عروس الجحيم الجزء السابع

ماعالمين ما حاسين بشكون الي كان واقف وسمع الي تقال...وسمع الكلام القاسي من فم مليكة العمة...ومن فم توريا الام...الاشخاص الي يحاميو عليك فضهرك هما الي يطعنوك فيه...وصدق الي قال..الطعنة كتجيك من اقرب الناس ليك...والكلام ابدا واش توقف هنا بل استمر والتجريح بقى...

توريا. : مليكة نتي راك طفلتي ومعزتك كبيييرة...ايييه سخطت عليه وضرني وداز الغيار بيناتنا والقلوب مزال متصفات...وليني "حطات ايدها على صدرها" راه الهضرة الي گلتي عليه ماتعجب...

مليكة : تي اش سايرة تگولي...ياك كفرتي عليه واحد الوقت..اش بدل ريك ا مرت الغالي...

توريا : الي بدل رايي راك عارفاه..تقهرت من كاع جوايه...

مليكة. : وماشتيهش هاز علينا مناخرو لسما !! علاه مالي انا الي صفيتها لخويا !؟...ماعذر همنا ماقرا الكية الي تكوينا مع سلام عليكم نسى ونسمح ليه...نتي الي مو وماسمحتي ليه نساها انا بالخف !!...وهاني صرطتها وهاني ديت علي كية خوييي فگلبي...وقريت ليه الحساب...معفر عليا بالبغل الي گالها ليه...اش يحسب راسو جاي يسمعني الهضرة الخايبة..هذا مسوايا عمتو يقلل عليها العفة !!...وسرو نيت سرو الي درتوها بيه ماخاص جد بوه غا يتشمت...نعل ترابيه الناقصة...

توريا : الحيلة مليكة درناها يبقى هنا...وتهضر معاه جداه يدگ وتادو مع بنت الناس...يگابل ختو الي غلبتني...ماشي گابل ليا القراية الي خلخلات ليه العقل...يسمع ليا هاد النوبة حيث لو كان سمع ليا من صغرو كون راه يحلفو بيه شلاامية دابا...وكون راه بوه دابا كيتسنى منو تريكة وضهري كون مغطي مايضربني البرد...الوقت مابغاتش ترطابي امليكة الوقت بغاتك تقصحي مع تريكتك يتسگدو ليها رجلين وتقاد ليها طريق...وليني تريكة تخرج ليك مگادة من قنت وعوجة من قنات..

مليكة : ودابا بان ليك تواطا ؟...هانتي سايرة تشوفي يجي من ليل ليل كي موكا...ماعرفناه انس ماعرفناه جن...هاهي مي علاين تصفى ليها صحتها بمسبتو وصلات بيها تصوم راسها باش تواطي ليه راس...كون ماتواطاش ؛؟! تموت ليا مي انا بمسبة حما.ر تاع الخلا نعل ترابيه...

توريا : ملييييييييكااااا....

مليكة"ناضت مشربنة" : ما مليكة ما ويل كحل...كي طرا رطب كبدتك الي تگولي قاصحة وخاصها تقصاح باش يخرجو رجال.. اشمن رجلة هادي بانت ليك فيه ااا ؟...تقلال الاحترام على الي كبر منو...ردنا دراري صغار !!...ماتقوي عليا الهضرة...منصيب غا مي تولي لباس ولا تشوفو مليكة الوجه ثاني... تباتي فراحة الله...

خلاتها وزادت مضارت لا هنا لا لهيه...بقات توريا هازة حجبانها ماعاجبها حال لا من هك ولا هك...بقات تفرك ف ديك بيجامة الي لابسة...حتى تنهدات وناضت لعند عگوزتها لبيت...طلات عليها وحيدات الطابلية وتسرحات فلارض مفرشة حداها كانو الكنينات مناوبين عليها كل ليلة تبات حداها وحدة اما الحاج كيبات فبيت لاخور...حلات سعيدة الباب وهي طل عليها...

سعيدة. : مزال ماجاش بشار وهاشم !!

توريا : لا ماجا حد هاد ساعة...

سعيدة"سمعات صوت برا" : يضهر ليا برا..."حركات توريا راسها وسعيدة بقات تشوووف جيهة عگوزتها وتشوف فصدرها كيبان ليها كيطلع ويهبط...تنهدات وبقات شحال واقفة كتفكر تا عقلها سرح كون ما فيقها صوت كحبة توريا..حركات راسها وخرجات سدات الباب...

فهاد الاثناء كان واقف بعييييد حدا البنية الي دايرين لكلب الحراسة...السيجارة فايدو واقف فوسط داك الضلام كيكمي...حتى تم جاي هاشم شاعل بيل ديال تيليفون واشار ليه بان ليه واقف...قرب لعندو...

هاشم : مازال مادخلتيش ؟!..

بشار : فين تحركتي نتا ؟!

هاشم : مشيت طليت على الكوري واحد البگيرة (تصغير بقرة) كتولد معاها الرباع والطبيب..وكاين تا با تما...يلاه جا طبيب الي عيطت ليه حداك گبيلة..

بشار "حك بصبع ايدو الي فيها سيجارة لحيتو وعينيه على باب الفيرما...بقى شحااال كيشوف وحرك راسو وعينيه على الباب" : هاد الفيرما امتى تعاودت !!

هاشم"ضار كيشوف" : وسنييين هادي...دوك ديور الي كانو مكاملينش فالبني عقلتي...زديناهم فدار وحدة...كبرو الولاد وكثرو ريوس وتجمعنا هنا...

بشار : نتا قايد گد ما هاز گلبي اش مخليك نابت هنا !! گاد دير جوج ديور ويشيط الخير...مالكم يا الحبس عزيز عليكم تخاشو شي فشي...كترة تنخشيش هي الي جبدات لعدو ربو صداع من لول...

هاشم : اتا مالك...

بشار : ماعاجبنيش هاد الدفيش...مابغيتش ليك اصحبي هادشي..

هاشم : الله ماكرهت ابشار بالرب المعبود وليني مي وبا حطو قدامي سخط ورضى لا عزلت عليهم...ماصبتش نقلقهم مني اما كون جات عليا نخرج نبدل البلاد كلها...ماعليش هاحنا هنا تايفرج الله...

بشار : السخط عند هاد ولاد العبد غا بلاش...الي ماشرا منو يتنزه بيه...

حك شنايفو بسنانو بواحد وتيرة سريعة من بعد ثقل الحركة ودوك العينين ماتزعزعوش على الباب...رجع الكارو لفمو وسف منو سفة طوييييييلة تا تجغمو عينيه بالد.م...بقى شحال عاد كلق داك دخان الي خرج من نيفو وفمو...لاح سيجارة عسف عليها...وزاد هو وهاشم...بان ليه صهييط مخلين ضواو قاع دار مشغولين..نيشان لبيت عيدة ماتحرك لا هك ولا هك...دق الباب وهو يدخل وتبعو هاشم...غا سمعات توريا حسهم وهي تنوص وجلست...

بشار"عينيه على عيدة ماشافش جيهة مو حدو نطق" : نعسات !؟

توريا"تفرهت عاد نطقات" : ممم...ناوي تبات حداها ولا تصد مع الفجر !!

بشار : طلعي لبيتك ولا فين كتنعسي...باقي معاها..وسمحي لينا عذبناك معانا...

مصحة الكتبية...

كانت اقرب مصحة ليهم باش داو مولاي حفيظ...حتى وصوله لمصحة وعلى الفور دخلوه لمكان الفحص...جلسات لطيفة شادة حنكها وتدعي معاه...وناديا واقفة حدا الباب وايوب واقف تاهو متكي عالحيط...اما حبيبة غاديا جايا وقلبها فحلقها عينيها حمرين وكلها كترعد...ثاني مرة يوصل للمستشفى من سنييين من بعد ما كان فالفايت فاتح على المرارة وكانت حبيبة مزال صغيرة ماعارفة والو...وهادي كتعتابر اول مرة تشوفو وصل لمستشفى الشي الي خلعها بزاااف وعقلها دا وجاب را غايموت...والى خطاها تحماق...

ناديا"شافتها مرعوبة جراتها لعندها وغا هي حطات ليها راسها على صدرها وهي تبدا تبكي.." : ششش ابنتي ماكاين والو ان شاء الله...

حبيبة : عمري ماشفتو هاكا...مالو اما مالو !!؟

ناديا : مشاكيل الخدمة بنتي وصافي...

لطيفة : الله ياربي ومالو على حالتو لاش يهز هم فوق هم...الله يقطع الورث وميجي منو لاكان غايوصل ليا خويا لمرض ويطيحو فالفراش معندي مندير بيه...شلا...

ايوب : واش هادشي سبابو هي الكريديات والضريبة !!..نبيعو حقوقنا ونخلصو هادشي..الحاجة الي بتمرض ليا با ماشي تا عمي معندير منگجدر بيها...امصاب هي يبقى بصحيحتو جامعنا هذاك هو الرباح...

ناديا"حركات ليه راسها كتنهد وقلبها مقبوض من جيهة راجلها...وبنتها متكية على صدرها معنقاها. وتبكي" : الله يرضي عليك اولدي...

شوية حتى تحل الباب وخرجات واحد طبيبة مسحات حبيبة عينيها وطارت لعندها...كلهم تكبو عليها كيسولو..

طبيبة : الحمد لله صافا..واش عندو شي مشاكيل صحية قبل ؟!

ناديا : كان سنين هادي حيد المرارة وصافي وتا باقي هي مرضات عاديين لاگغيب وداكشي..

طبيبة : المهم هو من قلتو لينا الكحة او السعلة...غايهبطوه يدير راديو الصدر باش نتاكدو...وبالنسبة لا عندو ضغوطات نفسية هي الي تسببات ليه فانهيار عصبي...الوغ الى عندو شي مشكيل حاولو تبعدوه منو او يتفاداه...حيث مهدد فاي لحظة تجيه كخيز كاغدياك غير باش نحطكم بالصورة...دابا ينزل يدير راديو نعطيوه الكالمون وتقدرو ترجعوه معاكم عادي..هي هو بعدوه من توثر مؤقتا...الله يجيب الشفاء...

بالفعل داكشي الي وقع...هبطوه دارو ليه راديو الصدر تاكدو انه عندو برد خفيف مسبب ليه ديك السعلة..عطاوه مهدئ وكتبات ليه الدواء ووصات وعاودت وصات بالراحة تامة ليه...

حبيبة"دافعة بيه الكرسي باش يخرجو برا لسيارة فين موقفها ايوب.." : هانتا بابا شكون فحالك تمرح ليا هي مع راسك هههه..

م.حفيظ"ضحك بتعب مرخييي" : هههه هي نبقى نمرض بحال هاكا هههه...

حبيبة : الله يحفظ...ماتبقاش تخلعني عليك ابابا عافاك...

م.حفيظ : ايوى لا تاني را صحة هي على قد الحال راني واحد الشارف شيباني عايب...ههههه...

خرجات هي وياه ووراها لطيفة وناديا...ركب لور وركبات حداه ناديا وحبيبة اما لطيفة ركبات حدا ايوب الي ساق بيهم حتى لاقرب صيدلية خذاو ليه دوا وداوه ديريكت لدار...عاونوه تا تكى بلاصتو وجلسو حداه مجمعين معاه كيضحكو فيه ماحتال فين يدورو لقاوه سرح عجول لاخرة...المهدئ عاونو والعيا كمل عليه حيث نعاس ابدا مابقى يزورو من نهار طاح فمشكيل كريديات وضرائب....

الفجر كياذن...صوت التقرقيب على برا شي غادي شي جاي...الصوت مسموع ديال الحاج كيبلغ شي حد بالي البقرو ولدات عجلة وعندهم العجلة شي حاجة الي مزيانة بزاف زيادة فالابقار والحليب كذلك...جالس فوق واحد سداري مفرق رجليه ومربع ايديه كيشوف فيها ناعسة...مرة كتبدا تحرك ومرة تبدا تكحب...تحل الباب وهي تدخل سعيدة لقاتو كيشوف فجداه..

سعيدة : بشار !! عند بالي مشبتي ما قاليا هاشم والو...

بشار"ساااكت مجاوبهاش..شي دقيقة وهو سااهي..تا ضار شاف فيها" : لا مزال...سخيتي بيا ولا كيفاش !؟

سعيدة"ضحكت" : ههههه انا نسخا بيك...الله اودي بالفرحات عليا...هي ناوي تبقى معانا شوية !!

بشار"غمز بجنب بمعنى تت" : لا..گولي غذا بعدو..يومين الى طولت...

سعيدة : وراجع ياك !! ولا ناوي طول...

بشار"ضار شاف فجداه شحااال وهو كيشوف وساكت...راسو ينغل والله الي عالم..ورجع هضر وعينيه على جداه" : نصفي شي حسابات ونطرق شي مسامر ونشوف...

هضرتو مافهمات فيها والو...حركات راسها ومشات عند عيدة تحنات عليها وبدات تعيط باسم "لالة" عيدة بدات تحرك واللون فوجهها بدا يرجع...عينيها بداو يرمشو تا حلاتهم عيااانين ونطقات "امممم"...

سعيدة : نجيب ليك تفطري الالة...ها بشار حداك...

عيدة : مممم..."نطقات بصوت عيااان بزااااف بالكاد كيتسمع حتى كتقرب وذنيها عندها" گولييييه يجي حدايا نشوف وجهو...

سعيدة"شافت فيه" : بشار گالت ليك اجي حداها تشوفك...

بشار : هذا ماكان ؟!...الله ودي...

ساس فوق فخادو وخبط تا ناض وقف كيقاد حوايجو ويحنحن وديك تحنحينة تزعزع...قرب لعندها وتحنى على ركابيه وقبط ايدها وباسها...

بشار : عيدة !!

عيدة"تبسمات بعيا وزيرات ليه عاى ايدو": ا لل الله يرضي عليك

بشار : امين...

عيدة : م كلتي و الي...(ماكلتي والو)...

عيدة : اش گالت !!

بشار : حتى تگهمت اميمتي....

عيدة"زيرات ليه على ايدو" : لا ت غيب شااااي عليا..عندي م عاااك هضرة وكلام گبل مايدي ربي الامانة..انا راااضية عليك...

سعيدة : لالة اش هاد الهضرة...

بشار"ساكت"

عيدة : بشار !!!...

بشار : حداك اعيدة حداك تانمشيو جملة...

تحطات صينية اتاي من ايدين للا رقية وتبعاتها صينية القهوة هازاها حبيييبة ويالالة...كانت ناديا مفرشة للحاج فالصالون المشروك تما فواحد دخيلة فداك صالون فيه ناموسية مديورة لضياف...تبعها ايوب الي مامشاش لخدمتو رسل غير فريق ديالو يتكلف ليه هاد لاسومين واعتاذر من ناس..

م.حفيظ. : واااطرني عزيز ومافراسيش ههههه...

حبيبة"تنخشت حداه هب وخوتها هما من جنب وهي من جنب" : ايوى شنو ههههه...

وردة : حتي حبيبة عطيني كرواصة...

حفيظ : اري ليا كرواصة لكبيدة دياال حفيظ...ونتا معتز اش بيتي...

معتز : بيت هي قهوة...

حبيبة : ويلي هذا قهواني من دابا...اهيا راك باقي صغير على قهوة شرب حليب...

معتز : وهي عطيني قهوة مخلطة...

ناديا : كبي ليه اللا لطيفة قهوة وكثري ليه الحليب...ماعليش هي ديري ليه خاطرو...

م.حفيظ : وديرو الخاطر حتى لمولات العش...اهيا كلشي يغبر وجهو عليا وخليو ليا هي مولات العش...

ايوب"قرب لطيفة" : اهيا كيدير ليك عزوز هكا ؟!

لطيفة : بالعمى...ياك من ازيلال داز هنا حطني تغذا ودرك لسمارة...هاني صيف كلو نگعدو هنا الله مايگوليا ايخ منك..ماشي تا اجي...

حبيبة"تنهدات" : ايوى الله يجيب لينا من يقولينا مولات العش..

ايوب : لا كان هي نتي الى بتفرتكي العش جات عليك..تجمعي العش مابان ليا...اهيا شدي عينيك عندك تخنزريييش فيا...

م.حفيظ"شاف فيه" : ونتا تبان ليا گاعد !!

ايوب"قرب ليه وقبط ايدو خبشها ليه وباس صباعو". : يمرض ليا الحنان نلوح كلشي ورايا...نتا لول اعمي سيمانة گاعد على قبلك.

ناديا : ههههه وهانتا اش بغيتي ههههه...

م.حفيظ : وترجل ترجل هادشي ماعاجبني...

ايوب : نهاك الله اعمي..."شافو هاز فيه حاجبو مخنزر" نهاني الله نهاني الله...يعطي لفمي الباسر.... للا ناديا كبي اتاي لا بغيتي زعما...

سماو الله وبداو يفطرو فجو حميمي دااافي...كتخللو فرحة نهوض حفيظ بالسلامة...كملو وناضت حبيبة وايوب كيعاونو رقية فالمعان تديهم الكوزينة...دخلات حبيبة وبدات تستف الماعن فلاماشين...وايوب يحط تا من زيف ديال طابلة داه هو وبالة ومسحها ومسح بالعطر ونقى دنيا كيف وراتو ناديا...ناديا الي كانت كتعطي دوا لحاج....

"رحامنة..."

واقف فشرجم ديال بيت عيدة...راسو كيخبط باغي يكمي وباغي يخرج كيسمع فدنيا على برا عامرة وماحاملش يخرج غايلقاوه بسلام واجي سلم على عم باك عم مك عم جد بوك...واحد تريكة طويلة عريضة...كيبغيو يدخلو عند عيدة كيقولو ليهم را ناعسة ماتصيبش يدخل عندها حد...كان صبااح مزال...مانعسش ماشافو...ليلة كلها وهو مقابل مع عيدة وراسو كيتبخ اما قلبه حكاااااية اخرى...غير كيفكر ويخبط...نواضرو تورمو وهو ماحاس...ساكت ومامبين لحد...اش بيه يعلم الله...عارف اش يدير واش غايدير...ضار ساف فجداه وحرك راسو مثقااااال....علاش الله اعلم...جا عندو يوسف شافو وجلس معاه براااكة وخرج....رجع لسهوتو كيشوف قدامو تا رمى عينيه وهي تبان ليه اشراق من بعيد كتعاون فكريمة فتشطاب وغير تبجق فداك الفم ماعاجبها حال...كمش عينيه وهو حاضييييها بانت ليه كتميق فكريمة تا هز حاجبو...

فهاد الاثناء كان هاشم واقف مع حسام كيسول فيه...محاولين قدر الامكان يبعدو الناس ميتخالطش معاهم باش ميطلعش ليه الد.م حيث واخا ساااكت عارفينو خاطرو ضيق بزاااف...يقدر يدور فشي واحد تما...

هاشم : حسنية مكايناش !!

حسام : سولت ياسين گاليا مشات مع اشرف عند ديك السيدة الي كتمشي عندها تعوم عندها...

هاشم : مزياان..كنت بغيت نگوليك شوف كي دير مايبانش ليها بشار مگادين على غوات..ونيت ولادها ميشوفوش...

حسام : كون غا تهضر مع ياسين يتعلم صنعة ولا يكمل قرايتو...خدمة الفدادن ماتليقش ليه باقي صغير اصحبي...يدفع باك ليبر انا نعاونو...

هاشم : دابا نتوالى ليه نفك غا حريرة هادو ونشوف كيفاش..

مزالين كيهضرو حتى صونا تيليفون هاشم بان ليه بشار جاوبو قطع وهو يغمز حسام تا وقف هاشم مقرب لجيهة الكوري...

هاشم : اشراق (هزات فيه عينيها وقالت نعاام اعمي) دخلي تكلمي لخوك بغاك...

اشراق عينيها وساعو وقلبها خفق...حركات راسها بزربة وهي تم جايا تابعاه...لاح سلام لشي ناس كانو واقفين مع باه خارجين فحالهم...دار بدات تخوا حيث ناس عندها اشغال حتى يقرب العصر عاد يتكبو...حل الباب ودخل اشراق الي حادرة راسها...وقالت "نعام خويا"

بشار"حرك راسو لهاشم الي رد ليه الحركة وخرج سد الباب...شاف فيها وبقى كيشووووف تا نطق" : قربي...

قربات كتحس بيه كيشوف فيها وعينيها ماقدرات تهزهم...

بشار : شكون هاديك الي كنتي واقفة معاها برا ؟!

اشراق : كر كريمة مرات رضوان...

بشار"هز حاجبو" : جهدي صوتك نسمعك...شكون ؟!

اشراق : كريمة مرات رضوان...

بشار : شكون هاد رضوان ؟!

اشراق : عمي...

بشار : رضوان !؟...جهدي عليا صوتك مامساليش نعطيك وذني...شكون هذا گلتي ؟!

اشراق"جهدات صوتها" : عمي...

بشار : عمك !!..عمك تگولي ليه رضوان حرفية ؟!..."جرها من دراعها غا بشوي حسات بيها تهديدة قبل العاصفة" القواد الي گالها ليك رضوان صاحبك ! گرين ملة مك !! تگولي ليه رضوان..."زير على دراعها غااا متبت وكيهضر بصوت منخفض" شكون هذاك ؟ وجهدب صوتك نسمع... ااا ؟..

اشراق : عمي رصوان عمي...والله ماباقي نعاود نگول سميتو..غا ولفت..بببب..

بشار : الي ولفتيه بدليه وولفي بلاصتو الاحترام...تحركي طلعي لفوگ..نسالي ونعيط ليك نزلي نهضر معاك قبل منتحرك فحالي...

حركات راسها بزربة وخرجات تجري قبل مايلصق ليها حنكها مع الحايط وينعسها حدا عيدة...بقى كيدور باغي يخرج راسو كيفور...تا دخل هاشم...

بشار : بغيت نتحرك من هنا راسي تفرع اصحبي...

هاشم : غا خرج مكاين حد. كاين غا انا وبا...رضوان مشى لواحد سوق هنا.يتقدا حيث .كيوجد باغي يمشي فحالو لطاليان...

ماجاوبوش هز تيليفونو خشاه فجيبو وهو يخرج...داز منير ماشايف حد حتى من مليكة. وراجلها كانو واقفين داز من حداهم كي الريح خلاهم يشوفو...تا من هاشم مافهموش مالو حيث شافو صعر بالبيان وكيدعي مايهضر معاه شي حد لا يصدقو فصداع كيف قال هو براسو فمي فيه العار وعيبي قريب...يعني عارف راسو ممتوازنش فهضرتو وف ردات الفعل ديالو...تا من توريا كانت واقفة عند باب الكوزينة حيث فيها نوبة ديال طياب كانت موجدة دجاج محمر ولحم بالبرقوق وسعيدة كتعاون فيها بحكم هما الكبارات فحال طياب دجاج وداكشي دالمناسبات هما مكلفات بيه...شافت فهاشم وقالت !!

توريا : مالو ياك لباس !!

هاشم : والعلم لله..."نطق بهاد زوج كلمات وتبعو.."

مليكة : شلا وشلالي...

خرج على برا وتم غادي تا وصل للحد..جبد كارو شعلو وكماه ماهضرش ابدا...عاود واحد اخور...هاشم مافهموش مالو...قال راه تقلق من كثرة بنادم...توريا قالت راه ماحاملش يبقى والحيلة الثانية فشلات...مليكة بلانها وحدووو فصلات وخيطات وبنات وريبات...ايييوى وهو را بلانو فراسو...حس براسو بدا يتهدن شوية...

حسام"الي تبع هاشم" : شوية اخويا...

هاشم"شاف فساعتو" : حسام جيب واحد قرعة الما ولدي الله يرضي عليك...

فالبلاصة مشى لداخل جاب ليه قرعة سيدي علي من الباكيات الي شراو لعيدة...عطاها ليه شدها ومشى من حداهم خلاهم كيشوفو وركب فسيارة...حساب ليهم را غايمشي لكن هو وصل وقت دواه ديال الصرع ولازم يشربو باش يخفف من حدة النوبة لانه حس ممكن تعاود تزورو وهادشي ماشي فصالحو...رمى حبة وتبعها الما وحط راسو على الكوسان مغمض عينييييييييه...

حسام : مالو ؟!!...

هاشم : الله ماعرفت...حالتو ماعجبتنيش حق الرب الى قواو هاد الخلق الي عندنا...مو من جيه عمتك ماتسكتش يا صحبي...

حسام : كون غا بقات فرنسا بلا وراق يشبعوها غا ضرائب...لاش جات مافهمتش...

تنهد هاشم وهو كيشوف فيه...جات سعيدة تاهي لحقات عليهم ولقاتهم كيشوفو فيه...

سعيدة. : مالو ؟..."هزو ليها كتافهم بمعنى الله اعلم"...گوليه يتكلم لالة فاقت كتسول عليه...

هاشم"حرك راسو وتنهد مشى لعندو دق عليه تسناه شحااااال تا شك حساب ليه غيب...عاد ضار بالعرض البطيئ وهبط زاج" : شوية ؟.."حرك راسو" مي فاقت كتسول عليك...

بشار بقى كيشووووف فيه...فلاخر هز كمايم تريكو تالمرفق..ورك عالبوطون تسد زاج وحل الباب وهبط. كيقاد فحوايجو ويقاد فسمطة ديال سروال..غادي مع هاشم بخطاوي ثقيييلة.. تا وصل لدار ودخل...داز من حدا جدو ووقف تا طبطب عليه اما لاخرين ماشافش فيهم كاع.. العيالات الي مكيعرفهمش ماشافهمش...تا حل الباب ودخل لقى عيدة جالسة حداها توريا...حالة عينيها وتكحب كحبات خفاف...غا حسات بيه وهي تشوف ف توريا وقالت...

عيدة"بصوت عياان" : بشار الي دخل ولا !!

توريا. : هو هذا الي دخل..."شافت فيه مبسمة" زيد اولدي دخل..

بشار : ولدي !!!

توريا"حركات راسها مبسمة" : دخل دخل...بغات تهضر معاك..

بشار"كيشوف فمو ببرود ولكن سنانو من لداخل مزيرييييين..يزيد شوي يتهرسو...ايدو الي فيها سيكاتريس ضربات عروقها تورمو وتفرعو...غمض عينيه ورجع شاف فجداه وحاول يغير نضرتو للبشاشة..تبسم ابتسامة خفييييفة بالكاد كتبان...وقرب لعندها وجلس شد ايدها وباسها...

بشار. : مزيانة ليوم ؟!..

عيدة : بشوفتك "كتنهج" بشوفتك الحنين...الله يرضي عليك اولدي...مافتينيش...علماتني توريا بمجيتك ملي سمعتي محنتي...انا اش بغيت اولدي غا ترجع ليا ولا تبقشاي غابر...رجع كون ضهر خوتك..خشيهم تحت جناحك الحبل تفلت اولدي...وانا باغيا نشوفك حدايا گبل مايدي الله امانتو...واش رجايا غالي اولدي...

بشار : عيدة...خدمتي لهيه..راسي عمر لهيه...مابغيتيش ديك بنت الناس ماشي مشكيل...ليها حل اميمتي...وخدمتي !؟..عندي مسؤليات تما...مانصيبش نخلي كلشي دقة وحدة...فهمي اعيدة شويا فهمي...

عيدة"حطات ايدها لاخرى فوق ايدو وزادت زيرات عليه" : فيك ولد ولدي فيك ولدي الكبير...راني ربيتك مع عمامك الي نتعتهم بخوتي...شفت فيك الهاز هم خوتك...شفت فيك الداگ وتادك...رحم رجايا ولدي "بدات تبكي" رحم همي وگلبي الي طاب من جيهتك الله يرضي عليك...خليني نشوف ليك بنت الناس...لا تگولشااااي مكاين الي تقبل...

بشار : مابغيش نكرفص...رحمي راسك من العار الي فيا راني خايب اميمتي...

عيدة : المراة الي تگاد لجام راجلها...هي الي تزگي ليه الوتاد...دير ليا خاطري وخاطر مك الي شهوتها دير ليك العادة على حقها وطريقها...ياك خدمتك لهيه...ها رضوان خدام برا ومخلي مرتو هنا...ماشي نتا لول ولا لاخر...

بشار : وديك بنت الناس الي عاطيها الكلمة لهيه...

عيدة"جات تهضر وهي تبدا تكحب وتبكي تا ناضت توريا تولول ووجهها مخطوف شاف فيها بشار شحااال وهو كيشوف فيها..." : واااااش بغيتي تقت.لني كحكح كحكح...ياك اولدي هذا مسوايا عندك اااا "تهضر وتبكي وتخبط فصدرها بجهد وتوريا تشد فيها وتهدن"

توريا : لا لالة ماديريش فراسك هادشي...غابالخاطر...

عيدة : واش اولدي هذا مسوايا ياااك !!...

بشار"ماتحركش من بلاصتو ما تنفنفات فيه وتقووول شي زغبة لاخرة...كيشوف فعيدة تبكي من نيتها ويهز عينو يشوف فمو تاهي ومطوووول فيها شوفة...حرك راسو وشاف فجداه" : مايمزح معاك حد اعيدة ولا كيفاش...

توريا : كيفاش !!

بشار"عينيه على جداه". : تهضيت نضحك معاك..ماديري فبالك والو..."قرب باس ليها راسها وايدها" الي تبكي ليا عيدة مرت الرحماني نگلع مها من جدر...الي حب خاطرك ديريه..بقاي لينا لالة بصحتك وميكون غا خاطرك...

عيدة : هي اش ...

بشار : ياك باغيا تشوفي ليا بنت الناس...ياك مشهية ندير العادة ونربط وتادي هنا...نديرو ليك خاطرك...ونديرو ل بنت المشاوري خاطرها..."شاف فتوريا" ياك الحنانة ديالي !!...

توريا : ساير تهضر ولا تمازح تاني ؟!

بشار : لا كنهضر بصح...المزاح فوقته دوزناه...مشهية ندير ليك العادة ولا لا ؟!..مشهية كل كونجي نجي عند مرتي ومانبقاش نغيب بالعوام !!...ومنها نگابل خوتي...نسى الي فات !!

توريا"الصمت"

بشار : ميكون غا خاطرك...شحال عندي من عيدة...وشحال نكساب من توريا ميمتي...شنو منسمعش الله يرضي عليك ؟! "عينيه تجغمو بالد.م...حيث بصح مشهي ميت انه يسمع الله يرضي عليك...

توريا"بقات تشوف فيه تشوف...وكل ماتشوف ضحكتها تزيد توساع...تا بانو سنانها...ولكن ضحكتها الي كان مشهي ماحركات فييييه واااالو..." : الله يرضي عليك اولدي...

بشار : ياك سمعت ليك اميمتي !! وشتييي هاني تانا سمعت شي دعيوات ندوز بيهم هاد ليام لهيه..."ضار شاف فجداه" ميمتي...غادي نغيب عليك شي ايام...قومي بالواجب "غمزها" فهمتيني...

عيدة : سير خوذ وقتك عنداك اولدي تغبر وتخليني معلقة لا ديرها شاااي بيا...

بشار : الكلمة ميمتي كلمة رجال..خاطيييني من العيب دابا...

باسها فراسها وناض...جات تهضر معاه توريا وهو يخليها واقفة بلاكة وزاد...خرج تلاقا جدو سلم عليه بسكااات...عطاه لقاء بالرجعة...تا وقفو رضوان...

رضوان : ماتگولش سلام !!

بشار"ضار مخنزر رافع حجبانو مخسرهم فيه." : شكون نتا ؟!!.

رضوان : هههه وايلي عمك...

بشار : مزيان...

ماجا فين يهضر تا زاد خارج لبرا خلاهم شي يشوف فشي...ضار عند حسام علمو يعيط ل اشراق...جات سعيدة توادع معاها بعدا عطاتو دعوات يعاونوه...تا شوي تمات نازلة اشراق وجايا تزرب لعندو...عبنيها تحلو من سافتو مخرج تيليفونها توحشاتو وقالت صااافي الفرج جا...تا وقفات حداه...

بشار : تيليفونك هذا بقى عندي..درت معاك نرجعو ليك !!

اشراق"حركات راسها"

بشار : هضري نسمع نعاودو نتلاجو فالهضرة تاني...

اشراق : ااه...صافي ناخذو ؟!

بشار حرك راسو بطريقة غريبة...ضار حك ورا شعرو ورجع شاف فيها حاصيها كيفاش حادرة عينيها...رجع تاني شاف هنا وهنا...هز عبنيه لهييييييه...وهو يشوف فداك تيليفون دورو هكا وهكا وهو يهز ايدو تالسما وخبطو فلارض تا تشخشخ مابقى فيه عضم صحيح...هاشم كمش عينيه اما حسام دار ايدو على راسو...زكرياء كان واقف جاي بغى يسلم عليه دار بناقص مشى يشطب الكوري تطوعا ههههه....

بغات تغوت ماقدراتش عينيها خرجو عليه مشتت...تا حسات بيه قرب عند وذنيها كيهضر عادي ولكن انفاسو تحرررررق....

بشار : دابا داااابا مع نكمل تگلعي لبيت الفوق تما تبقاي تما تاكلي تشربي تنعسب...تما تحطي كتوبتك...باقي شهر لقرايا هاشم يدفع لزبور مك استعطاف من هنا لتما تاكلي كتوبتك تاكليييهم ماشي غير ديري l préparation...عندك سيمانة ولا كثر نجي لهنا نشوف فين وصلتي...مادرتيش حسبي روحك شحال بقى ليها..."بصوت مهدن ولكن عقل تخلخل تفاوت" تگلعي يلاه...

توريا ضحكاااات تا تكات وهي تخبش ايد عيدة...

توريا : مايگد عليك غالي خلقك الالة...

عيدة : اوكيييه !!...ديري يومين وعلمي الحاج نقصدو دار المراكشي..

توريا : عينيك ف بنتو صافي ؟! هاديك را متبغيش عايشة الشيكي والبخ ماتصيبش تولف ليك هنا...

عيدة : دابا تبغي والى مابغات...بنات العايلات راهم كثار...

اشراق لمحات الشر فعينيه ودعوتو ماتعجب...النبرة باش هضر مهدنة ولكن جدورها شر...وسيسانها بركان...وسواريها تهديد...النبرة الي تقولي اللهم يغوت يضرب ولا يهضر بيها...لانه شخص ماشي محل ثقة....انك تسمعو مهدن كيهضر بهاد نبرة را ماغايدير والو...لااا...الخوف من هاد النبرة قويييي...ردود افعالو غير متوقعة ابدا...وهادشي كايزيد يازم الحالة النفسية....

حركات راسها بزربة وعينيها بغاو ينقزو منهم دموع..ماعاوداتش معاه واحد جوج...ضارت دخلات تا بعدات على انظارو عاد طلقت البكية وتنخصيصة بالحس...بغات تصطى وعقلها يخرج لانه تيليفون مشى والي جاي مكيبشرش بالخير...خصوصا مع تهديدات حميد ليها هنا صااافي نهايتها على الابواب..نهاية التصرفات طايشة...الفشوش الي مكانش فصالحها...الحقد الي كبر فيها...التربية الغير الحسنة الي عطاتها توريا...الجو العائلي المشحون...بزاف ديال العوامل السلبية الي ساهمات ف تكوين هاد الشخصية القليلة تربية...

اشراق"مشات تجري طلعات البيت وغير سدات الباب بدات تنذر فحناكها وتحندب.." : اااويلي اويلي اهى اهى...اويييييييييلي ساليت ساليييييييييييت...اااااويلي الموت الموووت اهى..يااااااربي اش غاندير ياااربي...مممممم..ففففف..

بقات تمشي وتجي فداك البيت ووجها لون منو مسقوط ودموع كينزلو كي الغيث...قلبها بغا يسكت...اشمن حفاظة تحفظ وهي مهددة فاي لحظة يتكشف مستورها...مشات تجري ل شرجم طل عليه واش مشى لقاتو واقف مع هاشم وباين عليه ماشي طبييعي...ايديها كايترعدو البولة بغات تنزل ليها..جلسات وقفات وعاود جلسات وحناكها شبعو طريش من عندها ونديب...هادي لاخرة ليها حيث عااارفاه اش كيسوا...القتي.لة بين عينيها مايحيدهاش طبيب...يلاه كتفكر ومنغامسة فقوقعة الرعب الي هي فيه تا حسات بتيليفون تحت مخدتها كيتهزهز....طااااارت من بلاصتها...

اشراق : ممممممم...

هزات المخدة وهي تنوض سدات الباب ورجعات جبدات تيليفون كيصوني فايدها تقولي حس بيها وقرا اش بيها...طلات على بشار لقاتو باقي واقف كيكمي وعينيه كيشوفو فالعدم قدامو..هاشم كيهضر وهو باين من طيارة خارج تغطية...طلقات الخط وعطات الضو للجواب...لكن الجواب كان قليل الاداب...

حميد : واش ابنت القح.بة غانبقى نعيط نسول...واش عينك ديري ليا الصابونة ولا كيفاش...

اشراق"كلامها تلعثم..ماعرفات تلاقي الالف مع اللام..صوتها تقج ونبرتو تردعات" : ما بب حميد "صرطات ريق الي ضربو الجفاف" وو تيليفففوني ه...

حميد : قادي هضرتك يا القحب.ة...اش كتقولي تما...مال تيليفونك...

اشراق : هرسو خخخويا..."بان ليها بشار هز راسو يلاه غايشوف جيهتها وهي تخرج عينيها. وجلسات طايحة كترعد..حيدات تيليفون من وذنيها مخليا حميد كيهضر غا وحدو...رجعات طلات غير شوية بان ليها رجع كيف كان...شي حاجة فيه ماشي طبيعية...ورجعات دارت تيليفون فوذنيها سمعاتو كيعرعر"

حميد : والله يعطي لدنمك الجهل...معامن كنهضر يا القحب.ة معاااامن...

اشراق : خخخخ خويا خووويا هرس ليا تيليفون احميد...

حميد : كيفاش هرس ليك تيليفون !! ايه وباش غانخدمو حنا ؟

اشراق : مم ماعرفتش احميد اخى اهى...حميد صافي غير ميك عليا انا شوف شي وحدة اخرى تخدم ليك بلاصتي...عع عافاك را والله حتى يصفيها لينا بجوج...را سد عليا البيت ومنعني نخرج منو..عااافاك احميد اهى اهى...مابغيتش نموت رحمني الله يخليك...حتى تيليفون هرسو ليا...وغايخلي عمي هاشم يقطع عليا الويفي...

حميد : ايه وانا مالي ؟...نلقى وحدة تخدم ليا ؟...فين غالقى فحال كسدتك ابنت القوادة...

اشراق : واااا حميد انا مابقيتش نصيب نخدم معاك...مابقى عندي حتى تيليفون...هذا الي كنهضر معاك بيه كاميرتو مهرسة وغذا ولا بعدو تبغيه مي كتهز منو نوامر القدام... واااا تيليفوني تهرس...هييييييييي"تهزت وتحطت من سمعات شي باب تحل حسابها جا كيقلب عليها طلات بزربة لقاتو باقي..رجحات انه كريمة مشات لبيتها..ورجعات استانفات الهضرة" باش غانخدم...عدي بدوك الفلوس الي يلاه واصلينك...

حميد : منصيبش..باغي نشري طوموبيل...خاصني الحبة...عرفتي اشنو..انا غانشري ليك تيليفون جديد...

اشراق : لا حميد فهم راسك مابغياش دابا..خويا حاط عليا العسة الى صاب عمي هاشم ولا ولاد عمي تيليفون ولا مي غااا مي احميد تقتل.ني عساك خويا...

حميد : تي خويا خويا خويا تي هاد خوك بغى يخلعني...لا سميتو يجي عندي نيت نعطيه مايسوى...ماسوقيش..تي فين لقى انا بزازلك وترمتك فين لقاهم...

اشراق"كيقوليها هاكاك وقلبها كيتحسك..حطات راسها فاكبر مشكيل..ولاحت راسها لحرام الي حرام عند ربي وعقابو كبير...والي ممقبولش عند العبد الي عندو الشرف مسالة حياة او موت...خصوصا البادية الي الى شمو غير ريحتها فهادشي تقدر سمعة تهز دار كلها...خلييييي عليك لا ساقت امها اما بشار را حكاية اخرى..." : خلي حتى دوز شي يومين تاتهدن الوقت...

حميد : دابا نجيب تيليفون ولا نقودها معاك ؟!

اشراق"عصرات عينيها تا نزلو دموعها من جديد...مسحاتهم بطرف كمايمها ونطقات بصوت مبحوح" : جج جييي جيييبو..

حميد : ودابا دويتي ازين...صافي وجدي راسك...

اشراق : عع عافاك ماشي هاد الايام..عافاك حاول تصبر حتى تهدن الوقت عندنا فدار وترجع كيف كانت ونگوليك امتى تجيبو وفين تخليه ليا...

حميد : يلاه قودي....

مزال هاشم كايستوعب كلام بشار الي مافهم فيه والو...حسام تاهو واقف ومافهم والو...

هاشم : جوج سيمانات هكاك وراجع ؟!...تستقر هنا ؟!

بشار : لا..راجع ندير مابغاو الواليدين...نديرو شوية الخواطر ...

هاشم : بشار واش بعدا نتا مزيان ؟ كتبان ليا ماشي هو هذاك..

بشار"هز فيه عينيه" : فين عمري كنت هو هذاك ؟!..انا فحالتي العادية المزيانة كاع المخيرة...

هاشم : اشمن خاطر غادير...عافاك فهمني لا بغيتي...

بشار"بدون مقدمات نطق وهو كيشوف جيهة الدار" : عيدة بغات دگ ليا وتادي هنا ...توريا بغات تعيش العادة (العادات وتقاليد تاع زواج)...درت الخاطر...درت الخاطر لواليدين..وايلي اصحبي...

حسام : عادة !! اشني هي العادة...

هاشم"كان غايقوليه الشهرية وهو يجمع راسو ورجع حنحن حيث را باقي ممستوعبش اش تايقول بشار" : تا كيفاش دير الخواطر ؟!...باغي ترجع تستقر هنا. ؟ وخدمتك ؟!...

حسام : واا هاشم تا شور را گاليك بغى يدير العادة زمعا يتجوج ااااهاشم...

هاشم : تا ريح من هضرة...قاليك يتزوج...ورا يتزوج هي هو..."فيكسا عينيه ماحتاااال ينطق تا لقى بشار ركب ضار غادي راكب فطوموبيل" وا تا فين غادي...بشار...وا صحبي تسنى غا نفهم...كيفاش تجوج ؟!

بشار"حل زاج نافذة" : هاااشم راسي كايطير وينزل...الي عندي گلتو...درت الخاطر لواليدين...ميمتي لاحت ليا رضى وسخط وانا لگطت (لقطت) الرضى...هاشم راني سنيييييييين وانا كنجري على رضاها ماعليش ماعليش...الي غلب يعف ياك ؟!!..ميمتي ترضى عليا ومنديرش ليها اش بغات ؟!!!...وايلي اهاشم وانا هزيت فالدنيا من جيهتها النص والنص مقودة عليا فيه تاهو...خليني نخفف الحمل على كتافي...ناوي نتزوج كي الناس...غانتحرك فحالي حتى ندير وقت ونجي....

هاشم : وديك بنت ناس الي لهيه...

بشار : بيني وبينها هاشم...خرج سوق...

هاشم : ابشار والله خاطري مامرتاح...ونتا غادي كتبان ليا عيان...والى شداتك الكريز ؟!!..

بشار : انا مرتااااح اهاشم..مرتاح..مامنحقيش نرتاح ؟!...واش ميمتي بغات تخطب ليا ونگوليها لا ؟!...شحال عندنا من عيدة ؟!..وشحال عندي من توريا اااهااشم را غير توريا وحدة ميمتي الي نكساب...بويا درت ليه فين يصد هنيتو على بكري... هذا هو جهد الخصام الي بيناتنا...ناوي نبدا معاها بدية جديدة...ناوي گبل مايدي ربي واحد فينا نشبع رضى تقاد ليا طريقي...كلشي معكس ليا بسباب السخط...مامزططش ليا العكس مع سخط...خلينا نحنيو راس ماعليييش....

هاشم : بشار...

بشار : هاشم...قويت معاك الهضرة بزاف...نشوفك فساعة الخير...دير بالك مع اشراق دير بالك معاها...

ماحتال يهضر هاشم تا كسيرا وخرج مخليه فبلاصتو جامد...قرب حسام تاهو حداه...

حسام : تا كيفاش يتجوج !؟...

هاشم"عوج فمو" : وركو ليه على الجرح الي فدراعو...عرفات توريا تستغل مرض مي (مافراسوش راه راس الحربة هي مو)...بشار خاطري ممهنيش من جيهتو..كيبان ليا فشكل...

حسام : تجيك غريبة نلاحظها ؟!..كيبان ليا انورمال من لاخر...

هاشم : هذا هو نورمال...غا ملي ضحكات ليه توريا ورضات عليه هذا هو المهم عندو...را عشر سنين وكثر وهو تابع رضاها..را شحف وهو متمني رضاها...شيء طبيييعي...وزيد مي على شوي وتموت بسبابو لقى راسو عندو قيمة كبيرة عندهم...اضطر يدير ليهم خاطرهم واخا يبقى هو بلا خاطر...المشكيل هو ديك بنت الناس الي بغاو يگدموها ليه...حسبي الله ونعم الوكيل...

غيييير هو مشى وزاااد هاديك هي مشيتو مخلي وراه سعيدة الي جايا خارجة بغات تعطيه مايدي معاه لقاتو مشى...

سعيدة : اويل شيطان مشى !!؟

هاشم"تنهد" : مشى...غير رجعي داكشي مزال غايرجع...

سعيدة : حلف ؟! امتى وعلاش ؟!

هاشم : خلا خدمتو واقفة لهيه...وراجع باش يخطبو ليه...

سعيدة : تههههه يخطبو ليه..الله يمسخ شيطانك...

هاشم شاف فحسام الي ضرب ايدو فايدو اخمسا اسداس ورد عليه هاشم ب يلاه زيدك مع هادي...ودخلو خلاوها كاتنحزز باقي تاهي مامستوعباش...مع خرج بشار مع تمات داخلة زكية الي لابسة احسن ماعندها على بالها تلقاه وتبين انوثتها المخلطة بالحشمة والمنسمة بالحداگة...لابسة جلابة قهوية وشال فنفس اللون يلاه خيطاتها هاد سيمانة مخلياها لواحد العرس معروضة ليه...خاشية رجيلاتها ف صبيبيط باش تبان راها مستورة ومحتشمة...مبينة شوية من خصلات شعرها الحريري ومدايرة حتى نقطة من مكياج الي مختاصر عندها فالكحل...ماتقدرش ديرو حيث عندهم عيب البنت تكحل وهي ممزوجاش...وخا را عينيها حكاية من الجمال......

عيشة(ام زكية): وااا سعيييييداو وتي كي دايرة وكي بقات الحاجة...

سعيدة"سلمات عليهم" : لا شوية اليوم لباس..." شافت زكية لابسة مقادة...حسات بيها عرفات مجيتو وتنهدات على حالها عيات معاها تنساه بطريقة غير مباشرة ولكن الي فالقلب فالقلب.." زكية لباس ؟!!..اش هاد زاز هههههه...لمن لابسة هاد شي..

زكية"تزنگات وحنحنت كتدخل فخصلات شعرها" : احم..لحتى واحد اخالتي سعيدة...هذا هو لباس ديالي ههههه...

سعيدة : غانضحك معاك ابنتي بصحة وراحة....

حركو ليها راسهم ودخلو اطمانو على الحاجة...زكية عينيها كيدوورو فالدار هاهو يبان هاهو يدخل تنوض تشقى باش تبين الحداگة ساعاك الاحلام رابت من جديد بكلام عيدة الي قالت فيه...

عيدة : بحرا صبتي ولد ولدي مشى..."فرحانة" مسيكين گعد معايا يومين بايتهم معايا هاو اليوم صد فحالو..."زكية تصدمت كانت ناوية تشوفو وتمتع عينيها وتروي الشوق من جيهتو..."

عيشة : مسكييييين ايوى الله يوصلو على خير....

الحال عند عيدة تقاد...فرحانة وماقاداها فرحة مرادها تقضى...الحيلة نجحات ماهمهاش خاطر يتخصر مهم خاطرها يتقاد...بغات تحوز ولد ولدها حداها بغات تربطو وتشوف تريكتو...كيتو عندها كبيييييرة واخا دارت الحيلة الا ان قصدها زوين ماشي خايب من جهتو هو ولكن من جيهة بنت الناس الي ناوية تخطب ليه سواء حبيبة الى كانت فالنصيب او غيرها كيبقاو كاملين بنات الناس...باقي هاشم لدابا مصدوم من قرار بشار المفاجئ وخا را عطا نسبة كبيرة انه دار لخاطر لمو غير با يسمعها كترضي عليه وهادشي حاجة مقدسة عند بشار...

خمس ايام الي دازت....

واقفة حدا عمتها الي جالسة على كرسي فالكوزينة هازة غطى الطنجرة الي مردود فيها اللحم على شكل طنجية...محطوطة فوق الفورنو صغير....ريحة طياب عاطية...

لطيفة : عطيني داك السمن ابنتي...

حبيبة"مداتو ليها" : ياك هو هذا ؟!

لطيفة : ههههه اييييه...ايه ازرقة ف طياب..مناوياش تعلمي...

حبيبة : ماشي دايا "كتشوف فضفيراتها" عرفتي تشهيت نصبغهم بالحمر...

ناديا"كتقاد فعمارة البسطيلة" : ايييه باش باباك يقطع معاك الهضرة...

حبيبة : ههههه لا غير كنضحك...شهوتي نصبغ وليني حتى تكون فيا ليغيگل...نيت نمشي لصالون ايوب يقادو ليا ضفار ايدي ورجليا...شحال هادي ممشيت ويديرو ليا سوان لوجهي...حتى نتي اما ونتي اعمتي...كيبان ليا نسيتو وجاهكم...

لطيفة : ايوى نحيدو علينا ضياف الي جايين يشوفو باباك...ونحيدو ليوم ضياف رحامنة...هي سكتي ماتسيق رحامنة الخبار كلشي بيتكب علينا...

حبيبة : اجي علاش بايجيو ؟ حيث كانو جايين اصلا قبل ميمرض بابا...

ناديا : والله اعلم ابنتي...الحاجة الي بغات تجي هي وللا توريا...والي جا مرحبا بيه ابنتي نسولو ضياف علاش جايين...

حبيبة عوجات شنايفها باستغراب..بقات معاهم تا جات واحد البنت كتعاون اما لطيفة هي الي تكلفت بطياب وناديا بسطيلة والبنت الي جات من عند واحد تريتور باش تقاد ليهم ديزاين شلاضة...مع قربو يجيو ضياف ناضت ناديا تبدل عليها وحبيبة طلعات لفوق تاهي تبدل ولطيفة كذلك...ناديا استقر اختيار لباسها على عباية مزركشة بالاسود زواقة رخامية محاطة برشيشات ذهبية...والارض دياالها كاشيري اما لتحتي كاشيري لون موحد حريرية...وشال اسود لواتو على شعرها بطريقة هماوية شال طويل رمات اطرافو ورا كتافها.....مارشاتش من عطرها حيث غايكون الحاج ويمكن حتى ولدو معاه اكتفات ب كريم لايديها تعطرات غير بالبخور ديال العود القماري الحر..خرجات على برا لقات لطيفة تاهي لابسة قميس لون واحد فالبيج مطروز بطرز رباطي وااسع وشال على راسها...لكن هي كانت مكحلة عينيها....

ناديا : فين حبيبة مانزلاتش !؟

لطيفة : حبيبة ماتعطليش راه باباك خرج يدخلهم من راس درب..

ناديا : مشى عيان تاهو كون هي للا رقية ولا حبيبة نيت تلقات ليهم...

لطيفة : وخلاص ماعارفاش مولاي حفيظ مع ضياف...وعاد را من تريكتنا...

شوية حتى نزلات حبيبة من فوق حاطة طراف صبيعاتها على الحديدات النحاسية ديال دروج...مكتافية غييير بفراشة زرقة موردة عادية جات مع طايتها لتحت تبارك الله...جامعة شعرها جمعة مهملة عطات لشعرها فوليم زوييين خصوصا خصلات الي طايحين على عينيها..الوجه كيما هو مافيهش نقطة الماكياج من غير ترطيب شفايف وعطرها المفضل...نازلة وصوت خطواتها بصندالة صبع فالفضي لامع...هبطات تالعندهم وتبسمات ببرائة..

حبيبة : كي جيتكم ههههه

لطيفة : تگولي جايين فيك الخطاب هههههه...

عوجات فيها راسها وشافت فيها بعويناتها الخوضر لونهم بحر صافي...وابتسامتها حكاية من الصفاء والنقاء....شافت فيها بمعنى ياااك...

لطيفة : ايوى شنو هههه...تبارك الله وحجاب الله...زيدي القشة زيدي....

حبيبة"عنقاتها هي وامها واخا كتبان حداهم قصيرة حيث ناديا طويلة و لطيفة كثر...". : وادابا هي گولي ليا هاني بينتزوج شكون الي بايقبل عليا وانا بابا مفششني تا خرج ليا من نيفي...

لطيفة : وبقاي حداه ضفري شيب نتي وياه...

حبيبة : عميييتووو...

لطيفة : وزاااك....

مشات ناديا تشوف اخر اللمسات...طلات على داكشي بان ليها على حقو وطريقو...العين معمرها والمعدة مراضيها...والخير موجود والكرم حاضر كثر من الجود...براكة غير الابتسامة الي كيستقبلو بيها ضيافهم مخلياهم سيرة على كل فم شاكرهم وشاكر جودهم...ماتشوفيش التغوبيشة منهم وماتحسي بقنط عندهم...بشوشين الوجه...

تسمع صوت الباب وضحك الحاج وهضرة الحاج عبد القادر الي صوته كيتسمع مجهد لا هو لا سيحمد الي استنتجو انه تاهو جا معاهم...وهضرة شي عيالات كثيرة...وقفات ناديا مبتاسمة فيهم بان ليها عبد القادر داخل ويحنحن وذكر الله ففمو موجود...وراه سيحمد رماو ليهم سلام وتبعو الحاج لصالون الكبير...بانت ليها توريا سابقة لابسة جلابة لونها بلونكاسي وشالها نفس اللون...وصاك كبير فايدها مكحلة عينيها تا ما قدت وجايا ضاحكة...ووراها ربيعة الي شادة فااحاجة مدخلاها..لابسة جلابة وشال وصابو كحل تاهي مكحلة عينيها وسواك كيبان من جناب فمها لداخل صفرييين بحال مرشوش عليهم زعفران...سلمات عليهم وهي تقرب حبيبة سلمات على توريا الي فلاتها من فوق ولتحت...

عيدة : واسعدي بزينة البنات جات...زيدي حبي(بوسي)..ميمتك زيدي...

حبيبة"قربات باست ليها راسها وايدها وبقات شاداها ليها فكراتها غير فشدة بشار ليها" : مرحبا بيك امي عيدة..كيف بقيتي شوية"كتجهد صوتها باش تسمعها"

عيدة : اللهم ليييك الحمد...الله يرضي عليك اكبيدتي...

ناديا : تفضلو مرحبا...

توريا : واخا بلاتي تجي طفلتي (لوستي)..بقات غا هنا گدام الباب كتهضر...

ناديا : حبيبة بقاي عند الباب استقبليها الله يرضي عليك...زيدو تفضلو مرحبا بيكم والله الى نهار كبير هذا بحالاش...

خلات حبيبة امها وعمتها يدخلو الناس لصالون المجاور ومشات هي وقفات حدا الباب مبتاسمة كتسمع فصوت مليكة مجهد عند الباب كتهضر كلمة فرنسية ملاوطة والباقي داريجة...

مليكة : واسيري ابنتي أفيك پابا...نن...مانصيبش راني عند الناس الي يتسالهم جدك الفلوس (حبيبة هزات حاجبها)...ايييه..ولا تمشيش مع حسام ابنيتي را حسام عندو شغالو...سيري مع پاپا مافييي...وي جاغيف جاغيف...ااابياان طو...

قطعات ورمات تيليفونها فواحد صاك ديال گوتشي كبييير تقولي صاك ديال حوايج...لابسة واحد جلابة بلا قب شيبية مطروزة تاهي بالغوز ولونها وخضر...وواحد صابو شيبي سوميلتو عالية دايرة عطر Alien...مصايبة شعرها وطالقاه حد كتافها شادة خصلات قلال لور بفيليل نحاس صغيور..دايرة مسكة ففمها صغيرة كتحرك بيها ضراسها وخا كتندغها كتسمع طرطيقة تال تادلة...دخلات وهي تبان ليها حبيبة وهي تضحك تا بانو ضراصها...

مليكة. : هازين هااا زين اخويتي هالفنات...بقات صورتك فبالي من نهار جيتو...زيدي خويتي بوسيني زيدي...نتي هي حبيبة ياك ؟!

حبيبة"ببسمة تفرفر العقل" : هي انا هههه...

مليكة : تبارك الله وحجاب الله..."قرباتها ليها وباستها جبدات ليها حنيكاتها فنفس الوقت كتقيص فيهم ملمسهم رطب وناااعم...حمقها زينها كلها كتفتن...كتبان مليكة قدامها فحال الفيدورة..."...

رحبات بيها ودخلاتها لصالون حداهم..رمات مليكة سلام بواحد صوت حلگها غلييض ومبحوح تاتسمع عند الحاج الي كان جالس مع عبد القادر وسبحمد الي غير كيجر فمسطاجو. وحاضي مولاي حفيظ الي قشعوو وزادو هم فهم...تا فيقو من شرودو عبد القادر...

ع.القادر : نوض اولدي جيب داكشي من الكوف...

سيحمد : ايه مرحبا...

م.حفيظ : سير اولدي معتز عاون عمك سيحمد...

معتز ناض فالبلاصة معاودش الهضرة...جبد سيحمد ساروت طوموبيل كاتكات الي كيتحركو بيها خارج التجارة...حدر راسو وتوجه لباب الي لقاه محلول اصلا دغيا خرج وحل الكوف وبدا يهز فكراطن سكار حطهم عند الباب فديك دخيلة وفنفس الوقت عينيه فهاد رياض المخدوم بطريقة القديييمة بقى مبهوض..والسقاية الي خدامة ولوان فسيفساء الي فيها...رجع جاب واحد الخنشة كبييييرة ديال شتب عامرة حنة. موصي عليها الحاج من سوق من نوع المزيان...وحط فوق هادشي كامل زوج كراطن كبااار ديال تمر المجهول احد افخم الانواع ديال التمر...بقى يهز ويحط تا خرج مولاي حفيظ يوصي ناديا يجيبو مجامع اتاي حتى بان ليه حط اخر حاجة الي هي خنشة كبييير عامرة فاكية الفاكية المخيييرة...

م.حفيظ : علاش الحاج عذبتو راسكم...وايلي اش هذا...

ع.القادر : غا قبل الحاج وكان...گليل (قليل) فحقكم الحاج...

عبد القادر نيتو صافية ماعارفش اش دار سيحمد لحد ساعة وسبحمد طااوي متمر داير راسو مافراسو والو...ساس سيحمد حوايجو وقادهم حنحن ودخل لصالون حدا باه...شاف مولاي حفيظ تا عيا وحرك راسو كيضحك...حتى عطاتو ناديا الصينية فيها مجامع عامرين وحدة سكار ديال قالب مهرس وثانية اتاي وثالثة نعناع...داهم وجاب تاني صينية فيها برارد بلدية فخمة كبار...حطهم...

م.حفيظ : زيد الحاج براكتك فواحد دكة رحمانية حلووووووااا هههه...

ع. ااقادر : دير بحلاوة نسوبية الحاج...

م.حفيظ : مافهمتش هههه...

ع.قادر : نشركو طعام من جديد..ولينا هضرة وكلام...سمي الله وصلي عالنبي وارا داك المقراج بسبولتو (دخانو طالع)... نوزنو كلامنا ونقراو رجانا عاد نوصلو لمرادنا...

م.حفيظ : مرحباااا الحاج...

عند العيالات كذلك جابت لطيفة صينية المجامع تبعاتها حبيبة صينية البرارد والكيسان...مليكة وربيعة حالين فمهم فداك الصالون الطوييل المنقوش والزليج ديالو البلدي العريق...وفراشو ديال الخريب وشراجمو حديدهم زوقتو بلدية وزاجو العراقي الملون...اما ريحة البخور ريحتو فايحة..حبيبة غير كتدخل يعبروها من فوق لتحت خصوصا ليهونش ديالها العامرين والملفتين...وزين الوجه ورجلين...كلشي فيها كيخليهم سارحين فيها ويقولو هذا هو زين الي خاص يدخل لتريكة رحماني يحسن ليهم النسل...عامرة من تحت وبيضة وزينة واصلها كبير ولباس عليهم هادي هي المواصفات الي كيبغيو دار رحماني داكشي علاش كنيناتهم كل وحدة وزينها...

وجد اتاي ك تنغيمة البدية مع مملحات مشكلة غير المملحات محطوطين طبيسلات زواقتهم بلدية من فخار اسفي...باش ينغمو هصرتهم ويبداو يشركو طعام...تا تهزو صواني وبداو يسربيو فالغذا بمساعدة البنت الي جات من عند تريتور...واقفة عليها ناديا ولطيفة...تا جا الحاج جايب عبد القادر وسبحمد لصالون مع طوييل دارو ليهم جلستهم وحدهم لهيه رجال بيناتهم معاهم معتز تاهو...و العيالات طبلتهم حداهم...بداو بشلاضة الي مصاوبة بتصميم زوييين يشهي خلاو مليكة حالا فمها وعيدة تقول تبارك الله اما توريا غير مبسمة وتقول نسوبية زينة هادي اما واحد ربيعة راها تجمع فالمزيودة ماتعاود وتشد الحتيت مع عيالات لواسها...داكشي هماااوي وعامر...

توريا : عذبتو راسكم الحاجة ناديا...

ناديا"حطات ايدها على صدرها بصدر رحب رامية الكلام المعسول" : مرحباا بيكم والله الى قليل فحقكم وحق الحاجة عيدة..مرحبا...

م.حفيظ : مرحبا بيكم الحاج نتوما دياولنا الحاج...ماشي كثير عليكم هادشي...

عيدة : الله ينور طريقكم ويعطيكم الخير من عندو ويعوض ليكم...والله يبلغ مقصود الجميع...

الكل قالو امين الي فهم را فهم الي عارف راه عارف...عيدة حلفات ماتزعزع حبيبة من حداها تاكل وتمد ليها وحبيبة كتعجبها عيدة بتعاملها اللطيف ماعارفاش اش تحت راسها لكل واحد نيتو ولكل واحد غايعطيه ربي على قد نيتو...تشاركو جميع الاكل...تهزات صالاد وتبعوها بسطيلة الحوت مزينة من فوق بكروفيت رويال و فرماج حمر و بريوات مالحين صغار معمرين ب بفرماج وزعتر...اما لداخل را كنز ديال الحوت المشكل ..غير بسطيلة خلاتهم حالين فامهم ويزيدو يشدو فاختيارهم لدار المراكش كا نساب...ماجاو فين يستوعبو تا تبعو ليهم زوج طباسل ديال طنجية عامرين...مونادا محطوطة معاها عصير الحامض...الحاصول الغذا كان ملكي همااوي...جمعو طابلة بمساعدة لطيفة وحبيبة والبنت...تبعوه اتاي وقهوة كحلة الي بغاها ودخلات حبيبة زوج ديكورات على شكل قفص طيور عمودي فيه ايطاجات كل ايطاج فيه زوج نواع من الحلوة معمرة باللوز والصابلي...

كب الحاج عبد القادر اتاي كشاكشو تبان من بعيد..تفرق اتاي ووصل وقت الجد...حنحن الحاج عبد القادر بادي هضرتو...

ع.القادر : يضهر ليا ماعالم بزيارتنا الحاج...

م.حفيظ : زيارتكم فاي وقت مرحب بيها الدار ليكم والعتبة لينا...

ع.القادر : الله يكبر بيك الحاج والنعم منها ناس ود.م...الحاجة عيدة هاهي تسمع وبنتي توريا مرت ولدي الله يرحمو ويجدد عليه رحمات تسمع..وبنتي الكبيرة هاهي تسمع...جاييين قاصدينكم والمقصود الله...نسى عليا الكريدي الي بيناتنا وحللو بنسوبيتك...

حبيبة"كتسمع مافهمت والو اما ناديا فهمات من لول...ولطيفة خلاص..."

م.حفيظ"جمع حجبانو بعدم فهم" : نورني الحاج...

ع.القادر : حسب داك الكريدي الي بيناتنا بعيييد ولا قسمو على كل عام حط ليا الي جدتي بيه ولا سي متحسبوش...وخلينا نتجمعو ونسوبية تكون بيناتنا...انا منصيبش نتفاوت عليك لاكان غا من جيهة حفيدي الكبير...بفهامة العبد الحاج راني جاي طالب راغب فالبنت كريمتكم الكبيرة لولد ولدي بشار الي يلاه جا من برا...راك عارفو قرا مزيان وتوضف وضيفة لهيه مخيرة مايخصص بنتك من والو...

حبيبة"وذنيها تزنگو وعينيها خرجو وريقها نشف..ماقداتش تهضر خصوصا من غمزاتها ماماها متقول والو قدام ناس حيث عيب تاتعطيهم جوابها من بعد"...

عيدة : لا يگوليك راسك ابنتي تعيشي معانا فالعروبية لا تخلعيشااااي ههه راكي فحال بنتي وكثر...وها توريا تگوليك...

توريا : لا لا ...لا قبلات بالفرحات عليا راها بحال بنتي اشراق وكثر...والى قبلتي ابنتي را كي تجوجي بيه بقاي شوية ويدير ليك وراقك ويديك معاه...والله ابنتي ماكرهتك ليه...تربية وزين واداب وصواب...

مليكة : زيييينة تبارك الله...نوا يدير دارو تاهو يعيشك الفووووق ابنتي والي حليتي عليها فمك تلقايها...هانتي يديك تما ولاكنتي ناوية تقراي راه يخليك تقراي...

م.حفيظ : هههه ايه مرحبا وليني البنية باقيا صغيرة...

عيدة : رزقها جاها الحاج زين وهمة وشان ويديها لبلاد برا ويخليها تقرا...را بفلوووسو تبارك الله...

مليكة : وانزينور (ingénieur)..ولا ش يگولو ليه كبييير...لا تگولي نجي نترس عليه ولا نخدم عليه...راه يخليك تقراي وتوصلي فين بغيتي...

ع.القادر : لا تعطي جوابك دابا فكرو اسي الحاج والي بغيتوه مرحبا بغات...من صباح نگطع دوك الشيكات الى بيناتنا خنز دنيا ماعندي مندير بيه لاكان غايفرقني على نسيبي..."حشاها ليه بلباقة.." ...

كلام الحاج عبد القادر كان اشبه بالتهديد لمولاي حفيظ بشكل غير مباشر وبطريقة لبقة الي معناها واحد وكيرمي ل " الحاج تزوجني بنتك نسى الكريدي..متزوجنيش را فهمك كافي وموفي" واخا را وصلها ليه بطريقة مافيها عيب وفنفس الوقت هي العيب...شدو من ايدو الي كضرو...مولاي حفيظ صرط الهضرة ولبس وجه البسمة وحرك راسو خصوصا من قال ليه تاتفكرو...هنا حبيبة بدات تفهم المشكيل الي عند باها وخا را فمها تلجم ولات غير تاتبتاسم ماقالت زوين ماقالت يخ...

اما ف الرحامنة عند الناس الي بقاو تما...رضوان الي سافر رجع فحالو لطاليان مخلي ليهم كريمة امانة تشقى وتخدم فحالها فحال الكنينات... والعديزات يتمرحو...كانت سعيدة جالسة شافت ساعة فتيليفونها بانت ليها وقيتة مجية هاشم من القيادة اما حسام را مشى لمراكش يشوف الكلية على حساب الماستر بحكم هو فالسنة ثانية ماستر تخصص القانون العقاري...هزات عينيها وهي تبان ليها حسنية جايا تجري لابسة بيجامة جديدة...شافتها وهي تبسم وفنفس الوقت كتحسر على حالها...

سعيدة : حسنية ايهااااي ناس لابسين بيجامة جديدة وناقشين لايدين...بصحة وراحة...

حسنية"تبسمات وهي تحرك ايديها باشارة وتمتمات بحروف بزز باش تفهميها". : اببب ناار..

سعيدة : منار !! دخلي راها لداخل ابنتي كتاكل جاها جوع سيري عند كريمة تعطيك تاكلي معاها...

هي دخلات هاشم داخل بسيارة داسيا داستر فيها ماتريكيل الجماعة...خرج بلبستو ديال القايد خزية وكاسكيط فنفس اللون وبروتكان طويل لفوق شوي...وصل لعندها حيد كاسكيط وحطها كيدوز على شعرو بتعب....

هاشم : عيييت عييييت نهار كامل لغط ف دوا الكشايطي على دوك البيار الي تحفرو بلا موجب شرع...

سعيدة : گوليا واش لالة فاش عينها ؟

ناشم : عينها !!..تت..وايلي را هو گاليهم قضيو غراض...

سعيدة : ماضغطوش عليه ؟!

هاشم : ورا ضغطو عليه...سهلتي مرض مي على شوي تموت...

سعيدة : علاش مداونيش انا لاش گالت ل ربيعة يلاه نتي معانا..علاش منمشي انا اه حگا نتي الكبيرة دار فامانتك...

هاشم. : علاه هو خلاني نفهم را مزال لدابا ماهصرش معايا وتيليفونو طاافي ماعرفتو وصل ولا باقي ولا ممشاش كاع...خمسيام هادي وهو لا برية لا تيليفون...

تنهدات سعيدة ماعارفة تاليت هادشي اش...شافت تا عيات وهي تنوض هي كاااع...وهاشم تاهو ناض طلع لفوق حيد دوك الحوايج لبس فوقية وخرج هاز حوايجو دخل لدوش دوش مزيان صحصح من عيا الخدمة وتراب ديال دواور...يلاه جلس كينشف فشعرو تا صونا تيليفونو...حدر عينيه بان ليه "بشار" فالبلاصة جاوبو...

هاشم : سعادة l'ingénieur chimiste...(سعادة المهندس الكيميائي)...عاش من سمع صوتك اااخوييي الى ماقتلتني كورونا تقتل.ني نتا...

بشار"هز حاجبو مشنج سيفتو" : ياك لباس ؟!..

هاشم : مااكاين باس..ماعرفتك مشيتي ولا مزال طافي تيليفون..حنا ناس العزاز ماعندنا قيمة عندك...

بشار : براكة عليا ميمتي ولات دايرة ليا قيمة "غمز بحنكو" كافيييني وموفي ابا هاشم...

هاشم : ياااك...صافي تصالحتي مع مك ونكرتيني..

بشار : شحال عندي من توريا...

هاشم : فخبارك مشاو يخطبو ليك !؟

بشار : تبرزطت فكري ملي مشيت من تما...طلب سموح من سعيدة نعوضها فاش نجي...واحد اليومين هكاك ورسل ليا RIB ديال الواليدة (هاشم هز حاجبو من كلمة الوليدة اول مرة يسمعها من فمو واخا جاتو قالها بواحد نبرة ماقدرش هاشم يستقر فتفسيرها) نفيرسي ليها شي بركة باش تقضي...تشوف شنو يخصها لداك العجب ديال الخطبة...الي خصها گولها ليا نزيدها....هاشم !!

هاشم"دوز على وجهو" : نعاام !!...

بشار : بغيت توريا تبقى مرتاحة وفرحانة...بغيت راحة ميمتي اهاشم...

هاشم : وتبقى نتا بلا خاطر ؟!

بشار : فين عمر الخاطر عرفتو ؟!...قضي معايا الغراض..خاطيني من كثرة الهضرة...ريح ليا الواليدة...ريح ليا عيدة...الي خصهم عطيه ليهم بدوبل...منوصيكش اهاشم...نسالي شي مشاكيل عندي هنا نهار يقضيو الغراض قيد لبنت المشاوري نمرتي وعلمها هي تواصل معايا...خليني نتقرب من ميمتي...

هاشم : واخا بشار مرحبااا...

ماجا فين يهضر هاشم يسولو غير واش راه ف برلين حتى لقاه قطع...تنهد هاشم ماعارف تاليت هادشي اش هي...اما المعني بالامر غير قطع بقى شحاااال شاد داك تيليفون جالس فالكرسي عريان من فوق ولتحت باقي بسروالو مفرق رجليه وحاط ايديه فوق ركابيه ايد كتلعب بتيليفون وعينيه ساااهيييين...هبط عينيه لايدو ليمنى كيشوف فيها ببرود...رجع لعادتو ديال ايام المراهقة من بعد ما بقاش كيديرها هاهو رجع ليها من جديد...هز عينو لزيزوار ورجع شاف فايدو وهو يمد ايدو لبواطة كلينيكس هز منها مشوار وبدا يمسح فديك الضربة الي ضرب ايدو كيمسح ويعاود وداك د.م مابغاش يحبس...

حتى حس بايدين سخااان تحطو عليه بقاو غاديين هابطين تا توسطو صدرو كيلعبو بزغبو....وخشات راسها فعنقو مزيرة عليه. معنقاه من لور....

هانزادا : بشار !! (الحوار بالالمانية)...مالك اش واقع ليك تاني..."شافت د.م فايدو وهي تشهق برعب" ممم مالك...

بشار"كيمسح ويعاود" : ماماليش..."نطقها بواحد البرووووود خطيييير...برود خطير من كاع جوايه"...الام ديالي شافت ليا واحد بنت الناس عشقاتها ليا وناوي ندير ليها خاطرها...نديو شي بركة ديال الرضى...

ذكرايات قديييمة رجعو ليه ب ماليهم وبفعايلهم وبفعايلو...د.م من ايدو كيدوز وهو كيمسح ببرود...يمكن الجرح الي فايدو مايجيش قدام الي فيه لداخل...يمكن مابقاش حتى لداخل كيحس بيه !!...

"~من شدة فرط الألم،،لم أعد أشعر بقيمة الحياة.~"

واش كيهضر بصح ولا راه ساير يطنز...عارفاه من النوع الي يقوليك الحاجة ديريكت مكاين لا زواق لا تمهيد...وهادشي فراسها تسد عليه باب بساروت والقفل مخليا باب الامل فانه كيتمازح معايا ناسيا را بشار عندو زوج طرقان يا النيشان يا نيشان...

اما هو كااع ماداها فيها ولا حس واش تصدمت من كلامو ولا قلبها تهرس من هضرتو...الهم كلو مشى لايدو الي د.م يسيل...ماحملش راسو يرجع لهاد المرض الي نهك ليه لحمو واحد الوقت فمراهقتو الي محفورة فراسو وقلبو.. المراهقة الكحلة زحلة الي ماتبغيها لعدوك...ناض على وقفتو شاد كلينيك على ايدو وملامحو مكشرة متشنجة خااصرة ...ماعرفش كي طرا حتى شرد بيه تفكير العميق عمق البحار فالليالي الكحلة...سرح وزاد بيه السرحان لطريق طويلة غيباتو على الواقع تهز من الحقيقة ومشى لواحد الخيال مضلم حالك...فحال كينتاقم من راسو بلحمو..فحال كيبرد غدايدو فلحمو...فحال واحد ياااااائس مسالي ساخي فهاد الحياة..."كسدة بلا روح...گلب داير خدمتو معندوش الاحساس....عقل خالي من الضمير..."

انسان ماعاطيش القيمة لحياتو يعيشها بكل بساطة غير عايش وصافي...يمكن عايش على جال خوتو كيف قال كنخدم وندمر ومايخصهم خير المهم يعيشو عيشة الملوك ماشي عيشة العبيد...لكن..

بشار"ضار هنا وهنا كيشوف اش يدير...بان ليه بارفان ديالو فوق كوافوز حيث كان فبيتو...هزو ورشو نيشان على جرحة شنشنها ليه وخا ماحسش بداك الحريق...ماهزش عينيه ف هانزادا الي كانت واقفة عينيها محجرين بدموع كتسناه يقول شي حاجة...تا هز راسو وشافها واقفة شعرها الاسود الليلي مغطي كتافها وعينيها الحمرين عطاو واحد لمسة زوينة حتى فبكاها فاتنة" : اش كاين ؟!

هانزاده : علاش درتي فايدك هاد الحالة ؟!

بشار : ماشغلكش...

هانزاده"قربات ليه وشدات ليه فايدو كتشوف ف ضربة كانت ضربة قديمة ورجع فتحها.. ؟!.." : فحال الى فتحتي جرح قديم ؟!...اش واقع عاود ليا...انا عارفاك وفهمت من كلامك الام ديالك خطبات ليه ونتا مسايرها...عارفاك مغاديش تزوج بيها حيث انا وياك غانتزوجو...

بشار : ماموالفش نتمازح معاك...نتي معايا بنت الناس وگفتي معايا فليام المقودة بالبيان...فهمتيني بغيتي ضحي براسك گلنا مافيها باس...اشنو الي واگف بيناتنا لحد ساعة ؟...

هانزاده"كتجاوب نيشان" : المذهب...وواليديا...

بشار : اش درتي ؟!

هانزاده"حابسة البكية وحادرة راسها...قلبها كايتنهش من لداخل..كاتبغيه بزاف وتعلقات بيه لكن العراقيل والعوائق بيناتهم كبيييرة...نطقات بحروف مقجوجة" : هادشي علاش جيت عندك باش ن ن نهضرو...

بشار : المفيد ؟!

هانزاده : بابااا رفض وماما حتى هي...اختي ساندتني...

بشار كيسمع ليها وعينيه على ايدو كيمسح فيها ويعاود يهز فكلينيكس تاني...حتى مشى خرج من البيت وهي كتهضر موراه تابعاه وكتهضر حتى دخل لدوش جبد من فارماسي معقم وقطن وبيطادين وشاش...هي كتهضر وهو خداام غا مع ايدو....

بشار"خوا عليها بيطادين كيمسح فيها ونطق ببرود" : كملي...

هانزاده : مايقدروش يقبلو ليا انني نتزوج ب سني...رافضين الرفض التام...غير باش نحطك بالصورة حيث مكتبغيش الكذوب...وباش نبدا معاك حياتي بكلشي شفاف...

بشار"عينيه على ايدو كيمسح فيها وكيهضر عاد" : هي اقتانعتي بالمذهب ديالي ؟!..

هانزاده"الصمت"

بشار : جاوبي طلقيني...

هانزاده : مزال على مذهب ديالي...كنحاول نقرا على السنة...كنحاول نفهم والى اقتانعت اكيد غانبدل المذهب ديالي...هادشي صعييب عليا نبدلو فالحين..مسالة المذاهب او ديانات الاقتناع بيها ماشي سهل...انا بغيت نكون معاك غادي نرمي ورايا كلشي غادي نضرب على ايران ونعيش معاك...حياتي تعلقات بيك ابشار...شفتي فين وصلت باش نكون معاك ؟!..شفتي هاد الحب الكبير من جيهتك قداش...نتحدا الثقافات ودارنا على قبلك...

بشار"زفر بشوييية تا كمل ايدو وسد داك الفارماسي. وضار شاف فيها بعينيه ..حادين الشوفة.." : ماغانزيدك والو من غير ندي فيك لاجر...اقتانعتي بالفرحات عليا...دخلتي فالسنة راه غاينفعك فملقاك مع الله....واليديك ابنت ناس مابغاوش زواجي بيك ؟...باغيا تزيديني سخط الشيعة مع ليهو.د الي عندي مع السنة...ياك شي باس مكاين ابو لهب ما وصل لسطاج ديالي !!...جوج كلمات مغاديش نفوتهم ليك...البنت الي تخلى على واليديها على راجل ماعندي ماندير بيها...ميمتي ونفرتني فوقتها وايامها وترحميني نتي ؟!...سيري ابنت الناس حسبي خطاويك ماعندي منگجدر بيك...

هانزاده"خرجات عينيها وبشهقة ماحسبات ليها حساب " : بشار !!...بشار انا هانزاده ؟؟...

بشار : freut mich (فخوت ميش..تشرفت بمعرفتك)...

شير ليها جيهة الباب وبدا يمسد فنواضرو...مازادتش معاه الهضرة حيث حسات بيه ضرو راسو ومكيبقاش عندو الخاطر لراسو يقدر يتنيرفا ويدير شي رد فعل ممتوقعش...كتمات الغصة فالقلب وخلات العقل يفكر ويخرج بنتيجة وهي يخليه على خاطرو حتى ترجع لعندو من بعد...واخا را حاسة شوية ان نقاش غايكون عقيم مادام قال هاكا الا وصافي هادي نهاية علاقتهم...من خرج هاد الهضرة من فمو صافي را قرر...زادتها تا الغصة ديال زواجو...هزات صاكها وخرجات كتشهق بالحس وعاضة على صبعها باش متنهارش...

اما هو تحنى غسل وجهو وراسو بالما وخرج رمى كبسولة قهوة كحلة فماشين تا تعصرات هز الكاس ودخل لواحد لمكتب فيه لابوراطوار صغير...وجلس فالمكتب وبدا خدمتو الي اجلها اسبوع وزيادة باش يعطيها لماليها فالمختبر الي ف منطقة تكرير البترول في عابادان ف ايران....

الضياف خذاو المقام العالي من الترحاب...والضيافة الكريمة كانت ليهم...جا وقت المشي...وكيف مولفة اي عائلة مغربية وقوفها عند الباب من اجل الوداع طول من زيارة...بقات ناديا وعيدة الي شادة ليها فايدها ومزيرة عليها...شافت ف حبيبة الي كانت مزيرة وجهها مزنگ وعينيها بغاو ينقزو بالدموع حادرة راسها وواجب عليها تسلم عليهم بابتسامة...

عيدة : شوفي بنيتي مكاين الي يبزز عليك..لا گلتي لا الله يجيب ليك ماحسن..گلتي مرحبا على رقبتي لا نديرك فعيني كتر من ولادي...راكي غاتكون مرت الغالي ولد الغالي...بشار را ولدي ماشي حفيدي راني كبرتو مع عمامو ويعيطو ليه خويا...كنتي باغيا البهيمة المخيرة عندنا تدب.ح وتصدق على المحتاج هاهي وبحلوفي يا بنتي..توريا حسبيها ميمتك...لواسك حسبيهم فمقام باك الله يطول فصحيحتو...عجبتيني زينة ومصوابة وحريرية...والي حليتي عليها فمك تجيك...مانگوليك شاااي تعيشي حسن من عيشتك عند باك...البنت عند واليديها بنت الفشوش وعند راجلها بنت زمان...فكري بنيتي وفرحيني وفرحي باك...

حبيبة"سمعات ديك فرحي باك وهي تزيد تزير..ماردات ما قالت يخ...هبطات راسها باست ليها ايدها وتبسمات...سلمات على توريا ومليكة وباست ايد عبد القادر اما سيحمد حدو حرك ليها راسو...

تسالا سلام وكل قصد بلادو...مع الحاج سد الباب تنهد وحط راسو عليه..كتافو طاحو وحملو ثقاااااال....تنهد ولاح النفس سخووونة تحرق...هز راسو ورجع دخل داز من حدا ناديا وحبيبة مغوبش ووجهو مايتفسرش...من قبل مايجيو كان باين عليه مدمر نيييييت...ماقدروش يهضرو معاه وفنفس الوقت خايفين عليه لا يرجع يتأزم وتجيه كخيز كاغدياك الي حذراتهم منها طبيبة المختصة...مافاق غير على لمسة ايد ناديا على كتفو..

ناديا : افين سهيتي هههه...

م.حفيظ"شاف فيها تبسم من فوق الخاطر ورجع شاف فحبيبة" : البنات كبرو ورجعو يجيو فيهم الخطاب من جدة. وجديد هههه...

حبيبة"تبسمات بغير خاطر وحدرات راسها"

ناديا : الحاجة عيدة الله يعمرها دار...عطيهم وقت وديك ساعة يكون كلام اخور...

م.حفيظ"يلاه بغى يهضر وهو يرجع طبطب عليها وشاف فبنتو تبسم ليها ورجع حدر راسو ودخل لبيت"

لطيفة : سيري اتا شوفيه مالو...اش واقع راه من الي جا صباح بكري جاب المقدية من مرجان ماهو على برجو...

ناديا : هي خليه ماشي دابا...دابا بيخرج يصلي المغرب ويرجع...

حبيبة سهات وهي كتفكر...كتفكر فهضرة عبد القادر الي حساتها مهينة ل باها...واخا را مافيها عيب ولكن كانت العيب...شوفة باها فتلك اللحظة كاتقهر...قسمات ليها قلبها من ايااام او تقريبا فايت شهر وباها شوفتو طافية...بقات ساهية كتسمع فناديا كتهضر مع لطيفة عمتها مشاو بدلو عليهم ولبسو حوايج بيتوتية...جالسة ناديا دايرة رجل فوق رجل وشادة كاس القهوة كحلة كتنغم بيه وتهضر مع لطيفة..وحبيبة غير شادة داك تيليفون داخلة خارجة...حتى جاها ميساج من جديد من جاد حيث كانت جاوباتو ورجع غبر لانه ماشي صحبة بزاف مع انسطا غرام واخا داير فيه صورة بروفيل وشي زوج تصاور ثلاثة لا اقل...

جاد : im so so sorry...كانو عندي ضغوطات فخدمتي..داكشي الاش (علاش) كنجاوبك معطل..لباس عليك..

حبيبة"بقات كتقرا فرسالتو وتعاود..عوجات فمها وجاوبات ب لا مبالاة حيث عقلها غااايب فحاجة اخرى.." : دونت كير..لباس الحمد لله...

جاد : انا ف سوشل ميديا ماشي اكتف..سو كان يو گيف يور نامبر فون..الى ممكن (تعطيه نمرتها)...

حبيبة : مازال موصلتش معاك لسطاج انني نعطيك نمرتي...مزال مكنعرفكش شخصيا..حدي كنعرفك ب سلام لباس..كتغييييب شحال عاد ترجع تجاوب..عاذرة انك شخص مشغول ولكن مسالة نعطيك نمرتي اجلها شوية الى ممكن...

يتبع...