محتوى القصة
أي وحدة فينا طيح فالموقف الي طاحت فيه حبيبة وتجيها نفس الاخبار على باها...ماكنبقاوش عاقلين على راسنا من ساسنا...جميع الاحتمالات كايجيو لبالنا...قلبنا كايتكمش علينا كأننا على حافة المو.ت...حتى حاجة ماكتبقى تبان لينا من بعد الصدمة وعدم التقبل...من غير اننا نشوفوه بعينينا بيخير مابيه والو...طبعا كاين استثناءات للبعض الي علاقاتهم بواليديهم ماشي طبيعية...
وقف السيارة قدام باب المصحة فين كاين مولاي حفيظ...نزل وحل ليها الباب حيث كانت منهار تماما...ملبسها واحد الجلابة رجع لدار فالبلاصة حتى جابها ليها سترها ماعرفش تا اش هز بانت ليه طويلة وحتا عليها...ماهضرش معاها ولا عاتبها علاش خرجات عيانة...اصلا حالتها والاخبار ماخلاوهش يفكر فهادشي تبرزط حتى هو معاها وعليها اول حاجة حيث كانت حالتها كاضر فالخاطر اما خاطرو مرض من جيهتها العار غير تسكت من البكا الي كان فيها بهيستيريا...نزلها من طوموبيل وعنقها غادي بيها وطالع ليه د.م من بكاها تخربق كلو وتبرزط هادشي كايجيه فشكل...كايتلف ويتخربق وخاصو يبقى راد ليها البال...عرف راسو غادي يتصرف شي تصرف ماشي تال تم شرب المهدئ ديالو فاش كانو جايين وهي كاتبكي حداه...
حبيبة : بابااا اهئ باباااا ماخاصوووش تجيه كخييييز ابشار باباااااا گالينا طبيب ردو معاه البال اهئ...
بشار"مزير عليها وهي محاوطاه بايديها ومنخششة فيه وتبكي كاع تيشرت ديالو من جنب فزگاتو ليه..ماجاوبهاش مابغاش يهضر حيث لا تكلم غادي يقوليها سكتي ولا ششش...خلاها تهرنن على خاطرها...دخلو لفين نعت ليه هاشم كانو فالطابق تحتاني...دور عينيه وهما يبانو ليه جالسين فكراسا الانتظار...حبيبة غير بانت ليها ناديا وهي طلق من بشار ومشات تاتجري لعندها...
حبيبة : مامااااا اهئ بابا فين بااااااباااا...اهئ...
ناديا"جرتها من ايدها وجلساتها حداها عنقهتها منخششاها فبها" : ششش...تهدني ابنتي تهدنييي...
حبيبة : بابااااا اماما اش وقع ليه...اماااما مانقدرش نشوفو مريض اماما اهئ...عافاك گولي هي كذوب هييي گوليييي...بابا ماخاصووووش يمرض ماخاصش تجي لاكخيييييز ياك گالت لينا طبيبة ماخاصوش يتعصب ولا يتقلق الى جاتو خطر عليه ياااك اهئ...
كاتحاول تهدن فيها...وبشار بغا يمشي ليها ماعرف اش يدير وناديا مزيرة عليها تا بدات تركل وبغات تنوض...وبدات تغوت وناديا تهدن فيها....
حبيبة : علاش خليتيه يتعصب علااااااااش اماما...علاش خليتيييييييييه اماماااااااا...وباباااااااااا اهئ...بابااااااااااااااااا وبابااااااا عافاك ماتعصبش ابابا عافاك ماتخلينييييييش...باباااااااااا...
ماحسات تا نزلات عليها ناديا بواحد تصرفيقة تسمعات فوذن بشار خلاتو خرج عينيه على جهدهم وتم غادي ليها حتى شدو هاشم بززز مزيييير عليه حيث عرفو غايخرا على ناديا وهو ولا عاااارف حجم حبيبة عند بشار...واليديها وكايهبل لا ماردوش ليها البال فالمرض...وعارف ان ناديا بغات تهدنها وتوگضها...
هاشم : بشااار بشااار..تبت اصحبي...
بشار"دور راسو لعندو بالعرض البطيء بواحد تخنزيرة تحش الركابي"...
هاشم : ششش...غا سمع سمععع...باش تفيقها الى مادارتش ليها هوك يخرج ليها العقل...ماطرشتهاش بزاف...راه مها ابشار مهااا...تخاف عليها كثر من مها..."خرج فيه عينيه بشوية كايهدنو"..خرج برا كمي ورجع..."زير عليه من دراعو" بشااار...
دور عينيه ناحية حبيبة لقى ناديا عنقاتها تاني خشاتها فيها وكاتبوس ليها فراسها...وتبكي معاها...حالتهم تشفي العدو...مولاي حفيظ بالنسبة ليهم هو كلشي...خصوصا حبيبة عندها الحياة هي مولاي حفيظ...كاتحس بقلبها بغا يسكت...هزات ناديا عينيها فبشار لقاتو كايشوف فحبيبة ومخنزر عرفاتو تعصب من طرشة...هو ماكانش كاع غايحير فناديا كان غايجرها ويديها من تم كاع...مابقاش قادر يهضر خاصو يخرج يتنفس ويكمي بشراهة ولا يخرا عليهم تم...بكاها زنزنو فراسو والاجواء كاتمرض اصلا...ضار دورة وزاد مع طريق ماتسوق لتاواحد الي تما باقي...
سعيدة : اابنيتي تهدني الله يرضي عليك..ماتسبقيش الفال الخايب نشاعلاه مايكون غالخير...دعي معاه وكوني قوية الى توگض وشافك هوك بغيتي تكملي عليه ؟...نعلي شيطان وسيري غسلي وجهك...
ناديا"خرجات ليها راسها وشافت فيها كاتمسح ليها دموعها" : اشنو گال ليك باباك ديك المرة...
حبيبة : اهئ اهئ...
ناديا"خرجات فيها عينيها" : بينسمعك تاتجاوبي...شنو گاليك.
حبيبة : فاش تان تان اهئ..نطيحو فالهم تا ندعيييعيييو اهئ...
ناديا : وشنو خاص يكون...
حبيبة : الاييممان بالله(دموعها ماحابسييينش)...
ناديا : هي اش دابا...
حبيبة : خايفااااا اهئ...خااايفاااا...
ناديا : شنو گاااااالت ؟؟...
حبيبة : ياااربي تشافي ليا بابا اهى اهى...
عنقاتها ناديا عندها كطبطب عليها ولات خلاتها تبكي تاتفش...لداخل راه عالم بمولاي حفيظ غير الله والاطباء الي مجموعين عليه...بشار من الي خرج برا تبعو هاشم حتى هو يهضر معاه...حط ايديه على طوموبيل مسند عليها الكارو شاعل فايدو وعينيه حمريييييين...كايشوف فيه هاشم كاينهج...
هاشم"شعل تاهو الكارو ديالو سف منو وطلق دخان كايضوف فيه" : قهوة كحلة...
بشار"الصمت"..
هاشم"عاود سف من كارو ديالو...وبقى يضوف فيه مرة يشوف فالناس غاديا جايا...حتى ضار لعندو"..
بشار : شي بلان مگمح طرا فالبلاد ؟!..
هاشم : اشمن بلان...
بشار : crise cardiaque فالرحامنة ماكتجيش بلا موجب شرع...
هاشم اللحظة فين خلا سعيدة مع ناديا خرج لبرا وهو الي علم بشار فنفس اللحظة ناديا كانت كاتعلم فحبيبة على داكشي باش كان مسرع فاش ساق الخبار...لانه قبل فاش كانو جايين موراه فسيارة الاسعاف ماكانش بشار كايجاوب حيث كان مع المحامي...
فهاد اللحظة دخل تا ايوب الي ساق الخبار ...طل هنا وهنا وهما يبانو ليه جاي وجهو مسقو.ط من د.م ماعرف باش تبلى حيث كلهم عارفين انه موصين مايتعصبش ولا يتقلق حيث غاتجيه لكخيز فاي لحظة وماشي فصالح ديالو...بانت ليه ناديا معنقة حبيبة...
ايوب : مي ناديا...اشاتا هادشي سماعت...
ناديا"حركات ليه راسها وتنهدات" : الله يسمعنا خبار الخير يااربي...
حبيبة"كاتبكي"..
ايوب : اه اه بايكون هي الخير...العميم شديد ماتخافيش عليه اهي بايتفشش علينا تشهى شي حكيكات ديال دانون من داكشي...هييي يتوگض بنجيب ليه ستيلة (سطيلة) ديال البناشي من درب ضباشي...
ناديا"حركات غير راسها..وصافي ماكايناش طاقة حتى ترد الهضرة فما بالك تضحك...ايوب عفويتو وخوفو الشديد مسكين خلاها مايعرف باش يتبلى...شوية حتى وصل حسام هو وعبد القادر لكلينيك...دخلو من الباب الرئيسي كاع ماشافو بشار...بانت ليهم سعبدة وناديا وايوب وقربو لعندهم...
ع.القادر : الحاجة اش هاد الخبار ؟!..
ناديا"حادرة عينيها ونطقات بصوت منخفض" : الحمد لله الحاج...
سعيدة : سيدي جلس رتاح...
حسام : ماگالو ليكم والو ؟!..
سعبدة : هاحنا نتسناو...من الي دخلوه گبيلة ماعليه خبار...سول غا هاشم گاليه واحد راهم معاه مايگد يعطيه تا خبار...
ع.القادر : الله معاه الله معاه...الله يجيب الشيفا والعفو من عندو..
حركات ناديا راسها وقالت امييين...ايوب عطا لناديا تيليفونها رسلاتو معاه رقية ليها...عيطات لدراري طمناتهم اما حبيبة حالها هو حالها غير تبكي...حتى تم داخل بشار هو وهاشم الي ماعطاه تاخبار حيث ماعرفش اش واقع قاليه عيط ليه حسام يلحق عليه فالطريق لكن راسو بقى كايزنزن حيث عرف كاينة شي حاجة وقعات...بان ليه جدو ماداهاش فيه اكثر ماكانو عينيه على نقطة العسل ديال قلبه الحياة بالنسبة ليه...قرب لعندها وجلس حداها...فرق رجليه وحط مرافق ايديه فوق ركابيه ولاقا صباع ايديه كايضرب بيهم فمو بخفة وبتفكير....كايشوف فنقطة بعيييدة حجبانو معقودة بشكل ملفت...باين مخززز بالخز...بزز باش مهدن...بقى هكاك وهو كايسمع فتنخصيصها المنخفض...بحال شي مشة صغيرة صابة عليها شتا وكاتغوت باش يدخلها شي حد...زنزنات ليه فوذنو بجهد...وهو يدور لعندها بشوي...شاف فيها مطووول...قبل مايمد ايدو ويجرها من دراعها من حضن ماماها لحضنو...دور ايدو عليها خشاها فيه مامسوق لتاواحد تما كأن العالم فيه غير هي وهو...مرته حبيبتو ديالتو...كانها قطعة من روحه...ضامها لعندو محاوطها بزوج ايدين...بحال الى غاتهرب منو ولا تفلت لدرجة زيررر عليها تا حسات بعضامها تشابكو وفيهم الي طرطق...هز ايدو كايدوز على شعرها بحنية...مرة مرة ناديا كاتهز عينيها الي تنفخو تاهي وووجها فلحظة تبدل ليه اللون والمود...ولا شاحب وعينيها صغارو...رتاحت شوية من جيهة حبيبة بعدا بدات كاتهدن وتغمض عينيها باش تولي فحالة سكون تااام...هزات عينيها. فايوب ونطقات متمتمة بين شفايفها..."جيب دوا راس" بحركة من صبعها ضربات فناضرها باش يفهم...حرك راسو وناض فالبلاصة جاب ليها من صيدلية دوليبران 1000 وقرعة ديال الما من حانوت وگوبلي...جاي دايرو فالكاس كايتشتش...مدو لبشار الي هز عينيه فيه وقال....
ايوب : دوا تالراس...
ناديا"بصوت متعب ومبحوح" : تايضرها راسها فاش تتبكي بزاف...
شد من عندو داك الكاس طل عليه حتى كملات الحبة فذوبان وگعدها...قرب ليها الغراف عند فمها...
بشار : شربي...
فمها بدا كايترعد...الانهيار الي هي فيه تقيصيها تولي كلها ترعد وتبكي...ماكايبان ليها والو من غير انها تسمع خبار الخير على باها...شاف تاعيا وهو يشربها راسو...مشا معاها قطرة بقطرة كايسيح ليها الكاس ويمسح ليها جناب فمها...واحد الاهتمام خلاهم كايشوفو فيه خصوصا ايوب وحسام...تا كملات الكاس يلاه حطو وهو يخرج عندهم الطبيب....
"الرحامنة"...
المغرب كايأذن...حطات كريمة صينية ديال فيها بروقة ( ابريق واحد قهوة وواحد حليب)...وجات وراها ربيعة تاهي هازة صينية ديال اتاي...تبعاتهم مباركة هازة طبسيل ديال مسمن طيباتو هي...جليات حدا عيدة...
مباركة : مي عيدة بسم الله...
عيدة"دايرة ايدها على حنكها وساهبة غا سمعتها وهي تهز ايدها بمعنى لا...مباركة ضارت عند ربيعة حركات ليها راسها...
ربيعة. : كبي ليها قهيوة كريمة دابا تبغيها غا وحدها تاتجوع ونحط ليها...
كريمة : فين خالتي..(كريمة بنت اخت توريا للتذكير)..
عيدة"سمعت سميتها وكمشت ملامحها بغضب..بالها كلو مع مولاي حفيظ كاتسنى اتصال من حسام يقوليها حالتو"...
ربيعة : طلعي نابي عليها تجي (عيطي ليها)...
حركات راسها وطلعات تجري لفوق...كانو بنات هاشم واشراق منزلة يوسف باش ياكل تاهو نازلين من فوق تلاقاو بكريمة طالعة...لقات الجو مشحون كلهم مافهمو والو اصلا...مباركة سمات الله وبدات تاكل مخلية ربيعة ترمش فيها...دقات كريمة على توريا الي كانت متكية وعاطية بالضهر تا نطقات كريمة...
كريمة : خالتي توريا...
توريا : اش كاين ؟!..
كريمة : هبطي تاكلي...
توريا : خليوني عليكم هاد ساعة ووقرو جيهتي..سيري اكريمة لحگي لتحت ولا باقيش دقدقو عليا...
خرج عندهم طبيب الي شافتو ناديا وهي تنوض علر وقفتها ماحسات تالقات راسها قدامو كاتشوف فيه بعينين خارجين بالخوف...ناضو كلهم حتى من حبيبة غير شافت ماماها ناضت وهي دور فين مشات وناضت حتى هي...قربو لعندو...
ناديا : ادكتور ؟؟؟...
طبيب : الزوجة ديالو ؟!..
ناديا"كتحرك راسها بهيستيريا" : ها اه اه اه...كيدايرة حالتو ها ؟..
طبيب"ماعارف مايقول مابغاش يخليهم يتأمنو" : نقدر نقوليك الحالة شبه مستقرة حنا درنا الي علينا ودايرين جهدنا وكثر...مابيناش نعتيوكم امل على والو...مي الي نبغي منكم هو الدعاء حتى يدوز من هاد الازمة الحالة حتى كاتبغي تستقر وترجع...
ناديا : يعني..هو دابا فايق ؟!..
طبيب : non...حاليا هو فالانعاش وبايبقى فيه حتى يتجاوز مرحلة الخطر الي هو فيها دابا...هي باش نعلمكم السن ديالو ممساعدوش باش يتجاوز هادشي واي قلق ولا توثر بسيط كافي باش يرجعو للحظيظ...
بشار : c'est sur crise cardiaque ?..
طبيب : ouiii...
حبيبة"دموعها نزلو من جدييد تلجم ليها الفم ولات كلها كاتغزل حتى قربات لبشار وشدات فيه بالخلعة تخشات فيه وكاتقفقف تا نزل عينيه ليها وحاوطها بايديه بحال شي بنية مخشية فباها"...
ناديا"حطات ابدها على صدرها وبترجي" : عافاك بينا نشوفوه عافاك هي يبرد خاطرنا...عافاك ادكتور واخا هي بنتو حالتها مريضة بزاف وماتگدش تسكت الى ماشافتوش...(شيرات ليه لحبيبة)..
طبيب : واخا تضوفو مغادي يتغير والو الى ماقاوم هو..."شاف ناحية حبيبة الي كاتشوف وتقفقف..تنهد وهو يحرك راسو" اجي بنتي معايا...
ماتسناتش الاذن من اي واحد غير قالها ليها حيدات من حدا بشار وتبعات الطبيب...بقى واقف بشار داير ايديه على نصو وعينيه عليها..مكلكمة فجلابتها وشعرها مجموع عوج ملي تخربق ليها جمعو ليها هو بطريقة مبعثرة ماعرفش ليه وهي ماداتهاش فيه...كاتمسح دموعها بكلينيكس وتنخصص بالحس مشات وتنخصيصتها بقات فوذنيهم...حتى دخلات وتسد الباب الكبير وراها...تابعة طبيب كل مكتقرب كل مكان داك الصمت فديك البلاصة رهيييييييب...دنيا بااااردة تما والي خدامين تم كايهضرو يا بالاشارات يا بالحس...حتى وصلات عند باب الانعاش لولاني دخلات لبسوها اللباس casaque والكمامة والطاقية على شعرها...طبيب هضر مع المسؤولة تما وقال...
طبيب : 3 min maximum...
حركات راسها وهي تدخل تبعاتها حبيبة...الانعاش كان عامر بالناس الي حالاتهم حرجة والخطيرة...ريحة ديك البلاصة طيح عليك الضيم وتعرفك بلي دنيا بلا صحة واخا يتجمع المال ديال قارون...وطغيان فرعون مايجيو قدامها...مكمشة فاللباس وكل مكتقرب كل ما قلبها كاتحس بيه بغا يسكت من شدة الخوف..من خسارته ومن انها تنهار وتشوفو بديك الحال...هاد النهار كانت ديما نفسها الامارة بالسوء كاتخيلو ليها كاتحس بقلبها كايبغي يتحيد من جذر...عطات حياتها عطات شبابها عطات اكفس ايامها غير باش باها ترجع ضحكتو...حتى لقات راسها واقفة والفرملية كاتقوليها..."ثلاثة دقايق وخرجي"...غير حيدات من قدامها وتحيد الستار وبان ليها...اخيب تمغيطة هي هادي...مغطي نصو وعريان من فوق...ملصقين ليه ECG(.Electrocardiogram)..ف صدره والجهاز ديال الاوكسجين على فمو...شفايفها بداو يترعدو حاولات جهدها تصرط البكية حتى شهقات وهي تجمعها فالبلاصة...حطات ايدها على ايدو وكمشت فيها بحذر حيث صبعو فيه داك المقبط ديال تخطيط...
حبيبة : عاافاك ابابا حاول هي على قبلي انا ووردة ومعتز وماما...ياك گلتي لماما بينعرض على نسيبي للعشا...يااك...عافاك ابابا هييي برا ونديرو الي بيتي الييي بيتي...
تحنات عندو بشويييي وباست ليه جبهتو وحطات جبهتها عليه...حتى جات الفرملية وخرجاتها من تما حيث ماخاصهاش تبقى اقصى من داك الوقت...خرجات على برا حادرة راسها ودموعها على خدها...غير بانت لبشار عنقات ماماها وجلسو وهو يخرج تابع جدو الي عرف الاخبار وسلم فيه وخرج باش يرجع لرحامنة حتى يجي الغذ ليه...خرج برا الكلينيك وهو يبان ليه واقف مع هاشم كايهضر معاه ويشالي وهاسم كايحرك فراسو وحسام واقف مربع ايديه وكايسمع...جبد من جيبو باكية الكارو خبطها فوق كف ايدو تا جبد سيجارة ورجعها..شعل البريكي تا شعل الكارو على خاطرو وعينيه منيرييييين ناحية جدو...نتر من الكارو نترة ثقييييييلة...عاد تقدم بخطوات بطييييئة خاشي ايد فجيب وايد منغم بيها بالكارو...حتى وصل لعندهم...شاف فجدو...
بشار"بنبرة ثقيلة" : لاحگ فحالك ؟!..
ع.القادر : وااه..جداك تسول نعلمها باش كاين تارجعو صباح نشاعلاه...
بشار"حرك راسو" : مزيان..مزيان...
حسام : راجع اهاشم ؟!..
هاشم : بلاتي شوية..غذا ماخدامش يقدر نباتو هنا...
بشار كايسمع فيهم وحادر عينيه ويكمي بشواااايا تا كايصغر عينيه ويرجع يحلهم...حتى هز راسو وشاف فجدو وديريكت دخل فالهضرة...
بشار : وقع شي مشكيل تم ؟!..
ع.القادر"كمش حجبانو...مايمكنش مايحسش ومايمكنش يدوز هادشي مرور الكرام...ماباغيش يقوليه دابا اش واقع حيث عارف فين غايوصل هادشي" : ياودي دوينا عا فداكشي...
بشار"قاطعو" : رييط ليا الهضرة ولحگ معايا لاخر...اشنو گالت ليه بنت المشاوري...
هاشم"وسع عينيه وحسام هز راسو"..
ع.القادر : اش لحگ مك الهضرة اولدي...
بشار"بملامح بااااردة داك البرود الملفت المقلق...الي كاتحسي بيه واخا بارد وكيهضر بشوية يخليك تخاافي...تكلم بنبرة تهديد تمهيدي"...
"عارف خبزي شحال مكيل شعيرو"...
(يعني عارف مو اش كاتسوى ههه)...
كلامو كان اشبه بالتهديد الى كان الي فبالو صحيح واخا متأكد بنسبة كبيرة انه ورا هادشي غادي تكون "توريا"...مو الي عارفها مزيان وعارف عجينتها كيف دايرة...عبد القادر مابغا يقوليه والو دابا لان الظروف مامناسباش...عارفو الى عاود ليه غادي تكحال القضية كثر ماهي حامضة...
ع.القادر : الهضرة ماشي هنا..سير برك عما مرتك ونسابك تا وكان يتوگض الحاج هاو ديك ساعة نهضرو...
بشار"بقا مخنزر فيه"...
هاشم"عارف كاينة شي حاجة وهو يتدخل" : بشار..گاليك صح..حتى نعرفو خبار الخير على نسيبك وراه يعاود ليك اش كاين..سير برك مع حبيبة راك شتي حالتها كيدايرة هانتا كااع عرفتي ولا كان بصح هضرتك تزيدها تا همك ونتا عارفها كاتخلع عليك...
ع.القادر"قرب لعندو وشد ليه فكتفو وهضر بواحد الثقة وصلات لبشار" : على رقبتي وماتسالني حلوف...الى حسب راسك بحال دويتي نتا...غا يولي لباس وغذا لا جيت نعاود ليك كلشي من سلام عليكم لعليكم سلام...
بشار"والو واش دازت عليه هضرته تأكد بلي بصح مو الي دايرة شي حاجة تا وصلات مولاي حفيظ لهاد المواصل...عض على سناااانو من لداااخل عضة ديال الغدايد لدرجة بان الفك ديالو من جناب كايتحرك ...زييرررر على صباعو على شكل بونية تا تسقطو من د.مهم...طوا لسانو وعض عليه مزيياااان وهز صبعو تا قرب لعندووو...كان باغي يقول شي حاجة باغي يدير...وولا تراجع...وضرب دورة ومشا خلاهم واقفين...
هاشم"شاف ف باه" : هادشي مامسلكش ابا...ديك قواعد تخبية الي ولات مسلكاكم هي الي غاتخرجكم للعيب...جيني انا من لاخر وگوليا اش وقع باش نعرف اش ندير ونعلمو انا راسي...
ع.القادر : كيف كيف كيييف كيف..."تنهدت بحزن وغضب ممزوجين من ناحية توريا والي وقع شاف فحسام ورجع شاف فيه" : علمات نسيبو بداكشي الي على بالي وبالك...
هاشم"كمش حجبانو" : كيفاش ؟..اشمن بالي وبالك ؟...
بقى شحال كايفكر وحسام كايشوف مافاهم والو...وسع هاشم عينيه على جهد جهدهم الشي الي خلا عبد القادر يحدر راسو وتكماش عينيه يزيد...ويحدر راسو...هز هاشم ايديه دارهم على راسو لان القضية باينة غاتكون وصلات بطريقة "توريا"...يعني وصلات بطريقة قاسية...ماعارفينش انه عرف اقسى من باش عرفات توريا....عرفها من المحامي وحل ليه عينيه على حوايج يخليوه يخاف بجهد ويوصل خوفه وصدمتو للنوبة الي جاتو...
هاشم"هز راسو الفوووق وزفر بجهد وبدا يحك فحلقو ورقبتو...ضار عند حسام" : لحگ با لدار...
حرك حسام راسو...مشا عبد القادر ركب فالسيارة وحسام ضار ناحية باه قبل مايركب...
حسام : مكاين باس ؟!..
هاشم : ماكاين والو...باينة توريا لاحت شي هضرة سممات ليه الخاطر...على الكريدي وداكشي...
بقا حسام واقف وكايشوف فيه بشك...مادخلاتش ليه هضرة هاشم لراسو حيث باينة غير من رد الفعل ديالو انه شي حاجة كبيرة تم...هز فيه هاشم راسو وهو يقلب دورة وركب فالسيارة...الليل ليل وشدو طريق دوار...في حين هاشم تا باش يدخل ماقدرش حيث غايبدا بشار يسول فيه ولا شي حركة تخلي هاشم يزهق بالهضرة ودابا ماشي وقت الهضرة...جبد كارو من جيبو تاهو شعلو ومشا جلس فواحد الكرسي من الكراسا الي تما...كان عارف غايجي واحد الوقت وتعرف حبيبة ولا عائلتها...يعياو يضمصو فهاد الحادثة الا انه تقدر تسرب باي طريقة...17 عام دازت على داك النهار الكحل الي عاشوه كاملين والي كان مدوبل على مرااات عند "بشار"...ماشي غير ترزا ف باه ماشي غير فقده كيف فقدوه كاملين ماشي غير تغدر فيه كيف تغدرو فيه كاملين...الاقوى والاقسى انه هو الي "قت.لو"...بايديه...سواء بالغلط النتيجة وحدة...ناهيك على الاشهر الي وصلات لعام الي دوزها فداك المصح العقلي...ماعمرو ينسى نهار الي تحول فيه بشار لواحد كايدخل ويخرج فالهضرة...مرات يهضر معاه مرات يهضر مع راسو...
"فلاشـباك"...
حط ايدو على كتاف بشار الي كان حادر راسو وعينيه فنقطة مبهمة..جالس فسريره...تحنى لعندو فاش شافو مادار تا ردة فعل ملي حط عليه ايدو...قال را غايحس بيا ساعاك كأنه حطها على جماد...
هاشم"بصوت منخفض" : بشار لباس عليك ؟!..شوية ليوم !!..
بشار"الصمت"...
الفرملي"مربع ايدو وكيشوف فيه باش يشوف رد فعله و يعطي تقريره لطبيب المختص تما" : مكالمي دابا...
هاشم"هز فيه راسو" : علاش !!..
الممرض : جاتو واحد النوبة عصبية...اضطرينا نزيدو ليه لادوز ديال المهدئ...
هاشم"بقى كيشوف فيه كايحاول يفهم اشمن نوبة ورجع شاف فيه...فلحظة بشار تحرك وبانت ايدو الي مدورين عليها فاصمة...كمش حجبانو وهز راسو فالممرض غمزو بمعنى منين هادشي.."
الممرض"غمض عينيه وحرك راسو باش هاشم يفهم"...
هاشم وسع عينيه ورجع شاف فايد بشار...هنا عرف انه كايضرب راسو...وعرف من بعد ماخرج من شومبر ديالو...بلي لقاوه كايضرب ايدو كنوع من النوبة غضب واعصاب كاتخليه يبرد الحر فجسمو...هنا عرف هاشم هاد القضية حيث قبل كان كايتعصب فصغرو وكايضرب بايدو اي حاجة قدامو على غفلة كايبقى يجمع يجمع كمية الغضب حتى كايغفلهم كل مرة واش داكشي الي خلا ديما توريا كاتقول را كايغفل ماثيقوش بيه...(الى عقلتو فاول بارت بان فيه بشار ضارب ايدو قاليه هاشم مال ديك الايد تاني وشاف فيه بشك واش رجع للعادة ديال يآذي جسمو)...
هادشي كامل داز ك فلاش رجع هاشم لدوك الاشهر ديال المصح...هز عينيه قدامو...تنهد تنهيدة طوييييلة وهبط راسو باسف عينيه غرغرو بجهد...مولاي حفيظ عرف بالحادثة...عارف حجم الحب الي من جهة بشار لحبيبة...عارف ان حبيبة هي الي رجعات بشار "انسان" على قولته «وليت بنادم »...
هاشم سعيدة حسام عيدة عبد القادر اي واحد كان عارف بشار غايلاحظ الفرق الي ولا من الي بان بشار لحد ساعة...دار ايديه على راسو وشابكم فوقه...توثر وخوف وغضب تجمعو فهاشم دابا...هادشي كااامل داز قدام عينيه...دار الكارو في فمو نتر منو...واقف وخاشي ايدو فجيب سروال...
بقى هاشم جالس شوية حتى حس براسو هو تهدن..وناض دخل لداخل ونزل فين كاينين لتحت...لقى بشار بنفس الوضعية مع حبيبة معنقها جنبو محتاويها بحنان واهتمام...ماشافش كاع جيهة هاشم...بقاو على ديك الحال ليلة كلها...مرة يهدئها مرة يخرج يكمي ويشرب قهوة حتى يتهدن شوية ويرجع عندها...حلفات ماتنعس حتى تعرف احوال باها....سعيدة وهاشم مافارقوهومش كاااع ليلة كلها الي حتى بغا ياذن الفجر عاد تمات جايا ناديا الي كانت كاتصلي فمسجد المصحة وحطات ايدها على كتفها...
ناديا"بصوت متعب" : للا سعيدة سيري ترتاحي اه بايصبح الحال...
سعيدة : ماشي مشكيل الحاجة...يصبح ويفتح نعرفو غير صحة الحاج كي بفات هاو نصدو نرتاحو...
ناديا : الله يا ختي عذبناكم معانا...هي سمحي لينا...
سعيدة : الحاجة ناديا حنا تاوع بعضياتنا...(طبطبت ليها على ايدها) مابيناتنا والي...
تنهدات وهي تحرك راسها بثقل...ومشات ناحية حبيبة الي كانت متكية على الحايط ومغمضة عينيها...طبطبات عليها وهي تحل عينيها...
ناديا : نوضي ماما تصلي العشا قبل ما ياذن عليك الفجر...
حبيبة"بقات كاتشووووف فيها بحال الى غالبها نعاس وماواعياش"...
ناديا : حبيبة !!!...مالكي ؟!..
حبيبة"بقات كاترمش فيها ونطقات بكلام بحال لا وعي هزات ايدها وشيرات بصبعها ناحية البلوك..ببحة تعب وبكااء فصوتها الي شبه كايتسمع..." : بابا...سمعت بابا تايعيط ليا...
ناديا : كيفاش ؟..
سعيدة : بسم الله عليك ابنتي...توگضي الله يرضي عليك..
حبيبة"كتحرك فراسها" : اه سمعتو ماما والله...گاليا القشة شهادشي..."عينيها نزلو بدمووع"..والله اماما تا سمعتو...
حست بيها ناديا بغات تبدا تجيها هيستيريا وهي تشدها من دراعها وقفاتها وخرجت فيها عينيها....
ناديا : شششش...هيي تتحلمي...ايييه باباك بيخير ولكن اه باقي ماتوگضش مزيان...گولي بسم الله الرحمن الرحيم...وبتسمعي مني زوج كلمات...بتنوضي دااابا تمشي معاك سعيدة ولا راجلك بتدخلي توضاي ودخلي لمسجد هاهو هي هنا فنفس ليطاج...وسرحي صلاية تم اه كاين الشيلان باش تغطاي كاين كلشي تم...وصلي العشا والشفع والوتر...وهزي كفوفك ودعي مع باباك...حنا قدام الصحة ابنتي والو...والصحة قدام الله سبحانه وتعالى كي والو...هو الي قادر على كلشي قادر يشافيه وقادر يبتليه...قادر يبيتها فشان ويصبحها فشان...
"زادت وسعات فيها عينيها بطريقتها المعروفة مع ولادها"...
ناديا : سمعتيني ؟؟!!!...(ضارت وهو يبان ليها بشار جاي معاه هاشم..اما ايوب خرج تاهو يضربو برد شوية ويرجع عندهم)..
بشار"عينيه كانو على حبيبة الي بانو ليه قطرات دموعها نازلين..كمش حجبانو وزاد تعصب من بكاها..قرب لعندها ودور ايدو على كتافها"...
ناديا : بشار...الله يرضي عليك اولدي ديها للمسجد الي كنت فيه دابا...
بشار"هز ليها شعر من على جبهتها مسحها ليها ودار ليها بعض الخصلات ورا وذنيها..وهز ليها ذقنها تا بان وجهها" : شوفي فيا نتي...
حبيبة"هزات عويناتها الي ولاو كي الشقة بالنفاخ والحزن وشافت فيه"...
بشار : قويتي البكا بجهد..وهادشي بدا يبرزط ملتي تاني.."خرج عينيه بشوي فيها"..تحركي دابا فين گالت ليك الواليدة...مزيان ؟!..
تنهدات وهي تحدر راسها وحركاتو بشوية...كانت ناديا كاتشوف فيهم تا حركت راسها وهي تحدر راسها هي مطمئنة...عنقها جنبو ودار ليها ايدها ورا ضهرو شدات فيه ومشا بيها دازو من حدا ايوب الي كان داخل تبع ليهم العين ومشا جلس حدا ناديا...فين حين هي دخلها لمراحيض الي تما...توضات وخرجات لمسجد دخلات ليه...صلات تحية المسجد وتبعاتو العشا وشفع والوتر...عاد جلسات هازا كفوفها لله...داعية بالشفاء لباها...
حبيبة : يااااربي تشافيه يااااربي...يااااااربي طول ليا فعمرو يااااربي...ياربي هي يفيق منها ونديرو ليه الي با...يااااربي هي فيقو يااا ربي وندير الي بيتي اسيدي ربي (بعفوية ماعارفاش اش تقول)..ياااربي تشافيه يااااربي...ياااربي اه مانقدرش بلا بيه ياااااربي...ياربي طول فعمرو يااااربي...اهئ...(كاتمسح فدموعها)..مابيت والو يا ربي هي يفيق ويولي لباس...يااااربي اه على قيبالو تزوجت هي باش منشوفوش هاكا...يااااربي تشافييه يااااربي اهئ...
كملات دعائها وهي تنوض حسات براسها خفافت وبلي كاين امل حيث الامل فالله كبييير...«لَا تَقْنَطُوا مِنْ رَحْمَةِ اللَّهِ »..مسحات دموعها وحيدات شال حطاتو بلاصتو وحيدات واحد العباية طويلة حيث الي لبسها بشار كانت عند الكعبة...وخرجات لقاتو واقف حدا واحد النافذة خاشي ايد فجيب وايد شاد بيها تيليفونو كايكتب فيه شي حاجة..هز راسو بانت ليه خشا تيليفون وقرب لعندها..قبط ليها وجهها بين ايديه..وتحنى لعندها باسها فشفايفها مدة حتى هز راسو وشاف فيها كايفحص ملامح وجهها...
بشار : ماتبرزطينيش من جيهتك يا حبيبة ..
حبيبة"هزات ايدها وهي تبعد ليه ايدو وهي تلاح عليه عنقاتو وحطات رايها على كرشو وقالت بصوت عياان " : ماقدرتش من جيهة بابا.."تكلمات بعفوية" راك عارف علاقتي ببابا...هو كلشي عندي..
ماجاوبهاش...اكتفى انه يخليها على خاطرها بقى كايدوز بايديه على ضهرها حتى حس بيها تهدنت وسكنااات...
بقاو شحاال وهما معانقين حتى خرجها قدام الكلينيك تشم شوية الهواء...حتى تنفسات وطلبات منو يرجعو يدخلو...صبح الصباح تقريبا الساعة الثامنة...
ناديا غاديا جايا فداك الكولوار...مرة يخرج فرملي يبلغ اقرباء شي حد من الي داخلين للانعاش...اخر واحد خرج بلغهم بلي فاق واحد من تم...بديك الفرحة الي فرحو عائلة داك المريض لقاو راسهم تاهما كايضحكو معاهم...
حتى تمات جايا لطيفة وجهها مسيق بالدموع...جايا وتقلب تابعاها بنتها سناء...غا بانت ليها ناديا وهي تمشي تزرب..
لطيفة : ناديااا !!!..اشاتا هادشي سمااعت !!...
ناديا"عنقاتها كاطبطب عليها" : مكتااب احبيبة مكتاب...
لطيفة : اش گالو ليكم باقي ماعليه والو !!...
ناديا : مازال...
ضارت عند حبيبة الي غير شافتها وهي تلاح عليها...تقولي شمات فيها ريحة باباها...تقولي شافت باها فصورة لطيفة حيث هي وياه كايتشابهو...نفس تكمشية العينين من جناب...من كثرة ما بكات ليطفة بكات تاهي معاها...جاب الله بشار كان خارج مع هاشم يجيبو ليهم الفطور...بكات حبيبة فحضن عمتها تا بردات...بشار ماخلاهاش تبكي واستغلات غيابه وبكات....سلمات على سناء وجلسو....من بعد ما سلمو على سعيدة الي شكرات وجود سعيدة ووقفتها مع ناديا وحبيبة...
ناديا : جيتو فالكار...
لطيفة : لا..جينا فطوموبيل اه فين بتلقاي الكار ديك الوقيتة نبقى هي نتسنى ونتعطل...جابنا فيصل هاهو خليتو يبلاصي طوموبيل...
مازال كايهضرو حتى تم داخل نيت معاه ايوب...سلم على ناديا بحزن حيث عزيز عليه خالو بزاااف...مد ايدو سلم على حبيبة...
فيصل : مايكون عندو باس...غير توگضي احبيبة راني كنعرفك من جيهة باباك كيفاش دايرة...
حركات ليه راسها وصافي ماكانتش عندها طاقة باش تجاوب...حتى شوية وهو يدخل هاشم وبشار هازين ساشيات فيهم الفطور...بشار كان هاز ساشية صغيرة فيها واحد تيرموس ديال حبيبة جابها من برطما...دارو ليه فيها اتاي فالقهوة وجابها ليها معاه...بانو ليه ناس جداد قدر يعرف منهم غير لطيفة...فيصل وسناء ماداهاش فيهم...مشا ديريكت حدا حبيبة جبد ديك تيرموس ومدها ليها...
بشار : شدي...
حبيبة"شافت فيه بامتناع صابحة مافيهاااش ماياكل حس الشهية ماكاين بغات تبدا تبكي ليه وهو يحمر فيها تحميرة وحدة شدات من عندو تيرموس...وبدات تشرب جغمة بحال رشفة غير بزز باش مايبداش عليها بالزابور ديالو...
هاشم : يلاه بسم الله الحاجة...
ناديا"حطات ايدها على صدرها" : والله مافيا..علاش عذبتو راسكم اسي هاشم...
سعيدة : ولواه الحاجة...شدي گعدي راسك باش بغيتي دخلي تشوفيه نشاعلاه لا فاق ؟!...
هاشم : بغيتي تكملي عليه لا شافكم هوك صفرات تا الوگفة ماتشدوها ؟!...
ناديا : وسبقي هي نتي بعدا ويلي تالعشا ماتعشيتيه ومعذبة راسك معانا...
حبيبة"هزات راسها وشافت فيها ونطقات بصوت متعب بزاف" : فطري اخالتو سعيدة...
سعبدة"تبسمات بفرحة الي هضرات حبيبة" : نفطر اكبيدتي نفطر...فطري حتى نتي...
بزز باش شدو من عندهم داكشي الي جابو ليهم من فطور...حبيبة كاتشرب وتنتر ندغة صغيييييييورة بزز حيث مقابل معاها...تا هزات فيه عينيها وقالت...
حبيبة : ونتا...
بشار : فطري...
حبيبة : ونتا حتى نتا بتبقى بلا فطور..."سكتات كتاخذ راحتها من الهضرة عيااانة بزاااف..عاد نطقات"...شربتي دواك (ديال الصرع)..فطر باش تشربو...
بقا كايشوووف فيها..ماهضرش انما قرب وباس ليها راسها..تا حدرات عينيها يلاه بغا يهضر وهو يتحل البلوك وخرج الطبيب لعندهم...ضارو كلهم كايتسناو واش غايهصر معاهم حتى شاف فيهم...
طبيب : الحاج فاق...
ناديا"وقفات هي وحبيبة وكلهم وقفو وقربو لعندو" : كي بقى شوية ياك فات الخطر ؟!..
الطبيب : مانكذبوش عليكم الحاجة..الخطر باقي عليه...حنا كانحاولو معاه يبقى مهدن ومستقرة حالتو...
حبيبة : و واخا نشوفو عافاك !!..
طبيب : كل واحد يدخل وحدو...ثلاثة دقايق ك ماكس باش مايعياش ويدير شي ايفوغ...راااحة ثم الراحة...
حبيبة : اه اه..."ضارت عند ناديا" ماما بندخل نشوفو عافاك..
بشار"جرها من دراعها" : سيري غسلي داك الوجه ودخلي عندو"خنزر فيها" فين محركة عندو بهاد الحالة ؟؟..
ضار عند سعبدة وطلب منها تمشي معاها...مشات بزربة باش دير الخاطر وتدخل حيث بصح ماتقدرش تدخل عندو هكاك...شاف فناديا وطلب منها يسبق هو بينما تجي حبيبة باش يبقى معاها ماعارضاتش ابدا..تبع الطبيب لبسوه تاهو لباس..ودار الكمامة..ملامح حجبانو الي عارفو يقشعو هو غا بديك تغوبيشة...حتى دخل وحيد عليه ستار..بان ليه مولاي حفيظ مدور وجهو كايرمش وعياااان دايرين ليه الاكسجين...حتى سمع بصوته "الحاج"...دور وجهو بتعب
بشار"قرب عندو شوي محني" : شوية ؟!..
هز فيه عينيه..بقى كايشوووف فيه مدة...زير على ايديه تا دعقو داك المقبط فيهم....رجع عقله مباشرة لكلام القرافلي..
~~~
القرافلي : الى بغيتي تأكد...نزل عينيك لدراعو ايديه معصم ديالو...شوف واش كاينين شي ندبات شريطات ديال الضرب..
~~~~~
مولاي حفيظ نزل عينيه لايدين بشار..كانو مغطيين باللباس لكن كان مطلع شوية الكمايم...بانو شي شريطات حدا بعضياتهم قرااب...
~~~
القرافلي : هو لحمو وما رحمو بغا يرحم ليك بنتك ؟!...
بقات كاتردد ديك بنتك بنتك بنتك...فوذنيه...حتى هز عينيه ووسعهم فيه ودور وجهو عليه...شوية وهي تسمع الالة ديال القلب الي كانت كاتسمع طط ط ط...لخط مستقيييييم...وتسمعات طوووووووووووووط....
حتى تسمع صوت الالة ديال القلب...دور بشار راسو ناحية الالة الي تسمعات بانو ليه الفراملية جاييين يجريو لعند المريض الي سكت ليه القلب....وكايوركو على بوطونة باش يجي طبيب لعندهم....جات واحد الفرملية...
الممرضة"لبشار" : اسيدي عافاك خرج من بعد ودخلو عندو...
حرك راسو بشوية متفهم الامر...رجع شاف ناحية مولاي حفيظ وكمش حجبانو من طريقة باش دور راسو عليه مافهمش مالو...ورجع ضار وخرج من تما...تلقات ليه حبيبة وناديا والبقية...شافتو خارج ولاخرين داخلين يجريييو....
حبيبة"بملامح مخلوعة" : بابا ؟؟...بابا مالو...
بشار : ششش..."ضار ناحية الانعاش"...لا... شي حد تم جاتو crise..
ناديا ولطيفة وايوب تنفسو الصعداء...حبيبة غمضات عبنيها وتنهدات براحة...بانو ليهم الفراملية كايتجراو ويبعدو فيهم طاح ليهم الما فركابي...جلسها فالكرسي تما وجلسو كاملين ورجعو ثاني لمود الانتظار الي طااال...شي ساعة عاد تم خارج طبيب وسمح ليهم باش يدخلو عند مولاي حفيظ...سبقات حبيبة هي اللولة بطلب من ناديا حيث عارفاها ماغاتصبرش وماتهنى تاتشوفو حال عينيه...
دخلات هاد المرة وكلها امل انه يكون متحسن ولو غير شوية...لبسات داك اللباس ودارت الطاقية والبافيط ودخلات...ديريكت لفين كاين حتى وقفات عليه...كلها ولات كاترعد وهي كاتشوف فيه كان مدور راسو لهيه ومغمض عينيه...حاولات ما امكن انها تصرط البكية باش ماتبينهاش فصوتها ويسمعها تكمل على ما بيه...مدات ابدها وشدات ليه فايدو حتى حل عينيه وهو يدور...
حبيبة"بصوت منخفض شافت فيه بعويناتها الخوضر الي باين عليهم تعب السهير...والحزن" : بابا...
م.حفيظ"كايشوف فيها وكيرمش ماقادرش يتكلم وباغي يتكلم يقوليها شي حاجة على حالتها...الي ماتخفاش عليه وهو حافظها مزيان..حرك راسو مثقل وغمض عينيه وحلهم فيها"...
حبيبة"حطات ايدها فوق ايدو مطبطبة عليه" : هيي بلا ماتعيي راسك..ياك ابابا شوية ياك ؟!..متتحس بوالو ؟!..
م.حفيظ"هز نفس وحطها وحرك راسو مثاااقل"..
حبيبة"تحنات باست ليه ايدو" : هااكاك هييي براسك جاوبني..باش متعياش واخا...انا بايخصني نمشي حيث طبيب گالينا هي ثلاثة دقايق..شوية عاوتاني وبنرجع عندك...بادخل عندك ناديا اهييي بزز باش خلاتني..نقاد معاها ضواصا لمرة جايا متخلينيش هههه...
م.حفيظ"حرك راسو وعينيه كايغرغرو وهو كيشوف فيها كايحاول مايتفكرش الهضرة ديال داك المحامي كايحاول مااا امكن مايفورصيش باش مايتعصبش وتراجع صحتو....تحنات لعندو وقربات حتى باست ليه راسو ونزلات لحنكو...وباست ليه ايدو...باغي يهز ايدو يطبطب عليها يقول شي حاجة لكن صحتو حاليا على قد الحال...ومازال مامستقراش حالتو...شافت فيه وهي تحرك راسها وضارت خرجات...غا هي مشات نزلو دموعو على طرف عينيه...داكشي الي كان حابس غير تفاوتت وهما يلقاو طريقهم...
خرجات لعندهم بعدا منفسة شوية الي شافتو حال عينيه...خلات ناديا مشات دخلات وهي جلسات جنب بشار فين طبطب ليها تجلس حداه...عنقها بجنب كايقلب فوجهها واش رتاحت دابا الي شافتو...
بشار : هانيا ؟!..
حبيبة"تبسمات ليه وحركات راسها بزربة"..
هاشم : على سلامتو ابنتي...
حبيبة"شافت فيه" : الله يسلمك..شكرا بزاف عمي هاشم نتا وخالتو سعيدة شكرا حيث وقفتو معانا البارح واليوم..لهلا يخطيكم...
سعيدة. : وا بنتي نعاودوها حنا ديال بعضياتنا...كيفنا كيفكم راه منا وفينا...
هاشم : من غير نسيبنا راه من عائلتنا...تبقايش تهضري هوك..على سلامتو...
ابتاسمات ليه ورجعات كاتسنى تا خرجات ناديا وتبعاتها لطيفة...شوية وهو يتم داخل فيصل الي مابانتش ليه مو ووجه سؤالو لحبيبة...
فيصل. : حبيبة فين الواليدة ؟!..
بشار"هز حاجبو وهز فيه عينيه عاد رد ليه البال"..
حبيبة : دخلات عند بابا...
فيصل : شوية بعدا...
ناديا : شوية شوية...هو عند الله اولدي...
ايوب : هي تخرج بندخل انا...
فيصل : نتبعك انا من بعد...وايلي الخال خرجها منا خلعة...
سناء : غير سكت والله ماقديت ناكل باقي ولا دوز ليا من الي علماتنا حبيبتي ناديا...
فيصل حرك راسو وبقى واقف شاد الگوبلي ديال قهوة كحلة فايدو ومسند على الحايط...مرة مرة عينيه كايمشيو لبشار الي قشعو فاش هز فيه عينيه وشاف فيه بواحد شوفة كاتخلع...بانت ليه حبيبة تخشات فبشار وعنقها وهو يهز عينيه وشاف ناحية الانعاش مخليهم على راحتهم وخصوصيتهم...
وصلات وقيتة اذان الظهر وهو يقرب هاشم لعند ناديا...
هاشم : الحاجة الله يجيب الشيفا..خاصنا نرجعو لدوار نشوفو الوليدات ونرجعو نجيب عمايا مي...
ناديا"تبسمات ليه" : الله يجيكم الخير اسي هاشم...
سعيدة"كاتقاد فشالها" : الله يشافيه...نزگي غا بناتي هاو نرجعو تاني نشوفوه..."شافت فحبيبة" بنتي ماتبقايش مسبقة الفال الخايب...ديري ما وصاتك ميمتك هزي كفوفك لمولاك هو القادر على كلشي...
وقفات حبيبة هي وبشار سلمات على سعبدة وتسالمو معاهم كاملين وشكروهم على وقفتهم...خرج معاهم بشار تال قدام الكلينيك...سلم على سعيدة وهو يشوفيه هاشم وقال...
هاشم : بعد غذا الجلسة ؟!..
بشار"خاشي ايديه فجيابو..حرك راسو"...
هاشم : يكون خير ان شاء الله...
.يلاه قال هاشم بسلامة...وهو يوقفو بصوته...
بشار : كانتسناك...من بعد..
هاشم : نهار الجلسة ؟...
بشار"حك بشار شنايفو بسنانو وهز فيه عينيه وغمزو" : تعلمني بداكشي الي عرفتي...
حرك ليه راسو ببطء وهو يدور ودخل خلا هاشم كايشوف...
«وما ضَرني غريب يَجهلني، وإنّما أوجعني قريب يعرفني»...
دخل بشار لداخل كايقلب بعينيه عليها مابانتش ليه يلاه بغا يسول عليها ناديا وهو يسمعها كاتقوليه "هاني"..ضار لعندها بانت ليه جايا هازة قريعة الماء...وجايبة گوبلي...قربات لعندو...
حبيبة : يلاه نخرجو حدا طوموبيل...
بشار : محتاجة شي حاجة...
حبيبة"حركات راسها بلا" : باش تشرب دوا ديالك...راك نسيتيه..
هز حاجبو مصدوم من كلامها...كيفاش عرفات بلي ماشربش دواه !؟..نزل عينيه لايدها الي فيها القرعة ورجع شاف فيها...
حبيبة : ديما فاش تتكون مبرزط ولا مشطون ماتتشربوش كاتنساه...وانا حاسبة ليك شحاال باقي فالباكية...الي عندك فطوموبيل بقا هي زوج حبات...وحدة شربتيها البارح ومامشيتيش لدار باش تجيب الباكية ديالك...يعني باقي وحدة...يلاه تشربها ونيت بنخرج شوية برا نتنفس "حطات ايدها على حلقها بضيق"...هفففف تخنقت بزاف...
هز راسو شاف قدامو وهو يدور ايدو على كتفها ودورها وتم خارج بيها مادوا ما تكلم...خرجو لباركينغ فين مبلاصي طوموبيل كان جنب لاكلينيك...جبد من جيبه الكونطاكت فتح البيبان ديال طوموبيل...حلات الباب وركبات بلاصتها حداه وحل تاهو الباب...خشا الكونطاكت بغا يكليكي باش يديماري وهي توقفو...
حبيبة : خليني هي هنا...
بشار"ولا ريح مادار والو...تقاد فبلاصتو وجبد باكية الدواء...لاح حبة في فمو وشد من عندها القرعة شرب عليها...عاود زادو الما تاني وسد القرعة وتهز شوية جبد من جيبو باكية الكارو جبد منها سبجارة شعلها تا نتر منها...دور وجهو لعندها بانت ليه متكية ومغمضية عينيها...مد ايدو لبوطون...حلات عبنيها شاهقة ملي حسات بالكوسان تحرك بيها...
بشار. : ششش..تكاي شوية تم...
حبيبة"رجعات غمضات عينيها" : ممم...
"الرحامنة"...
وصلات الوقيتة ديال الرجوع من المدارس...زكرياء كيف دخل مشا يجغدظ وطلع ديريكت يراجع واحد الكونطرول عندو فالعشية...اما اشراق غير دخلات بانو ليها كل مدهي فاشغالو...بانت ليها عيدة جالسة شادة تسبيحها وتسبح وتيليفونها يصوني حداها وهي مامدياها فيه...
اشراق"باست ليها ايدها" : مي تيليفونك كايصوني...
عيدة : خليه تا يسكت على خاطرو...
اشراق"طلات عليه" : عمتي مليكة امي...
عيدة : عرفتها...
عوجات اشراق فمها وهي ضرب دورة يلاه غاديا طالعة تلاقات ب ربيعة جايا نازلة لابسة جلابتها وشالها ودايرة صاكها فدراعها...
ربيعة : جيتي..سيري طلي على مك...
اشراق : مالها...
ربيعة : يلاه خرجت من عندها...بحرا نزلت ليها سخانة من يامس فالليل..كانت طايبة وحنا ماجايبين خبار غا عمتك مليكة الي عيطات عليا ندخل عندها...سيري طلي على مك ونتي من الي تجي ماتشوفي جيهتها...سيري را خليت غا يوسف الي بارك حداها...
اشراق : مافيقتينيش...واخا هاني غاديا...
نزلات ربيعة كاتزرب خلاتها طلعات لعندها وهي سلمات على عيدة وخرجات حيث داير معاها سيحمد غايجي دابا باش يديها لمراكش عند طبيبة الي متبعة معاها على الحمل...وقفات شوية تا عيط ليها وقاليها تخرج عندو برا الفيرما وبالفعل مشات مسافة تا خرجات وهي تلقاه واقف بسيارة ديال باه...ركبات حداه...
ربيعة : عالسلامة...يومين ونتا غاطس مسافر...
سيحمد"كسيرا بسيارة شاد طريق" : خسر ليا الكاميو راني جيت عا فالكار...تلاگيت المداني هو الي عطاني طوموبيل...
ربيعة : مافراسك والي اش وقع...
سيحمد : اش تاني...
ربيعة : الحاج نسيب ولد خوك المسخوط...جا يامس عدنا دخل توريا ولالة وسيدي بقاو شحال وهما سادين عليهم...شوية اتا خرجاات توريا جناوح منخرها يفرقرو وعينيها هنا فين واصلين...هاو شوية وهو يخرج هو داك المراكشي...اتا سقنا الخبار بلي جاتو شي مرضة خايبة فطريگ لحگ عليه هاشم وسعيدة داوه كنينيك (كلينيك)..وراه لالة من يامس (البارح) وهي مكونة ماكلتها قليلة...توريا سدات عليها فالبيت من يامس فالصباح...ايييييوى واحد الحالة...
سيحمد : هاناري ناري كاااع هادشي...
ربيعة : ولهلا يزيد كثر...شوووف اش ضاير تم...
سيحمد : اش بغاهم داك المراكشي !!؟..
ربيعة : ويعلم الله اش كاين...حاسة بلي ليها علاقة بالمسخوط ديال ولد خوك يگطعو علينا...(ضارت عندو مخنزرة)..مازلتي مابغيتي ترد ليه دقة ديال قلة ترابي الي دار عماك ؟!..
سيحمد : لا...
ربيعة : ولهلا...بقى هكاك تايجي تاني هاو يزيدك شي حاجة كي وجهو...مو ومارحمها بغا يرحمك...نفسي هزاتني عليك ونتا ممسوق...الحاصول شغلك هذاك...
سيحمد : الدقة جاياه ملي حل عينيه...بغيت ليه ماكثر ؟!..لهلا يردو...الي فيه كافيه...
ميقات فيه وهي دور لنافذة حاضية الطريق الي غاديا بيهم لمدينة مراكش...الي فهاد اللحظة وفيها بالضبط فالباركينغ ديال المصحة...ماحساتش بالوقت امتى دازت وغفاات بيها عينها...مابرزطهاش ومافيقهاش ماهضر مادار حتى حاجة الي تزعجها وتفيقها...فيقها غير تيليفونها الي صونا وهي تنوض اشهقة بجهد حاطة ايدها على صدرها...
حبيبة : ببب بابا...بابا...
بشار"حط ايدو على كتفها مهدنها" : ششش..تهدني...
حبيبة"صرطات ريقها ورجعات نفس...نزلات عينيها لتيليفون بانت ليها نمرة فيصل" : الو فيصل...
بشار"كان ضاير لهيه غاوسمع سميتو وهو يدور عندها مخرج عينيه وهاز حاجبو تا ضارت شافت فيه ماعرفت باش تبلات" : ها...ممم ماما..اه هاني هي فباركينغ...واخا واخا...
قطعات عليها وهي دور عندو قبل مايهضر زربات فالهضرة...وتلفات ولات تهتهت ههههه....
حبيبة : لا هي ماما طفا ليها تيليفون وعيطات ليا من عند فيصل...خويا فيصل...خويا...ولد عمتي...هي سولت فيا وفيك...
تاواحد فيهم ماقدر يتزحوح من بلاصتو...مشا غير فيصل وسناء لحقو لعند رقية باش تجي هي ويبقاو هما مع الوليدات بينما يولي باهم شوية ويجيو لعندو يشوفوه حيث صغار مايقدروش يدخلو للانعاش...
وصلات العشية...كان واقف بشار قدام الكلينيك كايهضر فالتيليفون مع المحامي...كمل معاه ويلاه بغا يدخل وهو يجيه اتصال من "المانيا"...بقا كيضوف فتيليفون كايصوني الي حتى سالا على خاطرو عاود صونا من جيد...عض على شنايفو كيشوف فيه تاني قبل مايطلق الخط ويجاوب....
فهاد اللحظة كانت جالسة حبيبة شادة طاسة صغيرة فيها صالاد كتاكل فيها بزز...بأمر من ناديا...
ناديا : الحاج راه بين ايدين الله...اش نكونو حنا حتى نعارضو ارادة الله...كولو باش تقدرو تحركو الى ولا شوية وندخلو عندو ثاني بايلقانا بحال ما هاكا ؟!..تنفخي علينا نطيحو ؟!..
لطيفة : هي تقليقة اناديا...ماعطانتش خاطرنا...
ناديا : وانا عطاني ؟؟..اه راجلي هذاك وبات ولادي...بنفوتو ؟..بيت نتقوت باش نوقف بايشوفني عيانة ولا سخفانة بيتي نكملو عليه ؟!..نتي متتعرفيش الحاج...(شافت فحبيبة وخرجات فيها عينيها) ونتي بتاكلي مزيان...وجهك صفر من البارح وهانتي بدخلي فيومين هي بزز باش واقفة...راجلك راه شاد معاك بات الخاطر...ديري بحسابو تاهو شوية...
حبيبة"الصمت"...
داز شوية الوقت وهو يتم جاي "بشار"...هزات حبيبة عينيها فيه وهي دور ناحية واحد طاسة حداها هزاتها مع فرشيط بلاستيك ولانجيت...وطبطبات حداها...
حبيبة : اجي تاكل ماتغذيتيش...
ناديا : تغذا اولدي حتى نتا من بارح مانعستي...
بشار"شاف قدامو ورجع دور راسو عندها مشتت شوفة" : اشنو گالو ليكم هنا ؟!...
حبيبة : رجع نعس...باقي ماكاين والو...نزل عندو الكاغديولوغ..حتى يخرج ونعرفو اش كاين...
حرك راسو وريح حداها...عطاتو ماكلتو ياكل حيث الغذا فاات وقته تاواحد فيهم ماكال شي حاجة حتى مشا هو تقدا ليهم ماياكلو...
تقريبا وصلات ثلاث ايام وهما على هاد الحال مرة يقولو ليهم استقرت الحالة مرة كاين الشك...الكخيز كاغدياك الي جاتو ماكانتش ساهلة...بشار مابقاش دخل عندو من داك النهار...اليوم عندو الجلسة الي عليها غايقدر بنسبة كبيييرة انه يتحكم لصالحه وبالتالي يقدر يطالب القاضي بانه يتكلف بيوسف الي عام تقريبا وهو كايتقات.ل على ودو باش يتكفل بيه....خلا حبيبة حدا ناديا ومشا يحضر لجلسة طبعا من بعيد مابغاش يتواجه مع مو..
خرج الطبيب من الانعاش من بعد ما دار دورة لعند المرضى الي تما ولعندو...حتى وقف عليهم...وشاف لعند ناديا وحبيبة ولطيفة الي قربو لعندو...
ناديا : امضرا دكتور ؟!..
دكتور : نقدرو نگولو تجاوز مرحلة الخطر بواحد النسبة كبيييرة...على حسب تقرير الكاغديولوغ بايخصو يبقى تاني الليلة والى بقات مستقرة غذا ان شاء الله يتحول لشومبر نورمال...
حبيبة"بامل" : نرتاحو ياك ؟!..
طبيب"تبسم ليه وحرك راسو حيث حضر لحالتها هادي يومين واكثر" : الامل فالله ابنتي...
حبيبة : نقدر ندخل عندو ؟!...
طبيب : حاليا هو فايق ولكن هو الي طلب مني نعلم الزوجة ديالو دخل تشوفو (شاف فناديا) ماتفوتيش عشرة دقايق...مايكونش ايفوغ فهضرتو...اي حاجة تعصبو ماتذكرش ليه...
ناديا : واخا دكتور...
طبيب"خشا ايديه فجياب الطابلية وشير ليها براسو" : Vous pouvez entrer (تقدري دخلي)...
رجعات حبيبة جلسات حدا عمتها ولحق عليهم ايوب تاهو عاد دخل جلس حداهم...توجدات ناديا ودخلات لعندو...قربات لعندو وهو يبان ليها حال عينيه وكيشوف فنقطة بعييييدة...حتى حس بيها وهو يدور وجهو لعندها...تبسمات ليه تا بانو سنانها وتغمضو عينيها...شاف فيها فلحظة ناديا العروسة الي تزفات ليه وتعجب بزينها وبكلامها الحلو وضرافتها...بزز باش قدر يتبسم تاهو يردها ليها...هز ايدو الي فصبع سبابتها مقبط ديال التخطيط دالقلب...وشير ليها تقرب لعندو...
ناديا"طبطبات ليه على كتفو" : الحاج...شويا ؟!..
م.حفيظ"حرك راسو..صرط ريقو ونطق بصعوبة بالغة" : الحاجااا..
ناديا : هيي سكت ماتعييش راسك بالهضرة..انا نهضر ونتا حرك راسك...بغيتيني ؟!..
م.حفيظ"حرك راسو"...
ناديا : توحشتيني هههه...
م.حفيظ"تبسم بتعب..وكحب شوية وحرك راسو..الاكسجين على فمو ونيفو..مد ايدو حيدو شوية" : ب بيييتك...
ناديا : هاني الحاج...
فنفس التوقيت لكن فمكان اخر...فالمحكمة ديال مراكش...فالجلسة لداااخل...من بعد ما ترافعو المحاميين كل واحد قال اش عندو على الموكل ديالو...ماكانتش توريا حاضرة وماكانش بشار طبعا حاضر...كان واقف برا...
القرافلي : ولكم يا سيدي واسع النظر...
القاضي شد دوك الوراق الي عطاه...حل الملف ودار نظاظر الشوف بدا يقرا فيهم ورقة بورقة...خذا وقت كااافي باش قراهم وتمعن فيهم...ضار عند المستشارين من بعد ما عطاهم يقراو حتى هما... المحامي ديال بشار بقى كايشوف فيهم ورجع حول عينيه ناحية المحامي القرافلي...
القرافلي : كلشي قدامك اسيادة القاضي...حتى لو سيادتكم عطيتو الحكم الاخير لصالح بشار الهاشيمي...هنا غادي يطلب من سيادتكم انه يتكلف بيه...كيفاش غايتكفل بيه وهو ماقادر حتى يقاد حياته ؟..عايش برا البلاد...عندو مشاكل تما هذا غير المصح الي دوز فيه عام هادي سنوات...شهر وزيادة باش تعطاه توقيف بتهمة ضرب وتعن.يف سيدة خدامة معاه...
اخر جملو خلات محامي بشار يوسع عينيه بصدمة...منين جاب الاخبار هذا ؟!...هنا كارثة يعني مستحيل باقي بشار باقي يحلم بيوسف ؟ ...
يتبع...
التعليقات
لا توجد تعليقات بعد، كن أول من يعلق.