محتوى القصة
كلهم كايسمعو ليه...الي فيهم عارف فحال هاشم وحسام والي فيهم تصدم فحال رضوان و ياسين والي فيهم تبهض ويمكن هادشي مايجيهش غريب على بشار فحال عبد القادر...اما لاخرين كانو كيسمعو منهم مجيد الي ضهرو قرب يتقوس من كثرة ماحدر راسو وعينيه فالارض...البشير غير داير ايدو على حنكو ويسمع وسميرة حولات الشوفة ناحية بشار من الي اشار ليه...ركزات فيه الشوفة كيفاش جالس حجبانو الغلاض كيفاش مغوبشين الي يحلف عليه را باغي ينطح شي حد...من الفضول شافت فيه بحكم الكلام الي كان كايتقال فحقو من طرف اشرف وكيفاش كان كيهضر عليه بحرقة...هاشم واخا كان عارف هو وحسام حسو براسهم كأنهم عاد عرفو حيث كملت عليهم حتى صدمة ديال كيفاش اشرف عرف...ياسين ولا حدر عينيه وكايسمع لخوه...
اشرف : ونتا الله ياخذ فيك الحق..ماباغي منك لا نسب ولا حسب ولا مال...وحنا ماشي ولاد لحرام حنا ولاد الحلال گادين نجيبوها بدراع...حنا ولاد الحلال مانخليوش مي تشيط على شي حد كيما كان...حنا ولاد الحلال الي ماخرجناش لبلية بحالك..حنا ولاد الحلال الي مامديناش ايدينا ولا تعدينا على بنات الناس...
بشار"كمش حجبانو"..
اشرف : هذا هو الكلام الي باغي تسمع...عطيناك كلامنا لا انا لا خويا..غا انا عطيتو ليك بالمفاهمة وخويا را بغا يوصلو ليك بالعصا...نوض نتا وتريكتك والباب الي دخلتو منو رجعو ليه...
رضوان كان بغا يهضر وهو يحنحن هاشم ضار عندو وهو يغمزو يسكت...ولا ناض حتى ياسين الي شير ليه اشرف دوزو لجنب لاخور لا يمشي يضرب مجيد على غفلة...
اشرف"شاف فهاشم" : سولتينا وها جوابنا خويا هاشم...
هاشم : هضرة وحدة...
ياسين : ماكنعرفوهش من لاخر...
هاشم"حدر راسو وهزو بمعنى واا عليه"..
اشرف جر ياسين وخرجو...كان قرارهم باين اصلا غا هاشم بغا يلاقيهم ب باهم باش يعرفوه شكون بعدا اما فكرة يلقاو باهم. ويدخلو على سميتو كانو من ديما راقضينها رفض قاطع...حالفين بحلوفهم مايكونو على سميتو والى شافوه يقت.لوه غير اشرف الي حضر عقله وتبت تا وصل ليه الهضرة...ومن هادشي كاااامل "بشار" ماهضر ما تكلم كان جالس وكايسمع لكل واحد فيهم وكان فبالو الى قبلو يدخلو على اسم باهم يوقف معاهم حتى لاخر امضاء ليهم ويكمل كلمتو الي عطاها فالنهار الي حط الحسنية عند العتبة ديال دارهم (فاش لقاها مفروشة ومغت.اصبة هزها وحطها لدارهم هما الي تصرفو ديك ساعة)..ماعمرو ينسى "المقدم" صاحب باه نور الدين الي تكلف بمجيد انذاك والي شهد انه هو الي تكرفص على الحسنية...اما كانت غادي تلبق التهمة لبشار وتهمة اخرى تزادو...
ع.القادر : لا اله الا الله...
ناضت سميرة كاتقاد فشالها وتمسح فعينيها بكلينيكس تبعها البشير الي نغز مجيد وناضو كاملين...توجهو معاهم حتى لعند سياراتهم...بشار مشا لطوموبيلتو جبد كارو يكميه وحسام مشا حداه...
سميرة"تنهدات" : خليهم على خاطرهم...حقهم اخويا حقهم...
هاشم"عينيه فالارض" : مانضنش اختي..هادشي عاطين عليه الكلمة من نهار وعاو...
مجيد : واشنو ندير دروك معاهم ؟!...
هاشم : باقي ساكن ف كازا ؟!..
مجيد : واه..وليت ساكن مع ختي تم...
هاشم : فين ؟!..
سميرة : ف اناسي...
هاشم"جبد لاكارط وعطاها ليه" : هاهي شد..الي مهم هو هذا هانتا شتيهم وسمعتي هضرتهم...الي علينا درناه نهار يبغيو يسولو عليك نجيبهم عندك فينما كنتي...
مجيد"بحزن وندم كبييييير" : راني مريييض اخويا هاشم..الندامة الي فيا كبر من مرضي..خايف نم.وت وماندي منهم سماحة...ماكرهتش نشوفها هي نيت مهم...
ع.القادر : اش فيها ماتشوف...بنية فگنازة مراة كبيرة...شوف لا كنتي دايز را تصيبها تلعب عما دراري فالدوار...
هاشم : مايلگاهاش مشاو ولادها دروك مايخليوهاش تخرج تاتمشي...
سميرة"شافت فهاشم برجاء مدت ليه ورقة" : ها نمرتي وعنوان دار لهيه فكازا...حاول معاهم واخا يهضرو معايا غير انا...والله اخويا ما كنا عارفين عندو شي ولاد من التهمة الي تشد عليها...فراسنا حكمو عليه تعدا على بنية وليني اش وقع معاها ماعرفناش وماعطانا حد خبار..."حطت ايدها على صدرها ونزلو دموعها يجرييييييو" عافاك اخويا قنعهم غا من جيهتي انا را ندير ليهم كتر من ولادي والي خصتهم نوقف معاهم فيها...
هاشم"بقات فيه حيث كانت كاتهضر بصدق...حرك راسو وقال" : يكون خير اختي...
ركبو فطوموبيل وتيسرو فحالهم...غير هما خرجو هاشم وعبد القادر مشاو لعند بشار وقفو حداه كايهضرو...ولداخل فالكوزينة كانت واقفة مباركة كاتنصب فالغذا وربيعة مقابلة الخبز فالفران.. وتوريا جالسة حداهم تم..دخلات كريمة...
كريمة : مشاو...
توريا : كلهم ؟!..
كريمة"صرطت ريقها" : لا باقي بشار..
توريا"عوجت فمها وخنزرت بجنب عينيها"...
مباركة : سمعتي اش گال داك الولد الي وقف..عاماذا دوا على ولدك بشار اختي توريا...
توريا"الصمت"..
مباركة : والله الى عاود عليه غا بالخير...هو الي مكلف بيهم...(عاودات ليهم اش قال اشرف)..والله الى بقيت غا كانشوف...
ربيعة : تي فين سمعتي هادشي...
مباركة : بقيت واگفة هاو سمعت تا بردت ههههه...
كريمة : وتانا جاني فضول وليني خفت رضوان يخرج يلگاني ونهار ماتبرگ فيه شمش...
توريا : ورا الفضول عيب اكريمة...
مباركة"ضارت عندها" : علاش انا فضولية اختي توريا ؟!..
توريا"حطت ايد فوق ايد على حجرها ورجعت مسندة عالحايط" : عيب عدنا هنا فالدار العيالات ماخاصهمش يتصنطو على ضياف..
مباركة : وهو انا مافيا هاد القاعدة وليني من شفتك تانتي كاطلي من شرجم فاش يكون المجمع الي فيه ولدك گلت را عادي عدكم هادشي...
خرجت كريمة عينيها فيها...ربيعة دارت زيف على فمها ماعرفت ماتقول اما توريا سكتاااات وبقات كاتشووووف فيها....هزت تيليفونها الي حطاتو حداها وخرجات من الكوزينة مخلية مباركة ضارت تكمل نصيبها ودندن باغنية ديال ولد الحوات...
على برا من بعد مامشاو لاخرين وتيسرو فطريهم بخيبة امل من الي سمعو وشافو من ولاد الحسنية...وصل الوقت حتى على بشار باش يرجع حتى هو...
ع.القادر. : اش غانگوليك الله يرضي عليك وصافي...هذا مضنون فيك...
بشار"كايكمي ويشوف قدامو"...
هاشم : الي علينا درناه نهار يبغيو يشوفو باهم لااا بغاو ديك ساعات نديهم عندو...
بشار"حرك راسو..هز معصم ايدو شاف ساعة وضار عند هاشم" : غادي نتحرك دابا...
حسام : نمشي معاك نشوف مي ؟!..
بشار" بدون تفكير" : تحرك...
حسام : هانتا وصل معاك منار وريهان لمدرسة...طرونسبور گايل ليه مايجيوش ليهم حيث كنت غانديهم انا...عشية نرجع هنا...
ضار حسام ركب حدا بشار الي سلم على جدو وعلى هاشم وركب مديماري سيارة وخرج من الفيرما...يلاه كيف تيسرو فالبيست حتى بان لحسام شي واحد واقف لهيه وكايشير ليهم...
حسام : بلاتي شي حد كايشير...
بشار"گرن حجبانو كايشوف عرفو فالبلاصة...نقص السرعة حتى وقف"...
حسام"نزل زاج النافذة" : اشرف !!..باغي شي حاجة...
اشرف"حرك راسو ب لا وشاف ف بشار" : باغي ندوي عماك...
بشار"طلق سينيال وزاد شوي بسيارة حتى ركنها جنب..خلا حسام فالطوموبيل وحيد سانتيغ ونزل لعندو..هبط راسو عند اشرف وحط ايدو على كتفو" : خاصك شي حاجة ؟!..
اشرف"حدر راسو وحركو ب لا...سكت بشار وهو كيشوف فيه...عارفو باغي يقول شي حاجة باغي يوصل ليه شي حاجة...ماتكلمش بشار خلاه على خاطرو حتى جمع الكلمات الي غايبدا بيهم...هز اشرف راسو وعينيه فبشار...
اشرف : خويا ياسين كان كايشوف مي من الي تاتسمع سميتك كاتجيها لكريز...لا انا لا هو كان يحساب لينا نتا هو "حدر راسو"..
بشار"زير ليه على كتفو" : رجال مكيحدروش عينيهم لمن ماكان...كمل وعينيك لفوگ...كانسمع...
اشرف"هز ايدو مسح عينيه ماباغيش يبكي محاول بجهد باش يصرطها ومايبينش ضعفه" : فاش كنتي كاتصيفط لينا الكوليات ديال الحوايج وشهرية مع مي سعيدة ماكنتش كانبغي نشدها...وهي تعاود ليا اش كاين وكيفاش لگيتيها...واخا هكاك مابغيتش ديك شهرية...حتى لواحد نهار گالت لينا را مابقيتيش كاتصيفط لينا حيث مابغيناش وليني هاد الفلوس را منها هي ومن هاشم...ولينا كانشدوهم نيييت قلة الشي خلاتنا نشدوهم صحة قبل مانخدم فديك الفيرما وكنت عاارف منك من واحد نهار كمشتهم ليا فايدي ونسات ماحيدت ورقة الويستيرن...
بشار"كايشوف فيه بتركيز"...
اشرف : مانكذبش اخويا حتى على داركم تاهما ماكانوش مفرطين من جيهتنا مي عيدة وخويا هاشم وختي سعيدة وحتى الواليدة ديالك...ولكن الحق حق خيرك كبييير اخويا والي گلتو گبيلا گدام هادوك ماكذبت فيه بحرف وندي عليه تقليد...شحال من مرة كنت باغي نشوفك وماكتابش ماكنتيش كاتجي والى جيتي نسيق الخبار غا من مي سعيدة كاتجي غا نهار فالعام...وها الايام لاگاتنا..."شاف فيه وعينيه مغرغرين" خيرك اخويا مانساهش والى على خويا ياسين ماديش عليه معصب غا مع راسو ما صبارش كلمة جوج طير ليه نقشة هههه..."ضار لهيه مسح عينيه ورجع شاف فيه"...عارف راني صغير على هاد الهضرة وليني الي احتاجيتيها هاني معاك شديد...
بقى بشار كايسمع ليه ويشوف شحااااال...ضربو لكتافو ضربات صحاح رجولييين...شد ليه راسو بين ايديه وقربو لعندو باس ليه راسو...هادشي كامل داز تحت عينين حسام...تسالم مع بشار وتيسر اشرف فحالو...ركب بشار فالسيارة وكسيرا للوجهة مراكش...
الساعة الواحدة ونصف بعد الظهر...خرجات كيف عادتها من لافاك من بعد الحصص الي دوزات...بان ليها باها وهي تسالم مع البنات ومشات كاتزرب وابتسامتها كاتعراض..توحشاتو حيث شحال ماشافتو...تلاحت عليه معنقاه وهو كايضحك كيف عادتو...
حبيبة : توحشتك...
م.حفيظ : اشاو بيتك توحشيني مانتوحشك...
حبيبة : يااااك..صافي هي سير دابا نعيط لبشار يجي يديني وسير عند مرتك ناديا...
م.حفيظ"حط ايدو على قلبه" : الاتيف واش گلتي وراه ضربي قلبي...واطرني الغرام سمعني هههه...
حبيبة : ههههههههه...سعداتها...
م.حفيظ : ركبي ركبيي هههه...لدويرة نشاعلاه ؟!..
حبيبة"ركبات بلاصتها وحتى ركب وديمارا" : لا بتديني ناخذ شي حاجة هي لولة...دغيا دغيا...
كسيرا مباشرة للوجهة فين بغات حتى قضات غراضها وعاد وصلها لعمارة بانت ليها سيارة بشار واقفة فرحات حيث جا دغيا...
م.حفيظ : گلتي خارجين عشية..ايوى صافي غذا بلا ماديرو الغذا على حسابنا حنا...علمي بشار ولا تاندوي معاه...
حركات راسها وباستو....دخلات لقاتو واقف خاشي ايديه فجيابو كايتسنى فيها تجي عندو حتى وقفات وحطات دوك ساشيات...قربات عندو مبتاسمة ليه...
حبيبة : سلام...
سلام عندو كانت مميزة...قربها ليه خاشي ايدو ورا ضهرها وتحنى لعندها باسها فحنكها وطلع لفمها بوسة خفيفة...
بشار : هانيا ؟!..
حبيبة"حاطة ايدها على كرشو..حركت راسها بزربة وكاتشوف هنا وهنا لا تكون جايا سعيدة" : هممم...
بشار"شاف دوك ساشيات" : شنو داكشي...
حبيبة : طلبت بابا داني حتى لعند واحد سيدة كنعرفوها تاتصاوب بيتزات صغار ديال دار وبريوات معمرين وبسيطلات صغار تاهما مالحين وحلويين..خذيتهم من عندها باش نديرو گوتي "تبسمت ليه وعوجت راسها بكياتة" عجبو مي عيدة بزاف..باتشوفهم وتفرح...
زاد زيرها لعندو وتحنى تاني شلقم ليها شفايف تا خلاها تنهج بلا مايهضر ولا يعبر اصلا التعبير الكلامي ماعندوش فالقاموس...هادي كانت بادرة شكر منو وصافي ماعرفش كيفاش يوصل ليها...تا الى هضر غايخسر ديك "شكرا"...
بشار : لبسي شي حاجة مستورة...حسام كاين...
صيفطها لبيت تبدل وقلبها كايضرررب...بدلات حوايجها وخرجات الصالون حتى سلمات عليهم وخرجات مستاذنة باش توضى و تصلي...ملي دخلت وهي تتشم فريحة طاجين الي ناصبة سعيدة تعطعط جابت ليها الهوايش (حيث بنين ماشي حاملة.تهدنو)...صلات الظهر وخرجات لعند سعيدة لقاتها كاتقاد شلاضة فطبيسلات...عاوناتها......
كان جالس بشار كايسمع لهضرة عيدة على الحسنية وكيفاش عاشت من بعد ديك الحادث وولادها...وحسام كايعاود ليها اش وقع....كان عاطيهم وذنيه وصافي اصلا من الي رجع جا راسو مزنزن عليه شرب حبة من الكالمون ديال راس عادية...
تحط الصحن ديال صالاد قدامو هز عينيه بانت ليه حبيبة الي حطاتو ليه عرفها هي الي صايباتو حيث مولف ضروري تكون صالاد معينة فيها انواع محددة ضروري يبدا بيها هي لولة...حطات ليه كاسو ديال الما وكل هاد تفاصيل بدقة دارتهم وهادشي مايمكنش ما يلاحظو شي حد...شدها من ايدها تا شافت فيه...حرك ليها راسو ناحية البلاصة الي حداه ونقر فيها بصبعو...
بشار : ريحي...
حنحنت بخجل وجلسات حداه...سماو الله وبدات سعيدة كاتفرق فالخبز وتكحز لعيدة...حتى نطقات حبيبة كاتنغز بشار فدراعو هبط راسو لعندها عاطيها وذنيه...
حبيبة : ماما وبابا بايجيو غذا لغذا وبايجيبو معاهم الغذا باش يشوفو مي عيدة...
بشار"حرك راسو"...
تبسمات ليه وبدات تاكل وتبنن مع داك طويجين الي نصبات سعيدة ديال اللحم بالبرقوق ولحم ...كلات حتى بردات لا هي لا حسام فالماكلة مايحنتوكش...كملو الغذا وناضت حبيبة دارت اتاي هي وسعيدة...صايبات لبشار كاسو ديال القهوة دارتو فالبلاطو هو وقريعة الما صغيرة...
حبيبة : انا نديه ليه بايكون تايكمي فالباللكون...
سعيدة : سيري لحگي علينا لصالون تشربي كويسك اتاي...
حركات راسها ومشات لبيت...سدات الباب وراها ومشات لعندو ديريكت لبالكون حطات ليه قهوته غا شافها تسناها حتى حطتها وقربها ليه باسها فراسها ك شكر ليها ولهاد الاهتمام الي كادير ليه...تبسمات ليه وخرجات لصالون جلسات معاهم مجمعين بالضحك مع حسام ونقايمو مع عيدة تاهي...مخلين الي باغي الكالم را فالبالكون كايتنغم بالكارو وتيليفونو قدامه كايصوني بدون مايرد عليه....
بعد اذان العصر...خرج مولاي حفيظ من دار الدباغ وتوجه مباشرة لمحل ديال البازار الي فالسمارين...صوت البياعة تما واصل...صوت تقرقيب كيسان النحاس من بياع الماء الملقب بالگراب...ريحة الصناعة تقليدية فايحة والالوان الي متميزة بيهم السمارين...وصل مولاي حفيظ حتى سمع صوت النداء...
م.حفيظ"ضار ناحيته" : اشكا امولاي عبد المالك...
م.عبد المالك : ابيت هي تصيفت ليا عماد يشوف ليا شي ناس من لاليما.ن...الي عندي هضر معاهم بالميريكانية گاليك اسيدي مافهموش...عتقني...
م.حفيظ : ودخوول لمحل ودي تا وربية معاه اشاوا تتگول...معاد اه ديالك والمحل ديالك اسيدي هههه...معاد...تحرك شوف مع مولاي عبد المالك...
م.عبد المالك : ا لقمان..معاك واحد البراد اتاي منعنع متوت ناضي كنادي لحاج حفيظ على حسابي...
م.حفيظ"دخل كايضحك" : ههههههه ينعلك امولا حاجتك...اگوليه ينقص اتا سكار...مولات الخيمة تتوصي وتعاود...ههههه
دخل المكتب الي فالمحل الكبير ديال البازار...كان واحد المتعلم تاهو يلاه بادي معاه دخلو يعاونو فالمحل تاهو كايتقن اللغة الفرنسية والاسبانية...باغي يخدم فاش ماكان حيث كايقرا وتعاون معاه...جاب ليه لقمان صينية اتاي مدخلها تا دخل معاه واحد الشخص الي شحاااااال ما وصلو من ايام ماكان كايجي مع مولاي عبد القادر...كايحك فلحيتو وهاز ديك الايد الي داير لحديد لصباعو باقي ماكيحركهاش مرة كايدير ليها باندة ومرة لا...تا حنحن وقال...
سيحمد : واحد سلام عليكم...
م.حفيظ"هز عينيه من فوق نضاضر شوف وتبسم" : اهلا اولدي...عاش من زارنا وشافنا...
سيحمد"سلم عليه" : بخير والي باس...
م.حفيظ"حيد نضاضرو وربع ايديه" : ولله الحمد..جيتي مع براد اتاي عاد مشحر هههه...جيب ا مراد واحد الكاس نقي..."كب اتاي فالكاس لاخور وحطو ليه"...كي طرا تفكرتينا بزيارة...
سيحمد"شرب من كاسو" : وغا كنت جاي عند واحد سيد ف درب ضباشي جاب رحيل لمحل ديالو فالكاميو ديالي ولگيتها حجبة وزيارة...
م.حفيظ : مرحبااا...
سيحمد"كايحك فلحيتو ويشوف فالمحل ويدور هنا وهنا حتى شاف ف مولاي حفيظ" : فكيتي امور شيكات مع با ولا...سقت الخبار الحمام حليتيه...
م.حفيظ"جمع البسمة وحنحن محرك راسو" : اييه رصيناها بيناتنا...علاش اولدي...
سيحمد : وايلي 110 المليون دغيا ضبرتي فيها ؟!..بحال الى سقت الخبار داهم بشار ولد خويا من عندو...لا ؟!..
م.حفيظ"بقا ساااكت شحال وهو يجاوب" : لا فكيناها بالتي هي احسن...شوية بشوية...مادخلنا بشار فوالو...
سيحمد : حسن....واخا كان عليك تفكها شحال هادي گبل ماتعطي بنتك...تانتا غا گاليك بويا نخطبوها ونفكو الكريدي گلتي ليه بسم الله ههه...ماسولتي على الولد ماگلتي ياكما فيه شي عيب(هز صبعو مشير ليه بمزاح زعما)..ياكما عطيتي بنتك على طمع الحاج (هز راسو كايضحاااااااك...وضحكتو نزلت كي السم على خاطر مولاي حفيظ)...
هضرة محشية ل مولاي حفيظ بطريقة دخلات ليه مع العروق وغيرات ليه الخاطر واخا هكاك مابغاش يبين ليه وضحك معاه عكس ما فلداخل ديالو...
م.حفيظ. : اشاتا تاتگول ا سيحمد...اش هاد الهضرة...
سيحمد : ههه لا لا غا نبسط عماك..
م.حفيظ : واطرني مزاحك خايب...
سيحمد : ياعوذ بالله...الله اودي عز نسوبية الحاج...غاا ديك ليام فاش بغينا الفلوس ديالنا كنا محزوزين (مزيرين زعما محتاجينهم)..هاو مابغينا غا حقنا ولا لا الحاج ؟!..
م.حفيظ"حدر راسو وهزو بتاكيد" : معلوووم...وليني هادشي اه فات وتفاهمنا...وهادشي اولدي اه بيني وبين الحاج باك...نتا اش ليك بهادشي خليك اتا بعيد وعزيز...
سيحمد : شكون كان يجيب ليك العواد...واخا مابقيتيشاي تجيب من عندنا...
م.حفيظ : اراه لي خلاني وصلت معاكم لدوك الكريديات هو كنتو تحلفو عليا مانخلص وتگولو سير وقتما خلصتي نتا ديالنا...
"تسند عالكرسي والفقصة تاكل فيه من لداخل بهضرة سيحمد"...
م.حفيظ : ايييوى شفتي فين وصلنا تجمعات علينا ملاين تاتگال هي بالفم...دابا تناسبنا مانگد اتا نعاود نشد من عندكم العواد...
سيحمد. : ماكاين باس ماكاين باس...لخطنا وضحكنا عماك وصافي...لا تهزها فخاطرك الحاج راني غا نبسط عماك...الحق يتگال عز نسوبية...
م.حفيظ"بملامح ممحية فيه" : الله يكبر بيك...
هز سيحمد راسو كايشوف فالزرابي القديمة المعلقة والصواني ديال نحاس...صيكان الجلد الاصلي مخدومين على ايد الصناع تقليدييين وريحتو تعطعط...ديكورات العود تماثيل كبيرة من العرعار وكاين من خشب اخر...مولاي حفيظ نزل عينيه وخاطرو راه تغير والي عطا الله عطاه...بقى سبحمد يشوف ويحك فلحيتو حتى دخل المتعلم حط طبسيل ديال الحلوة وقال "بالصحة"..
م.حفيظ : دوز كاسك...
سيحمد : ايييه..."مد ايدو هز واحد كعب غزالة كايتلدد بيها"..زينة عندكم هاد الحلوة...من خونا بلكبير ؟!...
م.حفيظ : الي حداه...
سيحمد : مليحة...
كمل كعب غزال وزادو وحدة اخرى معمرة بالتمر كمل كاس وساس ايديه وناض كايحنحن ويهضر وفمو عامر...
سيحمد : لا تقلقشاااي مني وهانا (ضار باس ليه راسو وعاود)..ورقبة ولدي لا غا تانبسط عماك...
م.حفيظ : الله يحفظو وينجيه ليك ياعوذ بالله...ماكاين باس عارف عارف...
سيحمد : دوز بخير...
م.حفيظ : الله يبارك فيك..ومايكون عندك باس ف صبعك...
حرك سبحمد راسو وهز ايدو شير ليه ببسلامة وضار خرج من المحل كاينقي سنانو من بقايا الحلوة العالقة فيهم...خلا مولاي حفيظ متبع ليه العين وبقا مفيكسيهم بسهو واخا مشا...
وصلات العشية خرجات من الدوش بزربة دخلات البيت...كانت لابسة دوبييس اصلا فدوش وذاهنة لحمها ورجليها بالكريمات ديالها...كانت حاطة سروال دجين بويفراند وقميجة شيبية ستيلها واسع وطويلة...لبساتهم وحطات فيست على قبل البرد...مشات ل كوافوز ربطات سيشوار حتى نشفات شعرها وضفراتو جنب ضفيرة مخربقة عطاها ستيل معين...ذهنات وجهها بليكخون واخا غربات شمس على قبل ترطيب...دارت شوية فوندايشن وهي تقرب عند الباب طلات لا يكون جا حيث قاليهم خارج يرجع يلقاهم واجدين باش يخرجهم يتعشاو برا...بانت ليها غا سعيدة غادية بقرعة الما مدخلاها لعيدة..كانت لابسة جلابيتها وواجدة...رجعات بزربة دارت شوية من مورد شفايف ليكيد غير قطيرة فصبعها دوزاتها على شفايفها...وشوية لحناكها....مطمطاتهم مزيان ودازتدارت گورميط الي خذا ليها لول فيه حجيرات ملونين وسنسلة فيها قليب...رشات بارفانها ودازت هزات صويكها دارت فيه تيليفونها وخرجات لعندهم...
شوية وهو يدخل هو نيت معاه حسام...حنحن تا سمع سعيدة قالت ليه دخل عاد دخل اما بشار مشا ديريكت لبيت هز اش بغا يهز وخرج لعندهم اول وحدة مشات عينيه ليها هي حبيبة طلعها وهبطها صغر عينيه فحناكها بانو ليه حمرين ماشي فطبيعتهم الي مولف حساب ليه بيها شي حاجة...
بشار : هانيا نتي ؟!..
حبيبة"شيرت لراسها" : انا ؟..هانيا علاش...
بشار"حرك راسو مثقل وعينيه باقين عليها قال" : يلاه...
ناضت سعيدة معاونة عيدة وحسام تاهو خرجو وتبعتهم حبيبة الي بزربة دازت لبست سبادري ديالها...لاحت عليها جاكيط وخرجات وراهم عاد هو...تقادت عيدة فبلاصتها...وحبيبة توخرات حتى جا بشار دور ايديه على كتفها ومشات هي وياه حتى لجيهة فين غايركب حل ليها الباب الي ورا بلاصتو حتى ركبات عاد سعيدة الوسط عاد حسام فجنب لاخور....
تسناو بشار حتى كمل الكارو الي كان باديه هاد ضار وركب بلاصتو قاد سانتيغ ديالو وديمارا طوموبيل وهو ينطق حسام...
حسام : بلا مادير المابس انا نعت ليك....
سعيدة : ولييتي حافض ليا مراكش كثر من دواركم...
حسام : اوكييييه....
كل واحد فيهم فين مدهي بالهضرة حسام مع عيدة مرة مع مو تا شدو جماعة بثلاثة مرة تشارك معاهم حبيبة مرة تضحك وصوت ضحكتها وحدو الي كيوصل لبشار لوذنيه واخا مركز مع طريق...كايحس براسو باغي يتنغم بضحكتها..كايحس براسو موحشها وغادي يتوحشها اكثر...هبط ايدو وداروخشاها وراه الخوية الي بينو وبين حبيبة حتى بانت ليها...طرطق ليها صباعو تا شافت فيها ومدات ليه ايدها...ديك الفسحة قدرات تخليه يشد فايدها ويزير عليها... وسعات عينيها وكحازت اكثر لعندو باش تخبي...شافت فسعيدة وضحكات زعما ماكاين والو...لمسات صباعو على صباعها بورشوها وتزنگت اكثر....نزل عينو لواحد من صبعانها بان ليه حمرررر فيه بقايا مورد الخدود الي دارت كايبان فحال دايرة دوا الحمر ههه....عض على شفايفو مزياان حيث عرفها دارتو لحناكها...
طريق كلها وهو شاد ليها فايدها ماساخيش يطلقها...واخا عرفها دارت شي حاجة لحناكها...جاب الله ماكثرتش في فمها...بقى يلعب بصبيعات ايدها طول طريق...حتى ضارت سعيدة بانت ليها جلستها ماهياش ومقربة بزاف لورا بشار عرفاتو شاد ليها ايدها...ضارت لهيه كاتضحك...ولات كاتشوف شي حركات من بشار فشي شكل متغيرين فيه وفطبعو...الحب تمكن منو وبدل فيه او بين فيه شحاال من جانب واخا هاد الحركات غراب وفشي شكل....ضارت عند حسام شدات معاه جماعة باش ماتحرجش حبيبة كثر ماهي محرجة حيث حلف مايطلق ليها ديك الايد ههه....
وصلو لواحد ريسطو جا خارج مراكشي بشويا فواحد الوازيس...خرج هو وحسام قبل حتى ريزيرفا فيه ووصاهم حسام على انهم عائلة...كانت بلاصة فيها جليسات فخيمة..هادشي اقتراحو حسام ل بشار وعطاه vibes كيفاش غايكونو واقتارح عليه عدة اماكن مشا ليهم حسام ويكونو مناسبين حتى لبشار كونه شخص ماكيبغيش الصداعات والبلايص الي فيهم لانيماسيون باش تاهو يجلس بخاطرو حسن مايحرمها عليهم لا طارت ليه نقشة بدون استئذان...دخلو مع البيست مسااافة حتى بانو ليهم ضواو شاعلين و على طول واحد بيست مؤدي لدوك الخيم كاين فوانيس شاعلين...وجنبهم عواد وافين وسط منهم العافية شاعلة عاطية فايب ديال صحراء...صونا لحسام تيليفونو كان واحد من المكلفين الي وصاوه يقاد ليهم بلاصة ليهم فاحدى الخيمات...بلغو بلي وصلو...
سعيدة : هادشي شتو زين هههه...
حبيبة"كاتشوف كايعجبها هادشي ديجا كانت كاتجي ليه مع دارهم فاحدى الويكاندات الي كيخرجو فيها ك عائلة...وقف طوموبيل بعيد شوية ونزلو كاملين...عيدة شدات فحسام وحبيبة وسعيدة شدو ف بشار...حتى وصلو لخيمة فين مقادين ليهم بلاصة كأنهم ف اماكن الرحَّل...هاد الفايب رتاح فيه هو نيت واخا كايسمعو الموسيقى بعيدة شوي لكن جو طبييعي مافيهش الهرج بزاااف...قادو لعيدة بلاصتها تا جلسات...وطبعا كل واحد شد بلاصتو...حسام من هنا وسعيدة من هنا وعيدة وسطهم...وحبيبة مقابلة معاهم حتى جلس حداها بشار الي كان جنب...تسند لور ودار ايديه ورا حبيبة...مع الاضاءة كانت بالعافية وضواو كانو بعاد شوية...ماردوش البال لادو الي نزلات مع ضهرها وضارت على جنبها كاتدوز عليه بحركة بطييييئة خلاتها تعوج...حتى زيرها من تم...
بشار : شنو داكشي ف صبعك تم ؟!..
حبيبة : هاا..."هزت صبعها تشوف وهي تخرج عينيها وضارت عندو"..و. والو هي واحد مرطب كايطلق لون...
بشار"كايشووووف فيها عاقد غوباشتو...خلاها دور عينيها هنا وهنا...تاحاجة ماتخفى عليه..بقى شادها من جنبها ويضغط بصبعو عليه حتى كاتقفز وتبغي تبعد...عاض على فمو وعينيه غا عليها...بغات تهرب تغوت تعيط لسعيدة ماكاين مهرب...ما فكها غا حسام الي قال"
حسام : ها هاشم جاااا...ها باباتيييييي الي ماتحلى ليا الخرجة بلا بيييييه....
سعيدة : والله يمسخك...
وقف هاشم طوموبيل بعيييد...ونزل تابع المكلف تا وراه فين جالسين...وقف عليهم داير ايديه وراه فيهم كونطاكت سيارة...هز واحد الايد وشير ليهم بسلام الجماعة...
هاشم : واحد السلام عليكم يا اهل الرحامنة الاحرار...من طرف تال طرف..."شاف فحبيبة"...تانتي راك رحمانية من البو لجد...
عيدة : اوكيه راها من تريكتي (بات حبيبة ولد عم عيدة)...
حبيبة : ههههه...اهلان عمو هاشم...
حسام"جاتو ضحكة على ديك عمو لهاشم ههه..دور وجهو لهيه كاينش ويشوف حسن مايخرا ليهم تم واش جا مايسكتو"...
سعيدة : زيد جلس زيييد...
حيد صباطو وتلاح ريح حدا سعيدة هو كاااع حدا مرتو سعيدة الي قاليك توحشها وخلات عليه المكان خاوي...
بشار"ضار تا شعل الكارو نتر منو ورجع شاف فيه" : البنات ؟!..
هاشم : قارين صباح بكري لا تعطلو مايبغيوش يفيقو ليا...وعندهم امتحان مايصيبوش يجيو...
سعيدة : وصيتي عليهم كريمة ؟!..
هاشم : بناتك گادين براسهم...وصيت عليهم زكريا...
حسام"حط ايدو على قلبه" : هاااح زيكو خليتو يتيم تم...
حبيبة : علاش ماجبتيه معاك ضريف بزاف...
حسام : تاهو عندو امتحان مايصيبش يجي والى تعطل فالنعاس واخا يكون الوطني لا ناض ليك من بلاصتو...تاندي ليه حقو فخبيز ...
هاشم"شاف فمو" : وااا عيدة...وتي هانية مهنية ؟!..
عيدة : نحمدوه...كي خليتي دوك ناس لهيه ؟!..خوتك وعيالاتهم...
هاشم : كلهم لباس وكلهم يسولو عليك خليتي بلاصتك تم گداااش...(ضار عند حسام نغزو)..اش كاين لعشا نتا ؟!..
حسام : واحد الجدي ابا هاشم حق ربي لا منغم...
هاشم : منسم وداكشي ؟!..
حسام : اوكيه...داروه يطيب گبل العاصر فالحفرة...اشوية ويمغطوه ليك وتمغط عليه...
هاشم"حك كرشو" : نوغشتييني...
الجو كان زويييين دااافي فالخيمة...حطو ليهم صينيات اتاي معمر بالطريقة البلدية...وحطو ليهم مقبلات بينما يوجد ليهم العشا...ماكانو تاهما باغين لا انيمتسبون لا صداع...الجو مهااادن وطبيعة الي كاتسمع واخا اصوات الموسيقى كاتسمع بعيدة شوي...عيدة لقات راحة نفسها ونسااات شوية خاطرها تفوج...مرة مرة كاتقاد ليها سعيدة رجلها على حساب الحرقة...كان باقي شوي الحال كل وفين تكا ولا تسند على شي مخدة...بشار متكية حبيبة على دراعو كاتوريه شي تصاور فتيليفونها فالبلاصة هادي نيت فاش كانت جات...سعيدة شادة الحديث مع هاشم لهيه...بقى حسام هو وعيدة...تكا وحط راسو على فخدها...
حسام : كي جاك هادشي...
عيدة : والله ماكرهت اوليدي نتكى غا هنا ونعس...
حسام : رتاحيتي ههههه
عيدة : على رگبتي (رقبتي) لا نسيت جدك ومايجي منو..
تفرشخ حسام بالضحك...كايحس بيها قالتها من نيتها...شحال وهما جالسين كل ومعامن شاد جماعتو...حتى جابو ليهم العشا الي كان شبه فخم وعجب عيدة بزااف...تسالا العشا وجلسو شوية تا شبعو وناضو كاملين..حسام ركب مع هاشم حيث غايرجع معاه لدوار وعيدة وسعيدة ركبو مع بشار...كل صد فحالو...وصلو لبرطما دخلات عيدة حيدات جلابتها ومشات لدوش معاوناها سعيدة تا دخلت توضات وخرجات حيث كاتبغي دير قيام الليل وتنعس على وضوء...جلسات جنب سرير عطاتها سعيدة تيليفونها الي شعلااتو وهي تكمش عينها...
سعيدة : معيطة عليك مليكة شي خمس مرات الالة...
عيدة : تعيط تاتفرگع نعل والديها...
سعيدة : مالها ؟!...
ماجاوبتهاش عيدة حدها حركت راسها وضارت كاتسبح...سعيدة تنهدات حيث فهمت بلي ساقت ليها الخبار عند بشار ومابغاتهاش يمكن تمشي عندو وضارت فيها واصلا عيدة كان خاطرها مريض مامستحملاش هضرة بنتها الجارحة والگارحة...حطات تيليفون فوق الكوافوز وخرجات...فطريقها لقات حبيبة واقفة تاهي مبدلة لابسة بينوار فوق بيجامتها ومزيرة عليه بايدها لا يتحل ودايرة تيليفون فوذنيها كاتسمع اوديو ماماها...مكمشة حجبانها وباين عليها القلق...سمعات وهي تحط تيليفون وتنهدات...
سعيدة : مالك...
حبيبة"شافت فيها" : هي سولت ماما على غذا بايجيو..گالت ليا حتى نشوف اه باباك جا عيان..بيت نهضر معاه گالت ليا نعس بكري...
سعيدة : واهيلي..اش عياه ؟!..
حبيبة : ماعرفتش..كايقلقني بزاف الى عيا..مرضو صعيب شوية وديجا مهدد بجلطة قلبية تجيه الى تقلق..."حكت جبينها بقلق" تت...قلقني...
سعيدة : لواه لواه مايكون هي الخير...نعلي شيطان وسير قراي شوية القرآن ونعسي...
حركات راسها وقالت ليها تبات فراحة الله وضارت دخلات البيت...سداتو ويلاه بغات تمشي لبلاصتها حتى شدها من ايدها ودورها عندو...شد ليها وجهها بين ايديه وقرب لعندها حتى تحنى وحط فمو على فمها...بدون اي كلام شرع فتقبييلها بحب خلاها تحط ايدها على كرشو...بقاو يتباوسو حتى لقات راسها محتاجة لاوكسجين وبعدات راسها وشافت فيه...
حبيبة"بصوت حنين ومنخفض باقي فيها نهجة ديال بوسان" : مامرتاحاش...
بشار"فمو عند فمها نطق بفحيح" : مالك...
حبيبة"نزلت عينيها" : بابا عيان شوية..برزطني ماعرفتش مالو..
بشار : نديك تشوفيه ؟!..
حبيبة"حركت راسها ب لا" : گالت لي ماما ناعس دابا...وگالت ليا ماديريش بالك هي عيا تمارة...ولكن بابا مريض الى عيا ممكن بزاف تجي كخيز كاغدياك "سكتت شوي وشافت فيه" كنت عاودتها ليك شحاال هادي...
دوز بايدو على شعرها حتى لورا راسها وقربها حطو ليها على كرشو وحاوطها بايديه تا دورات ايديها ورا ضهرو معنقاه...تنهدات وغمضات عينيها...بقى شحاال وهو معنقها حتى داها لسرير وجلسها تخشات بلاصتها محيدة بينوارها...حيد هو تيشرت وتخشا حداها...
غسلات الماعن ورتباتهم..طفات ضو وخرجات من الكوزينة...طلعات ديريكت لفوق كان كلشي داخل لبيوتهم الا توريا الي دخلات غا لبيت عيدة مكانش فيها مايطلع حيث عيات ووصاتها مليكة تبات فيه لا تدخل ليه مباركة دير فيه مابغات...حيث بزاف المرات كاتبات فيه هي وعيدة...دخلات لبيت شادة تحت كرشها لقاتو مدد شاد تيليفونو يتفرج في فيديوات...جلسات قدام الكوافوز بدات تذهن فايدها بكريم...شافت فيه من مراية...
ربيعة : علاش ماگلتيش لينا را ولد خوك الي هرس ليك داك صبع ؟..علاش سكتي ليه ؟!..
سيحمد : گلناها ليك لا تندميناش...
ربيعة : تا عقت بيك عاد گلتيها...ديك ساعة ديكلاري بيه المسخوط الي گالها ليه...سيبة هنا ينوض يهرس عمو ؟..اش فيها لا ضربتي اشراق راه تاهي بنت خوك...تصابك سكوتي وتصبر على حقك...
سيحمد : ممم...
ربيعة : شلا ضصارة فيه...ساكتين ليه على شلا وكون دعيتيه نيت يكمل الباقي بالمسخوط...
سيحمد : ليوم كنت عند نسيبو...
ربيعة : ولاش مشيتي...
سيحمد : گلنا نشوفو فين لاحگ عما شيكات..ساعاك گاليك تفاهم هو وبا عليهم...ماصبت منين ندوز ليه سكتني...كان باقي واحد شيك وليني خلصو...
ربيعة : و تانت را فكو داكشي...ماشي راني سمعت وااقيلة ولد خوك الي شد من عندو دوك شيكات ؟!..
سيحمد : هاناري فين سقتي لخبار لهادشي ؟!..
ربيعة : كون راه المبعككة زيداتو يخلصهم وعطاتو راسها...تريكة من اولها داخلين على طمع واخا لباس عليهم...
سيحمد : اكاااوا...
ربيعة"بالفقصة" : كون بغيتي تعبر علمو را تكرفص ليه على بنتو...
سيحمد : كيفاش ؟!..
ربيعة : ماشي را صبح مكرفص عليها نيت ؟!..
سيحمد"عينيه ووذنيه قرقشو بالصدمة" : تي شكون يا..
ربيعة : ولد خوك نور الدين المسخوط...واخا ضرگو عليا حضيتهم وشفت كلشي...
سيحمد"تگعد" : تي كيفاش تكرفص عليها...وعلاش هادشي تال دروك عاد گلتيه يا بنت لحرام...
ربيعة : سيمانة وهي فيها سخانة...خباو عليا خافو نوصلها لناس...سنين وانا معاهم حليت عيني عليكم وخباو عليا حيث ماتاقوش فيا...(حطات الكريم)...
ناضت شافت فيه وقالت ليه "تسنى"...خرجات من البيت والغدايد تقت.ل فيها من جيهة بشار حيث هرس سيحمد عمو وماهضرش معاه...طلات هنا وهنا ودخلات لبيت توريا بان ليها يوسف ناعس مشات بشويا لباب الوسطاني حلاتو وجرت المجر بقات تقلب تا هزاتو...خرجات من البيت كاتسلت بزربة متأكدة ان توريا ماغاديش تجي ديك ساعة...دخلات لبيت كاتنهج...وهي تحطو ليه مسرح هكاااك ليزار كلو مجلخ بالد.م ديال حبيبة فاش وقع ليها نزيف فليلة دخلة...وسع عينيه على جهد جهدهم فداكشي الي كايشوف....
سرحات ليه داك ليزار هكاك باقي كيف تهز من داك الصباح ديال ليلة دخلة بين "حبيبة" و "بشار"...عينيه خرجو من داك المنظر وعقلو تصعق وهو كايستوعب شنو قالت ليه ربيعة...الي كانت واقفة وكاتنهج بالغدايد لانه من الي عرفت ان بشار الي هرس ل سيحمد صبعه وهي مغددة عليه والي غددها ان سيحمد مادار ليه والو خبا عليهم !!...
سيحمد : يالاطيف يالاطيييف...هذا اش دار ليها...
ربيعة : تكرفص عليها...دخل عليها حما.ر ماشي بنادم...
سيحمد"باقي مصدوم من داك ليزار حتى باش يحط عليه ايدو كايقرب ليه ويقفز" : هذا نا.حرها شتو...
ربيعة : وشتي هادشي وراه خباوه عليا (جمعت ليزار قدام عينيه وكاتهضر)...كايخليوني تانمشي ويعيطو لسويعيدة ويتجمعو يسدو عليهم داك بيت نعاس هاو ويهضرو...وانا وكريمة يصيفطونا نشقاو...
سيحمد : واش عگبو دارو ؟..حگلها ديك ليام تبان صفرة تگولي راكباها المو.ت...
ربيعة"دارت ايديها على جنابها وحركت راسها" : سيمانة وهي مخشية فالبيت تدي ليها سعيدة فطورها وغداها وعشاها...تردهم هكاك سيمانة بلا ماكلة...
سيحمد : ودارهم ما عاقوش ؟..
ربيعة : لجمو ليهم الفام بالهضرة ولاكون (واقيلة ) لا زيدوها هي تهضر عماهم ضمصو القضية بلي مريضة وصافي...مالهم بغاو يقلبوها من تحت ؟!..
سيحمد : نعقل داك صباح هو فين زاد مابقى رجع على شحاال...
ربيعة : علمو المراكشي ومها بلي جاتو شي خدمة والمراكشي را طمع عامي ليه العينين دغاك ثيقهم...
سيحمد"بقى يشوف فيها ويحك فلحيتو بصباعو كايستوعب هضرتها...ضحك باستهزاء " : ههههه..باينة لعما...علاه 110 المليون ساهلة...يديرها ويفوتها...
ربيعة : حنا مالينا دروك فالمراكشي..لينا فالمخسوط الي مابغيتي ديكلاري بيه خايف من الصداع عما جدك ؟!..
سيحمد : ماخايف من والو...دي داكشي عليا ديه...ياعوذ بالله على فضيحة...
بقات واقفة كاتشوف فيه وتنهج...حتى حركت راسها وهي تخرج من البيت طلات هنا وهنا وسمعات حس الصهيييييط ماكاينش الي مگعد فهاد ساعة...بزربة تسلتت ل بيت توريا حطات ليزار بزربة بلاصتو يلاه بغات تسدو وهي تسمع صوت يوسف كايهضر وكايقول "بشااار"....
يوسف : بشااار..خويا بشار وحشتك...
وسعات عينيها على جهدهم...طارت ونزلت تا حست بالحريق فكرشها لتحت...وقفات جامدة ماقدرات تحرك...بقات تسمع اش كيقول ساعاك لقاتو غير كايحلم...بقاات تصرط فريقها وتنفس غا باش تقدر تمشي حيث غا سمعت سمية فشلو ليها رجلين...سدات باب الماريو وخرجات حاطة ايدها تحت كرشها كاتحس بيها كادور...دخلات عند سيحمد وجهها صفر...جلسات جنب ناموسي عاطياه بالضهر وكبات ليها كاس الما تا شربات وهي حاطة ايدها على قلبها...
سيحمد : امالك ؟!..
ربيعة : غا سكت لگيت يوسف يحلم قت.لني غا بالخلعة...حساب ليا غا يهضر عما خوه يخوي ليه ركابي...
سيحمد : ياودي يا ودي...
حط راسو عالمخدة ويضحك عليها حيث عاد كانت تحلف على بشار...جر عليه الغطا وضار عاطيها بالضهر غمض عينيه...تخشات تاهي ففراشها وعطاتو بالضهر...غا هي طفات ضو عند راسها وهو يحل عينيه فداك الظلام كايفكر ويدوز لسانو على سنانو...
"الساعة" السادسة صباحا...
دورات عينيها ناحيته..داير دراعو على عينيه ونااعس...هي ضرباتها الفيقة او نقولو مانعساتش كاع...تسنات بسوايع باش توصل لوقيتة الي كايفيق فيها باباها باش تصوني ليه...وبالفعل كيف حسات بيه يكون صلى الفجر صونات ليه بعد رنات وهي بقلق جاوبها هو صدق مخلوع...
م.حفيظ : حبيبة !!...
حبيبة"حطات ايدها على قلبها" : بابا !!..كيف بقيتي ؟..
م.حفيظ"غمض عينيه وتنهد عرف وصلات ليها ناديا راه جا عيان" : ابابا بيييخير الحمد لله..اش مفيقك بكري...
حبيبة : تسنيت حتى وصلات وقيتة الي تاتكون فايق ومصلي وصونيت عليك...
م.حفيظ : مانعستيش ياك...
حبيبة"نزلت عينيها بحزن"...
م.حفيظ : اه لا شديت ديك ناديا بنعلقها ف اعگمي (دخلة ديال الباب بالمراكشية)..
حبيبة : ههه حرام عليك..هي سولت معاش باتجيو وشنو نوجد وهي گالت ليا ماتوجدي والو تاتشوف حيث جيتي عيان...والى ماگالتش ليا وعرفت بلي عيان وماگلتيها نتا بنتقلق منك...
م.حفيظ : واش تزوجتي باش تبقاي لاصقة فيا اديك القشة..ياك درتي دارك خليني نتوالا بمرتي...
حبيبة : هههه ياااك ورا فيك لاصقة بت نبت...
م.حفيظ : ايوى زاااك...سيري تنعسي شوية اه نعرفك ماتغمض ليك عين تانحل عيني انا...
حبيبة : ياك عارف هههه...نتا دابا بيخير ياك ياك ؟!..
م.حفيظ"حط ايدو على صدرو" : حدايا ناديا...ولادي بيخير القشة هي نعطس تعيط ليا...اش بغيت من هاد دنيا ؟!..بييخير هي شوية التعب ديال الخدمة وصافي...
حبيبة : ايوى خوذ ليك كونجي وسير رتاح مع راسك...عام ابابا ماجلستي فيه جلستي هي سيمانة فين تزوجت صافي...
م.حفيظ"جمع حجبانو مفكر الايام الي تزوجات فيهم ورجعت ليه هضرة سيحمد...تنهد وحرك راسو" : دابا نشوف ابابا دابا نشوف..سيري رتاحي ليك مع راسك..تانشوفك مع الغذا ان شاء الله...
قطعات معاه وبالها مامرتاحش من جيهتو حتى تشوفو وتعنقو عاد ترتاح...حطات تيليفون تخشات بلاصتها وعطات بالضهر...حتى حسات بيه تحرك وحط ايدو على كرشها ملاصق ضهرها معاه...خشا وجهو فعنقها وباسها بوسة تاتسمعات فارجاء الغرفة...
بشار"ببحة خشنة" : هانيا دابا ؟!..
حبيبة"تبسمات مغمضة عينيها وتعوج فعنقها حيث كيهضر فيه ويبوس" : هانيا هانيا...
بقا يبوس فيها ويداعب فيها وهي كاتنوغش ليه تما...المكالمة دازت على وذنيه وكان عارفها مقلقة وماتهنى تاتسمع صوت باباها...
قبلة تابعة لوخرا...سخن الحال عليهم فداك صباح كان موحشها بزاااف واخا يعاشرها تايعيا ماكيقنعش منها...حطات ايدها على صدرو كاتنهج تعرات كلها ...شاف فيها گارن حجبانو...
بشار : اش كاين ؟؟...
حبيبة"بصوت منخفض" : ماشربتش دوا...
بشار : وهادشي يبقى ديما ؟...
حبيبة"نزلت عينيها" : حتى انا مابيتش نولفو..."تنهدات" غادي نرجع عندها ونشوف اشنو ندير...
بشار : كاتقصحي بجهد ؟!..
حبيبة"حركت راسها ونطقات مخفضة صوتها" : لا...
بشار : وشنو المشكيل الي مازال مخليك تشربيه ؟!..علاش عطاتو ليك نهار لول ؟!..
حبيبة : هي باش مانتستريساش فالمرة اللولة ونحيد الخوف..
بشار : وشنو واقع دابا...
حبيبة : كانحس براسي معولة عليه...خاصني نحاول بلا بيه...تانگول من بعد حتى نرجع عندها..."شافت فيه بترجي" خليني هي نشربو تانرجع عندها...
بقى كايشوف فيها مطول...نزلات عينيها بحزن حيث حتى هي مابغاش تبقى معلوة على الدوا...وهو فينما كايشوفها كاتشربو كايحاول عليها اما جهدو كثير وكل مرة خاصو يفكر انها غاتخلع...ديما خاصو يحاول...حك شنايفو بسنانو مدة وهو كايشوف فيها..مايمكنش ليه يحبس حيث بداو وبغاو يدخلو فصح ماصلاحش ليه يحبس...حرك راسو وتلاح بلاصتو قايل ليها " تحركي قضي غراض"..هزات الغطا غطات صدرها وضارت ناحية المجر جبدات الدوا رماتو في فمها وشربات عليه الما ورجعات تكات بلاصتها...قربات حداه وتلاقا لحم مع اللحم وربي يرحم...رجعها لعندها حطها فوق كرشو وهبط ليها راسها لعند وجهو وشرع فتقبيلها بانواع خاص بيه من القبل الي خلاو فمها منفوخ...اتسوقش لدوك الناس الي برا اصلا كايفيقو بكرييي...
سعيدة"وقفات عند عيدة" : يلاه لالة نديك لدوش...
عيدة"عطاتها ايدها وناضت" : الله...ممم اميمتي...اركابي مشاو ليا بنيتي ماتليت نگد نخطوي...
سعيدة : ونتي غا باركة كون تمشاي ليك شوية يتسرح ليك د.م..
عيدة : تي مالي باقي ديال نمشي..راني نتسنى فنوبتي عند ربي..
سعيدة : الله يطول عمرك...
عيدة : لا فاق بشار علميه عشية يرجعني ل دوار...براكة هذا جهد نمشي لخيمتي باغيني يجيو ناس يسلمو فيا وماصابونيش..
سعيدة : وتاديري صواب عما دار حبيبة هاو نمشيو كاملين..تانا خليت بناتي...
دازو لدوش ديال البيت الي كاتنعس فيه عيدة...في حيث الجو سخن فالبيت لاخور...عاطيها ايدو فين عاضة حيث لحد ساعة باقي كايلقاها مزيرة وكايخص فين تعض...تخلطت ليها الدعوة بين المتعة والالم اللذيذ...عروقاتها تكب وتكبكب اما هو خلاص القطاري ديال العرق كايتلاقاو ليه عند منخرو...كايخليها تحس براسها عايشة علاقة فالفراش خيالية...رجليها مقلشهم فوق كتافو والعذاااب خدام عندها...طلقات ليه من ايدو وهزات راسها غمضااات عبنيها عاضة على شفايفها حتى حبس وحط ايدي مسند عليه كاينهج فوق منها وهي كذلك...نشوتهم وصلات للاوج...احاسيس تخالطت بين الحب والمتعة بين العشق والاشتياق...نزل راسو لعنقها ودوز بلسانو من راس عنقها مشا بيه خط واحد حتى لتحت كرشها خلاها تهزات تال عندو ورجعت لبلاصتها...ضار لبلاصتو وجابها فوق منها باقي انفاسها متسارعة ومخربقة...
جمع ليها شعرها الي تشعكك وطلع للسما...قادو ليها مزياان وبقا كايدوز على ضهرها بحب وحنية..حتى تنفسو بزوج وناض لبس عليه نوضها معاه تا لبسات حتى هي بزربة يلاه توگضات تاني تولول ههههه...جمعات شعرها بقراصة وقادت حالتها...
حبيبة"حناكها مزنگين وحشمانة تخرج..وقفات عند الباب"..
بشار"كايسد فسيور سروال هز عينيه فيها" : مالك ؟!..
حبيبة"عضات صبعها وشافت فيه" : حشمت نخرج...
بشار"غوبش" : ؟؟..
حبيبة"صرطت ريقها" : اش بيگولو دابا ؟!..
بشار"خرج عينيه ونطق بجهد تا قفزت" : كيفاش ؟!..
حبيبة"شافتو خرج عينيه وهي تحل الباب بلهلا يحزقو ليها...لقات سعيدة فالكوزينة كاتعمر فاتاي والقهوة مردودة...
حبيبة : صباح الخير خالتو...
سعبدة : صباح الورد ابنتي..معاش قارية...
حبيبة : ليوم ماعندي والو...اشنو خاص يخرج يتقداه ؟!..
سعيدة : داكشي الي جبتي البارح هاهو سايرة نسخن فيه والملوي الي وريتيني تاهو..ماخاص والي لالة ماتبغيش خبز الزنقة...لا بغيتيه نتي علميه يتقداه..
حبيبة : تانا ماتيعجبنيش..صافي بلا مايخرج...انا نمشي نتوضى ونصلي ونجي عندك صافي...
بقات حبيبة واقفة..طلعات كمايم بيجامتها...وتسندات على بوطاجي بتلفة كاتشوف فسعيدة وتفرنس كي الهبيلة...حتى ضارت سعيدة وشافت فيها عاد ردات البال...
سعيدة : ديك البيجامة هوكاك تلبس ؟!..
حبيبة"وقفات ونزلت عينيها كاتشوف بيجامتها..وسعات عينيها..البيجامة لبستها مقلوبة..سعيدة تسندت على بوطاجي ربعت ايديها ودارت ايد على فمها...
سعيدة : ههههه سيري گلبيها سيري المگلوبة...
حبيبة : لقيت راسي فايقة معطلة وبالدعقة لبستها مقلوبة...هاني مشيت نبدلها..."خرجات من الكوزينة كاطرش فحناكها هههه" ويلي ويلي ويييلي... اهئ..اويلي على فضيحتييي...
غاديا وتولول دخلات البيت وماداتهاش فيه جاي من بالكون كان كايكمي...تا خرجات فيه كانت غاطيح كون ماشدها...
بشار : ششش مالنا ؟!..
حبيبة : همم ؟..(بقات ترمش فيه شحاال حتى نزلت راسها كاتوربه) قلبت بيجامتي...علاش ماگلتيهاش ليا ويلي خارجة بيها مقلوبة...
بشار : فين المشكيل ؟!..
حبيبة : يااااك...
بشار : تحركي بدليها وهني الوقت...(خلاها وتم غادي وصل عند الباب)..ديري شي حاجة لداكشي الي فعنگك (عنقك)...
وخرج عااادي ماخاصو حتى خير وهي خلاها جامدة فبلاصتها...
"الرحامنة"...
حطات كريمة صينية ديال اتاي فالطابلة..وجلسات جنب رضوان الي كان شاد الحديث مع سيحمد وتوريا...اما هاشم خرج بكري لواحد دوار بعيد شويا فيه شي مشاكيل تم...
رضوان : ودابا اش گاليك كاين...
توريا"شافت ناحية مباركة فالكوزينة ورجعات شافت فيه" : غذا نديه لسبيتار على حساب الخبرة..." بفقصة كملات"..الكفة مايلة لمسخوط يگطعو عليا...
سيحمد : وراقو صحاح ؟!..
توريا"حركت راسها وزمت فمها بفقصة"...
رضوان : واش المعمول دروك...
توريا : ديار ديار الله...سد عليا دابا الغاشي جاي ( زعما جايا مباركة برانية)...
خرجات مباركة من كوزينة هازة طبسيل فيه تستيفة ديال بطبوط مريح بالزيت زيتون...شي باقي ناعس وشي تيسر لخدمتو...شوية تحل الباب وخرج عبد القادر كايحنحن ويشكر الله..مشات عندو مباركة بزربة كلها كاتنخض خلاتهم برمشو حيث غليضة وخفيفة هههه...رمى السلام وجلس دايرين ليه بلاصتو...قادت ليه سلهامو على كتافو وكل حركة كاديرها ليه باهتمام...جلسات حداه وهي تهز البراد بغات تكب نطقات ربيعة..
ربيعة : ختي توريا الي تاتكب لينا بلاصة لالة ولا سعيدة...
مباركة : بحال بحال اخويتي...بسم الله...
كبات البراد بكل برود خلات ربيعة خرجت عينيها وتوريا عقدات حجبانها فيها وضربتها بتخنزيرة...لاخرين بقاو شي يشوف فشي...الحاج حدو نطق وقال...
ع.القادر : ماكاين باس...كبي خلينا نتيسرو لكسيبتنا...
هزات البراد تالفوووووق وكبات فالكاس بالخااااطر بواحد طريقة ثقييييييلة دارت ليهم الفقصة وليني الكبة كانت همااااوية دارت ليهم اتاي بالرزة خلات الكيسان مكشكشيييين وهي الي معمرة اتاي...ناضت كريمة فرقات عليهم وحطات لتوريا كاسها...
توريا : لا كبي ليا قهة كحلة...مانبغيش اتاي...
مباركة"ماداتها فيها كاع ضارت عطات لكاس لراجلها وطبطبات ليه على كتفو وتحنات باستو ليه تا خرجات ربيعة عينيها وهي تشرگ ليها"...
سيحمد"هاز كاسو ويشوف فيها كاتحكحب وتشهق" : ذنوووب ذنوووب كاتصرف ذنوووب...
ناضت كريمة كاضرب ليها على ضهرها ولاخرين حبسو كايشوفو فيها...بقات تكحب تا بغات تسخف...مارجعت روح تا كانت بغات تخرج...على شحال عاد رجعات تكمل فطورها معاهم لقات رجال دغيا دخلو فطبسيل نص الكثير فالمطلوع ضربوه غا هما...خرج عبد القادر لكاميو كايتسنى ف سيحمد يخرج باش يمشيو لواحد سوق...سيحمد خرج من طواليط جبد كلينيكس من جيبو كايمسح فايديه...بانت ليه توريا جالسة وحدها ومربعة ايديها كاتشوف فنقطة بعييييدة ومهمومة....قرب لعندها كايشوف هنا وهنا...
سيحمد. : اش گاليك القرافلي ؟!..
توريا"هزت فيه عينيها ورجعات سافت فين كاتشوف" : خليك خارج سوق كي كنتي اسيحمد...
سيحمد : بالله ماخارج سوق..كنت باغي ندخل بخيط بيض بينك وبين ولدك..بغيت تحدو هادشي بيناتكم...
توريا"ضحكت باستهزاء" : باغي تحد...هادشي بيناتنا عمرو يتحد..حلفت بحلوفي من جيهتو "شافت فيه ونطقات بغيض كاضرب جيهة قلبها" ماحد هذا حي وماحد نورالدين ماناض من القبر نبقى غاضبة عليه تايديني ربي...عذبني من نهار تزاد وسخط تابعو...من نهار تزاد وانا مريضة وكمل عليا..."دورات عينيها كاتشوف واش جايا مباركة ورجعات شافت فيه"..سير اسيحمد سيير..من بعد خيري انا وخوتي عليك دورتي عليا وجهك...
سيحمد"ضار ناحية برا ورجع شاف فيها ومقرب تاتحنى لعندها ضرب رقبتو لور" : كنت اتوريا كااااانت...حقك فرقبتي اختي خيركم مانساه...
ماجاوباتوش...رجعات لسهوتها حيث عارفة راسها غادي تخسر فالمحكمة لان المحامي قاليها بلي غالبا ووارد بزاف يحكمو لصالح بشار وبالتالي تم تم غادي يطلب يتكفل بخوه وهنا غادي تنهازم قدام ولدها وخبارها توصل وشوهتها بين خوتها ودوار ماتحد...
"مراكش"...
وصل وقت الظهر...غير سمعات صونيط الباب وهي تخرج من الكوزينة كاتزرررب لقات بشار خارج وقفها بايدو ولكن الي فيها مامهنيها تبعاتو حتى حل الباب الي غا بان ليها باها وهي تلاح عليه بجهد تارجع باللور كايضحك وناديا كاتحرك فراسها...بقات مخشية فيه...نفس التعنيقة كاديرها لبشار بعض المرات خلاتو كايشووووف...ماطلقاتوش بقات معنقاه سلم على بشار وهي مخشية فيه سلمات على ماماها ولاصقة فيه...ماصاب كي يدير ليها داها هكاك تال صالون عاد طلقات سلم على عيدة...جلسو مجموعين فالصالون...دخلات سعيدة سلمات عليهم وهي توقف ناديا...
ناديا : ماما اجي معايا لكوزينة شوفي داكشي...
حبيبة"شافت فباباها" : واخا بلاتي...
م.حفيظ : يا هاد البنت خرجي من باطي...(شاف. ف بشار) شد عليا مرتك اتا...
بشار"جالس مفرق رجليه وحاط ايدو على ركبتو كايشوف فيها كيفاش مخشية فباها...ماجاوبوش بقاو عينيه عليها"...
ناضت حبيبة مع ماماها حتى لكوزينة...جابت طنجرة متوسطة فيها داج باقي مامحمرش وطنجرة فيها دغميرة...وطاسة فيها داكشي باش غاتزوق دجاج...
ناديا : هذا هي شوي وبديريه يتحمر...وهاد ديسير غسليه دابا وقاديه فداك طبسيل ديال اسفي تم...يلاه يلاه براكة من الفشوش قضي واجي عنقي باباك اه هو الي ولدك ماشي انا...
حبيبة. : لاااا ههههه (تلاحت عليها عنقاتها) والله حتى توحشتك وهييي بقى بالي معاه حيث عارفة ممكن تجيه كخيز كاغدياك وخفت...
ناديا. : ممم انا باتجيني هي بيك..."طبطبات ليها على ايدها" حيدي خليني نمشي..قضي ولحقي علينا...
حبيبة : صافي..اه بلاتي شوي وونرجعو هنا بيت نهضر معاك...
خرجات من كوزينة وخلاتها كاتغسل فالديسير الي جابو...كملات داكشي وخرجات عندهم لصالون وتاني تنخششت فباها تا صلى عالنبي...
م.حفيظ. : ياه هاد لبنت ههههه...
حبيبة"زادت تنخششت فيه كاتحك نيفها عليه بحال المشة..خلات بشار غا يشوف فيها...ولاخرين يضحكو...مولاي حفيظ هز راسو وشاف ف بشار...
م.حفيظ : بنت الهم كاتنوغشي ليا الكبدة بفعايلها...
عيدة : الله يحفظها ليك..درويشة وبنت الاصل..خيط بيض وصواب..تحط عالجرح يبرا...
م.حفيظ. : هادي راها بكري...هي الي خلاتني نجرب الكبدة...جات على عگر سنيبيين..."شاف فبشار بترجي عينيه دغيا غرغرو ليه ونطق بضيم باقي هضرة سيحمد كاتاكل فيييه مااكلة".....تهلا ليا فيها ولدي اه هي لعين ليمنى باش تنشوف...بتعميها ليا بنخرج عليك نيابي...
حبيبة"غمضات عينيها وتنخششت فيه تاني"...
بشار كان كايشوف فيها غير هي مع نطق هو هز عينيه فيه...ماجاوبش ديك ساعة بقى شحاال كايتمعن فهضرتو...نزل عينيه ليها تاني شاف مطول ...
بشار"شاف فيه ونطق بهضرة حقييقية ماعندوش فيها الشك حيث يديرها " : فشردها (على قبلها) نطيح عليها الرواح الحاج....
"عاودها ب طريقة خاااترة وثقييييلة كل حرف كايعطيه حقو وكايعني اش كيقول..حس باحساس فشكل...خاطرو تقاس..جاب ليه الله غاتمشي عليه...جمع حجبانو بنظرة حااادة فيه"...
"نطيح عليها الرواااح..."...
جملة طاحت على مولاي حفيظ بالفرحة...بطبيعة الحال ماغاديش يجي لبالو شي حاجة من غير انه يحس بالاطمئنان حيث راجل كايبغي بنتو كل هاد الحب الي يخليه يحلف انه يقت.ل على قبلها...ماغايجي فبالو تا شي حاجة سيئة ولا معاكسة من غير هادشي...
عيدة : لواه لواه لهلا يلحگنا لهاد المواصل...الله يتبت الغرس اوليدي والله يجعل رضايا شتا عليكم...
ناديا : يديييرها وبايفوتها...هههههه اه ماشي كانت مريضة وعلى شوي ويخرج ليا من تيليفون هييي جاب الله العفو...
بشار"عينيه غا على حبيبة وهضرتهم كاتدخل ليه فوذنيه"...
م.حفيظ : واهو شي مرات متيبقاش يوزن ولا زاد فيه وليني من تنشوف هي على قبل حبيبة تنگول وماكاين باس هيي خايف على المدام هههه...
حبيبة"خشات وجهها فيه بخجل" : بابااا...
م.حفيظ"ضربها بمزاح" : التوت هذا ماشي بابا...
ناديا : انا المهم هي مهلي ليا فيها...مايبكيها ليا ومايخليها مخصوصة...بنتي بنت الفشوش بزاااف كثير شي من باهت ضصرها بزاااف...
م.حفيظ : اه البكرة بنتي هادي الحاجة نهاك الله...
ناديا : ماگلت والو...بنتك انا هي تسخرت...
حبيبة : ههههههه..."شدات ليه ايدو باستها وناضت من عندو لناديا تاهي عنقتها تنخششت فيها وباستها لا تقلق"...
فالاخير الجو تحول لضحك...واخا كانو بعض الجمل الي تقالت بصح وماشي بمزاح...وهاكا حتى وصل وقت الغذا تغذاو مجموعين كولها وضحك عليها والي ساكت وكايسمع راه معروف...وقفات حبيبة وسعيدة كايجمعو فطابلة وهي توقف ناديا سعيدة...
ناديا"وقفات" : اجلسي ويلي من صباح ونتي واقفة...
حبيبة : اه گلتها ليها ماباتش...
سعيدة : ياويلي علاش دنيا هانيا كي دار ولدي راه دار تا بنتي حبيبة راها حسبت بنتي...
ناديا : عاارفة الي كاين وليني عتي شوي تالراحة لراسك ويلي ملي جينا ونتي تقضي...جعدي انا نعاونها ولا تقضي هي راسها اش تادير...اجعدي عطي راحة راسك...
ولات ناضت ناديا تعاونت مع حبيبة هزات معاها داكشي حتى لكوزينة وصيفطتها تمسح طابلة...ورجعات وقفات عليها حتى غسلات الماعن بايديها مابغاتهاش تعتامد على الماشين حيث زوج كيسان ثلاثة ولا شي حاجة قليلة ديرها فيها...بغات تولفها تعتامد على راسها يعني الماشين تحتاجها لا كانت عراضة كبيرة ولا كثرو الماعن يعني لا كانو كثار...ردات الما يطيب في حين تكمل هي...
ناديا : اش بقى اتا دار فالخدمة...
حبيبة : ماعرفتش "عوجت فمها بحزن"..مابقيتش قديت نسولو تايگوليا هي باقي ماكاين والو وصاف...
ناديا : الله يصوب ليه وصافي...واشنو دابا قربات الجلسة ديال خوه ؟!..
حبيبة : اه باقي شي 12 يوم هكاك وباتكون...
ناديا : الى ربحها شنو بايدير ديك ساعات...
حبيبة : مخربق..حيث الى حكمات ليه گاليه المحامي بايخصو موافقة الام ديال يوسف باش لا بايخرجو معاه من هنا لالمانيا..وخالتي توريا ماتبيش واخا مانعرف اش...هادشي هو مبرزطو..."تنهدات" كلشي مخربق هي سكتي...
ناديا"سكتات كاتعمر فالبراد وكاتفكر واش تسولها ولا لا..فاز الفضول وسولاتها" : اش بايدير معاك نتي ماگاليك بايديك معاه ولا مازال...
حبيبة : عمري ماسولتو...
ناديا : ولا بايدي خوه ولا بايمشي راه ضروري يا دلي يديك...ونيت تحيدو من ديور الكرا وفراشات ماليهم..ديري فراش دارك ديالك وكلشي يكون ديالك...هانتي بنتي جالسة هنا شهور ونتي هنا مابقا ليك والو وتكمل عام باش سكنتي هنا...تبقاي هازة لهم لفراش لا يخسر...
حبيبة : ضروري ماغاديش نبقاو هنا...يا تكون لينا دار بوحدنا يا نمشي لهيه...حتى نسولو...
كملات ناديا توجاد اتاي..دات صينية لصالون وحبيبة بقات فالكوزينة غير دخلات ناديا هز بشار راسو مابانتش ليه جلسات ناديا وماجاتش حبيبة حتى ناض بلا استئذان ولحق عليها ل كوزينة لقاها واقفة كاتسنى فالقهوة تعمر...
حبيبة"ضارت عندو وتبسمات" : مالك...
بشار : اش كاديري تم ؟؟...
حبيبة"ضارت شافت فالقطارة" : تانوجد القهوة ليك نتا...
قرب ليها اكثر وباسها فراسها...دوز بايدو على ضهرها وطبطب عليها وخرج...المهم هو يعرف مالها تعطلات...عمرات القهوة فتيرموس ودخلات لصالون مالقاتوش...خوات ليه كاس ديالو بلا سكار...ودارتو فالبلاطو...
م.حفيظ : فين بشار...گال هاني جاي ومشا...
حبيبة : فالبالكون بغا يكمي..داكشي باش بندي ليه قهوته...هي يكمي وبايجي لهنا..مكيبغيش يديرونجيكم بدخان ديال الكارو...
م.حفيظ"حرك راسو مثقل" : الله يعفو عليه...واخا بنتي سيري...
خرجات من الصالون خلاتهم كايشوفو بابتسامة خصوصا سعيدة الي فرحات بجهد كثر منهم يمكن حيث عارفة بشار مناش داز هاد التفاصيل والاهتمام الي كاتشوف من حبيبة كايخليوها ترتاح من جيهة بشار وتفرح ليه كأنها فرحات لولدها...دازت حبيبة الكوزينة جبدات ليه قرعة الما صغيرة من ثلاجة دارتها فبلاطو مع القهوة وخرجات ديريكت لبيت...لقاتو بالفعل فالبالكون كايكمي..ولات عارفاه الى اختفى يا يكمي ولا تيليفون وغالبا الكارو حيث هو الي يخليه يغبر من وسط ناس باش مايبرزطهمش بالدخان..حطات ليه البلاطو ووقفات...
حبيبة : بيتي شي حاجة ؟؟....
بشار"حرك راسو ب لا...وشدها من ابدها قربها لعندو دار ايدو ورا راسها وقربها اكثر ولات دور فعينيها...حط صبعو على شفتها بانت ليه برات تقريبا من ديك العضة...وقلب ليها عنقها مالقى فيه والو حيث خباتهم بالفوندايشن...عاد طلع لفمها باسها فيه تا رجع راسها باللور شحال وهو ملاصق فمو مع فمها تا خنق فيها نفس طلقها كاتنهج...وضار شاف قدامو عاد جاوبها على سؤالها...
بشار : لا....
خرج لعندهم لقى حبيبة جالسة وحدها وجلس حداها دار ايديه ورا ضهرها كايدوز عليه خلا عينيها خرجو خافتو لا يدير شي حركة ماهياش....دوزو وقيتهم طمنو على عيدة ودارو صوابهم ووصل وقت المشي..توادعو معاهم ومشاو فحالهم على امل مرة اخرى يجيبو خوتها...وصلات العشية وجا هاشم هو وحسام باش يرجعو عيدة لدوار من بعد ماحست براسها ولات شوية...لبساتها سعبدة جلابتها وقادت شال ديالها...
عيدة : ولاكون هذا هو الوقت اوليدي...الله يرضي عليك...
بشار"قرب لعندها باس ليها راسها وايظها وطبطب عليها بلا مايهضر"...
عيدة : تهلا فراسك وتهلا فمرتك اولدي...تهلا فيها بزاف والله يرضي عليك...الله يرضي عليك والله يتبعك رضى فين ما مشيتي وحطيتي رجلك...الله يسهل عليك والله يبعد عليك ولاد لحرام...وينقي طريگك من شوك...الله يرزقك شرية صاليحة...والله يتاويك نتا ومرتك للخير...الله يبعد عليكم كحل الراس ويكون معاكم...الله يفرجها عليك ويفرحك فالدنيا قبل لاخرة...انا راضية عليك اولدي گبل مانمو.ت وبعد المم.ات...
سعيدة : امييين ياربي...
حسام : دعيوات ملاح من الي بغا خاطري حاااق ربي لا عطاتني منهم دعوة وحدة نهار ديتها تعبر سكار...
هاشم : نص دعوة شديتها يامس (البارح)..تصابت فرحانة....
حبيبة : هههههههه...
سعيدة : والتعاقير تا فدعاوي يا العياذو بالله...تبعتوه فيهم ياربي سلامة...
هاشم : سكتي ابنت جناتي...
عاود باس ليها ايدها...من دعوتها حس براسو تبورش...شي حاجة فيه لداخل تحركات...فرحة واطمئنان كبييير من دعواتها يمكن هادشي الي محتاج...محتاج دعوات ديال الخير الي المفروض تدعيهم معاه مو ماشي تدعي عليه وتنعلو فور ماتشوفو...قربات حبيبة لعندها باست ليها ايدها وشافت فيها عيدة شحااااال وهي كاتشوف فيها حتى خلاتهم شي يشوف فشي...
عيدة : الله يرضي عليك...وسمحي ليا بنيتي بزااااف سمحي ليا...ذنوبك هزيتهم ونبقى هازاهم تايديني ربي...سمحي ليا تعديت عليك وزيدتك لتكرفيص...غرضي كان شريف...
حبيبة"صرطت ريقها وتزيرت حيث تفكرات اشنو داز..حدرت راسها ونزلت عينيها الي تحجرو بالدموع وحركت راسها فقط بدون ماتتكلم"...
هاشم : يلاه عيدة دروك ترجعي عدو تاني...
عيدة : نشاعلاه نشاعلاه (ان شاء الله)...
تسالمت سعيدة مع بشار وحبيبة...توادعو معاهم خلا بشار حبيبة فالدار ونزل معاهم حتى لتحت...ركبو عيدة القدام وركبو بلايصهم الا بشار بقى واقف مع هاشم...
هاشم : جيب ليا غا الوثائق ديالها..قل من سيمانة يكون واجد عندك...ولكن سولها واش عندها اصلا...
بشار"حرك راسو"...
هاشم : بالنسبة لاشراق...راها ميسرة مزيان...
بشار : فالويكاند دير بحسابها هي ويوسف يجيو لعندي...
هاشم"شاف فيه شحال" : يوسف مانصحكش دابا تديه...تبدا توريا دير ليك شي عجب والمحكمة قربت ليك بزاف...وكثير شي هاد لايامات جاعرة شوية...هدن طرح من جيهة يوسف تا تقضي امورك ويكون خير...حسن كاع بلاش من اشراق...
تسالم معاه ومشاو هاشم تيسر فطريقو ورجع هو لبرطما...دخل لقاها جالسة فالصالون حاطة بوليكوبات ديالها بدات كاتراجع...وقف خاشي ايديه فجياب سروال وكايشوف فيها حتى هزات فيه راسها...
حبيبة : مشاو...
بشار"حرك راسو..نزلات عينيها ف شغلها وهو ينطق" : امتى عندك les examens...
حبيبة : بداية شهر جاي...بايخصني ندوبل البريباراسيون..مايمكنش مانجيبش مونسيون...
بشار"جمع حجبانو" : تفورصي على راسك وتمرضي تاني ؟!..نقصي جهد..ديجا دويت معاك فهاد البلان لا ؟!...
حبيبة"تنهدات" : نحاول نحاول...
بشار"سكت شحاال كايشوف فيها ويفكر...حتى نطق من جديد" : passeport ديالك شحاال باقي ليك فيه !؟..
حبيبة"هزات فيه راسها" : ها...ماعرفتش مي يمكن باقي فيه...حيث درتو فسيزيام...يعني بتكون باقي فيه شي 3 ans...علاش...
بشار : نشوف بلان يوسف...كملي قرايتك ونشوف بوسيبل ندير ليك touristiques..من بعد نگاد ليك شغلك تما تعيشي معايا لهيه..."قبل ماتهضر"..ركزي مع les examens ديالك من بعد نلحگو على هادشي...
تبسمات ليه وحركات راسها...خلاها كاتراجع مابغاش يبرزطها اما را توحشها تاني وماكرهش يمغطها فوق ديك طابلة...دخل لبيت جبد لابتوب ديالو ودخل يقضي شي خدمة واقفة ليه ديال اي.ران ريثما يقادو الامور ويتوصلو معاه لحل حيث يا يستغناو عليه يا يستغناو على هانزاده...المانيا لحد ساعة ما ردوش عليه وماعطاوش واش غايتفصل نهائيا ولا يخليو عقوبة محددة...وحتى هو مابقاش حاشاها ليهم ولا عرفهم فين جاو...
"الرحامنة"...
دخلات سيارة هاشم لفيرما والمغرب كايأذن...لقاو الكاميو ديال سيحمد واقف عرفو بلي جا هو وعبد القادر...خرجات ربيعة وكريمة ورضوان لاستقبال عيدة...نزلها حسام وتابطات دراعو تا وصلها لعندهم تحناو كاملين باسو ليها ايدها...الحفايد تاهما خرجو سلمو عليها...تمات خارجة حتى توريا...
توريا"باست ليها ايدها" : لالة كي وليتي شوية...خليتي بلاصتك گداش...
عبدة : ولباس والي باس ابنيتي..الله يرضي عليك...
دخلاتها سعيدة الي سلمو عليها تاهي وسلمات على بناتها...مشاو كاملين دخلو وتوخر هاشم مع رضوان وحسام مع زكريا....
هاشم : فين با ؟!..
رضوان : خليناه فبيت نعاس دخل ليه...
هاشم : ومالو ماخرج يشوف مي...
رضوان : الله ماعرفت...
زكريا"قرب لحسام" : تا كي دخل كشمطت عليه دخلاتو لبيت نعاس مابقى خرج...
حسام : جواج زين هذا...
زكريا : سعد مي عيدة مقزب...
يتبع...
التعليقات
لا توجد تعليقات بعد، كن أول من يعلق.