محتوى القصة
تنهدات راجعة من ذكرياات الامس... وماكان عليها الا تجبد من لمجر واحد كرييم مرطب نهاري ذهنات وجهها حسات بالكريم دغيا تشرب من وجهها...ذهنات ايديها ورشات واحد بارفان صغير بنكهة الفانيييليا ديال دار حيث فاش كتكون فيها ليغيگل كتكره تشم ريحة ديما منقية حالتها...خشات رجليها ف صندالة فيها ريش ذهبي وخرجات من البيت هبطات نيشان لتحت لقاتهم مجموعين ف قاع دار والرجال فالصالون...حاطين صينية ديال القهوة معطرة وكتسمع صوت مليكة فالتيليفون كاتهضر ابيل فيديو...هزات سعيدة عينيها وهي تشير ليها تجي حداها جلسات بينها وبين منار بنت سعيدة...
حبيبة : صباح الخير...
عيدة : صباح الخير اكبيدتي...دوزي بركي تشربي ليك قهيوة...
سعيدة : سعيدة ماتشربهاش عندها مع اتاي ولا حليب بارد.."ضارت عندها" تشربي حليب !!
حبيبة"حركات راسها ونطقات بصوت شبه مسموع" : احم واخا...
توريا طلعاتها وهبطاتها بديك ضراعية الي لابسة...مالقات ماتعقب مستورة واخا جنابها باينين مالقات جهد حيث اصلا هاديك طايتها واخا صدر مسكينة صغييور...شادة الكاس فايدها وتخمم ومرة تشوف فحبيبة حاسة براسها عيااانة وماعندها جهد...حتى تنهدات وهي تنطق...
توريا : اليوم ندخلو كلنا لكوزينة جاييين خوتي يشوفوني ويتغذاو...واخا يتعطلو واحد شوي حيث خويا المحجوب حتى يجي من سوق الجمعة عاد يطرگ ختي دامية والعالامي...يمكن جايين هما ولد خويا المحجوب را جا ونامس من صبليون...
توريا"شافت ف حبيبة" : سالي وسيري نتي واشراق وكريمة سوسو صالون...وسيقو دار نقيوها يدخلو يلگاو دار تعطعط بالوسخ...
سالاو وهما ينوضو كيهزو فالصواني ديال قهوة...خرجو رجال من الصالون تم جاي سيحمد بانت ليه ربيعة شير ليها تبعو...غير طلعو لفوق سدو عليهم البيت وهو ينطق...
سيحمد : دوزي جمعي ليا حوايجي بغيت ندخل نعوم راني توسخت...(حركات راسها ومشات تجمع ليه)...
ربيعة : سيحمد اش درتي امتى نمشيو عند طبيبة ؟ راني كبرت وغذا ولا بعدو اتمشي عليا حق الشهر وانا باقي مادرت تريكة...
سيحمد : راكي والدة زكريا فيه عشرين...
ربيعة : بغيت بنية بغيت نزيد اسيحمد...صحتي غاتقلال ونبغي الي تعاوني فالشقى...شوف توريا معاها اشراق شوف غا سعيدة بناتها وحدة ماتهز راس مايعاودوش معاها الهضرة...
سيحمد : تانسالي ونمشيو لا تقويش عليا...جمعي الحوايج وديري واحد زص ساعة ودوزي حكي ليا ضهري...وسوخات سواق كلها تجمعت عليا شهر ما حكيت يا العياذو بالله...
ربيعة : وراك عاطيها غا لتدواش...تقضي غراضك كل ليلة وتصبح دوش...كون مشينا عند طبيبة كون هزيت ربعة...اه نسيت را لاكارط (البطاقة الوطنية)...تقادا ليا تاريخ ونامس شافتها اشراق وگالت ليا تقادات...جمع ليا الوراق ولا علم غا هاشم لوسي يجمعهم هو الي كيقضي معانا...
سيحمد"حك شعرو كيتفوه" : اااخخخخخ خااايت...(ضار شاف فيها مغوبش) اش بغيتي ب لاكارط ؟!...تقادات خليها تم ماعندك بيها غراض..لا على الولادة هانتي ولدتي..ماعندي عيالات يبداو يدورو ليا ف كوميساريات ومقاطعات وجري من هنا وبصم من هنا مسالي لجد مك انا...دوزي تجمعي ليا الحوايج لا ندوفر مك هنا...
ربيعة"خرجات عينيها على جهدهم وخبطات فخادها" : اويلي اويييييلي غدايدي على ماتعاوديش لاكارط...اويلي حي اش كتگول اراااجل...تا كيدرتي ليها ياويلي طليتو خضر...
سيحمد"مشى ليها ودفعها من دراعها بايدو الي حولها على شكل قبضة كيضرب فيها وهاديك هي الي كاتعني ندوفرك كاتحسي بدراعك بغى يطير من بلاصتو" : راني دوييييت مع مك ابنت الخانزة...شتك كاتهبطي لمسوايا...ولينا گران هنا...
ربيعة"دمعة بغات تنقز ليها".: ياااااويلي و كيندير بلا لاكارط...بغيتي تديني لحبس شي نهار...ونامس كانو الجدارمية فدخلة ديال مراكش وقفونا كون مايعرفو هاشم وخلاوه يدوز كون فين ولينا...ونامس بغيت نتقيد فالرميد گالو ليا تجيبي لاكارط مابغيتي دخلني معاك فلاسينيسيييس مابغيتي دير ليا النو...بقى لاكارط هاهي وگفتي ليا حسكة فيها...ماباغي دوز معايا عند طبيبة ماباغي دير معايا حل...علاش انا صابرة علااااش صباح نفيق على بونبر نعطيك ماتاكل ونطيب ليك نصبن ليك ندلك ليك رجليك ونضل فجافيل وتيد وطياب وتسياق مامعايا عوين فالنوبة كون نا سعيدة بعد المرات تحط معايا ايدها...فلاخر هذا مسوايا عندك ...علاش مسمينك راجل الى ماهزيتي عليا درك...(مع قالتها مع نزل عليها بترفيقة بضهر ايدو تا بان ليها ضو وعاودها تانية وثالثة تا فمها طوش بالد.م ودفعها لارض تا بح صوتها وحدرت عينيها تبكييي وتنخصص)
سيحمد : كبرو ليك الكتاف يا بنت الكلبة...الله ينعل بو مك وبو جواج منك..نعار جوجوك ليا مالك ما گلتي مابغيت..غا سمعتي ال رحماني الهاشيمي عينيك وط.بونك تحل...على مانعقلش ماشتفك تالعرس ماعارفة راسك فين ترسي وغاديا حالا فمك كي البهيمة...ياك تجوجتي وولدتي وسدي فمك را هنا بلاصتك تايديو مك القبر وديك لاكارط والرب المعبود لا درتيها...وطبسبة ماماشيش ليها....الله يغرق لبوك شقف...
ضار كيسب ويدفل هز حوايجو الي وجدات ليه ومشى هبط يعوم كأن شيئا لم يكن وخا غادي ويسب ويتمتم...
دخلات لبيت دارت تيليفون يتشارجا حتى شوي تسمع صوت ميساج وشعلتت ليكخون فايدها بان ليها نوتيف او اشعار من انسطاغرام...سمحات لفضولها ياخذ ثواني من وقتها ودخلات تشوف كان ميساج من "جاد" الي جاوبها من اخر مرة كانت اخر رسالة بيناتهم دازو الايام والاسبوع عاد جاوبها....
جاد : حبيبة لباس عليك !!..سوو. سوو صوري مكنجاوبش دغيا اخر مرة كانو عندي مشاكل كنت فالمغرب هنا ورجعت لندن نبدا فشي اجراءات...لباس عليك...
مكانش ومالقاش جواب ولا حتى بان ليه انها قراتو لانها ببساطة كانت نزلااات فور ما سمعات صوت النداء من اشراق...هبطات لتحت وهي تمشي نيشان لصالون لقات كريمة مهبطة كاااع المخاد وكتسوس...تا تمات جايا اشراق عطاتها شطابة...
اشراق : هاكي شطبي..دابا ماتعرفيش تسيقي تانعلمك...
حبيبة"شدات شطابة بصباعها زوج فحال شادة خرية هههه هبطات عينيها كتشوف فشطابة وتشوف فزربية مع مددات عينيها لقات راسها فصالون طويييييييييييل شاد واحد المسافة طويييييييلة حيث عروبية كيديرو صوالن طوال وكبار زعما يهزو ليهم ناس حيث ديييما كيفكرو فالضياف عاى راسهم...شافت فكريمة الي واقفة تشوف فيها وكتبتاسم حابسة ضحكة"
كريمة : سخفتي غير بشوفة هههههه...هانتي سوسي اري انا نشطب...عيطات ليها سعيدة الي ملي عاودات ليها وسعيدة كاتشوف فتوريا بشوفات ناااقصييين وعيدة كذلك وخا هما ماداو ماجابو ف شوفاتها...حتى كاتبغي تهضر وكاتفكر ترجي حبيبة وكيفاش امناتها على هاد السر الي مثقل قلب بنت ف سنها كاتبغي تاكل راااسها عليها وتبغي تشعل فيهم العافية...
حبيبة"دخلات عندها كتفرك فايدها وتنش بيهم" : نعام خالتي...
سعيدة : مال ايديك...
حبيبة : ديك الطلامط حرشييين طيبو ليا ايديا...(نقزات توريا شهقت)...
شوي ونزلات ربيعة الي فشاااات قلبها فالبكا تا فشاتو ومشات لدوش الي تم فالفوق غسلات وجهها وحالتها بلا ماتقيس شعرها...وبدلات عليها...سيحمد ما عيط ليها ماتسوق حك لراسو وضهرو حكو بالكيس طويل وماكلفش راسو يعيط....تا هبطات عندهم هزات كريمة عينيها فيها وهي تشهق تا ضارو كلهم...
كريمة : اويلي مالك ؟
سعيدة"قربات كتقيس ليها جنب فمها وفوق حنكها الي ولا خضر..عرفااااتها حيث هادشي ماشي جديد عليهم واخا ماشي ديما" : ضربك !!!
حبيبة"كاتشوف فيها وكتفرك جنب ضراعيتها...غا ضارت ربيعة وهي تخرج عينيها من شافت حنكها هادشي عمرها شافتو..راجلها كيضربها !!...
عيدة"كانو مجلسينها فوق كرسي كتوريهم اش يديرو والقياس وطبعا عينيها كبيرة كتكثر هي فالماكلة...نطقات كتنهد" : يعطيه الگرد ولد لحرام...تايجيني ابنيتي تايجي وليا هضرة وكلام معاه...
توريا : ديري ليها ثلج...وصبري وسكتي ماعندك ماديري ماتكوني غا بحرتي عليه (قلبتي عليه) عارفاه فمو عار وايدو سابقة...
ربيعة"خرجات عينيها" : مابغاااش يدير ليا لاكارط ا توريا مابغى يمشي معايا عند طبيبة نشوف عالولاد...وتگولي ليا قلبت عليه...
توريا : وطلبي ولا هضري معاه فوقيتة يكون بخاطرو...وتي عارفاه عاگد الغوباشة على بونبر وبغيتيه يعطيك خو جوابك !!..
ربيعة"الصمت"
سعيدة : داكشي الي بغات اتوريا راه حقها مافيه لا بخاطر ولا بلا خاطر...كوني خيط بيض اختي توريا...
توريا"هزات حاجبها" : هي انا كندخل بخيط كحل !!..
تسمع صوت الهضرة برا ناس داخلة وهي تم جايا اشراق كتضحك كانت كتسلم عليهم...
اشراق : مي جاو خوالي وخالتي دامية...وجا منير ولد خالي المحجوب...
توريا"ضحكتها وساعت تا بانو ضراسها اول مرة تشوفها حبيبة هاكا" : اخيااار..مرحبااا...
خرجات من الكوزينة نيشان لصالون وقفات كاضحك مشات نيشان لخوها المحجوب سلمات عليه والعالامي وخوها...كترحب بيهم وتعاود...خرجات من صالون لقات عبد القادر وهاشم وسيحمد داخلين وحسام...غا قالت ليهم خوتها جاو ودخلو عندهم يديرو الواجب...دخلات لكوزينة
توريا : حبيبة دوزي دي ليهم صينية ديال الما وهاد المرة ردي البال لا تعايبينيش مع خوتي...هادو ماشي كي الي جاو...
اشراق : انا نديها ونتي تبعيني بالقراعي...
.تبعاتها حبيبة هازة القراعي وراها وحادرة راسها...الصالون جا حدا الباب ديال دار مع الدخلة كيف تدخل كاين هو اللول على ليمن...وقفات وجهها مزنگ حشمات وتا سعيدة مكانتش تما...قالت سلام بالحس ودخلات سلمات على رجال من بعيد ودامية من وجهها...
دامية : نتي هي كنينة ختي توريا...هنهه عقلت عليك فالعرس...
حبيبة"تبسمات بزز بغات تسخف بالحشمة..خدامة كتفرك فايدها" : اه انا....
توريا"دخلات كتضحك" : مرحباااا مرحباااا بخوتي الحباب والله الى نورتوني...
المحجوب : وتي كي بقيتي وكي بقى يوسف...
توريا : واشويا وصافي..ماصبناش نمشيو ليوم لكنينيك كي شتي كيديرو ليه دوا هاو صباح نواجبوه بزيارة نشاعلاه...
العلامي : تي فين هو ولدك الكبير ؟ شتو كي دار العرس ماشناه..مايجي مايسول جوجتيه وماجبتيه يشوف خوالو...باقي مغضوب عليه بالمسخوووط !!!....
يلاه بغات تجاوبهم اتا سمعو صوته البح الي مايتنسااااش لا لتوريا ولا لحبيييييييية حبيييييبة الي غير شافتو وهي تخرج عينيها على حر جهدهم....
واقف عند الباب ماعرفوه امتى جا ولا كيدار تا جا غفلهم واحد الغفلة ديال بصح تا ضارت توريا عينيها بغاو يطيرو من بلاصتهم..حدو نطق جوج كلمات ووجهو ماكيبشرش بالخير
بشار"بدووون مايشوف جيهة مو ولا فيها عينيه فلارض وحجبانو يخلعو" : فييين عمر بنت المشاوري ديرها زينة... يااا تريكة الحبس ....
صدمة.!! ماشي غير صدمة وانا حاجة ماكانتش طيح عالبال واش غايجي ونيشان مع هضرتهم السامة !!..لدرجة حتى هاشم الي حافض فعايلو مابقى كايقشبل معاه حتى لعبة...توريا مامصدقاااش اش كتشوف خلي على اش سمعت من فمو...عينيها جمدو خارجين حسات بالعرق نزل عليها من ضهرها..ماحيلتها لصدمة مجيتو ماحيلتها لتحشيييييمة الحارة الي طرات ليها مع خوتها...وماشي اي خوت...هاد الخوت هي كتعرفهم مزياااان كل واحد فيهم يضرب بيها طر ويديرها مسكة بين ضراصو...عارفينها ممفاهماش مع ولدها وعارفين انها غاضبة عليه لكن السبب اش ماعارفينوش لحد ساعة لانه لو تعرف انه قت.ل باه زماان كان دابا كلشييي عارف والي وقع وكيفاش لملمو الحادثة ماغايلقاو ما يلمو فيها ومايخليوهاش بيناتهم وبين المخزن....(مزال فلاش باك لكيفاش تسدات القضية)...
"حبيبة" الي عالم بيها الله فهاد اللحظة.. بمجرد كاتسمع صوته كايركبها الرعب منو...لحد ساعة باقي ومازال هو الشخص المجهول الوحش الي واجهت ديك الليلة وصعيييب انها تولف عليه واخا را عارفة المواجهة ولابد منها معاه مادام جا ودارهم غايبغيو يشوفوه ولا يتجمعو بيه طال زمان ولا قصار...
هاشم"شاف دعوة ماتعجبش خصوصا ملي العلامي وخوت توريا تبدل ليهم اللون فوجههم..ناض هو وحسام لعندو مقربين" : بشار !!...
العلامي"جمع غوباشتو" : تريكة الحبس !!..(ضار عند توريا الي زمت فمها وعينيها عليه اما هو حلف عينيه ماييجيبهم لجيهتها..كانها ماكايناااش نهائيا وهي كتشوف فيه واقف عند الباب الي الطول دياال الباب قصير عليه حيث هما كاملين طوال وطول عندهم وراثي...)
المحجوب : هذا هو ولدك اتوريا ؟!..هذا هو ؟ ولينا نسمعو كلام العيب هكاك نيشان عاين باين بالعلالي...القب ولا گد سطل والكتاف عراضو...
دامية : ايييه هو هذا..هذا هو الي مايعرف طريييگ ل قبيلة خوالو مايسول...ولينا نتعايرو من فمو..هادي هي سلام وتسلام مع لحگ مع ضرب...اخااايت...
منير"ضار عند باه" : شكون هذا ؟!
المحجوب"ماعجبوش الحال وكايتسنى تفسير من توريا ويتسناو الاعتذار وبوسان ليدين" : ولد عمتك الغايب...
هاشم"قرب ليه عرفو بالي وااازن بالعصبية واخا عصبيتو ماكيبينهاش ليك بالغوات وانما بافعال الي تخلييك تبغيه يغوت ويبلبل ومايديرهم...نطق" : بشار اجي معايا...
بشار"الصمت"
هاشم"ربت ليه على كتفو وزير كايترجاه" : بشااااار...
توريا كتشوووف فيه فحال الى جمدت على الحركة..من جيه كاتسمع فخوتها يبرگمو حداها ومن جيه كتشوف فيه وتشوف فوجهو الي صعيييب تعرف تفسرو حيث ماعاشتش معاه كي ناس ممعاشراش معاه معارفة عليه والو من غير انه سخط من فمها خيرو فايض...حتى سمعات صوت عبد القادر...
ع.القادر : نعلو يا شيطان !! وايلي العلامي(مالقى ما يلم تاهو تصدم وماعرف باش تبلى...اما سيحمد ضحك باستهزاء وضار لهيه كايحك فلحيتو كاتجيه ضحكة ويحبسها.)...
بشار"كايسمع فيهم يهضرو وكايمسع فكلامهم الي كلو سم..لاح ليهم ديك الهضرة وخلاهم يتجالبو...مابقى دوا ما بقى تكلم...ضار وهو يخرج وتبعو هاشم تا وصل لعند طوموبيل وهو يدور كايشعل فالگارو بدا يكمي هاشم وحسام ماعرفو يهضرو ولا يسكتو ولا يبقاو جنبو"
المحجوب"شاف فتوريا الي مزال على حالها...وهو ينوض وقف من بعد ما شاف بشار مشى وخلاهم بلاكة" : هذا هو المضنون ؟!..جينا نطلو عليك دينا مانعاودو...
دامية : جينا نطلو يگطع طلنا...نوض ا العلامي نوض اخوييي يگطع المجيان ومايجي منو...لاح لينا السم من فمو وزاد !!
توريا"الصمت..عينيها ولاو بيضيييين..فالعادي غاتنوض تزاوك وتطلب وتعاير بشار لكن فهاد الحالة جاتها صدمة من كاع جوابه شواها وعرف كيف شواها وسط خوتها حط ليهم مايعاودو على طبق من ذهب ووواخا تطلب وتزاوگ والله ماتسلم من لغاهم وضريب طر الي غايضربو بيها فدواورهم ومع نسابهم...وهادشي هي ماتقدش عليه وهو علاش عايشة على ماء الوجه والسمعة...
ناض عبد القادر نغز سيحمد الي ناض جمع ضحكة بزز...وناض مع باه...ماردوش البال لحبيبة الي لقات الغفلة وغير شافتو جرو هاشم ومشاو برا وهي طييييييييير كاتجري دايزة كي زواق تا خرجات فاشراق الي هازة صنيية فيها كيسان وبرارد وواحد الزينة جديدة ديال كيسان حطاتها توريا تباها بيها..باش يحطو اتاي يعمروه بالطريقة البلدية والفاكية يدوزو بيها بينما يتحط كسكسو الي موجد على حقو وطريقو...
اشراق"ماحسات غير براسها تدفعات وهي طيح ليها صينية نصوالكيسان تهرس والبرارد بقاو ينقزو طنطن طن تا تشتت كلشي" : اويلي ويلي وييييييلي
شدتها البكية والخلعة وجهها ولا بييضضض حيث اليووووم ياكلو عزاها من عند توريا تا تمات جايا سعيدة وربيعة وكريمة يتجاراو...ماعرفو باش تبلاو يلاه غايهضرو تا بانو ليهم خوت توريا خارجين ووجاهم ماتبشرش وتابعهم عبد القادر و سيحمد يطلبو فيهم....
سعيدة. : تي كي طرا ليك ؟....
اشراق"كتبكي ولات ترعد" : اهى اهى خرجات فيا هاديك حبيبة الله يعطيها مصييييبة غاتقت.لنييييي مي والله مادرتها بلعاني اهى اهى....
ربيعة : وجمعي جمعي لا تجي وتشوفك...
سعيدة"كاتشوف من بعيد فيهم خارجين" : اش واقع ؟
ع.القادر : انعل يا شيطان سي المحجوب واش هذا مانسواو عدك (عندك)...ساعة غضب ساعة غضب ياعوذ بالله...
المحجوب : شيطان را حضر فرتك المجمع وزاد...
كان واقف هاشم حداه وحسام تاهو ماعرفو باش تبلاو...هو كايتكيف ماعلى بالوش طلق ليهم السم وزاد...كانو بعيد شي شوية حدا فين كاين شاريج حيث تما منطقة واسعة شوي كيوقفو فيها طوموبيلات ديالهم اما الكاميو كايوقفوه بعيد ولا سيارات ديال النقل....
هاشم"ماهضرش معاه خلاه حتى يهضر هو...حتى ضار كيشوف بانو ليه خارجين وتابعهم عبد القادر الي ماعجبوش الحال حتى هو...عيدة جايا شاد فيها سيحمد ملي عرفات جات تابعاهم تطلب....
المحجوب. : زيارة الخير هي هادي اسي رحماني...
ع.القادر : وايهديك الله المحجوب واش حنا نطلبو فيك ونتا مابغيتي تهد...نعل شيطان هانتا بغيتي طيرو ليا (نتقلق ولا نتعصب)...دوز دخل براكة من الهضرة الخاوية...
عيدة. : واسي المحجوب وتا ما عوايدك نطلبوك وتهز فينا العين..
المحجوب"قرب باس ليها راسها" : ماتساليني شاااي الحاجة..مابقى لينا گعاد..راك عارفانا وحطي راسك بلاصتنا مانصيبوووش...ولينا فالمعيور عاين باين...
عيدة : العااار اوليدي رجع ونعل شيطان العااار..مسحها فيا مسح فيا كاااع الي تگال...
العلامي : تي اش نمسحو..تي نسمعو على وذنينا الي مايعجب ونمسحو...
دامية"حادرة راسها وتبكي وتمسح فدموعها"
العلامي : ولينا تريكة الحبس !! على رقبتي ما گاعدين هنا..را بشلاغمنا ودايرين لراسنا النو..جينا نديرو زيارة سمعنا بمرض يوسف ومرض ختنا بنت منا وبوونا... وجيناكم بالكبرانية (حيث فاش جاو دخلو معاهم كراطن سكار وخناشي الفاكية...و الحليب كراطن وشي مياكي عامرين دانون وبيمو كل واحد منهم جاب ميكة كبيييرة...)..ولينا نسمعو خل وذنينا...
عيدة : حااااشا ياوليدي حاااشا نتوما مالين الخير والكبرانية...ودار المشاوري دار الخير والحق...
العالامي : ورا جينا وطاح علينا الباطل من الي حسبناه من د.منا صدق طالينا بيه....
منير"ضار جيهة بشار بان ليه واقف لهيييه عاطيهم بالضهر بقى وحدو مع حسام حيث هاشم لحق عليهم..ضار عند عمتو دامية ونطق بينو وبينها" : شوفي كي لاح العافية وزاد..تاعت الي ينزل على جد مو لراس...راني تبت راسي حيث يلاه اول مرة نجي وبغيت نشوف عمتي اما الي يديه مني عمرو ينساه...
دامية : ماتقرب ليه ماتهضر معاه ماتحاديه..نعل ترابي الي حطوه..غابر ومدي سخط مو..مو ماحن فيها وبغى يرحمنا حنا.."شافت ف المحجوب" خويا المحجوب زيد يلاه فحالك...زيد تا ختك ماكلفت راسها طلب سماحة...زيييد اخوييي دينا فحالنا...
والو واش بغاو يطلبو ليهم تا من هاشم طلع ليه الخز وولا يقول سر ملتكم نييييت...كيهضر معاهم عبد القادر وسيحمد وهما غا ماكيهزو فخنافرهم...توريا مابااانتش ماخرجت ما قربت نساااوها هما كاااع...ركبو الخوت فطوموبيلاتهم وعفطو تا خرجو هازين فقلبهم وغضبانين...
عبد القادر"شاف جيهة بشار وصغر عينيه" : واشوووف فين وصلنا هاد التريكة العوجة...امتى جا هذا ؟
هاشم : جا شي سيمانة هادي غا تدهى مع يوسف وماخلاناش نعلموكم...
ع.القادر : كنتي تعلمنا تايجي ينوض روينة الكحلة هنا ؟ دابا خبارنا توصل لكاع دواور غذا وبعدو نلگا تجار فالسواق يسولو على العيب الي طرا ؟!
سيحمد : كاتشوف فيها...
هاشم : سيحمد دخل بخيط بيض !!
سيحمد : ندخل بالزمر حاشا سامعييين...سيري شوف مو مالها ماخرجات...
لداخل جمعو روينة ديال الكيسان وعرفو بالي طرا..دخلات كريمة لصالون من بعد ما شافتهم خرجو حساب ليها تبعاتهم توريا بغات تجمع حتى بانت ليها توريا جالسة لهييييييه فوق سداري ودايرة ايدها على حنكها...جبيرتها تحيدت و الباندة صغيرة باقية فايدها...عينيها جامدين مكتهضر ماكتحرك ما دايرة حتى ردة فعل...
كريمة"قربات ليها" : خالتي توريا !!...مالك اخالتي ؟
توريا"فمها ولا بيييض"
كريمة"ولات كتفتف" : اويلي خالتي بسم الله عليك...ختي سعيييييدة واااا ختي سعيدة...
جات سعيدة كاتزرب لصالون حيث صوت كريمة كان مجهد..شافتها فين واقفة وهي تهبط عينيها لتوريا الي وجهها كان باين من طيارة مجيييييف...باقي اثر الصدمة عليها...
سعيدة : بسم الله عليك...اخويييتي مالك ؟ جيبي كريمة الما...
مشات كريمة طير تجيب ليها الما بانت ليها اشراق طالعة تجربييي كترعد وجهها بيض تاهي هاربة من خوها طلعات لبيت وجبدات الكتوبة نيشان...جابت كاس الما وجات تجري لقاتها باقية على حالها...
سعيدة : شدي توريا شربي بسم الله عليك...
ربيعة"دخلات تاهي تشوف" : يا مالها ؟!
سعيدة"كتمد ليها الما والو كاتلقى فمها مسدووود لاااصق وولا زرق." : توريا بسم الله عليك..واتي اش واقع ياويلي..."ضارت تشوف عند الباب بان ليها عبد القادر وسيحمد جاي شاد فعيدة مدخلها خلاو بشار واقف لهيه مع حسام بعيييد تاحد مامشى عندو
سعيدة : فين هاشم وحسام ؟!
سيحمد : راهم مع هذاك عدو الله...
سعيدة"غوبشات فيه جات تجاوبو وهي تسكت حيث عرفاتو تاهو معاهم ف مرمة الكريدي...مالقاااتش ليهم جهد ابدا...ضارت جيهة توريا خوات الما فايدها وهي ترشها" : توريا...
توريا غااا هي رشات عليها سعيدة الما وهي تشهق واااحد الشهقة الي خلاتها تفيييييق من اللقطة الي توقفات فيها فاش شافت بشار واقف عند الباب وطلق ديك الهضرة...شهقات حتى يحساب ليهم روحها بغات تخرج...هزات فيهم عينيها وووجهها ولا حمرررررررر...وهي تطلق حلوووقها بواااااحد الغوتة تا وصلات لعند حبيبة الي غمضات عينيها كترعد ودارت صباعها على وذنيها...هاشم وحسام ضارو يشوفو تا مشى حسام يجري....واشراق تحنات على واحد الكتاب بالخلعة بدات تقرا فيه مقلوب....
غوتة خلات كلشي يتلفت ليها والي كان جاي يخفف المشية..والي برا يدخل والي واقف يدور الا شخص الي ماتحرك ما قرب...سالا الكارو وعاود واحد اخور...
هاشم : ياربي سلامة..."شاف فبشار" هذا صوت توريا...
بشار : مزيان...
هاشم : ديك ساعة علمني بالي جاي اصحبي...
بشار : نعلمك باش نجي لدارنا اهاشم ؟؟
هاشم : لا ماشي هاكاك...غا باش نگوليك شكون كاين حيث خوالك مكتعرفهمش وتاهما لسانهم مضى من السيف ياعوذ بالله...
بشار"كيحك فلحيتو..كايتسمع ليهم غوات توريا واصل لعندو وماتحركش.." : هاشم سير شوف الدعوة لداخل ماتهزش الهم ليا...
هاشم"بقى فيه واحد اللحظة حيث سمع اش قالو واي واحد غايسمع ديك الهضرة يبقى فيه الحال لكن بشار مابينش هادشي حدو عطاهم جوج كلمات وخرج واخا يبين البرود را سمع الي مايتسمع.." : راجع ؟!
بشار : لا هاني هنا..نسالي شي هضرة وندخل..
هاشم : كون غا بدلتي ساعة باخرى...
بشار : شلا سوايع بدلت يااااهاشم...مسالي انا ؟.. خلينا مزيانين هاد ساعة..جاي لشغلي ماعلى بالي بحد هاد ساعة...دخل شوف الدعوة يا صحبي...
هاشم يلاه تم غادي راجع وهي تبان ليه جايا زيفها كلو طايح وجهها فازگ وعينيها خارجيييييين...تابعاها سعيدة وربيعة وسيحمد وحسام......وهي جايا عينيها خارجييييين فيه...هاشم مشى يزرب بغى يشدها وهي تنتر ليه من ايدو كاتنقز واحد جهد ولا فيها ولا عشرينية تقولي خفة بنت خمس سنييين...
هاشم. : تورياااا نعلي شيطان...توريااااااا. .
توريا : شيييييييييطاااان هو الي دخل عليا وشوهني..شيطان هو الي حاط عليه راسك يا عدو الله نتا وياه...شيطان هو الي خرات كرشي دعيتو لله...وكلت فيك الله يا ولد لحرااااام خرجتي فيا العجب من نهار ولدتك(كاتنقز تنتر لهاشم وحسام تاهو جا يعاونو فيها وهي والو كاع حوايجها تهنتكو...راسها كان عليه شال وتحتو زيف حياتي الشال طاح فلارض. وزيف حياتي نصو طاح تا بان شعرها....وجهها كلوووو يخلع...)
عيدة"لداخل فالصالون حداها كريمة وعبد القادر كيسمعو فيها تغوت على برااا" : ياعوذ بالله من شيطان رجيم...
ع.القادر"مغوبش" : ولينا ضحكة دروك...ماگعد كي عباد الله ماغبر كي عباد الله...علاش كايدير هاد الفعايل اش شاف منا عا گولو ليا ؟!
عيدة : الهضرة ماهي دروك..الهضرة من بعد خلي النفوس تنفس وكل يشد ما هز گلب لاخور...خليه منو لمو حتااا وكان يلگى تيساع لينا هاو لينا معاه هضرة..
ع.القادر ضرب بعكازو وناض كيقاد فسلهامو عينيه صغارو ب تغوبيشة الي غوبش..خرج على برا لقاها كتركل وهاشم شادها وبشار لهيه واقف عاطيها بضهر وتقول واش ضار شاف فيها...
توريا : وريييييني وجهك يا كحل ليام..يا كحل الگلب والسعد...ورييييييني وجهك يا المشوهني وكلت فيك الله...رزيتيني فعز ماليا (بشار زاد غوبش وهز راسو كيشوف لهيه)..خليتيني تا شفت فيك كي ناس وبغيتك ضهري نتحامى بيه وتكون ف ضهر خوووتك الي خرجو من تحت ايديا وماليا عويييييييييييين ياولد لحرااام وخليتيني تا جوجتك ونضتي خليتيها فعنگي ماهي مطلگة (مطلقة) ماهي مجوجة كرفصتيها ولحتيها ليا نجمع شوهتي ونكوي ونبخ من هنا و نرقع من هنا ونسد تقابي عيبك يا ولد لحرااام ورجعتي حطيتيني بوجهي وسط خووووتي وسط حبابي ونعتينا بالخايب يا فم العار. يا فم العيب...اش ولدت انا ااااااااش ولدت ولدت سخط ولد ولد لحرام خرج فيا العجب...هاااا ؟!
دفعات هاشم بكل قوتها تا تقطعات ليها البيجامة وضارت مشات تزرب عنظو كلها تهز وتحط تا طاح زيف وفيليل على راسها تحل وطاح وتطلق شعرها...
سعيدة : اويلي ويييييييييلييييي هااااشم شدها سيري ربيعة ستريييييها...
توريا"ضارت لعندو كتقرب ليه وتخبط جناااابها" : فاش عينك ؟!
كاتهضر وتنهج وتشوف فيه...وهو والو واش هز فيها عينيه كأنه هو الي غاضب عليها..كأن الاية انقلبت والولد الي غضب على مو...كان القلب ديالو هز من جيهتها لدرجة وجهها حلف مايشوف فيها...عمرات ليه قلبو لدرجة وجهها مابقاش كايبان ليه...
حالة وقعات فلحظة تقلب كلشي...رباعة او الفلاحة الي لهيه كيسمعو فالغوات بعيد ومشاو يطلو..العساسة الي تم وقفو كيشوفو...
بشار مربع ايديه شاد دراعو بايدو الي متوسطها الگارو كيخرج دخانو مع دخان توريا الي ولات تنهج وعينيها خارجيييين فيه...تا حسات بضبابة بغات تغشي عليها وراسها بدا يدور والي فيها مامهنيها...
توريا : اشنو الي ورا سخط الي ساخطة عليك ااااااش يا عدو الله...
بشار"دار الگارو وجر منو جرة وساط دخان بدون مايجاوبها ولا يحرك تا شفر من شفارو"
هاشم"قرب لعندها وشدها من كتافها بغى يديها" : لعني شيطان اتوريا اش هاد الحالة...
ربيعة"جات هازة زيفها بغات تستر ليها راسها" : لبسي عليك اختي توريا والله يلعن شيطان...تهدني اخويتي...
توريا"ضحكات فعز غيضها وعينيها عليه" : ههههههه شيطان هاهو يا وراني سايرة لعن فيه ولا بغى يتلعن...طيحو المرض وماتهد ومزال يهد فينا حنا "ضربات صدرها بضربة تا تسمعات لعندهم واحد الخبطة خلات صدرها حمر تا شهقات ربيعة"
توريا : يا ورا جهل جهلني...يا ورا سخط داه ومزال زااايد يااا خويتي يا ربيعة (عينيها عليه)...اش بغيتي تاني ؟...
ماعقلاتش على راسها امتى تجرات بجهد كااااع قوته خدمها ليها وجرها بجهد حيث بصح صعرااااتو وعيقاااات وهو هو وتعصب وتفقص ف مابالك ب صاحب الشأن الي ماتحركات فيه ولا ذرة...
هاشم"جرها من دراعها غادي بيها بحر جهدو صعراتو" : زييييدي دخلي من شوهة مكاين الي شوهنا گدك هاد ساعة زيدي...
هاشم"دافعها جيهة دار" : وزيييدي تحركي لا تسمعي عيبي انا زيدي تحركي...زيدي لا عمرك شفتي مني العار تشوفيه..زيدي لبدي عليا سوق لا ندير خدمتي ونكحلها على الخرا كااامل..."ضار جيهة سيحمد" كاتشوف ليا مع راسك كاتمنضر ؟
سيحمد : اش بغيتيني ندير ؟!
هاشم"غوت تا قفزو وحيث هاشم الكبير دابا فخوتو ماهزش فيه العين خصوصا شاف فباه الي حرك ليه راسو بمعنى دير اش گااليك.." : تحرك...
شدها معاه سيحمد ودخلوها لدار نيشان لصالون نيت وجلسوها...تمات جايا ربيعة وكريمة الي داخلة تولول...
سعيدة شافتو مشى وهي تقرب لبشار وخا مقلقة منو بزااااف ولكن خاص شي حد يهضر معاه شي حد كيعرفو مزيان حيث كلشي دخل تبع توريا وبقى هو بوحدو كيف كانو كيديرو ليه فصغرو...
سعيدة"تقابلت معاه ونطقات" : بشار...
بشار"سف من سبجارتو وهبط عينيه ليها" : سعيدة عاش من شافك.."قرب باس ليها راسها بحال مكاين والو وهادشي بحد ذاتو خلع سعيدة"..
سعيدة : بشار واش لباس ؟!..
بشار"هز حاجبو وحرك راسو"...
سعيدة : واش هادشي عجبك ؟!
"حط صباعو كيمسد فنواضرو حس بصداع فراسو..حس بيه كايتزنزن ليه واش نوبة صرع بغات تجيه ولا الحالة الي كاتجيه مرة مرة فاش كيتفكر شي حوايج دازو عليه واخا ماكيبينش اش كيضرو ماكتعرفيييش اش بيه من الغموض والبرود الي فيه..."
سعيدة : مالك ؟"هز ليها ايدو بمعنى ماماليش...تنهدات وهي تشوف فيه..يلاه بغات تهضر وهو ينطق"
بشار"هز صبعاعو كيطرطق فيهم" : سميتها ؟!..حبيبة..فين هي ؟!
سعيدة : علاش بغيتيها...
بشار : سعيدة قويتي تسوال..فين هي ؟!
سعيدة : را خاص تگد تشوفك واش هي ياا بشار سميتك تسمعها كاتولي مريضة وطايحة وباغي تشوفها ؟!...
بشار"عض لسانو وضار لهيه" : دخلي عندهم...
ضار كيمسد فجبهتو..بغات تهضر وهو يقاطعها" سعيدة دخلي ماحدي مهدن...
تنهدات وهي تحرك راسها خلاتو واقف..ومشات دخلات لدار لقات توريا سخفانة كيرشو ليها فالريحة وكريمة جايبة ليها البصلة وسعيدة كتغطي فيها تكاوها فصالون...شافت هنا وهنا وهي تسول هاشم ب شفايفها "فين حبيبة" شير ليها بعينيه جيهة الفوق بمعنى راها الفوق...فالبلاصة خرجات من صالون وضارت لداخل طلعات لفوق نيشان لبيت حبيبة بغات تحل الباب وهي تلقاه مسدود..
حبيبة"سمعات الباب كيتحل وهي تشهق ورجعات باللور عينيها حمريييين ووجهها بيض بالخلعة كاتنفس بزز وقرجوطتها كاطلع وتهبط..فاش سمعات الغوتة ناضت بجهدها سدات شرجم" : هيييييييي...
سعيدة : حبيبة !!
حبيبة"سمعات صوت سعيدة وهي تغمض عينيها وصرطات ريقها حتى بانو شفايفها كيترعدو" : خ خالتيييي سعيييدة اهى...
سعيدة : بنتي حلي الباب غير انا ماتخافيش...
باش تنوض حسات بالفشلة..تسندت على طرف ناموسية وناضت كاتجر تا وصلات الباب وحلاتو...دخلات سعيدة وسدات الباب وراها...وقفاتها وهي تقيس ليها وجهها وتحت عينيها هبطات ايدها لقات ايديها بااارديييين...
سعيدة : ششش بسم الله عليك ابنتي مالك ؟
حبيبة"كتحرك راسها ب لا" : م ماببب بغيتش نشوفو اهى...كايخلعني اخاالتي مانقدرش نشوفو ونهضر معاه...انا ه هنننا ح حتى يمشي ونهود اهى..عافاك...
سعيدة"جلساتها فوق ناموسية وطبطبات عليها" : غير تهدني مانضن شاي يبقى هنا...راك شتي ناس مشاو وهو خرج لتحت..
حبيبة : س سمعت غوات خالتي توريا !!؟..
سعيدة : تقلقات حيث خوتها مشاو تعصبت..وليني را خوتها لسانهم ينگط سم الله يهديهم..."شافت فيها كاتبان ليها باقا خايفة وكترعد.زيرات ليها على ايدها كتهدنها"...حبيبة بنتي انا مانبززك على والو ومانتدخل فوالو..وليني ابنيتي بغيتي نصيحتي ؟ خاصك تواجهي معاه...هو جا غير على قبلك ابنتي بغى تهضرو...هضري معاه حاولي تهدني گولي اش عندك وبردي سووق..نتي گلتي بغيتي باك مايعرف بوالو ؟ خفتي باك يسيق الخبار بالي مكاينش وبالي هاد جواج الي تجوجتو ملاوط وبالي زاد وخلاك مكرفصة !!!...
حبيبة : م مانقدرش خء كايخلعني...ماعمري نسى هاديك الليلة عمري نساها..خايفة منو بزااف مانگدش اهى...
سعيدة : وراه خاصك تگدي باش يمشي كلشي هو هذاك عرفي منو اش كاين شوفيه اش بغى را كيبقى راجلك ابنتي طال زمان ولا قصار را هادشي الي كاين...نتي كتهربي منو وهو جاي باغي يهضر معاك..را مابغاش يجي هنا طلب هاشم يجبك ليه..هاشم مابغاش وحيث خاصو يجي هو لعندك هاهو جا...هادشي ابنتي خاصو يتحط ليه حد..خاصك تخرجي من هاد الحالة الي فيها...
عوجات راسها فيها بترجي..كاتقوليها بعينيها ماقادراش ماقادراش اخالتي الي فقلبي كبر من الي كتهضري عليه...اخالتي را الهضرة ساهلة وتطبيقها صعييييب...انا صغييييرة على المسؤولية صغير بزاف عاى داك الانسان الي بان ليا فليلة "ملقانا" وحش...عاملني كيف ناس فلول حتى غدرني فلحظة هرسني وتكرفص عليا وزاد خلاني مليوحة...كاترجاها بعينيها تحاول تعذرها وتأجل اللقاء حيث ماتقدرش اطرافها كيبردو بمجرد كتعرف انه غايهضر معاها...غاتواجهو وترجع تفكر الهضرة الي قاليها ليلتها...
~بشار : ياك نتي عروستي ؟..(حط ايدو على حنكها ودوز عليه) ششش ماتخافي واااالو..نتي عرووستي بغاتك ليا ميمتي وهاني كندير ليها فالعادة..~~
غمضات عينيها مع نزلوووو دموعها يجرييييييو تا شهقت وزيراااات على ايد سعيدة...فجأة تحل الباب وهي تهز عينيها نيشان جاو فعينيه...كاطلع وتهبط فيه بصدمة...طولتو وتگضيرتو خلعاااتها وهي قصيييرة على قدها...
بشار"موجه كلامو. لسعيدة وعينيه عليها نطق مباشرة " : سعيدة خرجي خليني معاها....
يمكن خذات جرعة من انها ماتصدمش من اللقاء على غفلة معاه...يمكن تكرار الصوت المفاجئ ونبرته الي ماعمرها تنساها ديك "البحة" ديك تدعديعة الي ممزوجة مع هاد البحة من جراء التدخين المستمر...... ماتعاملش معاها مزيان خلا ليها بصمة سوداء... ماعاشتش معاه حوار وماهضرو ومارحمهاش وهي كتناجيه يصبر ليها...استعملات جميع وسائل التوسل باش يفهمها ويصبر لصغر سنها...
كلشي جاها مفاجئ فلحظة تحولات من بنت فرحانا بنجاحها فالباكلوريا وماهازاش هم المستقبل اش فيه...حتى لقات راسها. وسط زواج ماتفرضش عليها وانما فرضات راسها على زواج باش تفك اعز ماليها...فلحظة وافقات على زواج من شخص ماعارفة عليه والو من غير سميتو...حتى لقات راسها فليلة بين ايديه وعيشها دخلة عمرها تنساها دمر نفسيتها فيها وخلاها ماتنساش وجهو ماتسناش داك الصوت الي بقى كيتردد فراسها "ياك نتي عروستي...ششش ماتخافي وااالو..."...
صرطات ريقها تا تحركات قرجوطتها وشفايفها بداو يترعدو...فكرة انها تواجد معاه فنفس الغرفة الي عاشت فيها اسوء ليلة بالنسبة ليها صعييييب... وصعيب تبقى معاه فيها بزوج بيهم...
سعيدة"ضارت شافت فيها لقاتها عينيها خارجين فيه جفونهم حمرة ورموشهم لصقو" : ماتخافيش ديري اش گلت ليك...
بشار"عينيه عليها ببرود كيشوف فوجهها"...
حبيبة"حركات راسها ب لا" : ل لا لا لا لاااا ماتمشيش بقاي معايا بببقاي معايا "زهقت ليها تنخصيصة خفيفة"...
سعيدة كتحس بايد حبيبة كتقفقف وباااردة....ضربات ليها طن فراسها انها ماتقدرش تبقى معاه فنفس البيت الي عاشو فيه ديك الليلة الي تلاحمو فيها اجسامهم بطريقة قاسية...كتشوف فيها كاتهز ايدها كترعد وتحطها على عنقها من جيهة العضة الي عضها حتى سال د.مها ديك المرة...اما هو غير كيشوووف بطريقة باااردة كيشوف فيها كاتبكي حدو كيهز حاجبو وصافي..عاطي الخاااطر ديال الخاطر حتى تكمل هي كاااع بكاها...يمكن عارف انها غادير هاكا ؟ او يمكن نيييت كيتصرف بطريقة باردة...
سعيدة"ضارت عندو" : بشار .."شافت فيه حول نظرو ليها" ماشي هنا...ولا ماشي دابا...
بشار"بقى كيشوف فيها جهد دقيقة وهو كيشوف فسعيدة بشي شوفات ماعرفاتش هي تفسرهم..حتى حرك راسو" : كانبان ليك مسالي قبي ؟!...
سعيدة : عارفة مامساليش...
بشار : اشنو دابا ؟! مافهمتش...بشار جي فك مشكيلك مع فلانة..بشار (كيهضر بصوت منخفض وثقيييل فهضرتو) لا ماشي دابا..."كيغمز بعينو" عندكم الخاطر لتفلية ؟!...
سعيدة"خرجات فيه عينيها ونطقات بشوية وحبيبة مزال مزيرة عليها من ايدها": هانتا شفتي اش كاين !
بشار"هز حاجبو" : هي اش ؟..عطييني المفيد اسعيدة..الخاطر لاروب ..
سعيدة : وهادشي علاش سير بلاتي..واش شفتي اش وقع ؟ را عليك وعليها ابشار..نتا ماعندكش الخاطر وهي شفتي حالتها"كتخرج ليه فعينيها وتشير ناحية حبيبة"...ساعف مرة وحدة ..
بشار : مرة وحدة..."قالها باستهزاء...زعما انا معمرو ساعف"...
حبيبة كتسمع صوته وكتعصر عينيها الي هبطتهم وماقدراتش تشوف فيه تشوف "المجهول" الي بين عينيها...عارفة انه خاص المواجهة..عارفة بالي خاصها تهضر معاه يحطو النقط عالحروف لانه فالاخير كايبقى "راجلها"...كاتفكر باها بين عينيها وكتحاول تقاوم باش تهضر معاه وتشوف راسها فين غاتوصل معاه...كاترجع تفكر ديك الليلة وتفكر انهم ف نفس الغرفة كاتراجع وتخاف لان الغدر ممكن يوقع فاي لحظة...عصرات عينيها وصرطات ريقها وهي تزير على سعيدة تا ضارت عندها وقربات ليها كتهضر معاها بشوية...
سعيدة. : هاني بنتي...
حبيبة : م ماشي هنا ..."بصوت منخفض بدون ماتشوف فيه"
سعيدة"تنهدات وضارت عندو" : اش بان ليك...
بشار ماجاوبهاش بقى شحال كيشوف فيها كأنه كيفكر ولا واخذ لحظة مخلوي فيها مع راسو الي اصلا بغى يتفرع..بدا كيحس براسو ماشي تالهيه عيا يعافر الا انه استقر ف قرار والي هو...
بشار"كيشوف فساعتو..عندو موعد وخاص يمشي ليه..نطق كيهضر مع راسو وصوته كايتسمع" : نعل بو مها حياة ..."ضار جيهة الباب وعينيه على برا هز صبعو مشير ناحية لكولوار" فين اشراق ؟!..
سعيدة : فالبيت هنا...سير على ايدك ليمن البيت الثالث جا مع راس دروج تما كاينة...
بشار : نسالي باش ماكان نعيط ليك...من هنا لساعة ساعتين على حسب امتى ساليت جيبيها معاك لفين غانگوليك...دعيو يا سعيدة ماتزنزنو ليا ثاني بكثرة الهضرة بلا فايدة تفيد...
ماخلاهاش تهضر كان خرج من البيت حيث اصلا حس براسو مغايبقاش يوزن لا فالهضرة لا فردود الافعال..وصل لواحد العصبية كابتها صحة وهادشي ماشي فصالح لا صحتو لا نفسيتو الي غير كايحط رجليه هنا كاتبدا تهبط للحضيض....مشى لفين قالت ليه كيحسب فالبيوت وكيهز صبعو مشير لكل بيت ب الحساب...واحد زوج ثلاثة..نقر بصبعو فالخوا عدة نقرات وحط صبعو على نواضرو وغمض عينيه لثانية ورجع حلهم ودق الباب تا سمع صوتها...
اشراق : ش شكوون !!
تهز قلبها وعينيها خرجو فثانية وجهها تخطف منو اللون..ظنات للحظة انه مشى من بعد الي وقع مع امها...
بشار : وحدك ؟!
اشراق"سنانها تقرقبو بالخلعة" : ب ببووححدي..خ خويا بشار !!
ماعطلهاش فالبلاصة حل الباب ودخل..حدر راسو تا دخل من باب سدو وراه ووقف كايشوف فيها...واقفة كاتفرك فحوايجها وترمش فيه...
بشار"بقى كيشووووف فيها تا قربت طييح قالت غايصليها معايا مافيها..حتى سرح ايديه على غفلة وتبسم شوي" : ماناوياش تسلمي على خوك ؟!...
وهو تفرض عليه هاد زواج وخذاه ك انتقام ورغم ذلك لقى راسو غارق فهاد زواج وخاص يفك هاد الحالة الي طاح فيها وطيح راااسو فيها....
سعيدة. : اش هضرنا ا حبيبة ؟!...هادشي ماخاصش يبقى هاكا...
حبيبة"هبطات عينيها كتفرك فايديها الي بردو عليها وقلبها الي باقي بغى يخرج من صدرها ووجهها كتحس بيه شوك...المواجهة جاتها صعيبة...نطقات بصوت فيه رجفة" : م ماقدرتش ماقدرتش..خفت نبقاو هنا فهاد البلاصة خفت منو..عااارفة خاص نهضرو وهادشي مايبقاش...ثيقي بيا والله ما قدرت نبقى معاه فنفس البلاصة..شوفي هييي فين بايهضر معايا...
"شيرات ليها بايدها زعما شوفي ؟ نفس البيت !!"...
سعيدة"بقات ساكتة كتسمع ليها وكتشوف كيفاش كتهضر ومقجوجة." : خاصك تصبري وتغلبي الخوف..باش تحيديه منك..انا نضمنو ليك ا حبيبة مايدير ليك وااالي (والو)..كي ضمنتو مايهضرش معاك حيث الجو ماموالمش للهضرة يلاه وقع مشكيل گداش لتحت وباقي نفوس هازة...
حبيبة : وضمنتيه ليا ديك الليلة ؟ (هزات فيها عينيها بواحد شوفة خلات سعيدة تحشم على جملتها ديال "نضمنو ليك"...
سعيدة براسها ماخاصهاش حيث معدوم الثقة..سعيدة حيث ثايقة فيه حيث عاشت معاه بقلبها وعطاتو حنانها مكانش كيقابلها بالشر...يمكن جملة قالتها عفوية نسات فلحظة اش وقع...تنهدات وهي طبطب عليها..
سعيدة : شوية وغايعيط ليا باش تخرجي تهضري معاه..حاويلي احبيبة مغاديشااااي نبزز عليك وليني سمعيها مني وتنغمي هضرتي وخليها وسادة تحت راسك...ماعمر التخبية تنفع شحاال ما گدك تلاقاي بيه تلاقاي..حيديها عليك وشوفي فين توصلو بهضرتكم...واااايه مادام جا بغا يدوي منو راسو كوني هانية مايوصلك شر منو...ثيقي بيا انا انا الي حطي تييقة فيا...وكوني هانية لا دارت گد هوك "لاقات صباعها زوج بمسافة سنتمتر" حسابي معاه خايب وانا مايصيبش يخسر ليا مايگدش على خصامي...
مابقاتش هضرات حبيبة ولا دارت حتى شي رد فعل..حدها حادرة راسها وكتسمع ليها...
_شافتو مبسم وهي تحس بالعرق نزل مع ضهرها تنفسااات على شوي تسخف ههه...تبسمات تاهي ومشات كاتزرب لعندو عنقاتو حطات راسها على كرشو حاوطها بايديه كيبوس على شعرها وراسها وكيطبطب عليها...
بشار : لباس عليك ؟!..
اشراق"حركات راسها ونطقات" : لباس لاااباس...
بشار"بعد ليها راسها وشد وجهها من الفك..عينيه فعينيها مركز فوجهها شي دقيقة كيف عادتو حتى كيخليك ماعارفة باش تبليتي واخا مدايرة والو حيث عندو شي شوفات غراااب..طرش ليها حناكها بشوي كيطبطب عليهم ونطق بنبرة صوت هااادية" : اشنو درتي فداكشي الي وصيتك ديريه ؟"هز حاجبو"..
اشراق"دورات راسها كتوربه كتوبتها" : هاني يلاه رجعت نحفظ (ماتقدرش تكذب)..
طلق منها ومشا لدوك الكتب ديال السنة ثالثة اعدادي..شي وحدين باقيين جداد هز حاجبو فواحد باقي جديد مغلف حلو كيقلب فوراقو توقف عند واحد صفحة ...هز فيها عينيه ورجع شاف فالكتاب..
بشار : يلاه شريتيه ؟!
اشراق : اه يلاه شريتو..
بشار"عينيه عالكتاب ونطق بصوت هااادي" : اشراق..علاش الكذوب ؟ اش گلت ليك ؟!..."هز الكتاب وراه ليها" هذا مشري العام الفايت...گولي يا اشراق ماحليتوش باش يقدام ماحفيتش فيه عيني وصباعي..ما گلبتش فوراقيه باش يرطابو..."حط الكتاب وضار كيشوف فيها"...
اشراق"حدرت راسها ماهضراااتش"...
بشار"ربع ايديه كيشوف فيها..عاود رجع ضار وهز واحد دفتر لقاه ديال الاجتماعيات مكتوبين الدروس مشى لجيهة "الجغرافيا" لقاها كاتبة دروس بلون واحد مامنظماش النقط مامنظماش العوارض..كاين "اهمال" لهاد المادة...كيقلب ويعاود كيلقى نفس الشيء...لاح داك دفتر ومشى جلس فوق السداري فين كاتنعس هي..فرق رجليه وحط مرافق ايديه فوق ركابيه ايد كايدوز بيها على لحيتو وايد مرخية لتحت...
بشار : خاصك تشري شي حاجة فالادوات ؟!..
اشراق"حركات راسها ب نفي" : عندي عندددييي...
بشار : عندك ؟...لا ماعندكش..اشراق ماعندكش...
"جبد من جيبو بزطامو حلو كيقلب جيهة الفلوس جبد ربعمية درهم طواها ورجع البزطام...هز عينيه فالارجاء كايشوف فالبيت باين بيت ديال بنات..."
بشار : كاينعسو حداك بنات هاشم !
اشراق"حركات راسها" : ا ااه...
بشار : جلسي گدامي تم...جلسي..
بالخلعة ضارت تعترت فواحد الكتاب فلارض تا تشقلبو وراقو وهي تشهق بشوي عاد رد ليه البال مليوح فلارض...هز فيها عينيه تا جلسات وهزات الكتاب كاتقاد ليه فوراقو وتسرح وعينيها فلارض ..
بشار : امتى تبداي القرايا ؟!
اشراق : ن نهار تنين غايخرج نتيجة طلب استعطاف الي دفع ليا هاشم..عع عمي هاشم..حيث الحارس العام گاليه غير گوليها تجي نهار ثلاث عندي نگوليها فين تدخل اشمن ثالثة...
بشار : مزياان...
"بدا كيحك لحيتو ويعاود ويدور هنا وهنا...مابغاش يضرب مابغاش يحكم عليها باغي يعطيها فرصة تستغلها...اشراق لقات اهمال من الام ديالها حتى هي.
بشار : قربي عندي هنا...
ناضت في ساع قربات عندو شد ليها وجهها بين ايديه كيدوز على حناكها بصبع ابهامو...عينيه فعينيها الي غرغرو بالخوف خايفة يغفلها بشي صلية ماتحسب ليها حساب...
بشار : نعطيك من هنا ل résultats ديال premier semestre..بشريني مايخصك خير يا بنت مي وبويا...مالگيتش اش بغيت.."سكت وحرك راسو" لا غادي نلقى مابغيت ياك ؟"حركات راسها بزربة" مزياان...كوني حسن مني..(عاود جبد بزطامو جبد فلوس من جديد زادهم على ديك ربعمية درهم عطاها ليها) هادي قضي بيها اش يخصك..وهادي عطيها ل بنات هاشم.."طبطب ليها على حناكها حسات براسها تزعزع"
لتحت بقى حالهم كما هو عليه جالسين فالصالون مجموعين شي ميشوف فشي وشي يتنهد على الي وقع وشي كايضحك مستهزأ بالوضع...جات كريمة وتحنات عند وذنين عيدة...
كريمة : لالة اش نديرو فالغذا ؟!..
عيدة : سيري نتي وربيعة سگيه وغطيه بالميكة ومانطة يبقى سخون.تا لا بغاو يتغذاو عطيهم..والگصاري الي بقاو سگيهم وديهم ل رباعة والعساسة بقاو بجوع بلا غذا وفاطيمة الي كاطيب ليهم ماكاينة (نهار جمعة كسكسو كيديرو بحساب الفلاحة الي فالفيرما ورباعة والعساس اما باقي الايام كاينة امرأة مخدمينها مكلفة بيهم من فطور وغذا من غير العشا حيث غير كيوذن المغرب كايمشيو فحالهم والعساس را عشاه مكلفين بيه هما...)..
مشات كريمة من بعد ما ناضت ربيعة تبعاتها تعاونها تسگي...هاشم مربع ايديه ومغوبش تا شوي سمع تيليفونو كيصوني شاف "بشار" المتصل حرك راسو وناض مستأذن من تم وخرج يجاوبو....
ع.القادر"ضار جيهة توريا مغطينها وغاايبة بزز باش صمطت عبر ليها هاشم الضغط لقاه طالع عطاتها ربيعة دواها بزز باش شرباتو غايبة وغطاوها..رجع شاف ف عيدة" : يلاه تسگم الوقت تعواج (تسگم هي تقاد)..
عيدة : هادشي كان ولابد يطرا سوا اليوم سوا غذا..."دورات راسها جيهة حسام" حسام هنا !!
حسام : هاني مي لالة...
عيدة : فين بليهو.دي ؟!
حسام : ماعرفتش ماشفتوش يمكن مع الوليد بان ليا صونا ليه...
عيدة : وصل نوض فينا الرفع وخرج !!..حنا زايد ناقص فالمكان ولا حرو ناوي يخرجو فينا ؟!...ماكفاهش هاد الشوهة والفعلة الي دار فبنت ناس وفينا زايد ويقاقي ليا هنا...
ع.القادر : خليه غااا خليه تا نساليو هاد المرمة وليا هضرة وكلام معاه..تنقية الوذنين كانت خاصاه شحاال هادي..
عيدة : ولا خلاك تگول سلام....ياعوذ بالله...نوض ديني لبيت الما نعاود الوضو العاصر على وصول نوض احسام نوض...
عاونها حسام تا وقفات ضارت جيهة توريا ورجعات كاتستغفر الله...مع وصلات لطواليط دخلات مع نزل بشار منير عينيه مكيشوفو لا هنا لا لهيه...خرج مع الباب لقى هاشم حدا طوموبيلتو...
هاشم. : غادي عند يوسف ؟!..
بشار : لا هاشم مزال ماغاديش..مزال ماقضيتش الي كنت جاي على قبلو..(تيليفونو صونا فايدو لقاها سعيدة) نعام !..
سعيدة : بشار باقي هنا ؟!
بشار : علاش ؟!...
سعيدة : الى بغيتي تهضر مع حبيبة..كون غا ساعفتيني وصبرتي تال عشية نجيبها انا وهاشم تال عندك فمراكش وهضرو اش بغيتي تهضر...
بشار"تا بغى يقول لا وهو يتفكر انه هو براسو مايصلاحش ليه يزيد ضربة هنا حيث ماحاسش براسو مزيان..مسد عينيه بصباعو وهو ينطق بصوت فيه بحة العيا المكتوم" : ماتزهزايش ليا على عشية..غذا مسافر مانصيبش نتفاوت كثر...
سعيدة : بالكلمة هي براسها گالتها ليا...
بشار : مزياان داكشي الي بغيت...
قطع معاها وخشا راسو فنافذة سيارة مد ايدو لمجر جبد منو باكية الكارو الي حط جبد سيجارة شعلها وبدا كيتكيف..
هاشم : اش گالت ليك ؟!
ماجاوبوش بدا كيكمي وعينيه فنقطة بعييييدة بحال ماسمعوش بدا كيحس بطنين فوذنيه كثرة ضغط الي ضغط على راسو خلاتو يفور وضغط ديالو يرتافع...بدا كيحك فصدرو ويكحب وديك الكحبة كتسمع فحال تزعزيعة تا كمش هاشم حجبانو مقرب ليه...
هاشم. : ياك لباس مالك ؟!..
بشار"حرك راسو ب لا" : ماماليش..عادي..
هاشم : ضاربك البرد !؟
حرك ليه راسو ب لا واستمر فالتدخين تا كمل سيجارتو...بقى شوية تا حس براسو تهدن حيث بدا كيحس انه بدا يفقد السيطرة على اعصابو...رمى السيجارة عسف عليها وبدا يسوس فحوايجو...جبد من بزطامو شي فلوس مدهم لهاشم. وصاه على اش بغاه يدير حيث مغايكونش هو....
بشار : وباش تحرك بيها..بلا منوصيك ...
هاشم : غادي نديها لگراج هنا نيت ونسد عليها ساروت يبقى عندي...
فهاد اللحظة تم داخل زكرياء داير شكارتو فكتافو جاي من الفيلاج كان داخل يقرا حيث بداو هما...كيهز عينيه جيهة العساس ويهز ايدو زعما را ناس معرفة ودايرين ليه حساب وتاهما كيمشيو معاه فهبالو...
زكرياء : واش ابا عروب لباس ؟..اش طرا واش جرا فهاد الفيرما...كاين شي خير ولا القضية ناشفة...
عروب"العساس" : اتا اش ليك من دروك هاز الهم...
زكرياء : على رقبتي لا تحط رجليك هنا يطلع معاك الهم صحة...
عروب : واسير دخل عاد ناضت ريگاطة يبان ليا...
زكرياء : وايلي ؟!..
دور راسو زاد غادي داخل وحيث مسافة بين باب الفيرما الكبير لعند دار لداخل طويلة...بقى غادي حتى بدا يبان ليه شكون من لهيه..بانت ليه سيارة jeep گري مزال كاع ماشاف شكون واقف عرف بشار من طيارة ماعرف اش يدير واش يمشي يسلم عليه ولا يدير راسو ميت ولا يمشي ويبقى غادي تايصبح الحال ولا يمشي يسلم عليه بسكات ولا يسلم على هاشم ويخلي بشار بلاكة ولا يرجع يقرا تايكمل العام ولا يبدل الكنية وهاد تريكة الكحلة الي تزاد فيها وكان من الابناء الملعونة هههههه...
زكرياء. : تا ريح مالو بغا يخلعنا...
هز راسو للسما وتم غادي بكل شجاعة يدير الصواب اللازم...ماحدو كيقرب وداك راس كينزل ماعرف مسكين علاه خلعو وهو تالهضرة ماهضرها معاه حدو عارف بشار المسخوط علاش الله اعلم...ما وصل تا بغى يسخف عمر هاد طريق ماسخفاتو...
هاشم كان واقف مسند عالطوموبيل كيشوف ف بشار الي مكانش بيخير...تا حس بنغزات فدراعو وهو يدور...بان ليه زكرياء...
هاشم : امالك ؟!...
زكرياء : جيت ندير صواب ونسلم عالحباب...
هاشم"شير بايدو جيهة بشار الي اصلا ماسمعش وماشافش زكرياء كان حادر عينيه وخاشي ايديه فجيابو" : دوز سلم ...بشار هذا زكرياء ولد سيحمد خويا...بغى يسلم عليك...
بشار"هز راسو وشاف جيهة زكرياء..حرك راسو ليه وهو يتم جاي عندو مد ايدو وسلم عليه بشار حدو سلم عليه وطبطب ليه على راسو"...
زكرياء : كيداير مع صحة الحال الاحوال..دعوة هانية ولا ياكما لعبات عليك الوقت وخرجات ليك الخالة توريا...لا تديشاااي عليها راها حال وحوال (تطلق مابقى بغى يسكت هاشم ناض تقاد فالوقفة باغي منين يطفيه لاخور تطلق طلقة وحدة تا هز بشار حاجبو)...
هاشم : صافي سير تدخل كول ليك شي حاجة سير را حسام لداخل...
زكرياء : وا غا قلنا ابا هاشم...المهم مرحبا بيك فداركم وعاش من شافك ولا باقيشااااي تغبر تخلي لينا توريا معصبة را كنمشيو فيها جملة...الميمة هي هاديك الكبدة حارة حارة وكاااان...
هاشم : زكرياااا صافي سكت سير دخل...
دفعو هاشم وتم غادي بيه دافعو تا بان ليه حسام جاي خارج وغمز ليه بعينيه خارجين...
هاشم : دي المصيبة را جاع ديييي علي بگيرة...الي بداتو توريا يكملو هو..."شاف فيه بشار وحرك ليه راسو بمعنى مال هذا"...غا زكريا هذاك هذا حالنا معاه لا تديشاي عليه را درويش وهبيل وقربت نسلخ لوالديه جلدة عالعضم...
حسام"مافهم والو لبق ليه زكرياء وتم غادي بيه تا دخلو لداخل" : اش درتي امسخوط...
زكرياء : سلمنا على ولد العم..
حسام : سلمتي عليه ولا سرسبتي ليه شي عجب...مالك ماتلجم فمك !!...
زكرياء : ديما كنتمنى نولي قدوة..بكثرة مكنكحلها غانولي عبرة...اااححح شدتني سخفة بكثرة الهضرة...كاين شي كسكسو راني جعت...
حسام : گول جاي مقادي ليك المازوط..سير دخل عند مك تاكل سير...وسير عند بوك را سول فيك بغاك تمشي معاه لشي قنت...
اذان المغرب مع قال "الله اكبر" حلات عينيها ورجعات غمضاتهم وعاد حلتهم كترمش شوي بشوي...راسها كايدور وصدرها فيه حجرة كاتمة النفس فيها...الفم الي ينطق ثقال والعينين الي يشوفو تغشاو بالضبابة...دورات راسها كايبانو ليها جالسين حداها معمرين القهوة واتاي وحاطين الگوتي البلدية الي متكونة من زيت زيتون زبدة بلدية مدوبة و القاسية...زيتون مشرمل بلدي والمطلوع سخون والكعك...حطات ايدها على السداري وبدات كتنوض بشوي حاسة براسها عياااانة بزااااف...هزات نفس تا هزاتها وهي تزفر بجهد تا ضارو كيشوفو. فيها...
عيدة : گولي ياعوذ بالله...
توريا حركات راسها بدون ماترد..بقات مسندة حاسة بروحها بغات تخرج..وهي تقاد زيفها على راسها وناضت بشوي وقفات اشراق وهي توقفها بايدها بمعنى خليني..حركات راسها وجلسات ونيت عيدة قالت ليهم خليوها...جمعات الوقفة كاتحس براسها ماقادراش تمشي ولكن كااابرت...وهي تشوف هنا وهنا...مابانت ليها لا حبيبة ولا سعيدة..ضحكات باستهزاء بمعنى مكاين الي حاس بيا ولا هاز ليا الهم...خرجات من داك الصالون ومشات طلعات لبيتها...
ربيعة : نوضي تبعي مك ا اشراق...
عيدة : خليها دير اش بغات تال بلاتي وطلع تشق عليها...لا تفوتيش مك ا اشراق بقاي تفاگديها (طلي عليها)...
طلعات توريا الفوق مسندة عالحيط وطالعة تنهج تا وصلات عند الباب وهي تبان ليها حبيبة خارجة من بيتها لابسة جلابة گرونة مخزانية جامعة شعرها لفوق اسفنجة مهملة...ووجهها كيبان ماشي تال لهيه...تمات جايا بخطى بطييييئة...حتى زصلات وهي تهز عينيها لقات توريا واقفة ومغوبشة كتشوف فيها...
توريا"بصوت مبحوح بكثرة الغوات" : فين غاديا بسلامة ؟!..
سعيدة"خرجات من بيتها وسمعاتها" : خارجة معايا انا وهاشم اختي توريا..."سكتات تا سكتات وهي تنطق" بغى يهضر معاها بشار...
توريا"طلعات وهبطات ف حبيبة" : سيري سعيدة تسنايها عندي معاها شي هضرة...
سعيدة : رتاحي ا توريا دابا نرجعو مامعطلينش ونيت نشوفو يوسف...
توريا : سعيييدة..گلت ليك هبطي تسنايها..ماتمحنينيش فالهضرة...
سعيدة"شافت فحبيبة ورجعات سافت فيها حسات بيها غاتگوليها شي حاجة تهددها بيها..هزات عينيها ف توريا لقاتها مخنزرة وخا تخنزيرة عياانة"..
توريا : راها كنتي ماشي كنتك..لا تقويش اسعيدة ونتقلق منك..ديها فراسك وخرجي سوق شوية !!..
تا بغات تهضر وهي تحرك حبيبة ووركات على دراع سعيدة كاتقوليها ماشي مشكيل...سعيدة ماكرهاتش لو ضارت ف توريا لكن ماتقدرش خصوصا حبيبة مأمناها على هضرتها..وعارفة سعيدة توريا اش كتسوا ودغيا تقلب كلشي فصالحها ويقدرو يآديو حبيبة ودارهم حيث ببساطة حبيبة كنة توريا ماشي سعيدة...هبطات سعيدة كتحسبن وتستغفر الله...خلاتها معاها بقات توريا كتشوف فيها وخا حاسة براسها عيااانة بزاف...
توريا : نسيتي مادار فيك ؟!
حبيبة"عينيها فلارض ومغوبشة" : مانسيتش..خاصني نمشي نشوف اش بغى يگوليا...اما باش نسى عمرني نسى اش دار فيا وعمري مانسمح ليه غير كوني هانية...
توريا : لو كان الوقت جابت ليا ولد كي ناس ودار ليك مدار كون صيفطتك شحال هادي لداركم..ولكن ربي كتب عليا ولد ماداير ليا حساب والى صيفطتك ندي معاك العيب..الهضرة بدات تخرج واللغى كثر عليه من جيهتك ومن جيهتي...دارني ضحكة وخلاني ضحكة وسط خوتي وداو عيبي..هانتي تشوفي على عينيك بلاني الله بولد خااايب مايرحم...ترجيتك تصبري وتكوني ليه امرأة الي اختارتها عگوزتي...بغيتي تهضري معاه سيري وهضرو وليني مايسيق خبار لمشكيل باك معانا..ولا عيبنا معاك مايجمعوه شراوط...
حبيبة"صرطات ريقها" : م ماعرفتش اش غايگول واش غانهضرو..انا غاديا على عينيا اما البلاصة الي فيها هو مانحطش فيها رجلي..ماكرهتش تجي منو هو ويخليني نمشي فحالي...
توريا. : فحالك ماشي دابا مزالني على هضرتي وكلامي....اللغى بدا يخرج والهضرة غاتبدا وانا مانصيبش نولي ضحكة ومسكة فضراص ناس...سيري هضري معاه ورجعي نهضر معاك تانا..وگفتك هنا باش نعلمك تلجمي فمك وماتخرجي المشكيل الي مع باك ليه... حتى نگولها ليه انا..."شيرات براسها ودخلات" سيري يلاه تلحگي على المسخوط...
المسخوط المسخوووط هاد الكلمة بقات كتردد فمسامع حبيبة الي بدا قلبها يضرب تا خرجات عينيها وريقها نشف...واش زعما مسخوووط ولا غا قالتها حيث تخاصم مع مو...حسات براسها بغات طيح وهي تزييييررر على السمطة دصاك تا بغات تقطع...هبطات بزز لتحت ماضارت لا هنا لا هنا...غاديا وعقلها مرفوووع تا دازت من حدا سبحمد ضرباتو لكتفو ماشافتوش وبقات غاديا...
سيحمد : والعمى يا العمى..مال هادي ؟!
ماجاوباتوش او بالأحرى ما سمعاتوش اش قال...خرجات ولقات سعيدة واقفة مع هاشم وحسام...لحقات عليهم عقلها مرفوع وعينيها جامدييين طبطبات عليها سعيدة...
سعيدة : گالت ليك شي حاجة ماعجباتكش ؟!
حبيبة"حركات راسها ب لا ونطقات بصوت مشحرج بزز باش كتهضر" : م ماتتعطلييش..."مسحات على جبينها بايدها كترعد"..
اصلا بدات كتوثر من هاد اللقاء مع بشار..كاتحس براسها مابغياش تهضر معاه ماباغياش تواجهو..يعطيها غا تيساع ماتسمع منو مايسمع منها ولكن ضروف الي هي فيها اقوى من هادشي..لازم عليها تشوفو لازم تعرف اشنو الوضع الي غايكون بيناتهم باش تعرف اش تفسر لباباها او دارهم بالمجمل..سواء اليوم او غذا غايتعرف كلشي مغاديش تبقى مخبية وكتستر على هادشي...غاتعيا ونفسياها غاتزيد تأزم وتمرض وباها يتأزم اكثر وهادشي الي مابغاتوش والا علاش هي لايحة راسها لهاد "الجحييييم"....زيرات على صاكها وطول طريق وهي غير كتاخذ فالنفس وتخرجها كتحس بقلبها بغى يسكت..كاتدخل نفس وتخرجها تا كيخرجو عينيها حاسة براسها بغات تسخف بغات تنهاى حيث هادشي الي كاتعيس كبر منها بزااااف...ديال وحدة كبييييرة دات وجابت فتجارب الدنيا...مكتفهمش توريا مكتفهمش طبعها القاسي علاش هي هاكا دايرة مالها مع ولدها علاش هو صدق عكس ماقالت عليه فاش خطباتها ليه...علاش فلول كانت كتقول را حنيين ويعيشك مزيااان...وهو دابا العكس خااايب ومخاصمة معاه...اش واقع اش طاري وسط هاد العائلة اش هاد الغموض دخلات ليه وعايشة فيه...ماكرهاتش تصرخ باعلى صوتها تبقى تغوت تغوت تغوت تا يبح ليها صوت وتلوح راسها ولكن كاتفكر هي علاش جات هنا ؟؟...نطقات بصوت مسموع ليها ولكن واش سمعوه هما المهم انها نطقات من تفكيرها...
حبيبة : كلشي على قبلك ابابا حبيبي كلشي يهون غير كون ليا مرتاح نلوح راسي فالعافية...
هاشم"شاف فيها من المرايا" : كيفاش ؟ بنتي دويتي ؟!
حبيبة"الصمت واحد دمعة عند الحافة..تا نغزتها سعيدة حركتها وديك دمعة نزلات تجرييييييي تقولي مسببة"
سعيدة : بنتي !
حبيبة"مسحاتها بالخف وضارت عندها" : ها ؟!
سعيدة : ياك لباس ابنتي بيك شي حاجة ؟ ماگاداش تمشي ؟
حبيبة"بقات شحال ساهيا فيها تا خلعتها وهي تنهد تا شهقت" : لا لا مابيا والو..وصلنا ؟!
حسام : هاحنا فتارگة...
دورات راسها وهي تلقاهم داخلين جيهة لاكلينيك...حيث فاش عيط ليه هاشم قاليه بالي كاين تما لان يوسف طلعات ليه سخانة ومابغاش هاشم يخلعهم فالدار وفضل انه يلقاوه تما...شدات فدراع سعيدة كاتبان حداها كي شي بنية صغيييرة...غاديا وكل خطوة كتحس بيها عاافية تحر.ق...طلعة فسانسور نيشان تفتح على الطابق الي يوسف فيه مع تحل المصعد نيشان عليه كان واقف عاطيهم بالضهر كيهضر مع طبيب....
سعيدة : بشار !!
بشار"ضار جيهة الصوت وهو يشوف فيهم شاف فسعيدة وحسام وهاشم الي قرب عندو حتى استقرو عينيه على حبيبة الي مخشية وجهها حمررر ورا سعيدة..هز عينيه بسرعة فسعيدة ونطق كيشير بصباعو جيهة واحد الممر" : شومبر 15 من هنا دخلو ليها هاني شوي وجاي عندكم...
دخلات سعيدة وحبيبة الي ماحاساش براسها مزيانة...حاسة براسها ماهياش بغات تطرطق بغات تغوت...
سعيدة. : هادي فيها حوايج يوسف !! امتى حولوه هنا ؟!..
يلاه غادور جيهة حبيبة حتى تحل الباب وهو يدخل تا هزات حبيبة عينيها فيه وهي تشهق وايديها بداو يترعدو...كان هاشم وراه الي غمز سعيدة وشير ليها براسو تخرج...
سعيدة : هاني برا ابنتي...نشوف يوسف ونلحگ عليكم...
حبيبة"الصمت"
سعيدة : بنتي "بغات تحركها وهو ينطق بصوته الي فيقها ورجعها للواقع"
بشار : سعيدة...
حدرات راسها وخرجات...سد الباب وراها وهو يتقدم بكل بروود ناحيتها كانت جالسة فالفوطوي تما...مشا جاب كرسي وحطو مقابل ليها..ماهزاااتش راسها فيه كتفرك فصباعها كتحاول مترعدش كتحس بالخنقة كاتمة عليها نفس بمجرد انها معاه فنفس الغرفة وحدهم واخا وسط ناس..شفايفها كيترعدو وعينيها كترو ترماش...جلس فوق الكرسي وحط رجل فوق ركبتو لاخرى..مفرقهم كيحرك فديك رجل باهتزاز...بقى شحاال كيشوف فيها...ماهو طالع ليه د.م ماتعرفيه عادي...مدة وهو كايشووف فيها وهي بغات تسخف...كاتسناه ينطق والو واش نطق...حتى حك شنايفو بسنانو ضار لهيه كيشوف قبل مايخشي ايدو ويجبد تيليفون مشى نيشان لتسجيل اخر مكالمة كانت بينها وبينو من تيليفون "يوسف"...طلقها وحطها ليها فوق طابلة...قفزت فاش سمعات صوتها فداك تسجيل...بقى مطلوق الي حتى تختم ب كلمة "مريييييييض"...تحبس وعاود طلقو من جديد تا غمضات عينيها ماكرهاتش تقوليه صافي حبسو تا كمل تاني....
بشار : براكة ؟!..
حبيبة"الصمت"...
بشار"ربع ايديه وشاف فيها" : هضري بغيت نسمع صوتك..ردي على هضرتي باش نعرف معامن كنهضر...
حبيبة"غززات سنانها صوته مامحلاتوش وطريقتو ماحملاتهاش واخا الخوف..ماهزاتش فيه عينيها وتقووول.نطقات بصوت شبه مسموع" : سمعتو مكاين لاش تبقى تعاود فيه...
بشار : مزياان...مزياان..."كيحرك فراسو بثقل" و يا حبيبة..ملي عارفاني مريييض علاش لحتي راسك لهاد زوبية الكحلة...علاش قبلتي بواحد ماعارفة عليه من غير سمية وميساج فيه مبروك..ماجاش على بالك بداك الميساج ناااشف ياا حبيبة تگولي كاينة شي لعبة تما..والدعوة ماتعجبش...نسولو على هاد سيد...كون سولتي كون عرفتي هاد سيد را بصح مريض..."كيحرك فراسو"
حبيبة"عينيها فلارض" : انا فحالي فحال اي بنت قبلات تزوج زواج تقليدي..ماكانتش عارفة غايوقع ليا هاكا...
بشار : واخا خليني عليك انا بلاتي ونرجعو ليا...انا معاك بالخاااطر غير فهميني ونفهمك مزياااان..."صوته غير مزاد خشان ودعدع" گلتي تكرفصو عليك؟..ملي تكرفصو عليك هاد ناس اش مخليك جالسة معاهم...خليتك ديك الليلة ومشيت ما گلبتش...علاش بقيتي مزال معاهم ؟!..جاوبيني رضي ليا فضولي...ديريني غشيم وفهميني...
حبيبة"كتنهج ماكرهاتش تغوت وتقوليه شادين عليا شيكات وناوييين يدخلو بابا لحبس..غمضات عينيها بقلة حيلة وحلتهم كاتشوف لتحت لان باش تشوف فيه كاتخاف وتخلع من شوفاتو وتخنزيرتو وحتى وجهو مايرجعش ليها وجهو ديال ديك الليلة...زيرات على ايدها ونطقات" : يلاه جيت عروسة..الى رجعت لبابا فنهاري غادي تكتر عليا الهضرة..صبرت وماعندي ماندير من غير نصبر حيث لا رجعت لبابا فنهاري غايمشي فيها صحتو على قد الحال وانا بابا هو عينيا .."جاتها سخفة والبكية لدرجة كتهضر وشفايفها كيفلتو ليها..."...
بشار"مربع ايديه وكيسمع ليها..كيشوف كيفاش كترعد وهي كتهضر وكيهبط عينيه لايديها الي تفركو ولا حمرييين بكثرة ما فركتهم...كيشوف فيها.." : مشيتي على هضرة ناس واش يگولو...علاش هادشي مافكرتيش فيه ملي ماجاش هاد سيد شافك ماهضر معاك ماشفتيه حتى لنهار التكاتيبة...نسول على هاد سيد نسول على هاد ناااس اش ليهم واش عليهم..مزيانين خايبين..بنت بحالك باقيا صغيرة بزاف كملشي قرايتك ماشي تلوحي راسك لهاد زواج الي ماعندو ساس ولا راس !!...
حبيبة : حيث كنعرفوكم من العائلة..حيث مي عيدة وخالتي توريا گالت ليا غايتهلى فيك "نزلو دموعها يجرييييو" غايديرك فعينيه ويخليك تقراي ويديك معاه لهيه...و و "صوتها تقج مابقاتش قدرات تهضر"...
بشار"هز حجبانو ونطق بطنز" : يديك معاه لهيييه گاااع ؟...
حبيبة"الصمت"...
بشار : ماداكش معاه وماغايديكش معاه...نهار لول يا حبيبة ووقع هادشي "طرطق صباعو" نزيد فحالي هضرة ناس مانهزش ليها الهم وانا تكرفصت من تحت واحد مرييييض..."حط رجليه وتقابل معاها مزيااان تا وصلاتها ريحتو"... انا واحد مريييييض مرييييض فراسي...كنتي مكرفصة سيري ابنت الناس فحالك..الي درتو ليك جا من راسي المريض (كيضرب راسو بصباعو بجهد شي ضربات ديال الغدايد)...مقو"عض لسانو مابغاش يخسر الهضرة" مريييض فرييي..ماعندش جد مي المنطق...ديك ساعة هزي حوايجك يا بنت الناس وسيري...
حبيبة : ماكرهتش مااااكرهتش اهى اهى ماكرهتش اما مانبقااااش مع واحد مرييييييييض تكرفص عليا ومسخوووووووط مو اهى اهى...مسخوووط ومخاصم مع مو...مك ومارحمتيها وبغيتي ترحمني انا اخء...الله ياخذ فيك الحق الله ياخذ فيك الحق المريييييض....
حدرات راسها كاتبكيييييي حسات براسها غاتزيد تنهار وطيح تاني ولات كلها كتغزل...اما هو سمعها تا سمعها مزياااان...ورجع ربع ايديه....
بشار"صوت جد جد هااادئ... وخا را مسخوط دخلااات نيت" : غذا عندي شي غراض برا...نرجع ونفك شي مشاكيل هنا...ونفك معاك الجرة ونعطيك براتك....
يتبع...
التعليقات
لا توجد تعليقات بعد، كن أول من يعلق.