محتوى القصة
هاشم"تنهد ومع كل تنهيدة كاتنزل ليه دمعة" : هذا الله..ماعندي ليه جهد اسعيدة..هذا الله اسعيدة هذا الله...
سعيدة : غايبقى فالبيت وحدو مسدود عليه ؟ واش ممراعينش لحاالتو ؟ توريا من جيه وهو من جيه اش خادشي اهاشم اش وقع فهاد دار ااااهاشم اهى اهى...واش هاد الحالة ياربي ولا ساقو ناس الخبار فين غايبقى ليه مسكين شي وجه ؟! فين غايلوح راسو لا بقى ليه شي عقل فين غايتل بيه الوقت اهى...شوف كي ديرو اهاشم شوف كي ديرو ماضيعووووهش توريا لا توگضت را تكمل عليه وهي عقلها نور الدين وعندها مشاكل مع بشار وتزيد تكمل اهااااشم اهى اهى...اش نديرو ااااش....
هاشم : سعيييييدة انا براسي را خاص الي يشدني وراني اسعيدة مالاگيها لا من هك ولا هك...واش خويا ولا بويا ولا مي ولا بشار براسو...سعيدة راني طلبت لاجودان يصبر غا حيث خاص نستوعبو اش جرا...ورا خويا خليتو داااوه لمراكش ل الطب الشرعي...وخاصني صباح بكري نكون تم باش نجيبوه وندي بشار...گولي ليا اش ندير اسعيدة باغي غا نحط راسي ونفكر...اش نديييير...
سعيدة : نتا ترزيتي فخوك...مرت خوك ترزات فراجلها..لالة فولدها سيحمد ورضوان فخوهم مليكة خلاص...بضار اهاشم بشااااا راه كلاها گدكم وبالمضوبلة عليكم...را هو الي ضربو حط راسك بلاصتو اهاشم ودري مريض فراسو قبل وزاد كمل واش مكترحموووووووش مرحماتو مو ومنرحمووه حنا اهى اهى...وا عز عليا اهاشم بقا فيا وهرسني اهاشم...دخل عندو هضر معاه وشوف اش غايگوليك دخل دخاااااااااااااااال....
بقات تنهج وتنخصص وهي دور ومشات وخلاتو واقف حاير تاهو يحسن عوانو...حلات الباب على توريا لقاتها باقيا جالسة كيما خلاوها هبطات لعندها وهي تحط ايدها على ايدها...وشافت فيها...
سعيدة : توريا ختي كوني مع الله يكون معاك...
توريا"هزات فيها عينيها وهزات فيها راسها" : ياك گلت ليكم را مافيهش ثقة ؟!...ياك گلت ليه رد البال منو را مفاوت البرهوش...شحاال وانا نگول فيها تا رزاني فيه دارها ليا على گد فمي...
سعيدة : نهاك الله اتوريا واش عارفاه يديرها ؟..جويجة كان حد علمنا خاوية !؟..كنعرفوها خاوية اش غايعرف هو يهديك الله..نوضي عند ولدك كوني معاه يكون معاك را عقلو خرج ليه اتوريا مكاينش الي يحط عليه راس من غيرك..عفطي على گلبك وكوني حداه...
توريا : كانتسنى نور الدين يجي يدير ليا معاه حل...خرج عليا وخرج ليا من جنب...ا شدار ؟ رزاني فيه...
سعيدة"بقات حالة فمها كاتشوف فيها تاهي تفاوتت كتهضر وتخربق فالهضرة..سمعات صوت اشراق تاني فاقت بجوع الي ماعتقها حد من الي تولدات...ضارت جيهتها لقاتها حداها...مشات ليها وهزاتها كاتراري بيها شافت ف يوسف وتبسمات ليه بزز" : يوسف ولدي اجي عندي...(ناض بزربة كايجري مشا عنظها ولصق ليها فجنبها خاشي صبعو في فمو...بقات شادة اشراق وكتراري بيها والو مابغاتش تسكت...حتى من قرشية القابلة ماكايناش مشات لبيت حدا عيدة و مليكة الي متكية كتنخصص وعينيها مكيرمشوش بالصدمة....وهي تقربها ليها بغات تحطها لثها ترضعها قايلة)...
سعيدة : رضعيها توريا رضعيها ماعارفة والو...
توريا"شافت ف اشراق كاتبكي وفمها محلول وجهها تجيف بالبكا..حطت ايدها عليها وهي تدفعها ليها بجهد تاكانت غاطيح سعيدة وهي فايدها."..
سعيدة : الله...ياعوذ بالله..."تنهدات وبتفهم حركات ليها راسها وناضت هازة البنية وطبطبات على توريا" الله يصبرك اخويتي الله يصبرك اهى اهى...زيد ا يوسف ولدي زيد معايا...
خلاصة القول هاد نهار كان نقطة كحلة عند كلشي...حتى من القابلة ماقدراتش تمشي وتخليهم حيث اصلا كاتجيهم وبقات معاهم...توريا حالها يشفي والخوت حالتهم تبكي...والواليدين الله الي عالم بكبدتهم الي ترزاو فيها...وبشار حالتو جمعات حالتهم وتضربات ف زوج حيث هو سباب هادشي...بقى فالبيت مسدود عليه كل مرة تمشي سعيدة طل عليه كاتلقاه جالس كاتجيب ليه الما يشربو مكيتحركش حتى كاتلقاه كايهضر غا وحدو وكيبتاسم ويعاود نفس الهضرة الي هضر مع باه...جويجة داوها جوندارم عندهم والميت راه فمراكش...هبطات سعيدة لعند عبد القادر لقاتو فالبيت جالس وحادر راسو وعلى ملامحو الحزن الشديييييييد ممزوج بصدمة لانه باقين لحد ساعة ما استوعبوش..حطات ايدها على ايدو تا هز فيها راسو...
سعيدة : سيدي..كون مع الله يكون معاك...ثضاء الله اسيدي ونتا عارف هادشي...
ع.القادر"تنهد ونطق بصوت مهمموم مقسوم بالحزن" : وناااامسينا كان يوصي فيا عليه ويعاود..رد ليه البال ابا را حنييييين واخا رويسو قاصح غير عرفو ليه...رد ليه البال ابا الي جات منو سمن وعسل...
سعيدة : اهى اهى...
ع.القادر : لازم ندير بالوصية واخا رزاني فيه ؟!..
سعيدة : طلع طل عليه اسيدي طلع..شوف حالتو اسيدي..واش كاين شي حد يصفيها لبوه..واش ماعارفش بشار مع نور الدين ؟!...لا صبتي اسيدي كي دير عتقو اسيدي عتقو لا تخلي ناس يعرفو را مستقبلو يمشي وحالتو تولي كفس وجدر ابا اهى.ياك وصاك عليه دير بالوصية اسيدي..."تحنات ليه على رجليه بغات تبوسهم ليه وهو يشدها ووقفها"...
ع.القادر : هذاك ولدي وهذاك ولد ولدي...عيبي مني ولحمي وايدي واخا تكون مجدااامة يا بنتي...لا ساقو ناس الخبار العيب علينا حنا لولين...
سعيدة : كيفاش اش نديرو ؟!
ع.القادر : هادشي الي طرا هنا يبقى...الي سول كان معاه ولدو وكان كايجرب فالجويجة راسو وضرب راسو...
سعيدة هزات فيه عينيها...وضارت لقات هاشم تاهو واقف كايسمع فيهم...وهي دور عندو وتحنات ليه على ايدو وباستها ليه...
"عودة من فلاش باك"...
العمراني. : الو !! سي الهاشيمي كاتسمعني الو...
حط بشار التيليفون حداه وخلا المحامي كايهضر حتى قطع راسو...عارف مو ممكن توصل بيها دير اي حاجة باش تفكرو فالنهار الكحل الي دار...واخا بقات كاتمة الامر وسط الناس وماكانوش عارفين الحقيقة كاملة ان بشار الي ضرب باه...عارفين فقط " كان تور الدين مع ولدو كايجرب جويجة بالغلط ضرب راسو"...
كايسمع جميع العبارات الي كاتخرج من فمها وتفكرو انه هو الي صفاها لباه حتى ولف...ولكن ماضنش انه تستعملها ك سلا.ح ضدو فهاد الجلسة...يمكن من فم البراني جاتو قاصحة !!؟...
بقى جالس جهد نص ساعة وهو على نفس الوضعية ماتحرك ما هضر ما غوت مادار حتى رد فعل بثى حابس فبلاصتو واقف عندو زمان تاني...تا حس براسو ضربو فيه ضو وهو يشدو بايديه بحركة فجائية وزييييررررر عليه تا حس بصدرو كيحرقو من جديد...حط ايدو جنب طابلة وزييرررررررر عليها تا ولا عرقااان من جبهتو....شوية بدا راسو كايهمد عليه وكيتنفس وكايسوووووط ب فمو...
حتى ناض هز تيليفونو ومشى ل بلاصتو فين كان خدام حط التيليفون ورجع كايكمل خدمتو عاااادي...صونا ليه تيليفون شاف جيهتو لقاه المحامي ماجاوبوش بقى كايصوني يصوني والو حتى حبس...رجع كايكمل خدمتو ويجاوب عن بعد تافق مع الخدمة الي لهيه الرسمية والي ماشي رسمية غير قانونية ... ساعتين وهو غاطس فالخدمة القهوة والكارو القهوة والكارو حتى ولا يكحب فالكارو وصدرو تزعزع ليه...تا شوي صونا ليه تيليفون ولقاه الطبيب ديالو النفسي...حس براسو مامحتاجش دابا يهضر معاه...تاهو ماجاوبوش بقى ساعة تاني من ورا الاتصال حتى عاود صونا ليه تيليفون هزو شاف المتصل كانت اول مرة هي تتاصل بيه واول مرة يشوف اسمها كيصوني"HABIBA"... جمع حجبانو...وطلق الخط بدون رد منو تا سمع صوتها المتردد...يمكن تاصلات بزز منها او يمكن هي مترددة وبغات تعرف اش طرا كونه عاونها ودار بكلمتو...
حبيبة : الو..
بشار : كنسمعك...
حبيبة"حنحنت وصرطات ريقها" : اش وقع ف المحكمة !!
بشار"حك شنافتو بسنانو وهز كارو كماه ورجعو لطفاية كيسوط فدخان وكايهضر" : داكشي عادي..مزال مطولة دعوة...مزال ماشفتش المحامي باش نعرف مزيان اش وقع..ماحضرتش لجلسة...
حبيبة : علاش ؟!...
بشار : مانصيبش نتواجه مع الواليدة تما...المحامي يقضي ليا الغراض...
حبيبة : ااه صافي...عيطت بغيت هي نسول اش وقع وصافي..
بشار : شكرا...
حبيبة : العفو...بسلامة...
غير قالتها قطع ديك الساعة...حط التيليفون كمل الخدمة وسد داكشي وناض حل شراجم هوا الدار من دخاخن الكارو...مشا لبيت بدل حوايجو وخرج هز لوازم ديالو وخرج من دار...مشا ديركيت لواحد البار متواجد ف گيليز فيه ريسطو بموسيقى هااادية وبار فنفس الوقت...طلب ليه مشروب ديالو...حط ليه النادل شنو طلب...طلب قرعة كاملة وحط ليه الكاس كايكب يشرب ويكمي رغم ان الطبيب فاخر فترة حدرو ينقص من الشراب والكارو حيث ماشي فالصالح ديالو بخصوص نوبات "الصرع"...لان هادشي كايزيد من حدة الشحنات الي كاتسبب النوبة...لكن بشار كايدير العكس ماشي باغي ينسى ولكن كيف قاليه طبيب واحد النهار...
"نتا ماباغيش تعالج...نتا ا بشار باغي تدي حياتك لهلاك براسك...كاتقلب فين تلوح راسك لهلاك وساخي بحياتك"...
حط الكاس الي بين ايديه..كايشوف قدامو ويكمي...رجع زمان بيه للوراء بنهار الي كانو غادين بيه لعند جوندارم...ركبوه فالسيارة مع هاشم الي تبعو جوندارم من لور...حتى وصلو لابريگاد...غادي وساااكت ماكيهضرش حتى دخل لابريگاد جلسوه فالكرسي مقابل لاجودان شاف باش يكتب المحضر الي غايمشي لنيابة العامة...
لاجودان. : بشار الهاشيمي السن 18 سنة..."شاف فيه" عاود ليا كيفاش وقع الحادث...
بشار"شاف فيه ورجع شاف لتحت" : انا نجحت جيت لول فالباك...خاصني نعلم با..جويجة كانت مصايبة عند با عباس..
لاجودان : ايه...
بشار : هادوك مشاو شافو..مشيت شفت وجيت...با كايتسنا فيا نعاونو فالصيف ويديني لبرا...راني بشارة الخير اسي..ماشي مسخوط...فين با...
لاجودان بان ليه بشار ماشي تالهيه...كمل المحضر معاه...وداك اليوم ملي خرجوه من لابريكاد كانت سيارة الموتى فيها نور الدين واقفة باش يديرو االاجراءات من الي جابوه من مراكش ويديوه ل دوار يتوادعو معاه واليه...وقفو هاشم وشاف فيه...
هاشم"داير ليه راسو بين ايديه كيشوف فيه" : بشار تشوف باك ؟!..
بشار"حرك ليه راسو" : وراني كنتسنى فيه..تعطل عليا اصاحبي..
صرط هاشم ريقو وصرط الغصة والحرقة الي فقلبو شاف فلاجودان الي حرك ليه راسو وشاف فالي سايق السيارة باش يحل ليه الباب...بمجرد ماحل الباب دخلو هاشم لعندو كانو حاطينو فبياص مكفن ومغطينو بايزار بيض عرا عليه لايزار حتى بان ليه ضاير عليه الكفن على وجهو ورابطين ليه شريط فوق راسو تابعة لكفن معقود عند راسو..طلعات معاه ريحة الحنوط تال منغيغة راسو...دايرين ليه قطن فمنخرو...عينيه شبه محلولين وفمو كذلك مع شافو بدا كايحك فراسو وعنقو ويحك فصدرو ويعاود يحك فراسو ويهضر ويتمتم بين شفايفو وعينيه كايتكمشو تا كيبغي يعصرهم ويعصر على خااطرو وقلبو...اش غايقول اش غايدير فهاد اللحظة هاشم كايمسع فيه كايهضر ويتمتم...
بشار"شاف فهاشم وبدا يضحك ضحك هيستيري غريييب ويحك فذاتو" : جاي نگوليه راني نجحت ماشي يلبس ليا الكفن !....
ماضي اليييييم...والماضي لا يرحم...
من بعد ماعمرو الجوندارم المحضر وخذاو االاقوال خصوصا اقوال المعلم "عباس" الي اكد ليهم ان الغلط منو...
~~عباس : ماضنيتهاشااااي توقع كارثة من وراها الشاف...ملي عمرتها باش نجربها واش خدامة ديك الساعة جاتني خبار واحد من دراري وحلات ليه الجويجة فوسط الحركة حيث كاين الموسم عدنا (عندنا) هنا هاو مشيت نجري نقضي غراض حيث كت (كنت) داير مع نور الدين المقدم ديال صربة يجي ميعاد يفوت العاصر...تا المتعلم ماعلمتو حطيتها ومشيت جا هو داها ورايا...
وكيل الملك : مولف يديها واخا متكونش ؟!..
عباس"حرك راسو" : ايه مولف..شي مرات كانجربها واش يدخل فيها البارود حگ ديك الجويجة كان مايدخلش فيها مزيان وكانديرو ليها واحد القتيب باش ندخلوه...ملي نسالي ونتأكد را مزيان كنفرغها منخليهاش عامرة على حساب لافات...
وكيل الملك : عندك شي حد يأكد لينا هادشي ؟..اش يضمن ليها ماتكوني عمرتيها بلعاني "تبسم باستهزاء" تزهقات فيها روح اشريف بسباب غلاط ؟...
عباس : الله يهديك اشاف راني ثلاثين عام وانا فالحرفة والسي نور الدين الله يواليه برحمة الله عارف هاد القضية...وعندي شهود معايا دراري المعلمية كاملين كايديروها...
بقاو مستمرين حتى تعرض بشار قدامهم...بناءا على حالتو الي كانت مكتبشرش بالخير لدرجة ولا غير ساهي وكايعاود نفس الهضرة...اصدر قرار باحالته للمصحة النفسية مع المراقبة و يدوز التحقيق معاه ف حالة سراح....
17 سنة وزيادة مرات على اكفس نهار تبعوه اسوء ليالي واسوء عام..شهر بعد شهر عام تبعو عام دازو العوام والناس تعودات وخا الجرح قدتم فينما تجي شي نكسة كايتفتح من جديد...جرح بشار عميييييييييييق بجهد لدرجة الغموض...جرح خاصو تعقيييم خاصو تنضيف خاص الي يحط عليه شاش العوض شاش الطبطبة والمواساة...يرممو ليه ويعاونو يتخطاه وخا را صعيب يتخطى لكن فاش كانلقاو الي يطبطب علينا ولا يواسينا كانعرفو منين ناخذو الصبر وكانتعايشو...
بشار بمقدار النقص الي فيه لا يعطي لكن ياخذ..هاكاك بقى كايشرب حتى حس براسو ماغايقدرش يسوق ولا يركز حتى ولاو عينيه حمريييين ووجهو حمررر...هز صبعو مثقل وشير لسرباي الي جا عندو عطاه الحساب...جبد الفلوس خلصو وناض ماتسناش حتى يرد عليه صرف...غادي بخطى بطييييييئة مثقل فمشيتو تا خرج على برا كان البرد بزاف هو ماحسش بيه حيث شارب وحاس بالحرارة فديك اللحظة...كايبان ليه الغشاوة على عينيه..وقف قدام سيارتو وخشا ايديه فجياب سروال كايقلب على الكونطاكت الي جبدو بزز....ركب فالطوموبيل وديماراها...بقا شحااال وهو كيشوف قدامو..واش يزيد ولا يبقى ولا اش يدير...القدرة على سياقة مكايناش...فالاخير كسيرا وزاد غادي غير فطريق ماعارفش فين يمشي...خذا طريق الي غاتديه العمارة لقا راسو غادي نيشان حتى شد طريق اگادير....غادي وضبابة كاتغشي ليه عينيه حتى مابقاش قادر يسوق وهو يبلاصي جنب طريق دخل فواحد الخلا شوي ووقفها...هبط الكوسان مزيااان وحط راسو عليه كايشوف بعينين نعسلين بشراب السيارات غادين جايين فديك الطريق الوطنية...عينيه كايشوفو ولكن العقل غايب ف قنت اخور...كايسمع اصوات فعقلو كايسمع غوات بكا...نديب...الطلقة الي خرجات...كاااع الي داز عليه من ديك الوقت لدابا حتى لاخر صوت...
~عافاك راني باقا صغيرة ماعارفة والو فهادشي..عافاك نهضرو..~~~
اخر الاصوات عليها غمض عينيه ومشاااا نعس فوسط داك الخلا فزنقة. حتى صبح عليه الحال تم...
صبح صباح يوم جديد...حلات عينيها فوقت ابكر وناضت دخلات لدوش غسلات وطرفات حالتها ودارت روتين الوجه ديالها...دازت لماريو هزات اللبسة الي كانت معلقة باش تلبسها فاش تمشي لافاك وحطاتها كانت عبارة على سروال دجين سليم كحل ستيل هيپي طالعين صدافيه حتى لصرة... و قميجة گرونة قصيرة من قدام وطويلة من لور فايتة مؤخرة بشوييي...لبسات سروال وخشات فيه قميجة من قدام..جبدات كلاسورها و وروجيستر ديالها دارتهم ف صاك كبير ديال شانيل ودارت كالكيلاتريس ومذكرة ديالها واتخوس فيه ادوات حيث هي من نوع الي منظم بزاااف وعزيز عليها تلون ف دفاتر وتحدد ب ماركور الوان...هزات اتخوس صغيييورة غوز دايرة فيها گلوص صغير ماط و ريحتها و لايكخون كاتجددها على قبل شمس ماكتقدرش تبقى فيها بزاف حيث كايولي وجهها حمر وكتيحرقها...طلقات شعرها الي كان مضفور نفشاتو مزيان لور ومشات لكوافوز دارت ليه بوندو كحل رقيق...دارت گلوص نيود وليكخون هزات تيليفونها وهي كاتدهن وجهها بيها...دخلات لواتساب شافت رسالة صاحبتها ف لافاك ودازت جاوبات عمتها وبنت عمتها وايوب نيت...ما دخلت لسطوري ديالو تا لقاتو يلاه حط حيث فايق باش يوصلها ويمشي لخدمتو... حاط واحد سطوري هرب ليه فيه الحقيقة تا خرجات عينيها....
"ايوب : لى اولئك الذين يسألون من هو والد طفلي..لا يوجد احد اصبحت حامل لان الحياة ضاجعتني بشدة"
حبيبة : اويليييييييييي على مسخوط الواليديييين...اويلي على الحيماري...وناري يشوف بابا هاد سطوري وناري...واش هذا شفر ليه شي حد تيليفون..."صونات ليه مع الو مع بدات تغرق" واااااالحماااااري. ومسح داك سطوري...اويلي...
ايوبينو : ابتعدي عني لقد راقتني تلك الجملة فاقسمت ان احطها..
حبيبة"غوتات بلا ماتشعر" : واحيد السطوري والله تالاخرة ليك مع بابا...حيدو...
ايوب : لا سميتو مولاي حفيظ يهضر ولا هضر وحيدتو سميني ايوبة...
حبيبة : دابا نبدل سميتك لايوبة والله تا نبدلها...
"الفيرما"...
نزلات من الفوق وشادة فايدها شي ملف..حتى هبطات لتحت وهي تلقى سيحمد واقف كايهضر مع ربيعة مرتو...
سيحمد : دوزي بركي لارض داركم ماشي وقت المشي ليها...
ربيعة : را با سيحمد عيان نمشي نشوفو...
سيحمد : ولا عيان الله يشافيه...بركي فحالك ممساليش باش نديك انا...
ربيعة : غايجي ولد خويا عزيز يديني جاي ياخذ شي بهايم من هنا را داير مع سيدي ويديني عماه...عايشك خليني نمشي...
سيحمد : شحاال ناوية تبركي تم ؟
ربيعة : اليوم وغذا بعدو نجي مع بونبر...
سيحمد : سيري ولا تفوتيشاي هاد ليام هاو بوك تانصيب وقت ونجي نشوفو...
تبسمات ربيعة بفرحة كبييييرة غاتقدر تمشي لعند باها حيث لا مابغاش سيحمد ماتمشيش وتكمد كيتها فقلبها...ضارت شافت ف توريا تبسمات ليها ومشات طايرة لبيت لفوق توجد راسها...فرحانة حيث خوتها جاو من برا ومجموعين تم وغاتمشي تجمع معاهم حيث جاو يشوفو باهم محن...ضار شاف فتوريا وهبط عينيه لملف...
سيحمد : مضرا وجد ليا داكشي ؟!...
توريا : داز يامس عبد الرحيم خويا من جينا لمحكمة شاف يوسف هاو عطاني هاد الورقة گاليك عطيها ل باشا الي فالقيادة لهيه هو يقضي معاك.."قبل ماتعطيه الملف ضرباتو بيه بشوي على كتفو وكاتشوف فيه بعينيها" راني درت معاك المزيان ماشي حيث وگفتي عمايا...راني درت معاك المزيان حيث من نهار عقلت ونتا جاي من جيهتي وعمرك هزيتي فيا العين ومحتارمني...غا هو تسوالي ليك لاش بغيتي ديك لارض ؟!..
سيحمد : ناوي نحرثها وندير فيها النخل ديال زينة (كايديروه باش كاتشريه من عندهم البلدية ولا قيادة كايزينو بيه شوارع ولا كايتشرا خاص وكايدخل فلوس نيت غا نخلة تتوصل ل 1500 درهم لفوق..)...ومن هنا لديك الوقت نشدها ونشوف..ياك غا يقضي ليا دغيا وكان...
توريا : ومانعرف لهادشي ديالكم...لحگ عندو وفهم منو..راني مرسول وعطيتك لامانة..."عاودت شافت فيه" ماجاتك خبار اش دار هذاك ؟!
سيحمد : گاليا القرافلي را يكون وصلها ليه المحامي ديالو...نتي زمي فمك شويا لا يسيقو هادو الخبار...
توريا : والى ساقو ؟ مالي كذبت ؟ مالي مادازتش عليا بالمتني والمتلت...مالي انا مامرضت فيها وسايرة لدروك...اش قضا ليا هو اش قضاو ليا وانا كمدتها وباقيا تشوي فيا كيتو لدروك..اش بغا عندي الولاد الي من ريحتو باغي يديهم ليا اليوم يسوف وغذا اشراق ؟!...باغي يهرس ليا لايد وضهر بيهم ؟...
سيحمد : ماكانش عليك تجبدي الي طرا ف نور الدين كون خايتي غا الشواهد ديال المصحة گاليك المحامي هادوك الي غايضروه فالشكاية...
توريا : هادي تجر لهادي...والي دوا على هادشي يشوف حالتي كي كانت وكي باقيا راه يلجم فمو...شد غراضك وسير،، شد...
شد من عندها الملف وخرج فرحان الي قدر ياخذ اش بغى...اما هي رجعات ودخلات لكوزينة لقات كريمة كاتغس فماعن الفطور و سعيدة كاتخبز فالبطبوط قدامها عشرين بطبوطة...
توريا : مالك نتي وهاشم ؟!
سعيدة"شافت فيها بشوفة ناقصة ورجعات شافت ف مطلوعة قلباتها" : الساعة لله...
توريا : بقا فيك الحال حيث مابغا يشهد مع هذاك ؟!
سعيدة : هذاك ؟ هذاك الي هو ولدك ؟!...
توريا : لا تحكيش اسعيدة لا تحكيييييش وخلي الهضرة زينة بيناتنا...لا تجيش مع العيب ...الي عندي را گلتو والي دايراه وسايرة ندير فيه راه حقي اسعيدة..وهاشم مادار غالمزيانة مادار تا عيب...
سعيدة"الصمت"..
توريا : نهار الي مالگا حد حداه راني وگفت معاه وكنت ليه ختو الكبيرة قبل مانكون مرت خوه...
سعيدة : كيفاش ؟!
توريا : لحگي على زمانك وهضري معاه هو يعلمك.."ضارت خارجة من الكوزينة كاتقاد فزيف على راسها وتهضر" وازوينة هادي وگفو معاه يدي ليا دري...بلا موجب شرع...عاماش كان ليه الحق يديه...
سعيدة بقات كاتشوف وتفقص وهي تحط البطبوطة وشافت فكريمة قالت ليها تكمل عليها بيدما ترجع...خرجات من الكوزينة بانت ليها عيدة خارجة من بيتها كتسند عالحايط وهزات تيليفونها من شارج خرجات قدام دار وبعدات شوي...دازت لواتساب لعند هاشم ورسلات ليه اوديو...
سعيدة : هاشم دااابا تعيط ليا فينما كنتي تعيط شوف كي دير لراسك تعيط وطارت معزة...
بان ليها دخل وسمعو فالبلاصة...عيط ليها ديك ساعة وعلى صوته القلق...
هاشم : ياك لباس مالك ؟!...
سعيدة"ضارت كاتشوف وراها وضارت قدامها" : اش بينك وبين توريا مخليك ماتعاونش بشار...
هاشم : هذا وكان ؟..نتي مابغياش تميكي واحد شوي...
سعيدة : والله يا هاشم وماتگوليا حتى نهز بناتي ونزيد لدارنا منرجعش ليك...
هاشم : اتي اش وصلنا لهاد الهضرة يا..
سعيدة : جيني من لاخر..دابا كانسمع...
هاشم"ضار شاف فبعض الموضفين جالسين حيث داير اجتماع ورجع شاف قدامو مبعد كايحك فلحيتو الي محسنها" : الهضرة طويلة اسعيدة...داكشي قديييييم ماكنتيش عارفاه...
سعيدة : الي هو ؟
هاشم"تعصب" : سعيدة را غاندور فيك..هنيني را عندي اجتماع...
سعيدة : والله لا قطعت وما گلتي ليا والله يا هاشم تا ندور عليك وجهي تدويرة الغدايد را فايت درتها وعقل على شحال ونتا تطلب وترسل فناس يطلبو شكون هضر معايا ورجعت ليك..
هاشم"بحزن" : بشار...
سعيدة : اش درتي تا مابغيتيش تعاونو...
هاشم : وقع مشكيل فالخدمة وهضرات مع خوها الي هضر ليا مع صاحبو وفكني كنت غانحط فيها الكسوة اسعيدة كنت غانحط الكسوة..را خيرها وخير خوها ديك الوقت مانساهش..را كون حطيت الكسوة كنتي غديري المسمن معايا فسوق لاربع حدا مالين دجاج...
الساعة الرابعة بعد زوال...خرجات من الكلية راسها كيتبخ عياااانة وعينيها كيلصقو بالعيا وجوع وخا كلات شي حاجة خفيفة فواحد سناك تما...خرجات لقات ايوب الي كايتسناها وهي تبدا ضحك عليه ميق فيها وضؤب فالخوا بايدو...
ايوب : طيييييك دل...دوزي ركبي..
حبيبة"ركبات حداه" : ايهايييي ايوبينو ديالي الي رجع ليا...
ايوب : را تندير معاك بات مات مزيان...
حبيبة : مسحتي سطوري يا ايوبة هههه"خنزر فيها وطلع فيها وهبط ميق فيها".عهههههه اهيا..باقي ماجاش بابا ؟!..
ايوب : ممم..لا مزال...
حبيبة : يلاه يلاه فيا جوع بزاف...
ايوب"زاد مع طريق" : شوووفي دابا بنمشيو ناكلو ياك..وبنخرج نقضي شي شغال نديك لصالون مع خالتي ناديا بادير سوان لوجهها وشعرها وباتك تمشي معاها صايبي شي لعبة تم...را نسرين ليييبر هاد العشية تلاهى مع الفقيرتمك...وبنرجع نديك لدار ونمشي لحمام الي حدانا...خخخخ كان نافعنا حمامنا وتسد دابا...
حبيبة"حسات بالحزن من جيهة الحمام الي تسد وحدرت عينيها تا ضار شاف فيها"
ايوب : وبتبقااااي فايقة فاش نجي هبطي نديرو فيلم كيف ديما وبتعاودي ليا على سيدي هولاكو الي مزوجة بيه واش طاري تم وفين مشا...وغاتسدي فمك وماتهضريش...
مشاو نيشان لدار بدلات حوايجها وغسلات حالتها ولبسات بيجامة ساتان وردية....وهبطات كلات تا شبعت...وناضت مشات مع ايوب داها لصالون هي وناديا...دارت سوان لوجهها حسات بيه خفاااف بزاف وتنقى..وهي نقاو ليها ضفيرات رجليها وايديها ودارو ليها گوماج لرجليها وايديها ولاو رطبييين وحريير واخا را كاتهلى فيهم فالدار...رجعهم لدار ومشى هز صاكو وصطل وسطيلة واتخوس وجلدة وكرسي فالشيبي قاليك اسيدي كاينين الجراثييم والوسخ ههه...قاليهم بسلامة وخرج خلاهم كيحركو ريوسهم عليه....دار صاك وسطولة حداه وركب نيشان لحمام تما حداهم فرميلة...مع دخل وقف لقى مول لاكيس كيعرفو...
ايوب : افين اخا الكبيشي هانيا ؟!
هو : افين افركوس..كاين شي ولا الفرشي...
ايوب : كاين هي الوسخ الى بيتي تعيط ل داك بوصمة يجي يحك ليا..علمو بالي سيمانة ونص متحكيت وراه بندخل ندير واحد گوماج مخلط مع صابون بلدي بالعكر الفاسي...
هو : ولاكان هك دووز لهوووك...(زعما دخل عند العيالات ههه)..
ايوب : ولا بيتي دخلني هوووك خويييي هوك لا يسيقو ليك الخبار ناس هوووك..قوييييتي الكبيشي...شد تخلص وعيط لكسال...نص ساعة بنما سخن طرح ...تانا لحمي يجي...دارها بينا الحمام اما نوريك هوووك منين جات...راه فمي مسموم جبدتييني جبدتي الخرا...
هو : لداخل اه مكاين حد هي دخل والكسالةعبودي راه مشى يصلي العشا...حيث كان مقابل ليا هنا فاش مشيت نتقدا شي لعيبات....والكسال لاخور مريض...بيجي ويحك ليك..
ايوب : دعوة خاوية لداخل...
هو : تايصفر...
ايوب. : معاش كيدخلو جنون ؟!
هو : مع لاروب...
ايوب : تايگولو سلام ولا نسدو الفام...
هو : بتگول كلام الله وبتدخل حادر راس...مع يشوفوك مع يبدلو الطريق ويدخلو لحمام الي لهيه...ديها فجيهة ضاراك الجنون مسالين لراسهم بقى هي لبنادم...دخل سخون مع راسك وتحمحم ليا درتيهم فراسك اه بتلگاهم گدامك...
ايوب. : ونتا عرفتي اش كاين..من دعوة لداخل خاوية تصفر بتبان ليهم فيا راني زين وعاتي لعين...
هو : اخااا يا النخوااا...دوز اوا دوز يعتيك قاتا...
هز صاكو وسطولتو ودخل حيد حوايجو وطواهم بتاويل بقى بواحد البوكسر گري زكيكتو فيه كي طرينبوية تميختر..حط صاك تايجيوالي حاضي تم حيث مابان ليه حد وبلاصة رزامي خاوية تصفر...ماشافش را صاك محطوط لتحت وكاين واحد داخل عند بالو راه غير بوحدو..داخل تايدندن مع راسو...
ايوب. : وااا رضاك يا مي غطاني رضاك يا مي غطاني...
عمر سطل سخون وخواه فالبلاصة تا نقاها مزيااان وفرش جلدة وحط ماعنو تم فرش حدا روبيني وعمر سطولة خوا عليه الماس سخون حس بعضامو تكمدو عليه...ودار داك الگوماج وصابون البلدي وريح فوق جلدة كايتسنى فالكسال...حتى بدا يسمع تششش ما تشششش و صوت غليييض كايقول...الله...ااا خرررر...
وذنيه قلشووو وعينيه جمدو من ترماش...ريق باش يصرطو تبولكا ليه بالمرة..دور راسو وعطا وذنيه ناحية صوت وعاود سمع ديك خررررر...اتا بدا يسمع صوت المشاية خيييط خيييط شيييييط...غاااا هو هز عينيه وهو يبان ليه واحد غلييييض وطوييييل والمشكيل ماشي هنا المشكيل ان شعرو حمررررر ولحيتو حمرررررة وحجبانو غلاااض مشعكين وكحلييييين ومگرونيييين...هو را هكاك داير ولكن ايوب بان ليه جن محطوووط منسوط...
ايوب : عتعتعت هتتهتهت شش شششششم ههاااا هااااا..شم شمهروش...هاااا م ماما ر رضاك مم غاطانيييش اماااي..هاااا.
ناض على وقفتو بغا يجري وهو يطيح وتم غادي على كرشو كيهز فايدو ويعيط ل كسال مابقاش عاقل على سميتو...
ايوب : ييي ياربي لا كان جن ردو انسان ولا كان انسان الله يغبر ليه ساس...فينك اولد لحرااام الي گلتي جنون متيدخلوش دابا...وااااعوووووك عووووك اعباد الله...
مع ناض بجهد بغى يعطي رجليه لريح زلقات بيه رجلو تهز تال سما وجا على قزيبتو فوق القادوس...حس بضو ضربو....
ايوب. : انا الي جن انا الي ولد لحرااام...وياااربي لا وسخ حيدتو لا قزيبة بقيت بيها...
رجع لدار وجهو مزنگ وجاي وشاد قزيبتو..تا طوموبيل ما قدر يسوقها غادي سايقها وجالس بجنب...وصل لدار لقا غير ناديا شادة تيليفون ودايرة نضاضر شوف كاتقرا فيه...حتى هزات عينيها في ايوب وجمعات حجبانها...
ناديا : امالك ؟!...ويلي مالك...
ايوب"هز ايدو كايشالي بيها" : شوفي هضري مع زمانك الي هو عمي يشوف حل نبيع كلوتي ونص فمصراني والمحال ويرجع لينا حمامنا...بدلت العتبة خرجو ليا جواها...كيييييييي سدي كي جوادو...
ناديا : اش كتگجدر عليا تم..اجب لهنا نشوفك مالك...
حيدات نضاضر شوف حطاتهم حدا تيليفون..كانت تاهي وجهها كايبري صااافي ومزنگ... حيث عاد دارت سوان وعامت...حط سطولة وصاك وجا جلس حداها شاد على ضهرو كايواگع حشم يشد ترمتو قدامها...بدات تقلب وتشوف فيه...
ناديا : واش طحتي ولا مالك...
ايوب"سبل عينيه وهز ايدو وشير بيها" : على القاااع فوسط القاع...جيت فوق القادوس نيشان لفوق شمهروش ولتحت مخازنية ديالو...
ناديا"جاها ضحك" : هههههه وعلاه نتا تجلس فشي مكان..سير تكا بيفوتك الحال الى عطاتك صداع سير دوز...
ايوب"وسع فيها عينيه" : اشنهي...
ناديا : قاعك اولدي...نوض نوض...دق معاك على حبيبة گوليها تهبط شوي وبايجي باباها بنتعشاو...
ناض بزز كايهرنن بصداع...وطلع الفوق مشا لبيت حبيبة دق عليها وقاليها تهبط عند امها..كانت هي مدهية وسط وراقهاةكاتخرج فشي تمارين انغامست فيهم...جاوباتو ب "واخة" ومشا لبيتو...
صبح يوم جديد...يومين الي دازت من ورا الجلسة...الي تقرر فيها الجلسة الموالية من بعد اسبوعين....لا جديد فيها على بشار فين مشا واش دار...ماجابوش خبارو حتى رد الفعل ديالو مابان عليه والو...يمكن هادي هي عادتو كايغبر ويغبر شر رد الفعل ديالو من الناس...من داك اليوم وسعيدة كاتصوني عليه وحتى هاشم الي عارفو هاز من جيهتو ما جاوبوش والو تيليفون طافي...حبيبة وحدها الي جاوبها ديك النهار ومن تم مابقاش شعل تيليفونو...هادشي الي عرفات سعيدة وهاشم من حبيبة...حتى مشاو لعندو لبارطما والو كايقوليهم العساس بالي ماجاش كاع...فين يكون مشا !؟..ولاو خلاوه على خاطرو حيث عارفينو كايبغي وقت خصوصا انهم عرفو بالي توريا حطات وراق المصحة النفسية فالمحكمة وحتى انها ذكرات ماطرا فحادثة نور الدين الشي الي ماعجبش كلشي تقريبا...منهم عيدة...
عيدة : توريا بنيتي الي بينك وبين ولدك ماحد دخل فيه وطلبنا ليكم الهدايا...نوينا ندخلو بالصلح مابغيتي خليناك منك ليه وليني لاش تبكشي (علاش تقلبي) وتجبدي الي داز ؟!..نتي ترزيتي في راجلك هذاك را كبدتي وفرحتي لولة وطويتها ف گلبي..علاش قويتي شغل ا توريا...ياك هادشي سديناه وداز بيناتنا...
توريا"مهبطة عينيها" : الي حك نحاسي يلگا باسي الالة..الى انا قويت هو اش ؟..يدعي مو فالمحكمة ؟ هنا فين وصلنا فالعيب ؟..
عيدة : الله يهديكم ونتي لا باقيش تبحرتي على داكشي الي داز...نقصو علينا صداع راكم كترتو..خليو دنيا مهدنة را شوهتنا توصل لناس لا زدتو فيه...سيري تفاهمي معاه وحيدي عليا هادشي...
توريا"ماجاوبتهاش..حيث الي فراسها فراسها.."
عيدة : يوسف امتا يخرج ؟!
توريا : هاد اليومين نشاعلاه...
عيدة : وديك بنت الناس مامشيتي شاي طلي عليها...
توريا : يگطعها عليا كنة...من نهار مشات ماسولت ماجات طل على لوسها ؟!...
عيدة : سيري عندها وجيبيها...
توريا : مابقا عندي بيها غراض راه گالت ليك بغا يطلگها...يديرها ولا يعطيوني تيساع بجوج...
عيدة : انا عاطيا الكلمة لدارهم مابغينا نخرجو لعيب لا مامشيتي معايا نرجعوها ولا نشوفوها راني نتقلق منك اتوريا...لا بغا يطلگها بعد توصل ديك الوقت يكون لينا كلام....
ماجاوبتهاش حركات راسها وناضت مخلياها فالبيت...كلشي خرج ديك ساعة لشغالو حتى فمراكشي خرج مولاي حفيظ ومشات معاه حبيبة وصلها لكلية..دخلات دوزات سوايعها وخرجات مع العشرة ونص...يلاه غاديا خارجة حتى صونا تيليفونها تحنات جبداتو من صاكها وشافت المتصل وهي توسع عينيها وصرطات ريقها الي نشف فثانية " BACHAR"....
حبيبة"دارت الايربودز فوذنيها ونطقات بصوت مرتجف" : ا الو...
بعد مدة معدودة تلخصات ف ثلاث ثواني..سمعات صوته. الي نطق بيه كايسول عليها واش "لباس"...
حبيبة"كاتحك فناضرها وصباعها كايترعدو بالتوثر والرهبة". : ل لباس...
بشار. : اش عندك دابا ؟ مسالية ؟!..
حبيبة : انا ف لافاك...يلاه خرجت..علاش ب بغيتي شي حاجة ؟ بغيتي تگوليا شي حاجة..
بشار : رسلي ليا localisation ديالك..."كايشوف ف شي بلايك كان نيت فداوديات" هاني قريب ليك...سي بغيت نهضر معاك...
صوته التخيييين الممزوج بديك تزعزيعة والبحة كاتخليها متوترة منو بزاف وخايفة...عندو جدية قوية فهضرتو ماعندوش تمهيدات كايدخل نيشان فالموضوع شي مرات كاتحسي بيه بارد ما ان كايسالي كلامو كاتحسي بيه جدي بزاااف وهضرتو مافيهاش تخرشيش...قطع معاها وهي ترسل ليه الموقع فين كاينة...وصاها تبقى واقفة قدام الكلية حتى وصل عندها كانت واقفة وكلها كاتغزل بالتوثر حتى بانو ليها شي بنات كايقولو..."اهياتا شوفي شوفيييي jeep ياختي..داكشي تالماف.يا"..ماجات فين تشوف حتى صونا تيليفونها...كان هو واقف بعيد شوية داير نضاضر شمس رايبان كيف العادة..داير ايدو على شرجم وحادر راسو. وعينيه على تيليفون الي طالق ليه سبيكر حتى جاوبات وهو ينطق...
بشار : تعالي...
قطعات وهي تخشي تيليفون فصاكها الي زيرات عليه بايدها وغاديا وكادور هنا وهنا قشعات سيارتو واقفة...كانت تقريبا بنفس لباس الامس غير القميجة الي لونها كان مبدل وكانت كحلة عكسات لون بشرتها الابيض..كانت جامعة شعرها اسفنجة مادايراش حتى نقطة ميكاب من غير ليكخون فوجهها...دايرة حتى هي نضاضر دشمس Dior كبار...بان ليها حادر راسو ومغوبش كايشوف فشي حاجة فتيليفون حتى وقفات حداه راسها واصل عند شرجم حيث سيارة عالية رباعية دفع وهي قصيورة...حتى حنحنات وهو يهز راسو وشاف فيها وحرك راسو..
بشار. : طلعي...
حبيبة : و واش بغيتي تهضر فشي حاجة !!
بشار"عض لسانو شوي ورجع نطق" : اش بان ليك ؟!
حركات راسها وهي دور جيهة البلاصة القدام..حل ليها الباب تا طلعات وهو يزيد من تم حيث تعصب مع كثرة طلبة ناس بزااااف دنيا عامرة وطلبة شي كايغوت شي كاسر دنيا وشي كايضحك والغالا غالا...خرج من تم وزاد مع طريق حتى بعدو وهو ينطق...
بشار : les cours غادين مزيان ؟!..
حبيبة"حركات راسها وقالت "اممم"...
بشار : شنو filière ?....
حبيبة : سيونص ايكونومي..
بشار : مزيااان...
سكت وهي سكتات تاواحد فيهم مانطق بقا غادي وهي كاتشوف لكن الامان معاه شبه منعدم...بدات كاتحك فجبينها وتوثر اكثر..اما هو مابقاش ضار جيهتها لكن عارف ومتأكد انها متوثرة منو وبزاف...هز ايدو وشير بصباعو ناحية قدامهم وقال...
بشار : نتحركو شوية هنا لواحد الكافي...
حركات راسها وصافي اما هو زاد كسيرا حتى وصل لواحد ريسطو هااادئ بزاااف...غاديا حداه ماشي وراه ولا قدامو..عاطيها مسافة تمشي حداه....مع دخلو بدات كاتسمع موسيقى خفيييفة وهادية وحتى الاضاءة ديال ريسطو باهتة...جلسو فواحد المكان فيه فوطويات...كانت ريسطو خاوية تقريبا حيث ديك الوقت ماشي ديال الغذا وماشي ديال فطور جات بين الغذا والفطور...حط تيليفونو فوقو باكية الكارو وكونطاكت وجلسات حتى هي كتفرك فصباعها...حتى جا سيرفور...
بشار : شنو بغيتي...
حبيبة حشمات ومع متوثرة بزاف ماعرفات ماتقول الجو هادي والمكان هادي وصوتها هي بالكاد كايتسمع...نطقات بصوت شبه مسموع..." اي عصير ماعنديش مشكيل"...هز بشار عينيه فسرباي ونطق تاهو بطلبو الي اغلبية ملخص ف قهوة كحلة بدون سكر...شاف فيها وهز سيجارة وشير ليها بمعنى "نكمي ؟ "..حركات راسها وضارت كاتشوف بتشتات... دايرة نضاضر فوق راسها وكتفرك فايديها فوق بعضياتهم...حتى جابو ليهم طلبهم كان هو كايكمي....شربات جغيمة من عصير ديالها...وهي تنطق..
حبيبة : احم ف شنو بيتيني...بخصوص شيكات ؟!.
بشار"داير صباعو عند لحيتو متوسطهم كارو دخانو طالع" : لا...
حبيبة"صرطات ريقها وبانو حناكها حمريييين شتتات النظر عاوتاني ونطقات وعينيها فالارض" : بخصوص ط طلاق...
بشار : الطلاق ؟؟.
"هز كارو سف منو حتى سف كايشوف لهيه بعينيه مصغرين بفعل دخان والتغوبيشة..ساط دخان ورجع شاف فيها..شي ثواني وهو حاضي تفاصيل حركات ملامحها...كيفاش باين عليها التوثر...كيفاش باين عليها الخوف وعدم الامان من جيهتو...عارف راسو اذاها...عارف حجم المعاناة الي دوزات...عارف فعايلو فين وصلوها وعصبيتو وحر الشمتة الي كانت هي ضحيتها....تسند عالفوطوي وحط رجل فوق رجل مربع ايديه... حتى نطق"
بشار : نسايه...ياا حَبيبة....
جاب ليها الله فحال الى ماسمعتش مزيان..وسعات فيه عينيها تا تحرك البؤبؤ ديالهم الي هو قشعو حيث كان كايشوف فردود افعالها انطلاقا من تعابير وجهها...رمشات مثقلة كأنها كاتقول لا بصح ماسمعتش مزيان وهادشي تلخص فسؤالها...
حبيبة. : ك كيفاش ؟!..
بشار"ساس رماد سيجارة فطفاية عاد نطق" : سولتي على الطلاق ؟!..
حبيبة : اه سولت عليه واش جينا نهضرو فيه...
بشار : الطلاق يا حبيبة نسايه...
حبيبة"زادو توسعو حدقات عينيها ورجفو شفايفها فحال الى صمكها" : كيفاش نساه ؟...ماغاديش نطلقو ؟ ياك نتا گلتيها ديك المرة وبتجي من السفر وتفك معايا المشكيل...
بشار"مجاوبهاش..كايشوف كيفاش فلحظة بدات كاترجف من طريقة شوفتها وايدها الي كانت كتهزها تعبر وشوي تحطها تفركها مع لاخرى"
حبيبة : علاش نساه ؟ واش ماغانتفرقوش ؟ واش كاضحك عليا..
بشار"خلاها هضرت حتى حبست وهو يطفي الكارو ورجع تگعد كايشوف قدامو وشوي رجع شاف فيها" : مزال عند هضرتي...فاش گلت ليك نسايه oui c'est pour l'instant...عندي مشاكيل الطلاق ماشي فضل ليا دابا..ونتي كثر مني...خلينا فهاد الحالة نميكو شوي عليه...نهار يتگاد الحال عندنا نديروه بين عينينا...
حبيبة"صرطات ريقها ورجعات تقادت فبلاصتها وكاتهضر بدون ماتشوف فيه" : انا الي عندي هو راك عارفو..انا دابا بين عينيا غير بابا مايتضرش..وثقت فيك بخصوص شيكات شي حاجة اخرى مانقدرش نثيق فيك لا نتا لا شي حد اخور...
بشار"كايحك فلحيتو ونطق ببرود" : ماگالك حد تيقي بيا..راسي وماثايق فيه نتسناك ثيقي نتي...
"سكت شحال وصمت كان سيد الموقف..عينيه ماتزحزحوش من عليها خذا وقتو كيف كايبغي وهو ينطق ثاني بداك صوت الي عندو هاد المرة نبرة هااادية وخفيفة"...
بشار : جيت نهضر معاك "هز صبعو كاينقر بيه فالخوا" الحاجة لولة داكشي ديال شيكات باك لوحيه لعندي كيفاش وعلاش ماتعرفي يا بنت الناس غير باك ماتقيسو مضرة من تريكتي..."زاد فنبرة صوته" تفاهمنا ؟!..
حبيبة : مافهمتش..دابا صافي غير نعيش عادي ؟!..
بشار : ماحدك باقا تحت جناحي ماعمرك تعيشي عادي...
حبيبة"هبطات راسها وعينيها فلارض" : من الي تزوجت بيك وانا حياتي ماشي عادية...كون ما شيكات والكريدي ديال بابا ماغاديش نفكر حتى نقبل زواج من لول...
بشار : مزيان...
عاود سكت..يمكن صراحتها هي الي باغي...باغي يسمع الحقيقة ماشي زواقات وشكاوات...باغي يسمع بدون ماتحس بالخوف وتبدا تكذب... خذا وقت تاني وجبد من باكية الكارة سبجارة عاود شعلها. وضار لجيهة ثانية تا ساط دخان ورجع شاف فيها...
بشار. : مابغيتك لا ثيقي فيا ولا بيا ولا بغيري ديما حطي فبالك تيق بيا نتيق بيك براسو مافيه ثقة...الي نگوليك نهار عطيتك الكلمة نعاونك سدي عليا هاد الباب...الشيكات عندي وكيفاش وعلاش المشكيل خليه ليا...الي نوصيك هو مايعرفش باك راك عارفة شي حاجة...بقاي كيف ما نتي بقاي شادة فقرايتك ماتفرطيش فيها كوني كيف بغيتي وفضل ليا تقراي مزيان واخا الي دزتي منو يهبطك نتي ماتخليهش يوقف فطريق قرايتك...
حبيبة"الصمت"
بشار : طرقنا هاد المسمار ولا نعاود الهضرة ونوسع الخاطر تاني ؟...
حبيبة"تنهدات وغمضات عينيها ورجعات فتحاتهم بدون ماتشوف فيه" : واخا غاندير بهضرتك...
بشار : خيَر خيَر...الهضرة الي علاش جاي تاهي..ماشي بزز وماشي بالخاطر...محتاجك تعاوني معايا فالقضية ديال يوسف..
حبيبة"جمعت حجبانها وضارت شافت فيه" : عاود على قبل شهادة ؟!...
بشار : تت...مزال ماوصلناش لشهادة...والشهادة تگدي ماتشهديش الى بغيتي وماعنديش مشكيل...
حبيبة. : وفاش بغيتي نعاونك ؟!...
بشار"حدر عينيه كيسوس فالگارو وحجبانو طالعين من جنب ومعقودين من وسط.نطق" : فالجلسة الي فاتت كانت الواليدة عطاتهم شي وراق بلي ديجا كنت كانتعالج واحد الوقت..
"حك شنايفو بسنانو لمدة وعاود نطق بحال باغي يقوليها ولكن مابغيش يهضر على ديك الفترة وماباغيش يقول الحقيقة بالضبط...حيث لو قالها غاتخاف وغادي تزيد ترعب اكثر لانه عرف وعاودت ليه سعيدة بالي هي ماعارفة والو من حياتو ولا اش دار...يمكن ماباغيهاش تخاف وتدمر اكثر ماهي مدمرة بسبابو وسباب مو وعائلتو.."
بشار : كنت دزت من شي مشاكل نفسية ماكانتش معاوناني باش نكون عادي..كان عندي شلا ضغط وتبرزيط وصداع فصحتي وراسي...داكشي كان قديم من 16 عام ل عشرين عام هكاك...بنت المشاوري هادشي حطاتو فالجلسة وهادشي ماشي فالصالح ديالي يمكن ولا نيييت مايعاونيش نربح الشكاية ونطلب باش نتكفل بيه...
حبيبة"الصمت"...
بشار : دزت من شي مشاكيل كبر مايصلاحش ليك تعرفيهم...تگدي تگولي هما علاش نايضة بيني وبينها الصمكة...
حبيبة"كايزيد قلبها يضرب وعينيها يوساعو من اش كاتسمع..كانت حاسة بيه ماشي طبيعي وهاهو اكد ليها انه بصح ماشي طبيعيي..هزات فيه عينيها مصدومة"
بشار : باش نختاصر ليك بلا كثرة الهضرة...الى كنتي باغيا تعاوني معايا نشد يوسف ونتكفل بيه كوني معايا...مانكرهش تعيشي معايا حتى يفوت هادشي وديك ساعة سيري عيشي حياتك ابنت الناس...
حبيبة"كمشت حجبانها" : نعيش معاك ؟! "حرك راسو"...كيفاش نعيش معاك ؟ يعني نكون انا وياك تحت سقف واحد ؟...
بشار : القاضي باغي حجة بهادشي...نخليوهم يفهمو بلي حنا عاديين واخا صعيب هادشي عليك ؟...
حبيبة : واش كاتهضر من نيتك ؟ واش عارف بالي مستحيل نعيش انا وياك وحدنا !!...ياكما هذا هو المقابل باش فكيتي الكريدي ؟!..
هز فيها عينيه وزاد غوبش حتى ولات شوفتو كاتخلع خلاتها ترجع باللور. واخا كانت باقيا محافضة على نفس الشوفة وهي الصدمة والتغوبيشة..خصوصا انه حطات بين عينيها وحساب ليها انه غايدير ليها شونطاج بالكريدي الي فك ليها...
بشار.: كاترهطي عليا تم ؟...هضرنا فالكريدي وسدينا الباب ديالو علاش نحك على جيهتو ؟!...خاطيني تبرهيش ولا يلاه ناوي نبداه ؟!...
حبيبة"عينيها غرغرو ومابغاتش تبين" : كاطلب شي حاجة الي نتا عارفها مغاتكونش..انا ماغاديش نقدر نعيش معاك وحدنا ومغاديش نقدر نبين ليهم عايشين عادي...صعيب عليا ومستحيل...
"كاتهضر وتعبر بايديها ومتحاساش بالي راها كتهضر وترعد حيث بصح من الصدمة زادها الخوف وفكرة انهم يكونو تحت سقف واحد بحد ذاتها قاصحة عليها وهي كل مكتشوفو كاتجي بين عينيها ديك الليلة كيفاش كان مزيان فاللول حتى تقلب وغدرها وتكرفص عليها...لحد ساعة كاتشوفو ومزال ماشي مصد للامان ليها...وخا تعيا تضغط على راسها وتجلس معاه عادي الا انه تقدر تفلت ليها زمام الامور وتقدر ترجع تنهار فأي لحظة"
بشار"عروق نواضرو تورمو ليه وزير على سنانو حتى كان غايقسمهم وتحت طابلة كان مزييررررر على ايدو تا تسقطات من د.م...عينيه عليها كانت حادرة راسها وهو كايشوف فيها وحابس راسو مايديرش شي حاجة فلحظة...زفر النفس وعاود تا غمض عينيه وهما يتطلقو دوك العروق الي زير على راسو باش مايديرش رد فعل هي ماتستاهلوش...كايحاول باش مكان مايضرهاش براسو حيث هو ورايو كايضرو غايحير فالي قدامو...كايحس بيها وكاتبان ليه انها ماشي ديال تكرفيص خصوصا ملي عرف سباب زواجها.."..
بشار : ماجيتش باش نبزز عليك وماجيتش باش ندير ليك شونطاج...و عاونيني نعاونك حايدي داكشي من بالك لو ماتبغيش ماعنديش مشكيل...ماعنديش حل نهز يوسف من تكرفيص من غير تعاونيني...مابغيتيش ماكاينش عدور ربو فهاد الحياة الي يحطك فشي بلاصة نتي مابغياهاش...من غير هاد الحبس كااامل الي هضرنا فيه الطلاق بك"كان غايخسر الهضرة وحبسها" براسو ماشي مزيان ليك نتي براسك..لا جات عليا انا مكاينش الي سوق ملة مو فيا...ياك نتي بفمك گلتي لا رجعت مطلقة من ساعتي ناس مترحمش..دابا كنشوفك مارحمتي راسك ماخليتي ناس ترحم ؟..."خرج عينيه بتخنزيرة حيث حس براسو كثر الهضرة بزاف"...
حبيبة : عارفة ولكن نعيش معاك ونبين ليهم زواجنا بصح هادي ماتكونش ومانقدرش عليها...الى على شهادة نفكر فيها غير هادشي لا...
بشار : دابا فكري فهضرتي شوفي يوسف وشوفي شنو عاش فاش كنتي معاه وجاوبيني..يومين وراجع فحالي لهيه...عندك deux semaines فكري فيهم. وجاوبيني...مابغيتيش ,, حتى الشهادة ماعندي مندير بجد مها گاع...
حبيبة"حطات ايدها على جبينها كاتحك فيه..حسات بتوثر رهيب وشلا ما تراكم عليها فهاد اللحظة...ماهزاتش فيه عينيها حدها نطقات" : بغيت نمشي فحالي...
بشار"طفا الكارو فالطفاية وناض على وقفتو تا تفزعت..هز كونطاكت وتيليفون وشير لسرباي" : تگعدي...
هزات صاكها وناضت باغيا غير تمشي. فحالها حيث حسات براسها مابقاتش بغات تزيد تبقى معاه هو كلو كتلة من الرعب بالنسبة ليها...خلص السرباي ونطق "يلاه"...ركبات فالسيارة وهي مكتشوفش كاع جيهتو هضرتو كادور ليها فدماغها ومسالة تعيش معاه وطلاق مايكونش كاتخليها تحس بالغمة وبشي حاجة ماشي هي هاديك جاياها...كاتحس براسها باقيا مربوطة بهاد العائلة وبيه هو...لا هو باقي هضر معاها لا هي اصلا بقات هضرت وماباغياش تهضر...طريق كلها وواحد صمت رهيييب بيناتهم..كانت سياقتو عادية كاين سيركيلاسيون فمراكش صعييييبة وهو كايسوق بواحد البروود..كايمشي بحسب القوانين الي فالمانيا لكن هاد القوانين ماكتسريش فالمغرب خصوصا مراكش كنتي سيدي ومولاي فلت ودخل نتا وزهرك...والى مشيتي بالقانون مكيعجبهمش الحال كايبقاو يكلاكسونيو عليه هو كااع مامعبرهم مخليهم يطرطقو تالصباح وهادشي هي داز بين عينيها وكاتحاول تقول اش هاد الانسان الي ماشي طبيييعي ومن قال كان كايعاني من مشاكل نفسية قديمة تأكدات وهي غير داااارية بحجم المشاكل نفسية ديال بصح الي كان فيها ولو عرفات كانت غاتأكد انها تزوجات ب "انسان غير طبيعي بصح"...ولو عرفات باقي الخبايا غاتكون اكفس حاجة عرفات فحياتها وكيفاش غاتواجهها...وحتى هو ماقالش ليها حيث عارف ان الامر صعيب عليها بزااااف الى هو براسو باقي كايعاني منو ومرض بيه ووصل بيه لدرجة يضر راسو بسبابو كيفاش غاتكون هي الي باقيا صغيييرة على هذا الشيء....
ماحساتش فوسط افكارها وتخمامها حتى لقاتو وقف عند راس دريبة ديال "رميلة" وقال...
بشار : نزلي...
هزات صاكها وحلات الباب وتا بغات تنزل وهي تنطق...
حبيبة : بغيت نشوف يوسف يمكن ليا...
بشار : داكشي شغلك...ديري بين بالك شكون تلگاي تم...
حبيبة : كيفاش نشوفو...
بشار"كايشوف قدامو باقي محافظ على تغوبيشة الحارة" : دابا نهضر مع سعيدة تقضي معاك الغراض يديك هاشم تشوفيه...
حركات راسها وتا بغات تهضر وهو يديماري طوموبيل وطلق سينياال وهي تنزل وسدات الباب ضارت مشات تا وصلات لدارهم وبدات تحل الباب وهو يبان ليها من بعيد كان باقي واقف غير حلات الباب وهو يكسيري تا تهزت بيه سيارة وتسمع صوت الكسيراتور مجهد...
هبطات رقية من الفوق جايبة شبكة ديال حوايج مصبنين طاوياهم فبلاصتهم...بانت ليها وهي تبسم...
رقية. : كبيدتي جيتي...
حبيبة"باستها فحناكها" : جيت ادادا جييييت...فين ماما...
رقية : مشات لعند للا زبيدة لوپتيسيانة باتصايب نضيضراتها تهرسات ليها زاجة...
حبيبة : اااه الي فجبل الخضر ؟!...مشات هي على رجليها...
رقية : باتمشى شوية...مالك تعطلتي ياك بتجي مع الحداش..
حبيبة : احم..جا لحگ عليا بشار ومشيت معاه داكشي باش تعطلت...
رقية : ايهاااي ناس مع رجالهم هههه...كيداير كيبقى هو شوية..
حبيبة : احم شوية..مهم انا بنطلع نبدل ونغسل حالتي وبنهبط..
رقية : تهبطي تاكلي اه مشيتي بلا فطور...
حبيبة"تسدات ليها شهية" : لا لا مابيتش...
"حسات بنغيزات وجع فكرشها عرفاتها العادة واخا ماشي وقيتها!!.... من التوثر النفسي حساات بيها جاتها قبل من الوقت وهادشي كايوقع ليها بعد المرات فاش كتكون ماشي طبيعية كاتهبط عليها...طلعات لفوق حطات لوازمها وبدلات حوايجها..كان الحال بدا يميل لبرودة ماشي فحال صيف حيث شهر عشرة هو هذا...
كان واقف على المتعلم الي كان كايسرح فواحد زربية فار.سية..كانو احد زوار اجانب وكان كايشرح ليهم بالانجليزية...
هما : my ne ponyali ...
م.حفيظ. : اه مالهم...
عماد : من روسيا ولكن ماكفهموش الحاج الانجليزية بيخصنا توفيق الي يتفاهم معاهم مشا يتغذا...
م.حفيظ : ومشكيلة كحلة هادي...
بداو كايهضرو بالروسية وتقول واش زططو معاه شي حاجة...كانو باغيين يشرحو ليه شي حاجة بخصوص ديك زربية وباغييينها ووالو...تا بدا يوريهم من غوغل تراديكسيون عاد تفاهمو معاه..خلاه كايقاد ليهم فزريبية وهو يمشي لبيرو ديالو وجلس ضار جيهة الكوفر فور وجبد منو دوك شيكات الي خاص يصرف باش يعطي دفعة لحاج عبد القادر...شوي حتى صمع صوت تحنيحنة غليضة حرشة وهو يدور هز راسو تا وساعت ابتسامتو...
م.حفيظ : اه اه اه..نهار غليظ مشحم اوا هذا ههههه...
ناض وقف وسلم عليه...شير ليه باش يجلس وهو فرحاان بمجيتو الي اول مرة تكون ليه...هز مولاي الحفيظ راسو ووجه كلامو لمتعلم ديالو عاطيه الامر يقوم بالضيافة والي هي...
م.حفيظ : واحد القهيوة مقطرة من عند مولاي عبد المالك...اه بلا سكار الولَد...
عماد : هي الي ماتعاود...
م.حفيظ"شافو فحال الى ممرتاحش" : ياكما مابيتيهاش ؟
بشار"دوز على قفاه ورجع حك لحيتو" : لا ماعليش..
م.حفيظ : نهار كبير هذا..هي دايز ولا زاير هنهه...
بشار : لا جيت عندك نيشان..."شاف ف ساعتو لقا ماعندوش الوقت حيث خاصو يقضي شلا حوايج قبل مايمشي لالمانيا...هز فيه عينيه ونطق"...جيت نهضر معاك والي باغي نهضر معاك فيه مايفوت هنا الحاج...
م.حفيظ : ايه ولدي خبار الخير...
بشار : قبل من هادشي نسولك واش عندك شي كريديات مع الحاج رحماني ؟!..
م.حفيظ"تعصر فخاطرو حتى تبدلو الملامح ديالو وبان التغيير نيشان لبشار الي هز حاجبو..حنحن ونطق" : ايه اولدي...كريدي قديم...كان بيني وبين جدك تجارة العواد كايجيبهم ليا لحمام كل سيمانة هكاك...
بشار : كنتو تعاملو بالشيكات لا ؟!..
م.حفيظ : الفياجات اللولة كانو بالخلاص من بعد فينما يجيب كنت مكنخلصوش مرة نعطيه شيكات..شيكات حتى ولا سيحمد عاد درتهم...دارتها بيا ولدي التجارة باش منسدش الحمام كنت نعطيه شيك وكيجيب ليا سلعة...
بشار : شحاال وصلتو ؟!..
م.حفيظ : الشيكات الي عندو فيهم 110 المليون على ماعندو فالحساب...حيث ديك الوقت كان كل شيك وكريدي كايتقيد...
بشار"هز حاجبو" : وايلي الحاج كيفاش على ماعندو ؟ فلوس صحيحة الحاج ماشي تكميشة خمسين درهم ماشي خلص عليا نخلص عليك فالكافي...فلوس الحاج مايجمعها فم مايلموها ايدين...شكون كان يقيد فهادشي ؟!
م.حفيظ : الشيكات دابا وقت الي نوجد شي فلوس يعطيني بلاصتهم شيك فلول كان باغيهم فالبلاصة من بعد ملي تناسبنا دار معايا نعطي هي شوي بشوي دار بوجه نسوبية هههه..
بشار"شاف بشوفة جد مستهزأة ضار لهيه نعل شيطان وغمض عينيه وعاود حلهم ورجع شاف فيه" : الحاج الشيكات عندي انا..."جبد من جيبو واحد لونڤلوب وحطو ليه قدامو" هاهما هنا...
م.حفيظ"تگعد من بلاصتو كيشوف بعدم فهم" : كيفاش ؟..
بشار"بجلسة مفرق فيها رجليه وحاط مرفقو على ركبتو كايعبر بايدو بطريقة ثقييييلة خاترة" : شديتهم من عند جدي...كيفاش وعلاش داكشي بيني وبينو...نتا ريح راسك وتهنى من جيهة الكريدي...
م.حفيظ : مافهمتش ؟..بلاتي ولدي اه زربتي عليا...
بشار : جدي وااخا يلوح ليك كلام مزيان ماشي گدو...مابغييييتش ومافريييش المشاكيل شديت من عندو الشيكات غادي يبقاو عندك فينما وجدتي شي حاجة ديرها فالحساب الي غادي نعلمك بيه...
م.حفيظ"صدمو بقا غير كيشوف"...
بشار : فك مشاكيلك الحاج وتيسر فهاد شيكات...
م.حفيظ"باقي لحد ساعة مصدوم وهو ينطق" : مايمكنش هادشي ولدي...
بشار : نعاود نأكد الحاج ياك هادشي الي كاين ؟
م.حفيظ"حرك راسو باقي مصدوم مشعوط" : ا اييه ايه...
بشار"ناض وقف كايقاد فتريكوه" : يمكن يمكن...هادشي بيني وبينك الحاج وياك الغاشي يعلم...هذا هو جهدي هاد ساعة والحل عطيتو ليك...شد شيكاتك وسمع مني الوقت خايبة والراس الكحل خايب مني وجبد "غمزو بعينيه محرك حنكو"...درت بوجه النسوبية وبوجهك نتا نيت...
يلاه بغا ينطق مولاي حفيظ وهو يحرك ليه راسو...كايسول فيه ماجاوبوش سسلم عليه ومشا خلاه كايشوف والجوا ديال شيكات قدامو...
اذان العصر معطر ارجاء الدوار ودواوير المجاورة فكل مساجدها...دخل الكاميو للپيست وخذا مسااافة طويلة باش وصل لفيرما الي كانت معزولة بأرضها...حتى دخل ليها من حل ليه العساس الباب...ركن الشاحنة ونزل منها هاز فايدو قرعة سيدي علي معمرها بالبول "حاشاكم ولكن اصحاب الشاحنات اغلبهم كايديروها"...رماها ف واحد طارو كبير دايرينو ل ز.بل...تسرح كايسرح فعضامو ويطرطق فيهم ويقاد فالفيستة..ضار هنا وهنا كايحك فايديه ويدوز على مسطاجو تا دخل..مع دخلة كان صالون عند الباب سمع صوت هضرة العيالات دور وجهو باش مايشوفهمش وتم داخل لداااخل...لقى اشراق جايا هازة صينية اتاي ووقفها...
سيحمد : شكون كاين ؟!
اشراق : خالتي عيشة وبنتها صابرين..جاو يشوفو مي..
سيحمد : هممم...فين زكريا ؟!
زكرياء"سمعو كان جاي" : نعام ابا شگالو...
مشات اشراق وزكرياء قرب ليه وهو يشدو من وذنو تا غمض عينيه...
زكرياء : اياا الحنان اش طرا ليك..ياكما قصرت فترابيا...
سيحمد : نعل ترابيك..ياك گلت لجد بوك تسناني فباب مدرستك نجيبك عمايا مال بوك ولد الهم...
زكرياء : انسيت ابا..وذني يا با طيرتيها راني منصيبش نبقى نسمع وتعاود ضربني شد وقيس اباااو...
طلقو وذنو كاتوزوز...مشا كيحك فيها مسكين وهو طلع نيشان لفوق البيت هز حوايج مايلبس ودخل لدوش دوش ورجع لبيت كاينشف فراسو...ضار جيهة الماريو وحلو حل بساروت صغير الكوفر الي فيه هز منو شي وراق وهو يدير ايديه على صدرو كرشو جنابو بحال كايقلب على شي حاجة تا استقر فجيب ودار فيه دوك الوريقات وشي فلوس واحد الماصو...
فهاد اللحظة كانت واقفة سعيدة وتوريا اما عيدة سلمات عليها لداخل وخرجو ... مع عائشة ام زكية...
توريا : يجيكم الخير عيشة...
عيشة : نجيو نشاعلاه فاش يخرج يوسف..."ضارت شافت لهيه" ها ولدي منير جا..يلاه خليت ليكم راحة وكان يجي الناجي يبغي العشا...
سلمات عليهم وهما يدورو غادييين لاحقين على ولدها...فهاد اللحظة تحل باب الفيرما وهي تدخل سيارتو الي شافتها سعيدة وهي توقف وحسام كان واقف لهيه مع زكرياء تايشكي عليه حر الوذن...وحبسو الهضرة تكوانساو...اما توريا كانت ضايرة بغات تهضر مع سعيدة وهي دور لقاتها كاتشوف وهي تشوف تاهي وخرجات عينيها ....نزل من سيارة جات سعيدة سلمات عليه وحسام تاهو اما توريا بقات واقفة وكتخنزر فيه واحد تخنزيررة ديال شر...كاتسناه يهضر ولا يدير شي حاجة باش تطلق عليه...
بشار : اشراق...
سعيدة : اا ..لداخل...بغيتيها..."يلاه غاتعيط وهي تسمع صوت توريا"
توريا : اشراق مكاين فين تخرج ولا لحگت هنا رجليها يتحشو..
بشار " وجه كلامو ل سعيدة" : مزيان...
ماتسنا حد هو وصل وتحرك ودخل نيشان لداخل..تبعاتو سعيدة وحسام هو وزكريا غادين ويحسبنو ويكبرو ويطلبو سلامة...تا وصل لداخل لقى اشراق واقفة كاضحك مع كريمة غا شافتو وهي تجمع ضحكة ووسعت عينيها...
اشراق : خ خويا...
بشار : خوك اشراق خوك..."شاف فتيليفونو" عندكم عطلة على حد علمي ياك..
اشراق : ا اه..
بشار : طلعي جيبي اش تحتاجي نديك تجلسي معايا شي يومين قبل منتحرك فحالي...
يلاه غاطلع كيف قاليها تا وقفها صوت مها ضارت لقاتها مخرجة عينيها...
توريا : تلحگي برا الباب نگلع لجد مك وذنيك وركابيك نحشهم...يلاه لحگي لبيتك ماتنزليش...
اشراق : و واخا...
يلاه بغات طلع وهي تشوف خوها الي عوج فيها راسو وشاف فيها بنضرة تمووت ماتنساها عينيه حمرييين...
بشار : تحركي گدامي بلاش من دوك الحوايج دياال الحبس...يلاه يلاه يلاه...كنشوفك باقيا بلاصتك ؟ "خنزر فيها تا تفافات"...تحركي...
اشراق بان ليها ماكيلعبش واصلا عمرو لعب قهضرتو الي مكاتعاودهاش من وراه مشات كاتجري مخليا مها كاتغوت وهو يتبعها وخلا توريا وراه كادعي وتشحت تا طلقاتها بغوتة و طاحت ليهم فقاع دار كتمرمغ وتغوت...
توريا : وبغااا يهلكني يهلكنيييييي ولد لحراااام...واربي را ماهدو لا مرض لا بنادم...واااااااربي خرج ليا على صحتي الله يعطيه مصيبة تجليه عليا...وعيطو لجدارمية يديوه عليا كي داوه هادي شحال...وااااااااااااااااااااربي را قت.لني....
عيدة : ياعوذ بالله من شيطان رجيم...اش واقع يا تاني...
سعيدة : بشار ولدي الله يهديك...
تبعاتو سعيدة كان تابع اشراق الي كلها كاتغزل قربات تبول فحوايجها...اما فهاد اللحظة كريمة مشات جابت ل توريا الما الي طاحت كاتمرمغ كاتشد فيها وحسام تاهو مالقاو ليها جهد كاتغوت وتركل ليهم تم...تا نزل سيحمد شافها كاطير وتنزل...
سيحمد : اش واقع تاني...
كريمة : بشار جا ودا اشراق...
سيحمد"خنزر" : واش سيبة هنا ولا ؟ فين هو...
قالو ليه راه برا وهو يخرج مشا ليه نيشان تا بدا يغوت ويعرعر عليه...
سيحمد : كاينة سيبة هنا ؟ ياك كالت ليك مك لا تديهاش مالك عزيز عليك السخط يا المسخوط...
بشار فهاد لحظة تقولي سيحمد هو علاش كان كايقلب نييييييت...تسناه تا كمل وهو يحل الباب لاشراق خلاها فسيارة وهو يمشي تال عندو...
بشار : شنو گلتي ؟ "مد ليه وذنيه" جهد صوتك الحبس ماسمعتش...
سيحمد : السيبة كاينة هنا ؟ مالك داير هاد الحالة ف مك..فك مشكيلتك معاها بلا صداع...ونتا داخل بلا موجب شرع...
بشار : ونتا ل زبور مك يااا ولد الهازة (ولد القاف)... فكيتي مشكيلتك مع ديك خيتي الي فاتح ليها برتوش(دار دعا.رة)... فالسوق وفرختي معاها البنات بلا موجب شرع ؟!..f
يتبع...
التعليقات
لا توجد تعليقات بعد، كن أول من يعلق.