نتيجة صدمة صابتها فداك العمر...شوي حتى بان ليهم بول ديالها هابط فلارض ووجهها ولا مزنگ.."...

يتبع...