محتوى القصة
واخا كيتسمح ليه انه يجي فطيارة الا انه ولف يجي مكالمي فطوموبيل مايتبرزط مع الحركية ديال المسافرين فالمطار وروتينيات الاجراءات والفريع ديال طيارة...ماولفهاش واخا را ركب فيها شحال من مرة لكن الي ولف شي حاجة ولفها والي لقى راحتو فيها لقاها خصوصا انه كيشد الباطو الي كايجيب نيشان لطنجة ومن طنجة كايجي بسيارة...
بقا شاد ليه ايدو الصغيورة بين ايديه الضخمة..كيتحسس فيهم سخااان الحرارة لاعبة عليه ومخلياه بلا حول ولا قوة...الوحيييد الي كايشوف فيه بشار الحياة..الصدق المحبة كيشوف فيه ديك الصفحة البيضاء الي مستحيل تلوث بفعايل كحل الراس..مستحيل تقاس بالنفا.ق والضلم..مستحيل قلبو الي كيضخ د.م يرجع يضخ القطران..مافيهش الكذوب مافيهش القصوحية..عامر محنة ومزين شفايفو بالبسمة يخليك تحس بالحب جيهتو يخليك تفرح بشوفته يخليك تبسم بلا هواك وقلبك يرفرف لا شفتيه...حنييين بزاف وشاري تيقارو لكن مع الاسف معرض للاهمال ومع الاسف ضحية ناس نقولو "ماراضينش بيه"....
بقات توريا فقاع دار هي ولاخرين الا كريمة وربيعة وسبحمد الي طلعو ينعسو...بقى عبد القادر مكمش حجبانو تا حنحن...
ع.القادر : كل يلحگ خيمتو يصبح ويفتح...نوضي لحاجة غمضي عينيك...هذا مكتاب ماعند العبد مايدير..نعلو شيطان وصباح نتيسرو عندو...
توريا"غييير كتنهد وتصوط وتلولب فراسها بحزن"
هاشم"ناض وقف" : داكشي الي كاين...السهير ماغاينفع بوالو نوضي نتي تنعسي نوضو تانتوما صباح ميعادنا مع بونبر نمشيو عندو يلاه غمضو عينيكم...
سعيدة"ضارت عند حبيبة الي كانت حادرة راسها حيث بقى فيها بزاااف يوسف ومعزتو عندها كبيرة" : نوضي بنتي تال صباح ونمشيو نشوفوه...
حبيبة"بصوت منخفض" : وت تفيقيني ياك ؟
سعيدة : وااه نفيقك كوني هانية..."حركات حبيبة راسها وتنهدات وهي تنوض طلعات لبيتها اصلا حاسة بعينيها بغاو يلصقو عيااات من كل جوايه غير مكابرة وساكتة"...
ناضت سعيدة دات عيدة لبيتها واشراق غمزاتها مها تطلع حسام شير ليه باه ومشا طلع زكرياء تبع مو وباه كي طلعو تاهو طلع ينعس...هاشم شاف فتوريا وحنحن...
هاشم : ختي توريا مكاين لاش تبقاي وحدك هنا نوضي رتاحي مايكون غالخير...
توريا"هزات فيه عينيها.كتشوف فيه شوي وهي تهبطهم ودوات" : سير هاشم لحگ خيمتك ماعليش شوي ونطلع...
يلاه بغى يهضر هاشم وهي تنغزو سعيدة وضار عندها حركات ليه راسها وغمزاتو بمعنى خليها عاى راحتها..شاف تا عيا وعنق نعيمة بجنب وطلعو لبيتهم...مع دخل هاشم بدا يحيد فحوايجو ونعيمة حداه حيدات شال طواتو ورجعاتو بلاصتو و جلابة علقاتها فبلاصها مشات لجنب ناموسية جلسات كتفرك ففروة راسها من بعد ما طلقات شعرها وتنهد وتسوط بتعب تا كمل هاشم لباسو تيشرت وشورط قصير ومشى تلاح حداها كيحك فشعرو ويدوز على جبهتو بتعب....
سعيدة. : من لول ماعجبنيش يوسف من لول...كنگوليها نرجعوه لسبيتار كتگوليا عطيه غالمخينزة وليمون...
هاشم"كيمسد فعينيه باغي ينعس بالعيا تجمع عليه كلشي نهار الي كيرتاح فيه ماصاب فيه راحة...زفر ونطق" : كيبان ليا نسد سيمانة نرد معاه البال خاصني نكون معاه منعول على حد سيحمد جد مو ماعندو كبدة على حد مقابل ليا غا سواق...
سعيدة"تكات حطات راسها عالمخدة" : دابا اش غايديرو معاه ؟
هاشم : خاصو يبرك فالكلينيك...يديرو ليه شي تحاليل على ما گاليا طبيب يجبدو ليه شي ما ويديرو تحليلة يعرفو ميكروب منين جاه...ويكملو ليه الدوا ماخاصوش يخرج من تم..مينانجيت صعييييبة ومناعتو ضعيفة...
سعيدة"حركات راسها وسكتات يلاه غمضات عينيها اتا طلقها لسها خلاها وسعاتهم على جهد جهدهم"
هاشم"حنحن كيحك فنيفو" : جا بشار...
سعيدة"ناضت على جهدها تا قفز" : هاويلي ؟ تا كيفاش هاو ؟
هاشم : تي شتك وليتي تنبحي...
سعيدة"عينيها خارجين" : واش كتهضر بصح اهاشم ؟ واش جا ولا تخايل ليك فشي قنت...
هاشم : صلي عالنبي..تي كيفاش تخايل ليا فشي قنت...كنهضر معاك اسعيدة...جا صبااح وعيط ليا داكشي باش خرجت ياك گلت ليك نخرج من حمام وجدي ليا فطوري...
سعيدة"كترمش" : اييه حتى خرجتي تجري ماعرفتك نتا وولدك فين زدتو.."سكتت شحال كتشوف فيه ممثيقاش ماكانتش ليها عالبال يجي.." كي طرا ليه حتى جا ؟!..وفين هو دابا...
هاشم : يكون عند يوسف...ماعرفت باش تبليت صباح تا صونا ليا بنمرة ديال المغريب يمكن شراها من شي قنت وخدمها وعيط ليا صدمني فلول...واخا مقلق منو مشيت لعندو...
سعيدة : وعلاش جا ؟ فراس توريا...
هاشم : مافراسهاش وماعرفتش علاش ناوي...حدو گاليا جي عندي ومشيت عندو..اش بغى يدير ماعطانيش راس الخايط سلام سلا لباس..جا عياان بان ليا ماشي تالهيه مزالين كنهضرو تا عيطتي ليا على يوسف...
سعيدة : غايجي هنا ؟!...غايجي يفك مشكيلتو مع مرتو الي خلا ؟...ماحسيتي بوالو زعما ؟
هاشم"بقى شحااال عينيه لتحت كيخمم..تا عوج فمو وهز كتافو وتنهد" : ماكيعطيش راس الخيط..الي فراسو فراسو اشنو هو يعلم الله...الايام تورينا دابا عقلو خرج غا مع يوسف..
سعيدة : لا سول فيا گوليه غير ينساني مابقى عندي معاه هضرة ولا لغى(كلام)...
هاشم : من بعد ونهضرو فهادشي من بعد..بان ليا جاي ومكيبشرش بالخير...ماعجبنيش فهاد المجية كاع...
سعيدة : كيفاش !!
هاشم"تنهد وتكى حط راسو" : ناوي على شي حاجة...
قدام سرير يوسف كان واحد الفوطوي كبيير وقدامو طابلة صغيرة...حطوه فغرفة كبيرة ومريحة..مادام فلوس كاينة يتحط فالعينين...كانت المصحة اسميتها "الاطلس" الي جات مباشرة امام مصحة الامومة ب تارگة...
مربع ايديه وكيشوف فيه هز معصم ايدو شاف فساعة كانت جوج ديال الليل...مرة مرة كينوض يحط ايدو على جبينو يقلبو ويرجع يجلس...حتى شوي بدا يسمع انيين ناض على وقفتو توجه لعندو...
بشار"عوج فيه راسو وعلى ملامحو الخوف" : يوسف !!...
يوسف : انننن...اسيي (راسي) ما بغيت ماا...
بشار ضار جيهة الكومدينو الي عند راسو كانت قرعة ديال الما حداه وباكية ديال الگوبلي (كيسان ميكة للاستعمال الواحد) خوا ليه الما ومد ايدو لريمونت گعد ليه الناموسية شوي وعطاه الكاس كيشربو بالخااااطر جغمة بجغمة...حتى سد يوسف فمو..
بشار"حط الكاس وضار حط عليه ايدو لقاه دافي الحرارة بدات كتنزل...رجع ليه ناموسية لوضعية الاستلقاء وبقا واقف شحال تا حس بيه نعس تاني...شوي حتى دخلات الفرملية الي كتراقبو وتكتب فتقرير حالتو غا بان ليها واقف وهي تفزع خلعها وخلعها حتى انه ماضارش تحل الباب وماشافش شكون دخل وهذا كيعني انه مامسوقش لشكون جا ولا شكون غايجي...
هي : بونسواغ...
بشار"لا رد"
حدرات راسها ومشات عبرات ليه طونسيون هزات ليه ايدو بجهد تا حل يوسف عينيه ورجع سدهم...حتى قفزات من صوته فاش نطق وخا دوا عادي...
بشار : ششش بشويا اشريفة !!..
هي : غير طلعتها بزربة باش ميفيقش درت ليه هاكاك..
بشار"بنبرة صوت ثقيييلة" : لا... ردي بالك ايدو ماشي هي ايدك وايد شي حد عادي..جا لهنا باش يترد ليه الباال..مالكم فهاد تڤنفين ديال الحبس...
بغات تهضر وهو يهز صباعو زوج موقفها وشير ليها براسو تكمل خدمتها...دورات ليه باندة وخدمات لاباراي ضغط تا تنفخت مزيااان وهي تبدا تفش وعبرات ليه ضغط قيداتو...شافت ليه سيروم كان قريب يسالي قلباتو لا يكون ممدوزش...عاد تمات غاديا تا وقفها...
بشار : spécialiste(المختص) الي شاف حالتو مزال خدام دابا ؟
هي : عندو عملية دابا..
بشار : شحال جهدو يسالي ؟!
هي : م ماشي طويلة..."شافت فساعتها" نص ساعة ويخرج منها
ضار جيهة خوه وربع ايديه خلاها واقفة حساب ليها غايهضر ولا يقوليها شي حاجة لكن هو خذا شنو بغا منها وضار عند خوه...حدرات راسها وخرجات اما هو رجع جلس فالفوطوي تسنى نص ساعة وزيادة وهو يهز تيليفونو دارو فجيبو وناض توجه لعند طبيب المختص الي علموه فين كاين..دق الباب سمع صوته كيعطي الاذن بالدخول..حل الباب ودخل حرك ليه راسو...
طبيب : خو يوسف الهاشيمي لا ؟
بشار"حرك راسو"
طبيب : تفضل اولدي جلس...كاين شي مشكيل فسيرفيس ؟
بشار"حرك راسو ب نفي" : لا.. "قاد تيشرت ديالو وحط مرفقو جنب الكرسي كيدوز بصباعو على لحيتو من تحت" ..بغيت نعرف حالة يوسف بالضبط..اشمن سبب خلاه وصل لهاد الحالة..
طبيب"كمش حجبانو مستغرب من سؤالو...وحط ستيلو" : كيف كتعرف حالة الاخ ديالك جات نتيجة مناعة ضعيفة...على حسب الملف الي عندي ديالو بالي ديجا جا المستعجلات هادي اكثر من اسبوع بسبب ارتفاع الحمى فمرات متكررة متفرقة...وكان عندو"كيقرا ليه فالملف" نزيف فالانف ديالو جا فحالة مستعجلة "بشار هز حاجبو"
بشار : نزيف !!.."رجع حط صباعو على فمو اشار ليه باش يكمل"
طبيب : وي...الطبيب فالمستعجلات باستشارة مع طبيب من نفس الاختصاص ديالي علمهم الى تكرر الوضع يرجعوه على وجه سرعة واخا منكذبش عليك كان عليهم من الي طلعات السخانة فاليوم الموالي يجيبوه على حسب ما شرح ليا العم ديالو سي هاشم...
بشار : donc هما تعطلو باش جابوه لهنا ؟؟.."حك شنايفو بزربة" كمل...
طبيب : ملي درنا ليه ليريم ديال مستعجلات تبين لينا la méningite ضروري يبقى هنا تحت المراقبة المستمرة والعلاج المكثف كيف قلت ليك مناعتو ضعيفة وتعطلو باش جابوه...غذا فالصباح بكري غادي ناخذو ليه عينة من الما الي فالفقرات ديالو باش نديرو l'analyse ونشوفو منين جا هاد germ (الميكروب او جرثومة) وعليه نبداو نعالجو فيه...حاليا كنعطيوه les trois antibiotiques دقة وحدة حيث حنا ماعارفينش نوع المكروب الي عندو كنحاولو نطاكيو بيهم بينما يتبين لينا نوع هاد الميكروب...
بشار. : كيبان ليا تعطلتو ف l'analyse "كيأكد هضرتو" شي مشكيل ف الطونسيون ؟!
طبيب"حرك راسو" : سي..منقدروش نديرها ليه حيث لا كان مشكيل فالطونسيون ميمكنش نديروها صعييب بزاف...وهي ماشي ك أي تحليلة عادية...
بشار"كيسمع ليه ولداخل عالم بيه الله...خدااام كيجمع ويجمع ماحدو كيسمع اطوالقضية كتكحااال...كان جاي لغرض وزادو غرض اااخور".
طبيب : داكشي علاش كل شوي كتدخل عندو لانفيغمييغ تعبر ليه وتعطيني تقرير...غذا فالصباح غايجي المختص باش يعطينا الما الي محتاجين..نعرفو بيه نوع الجرثومة وعليها نكملو ليه العلاج ب لانتيبيوتيك الي غايحاربها لينا...
بشار"خلاه تااا هضر على خاااطر خاطرو" : مزال ما گلتيش ليا اشنو سبب الي ممكن يوصلو لهاد الحالة...
طبيب : المناعة الي ضعيفة..الاهمال ديال فاكسان كنضن مكانش واخذ الفاكسان او تخاذ بشكل غير صحيح..من بعد 3 جوغ نعرفو بالضبط...
صبح الحال و على صوت الدقان فالباب حلات عينيها ونطقات بصوت مبحوح بنعاس..."شكون"...حتى كتسمع صوت سعيدة بصوت حنييين كيفيقها وبشويا ماشي بجهد كيف كدير كريمة ولا لاخرين...
سعيدة : بنتي نوضي دغيا بدلي شوي وغانخرجو باش تمشي معايا انا وهاشم...
حبيبة"شي دقيقة وهي كتفكر فين تمشي جاها فحال فقدان ذاكرة مؤقت ههه..حتى تفكرات يوسف وهي توسع عينيها وناضت على شوي طيح بدوخة الي جاتها من نوضة بجهد" : واخا هاني داابا...
ناضت بزربة جبدات ماتلبس سورفيت كحلة بالقب صيفية فايتة مؤخرة بشوي سروالها من تحت فيه بانضة مجموعة طالعة عند الكعبة عنقها فيه سيور ديال القب والوسط مكتوب فيه levis بالبيض..حطاتها ومشات بزربة غسلات وجهها بجيل ديالها ورجعات دارت ليكخون لوجهها بزربة جمعات شعرها اسفنجة هزات تيليفونها دارتو فجيبها ومشات هزات سبرديلا من ماريو بيضة الي لبسات البارح نيت لبسات تقيشرات قصار بيضين عاد لبستها...يلاه غاتنوض وهو يصوني تيليفونها لقاتو باباها...
حبيبة : بابا !!
م.حفيظ : افين ابنتي هانيا ؟!
حبيبة"صرطات ريقها وحنحنات" : الحمد لله...مالك ابابا فايق بكري ؟ "شافت ساعتها فايدها" ستة ونص هادي...مكاين باس ؟
م.حفيظ : لا لا ماتخلعيش هي ماماك گالت ليا على داك الوليد يوسف مسكين ملي گلتيها ليها البارح...عرفتك بتكوني فايقة حيث گلتي بتمشي معاهم...
حبيبة : اا ااه اه... اه غادين دابا...
م.حفيظ : فين ناعس ؟
حبيبة : مصحة الاطلس ف تارگة...
م.حفيظ : هي توصلو علميني را بنجي انا وماماك نشوفوه مسكين...
حبيبة"عينيها لمعو غاتشوف دارهم وقلبها ضررب بجهد" : اه بابا صافي اصلا توحشتكم بزااف بغيت تانا نشوفكم...
م.حفيظ : يلاه بنتي هو هذا...
قطعات معاه وناضت على صوت دقان تا حلات عليها سعيدة الباب لابسة جلابتها ودايرة شالها واجدة باش يخرجو...ابتاسمات ليها وخرجات هي وياها نزلو لتحت لقاو توريا مشاات هي وسبحمد وعيدة واشراق وعبد القادر...بقى هاشم الي كان يتسنى حسام حتى زكرياء تاهو بغى يمشي معاهم وربيعة تاهي...هبطو لتحت لقاو كريمة جالسة ف قاع دار كتحط فشي ميكات...
كريمة : بعد يجيو نمشي انا...
سعيدة : منجلسوش تما بزاف ماعندو ميفيد جلاسنا غايدخلوه يدير تحليلة ويبقاو سادين عليه...بعد نرجعو فالعشية سيري نتي مع سيحمد...مابغيناش دار تبقى خاوية دابا يجيو خوالو يسولو..
حركات ليهم راسها وهزات سعيدة الميكات هبط حسام وشدات فيها حبيبة لاصقة فيها دازت قدام ربيعة الي طلعتها وهبطتها وبقات حاضية ديك السورفيت واخا عريضة فستيلها جاتها زويينة...لولبات راسها وكتقول فنفسها...
كريمة : مالگيتي ختي توريا مسالية وبخاطرها وتشوفي ديك سيرفيت الي لابسة بشحال تقام عليك...لا نتي عروسة لا نتي بعدوزة لا نتي براجل معاك...سعدك لهلا يكتبو على شي مسلم...
ركبات حبيبة لور حدا سعيدة وربيعة وزكرياء وحسام القدام حدا باه...ديمارا طوموبيل وخرج موصي العساس يحضي معاه...وكسيرا مباشرة لمراكش بالضبط لمصحة الاطلس...الي وصلو ليها من بعد ساعة وزيادة ديال طريق...
حبيبة"شافت طوموبيلة باها واقفة وهي تنزل بزربة كتجريييي تا حلات عليه الباب كضحك" : بابااااا....هههههن
غا هو نزل وهي طييييييير عليه بتعنيييقة تا هزها رجليها كيلعبو فالخوا ويضحك وهي مخشية فييييه مابقاتش بغات تطلق تا حست براسها غاتبكي عيااااات تصبر عياااات تكبت مابقاتش صبرت من الضحك حتى تحول لبكا تا جمع حجبانو وناديا ضارت كتقاد فشالها وهازة صاكها فدراعها ديال شانيل مكمشة حجبانها كانت كضحك تا سمعاتها كتبكي وهي تغوبش...
ناديا : ويييل شيطان مالهاااا ؟!
م.حفيظ : امالك اتااا ؟!
حبيبة"كتبكيييييي وتنخشش فيه توحشاااتو توحشات هاد الحصن فهاد المدينة حسات براسها فبلادها ووسط حضن باها...شي حاجة الي صعيييييب يحس بيها الواحد غير الي مر بتجربتها..." : مممم..خليييني ابابا خلييييني توحشتك اهى...
سعيدة"حساات بيها وهي تبسم مخبية" : هههه والواليدين هما هادو اختي ناديا...
ناديا : وهي خرجي من عنگ باك هي نشوفوك ويلي ههههه
كبيبة خرجات راسها من وسط حضن الوطن بالنسبة ليها...هزات عينيها المدمعين وكتشوف فيه..شدات ليه حناكو بايديها كتبوس فهاد الحنك وتبوس فلاخور تهضر بصوته مغنغن تا خلات حسام وهاشم يشوووفو...
حبيبة : ابابا حبيبي بااابا ديالي اخء..
م.حفيظ : القشة بنتي حبيبتي القشة...
حبيبة : توحشتك ابابا والله...
م.حفيظ : تكوني كثر مني الكبدة ؟!.."مسح ليها دميعاتها وباس ليها راسها"
ناديا : باك والدك وانا كبرت حداك ياك ابنت الهم...
حبيبة ضحكات وسط حزنها وهي تمشي عندها عنقااتها بجهد مزيييرة عليها تا شهقت فوذن ناديا هنا ناديا حسات بيها هازة شي حاجة وساكتة حيث بزااف على الاشتياق...طبطبات عليها وشدات ايد ناديا باستها وباست ليها راسها وعنقتها ناديا خاشياها جنبها كي القشة نيييت حيث ناديا طويلة...شافت فهاشم سلم عليها براسو وحسام تقدم ناحيتها باس ليها راسها وايدها وباس راس مولاي حفيظ...تقدمو كاملين هاشم معاه مولاي حفيظ كيشرح ليه حالة يوسف وناديا وسعيدة وربيعة وحبيبة وراهم توخر حسام وزكرياء...
زكرياء : تا شوف ليا كي داير مع بنتو...والله الى حبييييت حبيييت...
حسام : بديتي تاني..."شاف فحبيبة الي مشات تحت باط باها الي عنقها كيطبطب عليها" فكرني فيا انا وهاشم فاش كنت كبير...
زكرياء : داكشي باش قلت ليك حبييييت...ندير هوك مع سيحمد بويا مانعقل على راسي امتى صليت العشا بلاصة العاصر...يحساب ليه غا بغيت شي ريال...
حسام"عنقو بقى فيه" : هههه ديرني انا هو بوك عنگني وزيد حبني...غا هو انا نعطيك بعض صليات يلاه ترجع لعمرك....تا رجع لعمرك راك شهمتيني...
زكرياء : تنرجع لقرايتي معاكم مخدم الكبر حيث لا تبعت تريكة رحماني نزيد بلا وقت....
حسام : لاااهيلا...
وصلو ل عند سانسور لقاو راسهم غا هما الي كاينين ورك حسام على اشارة الصعود كيتسناوه يتحل وهي دوز من حداهم واحد فرملية عندها وااااحد مولاتي طرف خلات كلشي رد ليها البال بقاو متبعينها بعينيهم تحل سانسور ومردوش ليه البال...
زكرياء"حك راسو" : عندها تلاوة ملييييحة...(ماحس غا بصلية لگرفادة ضار ودخل لسانسور ديال المستعجلات)...
من بعد ما لبسوه اللباس الخاص وعقمو ليه كلشي حتى من البلاصة فين كاين معقمة...واقفة فرملية كتعبر ليه فالضغط والمختص عينو عليها حتى عطاتو القياس ديال الضغط الي عندو حرك راسو وضار جيهة لاخرى شير ليها براسو باش تبدا تعقم ليه ديك البلاصة...
يوسف"عينيه منفوخين وحادر راسو مرخيييي شادين زوج فراملية مجلسينو ومثبتينو مزياان باش ميتحركش بينما يقوم المختص بالعملية الي تقريبا نفس طريقة باش كيبنجو الحامل فالعملية القيصرية غير هادي كياخذو ليه الما الي فالنخاع الشوكي باش يديرو عليه تحليلة ويعرفو نوع الميكروب الي تسبب ليه فهاد المرض ديال التهاب السحايا والي كتكون الحمى ديالو مكتنزلش على درجة ربعين...على التوالي...ذهنات ليه الجهة فين غايهزو ليه ببيطادين مزيااان ووقف المختص فهاد المجال بالضبط خصوصا هاد نوع من الابر الي كيكونو دقيييقين ماخاصش يتململ او يكون شي خطأ...يلاه غايدخل ليه الشوكة تا غمض يوسف عينيه بدا يتململ وهو يهز الفرملي عينيه وحرك ليه راسو ب لا...
المختص : سي ميو ينعس على كرشو...ماغاديش نغامرو وهو فهاد الحالة...
حركو ليه راسهم وتكاوه فبياص خاص...عاود ذهنات ليه ضهرو...تبتوه مزيااان وخشا ليه شوكة تا جبد واحد الكمية مناسبة من الما وهزها كيشوف فيها حرك ليهم راسو وكملو هما ذهنو ليه ديك البلاصة ودارو ليه قطن خاص وسبارادرا كبيرة وخلاوه تايحيد منو البنج الموضعي...
كانو جالسين على برا كيتسناوو حتى خرج البناج عندهم كيحيد فالبافيط علمهم بالي سالاو ليه وخاص يتسناو نتائج تحليل باش يحددو اشمن مضاد حيوي يعطيوه الي يقضي على هاد الجرثومة المسببة لالتهاب سحايا....
هو : من هنا يكمل العلاج مايبقاش فشي بلاصة سخونة ممنوع يمشي لحمام سخون...اي حاجة حاجة تقدر تسبب ليه فارتفاع درجة الحرارة مايوصلهاش...خاصو يبقى هنا عالاقل 15 يوم عاد نشوفو فين وصل فالعلاج...الله يجيب شفاء...
توريا"ضارت عند هاشم" : امتى نشوفوه ؟
هاشم : مزال تايرتاح غير يهبطوه وشوفوه. گولي تال ديك 12...
عيدة"قربت ليها" : اش گال ؟
ربيعة"جهدات صوتها" : مزال منشوفوه تال يهبط لتحت فين كينعس الالة...
"حركات عيدة راسها..شوية تا صونا تيليفون توريا فايدها هزات عبنيها وشافت صورة مليكة الي دايرة فواتساب ديال "نور الدين" صوراتها من صورتو اياام تبوريدة قبل ميموت هي باش معروفة مليكة عندهم فالواتساب..عرفتها هي دايرة ابيل فيديو...وجاوبات تا سمعات صوتها مجهد"
مليكة : يااا توما فينكم...
توريا : هاحنا ف كونينيك (كلينيك)..
مليكة : هاا وصلتو لكنينيك...اش دارو مع الكبيدة...توگض شي ؟!
توريا : يلاه سالاو ليه على ما گالينا طبيب...تايهبطوه لبيت و ندخلو نشوفوه...
مليكة"حطات ايدها على صدرها حنتها فايدها بدات كتغماق بزاف باش تبدا تقشر دايرة خاتم فضبعها فيه لويزة كبييرة" : والله ياربي على دريويش الحنييين الله...شكون كاين تم...
توريا : كاينين حنا ونسابنا الحاجة ناديا وبات حبيبة "خرجات عينيها ورجعتهم زعما لجمي فمك"
مليكة ؛ هاااا وسلمي عليهم وگولي ليهم يجيكم الخير...
ناديا : سلمي عليها...
مليكة : يسلم عليك الخير اختي ناديا سلامك وصل...
بقات تهضر معاهم تا طمنات على الاحوال وهي تقطع بقاو تما حتى قاليهم طبيب جلاسكم ماعندو باش ينفع محتاج يبقى فراحة وتحت مراقبة مشددة حتى يدخلوه لغرفة ديالو ويرجعو عندو...وقفات ناديا...
ناديا : للا توريا تمشيو عندنا حتى ل بلاتي ورجعو بينما يقربو يدخلوه لبيتو ماجاتش تمشيو وتعاودو ضربو طريق تالهنا...
م.حفيظ : ايه ماتعاود غالصلاة عالنبي...والله اسي هاشم تاتمشيو عندنا بالله...فطرو ورتاحو ورجعو...
عبد القادر : ياودي كي دير لينا را حنا عرام تبارك الله...
م.حفيظ"وسع عينيه" : ومالكم بيثقلو علينا ؟ اش هذا الحاج ماتخليني نتفگع عليك...هانتوما هنا...الطرقان بزاف عليكم..والحاجة عيانة...
تنهدو مالقاو ميقولو..حركو راسهم وهي تفرح حبيبة بالي غاتشوووف دارهم الي توحشاتها وايوب يلاه ناضت غاديا وهي تحنحن توريا...
توريا : بقاي معايا ابنتي حبيبة انا باقيا هنا منصيبش نمشي دروك...خاصني نستف ليه حويجاتو...سيري نتي اشراق عاوني (تمشي تعاون ناديا فالشقى عليهم..كيديروها الى مشاو ضياف الضايفة تنوض تعاون مالين دار)....ونتي احبيبة ماجاتش تمشي لداركم وحنا باقين ماديناك لزيارة بالعادة (عادة الكنة كيديوها لدارهم اول مرة كاتكون واحد العادة خاص عگوزتها تديها هي وراجلها)....
حبيبة"شداتها البكية وضارت عند سعيدة يلاه غاتهضر وهو يهضر باها"
م.حفيظ"بتفهم": بقاي معاها بنتي ماعليش تا وكان تگاد الوقت وبتجي خطرة وحدة عندنا (حيث داير بالو انها غاترجع لدارهم فوقت القرايا)...
حبيبة : ااا ؟ و واخا..
جلسات حداها ماكرهاتش تنوض تشيتف تم وتهرنن... اما هما ماقدروش يقولو ليها لا حيث كتبقى ام وبالها مع ولدها حد علمهم...طبطبات عليها ناديا وطمناتها انهم غايرجعو فالعشية ماهزاتش راسها خافت تهزو وتبكي.. بقى هاشم وحسام وسعيدة وخلا لاخرين مشاو...
توريا"طلات على سعيدة دايرة زيفها على فمها" : جبتي ليه معاك مايلبس ؟!
سعيدة : وااه خاص نديه لبيتو...
توريا : نوضي نديوه ليه نستفوهم ليه هاو نرجعو نشوفو لا بغاو ندخل عندو نشوفو غا شوية ونخرج...ماصابوش يدخلونا شافو بنادم كثير داكشي باش يضهر ليا....
هاشم : فطرتي نتي بعدا..
توريا : منين يدوز ؟!
هاشم ؛ تااحد ماضاگو..."شاف فحسام" سير جيب ميتكال تصيب بعدا باش توگف...جيب ليا معاك واحد نص نص نحل بيه عينيا تصيبني برا...
ناضت سعيدة وتوريا هازين ساشيات...وحبيبة معاهم...دخلو لبيت فين كينعس...مع دخلو شمات حبيبة شي ريحة رجالية مجهدة وزويييينة...ضارت توريا جيهة كاناپي بان ليها باكية كلينيكس هو مكتوب بالالمانية ولكن هي ماقارياش ماعارفاش اش فيه...
توريا"كمشت حجبانها" : شي حد كان معاه ؟!
سعيدة"بدات تفتف عرفات بشار كان تم هزاتو" : ايكون غا هاشم خلاها هنا...
توريا مادات ماجابت ومشات لماريو الي تم ستفت ليه حويجاتو...جلسات حبيبة كتشوف فيها كتستف وتشوف فسعيدة كاتقاد تاهي فشي مجورة...ضارت توريا عند حبيبة...
توريا : سيري شوفي هاشم واش جاب فطور جيبيه هنا وفطرو...
سعيدة : ايه باش تفطري تانتي احبيبة...
رجعات حبيبة من عندهم هبطات لتحت عيطات لهاشم عطاتها سعيدة نمرتو قاليها بالي باقي فين خلاوه...مشات عندو لقاتو واقف كيتسنا يعيط ليه حسام يهبط يكمي ويشرب قهوته...
حبيبة"نغزاتو من دراعو تا ضار عندها هاز حاجبو" : عمي هاشم واخا تطلب ليا طبيب ندخل نشوف يوسف !! عاافاك بغيت نشوفو دابا بقى بالي معاه...
هاشم : ماعرفت صبري نشوف بعدا فين كاين"هز راسو بان ليه لهييييه واقف كيهضر مع فرملية.." سي برادة...
طبيب"ضار شاف فيه وهز ايدو شير ليه" : سي هاشم تفضل...
قرب عندو هاشم سلم عليه..جات حبيبة وراه كطل هنا وهنا وشابكة ايديها كتسنى يهضر معاه...واقفة كتمصمص فشنايفها...
برادة : واخا وليني متهضرش معاه تخليه يرتاح تشوفو غير دقيقة وتخرج..را غير يرتاح يرجع لبيتو عادي...را يمكن گالو ليا معاه شي حد...بيكون مشى...
هاشم : لا لا ماتعطلش..."ضار عندها" سيري دخلي عندو سيري هههههه....
تبسمات وهي تحرك راسها وتبعات الفرملية....دخلات عندو لقاتو متكي على كرشو حتى يرتاح ساعة هكاك ويهبطوه...تبسمات ليه كان حال عينيه شوية واخا منفوخين بالمرض...تبسم ليها ابتسامة باااهتة...
حبيبة : يوسف كي بقيتي شوية ؟!
يوسف"حرك راسو كيبتاسم عيااان وحط راسو كيغمض عينيه"
حبيبة"حطات ايدها على شعرو دوزات عليه" : الله يشافيك..جيت غير نشوفك قبل ماتعمر عليك دنيا هههه..شد فراسك اخويا عافاك نتا ضريف بزاااف ماتستاهلش هادشي...الله يشافيك كنتسناوك فالدار واخا ؟
مجاوبهاش يوسف حدو غمض عينيه وحلهم كيشوف وراها ويتبسم....بقات كتشوف فيه تا حسات بشي حد وراها....كان واقف واقف خاشي ايديه فجيابو....يلاه ضارت تشوفو وهي تهز راسها وشهقات....
"حبيبة"...
المعاناة الي بداتها كانت ف بداية مشاكل باها المالية والصحية هنا بدات كتحس بناقوس الخطر من جيهة باها لانها متعلقة بيه لدرجة مايمكنش تقبل انه توقع ليه شي حاجة..تبعها الزواج الي كان تقليييدي مئة بالمئة زواج بالشكل القديم ديال تزوج ومتشوف راجلها حتى ل نهار العرس...هادي تجربة عاشتها حبيبة فهاد الزمان الي كتعرف فيه زواج الي يا يكون عن حب يا اما تكون عارفاه وتعرف عليه...وبما ان الحل الوحيد باش باها يتفك اضطرت تعيش هاد التجربة وتكون ضحية او كبش فداء باش باها يتفكو ليه المشاكل المالية..حاولات تقنع راسها انها ممكن تكون غالطة فهاد زواج ويصدق زوين وتلقى تفاهم مع راجلها لكن وقع العكس تماما بل عاشت معاه اكفس ليلة عاشت...ليلة خلاتها تشوفو "وحش" ف سيفة انسان بالنسبة ليها...لدرجة الخوف والرعب من انها تسمع سميتو وحتى صوته ذاك االاخير...
مكانش فبالها انها ممكن تلقاه مكانتش طيح ليها على بالها انه غايكونو بزوج تحت سقف هاد الكلينيك...وخا هو ديما فبالها ك نقطة سوداء ديما كابوس بالنسبة ليها..ماتوقعاتش يكون هو لدرجة فاش ضارت لقاتو "هو" فعلاااا هو كان وراها ماثيقاتش وظنت انها كتحلم وكتعيش كابوس شوفته...كتشوف فيه كيشوف فيها بوجه خالي من اي تعابير...وهي كتشوف فيه وترمش حتى حسات بقلبها تلوا عليها وحسات بالضبابة كتغشي ليها عينيها...الصوت تبكم والريق نشف...يلاه كيف وقف تا سمعو صوت واحد الالة ديال القلب ديال واحد المريض واصلينها بيه بدات تغوت..حيث يوسف كان فالانعاش مؤقتا...الفرمليات جاو كيجريو ناحية داك السيد...يوسف هز راسو من الغوات وبدا ينين مشى ليه بشار شد ايدو ماجا يدور تالقى غير الريح...ماعارش اي اهتمام !؟...
اما هي كيف لقات الفرصة خرجات بصدمة عينيها خارجين ووجها ولا بيض غاديا والنفس ديالها تخربقت لدرجة الخنقة شدات على صدرها وقلبها بدا يضرب بواحد الوتيرة خلات اطرافها يبردو عليها...وقع ليها فحال "الدهشة ممزوجة بصدمة ب الغير المتوقع" لدرجة قالت را غير تخايل ليا حيث عمر وجهو يتنسى ليها...
هاشم"يلاه كيهضر فالتيليفون مع حسام وهو يدور كيحك فلحيتو حتى بانت ليه جايا تزرب تا وقفات تسندات على واحد الحايط وعينيها خارجين من بعيد فمها كيبان بيض من هول الصدمة" : بلاتي حسام قطع...
قطع مع ولدو وهو يمشي كيزرب لعندها كانت بغات طيح كون ما شدها كون طاحت فالارض مزدوحة مغيبة...
هاشم : بسم الله عليك...
مابقاتش شعرت براسها مابقاتش حسات بتاحاجة...عمرها ما سخفت فحياتها تا وصلات لعند هاد العائلة...تجربة كبييييرة عليها وقاسية...جحيم عاطي لفحات عافيتو من دابا...اش وقع واش طرا مابقاتش عقلات ملي ضارت شافتو انعازلات على الواقع...مابدات تحل عينيها غير على لمسات فرملية كانت عند راسها شادة لاباراي كتعبر ليها الضغط والطبيب كان واقف حيث طاحت وهو خارج من القاعة...
هاشم : بنتي كتسمعيني ؟
حبيبة"كترمش وترجع تسد عينيها وتعاود تحلهم كتحس برموشها مثقليين عليها باش تغلب عليهم سوفل مكاينش"..
فرملية"ضارت عند طبيب وراتو القياس.."
طبيب : الضغط هابط ليها..غادي تبى هنا تحت المراقبة واحد شوية بينما يستقر...الله يشافي...
حرك هاشم راسو وخرجو كل من طبيب والفرملية..بقى هو واقف مربع ايديه حتى تحل الباب ودخلات سعيدة وحسام اما توريا بقات ف بيت يوسف...
سعيدة : مالها ثاني ؟!
هاشم : يلاه غانعرف "شاك انها شافت بشار حيث عرف انه مع يوسف لداخل ونسى انه ممكن تلاقى بيه مشا من بالو هادشي"
سعيدة : حبيبة مالك ابنتي اش وقع ليك ؟!..."شافت فهاشم" ياويلي هادي لمرة ثانية كاطيح ب الطانسيو...تا شطاري...
هاشم سكت كيتنهد...حبيبة بقات ناعسة كيتسناو تايتقاد ليها طونسيو...شاف فحسام وشاف فسعيدة وشير ليهم يخرجو...
سعيدة"سدات وراها باب الغرفة ديال الفحص وقربات ليه" : مالها ؟..صيفطتها تجيب الفطور من عندك نابيتي عليا (عيطتي ليا) راها طاحت !!
هاشم : جات عندي بغات تدخل تشوف يوسف (كايوريها بايدو) تا خرجت وجهها بيض مسقوووط عينيها خارجين...مافهمت والو تا طاحت...
سعيدة : يا ويلي...
حسام"شاف فباه وعرف كاينة شي حاجة" : شي حد مع يوسف لداخل...
هاشم"هز فيه عينيه بزربة بقى شحاال كيشوف فيه وهو يحرك راسو" : يلاه تفكرت...مشى من بالي واش غايكون معاه دابا حيث كان معاه الليل كلو وماشي ف مود يبقى هاد نهار مابغى يتلاگا بحد...ساعاك بان ليا تلااااگى والي عطا الله عطاه...
سعيدة : شكون الي مع يوسف !!؟ (وسعات تينيها) اويلي ياكما كان بشااار "بصوت مجهد"
هاشم : ششش..سيري دخلي عندها تأكدي انا نمشي نشوف...فين توريا ؟!
سعيدة : بقات فبيت يوسف...مافراسها والو عيطتي ليا وجيت...
حدو حرك راسو وشير ليها باش تدخل ومشى هو فاتجاه واحد الممر وحسام وراه...جبد تيليفونو دوز الخط وحطو فوذنيه الرنة الاولى وثانية لا مجيب قطع وعاود صونا ليه الي حتى بغى يقطع ثاني وهو يجاوب...
هاشم : بشار واش نتا مزال هنا !!؟
بشار : لا...تهنيت على يوسف وراجع...ميعادي الليل معاه...
هاشم : وايلي !!...ايه واخا غير هو...
بشار"واقف عند الباب ديال طوموبيل حالو وكيهضر فايدو الكونطاكت" : بلا ماتبدا دوخ عليا تم...سالي ووصل عليا فين كانزل...عندي معاك شلا هضرة ..
هاشم : ايه نيت خاص نهضرو...نشوف يوسف وهاني عندك...
بشار : رد ليه البال اهاشم...الصغيرة والكبيرة عليه ترد ليها البال..."كيخبط بالكونطاكت فوق سيارة"...
جالسة سعيدة عند راسها دايرة ايدها على حنكها..هادشي ابدا ماتوقعاتو واخا متوقعين يكون اللقاء معاه..هادشي مغاديش يبقى هاكا وهاد الحالة الي هي فيها خاصها تعالج منها "بالمواجهة" المواجهة من كرف كلشي وتاحاجة مغادي تحل "بالهروب"...تنهدات وهي كتسنى فيها حتى صونا تيليفونها...لقاتها توريا الي كتاصل...
توريا : تي فينك نتي وياها ؟!...
سعيدة : هاني هاني.."زفرت" راها سخفات تاني وهاني معاها..
توريا : كيفاش سخفت ؟ هاويلي هادشي شتها قوات ليا من السخفة...توگضات ولا باقي ؟!...
سعيدة"ضارت لقاتها حالة عينيها فالسقف" : هاهي فاقت فاقت را طاح ليها طانسيو..گاليك تسناوها تايتگاد وتمشي...(جات الفرملية كتعبر ليها) هاحنا شوي ونجيو...
توريا : شوفي هادشي ماهكاكش ياكما هزت ؟!
سعيدة : هزت ؟( وسعات عينيها وفهما انها ممكن تكون حاملة) الواه يا ماگال طبيب والي غير طانسيو طاح...
توريا : مممم وسربي جيو هاهو شوي وغايدخلو يوسف يلاه نلبسو حوايجو عاونيني فيه...
قطعات معاها وضارت سعيدة عند حبيبة من بعد ما اكدت ليها الفرملية بالي الضغط تقاد وتقدر تمشي...طبطبات ليها على كتفها..
سعيدة : حبيبة...كي بقيتي شوية ؟!
حبيبة"بقات كتشوف فالسقف وهي تنطق بصوت بزز باش كيتسمع" : امتى جيت لهنا ؟..
سعيدة : شي شوية هذا..جابك هاشم هو الي عيط ليا جيت عندك لهنا...مالك كي وقع ليك ؟(بغات تعرف منها)..
حبيبة"تا كتحل فمها تبغي تهضر وترجع تسدو..فحال الى كيوقع ليها بلوكاج من كتبغي تذكر انها شافتو" : ك كك كاين تما...كاين تما...
سعيدة : شكون...
حبيبة : ه هذاك الي تكرفص عليا...هذاك الي وصلني لهاد الحالة ومشى..(ضارت عندها) عافاك مابغيتش نشوفو...(هزات ايدها كترعد وشدات فيها مزيرة)..ب بغيت نمشي لدارنا بغيت نمشي من هنا عافاك راه كاين هنا (فمها بدا يترعد)...
سعيدة : ششش حبيبة تهدني...حبيبة !!(خرجات فيها عينيها باش تسكت) ششش...ماكاين حد هنا...كاينة غير انا ونتي وتوريا راها كتسنانا فالبيت بغاو يدخلو يوسف...ششش هو ماكاينش ومغايجيش ماشي دابا وماشي ليوم...مامفاهمش مع مو ومايصيبش ينوض صداع وخوه مريض...(زيرات عليها كتضغط مزيان باش تهدن) ماشي وقت صداعات...واش هضرتي معاه گاليك شي حاجة دار ليك شي حاجة ثاني ؟!..
حبيبة"حركات راسها ب لا ودموعها عالطرف وجهها باقي مسقووط"...
سعيدة : وكي وقع ليك ؟! عرفك هو ماهضرش كاااع...(حركات راسها ب لا تنهدات سعيدة) واخا..واخا هادشي ابنتي را ماخصش يبقى هوك...هادشي خاص يتحط ليه حد...
حبيبة"ناضت شادة فيها يلاه غاتمشي وهي تشد فدراع سعيدة دورتها عندها" : واش غايجي لهيه ؟!
سعيدة"زمات فمها تا بغات تمشي وهي ترجع..شافت هنا وهنا كانت لاصال خاوية..وقربات جلسات جنبها" : شوفي بنتي...ماغاديش نلومك وليني ابنتي هادشي را خاصو يتگاد..يا هوك يا هوك..اييييه تكرفص عليك..ماشفتي منو تاحاجة زينة وليني را كيبقى راجلك بيناتكم واحد العقد سنيتوه بجوج..تكاتبتو بجوج وهادشي نتي عارفاه...ماعارفاش اش عارفة نيييت وليني غانمشي معاك باش كنشوف...واش هاد جواج تبززتي عليه ؟!..
حبيبة"حركات راسها ب لا وكتنخصص بالحس"...
سعيدة : كان بخاطرك مابزز عليك حد...قبلتي بهادشي وطرا ليك هادشي واخا ابنتي انا حاسة كاين شي حاجة كبر من هادشي...ماثقتيش فيا ومااانزيد شاااي نحكر عليك..انا نصحتك بالي كنشوف بعينيا...هاد الحالة ماخاص شاي تبقى هوك بيناتكم...ملي ما گاداش تشوفيه ماحاملاه ماقابلاه...شوفي حياتك ابنتي وتفكي منو...
حبيبة"سكتت فلول من شافتها بغات تنوض وهي ترجعها..هبطت راسها" : صعيييب عليا نمشي من دابا لدارنا...صعيييييب عليا نبين لبابا انني ماباغياهش...شي حوايج كبر مني وفوگ طاقتي اخالتي اهى...هو مانقدرش نسمح ليه وصعيب دابا نواجهو..م مانقدرش اهى..ضرني بزاااف وكرفصني...عمري نسمح ليه...
سعيدة : هادشي الي كاين ؟!..
حبيبة"تنهدت ومسحات عينيها بطرف كمايمها" : نخرجو من هنا ونعاود ليك..عافاك ماتگولي لخالتي توريا والو عااافاك اهى...
حركات ليها راسها وهي تعاونها ناضت تسندات عليها خشات حبيبة ايدها فدراع سعيدة..فاشلة جسديا ونفسيا...تا دخلو لبيت فين كاينة توريا لقاوها كتحط ليوسف مايلبس حيث شوي وغايدخلوه...
توريا"ضارت طلعتها وهبطتها" : كي وقع ليك ؟!
حبيبة"حدرت راسها" : ماعرفتش حتى حسيت بالدوخة...
توريا : وهاد دوخة مخليا عينيك منفوخين بالبكا ؟!..
سعيدة : غير تخلعت تخلعت..ماعليش كاتوقع...
توريا"غوبشت مصغرة عينيها بشك" : ومناش خافت بسلامة ؟.."شافت ف حبيبة" مافيك تا شي تقيا ماحاسة بوالي ؟!...امتى مشات عليك حق الشهر ؟!
حبيبة"بعدم فهم" : غاتجيني هاد سيمانة (باقين ايديها باااردين بالخلعة وضغط...كتهضر وترعد) ع علا علاش...
توريا"نيشان" : ولا تكوني هزيتي...تال صباح هاو سيري ديري تحليلة...
حبيبة : اشنو هي هزيت...
سعيدة : ما والو توريا نعلي شيطان "كتخرج عينيها فتوريا"..
توريا : اويلي ضحكة وشرگة...مالها جابتو من زنقة...
حبيبة : ؟؟..
توريا : ياكما حاملة ؟!...سيري صباح ديري تحليلة وحيدي شك...بزاف على كل مرة طايحة...ياك صيفطناك صحة سلام جيتي مغيبة...
حبيبة كانت على شوي طيح كون ما شدتها سعيدة الي ماكرهاااتش تاكل توريا بلا ملحة...حبيبة ماقدو فيل زادوها فيلة ولات تحرك فراسها بهيستييييريا...
حبيبة : لا لا ماحاملاش اهى اهى..اويلي اويييييلي اويلي....
سعيدة : يا نعلي شيطان را كون حاملة يگولها طبيب ولا يعرفها..
مدت ليها كاس ديال الما عطاتها تشرب باقي الخلعة من بشار...شحال عاد انتاظم التنفس ديالها...يلاه غاتهضر توريا وهو يتحل الباب ودخلو يوسف جارينو فوق.واحد البياص طويييل...حطوه فوق الناموسية متكي على جنبو...بقاو شحال كيقادو ليه من سيروم والوضعية...
توريا : نصيبو نبدلو ليه ؟
فرملية : تقدري امدام...هي هو بعدو عليه شي حاجة بتكون دافية باش متسخنوش...الله يجيب شيفاء..شوي وبيجي عندو دكتور بيگوليك اش بديرو ليه...
فهاد اللحظة هاشم وحسام شدو و طريق ل بلاصة فين رسل ليهم الموقع...الي كان اوطيل longue vie المتواجد ب گيليز قرب محطة القطار مراكش...ونيت قريب شوي ل تارگة فين كاين الكلينيك...وقفو سيارة لتحت وصونا ليه...
حسام"كيدوز على وجهو بتعب" : مالو نزل هنا ؟!
هاشم : قريب لكلينيك...بعدا حسن من هذاك بعيد..."صونا ليه التيليفون جاوب وهز راسو" هاني شفتك..نتبعك ؟! واخا...
عوج فمو وديمارا مكسيري غادي تابعو حتى مشاو لواحد الكافي قريبة تم...نزل بشار من سيارة وتم غادي...كان يلاه مدوش ومبدل حوايجو الي بقى بيهم من يوم امس...نفس ستيل غير هاد المرة سروال دجين وتيشرت خزية..داير فالمعصم ديالو اليمين ساعة جلدية كحلة..توجه لواحد طابلة وجلس على برا كانت الريسطو كتشوف فالمحطة ديال تران بيناتهم شانطي...تا وقف عليه هاشم وحسام جلسو معاه تم...
هاشم : فطرتي ؟
بشار"حرك راسو ب اه" : شي حاجة خفيفة...
وقف عليهم سرباي ماشافش فيه حدو نطق "café noir sans Sucre" وهاشم طلب نفس الكافي لكن مع سكر وحسام كافي كريم...جبد بشار باكية الكارو ضربها مع طابلة بشوي تا خرجو مجموعة سجائر جبد واحد شعل بريكي ودارو بين ايديه تا شعلو ورمى البريكة لهاشم الي تاهو شعل كارو...حسام وسط كي طير الجنة"
بشار بقى شحاال كيكمي حط ليهم سرباي الطلبيات...شاف جيهة فنجانو هزو ورشف منو جغمة غمض عينيه مزياااان وهز صباعو الي متوسطهم الگارو ودلك بيهم مزياااان ناضرو..غير هز ايدو هاشم بانت ليه واحد ضربة فيها من جيهة المعصم باقيا شي شوي جديدة برات ولكن باقيا كتبان حديثة العهد...
هاشم : مالك فايدك ؟!
بشار"ماجاوبوش"
هاشم : بشار !! (بشك حس بيه عاود ضربها ثاني)..
بشار"بقى شحال كيمسد فنواضرو ماسوقوش هو تسنى ولا موت تااايتكيف على خاطرو..ثقيييل بزاف فرد الفعل وكيغفل فرد الفعل هذا هو طبعو...تا حل عينيه وساس الكارو فوق طفاية..نطق بصوت مبحوح" : مامالهاش...
كلمة وحدة الي خسر عليه.."مامالهاش"...هاشم سكت تا هو كمى من سيجارتو وساس منها فطفاية...كيشرب ويشوف قدامو..كانت وقيتة ظهيرة..شانطيات بداو يعمرو وحركة المرور بدات تكتض...بشار هنا بدا يحس بتبرزيط تا زاد عقد حجبانو...شوي وهو ينطق...
بشار : كاين des appartements (شقق) لكرا هنا قراب من الكلينيك ؟!..عندك شي معارف يشوفو ليا شي وحدة ؟!
هاشم : كاينين موجودين..معارف عطاهم الله...
بشار : شوف ليا وحدة مفرشة شحال ماكان قياسها..مانوصيكش كيفاش بغيتها...بعد ليا من الهراج ديال البشري وفريع الكر ديالهم..
هاشم : غذا فالصباح نشوف ليك...
بشار"حرك راسو وسكت كيشرب فالقهوة ويكمي..حك لحيتو بصبعو وشاف جيهة حسام" : اشراق فين وصلت ؟!
حسام"مايقدرش يكذب عليه جاه نيشان" : ماكاين بو قراية الي وصيتيها عليها...باش نجيك نيشان "هز عينيه فهاشم الي خرجهم فيه وهو يحدر راسو وهز كتافو...مكيقدرش يكذب على بشار حيث. وصاااه عليها وتكل عليه..وعارف حسام انه بشااار هو الي غايگد عليها"
بشار : مزيااان...دوز شي يومين وجيبها ليا نشوف بلانها..."غمز بعينيه وحنكو" نرجعو فين كنا...انا الي رخيت..هي ماعليها والو...
هاشم : غير مع مرض يوسف وكانو ناس كيجيو بزاف يشوفوه هو وتوريا...داكشي باش تدهات...
بشار"كيشوف لهييييه مخنزر" : ماعنديش مع هاد زعت ديال نلقى ليها سبة فين تسلك....اش درتي ليها فداكشي الي وصيتك ؟
هاشم"تكا عالكرسي وربع ايديه" : الي وصيتيني قايم بيه...نتا فينك ؟ نتا الي وصلتي وصديتي اش قضيتي ؟!
بشار : انا خايب كون نتا مزيان...
سكت هاشم وسكت حسام كيشرب فقهوتو...عم سكوون واحد اللحظة شي خمسة دقايق وهما كيشوفو. فدنيا...
بشار : من امتى يوسف وهو على هاد الحالة ؟!
هاشم"حك تحت شنايفو بسنانو" : من عرسك...
بشار"هز حاجبو" : شهر اهاشم ؟ شهر ؟؟؟..
هاشم : كانت سخانة عادية فاللول..برا ودازت الوقت وهو عادي حتى لتواخير عاد مابقاش كينوض كايبرا ويرجع ثاني يتنكس...
بشار : ماشي تنكس..مكانش كايترد ليه الباااال اهاااشم...هاااشم يوسف ماشي ديال الاهمال...يوووسف تكتاب عليه يكون بنت المشاوري مو...وتكتاب عليه يكون هاشم عمو...واحد ماعندش ملتو االرحمة فولادو (توريا)...وثاني گلبو بيض(على هاشم)...
هاشم : بشااااار...
هاشم خرج فيه عينيه يلاه غايهضر وهو يقاطعو بشار بكل برووود...
بشار : ماتبداش على جد مي داك الزبور ديال نتا الي صديتي ولا الحبس..كنرصي معاك على يوسف...ديك الهضرة الي ناوي تگول من بعد...
هاشم"هز ايدو وضرب بيها طابلة وشير بمعنى يلاه اسي..ضار لهيه كيشوف وحسام كيسمع..."
بشار"رجع شعل سيجارة جديدة نفت منها مزيااان وبقى شحال ساد فمو عاد نطق ودخان كيخرج" : كنت عندو گبيلة دخلات وحدة تشوفو...عينيها خضرين...(بغى يأكد شكوكو) شكون هي ؟..
هاشم هز عينيه شاف فيه وهز حاجبو ضار شاف جيهة حسام الي تاهو بدوره شاف فيه...كيفاش شكون هي ؟ ...ماعارفينش انه فديك الليلة كان شااارب لدرجة العقل مابقاش...وجاتو الحالة لدرجة ترفع على الواقع...هاشم نيييت بغى يعرف منو اش داز بينو وبينها فالغرفة ديال الكاينيك حدا يوسف...وجابتها الهضرة وهاهو هضر نيشان...
هاشم : هاديك هي مرتك ا ولد خويا...
بشار"بقى كيشووف فيه ويكمي" : كيفاش مرتك ؟؟؟...برهوشة اهاشم !!..(هز حاجبو...حيث شافها قصيرة بزاف)...
هاشم : علاش مابقيتيش عاقل عليها ولا كيفاش ؟!..
بشار : لا...
حسام"نقز كي الحزقة" : وباش عرفتيها عينيها خضرين ؟!..
بشار : ماشي خضرين ولا كيفاش ؟!
حسام : لا خضريين..باينين اصلا...
بشار...سكت فحال كيقوليه هانتا جاوبتي راسك..كمل قهوته وطفى السيجارة...ضار عند هاشم وقال...
بشار : فالعشية ندوز عند يوسف...هاد ليام كاملة انا معاه...يرتاح شوية ونتوالى لشي مشاكيل نفكهم...وشووف داباعلاش جيت وهاني علاش غانصدق باقي..."مسد على نواضرو ونطق بشكل ثقيييييل كيف عادتو هضرتو ثقيلة وقليلة"...ماتنساش تجيب ليا اشراق نتا..مانصيبش نطول معاها كثر من هادشي...
حرك حسام راسو وناضو كاملين خلص بشار..وخرجو على برا وقف قدام السيارة شير لحسام يمشي لطوموبيل وبقى هاشم واقف...
بشار"دار نضاضر شمس على عينيه" : الي تزوجت علاش مارجعاتش لدارهم من الي وقع داكشي ؟ اش باقي مگلسها معاكم ؟!
هاشم"حدر راسو وعاود هزو" : على بالك ساهلة ؟!..واش عرفتي اش درتي ؟ راك تكرفصتي عليها...
بشار"حرك راسو" : سيي تكرفصت شكون نكر ؟!...
هاشم"بقى كيرمش فيه" : ايوى ؟!
بشار : علاش ما هزاتش راسها ومشات من تم ؟..اشنو مگعدها عندكم هذا ما بغيت نفهم ؟...ملي گالت مكرفصين عليها تما اش الي مخليها ؟..
هاشم"مافراسوش بالي قالتها ليه فالتيليفون": حيث يلاه تزوجات..ماصابتش تمشي من نهارها لول راك عارف المجتمع ديالنا مكيرحمش شلا مغايخرجو عليها...وباها صحتو على گدو ماتگدش تمشي...دابا...
بشار : كاين شي بات يلوح بنتو لزوبيا ؟!.."ضار كيحك فلحيتو بنفاذ صبر..عض لسانو واحد اللحظة لا هاشم دوا لا هو هضر..كيشوووف وساكت حتى ضار عندو"....خضخضتو لعدو ربو اللوجيك يا صحبي...
هاشم"زفر بجهد..تاهو وعاود نطق" : دارت معاها مي وتوريا شي مدة وتمشي فحالها...راك مشيتي ورونتي شعب وراك...كايحساب ليك ساهل الي داز عليهم...
بشار : بلاااان اهاشم بلااان درتو ليهم وانا مرتاااح...مزال بنت المشاوري ماشافت مني والو...مزال يلاه عطيتها الصهد...مزال ماشويتهاش بالعافية...
هاشم هز عينيه فيه كيشوف فيه كيهضر بواحد الطريقة باااردة الى سمعتيه يجيك كيهضر عادي ولكن لا عاضرتيه ولا قربتي ليه غاتعرف ان ديك البرودة خااااايبة مافيهاش ثقة...لو يبلبل ويعرعر ولا يضرب اسهل من انه يتكلم بهاد طريقة...هاشم ولا غير كيشوف وخايف من الي جاي...حس بيه بالي فعلا الي دارو منادمش عليه حيث ببساطة هو الي بغى يوصل لهادشي وهو الي خطط..يعني عيشهم فالاحلام وهزهم تال سما وخبطهم فيقهم على كااابوس عمرهم ينساوه...الى دققتي فالهضرة تلقى انه عندو الحق من بزاف نواحي وهو علاش حبيبة قبلات بزواج بيه وعلاش باها لاحها لهاد "زوبيا"...هاشم براسو مافاهمش...
هاشم : لا حول ولا قوة الا بالله...
هاشم رجع هو وحسام لكلينيك لقاو يوسف فالغرفة ديالو...شوية حتى بداو يجيو كاملين دخلو بشوي بشوي لعندو...
ناديا"شافت جيهة حبيبة بانت ليها عياانة" : حبيبة !!(قربات جلسات جنبها..حطات ايدها على جبينها كتقلب فيها) مالك ياك لباس ؟!
حبيبة"هزات عينيها جيهة توريا لقاتها كتشوف فيها وهبطات عينيها" : والو غير عيانة...
ناديا"قربات عند وذنيها توريا هزات راسها حساب ليها كتهضر عليها" : ياكما باتجيك ؟!
حبيبة"حركات راسها كأنها لقات منفذ جديد" : هء اه...واقلة...
طمنو على يوسف واكد ليهم طبيب انه غايستمر فالعلاج لكن خاصو يرتاح ويكون تحت المراقبة...وجودهم مغايساعدوش ولاو خرجو كاااملين تسالمات حبيبة مع دارهم والبكية على عينيها...لو مكانت سعيدة كون علم الله فين توصل بحالها...باقي فيها رعدة والخوف من اللقاء ب "بشار" طول طريق وهي حاطة راسها على الزاج...شوي وهي تبدا تحس بوجيعات خفاااف تحت بطنها تا كمشات عينيها وتأوهااات..ماحاسوش بيها كلشي كان عيااان من تعب السهير والخلعة الي ركبتهم من يوسف...بقاات شحال كتدلك وتعاود تا حسات بيه خفاااف...
وصلو لفيرما لقاو بابا فاتحو ليهم العساس والكلاب ينبحو تابعينهم تصافو سيارات لداخل ونزلو كاملين عياانين...ويهضرو ويشكرو ف ضيافة مولاي حفيظ وناديا...
ربيعة"شادة تيليفون وترسل فاوديو لمليكة" : على رقبتي لا دارت لينا طاجين ديال القوق وجلبانة كبييير ومونادة وعصير..وتبعوه ديسير...
مليكة"ردت عليها باوديو" : طاجين قوق وجلبانة فيه شي لحيمات ؟..
ربيعة : وااه عاامر لحم بقى تا شاط..
دخلات وطلعات نيشان لبيتها تبعاتها اشراق لبيت لاخور تيليفون صغيير فجيبها كيفيبري وجهها ولا حمر...مشات نيشان لسطح هاد المرة...حبيبة وصلات ودخلات لطواليط شادة كرشها بالوجع الي قبطها وبدا كيتجاهد...
حبيبة : امممممم...فففف...
مشات لطواليط وجلسات فلاشاص كتدوز على كرشها بماساج...هبطات لكيلوط وهي تلقى قطرة ديال د.م هبطات منها..عرفات انها العادة شهرية...وهنا تنفسات برااااحة تا نزلو دموعها مأكدة انها ما حاملاش....
اذان الفجر كايتسمع فارجاء مدينة مراكش الحمراء كلها...وحتى فالدوار....
اما ف مراكش كان واقف مربع ايديه كيشوف فشرجم ناس لتحت كتدخل وتخرج دنيا عامرة ف ليل وصباح...المستعجلات بقاو لور...كيشوف نيشان فالباب الامامي ديال المصحة الي مقابلة مع المصحة لاخرى تحت اسم "الامومة"...وحدة شاملة وثانية للولادة...ناس عاشت وناس ماتت...ولادة جديدة وروح زادت...واش درتي يا العبد ف دنيتك ؟!...
ضار جيهة يوسف وقرب ليه كيقيس ليه فجبينو كانت حرارتو دافية...هز ايدو شاف فساعة لقاها ستة ونص ديال صباح...شاف جيهة يوسف خلا معاه الفرملية الي دخلات تقلبو وتعبر ليه الحرارة وتكتب تقرير...خلاها معاه وخرج نزل نيشان لتحت ركب فالسيارة وزاد مع طريق...صونا ليه تيليفونو كان واتساب الي مخدم فيه نمرة المانيا...شاف المتصل كانت "هانزاده"...حط تيليفون فوق حجرو وطلق الخط من شاشة تا تسمع صوتها...
هانزاده(كانت لابسة كلشي كحل...عنقها كلو مخبوش وصدرها حمررررر...جالسة بعيد) : بشار Guten Morgen...
بشار : اش كاين ؟!..
هانزاده : غايخصك تجي لهنا ل عابادان (مدينة مصافي البت.رول ف اي.ران)...نهار 20 فالشهر...
بشار : ياك نتي تما مافهمتش ؟..طلقيني ممساليش...
هانزاده : كاين اجتماع هنا..هادي هي الوقت باش تكون وتشرح ليهم الطريقة...
بشار"دور الفولون جيهة ليمن وضار عينيه على طريق كيسمعها اش كتقول ولكن بالو فجهة اخرى...خلاها تا هضرات وشاف فساعة عرف انهم باقي عندهم الحال وهي معيطة ليه" : اش مفيقك نتي دابا ؟!
هانزاده"فرحات حيث رد ليها البال" : مانعستش...كان عندنا الذكرى...
بشار"تبسم مستهزء" : لا دنيا لا دين...كثر من جد مي....ماتبقايش تعيطي فهاد الوقت(الحوار بالالمانية)..ايمايل كافي..
قطع معاها حطات تيليفون جنب كوميدينو...دخلات ختها عليها تاهي صدرها حمررر بالشحيط الي كانو كيشحطو وهانزاده اكثر بردات غدايدها من كلشي...هزات فيها عينيها وقالت...
فريال : الحسين غايجي غذا عارض عليه بابا الغذا..
هانزاده"بتأفف" : فففف...ماغاديش نرجع ليه..جيت هنا ندوز خدمتي والذكرى وراجعة لهيه...
اما هو كيف قطع بقى تيليفونو فوق حجرو...مشى لوطيل بدل حوايجو وفطر وتكى يرتاااح حتى ضرباتو الفيقة هز راسو الي كان خاشيه بين المخاد رامي عليه كوفرلي السرير ولابس غير شورط قصيييير...شاف ساعتو لقاها الظهيرة...ناض دخل دوش مزيااان ولبس حوايجو...جلس جنب ناموسية كايلبس بروتكان..هز تيليفونو وهو كيقلب اش يهز اخور...سمع صونيط كيصوني حتى جاوبو هاشم...
هاشم : هاني كنتسناك ف تارگة نيت...نرسليك لوكاليزاسيون تلقاني تما...
قطع معاه هز لوازم ديالو...وخرج من لوطيل ركب وديمارا زاد مع طريق ماخذاش منو وقت بزاف حتى كان فالبلاصة فين وراه هاشم لقاه عند باب العمارة فيها شقق راقية وفنفس الوقت ديك العمارة جات وحدها تما ومافيهاش سكان بزاف...شاف الشقة اتافق هاشم مع مولاها والكرا غايخلصو بشار...
بشار"شاف هاشم بغى يركب ويمشي" : فين غادي ؟
هاشم : لاحگ عليهم لكلينيك...
بشار : بغيت نهضر معاك...عارف شي قنت مكالمي ؟..
هاشم : زيد تبعني...
كل واحد ركب فسيارتو...هاشم زاد قدامو وهو تبعو حتى خرجو شوي على مراكش...لنفس ريسطو الي كان تلاقا فيه عيدة وعبد القادر فاش جابو ليه يوسف...جلسو فواحد طابلة بعييييدة...طلب هاشم الغذا حيث هاديك وقيتو...كيف العاد ضرب بشار الباكية ديال سجائر جبد وحدة شعلها...بقاو شحال كيكميو والصمت سيد الموقف...
بشار. : اش وقع لديك بنت المشاوري ؟!..
هاشم : ملي هضرتي معاها طلع ليها طونسيو طاحت فدروج وتفدعات من ايدها...نهار تنين ان شاء الله تحيد جبيرة...
بشار"بقى ساكت عاد نطق من جديد" : شلا مطارق بداو يضربو ليا فراسي...بنادم حمضها معايا بجهد...جيت لغراض صدقت ناوي نريح هنا بزاف...غذا غادي تخرج le résultat des analyses ديال يوسف...نشوف مناش هادشي وقع ليه...نهار 20 فالشهر عندي مشية لواحد البلاد نقضي شي خدمة تما ونرجع لهنا...طوموبيل نخليها ليك تحرك بيها بينما جيت...
هاشم : غادي فالطيارة "حرك راسو"...
بشار : نهار وراجع...
هاشم : وطوموبيل غادي يشوفوها عندي يعرفوك جيتي...
بشار"بكل برود" : البحر مابعيدش...(زعما يشربو البحر)...
هاشم"سكت تا سكت وهو يهضر والي ليها ليها" : بشار...علاش تكرفصتي على ديك بنت الناس ؟ اش ليها من ذنب غا گوليا...مكنعرفكش هاكا بشار...وعلاش مشيتي فديك الحالة دماياتك دايزة وخليتي روينة الكحلة...علاش ؟!
بشار : الروينة هي غراضي...
هاشم : بشار،، ماتخرجش حرك فالناس...ماعندهم ذنب...
هاشم النقشة طاحت ليه الحقيقة هربت ليه مع بشار...عارفو واصل لاقصى عصبية حيث الطريقة باش كيهضر ماكتبشرش بالخير...عارفو ناوي على شحال من حاحة. واشناهي الله اعلم...المسألة بدات كتخوفوو وبدا كيهز الهم ل صمكة (المطايفة) الي ممكن تنوض تاني من تحت راسو...عارفو هز بزاااااف من جيهة زمان ومو...عرفو بالي رجع تنكس فحالتو النفسية ومكاينش الي يشد بايديه...خرج من تحت ايدو..يعيا هاشم يتقلق منو كايتفكر من اش عانى ومالقى حد فجنبو فالغربة...شي مرات كيعذرو الى دار شي عجب ف دار رحماني ومو ولكن هاد المرة داخلة بنت ناس ضحية...يلاه ف خضم التفكير حتى هز راسو من كلام بشار...
بشار : سميتها "حبيبة" ؟
هاشم : اه حبيبة...
بشار"نفت الدخان" : عشية جيبها معاك نشوف حريرتها ونهضر معاها(على حبيبة)...وغذا فالصباح شوف ليا محامي هنا...
هز فيه هاشم عينيه مستغرب من كلامو مستغرب من اش كيقول..زوج حاجات ذكرهم يمكن وحدة فيهم تجي عادية كونه بغا يشوف ويهضر مع مرتو وثانية كونه بغا محامي...الشي الي خلاه يتسائل عاد يدوز ل حبيبة...
هاشم : المحامي !! لاش ؟!
بشار : ماعنديش دراية بالمحاميين هنا..محتاج واحد كتعرفو مزيان...ضبر ليا فالنمرة ديالو انا نتكلف...
هاشم : واخا نخليو المحامي حالو ساهل...كيفاش بغيتي تهضر مع حبيبة ؟!..
بشار"هز تيليفونو كيشوف فواحد الايمايل وصلو" : هضرة وصافي.."هز فيه عينيه ورجع شاف فتيليفونو" علاش ماشي وقت نهضرو ؟!..
هاشم : ايه ماگلتش ليك..وليني اسي بشار ما على بالك بوالو ؟!
بشار : شنو ؟!
هاشم : بالي مرتك بقات فواحد الحالة من وراك ماتعجبش ؟!..على بالك بالي تكرفصتي عليها غاتبقى كي ناس ؟..
بشار "كايسمع ليه..حط التيليفون وربع ايديه" : هي علاش جيت من وسط هاد الفرييييع كااامل الي خرج...
هاشم : ايوى اسي بشار... سميتك كتسمعها كاتولي تفيييبري يا صحبي..حالتها ماتسمحش انني نجيبها لعندك بكل برود...
بشار : هي اش دابا ؟!
هاشم : بغيتي تهضر مع مرتك سير عندها واجهها انا مانصيبش نجيبها ليك..حيث ماشي يوسف وماشي مك وماشي اشراق...هاديك راها مرتك ونتا الاحق تمشي عندها لا بايتو تهضرو...وسلام عليكم...(هز سوارتو وتيليفونو وناض)...
هاشم : انا لاحگ لكلينيك..نمرة المحامي شوية وتكون عندك...دار شفتها ليك ايوى قضي غراض...طاجين شوي ويجيبوه ليك انا مافياش ماياكل هاد ساعة...
ماهزش فيه راسو خلاه كيشوف فتيليفون حدو حرك راسو وصافي..جابو ليه طويجين على اساس ديال زوج ناس...جابو ليه صالاد. وعصير...شرب دواه هو لول عاد تيسر فداك طاجين ماكلاش منو بزاف..اما صالاد كال منها مزيااان...كمل غذاه وخلص وناض...
"الفيرما"...
خرجات من الدوش لابسة حوايجها ودايرة فوطة صغيرة على شعرها حناكها مطرطقين بالحمورية ديال دوش...دخلات لبيتها يلاه بغات تحيد الفوطة من شعرها وهو يتدق الباب...نطقات "دخل"...حلات الباب وطلات عليها مبتاسمة مامشاتش معاهم النوبة فيها ومشات ربيعة وكريمة...
سعيدة : دوشتي !! (حركات راسها..وهي تدخل وسدات الباب) ودوشتي ونتي فيك حق الشهر يلاه جات ابنتي غير طرفي حالتك...
حبيبة"خسرات سيفتها" : مانقدرش خصوصا كنت عرگانة وتراب وجاتني على العرق...مكنصبرش والله...
سعيدة : وماعليش..
ضارت حبيبة فسخات الفوطة كتمشط فشعرها بالبروص ديالها..بقات كتشوف فيها..كاتشوف فهاد زين وهاد البنت صغر سنها مكافيييش ابدا باش يواجه هاد العالم ديال هاد البلاد..هاد العائلة..قاصح عليها تكون "كنة" توريا...تحنات ودورات شعرها وباشرت فانها ضفرو ماحسات غير بايدين سعيدة على شعرها طبطبات عليها وتبسمات وهي تبدا تضفر ليها فيه...
سعيدة. : شعرك تبارك الله قوي وزوين...
حبيبة"تبسمات بتعب" : بدا كايتكرفص ليا...
سعيدة : ركبتي لراسك الهم من دابا !!...اش داك تكوني كنة هاد تريكة.."كملات وشافتها بدات تزير وهي تورك ليها على كتفها" خاصك تهضري معايا وگولي ليا اش كاين..هاني غير انا وياك فالدار هاد ساعة...هضري معايا باش نتي ترتاحي..وسمعي مني لعلى وعسى نفيذك راني كبر منك وسابقاك فالزمان والهم ديالو...
مكانش على حبيبة الاختيار من غير انها تنهد وتحرك راسها...شدات فيها ومشاو لجنب ناموسية كان هو مكان جلوسهم وراحتهم فالحديث..حطات ايدها على ضفيرتها كتقيس فيها وعينيها فلارض...منين غاتبدا واش غاتقول وهي كل مكتفكر ديك الليلة قلبها كايبغي يسكت...وماتنساش فاش شافتو يوم امس كيفاش حسات بالروح بغات تخرج بالصدمة والخلعة...ماعقلاتش وماحساتش براسها امتى نطقات وبدات تعاود ماعلى بالهاش بالي قلبها الي الفيض الي فيه خرج من صوتها ونطق...ديك الليلة اشبه بالكابوس...حتى لقات راسها كاتقول...
حبيبة : كنطلب فيه نهضرو ومابغاش..."حجبانها تجمعو ووجهها ولا حمرر حيث مزيرة راسها بغات تعاود ومابغاتش تبكي مابغاتش تنهار..كاتبغي تخرج الحرف كاتحس بيه بغى يتصرط.."
سعيدة : مابغاش يهضر معاك گاع...
حبيبة : ماكنتش معولة انه يقرب ليا..ماكنتش بيتو يقرب ليا اصلا...كنت بيت نهضرو نتعرف عليه...انا ما قبلتش بهاد زواج باش نتكرفص...ماكنتش معولة على هادشي وعلى حسب هضرتهم هادشي مكانش يطيح فالبال...
سعيدة : اش گالو ليك ؟!..
حبيبة"تنهدات حتى شهقت" : بايتهلى فيك..وبيتبقاي هنا مدة وترجعي لداركم بينما يصايب ليك وراقك...وهاني دابا هو كيف تكرفص عليا وزاااد...الله ياخذ فيه الحق...
سعيدة : ونتي قبلتي بهاد زواج غيير حيث گالو ليك را مزيان وبغى يتهلى فيك !؟..مافكرتيش تهضري معاه عمرك ماشفتيه ؟!
حبيبة : شفت هي صورتو..والهضرة ماهضرناش...حتى لديك الليلة (كاتعصر عينيها بحال مابغياش تفكر)...وحتى هي ماهضرناش فيها كي ناس...
سعيدة : ماعمرك تسمحي ليه ؟!
حبيبة"حركات راسها"
سعيدة : واش مجلسك هنا ابنتي..اش مصبرك تبقاي هنا ملي عمرك تسمحي ليه...شوفي حالتك كل مرة كطيحي بالخلعة وغير شفتيه طحتي...علاش مافكرتيييش تمشي فحالك راكي ماشي ديال هاد العيشة هادي بغات بنات ديال هنا..فيها تكرفيص وتاوحدة ماتصبر ليهم عساك وحدة بحالك عايشة فالفشوش و "حطات ايدها على حنكها كادوز عليه" حلييييب صافي ماشي ديال تگطر فيه قهوة كحلة...واش خايفة من هضرة ناس !؟
حبيبة"حركات راسها" : هضرة ناس خايفة على بابا...
سعيدة : وباباك الي قبل بهادشي عارفك ماشي دياال تكرفيص مايجوجكش...
حبيبة : حتى هو بحالي تاهو تقنع بهضرتهم...كانت هضرة فجيه والي طرا ليا فجيييه...(تنهدات تنهيدة طوييييييييلة ماكرهاااتش تقوليها را بابا مشدود بكريدي قااصح...باباها الي تاهو على بالو قبلات بزواج برضاها وتاهو مافراسوش راها قبلات باش تفكو من داك الكريدي الي نزل عليهم كي الهم...ماكرهاتش تغوت وتقوليهم را مابغيتكمش ل زينكم وهضرتكم را بغيت نفك بوووويا الي تلات بيه ليام وولا يهددوه فالغديا وجايا...ماكرهاتش تعاود ليها كاتلقى راسها مربوطة وتهديد توريا بين عينيها)
~~توريا : بغيتي تصبري تا دوز وقيتة وتغبري عليا وجهك زيدي مع طريگ نعل بو الي يشدك ويزاوگ فيك..مابغيتش عيبنا قرييييب غذا ولا بعدو نعلم شيخي يهز دوك شيكات وينوض يغرق بوك فالحباسات وديك ساعة تعرفي بحق تنوفيق مزيااان...تگلعي عليا من رهوط وتركني فبيتك ودار ناسك ميخصك خير.~~~~
حلات عينيها لقات دموعها غفلوووها ودارو مابغاو وهي الي عمر دمعة نزلات من عينيها والبكا الي مكانتش كتعرف ليه طريق...حتى من شخصيتها تضرررات بهاد الرباط الي ربطوها...ماحساتش براسها غير وهي شادة فايد سعيدة ومزيرة عليها....
حبيبة : اهى اهى والله مالخاطري...انا صاااابرة حتى دوز مدة ونرجع فحالي مرة وحدة...بابا صحتو ولات على قد الحال..ربطوووني بي بابا ربطوووني بيه...بابا كايتسالهم فلوووس كثييييييرة الى طلقت يدخلوووه الحبس اهى اه...مابغييييييتش بابا يعرف اهى مااابغيتش اخالتي سعيدة مابغيت حتى حد يعرف من غيرك...
سعيدة"وسعات عينيها ماعرفت باش تبلات...هضرتها الاخيرة نزلات عليها كي الضو شحطها بين عينيها..." : اويلي اشمن فلووس صحيحة ؟..ياكما الي كايتسالو سيدي (شيخها) من داكشي العواد والفيتور الي كايديو ليه لحمام ؟!...
حبيبة"كاتمسح دموعها وتحرك راسها...قلبها كيضررررب وهي كاتفكر ف حالة باها ديك الوقت...ودوك دموووع وكي هبطو كي شتا تمسح وينزلو.."
سعيدة : شحال كايتسال ؟!
حبيبة : خء اهى..(كاتبغي تهضر وتغلبها تنخصيصة) خء..م يمكن فوووگ مية مليون...م ماگدش يعتيها ليهم..ماگدش يبيع الاملاك الي عندنا...حيث داخلين فيهم الورثة وبايبيع الحوانت الي كارينهم حاكمة ليهم المحكمة مايخرجوش منهم...الحمام حيث فيه مشاكيل ضريبة تاواحد ما بايشريه...
(عاودات ليها كلشي كاع الي سمعات من فم باباها...وعلاش وافقات من الاساس...حسات براسها ارتاحت وبالي شخص الوحيييد الي عاودات ليه غايكون عارف هي علاش جات من الاساس...وعارفة ان سعيدة بئر الاسرار حيث لمسات فيها وحسات بحنان قلبها وعقلها الي كايوزن...)
سعيدة"دايرة ايدها على فمها ماحد حبيبة كاتعاود او ان صح التعبييير قلب حبيبة الي بدا يفيض الي كايعاود بلا فران..نطقات بصوت بينها وبين راسها." : تهديييد كاااع !!..
حبيبة(غير كملات ليها وهي تهز فيها عينيها حمريييين ولون خضوريتهم زاد تشعشع) : عااافاك عااااافاك هضرتنا تبقى هنا..حتى واحد فدارنا ماعارف علاش قبلت اصلا..مابيتهمش يعرفو..مابييييتش بابا يعرف حيث الى عرف بايعرف بالي انا هنا جيت بسبابو وبايرد لومة على راسو عاااافاك انا الي عارفاه را كايحماق عليا والله تايمرض والله اهى را ماشفتيييش حالتو فاش ديناه لكلينيك واحد المرة وگالت لينا طبيبة مهدد بالكخيييز كاغدياك...
كاتطلب فيها وماحاسش بالي راها مزيرة على معصم سعيدة تا هبطات عينيها لقات ايد حبيبة كتررعددد ومزيرة عليها...فحال الى شدتها هيستيريا ديال الخوف...
سعيدة. : صافي صاافي ششش ماغانگول والو لداركم..كوني هانية غير تهدني تهدني بنتي...ششش حبيبة بسم الله عليك...شششش....ياعوذ بالله من شيطان رجيم...ياعوذ بالله ياااعوذ بالله....
العلاج ل "يوسف" را خدامين فيه حالو حال اي واحد تصاب بهاد المرض الي الى ماتشخصش فاللول كايدي بمولاه للموت...لا مينانجيت او السالمة كيف كنقولو بدارجة او عند اغلب ناس فالمدن المغربية...هي مكيروب كايصيب السحايا وبالتالي كايودي للالتهاب فيهم...والشي الي كايسبب فالحمى الي ماكتنزلش على 40 درجة...وباش يتعالج كايديرو تحليلة هي نفسها الي دار يوسف والي كاتكون تقريبا تقنية باش كاتدار نفسها ديال "ابرة البنج الموضعي" عند اصحاب العمليات القيصرية او عمليات اخرى...ولكن الاسم مختلف بحيث هاد التقنية كاتدار لاستخراج الماء المتواجد بالنخاع شوكي والي كاتحمل اسم "Ponction lombaire بالعربية البزل القطني"...كاتدار ببزاف الحالات منهم حالة يوسف ديال la méningite...وهي باش كيعرفو نوع المكيروب المتواجد ف السحايا وعليه كايخرج طبيب انتبيوتيك محارب لهاد المكيروب...واليوم كانت النتيجة ديالها عند يوسف وكيف العادة الوحدة ديال الليل تسنى الطبيب المختص حتى خرج من واحد العملية وصونا ليه باش يدخل عندو...عطاه النتيجة ونوع المكيروب...وتأكد ان "يوسف" ماعمرو خذا الفاكسان او الجلبة نهااائيا...وانه تعرض لاهمال شديد حتى فصحتو...
الثمنية ديال الصباح..
حلات عينيها على غير العادة هاد المرة صوت صداااع رهييييب جاي من برا....يلاه كيسكت تا شوي كاتسمع دكدكدكدك مجهدة...جاب ليها القلق الازعاااج نعاسها عمرها لقاتو كي ناس...خصوصا انها سهرات بزاف البارح كاتهصر مع ماماها و ايوب وحتى عمتها وبنت عمتها مجمعين نساوها شوية الهم الي هي فيه وعايشة فيه...توريا تلهات عليها حيث مدهية مع يوسف...اشراق ديما فحالها مرة تهضر معاها مرات مكتلقاهاش لتحت...اليوم يوم الجمعة كلهم كاينين...مامشاوش لاكلينيك حيث ببساطة عياو من سير واجي وبما ان الكلينيك مهلي فيه ماكاين لاش يمشيو....واليوم روپو عند عبد القادر وسيحمد من سواق الي كايمشيو ليهم...
خرجات من بيت لابسة ضراعية طويلة الي فحال ديال ثلاثين درهم غير هي ستيل جديد ومشرية ب خمسين درهم وواصلة تحت الكعبة فلون البوردو وفيها زواق بين بيض وخضر والعنق فيه قطان بيض وشوشات هابطين...فصالتها سطاندار جاتها تحمق عليها..قاست وجهها وحناكها لقاتهم ناشفين..هملات راسها بزاااف من ناحية العناية ببشرتها وهي الي كان صباح بروتين نعاس بروتين..وحتى ماماها لاحظت انها ذبلاااات بزاف وبدات كتحس بالي بيها شي حاجة....
~~~ناديا : امتى بتجي لداركم...القرايا باتبدا عندك هاد سيمانة...
حبيبة : هي يخرج يوسف ونجي...داك نهار سولت خالتي توريا گالت ليا نسالي ونديك...حتى طاح يوسف داك نهار...
ناديا : اه ايوى لا هاكا صافي ماعليش...هي هو تنشوف وجهك وحالتك مابقاتش عاجباني...شوفي كيف ضعافيتي...واش مولفتيش ولا بيك شي حاجة ؟!
حبيبة"تنهدات وداك تنهيدات شحاال ولات تكثر منهم" : لا لا هييي مع ليغيگل جاتني بالوجع هاد المرة..."كتحط ايدها تحت كرشها نييت كانت كتحس بنغيزات" فففف...
ناديا : ممولفاش تجيك بالوجع كيف طرا...عليييها...وشوفي وجهك كي دبال شوفي حالتك...مابقيتيش كاتهلاي فوجهك...لا لا نتي بيخصك ترجعي لداركم...
حبيبة"ضحكات بغير نفس" : هههه ياااك والى مشيت لهيه "قلبها تعصر حيث عارفة ان الواقع شيء وهضرتها الي قالت دابا شيء اااخر"
ناديا : مابيت نتفكر بالي غاتمشي تم...خلينا هييي فدابا...سيري سيري نعسي ماتسهريش بزاف تعلمي تنعسي بكري بيخصك تولفي على حساب القرايا...
حبيبة : واااخا.. بوسي ليا خوتي بزاف وبابا...~~~~
يتبع...
التعليقات
لا توجد تعليقات بعد، كن أول من يعلق.