عروس الجحيم الجزء 61

خلا محامي "بشار" في حالة صدمة...بطبيعة الحال كان عارف بهاد القضية وعلمو بيها بشار حيث ديجا موصيه اي حاجة كانت يكون على اطلاع بيها..وفاش وقعات الحادثة مع هانزاده خبرو بشار بيها من بعد...

تسالات الجلسة وخرجو المحاميين بزوج...العمراني كان فطريقه لعند بشار لمح المحامي القرافلي داير تيليفون فوذنيه وكايهضر وصوت ضحكتو مسموووع ثوت الضحكة الي كاتبين انه متأكد من قرار المحكمة...حرك راسو يمين شمال على خبث هاد المحامي فين واصل...خرج على برا وهو يلمح بضار واقف مسند عالسيارة مربع ايديه وكايتسنى داير نضاضر شمس رايبان على عينيه...هز المحامي ايدو مشير ليه رد ليه بضار الحركة براسو...وصل لعندو...

العمراني : الحكم تأجل ل نهار عشرين فالشهر...

بشار"هز حاجبو..حيث كان باين انه غايربح واستغرب حتى من انهم خرجو فوقت اقل شوية" : شنو المشكيل ؟؟..

العمراني"عاود ليه شنو وقع" : بزز باش قدرت نقنع القاضي باش يأجل..يعطينا فرصة فين نثبتو بلي مجرد توقيف مؤقت وغير سوء تفاهم لا غير يعني ماعندكش طرد...

هو كايعاود ليه وبشار ملامح وجهو بقات هي هي...يعلم الله اش تحت داك الراس الي ماعيطيك لا خيط لا ساس...بقى مربع ايديه وكايسمع ليه...المحامي تاهو ماكانش متوقع ان القرافلي غايطيح على هاد المعلومة...يمكن هنا تغفلات ليه هاد الثغرة انه مادام غايكون على مشارف يخسر القضية يقدر يدير اي حاجة كيما كانت باش يدير اخر محاولة فانه يقلب الوضع ليهم...

بشار"باقي محافظ على هدوء ديالو" : الحل ؟!..

العمراني : الحل ديال الخدمة يا يتحيد عليك التوقيف يا تبدا خدمة اخرى وتكون حسن من الي قبلها...والحل ديال التقرير الطبي الي جابو ليك ديال المصح انك كيف شحال هادي قلتها ليك...الزواج وانك انسان بدارك وبمراتك غير انه عندك تقرير بالشفاء ديالك...باش تبان للقاضي انك انسان كفء وتستاهل باش تكون كفيل لخوك...الحكم دابا تأجل اما كان غايكون لصالح الام ديالك انه الحضانة تبقى ليها وبالتالي ماغاديش تقدر تثبت بلي هي أم مهملة لولدها الي من حالة خاصة...(تنهد وشاف فيه بجدية وتأكيد)..ولدي باش نعلمك هذا راه اخر تأجيل كاين...غييير بزز باش قنعتو...كون اكيد الى ماكانش عندك اش قلت ليك غير بلا ماتحضر للجلسة الجايا...حيث نورمال كيطولو فهادشي لكن الاثباتات ديالك كانو قوييين ودابا الكفة تقلبات عليك...عندك هاد الوقت حاول فيه انك تقلب كلشي لصالحك للمرة الاخيرة...

ماجاوبوش اكتفى انه يحرك راسو..مشا المحامي لحال سبيله وهو بقا واقف بنفس الوضعية الي خلاه عليها الي تبدل فقط ان النظرة الي فعينيه ولات قاسية عكسات ما فلداخل ديالو...هادشي طول بزاااااف بزااااف مع مو...مو الي خلاتو يرجع لهاد البلاد الي شاف منها غير الايام الكحلة الي ضراتو فخاطرو ومرضاتو فيه...حتى تلاقى ب "حبيبة" ودارهم الي وراوه العكس...لكن حتى لامتر غايبقى هنا وهو كان ناوي ياخذ دار جديدة الي تجمعة ب مرته وخوته...ويدي مرته حتى لالمانيا ويبقى مرة هنا مرة لهيه حتى يضوف حل فانه يجيب خوه لعندو تما...لكن حتى حاجة من الي كانخططو ليها مكتكون بنسبة مية فالمية...

خرجات ناديا من الانعاش من بعد ما هضرات مع مولاي حفيظ...

حبيبة : كيف بقى بابا !!..

ناديا : شوية بنتي شوية...

حبيبة : كان باغيك فشي حاجة !؟..

ناديا"بقات شحاال ساهية فيها كتفكر اشنو قاليها قبل قليل"..

حبيبة : ماما !!..

ناديا"شافت فيها" : همم...والو هي بايشوف خوتك...

حبيبة : تانتسنى هي بشار يجي من المحكمة ويديني نجيبهم ؟!..

ناديا : بتمشي ترتاحي فدارك...وصباح رجعي حيث دابا مايخليوناش ندخلو عندو...غذا فالصباح بايطلعوه لشومبر عادية هي يومين وبايخرج من هنا...

حبيبة : لا لا هي خليني...

ناديا : ماتشاورتش معاك...باباك الي وصاني..انا ونتي وعمتك كلنا بنمشيو مع صباح بكري نكونو هنا...

لطيفة : كوني تسمعي اهياتا...الي خايفين منو مابقاش ديري بضنو گاليك باباك ويلاه...

حبيبة : حتى يجي بشار...

بالفعل جلسو غير تما...شوية لحق عليهم ايوب الي خلا المساعدين ديالو هما الي يتكلفو بالكليان فالاعراس والمناسبات واعتاذر منهم...هاد المرة دخل ومعاه مو الي جات من ايت اورير باش تشوف تاني الحاج وطمن عليه...سلمات عليهم وجلسات...حتى داز وقت نيييت وهو يصوني تيليفون حبيبة...كان بشار..

بشار : خرجي عندي...

زوج كلمات مافاتهمش وقطع...شافت فماماها الي حركات ليها راسها وهي تخرج لعندو...كان واقف قدام سيارة شاد الكارو كايكمي وكايهصر فتيليفون قربات لعندو كاتسمع فيه كايهضر بالالمانية طبعا مافهمات والو..قدرات تفسر من ملامح وجهو انه وقعات شي حاجة فالجلسة....حتى كمل...

حبيبة : اشنو درتي ؟!..

بشار"عض على فمو شحااال كيشوف القدام...حتى حرك راسو ب لا" : تأجل داكشي...(على شحال عاد بدا يعاود ليها وهي توسع عينيها)..

حبيبة"دارت ايدها على فمها" : ويلييي باش عرفها ؟!..

بشار"ساكت"..

حبيبة : ويلي اش هاد المحامي..."شافت فيه"...أجلو ليك ؟!(حرك راسو)...بيتي نصيحتي ؟!..

بشار : ؟؟؟...

حبيبة : بدل المحامي ديالك..ودير محامي خبث من هذاك الي دايرة خالتي توريا...

شافتو نزل فيها عينيه وهاز حاجبو من هضرتها...رجعات كاتشوف تاهي قدامها وتنهدات...

حبيبة : بابا كان تايگوليا الى بيتي تقضي مصالحك الكبار فهاد البلاد عليك بالخبث مع بنادم (تبسمات) الله يشافيه ليا يااارب..."هزات فيه عويناتها الخوضر الي خلاو قلبه يوقف من جمالهم فعينيه"...الى بيتي يوسف...

الساعة السابعة صباحا...بدات كاترمش فعينيها حتى حلتهم بان ليها الضو وهي تنوض شاااهقة ...قلبات تيليفون وهي تلقاها سبعة ديال صباح...نعسات بلا ماتحس من فرط العيا ديال سهير دوك الايام والخوف والبكا وشلا ماتراكم عليها...لاحت الغطا وناضت بزربة حاسة بضبابة بين عينيها..وقفات تا رجعات الوعي مع ناضت بزربة وبجهد...خرجات كاتزرب تا تساطحت معاه شدها من كتافها مغوبش...

بشار : شش ياك لباس...

حبيبة: بابا بايجلع لشومبر بيت نشوفو...

بشار"شاف فمعصم ايدو الساعة" : مازال لحال...

حبيبة : ويلاه نتوضى ونصلي ونلبس باش لحقو عليه...

ماجاوبهاش...قرب لعندها باسها فراسها وخلاها مشات لدوش توضات وخرجات لبيت صلات ولبسات حوايج الخروج...جايا خارجة من البيت كاتعقد فساعتها...

بشار : l préparation ديالك نتي فين لحگت ؟!..

حبيبة"شافت فيه وتنهدات" : مابقاش عندي تركيز..بابا ومرضو...ونتا والمحكمة...مابقيتش قديت نركز فوالو...

بشار"قرب لعندها" : باك شوي وتكوني عندو...

حبيبة : والمحكمة...

بشار"ماجاوبهاش على سؤالها..حدو طبطب عليها وقال" : تحركي فطري ويلاه نوصلك...

حبيبة : فين بيتي تمشي ؟!..

بشار : عندي غراض نقضيه ولحگ عليك عند باك...

دخلات لكوزينة فطرات هي وياه...وجمعات داكشي...هزات واحد البوليكوب قدامو حيث واعداتو باش تراجع ودات معاها حفاظتها عارفها راسها جلدة من ناحية باها خاصها امتى تكون عندو...ركبو فالسيارة وتوجهو ديريكت للمصحة...وقف سيارة ودخل معاها طلعة ديريكت لشومبر فين قالت ليها ناديا بلي كاينة فيها هي وعمتها كايقادو ليه بلاصتو حيث شوي وغايدخلوه...دقات الباب وهي تحلو طلات على ماماها...

حبيبة : ماما...صباح الخير...

ناديا : صباح الخير...دخلي بنتي...

حلات الباب وهي تدخل...تبعها بشار ...

حبيبة : فين معتز ووردة...

لطيفة : يخرجو من مدرسة وبايجيبهم فيصل وسناء...

لطيفة : گعد اولدي اه شوي وبايجي...

ناديا : واقيلة هما هادو سمعتي السانسور تحل...

مشات حبيبة كاتجري خلات بشار كيشوف فيها...حلات الباب تلاقات الفراملية يلاه جاييين...وسعات ضحكتها على جهدها تا بانو ضروصها وحلاقمها لدرجة صفقات بايدها وقالت...

حبيبة. : ها باباتي حبيبي جااااا....

قربو لعندها وتحنات عليه فالبياص فين جايبينو...قبطات ليه ايدو وماشية معاه كاتبوس فيها وتعاود...تا ضحكاتو فعز تعب ديالو ونطق بصوت عيااان...

م.حفيظ : القشة...

وقفات ناديا ولطيفة...ودخل تا ايوب الي جاي عينيه مبوقين بنعاس باش يحلقو...حطوه فبلاصتو وخلاو ناديا كاتقاد عليه الغطا وهما شي شاد ليه ايدو كايعبر الضغط وشي كايقاد فالشةكة باش يضربوها ليه...ماهزش عينيه ناحية بشار بتااااتا...كانو كاملين واقفين تما...غير كملو الفراملية كتبو تقرير وخرجو متمنين ليه الشفاء...

لطيفة : ايوى دابا عاد بينا نگولو تفوجات وتگعدات...الله يا الحاج طيرتيها منا خلعة...

م.حفيظ : بيت نتفشش...

ناديا : لا الى كان هي هاد الفشوش بناقص..شوف ليك فشوش ديال توگيضة اسيدي نفششوك...

م.حفيظ"تبسم ليها وحرك راسو"...

حبيبة"جلسات حداه وباست ليه حنكو" : خلعتيني بزاف فخبارك...

م.حفيظ"هز عينيه فيها بتعب ومد ايدو طبطب عليها"...

ايوب : اشوف العميم...هادي وبراكة..تفششتي بزاف تا بيتي تقادي الفشوش من سوق الدنيا...ويلي خمسيام ولا منعرف شحال وحنا متنشوفو نعاس هي الخلعة كانت باتخلينا نسبقوك لاخرة...(ماحس تا جاتو دقة لقرفادة كان شوي يجي على فمو) اهياتا...

لطيفة : برا والباس...فمك لاحسو كل.ب الخلا موضر فالظلام...

ايوب : شلااااا....

حبيبة : ههههه الله يحفظو...صافي مايبقاش يعاودها...ياك...

م.حفيظ"حرك راسو مبسم ليها متعب مزال فين يتوگض مزيان...باقي وجهو شاااحب بالمرض والانعاش الي كان فيه...

شوية وهو يقرب بشار الي خلاهم تا هضرو على راحتهم واخا مزروب وخاصو يخرج يقضي...خاشي ايديه فجيابو...

بشار : الحاج...شوية...

هزات فيه حبيبة عينيها ملي هضر وضارت عند باباها...كاتسناه يجاوب كان حادر عينيه حتى بدا يكحب يكحب...مد ايدو وشير لناديا مشات كاتزرب كبات ليه كاس الما...جلسات حداه وعطاتو يشرب...

ناديا : بسم الله عليك...

شرب علاش قدر حتى تنفس وحط راسو عالمخدة كاينين...خلاوه على راحتو...بقاو معاه شوية كايهضرو...مرة يجاوبهم مرات يبتاسم...حتى شاف بشار فحبيبة وشير ليها براسو بلي غايخرج...ضار دورة وتبعاتو...

بشار : ديها فقرايتك شوية نتي...

حبيبة : واخا...بتعطل ؟!..

بشار : شوية...نكون جاي نعلمك...

باسها فراسها ومشا...رجعات هي لشومبر جلسات فالفوطوي حيث لقات باباها نعس...شوية وهي تنوض ناديا...

ناديا : هذا هو الوقت فين دار معايا الكاغديولوغ ديالو...نمشي نشوفو ونجي...

ضارت باش تخرج وهي تنوض حبيبة وتبعاتها...

حبيبة : ماما...

ضارت لعندها ووقفات تا قربات لعندها...

ناديا : مالك بيتي شي حاجة ؟!..

حبيبة"حكات جنب فمها بصبعها وضارت ناحية شومبر ورجعات شافت فيها" : بيت نسولك واش لاحظتي ولا هي انا الي بان ليا !!

ناديا : اش بان ليك؟..هضري اه بينمشي لعند طبيب ديال باباك...

حبيبة : ب بابا...بابا علاش ماتيشوفش فبشار...

ناديا : هي بان ليك ابنتي..سيري رتاحي شوي وبتولي تگولي شي حوايج ماكاينينش ولا بشار عما ليك العينين...

حبيبة : وخا وعلاش سولو كيف بقيتي و ماجاوبوش !؟...

خرج من الكلينيك وركب فالسيارة...خرج من تما وشد طريق نيشان ل فيلاج سيدي بوعثمان...الفيلاج الي كايجي ليه غا لا كان شي حاجة فوق طاقتو...مورا هاد الفيلاج كاينين نواحي وفهاد النواحي كاين هاد الدوار الي هو مسقط الرأس ديالو...الاصل الرحماني تاعو من البو للجد...العرق والد.م فيه رحمانيين حتى للنخاع....

وفالفيرما فين كانت جالسة وعلى وجهها الضحكة...الفرحة الي ماقداتها ناضت مع صباح تخبز المسمن والملوي بايدها...لدرجة مباركة تصدمات فيها...الا عيدة الي بقات واخذة منها موقف لدابا...خرجات من الكوزينة هازة طبسيل كبييير مطرق بالمسمن ووراها كريمة هازة طبسيل ديال البطبوط مريح بالزبدة بلدية...

رضوان : وزردة هادي هههه...

توريا : الزردة قريييبة نشاعلاه...لا صبتي تبقى من هنا ل عشرين يوم تحضر عمانا...

رضوان : موحااال خاصني رجع لخدمة...الصهد دخل والفلاحة بدات...

توريا : واخا غا يومين ورجع...

سيحمد"تسند عالمخدة ودوز بصبعو على مسطاجو" : وتحضر لسبوع ولد خوك...

رضوان : اينا ولد...

سيحمد"شاف فربيعة الي نزلت راسها حشمانة زعما" : على ماشي تصاب عدي ولد...

رضوان : هاكيلي هاكاااوا.. ومبروك اسي...علمتي بوك...

سبحمد : فين بويا صبتو...اجي فين هو بعدا...

ربيعة : ضار عند الخدامة لور وشوية وبغا يمشي لمراكش هو ولالة...

توريا"قربات طبسيل ودارت فيه مسمنة وملوية وحطاتو لعيدة" : لالة گولي بسم الله...

عيدة"شافت فيها مغوبشة...وهي تمد ايدها وكحزات ليها طبسيل بجهد" : مابغيت شاي...

توريا"جمعات ضحكة" : گطعتي لغايا (مابقيتيش كاتهضري معايا)..

عيدة"جاتها من لاخر" : هازة منك...اللغا لا گطعتو عماك وجهي عمرك باقي تشوفيه....

توريا"هزات حاجبها وخنزرات" : واش سباب ؟!...

عيدة : مابقا مايتگال...كي شتي لا علمتك بغيتي تگادي الامور ؟..بالعمى...خليني عليك مابغيت ماكلة "زرود الغدر"...

مابقااااتش هضرات توريا معاها...شقلبات عينيها بسم ومطمطات وهي دور عند لاخرين خصوصا من شافت سبحمد غمزها وقاليها خليها ضبر راسها...تنهدات وهي تكحز ليهم طبسيل وسماو الله كايفطرو...مباركة دخلات فداكشي طول وعرض معاهم...شوية نزلات اشراق هي وزكريا جاو يجريو حيث تعطلو...تبعهم حسام الي غايوصلهم لفين كايقراو...

توريا : فين يوسف...

اشراق : هاهو نازل...

عيدة"بانت ليها سعيدة نازلة لابسة جلابتها" : نوضو دروك...

سعيدة : تاتفطري الالة...

عيدة : فطرت..نوضيني نلحگ لبيتي نخرگ (نلوح) عليا جلابتي وزيفي...فين هاشم...

سعيدة : هاشم مشا لفيلاج گبيلة عندو مايدار...يوصل حسام دراري لمدرسة هاو يرجع لينا ونمشيو عما سيدي...غا بركي تا تفطري بخاطرك...

جليات سعبدة تحت شوفات توريا المخنزرة بجهد فيها...حيث عيدة ولات كاتعاملها ناقص في حين سعيدة هي محط الاهتمام الي بدا كيصب ليها فبلاصة ماكان الاهتمام اغلبه على "توريا" حيث هي مرات الغالي والكبيرة فالكناين...والي زاد فشوشهم ليها حيث ما.ت ليها راجلها فديك الظروف وهي كانت كاتحماق عليه وبزاف الحوايج كانو مخلينها هي المرتبة الاولى...

وقف السيارة قدام القيادة...جبد تيليفةن من جيبه ودوز ليه الخط...حجبانو كايبانو مورمين من فوق نضاضر الشمس...حاط مرفقو فالشرجم مخر الايد الي فيها سيجارة شاعلة...

هاشم : هاني خارج عندك...

قطع معاه..كان غايحط تيليفون وقفو غير ميساج نزل عينيه بان ليه اسمها والميساج فالشاشة..."وقيتة ديال دوا ديالك ❤️"...حس براسو توحشها بزاف...ماكرهش تكون دابا بين احضانه العارية وهي لحمة بين ايديه كايفرغو شوقهم ثاني فالفراش...لحظة كمش حجبانو تاني ملي تفكر انه باقي كاتشرب داك المهدئ ديال ما قبل العلاقة...قرر انه فهادي غادي يمنعو عليها ويحاول معاها تنعس معاه بدون ما تلجأ ليه...دخل قراه باش تبان ليها وخرج مخلي ليها "vu"...تحنى شوية حل المجر جبد منو دواه شربو ديك ساعة حتى وقف عليه هاشم...حرك ليه راسو ناحية البلاصة الي حداه وقال بصوت خشن...

بشار : تحرك ركب...

هاشم حرك راسو بشوية...عارف راسو بلي وصل الوقت باش يقوليه اش كاين...كان كايتسناه يجي لمحكمة لكن ماقدرش يجي ودار معاه يتلاقاو موراها...يعيا يأجل ضروري خاصو يعرف...دار نضاضر شمس حتى هو وركب حداه...ديمارا بشار السيارة وتحرك من تما...خذاو مساافة ديال طريق حتى دخل مع واحد البيست ووقف فواحد الارض قاحلة تما...جبد باكية الكارو خبطها خرج منها واحد مدو لهاشم هزو وهز ليه تاهو واحد...عطاه شعل هو لول عاد هو...نتر منو وشاف قدامو...

بشار : اشمن خبار لحگات لداك السيد...

هاشم" شاف فيه" : حاس بشي حاجة ولا عارف...

بشار"هز صبعو كايدورو ناحية دماغو" : ديجا گلت ليك crise cardiaque فهاد دوار مكتجيش بلا بلان مزعت بالبيان..."ضار عندو" عرف عليا داكشي ؟!..

هاشم"حدر راسو باسف وحركو ببطء"...

بشار عض على سنانو مزيااااان...ماهضرشششش...رد الفعل ديالو كان سكااااات لكن داك الكارو الي فصباعو تطواااا...تطوا وطفاه فكف ايدو مجددا بدون مايديها فديك العافية الي حرقات ليه كف ايدو...غمض عينيه وحدر راسو مغددد...مغدد من فعايل مو تا بدا يتزير يتزييييررررر...هاشم هز فيه راسو لقى وجهو تبدل ليه اللون...

هاشم : بشار !!!...

وصلات العشية...مولاي حفيظ النهار كلو وهو مخلينو على راحتو ناعس كايوصل وقت ماكلتو كادخل ناديا توكلو ويرجع ينعس...موصين على راحة تااامة ليه...ماكيقويوش عليه الهضرة بتاتا...كانت واقفة قدام. واحد النافذة كاطل على برا من فوق...دايرة تيليفون فوذنيها كاتصوني ليه مكيجاوبش...حتى تمات جايا سناء هي وايوب...حطات ايدها على كتفها وهي تقفز وشهقت...

سناء : ابسم الله عليك...

ايوب : الغدنفر مدي ليها العقل...

سناء : جات عليه جات علييييييه...بوگووووص ومهيب ياا جدك..

ايوب : من ناحية مهيب هي توقفي حداه تاتحسي براسك بايصليها معاك تايبان ليك جن تايعجن فالملاوي...

حبيبة"خنزرات فيه" : ايووووب...

ايوب : مك انا "ضار هنا وهنا لا يخرج ليه من شي قنت يجمعها معاه هههه"...افييييييين فييييين الي مابيتوش...متنح...

حبيبة"وسعات عينيها" : ايوووووووب...

ايوب"لقا راسو تحمس وكاينة سناء ماعارفة والو شاف فيها لقاها مافاهمة والو" : تا تبلغي وتفهمي...

سناء : مزيناتك...راك كبر مني غير بعام...

ايوب : تاتصوني ليه ؟!..

حبيبة"تنهدات" : هففف...ممم...

ايوب : مال وجهك مسقوط من د.م !!...

سناء : الخلعة ديال باباها...شوف خالتي ناديا تاهي...

شوية وهما يبانو ليها خوتها جاييين ومعاهم فيصل معنقهم ورقية...شافتهم وهي تعيط ليهم جاو كايجريو لعندها توحشاتهم...تحنات لعندهم وجلسات قفازي تا عنقوها...

حبيبة : توحشتكم بزاااف...

وردة : مابقيتيش تاتجي عندنا...ماتايخليكش عمو بشار...

حبيبة : لااا...هي عندي بريباراسون ديال امتحانات...توحشتو بابا...

معتز : بزاااف اهي المدرسة ماخلاتناش ماما نجيو...

حبيبة : اجيو ندخلو عندو...

وقفات وشدات ليهم فايديهم...مشاو كاملين لشومبر ديال مولاي حفيظ الي كان متكي كايهضر مع لطيفة ختو...وناديا كاتمسح ليه فجناب عنقو بلانجيت ووجهو...حتى حلات سناء الباب وهي تقول...

سناء : حبيبيييي (خالها كاتقوليه حبيبي)..شوف شكون جا...

شاف ناحية الباب حتى دخل اجمل منضر كايشوف فحياته...المنظر الي كون ماتزوج بناديا موحاال كان غايشوفو المنظر الي تعطل سنيييييين باش رزقو بيه الله...فلذات الكبد...ثلاثة التمرات من صلبو...البكرة الي عيشاتو اولى لحظات يكون "اب"...الي بيها عرف بحق ومعنى الكبدة...الي سماها على سمية مو تيمنا بيها حيث كانت ديما فصلاتها وقيام الليل تدعي ليه بالذرية الصالحة..."حبيبة"...بجانبها التوأم...ولد وبنت...الي عطاهم ليه الله شبع بيهم رغبتو فالولاد...توام كيف نقيطة العسل على كبدتو...عينيه دمعو خصوصا ملي شاف ختهم الكبيرة شادة فيهم...ضاحكة ليه ديك الضحكة الي يعطي عليها عمره غير ماتحيدش منها...ماعارفش انه تاهي عطات شبابها والايام الكحلة باش تشوف ضحكته تاهو...سرح ايديه على عرضهم وتبسم وقال...

م.حفيظ : الكبداات...

قرباتهم لعندو طلعو فوق السرير وتلاحو عليه عنقهم نخششهم فيه كايشم فريحتهم وكيشمو ريحتو...

لطيفة : الله يخليك ليهم ياربي...

ناديا"بابتسامة" : اللهم امييين...

بقات حبيبة كاتشوف فيهم...تا حسات بعينيها غرغرو وهي تنزل ليها دمعة بالخف مسحاتها...كاتحس براسها طايح عليها الضيم...بقا شحااال معنقهم عندو ويهضرو...حتى سمع اذان المغرب وعلم ناديا تعطيه التيمم باش يتوضى ويصلي...

خرجو باش يخليوه يصلي حتى نطق...

م.حفيظ : ناديا...شوي ودخلي بيت ندوب معاك...

ناديا : واخا...

خرجات هي وياهم...خلاوه يصلي بخاطره...من بعد ما كمل سمعات صوت تيليفونها بانت ليها نمرته عرفات بلي بغاها تدخل..حلات عليه الباب ودخلات...سدات الباب وراها وقربات عندو...

ناديا : الحاج...

م.حفيظ : درتي اش گلت ليك...

ناديا : گلتها للا لطيفة...

م.حفيظ : هي نخرج من هنا ونعرضهم لدلالة ولا نشوف واحد فيهم يرد عليا حقي...

ناديا : واخا...ولكن علاش بيتي تبيعهم ؟!..

م.حفيظ : بيت نبيع حقي فالورث اناديا...نشوف لطيفة الى بات ترد عليا ونعطيها حقها...هادشي الي كان خاص يكون قبل ماتزوج حبيبة...هي لطيفة ختي الله يهديها بات كلشي يبقى مجموع...هاهو دابا لا ماتباعش بينا نتشتتو ونترزاو فالكبدة...

ناديا : كيفاش !!..

م.حفيظ"بتعب" : مابيتش نبقى نسمع كلمة ولا تسوال...ماتحكريش عليا اناديا ديري اش گلت ليك بالحرف...

ناديا : مافهمت والو الحاج وهادي ما ديالك...درت بكلامك ملي كنتي فالانعاش واخا هضرتك ماشي وقتها...

م.حفيظ : بيت نرجع ليه الفلوس..بيت نقطع العرق بلا مايسيل د.م كبدتي تما...

ناديا : ويلي اش هاد الهضرة ؟!..

م.حفيظ : بيت بنتي...شاري بنتي اناديا شاريها..."شاف فيها بعينين حمرييين حس بالنفس بغات وبدا تقطع ليه..حط ايدو على صدره"...مابيت حد يعرف تادوز الامور كيف بيت...ديري عين كحلة على نسيبك...براكة هي الندم تاياكل فيا من ساسي لراسي...تشمتنا اناديا تشمتنا وضحكو علينا وزدت من عندي انا طمع خلاني نضحي ببنتي...

ناديا"حلات فمها على جهد ووسعات عينيها" : اش تتگول الحاج ؟!..

م.حفيظ : صافي رزقها بايتقادا معاه...وهنا الحد بيناتهم...ماتخليهاش تمشي باقي لدار معاه...

خرجت عينيها على جهدهم...ماعرفت باش تبلات واش هادشي كاتسمع منو صحيح ولا كاتحلم...

ناديا : وييل شيطان استغفر الله الحاج اش تاتگول ؟؟؟..

م.حفيظ : كي سمعتي...

ناديا : وعلاش هادشي ويلي...اش دار بشار حتى بيتي تفارقهم نتا كاااع !!...

م.حفيظ : ناديا اه دويت معاك ماتحكرييش...ديري اش گولت ليك...

ناديا"زادت وسعات عينيها" : اش ندير الحاج الله يهديك...كيفاش نشدها تبقى معانا وتقادا رزقها معاه...اويلي راه ؤاجلها هذاك الحاج هيييي هكاك منخليهاش تمشي معاه بدون سبب ؟!...راه خرجان العقل الحاج هو هذا... وغي شرح ليا بعدا علاش...

ماقدرش يجاوب...بدا كايحس براسو غادي يمرض تاني الى عاود...وناديا غادي تبدا تحكر عليه واصلا خاص يقوليها اش كاين ماتكونش عندها الصورة مضببة...وبالفعل حس براسو زرب فهاد اللحظة...يمكن خاص حتى يرتاح ويشرح لناديا ربما تعاونه فاتخاذ القرار بشكل صحيح وتوافقو عليه...

حفيظ"رجع خفض صوته" : من بعد من بعد..عيان اناديا الى بيت نعاود ليك بايخصني سوفل...(بدا ينهج ويكحب)...

ناديا : شي حاجة كبيرة ؟!...(حرك راسو) وخا هاك شرب بعدا وبرد...

حفيظ"عطاتو يشرب" : الحمد لله..."يلاه بغات تحط الكاس وهو يقبط ليها ايدها"...هي ديري ليا خاطري بعدا هي دابا خليها تمشي لدار ديري شي حجة ولا الي كان...

ناديا : راجلها مايبغيش...وزايدون كاين فيصل ولد ختك.."خرجت عينيها شوي"...ماجاتش...

م.حفيظ : دارهم هاديك وكاينة نتي وعمتها...

ناديا : ماكاينش محرم ديالها الي هو باها...خوها باقي صغير...كي بيتي ندير دابا ؟!؟.

سكت ماتلا جاوب...ماعندوش جهد وماعندو كيف يدير يقنعها وهضرة ناديا صحيحة...وهو حاليا ماعندوش الطاقة باش ينوض ويمسي لدارو وتكون سبة وتبقى تما ريثما يقاد الامور الي باغي يقاد...نزل عينيه وطاحو كتافو ملي فكر حتى فحبيبة كيفاش غاتبغي ليه بلا ماتعرف ؟...غايظطر يضاعف الجهد باش يقنعها ومااااغاديش تقنع ليه...اشنو يدير من غير يقوليها الحقيقة ؟؟...رجع سكت ومابقاش حكر حتى يخرج وديك ساعة يكون فكر ف الف حل وحل ويتهدن باش يعرف يفكر...حيث كايعيا يفكر بالعقل كايطيح فبالو اشنو عرف عليه والمرض ديالو كايحس بقلبه كايضرب ليه فالكبدة...

ناديا حتى هي ولات سكتات بصح مابقاتش حكرات حيث شافت لون وجهو تبدل وبدا كاينهج والطبيب موصي انه مايتعصبش ولا يتعرض لشي ضغط الي يرجع ليه صحتو لزييرو مرة اخرى...

م.حفيظ"هز راسو" : دخليهم دخليهم...

حركات راسها ومشات حلات عليهم الباب لقاتهم مشتتين سناء وحبيبة حدا واحد شرجم وحبيبة كاتهضر فتيليفون و ايوب ودراري حداه...ولطيفة مع ولدها فيصل كايهضرو...علماتهم باش يدخلو عندو...

سناء"شيرات لحبيبة ونطقات بشوي" : هاني دخلت عند حبيبي...

حبيبة"حركات راسها ورجعات تهضر" : يعني معطل بزااف !!..

الى غايجاوبها دابا فغايكون ماعندو لا هم لا حتى حاجة تخليه ياخذ فترة تفكير طويلة...لكن بسباب الهم خلا التعطال فالجواب هو طبعه...شلا ماهاز ليه داك راس خصوصا فهاد اللحظة الي عرف فيها شنو قالت توريا وشنو دارت لمولاي حفيظ...

حبيبة : بشار !!..الو...

فالشومبر عند مولاي حفيظ...مقشبين معاه واخا حاسين بيه مابقاش كايقشب كيف كان...غير كايبتاسم ليهم بزز مرات لا ومرة غييير باش يدير معاهم صواب ومتيحسسهمش بلي بيه شي حاجة ويتخلعو عليه...حتى دخلات حبيبة الي شاف فيها بحزن وهم...جلسات حداه لقاتو كايشوف فيها بعينين عامرين حب وخوف...

وصلات الوقيتة الي خاصهم يخليوه يرتاح حتى يرجعو عندو الغذ ليه...خرجو كاملين من عندو...وتمو غاديين خارجين حتى نطقات لطيفة....

لطيفة : اهياتا بيتسناي رجلك ؟!...

حبيبة : غايتعطل برا...بينمشي معاكم..."شافت فماماها"..فين بيتي تركبي نركب معاك...

لطيفة : وصاك تركبي مع ماماك ههههههه...

حبيبة"بدات تحك فجبهتها من الحشمة"...

سناء : صافي صافي باينة هيي من التزنيگة حشمات ههههه...

ايوب"بالحس" : ممم باينة الحشمة على وجه طراح...

حبيبة"قربات حداه" : سمعتك ا ايوب...

ايوب : انا را صوتي وجهتو هي ليك حساب ليك خايف منك...

ناديا : تبقاي معانا حتى يجي ليك ؟!..

حبيبة : اه...

ناديا(قربات لعندها وزادو سابقينهم) : وزعما خلاك عادي ؟..

حبيبة : علاش كاين شي مشكيل...

ناديا"غمزاتها على فيصل"...

حبيبة : ماعرفتش حتى انا مافهمتش كيفاش خلاني نمشي معاكم عادي ونبقى...گاليا هو مع عمي هاشم ومزال معطل...مابغيتش نحكر عليه من داكشي الي وقع صباح فالمحكمة...واخا صوته ماعجبنيش خليتو على راحتو المهم معاه عمي هاشم...

ناديا : لا حول ولا قوة إلا بالله...هاد غناية حاشاك مع مو مابتهد...

حبيبة"تنهدات" : حتى هو حسيت بيه عيا بزاااف من هادشي...

ناديا : بالسيييف ...هادشي راه طول فوق القياس...ونيت سرها لاكان هي ديك سيدة...ماتتعرف لا صواب لا والو...

حبيبة : علاش...

ناديا"خرجت عينيها" : شوفي باك كان بايمو.ت وماسولات حتى فالتيليفون داك لاخر؟!..هادي نسوبية هادي ؟!..

حبيبة"حدرت عينيها مالقات ماتقول"...

ناديا : وتگول واحد فيهم هي دوك ولاد الخير عمو ومراته وولده والحاج عبد القادر...الحاجة عيدة دوات هي فالتيليفون معذورة عيانة...وانا الي ماخليتهاش تجي باقي رجلها مريضة...ايوى وديك عگوزتك !؟..هذا مانسواو عندها هي تكحب نطيرو نديرو الواجب...الهضرة ماشي دابا الهضرة من بعد والى سكت را هي على وجه راجلك الي ولد الناس ماشفنا منو هي الخير....

خرجو من المصحة..كانو زوج سيارات وحدة ديال ايوب وثانية هي الي جا بيها فيصل مع مو وختو...ناديا حيث عارفة ان بشار ماغايعجبوش الحال تركب مع فيصل فضلات تركب هي حدا ايوب و حبيبة تركب لور مع خوتها والبقية يجيو مع فيصل...وصلو لدار وحبيبة فايدها تيليفون كاتعاود تقرا فداك الميساج الي خلا ليها من بعد ما قطع عليها...ماقدرش يهضر معاها مكانش عندو جهد الي يشرح ليها خسر عليها ميساج انها تمشي مع ماماها لدار لانه يقدر يتعطل بزاف..

حبيبة"ضارت عند ماماها" : ماما انا طلعت لبيتي لفوق ندير تيليفوني يتشارجا..وندوش تما...الى جا بشار يطلع عندي...

طلعات ديريكت لبيتها حطات تيليفونها يتشارجا من بعد ماخلات ليه ميساج بلي غاتدخل دوش فحالة صونا ومجاوباتوش...دخلات دارت دوش خفيف وكضات بيه راسها شوية باش تخرج وتبدا تراجع بعقل مركز...خرجات لابسة بينوارها ولاوية فوطة على شعرها...مشات ديريكت تشوف واش جاوبها لقاتو باقي كاع مادخل من اخر ميساج خلا ليها...لبسات بيجامة طويلة بسروالها مستورة حيث كاين فيصل وباش مايعلقش عليها بشار...يلاه بغات تحيد الفوطة تنشف شعرها حتى تدق الباب ونطقات سناء...

سناء : حبيبة ندخل ؟!..

حبيبة : ويلي دخلي...

سناء"حلات الباب ودخلات" : ههه خفت يكون راجلك...

حبيبة : ههه راجلي خلاني معاكم وتاتگولي خفتي يكون ههه تاطنزي...

سناء"حكات نواضرها" : وغيير گلت...

حبيبة : جلسي...

سناء"جلسات فسرير مقابلة معاها" : حوايجك هنا ؟!...

حبيبة : باقي شي حاجة وشي حاجة لهيه...اصلا الي لهيه اغلبية ديالو شراه ليا بشار..

سناء : الله يخليه ليك...

حيدات حبيبة الفوطة وطلقات شعرها دارت السوشوار فالبريز وبدات تنشف فشعرها وسناء مقابلة معاها...كاتشوف فالتغيير الي طرأ على حبيبة...تبدلات كلها على اخر مرة شافتها فالعرس...زيانت بزاف وغلاضت على قبل...بان فيها تغيير الحب بشكل ملفت...هزات حبيبة راسها وهي تقشعها مربعة ايديها وتاتشوف فيها...

حبيبة : مالك ههه...

سناء"بقات شحال كاتشوف فيها عاد نطقات" : تبدلتي بزاااف ههه..الزواج كايدير هاكا ؟!..

حبيبة"رمشات فيها" : مافهمتش ههه تبدلت لاحسن ولا للاسوء ؟!

سناء : بيان سيغ لاحسن...

حبيبة"تبسمات ورجعات كاتمشط شعرها بالمشطة"..

سناء : كاتبغيه بزاف ؟!..

حبيبة"وقفات المشيط وبقات كاتشوف فيها...بسرعة توردو خدودها..تفكرات اول لقاء ليها بيه كيفاش كان كارثي...لكاااع العقبات والمشاكل الي دازو منها على حد علمها...شريط كاامل داز بين عينيها..جمعات شعرها ب باندة وحطات ايدها فوق الكوافوز متكية حنكها...تنهدات وضافت فيها بشوفة عااامرة شوفة مفروشة خلات سناء نيشان تفهم مدى عمق هاد الحب الي بينها وبين بشار...هي غير ففترة قليلة لاحظات وشافت الاهتمام الي بيناتهم الي مميز وشافت كيفاش كاتقلق عليه وتشطن عليه وتجيب ليه دواه يشربو الي ماعرفاتش ديالاش...

سناء : الله اكبر ههههه...

حبيبة"نزلات عبنيها وبدات تضحك"...

سناء : الله يخليه ليك ويخليكم لبعضياتكم...واخا تزوجتي صغيرة بزاف مي ملي شفتو تبارك الله معاك تبدل رأييي...

حبيبة : امييين...

سناء : بيت هي نسولك...داك الدوا الي كاتعطيه يشربو ولا تاتفكريه فيه...ديالاش...

حبيبة"تحولو شوفاتها لحزن" : l'épilepsie...

سناء : الله مسكيييين...من امتى فيه ؟!..

حبيبة : شي ستة دسنين هاكاك...

سناء : الله يشافيه...

تنهدات حبيبة وقالت "امييين"..ناضت هزات تيليفونها تشوف واش دخل...

في حين هي دابا فدارهم مهني عليها بلي فبلاصة امنة واخا كاين فيصل ماتسوقش نساه هو كاع المهم انها مع واليديها افضل من انها تشوف "بشار" الي واقف دابا بسيارته فواحد البلاصة بعيييييدة...فالروضة فين مدفون باه...فداك الليل جالس حدا القبر دياله...بدون خوف بدون اي احساس جالس...عينيه حمريييين والكارو شاعل بين ايديه...فين هي طوموبيل فين هو تيليفونه فين كاين هو ؟...عند راس باه...عند الشاهد...عند الشخص الي كان سباب حياته ونها ليه حياته حتى دمرات حياته...من عند المغرب وهو تما...الساعة العشرة ونص ديال الليل وهو جالس...ماخايف من قطاع طريق...ماخايف من حتى حاجة...القلب عندو ولا حجرة...عقله غاااااايب فشنو ممكن يوقع من بعد...كيفاش غايتصرف معاه مولاي حفيظ كيفاش غايشرح ليه...منين غايبدا ليه...غايرجع تاني يحكي ديك الحكاية المؤلمة..كيفاش غايشرح ليه...

شوية حتى بان ضوء سيارة جايا داك ضو غادي وكيقرب حتى وصل عندو ووقفات سيارة...تحل الباب وخرج منها كان حاس بيه غايمشي تما...وقف ليه عند راسو شوفة فيه وشوفة فالقبر...

«كل نفس ذائقة الموت...قبر المرحوم نورالدين الهاشيمي..توفي يوم 22/06..»

تحنى قفازي وشاف فيه...

هاشم : علاش جيتي لهنا ؟!!..

بشار"الصمت"..

هاشم : بشار !!..توگض معايا اصحبي...عندك مرتك عندك خوتك...مابقيتيش بشار ديال زمان..الخلا دارك والسما غطاك..."حط ايدو على كتفو"..توگض معايا...

بشار"بقى شحااال ماجاوبوش...حتى دار الكارو في فمو نتر منو وهز فيه عينيه ونطق بطريقة خلات هاشم يهز حاجبو مافهم فيه والو" : ريحت هنا نبدل الجو شوية...

هاشم : فالروضة...

بشار"حك لحيته" : دويت مع الواليد..شوي ونتحرك...

هاشم"بقى يرمش فيه حتى نزل عينيه لايدو وهي تبان ليه بلاصة الكارو فين تطفى شد ليه ايدو وسرحها" : مالك فايدك ؟.."شاف فيه بشك لا يكون رجع لداك المرض" بشار ؟؟...

نتر ايدو منو وناض جمع الوقفة كايسوس فحوايجو من تراب...ضار عند باه ورجع شاف قدامو كايسوس فنفس الوقت...جاه فشي شكل...ملي تفرق معاه وهو حاس بيه ماشي تالهيه...ماعارفش اشنو باغي يتصرف من بعد...علاياش ناوي ؟!..

هاشم : تمڜي لمراكش ؟!..

بشار"حرك راسو"...

هاشم : نوصلك ونرجع ؟!..

بشار"هز فيه عينيه" : علاش ؟!..

هاشم : جيتيني ماشي تال لهيه...

بشار"بصوت تخيين" : لا..ماكاين والو...نورمال..."ضار وراه شاف فقبر باه ورجع شاف قدامو"...ولفت...

هاشم"قرب كايشمشم" : بشار راك شارب...

ماداها فيه كاااع...لاح الكارو ومشا لطوموبيلتو وركب...غير ديماراها مشا هاشم ركب تاهو فسيارته تسناه حتى خرج وتبعو...اي تصرف منو عاذرو حيث عارف حجم الالم النفسي الي هو فيه لكن هاد البرود الي فيه دابا هو خالعو مي طمن راسو ان الشراب هو الي خلاه كايهضر ثقيل وتالق...استغفر مولاه حيث واخا هكاك فرح الي شرب كوميم غايكالميه على انه يدير شي رد فعل خااايب....

هاشم : الله يتبعك البلا يا توريا...كي خرجتي على هاد الولد الله يخرجهم منك متني ومتلت...(ضرب الفولون بجهد بالفقصة)..تفووو على ام تفووو...

ماعطاهش خاطرو يخليه...بقا تابعو حتى بان ليه شد طريق مراكش وواخا هكاك تبعو الي حتى بان ليه وقف قدام العمارة فين ساكن...تسناه حتى بان ليه نزل من سيارة...وطلع...بقى واقف شحاااال وهز عينيه ناحية البالكون بان ليه ضو شعل...تسنى شوية عاد رجع قلب دورة ومشا...

"صباح" اليوم الموالي...

ريحة القهوة المعطرة فايحة فاركان الدار...خرجات مباركة هازة صينية فيها القهوة والحليب باش يفطر عبد القادر هو وسبحمد حيث غايخرجو يتيسرو لسوق...

ع.القادر : نرجع ونمشيو عدو نشاعلاه...

عيدة : اوكيه ولابد نشوفوه...

سيحمد : ضروري تانا لحگ عدو نشوفو...

حرك عبد القادر راسو عطاتو مباركة كاسو ديال القهوة...شوية وهي تم نازلة توريا لابسة جلابيتها ودايرة شالها وهازة صاك فكتافها...تا وقفات عليهم وصبحات عليهم بقلب هاز من جيهتهم حيث نوعا ما قاطعين عليها الكلام...وبشوفة ناقصة وبنفخة...

ربيعة : تي فين مشورة ااخويتي...

توريا : ماشي عند خويا عبد الرحيم معيط ليا دا.بح ليوم لسبوع ولد بنتو...عارض عليكم غذا نشاعلاه ل صدقة...را علم سيدي ووصاني نعلمكم...

عيدة"ماجاوبتهاش"..

ع.القادر"حرك راسو وصافي"..

توريا : خليت ليكم راحة...

يلاه ضارت غاديا خارجة حتى وقفات وهي تخرج عينيها على جهد جهدهم حتى رجعات خطوة لور...وجهها فثانية تبدل فيه اللون...دورو عينيهم لفين كاتشوف حتى بان ليهم جاي داخل...ربيعة حسات بكرضها تهزات عليها وتحطات...مباركة كاتشوف فيه شوفاتو كايخلعو...كريمة كانت خارجة من كوزينة باش تجلس تفطر ورضوان هابط من فوق...

عيدة"صغرت عينيها فيه" : بشار هذا ولا كذبت...

ع.القادر : بشار...

ماسمعش ليهم ولا نقولو ماداهاش فيهم...سيحمد ماعرف باش تبلى...ماعرف ينوض ويزهق ولا يبقى ويدير راسو مافراسو مايتعاود...فالاخير بقى جالس ومتبت كأن شيئا لم يكن...اصلا هو ماداير والو علاش يخاف منو...جاي بشوااااايا وعينيه عليها هي بوحدها...العالم تعزل عليه ودار عالم خاص فيه غير هو ومو...حتى قرب لعندها وبدون انذار او استئذان نطق...

بشار : مامرجيش منك الرضى..."هز صبعو وضرب نواضره" طلع ليا رضاك فكر كري...

ع.القادر"كمش عينيه وحجبانو"...

ربيعة ومباركة وكريمة وسعو عينيهم من هضرته مابقاو قدرو يهزو راس...

توريا : .اش بغيتي مازال عدي ااااش يا عدو الله وكلت فيك الله خرجتي ليا من جنب ومرارتي الي كانت لاگية عليا طردگتيها...

قرب لعندها مزيااان تا ولا بيناتهم سنتمترات قلااال..وعينيه منيريييين فيها بشوفة يمكن عمرها ماشافتها فيه....ركز فيها مزيااان هي كاتشوف فيه منيرة وهو كثاااار منها...

بشار : مازال فين تحني ليا الراس وعينيك يشوفو... المرارة كي والو...ماااااازال فين نفرگع ليك الگلب...مازال فين نتنغم معاك بالسخط يااا بنت المشاوري"...

توريا"خنزرات فيه على حر جهدها" : نعلة الله وعليك...المسخوط يبقى ديما مسخوط..گلتها وعاودتها وحد ماسمع ليا ديت العيب وراك وناس قطعو لغايا بمسبتك..

بشار"قرب لعندها مزيااان وعينيه خارجييين فيها" : رزيتك فيه ؟..مازااااال نرزيييك فيهم واحد بواحد...مازال فين نهز سخطك بالبياااان وتنغمي ليا مع راسك وجات معاك...

هزات ايدها على جهد كانت بغات تجمعها معاه وهو يشدها ليها من المعصم وزيررررر عليها هبطها ليها بجهد وقربها بجهد لعندو تا غوتت...

بشار : المخير فقبيلتك ركبي عليه...

دفعها بجهد تا كانت غاطيح كون ما ناض رضوان بزربة شدها...ضرب دورة وخلاها وراه كاتغوت وتدعي عليه وتشحت...لاخرين كلشي تلجم ليهم الفم عبد القادر جهدو تقادا خلاه منو ليها ونيت بغاها فيها حيث قوات بزاااااف...مباركة مافهمات والو لا هي لا كريمة...حسام سمع الغوات هو وهاشم وسعيدة ونزلو يجرييييو حيث كانت سعيدة كاتعطي لهاشم حوايجو كان كايدوش قبل مايخرج لخدمتو...نازل بشعرو فازگ...

بشار حتى وصل عند الباب ووقف...الغوات دعا مو وتشحاتها وراه وهو طرطقو عنقو يمين شمال مزيااان...قاد تيشرت ديالو...حك منخرو وحك شنايفو بسنانو...ودور وجهو لعندهم بالعرض البطييئ مخنزرررر...ضرب دورة و دخل ثاني بان ليهم جاي هاشم عرفو راجع لخزيت كبر...ماجا فين يشدو حتى غفلو وهز البريق الي فيه القهوة طااايبة وشير بيه نيشان لراس "سيحمد"....

الروييييينة ناضت وزادت كثر ملي ضرب سيحمد الي ماعرف دقة منين جاتو ماجا فين يستوعب تا داخ...ربيعة طلات دنيا بالغوات الي كانو ناعسين ناضو معمشين يجريو ماعرفو باش تبلاو....واحد الحالة ف زوج دقايق من بعد ما كان السكون ولات دنيا تنوض وتجلس بالغوات...توريا دعا وتشحات لعلك ترضى...

ماعطاهش تا فرصة فين يستوعب شدو من الكول مزير عليه هزو لعندو عينيه فعينيه منيريييين فيه...زاد قربو لعندو وزاد زيررر ليه على الكول تا تحبست فيه نفس...ماهضررررش بشار شوفتو كانت كافية فيه...فحال كايهددو بحال الى قاليه راني شام عليك شي حاجة وهادي غير قرصة وذن لا صدق داكشي الي شاك فيه...كحالت عليه بالمعقول...سيحمد كان مخلخل بين بين ايديه وربيعة كاتغوت وتندب....مباركة هربات لبيت ماعرفت اش داكشي كاتشوف قدامها ولا قلبها بغا يسكت...هاشم بغا يجرو عليه عارف مايقدش عليه...عبد القادر حاول يقرب ليه يبعدو منو ماقدرش عليه...

ربيعة"كاتغوت ربي الي خلقها" : وييييويويويويو اش هادشي...وا شهدو علييييييه شانق على عمو واااااكواك الحق....وبعدوه عليه لا يقت.لو ولا عيطو لجدارمية....

ماجلقو تا كان غايجيف ليه بين ايديه....دفعو بجهد تا طاح....وهو يضرب دورة وخلا الروييييينة الكحلة والقيامة نايضة ماحيلتهم لسيحمد ولا لتوريا تزادتهم ربيعة...مشا لطوموبيل وعينيه حمريييييين...خرجات توريا كاتزرب شالها كلو طاح وشعرها بان وعقلها خارج وهي وراه كادعي وتشحت...ربيعة شافت سيحمد فديك الحالة بقات تغوت تا طاحت ليهم سخفات....

توريا : الله يلگيها ليك...الله يتبعك البلا كي خرجتي ليا من جنب وخرجتي علر صحتي...غا گلبي باغي طردگو ليا دعيتك لله ياخذ فيك الحق المسخوووووووووووووووط (عينيها خرجو وجهلت)...انا بارية منك دنيا واخرة الله ينزل عليك السخط...

شكووون حاار فيك يا ميمتي...الوذنين الي تعودو على سخطك تگهمو...القلب عمى من جيهتك حتى فوت...خلاها وراه كاتغوت تبعاتها غا كريمة الي صيفطها رضوان تشدها...سعيدة وهاشم تبعوه وحسام معاه...خلاهم كايعيطو عليه وركب فالطوموبيل...هاشم وقف وخلاه على خاطرو...حتى بان ليه كسيرا بجهد تاتهزت طوموبيل حتى وصل لعند الباب العساس شاف طوموبيل جايا بجهد لصق مع الحايط وطلب السلامة...ضار شاد طريق وخلا العجاج والغبابر وراه....

"مراكش"...

فاقت بكريييي...واصلا مانعساتش مزيان بقى بالها معاه بان ليها تيليفونو تكونيكطا حيث فاش دخل لدار تكونيكطا ليه مع الويفي نيشان...بالها رجع يتشغل من جديد...اش واقع ليه فين مشا...بزاف الاسئلة رجعو وبزاف الوساويس جاو تاني...ياكما طاح بالنوبة ومرض...صونات لبه ماجاوبهاش وهي تزفر بضيق...حسات بوجيعات فكرشها لتحت وشي حاجة سخونة نزلات...حطات تيليفون ومشات ديريكت لطواليط...بالفعل لقات نزلات عليها ليغيگل...حلات البلاكار ومن حسن الحظ لقات باقي عندها فوطة صحية...بدلات الكيلوط وغسلات مزيان ودارتها فكيلوط جديد وصبنات لاخور...خرجات لبيت وهي تدخل ناديا لابسة عليها حيث غايمشيو لكلينيك لعند مولاي حفيظ...

ناديا : ويلي نتي فايقة...

حبيبة"كمشت عينيها من الوجع" : مممم...مانعستش...

ناديا : مالكي ؟!..

حبيبة : فيا لوجع ديال ليغيگل شوية...هففف...نمشيو دابا ؟!..

ناديا : شربي شوية القرفة ولا خوذي شي دوا من لهيه الى تزادك الوجع...مرة مرة تادير ليك هاكا نتي معصبة ؟!..

حبيبة"حركات راسها ب لا" : مقلقة...بشار ماكايجاوبش...من بارح فاش علمني نمشي معاكم...

ناديا : والو كاااع...

حبيبة : كاااع...خفت هي يكون جاتو الكريز...فاش كايتعصب ولا يرد لخاطرو تا تجيه...والى جاتو تايفيق منها مهدووود...بيتو هي يجاوبني واش فالدار نمشي عندو حتى نجيو انا وياه...

ناديا"تنهدات" : يكون خير ان شاء الله...يلاه معانا وقت الي عيط ليك يلحق علينا تما...يلاه باش نعتي لباباك يفطر...شوية وبايخصو يشرب دوا قبل الفطور...

خرجات ناديا وهي هزات صاكها دارت فيه اش تحتاج تاني...الامتحانات عندها نهار الاثنين غاتبداهم...بغات تراجع واخا ماشي بنفس الحماس باش راجعات فالسوميستر اللولة...لبسات تيشرت شيبي طويل وكمايمو عند المرفق...وسروال بوي فراند دجين...لبسات سبرديلتها ونزلات لعندهم لقات خوتها كايفطرو قبل مايجي طرونسبور يديهم...عيطات ناديا لشيفور الي جاب طوموبيلة مولاي حفيظ...ركبات هي ولطيفة ورقية وبقات سناء مع فيصل حتى يجيو مع ايوب...طريق كلها وهي كاتصوني ليه بدون جواب منو الشي الي زاد من حدة قلقها...ولات غير كاتنقر بصباعها على شاشة تيليفون....كاتسمع ميساج كاتهز كلها كاتقول هو كاتلقاه غير نوتيف او رسالة من كروبات الي دارت ليهم صيلونص باش مايقفزوهاش تاني على والو...وصلو الكلينيك وطلعو ديريكت لشومبر... دخلو لقاوه فايق والفرملية كاتعبر ليه ضغط...

ناديا : صباح الخير...

م.حفيظ"اول حاجة تسناها تبان ليه هي حبيبة غير بانت عاد رد عليها" : صباح الخير...

لطيفة : كي بقيتي اخويا الحبيب...

م.حفيظ"حرك راسو فهاد اللحظة قربات حبيبة باستو فحنكو وايدو"...

حبيبة"بصوت منخفض" : شوية اليوم ياك...

م.حفيظ"هز فيها عينيه" : مالكي ؟!..

حبيبة : ماماليش...

م.حفيظ : مال صوتك عيان...

لطيفة"بعفوية" : مشطونة على زمانها هاديك...

مولاي حفيظ دار براسو ماسمعش اش قالت جمع غوباشتو الشي الي خلا ناديا تلاحظ وحتى حبيبة الي مافهماتش هاد التصرفات الي ولات كاتصدر من باها ناحية بشار...

شوية حتى صونا تيليفون جبداتو تشوف وهي تلقى سميتو...ناضت بزربة وخرجات من شومبر بلهفة طلقات الخط بلا ماتسناه يهضر...

حبيبة : بشار !!...حشومة عليك فين غبرتي من البارح !!...

بشار"وقف قدام العمارة وجهو ماكيتفسرش..ماكانش عندو جهد الي يسايرها" : فينك نتي..

حبيبة : فالكلينيك...

بشار : نسالي ونجي عندك...

حبيبة : كيفاش نسالي عاوتاني...فينك ابشار !!

بشار : راسي مبرزط يا حبيبة مبرزط ماعندش عدو ربي الجهد...

حبيبة"بحزن" : ياااك...واخا سمح ليا...

تاهو ماعطلهاش قطع عليها حساب ليها غايحزرها...ماعارفاش بلي هو فواحد الحالة ماهياش...ولباس الي هضر معاها وقاليها جاي...اما حالتو الهضرة مكيهضرهاش مع تا شي حد غا هي بانت ليه صونات ليه بزاف وعرف غاتكون مبرزطة عليه...خشات تيليفون فصاكها ومشات لواحد البالكون كاين فداك طاج كبييير...ماقدراتش تدخل عندهم حيث جاتها البكية من رد فعله قبل قليل...بان ليها واحد الكرسي وجلسات فيه...عيات تحبس فيها باش ماتبكيش بزاف لكن قطرة نزلات تبعتها اخرى حتى شقو دموع طريقهم على خدودها...حدرت راسها واستسلمات ليهم...بكات تما حتى بردات...سمعات تيليفونها كايصوني حساب ليها هو ساعاك كانت غير ناديا...مايمكنش ماتجاوبهاش فهزات راسها لفوووق تنفس...جاوباتها...

ناديا : افينك !!..

حبيبة"حاولت تيسطر على نغنغة البكا فصوتها بزز" : هيي..هي هنا تنتسنى احم...بشار دوا معايا وقطع يعاود يعيط ليا نهضر معاه ونجي...

ناديا : بيك شي حاجة ؟!..

م.حفيظ"دور راسو بزربة" : مالها ؟!..عطيها ليا لهنا...

ناديا : هاكي باباك...

حبيبة"ماجات فين تقوليها لا تا سمعات صوته" : ابابا !!..

م.حفيظ : مالكي ؟؟ تتبكي ؟...اش كاين تما...

حبيبة : ماماليش هي ضراتني كرشي...

م.حفيظ : اش ضرك فيها..اجب عندي لشومبر نشوفك...

حبيبة : انا فطواليط نبدل ونجي ابابا راك عارف البيريود...

م.حفيظ"بشك" : اا ؟..واخا واخا قضي...

ولات غير كتبرول فالهضرة وتلبق من هنا...رجعات تاني لتلباق والكذوب...ماتقدرش تدخل وعينيها حمرين...ناضت من تما ومشات لطواليطات غسلات وجهها وتسنات حتى ولات شوي وهي تخرج دخلات لشومبر كلهم ضارو شافو فيها خصوصا باها الي فلاها وعرف بلي كانت كاتبكي واخا دوزها عليه ستين كذبة وتلبيقة...طبطب ليها حداه...دارت ليه خاطرو وجلسات حداه...هز عينيه فيها وشاف فيها بديك شوفة ديال مدوزيهاش عليا ابنتي...كمل فطورو وعطاتو ناديا الدوا الي مورا الفطور...

"الرحامنة"...

فالمستوصف لداخل...واقف هاشم ورضوان وحسام وعبد القادر...كايتسناو فالطبيب الي كان لداخل عند سيحمد...ساعة وهما واقفين كايتسناو...

رضوان : واش هذا ماعند القانون ما يصور عماه ؟..كل نوبة داير لينا فضيحة...

ع.القادر"الصمت"...

رضوان : يتوگض وينوض يدعيه قليل الترابي...بالحق المسخوط يبقى ديما مسخوط...

ع.القادر : لاكون سد عليا يا فمك...سكتني شوية خلينا نسمعو لصداع راسنا...

رضوان : صافي دوز سكوتية ؟!..(خنزر فيه هاشم دار برايو ماشافوش)..

ع.القادر"هز فيه عينيه مغوبش" : مادوز سكوتية شاااي...يفيق ويدير اللازم الي بغى...ولاكون سكتني ولا غبر عليا من هن...

هاشم"هز صباعو بزوج لاقاهم" : سكتنا شوية...

رضوان : عاجبك ياك...

هاشم : سكتنا شوية..وداك تشلهيب فالهضرة كلنا عارفينو...لا فاق هو الي يدير لازم را كلنا عارفين القانون...لبدها وهني الوقت...

سكت رضوان وجلس فوق واحد الكرسي...شوية حتى خرج الطبيب لعندهم...

طبيب : خيطت ليه الجرح مبدئيا ولكن اسي الحاج ضروووري يطلع لمراكش يدير راديو لراسو...بالنسبة لحروق مكانوش شي حروق من درجة واعرة...درنا ليه بوماد..دقة الي فراسو خاص تأكدو منها هنا راك عارف الامكانيات مكاينينش...يمشي دااابا لمراكش مايتعطلش باش تأكدو من الارتجاج...من بعد هما الى طلعات ليه سخانة عاودو رجعوه لعندهم...

دخل عندو رضوان وعبد القادر وبقا هاشم وحسام حتى صونا لحسام تيليفون...لقاه زكرياء الي ماعرف اش يقوليه...

حسام : ازكريا !!..

زكريا : تا مالك خليتيني نعيط ليك نمشي عماكم وزدتي..

حسام : وامارديتش البال راك شتي طيرناه فالبلاصة هاشم را غير مخلوع هو الي زيدني نسوگ بيه...

زكريا : امضرا اش دار...علاش دار ليه هوك ؟!..

حسام"حشم يقوليه را بوك قلب عليها واخا ماعرفش ولكن حاس" : نمشيو لمراكش يدير راديو ونرجعو...لباس عليه ماتشطنش...

زكريا : جي ديني...

حسام : سير تقرا اصحبي فين نجي را خاص يمشي دابا...ماحتال تجي عشية تصيبنا جبناه...

قطع معاه ومع كان برا...ضار هنا وهنا وهو يدخل لداخل...قرب وقت يمشي لمدرسة حيث صباح مامشاش بالخلعة بطل...لقى مو دايرة محزون...شادة راسها بعكفة وتلالي وتخبط فجنابها...

ربيعة : واهيا ربي بغا يقت.لو ياربي...واهيا ربي على المسخوووط ضرب عمو الله يگطعو...

عيدة"جهدت صوتها" : ولاكون لا لجمي فمك من دعا...

ربيعة"خرجت عينيها على حر جهدهم فيها وغوتات بجهد" : تاواحد فيكم مايهضر...كلكم خايفين منو...هاااا ؟...فخبارك را هو الي هرس ليه صبع ونكر عليكم غا باش ماتعرفيش حيث عارف تاواحد فيكم مايهضر مايدوي...علاش هاد الحگرة الالة علااااااش ؟!..ولا حيث سيحمد (خبطت صدرها) ربيبك...حيث ماشي ولدك ماعندك سووووق...ياااك الالة يااااك...

قبل ماتهضر عيدة دفعات طبلة بكاسها وقرعتها ديال الما الي جابو ليها ولتوريا الي سخفات...ومشات كاتبكي وتدعي...

ربيعة : الله ياخذ فيه الحق...الله ياخذ فيه الحق...

تحت رشاشة الي ماها مطلوق باااااارد على داك راس الي حس بيه طاااايب بجهد...مسند ايديه عالحايط ساااهي والما نازل عليه...كايرد شعرو اللور الي كاينزلو الما على عينيه...حتى حس براسو برد شوية وهو يسد الما خرج من البوكس هكاك بلا مايلوي عليه فوطة كلو كايقطر حجبانو لحيتو وجهو كامل صدرو.... مشا عريان ربنا خلقتنا...الغوباشة مامحيداش من وجهو...جبد فوطة نشف بيها ورماها ولبس ملابس داخلية وتيشرت وسروال ديال مليتيغ فالخزي...رجع شعرو لور وفيكساه...حط في فمو الكارو وضار كايقلب بعينيه الحمرييين على البريكة شعل بيها الكارو وخرج حفيان تالكوزينة دار قهوة كحلة...عمر الفنجان وهزو...جلس جنب سرير كايكمي ويشرب فالقهوة...سمع صوت تيليفون ودور عينيه بتخنزيرة ناحيته كايشوف كايصوني...رجع دور وجهو لقدام كايكمي بشوااايا ويشرب فقهوته...

جلستو وشوفته ماكانتش تالهيه...خاصو شي حاجة تكالميه حيث حاس براسو بدا يتفاوت تاني من الاعصاب الي ركبوه...واخا برد غدايدو فسيحمد وفي توريا...حاس براسو ما هكاكش...شي حاجة خاصة غليله ماتشفاش حيث باقي شي حاجة حاس بيها كاينة وغاتكون من بعد...ناض من بلاصتو والكارو شاعل فايدو...جبد الباكية ديال المهدئ الي ولا كايستعملو فالحالات اللازمة ديال بصح ماشي كيف الاول...رما حبة في فمو وشرب عليها القهوة المهم راسو يتهدن مايبقاش يزنزن ليه...طفا الكارو فالكاس ديال القهوة...وتسرح على ضهرو فوق ناموسية ورجليه فالارض...حط دراعو على عينيه وغمضهم....

"المصحة"...

هزو راسهم ملي سمعو صوت الاذان...مولاي حفيظ شاف فناديا...

م.حفيظ : عطيني ايدك نوض نتوضى...

لطيفة : هي تيمم الحاج وصلي متكي ماعليش...

م.حفيظ : لا هي خليني مابيتش نتوالى لمرض...خليني نتوگض باقي عندي مايدار من بعد...

تنهدات ناديا ودورات راسها...ناضت عاوناتو ومشات معاه لدوش يتوضى...في حين سناء وفيصل وايوب وحبيبة ولطيفة خرجو باش يخليوهم على راحتهم...

حبيبة"شافت فسناء" : جبتي ليا اش گلت ليك...

سناء : اه...

ناضت حبيبة هي وياها مشاو حتى لطواليط عطاتها ساشية ديال فوطة صحية وخلاتها فطواليط ورجعات فين جالسين...بدلات تما وخرجات كاتغسل فايديها ووجهها بجيل الي جابت ليها...رجعات لفين جالسين لقاتهم دخلو...يلاه بغات تدخل حتى حسات بايدو شداتها من دراعها ودورها لعندو لصقها معاه ماجات فين تهضر حتى حط صبعو على فمو وخرج عينيه...

بشار : ششش...

حبيبة"بدات ترمش فيه وعينيها غرغرو ماعرفات تفرح الي شافتو ماعرفات تبكي كلشي تخلط عليها الهرمونات مخربقيين...تاهي ماهضراتش غير عينيها الي قالو كلشي حتى تكونات فيهم دمعة الي شافها ونزل راسو لعندها...باسها من عينيها ومسح ليها دوك دميعات بفمو...بقى نازل كايبوس شويية بشوية حتى وصل لفمها وحط عليه فمو...حس بايديها على كرضو بغات تبعدو لا يخرج شي حد...ماصورات منو والو تا خذا كفايتو وجر ليها شنايفها جرة وحدة حسات بجلدة طااارت...خشا ليها راسها فحضنو وطبطب عليها...بحال كايقوليها سمحي ليا..بثح ماعندوش جهد باش يشرح حاليا...مادواتش حتى هي مافيهاش مايهضر...باش متعصبش عليه وتغوت وتبكي وهما فبلاصة مامسموحش بهادشي...خرجها من حضنو وعنقها جنب...دق الباب وحلو وهما يدخلو...مولاي حفيظ كان كايسبح هز عينيه فيه ورجع نزلهم كأنه مادخلش...

ناديا : ولدي على سلامتك...كي بقى خاطرك شوية ؟!..

بشار"حرك راسو وصافي...شاف ناحية مولاي حفيظ ووقف قدامو" : الحاج...(هز فيه مولاي حفيظ عينيه) شوية !!..

م.حفيظ"شاف فحبيبة الي كانت كتشوف فيه ورجع شاف فناديا...حدر عينيه وحرك راسو وتكلم بغير نفس" : اللهم لك الحمد...

بشار ماحكرش...عارفو بلي واخذ منو موقف...مالقاش كيفاش يدير يهضر معاه واصلا ماكانش بغا يجي حيث عارفو بلي عرف كلشي...شوية وهما يخرجو لاخرين رسلاتهم ناديا باش يبقاو فدار حتى لعشية يجيبو معاهم دراري...بشار ماتحركش من تما حتى خرجو...كان جااالس وساااكت جاب الله حبيبة باقي مقلقة منو ماسولاتوش لقى راحتو حاليا...حتى انها مارداتش البال لحرقة الي فايدو ديال الكارو الي طفاه في كفو...كايحس براسو جالس عالشوك...وصلات العشية وخرجو من عندو تاني...ركبات حبيبة مع بشار ومشاو لدارهم...غير وصلها طلع معاها حتى دخلات لدار ونطق...

بشار : ماديريش العشا دابا نجيبو معايا...

حركات راسها مابغاتش تسولو فين غادي...تاهو ماداها فيها كاع...سد الباب ونزل خلاها واقفة كاترمش مصدومة حيث ما برر ليها وماشرح ليها...عضات على سنانها وخبطات رجلها وهي تمشي لبيت...

يلاه خرجات من عندو الفرملية بعد ماعطاتو دواه...حتى تحل الباب من جديد شاف شكون الي دخل وهو يغوبش اكثر وكمش فلحاف السرير...حتى وقف عليه خاشي ايديه فجيابو...

بشار : الحاج...نهضرو ولا من بعد...

م.حفيظ : بيتي دير ليا خاطري ولا مساعف معايا...

بشار : الي بان ليك...

م.حفيظ : اش بيتي فاش نهضرو...

بشار : نعطيك الي يفيدك....

بقى كايشوف فيه شحاااال...ماكانش عندو جهد الي يسمع منو حاليا...باقي عيان وكايتسنى غير يخرج باش يبدا فبعض الاجراءات ويبدا فداكشي الي فكر فيه وخطط...

م.حفيظ"تنهد بتعب" : مابقى مايفيد الي عطا الله عطاه ضحكتو عليا وشمتوني...(حرك راسو وبدا ينهج)...واخا واخاا...حتى نخرج ونهضرو مزيااان...ونساليو هادشي...

بشار"حدر راسو وحركو مثقل...حتى هز عينيه فيه بشوفة حااادة وجاه من لاخر" : فوت ليا مرتي وسالي ليا مع راسك...

عطاه المختصر الي يفيذو يعني بشار حيث عارف مولاي حفيظ ملي عرف عليه كلشي اذن اول حاجة غايفكر فيها ويخاف عليها هي بنته...شي حاجة باينة ومفروغ منها...وزيادة على هذا ان بشار بين عينيه حبيبة يعني عارف الى عرفات كلشي غادي تبعد منو ...

تكمشات ففراشها وحاطة ايدها على كريشتها لتحت...مكمشة عينيها مرة مرة كايزورها الوجع...قلقها الوجع وهي تنوش من فراسها لكوزينة...قلبات فالبلاكارات حتى لقات القرفة الي بغات...دارتها فكسرونة صغيييورة تا تبخات وخواتها ف mag ديالها حلاتها بمعيلقة العسل خرجات كاتخلط فيها وجليات فالفوطوي الي فقاع دار...تنات ركابيها عندها وبدات تشرب شوي بشوي...حتى حطات الغراف وسندات راسها لوووور وغمضات عينيها كاتنيييين وتدلك فكرشها...

حبيبة : همممم...فففف...

شوية بشوية تا بدا يتهدن عليها الوجع استحلات ديك الراحة ماحسات امتى دازت بيها عينيها...ماحلتهم غير على تحريكة خفيفة فكتافها بدات ترمش وهي تهز فيه عينيها بان ليها موسع عينيه بخوف وكيشوف فيها...

بشار : مالك...

حبيبة"شافت فيه مطوول وهي تحدر عينيها وجاوبت بغير نفس" : هي كانت تضرني كرشي...

بشار : شنو مكرفصك فيها ؟؟؟؟...

حبيبة"مجاوباتوش حيث حشمت تقوليه ليغيگل...حتى قفزها بصوته"...

بشار : شنو مكرفصك فيها طلقي ملتي...

حبيبة"تخلعت وحشمت وتعصبت تا تزنگ وجهها كثر ماكان مزنگ" : والو هي پيغيود..."صرطت ريقها"...

بقى شحال كيشوف فيها فاللول مافهمش على شحال عاد استوعب...حط دوك ساشيات الي جاب ديال العشا وريح حداها...هز ليها وجهها لعندو وقاس ليها حناكها وهي بدات تبعد فوجهها...

بشار"خنزر فيها" : ياك لباس ؟؟...

حبيبة"الصمت"...

بشار"زاد فصوته" : ماسمعتكش ؟؟؟...

حبيبة : والو واااالو..بيت نمشي نعس...

بشار"بقى مخنزر فيها ماجاوبهاش كايشوووووووف فيها حتى قرب ليها وجهها لعندو مزيااان"...

حبيبة"عينيها دغيا غرغرو...مخربقة باغيا تبكي مفقوصة منو كلشي مخلط عندها...هزات فيه عينيها الخضرييين الي تورد محيطهم بالدموع ونزلات دمعة كاتجرييييي وهي كاتشوف فيه...فعينيه الحادين شوفة فيها...الي غير شافو ديك الدمعة وهما يتقلبو لنظرات الخوف...زاد جمع حجبانو اكثر...

بشار : شششش...

بلا مايسول جرها لعندو اكثر وحضنها بين دراعو...حط ليها راسها على صدرو وتكى على الفوطوي متكيها عليه...حتى حس بيها تهدنت وهو يخرج ليها راسها وشاف فيها كايمسح ليها عينيها من دموع...عض على لسانو مكره من هاد الحالة الي كايشوفها فيها...كيفاش دارت فهادشي والى عرفات حكايتو اش غادير واش غاتقبلو...فكر حتى فهضرة باها الي عاااارف انه ماغايتقبلوش لانه داير فراسو بلي مووو الي ولداتو ومتقبلاتوش عساك مولاي حفيظ...الخوف من انها تبعد منو زاد كبر...ولا مبرزط كثر وكثر....

بشار"عينيه مترقبين وجهها كامل" : مكرفصة بزاف ؟!..

حبيبة"حركات راسها ب لا"...

بشار : نجيب ليك شي حاجة تهدن عليك ؟...

حبيبة"تنهدات" : لا مابيتش صافي فاتني...

بشار"بقى كيشوف فيها باغي يتأكد"...

حبيبة : وصافي والله حتى فاتني...

بشار : لاحگين لعاام ونتي معايا...مابانش ليا كان كايجيك هادشي !!...

حبيبة : ماشي ديما...هي مرة مرة...

ماعرفش علاش مانغماتوش حالتها...بقى شحال وهو مفيكسي فيها شوفة فالاخير حرك راسو ببطء...قرب لعند جبهتها باسها مطووول...ونزل لشفايفها ببوسة خفيفة حسن مايتعمق ويصدق مقفرها وغايحصل غير هو ههههه...قادها فبلاصتها وجر دوك ساشيات...

بشار : تحركي تعشاي...

حبيبة : مافياش...

بشار : كولي علاش گديتي...

حبيبة : مابيتش ناكل ابشار عافاك والله...بيت نعس...

شاف تا عيا وهو يدفع دوك ساشيات وحرك راسو وناض كايجبد فباكية الكارو...ماقجرش عليها...وتاهي ناضت موراه دات داك الغراف غسلاتو ومشات لدوش غسلات وجهها وحكات سنانها وخرجات دخلت لبيت...وقفات وهي دور وجهها ناحية البالكون بان ليها واقف عاطي بضهرو وكتافو العراض...كاتشوف فيه تاهو بيه شي حاجة...مشا بالها انه الي وقع مع مو لا غير...دور وجهو لهيه كايشوف ودخان سيجارتو خارج...حتى ضار وراه ورجع شاف قدامو وهو يدور من جديد بانت ليه واقفة وكاتشوف فيه...نسات راسها وسهات وهي واقفة...كمش حجبانو فيها وتقول واش توگضت تا رجع ضار...حط الكارو فطفاية ودخل لعندها حتى وقف قدامها...عاد توگضت وهي دور بغات تمشي لبلاصتها وهو يشدها ولصقها معاه...

بشار"دخل فالموضوع نيشان حيث عرفها تقلقات وهو ماكتنش عندو جهد لتفسير ولا يدير الخاطر لانه كان زيرو خاطر فمابالك يشدو" : راسي مبرزط حبيبة...تخربقات عندي دعوة وماكانش عندي الخاطر نعلمك ولا نجي عندك...شي مرات كايطلع ليا د.م كانبغي نتكوانا فشي بلاصة...

حبيبة : سولتك فين كنتي ماشي گلت ليك ماتكونش بوحديتك...انا عارفة طبعك تاتبغي تكون بوحدك فاش تتعصب واخا بايخص نكون معاك واخا تكون معصب...

بشار"خرج عينيه شوية" : مجهد عليك يااا حبيبة...

حبيبة"وسعات فيه عينيها" : علاش ؟؟..بيتي ضربني ؟..ياكما بيتي تقتل.ني ؟؟!...

بشار"اخر كلمة كملات على مابيه واخا هكاك حافظ على صلابة ملامحه" : نديرها ؟؟؟...

حبيبة"بعفوية" : لا ماديرهاش...هييي عطيتك مثال على شي حوايج ميمكنش ديرهم ...اذن علاش غانخاف وعلاش تكون مجهد عليا...

اخر كلام قالت شد منو غير ديك "لا ماديرهاش"..ماعرفش واش هادي حاجة زوينة انها ثايقة فيه مايقت.لش ولا قالتها حيث مايمكنش تجي فبالها انه يقت.ل ولا قااات.ل....

ليلة دازت عن البعض عادية...وعند حبيبة راااحة حيث هضرو ووضحو الامور بيناتهم...ماحساتش امتى نعسات وامتى خشاها فيه وتكمشات...وعند البعض بكا وقهرة حيث حسات بالحگرة الي تعرض ليها راجلها...وبالغيض من ناحية بشار الي عمرها ماتنسى كيفاش ضربو قدامها وهي يلاه مفقوصة حيث هري ليه صبعو وزادو ضربة اخرى...دورات راسها لجيهتو كاتشوف فيه ناااعس بفعل الدوا حتى هو...مدورين عليه فاصمة فراسو ودايرين ليه بومادا ديال الحراق الي تحرق حيث كان الابريق عامر...حسات بكرشها تقلبات عليها وهي كتبكي حتى شهقات وهي تنوض من بلاصتها دخلات لدوش وعطاتها لترجاع هاك بلاك تا حسات بالروح بغات تخرج ليها...غسلات وجهها كاتنهج...

ربيعة : الله يلگيها ليك...الله ياخذ فيكم الحق...

بقات فالطواليط حتى تنفسات...دخلات البيت حتى قفزات وشدات على صدرها...

ربيعة : بسم الله الرحمن الرحيم...اش فيقك...

سيحمد"شاد راسو" : مدي ليا نشرب مدي...

ربيعة"شعلات ضو...عطاتو يشرب" : ياكما صادعك رايك...

سيحمد"تا شرب" : لا...

ربيعة : واش فيقك ياك شارب دوا نعاس...

سيحمد : فايق لهمي...

ربيعة : گطع الهم من جدر...دير حد لولد لحراااام راك فقصتيييني...

سيحمد"الصمت"...

ربيعة : خايف من شي ؟!..

سيحمد : عارف اش كاندير...دوزي ترگدي يصبح ويفتح...

ربيعة : مابرداااتش ليا الحگرة الي تحگرتي يا بو ولادي...مابرداااتش...حگروك وجاو من جيهتو...برد ليا خاطري وخلينا نخرجو من هاد الفيرما الي دايريني فيها خدامة وكلمة المسخوط مسموعة....

ماجاوبهاش...شرب وحط الكاس وضار عطاها بالظهر...هز ايدو شير ليها باش طفي ضو وتنعس فبلاصتها....

"صباح" اليوم الموالي...

الساعة العاشرة ونصف...تسمع صوت دقان فالباب وهي تنوض ناديا من حداه كاتقاد فشالها...حلات الباب وهو يطل واحد السيد كبيير فالعمر لابس ضراعة رجالية فالبيض وطاقية فالبيج...لحيتو بيضة وكثييييفة....

هو : اصباح الخير...

ناديا : صباح الخيير...

هو: الحاج فايق !!.."عينيه فالارض ومابغاش يطول عليها"...معاك الحاج عبد المالك....حنا تجار السمارين جينا نزوروه لا كتاب هههه...

ناديا"تاهي حادرة عينيها باحترام" : اييييه مرحبا..."ضارت عندو"..تجار الي معاك فالسمارين جاو يشوفوك...

م.حفيظ"حرك راسو واخا فايق خاسر" : مرحباا...

حلات ليهم الباب كامل وحركات رايها خرجات من شومبر وخلاتهم يدخلو براحتهم يزوروه رجال بيناتهم...

ع.المالك"غير شافو وهو يدور عند البقية وبدا يصفق" : وتاق شباق رباااق ركبنا فالكوووتشي وبهجاوة العتاااق ليومة عندي كووولشي...

ردو عليه : وتاق شباق رباااق ركبنا فالكووشي وبهجاوة العتاق ليوما عندي كووولشييي...

هو : ولالالالااالاااا ...

هما : لالالالاااا لالالالاا....

شوية بداو يصفقو اكثر ويتهزو حتى ختموها ب " ومرااااكش واهيا سبعة رجاااال"...

م.حفيظ"تبسم وصافي دار ليهم الخاطر عارفهم جايين يزوروه الفوج الثاني حيث لول كان ديال القنارية ودابا هادو وديال دار دباغ دايرين باش يزوروه غذا فدارو حيث اليوم غايخرج..."..

ع.المالك : اشوف ا عماد واش المعلم ديالك باقي تايغوت...

عماد : باش بنعرفو العزوة ؟!..

ع.المالك : العزوة هي حناك...گوليه بعتي زربية ديال الهند وسند بالرخا لمولانا...

م.حفيظ"تبسم" : هههه...

عماد : لا باقي عيان ملي ماناضش عتاني سلخة دايزها الكلام امعلم....

اليزيد : اه تايگولو مول القلب بايخصو الحب باش يضرب وينوض يتگعد كي الكلب...

ع.المالك : كاينااا...

م.حفيظ : اش بيتو من لاخر...

عماد : جبنا ليك شي تقيتيقات باش تقوت...

اليزيد : ودانون باش تگعد...

محمد : وعصير باش تسلخ ولد العبد...

ع.المالك : واحد الكاس ديال زعزع فخوي سيك...بايخلي قلبك تايضرب تك تك تك تا يسكت ليه الحس...

م.حفيظ : ادابا نوض ليك البالا...

ع.المالك"شد لحيتو" : بنكرطها من جدر لا وصلتيني الحاج صافي لا كان هي دروك...

م.حفيظ"ضحك تا بدا يكحب" : ههه ياك...

عماد"قرب ل عبد المالك" : اهيا بايعگدهم...(يمو.ت زعما ههه)..

ع.المالك : تايعگدهم ليك نتا وطاسيلة مك عاد يصد لعند مولاه...اه بسبعة ترواح...مشات روح وباقي ستة...

اليزيد : امتى بتمو.ت...

م.حفيظ : اهيا...

اليزيد : تانا امتى بتخرج...

م.حفيظ : عشية...

اليزيد : هي الزردة النهار الي بعدو ؟!...

م.حفيظ : مرحبا...

ع.المالك : مممممممممممم... شي طنجية ناضية كنادية...

عماد : التوت المتوت...

محمد"ملي دخلو مشا تشتح فالفوطوي..حيد طاقية تا حك صليعتو ونطق" : بايديرها ليكم بفخادو ؟؟...

اليزيد : علاه مايدير لحم راس مبخر براسك...

محمد"حل فمو وطولهااا" : شاااااااااارف مكمش...

ع.المالك : البسطيلة بالحوت...

م.حفيظ"الصمت"...

اليزيد : دابا يگوليكم تقادا الحوت...

عماد : لا تايگوليا الحوت اليوم ماكاينش تايسيقو فالبحر...الكروفيت عندو سبوع والدة ليه دلفينة الشرن...

ع.المالك : نوض اوا تگعد...صافي هي ولي لباس اسيدي حنا نديرو ليك زردة العراضة عندي والحساب يخلصو محمد...

محمد"تهز تا حبد بزطام وحلو ليهم خااوي يصفر فيه غير لاكارط ناسيونال و كارت گريز ديال موطور وبيرمي داااك اللول الي حمر..حل فمو ونطق مطول تاني" : خااااااوييييييي...تااايصفر...

عماد"عوج فمو" : البيرمي امولاي عبد المالك باقي مابدلو وبيتي يعرض عليك...دوز الحساب ل يزيد رااه مول الخير وساكن ففيلا فوسط المدينة القديمة...يبيع هي سارية منها بايعرض عليك لعلي بلفلاح...

اليزيد : رااابت....

يتبع...