محتوى القصة
يلاه غايهضر اتا بان ليه هاشم داخل مخنزر فيه ماجا فين يهضم اتا بان ليه بشار وراه خرج عينيه وتزاد ليه الزايد مع دقات قلبو تا كحاز بلور وزير على ايديه وولا يقول هادي نوبتي ورا نور الدين يصفيها ليا...ساعاك مادوا بشار ماتحرك خلا وراه قاع دار تركش بالخلعة الصواني تهزو والي هرب والي واقف يطل يتسنى شي مصيبة توقع...
دخل وريح حدا عيدة مفرق رجليه عاقد غوباشتو على جهدها لكن عينيه كانو كيشوفو فنقطة بعيدة...
عيدة : گول اش عندك نساليو هن...
سيحمد : تخلات ليا عشتي على يدو...اش لحگو ليا...حگرني وسلخني سلخ عمو ومادويتي...
عيدة : درتيها زينة ياگ كلتي هبيل ومنديو عليه ؟!..علاش خربتي ليه بيتو نتا ومرتك فاش وصلك وفاش ضرك كاع نحدو هادشي من ساس ؟!...
الي جالسين برا تقريبا كلهم ناضو يسمعو على وذنيهم الا سعيدة الي طلعات مع بناتها خلاتهم مع يوسف باش ميسمعش شي حاجة...ونزلات كاتدعي ماينوض صداع...وتوريا الي بقات جالسة حيث ماحملاتو يجي ماحملاتو يدخل ومتمنية ينوض شي صداع هاد المرة باش مايجيش لخطبة ودوزها...خايفة تحاشم مع خوها عبد رحيم ومرتو الى ماقبلاتش اشراق بخوها...وفنفس الوقت مابغاتش تحاك باش ماتنوضش صداع وهي دابا ففترة الحكم ديال السجن غير نافذة...
مليكة"بالحس" : اش يگولو ؟!...
كريمة : داويين عما سيحمد دار شي حاجة...
مليكة : هاويلي شتهم قواو على سيحمد وبزااااف...
مباركة تاهي طالقة الوذنين...واخا مافاهماش...اما سبحمد كان يسمع اش تقوليه عيدة وماقادرش يهز عينيه ناحية بشار خاف منو...شوية وهو يسمع بشار تيليفونو صونا جبدو بانت ليه حبيبة كايشوف عاقد غوباشتو...قطع عليها ورجع خشا تيليفونه كايسمع اش كايقول سبحمد بغاه تايقول اش عندو والله ماهضر ولا قال اي....
سيحمد : المشكيل بيني وبينو اش وصلو لمرتي تا فرقني عليها...
هاشم"حرك راسو" : واش المشكيل الي بينك وبينو ؟!...
سيحمد : ماعندي عماه مشكيل المشكيل بدا ملي ضربت اشراق...عادي نضربها راها بنت خويا...وانا عمها اشمن عيب فيها ياك نتا ضل تصمك زكريا فين عمري دويت عماك...
هاشم : زعما ماوصلتي الهضرة لنسيبو ماكلتي ليه اش كاين تا وقع هاد المشكيل ؟...
سيحمد : اشمن هضرة وصلت...
هاشم : كلنا عارفين اشمن هضرة (قصد الهضرة الي وصل محامي ل مولاي حفيظ...حيث هما ماعارفينش راه المحامي ولكن الي وصل كان دقيق يعني راه شي حد منهم وهما الي عارفين معدودين على رؤوس الاصابع مادام مكانتش توريا اذن هو)...الي لحگ الهضرة لنسيبو تا تفرتك ليه الشمل...
سيحمد : تدي تقليد ؟! ..
عيدة : ماشي نتا ؟..الي وصل الهضرة ليه فسبيتار علمونا جيتي عدو سبيتار وگلتي ليه اش دار ليك زدتي غرقتي ليه ضواصا...
سيحمد : هادي درتها وماكذبت ومن حقي...
كايهضر وقلبو بغا يسكت خايف لا تجيه شي دقة من حيث لا يحتسب حيث بشار دار رجل فوق رجل قفز حساب لبه غاينوض يصمكو ولا يخلطو جالس وسط الصيراط...
هاشم : الي لحگ هادي گاد على ديك...حنا هنا معدودين الي عارفين الواقعة..."كايدور ويهضر ويضرب ويقيس حيث عارف راه لاخرين كايسمعو"...توريا ماتبغي فعايل شوهة هي الي مشات خطبت وماتبغي يعرفو باينة لعما...
سبحمد"وسع عينيه وهز ايدو" : عليا بليمييين ماوصلت ليه حاجة...نحلف ليك باش مابغيتي..."عينيه كايلوبو وهادشي قشعو بشار الي صغر فيه عينيه تأكد انه هو الي وصل الهضرة لولة تا عرف بات حبيبة...وهاشم خلاص...كان تا حسام داخل جالس كايسمع ورسل لزكريا سولو واش جاي قاليه تال غذا عاد قال لبشار راه مكاينش ولدو حيث مابغاش يتصرف وولد سبحمد كاين...كايبقى باه ومابغاش يشوفو كايتجرتل"...
هاشم : ممم...
عيدة"هزات ايدها" : حسام موضي اولدي...
حسام : ها ؟ (تفكر واش موضي ولا لا تا قرنعو هاشم)... اه موضي...جيب احسام داك المصحاف (مصحف)..
سيحمد"خرج عينيه"...
حسام حرك راسو وناض لقنت ديال صالون مع طويل فين كايجيو ضياف...هز المصحف من بلاصتو فوق ديك اللعيبة ديال العود...كان لونه اخضر كبير...عطاه ليها باستو وهي تمدو ليه...
عيدة : موضي ؟!..
سيحمد : لا...
عيدة : ياك عاد صليتي...وراني شتك...شد...
سيحمد"صرط ريقو ومد ايدو وشدو قلبو كايضرب"...
عيدة : تحط ايدك عليه هاو حلف بالله راك مانتا الي لحگتي الهضرة...
عينيه بداو يدورو العرق تكب ليه على نواضرو...زيرر على المصحف...قلبو حس بيه كايضرب فنواضرو...حط ايدو ونطق بصوت شبه مسموع...
سيحمد : مانگدشاي نحلف اعيدة...بغيتي ثيقي هي هاديك مابغيتي ماعندي مندير هذا كتاب الله مالحگو واخا نكون بصح دايرها...بعدي الحلوف الحاجة راني ولدك واخا ماولدتيني من كرشك...خليني نحس بهادشي بلاصة مانحس راني ربيب...
ناض وقف ودار راسو هو المضلوم وهما ضالمين وهو يتيم وهما بالواليدين...هو المحگور وهما طاغيين...يلله بغا يمشي وهو يهز بشار راسو وشاف فيه...
بشار : ماصعيبش عليا نقسم عدو ربك...مريض مريض والقلم عليا مرفوع...رييح...
حط رجلو وهو يدور عند عيدة الي بقات فيه...حيث عرفوه كذب وهو مول الفعلة... وقف بشار جبد من جيبو باكية الكارو بعد لهيه وشعلو...
بشار "ضار عند عيدة" : عيدة...نغميني بسمية مول الفيرما فالرسم والوراق ؟....
عيدة"حركات راسها" : بشار ولد نور الدين بن الهاشيمي...(هاشم خرج عينيه وحسام حل فمو هادي عمرهم كانو عارفينها فقط عيدة وعبد القادر وبشار الي عارفين)...
بشار"ضار عند سيحمد وربع ايد وايد سف بيها الكارو وساط دخان كثييير" : لحگ شرواطك وتهز تقاود عليا من هنا...
صدمة قوية ضرباتهم كاملين الي تما الا الي عارفين والي اكيد بينهم بشار وعيدة وعبد القادر الي مكاينش معاهم دابا...والي خرج حيث ماتحملش فعايل ولدو...قبل مايجي بشار هنا ويتواجه معاه طلب من حسام يجيب ليه عيدة وعبد القادر حتى هضر معاهم وحطهم بالصورة بمساعدة هاشم...
مليكة عينيها بقاو خارجين تا هزت ايديها ونزلات بضفارهم على حناكها نادباهم بقوة ممثيقاش اشنو سمعات...اما المعنى بالامر والي جاه طرد الوذنين ديالو تصمكو تاتسمع فيهم طنين قوي...
سيحمد"ضار عند عيدة بشوية بانت ليه حادرة راسها ومغوبشة حيث ضرها بزااف ماشي غير فبشار جبد حتى ماوقع لولدها وحك بزااف عالدبرة...عاد دور وجهو عند بشار وطلع عينيه شوي حتى وصل لعند لحية بشار مكملش شوفة فوجهو..ونطق بصوت مبحوح"...
سيحمد : تجري عليا من دار بويا ؟! سيبة هادي..
ماردش عليه بشار مابقى زاد حتى كلمة من ورا شنو قال...خدام كايكمي وعينيه مصغرين فيه...عارفو من لداخل راه مصدوم ويغلي...عارف اش غايجي مورا هادشي وما على بالوش...جملة قالها وغادي تنفذ سوا دابا سوا من بعد غادي يخرج عليه من رزقو...يلاه كايهضرو حتى دخلات مليكة عبنيه خارجين مابقات صبرات تا وقفات عليهم خصوصا قدام امها...
مليكة : مي !! اش هادشي سمعنا ؟..
عيدة"هزت راسها مغوبشة فيها" : اش لحگك هن ؟!..سيري بركي فين كنتي وخليهم بيناتهم...
مليكة"هزت حاجبها وخنزرات" : ايه يدخل هاشم الي صغر مني وتبرك ختو الكبيرة برا ؟!....ولاو صغار مالين شوار والكبار يتسناو الخبار...فين عمرك امي كنتي تحضري البراهش وتخرجي الكبار...
هاشم"هز حاجبو وضار عند حسام" : يا تا شكون البراهش انا ؟!..
حسام"حرك ليه راسو" : عايرت ليك مك...
هاشم"تگعد" : خدوج الشوكة ياك ماكاين باس ؟!..
يلاه بغات تهضر وهي تغوت عيدة مسكتة ليهم الفام ضارت عند مليكة وشيرت ليها تجلس بشوفة وصوت ماعاوداتش معاها لهضرة جلسات كاتنخصص بالفقصة باقي ممصروطاش ليها هادشي الي سمعات اصلا باقي ممثيقاهش وزادت بقا فيها خوها حيث جرا عليه ولد خوه....قلبها كايضرب ود.مها يغليييي بالغدايد...الخبار وصلات لتوريا من عند كريمة الي سمعاتها تا سعيدة...
سيحمد"راسو كايفيبري وهو كيشوف ومغببببش ريقو نشف باقي ممثيقش ماباغيش يثيق هادشي الي سمع...رجع ضار عند عيدة" : عاجبك هاد الحالة ؟!..نضتي كتبتي ليه رزق بويا باش يجري عليا ؟ هذا مانسوا عدك...
عيدة"بصوت عالي ماعجبتهاش هضرتو الي كان فيها ضلم ليها" : اش هاد الكلام ؟..
سيحمد : هذا ما بان..(منخرو كايفرفر ماكرهش ينقز على بشار يقت.لو)...
عيدة : فين عمر بوك كان عدو شي ملك تانحكم فيه ومن فوگ بالضلم !! بوك لو عدو ملك راك تسال فيه جوج حقوق نتا وخوك ( كاتعني شرح الاية الكريمة «للذكر مثل حظ الانثيين»)...
بشار كايكمي ويسمع مخليه يبرگم على خاطر خاطرو تايسالي العام طويل...واخا را كتيحس بتيليفونو كايفيبري فجيبو ومخليه...عض على شواربو وهو كايسمع ليه.. فلحظة هاشم هز عينيه فبشار وبانت ليه شوفتو فشكل ولا خايف لا يمشي يفوت فيه شي ضربة على غفلة...داير فبالو يستعد...
عيدة : عمرها كانت دار لا بوك لا داري...دار بوه حقو فيه مكتوب بيع وشرا من عد بوه...
اتا سمعو شهقة قدااش ضارو شافو فمليكة الي حطات ايدها غلى صدرها بخبطة...الحق يتقال كلهم تصدمو حتى من هاشم...هاد القضية مكانتش فراسو مكانوش عارفينها كلهم...حيث نور الدين هو الكبييير فيهم...وخرج يخدم على صغر بزاف ماكانوش عارفين ان الفيرما او البلاصة فين ساكنين هي ملك نور الدين وكتبها لبشار بيع وشرا...باقي مكان عندو تا يوسف...كان غير باشر وحيدو...
مليكة"بغات تبكي"...
عيدة"هزت صبعها زعما ندوي بالحق" : بالحق ندوي وبالباطل مانتبلى...(ضربات على صدرها) الفيرما من طريف لطرف تشرات من فلوس نورالدين...عطا فيها د.م جوفو...وجمعنا فيها حنا واليديه...سكنتنا مكانت هن سكنتنا لولة كانت فدوار لداخل...دار الي عطينا لامام ديال جامع هي فين كنا...كان شاري البقعة الي فيها البنية لولة وكل شوي كان يشري طرف تا وصل لهاد الخير الي حنا وسطو...نهار تزاد عدو البكر دازو سنين وجا عدي انا وباه تشاور عمانا..."وسعت عينيها" نعارضوه فرزقو ؟ نوگفو ليه فطريگ ؟..نوا ودا الرضى وقضى غراضو...باقي نعقل عليها كي دروك...وباقي صوته الله يرحمو (صوتها تقج وبشار تزير واخا مابينش وهادشي ماريحش هاشم الي واخا مصدوم راد لبال لبشار)...
عيدة : مي باغي نكتب لبشارة لبشارة الخير...(نزلو دموعها)...الوقت بانت ليا صعيبة عليه وجايه ما صعب...ماعرفتو حس ماعرفتو عرف الگلوب الكحلة الي ضايرة بيه...ماعرفت والي حرن بغا يكتبو گاليا سوا بغيتو ولا كرهتو كاتبو ليه كاتبو بعلمكم ولا وراكم...ونعطيهم العاهد واخا نكتبو ليه راها تبقى دار الواليدين...داركم اميمتي...
مابقاتش قدرات مليكة تزيد تدوي...تزنزن ليها راس والفم...بغات تنوض تجدب بغات تدير صبعها فوذنيها وتغوت...مكانتش عارفة مكانوش عارفين ان هاد الفيرما اصلا ملك نورالدين...مكانوش الواليدين كيقولو ليهم شي حاجة حيث حلو عينيهم على فين ساكنين...ماجات فين تستوعب تازادتها خبر اخر...
عيدة : الصليح الي صلحناها بفلوس بشار...كبرات بفلوس بشار والماكن بفلوسو...الفيرما وفدادنها ديالو ملكو بيع وشرا...والى حساب ليك ماعندي والي عنديي... خفتي ماتورثي والي غا تهناي عندي لاملاك الي تم ماتحرگ...ارا ماتورثي نتي وخوتك...
المعنى من هضرة عيدة انه عندها هي املاكها...ماشي غير اراضي عندها حتى المعصرة ديال زيتون ومطحانة ديال الدقيق...عندها ديور فدوار تريكتها...واراضي بعيييدة كلها صالحة لزراعة والي فيها زيتون والي فيها القمح....والي فيها البيار...حيث من عائلة لباس عليها وحيث كانت وحيدة امها ورثات منها واخا عندها خوتها من باها ماشي اشقاء...ورثات من باها تاهو الي كان من عائلة لباس عليها...شكون مايعرفش عائلة الصافي الي اصلا منها بابات حبيبة...كاملين معرفين تريكة خانزة فلوس...بشار كتب ليه نورالدين الفيرما ملي كان عمر بشار صغير...هادشي الي صدم حتى توريا حيث ناضت كاتسمع هضرة عيدة...صدمة كانت قوية بالنسبة ليها لجمات ليها الفم وسدات ليها الوذنين تا حسات بالدوخة شداتها...
هادشي كااامل سمعوه وكاملين تصدمو...وبشار واقف ببرود كما الكارو لولاني وتبعو ثاني وهو واقف حدا شرجم مربع ايديه ومتنغم بهضرة عيدة واخا را ذكرات شي حوايج قلبو اصلا مقسوم عليهم وعض فالنفس باش كمدها وصبر وبقى محافظ على هدوء ديالو...
ملامح مليكة المصدومين مايجيوش قدام ملامح سيحمد الي زادو هم وفكراتو واخا عارف ان باه ماعندو ملك اصلا وكان طامع فهاد الفيرما قال را مشارك فيها هو وعيدة...ودابا كمل ليه الباقي...عيدة الى توفات غادي يورثو فيها غير ولادها وعبد القادر فحالة سبقاتو هي فالوفاة...
سف من الكارو مزياااان تا خرج دخان من نيفو وفمو لاح سبجارة برا وهو يدور جاي كايسوس فايديه...ووقف خاشي ايديه فجيابو وشاف فسيحمد مكمش فيه حجبانو...كلمة وحدة مازاد عليها ثانية وبنبرة مافيهاش تخرشيش...
بشار : تگلع...
زير سيحمد على ايديه...كايحس بقلبه بغا يسكت...سطولة ديال الما تكبو عليه ولا كايحس براسو غايسخف ويطيح...عينيه بغاو ينقزو منهم دموع بالفقصة....كون دخل سوق جواه كون ماكان خبيث كان يلقى الخير من بشار...لكن حك عليه وبزاااف وبشار ماشي من نوع الي يخلي دقتو الى حك عليه شي حد مزييااان ودار ليه جرح صعيييب...مكينساش خصوصا ان سيحمد ماشي غير حك عليه...شتت ليه شملو وشتت لحبيبة شملها مع واليديها...
سيحمد"زير على سنانو وضار عند عيدة" : عندك گلب وصبر لهادشي ؟..ماعندك كبدة يا عيدة الي وليتي واگفة عما المسخوط...راضية بيه ومشبعاه رضى...رزاك فولدك وعاجبك الحال..."زاد لعندها وتحنى مخرج عينيه كيضرب فصدرو" ...خويا من با وحرگتو باقي فيا لدروك باقي بين عينيه مو.تو باقي بين عينيا تمغطيييتو وهو شابع د.مايات وحداه المسخوط (مشير بصبعو ناحية بشار)..كايضحك وشاد المكحلة ويعاود...عاجبو تمغيطة بوووه....
ماجا فين يكمل هضرتو حتى تهز من حوايجو ورا قفاه ودورو لعندو وهو يعطيه بروسية تا بانو ليه نجوم...غوتات مليكة بحر جهدها ووقفات كاتغوت...كريمة فبلاصة ماتجري دخلات عندهم وهي ترجع خرجات كاتغوت...
كريمة : واااا خالتي توريا....ورا شانق على عمو تاني...ويييييكيوييييك اخالتي ويييكويك....
ناضو حسام وهاشم لعندو يجريو بغاو يفكوه منو...وهو بلاصة مادافع على راسو طلق ايديه وعطاها لضحك باغي يستفزو وبشار ماشب من العاگزين...شنق عليه وتم غادي دافعو دفعة وحدة مخرجو من الصالون دوزو قدام توريا الي بقات مسمرة كاتشوف فيه مخرجو كي جرتيلة....تا وصلو عند الباب وهو يدفعو بجهد لاحو...على شوي يجي على فمو...وقف سيحمد وضار كايشووووف ناحيتو ويشوف وراه هاشم وحسام كانو مغوبشين...ماعجبهمش الحال لهضرة الي قال...حيث لعب على الوثر الحساس حك على جرح عمرو ما برا اصلا باش يفتحو غير مازاد دبرة...وعارفين ان بشار هاد الهضرة كاتجهلو كاترجعو انسان غير سوي فواحد اللحظة....
مليكة رجعات دخلات عندها تبكي وتنخصص...ماعجبهاش الحال وباقي كاتنغل فيها الصدمة انهم عايشين تحت خير بشار....
مليكة : صافي مي بردتي...عجبك الحال جاري على عمو يا مي (تبكي وتنخصص)...هذا هو مسواه...
عيدة"الصمت"...
مليكة"كضرب فصدرها" : باركين عدو ويدير فينا مابغا دروك جات عمااااه...
عيدة"هزات فيها راسها" : راكي عمتو...
مليكة : كي جرا على عمو گاد يجري عليا تانا وعلى هاشم...
عيدة : درتي ليه باش يجري عليك ؟ الي حك نحاس يلگى الباس...ودروك تسكتي عليا من البكا وشكا...وتلجمي فمك زديري هادشي عمرو تسمع ولاكان...
مليكة : مانبركشاااااي فمكان ماليه مانبركشاااي...لا بغيتك نعيط ليك يجيبوك ليا نشوفك...
عيدة : الي بغاني هنا مكاني...الي مابغا ليا ولد ولدي نور الدين مابغا نورالدين ومابغاني انا والى عتبتيها يا بنيتي وماتليتي رجعتي راني غاضبة عليك ليوم دين وعمري كان عندي بنت اسمها مليكة...
بغات مليكة طيح تركل ليها بالفقصة شداتها من اليد الي ضاراها حيث كاااملين العروبيات عندهم رضى وسخط شي حاجة مقد.سة..ضارت وخرجات من صالون طلعات لفوق تبخ وتنخصص بغات تنطح راسها...
عيدة"بصوت مرتفع" : كرييييمااا...زيدي ديني برا...
تسند عالسيارة...عاض على سنانو من لداخل...كاينهج مغززز لدرجة هاشم كايعيط ليه وهو ماكيسمعوش...بقى مدة وهو مزيييررر والحالة راكباه تعزل على العالم لمدة دقيقتين حتى غمض عينيه ورجع حلهم وهو يدور عند هاشم...قرب ليه وضرب ليه فوق كتافو ونطق بجملة مفسرة لهاشم كلشي انك جالس فداركم دار باك ماشي عندي...دار راس هاشم بين ايديه وزييير عليه...
بشار : دار الواليدين اهاشم..دار الواليدين...ماشي داري...(زعما حسب راسك فداركم كي كنتي)..تسال فيها كثر مني ياا هاشم وانا ضايف عندك...
هاشم عينيه غرغرو...عارف بشار بلي مابغاش يخليه يحس ملي عرفو هادشي انه جالس عندو بغا الامور تمشي كيما هي...غير اضطر يقول هادشي باش يحدد سرعة لسيحمد يردعو يعطيه تيساع حيث حك عليه بزاف...هاشم واخا مايقوليه بشار والو مكانش غايتقلق لانه عارف المعدن وعارف هاد الانسان قسات عليه الدنيا بزاااف...
ماجا فين يجاوبو طبطب ليه بشار على حناكو وضار ركب فالسيارة وكسيرا بجهد تاتهزات...كان بغا يتبعو حسام وهو يوقفو هاشم وقال...
هاشم : خليه عطيه وقتو...البغل قوا عليه بزاااف الهضرة...
حسام : مشكيلة كحلة مع هاد سيحمد...
هاشم"ضار مغوبش فيه" : حساااام ؟!..
حسام"تأفف" : عمي سيحمد...
هاشم : يكون كيما كان كايبقى عمك ماشغلك فاش دار بينه وبين بشار ومو...
حرك حسام راسو ماعاودهاش مع هاشم حيث فاش هاشم كايدوي بجدية مكيهزش فيه العين لا هو لا سعيدة الي كانت جايا دابا شادة فعيدة...تا وصلو لعندهم وشافت سعيدة هنا وهنا..
سعيدة : فين بشار ؟!..
هاشم"حرك راسو زعما خليه"...
سعيدة"تنهدات" : فم العار خايب...
عيدة : وتبعو وليدي ياكما تبع عمو...
هاشم : لا مايلحگوش غا خليه مشا يبدل ساعة باخرى...
تنهدو بحزن خصوصا عيدة الي واقفة وخاطرها مضرور بزاااف حيث تاهي هضرة سيحمد هرست ليها الخاطر حكات ليها على جرح...تا شوي حسات بدوخة وهي تزير على سعيدة الي ضارت بزربة وهاشم طار لعندها شدها مع حسام الي شد بلاصة سعيدة ودخلوها لبيتها...دازو من حدا لاخربن لقاو غا اشراق وكريمة...وقفات سعيدة...
سعيدة : فين توريا ومباركة ؟!..
كريمة : خالتي لفوگ طلعت لبيتها ومباركة دخلات تاهي لبيتها...
حركات سعيدة راسها بلا حول...ودخلات لعند عيدة تشوفها وتعطيها تشرب الما ودواها...هادي حالتهم كلشي مصدوم واخا وقع هادشي باقين مامثيقينش الهضرة...كريمة طلعات لفوق تعيط لرضوان وتخوي لبه المزيودة...واشراق طلعات تاهي لفوق لبيت ديالها...ماعندها سوق يمكن فرحات حيث هادي دار خوها وهادشي ملكو...توريا كي طلعات لبيتها سدات عليها وجلسات عند رجلين ناموسية جامعة ايديها دايراهم على فمها وتتنهج وتنفت...عينيه خارجيييين هضرة عيدة دور وتعاود...نور الدين كتب لبشار الفيرما وماقاليها والو !!...وهي الي كانت تشكي ليه عليه راه مكيسمعش وكايتمرد عليها...وهي الي عانات فولادتو وهي الي كانت تبكي ليه عليه وتقوليه راه مفاوت فعقلو ما ثيق بيه....امتى كتبها ليه وعلاش كتبها ليه...يعني هي دابا جالسة فدار ولدها ماشي دار راجلها...
واخا قاليها عندي مانقضي واخا هناها راه ماغايكون والو لكن قلبها هي ماهناهاش...عشراها مع بشار خلاتها تعرف اشنو غايدير...ضروري مايتصرف بشي حاجة وضروووري مايغبر ويطول لكن هي هادشي بغاتو يحيد منو بغا يشكي ليها يتعلم فبلاصة مايخرج لشي بلاصة يبرد فيها حرو يبردو قدامها...بغات تشوف ضعفو قدامها ماشي يشوف ضعفو الخلا ولا الحيوط الي جالس فيهم وساد عليه...بغات تعرف اش غايدير...حيث مابقاش بوحدو ولات معاه هي...مراتو الي كان غايكون عندهم ولاد وممكن غذا ولا بعدو يكونو...قفزات من صوت التيليفون كايصوني...
حبيبة : الو بشااار...
بشار"الصمت"..
حبيبة : بشار !! كاتسمعني ؟ فينك...
بشار : بقى بالك معايا ؟!..
حبيبة"حركات راسها بزربة" : اه..بزاااف...(صوتها تغنغن) تعطلتي بزاف فينك...
سكت ماجاوبهاش...اول مرة تسمع صوت انفاسو كانو مجهدين واضلين لعندها...باينة كاينهج واش بيه شي حاجة ولا حابس راسو على شي حاجة !!...يلاه غاتهضر تسولو حتى قاليها " شوي ونكون تم"...هادي الي قال موراها قطع عليها...تنهدات مغمضة عينيها عارفاه تزير من جيهة عمو واخا ماعارفاش اش وقع بالضبط...حاسة بيه ماشي تال لهيه...ناضت من البالكون ودخلات لبيت حطات تيليفونها وخرجات لكوزينة...ماعرفاتش اش دير فالعشا بغات توجدو يدخل يلقاه واجد...يحس بلي عندو مرتو كاتسناه يجي يلقا العشا ويلقاها هي واجدة بصدر رحب...بغات دير اي حاجة تخليه مرتاح حيث عرفات تاهي ان الحياة قسات عليه بزاف...
دازو ساعتين بالحساب...دازو عليها هي بالعام...حسات بيه تعطل بزاف...بالانتظار...يلاه طفات على طاجين وحطات البول الي فيه صالاد ديالو خفيفة...حتى سمعات الباب تحل..خرجات بزربة لعندو ووقفات كاتشوف فيه داخل ماشي تالهيه...
حبيبة : بشار...جيتي..
حرك راسو وحط ساروت فوق رخامة وتسند عليه حادر راسو...مهلوووو..ك باينة فيه وطبيب مايحيدها...قربات لعندو وحطات ايدها على ضهرو...
حبيبة : مالك !؟..
هاد "مالك" بالضبط كانت خاصة بشار...ماشي هو الي يبقى يقولها كان خاص شي حد يقولها ليه كان متمني مو الي تحط ايدها على ضهرو وطبطب عليه...تعطيه رضى والحنان كان غايكون لباس...هز راسو لفوق وضار عندها...
بشار : جريت على عمي وسلختو ثاني...
حبيبة"وسعت عينيها"..
هز راسو ومشا ديريكت لبيت ودخل...تبعاتو...حيد تيشرت ولاحو...ضار هنا وهنا ماعرفش اش باغي...دوز على لحيته ورجع حك راسو من لور بطريقة غريييبة...كايمشي تالهيه ويرجع...ماعرفش اش باغي اصلا اش باغي يدير كايحاول ما امكن يصبر ومايهزش راسو ويخرج ومايهزش شي حاجة يضرب بيها راسو يبرد الحر...تا وقفاتو حبيبة...
حبيبة"عينيها مغرغرين" : بيتي شي حاجة...
بشار : لا..."قرب لعندها مزيان"..سلخت عمي اش بغيت كثر ؟..
حبيبة : ياك گلت ليك بعد منو اه ممزيانش...
بشار"حرك راسو" : ماكانش يلحگني كون ما قت.لت ليه خوه ماكانش..."خرج عينيه" زعت كاااامل ضاير يااا حبيبة حيث صفيتها لبويا...(عينيه ولاو حمريييين جغمة د.م)..فراسك راني قت.لت با ؟!...
حبيبة"نزلو دموعها دارت ايدها على فمها وحركات راسها" : فراسي..ماشي لخاطرك عارفة هي مكتاب ابشار...
بشار"خبط ايديه" : عندهم مامكتاااااابش عندهم درتها بلعاني ورزيتهم فيه...(شير لراسو) انا ماعندي گلب (دور صبعو على راسو) حيث مريض درتها...
كايحرك راسو بطريقة ثقيييلة وعينيه خارجين مكيرمشوش...يمكن اول مرة حبيبة تشوفو فهاد الحالة...اصعب حالاتو...وهذا هو الضعف الي بغات تشوفو فيه غير هي...يبينو ليها غير هي وناس لاخرين يبان ليهم جبل مايهزو ريييح...ماحست بيه تا قرب لعندها وشدها من دراعها مزييير عليها تاحسات بيه غايتقسم...تاوهات بصوت مكتوم...
بشار : مادرتهاش بلعاني...(غوت بحر حر حر جهدو واعلى ما فصوته تا غمضات عينيها مكمشة عليهم وبدات تبكي)...وراني مادرتهاااااش بلعاني يا حبيبة....ورااااه بويا هذاااااااااك... عيني تحلو عليه... عقلي وگلبي تلگاي فيه بويا....شكون الي يسخا بالواليدين شكون يسخا بالبات...ماشي بشار الي يسخا بنورالدين...شارب من عندو رضى ونسخا بيه ؟...يغبر عليا بالشهر وجوج لحگ عليه فينما كان لسربة...ونصفيها ليه ؟!.ماقتل.توش بلعاني...حر داك النهار فگلبي ليوم دين يا حبيبة...
طلق منها وبدا يضرب فراسو بايديه تقولي غايقسمو....كايحاول يخرج منو شي حاجة كانه كايحاول يطرد داك النهار الي عذب ليه صحتو النفسية لدابا...قربات ليه بزربة كاتحاول تشد ليه فايديه واخا ماتفدرش عليه كاتحاول حيث قسم ليها قلبها....
بشار : نلحگ عليه باش يتهنااااو ؟..(خرج عينيه الي لي شافهم يقول ها دموع غاينقزو منهم)..يطردگ لعدو ربي العرگ فالراس ويتهناااااو....نغميييني اش ندير...
شد راسو بين ايديه مابقاش صبر لصداعو...بقا غادي تا وصل عند الحايط وهبط جلس فالارض...شاد راسو وكاينهج ينهج تا جلسات حداه فالارض...ماهضراتش معاه خلاتو قال اش بغا وعبر...حدها وقفات على ركابيها باش تقاد معاه وشداتو ليه راسو قرباتو ليها حطاتو على صدرها وعنقاتو...كان اول حضن كايلقى ملي كاتجيه نوبة ديال الغضب ولا مرضية...شوية وهي تسمعو نطق بصوت مبحوح بجهد...
بشار : لوقت الي نسمع البركة فراسك على بويا ونسلم العزايا...سدو عليا بين الحيوط...نعتوني بالمريض ونزلو عليا بالسخط...
عمرو ماينسى داك نهار...ولا يتمحى من حياته كانت ولازالت وستبقى نقطة سوداء واخا يستمر فالعيش بشكل طبيعي...
تسندات بايديها على البوطاجي كاتسنى فكاس القهوة يعمر من الماشين...اول مرة تشوفو بهاد الضعف...واول ماتعرفش اشنو تصرف معاه...مالقاتش من غير انها تسكت وتعطيه وذنيها...يعاود يشكي يخرج الالم الي فيه لداخل...منزلة عينيها وهي ساهية كاتفكر اشنو وقع قبل لحظات...كيفاش كان كايعبر بديك الطريقة من الحر الي فيه...كيفاش بانت فعينيه الي كانو حمريييين بجهد...صعيب عليه يبكي و ماكانش ساهل انه يعبر...جهل بمعنى الكلمة والنقطة الاخيرة طاحت فالكاس وفاض...تنهدات كاتمسح فعينيها من دموع...هزات الكاس دارتو فبلاطو مع الما وخرجات حتى بغات تدخل البيت وهي توقف...حطات بلاطو تما ومشات لدوش هزات من بلاكار فنيد ديال راس ورجعات لكوزينة هزات كاس نقي عاد رجعات لبلاطو ودخلات لبيت...ضارت جيهة لبالكون لقاتو جالس...الكارو فايدو شاعل وعينيه سارحين عقلو ساهي ماهواش هنا...دارت ليه الفنيدة تشتش عاد مشات لعندو حطات البلاطو وجلسات حداه...
حبيبة"حطات ابدها على دراعو كتمرر عليه بلطف ومواساة" : شرب دوا تالراس يتنفس عليك...
مكانش الرد من جبهتو...غير كيشوف وصافي...الي شاف تغوبيشتو دابا والي شاف جلستو غايقول راه ناوي على شي خزيت...عاودات حركاتوو...
حبيبة : بشار...
غمض عينيه وحلهم دوز بايدو على شعرو بتعب..مافيهش مايهضر كاع..عقلو مبرزط كاع داكشي الي خرج رجع عليه بالسكات...بلا مايجاوبها هز الكاس وتكا عليه دقة وحدة وحطو...عاود هز كارو من باكية وشعلو...رجع راسو لور وغمض عينيه...بقات تشوف فيه وتشوف فحالتو الهضرة ماكيهضرهاش وعاذراه...ماعارفاش كيفاش تصرف كيفاش تواسيه دابا نيت...ف تصرفت بطبيعتها وشنو ملا عليها قلبها قبل من عقلها...عضات شفايفها وقربات بالكرسي حداه...خشات ايدها تحت دراعو ولاتها عليه وحطات راسها عليه...هذا الي عرفات مادير...شوية ماكاملاش زوج دقايق حتى هز دراعو هزت راسها وهي تفاجئ بيه قرب ليها راسها وحطو على صدرو...حاوطها بايديه...نزل راسو باسها فراسها بوسة طويييلة وايدو طبطبات عليها...بقاو بديك الوضعية شحااال حتى واحد فيهم مكيهضر...هاد الحظة بالضبط مكتبغيش الهضرة...مكيقدرش فيها الواحد يقول شي حاجة...فترة كاتسمى او كاتكون فحال الاستراحة ما بعد طوفان المشاعر...ما بعد انف.جار بركان...كايبقى الانسان يسترجع اشنو قال شنو عاش...اش دار قبل قليل او قبل ساعة...غير بشار اما هي رجع بالها غير معاه لا تجيه لكخيز حيث الي شافت منو خلاها دير بالها اكثر وبنسبة كبيرة انها طيحو...لكن حاليا واقع العكس...فقط مهدن وسااااكت...خلاتو على راحتو مخشية فيه ومعاه والمهم حداه والمهم يحس انها معاه فكاع حالاتو...
شوية حتى تگعدات ووقفات...حطات ايدها على كتفو...
حبيبة : شوية راسك ؟!..
بشار"حرك راسو"..
حبيبة : براكة عليك من هنا...بايخصك تاكل شي حاجة وتكا تنعس...
بشار"بقا ساكت شحااال عاد شاف فيها" : لا..تعشاي نتي...
بغات تبزز عليه يتعشا لكن حالتو مبينة كلشي...فضلات تخليه على خاطرو وحتى هي ماكانت ومابقاتش عندها شهية...
صباح يوم جديد...
السبعة ديال صباح...حطات كاس ديال قهوة ريحتها فايحة فالدار...هزات البلاطو وخرجات من الكوزينة ديريكت لبيت...لقاتو داير دراعو على عينيه عرفاتو فاق او يمكن مانعسش كااع ملي نوضاتو ينعس تخشات فيه واخا بين ليها راه نعس لكن كانت حاسة بيه ماناعسش غير مساير ومغمض عينيه...حطات البلاطو حدا راو وجلسات حداه...
حبيبة"حطات ايدها على ايدو مطبطبة عليه وبصوت حنوون صبحات عليه" : صباح الخير...
ماردش عليها لكن قبط ايدها وباسها فوسط كفها بوسة مطووولة وبقى شادها ليها حل عينيه شاف فيها عطاتو ريحة القهوة وهو يدور جيهة بلاطو...
حبيبة : عارفاك تاتسبقها هي لولة مع الگارو واخا بايخصك تنقص من هاد العادة باتولي ضرك بزاف...
بشار"بصوت بح" : ماشي مشكيل...
حبيبة : هي حاول...(زيرات على ايدو) كي صبحتي شوية...
حرك راسو ورجع باس ليها ايدها...هز ايدو لاخرى دوز على حنكها بصبعو وشد حنكها بكفو كايطبطب عليها...
حبيبة : نوض غسل وجهك وشرب قهوتك لا تبرد...
طلق منها وناض وقف كايطرطق فعنقو طرااق طراااق تقولي قسمو على زوج...قاد تيشرت ديالو وتحنى باس ليها راسها...هز الكاس شرب منو زوج جغمات وتم خارج ونطق...
بشار : ندوش...
كلمة وحدة وخرج...حركات راسها بتفهم وهي تهز البلاطو..مشات جددات القهوة حيث غادي يخرج يلقاها بردات...حطات الفطور فالطابلة...غير بان ليها خرج وهي ترد ليه القهوة جديدة...حتى شوية دخل عندها لابس حوايجو ديال زنقة يعطعط بالكارو وتيليفون فايدو كايبقشش فيه...جر الكرسي ريح فيه حط تيليفون وهي تحط ليه كاسو ديال القهوة..
حبيبة : بتخرج ؟!..
بشار : نشوف بلان الخدمة...
حبيبة"حركات راسها بارتياح...المهم مايمشي لبلاصة تنكد عليه يمكن حسن يرجع لخدمتو على انه يرجع يقابل وجوه تريكتو الي شاف منهم غير الحقد والويل...شافتو كمل فطورو دغيا وهي تحط ليه باكية دوا ديال لكريز ديالو وكحزات ليه الما..هزو شربو بدون مايتكلم اهتمامها بيه ولا طبيعي عندهم...حط الكاس وهز راسو شاف فيها...اتا دخل ليها فالموضوع بلا مقدمات...
بشار : فين عرفتي بلان "سكت شوي ورجع كمل" الواليد بالديطاي..
حبيبة"صرطات ريقها" : كيفاش..
بشار : شكون لحگ ليك l'histoire en détails ? (كيفاش عرفتي القصة بالتفاصيل)..
ماعندوش مقدمات وماعندوش وقت ولا تريث لشي موضوع...بغا يعرف منين عرفاات بالديطاي...اصلا فايت قايلة ليه راه عارفة القصة كاملة ديك الوقت ماحكرش وحيث هي تقبلاتو بكلشي فيه مافكراتش تسولو كيفاش وقع لهادشي حدها قالت ليه راني عارفة كلشي..ربع ايديه وبقى كايشوف فيها...عينيها دغيا غرغرو حيث تفكرات الملف الي قرات الي كانو فيه تفاصيل الحادثة على شكل تقرير وشكل صور...تقرير المرض ديالو...
حبيبة : عطاني بابا الملف ديالك الي (صرطات ريقها بغصة حزن عليه)..
بشار : كملي...
حبيبة"بغات تكمل وهي تزير..بدات تحك فقرفادتها ورجعات شافت فيه" : ضروري تعرف...
بشار"حرك راسو واخا لاحظ ملامحها الي تغيرو"...
حبيبة : ب بابا فاش مشيت لسيدي افني فين وصلتي عليا...داك صباح..فاش رجعت عطاني الملف الي عطاوه ليه...كان ف فيه كلشي...حتى من rapport ديال سبيطار فين كنتي..كلشي قريتو بديطاي...
بشار : باك..."هز حاجبو"...منين جاه داكشي ؟!..
ماجاوباتوش...اصلا مكانتش عارفة...ولكن كانت شاكة...شافت فيه وعوجات فمها...
حبيبة : ماعرفتش ولكن..
بشار : ؟؟..
حبيبة : خ احم خالتي توريا دوك الوراق كانو عندها "شافت كتسناه يجاوبها لكن تعطل حتى حرك راسو مثقل بالايجاب"...باقي تنعقل كنتي شحال هادي فاش بيتي نبقاو مزوجين على قبل يوسف حيث ديجا المحامي الي دفع الوراق انك كنتي تتعالج فشي مصح..ديك الوقت محكرتش ومارديتش البال حساب ليا هي تأزمتي مورا مو.ت باك الله يرحمو... وتعالجتي عادي ماكنتش عارفة هادشي كبير ( كاتهضر ومزيرة حيث كايجيها هادشي قاصح بزاف تهضر معاه فيه)..واخا اه تايبقى هي مكتاب وصافي..و..
حرك راسو وهو يضرب فوق طابلة وناض وقف كايقاد فتيشرت ديالو وكيقاد ساعة ايدو...حرك راسو تاني مثقل...
حبيبة : عرفتي شكون عطا لبابا الملفات ؟...
بشار : مازال "بشك"..ضروري نتگاد مع هاد البلان مايبقاش واگف بلاش...(تم غادي خارج ووقفات حتى ماشيا معاه...هز كونطاكت سيارة وباسها فجبهتها)..ماديريش بحسابي لغذا...
حبيبة : واخا..رد لبال راسك (ضدات ليه فدراعو وزيرات عليه وشافت فيه بعيون قلقة)..حاول ماتفكر فوالو وماتقلقش...
بشار"هز ليها ذقنها بصبعو وتحنى باسها فشفايفها..ونطق بنبرة هاازة شلااا" : ياا حبيبة راني مولف..
حبيبة"حركات راسها ب لا" : ماتبقاش مولف...هادشي من بعد بايرجع هي على صحتك...مابيتش نگوليك عاود ليا مابيتش نخليك تعاود ليا حيث گلتها ليك...انا عارفة كلشي..انا بيتك فينما تقلق دير كيف البارح...هادشي باينفعك وهادشي هو الي نفعني فاش بيت نرجع ليك خرجت اشنو تايضرني هنا (شيرات ناحية قلبها)...ماشي ضروري تعاود ليا اشنو وقع..ماشي بزز عليك تعاود كلشي تقدر تعاود شوي بشوي تقدر ماتگول والو...هي كون بيخير عافاك....
نزلات ليها دمعة...يمكن حيث بقى فيها بزاف...وحيث بغات دير اي تصرف تخفف عليه وبغاتو يفهمها شنو باغية تقصد...ماشي ضروري يعاود ليها قصته بفمو...يقدر يعاود شوي بشوي يقدر يعاود حاجة فوقتها المناسب وهاهي غاديا...المهم يكون مرتاح ويبعد على اي ضغوط يرجع بصحتو للوراء وهو يلاه ما ولى لباس...اما هو كلامها كان كبف البلسم على خاطرو..ماحدها كاتعاود وواحد الراحة كاتسلل ليه...بدا رتاح انه عندو واحد الانسانة كاتسناه يعاود ويلقى منها طبطبة وشفاء لكل جرح ماشي يعاود او مايعاودش كاع وتشوف فيه شوفة ناقصة...ولا تدعي عليه ولا تنزلو بالسخط الي تگهم منو تا گنف وعيا...ماحسات حتى شد ليها وجهها وتحنى على شفايفها ببوسة خلاتها رجعات راسها لور حتى رجعات بخطوة وشدات فايدو علاين طيح...باسها بوسة قوييية تا حسات بنفس مشات ليها...عاد طلقها وعنقها بجهد دافنها فيه مزيررر عليها...هذا هو تعبير عندو وهادي هي "لهلا يخطيك عليا"...
الرحامنة...
يلاه كي هزات كريمة صينية وهي تنزل مليكة لابسة كسوة شيبية صيفية بالكمايم جامعة شعرها بقراصة مشوك حيث مامصيباهش...وهازة صاك ديال ديال دراع فايدها حجم كبيير...تا وقفات ريحة بارفانها واصلة لتيكيوين...
مليكة"بنفخة" : هانا مشيت امي...
عيدة : فين ؟!..
مليكة"تنهدات" : غاديا عما توريا عند خوتها واحد اليومين كان عارض عليا نيت عبد الرحيم...نحيدها عليا گبل مايجيو ولادي ونمشي عماهم لجديدة...
سعيدة : وبركي تفطري...
مليكة"بدون متشوف فيها" : لا...فاطرين عدهم فطور 12...
عيدة : سيري را طريگ...
هزات مليكة حاجبها ماعجبها رد امها...وهي دور وخرجات تبعات توريا الي اصلا خرجات تسناها مابغات كاع تفطر معاهم...مليكة ماعجبهاش الحال حيث جراو على سيحمد اما رضوان كي وصلاتها ليه كريمة وهو يتردح من بارح كون صاب يجي ديك ساعة مالقى جهد...شوية وهي تنوض سعيدة شدات فعيدة داتها لبيت...اما مباركة باقي داخلة لبيت تهضر مع عبد القادر...
مباركة : الحاج وهاد الحالة تبقى هوك !؟..
ع.القادر"هز ايدو مغوبش" : اينا حالة ؟!..
مباركة : ولد ولدك جاري على عمو ؟ فين يصد ؟!..
ع.القادر : داكشي ماتبحتي عليه خليهم منهم لبعضياتهم الي حك على ثاني يلگاه...
مباركة : ياك الحاج راه ولدك...وداك دري زكريا فين يممشي ؟!..
ع.القادر : كي كان كي يبقى...هادي دار جدو وجداه ماعندو فين يمشي...
مباركة : ماسمعت راها دار جدو وجداه...حساب ليا فيرما ديالك تا ولينا جالسين عند ناس...
ع.القادر"غوبش وجهد صوته" : راكي باركة هن ماجاري عليك حد بدارك وحدا راجلك ...راكي بعيدة امباركة وخليك فيا وفراسك..ودخلي سوق راسك راكي غا بنت الناس..
وقف سيارة ديالو وطل بعينيه من فوق نضاضر الشمس كايشوف شكون الي غايكون كايتسناه...بانو ليه شلا ناس واقفين وشلا سيارات...سكت سيارة ودوز الخط لرقم السيد الي مكلف واصلا كان ديجا خدام معاه لهيه فبرلين...حك لحيتو كايتسنى يجاوب حتى سمع صوته...بالالمانية ".Bist du gekommen? وصلتي"...
بشار : شلا بشري واگف... شنو كاين هنا ؟!..
هو : les ingénieurs الي غايبداو معانا...كايتسناو اللقاء بيك حسب الاجتماع الي مقرر ليوم...
قطع معاه...سكت السيارة هز الكارطابل الي فيها لابتوب وشي وراق ديال الخدمة...كان غاينزل وهو يتفكى حبيبة...رسل ليها ميساج بلي غايكون فاجتماع مدة ديالو ازيد من ساعتين باش ماتبقاش دايرة بالها ولا عارفها غادي تبرزط عليه وتبرزطو معاها...عاد نزل من سيارة وتوجه لمدخل غادي مخنزر تقولي باغي يضارب داخل بنضاضرو...دخل نيشان لمصعد وركب رقم الطابق الاخير فين كاينة قاعة الاجتماعات...فاش كايدخل لخدمة يقدر ينسا شي حاجة سميتها مشاكيل...كايعطي انتباهو واهتمامو لهاد الخدمة علاش ؟...حيث كايدير شي حاجة باغيها كايعشقها كايدير اشنو قرا واشنو باغي...والجدية حاضرة عندو بمعنى الكلمة...
كيف تدها هو فالخدمة...حاولات حبيبة حتى هي تلاهي راسها...كل شوية تفكر اش وقع ليه البارح مكتحس غير بدموعها نازلين...جمعات دار وسيقاتها بداكشي الي عارفة عندها كاع الوسائل وعطراتها...دارت غديوتها خفيفة...حسات بالقنط وفنفس الوقت توحشات ماماها وباها...فهاد اللحظة كون كانو مصالحين كانت غادي طلبو يحطها عندهم حتى يكون جاي ويجيبها لكن...مالقات مادير مشات لدروس ديال البيرمي وبدات تراجع فيه غير باش تلاهى حتى ترجع لمدرسة وتدفع ليه دوز امتحانها....وهكا حتى داز النهار كل فين لاهي وكل كيفاش كايحاول يدوز ويتقبل اشنو وقع...سيحمد ماعرفوهش فين مشا كايصونيو عليه كايلقاو تيليفونه طافي....حاولات عيدة تزيد الحاج يعيط ليه باش يشوف فين هو بالرغم من اشنو دار وبالرغم من انها تتقلقات منو مابغاتش باه يفوت ولدو وحيث هي مربياه مورا ما توفات امهم...يعني حاسباه من ولادها ماشي ربيبها...
وصلات العشية فات العصر بشي ساعة لاروب هكاك...نزل من العمارة ديريكت لسيارتو داير تيليفون فوذنيه كايهضر مع سيد الي غايجيب ليه سيارتو من تما قاليه بلي الليلة غادي يخرج من المانيا...قطع معاه وركب فالسيارة...قبل مايكسيري دوز ليها الخط...
حبيبة : الو بشار...
بشار : هانيا...
حبيبة : بيخير...ساليتي ؟!..
بشار : شوي ونجي...خاص شي حاجة ؟!..
حبيبة : لا..ولكن "سكتات" صافي هي بيت نسولك واش تغذيتي.
بشار : حبيبة...
حبيبة"تنهدات" : كي بقيتي ؟!..
بشار : مزيان يا حبيبة مزياان...شنو كاين...
حبيبة"حدرات راسها ماعندهاش مهرب عرفاتو عاق بغات تقول شي حاجة" : والو...هي كنت بيت نمشي لحمام ديالنا نعوم..ولكن صافي نعوم هي فدوش هنا ولا نمشي لشي حمام spa من الي حدايا هنا...
بشار : قضي غراض بالي حداك تم..وقت ما بغيتي تحركي نديك..ديالكم من بعد...هانيا ؟!..
حبيبة"حركات راسها" : واخا...صافي..
قطع معاها واخا تقوليه ماخاص والو غايتقدا...شد طريق وغادي وساهي...عقلو كايفكر فبزاف الحوايج راسو عامر قلبو عامر...حياتو عامرة غير بالمشاكيل...يمكن النقط البيضاء فحياته دابا هما خوتو منهم يوسف وحاليا حبيبة...الناس الي خاص يعض فالصبر ويحاول يتعالج ويحاول يكون انسان شاد فراسو...حاليا او دابا زاد تفكيرو انصب ناحية حبيبة وواليديها...خصوصا دابا من صوتها وهي كاتهضر على حمامهم...عارفها توحشات واليديها...هاد المسألة بالضبط خاص الوقت تبرد ولكن ماخصش الوقت يطول ويزيد الوضع يتأزم...نقص السرعة وبلاصا جنب طريق...دخل من شاشة السيارة ودخل لكونطاكط...
الرميلة...
غير طابت القهوة دارتها فتيرموس فالبلاطو وهزاتو وهي تخرج...دخلات عليهم لبيت كانو غير هما العيالات هاد ساعة م.حفيظ ماكاينش طبعا ماشي لمحلات معاه فيصل...شوية وهي تدخل لطيفة شاظة تيليفون فايدها وبركات حداهم...
ناديا : ويلي تعطلتي...
لطيفة : اهي كنت تنهضر فتيليفون...اهيا سناء اجي گعدي هنا نتي كبي خلي مرت حبيبك ترتاح شوية...
ناديا : هي خليها هانيا...
لطيفة : واحد رقية شفتها ولفات سراغنة ههههه...
ناديا : غذا باتجي ان شاء الله...
حركات لطيفة راسها...ومرة مرة تگمز يحساب ليها الى الباب تدق...تا شوي وهي تسمع صوت لانتيرفون كانت بغات تنوض سناء وهي توقفها..وناضت هي...تعطلات شوية شي خمسة دقايق وهي تم جايا...
لطيفة : ناديا ديري شالك اجي معايا لاعگمي تكلمي...
هزات ناديا حاجبها مستغربة وهي تحرك راسها وناضت رمات عليها شال وتبعاتها مافاهمة والو...حتى وقفات وهي تصعق وسعات عينيها كاتشوف فيه واقف فاعگمي (عند الباب لداخل)..خاشي ايديه فجيابو حادر راسو وعينيه عاقد حجبانو..
ناديا"شافت ف لطيفة الي كانت حادرة راسها ورجعات شافت فيه مخنزرة" : ياك لباس ؟!...
لطيفة : ناديا "شافت فيها" خليه يهضر معاك قبل مايجي الحاج...
ناديا"بانفعال" : فاش ؟ هضرتي باتكون بهضرة الحاج (زعما بحال بحال)..
بشار"هز حاجبو" : على بالي الأم رطبة شوي (زعما الام كتكون حنينة)...
ناديا"هزات حاجبها تاهي": راك مجرب ملي تقصاح...(زعما راك مجرب مك وقصوحيتها)
بشار"حك شنايفو بسنانو كايحاول يدير عين ميكة على هضرتها" : عيبك بعيد خليه يبقى بعيد...وكوني نتي حسن...
بقات كاتشوف فيه مالقات ماتقول حيث بصح الى جينا نقارنو توريا ديما عيبها قريب وماخصهاش تحطها فمجال المقارنة حيث واخا هكاك كاتبقى مو...وحيث ناديا نهار عرفها بشار ماعمرها كانت خرجات ليه العيب مكانتش هاكا كان ديما الصواب هي بلاصتو وكان لسانها مافيهش العيب...من ناحية عاذرهم وداير بحسابو ممكن يسمع هضرة قاصحة وممكن يبقاو رافضين...داير بحساب اي حاجة وبحساب هضرتها عارف اش غاتقول...
كانت بغات تجاوبو وهي تقرب ليها لطيفة شداتها من دراعها لور ونغزاتها...
لطيفة : ماشي عيب اناديا خلي السيد جا بايهضر معاك..(ضارت عندها وهي تغمزها مخرجة عينيها شوي) نادياااا...
ناديا"دورات راسها وعينيها كايشوفو بنص عين ناحية بشار ونطقات بشوي" : الحاج الطيفة شوي وبايجي راكي عارفة...مابينا مشاكيل...
لطيفة"ردت عليها بنفس وتيرة صوتها" : الحاج مايجي تايفوت المغرب وراكي عارفة كاين مشاكيل ف دار دباغ يلاه دويت مع فيصل...راه قبل مايجي لهنا دوا معايا داكشي باش نزلت شادة تيليفون وانا الي گلت ليه هي جي اه مكاينش الحاج...هو بايدوي معاك نتي وداير بحساب وسول واش كاين الحاج ولا بايكون...عطي الوقت اناديا سمعي شنو بايگول كيما كان اه عيب واخا يكون خايب كوني نتي مزيانة...
ناديا مابقاتش بغات تهضر فهاد الموضوع واخا من لداخل مشوية على بنتها وفنفس الوقت مقلقة منها بزاف وغضبات منها..هادي هي الام واخا تعطيك وجه الصلابة فحوايج عارضتيها فيهم لكن لداخل ديالها طري عليك...هادي هي الام طبيعية وهادي هي الفطرة علاش كبرنا الا البعض الي كايكونو طبعهم هكاك واقسيات بزاف وكاين الي منعدمات الكبدة...زيرات على ايديها وغمضات عينيها يلاه بغات تهضر حتى نطق هو...
بشار : ماناويش نكثر الكلام...
ناديا"تنهدات واخا منفخة ومغوبشة فيه..حركات راسها ناحية لداخل" : دخل...
بشار : لا..خلينا هنا..حسن..
لطيفة : ماتبقاش واقف فالباب...
بشار"حرك راسو ب لا" : هنا مزيان...
مابغاش يدخل وهما بوحدهم عيالات فهماتو لطيفة لكن ناديا ربعات ايديها وحركات راسها زعما قول اش عندك...تاهو نيت ماعطلهاش اصلا باغي يرجع قال يجي لعندها كان ناوي هاد المجية الاولى بعدا يهضر معاها او يقول ليها غير جوج كلمات لعل وعسى توگض شوية وترطاب من ناحية بنتها...بغا يجرب هاد المجية الخفيفة وعالاقل تعرف راه ماغايبغيش بنتها تبقى مقاطعة واليديها ويحطها بالصورة على حالة بنتها...
بشار : ماجايش نعاود هضرة فاتت ونحك دبرة...ومالايح عليكم لومة..."سكت شوية كايجمع شنو يقول باش نيت تفهم بلا مايكثر الهضرة"... مثل تربينا عليه وعارفين معناه واخا نفوت عوام فبلادات الناس (زعما واخا نتغرب)..نهار طيح البگرة يكثرو جناوا "هز راسو وخرج عينيه"...شوفي بنتك شنو عاشت وشافت وفوتي عليك لغا عباد الله...شوفي اش شفتي واش لاحگك نتي مني...عمي نهار حك عليا دا من عندي عزاه ،، ماعنديش مع الكذوب (كيحرك راسو) عمي خايب ومفوت مسبق العيب والعار...نهار لول حط ايدو على ختي داها من عندي نهار ثاني حك عليا داها من عندي نهار ثالث حك على بويا اشريفة مانصيبش نلجم ايدي عندي...بويا هذاك...ونهار شي حد يمد ولا يفكر لمرتي نحر عدو ربو ومانحنش...
ناديا"الصمت"...
بشار : شوفيها منك نتي..نهار يلحگك شي حد ويحك نحاسك كتوريه باسك...فمهتي فين لاحگ بهضرتي ؟...
ناديا : عمك عارفينو ممزيانش واخا هكاك مانبغيوش دير ليه هكاك بايورينا هادشي راك ماتعقل حتى على عمك وماعندكش المنطق وتربية !!...
بشار"حاول يعض فالصبر على ديك (تربية) الي قالت..خرج عينيه كثر تا قفزت من لداخ" : حنا بنادم شابع عيب وذنوب...منك وجبد...
لطيفة : ناديا !!..
تاهي ماعجبتهاش كلمة تربية..يلاه غاتنطق ناديا وهو يكمل وكانت اخر هضرة حيث حص براسو طول بزااف...
بشار : بنتك مانگدش نمد عليها ايدي ونهار لول الي طرا داكشي بيناتنا راني شربت المرار والگطران باش شافت فيا (سمحت ليا)...الي معدنو مزيان مالحگوش وماعمري لحگو.."هز صباعو زوج"..ماباغيش نفرط فمرتي وماباغيش مرتي بلا واليديها...حنا رجال گلبنا قاصح گادين نصبرو لحر الكبدة عاطي لحق لباها...ونتي رجعي لكلامي رطبي شوية راكي مها...شوفي من جيهتها...وعاطيك العاهد نهار تمد عليها يدي نهار لاخر ليا معاها...بنتك مريضة...لاباس عليها بيا ومريضة بلا واليديها...
مابقاش زاد على هاد الكلام...ماخلاهمش تا يقولو شي حاجة...ضرب دورة حل الباب وخرج خلاهم كايشوفو...
لطيفة : لا حول ولا قوة إلا بالله...(ضارت عند ناديا)..فهمتي هضرتو...
غوبشات ناديا وهي دور ودخلات لبيت وجلسات بلا خاطر...تا لحقات عليها لطيفة كاتدعي بالهدايا...دخلات ناديا مغيرة على كي كانت قبل مايجي...شافت سناء فماماها وغمزاتها وهي تحرك راسها زعما من بعد..كبات ليها كاس ديال القهوة مداتو ليها وبغات تجبد معاها الموضوع...هزات ناديا الكاس شربات منو جغمة وعقلها ساهي ومغووووبشة بالمعقول...تا شوية حطات الكاس وهي تنوض وخرجات من صالون مشات لبيت نعاس وسدات عليها...
سناء : ويلي مالها...
لطيفة : هي خليها...
سناء : واش قالو شي حاجة خايبة لبعضياتهم...ماسمعتش حيث تبرزطت مع طابليط الي مخدمة وردة...
لطيفة : هو الي گال...
سناء : تبعيها هضري معاها...
لطيفة"هزات ايدها موقفاها" : هيييي خليها...الهضرة دوينا معاها شحال من مرة خلي دابا الوقت الي تگعد فيه وحدها وتراجع راسها ودور هضرتو فراسها ديك ساعة يكون خير...
كيف صلات العصر خرجات من البيت توجهات مباشرة لكوزينة...وقفات كاتفكر شنو دير مادير واخا غير تلاها باش ماتبقاش تفكر وتقنط حتى يجي...فكرات ترجع دير ديك الكيكة ديال الحامض الي دارت شحااال هادي فالفترة الاولى الي عاشت فيها مع بشار...دارت اليوتيب وجبدات اول حاجة المقادير الي حتى تأكدات منهم كاينين عاد بدات تحط وتوجد..حطات كلشي قدامها حتى من المول حطاتو...مشات غسلات ايديها...وبدات توجد فيها كل حاجة ضبطات ليها المقادير...
كل شوية تقول راه غايدخل حتى بدات تحس بيه را تعطل على اخر مكالمة قاليها فيها راه جاي...شوية وهي دوز واحد اللقطة ديال العبار بكاس العنبة وهي ماعندهاش هاد الكيسان عندها كيسان اتاي من نوع اخور...
حبيبة : ويلي منين بينجيبو ؟!.. ففف ماما الي باتنفعني...
شوية وهي تخرج عينيها على جهدهم حسات بقلبها هبط وسط تكب عليها.. غمضات عينيها وهي دور وتسندات بضهرها على البوطاجي..هزات ايديها ودارتهم على وجهها...القطرة لولة ثانية تتابعو قطرات دموعها...رجعات الغصة فحلقها والعافية فصدرها كاتشعل بسباب واليديها...شوقها ليهم كبير وعمر نارو ماتطفر واخا سمعات منهم اقسى الكلام...حنا بطبعنا ك انسان واخا نتخاصمو مع واليدينا واخا نكونو حنا خايبين فطبعنا لاقسى حد راه ضروري غاتجي وقيتة وتفكر شي حاجة منهم واخا ماتعتارفش بيها...فما بالك بشي حد متعلق بواليديه لواحد درجة كبيرة فحال حبيبة...واخا اختارت راجلها واخا هي مرتاحة وفرحانة حيث معاه لكن شق منها مشتاق وماهانيش من جيهة واليديها...هاهي دابا كاع ماحاسا وفكرات بالفطرة الي فيها تسول ناديا على معلومة...الفطرة ديال البنت الي كاتمشي نيشان لمها تسولها حيث عارفة هي الي كاتنفعها وتفهم عليها وشترح ليها عكس باها الي ممكن فطرتها اخرى توجهها ليه بلا ماتحس...
بكات تا حساات براسها غاتنهار بزاف وهي تجمع البكية ومسحات دموعها عينيها دغيا ولاو حمريييين...ضارت غير لافابو فين غسلات وجهها ومسحاتو ب بابيي الي تما...عاد رجعات تكمل الكيكا دارت عبار الكيسان الي عندها ديال اتاي حيث سمعات السيدة كتقول عبار كاس اتاي العنبة...دارتها فيد الله ودارتها فالمول خشاتها فالفران وجمعات داكشي وجدات براد اتاي خلاتو بلا ما باش غير يدخل بينما دوش وبدل...يلاه خرجات من الكوزينة بغات تعاود تصوني ليه تشوفو علاش تعطل حتى سمعات الباب كايتحل بالساروت عاودت نشات على عينيها خافت لا يكونو باقين حمرين يعيق بيها بكات...حتى حل الباب ودخل مغوبش كي عادتو...هز عينيه فيها...
حبيبة"تبسمات" : تعطلتي...
بشار"حط سوارت ووقف بدون كلام تا شاف فيها مزيان وهي تنزل عينيها هاد البوز الي كايدير كتعرف اش غايجي موراها" : مالك...
حبيبة : ماماليش هي تعطلتي...
بشار" هز حاجبو وقرب لعندها كانت فايدو اكياس ديال مخبزة..هز لايد لاخرى ودوز على حنكها تا طلع لعينيها كان محيطهم حمر شوي كانت باينة بلي باكية يقشعها اي واحد" : حبيبة..مالك !!...
تنهدات ماعندها مهرب...ماشي مابغاتش تقوليه مابغاتش تزيد عليه اصلا باقي خاطرو مهرس من البارح..يمكن هي هادشي فاش فكرات..ماعارفاش بلي فاش تيقوليها راني مولف يعني را عانيها بالمعنى...شدات ليه فدراعو بايديها وقربات عنقاتو حطات راسها على كرشو دورات ايديها ورا ضهرو...حط دوك ساشيات وهزها عندو تا دورات رجليها ورا ضهرو وحطات راسها على كتفو...وتم غادي بيها تالفوطوي وجلس مجلسها فوق حجرو..شد ليها راسها بايديه وقابلها معاه...عينيه فلاو ليها وجهها كامل وعنقها وكلها عاد رجع شاف فيها...
بشار : كانسمع...
حبيبة"نزلات عينيها" : مابيتكش تفهمني غلاط...
بشار : شنو ؟!.."بقات ساكتة مترددة وهو ينطق زايد فنبرة صوته"...تحركي دوي يا حبيبة !!...
حبيبة"صرطات ريقها" : گبيلة مافهمتش واحد العبار حيث كنت تندير فكيكة ( نزل عينيه لايديها الي بدات كاتعبر بيهم ورجع شاف فيها)..وانا نگول نمشي نسول ماما...(دارت صباعها على فمها دغيا عينيها غرغرو)..نسيييت...(رمشت بعينيها وهما ينزلو قطيرات)...شوف انا توحشتهم وبنبقى ديما موحشاهم...ولكن ماشي ندمت حيث رجعت ليك والله ماندمت هي فهمني هادشي اه عادي...ماعمري نتفارق عليك انا معاك ديما هي صبر ليا حيث فين ما نتوحشهم بنبقى نبكي حتى نولف...عادي ياك...ولكن والله ما ندمت حيث رجعت ليك...راه هي...
ماسكتها كاع بصوتو ولكن فضل يسكتها ببوسة لشنايفها تا تبقجو لجم ليها الهضرة تا زوات فوسط البوسة...ماكانت البوسة العنيفة كانت بوسة حنينة رطيييبة...دافية خلاتها تغمض عينيها وتنهد ليه وسط شفايفو...استمر فالتقبيل حتى بدات كاتجاوب معاه تاهي بداكشي الي تعلمات معاه...مافرقوش القبلة مابغاش يفرقها بغا يبقى مطول تا تنسى ويسكتها ومنها يعبر ليها راه معاها...ماعرفش يواسي بشي طريقة من غير هادي...طولو فالبوسان بزااااف تا حطات ايدها على كتفو عاد عرفها راه تخنقات..وهو يفرق البوسة...خلا فمها حمرررر...رجع ليها خصلات شعرها ورا وذنيها...
بشار : c'est normal habiba..ماشي مشكيل...
تبسمات ليه بحزن وحركات راسها ورجعات عنقاتو حاطة راسها عليه...شوية وهي تهز تا غوبش بديك شوفة ديال "مالنا ياك لباس"...
حبيبة"نزلات من فوق رجليه وقفات" : ويلي كيكة شوي ونساها..
بشار : ؟؟..
حبيبة : درت كيكة...سير دوش واجي تاكل بايكون فيك جوع ياك..(غاديا لكوزينة) دغيا اه فيا جوع...
مشات هزات ساشيات الي جاب ودخلات لكوزينة خلاتو جالس مفرق رجليه متبعها بعينيه...
حطات ماتبقى من الاكل وجرات الكرسي وجلسات شادة تيليفونها...حتى دوش وخرج وقف عليها لاوي عليه فوطة من تحت وفوطة ورا عنقو ماشط شعرو باقي يقطر...
بشار : ديري بحساب تعشاي برا...
حبيبة"تبسمات ليه" : واخا ههه...
بقا كيشوف فيها وفابتسامتها الي كاتخليه من لداخل مرتاح عليها كاتحرك فيه بزاف الحوايج...حتى حرك راسو ومشا لبيت بدل عليه لبس حاليا غير حوايج دار...عاد دخل عليها لقاها يلاه حطات ليه كاسو دالقهوة...وبدات تاكل قطعات ليه من كيكة الي اول مرة تصدق ليها باقي سخونة...وحطاتها ليه مع فرشيط...
حبيبة : تعلطتي بزاف على فاش گلتي ليا هاني جاي...
بشار"هز فرشيط وذاق من كيكة تسنات اجابتو وفنفس الوقت حاضية ملامح وجهو تشوف واش كيكة هي هاديك..بان ليها تمذقها عادي يعني مزيانة..حط فرشيط وشرب من قهوتو عاد حرك راسو وجاوبها" : ماساليتش...
حبيبة حركات راسها مبتاسمة وبدات تاكل تاهي من الكيكة تاذاقتها عاد رتاحت راه زوينة حيث واخا تحضيه مايبينش ليها راها خايبة من اخر تجربة ههه....صونا تيليفونه كان حاطو حداها بان ليها اسم eida عيدة...مداتو ليه شاف فيه شحال مغوبششش بطريقة خلاتها تفهم را تفكر اش وقع لبارح...خلاه تا سكت وحطو مابغاش يجاوب دابا...
حبيبة : واخا نسولك ؟!..
بشار"شاف فيها"...
حبيبة : گلتي ليا جريتي على عمك..اشنو وقع م معاه البارح مافهمتش..منين جريتي عليه !!..(حطات ايدها فوق ايدو) الى مافيك مايهضر ماشي مشكيل...
بشار"نيشان" : من الفيرما...
حبيبة"وسعت عينيها" : عادي ! عمي الحاج ؟!..
رجع سند ضهرو عالكرسي وربع ايديه...وهو يعاود ليها اشنو كاين...كمل ودار الكارو ففمو كايشعل فيه...اما هي بقات ترمش وتعاود...تا دارت ايدها على حنكها...نفت دخان بجنب ناحية شرجم الي حداه...ورجع شاف فيها وصغر عينيه حيث وجهها بقا مفيكسي وتترمش فيه...
بشار : مالك ؟!..
حبيبة : واش..دابا الفيرما كاملة بسميتك ؟!..
بشار"حرك راسو"...
حبيبة : ويلي...(هز حاجبو ولكن مشكيل ماشي هنا المشكيل هو ضحك الي جاها !؟ علاش الله علم)..هههههه...ههههههه..
بشار : ياك لباس ؟!..
حبيبة : هههههه اااوييييلي ههههه... بلا ماتشوف فيا ولكن هادشي صدمني..وماعرفتش علاش ضحكني...هههههه..عافاك هي خليني نضحك....
جاتها واحد الهيستيريا مافسوقها مايتعاود...ماعرفاتش تا علاش تاضحك اصلا..بقى يكمي ويشوف فيها مصغر عينيه من دخان سيجارة تا كملات على خاطرها العام طويل وبدات تكحب..تاتهدنت كاتمسح فعينيها من دموع ضحك...عاد طفى الكارو فطفاية حداه وهو يهز صبعو ونطق بصوت مدعدع ونبرة تحذيرية...
بشار : هاد البلان يتسد هنا...الفيرما كانت كيف شفتيها وتبقى كيف خليتيها...ضحكتي سدي عليا زعت...هانيا ؟!..
حبيبة"حركات راسها بتفهم...وهو ينوض هز تيليفونو وتم غادي...حتى وصل لباب وهو يوقف ورجع ضار عندها تحنى عليها جمع ليها سميطات الضوني وقربها لعندو باسها فشفايفها...وهو ينوضها وهزها دورات رجليها عليه وداها لبيت ويبوس فيها ماخلاش ليها فين توجد راسها ولا تفكر...دخلها لبيت ودخلها فعلاقة حميمية جديدة بدون استئذان وهادي حاجة جديدة فيه بدات كاتدي عليها شوي بشوي خاصها تكون على استعداد فأي وقت...واخا غايخرجو من بعد مازگلهاش...
بعد صلاة العشاء...تمو راجعين على رجليهم من محل البازار الي فالسمارين هو وفيصل حيث غير قريبة دار بزاف وحيث كايبغي يتمشى اصلا مامحتاجش لسيارة...مسافة طريق كانو فالدار طلع فيصل ديريكت يدوش ومولاي حفيظ دخل عليهم لبيت لقاهم كلهم ولكن الي ثار انتباهو هو ناديا الي كانت جالسة ومغيرة...
م.حفيظ"بينو وبينها" : املكييي ؟! هانيااا ؟!..
ناديا"ضارت عندو وحركات ليه راسها وبابتسامة باهتة" : والو هي عييت شوية ليوم...
م.حفيظ : طونسيون ؟!...
حركات راسها وسكت مكمل الهضرة مع لطيفة الي دخلات سولاتو على الحال والاحوال...شوية ناض بدل حوايجو وخرج لقاهم بداو يحطو فالعشا...نزل حتى فيصل ودخل تا ايوب ...كان كلشي كاياكل عادي الا البعض الي شي عارف وشي ملاحظ وطبعا هنا القصد م.حفيظ الي طول جلسة العشا وهو متبع ناديا ماعجباتوش...تنهد وكمل عشاه الي كانو دايرينو ليه هو خاص ديال الحمية...ماكملو تا حس دازت عام..عاد ناض هز الما ديالو ومشا لبيت يشرب دواه...وجلس غير جنب ناموسية شاد تيليفونو وداير نضاضرو دالشوف...شوية وهي تدخل حيدات زيف على راسها وطلقات شعرها كادوز عليه بصباعها وعاودت جمعاتو...عاد مشات جلسات حداه حطات ايدها على كتفو...
ناديا : شوية ؟!..
م.حفيظ"ضار عندها كايشوف من فوق نضاضر" : الحمد لله..نتي الي مابان ليا فيك هانيا..ياكما عيانة بزاف نديك لطبيب ؟!..
ناديا"بقات كاتشوووف فيه بابتسامة خفية عاد حركات راسها" : لا مابيا والو ههه هي تايبان ليك...
"سكتات شوية تا حرك راسو وضار حدرات راسها كاتفرك فصباع ايديها...عينيها دغيا غرغرو ماعرفاتش علاش واش اصلا كلام بشار لقاها على سبة !!..حيث مايمكنش هضرة بشار بسرعة تأثر فيها او يمكن ساهمت بنسبة...كان كيشوف فتيليفون اتا سمع صوتها مغنغن...
ناديا : الحاج..
م.حفيظ : ممم...
ناديا : م "صرطات ريقها بزز باش نطقاتها"..ماعرفتش علاش بديت تنحس الى قصحنا مع حبيب...
ماخلاهاش تاتكمل تقولي كان حاس...لاح تيليفون وحيد نضاضرو بزربة..حط صبعو على فمو وخرج عينيه تا خلعها...
م.حفيظ : ماتحنييش... وياك تحني ولا بنتقلب عليك حتى نتي...
يتبع...
التعليقات
لا توجد تعليقات بعد، كن أول من يعلق.