عروس الجحيم الجزء 18

الساعة تشير الى الرابعة زوالا...نهار كامل وهي غايبة حضرات لكاع الحصص بكل حماس..وحتى انها بااغية تخرج تفك على نفسيتها من نهار مشات لعروبية ما خرجات كيف ناس مامارستش حياتها بشكل طبيعي...توريا ماداتهاش فيها ولا سولت عليها...من الي مشات ماهضرات عليها حتى تجبد موضوعها قدام سيحمد و ربيعة كانو فالكلينيك على برا...

ربيعة : تي امتى ناوية تجيبي مرت ولدك...

توريا"هزات فيها عينيها مخنزرة تا رجعت ربيعة باللور" : ماعندي تا ولد اربيعة.."هزات صبعها وحطاتو فوق فمها كتحلف بغيض" نهار باقي نسمع من فمك هاد الهضرة كلامي عار من جيهتك وفمي واد الحار عليك..زمي فمك ولا عيبي نسبقو معاك من دروك...

ربيعة : مانويتها شاااي اختي توريا..

توريا"خنزرات فيها وشابكت ايديها ورجعات متكية فوق كرسي ودورات وجهها" : مزال مناوياش خليها تم هاد ساعة تانفك المشكيل مع ولد لحرام..ماتدي عيبي تاهي الي بقات ليا...

سيحمد : را المحامي جاي عندك ويشرح ليك والي نحتاجوه وجدي غا الفلوس كلشي يتقضى...

توريا"شافت فيه" : يتقضى يتقضى ؟!..

سيحمد : كلمة وحدة...ماعادا لا خرج ليك بالشهود على ما گال..

توريا"رجعات ضورات وجهها" : والي سميتو قليل الاحترام..والي بغى يشمتني ويدور فيا يديرها...كلهم عندهم الولاد وعارفين يحق الولاد..."رجعات ضارت جيهة صاكها وجبدات منو واحد جوا عامر فلوس ومداتو ل سيحمد" عطيه هاد البركة وزيد زيرو..قضي معايا اسيحمد خيرك منساهش مانساااهش لا تخايهش يرزيني تا فيوسف براكة راجلي رزاني فيه ورزاه فشبابو...

سيحمد : انا معاك لا بغيتي ولدك نقضي معاك..وهو الله يهديه وكان هادي ما حالة داير تاهو...بان ليه فيوسف مال يوسف اش خاصو ياك المخيرة توصلو. وعايش مخير معانا حد ماينهصرو مايغوبش فيه...سيري كوني هانية ولدك "دار صبعو فلسانو ومسحو فوق الكرسي" على رقبتي لا داه...ماگادين على هم تاني...

حركات ليه راسها وتبسمات حيث عارفة سيحمد يقضييي...شوية تا هبط عبد القادر وحسام كانو مع يوسف الفوق..سيحمد خشا جوا ف الفيستة ديالو لداخل وشاف فباه...

سيحمد : با يلاه نتحركو..خاصني ندي الكاميو ل فرطاسي يگاد ليه شاكمة ونرجعو بكري صباح محركين ل سوق سبت نديو داك الفياج...

ع.القادر"حرك راسو وشاف ف توريا وحط عليها ايدو ربت عايها شافها مهمومة وسارحة" : يكون خير ابنتي يكون خير والله يهديكم...هادشي را قوا وكثر وانا صحتي مابقات گدت تهز هم تاني..رخفو على راسكم ولا طيروش ليا نقشة نصدق ضاير فيكم دورة خايبة لا نتي لا هو...ديها فصحتك وولادك وخليه عليك..

توريا"الصمت ماتقدرش تجاوب دابا متكلة على سيحمد"...

اليوم سبت مكاينش عندها حصص...توريا عقلها كلو خارج مع مشكيل ولدها والمحكمة غير تفيق تمشي عند يوسف متحيدش من حداه كايجي المحامي يشرح ليها اش دير وسيحمد يتكلف معاه...ملي قاليه على الشاهدة الي تعاونو فحالة ماحضراتش الشاهدة لاخرى..وكيف ما حضرو الشهود كيف ماتعزز الحكم ضد مو...وهنا يقدر يتكفل بيه ...طريق كلها وهو كيفكر فهضرة المحامي وهاشم...

~العمراني : ونتا عندك اثبات انك كترسل ليه وكتواصل معاه ديما...

بشار. : من نهار دراعي تمضاو وفنيت راسي فالخدمة فلوسي فلوس خوتي...عايش على جالهم...

العمراني : شكون شاهد على هادشي ؟!

بشار : عمي...~~~~

داير صباعو فوق فمو سايق وعقلو ماهواش هنا...الشاهدة الوحييييدة الي ممكن تنفعو وهي الي ما ضنش انها تكون هي...لقى راسو خارج على مراكش وغيييير غادي...حس براسو مزير...لدرجة تيليفونو صونا ماداهاش فيه كايشعل باسم "هانزاده" وكيتطفى...كيعاود يشعل ب اسم "هاشم" وكيطفى...وتيليفون ماشي صيلونص لكن هو الي عزل راسو على العالم...من يوم امس وهو كيفكر وكيتفكر حتى ردة الفعل ديالو....

~بشار : هاشم كاتهضر من جدر نيتك ؟!..

هاشم : كنگوليك...رخف فيك نفس..وساعف وهبط الكواري الى بغيتي حاجتك...

بشار : وعلاش انا باغي نتفك منها ونفكها مني..هذا را تنوفيق اهاشم....ماناقصش اهاشم فريع الكر تاني...~

ماعقلش على راسو حتى وقف فجنب الطريق بقى شحال واقف وطالق سينيال شي خمسة دقايق وعقلو مرفووووع...حتى قلب سينيال ليمن وضرب دورة بجهد..

رجعات من المدرسة ديال السياقة وبدلات حوايجها وغسلات حالتها وهي تهبط تغذات معاهم فرحانة ومخشية فباباها الي قدرات تشوفو هاد نهار...وهو بالفرحة يهز لحم ويمد ليها...

م.حفيظ : افرحي بالبنات...

حبيبة : توحشتك والله كاع ماساليتي باش نشوفك ونخرجو..

م.حفيظ : غذا ان شاء الله بنخرج انا وبنتي...شي خريجة دايزها الكلام فشي بلاصة مهوية ناشطة ماشطة نضربو طنجية ناضية گنادية توت المتوت ههههه...

حبيبة : وعليه ههههه."تنهدات تنهيدة طوييييلة فرحااانة"

ناديا : الحاج ورا الغذا ان شاء الله بنمشيو لحمام...

م.حفيظ"جمع البسمة وتنهد بحسرة على حمامو الي سد" : ايييه انا نوصلكم ونمشي لمحل تايجيبكم عمر..هي صبرو بنقاد شي مشاكيل العام جاي لا كتاب نحلو...

ناديا. : ان شاء الله...

طبطبات عليه كطمن فيه بمواسات...حبيبة حدرات راسها ورجعات تفكرات همها علاش مشات اصلا ورمات راسها فهاد زواج...كملو غذاهم وطلعات لفوق كتجمع فحوايجها حطات بيجامة قطنية فالحمر بالكمايم وكولون ديالها كرونة طالعة شوي عالمؤخرة باقيا جديدة بتيكيت ديالها الي حيداتها ورماتها فصاك..ودارت تقيشرات ودوبييس فالبيض..وديباردو فلبيض..دارت برودوي ديالها دياال ترطيب وتعطير...وبرودوي الاستحمام وگوماجات لحم ناوية تحمم مزياان تفرك حالتها...وحطات سيروم معاهم ديال شعر...رمات بوليرو عليها وهزات داكشي هبطاتو لتحت واتخوس فيها بخودويات حطاتها فسطولة الكبار...تسنات ماماها تا خرجات وخرجو غير هي وياها ورقية بقات مع دراري حيث يلاه عايمين وتا ناديا غير بغات تدي حبيبة تعوم حيث ماقنعهاش عومانها فدوش...حطو داكشي فالكوف وركبو نيشان لحمام...جلسو فيه ازيد من ساعتين تا خرجو حمريييين وحبيبة خلااااص راسها بغا يتشق لحمها كلو تفرك وجهها ولا مزننننگ....دايرة فوطة على راسها....دخلو لدار لقاو رقية موجدة گوتي على حقو وطريقو...

حبيبة"تلاحت تخشات فعنق رقية كتنهج" : امامااا سخفت ادادا..بنموووت...

رقية"كطبطب ليها فوق ضهرها" : الله على كبيدتي الله هي تزوجت مابقا عندها جهد...

حبيبة. : نعل بو زواااج ومايجي منو...

ناديا : الاطيف !!! وعلاش ؟!

حبيبة"خرجات راسها من عنق رقية وشافت فيها" : هيي ضحكت...

ناديا : لا مابان ليا ضحك..نيت خاصني نهضر معاك ماحد باباك ماكاينش...وبتجاوبيني وماطلعيش ولا نتفاهم معاك...واش ممرتاحاش تما ولا واقعة ليك شي حاجة وانا مافراسيش ؟"خرجات فيها عينيها" سكتييي ماتنفيييش...ياك نتي بغيتي تزوجي واقتانعتي واحتارمناك درنا ليك خاطرك ؟...گلبي راه حاااس خصوصا راجلك الي كل مرة خاجة لينا اه مسافر اه حگا را ماكعدش بزاف..شفناه مرة وحدة ووثانية فكلينيك گال سلام وزاد ؟!...اش واقع ؟!

حبيبة : ل لا...هي...وماما عافاك ماتقجريش عليا..واش عارفاني بنصبر ليهم الى دارو ليا شي حاجة ؟ مكتعرفيييش حبيبة ؟!

ناديا"ربعات ايديها" : مابقيتش كنعرفها...هاني بنسكت وليني مزال عندي هضرة ومزال نعرف شي حاجة تخبات حسابي معاك.. وغانتفاهم معاك..."تسمع صوت لانطيرفون ديال الباب..بغات تنوض رقية وقفاتها حبيبة وناضت كتهبط حوايجها وجهها مزنگ من الحمام شافت ناديا لور"

ناديا : شوفي شكون ورجعي بدلي ديك بيجامة مزيرة عليك بزاف...

حركات راسها ومشات كاتقاد بيجامتها..مزيرة من تحت وليهونش فايضين بشكل جد ملفت...غاديا وكتنش على حناكها الي ولاو مطيشة ببسخونية الحمام...مع حلات الباب كطل تا بان ليها وااقف داير ايديه على نصو وعاطيها بالضهر..صونا وضار كايفكر فهضرة هاشم...

~~هاشم. : هي را ماشي خايبة بنت الناس ودرويشة...غا ملي صبرات لتريكتك هاد شهر ماتگولها لحد...وليني دير فبالك تقدر تخاف من مك..غا باش نحطك بالصورة.~~~

بشار سمع الباب تحل وهو يدور شاف فيها وغا شافت فيه خرجات عينيها وقلبها بدا يضررررب.. زيرااات على بواني الباب تا تسقط د.م من ايدها...

بشار : حبيبة !!...

ديييما الصدمة متمكنة منها من جيهتو...ديما كايغفل وماكتوقعش المجي ديالو..سوا لحظة مناسبة او غير مناسبة...يمكن فهاد اللحظة تصدمت كيف ديما مكتشوفو ولا كايتواجهو..الا ان سرعااان ما جا فبالها انه قدر يجي باش يهضرو بخصوص الطلاق او يهضر مع واليديها !!!...

حبيبة"صرطت ريقها وعينيها عليه ماقدراتش تجاوبو حدها حركات راسها بهيستيريا"...

بشار"شاف وجهها هرب منو اللون وهو يغوبش" : كاين شي مشكيل ؟!!..

حبيبة"حركات راسها ب لا" : هممم...

بشار"حك لحيتو بصبعو ورجع هز عينيه شاف قدامو ورجع شاف فيها بادي هضرتو" : پوسيبل نهضرو معاك ؟!..

حبيبة"رمشات بثثاقل" : ف ففاش..يي ياك احم هضرنا "...

يلاه بغا ينطق حتى سمع صوت انثوي اخر نطق يمكن هو ماعارفوش لكن حبيبة طبيعي تعرف...غمضات عينيها وحلاتهم مع حلتهم شافت فيه بواحد نظرة هو ملي شافها هز حاجبو بلا مايشعر اما هي كانت شوفة ترجي يمكن حساب ليها جاي باش يهضرو فالطلاق مع دارهم...ايديها حسات بيهم بردو وخافت يتكشف كلشي ودارهم يمرضو بسبابها يلوحو لوم على راسهم وباها يمرض فيها بزاف...ثقلات على راسها الهم والتضحية...

ناديا"جايا وكاتقاد فالكاب على كتافها وشال رماتو على راسها وطل" : حبيبة شكون ابنتي...

ضارت حبيبة جيهة ماماها ورجعات شافت فيه...ماهزش عينيه ملي سمع صوت ناديا...حتى قربات عندهم ووقفات وهي تجمع حجبانها...

ناديا : بشار !!..

بشار"حرك راسو" : الحاجة...

ناديا : ويلي يا ولدي لاش واقف عند الباب !! اويلي حبيبة مخلية راجلك عند الباب !!

حبيبة"صرطات ريقها من كلمة راجلك اما بشار هز حجبانو وضار لهيه."

ناديا : دخل اولدي مرحبا بيك...

حشم ولا نيت باغي يهضر معاها وباغي فين يهضرو...ولا حشم من ناديا فاش رحبات بيه...حتى حاجة ماتبين ليك ولا تعرفيها من تحت راسو...حرك راسو وهو يحنحن بصوته الخشن وقال من الصواب ويمكن هو اصلا مصواب وخا شخصيتو قاصحة...

بشار"شير بصبعو الي معلق فيه كونطاكت سيارة" : تسناي نجيب شي حاجة من طوموبيل...

ناديا : واخا ولدي...

ضار جيهة ومشى جيهة سيارة فين موقفها غير تما حل الباب الامامي جبد منو شي ساشيات فيهم اسم مخبزة "امود" فيهم كراطن...داكشي الي عرف خذاه..عادة فيه وحتى فاش جا لفيرما جاب طوموبيل معمرو شي مشا لاحتياجات دار وشي ل مو وخوتو...هزهم فايديه وهبط راسو وتم جاي كايبان ليها بديك طولة ودوك شوفات كاتزيد تخلع منو وكاتزيد تفكر الشخص الي تكرفص عليها...مشيتو وطريقة باش كايشوف ولا كايكون غادي كتخلي اي واحد مايزعمش يهضر معاه...وصل عند الباب وهي تكحاز حبيبة الي قلبها بغى يسكت تا تحدر نصو ودخل حيث ديور اصلا عندهم هابطين "المدينة القديمة"...تبسمات ناديا وهي غاديا وكترحب بيه تا وقفات عند باب الصالون الكبير وشيرات ليه يدخل...

ناديا : دخل مرحبا بيك...

بشار"وقف وشاف فساشيات وهو يمدهم ليها".

ناديا : علاش معذب راسك زيارتك كافية...دخل..دخلي حبيبة راجلك هاني جايا نوجد كويس اتاي...

حدو حرك راسو ماهضر ماتكلم...بقى واقف كيشوف وحبيبة واقفة وتاهو واقف.وحنا واقفين وساعة الله ههههه...حبيبة الصدمة ماخلات ليها ماتقول..بقات واقفة وعينيها مغرغرين وتابعين امها...حتى سمعاتو حنحن وهي تقفز وشدات ورا الباب ديال صالة...

بشار. : نبقاو هنا ؟!..

حبيبة"خذات نفس تا خذاتها وهي تزفر وحدرات راسها ودخلات سابقاه. وهي تنطق بصوت شبه مسموع الخلعة واصلة ليها لقرجوطة" : دخل...

تحنى تا حيد سبادري الي لابس قادها ودخل..واخا ماحاملش يدير هاد الخطوة وماحاملش يجي بهاد الطريقة ولهاد الغرض وماحاملش يتخالط ويزيد يتعمق حيث ببساطة ممكن يلقى راسو مضطر يبقاو ممفارقينش مدة اخرى...جلس فسداري وهي بقات واقفة شابكة ايديها حتى هز فيها عينيه...

بشار : جلسي نهضر معاك...

حبيبة"هزات عينيها وشافت فسرجم مكان حد ناديا ورقية فالمطبخ وهي ترجع شافت فيه تاني بنفس الشوفة" : عااافاك الى على طلاق ماتگول والو دابا عااافاك...

بشار"هز حاجبو" : كيفاش ؟!..

حبيبة : دارنا ماعارفين والو معارفين حتى حاجة وقعات..

بشار : اش ماعارفينش ؟...شنو دابا عاجبك هاد الحال الي نتي فيه ؟!..عاجبك تبقاي مزوجة بواحد ماعندش ملة مو العقل الي يريزوني بيه..طبعو خايب مافيه ثقة غذا ولا بعدو نتعصب سييي بوسيييبل بزاف نصفيها ليك باش نبرد..ماعارفاش بالي مزوجة بواحد ف..."خرج لسانو وطواه وعض عليه مزيييير تا بغا يطوش بال.د.م..دوز على وجهو بتعب وشير بايدو"...

بشار : ماجيتش نهضر فهادشي دابا..عندي مشاكيل مزال مطول معايا الوقت باش نساليها ونفكو الي بيناتنا...وكوني هانيا الي مغاديش نفكها معاك بالضرر..براكة الضرر الي جاك مني كافي وموفي...دابا ريحي لارض وخليني نهضر معاك...

بقات واقفة ماعرفاتش اش بغاها واشنو الغرض الي اهم من طلاقهم حاليا او حالتهم...تنهدات واخا هاكاك خايفة،،خايفة من انها تبقى هي وياه راس فراس وخا را دار فيها امها وداداها...حدرت راسها حاسة بالعرق نازل مع ضهرها..جلسات غير تما مقابلة ليه بيناتهم طابلة ب سوانيها...

بشار"داير ايدو على فمو وصباعو فلحيتو..عينيه فنقطة مبهمة كايفكر منين يبدا واش يقول...واش غاتفهمو واش غاتبغي..حك لحيتو وهو يهز راسو وشاف فيها وهو يهز حاجبو ملي شافها كتفرك فايديها وتعض فشنايفها بتوثر..

عارف انها خايفة منو وكتخلع منو وصعيب تسنى اذا ماقلنا مستحيل تنسى ديك الليلة...عينيه مشاو نيشان لقرجوطتها الي كطلع وتهبط ريقها تلف ليها...حتى نطق"

بشار : نهار جيتي اول مرة...تعرفتي على يوسف خويا ولا عرفتيه قبل ؟!..گلتي ليا كاتجينا من العائلة donc تكوني كاتجي قبل من زواج !!...لا ؟...

حبيبة"هزات فيه عينيها ورجعات شتتات النظر وجاوبات" : جيت مرة وحدة قبل من "حنحنت كأنها ماحاملاش تقول زواج فوجهو.." مهم جيت ف عرس هذاك السيد الي كايمشي لبرا..دار عرس فالصيف..ماعقلتش على سميتو...

بشار"هز حاجبو" : رضوان ؟!..

حبيبة"حركات راسها"...

بشار : عرفتي يوسف تما ؟!...

حبيبة"حركات راسها ب اه" : سلمت عليه كان واقف مع حسام ولد عمي هاشم.."سكتات شحال وهو كيسمع ليها..قبل ماتهز عينيها فيه وترجع تهبطهم" علاش كاتسول ؟!..ماف مافهمتش..

بشار : نسول وجاوبي من بعد نفهمك...بغيت نعرف عليه "سكت كايوزن كلمتو"...منك...

مافهماتش شنو بغى وعلاش كيسول على يوسف...عارفاه عزيز عليه خوه وهادشي لاحظاتو ملي جا على قبلو وملي كيدوي معاه فتيليفون...لكن هي اش علاقتها ب يوسف...يلاه غاتهضر تا وقفات ناديا عليهم داخلة وهازة فايدها صينية كبيييرة ديال نقرة ب كيسان ملونين ديال بلار وبراد اتاي منقوش..حبيبة غا شافتها هازاها وهي تنقز وقفات تا هز فيها بشار عينيه..طارت عندها وشدات عليها صينية...ناضت بعفوية منها...

حبيبة : اري نشد عليك...

ناديا"عطاتها صينية" : ماعليش ماثقيلاش...

حطاتها حبيبة فوق طابلة وهي تبان ليها رقية داخلة هازة الحلوة محطوطة فديكور على شكل قفص طيور فيه زوج ايطاج بتصميم زخرفة بلدية مذهب...شداتو عليها وحطاتو...

رقية : سلام عليكم ولدي لباس عليك..

بشار"هز فيها عينيه ورجع حدرهم وحرك راسو" : لباس اميمتي..

اختاصر فزوج كلمات...اما هي تبسمات ليه وخا حادر راسو...وقبل ماتخرج قالت ليه "مرحبا بيك اولدي" وخلاتهم جلسات ناديا حدا حبيبة مبتاسمة فوجهو...كان قرب المغرب ياذن...هزات البراد تال سما وبدات تخوي فاتاي مكشكش وتهضر...

ناديا : مرحبا ولدي..لقيتي الحاج سافر لكازا كون علمتيه كاع مايمشي...

بشار : ماشي مشكيل...

ماشي مشكيل هي باش سد حيث مايمكنش يقوليها "مرة اخرى" وهو ماضامنش انه غايطول هادشي وغايكون اللقاء مرة اخرى...وحتى طبعو فانه مكيكثرش فالهضرة سوى الى بغى يشرح ليك...وخاص يكون مقتانع ودارس اش غايقوليك حيث هو براسو مكيضمنش اش ممكن يقول وفين يوصل معاك لانه حتى فالحوار را مكيريزونيش..او مكيسيطرش...ناضت شوي حطات ليه كاس اتاي حرك راسو وقربو ليه شرب منو رشفة بزز وحطو لانه ماشي من محبييين الشاي عكس حبيبة كاتحماق على اتاي...قربات ليه الحلوة والبسمة مكتفارقش شفايفها...

ناديا : كول ولدي..على الله يدخل الحاج بكري وتعضى معاه..

بشار : لا الحاجة منصيبش..."هز عينيه شاف فحبيبة ورجع شاف فيها" جيت نهضر مع حبيبة ومحرك لعند يوسف..مالگيتش وقت..ومكاينش وقت عندي شي مشاكيل ولابد نفكهم..."سكت تا سكت واخذ بوز من جديد ورجع نطق" ماعليش...

ناديا : لواه اولدي بتعشى معانا من نهار تزوجتو ماشفناك..والحاج باغي يشوفك ديما نسول عليك حبيبة ولا للا توريا كتگلويا مسافر..ايه ولدي دنيا مشاغيل ماعليش الله يحسن العوان وليني ملي شديناك ولابد تعشى معانا...وها مرتك هنا حداااك..

( وناااديا وااا ناديا واااا شرطي الممر تي ديري فران)..

حبيبة"خرجات عينيها ورجعتهم..ماهضراااتش حدرت راسها وزيرات على لحاف الطلامط"...

بشار"ببرود" : ماعليش عندي منقضي من دابا ساعة..خاصني نهضر معاها..

ناديا : ولو اولدي قضي ديك الغراض ورجع تعشى..لا تقلقنيش منك وهادي ماشي عوايدنا..

حبيبة شدات فدراع ناديا..ماتحملاتش ماماها تبقى تطلب فيه وهو ماباغيش..وناديا ماعارفة والو..مابغاتش تزيد تضغط عليه لا يصدق ضاير ف أمها..وحتى انها مامتحملاهش يبقى مزال باغيا غير امتى يخرج فحالو...

حبيبة : ماما.."حنحنت" غير خليه ...من بعد...مامساليش...

"بشار كايسمع وتقول واش جاوب"...

ناديا : وايلي بنتي راه نتي الي بتشديه يتعشى..راجلك هذا..راه عيب..."هنا بشار هز راسو ونطق"...

بشار : الحاجة ماشي مشكيل..مبرزطة دعوة عندي..حسبيها عليا ونخلص الحق...

ناديا سكتات مابقات قالت والو..تبسمات ليه بتفهم وهي تنغزها حبيبة شافت فيها وهي تنوض...

ناديا : شرب اولدي كويسك ومرحبا بيك...هاهي ولدي مرتك هضر معاها هههه..

خرجات على نيتها وخلاتهم راس فراس من جديد...حنحن هو هاد المرة ونطق بنبرة خشنة...ناوي يهضر مايكثرش ويدخل فالموضوع...لكن باش يطلب منها خاص يشرح ويبسط...

بشار : كمل اش كنتي كتگولي على يوسف...كانسمع.."سرح ايدو ورجعها" الى بغيتي...

حبيبة : ماعرفتش اشنو باغي توصل..مافهمتش علاش باغي تعرف مني على يوسف...خوك ماعارف عليه والو باغي تعرف مني انا الي يلاه جيت ؟؟؟...."جمع حجبانو"...

"قالت هاد الهضرة حيث بصح ماصبراتش علاش كيشول فين باغي يوصل...ماعارفاش انه باغي يعرف منها ويشرح ليها عليه عاد يجي ل رغبتو فأنها تشهد...يمكن باغي يحطها بالصورة باش تفهمو..ويعرف واش لاحظت شي حاجة باش يعرف واش تقدر تشهد معاه...واش تقدر تشهد لصالح الحق...غير داري ان هناك خفااايا وماخفي كان اعظم...."

كان كايحساب ليها راه جاي على ود يهضرو فالطلاق وامورهم لكن اتضح انه جاي يهضر على "يوسف"...عند بالها جاي يعرفو منها...

بشار"هز ايدو موقفها" : لا مغاديش تعرفيه حسن مني..

حبيبة : مافهمتش..

بشار : ناوي نعرفو بيك..جاوبيني وتفهمي..ماترديش الهضرة بسؤال...عطيني ونعطيك..ماجايش باش نترهط عليك فالهضرة..

"سكتات وبقات كتشوف لكن بدون متشوف فيه..واخا خايفة منو الا انها محاملااهش يكون معاها ولا حداها...ربعات ايديها وزفرات كتسناه يهضر...اما هو بغا يبدا يهضر فلحظة حس براسو ضرو وحس بشي نقيطات كحلين متفرقين بين عينيه..حتى مسد عينيه شحاال وكيسدهم ويحلهم مزيااان باش توضاح ليه الرؤية...حاس براسو بدا يدور بيه وبدا يحس بالي ماهواش.... هز راسو وشاف فيها باقين عينيه حمرين....

بشار : مانكثرش معاك الهضرة...علاقتك بيوسف باغي نعرفها منك..باغي نعرف واش عندو مكانة عندك...لا جات عليا يوسف من نهار حل عينيه وهو عينيا..نعطي عليه الروح الي باقا تهز وتحط فيا "ضرب بصبعو فوق طابلة بجهد تا قفزو" مانفرطش وماخساراش فيه بعينيا مغمضين....يوسف مرض بزاااف وتكرفص ونتي كنتي حاضرة ليه ؟!..

حبيبة"صرطات ريقها كترعد" : ها..اا اه..كنت حاضرة ليه...

بشار : داك نهار الي دويت معاه فتيليفونو جاوبتي نتي..سمعتيني الهضرة الي ماتعجبش ودرت عين ميكة عليها..مااشي مشكيل من حقك...ندوزو لمفيد الي يفيد..كنتي حداه ؟!..

حبيبة"حركات راسها"...

بشار : مكانتش معاه بنت المشاوري !!..

زير على سنانو وغمض عينيه.. كاتحسي بيه كياتح.ارب مع راسو....فجأة حس براسو تهدن وواحد راحة نزلت غريييييبة..."...

حبيبة"حركات راسها ب لا" : ك كانت معاه غير خالتي سعيدة...

بشار : فاش كنتو كاتقلبو عليه واحد الليلة شكون لقاه طايح !

حبيبة : انا...

بشار : مزيااان...

حبيبة : علاش هادشي كامل...

بشار"سكت عاوتاني..منين يبدا او كيفاش يكمل...زفر بجهد تا بانو العروق من جديد...ورجع نطق وعيينيه عليها مباشرة" : يوسف مريض...يوسف فواحد الوقت ملي تزاد مالقاش المحنة من مو..خليك مني انا وياها تاواحد فينا ما زين...خليك ف يوسف وحدو...يوسف نهار دار شهور فعمرو بانو فيه ملامح trisomie 21...عرفتيها ؟ "حركات راسها بزربة"...ديك الي مسمية راسها مو لاحتو..مارضاتش بيه...ماتهلاتش فيه وخا رجعات حطاتو تحت جناحها هاملاه بجهد...مناعتو ضعيفة والفاكسان مدارش ليه والو من نهار خلق..

حبيبة"الصمت"

بشار"حك شنايفو بسنانو ثوان كياخذ وقت باش يقدر يوصل ليها الهضرة..." : نهار مرض سعيدة الي كتكون عند راسو...نهار سافرت دمرت وحفييييت دراعي لحت راسي فزوبيات والعوافي باش يعيش مرتاح ومايخصو گرام...فتحت ليه un compte à la banque,, خاص غير بصحتو...خلي عليك الحساب المشروك مع ختي..."خرج عينيه بتأكيد" وزنتي هضرتي ؟!...زايد ليه نغزة على ختي فنظرك علاش ؟!..

حبيبة"كانت كتسمع ليه وملي سولها مجاوباتوش على سؤالو انما نطقات مباشرة فرأيها ب يوسف..وخا صوتها منخفض وفيه ذبذبات الخوف والتوثر والرهبة من هاد الجبل الي قدامها وغير هضرتو وثراتها" : يوسف عزيز عليا بزاف..يوسف هو نقطة بيضة تما "هز حاجبو" مافيهش كذوب مافيهش الغوات ماكتسمعش حسو غير كيضحك...يوسف ضريف بزاااف ومايستاهلش يكون مهمل من شي حد...كانشوف خالتي توريا مرة مرة عند راسو ولكن اغلبية"سكتات شحال ورجعات كملت" كنشوفو وحدو ولا معاه خالتي سعيدة..فاخر مرة قبل مايمشي لكلينيك كانت معاه خالتي سعيدة...

بشار"حرك راسو" : مزيااان...هادشي شفتيه بعينيك.."حركات راسها بدون متشوف فيه"...نتي كتشوفي يوسف خاصو الي يتهلى فيه ويرد ليه البال !!...

حبيبة : كنشوفهم دايرين ليه الخاطر...

بشار. : الخاطر ساهل يدار وساهل يتهرس..."تنهد بجهد ورجع نطق"..دابا الى بغيتك هادشي الي شفتي تگوليه گدام شي حد تصيبي تعاونيني ؟!..

حبيبة"هزات عينيها بزربة" : كيفاش ؟..م مافهمتش...

بشار : تبغي تعاونيني !!..ديري فبالك وبين عينيك يوسف..نسايني انا...ماتشوفيش اش الي داز بيني وبينك..شوفي فوجه الله من جيهة يوسف..شكون الي يتهلى فيه شكون يديرو بين عينيه..شكون گاد يوفر ليه راحة واخا صعيب عليا نديه معايا لهيه وانا ماعنديش l'autorisation لا من عند القانون ولا من عند مو نيييت...جيت لعندك تعاوني يوسف ماتعاونينيش عاوني يوسف...الى صبتي والى گديتي تشهدي بهادشي الي گلتي فالمحكمة تگدي ؟!!...

حبيبة"خرجات عينيها ورجعات بلور" : مم محكمة...علاش ؟!..

بشار : داير شكاية بتهمة الاهمال الاسري فحق يوسف...ضد مي ومو نيت..."شافها وسعت عينيها على جهدهم"..

بشار : مسخووط احبيبة مسخوووط ومامزيااانش لا مع مي لا معاك نتي نيت...ديري نتي بوجه يوسف،، بوجه النقطة البيضة..وشهدي معايا والي بغيتيها نديرها معاك...الى خفتي من...

مزال ماكملش كلامو شهقات وهي توقف وحطات ايدها على فمها كاترعد وغاديا" : مانقدرش مانقدرش...مادخلنيييش فمشاكيلك مع خالتي توريا..عافاك...

بشار وقف حتى هو وهي تكحاز كانو عينيه حمريييييين...

بشار : مكاين....

يلاه قرب لعندها غايجاوبها حتى مابقى حس بوالو رجليه خواو بيه وهو يطيح زداااااف على طولتو شد فجنب طابلة زيررر عليها كايحاول يسيطر بكاع مافيه من قوة لكن...ماقدش مزال وطااح حتى غوتات بكاع جهدها...عينيه طلعو لفوووق وكسدتو كاتهز وتحط...مافهماتش اش داكشي ماعرفاتش انها نوبة صرع طيحاتو عند رجليها....

الغوتة الي غوتات خلات ناديا طيييير من الكوزينة هي ورقية وجاو كيجريو ماعرفو باش تبلاو...

ناديا : ياربي سلامة اش هادشي..حبيبة...

كي دخلات لصالون عينيها مشاو نيشان ل بشار الي طايح ونوبة متمكنة منو فحال شي واحد شادو ضو وحبيبة دايرة ايديها على حناكها وكتشوف فيه وتغوت ماعرفت اش وقع ليه...

ناديا" خرجااات عينيها على جهدهم تا شهقات وحطات ايدها على صدرهاا" : يالاطيف ياالاطيف..مالو...؟؟؟

رقية"كتشوف فراسو كيتردخ مع لارض جرات بزربة جابت مخدة وحطاتها ليه تحت راسو يمكن عارفة هي هاد نوبة !!" : يلاطيف يلاطيييف..بسم الله الرحمٰن الرحيم بسم الله الرحمٰن..

ناديا"شافت ف حبيبة لقاتها مصدومة وكتشوف فيه...مشات ليها بزربة جلساتها وشافت فرقية...

ناديا : رقية جيبي تيليفوني نعيط لومبيلونص وطلقي معاك القرآن....

مشات تجري جابتو وعطاتو ليها عيطات على رقم الاسعاف و طلقات القرآن نيشان سورة البقرة...ماعارفينش هاد نوبة شنو هي بالضبط...حبيبة ايديها كيترعدو وعينيها خارجين فيه كتشوف فيه هكاك كيتهز ويتحط ماعارفاش اش داكشي شدو جا لبالهم كريييز وصافي ديال اش الله اعلم....

ناديا"كاتشوف فيه وعينيها دمعو...بقى فيها وخا مافهموش اش داكشي شدو...يمكن عرفت يمكن شكت وحاليا ماعارفة مادير سوى تسنى حتى تحبس منو الكريز وتجي الاسعاف هادشي علاش قدرو...ماحساتش براسها وهي كتشوف فيه حتى نطقات بالدعاء" : ‏اللهم يا من شفيت ضر أيوب و كشفت كرب يعقوب ؛ إشفِ كل مريض و إمسح عنه كل ألم ؛ اللهم انت أعلم بحالهم و وجعهم ؛ لا شفاء إلا شفائك ولا دواء إلا دوائك . اشف واعف عن جميع مرضى المسلمين برحمتك يا ارحم الراحمين وفك كرب المكروبين عاجلا غير اجل يارب...

كأن الله سبحانه وتعالى سمع دعائها فلحظتها...بدا كايتهدن شوي بشويييي بشوييييي تا تحطات ايدو فلارض وزگاااااااا..صدرو كيطلع ويهبط لكن عينيه مسدوديييين...

رقية"بصوت منخفض" : يمكن تهدنات عليه...

حبيبة"كاتقفقف تلفات ليها الهضرة" : اش وق ووقققع ليه ؟!!!...

ناديا"ضارت عندها شافتها دايرة ايديها على حناكها وتتشوف فيه" : ماعارفاش واش مريض بشي حاجة.. !!...

حبيبة"ماهضرت ما تكلمت بقات هكاك كتشوف فيه...واشنو غاتقول ليها ؟.."..

رقية : يكون هو ماعارفش وشداتو هنا...هادي نعرفها ماخافياش عليا..كاتجي لولد ختي اناس...

ناديا"بصدمة حيث عارفة مرض ولد اخت رقية" : الصرع !!...

حركات رقية راسها وهي تحط ناديا ايدها على حنكها وصدرها...ماتنكرش انه عز عليها وبزاااااف..خصوصا ناديا من ناس الي ماكيجيهمش المرض عيب بالعكس ابتلاء من عند الله ولا اعتراض على حكم الله...بقى فرقية الي شاكة فنوبة الي جاتو...بقى فناديا الي شافتو هكاك طايح..واحد قد سخط بهيبتو ب تگديرتو ب صحة العضلات تقضي عليه الصحة كايعز عليييك...

حبيبة : واش بايبقى فالارض !!...

رقية : صبري يتهدن...لا كان شكي هو الي گلت ليك را بيفيق من دابا شوي...

ناديا : شوي وبتجي الاسعاف عار الله هي ما تعطلش...

بقاو هاكاك كيشوفو فيه مخلووعين....مغمض عينيه ناضت ناديا قادت ليه رجليه ورقية صايبت ليه راسو حيث فاش حبسات عليه لكريز راسو هبط شوي...الاسعاف كيف العادة كاتعطل...وهو باقي مغمض عينيه تا شوي وهو يبدا يرمش فيهم...حبيبة كانت عينيها عليه ماحيدتهمش كاتشوف بفضول وخوف...حتى قفزات وشيرات بصبعها...

حبيبة : مم ماما يمكن بايفيييق...

ناديا"شافتو كيرمش وهي تنوض وقربات ليه محنية" : ولدي !!

بشار كايسمع وماقادش يهضر....ضارت جيهة حبيبة وهي تشير ليها براسها اجي عندو شوفيه مالو مابغاتش تنوض ويمكن خافت ولا تحطت فموقف محرج انها ماعارفة عليه والو...حتى خنزرات فيها وهي تنوض وقربات حداها كيشوفو فيه...اما هو هز ايدو وحط دراعها فوق جبهتو كايرد النفس...حتى سمعات ناديا صوت الاسعاف هزات عينيها ف رقية الي خرجات تشوف الاسعاف وتوريهم دار بالضبط حيث وصلو لدرب وماعرفوش انا دار...

ناديا : ولدي شوية ؟!...

بشار"الصمت"

ناديا"شافت فحبيبة ورمشات ليها بمعنى هضري معاه"

حبيبة"صرطات ريقها وهي تنطق ب تردد بكلامات متقطعة وصوت شبه مسموع." : ش شووية !!

بشار"سمع صوتها المرتجف..حدو حرك راسو ماعندوش الطاقة للهضرة"

ناديا : ترتاح هاكا ؟!...ها الاسعاف جات اولدي...عيطت ليها ماعرفنا مانديرو وخلعتينا عليك...

بشار"هز حاجبو من ديك الكلمة..اول مرة شي حد يقوليه خلعتيينا عليك من ورا هاشم وسعيدة...وهو ينطق بصوته المعهود لكن غالب عليه العيا بجهد" : علميهم يرجعو...."سكت كايجمع نفس"...

حبيبة : ولكن غاتبقى فالارض ؟..تقدر طلع فوق سداري ورتاح !!

بشار : لا..."سكت وعاود نطق" ...خليوني هاكا..

ناديا"بتردد" : الصرع ؟!

بشار"حرك راسو"...

ناديا : الله يشافيك...كون هي نضتي ترتاح فبيت حبيبة

بشار : لا لا..ماعليش شوية ونوض نتحرك فحالي...

ناديا : الله يا ولدي وفين تنوض...تاهنا را فحالك...عطي راحة لراسك حتى وكان ترتاح وسير...الله يرضي عليك طلع لبيت حبيبة وتكى ولا تكى هي هنا ماكاينش الي يصدعك...

كلمات وجمل الاطمئنان والخوف الي كانت نابعة من ناديا كانو غراااب عليه مامولفهمش ماعمرو سمعهم...ماحملش راسو فهاد اللحظة..يمكن تأنيب الضمير كايجيه وهو ماعارفش !!...ماحملش هاد الاهتمام وهو ما دار معاهم سوى الادية ل بنتهم...ماجاوبهاش كاع بقى هكاك كايتصنط لعظامو حتى جات رقية قالت ليهم عالاسعاف وهي تعلمها ناديا بالي مابغاش يمشي...مابقاوش هضرو معاه خلاوه حتى يتنفس...

ناضت ناديا ورقية خرجو وخلاو معاه حبيبة الي خنزرات فيها ناديا باش تبقى معاه حيث تاهي كانت تابعاهم...بقى هكاك جهد نص ساعة وهو داير دراعو على عينيه وجبينو كيتصنط لعظامو حتى صونا ليه تيليفونو فجيبو...مد ايدو قدامها جبدو طفاه ورجعو لجيب...

اما هي كانت جالسة ودايرة ايديها على حناكها ومشتتة شوفاتها ماعرفات مادير واش تهضر ولا تبقى ساكتة ولا تنوض طلع لبيتها تايرتاح ويمشي عليها فحالو...لكن هو رحمها وبدا يتحرك وناض كيمسد فعينيه وقف رجلو تانيها ومسند بايدو تا ناض وقف...وجلس فوق سداري مفرق رجليه...دوز بايدو على شعرو قادو ورجع غمض عينيه كايتنفس...

حبيبة"هزات فيه عينيها ورجعات حدرتهم.ونطقات" : شو احم..شوية دابا ؟!...

بشار"حرك راسو بدون اجابة"...

حبيبة : م ماعرفتش اش نگول لماما..مكانتش عارفة كاتجي كريز..سولتني وماجوبتهاش..فاش طحتي تخلعنا ماعرفناش اش نديرو حتى جات دادا هي الي حطات مخدة تحت راسك...

بشار : ماشي مشكيل...

ساد الصمت مدة...هي كتشوف هنا وهنا وكاتسناه ينوض ولا يدير شي حركة...وهو كياخذ وقتو ويرجع يتفكر فين حبسو الهضرة...حتى هز عينيه فيها طلعها وهبطها كانت الفوطة هبطات على راسها وباين شعرها باقي شوي سارد...

بشار : اشنو المشكيل الي مخليك تخافي من بنت المشاوري ؟!..

حبيبة"حدرت راسها" : ماعنديش مشكيل..مابغيتش نكون سبب صداع بينك وبين ماماك...

بشار"باستهزاء وغوباشتو باقي مجموعة" : ماماك !؟...

يلاه بغات تدوي وهي تدخل ناديا هازة بلاطو فيه كاس الحليب فيه لويزة وجنبو العسل الحر داكشي الي عرفات جابتو ليه...حطاتو قدامو كان هو بدا يحس بسخانة بدات تجيه من ورا النوبة...

ناديا : شرب اولدي تهدنك شوي وبيفوتك الحال...

بشار"شاف جيهة بلاطو وشاف فناديا حرك ليها راسو..وهز ايدو كيحك فلحيتو...ماعرف مايقول ولا اش يتصرف...رجع شاف فحبيبة الي كانت كتشوف فيه وتشوف فوجهو الي ولا حمر...حتى تحطات ايد ناديا فوق كتفو هبط عينيه لايدها وهز حاجبو..هاد اليد الي تمدات حس بيها حنينة فشييي شكل...حس بالصدق والمحبة الي مكتقدرش بالثمن"

ناديا : مالك اولدي حشمان !!!..علاش حادر راسك ؟...عمر المرض مكان عيب وعمر الصحة الى خطاتنا مانرضاوش بيها..الابتلاء كايعطيه لينا الله الى كنا عزاز عندو...ها حبيبة باقيا صغيرة وعندها حساسية الغبرة مكتبقاش تقدر تهز نفس ولا الى دخل ربيع كاتمرض...هاني انا مرة مرة كايطلع ليا طونسيون الحاج ديابيت وضغط ومعرض ل نوبة قلبية...تاواحد ماخاطيه المرض..

بشار"كان كيسمع ليها وعينيه على ايدها الي كل مرة كطبطب ليه بيها..هز فيها عينيه وحرك راسو" : عارف عاارف...عارف الي كاين...مولف هادشي عادي..."عاود شاف فيها" تخليني نهضر مع حبيبة !؟

ناديا : ايه..غير رتاح وهضر كي بيتي مع مرتك هههه...ياك شوية بعدا ؟!

بشار"غمض عينيه" : مزيان مزيااان..

مازادش هضر مازال...مكيعرفش يهضر على مرضو..او مكيحملش يهضر فمرضو ولا ممولفش يشرح لشي حد هاد المرض حيث ببساطة كان متعايش معاه بينو وبين راسو..هانزاده والي معاه فالمانيا الي كانو عارفين بيه ولكن مكانوش كايطبطبو عليه فحال هاكا..حدهم كيديرو ليه الاسعافات فييييين الى تصادفو مع هاد نوبة حيث مكانتش كتجيه بزاف ملي سيطر عليها بالدوا...وكان كيحس بيها فاش كتبغي تجي كايلقى ليها مكان وكيكون داير احتياطاتو...تبسمات ليه وناضت خرجات مخلياه يرتاح...رجع شاف فحبيبة ورجع شاف فساعتو لقاها السبعة ديال العشية...

بشار : المشاكيل الي بيني وبينها ماعندك بيهم غراض..نتي تشهدي بلي شفتي ماتزيدي عليه ماتنقصي...الحق حق والباطل باطل...ماعنديش شهادة الباطل ومانديرهاش ضد الي ولدتني...عيني فيوسف نرد ليه البال وعلى جال هادشي ضروري نتبع القانون...لا جيت نلوح الباطل فيومين نجيبو عندي...ماغاديش نبزز عليك الي عليا گلتو..مانگوليكش شوفي فوجه شي حد...من غير وجه يوسف...ماكاينش الي يرد ليه البال حسن مني...عينك فلي يتهلى فيه شهدي ماعينكش باغيا تخرجي من باب واسع نتي وضميرك ومكاينش الي يگوليك علاش...(باغي امتى يمشي حاس براسو عيااان باغي ينعس وكيكابر ولحد ساعة ضابط راسو صحة)...

حبيبة"كتفرك فايديها" : ما مانقدرش..مابغيتش صداعات ماگاداش على مشاكيل..عندي شي حاجة كبر من انني نعاونك...ويوسف غير يسمح ليا...مانقدرش...

بشار : عندك شي مشكيل وخايفة تشهدي بسبابو ؟!..

حبيبة"حركات راسها ب لا"...

بشار : كلامك لاخر...

حبيبة"سكتات شحااال..صغر عينيه فيها كايشوف فوجهها وعينيها الي كانو هابطين كيشوفو فالارض...تنهدات وهي تحرك راسها ب اه" : مانقدرش...وماتبقاش تأكد الي عندي گلتو..مشاكيلك بينك وبين مك مادخلنيش فيهم...

بشار"ضرب فوق فخادو وناض تگعد تا قفزت...مازادش معاها الكلمة لاخرة..خلاها حالسة وخرج خشا رجليه فسبرديلتو بزربة كان قاع دار خاوي غير سقاية الي خدامة بزربة لبس ومشا حل الباب وخرج غير سدو وهي تخرج ناديا من الكوزينة كاطل...

ناديا : خرج شي حد ؟!...(بانت ليها حبيبة خارجة ووجهها ماهواش...كمشات حجبانها فيها) راجلك الي خرج...

حبيبة : اه..

ناديا : ويل شيطااان علاش خليتيه خرج عياان ؟!..واش تخاصمتو ولا مالكم اش واقع ؟!...

حبيبة : ماتخاصمناش مشا لعند يوسف..

ناديا : كاتهضري عادي ؟ واش ماعزش عليك حالتو ؟ مابقاش فيك ما والو ؟ خليتيه مشا عيان ماگلتي ليه بقى رتاح خليتيه خرج عادي ؟..واش بيناتكم شي مشكيل الي مخليك هاكا بلا انسانية ؟..علاش احبيبة علاااش...

حبيبة"بنفاذ صبر" : مااااامااا..ماما خليييه يمشي عندو مشاكيل خليه اماما...جا باش نعاونو فمشكيل مع مو ومانقدرش انا ندير هادشي...عافاك اماما ماتبززينييييش نعاود ليك...

ناديا"هزات صبعها وشيرات ليها جيهة البيت ديال نعاس مخنزرة فيها" : دااابا بتسبقيني البيت تگولي ليا...

حبيبة : ماماا "تا قفزت من صوت ناديا الي اول مرة ترفعو"

ناديا : دوييييييييييت معااااك...يلاه دااابا...

سبقاتها لبيت وناديا ضارت جيهة رقية...

ناديا. : شوفي دراري عطيهم ياكلو...

حيدات شالها الي كانت دايرة فحظور بشار...ومشات نيشان لبيتها ديال نعاس لقاتها جالسة وحادرة راسها كتفرك فايديها...ماحاساش ناديا بكمية الضغط الي فيه حبيبة حاليا...جابت كرسي من عند كوافوز ديالها وحطاتو مقابل لحبيبة وجلسات...

ناديا : هضري كنسمع...

حبيبة : اش بيتي تعرفي...ماتخاصمناش مشا خرج مشى عند خوه...

ناديا : وخليتيه مشى عيان ؟

حبيبة : اش بيتي ندير ليه ؟!..ماما هو هكاك داير وداكشي علاش مامفاهماش معاه بزاف...مكنعرفش عليه بزاف يلاه كنتعرف عليه "كتهضر وريقها كيطلع وينزل من توثر..وضغط وخايفة تفرش"..

ناديا : ولو مامفاهمينش تمشي معاه...واش عرفتي شنو هو الصرع ؟!..واش عرفتي الواحد كيف ينوض منو انا الي شفت اناس ولد خت رقية...كون حساب ليا بايخرج منخليهش تا يرتاح..وهادشي ماشي انا الي نديرو را مرتو الي تادير هادشي..ماعرفتكش وماعرفتش اش ربيت انا..."بغات تبدا تهضر وهي تحبسها" دابا هي خلييينا منو حتى يجي باباك وبايتفاهم معاك...اش المشكيل الي بينو وبين مو باش بغاك تعاونيه ؟!..ماتكذبيييش عليا...

حبيبة : قدم شكاية ب خالتي توريا...

ناديا"وسعت عينيها" : اويلي ؟ علاش ؟!..

حبيبة : على قبل يوسف..حيث مكتهلاش فيه وبسباب الاهمال مرض وماتدارش ليه الفاكسان وهو صغير...باش يتكلف بيه هو بيخصو شهود..وانا بغاني نكون شاهدة..

ناديا : ونتي بتشهدي بالي مكانتش كتهلا فيه ؟!..

حبيبة : نشهد حيث نهار طاح انا الي لقيتو..وفاش مرض واحد اليومين كنت انا حداه ومرة خالتي سعيدة...هادشي الي بغاني نگول...

ناديا : ونتي هادشي بصح كاين ؟!..

حبيبة"حركات راسها" : ماكتهلاش فيه..داك نهار كان غايب ومسولاتش فيه عند بالها راه كاين حيث ولفات خالتي سعيدة ولا شي حد كيكون معاه...حتى ليل ملي سولات عليه گالو ليا ماشفناهش هي فاش نضنا كنقلبو عليه حتى لقيتو طايح وقبل لقيت تيليفونو طايح وعطيتو ليها وماسولاتش علاش كان طايح شداتو وبقى عندها...

ناديا : اش هادشي كنسمع !؟..امتى وقع هادشي ؟!..امتى دار شكاية بيها ؟ ولهاد درجة تواصل هو وياها...

حبيبة : ماعرفتش حتى گالها ليا ....قبيلة..."هزات ايدها كاتحك بيها على جبينها بتوثر" فففف..

ناديا : شوفي انا عگوزتك ماعرفتش اش بينها وبينو حتى تواصلو لهادشي...ماعرفتش اش واقع بالضبط الي خلاهم وصلو لهاد الحالة...وهادشي را مايتقبلوس العقل رافع شكاية ب مو ؟؟؟...و ناسك الله يعمرها دار..

"حبيبة فلتت ليها ضحكة بلهلا يطريه ليها..ورجعت جمعتها دغيا"...

ناديا : الى بصح هاملاه وسبابو فهادشي وكنتي تشوفي بشار احق فانه يديه عندو...شهدي بنتي شهدي بالحق..ماقدرتيش تكوني سباب فصداعهم خليك منحازة...وهو را حسن تبعدي من مشاكيلو هو ومو را كاتبقى مو غذا ولا بعدو يتصالحو وبتدي نتي العيب...

حبيبة"الصمت"...

ناديا : الله يهديهم على بعضياتهم...هادشي جاني عجب...كون بايهضر قدامي كون هضرت معاه ونصحتو..الام را تتبقى ام وماتفوتش ولادها....

حبيبة : فففف...

ناديا : بتگعدي وطلعي وبتعيطي ليه وبتسولي فيه...سمعتيني ؟!

حبيبة"وسعات عينيها على جهدهم وشافت فيها"

ناديا : مالك كتخرجي فعينيك ؟ اش كاين ياك ممخاصمينش ؟ علاش كتخنزري تما ؟...عيطي ليه وسولي فيه وسيري عندو...هذاك راجلك واحق انك تسولي فيه...حالتو ماضراتكش ؟!

حبيبة : ماما را هو مابغاش...هو الي خرج ومشا بلا مايهضر..

ناديا : كاينة شي حاجة كبر من هادشي ؟!...

حبيبة : لا لا مكاين والو...

ناديا : ايوى مالك ؟...را بديت تنشك فشي حاجة الى مكاين والو سيري سولي فراجلك...هاني غانميك ومن بعد نشوف واش سولتي فيه ولا لا...يلاه تگعدي خرجي...

كانو هادو نصائح ناديا الي كلنا غانجيو معاها حيث طبييعيا هادشي الي خاص يكون ويتقال لانها ماعارفاش اش كاين...وهادشي كتسمع ليه حبيبة وتاهي ماعارفاش اش كاين واخا عارفة ان بشار ممفاهمش مع مو...يمكن تكون حبيبة على حق انها ماتشهدش معله ويمكن تكون على خطأ...هي كاتعيش ضغط فوق العادي وبشار كايعيش ضغط اضعاف...ماحيلتو لمرضو ماحيلتو لمو الي ماحاملاش فيه شعرة وهادشي ماينكرش انه مرض بيه..ماحيلتو لجلسة الي غاتنعاقد بعد يومين...

وصل لدار ودخل نيشان حيد حوايجو بقى غير ب بوكسر...ضار هنا وهنا صدرو كايطلع ويهبط...مشا لماشين ديال القهوة كايركب فالكابسول ماعطاهاش وقتها مابغاتش تخشى ليه وهو يهز ديك الماشين وشير بيها لحايط تا تشخشااااات....حجبانو وشوفتو مكتفسرش...خلا ديك الماشين هكاك ومشى جبد واحد ساشية ديال راس خلطها فالكاس وشربها ومشى لبيت...تلاح نيشان فوق ناموسية ماعقلش على راسو امتى نعس مابقاش كيحس بتاحاجة من غيييير يغمض عينيه حيث عيا بجهد وخاصو يرتاااح...راسو مابقاش كيوزن مابقاش كيريزوني خاصو يغمض والا يقدر يضر راسو تاني...

اما حبيبة كانت متكية فوق ناموسيتها وعينيها فالسقف...سمعات صوت باباها دخل وناديا مستقبلاه...حتى صونا تيليفونها وهي دور جيهتو...هزاتو كتشوف شكون متصل بيها لقات اسم "سعيدة"...

فالبلاصة جاوبات يمكن كانت محتاجة شي حد عارف بحالتها وعالم بالضروف الي هي فيها...وسعيدة انسب شخص تقدر تعاود ليه وينصحها...

حبيبة : خالتي سعيدة...

سعيدة : حبيبة بنتي لباس عليك ؟!

حبيبة : الحمد لله...نتي لباس عمي هاشم وخويا حسام والبنات ؟!

سعيدة : كوولشي مزيان...بغيت نگوليك خليتي بلاصتك مانصيبشاي عارفاك باغيا امتى تهناي هههه...

حبيبة"تبسمات بحزن وحدرات راسها" : هي سمحي ليا..وماتفكرينيش بالي بيت نرجع تما...

سعيدة : هي تهناي هاد ساعة توريا مدهية وماتصيبش تجيبك هي بالفرحات عليها تبقاي تم هاد ساعة.مخبية من شوهتها..

حبيبة : اش واقع ؟!

سعيدة"تنهدات : مشكيل مع بشار...

حبيبة"بلعات ريقها وتكلمات بتوثر" : كا كان هنا...جا هنا قبيلة..

سعيدة"بصدمة" : وايلي ؟ امتى ؟...ياكما جا يهضر مع واليديك !!...

حبيبة : لا لا...

"حكات جبينها ثاني بتوثر..ماعرفاتش منين تبدا ليها واش الهضرة ولا نوبة الي جاتو...ولا اش تقولبها...بدات ليها بالهضرة هي اللولة...شي خمسة دقايق وهي كاتعاود ليها...عاودات ليها حبيبة بكل حرية مكاينش قيود ولا كذوب كيف دارت مع ماماها...كاتعاود ليها وكترتاح..."

حبيبة : واش كايعاني من شي مرض ؟!

سعيدة"بشك وقفات" : ياكما طاح گدامك..

حبيبة : ك كان كيهصر معايا شوية وهو يطيح بكريز..سولاتو ماما واش صرع گاليها اه...

سعيدة"حطات ايدها على صدرها وكمشات عينيها" : الله ياربي وفين هو دابا مشا ؟

حبيبة : مشى فاش توگض...

سعيدة"تنهدات بالم وحزن عليه" : اه بنتي فيه داك المرض..تاحنا يلاه عرفنا ماكاملاش ربع سنين...حسن عوانو معاه..

حبيبة. : عرفتي فاش طاح ماعرفتش وماحسيتش حتى غوت..."كتمسح عينيها" سولاتني ماما باش مريض تخيلي ماعرفتش باش نجاوبها...وماما بدات كاتشك وتحس وانا ماما كنعرفها بتبقى تهبش حتى تعرف كلشي...انا مخايفاااش على راسي انا خايفة عليهم يتصدمو ويعرفو كلشي...خايفة يتقلب عليا هادشي وعلى صحة واليديا اهئ...مابقيتش صبرت اخالتي سعيدة ومانضنش غانبقى صابرة...ماكرهتش تگوليا خالتي توريا نمشي فحالي من دابا..ماكرهتش نعطي تيساع غير يطلقني ومايضروش بابا ومساااامحة ليهم مسامحة ليه حتى هو هيييي يفرقوني...

سعيد. : هادشي خاصك تحطي ليه حد...عندك حل واحد ابنتي وغاتسمعيني مزياااان....مهم هوعلاش جا ؟! واش جا على قبل طلاق ؟!

حبيبة : بغاني نشهد معاه....

..."سكتات ورجعات نطقات"

سعيدة : ماعلينا بنتي غذا نشوفو كي بقى خليتي بالي معاه دابا...مهم حبيبة بنتي...انا مانگولش ليك ماتشهديش ولا شهدي...انا مانكرهش تشهدي معاه حيث يوسف را ممهلياش فيه مو...يوسف كيتعذب كل مرة كيطيح يمرض وبشار را يتهلى فيه كتر من راسو...توريا ماعندهاش الكبدة من جيهة ولادها...هادشي مغاديش ندخل ليك فيه ونشرح ليك مزيان هادشي مانصيبش نعاود ليك كثر فيه الى كملت غادي نوصل لشي حوايج ماهماش...ولكن انا بغيتك تشوفي من جيهة يوسف...وقبل منكمل بغيت نعرف واش خايفة تشهدي حيث خايفة من توريا ؟!...

حبيبة"عينيها غرغرو" : راكي عارفة....

سعيدة : لا حول ولا قوة الا بالله...عارفة ابنتي عااارفة ايدك ملوية...عارفاك درويييشة وماديال تكرفيص والله ياخذ فيهم الحق...امنتيني على سرك ماقدرتش نكولو حتى لهاشم..ولكن هادشي را غايفوت القياس ابنتي...هادشي را كبييير عليك وفوق طاقتك...الى بغيتي نصيحتي ابنتي سيري هضري مع بشار..

حبيبة"وسعات عينيها" : اش كتگولي ؟؟...اش غانگوليه ؟..

سعيدة : عاودي ليه...بشار احبيبة واخا صعيب وقاصح را مافيهش دغل...ماكيبغيش الكذوب واخا خايب معاك خاص غير تعرفي ليه...

حبيبة : لا لاااا مانگولش لييييه...

سعيدة : سمعييييييني ابنتي سمعيني مزيااان..هادشي فات جهد لهيه..نتي ماشي ديال هاد الحالة وتكرفيص...بغيتي تفكي وبغا هو يتفك ؟.سيري هضري معاااه وحطيه بالصورة....راه قاااصح ومجهد وواعر راه ماكيبغييييش الضلم...غير الى تعصب ولا جهلوه مكيبقاش يعرف يسيطر على تصرفاتو.....واخا مكيعنيش انني غادي نسا ليه اش دار ليك...الى بغيتي مشكيلك يتفك وتفكي من هادشي سيري هضري معاه وگولي ليه على مشكيل باك مع شيكات الي شادين عليه...ولا سيري ابنتي شهدي والى طرات شي حاجة هو غايعاونك...وهو الي غايفكك...وعاد را منضنش توريا دير ليك شي حاجة عرفتي علاش ؟!..

حبيبة"عينيها كيقطرو بدموع" : ع علاش ؟...

سعيدة : الشيكات ماعندهاش...عند شيخي وشيخي مايديرهاش...والاملاك كاملة را ديال لالة يعني مك عيدة...توريا ماعندها فهادشي واااالو....ياك تزوجتي كيف بغاو ياك خطبوك وقبلتي...والغلط دابا فيمن ؟ شكون الي خلاك ومشى...

حبيبة"مسحات دموعها" : ه هو اهى...

سعيدة : اذن الغلط عليه هو...الي عليك درتيه...انا بنتي عطيتك الحل تنازلي وسيري عندو الى بغيتي غراضك حتى نتي...مكااااينش ابنتي الي غايوقف معاك من غيرو هو..وهاد سكات ديالك مغاديش ينفعك...مهم غذا غانجي نشوف يوسف ونشوفك ونهضر انا وياك..

كملات معاها وحطات تيليفون...بقات متكية شحال وهي كتفكر وعينيها دايزين بالدموع...فيها خووووف كبير..قلبها مامهنيهاش...رجع بيها عقلها لجملة قالها ليها بشار...

~بشار : عندك شي مشكيل وخايفة تشهدي بسبابو ؟!..

حبيبة"حركات راسها ب لا"...~~~~

اصبح يوم جديييد...كانو جالسين فقاع دار الفطور محطوط كلهم كاينين الا توريا الي وصلها سيحمد لمراكش ومشات معاه عند المحامي...والولاد مشاو يقراو منهم اشراق...حطات ربيعة صينية القهوة وهي تدخل حسنية كتنقز تا جلسات حدا سعيدة ونغزاتها زعما كبي ليا القهوة...

سعيدة : وليتي كتغبري الحسنية ههههه...

مدات ليها كاس القهوة...شداتو وهزات الخبز كتنتش فيه...وهي دور ربيعة عند سعيدة...

ربيعة : تي توريا تسبق المحامي گالت ؟!...

عيدة : وايه...الله يهديهم..."هزات عينيها فسعيدة" تصيبيش دوي معاه نتي وتنهيه يخلي الولد لمو ؟!...

سعيدة : و لالة اش ندوي وهو رفع شكاية ؟...اش بقى مايتگال ويا لالة خليه يدي خوه عندو..ماهي حالة كان فيها خليه يديه تم يتهلاو فيه فصحتو يربي المناعة...را مريييض الالة...

عيدة : مناويش يدوي عمايا ؟!...كاع هادي غضبة ؟!...

سعيدة : خليه يفك هادشي ويتهدن ونهضر عماه...ساعة الله الالة راكم مدرتو فيها مايليق...ونتي عارفاه خااايب ماينساهاش..

عيدة"تنهدات وحدرات راسها دايرة صبعها عند فمها وتخمم...حتى نقزات كريمة كي البولة وهي تنطق...

كريمة : واش بشار يصيب يجي لهنا....

مع قالتها مع طاح واحد الكاس تشااااااااخ....هزو عينيهم وهما يلقاوها موسعة عينيها وكدور فراسها هنا وهنا وبجنابها وعندهم تا جاتها الهيستيييريا وهي توقف وبدات طرش فراسها وتركل ليهم وتغوت وتجذب....دارت ايديها على وجهها كاطرش فيه كاتحاول تطرد ديك الذكرى وديك الليلة....عمر وجه بشار الي كااان سبابها ماتنساااه....عمرها تنسى الشخص الي حلات عينيها ولقاتو كايحل ليها فصدايف الكسوة.....

~~حسنية : ايييييي اهى اهى..اممممم...."جات تحرك وهي تبلوكا وخرجات عينيها... تحتها كان طااايب وعامر د.م"...مممممممممممممممممم....مييييييييييي اهئ اهئ...ميييي عتقييينييييي..."كاتدفع فيه بايديها عاد مطلية ليهم الحنة ديال البلوغ... وهو كايبعدهم ليها ويتبتها"...بغيييت ميييييي....

حسات بدقة نزلات عليها لراس...حلات عينيها وعاودت سدتهم وعاودت حلتهم كاتشهق..اخر حاجة شافت هي فاش قرب عندها وحط صبعو على فمو وخرج عينيه مع وجهو كان ضارب فيه الضو الي شاعل ديال دوار..الشي الي خلا صورتو ماتنساهاش..اخر حاجة شافت هي فاش قرب عندها وحط صبعو على فمو وخرج عينيه مع وجهو كان ضارب فيه الضو الي شاعل ديال دوار..

بشار"خنزر فيها" : شششش....سدي فمك...

حسات بدقة نزلات عليها لراس...حلات عينيها وعاودت سدتهم وعاودت حلتهم كاتشهق..وهي تغييب"...

تهدنت وهي تمشي كريمة جابت ليها كاس ديال الما وهي مافاهمة والو حيث اول مرة كريمة تحضر ليها لهاد الحالة...

سعيدة. : ششش تهدني شربي الما ابنتي شربي...

حسنية"شدات كاس الما بايدها كترعد كان غايطيح ليها كون ما شداتو معاها سعيدة...كريمة بقات حالة فمها مافهمتش مالها وعيدة تنهد وتحوقل...اما ربيعة دايرة صبعها على فمها وتحرك راسها...حتى تدق الباب...

سعيدة : شكوون !؟ (عرفات شي حد ماشي من مالين دار داكشي لاش دق الباب واخا بيبانهم ديما محلولة..ضارت جيهة كريمة وربيعة) ديرو شي حاجة على راسكم...

ناضو بزربة لاحو عليهم زيوفتهم غير تم..عطات سعيدة الاذن وهو يدخل ولد الحسنية واحد من التوأم...

ياسين : خالتي سعيدة لباس ؟! "شاف فالحسنية كاترعد وهو يغوبش".. مي ؟..مالك !!..

حسنية"هزهزات ليه كتافها وحدرات راسها وهما يقطرو دموعها"

ياسين كان هاز شكارتو حيث غادي طالع لمراكش يكمل قرايتو فسونطر ديال نجارة وفنفس الوقت غايدفع باك حر لانه مستوفي السنة الثالثة اعدادي ومكملش موراها...لاح شكارتو ومشى لعندها تحنى عند ركابيها...

ياسين : مي مالك ؟!..

حسنية : ببب اهئ ابببب...اباا اهئ أءءءء..."كتحرك فراسها"...

ياسين"شاف فسعيدة" : ثاااني نفس المشكيل ؟!!!...

سعيدة : هذا الله...

ياسين"صعر وهو ينوض" : فيييييين هو ؟!!!...

سعيدة : ياسين مكاين حد اولدي...

ياسين"بدا يهلل ويغوت" : كيفاش مكاين حد وعلاش تاني جاتها هاد الحالة ؟...ديييييما كاتسمع سميتو وكايوقع ليها هوك !!..غا سميتو ودايرة ليها هاد الحالة...علاش ماباغينش تهضرو تگولو اش كاااين ؟!..

عيدة : ياسييييين (هز فيها عينيه) برك لارض وحوز ميمتك..هادشي ماعندو باش ينفع...

عقد غوباشتو حجبانو كحلييين وعينيه كذلك...هو واشرف نفس الملامح الحا.دة...يلاه بغا يهضر تا حس بيها عنقاتو من رجليه كترعد وتمسح فعينيها بطرف كمايمها وتحرك فراسها ب لا...حط ايدو على راسها وهبط باس ليها راسها وهو ينوضها...

ياسين : يلاه مي لدار نعيط ل اشرف يبرك عماك تانجي..راني دويت عماك لا تبقايش تكتري المجي هنا...

سعيدة : ياااك اياسين هذا مسوانا ؟!..

ياسين ؛ سمحي ليا خالتي سعيدة مانصيبش نخليها تبقى تجي بزاف ندير عليها العين...دوزي مي لدار...

ناضت وهي مزال كتقفقف اصلا باغيا تهرب من تم مادام سمعات حسو كااين...شداات ليه فدراعو وزيرااات وهو حايزها بجنبو تحنى هز شكارتو وتم خارج بغات تهضر ربيعة وهي توقفها عيدة هازة ايدها وشيرات بمعنى خلييه خليه...

كريمة. : هاويلي اش گلت يانا تا دارت هوك...

عيدة.: ماگلتي شاي ابنتي ماگلتي شاااي..هدنو سوق ونوضو شوفو شغاالكم...هادشي بعد يجي الحاج ندوي عماه فيه...غذا ولا بعدو ماتعرفي يدخل هنا تاني يوسف يرجع نشاعلاه وهو را مايصيبش مايشوف خوه....

سعيدة"تنهدات" : وعولي عليها يالالة...

ناضت كريمة هي وربيعة هزو الماعن وبقات سعيدة كاتعبر ل عيدة ف الضغط وتعطيها دواها..حتى صونا تيليفون عيدة هزاتو سعيدة بغات تمدو ليها..

سعيدة : هادي مليكة طفلتي (لوستي)...

عيدة : واجبيها واريها ليا لهنا...عينها تعرف اش طاري ثاتي..

كحزات عيدة زيف على ودنها باش تقدر تسمع مزيان...عطاتها سعيدة تيليفون وشداتو فايدها تشوف فيها وسعيدة سايرة توجد ف شوكة باش تعبر ليها تا سكار...

مليكة"كاتجمع ف كول بيجامة باش مايبانش صدرها..لايدين كي العادة مزرزرين ذهوبات وخاتم الدينار" : وا صباح الخير امي..كدايرة لباس والي باس..كلشي بخير...

عيدة : ونگولو لباس..

مليكة : وا سعيدة وتي كدايرة..

سعيدة : بخير اختي مليكة بخير...

مليكة : والحمد لله...تي كيدايرة توريا ختي كيدارت مع گرحتها تاهي ؟..راني يلاه جيت من زيكول ديال لينا بنتي وجاي بالي معاها جيت غا على رجلي نطيح بعض الكيلوات لا بغاو ينزلو شي هههه...اش دارت مع المسخووط الي خرات من كرشها...

عيدة : مادارو والي راهم سايرين...الله يهديهم وكان هذا جهدي..عيييت ندوي معاها تهدن وهو راكي عارفاه مايدوي عمايا...

مليكة : هاو لهلا يدوي جدو...هاويلي ضحكة وشرگة..يا وطليتو خضر لاكان غا دويانو يگطع بوه من جدر..المسخوط شاري سخط بالعلالي...عندو شي مراگة ولا ماعندوش ؟..داعي مو يا مي هادي فين كاااينة ؟..ورا ماعندو مراگة نيت (دايرة ايدها على فمها وتلولب فراسها..سعيدة كاتحسبن وهي كتسمع ليها مابينتش راسها ماباغاش تدوي معاها نيت)..

عيدة : هني عليا سوق داكشي شوف اش بيناتهم..راسي تبخ وصحتي قلالت ابنيتي مابقيت نگد نهضر مع حد فيهم..خليهم تم يتلاغطو ويضاربو تا يبردو غدايدهم..لا جيت ندير فيهم راسي نهلك صحتي...وبوك تاهو طلع ليه الخز من هادشي عيا وهو يساوم بينو وبين مو وراه عيا وتهد...مابقا باغيشاي هو يدخل هنا غير لا بغى يحط راسو على وسادو..كنا ناوييين نخطبو ليه بنت مسور...وتسنينا تا يبرا يوسف..وكل مرة خارج لينا شي عجب...

مليكو : هاويلي...

عيدة : ايييه...ولا صبتي تجي ف شهر 12 حضري ليه سيمانة هاو سيري...

سعيدة"هزات راسها وحلت فمها ربيعة دارت ايدها على حنكها كريمة حبسات ضحكة ولات تطرش فراسها مشات لطواليط غا هكاك...مليكة شهقت وحطت ايدصباعها على فمها...

مليكة : هاويلي يا مي تي نويتيها تا فعبقادر بوياو..

عيدة : وراه خاصو الي تلمو انا راني عيييت وجنابي طابو بالكشيفة باش نتگلب كي ندير نهز بوك ونقوم بيه...وعيبو ماتگد طالع بيه غا مرتو...

مليكة : واش نيت ولا قويتي الفشوش لبويا ولا بويا الي كالو المطيار (حجرو) ونوا جواج ؟!...

خلاتهم حالين فمهم شي يشوف فشي وشي يضحك...سعيدة حركات راسها ب لا حول ولا قوه الا بالله...اما مليكة تاهي تدهشرت...

مليكة : تي اش تگولي يا مي...

عيدة : الي سمعتي..بوك را بدا يعيا وانا جهدي وصحتي قلالت..تي شكون بغى يرد ليه البال لا مرض...

مليكة : الله ينجيه. امي..ياوييييلي...

عيدة"خرجت فيها عينيها" : ونكذب ؟ الصحة غاديا وتقلال وبوك غادي ويكبر...وعيا وانا عياانة الي نطالع على عيبو را منصيبش منگد تا نحرك جنبي ليمن بقى غا ليسر ؟!..

مليكة : وبويا مابغاشاي نجيبو عدي انا نقوم بيه مابغيتوش تجيو هنا ومابغيتو تسمعو لرضوان وتجيو...

عيدة ؛ ماعندي مندير ف بلا.د الكف** رة...الي عندي راني علمتك بيه..شوفي كي ديري...

مليكة : وهو خلاص را عندي مجية ف شهر طناش..يلاه ونامس گلت ل معطي يگطع ليا فطيارة لا لقا شي رخص على بعد..را كيسول..نيت جايا نصايب شي وراق ونيييت نشد فلوس الارض الي باعو تريكتو تم را دار ليا وكالة ملي كنت عندكم تم...

عيدة : وهي هاديك الوجيبة نيت تحضري ليه...يتهدن شوية الجو هنا ونمشيو نخطبوها ليه ونزگيو ميعاد الي تجي نتي...

قطعات معاها من بعد ما رصاو الهضرة وحطاتها بالصورة....طلعات سعيدة لبيتها الفوق بدلات حوايجها،، لبسات جلابتها ودارت شالها صايباتو مزيان..هزات صاكها دارت فيه الي كاتحتاج خشات رجليها ف صابو ومشات لكوافوز رشات بارفانها وذهنات بيه ايديها..وهي تخرج..نزلات لتحت لقاتهم جالسين وكريمة كاتسيق فدار قبل. مايجي طو لاخرين ودراري من مدرسة...لقات ربيعة شادة كروشي وتخدم فيه...

سعيدة : ربيعة تمشي عمايا ؟!

ربيعة : فين !!

سعيدة : جاي حسام بالطوموبيل يوصلني لمراكش عند يوسف نشوفو هاو ندوز لدار عند حبيبة...

ربيعة : واش ليا ب دار حبيبة ؟..حبيبة عمرها هزت تيليفون وسولت عليا ؟..ياك خلاتني مضروبة لحنكي ما گالت ليا تا تفو فواتساب !!..وهي ما ثيقت زادت لدارهم ما تلفتت..تي اش كتگولي ا سعيدة..

سعيدة ؛ مابغيتيش تمشي ؟ صافي هني سوق اربيعة لا تقويش ولا ديريش الحسابات الي بغى يسول يسول فيه الخير والي مابغاش يجيه الخير...رخفي فيك نفس وخليها على الله..."قبل ماتهضر ربيعة شافت دغيا ف عيدة" لالة ماصتيبيش تمشي ياك تباني ليا عيانة...

عيدة : منصيبش ابنيتي غا سيري وسلمي على يوسف وهنيني عليه..هاو سلمي عليها...

حركات راسها تا سمعات تيليفونها كايصوني كان حسام الي كايعلمها تخرج عندو..سلمات عليهم وخرجات ركبات حداه كان مسكسف عالحالة كيف ديما نسخة مصغرة بين سعيدة وهاشم وعينيه لونهم خزييي مغلوق فحال عينين سعيدة تقريبا...ضرباتو لكتفو...

سعيدة : روايح يكسرو دنيا...

حسام"دوز على لحيتو الي خلاها تنوض" : واش اسويعيدة...تانتي روايح يهرسو ويذوبو گليب هاشم..غا لگيتيه مشى يعرعر على واحد دوار اما عليا بلييييمين لا خرجتي من دارك...

سعيدة : نعل جدك وجدو...

حسام"خارج سلم براسو على العساس وزاد" : ياك اسعيدة وليتي تعايري لينا فجدود...

سعيدة : ماعندكش واحد الخبار ؟!..ماشي راني سقت شي خبار..

حسام : رويني يا هيام...

سعيدة"مدات ايدها" : بوس ايدي..

حسام"شدها وباسها كف وضهر" : وزيدي تا راس..اتيني...

سعيدة : تديني ل مخبزة نشري ماندخل عند ناس..

حسام : شكون ناس ؟!..

سعيدة : دار حبيبة غانمشي عند يوسف نشوفو ياك وراه غاتديني عندها...

حسام : وايلي !! وانا الي ناوي نديك تغذاي فواحد البلاصة نيييت فجامع الفنا عند واحد خونا كايدير الشوا ف الحفرة النگعة..ونفقص هاشم نخليه يتمرمغ ليهم حدا الفدادن ولا وسط شي غيس...

سعيدة. : اجلها صباح نمشيو...بوك مانصيبشاااي نمشي بلا بيه...

حسام : يا على مدلولة..."ضار عندها ورجع شاف قدامو غاديين فالبيست" وا گولي ليا ونگوليك...

سعيدة : عندك شي خبيرة ؟؛

حسام : تي را تعجبك...

سعيدة : شكون هي...اشمن خبيرة تعجبني...

حاسم : ناوي ندير ساطة تانا (شافها خنزرت)...بغيت نولي استاذ...

سعيدة : قلاال ليك العراااض ؟!...مابقيتي تحشم كاع هوك فراناتك حفاو...

حسام : غا بسطنا معاك ابنت الكريمي..هو ماشي بغيت ندير ساطة وليني عجباتني واحد خيتي اتعجبك تجيك عالگانة وتعرفييييها وناوي ترشميها ليا تنولي قايد وجيبيها ليا...

سعيدة : بلااااااا ماتحلم بلااا ماتحلم راني حطيت عينيك عليك ونااامسينا ملي جات بنت ختي هي وبنتها فاطمة زهراء...

حسام"حدر عينيه ورجع شاف قدامو زعما حشمان" : اههههه...

سعيدة : راها گدك گدها ومراضع معاها غا نسا را كلتها ليك نتا الي عقلك خضر فيه تبن...

حسام"جاتو البكية..واخا عجباتو ولكن ماشي ربا عليها كبدة.ولا قلبو ضرب..سعيدة عارفاه فينما يشوف شي وحدة زينة يحط عليها العين...مابقى هضرش بغى يلوح راسو من شرجم ويخليها تكمل سوگان ولا تزيد بيها طوموبيل راسها...مشاو شوية شادين طريق مراكش تا نطقات ليه اخر خبر وقع...

سعيدة : ماشي را جدك ناوي يخطب هاد ليام ؟!

حسام : با عامر (ترقيق الميم).."على باها هي"...

سعيدة : هاويلي على با ماعندو مرأة ؟!..تا شور يا را جدك عبد القادر...

حسام"فرانا شوي تا شهقت ضار عندها كيشوف فيها جاب الله طريق خاوية...ورجع شاف قدامو ورجع شاف فيها وعاود شاف قدامو ولا غادي بعشرين" : تي كي غايدير لهاد جواج وهو غايعطس يبول عساك لا شداتو ساكسة .

"ماحس غير بواحد صلية جاتو لگرفادة تا سلم على الفولون ورجع حط راسو عالكوسان مركز مع طريق مابقاش ضار جيهة مو"...

يتبع...