محتوى القصة
دخلات توريا لفيرما هي وكريمة ورضوان وراهم...قال سلام وطلع نيشان لبيت...لقات مليكة..
عيدة"صغرت فيها عينيها" : امضرا اش گالو ليك...
توريا"جلسات وحطت صاكها كاتنهج بالعيا وسخفة" : جيبي ليا كريمة نشرب..."شافت فعگوزتها و مليكة" گالو ليا عدك المرارة بحال والي تفتحي عليها...
مليكة : الله ياربي الله ياخويتي وكتاب عليك المكتوب...
توريا"تنهدت" : مالگيتها لا من هنا ولا من لهيه...هانتي تشوفي حالتي..هذا الله هذا الله...
عيدة : مقسمها ليك الله ماعدك ماديري...
مليكة : وامتى عندك الفتيح ؟!..
كريمة"جايبة ليها الما عطاتها تشرب وسمعات سؤال مليكة" : گالت ليها تمشي عد طبيب ديال مرارة (اختصاصي زعما)..هو يگوليها اش دير وعطاتها تحاليل ديرهم غذا فالصباح...وتما تمشي عدو (عندو)..
مليكة : صباح انا نيت غاديا لمراكش لشي وراق وندوز عماك.."بدات تحرك فراسها ب حزن"..وراه صبرات ليك اااا خويتي صبرات ليك وعامادا ماهزيتي هاهي الي بقات طردگوها ليك غا بالفقصة...
عيدة : مكتوووب امليكة مكتوب ولاكون لا سكتي...
مليكة : حيدي عليا مي المعقول ماتبغيوه...مالي كذبت...
توريا : ماكذبتي والي ماكذبتي وااالي..."شافت فجنابها" فاين يوسف ؟!..
مليكة : راه الفوگ بحرا طليت عليه ساير يرسم...
شوية تم هابط رضوان كايقاد ف ساعتو لابس جلابية رجالية وداير ترازة (شابو ديال الفلاحة) على راسو..خشا ايديه فجيابو تا قاد جلابية وجات كريمة حداه كاتبتاسم ليه وهو كايغمز فيها بدون مايعيقو...وصل لعندهم وشاف فتوريا...
رضوان : لباس دابا ؟!..
توريا : ونحمدو الله نحمدو الله...
رضوان : گولي ليا امتى عندك الجلسة مع ولدك...
توريا"خنزرت فيه" : يا ويگطعو عليا ولد..راني مبرية من داك الولد لا كان غا بحالو...ها مرارتي هي الي بقات هاهي طردگها ليا اش بقا تاني يصيفطني كي صيفط بوه...
مليكة"وسعت عينيها وبدات تغمز فيها حيث كاينة كريمة ماعارفاش القصة" : تووووريااااا...
عيدة : ياعوذ بالله ياعووذ بالله...
رضوان : ما وقع باس غا سولنا يناري تي مالك...
توريا : وزن كلامك گبل لا تسول...
رضوان"شافها شعلت ومريضة وهما عزيزة عليهم توريا بمثابة الاخت الكبيرة ومرات خوهم الي عزيز عليهم بزاف..قرب باس ليها راسها" : سموحات اختي توريا...جاوبينا دروك...
توريا : اخر هاد شهر...غا سكت لا ما صدقت محيدة هاد المرارة ومانحضرش...
رضوان : يحضر المحامي ماوقع باس...لا بغيتي تانا نحضر بلاصتك ماعنديش مشكيل...
توريا : وزعما ؟!..
عيدة : ونتا اش ليك...
رضوان : كيفاش اش ليا وعاجبك امرت بويا هاد الحالة الي داير داك ولد ولدك ؟!..كاين شي حد يدعي مو غا ففهميني ؟!..
عيدة : وبيناتهم نتا شغلك ؟!..
رضوان : توريا را معزتها من معزة مي امي عيدة (عيدة للتذكير را ماشي مو مرات باه..حيث هو وسي حمد خوه مهم بوحدها مات.ت)...
عيدة : اهاه...
مليكة : صافي هدنو الوقت دروك..تاتوصل جلسة لا كنتي عيانة انا ورضوان نمشيو...
عيدة : ونتي ابنت كرشي اش دخلك تانتي ؟..ولا معزتها من معزة بوك ؟..
رضوان شاف فمليكة الي ضحكات وهو يضحك ومشاو ليها بجوج جلسو يبوسو ليها فراسها وهي كاتبعد فيهم تا بدات تضحك كريمة...
فهاد اللحظة كانو جاييين على رجليهم ويتقاشحو واحد يحلف لاخور...الي شافهم من بعيد يقول كايضاربو ولا باغيين ينوضوها وهما را غا كل واحد يحلف على لاخور...
زكريا : تا بالرب لا دوزتيها عليا...الليلة تديني عماك فين گلتي ليا ديك مرة...
حسام"شربن وبدا يشالي" : تا امتى كلتها ليك امتى مال دلمك تاتكذب ؟!...
زكريا"وقف كايشوف فيه بعين وعين غامز بيها" : دابا هادي تراجليييت دابا نتا ؤاجل دروك ؟؟..
حسام : ابقا تقلب عليا تا تا نجر لمك جنابك ونوريك رجلة كيدايرة...
زكريا : اااا داك ولد لحرام...ااااداك مغرز العينين...او الي عينيه كي تقبة الزوك..."حسام شرع عينيه على جهدهم" ا شرعهم شرعهم را باقي كي التقبة...دابا نتا راجل ؟..ديك المرة فاش فكيتك من ديك سلوى...
حسام : سكينة...
زكريا : عاقل ياك ؟ وماعقلتيش فاش گلتي ليا فكني ونديك تسهر عمايا ؟!..
حسام"سكت تا سكت تفكر ورجع شاف فيه" : اراك باقي قاصر...
زكريا.: حجري بالغ...
حسام : وليني راك كيدار...
زكريا : ماتدينيش لبار...ماتدينيش لكوان شيشة ديني...
حسام : وشكون گاليك كانمشي لبار وشيشة ؟ بغيتي تخرج عليا نتا...
زكريا : دوك الفيديوات الي كاتوريني فين. ؟ ف مكة...
حسام : اكندير راسي سكران باش نجيب حنان...
زكريا"الصمت"...
حسام : بففف مصيبة كحلة...مابقيتيش كاتقرا ؟!..
زكريا : لا اليوم ماقارينش وغذا ماندخلو تال الاثنين...(زكرياء كايقرا ف سانكيام واخا اشراق كبر منو حيث اشراق عاودات العام جوج مرات كان خاصها تكون ف سيزيام هاد العام)...
حسام : الليلة تحرك عمايا.."بدا زكريا تايفرنس"..ساعتين ونرجعو..
زكريا : وغا قضي...
تمو غادين تلقاو راسهم داخلين لفيرما...بداو كايترادو يدندنو..بواحد الاغنية لصقات لحسام فراسو وتبعو زكريا...
حسام : ترمة عزيز عامرة بالويز اه اهاه...
زكريا : ترمة فدوااا عامرة بالقل.واا اه اهاه..
حسام : وترمة ياسين عامرة بالگريزين اه اهااه..
زكريا"بدا يضرب فصدرو شاد الميزان تا جهد صوته نسا راسو را دخل لدار" : وترمة مليكة عامرة بالميكااا اه اهاااه...
ماحس تا سمع صوتها مع ديك الحنگورة غليضة كاتسمع بحال راجل..." ياك المدوبز يااااااك تايجي بوك على قلة العراض"..ضار حسام يضحك عليه تا لقاه طار ماعرفو منين داز...
حطات راسها على المخدة وبقات كاتشوف وتفكر حاسة بالملل تيليفون الي كانت كاتلاهى فيه هرساتو ليها توريا...حاسة بواحد الفراغ كبييييير خلاه فحياتها...تاففات وهي تنوض من فراشها وخرجات بخطى بطييييئة تا وصلات لصالون فين جالسة حبيبة وسعيدة كايهضرو حتى وقفات عليهم...
اشراق"بصوت عياااان" : ح حبيبة.."شافت فيها..وشيرات بايدها ناحية البيت" ايباد ديال بشار واخا نهزها ؟!...
حبيبة : ااا ؟ م "ضارت عند سعيدة ورجعات شافت فيها" ماعرفتش خاص تاتگوليها ليه...
اشراق : ياك نتي مرتو بحالك بحالو...
حبيبة"تزنگت" : و و واخا هاكاك حتى تسوليه اه منقدرش نگوليك شي حاجة وماشي ديالتي واخا هكاك..بيتي تعيطي ليه نصوني عليه تسوليه...
اشراق"شافت تاعيات وهي تحرك راسها" : واخا هضري معاه نتي عافاك...
سعيدة : قنطتي ولا...
حبيبة بالزربة لقات راسها شاعلة تيليفون وغاديا لسميتو تا لقات راسها دوزات ليه الخط بغات تقطع مالقات مادير حيث بدا يصوني...كانت متمنية مايجاوبش هاد المرة مابغاتوش يجاوب كيف عادتو لكن الحاجة الي مكنبغيوش هي الي كاتوقع دغيا تاهو جاوبها...تا سمعات الخط تطلق...
حبيبة"صرطت ريقها" : بشار !!..
بشار : مالك ؟!..
حبيبة : ما ماماليش هي بيت نسولك دابا اشراق بغات الايباد ديالك وگلت ليها تاتسولك و احم "كاتحك راسها بتوثر شديد".
بشار : عندها جهد ؟!..
حبيبة : كيفاش ؟...
بشار : داك جهد الي عندها باش تهز Ipad تصرفو ف préparation فضل ليها...علميها بهادشي...
ماجات فين تجاوب تا كان قطع عليها خلاها كاترمش...شحال عاد استوعبت هضرتو وفهمتها وبصح مادام اشراق عندها طاقة تهز ايباد وتصفح فيها تصرفها فقرايتها وتراجع..ماكانش باغي يضغط عليها حيث شاف حالتها كان باغي ترتاح ودوز امتحانها باش ماعطا الله...
ركن سيارتو بعيد شوية على طوموبيلات كان عساس تما حاضي..كانت دنيا بدات تخوا حيث فالصباح فين كايكون عامر نيت واخا هكاك حاس براسو بدا يتبرزط بالمعقول...قبل مايركن سيارة شرب ربع حبة من المهدئ الي كايخليه مكالمي فاش كيدخل لهاد البلايص ولا فحالة ما كان حاس براسو غايخرج على طبيعة ويتعصب...بقا كيشووووف قدامو حتى هز باكية جبد منها سبجارة شعلها عاد حيد سانتيغ وخرج...قاد حوايجو مزيان وتم غادي كايحاول ما يديهاش فناس كايحاول مايرجعش بذكريات القدييييمة الي كاتخليه يتفكر واحد الفترة دوزها مع باه...فعمر عشر سنوات...غادي وذكريات كايجيو ليه صحة...
~~~~
بشار : فين غاديين هاد النوبة...
نور الدين : غادييين ل موسم مولاي عبد السلام..
بشار : تجلس بزاف تاني ؟...
نورالدين"كايقاد فالعمامة" : وحسب جوج جمعات هكاك ونجيو...من تم هابطين لجيهة ديال سراغنة ولاد شرقي (عاصمة التبوريدة بامتياز)..
بشار : تجيب ليا عماك بيكالة ؟!..
نوردين : هههه نجيب ليك تا خيل لا بغيتي..
~~~~~
الذكريات الي كان كايتحار.ب باش يطردهم مايجيوهش لقاهم هما ونيسو باس قدر يدخل وينسا كترة ناس الي كاينة هنا...حتى لقا راسو وسط الخيم كايبيعو لعب ديال الصغار...هبط عينيه كيشوف هنا وهنا ماغاتجي عينو على واحد اللعبة ديال elsa الي ف فروزن...ماعرفش علاش عقلو او قلبو الي خلاه يتفكرها...يتفكر ادواتها الي فيهم هاد الاميرة ديال ديزني...كايهز راسو ويدور هنا وهنا ويسمع فناس والهضرة ديال البوق...ماعرفش كيفاش تا جا هنا...داك الغضب من داك الشخص خلاه يجي لهنا...هضرة اشراق وحالتها خلاتو يجي بلا هواه يلحق عليه فينما كان يتبعو باش يعرف علاش مد ايدو عليها...
كان جالس مع شي رجال فواحد الخيمة مجموعين على طبسيل ديال الكبدة مشوية فبولفاف وبرارد اتاي غا مشتتة وصت هضرتهم كايتسمع منيييين...كان سوق ديال خميس العطاوية...يلاه هاز كاسو كايضحك تا صونا ليه تيليفونو جبدو من قب الجلابة كايشوف شكون بانت ليه سمية "atika"..حنحن بجهد وهو ينوض ومشا لجنب الخيمة كايتستس بسنانو ينقي بقايا لحم منهم...
سيحمد : ياك لباس...
عتيقة : واش كاين غالخبار زينة نيت...
سيحمد : اش كاين...
عتيقة : ولاكون لا هزيت...
سيحمد : اش هزيتي نعل بو مك هضري مگاد..
عتيقة : حق الشهر تعطلت عليا..وهاني جيت لفارماسيان نجيب داك "على تيست گغوصيص ههه"..ونتأكد...
سيحمد : ماتجيبي ماتشري..تمشي عد طبيبة ولاكان شي حمل طيحيه تم..را نصيب بوك مخلياه عليا وعلى ايماني يا شيخة تانطيحو ليك بايدي...راني گلت ليك خاصنا لبدوها مانكتر مجي عدك را ولد خويا عرف عندي معاك الولاد نضتي حملتي ؟..دعيت جد بوك لله...سيمانة ونجي عندك ونصيبك طيحيتيه...
يلاه قطع عليها وضار باش يمشي لعند رجال يجلس معاهم اتا لقاه قدامو قد سخط بالخلعة ولا كايبان ليه وحش كبييير وحيث اصلا بشار طويل بزاف ومگضر وكثير زاد كمل ليه الباقي...ماعرف راسو باش تبلى...
سيحمد : بشار "كايرمش حساب ليه واش كايتخايل"..وايلي..
كايدور وراه ويرجع يشوف فيه ويشوف ورا بشار الي كان ساااكت وهاااادئ بزاف... قرب ليه مزياااان...بلا سلام بلا كلام...بشوييييا وشد ليه ايدو بحال الى بغا يسلم...سيحمد حساب ليه بغا يسلم عليه...تا جرو بجهد لعندو مزير ليه على صباع ايدو...
بشار"گرن حجبانو تا ولاو عينيه صغاار" : خلاها ليا بويا كبدة فجنبي(على ختو)..ضريتيني فجنبي يااا سيهم حمد وحگرتي ليا عليها...
ماجا فين يهضر تا حس بصباع ايدو تشابكو وبغاو يطيرو من بلاصتهم زيرررررررر ليه عليهم تا غوت سيحمد بحر جهدو تا تكب عليه العرق...
دازت ثلاث ايام...اضطرت سعيدة ترجع لفيرما على قبل بناتها حيث خلاتهم بلا ماتوصي عليهم مادام كاين هاشم كايرجع ولا حسام ...كانت دايرة مع بشار باش ترجع الغذ ليه...
خرج من دوش كان عاد مدوش وخرج لابس من تما سورفيت بلا قب فالكحل شعرو باقي فازگ...جاي بخطى ثقيلة..وصل عند البيت ديالو دق بشوي تا سمع اذنها وهو يحل الباب ودخل عندها خاشي ايديه فجياب سروال...كانت شادة واحد دفتر كاتراجع فيه...
بشار : ميسرة مزيان ؟!..
اشراق"بصوت منخفض" : غير شوية..
بشار"هز من عندها الدفتر الي كانت شادة بدا يقلب ف صفحاتو ويشوف خطها ويشوف اش كاتراجع واخا عارف حالتها دابا لكن كايحاول عالاقل تكمل على مابدات ماكرهش يشدد معاها كثر لكن مايمكنش ليه يضغط عليها حيث ماغادير والو..رجع ليها دفتر" : حاولي جهدك تگادي داك الخط عندك مزعلك كايبان ليا تم...
اشراق : واخا...
بشار : ماباغيش نسمع ديك واخا ديالك باغي نشوفك دايرة بيها "حركات راسها بزربة"..وضحي خطك مزيان خلي الي بغا يصحح يعرف اش كاتبة...ضمصة ديال بنادم مانجحوش بسباب خطهم..تفاهمنا ؟...
اشراق"حركت راسها"..
بشار : Bon courage...
خرج من البيت مخليها كاتراجع واخا نفسية عندها باقي زفت..المهم تحاول تخشي راسها فالقراية حيث هي الي غاتنفعها فهاد الحالة وفسنها...أما هو خرج ومشا لكوزينة دار القهوة فالقطارة وخلاها تخدم...تيليفونو ماسكتش وتاهو مخليه حدو كايشوف شكون ويرجع يخشيه فجيبو...حتى خرجات حبيبة من بيتها كاتجمع فشعرها بباندة وقفات فالنفص تا لولباتو على شكل اسفنجة عاضة فالباندة...مارداتش ليه البال كان مسند عالبوطاجي وكايشوف فيها كيفاش كاتجمع فشعرها كلها ولات كاثير انتباهو ادق تفصيل فيها كايلقا راسو ساهي فيه...كايشوف فيها قدامو حداه بجنبو معاه تحت سقف واحد لكن بعيييييدة عليه واش يدير باش تولي اقرب ناس ليه...كايحس براسو كل نهار كايتعذب وهي معاه...كايحس براسو كاعيش جزاء مادار فيها لو ما كانت ديك الليلة الي جمعاتهم كان ممكن يكونو دابا بشكل اخور طبيعي كايتعرفو كأي زوجين عاديين او ممكن يتجمع معاها ف ضروف احسن...تعددت الظروف ومكتابهم واحد...
حبيبة"جرت كرسي وجلسات" : احم..ص صباح الخير..
حرك راسو وضار كب ليه قهوتو وجر تاهو كرسي ريح تما..كانت حاجة فطور موجداه كامل داكشي الي عرفات حطاتو واصلا تقريبا كلشي شبه واجد..حدها سخنات الي خاصو يتسخن وعمرت ليها براد اتاي ليها واشراق..أما هو شرب جغمة من القهوة حط الكاس وشاف فيها"...
بشار : ضروري تحركي نتي لداركم غذا ؟..
حبيبة : اه...حيث ماعنديش حوايج ديال سهرات هنا كلشي تقريبا باقي تم مافكرتش نجيبهم معايا...
مجاوبهاش...هز الايباد كان خدام بيها وحطها تم..ڤيريفيا شي حوايج تما وشاف note اش فيها...اما هي بدات كاتفطر...
بشار : صباح نديك لداركم شوفي شنو بغيتي تقضي تم..الوقت الي نتحركو لهيه نهزك من تما...هانيا ؟!..
حبيبة"حركت ليه راسها فقط..أما هو هز عينيه فيها كايشوف كيفاش كاتفطر وكاتجنب تشوف فيه...حتى شوفة نيشان مقادة عمرها دارتها ليه...كايحس انه باقي بانية داك الحاجز الي تبنى بيناتهم من أول لقاء وبقا غادي وكايمتان..حاجز تبنى حتى قصاح...خاصاه شي حاجة الي تهرسو وتحل العينين وتخلي المستور يبان...خاصو يزيد يدير حركة اخرى تخليها تقرب منو كا شخص باغيها ماشي ك شخص عاونها وماشي ك شخص للمصلحة او حيث ساكنين تحت سقف واحد...شاف تا عيا وناض..كان ديجا فطر قبل مايفيقو لا هي لا اشراق..ماحاولتش تهز عينيها واخا حسات بيه ناض ماقدراتش كاتحس براسها غاديا وكاتضغط بزاف مع هاد المشاعر وهاد الاحاسيس الي ولات كاتعيشها معاه...
"خريبگة"...
صوت الهاتف كايصوني..خرجات من الكوزينة كاتنشف ايديها بفوطة وريحة طياب عاطية...هزات تيليفونها وهي تجاوب...
عتيقة : ماعندك ساروت ؟!..
سيحمد : حلي من تم نعل بو مك...
تنهدات وهي تمشي حدا الباب وبركت على بوطونة لانتيرفون حلات ليه الباب...حلات الباب ديال دار فين كاينة تا بان ليها طالع هاز ايدو دارو ليه الگبص وهازها بباندة ديال الكتف...شهقت وهي كاتشوفو جاي هاز ايدو تا دفع الباب ودخل ماوقف تالبيت ديال تلفازة تمو جايين بناتو يجريو تحنى عليهم باسهم وطبطب عليهم ومشاو يلعبو عاد هي دخلات وجلست مقابلة ليه...
عتيقة : يا تا كي طرا لديك ليد...
سيحمد"ماراضيش يقول ولد خويا" : كتبها الله...
عتيقة : مهرس ؟!..
سيحمد"شاف ف صباعو كان واحد صبع تفصل ليه مع العضم ودار ليه الحديد باش يرجعوه ليه لبلاصتو" : تفرق ليا العظم يامس درت ليه عملية دارو ليا حديدة باش يرجع بلاصتو...
عتيقة"دارت صبع سبابة فوق شفتها العلوية" : ياااويلي و كي طرا ليك...
سيحمد"بنرفزة تا قفزها" : كي طرا لعباد الله...هنين عليا الوقت وسيري جيبي ليا منشرب واجي نهضر عماك...
ميقت فيه وهي تنوض كلها كاتحرك بداك الجسم والمؤخرة...هز عينيه وبقا حاضي ترمتها تا دخلات لكوزينة جابت ليه قرعة الما والكاس كبت ليه تا شرب وعاود كان شحفااان...عاد تقابلت معاه وجلست...
سيحمد : اش درتي طيحتيه ؟!..
عتيقة : طبيبة الي دايرة عماها ما گدتش گالت ليا صعيب نطيحو ليك"تنهدت" خافت على راسها سيحمد نتا ماكاين وماباغي دير معايا حل...
سيحمد : اشنو الحل ؟!..
عتيقة"خرجت فيه عينيها" : سير جيب سنية واجي نديرو تكاتيبة نبقاو هوك فالحرام ؟!..
سيحمد : گلتي مابغاتش طيحو ليك ؟!..
عتيقة : واااه...
سيحمد : شوفي اش تشربي وطيحيه راسك...وااا بالرب يا عويتيقة لا بقا ليك فكرشك....
في اليوم الموالي...
خرجات من بيتها لابسة حوايج الخروج ودايرة ضاكها ف كتافها...لقات سعيدة واقفة مع بشار كايهضر معاها كانت جات هاد الصباح مع حسام ورجع هو لقرايتو..جابت معاها بناتها نيت...كانت كاتهضر معاه على توريا...
سعيدة : عطاها شي دوا...
بشار : العملية ؟!..
سعيدة : ملي تهدن عليها الحريق عگزت...الحاصول راها خايفة وصافي..
بشار"گارن حجبانو وكيسمع ليها..عرف ان توريا خايفة من العملية ومن المرض بصفة عامة...وعارف ان مرضها غاترجع لومة ليه هو الي وصلها لهاد الحالة عارفها وحافضها كيف الما اش غاتقول...حرك راسو ببطء وطبطب على دراع سعيدة الي عارفة اشنو باغي بالضبط بلا مايهضر...أنه تحاول او يحاولو يقنعوها باش تحيدها وماتخافش...ماكانش ليه يهضر عليها كثر من هاكا..."
سعيدة : صافي مانسيتي والو...
حبيبة : لا مانسيت والو...
سعيدة"شافت ف بشار" : ترجعو هنا ديريكت ياك ؟..
بشار"حرك راسو"...
شاف فحبيبة ووما ليها باش يمشيو...سلمات على سعيدة ورجعات باللور تا طلات على اشراق سلمات عليها وتمنات ليها التوفيق...خرجو من العمارة وركبو فسيارة الي توجه بيها مباشرة واخذ طريق رميلة من جديد..مسافة طريق حتى كانو قدام درب نزل معاها تا وصلها قدام باب دارهم...شاد الكارو كايشوف قدامو مغوبش كيف عادتو...ناس دايزة وتسلم عليها من بعيد ولا من قريب كايشوف هاد جيران الي شافها يبتاسم ولا يضحك ليها وتاهي كاتبادلهم التحية وتضحك ليهم..قدر يميز انها محبوبة بزاف فدربهم غير من هضرتهم ك مثال " حبيبة عاش من شافك".."افين احبيبة هانيا ؟"...كانو تحيات كايبينو مدى معزتها عندهم ومعزتهم عندها...حتى وقفات قدام الباب وبدات تحل بالساروت وهي دور عندو...
حبيبة : بدخل ؟!..
بشار"حك لحيتو" : لا..عندي مانقضي.."وما ليها براسو" دخلي..
الدار فيها الكنينات يشقاو شقاهم والعدوزة جالسة هي وبنتها كي القايدات...وناس داخلة خارجة من عندهم كيف العادة الي داز يدخل يسلم...وهاهي غادية...
مليكة"كملات الهضرة مع راجلها وضارت عند مها" : گطع ليا فاول شهر 2 عندي طيارة ف داربيضا...
عيدة : مابعيدش الحال ؟!..
مليكة : وداكشي الي لگا.. بغيتيني نصد امي غمضي عيني وحلي عيني تلگاي ليام دازت...
عيدة : مابغيتك تصدي وليني بغيتك تنقصي من الهضرة الي ماعندها معنى...
خرجات توريا من الكوزينة من بعد مانصبات الغذا...تابعاها كريمة هازة صينية دياال اتاي حطاتها قدامهم وجلسو مجمعين عنظو تا تمات هابطة ربيعة من بيتها لفوق...جلسات حداهم...
مليكة : تي سيحمد كي طرا ليه لديك ليد...
ربيعة : گاليا تسد عليه الباب دسال كمايو (كاميو) بجهد على صبعو وتفصل ليه..."تنهدت" راه مشا لخريبگة لشي سوق تم عامادا خاصمت ماسمع ليا شاي قهرني...
عيدة : وجاتو فليمنى شكون يسوگ بيه ؟!..
ربيعة : معاه حمادة الي كايمشي عماه ملي برك سيدي هنا حاضي زيتون...هو الي كايتحرك عماه لسواقات...
توريا : يعطي راحة لديك ليد..بيه فيه هاويلي مالو مايعرف يعلم ناس يشد شويا لارض...
مليكة : هذاك لا حط مصاصطو يومين ماتگوليها لحد..."شافت ف ربيعة"..امضرا اش درتي تي...
ربيعة"تبسمات ب أمل" : داكشي الي گلت ليك...
مليكة : شحال تعطلت...
ربيعة : ورا اليوم عشريام...
كريمة : ياكما هزيتي هههه..
ربيعة"وسعت عينيها" : من فمك لباب سما...
عيدة : وعلى ربي يحقق مرادك..الله يرزقك ذرية ابنتيتي ويرزق كل محرومة...
توريا : ونوضي سيري دوزي..ديك ساعة ملي شكيتي كون مشيتي عمايا ودوزتي ولا شريتي داك ش يگولو ليه باش تعرفي راسك...
مليكة : تمشي عد طبيبة نيشان ودوز...
كريمة : وديري كي دارت ختي هند...مشات شار برة صغيرة ودارتها فالبول...
ربيعة : ايه ؟؟!!!.
كريمة : كاديريها فكاس فيه البول لول ديالك يعني ديال صباح بكراااااي...
مليكة : ههههه وتي مالها على هاد الحالة تشري نيت داك الي كيديرو فدار ديال الحمل هاو تشوف...غذا الحد مكاين طبة ديرو هو لول وتنين تمشي عد طبيبة تأكد...
ربيعة : وشكون يبغي يجيبو ليا فارماسيان راه فسيدي بوعثمان..
مليكة"كاتهضر وتجبد تيليفونها من حداها" : حسام راه فمراكش يجيبو ليك عماه..."شافتها وسعت عينيها" تخافي شاي انا الي نگوليه بغيتو...(دارت تيليفون فوذنيها تسناتو تا صونا وهو يجاوبها)..ولد هاشم فينك...
حسام : بنت عبقادر اش كاين...
مليكة : صاحبتك انا ابن لمجوط الي حطك...باقي فمراكش..
حسام : واااايه.. اش بغيتي..
مليكة : دوز عماك لفارماسيان جيب داك ديال غوسيس..
حسام"كمش وجهو" : يا ها ؟؟..
مليكة : داك الي كايعرفو بيه الحمل يگطعك عليا...
حسام"خرج عينيه" : اش درتي امليكة ؟ هاويلي تي حملتي تاني
مليكة : الله يمسخ شيطانك..سير جيبو ياك عرفتيه ولا نرسل ليك صورتو ولا تا شتي غا اش يجيك مليح گول لبنت الي فالفارماسيان داك دياال الحمل هي توريه ليك ولا عيط ليا انا نفهمها..
حسام : تي ؤيحي راني نعرفو...را فايت شريتو...
مليكة : هاويلي لمن...
حسام"نسا راسو" : شريتو ل واحد ختنا شكينا ساعاك جاب الله كاين الله ما وقع والي...
مليكة"خبطت فخادها وغوتت ليه فوذنيه تا قفز عاد عاق براسو" : هاااااويلي على المسخوط كنتي باغي تحمل شي وحدة هاويلي..
حسام : ماشي انا...هاشم بويا الي شك ف زكريا...سيري اديك مليكة انا معاك بالله وبشرع..."قطع عليها خلاها كاتعاير فيه ههه"...
خرجات من دوش مزنگة بسخونية ضرباتها بتدويشة من داكشي...نشفات حالتها مزيااان وجلسات جنب ناموسية هازة الحليب ديال جسم فايدها تا دقات ناديا ودخلات عليها لقاتها بدات كاتذهن...
ناديا : ايوب راه جا من المحل باش يصايب ليك...اش بتلبسي دابا...
حبيبة"ومات ليها ناحية الكسوة الي معلقة" : هاديك..
ناديا : ايييه الي كنتي كومونديتيها فالصيف !!..ههه شوفي امتى كتاب ليها هههه.."شافتها كاتذهن".واخا وكلقي راسك ابنتي اه قرب المغرب ونتي باقي هي تدهني...
خلاتها كاتكمل ومشات...ذهنات لحمها كامل وزادت عليه زيت فيه العطر خلات لحمها كامل يتزلق ورطببب...بقات بالفوطة فشعرها ومشات لمجر الي عندها تم باقي فيه بعض من ملابسها داخلية هزات اونسومبل باقي جدييد كانت تقداتهم فاش كانت بغات تزوج...نساتهم وبقاو تما نييت فاليج سوتيان بالبونج يلاه يقادو ليها صدرها الصغير باش تبان عليها الكسوة...لبسات فوقهم ديباردو تاهو باقي جديد فنفس اللون...ولبسات كولون مزير يجمع ليها جنابها وفنفس الوقت مع كاين البرد خاصها تلبس شي حاجة من تحت الكسوة طويلة ومابايناش...هزات ديك الكسوة ولبساتها تقابلت مع المرايا طويلة الي حداها..كادور يمين وشمال كاتشوف فالكسوة كيف جاتها نيشان على فورمتها...كسوة بستيل اميرات ستيل البروتكول الي كايفرض الاناقة البساطة المميزة والمنفردة...كسوة فالكريمي توبها ديال موسلين حريري مزوق بنجيمات فالذهبي...كمايمها طوال مسدودين عند المعصم ومنفوخين شوي..عنقها طالع..وفصالتها كلوش سامبل..عقدات ليها حزامها من لور وهزات صندال فالذهبي بطالون..لبسات اكسسواراتها منهم الگورميط الي خذا ليها...حطات صندال وصاك غير تما تاترجع من عند ايوب وتهزهم...
أما بشار فهاد اللحظة كان كايلبس فقميجتو فالبيض سد ليها صديفات خلا ثلاثة الفوق محلولين باش ماتجيهش الخنقة حيث هاد ستيل الكلاس ماعندوش معاه والى لبسو كايبان عليه ملفت. حيث.مكيلبسوش غير مرة فشحال...سد صمطة ديال سروال وهز بارفانو رشو على ايديه ودوز بيه على لحيتو...مشا ل واحد كرطونة هزها وخرج برا من بعد ما هز فيستة ديالو فايديه وجلس فوق الكرسي تا جات سعيدة تبسمات اول مرة تشوفو لابس هاد لباس وخارج قدرات تلاحظ الفرق الي بان فيه ملي سكنات معاه حبيبة وملي جا لمغرب بالخصوص...
سعيدة : تبااارك الله خاصني نبخرك...
هز فيستة ديالو وتم غادي شاف فسعيدة ووما ليها براسو بمعنى ردي بالك معاها...طمناتو بعينيها وخرج وتيليفون فوذنيه...ركب فالسيارة وتوجه نيشان لرميلة وقف عند درب...صونا ليها جاوباتو بالي شوي وغاتنزل.تحنى هز الفيستة لبسها عليه عاد سد سبارة ونزل مع دوك دروج توجه نيشان لدارهم حلات ليه ناديا الباب تحنى ودخل باسها فراسها..
ناديا : هاهي نازلة تتلبس فصندالتها...
بشار"حرك راسو بدون اي رد"...
ناديا : دخل لصالون تبقى واقف اولدي..
بشار"يلاه ضار باش يقوليها بلاش تا سمع صوتها الي خلاه هز عينيه"...
حبيبة : هاني مهودة أماماا (نازلة)...
خرجات من بيتها الفوق..موجدة راسها كما يجب وكيما تطلب على حسب لهادشي الي غايحضرو ليه..."عشاء عمل" اضطراري...لولا الظروف الي تحط فيها مكانش غايوصلو وماكانش غايطيح فبالو يحضر لهادشي...لكن كيف كنقولو "للضرورة احكام" والغاية مهمة...فا بفستان بسيييط وفنفس الوقت خذا طابع الرقي..طابع البساطة الي معتمد عند بروتكول الاميرات...مميز ومتقون وعاطي لعين ومريح..كيفاش خذاتو وكيفاش طاحت على هاد التصميم وهنا كانشوفو ذوق هاد البنت المميز واي حاجة فيها مميزة...هبطات فالدروج هازة طرف من فستانها باش تعرف تنزل بلا ماتعثر...
وقف خاشي ايديه فجيابو...كايشوف فيها من فوووق تالتحت..كسوة زويييينة بزاف مستورة وفنفس الوقت مبينة فورمتها غزالة واخا ممزيراش...هي واقفة كاتسناه يقوليها يلاه نمشيو وناديا واقفة مبتاسمة كتشوف فيهم.... لكن الزمن توقف عندو هو وهي بغات يقوليها يلاه باش تمشي وتفادا التوثر والاحراج والخجل الي واقع دابا وهو دار پوز...كانت فاتنة حتى فميكاب ديالها...فاتنة ف شعرها...بالمعنى ديالنا بالدارجة غزااااالة بزاااف...بانت فاتنة فالعينين الي واقفين كايشوفو فيها دابا وهي نازلة...
خشا ايدو فجيب الڤيست وجبد منها كلينيكس...وقرب ليها بزربة تا رجعات بلور وتفافات جاب الله شدات فحديد دروج...ريحة بارفانو ضربات فنيفها مزيان....اما ايوب الفوق شاف كلينيكس وكمش عينيه حساب ليه غايمسح العرق حيث جات زوينة.... تا بان ليه بكل سهولة وبروووودة ماتسوق كااع لشكون كاين تم ولا ردة فعلها ولا لفعلهم....قرب لعينها ومسح ليها داك الايلاينر واخا كان هاد المرة خفيف...تا شهقت وناديا جمعت ضحكة وايوب خرج عينيه تا خرجهم وهو يهز راسو الفوووووووووق كيقلب عالنفس تا دار زدف طاح مشبح شاداه كريييز بالفقصة....
بشار"الغوباشة كي ديما" : يلاه..."نطقها عادية"...
حبيبة"مخرجة عينيها ممثيقاش اش دار.." : علاش مسحتيه ؟؟؟...
بشار : ماكاين لاش ديريه....
حبيبة : را جخلطتي ليا عينيا...
بشار"ببرودة" : غسليهم.."شاف فساعتو وبنفاذ صبر زفر"..ياا حبيبة دركي ماعندناش الوقت مزاال..." مد صبعو على غفلة حتى رجعاات بلور شوي قافزة حيث ماوجر خصلة من شعرها الي كان مفرود مبوكلي من تحت مزيان"...ديري شي حاجة وجمعي عليا زغبك...(جمعي شعرك)...
خلا لاخرين كايرمشو فيه الا هي الي مرمشتش مافهمت حتى حاجة حتى باش تستوعب ماكاينش...دورات عينيها الي بغاو يبكيو شافت ف ناديا وهي تغمزها...
ناديا : سيري لبيتي هزي ديماكيون نقي عينيك ودغيا خرجي "جاتها ضحكة" ههههههه...
بدات كاتغزز فشفايفها بغات تبكي اما ايوب را هز صبعو بدا يشهد ويدعي على بشار بالي جات ففمو يخرجها...مشات لبيت ماماها نقات عينيها وخرجات مغوبشة ماعاجبهاش الحال وماحملاتش يتحكم فيها وفنفس الوقت تربطات حيث فدارهم وماماها غاتعيق....خلات شعرها مطلوق مابغاتش تجمعو تا عطاتها ناديا مقبط ديالها نيت مذهب يجي مع الكسوة...تأففات وهي كاتجمع فشعرها وهو كايشوف فيها يحساب ليكم هضر ولا دار شي حاجة طلق ليها داكشي ومشا عند الباب كايتسناها...ماكرهش يدير بناقص من هاد العشا...هو براسو خايف لا يوقع ما وقع فاخر حفلة بسبابها..ماكانش حب ديك ساعة ووقع الي وقع فمابالك وهو دابا والعشق تسلل لقلبه الي دارت فيه بلاصة الي هو خاف قبل اشهر ديرها حيث عارف راسو اش كايسوا واخا عمرو جرب الحب من قبل...خرجات من بيت ماماها مغوبشة...حل الباب وتسناها تا خرجت عاد هو تبعها وسد الباب وراه خلا ناديا ورقية ميتين باضحك عليها...من باب دارهم لسيارة وهو غادي حاس بيها ماعاجبهاش الحال وساكت..مرة مرة كايدور عندها كاتبان ليه هازة جلايل الكسوة وغاديا وراه حتى وصلو لسيارة ركبات هي وسدات عليها ...وهو وبقا واقف داير ايديه على نصو...
فجأة تقلب ليه المود...فجأة تقلب من شخص لهااادئ لشخص عقلو كايدي ويجيب...لشخص مكسوور شقااااف من لداخل...بقا واقف عاطي بوجهو لهيه گارن حجبانو بواحد طريقة كاتخلي لواحد يرد ليه البال..حطات صاكها فوق رجليها وهزات راسها وضارت كاتشوف فيه من زاج كايبان ليها واقف وكيشوف لهيه الشي الي خلاها تستغل الشوفة فيه...كان كايبان ملفت بداك ستيل كلاس الي لابس يلاه كاتفلي فيه حتى ضار ومشا لبلاصتو حط ايدو على الباب وتاني بقا شحال واقف وحاط ايدو لاخرى فوق السيارة...تا حط عليها راسو شحاااال ضارت كاتشوف فيه متكي ماعرفاتش مالو...اما هو كان الله الي عالم بيه...من بعد مالاحظ راسو كيفاش غار عليها غير من ميكاب الي دارت وشعرها الي طلقت وطلتها الفاتنة اما الى شاف فيها شي حد فين بغا يوصل ثاني...لهاد الدرجة وصل لمرحلة العشق ليها وغير من طرف واحد...كايحس براسو كايتقات.ل غير وحدو وخاصو يتقا.تل على قبلها الى بغاها خاصو يكمل لكن بمجرد ما كيعرف انه حتى ماضيه ممكن يوقف عائق بيناتهم كايخليه يحس بالجهل...حس براسو كايتضغط تاني وخاصو يشرب المهدئ باش يبقى سطابل فتصرفاتو وكالم والا غايدير شي حوايج تاني يهربوها منو..زييررررررر على سنانو تا بغاو يطرطقو ليه وهو يهز راسو ورجع حل صدفة اخرى على الله يتنفس شوية..حل الباب وركب دار سانتيغ وديمارا طوموبيل..كسيرا وخرج لطريق غادي عااادي شد طريق اوريكا..طريق كلها وهو عينيه غير على طريق ماشافش جيهتها كاااع...حتى وصلو ل palais dar sokkar...بانت ليه دنيا تما فييها بنادم...وقف سيارة كايشوف تما وهي تاهي كاتشوف باهتمام لهاد البلاصة واخا تاهي عالم بيها الله...صونا ليه تيليفون وجاوب غير من شاشة سيارة حاط مرفق ايدو الي شاد بيها الگارو متكي راسو عليها وكيشوف تا تسمع صوت الشاف الي معاه كايقوليه بالي وصلو وكايتسناوه للاجتماع الي غايديرو...حدو قاليه "هانا جاي" وقطع...مع قطع بقاات شاشة خدامة وراديو تطلق ماداهاش فيه ماسكتوش كيف مولف حيث ماعندوش معاه اصلا...كان عقلو سااارح فبلاصة اخرى كايغلي ليه...باغي يشرب دوا وماقادرش يشربو قدامها باغي يهضر يقول ماعارفش اش يوصل ليها بالضبط باغي يفسر تصرفاتو الي دار قبل قليل معاها على انها تصرفات "غيرة عاااشق"...ماعرفش كيفاش يوصل ليها اش يقوليها منين يبدا...ماباغيش يتصرف بعن.ف والا غاتهرب منو بمرة وهو حتى تصرفاتو مكيعرفش يشيطر عليهم...مادرش البال لاغنية الي تطلقات...كانت تاهي ساهية فالمعركة الي نايضة عندها بين مؤيد ومعارض...بزوج بيهم الله الي عالم بحالهم....
~~ما نخّدعك أنا ما تخّدعيني..حتى واحد غيرك ما يعجبني..أنا بغيتك اكثر بغيني..و خلّي اللّي بيناتنا مستور~~
ضار بشار ناحية حبيبة كايشوف فيها ساهية ومقلقة..كانت بعدا ناشطة جايا لبلاصة واخا معاه مهم كانت موجدة ومرتاحة تجي حتى خسر ليها توجادها باش ؟ حيث غار..وعلاش يغير ياك هي ماغاديش تبقى معاه...
~~نبنوها على ساس صحيح..ڤلبي و ڤلبك مليح..ما يتزعزع ما يهزّه ريح~~~
هز راسو كيشوف قدامو وعقلو مشا لهضرة طبيبة اخر مرة...وجملة بقات ليه فبالو "الانسان فاش كايغلط كايطلب سماحة..كانضن شي حاجة ماشي صعيبة عليك"..وكان رد منو " ماعمري طلبتها من شي حد الي ماعجبو حال ماعندي بيه غراض"...
كانت كاتشوف فديك البلاصة وكاتسمع فديك الاغنية...حتى سمعاتو نطق بثقاالة تقوليه شارب ولسانو ثقييييل وهي دور راسها...
بشار : قصحت معاك بجهد.."سكت شحاااال وعاود نطق"..سبقت معاك العيب...(قصد ديك الليلة)..ونتي ماشي ديال تكرفيص..
حبيبة"خرجت عينيها وقلبها تهز"..
بشار"كايهضر بواحد صوت ثقيييل ومدعدع غالبة عليه حتى البحة" : هادشي جديد على ملتي...(ضار عندها وكمل هضرتو)...تسمحي ليا ؟!..
~~ما يتزعزع ما يهزّه ريح...لا كان غدّار ولّا مغدور..هذاك هو le vrai amour (للشاب نصرو)...
القلوب هازة..هازة بزاف..منها المنكسرة...ومنها المنكسرة وصعيبة تجبر او ترمم...جروحها كبيرة...خاصها الوقت !!..ممكن تعوض وتداوا وتجبر...وممكن ماتعوضش ويبقى الجرح محفور...ماشي ساهل نسامحو الى كان الجرح كبير..وماشي صعيب نحاولو...
الامل ديما موجود..مادام التشبت بيه قائم مادام الانسان كايسعى بكل صدق انه يسعى المسامحة ويتشبت بيها..حنا كانبقاو بشر خلقنا الله بالايجابي فينا وبالسلبي..ماشي ملائكة معصومين من الغلط..كاملين كانغلطو الفرق ان كل واحد وكيفاش غلط وشحال كان حجم الغلط...ممكن مقصود وممكن غير مقصود...
زيرراات على سمطة صاكها تا تحبس د.م فصباعها...وهي كاتسمع لهضرتو وكيفاش طلب منها سماحة كانت بطريقة..يمكن لو كانت عارفة ضروفو كانت غاتحس بيها انها مخصصة غير ليها وتقالت ليها هي الوحيدة من شخص ماولفش يطلب سماحة..ماشي بزاف قليييل اذا ماقلنا ماكيطلبش سماحة من شي حد أصلا...
حبيبة" نزلت عينيها الي عياات تحبس فدموعهم لكن خانوها ونزلو يجريييييو..ماجاوباتوش وماقدراتش حتى تخرج كلمة لا بالقبول ولا الرفض...ماشي ساهل تجاوب ديك ساعة...واخا عارفة انه بكلمة تقدر توصل ليه اش كاين..
بشار"رجع شاف قدامو وسكت عاطيها فرصة وليه حتى هو باش كل واحد يستوعب..الاغنية بقات خدامة وماداها فيها حد بالرغم من ان كلماتها كايعنيييو بزاااف لكن القلوب مشغولة بهمها والعقل مرفوع..كل وفاش كايفكر...
عارفها صعيب تجاوب وعارف دموعها غايكونو نزلو حيث قشع عينيها الي تحجرو بزاف بدموع...وعارف ان الامر صعييب تلقاه بشكل طبيعي...ماقادرش يقوليها كلمة تخفف عليها وتنسيها... وماقادرش يواسيها ويعنقها فحضنو يبقى يبوس فراسها ولا يطبطب عليها..ماقادرش يدير حتى رد فعل الي يواجهو رد فعل منها ممكن يخليه يرجع خطوات لور...بالرغم من انه ساهل ساهل جدا يجرها لعندو..لكن..ميمكنش يدير هاد الخطوة فالبلاصة...
شافها تعطلت وهي ساكتة ماقدرش مزال يميك عليها...ضار دغيا عندها بانت ليه باقي على وضعيتها حادرة راسها ومنزلة عينيها...عارف انه ماغاتعطيهش اجابة مباشرة..الوقت ماكانش مناسب لهاد الكلام لكن البوح بيها كان مناسب ليه...
بشار : نرجعو ؟!..
تسناها تجاوب ماجاوباتش...وتاهو ماحكرش..فالاخير ديمارا سيارة..هز عينيه فالمراية الي سنا عليهم ضو سيارات الي داخلين تا غوبش اكثر..وتم راجع ماغش اغييغ باش يخرج من تم..يلاه غايشد طريق حتى نطقت محاولة تبين القوة...
حبيبة"بصوت مشحرج" : ماكاين لاش ترجع.."نقص من سرعة سيارة وضار عندها مكمش حجبانو فيها"...خلينا ندخلو الناس كايتسناوك..
بشار : ماشي مشكيل...
حبيبة"كاتصرط فريقها باش تقاد صوتها" : لا هي خلينا ندخلو...هادي خدمتك وواجب عليك.."سكتت تا حنحنت واستانفت كلامها"..وواجب عليا حتى انا نكون معاك وهادشي علاش انا معاك أصلا...
حسات براسها انه غادي تنهار الى فات حتى كملات فكلامها وزادت اكثر من هادشي....ماعندهاش الطاقة انها تناقش فهاد اللحظة الي هما فيها...واخا را ماهضرش مزياان ماقالش كلشي قال باختصار فجملة وحدة...وحتى هي قالت ليه اش كاين واخا الحاصول واحد فيهم وصل المعنى والثاني عطا المعنى...
بشار"حرك راسو بشواااايا...تسمع صوت تيليفونو فالسيارة قطع عليهم"..
حبيبة : هي جاوب..
بشار :.لهلا يرد مهم عليا...انا فيك نتي مامرتاحاش نرجعو...مابغيت منك والو لا واجب لا حبس..باغي تكوني براحتك لا حسيتي براسك ماتصيبيش دخلي وتكملي معايا ماكاينش الي يحط السيف على رقبتك..
حبيبة"حركات راسها ب لا بزربة" : لا لا عادي...
بقا كايشووووف فيها بشكل مطول..كايحاول يقرا الاجابة ويفهم هضرتها من تعابير وجهها...ماعارفش انها حتى انه تقول مامسامحاكش ماقدراتش تخرجها وحتى مسامحاك صعيبة عليها...جاها فواحد الوقت الي كان مناسب ليه وهي مامناسبهاش..واخا ماقالش كلشي وماتعمقش وماشرحش باش تفهم..وتاهي ماعارفاش انه كل مكيقوليها شي حاجة كايختابر رد فعلها بيها وفنفس الوقت كايزيد يرتاح ويتشجع لخطوات جديدة...فالاخير خلاها على راحتها مابغاش يضغط عليها..ملي طلبات يدخلو اذن را مزيانة الامور...ماعارفش انها هاربة من الاجابة دياال بصح...
دور طوموبيل ورجع لداك الريسطو او palais فين مقام العشا..تيليفونو رجع صونا من حديد ماجاوبش تا دخل لتما...نزلو من سيارة وضار عندها وقف حداها هي الي كانت كتشوف فدوك الاجواء ب عقل غايب...هضرتو كاتروج ليها فدماغها اما هو كثر...
بشار"كايشوف فدنيا عامرة خصوصا يوم سبت وصوت الموسيقى خدام مجهد" : النم الكحل هذا...
جبد كارو بدا يكمي فيه ...عاود صونا ليه تيليفونو جاوب فالبلاصة..ضارت كاتشوف فيه وكاتسمع فيه يهضر بالالمانية باين من على وجهو انه ماعاجبوش الحال..ماعندوش مع البلايص العامرين وبنادم كثير...طفا تيليفون ودار ايديه على جنابو..ويدور هنا وهنا وفنفس الوقت حدا حبيبة الي كانت كاتقاوم فدوك الدموع الي كايبغيو ينزلو تاني ...ماعرفتش علاش بغات تكمل فهاد سهرة..وعلاش ضاغطة على راسها انها تكمل معاه فهاد "الواجب" الي قالت عليه مع انه ساهل ماتجاوبش كاع ويرجعو فحالهم..يمكن حسات انه غاتعيق ليه خدمتو ولا شي حاجة اخرى ؟...او يمكن قالت ليه هاكاك باش توهم راسها أنه معاه فقط لتأدية واجب كلمة عطاتها ليه لا غير ؟!...شوية جا عندو واحد من الموضفين الي تم...
هو : موسيو الهاشيمي ؟!..
بشار"ضار عندو مخنزر" : تحرك عليا وريني فين هما...
حرك راسو وهو يشير ليه بمعنى تفضل من هنا...اول حاجة دار هي ضار عند حبيبة الي بانت ليه ماشي هي هاديك...ماشي غير باين عليها حتى انه ولا حافض تفاصيل تعابير وجهها..ردات فعلها..هادشي كامل كايلاحظو عاشق التفاصيل بحالو...ماتحركاتش كانت كتشوف لهيه عرف ان الامر ماتوقفش باقي هضرت كاتدور ليها فدماغها وانه هي موهمة راسها بالي ماقال والو ومامأثراش...
بشار : حبيبة !!..
حبيبة"ضارت عندو" : ممم ؟!..
بشار"شاف فهذاك ورجع شاف فيها" : يلاه نرجعو..."أكد ليها بعينيه وهاز صباعو الي فيهم سيجارة"...ماغاديش نعاودها ثاني ماعندي سوق فيهم تحركي رجعي فحالك الى مامرتاحاش نتي ماتهزي لملتي هم گاد براسي...
حبيبة"بقات كاترمش تاني تا سهااات وهي ترجع تاني حركت راسها وضارت كاتشوف فالاجواء ورجعات شافت فيه" : لا اه گلت ليك هي خلينا ندخلو انا عادي ما بيا والو هي خليني بخاطري..
بشار : وتحركي تبقاي تم ؟!..
حركات راسها وقربات لحداه عاد تمو غاديين...تابعين الولد الي حتى دخلهم لواحد الجيهة لداااخل طلعو فدريجات فحال الى داخلين لشي رياض كانو الاستقبالات تما..عطاهم الموضف الاسم ديالهم...بشار ضار عند حبيبة وحط ايدو على كتفها ملي شافها ماقفزتش قربها لحداه...هزات فيه عينيها لقاتو كايشوف وباين ماشي تالهيه حيث تبرزط دنيا عامرة ناس تقولي حفلة مقامة وهي را هاكا دايرة هاد البلاصة كل جيهة فيها واش فيها...تمشاو فطوالة طويلة فيها سجادة حمراء وجنابها فوانيس فيهم ضواو والضو الاحمر غالب على التيم الي فيها..عاطيها منضر سااااحر ومميز كاتحسي براسك ف الف ليلة وليلة ولا فشي زمن قديييم...زيرات على الكسوة بايدها الي عراقت من التوثر...وجهها دابا عكس وجهها قبل ماتجي لهاد البلاصة قبل ماتلبس كسوتها ويمسح ليها المكياج ويتحكم فلباسها وشعرها الي حتى لاخر هضرة قاليها..."تسمحي ليا ؟"...جملة وسؤال خلاها تشقلب كثر ماهي مشقلبة...
ماخسرش ليها خاطرها واخا مامبين والو كيف عادتو...بقا حداها ولاخور سابقهم كايوريهم فين يمشيو..وهو مرة مرة كايهبط عينيه ليها يحضيها تاني...حتى وصلو لواحد الجيهة فيها فيها طوابل مستفين والوسط خاوي....كانت الاضاءة فيها عادية واخا خافتة شوي حيث باقي مابداش فيها show...تا وقف الولد ناحية واحد الطابل فيها ثلاثة ديال الاشخاص واحد منهم جالسة حداه مراتو وثاني وحدو...حتى وقف واحد منهم الي معاه مراتو وتبسم كايشير ليه بايدو...
هو : بشار "تسناه تا جا سلم عليه" تفضلو..."شاف فحبيبة وتبسم محرك ليها راسو فقط"..
بشار سلم عليه وعلى وجهو ملامح مخنزرة..سلم على لاخور اما السيدة حرك ليها راسو بلا ميشوف فيها...جر الكرسي وهو يدور عند حبيبة الي قربات وعلى وجهها ملامح الخجل الشديد وابتسامة باهتة..شافت فديك السيدة بشوفة مخجوفة لقاتها كاتشوف فيها بملامح اعجاب ل جمالها وبساطتها فاللبس الراقي بديك الكسيوة وشعرها المجموع لور بانت بحال شي اميرة ببساطتهم...وشافت كيفاش جر ليها الكرسي الي جا فجنب ماحداه حتى كرسي. باش مايجيش يجلس حداها شي حد...حتى جلسات وبقا واقف تا حطات الصاك وتقادت فبلاصتها عاد جر الكرسي وجلس هو حداها..
هو : بلاصة زوينة عجباتني واخا ديما كانجي لمغرب..
بشار"كيهضر مغوبش ومكيشوفش فيه" : عامرة...
هو : كانت من اقتراح لورين ديال العلاقات العامة..
بشار"ماجاوبوش لكن كانت باينة عليه انه مامرتاحش"...
السيدة الي كانت معاهم كانت كتشوف فحبيبة باعجاب وهي تقرب لراجلها ونطقات بينها وبينو..."مراتو مغربية ؟"...جاوبها مقرب وشاف فحبيبة ورجع شاف فبشار الي كان حادر عينيه وشاف فمرتو مجاوبها " كنضن مغربية حيث فاش كان راجع لهنا قاليا بالي غايتزوج فالمغرب ببنت بلادو"...بقاات كاتشوووف فيها وهي ترد عليه " كأنها هاربة من البلقان"...
هو : هههه عجباتك...
هي : زوينة بزااف..وحتى هو زوييين بزاف لكن شخصيتو كاتبان ليا صعيبة...
هو : هو مدير القسم المهم عندنا والي معتامدة عليه الشركة...غايبان ليك هاكا داير..وتقدري تشوفيه انطوائي بزاف..فالخدمة مكانش كايتخالط مع الموضفين كايخدم خدمتو وكايحضر لاجتماعات الي مهمة..مكنهضروش معاه ومكنحكروش حيث كايدير خدمتو نيشان ماعندوش مع زيگزاك..ذكي بزاف والاهم انه كايخدم وعندو نيشان وحنا هادشي الي بغينا الباقي كاتبقى حياتو ومكانش الي كايدخل فيه...
هي : على ماشي هو الي قلتي ليا كان غايتزوج بوحدة خدامة عندكم...
هو : ههه هانزاده..ماعرفتش ماسولتوش وماسولتهاش الي عارف هو ملي تزوج ببنت بلادو اذن مابقاوش مع بعضياتهم...
بشار"بانت ليه كاتشوف فجنب مزيرة وحشمانة بزاف..قرب سوي لعندها" : بغيتي شي حاجة..
حبيبة"ضارت عندو كان قريب شوي ريحتو مجهدة دعقتها" : م ماعرفتش..احم.."كمشت وجهها بضيق"..بيت هي نشرب عطشت..
دور عينيه لطابلة كايقلب بان ليه غراف الما كبيير ورجع شاف فسرباي الي واقف للخدمة وحرك ليه راسو تا جا عندو وتحنى ب لباقة..
بشار"شير ناحية الما" : عادي ؟...
هو : لا سيدي.. معدني..."حرك ليه راسو واستاذن رجع لبلاصتو".
تا تأكد انه معدني عاد هزو وكب ليها فكاس قدامها وقربو ليها وهادشي تحت نظرات الاخرين الي شافوهم...قرب ليها الكاس وقرب ليها السربيتة...تا نطق هذاك الي معاه...
هو : كاين شي مشكيل عندكم ا بشار ؟!..
بشار"جاوب بالالمانية وعينو عليها كاتبان ليه مزنگة بزاف" : لا..داكشي بيناتنا...
خشا ايدو فجيب الفيستة الي حط ورا كرسيه وجبد منها باكية الكارو...شعلو وكحز ايدو لهيه كايكمي ويسوط لهيه محاول يبعد عليها الريحة باش ماتبرزطش بيها...شوية جا المكلف بيهم جاب اطباق ومقبلات حطوهم ليهم..كانو مقبلات مختارة من طرف الي نضمات ليهم العشاء...حطو ليهم المشروبات...جا سرباي بغا يحط ليه الويسكي حيث عارفينو كايشرب وهو يهز فيه عينيه وشير ليه بايدو بمعنى "دي عليا هادشي"..مابغاش يشرب حداها لاخرين كانو ليهم عصائر بالكحول...قرب السرباي لعندها حط ليها عصير من الي اختارت فاش قدموهم...وحطو ليه هو صودا بالثلج...
بشار"سف من سيجارتو" : مزال معطل هادشي ؟!
هو : لا كانتسناو بعض المهندسين من الي عندنا يجيو...
بشار"شاف فساعتو" : ماعنديش جهد نبقى بزاف هنا...
هو"شاف تاهو فساعتو" : نورمال يكونو هنا دابا ماعرفتش اش عطلهم "نقز لاخور"..
لاخور : هاهما عند الباب يلاه وصلو...
شوية وهو يتطفا ضو والاضاءة نقصات بزاف وتحولت لشبه ضلام والضو الاحمر مخلط بالالوان شعلو كانك فعصر عربي قدييييييم فيه راقصات وحريم السلاطين...كأنك فعالم السندباد وياسمينة...كأنك في عالم الحكايات خصوصا من الي بدات المقدمة ديال اغنية "سالمة يا سلامة" بصوت داليدة وبدمج من الديدجي الي كاين تما...هز بشار راسو وضار مغوبببش ماحملش هادشي كايجر ف كول القميجة باش يتنفس..ورجع ضار لهيه كايسوووط...شافو الشاف الي معاه عرفو ماعجبوش الحال...
حبيبة غير سمعات هادشي وهي دور تا بانو ليها ثلاثة ديال البنات لابسين لباس الرقص...وتوسطو فداك الوسط تما كايديرو نفس الحركات خفاااف كا تسخين لبداية الرقص...كانت كاتشوف فيهم وفنفس الوقت سااااهية...
بشار"ضار عند هذاك" : اشمن خدمة وسط هاد فريع الكر ؟!..
ادريان : حاول تصبر حتى يجيو الي بقاو..عندهم الملف ديال الصفقة بغيناك تشوفو قبل مانهضرو فالشراكة الي غاتكون هنا...
مابقاش جاوبو...اصلا تخربق مع صداع ديال شطيح ودوك الراقصات الي خدامات كيشطحو بكل احترافية ومرونة دايرين عرض مخلين عباد الله كلها كاتشوف مستمتعة بهاد الجو والموسيقى خدامة....
بشار كان مكالمي حيث المهدئ داير خدمتو واخا هاكاك مبرزط ماعندوش مع هادشي والي زاد كمل عليه "حبيبة"..ماعارفهاش واش مقلقة من هضرتو ولا مقلقة من الوضع كامل..ماعارفش اش يدير ليها...كان فيه مايقول لا مانرجعوش لعشاء لكن فضل يمشي معاها بالخاطر...كيف قرات ليه الحساب لخدمتو...قرات لحساب لشحال من حاجة...واخا هاكاك ماحاسش بيها بالي مرتاحة..
كانو الراقصات كيشطحو غير فديك المساحة الي عندهم فقط..شوية حتى جا واحد السيد كبير شوية فالسن سلم عليهم وحرك لحبيبة راسو وجلس مقابل مع بشار...
ادريان : مارك...تقدر تعطي دوك الملفات ل مستر الهاشيمي...
حرك راسو برسمية مبسم ليه..جبد دوك الملفات ومدهم لبشار الي شدهم من عندو وفنفس الوقت كتيكمي فداك الكارو...حل واحد منهم كايقرا فيه...خذا شحال ديال الوقت حتى سدو وحطو جنبو...
بشار : الضوصي لاخور ؟!..
مارك : هاهي شوية وتوصل خليتها كاتهضر فالتيليفون...
بشار"سكت ماحكرش" : غذا نعطيك rapport..هادشي ماشي ديال نجاوبك عليه فالبلاصة...
ادريان : اذن ؟!..
بشار : شي conditions ماطربونيش تما...
مارك. : هادشي ديجا دوينا عليه فالاجتماع...
بشار : ماعندي ماندير ليك...
بعض الشروط خاين بالصحة وهادشي داخل فالمجال ديالو...سالا داك الشو ومشاو هادوك...
بشار"ضار عندها" : تعشاي ونتحركو ؟!...
حبيبة"ضارت عندو" : علاش ساليتو ؟
بشار : مازال...باقي واحد ضوصي... شوفي اش تبغي تاكلي نوصي عليه..."هز عينيه كيشوف لقدام ورجع شاف فيها"...مطول هادشي هنا عندهم...
"هز دوك الملفات ووراهم ليها...كايحاول ما امكن يشد ليها الخاطر يشاركها شي حوايج مكيشاركهم مع تاحد خدمتو كايشاركها فقط مع شي حد خاصو يشوفهم بحكم الخدمة...اما هي كايحاول يوريها..العار غير تنسا ولا ترتاح حيث حاس بيها مزيرة ومامرتاحاش لكن كاتحاول تبقى عادية لدرجة كاتبقى تشوف وتسهى...الشو سالا وهي بقات ساهية فديك البلاصة...حتى من ديك المراة الي مع ادريان لاحظات انها ماشي تالهيه وحساب ليها مخاصمين...بشار كايحاول يبقى عادي مكالمي على قبلها وهي كاتحاول تبان عادية وانه ماهضرش وماطلبش سماحة...كاتحاول دير راسها ماوقع والو...بدات كاتحس انه غادي تنفا.جر وخاصها شي حاجة الي تخليها تبوح باش كاتحس خاصها نقطة تفيض ليها الكاس...
بشار : الي عندي بيه غراض شديتو...داك الضوصي الي بقا پوسيبل نشدو من بعد...
حبيبة"بقات كاتشوف فدوك الملفات وترجع تهز عينها فالاخير" : واخا نتسناو ضوصي لاخور ونمشيو..."حركت راسها ب النفي" مافياش ماناكل نشرب هي عصير...
خلاها على خاطرها...رجع هضر معاه ادريان شرح ليه اش كاين...كان كتيكمي ويشرب فالصودا مرة مرة...ويهز معصم ايدو يشوف فااساعة...ااشو توقف لمدة نصف ساعة بينما يبدا شو اخور...كاهز عينيه يشوف فيها ويرجع يهضر مع هذاك تا شوي وينوض من الي تعطلات مافراسوش شكون جاي اصلا...يلاه طفا الكارو فالطفاية حتى وقفات عليهم بكامل اناقتها وبشعرها الاسود الطوييل...كانت شبه طبيعية خصوصا ملامحها الحادة...ريحتها كانت مميزة...لابسة فستان سهرة محتشم...شافت ف بشار وهي تنطق...
هانزاده : هيلووو "شافت فبشار"..بشااار...
كان اول من هزو عينيهم ماشي بشار وماشي لاخرين وانما حبيبة الي غير سمعاتها وهي دور وهزات عينيها فيها....
حياتهم بعينيها الي توقفو شوفاتهم على حبيبة الي جالسة بجنب بشار الي ماهزش عينو كاع كان حل واحد الملف من دوك الملفات ...جرات الكرسي وجلسات كاترجع شعرها للوراء وتشوف فيهم...
ادريان : تعطلتي...
هانزاده"ساطت" : هفففف شدني الان بالهضرة..
ضارت عند بشار مبتاسمة فيه كاتشوف فيه حال داك الملف والكارو بين صباعو...واخا تفارقو وكل مشا لحالو باقي عندو مكانة فقلبها..صعيب عليها تنساه دغيا وهي كانت كاتعشقو...كان حب من طرفها هي كانت عارفاه شخص انطوائي وكانت حاضرة لحالة من حالات الغضب الغير الطبيعية الي كان كايدوز منهم وكانت حاضرة لوحدة من تفريغ الغضب الي كان كايدير فلحمو...كانت عارفاه غير طبيعي لكن ماكااانتش عارفة حكايتو الكاملة...ماكانتش عارفة اش عاش تا وصل لهادشي...ماكانتش عارفة اسرارو القاسية وحكايتو الاليمة...دوزات معاه فترة وكان على وشك الزواج بيها..لكن كانو بعض الحواجز وكان اكبر حاجز هو الاختلاف ف "الد.ين" واختلاف ف الطو.ائف..وبزاف الحواجز كانت مانعة هاد زواج...
هانزاده"شافت ف بشار" : بشار لباس عليك ؟!..
بشار"حرك راسو بلا ميشوف فيها"..
حبيبة"كاتشوف فيها وتشوف ف بشار واخا مافهمتهاش اش كتقول حيث كانت كاتهضر بالالمانية"..
هانزاده"وجهات شوفاتها لحبيبة وهي تبتاسم ليها ونطقات بالانجليزية" : bachar's wife ?..
بشار بقا بنفس الوضعية لكن عينيه الي تهزو واخا ماشافش جيهة هانزاده..شوية وهو يحول عينيه ناحية حبيبة..مابغاش يجاوب عليها بغاها هي تجاوب حيث السؤال كان موجه ليها هي..
حبيبة"حناكها سخنو كثر من السؤال وحتى من الجو..حركت راسها بلا ماتنطق بابتسامة دغيا جمعتها"...
هانزاده"بابتسامة صفرة" : nice to meet you..
حط بشار داك الملف حداه وهز عينيه ف ادريان وهانزاده عينيها عليه بشوفة اشتياق ليه...حبيبة كانت ضايرة لهيه كاتشوف فالاجواء تما وهي دور كاتشوف جيهتهم تا استقرو عينيها عليها الشوفات الي كانت كادير ف بشار كانو مفروشين حيث هو كيهضر وهي حاضياه لان ادريا كايهضر وهي بقاات مستقرة عينيها عليه....بقات كاتشوف فيها كيفاش كاتشوف فيه...حيث ماكانوش شوفات عادييين كانت باينة انه هايمة فيه خصوصا بديك الابتسامة الي كاتفلت ليها...
ادريان"شاف فالبقية ونطق" : وقت العشاء ياك...
بشار"طفا الكارو فطفاية" : الضوصي الي باقي فين ؟؟؟
ادريان"شاف فهانزاده" : جبتيه معاك ياك...
هانزاده"عضات فمها" : اووو خليتو فالسيارة..
ادريان : عندك سيارة هنا...
هانزاده : نوو كريتها على حساب واحد الوكالة..."شافت ف بشار" حتى نكونو غاديين ونعطيه ليك واخا ؟!..
بشار"ضار لهيه ورجع ضار عند حبيبة" : نتحركو ؟!..
حبيبة"شافت فيه" : صافي خذيتي اش بيتي ؟!..
ماعرفش يركز ولا يهضر مولف الهدوء الشديد باش كيفكر ويخدم براحتو..زادو حتى هي الي عارفها مامرتاحاش ومكابرة باش تحضر معاه بواجب زوجة"
"كانت تبدو وكأنها تستطيع أن تحمل العالم كله على كتفيها وهى بالكاد تحمل نفسها"....
بشار : مابانش ليا فهاد الحبس ناويين لشي réunion ...
حبيبة : علاش واقعة شي حاجة ؟!..
بشار"ضار عندهم الي كانو كايهضرو وفنفس الوقت حاضيين معاه ورجع شاف فيها" : التبعصيص فالخدمة...
صرطت ريقها وهزات عينيها كاتشوف فيهم تاهي وعاود عينيها مشاو لهانزاده الي ماشي غير شوفاتها ف بشار الي ثاروها وانما حتى زينها الي كان استثنائي وماتنكرش انه حتى هي عجبتها لكن علاش بقات مركزة عليها كيفاش كاتشوف فيه..علاش كاتشوف فيه هاكا هذا هو سؤال الي عندها دابا فدماغها وحتى طريقة باش عيطات لبشار"...
حبيبة : ماجابوش ليك ضوصي الي بيتي ؟!..
بشار"وقفو عليهم مجموعة من سرباية كايحطو ليهم فالعشا هز فيهم عينيه ورجع شاف فيها" : لا..
حبيبة : الى بيتي نوضو نمشيو ماشي مشكيل... "شافتهم كايحطو العشا" ولكن اه كايحطو العشا عادي نوضو ؟!...
بشار : الي ماشي عادي هو نتي ماتكونيش مرتاحة ونريح حيث باغين يتعشاو هما...
هانزاده"كاتشوف فيهم كايهضرو كاتشوف كيفاش كايشوف فحبيبة بشوفات اول مرة تشوفهم فيه..هزات كاسها ديال العصير شربات منو وعينيها عليهم.."..
حبيبة"نزلت عينيها من هضرتو" : هادشي اول مرة تنحضر ليه...ضروري بنتبرزط..نتا تتعرفهم وتبرزطتي عاد انا...ولكن الى على ود الخدمة ديالك ماشي مشكيل اه واخا يكون بابا راه منكونش مرتاحة...شوف نتا واش مرتاح معاهم..
بشار"گرن حجبانو ماحاملش البلاصة فين جالسين" : كاين شي راحة وسط هاد الويل فين كاينين..التبرزيط والخدمة ؟!..
شافت فيه عرفاتو حتى هو مامرتاحش عاد هي الي وسط هاد الجو..حركات ليه راسها وهي تهز صاكها تا ناض هو وهزو فيه عينيهم ومنهم هانزاده...شاف فيه ادريان...
ادريان : فين غادي والعشا ؟!..باقي ماكملناش الاجتماع..
بشار : فين dossier الي بقا ؟ (بغات تهصر هانزاده وهو يكمل هضرتو)..الخدمة والاجتماع كايبغي كلشي يكون فبلاصتو ماشي ناس جايين وناس تا گاالها ليهم كرهم عاد لحگو علينا...وشي ناسي ليا ضوصي ؟ ناسي ليا صباط فراس الدرب ؟..
ادريان : هذا الاجتماع كان مضمون ديالو نتفاهمو على بعض النقاط ديال شراكة عشاء عمل ا بشار ونتا عارف...
بشار"خبط ايدو فوق الطابلة بجهد تا قفزت هانزاده وحبيبة وسعت عينيها" : كاين شي réunion) treffen)..وسط صداع راس والغنا ؟..اش هاد الحبس عندكم... responsable ديال العلاقات العامة كاتفهم من كرها الي جايباك فهاد القلاوي..مخلين شلا بلايص فين تجمعو جايبين ملتنا وسط عرس..
الجو ماكانش مناسب وحبيبة مكانتش مرتاحة وهو عرفها وحس بيها خصوصا من الي هضرو ديك الهضرة فالسيارة قبل مايدخلو عرفها غير مكابرة باش تدخل معاه لهاد الاجتماع...مابقاش صبر حس براسو غايفرطو ليه الاعصاب حيث مضغوط ومامرتاحش كايبغي يركز فداكشي كايبدا شي عرض وكايلقا راسو تبرزط وعاد عقلو كلو مع حبيبة اما تا هازاده ماداهاش فيها ماتفاجأش واش جات...
بشار"ضار عند حبيبة ونطق بدارجة" : يلاه تحركي..
حبيبة : واخا...
هزات صاكها وتسناها تا قربات تندو وهو يهز الفيستة وهز داك الملف مخلي ادريان واقف كايهضر معاه...هز ايدو تا قربات وهو يحطها على كتفها ومشاو من تما خلاو لاخرين غير كيشوفو...خرجو من داك ريسطو لداخل وخرجو منين جاو فالاول دنيا عااامرة..ناس غاديا جايا شطيح ورديح فشي جوايح لانيماسيون خدامة من داكشي...غادي ويتمتم بفمو مكاين غا سبان من سمطة لتحت والله يعطيك صحيحتك...ولكن واخا هكاك كايدور عند حبيبة ويطمن عليها واش هي هاديك...خاف لا تكون تخلعت من ردة فعلو الانفعالية قبل قليل...ماخرج من ديك البلاصة تا غفر ليه الله...وصلو لسيارة يلاه بغا يركب حتى سمع صوت ادريان كايعيط ليه...
بشار"شاف فحبيبة" : ركبي...
حلات الباب وهي تركب اما هو جبد من جيبو كارو تاني وشعلو بدا يكمي وضاير جيهة الباب باش يكمي عاد يدخل لبلاصتو...تا وقف عليه ادريان كايهضر بغا يشرح ليه...
ادريان : الامر مامستاهلش هاد العصبية كاملة ا بشار...
بشار"هز راسو لفوق وساط دخان مزيااان عاد رجع شاف فيه" : قويتي الهضرة بلا فايدة نتا لا ؟!...
ادريان : هاد الاماكن ديال الاجتماعات ماشي حنا الي كنقررو فيهم..الي مكلفين بهاد القسم هما الي كاتكون عندهم نضرة لهاد البلايص..
بشار : تقب لزبور مهم العينين..ما بلايص ما حبس..
ادريان : راه ماكا... !!..
بشار"قاطعو" :.الخدمة بكرها ناقصة فين ضوصيات الي بقاو ؟..علاش تبدلو conditions الي فداكشي ؟!..شلا تخربيق وتزعليك كاين تم..ماگديتش نشوف داكشي بخاطري حيث يااا شريييف كاين الهراج وصداع برزط ليا راسي..جيت لهنا على وجهك نتا ولا لا ؟..
ادريان : بشار ..
بشار : بلا ماتقود معايا سوايع...
لاح الكارو عسف عليه وضار غادي باش يركب حتى جاات هازاده كاتزرب..وقفات كاتنهج..كانت حبيبة كاتشوف من المراية تا بانت ليها جايا وهي دور كلها كاتشوف اللور..كاتبان ليها كاتشوف فبشار...طلعاتها وهبطاتها...
بشار" يلاه بغا يحلو يدخل تا حطات ايدها على دراعو هبط عينيه فين حاطة ايدها وحبيبة كاتشوف فيها كيفاش كاتشوف فيه وتشوف فبشار الي هبط عينيه لايدها وهز حاجبو وهي تحيد ايدها بزربة..
هانزاده : بشار الغلط مني انا الي خليتو شد ليا الان الوقت بالهضرة وخليتو وجيت ماكانش كيفاش نرجع حيث لقيتكم ديجا كاينين..سمح ليا...غذا نجيبو ليك انا ماغادي نمشي من المغرب حتى لبعد غذا..سو غذا يكون عندك...
ادريان : بشار...
بشار"ضار مخنزر" : مرتي مامرتاحاش..(هزات هانزادها حجبانها وشافت نيشان لسيارة فين كاينة حبيبة ورجعت شافت فيه)..
مابقاش عاود هضر..ركب بلاصتو وديمارا طوموبيل مخليهم بلاكة خصوصا هي الي ماعطاها تا كلمة...يمكن حسو بيه انه وصل لطوب ماكايبيغيش يهضر فهادشي...كسيرا قدامو تا تحكو روايد وزاد خرج من تما مخلي وراه روينة ديال بشر سهرانين وشطيح عالجهد والسهرات خدامين...شدو طريق فداك الليل كان صقيييل كل وفاش كايفكر...حطات راسها على زاج..حتى ضربو نص وهو يدور عندها...بانت ليه ساهية تاني..كلشي تجمع عليها بقاات الخلعة را خلعها فاش انفاعل..ومن اخر حفلة الي وقع فيها داك المشكيل غاتكون خافت تاني...حتى نطق مباشرة بدون مقدمات..
بشار : ماعندك مناش تخافي ولا تخلعي..الحوايج الي ماكيعجبونيش ماكانعرف نرياكطي عليهم عادي..بنادم فاش كايكون عارف ملتك معندكش مع صداع راس وتبرزيط مايديكش ليه...تبعكيك فالخدمة الي كاتكون ناقصة عدو ربي نلگاها...
حبيبة"كاتسمع ليه وكاتفكر كيفاش كان مبرزط وحتى فاش دخلت هانزاده تبرزط" : كان عليك تعلمهم قبل هاد البلاصة ماعاجباكش..هذاكشي علاش گلت ليك داك نهار تفرج فيها كيف دايرة بلاصة عامرة ب لانيماسيون..فيها سهرات وفيها الموسيقى مجهدة وبنادم كثير...
بشار : هاد النم كااامل ندوزو بجغامي الما.."هزت راسها بلا متشوف فيه"..هزيت ليك الهم نتي..مامرتاحاش ماهانيش عليك..
حبيبة"عوجات فمها وهزت كتافها" : ماعنديش مشكيل..كنت نصبر واخا هاكاك..
بشار : ديك كنت نصبر الي مبرزطاني..ماباغيش كنت نصبر ماباغيش شي حوايج ديريهم بزز منك..كوني ليا براحتك نتي الباقي لهلا يردو...ماتزيريش راسك على شي حوايج فوگ طاقتك يا حبيبة..هادشي الي مايعجبش ملتي هادشي...ومانبغيهش ليك..الباقي ليه الحل...
سكتاات حبيبة وهي كاتسمع هضرتو الي خلات قلبها يضرررب..عاوتاني هي همو وعاوتاني هاز ليها الهم وسط هاد شي الي وقع هضرتو بينات انه هز ليها هي الهم ...شي حوايج او بزاف ديال الحوايج كايبينو انه هي مركز اهتمامو..بغاها تكون مرتاحة ولو على حساب حساب صحتو النفسية واعصابو...رجعات تفكرات البنت الي كانت كاتشوف فيه بطريقة فشكل...شوفات الي المكلخ غايلاحظ انهم شوفات اعجاب وحتى حب كبييير..حيث الجلسة كلها وهي غير كتشوف فيه بجرأة ماحيداتش عينيها عليه...حتى ضارت عندو وهو يدور عندها هز حاجبو حيث كانت باينة بغات تقول شي حاجة...
بشار : اش كاين ؟!..
حبيبة : والو.."ورجعات ضارت كاتشوف فزاج"..
يتبع...
التعليقات
لا توجد تعليقات بعد، كن أول من يعلق.