محتوى القصة
بقات واقفة مصدومة من الي جا..عمرها توقعت تجي لعندها بنفسها...اشنو بغات من بعد هاد المدة كاملة...من الي شتتات ليها شملها ...حتى وصل بيها تخاصم مع واليديها وتفرقها على باها...فضحات ليلة الدخلة الجحيمية الي طرات بيها وبين بشار...وصلات شي حوايج كانو خاصة...بخلاصة هي دابا كاتشوف فالانسانة الي كانت السباب حتى عاشت شهر وزيادة ديال الجحيم وباقي لحد الساعة كاتعيش الاضرار منها علاقتها الي تقطعات ب باباها بصفة نهائية...
حادرة عينيها ومهبطة الكتاف من الحسرة والندم الي كان باين عليها من برا الي شافها يعرف ان هاد سيدة بيها شي حاجة هرسات ليها الخاطر وخلاتها بهاد الحال ويقولو الله يحسن العوان ويفرج...
ماكانتش واقفة وحدها...كان واقف معاها الحاج عبد القادر...وكانت حتى سعيدة وهاشم..ماتوقعاتش يجيو فهاد الوقت..هي باش تقوليهم دخلو غير شافتها تبلوكات بمرة...حتى نطقات سعيدة...
سعيدة : سلام بنيتي حبيبة...نبقاو واگفين ههه...
حبيبة : ها..م اه واخا دخل..
مازال ماكملت هضرتها حتى حسات بيه وقف وراها ضارت لعندو بان ليها واقف مغوبش مكيشوفش جيهتهم كيف العادة غير لمحها حدر عينيه اصلا كان مولف مكيزگيش فيها شوفة من صغر كاع عيالات عمامو غير سعيدة حيث تقريبا رباتو الي مولف عادي...
ع.القادر : ندخلو ولدي ولا نبقاو هن...
حبيبة رجعات ضارت كتشوف فيه ماعرفتش اش تقول حيث باقي مصدومة...ماعرفت دخلها ولا تغوت عليها وتجري عليها..تفكرات ما جرا ليها بسبابها وتفكرات المأسات الي عاشتها حتى هي بمو.ت ولدها...سعيدة شافت فبشار الي بقى واقف كايشوف شحاال حتى قالو را جرا عليها بطريقة غير مباشرة لكن حنتهم ملي شاف فحبيبة وسولها غير بعينيه كانه باغي ياخذ الاذن منها حيث مضرورة بزاف بسبابها ويمكن كثر منو...وحيث حتى هادي دارها...حدرت عينيها وحركت راسها عاد رجع شاف فجدو وحرك ليه راسو بمعنى دخلو...
ع.القادر : دخلي ابنتي...
ترددات فالاول يمكن حشمانة ويمكن خايفة ويمكن حتى وجهها الي غلبها فهاد اللحظة...حدرت راسها ودخلات بشار عنق حبيبة بجنب وكحاز هو وياه حتى دارو ليهم طريق دخلو..وقفات سعيدة تا طبطبات عليه وشكراتو غير بعينيها حرك راسو مثقل...غير دخلو وهو ينزل عينيه لحبيبة باسها فراسها وعنقها بجنب وتبعوهم...
جلسو كاملين فالصالون..حبيبة جلسات جنب بشار كاتسنى شنو غايوقع وشنو غايتقال...حتى نطق الحاج موجه كلامو ليهم بزوج...
ع.القادر : ياكما جيناكم اولدي فوقت ماهواش..ضهر ليا لحگ (وصل) المغرب وحنا يلاه جايين...
بشار"كايحك فلحيتو" : ماشي مشكيل..
ع.القادر"حرك راسو وهو يدور عندها حط ايدو على كتفها محركها" : دوي ابنتي گولي اش عدك وقضي عليك هادشي خلاص...
صرطات ريقها..عينيها فالارض الوجه الي يشوف فيهم ماكاينش...بانت فيها وهما كايتسناو حبيبة تاهي كتشوف مخشية جنب بشار جامعة ايديها مزيرة عليهم...تنهدات وهي تنطق...
ربيعة : انا جيت لهنا حتى ضارت بيا الوقت وشفت وتشوفت العذاب..دازت عليا وانا الي كنت نگول ما بحالي حد فالعيشة راني كنة الرحماني وشكون هذا الي مايعرف رحماني...كنت غافلة على العيب الي ضاير بيا وغافلة على شلا...نهار غرني شيطاني وخرجت العيب ودرت معاكم العار...غرني شيطان تا نويت نشتت ليكم شمل (ضربت صدرها بجهد) باييدي مشيت ونويت نخرب البيت...بايدي هادو...جيهة من جيهتو وضحكت عليكم وهو را ضاحك عليا وضاحكة عليا الوقت...
بشار"زاد غوبش حتى حس بايد حبيبة تخشات بين دراعو تابطاتها وزيرات عليه بصباعها ضار لعندها بان ليه وجهها تزنگ...تزيرات وتوثرات...شد ليها ايدها الي فدراعو وزير عليها تا شافت فيه" : ؟؟...
حبيبة"بصوت منخفض" : ماماليش..
رجعو يشوفو فربيعة او بالاحرى يسمعو اش غاتقول وتمشي فحالها...بقات تعاود وتشكي اش دارت حتى شاف بشار فجدو الي دار ليه بايدو اشارة كاتعني "غا صبر اولدي تكمل" عارف الى صبرو قليل ماعندوش مع كثرة الهضرة الاختصار وصافي لكن ملي كاينة سعيدة وجدو نقولو حشم منهم ودار بالوجاه...
ربيعة"نزلو دموعها وهي كاتهضر بواحد الحرقة فالقلب" : ترزييت فالكبدة باقي جديدة...داز عليها كثر من شهرين وحرها تگولي غا البارح باقي يحسك ليا الگلب...ترزييييت وترزيت وتشوييييت...
حبيبة"دلات شفايفها جاتها البكية وهي على سبة"...
ربيعة : جايا لعندكم فهاد الوقت حيث صبري تقادا...جايا طالبة السماحة جايا نرمي عليكم العار (حطات ايدها على صدرها ودموعها نازلة ماحابسة)...العااار اولد العزيز سمحو ليا...العار ابنتي سمحي ليا راني مانعس منشوفو...ديرو غا بوجه العزاز براكة ترزيييت وتشويت فالكبدة وحرها عرفني بحق اش درت فيكم...خليوني نشوف نعاس كي ناس خليو عذابي يبقى غا فكبدتي وسمحو ليا...
سكتات وهي تحدر راسها طبطبات عليها سعيدة وهما يدورو لجيهة بشار وحبيبة...حبيبة حدرت راسها ودموعها نزلو مادواتش...
ع.القادر : ولدي اش بان ليك...الكلمة كلمتكم..الله يرضي عليك انا راني ما نبزز عليك ماندخل الي عليا درتو ونتوما تعرفو...
بدات حبيبة تمسح فدموعها بطرف كمايمها..هزات راسها فبشار كتشوف ردة فعلو مابانش ليها اشنو ممكن يكون كيفكر حيث طبيعتو بارد فالتعبير بالملامح...حتى ضار شاف فيها وشافت فيه وهي تنزل عينيه وحركات راسها...
حبيبة"زيرت عينيها ونطقاتها بصوت مخنوق غير زوج كلمات مافاتهم": الله يسامح..
بشار"بدون ميشوف فيها نطق" : عاطيك السماحة وشاري من عندك تيساع من هنا لگدام...الله يسامح...
"عاطيك السماحة وشاري التيساع"...
اي بمعنى مسامح ليك غير عليك بالوقر يعني نعطيو لبعضياتنا تيساع ماتوصايني منوصلك وسيري الله يسامح...هذا قصد بشار وفهموه حيث اختاصرها ليها فجملة ما قل ودل....وهي تحرك راسها...
ربيعة : كون هاني..كون هاااني وعاطياك العاهد...
هادشي الي بغات حيث الي كيكون نادم بصح وباغي يرتاح مكيهموش اش غايكون المهم هو يسمع ديك السماحة تكون من القلب...تبسمات سعيدة حتى ناضت لعندو شدات ليه راسو بين ايديها وتحنات باستو ليه...شد ليها ايدها باسها ليها وطبطب عليها بمعنى مرحبا...وباست تا حبيبة الي دموعها كايغلبوها وتمسحهم تا مسحاتهم ليها هي نيت وباستها فحنيكاتها الي تبطبطو ليها شوي...
ع.القادر : انا راضي عليكم دنيا واخرة...الله يرضي عليك اولدي...
احسن جملة كايبغي بشار يسمع هي هادي ويمكن لو كانت من الام كان احسن لكن صعيب ويمكن مستحيل حيث الام عمرها قالتها ليه وعمرها شافت حتى فوجهو...وقف عبد القادر وقال...
ع.القادر : يلاه ابنتي يلاه لحگو...
سعيدة : يلاه اسيدي..
حبيبة"شدات فايد سعيدة" : گعدو تشربو شي حاجة...اه دايرة اتاي وقهوة...يلاه معايا نجيبوهم لصالون هنا...
سعيدة"كتمسح ليها فعينيها" : لا بنيتي يلاه لحگو..خليت عمك هاشم فالدار والبنات واليوم نوبة فيا نطيب العشا...دابا نجي ياك السيمانة جايا دايرين داكشي فالدار (حركات حبيبة راسها)..ايوى صافي ملقانا نشاعلاه...ماكاينش وقت ابنيتي والله...
ناضت ربيعة حتى هي ضارت عند حبيبة ونزلت عينيها لكرشها الي كانت باينة شوية...تبسمات وتمنات من الله يفك وحايلها وماتعيشش اشنو عاشت هي وماترزاش فكبدتها...حيث الصدمة الي وقعات لربيعة فمو.ت ولدها كانت كافية تفيقها على حوايج غافلة عليهم وانا دنيا فايتة...دابا كتضحك وبعد دقيقة ممكن تكون مشات عند الله...سبقات هي وسعيدة من بعد ما قالت بسلامة حدرت راسها وزادت بقا جد بشار هضر معاه وحبيبة مشات لبيتها جلسات جنب ناموسية جامعة ايديها كاتفرك فيهم...حتى سمعات الباب تسد وهو يدخل لعندها وقف مقابل معاها...هي تشوف فيه وهو كيشوف فيها حتى سرح ايديه وهي تنوض تلاحت عليه عنقاتو بدون مايقول فهمات راسها...تحنى باسها فشعرها وهي زرات بايديها ورا ضهرو...
يوم اخر...
سدات سلسلة ديال اخر فاليز تجمعات واخر فاليز بقات قبل مايجي ينزلها...خلاتها فوق ناموسية تايجي يهزها راسو حيث الى هزتها يشير بيها من لبالكون لهيه..كانت لابسة حوايجها...تريكو الصوف رقيق فالبيض حيث الجو مشتي وبرد...وكولون ديال الخيط كحل ماقدراتش تلبس دجين فهاد الفترة وحتى فترة جايا...جامعة شعرها ضفيرة بجنب...الكوافوز خوا الماريو خوا كلشي خوا فالدار بقاو فيها غير الاثاث الي كان فيها الماعن تقريبا كلهم ديال صاحب الشقة غير الي شراو عطات منهم لمرات العساس حيث كانت شارياهم لان الدار جديدة تشارو ماعنها والباقي غاتشريهم شوية بشوية مع الوقت...جلسات جنب ناموسية وهزات تيليفونها كتخربق فيه حتى دخل عندها...هز الفاليز نزلها دارها فالسيارة ورجع لعندها...
حبيبة"وقفات كتشوف فالدار ماساخياش..ماساخياش بيها..شافت فيه" : بيت ندير اخر دورة فيها (بملامح حزينة)..
حرك ليها راسو وخلاها على خاطرها...ضارت فداك بيت النعاس الي عاشت فيه ايام زوينة معاه...الي سلمات فيه راسها ليه برغبة منها...الي شد فيه الخاطر معاها عكس ليلة دخلة...الي بات فيه شهور وحدو وهي فالبيت لاخور...البالكون الي كايجلسو فيه بزوج يلقاو راحتهم...عاشو فهاد البيت المرض الفرح...البكا الضحك...داوها الذكريات حتى ماشعراتش براسها بلي دخلات لبيت لاخور الي كانت كتنعس فيه هي...كانت كتسد عليها بساروت خوفا منو...الدوش الي كان غايفرعو ملي ما حلاتش ليه بالخلعة وهي كانت دايرة الكيت فوذنيها...ضارت فيه حتى هو وعاشت معاه ذكريات تجددو فديك اللحظة...خرجات من البيت ومشات لكوزينة الي دوزو فيها الزوين والخايب...حتى من علاقة حميمية عاشتها معاه فيها...فين بدات كاتعلم اول كيكة الي كانت ديال الحامض وفشلات فيها المرة لولة...فين بدات كتعلم وتفشل حتى تعلمت مزيان...مشات لصالون فين كان كايخدم فين حول نعاسو ليه ملي خطاتو هي ومشات عليه حتى سد بيت النعاس ومابقى يحلى ليه...من قال راه غادي ترجع ليه وهاهي حاملة بولدو...حطات ايدها فوق كرشها وتنهدات حتى جا وراها عنقها من لور وحط ايديه فوق كرشها كايتلمس فيها بلطف...تحنى تا لعند راسها باسو ليها وخشا وجهو فعنقها باسو وبقى مخشي تم كيبوس ويمص...حتى عوجت راسها وتبسمات...
حبيبة : بنتوحشها..بزاااف...
بشار"باسها فحنكها"..
ماعندهم مايديرو الحياة هي هادي واحد النهار غايجي وغادي يسلمو دار لمولاها...وكل غايستمر فحياتو وفبلاصة مستقر فيها...ضارت فالبرطما اخر دورات ليها وعلى عينيها دموع واقفين حتى مابقاتش قدرت تحبسهم ونزلتهم...ماعمرها تنسى هاد الدويرة ماعمرها تنسى نهار اول عفطة فرجليها فيها...ملي جابها تعيش معاه على اساس مزوجين باش يضمن راه غايشد يوسف وهي تمشي فحالها..سد الباب ونزلو بزوج تال تحت سلم عليه العساس وعطاه سوارت...علمو باش ياخذ الماكلة الي بقات فثلاجة كاين بزاف مكونجلي لحم ودجاج وبسيطلات وشلا عطاوهم ليهم وهما يبداو بداية جديدة...ركبات فالسيارة وضارت شافت ناحية العمارة مانقولوش اخر شوفة حيث ضروري الوقت يجيبها ودوز من حداها...
مسحات اخر دمعة نزلات من عينها...شدو الطريق كانت اول وجهة هي شي بلاصة بغا يديها ليها فين تغذا وتفوج شوية قبل ماتدخل لدارهم الجديدة...كانت الوجهة البساتين وحيث النهار والناس خدامة ومكاينة حتى عطلة كانت تقريبا خاوية...جلسو فيها لداخل خذا ليها اشنو تشهات فالغذا...ومنها تفوج شوية حيث اغلب وقتها فالدار واخا وصلات تقريبا لشهر الخامس..ماقدروش او هو ماقدرش يغامر بصحتها وبصحة البيبي..كيما كانت مرتاحة فضل ليها ولبيبي...سالاو غذاهم وطلب ليها اش تشهات تدي معاها كانت مشهية تدي شي حاجة فيها الحموضة...خذات تشيز كيك الحامض جمعوه ليها...وقف السيارة قدام الفيلا الي كانت مبدلة على كيف كانت ملي يلاه تشرات...زادت ليها زوج محابق كبااار فيهم شجيرات عند الباب وجناب الحايط ديال دار وجردة كانو محيبقات صغار فيهم غريسات...داكشي الي ولفات فالرياض جابتو حتى لفيلا وزرعات فيها روح...المحابق كانو مصبوغين بالاخضر وذهبي...نزلات من سيارة وقفات حتى جا...جبد من جيبو ساروت فيه بورتكلي ديال ستيتش فالغوز وعطاه ليها...
حبيبة : ديالي ؟ هههه زويين عجبني البورتكلي بزاف...
حرك ليها راسو وهي تقدم حلات الباب ديال جردة بساروت قالت بسم الله دارت شنو قالت ليها ماماها تسبق رجلها ليمنى وبالفعل داكشي الي دارت حتى هزات راسها فيه بان ليها كايتمتم...ماعرفاتش اش كان كيقول ماكانتش عارفة انه كايقرا دعاء الدخول لاولى خطوات دويرتهم...
عنقها بجنب ودخل هو وياها طريق من عند الباب لول لباب دار كانت بالحجر وجنابها زوج بولات على شكل فانوس كيتشعلو فالليل...بساروت ثاني حلات باب الدار الي كان ديال عود الخوخ فالبني كبييير...حلاتو ونفس شيء رمات لخطوة ليمنى...هي كانت ماشيا ليها قبل شافت الفراش واخر لمسات الاسبوع الي فات ولكن هادي الخطوة الي صافي عليها غاتولي تبات فدارها مرتاحة وفروجية اكثر...دارت ايديها على جنابها وبدات دور فعينيها...مامشات حتى دارت اش بغات زوج صالونات مفرشين فراش بلدي مغربي بامتياز...صالون مفرش بالموبرا حرة فالبيج وذهبي وسدادر سامبل مافيهمش نقش...وزربية بين بيج وبيض...لونه فاتح ومبهج والخوامي والطابلة منقوشة هي وصاندرياتها والكوانات ووسط الحايط معلقة كتابة فيها "لا اله الا الله" بزخرفة وذهبية طبعا ديكورات خفاف...اما صالون لاخور كان مفرش بطلامط فالصفر والگرونة...وزربية گرونة رباطية...لكن سدادر كان لونهم مارون ومنقوشين وطابلة تاهي نفس لون بصوندرياتها...وفالكوالة فين واقفة كانت زربية ممتدة على طول طوالة...الدار تفرشات ودخلات الروح...ريحة الفراش جديد فايحة...
حبيبة : اشنو درتي فبيت يوسف...
بشار : مازال مالحگت la date فين داير معاه...
حبيبة : بتجمع معاه حتى اشراق ياك زوج ناموسيات...
حرك راسو...داير بحساب حتى اشراق...كان باقي بيت اخور مسدود خلاوه خاوي...وكاين واحد البيت مفتوح قررو يفرشوه عادي وتكون فيه تلفازة فين يجلسو فيه لجلوس اليومي...مشات لكوزينة كانت تجهزات ثلاجة فبلاصتها كبيرة...وفران وحتى بلاصة ميكرو اوند...كانو فيها شي ماعن مبدئيا...شوية بشوية حتى يكملو دويرة...خرجات لجردة من الكوزينة ووقفات كاتشوف حتى نغزها من ضهرها ضارت لقاتو هاز كرسي حطو ليها زعما ريحي لارض شوية...
حبيبة : هههه تحمست...(جلسات هزات فيه راسها)...هنا فين بندير الحفيلة...بتكون زوينة ان شاء الله...ماتخافش منكثرش هي حليوة ومقبلات والغذا...بتجي ماما فالصباح تعاون خالتو سعيدة فالطياب...
بشار : شنو بلانها مع باك ؟!..
حبيبة"صرطات ريقها" : گالت ليه معروضة لسبوع واحد صاحبتها..ماتخافش بابا متيدي ميجيب ومتيسولهاش شكون...
سكتات مابقاتش كملت حيث بالنسبة ليها هاد الموضوع كاتحس بيه قاصح عليها بزاف...عرفتو شنو هي مها تخبي على باها راه جايا عند بنتو الجملة غريبة ولكن وقع صعييب على قلب حبيبة...حدرت راسها تنهدات وربعات ايديها...زير ليها على كتفها وتحنى لعندها هز ليها وجهها بصبعو...
بشار : شوفي فيا...حبيبة...
حبيبة"هزات فيه عينيها"..
بشار"حط صبعو على فمو بمعنى ششش" : منشوفهمش..(على دموع)..هانيا ؟!..
صرطات ريقها وغمضت عينيها غير حلتهم وهي تلاح عليه عنقاتو وحطات راسها على كتفو...
حبيبة : واخا...(دوز بايدو على ضهرها) معاش عندك طيارة صباح ؟!..
بشار : 12:30...
حبيبة : صباح بتجي خالتو سعيدة تبقى معايا هي وسناء..ياك مغاديش طول ؟!..
بشار : لا..
حركات راسها وبقات معنقاه..مستحلية ديك التعنيثة وريحتو الي محمقاها وحضنو...شحال توحشاتو وشحال توحشها وصابر عليها هاد شهور بدون علاقة لصحتها...
اول نهار ليهم فالفيلا واول ليلة يباتوها مع بعضياتهم فبيت ديالهم بفراش ديالهم مختارينو لاول مرة...ناموسية كبييرة فالكريمي والفراش بين گري فاتح وكريمي...فيه بيت صغييور بحال دخيلة دارتها كلها دريسينغ بالزاج كحل وفيه الاضاءة خافتة فين ستفات حوايجها وفين غاتحط الباقي...وكوافوز فلون الناموسية وبوفة مشعرة فالگري تحت منو زربية مشعرة فالغوز بيبي والبيت فيه زربية بيضة مشعرة رطبة تحطي فيها رجلك تغبر...البيت فيه دفء عجييب ومريييح...ريحة المعطر كل شوية كاترش خفييف كايبعث ريحة نقا...
هاكا دازت الايام ووصل نهار الي غادي تعرف فيه حبيبة جنس الجنين...الي ماعارفو تاحد من غير سناء الي مشات معاها عند طبيبة وتواصلت معاها بقرار من حبيبة حيث ماكاينش بشار بغات تاتعرف هي وياه دقة وحدة...
قدام كوافوزها جالسة...هزات البلاش دارتو فحناكها خفيف مكثراتش...ودارت شوي گلوص مات فالنيود قريب لون شفايفها ماكثراتش منو..وطالبة سلامة مايقشعو بشار يطيرو ليها هو وشلاقمو...هزات بارفانها رشات شوي فحوايجها وهزات واحد المسك دارتو تحت وذنيها وفمعصم ايديها...حتى دق الباب وعطات الاذن بالدخول..حلات الباب ودخلات بجلابة بييج مليفة غليضة بلا قب...وشال فنفس اللون وكاب فيه بيض وغوز طوييل جمعاتو ببروش لوسط...بابتسامة حنونة وفرحة لفرحة بنتها وقفات عليها كاتشوف فيها واقفة بكسيوة ديال خيط طويلة فالغوز اوفر سايز وفوق منها كاب بيض..
حبيبة : مامااا بدلتي ههه (باستها فحنكها وباست ليها ايدها) جيتي زوينة...بصحة الكاب زوين بزاف...
ناديا : يعطيك صحة..هذا كادو راجلك...(هذا هو الكادو الي جاب لناديا ديييك المرة)..
حبيبة : اه هو الكادو الي كان جاب ليك...
ناديا : ايه هو..امضرا وصل ؟!..
حبيبة : وصل هاهو جاي فطريق...
حركات ناديا راسها تابطات حبيبة دراع ماماها وخرجو من البيت ديريكت لجريدة...تقريبا لقات كلشي جا...اصلا نص بايت عندها منهم سعيدة وسناء ويوسف وعيدة واليوم جاو البقية...هاشم وحسام وزكريا وبنات هاشم حتى هما...وعبد القادر ومباركة حتى هي الي دور دورة وتهز عينيها تفلي الفيلا باش تدي ماتعاود...سلمات عليهم وجلسات فجريدة كاتشوف فالبلاصة الي صايبات سناء ماتوقعات كاع دير هاد الديزاين...لوحة لور فيها بنت وولد اللون ازرق ولون وردي...ونفاخات فالالوان بزوج...وطاولة قدامهم فيها مقبلات مملحات ولوسط حلوة لاكريم...بقات كتشوف فيهم شي كيهضر مع شي حسام شاد فزكريا غايدور ويعطيه العصا...مباركة تهضر مع سعيدة وعيدة تايهضر معاها الحاح واقف بهسبتو وسلهامو وداير ايديه وراه ويشوف فدنيا والغرس الي فجردة والسقاية الي تم ويدور عندها يعاود ليها مغوبش كيف كي بشار...حتى حسات او نقولو وصلاتها ريحتو قبل مايقرب باس ليها راسها وهي دور بزربة لعندو وقفات وهي تلاح عليه عنقاتو من كثرة ماتوحشاتو حيث قرب يكمل سيمانة باش مشا لبرلين...
حبيبة. : جيتي هههه...
بشار"باس جبهتها" : هانيا ؟!..
حبيبة : هانيا هانيا...شوف شحال زوين هادشي...
بشار"حرك راسو طبطب عليها ومشا جيهة جدو وجداه سلم عليهم بانت ليه ناديا ابتاسمات ليه ماعطلهاش فالبلاصة قرب باس ليها راسها..تا جا عندو هاشم وحسام وزكريا سلمو عليه...وجا ايوب حتى هو سلم عليه حشمااان بجهد...شوية وهي تدخل عمتها الي كانت جايبة بلاطويات مشات زادتهم على حساب العشا الي غايكونو فيه طلبة...
هاشم : تا هادشي زين هاد الدار غا رحلتو ليها بديتو برزود ههه زاهية الوقت هنا...
ع.القادر : الله يقوي الخير..."ضار عند بشار"..الطلبة عايقرب العشا نمشي انا وهاشم نجيبوهم ولا يتكلف حسام راه عارفهم..
بشار"حرك راسو" : خاص شي حاجة نقضيها معاكم ؟!..
ع.القادر : الي خص نعلموك بغسنا نعاونو وليني هادي صدقة ديال دويرتك فضل ليك تكون من حر مالك...
بشار : ماشي مشكيل اشنو خاص نقضيوه...
سناء"جات عند حبيبة" : شوفي شوية وغادي نبداو...باش غاتعرفو هادوك نفاخات الي معلقين كحلين الفوق هما الي غادي طرطقي نتي حيث راجلك غا داير ليك الخاطر...اه را كاين مفرقعات هما هادوك غانطرطقهم انا وايوب ويوسف تاهو علمتو..راه فيصل جا هو الي غايصور...صافي...
حركات حبيبة راسها بفرحة وحماس كبيييير...بقات جالسة حدا ماها وعمتها وسعيدة وعيدة كايهضرو ويضحكو وسناء واقفين معاها بنات هاشم كيتسخرو ليها ويعاونوها...كان زكريا واقف هو وحسام حدا الطابلة كيشوفو فالمملحات والحلوة...
بقاو يهضرو حتى جات ريح من عند الله واحد العجاجة جات مجهدة كان الجو عاادي مشمس تا تقلب الجو...وهي طيح داك الطابلو الي فيه الكتبة جا فوق الطابلة زدااااف على حلوة لاكريم...تا نقز زكريا بالخلعة هرب هو وحسام واحد فيهم دفع واحد الكرسي طاح جمع واحد طويبلة صغيرة بنص طاحت..زداف دردلاف شي كايطيح على شي والعجاج خدام..بشار طار يجريي لعند حبيبة الي كانت مخلوعة ومع ريح بداو يتجاراو لاخرين...تا بداو النبايل الصغار يطرطقو غا راسهم حيث رقاق طراااق كان هاشم جاي يزرب تاهو باش يعاون سعيدة الي تمات غاديا بمو ويدخل لفيلا دفع طابلة ماشافها وهو يطيح واحد طبسيل طراااخ تشتت تا نقز بالخلعة بدا ينش بايديه...
هاشم : هتهتهت هاناري سلامة سلامة اش هادشي...
خرج فيه زكريا بالخلعة جمعها معاه بتصرفيقة لقرقادة تا زوا صيفطو كاينش على راسو...ماعرف باش تبلى...
زكريا : يا طيباه يا داوا العريانا...
حسام الدااكا هرب باش يدخل من الباب كي ناس نقز من شرجم الي كيطل على دار لداخل...دخلو كلهم تا حيد داك العجاج...ملي حبس كانو واقفين ورا الباب ديال زاج بالسكة الي سداتو سعيدة...
سناء : ويلييي اش هادشي وقع...
ع.القادر : مكتاب الله...هذا عجاج ديال شي شتا جايا...
حبيبة"دلات شنايفها بغات تبكي مشا ليها كلشي"..
سناء : غير يزگا نقادو داكشي ماوقع والو النبايل الي عليهم العمدة باقي...
مازال كاتقول فيها حتى ضربات واحد رعدة مجهدة...ودوك النبايل الكبار تا طرطقو راسهم وتشتت داكشي فالسما...وسعات حبيبة عينيها وحلات فمها...
حبيبة : بشااار...شووف...
بشار هز حاجبو تا نوغش ليه قلبو وهو كيشوف فداك اللون...
هاشم : وضهر ليا عندكم رعدة...هههه اميمتي جايا بعجاجتها...
وهنا عرفو جنس الجنين وسط العجاج والرعد هههه...
«بنت»..
تعرف جن.س الجنين بطريقة مختلفة من عند الله...الله الي كتب عليهم يعرفو بهاد الطريقة..عياو مايقادو عيات سناء مسكينة ماتصايب وتأكد ان كلشي سري ومضبوط حتى جات هاد العجاجة ورعدة الي كاتعلن على ان شتاء قادمة...واخا ترونات دنيا ملي شافو اللون الوردي ديال دوك الوريقات الي كانو فالبالون متناثر فالسما طاير...نساهم كلشي..قلبهم رفرف ملي عرفو اشنو كاين...خصوصا بشار الي عينيه بقاو مفيكسيين على داكشي...شعور جديد كايعيشو دابا...شعور مختالف بزاااف...اذا كان الانسان الي كيعرف يعبر احساسه كيفاش غايكون وغادي تلف ليه الهضرة فمابالك ب شخص فحال شخصية بشار !؟..
ناديا"تبسمات بفرحة كبيييرة تاهي قلبها نوغش ليها بحفيدتها القادمة...حتى غرغرو عينيها وجمعات ايديها عند فمها...
ع.القادر : تبارك الله..البنات زينات مجايب الخير...
سعيدة : الله ياربي مبارك ومسعوود..الله يجيبها على خير ياربي وتفرحو بيها كيف بغيتو...
طبطبات على دراع بشار الي مكان كاع معاهم فهاد دنيا...عينيه غير على داكشي الي طاح فالارض من بعد ما تزلع فالسما...عينيه على داك اللون الوردي...هو ماكانش عندو حتى اشكال كيف كان ولد او بنت المهم ان شي حاجة من صلبو غادي تزاد مشروكة بينو وبين حبيبتو الي عشق...الي تخليه يعيش شعور كلمة "بابا" الي بقات محفورة ليه فقلبو...لكن هاد البنية ماعرفش علاش خلاتو يفرح كثرر من انها تكون ولد...يمكن الحلم رجع نعش ليه ذاكرتو من جديد..رجع كايتفكر ديك لمسة الايد الي خلاتو يعيد النظر فحالة ويزيد يكثف العلاج ويزيد اصرار على انه يحاول ما امكن مايرجعش لعادة ضرب الي كانت فيه...لمسة الايد وكلمة بابا كانت كاافية انه يحس بواحد نوع من راحة عمرو ما حس بيها...زادت اكدت ليه انه انسان مرغوب فيه بشدة كاينين ناس كايتسناوه حياتهم بدات بيه مهم عندهم واهميتو هي حياتهم...انه مسؤول على اسرة صغيرة فالمستقبل...اليوم هاد البينة غذا بنية اخرى ولا ولد...مرتو مسؤولة منو...خوتو...كاملين تحت جناحو...الى مرض يهزو ليه الهم من القلب...ولا كايعيش شعور الحب بدون مقابل...بهاد المعنى...
ما فيقو من سهوته الطويييلة غير لمسة ايدها على دراعو...حتى ضار لعندها لقى عويناتها حمرييين...دميعات خفاف نازلين بسباب التأثر...بسباب الفرحة ملي عرفات اشنو عندها...
بشار"جمع حجبانو وهز صبعو مسح بيه دوك دميعات...لاخرين دخلو لصالون لداخل خلاوهم بزوج على راحتهم" : ششش..مالنا ؟...
حبيبة"شدات ليه فدراعو بزوج" : ماعرفتش...ههه (كاتمسح فدموعها وتعاود) ياربييي..بنييتة ههههه...بتكون زويينة...ماعرفتش تخلط عليا كلشي ههه...
شافها مخربقة فالهضرة ديك الفرحة وصدمة ولات كتهضر وتجاوب راسها...جرها لعندو وحاوط ايديه ورا راسها وضهرها معنقها عندو بجهد...وهي حطات راسها على صدرو شادة ليه فدراعو...
حبيبة : فرحت بزااف...شفتي عمو هاشم اش گال ههه...عجبك الحال تكون بنت ؟..
بشار : بجهد...
حبيبة"تبسمت من هاد الجملة الاخيرة حيث عارفة ملي كيقول ديك بجهد راه فايت الفرحة لهيه" : هههه...حتى وجدات سناء كلشي مسكينة وترون دابا...
بشار"قابلها معاه وشد وجهها بين ايديه..تحنى باسها فجبهتها ورجع شاف فيها" : ماشي مشكيل..دابا يتگاد...
حبيبة"ضارت ناحية جردة" : باتصب شتا وقيلة...بايخصهم يجمعو داكشي...
عنقها بجنبو ودخلو بزوج لعندهم لصالون...جلسات حبيبة ديريكت حدا ناديا الي غير شافتها عينيها مغرغرين وهي تجرها لعندها عنقاتها بفرحة وحب...كاتبارك ليها وتبارك لراسها...تمنات لو كان مولاي حفيظ مصالح معاها كانت غاتكون واحد الفرحة غيييير....بالفرحة يقدر ييجيب دقايقية ومايخلي مايجيب ليها...لكن شاءت الاقدار وضروف انهم يعيشو هادشي بلا بيه...
ناديا : مبروك اكبيدتي مبروك..
حبيبة"هزات فيها راسها وهي تلمح دموع واقفين فعينيها" : ماما !!..بيتي تبكي ؟!..علاش ؟!..(مسحات ليها تحت عينيها) مامااا...
ناديا"حيدت ليها ايديها" : ويلي على نبكي...هي دموع الفرحة...بنت الهم جايا بعجاجتها هههه...دابا بتعرفي بحق الفرحة لولة ديال بنت كيدايرة...
حبيبة بقات كتشوف فيها...حسات بيها بلي مخبية حزنها انه مولاي حفيظ مكاينش وزيد عليها الفرحة والتأثر كملو الباقي...ردت ليها الابتسامة لكن كانت حزيينة بزوجات فهمو بعضياتهم...وهي ترجع عنقاتها وشدات ايدها باستها من الضهر والكف...
حبيبة : انا فرحانة حيث معايا ليوم...وحيث ماخليتينيش وكنتي معايا...(عاودت باستها فايدها) الله يخليك ليا...
رجع بشار لجردة هو وحسام وزكريا وايوب الي كانو كايقادو فداكشي ويدخلو فيه حيث بدات شتا كاتنشنش...مشا كايعاون فيهم حتى هو..هز داك البانو الي لور من على حلوة لاكريم الي كانت محطوطو خسرها من جنب...عطاها لايوب دخلها...واحد بلاطو كبير شدو من عندو فيصل...شوية تبعهم تا يوسف مسكين وقف حدا بشار بغا يعاون...شافو بشار مابغاش يخسر ليه خاطرو عطاه واحد صينية يدخلها...مشا فرحان انه مندامج تاهو معاهم وكيعاون...نقاو دنيا من تما كانت معاهم تا سناء مسكينة...
هاشم"خرج من طواليط بان ليه بشار واقف قدام الباب كايكمي مشا حداه" : جيتي مع مع ماعطلاتك ماعطلتيها هههه بنت بوها...
بشار"جمع حجبانو «بنت بوها» شحال نوغشاتو تاهي حتى عض شنايفو وهو كيتنغم بهاد الجملة وشحال زوينة على قلبو..هاشم ضحك حيث عرفو تأثر من هاد الجملة وقالها ليه بلعاني باش يزيد يحسسو بهاد الجملة اش ساوية...
بقاو واقفين حتى هاشم شد من عند بشار سيجارة وشعلها يكميو...كانو تقريبا كلهم الاشخاص الي كانو واقفين معاه فحياتو...والي تزادو عليه جداد...والي نورات ليه حياتو والي غاتزيد تنورها وتأكد عليها الي هي "بنتو"...شوية نطق بشار وعينيه على برا...
بشار : اشراق...علاش ماجاتش ؟؟..(حيث عيطات ليها حبيبة بنفسها من عند هاشم وهو وصا هاشم وحسام يجيبوها تحضر)..
هاشم"حنحن" : مابغاتش..كتراجع عندها شي امتحانات هاد سيمانة...ماگدتش تجي...(حدر عينيه)..
بشار"ضار شاف فيه ورجع شاف قدامو عرف علاش مابغاتش تجي وسكت ماجاوبش وماحكرش..حتى حنحن هاشم تاني محاول يطلبو زعما حيث طلبات هاشم يطلب بشار وعطاتو وعد مادير تاحاجة بقات عليه وبكات وكل نهار طلب هاشم"..
هاشم : ما زعما..مانرجعش ليها تيليفون وبيسي و...
بشار"ساس الكارو ونزل مع دريجات تا لاحو فواحد بوبيل صغيرة ورجع طلع لعندو" : لا...
ماكثرش عليه كلمة وحدة ودخل لدار خلا هاشم كايرمش..
كلهم كانو مجموعين...ناضت حبيبة كاتعاون فسناء وسعيدة وحتى ماماها يحطو الماكلة فالصالون بينما يوجد الغذا...كانو داكشي خفيف مملحات خفاف والحلوة غير لتصوير وصافي ساعاك الي وقع سكت ليهم الحس واخا هكاك كان فيصل بادي تصوير فديك اللحظة وشد ليهم الزوبعة الي ناضت ههه...
زكريا"مدات ليه سناء بلاطو يهز" : ااااري لهن..سيري الله يجزجك گولي امين...
سناء : اميييييييييين...
حسام : طولتها گد الهم الي فگلبها...
سناء : الله يجوجك تانتا...
حسام"كمش عينيه ونش عليها بايدو" : لاطييييف...باقي الحال اخويتي بااااااقي عليا الحال گد الطول الي طولتي فيه امين...
سناء : هههههه...
زكريا"من بعد ما مشات سناء" : وامتى ؟ عرفتي شحال عمرك ؟..
حسام : باقي ما بلغت (خشا فوجهو واحد ميني برغر ههه)...
تا جا ايوب انضم ليهم وطبعا شد ليا نقطع ليك واخا هكاك دايرين حدود خصوصا مع اخر فرشة وقعات لايوب قدام بشار ولا حاضي مسكين بلهلا يحزقو ليه يسولو حسام يجاوبو بالگرام...عيدة حديثها مع عبد القادر باااقي مطول واخا جالسة مباركة...
عيدة : غذا لا كتاب سير نتا وهاشم لدار عبد الرحيم خوها وهضرو عماها...ولدها واخا هكاك راه مايبغيش كيما كانت تكون الحاج...
ع.القادر"حرك راسو" : دابا نشوف كيفاش...
مباركة : والى مابغاتش تاني الحاجة...
عيدة : ذنوبها على راسها...
هاد الهضرة نيييت نفسها تقالت لبشار وهو جالس مع هاشم بعيد كايهضرو...عاود ليه كلشي وعاود ليه بلي مابغاتش ترجع تايجي يطلبها شي حد ويرجعوها حيث غضبانة زعما...بقى شاد تيليفون بواحد الايد كايدور فيه وايد دايرها على فمو وصباعو كايحكو فلحيتو...عينيه فنقطة بعيييدة...كايفكر...هو كان عاطيها تيساع بالمرة...لدرجة مابقاش كيشوف كااع جيهتها...بيناتهم جفاء كبييير...عمرهم هضرو كيف ناس..ديما السخط والدعا وتشحات الي كاتعطيه...عمرها شافت فيه راه ولدها من صلبها نهار الي بغات حاجتها شبعاتو يومين ونفراتو سنيييين....
هاشم : دوا عمايا با باش نمشيو نرجعوها..وهي بغات مي تجي..بغات الي يطلبها ويكبر بيها...مي حلفت عليها حيث كثرات عليها كلمة جوج دعي وتشحت والمرحوم ما المرحوم راك عارف..."هز ايديه وخبطهم فوق رجليه بخفة" وهادشي الي كاين...
بقى بشار سااكت...شوي هز عينيه فحبيبة بانت ليه كادوز بايدها على كريشتها وتضحك مع ماماها...ورجع نزل عينيه كايفكر فهضرة هاشم...ماعندوش هو مايدير مو مكتحمل فيه شعرة..وهو قلب عليها بمرة مابقاش باغي يشوف جيهتها...تنهد وهو يحرك راسو ونطق...
بشار : شوف مع مي..ماتخليوهاش باركة تم بزاف...
هادشي الي خسر عليه...هاشم حرك راسو بمعنى صافي وعليه...بقاو جالسين فالصالون شي مجمع وشي عالمو بوحدو...وشي غير ساكت وكيسمع حتى وقف عيط "حبيبة" وخرج من صالون ناضت تبعاتو حتى دخلات لبيت نعاس يلاه سدات الباب لقاتو جالس جنب ناموسية كايمسد فعينيه وقفات قدامو...
حبيبة : بيتي دوش ؟!...
بشار"حرك راسو وهو مزالو كيحك فعينيه بسباب العيا ديال السفر..شوية حتى هز راسو وشدها من ايدها قربها ليه حتى هز ليها لكسوة من تحت طلعها لفوق وفرق ليها رجليها من لور جابها جالسة فوق رجليه...تا شهقت...
حبيبة : نرييي حرام عليك...(حطات ايديها فوق كتافو)..
ماردش عليها بالهصرة ولكن كان ردو غييير...بالاقتراب لالتهام دوك الشنايف الي ماقدرش يمشي ليهم ديريكت كيف وصل...توحشهم توحشها...توحش فيها كلشي....ماطلقها حتى حسات بيهم تصرطو في فمو...نزل لعنقها حتى هو التهامو تا كان غايعضو يجرو وهي تحبسو حيث غادي يخلي ليها العلامة وتشوه برا...خشا ايدو من تحت الكسوة وبقا طالع حتى وصل لصدرها جمعو بايديه وهي تقفز وكحازت لعندو تا حس بكريشتها...
حبيبة : ايييي..ضريتيني عافاك (بصوت بح بسباب النشوة)...
هز ليها الكسوة لفوووق وزاد طلع اش كانت لابسة اخور تا بانو ليه سوتيان...نزلهم تا عرا ليها صدرها بوجه مقزدر مامسوق كااع عندو عااادي جدا...قاسو بايديه وقلبو بان ليه تنفخ على كيف كان...قاسها فالراس وضغط عليه وهي تقفز...رجع ليها سوتيان ونزل بايدو لكرشها دوز عليها بلطف قبل ماينزل راسو ويحط عليها شنايفو ببوسة طويييييلة عاد رجع كيبوس بوسات متتالية ومفرقة...ماسخاش يحيد فمو من تما...حس بالحماق على ديك البنية الي فكرشها...عمرو باس كرش حبيبة بهاد الكمية ديال القبل العجيبة الي دار عليها...ماطلق تا طول فاخر بوسة تا تسمعات فارجاء الغرفة...
تسناتو حتى دخل لدوش باش يدوش ومشات لكوافوز قادت حالتها وتأكدات انه ما خلا فيها حتى علامة تمشي تشوه...قادت شعرها ومشات لدريسينغ جيهة حوايجو جبدات ليه سوفيت على شكل قبية بسروالها كحلين...وملابس داخلية وتقاشر بيضين حيث ضروري كايلبسهم...حطتهم ليه فوق ناموسية وخرجات من البيت ديريكت لكوزينة لقات ماماها كاتذهن فالبسطيلة ديال حوت باش دخلها لفران...
حبيبة : خاصاكم شي حاجة...
ناديا : خاصنا...
حبيبة : اش نگول لايوب يمشي يتقدا ولا واحد فدراري...يدي معاه نيت يوسف يخرج شوية يفوج...
ناديا : بيناك تگعدي لارض...اليوم كثرتي من سير واجي اه باقي ماشاداش فراسك...تبتي وخلي البنيتة تبت فكرشك...
سعيدة : راه راسها باغيا تبت مابغات حفالي جاتكم بالعجاج يلاه تكمشو ههههه.. سيري بركي ابنتي لارض كلشي كاين الحمد لله والي خاصنا راه راسنا نصيفطو الي يجيب...رتاحي وتاااتولدي وتكلفي بدويرتك...
حركات راسها كضحك على هضرة سعيدة على البنية...فالاخير كلشي تقلب ضحك...الشتا بدات كاتجاهد نيييت على برا...الحال برد ودار لداخل خلاص راه سخونة...جلسات حداهم غير تما فطابلة ديال صالامونجي...كاتشوف فيهم كيفاش كيهضرو هي وسعيدة...انساجمو بلا ميحسو نساو الي فات بلا مايحسو...سعيدة ملاك محطوط على الارض مكتعرفش لغبينة مكتعرف خصام دغيا كاتسامح وتنسى وتفهم...وتوقف معاك من القلب وقفة رجاال...كايحماق عليها بشار من ديما كانت كتعوضو على الام ديالو...وناديا القلب البيض الي ماخيبها غير خوفها على بنتها تلف ليها المنطق وخلاها دير شي تصرفات مارداتش لبال انه كاتضر بيهم ينتها الي خافت عليها...واخا هادشي عمرها تلام عليه غير ضروق الي حكمات وصافي...
تسناتهم حتى دخلو لبسطيلة ووقفات حداها ناديا حاضية معاها وهي تدخل مباركة بغات تعاون وهي را عينها غا تفلي الكوزينة الي هبلتهم وخلاتها حالة فمها باش تدي ماتعاود...خرجات حبيبة من كوزينة وكانت غاديا لصالون حتى سمعاتو كايعيط ليها رجعات من طريق ودخلات لبيت نعاس ثاني كي دخلات لقاتو محني على واحد الفاليز جابها معاه...لابس اشنو حطات ليه...هز راسو شاف فيها ورجع حدرو فديك الفاليز تا هز واحد ساشية كبيرة عطاها ليها...
حبيبة : هادي هي ؟!..(حرك راسو) ههه بايعجبوها نيت كانت كتقلب عليهم...(تحنات باستو فحنكو) لهلا يخطيك...
حرك راسو...خرجات هي وياه من البيت هو مشا لصالون برك مع جدو وعمو...وهي مشات كاتقلب عليها تا بانت ليها فالكوزينة...
حبيبة : سناااء..اجي...
سناء : اش كاين ا ام رعدة...
حبيبة"غوبشت فيها" : بزاف عليك بعدي من بنتي...
ناديا : صافي كملت...
سناء : ههههه اش كاين...
حبيبة"مدات ليها ساشية" : جابها ليك بشار كادو ههه...
سناء"حلت فمها" : تي شكون جابها ليا ؟!..
حبيبة : بشاار ويلي مالك هههه...اه فاش كان لهيه سولني اشنو تبغي حيث تنعرفك وگلت ليه اشنو...ماعرفش يتقداهم وكومونداهم ليك انا عاونتو...مهم هي بايگوليك شكرا حيث تتباتي معايا وبقيتي معايا هاد المدة كاملة...
سناء جاتها البكية ماعرفت ماتقول صدمتها...شدات من عندها ساشية وهي تحلها قدامهم...كان باك ديال ماكياج من سيفورا داكشي الي كايعجبها...وواحد البارفان كاتحماق عليه واخا غالي شوية تاهو خذا ليها منو زوج...وساشية صغيرة حلتها وهي تلقى بواطة ديال اكسسوار غا السمية خلاتها تشهق..كانت من مارك Cartier...زوج براصليات نفس الاصدار الي ورات لحبيبة شحال هادي وراتهم ليه حبيبة وكومونداهم ليها...
سناء : حبيييييبة...اويييلي اش هادشي...
من صدمتها وفرحتها تلاحت على حبيبة عنقاتها بجهد...مانساوهاش او بالاحرى هو مانساهاش واخا مكيهضرش مكيعبرش كايلاحظ الانسان الي مزيان والي ممزيانش...ومكينساش الناس الي كتوقف معاه بكل معنى الكلمة...بقات معنقاها تا صظقت مبكية حبيبة تا ولاو ينشو عليها ويسكتوها ولات سناء كضحك وحبيبة تبكي وهذا الله...
خارجة من القسم من بعد يوم كامل عامر بالقرايا...خارجة غي وحدها مكمشة فشكارتها ومغوبشة ماعاجبها حال...يلاه غاتخرج من الباب الكبير حتى سمعات تصفار وشي حد كايعيط باسمها ضارت وهي توسع عينيها ضارت هنا وهنا قلبها خرج من بلاصتو يلاه بغات تهرب اتا نقز وشدها من معصم ايدها ضار هنا وهنا كانو تلاميذ خارجين...
اشراق : اش جابك هنا واش بغيتي تخرج عليا...
حميد"زير ليها على ايدها تا بغات طرطرق..اصلا تعمد يشدها لداخل حيث برا يقدر يجي شي حد من عائلتها" : عندي مانهضر معاك..عندي منوصل ليك ابنت القح***...
اشراق : جمع راسك راه كاين الي حاضي معايا دابا يبان خويا بعد مني تطيني تيساع...
حميد : مصيفطة ليا خوك داك نهار هاجم عليا ؟..حساب ليك غادي نسا اش دار ليا..حساب ليك غا نسكت مندير لطب.ون مك يالي مصيفطاه ليا ؟!..
اشراق : عافاك احميد غادي تخرج عليا وتخرج على راسك...
حميد : مابقى عندي منخسر البلاد وغادي نقود منها..الفيزا ديال كندا قربات تخرج ليا اش بقى ؟ بغا يتبعني تم..الى وصل لضهرو يعضو...
اشراق : حميييد اش باغي دير...تفرق عليه راه گلت ليك خااايب جلاخة والله مايعقل عليك ولا عليا (كدور وتشوف فالتلاميذ لهيه خارجين الثانوية بغات تخوا وهو شادها...
هز تيليفونه ومشا لواحد الفيديو ديالها كان مصورها وهي كتلبي ليه رغباتو عن طريق المص...مارداتش ليه البال راه صورها...خرجت عينيها تا ضارت بيها دنيا حيث هادشي قدييم..
حميد : يعجب القواد ديال خوك ؟!..
المراهقة خرجات عليها...تبرهيش كمل عليها...غيابة رقابة الاهل الي كان خاص يكونو قراب ليها ماشي العمام ماشي الخوال وانما الواليدين بالضبط الي كان خاصهم يكونو خير رقيب ليها..الاب ماكتابش ليه يعيش حتى اليوم الي يشوفها فيه وهي زايدة...الام عندها الولاد كي زجودهم كي عدمهم الى سمعو ليها وكانو تحت امرها بلا ماتعطيهم رضى راها معاهم كانو واقفين ضدها راها كارهاهم...حس الكبدة ماتكسابو جيهتهم...مالقات غير الاخ الكبيير الي لا حول له ولا قوة ماعندوش جهد من غير يعطيها الحنان الي كيعرف ليه الي هو ياخذ ليها اش بغات والي حلات عليها عينيها تلقاها فششها فوق القياس بالمقابل غير تقرا وتوصل كيف وصل هو...لگا ضهرو لشحط باش ماتقاسش والي قاسها يا ويل ويلو يحسب نهارات الي بقاو ليه من حياتو ..لكن كان العكس واتاخذت اتجاه اخور...غرتها فعايل المراهقة وكملات عليها...
اشراق : حميد هذا ماشي اتفاقنا ياااك (قلبها بغا يسكت) ياك ؟!..غير كتضحك معايا ياك احميد..
حميد : مسالي لطب** مك انا لضحك...حساب ليك غادي نفوت ليه الضرب الي ضربني ؟ لحمي شايط عليا جاني هو وبوليسي تحاماو عليا...مابغيتش ندعيه ولكن غاندير ليه كثر من دعوة...الدعوة غا محضر يومين ثلاثة مايديرو ليه والو الى دارو يخلص وهاهو ناضي..وانا ؟ يطلع مع جد مي القالب ؟!..لاااا حميد جلدو ساوي الثمااان الخانزة...والله يا مك لا بقات فيك...
طلق منها بغا يمشي وهي تشدو بترجي بدات تبكي...كايبعد فيها وهي كاطلب فيه تا لصقت ليه فايدو كطلب وتزاوگ...
اشراق : حمييييد عافاك احميد سمح ليا...مسحها فيا والي بغيتيه نديرو غا مترسلش داكشي...عافاك را والله تا يقت.لني احمييييد ويتبعك فين ما مشيتي راه مكيعرفش تمشي تال اخر دنيا احميييد....
حميد : المخير فقبيلتو يركب عليه...غا حبستي الفيديوات سكتنا گلنا براكة مكاين باس الخانزة تابت...وجمعنا وطوينا ملي دويتي فالتيليفون وگلتي ليا عطيني تيساع شربت عليها الما وليني ترسليه ليا يملخني عصا...يا بنت الهازة لا بقات فيك راني ماشي حميد...دروك غا سيري نعسي على جنب راحة غا نقرب نشد الفيزا وهاني معاك...طلقي ينعل بو مك الكلبة...
اشراق : الله يحفظك عااافاك احميد...سمح ليا سمح ليا وسمح ليه..الى صيفطتيهم غادي توقع كارثة كبيييرة احميييد...
حميد"كيبعد فيها وهي لاصقة فيه" : ملي كنتي تعري فطب*نك مافكرتي فكارثة !...حساب ليك دوز ليك طريفة ؟ هادشي الي كيوقع ونتي يا القح** تابعاني حميد تجوج بيا تجوج بيا...انا نزها تا نعيا ونمشي نجيبها من قرينة مغمضة عينيها بنت ربعطاش بنت شي دوار مامعروف كاع ماعندهم لا تلفازة لا راديو ونديرها اميرة فظارها على فعايلكم يا الخانزات...تفووو...
دفعهة بجهد تا طاحت ماتسوق كاع لشكون الي واقف يشوف فيهم اصلا خوات دنيا ملي بدات طلب فيه لكن كان شي بعضين بعاد كيشوفو مافهمو والو...
مراكش...
وصلات العشية...توجاد لعشا الي غايكون فيه طلبة خدام...الي خصاتهم يا كيمشي بشار يتقدا هو وحسام يا كيمشي حسام وهاشم...وصل المغرب وهي تمشي لبيت ديال نعاس هي وحبيبة الي داخلة وعينيها مغرغرين ماكرهاتش تبقى معاها وتبات لكن ما باليد حيلة...مدات ليها جلابتها الي معلقاها ليها تم...
ناديا : براكة على دوك العينين ابنتي...اه ليام طويييلة ان شاء الله وبنجي...والوقت اه بتگاد هي صبري...
حبيبة : سبع شهور اماما ماشي براكة عليه من جيهتي...علاش مابيتونيش نمشي عندو ؟!..هي خليني نمشي نهضر معاه بايعايرني...
ناديا : بايعايرك وبيتي ترجعي تاني مريضة فخاطرك وتجيبيها فصحتك...بنتك فكرشك اه باقي عليها الخطر لا تگولي فوت ربع شهور صافي...باقي ماولدتيهاش ردي ليها البال..وبتولدي ان شاء الله وبتردي البال...خلي الوقت وخلي من بعد وبندوي معاه...
حبيبة : الى ضار فيك ؟ هانتي لدابا باقي تتجي بلا خبارو...
ناديا"من بعد ما لبسات جلابتها ودارت الكاب ورا ضهرها..تنهدات وشدات ليها فكتافها" : انا براسي باقي تنفكر كيفاش نگوليه اش كاين...وباقي الوقت فين نهضر معاه عليك..بيتي المعقول بنخلي حتى تولدي ونرتاح عليك..بنخاف لا يوقعو المشاكيل وتهزي فخاطرك...فهمتي ؟ حيث الى بينا النتيجة زوينة بايخصنا نكبروها باش تصغار...والى هاكا بايخص نصبروو باش نواجهو...ونتي دابا صبر ماعندكش وماشي ديال تواجهي حيث بتسمعي واحد خل الوذنين بايضرك فخاطرك...فهمتيني ؟!..
حدرت راسها مدلية شنيفاتها بحزن..حركت ليها راسها...باستها ناديا فراسها وحنكها طبطبات عليها بقلة حيلة...ماعندهم مايديرو دابا...خرجات هي وياها من البيت لقات ايوب كايتسناها وحتى لطيفة الي كانت جالسة فالصالون مع عيدة...
حبيبة : حتى نتي بتمشي اعميتو يلاه جيتي ؟ هي جا العجاج مشيتي...
لطيفة : اه مشيت جبت باقي الكوموند ديال الحلوة الي بتحطو لرجال...لا لا انا معاك تايدوز العشا ونمشي...
سلمات ناديا على حبيبة وسعيدة والحاجة وحتى مباركة...وصلات عند الباب لقاتو واقف هو وهاشم حدا سيارة ايوب ابتاسمات ليه قرب باس ليها راسها بشكر..طبطبات عليه وركبات مع ايوب اما فيصل غير تغذا زاد مع طريق...غير مشاو سبقو هاشم ودخل...هز عينيه وهي تبان ليه حبيبة واقفة وحزيينة...حرك ليها راسو بمعنى اجي عندي...نزلات لعندو عنقها عندو...
حبيبة"شافت فيه مطوول وهي تنطق" : واش بابا بايبقى مخاصم معايا حياتو كاملة ؟!..علاش تتگولو ليا هي صبري باقي الحال..حتى لامتى ؟..
بقى كيشوف فيها...سؤالها ماعارفش اجابتو من غير خاصك تصبري..هو شحال من مرة قالها ليها..حاليا ماعندو مايدير ليها..ماجاوبهاش وانما اكتفى بانه يشد ليعا وجهها بين ايديه...نزل صباعو مسح ليها الدميعات الي كانو واقفين...حزنها كبييير وهما محاولين يوفرو ليها جو اسري يغطيو على غياب باها واخا را مستحيل بلاصتو تعمر...فقلبها كاينة...محاولين على حملها...باس ليها جبهتها حتى غمضات عينيها...
بشار : دخلي...
عنقها بجنب ودخلو لتاحقو بلاخرين....شوية وهو يخرج هاشم باش يجيب طلبة من رحامنة هما معارف ديالهم فالجامع وصحاب الحاج...شي ربعة رجال الي غايحضرو باش يثراو ما تيسر من الذكر الحكيم...بقا غادي بيها حتى جلسها فالصالون لاخور وشاف ف سعيدة تواصل معاها غير بالعينين وهي تحرك ليه راسها حيث موصيها باش ترد البال لحبيبة متخليها تحرك بزاف هاد الايام عطاتها لتحراك وضصرت هههه...
العشا كايأذن...البخور تطلق فالدار من اجود الانواع العود القماري...زكريا بقا معاهم هو وحسام كايتسخرو ليهم غير تما...العيالات داخلين للكوزينة وريحة طياب فايحة...
الرحامنة..
دخلات لدار وقلبها عند فمها...عينيها حمرييين جايا طريق كلها وهي كتفيبري وتخمامها فالي قالو حمييد...نهايتها قربات وهادي تالية ليها...ماعرفات واش تبقى ولا تهرب ولا دير حد لراسها...اش غادير...دير حد لحياتها ؟...تهرب ولا تسلم امرها لله وتشوف واش بصح غادي يرسل لفيديو لخوها ولا قال هكاك غير حيث مغدد على بشار الي ماتنساش ليه اش دار فيه...من سهوتها مارداتش لبال لكريمة الي كاتعيط ليها خلاتها تهضر غا وحدها وطلعات لفوق تجري ما بان ليها غير اول باب الي هو باب بيت مها دخلات ليه وسدات الباب وراها بساروت...لاحت شكارة وجلسات جنب ناموسية...
اشراق : اش درت فراسي اش دررت...(دارت راسها بين ايديها) لا لا ماغاديش يرسلو انا مأكدة حميد غا خواف الى صيفطو راه باين فيه حتى هو يعني غايمشي معايا فيها...ماغاديش يقدر غادي يتشوه حتى هو...غير بغا يخلعني الحما.ر تفووو...
وقفات كاتمشي وتجي ورجعات جلسات...عاود وقفات..الدنيا ضايرة بيها ماكانتش متوقعة غادي يكون صورها فاش كانت معاه وكاتمارس بداك شكل المقزز...ضارت هنا وهنا ماكاين حتى وسيلة تواصل كلشي داه ليها البيسي تاهو تاحاجة ماخلاها ليهاشهرين وزيادة هادي...تدق الباب وهي طير لسما ونزلات...
كريمة : اشراااق...
اشراق"بغات تنفخ عليها وهي تفكر خوها غير تنفاخ وعطاها قت.لة" : نعااام اش بغيتي ؟!..
كريمة : مالك ؟ علاش داخلة هنا وساظة عليك...
اشراق : ماماليش اكريمة...هذا بيت مي بغيت نراجع وسديت عليا عندي امتحانات اكريمة...
كريمة : واخا وهبطي تاكلي شي حاجة كاينة غا وحدي والحسنية تاهي خليتها تاكل شوي ويجي ولدها يديها...
اشراق : لا مابغيتش مافيا ماياكل...عندي الحفاضة غير سيري بالصحة...
عوجات كريمة فمها معجبة منها ماعرفت مالها...هزت كتافها ورجعات ادراجها نازلة مخلياها فالبيت فحالة ماتبغيها لعدوك اللدود...لهلا يطيح شي بنت فهاد الموقف...وها علاش ماخاصش نتبعو الشهوات..وها علاش خاص حتى رقابة ديال الواليدين لكن اشراق مالقات حتى حد من غير خوها الكبير الي مهمتو غير يوفر ليها اش بغات ويكون اخ سند فضهرها لكن الام الي تراقب وتقرب منها واخا تنقص غير شوية من جهدها لان حتى اشراق طبعها من لول مافيهش حس تربية...مع الاسف...
العشا اذن...وقفات سيارة هاشم ونزلو منها الرجال الي جابو معاهم لقاو فاستقبالهم عبد القادر وبشار...سلمو على الحاج الي رحب بيهم وسلمو على بشار الي مكتافي غير يحرك راسو...كانو قلال اصلا كثرة بنادم كتبرزطو بزاف وكيولي مخربق فراسو...دخل الحاج هو وناس لصالون مع هاشم...وبقى بشار حتى كما سيجارة كان الجو حابس من شتا...تعمد يبقى حتى بان ليه ضو سيارة وقف قدام الباب نزل مع دريجات تا حلو والي كان كايتسناهم جاو...
حبيبة"فالكوزينة" : ريحة زوييينة فكراتني فطياب دادا...
سعيدة : اجي فين سناء ؟ هاويلي البنت مسكينة هاد نهار خيطي بيطي ماجلست ماشافتو...
حبيبة : ماعرفتش عميتو فين سناء ؟!..
يلاه غاتجاوبها وهي دور حبيبة جيهة باب الكوزينة تا بانو ليها داخلين بثلاثة اكثر الاشخاص اشتياقا على قلبها...الي غير شافتهم وهي تزهق ليها كلمة "الله"...وقفات وجاو يجريييو لعندها عنقوها وسطهم...وردة الي فاتت ختها فطول...ونعتز الي طويل تبارك الله...حتى انضمت ليهم الي كيف كنقولو ملي كتشكر سيرة شي حد يقولو ليه عمرك طويل وهي شكرات سيرة رقية داداها وهاهي بانت...
حبيبة : الله توحشتكم توحشتكم بزاااف...
كاتعنق فيهم وتبوس وهما يبوسو فيها ويعاودو...ماسخاوش من بعضياتهم لدىجة عناقهم دام مدة طوييييييلة...
معتز : حتى حنا توحشناك حبوبتي...(مولفاهم يقولوها ليها من صغر)..
حبيبة : شكون جابكم ؟!..
وردة : خويا ايوب..
حبيبة : دادا توحشتك بزااف...
رقية : كون تشوفي انا كبيدة ديالي...(دوزات ليها على كرشها) كيف دايرة القشيشة صغيرة هههه..
حبيبة : ههه لباس...گالتها ليك ماما...
ابتسامتها كانت غير...الفرحة الي هي فيها دابا اكثر حاجة كاتخليه مرتاح لداخل من جيهتها...ضحكتها عندو كاتسوى دنيا...واخا الفرحة ماكاملاش بغياب باها...اش يدير كيفاش يصارحها انه باقي مقصح راسو وخير دليل اخر ميساج جاه من البنك انه تفيرسا فحسابو 50000 درهم اخرى...(خمسة المليون)..
السكاات فالفيلا فقط عاطين وذنيهم يتعطرو بذكر الله من الطلبة الي كيقراو...ريحة البخور فايحة والاجواء دافية دفء عندو طعم خاااص...بشار الي ممولفش بالهضرة ديال ناس جالس لهيه كايسمع فداك تجويد القدييم...راحة تبعثاث فلداخل ديالو لدرجة سهاا مع داك تجويد الي مكرهش يبقى مايساليش...استمر لازيد من ساعة كايقراو يرتاحو ويرجعو يكملو...
جا حتى منير الي عيط ليه طبعا مايمكنش مايحضروش وهو ولا اقرب صحاب ليه من بعد هاشم وحسام...تدفع العشا الي كان عبارة على البلا لول فيه بسطيلات الدجاج واللوز...والبلا ثاني كان طنجية مراكشية وديسير الي فيه فواكه الموسم كاملة والمونادة طبعا والي بغا والماس راه حاضرة...وحتى طباسل الحلوة الي تقدمات مع اتاي...
فالكوزينة واقفة سعيدة معاها حبيبة كاتجمع الماكلة فطاسة...
حبيبة : هذا ديه لكريمة واشراق...
سعيدة : يا بتي بلاش ماشي مشكيل...
حبيبة : اه بشار الي مابغاش الماكلة تشيط كلها تخرج تصدق...
سعيدة بقات كتشوووف...من ديما هو ولد الخير ماعندوش التقرزيز فالماكلة والفلوس...وجاب ليه الله بنت ناس ماشيا معاه فالخط بنت دار الكبيرة وهادشي الي بغات الوقت...خلات سعيدة كاتجمع هي ولطيفة...خرجات لقات سناء جايا شيرات ليها تبعها دخلو لبيت وسدات الباب...
سناء : مالك ؟!..
حبيبة : اشنو درتي فهذاكشي ؟!..
سناء : ياك عندك ؟..
حبيبة : سناء شحال هادي گلت ليك كوموندي ليا من شي ان !؟ كون دابا وصلو ياك ؟...
سناء"شافت وجهها تزنگ" : شش هاناري راه وصلووو...غذا نجيبهم ليك...
حبيبة : علاش ماجبتيهمش اليوم ؟!..
سناء"عصبتها وهي طلقها ليها فوجهها" : باغيا تنعسي مع راجلك وحنا كاينين القح*...تفوو استغفر الله العظيم...شي يهز رجليه وشي يجيبها فرجليه...
حبيبة : مابقيتيش تتحشمي والله...
سناء : مزينك...غذا نجيب ليك شوميز الي كومونديت ليك...ونتي علاش ماوصيتيهش اصلا يجيبهم ليك ؟!...كايمشي غير ليمارك منين كيتقدا ليك...
حبيبة"وسعت عينيها" : بغيتي نگوليه جيب ليا شوميز دونوي هكا بوجهي حمر ؟!..
سناء : ملي كنتي كتهزي ليه رجليك تال زدگ لگ كان وجهك زرگ ديك ساعة !..اشوفي دوك فعايل الوحم مابقاوش صالحين وحمك سالا بغيتي تصبري صباح نجيب ليك مابغيتيش حركي غا زوكك راه يتهز ليه العلام...
خلاتها كاتبرق فعينيها وخرجت من البيت...اصلا مولفة بهضرة سناء المقزدة بعض المرات...تسالا العشا وكل شد طريقو فحالو.. الطلبة وتبعهم الحاج وعيدة الي واعدت باش ترجع فالقريب...مباركة تاهي لطيفة وخوت حبيبة وايوب ورقية وحتى سناء كلشي مشا بقات غير هي وياه..من فرط العيا نعسو دغيا معانقين بعضياتهم والفرخة ديال بنتهم الي جايا فطريق ريحات خاطرهم...ولكن واش هاد الخاطر غادي يبقى مرتاح ديما...المشاكيل ماكيخطاوش فهاد دنيا...الناس عامرة مشاكيل وهموم ماحدها عايشة والنبض كاين...اليوم مشكيل غذا حل...
صبح الصباح ومع حلات عينيها على تقرقيب توضحات ليها رؤيا تا بان ليها واقف كايلبس فسروالو...نادات عليه بصوت مبحوح بنعاس وهو يدور عندها...
حبيبة : صباح الخير.. بتخرج ؟!..
بشار"حرك راسو وضار كيكمل"..
هزات تيليفونها من حدا راسها وشافت ساعة...السبعة وشي حاجة..رجعات حطاتو وناضت كاتفوه وتحك فعينيها...حتى ضار لعندها وجلس جنبها...دوز بايدو على شعرها ونزل لعينيها لحتى لفمها وهو يتحنى باسها فيه بوسة مطووولة...بوسة فشي شكل هز راسو وبقى غير كيشووف فيها شي شوفات فشكل...حطات ايديها فوق ايدو...
حبيبة : مالك...بنتي ليا فشي شكل...
بشار"حرك راسو ب لا زعما مكاين والو"...
حبيبة : اليوم گلتي عندك off بيتي تبقى معايا...
شوية تسمع صوت ميساج جاه فالتيليفون قبل مايجاوبها شاف ميساج بانت ليه نمرة ممسجلاش...غوبش كيشوف جاه فيديو من ديك نمرة خشا تيلي فجيبو ورجع شاف فيها باسها فراسها..
بشار : عندي شي خدمة...خاصك شي حاجة ؟!..
حبيبة : خاصني ترتاح راجع من سفر فطيارة بايخصك ترتاح على قبل لكخيز...
بشار"وقف" : ماشي مشكيل...رجعي نعسي نسالي ونجي بكري شوية...
تنهدات محركة راسها بتفهم...رجعات حطات راسها كاتشوف فيه مشا لكوافوز هز سوارت سيارة وبزطام وتم غادي ضار تا شاف فيها مزيااان شوفة ماعرفتش تفسرها حيث طول فديك الشوفة وهو يخرج من البيت...خلا خاطرها ماهانيش عليه حيث كان كايبان فشكل...خرج من دار حل السيارة وركب فبلاصتو قاد سانتيغ ةديمارا سيارة...قبل مايزيد هز تيليفونه ودخل لداك الفيديو كمش عينيه وحجبانو كيشوف فداكشي مافهمش فيه شي حاجة...وفهم استوعب لا ما استوعبش..منين جا هاد الفيديو اش هادشي العقل الباطني مابين والو والعقل الخارجي تاهو...لدرجة حل الشكارة جبد نضاضر شوف ديالو دارهم كايتأكد...عرفتو المعنى ديال السطل تكب عليه ماه باااارد...لدرجة عينيه خرجو وبقاو هكاك خارجين...صدرو شعلات فيه واحد العافية مايعلم بيها غير الله تا تفيكساو العروق فراسو وذاتو....النفس مشات والقلب تساعو دقاتو حتى بغا يسكت... فجأة طاح والفيديو كايسالي ويعاود على مشهد واحد اشراق كاتمارس مع حميد نفس الفيديو الي وراه ليها...وااه على موقف واااه على شوفة شاف واااه الضهر الي تهرس شقاااف...فلحظة..الدنيا ضلامت والعقل غاب والنفس مشات والوعي تفقد...وهنا تهديد حميد كان بصح وماشي كذوب...وهنا وعد ووفى يشوههها شوهة بمعنى الكلمة مع خوها....
يتبع...
ولد حراااااام هاد حميد هذا. ماعرفنا بشار اش غايدير