محتوى القصة
زكرياء كان فالطواليط كرشو قاصحة فيه القبط يلاه غايجيه التيسير ويتنفس تا رجعات ليه الخرية وناض وقف...
زكرياء : نعااااال تفووشك يا الحسنية نتي وغواتك...
مسح العرق من جبهتو ورجع جلس عرف را غي الحسنية شي مرات تاتجيها الحالة تقدر تبدا تغوت غا راسها بعد المرات بلا ماتفكر بشار...او اي سبب فحالتها...
سعيدة : ياربي سلامة...
"دارت ايديها فوق راسها..كاتشوف فالحسنية شادها بشار غي بايد وحدة وهي كاتركل...كاتهز تالسما وتحط ودور فراسها بواحد الهيستيريا عقلها بغا يخرج...عبد القادر فهاد اللحظة غير سمع الغوات خرج من البيت مخلوع تاهو...قربات كريمة الي غير بان ليها بشار كايجيب ليها الخلعة كاتولي غا تفتف طارت بجرا حدا عگوزتها....
حسنية"كتحرك فراسها ب لا وتغوت" : اباباا ببببببببباااااا اعععععععععععع..."كاتبغي تنقز طير عليه ودير داكشي الي مدارتش فديك الليلة والو ماقدراتش عليه شاد ليها ايديها بايد وحدة مزير عليهم تا بغا يقسمهم ليها وعينيه مخنزريين فيها"..
بشار : سكتي..."كاتغوت وهو كاينطق غا بشوي" سكتييي...
طارت عليه بغات تقمشو وهو يشد ليها ايديها بزوج زييير عليهم بايد وحدة وحط صبعو على فمو مخرج فيها عينيه...
بشار : شششش...
"نفس الشوفة نفس التسكيتة الي سكتها كأن الليلة تعاودت من بعد اقل من 17 سنة.."
شوية مابقاتش قدرات تزيد كلمة بقى غير راسها الي كايدور ب "لا" ودموعها دايزين واحد المنظر كايقطع ويضر فالخاطر بجه...عوجات فيه راسها تا بداو عينيها كايتغمضو ويتحلو..هز عينيه شاف فسعيدة وشير ليها بزربة تجي ماجات توصل عندها تا فشلو ليها رجليها وهي طيح على سعيدة مغيبة والاكفس من هادشي كاع حوايجها عمراتهم بالبول...
سعيدة : كريمة كرييييمة جيييبي كاس ديال الما ولا شي حاجة نرشها بيها...
كريمة "وقفات ورجعات جلسات" : هااا ..
سعيدة"غوتات بجهد تا قفزات جات تجري" : وااا طلقيييني جيبي ليها اش گلت ليك خفي راسك...
ضارت عند حسنية الي تكاتها عليها وبشار واقف عند راسهم خاشي ايديه فجيابو كيشوف فيها بواحد شوفة فشكااااال...جاي على حاجة خرجت ليه حاجة والمصائب تاتي تباعا...عينيه ماحيدهمش من عليهم تا جات كريمة قربات حداه قلبها بغى يسكت كايخلعها هو كلو...عطات الكاس ل سعيدة بدات ترش عليها الما ودوز على وجهها..
بشار"حجبانو مجموعين مغوبشين بجهد..هبط عينيه لارض بان ليه رجليها من سروال لابساه فالموف ولا كلو غامق بالفزوگية ديال البول الي بقى هابط تا مشى فالارض...بقى كيشوووف فالارض وفرجليها..ماعاطيش رد فعل باش تعرفيهةاش كاين اش عارف علاش كاتشوفو وتغوت وتخلع علااااش دار ليها هاكاك ؟ علاش كنشوفو غير وجهة نظرها هي كيفاش كاتشوفو واش دار ليها...ولكن وجهة نظرو هو ؟!...اش وقع ديك الليلة اش دار فيها هو لهاد البكمة الي لا حول لها ولا قوة...
ع.القادر. : اش طرا ليها تاني يا ؟!..
سعيدة"هزات عينيها ف بشار ورجعات هبطاتو ف الحسنية الي بدات كاتحل عينيها وتشعبط فسعيدة كاترعد" : تاني نفس الحالة...ياعوذ بالله من الشيطان الرجيم...بسم الله عليك ابنتي..
ع.القادر"شاف بشار واقف وكيشوف بواحد شوفة غريبة خاشي ايديه فجيابو وكيشوف والفك ديالو كايتحرك" : امتى جيتي..
بشار"الصمت"..
ع.القادر"ضرب ايديه اخماس اسداس" : ياعوذ بالله...زيد دخل زيد هما يعرفو اش يديرو ليها زيد...
بشار"بقى كايشووووف كاااع ماداها فهضرة جدو بقاو عينيه على "الحسنية" وكيشوف سعيدة كيفاش خشاتها فحضنها كطبطب عليها ولاخرى كاتفيبرييي بالخلعة..صهطات البكا تصرط ليها كايتسمع غير تنخصيصات صدرها..عايشة لحظة من الرعب وهو ولا رحمها واقف ليها عند راسها ماعتقهاش كايشوف فيها كاتغزل بالخلعة ولو باقي شي بول كون عاودت بالتو كتزير على بيجامة سعيدة...جا حسام تاهو وزكرياء الي خارج كاينهج وقف حدا حسام الي مافهمو والو وعيدة جالسة وطل مابان ليها تاحاجة شوف عندها قليل...
سعيدة"هزات عينيها ف بشار" : سير اولدي دخل مع سيدي...
عض شنايفو بجنب مكرررره كاره حاقد على الزمر كامل..هز راسو وهو يمشي دخل وسطهم تا كحاز زكرياء بجهد تعنكش فحسام..ماضارش بشار هنا ولا هنا نيشان لصالون وهو يوقف ضار جيهة جدو الي بقى واقف...
بشار : ماغاديش نبقى هنا ؟؟..
استغفر عبد القادر مولاه وضار وصا كنيناتو يديوها من بتم...هزوها بمساعدة حسام...تبع بشار لصالون لقاه جالس مفرق رجليه بجلسة خشينة..داير ايدو على لحيتو وباقي على نفس الشوفة...هز عينيه فجدو وشير ليه يجلس..
ع.القادر"جلس مقابل ليه كايقاد فطاقيتو ويحك فراسو" : خبار الخير !!..ملي نابيتي عليا فالتيليفون ماعرفت اش غراضك..بغيت فغراض ما غراض..ياك شي باس مكاين ؟!..نتا عندك هاد المجيان على غفلة بلا صواب ولا شان لينا...يبان ليا راني جدك ولا مافخباري شاي (زعما راني جدك الي جاي تا سلام ماسلمتيه عليا لدابا ملي غبرتي)...
بشار"ماتسوقش لهضرتو دخلت من وذن وخرجت من وذن تانية" : الي ندوي معاك فيه يبقى هنا
"ضار شاف بنص عيني مخنزر جيهة لباب ورجع شاف جيهتو لكن عينيه فلارض ونطق بصوت منخفض"...
بشار"جاه من لاخر" : عائلة البنت الي زوجتوها ليا عندك مع باها شي كريدي ؟
ع.القادر"جمع حجبانو" : ايه كريدي قدييم...
بشار : شحال ؟!
ع.القادر : فايت المية مليون...
بشار"هز حاجبو" : الشيكات عندك ؟!
ع.ااقادر : اييه عندي..
بشار : بغيتهم يكونو عندي..
كان كايهضر مع جدو فالصالون الي بعيييد كايهضرو...
ع.القادر : ناوي تخلصهم نتا ؟!...
بشار : بحال داكشي...
ع.القادر : وليني را فلوس مايجمعها غالفم...
بشار"هز فيه عينيه" : ونتا صبرتي عليهم حتى نويتي تخطب البنت وتلوط لهضرة لباها ؟!...
ع.القادر. : ماهكاكش غا جداك عشقتها ليك وحطت عليها العين وباها من جيهة تريكة جداك عيدة وناس الخير...گلنا نتساهلو معاه حگ را غايولي نسيبنا ديك ساعات..هاو گلت ليه هوكاك باش لا بغى نتناسبو نديرو بالوجه...
بشار : درتي بالوجه ملي مشيتي بغيتي فلوسك دقة وحدة..علاش ماعطيتيهش مهلة يجمع فيها ؟..درتي ليه العصا فرويدة شوية عطيتيه الخاطر !! ماشي تنوفيق هذاك الرحماني ؟!..
ع.القادر"غوبش فيه" : ولاكون راك ساير تعاير فينا ولا وذنيا طوبو...
بشار"تكا لور وربع ايديه كيشوووف فيه" : جيت لعندك بغيت الشيكات..فلوسك بالكلمة يكونو عندك حسب راسك كاتسالني انا...ماعنديش مع تخلويض ولا نخوي بيك..عطيني الشيكات وفلوسك يكونو عندك بحسب شحاال وجد نعطيه ليك ونقطع شيك...نعاود نزير معاك الطرح وهادشي هنا يبقى بيناتنا عارفك اولد رحماني بير غارق مايخرج من وسط جوج ديال ناس...بنت المشاوري ماتشمش ريحة الهضرة..بيني وبينك...
ع.القادر : لا مانصيبش نمد ليك شيكات...
بشار"هز حاجبو وعينيه تبدل فيهم اللون" : مكنعاودش الهضرة...لا تقويش...
ع.القادر : لا بشار مانعطيكش شيكات...
فهاد اللحظة.بدلو لحسنية وطلعاتها سعيدة الفووق لعندها لبيت داتها لدوش هو اللول غسلات ليها حالتها وعطاتها حوايج من عند اشراق الي غير سمعات حس بشار جا ولاو فيها عشرين يغزلو كاتسنى امتى يعيط ليها...بدلات للحسنية وعيطات لمنار بنتها هي وريهان...
سعيدة : سيرو معاها لبرا تاتوصل لدارها ورجعو...
حسنية"الصمت"
سعيدة"طبطبت عليها" : سيري بنتي ماتخافيش مكاينش هو كاع...
حركات راسها ب لا بواحد طريقة مبينة انها كاتموووت بالخلعة...تنهدات سعيدة وهي تقبط ليها ايدها تخشات جنبها وهي تديها لبيت البنات وصاتهم يبقاو معاها حتى تأكد ان بشار مشى ونيت ولادها لا جاو ماتبانش ليهم راها جاتها الحالة ثاني...خرجات من البيت وهي تنزل لتحت مشات حدا عيدة الي جالسة وحاطة ايد على ايد وكتشوف فنقطة بعييييدة...
سعيدة"شافت فيها" : مالك الالة...
عيدة"الصمت"...
سعيدة"حطات ايدها على كتف عيدة" : لالة !!..
عيدة : علاش ماباغي يجي يسلم عليا...
سعيدة : نتي ماعارفاهش !؟..
عيدة : وانا نيتي كانت زينة فين نويت ليه الشينة...هذا مسوايا الي باغياه يبرك هنا حدايا ونشوفو بالكثرة ماشي بالشوق...گاع هذا شدان فالخاطر من جيهتي !...
سعيدة"حدرت راسها ماعرفات ماتقول...حتى هزات راسها فور ماشافت هاشم داخل من برا دورات وجهها لهيه ماحملاتش تشوفو وتاهو ماعاتبهاش عاطيها الحق حيث عارفها غاتقلق ومقلقة منو...يلاه غادي طالع حتى بان ليه بشار من بعيد كايهضر مع جدو بقى كايشوووف فيه تا بغى يمشي يسلم عليه وهو يتراجع وحدر راسو وطلع لفوق...
بقاو هاكاك جالسين فقاع دار كريمة فالكوزينة ردات الغذا يوجد وعينيها على الخبز الي كايطيب على برا فالخباز حيث الكوزينة عندها باب كيخرج لبرا فين كاين الخباز...تا شوي خرج بشار قاطب حجبانو كيف العادة ماشافش كاااع جيهة جداه الي تبعات ليه العين وخاطرها تضر من جيهتو...ناضت سعيدة خرجات لعندو حيث عيط ليها قبل بالي جاي تا على قبلها...تا وصلات عندو فين كان واقف فالسيارة كان بغى يشعل الگارو وشافها ولا حيدو...
سعيدة : هاني ولدي...
بشار"شير بعينيه ناحية لداخل"...
سعيدة"فهماتو قصد الحسنية" : راها لفوق يلاه تهدنت.."تنهدات" هادشي ديالها طول بزاااف وحالتها واخا دينا عليها وليني را ولادها كبرو وكيسولو ا بشار...دير حد لهادشي الله يرضي عليك..
بشار"حرك راسو وايدو كادوز على لحيتو الكثيفة" : ندييرو حد جاي نيت ندير الحدود لبشري...نجلس لملتهم نيت لارض..."كان كيشوف بعييييد رجع عاود شاف فيها" فيك مايمشي معايا فين گلت ليك ؟!..
سعيدة"جاها ضحك" : هههههه سير نتا مالك حشمان...
بشار : ياا سعيدة الصواب عندي مشَير...ماصبتش كيفاش نگوليه لا..مرگ جد مي..عارفاني النفس ديقة عندي ماجاتش ندور فالسيد مدار معايا المزيان..مانجمش نتحكم ف هضرتي...كوني معايا وعاونيني كايبقاو ناس ماشفت منهم عيب...جي معايا...
سعيدة"طبطبات عليه" : غااا سير انا عارفاااك كاتبقى ساكت ومغاتجاوبش وتاهما را ناس دراوش بزاااف ماشي نوع الي يخليك تعصب ولا تخرج شي عيب من فمك...دير غير الواجب ديالك وصافي...ولا خايف يشدوك تبات ؟!..
بشار"كايحك فصبعو بسنانو وكيسمع ليها" : عندي جلسة غذا مايمكنش نبات...
سعيدة : يكون خير اولدي يكون خير...
بشار"دوز على شعرو بايدو ورجع شاف فيها" : اش كايديو فهاد العراضات ؟!..ماعارفش هاد زعت اشمن صواب فيه بالضبط...
سعيدة : دي زوج قوالب سكار و الحنة وتمر "شافتو كيشوف فيها ببرود عارفاه متيعرفش يتمازح" ههههههههههه...هانتا سير لمخبزة الي مشيتي ليها ديك المرة..خوذ شي حليوة ديال لاكريم...وخوذ مملحات...
بشار : مملحات ؟!..
سعيدة : اش كيگولو ليهم بالفرنسية ولا المانية..صبر
"جبدات تيليفونها ووراتهم ليه من غوغل ترجمهم بالالمانية عرف اش قصدات وحرك ليها راسو..وراتو اش يدير وتسالم معاها هز عينيه ف هاشم الي بان ليه جاي وهو يسلم عليها وركب فالسيارة ومشى واخا ماحاملش هاد العراضة وحشم منهم فنفس الوقت...
وصلات العشية ف الرميلة كانو التجهيزات على قدم وساق حيث جاي عندهم النسيب الي مكيعرفو عليه والو حاليا...حبيبة الي كانت واقفة ومربعة ايديها وكتشوف ف ناديا كاتوجد ف صالاد الملكية الي معروفة بيها والي كاتعطيها الخااطر باش كاتحطها مبهرة للعين قبل المعدة...
ناديا : داك الكروفيت غويال فين درتيه...
رقية : والله ماعرفت سولي حبيبة...حبيبة بنتي فين كروفيت..
حبيبة"الصمت..ماهياااش هنا عبنيها سااارحين فنقطة مبهمة"
ناديا : ويل شيطان..حبيبة..."جهدات صوتها" حبيباااا...
حبيبة"قفزات شادة على صدرها" : هااا..ماما مالك..
ناديا"سندات ايدها على بوطاجي وحطات ايد على خصرها" : ماماليش قضينا الي يتقضا ونتي هي مكونة..مالك ؟!..
حبيبة : ماماليش هي سهيت...
ناديا : السهو من شيطان..نعلي شيطان وعطيني طبسيل كروفيت غويال...
حبيبة"تنهدات وهي دور وراها هزات طبسيل ومداتو ليها ومعاه طبسيل فيه سوريمي وجبن borrata باش تزوق بيهم صالاد...ووقفات حداهم كاتشوف فيهم كايقادو..طنجية صايبها مولاي حفيظ على ايدو وبكرييي خلاها فوق الفاخر ومشى يقضي شغالو بيدما يقرب الحال...بقات معاهم حتى قادو داكشي وهي تخرج ناديا تبدل حوايجها ورسلاتها حتى هي تبدل..طلعات بغير خاطر وعقلها كلو معاه واش غايدير بكلامو ؟!..علاش ماهضرش معاها لحد ساعة يقوليها اش غايدير ..ماعارفاش هي طبعو كيف داير معندوش مع كثرة الهضرة يهضر معاك بسوايع ويبلغك بليديطاي...ماعارفاش طبعو بالمرة...حلات الماريو ووقع اختيارها على تريكو قطن بالكمايم كحل فيه كتابة بيضة عندو القب وطويل تحت المؤخرة وسروالو قطن حتى هو سليم لاصق مع سيقانها. فالكحل...لبساتهم ومشات لكوافوز جلسات قدامو مشطات شعرها الي كان يلاه نشف ضفراتو نيت باش صباح فلافاك طلقو ويكون كيرلي شوي من تحت...ذهنات وجهها بمرطب ورطبات شفايفها...رشات شوي سبراي معطر بنكهة الفانيل...ذهنات ايديها بكريم بنكهة الياسمين والعسل...وحطات ايديها بقات كتفكر وتنهد...كاتسنى منو خبر يهنيها يخليها ترتاح...كاين نسبة كبييييرة عدم الثقة من جيهتو مايمكنش ثيق فيه لكن ثقتها حاطاها ف سعيدة الي عطاتها امل وكلمة...سمعات العياط وهي تنوض جبدات صندالة صبع فيها سميطة رقييقة مذهبة وفيها حجيرات..لبساتها وسدات باب بيتها ونزلات هازة تيليفونها فايدها...هبطات لقات امها لابسة فراشة بكمايم طوال ودايرة شالها على كتافها..
حبيبة : فين بابا "عنقات خوها معتز حداها"...
ناديا"شافت فيها" : هاهو جاي مشى لكتبية بيصلس تم ويجي من تم...ونتي ماديري والو فوجهك ؟
حبيبة"حطات ايدها على وجهها" : اش بندير ؟ درت هي كريم ديالي...
رقية : انوضي البالا ديري شوية تالكحل ولا شي عكير خفيف بايجي راجلك ونتي جالسة فحال الى جايك ملك الم.وت...
حبيبة"هزات كتافها" : اا مافياش ادادا هي خليني...
ناديا"خنزرات فيها" : نوصي ديري شي حاجة فوجهك...يا ويلي.
حبيبة"زفرات ماحاملاش تصايب ليه هو واخا يكون الي كان ماباغياش تبين ليه انها مزينة ليه...ولا موجدة ليه حيث واخا يعاونها را ماتنساش ليه اش دار فيها...ناضت كتصوط وهي طالعة فدروج صونا تيليفونها مكالمة من انسطاغرام كاتشوف لقات "جاد" كيصوني ليها ماجاوباتوش عاود صونا وماجاوباتش وهو يقطع ورسل ليها ميساج....
جاد : حبيبة ملي تكوني مسالية ضروري ماتجاوبيني بغيت نهضر معاك..انا غذا غانكون فالمغرب وبغيت ندير وقيت ونشوفك...(الهضرة بالانجليزية)...
تجاهلت رسالتو وحيدات نوتيف ل انسطا...دخلات لبيتها كتسووط ماحاملاش دير شي حاجة...ماعرفت مادير وهي تحدر راسها وخرجات لبيت ايوب دقات عليه كان يلاه خارج من دوش ولابس قبية باردة وسروالها اونسومبل سورفيت...
ايوب : شكووون ؟!..
حبيبة : انا ايوب بغيتك...
ايوب : تبغيك لارض..سيري بعدي مني...
حبيبة : ومحتاجاك عافاك بغيتك دير ليا ميكاب نو ميكاب...
ايوب : خرا نو خرا نوضي تخراي مداير ليك تا خرا سيري لبيتك تخراي وديري راسك خرا نو خرا...ملي البارح تنعيط ليك مابيتي تجاوبي ميكتي عليا ودابا جايا بيتي حاجتك ؟..سيري طخراي...
حبيبة : غادير ليا ميكاب نو ميكاب ولا نتعصب عليك ا ايوب را بيتي تقلب عليا...
ايوب : خرااا دخلي ندير ليك الخرا يدير ليك ايدك فعنقك...يعتيك قاتا...دخلي...
حلات الباب وهي تدخل هزات فيه عينيها لقاتو داير ايديه على نصو وتايخنزر فيها...شير ليها فين تجلس وجاب واحد لاتخوس فيها بعض مستحضرات التجميل...هز ليها وجهها بجهد...
حبيبة : ابيتي طير ليا راسي الزمر...
ايوب : بتسدي عليا فمك ولا نطير ليك تا جنابك...سكتي يسكت ليك الحس...
حبيبة"الصمت"...
ايوب : هاد ميكاب نو خرا لمن بيتي ديريه...
حبيبة"ربعاات ايديها ماحاملاش الوضع" : ماما الي باتني نديرو..
ايوب"بدا يدير ليها ف فوندايشن kiko داير فحال بوماد فاش كايتحط عالبشرة كايمشي مع اللون كايتادابطا معاها..دار ليها ايلاينر فجنب شفارها و لخدودها مورد شوي" : هانتي درت ليك هي هاد blush..
"شاف جيهة واحد الباكية صغر فيها عينيه شاف فحبيبة وشاف فيها وهو يحدر كتافو وراسو وتم غادي ويسب..هز واحد الگلوص يلاه كيف وصلو باقي جديد..وراه ليها"...
ايوب : هذا شفتيه ؟ يلاه كي وصل من rare beauty...بنديرو ليك هي حيث جاي راجلك وبايشوفو في فمك..الى مدار والو ماشافش فيك بنرجعو لديك سلينيا قوميز ديرو فخرزتها..."شاف فيها مخنزرة فيه" بتسكتي حيث انا درت ليك خرا نو خرا...تانا ميكاب نو ميكاب (ميكاب خفيف بزااااف"...
نزلات ديريكت لعندهم لقات باها جا...سلمات عليه وجلسات حتى صونا تيليفونها هبطات عينيها وهي تبان ليها نمرة ماعرفاتهاش ويمكن نساتها وماسجلاتهاش...تا كانت بغات دير بناقص ماتجاوبش وهي ترد...
حبيبة : الو..!!!
بمجرد ما نطق الصوت ديالو باقي نفس الفزعة كاتجيها تا تزنگت كثر من المورد الي كانت دايرة...وهي تجاوبو بصوت مشحرج كان كايسول عليها واش لباس ؟...المقدمة الي ولابد منها عاد مشى للخطوة الموالية والي هي بلي راه وصل باش يحلو ليه الباب...قطعات معاه وهي تشوف جيهة باباها وكلها توثر وخوف..
حبيبة : بابا...راه وصل...
م.حفيظ : ايوى لا وصل بتمشي تحلي عليه الباب وتستقبليه وتسلمي عليه ودخليه لصالون وحنا نقومو بالواجب ابابا...
حكات راسها بحرج وخجل وتوثر كلشي مجموع...ومشات بخطوات بطيييئة ناحية الباب الي استغرقت دقيقة وزيادة وهي واقفة وراه بتردد تا خذات نفس عمييييق وهي تحل الباب مع حلاتو بان ليها عاطي بالضهر وهاز فايديه مياكي وساشيات كيف العادة فإيد....وساشية هازها فايد فيها زوج كراطن كبار...غير سمع الباب تحل وهو يدور وعلى وجهو البروود..شاف فيها وحرك ليها راسو وتاهي كذلك...تبسمات شبه ابتسامة وعينيها فلارض جامعة حجبانها الكثاف وحناكها سخنووو...حلات ليه الباب مزيااان تحدر نصو تا نزل فدرجة ودخل عاد تقاد فالوقفة...ماعرف اش يدير واش يدخل ولا يبقى واقف ولا يهضر ...تالف لاول مرة...
ريحة السجائر ممزوجة بريحة بارفانو الخفيفة وبلباسو المعتاد...عينيها فلارض شافت بروتكان الاسود الي كان لابس..طالعة بعينيها تال ساشيات الي هاز عاد نتابهت وهي تمد ايدها ونطقات بصوت منخفض...
حبيبة : عطيني نهز عليك...
بشار"ماسمعهاش اش قالت" : نعام .؟!..
حبيبة"كحبت باش تنضف صوتها وزادت علات نبرة الصوت" : عطيني احم..اعطيني نهز عليك هادشي...
مد ليها دوك ساشيات عطاها وحدة والباقي تكلف بيه حيث كثار ميمكنش تهزهم كلهم...حركات ليه راسها ونطقات بكلمة وحدة" دخل"...سبقاتوو خلا مسافة قليلة وهو يتبعها تالقى الحاج واقف كايتسناه بابتسامة بشوشة وناديا حداه تاهي دايرة شالها...قربات لعندو شدات من عندو الساشيات...وقرب باس ليها راسها تبسمات ليه ورحبات بيه قرب لعند الحاج تاهو باس ليه راسو وصافي باش يقول شي كلمة صواب مكايناش مدعوق فهاد الامور ودغيا كيتعصب حيث كايتلف وقبل مايجي شرب كينة مهدئ باش يبقى تابت ومطلعش ليه نقشة على والو...ابسط الامور الى دعقاتو او عصباتو ممكن يدير شي ردود الفعل غير متوقعة !!!...
م.حفيظ : مرحبااا ولدي نهار غليظ مشحم هذا ههههه...
بدون اجابة تبعو تال عند الباب تحنى جالس قفازي حتى حيد البروتكان وقادو فجنب بتنظيم...ودخل لداخل ريح فالبلاصة فين كان ريح ديك المرة فاش جاتو النوبة...حك ورا شعرو الكثيف وبشبه ابتسامة شاف ف الحاج وحرك راسو وقال...
بشار : شكرا...
م.حفيظ : شي كويس اتاي !!
بشار"نيشان بلا مايحس" : مكنشربوش...
نسا راسو وجاوب هاكا...عاد وعا على راسو اش قال وهو يعاود نطق مقاد هضرتو مزوقها...
بشار : واخا مكنشربوش ماشي مشكيل نشربو من عندك...
م.حفيظ : ولواه هي گول اش بيتي نوجدوه..ياكما ...
حبيبة"داخلة عندهم وقربات لباها ونطقات بشوية حدا وذنيه" : كايشرب قهوة كحلة بلا سكر...
قالتها بشوية لكن باها فضحها وقالها بالعلالي خلا عينيها وساعو ورجعو شافو ف لا شيء...
م.حفيظ : قهوة كحلة بلا سكار...وايلي هي لولة اولدي...ياك بعدا صحة لباس كي بقيتي شوي اولدي ؟!..
بشار"حرك راسو" : لباس لباس...
م.حفيظ : اللهم لك الحمد..الله يجيب الشيفاء اولدي...
حرك ليه راسو وهو يخرج مولاي حفيظ لعندهم...تبعاتو حبيبة اما هو حس بالديق بدا يدوز على شعرو وعنقو...باغي امتى يتعشا ويخرج يمشي عقلو اصلا مدهي وغااايب مع المحاكمة الي كاينة غذا مع تسعود صباح...اش غايوقع واش غايكونو الامور منصبة للصالح ديالو ولا غليكون شي تغييير...حاس بالي غايكون كلشي فصالح ديالو وحاس براحة انه غايقدر ياخذ خوه من ورا الحكم فاش يطلب الوصاية ويتكفل بيه..واخا ممعولش ومحيد شهادة حبيبة من الامر حيث مغاتقدرش...صونا تيليفونو وهو يجبدو جاوب على الاتصال يمكن باغي فاش يتلهى بقى كايهضر مع شي حد بالالمانية حتى كمل لقى حبيبة هازة بلاطو فيه فنجان قهوة كحلة ومعاه قرعة صغيرة ديال سيدي علي...حطاتو ليه وهو يتبعها باها هاز فراقة ديال فاكية مشكلة غير نواع الفخمة...حطو وجلس مقابل ليه حط مخدة تحت باطو وتكى نصف جلسة فحال الى مريح ف حصيرة مرتاح من وجود "بشار"...
م.حفيظ : مرحبا ولدي مرحبااا...هي عول اولدي بيتي تبات عندنا...
بشار"هز عينيه بزربة داكشي الي ماباغيش هو طرا" : لا الحاج منصيبش عندي واحد الغراض غذا فالصباح بكري..مانصيبش نبات...
حبيبة"قلبها بدا يضرررررب بغات باها يسكت والو"..
بشار"شاف فساعتو" : دابا ومزير عندي الوقت..ماگديت نردها فوجهك الحاج..ماشي مشكيل عذرني...
م.حفيظ : وتاهنا ولدي داركم.."شاف فحبيبة" هضري بنتي مع راجلك ولا بيتيه يمشي وتخليه هههه..
حبيبة يلاه جات تهضر تلجم ليها فمها ماعرفات باش تجاوبو بان على وجهها الخجل والتوثر...صرطات ريقها وحلات فمها يلاه بغات تهضر حيث بصح ماعرفاتش اش تقول حتى نطق هو كيف العادة. وعلى غفلة..نيشان دقة وحدة لا سلام لا كلام لا تمهيد...
بشار"عينيه فتيليفونو كايجاوب على واحد الايمايل مستعجل" : مغاديش تبات هنا... غادي تمشي معايا لدار...
"ماغاديش تبات هنا غادي تمشي معايا لدار"...
جملة خلاتها توسع عينيها وينشف ليها الريق...بقات مصدومة فمها تلجم..اما باها ابتاسم وحرك راسو كايضحك...
م.حفيظ : والو مابيتي تبات عندنا.ههههه اسيدي ماشي مشكيل دي مرتك معاك ههههه...
حبيبة"بقات مبلوكية كاتشوف فيه هو الي كان كايهضر بطريقة عادية كأنه غاتمشي معاه بلا هضرة والحياة عادية بيناتهم...يلاه غايهضر مولاي حفيظ حتى وقفات ناديا عند الباب كاتبتاسم وتزيد ترحب ب بشار عندهم شافت فمولاي حفيظ وقالت..
ناديا : الحاج اجي واحد دقيقة...
م.حفيظ : نجي المدام نجي عند مولات العش هههه...
بشار هز راسو فيه وشاف جيهة ناديا الي مبتاسمة فوجه راجلها ورجع حدر راسو كايشوف فتيليفونو حتى حس بالي باقي شي. حد واقف هز عينيه وهي تبان ليه باقيا واقفة مافاهماش اش قال واش بصح تمشي معاه لدار ؟..قلبها بغى يسكت..
بشار"شير بعينيه لسداري المقابل ليه" : جلسي تما نهضر معاك..
حبيبة"بقات كاتشوف فيه شوية وهي دور وجلسات ماقبل ليه" : مافهمتش كيفاش نمشي معاك لدار ؟!...
بشار"جمع حجبانو كايشوف فوجهها الي مشا منو اللون" : كي سمعتي..
حبيبة"بلا ماتشعر عاود وسعات فيه عينيها" : من نيتك ؟!..
بشار"هز حاجبو..ومد صبعو نقر بيه فوق طابلة" : شريييفة...الجهد ديال تفلية والضحك خليناه لبراهش..زگي معايا عقلك ووزني..اشنو بغيتي تگولي لباك لا مشيت انا فحالي ؟!...ياك گلتي داركم ماعارفين والو ؟!...ياك وصيتك تسمعي مني وتبعي هضرتي..مسالي انا لشحيط فشوشك ؟!..زيري معايا الطرح الله يرحم باك...(كايحاول يهضر بصوت منخفض لكن تزعزيعة والبحة فصوته مكتعاونش)..
حبيبة"سكتات حيث بصح اش غاتقوليه الى مشا تاني..وهو فحالة غايقولو ليها خليتيه وهادشي ماكيعجبش والشك يتسلل.."
بشار : تنغمتي هضرتي ولا نزيد نوسع الخاطر معاك ؟!..
حبيبة"بتردد وخوف" : مابغيتش نمشي معاك لدار..غذا قارية وبعيدة عليا لافاك بزاف...مانقدرش...
بشار"حد عينيه فتليفونو ونطق ببرود" : ماتمشيش...
قاطع هضرتهم دخول ايوب الي بدل عليه ونزل باش يسلم عليه..جاي وحادر راسو تحلفي عليه ماشي ايوبينو...وقف عندو وهو يمد ايديه...
ايوب : خويا بشار مرحبا بيك عندنا...
حبيبة"باقي فيها الخلعة ديال تمشي معاه لدار ماداتها كاع ف ايوب الي هز فيه بشار عينيه ومد ليه ايدو سلم عليه"
ايوب : انا ايوب ولد عم حبيبة وخوها فنفس الوقت...
بشار"حرك راسو"..
ايوب"الدعقة والخلعة خلاتو يهضر بلا عقل..بغى يخرج لقا راسو كايهضر" : تشرب شي حاجة تاكل شي حاجة...
بشار"هز فيه راسو بجهد وهو يرجع ايوب بلور" : لا لا..شكرا..
ايوب : مرحبا مرحبا...هي..
حبيبة"قاطعاتو عاد فاقت ليه حيث كثر الهضرة" : ايوووب..تكلم لبابا...
ايوب : ايييه ماقلتي عيب...
حدر راسو وضار دورة وهو يدير فييييييو طار من حداهم...يلاه ناضت وقفات باش تمشي لكوزينة حتى وقفها ب صوته...
بشار : نخرج من هنا تحركي معايا شي ساعة هكاك ورجعي...غذا مبرزط مانضنش عندي شي وقت نرجع نهضر معاك لا فوت غذا..
حبيبة"فهمات ان خاص يهضر معاها على مشكيل باها حركات راسها واخا خايفة منو وخايفة تنفارد هي وياه فشي بلاصة لكن الامر متعلق ب باها فخاصها تعض فالنفس..تنهدات وهي تحرك راسها حيث شافتو وحسات بيه غايعاونها والي زاد اكد هو انه بلا مقابل" : واخا...
مزاد شمعاها كلمة خرجات من صالون نيشان لكوزينة تعاونهم...دخل مولاي حفيظ من زنقة كان موصي على طنجية فالفارناتشي...غسل ايديه ودخل لصالون لقاه جالس وحدو شاد تيليفون بايد وايد فوق ركبتو كاينقر بصباعها على ركبتو...رمى سلام الله وبادلو تاهو سلام...جلس مقابل ليه حتى حنحن وفتح معاه الموضوع...
م.حفيظ : اش هادشي سمعنا ولدي نتا والواليدة ديالك..
بشار"هز فيه عينيه" : مشاكيل بسباب الاخ ديالي..
م.حفيظ : ايه وليني واش لهاد درجة !!..انا مانكرش اولدي يوسف ماشي ديال تكرفيص لهيه والى كان فرصة ليه تهلى فيه نتا وبايمشي معاك لديك البلاد بتوفر ليه كل وسائل الراحة وحسن ليه كاااع بايعيش مخير...(عجبات بشار هاد الهضرة حس براااحة ان شي حد كايفكر تفكيرو من ناحية خوه)..هي هو وكان تفكو هادشي حبيا اولدي بايكون حسن..من احسن بلاش مادخلو راسكم فالمحاكم وخليوها بيناتكم مايخرج هادشي لبراني...وهاديك را مك اولدي...
بشار"فاش نطق اخر جملة جاه لنقطة دياال الاعصاب هي هادي..طفى تيليفونو..وهو يكحاز لور وربع ايديه ونطق" : الحاج..الواليدة عندي شوية صعيبة..مكاتعرفش المفاهمة.ولو نگوليها ندي معايا يوسف دير ليا العصا فالرويدة وتخرج العجب "غمزو بحنكو كايحك فلحيتو محاول يبقى مكالمي" راك عارف تفكير ناس العروبية شوية كايسبقو العيب...
م.حفيظ : ايييه توريني فيهم ههههه...
بشار : الاخ ديالي مرض بزااف لواحد درجة بسباب الاهمال والى زاد كثر من هادشي يضيع وضيع ليه حياتو..كان ولابد نرفع دعوة باش نگد نطلب القانون يخليني نتكفل بيه...جهدي كاامل دايرو باش ماتقيسهاش هي شي حاجة ديال العيب ومابغيتش نديه ليها بلا موجب شرع...الواليدة كايعجبها تفشش نديرو ليها الخاطر الحاج...كاتبقى ميمتي وانا ماعليا نتبع القانون..(رجع ربع ايديه) تأكد الحاج نهار نحس شعرة قاست الواليدة نرجع لور..
م.حفيظ"حرك راسو" : اش نگوليك الله يهدي والله يهدي بيناتكم..
مالقى مولاي الحفيظ اش يقول...يمكن ماعارفش شنو الخبايا حدو نصحو بالتي هي احسن وصافي...وكايبقى هادشي شغل بين بشار ومو..وخا جاتهم فشكل انه يدعي مو لكن ملي شرح ليه بشار وشرحات ليه حبيبة قبل تفهم الامر وان القانون هاكا داير...
شوية دخلات حبيبة هازا بلاطو فيه كيسان ديال الما والمونادا...ستفات كلشي فطابلة وجابت طباسل ستفاتهم تا تبعاتها رقية تاهي هازة السرابت الي تابعين لطباسل حيث حطو طقم ديال صالاد بين الابيض وذهبي...شافت فيه رقية وهي حادرة راسها...
رقية : ولدي كي بقيتي شوية ؟!
بشار"تصدم نسا راها كانت ديك المرة فاش طاح حدو قال" : شوية...
رقية : الحمد لله الله يزيد فراحتك اولدي...
شي حوايج كايدخل لهاد دار كايعيشهم فشي شكل الاهتمام السؤال داكشي الي هو ماعارفوش او مفتاقدو كايعيشو معاهم..عدم المفاهمة الي كايلقى من دارهم بالخصوص مو لقى عكسها مع مولاي الحفيظ فاش شرح ليه مشكيل ديالو مع توريا...ممكن اي حد فبلاصتو يخاف على بنتو منو حيث مادارش الخير فمو مغايديروش فبنتو..او المعنى "مداعي مع مو وبنتي غاتلقى فيه الخير"...لقى عكس اش حاجة عاشها وولفها وكبر عليها...ولقى شي حوايج مكيعرفش ليهم...الدفء الاسري لقاه عند هاد ناس...
جابت حبيبة طاس ديال نحاس وفوطة فجنب دراعها..عينيه فلارض مكتشوفش فيه ومكتقدرش تشوف فيه والجو كلو بالنسبة ليها توثر وخوف...قربات عنظو وهي تمد ليه طاس شاف فيها وشاف فطاس...شحااال بينو وبين هاد قضية طاس من الي كان فرحامنة قبل مايخرج منها...حس بشي عادات كايرجعو ليه وهو فالمغرب ومع هاد ناس...حرك ليها راسو ومد ايديه خوات عليه ما دااافي وعطاتو الفوطة...ماعرف اش يقول وكيف العادة الكلمة المنقذة هي...
بشار : شكرا...
شوي وهما يتمو داخلين خوت حبيبة الي مگيدهم مولاي حفيظ كايضحك وقربهم ليه باش يسلمو عليه من الادب وصواب...
م.حفيظ : يلاه بابا سلمو على عمي بشار...
معتز"مد ليه ايدو سلم عليه" : سلام عمي بشار..انا معتز "كايلسلس بلسانو" خو حبيبة...
بشار"باس ليه جبينو" : مشرفين ابا معتز...
وردة"مدات ليه ايدها وقربات عندو باستو فحنكو تا هز حاجبو" : انا وردة حت (اخت) حبيبة...(ايوب هز راسو كايحسب فترية خايفها لا تغلط فشي كلمة بسباب الحاء بلاصة الخاء...نغز حبيبة وربع ايده ووراها ب صبعو ملاهي الوقت زعما)...
ايوب : ديك ترية جابها بويا ولا جد بويا...
حبيبة"غوبشات فيه ونغزاتو يسكت" : سكت...
بشار"قرص ليها حنكها بخفة وطبطب عليها" : مشرفين Prinzessin (بخانسيس)...
تبسمو ليه ومشاو جلسو لهيييه حداهم نيت جالسين بأدب مربعين ايديهم كايتسناو ف ناديا تعطيهم فطبسيلهم...
حطو كلشي وجدو طابلة على حقها وطريقها تا تم جاي مولاي حفيظ هاز صينية طويييلة الي فيها صالاد غوايال الي صاوبات ناديا بايديها والي كانت مشكلة ومنظرها يسحر العينين...
ناديا"شافت ف حبيبة" : زيدي بنتي جلسي حدا راجلك...
حبيبة"بتردد مالقات ماتقول ماعندهاش كيفاش دير وتقول لا...تنهدات بقلة حيلة وهي تمشي جلسات حداه مبعدة راسها عليه وتاهو كاع ماداها فيها ولا يمكن راسو مبرزط بشحال من حاجة مامديهاش فهاد تفاصيل ولا اش...غاامض بزاااف...
م.حفيظ : بسم الله اولدي...
ناديا"شافتو حشمان" : ولدي نحط ليك انا فطبسيلك..
بشار"هز راسو وشاف فيها وحرك راسو" : مانكرهش...
تبسمات ليه بكل بشاشة وهي تهز طبسيلو غرقات ليه من كل صنف...حطات ليه جبن البوراطا وكلشي ب نظاام وحطاتو ليه تبسم ليه نصف ابتسامة بالكاد كاتبان...بشكر...لاخرين كل هز راسو وحبيبة كانت ماكلتها قلييييلة دغمة كادير فيها شحاااال...كاتشوف لتحت وعقلها ساااهي ف اش غايكون دار واش غايبغيها علاش غايهضرو ؟!...الوقت داز فالماكلة اما هو كان كاياكل وخا تاهو حاس بديق وحاس براسو باغي يكمي واخا المهدئ داير المفعول...وغايخصو يشد الخواطر ويدير الصواب كيف علماتو سعيدة وهادشي هو جديييد عليه...كاياكل بالقد الي قاد عليه...كلا غير شوية وهو يهز كاس الما شرب منو وعاود وحطو وحبس...
ناديا : ماكلتي والو اولدي...
بشار"حط ايدو على صدرو" : هذا جهد ماكنتعشاش..."عاد وعى اش قال ثاني وهو يكمل"...متبع un traitement spécial..اليوم درت بحساب جاي هنا مانصيبش نكثر..
م.حفيظ : وليني طنجية بتدير حقك فيها ها وذني منك را متيبها ليك بايدي وبالعشق اولدي هنههه..بدقة المراكشي باش مشات لفرناتشي (فران فين كايطيبو خبز او الحمام البلاصة فين كايكون العافية او جمر هذا كايسميوه فرناتشي)...
بشار"حرك راسو بطريقة خاترة" : وعليه...
كيف كملو صالاد تهزات صينية الي هزها ايوب ودخلات رقية كاتنقي طابلة بقات حبيبة جالسة حداه كانت ريحة بارفانو فايحة وكانت ريحة الفانيل ديالها فايحة...بزوج حدا بعضياتهم وبزوج روايحهم كانو مميزين...حتى تم داخل ايوب هاز طبيقة ديال الخبز وتبعو الحاج هاز طبسيل قياس كبير ديال طاوس عاامر طنجية معلكة ياا سلام...
كايشوف ف مولاي حفيظ جايبها وحاطها بالفرحات...كايشوف ضحكة فعينيه قبل شفايفو كايحس بيه مرحب بيه وفرحااان بمجيتو كايحس وبدا يحس انه شخص مرغوووب بيه فوسط هاد المجمع...كايحس بهاد ناس فشييي شكل كيفاش دايرين عليه وهو هادشي ماعمرو عاشو فحيااتو...مالقى مايدير وتبع هضرة سعيدة دير الخاطر ناس فرحانين بيك ماعليك غا تصبر...
لكن هادشي ماغايدومش وهو فالاخير غايفك المشاكيل ومشكيل حبيبة وفالاخير كل غايشد طريقو...
كيف تحط العشا كلا من ديك الطنجية بالخبز وبايدو حيث كاياكل طواجن ومناسيش العادة الفطرية الي فينا حنا كا مغاربة كناكلو المرقة بالخبز وماشي بفرشيط...كايسمع لهضرة مولاي حفيظ وكيشوف ضحكو مع ولادو حتى انتابه لحبيبة الي كانت كاضحك بلا ماتحس لقى راسو كايشوف فيها وكايشوف فباها كايتمازح معاها وناديا مبسمة بواحد البشاشة ديال ام نبع الحنان...تهز الطبسيل وتهزو القراعي ديال موناديا والعصير الي بقى منهم بزاف والي هو اصلا مادازش فيهم مكتافي غير بالما وخا كال من طنجية وحيث ممولفش يتعشا كاااع...جابو ليه طاس وهو يوقف ووقفها...
بشار : toilette !؟..
ناديا : سيري وريه طواليط ابنتي...
حركات راسها وناضت سابقاه وهو غادي وراها...خشا رجليه فبروتكان عشوائيات وغادي تابعها تا وصلاتو لطواليط الي تما الاقل ما يقال عنها انا ب طابع رياضات ب الفسيفساء ولافابو ديال نحاس. والضواو على شكل فوانيس بلدية...وراتو ليه حرك راسو وهو يوقفها بكلامو...
بشار. : وجدي راسك محرك دابا...
حبيبة"شافت لهيه ورجعات نطقات" : اشنو غانگول لبابا الى عرف ماغانباتش...
بشار : شغلك هذاك...
خلاها واقفة وزاد دخل حيث بصح شغلها هذاك لانه بغا يعتقها من موقف هي رفضات...دابا تقلب على اش تقول لباها...غوبشات جيهتو وتنهدات وهي تمشي لصالون لقات باها جالس هو وايوب اما ناديا دات دراري لبيت ورقية فالكوزينة كاتقاد فالماعن فالماشين...شافت فيه...
حبيبة"كاتحك ف شعرها بخجل" : بابا بنمشي معاه هي هنا شوي وبنرجع...
م.حفيظ : علاه ياك بيتباتي ؟!..
حبيبة : احم..مانقدرش تما فين ساكن بعيد على لافاك وخلاني نبقى حتى لصباح وبنشوفو...
م.حفيظ : واخا عندك لافاك بتخلي راجلك يبات وحدو ؟! عيب ابنتي...
حبيبة : را هضر معايا هو الي ولا خلاني "بدات تحك فجبهتها بحرج قشعها ايوب وعرفها كاتكذب وبدا يسبل فعينيه ويزم في فمو ويحرك ليها فراسو ب ايهاي هااااي...دارت رساها ماشافتوش"
م.حفيظ : وبيناتكم...
حركات راسها وهي تمشي بزربة طلعات لبيتها جبدات سبرديلا بلا سيور ديال زنقة...لبسات سورفيت ديال زنقة فالبيض ولغوز..ونزلات لقاتو واقف عند باب صالون كايلبس فالبروتكان والحاج وناديا كايهضرو معاه مبسمين...قاد وقتو ودار ايديه ورا ضهرو كايقاد ف تريكو ويقاد فحوايجو...سلم على الحاج وناديا وحرك راسو لايوب الي بقى لهيه كايشوف فيه وكايحدر عينيه كايخلعو بشوفاتو وديك تخنزيرة والتغوبيشة...
بشار : شكرا الحاج...شكرا على الضيافة...
الحاج : وايلي اولدي راه داركم هادي وبتبقى داركم ومرحبا بيك فاي وقت...وكون عرفتك بتبغي نگوليك بقى هي هنا عندنا وقضي غراضاتك وليني عارفك ماتبغيش وتبغي تبقى براحتك نتا ومرتك...
بشار"خطف شوفة ف حبيبة الي تزنگت من هضرة باها وتحرجت ورجع نطق وعينيه كايشوفو بتشتات" : مانصيبش الحاج..وهي نيت غاتبرزط معايا جيت لمغرب خرجو ليا شلا مشاكيل ولابد نفكهم باش نكون براحتي...وهي نيت متبرزطش مع القراية ديالها...
حبيبة"زيرات على صباعها وغمضاات عينيها كاتنفس بشوييي صعداء..عرفاتو عتقها من الاحراج"
شاف فيها ونطق "مشينا" كلمة كانت كافية تخليها تسبقو جيهة الباب وبكن التوثر والخوف غالب عليها خصوصا غاتبقى غير هي وياه راس فراس واخا فسيارة الي اول مرة غاتركبها معاه..وهي وحدها مامعاهاش سعيدة الي تحاما بيها...حاسة بقلبها في فمها ماكرهاتش يتصرف غير هو ويخليها فتيساع ولكن ضروري ماتكون وتسمع لاش غايقوليها...ولو ماشي ضروري مكانش غايقوليها نيشان يلاه معايا...غير سدو الباب وراهم وهو يهز ايدو وشير ليها بصبعو ناحية شارع فين موقف سيارة...حركات راسها وتبعاتو كتفرك فصباعها وتعض فشنايفها وقلبها كايضرب فراسها...حتى وصلو لسيارة حل الباب وشير ليها تركب...حلات الباب وهي تطلع درجة سيارة حيث كانت عالية بزاف شدات فالكوسان تا طلعات وسدات الباب قادت سانتيغ وشابكت ايديها وحدرات راسها مكتشوفش فيه حدها كاتحس بيه كايتقاد فبلاصتو...ضار شاف فيها تاكد انها دايرة سانتيغ وهو يديماري وزاد مع كريق حتى هزات راسها كاتشوف فين غاديين...
بشار"نطق وعينيه على طريق حجبانو ملاقيين..سايق سيارة بالخااطر" : پوسيبل تريحي فشي كافي ؟!..
حبيبة"نطقات بصوت شبه مسموع" : اه...
بشار"هز حاجبو وشير بايدو" : جهدي صوتك مكنسمعكش ؟!
حبيبة"جهدت صوتها" : واخا ماشي مشكيل...
حرك راسو وزاد فسرعة حتى دخل وسط شارع محمد السادس حيث قريب ليهم تما نيت...لواحد الكافي تما وقف سيارة ونزل كايقاد فحوايجو...اما هي نقزات تا نزلات...سدات الباب لقاتو واقف وهو يشير ليها تجي حداه..دخلو لدااخل واحد الكوان فيه فوجويات والكافي كان خاوي شوية لقا نيت راحتو...جا السرباي..
بشار"شاف فيها" : شنو بغيتي ؟!
حبيبة"صرطت ريقها وحركات راسها ب لا" : مافياش...
بشار هز عينيه فسرباي كلب ليه قهوة كحلة مقطرة بلا سكار..شاف هنا وهنا كيحك فلحيتو...ورجع شاف فيها بانت ليه متوثرة وخايفة ايديها كيترعدو وحناكها مزنگين...وشفارها الي عاد لاحظ كمية الكثافة الي فيهم كانو كيرمشو بزاااف وهي حادرة عينيها...عنقها كايطلع ويهبط بريق الي كتصرط...حتى نطق بنفس نبرة الصوت المرعبة لكن هاد المرة هي ريحات ليها بالها...
بشار : الشيكات عندي دابا....
هزات فيه عينيها بعفوية بلا ماتشعر تا لمعو ليها وبدات تضحك وهي تحط ايديها على فمها تا نسات راسها وهي تقوليه "حلف"..
ماجاوبهاش وهي تسكت وبقات مبتاسمة...بشار"حط ليه سرباي قهوتو وحداها الما...هز فنجان شرب منو بشوييييا وعينيه عليها...حط الكاس ورجع متكي مربع ايديه ونطق"
بشار : غادي يبقاو عندي..الخوف منهم حيديه باك غايبقى يخلص بشكل عادي بلا مايعرف. باش مايوقعش ليه احراج ومايعرف والو..."هز حاجبو مأكد بعينيه" ياك هادشي الي بغيتي ؟!
حبيبة"حركات راسها" : اه...
بشار : مزياان...من هنا نسالي مشكيل المحكمة..غادي نديهم معايا...يومين هكاك وغادي نتحرك لبرلين غادي نتعطل شوية تم...
حبيبة : و خالتي توريا ياك مغادير والو ؟!..
بشار : اش عندها مادير ليك ؟ شيكات عندي فين المشكيل دابا معاها ؟!
حبيبة"حركات راسها" : فهمت صافي...
بشار : باك غايبقى يخلص كيف تافق مع جدي بشكل عادي جدي ماغايگوليه والو بلي انا الي شديتهم...هادشي غايبقى هاكا حتى نرجع من لهيه ونشوف اش ندير ديك الوقت...
حبيبة"حركات راسها وسكتات بقى هو كايشرب فقهوتو. وكيتنغم بيها..حتى جبد الباكسة ديال سجائر وجبد منها وحدة شعلها وبدا كايكمي مبعد عليها ساااكت كايتنغم بكاروه وهي سكتات ماقدراتش تهضر..بغات تسولو على شهادة لكن هو مانطقش ماذكرهاش كاااع بعني هو عاونها بلا مقابل..حسات بواحد راحة عجييييبة وقلبها قفز من بلاصتو تا كتلقى راسها الضحكة فلتات ليها وهي تحط ايد على فمها وايد على حنكها الي حسات بيه طااايب...اما هو كان كايشرب قهوتو منغم بسيجارتو وعينيه فنقطة بعيييدة ولكن مرة مرة كايقلبو عينيه ليها وكايشوف حركات ملامحها التعبيرية...حرك راسو باستهزاء..حتى ضرب فوق طابلة وهي تهز فيه عينيها...
بشار : تمشي ؟!
حركات راسها وهي مبسمة غالبة عليها الفرحة...جاب ليه سرباي الفاتورة خلص بكارط بونكيغ وكان شي صرف فجيبو مدو ليه وناض تسناها تا جات ومشا معاها فجنب الي شافهم كايبان ليه راجل وحداه بنية صغيرة هههه...حل سيارة من بعيد ركبات هي وركب تاهو ونيشان وصل حتى لرميلة ركن سيارة وقال...
بشار : نتحرك معاك حتى لداركم"ضار هنا وهنا كانت دنيا خاوية شوي فديك البلاصة اما المدينة ولاخرين كلشي عامر" دعوة خاوية هنا...
بالفرحة نعسات نعسة مرييييييحة ماحساتش براسها اما هو من فرط العيا ديال نهار كامل وراسو مدهي مع المحكمة كيف صبح الحال ناض غسل وجهو وسنانو ولبس حوايجو شاف فساعة كانت تمنية ونص...واقف كايلبس فسروال ديال دجين وصدرو عريان..صونا ليه تيليفون كان المحامي...جاوبو...
المحامي : بلا ماتصوني ليا ولدي غير نخرج من الجلسة نصوني ليك..باش مايبقاش بالك مبرزط...راك عارف هنا تقدر تعطل الجلسة...
قطع معاه وكمل لباسو هز تيشرت بيض ولبس تقاشرو خشا رجليه ف كلاكيط وتوجه لكوزينة صاوب ليه قهوتو فالماشين الي جاب جديدة...هز فنجانو ديال القهوة ريح فكرسي تما كايشرب ويشوف فتيليفونو حتى وصلو اشعار ب فلوس وصلوه فحسابو وجاه ايمايل ب البيي الي تقطعات ليه بدرجة رجال الاعمال...شاف المبلغ الي تحول ليه وكان نصيبو من اخر خدمة خدم ليهم ف "عا.ب دا.ن"...كايقرا ويحك لحيتو باصبع الابهام ويدوز على مسطاجة تا شوي تكمشو عينيه وحط ايدو فوق كرشو جيهة معدتو حس بيها كضرو هي كاضرو بزاف لكن حركاتو تعبيرية كاتبين انه ضراتو غير ضرة خفيفة...هز عينيه كايشوف لهيه وكايتفكر واش عندو دوا ديال المعدة...كمل فنجانو وناض كايشعل فالكارو دارو ففمو ومشى لبس سبرديلتو...هز لوازم ديالو وتيليفون وخرج كاينفت فدخان..ركب فسيارة وتوجه لاقرب صيدلية تما خذا دوا المعدة ومشى لواحد الريسطو خذا ليه فطور خفيف شرب دوا هو لول عاد تسنى شوي بدا يحس بيها كاتهدن وهو يبدا يفطر...كمل فطور وناض من بعد ماخلص مشا نيشان لبنك سحب منو مبلغ مهم.. عاد مشى للمصحة الاطلس شاف خوه هو اللول بقى معاه شوي وهو ينزل لتحت جيهة الاستقبال...صونا لطبيب علمو فين يخلص ووصا عليه تما...خلصهم وخذا توصيل بالخلاص عندو..وخرج شاف فالساعة لقاها العشرة ونص...ماعرف اش يدير خاصو يتسنى المحامي اش غايقوليه...ماكان عليه غير يمشي لدار مع دخل لدار جبد الماك ديالو وبدا يخدم خدمتو وتيليفون حداه...وكاس القهوة تاهي...كايشوف فالخدمة وكايتلمس مسطاجو طويل حتى لاخر..شاف كاسو خوا وناض لاماشين حيث ولف تبلى بانه يخدم والقهوة حداه..يلاه وقف كايصايب قهوتو تا صونا ليه تيليفون جاوب وهو واقف كان المحامي...
عمراني. : ولدي يلاه سالينا تعطلنا شوي..
بشار : ماشي مشكيل...امضرا...
عمراني"كمش حجبانو ماعرف اش يقوليه منين يبدا هو براسو تصدم" : تقريبا كنا غاديين مزيان القاضي كايسمع لهيئة الدفاع...الطرف لاخور كان على علم بشي حوايج ماعرفتش علاش ماعلمتينيش بيهم كون عرفت اش ندير...ولكن باش نعلمك اولدي را غايأثر بنسبة كبيييرة انك ماتقدرش تكفل بالاخ ديالك واخا يتحكم الحكم دياال شكاية فصالحك...
بشار"هز حاجبو" : علاش شنو جابو هما...
المحامي : ملي ترافع المحامي اكد ان الام ديالك دازت من مشاكيل معاكم...خصوصا نتا اولدي جابت شواهد تثبت انك كنتي كاتعالج ف مصحة نفسية لمدة عام...وانه فايت قت.لتي الاب ديالك...
قت.لتي الاب ديالك ديالك ديالك ديالك...هاد الجملة بقات كاتزنزن ليه فوذنيه فحال الصدى...تا كمش عينيه وحس بصدرو عمر عمر عمررررر وحرقو بزااااااااااف حتى جلس عالكرسي بجهد تا تسمعات زدحة....
داز من تجارب وضغوطات نفسية قاسية فحياتو...لكن موت باه والحادثة الي وقعات بسباابو وكيفاش زهق لباه الروح ديالو كانت هادي اكبر نقطة سوداااء فحياتو...النقطة الي خلات صحتو النفسية اللور لور...وكانت سبب فدخوله لمصحة لمدة سنة كاااملة...يعيا ينسى ويتناسى ويعيا يتعايش الا أنه ماعمرو يعيش عااادي كأنه ماوقع ليه والو...يعياو يحطو ليه اعذار انه قت.ل بالغلط انه مستحيل يكون واعي ويديرها واخا مستحيل فعلا يديرها لأن نور الدين كان بمتابة الصدر الاحن ليه..واذا ما قلنا اقرب شخص ليه واخا كان كايغيب عليهم بزاف حيث كايحضر للمواسم ديال تبوريدة وكانو كايمشيو لبزاف ديال المدن...
قرابة 18 سنة (يعني را 17 عام وزيادة دابا)...دازت على اسود نهار عاش فحياتو...النهار الي بقى وغايبقى محفووور والي كان سباب الكسر ليه هو اول واحد والوحيييد...
صوت مليكة وهي كاتغوت وتعدد وتلالي عند راس نور الدين الي كان غااارق فد.ماياتو حتى خرج ليه من فمو مكشكش...
مليكة"بقى غا عينيها ماجبداتهمش من الغوات وصدمة الي وقعات ليها" : وااااااااااا خويا وخووويا وااااخويا الحنييييييين...وااااااا خويا وكي طرا ليك واااااااااخويا وراني ترزيت فيك ااااا.....
بالصدمة والجهل الي جاها مابقاتش عقلات على راسها تا طاحت لارض كاتمرمغ وتندب فحناكها الي طلبو شرع وتغوت اما لاخرين الي جاو كايشوفو كلشي تصدم كلشي بقى مخرج عينيه حتى غوتات سعيدة بحر جهدها وضارت عند هاشم...
سعيدة : هااااااشم طييييرو ديوه لسبيتاااار اهاشم على الله روح تكون باقيا عايشة...
كانو فحالة صدمة استغرقات شي نص ساعة وهما مامثيقينش اش كيشوفو قدامهم...لدرجة اغلبهم ماداهاش ف بشار الي كان واقف وكايهضر غير مع راسو باقي الزمن متوقف عندو فاللحظة الي كان كايعاود فيها لباه وجاي باغي يبلغو ب النتيجة ديال الباك وبالي جا هو الاول على المستوى الوطني...هاشم طرش سيحمد باش توگض ديك الساعة ومشاو بزربة لتحت مع تلاقاو ب باهم عبد القادر جاي وكايذكر الله ويطلب سلامة شاف فيهم يلاه غايسول اش كاين وهو يجاوبو سيحمد بالغوات عينيه حمريييين...
سيحمد. : وااااابا وخويا البكر تضرب ابووويااا...وااا ترزينا فخويا يااا بويا...
تخطاه ومشا كايجري هو وهاشم يجيبو سيارة ولا شي حاجة يهزوه فيها حيث باش تجي الاسعاف داك الوقت صعيييب توصل دغيا وهما عايشين فدوار وفبلاصة فيها غير هما..بعض الديور بعاد عليهم شوي ومتفرقين...طلع الفوق ورجليه فاااشلين كان حاس بشي حاجة خصوصا من تسمعات الطلقة ضربات فارجاء المكان...وصل البيت لقى بنتو غابت عن الوعي وربيعة شاداها ورضوان واقف وداير ايديه على وجهو وكايبكي كان باقي صغير ديك الوقت...وسعيدة واقفة حدا بشار الي جلساتو وهو باقي مرة يسكت ومرة يبدا يهضر وهي كتزير عليه....هبط عينيه لجيهة ولدو لقاه فديك الحالة ماحسش براسو حتى غمض عينيه وكمش حجبانو بالم وصدمة...
ع.القادر. : الله....
حالة من الصدمة والذهول...كلشي بقا مصدوم حتى من انهم يغوتو يقولو شي حاجة كلشي جاه فحال الى غييير كايحلم الا مليكة الي ماصبراتش والصدمة تقريبا تمكنات منها حتى جهلت وعقلها خرج وغابت...اما سعيدة كانت جالسة حدا بشار شادة التربية بين ايديها وتبكي وعينيها على نور الدين الي كان مرمي فالارض..
تحل الباب ديال البيت لاخور وهي تخرج بخطى بطيييييئة بزااااف شادة تحتها لاوية عليها زيف باهمال وباقي هكاك ب تشاميرها الي ولدات بيه...غايدا وشادة فالحايط وعاضة على فمها باقي عرقانة من الولادة...حتى بانو ليها جاييين هاشم وسيحمد هازينو وراسو مدلي تحيد منو العمامة الي كان داير وجلابتو ديال التبوريدة كلها من صدر تلطخات بد.مو....كانو عينيه شبه مسدودين جاو عينيها فعينيه نفس الشوفة الي دار فيها فاش حل عليها الباب ملي كانت كتولد نفسها باقيا كتشوفها فسه كانو مزال عايش غير هازينو...
توريا"عوجات راسها تا فمها بدا يترعد ونطقات بصوت عيااااااان واكل دق ويطيح الضيم" : نوارة داااري...نور الدين !!..
هاشم : توريا ختي خاصنا لحگوه لسبيتار...
توريا"حطات ايدها على شعرو الي كان كثيييف كان نسخة من بشار وبشار نسخة منو فالشبه...دوزات صباعها على حجبانو عينيه فمو وحطات ايدها على كتفو" : عتقوووه ليا عتقووووه را حياتي تولي ضلام بلا بيه عتقوووووه ليا...عتقو ليا المفششني عتقووووه ليا...
بزربة داوه وهي متبعة ليه العين كتشوف فيه مهزوز هكاك هبطوه لتحت وداروه فالسيارة طارو بيه لفيلاج كان مستوصف صغير بزاف فيه غير طبيب وفرملي...
عيدة الي علموها بالخبار تاهي وبدات تلالي وتضرب وتعطي لقلبها...مليكة فالبيت لاخور سادين عليها مغيبة وحداها ربيعة...كلشي خايف كلشي كايترجى وكلشي كان مصدووووم وحالتو حالة تشفي العدو....
فهاديك اللحظة توريا دخلات لبيتها وجلسات...دايرة ايديها على حنكها وكتشوف وعينيها دايزين بدموع ماتسوقاتش لبنتها الي يلاه تزادت وغواتها واصل تال عندها لبيت...ولا لودها الي كان عنظو عامين "يوسف" ولا لبشار بنفسو...عقلها وتوريا راااسها مشات روحها مع نورالدين...كلهم كانو يتسناو وعندهم امل كبييييير انهم يكونو سعفوه ولا نقدوه مهم را داوه لطبيب....الطبيب الي غير وصلوه ليه وشافو وفحصو ديك الساعة...هبط عينيه وشاف فالفرملي...
طبيب : جا ميت من عندهم...لا حول ولا قوة الا بالله...
ضار جيهة نورالدين وغمض ليه عينيه سدهم وجر عليه الغطا غطا ليه وجهو....
خرج الطبيب الي كان هو املهم الوحيد باش يقوليهم را باقي حي ويديوه فالاسعاف الي كاينة تما لمراكش...بلغهم بالي راه جاي ميت من البلاصة وداك الامل تطفى... عبد القادر حس بصدرو وجعو تا كان غايطيح كون ما شدوه الطبيب والفرملي الي معاه...أما هاشم قلبو حرقو بجهد تا نزلو ليه دموعو يجرييييو...
ع.القادر : لا اله الا الله لا اله الا الله... الله يصبرني ياااااربي الله يصبرني..."
كايحك فصدرو ويهز عينيه لسما عينيه الي كانت فيهم جغمة ديال دموع ديال الالم والصدمة الي باقية طاغية عليهم كاملين ولحد ساعة هما كايتصرفو مصدومين مازال فين يرجع عليهم هادشي ومزاااال فين يستوعبو الامر الي طرا...سيحمد قلبو تقسم حيث نور الدين شخص عزيز عنظو بزاف ماشي غير خوه كان اكثر من ذلك كان "نور الدين" هو المزيان فيهم احن واحد وصوته ماتسمعيهش وديما كيضحك الي كان يضحك ودروييييش...تحطيه عالجرح يبرا...كان عزيز بزاف واخا كان كايغيب فالمواسم بزاف لكن كان ديما حاضر معاهم بالقلب....
طبيب"تحنى عند هاشم وطبطب عليه ب اسف" : سي هاشم...لازمنا نعلمو جوندارم ...
هاشم"حيد ايديه وهز فيه عينيه" : علاش...
طبيب : راك عارف جا مضروب من عندكم..لازم نعلمو..
هاشم"سكت تا سكت وهو يحرك ليه راسو..هاشم تقريبا واخا واكلها ف خاطرو الا انه ملزم يتوگض حيث اصلا كان يلاه تعين فالمنطقة...ناض السيحمد نوض باه الي قواه فشلت عليه وتا باش يسول كي طرا كلشي مشا ليه من بالو كان عقلو ديك اللحظة هو يخرج طبيب ويقوليهم را بيخير حيث فايت ل نوردين تصاب واحد المرة اثناء تبوريدة فوسط الحركة...لكن كانت طفيفة...ماقدرش ينوض ليهم ماقدرش هز فيهم عينيه وقال...
ع.القادر : خليوني حداه وسيرو علموهم...الي عطا الله عطاااه...
سيحمد : تبقى وحدك هنا...
هاشم : سير اسيحمد"كايمسح عينيه بطرف كمايمو" سير نتا علمهم..انا هنا معاه...
حرك سيحمد راسو وخرج من المستوصف...فهاد الوقت نيت كان باقي كلشي على حالو...سعيدة ملي شافت بشار تهدن واخا باقي بنفس جلستو مابقاش نطق ضارت جيهة الباب وهي تبان ليها عيدة جايا وشادة فالحايط وقفات عند الباب وشافت فيها وشافت ف بشار وشافت فلارض الي باقي فيها د.مايات ولدها..واقفة كاتشوف وتلالي بواحد صوت كايدخل مع العروق...حطات ايدها على صدرها...
عيدة"بصوت منخفض" : وااااا وليدي اااااوليدي هااا...وااااا دروييييش الحنين ياااا وليدي...وااااا راني مرجية ربي يشوف فيك ومايسمعوني عليك خبار هاااولدي ورا گلبي تشوا عليك ااااوليدي...ورا گلبي تشوا عليييييييك...
سعيدة"كاتمسح دموعها وتعاود مشات لعندها وشدات ليها فايدها" : لالة نعلي شيطان الله يسمعنا عليه خبار الخير الالة لا تفايليش عليه...
عيدة"حطات ايدها فوق قلبها على شكل قبضة كاضرب جيهة قلبها" : اهناااااا بنتي هنااااا حاس وعلم...ولدي نور الدين تادرواشت الي فيه ماديال دنيا...ولدي عالمة عليه نهار تزاد وموتو بين عيني..ولدي دروويييييييش بزاف مايصبرش لفعايل دنيا...لا بغاه ربي انا راضية واخا رجايا فمولانا يشوف فكبدتي ويحنت هضرتي ويعيش ليا ولدي...
بشار"الصمت"..
سعيدة"كاتبكيييي وتبوس ليها فراسها" : مايكون غالخير..الالة جلسي رتاحي دخلي الالة...
عيدة"هبطت عينيها لبلاصة نور الدين وهزات عينيها شافت ف بشار وكمشات فيه حجبانها وبقات كتشووووف فيه...ولا كايبان ليها نور الدين فواحد اللحظة...هزات صبعها وشيرات ناحيتو" : مالني نشوف فنور الدين تم...
سعيدة"ضارت جيهة بشار ورجعات شافت فيها" : لا لالة بشار هذاك..بسم الله عليك..دوزي تبركي رتاحي دابا يجي هاشم وسيحمد...
عيدة : ومالو بارك تم ؟ علميه ينوض يتبع بوه...ياك ديما يتبعو ديما لاصق ليه فعنگو ملي يجي شتو دروك بارك هنا متيتي وبوه فسبيتار ؟!...
سعيدة"هبطات راسها" : غا خليه هاني باركة حداه...
عيدة : ولدي دوز برك حدا ميمتك دوز لا تخليهاشاي راها وحدها..
بشار"الصمت"..
سعيدة : دابا يمشي سيري لالة رتاحي انا مزاوگة فيك را كاتباني ليا باغيا طيحي على وگفتك...
عيدة : وااخا بنيتي...ولا جاو دراري علميني هاني نمشي نبرك حداها ونسبح ونطلب الله يسمعنا خبار الخير..نشاعلاه نشااعلاه...
بقاو كايتسناو شي ساعتين تال ثلاثة حتى سمعو صوت سيارة وقفات برا...طلات سعيدة بان ليها سبحمد جاي وعينيه فلارض كتافو طايحين...بقات جالسة حداه وكاتفرك فايديها تا سمعات وااااحد الغوتة ضربات فارجاء المكان كانت غوتت ربيعة وغوتت مليكة الي فاقت وسمعات سيحمد اش قال...
سعيدة : الله ياربي الله الله ياربي الله...
بقات تبكي وبشار جالس حداها وداك دري تقوووول واش تحرك ديك الوقت ثلاثة سوايع وهو على ديك الجلسة...هزات فيه عينيها لقاتو كايشوف وساكت عينيه فالبلاصة ديال نور الدين...ماقدراتش تبعد عليه...كانت اكثر وحدة موگضة فيهم واكثر وحدة حاسة ب الم بشار فديك اللحظة...اكثر انسانة كانت عاقلة فيهم هي سعيدة واكثر انسانة كانت تابثة ومرزنة وسطهم..واخا كانت قرايتها حدها الاعدادي لكن عقلها كان كايوزن بلاد على قدها...بقات كاتنخصص بالحس...كاتسمع الغوات على برا...حتى عصرات عينيها على جهد تا حسات بايدو تحطات على ايدها وهي تهز فيه عينيها بزربة شافت فيه...
بشار : مزال ما گلتش لواليد راني نجحت...
دارت ايدها على فمها وهي تشهق..ماعرفات اش تقوليه...كانت حاسا بيه عقلو تفاوت فديك اللحظة قالت من صدمة. شيء طبيييعي وعز عليها بزاااف لدرجة ماخلاتوش وحدو حيث عارفاتو غايتفاوت...لكن باش تعيش الامر حقيقة هرس ليها قلبها مية شقفة...كان كايهضر بواحد طريقة كاضر فالخاطر عقلو صافي هرب ليه حيث ولا كيهضر كأنه باقي حابس فسوايع قبل ملي جا فرحان بنجاحو...ماجات فين تهضر معاه يلاه حطات ايدها على ايدو حتى تحل الباب على جهد جهدو وهي تدخل مليكة كاتغوت وتنقز وتجدب عليه تما وربيعة تابعاها هي وسيحمد كايشد فيها وهي كاتغوت لربي الي خلقها كاع وجهها مشا ليها بالقميش ونديب...
مليكة. : والله يرزييييييييك فحيااااتك كي رزيتيني فخويا...والله ياخذ فيك الحاااااااق اعدو الله...واااااااااااااااااااااااااربي ربي ربييييييييييييييييييييييي رزاني فخويا ربيييييي اهى اهى وااااااااااااااااربي رزاني فالحنين ديالي واربي رزاني فخوييييييي....واااااربيييييييي..
كاتهز تالسما...حتى مشات ليه على غفلة وهي تشدو من عنقو بغات تقجو تقت.لو...لو ما بعداتها سعيدة وضارت عليه كاتبكي وشادة ليه فراسو اما هو كايسمع ويشوف لكن داكشي كايجيه غير صورة وصافي باقي حابس عندو الوقت....
شدتها ربيعة وسيحمد...فهاد اللحظة توريا كانت كتسمع غواتها وكتسمع اش كتقول وعرفات ان بشار الي ضربو...مكانتش كاتحرك بقات على وضعيتها حداها بنتها الي كاتغوت من صباح تاحد ماعطاها الحليب غواتها الله العلام تا زراق ليها وجهها وهي والو واش حارت فيها اما يوسف كان جالس فواحد القنت محطوط داير صبعو في فمو وكيشوف بعينيه ماعارف والو...ماتحركش بقى فبلاصتو...كايسمعو الغوات وعيدة كاتلالي ودموعها هابطين وتضرب فقلبها وصدرها....بزز باش جرو مليكة من البيت خرجوها كاطيح وتنوض عقلها تاهي ملي ماخرجش وتفاوت تحمد الله...يمكن الغوات الي غوتات نفعها انها ماتمرض فصحتها نفسية بزاااف واخا هاكاك هاد النهار كحل زحل عليهم....
دخل هاشم و عبد القادر وتبعاتو سيارة الجوندارم...الفيرما كانت صغيرة مزال ماتبدل فيها والو مزال ما زادش الاراضي الي وراها ماكبروهاش كانو فيها غا هما والعساس...وكانت باقيا القابلة القرشية معاهم نيت...دخلو لدار وسمعو الغوات ديال مليكة وعيدة الي جالسة وتلالي...وربيعة الي واقفة حدا سبحمد وتبكي...
لاجودان : سي الرحماني فين وقع الحادث ؟!...
هاشم"شير ليه الفوق" : الفوق نعماس...تفضل معايا..
"غادي ودموعو كاينزلو ويمسحهم..قلبو معصور من جيهة خوه وجيهة بشار لكن مضطر يصبر حتى يديرو الجوندارم اللازم...شاف سعيدة واقفة عند الباب ديال البيت الي مسدود حرك ليها راسو بمعنى واش كاين وهي تشير ليه ب اه وحرك ليها راسو تحيد من تما...
لاجودان : شكون كان حاضر وقت الحادث ؟!
هاشم : الابن ديالو كيف گلت ليك...و الاخت ديالي داكشي الي قلت ليك...حتى سمعنا صوت الطلقة ديك ساعة...تفضل نعماس...
حل ليه الباب وتبعوه جوندام زوج شادين فايديهم روجيستر وستيلو...شاف مكان الحادث وخططو على البلاصة الي بقات عامرة بد.م نور الدين...شافو جيهة بشار لقاوه كما خلاوه بقى من شافو هاشم زاد قلبو تهرس كتر وكتر...
لاجودان"قرب ل بشار" : اسميتك اولدي...
بشار"هز فيه عينيه ونطق" : بشارة الخير...
لاجودان : كيفاش ؟!
بشار : با سماني بشارة الخير..."تبسم بشوي وبدا يحك فراسو" جيت نعلمو بلي نجحت فالباك جيت اللول فالوطن كامل...وكنتسنا فيه يكمل لباسو...لقيت هاديك جويجة يلاه جابها من عند با عبا.س... صايبها ليه وشفتها بانت ليا مزيانة..كانتسناه يلبس باش نگوليه نجحت..ماعرفتوش فين مشا...جيت انا اللول...
لاجودان"كمش حجبانو وهز عينيه ف هاشم" : فين الاخت ديالك...
هاشم : فين مليكة ارضوان...
رضوان : سخفات اخويا..مافاقتش يلاه كانت كاتغوت وطاحت تاني...
هاشم : سي لاجودان صعيب الحال شوي مانصيبوش نخليو تالغذا يلاه نستوعبو اش طرا...
لاجودان : خاص يتكتب محضر اسي هاشم..باش نصيفطوه لنيابة العامة...
هاشم : عارف اسي الحاج عااارف...هادشي را وقع بزربة راك شفتي الحالة...دير بوجه المعرفة وخلي حتى لغذا وانا نجيبو ليك بايدي تال لابريگاد...
لاجودان"ضار شاف ف بشار الي رجع حدر عينيه ناحية البلاصة فين كان طايح باه...ورجع شاف ف جوندارم الي معاه حرك ليهم راسو" : صورو هادشي وقيدو عندكم الاسم والمكان...واحد فيكم يبقى عند باب الفيرما...وعلمو المسمى عباس الوزاني يحضر دابا عندنا فلابريگاد..."ضار شاف فهاشم" هادشي الي نقدر عليه اهاشم...
هاشم"تنهد وحرك راسو" : كون هاني...
لاجودان : يبقى هنا تالغذا وغايجيبو واحد فدراري...
كملو اجراءاتهم...ومشاو بقى واحد منهم فالسيارة قدام دار...توريا ماخرجااااتش ماهضرات ماتكلمات كاتسمع الهضرة وتسمع غوات بنتها الي ماهزاتش فيها شعرة...كانت تاهي باقي حابس عندها زمان وكاتسنى ف نور الدين يجي وخا عرفاتو ما.ت...
سعيدة"كاتبكي بحرقة. وتنخصص" : هاشم اش غانديرو مع دري ؟ را مشا ليه العقل اهاشم اهى...وواش شفتي حالتو يااا هاشم را هرس ليا قلبي ...
يتبع...
التعليقات
لا توجد تعليقات بعد، كن أول من يعلق.