محتوى القصة
ملي سمعو قال هادشي عينيه جمدو وخرجو من بلاصتهم..حس بالعرق نزل عليه من جبينو وضهرو ولا باااااارد بالعرق...دور عينيه وراسو بالعرض البطييييئ ك اول رد فعل الي كانديرو كلنا الى تكشف شي سر او شي حاجة حنا مخبينها...
كانت سعيدة الي واقفة وخا بعيدة عليهم...اشراق الي غير سد عليها طوموبيل مشا فاتجاهو ماسمعات والو...لكن سعيدة الي كانت بالقرب هي الي سمعت وخرجات عينيها كثر من سيحمد ونيشان جا فبالها "ربيعة"...حطات ايدها على فمها وضرها خاطرها وقلبها على ديك بنت الناس الي صبرات مع هاد "سيحمد"...
سيحمد : ا اشش هاد الباطل ا ا(كان بغا يقوليه المسخوط وهو يزيد بشار خنزر فيه)..م..باطل هذا باااطل باغي تخرب ليا بيتي..
بشار"زاد قرب ليه تا ولا سيحمد كلو يقطر بالعرق" : نهار مزال تحادي ملتي..نجبد خنز ركانيك يا عم المسخوط...
دفعو دفعة وحدة سيحمد مابقاش نطق كلشي فيه جمد...ريقو نشف ليه وراسو ولا كايدور..رجع عاود دار هنا وهنا بانت ليه غير سعيدة الي شافها كيفاش مبهوضة عرف انها يمكن سمعات او لا...زادو دقات قلبو تا بغا يسكت ليه...
لداخل كان صوت توريا وغواتها هو مابقاش سمعو حيث بعاد على الباب بزاف...وقف حدا السيارة جيهة فين غايركب وشاف ف سعيدة...
بشار : هاهي معايا يومين ونعلم حسام يرجعها...
سعيدة"مالقات ماتقول باقيا مصدومة وتاهو ماتسوقش ماسولهاش واش سمعتي ولا لا..حركات ليه راسها وصافي بدون ماتنطق ولا كلمة"
ركب فبلاصتو وضار شاف ف اشراق الي كانت كلها كاتغزل بالخلعة...حدو نطق ب "ديري السمطة" بصوته..دغيا دارتها وبدات تفرك فايديها ماقدراتش تهضر...هز عينيه فالمراية بانت ليه توريا جايا كاتزرب بغات تلحق عليه وهو يديماري وكسيرا خرج مخليها كاطير وتنزل وتغوت وهما شادينها تا بغات تسخف كاع شالها وزيف على راسها تخربقو وتجنترو...زاد مسااافة نيت تا وصل ل فيلاج سيدي بوعثمان وهو يشد طريق مراكش عاد ضار شاف فختو ورجع شاف قدامو...
بشار : مالك ؟!
اشراق"ضارت عندو" : ها مم مماماليش..
بشار"كايشوف فطريق قدامو" : مابانش ليا..مابانش ليا يا اشراق..بان ليا ماباغياش تمشي معايا..ماباغياش دوزي مع خوك يومين !!..
اشراق"حركات راسها ب لا" : لا لا نمشي معاك اه ندوزها معاك..
بشار"حرك راسو مثاااااقل" : مزياااان...
اشراق : غير حوايجي ماعنديش ماتسنيتينيش نمشي نجيبهم..
بشار : حالهم ساهل...
مابقاتش نطقات حركات راسها واستسلمات..واخا را قلبها في فمها...اما هو كان صونا ليه تيليفونو شاف فالمتصل لقاها "هانزاده" سكتو وخلاها كاتصوني تا عيات...وعاود تاني صونا تيليفون لكن لقا الخدمة الرسمية ديالو..جاوب وبدا كايهضر،، كاتسمع فيه اشراق كايهضر بالالمانية طبيعي ماتفهم تا وزة...بقاو هاكاك حتى وصل لمراكش...خذا كريق نيشان ل تارگة وصل لجيهة العمارة فين ساكن وهو يوقف سيارة...ضار شاف فيها وقال "نزلي" حلات سيارة ونزلات تسناتو تا ضار عندها حتى قربها ليه وعنقها بجنبو غادي بيها طلعو فالمصعد تا وصل ل باب دارو..غير دخلات ليها وهي تبقى كاتتشووف..كانت دويرة صغيرة لكن كلشي فيها جديد وراقي فراشها اخر مكاين مجهزة من كلشي بقات غير كاتشوف حتى قفزات من صوته...
بشار"شافها لابسة غير بيجامة ديال دار هي باش جابها" : مزال قياسك هو ؟!
اشراق"حركات راسها بزربة..باقي مزنگة بالخلعة" : هممم...
بشار"شاف فساعتو كان المغرب علاين ياذن" : واكلة شي حاجة ولا لا ؟!..
اشراق : ل لا..
بشار"زاد غوبش مخنزر" : هضري مگاد وجهدي عليا صوتك..جايبك باش دوزي معايا يومين ماشي نصفيها لملتك..هضري طلقيني ..
اشراق"فالبلاصة جاوبت مجهدة صوتها" : ل لا من الغذا ماكليت..اه فيا ج جوع...
بشار : ماعنديش هنا شي حاجة تعدي بيها تنفعك..بقاي هنا حتى نجي..."خشا ايدو فجيبو كيشوف فتيليفونو ورجع دارو فجيبو وهز فيها عينيه" دخلي لبيت كاين ipad ديالي تلاهاي فيها ولا شوفي شنو ديري...
تبسمات غي شوي وهي تحرك ليه راسها...خلاها وخرج من دار نزل نيشان ل طوموبيل داير تيليفون فوذنيه كايهضر مع حسام الي بلغو شنو طرا من بعد مامشا ووراه من فين يتقدا ليها...مابغاش يخرجها ب بيجامتها باش ماتحرجش برا...دخل لواحد البوتيك كان قريب..عطا قياسها والسن ديالها جابت ليه البنت سروال بويفراند و تيشرت بيض والفوقي قميجة قصيرة زاد غوبش فيها ونطق...
بشار : شي حاجة طول من هادي ؟!
تبسمات ليه وهي تمشي جابت ليه قميجة بيضة طويلة شوي..وسروال اخور دجين سليم...وجابت ليه سورفيتات زوج بالقب وحدة كحلة وثانية غوز حيث قاليها عمر البنت...كانت جيهة ديال البيجامات خءا ليها ثلاثة تبديلات...وعاوناتو حتى فالملابس داخلية كلشي خذاه ليها وماحشمش حيث شي حاجة سميتها ختي وخويا كيموت عليهم خصوصا اشراق عنظو تاهي حالة خاااصة..خلص بالكارط بونكيغ دارت ليه الفاكتيغ ف ساشيات ورجع لسيارة...ديمارا ومشا لدار....غير سمعاتو حل الباب ودخل وهي تحط الايباد...
بشار "حط ليها ساشيات" : شوفي شي حاجة من هنا لبسيها...خارجين..."سكت وتا بغا يمشي وهو يرجع" معاك تيليفونك ؟!
اشراق : علاش بغيتيه ؟...
بشار"هز حاجبو". : نعام ؟!..
اشراق : لا لا مم ماجبتوووش خليتو اصلا ماعنديش ياك ه هرستيه ليا..كنعدي غير بواحد قدييييم ديال مي والله وحق الله..
بشار"زاد جمع حجبانو وهو كيشوف فيها..نطق بواحد البرووودة " : بقاااي لجد مك تفتفي عليا تم بقاااي..سيري لبيت لا بغيتي تبدلي...
خلاها كاتقلب فداكشي ومشا هو نيشان لبيت جبد حوايج الي غايلبس ومشا لدوش...اما هي لبسات داك سروال دجين سليم بلومارين وقميجة بيضة..وسبرديلا بيضة...كانت مرايا نيت طويلة تما تقابلت معاها كاتشوف فيها عجباتها وجات معاها ومع اشراق تاهي زويييينة ملامحها كحلين بحال بشار من غير عينيها الي كبار وزوهريات...فيهم واحد لمعة وبراءة فشي شكل..فورمتها زوينة عندها مؤهلات زايدة فصدر وحتى ف المؤخرة كاتعطيها عمر كبر...طويلة حتى هي بطول 1,75...كانت جامعة شعرها الاسود ب قراصة..وهي طلقو خلاتو على راحتو بدات تقاد فيه..مشات لساشيات مالقاتش بارفان وهي مولفة ديرو وتخرج واخا تمشي بيه لكوليج...بقات كاتقلب شافت بيجامات الي جاب ليها بانطوفات عارفها عارف اش كاتلبس شحاال كاتلبس حيث ولف كيرسل ليها من نهار وعات...عارف اش كاتبغي فاش كايهضر معاها شي مرات وكايقوليها "شنو بغيتي نرسل ليك"..كاتبغي توصف ليه حتى كايقوليها ترسل ليه اش بغات فواتساب ب صورة ولا فيديو وهو يتكلف...حتى حفض اش كاتبغي...المهم عنظو هي تقرا تقرا تقرا وتكون راسها وتكون حسن منو هو...وماتحتاج لتاحاجة وهو كاين واخا كان كايلقى بزاااف صعوبة من جيهة "توريا" لكن مكانش كايهتم تقول الي بغات تمنعهم عليه حيث واحد السنوات منعاتها عليه فاش كانت صغيرة بزاف فاش كان الجرح باقي جدييييد...واخا هكاك بقا كايصبر حتى مابقاتش كاتقول والو...
لبسات وخرجات كيف عيط ليها ملي سالا لقاتو تاهو. بدل عليه لبس تريكو خيط رقييق فالكحل بالكمايم..وسروال دجين كحل تاهو..كان كايلبس فسبرديلتو والگارو في فمو كايكمي فيه..هز فيها عينيه وطلعها هبطها وهو ينطق بصوت مبحوح...
بشار : جمعي عليا زغبك...(شعرك هههه)...
اشراق : واخا...
كلمة كانت كفيلة انها ماتعاودهاش من وراه حيث كان شعرها مطلوق وطويل وقوي...دخلات لبيت جمعاتو ب قراصة بطريقة زوينة مناسبة للخروج...لقاتو واقف كايتسناها وحاني راسو فتيليفونو كايخربق فيه وشاد الكارو الي قرب يكمل بصباعو...غير جات وهو خشي تيليفون فجيبو وعنقها بجنب تا خرجو من البرطما...نزل هو وياها تالسيارة ركبات وهو يجر اخر جرة من الكارو ولاحو عسف عليه وركب ودخاحن خارجة ليه من فمو...زاد نيشان حتى وصل لبابا دكالة وزاد نيشان تا دخل من واحد القواس وبقا غادي لقا راسو وصل لرميلة !!...هز حاجبو وفنفسو اش جابني لهنا...مالقاش كيف يدير وكمل حيث اصلا غراضو يمشي لجامع الفنا بغاها تشوفو واخا را صداع ديال تما مايقدش عليه لكن باش هي تدور وتفوج عسف على خاطرو...خرج نيشان ف بلاصة فين يباركي..لقا دنيا عااامرة والبارك الي يدخل ليه يقولو ليه عامر...تا بدا يتنيرفا...وجمع حجبانو وهو ينطق...
بشار : مانصيبش نبقى هنا..صباح نجيبك فوقيتة خاوية...
اشراق"حركات راسها"..
ضرب دورة ورجع تاني شد طريق تابع ل Maps...حتى رجع نيت فين كانو فات تارگة وشد طريق اگادير مركب اسم واحد الريسطو عائلي بامتياز...تالقا راسو فالمسيرة وفطريق اگادي كان داك ريسطو الي وقف قدامو كتيحمل اسم "البساتين"...وقف السيارة ونزل وتاهي تبعاتو...فرحتها دابا فشي شكل...لقات فين تفرج وخرجات من داك الدوار وديك الدااار الي فيها غير شقا وتنهصيييير من "توريا"...لقات فين تحيد طاقة سلبية الي فيها...ولقات ماتشوف وتنسا اش هي...وتنسا اشراق الي كاينة فدار الرحماني...عينيها لمعو ب ضو الي ساني من اسم الريسطو...حتى حسات بايديه محاوطين كتافها وكايهضر فالتيليفون...كمل وهو يوقف كايشوف جبد كارو تاني شعلو بدا يكمي فيه وهو واقف...شاف فيها كيفاش واقفة وكتشوف هنا وهنا...كيفاش عينيها كيلمعو...واخا تاهي خايفة منو...كانت مبهوضة بالريسطو وكاتسمع صوت لانيماسيون الي فيه...غرقااات ف بحر الفضول حتى فاقت وخرجات منو قافزة من سؤالو ليها الي كان مفاده...
بشار : كاتشوفي يوسف ؟!
اشراق : ش شفتو غير جوج مرات صافي...
بشار"خرج عينه شوي": علاش ؟...
اشراق : غ غير مي مكتدينيش معاها..
بشار : تمشي تمشي..ماتبغيش لصقي..سيري صحة..خوك هذاك اشراق خوووك..وصيتك عليه بزاف ولا لا !؟
اشراق : ا اه وصيتيني..
مابقاش هضر كمل الكارو حتى بانت ليه سيارة فورد فييسطا سايقها حسام الي كانت بجنبو سعيدة تاهي.ووراه البنات ومعاهم حتى زكرياء.....ضارت اشراق وهما يبانو ليها...تا نزلو وهي تقرب ليه سعيدة سلمات عليه ووقفات حدا اشراق معنقاها الي سلمات عليها بدورها...
سعيدة : عارض علينا ولا ههههه...
بشار"حرك راسو"..
حسام : خليت هاشم يهرنن ورانا ههههه...
ماجاوبوش بشار كأنه ماهضرش على هاشم...حرك ليهم راسو وضارو كاملين دخلو..حيث كان عيط لسعيدة باش تجي هي وحسام وبدورها سولات هاشم ما مانعش حيث عارف علاقتها ببشار كيف دايرة اقرب وحدة ليه بزاااف كأنه ولدها من صلبها وطبعا معاها ولدها حسام...بشار عنق ختو تبعاتو سعيدة معاها بناتها تبعهم حسام بجنبو زكرياء...
زكريا : وكون جبنا خالتي توريا كان يزيان طرح ابا حسام..
حسام. : تا هنينا دروك يسمعك ويزين بيك طرح نيت نتا...
حدر راسو وهي تم جايا تاني واحد خيتي سمراء اللون باين عليها من القرن الافريقي عندها واحد الفورمة صدر كبير ومؤخرة كبيرة...تبعها حسام وزكرياء بعينيهم بلهلا يحزقو ليهم
حسام : ترامح الملاح نعماس..
زكرياء : قرينا ونااامس على المجاعة ف افريقيا...من شت هادي..الجوع هو الي فطرمتي...الصدر دادا والترمة عاداعادا...
شدو طابل عائلية فيها فوطويات...جلسات اشراق فالقنت وجلس حداها بشار الي تشتح مفرق رجليه بطريقة رجولية...وجلسات حداه سعيدة...اما لقدام كان حسام وزكرياء والبنات الي كانو كايضحكو عالمهم وحدو...قربات سعيدة ل بشار وهي تنطق بينها وبينو...
سعيدة : اش داكشي سمعت صباح...
بشار : روي ستون سعيدة...(جمعي الهضرة)...
سعيدة"تنهدات" : هاني ساكتة..وليني را مزاال تعاود ليا ابشار..داكشي ماخاصش يتسكت عليه...
بشار"كان جامع حجبانو وكيشوف فنقطة بعيدة مبهمة" : سعييييدة..لبديها يرحم باك...جبد عيبي لگا عاري...ماناويش نگول شي حاجة ومانبغيكش تانتي تعاودي..لجمي فمك..كيفاش وعلاش ديري ميكة على وذنيك...
سكتات سعيدة مابقاتش هضرات حتى جا سرباي خذا طلبياتهم الاولية بعدا عصيرات وهو قهوة كحلة باغي يكمي بيها...ضار عند اشراق وسولها...
اشراق : بغيت لاگلاص...
زكريا"حبس ضحكة" : كخمم..
حسام : تا هنينا..هههههه...
زكرياء : بغاايت لاگلااااص ههههههههه...بغات تلحس هههههه
حسام"طلق ضحكة بلهلا يطريه ليه..زكرياء دغيا جمع ضحكة كأنه ماهضرش ورجع راسو خاااتر وضريف "
حسام : هههههههههههههههههههههههههههههههه...
بشار"هز حاجبو ودور راسو بالعرض البطيء ناحية حسام"...
سعيدة : اويلي يغرق فيه مالك...
حسام"جمع ضحكة من شاف بشار كيشوف فيه وشاف اشراق تاهي وزكرياء الي جمع ضحكة ورجع راسو ولد خمسين عام..صرط ريقو وحدر راسو" : بغيت بيبسي...
زكرياء"حبس ضحكة وضار لهيه كايحك فقرفادتو ويطرش زعما را كاين ناموس"...
خذا طلبياتهم الاولية بينما يوجد ليهم العشا الي كان عبارة عن مشاوي اما ل بشار كان مكتفي غير ب صلاد خفيفة...تعشاو ونشطو من غير بشار الي كان خاشي راسو فتيليفونو وصافي وهما كايضحكو...حتى ناضو من الي سعيدة صونا ليها هاشم بلغها بالي را كايتسناها فالمصحة...خرجو من ديك ريسطو..دراري كانو فوجو ونشطو منهم تا ااشراق...ركبات سعيدة مع بشار اما حسام دا دراري رجعهم ل دوار...وصلو لمصحة لقاو هاشم واقف عند الباب وواقفة حداه حبيبة الي شافتها اشراق وهي تهز حجبانها...
اشراق : حبيبة !!
حبيبة"شبه ابتسامة" : اشراق...
سلمات عليها وهي ترجع وقفات حدا سعيدة...ماهزاتش عينيها ف بشار وتاهو ماشافش فيها...عنق ختو وزادو طلعو ماشافش حتى فهاشم الي تنهد وحدر راسو وهي تقرب حداه سعيدة ونطقات...
سعيدة : يلاه طلع...
حرك راسو وهو يتبعهم طلعو كاملين دخلات اشراق الي شافت يوسف كان متكي كايتفرج فتلفازة...الوقت كان معطل بزاف لكن مكانتش حتى طريقة باش يشوفوه بلا صداعات من غير انه يجيو فهاد الوقت حيث توريا مكانتش كتخليه من نهار رفع عليها شكاية...
اشراق"قربات ليه وهي تبوسو فحنكو" : يوسف ههه لباس عليك
يوسف : اشاق اشااق..باس بااس...
سعيدة : كبيدتي كي بقيتي..خليتك هاد الايام ماجيت عدك"باست ليه راسو وقاستو" لواه الحمد لله مزياان...
تبسم ليها وهي تعنقو...شاف فبشار الي قرب ليه وهو يوسع ضحكتو بجهد تا عنقو بشار وباس ليه راسو كيطبطب عليه فحنكو...هز عينيه وهو يشوف "حبيبة" وهو يضحاااااك تا هز بشار حاجبو طاح ليه العجب وشاف فين كيشير بايدو...
يوسف : ابيبة بيييية..ختي...
حبيبة"ضحكات تا بانو سنيناتها كانت اول مرة تبتاسم قدام بشار": يوووسف ههههه...
قربات ليه سلمات عليه وهو كيضحك ليها وهي كذلك...واحد الكمية ديال راحة حس بيها يوسف من ناحية حبيبة خلات بشار كيشوف...واخا مبين البرود فملامح ديالو لكن راه ملاحظ وكيشوف...تا اشراق بقاات غير كتشوف وخصوصا ضحك يوسف كايتسمع...
حبيبة : كي بقيتي شوية ؟!
يوسف : شوية شوية...ههههههه...
بقاو كيضحكو معاه...كان اغلب الوقت مخشي فبشار حتى جلسات بعيد فوق الفوطوي...جات سعيدة حداها كيشوفو فيه كايهضر مع خوه وكيفاش بشار كايقلب ليه فحناكو ويقيس ليه فجبهتو...كيفاش كايقاد ليه القبية الي لابس...وكيفاش كايوصي فالفرملية عليه...ويوسف ضحكتو ما حيداتش...سهات وهي كتشوف فيهم ومبتاسمة حتى تحطات ايد سعيدة عليها وهي دور عندها...
سعيدة. : اجب معايا برا.."غمزاتها ناحية اشراق"..
حركات راسها وهي تنوض هي وياها خرجو على برا...وتوجهو بعييييد حدا واحد النافذة...شافت حبيبة فساعتها كانت 12 وشي حاجة ديال الليل...
سعيدة : قارية بكري ؟!..
حبيبة : لا ماعندي والو غذا..داكشي باش گلت ليك نمشيو ليوم...
سعيدة : فين وصلتي فموضوع شيكات...
حبيبة"هزات فيها عينيها وشافت ناحية الغرفة الي كانت مقابلة ليهم فراس الممر...ورجعات شافت فيها وهي تبدا تعاود ليها...ماقدراتش تخبي عليها حيث عارفة سعيدة كيفاش دايرة..وعاودت ليها حتى تكتم ديالو على الامر كيفاش وصاها تبقا هاد القضية بينو وبينها...لكن حبيبة كلها مافراسهاش را عطا شيكات لباها...وحتى هو ماقاليها والو...حتى كملات وهي تنطق سعيدة...
سعيدة : شوفي ابنتي..انا ماغاديش نگوليك سيري معاه ولا عاونيه...انا الي نأكد ليك عليه هو مادام كايعطي كلمة الا وكايگد بيها...وثيقي بيا مادام جا راسو وبغا منك تعاونيه كوني اكيدة ابنيتي را تلححات ليه والبيبان تسدو ليه فوجهو...مالگاش شي طريقة باش يعاون راسو فهادشي..وماكاين تا باب من غير بابك هو الي يعاونو...ياك نتي رايك جيتي وگلتي ليه عاوني نعاونك..اش تبدل...
حبيبة : ماتبدل والو..گلت ليه نعاونو فالشهادة...حيث الي كنت خايفة منو هو شيكات دابا ماعنديش مشكل..ولكن نعيش معاه الي صعيبة خالتي...حطي راسك بلاصتي...
حبيبة : اش يضمن ليا انه مايستعملش شيكات ضدي ؟!
سعيدة : تشكي فيه تاهو يهددك ؟!..
حبيبة : ماشي بعيدة اخالتي"حدرات عينيها" هو حدو قاليا شيكات عندي...علاش ما وراهمش ليا...غير گالها ليا ودغيا دخلني فالهضرة باش نعاونو..."حطات ايدها على جبينها بتوثر..قشعات سعيدة صباعها كايترعدو" مابقيتش كانتيق..بابا مزال بين عينيا وهو مكنتيقش فيه...تكرفص عليا فديك الليلة الي عمري مانساها وماتمحاش من بالي...فوسط دارهم ومارحمنيش وبغا يرحمني وانا معاه وحدنا...هي گولي ليا اخالتي ؟!...
سعيدة"الصمت"...
مالقات سعيدة ماتقول واش تجي من جيهتو وتضمنو ليها وهي براسها ماقادراش ضمنو حيث كايغفلهم وحيث بصح عندو ردود افعال غير متوقعة...وعارفة حجم حياتو النفسية كيفاش دايرة..
سعيدة : شوفي بنتي...بشار ماشي ولدي ولد لوسي الله يرحمو..وليني را حاسباه فحال حسام وكثر...نگوليك هو ومو مامفاهمينش..ونگوليك اييييه داز من مشاكيل كيف كايگولو ديك "نفسية" هادشي الي نگوليك..اش كاين واش طاري مانصيبشاييي نگوليك هو الي يعلمك وهو الي عنظو الحق يكوليك...الي نأكدو ليك ابنتي هو را مكااااين ما حن من بشار...الزمان والضروف الي داز منها خسرات ليه طبعو...بشار غادي بطريقة وحدة ضريه يسكت ضريه يسكت ويسكت ويسكت وليني لا فات حتى ناض را منضمن ليك ابنتي اش يدير...نتي ماعندك مناش تخافي مادام ماضريتيهش را مايدير ليك والو...ومادام عطاك الكلمة يعاونك را خاطيييييه داكشي ديال تخلوييض وخاطيه الكذوب وتسمتيل...جيه نيشان ياكلك بحوايجك...
بقات معاها حتى تحل الباب وخرجو كاملين كان هاشم خارج سبق وصل عليهم تا بان ليها جاي معنق اشراق الي حادرة راسها...
هاشم : نلحگك لداركم ابنتي...
حبيبة"تبسمات" : اه عمي...وسمح ليا...
سعيدة : ههههه عاوديها لراسك..مال هاشم اش كايصنع الي ما يوصلك...
بشار ماضارش كاع جيهتهم عارفها غايوصلها هاشم...ومشا مع ختو نزلو لتحت ركب هو وياها ومشاو ليرطما اما هي ركبات مع هاشم وسعيدة وصلوها لدارهم ومشاو...كل واحد فيهم رجع لدارو وكل تلاح ففراشو...بشار خلا ختو دخلات لبيت لبسات بيجامتها وتكات فوق ناموسية كاتبقشش فالايباد وعقلها مشا مع تيليفونها لا يكون حميد كايصوني ليها صرطات ريقها واخا راها مهنية نوعا ما من تيليفونها لانه صامت ومخبي فبلاصة مايعرفوش فين...بقات تبقشش وتفرج فاليوتيب..اما بشار بدل ولبس تيشرت وسروال سورفيت ومشا لصالون تكا فوق السداري وحط الماك فوق كرشو وبدا يخدم تاني ويدير فاتصالاتو..جاه تأكيد ديال البيي ديال طيارة لقا بالي عندو بعد غذا فالليل درجة رجال الاعمال...بقا خدام حتى دازت بيه عينو حيث كان شارب المهدئ باش يقدر يصبر ل ضجيج الناس فالريسطو...
"السادسة" صباحا...
نزل من الفوق كايبقشش فتسليفونو صغييير الي مدور عليه لاستيك شمع...كايحك فراسو ويتفوه حتى وصل لقاع دار لقا عيدة جالسة هي و توريا وسعيدة كايشربو فالقهوة ديال صباح...تا خرج عبد القادر كايحنحن تاهو....
سيحمد. : صباح الخير...
ع.القادر : شمن فياج عدنا اليوم ؟!
سيحمد : لاحگين "غادييين" تال سراغنة ل سوق تنين نفكو ليهم دوك ضروبات (عجول)..لا صبتي ترجع نتا انا باقي طالع تال سوق السبت وخريبگة...
ع.القادر : اش عدك تم...
سيحمد : واحد خونا داير معاه يعطيني فلوس ونعطيه شيك ديالو...
حرك ليه راسو وجلس كبات ليه سعيدة القهوة...جلس سيحمد وبدا يحنحن وتيليفون فوذنيه وساروت كاميو كايدور فيه بصبعو...صوته كان مجهد يكسر حيث كايهضر مع شي تاجر...تا كمل وهي تقرب ليه توريا...
توريا : كي ندير نخلي هذاك مايبقاش يلحگ خوتو...
سيحمد"كيشوف فتيليفون ويهضر مغوبش" : ختي توريا...بغيتي المعقول ولا تنوفيق ؟!
توريا : اش كاين...
سيحمد : لبدي الوقت وسكتي خليه مع ختو...خليه يدورها خايه يقرب منها..البنت ياك كنتي شاكة راها فلتت وبغيتي خوها يروديها ؟ اش تبدل...
سعيدة "غير كاتخنزر فيه وكاتزيد تحرق على ربيعة لا عرفات وتفكر هضرة بشار باش تسكت..ما استحملتش تبقى وهو كاين وهي تنوض دخلات لكوزينة"....
توريا"خرجات فيه عينيها" : اش تبدل نتا يا سيحمد..كاتهضر بصح ولا جبد ليك ركانيك ؟!..(جبد ليك شي ضوصي)..
سيحمد : ماجبد ليا تا حاجة...بغينا ندخلو بخيط بيض اتوريا...هادشي الي بيناتكم را گد الي يگعد راه يدور بين الناس وتولي شوهة نيت...لبديها شوية خلي غير دعوتكم الي دايزة..خليه يدير مابغا وسكتي...واش حنا كل مرة بنبقاو نفكو فيكم...راه ولدك اتوريا ولدك وراكي ولدتييييييه من كرشك...را مي الله يرحمها الي ولداتك فيه...نعلي يا شيطان...
يلاه غاتجاوبو ناض كايهضر فتيليفون خلاها حالا فمها مصدومة فيه...خرج على برا ومشاا كايهضر واحد المسافة بان ليه باه بعيد كايهضر مع واحد رباع ويشالي بعكازو...ومشا تا وصل الكاميو وهو يقطع وعاود صونا تاني حتى جاوبو صوت نسائي فيه بحة غليضة شوي...
سيحمد : عتيقة اليوم ديري بحساب جاي عندك...لازم علينا نهضرو...
عتيقة : شواقع ؟!
سيحمد : بركي تم فخريبگة ماتمشيش لداركم نجي ونعلمك...
قطع معاها وخشا تيليفونو فجيبو حتى جا بوه وهما يركبو وصدو ل فين غاديييين....اما توريا من صدمتها مابقاتش كاترمش ولا وجهها بيض بالفقصة وصدمة..وهي تنوض بزربة طلعات لفوق لبسات عليها وهزات صاكها وهي تنزل لكوزينة...
توريا : ولدك حسام معاش غادي...
سعيدة : دابا نيت...
توريا : يلحگني ل كنينيك ويزيد..."خرجات خلاتها كاتشوف"..
فالبيت كان جالس مولاي حفيظ كايفطر باش يتسسر لمحل حتى جبد الهضرة لناديا....
م.حفيظ : جاب ليا شيكات...
ناديا"حلات فمها" : وايلي ؟...كيفاش جابهم ايك..
م.حفيظ : كنت فالمحل حتى جا عندي وحطهم ليا...وصاني يبقاو عندي ونبقى نعطي شوي بشوي...وليني گاليا نبقا نحط فشي حساب تما..هي هو ماعرفتش...
ناديا"باقيا مصدومة حطات ايدها على فمها" : شكون گاليه على الكريدي ؟ وكيفاش شد شيكات من عند جدو...
م.حفيظ : گاليا هادشي بينو وبينه...دار معايا هو الحل وليني را مزال مافهمت وبنفهم حتى يجي...نحاول نخلي شي وقيت وبنعيط ليه يفهمني ونيت اه بغا يگوليا فين بنحط ليه الفلوس...المهم نتي هادشي هنا يبقى راه وصاني ونتي تحفظي على هادشي تا مرتو الي هي بنتك ماتگوليها ليها...
خرج من دوش لقاها لابسة حوايجها وواجدة كاتسناه...طلع فيها وهبط كانت لابسة سورفيت على شكل قبية وسروالها...جامعة شعرها...هو لوازم ديالو وهما يخرجو مشاو نيشان يفطرو...جلس هو وياها طلب ليها اش بغات كاع الي تشهاتو حضرو ليها...خلاها حتى فطرات و شبعات وهو يتگعد وقرب ليها مربع ايديه كيشوف فيها...
بشار : فين وصلتي ف قرايتك ؟!
اشراق : مزيان غاديا مزيان...
بشار : شنو خاصك ؟ خاصك سوايع !! كاين كيفاش ديريهم لهيه ؟
اشراق : ك كاين استاذ ديال ماط و انجليزية..عندي مشكيل فيهم..
بشار : فين كايديرو ليكم سوايع ؟!
اشراق : فالكوليج نيت...كايبقاو حتى لتسعود..غير هو مكاينش الي يجيبني مع تسعود..
بشار : كاين اشراق كاااين...نحضرو ملتو علاش الي مايكون...گولي نتي شنو خصك وصافي...نرجع من لهيه ونعاود نجيبك عندي لاكانت عندكم شي عطلة..نشوف معاك فين واصلة وشنو نيفو ديالك...المهم عندي نتي قراي مزيان والي ناقصة فيه نزيدوه ليك..."زاد فنبرة صوته الي هي كتعرفها كاترعب" تفاهمنا ؟
اشراق"حركات راسها...يلاه بدا يشرب قهوتو وبغا ينوضو باش يديها ل كارفور ولا شي مركز تسوق تاخذ لي بغات حتى صونا ليه تيليفونو كان الطبيب ديال يوسف من المصحة كايبلغو باش يجي...ناض فالبلاصة خلص ودا معاه اشراق...وصلو لمصحة مشا نيشان لمكتب طبيب...
بشار : سيري عند يوسف شوفيه...
اشراق"بتردد" : و الى كانت مي "كاتصرط فريقها"...
بشار : بقاي معاها.فين المشكيل...
اشراق : ها..واخا...
مشا معاها تا قربها ل غرفة يوسف تسناها. تا دخلات وهو يرجع دخل عند طبيب..سلم عليه وجلس...
طبيب : سي بشار..عيطت ليك اولدي باش نعلمك بالي يوسف غايخرج غذا فالصباح ان شاء الله..وبغيت نوصيك باش يكون ايه مراقبة مستمرة لصحتو...غادي نكتب ليك اش دير ليه وخا هادشي را عطيتو للام ديالو...مي ملي وصيتيني نعاود نعطيك..صحتو را باقي ضعيفة حاولو توفرو ليه جو نقي وباررد..حتى فالتحاليل ديالو عندو نقص فشحال من حاجة...المهم "كحز ليه واحد توصيل و شواهد طبية اخرى" هادو الي بقاو وطلبتيهم مني...
بشار"حرك راسو" : معاه شي حد دابا ؟!
طبيب : لا مامعاه حد ملي مشيت عندو صباح مكاين حد..
ناض بشار مستاذن منو...كان بغا يمشي عند يوسف وتردد مافيه مايسمع صداع مو...هبط لتحت مشا نيشان لطوموبيل دار فيها دوك الوراق...ورجع لاستقبال باش يخلص اش باقي...بقا جالس فالبيرو ديال الخلاص بتوصيات من طبيب...كايتسنى يجمعو ليه الحساب حتى صونا ليه تيليفونو فايدو وقطع...عاود وصلو ميساج وهو يهبط عينيه هاز حاجبو ومغوبش كيف عادتو..كايقرا الميساج...الي كان من "HABIBA"....فالبلاصة دوز ليها الخط...
فهاد اللحظة كانت اشراق جالسة فالفوطوي وحادرة راسها وتوريا واقفة وتنگر عليها...
توريا : هضرتي مشات فالواد يا الكلبة ؟...ياك گلت ليك لا تمشيش معاه ؟
اشراق : ماقدرتش امي...راك شفتيه كيفاش جرني اهى...
توريا"خرجات فيها عينيها". : وتجرك عليا سالمة يا بنت لحرام مالك ماعندك فم ؟ ياك وصيتكم تاواحد مايدويه...ياك گلت ليكم زمو عليه فامكم...معامن كندوي ؟...نتي غا كايبان ليك وعينيك يتحلو وتحلي...لاگيا عليه فشوشك ؟...
اشراق"الصمت"
توريا"يلاه بغات دوي حتى جرها يوسف من كمامتها وهي تهبط عينيها ليه باقي وجهها مجيف بدا ليها سيحمد وكملات ليها اشراق." : مالك...
يوسف"عينيه مغرغرين" : بغيت بشار بشااار خويااا...بغيت مشي عند بشااار...
توريا : بشااااار مكاينش داااك خوك مكاينش..باقي نسمعك ذكرتي سميتو نتفاهم معاك...خوك من نهار بان والمصايب تابعيني...اش بغيتييييه اااش "كاتشالي بايديها عند وجهو وهو كايبكي تا تفقص" اش بغيتيييييه يلحگك لبوووك ؟ بغيتيه يرزيني فيك تانتا...اش بغيتيه را غا هبييييل ومريض فراسو..
يوسف"بدا يغوت ويتركل ليها ويبكي" : بشاااااار خوياااااا بيت خويا اويياااااااا...بيت مشي معاه بيتوووو..
توريا"خنزرات فيه" : زم عليا فااااااامااااااك زم زاااااام...
كاتقرب ليه تسكتو وهو كيبعد فيها...اشراق ناضت على وقفتها...كاتشوف فيه كايبكي ويتركل ويبعد ليها فايديها تا غوت
يوسف : بشااااااااااااااااار....عااااااااااااااا..بعدي منييييي...
توريا بغات تسكتو مابقاش بغا يسكت دخل فهيستيريا وهي مفقوصة ماعاقتش براسها حساب ليها اشراق نسااات را هو عمرو ماتحطات عليه لايد...حتى هزات ايدها لسما ونزلات عليه بطرشة لفمو ودفعاتو..تا خرج ليه د.م من فمو ونزلو دموعو يجرييييو كايدير ايديه على فمو الي تجلخ ليه....اشراق خرجات عينيها تاسمعات الباب تحل وهو يدخل جاو عينيه نيشان مع يوسف الي كايبكيييي وفمو دايز....
وصلات توريا لواحد اللحظة يمكن مابقاتش قدرات تسيطر على ردود افعالها...حقا هي أم كانت تقريبا مهملة من جيهة يوسف يمكن هي كبدتها قاصحة على ولادها..لكن الضروف الي مرات بيها والحادثة خلقات منها وكبراااات منها واحد شخص الي سااام..حقو.د...قلبو كحل من جيهة كلشي حتى ولادها...
بقا شاد فمو الي كان دايز بسباب ضربة الي عطاتو عن غير قصد منها...ناضت اشراق مخرجة عينيها حيث توريا عمرها ضر.بت يوسف واخا مكتديهاش فيه بزاااف مامهلياش فيه لكن باش توصل انها تعن.فو هادي عمرها دارتها داكشي لاش اشراق تصدمات...شوية حتى تحل الباب وهو يدخل ضارت اشراق الي قلبها طاح فرجليها حساب ليها را بشار الي دخل لكن كان العكس ومن محااااسن الصدف عند توريا بجهد...كان المحااامي الي موكلاه هي...صاحب اسم "المداني القرافلي"
المداني : سلام عليكم...
توريا"ضارت لعندو" : عليكم سلام اهههه سي القرافلي...زيد اسيدي تفضل..
المداني"شاف جيهة يوسف الي كان كايبكي وشاد فمو وشاف جيهة اشراق" : الحاجة (كايقوليها الحاجة ك احترام فقط)..يلاه ساليت واحد الجلسة وجيت نيشان. كيف تافقت معاك..
توريا : اه ايه..مرحبا اسيدي مرحبا...
المداني : هذا هو سي يوسف ياك..."تبسم ليه لكن جمع تبسيمة فور ماشافو هكاك" مالك اولدي...
يوسف"بدا يغوت تاني ويبكي" : ضربتني ضبتنييييي...
المداني"وسع عينيه حيث عرف هادشي ماشي فصالح القضية ديالها" : واهيلي..."شاف فيها" الحاجة اش هذا ؟!
توريا : مادرتها بلعاني اسي القرافلي..ماشتوش مانويتهاش..دابا يسكت...
المداني شاف جيهة اشراق وسول عليها...
توريا : بنتي هادي اسي القرافلي...دنيا هانيا..
المداني"حرك راسو " : الحاجة الله يهديك هادشي را ماشي فالصالح ديالك...هاهو بدا يبكي ويشكي بيك..على بالك غايسكت الحاجة..."قرب ليها ونطق بينو وبينها"...رطبي معاه وهدنيه هادشي لا فات عرفو شي حد ولا ساقو خبار هنا را شهادة طبية تغرقك ودوزيها حبس...
توريا"شهقات وهي توسع عينيها بخوف...شافت فاشراق ةنطقات" : مسحي ليه ا اشراق فمو وسكتيه شوية نهضر مع الحاج....
المداني : انا جيت على حسب اش تافقنا..موصيني عليك سيحمد وكي گلت ليك ديريه ماتفاوتيش عليه ورطبي دابا معاه قربيه منك ماشي نجي لگاك ضارباه بغيتي تقفريها على راسك..بحسب المسطرة القانونية هنا را كاين عن.ف وهو من ذوي الاحتياجات الخاصة يعني هادشي را يگلب عليك الشكاية ومانتي فخير ويعزز دلائل عند طرف لاخور...
توريا : مافهمتشاي...
المداني : يربحك ولدك فالشكاية الحاجة..وهادشي مابغيناهش...
توريا"حطات ايدها على صدرها وهي دور عند يوسف الي كان باقي كايتنخصص غا قربات ليه وهو يبعد عليها وبدا يدفع فيها" : عايش وليدي مسحها فيا..."باست ليه راسو"...
المداني : المهم هضري معاه وعطيني دوك الوريقات الله يجازيك وديك الامانة...
توريا : الي بغيتيه باقي ماجاش لوسي باش نعطيه يخلص لكنينيك (كلينيك) باش نعطيك تواصل هاو يجي ونمدهم ليك..والفلوس "شافت فاشراق" جيبي ليا داك صاك ابنيتي...
جابت ليها اشراق الصاك..جبدات ليه واحد جوا فيه شي فلوس مداتهم ليه...عاود اكد عليها انه تحاول ترطب مع يوسف الي باين ماشي فصالح ديالها انه يتقلب عليها...وصاها تشوف معاه باش مايقولش لشي حد انها ضر.باتو...خرج المحامي وهي دور عند يوسف بدات تمسح ليه في فمو وهو كيبعد فيها وهي كتقربو ليها تا باست ليه راسو...فعلا بقا فيها مابغاتش ومكانتش قاصدة ضربو ولا دير ليه هاكاك الضغط الي كانت هي فيه ماستحملات فيه حتى واحد...
يوسف"كيبعد فيها" : بدي مني بعدي انييييي...بغيت بشار گولها ليه بدييييي...
توريا"باست ليه راسو" : الله يرضي عليك اكبيدتي لا ما سمح ليا...عايش وليدي ماشتك شاااي...نعيط ليك ليه بغيتيه ؟!
يوسف"حرك راسو بزربة ودموعو كايسرسرو..وهي كنمسحهم ليه"
توريا : دابا نعيط ليه..وليني لا گلتي ليه راني ضربتك ماتبقاش تشوفو...بغيتي تگوليه ضربتك ؟
يوسف"الصمت"...
توريا"خرجات فيه عينيها" : يوسف !! توصلها ليه ؟
يوسف : بغيت بشار..
توريا : الى ساق الخبار درت ليك هاكا ضربتك..غادي نتقلق منك ومنبقاش نخليك تشوفو ديما..."بتأكيد بعينيها" اش گلنا ؟ تگوبها ليه ؟!...
يوسف"حرك راسو ب بلا"...
توريا : مزياان..لا بغيتي تبقى تشوفو سكت..الى گلتيها ليه يجي واحد راجل غايعاوني وغانديوك وعمرك تشوفو..ماغاديش نخليه يبقى يجي عندك وماتبقاش تشوفو...دابا سكت اولدي الله يرضي عليك...
هزات عينيها ف اشراق لقاتها حالا فمها مدهشرة مدهوشة من اش كتقول مها...خنزرات فيها وهي تنطق بصوت مجهد قفز فيه يوسف تا زيرات عليه فحضنها....تا رجعات اشراق باللور خطوة...
توريا : اش كاين ؟!
اشراق : م مكاين والو...
توريا : تزمي فمك..نسمعك لحگتيها (وصلتيها) لشي حد ولا ليه هو نيت نهارك كحل زحل...
اشراق"الصمت"
توريا : اش گلت ؟
اشراق : واخا مي وواخا...
يلاه غاتمشي تجلس حتى تدق الباب وهي تدخل واحد الفرملية تبسمات ليوسف و لتوريا ووقفات كاتسول...
هي : اشراق ؟
اشراق"وقفات" : انا ختي..
هي : تكلمي لواحد سيد گاليك هو خوك...
اشراق"شافت ف توريا الي حركات ليها راسها وشيرات ليها بمعنى سيري...اشراق تصدمت من ان توريا سكتات..ماعارفاش بالي توريا هادشي دابا فصالحها انها ترطب كيف وصاها المحامي الى عكسات الامور ماغاتمشيش كيف بقات عندها مقادة...
نزلات عندو اشراق لقاتو متكي عالسيارة برا...
بشار : يوسف مزيان ؟
اشراق"لولبات عينيها حتى هز حاجبو" : م مزيان مزيان خليت حداه مي...
بشار : مال عينيك ماشادين قنت ؟!.. اش تم ؟
اشراق : وااالو..غير سول عليك وصافي...
بشار حرك راسو بواحد طريقة كاتبين انه شك بشي حاجة شك بان مو دارت شي حاجة ليهم بزوج...وكيفاش خلاتها تجي عندو دغيا !!...حدرات اشراق عينيها حيث ماتقدرش تشوف فيه وخايفة لا يحس بيها كذبات ويصليها معاها ههههه....
ركبات هي وياه وتوجه بيها لجامع الفنا الي كان خاوي فديك الوقيتة...
دوزات معاه بين امس واليوم عطلة مافيهاش اي حاجة الي تخليه يشك راها كادير شي عجب...وحتى هي كي خلات تيليفونها نسات واش كاين شي "حميد"...واخا مع خوها ممخليها خاصها والو لكن كاتبقا خايفة منو وفنفس الوقت مرتاحة من جيهة حميد...وحتى حميد طوال الاسبوع مابقاش عيط ليها فالتيليفون..شكات واش باقي باغي منها شي حاجة ولا وقعات ليه شي حاجة مابقاش عيط ليها من اخر فيديو رسلات ليه...
"خريبگة"...
حي الرياض..وفوحدة من المنازل الي فداك الحي...دار فيها زوج طبقات مصلوحة مزيان من كلشي وصليح تاع القلب اما الفراش مفرشة مزيااان...حطات اخر قرعة فوق الطابلة الي حاجة فيها العشاء بسطيلة ديال الحوت وبجنابها شليضات..وطبيسلات فيهم صالاد نيسواز...حطات زوج كيسان ومعاهم قرعة مثلجة و قرعة ديال هواي كبيرة اما الاساسية كانت قرعة ديال "الخم.ر"...وقفات ودايرة ايدها على خصرها لابسة بيجامة ديال ليكرا فالازرق ملكي مزيرة على جسمها هابطة تال عند ركبة...مبينة مؤخرتها الكبيرة ومزيرة على صدرها الي حتى هو كبييير مرافق لكرشها تاهي شوية خارجة..اما سيقان كانو غلاض...بيضة بزاااف وشعرها مصبوغ بالاسود مصاوباه وجامعاه الفوق ب قراصة مخلية خصلاتو نازلين بانسيابية...حجبانها مقادين ومطراسيين بطاطواج كحل دعينيها صغاار لكن رموشهم الاصطناعية كثيفة مصغرة حجمهم كاتبان فحال شينوية وزايدة ليهم الكحل العربي والفم معكر بگرونة ماط...بشرتها بيضة وصافية بزااف خصوصا ديال وجهها..ايديها مزينين ببراسليات وكورميط ديال ذهب ومگانة فالليسر تاع ذهب...حطات ايدها على سلسلتها الي فيها قليب وسطو اسمها بالفرنسية "ATIKA"....سمعات صوت لانتيرفون وهي تمشي ليه جيهة الباب ديال مطبخ شافت فالكتميرا بان ليها واقف كايحك فشعرو...هزات لاباراي ونطقات بصوت مبحوح ومحنگر غالب عليه بحة الغنا الي كانت كتغني سابقا...
عتيقة. : طلع ازين الوگفة طلع ههههه...
حلات عليه وهو يطلع حيث الدار تحتانية كلها صوالن وفيها بيت نعاس ليها هي وياه وبيت نعاس البنات...حل الباب وهو يدخل طلع فيها وهبط وهو يتبسم بجنب...
سيحمد : نعل بو مك بوقيام عد الباب...
عتيقة : ومالك على حالتك...زيد دخل نهار كبير هذا ماعلمتيني شاي مال نمشي لحمام..صدقت قاضية غا بالدوش...
سيحمد"قرب لعندها وتحنى باسها فشنايفها تا لصق فيه العكر وبدا يمسح" : نعل تواصلك تي وهاد العكر...
"عنقها بجنب وتم غادي بيها كيحك فجنابها ويعبز ليها فيهم حيث خارجين ويهبط تال مؤخرتها يضرب بشوي...تا وصلو لصالون ولقا طابلة مجهزة واجدة والاهم شراب تاهو محطوط...
سيحمد : فين البنات ؟!
عتيقة : كي شتي كاينين عند مي ف سوق السبت جيت لهن نخلص شي وراق تاع ضو هاو كنت عاگبة (راجعة) ونتا تعيط ليا...ياك مكاين باس...
سيحمد"تلاح فوق سداري وجبد ديك القرعة ديال شراب كب شوية منها ف كاس تكا عليه كامل تا كمش عينيه وبقااا مغمضهم كايتنغم قبل مايحلهم وهو يشوف فيها طلعها وهبطها حس بالمعلم كايتململ ليه نعماس هههه...
سيحمد : اجي لهنا البگرة اجي...
عتيقة"ضحكات بصوتها البااح وهي تبدا تغني ليه ومع حلقها فيه خامة غليضة وبحة فكراتو فاول يوم شافها" : واا ديري علاش ترجعي ايااا الواگفة فالباب..وديري علاش ترجعي ايا الواگفة فالباب...
سيحمد : اجي ندير ليك علاش تگعدي..."بدا يحك ف حجرو ويتجبد تا تسند عالمخدة وفرق رجليه وهي تم جايا تا جلسات فوق رجليه وبدات تلوى عليه"..
عتيقة : مخلي وسادي بارد اسيحمد...تالين هاد الحال !!
سيحمد"خشا ايدو تحت الكسوة وطلعها تالفوق وهو يزير ليها عليه" : نسخنو باباه ليلة...
عتيقة : تالين هادشي...امتا دير معايا الرسم (العقد)..لطيفة و رباب علاين يدخلو لمدرسة هاو يبغيو وراقهم..
سيحمد"هز حاجبو" : ياك كاتبهم فسميتي..ياك كانجي نرگب عليهم (نطل عليهم) ماخاصهم خير...اش بغيتي ؟
عتيقة"جمعات غوباشتها" : نبقاو هوك فالحرام...
سيحمد"هز ركابيه تا ناضت" : نوضي تعشاي ونهضرو..كبي ليا كبي "حيد الفيستة رماها وقرب لطابلة..شافت تا عياات وهي تمشي قطعات ليه من بسطيلة حطاتها ليه فطبسيل..خلاها ليها ومشا لطباسل ديال تغماس وبدا ياكل فيهم هما لولين...
عتيقة. : هاويلي والبسطيلة راني مصايباها على ايدي..
سيحمد : خليني تانغمس راني جاي مفرط باش نفرط لمك فداك لحشو.ن ياك محسن ؟!.
عتيقة : عهههه الله يمسخك..جلدة بيضة...لا صبتي فيه زغبة حاسبني..
سيحمد : لا خليت ليك شي سنتيم فقناتك نتحاسب عليهم...كبي كبي...
كبات ليه من الخ.مر خلطاتو ليه مزيان كيف كايبغيه...وكبات ليها هي خلطاتو ب شوية هواي...شربات منو وهو يهز فيها عينيه...
سيحمد : باغيا الحلال وداك الي شربتي ما زمزم. !؟...نوضي الله يمسخك ويمسخني تانا معاك...
حطات الكاس قبل ماتشربو...وحطات الندغة ديال الخبز وبقات كاتشوف فيه بواحد شوفة فحال الى بقا فيها الحال وبصح بقا فيها الحال....هو بقا كياكل حتى حس بيها واقفة وهو يهز فيها عينيه وبكل برودة..
سيحمد : مناوياش تجغددي (تاكلي)...
عتيقة : مابقا بان ليا شاااي...من عدتي تعاير فيا هاكاك عاين باين...مال هادشي جديد عليك ؟!
سيحمد : ولا بغيتي شي شوفي شي...كاتهضري عالحلال ونتي غارقة وسط الحرام..هاو هذا الي سايرة تشربي فيه حلال ؟...وانا نيت گول مني وجي مني...
عتيقة. : لا گطعتو دير معايا لازم...
سيحمد"رجع كياكل ويهز ندغة كبيرة يخشيها ففمو" : الوقت قاصحة عليا..هادشي بديناه ودينا عليه وهادي هضرتي ملي خرجتي تولدي ب لطيفة...الدعوة عندي صعيية ولا بغيت ندير بيك رسم خاص المرأة لولة تسني ليا ولا ساقو ليا الخبار نهاري كحل...وعاودتي خرجتي تولدي وماگلت ليك شاااي طيحيه وولدتي تاني...وسكت..هاو الغلط ديالمن دروك !؟...
عتيقة"هزات فيه عينيها" : وااا سبحمد ورا دريات غذا ولا بعدو يبغيو يسولوهم فين بوك ولا ساقو الخبار...
سيحمد : بوهم كايجي ومامخصصهم من والي...رسم راه مكاينش بلا متحبرشي عليا تم..."جهد صوته" ولا كون تركني عليا ولا نوض ليك تاتي ندير فيك شرع ايديا...ولا بناقص من شي عشا ولا جلوس عندك...
عتيقة ولات سكتت وهي تنهد ورجعات كتاكل هزات داك الكاس وشرباتو...
سيحمد : ديري بحساب نغيب عليك واحد شهر تال شهرين...دنيا عندي تبرزطت وشلا ماخرج..."هبط راسو كايحك فيه من لور" ولد خويا ساق الخبار راني والد عماك (معاك)...
عتيقة : هاويلي اينا ولد خو؟ ومنين ساق ياويلي...
سيحمد : مانعرف مااانعرف "جبد من جيب الفيستة واحد جوا فيه فلوس نييييت...رماه ليها" شدي عدي بهادو...
عتيقة : هاو دريات لا توحشوك...
سبحمد : نسمعهم صوتي...نحس بدنيا تهدنت وغبر ليه ساس تاني نجي عندك كي مولف...دابا نوضي هزي عليا هادشي "وقف وتم غادي كايحل فسمطة سروال وتم نازل " وتبعيني نشوف داك المهبر الي عندك لتحت راني جاي مقيم عليه وباغي نهرش ليه جلاااافط يا عويتيقة...( عندها ط* غليض عهههه)....
حيدات داكشي من فوق طايلة نقاتها مزيان وحطات الماعن ف لافابو تاترجع ليهم تغسلهم وهي طفي ضو مشات لفين حاطة حزامها ديال الموزون طوييييل وعااامر ديالها من ايام تاشياخت...دوراتو على خصرها وهبطات كاتزرب خفيييييييفة خفيفة طيييير....تال عندو لبيت كان يلاه بدل عليه لبس غا شورط والباقي عريان...غا بانت ايه جايا وتهرهر بالهبابر وهو يوقف هو وكلشي...وبدات يتبسم بجنب وتكا عالناموسية مسند بمرفقو..مطلع ركبتو ورجلي طاويها تحتها...
مشات ل بلازما الي عندهم حداها بيفان وهي طلق اغنية الوالي مولاي عبد الله...بدات كاتلوح رجل لقدام ورجل لور وتسرح فرجليها وتهبط فااحزااام تال تحت شوي وبدات تحرك فايديها مرجعها مرافقها لور...تا بدات الاغنية وهي تبدا تحرك فالهبابر لور وهو بدات تركز وتهز بواحد الخفة خطييييييرة....
سيحمد : اما گالو عليك عتيقة طيارة تا گالوها...زيييييييييد لباباك زيييييد...هاااااع...
هز ايديه وبدا يصفق...تا صافي مابقاش قد لا هي لا هو وهي تمشي تلاح عليه جابها تحتو...جردها من كاااع حوايجها وبداو فالممارسة الي عندو هو بلا مداعبات مع سلام عليكم طلعو تا غوتات ليه...
كملات شقاها كيف العادة حاسا بضهرها واجعها...ماسلات تا بغات تمووو.ت بالعيا...طلعات لبيتها حيدات عليها الخمالة وحيدات زيف حياتي من شعرها الي طلقاتو وبدات تفرك فيه بصباعها...قلبات ايديها لقاتهم منفوخيييين ومورمين بكترة جافيل الي كادير...حتى صونا تيليفونها دورات عينيها ليه كان محطوط فوق ناموسية.. ناضت لعندو وهي تكا وجاوبات على اتصالو...
رضوان : الحوووب...
كريمة"تبسمات حتى توردو حنيكاتها" : لبااس...
رضوان : اللهم لك الحمد..كيدايرة الغزالة ديالي...
كريمة : واالي باس...عييييييت...
رضوان : اش عيا ليا الحيبان...
كريمة. : الشقا نهار كامل وهو عليا..اشراق الي تعاوني مكايناش..وخالتي توريا ماكايناش وختي سعيدة تاهي وربيعة فدارهم يلاه صباح تجي...بقا كلشي عليا "هزات ايديها وراتهم ليه" شوووف شوووف كي منفوخين "جاتها البكية"...
رضوان : ااااحح على الفن ديالي احح...وليني هادشي نتي عارفاه كاين ومولفة شقا فداركم...ماشي جديد عليك...
يلاه بغات تجاوبو وهو يبدا يهضر مع واحد خدام معاه حيث كاينين فشي فيرما كايخدمو فيها صحاب الفلاحة...
رضوان. : كوزا فاااي...نيينتي نييينتي...ا سي سييي...اووو پوووڤيريييينو ههههه...گراتسييي...
كريمة"بدات تبسم دايرة ايديها على حناكها وكتشوف فيه تا ضار شاف فيها وهو يرسل ليها قبلة هوائية" : نههههه...اش گلتي ليه..
رضوان : والو غا غلط فالشجرة الي بغينا نزبرو...كون ما وگضتو كان بغا يحيدها يحيد لينا الشاف راس ههههه...
كريمة : بغيت نتعلم بحالك لطاليانية ههههه...
رضوان : تانجي ونعلم amore mio فداك الفراش تم راني موحشك نيييييييت..وشوف امتاش نجي دابا ندوزوها تكفات...
كريمة : اشناهو تكفات...
رضوان : هههههههههههه ها علاش كنحماق على جد مك..البريئة ديال رضوان...تانجي ونكويييييك مزياان ونفهمك تكفات كي داير ععتهه...
كريمة"حناكها تنملو عليها وهي تخرج فيه عينيها" : ماااسخ ماااسخ دابا نگولها لالة ..
رضوان : نكوي مك من عينيك...ياك لباس اش وصلنا لالاك...
كريمة : هههههه..دابا بغيت نسولك واش غاتجيبني عندك !!
رضوان : لا صعيييييب...مازال ماعنديش سكنة راني ساكن غا عما دراري هنا...لا بغيت نجيبك خاصني نوجدها وندفع ليك ديك ساعات صعييييب عليا الحب...
كريمة : هننن واخا...
رضوان : كاين شي جديد تما ؟ اش دار بشار مع مو...
كريمة. : دابا هي دفعات ليه شي وراق بالي كان مريض..على ما گالت...علاش كتن مريض ؟
رضوان"وسع عينيه ورجع كايحك فراسو" : كان مريص بالقرايا كايقرا بزاااف تا تفاوت ليه العقل...داكشي باش...تي هادشي الي عرفتي...
كريمة : كون عرفت كتر مانسولك...
رضوان : هممم
كريمة : رضوانييييييتو ديالي...
رصوان : را غانقيم على مك.. هضري مگاد...
كريمة : هههههه..بغيت نمشي لدارنا كاين عرس ولد خالي المحجوب منير الي جا من صبليون ومي بغاتني نجي..هضرت مع لالة گالت ليا علمي راجلك هو لول...
رضوان : سيري..دوزي العرس ورجعي...انا را بحال والو نجي مع مليكة ختي فشهر 12 علمتني بالي با باغي يخطب تاهو عا ما حاف عليه...
كريمةة : ورا لالة الي بغات تخطب ليه...را غادييين بعد يخرج يوسف غذا بعدو يمكن ماشييين...
رضوان : ومي عيدة عندها عادي...
كريمة : مافهمتش تانا...
رضوان : واخا سيري صباح نمشي نشوف امتا غادييين ونمشي عند مليكة ونقطع من تم انا وياها...
بقات كاتهضر معاه شحاال حتى قطعات..وكل واحد مشا ينعس..حتى ضبح الصباح الي جاب نهار جديد...فيه الي زين وفيه الي شين...شمسو لايحة خيوطها ورامية البهجة على ناسها...لكن فدار مولاي الحفيظ ماواصلاها شمس حيث جات لدااخل...الساعة كانت الحداش وشي حاجة ديال صباح...نزلات من الفوق لقات غير ايوب الي جالس شاد تيليفونو كايسمع لاوديوات ديال كليان وكايقيد...لابس مانتك باغي غير يسالي ويخرج...
حبيبة"لابسة تاهي غاديا خارجة" : ايوبينو..
ايوب : لبستي "شاف فيها ورجع كيكمل"
كانت لابسة سروال بوي فراند محكوك من ركابي شوية....وقميجة بيضة عريضة وهابطة على مؤخرتها...وبالينسياگا فرجليها بيضة...جامعة شعرها اسفنجة ودايرة نضاضر شمس فوق راسها...وهي تجلس مقابلة ليه كاتعقد فساعتها الي خسرات...قاداتها وهي تشوف فيه...
حبيبة : فين ماما...
ايوب : مشات مع باباك لمقاطعة...
حبيبة. : ودادا ؟
ايوب : را روپو عندها اليوم..اش بيتي مزال ؟
حبيبة : ديك الهضرة الي گلتي ليا البارح متأكد منها ؟
ايوب"حط تيليفون وستيلو وشاف فيها" : لاااا شك فيها...
حبيبة : عرفتي وبايكون كذوب ولا گاليا لا بنقت.لك ا ايوب..
ايوب : حق الرب تا صحيحة...وتأكدي منو...را سمعتها من عند عماد الي كان فالمحل فاش جا...
حبيبة : هضرت مع خالتي سعيدة گالت ليا ما گاليها والو...انا گاليا بايبقاو عندو شيكات وهو مشا عتاهم لبابا...فهم تسطى...
ايوب : وهانتي وسوليه...علاش نتي عيطتي ليه كاع...
حبيبة : گلت ليه بالي بيت نشهد معاه موافقة...
ايوب : وهو اش گال...
حبيبة : نفس الهضرة مايحتاجش..
ايوب : عرفتي علاش ؟ حيث الالة راه بايحس بالي دار ليك شونطاج...فك ليك باك بلا مقابل...وماباغيش المقابل...واخا مافهمتش علاش دار هادشي واش واقع شي حاجة كبيرة بينك وبينو ؟ كاين شي حاجة ماعارفهاش من غير انك عارفة على شيكات ومافراسش باك...
حبيبة"بدا فمها كايترعد..حركات راسها ب لا"...
ايوب : ااييييوى الله يجعل لللا عتيقة فيها التيقة (الله يجعلني نتيق ههه)...
تسناتو حتى كمل وحيث كان عندها القرايا حتى ل 12:30 تسناتو حتى كمل عاد ناض جمع لوازم ديالو وداها معاه فاالسيارة تا وصلها لباب الكلية سلم عليها ومشات...كان عندها زوج حصص وحدة تابعة لاخرى...طول هاد الحصص وهي كاتفكر ف الهضرة الي سمعات من ايوب...اشنو دار بشار وكيفاش حط شيكات لباها بدون علمها...يعني را واخا قاليها هاهما عندي ولا داهم لباها ؟...اش تبدل وخلاه يمشي يحط شيكات..وكيفاش حتى خلاهم ليه جدو بكل بساطة لان المبلغ الي فيهم كبير بزاف...ماركزاتش مزيان فالحصص ديالها...كلها تفكير فتفكير من الوقيتة الي قاليها ايوب وهي كتفكر حتى قررات وهي تجبد تيليفون ورسلات ليه ميساج من بعد تردد كبيييير كان فيه... " بغيت نهضر معاك نسولك"...
ماجاوبهاش..دوزات الحصص ديالها وخرجات باش تاخذ طاكسي حيث ايوب ممساليش وباها ماكاينش...حتى صونا ليها تيليفون فايدها هبطات عينيها بانت ليها سميتو...حتى ترددات باش تجاوب لكن الفضول الي كان فيها تفهم منو خلاها تجاوب...
حبيبة. : ا احم..الو..."كاتحك فراسها من لور وتشوف هنا وهنا بتوثر"
بشار : اش عندك ؟!
حبيبة : كيفاش ؟!
بشار : اش باغيا تسولي...ماشي هضرنا البارح فداك زعت ديال والو...صافي نهار نحتاجك فالشهادة نعلمك...شنو مزال مخلخل ليك راسك ؟!...
حبيبة"كمشات حجبانها" : عرفت...بغيت نسولك..عرفت شي حاجة وبغيت نتاكد منك..
بشار" شاف فساعتو..خاصو يمشي يشوف يوسف باش يرجع حيث عندو طيارة فالعشية" : فاش ؟؟؟....
حبيبة : واش ع عطيتي لبابا شيكات ؟!..
بشار"زادو حجبانو تورمو بتغوبيشة" : شكون علمك ؟!
حبيبة : عرفت وصافي..ماگالهاش ليا بابا...عرفتها من جيهة اخرى.....اكد ليا عافاك واش بصح...
بشار"طلق سينيال وضار مع واحد دورة المؤدية لكلينيك" : سي..
حبيبة : علاش !!..
بشار : شنو المشكيل !؟؟؟...
حبيبة"عينيها غرغرو" : حيث هادشي فرحني بزاااف..حيث كايعني ليا حيث بابا كاين هنا..حيث بابا تفك من مشكيل حياتو...حيث بابا ماغايبقاش يمرض ويطيح حيث كوووووووولشي كوووولشي نديرو على قبل بابا...
"غاديا فطريق ومتحاساش براسها اش كتقول عينيها دازو بدموع مابقاتش تسوقات لناس...نسات راسها وتطلقات...قلبها كايضرررررب بجهد وهي كاتعاود"
حبيبة : كلشي هادشي زواااج كلو درتو على قبل بابا ماهامني حتى واحد نتا براسك ماهميتينيش وماسوقييييش فيك...
بشار"وقف طوموبيل فجنب وبقا كايسمع ليها هاز حاجبو"
حبيبة : ماكااانش كيهمني فيك تكون برا ولا ديني ولا ماتدينيش...انا تزوجت غا باش نهني بابا حيث بابا هذا وماشي اي واحد...مرضت وتكرفصت وصبرت باش بابا متيعرف والو ونكون طبيعية...درت شي حوايج الي كبر مني وتحملتهم وتحملت مك الي عايرتني وضارت فيا...نتحمل اي حاجة حتى المو.ت نموتو باش بابا يرتاح....وحتى دابا غانعاونك وموافقة نعيش معاك باش تفك المشكيل ديالك ماشي غييير حيث عاونتيني..ولكن حيث حتى يوسف بحالي يوسف تاهو يستاهل يتعتق...غير هو عندي شروووط....
كان هذا كلامها...فلحظة حسات براسها قالت كلشي فلحظة انهيار بسيييطة قدرات توصل ليه المعاناة الي كانت عايشاها فالشيكات...فلحظة منها حطات باش كانت كتحس ولو غير شوية...يمكن قالت هذا هو الحد صافي تعتقت لكن واش بصح صافي ؟!..باها تفك وعلاش تزوجات تقضى ؟!...واش مكايناش ضريبة لهادشي ؟..زعما هنا الحد ولا مزال جحيم اخور تقدر تعيشو...واش باقيا عروس الجحيم ولا غايسالي جحيمها وتولي انسانة عادية واخا قبلات تعيش معاه وهي ماعارفاهش ؟...عاوتاني غاتزف ليه وغاتزف للمجهووول عاوتاني غاتخلص ضريبة المساعدة الي ساعدها واخا مابغاش المقابل...عاوتاني غاتعيش "زفة الى المجهوووول"....
~~~"السيء مهما ساعدته سيؤذيك."~~~
الوقت كان وصل عندو...الحصة كانت فديك الوقت خاصاه حاس براسو باغي يمشي لعندو...هو الي بادي معاه وهو الي براني عليه وعارف اش يقوليه...كانت الحصة طويلة شوية...حيث كان "بشار" ثقيييييل فالكلام..ماكيهضر ويجاوبك حتى كدوز شحااال عنظو الجواب ثقيييييل يمكن متولفش ولا تقول صافي هذا خلاني بلاكة لكن هو هكاك داير..البسيكو كان عارفو وحتى خدمتو كاتخليه يعطي وقت ل مرضى ديالو...
محمد"البسيكو ديالو فبرلين" : مزال عند هضرتك ؟
بشار"ربع ايديه وشاف فيه كايحك فشنايفو بسنانو بطريقة بطيئة" : ؟؟؟..
محمد : گلتي تكرفصتي على مراتك ؟..وگلتي ماندمتيش...مزال مانادمش...
بشار"ببرود" : گلت ليك واحد من بلاناتي..علاش ندم ونتا عارف ماكنجمش ندير لجام لفعايلي...دابا جيت عندك باغي ندير لجام من هنا لگدام...باغي نزير طرح عاى راسي باش منضرش كثر...
محمد : نقدر نعرف كيفاش تكرفصتي عليها...
بشار : داكشي بيني وبينها..(ماباغيش يقوليه اش دار فليلة دخلة..عطاه غير سطحيات)...
محمد"بقا شحاال ساكت داير ايدو على ذقنو..حتى عاود نطق" : من الي دخلتي ونتا كاتهضر...عليها...جل هضرتك كانت على عائلتها عليها وعلى يوسف خوك...راحتك فالهضرة كانت عليهم هما...كاتهضر وكنسمع كاتهضر عليها...عاود فكرني شنو سميتها...
بشار : علاش باغي تعرف سميتها ؟
محمد : ما من حقيش نعرف ؟؛
بشار"حرك راسو ب لا"
محمد : باغي تعرفها غير نتا...ههههه...واخا..."هبط عينيه وكتب ليه واحد لوغدونونص" هاد دوا هو الي تشرب خفف من هذاك وحيدو دير هذا لادوز ديالو اخف من لاخور...حاول هاد المرة تواجه جرب تعيش مع شي حد...جرب تكون راس فراس...حاول تبعد على باش تضر راسك ابشار حيث لا ضريتي راسك تاني ماغايفرقش ليك انك تضر ناس اخرين بدون رحمة ولا شفقة منك باش تنفس...
كمل معاه او بشار مابغاش يكمل معاه ناض من عنظو بلا مايقوليه وخرج...ركب فسيارتو ،، شعل سيجاتو وحل شرجم حتى يكمي...عينيه كيشوفو فنقطة بعييييدة..كايتفكر هضرتها داك نهار ويتفكر دابا هضرة الطبيب...الي كانت...
~~~محمد :المرة لولة مابغيتيش تشوف صورتها او كيف قلتي شفتي صورتها بزربة ومسحتيها..ودابا ملي شفتيها فالواقع شنو كايبان ليك فيها من غير انها زوينة كيف گلتي ديك المرة..واخا ب شوفة مخطوفة..واش تستاهل الي درتيه فيها ؟!"...~~~~~
زفر دخان قوي ديال الگارو راجع بذاكرتو...وحط راسو على الكوسان..مباشرة تفكر فاش كانت قدامو كاتهضر وكيفاش كاتشوف بعينيها ورموشها الكثاف الي كانو كايرمشو بزاف..كيفاش هضرت بواحد صراحة بلا زواق..كيفاش قالتها ليه فوجهو واخا كاتخاف منو وخا مأزمة منو واخا اذاها وضرها..عينيها الخضرين بلمعة الحزن والخوف والغضب منو ومن مو وعائلتو.....واش لاحظ بالي زوينة ؟..لاحظ كيف كيلاحظ اي واحد..شافها ما مرة ما زوج هضر معاها وشاف كيفاش كانت كتعبر بملامحها...واخا يكون جمااد يلاحظ زينها...فقط اعجاااب بزينها لا غير....نطق بصوت شبه مسموع او مسموع غير ليه هو وبطريقة ثقييييييييلة بجهد كل حرف عطاه حقو..."
بشار : نعل بو مها زييينها س.فااح...(زوينة بزاف.قتَّ_ال)
العجاااج بجهد فمراكش الدنيا تغمقاات والجو تزمط فانتظار قطرات المطر الي تنزل باش تنفس الجو...عباد الله تجري وتجارا..صحاب المحلات كايغطيو السلعة الي خارجة على برا...شي كايغطي بالباش وشي كايسد هو گاع...كاتسمع غير سوات الناس...
واجريييي جريييي الغبرة بادخل لمحااال...جرييي غطي غطي...ااااا سماااح سيري ظغيا لدار شوفي شراجم بادخل ليهم الغبرة...جرييييي ديري جفاف فازگ عند العتبة...اااا منييييير دوز غطي وسد المحاااال...ياربي سلامة يا ربي سلامة...
كاتسمع فعباد الله تلاغط وغالا غالا...واحد العجاج تقولي اعصار ناض فديك المدينة...صوت القزدير كايطيح صوت كلاكصونات...كلشي هادشي كانت كاتشوفو وهي جالسة فواحد الكافي بالقرب من لافاك حيث كانت عندها بين حصة وحصة ساعة ونص استغلتها في انها تجلس فديك الكافي...حلات تيليفون وشافت فالساعة لقات باقي الحال بزاف..الجو مريييض وهي جالسة على برا شوي ناضت ودخلات لداخل منها نيت تبعد من الغبرة الي بدات كاتهيييج ليها الحساسية ديالها من الي بدا الريح يتحرك والغبرة تنوض بداها العطيس وحدة تابعة لاخرى...جلسات لداخل وحطات دفتر ديالها مستغلة الوقت تراجع فيه درسها...حاطة حداها كالكيلاتريس وستيلويات وپوليكوب ودفتر المراجعة...وحداها تيليفونها...بدات كاتراجع فالدرس وتحسب وتبحث...بين رقم ورقم وبين نتيجة ونتيجة وبين غلط وصحيح...بين تفكير وتفكير فلحظة وفثانية سهااات و لقات راسها كاتفكر والذاكرة كاترجع ليها لداك اليوم الي كانت فيه المكالمة بينها وبين "بشااار"...كيفاش تلقى هضرتها وكيفاش كان رد الفعل ديالو على قرارها ف أنها تسكن معاه وتعيش معاه لمدة الي غاتخلي حياتو تبان عادية تقريبا وتبان للقاضي أنه شخص مؤهل وانه تماثل للشفاء وانه تقريبا كايمارس حياتو بشكل عادي وأنه يكون مزوج كايبين ويأكد انه شخص عادي حالو حال اي واحد عايش حياتو...باش من بعد ماتحكم القضية الي بينو وبين مو ولو ربح الشكاية غايخول ليه انه يطلب من القاضي بانه يكون وصي على خوه ويتكفل بيه وبهاكا يتهنى ويرتااااح بزاف ان يوسف معاه بين ايدي اميييينة وماشي معرض للاهمال ومكرفص بهاد المعنى...وهادشي كامل حتى هي فكرات فيه فاللول خصوصا ملي شافت بشار كيفاش كايتعامل معاه وكيفاش كايولي بمجرد مكايشوف يوسف كايولي شخص اااخر غير داك "الوحش" الي كانت وشافتو معاها هي وشخص خايب حتى مع مو...
~~~
حبيبة"مسحات عينيها ونطقات" : فين غادي نعيش معاك..
بشار"بقى ساكت وحتى هي بقات ساكتة..هضرتها كلها كادور ليه فراسو..شي دقيقة ولا اكثر وهو ساكت وحتى هي ماقالت ليه حتى واش معايا...حتى نطق" : شروطك ؟!
حبيبة"حركات راسها" : هممم..اه..
بشار : مجابة...
نيشان جاوبها بكلمة وحدة بلا مايعرفهم او يمكن عارف المهم حاوبها بكلمة اختاصرات كلشي مكاين لاش تقوليهم وماكاين لاش يعرفهم...يمكن عارف ان الشرط الاكبر هو مايكونش قرب كبيييير بيناتهم..يعني تعيش معاه فدار وحدة لكن يكون قرب طبعا هذا هو اكبر شرط عندها وحتى هو عااارف وتاهو را ماغايفكرش اصلا ييقيسها...هذا معروف اهم شرط...
حبيبة. : واخا ماعارفهمش.؟..
بشار : ماعنديش غراض نعرفهم..l'essentiel كافي...
حبيبة : فين غانعيش معاك...
بشار : فداري هنا..."بغات تعاود تهضر وهو يقاطعها" دابا ماعنديش الوقت باش نكونفيرمي معاك بقاي كيما نتي فداركم حتى نرجع من لهيه..ومزال نعرف منين عرفتي الهضرة الي ضارت بيني وبين باك...
حبيبة : ماشي بابا الي گالها ليا...
بشار : عارف..
حبيبة : وعلاش بغيتي تعرف شكون گالها المهم عرفت...
بشار"شاف مكالمة فتيليفونو قطع على ديك المكالمة واستمر فالكلام معاها" : حتى نرجع ونهضرو فهادشي...~~~
رجعات من الماضي للحاضر وهزات عينيها فور ما سمعات صوت قطرات المطر الي لامست التراب وفاحت ريحتو الي كاتعطر الانفاس..الريحة الي من بين اجمل العطور الطبيعية فالارض...قطرة وقطرة تبعوها قطرااات حتى بدات الشتاء كاتصب بغزااااارة وطرطق صوت الرعد قفزها من مكانها واخا متطونش كاتخاف منو لكن الصوت كان مجهد الشي الي خلاها تكون بلاصتها ودير الايربودز فوذنيها وتطلق القرآن الكريم على سورة "الرعد" بصوت ياسر الدوسري...طريقة او ولف علمو ليها باباها فاش كانت صغيرة شوي...وبقات كاتسمع ليها وتشوف فالناس غاديا جايا قدام الكافي...هبطات عينيها لقات الوقت قرب بزاف وهي خاصها تخرج ولكن شتاء ماحبساتش...
اما هو فور ما كمل ديك السيجارة ديمارا سيارة وكسيرا متوجه ل دارو...دخل لدار وتوجه ديريكت لبيت حيد الفوقي بقا عريان من فوق هز تيليفونو من سمع صوت الرنة...قرا الرسالة الي جاتو من البنك كايأكد ليه التحويل الي دار...كايحك فشعيرات صدرو وكيقرا..نيشان دوز الاتصال ل نمرة جدو الي بقا مدة عاد جاوبو...
بشار : الامانة وصلاتك ا با...
ع.القادر : امتى...
بشار : الوقت الي عطيتك هو هذا...
ع.القادر : واهييلي...
بشار : ماعنديش تخرشيش فكلمتي..الفلوس عندك مابقا بيني وبينك ريال..تقتي بيا وعطيتيني شيكات..الله يرحم بيها الواليدين..
ع.القادر : راني عاارفك حار ف كلمتك...وليني گاااع دوك الفلوس ؟ دقة وحدة..
بشار"هز حاجبو" : رزقي وگاد بيه الرحماني...
يتبع...
التعليقات
لا توجد تعليقات بعد، كن أول من يعلق.