عروس الجحيم الجزء 11

سعيدة كون لقات كون تيرات فيهم وسط الناس...عصبوووها بجهد ومالقات جهد لديك البنية...الي طمنها هو ان حبيبة كتحل عينيها شوية وترجع تسدهم...والي كيزيد يهلكها هو حالة بشار الي ماكانتش ابدا كتعجب...ماعمرها تنسى داك الوجه الي كان جديد عليها...شافت واحد الوحش خارج بلاصة بشار...شخص فعينيه ضلمة حااالكة...

عزااات عليها حبيبة والي خافت منو هو الي وقع وعز عليها بشار...واحد زوج ضحايا وسط مستنقع القطران الحار...وسط ناس ماكيهمهم غير ماء الوجه يكون مزيان...وسط ناس مكيعرفو غير "السمعة"...بان ليها زكرياء داخل كيكمع وتابعاه واحد القابلة كيعرفوها مزيااان منها قابلة ومنها فراكة ديال دراري صغار كداوي زيادات والرضع وكتولد العيالات حيث كانت فرملية مولدة متقاعدة وفتحات عيادة فدارها كتولد العيالات...هما بلاصة ميعيطيو الفرملية كيعيطو القابلة...جايا عينيها منفوخين بنعاس...

عتيقة : فين الحاجة ؟!

سعيدة : هاهي الفوق اجي معايا...

كريمة"جايا هازة قرعة الما طالعة لبيتهم هي ورضوان شافت القابلة وهي توقف" : مي عتيقة ياك لباس...

سعيدة : والو باس اكريمة مالك اش منزلك طلعي رتاحي صباح عندنا ميدار...

كريمة : ها ؟ اه واخا خالتي سعيدة...

طلعات كتلولب فعينيها مافهمت والو...اما ربيعة وسيحمد هادوك سرحووو تجول لاخرى ..زكرياء كي وصل المراة مشى تلاح فواحد العتبة بجلابتو عاماذا لوز بترمتو وشتف فالعرس ماعاقل على راسو فين صد بالنعاس...طلعات سعيدة وتابعاها عتيقة الي حتى حلات عليها الباب وسداتوو وراها...

عتيقة : ياك لباس ا توريا...

توريا"وراتها جيهة حبيبة" : صبحات ويمكن جاتها الفيضة (هي جاها نزيف بالعروبية)..قلبي الحاجة وديري خدمتك...

عتيقة : ياربي على بنية من زيناتها...

كتشوف فيها زوييينة حيث مسحات ليها سعيدة وجهها الي تجخلط وجمعو ليها راسها بزيف عقدوه ليها على شكل عكفة...جبدات باكية ليگانت من واحد صويك وپيل وهزات ليزار عليها وهي تخشي راسها تحتها مغطية لسترة...هبطات ليها السروال والكيلوط ودارت البييل...هبطات شافت الويز لقاتها فيها د.م وقلبات ليها التحت كتقلب فيه وتحط صبعها وحبيبة كتكمش حجبانها وخا شبه غايبة...لاحظت سعيدة واحد دمعة نازلة من جناب عينيها نزلت لسعيدة دمعة تاهي مسبة وخاطرها مرض...كتشوف فتوريا واقفة وحجبانها مگرونين بتخنزيرة فالعدم كتشوف فواحد نقطة فااارغة كانها حااااسة بيه عينو فشي حاجة ودارها بيها...حسات بيه انتاقم منها وكتكذب راسها...تا بانت ليها القابلة خرجات راسها وووجهها مكيبشرش بالخير...

عتيقة : لا صبتي الحاجة تجيبيها عندي ندير ليها واحد غرزة..

توريا"خرجت عينيها" : كيفاش الغراز...

عتيقة : فوتت شوية اختي توريا...

مليكة : مينة لا صبتي نتي تجيبي شغلك وقضي هنا...فين نخرجوها بغيتي تدي ناس خبارنا ؟!

عتيقة : اييه وليني ا مليكة را اما نديها تما اما ديوها لعند طبيبة ديال مستوصف ديال العيالات...

عيدة : مينة قراي حسابنا ..فات الفوت مابغينا شوهة الله يرضي عليك ديري بوجهنا را خيرنا سابق عليك...ولجمي فمك مايسيق حد لخبار...

عتيقة مالقات ماتقول من غير انها حركات راسها وهي تنوض بزربة خرجات من الفيرما مشى معاها العساس داها بطوموبيل ديال الحاج تا دخلات جابت من العيادة اش خاصها ورجعات لعندهم...عقمت ليها لتحت بالمعقم وبيطادين ودارت ليها بنج موضعي...طلبات من سعيدة تبت ليها رجليها تا دارت ليها غرزة حيث هي صاج فام عندها خبرة كبييييرة فهاد المجال وحتى انهم كيجيو عندها تعالج ليهم الجروح العادية..عندها كلشي مرخص ونقي....كملات ليها وهي تلبسها كيلوط بالويز ولبساتها سروال وخشات ليها سعيدة الحوايج فجنابها وهبطت ليها رجليها بشويييي وهي تنوض...

عتيقة : عطيها تشرب شي حاجة ترد ليها نفس..بعديها من البرد وتوضى بهذا هاني غانكتب ليكم سميتو..وعاوني بالعشوب تاهما شيح والخزامى باش ميضربها البرد وتكمش ليها الغرزة تبرا دغيا...ووصيه مايقربش ليها تاتبرا...

مليكة"ضحكت مستهزأة" : اييييه واخا...

عيدة غمزات مليكة تخلصها وهي تخرجها عطاتها ضمصة ديال لفلوس غا باش تسكت لا تديش خبارهم لناس وتسد فمها بالقفل وتشمع عليه كانها ماجاتش عندهم...

توريا"واقفة عند راس ناموسية كتشوف فسعيدة كتغطي فيها وتقاد ليها فجنابها.." : فين هو اسعيدة ؟!

سعيدة : شكون ؟

توريا : ولد لحرااام الي ولدت..فين مشى ؟! علاش دار هادشي الحما.ر...اش بغى يوصل ؟!

سعيدة : اش بغى يوصل اتوريا ؟!..ماعرفتش فين مشى تلاگيت بيه عند الباب وجهو ماعجبنيش اتوريا...ماشي بشار الي كنعرف..سولي على ولدك اتوريا حالتو متعجبش ايدو كلها دما.يات...سولي فيه تاهو وشوفيه مالو نعرفو علاش وصل هو وهاد بنت ناس لهاد الحالة...

عيدة"ساااكتة وكتسمع دايرة طرف شال على فمها وتسمع ماداوياااااش"...

توريا"صغرات فيها عينيها" : نسول فيه ؟...خلا ليا فين نسول ؟ دار ليا شوهة هنا لاحها ليا وزاد ؟..الى كان عينو فشي حاجة بغيت ربي لهلا يكمل عليه..."هزات ايدها كتشير بيها"...هاني سااااااكتة سعيدة ساكتة تنشوف علاش دار هاد الحالة...فيض ليا مرتو هنا ولاحها ليا وزاد ؟...كون ما صابك نتي فطريگو علم الله كي بغات توصل حالتها..."زكمات على فمها بغيض" هادشي ماعاجبني ومامهنيني وطلبي ربي مايكون الي فبالي...نهار كحل زحل..."شافت ف حبيبة ورجعات شافت فيها" ديري ليها لصاقة لديك الجرحة الي فعنقها ودوا..

خرجات من البيت عينيها دعوتهم ما تعجب..دخلات لبيتها وسداتو عليها وهي تحيد الحزام لاحتو وحيدات تكشيطة رماتها بجهد وجهها ولا مجيف بالغدايد فمها زراااق...جلسات فوق ناموسية لابسة بودي بيض وكولون حد ركبة مشبك من رجلين ديال عيالات الي فسنها...وجلسات كتنهج بالاعصاب...كتمنى كتمنى مايديرهاش بيها والا هاديك لاخرة ليها معاه...

توريا : فييين زاد هاد ولد لحررام فين...

بقات تنهج تا حسات براسها بغات طيح وهي تنفس بجهد وناضت لماريو جبدات منو بيجامة طويلة قطن بيج لبساتها وحيدات شال طلقات شعرها الكحل فركاتو وجمعاتو بفليل ديال ستة دريال صغير كحل...دارت زيف حياتي عقدات راسها عكفة وتخشات ففراشها وجلسات النعاس طار من عينيها غير جالسة وشابكة ايديها. وتفرك فيهم وعينيها كيشوفو فنقطة بعييييييدة...

حسام وهاشم طريق الي داتهم الي جابتهم ماعرفووووهش فين مشى وهاشم زاد تهول بزاااف من جيهتو...حتى مابقاش كيهضر غير مركز مع طريق..تا خوات سيارة من مازوط ومشى لاقرب محطة عمرها وعاود تاني مشى..طلع لمراكش تال لوطيل الي مولف كينزل فيه ووالو...

هاشم"شاف فساعة لقاها سبعة ونص ديال صباح...عينيه مارمشوش..دوز على وجهو بتعب وكيسوط" : ففففففف...مصيبة كحلة هادي...

حسام"عينيه كيتلصقو بالنعاس" : دابا غانبقاو هاكا ؟ ثلاثة سوايع وحنا نطحنو فطريگ...

هاشم"ضار شاف فيه" : اش بان ليك ؟

حسام : وليني مشكيلة هادي..."دار تاني تيليفون فوذنو يتاصل بيه حتى لقاه تطفى" طفاااه...

هاشم : اذن را لباس ملي طفاه...

حسام : رجع نرتاح غا نص ساعة ونخرجو نشوفو بالرب الواليد الى عينيا بغاو يتفرعو بالنعاس يومين مناعس كنتقدا والفريع ديال العرس...

حرك هاشم راسو بالفعل مكاين مايديرو فهاد الحالة قلبو عليه مكاين ليه اثر ولا خبر...تنهد هاشم وطلق سينيال ورجع ضرب دورة...

الحال عطا خيوط الصباح...كانو شي رجال داخلين من الباب ديال المقبرة الخاصة بدوار تما...جات بعييييدة بزاف بمسافة عشرة كيلمتر على دوار...هازين شي لواح ديال الكتابة كيكتبو فيهم ايات القرآن الكريم بالصمخ والي كيصايبوه بالصوف المحروق ويضيفو ليه شوية الما ويكتبو بالعواد فدوك لوحات بالطريقة التقليدية الاولى...داخلين بين القبورة...

هز واحد فيهم عينيه كيلمح شخص ضحم الجتة جالس وداير القب ديال جلابة متكي بضهرو على شاهد ديال القبر...بقاو يقربو تا وصلو عندو دايرين لواح وراهم ويشيتفو بين القبورة تا لحگو عندو..رماو سلام ديال الله ماجاوبهم...حنحنو ماجاوبهم...

هو : ياك ولدي شي باس مكاين ؟..بغيتي نقراو على الواليد شي بركة ؟!...

مجاوبهمش شافو تا عياو وهما يحدرو راسهم وزادو وخلاوه...اما هو بقى هكاك عينيه كيشوفو فلارض...تا هز راسو مزياان وشاف جيهة باه وهو يرجع جبد تيليفونو وشعلو...بقر شحاااال وهو يمشي لنمرة ديال مو ودوز ليها الخط...فالبلاصة جاوبات...

توريا : علاش درتي ديك الحالة !؟..

بشار : عجباتك اميمتي العادة ؟ هاكاك عشقتيها لراسك...

توريا : مادرتش العادة كاملة... البنت صيفطتها لعندك ترتاح..عادتها مدارتها وعادتنا مادرناها كاملة...علاش درتي هاكاك لبنت علاش تكرفصتي عليها...فين ندي وجهي من واليديها..

بشار : درت ليك خاااطرك ونتي ياااا ميمتي خليتيني بلا خاطر...الي تعري عليا نيابها فوجه البشري سمعات عليا كلام العيب وسكتت..شافتهم يعايرو وضحكت...دقتي وااااعرة .مكدااارش بيا يا بنت المشاوري.. وخليييييتكم ديروها بيا...

توريا : مرييييض ومافيك ثقة...

بشار : عمرك هزيتي تيليفونك وسولتي فيا وعليا ؟!..

توريا : علاش جاتك ؟!

بشار : ولدك اميمتي...مانتسالش ؟!...

توريا : اش كاين من لاخر باغي ديرني ضحكة ؟!

بشار : جيت مرييض.... سوليني ميمتي باش مريض !!..ماعارفاش ولدك باش مريض ؟

توريا : المرض ليه دوا والضحكة تالعند لله...كلنا مراض وهازينها..صبر راك زعما راجل..ورجال مايشكيوش...

بشار"الصمت"

توريا : فينك نتا دروك ؟!..علاش خرجتي على بونبر...

بشار"سنانو كانو مزيرييين على بعضياتهم وهو كيسمع ليها...كيشوف قدامو وكيحس براسو بدا كيدور عليه...النفس بدات كتقطع" : عرفتي فين انا ؟!..

توريا : فين ؟! جي بعدا نفكو حريرتك مع مرتك...

بشار "ضار شاف جيهة قبر باه وحط عليه ايدو بجهد خبطها". : حدا الواليد الي صفيتها ليه ورزيتك فيه...

توريا"ناضت وقفات على طولتها" : اش داك ليه ؟!...

بشار : جيت نحط عليه راس..مكاين علامن نحط راس من غير بويا...جيت نشكي عليه فعايلي...ماكرهتش يا بنت المشاوري يحيا ونعود نصفيها ليه ونشوف فوجهك شوفة ديال زماااان...ياك هادشي الي باغيا تسمعي ؟!...

توريا : ناوي ترجع لسخطي...علاش كدير هاكا اولد لحرااام...

بشار : نحقد گلبك من جيهتي نرجع كبدتك گطران عليا...نعل بو حياة مها امومة من جيهتك...نعل زبور مو رضى منك...رضاك شديه عندك وعطي لملتي تيساع...حقدتي ملة مي فهاد الحياة...كرهتي دييينمي فراسي نتي ورباعتك....الله يعطي لعدو ربكم الشتات...

توريا : عرفتي يااا ولد كرشي ودير الي فبالي...

ماجات فين تكملها تا قطع عليها كينهج بمعنى الكلمة كايموووت وعاض فالنفس...تا بدات الغشاوة كطيح على عينيه...السوفل ديال جبال الي شد تقااادا...الصحة فاش كتمشي واخا تكون صخة قد سخط مايگر فيك...بقى هكاك مزييير فالتراب ومكمش عينيه تا طاح بطيحتو كيتهز ويتحط...النوبة ديال "الصرع" رجعات ليه من جديد وهاد المرة حدا قبر باااه....

النوبة مخلات ليه فين يكمل..وهاد نوبات الي جاوه ف ضرف قصير قراب لبعضياتهم ماشي فصالح صحتو ابدا...

خرجات من البيت وجهها غااضب بجهد...وصلات وترعات الباب على اذراق وعيطات ليها بجهد تا ناضت ريهان بنت هاشم حيث البنات كينعسو فبيت واحد كبير ديالهم...ورجعات تنعس...

توريا : اشراااق...

اشراق"عينيها كيتلصقو بالنعاس ناضت مافاهمة والو" : مي !!

توريا"جبدتها من كمايمها على دراعها" : تگعدي شدي ليا نمرة مخويك...

اشراق : ب بشار !!..مم ياك امي مبلوكيك..

توريا : عيط ليا دابا...تگعديييي شدي ليا نمرتو يلاه ..

اشراق"ناضت حابساها البكية بغات غا تنعس خمسطاش اليوم وهي تصبح تشقى وتبات تحفظ كيف موصيها خوها بغات غا تغمض مخلاوها...شدات تيليفون مها شافت منين متاصل بيها لقات من نمرتو ولكن اتصال عاادي ماشي واتساب.." : معيط ليك عادي ماشي واتساب...

توريا : دوزي ليه الخط...

حركات راسها وشدات الخط كدوز ليه طلقات ليها سپيكر...بقاو يسمعو فيه كيصوووني يصوووني والو تكيقطع راسو...عاودو الكرة شي ربعة المرات والو...حتى خطفات ليها تيليفون من ايظها وناضت كتحسبن وتحلف..

خرجات من البيت ودازت نيشان لبيت الي فيه حبسبة وصلات وحلات الباب وهي تلقى غير عيدة جالسة حداها و سعيدة اما مليكة مكايناش...

توريا : فاقت ؟!

سعيدة : كتفيق وترجع تنعس..عيانة توريا مزال ماتوگض..

توريا : لالة الى گديتي تهبطي هاني لتحت فبيتك...ياكما تهبطي معايا...

عيدة : مدي ليا ايدك ونزليني..مابقى مايتگال هنا...بقاي معاها سعيدة نوضي بدلي ورجعي گعدي معاها تتوگض ونشوفو هاد الحريرة الي تلينا فيها..."مدات ليها توريا ايدها نوضاتها" ياااربي الحنين عليك عولت...

خرجاتها توريا من البيت شادة فعيدة تاهبطو لتحت لبيت عيدة نيت..دخلاتها وسدات الباب...جلسات عيدة ف سريرها وهزات عينيها فتوريا...

عيدة : شتي اش دار ولدك ؟!..هذا هو مسوانا ناض كرفص البنت هكاك ؟..اش نگولو لواليها وفين نحطو عينينا عليهم...لجم ليا فمي وسكت لينا الحس جملة...فين هو دروك ؟!

توريا"زكمات فمها وتنهدت بغيض" : شكون گاليه على حيلة مرضك ؟!

عيدة : هاويلي حي ؟..تي هو عرف ولا سايرة ضحكي عليا..

توريا : بانت ليك حالتي حالة ضحك..حالة تشفي العدو...صبح ليا العروسة فايضة وزاد مع طريگ...عيط ليا ولاح ليا كلام خلاني نشك راه سمع ولا عرف بحيلة مرضك...

عيدة : لا تگوليها شاااي..الحاج ما فخبارو درت حيلة المرض..هاو نتي ومليكة الي عارفين...مليكة ماديرها...اش گاليك هو وكان اش گال ؟...

توريا : الهضرة ناقصة الي كبر منو..راه فروضة حدا الغالي...ولا يهددني ب بوه يعاود ليه ماجرا..."عيدة خرجات عينيها"..

عيدة : هاويلي واش داه لتم...هادي وقيتة ديك البلاصة..هادي وقيتة الي خلا ليا هنا مرتو ماعرفناها تفيق ماعرفناها تبقى مغيبة..كرفصها ولاحها لينا وزاد ؟!...فين هو نابي عليه (عيطي ليه) يرجع لهنا نشوفو حريرة هاد الحالة لا يسيق لينا حد الخبار اش نگولو لناس ولا لاخرين..واش نگولو لواليها تعالو بنتكم على شوي يقت.لها لينا...

توريا : ماكيجاوبش گطع عليا تيليفون...سمعني المنقي خيارو وگطع...ولا هو الي هاز عليا خنافرو وگاليك بغى يعطيني علاش نقلب...ماندويشاااااي دروك ماندويشاااااي تنشوف حريرتي معاه اش تاليتها...شحاال گدو راجع راجع...علاه مالو بغى يخليها ليا هنا ويزيد ؟؟...

عيدة : نطلبو سلامة دروك..نطلبو سلامة تفيق ديك بنت الناس ونشوفو اش نديرو معاها هي عاد نشوفو حريرتو...سيري عاودي طلعي عندها ناس بدات تدخل عندنا ولاخرين راهم فاقو..لجمو فامكم لا تخليو حد يدخل عندها الي سول علموه راها عيانة وماتصيبش تخرج تايجيو دارهم لغذ ليه...مابقى مالبقو من غير هادشي تنشوفوه ملي يجي لهنا...را گد ما كعد مايخليها لينا هنا بلا موجب شرع....

توريا"هزات نفس تا هزتها وحركات راسها وخرجات من البيت...فطريقها لقات سعيدة هابطة مبدلة حوايجها ولبسات تشامير خفيف...

توريا : علاش هبطتي اسعيدة...

سعيدة : نجيب الفطور نشوفها لا فاقت نعطيها تاكل...

توريا : هاني طلعت عندها..الله يرضي عليك ردي البال هادشي مايعرف بيه حد اسعيدة...تانشوفو هادشي فين بغى يوصل..."سكتت شوية وعاودت نطقت" ماتهضريش معاه نتي يسمع ليك وعلميه يجي...

سعيدة : لا هاشم لا انا جاوبنا...ملي تساطحت معاه البارح وانا نعيط ليه ما جاوبني...

توريا : باش مريض هو الي داير هاد الحالة ؟!...

سعيدة : ماگاليك هو والو ؟!

توريا : الخصام كان بيناتنا ماصلاحش ليا نسول فيه ولا عليه الي فيا كان كافيني من جيهتو ومزاال زايد ليا فيه...بركت فنفسي ورميت الي ورايا باش نگلبو جيهتي ولا يعاير فيا ؟...ولا يهدد فيا بهضرة السم والگطران الكحل كي گلبو...عيطي ليه ولا يعيط ليه هاشم وجيبوووه لهنا الى فات تا كانت هضرتو بصح بحلوووفي يا سعيدة تاندير الي عمرو يطيح على بالكم...وديك ساعة نرجع لسخطي وعمري مزال نشوف وجهو..."هزات ايدها وخبطات جنابها تا سعيدة ضارت تشوف فناس واش شافو فيها ودايرة ايدها على فمها وهادشي كامل توريا كتهضر بالحس بينها وبينها" اااااوييييييلي على ولد لحرااااام كيهدد فيا بكلام العار...اسير الله يگطعك عليا يا ماحطات كرشي من ويل كحل تطليت بيه على اخر ايامي...غاندير براسي ماسمعت كلامو الخايب ولا عيبو الي خرج ونميك...گولي لهاشم يطير لعندو راه فروضة يجيبو هنا نشوفو ماشغلي كي ديرو ليها عيطو ليييييه....

خلات سعيدة واقفة وطلعات بزربة لبيت حبيبة لا تمشي شي وحدة فالكنينات تطلع عندها...يلاه دخلات وقفات...

حتى قفزت على صوت التيليفون حساب ليها بشار وهي تجاوب فالبلاصة يلاه غاتبدا تنگر وهي تسمع صوت ناديا ام حبيبة صرطات ريقها...

ناديا : صباح الخييير الحاجة توريا...

توريا"صرطات ريقها وشافت فحبيبة بانت ليها كتحرك فعينيها تحت جفونها المغمضيين" : صباح الخيير الحاجة كي صبحتو..

ناديا : والله ماشفنا نعاس لا انا لا الحاج...بينا نعيطو لحبيبة نسييت بالي خلات عندي تيليفونها تا صونا ليا فالصاح..وبييت نعيط ليك گلت را تكونو نعستو من العيا..تسنيت حتى صبح شوي الحال...

توريا : اللهم لك الحمد..فقنا گبييييلة راك عارفة دنيا مزال عامرة...

ناديا : وضروري...واش تلقاي كيفاش تعلمي حبيبة وتعطيها نهضر معاهااا ؟!..

توريا : دابا منصيبش باقي كاع ماخرج حد منهم من البيت ههه "فواحد الاحراج طاحت فيه مايعلم بيه غالله" راكي عارفة منصيبش نفيقهم ويالاه تمنية صباح...

ناديا : وااخا..ملي تفيق عطيها نهضر معاها تانجي غذا ان شاء الله وبنعطيها تيليفونها ملي نجيب ليها فاليز ديالها...والله الى تهولت عليها الليل كلو مانعسنا ماشفناه راكي عارفة الليلة لولة تتبات بلا بينا هههه...

توريا : عاارفة الي كاين...كوني هانية والله الى عيني عليها دابا غير تفيق وندوزها ليك...

قطعات معاها وخشات تيليفون فجيب الطابلية وبقات شحاال كتشوف فنقطة بعيييدة وعينيها كيوساعو ويضياقو بالتفكير...تا شوي وهي دور تشوف فيها تا بانت ليها حااااالة عينيها وكتشوف فالسقف ودموعها هااابطة على جناب عينيها...

توريا : بنتي كي صبحتي شوية ؟!...

حبيبة"الصمت"

توريا : الله يرضي عليك كتسمعيني...عار الله ابنتي لما جاوبيني..حبيبة...

حبيبة"دموعها ماحبسوش...كتحس بتحتها فيه صدااع ونغيييز..مجاوبتهاش عالمها وحدووو صدمتها اكبر شي حاجة جات وبدلات حياتها لواحد درجة كبيييرة...عاشت صدمة فاخر المطاف مكانتش تفكر فيها ولا تجي على بالها قبل شهر..من بنت يلاه ناجحة فالباكلوريا معولة تكمل كيف راسمة لحياتها حتى لقات راسها فضرف شهر وزيادة تحت مسؤولية راجل وبين ليلة وضحاها اصبحت امرأة وافتضت بكارتها بهاد طريقة الاشبه بالاغتصا.ب..طريقة جنس.ية منعدمة الحوار..مواجهة شخص مجهول ماسمعات منو غير زوج كلمات ثلاثة..والباقي كان ابشع...شوية وهو يتحل الباب وضارت توريا بزربة بانت ليها سعيدة داخلة هازة بلاطو فيه زلافة الحريرة ديال بلبولة بالحليب وزعتر وزيت زيتون...وكاس ديال حليب دافي باللويزة وقرعة ديال ماء صغيرة وخبيز سخون وطبسيل صغير فيه زيت العود...

سعيدة"طلات عليها" : فاقت ؟!..

توريا"تنهدات" : فاقت فااااقت.."شيرات ليها بمعنى سوفي كتبكي"...شوفي معاها الله يرضي عليك انا نمشي نعلم لالة طلع عندها...

حركات راسها وناضت توريا مخلياها معاها...سعيدة حطات داكشي فوق طابل دونوي وقربات ليها كتمسح ليها جنب عينيها من دموع..عزات عليها بجهد وماعرفت اش دير معاها...شوية انتابهت ليها ان راسها شوي حرارتو مرتفعة...

سعيدة. : بنتي واش كتحسي براسك عيانة بزاف ؟..جاوبني ابنتي الله يرضي عليك ماتقلقينيش عليك...غير هضري معايا گولي اش بغيتي نديرو ليك...

حبيبة"كترمش ترماش ثقيييل..ونطقات بصوت عيااان بالكاد كيتسمع" : ب بغيييت نمشي فحااالي...بغيت نمشي بدارنا اهئ اهئ..

سعيدة. : علاش مال هنا ؟ هاني حداك والى مشيتي لداركم غادي يتشطنو عليك بزااف البارح مشاو وبالهم معاك...وزايدون ماتگديش تمشي راكي عيانة...

حبيبة"حركات راسها ب النفي" : لا بغيت نمشي..بغيت نمشي عند ماما وبابا..بغيت نبعد من هنا مابقيييتش بغيتو اهى اهى..مابقيتش اهى اهى بغيت نمشييييي....

بدات كتبكي بهيستيييريا كبيرة تا بغات تنوص وهي تحرك رجليها بحركة لا ارادية خلات ضو يضربها تا خرجات عينيها وشهقااات على حر جهدها...تا ناضت سعيدة كترجع فيها وتنعل فيها شيطان وتهدنها...

سعيدة : نعلي شيطان الله يرضي عليك..خاصك ترتاحي ابنتي..غير رتاحي راكي عياانة ميكون غا خاطرك غير تهدني انا راجياااك ابنتي...

مزال كتهدن فيها وهو يتحل الباب ودخلات عيدة وتوريا وحتى مليكة معاهم لقاو سعيدة كتهدن فيها وهي كتبكي بهيستيريا...

مليكة : مالها ؟!

سعيدة : هانتي تشوفي اختي مليكة...

عيدة"قربات وجلسات حداها وحطات ايدها على شعرها الي طاح ليه زيف كدوز عليه وتسمي الله" : مالك ابنيتي..تهدني اكبيدتي خاصك راحة باش تبراي الله يرضي عليك...

حبيبة"شافت فيها ودموعها هابطين" : بغيت نمشي فحالي..عافاكم علمو ماما تجي باش تديني مابقيتش بغيت نبقى هنا معاه...

عيدة : وماحشوماش ابنيتي تشطني ميمتك عليك وبوك كثر وجدر..عرفتي لا ساق الخبار بغيتيه يمرض ويتنكس من جديد ؟!..

حبيبة"كتبكي وتسمع ليها"

توريا : عطي راحة لراسك ابنتي..تتبراي ويكون خير وحل لهادشي...

عيدة : كي طرا ليكم ابنيتي تا دار ليك هوك ؟ ماتناوشتو ماتسماعتو ما كثرتو لغا بلا فايدة ؟!..

حبيبة : ماعرفتش اهى ماعرفتوش مكنعرفوووش عمرو هضر معايا ثقت فيكم وحساب ليا غانهضرو حتى دار ليا هاكا..الله ياخذ فيه الحق...مابغيتوش بغيت نمشي لدارنا...

مليكة : تي شوري يا بنيتي الله يرضي عليك تهدني..دابا يجي وتفاهمو بيناتكم هادشي را عادي تانا صبحني راجلي وانا صغيرة سيمانة .وهو محاديني ميقرب ليا...سافر سيمانة تا بريت عاد هضرنا وهاني والدة ثلاثة تبارك الله...

هاد الهضرة كاملة دازت قدام سعيدة الي غير كتسمع ودايرة صبعها ففمها وماعاجبهاش الحال..

بزز باش قدرو يهدنوها عالاقل غير تيشوفو واش غايجي بشار يفك ليهم هاد المشكيل الي طيحهم فيه ويبرد ليهم شكوكهم ب واش عرف ب "الحيلة" الي تدارت ليه بصح وكيفاش عرف...مافخبارهمش را هو الي سمع كل حرف تقااال من الحوار الي ضار بين مليكة وتوريا ديك الليلة الكحلة زحلة عليه...كل همهم دابا يبان ويحل هاد المشكيل الي طيحهم فيه...خايفين بصح لا يدير ليهم اكبر شمتة ويخليهم شوهة وسط دوار وهادي الي غاتخليهم يحسو باكبر شمتة دازت فحياتهم انهم عطاوه فرصة عطاو فرصة لواحد معتابرينو مريييض خصوصا مليكة وتوريا الي محملينو مسؤولية وفاة باه وانه قت.لو حيث مريض فعقلو..ناعمرهم حطو ليه اعذار واخا دازو سنيييين والكية بردت...

توريا : دوات معايا الحاجة ناديا وسولات فيك...تبغي تهضري معاها...

عيدة : هضري معاها ولا تخليهاش تعرف شي حاجة..لا تشطنيهاش عليك ابنتي..الله يرضي عليك لما مسحيها فوجهي هاد النيبة (المرة) ولا تگولي ليها على الي جرا..ديري بوجهي ابنيتي...

حبيبة"الصمت"

مليكة : لا تهضريش معاها دروك خلي تا يوذن الظهر بينما رتاحيتي ليك شوية هاو دوي معاها...حاولي ماتعلقيهاش من جيهتك..."شافت فسعيدة" بقاي معاها وعطيها تدوي معاها لا بغات...وهضري مع هاشم "غمزتها" وسوليه سولييييه اش دار...

سعيدة : بحرا خرج تايوصل تما ويهضر معايا...

طبطبات عيدة على راس حبيبة بحنية وتنهدات على حالتها...نعلات شيطان وناضت هي ومليكة...اما توريا الي بقات غير ساهية...تا خرجو كاملين بقات غير هي وتوريا جالسين حداها...

بقات شحال وهي غير حاجة راسها وتبكي...كل مكتفكر اش وقع ليلة امس كتعصرررر عينيها وتزيد فحدة البكاء...حتى حسات براسها سخن سخن بزاف وعينيها ولاو حمرييين...ناضت توريا خرجات تشوف ناس برا ويتعاملو كان شيئا لم يقع وبقات معاها سعيدة الي تا بناتها ماشافتهم حدها هضر معاها هاشم فاش بغى يمشي يشوف بشار ورجعات عندها...

سعيدة"قربات ليها" : بنتي هاكي شربي هاد الكويس ديال حليب ولويزة...

حبيبة"حركات راسها ب لا"...

سعيدة : والله يرضي عليك مابغيتي تفطري مابغيتي دخلي تاحاجة لفمك...

حبيبة"بقات شحاال وهي تبكي..كتشوف سعيدة دوك العوينات الي سبحان من زينهم ولون بؤبؤ ديالهم..وسبحااان من رسم داك الفم المنفوخ بطريقة زوييينة والحجبان الغلاض المسطريين... ورموش الي ابدا ميستاهلو يلصقو بدموع الحزن...والجمال الي فيها مايستاهلش يتدفن فهاد البلاد حيث عارفة انهم متافقين مع بشار انه يجي كل كونجي لعند مرتو وبهاكا يشوفوه مرة وزوج تال ثلاثة فالعام بلاصة مايجي مرة فعامين ثلاثة...مافراسهاش والو سعيدة..مافراسهاش را كاين وسط هادشي كامل انتقام بين الابن ومو...بقات سعيدة ساهية فجمال هاد البنت وزينها الفاتن..وحبيبة ساهية فالي جرا ليها والحالة الي وصلات ليها...حتى نطقات حبيبة...

حبيبة : ب بغيت نمشي لطواليط...

سعيدة : واخا بنتي نوضي نعاونك...

حاسة بجسمها مهلووك واكل الدق بجهد...بزز باش ناضت عاونتها سعبدة بشوييييا تا وقفات...مع جات دور عنقها لهيه حسات بوخز مؤلم بجهد تا غمضاات عينيها وحطات ايدها على سبارادرا الي فوق الجرحة الي فعنقها من العضة الي عضها...شدات فيها وتما غاديا بشويييا مفرقة رجليها بشوي وكتمشى...حاسة بالسخفة وسخانة فذاتها تگدي...وقفات سعبدة تا طلات برا واش كاين شي حد وهي ترجع ليها وخرجاتها ل دوش الي ملاصق مع البيت..حلات ليها الباب ودخلاتها...

سعيدة : الشوفو را خدام ابنتي كاين ما سخون وكاين بارد لا بغيتي تبردي...صبري نجيب ليك بيطادين باش توضاي هو واحد دوا ديريه لتحت...

حبيبة : ع علاش !؟..

سعيدة"حدرات راسها شوية ورجعات شافت فيها" : حيث دايرة غرزة لتحت خاص داويها ابنتي...

حبيبة"بدات تنهج وتنهج تنهج تا رجعات ليها البكية وزادت تحرقت وكرهت هذاك الشخص الي دوزات معاه ليلة جحيييمية وماشي حمييمية...دموعها هبطو تاني يجرييييو بلا حساب ولا اذن...تنهدات سعيدة وقربات طبطبات عليها...كيف مكان الحال حبيبة فاش كتكون معاها سعبدة كتحس بواحد الامان غرييييب من جيهتها..كتحس بحال الى طيف ماماها معاها يمكن لان تعامل سعيدة من القلب نابع من قلب بيض مافيهش حقد مافيه سم مافيه بغض مافيه تنوفيق..."

سعيدة : تسناي تنجي واخا ؟!

حركات ليها راسها وهي تقرب سعبدة مسحات ليها دموعها وباستها من حناكها وعنقاتها كطبطب عليها كتحاول ما امكن تهدنها...خلاتها فالدوش وخرجات لبيت تجيب ليها الدوا...اما حبيبة بقات مسندة على لافابو تما كتمشي حتى وقفات مسندة وتنهج حاسة بضيق تنفس حاسة بروحها بغات تخرج...شوي حطات ايدها على عنقها وهي تهز راسها فالمراية كتشوف جيهة عنقها بانت ليها سبارادرة تحتها قطن عامر بدوا الحمر..حاسة بيها كتوزوز..شوي كتشوف فوجهها الي ولا صفر مسقوط من د.م وفمها بيييض...حالتها كضر فالخاطر ومكتبشرش بالخير...اش غايكون رد فعل واليديها الى عرفو او باها لا ساق الخبار كي غاتكون حالتو باش غاتقنعو...اش تقوليه وكيفاش تواجهو بالي مابقاااتش بغات هاد زواج وترجع ليه...نسااات الكريدي الي كاين والي علاش تزوجات هي اصلا...قاطع تفكيرها الباب الي تحل ودخول سعيدة لعندها هازة ساشية دوا وتيليفون فايدها...

سعيدة : ماماك كتصوني ابنتي...تهضري معاها ولا بلاتي...

شحال ما جلسات تهضر مع امها..شحاال مداز الوقت غادي تجي امها...الوجوه غادي تلاقا وتواجه والمصير غادي يتحدد...توريا وعيدة ومليكة راهم مع الناس الي كيباركو..حباب رحامنة كثااار والشقى كيتلا غير لكنينات...ربيعة وكريمة فاقو مع بونبر نعاسهم مانعسوه كي ناس...سيحمد برا مع الحاج عبد القادر جالسين مع شي رجال فواحد طويبلة حاطين ليهم فطوور نيت ومعاه تا رضوان وحسام الي شاد تيليفون كيتسنى ف هاشم يقوليه اش دار واش وصل عليه لمقبرة ولقاه...وزكرياء فاق هو والبقية راهم كيتسخرو....الجو دخل فشهر تسعود..المدارس بدات كتفتح...

اما لفوق الي طاري معالم بيه غير الله...مادة ليها تيليفون الي كيصوني بنمرة ماماها...كتشوف فيها وعينيها مزال حمريين ومنفوخين...قرجوطتها كطلع وتهبط بكثرة مكتصرط ريقها وقلبها بغى يسكت...اش غاتقول ليها كيفاشش غاتواجهها بصوتها العيان ضعيييف المبحووح...سكت التيليفون وعاود صونا من جديد حنحنات وهي تمد ليها ايدها بمعنى "عطيني نجاوبها"..عطاتها تيليفون وهي تجاوب مع سمعات صوت ماماها ووهي تعوج عنقها ب ضيم طاح عليها..ف ضرف سوايع قليلة حسات براسها بعدات على ماماها اعواااام...حسات براسها فغربة بعيييييدة بلا واليدين....

ناديا : الو سلام عليكم...

حبيبة"نطقات بعد تردد كبيييير" : مم مامااا...

ناديا"كانت جالسة فديك الجليسة الي حدا سقاية فقاع دار...كانو كيعمرو فالتمر ويستفو فالحلاوي وكان حداها مولاي حفيظ". : بنتي مالك ؟ مال صوتك ؟!

حبيبة"كحبات بلعاني" : كحكح...احم ضربني البرد شوية..صبحت عي عيانة بزاف "غمضات عينيها وسعيدة هبطات راسها"

ناديا : وكيفاش وقع ليك ؟! شربتي شي دوا جابو ليك شي دوا ابنتي..ياكما بايتيني نجي عندك...

حبيبة : امتى غاتجييو ؟!

ناديا : دايرين معاهم غذا ان شاء الله..الى بغيتي نسبق انا تاتجي عمتك وللا فاضمة وللا رقية وخوتك وباك غذا...

حبيبة : ل لا لا بلاش اماما انا بييخير معايا خالتي سعيدة وخالتي توريا ومي عيدة...

ناديا"بغات تسولها كيداير راجلك وتبدا تسول فيها تفكرات ان م.حفيظ حداها كتيسنى تعطيه خبارها واجلات حتى تهضر بينها وبينها" : تيليفونك خليتيه عندي تانجيبو ليك غذا واخا ؟!..

حبيبة"مسحات دموعها بطرف كمايمها" : و واخا احم..

شويا تا سمعات صوت باباها كيحيد ليها تيليفون وهضر حاسة بصوته مهول عليها بزاااف...غا هي سمعات صوته ورجعو انهامرو دموع من جديد كتمسح فيهم بجهد باش يحبسو كتكره البكا كتحس بيه ضعف ولكن ما باليد حيلة...تا وجهها ولا حمررر بالمسيح...

م.حفيظ : اش هذا القشة وايلي صيفطتك لرحامنة غبرت عليه هي سويعات مرضتي...اش بيتي نرجع نهزك نردك لداركم...

حبيبة"ماحساتش بيها تا خرجات" : ماكرهتش ابابا ترجعني ماكرهتش...

م.حفيظ"جمع ضحكة" : حبيبة ؟ مالك ابنتي...

حبيبة"تداركت الموقف" : ا اههه هيي ضحكت معاك ابابا حبيبي..هي ضحكت..ياك بتجي معاهم غذا وبنشوفك ديك ساعات واخا !؟..

م.حفيظ : واش بنتي بيك شي حاجة ؟!

حبيبة : لا لا هي ضربني البرد وراسي بيتفرگع عليا..نشرب فنيد ونرتاح وبايفوتني الحال...

م.حفيظ"قلبو ممهنيهش..زطم على هاد الاحساس ورجع انه غير مرضات وانها قالت هكاك حيث ممولفاش تبات بعيد على دارهم بلا بيهم..." : واخا بنتي واخا..كيداير بعدا بشار لباس عليه ؟!..

حبيبة"غاسمعات سميتو وهما يخرجو عينيها وهي تقطع عليه بلا ماتشعر...هنا مغاتقدرش تحمل القناع الي كانت لابسة دابا وغادي تنهار وغايعرف كلشي..حاليا قلبها وعقلها غير كيسمع سميتو كيرجع ليها ما جرا وكتفكر الوحش الي كان قبالتها يوم امس...صعييييب تنساه صعيب تخطى هاد المرحلة وصعيييييب تنسى ليها ديك الليلة...عطات ل سعيدة تيليفون وقالت" : الى صونات گولي ليها هي ريزو وبالي دخلت لطواليط حتى نرتاح ونعاود نهضر معاهم...

سعيدة : واخا كبيدتي وااخا...هاكي هادي الويز بدلي معاك...انا فبيتك حتى تخرجي...

خرجات سعيدة وخلاتها فالدوش من بعد ما عطاتها الدوا...بقات شحاال وهي واقفة حتى حسات بالبولة زيرتها والوجع خفيييف. شادها لتحت...مشات لاشاص حطات سروالها وجلسات حسات بالعافية شاعلة فيها من تحت...هبطات عينيها حاسة بالسخفة وهي تشوف الفوطة صحية عامرة...خرجات عينيها على جهدهم هادشي ماشافتش ليزار واخا را حساات بكمية الد.م الي هبطات منها ديك الوقت فاش دخل عليها...

حبيبة : اهئ اهئ الله ياخذ فيك الحق الله ياخذ فيك الحق...الله ياخذ فيكم الحق كلكم...اهى كي غاندير نرجع فحالي كي بندييير نگولها لدارنا...حرااام عليك حراااام علييييييك...حسبي الله ونعم الوكيل فيك...

بقات هاكاك تا صافي السوفل مابقاش سخانة كطلع...بزز باش قدرات توضى بدوا كيف شرحات ليها سعيدة...بدلات الفوطة صحية ولاخرى جمعاتها ودارتها فميكة وناضت هازاها ماعرفاتش فين ترميها وراسها حاسة بيه كيدووور ماعندهاش الخاطر تقلب...

سعيدة كانت جالسة فالبيت بدلات ديك الكوفرلي والفراش كامل داك الي عامر دما.يات حيداتو توريا قبل وداتو فين الله اعلم...يلاه كتقاد تا تحل الباب وهي تم داخلة بواحد المشية وبطء كيصر فالخاطر...من بعيييييد كانت واقفة كريمة حيث بيتها فديك الارجاء...كتبان ليها داخلة وتعرج ومفرقة رجليها دارت ايدها على فمها...

كريمة : اوييييلي حي مالها ؟!...ياكما دخل عليها فرعها المسخوطة...ويليييييي..وراه يفرعك غا بشوفة كيخلع ياربي سلامة عساك هي الي غاتكون عاشراتو...الله يكون معاها وصافي...

رضوان"قرصها من جنب مقفزها" : مال الحب واقف ؟ اش كتبرگمي تم...

كريمة : ها ؟ والو غير شفت مرت بشار ولد خالتي توريا...

رضوان : مالها ؟!..

كريمة : زوييينة وقصيرة وكتبان ليا صغيرة بزاف...زوجوها ليه وهو كيخلع ارضوان طبعو خااايب وهي كتبان ضريفة وزوينة ماشي ديال تكرفيص...

رضوان : هذاك ماتليق ليه تا مراة كيما كانت...راه غابر ليه ساس كاع ماخرج ماهبط ما بان...زيدي زيدي وكان عطيني مالبس نصد مع با نصليو الظهر...

دفعها من ترمتها صغيورة كمشها بايدو تا غوتت كاصحك ودخل وسدو باب وراهم...اما حبيبة كيف دخلات عاونتها سعيدة تا تكات...بزز باش قدرات تشرب حليب بالويزة غير جغمة بطليييب من سعيدة وهي تكى عطاتها دوا ديال سخانة شرباتو ومشااات غفااات....

حسام كان واقف مع شي رجال وجدو من بعد ما صلاو الظهر وخرجو كاملين...جاييين داخلين لدار...علم سيحمد ربيعة يخويو ليهم صالون حيث جاييين بزاف باغين يباركو ويقومو بواجبهم حيث كاين الي ماجاش...عبد القادر خلا سيحمد ورضوان يدخلوهم ووقف ضار عند حسام...

ع.القادر : تا فين هو بوك ؟!

حسام"تنهد وحدر راسو شوي وعاود هزو" : مشى يشوف بشار فين هو...

ع.القادر"وسع عينيه" : تا كيفاش مشى يشوف بشار..تا بشار فين مشى كلو تا يقلب عليه...اش طاري احسام...

حسام"صرط ريقو" : علاش مي ماگالت ليك والي ؟!

ع.القادر : وبان ليك خنشوشي خنشوش واحد فراسو شي ؟...توما اش واقع شفت كلشي فهاد الدار يلغي بلغاه...اش دار بشار ؟ ياكما دار شي عجب فعروستو...

حسام : ماعرفتش سول عمتي ولا مي...

مليكة"خارجة دايرة ايديها ورا ضهرها لابسة فراشة مطروزة بالطرز رباطي فالحمر" : مالك ماعارفش فعايل داك المسخوط !!؟

حسام"هز عينيه مخنزر فيها ماحملهااااش..نعل شيطان وخلاهم وزاد خرج"

مليكة : دوز ابا تكلم لمي بغات تهضر معاك وهي تعاود ليك..راه غبر ماعرفناه فين زاد...

فهاد اللحظة كان هاشم رجع من روضة قبل..مالقاش ليه الاثر تما..سول عليه شي رجال قالو ليه بالي فعلا كان ولكن بقى بعييييد حدا قبر باه...ماشافوهش امتى مشى...عيا يقلب عليه والو وقلبو حاااس بيه انه جاتو نوبة حيث طريقة باش قالت ليهم قطع عليا الهضرة شك انه تكون جاتو وزاد تشوش عليه بزاااف...عينيه بغاو يبكيييييو عليه بغى يجهل وهو كيقلب ويصوني ليه ووالو...عيا يدور تما ورجع تاني قلب عليه فمراكش الي حتى قرب يدوي المغرب وهما على نفس الحال حبيبة مغيبة بسخانة مرة مرة كطلع عيدة طل عليها..وسعيدة ملازماها اما توربا دور دورة وطلع حتى علماتها اشراق بالي يوسف تاهو مريض...تشطنات معاه.وفنفس الوقت عقلهم غايب مع "العريس" الي غبر ليه ساس تاني...توريا بدات كتحس انه الشك الي فراسها غايوقع بصح ويخرج لارض الواقع...جالسة عند راس يوسف وفنفس الوقت كتمشي وتجي براسها وضهرها...مالقات مادير وقررات تحاول اخر محاولة كي دخلات اشراق عطاتها دوز ليها نمرتو وخلاتو يصوني...تا قالت را مغايجاوبش ثاني.. فجأة تطلق الخط وهي توقف...

توريا. : علاااااااااش كدير هاد الفعايل !؟...فاش عينك يا ولد لحراااام فاش عينك...علاش كدير هاد الفعايل علاش خليتي ليا عروستك مكرفصة وحالتها حالة ؟ فين نعطي وجهي من واليديها ومن الناس ؟...علاش خليتيني تا خطبتها ليك وجوجتك ليها ونتا دير ديك الحالة ؟!...علاش باغي تخليني ضحكة ومسكة ففام عباد الله الله يتبعك البلا....

بشار"عرقاان حيث عاد طلقاتو سخانة الي كتجي ورا النوبة ديال الصرع" : هامك وجهك گدام القبيلة ودواور...ماعندك غراض ف واليديها...

توريا : ناوي تخسر ليا وجهي كيف عادتك..نعاود نرقع من جدة وجديد ؟!...بحلوووفي يا المسخوط وجهي تندورو عليك الى يوم الدين...وبحلوووفي "قاطعها"

بشار"كيهضر مغييييز عروق نواضرو كيبانو والعرق ناازل" : هادي هي بنت المشاوري ميمتي الي كنعرف...هادي هي توريا الي تسمعني السخط وتگلع ليا الرضى...هادي هي الي تسمع عليا الخايب وتكمل مع عباد الله...درتو فعايل ابليس باش تربطوني وتواطيو ليا راس نتي والرباعة الكحلة الي معاك...ماعلى بالك را شيطان هو الي سخطتي عليه...شفتييي دابا يا بنت المشاوري اش والدة ؟ سوكي بيها مزياااان..."عينيه ولاو حمرييين مجغميييين" تشهييييييت يا ميمتي تعري عليا نيابك تسمعي من ديك الخنشة ديال نفا.ق الي حطها ربي عمتي ودافعي عليا...علاش ماتعطيها خو كلامها...علاش يا ميمتي ما جيتيني نيشان وحطيتي راسك عليا..نتلاح لعافية ونگول باردة...نشد الشوك بايدي ونعطيك الورد...شحاال طلبتك شحال رغبتك وشحال صبرت ليك تا فوت ونتي طالعة سخط نازلة سخط..مرضتييييني فصحتي من نهار حليت عيني عليك..بغيتي تسخطي سخطييي وزيدي فسخطك نتي وعلاش دام فمك وگلبك...جربي حر شمتة الي تشمت جربي حر الوجاه الي ضارت عليا ونتي وگفتي معاهم عليا...مارحمتيني ماخليتي رحمة ربي تنزل عليا...وليت ابليس فسيفة انسان بمسبتك...كون حزتيني ليك كون فحجرك تريكتي هازاها ورافعة بيا راسك....كون ماتعديتي على بنت ناس وربطتيها بواحد مريييض مكرفص فعقلو ومقود فريو...ناعتاني بالمريض الي مافيه ثقة تا مرضتيني صحة ونتي براسك خاصك طبيب يحيد منك السم الي فگلبك من جيهتي....عرفتي علاش گطعت عليك صباح ؟ على بالك ولا لا راني مريييض بالصرع سيري ثقفي راسك شوية وبحثي وشوفي كيداير... كنطيح كنحسب روح خرجات ليا وغير ربي الي واگف معايا ربي الي عصيتو ما مرة ما جوج وكان رحيم بيا ونتي يا كحلة الكبدة والگلب مارحمتيني...حسبي شحال من مرة ذكرت رحمة ونتي زايدة فسخطك عليا......زيدي سخطي زييييدي راكي فاتحة ليا رحبة السخط غا بلاش.... ولاكان غا وجهك تانا وجهي حارمك منو...هادي اخر هضرة وكلام ليا معاك وكمالة هضرتي صباح...عمر وجهي مزال تشوفيه فحيااتك وصوتي تسمعيه....وعمر هاد البلاد منحط فيها رجلي وخا يجيبو ليا خبارك كيگطرو ليك ويشهدو ليك...

قطع عليها وهاد المرة حيد لاكارط سيم من تيليفون وعضها بسنانو تا تهرسات شقاااف وتضغطات ولاحها من شرجم كسيرا بجهد تا تهزات طوموبيل وهاديك مشيتو من البلاااد....

كلام الي خرج من فمو يمكن اقسى ما سمعات توريا من بعد ما سمعات خبار موت راجلها على يد ولدها الي هو ولدو...والاكفس من هذا ان الكلام خرج من ولدها نيييت...اما هو يمكن اول مرة فحياتو كيحس براسو قال الي خاصو يتقال...من بعد ما قلبو عمر حتى فاض وشيط الخير فيه...يمكن وصلات بيه للحافة حتى تكب كلشي وجا فيها هي...يمكن لو كان هاد الكلام من ابن لام ديالو فحالات طبيييعية يكون الرد صادم لكن فحالة بشار وتوريا استثناء حالو حال بعض الاستثناءات فالحياة ديالنا...ماشي ديما السخط ديال الواليدين عار وماشي ديما رضاهم حلال...بعض الواليدين اذا ماعممناش كيكونو نقمة لولادهم والعكس صحيح...ومزال الحياة تورينا وتثبت لينا شكون حنا واش كنسواو فيها واش خاصك يا عبد تراجع حساباتك فيها وتحط راسك فالمكان صحيح بلاصة مكنتي فالبلاصة الغالطة فهاد دنيا...

توريا يمكن شكها كان فمحلو مكانتش ابدا حاطة فيه ثقتها الكاملة...كانت عارفة انه موجد لشي حاجة ولكن ماحطاتش فبالها يمشي ويحلف مايرجع ويخلي ليها مرتو فعنقها فيوم صباحها عروس ماشي كأي عروس!!!...

وهنا المشكيل الاساسي عندها غايتقاس والي هي وجهها وصورتها قدام ناس نسابها "واليدين حبيبة"...دارهم خواتاتها الي كل وحدة متباهية بعرايسها...تجي حتى ليها وتشوه ان ولدها غبر زاااد وخلا ليها مرتو...هي ديما كتشوف غير راسها فقط مستواها وجهها الي متمثل فسمعتها وشكون هي بنت من ومرات من..جاتها فرصة تباها بولدها ولو عطاتو ورضعاتو من حنانها لو هو دابا معاها شخص عااادي وهازة راسها بيه لكن توريا شخصية من شخصيات العصاميين المحافظين بكشل ماشي فمحلو...ماعندهاش الرجلة فالقرايا عندها فدراع الحار من صغر وفانها تخرج فيك عينيها وتحذر راسك ودير الي قالت ليك وماتنزلش ليها كلمتها حتى ولفات هادشي لكن "بشار" خرج ليها عكس كيف بغات وتمرد عليها كيف بغى وزاد كمل اكثر واكثر وخلاها تنفرو هي فاش قت.ل "باه" هنا تطلى قلبها بالقطران من جيهتو...وسخط فتح رحبتو عندها كيلاغي بسمية "بشار"...

كيف رمى ليها الهضرة وكيف رش عليها سم لسانو سمعااات ودخلات الكلام وسدات عليه بالقفل وحدرات الراس مدة مدااااااا وهي حادراه فمها تزكم وولا زرق وصدرها كيعلى وينزل بحرقة النفس...شعلات فيه العافية لداخل الحر.ب ناضت الي دخل ليها مفقود والخارج مولود...اما برا ضاحكة عليك بالجمود..وخا را وجهها مبين انها تشمتااااات وشمتها شمتة حارة تموت وماتنسى...قلبها من كثرة ما دق حسات بيه قطع ليها التفس...واحد اللحظة حسات بوذنيها صدرو صوت طنييييين قويييييي...تا يدات طلع نفس وتهبطها بصعوبة...حتى بدات النفس فيها كتسمع فحال شي حد كيعاني من الربو...عينيها خرجو والوذنين تزمطو حتى مابقات كتسمع والو...بقات مكوااانسيا ووجهها كيفيييبري بالغدايد...العاااااافية تحرق طالعة هابطة فيها...حتى وقفات وايدها مزيرة على تيليفون وتمات غاديا بشوية...حطات ايدها على الپواني كتبغي تحلو كيفشلو ليها ايديها،،، بقات مكوانسيا فوجهها وصدمتها...بزز باش قدرات تحل الباب وهي تخرج بخطى بطيييييئة،،مصدوومة واكلاها بالمعقول...

ربيعة"جايا فالطوالة تا بانت ليها خارجة فشكل باينة عليها ماشي تالهيه...ماحدها كتقرب وهي كتزيد تنتابه ليها...وجهها مسقوط منو د.م" : ختي توريا ياك لباس ؟!

توريا"راسها كيفيبري وليد مزيييررة على التيليفون"

ربيعة"خلعتها" : ختي توريا ياك شي باس مكاين مالك ؟ واش ضاراك شي حاجة ؟!...

ماجوبتهاااش ولا عطاتها كلمة ولا حرف...مافهمات فيها والو اش واقع ليها وخصوصا كتشوفها ممكن فاي لحظة طيح ولا شي حاجة...بقات تابعاها تا طلعات كريمة تاهي وهي تغمز ليها ربيعة تشوف...

ف بيت عيدة وعبد القادر الي كان جالس حاط عكازو حداه وحاد ايدو فوق ركبتو كيحرك فصباع ايدو بتوثر حادر عينيه وحجبانو تگرنو بالغضب...من بعد ما قالو ليه الصباح اش وقع وهو كيتسناه يبان يفهم يعرف اش كاين ولاش دار ديك الحالة...

ع.القادر : وفينهو دروكانيات (دابا)..اش هاد تيهوديت الي فيه دابا..ما فعايل ما مسواه يدير هادشي...كيفاش خلاها فالبيت وغبر...

عيدة : لجم فمك اعبد القادر وهادشي هنا يبقى لا توصلو لواحد فولادك لاخرين..عيب الحاج...

عبدالقادر : وهادشي فيه معنى يتگال...ياعوذ بالله على مريض ياااعوذ بالله...فوگ ما بركنا على نفسنا فولدنا الي ترزينا فيه وعضينا فالنفس تا هزيناه التكرفيص هذا هو جازاتنا ؟!..

مليكة : وسركم يا با نهار گلتها ليكم رديتوني گارحة ومانسوى...انا الي حضرت وشفت بعيني ومرضت وباقيا تجيني حالتي من جيهة خوييي..عساك نتوما الي كبدتهم وعضيتو فالنفس وعاونتوه ايوى هاهو عما ليكم العينين...

يلاه غايجاوبها على هضرتها تا سمعو صوت الغوات ضارت مليكة كتقول سلامة ياربي وهي تدخل كريمة كتنهج وجهها بيض بالخلعة...

مليكة : ياك شي باس مكاين ؟

عيدة : ياعوذ بالله اش هادشي ؟..

كريمة : مم خالتي خالتي توريا طااااحت على وگفتها عند راس الدروج وهي تكركب فيهم اهى اهى...بغينا نشدها مالگينا مانشدو اهى اهى....

مليكة مشات تجري وعيدة وقفها عبد القادر تبعو كريمة لقاو توريا طايحة عند راس الدروج مغيبة....غا شافتها مليكة وهي طلقها بغوتة تا حلات حبيبة عينيها....

كانت سعيدة كاتدوي مع هاشم الي كان راجع لعندهم وجالسة حدا حبيبة من بعد ما طلعات ليها ماتاكل باش تعطيها دوا وتحاول معاها ما امكن تهبط ليها سخانة وتصبح لباس باش ميتهولوش عليها واليديها الي اتاصلو فالعشية يطمنو وخبراتهم بالي عيانة وناعسة وقالت ليهم نيشان بالي مريضة...تسمعع الغوات وهي توقف شادة على صدرها بالخلعة قالت ياربي السلامة وهي دور بانت ليها حبيبة كتكمش فعينيها وترمش...خلاتها وخرجات كتجري نزلات لتحت لمصدر صوت لقات مليكة كتعدد وكريمة تبكي وتوريا طااايحة غااايبة ماهي هنا ربيعة كتشمم ليها فالبصلة وعيدة تلالي...

سعيدة : ياويلي كي طرا ليها ؟!...

ربيعة : كانت خارجة من بيتها وجايا بانت ليا ماعلى برجها عييت نهضر معاها نسول مالك ماواجبتني ماحتال تحط رجلها فدروج طاحت على وگفتها وتكركبت...

كيشممو فيها البصلة وهي ماهناش...شافو ماتحركتش قالو را ماتت بدا الغوات وختها صافية الي هي ام كريمة جات داخلة معاها نيشان بانت ليها وهي تطيح حداها فلارض كضرب ففخادها وتندب حداها تا دخل هاشم هو الي شاف داكشي عيط لحسام يوجد طوموبيل وهزها هاشم بين ايديه غادي بيها وهما وراه يغوتو ويلاليو فحال الى مااتت اما مليكة تعدد بخوها الي كتفكرو غافالمصايب وتعداد مارحماتو ماخلات رحمة ربي تنزل عليه....

هزوها نيشان داوها لاقرب مستوصف تما تابع لجماعة سيدي بوعثمان فالفيلاج...كانت السبعة ونص ديال العشية...عيط هاشم لطبيب حيث هو قايد كلشي كيعرفو تم ويديرو ليه حساب لا هو لا عبد القادر رحماني حيث واصلين ومعارفهم غير ناس الكبااار وعندهم ليدين معاهم مكيوحول فتاحاجة بغاوها...دخلها لواحد البيت فيه بياص ومكتب ديال طبيب معاها ربيعة الي خرگات عليها جلابتها وشال ماعرفات تا ديالمن وهزاتو جلابة حمرة وشال ليموني واحد الحالة لا حول لها....سرحها هاشم فوق بياص وخلا طبيب يتكلف دار ليها السماعات عبر دقات القلب و عبر ليها طونسيون لقاه طالع بزاف...

طبيب : فايت مدوزة على طونسيون ؟!متبعة ليه دوا ديالو

هاشم : لا عمرها شكات من شي حاجة...

طبيب : طالع غادي نضرب ليها شوكة باش يتقاد ولكن تحاولو تديوها لاختصاصي حيث المؤشر باش طالع مكيعجبش حفضها الله من مشكيل كبييير..."هبط عينو لايدها لقاها منفوخة من عند المعصم.هزها قلبها" خاصها راديو ضروري..هنا راك عارف الحالة حاول دابا تديها لمراكش"رجع قلب ايدها" من احسن دابا نيت...ولكن حتى نضرب ليها الشوكة تفيق شوية ونتاكد ان طونسيون تقاد شوية وديك ساعة ديها...

تنهد هاشم وحرك ليه راسو خرج من تما خلاه يضرب ليها لابرة ديال ضغط المرتفع..خرج كيمسد فعينيه من التعب لقى سيحمد ورضوان واقفين وحسام...قاليهم اش كاين وبعد لهيه جبد تيليفون يتاصل بيه ولقى الهاتف "طافي" كيتسمع ليه غير صوت العلبة كتهضر بالالمانية...شوية وهو يخرج طبيب قاليهم بقات معاها السيدة الي هي ربيعة...بقاو شحااال كيتسناو شي ساعة لاروب تا بانت ليهم مخرجاها ربيعة وجهها بيضضض وفمها زرااق...مسندة عليها...

هاشم"ربت عليها وشاف ايدها الي خوا ليها عليها طبيب لالكول ودور عليها فاضمة حتى يديرو ليها راديو" : شوية اختي توريا !

توريا"الصمت"

ربيعة : صبر نديها ل كابينة (هي طواليط)...

زادت سنداتها وداتها تحت عينيهم حيث مع ضربات شوكة من وراها كاتزير فيها البولة ضروري خاصها تبول باش تنفس...بقاو شحاال كيتسناو فيها تا خرجاتها وعلى نفس الحالة ونفس الوجه مغدد مسمم مكنزز...شكر هاشم طبيب واوها تا شد هاشم طريق مراكش حيث بصح ايدها بانت ليه منفوخة بزاف وزراقت...ماهضراتش ماتكلمات تا وصلو لعند مستشفى ديال محمد سادس...

هاشم : صاحبي كاين هنا يقضي معانا حسن من كلينيك...

كي وصل دخل نيشان لقى سيد كيتسنى فيه حيث سبسطار كامل ماشي بالمعارف والا ايخصك تسنى نوبتك فالراديو...وحيث معرفة دار ليها راديو المستعجلات ديال الحوادث...هما كيدوزو ليها عاود طلع ليها ضغط تاني وغابت...تا بداو يجريو عبرو ليها وعاودو هبطوه ليها....هادشي كامل ماحضرو ليه معاها غير ربيعة الي كي شدو توريا خرجات كتولول عندهم...

سيحمد : اش كاين ؟!

ربيعة : طلع ليها طانسيو (طونسيون) تاني..(دايرة طرف زيفها على فمها وعينيها مغرغرين حيث توريا كبرو على عينيها شافو فيها مرات الولد الكبير وهي الكبيرة وكبرو على ايديها) يضهر ليا بغاو يشدوها تبات گاليك طلع ماطلع راني نسمع غا فيهم...

هاشم"هز حاجبو" : وايلي على تبات ؟!...

جبد تيليفونو ودوز لسيد الي عيط ليهم وعلموه بالي الضغط رجع طلع وخاص تبات حيث مزاگيش...بقاو كيتسناو فالكراسا تما مرة تعيط سعيدة تسولو وتعطيهم الخبار ومرة تعيط دوز ليه اشراق الي كانت مخلوعة بزاف...الي حتى خرج واحد الفرملي هو الي عطاهم الاخبار...

هو : شوي وغادي يطلعوها لانعاش حتى يتاكدو انه استقر وديك ساعة تقدر تخرج...ولايدها "عطاه ورقة مكتوب فيها نوع الجبيرة" هادي جيبها من فرمسيان هنا باش يركبوها ليها...

رضوان : اش عندها

هو : عندها فدع من درجة الاولى غايخصها دير هاد جبيرة واحد 26 يوم وترجع دير راديو...

حرك ليهم راسو وزاد هاشم بقى شاد الورقة شحاال وهو يضرب دورة وخرج قدام المستشفى كانت صيدلية حالة شاف فالساعة لقاها العشرة ونص ديال الليل...

الخبار وصلات لفييرما كاملة غا سمعوها غاتبات وهما يحميوها لتعداد خوتاتها ساقو الخبار من صافية وكريمة وسعيدة طلعات لفوق دخلات وهي تلقى حبيبة جالسة وعينيها فنقطة بعيدة وجهها عيان مع طحطيح سخانة الي ماطلقتها غا بالكشايف...

سعيدة"وجهها مبدل" : بنتي فقتي ؟ كي بقيتي...

حبيبة"حركت راسها وصافي"

سعيدة"تنهدات وجلسات حداها..دوزات ليها على شعرها وحطات ايدها على حنكها كاطبطب عليها وفنفس الوقت كتقيص فيها باش تشوف ياكما سخونة تاني" : هضري بنتي گولي شي حاجة راني فحال ميمتك عمرك تشوفي مني العيب...

حبيبة"بقات شحاال ساكتة تا قالت سعيدة را مغاتجاوبش وهي تنطق" : بغيت نمشي فحالي خفت بابا توقع ليه شي حاجة الى عرف...مابغتيش نشوف وجهو وفنفس الوقت خاصو يكون حاضر باش بابا مايعيقش هو وماما وعمتي ودارنا كاملين اهى...علاش كذبو عليا علاش گالو ليا ضريف وحنين وهو دار ليا هاكا اهى...اش غانگول لبابا ولا ماما..والله حتى يطيح ويمشي فيها وانا نتبعو اهى...علاش دار ليا هاكا علاش الله ياخذ فيه الحق الله ياخذ فيه الحق اهى اهى...

جاتها حالة اشبه بالهيستيريا ديال البكاء والخوف ممزوجين بصدمة الي واخا تفيق تنعس تهضر الا انها داخلة فيها...حسات بتحتها وخزها وهي تكمش عينيها محتاجة لحضن امها محتاجة ترمى فشي حاجة فيها الامان ولكن مالاقياش كتفكر انها ماشي فدارهم ومكاين الي يربت عليها حتى فجأة وقع العكس ولقاتها راسها مخشية فحضن كبييير حضن حنييين كيربت عليها ويهدنها واخا ماشي كيف حضن ماماها الا انه حضن كتحسي بيه صافي كبيير طيب حنون...

سعيدة"كتبوس ليها فراسها..كانها كطلب منها سماحة على ماداروه فيها ومدار فيها ولدها كان بشار ولدها حقيييقي وهي عروستها" : الله يرضي عليك تهدني ابنتي..الله يرضي عليك الى ما سمحي لينا مسحيها فوجهي...غير يجي هو كلو ماعرفناهش ابنتي فين مشى...غير يجي ونفكو هاد المشكيل ويكون خير..دابا ماعليك غا تصبري غير على وجه واليديك ما على وجه تاحد ابنتي ماعلى وجه تاحد الله يرضي عليك...

حبيبة : ضروري ضرووري نضغط على راسي باش منبين ليهم والو...اهى وهاد الحالة الي انا فيها وعنقي الي فيه هاد الحالة الي دار ليا كي ندير نخبيه ؟!..كي نديييييييير...

بقات شحال وهي هاكاك تا تنفسات صحة وحاولات ما امكن تاكل باش ترتاح وتبان طبيعية قدام دارهم...عاود من جديد تضغط على راسها...نسااات سعيدة ما جرا تا نطقات وسولاتها على توريا حيث قالت ليها را داوها...لانها فاقت على الغوات وعلماتها سعيدة اش واقع...

سعيدة : شفتك فهاد الحالة وماگلت ليك والي..ففف..طلع ليها طانسيو وتفدعات من ايدها فدع خااايب دارو ليها جبيرة وشدوها تباات تما..."تنهدات" راك شتيها كمداتها فگلبها تاهي مابغات ليك هاد الحالة ومرضات...

حبيبة"حدرات عينيها"...

سعيدة : كولي بنتي وتكاي وهضري مع ماماك علميها صباح يجيو عادي عاودي ليهم الي وقع حيث توريا ولالة الي يتلگاو ليهم راك عارفة اش وقع....

تاحد مالقاها كيف بغاها..تاحد مكان حاسب حساب لهاد الحالة الي غاتوقع والي طرا مكانش فالحسبان...رجعوه صحة رجع رون ليهم كلشي وزاد ونتوما عوومو بحركم ولا قطرانكم نعل الي سول فيكم...قرارو خذاه وماسوقو فالعواقب مكيعرفش اشنو هي تبعات شي قرار خذاه...هاديك الليلة رجع سيحمد ورضوان وبقى هاشم وربيعة معاها...بقاو الليل كامل وهما فايقين وتاحد ماحاس بواحد الشخص الفوق كيصارع تاهو فالمرض...غير سعيدة الي كطل عليه حيث لاحظت غيابو تا من ختو ماتسوقت ليه....الربعة ديال صباح حلات عينيها..حاسة بالتحت كيصادعها وخاصها تبدل تعنفجت وتقلقت والعافية شاعلة لتحت حيث الغراز ماشي ساهلين باش يبراو دغيا...ناضت مفرقة رجليها تا تقادت فالجلسة وهي تنوض شادة لتحت وتمشى بشوية تا خرجات ماعارفاش البلاصة كلشي غريب عليها حدها عاقلة على دوش صافي تالتحت ماهبطات ليه ماقربت...دخلات لدوش توضات تاني ودارت دوا باش يحبس عليها الحريق وبدلات الفوطة صحية باخرى جديدة...غسلات وجهها وحالتها..حاسة براسها خاصها دوش خصوصا مع سخانة كلها عرقات وهي من نوع العرق مكتصبرش ليه وديما كتعوم وحالتها ديما نقية... والحال معطل اجلات حتى يصبح الحال وتطلب من سعيدة تعاونها حيث هي الشخص الامن بالنسبة ليها...خرجات من دوش وتمات غاديا حتى بدات كتسمع شي صوت كيعيط وينادي صوت باين عليه ماشي طبيعي ولكن يضرك فخاطرك...

"مي مييي كحكح كحكح (ديك الكحة كي الزواية رقيييقة فداك صدر) ميي..خ خاتي (خالتي) سيييدة (سعيدة) خاتييي.."

صوته واخا كبير كيبان كانه ولد عشر سنين...ضورات راسها وبثات شحاال كتسمع وتاحد ماداها فيه والا سمعو...ضارت وهي تعاود تسمعو كيعيط ويبكي..كيقول "بغيت الما"...صوته كيبان كيناجي عياان وتاحد مانجاه...بقات تصرط فريقها وهي تلقى راسها غاديا فاتجاه داك الصوت ماحدو كيعيط ورجليها كيمشيو بيها تا وقفات وقالت ندخل سوق راسي والي فيا كافيني. ولكن صوت كيجذبها...بان ليها الباب شبه محلول وهي طل بعينيها تا بان ليها نصو طاايح وعرفاتو هو يوسف الولد الي من اصحاب متلازمة داون...غا شافتو كيبكي ودايرين ليه زيف حياتي على راسو متبتين ليه قطع مطيشة فيهم قهوة ومخينزة على نواضرو وعينيه كيبكيييو وهو كيعيط ومالقاش الي يكون معاه سعيدة الي رادة ليه البال لتحت...غا شافتو هكاك ماحساتش بعينيها الي غرغرو بجهد وهي كتشوفو واحد المنضر يهرس الحجر ويبكي الجبال...حلات عليه الباب وهو يهز عينيه شوية حس بوجود شي حد...

حبيبة"تمات غاديا هكاك فركة شوي وهي تحنى عندو" : بيتي شي حاجة ؟ (بصوت عيان تاهي وتاهي مسخسخة بتبعات سخانة)...

يوسف : بيت ما بغييت مي...

حبيبة : واخا تكى فبلاصتك ونعطيك الما ونعيط ليك لخالتي سعيدة ؟!..

حرك ليها راسو بزربة وهو واش عارف مسكين...قلبات بعينيها على الما ماراداش البال بالي راها فالبيت ديال توريا...لقات قرعة لهيه ناضت بشوية معگزة تا كبات ليه كاس وقربات حداه عطاتو يشرب غا شدو تكا عليه دقة وحدة عطشااان مهلوووك..كتشوف فيه وجهو حمررر وحالتو تقطع فالقلب...عطاها كاس وقاليها"زيديني" ماعطلاتوش...تا حس براسو روا الوكحة...بتردد حطات ايدها على جبهتو لقاتو طااايب وهي تشهق...

حبيبة : هيييي طالعة ليك سخانة حتى نتا...بيخصني نعيط لخالتي سعيدة...واخا نعيط ليك ليها ؟!

يوسف"عينيه مغمضين حدو حرك ليها راسو وصافي...هي يمكن ماعارفاش ولكن يوسف حس بيها..حس بواحد القلب طيب فيها لمس فيها الحنان والخوف الي كان من جيهتو...خرجات من البيت بغات تشوف فين كاينة ومشكيل لتحت ماعارفة شكون تما عارفاهم كلهم فايقين...بقات واقفة عند الباب وخا عيانة مهلوكة الا انها اصرت تبقى واقفة تا بانت ليها كريمة طالعة باغيا تدخل لبيتها عيط ليها رضوان...

حبيبة"حنحنت مترددة" : ختي واش خالتي سعيدة لتحت ؟

كريمة"طلعتها وهبطتها وكتقول واش هادي ممسوقاش عگوزتها فاسبيطار وهي واقفة تسول على سعيدة" : لتحت بغيتيها ؟

حبيبة : عافاك عيطي ليها ب ب "كتحاول تجهد صوتها حيث واكل دق وسخفانة تاهي" هي بغاها يوسف عيان بزاف...

كريمة : واخا "تا بدات تعيط قفزاتها وهي واقفة تا شدات على صدرها". وااااا سعيييييييييداااااو..."سمعات نعااام" تكلمي ليوسف بغاك هو ومرت بشار ولد خالتي...

غا هي ذكرات بشار كحلات حبيبة بالعمى...ماشعراتش كاع تا ضارت ومشات بزربة لبيتها وسدات الباب خلات كريمة كترمش...

يتبع...