محتوى القصة
حاولات ما امكن انها تبان طبييعية وانه ما كاين والو لكن معامن واخا ضار للجهة فين قشعها شافت...
بانو ليه جالسين نفس الناس الي هي شافت ونفس الشخص معامن هضرات السيدة...لكن كان ضاير عند المراة كايهضر معاها وبدا كايضحك...ورجع ضار عندها بشار..وهي تنطق قبل مايقول شي حاجة...
حبيبة"مبتاسمة واخا ريقها نشف بالخلعة خافتو يعيق واخا هي براسها ماعرفتش كيفاش حتى ثبتات راسها...يمكن لانه عارفة الى فات حتى شافو كايشوف فيها عارفة اش ممكن يدير بشار وعلاش قادر"...
حبيبة : هذاك الطابلو الي تم...فشيي شكل (خسرت سيفتها)..تايخلع...
بشار"بقا كيشوف فيها مدة حتى قالت را ماثاقش بيا ومشيييت فيها وهو يدور غير شوية براو وشاف ناحية طابلة الي كان جنب من جيهة فين جالس "جاد"...كانت صورة امرأة منتازعة قلبها الي كاينزف فايدها وهازة راسها وكاتبكي بحرقة...كمش حجبانو ورجع حط تيليفون مادوا ماتكلم...ماعرفتش واش ثاق بيها ولا اشنو..واخا مهدن ماثايقاش حيث هو كايعطي رد الفعل وهو مهدن يعني مارتاحتش..وجهها تزنگ بزاف وتلفت عينيها بقات منزلاهم حسات براسها مامرتاحاش كانها جالسة على شوك وسط جمر...راه واخا مابيناتهم والو لكن فكرة انها كانت عارفاه قبل منو وهو غير واحد براني وشير عليه بفاز فما بالك هذا الي جمعتهم واخا ماشي شي حاجة وفايت معاوظة ليه عليه ماعرفتش اش ممكن يدير وهي مجربة غيرتو القوية كيفاش دايرة...صرطت ريقها بغات تسخف...حاولت تغلب على الحشمة وان الوقت ماصالحش لاي حاجة من غير انها تخدم عقلها وتحاول ماتعيقش....وهي تنوض وقفت تا هز عينيه...
بشار : اش كاين ؟!...
ماحاوباتوش جرات الكرسي وهي دور ناحية البلاصة الي جنبو جرات الكرسي تما وجلسات حداه ماجا فين يسول حتى خشات ايدها فدراعو تابطاتو وحطات راسها على دراعو خلاتو كيشوف مافهم والو....
حبيبة : بيت هي نجلس حداك...
بشار : بيك شي حاجة نتي ؟!..
حبيبة"هزت راسها باقي مزنگة وقلبها باغي يخرج " : لا..ع علاش خاص حتى تكون ؟!.. اهيي عجبني المنظر من هنا حداك...(حيث قدام البلاصة فين جالس بشار كانت واحد نافورة صغيرة فيها شلال بالالوان الضوئية)...داك طابلو الي تم خلعني...ماقديتش نبقى نشوف فيه...
بشار"رجع كايشوف فداك الموني بلا مايرد عليها..حتى دازو دقائق نييت وهو يدور راسو بالعرض البطيئ ناحية اللوحة الفنية...حتى مشاو عينيه ل دوك الناس الي جالسين..والي كان معاهم جاد...مارتاحش حيث شي حاجة فلداخل ديالو معتاقدة انه تقلقات فراحتها...وشي حاجة كاتقوليه انه ربما داك الي جالس ممكن يشوف فيها كيف دار لاخور فالحفلة السابقة...بان ليه هذاك الي هو ماعارفوش طبعا لكن هي عارفاتو بلي جاد حيث عقلت عليه من الكلية فاش تلاقا بيها...بان ليه ضاير كايهضر مع عائلتو وفنفس الوقت تيليفونو فايدو مرة مرة كايشوف فيه ويبقشش...ويهز عينيه يشوف قدامو ويرجع يهضر مع ديك السيدة...يعني باين انه ماكيشوفش ناحيتهم كاع تا لا شاف كيشوف بطريقة عادية كاي واحد جالس وكيشوف...ورجع ضار عند حبيبة الي كانت متكية راسها على دراعو وكتحسب فعداد عمرها بالخلعة لا ينوض يخلطو تما ويعرفو را هو "جاد" الي فايت عاودات ليه عليه...وطيح روح لانها عارفاه يديرها ويفوتها بكل د.م بااارد....حتى حسات بشنايفو فوق جبهتها ببوسة فرحتها حيث حسات بيه عادي وفلتات منها...
بشار : شفتي اش بغيتي تاكلي ؟!...
حبيبة"تگعدت شوي وجرت الموني الي كان قدامها..مدات صبعها على واحد الپلا وقالت" : هذا...و "حطات صبعها على ديسير" وهذا...
حرك راسو وحط الموني وهو يهز ايدو ودورها عليها قربها ليه معنقها اكثر عندو فوضعية ملفتة ماتسوق لحد وينعل بو حياة مو العالم على قولته...هي لقاتها من الجنة وناس تعطي بضهرها لهذاك وماتشوفش فيه كاع ويدوز العشا بسلام لانه الروح كانت غاتخرج ليها بالخلعة...
شوية حتى حسات بيه نزل راسو وباسها تحت وذنيها حتى تبورشت وسعت عينيها مزنگة وهزت فيه راسها...
حبيبة : بشاار اش كدير...
بشار"جمع حجبانو" : مالنا ؟؟...
حبيبة"كدور عينيها هنا وهنا" : حنا ف ريسطو...
بشار : لهلا يرد حياة مهم...
حبيبة"حطت جبتها على صدرو حشمانة" : عافاك ماشي هنا..
حط التيليفون وهز عينيه خطف فيهم الشوفة مرة اخرى وشاف وضعيتهم...لو كملو تعارفهم كان ممكن يكون هو دابا بلاصة بشار لكن النصيب اختار ليها شخص اخور...
تودة"مو" : كاتعرفهم ؟!..
جاد"هز عينيه فيهم باقين بنفس وضعيتهم" : perhaps (ربما)..
تودة : مافهمتك اولدي هههه..
جاد"حك شعرو من لور وزفر بضيق" : ماشيو (نمشيو عوجها) انا عييا فيا (فيا العيا)..
حركات راسها وهو ينوض هز تيليفونو وكونطاكت سيارة..شاف جيهة لاخرين وحرك ليهم راسو بمعنى نوضو حيث اصلا كانو تعشاو لانهم كانو ف عشاء بيناتهم عائلي...اما بشار وحبيبة عطاو الطلبية ديالهم فانتظار توجد ليهم بقا معنقها فيه تقولي ماسخيش بيها حيث قرب يسافر وهاد المرة غير كل المرات عارفها غاتسناه وعارف راسو غايتوحشها بزاااف ويتوحش صباحاتو معاها...
شوية حتى خشا راسو تحت وذنبها تاني وهو يعضها وجر ليها لحمة تا تاوهت وغوتت وهي تجمع الغوتة فالبلاصة هزات فيه عينيها لقاتو ضار كايشرب فالما وعلى عينيه نظرة صارمة..ماجات فين تستوعب العضيضة حتى داز جاد وعائلته معاه...فرحتها انه خرج ومشا نساتها العضة الي تعضات على غفلة...
كانها كانت وسط ارض عاامرة بالالغا.م...فاي لحظة تزطم وتنفا.جر بيهم...ماعرفتش كيفاش واش طرا تا دازت الامور بخييير...جاب الله مكيعرفوش وجاب الله ماجاش عندها جاد براسو...
جا السيفور ومعاه المكلف ك برطوكول باش ماشي هاد ريسطو..رحب بيهم بالاسم العائلي "الهاشيمي"...حط ليهم المقبلات هما لولين عاد حط معاهم الپلا الرئيسي حتى يكملو عاد تجي التحلية...قدرات ترد النفس وتعشا فجو عااادي معاه واخا كادير بالها وولات كاديرو من حركاتو المفاجئة..مكتعرفوش امتى ينقز عليها يبوسها ولا يخشي راسو يبوس...ولا يعض وسط ناس ممكن ماعندوش سوق وقت ما جاتو الحالة يعطي ومايفرط...
بداو كايتعشاو فوسط واحد الجو خالقو داك ريسطو هاااادئ بشكل مريييييح...حسات براسها حتى هي رتاحت وبدات تحيد منها ديك الخلعة الي شداتها فاش شافت جاد..ومازال مامثيقاش انه ماجاش ولا وقع شي مشكيل لان ليصانص راها كان تما والبركان كان حداها...
كان كاياكل فالپلا ديالو وهو يشوف بنص عين جيهتها بانت ليه كاتبعد فخيزو وتقلب فيه عرف بلي ماعندهاش مع خيزو...حط الفورشيط هز كاس الما شرب منو...عاد ضار عندها...
بشار : ماعجبكش ؟!...
حبيبة"حركت راسها" : عجبني ولكن ماتيعجبنيش خيزو...ماحسابش ليا بايكون فيه...
بشار : شوفي شي plat يعجبك...
حبيبة : هذا عجبني هي مابيتش فيه خيزو...
هز ايدو تم جاي سيرفور...كان كيشوف قدامو تا وقف عليه..ونزل عينيه ناحية الپلا شير ليه بطريقة ثقيلة وخاترة وقال...
بشار : Même plat sans carottes.. possible ?..
النادل"حرك راسو" : avec plaisir Monsieur...
هز داك الطبق من قدامها ومشا يوصي ليها على نفسو بلا جزر...هي بقات كاتشوف او بالاحرى كل مرة كاتفرح وترتاح من كمية هاد الاهتمام الي كايدير ليها والخاطر الي شاد معاها المهم تكون مرتاحة ليه...كل مرة كتزيد طيح فيه وفهاد الحنان الي كون بينو ليها فاول لقاء ليهم كام ممكن يكونو زوجين عاااديين...كل مرة كاتزيد فدرجة قرارها وفدرجة انها تشجع وتبدل من راسها كيف ما هو كايتبدل على قبلها وكيف ماهو كايضحي ويتقات.ل على قبلها حتى هي خاصها تزيد بعلاقتهم لقدام...
تبسمات بحب وهي تحدر راسها وبدات تاكل من المقبلات لي تما بينما يجي الطبق ديالها...الي ماتعطلش بزاف وجابوه ليها وتعشات هي وياه فجو مرييييح وهادي جامع قلبين فالعشق مقات.لين...تحط ديسير ليها اما هو طلب غير فنجان قهوة بلا سكر...جبد باكية سجائر وهز منها كارو شعلو بعد شوية حتى ساط دخان وهز كاسو شرب منو رشفة...اما هي كانت منغامسة ف التحلية ديالها حتى سمعات صوته مدعدع بالكارو داخل نيشان فالموضوع...
بشار : غذا محرك لبلاد...
حبيبة : علاش ؟ (سمعات البلاد وخافت حساب ليها باغي يمشي عند مو ونسات ان عبد القادر غايجيب العروسة)...
بشار : العقد ديال لحاج.."كمش حجبانو" تخربيق ودوك البلانات ديال داكشي تم..."حك لحيتو بصبعو ونتر من الكارو عاد كمل هضرتو"...واحد ساعة نبان ليه ونرجع...
حبيبة : اااه..بايجيب العروسة...
بشار"ساس الكارو وحرك راسو"...
حبيبة : معاش دايرين...
بشار : الليل...
حركات راسها بتفهم ورجعات كتاكل تا تفكر "زكية"..وهي تهبط القردة وطلعت الاسدة...ماحست تا قالت ليه...
حبيبة : غاتمشي وحدك ؟!..
بشار"كيكمي ويتكلم بصوت ثقيل تابت" : علاش ؟!...
حبيبة"غوبشت تا هز حاجبو" : لا ماتمشيش وحدك...
بشار : معامن ؟...
حبيبة"هزت كتافها ووسعت عينيها فيه" : معايا...
بشار"بقا كيشوووف فيها مطول حتى حط الكارو فطفاية" : شي باس ماكاين...
حبيبة : ماتمشيش وحدك..بنمشي معاك..ياك هي ساعة وماجاتش تمشي وحدك وانا كاينة...
خلاها تهضر وتقول الي بغات...ما رفض ما قبل واخا عرفها اش بيها وعلاش مابغاتش تخليه يمشي وحدو...فالاخير رجع كايكمل فسيجارتو بهدووووء حتى الجو الي فيه كان مساعدو بزاف...وجالس بخااطرو مامنغص عليه حد ما معصب من حد حداه مراتو معشوقتو الي مخليا قلبه كاينبض بالحياة...بحبها ليه بطيبة قلبها وانسانيتها وحتى بغيرتها وعصبيتها...
كملو ماكلتهم ووصل الوقت وناضو من تما كيف دخلو معانقين خرجو كذلك...ركبو فسيارة وتوجهو ديريكت لدارهم...
"الرحامنة"...
فرشات ايزار مطروز بطرز الحساب فوق الناموسية...وهزات المزود طوييل تلهو تابع ليزار حطاتو وهزات المخيدات حتهم وقادت الناموسية بلدية على حقها وطريقها...تحل الباب وهي تدخل اشراق هازة فوطات فايديها...
اشراق : عطاتهم ليك مي...
سعيدة : اري الله يرضي عليك...سيري نعسي تعطل الوقت...
حركات اشراق راسها وهي تخرج من البيت الي وجدوه للعروسة جديدة...شافت هنا وهنا وهي دير فررر وطلعات لبيت لفوق...يلاه كيف دخلات سدات عليها...رسلات ميساج لهذاك الي كاتهضر معاه دردشو شوية...حتى طلعات ليها نمرتو "BACHAR"...حسات بقلبها هبط لتحت ووجهها ولا صفر...شافت الساعة بانت ليها 12 ديال الليل وقت معطل واصلا هما فالدار كانو مدهيين مع توجاد خذاهم الوقت...لكن ماضناتش انه غايتاصل بيها فهاد الوقت...حتى بدات ترجع سينتة وتفكر انه هذا بشار ماعندوش وقت محدد ليها فينما وصل وقته هو يهضر معاها فيه يهضر...
اشراق : الو خ خخويا بشار..(تسنات شوية حتى رد عليها خلاها تصرط ريقها)..
بشار : مزيانة !!..
اشراق : اه الحمد لله..
بشار : غذا نجي تما نشوفك...هانيا ؟!..
اشراق : واخا...
بشار : اشنو كاديري دابا ؟!..
اشراق : كنت كانعاون فخالتي سعيدة..ودابا طلعت نعس...
بشار : شفتي مك ؟...
اشراق : لا..مشات عندها ختي كريمة...
بشار : مزياان...
وهو يسكت...حتى قالت را غايقطع وهي تسمعو نطق بصوت خلاها تهز من بلاصتها...
بشار : تگلعي شوفيها...شوفي شنو باغية...
اشراق : تكون نعست والله...
بشار : نعسي حداها تم...يلاه...
فالبلاصة ناضت وقفات وقالت ليه واخا قطع معاها الخط وهي تخرج ديريكت لبيت مها تا دخلت عليها لقاتها ناعسة وهي تفرش حداها فالارض وتكات حداها...
حبيبة"حطات صاكها فوق الكوافوز كاتسمع فيه كايهضر مع ختو...كاتسمع كيفاش كايوصيها تقابل مها وتفكر كيفاش كاتعامل معاه مو كايزيد يضرها قلبها عليه...ماكاين حتى فهاد الحالة من غيرها يكون بجنبه ويواسيه....كانت كاتحط فاكسسوراتها وهي تهز عينيها حتى بان ليها حيد تريكو بقا عريان من فوق صرطات ريقها وهي دور كاتهز وتقلب هنا وهنا مشتتة شوفتها...شوية وهو يبان ليها غادي خارج وهي توقفو...
حبيبة : انا مشيت لدوش لاخور "هزات ايدها كاتوريه وجهها" بينغسل وجهي وحالتي"...
حرك راسو ومشا حطات داكشي تما نيت يبقى تاتكمل شي لاخور...خرجات من البيت ودخلات لدوش لاخور الي فالبيت الي كانت فيه...حيدات دوك الحوايج ودخلات ببيرميدا وضوني...ودخلات ديماكيات وجهها وغسلاتو بجيل ديالو...دارت باقي روتين ديالها من زيت مرطب وكريم وداكشي...هزات عينيها كاتفكر ما وقع فالريسطو...كاتفكر كيفاش حفظ الله ما وقعات شي كارثة وعرف انه جاد هذاك ولا كون شافو شاف فيها اشنو كان ممكن يدير....عارفة وجربات غيرته الحارة عليها...
حبيبة : اوفففف...نرييي كون وقعات شي مصيبة...فففف...
رجعات كملات روتينها...وخرجات من دوش بغات تجبد ماتلبس وهي تفكر غذا تاني غايمشيو لديك البلاد وتدخل معاه لديك دار ثاني...بقات تفكر حتى داها التفكير وحط عند زكية...حسات بالعافية شعلات من جديد...بما ان العروس اخت زكية ف شي طبييعي غاتكون حاضرة غذا...حطات ايديها على حناكها حسات بالغضب نوعا ما شدها حيث كاتفكر هضرتها معاها وكيفاش هضرات بكل ثقة انها كانت مخطوبة لبشار...كاتحس بهاد الكلمة كاتدخل ليها بحال الموس ماضي...ساست راسها من هاد الافكار الي كايجيوها...وهي تمشي لماريو بغات تجبد بيجامة ماتلبس لقات باقي غير دوك بيجامات القصار الي كاتلبس دوك دوبييس ديباردو وشورطات ديال ساتان الي كاتلبس فنعاس...
حبيبة : وييلي هادو الي بقاو....
يلاه سدت وبغات تلبس اي حاجة باش تمشي لبيت تبدل تما وهي توقف...دارت ليها طن فراسها...حتى لامتا غاتبقا تلبس مستور قدامو...قدام راجلها !!!...امتى غادير خطوة وتزيد بهاد العلاقة لقدام...امتى غاتبقى خايفة...علاش ماتشجعش خطو تابعة لاخرى باش يزيدو لقدام...هذا راجلها كايدير المستحيل على قبلها...شاد بخاطرها صابر معاها ولكن حتى لامتى ؟!...
اما هو دوش وخرج ديريكت لبيت لاوي عليه فوطة بيضة وشعرو ماشطو لور واخا باقي فازگ ولحيتو تقطر عينيه حمرين بسخونية الدوش...هز فوطة اخرى مسح بيها لحيتو وعنقو وصدرو تاهو الي زغبو باقي لاصق فيه الما...وايديه تاهما...يلاه بغا يهز مايلبس حتى وقف وضار حس بيها تعطلت...خرج راسو من باب البيت وعيط تعيييطة وحدة...
بشار : حبيبة !!...
سمع صوتها كاتقوليه "هاني جايا"...ورجع هز تيليفونو جاوب على شي ايمايلات وشاف ايمايل الحجز ديال طيارة الي عندو بعد غذا مع صباح...گرن حجبانو كايفكر ف حبيبة الي ماعرفش واش يخليها تبقى هنا فدارها ولا يديها لدارهم...حيث غايطول هاد المرة ماشي كيف المرات سابقة...وكيفكر اكثر انه يطلع ليها فيزا سياحية تمشي معاه لكن عندها القرايا شاداها...حس براسو بدا كايتنيرفا حيث غايبقى عقلو معاها...سد داك تيليفون وهو يلوحو بنترة...هز باكية الكارو ومشا جيهة البالكون ووقف هكاك عريان بالفوطة...يلاه مدوش...شعل الكارو وبدا يكمي..دور راسو لداخل ورجع شاف قدامو كايكمي...حتى توقف وهو يدور بالعرض البطيء..هز حاجبو كايتاكد واش هي نيت الي دخلات لابسة داك لباس نفسو الي شافها لابساه وهي ناعسة مريضة واحد المرة...نفسو الي تمنى يشوفها لابساه وهي حداه بدون ماتحشم ولا تخاف...تمنى يشوف جسدها الي كايفتنو هو وسط هاد شريويطات ديال ساتان الي مطراسيين ليها طايتها وموضحين بياض لحمها...نسا الكارو فايدو ونزل عينيه حتى لاخمص قدميها ورجع طلعهم حتى لراسها الي كانت منزلاه وحناكها بغاو يطرطقو....لاح ديلمو داك الكارو نعل ليه الواليدين وجدود...وتقدم ناحيتها باقي بفوطتو على خصرو ملوية...تا بانت ليه ضايرة بغات تفرفر لبلاصتها تا سمعاتو قال بصوت ثقيييل وخشيييين....
"وگفي"...
كلمة خلاتها تفراني تا حسات بيه قرب وهو يدورها عندو..ريحتة شامبو وباندوش عاطية منو وريحة كريمها وبارفانها عاطية..صرطات ريقها تا حسات بيه هز ليها وجهها من ذقنها وحط صبعو على حنكها الي بغا يطرطق لقاه سخون ونزل تاني لشفايفها كانت كتغزز فيهم هبط ليها شفة بصبعو باش تحبس ولا ماهي فخير... ونزل عينيه لصدرها لابسة داكشي بلا سوتيان..واخا صغيور ماعقبش وماحكرش..سمع صوتها الي باقي بح وكحبتها وهي كاتهضر كاتعاتب فيه الي خارج لبالكون والبرد محرك...وفنفس الوقت باغية تشتت التوثر والخجل الي ركبها بجهد....
حبيبة : خارج بيتي يضربك البرد ؟!..
ماتسوقش..تا بان ليها تحنى كامل عندها وشد ليها وجهها مقربها ليه حساب ليها غايبوسها زيرااات على صباع ايديها تا تقطع منهم د.م...ولات كتنفس بجهد من قربو وهو عريان قدامها والفوطة هي الي ساترة ماستر مولانا...
بشار : يااا حبيبة..
حبيبة"خرجات ليها وسط تنهيدة بالدعقة والحشمة واخا محاولة تشجع بهاد الخطوة" : مممم ؟!..م نعاام...
"سكت شوية كيشوف فيها ويدوز على وجهها بصبعو...حساب لبها غايتغزل ولا شي لعبة...لكن كان العكس والغير المتوقع ابدا...
بشار"بنظرة حاادة " : شكون شفتي ليا گبيلة ف ديك الريسطو تم ؟!...
هزات فيه عينيها بلهلا يطريه ليها...صدمها بسؤالو ماتوقعاتش غايسولها حتى قالت را الامور دازت بيخير وتسلكت وسلكاتها هي وصدمها دابا والاجابة على السؤال طبعا عليها هي بكلشي...
حبيبة : ممم ؟!...
بشار"ضغط بصبعو على حنكها بلطف" : كنسمع....
زعما جاوبي نيشان بلا دخول وخروج فالهضرة...حيث اعدا حاجة عندو هو الواحد يبدا يتمتم ماعارف مايقول...
بشار : بلا تلاوي عليا...
بدات تلولب فعينيها هنا وهنا...اش غاتقوليه را هذاك الي شفت فريسطو جاد ؟!..الاسم الاول الي سول عليه شكون هو...الى قالت ليه ماعارفاش شنو ممكن تكون رد فعلو..طبعا ممكن جدا تكون غير متوقعة...وقفات بيها دنيا...الى مجاوبتش بضراحة ممكن يتحطو فنفس الموقف ممكن تجمعهم صدفة من جديد وتعاود دير نفس رد الفعل...غمضت عينيها وصرطات ريقها محاولة تمسك بالقرار وهو انها تقوليه اشنو كاين...
حبيبة : دوك ناس الي كانو جالسين فديك طابلة وراك ؟..
بشار : كملي...
حبيبة : ك كان "تنهدت بخوف ورجعت كملت كلامها" كان معاهم واحد...
بشار : كاتعرفيه ؟!..
حبيبة"سكتت ونزلت عينيها وحركت راسها ب اه"...
بشار"عض على سنانو من لداخل..بقا كيشوف فيها كون هزات عينيها غاتشوف تخنزيرة الي بانت عليه...حتى سمعاتو ثاني" : زيدي كنسمع..ماتوگفيش الهضرة...
هزات ايدها كاترعد شي شوية وهادي قشعها ومادار تاحاجة حيث باغي يسمع نيشان بلا تلاوي...ماعرفتش كيفاش تبدا واقفة قدامو وقات.لاها الرهبة...زفرت النفس الي كانت حابسة وهي تبدا تعاود ليه...
حبيبة : فاش جلسنا فطابل ديالنا..هزيت الموني باش نشوف لي پلا الي بينا نكومونديو...هزيت عيني هي هكاك شفت داك طابلو بصح..وعيني مشات ليه راك عارف شي حد الى فايت شايفو تاتشوفو عادي.."هزات كتافها"..ونزلت عينيا...
بشار : علاش گلتي شفتي tableau de peinture..وداك البلان ديال خلعني..مامنوش ؟!..
حبيبة"شافت فيه وحركات راسها ب لا" : لا لا..بصح خلعني حيث رسمة هي اول ما شفت..."سكتت كاتفكر بصح الطابلو فكرها فالحلمة الي حلمت" تفكرت ديك الليلة فاش حلمت شبه ليا ل اشنو شفت...
"تنهدت ورجعت كاتكمل هضرتها"...انا ماشي خفت حيث تنعرفو...هو فايت شايفاه "سكتت تاني كتصرط ريقها وماعرفتش واش تقول ليه را هو ولا لا..فضلت ماتقولش شكون حيث بالنسبة ليها ماشي مهم تقول شكون هو واخا فايت سولها عليه..وباغيا تفادا صداع فضلات تقول الحقيقة لكن بلا ماتذكر ليه الاسم..تقول اش كاين وتهني راسها من هاد الامتحان صعب الي قدامها..رجعت خدمت عقلها وحاولات ترطب لسانها وتحلي كلامها هاكا وهاكا...
حبيبة"كاتهضر وتكحب" : خفت يشوف فيا..خفت يوقع كيف ديك المرة فالحفلة..تفهم نتا غلاط هاد المرة ويوقع صداع وخفت يقوليا سلام وانا مراة مزوجة..وفاش جيت حداك حيث بصح طابلو خلعني..وجيت جلست حداك باش نكون قريبة ليك "هزت ايدها وحطتها على معصم ايدو ودورتها عليه مزيرة عليه"...كنكون حداك ومتنخاف من والو..."زادت قربت ليه اكثر" وصافي...
بحركة بطيييئة نزل عينيه لايدها الي شادة المعصم دياال ايدو..ورجع هز عينيه فيها...تفيكسا ماهضر ماتحرك كايشوف فيها كاتصرط فريقها باين ليه من تم..وكتولولب فعينيها..ماعرفت تحشم من اش جايا لابسة ليه ولا تخاف من ردة فعلو ولا اش دير..كون صابت دابا يهزها شي حد يشير بيها لهيه تا يبرد غدايدو على خاطرو وترجع هههه...
يلاه غايهضر تا بانت ليه تعلات وقربات حطات راسها على صدرو..عضات فمها وغمضت عينيها ومدات ايديها بتردد حتى شدات ليه فدراعو معنقاه...كاتحس بزغب صدرو وكرشو كايتكها فحنكها...واخا حشمانة حاولات تزعم..خدمت عقلها باش طفي لينا العافية تا بركان سيدنا بشار...الخوف ومايدير....
حبيبة : بيت نتعشاو مرتاحين وضاحكين..
بشار"الصمت"...
حبيبة"شافتو ماجاوبش" : سير لبس عليك اه بايضربك البرد...
بقاو هكاك يمكن هو رجع عجبو الحال وعجباتو الحركة وزعامتها ويمكن باغي وقت فاش يفكر كيف عادتو...شوي هز ايدو وحطها على كتفها...وهو يدوز عليه ورجع طبطب عليه تا سمعاتو قال "سيري بلاصتك هاني جاي"...ماعرفت واش تفرح ولا تبقى خايفة...ماكيعطيك خيط من مخيط ولا راس الخيط...ولات خايفة يبقى شادها تا يدوز وقت تاني ويرجع يسولها ولا يدير رد فعل تاني غير متوقع...يلاه غادور تسولو وهو يبان ليها حل الفوطة باش يلبس البوكسر خرجات عينيها على جهدهم وهي طير لبلاصتها قلبها كايضرب...والله ماتسوق ولا عقل عليها بدا يلبس حداها....
اما هو ماداهاش فيها عرف وسمع داكشي الي بغا يسمع ويتاكد من شكوكو من الي جاوباتو صافي الباقي مابقاش حكر فيه ومابغاش يحكر الي بغاه را عرفو ونيت بغا يريحها حيث عرفها خافت وتزيرت...لبس شورط قصير وتيشرت ومشا تا سد البالكون حيث داخل البرد عاد دخل ومشا لبلاصتو...تخشا فالفراش حسات بيه وهي دور عندو دايرة ايديها على حناكها مرتاحة حيث ماعقبش تقولي خرجات من امتحان صعب...وفنفس الوقت كاتحاول تكون عادية وان هاد اللباس الي لابسة والي ولفات تلبسو وتشوفها بيه غير ماماها عمتها ولا داداها رقية فقط..وان هاد الراجل الي حداها حلال يشوفها بيه كيف فهماتها ناديا من صغرها انها ماتعرا لراجل من غير راجلها...ف خضم افكراها وتوثرها سمعات صوتو وهو كايقول...
بشار : اجي هنا نتي...
شافت فيه لقاتو مسرح ايدو باش تقرب عندو...كحازت شوية حتى قربت وجرها عندو تكاها على كتفو ودور ايدو على دراعها العاري كايحك عليه بايدو جاب ليها تبوريشة...شوية حتى بان ليها ضار جيهة طابل دونوي هز من فوق منها قرعة سيرو الي كاتشرب على قبل الكحبة...كان ديجا جابو وحطو تما باش يعطيه ليها تشربو قبل ماتنعس...
بشار"حل القرعة وعطاها ليها" : شدي...
شربات منو وعطاتو ليه رجعو بلاصتو وضار عندها..طلع عليها المانطا مغطيها ومغطي حتى هو معاها...رجع كايحك على دراعها العاري..مستحلي داك الملمس رطب اما هي تبوريشة وهر خدامين عندها...غمض عينيه وبقا ساااكت وعقلو يدي ويجيب...ساد الصمت فداك البيت الي جامعهم ففراش واحد...حتى كسرات السكون بسؤالها...
حبيبة : امتى بيتي تمشي ؟!..
بشار"حل عينيه" : بعد غذا...
حبيبة : معاش ؟!..
بشار : صباح...بكري شوية...
رجعت سكتت ماساخياش بيه يمشي...لكن فنفس الوقت عارفة انه عندو خدمتو وعندو التزامات خاص يقضيهم تما وعندو فحوصات لكن الي ماعارفاش انه عندو حتى طبيب نفسي...الي هو غادي عندو باش يعرف كيفاش يقدر يفاتحها بموضوع انه كان ففترة مريض وكايتعالج...
"التاسعة صباحا"...
بدات كاتحرك من بلاصتها وتحل فعينيها حتى فاقت تماما..ضارت هنا وهنا بلاصتو خاوية وهي وسط مانطتها دافية..بدات كتفوه وتشبح وهي تنوض من فراشها وخرجات من البيت..مشات ورجليها حفيانين حتى لكوزينة مالقاتوش عوجات فمها حيث عرفاتو خارج يتقدا شي حاجة ولا يدير لامارش الي ولا كايديرها نهار اه ونهار لا...دخلات لدوش توضات وحكات سنانها وخرجات ديريكت لبيت لبسات عباية وشال وفرشات سجادة صلات ضلاتها وناضت..اليوم ماعندهاش الكلية...مشات لماريو وجبدات بيجامة قصيرة ولكن دافية حيث جاها البرد بداكشي الي لابسة...سمعات صوت الباب تحل عرفاتو جا..يلا بغات تبدا تلبس تا وقفها بصوته حتى قفزت...
بشار : شنو كاديري تم ؟!..
حبيبة : بيت نبدل نلبس هادو"شيرات ليه بصبعها ناحية البيجامة"..
بشار "طلع عينو ونزلها معاها موريها زعما تبقى بهادوك"...خليك بداكشي...
حبيبة"قوست حجبانها" : جاني البرد...
بشار"تفهمها وهو يحرك راسو"
تسناتو حتى خرج وهي تهز بيجامتها ولبساتها بزربة لا يخرج من دوش هههه...دخلات لكوزينة كاتوجد لفطور حتى بان ليها خارج لاوي عليه فوطة حيث كان دار لامارش وجا عرقان...
وصلات العشية او بالاحرى قرب اذان المغرب...هز ايدو شاف ساعة..ضار جيهة شرجم بان ليه حسام خارج هاز فايدو زوج كراطن كبار ديال تمر...وشي تخربيق مصيفطينو يجيبو من عند شي حد وصاه جدو باش يجيبو ليه من شي سوق...دخل لطوموبيل كاينگر ومعاهم تا زكريا جاي ب واحد الجلابية زيتية تحلفي عليه راجل بشلاغمو وهو يلاه زوج زغيبات نايضين ليه مفرقين بغا يبدا ينبت....
حسام : زيد زيد مصاصطي عياو...
هاشم : المقدية هي هاديك ؟!..
حسام : هي هاديك...
ديمارا سيارة ومشا مع طريق...راجعين لفيرما الي بداو الناس يجيو ماكانوش بزاااف غير الرجال الي غايجيو مع طلبة ومعروضين من نسابهم وصافي...مد ايدو طلق سجالة وتطلقات اغنية شعبية غادي ويدندن معاها تا نطق زكرياء...
زكرياء : خو بويا...
هاشم : ممم...يخوي ليك ركابي نتا وياه...اش تم...
زكريا : دابا العروسة الي هي مرت جدي ياك...
حسام : فين باغي توصل اداك گلفة الشحمة...(گلفة هي قطعة كبيرة)..
زكريا : حق ربي لا ناضو ليا تواشي فعقلي بايت نخمم وصابح نخمم وهذا الله...
هاشم"شاف فيه من المرايا" : گول اش كاين...
زكريا : واش تبات حدا با زعماكينيات...
حسام"ضرب ايديه فبعضياتهم" : مصيبة كحلة...
هاشم"ضار عند حسام" : ناوي يقلل العراض ؟! (زعما ناوي يقول شي قلة ادب ههه)...
حسام : تبعو تشوف فين لاحگ...
هاشم : سير عالله...
زكريا : وانسكت (رجع جلس ودار ايديه تحت ذقنو زعما كايخمم..هاد الحركة دخلت تناوي لهاشم خاصو يعرف فين باغي يوصل..)..
هاشم : وتا غا گول عليك لامان...
زكريا : لا والو...عارف ناكل عزايا من عند القايد...
هاشم : ساليت الخدمة دابا معاك هاشم عمك..
حسام : ابربي تاتاكل عزاك هاني حدرتك..
هاشم"مد ايدو صلاها مع حسام تا غوت زوا" : ماشتيش لا جمعت ليك ديالك وديالو...طلقنا نتا دوي راك واكلو واكلو ولا ماگلتيش واكلو مدوبل..
زكريا"ضار شاف فيه من المري وهاشم حرك ليه عينيه بمعنى قول اش كاين" : واش بوك گاد شي؟!..
هاشم"كمش سيفتو" : يا ها ؟!..
حسام"حبس ضحكة..وضار لقا هاشم كيشوف فيه بمعنى اش قال هذا"...ماشي سوقي...
هاشم : تا شتاتگول...
زكريا : بوك گاد على جواج الي نايض يتجوج لينا وباغي جواج وبيت نعاس...
هاشم : ومالو ياك برزقو ومرتو باغية ماعندها مشكيل اش ليك نتا شتك وگفتي ليه حسكة...
زكريا : وسلام عليكم...
حرك هاشم راسو بلاحول ولا قوة...وزاد كسيرا مع طريق...وزكريا بقا يبرگم ماردش البال لهاشم را مرة مرة كايحضيه...
زكريا"لاقا صباعو زوج تا شكلو دائرة وبدا يخشي وسطها صبعو لاخور وقال متمتم بين شفايفو" : الغاشي عند البراني...گالو لا سلام على طعام..تعانگو وخرجو الويدان وزغرتو جلافط وگالو هاكاا البارود...
مع قالها مع هز عينيه بان ليه هاشم وهو يفرنس ليه...تا بدا يغني مع الاغنية...محاول يغمق عليه...
زكريا : اضرب وصبر هاي هاي..كب وكبكب هاي هاي..اضرب وگلب هاي هاي..باغي نزها هاي هاي...سيد الجلسة هاي هاي..تحت زيتون...سيد الگعدة هاي هاي تحت الليمون...تحية من هنا لرحامنة وتحية خااااصة لسيدي القايد...
خرجو من مراكش وشدو طريق سيدي بوعثمان..هاد طريق الي كل ما تشدها كاتحس بقلبها مقبوط..ودابا زادتها حتى زكية تاهي الي غاتعاود تشوفها...كادور عبنيها ليه مع ضلام طريق كاتشوف غير ضو شي سيارة جايا كاتسني ليه على وجهو كايبان ليها مغوبش...
وصلو لفيلاج سيدي بوعثمان طلق سينيال وضار مع الدورة الي عمرها ماتنسى ليه واخا يغيب عليها قرن...الدورة وطريق والبيست الي حل عليهم عينيه...الي مشا معاها واخا ضلام مايحتاجش يستاعن بشي حد يوريه ممكن يمشي فيها مغمض العينين..حتى وصلو قدام الفيرما...لقا الباب الكبير محلول ودخل مع طريق تا بانو ليه سيارات واقفين وشي بيكوبات (نوع سيارات)...فرانا وبقا واقف كايشوف بانت ليه دنيا عامرة وهو عند بالو را غير طلبة وناس خفاف...
حبيبة : واش كاين بنادم بزاف ؟...
مد ايدو لتيليفون ودوز الاتصال لهاشم...بقات كاتسمع فيه كايقوليه اش هادشي هنا...تا بان ليها قطع ورما تيليفون بزعفة...شوية بان ليها ثاني جبد واحد الباكية قدامها وشرب منها ربع حبة...كمشت حجبانها تفكرات انه كاتبغي تسولو شنو هاديك وكاتنسى...
حبيبة : اشنو شربتي..
شرب عليها الما وتكا راسو عالكوسان مغمض عينيه ماجاوبهاش ديك الساعة..وتاهي بقات كاتشوف فيه وتسناه يجاوب..لكن لا رد منو..وهي تعوج فمها وضارت كاتشوف فدنيا على برا...بانو ليها شي وحدين هازين طباسل ديسير مصاوبين...وبانو ليها شي وحدين هازين طيسان ديال الما...بقات ساهية واخا مكتسمع والو حيث سادين نوافذ سيارة ومخدمين لاكليم دافية...تا سمعاتو قال بصوت مهدن واخا خشين...
بشار : calmant...
حبيبة"ضارت عندو" : كيفاش كالمون ؟..علاش...
بشار"كايهضر وعينيه مغمضين" : ماعنديييش مع كثرة البشري وصداع الهضرة..راسي كايتبرزط ماكنصيبش نبقى مكالمي.."سكت. شوية ونطق تاني"..مانگدش نكونطرولي راسي لا تعصبت...
حبيبة : كتشربو باش تكالما..
بشار : سي...
كانت هادي اول حاجة صريحة يقولها ليها..كان كايتسنى تستغرب ولا تقول شي حاجة ولا تعاود تسول لكن فضلات انها تسكت وتفهم الامر..ماعرفتش علاش جاها عادي انه يشربو !!!..
مازاال شوية حتى سمعو دقان فزاج وهما يدورو بانت ليهم سعيدة كادق وضاحكة ومعاها هاشم حتى هو...تا مد ايدو ورك عالبوطون ونزل زاج عليهم...
سعيدة : وتوما نزلو يا ويلي شتكم باركين هنا...
بشار"شاف فهاشم" : دنيا لداخل ؟!..
هاشم : البيت الي عند الباب فيه غا انا وحسام و شي رجال جالسين فحالهم...
بشار"شاف ف سعيدة" : فيك مايسالي واحد ساعة ؟!..
سعيدة : ساعتين لا بغيتي وليني علاش...
بشار : حبيبة...
سعيدة : هاااكاك..كون هاني نبرك عماها..كاينة لالة وصافية خالتك هي وشي عيالات وتوريا را الفوگ عيانة ماتصيبش تنزل...
بقا فسيارة شوية وهو يدور عند حبيبة وقاليها "نزلي"..نزلو من سيارة...هي كانت بلباس بلدي متميز ف جلابة مخزانية مليفتها غليضة فالبيج ومخيطة بسفيفة فنفس لونها..بالنسبة لبلدي عندها موجود حيث توب من عند محلات باها...دايرة لشعرها مشيطة مجموعة لور...وصاك مارون فايدها وصباط موكاسان فلون صاك...كانت كاتبان راقية فلباسها وفكياتها وفزينها مميزة...قربات لعند سعيدة سلمات عليها ومدات ايدها سلمات على هاشم بابتسامة...
سعيدة : يلاه زيدي بنتي...
حبيبة"ضارت عند بشار حيث عيط ليها"..
بشار : ديري بالك مع تيليفونك نتي...
حبيبة"حركت راسها وضارت شدات فدراع سعيدة ومشات هو بقا حاضيها جلابة وخا مخزانية فورمتها كاتبان واعرة فيها وقصيورة من فوق...ما قاليه راسو المفضي هزها ورجعو فحالكم نتوما كاع...اما هي مشات مع سعيدة وحادرة عينيها مزيرة على صاكها...حتى دخلات معاها لداخل ماهزتش عينيها كاع فشكون دايز من حداها...مارداتش البال ل كريمة الي كانت جايا هازة بلاطو فيه كيسان الما داخلة بيه لصالون وهي توقف كاتشوف فيها داخلة هي و سعيدة ل بيت الي فيه عيدة وشي عيالات...بجقات فمها فيها وهي تدخل...
سعيدة : زيدي بنتي...
دخلات حادرة راسها ومزنگة بالتوثر...سمعات صوت عيدة كاترحب بيها وتقوليها "زيدي بركي حدايا"..قالت سلام كيف وصاتها سعيدة ومشات حدا عيدة من بعد ما سلمت عليها...كانو فبيت فيه غير هما وشي جوج عيالات معرفة قريبة اما الباقيين را جالسين فصالون مع العروسة...شوية حتى سمعات سلام عليكم وهي تهز عينيها بانت ليها زكية داخلة لابسة تكشيطة ومصايبة شعرها الي نصو مشا فاش تحر.ق ومضركة بيه الحرقة...ودايرة لعينيها كحل ولات كاتبان زوينة بزااف...قالت سلام وهي تبان ليها حبيبة...
زكية : حبيبة لباس عليك..
حبيبة"هزات فيها عينيها وهي تبسم ابتسامة صفرة" : لباس الحمد لله..
زكية : جيت باش نعيط لمي عيدة تبرك عمانا..خالتي توريا تتسول عليها...ههه طلعت نزلتها تبرك عمانا...(بلعاني)..
عيدة : خليني بنيتي غا هنا..
سعيدة : طالع ليها طانسيو بنتي..
زكية"شافت ف حبيبة" : يلاه عمايا بركي فالصالون..شوفي خالتي توريا عدوزتك وسلمي عليها..
حبيبة : هي خليني احبيبة هنا حدا خالتي عيدة...
زكية : نوضي نوضي ازين دابا يشوفوك ناس هنا ممسولاش وماكايناش مع عدوزتك وتدي العيب..را حشومة هاويلي...
حبيبة"خنزرت فيها بواحد تخنزيرة اول مرة تشوفها سعيدة فحبيبة "..
سعيدة : زكية..سيري شوفي ختك مباركة...
مازال كاتهضر وهي تقاطعها حبيبة فوسط الهضرة بهضرة مامتوقعاش...
حبيبة"بلهجة مراكشية قحة" : ونتي سوقاااك ؟!...
جمعات الضحكة فالبلاصة..شي عيالات تما بقاو غير يشوفو مافهمو والو......
زكية"سطل ديال الما تخوا عليها تا ولات تضحك وتجمعها" : هههه هااويلي يا حبيبة ماگلت عيب هههههه...راني حاسبة راسي بنت دار من صغري ملي كنت"قاطعتها سعيدة"...
سعيدة : زكيييية (ضغطت على سميتها)..سيري شوفي اش خاص مباركة وبركي حداها راكي من اهل العروسة دابا وضايفة..
حبيبة"طلقت دوك زوج كلمات وسكتت باقي بنفس شوفتها"...
الهضرة ممكن تدي وتجيب وتكبر القضية..تدخلات عيدة....
عيدة"مدت ايدها" : زيدي نوضيني نمشي عماك واخا نبرك عماكم غا شوية..زيدي (جهدت صوتها)...
زكية"كانت كتشوف فحبيبة محافظة على ديك الابتسامة ديال را ماوقع والو حيث كاينين العيالات تما والقمعة الي شدت باقي تحك فيها لكن خاصها تحافظ على الهدووء حيث دخلات فشي شبوقات ماشي شغلها فيهم وهي بعيدة عليهم..وهي تقرب عند عيدة عطاتها ايدها ونوضاتها معاها...
سعيدة شافت فحبيبة الي بقات مخنزرة فيها وبقات محافظة على تخنزيرتها...مشات زكية شادة فعيدة وهازة جلايل قفطانها وخرج من صالون..حاسبة راسها من مالين دار اصلا من شحال هادي حيث مولفة تجي عندهم فمناسبات وتشقى مع البنات والكنينات ودابا را زااادت نغزة حيث غاتولي دار حتى ختها...
زيرات سعيدة على رجل حبيبة الي ضارت عندها وهي تغمزها بمعنى ميكي...
سعيدة : تهدني بنيتي عيشك دابا يشوفك معصبة ويصدق نايض ليهم ومانتوما فخير..تهدني ومسحيها فيا...
حبيبة "ضارت عند سعيدة" : واش هي شوية لباس ؟!..
سعيدة : الله يهديها..دخول صحة هو هذا...عيشك ابنيتي العار لما تهدني ديري غا بوجهي انا...
سكتت حبيبة مابقات قالت والو حيث بصح الى بقات معصبة وكبرت الموضوع لاخور يسيق الخبار وماهما فخير ماغايعقل على تاحد فيهم ويقدر يبدا بيها هي نيت الي جات معاه لصقت فيه ويكمل بيهم...مامرة ما جوج حضرات معاه لصداعات ولات عارفاه اش ممكن يدير....واصلا جاي لبلاصة فيها الجو مشحون ديما هما على سبة ينوض شي صداع...غضمات عينيها وبقات مزيرة على ايدها حتى تنفساات وهي تحلهم حيث بصح عصبتها وحبيبة مكتعصبش بزاف لكن الى تعصبت كاتعصب خايبة...
جبدات تيليفونها وهاد المرة هي الي رسلات ليه ميساج وكتبات ليه فيه...
"مرتاح،، باقي راسك تايضرك ؟!.."...
صونات ليه باش يدخل يشوف... وتسناتو حتى قرا الميساج..وجاوبها بلي مزيان وسولها حتى هي طمناتو عليها واكدت ليه بلي جالسة غير هي وسعيدة وعيدة وواحد زوج عيالات...
فالصالون الكبير كان فيه العيالات الي من جيهة مباركة كانو خوتاتها الي قدرو يحضرو مختاصرين ف ثلاثة ومعاهم زكية...اما لاخرات ماجاوش لضروف البعد كاينة الي ساكنين برا المغرب...وكاينة ام زكية..ومن جيهة اخت توريا صافية وحدها الي حاضرة..وشي عيالات من نساب عائلة ربيعة اما سعيدة ماجاوش..ومالين دار طبعا اشراق...وصالون الي عند الباب كاينين شي رجال وهاشم وحسام وبشار وزكريا...وصالون اخور فيه طلبة الي باقي ماجاوش من العشا باش يبداو...فصالون العيالات كانت جالسة العروسة لابسة قفطان بيض وطالقة شعرها باقي بحنتها فايديها ورجليها ودايرة ماكياج خفيف...جالسة حدا امها كايهضرو ولاخرين يتقداو ويسربيو فالمشاريب والضيافة...
دخلات زكية عيدة وجلستها بالخاااطر واخا واكلة قمعة محاولة تبان متبتة...ومشات جلسات حدا ختها مباركة...شافت فيها مها وهي تغمزها تجلس لارض لكن ماداتهاش فيها جاتهم فشكل هاد الليلة...اما دابا من الي دخلات من البيت وشافت حبيبة بديك الجلابة وداك الرقي باش جالسة كملات...
مباركة : تي بركي لارض وتبتي هاويلي...
زكية : جبت مي عيدة...فين صابرين..
مباركة : مشات تعلم با يوري لعمي الفيرما هنا...
حركات راسها وبقات كاتشوف فالعيالات ولكن عقلها غااب مع ما وقع بينها وبين حبيبة قبل قليل...بقات تشوووف حتى لقات راسها مزيرة على صباع ايديها...كأنها مالقاتش جهد وأنها كاتفيق من واقع وتلقى راسها بلي بشار ماشي ليها وترجع العافية تشعل فيها وماكاين الي يطفيها ليها الا اذا مادارت حل لراسها او تعيش فخيالها مع بشار حبها الطفولي الي كبر معاها...
هو نفسو الي دابا جالس وتغوبيشة ماخاطياش ملامح وجهو الخشنة...كايسمع فشي رجال كيهضرو تا بداو يضحكو بجهد وهضرتهم بدات تعلى خلاو عينيه يتكمشو من صداع...واخا هو عارف قبيلتهم عندهم الهضرة بالهيلالة وضحك تقولي مضاربين وهما را غا كيضحكو ولا يهضرو عادي..لكن هو بالنسبة ليه عاش سنييين ومرضو مكيبغيييش صداع والگج كايحس براسو تدعق وكايضرو راسو وكايولي معصب والى تعضب كايخرج على طبيعة يقدر يدور فالواحد بلا موجب شرع...داكشي علاش المهدئ كاينفعو فعاد المواقف...
هاشم"قرب عندو" : تبدل البيت ؟!..
بشار"شاف فيه بجنب" : فين با ؟!..
هاشم : واگف يتسنى شي طلبة يدخلهم...
بشار"حرك راسو مثقل..من بعد وقف" : هاني حدا طوموبيل..."شاف فحسام" لحگ عليا اشراق نشوفها..."شاف فتيليفونو حيث صونا ليها وماجاوباتوش"..
ناض معاه هاشم وحسام وخرجو مشا حسام يعيط لاشراق وهو وهاشم خرجو تا ل سيارة حل الباب جبد منها باكية الكارو شعل ليه واحد وتسند عالسيارة...تا بانت ليه اشراق جايا وتخطوي بالخلعة عفطت على جلايل تشاميرها تا نقزت معثرة كانت على شوي تجي على فمها...هاشم قال "ارسول الله" اما بشار بقا حاضيها وكايكمي...
هزات التشامير وتقادت فالوقفة وتمات جايا لعندو قلبها كايضرب...حيث دخلات راسها لمسار وعرفات راسها شحال جابت...ماعرفتش ردة الفعل ديالو شنو غاتكون واش غايفهم انها دازت من دوك المشاكل السابقة ولا اش غايدير...اشراق عارفاه اش كايسوى وعارفة ردود افعالو الي مكيعطيوكش انذار قبل انهم غايوقعو داكشي لاش جايا وقلبها بغا يسكت...وصلات لعندو ووقفات قالت "خويا بشار"...بقا مربع ايديه حتى كمل الكارو ولاحو عسف عليه وتگعد قاد تيشرت ديالو وهو يمد ايدو قاليها اجي عندي...قربات لعندو...
بشار : هانيا ؟!..
اشراق"شافت فهاشم الي كيشووف فيها كيفاش وجهها بياض وحركت راسها" : مم بيخير..ون ونتا...
بشار"حرك راسو..ورجع هز عينيه شاف الانحاء تا سمعاتو قاليها" : دخلي...
حركت راسها ومشات ديريكت لطوموبيل وركبات...ضار عند هاشم الي غمزو بمعنى خوذ راحتك هاني هنا...حيث كان اصلا باغي يخرج دعقوه دوك رجال الي فالبيت كايهضرو ويتغاتو تم...بعد شوية وتم جاي حسام لاحق عليه...
حسام : داك گلفة الشحمة بانش ليك ؟!..
هاشم : لا توضر ليك سير عند تباخة خديجة تلگاه حدا مرامط دجاج...
حسام"ضار بان ليه بشار هاز تيليفونو كايشوف شي حاجة وحداه اشراق بلا مايطل عليها عارف غاتكون كتسنى عزازيل يكمل اش بغا يدير ههه.." : سلكتها المراقبة...
هاشم : بنت لهم را ذكية بحال خوها غا مابغاتش تقرا..ديك المرة خرجات الفيزيك بلا سوايع..كان عندهم فرض منزلي وخرجاتو ليلة قبل...الفيزيك جايبة فيه نقطة مخيرة هو والماط..ولكن لغات عندها والو..مكنززة فديك الفرونسي..
حسام : على الله مايصمكها معاها..واخا ديال تصماك...ورا..."سكت وحبس الهضرة تا ضار عندو هاشم"...
هاشم : اش كاين ؟!..
حسام : والو...
هاشم : اداك سلوم الگباصة ؟!..
حسام : تا ريح مكاين والو غا ديال تصماك باسلة ومكتحتارمش...ماعلينا كانصيبها بعض المرات كاتنهض فمرت عمي رضوان..هادشي ماحملتوش وماگديتش نگولها ل بشار...
هاشم"بشك" : انا نهضر معاها...ياك غا هادشي ؟ "حرك ليه راسو بمعنى غا هادشي"...
كاتشوف فيه شاد تيليفون كايكتب فيه ويقلب علاش الله اعلم وهي جالسة حداه ودايزة من سيراط وباقي ماخرجات منو...حتى حط تيليفون وحط مرفقو على شرجم وصباع ايدو مسند عليهم حنكو...وقال...
بشار : كانسمع...
اشراق : ا اش بغيتي تعرف...
بشار"هز حاجبو" : شحال جبتي نتي ؟!...
اشراق : ماعرفتش گاليا عمي هاشم تاتگوليا نتا...
بشار"خنزر فيها بطرف عينيه"..
اشراق : 12,65 فالمراقققبببة...و 7,45 فالجهوي...
بشار"حرك راسو ببطء" : مزياان...عطيني اش باغي...
اشراق"صرطت ريقها" : نسى اش داز ونركز ونجمع راسي الدورة تانية مزيان...
بشار : مزيان..مازال ماتنغمتش يا اشراق.."ضرب الفولون غا بشوي طارت ونزلت" الي باغي انا ماوصلتش ليه..ريحي ليا الدماغ باش بلا ماندخل فعدو ربك تانتي فهاد الليل...زيدي نسمع...
اشراق : نكمل فسوايع ديال فرنسية و انجليزية...ونبقى نجي ونراجع حتى نجيب نقطة مزيانة حيث درت معاك الكلمة...
بقا ساكت وهو كيسمع ليها...بقا ساكت مادار حتى رد فعل...وتاهي سكتت كاتسناه يقول شي حاجة...حتى تهز شوية وهي تقفز مطاكيا حساب ليها غايصليها لكن ماداها فيها كاع...تا قدر يجبد بزطامو..حلو ومد ليها شي فلوس وقال ليها...
بشار : تحركي نزلي.."يلاه ضارت تحل الباب باش تخرج تسلك تا سمعاتو عاود نطق"...جيبي ليا يوسف...
اشراق : واخا واخا...
بزربة نزلات دخلات لدار تقلب على يوسف تجيبو ليه...طلعات لفوق كتحري وجهها مخطوف ماعرفتش كيفاش سلكات منو ماضربهاش ماصلاها معاها ما رعفها...حطات الفلوس الي عطاها تحت حوايجها ونزلات كاتزرب...مشات تقلب على يوسف وهي تعيط ل زكريا كان كايتسخر على رجال...
اشراق : عيط ليا ليوسف...
زكريا : شبغيتيه...
اشراق : بغاه بشار...
يلله بغا يمشي يعيط ليه تا سمعات صوت توريا خارجة من صالون وسمعاتها كاتقوليه بغات يوسف لبشار...ضارت عندها...
توريا : لاش بغيتي يوسف ؟!..
اشراق : ب ببغاه بشار...
توريا : سيري علميه ماخارجش ماعندو مايشوف فيه...
اشراق : ولكن امي.."طارت ونزلت من غوات توريا الي خلات البعض يدور يشوف اش كاين"..
توريا : طيييري علميه ماخارجش وعليا بليمين وتخرجيه ليه تنعاود ليك كثر مافوت فيك "زيرت على فمها وسنانها"..بلا مانفكرك..."عوجت راسها" يلاه...
كان هو واقف قدام سيارة جا عندو عبد القادر جدو كايهضر معاه...ورجع دخل حيث جاو طلبة خاصهم يقراو...خرجات اشراق علماتو بلي مابغاتش توريا تخلي يوسف يخرج...ماردش عليها فالبلاصة مافيه مايتقاشح تم غادي باش يدخل ليهم يجيبو راسو...
هاشم : بلا ماتعصب...صباح نجيبو ليك لمطار تال عندك تشوفو وتشبع منو عاد سير...
بشار"الصمت"...
هاشم : كون هاني اصحبي معاك تانهضر...
بقا شحال كايشوف بوجه مغوبش...وهو يدور عندو شاف فيه ورجع تسند عالطوموبيل...
هاشم : يلاه دخل...
بشار : لا...مريح هنا...
هاشم : وعنداك تمشي خلي بعدا غا تاتعشا مرتك وتعشا نتا نيت..
ماجاوبوش جبد تيليفونو ودوز ليها الخط كانت جالسة كاتهضر مع سعيدة قدرات تنفس من العصبية...جبدات تيليفونها وهي تجاوبو...
حبيبة : الو بشار...
بشار : تحركي ولا تبقاي شوية تم ؟...
حبيبة : ياكما بيتي تمشي..تعصبتي مع شي حد ؟!.."بخوف على نيتها مشات مع قاليها بلي كايتعصب الى جا لدارهم"..
بشار : سولي واش مرتاح مع شي حد...فين عمر الراحة جات مع تريكة الحبس...شوية ونتحركو ديري ليا بالك مع تيليفونك...
شافت فيها سعيدة وغمزتها قالت ليها مالك...حيث حاسة بيها مغيرة من الي جات...اصلا...
حبيبة : گاليا شوية ونمشيو..."تنهدت" بايخص نيت نمشيو حيث غايمشي غذا فالصباح بكري "بحزن كبيير خلا سعيدة تلاحظو بشكل كبير"..
سعيدة : ياك غايرجع مايتعطلش ؟!..
حبيبة"عوجت فمها" : ماعرفتش...
سعيدة"بانت ليها مغيرة ماشي كيف ولفتها..يمكن فرحت ان ولا لبشار شخص يخاف عليه ويتسناه...بغات تلطف الجو وضحكها ولا غير تحشمها وقالت ليها" : خفتي توحشيه ؟ هههههه...هاوويلي على مرت بشار تي فين كنا وفين ولينا هههه..
حبيبة"نزلت عينيها وتبسمات واخا حزينة" : حاولت بزااف وماقدرتش...
سعيدة : اش حاولتي ؟!..
حبيبة"هزات عينيها ورجعت نزلتهم" : حاولت نبعد منو ونعطي تيساع...حاولت منسمحش ليه حاولت منعطيهش فرصة...حاولت بزاااااف "تغنغن صوتها..صرطت ريقها ورجعت كملت هضرتها"...اي وحدة بلاصتي ماعمرها دور وجهها جيهتو...ولكن داكشي الي دار معايا من بعد..داكشي الي تقاتل معايا باش نكون مرتاحة ونسمح ليه..لقيت راسي متعلقة بيه وباغياه.."شافت فيها" واش هادشي عادي ؟!..
سعيدة : هادشي مكتاب عليكم..الله جمعك بيه واخا الوقت كانت صعيبة...ملاگيتكم فشي شكل وليني الله الي قسم ليكم تلاقاو هوك..والله الي باغيكم تلاقاو وتكونو لبعضياتكم...
حبيبة : شي مرات كانحس براسي ماغانبقاش معاه...وغير تنفكر فيها كانحس ب هنا "حطات ايدها على قلبها" تايضرني بزاف...
سعيدة : الى مكتبين لبعضياتكم من عند الله ماعند العبد مايفرق فيكم..."ضارت شافت فشي عيالات كانو شادين كاس اتاي ويهضرو ورجعت شافت فيها"...تهلاي فيه ويتهلا فيك ولا دخلوش كحل راس...
حبيبة : شي مرات كانخاف لا يعرف بابا اش وقع ليا معاه فديك الليلة الي انا باقي مانسيتهاش...
سعيدة : شكون يوصلها ليهم ؟!..
حبيبة : ماعرفتش...ولكن حاجة گالها ليا بابا وماما حتى هي...الى عرفو قاصني ولا ضربني بايفرقوني عليه...
سعيدة : علاش فايت ضربك ولا ؟!..
حبيبة : لا لا عمرو ما حط عليا ايدو...
سعيدة : شوفي ابنيتي يكون الي كان داكشي بين المراة وراجلها والى باك گاليك هكاك را من حقو...الكبدة بنتي صعيبة مايبغي بو ولا ام تقاس ليهم...دابا تجربي تانتي الكبدة وتولدو وليداتكم وتعرفي بحق الواليدين...
حبيبة"سمعات ديك تجربي الوليدات وهي تفكر انها ماكتخليهش وباقي كاتخاف من انه ينعس معاها...ضارت عندها" : عمرو ما قاصني فالفراش اخالتي...كيفاش غانجرب الكبدة والوليدات...
سعيدة : علاش ؟!..
حبيبة : كانخاف...كانخاف يتعاود ليا اشنو دار ليا ديك الليلة...مكنقدرش وشحال من مرة كنبغي نعيط ليك ومكنقدرش كنحشم ودابا تجبدات الهضرة...
سعيدة : كااع ؟!..
حبيبة"تنهدات وهزات عينيها شافت فدوك العيالات مكيشوفوش جيهتهم ورجعات نطقت بصوت منخفض وعاودت ليها اش كيوقع"...
سعيدة : ونتي باغية ؟..الى مكنتيش نتي باغية مايمكنش ليك ابنتي تنعسي عادي كي العيالات...
حبيبة : بيت نكون عادية معاه...بيت نكون فحالي فحال عيالات نزوجات بيت نكون معاه ولكن "عوجت راسها" متنگدش اخالتي..شحال من مرة حاولت نجرب من راسي ولكن مكلقاش شجاعة باش نكمل ونجرب...وهو صابر معايا وعمرو ضار فيا ولا عايرني..."شافت فيها" واش يقدر يبقى صابر حياتو كلها ؟!..
سعيدة"الصمت"..
حبيبة : شفتييي...
سعيدة : مايصبرش وليني يصبر ويشد ليك الخاطر باش تبراي...را ميمكنش ابنتي تبقاي هكا علاش حيث نتي يا بنتي قانعة راسك بالخوف...اما يا بنتي الى هو باغيك را مايضركش كي ديك المرة...
سعيدة : صبري يسالي هادشي هاو غذا من الي يمشي بشار نجي عندك ونعلمك اش ديري...گبل مايرجع من لهيه...وحسن مايعرف والي باش مايتشطن عليك...راكي عارفاه ولا كايدير بالو عماك بزاف...ياك غاتكوني فداركم...
حبيبة : لا...بنگوليه نبقى هي فداري حسن...
سعيدة : موحاال يتهنى عليك وحدك...
مسحات جنب عينيها وحركات راسها بتفهم...وتبسمات ليها...تا دخلات واحد سيدة كاتعرف سعيدة وجات كانها اشارة...سلمات عليهم وبركات حدا سعيدة...عرفاتها على حبيبة سلمات عليها وضار الحديث بينااتهم...
هنية : تي كي دايرة...
سعيدة : وبيخير..كيدايرة مريم بنتك لباس عليها...
هنية"تنهدات بحزن" : را لباس وصافي...على شوي تمو.ت لينا غا سكتي...
سعيدة : هاويلي مالها...
هنية : تخاصمت مع راجلها ولد لحرام الله يغبر ليه شقف....
سعيدة : مريم تخاصمت مع معاد ؟؟..هاويلي معاذ الي طار ونزل باش تجوجوها ليه وكان بغا يقت.ل راسو كون ما عتقتوه ؟!.. وتي كي طرا ؟!..
هنية : كي شتي تجوج مريم شي ربع سنين هادي...قبل مايتجوجها كانو خاطبين ليه بنت عمتو..ومابغاهاش كان باغي مريم..بالكشيفة جوجناها ليه...ايوى مريم بنتي تصابت ماتولدش...كي عرفو وخرجو من عند طبيب...جابها ليا الغذ ليه صيفط لينا مغميتو يگطع ليها حليب بناتها ويرزيها...گاليها تجي تجمع حوايجها...دازت سيمانة تا وصلنا خبار دارو زغاريت وخجبو ليه تاني ديك بنت عمتو الي مخطوبة ليه فالصغر...
هاد الهضرة دازت على وذنين حبيبة الي عقلها لاروب فهاد اللحظات وماصور ليها من خيال مفردگ..وربطت القصة ببشار وزكية...وتخيلت زكية بأنها هي و بشار ناعسين فوق الفراش وزكية فوق منو كايتباوسو عريانين وبشار كيبوسها البوسات الي كايدير لحبيبة على غفلة...ماحسات تا غوتات خلات سعيدة طير وتنزل وديك هنية تجبد كول تشاميرها ودفل فيه...
هنية : يگطع القحا**ب...
حبيبة : ويييلي لااا...مايديرهاااش...
يتبع...
التعليقات
لا توجد تعليقات بعد، كن أول من يعلق.