عروس الجحيم الجزء السادس

الحزن غيم على الفيرما...ناس مجموعة فالصالونات...واخا كيتكبو عليهم بالكثرة الا انهم ناس عندها بزااااف مع صلة الرحم...ناس كتبغي تسول فيك فالفرح والقرح واخا فيهم الي كيبغي يدي تبرگيكة مهم كيف كيقولو " راه كب عليك الباب" وسول فيك....جالسين كيتسناو الفرج ويقولو را الحاجة حلات عينيها ولا حركات شي طرف من طرافها...هالي يتنهد على الحال..والي قلبو عامر بالايمان هاز ايدو يدعي لرب العباد...وشي غير جالس كيشوف فلان داخل فلانة دخلت تشوف الحاجة...

هاشم من الي قطع عليه خلاه كيرمش...هاد المرة تقلق منو تقلق حيث بشار الي ديما محامي عليه ديما فضهرو مخرج نيابو ف توريا ولا كيقضي ليه وهو بعيد..كيعطيه خبار خوتو وخبار جداه وجدو الي ترزاو فكبدتهم ورغم ذلك مافرطوش فيه...حزنو وقتهم وخلاوها لله حيث قضاء وقدر وعمرو جا على ايد ولدو...ولدو الي ابدا وعمرها تكون ليه فالبال يقت.ل بااه !!!...ولدو الي بالرغم من انه عانى مشاكل نفسية قبل فمراهقتو الا انهم ماضنوش ينوي يقت.لو...الا توريا والبعض منهم كانو مدايرينش فيه الثقة انه ممكن يدير شي ردود افعال غير طبيعية وممكن جدا يفقد السيطرة...لانه مر بمراهقة صعبة خلاتو فمشاكل نفسية وصلات بيه انه يفكر فافكار قاسية...

سعيدة"خرجات تشوف هاشم اش دار..لقاتو واقف وداير ايديه على نصو وكيشوف فلارض ويتنهد...قربات ليه وحطات ايدها على كتفو" : اش الخبار اهاشم...

هاشم : قطع عليا...

سعيدة"تنهدات بحزن" : مادارش بوجهي وبوجهك !!؟...

هاشم : حقد تا حقد وتشابهو ليه الوجاه...ا شنگول عندو الحق !! ماعندوش الحق...علاش ؟...حيث هادي الوجيبة فين يرجع ماعرفتي تبدل ليه حياتو..ماعرفتي يصلح اش يتصلح واخا توريا قجرة وطبعها صعييب مافيهاش رحمة من كان دري صغير محتاجها مالقاها يلقاها دابا !!...وليني بغيتو يرجع باش على الله وعسى يدي رضى شتي لا بقى تابع الرضى خير من يمشي وتكتب عليه مسخوط صحة...اااااايه اسعيدة مدارش بوجهي وليني را خوووويا صااااحبي وخا ولد خويا عمري حسبتها بيناتنا فرق عمر قليل ماحاسبوووش...ومريض راه مريض اسعيدة...مريض ومو معارفاهش تا باش مريض !؟ وااااتخيلي نتي دابا مو ماعارفاش ولدها واش مريض واش واكل شارب...نتي تصيبي يبعد حسام وماتعرفي عليه والو !!!

سعيدة"دموعها دايزين" : نموووت اهاشم نموت...

هاشم : وا شتييييي شتيييي هاد المنكر شتي قصوحية طبع والقلب الكحل...عمرك شتيهم ؟ ورا هما توريا بنت المشاوري...

سعيدة : تا بشار را حاسباه ولدي الى مالقاش الي يسول فيه براكة عليه حنا الي هامنا...

هاشم : ههههه وراه الي هامهم مادارش بوجهم...هاهي جداه شوي يگولو لينا روح طلعت ولا تبقى هكاك ولا توگض يعلم الله...وهو مادارش بحسابها...اااااش فيها لا عسف على گلبو وجا يشوفها !! ياك جا شحال من مرة هنا لدوار وخا ماجاش لدار وليني شحاال من مرة دار بادرة يجي غا مو الله يهديها كتجري عليه...ياك جا زاوگ !!...

سعيدة : الگلب اهاشم فاش كيبرد صعيييييييب يشعل...صعييب يدفى صعييييب يضرب...بغينا ولا كرهنا بشار راني شفتووو ونامس (ولبارح) عينيه طفاااو...غا عايش اهاشم غا عايش وصافي...خليه على راحتو الى مابغاش يجي بلاش...يلاه دخل..

طبطبات عليه ورجعات دخلات...اما هو بقى واقف تا جبد كارو من جيبو شعلو وبقى واقف كيكمي تما حتى صونا ليه تيليفونو هزو بدون مبالات كيشوف تا وسع عينيه وبزربة جاوب...

اما لداخل را وحدوووو...فالبيت ديال عيدة واقفين شي رجال هما ولاد خوها..رجال كبااار بلحيتهم شايبة...وجالسة حداها مليكة عند راسها...تسمع صوت واحد من رجال قايل...

هو. : واش هذا اعمتي...ماعاهدناكش هوك !! تي كي طرا ليك...

عيدة"مغمضة عينيها غايبة وخا كيرمشو بشوييي"...

هو"هبط باسها فجبهتها" : لا حول ولا قوة الا بالله...الله يشافيك اعمتي الله يشافي...

تنهدو وبقاو معاها شوية قرا علبها واحد منهم حيث امام فالجامع...ومليكة جالسة مشتحة ليهم تما كاع فايضة...هما عينيهم فلارض وهي ماحشمت...غير تبكي وتعدد عند راس مها تا نهض فيها باها عاد دخلات لسانها ولجمات فمها ويدات تبكي بالحس...حتى دخل واحد فولادها الكبير اسميتو اليزيد...

مليكة : زيد اولدي زيد...

اليزيد : وي ماما...باقا !!!

مليكة"تنهدات" : هانتا تشوف اكبيدتي...فين ختك لينا..

اليزيد : اڤيك مون پيغ..."شاف فجداه وتحنى بكل حنان وقلب صافي باسها على نيتو..عزيزة عليه جداه هو وختو اما ختهم لاخرى الي هي الكبيرة ماجاتش...طبطب ليها على ايدها وخرج...

هاشم عيني خرجو مامثيقش...حس براسو واحد الوقت راه يحلم...

هاشم : اش بغيتي ندير غير گول كول...

بشار : الخير الي دير خوي ليا دنيا تم...مناويش نشوف شي بشري (بنادم) هاد ساعة...

هاشم : وصراحة دار را بغات طرطق بالبشري...

بشار : جري على الخرا...

هاشم : والله ماكرهت وليني راك عارف تريكة...

بشار : ماكنعرف قواد تما..."شاف فساعتو"...من بعد ونهضر معاك...

ماجا فين يجاوبو تا لقاه قطع...عرف انه بغى وقتو باش يقدر يجي نيشان هنا...يلاه غايرجع يدخل يعلم سعيدة تا بان ليه حسام جاي كيجري لعندو....طيح منو النص تا نشف ليه ريقو غير باش يقوليه اش كاين تعطلت ليه الهضرة....

خارج حسام كيزرب فمشيتو ما وصل عند باه تا كان هاشم غايسخف فبلاصتو...عقلو قاليه را جاي يقول مي مشات عند الله...هاشم حدو هز ايديه بحركة كتقوليه اش كاين ...

حسام : فففف...با گاليا نمشي نتلگا ل واحد ولد عمو جاي من داخلة وبغى يتبعني باش يعرف طريق لهنا...

هاشم" كان غابسخف تا طوا كون ما شدو حسام كون طاح مشبح" : اش بغيتي عندي ااااااش بغيتي عندي ينعل جد بوووك الكلب...اش بغيتي بغيت لبوك العگر...

حسام"مكمش فيه عينيه" : علاش مناويش تزيد فالولاد !!!

هاشم"وقف على طولتو وهز ايدو نزل عليه لراس تا تحنى" : يحرق جد بوك الكلب...ومالك جاي تلهت كي الكلب...جي عادي وعلمني جي كي ناس.. عقلي را مشى دفن مي ورجع.. عقلي را طيح مني نص بغيت ليك ساكتة...ااااش كاين ؛؛!؟؟ وانا مالي ؟؟ مالي فولد عم جد بوك مالي ؟ الى جا من داخلة يدخل فيك نتا وياه دحش ما توگضو ما تعرفو طريق...

حسام : يناري هذا مالو...

هاشم : راك جاي تجري لاش جاي تجري ثقل...

حسام : را مي گالت ليا نشد من عندك ساروت طوموبيل...حساب ليا خرجتي ولا منعرف...

هاشم : واش غايخرجني اااااااااش....وخرجت ليا وفيا وخرجو عليا...خرجو علياااا...

حسام : ياهاااه....

هاشم"جبد ساروت من جيب الفوقية حيث كان لابس غا فوقي...وحطو ليه فايدو". : شد وماتعطلش را نبغيها قبل مايوصل...

حسام : شكون !!!

هاشم"ضار هنا وهنا" : هاد الگج مزال مناوينش يخرجو ؟!

حسام : النص فيهم بايت حيث جايين من دوار صوالحة...ونص را عند الباب مشاو يشوفو مي...وباقي دوك ناس ديال مراكش را شوي ويكونو هنا...

هاشم : هااااانااااري....

حسام : من لاخر اولد عيدة اش كاين !!!

عاشم : ولد توريا ناوي يضهصص ليا العباد...

حسام : يا رباااااااه...

هاشم : فالمرمى اولدي"خشى ايدو فجيباو وجبد الفوقية ورجعها" فالمرمى...شدييييد دار بوجهي...

حسام : على مولانا تقاد الوقت...اما من جيهة مرت عمي توريا مخضخضة الوقت...وزيدك تا عمتي مليكة...شوف كي دير هضر معاها تلجم فمها...

مشى حسام كيضحك وتاهو نوعا ما فرح ان بشار غايجي..من ديما عزيز عليه بشار واخا عارف الواقعة الي طرات كان صغير داك الوقت كانت عندو ثمن سنين حضر لكلشي تاهو وحضر لباه الي كان مع بشار وحضر لازمة والحزن الي خيم انذاك...وفاش كبر عاود ليه باه بحكم هو وباه ماشي غير علاقة ابن واب وانما صحااااب روح بروح...اسرارهم بيناتهم..حسام عندو معارف ولكن صحاب عندو هاشم...

فهاد اللحظة بالصبط...سيارة مولاي الحفيظ كانت وصلات ل سيدي بوعثمان الفيلاج...حداه ناديا لابسة جلابة وشالها...وحبيبة لابسة كسيوة بيضة بسميطات ديال ساتان فالشيبي وفوق منها فيست شيبية...دايرة ضفيرتها فجنب ونضاضر شمس فعينيها كبار من ديور...حاطة تيليفونها فوق حجرها كتنقر فوقو بصباعها...تا وصلتها رسالة من عند "جاد" شافتها ماعطاتها اعتبار ماشي فمزاج تجاوب...وماشي فخاطر تهضر مع شي حد...كتشوف بعينيها من شرجم فخيورات ربي فديك طريق تا بان ليها باها ضار من الطريق الي فيها بيست...مسافة طريق حتى وصلو لفيرما الي لقاو قدامها تستيفة ديال سيارات...عرفو ان ناس باقيا فزيارة والحباب ما ثقالت...عينيها مشاو لباب كيبان ليها محلول حيث ناس داخلة خارجة عند بالها السيدة ماتت قلبها تخطف...

حبيبة : ياكما ماتت !!!

م.حفيظ : الا بنتي...هادو الحباب را منهم كيجيونا بنتي...منهم حباب الحاجة منهم حباب الحاج...ناس مكيثقالو من تسوال...صلة رحم عندهم واجبة فالفرح والقرح تبارك الله...

ناديا : الحاج فخبارو جاييين !!

م.حفيظ : وا علمتو جاي امتى ما گلت ليه والو...تانتي را زيارة هي هادي وهما عارفين ناس داخلة خارجة عليه...

وقف سيارتو لداخل بان ليه هاشم واقف مع خوه سيحمد ورضوان ومعاهم مليكة تاهي وكيهضرو...خرجو من سيارة حبيبة لصقات حدا امها تا ضار هاشم وهو يبان ليه حفيظ...

هاشم : ااه مولاي حفيظ هذا...

مليكة"ضارت وشافت فيهم وشافت فناديا بانت ليها سيدة زينة بزاف...وهبطات عينيها لحبيبة بانت ليها زينها كيفتن كثر...بقات طلع فيهم وتهبط وهي دور عند سيحمد حيث هاشم مشى عندهم" : شكون هادو ؟؟

سيحمد : ريحة شحمة فشاقور...المراكشي هذا هو الي كنديو ليه فياجات العواد والفيتور لحمام والبطاين ديال البهايم على حساب دار دباغ...كنتسالوه الفلوس بان ليا ميك علينا...

مليكة"ربعات ايديها وتنهدات كتحرك راسها" : ولا تقجروش دابا يخلص..با مدهي مع مي دابا الخاطر مزال مكاين...

رضوان"شاف فيها" : تي داك ولد خوك ماناويش يجي يشوف جداه !؛؟

مليكة"هزات كتافها وضارت لهيه مغوبشة" : مانعرف ليه...ياك راني حداه فين عمرو فكر يطل عليا..ها فرنسا ها لالمان...طوموبيل جا بيها لمغرب طحن ثلثيام ديال طريگ...اش شدو عليا...ياك مرضت داك العام شهرين وانا فيا السالمة (سخانة القوية) وگالها ليه هاشم..هزيتي شي تيليفون وسولتي...ياك نسينا ياك انا نسيت ولعنت شيطان..مالو هازها منين ثقالت...وااا شلا شلا...

سيحمد : اوديييي كتعيييو الحجرة...خليه لهلا يجيبو هو كاااع اش زادكم ولا نقصكم...

رضوان : وديك الي طايحة بمسبتو عجبك الحال عليها ؟!...

سيحمد : ياك كانت صابرة وهو غابر يجي بالعامين ثلاثة يشوفها قسمين ويغبر تاني...

مليكة : ...وختو را مابقى عليها حكام ..خوه مريض ومو كتافها رابو...ايوى بنادم كيعيا..زاد كمل عليها ناوي يتجوج گاليك...ومن تم عمرها باقي تشوفو را كانت تشم فيه ريحة ولدها...

سيحمد : داير شلا فعايل وهاز ليا مناخرو لفوگ...والله كون ما با ومي لا عتبت فهاد دار نهز ولدي ومرتي ونزيد...بقى ليا غالمسخوط نهز ليه الهم...

وصل الحاج هو وناديا وحبيبة الي رشدهم هاشم لبيت الحاجة عيدة...جاي الحاج وحادر عينيه تا حل الباب هاشم وقاليه يدخل...رمى سلام من فمو ولقى الجواب من عندهم...كان الحاج جالس حدا رجلين عيدة وتوريا عند راسها شادة طرف من صوفة غاطساها فالما وكتقطر ليها ففمها..الما كيدخل يجريييي وميكرجع...حتى هزات عينيها وبانو ليها داخلين...

م.حفيظ : الحاج !! اش هذا ؟؟..

ع.القادر"ناض سلم عليه" : هانتا تشوف الحاج "شاف جيهة عيدة الي مغطة ومغطينها" هذا حالها...

م.حفيظ : الله اكبر...الله يشافي الحاجة...الله يشافي...

ناديا"قربات عندها تحنات باست ليها راسها وهزات عينيها ف توريا" : الحالة هي الحالة !! گاليا الحاج تمحنات ...

توريا"حركات راسها مثقلة" : شوية شوية..يجيكم الخير الحاجة ناديا يجيكم الخير...

حبيبة"قربات وقبطات ليها ايدها فديك القبطة الحاجة حركات صبعها شويييي...الى شديتيها تحس الى جالس متشوفش..حسات بيها حبيبة مادات ماجابت حساب ليها كاتحس..باستها ليها قدام عينين توريا الي متحيدوش من على ديك البنت" : الله يشافيها...

توريا"دوزات ليها على ضهرها" : امين ابنتي..الله يرضي عليك...

بقاو حداها...حبيبة ازمها الوصع معندهاش مع جو الحزن والكآبة..نغزات امها وهي تفهمها وناضت مخليين توريا حداها تا دخلات ربيعة وكريمة جايبين شي حوايج طلباتها منهم توريا باش يبدلو ليها...لقاو سعيدة الي جات رحبات بيهم وداتهم لصالون...

وصلات العشية وهو يصوني تيليفون ناديا كان الحاج كيعلمها باش يخرجو لبرا يمشيو....هو فهاد اللحظة كان واقف مع الحاج الحاج الي مافرقوش حيث عيدة قبل موصياه يربط معاه صلة ويتقرب منو كثر...الحاج مااا جبد ليه حس الكريدي وخا مولاي حفيظ راه فبااااالو مصيبة كبر من انه يخلص هاد الكريدي...

ع.القادر : عليا بليمييييين الحاج ماتمشي تاتعشى معانا...ها مراكش غا هنا...

م.الحفيظ : الا لحاج لا تحلفش هههه...جينا نطلو على الحاجة راجيين الشفاء من عند الله...

ع.القادر : الحاجة لو كانت موگضة هي متخليكش تمشي...سير كون تسمع...تعشى وهاشم ولا حسام يمشيو وراكم يونسوكم تاتوصلو بحول الله ويرجعو...لا تردهشااااي فوجهي...ابالله متمشب...

م.الحفيظ : امنا بالله..."ضار شاف فناديا" الحاجااا رجعي رجعي نتعشاو ونمشيو...

ناديا : وايلي "ضارت شافت ف ربيعة الي شداتها"

ربيعة : دوزي دخلي مرحبا بيكم...

تنهدات ناديا وشافت فحبيبة غمزاتها وهما يتبعو ربيعة لقاو سعيدة جالسة حدا شي عيالات لداخل...جلسو تما حداها...تا بانو ليهم الناس نصهم بدا يمشي على امل يجيو غذا...بقاو غير هما وشي عيالات قلاااال...الرجال النص مشى ونص مشى يصليو العشا...

حبيبة : ماما بغيت نهضر فالتيليفون !!!..

ناديا : معامن !؟

حبيبة : مع نائلة كانت جايا عندي ولكن قلت ليها غانتعطلو....

حركات ليها ناديا راسها عاطياها الاذن...ناضت حبيبة والحشمة مزينة وجهها...عطاتها زين على زين خلات عليها العينين محلولين...وزادتها الكسوة البيضة حسن...خرجات حادرة راسها مكتشوفش هنا حتى خرجات من الباب ومشات مع واحد الطوالة وخرجات من الباب الثاني...يلاه غاتخرج تا خرجات فيه وشهقات هزات فيه عينيها لقاتو شادها من دراعها وهي تبعدهم بزربة...

سيحمد : بشوية عليك...بنت من نتي...

حبيبة : بنت مولاي حفيظ...

سبحمد : اااه الحاج مول الحمام !! "حركات راسها"...اييييه الحاج الي كنتسالوه فلوس كثيرة..."كمش حجبانو باغي يطلع منها الهضرة" فراسك شي ههههه...

حبيبة : م ماعرفتش...مكيهضرش معانا فهادشي...

سيحمد : هههه كنضحك معاك ابنتي...خارجة ؟! وردي البال كاينين الكلاب هادجيه...

حركات راسها وهي تمشي هضرات مع صاحبتها بزربة ورجعات دخلات جلسات حدا امها....

شوية تا تمات داخلة مليكة قالو ليها جي را شي ناس كيسولو عليك دخلي سلمي...هزات حبيبة عينيها بانت ليها داخلة ماتبانش حداها حبيبة..غليضة وحلقها غليض...كي دخلت رمات سلام وبدات تسلم على عيالات الي سولو فيها...

مليكة : مي غيثة بخير...لبااااس امي غيثة..كيدايرة فتيحة بخسر كيدايرين دريات...وهاني جيت ندوز كونجي لگيت الكية...

سعيدة"قربات لمليكة" : ختي مليكة...هادو ناس مراكش...كيجيو ل لالة من جيهة باها...المراكشي عرفتيه !!!

مليكة"طلعات وهبطات فناديا وحبيبة" : ونسمع بيه بحرا گالها ليا خويا سيحمد..."تحنات سلمات على ناديا" مرحبا بيكم اختي..."مشات لحبيبة سلمت. عليها...عفوا نطحتها بحناكها تا حسات بنواضرها تقرقبو..." تبارك الله هادي بنتك ؟! زييييييينة تبارك الله...

ناديا : اييييه اختي...ربي يخليك...

مليكة"جلسات بعيد وتشتحو فخادها هزات كمايم تشامير تتبين ذهبها حيث بانت ليها ناديا تاهي لابسة ذهب ولكن بطريقة راقية ماشي معمرة ايديها..ضارت جيهة واحد سيدة وبدات تهضر...اما حبيبة... نغزاتها واحد سيدة ضارت شافت فيها لقاتها مراة كبيييييرة...كتمسح عينيها بواحد شال لاوياه عليها من فوق العكفة....

هي : بنيتي نتي تجيهم شي ؟!

حبيبة"تبسمات" : شييي شوية خالتي..بابا كيجي خالتي عيدة من بعيييد...

هي : ماعندك علم ابنيتي بولدهم الي برا البلاد واش جا ؟!

حبيبة : ماعرفتش شكون ولدهم...

هي : ولدهم الكبير فالحفايد يكولو ليه خويا...سميتو بشار...كلشي جا الا هو غايب...مكيجيش بزاف يضهر ليا...

حبيبة"تبسمات باحراج". : مم ماعرفتش صراحة شكون هاد بشار...تقدري تسولي خالتي سعيدة...

قدامو كاس ويسكي فيه زوج مكعبات ثلج...وتحت منو كلينيكس..ماطلب قطعة ما طلب تخلاط...الكاس لول عطاه حقو والثاني تنغم بيه والثالث زنزن ليه ورابع فطريقو يهدنو هدنة الي تحتها بركان...شاف تا عيا وسكت تا عيا وكبت الحرقة تا عيا ولكن كيبقى شي كيدوز فشي ...تجلس جداه حتى تجلس كتبقى جداه الي حنت فيه فواحد زمان...رغم كبدتها الي فيها ترزات...ما لامتوش عاشت حزنها وعذراتو...ورضات بقضاء الله...

كمل كاسو وهز ايدو جا سرباي عطاه لاماشين جبد كارط بونكيغ من بزطاموو بشويييية ايدو ثقيييييلة دوزها فالماشين خرجات الفاكتيغ خلاها ليه فايدو وناض...غادي وكيخرج فساروت من جيبو وداك ساروت حلف لا هو خرج...وقف واحد شوية جهد دقيقة عاد خشا ايدو وجبدو...ركب فطوموبيل ديمارا وزاد...صونا ليه هاشم طلق الخط ونطق بصوت ثقيييييييل مرخيييييي....

بشار : جااااااي...

قالها وقطع...فعادتو ميكثر كلام مايعطيك جواب...يمكن من كثرة ما قسى عليه الزمان وهلكوه العباد...خرجات ليه شخصية معقدة ومفشكلة خاصها الي يشتتها ويعاود ترتيبها او الي يفهمها او الي يتقبلها...شد طريق سيدي بوعثمان...طريق الي ماحدو كيقرب ماحد العقل كيسرح وداك القلب كيعمر...ديما فينما كان يشدها فواحد الوقت وخا كان حدو الفيلاج ماعمرو وصل دوار من الوقت الي وصل على مو لروضة...ديك سيارة سرعتها كتعلى وضواو سيارات كيسنيو ليه فعينيه...وصوات كلاكسونات رموكان عااالية....مسافة طريق حتى قرب يوصل لسيدي بوعثمان صونا لهاشم وهاشم فديك الوقت ضار عند حسام سولو....

هاشم : الحسنية كاينة ؟!

حسام : لا جا داها ياسين واشرف گبيلة فاش دخلو شافو مي...

هاشم : مزيااااان...يلاه را وصل لفيلاج....

حرك ليه حسام راسو وخرجو ماعلمو حد تا خرجات سعيدة شافت هاشم خرج بسيارة معاه حسام ماجات فين تعيط تا كانو زادو...دخلات توجد لناس العشا...

وصل هاشم وحسام للفيلاج وهي تبان ليهم سيارتو واقفة فجنب...بان ليه متكي راسو على زاج مغمض عينيه...واحد النعسة داير طيح عليك ضيم...لدرجة هاشم عينيه غرغرو...تنهد وهو يجبد كاس وكب فيه الما وجبد دوليبران رماها فيه وخرج تا وصل عندو ودق عليه شرجم حل بشار عينيه معسلييين فهاشم الي هز الكاس وراه ليه....ورك بشوية على بوطون هبط زاج...

هاشم"مد ليه كاس الما فيه حبة فوارة ديال دوليبران" : قول بسم الله ورخيها..ماعليش الي فات فات..

بشار"نطق بلسان ثقيييييل بشراب" : ولييي بقى محفور ؟

شد من عندو بشار الكاس تكا عليه دقة وحدة وعطاه ليه...تگعد كيديماري....حرك ليه راسو بمعنى سبقني...ماعطلوش هاشم مشى لسيارة ديمارا وزاد كيشوفو فالمراية حرك طوموبيل طالق سينيال ودخل فالطريق كان جاي واحد الكاميو على شوي يخبطو من جنب تا تسمع كلاكصون كاميو مجهد تا غوت هاشم وحسام شد راسو اما مول الشان ماداها فرموك ماداها فراسو...تنهد هاشم مغمض عينيه وحلهم وزاد وتبعو بشار....بشار الي غااادي وصافي...العقل الي يرجعو لذكرايات مسالي...عينيه على ديك البيست...حتى تمات جايا سيارة مولاي حفيظ راجعين فحالهم داز من حدا هاشم شير ليه من شرجم اعتاذر ليه تا علمو بالي شي حد من رجال وصاهم عبد القادر يمشيو معاه فطريق...وزادو...وصلو لسيارة بشار وزادو بشار عينيه قدامو...وحبيبة ضارت كتشوف فسيارة والي سايقها مع ضلام كيبانو غير عينيه...تنهدات وحطات راسها على زاج...دخل هاشم لفيرما ووقف وهما ينزلو تا بانت بيهم سيارتو دخلات...كيشوف فكلشي تبدل !!! تبدلات دار تبدلو الحيوط...وتبدل حتى زمان والوجاه...

البيت عند عيدة كان فيه الذكر الحكيم...توريا ماتفرقاتش من حداها...اما سعيدة داخلة خارجة...ع.القادر كان كيصلي ركعات قيام الليل...كمل وجلس كيسبح...تحل الباب...توريا هزات عينيها كتشوف عادي تا شهقات بالحس وهزات حاجبها ..

توريا"هزات حاجبها وتبسمات بمرادها الي تقضى" : بشار....

الحاج هز عينيه وضحك...اما بشار ماااداها فحد...دخل وعينيه على جداه الي مغطة...مخليه وراها الفام محلولة ومبهوضة...تا نزلات مليكة سولات عطاوها الخبار....شمات فيه توريا ريحة شراب وكمشات حجبانها ماااعجبها حال....اما مول شان فالبلاصة مشى لجداه وتحنى عاى ركابيه...شد ايدها وباسها...

بشار : ماتصيبيش تخليني بخاطري !!؟...ناوية تلبقي ليا مسخوط صحة ياك (كيهضر ثقيييييييل)...

توريا : معزتك عندها كبييييرة...غيابك قت.لها فصحتها...راك كبدتها المعاودة...

بشار"مشافش فيها حدو نطق" : ونتي ؟!...

لجمات فمها وسكتات...رجع كيشوف فجداه وايدها المكمشها زمان مدي منها لحم ومخلي العضم.. وسط ايديه الي دفاو ليها ايديها...تعزل عليهم ووقف الوقت غير هو وجداه...

بشار : توگضي اعيدة توگضي معايا و الي بغيتيه نديروه...

تا رجعوه للواقع ايدين تحطو على كتافو العراااض..وعدوووه شي حط يحط ايدو على كتافو بهاد طريقة خصوصا زيرات عليهم...

مليكة"كتبكي": ولد خويا !!! عاش من شافك اااااخويييي عاااش من شافك...وغيبتك طويييلة اخويييي...

بشار "طوا لسااانو وعضو مزييييير..حرك كتفو بشوي تا بعدت ايديها على شوي تخوا بيها وطيح كون ما شدها هاشم....ماشافش فيها حدو دوا مشمئز" : بنت الرحماني محبتك ليا تروع الگلب....(القلب)...

ماجات فين تستوعب تا حس بايد جداه تحركات وزيرااااات ليه على ايدو...وتسمع انينها تا تبسمات توريا الي زيرات صباعها وتوسعت بسمتها تا ضحكااااااات نيييييييت....

ماجات فين تستوعب مليكة القمعة وتفهم را فاهم نفاقها وتدير ليه طريق لتيساع...حتى كمشات عيدة على ايدو...ماشافتهاش مليكة الي يلاه غاتجاوب حتى شافو فتوريا الي ضحكات وشافو فين رمات عينيها شافو هما لقاو عيدة زيرات على ايدو...مايكذبش بشار انه فرح من لداخل بلا ميحس...السبب لول هو انه حس بيها فعلا مرضات بسبابو وبغاتو يرجع يعني را عندو مكانة كبيييرة فقلبها...وخا عارف هادشي من الي زطمات على قلبها وكبتات كية موت ولدها الي كان هو سبابو. والي يموت وماينسى هاد الواقعة وهي الي كانت سبابو تا مرض فصحتو كثر وكثر...صعيييب اذا ما قلنا مستحيل انك تعيش حياتك عادي ونتا كنتي سباب فموت شخص اخر وزهقتي حياتو فمابالك ب باك باك المحبوب عند الكل ونتا كان عندك هو كلشي..والحنين فيك بالرغم من معاملة الام الي كانت قاصحة والكبدة عندها حجر.....

بشار"زاد زير على ايدها تاهو بايدو" : مي...

عيدة"حدها زيرات عليه وعينيها رمشو ورجعو حبسو...انينها تسمع ورجعت سكتت"

ع.القادر : سمعاتك !!

توريا : حسات بيه...سباب رگدتها (مرضها زعما) داوا جرحها...

بشار"كاع ماكيسمعها عينيه على جداه"

مليكة"دارت ايدها على فمها" : الله ياربي على الحنينة الله...واااا مي واتوگضي ها الغابر جا كبيدتي...وتوگضي يا الحنينة...

هاشم"عصباتو" : ملييييكة "ضارت شافت فيه" تحركي خرجي وخليه معاها...

مليكة"حطات ايدها على صدرها تا تسمعو براصلياتها" : ياك اخويي وانا اش درت خليني معاهم..."سمعات تحنحينة عبد القادر وهي تحدر راسها"

ع.القادر : ولاكون كوني تسمعي..يلاه خليوهم...خرجي ابنتي توريا تانتي...

توريا : منصيبش اسيدي "شافت فيه بعينيها كترجاه" خليني معاهم...

عبد القادر تنهد وهو كيحرك راسو ببطء...خرج مليكة الي تبعات هاشم وسدو عليهم الباب...لقاو التريكة كلها طل على شكون جا...حمد الله هاشم جات غا فقمعة اما كون هزها ولصقها مع الحايط...هذا هو حال مول الوجاه ماشي تا جوج ولا ثلاثة...

بشار ماسمع حد فيهم او نگولو مامسالي يديها فيهم عينيه غير على جداه الي حركاتو حالتها...واخا طبعو خايب معقد الا انه مغايكونش ولد لحرام لهاد الدرجة انه مايجيش على قبلها...

توريا"عينيها عليه كتشوف فيه كيفاش مغوبش وعينيه حمرييين معسلين...شمات فيه ريحة شراب وميكات..." : نوض جلس حداها ماتبقاش محني على ركابيك...

بشار"مكاين جواب مكاين مكاين حتى ايخ منك افلان."

توريا : غاتبقى جالس هاكاك..

بشار"مخليها تهضر كييف بغات..اما هو زاد زير على ايد جداه وتحتى باسها..ونطق بصوته الي كل مرة تسمعو توريا تبهض بديك البحة وداك الغلض...عندها ولد ولا راجل شيبو بدا يبان وهي يلاه كتكتاشف فيه !!" : وگضي راسك معايا...هاني جيت ماتخلينيش نمرض من جيهتك...ناقصني مرض اعيدة !!...

توريا"ساكتة وكتسمع ليه اش كيقول..واش هضرتو من القلب ولا العقل...عارفة الشراب مخليه ينطق بالصح بلاصة الغلط..عارفة ان شراب كيخرج منك المكبوت بلاصة الباين.."

بشار "باس ايدها" : توگضي وندير معاك الي بغيتي...

عيدة زيرات على ايدو وطلقات انين...عرفها كتجاوب معاه...توريا ناضت من حداها وهي توقف مقربة ليه...حطات ايدها على كتفو زيرات عليه...مدارش كيف دار لمليكة...يمكن هاد تزيرة من مو كان محتاجها !!...غمض عينيه تا نطقات...

توريا : بقى معاها الى عييتي طلع لفوق ترتاح...

ماجاوبهاش حركات راسها وهي تخرج وخلاتو هو وياها...لقات هاشم واقف حدا سعيدة فالمراح تا ناضت سعيدة...

سعيدة : باقي معاها ؟!

توريا"حركات راسها" : مممم معاها...

هاشم : ماهضرتيش نتي وياه ؟!..

توريا"هزات فيه عينيها وهزاات حاجبها" : هاشم كي ندير نهضر معاه وهو مسالي تالعينين ماهزهم فينا ؟!..يتوگض وديك ساعة لينا هضرة وكلام...

مليكة"تمات جايا دايرة ايديها ورا سنطرة ليتيير الي وراها وهازة حاجبها ماعاجبها حال" : ومالو كي دخل نطق بالكلام الخايب...دابا عمتو يگول فيها ديك الهضرة..ماشي حشومة توريا !!

توريا"ضارت شافت فيها" : انا الي مو وكيعطيني من المنقي خيارو تبقى ليه شي عمة...

هاشم : ماقويتوش شويا ؟!

توريا : مو وكنبقى مو اهاشم ندير الي ندير مايهز فيا العين..ياك عيا وهو يطلب مني سماحة...وليت انا الي مشتاقة سماحتو ماعطاها ليا...

هاشم : ايوى جربي ..

توريا"وركات على اسمو" : هاااشم...شيبك بان وتبعو صوتك !!

هاشم : كلام الحق اختي توريا...احترامي ليك واجب وليني الحق حق وخا تكوني مي...ماشي حلمتي اليوم صباح حققو ليا حلمتي...ناس راها سنين وهي تحلم تا ربي كتبها عليهم...سماحتو ماتجيكش بين ليلة وصباح...شوية بشوية..هاهو جا عطيه وقتو خليه فين يرتاح وخلي الحيوط الي بيناتكم تريبها ليام...وزني كلامي وذوقي لغايا...فكري مع راسك راني ماباغي ليكم غالخير...كنجري فالمحبة ماااكنجري فالعيب...تانا كتر منك باغيه يرجع وكنخليه على خاطرو...

سعيدة"طبطبات ليها على كتافها" : ا ختي توريا راني انا عارفااه مزيان...عطيه خاطرو يمشي معاك فين بغيتي..هو مصاب وريتيه وجهك...

توريا : واخا هاشم واااخا..."ضارت شافت فحسام" فين اشراق !

حسام : يمكن الفوق...

توريا"شافت ف ربيعة" : ربيعة بنتي لا باقي شي عشا سخنيه وشوف معاه اهاشم لا بغى ياكل...

خلاتهم ومشات طالعة الفوق تا سمعوها كتعيط لاشراق...

اشراق الي همها هم..سمعات را كاين ليه الحس تقطع ليها الحس...حطات ايدها على قلبها الي شكات واش باقي يخدم...ماضنات راه غايجي ومكانت قارية لحساب لهادشي...الى جا صافي هنا تسالات وتجلس تحسب ايامها المعدودة...حيث لا عرف المخبي الموت على الابواب...

اشراق : ك كيفاش خوك..."ماجات فين تستوعب تا حلات عليها امها الباب وهي تشهق طارت ونزلت"

توريا"غوبشات " : اش كاين مالك ؟!!..

اشراق : خلعتيني امي...

توريا : مايتخلع غالي داير شي عجب...اش دايرة ؟!

اشراق : وو والله مكاين حاجة غغغير ماتيقتش بالي خويا بشار جا...

توريا"بشك" : عارفاه علاش گاد...الي مدايرش مايخاف...سيري لبيت جيبي ليه ايزار راه فبيت مك لالاك...غطيه لالقيتيه فايق سلمي عليه وعطيه صوابو..باين ليا ناوي يطول حداها..."بصوت جدي" تحركي...

.كانت كضن غيلقى تيليفون خاوي ويعيطه ليها او يشدو مهم ميدير ليها والو حدو يقول راه مافيه والو وليني نشدو باش مايشدها على قرايتها وتركز اكثر...ضنات غاتعطاها فرصة او يقوليها غير جلسي المهم ما يعرفش اش دايرة...هزات ايزار وتا تمات غاديا وهي ترجع تا تاكدات ان لباسها مستور مافيه عيب لا يصدق عاطيها صلية ماقاريا حسابها...هبطات مع دروج وكل درجة تدير فيها جوج دقايق...تا وصلات وهي تلقى هاشم عند باب البيت...

اشراق : ب بغيت نعطيه ايزار صيفطاتني مي نعطيه ليه...

هاشم : دخلي شوفيه الى فايق عطيه ليه..موحال يبقى بزاف...سلمي عليه وحدري عينيك ماتهزيهمش...

حركات راسها وهي تحل الباب بشوييي وكترعد تا حلاتو لقاتو متكي حدا جداه محيد البروتكان ومتكي طاوي رجل ورجل موقفها حيث ناموسية شوي صغيرة داير دراع ايدو على عينيه...حداه جداه الي مغطية...وقفات عند راسو وهو يحل عين بغمزة معسلة...شاف فيها...

بشار : اشراق...

اشراق"تحنات وباستو فحنكو..ونطقات بصوت منخفض" : صيفطتني مي نسلم عليك ونعطيك ايزار الى بغيتي تكى هنا...واش تبغي تعشى واكل شي حاجة...

بشار : لا..حطيه وسيري...گولي لهاشم يدخل عندي...

قالت ليه واخا خويا حطات حداه الايزار وخرجات..علمات عمها الي فالبلاصة دخل وسد الباب وراه...ناس الي جاو فيهم شي وحدين اضطرو يباتو...راهم فاصالون بعييييد على البلاصة فين كاينين حيث دار عامرة بيوت وصالونات ديال ضياف بعاد على بيوت ديالهم والكوزينة...

هاشم : هاني بشار...

بشار"حل عينيه وكل عليه" : حاول تبقى موگض شوية معايا..غادي نبقى هنا قبل ميصبح الحال نمشي حتى نرجع..منصيبش نبقى دنيا عامرة...

هاشم : على خاطرك...غاترجع لوطيل ولا كيفاش !!

بشار : لا...عندي يومين نبقى فيهم هنا ولا ثلاثة الى كثرت ضروري نرجع لبرلين خدمة عندي كثيرة ومزيرة...داكشي الي بغاو ما عطيتوش ليهم...

هاشم : مزال ماهداكش الله تفرق على دوك الخلق...

بشار : هادشي الي عطى الله...كون ماهما شكون غايقبل بواحد مريض فراسو !!!..

هاشم : واخا..قبل مياذن الفجر نجي عندك ونمشي معاك متمشي وحدك...

بشار : حاول يوسف ميعرفش راني هنا دابا تنشوفو غذا...

هاشم : علاش !!

بشار : شارب اهاشم مابغيتوش يشم فيا ريحة...مكيعجبنيش الحال يشمها فيا...

هاشم : ياودي غا رتاح فين رتاح خاطرك الي بغيتيه نديروه ليك الله اودي...

يلاه غايدور يحل الباب يخرج وهو يسمع اسمو بصوته كايقوليه "هاشم"

هاشم : اش تاني نجري عالخرا...

بشار : ماكرهتش بالله ماكرهت..."سكت تا سكت وعاود نطق وصوته مرخيييي ثقيل"...ديك عمتك گوليها تقرا وقري هاد اليومين ماعنديش جهد هاد ساعة لا ليها لا لخوتها....

هاشم خرج من عندهم مخليهم بجوج فالبيت...ع.القادر رتاح نوعا ما..وناض مستغفر مولاه ودخل لبيت اخور...ربيعة تبعات راجلها الي شافتو طلع ماقال تا تصبحو على خير..كريمة جرها راجلها ماتسوق لحد غا وصل لبيتهم دفعها فوق تاموسية وشدها لعلاقة حميمية...حسام وصاتو مو يطلع يرد لبال ليوسف...كلشي مشى ينعس زكرياء واشراق وبنات هاشم منار وريهان...بقاو غير زوج الناس الي قلبهم بقى معاه سعيدة الي تكات غير تما وهاشم الي تكى نص تكية فوق واحد من دوك سدادر الي فالمراح...شد تيليفونو كيتفرج ملاهي الوقت بينما يقرب الحال....كل واحد راه فهمو والي ماعندو هم راه ملاهي فشغل غير...الي حط راسو ونعس والي حط راسو وبالتفكير سهر...

وهنا قصدنا والمقصود الله...الحاج مولا حفيظ...الي ماحد ليام كدوز ماحد الضغط عليه...تنهد وتسمعات تنهيدتو عند ناديا الي كانت شادة تيليفونها كتفرج فبرنامج متبعاه تا دورات راسها نص دورة. قالت "الحاج !!" سمعات صوته المهموم كيگول " ممم"

ناديا"ضارت مهولة عليه حساب ليها مرض تاني" : اش بيك ؟!

الحاج"تنهد مطول تنهيدة تحرق ماتم" : الحاجة ضغطات عليا الوقت...الي كنت خايف منو جاي جاي...

ناديا" خلعها تا ناضت حساب ليها غايموت" : اش كاين ياربي سلامة...

الحاج : فاش جينا لقيت ورقة طايحة عند الباب ماشافتهاش للا رقية..

ناديا : عند بالي فاتورة ديال ويفي ولا ضو ولا..ديما كتهزهم وتعطيهم ل عمر يخلص...

م.حفيظ : هاديك فاتورة التشتات الحاجة...هادي اعلام من دار الضريبة باش نخلص ضريبة الحمام والمحلات...وزيد عليها كريدي الحاج الرحماني غذا ولا بعدو يسول عليه...الكريدي الي بغيت ناخذ من البنك گالو ليا خاصني موافقة الورثة باش نرهن دار...

ناديا : ايوى...

الحاج"تنهد" : الكريديات كثرو...ولااابد نجمع الورثة ونقسمو هادشي...نحاول جهدي منبيعوش هاد دويرة دياال الواليدين"حس بصدرو موس حسكو فيه تا تاوه وشد عليه وهي تسعل ناديا الفيوز وناضت مفزوعة"...

الله اكبر الله اكبر...

صوت اذان الفجر الي كان بصوت عطر...شوية تسمعو ليه كاع اصوات الجوامع المجاورة...شحااااال هادي ماسمع داك الصوت من واحد الليلة مضلمة تاهي عاشها...مع سمعو مع تفكر الحادثة الي وقعات ليه من بعد عام تقريبا على الفاجعة الي طرات ليه...من نهار المقبرة وزيارة موراها ليلة عاقل عليها واخا داز عليها زمااان ودهور...غمض عينيه عاطي بدماغو راحة من تفكيييير لليلة مستمرة...تا كمل الاذان وهو كيتسنى هاشم يدق عليه...تا ناض وهو يدور جيهة جداه قبط ليها ايدها وباسها بانو ليه شفارها كيرمشو شوية وهما يثبتو تاني...

بشار. : عيدة...نخليك اليوم شوية..نسالي ونعاود نشوفك...

عيدة"صدرات انين..عرفها راها حاسة بيه وفايقة"...

دوز على شعرو ورجع قادو وهو يجلس تا لبس البروتكان وناض كيقاد فحوايجو راسو بغى يتفرع...يلاه كيقاد وهي تدخل توريا ونطقات بصوت منخفض...

توريا. : فين غادي...

بشار"مكيشوفش فيها" : عندي ميدار..نسالي ونرجع...

توريا : علاش متبقاش هنا..طلع لفوق ولا فين بغيتي رتاح فيه..بقى تتفطر...

بشار. : لا...

مزاد مانقص خلاها كتشوف فيه غادي وماراضياش علاش يهز عليها مناخرو...صبرات وزادت كتمات حتى تشوف...اما هو خرج وغادي حادر راسو ماحامل يشوف حد..تا بان ليه هاشم ناعس معوج راسو ونعستو معذبة مسكين ماحسش تا داتو عينو..قرب ليه وحط ايدو على كتفو وهو يقفز شاهق...

هاشم : لا مزال الحال...

بشار : مزال الحال !! واخا رجع نعس..هاني مشيت...

هاشم : اتا لا شور يا..."شاف فساعة وبدا يحك فعينيه" زيد نمشي معاك اصحبي داتني عيني...كي بقات مي شوية...

بشار : يمكن شوية...يصبح ويفتح...تحرك لا بغيتي تمشي معايا گبل منشوف شي ملاوي داخل هنا...

حرك هاشم راسو وناض بزربة طلع لفوق بدل ونزل كيزرب مشى معاه...

صبح الصباح الي نگولو ستة صباح...عندهم را تعطل الحال..ناضو لقاو غالريح لا بشار كاين لا هاشم..تا قالت ليهم توريا را غايرجع...الحاجة عيدة بدات تستاجب وحالتها نفسية بدات تقاد..حلات عينيها فيهم وعاودت رجعات تنعس...عطاتها توريا تفطر مقتاصرة غا فجوج معالق حريرة بيضة فيها تقاوت مازادت مانقصت...كيف كيقولو اللهم العمش ولا العمى...مليكة باقيا القمعة طلع فيها وتهبط...ولات سكتاات حيث باها قاليها تميك تا يتقاد الحال...وتاهي حسابها فرااااسها...

هادي من جيه فهاد الدوار اما الدوار الي حداهم...فوحدة من ديور الي فيه...واقفة حدا امها كتبخ القهوة معطرة تعطيها لباها قبل مايتيسر لسوق حيث تاجر تما كبييير كيبيع الهري...

زكية. : مي مغانمشيوش نشوفو مي عيدة...

الام : نصيفط الغذا لبوك هاو نمشيو مع عمك ف پيكوب...

تمات جايا جارة الي حداهم داخلة كتفرفر باغيا توصل تبرگيكة الي وصلات مع بونبر...شافت فزكية ورجعات نطقات شايفة فامها وقالت...

هي. : سلام عليكم اناس المكان...عيشة لباس...

عيشة"ام زكية" : نحمدوه ا تايكة..اش كاين شي خبار فمك يمشي ويجي وعينيك ماهم خوت...

تايكة. : دار الرحماني يامس بالليل جا ولدهم الكبير...ولد توريا الغايب...

زكية"كانت هازة كاس بغات ذوق بيه القهوة وهي تفيبري ايدها على شوي يطيح..حطاتو وشدات على قلبها الي كيضرب...من نهار شافت تصاورو وهو كبير وهي كتسناه...ملي خطبوها ليه وهي صغيرة عندها 14 عام وهو داك الوقت يلاه دخل ف تمنطاش قالو يخطبوها ليه حيث كانت زينة وعاطية لعين...وباها تاجر كبير قالو يرشموها ليه (يرشموها يعني يكونو عاطين الكلمة) حتى يوصل لعشرين ويزوجوها ليه ماحدو صغير حيث ناس العروبية كيزوجو ولادهم صغار بنات ورجال باش مايخرجش لفساد وكدا...هذا هو مفهوم الاغلبية...وهادشي كان قبل ماتوقع الفاجعة ديال باه ويغبروه...الشي الي مافهماتوش هي...واخا دازو سنيييين بقات متعلقة وكتقول را غايجي حيث قالو مشى لبرا يقرا...حتى لواحد العام سولو دارهم وقالو ليهم مايدرو املكم فيه..الي جا خطبها عطيوها ليه...تقبلو دارهم الهضرة حيث علموهم من ورا الحادثة بعام...لكن زكية بشكل من الاشكال ماتقبلاتش...الي جا خطبها كترفض بحجة من الحجج الي مقبول والي مامفهوم...من بعد ما كان سوقها عامر حيث زينة بكثرة الرفض سوقها خوا من رجال الي باغينها...واخا باقيا زينة غير كيسمعو سنها كيرجعو بحجة باغين الصغر...سهوتها طالت وهي كتفكر هادشي حتى قفزت من حركة امها لدراعها...

عيشة : فين غاب عقلك...

زكية : ت تا فين امي تا فين..."شافت ف تايكة" شفتيه نتي ؟!

تايكة : لا شافو راجلي وگالها ليه سيحمد گبيلة تلاقى معاه خارج بالكامايو (كاميو) هاو علمني...

زكية"صرطات ريقها وتزنيگة فرشتها..تا نغزتها امها وهي تستاذن بحجة تمشي لبيت تفيق خوتها...مع دخلات حلات باب الماريو فيه مراية فالباب...بقات كتشوف فوجهها..وتشوف ف جنب عينيها..وتشوف فلون عينيها..حيدات زيف حياتي من شعرها وطلقاتو تا تسرسب على طولتو فرررررر فات المؤخرة...سبحان من زينة بلونو تقولي حرير ناعم...والقوة الي فيه تقولي حورية...قادات خصلاتو على كتافها ....كتقول اش نزيد واش نتزين ولا نبقى على طبيعتي...واش نخلي الحشمة تطغى عليا ونحدر عينيا...واش نتعطر ولا نلبس احسن ماعندي ونبين احسن مافيا...اش ندير ياربي راه مول قلبي رجع...

زكية"تبسمات وقلبها كيضرررررب بجهد تا ضحكت" : هههه هء...."وهي تحط صباعها على شفايفها كتحبسها بدلع"....

حلات عينيها على صوت المنبه...من الحلمة الي حلمات فيقاتها فاخر الليل شاهقة وعرقانة وصدرها مقبوووووض...ماعرفاتش شنو ديك الحلمة واش تفسيرها....داكشي مخربق وعااامر دما.يات...وجوه ماعرفاتها وهضرتهم مافسراتها...فاقت كتنهج وباقا فيها نهجة تا دبابا فاش تفكرات...استغفرات الله وهي تنوض كتنش من الصهد حيث ماقدراتش تشعل لاكليم مع عرقانا غاتمرض نيشان...نايضة تجر فرجليها لابسة شوط قصير زرق قطن وديباردو بيض فيه سميطات فلون شورط...جمعات شعرها لفوق بمقبط ودخلات قضات حاجة حكات سنانها ودرات روتين سكين كير ديالها...وخرجات كتذهن فايديها ودرعانها بكريم مرطب ديال فاينليا...جبدات تيشرت طويييل خضر فايت ركبة وكتفو طايح حيدات داكشي الي لابسة ولبساتو...هزات تيليفونها شافت ساعة لقاتها تسعوود...خرجات لبسات صندالة صبع ديال دار فالبيض ونزلات بخطاوي ثقال وهي كتسمع صوت كحبة باها الي زاد قلقتها كثر...تا وقفات كتشوف فيه تاني رجع لحالتو...واقف عند الباب وناديا كتدهن ليه ف صدرو من لداخل...

حبيبة : بابا !! صباح الخير.."قربات باستو" عاود رجعات ليك الكحة...

م.حفيظ : عجبتها سكنة عندي ههههه...اش وقع ماغادياش تقراي !

حبيبة : لا مافياش ليوم والله...

لطيفة. : خليها تگعد مع عمتها هاد النهار نخرجو نتساراو انا وياها...

حبيبة : والله ماكرهت...

لطيفة : ايوى هكاك ههههه...

م.حفيظ : ختي لطيفة...

لطيفة : اخويا الحبيب...

م.حفيظ : نرجع من المحلات عشية كوني فالدار...وعيطي لجدر يكون تاهو الى كانت عندو خدمة يحيدها...

ناديا"تنهدات وحدرات راسها"

لطيفة : خبار الخير...

م.حفيظ : نتي علميه...ولابد نهضر معاكم فشي امور...والله يرضي عليك لا تعكسوش ليا...يدير الله خير...

ضار مشى وخلاهم مافاهمين والو...شافو فناديا هزات كتافها بمعنى الله اعلم وهي را عاااارفة اش بيه...ضارت حبيبة عند عمتها ونطقات...

حبيبة. : بابا عيان اعمتي بزاف...عندو شي حاجة مخلياه مريض...

لطيفة : هادشي الي بان ليا...الله يدير تاويل. وصافي...عيطي لجدر يجي فالعشية الى ممساليش گولي ليه يسالي مابغينا مشادة تاني مع عمو وهو مريض...

ماجاوبتهاش اكتفات بالصمت مخليا عقلها تاني يديها لديك الحلمة الي خربقات ليها نفسيتها وزادها باها الي مكانتش عارفة را يوم امس على شوي تجي كريز كون ما ناديا عتقاتو...تاهو خرج دابا عقلو غااايب وغير كيفكر..داك مولاي حفيظ الناشط الي داز من حداه مع سلام مع يضربو شي ميزان ويشطحو تا يدوزو دموعهم بالضحك..ليوم الي سلم عليه يا يحرك ليه راسو يا ميسمعوش...وسبحان الي بيتها فشان وصبحها فشان...ركب فسيارتو وقصد واحد من المحلات وهو المحل الكبير الي جا فالقنارية...رمى سلامو وقصد مكتبو...جلس وعقلو سرح...رجع فتح داك الملف الي عامر بخلاص الحق...دار نضاضرة وتخشع حتى سمع سلام من بعيد هز عينيه من فوق نضاضر وهو يبان ليه سيحمد جاي من بعد ما سلم على المتعلم...تا وقف حفيظ عاطيه بسمتو وصوابو من القلب...

م.حفيظ : اهلا وسهلا اهلا...مرحبا بولد الحاج...

سيحمد"سلم عليه" : وا بخير الحاج...

م.حفيظ : اللهم لك الحمد...جلس اولدي جلس...

سيحمد"هز سروالو من تحت وجلس..حط ايدو فوق المكتب كيلعب بواحد ديكور ويشوف فالمحل من فوق وتحت ويحك فلحيتو ويشوف فتواب غير الفخمة" : كاين شي تواب ديال رجال ولا غير كيد نسا هههههه

م.حفيظ : هههههه موجود اش حب خاطرك نعطيوه ليك من القلب...

سيحمد : فابور شي ولا تنقص خلاصو من الكريدي...

م.حفيظ"ضحكتو تجمعت وناضرو عرقو خبط" : لا لا فابور الله اودي احم..."بدا يحك فلحيتو باحراج"

سيحمد"حط ايدو على صدرو" : الدار الكبيرة الحاج...

م.حفيظ : شي دكة من داكشي ولا قهوة. لا عصير ولا مونادا...اش حب الخاطر يشرب ابا سيحمد...

سيحمد : لا كان شي اتاي واجد من الخير مكانش بوجه الله متوجدو..خلينا ندخلو فالهضرة..عندي ميدار مزال طالع لسوق السبت ديال دشرة فالقلعة لفوق...نجيب شي فياجات گبل ميسالي سوق...

م.حفيظ : مرحبا...

سيحمد : ديك الامانة لا صبتي توجدها سيمانة جايا الحاج...

م.حفيظ"العرق بدا يهبط تا هز كلينيكس من باكية قدامو وبدا يمسح جبهتو" : هههه ايييه ههه...هي هو گلت لحاج يصبر عليا شي شوية هي بينما جمعت خوتي نبيع شي املاك ونعطيكم حسابكم...

سيحمد : الله الحاج ماكرهنا وليني ناس كيتسالونا تاحنا مايصبرو علينا...لا تحرجنا شاي الحاج..مقامك كبييير عندنا...ناس الي كنتسالوهم الى ماعجيناهمش يحطو شيكات لعند المخزن...راك فاهم الحاج...

راك فاهم يا الحاج والفاهم يفهم...الحاج فهمها بالي را يدعيوه غا سبحمد وصلها ليه بطريقة ماتخليهش يتقلق وفنفس الوقت يفهم وخا را مفهومها واحد وهو يا تخلص يا تخلص...ضحك مولاي حفيظ باحراج مخلي البسمة على شفاهو اما قلبو راه يبكي د.م...تا حس بدوخة زارتو وشد فراسو ولكن القوى بدات كتفشل على شوي يطيح كون ما جا المتعلم الي شافو وسمع كلشي وطار جاب ليه كاس الما عطاه ليه عاااد فهم سيحمد راه يمكن سخف...

سيحمد : ياك لباس الحاج...

حرك ليه راسو وهز ايدو بمعنى لباس لباس...سيحمد حرك راسو وهو ينوض وقف...

سيحمد : الحاج منصيبش نجلس بزاف ماكرهتش نبقى وليني عندي شلا مايدار...

سلم عليه وهو يدور كيقاد فقميجتو المهيتكة فوق منها فيستة جيوبها كبار...خرج من المحل وهو يحرك راسو باستهزاء...

سيحمد. : باغي تكشمط نتا...عوام وحنا ساكتين نهار نبغيو رزقنا يبقى فيكم الحال...زوينة هادي...

شاد كاس قهوة كحلة مقطرة بلا سكار يحل بيها دماغو...فطر هو وهاشم ومشاو بطوموبيل قدام البحر ديال مدينة الجديدة ملي خرجو شدو طريقها باش يلاهي راسو ويفكر بينما يوصل ليل تاني ويرجع يشوف جداه...

هاشم : بدات تجاوب معاهم شوية وصافي...

بشار"ماشافش فيه غير مخنزر" : شحال باش مابقاتش تاكل ؟

هاشم : من داك نهار الي شافتك فيه وهي گاطعة...سادة فمها ومزكمة مابغات تهضر ماوالو..بقات قاطعة تا فشلت..جبنا طبيب دار ليها سيروم وصحتها عيااات الصيام ممساعدهاش...

بشار : هادشي كامل عليا ؟!...

هاشم : سهلتي راسك ومكانك عندها ؟!...

بشار"سكت كيعض ففمو من داخل وعينيه كيشوفو فالبحر...تا حرك راسو مثقل" : ماشي مشكيل...

هاشم : اش ناوي دير...

بشار : يومين ونمشي نشوف خدمتي تما ونشوف وقت ونرجع...حياتي بدات تما...اهاشم واحد بنت ناس تما كتسنى فيا مزال مگاديناش شي تخربيق بيناتنا...كاين شوية تشاش...

هاشم : كيفاش !!

بشار : البنت شيعية...مانگدش ناخذها خاص تسلم ولا ندخل فدينها ..

هاشم : كيفاش !! ياكما ناوي تولي شيعي...

بشار"ضار هاز فيه حاجبو وتبسم باستهزاء..رجع شاف قدامو" : ديني ومامطفرو فيه مخيب وجهي مع الله...ونزيد نقودها...هادي هي عاصي ربي وخالع عبادو...

هاشم : ايوى اش غادير...

بشار : الى مابغاوش دارهم ومكانوش راضيين ومابغاتش تسلم منتزوجش بيها...بنت الناس اهاشم وگفات معايا فاش قوادت عليا بالبيان...فاش طحت ونضت...عارفة مرضي...قابلة عليا...شرطي كان هو تسلم وتقتانع بديني...تالا اتاقنعت تجرني ونتوب...ماكانش هادشي الله يعاون...هادشي الي عطى الله...مانكثرش ومانتعاطاش...

هاشم"تنهد وضار شاف فيه تاني" : عارف مي باغياك تجوج !! عارف باغيا تخطب ليك...

بشار"غمض عينيه وزير على سنانو وساط بشويييية ونطق بصوت مهدن" : لا بغات تعدا على بنات ناس اهاشم...مزال ماعنديش الخاطر نربط راسي ببنت البلاد..منصيبش كااع...ومابغيتش هي عشرة...عيبي قريييب..فمي عامر بالعار والعيب...شكون فهاد البلاد تقبل عليك مريض فراسك وعقلك...مي الي والداني ونفرتني حيث مريض...وياااك تگوليا طاح حبها عليا!!! دغيا ؟؟ ...هي دغيا قرات فيا وجه الله..."ضحك تاني مستهزأ"....مشاكيييييل...

هاشم : سمع اش تگوليك مي لا ولات لباس...دير ليها خاطرها والله ابشار الى همك هازاه من ديما باغياك ترجع...شحال من مرة شفتها تبكي وهي هازة صورتك وتشبهك بالغالي...

بشار"زير على گوبلي القهوة"

هاشم : دير الخاطر بعدا ويكون خير...

بقاو هكاك على داك الحال...تا حس براسو رتاااح...رجع مارش اغييغ وخذا الوجهة مدينة سيدي بوزيد خذا غرفة لوطيل هو وهاشم باش يرتاح حيث حس براسو كيزنزن بصداع...تغذا وشرب دواه وتكى ينعس...تا اذن العصر وشدو طريق رجعة...

داز الوقت وبدا الحال كيمسي تا غربات شمس وتبعها العشا الي كياذن...لقات الحاج راجع بلا وقت...مع دخل لقى ايوب يلاه نازل مبدل غاسل حالتو ومرطب وجهو قاليك بكثرة صهد والسهرات وتصوير وجهو تشقق...حنحن وعلمهم يتبعوه لصالون...طلب ناديا وحبيبة يخليوه منو ليهم...ماردوهاش فوجهو خلاوهم بثلاثة يهضرو...جلس الحاج وحنحن تالف منين يبدا...حتى تنهد وهو يبدا...

م.حفيظ : ختي لطيفة...ولد خويا ايوب...عارفين رزقنا هنا مشروك...نتي نص حق ونتا حق بوك راه كامل...

لطيفة : اش هاد الهضرة اخويا...

م.حفيظ : ماتقاطعيني اختي...سمعي هضرتي وخليني نكمل...باش نجيكم نيشان...الحمل قوا عليا...درك كلو عليا...عمرت ديون وعمرت هم ومشاكيل...كيتسالني شلااا وشوية منصيبش اختي نقطعو من رباحنا حيث فايت رباحنا بشلاااا...يگولها الفم وميجمعوها ليدين...صحاب الكريدي بغاو فلوسهم وباش نخلص هادشي خاص نبيع شلا ملاك...والى بغيت نبيع اختي خاص نديرو عدة ليراثة منها ناخذ كريدي باش نرهن ومنها نبيع باش نخلص...

لطيفة : اخويا مابغيتش نقسمو...قالتها مي الله يرحمها غير نقسمو نتشتو وياااخويا را مابغيناهاش...

م.حفيظ.: عيطيني حل الطيفة عطيني...هادشي نتي ماعارفاهش عارفة غير جماعة ماعارفاش اش يكون ورا هاد جماعة...ماعا"بدا يكحب يكحب تا غمض عينيه وشد صدرو وهي تنقز حبيبة طااارت لصالون لقاتو شاد صدرو وعينيه تقلبو....وهي تغوت لربي الي خلقها...

حبيبة : باباااااااااااااااا....

دخلات لكوزينة طلات لقات كريمة....

توريا : ندي شوية الحريرة لالة وعصير ودواها ونجي نصايبهم الله يرضي عليك...وعيطي لاشراق تغسل هاد كركور الماعن الي هنا...انا نمشي نبدل لالة عنداك شي حد يدخل علينا...

كبات توريا زلافة الحسوة دارتها فبلاطو مع عصير التفاح والبنان تعطيه ليها بالپاي...وحطات قرعة سيدي علي صغيرة ليها ومشات دخلات وكلاتها وبدلات ليها وخرجات حطات بلاطو فكوزينة لقات بنتها كتغسل فالماعن ديال العشا ولقات كنينات طلعووو وكلشي صهط فبيتو....جلسات فالمراح تا نزلات مليكة وجلسات حداها...

مليكة : مي نعست !! "حركات ليها راسها"..تي كي درتو لهاد الحيلة...وكون تا ماتت لينا...

توريا : حيلتها هي امليكة..مشيت معاها فالخط..يضهر ليا نجحات الحيلة ونفعات....

مليكة : وخا على حساب صحتها..غامرتو توريا ماهوكاكش هادشي..وخا را نجحات وتواطا ليه الراس المسخوط الي گالها ليه...ماشي دابا نوريه يگول لعمتو داك الكلام الخايب...الله ينعلو كثر ماهو ملعون....

جاوباتها توريا وهي ماحاساش او ماحاسينش... بشكون واقف حدا طوالة الي حداهم و الي كتدي لبيت عيدة...وتسمع على الوذنيييين كلشي من طرف تالطرف...

يتبع...