محتوى القصة
ماعرفو راسهم باش تبلاو...عاد ردات البال لراسها را صوتها تسمع حيث خيالها خرج للعلن...حست باحراج شديد خصوصا من شافت تا دوك العيالات ضارو كيشوفو فيها...ولا النمل سارح ليها فوجهها من كثرة ما مرگت فبلاصتها...حتى نطقات سعيدة حيث خلعتها...
سعيدة : مالك احبيبة ياك لباس ؟...
حبيبة"صرطت ريققها وجهها تزنگ" : مم ماليش هي تفكرت شي حاجة و هضرت بجهد..س سمم س "صرطت ريقها حشمممت من الفرطة بجهد"..س سممحو ليا...
حبيبة "شافت فتيليفون" : صونا بشار ومسمعتوش خفتو يكون واقف كايتسنى ومعصب... راك تتعرفيه فاش تايتعصب هههه..(ولات تضحك بلا ضحك ههه)...
سعيدة : ماوقع باس عيطي ليه...
حبيبة : اه اه نعيط ليه...
هنية"صغرت عينيها فيها" : مرت ولد توريا تبااارك الله مزيناتها ياربي..
سعيدة : هههه الله يبارك فيك...
حبيبة"ماسمعتهاش كانت كاتشوف فتيليفون ودوز لخط ليه"..
هنية : لباس الي ولا يجي لبلادو ويزور ميمتو وخوتو...
سعيدة"تنهدت" : واييه..ايوى الحمد لله...
شوية حتى بانت ليها حبيبة كاتخشي تيليفون فصاكها باقي وجهها مزنگ من الفرطة الي وقعات قبل قليل...وهي تنوض تبسمات لديك هنية بحرج لقات فرصة فين تهرب....اما هنية غير كاتشوف فيها حمقاتها بزينها ولباسها....وشافت فسعيدة...
حبيبة : يلاه خرجي معايا خالتي...
ناضت سعيدة تمشي معاها وهي دور حبيبة عند هنية
حبيبة : بسلامة خالتي...
هنية : بسلامة بنيتي سلمي على راجلك گولي ليه هنية مرت الشايب بوجمعة الي كنتي تجي عدو فالسوق نتا وباك الله يرحمو ويعطيك تميرات وشوية الفاكية...را يعقل عليه مزيااان...
حبيبة : واخا خالتي ان شاء الله...
خرجات هي وسعيدة من البيت بانت ليها عيدة جايا خارجة شادة فيها كريمة الي طلعات ونزلات فحبيبة وتبسمات ليها ابتسامة صفرة...قربات حبيبة عند عيدة سلمات عليها..وشافت فكريمة تبسمات ليها بشوية غير صواب وصافي...
كريمة : ختي حبيبة لباس ؟..شتك تشوفينا ماتسلمي ههه نسيتينا ياك...
حبيبة : لا حاشا اختي...مانسيتكمش هي نتوما مابقيتوش تتسولو فيا..
كريمة : ياك عدك نمرتي ديال واتساب ههههه...
حبيبة : حتى نتي عندك نمرة ديالي...
سكتت كريمة وبقات كاتشوف محتافظة بضحكتها...فهاد اللحظة خرجات زكية من الصالون هي وختها صابرين بانت ليها حبيبة بقات تشووف فيها وهي تخرج... سمعات حبيبة تيليفونها كايصوني وهي تستأذن منهم بلباقة...
خرجات هي وسعيدة بان ليهم عبد القادر جاي قربات عندو حبيبة باست ليه ايدو واخا ماعندهاش معاه من ايام الخطبة والهضرة الي حشا لباها باقي مانساتهاش وهو السباب فهاد الزفاف كامل الي ضحات فيه هي...لكن باها وصاها انه الواجب واجب..حيث باها لحد ساعة مافراسوش بلي حبيبة قبلات بهاد الزواج غير على قبله اما كون ماوقعش داكشي كون هي دابا كاتقرا كأي بنت والزواج هو اخر همها ومكاينش كاع فتفكيرها...لكن المكاتيب والاقدار المرسومة من عند الله مكنتحكموش فيها وكيف كيقولو ماتمشي غير فين مشاك الله...
حبيبة"بمباركة جافة" : مبروك اعمي..
ع.القادر : الله يبارك فيك ابنتي..كيدايرة بخير (كاينطقوها بخااير)..
حبيبة : الحمد لله...
حرك راسو وهي تسمع"حبيبة" بصوت خشين وخااتر وشكون من غيرو بلا مادور عارفاه هو..توادعات مع عبد القادر وزادت مع طريق هي وسعيدة حتى وقفو لعند فين واقف بشار بعيد حدا طوموبيل مسند عليها كايكمي وحداه هاشم وحسام كايهضرو...شافت فيه بان ليها مغوبش ماشي تغوبيشة الي مولفة باينة انه منيرفي شوية...قربات عندو وهو يدور عندها تا شاف ليها فوجهها ماهضر ماتكلم بقا يشوف فيها بلا مايتسوق لاخرين تا ولاو يهضرو مع بعضياتهم وهو كيشوف فيها وهي توسع عينيها فيه باش يحشم والو تا قاليه راسو عاد هضر...
بشار : بيك شي حاجة نتي ؟!..
حبيبة : لااا..مابيا والو...
سكت كايشوف فيها بشك حيث خارجة وجهها باقي مزنگ...وهو يعاود سولها...
بشار : لحگك (هي لحقك ولا وصلك) شي حد ؟!..
حبيبة"حركت راسها ببطء وجهها باقي مزنگ" : ل لا..ماوصلني حتى حد ...هي واحد سيدة كانت لداخل تاتعاود على بنتها مريضة وبقات فيا صافي...
بشار"بقا يشوووف فيها وهو يدور كايحرك فراسو مابغاش يحكر"...
حبيبة : واقعة شي حاجة ؟!..
بشار"حرك راسو ب لا ورجع كايكمي"..
حبيبة : ماشفتيش يوسف ؟!...
هاشم"نقز" : تال صباح نجيبو ليه لمطار يشوفو...
حبيبة شافت ف سعيدة الي غمزتها بمعنى خليه على خاطرو...بقا هاشم كايهضر وهو كايسمع مرة يحرك ليه راسو ومرة يبقى ساكت حتى كمل الكارو وهو يدور عندها وقال "تحركي"...يلاه غادور حتى سمعو صوت الي عرفاتو حبيبة وهما يتشتحو ليها جناوح منخرها وهي دور مغوبشة شافت جيهتها هي وسعيدة وهاشم...
زكية"دايرة ابتسامة خجولة هازة جلايل قفطانها ومعوجة شعرها لجنب ومعوجة تا راسها خلات حبيبة تكمش عينيها خصوصا من شافت انها دايرة بلاش كثير فحناكها حيث فاش سلمت عليهم مكانتش دايراه وهازة قفطان تا بانو شوية من سيگانها بلقيين" : ختي سعيدة..گالت ليك مي گولي ليهم يدخلو يتعشاو عاد يمشيو...
سعيدة : لا زكية غاديين فحالهم..عندهم مايدار...دخلي بركي عما الضياف...
بشار راه دخل لطوموبيل ماشافها كاع واش جايا..حبيبة كانت واقفة كاتسمع فيها حتى قفزت من صوته هو نيت كايقوليها "تحركي فحالك نتي"..ضارت عند سعيدة قالت ليها بسلامة وهي تركب حداه...حتى رجع مارش اغييغ وهو يضرب دوميتور وخرج من الفيرما..كل تشتت فين باغي يمشي الا زكية الي بقات واقفة كاتشوف جيهة الباب منين خرجو...
كملو الطلبة وعلمو الطيابة الي بدات توجد فالعشا فطباسل الي كان عبارة على لحم كثييير بالبرقوق واللوز والدجاج محمر وديسيرات تشاير....تهز العشا وتحط تعمار اتاي فهاد اللحظة جا حسام وتكلم فوذن عبد القادر وهو ينوض على وقفتو قاد سلهامو وراه وشير لحسام يحيد من طريق وتم غادي كايحنحن ويقول الحمد لله الله اكبر...ديما كايتمتم بيهم فاي وقت ومكان...غادي بغوباشتو المعهودة كلهم تريكة وحدة فتغوبيش...حتى خرج لبرا وهو يسرح ايديه وقال...
ع.القادر : الحاج الصافي مرحباا الحاج...تعطلتو الحاج...
م.حفيظ : اشدتني شي خدمة وقع مشكيل فدار دباغ يلاه تا وكان ساليت وجيت هي خطيفة انا والحاجة...
ع.القادر : محبا..زيدو مرحبا وزيد الگدام...
ع.القادر : ترحب بيك الجنة الحاج...
خرجات ناديا من سيارة كاتقاد فشالها نازلة بعباية بلونكاسي مطروزة بالمارون كلها حرير وصاك ديال شانيل مارون هو وصبيبيط...انسانة élégant نيييت...حادرة عينيها ومبتاسمة باركت لحاج وقربات حدا مولاي حفيظ...وهادشي كامل داز تحت عينين توريا الي كانت واقفة فبيتها وكاتشوف من شرجم تا تبسمت باستهزاء وهي دور وكحزت الخامية...
ع.القادر : مالگيتو بشار ومرتو مشاو بكري...مابغا تا يتعشا عمانا..
م.حفيظ : اييه بحرا كنت تندوي مع حبيبة..اه مبرزط صباح عندو طيارة يلاه يرتاح..
ع.القادر : واه داكشي..زيد مرحبا..."عيط بجهد تا كمشت ناديا عينيها وقالت يحصن عوات حبيبة كي كانت عايشة معاهم ديك الايام اللولة مافراسها والو اصلا..." سعيييدة...
جات سعيدة الي الحمد لله كانت خارجة من كوزينة هي وربيعة شافت ناديا وهي تمشي تاتزرب باش تدخلها معاها لصالون حسن ماتجلس مع لاخرين فالبيت وعاوتاني عندها مهمة انها تحمي ناديا من حشيان الهضرة واخا مكاين حد يحشي لكن ضروري تسمع شي كليمات حيث هما خضرين بمعنى الكلمة...سلمات عليها بترحاب كبييير وداتها لبيت وصيفطات كريمة تجيب عيدة الي باغية سبة تخرج من صالون ضرتها هضرة عباد الله فراسها...
دخلات لبيت وهي تنوض ناديا سلمات عليها وجات حتى ربيعة وكريمة سلمو عليها حيث علمتهم عيدة يجيو يسلمو عليها حيث من نساب ديالهم واجب عليهم يجيو...
عيدة"حركت راسها مثقلة وهزت راسها مقرباه لناديا باش تسمعها بدون متشوف فيها" : كي دايرة طفلتك مالها ماجات عماك ؟!..
ناديا : مرة خرا الحاجة..يلاه جا ولدها عندو شي مشاكيل الله ينجيك ومشات معاه لازيلال...تا دابا جينا هي نباركو وبنرجعو يلاه كي طلقو الحاج من دار دباغ...
ربيعة : كون جيتو بكري كون تلاقيتو حبيبة و بشار...حتى هما مشاو مزروبين مابغاو كاع يتعشاو..
ناديا : هههه دويت معاها..ماعليش اه عندو الطيارة بكري خاصو يمشي يرتاح شوية...
سعيدة : وااه عدو بكرييي...
ناديا : كيف بقات الحاجة توريا شوية ؟!..
عيدة : وشوية بنيتي شوية...
ناديا : فين هي بيت نشوفها...
عيدة : طلعت لفوگ عيات..الصحة مابقات ابنيتي ماتعرف كبير ولا صغير...
ناديا : داكشي الي كاين الحاجة..الى طالعة ترتاح ماعليش حتى وكان ونشوفها ثاني...
ربيعة : لا بغيتي دروك نطلع عماك تشوفيها..باقي فايقة كاينة عندها ختها صافية وبنت خوها ليلى...
سعيدة كون لقات تشد ربيعة تجيفها تجياااف تايقطر منها زيت بالفقصة...حيث عارفاها غادي طلعها عندها باش تجمع ماتوصل لمليكة فتيليفون...هزات ربيعة عينيها فسعيدة لقاتها محمرة فيها واحد تحميرة خلات ربيعة تكمش فحوايجها وشافت فعيدة لقاتها مغوبشة...ماشي حيث مابغاتهاش طلع عندها ولكن حيث فعايل ربيعة ديال البراهش...جاب الله ناديا انسانة متفهمة وحيث قبل شافت توريا يعني هادي زيارة تانية مابغاتش تحكر..
ناديا : مرة اخرى ونجي نيشان عندها خليها ترتاح...الله يشافيها...
طريق كلها وهما ساكتين اصلا هي ماقدراتش تهضر معاه من شافتو ماشي تالهيه عرفات غايكون تعضب انه ماقدرش يشوف يوسف...فضلات تدخل فقوعقة تفكير تاني وترجع لهضرة زكية الي كاتلقا راسها عصبتها وتسوس راسها منها...حسات انه باقي ماتخطاتش بشار وبدا كتيدخلها الشك انه ماتزوجاتش بسبابو ؟!..كاتعاود تلقى راسها رجعات تفكر فيها وتعاود تسوس راسها حتى تفكرت انه الصباح بكري غادي يمشي بشار وهادي خلاتها تنسى زكية...كان باقي ليهم ويوصلو لدار شي خمسة دقايق حيث مشا حتى دموندا العشا...ضارت عندو وسولاتو....
حبيبة : بتعطل لهيه ؟!..
بشار"عينيه على طريق" : لا...
حركت راسها ومابقاتش هضرت حتى وصلو لعمارة..نزلو وطلعو لدارهم...خلاها كاتحط فالعشا فوق الطابلة فالكوزينة ومشا كاتسمع فيه كايهضر بالالمانية حيث تا دخل عاد عيط هو...حطات داكشي ومشات هي لبيت جبدات بيجامة وهي دور راسها حيث ولفت تلبسها نيشان...رجعتها وجبدات ضوني وشورط لبستهم ولبسات عليهم كاب طويل حيث دار باردة شوي..ستفات جلابتها وداكشي ودخلات لدوش غسلات وجهها بجيل ونشفاتو وخرجات...كان هو جاي شافها وهو يعنقها بجنب ودخلو لكوزينة جرات الكرسي باش تعشا وجلس تاهو حداها شاد تيليفونو..
حبيبة : مابيتيش تعشا ؟!..
بشار"حرك راسو ب لا"...
حبيبة"عوجت فمها وهي تبدا تاكل حيث كان فيها جوع نيييييت...يلاه تخشعات وهي تفكر هزات فيه راسها" : بيت نبقى هنا...
بشار"هز فيها عينيه" : ؟؟..
حبيبة : بيت نبقى هنا مابيتش نمشي لدارنا...خليني هي هنا...
بشار : معولة يبقى معاك شي حد ؟!..
حبيبة : لاا..داري هادي نبقى فيها حتى تجي...
بشار"الصمت..كايشوف فتيليفونو وخلاها تسنى"..
حبيبة : صافي ؟...
بشار : لا...
كانت عارفة اجابتو غادي تكون الرفض حيث ببساطة ماغايبغيش تبقى وحدها وهي عندها طريق بعيدة حتى لافاك مايمكنش لباها يجي تال عندها ويوصلها ومايقدرش يخليها تبات وحدها فدار وتبقى وحدها كاع بصفة عامة...ناض هو دار قهوتو تا وجدت وهز الفنجان ومشا لبيت وهي مشات لدوش حكات سنانها وخرجات طفات ضواو ودخلات لبيت عندو لقاتو فالبالكون شاد بيسي وكيكمي ...حيدات الكاب حطاتو عند راس ناموسية ومشات تخشات فبلاصتها جرات عليها مانطة وهزات تيليفونها كاتبقشش فيه...حتى سمعاتو سد البالكون ودخل حط لابتوب ومشا تخشا حداها...سرح ايديه بمعنى اجي هنا..تبسمات ليه وتكحازت لعندو تا جرها تكاها عليه وتسند عالمخدة مگعد شوية...بنفس الحركة الي بدا يولفها وتولي معتمدة عندو كايدوز على دراعها العاري ويطلع لحنكها وشعرها...وساااكت ماداويش ...غمضت عينيها تاهي ساكتة واخا قلبها كايضرررب...كاتفكر شنو دير من الي يمشي كيفاش غاتبدا الخطوة الي قررات انها دير موراه...خصوصا انها خطوة جديدة عليها وتجربة جديدة...شحاال غايجلس واش يطول ولا كيف ديما يومين ويرجع ولا شحال...كاتفكر كيفاش كانت كتبقى عادي ملي يمشي مكتحس بوالو سوا انه فلول كانت كاتخاف منو فاش يقرب يجي مكانتش كتحملو وكان الكره هو الشعور الوحيد الي من جيهتو...كيفاش طور الامر واصبح "حب" في طور عشق كبييير...كيفاش قدر يخليها تسامحو وكيفاش تقات.ل وعاش بزاااف تجارب كبيرة فشردها باش يخليها ثيق فيه وتسمح ليه الي حتى وصلو لمرحلة تبغيه وهاهي دابا كاتحس انها ماباغياهش يمشي وانه "الاشتياق" بادي من دابا...اما هو خلاص غايخلي قلبه معاها..القلب الي خلاتو كايعيش الحياة بنكهة جديدة...نكهة "الحياة" نيييت...
شوية حلات عينيها من الي سمعاتو نطق بصوته الي خشين ومدعدعو الگارو...كايقول "ديري بالك مع تيليفونك"..
حبيبة"حركت راسها وتكلمت بصوت منخفض" : واخا...
رجع سكت وحط راسو على راس السرير حتى حس بيها كاطلع فالمانطا على رجليه نزل عينيه كايشوف فدوك ليديدات ودرعانها الي كايبقى يشووف فيهم..كلها ولات كاتخليه يسهى فتفاصيلها..وجهها ايديها رجليها...عارف انها زوينة بزاف لكن فنظرو هو كاتبان ليه مميزة..مميزة بتصرفاتها مميزة بزينها عندو..مميزة بحنيتها.."حبيبة" هي الحياة بالنسبة لبشار الشخص الي نهار عشق عشق الحياة بحبيبة...الي مستعد يتعالج وهي الدواء..مستعد يكمل وهي الهدف...حبيبة الي خلاتو مايرجعش لاسوء صفة فيه الي هي احد نتائج المرض النفسي الي فيه..والي هي ايذاء جسدو...من الي بغاها مابقاش كايجرح راسو عند كل عصبية مفرطة او حالة جاتو...وهادشي حاجة ايجابية وهنا تلخصت بان حبيبة هي العشق والحياة الي عطاتو هي الجزاء...
كانت كاتشوف فنقطة بعييدة حتى سمعاتو كايقوليها "نعسي"...ماحس حتى بانت ليه حطات ايدها على كرشو بحركة شجاعة لكن هو خلاتو يغمض عينيه حس بتبوريشة شداتو ورجع حلهم من سمعها قالت...
حبيبة : مابيتش نعس..هي خليني حتى نمشي معاك لمطار...
ماكانش عندو جهد باش يتقاشح معاها ب لا ونعسي ولا وبلا بلا اصلا راسو منيرفي شوية من فعايل مو حيث عرفها علاش مابغاتش تحليه يشوف يوسف باش تجبدو ويمشي يجرو بسيف ودير عليه شهود انه تهجم وهو عااارف تفكيرها مرييض وفين يوصلو عارف انه مغاتعقلش عليه واخا يقولو ليها را لقينا بشار مكفن ماتهتمش...حياتو كلها كرسها انها ترضي عليه لكن بدون جدوى حتى كرهاتو فحياتو الي كون ما عطاه الله هاد بنت ناس..
"الرحامنة"...
الي باركو مشاو فحالهم والي باييتين حيث بعاد فرشو ليهم بلايصهم...واليدين مباركة وعائلتها مشاو بكرييي حتى يجيو الغذ ليه يجيبو ليها الفطور وهادي من العادات وتقاليد...تسالم عبد القادر مع شي رجال باركو ليه..كان بجلابة بيضة وسلهام بيض وعصابة فوق راس صفرة...ريحة المسك عاطية منو...دخل لدار بانت ليه عيدة غادية لبيتها...
ع.القادر : الحاجة..."مشا لعندها حرك راسو ل كريمة خلاتها ليه ومشات..دخل معاها تال البيت جلسها فناموسية وبقا واقف"..
عيدة : سير تصبح على خير الحاج..مبارك ومسعود..
ع.القادر"حرك راسو مثقل" : بنت الخير...
عيدة : من الجد للبو (زعما بلا ماتحتاج تقولها معروفة عليها وعلى تريكتها)...سير لحگ عد عروستك..الواجب درتو عماك ماتسالني منسالك..لگيتي جهدي تسالا اما نهزك بايدي وبسناني...وليني تصابت صحة بنت لحرام والعبد مايرحم.. (حشاتها ليه)..
حرك راسو وقاليها "تصبحي على خير"..تسناها تجاوبو لكن ردات عليه براسها..وهو يدور وخرج من البيت بانو ليه الكنينات كايمشيو ويجيو واشراق تجمع معاهم...ومشا لبيتو جديد داخل على عروستو الي كانت جالسة جنب سرير حادرة راسها وتفرك فايديها...عارفة راسها لمن تزفت لراجل قد بوها وكبر...عارفة راسها الى ماقبلاتش بيه مكاينش الي يتزوجها خصوصا عارفين انها مكتولدش !!.....سمعات البواني تحل وهي تهز راسها من بان ليها داخل وهي توقف منزلة عينيها تا قرب عندها وهي تحنى باست ليه ايدو تا طبطب ليها على راسها...
ع.القادر : الله يرضي عليك...
مباركة"مد ايدو بغا يحيد سلهام والجلابة وهي توقفو حطات ايدها فوق ايدو وقالت ليه "نعاونك الحاج"..خلاها دير مابغات...عاوناتو حتى بقا غير بتريكو نص كم تحتي بيض وسروال قندريسي...من برا كان بيتهم شاعل فيه ضو..ضار زكريا كان واقف هو وحسام ونغزو يشوف تا بان ليهم ضو طفا...
زكريا : صافي تمغطو...شاف الركاني واخا مضهصص...
بقات مخشية فيه وهو بقى بنفس وضعيتو ماساخيش تحيد من حضنو...مدفياه ومدفيها...سكوووت فديك الغرفة من غير صوت انفاسهم المخربقة حتى كسرات الصمت بسؤالها...
حبيبة : بينا نبقاو هاكا ؟!..
بشار : كيفاش ؟!..
حبيبة"بصوت هاادئ" : بينبقاو فهاد دار...
بشار : لا...
حبيبة : بيتي تبدلها ؟!..ملي تسالي المحكمة ديال يوسف...
بشار"ماعارفش اصلا اشنو يدير...حيث الى حكمت ليه المحكمة ويقدر يتكفل بيوسف ماغايقدرش يديه معاه لهيه حيث واخا يتحكم مايمكنش يمشي معاه الا اذا سنات ليه الام باش يخرج وهو عارف ان توريا غادير ليه العصا فرويدة...ف عندو الحق يعيش معاه هنا فالمغرب اما يخرج برا خاصو موفقة الام...وهاد دار ميمكنش يبقى فيها حيث مكرية بفراشها عاد هو حياتو كاملة تبنات فالمانيا فصعيب عليه يعيش حياتو كلها هنا...ماجاوبهاش حيث براسو ماعارفش اش غايدير من بعد...حدو زير ليها على كتفها تا هزت راسها بان ليها مغمص عينيه وهي تسكت يمكن حسات بيه باغي يرتاح باش يفيق بكري...
ايييوى الي قالت ليه بغيت نبقى فايقة ضحك عليها نعاس وغلبها... اما هو مانعسش بقا فايق يخمم... قادها فبلاصتها وباسها ففمها بوسة مطووولة...وناض ديريكت هز وراقو من الكوفر فور الي فالماريو حطهم فشكارة ديال لابتوب...خرج من البيت وداز ديريكت لدوش دوش مزيان وخرج بدل عليه لبس حوايجو الي بيهم غايخرج لمطار...حط جاكيط ديال الكوير فوق كرسي ديال طابلة المراح وداز لكوزينة...كانت ساعة الخامسة صباحا..دار قهوته غير عمر الكاس هزو وخرج برا كايكمي ويشرب فيها...غير قرب الحال وهو ينوض ومشا دخل البيت عندها يفيقها...
الساعة السادسة ونصف...قدام مطار المنارة مراكش...وقف سيارة..البرددد كان شديييد فداك الصباح فالمدينة الحمراء...داكشي الي قاليه هاشم هو الي كاين...فالوقيتة الي قاليه وقف فيها سيارتو نيشان...ضار عند حبيبة الي كانت مخشية فكبوط بالقب فوق سورفيت دافية...وقاليها تنزل...نزلو بزوج غير ضار وهو يخرج يوسف من طوموبيل ومشا كايزرب تلاح على بشار بتعنيقة قوييية حتى دور عليه ايديه كايبوس ليه فراسو ويعاود..توحشو بزااف..يوسف الانسان الوحيد الي كان بشار كايحس براحة بمجرد مكيشوفو...هو عينيه لدرجة دعا مو بسبابو...
يوسف : خويا وحشتك بزااف...
بشار"باس ليه راسو" : صحتك مزيانة ؟!..
يوسف"حرك راسو وشاف فحبيبة الي سرحات ليه ايديها ومشا عندها عنقها فرحان" : ابيبة باس عليك..
حبيبة : الحمد لله ونتا بيخير..
يوسف : بييخير..اصيفط ليك واتساب اشنو رسمت ؟!..
حبيبة : صافي وانا نوطي ليك...حتى نرسليك ثاني ملونات واوراق رسم ياك باقين عندك هادوك ؟!..
حرك راسو فرحان وبشار حاضيهم حتى جا حداه هاشم الي شاف فساعتو...
هاشم : باقي شوية الحال ؟!..
حرك راسو...بقاو تما واقفين عند باب المطار حيث ميمكنش يدخل لداخل من غير المسافرين...مرة يهضر مع يوسف ومرة مع حبيبة ولا هاشم...حتى ضارت حبيبة وهي تبان ليها سيارة باها داخلة...
حبيبة : بابا هذا !!..
نزل منها وتم جاي لعندهم سلم عليهم وهو يعنق يوسف هاد المرة كايضحك معاه..وبشار حااضي كيفاش كايهضر معاه تقولي ولدو ويوصف كايضحك حيث مولاي حفيظ عندو قشابة كبيرة ونشوطي...قرب بشار عند حبيبة...
بشار : تحركي معاه ملي نمشي...
حبيبة : باقي ماجمعت حوايجي...
بشار : يلحگ معاك قضي غراض وتيسري معاه..
زفرت بقلة حيلة...بصح ماكاينش الي يرجعها من غير باها...الي هضر معاه الباارح وعلمو باش يجي ليها بهاكا يرتاح من الي يمشي...الوقت وصل ديال طيارتو وبلي خاص يدخل يدفع الباكاج ويكون ساعتين قبل اما الباكاج ماعندوش مابغاش يجمع حيث عندو لهيه اصلا وباغي يمشي خفيف...سد الباب ديال سيارة من بعد ماجبد منها لوازمه وخلاها فالباركينغ الخاص وعطا الساروت لهاشم يجي ليها فاش يكون مسالي ويديها...تسالم مع هاشم ويوسف وهما يمشيو جيهة سيارة ديال هاشم وخلاوه مع حبيبة الي بداو عينيها يغرغرو..قربها لعندو دار ليها القب على راسها وخشا ليها شعرها وزاد طلع ليها سلسلة الكبوط...
بشار : متني الحوايج شوية يا حبيبة..
حبيبة"حركت راسها مدلية شنايفها حابسة البكية": ماتنساش دواك..والى ضرك راسك تكا رتاح عافاك...
بشار"خشا ايديه تحت القب شد ليها حناكها بايديه وطلع صبعو كايدوز على عينيها مسح ليها شي دميعات خفاف...وبقا كيشووووف فيها وهي كاتحاول تشوف فيه وترجع تنزلهم...حتى هز راسو وزفر بجهد وضار هنا وهنا بانو ليه لاخرين بعاد ممدينها فيهم كاع ورجع ضار عندها وهو يتحنى حط شنايفو فوق شفايفها تا غمضت عينيها ونزلو دموعها...حست بقلبها كايضررب يضررب..ماحيدش فمو بقا هكاك مخليهم شي زوج دقايق ولا كثر وهما هكاك حتى ضغط بفمو مزيان وجر ليها شنايفها بمصيصة خفييفة وطلع باس ليها راس منخرها حتى توخر بجبهتها وقال مودعها...
بشار : ماتبرزطيش بالي معاك...
تحنى تالعندها عنقها وطبطب عليها...وقاليها "سيري" حركت راسها ومشات وهو يتم جاي عندو مولاي حفيظ تسالم معاه...
م.حفيظ : طريق سلامة...
حرك ليه راسو..وعينيه كانو نازلين كايسوفو فساعة ايدو...حك شنايفو بسنانو مطول بتفكير...وهز راسو وشاف فيه...
بشار : تجيك فشكل لا وصيتك ؟!..
م.حفيظ : گول اولدي خوذ راحتك مرحبا...
هز بشار عينيه بانت ليه حادرة راسها وكاترسم دوائر بسبرديلتها فالارض..عرفها كاتبكي ورجع شاف ف مولاي حفيظ...وقاليه اغرب جملة سمعها مولاي حفيظ ويمكن غيره...
"تهلا ليا فبنتك"....
وقفات قدام الكوافوز وهزات مشطة بدات كاتمشط فشعرها ...رجعاتو لور وشداتو بقراصة صغيرة...هزات ساعتها كاتركب فيها حتى تحل الباب والي عارفة شكون ممكن يكون يا ناديا يا عمتها يا اختها صغيرة...ضارت ناحيتها...
لطيفة : لبستييي...
حبيبة : اه..جا بابا من المخبزة؟!..
لطيفة : جاا هي هبطي...
ضارت ناحية الفاليز الي جابت باقي مخلياها مفتوحة كاتهز منها من نهار جمعات فيها الحوايج خلاتها هكاك كاتقوليهم ممكن يجي ونصدق جامعة عاوتاني...لكن هما حسو بيها بلي ماساخياش وهادشي جاهم جديد ف حبيبة حيث فاللول كانت كتفرح بزاف تجي لدارهم دابا تبدل الوضع كليا تقريبا...
لطيفة : اه اه حلفتي ماتحطي حوايجك فالماريو...
حبيبة"تبسمت"..
لطيفة : دوا معاك ليووم ؟!..
حبيبة : البارح بالليل قبل مانعس..كان خدام فلابو فالخدمة..دابا بايكون عند الطبيب الي متبع معاه...
لطيفة : هكاك..ايوى يلاه هبطي تفطري باش تمشي لقرايتك...
خلاتها كاتكمل فلباسها ومشات..ضارت هزات صاكها دارت فيه اش تحتاج ومشات لمجر جبدت تقاشر يلاه كي جلست تلبسهم تا سمعات صوت ميساج فالبلاصة نقزت مجبدة فوق ناموسية حتى وصلات لتيليفونها....فتحاتو نيشان لقاتو راسل ليها رسالة...بلي راه غادي يدخل يدير شي فحوصات عند الطبيب الي متبع معاه على الصرع...
من نهار مشا وهو كايهضر معاها قليل شوية حيث من الي مشا وهو مضغوط بالخدمة الي عندو...هو اصلا هاكا داير غير معاها الي تعود شوية يهضر ويقوليها اش غايدير وفين غادي اما هو هادشي ممولفوش اصلا...خلات ليه رسالة بلي غاتمشي لافاك حتى تخرج وتقولها ليه باش الى بغا يعيط ليها....شافتو قرا الميساج وماردش...صافي ماحكرتش يمكن حتى هي بدات تولف على هاد التصرفات الي فطبعو...هزات تيليفونها وصاكها وخرجات لبسات سبرديلتها ونزلت لتحت لقات اللمة الي شحال ماشافتها...اللمة الي عند طابلة الفطور،، خوتها جالسين كايفطرو وناديا مخرجة شي حاجة من الكوزينة ورقية وراها...وباها الي جايب شي حاجة من المخبزة نفس الطريقة تفكراتها ف بشار حتى هو كل صباح يخرج يجيب شي حاجة كيما كانت مهم مايدخلش لدار ايديه خاويين...تنهدات بحزن حيث توحشاتو من داك النهار الي مشا وهي حاسة بفراغ..ولفات معاه شحال من حاجة..تزادها حتى الحب الي من جيهتو وضاعف ليها الاشتياق...هي دابا غيير معدية ومصبرة راسها انه مغايتعطلش على حساب ماقاليها وبلي غادي يحاول...وكيف مولف الى طول بزاف اسبوع وكايرجع...تنهدات وهي تقول فخاطرها "نتمنى مايتعطلش"..وهنا تأكدات انه من هنا لقدام ماغاتبقاش تقدر على فراقه...حيدت سبرديلتها ودخلات عليهم لبيت....
حبيبة : صباح الخير...
م.حفيظ : صباح الرباح ابنتي..گعدي تفطري خلاص باش ندركك لقرايتك ونمشي نتيسر...
دخلات حدا عمتها وايوب وجلسات حطات ليها ناديا كاسها ديال اتاي...هزات تيليفونها كاتشرب فاتاي وتبقشش فيه...لطيفة نغزات ايوب وغمزاتو بعينيها...
ايوب : سوليها تگوليك هييي تنشوف فشي بحث...والبحث باين من هنا...
لطيفة : وايلي ؟!..
ايوب : جربي..
لطيفة : حبيبة..شربي كاسك ماتلهايش فتيليفون...فاش تتشوفي تم...
حبيبة"شافت فيها" : هاا..والو هي تنشوف فواحد البحث...
ايوب"جاتو ضحكة وسط الكاس" : كخخممم هههه...
شافت فيه حبيبة ولطيفة حبست ضحكة وهي تنغزو باش يسكت وقالت ليه " اهياتا هنينا"..
حبيبة : اش كاين ؟!..
ايوب"شاف فيها حابس ضحكة لقاها مخنزرة فيه" : اهيا جمعي عينيه اه عامرين هي ما...
حبيبة : اش بيتي دير ليهم ؟!..
ايوب"مستغل الفرصة ان مولاي حفيظ مشا لطواليط يغسل" : بنفگسهم...
لطيفة : لعنو شيطان اوا ههههه...
حبيبة : اجي ضربني هي اجي جرب...
لطيفة : اهي تايضحك معاك ويلي...ناديا هضري...
ناديا : اهيا بعد منها دابا يتقلق علينا راجلها هههه...
حبيبة"سمعات راجلها وهي تزنگ وتزادو فيها ضلوع حيث عارفة اش تايسوى راجلها.." : ايوى حرررربوش...
ايوب : اهيا راني نسيت واش مزوجة عتيها دل..
لطيفة : وعرفتي راجلها گداش هي توقف حداه تشدك الساكتة والمسكوتة...
ايوب"طل عليها برويسو" : سمحي ليا ختي انا باقي عزبزب (اعزب)...
حبيبة"غوبشات فيه ورجعات كاتشوف فتيليفونها تا نطقات ناديا وقالت ليه تحطو باش تفطر وهي تحطو فالبلاصة ماعاوداتهاش معاها...كملات فطورها ووصل الوقت باش يوصلها باها...خرجات هي وياه..ركبو فالسيارة وانطالق مباشرة للكلية...
م.حفيظ : معاش خارجا ؟!..
حبيبة : الوحدة...
م.حفيظ : صافي هي هاديك نخرج من جامع ونجي عندك..."وقف سيارة عند باب الكلية" خاصك شي حاجة ؟!..محتاجة فلوس ؟!...
حبيبة : لا لا عندي...
باست ليه ايدو ونزلات من سيارة...دارت صاكها فكتافها وشدات بوليكوب كبير فايدها محرفة بيه..وتمات غاديا قاطعة شانطي...تفكرات الوقيتة الي كان كايوصلها هو ويبقى واقف حتى كاتدخل عاد كايزيد...غاديا بشوييييا بسباب تفكير خلا خطواتها تولي بطيئة...حتى وقفات وهي دور لقات باباها باقي واقف...هزات ليه ايدها شيرات ليه وهو بدوره خرج ايدو شير ليها وهو يزيد...غا بان ليها مشا وهي تمشي حتى هي...دخلات لداخل ولانها توحشاتو من دابا قاليها راسها خليه على اطلاع حتى بتفاصيلك الي كيعشق بما انك بعيدة عليه...وقفات لدقائق جنب واحد سارية وجبدات تيليفونها ديريكت لواتساب وكتبات ليه...
حبيبة : انا فلافاك.."هزات تيليفون وتقابلت مع لونفي صوراتو بلي قدامو ورسلات ليه"..بندخل دابا...مانخرج حتى ل 1...هي نخرج خلي ليا اوديو گوليا اشنو گاليك طبيب...
كاتحس بكلشي غريب عليها فهاد لافاك...حاسة بفراغ غرييييب واقع معاها...خشات تيليفون فصاك وكملات طريقها لونفي...
"الرحامنة"...
واقفة قدام الماريو الي مدتها ليها تدخلها للرف ديال الحوايج...كان اغلب الحوايج جداد كيف معروف العروسة ولابد تجي بحوايج جداد...منهم الي جابوهم ليها فالدهاز وشي من دفوع وشي شراتو ودارتو فالفاليز بلا مايبان فدفوع ولا الفطور الي جابو ليها نهار الصباح ديال اول يوم فزواجها...
مباركة : تكمل سبعيام وسيري لا تبركيش هنا...
زكية"توقفت وشافت فيها" : ياك امباركة...
مباركة : ماتعيقيش ازكية..را تدي العيب..صبري تادوز وقيتة وجي بركي عمايا..وزايكون علاش باغية تبقاي نتي ؟ هو ماعايشش هنا راه لهيه برا على ما گاليا عبد القادر يامس را مشا لهيه وخلا مرتو فدارهم...
زكية"بقات ترمش فيها وهي تمد ليها بيجامة" : انا ماعندي بيه غراض علاش باقي يحساب ليكم مزال عيني فيه...
مباركة : وفاش عينك ؟!..
زكية : ماعيني فوالو..شدي...
مباركة : ايوى عنداك تنساي بلي فضااااو عمانا من العام لول مازال عدك 14 ولا 16 ولا مانعرف...الدرهم باقي مالحگتيها (درهم هي عشرين عام)...كون ما فشوش با ليك كون راكي مجوجة بسيدو "خشات البيجامة فالماريو" وليني الراس عدك خاوي خاااوي ابنت ميمتي وبويا...
زكية"بدلت الموضوع" : شدي...وگولي ليا من جينا عدك البارح صباح ماعاودتي ليا كي دازت ليلتك لولة عما الراجل هههه كاين شي ولا مكاينشاي...عاودتي غا ليلى ختي وانا لا...
مباركة"ميقت فيها" : مزينك...اش بغا يكون راه راجل كبير دار على گد جهدو وتگلبنا نعسنا...
زكية : هاويلي...
مباركة : هههه قضا الراس اللول وضار نعس...
زكية : كيفاش قضا راس لول ونعس...العاار اخويتي شرحي ليا ههههه...
مباركة : هههه نعل مك...عياان جهدو تانتي راه كبيير ا زكية..الراس اللول وسخف ليا وتكا نعس..قرب الفجر يوذن ومشيت وجدت ليه دوش والحوايج غا دوش توضى وخرج صلى غا فالدار جامع مابقى گد يمشي ليه...
زكية : هههههه هاوييييلي...
مباركة : هععع ضحكي تهجريه ههه...
زكية : هاو مالك يا خويتي على حالتك...
مباركة"بجدية" : زكية را تجوجنا بيه نتسترو تحت جناح زييين وهمة حسن مايلبقوني لشي حد كيما كان غا باش منبقاش ليهم مسكة لاصقة فقراجطهم...لباس الي خطبني الرحماني "باست ايدها وجه وضهر"..نحمد الله...
زكية"الصمت"...
مباركة : هضرة المعقول والي كان خاصك تسمعيها مني..."سكتت" وكون كنتي لالة ومولاتي كون تانتي فلتي براسك را غذا ولا بعدو يفوتوك واليديك بغات تبقى دار لخويا الكبير والتهامي ونتي عارفة عيالاتهم كي الخرا حاشاك...هاو زيدي طاريق الي غايجي من برا تاهو يبغي يتجوج شوف كي بغا يجيبها تاهي وكي طلعت نوارتها...
هضرة مباركة نقدرو نقولو على صواب...لكن كانت موجهة للشخص الغلط الي اصلا راسها وقلبها معمراهم بشي حوايج كبرو معاها وعششو فيها يعني صعيييب انها تسمع ليها ودير بنصيحتها بل مستحيل...دخلات ليها من هاد الوذن وخرجت من الوذن لاخرى...بقات معاها كاتكمل تستاف الحوايج والهدايا فبيتها...حتى وصل وقت الغذا وعيطو ليهم يخرجو يتغذاو حيث كانت معاها امها وحتى زكية بينما تكمل سبعيام ودير العادة واخا را كدار لعروس البكر اي الي عندها العذرية قليل فين كايديروها لشي وحدة فايت مزوجة..وطبعا العادات كاتختالف حشب كل منطقة وحتى حسب كل عائلة...
وصلات الوحدة وخرجو الطلبة من الكلية وكاين الي يلاه داخل...خرجات من لونفي راسها كايدور...شافت ساعة فتيليفونها لقاتها الوحدة وشي قسم...لقات اتصال من باها دوزات ليه الخط قاليها بلي راه كايتسنا فيها...شعلات الكونيكسيون كاتسنا فميساجة كاع الرسائل وصلوها الا "الرسالة المهمة" الي بغات هي...دخلات ديريكت لقاتو باقي مادخلش من الي رسلات ليه ماداخلش...تنهدات بحزن وهي تمشي لعند باها..ركبات سلمات عليه...
م.حفيظ : يلاه ابابا نديك ونمشي لدار دباغ...
حبيبة : علاش واقعة شي حاجاا ؟!..
م.حفيظ : گولي اش الي مواقعش..الخدامة تشادو ليا على شي حفاري..وواحد الكوموند تعطلات لواحد الوزين...وشلاااا بنتي مشكيل يولد مشكيل وكثرو الحفايد...
حبيبة : ااه..
م.حفيظ : واحد بشار مادواش معاك ؟!..
حبيبة"زفرت وحركت راسها ب لا" : لا...
م.حفيظ : اه اه واطرني بركت على الهم يا بنتي هههه...
حبيبة : ماعرفتش علاش ماداخلش..تنتسناه هي يجاوبني اشنو دار عند طبيب...
م.حفيظ : بايكون ماسالاش ابابا...صبري ابنتي ماتزربيش وتهزي الهم بكري...
حبيبة"حركت راسها...يمكن باها حساب ليه انها مشطونة عليه حيث مشا عند طبيب ماعارفش ان الاشتياق والتعلق لاعبين عليها من جيهتو...توحشاتو بزاف وهو ليه يلاه يومين او ثلاث ايام تقريبا باش مشا...يلاه حطات راسها كاتشوف فالطريق حتى صونا تيليفونها وهي تقفز خلات باها كايضحك ويحرك فراسو بلا حول ولا قوة...حساب ليها غادي يكون هو لكن كانت سعيدة...
حبيبة : خالتي سعيدة...
سعيدة : كيدايرة بنيتي لباس..
حبيبة : الحمد لله..ونتي كيداير عمي هاشم وحسام والبنات..
سعيدة : وجمعي كلشي وگولي لباس...راني عيطت عليك غذا نشاعلاه نجي عندك...
حبيبة : بصح..وواخا خالتي مرحبا...
سعيدة : يلاه دوزي بخير نسالي ونهضر عماك فواتساب..
يلاه كي قطعات معاها وهو يصوني ليها تيليفونها وبانت ليها سميتو الي زادت عليها قلب "💓BACHAR"..ضارت عند باها وتبسمات بخجل تا حدرت عينيها كاتضحك حيث غمزها...وهي تطلق الخط والايربودز فوذنيها وقالت..."الو بشار"..
ضارت جيهة باها الي ضحك عليها وهو يدور مركز مع طريق وشاف بجدية باش تهضر بخاطرها بلا ماتحشم...
حبيبة : لباس عليك..تعطلتي بزاف..
بشار"كان سايق وطالق السبيكر فسيارة كايسمع صوتها الي كايتسمع فسيارة كلها منغم بيه..حتى هو توحشها كثر منها هي ماتوحشاتو.." : الوقت مزير شوية...
حبيبة : اشنو درتي..شنو گاليك طبيب ؟!..
بشار"وقف طوموبيل قدام البناية وبقا فالسيارة حتى يسالي معاها..تفكر الحصة الي كانت عند طبيب النفسي على حساب المهدئ حيث وصل الوقت باش يدير ليه دياغنوستيك يشوف واش ينقصو ليه ولا يحيدو ليه بالمرة...ماعرفش واش يجيها لصراحة ولا يختاصر بكلمة ولا اش يدير...اكره حاجة عندو هو الكذب و تلباق...يعني يلبق اي حاجة باش ثيق..بقا ساكت وحتى هي بقات ساكتة كاتسناه يهضر...حتى لقات راسها وصلات لرميلة..وباباها وقف سيارة فراس الدرب تا سمعو بشار نيت قاليها هاكي ساروت سدي وتبعيني...عاد قدرت ترتاح حيث جالسة حدا باها وميتة بالحشمة..."...
حبيبة : بشار...
بشار"غمض عينيه من صوتها المنادي باسمو وشحال نغمو وزاد من اشتياقو ليها...جر من الكارو وساط دخان وهو يشوف جيهة العمارة ونطق بصوته المغموق بدخان سيجارة" : التبرزيط وصافي...
حبيبة : درتي سكانير ؟!..
بشار : لا..ديجا درتو شي 2 mois هادي..
حبيبة : وشنو درتي اشنو گاليك...اه خليت ليك ميساج تگوليا شنو گاليك طبيب..
بشار : مازال مايعلمني هاد الساعة just des analyses وكونطرول..
حبيبة : ااه..
بشار"نطق وهو كايطفي الكارو فطفاية" : فينك نتي ؟!..
حبيبة"ضارت شافت دربهم" : فطوموبيل..يلاه جابني بابا مشا يجيب شي حاجة من دار وبايمشي لدار دباغ...
بشار : نزلي..نسالي شي حاجة ونهضر معاك...
حبيبة : واخا...
"سكتت شحااال حتى كانت بغات تقوليه امتى غاترجع وهي تفكر انه يلاه مشا يومين هادي اصلا...حسات بيها كأنها عاام...حتى سمعاتو نطق كاسر ليها صمتها"..
بشار : مالك ؟!..
حبيبة"تنهدات تا تسمعات ليه فطوموبيل" : ماماليش..واخا بينما دخلت ورتاحيت شوية..
بشار : عيانة ؟!..
حبيبة : لا هي صداع ديال ليكوغ ضرني راسي...
بشار"سكت شحال تاهو ماساخيش بالهضرة معاها...اول واحد يطول معاه فتيليفون كونه شخص ماشي اجتماعي حتى فالمكالمات الهاتفية...عاد استانف الكلام وناهي الحديث" : تهلاي ليا فراسك..
تبسمات وهي تجاوبو...وتسالا حديثهم الي بقد مكان وقته قصير شوية بثد ماكان عميق حيث كل واحد فيهم حاس انه موحش لاخور والهضرة ماغاديش تقدهم...شي حوايج جداد كايعيشوهم فالبعد ومشاعر كاتولد جديدة وهما كيجربو اول سفر غايبعدهم من بعد بداية علاقة جدية بيناتهم علاقة حب خالية من اي مصلحة ووعد معطي...
هادشي كامل كايعيشوه وتعاش...كل حاجة تعطاها رد فعل واحساس...ولكن بزاف الحوايج خاصهم علاج...وبزاف الامور خاصها توضح من بينها بعض المسائل الي باقي ماصارحهاش بيهم والي واجب عليها تعرفهم واخا صعيب عليه الحال يبوح بيهم...
جر الكرسي وتقابل معاها بجلستو المعهودة بهيبة وصلابة جالس مقابل معاها هي الي كانت مبتاسمة ليه من بعد مارحبات برجوعو مرة اخرى واصرارو انه يجي بنفسو يزورها حيث الحصص عن بعد مكانتش كافية...
نادين : كيف حال حبيبة "بابتسامة شافت فيه"..بيخير...
بشار"حرك راسو مثقل"...
نادين : كيفاش دايرة علاقتكم حاليا لاي مستوى واصلين ؟!..
بشار : الي مرتاح فيه خاطرها...
نادين"بقات كاتشوووف فيه" : وخاطرك...
بشار : ماعنديش مشكيل..
نادين : تكون مرتاحة ترتاح..."مجاوبهاش"... relation se.xuelle( علاقة جن.سية) ؟؟...
بشار : واكلة الدق...
نادين : هادشي متوقع...
بشار"الصمت"..
بدات كاتكتب فشي ملاحظات استمرت الكتابة ازيد من دقيقتين...اما هو كان ساااهي فاخر محاولة دار معاها فاش غوتات ودفعاتو..كيفاش كانت مزيانة فلول من بعد حتى عطات داك رد الفعل...رجع من السهو بمجرد مارجعت استانفت طبيبة كلامها...
نادين : هادشي كان باين وهذا هو الطبيعي..قبل خبرتك بيه وشرحت ليك بالتفصيل...ماشي بحسب دراستي ولكن بحسب الخبرة...الزوجة ديالك ماكانتش اول وحدة تعيش هادشي...كاين الي عاش اكفس منها وماتجازوش بسهولة...كاين الي ماقدراتش تتجاوز...كاين الي فكرة الانت.حار كانت هي الحل...كل وحدة وحسب الشخصية وحسب اشنو عاشت...يعني هادشي الي شفتي منها طبيييعي جدا...وواجب عليك تصبر الى كنتي باغيها تكون ليك بالخاطر ولا تبقى معاك...
بشار"الصمت"...
نادين : حاجة اخرى..."كتبت شي حاجة ورجعت شافت فيه"..حتى هي خاص تعطي ايفوغ باش تصلح هاد العلاقة الى حتى هي كاتبادلك نفس المشاعر...
بشار"گرن حجبانو" : ؟؟؟...
نادين"حطت ستيلو وربعت ايديها فوق المكتب" : حتى هي خاصها تزور طبيبة مختصة...المشكيل ماشي غير معاك..المشكيل كايعنيها هي شخصيا...حتى هي خاصها تخرج من هاد التخوف سوا معاك...سوا...
حبسات الهضرة حتى كانت غاتقولييييييه سوا مع غيرك جاب الله الطبيب لاخور موصيها انه دير بحساب بلي هو رجل شرقي ود.مو حامي..غير انه مرييض يقدر يلصقها مع الحايط لكن احترام انه من ثقافة شرقية يكفي انه يخليها تفهم بلي ماغايعجبوش الحال يسمع بحال هاد الاحتمال عاد هي عارفة شحال غيرته حارة غير من هضرته وحسب خبرتها وشنو عاود ليها عارفة الحجم)...
نادين : على اي حتى هي خاصها زيارة طبيبة مختصة..."سكتت كاتشوف فيه كان ساهي وعينيه فالارض وعاقد حجبانو بجهد..وعاود تكلمت مبدلة الموضوع لجيهة اخرى"...
نادين : شنو السبب الي خلاك تأجل موضوع العلاج السابق فالمصح ؟!..
بشار"كان ساهي فالارض تا هز عينيه ونطق" : صعيب عليها الحال...
نادين : غايزيد يصعاب كثر..
بشار"الصمت"...
نادين : غادي نعطيك مثال عيش معاه وعطيني رد فعل باش حسيتي...ولا اجابة تفهم..."شافتو حرك راسو وهي تكمل"...في حالة عرفت منك انك كاتعالج فمصح وبغات تبعد منك ولا خافت شنو ممكن دير...
بشار : مانصيبش...
نادين : تحبسها ؟!..
بشار : لا..
نادين : تخليها على خاطرها ؟!..
بشار"الصمت"...
نادين : شحال ما طول الوقت... كان الحال اصعب...ممكن تتكسر الثقة الي تبنات بسهولة بالغة جدا..تعرف منك حسن ماتعرف من غريب...لا من ناحية المصح ولا من ناحية مشكيل الاب ديالك...
كايسمع ليها وغير مازادو دوك الحجبان تلاقاو...عينيه ولاو حمرييين بمجرد ماكيتفكر انه الى عرفت غايكون صعيب الحال...شي حاجة فخاطرو كاتهرس شيئا فشيئا...هو ماعارفش هاد الاحساس من غير انه كيحس بالي خاجرو كايضرو بجهد...هز راسو لفوق شحال ورجع شاف فيها غير شوفة هي بانت ليها فشي شكل...حتى نزل عينيه وشاف فيها...وتطلم يمكن احد احزن ماقيل من عندو...كأنه عطا مثال بان مو ومارحماتوش وهو مريض وخلاص ملي قت.ل باه فكيف ل "حبيبة" تقبل هادشي...يعني عارف انه ببساطة غادي تبعد منو بمرة....حيث شكون الي غايتقبل هادشي الي عاش وشكون غايتقبل انه بغا او كره قت.ل باه واخا بالغلط...
بشار"باستهزاء" : الحنَّانة وتبرات مني...
حلات عينيها على صوت المنبه الي كانت محققة باش تفيق بكري شوية وتوجد راسها لبلاصة فين باغية تمشي...غسلات وجهها بصابون خاص كديرو فصباح مناسب لبشرتها وحكات سنانها عاد خرجات كاتنشف...جبدات من ماريو من الملابس الي كان باقي منهم عندها فالبيت...الجو بدا كايدفا حيث مقبلين على شهر مارس...جبدت اش بغات..لبساتهم ديك ساعة ومرة مرة كادور ناحية تيليفونها لا يجي شي ميساج منو او الاتصال الي كاتسنى من سعيدة...لبسات سروال دجين بوي فراند شيبي وفوق منو قميجة بلومارين طويلة من لور وكاتخشى القدام ساترة ليها المؤهلات بعدا وسااامبل فنفس الوقت...حتى دارت ليكخون ورشت بارفانها وبغات تهز صاكها وتخرج وهي ترجع ووقفات قدام كوافوز ديالها..نزلت عينيها لگلوص كان محطوط ديال NYX كان عاطيه ليها ايوب..او عفوا عطات لايوب واحد گليتر ديال شيغلام جاها كادو من عمتها كومونداتو ليها من شي ان عاد عطاها هذا حيث لونه pink عجبها بزاف..اما واخا تحط كلاويها ويمكن تزيد حتى خصية من خصيات بشار والله لا شماتو...
ضارت ناحية تيليفون ابحال الى خافت يخرج ليها من تيليفون ههه ورجعت شافت فالگلوص وقالت...
حبيبة. : وهو فين بايشوفني ويلي مالي خايفة على والو...اصلا هو بعيد دابا....
عضت شنايفها وهزات داك الگلوص دارت منو على شفايفها شحال مابقات دارت هادشي ولات كاتحس براسها كيف المريضة حيث ولفت دير واخا هي روتوشات خفاف...مطمطات شفايفها وهزات ايدها كادوز على شعرها من عند نواضر وخرجات شفايفها على شكل بووز..عجبها الكلوص اصلا را منوضة عليه حر.ب هي وايوب باش عطاه لبها...حطاتو وهي تبان ليها فالبلاش وتفكرات زكية من الي خرجات دايراه باش يشوفها بشار زعما طايح عليها سر وهي تغوبش...هزات من داك البلاش دارت منو شوية ف حناكها كان فلون وردي خفيف...مزال كاتطبق فيه وهو يصوني تيليفونها وياااا خوتي طارت ونزلت مغوتة...تا طاحت ليها ال highlight brush من ايديها مشات تحت ناموسية...
حبيبة : ماماااا....
بدات تمسح بايديها بالخلعة ودعقة...مشات كاتزرب هزات تيليفون وهي تلقا سعيدة الي كاتتاصل بيها...
حبيبة"حطات ايدها على صدرها تنفست صعداء وجاوبت" : خ خالتيي صباح الخير...
سعيدة : صباح الورد ابنيتي..
حبيبة : وصلتي ؟!..
سعيدة : هاني عند راس الدرب...
حبيبة : ودخلي ويلي اه ماما كاتسنى فيك اصلا باش نفطرو عاد نخرجو...
سعيدة : هاويلي تي فراس مك...
حبيبة : لا مافراسهاش داكشي الي عارفين انا وياك...هي دخلي...
قطعات معاها وصونات لناديا باش تحل ليها الباب تستقبلها...رجعات كاتقلب على البراش لقاتها تحت ناموسية حيث شافتها فين تلاحت..رجعتها لبلاصتها كاتحرك فراسها ب لا حول...رجعاتها وشافت حناكها مسحت غير شوية...لبسات ساعتها جلدية و گورميط ديالها..ضارت هزات جاكيط على حساب البرد وصاكها وخرجات من البيت كاتلبس فصبادري وتسمع فهضرة سعيدة مع ناديا ورقية و لطيفة...نزلات لتحت لقاتهم فالبيت تبسمات لشعيدة ومشات لعندها عنقاتها كاتبوس فيها وتعاود...كان حتى ايوب باغي يخرج لعند عمو مولاي حفيظ يشوف معاه شي حاجة فالمحلات...جلسات جنب حطات صكها وجاكيط وشدات كاس اتاي من عند ماماها...
لطيفة : فين بتمشي ؟!..
حبيبة"حنحنت وهزت صبعها كاتحك فجبهتها" : هي هنا نقضي شي حاجة مع خالتي باتقدا...
لطيفة : هكاااك...
ناديا : فطري اللا سعيدة...ويلي..
سعيدة : هااني الحاجة نتوما مالين الخير...مابغينا شاي نتعطلو على شغلنا الحاجة راني غا خطفت وقيت وجيت...
لطيفة : ولواه بترجعي وتغذاي معانا ولا نتقلقو منك...
ناديا : لا سعيدة الغذا عندنا ان شاء الله...
حبيبة"ضارت عند سعيدة" : عافاك رجعي تغذاي معانا.."حطت ايدها عليها بترجي"...عيطي لعمي هاشم وعيطي حتى لحسام يجي تغذاو معانا...
سعيدة شافت اصرارهم وناديا حلفات حشمت وهي تحرك راسها خصوصا انه ناس طيبين وبشوشين وحتى فاش كايشدو لواحد وضايفوهم كاتلقاي راسك بغيتي حيث كايكونو طالبينها منك من قلبهم ماشي غير جملة جات من باب صواب فقط وسطحية...ماحسات حبيبة حتى باستها فحنكها يمكن فيها من ريحة بشار...
ايوب"كان جالس قريب لحبيبة ونطق بشويا بينما لاخرين تدهاو فالهضرة مع سعيدة" : هممم منين ضبرتي على هاد گلوص...
حبيبة : ديالي...
ايوب : هذا كان عندي الشفارة هي اللمعة ديال NYX...بتهزي ابتلحرام وترجعيه لبلاصتو ولا ندير صبعي فوذني ونغوت...
حبيبة"ضارت مخنزرة فيه" : رجعي ليا الگليتر ديال شيغلام...
ايوب"بدا يلولب فعينيه حيث تفكر انه مقايضها بيه وهو يهز الكاس وكحز شوية كايحنحن"...
حبيبة : ايوى تكمش وصهط...
ايوب"بقا يلولب فعينيه ويعاود حتى دارت ليه طننن وهو يحط الكاس بجهد تا ضارت ناديا تشوف فيه هز ايدو وقاليها" : ناديوش زيدي لسعيدة اتاي..."وضار عند حبيبة تاني" دايرة الگلوص بلا خبارو ؟!..
حبيبة : متندير حتى خطوة بلا شوار راجلي...
ايوب"رجع قرب ليها" : ممم اييوى لاكانت فخبارو..نوريك الجن منين تايحزق..."هز الكاس ورشف منو تا تسمعت شربة وقال اححح"...
هزات تيليفون وقبل ماتنوض رسلات ليه ميساج بلي غادي تمشي لافاك واخا كتباتها وهي عاضة شفايفها حيث غادي تخبي عليه فين غاتمشي...هاد القرار جا من بعد مشاورات مع عقلها ومع سعيدة الي نصحتها...حيث مايمكنش تزيد القدام هي وياه الا اذا مادارت حل وتقدمات حتى هي...كاتكتب ليه فيه وكاتحس براسها غادي يحصلها...رسلاتو ليه وخشات تيليفون فصاك ووقفات مستاذنة منهم...
حبيبة : خالتي مشينا ؟؟..
وقفات سعيدة كاتقاد فشالها وعلى وجهها ابتسامة...سلمات عليهم فانتظار العودة للغذاء...يلاه غايخرجو وهي تنطق سعيدة...
سعيدة. : كون غا علمتي بشار ابنتي يعرفك غا فين مشيتي...
حبيبة"وسعات عينيها" : اه مايخلينيش وبايگوليا حتى نجي ونمشي معاك...
سعيدة : وراه يا دلي مزيان يمشي عماك....
حبيبة"تزنگت" : مانگدش...احم "صرطت ريقها ووقفات فطريق" بيت نديرها ليه مفاجئة...
سعيدة"جابت ليها ضحك" : ههههه وراه غا هادشي الي بغايتي ديري را تاهو مفاجاة هههه...الله يهديك...وليني هانتي كاع مشيتي وعرفتي اش بغات تگوليك...
حبيبة : ولكن نتي گلتي ليا اش ممكن يكون ؟!..
سعيدة : وبلاتي..هانتي كاع درتي اش تكوليك...وليني را خاص تايكون هو...
حبيبة"بقات ترمش" : مافهمتش...
سعيدة : ههههه زيدي زيدي وكان...اميييمتي على هاد البنت ههه..تيي فييين كنا وفين ولينا..امن يسمع حبيبة الي كانت تگول بغيت امتى نتفرق عليه ونمشي فحالي...ولا حسبي الله ونعم الوكيل فيه...ههههه
حبيبة"عضت شفايفها كاتفكر ديك الايام الي دازت الاولى والي كان بشار بالنسبة ليها شي حاجة ضلمة وكحلة...شي نقطة سوداء فحياتها...الشخص الي كانت كتكرهو كره العما وكيفاش تبدلات الوقت من ديك الايام لدابا...سبحان مبدل الاحوال...تنهدات محاولة تنسى داكشي الي اصلا مايتنساش غير تبدلو بزاف الحوايج رجعو الي فات ذكريات كانت قاسية...
سعيدة. : گلتي ليه راك معايا ياك ؟!..
حبيبة : اه حيث موصي بابا الي يبقى يوصلني..البارح گلت ليه بتجي عندي فالصباح وبلي غانمشي معاك توصلوني لافاك...
سعيدة : ولكن ابنتي ملي يجي گوليها ليه..راه مايبغيش الكذوب وتخبية...انا وصيتك تمشي وليني تكون فعلمو واخا هكاك...
حبيبة : واخا حتى يجي...
وقفو فالشارع حتى بانت ليهم سيارة حسام جايا وقف قدامهم...ضارت سعيدة ركبات حداه وحبيبة ركبات لور...واخا هادشي ماشي فخبار بشار وماشي فخبار مولاي حفيظ..فخبار غير ناديا ولطيفة انها غاتمشي للوجهة فين قايلة ليهم...لكن اش بغات دير وعلاش غادية فالاساس ماعارفينش...اضطرت تقوليهم حيث ماغاتقدرش تخبي على دارهم ماشي بحال بشار وماعندهاش حل...وسعيدة واخا ماعجبهاش الحال نوعا ما تخبي على بشار لكن من الي عاودت ليها انها بغات تفاجؤو...
حسام : فين اميمتي...
سعيدة : هانتا تعقل على ديك البلاصة فين لحگتيني فاش كنت حاملة بختك منار ؟!..
حسام"دار حناكو على ايدو ونقص من سرعة سيارة" : تي فاش ولدتي منار مكانتش بالغ تا البلوغ بقا غا البيرمي...
سعيدة : هء ياويييلي نسيت...
حبيبة : ههههه هانتا انا نوريك...
حرك حسام راسو وتبع النعت الي كتوريه حبيبة وهما غاديين فطريق تابعين نعت حتى بان ليها ميساج وصلها منو...وسعات عينيها وضارت عند سعيدة...ورجعت شافت الميساج الي كان مضمونو ايموشن كايعني "ok"..هادشي الي كايخسر...ولكن هي حسات بديك اوكي فشييي شكل...حيث دايرة شي حاجة من وراه ولات كتقول را عااايق بيا ويخليها تاتنسى ويصدمها...تصرفاتو الغير طبيعية كايخليوها ترعب وتفكر انه يمكن خاصها تصارحو فين غاديا...
رجعات كملات لحسام نعت الي حتى وقفهم قدام عمارة...ونزلات هي وسعيدة الي ضارت عند حسام طلت عليه من نافذة..
سعيدة : سير تنعيطو ليك...
حسام : واخا فين غاديين بعدا...
سعيدة : وشغلك..هاويلي شغل العيالات تدخل فيه...
حسام"بدا يرمش"..
سعيدة : يلاه لحگ شغلك تانعيط ليك لگاك گدامي...يلاه...
ماعاودش معاها الهضرة فالبلاصة كسيرا ومشا...تبعات حبيبة وطلعو لزوج لطابق الاول...غاديا ومزيرة على سمطة صاكها وقلبها كايضررررب حتى بغات ترجع...ضارت سعيدة لقاتها واقفة ووجهها بيض...اول مرة تدخل لهاد البلاصة الي عمرها دخلت ليها...
سعيدة : زيدي حبيبة مالك وگفتي...
حبيبة : همم...اه اه ندخل..احم...ففف ماعرفتش...
سعيدة : ودابا جينا بنتي..ياك گلت ليك خلي تايمشي...
حبيبة : ولكن نتي نصحتيني بهنا...
سعيدة : اييه ويكون عماك فضل..
حبيبة"بقات شحال كتشوف مترددة...حتى تنهدت وهي تحرك راسها وزادت بخجواتها قايلة" : يلاه..بتكون نوبتي وصلت...
تقدمات قدام سعيدة ومشات لعند البنت الي فالاستقبال...
حبيبة : انا الي دويت معاك البارح فالعشية وخذيت رونديفو..وعاودتي صونيتي عليا صباح..
البنت : السمية حبيبة حيث صونيت على شي ثلاثة گبيلة...
حبيبة : حبيبة الصافي...
البنت"قلبت فسيستيم" : اه وي...دابا بدخلي..هي تسناي واحد سبدة بتخرج ودخلي موراها...
حركات راسها ومشات جلسات هي وسعيدة فقاعة الانتظار...واحد الايد كاتحك على ركبتها بالتوثر الشديد وكتشوف فشي عيالات كانو قلال...وحدة فيهم كانت جالسة وكريشتها قدامها كبيرة ونازلة لتحت باين عليها انها فالاشهر الاخيرة من الحمل...ضارت هنا وهنا صور وستيكرات...ونساء الي حامل والي عندها مشاكل...هزات عينيها كاتشوف فواحد الحيط فيه رسمة جنين فالمشيمة عليه اسم العيادة او المركز...ديال الجينيكولوغ الي خذات موعد عندها...
دخلو عند طبيبة الي كان المكتب خاوي غير جلسو باذن من المساعدة وهي تم جايا كاتحيد فليگانت وجلسات بابتسامة جد بشوشة...كانت سيدة باين من عمرها انها خمسينية...كاتشبه شوية لحبيبة فزين (فملامح باش نقربكم)...رحبات بيهم اصلا اختيار سعيدة لهاد طبيبة حيث مزيانة فايت ماشية لهاد المركز حيث عندها حتى تخصص استشارة العلاقات الجن.سية...
غيثة"اسم جينيكو" : تفضلي بنتي شنو عندك...
حبيبة"صرطت ريقها وضارت عند سعيدة ترجاتها تهضر بعينيها..الطبيبة جمعت حجبانها مستغربة من الامر وهي تشوف فسعيدة الي نطقات...وبدات تشرح ليها الوضع...مافسرتش ليها بالتفصيل بكن الي قدرات تلخص ليها باش فهمات...انه فليلة دخلتها دخل عليها بجهد بطريقة خلاتها تفقد الثقة فاللول فالعلاقة من بعد تطور الامر واصبح خوف ورعب من السرير.."..
غيثة : واخا تفضلي معايا بنت نشوف...
حبيبة"ضارت عند سعيدة الي غمزتها وطمنتها باش ترتاح وتبعها...صرطت ريقها وهي تنوض تابعة طبيبة...حتى لواحد القاعة فيها بياص فين كاتكشف على الحوامل وفيها حتى واحد فين كايديرو الكوغطاج...حطات صاكها وهي تسمع طبيبة قالت ليها حيدي سروالك ابنتي والكيلوط وتمددي تما ووقفي رجليك...وسعات عينيها وقالت" : علاش ؟!..
غيثة : باش نعرف ابنتي نوع الغراز الي دارت ليك هاديك سيدة..
سعيدة : تبعيها بنتي وسمعي...
بقات شحال كاتشوف...ميتة بالخلعة وتوثر تنفسها مامنتاظمش...تفكرت انه جايا باش احدا الخوف وتعالج راسها اصلا من هادشي...تفكرت انه حالتها غاتبقى هي هي..تفكرت انه يبقى صابر فالاخير غادي يعيا ويمل...راسها وماقاليها...ماشي لخاطرها تعلقها بيه وحبها ليه خلاها تحدى بزاااف...وهي طلع فوق البياص غطاتها البنت بايزار بيض وهبطات سروال والكيلوط وهزت رجليها تا طلعتهم عند ركابيها...كلها كاتقفقف بالخلعة ماعارفاش اش ممكن دير...دارت طبيبة ليگانت وجلسات مقابلة ليها تا سمعتها كاتقول "بسم الله"...هزات ليزار وهي تجمع حبيبة رجليها...
غيثة : فرقي رجليك ابنتي...
فرقات رجليها ووجهها بغا يطرطق بسخونيا وتزنيگة...تا بدات تحس بيها كاتقلب فيها من تحت...عضات فمها مزيييرة عليه شوية ماقدهاش دارت ايدها بقات عاضاها...حتى خرجات طبيبة راسها وسمعات قالت ليها "صافي بنتي لبسي عليك واجي تبعيني"...تنفسات بجهد وهي تسرح رجليها ولبسات السروال وناضت كاتقاد فحوايجها لحقات على طبيبة وسعيدة وجلسات...
غيثة : شكون هادي الي دارت ليك الغراز بضبط...
سعيدة : واحد السيدة فرملية كاتولد...
غيثة"ماعجبهاش الحال" : كنتو تديوها ليرجونص ديك ساعة ومن بعد هما يوكلو ليكم المختص..على كل انا ماغاديش نعقب حيث هادشي داز ونتي بنفسك جيتي...هي باش تفهمك وتكوني على بال..الى جيتي باش تعالجي علاقتك فالفراش مع راجلك سوا كان هو الشخص الي افتض بكارتك بهاد الوحشية لدرجة درتي الغراز..ولا غيرو لو تزوجتي واحد خور...انا ديجا دازو عليا حالاتك واكثر...فاش كاتجربو العلاقة كاتلقاي منو شي عن.ف نفسو ؟!..
حبيبة"حادرة عينيها حشماانة..حركت راسها ب لا" : ماتيبزز عليا والو..
غيثة : نورمال الى بايقاد العلاقة هذا هو الواجب...
سعيدة : دازو من مشاكيل كبيييرة...راه من الصيف ديال العام الفايت..
غيثة : بايخصك تعرفي وتكوني على بال انك غاتعاودي دخلة جديدة..."حبيبة وسعت عينيها"..مي بايكون معاك بالخاطر عكس الي فاتت..اصلا لو مشا معاك بالخاطر مكنتيش غادي تلقاي هاد المشكيل...
سكتت طبيبة وبدات كاتكتب ليها فواحد الاوغدونونص...دارت طومبو وسينات وهي تمد ليها الورقة...
غيثة : هذا بتاخذيه...anti stress...ملي يجي راجلك شربيه دو جوغ قبل...عاد ملي تجربي تنعسي معاه شربيه قبل..مهم مهم تبعي اشنو غادي نگوليك ديريه...الى مكانش تحسن فالغولاسيون سيكسييل رجعي عندي وحسن يكون حتى الزوج ديالك معاك...سي نو غادي نصحك تمشي عند طبيب نفسي...
خرجات من عند طبيبة وجهها مزنگ...وسعيدة كاطبطب عليها..لقاو حسام كايتسنا فيهم ركبو معاه ومشاو...طريق كلها وهي كاتفكر فهضرة طبيبة و فبشار اشنو غاتكون ردة فعلو والاكثر هي قالت ليها بلي غاتعاودي دخلة جديدة يعني غايخص تستعد ل ليلة جديدة..هاد المرة عارفة انه غايكون حوار..هاد المرة هي كتعرفو وكيعرفها كاتبغيه وكايبغيها بزاااف...خاطرها فوق الخواطر ف غادي تعيش معاه كاي زوج وزوجة...لكن ؟!...
وصلو لدارهم وهي تستاذن منهم باش تمشي تبدل وتنزل...حطات تيليفونها كايتشارجا ومشات تبدل حوايجها يلاه كي لبست بيجامتها وهو يصوني تيليفونها...جلسات جنب ناموسية دارت صبعها ففمها وهي تطلق الخط...
بشار"شاف فساعتو مكمش حجبانو" : فدار !!..
حبيبة : اه..عاد جيت..
بشار : معامن شكون جابك ؟!.
حبيبة : خالتي سعيدة هاهي معانا بتغذا هي وحسام..
بشار : مزياان..هي ماقريتيش ليا يا حبيبة فلافاك ؟!..
حبيبة : لا لا قريت وجيت...
بشار : مزيان مزيان..
ديك "مزيان مزيان" حبيبة عارفاااها اش كاتعني وحست بيه يمكن عاق بيها...حست بانفاسو كاينهجو فوذنيها وماعندها تا حل من غير انه تعتق الموقف...وهي تبدا دميعات ديالها...حتى سمعها كاتعيط ليه بصوت مغنغن...
حبيبة : بشااار...امتى بتجي...
بشار"فرانا سيارة جنب " : مالك ؟؟؟...
حبيبة"نزلت عينيها وغمضتهم تا تعصروو وزيرت على ايديها ونطقات": توحشتك بزاااف...
اول مرة غايعيش تجربة انه يسمع من شخص شي حاجة كاتعبر على الاشتياق..شي حاجة كاتبين بلي هو را محط اهتمام وشي حد كايفكر فيه...
غير طلقتها ليه بقات هكاك مزيرة على عينيها وايديها...شحال وهي حابسة نفس ...بقاات شحال وهي كاتسنى تا بدات كاتحل عينيها شوية بشوية تا ولات غمزة وهي تحلهم كاتشوف فيه تعطل فالاجابة...قابلت معاها تيليفون تشوف ياكما قطع الخط لكن الخط باقي مطلوق...كون ما حنحن كون حساب ليها را جاتو كريز حيث ضربها بصقلة طويلة...صرطت ريقها وهي كاتسنى يهضر ماقدرتش تهضر هي..لكن ملي طول مالقات من غير انها تكحب...
حبيبة : كحكح كح...احم..
بشار"كانت شوفته واخا نيشان مع طريق لكن عقلو مكانش مركز تما..عقلو توقف على ديك كلمة "توحشتك بزاااف"..هي شي حاجة جديدة لكن لخصات حتى احساسه تاهو من جيهتها..حتى سمعها كحبت وهو يحول نظرته لشاشة سيارة...هي كانت كاتسنى يقول ديك "حتى انا" ولا "تكوني فحالي ؟"..ولا "ماتكونيش گدي"...الا انها نسات بلي راها مع واحد الانسان خزي خارج منو الموڤ مغلوق ماشي تا خضورية..."..
بشار"طلق سينيال وخرج بسيارة لطريق" : سيري متني حوايجك..من بعد ونهضر معاك...
ماجات فين تجاوب حتى كان قطع تيليفون...ماعرفتش واش عجبو الحال ولا باقي ماهضمش هضرتها ولا ميك عليها...لكن الي ماعارفاش انه تاثير "توحشتك بزاف" خربقو بلا مايحس...حس بيها بورشاتو..تلفاتو...ماعرفش باقي اش يدير من غير انه يقطع معاها حيث الهضرة غير ماغايزيد يكفسها اللهم يقطع لانه اصلا تا باش يهضر مابقاوش الكلمات...بقات الجملة كاتردد ليه فوذنيه حتى حس بالسخونية طلعت معاه والصهدة خلاتو يحل شراجم سيارة واخا كاين البررد...دوز بايدو على قرفادتو تا طلع لشعرو ورجعو ودوز على لحيتو وهو يسوط...مد ايدو لبكية السجائر...ماكاين من غيرو الي يخليه مكالمي وسط هاد الزعزعة الي وقعات ليه بسباب "توحشتك بزاف"...
بقات كاتشوف فتيليفونها مافهمت والو واش سمع اش قالت ولا واش نفعاتها الحيلة ديال تبوحيط ولا اش وقع ليه...بقات تفكر وتفكر مامشا لبالها غير را ماهضمش هضرتها حيث فايت استعملت الحيلة وخلاها حتى نسات وفكرها من جديد...ماثاقتش وبقى بالها انه ترجع لنصيحة سعيدة وتعاود ليه فين مشات وعلاش مشات حيث ماقدرتش تقوليه حتى تشوف واش تقدر تعالج ولا واش هادشي فيها عادي...ماعرفتش فين كاتفكر المهم انه بغات تفاجئو حيث كاتقرا مشاكل بنات ونساء فالكروبات بسباب ان الازواج كايخليو ولا كيمشيو لوحدة اخرى حيث لاخرى ماعطاتهمش حقهم...راسها وماقاليها وزيادة على انها فالاصل بغات تحيد منها خوف العلاقة سوا ببشار ولا بلا بيه...
دارت ايديها على حناكها. كاتشوف لهيه كاتهزهز فرجليها وتعاود بتوثر شديييد...خلي عليك انها تفوهت ب "توحشتك" هادي تاهي كملت ليها الباقي...تقيسي حنكها بصبعك يدير بييق بد.م...
حبيبة : ويلي ويييييلي اشاتا گلت انا وييييلي اعء...يلاه شدي سرك نييييت..وتا باقي نگوليك شي حاجة عكر ليا...
مازال كاتهرنن حتى تحل عليها الباب وهي تقفز هزت عينيها كانت ناديا حيث هي الي كاتدخل بلا دقان...لقاتها مزنگة وعينيها مغرغرين بغات تبكي بالفقصة والحشمة وكلشي خربقو ليها وقطع عليها وزاد...
ناديا : ويلي مالك ؟!..
حبيبة : ها..م ماماليش علاه...
ناديا : شوفي وجهك وعينيك بيتي تبكي...
حبيبة"فنفسها" : اش غانگوليك اماما اه تقمعت واقلة واول مرة تنگول كلمة زوينة جمعني بنص..(حركت راسها كاتنفض هضرتها ونطقات بصوت مسموع)..والو هي تنفكر وصافي...
ناضت ومشات تالعندها الي جاها شك من هضرتها وهي تعنقها وقلبتها ضحك كاتبوس فيها وتنخشش باش تنسيها تاهي الي تلاقاو عليها لا هي لا بشار....
حبيبة : اماكاين وااالو هي مع راسي...عاد كنت تندوي مع بشار لقيتيني قطعت معاه وبنزل عندكم...
ناديا"بقات كتشوووف فيها وهي تبدا تبتاسم تا بدات تضحك حساب ليها قاليها شي حاجة كاتحشم حيث عارفة حبيبة لا حشمت كايبانو عينيها بحال بغات تبكي" : اهيااا گول هكا...
حبيبة : اه سمكة..مكاين والو مامااااا...
ناديا : هههههه زيدي زيدي..والله الى كبرت ليا القشة وتاتزنگ ههههه...
حبيبة : زيييديني اماما تانتي زيييديييي اهئ...وصافي هبطي نخليوش خالتي سعبدة وحدها...
ناديا"هابطين ويهضرو" : ممم خالتك سعيدة اه شادة القشابة مع لطيفة وحسام...
خبطت ليها ضهرها بضحك ونزلو تال صالون لحقو على البقية تما...كانت سعيدة وحسام ولطيفة...جلسات ووجهها باقي مزنگ والو واش تنسات ليها بزز حتى شافت فيها سعيدة وغمزاتها...خرجات ناديا هي ولطيفة لكوزينة يشوفو الغذا...وبقات غير حبيبة وحسام وسعيدة...
حسام"نقز" : اه ختي حبيبة دوا معايا بشار وصاني على شي حاجة بغاها يوسف ولگاني يلاه كي غادي نجيبكم گلت ليه را جاي ليك نتي ومي...
حبيبة"وسعت عينيها على جهد جهدهم نسااات توصي حسام اما سعيدة كون لقات طول صبعها شي ميترو تاتوصل لحسام تليعو من ترمتو ماكرهتش" : اويلي اويلي...ااااويلي اش درتي ؟!..
حسام : ياهاع ؟؟..
سعيدة : اسير يگطعك عليا يا ماحطت كرشي..هالي كاينسى مايذكر الله گبل الحمل هاااا...
حسام"صغر عينيه" : تي اش درت ؟!..
حبيبة : فين گلتي وصلتينا ؟!..
حسام : لعمارة فين نعتي ليا !!..
حبيبة : شوووكرا احسام شوووكرا...
حسام : دنيا هانيا..فين مشيتي بالضبط باش نكمل ليه الهضرة ؟
سعيدة"غوتت تا لاح المخدة وهز رجليه وحطهم"
حسام : سيحت زكريا...
سعيدة : تمشي تكوس اولد الهم تمشي تكوووس...والدة فرفارة ماشي بنادم...
يتبع...
التعليقات
لا توجد تعليقات بعد، كن أول من يعلق.