محتوى القصة
حتى مبرر ماكاين الي غايخليها تبقى معاه وهي مكرفصة !! وغايخليه يبقى معاها وهو براسو كيقول على راسو مريض وماشي ديال العشرة والي دارو داخل ف تبراد حر الشمتة وفين وصلاتو العصبية الغير طبيعية الي فيه....مكاين حتى حل من غير الطلاق فحالتهم..لا هو نادم على فعلته ولا هي حاملة فيه الشعرة وزاد هرس نفسيتها...
اش الي غايخلي وحدة تبقى فدار مع ناس معقدين او إن صح التعبير مع محيط وناس ماشي ديالها مع جو مامناسبهاش...واش الي غايخلي بنت الفشوش تصبر لهادشي كاااامل...
مع اخر كلمة قال نهى بيها الحديث...مادارت حتى ردة فعل بقات هكاك كتسمع ليه تاهي بكل برودة...
بشار : ماشي ديال زواج انا..حطوني فهاد الملاغة الكحلة من فوگ الخاطر..حطو واحد مريض وزنييها مزيااان هاد الكلمة الي گلتي حتى نتي والي عندك فيها الحق..مرييض راسي مصابرش ليه وگرام ديال الخاطر مانكسابو...ونتي بلاصة ماتعرفي فين تحطي رجليك عماو ليك العينين وطمعوك بشي حوايج كان عليك تشوفيهم بعينيك وماتسمعيهمش بوذنيك..ماشي كلشي سمعناه صحيح وماشي كلشي ماعالمين عليه والو را مكاينش...
حبيبة"الصمت"...
بشار"هز معصم ايدو ليمنى شاف فساعتو..وطلق ايدو كيضربها بخفة فوق فخدو..عينيه كيشوفو جيهة الباب وكلامو موجه ليها" : گولي اش عندك مزال...
حبيبة"بغات تهضر لقات صوتها مشحرج..حنحنت باش تقدر تهضر" : حم...م ماعندي مانگول..الي عندي گلتو ليك...ماكرهتش نطلق ماكرهتش ليوم قبل غذا ولكن..."سكتت"..
بشار"هز حاجبو" : باغيا لراسك تكرفيص صحة ؟!..
حبيبة"حركات راسها ب نفي" : لا...مابغيتش..ولكن بزز مني منطلقش..الناس مكترحمش..الى مشيت فايامي اللولة ماغاديش يرحموني الناس رجعت مكملتش حتى شهر...
"سكتات كتحك شفايفها بسنانها كتحاول تلملم الحروف تجمع منهم كلمات الي تقدر تخرجهم باش توصل ليه الفكرة ديال انها مضغووطة...مضغوطة بزاف وصبرها بدا كاينفذ..وممكن يتحط حد لهاد صبر ويغلب عليه فقدان السيطرة وديك ساعة الي بغا يوقع يوقع !!...
بشار : زيدي كملي...
حبيبة : بابا وماما مغايصبروش لهضرة ناس..غادي ضرهم...
بشار : داكشي ماكايدي منو والو الى كانت سُمعتك قبل مزيانة...هادشي ديالك ماثبتش (ماقنعنيش) ليا راسي..هادشي كامل على جال واليديك !؟...
حبيبة"بصوت شبه مسموع" : اصلا هادشي كاامل على قبلهم..."تنهدات بحرقة"...
بشار"ساس فوق فخادو وناض وقف خاشي ايديه فجيابو شاف فيها مدة ونطق" : سيري عيشي حياتك وماتلفتيش وراك عيشي بصحتك حسن ماتبقاي بلا صحة..
حرك راسو مثاااقل وخرج خلاها عقلها مرفوع من ناحية فرحااانة انه جا طلاق منو وممكن ينقص عليها هم انها ماتبقاش مزال معاهم وتخرج باقل اضرار...ومن جيه حاسة بالي الي جاي مازوينش مازوينش بالمرة الي غايتطلب منها تصبر صبر ايوب...صبر ايوب وهي فهاد السن ؟...كاتمنى كاتمنى انها تجي البادرة حتى من دارهم ويصيفطوها فحالها ولكن كتفكر انهم مغايسمحوش فالكريدي الي مبلغ ديالو ضخم وباها باقي ما حسنش من الوضعية ديالو المالية...كاجيها التفكير فهادشي صعب ممتخيلاش لفين غاتوصل من هنا لساعة ساعتين غذا بعدو شهر....
تحل الباب ودخلات سعيدة من بعد ما شافتو خرج...قربات لعندها وجلسات حداها..غا هي حطات عليها ايدها ماعرفاتش امتى وعلاش وكيفاش حتى ترمات حبيبة مخشية فحضنها كأنها كاتستمد منها الطبطبة من حضن بديل لحضن الام ديالها الي مايتعوضش حضن الواليدين الي رمات راسها فالجح.يم على قبلهم...اكتفت ناديا انها طبطب عليها وخلاتها تبكي على راحتها لعلى وعسى هادشي ينفسها شوية....
اما هو كيف خرج من عندها شاف فهاشم شير ليه ومشاو بزوج لعند يوسف الي طمنوهم انه بخير وحالتو مستقرة....
بقاو شوية تما ورجع هاشم مع حسام تسناو سعبدة حتى خرجات مع حبيبة ورجعو لفيرما نيشان...مع دخلات حانية راسها طاقتها ابدا ممستحملاااش تهضر ولا تشوف فشي حد ولكن سكون يخليك هاني يا انسان...
توريا"شافتها غاديا وداخلة مهاضرة ممكلمة وحانية راسها تا وقفتها" : مالك ؟!
حبيبة"بدون روح" : ماماليش...
توريا : اش گاليك !!..."ضارت هنا وهنا" سيري طلعي بدلي عليك ودخلي عندي لبيت نهضر معاك...
حبيبة"بامتناع ماقادراش تهضر معاها وماقادراش على كلامها الي كلو س.م قا.طع على نفسيتها..حطات عليها ايدها وكانت هادي اول مرة ديرها حبيبة من ناحية توريا...زيرات عليها وشافت فيها بعيون بشوفة الحزن والترجي" : عاافاك اخالتي والله ما گادة ندوي ولا نسمع...عافاك ماشي دابا..عافاك خليني نطلع نحط راسي والله حتى عيانة وبيت هييي نعس...غير مرة وحدة عافاك...
توريا : شلا جهد رماه عليك ؟!
حبيبة"مافهماتهاش هي كل همها غير تطلع وتحط راسها تفكر فهاد الحالة الي وصلات ليها" : مادار والو وااالو انا عيانة...هضرنا وصافي..."تنهدات" بغا يطلقني اخالتي..كيفاش وعلاش حتى نرتاح وندوي معاك...
توريا"هزات حاجبها" : يطلگك (يطلقك)...سيري طلعي سيييري...
ماعارتش اي اهتمام لهضرتها لقات فرصة فين تحدر راسها وتزيد وداكشي الي كان..بقات توريا واقفة شحال متبعة ليها العين الي حتى طلعات لفوق...تم هاشم داخل وهي توقفو...
توريا : هاشم اش وقع ليوسف !!...
هاشم : يلاه فراسك ؟!
توريا : كون فراسي صباح تلگاني جالسة هنا !؟..هاشم وزن كلامك..عراضك بدا يقلال عليا ؟!"خرجت فيه عينيها"
هاشم : سولناك عادي...لا كنتي هازاها منين ثقالت نعذرك اما الاحترام عمري نقللو عليك ماشي ترابية اختي توريا...يوسف لباس عليه نعسي على جنب الراحة...
"يوم" جديد داز من بعد ما فاتو يوم عامر بالاحداث والي داز على كل واحد فهاد الناس الي نسى والي مانساش وهزها فخاطرو...والي دازت عليه كي باقي الناس العادييين....
كانت جالسة فوق ناموسيتها مسرحة رجليها الي حاسة بيهم كايوزوزوووو...شادة تسبيحها وتسبح دايرة زيف حياتي عاى راسها اورنج باينين خصلات شعرها الابيض المخلط بالاحمر بحمورية الحنة....حتى تحل الباب ودخلات ملي عرفاتها كاينة وحدها فالبيت..
توريا : لالة...
عيدة : زيدي بنتي زييدي...كي بقيتي...
توريا"حركات راسها" : واشويا وكان شوية...هذا مكتوبي ماعندي مندير...
عيدة : وملي ابنيتي مآمنة بالمكتاب رخفي شوية على راسك..ورخفي عليه...حنا غراضنا يتبت فبلادو مابغيناه ينفر..وخا الي دارو فتواخير مايشفع ليه...
توريا : لالة الدفلة لا خرجت ماترجع..هرس ليا الضهر على جوج مرات ومزال زايد فطغيانو...وراني حلفت بحلووفي ومن حلوفي منرجع..
عيدة : نقصي الجهد ابنيتي دنيا مادايمين فيها "تنهدات" كلنا سبقنا الجهد ومانفع بوالي...
توريا"زمت فمها كتسمع ليها.."..
عيدة : والله يهديكم الله يهدي الجميع...
توريا"تنهدات" : ماعلينا...جيت ندوي معاك ونشاورك..مرتو لازم نديوها لدارهم !؟...راك تعرفي العادة الالة اش يضهر ليك...ماكرهتش تمشي اليوم قبل غذا..ماعندي جهد ولا خاطر ليها خاصني نديها ف يوسف شوية..ونيت تهدن لوقت ونشوفو هاد الطلاگ الي ناوي عليه هذاك....
عيدة"حركات راسها" : مزيااان صيفطيها تشوف دارهم...غذا نشاعلاه علمي دارهم بالي جاييين وتوجد راسها هاو ديها..نمشي معاكم لا گديت...
حركات توريا راسها وناضت باست ل عيدة ايدها وضارت خرجات حاسة براسها باقي عيانة...طلعات لفوق توضات وخرجات لبيتها صلات العشاء تبعاتو الشفع والوتر وختمات وناضت قادات زيفها من جديد جمعات صلاية..خرجات من البيت ووقفات كتشوف جيهة بيت الي فيه حبيبة....عوجات فمها. وهي تمشي جيهة بيتها وقفات ودقات الباب...
توريا : حبيبة...
حبيبة"كانت جالسة مسندة بايديها على جناب ناموسية وحادرة راسها غارقة فدوامة التفكييير المهلك..تا قفزات من صوت توريا هازة راسها" : ن نعااام ؟!..
توريا"حلات الباب وبقات مسندة عليه بدون ماتدخل". : ماناوياش تنزلي ؟!...
حبيبة"حركات راسها" : نزل...
توريا"طلعتها وهبطتها كاتشوف فيها باقيا على حالها ملي قاليها طلاق وهي مهمومة وهمها وحدووو" : هاد الحالة الي نتي فيها قوات ابنتي قوااات...قويتي على راسك هاد الحالة...علاش هادشي ؟!..
حبيبة"الصمت"
توريا : وراني سايرة ندوي معاك...
حبيبة : عارفة..
توريا"سدات الباب ودخلات تال عندها وتقابلت معاها" : خليتك كي بغيتي ماخرجتي فطرتي كي ناس ماشفناك كي ناس عطيناك الخاطر نيييت كانو الخواطر عيانة..دهاني يوسف هاد صباح ضليت معاه تا تهنيت عليه ونيت نخليك ترتاحي ياك هاكا بغيتي ؟!..
حبيبة : اه شكرا...
توريا : ايوى..ماگلتي ليا شاي اش طرا بيناتكم اش تگاولتي نتي وهذاك ؟!
حبيبة"استغربت من كلمة هذاك" : ش شكون هذاك ؟!..
توريا : راجلك بالسمية..."زمات فمها وهزات راسها بنفخة"...
حبيبة"صرطات ريقها وغمضات عينيها بنفاذ صبر تا زفرت وهي تحلهم خاصها تقولبها باس تهنى من اسئلتها" : كيف گلت ليك بايطلقني...
توريا"هزات حاجبها" : ونتي وصلتي وسكتي ماگلتي والي ؟!..
حبيبة : سولني علاش مامشيتيش فحالك ملي مشى وخلاني داك النهار..علاش مرجعتيس لداركم وعلاش قبلتي بهاد زواج...
توريا : واش گلتي ليه !!؟..
حبيبة : گلت ليه كيفي كيف اي وحدة قبلات بزواج تقليدي..ماذكرت ليه والو من داكشي...
توريا"باستهزاء" : يطلگك..ههه..وهاانتي ليك هانتي...
حبيبة"هزات فيها عينيها مستغربة ليها كيفاش كاتهضر عليه بهاد النبرة"
توريا : مزيان ملي ما گلتي والو...وهادشي نتي باغياه !!..
حبيبة"ماعقلاتش عليها نطقات وعينيها فلارض كتهز كتافها". : ماكرهتش عارفاني مانكرهش ونمشي من هنا..انا هنا زايد ناقص ياك هو الي جا بغى يطلقني اش باقي مزال ندير هنا ؟!...
توريا"بقات شحال كاتشوووف فيها وتوزن هضرتها" : وهو صراحة بنيتي درنا فاااالطة الي جوجناك ليه..كنا مسندين عليك نتي تربيه وتكون امرأة عندو هنا يدير علاش يرجع..يتهرس داك الطبع الخااايب...يدير عقلو ي(على شوي تقوليها يخليني ندور جيهتو من بعد ما رزاني ف راجلي..دارت فران ل فمها وكملات)...زاد خرج ليا من جنابي وهانتي فين وصلني معاك ومع العباد...
حبيبة"الصمت"
توريا : امتى گاليك ناوي يطلگك(يطلقك)...
حبيبة"عصات شنايفها ورجعات نطقات" : حتى يرجع ماعرفتش عندو شي حاجة...حتى يسالي شي مشاكيل...
توريا : مممم مشاكيل..."حركات راسها ببطئ" واخا ماكاين باس ماااكاين باس..ايوى من تم لتم ربي تم...
"عضت فمها من لداخل تا ولا فمها بيييض بالغدايد وهي كاتفكر كيفاش شمتها وباقي كيشمت فيها ويهبط ليها فالراس..."..
حبيبة جات بغات تنوض وهي توقفها ب الكلام الي خلا خاطرها ينفرج وقلبها يضرب وعينيها رجعات ليهم لمعة الفرحة والشوق...
توريا : جمعي اش بغيتي تدي غذا فالصباح ندوزو عند يوسف ونمشيو نديك لداركم...بركي معاهم شوي وديك ساعة ملي يرجع هذاك نشوفو اش يكون...
حبيبة"ضحكات بلا متشعر" : بصح !؟...حلفي حلفييييي ههههه حلفي ؟!
توريا : گرينتك انا ؟!
حبيبة"ماداتها كاع فهضرتها مافسرتها المهم هي بدات تفرح" : لا لا غير ماتيقتش ههههه..صافي واخا نتعشى ونوجدهم...
خرجات توريا مخلياها كي الفراشة كدور فبيتها وتجمع حوايجها ..
هبطات لتحت تعشات معاهم وهي مرتاحة لدرجة ناضت عاونات ربيعة فجميع طابلة خلات توريا غا مصدومة...طلعات لبيتها وهزات فاليز صغيرة ديالها ستفات فيها حوايجها بكل خاطر..حطات اش يخصها من حوايج وبرودويات..توحشات تعوم ف دوشها توحشات تنعس ف فراشها بيتها ماريو ديالها دارهم طلامطهم كلشي توحشاتو خلي عليك واليديييها وخوتها والدادا مربيتها....
جمعات ديك الفاليز وحطاتها عند الباب...ومشات لمجر ديال كوافوز جبدات گوماج ديال الوجه وغسول الوجه وخرجات لدوش نقات وجهها وغسلاتو وحكات سنانها ومضمضات فمها بالباندبوش ورجعات لبيت نشفات وجهها ورطباتو...ذهنات ايديها رطباتهم وتخشات ففراشها مكونيكطيا من فرحتها ماجاوبات كاع جاد على اخر ميساج مداتهاش فالميساجات بقات ملاهية مع صاحبتها ماماها وايوب الي جاوب غير شوية ومشى مدهي مع الخدمة....
اليوم الموالي فاقت بكرييي فطرات وجمعات مع اشراق الماعن وعاونتها علاش قدات وعرفات وصافي...طلعات لبيتها تزرب بدلات عليها من بعد ما دوشات مزيااان نشفات حالتها وشعرها ولبسات كسيوة ديال قطن طوييلة بالكمايم ف الكريمي عريضة شوي على فورمتها ورمات فوقها كاپ غوز بيبي..مشطات شعرها من بعد ما شهناتو ب سيروم ومعطر شعر فنفس الوقت وخلاتو مطلوق على راحتو...ذهنات وجهها باكخون دشمس ورطبات شنايفها ب بوماليفغ فخومبواز..خلات وجهها طبيعي بلا زينة تزيد فتنتها..زينها كافي وموفي وطبيعي يحلي...وقفات كاتقاد كسوتها مزيان وتشوف حالتها الفرحة كاتشعشع من عينيها...جمعات شنو تحتاج فصاكها تيليفونها وشارجور والايربودز...رشات بارفانها المعتاد كلها من راسها ضايرة عليها خلات البيت يطنطن بريحة بارفانها...لبسات صنديلة صبع ديال جلد فالمارون فيها حجيرات لامعين خفاف مبينة رجيلاتها البويض المرشوشين ب الاحمرار..دارت صاكها فجنب وجرات فاليز ديالها سدات بيتها ونزلات هازة فاليزتها تا هبطات لقات سعيدة واقفة هي وهاشم وعيدة وحسام...
حبيبة : هاني واجدة...
توريا"طلعتها ونزلتها وكريمة وربيعة يشوفو. فيها من فوق وتحت" : سيري معاهم انا مزال هنا مانصيبش نمشي معاكم..جايا بنت ختي يلاه عيطات ليا جات من صبانيا (اسبانيا) بغات تمشي معايا تشوف يوسف..ندير وقيت ونلحگ عليكم تم..ولا ماصبتش بلغي سلامي لداركم...
حبيبة"حركات راسها" : واخاا...
سعيدة : يلاه زيدي ا لالة تگادي فبلاصتك حدا هاشم ونتا حسام هز ليها باليزتها ديرها فالكوف...
خرجات حبيبة وكلها فرحة غاترجع لدارهم..لدرجة بغات تغوت بالفرحة عينيها من طيارة باينين لامعييين...ركبات لور حدا سعيدة وحسام حداهم وعيدة حدا هاشم لقدام...اما فالدار كي خرجو ضارت ربيعة عند توريا...
ربيعة : تي مطا عليها (باطي عليها او باغيا غير امتى) امتى تخرج تلحگ لدارهم..تي مالها باركة هن على عينيها...هاو كنا هازين عليها المضا ؟!..
كريمة : غا مكونة وجامعة غوباشتها...غا تزرزيتي يا خالتي وجوجتيها لولدك..گالت ليك مي شوفي ليه بنت عزوز الي حدانا فدوار مابغيتي...
توريا : بغاتها لالة ماصبتش نطيح كلمتها...مابقى گد مافات وتغبر عليا هي وماخرات كرشي..نوضي كريمة وجدي اتاي واالفاكية ودواز اتاي شوي وتجي سهام ختك...
كريمة"فرحانة حيث اختها الكبيرة جايا" : هي اللولة خالتي هههه..غا بركي ا ختي ربيعة انا نقضي...
ناضت تاهي كي الفراشة كل فرحانا بدارهم حبيبة الي غاديا لدارهم والي هما فهاد اللحظة فرحانين وكيوجدو لمجيتها هي وناسها...قبل مايدخلو لمراكش نطق حسام...
حسام : لا صبتي الواليد حطني قريب لگيليز عندي شي غراض على حساب لافاك...
حبيبة"ضارت عندو ب عفوية نطقات" : لا غاتمشي عندنا...
حسام"حشم حيث عمرها هضرات معاه بشكل عادي" : ههه منصيبش...
حبيبة : لا تصيب...عافاك هي تغذا وسير راه گيليز هييي فدورة..
حسام : حساب ليا حدا داخلة ملي هييي فدورة نمشي منردهاش فوجه ختي هههه...
سعيدة : ههههههه...
فهاد اللحظة هما كانو دخلووو لمراكش...ونفس الوقت دخلات سيارة نوع داسيا داستر كلاكصونات على العساس الي خرج عندهم هضرو معاه شوية وهو يرجع دخل من الباب صغير وحل ليهم الباب الكبير حتى دخلات تال داخل...تبعهم العساس تا وصلو وهو يدق الباب خرج عندو زكرياء...
زكرياء : نعام ابا عروب...
عروب : هاد سيد كيسول على مرات عمك نور الدين الله يرحمو..
العون : توريا المشاوري...علمها تجي اولدي
زكرياء : مي توريا..."مشى يجري لداخل كانت جالسة فالصالون وحداها بنت ختها وكريمة فرحانين بيها تا عيط ليها وخرجات لعندو رامية عليها زيفها الكبيير..."
توريا : نعام اشريف انا هي توريا المشاوري ياك شي باس مكاين اسيدي...
العون"جبد واحد الورقة من شكارتو...مدها ليها" : هادي استدعاء للمحكمة بالاسم ديالك...
توريا"خرجااات عينيها تزاد معاها زايد..كايسمعو المحكمة ولا جوندارم..شداتها من عندو" : ي ياااك لباس اش كاين اشمن ستييدعا ديالاش هادي...
العون : الاسم توريا المشاوري...مرفوعة عليك دعوة "الاهمال الاسري"...
توريا : كيفاش ؟ مافهمتشاي اولدي..اشنو هذا اهمال اسري...علامن !!؟
العون"عرفها امية" : الاهمال الاسري للابن ديالك يوسف الهاشيمي...
توريا"فمها نشف وعينيها بغاو ينقزو" : و ششكوون دعاني "خبطات فخادها بغات تسخف..حاسة بييه هو مولاها..ريق نشف ليها فذاتها"
العون : بشار الهاشيمي...
حاجة مكانتش متوقعة وماطييييحش ابدا على بال تواحد فمابالك توريا...توريا الي كيف قاليها العون محتوى الاستدعاء خلاها واقفة وتشووووف بعينيها يمكن مامصدوماش من بشار حيث عارفاه ممكن يدير اي حاجة طيح بيها...ولكن الي صدمها هو دعوى الي رفعها عليها... هاد نوع من الدعوة مافهماتوش والي خلعها حيث غايوصلها للمحكمة واي حاجة متعلقة بالمحكة وانك توصل لمخزن بصفة عامة كاتخلع العيالات فدواور....
زيرات على ديك الاستيدعا والي قاليها ان الجلسة غاتكون يوم 1 فالشهر الجاي وبقات واقفة في حالة سهو عينيها كيصغارو ويوساعو لدرجة ماسمعاتش الي وراها وهما كايعيطو ليها حتى قبطاتها ربيعة من كتافها وهي تشهق وضارت عندها...
ربيعة : نعلي شيطان اخويتي مالك ؟!
شافت فيها وشافت فديك الورقة ورجعات شافت فيها شي دقيقة وهي كتشوف فيها لكن هي كانت ساهية كتفكر وقلبها كيضرب حاسة براسها بغات طييييح حاسة بذاتها بدات كترجف بغات تغوت وتندب بغات تق.تلو بهاد المعنى واحد الغدااايد ركبوها ولكن صبرااااات صحة وهي ترجع هزات عينيها ف ربيعة..
توريا : سيحمد راجلك معاش يكون هنا ؟!
ربيعة : هاا ؟!..واميعاد العاصر...
توريا"كتحرك فراسها وتعاود" : لا فات تا جا وماشتووش علميه يلحگ عليا لهيه عند يوسف باشماااكاااااان ا ربيعة باش ماكااان...
ربيعة"خلعتها خصوصا شافت جناوح منخرها فرفرو وفمها بياااض ووجهها ولا يخلع خافتها طيح" : وووو وواخا واخا خويتي كوني هانية...ياك ماكاين باس ؟!
توريا : الباس هو الي كاين..الباااس هو الي كاين..
مشات كتزرب لصالون وكتنهج حابسة راسها ماتنفاج.رش على شي حد ماتغوت كاتسنى يجي سيحمد هو الي غايفكها...وقفات على بنت ختها علمات بالي غاطلع تلبس حوايجها وتنزل باش يمشيو بسرعة طلعات كأنها حسات بناقوس الخطر انه يوسف غايمشي من تحت ايديها...لبسات جلابتها ودارت شالها وهزات صاكها ونزلات لتحت لقات كريمة لابسة تاهي ومع ختها سيهام الي جابت سيارتها وهي معامن غايمشيو...
سهام : خالتي مراكشي نيشان ؟!
توريا : ممم...
ديمارات وزادو خرجو نيشان لمراكش...مراااكش الي نورااات بزيارة البكر ديالهم والي ماقاداهم فرحة الماكلة المخيرة وجداتها ناديا هي ورقية على ايديهم من الي عرفوها غاتجي باش تبقى معاهم وهما يوجدو ويقولو. ماوجدنا...حتى سمعات صوت الباب كايتدق وهي تخرج كتزرب تا وقفها مولاي حفيظ الي جاي خارج من الصالون...
م.حفيظ : هي گعدي هانا نفتح...
مع حل الباب مع تلاحت عليه كاتعلق وتعنق وتبوس...حتى تنهدات بجهد حسات بروحها رجعات ليها فحال كانت مخشية فبلاصة مافيهاش حس الاكسجييين حسات باطرافها دفاااو والامااان رجع...بقات معنقاه تا نساو ناس على برا كون ما هاشم رمى طنزو مستملح الجو....
هاشم : تي الي شاف حبابو نسا صحابو ولا كيفاش خهههه..
حسام : وخليتو سعادة القايد واگف عند الباب وام سعادة القايد تاهي....هههههه...
م.حفيظ"باس ليها راسها وشاف فيهم حشمان" : اعوذ بالله حاشا..تفضلو مرحباااا مرحبا بناس الخير...
بعد ترحيب كبير ليهم وسلام دخلو لصالون جلسو حتى تمات جايا ناديا وبجنبها حبيبة الي عينيها لامعين بواحد الفرحة غريييبة عليهم...سلمات عليهم ورحبات بيهم اجمل ترحيب...ورجعات لكوزينة كتوجد اتاي ومرافقات ديالو بيدما يوجد الغذا....
حبيبة"عنقات رقية من لور وحطات عليها راسها" : توحشتك ادادا توحشتك توحشتك...
رقية"تبسمات وضارت عندها قبطات ليها وجهها بين ايديها وهي تغوبش كانت حبيبة شكل ورجعات ليهم شكل تاااني وجهها ضعاف فداك المدة كلها" : الله يابنتي اش هاد الوجه جيتي بيه..
ناديا : شفتيها كيف ضعافت ؟!..حالتها ماعجبتني كااع...
حبيبة"زفرات بقلة حيلة" : وخلااص اما عادي هي حيث ماولفتش تما وصافي...
ناديا : مولفتيش ؟!..
حبيبة"تدراكت راسها" : عاادي ماشي دابا بنولف دغيا..ففف..نساو عافاك..انا نطلع لبيتي ندي فاليز ونبدل حوايجي وبنزل توحشت بيتي بزاااف...فين جدر ؟؛
ناديا : حتى لعشية ويجي...سيري "بعدم تصديق لان حالتها ماعجبتهاش" سيري بنتي سيري...
طلعات بزربة لبيتها باغيا امتى تدخل ليه وترجع الحيوية لراسها تنعش نفسها بريحة فراشها...ترجع لحياتها وترجع "حبيبة" القديمة..حاسة براسها كبرات عشرين عام من عمرها غير فضرف هاد المدة القصيرة الي عاشت فيها فالفيرما عندهم...عاشت اسوء ايامها مع احد اسوء الناس...كيف حلات الباب وهي تغمض عينيها واستنشقاااات العطر ديال بيتها الي ماكيخلاش من المعطرات الي عندها على شكل كاندلز (شموع) معطرة،،عويدات العطر،، معطر سبراي ديما بيتها نقي مجموع وريحتو زوييينة فيه الحياة فيه انتعاش انثوي...ماحسات براسها غير وهي مستلقية فوق ناموسيتها تبوس وتشم في مخدتها تا جراااات نفس وهي تطلق تنهيدة طويييييلة رامية فيها كل سلبية خذاتها فهاد الاونة الاخيرة....
بقات شحال وهي تنوص دخلات لدوش غسلات وجهها مزيان وايديها وطرفات حالتها وخرجات بدلات حوايجها ولبسات حوايج بيتوتية فيها سترة حيث كاين هاشم وحسام كاتحشم منهم...نزلات نيشان لكوزينة باغية تعاون ماماها وترجع كيف كانت تنسى واش هي كنة دار "الرحماني" تنسى واش هي باقية على ذمة الزوج "بشار"...هي دابا "حبيبة الصافي" فقط...لكن سرعان ما رجعااات ليها ثاني ب سؤال ناديا...
ناديا"ضارت وسندات ايديها على البوطاجي من بعد ما عمرات البسطيلة" : فين راجلك علاش ماجاش معاكم !؟...
حبيبة"ماكان عليها غير تقول الحقيقة" : ساف احم..سافر البارح ف الصباح وغايرجع اليوم ولا غذا..
ناديا : ما كثرش من هاد السفر ؟...عمرنا جلسنا معاه هادشي فسكل احبيبة وحنا ساكتين دايرين ليك الخاطر...
حبيبة"حطات ايدها على جبينها وهاد الحركة كتعرفها ناديا بالي كتكذب فاش كديرها حيث حبيبة مكتكذب ونهار كتكذب دغيا كتحصل" : خدمتو صعييبة ب بزاف احم وانا ماكنشوفوش بزاف..دابا يقدر يرجع غذا ولا بعدو و تت تشووفوه...
ناديا : حبيبة هادشي ماقنعنيش..اش واقع ياكما مخاصمين ؟..ماتكذبيييش عليا حبيبة...
رقية"تدخلات" : للا ناديا صبري ماشي دابا تهضرو را ناس كاينين...
ناديا"عوجات فمها عاضة على شنايفها وكتطلع فيها وتهبط وتحرك فراسها" : واخا..ماشي دابا الهضرة سيري جلسي حدا ناسك هي خلي هادشي من بعد وبتعونينا عيب تخليهم وحدهم مع باباك...
كأنها لقات منفذ الهروب فالبلاصة طارت ومشات لصالون جلسات حدا باها تنخشت فيه كاع ماتسوقت ليهم...حتى سمعات صوت الباب تحل على بالها خوتها لكن هما دابا ف مدرستهم شكون غايكون ماتعرفات حتى دخل ريحتو سابقاه وقف كانه رجل يحتدى به هههههه...مع قال سلام وهي دور موسعة عينيها...عند بالها غايسلم عليها بعناق تا صدمها ومد ايدو...
ايوب : سلام عليكم ختي حبيبة لباس..
حبيبة"حلات فمها مدهشرة"
ايوب"بالحس" : سدي فمك اه عزرا.يل كايدوش حاط عالشباب هاد ليام...
داز ل هاشم سلم عليه وهاشم غاكيشوفو كيولي يرمش وحسام حابس ضحكة سلم عليهم وداز باس راس عيدة وايدها وحرك راسو لسعيدة...
ايوب : مرحبا بيكم نورتونا...
عيدة : الله يكبر بيك اوليدي نتوما مالين الخير...
ايوب"حرك راسو جامع فمو زعما تاويل وصواب واخا كينسى راسو ويبدا يشالي بايدو كي الولية حتى كيهز عينيه يلقى حفيظ مخنز ويتجبد..جلس حداهم وحدر راسو كيتبسم ويضحك" : ههههه...
حبيبة"هزات فيه عينيها باقيا كترمش كتشوف فيه جلس حدا حسام كيهز راسو جيهة حسام يضحاااك بالعبار ويرجع يحدر راسو تا جاب ليها ضحك" : هههههه اجي سولت عليك ماما گالت ليا بتجي فالعشية...
ايوب : ايييه وليني خليت كلشي لدراري وجيت ملي سمعت مي عيدة بتجي عندنا...
خلا حبيبة ومولاي حفيظ وهاشم وحسام كيرمشو كلشي ضهشر من صوابه وكيفاش كيهضر بديك طريقة مولاي حفيظ جاب ليه الله را تبدل فشي قنت....ايوى الضياف راهم ناشطين مرتاحين فدار مولاي حفيظ...وناااس جاها الهم على بونبر والحالة ماتعجب والدعوة بدات تخياب والقلب الكحل بدا يطلق السم من جديد...اذان الظهر كايتسمع من بعد ما طمنات عليه سهام رجعات هي فحالها وبقات كريمة مع توريا حيث رضوان ماخلاهاش تمشي مع ختها فضل تاترجع مع توريا فاش هضرات معاه....جالسين فالبيت ويوسف ناااعس ...تحل الباب هزو عينيهم بان ليهم سيحمد داخل وعلى وجهو علامة استفهام شاف جيهة يوسف وحرك راسو...
سيحمد : كي ولا ؟!
كريمة : شوية يلاه نعس...
سيحمد"شاف فتوريا" : ربيعة گالت ليا بغيتيني...
توريا"هزات فيه عينيها وتنهدات حالتها ماشي تالهيه..رجعات شافت فكريمة" : كريمة سيري دي هادشي من هنا لوحيه لتحت ورجعي ياك تعقلي على هنا ؟!
كريمة"فهمات راسها وماتقدرش تقول لا ناضت وقفات" : مانعرفش صراحة وليني نجمعو ونهبط هاو نسول الى تلفت نعيط ليك...
حركات راسها وخرجات هازة ساشية فيها بقايا الاكل والمياكي يعني زبل..شافت توريا ف سيحمد وضارت جيهة صاكها جبدات منو ديك الاستدعاء ولاحتها ليه هزها حلها وبعدها على عينيه كيقرا فيها ويحك فلحيتو...تا هز فيها عينيه مدهشر مصدوم...
سيحمد : تي ولدك داعيك ولا عينيا غيسو...
توريا"غا مكتزيد حالتها تكفس" : شتي فين وصل معايا..
سيحمد : ياعوذ بالله اش اوا هاد المسخوط مالو فهادشي..هادي هي ندي رضى والحالة الي دوز باش تسمحي ليه..صافي گلب وجهو ولا وجهو هذا ولا كيفاش...
توريا"تنهدات تا زفرت" : من هادشي كلو..نورني اش هادشي وفين غايوصلني ياكما الحبس ؟!
سيحمد : ههههه..تشوفي فيها بعينيك "خرجات عينيها على جهد جهدهم تا شدات فطرف ناموسية"
توريا : اويلي حي اويييلي حي يگطعو عليا..."خبطات فخادها على حر جهدهم تا حل يوسف عينيه ورجع سدهم..وهزات ايديها هبطات على حناكها بندبة تا خلاتهم حمريييين" اويلي يعطيييه مصيبة طيرو عليا وصلات بيه سدخل مو الحبس..
سيحمد : ششش شوري يا...مانهضروشاي فهادشي دروك راسن غانبسط عماك..انا نهضر مع القرافلي صاحبي (محامي) هو يفهمنا ويعلمنا اش نديرو...على مابان ليا دعاك حيث هاملة يوسف ولدك وهنا يضهر ليا باغي يوسف خوه يعيش معاه...ملي دعاك عليه سعني را بغا ياخذو ليك...
توريا"فحال رمى ليها سم" : مااااتشوف ليا قرافلي ولا غيرو...ولد كرشييييي وصلني لمحاكييييم شوهتي وصلت وزايد يحطو ليا فسطل والي جاي يطل "كاتخبط فصظرها الي حساتو بغا يخرج من بلاصتو بالفقصة"...شوف كي دير دير خدمتك اسيحمد راك تعرف شلا وشوية من المعارف علم سيدي يعاوني مايديييييهش خوتو حلفت علييييه مايشوفهم وحنتني وسكت وزايدها داعييييني ؟؟...
سيحمد"كيسمع ليها ويحك فلحيتو ويشووف فديك الورقة" : ممم...نخدمو معارفنا علاش لا...نشوف مع القرافلي نيت ونشوف وكيل الملك شكون ونديرو خدمتنا...ورا هو مايدير وااالي اتوريا ماعندو دليل ماعندو شهود على هادشي يعول علينا حنا ؟ ماعادا لا هاشم دار لينا ديك الخدمة لاروب ويحطك بوجهك الي عليا نديرو معاك...
جاو خوت حبيبة دخلو سلمو عليهم وعليها بقاو حداها معنقينها وفرحانين بمجيتها....وتحط الغذا مورا الغذا تحط اتاي مدوزين بيه هضرتهم..هاد المرة كلشي جالس الا رقية الي مشات مع دراري تلبسهم باش يجي ليهم طرونسبور ديالهم....
هاشم : امتى تقراي ابنتي ؟!
حبيبة : غذا عندي مع صباح...
حسام : درتي ايكونومي ؟!
حبيبة : اه...
م.حفيظ : امتى بيرجع بشار ؟!...
سعيدة عينيها مشاو لحبيبة الي ولات كلها حمرة تنهدات وحدرات راسها عيااااو من هاد تخبية وضغط...هاشم بدا يحك فراسو حسام حدر عينيه..نطقات غير عيدة كتنهد وماراضياش على هادشي والندم بدا كيزورها وبزاااف...
عيدة : الحاج لا ديرهاش منا قلة صواب سمح لينا وكان..."حبيبة خرجات عينيها خايفة تقول شي حاجة"...
م.حفيظ : لاوااه حاشا الحاجة..ياك مكاين باس...
هاشم : ونامسينا رجع ثاني سافر عارفة الحاج قوا السفر وتحاشمنا عماك...
هاشم : سافر غا يومين فطيارة وراجع خلا ليا نيت طوموبيل..ماصابش يجي تدها مع يوسف خوه خلاه بلا عقل تا مرتو ماجلس معاها كي ناس..."حدر راسو ماقدروش يقولو را غايطلقها حتى يتاكد الوضع ويصارحوهم بكلشي"
ناديا"كاتشوف فيهم ومامثيقاهمش وساكتة"
م.حفيظ : ايه هههه ماعليش الله معاه...
عيدة"نغزات ولدها" : يلاه هذا هو الوقت اولدي..
ناديا : لواه الحاجة جلسو باتو معانا وصباح سيرو...
عيدة : مانصيبشاااي نبعد على وسادي..نمشيو نزورو يوسف ونصدو الحاج يرجع مايصيب حد وماصابش يجي معانا مشى على بونبر ل بني ملال...
مابقاوش قدرو يبقاو الوضع اصبح محرج بزاف...ناضو تسالمو معاهم وخرجو من صالون بقات سعيدة موخرة شدات فايد حبيبة وزيرات عليها وغمضات عينيها وهي تلاح حبيبة معنقاها بزااف عزيزة عليها سعيدة لقات فيها الحنان والامان وسط جه.نم الكحلة وتا عيدة ماعمرها خسرات ليها ولكن بعض الاشخاص عيشوها المرار مع البدية...تسالمو معاهم ومشاو...ضارت حبيبة جيهة ايوب وهي تصغر فيه عينيها وبدات تقرب..مولاي حفيظ دخل لدوش يتوضى للعصر وناديا دخلات مع رقية تعاونها تحط الماعن فلاماشين....
ايوب : اش تم ؟!
حبيبة : مالك قلبتي وجهك ؟!..مابقيتي تتعرفني ؟
ايوب"ماد ايديه مبعدها" : اسيري اوا فحالك راكي مزوجة دابا ب خولاكو يعطيك قاتا بعدي مني...سيري لاش رجعتي ؟!
حبيبة : حيث توحشتك ههههه...
ايوب"ميق فيها" : مزيييينااااتك نتي ووحشك..لاكان غا وحشك جاي من رحامنة هي بعدي مني..اجي باقي مابدلتيش اسم الفيس !؟
حبيبة : اش نبدل فيه ؟!
ايوب : ديري زوجي خذ بيدي الى جهنم...او زوجي سر تعاستي...
حبيبة"صرطات ريقها كانه فيقها ورجعها لواقع بشااار وعائلتو..حسات بحلقها نشف وعينيها بغاو يغرغرو جات تنسى هاهو فكرها..حدها تبسمات ليه واحد ابتسامة جاتو هو فشكل..ابتسامة فوق الحزن"
ايوب : اهيا را هي تنضحك...
ماعرف باش تبلى ندم لاش قاليها هاكاك مالقى مايدير وهو يبان ليه فوجهها تا بدا يصغر فعينيه ثاني...شافتو تايشوف وديك الشوفة هي كاتعرف مغزاااها..
حبيبة"طلقات حلوقها" : واااااااااعووووو مامااااااااا...
ماعقلاتش على راسها امتى عطات رجليها لريح قبل مايوصلها كانت طارت طلعات كتغوت وهو تابعها تا دخلات وطرقات عليها البيت سداتو بساروت...
ايوب : يااا والله يالفقيرتمك تاتنقي داك الوجه...اويييييلي وييييلي مشات لرحامنة جات بوجهها عامر ريش الدجاج البلدي وبيبي بخنونتو...
حبيبة : بعد منييييي...
ايوب : صباح رجعي من لافاك وبدوزي عند نسرين لصالون وبديري سوان لداك الوجه...هي هو بتخرجي دابا نقص ليك راسي بتشوهيييني تا مع نسرين...
حبيبة : غانمشي لصالون ونتا ماتحطش فيا ايديك...
ايوب : خرجي نقص ليك ماتخافيش اه درتي ليا الجعرة ابنتلحرااام...
حبيبة : لاااا..مامااااا...
ايوب : يعتيك غمة..بتخرجي ؟..خرجي وندير ليك واحد الكادو فالصالون...
حبيبة : اش هو ؟!
ايوب : بيديرو ليك البراليفت الي كنتي بيتي...
حبيبة : انا بحجباااني ياك گلتي يعمرو صالون...
ايوب : وراه تتباني ليا نسلتي..عمرتي بيهم صالون توريا وجيتي..وخرجي الحيمارية درتي ليا جنون مخلطين ب شمهروش...
حبيبة : وااا بعد منييييي اهى سير فحالك را تتقصحني فوجهي.غذا بنمشي عندك لصالون ونسرين را ديالنا ماشي مشكيل نيت بنصايب بزااف...وندير سوان لشعري مادرتوش حيث عندي لافاك وغانمشي مافيا مايتشاف...
ايوب : مابغيتيش تخرجي ؟!
حبيبة : لا...
ايوب : ايوى الله ينعل الفقيرتمك وجد بوك...فين راجلك الكذابة خلاااك وزاد ؟ هادشي متيدوزش عليا ونجلسو انا وياك وبتعاودي ليا...
مع قالها ضار وهو يلقى مولاي حفييظ واقف كيشوف فيه...عينيه ورجع باللور...
م.حفيظ : اش كتگجدر تم...مال صوتك واصل بالغوات ياك اودا شي باس مكاين ؟!...
حبيبة خرجات عينيها من سمعات صوت باباها...ايوب ولا يصرط فريقو...
ايوب : بغيتها تخرج..
م.حفيظ : لاش ؟! ..
ايوب. : تحيد وجهها من ريش وتمشي عند صالون يحيد ليها نسرين...
حبيبة"شدات فمها ماتت بالضحك" : هههههههههههههه...
م.حفيظ : حيد من تم وخليها عليك ديك البسالة نقصها..يلاه حيد من تم...ونقص صوتك من الغوات...
ايوب"مشى عمو" : هاني..(سمع ضحك حبيبة) كاضحكي وتهجريييه من جنابك..غاتمشي لصالون وبتخلصي على قلبك فلوس سوانات بجوج...داير معاك مزيان ودابا جلسي على قاعك..ومزااال نهضرو على داك هولاكو الي مجوجة بيه من نهار خاضك وهو كايقضي فشغالات...كلشي بدوز عليه الا انا..
"عاباد.اان"
خرج من واحد المبنى على شكل لابوراطوار كايسوس فحوايجو وشاد سيجارة فصباعو شاعلها كيتكيف...داير نضاضر شمس نوع رايبان ولابس لباسو المعتاد كان البرد محرك لايح عليه جاكيط كحلة خفيفة تحت منها تيشرت بيض وسروال ميليتيغ بيج وبروتكان كحل...تا لحق عليه عباس ووقف حداه...
عبا.س"بالمانية" : بقى اجتماع واحد..ونسينو معاهم..
بشار"معصب واخا مبين البرود" : هادشي بزاف..عندي مشاكيل فبلادي ممساليش لهاد قوة الاجتماعات...على بالي نهار واحد نصدقو فيومين ؟!..
عباس : هنا مكاين حتى واحد يقدر ينفعنا من غيرك..باش ترسم التخطيط خاصك تكون فارض الواقع وتدرس هادشي... ( المهندس الكميائي عندو بزاف الوضاىف من بينها استخراج الوقود من البتر.ول وكيفاش كيخرج منو منتوجات كميائية وطرق حفظ السلامة من الخطر وكيفاش كينقص من المشاكل الي كتكون خطرة ورسم تخطيط المعدات المستخدمة..عندو بزاااف الوضائف الكميائية الي كتساعد وميمكنش يستغناو عليه حيث هو العقل المدبر عاد كيجيو وضائف وراه)..
بشار هز عينيه كيشوف بعيييد عقلو وبالو مع يوسف ومع المشاكل الي خلا وحتى مع مرتو الي علاقتهم على وشك الطلاق..راسو عامر حاليا بهادشي ولكن مضطر حيث مرتابط مع هاد ناس وهادشي دايرو غير قانوني لانهم خدامين معاه بلا وراق حيث عندو خدمتو اساسية فالمانيا ف صناعة وقود طائرات تما وهنا كيخدم بلا وراق حيث ذكي بزاف وعاونهم وحيث مغربي ومرتابط بخدمة اخرى رئيسية المغاربة بصفة عامة كيواجهو مشاكل ف اي.ران ماعندهمش قنصلية تما والي بغى يصلح الوضع كيطلع لاذربيدجان...بشار كيخدم معاهم عن بعد وكيتخلص بزبابل ديال الفلوس...يعيا يقنع راسو انه كيخدم عادي لكن كتبقى غير قانونية...حيث كيستخدمو الوقود حتى فالتهريب...
بشار"شاف فساعتو" : شي اوطيل هنا !!
هانزاده"تمات جايا ووقفات حداهم وربعات ايديها كتشوف فيه" : كاينة داري هنا نزل بات فيها...
بشار : لا..."شاف فعباس" ؟؟
عباس : كاين بزااف شوف اش بغيتي ونوصلك..."حرك راسو ومشى ركب معاه خلا هانزاده كترمش فيه. غمزها عباس تخليه طرونكيل وتميك"....
وقفات قدام المري كاتقاد فكسوتها البيضة دياال العروس كلها اسطخاس ومنفوشة من تحت قداااش..وورا ضهرها لتحت مزينة ب بابيون كبيرة وفوق على كتافها ضايرة على شكل بابيون نيت... كاتبان وسطها كانها عروس هاربة من العصر الفكتوري...شعرها البني مموج من فوق ومزين ببروش فيه لؤلؤ وحجر لامع ومكياجها نااااعم باحمر شفاه مخلي شفايفها المنفوخين يبرزو وتبان كأنها اميرة الاميرات...حطات صبعها تحت شنايفها كاتقاد اخر لمسات وهي تهز اطراف فستانها بايديها وضارت جيهة الصباط الابيض المزين بنفس شكل الكسوة...هزات رجلها وخشاتها ففردة وثانية ففردة وتمشات خارجة من بيتها كاتسمع صوت الزغارييييت...غاديا بخطى ثقيييلة كأي عروس حتى سمعات صوت وراها وهي دور مع ضارت حسات بالعافية لفحات ليها وجههها وباب تحل مع تحل خرج لهيب العافية فبلاصة مايحر.قها رش عليها د.م لطخ ليها كسوتها تا دارت ايديها وغوتات...
حبيبة : اااااااااااا....اش هادشيييي....
ضارت كتجري هازة جلايلها تا بدات تسمع صوت ناس كيغوتو وصوت واحد كيعيط ليها شبه ليها فصوت جاد من خلال الاوديو وهضرتو المعكلة...
جاد : حبيييبة ههههه...اجي عندي...
بقات كتجري والصباط الشوك كينوض فيه كتحس برجليها بغاو يطيرو تا بدا صباط يتملص ليها طاحت ليها فردة وهي دور لقاتو واقف كيشوف فيها تا تحنى هزها كيشوف فيها....
رجعات ضارت هاربة وكسوتها مرشوشة....كتسمع صوتها كيحلف عليها وعنقها كايتقج عينيها خرجو كاتجري وتقول وصلت مكتوصلش....غاديا وتبكي وتغوت بحر جهدها والغوات والعافية والحالا راسها ضرها والنفس تقطعاااات....رمات صباط الثاني ومشات كتجري حتى تزدحات مع صدر هزات عينيها فيه وهو يجلسها على واحد الكرسي ودار ايدو على فمو بمعنى "ششش"... هبط عند رجليها....هو نفسو كتشوف فيه..هز ليها رجل لبسها فردة وهز ليها ثانية ولبسها ليها...كاتحس بيها كتحسك ليها فرجليها...دفع ليها صباط حسات بروحها خرجات وهي تغوت تا ناضت شااااهقة كتنهج وعرقاااااااانة...
حبيبة : م مامااا اهى اهى...فففففف...
ضارت هنا وهنا حمدات الله بالي حلم ماشي حقيقة وخا كان كيخلع....قدرات تفرز الاصوات وغواتهم كانو ديال ديك الدار...بقات تنهج وهي ترجع حطات راسها على المخدة وماحسااتش براسها امتى غمضات عينيها تا تحل الباب وهو يدخل خاشي ايديه فجيابو كيشوووف فيها ناعسة وقف شحااال كيشوف فيها قبل مايجلس جنبها...مدة وهو حاضي تنفسها ووجهها حتى هز ايدو وحطها على رقبتها حساات بالخنقة من جدييييد وهي تشرع عينيها وشهقااات كتقلب عالنفس وتحيد ليه فايديه حتى بغات تموووت...ماعرفاتوش تا شكوون هو كيبان ليها كلو ضلااام هبطات عينيها لقات رايها لابسة نفس الكسوة وملطخة بنفس دم.يات....تا شوي حسات بالنفس رجعاات وراااحة ماعمرها شافتها...حلات فيه عينيها لقاتو حاط ايدو على حنكها كايدوز عليه ونفس الصوت نفس النبرة...كاتسمع فصوته كأنه غارق فبيييير عمييييييق وبعييييييد....شوية كايتسمع غير....
بشار : عاونيييني...
"يشهد الله أنني تحملت بشراً يرفضهم حتى الطب النفسي."...
حلات عينيها على جهدهم قلبها كيضرررب بوتيرة سريعة فحال الى كانت كتسابق...شحال وهي كتشوف بلا ماترمش وتنهج،، مدة حتى استوعبت انها فعلا فاقت وبلي كان مجرد كابوس وسط حلم ودوك الاصوات شي عقلت عليه شي ماعقلاتش...ضارت هنا وهنا لقات الحال باقي ضلام..مدات ايدها شعلات لفيوز عند راسها وهزات ساعة سمارت كتشوف الساعة لقاتها ربعة ونص ديال الصباح..حطات ايدها على وجهها انتابهت للعرق الي كان كايتصبب منها...غمضات عينيها مزال كاتنهج وهي تحط ايدها على حنكها نيشان مشى تفكيرها ل ايدو الي تحطات عليها وكيفاش ديك اللحظة كانت حاسة بديك اللمسة مختالفة !!..منو هو ؟...نفات اي حاجة فراسها وساست اي حاجة من داك الحلم...تنهدات وناضت شوي تا شربات الما وحسات براسها روات عطشها ورطبات ريقها الي نشف وهي ترجع تكات كاتعوذ من شيطان رجيم كيف كانت كتقوليها ناديا دير الى حلمات بشي حاجة خلعاتها وتقرا اية الكرسي حتى حسات براسهت رتااحت وهي ترجع تكات مابقاتش عقلات مزال على راسها امتى غفاات من جديد وهاد الراحة فنعاس مكانتش كاتلقاها فالفيرما...
الصوت الي افتاقداتو كل صباح رجع من جديد..من فرحتها باليوم الاول كيف صونا المنبه اول رنة طفاتو وناضت نيشان لدوش وحيث كانت مدوشة قبل ماتنعس فاقت غسلات غير وجهها بالجيل ديالو وخرجات حيدات زيف من شعرها وطلقاتو كان باقي شوي فازگ...نشفاتو ب سوشوار وبزربة دارت ليه ليسور صايباتو بكل حيوية ونشاط...ناسية ورامية اي حاجة تفكرها بلهيه وبيه هو...من فرحتها برجوعها لدراسة خلاتها تنسى او تتناسى وتعيش لحظة بلحظتها...هزات الحوايج الي غاتلبس فاول يوم دراسي ليها والي كانت classy outfit...سروال ديال توب توبو واقف فالاسود رجليه طالعين شوي عند الكعبة ستيل دروا وسمطة ديالو طالعة عند صرة...وفوق قميجة فالارجواني من لور هابطة فايتة المؤخرة ومن قدام طالعة ومع ليهونش بان هاد ستيل عليها كيحمق...سدات ماتبقى من صديفات ومشات ل كوافوز دارت ليكخون دشمس ولاحتها ف صاكها باش تجددها...والميكاب اكتفت ب ايلاينر خط قصير و گلوص نيود الي خذات قبل ماتزوج من كيكو..جلسات فوق ناموسية كترش ليكخون على رجليها الي حيدات ليهم تقاشر من بعد مادوشات ودارت ليهم فازلين مخلطة بالعكر الفاسي لقاتهم رطبيين دغيا شربو ليها رجليها حيث نشفو بزاف وهي فالعروبية والجو سخون والمشاكل الي دازو هملاتهم وهملات راسها ونفسيتها كانت فالحضيض...مزال جالسة حتى تدق الباب ونطق...
ايوب : الجدرة فقتي ؟!
حبيبة : ايووب دخل...
ايوب"حل الباب ودخل مبوق بالنعاس لابس سورفيت كحلة وشعرو مخربق" : سربي نوصلك بنرجع نعس...
حبيبة : توصلني !! علاه فين بابا..
ايوب : خبيتو ف جيبي وبنوضلك انا...ويلي يا حبيبة !!
حبيبة"غمضات عين وخلات لاخرى" : اييي نسيييت بلي مشى ل كازا...
ايوب : مممم...
حبيبة"كترمش فيه كيبان ليها مضهصص مسكين ههه" : هييي سير رجع بنعيط لعمي عمر يوصلني...
ايوب : راه انا الي مشقلب بنعاس ماشي نتي..عمك عمر را مشى مع باباك علاه باك باش بيمشي لكازا على كرشو مثلا !!...
حبيبة : نمشي فطاكسي...
ايوب : يخخخخ على حالة هبطي لا بيتي تهبطي فطري وزيدي نوصلك..فيك الهضرة راني جيت ندق عليك باش تسربي راسك حيث بسلامتك ااه تتجلسي سبع سنين هيييي فسير من هنا وطير من هنا ودخل لدوش تشوفيه واش باقي هو هو ولا بدل فايونص راسو ...سربي راسك را بيت نرجع نعس راه مادخلت تال خمسة تسنيت عمي فراس درب تا مشى ودخلت...
بقى يبرگم وينگر تا هزات صاكها وواحد دفتر حجم كبير رمات شي ستيلويات من الي عندها حتى تمشي تاخذ اش غايخصها..و كالكيلاتخيس حيث عندها حصة ف comptabilité و مذكرة فالشيبي فيها elssa...خرجات عند الباب كاسن ماريو ديال صبابطها هزات صندال كحلة بطالون قصير نزلات بزربة شافت ساعتها الاپل لقات باقي الحال ب ساعة...لقات رقية و ناديا جالسين كيفطرو مع دراري تاهما واجدين وحداهم شكايرهم باش يمشيو لمدرستهم...
حبيبة"تحنات باست ماماها ورقية ودازت لخوتها تاهما" : صباح الخييير...
ناديا : صباح الخير حبيبتي..فايقة ناشطة...
حبيبة : ههه معلوم ليوم لول ههههه...
رقية : اتاي ياك ؟!..
حبيبة"تنهدات تا تسمعات تقولي هازة شوااال الهم وبصح هااازة غير متعايشة مع لحظة وصافي" : الله...كبييه كبيييه توحشتو بزااااف..
ناديا"هزات حاجبها" : علاه مكنتيش كتشربيه تم ؟!..
حبيبة : ااا ؟ لا كنشربو ههه هي ماشي بحال ديالك وديال دادا..
حركات ناديا راسها وحبيبة حدرات عينيها..
يلاه تيسرات ففطورها اتا ناض وقف وبدا يشير بايدو...
ايوب : ساقازو نوضي...
حبيبة"وقفات جبدات نضاضرها من بوشيط دارتهم فوق شعرها وناضت سلمات عليهم ومشات خلات ناديا متبعة ليها العين"
رقية"طبطبات على ناديا" : باقي شاكة !؟
ناديا : گلبي ماهانيش عليها..شوفي كيف جات من لهيه..هادي هي حبيبة ؟..
رقية : يكون الجو موالمهاش وصافي...
خرجات حبيبة تابعة ايوب حتى ركبو فسيارتو وديمارا منطالق مباشرة لداوديات فين كاينة كلية العلوم الاقتصادية باش تبدا اول يوم ليها..مع وقف وهي تجيد من صاكها ريحة طوباكو فانيل ديالها رشاتها عليها كلها تا خلاتو يحل فشرجم ويكحب..
ايوب : يعتيك قاتا خنقتيني...اواخا تخويها كلها را باقي فيك ريحة صردي رحامنة...
La comptabilité générale consiste à répertorier tous les mouvements financiers....
صوت البروف كان مالي ارجاء لونفي او مدرج القاعة...واقف كيشرح والميكرو فايدو..كاتحاول ما امكن تعطي تركيزها..حاطة تيليفونها حداها حتى تشعل وطلع نوتيف ف انسطا فهاد اللحظة البروف خلاهم يقيدو اش كتب كانت هي مسجلاه استغلت البرهة باش ترتاح وتشغل بالها بحاجة تبعدها على داك الحلم...دخلات نيشان لانسطا ومشات جيهة الميساجات كتقرا وتجاوب حتى لقات ميساج جاد هابط لتاااااحت ماشافتوش من كترة نوتيف وميساجات ديال اصدقاء القدام والي باقيين...كمشات حجبانها كتفكر كيفاش شافتو فالحلم وخا نص فداك الحلم نسات تفاصيلو كتفكر غير تشاش واخر فقرة من الحلم الي بان فيها بشار كيناجيها تعاونو...صرطات ريقها وساست داكشي من بالها وجاوباتو فالحين حيث غير حلم وكابوس لا غير وفاقت منو وهي دابا فحصتها عاادي...
حبيبة : سمح ليا مجاوبتكش ماكنتش مسالية..اشمن اجراءات !
وكان داخل فديك اللحظة كيف وصلو ميساجها ماتردد يجاوبها..هي مشات تصفح باقي صفحات حتى طلع جوابو والي كان ملخص ف " شي مشاكل عائلية ماتشغليش بالك"....حركات راسها بتفهم وعدم اكتراث وترد عليه تاهي ب ما قل و دل " اوك"...لحظة رجعات فيها كتشوف الانحاء ديال لونفي حتى وصلها ثاني الرد...
جاد : قريب نرجع ل مغرب...نقدر نتلاقا بيك !!..
حبيبة"دايرة ستيلو ففمها عينيها فالرسالة وترمش برموشها الكثاف..اش غاتقوليه لا انا مزوجة ؟...هذا زواج مزوجة اصلا...ماعمرها اعتارفات بيه حيث ببساطة جالسة على عينيها ولغرض باها يتقدا..وهي دابا على وشك الطلاق كيف مفكر بشار وكيف هي قااابلة وكتسنى غير يتم...ولكن كتفكر توريا وتهديدها وخا ساكتة هاد الايام بدات كتحس ان توريا تقريبا موافقة انها تطلق...ولكن شنو مصير الكريدي واش غايبقاو على كلمتهم فداك الحل الي دايرين يبقى يعطي من العام لعام؟؟..بقات كتفكر وتفكير ولا ملازمها من نهار حطات رجليها فدار الرحماني...مافاقت غير على صوت الهاتف الي تسد وهي كتفكر ورجع شعل ب ميساجو فيه " ؟؟؟"...زفرات وهي تدخل وكان ردها " ان شاء الله"...
ماكثراتش دغيا خرجات من المحادثة سدات الكونيكسيون وحطات تيليفونها ورجعات لتركيزها فالدرس بمجرد ما نطق البروف مستانف الحصة...
الساعة كانت كتشير لعشرة قدقد..و فمطار مراكش المنارة نزلات طيارة القادمة من برلين...من ديك البلاد الي مشى ليها..كمل فيها ورجع بطيارة لبرلين عاد هبط فمراكش حيث دخل ل اير**ن ب الجن..سية الالمانية...كان واقف هاشم متكي على سيارة بشار الي جا بيها شاد الكارو فايدو كيكمي فيه ويتسنى...حتى بانو ليه ناس خارجين الفوج ديال برلين...شوي حتى بان ليه جاي حادر راسو وحجبانو مغوووبشييين وطالعين للسما داير نضاضر شمس...وخاشي ايد فجيبو وايد هاز بيها صويك صغيير داير فيه لوازم ضرورية فقط ودواه...تگعد هاشم شاف فساعتو كانت ساعة لاصقة معاش قاليه غايوصل نيت...تقدم شوية حتى هز بشار عينيه شاف فيه ورجع هبط عينيه تا وصل لعندو تسالم معاه وضرب بشار على ضهر هاشم بشكر...
هاشم. : ياكما تكرفصتي....
بشار"حرك راسو ب لا..ووقف داير ايديه على نصو من بعد ما دار صاك ف سيارة..تنهد كيفكر ويحك فشنايفو بسنانو عينيه فنقطة بعيييدة لهيييه...حتى ضار عند هاشم" : شكون مع يوسف دابا !؟..
هاشم"حدر راسو كيضحك ورجع شاف فيه" : معاه توريا و بّا و مرت سيحمد عمك...
بشار"بدا يدوز على لحيتو بايدو وشاف فساعتو" : خاصني نشوف المحامي دار معايا البارح وماساليتش باش نلحگ لهنا...
هاشم. : سير ريح فدار كول شي حاجة وسير عندو...وصلني لكلينيك غايجي تما حسام...
وصل هاشم الكلينيك ورجع بشار لبلاصة المقود وكسيرا ماشي لدار الي غير قريبة تما...خرج من دوش كاينشف فحالتو وشعرو رش ديدورنت...هز تيليفونو وداز نيشان لنمرة المحامي صونا ليه اكد ليه انه غايجي من دابا شوي...رجع حط تيليفون ووقف كيشوف اش يدير منين يبدا..كايعض فشنايفو بجنب حتى ضار ومشى لماريو فين حاط حوايجو جبد لبسة كاملة باقي جديدة بتيكيت ديالها...سروال ميليتيغ كحل وتريكو قطن بالكمايم بيض فيه كتابة بالاسود..جلس جنب ناموسية تا لبس تقاشرو..كيلبس وعقلو كيدي ويجيب راسو عااامر بزاااف بشلا مطارق وشلا مصايب وشلااا مناوي يدير والي دخل لراسو يجيه عجب انه كيبان خاااتر ومتبت وهاااادي..وهاد نوع الخوف منو كبيييير ماكتقدرش تعرف اش غايدير واش ناوي حتى كيغفلك...لبس سبرديلا هاد المرة وخلا بروتكان...مشى لكوزينة حل ثلاجة هز قرعة ديال الما ومشى هز فنيدة من دواه حيث هادي وقتو رماها وشرب عليها الما وجلس شوية فصالامونجي تم...عاد كمل القرعة وناض هز تيليفونو وبزطامو وسوارت سيارة دارهم فجيبو عاد مشى لدوش مشط شعرو لور ورش بارفانو ومشى هز واحد الملف كان حاطو تما...وخرج نيشان لعند المحامي الي ماتعطلش باش دخلو حيث عطاه موعد...جلس قدامو فالمكتب..
العمراني (محامي): سي الهاشمي امضرا جبتي ليا داكشي !؟
بشار"حط ليه الملف وكحزو ليه بدون ميتكلم"
العمراني"جر الملف حلو وبدا يقرا وبشار مربع ايديه خلاه يقرا على خااطرو..حتى سد الملف وشاف فيه" : هادشي مزياان..ولكن ماكافيش بالنسبة لانك تقنع القاضي يحكم بالاهمال..ودير فبالك انه الى تثبت الاهمال هنا عندنا جنحة وبالتالي تقدر دوز الام ديال حكم سورسي او تدفع غرامة او حبس...
حطو حاليا بالصورة...فهاد الحالة "بشار" رفع شكاية الاهمال الاسري ضد توريا عن طريق المحامي للنيابة العامة..هاد الحالة ديال اهمال اسري فحالة يوسف كتكون "جنحة" بالتالي كتدفع شكاية وخاص يكونو حجج وبراهين كاتسمى شكاية المرفقات...اذا اقتانعت كتكفل النيابة العامة بفتح الملف وبالتالي ارسال استدعاء للمعني بالامر لحضور الجلسات..
العمراني : الجلسة كاين نهار واحد فالشهر...الحجج الي عطيناهم كانو شواهد طبية ان الاخ ديالك ماعمرو دار الفاكسان..وانه كان مهمل صحيا...مزال خاص تزيد شواهد طبية ومزال غايخصنا شهود...
بشار : شهود ؟!
العمراني"حرك راسو وحط ستيلو" : الشهود كيزيدو يعززو تبوث الاهمال من طرف الام...على ما شرحتي ليا بلي فزيادة ديالو تلقى نفور من الواليدة ديالك...بلغتنا العامية مكانتش راضية بيه...كنتي حاضر لديك الوقت ؟!..عندك شاهد كيثبت هادشي ؟!
بشار"تفكر وجود حتى باه ديك الوقت حس بموس اختار.ق ليه صدرو تا زير على ايدو بجهد..هز راسو وحركو" : فاش تزاد مكانش باين انه من صحاب syndrome de down..بدا يكبر وبداو الملامح يبانو..داك الوقت العروبية وقلة الوعي باش تمشي تبع مع الطبيب ماعمرها مشات ليه...
المحامي : ملي كنتي كتهضر معاه كنتي كتلقاه وحدو مامعاه حد حتى من الاخت ديالك...مايمكنش شي حد عندكم يشهد معاك اذا بصح حاضرين...
بشار"تفكر مرت عمو..تفكر هاشم..حسام" : كاين العم والمراة ديالو وولدو...
العمراني"حرك راسو" : مزياان..تقدر تهضر معاهم نهار يطلبهم القاضي يدليو بالشهادة ديالهم..."بقى كيقلب فدوك الوراق" فديك الوقت ديال الجلسة نطالب بالخبرة الطبية على الاخ ديالك...
بشار : الى ماگدوش يشهدو ؟!.."ربع ايديه وشاف فيه بجدية"
ماقدرش يقوليه راهم كيديرو اعتبار لتوريا...غايخافو ولا يحشمو منها...مغايجيوش من جيهتو...كلشي تم خايف على راسو...هاشم يقدر يشهد معاه ويقدر لا يخاف يزيد يكفس او يساهم ف الح.. ر ب بينو وبين مو...سعيدة كذلك..كلشي جا بين نارين...المحامي فهم انه ممكن مايجيوش...
العمراني"كان مسند على كرسيه ومشابك ايديه..بقى كيشوف فيه ويفكر" : نهار طاح ومرض شكون كان حداه...كيفاش وقع ؟!..رجع عاود ليا من لول باش نعرف ونفكر نشوف شي ثغرة منين نجيبو دليل قوي ولا شاهد...
بشار"بقى كيشوووف فيه ويفكر"...
ماعمرو فكر انه شي نهار يوصل هو ومو لهاد المواصل...سنيييين وهو كان كيسعى ويترجى رضاها ويسمع سماحتها فالي دارو...عاش تحت ضغوطااات نفسية مرض فصحتو وماگالها لحد كان الهدف الوحيييد عندو هو مو تشوف فيه...لكن يوصل انهم يتواجهو فالمحكمة ؟!..هادي عمرها مكانت طيح ليه عالبال..لكن ربي كيخلق ويفرق ريوس وكل راس واش مكتب ليه وبشار مكتابو فهاد الحياة هو هاد الحالة...من الي خرج وهضرة المحامي كتزنزن ليه فراسو...هبط من العمارة ووقف حدا سيارتو تا بغى يركب وهو يزفر وضار تكا على سيارة كيدوز على شعرو ووجهو بقلة حيلة ونفاذ صبر...حتى جبد تاني السيجارة من باكية وشعلها بدا يكمي وعقلو كيدي ويجيب...حتى مرر ايديه وجبد من جيبو تيليفون ودوز الخط نيشان لهاشم...اقرب شخص ليه ويمكن الصديق الوحيد الي عندو ماشي غير عمو حيث هو منعدم الاصدقاء والاحباب..ممكن تحسي بيه شخص مقطوع من شجرة وهادشي مريحو...
بشار : فينك ؟!
هاشم : راجع ل سيدي بوعثمان...لقيادة..
بشار : ماشي مشكيل نجي عندك ؟!
هاشم : جي الله اودي..تلقاني فالمكتب مخارجش لدواور نيت..
قطع معاه وبقى واقف تا كمل الگارو رماه وعشف عليه وركب فسيارتو..عارف غايكونو مع يوسف وعااارف مو غاتبقى ملازماه مادام وصلتها الاستدعاء...ضحك بجنب مستهزء من الوضع الي هو فيه مع مو...وهو فالطريق حتى الماكلة ماكال والو من غير الفطور فطرو فالطيارة كيف وصل تا راحة ماعطاهاش لراسو حيث ببساطة معندوش وقت لراحة لهادشي الي كيدير فيه..وصل لسيدي بوعثمان وقف قدام القيادة...صونا ليه تا بان ليه خرج وشير ليه باش يدخل..جلس شي دقايق عاد نزل من سيارة كيقاد فتريكوه...غادي نيشان تا وصل لمكتب ودخل لقاه جالس فمكتب ديالو مشى لفوطوي وتلاح فوقها حاط راسو وغمض عينيه تا حلهم فور ما سمع صوت هاشم...
هاشم : فين وصلتي مع المحامي...
بشار"مجاوبوش بقى شحال كيشوف فالسقف...وهو يهز راسو وشاف فيه" : السيدة الي ولدات بنت المشاوري ف يوسف..مزال عايشة ؟!
هاشم"بتفكير" : القابلة القرشية ؟!..
بشار"حرك راسو"
هاشم : عشرين عام هادي..وراها فدوار الي حدانا وليني نسول ليك سعيدة...علاش؟!..
بشار"كيحرك ف كونطاكت سيارة وايد كتحك فلحيتو بتفكير..نطق وعينيه فلارض فنقطة مبهمة". : كانت عندي 16 ans...دازت وقيتة ولات عند يوسف 6 mois...كنت جاي من lycée..ملي بان فيه علامات Trisomie 21 (ثلاثي صبغي ديال نوع متلازمة داون)...مايتنساش ليا داك نهار الي لاحتو ليها اهاااشم مايتنساااش..."هز فيه عينيه حمرييييييين" هاااشم باش ماكاان تمشي معايا نشوفو ديك سيدة..الى كانت فالحياة...
هاشم"حرك راسو بتفهم" : نمشييي علاش منمشيش...محتاجها ؟!..
بشار : شاهدة معايا...
هاشم : مرحبا..ولا بغيتي تزيد شهود انا معاك كاينة تا شاهدة من غيرها..مايغركش راني دكتوراه فالقانون نفعك...
يتبع...
التعليقات
لا توجد تعليقات بعد، كن أول من يعلق.