عروس الجحيم الجزء 89

داز شوية الوقت وهي تحس بترويييعة وناضت كاتزرب لدوش طفا الكارو وهو يتبعها تاني بقى واقف حتى رجعات داكشي الي كالت ونوضها بشوية غسلات وجهها كاتنهج...

هزها بين ايديه حيث كاتفشل فاش كترجع...داها البيت وحطها...

حبيبة : بيت نمشي لصالون...ايجيو وانا جالسة هنا حشومة...

بشار : رتاحي شوية...

حركات راسها وهي تنوض لماريو جبدات بيجامة مستورة لبساتها وخرجات لفوطوي...لقاتو هز داكشي فاش فطرو دارو فماشين وخرج ...

بشار : نشوف مرت العساس دير لميناج هنا..

حبيبة : اه حسن كنت بيت نگولها ليك مابيتش نكرفص سناء..

بشار"حرك راسو وتقدم عندها خاشي ايديه فجيابو" : سولي الواليدة على شي حد مزيان يتكلف بفراش دار لهيه...وشوفي شنو يعجبك عندو نتكلف...

حبيبة : اه كاين واحد هو الي كايخدم لينا فراش كامل هو الي صايب لينا صالون الكبير راك شفتيه عود وطوابل وطلامط كلشي...

بشار : مزيان...

مادازش وقت بزاف حتى سمعو سرسار دار...مشا لانتيرفون حل ليهم باب العمارة ونزل لعندهم سلمو عليه وسلم على عيدة الي فرحات بزاااف تا دمعو عينيها ومابقاتش قدرت تهضر من فرحتها...باس ليها راسها...شاف فيه جدو...

ع.القادر : مبارك ومسعود اولدي...الله يكمل بالخير...

بشار"باس ليه ايدو وراسو" : هانيا ؟!..

ع.القادر : فووك هانيا ولدي...زيد احسام طلع داكشي الله يرضي عليك تا وزكريا...خطية ماجا بوك يعاونكم...

حسام : هاشم كايعرف يدير سلتات بورماكس...حايد..خويا بشار لباس...

بشار حرك راسو وتسناه تا داز سلم على سعيدة وختو اشراق تاهي عنقاتو...وتبعات حسام هازة تاهي معاونة ويوسف قرب ليه وعنقو باس ليه راسو...

بشار : لباس ؟!..

يوسف"حرك راسو" : بيخير..توحشتك..

بشار"باس ليه راسو" : مأكد من داك التيليفون الي بغيتي تم ؟..

يوسف"بفرحة" : اه اه زوين...عجبني...

بشار"طبطب عليه وهو يبان ليه زكريا جاي هاز وحادر راسو" : ششش...

زكريا"حادر راسو تالارض ماقادرش يهزو" : سلام خويا لباس...

بشار : هز راسك..."طرطق صباعو" تحرك...

زكريا"حبس البكية ماقدرش يهزو بزز وغا هزو وشتت شوفة"..

بشار : فين عمر رجال نزلو الريوس ؟..؟؟..

زكريا"مالقى مايقول"...

بشار : هز عليا راسك تم...خليك بعيد على دوك البلانات..شنو گلت ؟!..

زكريا"حرك راسو"...

بشار"قرب وشد ليه راسو باسو ليه بوسة فيها سمح ليا حيث زكريا ماعندوش ذنب ف شنو دار بشار لسيحمد...بغاه يكون بعيد على هاد المشاكيل الي بيناتهم...باقي صغير اصلا...وكايجبه مزيان وضريف وبعقلو واخا هكاك...

بشار : تيسر...

طلع زكريا ووراه بشار مع يوسف كايهضر معاه ويسول فيه...حتى طلعو لدار لقاو كلشي مشا لصالون وجلسو كايهضرو صوت ضحك حسام شاد فجدو حيث سولو وتلف...

حسام : دابا نتا جد بشار ياك...

ع.القادر : اوكيه !؟..

حسام : هاااا...دابا نشاعلاه ختي حبيبة غاتولد...دابا كيفاش نقنعهم بلي غاتولي جد بوه ؟!..وماشي معيورة وراك بصح جد بوه ؟!.

سعيدة : هاويلي هادي معيورة...

حسام : يلاه وشد عندك...

ع.القادر : وراه معقولة...

حبيبة"وخا مسكينة تزنگت بجهد كانت مخشية حدا عيدة جاب ليها ضحك" : هههههه...

تا شوية دخل بشار هو ويوسف وجلسو تما حداهم...جلس زكريا حدا حسام وكايسمعو...

سعيدة : والله ينعل جدرك شهمتيني كون يحساب ليا كون خليتك عما خواتاتك خليناهم غا وحدهم...

حبيبة : علاش ماجبتيهمش توحشتهم...

سعيدة : والله ماكرهت هاشم غايجي لغذا وصيتهم يحطوه ليه ويعطيوه حوايجو حيث غايدخل يعوم فالحمام تم...

عيدة"طبطبات عليها" : مشهية شي ابنيتي...

حبيبة"مزنگة حركات راسها ب لا"...

سعيدة : هاويلي گولي اش بغيتي شتك تزنگتي راه عادي بنيتي..راه جبت ليك جبن...

حبيبة"عينيها لمعو" : بصح !!..

سعيدة : نوضي اجي عمايا نوريك...

بشار : لا..(شافت فيه حبيبة) ريحي لارض...

سعيدة"ميقت فيه" : هاويييلي على ريحي تم...والدين فعز المرض يا وليدي حسام كان طايح ليا ونمشي نصبن الحوايج حدا البير ونشتف عالكواش...

حسام"كمش عينيه كايرمش فيها"...

زكريا"قرب ليه" : حگلك خارج مسلگم...تا فكرش مك مابركتي كي ناس...ههههه (جمع ضحكة بحال الى ماضحكش خلاه كايرمش تا نطقات سعيدة تاني مكملة هضرتها)...

سعيدة : مانعة عليك طبيبة تحركي بزاف ماشي من هن لكوزينة...الجلاس غايعييك ابنتي شوية...

عيدة : وزكريا نيت (حسام قلش وذنيه وزكريا ماعرفش علاش كايقلب بعينيه على شي حاجة طفي عيدة)..

عيدة : ربيعة توحم بيه وگاليها طبيب مايعيش ليك يلحگ رابع ويطيح...ساعاك ربي كتب وكنل هاهو تبارك الله...

حسام"نقز بلا مايحس" : صارط طالب...عقلو وگف عند شهر رابع...والباقي كملو ليه راقي الي كان يجيب سيحمد يقرا على ربيعة تا كمل ليها الحمل...ها شونتيو يحلگ يدلگ حدايا...

اشراق : هههههههه...

ماجاوبهمش بشار وهي تضحك سعيدة قالت ليها جلسي ومشات هي لكوزينة جابت ليها جبن دارتو فواحد زليفة وجابت ليها معيلقة عطاتو ليها وهي ذوق منو وبدات تاكل وحدة تابعة لاخرى بشهية...

بشار : اشراق (شافت فيه حرك راسو وناضت حداه)..

سعيدة : داك الاجتماع گلتي عندك سبت جاي..نگد نجي انا نبقى عماها فالليل ونتا سير تهنى من جيهتها...

حبيبة : لا ماغايمشيش وحدو غادي نمشي معاه...وصيت ماما باش تشوف ليا مانلبس لحضور...

عرفتو ديك القضية ديال كلامي هو الي يمشي عليك...ونتا عاودها لكرك هي الي دارت لبشار دابا...كان كايهضر مع يوسف وكايسمع تا وقف عن الحركة وهو يدور لعندها بالعرض البطييء بشوفة حادة ماتبغيها لعدووك...

عارفة راسها ماغاديش يعجبو الحال انه شدات ضد وخصوصا فامر حسااس بحال هذا ماشي على الاجتماع ولكن لظروفها الصحية مانعة عليها تمشي وتحط تحت التوثر ولا تحرك...لكن عنادها فهاد الفترة زاد لادوز بزاااف وهو عارفها كاتشد ضد لا بغات تمشي معاه لشي بلاصة خصوصا الفيرما لكن هاد المرة لادوز زادت بزاف...ماتسوقتش حيث الي كايمليه عليها راسها دابا مستحيل تغيرو...عقلها وقلبها باغي يمشي معاه الاجتماع وطارت معزة...

عينيه بقاو مفيكسيين فيها بواحد شوفة منيرة...الموقف الي حطاتو فيه دابا اول مرة يحطو فيه شي حد...عض على سنانو من لداخل تا ولا يبان الفك ديالو كايتحرك...بدات سعيدة كاتضحك وتقوليها...

سعيدة : هههه هاويلي هي كاتجري عليا منجيش...

حبيبة"حادرة عينيها فزلافتها وحركت راسها ب لا" : لا ح حاشا راكي عارفة دارك هادي...هيي...

سكتت حيث حاسة بالعافية بدات توصلها بالمعقول حيث مادواش لحد ساعة سعيدة ولات غا ضحك شافت الجو تشحن وتوثر...خصوصا شوفات بشار ماكيطمنوش..ولات خايفة يقلب ديك طابلة بلي فيها ويصدق خالعها بالمعقول حيث راه ماكيضمنش راسو ومكيضمنوهض مكيعرفوش امتى كايغفل...عيدة باقي مافهمت والو عند بالها عادي اما عبد القادر ولاخرين غير كايشوفو عرفو القضية حامضة نيت...خصوصا زكريا وحسام...

زكريا"نغزو" : حسااام "بالحس"..

حسام : ممم...

زكريا : نتا تتعرف بشار وصحاب وقراب وداكشي...

حسام : غا سول سول كحالت...

زكريا : آخر واحد شد عماه ضد..

حسام : توريا مو..دعاها...

زكريا : وآخر واحد گاليه لا ؟!..

حسام : ما.ت...

زكريا : دابا تنشوف وعلى مافهمت مرتو دارتهم بجوج...هياش..

حسام : غايقت.ل توريا ويدعي عيدة حيث خطبتها ليه...سد وذنيك امسخوط راه ناض..

زكريا دار صباعو فوذنيه وكحاز من طابلة ومرة مرة يرمش فعينيه كايجيب ليه الله غايقلبها وتجي ليه فراسو هههه...تم جاي وهي تزير على زلافة وقلبها بدا يشطح رگادة فوسط راسها...وايد نزلتها وشدات فتوب جلابة سعيدة زيرت عليها تا ضارت عندها...وصل عند الباب عاطي بضهرو...

بشار : تبعيني...

كملة وحدة فقط ومشا لبيت...ضارت عندهم تبسمات ليهم بوجهها صفر...وشافت فسعيدة بترجي...

حبيبة : بيتك اخالتي اجي معايا لكوزينة...

سعيدة : غا سيري شوفي اش بغا وتلگايني فالكوزينة...

حبيبة"صرطات ريقها" : لا هي اجي معايا ونمشي عندو بايتسنى ماشي مشكيل...

ناضت هازة زلافتها ومشات لكوزينة وعينيها كايشوفو فالبيت تنهدات سعيدة وناضت تبعتها لكوزينة لقاتها جالسة دايرة ايديها على حناكها وعينيها بغاو ينقزو بدموع...شافت فيها بترجي كبيييير...

حبيبة : عافاك سيري عندو نتي وهضري معاه عافاك...

سعيدة : وملي خايفة لاش وصلتي وهضرتي راسك...نتي عارفة اش درتي ابنيتي راك جبتيه وسط جماعة وحطيتيه بوجهو...هو الى مابغاش غا على صحتك ابنيتي نتي گلتي طبيبة ماخلاتكش تحركي حملك صعيب...حاولي تصبري غا وقيتة ودوز وتفكريها بالضحك...

حبيبة"وسعت عينيها" : لا لا بيت نمشي معاه...قنطت هنا وانا فالدار حتى قرايتي موحال بنقرا هاد العام بسباب الحمل...كلشي أجلتو...الدار عيييت وانا فيها بيت نخرج..هاد الاجتماع شحاال وانا تانتسنى فيه قبل مانعرف بالحمل...

قفزت ملي سمعاتو عيط...وهي تنوض شدات فايد سعيدة كاطلب فيها وتعاود...

حبيبة : عفاااك اخالتي سعيدة هضري معاه...مانقدرش نمشي ومانقدرش نتراجع على المشي بيت نمشي والله تانمشي يلاه "بدات تهرنن ليها وتنتر تا وقفتها"..

سعيدة : صافي صافي انا ندوي عماه ياعوذ بالله من شيطان الرجيم...سيري بركي معاهم هاني جايا...

حركات راسها بزربة وهي تخرج بزربة مشات لصالون جلسات حدا عيدة وتكمشت فيها حطت راسها على كتفها تا صدمتها...

عيدة : مالكي بنيتي...

حبيبة : م ماليش هي بيت نتكى عليك...(قلبها بغا يسكت وهي حاضية سعيدة من القنت بانت ليها دقات)...

بشار"عرف ماشي حبيبة حيث ماكدقش" : سعيدة !!..

سعيدة : ندخل ؟!..

بشار"زفر بجهد وبدا يمسد فعينيه راسو كايغلي" : دخلي...

حلات الباب وهي تدخل لقاتو مشا لبالكون كايجبد فالكارو دارو في فمو وهي توقف عليه يلاه بغا يبدا يشعل فيه...حطات ايدها على دراعو...

سعيدة : لا گلت ليك وسع خاطرك مانصيبش عارفة خاطرك ضيق بزاااف واخا مكاتغوت ماكتبين...عارفة مادير ليها واالي وليني غا شد الخاطر...

بشار"عوج راسو لعندها بالعرض البطيئ" : عمر شمش ماشرقت ؟!..

سعيدة : هههه لا فهادي خاصك خاطر صبر ايوب كي كايگولو...اولدي الوحم راه فيه وفيه...حمد الله ما شفتي الوجه الي مايحملك مايقبلك..حمد الله الي ماگالت ليك حول بلاصتك ونعس فالبيت لاخور...

بشار : ماعنديش جهد لشدان الضد...عدور ربي يا سعيدة فعايل البراهش...مبلاني معاها على الگعاد فدار تريح فدارها صحتها على گد الحال وداكشي الي فكرشها بالكشيفة باش شاد..الاجتماع مبرزطني منصيبش نتكونسونطرا معاه وهي معايا...الدعوة مستريسيا تم..

سعيدة : غا حاول معاها وشرح ليها...

بشار"ضار عندها مغوبش" : يا سعيدة لمن وهي عارفة راسها interdit تحرك ؟..

سعيدة : واخا عارفة الوحم غايخليها ماعارفة والي...انا غانهضر معاها غا الله يرضي عليك لما وسع خاطرك دابا شرب دوا ديال راس ولا كمي وبقى هنا حتى تنفس هاو خرج ودير مكاين والو..ماگالت والو..."بقى كايشوف ماجاوبهاش وهي طبطب عليه" الي بغا الولاد يصبر راه هادشي الي كاين ماعندك مادير...هادو هما الولاد على مايجيو يخرجو منكم والله يسمح لينا من الواليدين...عيشك وسع خاطرك..

ماجاوبهاش بقى كايشوف مغوبببش...راسو تايزنزن عليه ماكرهش كون شد حبيبة يخبطها باش تفهم راه ماخاصهاش لا تحرك لا تحط تحت ستريس وهما بالكشيفة باش مضاربين مع البيبي يبقى ثابث..خاصها عناية ومراقبة باستمرار حتى يدوزو اشهر باش يثبث فمكانو....بقى عاض على سنانو تنهدات وهي تخرج وخلاتو وراها مفيكسي طفا الكارو وشد فدوك الحديدات ديال البالكون وزير عليهم وبقى هكاك حتى غمض عينيه كاينهج...مع يهز واحد الايد وهو يخبطها على الحديد بجهد تا تسمعات زداف زننننن...وعاود ضرب...

أما فالصالون كيف دخلات حبيبة جلسات حدا حبيبة وهي طمنها غا بعينيها...الهضرة قوات شي يضحك مع شي وشي شاد فشي...وعيدة تدوي مع حبيبة تسولها وتنصحها بخبرتها الي ممكن نصنفوها قريب لخبرة الطبيبة بحكم التجارب ديال سنييين...وتوعيها...ومرة مرة حبيبة ترمي عينيها لباب البيت والو ماخرجش حتى بدات كاتقلق عليه وبدات ترجع عليها ندامة حيث عرفات انه مانعها لمصلحة صحتها وصحة البيبي وهادشي عارفاه لكن اش دير الوحم خو الهبال...شوية وهو يصوني تيليفونها هزاتو لقاتها سناء...

حبيبة : احبيبتي...

سناء : شوفي واحد خمسة دقايقة ونكون عندك جايا انا وايوب جايبين ليك شي حاجة رسلاتها ماماك...صافي..

حبيبة : واخا...

قطعات معاها واستغربات اش ممكن ترسل ليها حيث قالت ليها جايا سعيدة وجايبة ليا الغذا وجايين يتغذاو معاهم ويزوروها...ماعرفاتش واش تعيط ليه ولا لا...حيث تعطل وخاص تعلمو...سمعو سرسار ديال الباب وهي تنوض...حتى وقفتها سعيدة...

سعيدة : بركي فين غاديا...انا نحل ليهم...

حبيبة : گولي ليهم يدخلو عافاك...

ناضت سعيدة وهو يخرج بشار عاقد غوباشتو..شافتو وهو يتهز قلبها وحدرت راسها ماشاف جيهتها كاع...تبع سعيدة الي حلات الباب بانت ليهم سناء هازة طبسيل صغير فايدها ووراها ايوب هاز صينية طويييلة...

سعيدة : اهلا بنيتي زيدو دخلو...

تبسمات سناء سلمات عليها وحركات راسها لبشار مفرنسة وهي را تفتف من لداخل ايوب خلاص غا حادر عينيه قال سلام وهو يدخل...دخلو لكوزينة وحطو داكشي...

سناء : هادي "صينية" صيطفاتها خالتي ناديا كومونداتها من عند واحد سيدة...هادي صالاد غويال وهادي صالاد بحالها ولكن ديال حبيبة صايباتها ليها ب كروفيت وكالامار وداكشي الي ممنوع عليها...وصافي...حبيبة لباس عليك...

ضارو كاملين لقاوها جايا وهي توقف كاتشوف فصينية...شاف بشار تا عيا غايخلطها وهو يخرج لقا ايوب واقف مربع ايديه مسكين ومتكي كايتسنى...

بشار : ايوب..

ايوب"قفز" : نعام اخويا...

بشار : دخل..."حرك ليه راسو ناحية صالون"..

ايوب"صرط ريقو وحط ايدو على صدرو" : والله ماكرهت اخويا عندي خدمة من دابا ساعة بايخصني نكون شاد طريق لاگادير اه جيت هي نوصل سناء ونرجعها...هي سمح ليا...

بقى كايشوووف فالاخير حرك راسو بتفهم...ومشا لصالون ريح حدا خوه يوسف يهضر معاه حسن مايرجع يتعصب من جديد وهو بالكشيفة باش زير راسو...شوية وهو ينطق زكريا...

زكريا : خويا بشار (بصوت منخفض حتى ضار عندو) احم..بغيت نمشي لبيت الما...

بشار"شاف فحسام وحرك ليه راسو" : نعت ليه...

حرك حسام راسو وناض هو وياه...خرجو من صالون غادي ويدفع فيه بالضحك اتا فرانا زكريا كايشوف فايوب...صغر عينيه وطلعو وهبطو بعدا الاناقة مايحدوش ايوب فيها ونقا وجهو يبرييي...ضار هنا وهنا وقرب ليه مد ايدو...

زكريا : نتا ولد عم مرت بشار الي جيتي فالعرس داك العام ؟!..

ايوب"سلم عليه براس صباعو" : ايييه ونتا شكون...

زكريا : انا داك الي كنتي واگف حداه وتغرم هادي فحق ايوب وهادي فحق...

ايوب : ايييه لخص ازيكو...

زكريا : زيكو !!..هانيا ملي دفنوه مازاروه هههه...دوز برك عمانا شحال هادي ماشناك غا فانسطا زاهي مع راسك...

ايوب"نقى ضفيراتو وبدا يسوس فحوايجو" : ايييوى الخدمة ديالي فيها الزهو علاه بيتي نماكي فالعزو ؟!..

زكريا : لا ماكي لحسام...(نزل عليه حسام لوسط راس) اووو...

حسام : والله وليك وحشة ايوبينو...

ايوب"خرج فيه عينيه وقرب ليه" : بتسكت نتا بتعطيني تيساع اداك سلوم الگباصة...

حسام : يا الهي تعصب الشمقمق...

شوية وهي تخرج سعيدة وراها حبيبة وسناء مشا حسام ورا زكريا طواليط ورجع لصالون وحبيبة بقات واقفة هي وسعيدة مع سناء وايوب....

ايوب : يلاه نتي ساليتي..."شاف فحبيبة" هانيا نتي ؟!..

حبيبة : لباس ونتا فين غبرتي...يلاه حتى تغذاو وسيرو...

ايوب : لا عندي شي خدمة ف اكادير يلاه نوصل سناء ونشد طريق..

شافت تا عيات وهي تحرك راسها سلمات على سناء تسناوهم تا خرجو وهما يرجعو لصالون شادة حبيبة فسعيدة ودخلات بشوييية باش ماتعصبش كثر ماهو معصب دابا هههه...سعيدة جاها ضحك على تصرفات حبيبة جديدة عارفة الوحم ومايدير...

وصل وقت الغذا وهي تنوض سعيدة باش تسخن داكشي الي طيبات كان عبارة على دجاج محمر بالدغميرة...ودايرة بحساب حبيبة كفتة مشوية بلا توابل دخلاتها لفران تسخن وتحطها ليها...عيطات لاشراق تبعاتها وبدات تعطيها باش تعاونها تحط فالطابلة...ناضو لاخرين غسلو ايديهم بقات حبيبة مشات تغسل ايديها وهو ينوض بشار باش يغسل ايديه تاهو...فهاد الاثناء جات اشراق هازة صينية ديال صالاد وهي تحطها ليهم الى قالو صالاد ملكية حتى كانت ملكية...زكريا وحسام غا شافوها وهما يخرجو عينيهم..شافو هنا وهنا ماكاين بشار وهو ينوض حسام سد منخرو وبدا يلوز بزكيكتو ورجع جلس خلاهم كايرمشو ماعرفو مالو...

زكريا : السااااكسة...صور وصيفط طردگ لهاشم شي عرگ..حيث مباركة دايرة غا لوبيا..

ملي ناضت على اساس تغسل ايديها قشع وجهها مغير عرف بلي جاتها ترويعة داكشي لاش تبعها ديك ساعة...تا دخل عليها لدوش لقاها متكية على لافابو وكاترش الما على وجهها وترجع غير ريوگ...بقى واقف تا غسلات وجهها وتنفسات شدها وهي تسند عليه بغات تبكي...جلسها غير تما فوق لاشاص كاتنهج جلس مقابل معاها تاني رجليه...عينيه عليها واخا مغوبش ماهضرش...

حبيبة : هي صبر معايا...

بشار"الصمت"..

ماعرفش لاش قالت هاكا بالضبط يمكن قصدات كاع التغييرات الي واقعين ليها...بقات حتى تنفسات وهي تنوض مشا معاها حتى لصالون بدون مايهضر جلسات حدا عيدة بقات بلاصتها...ورجع هو غسل ايديه وفمو عاد لحق عليهم وجلسو مجموعين كلاو صالاد اللولة وحبيبة كلات من ديالتها وكحازت كاتشرب فالما...

يوسف"على نيتو مسكين" : حبيبة..كولي كولي..زوين..

حبيبة"باباتسامة حنونة" : ماقديتش والله...

عيدة : ماعليش تاكل علاش گدت..وديرو ليها الخاطر ووسعو خواطركم...

زكريا"قرب لحسام" : واش هادشي داخل فيه تاحنا !؟..شتها جمعتنا...حنا لينا دوا تشوف غا عما راجلها...

حسام : اودي حمد الله جات غا فالخاطر ماگالت نوسعو حاجة خرا..كول كول..

سالاو من صالاد وناضت اشراق هزاتها وتبعاتها سعيدة حطات داك الدجاج محمر الي جابت سخنات دغميرة وجبدات دجاج من فران هو والكفتة مشوية بلا توابل باش تاكلها حبيبة حطاتها ليها فطبسيل وداوه حطو داكشي والخبز تاهو والمونادة وعصير...حبيبة بقات كاتشوف مشات لدغميرة هي الي بغات...

سعيدة : المرقة ماتعيفكش..

حبيبة"حركات راسها بلا" : هي ماكنبغيش ناكل كانخاف نرجع...ماعرفتش دابا تشهيتها..

عيدة : كووولي الي بغات خاطرك ماتخليهش فحقك...كولي والى خاصك نزيدوك...

تبسمات حبيبة بحب فرحانة لهاد الاهتمام حتى من ماماها اكثر الي مصيفطة ليها صالاد غويال باش تكبر بيها قدام ناس هي وبشار...كلات من دغميرة غا شوية ومن كفتة صافي...شوية وهو ينوض بشار جاب ليها قرعتها ديال الما وكاس وفيتامين ديالها قدامهم...صايب ليها فيتامين لول شرباتو وتاني حتى تكمل حيث كاين ديسير...

كلاو تا شبعو خصوصا حسام وزكريا وحتى يوسف تاهو ماخلاش من حقو بشار يدور ويعطيه ويكحز ليه مراقبو ومراقب حبيبة وحتى اشراق كايكحز ليها...تهز الغذا وهي تنوض اشراق بغات تجيب ديسير...ناضت حبيبة تاهي...

بشار"بدون مايشوف فيها" : قويتي تحراك نتي..قويتي بجهد..

عيدة : ماتخاف شاي اوليدي خليها شوف اش بغات...

ماجاوبهاش وهو ينوض تاهو مشا لبيت هز باكية الكارو وخرج يكمي...شاف فالساعة كان باقي العصر...اصلا الظهر صلاوه كاملين الا اشراق الي كانت غيگلي...ورجع شاف قدامو كايكمي..دازت خمسة دقايق وهي تدخل هازة فايدها كاس ديال قهوة كحلة...حتى خرجات لعندو لبالكون وهي تحط الكاس هو كان عارفها دخلات ماتحركش...شدات ليه فايدو وحركتها...

حبيبة : بشار "بصوت منخفض"..عارفاك معصب حيث ماسمعتش ليك وگلتها قدامهم بلا مانتشاور معاك..."شافت فيه بعيون حزينة"...انا بلا هادشي متنبغيش تمشي وحدك..مابيتش تمشي وحدك ابشار بيت نمشي معاك حيث قنطت وانا فالدار...عارفة خطر عليا وعلى البيبي غادي نكون على بال و...

بشار"كايشوف قدامو" : فينالمون الي فراسك فراسك دابا بلا تلاوي عليا !!..

حبيبة"بدات تنهج زامة فمها" : اه بيت نمشي..والى مامشيتش بنتقلق منك بزاااف بزااف والله تانمشي يالاه..."ضار عندها مغوووبش تغوبيشة حارة كاتخلعها لكن زيرات راسها"...بيتي ضربني ياك...حيث طلبتك...

وهي كاتشوف فيه نزلات واحد دمعة كاتجرييي...طلقات منو وهي تمشي خرجات من البيت ومشات لصالون كاتمسح فعينيها...مادوات ماتكلمات خلاتو واقف جامد فبلاصتو...تسند على الحديد ديال البالكون تاني كايحاول يتكالما شاف تا عيا وهو يمشي لمجر جبد داك المهدئ وشرب نصو باش مايثورش على غفلة حيث بدا يحس براسو كايتخربق وغايبدا يدربز ويصدق خالعها...يانااااري على عكس شدات يا ناري وخاصو ليها مهدئ ديال شي مقرقب يلاه يشد معاها ستون ههه...

اشراق تيليفونها كان كايفيبري فجيبها وعارفة شكون كانت واقفة قدام البراد حتى تبخ وهي تحطو فالصينية وتبعاتو لاخور المسوس...هزات صينية وريقها نشف...حطات صينية...

سعيدة : جيبي داك الحلوة الي جبنا عمانا...

حركات راسها و مشات لكوزينة شوية وهي طل هنا وهنا بان ليها بشار خرج مشا لصالون طلات عليه حتى جلس وهي تمشي لواحد القنت حدا ثلاجة وهي تجاوب...

اشراق : حميد عيقتي راه سالينا...

حميد : بغيت نشوفك

اشراق : ماعندك ماتشوف فيا...مابقيتش بغيت ندير داكشي..

حميد : اجي نديرو غا انا وياك..تانا باركة عليا من داكشي تبت...

اشراق : وبعد مني عطيني بتيساع...والله حتى نحرش عليك خويا يقت.لك...بعد مني...

حميد"بدا يعرعر عليها" : والله يا مك تانكويك نتي وياه...تخليعيني بخوك ؟!..المخير فقبيلتكم ركبو عليه نتي وياه...

اشراق : وااا بعد منييي...الحما.ر...

بغات تكمل وهو يبان ليها بشار جاي خاشي ايديه فجيابو...قطعات التيليفون وخشاتو فجيبها قلبها بغا يسكت ماعرفاتو واش سمع ولا لا...وقف قدامها...

بشار : تيليفونك...

بقات كاتشوف وايديها كايترعدو...مداتو ليه قلبها بغا يسكت..هو ماسمعش اش كاين لكن غير قرب اخر كلمة سمع هي حم.ار...شد تيليفون شعلو كان عندها ايفون اكس ماكس قابلو مع وجهها تاتحل ومشا ديريكت لاخر اتصال لقاه بلا اسم...دوز الخط وهو يسمع...

حميد : يا الخانزة لاش قطعتي...

گاع المواقف دازو عليها بحال صيراط قدام بشار فاش كايكون باغي يتفاهم معاها بطريقتو...لكن هاد الموقف بالذات ولات كاتحس انه بينها وبين المو.ت شعرة وحدة...اطرافها كاملين بردو عليها...وهي كاتشوف فيه كايدوز الاتصال لاخر رقم ولكن باش تعرف اشنو سمع مابانش على ملامح وجهو حتى حاجة وهادي اخيب صفة فبشار حيث مكايعطيش راس الخيط حتى كايغفل...

حميد : يا الخانزة علاش قطعتي...

ماجاوبوووووش...حدو هز عينيه فاشراق بانت ليه وجهها ولا صفر وفمها بيضضض...رجع نزل عينيه كايتسنى الاجابة تاني...يلاه بغا يدوي حميد يقول اشراق وهي تغوت اشراق...

اشراق : اااااااا .....

حميد غا سمع صوتها وهو يقطع فالبلاصة...اما اشراق صوتها تسمع تالصالون تا قفزات حبيبة بالخبعة شدات فكرشها ماعرفت باش تبلات...اما اشراق شدات فكرشها وغوتات تاني وبدات تبكي قدام بشار الي عينيه عليها ماتحرك مادار رد فعل...ناضت سعيدة خرجات تجري من صالون وراها زكريا وحسام وحبيبة تاهي شادة فكرشها...

سعيدة : مالك اناري...اش كاين...

اشراق"مغمضة عينيها وتغوت" : لا..مادرت والو مادرت واااالوووو...ااااا...

حبيبة : بشار !!..

والو واش تحرك كايشوف فيها تبكي وتركل...حتى هزات عينيها لفوق وهي تشهق وطاحت تا غوتات سعيدة...

سعيدة : بسم الله عليك...اشرااااق ناري مالكم اش وقع...

ع.القادر"جا تاهو حسام وزكريا كايطلو" : يالاطيف اش طاري...

ناضت سعيدة تجري جابت الما وبدات ترش عليها...وبشار والو واش تحرك غا كيضوف فيها باقي تيليفون فايديه حتى حس بايدين حركوه ماجاوبش وهي تقابل معاه كاتشوف فيه بخوف...

حبيبة : بشار مالك !؟..بشار "شدت ليه فدراعو عاد حول شوفة ليها بانت ليه خايفة وشادة تحت كرشها وخرج عينيه"...

بشار : ششش...مالك ؟!..

حبيبة : نتا الي مالك..مالكم ؟!..خلعاتني...

بانت ليه كاتنهج حيث را غوتة نيت دارت صمكتهم...كاين الي حساب ليه مانعرف اش...شدها من كتافها ودورها خرجها من كوزينة...عاديا وكادور تشوف فاشراق وهو يدورها وفيكساها باش مادورش....بقات سعيدة كاتفيق فاشراق الي بدات ترمش فعينيها...

حسام : مالها ؟..اش وقع مع بشار ؟!..

ع.القادر : ناري تي كي طرا ليك اش كاين...ياعوذ بالله من شيطان رجيم...

اشراق"ماجاوبتش قلبها كاتحس بيه مابقاش كايضرب العرق نزل معاها صافي هادشي اخرتها"...

سعيدة : واش ضربك ولا كي طرا ليك...

ملي ماجاوبتهمش ولات نوضتها تا تمشي ترتاح عاد تسولها...ضارو مالقاو لا بشار لا حبيبة الي دخلها لبيت وجلسها حيث بانت ليه ولات صفرة...حط ايدو على وجهها بخوف عينيه كايتفحصو كاع ملامحها ولون بشرتها...

حبيبة : مابيا والو هي تخلعت من الغوتة...هي گوليا مالكم ؟..

ماجاوبهاش مشا لقرعة ديال الما كب ليها كاس وعطاه ليها تسناها حتى شربات بدون مايتكلم...حطات الكاس وشدات ليه فايدو كاتشوف فيه ماطمنهاش وجهو حيث واخا مامبينش لكن غوتة اشراق وهي معاه وكايبان بارد ؟..هادشي راه كايخوف...

حبيبة : مالك نتا انا بيخير ماتخافش...مالكم اش وقع مع ختك اشراق...واش درتي ليها شي حاجة...

مالقاتش رد شحال وهو كيشوف فيها حتى حرك راسو مشير لناموسية...

بشار : تكاي...

بغات تهضر وهو يهز صبعو دار ليها "ششش"...تنهدات وهي تحرك راسها...ناض وقف وخرج من البيت...بانو ليه جالسين فالصالون وهو يدخل دور عينيه هنا وهنا بانت ليه متكية وكاتبكي وحداها سعيدة وهما كايشوفو فيها مابغاتش تجاوب...بقى كيشووووف فيها وهو يهز صبعو...

بشار : تحركي اجي معايا...

سعيدة : بشار...

بشار : سعيدة !!..

تنهدات سعيدة وهي تشوف فاشراق دابا مابقى عندها مادير من غير..تمشي معاه وطبق شنو فكرات والي ليها ليها...اصلا ماعندهاش خيار هما فمسالة اشراق ولا يوسف كايخليوه منو لخوتو...زكريا وحسام كايشوفو فبعضياتهم...ناضت بشوية عليها كاترعد كاتحس براسها كايفيبري وماقادراش تسيطر عليه...تبعاتو وخرجو من الصالون لقاتو واقف قدام باب بيت نعاس لاخور حال الباب وكايتسناها...زيرات على تريكوها تا بغات يتقطع ولات كلها تغزل...ياربي اش غادير راها كاتشوف راسها غاديا لمو.ت برجليها...دخلات البيت ولات كاتحس بيه بااارررد...وقفات فالنص تا سد الباب بساروت قلبها تهز...وتم جاي لعندها...غا ديك الشوفة كفيلة تخليها تهضر بلا مايقوليها "كانسمعك"...

اشراق : مم مكك ن ت عف شوي..ففششش...

ولات كادخل وتخرج فالهضرة...حيد ايدو من جيبو بغا يدوزها بيها على لحيتو وهو كايتسناها تا تقاد هضرتها على خاطرها...هي حساب ليها واش بغا يصليها معاها تاطير خنونتها...هزات ايديها طاكات بيهم وغوتات...

اشراق : وااا....لا..مادرت والو م كنعرفووش...

بشار : شكون ؟!..

اشراق"كاتهضر وتنخصص بلا حس" : ه هذاك دااك الي ص ون صونيتي عليه..مكنعرفووش والله.."ريقها نشف"..ك كايعيط ليا مبرززطني بب بزااف..والو ك ن بلوكيه وكايعيط ليا..م كنعرفوش...عايرتو وگلت ليه ب بعد مني..حيث ب برزطني..غا مم معيط ملي گلت ليه رقم غلاط گاليا لا وبدا يعاير..

دارت ايديها على راسها مطاكية...هي هضرة ولاحتها سويرتي...كاتقول فراسها غايقت.لني يقت.لني اللهم نقول هاكا وانا وزهري...

بقا كيشووف فيها عينيه عليها وايدو مشات لجيب جبدات تيليفون...قربها بجهد لعندو تا غوتت..خشا صباعو فحناكها تا قاد ليها وجهها..قابل تيليفون مابغاش يتحل لقاها مخسرة سيفتها كاتبكي تيليفون ماتعرفش على وجهها وماتحلش..

بشار : الكود !؟..

بدات تنخصص..قالت صافي هادي لاخرة ليا...ماعرفتش واش حميد فهم غوتتها ولا لا...بغات تكتب ليه الكود ايديها ماتقادوش حيث كايغزلو...حتى شدها من معصمها وزير عليها هز عينيه فيها...

اشراق : 2206...

قالتها بحروف متقطعة سخفة شاداها فالقلب...دخل لتيليفون ومشا لاخر رقم...قلب اصلا لقاه معيط غير فهاد اللحظة وديك الوقيتة فاش كان كايصوني ليها فجيبها يعني مجموع ربعة المرات...مشا لنماري الي مبلوكية بالفعل لقى نماري مبلوكياهم وبصح كانت مبلوكية حميد من شحال من نمرة حيث مابقاتش بغات تهضر معاه...مشا لواتساب لقاه فيه غير هضرتها مع كروب ديال قسم فين كانو يقراو...وهضرة مع واحد البنت فيه زوج اوديوات سمعهم كاملين قدامها...مشا لدوك الي دايرة ليهم اغشيفي لقا فيه غير كروبات ديال اساتذة ديالهم....جالسة فالبيت وجالسة فالصيراط المستقيم...هي اشنو كادير ذكية لواحد درجة داكشي كيف كتصورو كاتمسحو فالبلاصة وكاتبدل جيمايل ديال تيليفون...حيث ماكتصورش ديما يوميا غير فين وفين...وباش كاتحاور مع حميد فواتساب اخور مديور فتيليفون اخور مشقف قديم عندها...ولكن ماشي ديييما...فالفيس ولكن بكونط اخور...غير كاتلقى الفرصة كاتدخل تهضر معاه فيه فالوقيتة الي كان كايقرب يجي بشار كانت كاتمسح كلشي وتخلي كونطات الي كايعرفها دايراهم...كانت محتاطة بالمعقول...مشا لبلوكاج الي فالواتساب مالقى فيه والو...قلب داك تيليفون قدامها ولاخرين برا كايتسناو ماعارفين اش واقع...جر ليها وجهها بصباع ايديه...وقابل وجهها مع وجهو...

بشار : تحركي دوي نتي...

اشراق"حركات راسها"..

رجع مشا لاخر رقم ودوز الخط...طلق سبيكر غا هي سمعاتو كايصوني فشلو ليها ركابي...حيث قالت غايكون فهمها وطفا تيليفون لكن خلاه شاعل...شوية وهو يتطلق الخط وهي تسمع الو...عينيها حبسو من ترماش...

اشراق : ال الو...

هو : علاش قطعتي خليني غا نهضر معاك...

اشراق"شافت فبشار الي غوبش ورجعات تكمل" : ماتبقاش مصدعني...ولا نعلم خويا يتفاهم معاك ولا ندي نمرتك لبوليس...برزطتييني اخويا عطيني تيساع...

هو : ختي برجولة سمحي ليا...كنت باغي نتعرف عليك ناوي المعقول...بنتي ليا شادة فهضرتك...

وهو يقطع...بشار هز عينيه فاشراق وهز حاجبو مادواش...حدرت عينيها الي نزلو منهم دموع ماعارفاش واش ثيق ولا لا حيث ماجاوبش...تا شوية شد من عندها تيليفون وقرب...غرس صباعو فحناكها وهز ليها وجهها لعندو...غا شوفة كانت كويييلة وهي كاتنخصص قدامو...قلبها بغا يسكت...بقى كايشوف فيها بدون ولا كلمة...عقلو مامثيقش ابدا هاد سيناريو جاه محبوووك بامتياز شام ريحة الغدر منها...وقلبو ممثيقش انه دير سيناريو وتكون كاتعرف شي حد لدرجة يقول عليها ديك الكلمة "الخانزة"...اش كاين...هزات عينيها فيه وشافت فيه بترجي...

اشراق : ماثقتيش فيا...مادرت والو اخويا والله غا خلعتييني فاش حصلتيني كانهضر..انا بعدت ومشيت لكوزينة غا باش ماتسمعش خفت دير شي حاجة...ولكن حصلت..والله مكنعرفو هانتا سمعتي بوذنيك...عافاك ماضربنيش تيق بيا...

بانت ليه كاتغزل...هبط عينيه لايدها الي شدات ليه فمعصم ايدو حس بيها باردددة فعز الحرارة...ورجع شاف فيها قرب مزيااان...

بشار : يا اشراق ماتهرسيش ليا الضهر...

هادي هي الجملة الي قال...كايحاول يثيقها حيث مابغاش يتصدم فيها...غمض عينيه وعض سنااانو...كاتعرف شي حد مضصراه عليها بزاف لدرجة يقوليها ديك الكلمة...مايمكنش وماطايحش فبالو انه تكون كادير داك العجب...بقى مزير ليها على الفك ديالها تال واحد لحظة على شوي يقسمو ليها حيث كان مغمض عينيه وماحاسش باشنو كايدير مافيقو غير غوتتها فاش قصحها...حل عينيه وشاف فيها وهو يطلقها...

بشار : خرجي...

حركات راسها بزربة وهي تمشي كاتجري حلات الباب وخرجات كاتنهج وتنخصص...العرق نزل منها بااارد...حبيبة غا بانت ليها خرجات وهو لا وهي تمشي لعندو لبيت لقاتو واقف خاشي ايديه فجيابو...ضارت عندو...

حبيبة : بشار...

بشار"كان مغوبش..نزل عينيه لعندها" : شنو گلت ليك نتي ؟!..

حبيبة"شافت فيه ب ياك" : بيتي نخليك بوحدك ماعرفتك مالك..

بشار بقى مغوبش فيها كايشوف فهادي تاهي خاصو يعلقها ويبدا يشحط يشحط تا يرجعو دوك جناب يدخلو تاني هههه...ضار بجنب وزفر بجهد...عنقها من كتافها ومشا بيها لصالون...لقى اشراق جالسة جامعة ايديها عندها وحادرة راسها وزكريا وحسام دايرين ايديهم على حناكهم ومفيكسيين فيها الشوفة...غا بان ليهم بشار دخل وهما يتجمعو كل فين تدها...

عيدة : شي باس ماكاين...

بشار"حرك راسو وصافي...جلس حدا يوسف وحبيبة حدا سعيدة وكتشوف فاشراق ماعرفوش لحد ساعة اش وقع...ومرة تشوف فبشار كاتلقاه كايهضر مع يوسف يمكن باغي قاش يتدها وباغي شي واحد الي يكون نقطة بيضة ينفس عليه ماكاينش ماحسن من يوسف...

بعد صلاة العصر...وصل وقت المشي...تسالمو معاهم وتمناو ليهم الخير...سلمات سعيدة على حبيبة وطلبات منها تهدن وتحاول تكالما وترد لبال لصحتها...اشراق قربات لحبيبة سلمات عليها...ومشات لبشار خافت منو لكن تحنى لعندها وهي تعنقو سلمات عليه وباستو فحنكو...

اشراق : سمح ليا عافاك...

بشار"حرك راسو"...

اشراق بقات تشوف فيه وهي تحدر راسها وتبعات لاخرين...سلم على يوسف عنقو ونزل معاه تال تحت...تا ركبو فالسيارة وبقى واقف حتى مشاو...هز الباكية الي نزل معاه وبريكة جبد كارو شعلو وبدا يكمي...

حل الباب ودخل الحس مقطوع...طل عليها فالصالون ماكايناش وتوجه لبيت نعاس...حل الباب وهي تبان ليه متكية وكاتشوف جيهة البالكون...شافت فيه بلا ماتدوي...غير شوفاتها كانو كافيين...وتاهو شاف فيها ومادواش خلاها متكية لاقية راحتها احسن من انه يهضر وتصدق نايضة تاني وتجعرو وهو دابا فغنى على انه يتقاس ليه المود الي هو فيه...على شعرة...

سد الباب ومشا لفوطوي تلاح فوقو...رجع راسو لوور تسند عليه متكي...حط دراعو على عينيه وغمضهم...كايحس بالضبابة كاتغشي ليه على عينيه...للحظة كان كايتسنى فنوبة تجيه بقى متكي ومتمني ماتجيهش...متمني الى جات دابا تمشي قبل ماتخرج حبيبة تشوفو...ساعاك ماجاتوش..يمكن المهدئ الي شرب عاونه فانه يبقى مرخييي...رما صندالة من رجليه وتقاد فوق الفوطوي وحط رجل فوق رجل مسرحين...تكا راسو على المخدة الي فالقنت...وبقى مغمض عينيه حتى غفااا...خرجات حبيبة طلات عليه بان ليها ناعس تنهدات وهي ترجع لبيت تكات حتى هي ماجاهاش نعاس بقات غير متكية شادة تيليفونها دوات مع ماماها...حتى دازت شي ساعة وزيادة وهو ناااعس...

تنوغيش فتنوغيش...ايد كاتمشي وتجي على شعرو...حتى حل عينيه ورجع غمضهم...

حبيبة : واش عيان بزاف ؟!..

بشار"بصوت مدعدع" : لا...

حبيبة : م مالك مع اشراق ؟!..

بشار : ماعنديش جهد ندوي فداك البلان...من بعد..

حبيبة"حركات رايها بتفهم" : واخا...براكة عليك ماغديش يجيك نعاس بليل...

بشار"حرك راسو"...

حبيبة : صايبت ليك قهيوتك...

ماردش عليها وهي بقات حداه كاتسنى فيه...حتى شد ليها ايدها ولايد لاخرى دارها ورا راسها وقربها بجهد لعندو تا شهقت...قرب بزاااف تا شفايفو قربو يتلاصقو مع شفايفها...عينيه الكوحل مع عينيها الخضرين...

بشار : مالك فالضد نتي ؟..

حبيبة"صرطات ريقها" : ماشي ضد..

بشار"كيشوف فيها"...

حبيبة"شدات ليه معصم ايدو" : هي بيت نكون معاك..مابيتكش تمشي وحدك مانقدرش نخليك تمشي وحدك...واخا ماتدينيش بنكون مقلقة ونتا لهيه انا تنعرفك تتبرزط فالاجتماعات...عاد بيت نفوج راه تقهرت وقنطت وانا فدار...اه عارفة هي فترة نؤقتة ولكن عيييت ماتهرسش ليا خاطري عافاك ابشار...

دلات شنايفها وبدات تنهج بغات تبكي...بقى كايشوف فيها وهو يطلقها وناض ريح...هز من القهوة الي صايبت ليه رشف منها وناض لدوش خلاها كاتشوف بغات تفقص بغات تمشي وطارت معزة...حيد حوايجو ودخل تحت رشاشة طلق الما بارد...دوش وتوضى وخرج لاوي عليه فوطة نشف شعرو ومشطو تا قادو عاد خرج من دوش ديؤيكت لبيت داز قدامها ودخل...شوية وهي تنوض دخلات لبيت لقاتو كايصلي...تكات بلاصتها حتى كمل وناض...

بشار : شنو تعشاي ؟!..

حبيبة : مابيت والو نشرب هي رايبي وجبن وخبيز ونعس...صافي هادشي الي غانبقى ندير...

نفخت فمها هز حاجبو كايشوف فهاد الفشوش الي تفج.ر قدامو...كايشوفها واحد الانسان غريييب هههه...غايملخ مها يصدق داير كارثة...مصيبة كحلة هادي...هز باكية الكارو وخرج شوية سمعات الباب ديال دار تسد عرفاتو خرج كاااع...حطات راسها على المخدة وتأففات بملل...تنهدات وهي تحط ايدها على كرشها...

حبيبة : بديتي من دابا تدي بلاصتك عند باباك بيتي تزاحمني ياك...هففف...

بصح عياتها الجلسة فدار الزنقة ماشافتهاش كاترجع لهضرة طبيبة كاتلقى ان الامر خاصو وقت الى بغات البيبي يبقى بلاصتو وتبعد على الخطر..شوي كاتقهرها النعسة والجلاس فدار..هي را شي حاجة صعيييبة...

صباح اليوم الموالي...

سبعة ونص ديال الصباح...حلات عينيها كترمش وهي دور حتى بان ليها واقف كايسد فسمطة ديال سروال...طلعاتو وهبطاتو لابس تيشرت كحل وسروال دجين...حتى جلس جنب ناموسية كايلبس فتقاشرو وهي تكحب ونطقات بصوت مبحوح...

حبيبة : صباح الخير...

بشار"عوج راسو جنب بدون ميشوف فيها حرك راسو ورجع ضار كايلبس...غوبشات حسات بيه مبدل عليها...تگعدات جالسة كاتحك فعينيها وتفوه...

حبيبة : غادي لخدمة...

بشار"حرك راسو"...

حبيبة : فطرتي...

بشار : لا...

ساس فوق فخدو وناض كايقاد فحوايجو...هز ساروت وكونطاكت وبزطام دارو فجيبو...خشا تيليفون فجيبو دار الكارو في فمو بدون مايشعلو وشاف فيها...

بشار : فطورك برا...تكاي رتاحي مازال الحال...

ماجاوباتوش كاتشوف فيه مغوبشة بالنعاس...هز البريكة ومشا تا وصل عند الباب بدون مايدور سمعاتو قال...

بشار : شربي دواك ولي فيتامين ديالك...

وخرج...ماكانش عندو جهد باش يزيد يهضر تصدق راجعة لنفس سيناريو الي حك ليه فمنغيغة راسو...ركب فسيارة وزاد..طريق كلها وهو كايدور يدور فداك صباح..الخدمة ماشدش ليها طريق كاع...بقا كايدور تا وصلات تسعود لقا راسو تاني خرج على مراكش...حتى قلب دورة ورجع تاني بقى شاد طريق وعقلو غاايب كايفكر...تنهد بجهد بدا يحك فعينيه ورجع شاف فطريق وهو غادي حتى لقى راسو قدام ولاية الشركة...هز تيليفونه ودوز ليه الخط ماكاملاش خمسة دقايق حتى وقف عليه...

منير : رحماني لباس...

بشار"حرك راسو ومشا لمجر حلو جبد مذكرة وستيلو..كتب النمرة الي بقى عاقل عليها..ديجا عطا لاشراق تيليفون باش ماتعيقش راه غايبحث وراها...جبد تيليفونه تأكد منها قطع الورقة مدها ليه" : نصيب تجبد ليا مولاها ؟!..

منير : نشوفو الى ماكانش داير كونطرا لنمرة...نشوف مع دراري...

بشار : قضي...باش ماكان...

بشار : حك عليك ؟!..

بشار"ديك الخانزة مابغاتش تصرط ليه" : لحگني بجهد فختي... "وسع عينيه"...لگا ليا ولد الهازة فين ماكان...

بالو ماتهناش بقا مبرزط...ربط تصرفاتها ملي شد من عندها التيليفون ورد فعلها كيفاش خافت كل هادشي غايكون فيه ان...يقدر بصح خافت منو حيث عارفها كاتم.وووت منو...لكن هو اكثر حاجة خلاتو يبحث مورا صاحب الرقم هو الكلمة الي قال على اشراق "خانزة"...

منير : صافي كون هاني...

بشار"حرك راسو وهو يديماري سيارة"...

منير : نشوفوك عشية ؟!..

بشار"شاف فساعتو بقاو عينيه عليها بحال كيفكر وضار عندو" : نشوف البلان كيفاش..

منير : صافي بيناتنا تيليفون وبالنسبة لخونا غانحاول نشوف بلانو فاقرب وقت...الى لگيت نمرة بلا كونطرا نشوف كيفاش نجيبو تال عندك...

بشار : يتوب..

كسيرا متوجه لطريقو ومنير دخل لخدمتو...هز تيليفونو ودوز ليها الخط...جاوباتو بصوت نااعس...

بشار"بصوت خشيين" : رجعي نعسي...

حبيبة : لا بلاش مزيان فيقتيني...تجي سناء كاع منسمعها...اه يقدر باتجي ماما حيث درت معاها تجيب ليا الكاطالوغ ديال السدادر وداكشي..وباتجيب ليا تصاور فراشات جداد...هي باتعاوني...

بشار : قضي غراض...

حبيبة : بشار...

بشار : ؟؟

حبيبة"تنهدات تا سمعها" : والو والو ماشي مشكيل صافي هي شوف خدمتك...

بشار : محتاجة شي حاجة ؟!..

حبيبة : الى گلت بتعصب مني...

بشار"بدل الموضوع بطريقتو" : اشنو مشهية ؟..

حبيبة : مامشهياش...نتا عارف اش بيت بيتك تخ..

قطع عليها فوجهها خلاها كاترمش شافت فتيليفون لقاتو قطع...زفرات بجهد ماكرهاتش تغوت حطت ايدها على حنكها كاتنهج تا استغفرت الله وهي تنوض من فراشها...يلاه وصلات عند الباب حسات بوجعة خفيفة تحت كرشها تا ولا وجهها بيض...هي مشات فالبلاصة لكن حبيبة خافت لا تكون بداية وجعات حيث فالحمل السابق هكا وقع ليها هي حساب ليها ليغيگل بغات تجي لكن دابا عارفة كاين حمل وانطلاقا من تجربة سابقة خافت...رجعات دغيا لفراشها وجلسات...

حبيبة : ياربي ماتعاودش يااربي...صافي صافي...

لاح تيليفون عشوائيا ماعرفو فين تلاح...عرفها اش بغات تقول غايبداو الاعصاب مع صباح ثاني وراسو مبرزط من كاع جوايه مشكيل هذاك الي نعت ختو بديك الكلمة وراسو كايغلي بمجرد مكيتفكرو...وحالة حبيبة صحية والعناد الي هي فيه مع الوحم ومشاكيل الخدمة يعني مئات المطارق كايضربو فراسو...راه الجهل هو هذا...كان شاد طريق على اساس غادي لخدمة...تالقى راسو فبلاصة ماعرف كيدار تا جا ليها....طلق سينيال ووقف جنب طريق...حط راسو عالكوسان حط دراعو على عينيه..المشاكسل ماكايتقاداوش وشخص بحالو خاصو صبر ايوب باش يحاول يبقى محافظ على هدوءو...خاصو يحاول جاهد باش يسيطر على ديك النوبة العصبية الي كاتجيه على غفلة بدون علم او انذار...بقى هكاك مغمض عينيه ومد ايدو هز الباكية الي حداه جبد منها سيجارة بفمو وشعلو...بقا واقف كايكمي وراسو يخبط اش غايدير كيفاش غايحاول يتصرف حس براسو تبلوكا بجهد...الى بقى مزير على راسو وكثرة الضغط غادي تقدر تجي نوبة الصرع فاي لحظة...يقدر ينفاجر اصلا فاي لحظة...يقدر يخرجها فحلمو فاي لحظة...اش غايدير...

~~~~

نادين"طبيبة نفسية" : كانت مرة وحدة فقدات فيك الثقة...(حطات المذكرة)..مرة وحدة ورجعات كون اكيد موسيو بشار الى مشافتش منك الامان باستمرار غادي تخسرها بمرة...هي صبرات معاك وصبرات لمرضك لونتوغاج الي فيه نتوما مايخليكمش تبقاو وهنا كنقصد واليديها..شكون الي غادي يبغي يشوف واحد فولادو معرضين للاذى ؟..هما علاش بعدوها عليك من لول ؟ نتا عارف السبب...هي رجعات ليك حيث عارفة انك عمرك ماتآذيها حيث تحطيتو فمواقف كان ممكن تخليك تآذيها...لكن واليديها باقين غايشوفو قيك داك الشخص المريض الي كايضر راسو يعني راسو مالقاش منو الرحمة يقدر مع الوقت تفاقم الامور...غايكونو عندكم ولاد..ماتنساش انك دابا تحطيتي فاختبار...اولا ثدام راسك لشخصك..عاد الباقي يأتي بتتابع..

~~~

حل عينيه وبقى شحال ساهي عاد رمى السيجارة...رجع كسيرا وضار دورة كان غادي لخدمة لكن بدل الوجهة ومسافة الطريق حتى لقا راسو قدام البناية...

أما هي بقات هكاك متكية ماقدراتش.. تنوض حتى حسات بالوجعة مابقاتش رجعات...تا سمعات لانتيفرون شدات فكرشها وناضت بشوييا عليها تا وصلات عند الباب لقات سناء حلات ليها الباب ورجعات جلسات فوق الفوطوي هزات رجليها وحطاتهم فوق طابلة كاتسنى حتى طلعات سناء ووراها ناديا غا شافتها حبيبة وهي تبسم...

حبيبة : ماماا...

ناديا"تحنات سلمات عليها وجلسات حداها كاتشوف فوجهها" : حبيبة مال وجهك مخطوف..

حبيبة : ها (تفكرات راه عاودت لبشار اش دار ليها باباها وخافت تقوليها على لوجعة يزيد يتشبت بقرار انه مايديهاش لاجتماع)..وو والو هي يلاه فقت...

ناديا"بشك" : تاتفيقي بهاد الوجه مسقوط من د.م...بيك شي حاجة...

حبيبة : لا لا راك عارفة فقر د.م...

ناديا بقات كاتشوف فيها بشك...وهي تهز ليها رجليها دورتهم فوق الفوطوي مددتهم ليها...وجابت ليها مخدة حطتها ليها تحت ركابيها وقادت ليها النعسة...

ناديا : فطرتي ؟!..

حبيبة : باقي...

ناديا : ماعرفتش انا عقلك بايخرج على الولاد وماتتردي لبال لراسك..راجلك راه يرد البال تايعيا بايكون مشغول وهنا بايجي دورك فين هو هاد دور ؟..ماتتسمعيش..انا هاد نهار بنشوف معاك فشوشك جايباه على سناء تا وليتي تبوردي...

حبيبة"دلات شنايفها شافت فسناء الي هزات كتافها بمعنى عندها الحق" : بتبقاي معايا نهار كامل ؟ وبابا...

ناديا : مساافر لكازا مع فيصل...يلاه نگعد ليك لارض..

بعد ما فطرو صباح بكريي كيف عادتهم وعادة ناس العروبية...ناضت كل وحدة منهم تقضي شغالها فنوبتها وشنو فيها...خرجات من الكوزينة مستغلة انشغالهم بالشقا وتخمال ويوسف خارج مع حسام وزكريا...وهي طلع كاتجرييي مشات لبيتهم جبدات تيليفونها لاخور الي مشقف دارتو فسوتيانها وخرجات من البيت كتسلت تا دخلات لبيت توريا...سدات عليها الباب ومشات لقنت جبدات تيليفون شعلاتو وهي تمشي لواتساب الي تيليشارجاتو صباح بنمرة الي فداك تيليفون ودخلات تسنات شوية وهما يوصلوها ميساجات القدام ماتقراوش لكن شي وحدين جداد تقراو...كلهم غير من "حميد"...

صرطات ريقها ودوزات ليه الخط لكن ماجاوبهاش وهي ترسل ليه ميساج اوديو...

اشراق : انا اشراق احميد غير جاوب...(فالبلاصة عيط ليها)..

حميد : الحبس اش واقع مع خوك يگطع مكم عليا...

اشراق : عرفتي علاش ؟ حيث عيقتي عيقتي بلا قياس ماجاوبتكش ماتعيطش ليا...

حميد : هي اش دابا...

اشراق : حميد ماتبقاش تعيط ليا كاع...ياك سالينا داكشي وشديتي اش بغيتي شبعتي فلوسانا حاسة بيه ماتاقش بيا خاصني نبعد منك ...خليني عليك وغانگوليك واحد الحاجة غا سير بدل نماريك كلهم وبدل المدينة خويا را مريييض فراسو غايگد يحطك فراسو ويقلب عليك...ويبقى داير عليا العسة كثر...

ماتسناتوش حتى يجاوبها قطعات عليه بلوكاتو ومسحات داك الواتساب ثاني...مشات لفيس بوك لاخور دغيا دخلات باغاميتخ مسحاتو وخرجات...نفس شيء لانسطاغرام...قلبها كايضررب ليل كلو مانعساتش ماعمر دارت فبالها غايحصلها شي نهار حيث كان اغلب حياتو خارج المغرب كايجي غير يومين الى طول بزاف ربعيام ويرجع مايجي على عوام...ماكانتش عليها رقابة بزاف حيث ماعمرهم كان يجي فبالهم دير داكشي...

طفات داك تيليفون ضارت هنا وهنا وهي تمشي لواحد ديكور ثقييل محطوط تما هزاتو وبدات ضرب فتيليفون تا تشتت شقاف...هزات كلينيكس من المجر جمعات فيه داكشي دارتو فجيبها وخرجات من البيت كيف دخلات..هبطات لتحت تجري كانت بنت هاشم كاتسيق كاع جلخت ليها الطريق...

منار : وراه كانجفف ااشرااااااق...يخ...

اشراق"ضارت خنزرت فيها وهي غاديا" : عاودي جففي ورايا مالك اش خاسرة.. باسلة ..

بغات ترد عليها منار وهي تسمع صوت مها سعيدة ضارت عندها وهي دير ليها بصبعها ششش...

سعيدة : كملي تسياق ماتجاوبيش..

حركات راسها فالبلاصة ماعاودتهاش مع سعيدة...اشراق مشات لفين كاينة المطفية (حفرة واد الحار ديال عروبية كايديروه لطواليطات حيث ماكاينيش قوادس) وهي تلوحو...بدات تسوس فايديها كاتنهج زفرات بجهد وهي ترجع لدار تا حسات بتيليفونها فيبرا فجيبها وسعات عينيها وقلبها خفق بجههدد...حساب ليها حميد الي رسل ليها ميساج...صرطات ريقها وجبدات تيليفون ضارت هنا وهنا ومشات جلسات حدا جداها الي كانت كاتصلي زوج ركعات الضحى جالسة جبدات التيليفون غا شعلاتو مشات لواتساب مالقات والو...مشات لانسطا حلاتو وهي تلقى ميساج من "جوزيف" هزت حاجبها ودخلات قرات...

جوزيف : اي ميسيو ايشاك...

دارت ايدها على صدرها...هذا اشنو فكرو فيها دابا حتى قالت راه تاهو مشا كيف سفيان !!..هزات راسها وهي تلمح سعيدة واقفة عند الباب كاتشوف فيها اصلا كانت مقابلة بنتها كاتسيق وهي ترد لبال لاشراق كاتشوف فتيليفونها وحاطة ايدها على صدرها...حتى مشاو شكوك من ناحيتها ملي قالت ليها بنتها اشنو شافت وهاهما بداو يرجعو شوية...اشراق طفات تيليفون و تبسمات لسعيدة صرطات ريقها ونطقات...

اشراق : مي سعيدة بغيتي نعاونك ؟!..

سعيدة : لا بنيتي ماتعاونيني شاي..يجي غا خوك ديها فيه شوية شوفيه اش باغي..

اشراق : ضروري كوني هانية..."تنهدات" واش ماغاتمشيوش تجيبو مي ؟!..

سعيدة : ابنيتي ماصبت مانگوليك الله يهدي ماخلق..

ضارت لكوزينة واشراق بقات كاتشوف حتى كملات عيدة الصلاة وهي دور عندها شافت فيها...

اشراق : واش مي ماغاتبقاش تجي هنا...

عيدة : مك هادي دارها وهذا مرگدها...نهار تفش را اخرتها ليه...

كان هذا هو جواب عيدة ما قل ودل..عوجات اشراق فمها بقات شوية وناضت باقي مستغربة من رسالة جوزيف كانت غاتجاوبو دعقاتها سعيدة...

مراكش..

وقيتة الغذا...كانت شادة تيليفون فايدها كاتشوف مع سناء فالفراش الي رسلات ليها ناديا فاش جات...اما ناديا كانت فالكوزينة كاطيب فالغذا حتى بدات حبيبة كاتشمشم...

حبيبة : اففف ريحة فشكل...

سناء"بدات تشمشم" : ماكاين والو كنشم غا ريحة ديال طيحال وصوصيط لحم...

حبيبة : ريحتهم تتكون بنينة هادوك...هففف ناري شوفي ديك لاباراي ديال ايرويك واش خدامة ياكما حبسات...

سناء : حبيبة...غا لوحم دخل معاك ريحة المعطر راه عاطية يعني خدامة..برزطاتك ريحة ديري كمامة على منخرك وسكتينا خلينا نشوفو معاك الفراش راك ضصرتي نتي...

جمعات حبيبة فمها كاترمش فيها وهي تعوجو ونزلات عينيها لكتالوغ تا خرجات ناديا كاتمسح فايديها...

ناديا : اش عجبك فسدادر...

حبيبة : بيت ديال صالون لول يكونو بلديين بزااف نقش الي عندها فهادوك ماعرفتش اسميتو...ماكرهتش يكون فحال العود الي ريحتو زوينة عقلتي فاش مشينا لصويرة ؟!..

ناديا : ارابيسك ايه...هذاك العود الي ريحتو زوينة سميتو العرعار ولكن ابنتي اه ماتيصبرش فمراكش حيث الجو جاف تايبغي هي ليميديتي...

حبيبة : ممم وصالون لاخور يكونو هي سامبل...

ناديا : ياك بتفرشو هي صالون واحد..

حبيبة : اه ضروري تا لاخور..بيتي نخليه قرع...تشهيت حتى لاخور يتفرش ماشي سوقي...

سناء : واش كتوحمي نتي ولا كتقحبني ؟..

حركات ناديا راسها ب لا حول ولا قوة إلا بالله..وناضت لكوزينة وجدات الغذا وصايبات ليها صالاد خاصة بلا مايونيز غير بزيت زيتون باش مايخصرش ليها الفوائد ديالها ونيت ماغاتبغيش تاكلها فيها مذاق...ودارت ليها عصير البرتقال بلا سكار..قادت صوصيص ديال لحم فطبسيل مفرش ليه الخس و طبسيل اخور ديال طيحال طايب مزيان حيث كاتعاني فقر د.م...

كاتحط هي وسناء فالطابلة كانت حبيبة ناضت لطواليط قضات حاجتها وتأكدات واش كيلوط مافيه والو عاد خرجات بشوية لقاتهم حطو الغذا معاه شلايض ومرافقات...جلسات بلاصتها مربعة ايديها ومتكية عليهم كاتشوف فداكشي تا خسرات سيفتها وهزات راسها ف ناديا...

حبيبة : مامااا مابيتش طيحال..

ناديا : والله يا بنتي تاتاكليه...ولا نوض ونمشي فحالي ماباقي نجي...

شداتها البكية بدات تنفخ وتسوط...بدات بشلاضة هي لولة شافت فسناء...

حبيبة : بيت رايبي...

ناضت كاضحك عليها جابت ليها رايبي حطاتو قدامها عاد جلسات..سماو الله وبداو ياكلو وصلات لطيحال جاها مزفر بزااف حسات بروحها بغات تخرج..سدت منخرها وكمشت عينيها...

حبيبة : وااا ماما..

دموعها بغاو ينقزو...ناديا دارت ايدها على حنكها كتشوف فيها بغات تبكي..

ناديا : كولي صوصيص...

حطات طيحال مسحات ايديها ومشات لصوصيص بعدا شوية مافيهش التبزيرة مابيهش قدرات عليه كلات منو زوج حبات ورجعات لصالاد..شربات كاس عصير عاد ناضت غسلات ايديها وحكات سنانها ورجعات لعندهم شدات داك رايبي حلاتو من تحت بسنانها وبدات تمص بحال درية صغيرة خرجات سناء شافت هاكاك وهي طرطق عليها بضحك...

سناء : راه كاتباني بريهيشة ههه...

حبيبة"ماجاوبتهاش بقات تشرب تا كملاتو تقادت فبلاصتها وهي تجي ناديا قادات ليها المخدة...

ناديا : حطي عليها رجليك...

حبيبة"دارت اش قالت ليها وشافت فيها" : ماما انا گلت لبشار بلي وصيتك تجيبي ليا اشنو نلبس فداك الاجتماع...

ناديا"خرجات فيها عينيها تا رجعات حبيبة راسها" : اش گلتي ليا ؟!..واش دوينا فهادشي ؟ مالك فهاد العكس اهاد البنت مالك ؟!..

حبيبة : ماما را والله تانمشي يالاه والى مامشيتش ماغاديش نبقى نهضر معاه...

ناديا"دارت ايدها على حنكها مصدومة فيها" : ويلييي على حالة !!..اش كاين فهاد الاجتماع مافهمتش الي بايخليك ديري هاد الحالة ؟!..شكون گاليك حملي ؟!..(فقصتها ولات دربز) ملي رجعتي ليه كان عاجبك الحال تحلي ليه رجليك..ها شنو تايجي مورا حلان رجلين...

سناء"حبست ضحكة بزز وضارت لهيه"..

حبيبة"حدرت عينيها وحناكها تزنگووو ولات تنهج"..

ناديا : فففف...(جلسات)..علاش شادة ضد لهاد الاجتماع ؟ راه تما ستريس وراجلك نتي عارفاه تايكون مبرزط...ساعفي ودوزي هادي...

حبيبة"ربعات ايديها وسكتات حابسة البكية...يمكن تجيهم بالغت فهادشي...هي براسها كاتقول علاش انا شادة ضد لكن غير بمجرد يقرب الوقت ديال اجتماع كاتحس بالغليان فذاتها..كاتحس انه غادي يدير الي فراسو وهي مامشاتش..بغات تمشي وسلام..حتى الغيرة لاعبة عليها والقنط خلي عليك الوحم..كلشي مخربق...جلسات حداها ناديا وجرات ليها راسها حطاتو على صدرها وهي تخشي حبيبة وجهها فحضنها عنقاتها وعطاتها لبكا...

ناديا : الله يهديك والله يدوز هادشي على خير هي حاولي تصبري وساعفي ابنتي حتى يتبت بنادم فكرشك راه هي تكملي ربع شهور كيف گالت ليك يعني ماشي بزاف...

ماجاوبتهاش بقات مخشية فحضنها...تا نعسات قادت ليها راسها ورجليها وناضت تشوف اش تصايب ليها تخليه ليها فبواطات دوز بيه هاد اليومين...بقاو معاها نهار كامل..حتى عيط بشار علم بلي جاي عاد خرجو مشاو غير فطاكسي خلاوها ناعسة...ماكاملاش خمسة دقايق وهو يوصل...طلع لدار معطل شوية تا فات العشا صلاه فالخدمة عاد خرج...

حط سوارت ودخل لكوزينة حط دوك ساشيات لمقدية...وقف كايحك فعينيه بتعب وارهاق ووقف خشا ايديه فجيابو مقطوع ليها الحس غاتكون ناعسة..رجع بيه التفكير لهضرة طبيبة نسائية الي متبعة معاها والي مشا عندها باش يسولها...ماعرفش اش يدير معاها واخا يعض فالصبر مايقدرش حيث كايشوفها مفقوصة بصح وقنطات وشدات ضد خاف عليها وعلى الي فكرشها من كاع جوايه سوا مشات ولا جلسات...حك شنايفو وهو يمشي لبيت حل الباب ودخل بانت ليه ناعسة على ضهرها مشتحة رجل مطوية ورجل مسرحة ايد مسرحة وايد فوق كرشها..ناعسة بديباردو بلومارين قصير كايبان بوطها وشورط قصير ديال كارويات فالبيض ولون ديباردو..جامعة شعرها لفوق منضرها مغري قدام عينيه...تنهد وهو يجلس حداها بانت ليه عرقانة هز عينيه فالكليما مطفية..هز مشوار وضار عندها بدا يمسح ليها فالعرق حتى تحركات وبدات تأفف هزات ايدها وبدات تنش..حتى حلت عويناتها ورجعت غمضت عينيها...

حبيبة : جيتي...

بشار : عيانة !؟..

حبيبة"حركات راسها" : قنطانة...(كاتهضر وعينيها مغمضين)..

بشار"الصمت"..

حبيبة"حلات عينيها" : عييت ونعست باش ندوز ليام حتى نولي بيخير ونخرج عادي..

بشار"ناس يمهدو هو عندو نيشان مافيه مايمهد ههه" : ديري بحساب تحركي معايا لداك réunion..

حبيبة"شافت فيه وبقات تشوووووف" : كيفاش ؟..

ماجاوبهاش كاتسناه يحلف ههه وهي تگعد وشدات ليه فدراعو...ماثيقتش لكن ملي قالها نيشان اذن راه بصح بشار ماعندوش المزاح اصلا...تلاحت عليه باستو فحنكو بلا شعور وعنقاتو بجهد..

حبيبة : لهلا يخطيك عليا..(تبسمات بفرحة)..فرحتيني حيث درتي ليا خاطري..

بشار"تقولي حاس" : ياا حبيبة خاطرك فوگ الخواطر تانجبدو رواح البشري ونبقاو بلا خاطر..

يتبع...