محتوى القصة
من كثرة الضغط الي تمارس عليها هاد الايام حتى من نفسها...خرجات كلام ماعمرها كانت حتى تفكر انها تقولو ولا يطيح فبالها...الدموع نشفو فهاد اللحظة وهي كاتسمع كلام امها القاسي ليها...بالرغم من انها عارفة اشنو جايها وبالرغم انه عاطياهم الحق فهاد الكلام ولا فالتصرف لكن كان قاسي وحرق ليها قلبها...كانت كتهضر ومزيرة على ايديها تا تقطع منهم د.م...قالت اخر جملة ليها وضارت غاديا خلاتهم كايشوفو...لطيفة ماعجبهاش نهائيا كلام ناديا لبنتها حسات بلي قسات عليها بزاف فالهضرة وحتى كلام حبيبة ضرها فخاطرها حيث عرفات بلي وصلات ليها للحد الي خلاها تخرج داك الهضرة عاكسة ما فالقلب...
لطيفة. : العربي ديها ماتخليها تمشي وحدها...
ناديا"بقات تشوف فيها بنفس الشوفة مخنزرة واخا هضرتها زعزعاتها من لداخل وصدماتها لكن مابيناتش...حتى ضارت لسيارة ركبات فيها وسدات الباب بجهد"...
سناء : بفففف...يلاه بابا...(عيطات) حبيبااا تسناي...
.الجو تشحن..شي كايشوف فشي متأسفين على الحالة الي وصلو ليه اكثر زوج كانو مقربين من بعضياتهم..."حبيبة" و "ناديا"...معقول الحب يوصل الانسان لهاد المواصل او هما مكانوش عارفين بنتهم مزياان ومافهموش اش بيها واشنو الي يخليها تكون مرتاحة وهما يرتاحو عليها...
مشات لطيفة مع ناديا وفيصل وايوب وحبيبة مشات مع العربي وسناء...طريق كلها وهي كاتشوف قدامها مادوات ماتكلمات ما ذرفات دمعة...مرة مرة كادور عندها سناء تشوفها تلقاها بنفس الشوفة...حتى وصلو لعمارة ونزل معاهم العربي حتى طلعو لدار...
العربي : داكشي الي قلتي خاص صباح يكون عندكم...
سناء : واخا...
العربي"شاف فحبيبة وحط ايدو على كتفها" : بنتي...ماغاديش نقوليك ماديريش فبالك...ديري فبالي وتقلقي حسيي وعيشي باش توگضي على راسك وتعلمي من تجارب ديالك...
حبيبة"شافت فيه بنظرة باردة" : گلت لماما هيي سخطي عليا..
سناء"حدرت راسها بقات فيها حيث طريقة باش قالتها كاتبين عكس شوفة الي شافت..خرجات ليها ديك الهضرة بلا ماتحس وباينة ندمات"...
العربي"تنهد وجرها جلسها فالفوطويات تما وجلس تقابل معاها..حس براسو خاصو يهضر معاها وياخذ دور الاب لفترة مؤقتة" : نتي عارفة ماماك تسخط عليك ؟..(وسع عينيه بتأكيد).. عارفة ؟!..
حبيبة"كاتشوف فيه" : عمري شفت ماما معصبة مني بحال هاكا...(نزلت راسها)..گالت لي هضرة قاصحة عمي..قاصحة بزاااف..
العربي : فوقت الغضب ديما كنجرحو اقرب ناس لينا..علاش ؟ حيث عارفين بلي غادي يتفهمونا من بعد وعارفين بلي غايجي وقت ونساو...ممكن يكون جرح كبيير لكن الوقت كايداوي...حيث غذا ولا بعدو غادي نرجعو نتلاقاو بيهم ونرجعو نهضرو...اليوم كلمة غذا جوج..بعدو نتلاقاو..شوي بشوي حتى نرجعو وترجع ديك الهضرة غير تعاويد...نتي ابنتي عشتي حياة الفشوووش وواليديك ولفوك هادشي..دابا هاد الموقف الي وقع عند ناس عاادي ويمكن لو تختاري راجلك مايگولو والو..لكن عند باك ومك والي بحالهم فطريقة تربيتهم ليك...غايجيهم قاصح...خاصهم يتعودو على انك كبرتي وكتحملي قراراتك..ماشي عيب يخافو عليك ومن حقهم وعندهم كامل الحق حتى انهم يتقلقو منك ويغضبو عليك ولكن را غير مسألة وقت ابنتي..ونتي غاتجيك قاصحة من بعد تولفي حتى تصلح الامور بيناتكم...الي بغيت نوصليك عمر الواليدين مايقصحو الهضرة مع ولادهم من خاطرهم...الا البعض الي كاتكون كبدتهم اصلا منعادمة وهذاك طبع وداكشي الي عطا الله فطبعهم...تفاهمنا ؟!..
حبيبة"حركات راسها"...
العربي"شاف فبنتو" : بابا خوي ليها كاس يدال الحليب (شراه ليهم هو وشي مقدية خفيفة فاش كانو جايين).. تشربو قبل ماتنعس "شاف فحبيبة" ششش مانبغيش لا...
سناء : نوضي دوشي ورتاحي ونجي عندك...
شافت تا عيات وهي تحرك راسها وناضت تا بغات تمشي وهي تسمع العربي عيط ليها...
العربي : شحال ما طول الوقت كلشي يتقاد...مادرتيش الي يغضب الله...وباباك را انسان مؤمن عذريه غير الصدمة ابنتي لعبات عليهم والي وصل ليه هاديك الهضرة عرف كيفاش يلعب ليه على الوتر الصعيب عندو الي هو نتي...وهنا تعرفي معزتك عند باباك قداش...
حبيبة"بقات ساكتة كتشوف فيه شحال عاد نطقت" : انا درت كلشي على قبلهم حتى هاد زواج تزوجت فلول على قبلهم...هي باش منشوفش بابا طايح ومريض...دابا صدق طايح بسبابي...
سناء : كيفاش...
ماجاوبتهمش حدرات راسها ومشات لدوش...خلاتهم كيشوفو فيها بشفقة...تنهد وهو ينوض سلمات عليه بنتو وصاها عليها وخرج من بعد ما تأكد انها سدات الباب بالكود...
"الرملية"...
خرجات من البيت من بعد ما حيدات جلابتها...جمعات راسها بزيف ديال دار...باقي على وجهها تخنزيرة حاارة...دخلات لكوزينة هزات كاس خاوي وحلات ثلاجة هزات قرعة ديال ما باردة...بغات تحلها تعكسات ليها...ماتعكساتش انما هي الي ماشي تالهيه...بقات مضاربة مع الغطاية حتى دفعات القرعة بجهد على شوي طيح وتهرس بقات كاتمشي وتجي فوق بوطاجي...وبدات هي تنهج وتعض فشفايفها مابغياش تستسلم لدوك دموع...مابغاتش بغات تبقى شادة فموقفها...لكن حر الكبدة كايغلب...حتى ربعت ايد وايد دارتها على وجهها واستسلمت لبكا...بكا مكانش عادي...كانت كتحس بقهرة وبالنار شاعلة فصدرها...كاتنخصص بالحس حتى حسات تحطات ايد عليها وجرتها لعندها...
لطيفة : الله يهديك اناديا الله يهديك...
ناديا"صوتها متقطع" : وصلت بيا ليام نقصح مع بنتي بهضرة السم..
ماكان على لطيفة غير طبطب عليها...واخا تهضر معاها ماغاديش تجيب نتيجة حيث كلام ناديا نابع انه الاختيار ديال حبيبة هو الي وصلهم لهاد المواصل...اي كان وكيفاش تقال....كيف قال العربي فشوشهم لحبيبة وانها كانت بنت مفششة وفنفس الوقت مربية انها تسمع هضرتهم ومكانوش كايلقاو مشاكل معاها نهار قررات هاد القرار جاهم تمرد وعصيان ليهم...فكان الامر صعييب عليهم...هذا ماكان...
"السابعة" ونصف صباحا...
واقفة فالبالكون...شهر سبعة الحرارة مازالها وزايدة فالارتفاع وشكون مايعرفش حرارة مراكش فالصيف...كان غربي خفيف كايكون فداك صباح قبل ماتوصل تيقيقت او العافية..ملي فاقت وهي كاتسنى اتصال من عمتها...ومن «بشار» لحد ساعة باقي التيليفون طافي...من ليلة الجلسة ليوم الجلسة لامس واليوم يعني اليوم اربع ايام وباقي ماوصلش ؟..القلق بدا ينخر فيها من لداخل...حتى صونا تيليفون فايدها وهي تقفز تا شهقت بشوي...شافت المتصل كانت عمتها الي صونات ليها كيف فاقت هي اللولة عاد صونات لبشار...
حبيبة"بنبرة مرعدة" : عميتو...
لطيفة : هاحنا عندو فالانعاش...اليوم شوية واخا گاليك بايخصو يزيد يبقى هاد النهار تاني...
حبيبة"بخوف" : ع علاش ؟...
لطيفة : حتى يتأكدو راه مستقرة الحالة...يلاه كي خليت ماماك عندو لداخل وخرجت نعيط ليك...هي تهناي ابنتي...
حبيبة : بيت نشوفو (نزلات ليها دمعة بلا متحس)..
لطيفة : دابا نصيفط ليك العربي يجي يجيبك...
حبيبة"نزلات راسها ودارت ايدها على حنكها" : خفت ي شوفني ويتزاد عليه الحال...هي خليني...صوريه ليا وصيفطي ليا نشوفو...
لطيفة"طيحت عليها ضيم" : واخا حبيبتي...هي تهناي كل شوية نصيفط ليك ونعتيك الخبار...دابا بتمشي تفيقي ديك الخامرة دير ليك الفطور..هي يحلو الحوانت ونمشي نتقدا ليك اش يخصكم..
حبيبة : واخا...
لطيفة : راجلك باقي ماعيطش ؟!..
حبيبة"تغنغن صوتها كي فكراتها فيه وهي ماعارفاش فين هو" : باااقي...ماعرفتش علاش طافي تيليفون...
لطيفة : بايكون باقي ماوصل...
حبيبة : ربعيام اعميتو كلها وباقي ؟!..
لطيفة : راه فالمانيا يا دلي...هي اسبانيا وراه يومين تالطريق راه مشا بطوموبيل ماشي طيارة..عاد نتي گلتي تايجلس يرتاح شوية ويرجع يسوق على حساب راسو يرتاح....الغايب حجتو معاه...
بقات كاتهضر معاها حتى ريحاتها شوية..وطمناتها على باباها...خرجات من البيت دخلات لكوزينة ووقفات فالنص كاتشوف فالكوزينة..الي شحاال ما دخلات ليها...الي عاشت فيها بزااف الذكريات معاه...فاش كاتدخل توجد برريريد ديالها وتوجد ليه هو قهوتو الوقت الي كايكون خارج يجيب ليها من المخبزة الكرواصون الي ولفها تفطر بيه يوميا...ولا دير مقيلة الاومليط ليها وليه...ضارت ناحية الباب تخايل ليها داخل منو...
~~~~~
بشار"حط ليها ساشية ديال كاغط شافت فيها بانت ليها فيها طبيعات ديال زيت حساب ليها جاب شفنج"..
حبيبة : جبتي شفنج هههههه...
بشار"كمش حجبانو" : بغيتيه ؟..
حبيبة : حيث شفت (وراتو) حساب لي هو...كان تايجيبو بابا بزاف المرات فالصباح فاش تايبرد الحال...عزيز عليا...
بشار : عاهدي بيه فسواق عندنا فالبلاد...ماعندي information فين كاين هنا...
حبيبة : هي حيث كاين حدانا فالقصور وسويقة...ماعرفتش هنا فگيليز واش كاين...
كان واقف كايحيد فالمگانة ديالو وكايشوف فيها كتهضر مركز معاها حتى كملات وهو يقرب لعندها تا تحنى على غفلة باسعا فعنقها بوسة قوية تا عوجات راسها كاضحك...رجع طبطب ليها على كتافها...
بشار : دابا نشوف بلانو كيفاش..(وضار خرج لدوش يغسل خلاها مبتاسمة بحب وخجل)...
~~~~~~
قاطع ذكرياتها صوت سناء من بعيد خارجة من البيت لاخور كاتفوه وتجمع فشعرها...
سناء : صباح الخير...فقتي بكري..كي صبحتي
حبيبة"حركات راسها" : شوية...
تبسمات ليها سناء عارفة بلي قالت ديك شوية غير من فوق خاطرها اما عالم بيها الله ودليل هو فايقة فهاد الوقت بكري يا مانعساتش يا برمجات عقلها على هاد الوقت حيث دايرة بالها مع واليديها وبشار...دخلات لعندها لكوزينة ووقفات...
سناء : امضرا عيط ليك راجلك ؟!..
حبيبة"حركات راسها ب لا"..
سناء : يكون باقي ماوصلش ولا بغا يرتاح عاد يشعلو..ديري فبالك عندو الخدمة وبزاف الامور الي تخليه مايقدرش يبقى طافيه واخا يكون داير فبالو راه طلقتو...
حبيبة"حركات راسها"...
سناء : انا نمشي نتوضى ونصلي ونخرج نتقدا نديرو لفطور..
حبيبة : بغيت نخرج نتيري فلوس..
سناء : اش خاصك ؟!..
حبيبة : ماغاديش نخلي عميتو تقدا ليا..عندي فلوس كل مرة كان ب "صرطات ريقها" بشار كايدوز ليا فحسابي..و (بغصة) بابا حتى هو...بزوج بيهم عمرو ليا الكونط...هالوقت وصل واحتاجيتهم...
~~~
بشار : .النسبة فسميتها وشريكة معاك...فيها بنتك ومنها مرتي..."هبط عينيه ونطق وهو فحالة سهو"...نگد مندومش ليها من لگدام...
~~~
سناء : وعميتوك الى عطيتيها الفلوس غادي تقلق منك..ونتي عارفة ماما تقليقتها خايبة...(طبطبات عليها) دوزي جلسي راك باقي مريصة شوفي وجهك كيف صابح صفر بزاف وحالتك...دابا الامور احبيبة ديها فصحتك...(ضارت غاديا وهي دور عندها) اتاي ديري غير ليا قالت ليك ماما بعدي من اتاي هاد المدة..
خرجات سناء وهي بقات واقفة حتى هزات راسها وزفرات بتعب..حاسة براسها واقفة غير على الخوا فاشلة بزاف...ضارت لبوطاجي بغات تجبد البراد طيب ليها اتاي عالاقل دير شي حاجة على قبل هاد البنت الي وقفات معاها وقفة رجال...مشات لفين كاتحط البراد مالقاتوش..
قلبات عليه البلاكارات الفوق وتحت مالقاتوش...ماعرفاتش واش عطاه ولا فين مشا...ما كاين ليه اثر...
"الرحامنة"...
ف احدى دواوير بالضبط فدوار ديال عائلة المشاوري...فالدار الكبيرة الي ساكن فيها الاخ الكبير عبد الرحيم...كانو مجموعين كاملين على طابلة ديال فطور...كانت مريم يلاه جات من طاليان مزوجة باقي موالداش وهي الي لابسة حوايج الخروج...
مريم. : اشراق فطري دغيا باش نمشيو...
ع.الرحيم : دي عماك خوك...ماتمشيش وحدك..
مريم : واا با تا راني جيت بطوموبيل من فيرينز (مدينة فطاليان) لهنا غا وحدي...
حكيمة(ماماها) : هادي مزال نتفاهم معاك عليها..الغيد على راجلك الي خلاك تجي وحدك..
مريم : ياك امي وانا الي محملة وجايبة ليك...
ع.الرحيم : لاش ماشين دروك لمراكش ؟!..
مريم : بغيت نمشي عند طبيب ديال سنان الي دايرة معاه من لهيه...وندور شوية ونرجع...را غاديا معايا سهام بنت عمتي صافية...دابا نلحگ عليها فطريگ...
ع.رحيم : مانصيبش..سيري وملي تبغي تخرجي عيطي ليا نوصل عليك ونجيو هنا...
حركات راسها بلا ماتعارض...فطرو وهي تنوض اشرقا عطات تيليفون لمريم عيطات ل توريا خذات منها الاذن ومريم عزيزة على توريا ماعارضاتش...خرج معاهم عبد الرحيم تا تاوصلوه الفيلاج ديال سيدي بوعثمان...وزادو مع طريق مراكش...
مريم : فين دايرة نتي مع داك الولد ؟!..
اشراق"تبسمات" : ماعرفتش گاليا توصلي عيطي ليا فواتساب..
سهام : تي شكون ابنت خالتي...
مريم"شافت فيها من المري" : تعرفت على واحد العزوة من فرنسا...
سهام : ايهاااي...
بدات اشراق كاتضحك...وقلبوها ضحك كاملين تا وصلو لمراكش...مشات معاها لطبيب سنان...حتى عيطات ليه فواتساب عطاتو لوكاليزاسيون فين كاينة...نص ساعة وهي تسنى حتى صونا ليها وقاليها بلي لتحت...تسالمات مع البنات ودارت معاهم شي ساعة وترجع عندهم...خرجات وهي تبان ليها سيارة بوغاتي فالكحل..واقف واحد الولد شعرو شهب بزاف حتى من شفارو..عينيه زرقييين (مريم قالت العزوة غا طنز)..طويل ومگضر...مربع ايديه تا خرجو لعضلات..شدات فصاكها مزيرة اول لقاء ليها معاه توثر ورهبة..خصوصا ان لغتها الفرنسية مامساعداش فتواصل...عضات فشفايفها قرصات حناكها بزاااف جايا دايرة ميكاب دارتو فسيارة ملي كانو جايين...وهي توقف حداه عطات ريحتها لعندو وهو يدور...طلعها ونزلها...ونطق بالفرنسية...
جوزيف : ايشخااك (اشراق)..
اشراق"حركات راسها" : ويي سي موا...
تبسم وهو يسرح ايديه وجرها عنقها بجهد تا باسها فعنقها وهي تشوكا وخرجت عينيها...
"گيليز"...
كحزات ليها كاس ديال الحليب الي شربات منو غير جغمة ومابقاتش بغات تكمل...
سناء : شربي احبيبة ماتحمقينيش معاك...اشمن شريب هذا ؟!..
حبيبة"حركات راسها بلا وهي تنوض"..
سناء : فين غاديا ؟!..
حبيبة : بيت نمشي لبيت نعاود نصوني على عميتو ونشوف بشار...
خرجات حبيبة وهي تنهد سناء وشافت فطابلة...كاع داكشي الي وجدات ماكالت منو والو تقريبا...الي داها الي رجعها تصوني وتعاود واخا قالت ليها را غايشعل تيليفون يصوني عليك لكن والو الي فقلبها ماهناها وخاطرها بدات كاتدياق...والقلق بدا كاينخر...كادوز نهارها بتفكير والعذاب ديال الهم...حتى حاجة مامعاونة نفسيتها الي دابا فالحضيض... دارت الماعن فالماشين وجمعات الكوزينة حتى سمعات صوت سرسار وهي تخرج حلات الباب لقات باباها ومعاه معتز هاز ساشيات فيهم مقدية من اشنو يحتاجو...حتى خرجات حبيبة وهو يبان ليها معتز الي لاح ساشيات ومشا يجري عند حبيبة تلاح عليها عنقها وعنقاتو بجهد...
حبيبة. : حبيبييي...
معتز : ختي توحشتك...
حبيبة : حتى انا "عينيها غرغرو" كيدايرا..ماجاتش معاك وردة ؟!.
العربي : درت معاها حتى نجي مرة جايا ونجيبها..خليناها تاتبكي بغات تجي تشوفك...
حبيبة : كون هي جبتيها معاك توحشتها...
العربي : ماشي مشكيل...خاصني نمشي انا لكلينيك نشوف الحاج...
حبيبة"بحزن" : كيف بقى ؟!..
العربي : شوية شوية...يلاه هاني مشيت ابنتي...
سلمو عليهم وخرجو...اما هي رجعات دخلات تاني تشوف بشار واش شعل تيليفون والو وتهضر مع عمتها...دااز وقت لا بأس به..حتى خرجات حبيبة لابسة عباية...
حبيبة : يلاه معايا نمشيو لكلينيك ؟!..
سناء : ويلي لاش ؟!..كون غا قلتيها فاش كان بابا...
حبيبة : بيت نشوف بابا واخا هي من بعيد.."كاتهضر بحال شي وحدة مقطوعة فيها نفس"...بلا ماتهضري هي ديري ليا خاطري عافاك...
حركات ليها راسها ومشات لصالون لبسات تاهي وخرجات هي وحبيبة...حاسة بيها بغات غير تخرج تنفس وتهنى على باها..لحسن صدف لقاو طاكسي كي خرجو من العمارة وصلهم لكلينيك فين كاين باباها...نزلو منو وهي توقف...
سناء : مالك..
حبيبة : عافاك شوفي كيف ديري گولي لعميتو ندخل وماتشوفنيش ماما..عافاك هي من بعيد نشوفو ونرجع لدار...
دارت ليها سناء خاطرها وهي تمشي...جلسات حبيبة فالكراسا تما عند الباب سندات راسها عالحايط مغمضة عينيها...صونا ليها تيليفونها وهي تقفز حساب ليها بشار ساعاك كانت سعيدة الي قالت ليها بلي شوي وتجي عندها...كملات معاها ورجعات كاتسنى مغمضة عينيها...حتى كاتسمع صوت نطق باسمها...صوت رجولي..ماعقلاتش فين سمعاتو حلات عينيها وهي تشوف فيه...الهم والمشاكيل والذكريات وبشار كلو وما عاشت نساتو وخرج اصلا من بالها...كان هاز ايدو بباندة باين مهرس منها..وداير باندة مفيكسي بيها عنقو...
جاد"باستغراب" : حبيبة !؟...
هزات فيه عينيها الا انه تصدم من حالة وجهها عكس الي كان شاف شحال هادي...بنت يافعة..مشرقة وجمالها كان مميز بالنسبة ليه...هادي الي قدامو اه عرفها حبيبة ولكن..ذابلة..طافية وضعافت...وتورم تحت عينيها...وجه شاحب..وفم بهات...مالاحظش بدقة ولكن كانو باينين من بعيد ولعما...حتى حركات راسها وضارت بلا ماتجاوبو ولا تعطيه وقت...
جاد : صدفة غريبة هادي ههه...(جمع الضحكة وبقلق تكلم) واش بيهير..علاش نتي هنا فلكلينيك...كاين مشاكيل...
حبيبة"ضارت عندو وحدرات عينيها وحركت راسها ب لا" : لا شكرا...استاذ..
حيث عرفات بلي جابوه لافاك ك مستثمر وقالو ليهم بلي احتمال يجي ك استاذ مؤقت لواحد المادة ليها علاقة بالماركوتينغ...هي جاوبات باحترام مامسوقاش ليه هو شكون ولا واش فايت تعرفات عليه من قبل ولو ماتزوجاتش ب بشار كانت غاتكون معاه فعلاقة عاطفية سابقا...ماهمهاش شكون واش كايدير ومالو مهرس...بغاتو يمشي فحالو وصافي...حتى قاطعها...
جاد : رجعت الكلية ديالكم باش نخدم معاهم سوميستخ اللولة (شي هضرو بالانجليزية وشي بالعربية معكلة)..يلاه كيف جيت الاسبوع الي فات عندهم لادارة خرجت و (هز ايدو المهرسة)..درت حادثة..
حبيبة"بدون ماتشوف فيه" : الله يشافي استاذ...
جاد"تبسم" : يبان لي يشوفك ف next year (عام جاي)..يمكن بينكون انا بروف ديالك ف second year (العام ثاني)..
حبيبة : ماكانضنش بينكمل فلافاك العام جاي...غادي نمشي عند راجلي (قالتها غير من راسها) لبرا...
جاد"حرك راسو بخيبة امل جديدة ومابقاش حكر" : sadly,, okey good luck..
حدها حركات راسها وصافي...تعاملت معاه بجفاء او نقولو هو هكا حس ماعارفش بلي مابقاش مهم عندها وماكانش مهم اصلا ملي كان كايغبر عاد باش يجي يجاوب..وملي تزوجات رجع هضر معاها لكن ماكملاتش معاه وضربات عليه...وحتى هو ملي شافها فالريسطو مع بشار ديك المرة وشاف كيفاش كانو جالسين مع بعضياتهم واخا بشار كان كايبان شخص جدي بزاف وقاصح بزاف لكن كان شاف تعامل ديالو معاها عكس مكيشوفوه ناس..وكيفاش كانت كتشوف فبشار بشوفات باينين لناس انهم شوفات حب كبييير بيناتهم...رجع حرك راسو وتبسم ليها...حرك راسو ومشا...خرج لبرا ودار نضاضر الشمس ووقف كايشوف حتى نفخ بفمو ورجع كمل طريقو نزل مع دروج بشوية حتى ركب فالسيارة الي كانت كاتسناه..حل الباب وركب القدام...كانت راكبة فيها بنت شقراء زينها اوروبي...تبسمات ليه...وقرب سلم عليها بلابيزو...
هي : تعطلت عليك !؟..
جاد"حرك راسو" : نو نو..يلاه ساليت نيت...
حركات راسها وهي ديماري طوموبيل ومشاو فحال سبيلهم...اما حبيبة بقات جالسة حتى بانت ليها سناء جايا وهي توقف...قالت ليها بلي ناديا دابا مشات عند طبيب هي ولطيفة يقوليهم اشنو كاين واش يديرو...طلعات هي وياها لفوق بزربة وقفات ورا زاج كانو دايرين ستار عليه حتى هضرات معاهم سناء وهما يكحزوه وهو يبان ليها باباها كان ناااعس ماجايب خبار...الالة ديال تخطيط عند راسو..شي فراملية كايمشيو ويجيو حداه كايراقبو ناس الي تما وحتى هو نيت كايضوفو تخطيط فين واصل...
سناء"حطات ايدها على كتفها" : قالت ليا ماما راه ولا شوية..غذا فالصباح يطلعوه لشومبر عادية يومين ويمشي لدار...
حبيبة"بصوت مخنوق" : دابا مانقدرش نشوفو ونهضر معاه !؟..
سناء"تنهدات" : راكي عارفة اش كاين..قاليك بابا خلي الامور حتى تهدن وتبرد القضية...خاصك تسناي حتى يدوز وقت...
حبيبة : هيير يولي بيخير واخا مايشوفش فوجهي ومايهضرش معايا..."غمضات عينيها حسات بالسخفة" فففف...
سناء : مالك ؟!..
حبيبة"حركات راسها بلا وهزات ايدها ب معنى ماماليش"..
سناء : شفتي على حالة ؟ مابغيتش تفطري ومابقيتيش تاتاكلي مزيان احبيبة...ها باباك ولا شوية...مسأة وقت احبيبة وتقاد الامور...ماشي كلشي غايمشي كيف بغيتي وبزز..صبري احبيبة الماكلة را باش توقفي على رجليك وتواجهي الامور...ماشي الى كليتي راك فرحانة لهادشي الي واقع...خدمي عقلك...
حبيبة"الصمت"..
بقات شحاال وهي واقفة كاتشوف فباها من بعيد..ماكرهاتش تدخل عندو وتعنقو ويكون راضي عليها كيف كان قبل ماتعرف بشار وبعد ما عرفات بشار...ماكرهاتش تكون الامور مقادة دابا ويكون معاها بشار معنقها بجنب عاطيها داك الاطمئنان الي واخا كيبان جد هي كاتحس بيه واخا مايعبرش وناشف كايوصل ليها بالفعل وتطبيق ماشي بالشفوي...توحشات بشار بزااااف توحشات تشوف وجهو وهو مغوبش ولا هاز حاجب فيها...مخشية فحضنو متنغمة بريحتو...يقول زوج كلمات كافيين وموفييين...توحشات الاهتمام زايد بزااف غير ليها...تعطس يعرف اش بيها..تكحب يمشي يداويها...تبكي يمسح ليها عينيها...توحشات الصبر ديال ايوب الي كان صابر معاها...والخاطر الي كان شاد ليها وهو براسو خاصو الخاطر...
توحشات «بشار»...
قبل ماتجي ماماها شافت فباباها اخر شوفة وهي دور حركات راسها لسناء وهما يمشيو...خرجو من لكلينيك مشات معاها حتى لبنك غير تما تيرات شي بركة تعاون بيها فالوقت الحالي...وهما يشدو طاكسي ومشاو لعمارة...يلاه كيف نزلو دفعو الباب باش يدخلو يطلعو وهي تسمع اسمها ثاني...دورات راسها بانت ليها سعيدة نازلة من طوموبيل...معاها هاشم وحسام...
حبيبة : خالتو سعييدة...
مشات لعندها كاتزرب تلاحت عليها عنقاتها بجهد تا تنهدات ليها فصدرها تقولي شمات فيها ريحة بشار...حتى غرغرو عينيها وزيرااات عليها مخشية فيها خلاتهم غير كايشوفو...
حبيبة : الله...توحشاك بزااف خالتو...بزاااف...
فرحات سعيدة برجوع حبيبة وفنفس الوقت حزينة عليها...وعلى الي واقع ليها مع واليديها...شدات ليها وجهها بين ايديها ومسحات ليها دميعات خفاف كانو نازلين ليها...وطبطبات عليها...شافت فهاشم وتبسمات ليه وسلمات عليه...
هاشم : طلعي نتي وياهم هاني نهز هادشي ونطلعو...
عنقات حبيبة وضارو طلعو لفوق هما وسناء...مع حلات الباب وهي تدخل سعيدة وتنهدات قالت " الله"...تاهي توحشات هاد البرطما واخا غاب بشار غير ايام قليلة لكن فاش كان بغا يمشي وبغا يعطي ساروت لمولاها حسات بلي صافي ماغاديش يبقى يجي بمرة وهاد البرطما الي كانت جامعاهم غاتسد...دابا حسات بحال الى الامور غاترجع تقاد لكن بشار باقي غايب...
سعيدة"جلسو فصالون" : كي بقيتي شوية ؟!..
حبيبة : هيي شوية خالتو...
سناء : ما شوية والو اخالتي..مكتاكلش عندها فقر د.م قالت ليها طبيبة الى بقيتي على هاد الحال غايضربك فقر د.م حاد...(ضارت عندها حبيبة) بلا ماتشوفي فيا...فقصتيني...
سعيدة : الله يا بنيتي وعلاش متاكلي ؟..حساب ليك الى ماكليتي باك يبرا ؟ راك غادي غا تكملي على راسك...خاصك تاكلي توقفي على رجليك لا بغيتي تشوفي باك وتكملي حياتك ابنتي راك مريضة ومعذورة وماشي هوك تاتحل لاومور ابنيتي...
هما كايهضرو حتى سمعو الباب تحل حيث خلاوه مردود..دخل هاشم هاز شي قفاف فيهم اش جابو ليها من الفيرما...ووراه حسام هاز بيدو ديال خمسة ايترو زيت زيتون وشي قراعي فيهم حليب ولبن ورايب...حطو داكشي فالكوزينة ووقف كايسوسو ايديهم وهما يحنحنو...
سعيدة : زيد اهاشم...
هاشم"وقف عند باب صالون " : اش كاين هانية الوقت ابنتي ؟!..
حبيبة"حركات راسها بتعب" : شوية...دخل اعمي گعد...
هاشم"حرك راسو ودخل هو وحسام ريحو فبلايصهم الي كانو كايجلسو فيهم فينما يمشيو يباتو عند بشار...كايشوفو فالدار رجعات وكاينة مولات دار الي كانت غايبة عليها...لكن هاد المرة هي فيها ومول دار غايب عليها...سخرية القدر هي هادي...شوية وهي تنوض سناء باش دير ليهم ضيافة واخا ماعارفاش اش توجد...
سعيدة : كي بقى باك شوية ؟!..
حبيبة"تنهدات وهما يغرغرو عينيها ونطقات بحزن شدييد غير من صوتها غرفو كمية الالم والحزن الي هي فيه...نزلات عينيها" : شوية...(سكتات شحااال وعاود كملت)..بايكون شوية بلا بيا...
سعيدة : مكاينش ابنتي الي يكون شوية بلا كبدتو...
حبيبة"حركات راسها ب نفي" : هما بايحصو بيخير الى ماشافونيش...حيث تقلقو مني و "صرطات ريقها تا نزلو دموعها" غضبو عليا...
هاشم"كمش حجبانو" : وايلي...
حبيبة"غززات شفايفها باش ماتنهارش..مزيرة على صباع ايديها وراسها ماقدراتش تهزو"...
سعيدة : واليديك ابنتي معذورين وتانتي معذورة...بغيتي ترجعي لراجلك ماهي فقانون ولا شرع محرمة عليك...خاصك غا تصبري وهما غذا ولا بعدو غايفهمو..ماشي ساهل عليهم عرفو كلشي دقة وحدة ماهي وحدة ماهي جوج...وداكشي كبيير...
حبيبة"حركات راسها ب لا" : ماما البارح جرات عليا...مشيت قبيلة هي بتخبية باش نشوفو من بعيد...عمري ماكان كايحساب ليا بنوصل لهاد الحالة معاهم (دموعها نازلين بلا حساب)...
هاشم"دوز بايدو على وجهو" : لا حول ولا قوة إلا بالله...
تنهدات سعيدة بحزن عليها وعلى حالتها...ضارت عند هاشم الي هز حجبانو...اما حسام غير كايسمع وتاهو متأسف على الحالة...
حبيبة"هزات راسها كاتمسح فعينيها بطرف كفها" : هاني دابا گاعدة بوحدي...حتى بشار الي رجعت علر قلو مالقيتوش...تيليفونه باقي طافي ومامرتاحاش لهاد الحالة...
سعيدة : دابا يضعلو ابنتي...
حبيبة : مامرتاحاش اخالتو...ربعيام دابا وباقي ماشعلوش...وگلتي مشا مريض...كان خاصو يرتاح عاد يمشي..كون دارها كان بايعرف راه ماطلقناش وكان بايبقى وكان هو دابا كاين "رمشت ونزلت دمعة"...
حسام : را مشيت معاه حتى لطنجة حيث كانت باقي حتى رجلو كاضرو...ودا"جاتو زوية لجنب تا زوا وغرنگ" اوووو....
حبيبة"جمعت حجبانها" : كيفاش ؟..علاش رجلو تاضرو ؟ (شافت فسعيدة) مالو فرجلو...
هاشم : بغيت ليك الحلاقم يا ولد مرتي...
حبيبة"بخوف" : مالو فرجلو اخالتي سعيدة ؟!...عافاك ماتكذبييييش عليا...
سعيدة"ضارت خنزرات فحسام الي ضار لهيه بالخلعة من تخنزيرتها ورجعات شافت فيها..تنهدات وماكان عليها غير تقوليها اش كاين...بدات كاتعاود ليها بلي جا سيحمد ضارب معاه وجات ليه دقة فرجلو" : كيفاش وعلاش الباقي حتى يجي ويعاود ليك هو ابنتي...ولكن...بسم الله عليك ابنتي مالك...
مازال كاتهضر حتى وقفات حبيبة دايرة ايدها على فمها الي حلاتو بالصدمة ورجعات جلسات وعاود وقفات تا ولات كلها كاترعد ترعد بردو عليها اطرافها يمكن ضغط تاني ويمكن حتى الخلعة ديال دابا كلشي تجمع...تا بداو عينيها يتحلو ويتسدو ناضت سعيدة لعندها يلاه كي شدتها وهي تغيب عن الوعي بين ايديها....
مسافة طريق كانت راكبة حداه وحاسة براسها طايرة...حداها واحد وسيم بزااف...فيه كاع مواصفات الزين والفلوس...طايرة معاه فديك البوغاتي...مرة مرة كايدور يشوف فيها ويبتاسم ويغمزها كايخلي قلبها يفرفر...ماعرفاتش واش تهضر وكيفاش تهضر وهي تواصلها مستواه ضعيف...جبدات تيليفونها ودارت شات gpt..كتبات اش بغات عطاها الاجابة وهي تهز راسها ونطقات...
اشراق : في غادين نمشيو..ماخاصنيش نتعطل...
جوزيف"هز ايدها وباسها وحطها بلا مايجاوبها"...
بقات تشوف حتى بان ليها وقف طوموبيل قدام واحد البلاصة...دورات عينيها تاتشوف بانت ليها PESTANA CR7 ..(فندق كريستيانو رونالدو)...
بقات كاتشوف فين جايبها...لهاد لوطيل..مادارتش فبالها انه يطلعها لشي غرفة قالت را غير غايمشيو لشي ريسطو...حتى سمعات صوته مفيقها من تفكيرها وتبرگيكها...ضارت عندو..
جوزيف : انا نازل هنا هاد 3 جوغ الي عندي ف لو ماغوك..
اشراق"بابتسامة" : زويين هنا...ممم غادي نجلسو فريسطو...
جوزيف"كمش حجبانو" : نووو حسن نطلعو لشومبغ عندي نهضرو شوية تما...ميم با ساعة ونرجعو...(قرب لعندها مزياان تا غفلها باسها جنب فمها تا غمضات عينيها وصرطات ريقها من هاد القرب ومن ريحتو)...اوكاي ؟!...
اشراق"حلات عينها كاتشوف فيه كايقوس حجبانو ويدلي شنيفاتو عضات شفايفها بتردد...شافت فين هما ورجعات شافت فيه...كل هاد الكاريزما...والفلوس والوسانة تقول ليه لا ؟..حركات راسها وهزات صبعها" : مانتعطلوش...
جوزيف : ديييل (اتافقنا زعما)...
خرج من سيارة رما ساروت ل لمسؤول على سيارت تما...تسناها تا جات لعندو وعنقها جنبو كايحك على درعانها جاب ليها تبوريييشة...مزيرة على صاكها ومشات معاه حتى دخلو لهاد الفندق اول مرة تدخل ليه واقعيا حيث كانت تتشوفو غير فالفيس انسطا...ملي كايدخل ليه شي انفليونسر يدير فيه سكوريات ولا فلوغ...عاضة على شفايفها منباهرة بالحمالية ديالو...هو فيه ريسطورات وفيه حتى لفوق فالسطح ريسطو زويين لكن هو اختار يدخل لشومبر ديالو...شد من عندهم كارط كلي من عندهم وطلعو فسانسور لفوق...بقى معنقها ومرة مرة يخشي وجهو فعنقها يبوسها..والغريب انه مالقاش منها شي تردد فحركاتو...زاد زعم...تحل سانسور ودخلو لغرفة ديالو كانت كبيرة يمكن خذا جناح صغير تما...تلاح فوق الفوطوي بتعب دوز بايدو على وجهو...وشاف فيها حرك حجبانو...
جوزيف : ففف عييت..كان عندي واحد غيونيون صباح..."شاف فيها" mais .assieds toi ايشخاك...
اشراق"قربات وجلسات حداه" : هاني هههه...
بقا يشوف فيها دوز بصباعو على جبهتو...حتى ضار كامل وقرب لعندها مزيااان..بين شفايفهم سنتمتر واحد...كايشوف فيها وتشوف فيه...حتى باصها فشفايفها بوسة خفيفة ورجع تقاد فبلاصتو...حط راسو عالفوطوي مرجعو...شاف فالسقف ونطق...
جوزيف : tu sais خاصنا نزيدو نتعرفو على بعضياتنا كثر...
اشراق: quoi ?..
زفر وجبد تيليفون من جيبو كتب اش بغا وعطاها تقرا ترجمة...تبسمات ليه وهي تجاوبو باش بغات وعطاتو يقرا...
اشراق. : خاصك تصبر حيث مكنقدرش نخرج بزاف...
جوزيف"حرك راسو" : داكوغ...( بدا يحك فراسو وزفر بجهد تا وقف وشاف فيها) يلاه نوصلك فحالك...
مافهماتش مالو وعلاش دغيا ناض وقف...شنو خلاه يتبدل فثواني معدودة...شافت تا عيات وهي تحرك راسها وناضت خرجو من شومبر ونزلو...رجعها لبلاصة فين تلاقا بيها تسالم معاها وحطها ومشا...تنهدات وهي ترجع طلعات عند البنات فين خلاتهم...
وصلات العشية...متكية فوق ناموسية حاجة ايديها تحت حنكها...يلاه كي قطعات معاها عمتها وبلغاتها بلي باباها ولا شوية وحالتو كاتحسن...كمشات عينيها كاتحس بوجيعات خفاف تحت كرشها عرفت بلي غالبا غاتجيها ليغيگل...بدات كاتماصي تحت كرشها وعاضة شفايفها...حتى تحل الباب دورات عينيها بانت ليها سعيدة داخلة وهازة بلاطو فايدها تبسمات ليها ملي شافتها...
سعيدة : كي وليتي شوية ؟!..
حبيبة"شافت فيها بحزن وحركات راسها ب لا"...
سعيدة"حطات البلاطو وجلسات جنبها" : دابا يشعل تيليفونه ابنتي غا صبري را هاكا كانت حالتو قبل مايتزوج...
حبيبة"ردات عليها بصوت مقهور حزين" : دابا اه مزوج..دابا كاين انا...واخا ماعرفش اش وقع...انا مامرتاحاش اخالتو...مامرتاحاش وزدتي كملتي عليا برجلو الي مضروبة (رجعو نزلو دموعها من جديد)...ومشا مريص بالكخيز...ومشا داير فبالو راه تفارقنا...راه تايبقى بنادم اخالتو..."حطات ايدها على صدرها"...مامرتاحاش وهو هي ماتيزيد ويتعطل...هاحنا بنوصلو لخمسيام وباقي ماشعلش تيليفون وماعليه تا خبااار...(دارت ايديها على وجهها ورجعات تاتبكي بحرقة زادت كملات تا على سعيدة...)...
سعيدة : تفايلي ابنتي...تفايلي راه والله الى هذا هو طبعو (تاهي مقلقة من جيهتو غير مابغاتش تبين ليها)...غا صبري ونوضي توگضي ابنتي شوفي حالتك كي ولات...بغيتيه يرجع يلقاك عيانة وتزيدي تكملي عليه ؟..وهو لا ما رد ليك حد البال يتعصب...بغيتيه يجهل علينا اىى عرفك مريضة وماردينا ليك البال !؟..نوضي راني درت ليك حسوة ديال درة مزيانة ليك لفقر د.م..ديري غير بوجهي انا الي خليت ولادي وراجلي وبقيت عماك هنا هاد اليومين تانتهنى عليك...بغيتي ترديها فوجهي...
حيدات ايديها وناضت تگعدات بلا كلمة بلا جوج عنقاتها بجهد مزيرة عليها...بزوج بيهم القلق بدا يتمكن منهم وحدة عبرات وثانية صابرة حيص مولفينو كايدير هاكا..وقالت يكون وصل ليوم وغذا را ضروري يعيط...حيث هذا هو الوقت فين غايكون وصل لان طريق بعيدة...بقات معاها بزز تا شربتها ديك الحسوة وكالت بيض بلدي مصلوق...هزات سعيدة البلاطو وخرجات عند سناء لكوزينة...وهي بقات شحال جالسة وهي تنوض تاهي لدوش غسلات وتوضات وخرجات صلات المغرب...صلاو كاملين..وصل العشا الي طبعا كان من ايدين سعيدة والي زادت فيه شحال من وصفة باش تعاونها ففقر.دم...
غربي خفيييف داخل..خلا الخامية تحرك وتهز لفوق...حلات عينيها بشوي بحال معسلاهم كاتشوف فديك الخامية كيفاش كاتحرك...حتى بان ليها خيال شخص واقف عاطيها بالضهر...شوي بشوي بدات توضح ليها الرؤية حتى وسعاتهم كاتشوف فداك الهضر ماخافيش عليها...ضهرو هو نيييت...لابس تيشرت اسود وسروال ميليتيغ...واقف خاشي ايديه فجيابو ودخان خارج من جنب وجهو باين انه كايكمي...ماحسات حتى شهقات وهي تگعد...
حبيبة : بشار !!؟؟...
ماجاوبهاش...حطات ايدها على جبهتها كاتحس بالعرق نازل ورجعات كاتشوف فيه وهي تنوض لعندو...ماحدها كاتقرب وهي كاتعيط بسميتو وحلف لا هو ضار عندها...تا وصلات لعندو وهي تحط ايدها على ضهرو...كاتقيس فيه باش يدور لعندها...و والو...
بشار : امتى جيتي ؟..مالك علاش مابيتيش تجاوبني...مقلق مني ياك..حيث خليتك وبيت نتفارق معاك..حيث ضربك هذاك الي مايسواش وبقيتي بوحدك مريض...بشار...بشار !!...شوف فيا...
شدات ليه فدراعو وهي دور عندو هي...شد ليها فايدها وزيييررررر عليها تا حساتها بغات طرطرق...كايزير وويترعددد....حتى غمضات عينيها من حر الم ديك تزييرة الي مزير عليها...
حبيبة"كمشت حجبانها مغمضة عينيها" : مممممم....ايييي...
شوية اختفى الالم وهي تحل عينيها كاتنهج وعروقااتها تكب...مالقاتوش طار من قدامها...عاودت غمضات عينيها وحلتهم وهي تحلهم على سقف لقات راسها ناعسة فبلاصتها...ضارت هنا وهنا...وهي تنوض كاتقلب بعينيها...طلات على الباب بان ليها محلول عادي حيث كاتخليه محلول...بان ليها ضو خفييف داخل...ناضت من بلاصتها ومشات لباللكون كاتقلب عليه...وتعيط...باقي ما فهماتش راها غير حلمة...تقلب هنا وهنا وتنهج حتى ولات دور وتعيط...عاد استوعبات راه فاقت وهي تمشي لتيليفونها...شعلاتو مالقات حتى اتصال...عاود تاني مشات لواتساب شافت اخر ظهور لقات نفس تاريخ الي باقي...دوزات ليه الخط ماداخلش...غير الميساجات الي مخلية ليه فواتساب...من بعد ما خلصات لابونمون صونات ليه ابيل عادية...نفس الشيء.. العلبة صوتية بالالمانية....ماحساتش حتى جلسات فالارض وجمعات رجليها عندها حطات راسها على الحايط وضارت كاتشوووف جيهة البالكون...تا نزلو دموعها بالحس...قلبها واكلها عليه وزادت الحلمة...ماصوناش وباقي تيليفونه طافي...
فين هو اشنو وقع ليه...علاش طافي تيليفون دابا خمس ايام بدون خبر...يعياو يصبرو راسهم را حتى يوصل ويعيط ولكن دابا راه وصلات خمس ايام...والسؤال كايبقى...
فين هو بشار ؟!..
الشمس شرقات...حارة...وبعيون كاسيها الحزن تاتشوف ناحية البالكون الي باقي خياله بين عينيها...خذات نفس عميييقة وطلقات تنهيدة طويييلة قبل ماتحك عينيها وتگعد من فراشها...باقي الحلم بين عينيها والقلق غير ما زايد عليها...يلاه غاتوقف حتى صونا التيليفون وهي تقفز شاهقة ضارت بالزربة هزات التيليفون حساب ليها بشار لكن كانت عمتها...زادت تخلعات كثر حيث مصونيا عليها مع تمنية صباح...ريقها نشف جاوبات مخلوعة لا تقوليها وقعات شي حاجة لباباها....
حبيبة : عمتي !!..
لطيفة : فيقتك ؟..ياكما تخلعتي...
حبيبة : لا لا..."غمضت عينيها تاتنفس براحة"...بابا بيخير ؟!..
لطيفة : اه اه هي يلاه كيف دخلوه لشومبر من الانعاش...كنت بيت هي نفيقك باش نعيط ليك فيديو تشوفي كيف وصيتيني...
حبيبة : اه اه عيطي فيديو...
قابلات معاها تيليفون وحولات المكالمة لفيديو... بانت ليها داخلة لشومبر حتى بان ليها مدد فسرير كاتقاد ليه ناديا فالغطا وكاتهضر معاه لكن كان غير كايحرك راسو وضافي...باين عليه عيااان...دارت صباعها على فمها كاتشوف فيه بحزن...توحشات باها الي كان كايفهمها من اول ماتشكي ليه على شي حاجة ضاراها..توحشات باها الي كانت غير تقول اي يعرف اش بيها...حتى من الفوطة صحية كان كايتقداها ليها ويحطها ليها فوق فراشها فاش ماتكونش تفاديا لاحراجها...توحشات باها الي كانو يديرو وقيت وتخرج هي وياه راس فراس يتغذاو فشي بلاصة ولا يفطرو باش تعاود ليه اشنو دارت فاسبوعها دراسي...توحشات الي كان بئر اسرارها...توحشات الاب الي بغاتو حتى دابا يفهمها...لكن مع الاسف ظروف قسات عليهم كاملين ولعبو بيهم كاملين...وفرقاتهم...حنحنات صارطة ريقها..
حبيبة : عميتو...قربي شوية لعندو بزاف نشوف وجهو عافاك...
حساب ليها واش دايرة الايربودز كاتسمع ليها..ساعاك ماجاوبتهاش...عاودت عيطات ليها والو...حتى خرجات من شومبر وبعدات عاد دورات كاميرا عليها وهي تسمع صوتها...
لطيفة : باتبدل ليه داكشي باش خرجت...
حبيبة : گلت ليك قربي شوية عند وجهو نشوفو ماسمعتينيش..
لطيفة : ااه كنت دايرة صيلونص باش مايسمعوكش...
حبيبة"بقا فيها الحال وتهرس خاطرها" : لهاد درجة مابقاوش باو يسمعو صوتي...
لطيفة"عضات شفايفها نسات راسها" : لا هي ماخاصناش نهضرو حداه خاصو شوية تالراحة ابنتي...احم..ماديري فبالك والو...
حبيبة"حركات راسها ببطء" : عارفة عااارفة...
لطيفة"بغات تبدل الموضوع جبدات ليها موضوع كفس" : امضرا عيط ليك راجلك ؟!..
حبيبة"تكمش قلبها تفكرات الحلمة" : لا...(حركات راسها ب لا)...
لطيفة : وايلي باقي ماشعل تيليفونو ؟!..
ماعرفات ماتقوليها باقي واش تواسيها غاتزيد من قلقها الي كان باين فوجهها...ولا تسكت ولا...لكن حاولات تطمنها وتزيد تعطيها امل انه غايكون وصل وغايكون محتاج يبقى مع راسو شوية لانه دا فراسو بلي راهم تفارقو...
لطيفة : هي نبقى شوية مع باباك ونجي عندك...تهلاي فراسك ابنتي وشربي دوا ديالك...
قطعات معاها المكالمة...ورجعات دازت تاني لواتساب الي حفات وهي تمشي ليه تقلب واش دخل...كاتلقى باقي نفس الشيء...عاودات الاتصال والو باقي طافي...حتى زفرات بتعب وعصبية وقلق...
حبيبة : هفففففف فففففف...
لاحت التيليفون بعشوائية وحنات راسها دارتو بين ايديها... تحل الباب بدون ماتهز راسها...حتى سمعات صوتها...
سعيدة : صباح الخير..كي بقيتي شوية...
حبيبة"شافت فيها" : شوية...
سعيدة : مابقيتيش نعستي ملي فقتي گبيلة...
حبيبة"حركات راسها ب لا" : ما قديتش..فففف...(بدات تحك فكرشها من تحت)
سعيدة : مالك ضاراك شي حاجة...
حبيبة : ممم..باتجيني ليغيگل...
سعيدة : عندك شي دوا ولا ندير ليك الخزامة...
حبيبة : لا عندي...
سعيدة : ونوضي فطري باش تشربيه...
حركات راسها وهي تنوض...عنقاتها وخرجو لا هي لا سعيدة وجههم مرتاح حيث مقلقين من جيهة بشار...تا سعيدة دور دورة وتجرب تصوني ليه واخا عارفين راه كي يفتح تيليفونه عالاقل غايصوني لشي حد فيهم كيما كان ويعرفو را بيخير لكن هو دابا ماعارفين عليه والو واش وصل ولا باقي ولا وقعات ليه شي حاجة ولا مجلي...يعلم الله...
لقات سناء باقي ناعسة مابغاوش يفيقوها حيث عيات مسكينة بقلة نعاس مع حبيبة رادة ليها البال...ملي شافوها غاطسة فنعاسها براحة عزات عليهم...دخلو لكوزينة فين محطوط الفطور...شافت حبيبة طابلة فيها فطور بلدي وشهي...واكثر حاجة شدات بالها هي الحريرة بالبلبولة وزعتر وفوقها زويتة العود..وبطبوط بدقيق القمح باقي سخون...وطبيسلات فيهم عسل زيت زيتون وزبدة بلدية...وحدا زلافة حبيبة حاطة كاس ديال الحليب لكن كان كايبان فيه الحمورية...جلسات كاتشوف فداكشي ...
سعيدة"كحزات ليها كاس" : سكلي على هاد الكاس..مابغيتشااي. نسمع لا..لا صبتي سدي منخرك وتكاي عليه...
حبيبة"بامتناع خسرات ملامح وجهها..اصلا خاطرنا زيرو" : اشنو هادشي حمر..
سعيدة : هاديك غا عشبة مسيتها الفوة مزيانة ليك لفقر د.م دقة بطلة....
حبيبة"تليع خاطرها" : ففف عافاك والله مانقد...
سعيدة"خرجات فيها عينيها" : هاويلي على تبجاگ..تي شربي بغايتي (بغات تزرع ليها الامل. وضافي) يجي راجلك يلگا فيك غا سفود...شربي ولا والله يا بنيتي تا لبس حوايجي ونعفط لرحامنة الله يجعلني نمشي فالمركوب وماباقي شاي نجي عدك واخا تحلفي...
خوات اتاي فالكاس وحطاتو قدام توريا الي هزاتو وحركات ليها راسها بمعنى يخلف عليك...وضارت عند خوها عبد الرحيم ...
توريا : تديني تال لفيرما نلحگ اشراق ونهز عمايا الوراق ونمشيو من تم...
حكيمة : حاولي ترجعي سيمانة جايا...بغا يجي ولد ختي.."غمزتها" تشوفو ويشوفها واخا غا من بعيد...
توريا : وتي خوك داخل سوق راسو مايشوف فالنسا كي بغا يدير...
ع.رحيم : حسبيها رؤية شرعية....
ضارت مريم عند اشراق وهي تنغزها بركابيها زعما سمعي اش كيقولو...عطات وذنها كاتسمع فيهم كايهضرو على خو حكيمة وكايهضرو باينة عليها...وسعات عينيها ثاني خطاب جداد...كيفاش غاتخطب وهي كاتعرف جوزيف وعينيها قرقشو عليه واخا ملي جات وهو قالب عليها رسلات ليه شحال من ميساج ماجاوبهاش...شافت ف مريم...
اشراق : اويلي شكون عبد السميع !؟..ياكما خالك...
مريم : ههههه والله تا هو...
اشراق : الي ملتزم ؟..ياك كان مزوج ؟!..
مريم : طلقات منو عبير حيث ماكيخليهاش تخرج...والى خرجات خاص يمشي معاها ودار ليها النقاب حتى عينيها مكيبانوش...مشكيل ماشي هنا المشكيل هو انه كان خانقها بزااف..ماطل من شرجم ماتخرج الى كانو ناس تجلس مع العيالات...الى بغات شي حاجة هو يتقداها ليها...ومابغاش الولاد حتى دوز مدة نيييت...
اشراق"وسعات عينيها وقلبها طاح فكرشها" : اويييلي...وماما باغية !!..
سهام : البارح هضر معاها با فهادشي وگالت ليه مرحبا بيه...گاليها عداك ولدك يدير لينا تاني شي شوهة گالت ليه عارفة اش كندير...
اشراق"حركات راسها ب لا وجهها ولا صفر" : لا لا..الا خالك..وكبير بزاف انا درت 18 عام وهو عندو 46 عام...واععع لااا...خاصني نهضر مع خويا بشار ..
سهام : اححح عيطي ليه وهضري معاه...
مريم : تي شتك توحوحي...
سهام : ملي شتو فالعرس ديالو حمقني..مايمكنش على تغوبيشة داير...
مريم : هاويلي عمري شت تغوبيشة يتزعطو فيها ناس..."شافت فاشراق" خوك.داك المغوبش...غا يشوفو يدير بناقص من نسوبية..
سهام : ههههه داكشي الي بغات...
حركات راسها متوعدة باش تهضر مع بشار...شوية حتى سمعات مها كاتعيط عليها باش تنوض يمشي...وقفات سلمات على بنات خالها وناضو كاملين...وقفات مريم عنقات عمتها توريا وباستها...
مريم : ثلاث نشاعلاه نجي ندي معايا اشراق تاني ترجع معايا عد طبيب...ياك تخليها...
توريا"شافت فيها بنص عين" : داكشي لاش شابعة فيا بوسان..
مريم : هههه لا لا والله الى عزيزة عليا بلاش...راك العميمة...
توريا"شافت فاشراق ورجعات شافت فيها" : يكون خير...يلاه خويي هذا جهد يلاه لحگو...
تسالمو معاهم وخرجات ركبات هي وعبد رحيم واشراق ومشاو تال فيرما...دخلات اشراق وهي...سلمات على شيخها الي خرج عند عبد الرحيم يتسالم معاه...
مليكة : وخويتي عاش من شافك..تي شتك قويتي علينا الغياب..
توريا"تبسمات بزز حيث باقي شادة من جيهة عيدة" : وا كانو الحباب جاو ماتقالي منهم راكي عارفة...وحضرت لصدقة الي دار خويا تاني...
مليكة : فين عبد رحيم برا..."ناضت" نوض نسلم عليه...
حركات راسها وهي طلع تلاقات فطريقها بسيحمد نازل سلمات عليه وسولات فيه كي بقى وطلعات لبيتها اما هو كمل طريقو حتى وقف على عيدة حادر راسو ماقاد يهزو فيها وهي باقي مغوبشة فيه...
سيحمد : مي عيدة..."ضارت عندو تتشوف فيه بنص عين مخنزرة"..باغيك تشوفي فيا وتعطيني وقتك اميمتي...
عيدة"لا رد"...
سيحمد : ديري بوجه زكريا ولدي...
عيدة : ولدك مادخلوشاي فرغيبك وطليبك...ولدك بشانو ماتخسر ليه وجهو...بفعايلك...كحلتي عمايا الطريگ اولد فاطيمة (مو)..صبرت ليك وسكت على هاد الفعلة غا على وجه ميمتك الي كنت حاسباها بنتي ماهي ضرتي...اما حسابي عماك برا الفيرما (زعما نجري عليك)..ودرت بوجه خوك الكبير نور الدين الي كنتي عزيز عليه وعزيز عليك...
سيحمد"حادر راسو..قرب وتحنى بغا يبوس ليها ايدها وهي تخطفها وشيرات ليه ب بعد مني عاطياه بضهر ومسندة حنكها على ايدها لاخرى" : بغيتك تمشي عمايا نهضر مع ربيعة...
مليكة"نقزت كانت جايا وسمعات" : سيحمد..ربيعة غا فوتها عليك هاد الوقيتة تاتولد..لا تزيد شاب تفقصها وطرا شي حاجة لداك تيلاد الي فكرشها...
سيحمد : شحال باقي ليها على باش تولد...
مليكة : شهرين هوكاك...الله يفك الوحايل ونتا ماعليك غا بالصبر..
عيدة : تا يجي بوه ويهضرو على دوك البنيات الي بقاو لهيه...
سيحمد : هادوك بعاد ماكان خاصهم خير...ومايخصهم خير..
مباركة"جات وجلسات حدا عيدة ومليكة هزت حاجبها تاتشوف فيها كيفاش جلسات زعما را سيدة من ناس الكبار هههه"...
عيدة : تا دوي عما بوك وشوف اش دير عماه...
سيحمد : ونتي ميمتي ماتنصحيني...
عيدة"دارت صبعها فوق فمها وصغرت عينيها وسهات ماردات عليه"...
حرك سيحمد راسو وبلع الغصة تاني بجغمة الما...يلاه بغا يدور وهي تنطق مباركة...تا هز حاجبو وضار شاف فيها...
مباركة : وبوك اخويي دوا عمايا يامس بالليل..تايگول خاصك دير رسم عما المراة الثانية ( رسم هو العقد)...
سيحمد"بقى يشوف فيها وهو يدور ومشا خرج خلاها كتشوف".
مليكة : ونتي اش لحگ بويا تايجبد عماك هادشي ؟!..
مباركة : ههههه وراني مرتو هاويلي يا ربيبتي...
عيدة ماداتها فيهم كاع همها غا مع بشار الي تاهي عيطات ليه ولقات تيليفونه طافي...مليكة وسعت عينيها ودارت ايدها على حنكها وقالت بشوي "هاوييلي ضحكة" وطلعات لبيت عند توريا..اما اشراق كيف دخلات اول حاجة مشات شافت جوزيف واش جاوبها والو..مشات تعيط لبشار تاهو مالقاتوش عيطات ليه ابيل عادية باش يدخل لواتساب تهضر معاه لقاتو تاهي طافي..
هزات توريا اشنو كانت محتاجة من الماريو وهي تسدو....قادت شالها وهي دور عند يوسف الي لقاتو داير ايدو على حنكو وعينيه مغرغرين...كمشات حجبانها وقربات ليه...
توريا : مالك ؟!...
يوسف"هز فيها عينيه حمرين ورجع نزلهم هزهز كتافو"...
توريا : اتا مالك ياك لباس..طارية ليك شي حاجة...
يوسف"رمش عينيه وهما ينزلو دموعو" : اويا بشار ماكايجاوبس..
توريا"بقات ترمش فيه مغوبية وهي تهز حاجبها ومطمطت فمها" : ايوى شلا...هذا هو خوك الي باغي تمشي تعيش معاه ؟!..تا تيليفون گطعو عليك !؟..
"تا تحل الباب ودخلات مليكة لقاتها تاتشوف فيوسف الي كان كايمسح عينيه ويعاود بدموع...
مليكة : يوسف مالك اوليدي...
توريا : مشير على خوه..كي ديما وشووووفي انا كي نجري ونهز فالهم ونضرب فطرگان ونعطي الفلوس ود.م جوفي باش نشدو عندي وهو تابع ليا مسخوط...مشوهني وضارب ليا طر فدواور...
مليكة : وا وليدي اش بغيتيه دروك...
يوسف"دموعو نازلين" : خويا مكايجابونيش بايت اويا بشار...
مليكة : تا فين هو..را طافي تيليفون سمعت غا هاشم يامس يهضر عما حسام كاع ماحسو بيا...ماشي را رجعات المراة لدار ماصابتوش وراه طافي تيليفون...
يلاه غاتجاوبها وهو يصوني تيليفونها كان خوها..نزلات بزربة خلات مليكة مع يوسف وخرجات لعندو...ركبو ديريكت شدوها گرجة وحدة لمراكش...ما وقفو حتى لقدام العمارة...دخلو ديريكت لمكتب "المحامي محمد القرافلي"...رحب بيهم وجلسو مقابلين معاه...
ع.الرحيم : تا شتك غبرتي ماتليتي عيطتي..
القرافلي : هههه وشلا مشاكيل طراو..مشيت تال فاس حليت شي مشاكيل...
ع.الرحيم : همم..اويى اش درنا فداكشي...كاين شي ؟!..
القرافلي"حنحن منضف حلقو وصرط ريقو" : اا ههه..تادوي على الطعن ياك..
توريا : اوكيه ( زعما واييه مهم كاتأكد هضرتو)..
القرافلي"قاد الكول ديال قميجتو..مبتاسم ابتسامة خوف وتردد" : الحاجة..باش نجيك نيشان..حسن ليك مادفعيهش"وسعت عينيها" حيث ماغادي يخرجش ليك القضية تبدلات وداكشي تبدل...اش نقوليك اسي عبد الرحيم الملف ديالو مدعوم مزياان...كلشي عندو بالوثائق..واخا حطينا المرض ديالو معاوناه الجدة الي دخل معاه...
ع.الرحيم : هي اش دروك ؟ ماگاد تكمل ولا نشوفو محامي خور..
القرافلي : ولواه اسي المشاوري...مكمل معاكم غا هو نعطيكم اش كاين..غادي نحاول نعطل قضية التكفل عليهم مدة نيييت تا يعياو...غير هو مسألة الحكم على الحاجة ماغادي يمكن ندير والو...
توريا"خرجت عينيها وفمها بياض" : هاويلي را شهرين تاع سورسي..هاويلي فلوس تاني نحطهم على گلبي..نزيد تاني شي حد يبيع حق من حقوقي فالبلاد تاني تانسالي ورثي"صوتها بح"..
القرافلي : الشهود الي كانو ضدك خصوصا داك الولد حسام ومرات ولدك تاهي اكدات...
بقاو عينيها خارجين...غير مازاد قلبها ضرب بالخلعة حيث غادي طبق الحكم الي تحكم عليها...
دخلات لدوش قلبات ولقاتها جات..بدلات الكيلوط ودارت واحد اخور دارت فيه فوطة صحية...مشات لافابو غسلات وجهها ونشفات...وخرجات من دوش كاتشم فريحة طتجين مردود وتاتسمع صوت هضرة سعيدة فالتيليفون مع بناتها...سناء مشات لكلينيك تشوف خالها وترجع...تنهدات وضارت لبيت نعاس...مشات لتيليفون الي حاطاه يتشارجا قالت غاتلقا اتصال والو...عاودات دوزات الخط الي وصل لفوق مية اتصال والو...حتى لاحت تيليفون وبدات تمشي وتجي وتحك فجبهتها عينيها غرغرو زادت تخلعات اكثر...هزات راسها لفوق كاتنش على راسها باش ماتبكيش...ورجعات نزلاتو...غير مازاد قلبها تقبط حاسة بلي بيه شي حاجة مايمكنش يكون طافي تيليفونو...حسات بالخنقة وهي تخرج من البيت يلاه غاتمشي لصالون وهو يصوني سرسار...رجعات ومشات لباب حساب ليها سناء حتى كاتفاجئ بيها هي نيييت...عقدات غوباشتها فيها ووقفات...
توريا : كاينة غا وحدك ؟ ولا جايبة عماك الي يونسك !؟..كاع هذا عاار صرفتيه عمايا فشرد توگفي مع الي صبحك بد.ماياتك وزاد مع طريگ ماعقل عليك ؟..اش تاني شهدتي عماه وزاد تاني وخلاك ؟..ولفتي الدل ؟!..عاجبك بفعايلو وبسخط الي تابعو ؟..
حبيبة"ماجاوباتش"..
توريا."تبسمات بغيض" : راه مافيه خير مافيه خير مع مو الي ولداتو وهادشي يبان ليك وليني بغيتي دل وتبعتي مسخوط...خلاك تاني كثر من لول وتليتي مانتي براجل مانتي بواليدين...ودي على گلبك الي يدور فبنت المشاوري...شهدتي عماه وبغيتي ترزيني فولدي فكبدتي...
حبيبة"وسعات عينيها" : علاش نتي عندك الكبدة ؟!.."غوبشات توريا"...نتي عمر ماشفت فيك ام عندها الكبدة...الي رزيتك فيه كون ديتيها فيه كون عرفتي راه مريض وقابلتيه...الي تاتگولي عليه مسخوط كون وقفتي معاه وعرفتيه تسخطي على راسك..كون نتي عندك كبدة كون عرفتي ولدك مريض كاتجيه كريز وكل مرة تايطيح عندو الله الي شايف فيه...اشنو بيتي باقي هي ضرب اه تايضرب راسو اشمن سخط بيتي مزال واشمن دعوى مابرداتش ليك غدايدك...راجلي كون نتي عندك كبدة كون تاتسولي فين هو علاش ستيام دابا وهو طافي تيليفون ماعرفنا تا اش وقع ليه...و واليديا خلاوني حيث خايفين عليا حيث عندهم كبدة ماشي بحالك عندها كبدة معفنة...احسن حاجة والوحيدة الي شفت منك هي زوجتيني لولدك...
توريا"تلجم ليها الفم"..
حبيبة "خنزرات فيها اكثر" : هاد المرة انا بندير هي بوجه راجلي حيث تايدير بحسابك وتربية واليديا ليا... اما كون سديت عليك الباب فوجهك ولا بنعيط لبوليس..
دخلات وخلات الباب محلول مابغاتش تسدو فوجهها خلاتها مخنزرة...
دخلات وخلات الباب محلول مابغاتش تسدو فوجهها خلاتها مخنزرة ومشعوطة فنفس الوقت من الهضرة الي قالت ليها...بقات ليها غير حبيبة وهاهي سمعاتها الي يعجب والي مايعجب...حتى جات سعيدة الي سمعات كلام حبيبة كامل.... شافت ف توريا الي بقات واقفة كاتشوف فيها....يلاه بغات تهضر وهي طلعها وتهبطها وضحكت باستهزاء وضارت مشات فحالها...
كاينين شي ناس طبعهم مثل طبع توريا كايكون قاصح بزاف وفيه حتى واحد الصفة الي من داك نوع الي واخا يكون غالط مكيرضاش يتنازل حيث الغرور الي فيه نسبته زايدة بزاف...ماكيبغيش يعتارف راه ممزيانش فشي حوايج...اما لا كان اغلاطو كثيرة مستحيل يثيق راسو راه ضالم..ديما غايعيش دور المظلوم وناس كلها خايبة...
استغفرات سعيدة الله سدات الباب...اما حبيبة دخلات ديريكت لدوش طلقات روبيني ديال لافابو كاتغسل وجهها وتعاود...كاتحس بشاتها شاعلة وكاتفيبري عصبتها وبقا فيها الحال من جيهة بشار على هاد الام الي عطاه الله...عايش مريص وعايش تحت عذاب مو.ت باه الي بسبابو وبزاف الحوايج كايعيشهم ومع ذلك مافكراتش تلين قلبها عليه وترحمو غا شوية...ديما لسانها ماضي وكلامها علقم يسم...تسندات على لافابو كاتزفر حطات ايدها فازگة على رقبتها حسات براااحة مغمضة عينيها...تنهدات وهي تخرج لقات سعيدة جالسة فقاع دار...
سعيدة : تنفستي شوية !؟..(عرفتها تعصبت)..
حبيبة"حركات راسها وتلاحت جلسات حداها دارت ايديها على وجهها كاتنفس وتعاود" : هففففف...
سعيدة : الله يهديها هذا مانگول..
حبيبة"حيدات ايديها وتكلمات بانفعال شوية" : ماتايبانش ليا فيها باتهدا...واش ماكتحس كاااع بولادها ؟..وا هي تكون مع شي واحد فيهم والو هي تاتشوف هي راسها صافي...ماتتشوفش فين وصل بشار بهاد الحالة...مريض من كااع كلشي وهادشي ما بردهاش كااع شنو باتشوف فيه مثلا ؟!..
سعيدة : هذاك هو طبعها ماعندها كبدة على تريكتها...تشوفي تاتعياي ديري بوجه ولدها وصافي..
حبيبة : راه درت هي بوجهو اما بنعيط لعساس يجري عليها ولا ندير شي التزام عند البوليس ماتبقاش توصلني كل مرة تنسمع منها كلام قاصح...ماگدهاش واليديا وماگدهاش بابا الي صيفطاتو ديك نهار بكخيز ماعقلاااتش عليه...اشنو بات مزال ؟..شهدت ضدها حيث شهدت بالحق اه گلت اشنو شفت...هي ماتستاهلش تشد يوسف ماتستاهلش تكون ام كاااع...
سعيدة"تادوز على دراعها" : تهدني بنتي...صافي نسايها..
سكتات حبيبة مابقاتش زادت كلمة ولات كلها كاتنهج بالاعصاب حيث عصبتها وزادت جاتها فواحد الوقت الي ماعارفينش بشار فين هو واش وصل ولا مزال...ولا واقعة ليه شي حاجة...لانهم على وشك تولي ستة ايام باش غابر بلا تيليفون ولا خبر ولا اي حس ليه...
ضارت عندها حبيبة بعيون متحجرة بدموع...عضات شفايفها باش تحبسهم متينزلوش حتى صرطات ريقها وهي تنطق...
حبيبة : فين بشار دابا ؟!..اه بزااف على باش يكون باقي ماوصل...بزاااف...
سعيدة : وهو را بزاف ويكون لحگ دابا عا هو كي گلت ليك غايكون طافيه راسو رجع لايامه اللولة...
حبيبة"نسات راسها" : راه مزوج دابا عندو انا مايقدرش يخليني ويطفي تيليفون...
سعيدة"جابت ليها ضحك" : هههه وهو باش عرفك باقيا مرتو دروك ياك فضيتيها عماه وصيفطتيه...(بمزاح بغات تلطف الجو اما تاهي ماقلقة عليه)...
حبيبة"تنهدات بجهد وغمضات عينيها" : نسيييت...
رجعو شادين طريق رجعة لدوار...طريق كلها وهي تنهج وتبخ وتدعي وتشحت...وضرب على صدرها وتوعد...
ع.الرحيم : وشوف ليك البراهش يا...
توريا"ضحكت زامة فمها بغيض" : ايوى الي ضصرهم تا ولاو يتهزو على سيادهم را بسيف مايضصرو...
ع.الرحيم : اما خليتيني طلعت عدها وديك ساعة نورثها المسوا كيداير نعل ترابيها الكلب...وشوف ليك المراكشي اش ولد غا ماكرف...
توريا : نهاااااااار لول ماحملت فيها شعرة لا انا لا مليكة طفلتي ولالة لصقت عليها لصقة العما عالحايط فالضلمة...
ع.الرحيم : وليني الواحد يصيب يلجم فمو ويتعلم يحدر العينين على الكبير...فييين عمر الكنة عدنا ضصرت على لعدوزة عليا بليمين وكون فاطمزهرا هزت عينها ف حكيمة ليلة صباح يلحگها عثمان لدارهم عليا بليمين لا باقي عتبتها عدي...ما صابتكش نيييت حارة يا توريا...
توريا سكتت كاتنهج وتاخذ نفسها...بغات تاكل راسها من ديك الهضرة الي سمعات من حبيبة...مارضاتش بنت فعمر حبيبة تعطيها داك القاصح الي تعيا تخبيه وتغطيه كايبقى صحيح وهي الغالطة وضالمة...جبدات كلينيكس مسحات العرق الي تصبب من جبهتها ونواضرها وهي دور عندو...
توريا : اش بقيتي درتي فداكشي مابقيتي جبتي ليا والي...
ع.الرحيم : تلهيت عليه هاد التواخير فكرتيني نيت فيه...تاندير ونمشي لمراكش لديك القهوة فين تانبرك انا والمعارف ونشوف كيفاش...
توريا : غا شوف اخوييي كي دير...العلگة باقي واگفة ليا راني مانساهااااش يا ولد مي وبويا مانساهاشاي...
ع.الرحيم : يكون خير...
رجعات سكتات تاني تاتشوف فطريق...حتى قربو يدخلو لسيدي بوعثمان وهو يسولها...
ع.الرحيم : تمشي معايا تايجي خو حكيمة يهضر عماك وتفاهمو ولا تال من بعد تنفسي...
توريا"تا بغات تقوليه خلي من بعد وهي دور عندو" : لا نمشي عماك نشوف الولد اش يگول ويكون خير...
ع.الرحيم : والى تاني دارت لينا عصا فرويدة..
توريا : البرهوشة تحت ايدي دروك..المسخوط مكاين ماحتال يجي يصيبنا دربنا الرسم (العقد) والى گد يدوي غا يدوي نيت..
يلاه كي طفات سعيدة على الغذا تدق الباب وهي تخرج من الكوزينة حيث حبيبة كانت داخلة لبيت كاتحاول تاني تصوني على بشار...حلات الباب وهي تدخل سناء هازة فايديها ميكات ديال مقدية...
سناء : اوفف سخفت بالصهد اخالتي...
سعيدة : الحال صابح سخون هاد النهار..."شافت الميكات" جبتي علاش وصيتك..
سناء"حركات راسها" : راها بوحدها...تقداها بابا هو الي وصلني لهنا...
جبدات الميكا كانت بيضة فيها طيحال وكبدة...دارتهم فالشبكة تغسلهم...كانت منقية الباربة خضرة مقطعاها ودايرها فالخلاط مع الليمون طحناتها تاهي...خرجات سناء بدلات ومشات لدوش تغسل وجهها...ورجعات عند سعيدة لقاتها كاتحط فطاجين بدات تعاون فيها تا حطو كلشي على طابلة وجلسو يتسناو حبيبة ساعاك تعطلات...
سناء : حبيبة وااا حبيبة...
ملي شافوها ماجاوباتهمش ناضو بزوجات لعندها بخوف حساب ليهم سخفت ولا نعست حيث تا فقر د.م كايدير الخمول...لكن لقاوها جالسة وشادة تيليفون فايدها مدوزة ليه الخط كايتسمع غير صوت العلبة صوتية...
Der gewünschte Gesprächspartner ist leider zur Zeit nicht erreichbar. Bitte versuchen sie erst später noch einmal.
هادشي الي كاتسمع والي تقريبا قربات تحفظها من كثرة ماكتجرب تعيط ليه...ايه عارفة بلي اذا فتح تيليفون را غايعيط هو راسو لكن هادشي مابغاتش تقنع بيه راسها حيث بالها مشغول عليه بزاف وخاطرها من لداخل ماهانيش...كلهم مامرتاحينش لكن هي اكثر...يمكن هما حيث كانو ولفوه ديجا بلي كايطفي تيليفونه مدة حتى كايعيط هو لكن هي ماولفاتش او هو ما ولفهاش حيث ببساطة هي "حبيبة"..كان هو كايتاصل وكانت الى عيطات ليه يخلي كلشي ويجاوبها فيساع...ولفات على انه كايخلي كلشي على قبلها...ماعمرو طفا تيليفون فاش عرفااتو او نقولو فاش عرفها وبغاها...
سناء : وا حبيبة يهديك الله راه دابا يعيط...
حبيبة"شافت فيها" : مامرتاحاش اسناااء..."ترعدو شفايفها"..
سعيدة : واش بغيتي تبقاي غا باركة وتعيطي...يلاه تغذاي وحطي حداك تيليفونك غا يشعلو يعيط ليك...لا وقعات شي حاجة راه نعرفو نعرف ..
سناء : اكفس حاجة توقع راجلك عندو وراقو كاملين يعرفوه يعرفوه ويجيبو خبارو (شافت فيها حبيبة) اه غانجي لصراحة ياك هادشي فاش تاتفكري ؟!...
سعيدة : كلام المعقول...نوضي تغذاي ولا تاني نبدا نحلف عليك...
تنهدات وهي تحرك راسها غير مجارياهم وصافي...عنقاتها سعيدة كاطبطب عليها ومشاو لكوزينة يتغذاو...
"الرحامنة"...
وقف سيارة فبلاصتها فين كايركنها...حتى بان ليه حسام خارج كايسوس فايديه كان لداخل يتقاشح مع زكريا على والو...تا وصل عند هاشم مغوبش...
هاشم : تا مالك...
حسام : مع طالب معاشو ديال زكريا...كايتريگل عليا بغيت ندخل فيه براس وانا نميك...
هاشم : وسع خاطرك دير بحساب راه مأزم غا مكمدها وداير راسو كايضحك...
حسام : وانا غا على مصلاحتو..گلت ليه يلاه نمشيو يومين لاگادير حق ربي لا بغيت غانديه يفوج بقا فيا...گاليك بغيت تاتولد مي نتهنى عليها عاد نمشي...مو باقي ليها شهرين على ما گال ايوى شهرين را غايكون بدا قرايتو وعندو سيزيام بلمسخوط...
زفر هاشم بديق محرك راسو واخا سمع ليه تاهو باين عليه القلق...حيد الكاسكيط ديال اللبسة وتوجه لطبيبة الي دايرين تحت ضليلة مبردة تما حيث قريب ليها شوي داك شاريج الصغير الي دايرينو لداخل ناهيك على واحد قد سخط دايرينو لور فين كايسقيو منو...كانو نيت يلاه ساقيين الغريسات الي تما مع صباح بكري قبل ماتحرار شمس وتحرقهم...
حسام : بشار كاع ما شعل تيليفونه...ماعرفت مالو هاد الخطرة بان ليا...
هاشم : وايييه..."حك شعرو من لور حال عين وساد اخرى تايفكر " بان ليا نتحركو انا وياك نشوفوه...
حسام : خاصك فيزا اسي القايد...
هاشم : واش انا گلت ليك نمشيو لحگو عليه لهيه ؟..ونتحركو لطنجة البالا...
حسام : ماعندك فين تحرك...راه بقيت حتى زاد الباطو...واخا زدحوه فديوانة بالخلاص...
هاشم : وايلي علاش ؟!..
حسام : على طوموبيل حيث فوت العام ماخرجهاش من المغريب...واخا كان مكسح مريض نيت..عض فالصبر وعطا الفلوس على گلبو مسكين...واخا بداو يتبعصصو عليه تما عيطت غا لولد سميح الي خدام تم فالديوانة هو الي بصبصنا ونضا معانا الامور...
هاشم : لا ولد سميح رجولة...
مازال كايهضرو وهي تخرج ريهان عنقات هاشم وباستو من حنكو...دورها وجابها فوق رجليه كايفلي فيها ويبقشش...
هاشم : فين ختك ؟!..
ريهان : كاتحط حوايج مي فالماريو الي تصبنو...بابا امتى تدينا عند ماما...
هاشم : نرجع من الخدمة ونجي نديكم عشية انا وحسام...
حركات راسها وبدات تناوش مع حسام خوها ويفقص فيها تاينزل عليه باه دقة من حيث لا يحتسب...وهي تخرج اشراق الي شادة تيليفون فايدها وعينيها مغرغرين...تا وقفات على هاشم...
اشراق : عمي هاشم...
هاشم : هممم مالك تانتي...
اشراق : بشار...خويا بشار كانصوني ليه ماكايجاوبش...
حسام : هاء...
اشراق"شافت فحسام ورجعات شافت فهاشم" : عافاك بغيت نهضر معاه ضروري...
هاشم : مالك ياك لباس...
اشراق"عينيها غرغرو بغات تبكي" : مي بغات دير ليا كي ديك المرة تجوجني بزز...
حسام : ديك المرة نتي الي بغيتي وخورتي الشعب...
اشراق : ولكن هذا خو حكيمة مرت خالي عبد الرحيم...داك الي كاتعرف اسميتو عبد السميع...
هاشم"وسع عينيه" : هاويلي هذاك را يلاه طلگ المراة...وكبير عليك...
اشراق"نزلو دموعها" : را مشات لدوار المشاوري حيث غليجي ويهضر معاها...بغيت خويا بشار هو الي ماغاديش يخليها...
يتبع...
التعليقات
لا توجد تعليقات بعد، كن أول من يعلق.