محتوى القصة
ماكرهتش تسخف ولكن ماتقدرش ديرها بلعاني حيث فاش تايقوليها شي حاجة خاص ديرها مكاينش محال للنقاش...اما كريمة ماعرفت ترجع بلور وتفرتح ولا تبقى بلاصتها ولا مادير والو...تمات جايا لعندو بشوية ومزيرة على ايديها...وحسام كان واقف تاهو وسمع اش قالت مع بشار حيث كانو داخلين بجوج مع يوسف...وصلات لعندو ووقفات...بقى كايشووف فيها شحال وهي كاتسنى وهو كيشوف..دخلات سعيدة مع عيدة وهو باقي كايشوف فيها...حتى جبد من جيبو كونطاكت وهز ايدو قفزت بغات طاكيها بايديها ساعاك دارها وراه برك على القفل حل ليها سيارة...
بشار : تحركي ركبي تسناي تم..."سكت شوية واستانف" هاني جاي...
حركت راسها وتمات غاديا قلبها بغا يسكت...وصلات حدا حسام وشافت فيه وهو يهز ايديه وشابكهم بحال كايوريها المعنى ديال العجن...اصلا حسام باغيها فيها نيت هاد التواخر ضصارت بزااف ملي عرفاات را خوها مول الشي...وتمتم بين شفايفو داير شكل موس فعنقو فهماتو طايرة...
حسام : سباكاتااك...
ماكرهاتش كون عيط حتى ل حسام يخلطو معاها...جلسات سعيدة عيدة وجات لعند بشار الي كان واقف مع يوسف...شافت فيه بترجي ونطقات...
سعيدة : بشار.."هز فيها عينيه" غا بشوية الله يرضي عليك...
ماردش عليها...ضار عند يوسف وشد ليه وجهو بين ايديه...
بشار : شوية دابا ؟!..
يوسف"بابتسامة حزينة حرك راسو"...
بشار : الويكاند يجيبك عندي حسام ولا هاشم..برك معايا يومين ونجيبك..مزيان ؟!..
فاش قاليه هاكا عاد ابتاسم نيت وفرح...اكثر حاجة تفرح يوسف هي يكون معاه خوه بشار...وهنا رتاح بشار ملي ضحك ليه هاكا..ضار عند حسام...
بشار : الليلة نضي ليه البلان حسام...
حسام : كون هاني الليلة نتفرجو انا وياه فديك سيري الي متبع معاه فتيليفونو نيت...(شاف فيوسف) زاهية...
يوسف"حرك راسو" : ههههه...
باس ليه بشار راسو وطبطب عليه طبطبة رجولية...وخرج...سمع رنة تيليفونو جبدو بانو ليه ضمصة ديال ميساجات اغلبهم ايمايلات وميساج من حبيبة فالواتس..رجع تيليفون لجيبو...لداخل كانت جالسة اشراق ووجهها صفر قبل مايخرج كانت كاتلالي وتعد على زهرها المكوز...ماعرفت تشهد ولا تهرب ولا لمكتابها ماتنفد...حل الباب وركب مادوا ماتكلم...ركب سانتيغ وهي تركبها بلا ماتسناه يقولها حيث غايصرفق مها عاد يقولها هذا ما صور ليها عقلها وتجاربها مع الهبيل نييت...مادوات ماتكلمت تاهي كاتسنى تايوصل لشي خلا عاد تبدا تجاوب...دار نضاضر شمس ورجع بلور وكسيرا خرج من الفيرما...مسافة طريق حتى دخل فواحد البيست ووقف فواحد الارض خاوية تابعة لفيرما ديالو نييت...وسكت طوموبيل...جبد كارو شعلو نزل زاج ديال نافدة ودلا ايدو من بعد ماكمى منو...شاف قدامو كايكمي وساكت والي حداه كون كاطلب يسربيها خلاص ولا هاد الانتظار الي داير ليها عذبها...حك لحيتو بصبعو كايشوف قدامو وهو ينطق...
بشار : شحال هادي.."حك شنايفو محاول يتكالما حيث هاد ساعة ماعارفش اش يدير يقدر يخربق ليها وجهها بلا مايحس"...شنو وصيتك على عيالات عمامك...
اشراق : اا ؟...م گ..
بشار"هز ايدو وطرطق صباعو" : دركي دركي...
اشراق"صرطات ريقها" : نحتارمهم..مانهزش فيهم العين..وكريمة وختي كريمة واخا گدي فالعمر نحسبها بحالها بحال عيالات عمامي الكبارات...
بشار : اش داك زعت الي سمعت ؟!..
اشراق"عينيها تحبسو فيهم الدموع" : سمح ليا...
ماحسات تا جبدها معاها بصلية بضهر ايدو تا نقزو دوك الدموع وشهقت حالة فمها كاترعد..
بشار : سولتك...عاودي نسمع..
اشراق : گلت ليها وصالة الخبار حيث كاتوصل الخبار لمي ولمليكة عمتي مليكة و عمي رضوان...
بشار : كملي..
اشراق"خاصها تقول كلشي اش قالت" : ودابا بانت ليك فخويا تگولي ليه را طيحت تيليفون طيحة خايبة ماشي ديك الي عاودت ليك...باش تكبر فعينيك حيث نتا مول الفيرما وفين عايشة وواكلة من رزقك...
بشار"سف من الكارو مطول دور وجهو تا ساط دخان ورجع شاف قدامو وهي تكمل"..
اشراق : شي نهار يكلع ليه د.م (ماقدراتش تقول هبيل) ويجري عليك نبقاو غا حنا خوتو حيث مقطرين ليه من العي عي عين...
ريقها ولا كايترعد..سالات اش قالت وقالتو ليه بالحرف...واخا عارفاه سمع ديك الهبيل...ماغاديش يديها فهاد الكلمة حيث مولف...واخا نقولو حركات فيه شي حاجة حيث سمعها من ختو...بقى ساكت وهي بقات كاترعد وتغزل البولة ضرتها وهي كاتسنى...حتااااا كمل الكارو رماه وبدا يسوس فايديه..تهز شوية قاد حوايجو حيد سانتيغ..وهو يدور لعندها اتا جبدها معاها بصلية اخرى سمعات زنننن فطبل وذنيها بضهر ايدو...هزات ايديها كاطاكي على راسها تا بدات تنخصص بالحس ماقدراتش تسمعو صوت بكاها...عاودها صلية اخرى تا حسات بدوخة...حيد ليها ايديها بجهد وشدها من وذنها جرها بجهد لعندو...تحنى عند وجهها الي ولا حمرررررر...
بشار : يا لزبور مك شكون نتي فملك الله...
اشراق"وذنها بغات طير من بلاصتها عينيها خرجو والبولة نزل نصها..وشد ليها منخرها زير عليه وهبط ليها راسها بيه بجهد تا غوتت"
بشار"جبدها لعندو تا تسمع صوت انينها مقربها ليه كثر" : نزلي لارض يا اشراق نزلي...(زعما هبطي مناخرك لارض حيث الغرور ماعندو باش ينفعها)...فين لاحگة ؟..(كايعاود يدفع ليها منخرها لارض).. نتي مكملة شهورك فكرش مك وانا مكمل سبعة البشري كامل شحال مالحگ فالكرش جامعنا تراب واحد وحساب واحد...فين غاديا لعدو ربك فييين..."جبدها من وذنها لعند وذنيه".. ماسمعتش..
اشراق"كتنخصص" : س سممح ليا سسسمح ليا..
بشار : شنو ديري ؟!..
دوزات اكفس نص ساعة فحياتها...ولات كاتحس بوذنيها كايزنزنو...دار ليها ماكيديرو الحماق نيييت...تا كتقول راسي غايطيرو...ندمات قد زغب الي فراسها علاش قالت لمرت عمها هكاك...دفعها وبدا يسوس فايديه مكره...بدا كايحس بداك المهدئ مفعولو طار كاع داكشي الي كبت فدار جدو كان على شوي يخرجو فختو...حل الباب ونزل كايقاد فحوايجو حجبانو مرفوعين للسما...الكارو تاني هاهو كايشعل فيه باش يحاول يكالمي راسو...دوز على نواضرو كايماصي فيهم ويعاود...كايحس براسو كاينهج وهو محاول مايرجعش ليها يخلطها تاني...خلاها كاتنخصص بالحس وتحك فوذنها ومرة منخرها...وتمسح فعينيها ومنخرها بطرف تريكو...طلات على بين رجليها عامر بول جاب الله ماشي بزاف تعمر ليه طوموبيل وحالتها وجاب الله تريكو طويل غاتغطي شوهتها...
جهد ربع ساعة وهو برا تا حس براسو شوية وهو يرجع اصلا خاصو يمشي حيث الاجتماع تعطل عليه...ركب وقاد سانتيغ..ديمارا طوموبيل ورجع بيها لفيرما... دخل لداخل ووقف تا نزلات كان نيت حسام خارج كايهضر فتيليفون مع صاحبو بغا يدي ليه تيليفون يوسف...شاف بشار وقف سيارة تا نزلات اشراق ورجع بلور وكسيرا تاتهزت طوموبيل...مادوا ماتكلم خلاه مشا...قربات اشراق عند حسام وجهها مخربق حمررر ومناخرها دايزين وتتهبط فتريكو غالحركة عرف اش كاين...
حسام : جاب الله تيسير ؟!..
اشراق"خرجات عينيها بغات تبدا تعاير فيه وهي تكمش"...
حسام : ههههههه حدد ليك سرعة..
مارداتش عليه ودخلات ديريكت لبيت دخلات على وحدة فبنات هاشم كانت شادة تيليفون كاتفرج فواحد الاستاذ فاليوتيب كايراجع مع الناس المقبلين على السنة الثانية اعدادي فالماط...من بعد ماخذات الاذن من سعيدة وحسام وطلعات...جبدات اشراق ماتلبس ومشات لدوش دوشات بلا ماتقيس شعرها غسلات من البول...ولبسات حوايج اخرين وباقي كاتنخصص...ماعرفتش علاش حساات بندم ماشي على كريمة ولكن على الهضرة الي قالت على بشار "هبيل" سمعها وباينة غادي ضرو فخاطرو واخا مايبينش...بدات كاتبكي وتنخصص تا بردت وهي تخرج لبيت جلسات شوية تا تنفسات عاد خرجات من البيت مشات لبيت كاتقلب عليه مالقاتوش...تا نزلات لتحت سولات عليه...
سعيدة"عرفات الى كلات عزاها" : مشا مع حسام لمراكش..
حركات راسها وهي ترجع ومشات كاتقلب عليها...مالقاتهاش فالكوزينة سولات عليها مباركة عرفات راها لفوق فبيتها طلعات عندها...دقات الباب وهي تسمع "نعام"..
اشراق : انا...
كريمة"غوبشات شافت فرضوان وهي تقاد حوايجها ورجعات شافت ناحية الباب" : نعام اشراق اش بغيتي ؟!..
اشراق : بغيت نهضر معاك (باقي كاتشهق بالخف مرة مرة بسباب البكا)..
كريمة : دوخلي...
اشراق"حلات الباب ودخلات عندها حدرات راسها" : سمحي ليا..
كريمة : علاش...
اشراق"تنهدات وهي تمسح عينيها" : على هضرة گبيلا...عافاك سمحي ليا مكانش خاصني نگولها..حنا هنا ساكنين فدارنا دار جدي..انا غذا ولا بعد غذا غانمشي نكمل قرايتي عند خويا ولا نتجوج ماساكناش اصلا هنا غادي تبقى دار جدي والواليدين..ودار عمي رضوان وعمامي كاملين...حتى خويا را غا ضايف مرة مرة...سمحي ليا...
كريمة"بقات ترمش وهي تحرك راسها تا تسمع صوت رضوان"..
رضوان : مرة جايا حسبي كلام فمك ولجميه هادشي كبير عليك..
اشراق"الصمت"...
مراكش...
في واحدة من المقاهي الشعبية فالدخلة ديال مراكش...دخاخن ديال شوا تعمي العينين وريحة طواجن واصلة لفين...وصل وقت الغذا وبداو كايوصلوهم طلبياتهم...صينية فيها شوا كفتة وصوصيص وكوطليط...وطاجين كبيير ديال اللحم والبصلة وزبيب...مد ليها خبزة...
العربي : شدي بداي نتي ههه...
سناء : وانا...
حبيبة : ههههه..
العربي : هااكي الالة بنتي...
عوجات راسها يمين شمال بطفولية ومزاح وحبيبة كاتضحك...تحط براد اتاي كبير وقرعة الما...سماو الله وبداو ياكلو...شي دخل فالشوا وشي فالطاجين اكثرهم حبيبة حيث كاتحماااق على شي حاجة سميتها طاجين خصوصا الى كان فوق الفاخر طايب بالمهل كيف ولفاتهم ماماها...والى كان فيه شوية الحراق كاتحس بواحد البنة فشكل...كلات تا بردات وشربات كاس اتاي...عاد كلات شوية من الشوا...ورجعات لور شبعانة...حسات براسها فوجات شوية واخا توحشات بشار...ناضت غسلات ايديها هي وسناء ورجعات جبدات تيليفونها لقاتو ماقراش ميساجها...حطات تيليفونها ورجعات كاتهضر معاهم حاولو ما امكن يفوجو عليها...حتى ناضو خلص راجل عمتها وركبو رجعو لعمارة نزلات لطيفة الحوايج هي وسناء وطلعو لبرطما...دخلات حبيبة ديريكت لكوزينة حطات داكشي وجبدات تيليفون صونات ليه مكايجاوبش...تنهدات وقالت غايكون فشي اجتماع...مشات لبيت جمعات حوايجها والماعن ديالها وداكشي فصاك حطاتو يلاه كي بغات تمشي عند عمتها لصالون اتا تحل الباب وهو يبان ليها داخل...
حبيبة"مشات بزربة لعندو" : بشار...جيتي بكري...
بشار"كايحك فنواضرو عيان" : ساليت شي بلانات..."باسها فراسها" هانيا...
حبيبة"تزنگت حيث عمتها وسناء فصالون" : هانيا..عمتي وسناء هنا.."شافت فيه وتبسمات حشمانة" عرفتي جبت ليك معايا حقك ههه..
بشار"هز حاجبو" : ؟؟...
حبيبة"شداتو من ايدو" : اجي معايا...(مشا معاها وهي توريه طاجين صغير وحداه بلاستيكة فيها اليمنيوم حلاتها ليه فيها بحال شوا الي كومونداو..وطاجين بحال الي خذاو بالبصلة) عارفاك بيتجي ممغديش كيف ديما..جبت ليك حقك معايا واخا دير بيه گوتي وغذا دقة وحدة...
مولف من عند حبيبة الاهتمام وهي مولفة منو تاهو اهتمام من نوع اخر...ولفو على بعضياتهم شحال من حاجة...ولكن هاد القضية ديال يجي ويلقى شي حد مخلي ليه حقو من شي خرجة او شي مناسبة ماعمرو عاشها...دارت ليه حبيبة بحال ديك القضية الي كادير الام الى مشات لشي عرس تجيب لولادها حقهم ولا راجلها...احساس زوين...هو جاه فشكل ولكن عجبو...ويمكن حبيبة ماشي غير طيبتها وانسانيتها وعفويتها وحبها لبشار خلاها دير هاد الجيست وانما حتى نضائح طبيبة النفسية الي مشات لعندها...واخا عندها حصة جديدة معاها غذا...
بشار"شدها من دراعها وقربها لعندو وتحنى باسها فشفايفها وبقى واقف تا غمضات عينيها وصرطات ريقها حشماانة بزاف..عاد فصل القبلة ورجع باسها بالخف وشاف فيها" : شكرا...
حبيبة : هههه العفو...هههه..
حرك راسو واخا مافهمهاش علاش ضحكات وخرج لصالون تا سلم عليهم وخرج لدوش غسل ايديه ووجهو ودخل لبيت بدل حوايجو بحوايج دار تيشرت وسروال سورفيت...عاد دخل لكوزينة لقاها سخنات ليه طاجين وكاتجبد فداك شوا من فران حطاتو ليه وحطات ليه الما والخبز وفرشيط...
حبيبة : انا فالصالون معاهم...
شد ليها ايدها باسها فوسط كفها بوسات متتالية تا بورشها عاد طلقها وخرجات وجهها مزنگ...جلسات معاهم فالصالون شافو وجهها وحبسو ضحكة عرفو اش كاين ولات تبرق فعينيها...بقاو مجمعات مع بعضياتهم تا سمعاتو كايعيط ليها وهي تنوض عندو...
بشار : تحركو دابا ؟!..
حبيبة : اه حيث من دابا نص ساعة باتوصل نوبتنا...
حرك راسو ومشا لبيت تبعاتو...هز بزطامو وسوارت وضار عندها عطاها كونطاكت و حرك ليها راسو وهي تخرج عندهم قالت ليهم يلاه وناضو بغاو يهزو صاك وقفهم وقاليهم يسبقوه لتحت...هز ليهم صيكانهم ونزل تبعهم...لقاهم ركبو دار ليهم صيكان فالكوف وركب...كل مرة تكتاشف لطيفة الاهتمام الي كايعطي بشار لحبيبة واهتمام حبيبة بيه.. كل مرة كايخليها تحيد تاهي الغشاوة واخا ماكانتش هازة منو او نقولو كانت خارجة سوق...وقف سيارة قدام العنوان الي نعتات ليه حبيبة كان واحد السونطر ديال حمام وسپا...مابغاهاش تمشي لحمام ديالهم وهي مخاصمة مع باها...وتاهما كانو مشهيين هاد نوع من الحمام...نزل راسو كايشوف فالدنيا تما من بعد ما حل ليهم الكوف كاينزلو صيكانهم وبقات هي حداه...
بشار : شحال عندكم هنا ؟..
حبيبة : ساعتين هكاك ورجع بنصيفط ليك ميساج فاش نخرجو...
حرك راسو وهي تنزل.. تسناها تا دخلات عاد تحرك رجع لبرطما...طالع وحاس براسو كايضرو مبرزط وخاطرو دايق عليه حيث تعصب مع خوالو مو وتوخرات بختو...مشا لدوش ديريكت كايقلب على الدوا ديالو مالقاهش تم ودخل لبيت جلس جنب ناموسية حل المجر حدا راسو مالقاهش تلاح فوق ناموسية مد ايدو لنجر الي عند راس حبيبة حلو وهو يلقى الباكية هزها بغا يسد المجر وهو يرجع حلو...
بعد ساعتين بالضبط...وقف السيارة ورك عالشاشة فالسيارة دوز ليها الخط تاتسمع صوتها...تسنى شوية وهي تخرج هي وعمتها وسناء خارجات يشقشقو خصوصا هي خارجة دايرة فوطة ديال راس بحال زيف وجهها مزنگ بالحمام ومع الحال سخون كملت..لابسة سورفيت صيفية فالبيض كملات البيوضية الي فوجهها خلاتو غا كيشووف فيها ماهبط عينيه...دارو حوايجهم فالكوف وركبو قالو ليه سلام وحرك راسو...
بشار : بالصحة...
لطيفة : عطيك صحة ولدي...عافاك بتوصلنا لدار...
حرك راسو وكسيرا بسيارة ديريكت لرميلة...وصلهم عند راي درب ونزل تا حط ليهم حوايجهم شكروه وقالو بسلامة لحبيبة...ورجع ركب كل شوية تعطيه ريحتها ديال عومان ومستحضراتها ماكرهش يتكيها فطوموبيل من كثرة ما شهاتو لكن الي فراسو خلاه مبرزط...وصلو لعمارة تسناتو تا هز الصاك ديالها عاد تابطات دراعو وطلعو لدار...
حبيبة : نمشي نشف شعري...بيتي شي حاجة لعشا ؟!..
بشار : لا...
حركات راسها ومشات لبيت حيدات الفوطة وطلقات شعرها كاتمشط فيه دارت ليه سيروم...حتى وقف حداها وهو يحط ليها كلينيكس وكحزو..نزلات عينيها وهي توسعهم ودغيا غرغرو...شافت فيه ورجعات شافت فالكلينيكس...
حبيبة : لقيتيه فالمجر...
بشار"حرك راسو عاقد غوباشتو"
بقات كاتشوف فداك كلينيكس...حطات المشطة وهزاتو حلاتو وهو يبان ليها داك طريف من الجنين الي طاح ليها...شفايفها بداو ينزلو ويترعدو...
بشار : شنو هادشي ؟ (عارف غير بغا يسمع منها)...
حبيبة"بصوت مقجوج نزلو دموعها" : ش شي حاجة من البيبي الي طاح ليا...
رجع بيها زمن تاني لداك دقيقة الي عرفاات فيها انه كانت حاملة ونفسها عرفات انها جه.ضات...ماعرفاتش تفسر داك الشعور...حسات بالحزن والالم حيث ديك الايام فين تجمع كلشي صدمة شمتة غضب...قرارات مصيرية...اكثر شهرين دوزات فيهم العذاب...الي حتى رجعات ليه...
رجع بيها التفكير لداك اليوم...لديك اللحظة الي عرفات من عمتها انه كانت حاملة وطاح ليها...
سابقا...
شدات معاها سيروم...عاوناتها حتى حيدات الكيلوط غمضات حبيبة عينيها وهي تجلس تا تسمعات تشاااااخ...شهقات لطيفة ملي سمعت داكشي...ناضت حبيبة بزربة وهو يبان ليها طواليط عامر د.م وجناب فيهم طروفة فحال كبدة...حبيبة قشعات واحد طرف جاها فشكل...هزات عينها فعمتها ونطقات بصوت منخفض بزااااف بزز باش كايتسمع...
حبيبة : و وااش كنت حاملاا (اخر كلمة ترعد فيها صوتها)...
حاليا...
هزات فيه عينيها حمرييين...دموع غير مازادو نزلو تا تكمشو ملامحها...جمع حجبانو وشد فيها...داها لناموسية جلسها وجلس حداها...دارت وجهها بين ايديها كاتبكي...
بشار"حيد ليها ايديها من وجهها بزز" : شش مالك ؟!..
حبيبة"كاتنزل عينيها" : تفكرتي ف فاش گلت ليك ديك الهضرة القاصحة ياااك...
بشار هز حاجبو وتفكر الجملة الي قالت ليه...ماتفكرهاش عمرو نساها...كانت من اقسى الجمل جديدة الما سمع...وسمعها منها..باقي عاقل عليها بالحرف وبنفس الاحساس باش سمعها...
~~
حبيبة : الولد الي كان غايجمعنا الحمد لله الي طاح ومابقى جامعنا والو..
~~~
كان كايشوف فنقطة بعيدة كايتفكر...ورجع نزل عينيه ليها حادرة راسها وكاتفرك فصباعها..مادوا ماتكلم...حتى نطقات بصوت مغنغن...
حبيبة : هي گلتها ليك...ماعرفتش فين كان عقلي..كنت بيت هي باش تحقد عليا بهاكا ماتبقاش تجي عندي ومانضعافش ونرجع...حيث ديك ساعة بابا كان مريض وكنت مصدومة ممثيقاش داكشي عليك فلول...تخلط عليا كلشي...اشنو عرفت عليك والي طاح فكرشي مكنتش عارفة بيه...وانا كنت تانتسنى باش نحمل..
بشار : كيفاش ؟!..
حبيبة "حركت راسها" : قبل ماترجع من المانيا واحد نهار..عقلتي فاش مشيت عند ديك طبيبة الي عطاتني anti stress فاش ف "عضت شفايفها حشمات تقوليه باش بدينا اول علاقة"..
بشار : سي..كملي...
حبيبة : تما گالت ليا بترجعي باش نعطيك پيليل...گلت ليها مابيتش...ماعنديش مشكيل نحمل...انا اصلا بيت نحمل من راجلي "كاتهضر وتصرط فريقها"..بيت يكون عندي وليد ولا بنية..مابيت ندير والو...ماشربت والو من غير داك الدوا...
هزات فيه عينيها حمرييين كاتنخصص بغات تقوليه شعورها...فديك اللحظة ملي طاح ليها...نزلت عينيها وشدات داك كلينيكس كاتشوف فيه...
حبيبة : عرفت بلي دارنا ماكانوش بايخليوني نرجع ليك...عرفت بنعيش العذاب حيث كلشي كان باين بلي بنتفارقو ومنكملش معاك واخا هي مدة طويلة...گلت الى تفارقنا تبقى ليا شي حاجة منك "دموعها كاينزلو من جديد"...بيت هي نشم فيه ريحتك ونتا بعيد...كنت تنشوف بلي من سابع المستحيلات باقي بنرجع ليك...(حطات ايدها على قلبها) عقلتي فاش حلمت بشي حد تايحيد ليا هذا مني..."عاقد حجبانو مركز معاها"...هو الي حسيت فاش بعدنا...هو الي حسيت فاش عرفت طاح ليا...هو الي تانحس فاش تنشوف هذا وتانتفكر...(عوجات فيه راسها) عمري مانسى ديك الوقت وعمري انا مانسى اش گلت ليك...سمح ليا عافاك...
اش غايقول هادشي كايسمع فيه جديد واخا عاودات ليه سعيدة لكن ماشي بهاد ديطاي الي سمع منها ماشي بهاد الاحساس الي خارج منها...تكمش عليه خاطرو بين حالتها دابا وبين اشنو سمع منها كيفاش كانت مخططة تولد معاه...يعني هي بغات تولد مع الشخص الي نعتو فيه ناس انه مريض نفسي.. ماشي ديال الزواج فما بالك ديال الولاد...هو براسو كان واحد الوقت كايقول عمري نكون اب..انا انسان مريض راني طبيعي هاني ومهدن ولكن الي حك عليا والى جاتني الحالة كنوض ونضر راسي هو لول بطريقة خايبة...هاني هاد ساعة مزيان ساعة اخرى مزيان لكن ضروري واحد الوقت ندير شي مصيبة نضرب شي حد ضربة خايبة...الى كانو الولاد...ولكن !!...علاش مانعيش الزواج ونلقى مراة تهدني وبسبابها نكون بنادم...علاش مانعيشش تجربة الابوة ما ربما ولادي يهرسو فيا الجهد...علاش...علاش مانعيش اشنو كايعيش بنادم...راني بنادم تانا د.م ولحم...
هز راسو لفووووق وزفر بجهد...ورجع جرها لعندو خشاها فيه دور ايديه عليها محاوطها تا شدات ليه تيشرت وحطات وجهها فحضنو...زيررررات عليه...بقا هكاك ضار هز بزطامو حلو وهي مخشية فيه...جبد منو ديك الايكو الي عندو...تا مدو ليها...هزات عينيها فيه وهي توسعهم شافت فيه بعينين منفوخين ورجعات شدات الايكو...
حبيبة : ديال بيبي الي (نزلو دموع) طاح ؟
بشار"حرك راسو"...
نزلات عينيها كاتشوف فيه اول مرة تشوفو واخا ماباين والو من غير نقيطة صغيييييرة...مصدومة مدهوشة غير كاترمش وشفارها يقطرو..
لاا هي قادرة تداوي ولا هو قادر يداوي...الايام الي كاتنسي وترمم الجراح...الكلام بعض المرات قاضي غراض ومرات لا...لكن الى كانت شي جملة غزل حلوة كان احسن لكن ماذا لو كانت جملة غزل مختلفة وفشييي شكل...والي ممكن تكون بحال الجملة الي نطق بيها دابا من بعد ماشد ايدها الي فيها الايكو وقربها لفمو باسها..وهز عينيه فيها تا شافت فيه ولاول مرة يغمزها...ويقول...
بشار : نعاودو واحد جديد (زعما نديرو ببيبي جديد ههه)..
ماكاين ما حسن من ان كل واحد يقول شنو عندو ويتصلح سوء التفاهم...ماكاينش ماحسن من ان الانسان يخرج شنو عندو...يعبر،، يصارح،، المهم مايخليش شي اشكال عندو...كان ممكن بشار مايقولش وحبيبة تبقى ساكتة...كان ممكن يعرف بعد مدة طويييلة وكان ممكن مايعرفش..لكن الصدفة الي حطها لله سبحانه لبشار عن طريق دوا هي باش عرف بداك طريف الي بقات محتافظة بيه حبيبة عندها وشاءت الاقدار يفهم منها سباب "الكلام الجارح" الي قالت ليه بطريقتها هي بشعورها واحساسها باش يوصلو...يمكن هاكا حسن باش تكون بداية جديدة ويمكن حسن كل شوية يتصلح شي سوء فهم باش مايكونوش مشاكل من بعد وعراقيل...
حطات راسها على صدرو عريانة هي وياه تحت الغطا او هي مغطية وهو غير ساتر راسو...هزات ايدها كاتمسح العرق وبدات تنش وتسوط...
حبيبة : طلق لاكليم...صهد...
بشار : بلاتي شوي...
حبيبة : هي طلق ماتخافش مايضربنيش البرد...
ماجاوبهاش وماطلقش لاكليم حيث عرقانة غادي يضربها لبرد..تسمع صوت تيليفونو دور راسو وهزو شاف شكون وهزات تاهي عينيها كاتشوف معاه شكون الي متاصل...طفاه ورجع حطو...
حبيبة : شكون...
بشار"هز حاجبو"...
حبيبة : اهي جاتني فشكل حيث ماشي وقت لخدمة..بتكون خالتي سعيدة...
بشار"طلع شوي الفوق تقاد فبلاصتو متكي على راس ناموسية..وجرها عندو حاوطها بايدو" : شي ناس من خدمة ديك لبلاد فين بديت...
حبيبة"هزت راسها بجهد" : اي.ران ؟ (حرك راسو) علاه باقي تتخدم معاهم ؟!..
بشار : لا..بقات شي خدمة واحلة تم...شهر هكاك ونفضي عليا زعت...
رجعات تكات عليه و بقات كاترمش...نزل عينيه بانو ليه صباعها كاتفرك فيهم وعاقدة غوباشتها...بلاه ماتقوليه اش كاين عرفها حيث مادام سمعت اي.ران اش غايكون...رجع راسو لوور...
بشار : ماتليتش محرك عندهم تم...خدام معاهم a distance...داك البلان الي كايحرگ فراسك حيديه...هانيا ؟!..
حركات راسها وهي تفك الغوباشة...بقات كاتشوف والابتسامة تاتشكل على شفايفها تا بانو سنانها...عارفها وحافظها...حطات ايدها على فمها حابسة ضحكة...نزل عينيه تا شافها ورجع رد راسو...بقاو هكاك الصمت سبد الموقف...مرة يدوز على درعانها ومرة يدوز على عنقها...مرة يخشي ايدو تال صدرها واخا صغيور قاضي غراض ههه..مرة يشد ليها راس يلعب بيه ويجرو تا تقفز تهز راسها مزنگة تلقاه كاع ما هنا...شوية يهز تيليفونه يدخل يبقشش فيه...حتى تگعدات دايرة عليها ليزار ساترة راسها...شافت فيه...
حبيبة : فيا جوع...
بشار"شاف ساعة" : من برا ؟!..
حبيبة : لا لا ندبق هي هنا...
حرك راسو وهي دور هزات كيلوطها لبساتو ولبسات عليه شورط وديباردو بلا سوتيان...وناضت كاتجمع فشعرها لفوق...خلاتو هاز تيليفونه ودوز لخط لخدمة الي قاليها...اما هي مشات ديريكت لكوزينة دارت الما فكسرونة حتى طاب رمات فيه شوية ليپاط...حلات ثلاجة جبدات صوص طوماط واجدة..دارتها فمقيلة تا طابت وزادت عليها حك ديال طون وجدات طبسيلها يلاه بغات تمشي عندو تسولو واش تصايب ليه حتى دخل عليها لابس غير شورط قصير تا قفزت شادة على صدرها...
حبيبة : خلعتيني هههه...بيتي نصايب ليك ؟!..
بشار"كمش ملامح وجهو حيث قبيلة تعشات " : لا..
حبيبة : هي جاني جوع وصافي...
بشار : بصحتك...
مشا لماشين ديريكت دار ليه كاس قهوة كحلة...ضار متكي عالبوطاجي جابد كارو كايكمي فيه حدا شرجم وحاضيها فنفس الوقت كاتاكل براحتها...شوي تا هزات راسها شافت فيه...
حبيبة : بايخصني نمشي عند gynéco..(هز حاجبو متسائل)..بندير كونطرول واش نقدر ن "صرطت ريقها حشمانة" واش وليت لاباس حيث فاش رجعت عندها گالت ليا حسن مايكونش حمل تاتفوتي شهرين يمكن ولا ثلاثة..
بشار"حرك راسو بتفهم" : شوفي rendez-vous ونديك...
حبيبة : واخا غذا نهضر معاها ونعلمك...ولكن يقدر نمشي سيمانة جايا حيث غذا عندي موعد مع البسيكو..وبنرجع ليكوغ ديال بيرمي...وخمسطاش ليوم وبايكون دخول مدرسي...عندي بزاااف ههه...
بشار : ماشي مشكيل..
تبسمات ليه ورجعات كاتاكل اما هو هز كاسو ديال القهوة وخرج لفوطوي برا كان حاج لابتوب ديالو والوراق وكان مسرح واحد البلان قداش خدام عليه...كملات هي ماكلتها وناضت غسلات داكشي...وخرجات لعندو بان ليها كايكتب فشي حاجة بستيلو ويشوف فلابتوب...كايبان منغامس بجهد...ديما كاتلاحظ هادشي وديما كاتأكد انه شخص عزيزة عليه الخدمة الي كايدير كايلقى فيها راحتو ممكن يبقى بسوايع مايملش...تفكرات نهار عطاتو تمرين حلو ليها فخمسة دقايق...تفكرات ديما كايعاونها ديما مغرقها كادويات...هي يمكن عمرها جابت ليه كادو...مشات لدوش حيدات حوايجها كاملين وتخشات تحت رشاشة تعاود تعوم وتوضى...خرجات من دوش وهي توقف عليه ريحتها فايحة تا هز راسو...
حبيبة : بدخل دوش...
بقى كايشوف فيها..حتى صغر عينيه حط اشنو عندو وجرها تا قربات ليه..نزلها عندو وحل كول بينوار حط صبعو على اثار مصة زراقت ليها تم..شدها منها تا تأوهات بشوي...
بشار : قصحاتك...
حركات راسها...شوية تا بان ليها حل الكول مزيان وجرها فرق ليها رجليها بزربة جابها فوق ركابيه دارت ايدها على صدرو كاترمش..تا دفع ليها راسها عندو وترمى على شفايفها بقبلة وايدو سارحة كاتحل ليها البينوار ودخلات مع جنبها تا زير عليه بايدو وهي تقفز...ونطقات بلا ماتحس..
حبيبة"بصوت منخفض" : بحرا دوشت...
بشار"ببرود" : ماشي مشكيل..عاوديه..
ماحسات تا طيح ليها البينوار ودورها فوق الفوطوي جالسة هز ليها رجليها لواهم ورا ضهرو...
ايييوى هاد المرة قضا معاها فالمراح وسط الوراق ديال الخدمة...ماعندوش وقت..رجعات على وعدها وسعدها دوشات خرجات نشفات حالتها وذهنات مرطب لحمها كامل وشعرها ووجهها...حيث كثرة تدواش كاتنشف البشرة...مشطات شعرها وخلاتو مطلوق وتخشات ففراشها عينيها كايتلصقو بالنعاس...بقى هو وراها شحااال تا كمل شي خدمة صيفطها عاد دخل دوش تاهو وخرج لبس عليه وتخشا حداها...جرها لعندو من كرشها نخششها فيه عاد نعس وراها...ماعرفش وماميزش هاد الاحساس الي كايحس بيه...احساس "الراحة"...يمكن فاش كايخرج برا يواجه الخدمة عادي يدخل يلقى راحتو مع حبيبة ولكن بمجرد ما كايواجه العائلة الي سبابو فعذابو او بالاحرى الشخص الوحيد الي دمرو "مو"...الي مرض نفسيتو الي كان كايسعى نص حياتو تابع رضى تا ولا عقدة حياته...
صباح يوم جديد...
فمدينة مراكش نيت..بالضبط مستشفى محمد السادس...فجناح النساء والتوليد...كاتمشي وتجي فداك الممر...كرشها نازلة لتحت بزاااف..عروقاتها تكب مع الحر ديال الوجع والصهد ديال الصيف ولا حول ولا قوة إلا بالله...
ربيعة : واااااربيييييي... ياربي فكني...ممممم..واااميييمتي دعي عمايا يطلگ سراحي...وااا ميمتي را الحر عذبني اااامييييمتي...
الام : سيري وجي على الله تسرح ليك ديك الوالدة...
هزات ربيعة الزيف الي طاح ليها ورماتو بقات بشعرها عريان..كون لقات حوايجها تحيدهم...الوجع ديال الولادة والصهد وربي يرحم...كاتمشي وتجي فديك طوالة حيث دار ليها طبيب وجع اصطناعي والحر ديالو قاصح بزاف...كاتحس بالماس كايحسكو فيها شي وجع صعييب مايتحملش...خلاتها معا مع ختها وخرجات وهي تلقى زكريا واقف كايهضر فالتيليفون..تسناتو تا كمل وهو يدور عندها...
فاطيمة : مضرا...
زكريا : واجبني مانعرف فين كان..گاليا هاني شاد طريگ جاي من خريبگة...
فاطيمة : هاويلي كان عند المصيبة الي عدو...
زكريا : مانعرف...اش دارت مي ؟!..
فاطيمة : راها تلالي شوي وتدخل عد الفرملية تشوف...
حرك راسو وهي تدخل..بقى هو برا جالس وحادر راسو...تا شوية حس بكتفو مشا وجا هز راسو وهو يتصدم...
حسام : فين اخويا الكبير لباس..
زكريا : نعل والديك لاش جاي..
حسام"ضار عند باه" : عايرك اهاشم...
هاشم"وقف داير ايديه وراه" : تنسالي مشكيح الي حطك المدوبز...اش دارت مك...
زكريا : راها باقي...عيطت لبا...
هاشم : عالسلامة فين صاد...
زكريا : كان فخريبگة...كان فالكوميسارية...
هاشم"خرج عينيه" : هاناري اش دار ؟!..
زكريا : ماعرفت هادشي الي گاليا هاهو جاي فطريگ..."هز عينيه مكمشهم من شعا شمس" جيتو غا وحدكم ؟ فين مي وعمتي مليكة تاهي گالت بغات تجي...
هاشم : مليكة شغلها هذاك ماسايق ليها خبار...هاو مك عيدة عيانة گالت غاتولد وتجي عندها ماتبقى تسنى...حنا جينا نشوفوك نتا نشوفو اش كاين الى فكها الله مبارك ومسعود...
حرك ليه راسو وجلس...بقاو معاه شوية وهما كايتسناو يعيط لجداه يسول تقوليه باقي...دازت شي ساعة حتى ناض هاشم خلا معاه غا حسام وصاه عليه...واصلا حسام مكانش غايخلي زكريا واخا هكاك...مرة يخرج يجيب ليه ماياكل ولا يشرب ومرة يدورو غا تما فسبيطار حيث كبير بزاف...حتى خرجات جداه عيطات ليه وقالت ليه را قربات بزاف...يعني فاي لحظة تدخل تولد الى تحلات الوالدة مغاياخذوش معاها وقت بزاف...
هزات راسها للسما وبدات تلالي...شادة فيها ختها غاديا بيها فالممر...حتى تعيا وتجلسها ويهمد عليها الوجع وتكا على ختها...جابت ليها مها طبسيل عراتو وهزات منو بيضة بلدية مرمداتها فمليحة وكمون وعطاتها ليها بدات تاكل فيها بشراهة ملي حبس الوجع شوية حسات بالجوع...
ربيعة"كاتندغ وبدات تنين حيث بدا كايرجع الوجع..كمشات عينيها وصرطات ريق مع الماكلة" : امممممممم...وااااربييييييي واربييييي...
ماجدة"ختها" : دكري الله..ودعي معانا هههه...حطي البيضة حطي هاويلي توجعي وتاكلي...
ربيعة : مممم واااربيييي راني كنتعذب اربيييي....(هزات راسها لفوووق ونزلو دموعها)..
كانو معاها عيالات كايولدو وهي خارجة برا وكاينة لي لداخل كاتزحم...جناح توليد هو هذا...شوية كمشات عينيها وغوتات بحر جهدها حتى حسات بشي حاجة نازلة بين رجليها هبطات راسها وعينيها كاتشوف دموعها نازلين وعينيها منفوخين حيث من الفجر وهي توجع...وسعات عينيها وخبطات ايدها فوق فخدها وهزتها ورات ختها...
ربيعة : سگية ااااخويتي سكية طرطگت...وييييييويو...
بزربة نوضاتها مها شاداها من ايد وختها من ايد...ودخلوها لعند الفرمليات الي شدوها من عندهم وسدو عليهم...وقفوها هبطو سروال شوي وخشات الفرملية صباعها بزوج لتحت قلباتها..
فرملية : تكاي هنا دغيا...
ماتكاوهاش هي الي تكا حيدات سروال والكيلوط وهزو ليها رجليها فوق لعيبات حطتهم فوقهم مفرقين...وبداو معاها فعملية زحمة اصلا بدات كاتحس بشي حاجة بغات تخرج منها...بقاو عليها زحمي..ويغوتو عليها وتزحم...
ربيعة"زيرات بحر جهدها" : ممممممم...وااااااربيييييييي ربي...وااربيي خوذ ليا حقي فييييه وااااربي راني فوقفتي كي شتتو ليا شملي رزييييهم فالي عزيز عليه...واربي ماتكمل عليه واااربي...واااربيي شتت ليه شملو ورزيه فتريكتووو..وااربي بغيتو عمرو يدير تريكة واربيييي...
دفعات مرة لولة وثانية و...تا ضربات ليها لفرملية لتحت بمقص خاص زادت وسعات ليها الفتحة..عاد قدرو يخرجو راس وهوووپ خرج الوليد..شداتو القابلة من رجليه وقلباتو ضرباتو ضربات خفاف عاد طلقها بغوتة حااارة تصمك..
فالوقيتة الي دار معاها غايجي يديها تقرا ساعتين فالكوغ ديال بيرمي فالصباح..نزلات لعندو لقاتو واقف كايتسناها مخرج ايدو من شرجم كايكمي...ركبات بلاصتها مبتاسمة ليه مع ماشافتوش ملي خرج فالصباح قربات عندو باسها في فمها بوسة خفيفة وشد ليها وجهها كايقلب فديك المصة لقاها خباتها بفوندايشن...
حبيبة : صباح الخير...لا خبيتها..
وقف طوموبيل قدام سيارة التعليم الي كانت بادية فيها من قبل ماتزوج بيه وحبسات...شعور قدييييم رجع ليها...علاش لا وهي تفكرات التوصيلات ديال باها...كانت كاتجي مجمعة معاه على رجليهم ولا يكون جاي من المحل ويجي ليها بطوموبيل ومايوقفو تال شي ريسطو يتغذاو فيه يخليو ناديا تنگر حيث تغذاو برا...حسات بقلبها ضرها عينيها غرغرو تنهدات وهي دور عندو وتبسمات ليه...
بشار : قربي...
قربات عندو باس ليها راسها ماسولهاش مالها..عرف باشنو حاسة حيث معاودة ليه على المدرسة الي بدات فيها وكان باها كايوصلها ليها...
حبيبة : صافي ملي نخرج نتسناك هي هنا...
حرك راسو وهي تنزل بقى واقف حاضيها تا دخلات لمدرسة وهو يمشي لخدمتو تاهو...دازو ساعتين تقريبا وهي تخرج من المدرسة...بقات واقفة كاتسناه فين قاليها...مرة مرة كادور راسها تشوف فدنيا تما...توحشات هاد البلاصة بزاف...الى ماوصلهاش باها كاتجي ليها على رجليها ولا تمشي على رجليها...شوي وهي تلمح سيارة باها غاديا وسعات عينيها وبقات متبعاها بعينيها تا بان ليها راكب حدا فيصل الي سايق حساا بقلبها تهز من بلاصتو...
حبيبة : باباااا...
عينيها تحجرو بدموع وهي متبعة لعين لسيارة تا غبرات...ماحسات تا تحطات ايد على كتفها غير من ريحتو مادواتش ضارت وعنقاتو حطات راسها على صدرو ونزلو دموعها...
حبيبة : شفت بابا...
بشار"دور عليها ايدو كايدوز على ضهرها" : ششش...
حبيبة : توحشتو بزاااف...توحشت ماما...
ماجاوبهاش حيث ببساطة ماعندو مايدير ليها دابا..الي فجهدو دايرو معاها محاول ما امكن يهتم بيها ويسبق ليها خاطرها...محاول باش يكون اهل لثقة ويبين لواليديها راه هي الشخص الوحيد الي مستحيل يضرو حيث دخلات لقلبه...
طلعات لسيارة جبدات مشوار من تما كاتمسح فعينيها وهي دور عندو كاتشوف فيه مغوبش دار نضاضر شمس وديمارا طوموبيل...مادوات ماتكلمات حطات راسها عالزاج وبقات متبعة طريق...حتى وصلها قدام العمارة فين كاينة طبيبة نفسية...نزل من سيارة وطلع معاها ساااكت كل شوية دور تشوف فيه كايبان ليها عادي كيف ولفاتو...وصلو لعيادة..بقات جالسة شوية وهي تخرج عندها طبيبة بابتسامتها حركات ليها راسها وهي توقف ضارت عند بشار حرك راسو مثقل وقاليها كايتسناها تما...دخلات لحصة ديالها وهو وقف ومشا لواحد الكوان كايهضر فالتيليفون مع ناس الي كانو متاصلين بيه ومجاوبهمش حتى يسالي...رجع كايخدم من تيليفون ورجع وقف بعد شوية كايكمي...حتى خرجات كان عاطي بالضهر تا حطات ايدها على ضهرو...
حبيبة : بشار...(ضار عندها وعنقها بجنب)..تعطلت عليك...
بشار : ماشي مشكيل...هانيا ؟!..
حبيبة"تنهدات وتبسمات ليه" : هانيا...يلاه نمشيو...
عنقها بجنب ونزلو لتحت ركبو فطوموبيل وتوجهو اول بلاصة تاخذا ليها غذا واجد...عاد مشاو مباشرة لعمارة...طلع معاها لدار حتى دخلات ونزل رجع لخدمة ديريكت لمختبر حيث عندو خدمة كثيييرة باقي تاحاجة ماتقادت مزيان...دخلات دريكت توضات وصلات عاد ناضت لكوزينة حطات الغذا الي جابت من برا...تغذات تا شبعات كان فيها جوع...جمعات داكشي..جابت معاها كاس وقرعة ديال لما ودخلات لبيت جبدات فيتامين الي واخذ ليها...دارتو فالكاس تا طلق وهي تشربو...جات ترجع فيتامين لمجر وهو يبان ليها داك كلينيكس الي فيه داكشي...هزاتو بين ايديها كاتقيس فيه..ماساخيش عليها ترميه..تكمش عليها قلبها كاتحس بيه ولدها بين ايديها...زيرات عليه وهي ترجع لبيت هزات تيليفونها يلاه بغات تصوني لعمتها حتى سمعات الباب كايتدق...
خرجات من البيت ومشات حلات الباب وهي تخرج عينيها...قلبها مشا وجا وهي كاتشوف فيها قدامها...غمضات عينيها وحلاتهم...واقفة قدامها هازة فايدها ساشية شاداها بزوج ايدين فيها طاسة لداخل...
حبيبة : م ماما...
ناديا"مدات ليها طاسة..ونطقات بدون ماتشوف فيها هازة حجبانها مغوبشة" : شدي هادشي...
حركات راسها وشدات من عندها طاسة عينيها محبوسين فيهم دموع صدرها كايطلع ويهبط حابسة البكية...ضارت ناديا بغات تمشي...
حبيبة : ماما..
ناديا"ضارت عندها" : اش كاين...
حبيبة"عوجات راسها كاتفرك فايديها" :ماتمشيش عافاك..
سكتات كاتشوف بنص عين...حتى عواجو شفايفها دليل على انها تاهي حابسة البكية ومغلفة بقناع الصرامة ساعاك ماقداش..ضارت عندها وهي تخنزر فيها لكن تخنزيرة فشلات...
ناديا : ماعندك مابيتيني..انا جيت نعطيك دوا...هي مسخرة لعمتك..ماعندي مانگجدر بيك..وو
مابقاتش قدرات تكمل...دارت ايديها مغطية وجهها وبدات تبكي...قربات حبيبة بعدات ليها ايديها كاترعد..وناديا كاتنتر...حتى بعدات حبيبة ووقفات دايرة ايدها على فمها كاتنخصص...ماحسات تا جرتها ناديا بجهد ودارتها فحضنها...
ناديا"حطت راسها على راس حبيبة بحزن واشتياق..بقهرة وبالم..توحشات بنتها بزااف ماقدراتش تبقى قاسية..كبدتها الحارة عليها هي الي خلاتها تكون قاسية وهي الي خلاتها تلين وتجي لعندها واخا بمبررات تافهة"..
ناديا : شويتي گلبي عليك افرحتي لولة...
خوف الأم على ولادها شيء ما فيش شك فيه، كتعيش معاهم كل لحظة وكأنها لحظة مصيرية....هاد الخوف ماشي ضعف، بل حب وعناية كبيرة، وهادشي اللي كيخليها دايما مستعدة تدير أي حاجة باش تحميهم...وهادشي الي وقع حتى مع ناديا..من كثرة الخوف على بنتها خصوصا انه عرفات مرض بشار وكيفاش كان كايضرب راسو وزاد اكدو ليها هو نيت ومانكرش...كان صعيب عليها انه ترتاح وتقبل ان بنتها تعيش معاه حيث يعياو يدوزو ليه الايجابيات الي فيه يعياو يعتارفو بخيرو كايبقى مرضو شي حاجة الي يتخاف منها وبزاف...ما اذاهاش اليوم ممكن ياذيها غذا واخا يكون كايبغيها...احيانا الحب مكيكونش كافي هادشي بالنسبة لواليديها...
فالصالون...حاطة راسها فوق صدر ناديا معنقاها بكل مافيها...ماساخياش تفرق عليها خصوصا انه توحشاات هاد الحضن ديال الام..توحشات مها توحشات تعنقها وتشم ريحتها...توحشات هضرتها توحشات عتابها..لومها..نصائحها..توحشات كل حاجة فماماها...حضن الام كايبقى استثنائي ومايجيش حضن ينافسو...
حبيبة"كاتبغي ناديا تحيد ايدها من شعرها وترجعها ليها" : خليها عافاك...
ناديا"تنهدات" : بايخصني نمشي...
حبيبة : باقي الحال.."سكتت شحال عاد كملت"..بابا باقي ماتيجي حتى المغرب..هي بقاي عافاك..
ناديا : ما..مابيت يعرف جيت..خليت ايوب لتحت تايتسناني..هي كذبت عليه وگلت ليه بنمشي نصايب نضاضري شوف...
صرطات حبيبة الغصة حيث ماعمرها كانت تفكر ولا يجي فبالها يقاطعوها واليديها خصوصا باباها الي كانت علاقتهم يتضرب بيها المثال !!...ماعمرو كان يجي فبالها تجي عندها ماماها تخبية على باباها..ماعمرو كان يجي فبالها الى عرف باباها بهادشي يتعصب ويمرض...بسبابها..شي حاجة صعيب تهضمها وغصة تبقى فحلقها وخاطرها يتضيم...
سكتات حبيبة لكن ناديا حساات بسكاتها ممطمنش..نزلات عينيها وطلات عليها لقات دموعها نزلووو..تنهدات عرفاتها بقا فيها الحال من جيهة باها...
ناديا : حبيبة نتي كنتي عارفة اش جاي من ورا ماتبعتي راجلك ؟!..
حبيبة"هزات راسها" : واخا بيت راجلي بيتكم حتى نتوما..بيتكم معايا كيف كنتو ولا حسن...بيت تفهموني وتعرفو بلي مرتاحة مع بشار..هاني مع بشار مرتاحة ولكن ناقصاني شي حاجة...انا مع بشار فرحانة ولكن فرحتي ماكاملاش...بيتكم معايا..توحشتكم توحشتك نتي توحشت تخلي ليا اوديو اشنو تاديري فاش بيتي نعاونك..توحشت فاش نصيفط ليك اوديو نسولك اماما باش نعبر كيسان العنبة ولا هادو الي عندي يقضيو...توحشت نمرض وتعيطو ليا كي بقيتي..فاش يقرب رمضان توصيني شنو ندير وتجيبي ليا حقي من سلو من بريوات شباكية الي تتصايبي نتي وعميتو فاش تتجمعو...يقرب العيد تعلميني ندير الحلوة راسي وتصيفطي لي حقي...
هي تتعاود وناديا كتشوف فيها واخا محاولة تبقى صلبة لكن عينيها غرغرو...حتى هي توحشات بنتها ليالي دازو وهي معتالية تفكيرها تا ولا نعاسها ماهو نعاس...فينما مشات فبالها تا ضرها قلبها وخلاها تستسلم وتجي لعندها...
حبيبة : بيتكم تخليوني مني لراجلي واخا را مستحيل يضرني...
ناديا : خفنا يجي وقت ويضرك..نهار جا عندنا اكدها لينا براسو وشفنا ايديه مضروبين...شفنا بلي هو لحمو يا بنتي مارحمو بايجي شي نهار يمرض ويفوت فيك دقة واخا يبغيك باتكون ضربة خطا...نتي عمرك شفتي المخاصمة بتعيشيها وبتشوفي د.ماياتها...بشار ماعمري گلت راه ممزيانش بالعكس خيرو لدابا باباك باقي يشهد فيه فكو من كريدي ووقف معاه وكتب ليك حق من الحمام..ولكن مرض تايبقى مرض ومرض نفسي من فوق...كيفاش بيتينا نتقبلوها..هاهو المو.ت الحادث ديال باه ودوزناه حيث مكتاب الخطأ كايوقع كلنا ممكن يوقع لينا ماكفس..وحتى مرضو ابتلاء كيف عرفنا مرضو بالصرع حتى هذا ولكن تايبقى مرض يضرك..
حبيبة : كون كنت مريضة ب مرض بشار !!..
ناديا"بقات تاتشوووف فيها شحال عاد نطقات كاتحرك راسها" : بيتي المعقول ؟! (حركات راسها)..نجري بيك فسبيطارات ومنفرطش فيك..ويجي ولد ناس مانقبلش حيث كيف نبغيه لبنتي نبغيه لولاد ناس...هادشي الي بيتي تعرفي..
حبيبة : وهاد ولد ناس كان بايكون بشار ومكانش غايفرط فيا...
ناديا"هزات حاجبها كاتحرك راسها" : ماتلوميناش احبيبة...
حبيبة"حركات راسها ب لا وعينيها مغرغرين" : عمري لمتكم وعمري نديرها...انا بيتكم هي تفهموني وتقبلو اش بيت خليوني مني لقراري..ماتخافوش عليا اماما عمركم تخافو عليا وانا مع بشار...بشار اه دار بزاااف الحوايج خلاوني نسمح ليه عاد نبغيه...تعقلي فاش كنت بيت نتفارق معاه ؟!..
ناديا"حركات راسها"...
حبيبة : تعقلي فاش بابا گاليا عطي فرصة...ديك الوقت اماما كنت بصح بيت نتفارق معاه حيث كنت مضاربة مع راسي واش نعطيه فرصة ولزواجي بيه..ماكنتش باغياه ماكنتش مسامحة ليه..ملي خلاني فاول زواج وانا كنكرهو..كنت معاه هي حيث (مابغاتش تقوليها راه ضحات براسها باش تزوج بيه ويفكو لكريدي حيث لحد ساعة باقي واليديها ماعارفينش)..خفت من هضرة ناس تمرض بابا الى تفارقنا ديك الوقت كان داز على زواجي 15 يوم..شنو كان غايدير بابا وبنتو مرجعينها ليه ديك ساعة...رجع بشار وطلب نبقى معاه حتى يفك قضية خوه ويعطيني حريتي..منها نعاونو ومنها دوز وقت حتى الى طلقت يگولو ماتفاهموش بلاصة ماينعتو فيا بالخايب لبابا الى رجعت فايامي لولة..."وسعات عينيها وشفارها يقطرو"...ماكنتوش تصبرو مكانش بابا يصبر...
يمكن جا الوقت الي خاص تكون هاد الجلسة بين حبيبة وناديا...يمكن لو هاد الجلسة تدارت شحال هادي كان غايكون اقتناع وتفاهم...كان ممكن تعرف بنتها مناش دازت هي وبشار حتى وصلو لهاد الحب الي خلا حبيبة تبغي بشار بكل عيوبه...كان ممكن يتبدلو بزاف الحوايج...اكثر شيء انه تخليها تحمل قراراتها مادام عاشت هادشي...
ناديا"ماتلاتش دوات"..
حبيبة : داز شحااال عايشة معاه شهور وانا فبيت وهو فبيت...عمرو فكر يقرب ليا..الى كانو ناس تايعطيو شبر هو عاطيني زوج...
ناديا : كيفاش..
حبيبة : اه كنتو تاتجيو عندي وماكنتش تنبين ليكم اش كاين...بشار ماعطيتو راسي حتى طلب مني سماحة وماعطيتوش راسي وماعمرو تشكى ليا...كان كايگوليا هي بقاي معايا بخاطرك...ماعمري نقرب ليك حتى تبغي نتي...كان مهلي فيا واخا مكنتش باغياه...كان مسبقني على راسو واخا ماكنتش تنشوف فوجهو...خاطر بحياته هي باش ماتقيسني قمشة هي باش نسمح ليه على ديك الليلة..."هزات فيها عينيها حمريين"...انا ماكنتش غانسمح ليه على ديك الليلة ودوز عليا بزاااف شاف الم.وت هي باش نسمح ليه...شفت منو بزاااف خلاني نبقى معاه ونتعلق بيه ونولفو بزاف حتى لقيت راسي ماقادراش باقي نتفرق عليه...نتي كنتي تتحطي راسك ومرتاحة حيث انا مع راجلي واخا زواج تقليدي...انا كنت كنتقات.ل باش مانبغيهش وكنت معمرة راسي بلي هو انسان ضرني وسمح فيا ودارني لعبة باش انتاقم من مو...
ناديا كاتسمع لحكايتها مع بشار وكاتشوف عينين بنتها كيفاش كايلمعو ملي كاتذكر بشار...كيفاش هاد البنت كاتهضر على هاد الانسان بهاد طريقة...معقول حبها ليه كبير.. معقول وصلها لهاد الاحساس...تنهدات حبيبة وهي منزلة عينيها...
حبيبة : الي خلا وحدة كانت تتكره تشوف حتى شوفة فيه تسامحو بايخليها عمرها باقي تفرق عليه...
تنهدات ناديا يلاه بغات تجاوبها تا سمعات حبيبة تيليفونها كايصوني وناضت وهي كاتجري ضارت عند ماماها...
حبيبة : بايكون بشار خاصني نجاوبو...
مشات جابت تيليفون وجات جلسات حداها وحطات ىاسها على كتفها وزيرات عليها بايد وايد شادة بيها تيليفون...جابت لناديا ضحك...
حبيبة : لا مانعستش..."شافت فناديا ورجعات" بشار...ماما معايا...فالدار ههه...(ناديا دارت ايدها على حنكها ودور فراسها)..
بشار"هز حاجبو": مزيان...نتي (سكت شحال باغي يتأكد واش مزيانة) هانيا...
حبيبة : هانيا..فرحانة...
بشار : بكيتي عينيك ثاني..
حبيبة"مسحات بقايا دموع" : بكيت هي شوي...ضروري..
بشار"حك شنايفو ورجع كمل" : بروفيتي معاها...تهلاي فراسك..
حبيبة : حتى نتا..الى ماتغذيتيش تاني علمني نوجد ليك شي حاجة فاش تكون جاي...
قطعات معاه حطات تيليفون فوق طابلة وضارت شافت فناديا لقاتها تاتشووف..قربات ليها وباستها فحنكها...
ناديا"تنهدات" : نتي..شوية ؟!...
حبيبة : شوية شوية...متبعة دوا والعشوب الي مخليا ليا خالتي سعيدة...
ناديا"كل مرة تزيد تندم على تعاملها مع سعيدة خصوصا ملي عرفات انها بقات مع حبيبة واهتمات بيها" : شنو دوا الي عطاتك طبيبة...
حبيبة : مامشيتش عندها...فاش كان بشار لهيه...وصى عليا حسام وخالتي سعيدة يمشيو معايا ندير تحاليل باش ملي يخرجو يرسلوهم ليه ديريكت فالايمايل ديالو..داهم لواحد الاختصاصي تما هو الي خرج ليا دوا مزيان وخذتو من هنا وجاب ليا هو معاه...
ناديا"حركات راسها كل مرة تتزيد ترتاح هادشي ماشي جديد على بشار اهتمامو بحبيبة هي عارفة هادشي..لكن ظروف لعبات والهضرة ملي وصلاتهم عرفاات الوتر الحساس فين كاين ولعبات بيه...شوية وهي تنوض حبيبة وشداتها من ايدها...
حبيبة : اجي معايا...
ناديا : فين اتا خليني نمشي ويلي ايوب خليتو برا...
حبيبة"وسعات عينيها" : ويلي گولي ليه يطلع..عافاك (بترجي) عافاك اما بقاي هي تايفوت العصر...اه ماشي ديما بتجي عندي خليني حيد منك الوحش...
ناديا"بنص عين" : ممم..كون موحشاني كنتي بتبقاي معايا..ماشي تخليني...
حبيبة : يااك..وهي زيدي نكمل ليك سوليني ونعاود ليك الي بيتي...عندي منعاود ليك بزاااف...فخبارك شرا بشار بتي فيلا...فخبارك ولا فيا جوع بزاف..كناكل وتايجيني جوع..واقلة دوا والفيتامين الي عندي تايوكلوني...فخبارك (كاتهضر وغادين لكوزينة)..كنت بيتك باش تمشي معايا نختار فراش لدار جديدة...ماكرهتش كون تمشي معايا تشوفيها وعاونيني...والكوزينة هنا كاينين شي حوايج بيت نوريهم ليك و..
ناديا"خرجات عينيها" : ويلي تهدني بسم الله عليك...
عاد سكتت..من الفرحة ولات غا الي جا فمها تقولو كاع داكشي الي جامعة خرجات...هزات ناديا تيليفونها دوزات لخط لايوب وهي طيرو ليها حبيبة من ايدها...
حبيبة : جدر طلع...
ايوب : شكون نتي...
حبيبة : ايوووب وطلع تشرب معانا اتاي ماما باقي معطلة شوي..
ايوب : ماكاينش راجلك مانطل...
حبيبة : ايووووب طلع ولا نگوليه هو يهود يجيبك..
قطعات عليه وهو يطير خرج من سيارة وطلع يجرييي...اما مشات طير دارت الما يطيب وجبدات براد ومشات لطاسات ديال حلوة دارت منها فطبسيل....ورجعات جلسات حدا ناديا عنقاتها..
ناديا : راه مانطيرش هي تهناي..هي هو بتصبري فين وفين بنجي..وبتصبري حيث باك هذاك "هزات ليها راسها" سمعتيني...
حركات راسها وهو يدق ايوب الباب...ناضت لوات عليها بينوار ومشات حلات ليه...
ايوب : عرفتي فاللول فاش كنت تانجيبك عند راجلك كنت خايف تحصلنا مك وباك..ودابا مع ناديوش...انا متأكد نهار بايحصلني باك بايسمح ليكم كاااملين الا انا بايشدني يدير ليا ساكسباني ميا خليفة...
جاب ليها ضحك حيث المعارك كلها كايلقاوه مع كلشي واقف مع ناديا ومولاي حفيظ ومع حبيبة ومع بشار ومع فيصل وحتى حسام...معذبينو غا بمشاكيلهم تا مو مابقى مشا عندها...دخل كايبرگم جلس معاهم فالكوزينة مابغاش يمشي لصالون...
ايوب : ناديوش نشرتي رجليك اتا...
ناديا : اش تسالني...
ايوب"هزهز حجبانو" : مولاك حفيظوش...
ناديا"تبسمات بغيض" : بتوصلها ليه ولا...
ايوب"بقى يرمش حيث هاد شوفات تايخلعوه صرط ريقو" : هو الي بايوصلها ليا...تانا لا...
حبيبة : ههههه...اهيا شفتك مابقيتي تتلوح والو فسطوري والو من خدمتك...
ايوب : ديما تنبوسطي...
حبيبة : ماتيطلع ليا والو...
ايوب : حيث كاشيتك...
حبيبة"وسعات عينيها" : علاش !!...
ايوب : من نهار مسح ليك راجلك الميكاب الي درت ليك حلفت ماباقي تشوفي سطورياتي..."خرج عينيه" بتسكتييي..رزاني زوج مرات ف 1000 درهم..
حركات ناديا راسها يمين شمال على هبال ايوب...وحبيبة ميقات فيه وهي تنوض شوي حسات بحال وجيعات خفاف تحت كرشها نفسهم تايجيوها فاش تتقرب تجيها ليغيكل بسيمانة هكاك ولا كثر...دغيا مشاو...قادت صينية اتاي وعطاتها لناديا باش تكب فرحانا ماقاداها فرحة...حطات طبسيل حلوة وجبدات مونادا من ثلاجة ديما عندها حيث عزيزة عليها هي وعصير حطاتهم فينما دوز تهز وتحط تا جرتها ناديا وجلستها...
حبيبة : هاني جايا...
ناضت بزربة لبيت جابت فيتامين ديالها دارتو فكاس وجلسات حداهم شرباتو...شافت فيها ناديا...
ناديا : حتى هذا خرجاتو ليك...
حبيبة : هذا زادو ليا بشار مع دوا..سول داك طبيب وخرج ليا هادو جابهم ليا معاه باش يعاونوني...
ناديا"هزات حجبانها وحركات راسها..كبات اتاي وبقاو شوي معاها مجمعين عاودات ليها حبيبة شنو داز هاد الشهر كامل..حتى وصل الوقت وهو يقوليها ايوب يلاه وناضت.."..
ناديا : نحاول وصافي..تبعي دوك العشوب الي جبت ليك را مطحونين بايدي..والي صيفطات ليك داداك تاهي..
بعد وداع طويييل ماسخاتش بيها شحال وهي معنقاها وتبكي..بكاء فرحة اشتياق..ماساخياش..بزاف الاحاسيس تجمعو...عاد طلقات منها تا عطاتها وعد ترجع فاقرب وقت...مشات ناديا وايوب وهي دخلات لدار جمعات لكوزينة وخرجات لمراح تما جلسات فوق الفوطوي بقات غير ب اونسومبل ديباردو وشورط ديال ساتان فالخضر مغلوق..حطات رجليها فوق طابلة وتسندات لور شادة تيليفونها لاهات راسها بواحد رواية شوية شعلات تلفازة نيتفليكس تفرجات فواحد مسلسل حتى قرب المغرب وهي تسمع صوت الباب حطات تيليكوموند ووقفات مبتاسمة وفرحانة علاش لا وماماها جات عندها..غا دخل كان هاز ساشيات فايديه يلاه دار ماحس تا تلاحت عليه عنقاتو من كرشو...
حبيبة : جيتيي..
بشار"تحنى باسها فراسها" : هانيا...
حركات راسها عنقها بجنب ومشا بيها تال كوزينة حط دوك ساشيات...مشات بزربة دارت ليه كاسو تالقهوة يوجد...ورجعات تاتشوف فدوك ساشيات شي من مخبزة وشي مقدية ديال درا وصاتو عليها..وشي جايبو ليها كانت شيبس اما سقاطة ديجا عندها جايبها ليها من برا...
حبيبة : شرب قهوتك بينما دوشتي تلقاني وجدت ليك ماتاكل..
حرك راسو عطاتو كاسو القهوة مشا تنغم بيه مع الكارو...عاد خرج ديريكت لدوش دوش ولبس عليه دخل لقاها حاطة ليه ماكلتو...
بشار"هز عينيه" : نتي...
حبيبة : كليت مع ماما شبعانة..
بشار : شوفي وكان..
حبيبة"جاها ضحك حيث ولا كايجيها جوع" : ههههه لا الى جاني جوع كاين ماندبق...حتى لعشا..
بشار : ماديريش بحسابي...
حبيبة : معشي برا...
بشار : لا..ماناويش وصافي..
بدا كاياكل هزات عينيها كاتشوف فيه كاياكل بالقاعدة خاتر حتى فماكلتو...كايهز تيليفون يشوف شي ايمال يقراه ويرجع ياكل...
حبيبة : عندك خدمة كثيرة...
بشار"حرك راسو"..
تنهدات ورجعات كاتفكر الحوار الي داز بينها وبين ماماها..تفكرات كلام ناديا وتفكرات ردها على الجواب...كيفاش جاوبات وهي متأكدة ان هاد الانسان غايدير بزاف عليها والى تحط بلاصتها..تفكرات المرض وهي تنزل عينيها لايديه الي ديما كاتشوف دوك ندبات...كانو حدا بعضياتهم..كانو كبار واخر وحدين باقي حموريتهم واخا براو...ماحسات تا قربات ليه وعينيها عليهم ماحس حتى لقاها شادة ليه ايدو وحاطة صباعها على دوك ندبات...هز حاجبو مستغرب ماشي علاش حطت ايديها ولكن علاش عينيها مغرغرين...
حبيبة"بكلام متقطع" : من امتى.. بديتي هاد..هاد شي..
بشار"نزل عينيه لفين حاجة صباعها وهو يشوف قدامو" : من نهار حطيت رجلي فداك Clinique psychiatrique..
حبيبة"بقات كتشووف فيه" : علاش كنتي تا ضر راسك..علاش تبرد الاعصاب فلحمك...
بشار"حط الخبز وبدا يسوس فايديه..حك لحيتو وعينيه لقدام" : كانت حالة وصافي..نهار يلحگوها فيا لعظم ماكنتش نكونطرولي راسي...باش نتحكم نكمدها فلحمي...
حبيبة : تا ضر راسك..لحمك هذاك وهما داكشي الي كانو باغيين..عرفتي نهار شفتك ضارب ايدك باش حسيت ؟!..ماعرفتش ولكن حسيت بقلبي ضرني بزااف عليك مابيتكش ضر راسك...
عض شنايفو وهو يهز ايدو جابها جنبو تحت باطو معنقها...تنخششات فيه بحزن...باسها فراسها وبقاو هكاك تا نزلات عينيها لايدو لاخرى تاني وحطات صباعها تم...
حبيبة : كنتي تتحس بداك الضربة...
بشار : لا..
حبيبة : عمرك حسيتي. كاع...
بشار : ماشي بزاف من بعد ولفت...
حبيبة"تگعدات وهزات راسها فيه" : عمرك حسيتي بزااف...(بالالم ديال دوك ضربات)..
بشار"حرك راسو"..
حبيبة : امتى...
بشار : نهار داوك واليديك عليا...(نهار هربوها سيدي افني)
يتبع...
التعليقات
لا توجد تعليقات بعد، كن أول من يعلق.