محتوى القصة
الفقد ليس مجرد غياب، بل حضور دائم في الذكريات، ورائحة عالقة في الزوايا، وصوت يرن في أعماق الصمت،،يُعلّمنا أن الألم قد يكون هادئًا، يرافقنا في تفاصيل يومنا، ويذكرنا دائمًا بمن كانوا هنا، ثم غابوا..
صحيح ان الولد ماعاشش فالدنيا مدة...هي كلها اربع ايام..لكن الله بغاه يدخل لقلوب الناس الي هزاتو بين ايديها..زرع فيه قبول كبيير...وهادو غير الناس..فما بالك ب مو الي هزاتو فكرشها من اول نطفة...حتى كمل تسع شهور وهي كاتسناه بفارغ الصبر..كاتسنى داك الذرية الي سنييين وهي كاترجى الله يرزقها بيها من بعد اول خلفة ليها...عطاه ليها الله بهاد طريقة وخذاه بطريقة اخرى...هي امانة مدتها قليلة ورجعات لمولاها...
بقات هكاك كاتبكي وتعدد عليه...شي حضنها وشي طبط عليها..حتى تمات جايا عيدة شادة فيها كريمة..قرباتها لعندها تا جلسات حداها فوق السداري..وربيعة فالارض..حطات ايدها على كتفها وطبطبت عليها...
عيدة : الي جرا ليك مكتاب..والي كتبو عليك باغيك توگضي وتفيقي على راسك ابنيتي وتعرفي دنيا مادايماش..ليوم ليك وغذا عليك..مانگوليك شااي حبسي البكا..بكي وبكي تا تنفسي..وتاحد فيهم مايمنعك ماتخليهاش فگلبك لا تخرج عليك (زعما خاصها تبكي مايحبسوش فيها البكا باش ماتمرضش كثر)...نهار ربي زرع فيك ديك روح داها..ونهار يبغي راه يزرع فيك روح خرا..باقي صغيرة وباقي تشوفي الولاد الى مكتبش ليك حمدي الله بداك الولد الي عطاك الله..هاهو قرب يولي راجل بشلاغمو ويجيب ليك ولاد ولادو...وهذا الي مشا عند الله صدقة ولاگي عليك غذا يوم القيامة...بكي بنيتي بكييي ومتفرطيش..وگولي الحمدي الله (الحمد لله)..
عيدة كاتعاود بواحد طريقة خاترة زويينة...ولاخرين كايسمعو شي كايبكي وشي كايتنهد...بقات فيهم بزاف حرقتها صعيييبة..صدنة مكانوش متوقعينها كاع ان طفل يكون بين ايديك عادي حتى فظرف ثانيتين يفارق الحياة...هنا نعرفو اننا غير ضياف فهاد دنيا واننا فيها تحت اختبار..ماغاديش نديو معانا المال ولا الجاه ولا المناصب ولا الديور والفيلات قصور..ماغاديش نديو معانا الصحة...غادي نديو معانا سيئات والحسنات الي جمعنا من دنيا...وسعداتك افاعل الخير...
واقف حسام هو وهاشم كايهضرو مع تهامي قدام الدار على برا...كان الوقت تعطل شوية جايا ل نص الليل...
هاشم"ساط دخان سيجارة" : هي هاديك العصر نشاعلاه يتدفن..
تهامي : مايصيبوش يعطيوه لينا بكري..
هاشم : صعيب الحال گاليك..
هما كايهضرو وحسام لمح شي حد ورا الشجرة لهيه جالس غير بوحدو..صغر عينيه تا قشعو زكريا..خلاهم واقفين ومشا تا وقف عليه مسند حنكو على ايدو وسااكت..
حسام : مريح هنا ماخفتيش تسكن...
زكريا"الصمت"..
زم حسام فمو وهز حجبانو باسف..قالها ليه من باب المزاح لكن الوقت غلط..ضار هنا وهنا بانت ليه واحد حجرة كبيرة جرها وجلس فوقها..شاف فيه ولقاه ساهي..
حسام : واا زويكة (زكريا)..وتا هوك وباك تاهو..وتا توگض اصحبي غا على وجه ديك مك الي صوتها بح بالبكا..اش خليتو ليها..
زكريا"شاف فيه ورجع شاف قدامو" : باقي صغير...
حسام : ماشي هو لول..غذا ملي نمشيو لروضة سرح عينيك جيهة دراري صغار وشوف شحال..خسارة فالله ؟!..
زكريا"حرك راسو ب لا"..
حسام : بغيتي ترجعو بهادشي ؟!..
ماجاوبوش..عارف مستحيل..كون يرجع بالبكا كون رجع شحال من واحد بكينا وتقهرنا عليه قهر شديد..حدر راسو وجمع حجبانو مزير مابغاش يبكي حيث عيا وداكشي الي كايحس بيه فصدرو عمرو حسو اول مرة يعيش شعور الفقدان...ماقدرش يشوف فحسام وهو كايهضر...
زكريا : والله تا فرحت نهار گالت ليا راني نتوحم..واخا طنزت عليها وبركت نضحك وشاد فيها..لداخل راني فرحان مانبقاش وحدي..نهار تزاد عطيت العاهد تانگابلو عارف مي حدها ترضعو يبدا يمشي وتخليه سارح كي مولفين فالعروبية ولد وطلگ..مانفرط فيه ونعلمو هبل تربح الي داير على دار رحماني لا بغا يعيش هاني...
حسام"ساكت وكيسمع ليه..شاف فهاشم شير ليه وهز ايدو بمعنى تسنى"...
زكريا : نهار تزاد هزيتو وشديت فايديه زير ليا على صبعي نوغش ليا هنا (شير لصدرو)..ربعيام دخل فيها لخاطر دخلة صحيحة ومشا...لا جينا نشوفو وياربي تسمح ليا حسن الي صد على بكري ماطول وكبر وعاش مع بات شابع فسا.د وعيالات ومشاكيل...
حسام : واا زكريا...
زكريا : خليييني نعاود ليك خلييني نگوليك هاد الهضرة تگال غا مرة وحدة وعمرها تعاود..هاهي كاتخرج راسها...خليني نشكي عليك احسام..خ..
هز ايديه وحطهم وهما ينزلو دموعو الي كان حابس...عيا يصبر تا تزير مابقاش قدر...دار دراعو على عينيه وتكا راسو..بغا يشدو حسام كايبعد ليه فايديه تا جرو بزز وعنقو مزير عليه..بقى فيه بزاف..وقف عليهم هاشم كايشوف فيه وهو يتنهد مالقى مايقول..اصلا زكريا تجمع عليه كلشي مشاكيل ديال واليديه باه..كان "عبد الله" نقطة بيضاء فحياتو لكن شاءت الاقدار...
بعد راسو كايمسح فعينيه..نزل هاشم ربت ليه على كتفو..حرك راسو وهو ينطق...
هاشم : واليديك مازال صغار..مازال فين يجيك خو وخوت..مازال العمر طويل نشاعلاه...
زكريا"هز راسو" : مازال عندي خوت..عندي جوج خواتات اعمي هاشم..."حسام شاف فهاشم وهاشم كذلك ورجعو شافو فيه"..
هاشم : باغي تشوفهم..
زكريا : تاهما خواتاتي..
بقاو يشوفو فيه...من ديما زكريا عقلو سابق عمرو...واخا هبيل لكن رزين..
الوحدة ديال الليل...لابتوب ديالو فوق الطابلة فالصالون حداه الوراق بكثرة...قدامو ايباد حتى هي...حال شرجم باش يدخل الغربي حيث برزطاتو لاكليم ماعندوش معاها بزاف...داير نضاضر شوف وخدام يطابي هنا ويكتب فالوراق ويخطط فاخرى...الطفاية عامرة ببقايا سجائر...وكاس منصص بقهوة كحلة...يلاه كي وصلو واحد تقرير من المختبر وبدا يقرا فيه حتى حس بخطواتها هز عينيه بانت ليه واقفة كاتحك فعينيها..
بشار : مالك ؟!..
حبيبة"تنهدات ومشات جليات حداه حطت راسها على دراعو" : نعست وفقت مابقاش جاني نعاس...
بشار"هز ايدو تا حطت راسها على صدرو ودورها عليها..حط صباعو على حنكها كايقيس فيها" : ناوية تمحني ملتي صباح فالفياق...
حبيبة"تبسمات" : لا نفيق..ضروري..."سكت ورجع كايقرا فداكشي ومعنقها عندو..حتى هزات عينيها كاتشوف فداكشي مفهمت فيه والو.." بتبقى سهران وصباح تفيق بكري..ماشي صعيب الحال..فكر فراسك حتى نتا عارف السهير وستريس مامزيانينش ل épilepsie..
بشار : ماشي مشكيل...
زفرات بقلة حيلة...هادي هي هضرتو...اختاصر ليها فجوج كلمات ماشي مشكيل...اصلا هادي خدمتو من نهار بدا..جاب الله مراقبة ليه دوا ديالو يشربو فالوقت باش مقلل ليه نسبة النوبات...هي ماشي فاقت وماجاهاش نعاس هي بقات كاتفكر..بقا فيها البيبي الي ما.ت لربيعة..عاودات ليها سعيدة اشنو وقع وبقا فيها الحال...بقات كاتفكر وغير مكتزيد تخاف...تنهدات وهي تگعد وورجع تقاد فبلاصتو كايكتب فشي حاجة بتركيز..
حبيبة : بشار..
بشار"ضار شاف فيها مغوبش ورجع شاف فلابتوب"..
حبيبة"نغزاتو وجراتو من تيشرت" : بشاااار...
بشار : يااا حبيبة اش كاين...
حبيبة : عافاك شوف فيا بيت نسولك..
بشار"رما ستيلو وضار عندها"..
حبيبة"خذات نفس عميييق وعضات شفايفها بتوثر" : احم..بتمشي غذا ؟!..
بشار : ؟؟..
حبيبة"هزات ايدها كاتحك جبينها متوثرة من ردة فعله" : ل عزو ديال داك البيبي الي ما.ت (عينيها غرغرو تنهدات)..واخا تحضر هي لدفين...
بقى كايشووف فيها..تسنات يجاوبها لكن مادار حتى ردة فعل تبين واش معصب واش ماباغيش واش باغي...مادار والو بقى يشوف فيها وهو يدور هز ستيلو وبدا يكتب ويطابي فلابتوب..تا صونا ليه تيليفون واخا ساعة متأخرة من ليل عيطو ليه حيث مختبر دايرينو 24 ساعة...وديجا وصاهم يصونيو ليه فواحد ساعة هو حددها..جاوب وبدا يهضر بالفرنسية هاد المرة..شافت تا عيات وهي تنوض بغات تمشي شدها من ايدها ورجعها جلسات حداه...بقا شاد ليها فايدها وصبعو كايدوز على ضهر ايدها حتى كمل حط تيليفون وضار عندها...
بشار : صباح عندك مايدار...(هز صبعو ورسم دائرة فالخوا)..البشري كامل ورا صحتك عندي (زعما صحتك هي لولة)...تحركي نعسي شوي ونجي..
خشا وجهو فعنقها باسها فيه بوسة طويلة..حركات راسها وهي تنوض ماتجادلتش معاه..بالفعل مشات تكات ونعسات شوية وهو يتبعها حتى هو...
هكا داز اليوم...يوم كان صعييب بزااف تقريبا على كلشي..فيه ناس عاشو صدمة وناس تحسرو وناس كاع ماجايبة خبار...حتى صبح الصباح...الساعة تشير ل سابعة صباحا...لبسات اخر قطعة فحوايجها ومشطات شعرها...هزات صاكها وخرجات عندو لقاتو واقف حدا شرجم الكوزينة كايكمي ويشرب فقهوة وقفات عند الباب من بعيد...مبعدة من ريحة الكارو...
حبيبة : بشار..
شاف فيها حرك راسو طفا الكارو..حط الكاس وخرج لعندها عنقها بجنب باس ليها راسها وخرجو من الدار...توجهو لمتخبر التحليلات الي مقابل مع صومعة الكتبية...فين خاصها ديرهم...عطاتهم الورقة ديال طبيبة قيدو سميتها وطلبو منها تسنى فالقاعة..مع جات بكري مالقاتش ناس بزاف..دازو شي زوج ووصلات نوبتها...دخلات لداخل حتى دارتهم..ماشي بزاف وهي تخرج عندو لقاتو كايتسناها برا...اتا بانت ليه جايا وهازة بيمو بحال ميريندينا ديال Be...
حبيبة : صافي ساليت..
بشار : نديك تفطري فشي بلاصة...
حبيبة"حركات راسها ب لا" : بلاش..بيت نمشي لدار باقي فيا نعاس..خوذ ليا هي شي حاجة من مخبزة باش تفطر حتى نتا...
بشار : لا..عندي مانقضي فطري نتي...
حركات راسها بتفهم..خشات ايدها فدراعو ومشاو لسيارة ركبو...داز بيها لواحد المخبزة تقدا ليها اشنو بغات..خذا ليها تا ديك نيويورك رولز الي كايعجبوها...وتقدا اشنو خاص نيت...وصلها حتى لدار طلع معاها لفوق حط لبها داكشي وخرج...
فالدوار فين كاين العزو...الصدقة الي تدارت على سمية الولد صدقات لجنازتو...سبحان الي يبيتها فشان ويصبحها فشان...البيت فين كاينة ربيعة مكان فيه حد تقريبا من غير عيدة وكريمة...الصوالن وبيوت عامرين بالاقارب وناس الي جاو من بعيد غير عرفو جاو...القرآن مطلوق باعث الطمأنينة فالقلوب ومهدنها...جالسة وشادة تريكو من تريكوات داخلية ديالو باقي فيه ريحتو من الحوايج الي كانو غايتصبنو ديالو..شاداه بايدها ومسندة عليه حنكها..دموعها خمسة ستة لعين...ولات سكتات هاد صباح خلاتها بكاىها صامت...حتى دخلات وتمات جايا بخطاويها ووقفات قدامها...حطات ايدها على كتفها وقالت...
توريا : خويتي ربيعة...
ربيعة"هزات عينيها وبدات تحرك فراسها بحال كاتلالي" : وااا خويتي راني تشويييت اااخويتي...شفتي اخويتي شحال وانا نتسنى..نهار جا برك عمايا ربعيام ومشا..
توريا"حركات راسها باسف..ونزلات باستها طبطبات عليها" : البركة فراسك..الله يعوض محبتو بالصبر...باقي صغيرة فين تولدي غيرو وتعوضيه....كية فالي مشا ومايتعوض..(غوبشات عيدة من هضرتها ودورات وجهها لهيه عليها)..
داز وقت حتى دخل سيحمد هو تهامي خوها...قالو ليها باش توجد راسها تمشي معاهم لسبيطار تشوف الوليد اخر شوفة قبل مايغسلوه ويقادوه فالكفن ديالو...هي لحظة صعيبة بزاف لكن هادي هي الحياة...وقفاتها وحدة من خواتاتها وداوها لبيت تلبس عليها...يلاه ضار سيحمد وهي توقفو توريا...
توريا : الله يبدل المحبة بالصبر...
سيحمد"حرك راسو وجهو مبدل" : امين..
رجعات جلسات ومرة مرة تاتشوف ناحية عيدة كاتلقاها مكتشوفش فيها...تنهدات وهي تشوف فكريمة...
توريا : فين اشراق ؟!..
كريمة : فالفيرما شوية وتجي عما مباركة وسعيدة بغاو يجيبو الفطور...
توريا : ويوسف جاي عماهم ؟!..
كريمة : يوسف مع حسام وهاشم لوسي..
حركات راسها وبركات معاهم تما تا شوية بداو يدخلو شي عيالات...كان خوها عبد الرحيم نيت وخوتاتو وخوتو جاو بكري باش يعزيو ويمشيو...اما ربيعة لبسات عليها وخرجات تلالي وتعد بصمت..حالتها حالة عينيها منفوخين بزاااف وحناكها بداك نديب تنفخو وتورمو...حالتها تبكي قاصح القلب...غادين بيها بشوي حيث باقي غرازها جداد...ركبات فالسيارة مع خوها وسبحمد وختها ماجدة...وسيارة لاخرى فيها حسام وزكريا وعبد القادر وهاشم حتى هو...مليكة غير قالوها ليها طلات دنيا بالبكا وتعداد كانت على سبة مع بنتها الي مالقاوهاش فالمدينة فين كاينة فاسبانيا...لحد ساعة باقي ماعليها خبر يأكد واش تزوجات بصح...ورضوان ماقدرش باش يجي لكن اتصالاتو كانت مستمرة مع خوه ولا باه ومرتو كل شوية يعيط ليها تعطيه لخبار فحالة مجاوبوش خوه...اما حبيبة ملي وصلها مشات تكات وغفات بالعيا وفياق بكري..تا وصلات العشرة وشي حاجة عاد فاقت ودارت ليها فطورها عيط ليها بشار سول فيها ورجع قطع...حطات فطورها ولكن كاتحس بالشهية ماشية ليها..دور دورة وتفكر داك الولد وتفكر مو كيفاش حالتها...هي جربات غير الاجه.اض ديال بيبي كانت باغيا وعاشت المعانات نفسيا وجسديا موراه عساك ربيعة الي هزاتو فكرشها تسع شهور كاملة وكانت كاتسنى باش تحمل سنيين وولداتو ومشا...اكيد غاتكون صعيبة...واخا كاع الي دارت معاها لقات راسها بقات فيها وبزاف غير دور وتفكر وتزيد تخلع...يلاه كي بدات تاكل من كرواصة وهي تحطها بغير خاطرها عينيها غرغرو..هزات تيليفونها ودوزات لخط لسعيدة...
وصل الظهر...ملي مشاو فالصباح وهما كايتسناو باش يقدرو يدخلوهم عندو...مد سيحمد ايدو باش يشدها شدات فايد زكريا ووقفات...دخلو تال داخل فين كاين مستودع الامو.ات...تا لقاتو حاطينو فواحد الجيهة فين كايغسلو..قلبها تعصرر وتعصر عمرها توقعت تدخل لهاد البلاصة وتشوف فيها داك الوليد الي تشوگت عليه...زكريا تكمشو ملامحو حابس البكية..اما سبحمد دخل عندو هو لول عاد باش خرج لعندها...عرا ليهم المكلف تما تا شافتو..تقولي كاع ما ميت..تحنات لعندو باستو فراسو ودموعها نازلين..وضارت لحنكو ريحتو البيولوجية ريحة زويينة بقات ليها فنيفها واخا ما.ت..شدات لبه ايدو باستها وعاودت..تحنى زكريا كذلك باسو وعاود...عاد قاليهم بلي خاصو يتغسل..بزز باش خرجها زكريا وداك الفرملي...مادوات ماتكلمات كايبغيو يبعدوها كاتلصق ليهم بدون كلمة منها..غا ساكتة وتبكي بالحس...بزز عاد تفرقات عليه...خلات كبدتها وروحها مع داك الملاك...خلاوها تمشي تشوفو وتشبع منو لاخر مرة..
هاشم : التقرير من هنا لسيمانة عاد يعطيوه ليهم..گاليك غالبا تكون سكتة قلبية..
حرك راسو وهي تخرج ربيعة..شادة فزكريا مزيررة عليه...شوية ضغطات كثر تا ضار عندها بانت ليه كاتحل عينيها وتسدهم تا تخلخلت وشاف فحسام فالبلاصة طار لعندها ماجات فين طيح شدها...
الحال هو هذا المو.ت هي هادي وهادي مراحلها...تغسل الوليد وتكفن...وصل الوقت وتسلم...العصر كان قرب يأذن...الرجال كلهم تجمعو..الاقارب الحباب والجيران...هادي هي البادية وهادي هي رحامنة كلشي خاصو يجي الله يجعل بنادم يعطس يمشيو...دار رحماني كاملين جاو من كبيرهم لصغيرهم...وصلات سيارة نقل الامو.ات من المستشفى من بعد ما سلموه...وصلات لدوار...وقفات قدام باب الفيرما ديال عائلة ربيعة...تا نزلات هي عياانة واكلة دق...فين كان مخبي ليها هادشي لو كانت تعلم كان الهم كفس داكشي علاش الله رحيم بينا... محيد علينا علم الغيب ومخلي مستقبلنا مجهول علينا...
دخلوها تاني عكس كيف خرجات ساااكتة سكات غريييب ماداوية مامجاوبة العيالات الي يسلمو عليها ويعزيو..اما رجال تبعو السيارة...حتى وصلو لروضة هي نفسها فين مدفون نورالدين بحكم دواور قراب لبعضياتهم مشاركين فروضة كبيرة...
القبر كان واجد صغيير على قد الرضيع...تجمعو رجال من بعد مادازو المراحل...نزل سيحمد الاب الي طبعا موضي ومصلي..مد ليه الوليد شدو بين دراعو وحطو فين وراه الحفار...هز سيحمد راسو عينيه حمرين شاف فباه الي حرك ليه راسو..دور عينيه على الحظور ورجع لباه تا وسع عينيه من شنو شاف..ضار عبد القادر وزكريا وحسام وهما يشوفو فين شاف تا بان ليهم بشار واقف بعيد شوية..ماتوقعوهش غايجي تال روضة ويحظر لدفن..بقى سيحمد كايشوف فيه ورجع نزل راسو وهو يحط الولد وطلع..حطو على الوليد اللحد..وبدا تراب يتلاح عليه...واخا رضيع مادوزش فالدنيا بزاف..كانو رجال حاضرين باش يتدفن..معرفة ومواساة لا غير...
"اللهم شفعه لوالديه والحقه بصالح المؤمنين واجعله في كفالة ابراهيم"..
كنت ظيفا خفيفا..ملاكا محبوبا..درسا قاسيا...
في كفالة سيدنا ابراهيم
«عبد الله»...
وبهذا قد انتهت مراحل الدفن...جسد صغير تغطى بالتراب وتزاد على الي سبقوه...سواء رضيع طفل شاب او عجوز...كلنا سواسية فالم.وت وان تعددت الاسباب...سلمو الرجال على الحاج رحماني وسيحمد تاهو..والي سلم على هاشم..والي سلم تا على زكريا...حتى تقريبا مشاو بقاو غير القراب...هاشم وحسام مشاو لعند بشار الي كان واقف لهيه خاشي ايديه فجيابو وشاف مراحل دفن...اما عبد القادر ربت على كتف سيحمد بادي كلامو..
ع.القادر : الصدقة العشية عد دار نسابك..وغذا فالليل نشاعلاه عدنا لهيه...
سيحمد"حرك راسو وصافي عارف الفيرما مابقاش يوصلها"...
طبطب عليه وخلاه واقف هو وزكريا مع شي رجال والحفار نيت كايقاد فداك القبر الصغير من جناب...اما هاشم بقى مع بشار كيهضرو معاه هو وحسام...حتى جا عبد القادر وقف عليه شاف فبشار بواحد شوفة مغزى ديالها باين ديال رضى..فرح بزاف الي واخا داكشي الي دوز هو وعمو سيحمد من مشاكيل كانت غاتوصلهم لتطياح روح جا...فهاد الظروف واخا يكون لواحد مخاصم كايخلي خصامات على جنب ويجي من غير الي قلبو حقود ومشرار...
بشار : مي ؟!..
ع.القادر : باركة تم عند نساب سيحمد تادوز صدقة هاو ترجع...
بشار"حرك راسو وضار كايشوف فالانحاء..شحال ماجا لهاد روضة..فيكسا عينيه فواحد الاتجاه عاقد غوباشتو واضحة من فوق نضاضر شمس..حك شنايفو بسنانو وبقى سااكت..حتى تنهد وتم غادي وقف عند جدو ربت عليه ومشا فداك الاتجاه..دارو كاملين كايشوفو حتى نطق حسام..
حسام : ماشي عند عمي سيحمد...
هاشم : لا.."سكت شحال كايشوف فيه فين غادي وكمل" قبر عمك نور الدين...
ع.القادر"جمع حجبانو بحزن"..
اما بشار بقى غادي فاتجاهو...داز من حدا سيحمد وزكريا لمحو سيحمد غادي تاهو عرف فين ماشي...بقى فطريقو مستمر مسافة نيييت...حتى وقف قدام القبر..قبر الشخص الي بدل ليه حياتو كليا...الي نقولو فاليوم الي توفى فيه توقف الزمن عند بشار توقفات الحياة بالنسبة ليه...تحول من شخص طموح همو قرايتو ويوصل فين باغي لشخص زصل بصح فين باغي لكن بعقد نفسية...شخص حياتو كانت كلها فراغ...عايش على حلم واحد هو شي نهار تجي مو وتعطيه الرضى..تشبعو من حنانها وتقوليه انا مسامحة ليك دنيا واخرة...وعلى امل يكون اخ لخوتو ومعيل ليهم ومايخليش شي حاجة تخصهم...حتر شاءت الاقدار وتزوج بحبيبة...الانسانة الي فتحات ليه بيبان ناس جداد..اول باب كان باب الندم ندم على شنو دار فيها...باب الاعجاب تعجب بيها..عاش احساس جديد عليه...حتى لقى راسو كايبغيها وفات الحب بمراحل ووصل لمرحلة العشق والي ولات بالنسبة ليه هي الانسانة الي خلاتو يكون انسان عندو ناس تخاف عليه تبغيه..ابسط الامور عندنا هو كاتشكل عندو فرق كبير...
كلهم بقاو كايشوفو فيه من بعيد...حتى تبعو عبد القادر تاهو فرصة وزسارة لقبر ولدو...شوية تبعو تا هاشم وحسام...
فهاد الاثناء كانت متكية ففراشها شاعلة تلفازة الي فبيت نعاس كاتفرج فواحد سيري فنتفليكس دوز بيها وقتها...حتى صونا تيليفونها هزاتو من حداها شافت المتصل وجاوبت فالحين...
حبيبة : حبيبة ديالي..ساليتي...
سناء : انا لتحت حلي ليا الباب نطلع وندخل راسي ياك بوحدك..
حبيبة : هي بوحدي...
قطعات معاها وناضت بشويا عليها...مشات لاباراي ديال لانتيرفون حلات ليها الباب من تحت وحلات الباب ديال برطما ورحعات لبيت نعاس..حتى دخلات سناء عليها بابتسامة...
سناء"سلمات عليها" : رتاحيتي..
حبيبة : شوية.."تنهدات بحزن" عرفتي باقي داك البيبي بين عيني..ملي عاودات ليا خالتو سعيدة كيفاش ما.ت ضرني خاطري..
سناء"مسحات ليها تحت عينيها" : مسكيين..باينة بكيتي...
حبيبة : هي شوية..ماشي بزاف.."بقات ترمش فيها"..
سناء : ههه باينة على وجه طراح...ماعلينا درتي ليزاناليز...
حبيبة : اه..غذا فالصباح بايخرجو عطيتهم جيمايل ديال طبيبة باش ماكان بنصوني عليها ونتأكد..
سناء : صافي مزيان..مهم جبت ليك داكشي علاش وصيتيني راه فوق طابلة فالمراح مقاد مصايب...وداكشي الي صيفطات ليك ماماك..اه غذا يمكن ولا بعدو غاتجي ماما وتجيب معاها خوتك..ونيت تسلم عليك حيث غاترجع لسمارة..وانا غانبقى هنا معاكم هههه...
حبيبة : درتي تسجيل القبلي ياك ...
سناء : شحال هادي..
حبيبة : بشار ماغايجي تالعشية يمكن يتعطل..بقاي معايا حتى نديرو گوتي وسيري...
حركات رايها بالايجاب وبقات معاها...النهار كلو وهي كاتفكر فالبيبي ديال ربيعة وطريقة باش توفى بقا فيها بزاف وبقات فيها حتى ربيعة بالرغم من الي داز ضرها الحال عليها حيث صعيبة وبزاف...
بقى شحال وهو قدام قبر باه...شحال من ذكرى دازت عليه بينه وبين باه..فاش كان كايجي ويمشي هو وياه لمسجد..وكانو كايتجمعو رجال دار ويمشيو يصليو...فجأة تبدل كلشي وبشار ولا انسان اخر...حيد نضاضرو مسد بين عينيه ورجعهم وهو ينوض..
ع.القادر : تصيب تجي غذا لفيرما دايرين صدقة...ماكرهت تجي..
بشار"الصمت"..
تنهد عبد القادر مخلي ليه الكرة...الى جا مزيانة ماجاش من حقو..هاد المجية فهاد ظروف بينات المعدن..طبطب عليه وتمو راجعين من عند القبر...خرج سيحمد هو وزكريا لسيارة مع حسام وهاشم تسناهم تا وصلو لعندو وخرجو من روضة...وقف بشار قدام طوموبيلتو...
ع.القادر : الله يعاون...
بشار : با...
ع.القادر : نعام اولدي...
بشار"جبد باكية الكارو من جيبو..هز سيجارة تا شعلها وسف منها..بقى شحال ساكت..شوية ضار هنا وهنا ورجع شاف فجدو" : الوقت مكسحة...خليه يرجع لدار...(على سيحمد)..
قاليه هاد الهضرة الي سمعها هاشم حيث كان واقف معاه باش يركب ويمشي معاه...حدر هاشم راسو وعبد القادر فعز الظروف تبسم وحرك راسو يلاه بغا يهضر حل بشار الباب وركب ساد عليه الهضرة مابقى بغا يسمع والو...اما سيحمد كان راكب فالسيارة وكايشوف فبشار...عينيه كاسيهم الحزن والصدمة من فوق ماتوقعش بشار يجي فهاد الظروف ويحضر لدفن...تا بان ليه ديمارا سيارة وكسيرا بجهد تا تحكو روايد مطلعين الغبارية مع كاين غا تراب تم...مشا هو وهاشم...
فدار عائلة ربيعة...فدار العزو فين كانو ناس داخلة خارجة كايديرو واجب العزاء...قصاري كسكسو داخلة خارجة بالكثرة وكاين الي مطيب المرقة بدجاج وكل واش جايب على قدو...لدرجة البوطة فدار العزو ماشعلاتش العزاية وجيران مكفيين وموفيين بالواجب على اكمل وجه...وهادي هي عادة المغاربة فالعزاء...دخلات فاطيمة لبيت فين جالسة عيدة وكنيناتها شافت فيها سعيدة...
سعيدة : امضرا...
فاطيمة : مشا خوها عزيز لفرمسيان عطاوه واحد الفنيد شرباتو وراها نعست...
عيدة : الله يصوب ويرزق الصبر..ماهي ساهلة بنيتي ماهي ساهلة..الكبدة تشوات وشويتها حارة وكيتها تكوي...سوليني انا الي مجربة بنيتي وعارفة بالحر...
هزات توريا حاجبها وحطات ايد فوق ايد وزمات فمها باستهزاء..بحركة لاحظتها سعيدة ومباركة..يمكن سعيدة فهمات علاش توريا دارت هكاك حيث كاتقول راه عيدة ماتشواتش على نورالدين وكون تشوات عليه كون تاهي سخطات على بشار...هكا كاتفكر وهاكا مصورة فراسها ان واليدين نورالدين كاع ماتشواو على كبدتهم ناسية انهم واخا هكاك ناس صبارة..وماعارفاش انهم عارفين معدن بشار وراضيين بالمكتاب وتفهمو ان الغلط وقع..حيث كلهم كانو عارفين العلاقة الي كانت كاتربط بين بشار وباه وكيفاش كانو قراب بزاف واخا نورالدين كان اغلب اوقاتو مسافر مع صحاب سربة...
وصلات العشية...فات العصر وناس صلات..بلاصة القصاري بداو يجيو الفطورات...ماغريبش على ناس البادية وعلى المغاربة ككل...هي عادات فالعزاء لازالت مستمرة الى الان...الخزاين قدام الفيرما تنصبو مع صباح وطبالي عمرو بالعزاية الرجال ولداخل لعيالات...
عيدة : سعيدة نوضي عمايا ابنيتي...
سعيدة : واخا لالة...
ناضت سعيدة لعندها عاونتها تا وقفات شادة فيها وتمو غادين خارجين من البيت قدام عينين الكل خصوصا توريا...توجهات بيها شوية بشوية تا وقفات شافت فام ربيعة وهي تحرك ليها راسها ونعتات ليها البيت داتها سعيدة تا دخلو لبيت بزوجات...شافت فربيعة الي كانت جالسة شادة داك التريكو نفسو ديال عبد الله وسااهية..جلسات حداها شافت فسعيدة..
عيدة : بركي ابنيتي تانتي...
حركات راسها وجرات واحد كرسي لقاتو تم وجلسات فيه..هزات عيدة ايدها وحطتها على ايد ربيعة وزيرات عليها تا فاقت ربيعة من سهوتها وشافت فعيدة...
عيدة : كي بقا الگليب وفين وصل بيك الحال...
ربيعة"نزلو دموعها يجرييو بدون ماترد"..
عيدة : يكون كيما كان..وگداش كبير صغير..كبدة وحدها وحرها مجهد...شحال ماكانت معزتو عندك صرفيها دعا..وفرحي داه مولاك لمكان نگول فيه سعداتك يا انسان...شفيع ليك ابنيتي نتي وباه..صدقة بغاها الله وخيركم من الناس يديها عندو شوفيها من جيهة زينة ليكم ابنيتي..مكتاب ليك مكتاب..بكي ابنيتي وماتفرطيش خرجي اش عدك وليني لا تفوتيش القياس يتگلب عليك الحال وتمشي صحة وتعصاي الله وتدي عماك ذنب صعيب.."طبطبت عليها"..انا جيت عدك ناسية اش طرا..الليلة صدقة وغذا ابنيتي تجي عمايا لدارك..تجي فين كنتي دار ناسك الي دوزتي فيها عمر وعشتي معانا الفرح والقرح...الله يرضي عليك ابنتي لا ترديهاش فوجهي...
هزات ليها ايدها وتحنات بغات تبوسها وهي تجرها ربيعة بجهد وشدات لعيدة ايدها وتحنات باستها ليها وتكات عليها وطلقات العنان من جديد لدموعها...عيدة ماشي غير جات وحنات فيها هي بوحدها غير حيث ما.ت ليها الولد وعرفات قاصحة عليها حيث سنين وهي تسنى...لا...حيث شحال من مرة سمعاتها عاودات جملة وكرراتها هي نفس الجملة ديال "ذنوب اليتيم خرجو فيا" عرفتها علامن وعرفات بلي ندمات ندم خلا كيتها ضوبلات متني ومثلث...
حطات سناء اشنو وجدات وهي تخرج عيطات ليها حتى بانت ليها خارجة من دوش غاسلة وجهها وكاتنش...شافت فيها بقلق..
سناء : مالك ؟!..
حبيبة : والو هي غسلت وجهي..
سناء : اجي تاكلي..شوي وغايجي فيصل ملي يكون جاي من المحل باش يديني لدار...
حركات راسها ودخلات جلسات كبات ليها سناء كاسها...هزات واحد الفنيد مخرجاه ليها طبيبة ديال فقر د.م شرباتو عاد باش سمات الله وبدات...هزات تيليفونها ورسلات ليه ميساج...
حبيبة : غادي تجي بكري ولا تعطل ؟!..عافاك حاول تجي بكري بيتك..
حطات تيليفون وبدات تاكل وتهضر مع سناء...شوية وهو يصوني ليها..وهي تجاوبو نيشان دوات قبل مايسولها...
حبيبة : مابيا والو انا بيخير هي بيتك...
بشار : حبيبة !!..
حبيبة : والله ماكاين حاجة خايبة "صرطات ريقها شافت فسناء ورجعت حدرت عينيها ودوات بشوي زعما ماتسمعها سناء ساعاك صوتها وصل لدرب غلف حيث بغاتو ينخافض ههه"...هي بيت تجيب معاك عشا وبيتك تكون حدايا وتعشا معايا...
سناء"خرجت ليها ضحكة وجمعتها فالبلاصة وضارت لهيه زعما دايرة راسها ساهية...
بقات هي وياها تا وصل الوقت وجا فيصل صونا على ختو باش تنزل..سلمات عليها وخرجات فحالها...
شوية وهي تنوض ومشات لداكشي الي جابت ليها سناء وحطاتو ليها فوق ناموسية...تأكدات منو ومشات هزات شي حوايج من ماريو وخرجات تكات فوق الفوطوي شعلات تلفازة كتكمل مسلسلها حتى اذن العشا وهو يصوني ليها بشار قاليها شوية ويجي...هزات تيليفونها وهي تمشي لواحد الاوديو سجلاتو بصوتها عاودت سمعاتو مزيان...وناضت لبيت سداتو...ورجعات بلاصتها...دازت نصف ساعة وهي تسمع صوت السوارت فالباب...تقادت فبلاصتها حتى دخل هاز فايديه شي ساشيات من نفس ؤيسطو فين مولف كايجيب ليها العشا شي مرات...دخل لكوزينة حطهم وخرج كايسوس فايديه تا قرب لعندها وهي توقف تاهي..تحنى عندها عنقها وباسها فعنقها بوسة بورشاتها...
بشار"دوز على حنكها بصبعو" : هانيا...
حبيبة"حركات راسها وبقات كاتشوف فيه بعويناتها الخوضر..كانت فيهم لمعة فشكل...كانت كاتبان بحال الى غاتبكي ولكن هي لمعة ماشي ديال بكا...اول مرة كاطول فيه شوفة اول مرة ماتوثرش واخا را لداخل قلبها كايضررررب...ماعارفاش كيفاش غاتكون هاد الخطوة الي غادير واش غاتمشي كيف بغات هي ولا لا...واش غاتنجح هضرة طبيبة نفسية الي مشات عندها وكان احد نصائحها...
~~
مريم"طبيبة نفسية" : كايعطيك الهدايا كايخليو اثر عندك..وحدة من الاسباب گلتي خلاوك تبدلي نظرتك عليه فاللول وتشوفيه من جانب اخر وخلاك تعيشي تجربة جديدة فحياتك رجعات عليك بالايجاب من بعد...خليه حتى نتي يشوف منك حوايج يرجعو عليه بالايجاب...عطي هدايا ولكن هدايا من نوع اخر...سوايع..قادر يشريهم واخا منك مختالفين...روايح تاهما نفس شيء...حوايج..الخ...لكن شنو بان ليك تعطيه كادو يرجع عليك نتي وياه بالايجاب...
حبيبة : بحالاش..
مريم"حطات الايباد وربعات ايديه معوجة فيها راسها بتركيز" : بغيتي تعاملي مع انسان مرض فنفسيتو..عاش مشاكيل خلات فيه عقد نفسية وصلاتو يضر راسو...
حبيبة"حركات راسها"..
مريم : شنو الحوايج الي ماعاشهاش "بشار"..ولا نمشيو لاسهل حاجة...اشنو الي كان عايش وتوقف مباشرة من بعد ما وقع الحادث ديال باه...
حبيبة : روتين حياتو...
مريم : مثلا...
~~~~
حسات براسها كايتحرك وهي تفيق من سهوتها فيه...تبسمات ليه وحطات ايدها فوق ايدو الي شادة وجهها...وقربات ليه اكثر حتى عنقاتو وحطات راسها على صدرو...
حبيبة : مشيتي لمقبرة !؟؟.(هزت راسها شافت فيه)..
بشار"حرك راسو"..
رجعات حطات راسها تاني معنقاه وهي تنهد تنهيدة طويييلة..غمضات عينيها وصرطات ريقها...حتى حسات بايديه ضار عليها وضغطوها اكثر عندو وبدا يحك على ضهرها بلطف حسات براحة كبيييرة ومع هاد الراحة كاينة فرحة كبيييرة واخا فيها قلق كبيير لكن العزيمة كاينة...شوية وهي تهز راسها وشافت فيه...
حبيبة : بيتي دوش ؟!..
بشار : ضروري...
حبيبة"حركات راسها" : غادي تلقى حوايجك فالدوش.."هز حاجبو"..بشار...
بشار : ؟؟..(كايشوف فيها بقلق حيث كاتبان ليه فشكل ماشي كيف مولفها..دارت حركات جداد)..مالك ؟؟...
حبيبة : عارفة باتجي فشكل وغريبة (عينيها غرغرو)..عارفة بتگول علاش وكيفاش...
بشار : حبيبة شنو كاين...
حبيبة"شدات ليه فايدو وزيرات عليه" : بشار بيت نطلبك طليبة..عارفة ماتتخسرش ليا خاطري..دير ليا خاطري فهادي وتبعني..
بشار : فين ؟!.
حبيبة"جاب ليها ضحك بديك فين" : ههه تا فين..زعما بيت نقصد تبع هضرتي...واخا ؟!..
بشار : حبيبة تحرگي گولي اش كاين ماعنديش جهد هاد ساعة نخدم دماغي نفهم راسي...ياك لباس...
حبيبة"شدات فايدو وزيرات عليه..وهي تبدا تعاود ليه اشنو بغات...هضرتها من ناحية راه عادية وزوينة لكن هو جاتو فشكل منها..بقا كايشوف فيها وهي كاتطلب فيه يدير اش بغات..حتى كملات..بقات ترمش فيه ببرائة عينيها مغرغرين...وهو قدامها مغوبش كايحاول يستوعب اش قالت..حتى حرك راسو..توسعات ابتسامتها تا بانو سنانها بضحكة...طبطب عليها وهو يحيد ساعتو من ايدو وجبد تيليفون وبزطام حطهم تما حداها ومشا لدوش..وهي تمشي لتيليفونو هزاتو وحطاتو فوق داكشي الي حاطة فوق ناموسية...وخرجات لكوزينة شافت اشنو جاب..بان ليها جايب حتى واحد العلبة فيها سوشي الي كايعجبها حطاتو جنب لهيه وحطات شي لاخور...
داز وقت لابأس به خرج من الدوش لابس حوايجو الي حطات ليه تما...جاه غريب داكشي الي حطات ليه شحال هادي مالبسو كانت فوقية بيضة غا خرج لمحاتو من كوزينة عينيها طرطقو بالقلوبة جا فيها كايحمق هيبة وحروشية زايدة...يلاه غايحل باب البيت وهي تعيط ليه...
حبيبة : ملي تشوف اش كاين سير لتيليفونك رسلت ليك اوديو..
هز حاجبو مافهم تالعبة معاها تابعها فهبالها حيث طلباتو وضرباتو فالوتر الحساس ديال يدير ليها خاطرها تبعها...حل الباب ودخل لبيت..ضار هنا وهنا ورما عينيه لفوق ناموسية...محطوط فوقها كرطونة كبيرة فالابيض وضاير عليها سينتة فالاسود معقودة وعليها بابيون...هز الفوقية شوي من تحت برزطاتو ممولفهاش...ومشا لديك الكرطونة وقف قدامها بدون مقدمات حيد ديك سينتة وهز تيليفونه دخل لميساج الي رسلات ليه يلاه طلقو كايسمع وحل الكرطونة حتى تصدم من اشنو شاف...
"مصحف شريف وحداه سجادة وتسبيح"..
كيف حل ديك الكرطونة عطاتو ريحة المسك والمنظر قدامو ماحسش براسو حتى تسللات ليه تبوريشة فشكل...
شكون فينا الي يشوف هاد الهدية ومايحس بوالو..هدية قيمتها كبييرة ومايصولوهاش فالقيمة كل من روايح ذهب صيكان وسوايع...عمر شي حد فاتحو فهاد الموضوع من غير طبيب نفسي ديالو "محمد"..اما عائلتو عمرهم قدرو يزعمو يجبدو معاه هاد المسألة...جلس جنب ديك الكرطونة وحط ايدو فوق المصحف طبعا موضي حيث هذا هو طلب حبيبة فاش قالت ليه دير ليا خاطري وهو...
~~~
حبيبة : بيتك فاش تمشي دوش توضى عافاك..هي سمع مني وبتعرف هي مرة وحدة سمع بلا متسول والله حتى نگوليك
~~~
هو فينما كاينعس معاها كان كايتوضى...لكن الوضوء ديالو ماكانش مطبق كامل..مكانتش موراه صلاة...دابا قدر يحط ايدو فوق المصحف موضي طاهر...رجع هز تيليفونو وطلق الاوديو ديالها بصوتها...
حبيبة : عارفاك دابا بتسمع اوديو ديالي ونتا يا سمعتي مني وجالس حدا الكادو الي خذيت ليك...ولا سمعتيه عشوائي وماكاينش حدا الكادو...انا طلبت زهري وطلبت من الله تكمل الخطة ديالي الي رسمت...دابا بتكون كاتسمع وانا بعيدة عليك ماشي بعييدة هي بتكون وحدك فالبيت دابا..."سكتات شحال ورجعات كملت"...قدامك مصحف وسجادة وتسبيح...مالقيتش حسن من هاد الكادو...مكاينش ماحسن من انك تبدا حياتك معايا ونتا تاتصلي...بشار انا نهار "حنحنت حشمانة" بيتك..بيتك حيث شفت فيك معدن زوين...حنين بزااف عليا..وقفتي معايا فوقت صعيييب واخا تعارفنا اول مرة فليلة الي كان ممكن عمرك باقي تشوف وجهي فيها حيث كانت صعيبة...ولكن الله خلانا نبقاو مع بعضياتنا وحطك فطريقي تعاوني ونبغيك..وحطني فطريقك باش نكون معاك باش نبدل ليك حياتك...يمكن بزاف عارفين معدنك زوين ولكن حتى واحد ماعارف اش تتسوا...نتا ما مريضش نتا هي عشتي مشاكيل وظروف الي كون عشتها حتى انا بنكون يمكن كثر منك...ماعشتيش حوايج عاشوهم ناس وعشتهم انا..مالقيتيش الي يشد بايديك لهادشي...قريت فتقريرك انك حاولتي ثلاثة المرات تقت.ل راسك ولكن مانجحتيش...حاولتي موراها تبعد وتعيش كاع البليات...عشتي تا تاضرب راسك...تاتجي الحالة وكاتوقف على رجليك موراها...هادشي ماشي هي حيث صبار...حيث الله باك تكون انسان جديد...عطاك فرصة وثانية عطاك بزاف تالفرص واخر فرصة هي انا...عارفاك كنتي تاتصلي كل وقت بوقتو مع باك الله يرحمو...مع جدك مع عمي هاشم...مع رجال دوار...ولكن ؟..
عرفتي اشنو الي خلاني صبرت وماوقع ليا والو من ورا المشاكيل الي دازو عليا.. معاك مع واليديا ونهار عرفت اش وقع ليك وبمرضك..."الصلاة"..نهار بديت تنصلي كان نص فيا مرتاح ونص لاخور صابر...اما كون وحدة بلاصتي فهاد العمر ماتصبرش..نهرب ولا حتى انا نقت.ل راسي...بشار انا بيتك بكلشي فيك بعيوبك حتى هما...كلشي فيك كامل تبارك الله ولكن كلشي بايكون ناقص ونتا بعيد على الله...عمرك جربتي تقرب من الله...حاول تجرب بتلقى راسك مرتاح كثر واخا يدوزو مشاكيل عالاقل بايؤزقك الله صبر...هادشي كامل داز مانشكرو فيه حتى حد من غير الله هو الي ليه الحمد...اوديو ديالي بايجيك طويل شوية وانا عارفاك نفسك ضيقة متتصبرش هههه...
(سكتات شحال وهو كايتسنى تهضر تا حدر عينيه حساب ليه اوديو حبس وهي ترجع كحبت عرف راه كانت تتبكي وهي كاتسجل)...
حبيبة : بشار...بيتك تهز المصحف الي قدامك...قبل ماتهزو بيتك فاش تقرا ديك الاية تعطي العاهد لراسك انك تبدا تصلي لله قبل كل شي...لراسك ثاني شيء ولداكشي الي غاتقرا من الاية وتفهم وتلقاه تما...وهي سمح ليا فاش تعرف دابا نشرح ليك...
عقد حجبانو مستغرب من هضرتها...واخا راه البراكين شعلات فيه من لداخل حيث فكراتو بحاجة هو عارفها ولايم راسو عليها ديما وديما كان كايقول "عاصي الله وخالع عبادو"...لكن حاول ما امكن يتكالما...هز المصحف وديك تبوريشة كاتجيه راسها...بشوية تحنى باسو وايدو لاول مرة كترعد..احساس صعيييب انك تكون بعيد على الله...
حبيبة : بيتك تمشي للصفحة **(على حسب المصحف)..وتمشي للاية 49ـ50..قراها بتمعن...من بعد بتلقى واحد الورقة لاصقة تحت الاية فاش تقرا الاية...حيدها ودورها...
تبع شنو قالت ليه حل المصحف وقلبو ضررب...وهو يمشي فين قالت ليه...وهو قال "بسم الله الرحمن الرحيم".
"لِّلَّهِ مُلۡكُ ٱلسَّمَٰوَٰتِ وَٱلۡأَرۡضِۚ يَخۡلُقُ مَا يَشَآءُۚ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ، أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ"سورة الشورى..
كملها وهو يطلق الاوديو كملات بصوتها...هاد الآية تتوضح أن الله هو واهب الأولاد، كانو بنات ولا ولاد...
حيد اللصاقة كانت صغيورة غير باش تشد داك الورقة صغيرة...حيدها وهو يدورها كان فاهم الاية ولكن عينيه وساعو تصدم قلبو مشا وجا..عينيه تفيكساو على ديك الورقة صغيرة...هز راسو لفوووق ورجع نزلو..بدون شعور بالصدمة والفرحة الي تسللات...كان شعور زوين وصادم فنفس الوقت ملي سمع اخر جملة منها...
حبيبة : بيتك تسجد وتقول الحمد لله وبهاد سجدة بيت يجيو موراها سجدات صلاتك ان شاء الله باش يكون زواجنا كامل وباش يجيو ولادنا نكونو ليهم مثل زوين ونربيوهم زوين...وباش يكمل هذا...
ماكانتش ورقة عادية انما كانت ايكو..ماشي القديم ايكو جديد فيه تاريخ الي مشات فيه عند طبيبة نسائية ولبارح...ولتحت كاتبة بخطها...
«ولدنا الثاني»
الايكو الي شاد فايديه....قبل ماتقول ولدنا الثاني...كلامها..كان فاهم وحاس ويمكن قبل كان شاك انه غالبا تكون حاملة لكن كان خايف لا يتكرر نفس السيناريو ديال الاجه.اض شعور خايب مايقدرش يعيشو وهما باقي كاع مانساوه...مكاملاش ثلاث اشهر باش وقع ليهم داكشي...لكن فاش مشات عند طبيبة وماقالت ليه حتى حاجة من غير شنو قالت ليها دير حيد احتمال الحمل حيث مادارش فبالو راه غادي تخبي عليه باش تقولها ليه على شكل هاد المفاجئة...
احساس جديد تزاد عليه...هاد المرة غادي يعيشو وهو عارف انه حاملة والبيبي الي فاحشائها لحد ساعة حي ومابيه والو...يعني فرق كبير بين المرة الي فاتت ملي عرف بحملها فنفس الدقيقة عرف ان الجنين مي.ت...هاد المرة عايش...وكاينبض فاحشائها وشوية بشوي غادي يتكون ويخرج لدنيا شي حاجة من صلبو...شي حاجة الي غادي تكبر وتحامى بيه كيف تحامات حبيبة...طفل غادي يقول "بابا"...غادي يهزو بين ايديه فاول دقيقة ليه...غادي يحس انه مرغوب فيه كثر وكثر...انسان عندو هدف فهاد الحياة...عايش لراسو على قبل مرتو وولادو وخوتو...
الورقة فايدو شادها بصباعو وعينيه عليها...عينيه على ديك النقطة الي فداك الايكو...عينيه على ديك الثمرة الي فاحشاء حبيبة...العشق ديالو الانسانة الي كل مرة كاتخليه يزيد يتشبت بالحياة...لكن هاد المرة غاتخليه يعيش الحياة...يشوف هاد الحياة من جوايه اخرى...يعيش مشاعر جديدة حقيقية..ماشي تابعها وانما تعطات ليه...تكتبات عليه...
الاوديو بصوتها تسالا عند اخر جملة "ولدنا الثاني" احسن جملة سمع فحياتو...من اكثر الجمل الي بعثاث فيه الراحة...لكن اكثر حاجة خلات تبوريشة تسلل مع عروق ذاتو وتخلي قلبو يضرب بواحد راحة مايمكنش هيث فاش هز المصحف بين ايديه واخا كانو كايترعدو حيث بصح بعد على الله...من الي وقع الحادث مشا لبلية ديال شراب...بعد على طريق الله واخا هو كان انسان ملتزم فصلاتو مع باه لكن من ورا وفاة باه اش وقع ؟...بعد على الله لكن الله بالرغم من هادشي كان رحيم بيه...من بعد كاع هاد العذاب فحياتو عطاه فرص كثييرة باش يرجع لطريق...
عينيه ماحيدوش من داك الايكو...وهضرة حبيبة كاتعاود فراسو...دور عينيه لمصحف الي حط ورجع شاف فالايكو....
حبيبة كانت جالسة فالفوطوي برا جامعة ايديها عندها كاتكدد فصبعها بتوثر...لحد ساعة راه داخل لبيت لا حس ولا خبر...واحد اللحظة ولات كاتقول ياكما تصدم وطاح...
حبيبة : علاش ماعيطش...ففف هاد سكات ديالو عنداك تكون كريز ؟..يا طاح بكريز يا بايصليها معايا حيث خبيت عليه...(بالخلعة من ردة فعلو حيث شايفة صلياتو مع ختو و الغفلات الي كايدير ديال العصا هههه...تلفات وهي تقول) على الله تكون كريز..."وسعت عينيها وهي ضرب فمها" ويلي لا لا ياربي تسمح ليا الله يحفظو...(وقفات وعاودت جلست)..نمشي نطل عليه هي من بعيد...وناري (توثرات بزاف)..
فييينك نتي وفييين بشار بعدا باقي لحد ساعة مفيكسي فداك الايكو...كايشوف فيه ويعاود تقولي خايفو يكون كذوب وبغا يشبع من شوفتو...حتى عض شنايفو وغمض عينيه...تابع خفقان داك القلب...ومعاود هضرة حبيبة فراسو واكثر حاجة لمسات قلبو قبل من معرفتو بالحمل هي فاش هز داك المصحف بين ايديه...وفاش شم اول ريحة بعثات معاه ديك ريحة المسك...ريحة الطهارة ريحة النقا ريحة التقرب من الله...ريحة الراحة والدفء...عمر شي حد مازعم يجبد معاه هاد الموضوع...عمر شي حد ما قاليه افلان نوض تصلي...مكانوش كايزعمو وماكانش كايجي بزاف اصلا لمغرب وكان عايش فبلاد ماليها اصلا بعادين على دينهم...وكان عايش الوحدانية ومنطوي علر نفسو...احيانا اذا ماقلنا ديما خاصنا شي حد يشد بايدينا شي حد يكون فايتنا فشي حاجة زوينة يوريها لينا وينصحنا بيها اكثر حاجة واحسن حاجة هي شي حد يشد بايدك با شتقرب من الله واهم نقطة ومركزها هي "الصلاة"...عماد الدين...
هنا حل عينيه من هاد التفكير...وحط داك الايكو جنبو تما...وهو يدور جيهة الكرطونة...خشا ايديه وهز ديك الصلاية...الي اختارتها ليه على ذوقها ملي مشات سناء عند واحد المحل كايبيع حوايج النساء الخمار الخ..وحتى فوقيات رجال هي منين خذات ليه الفوقية الي لابس...الصلاية كانت مبطنة ولونها الصلاية كان ابيض...
التفكير خذا منو وقت طويييل باش استوعب اشنو هادشي...باش حلل ديك الراحة الي تبعثات فيه...منين جات هاد الراحة ؟..مني كايتحلو مشاكيلنا...منين كايرزقنا الله الصبر الى وقعنا فمشكيل...شكون الي كايحل لينا باب التوبة ديما وشكون الي كايغفر لينا وشكون الي رحيم بينا من غير الله سبحانه وتعالى وشكون الي يستحق الحمد والشكر...وحده لا شريك له...
الصلاية تفرشات مع القبلة...ضار هز داك الايكو وجلس فوق الصلاية...رجع شد الايكو كيشوف فيه..هز راسو وضار ناحية الباب ورجع شاف قدامو...رجع قلبو كيضرررب بجهد...مابغاش يهضر ولا يقول حتى كلمة بغا يدير شنو قالت ليه حيث هضرتها على صح...الايكو بقا فايدو وتحنى على ديك الصلاية ساجد لله...اول سجدة شكر طلبات منو...اول سجدة خلاتو يرتاح..اول سجدة من بعد انقطاع دام لمدة 18 سنة...
واقفة بعيد شوية كاطل عليه... دار ليها خاطرها ودابا سجد عرفات توصل او ترجعو شوي بشوي لله...واخا جلس غير ربع ساعة من الي دخل لدابا هي جاتها بحال العام وهي كاتسنى غير باش تشوف هاد سجدة الي دار والي طول فيها ومغمض عينيه بخشووع...
اكثر منظر عجبها هو شوفة بشار وهو ساجد سجدة شكر على ما رزقه الله...عينيها غرغرو بزاف حتى مابقات قدرات تحكم فالدموع.... على الله تكمل فرحتها ويبدا يصلي ويرجع لصلاتو...رجعات جلسات فبلاصتها مرتاحة وفرحانة من شنو شافت...مرة مرة تمسح دوك الدموع الي كاينزلو...شوي حتى سمعات سميتها بصوته الخشن...
بشار : حبيبة...
وقفات موسعة عينيها...هاهي وصلات نوبتها وغادخل عندو...كيفاش غاتشوف فوجهو دابا وهو عارف...كيفاش غاتكون ردة الفعل ديالو...كيفاش غاتصرف وتهضر...صرطات ريقها وزيرات على ايديها وهي تمشي عندو بشوية حتى وقفات عند الباب حادرة راسها...ماشافت كاع فيه جايا حشمانة بزاف...حتى سمعات صوته من جديد...
بشار : اجي عندي...
عضات شنايفها وحركت راسها...تقدمات لعنظو بشوية تاني جات بغات تجلس حداه حتى شدها من ايدها وجلسها جنبو...هز ليها وجهها من ذقنها...
بشار : شوفي فيا...
حبيبة"صرطت ريقها وهزات فيه عينيها..مع هزتهم نزلو دموعها من جديد"..
بشار"مسحهم ليها بصبعو" : ششش...مالك...
حبيبة"كاتبغي تهضر ويتدلاو شفايفها لتحت...كاتحاول تحبس البكية حتى بدا صدرها كايطلع وينزل...ماجاوباتوش وماسولهاش مازال...جرها لعندو معنقها بجهد...خشات وجهها فصدرو وعطاتها لبكا...يلاه البكية الي عياتها هاهي خرجتها باش تنفس... بقى مزير عليها كايدوز على ضهرها ودراعها بايديه...خشا فمو فشعرها كايبوس ويعاود حتى هز راسو لفوووق ورجع قابلها معاه.. مسح ليها عينيها وعاود وهي منزلة راسها...
بشار : حبيبة...ششش...هانيا !..
حركات راسها وهي تسكت واخا باقي كاتشهق مرة مرة...رجع قرب عندها حتى حسات بشنايفو على جبهتها...كانت قبلة جبين عامرة وهازة بزاااف ليها...طول فالبوسة حتى غمضات عينيها وشدات ليه فدراعو...عاد طلق منها وهز ليها راسها تاني تا شافت فيه...هز داك الايكو وراه ليها وقال...
بشار : كانسمع...
رمشات فيه شحاال...عاد فهمات انه قصد تعاود ليه كيفاش عرفات من عند طبيبة...حركات راسها ببطء وشابكات ايديها مزيرة عليهم عاد حنحنات منضفة حلقها باش بدات كاتعاود ليه كيفاش شكات فراسها والاعراض الي جاوها الشي الي خلاها تمشي عند طبيبة...
فلاش باك...
ناضت تابعة الفرملية لبيت فين كاين جهاز الايكو او قاعة الفحص بشكل عام...تسطحات فوق البياص وهبطات السروال شوي حتى خشات ليها مشوار بين سروال وكرشها لتحت...خوات ليها جيل تما وبدات كاتدوز بديك لاباراي وتورك مزيان وهي حاضية الشاشة قدامها...مرة تكمش حجبانها مرة تشوف عادي...وحبيبة متبعة بعينيها...احساسها كان كبييير انها حاملة...كملات ليها...
طبيبة : مسحي ابنتي واجي عندي لبيرو...نوضي هي بشوية عليك...
دارت شنو قالت ليها وناضت نيت بشوية عليها...قلبها كايضرررب بزاااف...عارفة اش غاتقوليها يمكن جايا دايرة بحسابها ولكن خايفة تقوليها راه تاهو ماصدقش ليك تاهو ميت فكرشك...عاد انه حذراتها ماتحملش مورا الاجه.اض عالاقل حتى تفوت شهور...زيرات على ايديها كايترعدو...وهي تجلس مقابلة معاها وبعينين واسعين بالخوف حركات راسها...
منال"طبيبة" : تايبان ليا عارفة ابنتي n'est ce pas ? ماتگوليش ليا هي بيتي ديري كونطرول...لا ؟..
حبيبة"حدرت راسها وحركاتو" : اه شرحت ليك شنو وقع ليا...
ناديا : شنو ابنتي ؟!..
حبيبة"تنهدات ونطقات وعينيها فالارض" : حا حاملة اماما..
ناديا"وسعات عينيها"..
منال : الايكو (جابت ليها الفرملية الايكو حطاتو قدامها تا تقادو فضوصي ديال حبيبة وشافت فيها)...من اخر فوص كوش علمتك من باب الواجب فحالة غاتفكري تحملي ابنتي احسن فترة هي تفوتي 6 شهور...ثلاثة اشهر غير البداية ديال انه الرحم غايبدا يرتاح...اما حسن ستة شهور باش تكوني طبيعية فالحمل ديالك من غير الى كتب الله شي مشكيل هكاك...
حبيبة"بعيون خايفة بجهد" : الي فكرشي دابا مابيه والو ياك ؟..
منال"حركات راسها" : حاليا مزيان...ان شاء الله يبقى مزيان...باش نحط بالصورة ابنتي نسبة الحمل من بعد اخر فوص كوش بشهور قليلة كاتصدق بنسبة 35 ٪...يعني عندك 65 فالمية انه مايصدقش..غادي تجيك صعيبة ابنتي ولكن واجبي كايحتم عليا نحط بالصورة وتعرفي اشنو كاين...وخطر عليك حتى نتي...
حبيبة"بخوف" : عافاك مابيتوش حتى هو يمو.ت...ندير اي حاجة عافاك حتى راجلي بايحماق الى وقعات شي حاجة ليا انا كثر...
ناديا"هزات راسها من اخر جملة قالت"...
منال : دابا نتمناو انه يبقى مزيان سوا كان حمل طبيعي او غير طبيعي...حاليا حطيتك غير بالصورة...نجيو دابا لما بعد ماعرفنا انك enceinte...الايكو الي درت ليك كايبين انه مزيان لحد الساعة...دابا غادي نعطيك دي فيتامين تبعيهم بالحرف...وغادي نعطيك نظام غذائي حتى هو تبعيه بالحرف ماتنقصيييش وماتزيديش...هادشي الي غانقوليك يطبق كيف ماهو...غادي تصبري حتى تفوت واحد المدة عاد تبداي ترجعي عادي...
حبيبة"مسحات عينيها وحركات راسها" : اه اه ندير...
منال : اول حاجة هاد دموع مايبقاوش ينزلو حيث غاتبعدي على التوثر والاعصاب...بعدي على اي حاجة تخليك مستيريسيا...بالنسبة لنظام الغذائي نتي ديجا عند فقر د.م...غادي نكتب ليك تحاليل ديريهم ديالو...دواك متبعاه (حركات راسها)..ديجا شربتي شي عشوب...
حبيبة : قبل مانحمل...
منال : حيديهم بمرة (شافت حبيبة فناديا وهي تحرك ليها راسها زعما ماشي مشكيل)...غادي نضاعف ليك لادوز ديال دوا الي عندك مي حتى نشوف ريزيلطا ديال ليزاناليز الي غاديري..
كاتعاود ليه ديطاي ديال زيارتها لطبيبة....ماكانتش غاتخبي عليه وعمرها تخبي عليه شي حاجة لكن كان هدفها انه تقوليه الحمل بطريقة زوينة وفنفس الوقت ترجعو لطريق الله تنهدات ورجعات كملات ليه ثاني اشنو قالت ليها طبيبة...
منال : الماكلة ديالك تكون معتامدة اكثر على كبدة طيحال ولحوم الى تشهيتيها خاص تكون خالية من الكوليستيرول وبعدي على الحوت بصفة عامة...واهم حاجة الي طبقيها هي تبقاي ناعسة وماتحركيش..من غير لا بغيتي تمشي لطواليط او تاكلي..والعلاقة مع راجلك ممنوعة حاليا...حاولي على راسك ابنتي فهادشي هذا امر حساس بزاف الى بيتي تحافظي على البيبي ديالك...(سكتات وشافت فيها) شفتي علاش حسن حتى تكملي ستة شهور..من غير ان رحم ديالك خاصو يرتاح الا ان هاد العذاب ابنتي صعيب...وانا عارفاك قدها مادام عندك اصرار تحافظي على البيبي ديالك...وباش نعطيك امل شوفي تبارك الله كمل شهر وكايبان مزيان...
حبيبة : بيتو يبقى مزيان...
منال : الوغ تبعي هادشي...وكل عشرين يوم ترجعي عندي لكونطرول...ضروري كل عشرين يوم...
حركات راسها وهي كلها خوف لكن اكثر حاجة هي انه العزيمة عندها قوية...متشبتة بهاد البيبي واخا عليه خطر كبير متمنية يبقى ليها وميوقع والو حيث ماغاديش تصبر...
رجعات للحاضر من بعد ماعاودت ليه الحكاية كاملة...شافت فعينيه الي كانو مغوبشين...عرفات الى زاد تقلق اكثر من هضرتها...شدات ليه فايدو وزيرات عليه...
حبيبة : مابيت نگوليك والو حتى ناخذ ليك هاد الكادو..اول كادو مني بيت يبقى عندك حياتك كلها..هي تبقى تصلي وتحمد الله على هاد الفرصة واخا جات فهاد الظروف واخا بايكون تكرفيص ماشي مشكيل على قبلو نصبر...
بشار : les vitamines ؟!..
حبيبة"بغات تنوض وهو يجلسها"...
بشار : شش ريحي...فين محركة ؟!..
حبيبة : هي نوريهم ليك خذيتهم كيف عطاتهم ليا...هما فيتامين ثمن ديالهم غالي على لاخرين حيث خاصين لهاد النوع من La grossesse..
بشار : گدوك الفلوس ؟..علاش ماعلمتينيش بهادشي نتحرك ناخذهم ليك...
حبيبة"شدات ليه فايدو وتبسمات" : باش ندير هاد الخطة ونفرحك...ههه ماعجباتكش ؟..انا عجباتني وفرحت حيث درتي ليا خاطري...(تلاحت عليه عنقاتو وحطات رايها على كرشو ودورات ايديها عليه مبتاسمة وفنفس الوقت بغات دغر عليه باش مايعاتبهاش)...
حبيبة : ماتقلقش عافاك وماتعصبش والله هي بيت نفرحك...
زير على سنانو..حس براسو تخربق وتعصب ثاني...ماشي من اشنو دارت ولكن الخوف كبر خصوصا ملي قالت ليه انه على خطر كبييير...وعندها نسبة قليلة بزاف باش انه يبقى عايش فكرشها ومايطيحش...غمض عينيه محاول يبقى كااالم..حتى مسد عينيه حلهم وهو يبعدها عليه...حرك راسو ناحية السرير...
بشار : تحركي تكاي...
حبيبة : بشار...
بشار : يااا حبيبة دويت...
لاحت صندالتها وطلعات فوق ناموسية وتكات...عطاها بالضهر جالس وهي دارت ايديها تحت حنكها كاتشوف فيه حتى بان ليها دار راسو بين ايديه وحدرو...بقى شحال هكاك حتى هز باكية الكارو وناض دييكت لبالكون سد عليه وبقى برا كايكمي...صرطات ريقها عرفاتو الى تخلع من هضرتها..دابا غايبقى مقابلها على ادق التفاصيل وهادشي ممكن يخنق شي حد لكن هي غادي يفرحها حيث غايعاونها باش يحافظو على البيبي...شحال وهو برا حتى كمل ودخل..حيد ديك الفوقية بقى غير بالشورط والفوق عريان...خرج من البيت بدون مايقوليها شي حاجة...كاتسمع فالتقرقيب فالكوزينة شوية وهو يتم داخل هاز فايدو بلاطو حطو حداه...
بشار : شنو الفيتامين الي عندك دابا ؟!..
حبيبة"ضارت حداها جبدات ساشية فرماسيان من المجر وجبدات ليه واحد باكية" : عندي هذا وهذا...ولاخرين كاملين فالصباح...
حرك راسو عطاها قرعة الما وهي جبدات الفيتامين شربات الي عندها وهو يحط ليها بلاطو حداها...
حبيبة : علاش جبتيه هنا ماشي مشكيل ناكل فالكوزينة...اصلا بايخصني نوض لطواليط...
"شافتو ماجاوبهاش لكن غير الشوفة الي دار فيها سكتت ليها الحس وهي تنهد جرت عندها بلاطو وبدات كاتاكل لقاتو محيد ليها السوشي وحط ليها ديك صالاد الي طلب ليه هي الوحيدة الي مافيهاش الحوت وصحية بزاف..وعصير حيث ديما كاتقادو مع هاد الصيف...شافت فيه..
حبيبة : مابيتيش تعشا ؟ علاش عطيتيني صالاد ديالك..
بشار : لا..ماعنديش جهد لعشا..
بقى معاها حتى تعشات وشربات العصير اصلا هاد الايام كانت كاتبان ليه عيانة دار فبالو مرضها وصافي...ناضت حتى حكات سنانها قضات حاجتها اصلا العشا ديجا صلاتو..ورجعات تكات وتلاح تكا حداها جرها عنقها عندو مادوا ماتكلم لحد ساعة وهادشي ماريحهاش كانت بغاتو يرياكطي لكن وقع العكس...غمضات عينيها ونعساات كاع ماحسات اصلا على سبة فالنعاس...
صوت ماشي غريب...الغريب هو هاد الصوت كايقرا فالقرآن..منين جاي هاد صوت ؟..صوت بشار هذا ؟!..رمشات عينيها وهي كاتسمع حتى حلتهم..كان يحساب ليها راه كاتحلم لكن مكانش حلم كان بصح هذا صوت بشار...حكات عينيها وهي دور كاتشوف فيه واقف لابس ديك الفوقية..هزات تيليفون شافت الساعة شحال ورجعات شافت فيه حتى حلات فمها...
بشار : الله اكبر...
و تحنى راكع ورجع وقف وعاود سجد...اجمل منظر شافت ماشي منظر سجود وانما الوقت... فرحها هو انه بدا صلاتو باول صلاة وهي صلاة "الفجر"...وفي وقتها الاصلي...
"إِن الصَّلَاةَ كَانَتْ عَلَى الْمُؤْمِنِينَ كِتَابًا مَوْقُوتا"
يتبع...
التعليقات
لا توجد تعليقات بعد، كن أول من يعلق.