محتوى القصة
غادي ويهتهت غا وحدو تلفات ليه الجرية بهاد الخبار جاتو فشكل جدو يتزوج وخا كان حاضر ل مرات جدو الي ماتت لكن كان صغير بزاف فاش هي ماتت...وصلو لكلينيك طلعو نيشان لغرفة يوسف الي بدا كايمتاثل للشفاء واخا مزال معطل فالدوا...
مالقاتش معاه توريا كان غير وحدو...بقات معاه شويا هي وحسام ضحكو معاه وجمعو معاه شي ساعة تا جات توريا سلمو عليها وهما يمشيو...
حسام : كاينة مخبزة كنت رسلت ليها بشار تقدا منها..
سعيدة : وايلي ؟..زوينة ؟!
حسام : زوينة سميتها امود...انديك نتقدا ليك اش بغيتي ونوصلك عندهم وغانطلع تال عند دراري نجيب شي بوليكوب وناخذ شي معلومات وملي تسالي عيطي ليا...
سعيدة : وعليه...
مشى حتى لمخبزة تقدا ليها منها..ماخلاهاش تخلص خلص هو كلشي كاع اش بغات تقداتو...تقدات حتى امريكان رولز الي كيعجبو حبيبة حيث معاودة ليها بالي كان باها كايجيبهم ليها...ورجع وصلها حتى لرميلة كانت دايرة تيليفون فوذنيها كاتهضر مع حبيبة تا وصلات لقاتها واقفة كاتسناها عند الباب هي وناديا وعلى وجههم الضحكة...سلم عليهم حسام ورجع بداعي ان عندو مايقضي خلا سعيدة ورجع مشى...
ناديا : مرحبااا بيك اختي سعيدة والله الى نهار كبير..."عطاتها الساشيات" ويلي لاش معذبة راسك...
سعيدة : واماعليش ماعليش..قليل فحقكم اختي ناديا...
تابطات حبيبة دراع سعيدة ووجهاتها لصالون...كيف العادة الترحاب ب رقي بلاصتو دار المراكشي...الي كيف سمعو جايا مشى تقدا ليهم اللحم وجدو لحم طنجية على بكري...وجدات صينية اتاي والمرافقات ديالها...
ناديا"مدات ليها كاس اتاي" : مرحبا سعيدة..خوذي ماتحسميش حنا ديال بعضياتنا ههههه...
سعيدة : نتي مولات الخير...والله الى توحشت حبيبة وجيت نشوفها...معزة بنتك عندي گداش...
حبيبة"باستها فحنكها وعنقتها من دراعها" : ربي يخليك اخالتي حتى انا توحشتك...
سعيدة : كيدرتي مع القرايا بديتو شي مزيان ..
حبيبة : صااافا بدييينا كايكون عندي نهار عامر...
سعيدة : وماعليش صبري...
بقاو يهضرو ويسولو على احوال بعضياتهم حتى ناضت ناديا لكوزينة تشوف فين وصل الغذا استاذنات باش نيت تمشي تكمل صالاد الي موجدة فاخرة غاتحطها قبل الطبق الرئيسي...حطات سعيدة الكاس وهي دور عند حبيبة...
سعيدة"شافت فالباب" : كايسمع هنا ؟!
حبيبة"حركات راسها ب لا عرفاتها اش بغات تقول"...
سعيدة : فكرتي فهضرتي ؟!
حبيبة"تنهدات وحدرت راسها" : خايفة بزاااف..بابا بين عينيا دارنا..خالتي توريا ملي شفتها فين واصلة هي وياه عرفت بالي هي ماعندهاش سوق فتاحد وبغات ترحمني ؟!..
سعيدة : عطيتك الحل احبيبة...عطيتك الحل وبشار انا نضمنو ليك الى ماعاونكش مايضركش غايعرف بالي عندك سبب...بشار عطيه غير الامان وكيف كايگولو الصدق من جيهتك خليه يحس راك مزيانة والله حتى تاكليه بحوايجو...كون عارفاه انا خايب بزااااف من جيهة مو بغيت ن دور جيهتو ؟ بغيت نربي عليه الكبدة ؟...راني كنبقى غير مرات عمو ولا حسبيه خوه هو وعمو كبرو قراب لبعضياتهم..."سكتات كتشوف فيها كيفاش حادرة راسها" حبيبة ماعندكش ماديري سوى تفكري فاش گلت ليك...
حبيبة : ماعندوش حتى حد يشهد من غيري ؟!.
سعيدة : كاين هااشم...هو كااافييي وليني هو جا عندك حتى نتي حيث شافك مزيانة مع خوه وبعيدة وداك البعيد را كتكون شهادتو معاونة بزاف...
حبيبة. : مابغيتش المشاكيل..عافاك اخالتي صافي عطيتو جوابي...
"يومييين" دازت لا بشار وصل يوسف ولا توريا تحركات من حدا يوسف...كايعرف اخبارو غير من هاشم ولا يهصر معاه فتيليفون وتشد توريا تيليفون وتقطع عليه تخلي يوسف مغوبش فيها ويرجع يتكى بلاصتو ويدور عاطيها بضهر...اش وقع فهاد اليومين اش تبدل واس طرا واس داز ؟!!...
خرج من دوش لابس حوايج الخروج وتيليفون فوذنيه كايهضر بالالما.نية...مع الخدمة...شرح ليهم شي حاجة واكد ليهم انه غايرسل ليهم طلب باش يمدد فالمدة وممكن توصل ل كونجي مفتوح ولا يخدم معاهم عن بعد...اما لاخرين فضى معاهم مؤقتا تايسالي ويرجع يشوف الامور فين وصلات...كمل ومشى شرب كاسو ديال القهوة وجلس كايتسنى حتى صونا ليه هاشم...
هاشم"بحزن" : بشار هاني لتحت نزل نتحركو نهضر معاك..
بشار"هز حاجبو" : طلع عندي...
هاشم : وغير نزل...نهضرو هنا...
بشار : شي باس ماكاين ؟؟.
قطع معاه وبقى جالس تا كمل قهوتو وتنغم بيها ب سيجارة...ناض حط الكاس فلافابو غسلو وحطو بلاصتو وغسل ايديه...هز لوازم ديالو وخرج من البارطما نزل فسانسور تال تحت لقى هاشم فالبارك متكي على سيارة بشار..سلم عليه وركب هو وياه..
بشار"بقى جالسة كيكمي فالكارو عينيه فنقطة بعيييدة..كيتسنا هاشم يهضر وهاشم حادر راسو..بشار كمى الكارو كملو وهاشم باقي ساكت..خلاه بشار على خاااطر خاطرو ووالو واش هضر ساد صمت رهيييب وهاشم حادر راسو ماقدرش مزال يشوف ف بشار...
بشار : مسالي تريح ستين عام هنا ؟!..."ضار شاف فيه وهز حاجبو بان ليه ماشي هو هذاك". مالك ؟!..
هاشم"زفر ودوز على شعرو بايدو ولحيتو" : شحاال باقي الجلسة...
بشار : يومين !!..علاش تنسات عليك ؟!..
هاشم : لا غا بغيت نسول..
بشار : سي سول ماعليش..راك على بال باش تحضر معايا وتشهد تانتا...
هاشم"الصمت"..
بشار"شاف فيه طلعو وهبطو وضار جيهة شرجم كيحك فلحيتو تا تبسم باستهزاء ورجع جمع البسمة فالبلاصة" : مناويش..معول عليك خويتي بيا !!..لا ماخويتيش بيا دارتها بيك بنت المشاوري..
هاشم : بشاار..فوگ الطاقة...
بشار"هز ايدو..ماخسرش عليه سوى جملة وحدة" : هانيا با هاشم..سمن وعسل...
الشخص الوحيد الي عول عليه فالشهادة هو هاشم الي محتاجو يشهد بالي بشار كان كيرسل ليوسف ومعمر ليه كونط خاص غير بيه وبحالتو الصحية...دابا مابقى عندو حتى شاهد من غير الله الى جا من جيهتو والدلائل هما شواهد الطبية والخبرة الي غايتحط فيها يوسف باش يجيب تقرير من الخبير بحالتو صحية الي مهملة..وهنا كايمشي او كتمشي التهمة للام...وباش يتكفل بيه بشار كيخص يربح هاد شكاية ضدها وديك ساعة يطلب من القاضي انه يتكفل بيه....
مابقاش هضر بشار وهاشم ماقدرش يزيد يهضر...دور عليه وجهو لهيه وسكت كيحك فلحيتو ويعاود بواحد طريقة غرييييبة تا بدا يتمتم بفمو اش كيقول الله اعلم ولا كيهضر غير مع راسو...هاشم ماقدرش يبقى معاه ضار اخر دورة شاف فيه وهو يحل الباب ونزل مشا...
اما بشار غير سمع صوت الباب تسد وهو يديماري وكسيرا تا تهزات سيارة خلا هاشم ضار بزربة بان ليه طااار من حداه...جبد تيليفونو وهو يصوني لسعيدة...
سعيدة : اش بغيتي ؟!..
هاشم : اش هاد لافاصون باش كدوي معايا !!..
سعيدة : دويت معاك بلي تستاهل...حشومة عليك والله حتى حشومة مابغيتي ماخليتيني نعاونو...علاش كديرو فيه هادشي باش اذاك اهاشم ياك باغي غير يتهلا فخوه علاش حتى كيرجع لمغرب كتندموه وتخليوه واحد خااايب...علاش حلفتي عليا مانشهدش معاه علااااش ؟...لهاد درجة خايف من توريا ؟!!...
هاشم : فوگ جهد ا سعيدة فوگ جهد...ماضغطييش عليا منصيبش نكوليك..خلينا بعاد من الصداع غايخرج لينا العجب...انا الي عارف اما كون جات عليا كون هنيتو شحاال هادي...
يلاه غايكمل حتى سمع طوووط طوووط...زيررر على التيليفون تا كان غايشير بيه ودار راسو بين ايديه بغا يتفقصصص...بان ليه طاكسي صغير وشير ليه وركب. حيث سيارتو بقاات عند حسام...
الربعة ديال العشية...جالس فكوان وحدو كيسمع موسيقى هادية والكاس فايدو...وصل للكاس الرابع تا ولاو عينيه حمريييين..اخر كاس كان فايدو غير كملو وهو يحطو..هز صبعو شير لسرباي ودور ايدو كيجبد فبزطامو حاس بايدو ثقييييلة..وصل عندو جبد كارط بونكيغ دوز الحساب وجبد من جيبو بقشيش حطو ليه وناض عينيه حمريييييين الي داز من حداه يبقى يشوف فيه..ركب فطوموبيل وديماراه وزاد بلا مايدير سانتيغ...وصل لعمارة فين ساكن وطلع لدار...حيد حوايجو ومشى لدوش تخشى تحت رشاشة تا دوش بما دااافي واخا هكاك راسو حاس بيه بغى يتفرق عليه...خرج نشف حالتو ولبس تيشرت وشورط قصير...مشط شعرو لور وداز ل كوزينة جبد قرعة ديال الما خوا منها فكاس شرب لول وزادو تاني وهو يتوقف رجع كيفكر يفكرررر وعينيه فنقطة مبهمة...تا ولاو كي جغمة ديال د.م مع شوافتو الحاادة..مابقاش عاقل اش كيدير....كايبان الفك ديالو كيفييبري ويتحرك العروق تورمو ليه مابقاش حاس كاع تعزل عالواقع لدرجة الكاس تهرس فايدو وتغرسس فيها تا بدات دوز بد.م وهو مييييييت مكنززز فحال الى كيغوت من لداااخل ويريب...كاتحسي بيه بغى يطرطق مجنن...حتى حل عينيه على جهدهم ورجع لشوافتو العادية البااردة...هبط عينيه لايدو ومشى لروبيني كايغسل فيها بكل برود...مشى لوا على ايدو واحد فاصمة كاينة فصيدلية الدوش دار ليها بيطادين وعقمها..عقد الفاصمة بسنانو فلحظة زييير عليها بسنانو بجهد تا كان غايقسمهم....ومشى ل بيت تلاح فوق ناموسية وحط راسو عالمخدة كيشوف فالسقف يشوووف حتى صونا ليه تيليفونو هزو شاف المتصل كان يوسف...
بشار. : يوسف !!..
توريا : يوسف ؟ ههههه هو الي عمرك تسمع صوته ولا تحلم تشوف وجهو...يوسف الي باغي تديه مني ؟..باغي تبرد فيا حر الشمتة الي شمتك يا ولد لحرااام ؟!!!...علاش هاد شوهة درتيها ليا ؟!..
بشار"الصمت"...
توريا : خليتي ليا مراة فعنگي وزدتي ؟..راها فدارهم غا طلگها ولا دير فيها مابغيتي مابقى ليها رجوع عندي...عينك فيوسف ؟ واخا طير لسما يا الي حطيت من كرشي ونزل عليا ربي اللعنة تا ولدتك لا شتيه...ولا شتيه غا نوي على خزيت...شفتي كاع عباد الله دورو وجههم عليك ؟..ماعمرك عرفتي منين الغلاااط وعلاش كايدورو فيك ؟ حيث نتا خاااايب خااااايب ومسخوووط...ناس يقلبو على رضى ونتا مديه بالفابور...سير تنازل على شكاية وجمع عليا شوهة الي شوهتيني وسط اهلي وليت ضحكة وشفاية للعديان...سير طيح الشكوى يا عدو الله بغيت ليك مصيبة...
ماجاوبهاااااش بقات تحط تحط تحط تحط تا سخفات ماسمعاتش منو الكلمة حرف لاخر ماقالو خلاها هضرات وبردات على خاطرها وهو يقطع عليها...حط تيليفون عند راسو وجاب مخدة خشا راسو بين زوج مخاد ويلاه بغى ينعس يرتاح حيث راسو زنزن عليه باش ينوض يشوف الخدمة الي عندو....
تا سمع صوت الباب كايتدق ماعمر شي حد جا عندو ولا دق عليه من غير هاشم...هاشم الي طاح فبالو دابا وهو يخنزر..مشى حل الباب غير هو حلو وهي تبان ليه واقفة كتفرك فايديها الي كيترعدو ووراها سعيدة...
سعيدة"نغزتها" : مسالي بشار نهضرو معاك ؟!..
بشار"كايطلع ويهبط فحبيبة ورجع شاف ف سعيدة...ماهضرش كيتسنا فيهم يهضرو هما الي جايين"...
حبيبة"صرطات ريقها..بقاات شحاال كتفرك فايديها وتعاود..قرار خذاتو بعد تفكير طوييييل...بمساعدة سعيدة واخذ رأي منها..مكاينش حل حسن من انها تاخذ هاد القرار..يلاه غاتهز راسها وهي تقفز من صوته"
بشار : اش كاين ؟!..
حبيبة"هزات فيه عينيها وعوجات راسها وشافت فيه بواحد شوفة تا خلاتو هز حاجبو من ديك الشوفة...واش اثرات فيه بلا مايشعر ؟!" : عاوني...عاوني ونعاونك...
واقفة قدامو وكلها توثر وتردد...خايفة تهضر وتندم..خايفة تعاونو وتندم...خايفة من هاد الخطوة..لكن باقناع من سعيدة ماعندهاش حل سوى تقوليه اش كاين...كان ممكن يعاونها تعاونو حتى هي بدورها مكانش ممكن..المهم يعرف الاسباب الي عندها..لكن مجيتها فالاساس هي باش "يعاونها"...
بقى كايشوف فيها وكيشوف فديك الشوفة كيفاش كانت كدير ليها..شوفة ديال الترجي مع الخوووف...حول الشوفة ل سعيدة الي نطقات وهي وراها...
سعيدة. : ههه غاتخلينا واقفين مامرحبش بينا ؟!..
بشار حل الباب مزيان وكحاز داير ليهم طريق...كايتسناها تدخل لكن هي بحال الى خافت واصلا جايا خايفة كيفاش غاتقدر تجلس معاه وتهضر بشكل عادي..هو باقي ولازااال ديك الرهبة والخوف من جيهتو..مزال نفسيتها الي اذاها ليها كما هي..لكن فاش كيوقعو لينا شي حوايج كنضطرو نضغطو على راسنا باش نقضيو ونحلو هاد المشاكيل الي سبابهم هاد الحوايج...حطات سعيدة ايدها ورا ضهرها وطبطبات عليها كاتقوليها دخلي وانا معاك...
كانت بلباس عبارة على كاپيشو خريفية وسروال دجين بويفرند جامعة شعرها اسفنجة وصاك صغير سمطتو طويلة على كتافها..ديك سمطة طيبات ليها لايدين وهي كتزير عليها وتفرك...وقفو الوسط وتسناوه تا سد الباب وضار عندهم شير لسعيدة جيهة صالون حيث برطما كانت گاغصونييغ فيها صالون بيت نعاس كوزينة ودوش بطواليط مفرشة فراش فخم ومجهزة الكوزينة بكلشي..
بشار : هاني جاي...
دخلاتها سعيدة جلسات لداخ وحبيبة جلسات جنب سداري عند الباب متوثرة وخايفة بزااااف...اما هو مشى لبيت حيد شورط حيث قصيير...لبس سروال كيطمة كحل وخرج كيعقد فسيور ديالو تا وصل عندهم بانت ليه حبيبة مريحة عند راس سداري جلس تاهو تم مقابل ليها..
سعيدة"شافت ايدو" : مالك فايدك ؟!.."حبيبة هزات عينيها بزربة شافت ايدو ورجعات حنات عينيها"...
بشار"عينيه مشاو لحبيبة شوية ورجع شاف فسعيدة" : ماشي شي حاجة.."شير بصبعو جيهة الكوزينة" تهرس ليا واحد الكاس تم...
سعيدة : دا الباس اولدي دا الباس..
بشار"بدا يحك فلحيتو ورجعو عينيه تاني مشاو لحبيبة..ركز فيها شوفة مزيااان..حاس ومتأكد بيها شي حاجة قوييية الي اصلا وصلاتها لهاد المواصل كاملين..سعيدة تاهي من شافتو شاف فيها وهي دور عندها يلاه غاتدوي تا نطق هو نيت"...
بشار : تشربو شي حاجة ؟!.."شاف جيهة الكوزينة" شنو تشربو ؟!..تسناو حتى نرجع ...(وقف)..
سعيدة : لا ولدي لا نتا مول الخير..جينا عندك لغراض ها حبيبة غاتبدا معاك من لول..ملي بغات تهضر معاك عيطات ليا وجيت مع حسام كيتسنانا لتحت..سمع ليها ولدي وديك ساعة شوف اش دير...
بشار"هز سروالو من جيهة فخادو وجلس مفرق رجليه" : كانسمع...
سعيدة"ضارت شافت فحبيبة" : هضري بنتي..گولي ليه كلشي گولي اش عندك..
حبيبة"كتفرك فايديها وكتصرط فريقها..بغات تهضر لكن ماعرفاتش منين تهضر..بغات الي يبداها ليها لانه صعيب توصل وتبدا هي..هو كيشوف فيها كايتسنى تهضر وسعيدة كذلك..منين غاتبدا وشنو غاتقول...فين غايوصل هادشي ؟..لحظة ترددات وبغات تقوليه مكاين والو وتخرج من تما..لحظة كاتقول غير هضري..كايجي باها بين عينيها لكن كاتفكر هضرة سعيدة انه شيكات عند عبد القادر وتوريا واخا تقول مغاديرش بتهديدها..دارت بهضرة سعيدة ان بشار هو الحل الوحيد ليها فانه يعاونها فهاد الحالة الي وصلات ليها واخا حتى هو مشارك فهاد الحالة...مافاقت من تفكيرها غير بصوته الي تعيا تولف عليه ديما كايبقى صوته "قوي"...
بشار : اش المشكيل الي عندك ؟!..نسهلها ليك..شنو الي خلاك خايفة ولا شنو الي وصلك لهاد الحالة...
حبيبة : كانو كايگولو ليا حاجة وصدقات حاجة اخرى...
بشار : كملي...
حبيبة : شادييني من بابا "هبطات راسها وعينيها ولاو حمرييين من جفونهم منخرها وحناكها دغيا بانت فيهم تزنيگة"...
سعيدة"تنهدات بحزن على حالها" : عاودي ليه من لول باش يفهم ابنتي..
بشار"جامع حجبانو كيشوف فيها كيفاش تبدل لون فوجهها..كايتسناها تهضر وخا خاطرو ضيق بزاف"..
حبيبة : نهار..."بغات تكمل وهو يقاطعها ونطق شايف ف سعيدة"..
بشار"حرك راسو لسعيدة" : شوفي شنو تشربو...هاهي هنا..
حبيبة"هزات راسها ب زربة ف سعيدة الي بانت ليها وقفات" : لا لا لا بقاي معايا "زهقت ليها شهقة خفيفة" لا فين غاديا..
سعيدة : ماغاديا فين هاني فالكوزينة بنتي..هضري معاه بينك وبينو حسن.."حطات ايدها على كتاف حبيبة كطمنها" كوني هانية ماتخافي والو غير تهدني..
بقات طبطب عليها تا مشات خرجات من صالون وضارت لكوزينة..
بشار : هضري كنسمعك..بداي من لول..
حبيبة : انا ماعمري فكرت فزواج عمري مافكرت نتزوج كاااع..عمري مافكرت نخلي واليديا خصوصا بابا..بابا من نهار حليت عينيا وهو كايجيب ليا الي بغيت...عمرو ماخصصني من شي حاجة كلشي كاياخذو ليا كلشي كايتقداه ليا...كنخرج معاه كندور انا وياه كلشي كلشييييي اهئ...انا تزوجت ماشي طامعة فيك تديني تزوجت باش نعاون بابا...
بشار"هز حاجبو" : تعاونيه ؟!..
حبيبة"حركات راسها وعينيها فالارض" : درت كلشي على قبل بابا..لحت راسي فالعافية كيف گلتي ليا...وها علاش لحت راسي "دارت ايديها على وجهها" على قبل بابا..
كايسمع ليها وكيوزن اش كتقول وكيفاش خارج بصوت كلو حرقة وخوف كبييييير جدا...
بشار. : شنو علاقة باك ب هاد العافية الي لحتي ليها راسك..وضحي مزيان..عطيني المفيد باش نعرف اش كاين..
حبيبة : بابا عندو مشاكيل فالفلوس..عندو كريديات كبيييرة منهم اهى خء.."كاتنخصص وتمسح دموعها بطرف كمايمها"..منهم و واحد كرييدي كان كايتسالو كبييير بزاااف...لدرجة قلب على كاااع الحلول ومالقاش حل..كان حل انه يبيع شي املاك ولكن مكانش يمكن حيث هادشي فين عايشين هييي الورث تاع جدودي..ودا الورثة كاين بابا هو الكبير وكاين عمتي وعمي مات ولكن عندو ولد عايش معانا..الى بايبيع بيخصو يقسم الورث...
علاش جات وعلاش مابغاتش تشهد ويعرف واش عندها بصح سبب قوي الي حس بيه ومخليها خايفة والاهم وحدة فحالها عايشة حياة زوينة ماخاصها خير تطمع فواحد يديها لبرا وتلوح راسها وسط الجحيم..ومن فوق هادشي خلاها فليلة دمرها فيها نفسيا وكرفصها فيها وتبقى صابرة من وراه !؟؟...
سكتات واحد ثواني كتاخذ نفس وتررتاااح باش تقوليه التتمة...حط رجل فوق فخدو وربع ايديه كايسمع ليها..شوفتو فشييي شكل وحجبانو زادو غوبشو وهو كايسمع وبدا يفهم اش الي وصلها ليهم...
حبيبة : كاين عندنا حمام بايبيعو مابغى يشريه من عنظو حد حيث فيه ضرائب ممخلصينش و دي فاكتيغ تاهما ممخلصينش..كيث هي وحدو والي بايعاونو مكاينش ولد عمي داير خدمة. وتخصص اخور..كان كايتسنى هي نكمل قرايتي ونشد عليه نص ونبقى حداااه مابيت كاع نتزوج هييي يبقى ليا بابا بصحتو ونبقى كيف مولفين..شاف محلات عندنا فگيليز كايشد فلوس الكرا ديالهم ولكن باش يبيعهم مايمكنش حيث ماباوش يخرجو ليه من المحلات والمحكمة حاكمة ليهم مايفرغوش مادام ملتازمين بالكرا...
بشار"الصمت"..
حبيبة"مسحات تحت عينيها..كتمسح وتعاود" : هادشي ماگالوش ليا ولكن انا سمعتو كيعاود فيه لماما..حيث بابا مكيبغيش يقلقنا عليه وماكيبغيش نهزو الهم معاه..بابا كايبغي نكونو ضاحكين ومكيحملش نكونو باكييين...حتى لامتا بابا بايبقى يهز الهم..علاش مانهزش عليه الهم...
بشار: تهزي عليه الهم فعمر صغير ؟ صغير بزاااف ؟!..
حبيبة"خنزرات وهي دور وجهها لهيه" : فاش كايكون بابا ولا ماما ماسوقيش فالعمر..فاش يوصل ليهم ولا لخوتي ماسوقيش..نكون حتى بنت تمن سنين ماعنديش سوق..
بشار."هز حاجبو من الطريقة باش قالتها وكيفاش دورات وجهها" : شحال فعمرك ؟!..
حبيبة"باقا بنفس تخنزيرة" : 18 عام..
عض لسانو ولعن وسب الحال والاحوال الي خلاتو وصل لهاد الحالة وطيحو بين ايديه بنت فعمرها..قريب تكون قد بنتو..غمض عينيه كايحاول يتكالما صحة..رجع حلهم ونطق"
بشار : 18 عام وشوفي حالتك فين وصلات..فايتة ثمن سنين ب كثر من النص !!...هضري وكون گد كلامك..مكنهضروش غير عبث مكنلوحوش المعاني وحنا براسنا مگادين بيهم..."سكت شوية وعاود نطق" زيدي كملي...مزيان بديتي من لول باش نعرف شنو كاين نيت...
حبيبة : واحد نهار عرضو علينا داركم للعرس الي گلت ليك..ماعمري انا مشيت لعروبية ماكنقدرش نمشي ليها لا فالبرد لا فالصيف..ماعنديش معاها وداك النهار مشيت مع ماما لعرس مابغاتش تمشي وحدها...تما شافتني جداك خالتي عيدة..تهلات فيا بزااف ومكتخلينيش نحيد من حداها وتهلاو فينا كاملين ماغاديش نكذب مخلاوناش نمشيو وعرضو علينا بكري ودارو الغذا بحسابنا...
بقات تعاود ليه يمكن كاتعاود من لول كيف وضاتها سعيدة ماتخلي والو ويمكن حتى انها لقاتها فرصة باش تزيد ترتاح من هاد جبل الي هازا عليها وثقييييل بزاف على عمرها...بقات تعاود وهو كيسمع حتى وصلات لنهار الخطبة...
حبيبة. : ماگالوش را بايجيو يخطبو حتى گالوها..انا ما جاوبتش تصدمت وكنت غانرفض حيث ماعندي ما بيت زواج..ومانتزوجش فالعروبية واخا بتكون مانعرف اش...
بشار : شكون مول الكريدي الكبير ؟ (جاها من لاخر)...
حبيبة"صرطات ريقها وعاودت" : عمي عبد القادر...
بشار"جاتو ضحكة ديييك ضحكة ديال الاستهزاء مع الغدايد..مابينهاش بين ليها البرووود.." : مزيااان...مزياان..زيدي كملي..
حبيبة : گال لبابا وسط الهضرة الى تناسبنا اسيدي الكريدي الي بيناتنا بنشوفو ليه حل..بتعطيني كل مرة شوي ماتعطينيش خطرة وحدة...
فالفيرما كانت واقفة وكاتسنى عند الباب حتى بانت ليها اشراق داخلة هازة شكارتها باقيا جديييدة عاد مشرية وهازة ساشية فايدها كانت فيها لانش بوكس ديالها حيث ليسي بعيدة وكايجيبهم طرونسبور تال عند باب الفيرما..جايا وطالقة شعرها تا وصلات عند امها الي طلعاتها وهبطاتها...
توريا : اش داك شعر طالقة كي شيخة ؟!
اشراق"شافتها كاتخنزر" : م مالو..ع عادي امي...
توريا"جرتها بجهد من شعرها تا مشات وجات حسات بجلدة بغات طير ليها" : شفتيني ملهية عليك الكل.بة ودايرة مابغيتي ؟ طالقة ليا شعر يا شيخة كاع ناس يديو سعرك !! جمعي شعرك ونهار باقي لگاك طالقاه يا صبيصة نحرگو ليك فوگ كتافك..."غوتات تا طارت ونزلت كتجمع فيه وتبكي" يلاااه دابا...
...بدات تجمع فيه وهي تجرها تاني بجهد...
توريا : كايهضر معاك هذاك المسخوط ؟!..
اشراق : اهى اهى ل لاا...
توريا : طلعي وبلوكي نمرتو ونصيب جد مك كاتهضري معاه نهار كحل معايا...خرجات اشراق عينيها يلاه غاتستوعب اش قالت وهي تعطيها تيليفون يوسف" هذا طفيييه وديريه ليا فالماريو...طلعي بدلي وسيري عاوني مرت عمك فالشقا.. تانسالي هاد الويل الكحل الي دار ليا المسخوط ونعيط نعلم شي ناس كانو دواو فيك يجيو.."...
بدا كايوصل لنتيجة الشك ديالو...فهم ان بيها شي حاجة موصلاها لهاد الحالة ديال الخوففف الهيستيري من جيهة "توريا"..ماحدها كاتكمل هضرتها وماحدو كاعرف مدى الخبث الي واصلين ليه دارهم خصوصا مو اما تا لاخرين يمكن دايرين ليها الخاطر...
بشار : بنت المشاوري الي حطات عليك العين !؟..
حبيبة"حركات راسها ب لا" : مي عيدة هي الي بغاتني وهي الي بقات لاصقاني..ماغاديش نكذب عليك ماشفت منها هييي الخير واخا لاحو لبابا الهضرة...حيث فلول كان عمي عبد القادر وعمي سيحمد جاو باغين فلوس دقة وحدة ماشي يعتي هي شوي بشوي...ملي
"سكتات حسات براسها عياات...حتى تمات جايا سعيدة وكملات عليها الهضرة...وقفات عند باب الصالون"..
سعيدة : داركم بغاو نساب الاصل ماعارفش نتا هادشي ؟!..ماعارفش كايزوجو ولادهم لنساب لباس عليهم..لالة شافت حبيبة ولصقات عليها انا الي حضرت بغاتها ولصقات سيدي باش يخطبوها ليك..."حبيبة غمضات عينيها كتعصر فيهم"..باش يتبتوك هنا باش تكون عندك امراة عندمن تبقى تجي ماشي تبقى بالعوام غابر وتجي يومين...لالة انا فهمتها باغيا الزينة مابغياش الخايبة وليني الي دارتو مكانش مزيان..تعدات على بنت الناس وتانتا مادرتي فيها مايصلاح بلا متشوف فيا انا نجيك نيشان راه باقي مانسيتش اش درتي فديك الليلة وصباح زدتي و"سكتات من صوت حبيبة المجهد"..
حبيبة : صااافي صااااافييييي سكتي اهى اهى...
سعيدة"غمضات عينيها وحلاتهم..نسات ان حبيبة ماعمرها تنسى ديك الليلة المؤلمة بالنسبة ليها"...
بشار"بقى مغوبش كايشوف فيها كيفاش كتهضر وكيسمع لسعيدة.."
سعيدة : كملي ليه كملي...
بشار : قبلتي بهاد زواج باش باك يتنفس من الكريدي ؟!!..
حبيبة"حركات راسها"..
بشار"بدا كايحس بدوخة شوي حيث كيف جا شارب دوش وتلاح نعس تا نعاسو ماكملش" : من بعد ؟!..
حبيبة : اهى..من الي نتا مشيتي بغيت نمشي فحالي ماخلاتنيش..دازت يومين وطاحت هي تهرسات من ايدها..بغيت نمشي مخلاتنيش..بغيت نهز حوايجي ونمشي مسااامحة ليهم وكلشي مابغااتش...طلبتها غوت بكيييييت مابغاتش عايرتهم حيث كذبو عليا حيث گالو ليا غايتهلى فيك وصدق مكرفص عليا اهى اهى...تكرفصتي عليا نتا وداركم وضحكتو عليا...عمري نسمح ليكم...
بشار كلشي دخل ليه لراس والخاطر..حتى تفكر الليلة وداك صوت ديالها وهي كاتناجيه وديك الجملة الي مافارقاتش بالو
~~~حبيبة : عااافاك (فمها كيترعد بالخلعة..دوات بصوت رهيييييف حساس يلاه باش كاتسمع نبرتو) عااافاك راني باقا صغيرة ماعارفاش هادشي.." ~~~~
دوز على وجهو وشعرو بايدو...هز راسو فور مانطقات..
حبيبة : بغيت نمشي وماخلاتنيش باش ماتكبرش شوهة انك مشيتي وخليتيني ليها..هدداتني الى مشيت غادي تعلم عمي عبد القادر ويدفع شيكات البوليس...
حس براسو بدا كايتعصب وهادشي ماشي فصالح ديالو هو حيث غايبرد غدايدو وعصبيتو غير فراسو وممكن يضرهم حتى هما...ممكن يدير شي حوايج الي خايبين لان النفسية ديالو الي تأزمات والمرض ديالو كايبان فاش كاتوصل بيه..وميمكنش تعرف اش غايدير واشمن رد الفعل...
بشار : جي ودخل شي حد لحبس ؟!...تفكير ديال الحبس وكلاخ دنيا ودين نزل على عدو ربكم...ساهلة دخلو ؟.."هز ايديه وخبطهم" خضخضتو اللوجيك حق الرب...
"هز راسو ف سعيدة الي شافت فعينيه الي ولاو حمريييييين وعرفات ان دعوة ماتعجبش وبدات تندم لاش جابتها ليه"...
بشار. : الشيكات عندمن ؟!..
سعيدة : عند شيخي هادشي الي عارفة !..
بشار : شحال ديال كريدي ؟! "هز صباعو كيطرطق فيهم بزربة" جاوبي طلقي ملتي شحال ؟!..
سعيدة : شحاال احبيبة ؟!..
حبيبة : م 110 المليون...
بشار : 110 المليون كلها بغى يخلي شيكاتها عند بنت المشاوري ؟!...كاااع هاد بنت المشاوري دايرة ليكم التكوليخ ف راسكم !!..جي وكون مول شيكات ؟!...ونتي ياك تزوجتي وقبلتي علاش مزال خايفة ياك درتي بكلامهم ؟ شكون الي جا منو العيب ؟!...
حبيبة"ماحساتش براسها تا نطقاتها" : منك نتا...
بشار : ديك ساعة تگلعي فحالك مادوريش..ياك علمتك سيري بقاي بصحتك حسن ماتبقاي بلا صحة...ديك تريكة كلشي فيها مريض فراسو مني وجبد...
سعيدة"خرجات عينيها ولات خايفة يتعصب عليها" : صافي ماعليش تهدن..يلاه نمشيو تا تهدن...
بشار"نطق بواحد صوت تا قفزهم ولات حبيبة ترعد" : رااااايحيييي عليا لارض تم...كاترهطي عليا !!...
سعيدة"كاتغمز فيه جيهة حبيبة يتهدن حيث خافت منو"
بشار"دار صباعو فنواضرو كيمسد فيهم تا بدا يتمتم بينو وبين نفسو كون سمعوه كون فرتحو حفيانين" : ينعل بو حياة مكم يا تريكة الحبس..تريكة ديال الملاوي الي يشعل فعدو ربهم العافية ومايحن...
سعيدة : دابا فهمتي علاش خافت...
بشار"هز عينيه مخنزر وخمريييين ولات حبيبة كتكحاز ومزيرة على ايد سعيدة" : خافت على والو...على والو على واااااااالو...
ماحسو بيه تاض على وقفتو تا رجعات حبيبة بلور وهو يدوز من حداها وخرج مشا قبل مايمشي لبيتو ضار عندهم وهز صبعو"
بشار : ماتمشيوش هاني جاي...
سعيدة : واخا ولدي غير سير...
مشا سد عليه البيت اما سعيدة جلسات حدا حبيبة الي ولات كترعد باغيا تهرب ندمات لاش جات وعاودات ليه...
حبيبة. : بغيييت نمشي اهى عافاك خلينا نمشيو..ندمت الي عاودت ليه ندمت..نتي الي گلتي ليا بايعاونك نتييييي اهى..ثقت فيك وجيت نعاود ليه...حرااام عليك حرااام عليييييك...
سعيدة : ماتندمي واااالو..راني باقي عند هضرتي غير سمعي مني وسميه صابر...
بقات كتحرك راسها بهيستيريا...وباغيا تهرب خافت خصوصا من شافت وجهو الي تبدل ولا فواحد الحالة لا تبشر بالخير...بقات هكاك شي ربع ساعة مشات جابت ليها الما تشربو باش تنفس حيث ولات كلها حالتها ..تا تحل الباب وهو يبان ليها خارج لابس حوايج الخروج ووجهو مكيبشرش بالخير....
دغيا لبس عليه تيشرت كحل وسروال ديال ميليتيغ كحل تاهو...جاي وكايقاد فتيشرت عليه..وكيقلب فجيوبتو واش فيهم كونطاكت ولا بزطامو وكيدور هنا وهنا...
"الرميلة"...
يلاه حطات صينية اتاي حتى تحل الباب وهو يبان ليها داخل وكايكحب تاني..جمعات حجبانها ب قلق..قربات ليه بان ليها داخل بكري على غير العادة...
ناديا : الحاج ياك لباس ؟!..
م.حفيظ : والو هي باتشدني الكحبة تاني وجيت بكري بدا يبرد الحال وانا ملابسش مزيان...حسيت براسي شوي عيان مابغيتش نكابر باش منمرضش كثر وجيت...
ناديا : كاتحس بشي حاجة خرى كاضرك ؟!..
م.حفيظ : لا لا هي كحبة وشوي راسي...عطيني هي شي ساشية تدوا وصافي بيفوتني الحال...
ناديا : واخا سير بدل عليك واجي گعد هنا تاكل نيت جيتي مع وقيتة الگوتي...
حرك راسو ومشا لبيت حاس بالبرد ضربو وعيا..بدل عليه ولبس حوايج دار سروال قندريسي وتيشرت بيض..وخرج لدوش غسل وجهو ومشى جلس فديك الجليسة الي فدخيلة فين لقاها حاطة كسكروط...
م.حفيظ : فين القشة !!؟
ناديا : مشات عند راجلها...
م.حفيظ : واهلييي ؟!..امتى ؟!
ناديا : هي فات العصر بشوي جات سعيدة مرات لوسها وداتها..مشات بتشوفو را كان عيان..ويلاه طلقاتو الوقت على ماگالت يلاه جا من سفر تاني...
م.حفيظ. : وراه قوا السفر هاد السيد...ماعلينا باتيج وبنسولها تعطيني نمرتو نهضر معاه نشوفوه كيف بقى من نهار گلتي ليا طاح هنا وهو فبالي...وهاد الغبرات الي كايغبر راه مداخلين ليا للبال وبنتك كاتبان ليا كاع مامدياها فراجلها...
ناديا"حطات دوا وقرعة وكاس الما تم وجلسات كتكب فاتاي" : بتجي وهضر معاها..والى هضرتي معاه نيت علمو يجي يتغدا معانا ولا يتعشى..وهضر معاه يلعن شيطان مع مو...
م.حفيظ : الله يهديهم. وكان...ولا جيتي تشوفي كون هي يدي خوه عندو ماديال تكرفيص تما خوه بايتهلى فيه..الى داه بايدي تا حبيبة تما وبتهلى فيه بنتي راها درويشة وعزيز عليها يوسف على ماعاودت ليا...
ناديا. : يهديك الله كاين شي حد يفرق ولادو...راه تا توريا مو وانا عارفة قلب الام اش كايسوى...نتا هي هضر معاه ونصحو بالتي هي احسن الله ينعل شيطان والله يهديهم..
م.حفيظ. : لا جا را بيت ندوي معاه وبيت نعرفو ونتعرف عليه..را مادرت فيها مايليق جوجت بنتي بلا منعرف نسيب مزيان..."تنهد بحزن..حيد طاقية حك راسو ورجعها وبقى ساكت شحااال وهو ينطق" راه بنبيع واحد الارض نيت فرحامنة...جابت ليا عشرة المليون...
ناديا : الي گلتي كاينة ف حد المحرة (بلاصة فرحامنة)..
م.حفيظ : ايييه..بفلوسها بنعطيهم الحاج رحماني ويعطيني شيك من شيكات الي عندو..
ناديا : مزياان مزياان فك عليك هادشي..انا راه سولت خالتي الي فكندا على حقي الي فارض كاينة ففاس بتباع وبتعطيني عاى ماعلمتني جاتني عشرين مليون...
م.حفيظ ؛ عشرين مليون بتشديها وبديريها تحتك..ماتگولي نعطيها ليك نعطيك لراس..."بغات تهضر" ا والله لا شديتها ولا تطيريش ليا النقشة...هي تجي القشة فكريني نشد من عندها نمرة بشار راجلها نهضر معاه...
ناديا : وعليه...
فهاد اللحظة لكن ماشي فمراكش انما فالرحامنة...يلاد الخير والخمير وناسها المجوادين...الا ان دنيا طوب وحجر كاين المزيانين وكاين الخايبين وكاين الي فحال سبيلهم ودنيا هاهي غاديا...تحل الباب ديال الفيرما وهو يتم داخل بسيارة ديال القيادة عليها ماتريكيل خاص...وقف سيارة وهو يدور عينيه فالارجاء بان ليه غير سيارة الي كايحتاجوها العيالات كيديهم شيفور فين بغاو..لكن سيارة الي كايسوقها حسام مكايناش...جبد تيليفونو وهو يجاوبو...
حسام : واش القايد...
هاشم : باقي فمراكش ؟!.
حسام : وااايه هاني تحت العمارة الي ساكن فيها بشار..كاينة الفوق الواليدة هي ومرتو...
هاشم. : يااك..واخا رد البال..
قطع معاه وهو يحط راسو عالفولون..كره راسو وكره النهااار الي سمح فيه لتوريا تعاونو فيوم كان غايمشي فيه كلشي خدمتو ويحط فيها الكسوة ويودع شي حاجة سميتها القيادة...الرتبة الي لحد ساعة باقي فيها وماترقاش من قايد ممتاز ل "باشا" علاش لحد ساعة باقي ماترقاش وماتزادش فالرتبة...اش وقع تا بقى فهاد الرتبة...ماينساش نهار الي كان الحاج عبد القادر سبابو رما عليه العار وسخط الى ماعاةنوش فواحد الارض...رجع بزمن الي ياما نسااه وحاول لكن ما باليد حيلة...
~~~هاشم : واا با را لارض ساوية كثر وكلشي عارف حيث جات شوكة والما فيها طالع...
ع.القادر : واش فايدة الولاد لما كانو يعاونو بوهم ؟!..دير نتا ساوية هاد الثمن فالوراق ونخلصوها وقضي معانا...
هاشم : راه مصيبة كحلة الى فات تا عرفو خربقت فالوراق وعطيتك رخصة را غاتخرج عليا...
ع.القادر : عليا بلمييييييين تاندي هاد لارض وعليك بالسخط وفات تا مشات مني وماعطيتيني رخصة البيار الي فيها هاد لارض مانتا ولدي مانا بوك...انا ولدتك باش توگف فوجه رزقي ؟!.."خبط عكازو بجهد وناض مخنزر فيه" وهانا هانتا ولا مديتهاش هانا هانتا..."خلاه وزاد"...~~~
حك شعرو وهو يخرج من السيارة وتم داخل تالداخل يلاه غايوصل لدروج تا سمع صوتها معيطة ليه..غمض عينيه بنفاذ صبر وهو يدور عندها...
توريا. : فكرتي فهضرتي ؟!...
هاشم : هضرت معاك..ياك طلبتيني !؛ وريحي هضرة وحدة گلتها...ونصيحتي ليك سيري هضري معاه هادشي الي بيناتكم ماهكاكش..غا مزايد ويكبر فالشوهة الي نتي خايفة منها راك كاتشوهي ونتي ماحاساش...سيري هضري مع ولدك وكوني حداه را تاكليه بحوايجو...سيري شوفيه وتقربي منو بلاصة مانتي شادة معاه ضد هو يحلف ونتي تحلفي..سيري را بشار ولدك وكان ولدك وغايبقى ولدك...را هو غاتلگاي فيه الخير على حبابك الي دايرة بحسابهم وناس الي خايفة تشوهي وسطهم..."بغات تهضر مخنزرة وهو يهز ايدو" سكتيني من الهضرة لاروب ديالك.."وطلع"...
"مراكش"...
كاتشوف فيه سعيدة واقف بعيييد فالكوزينة كايهضر بلغة هي مافهماتهاش كاتسمع فيه كايهضر شي ربع ساعة تا كمل وتم جاي عندهم كايشوف فالساعة...
بشار"جلس مقابل لحبيبة..بقى كيشووف فيها يشوووف واحد سهو سهى وهو كيفكر ويشوف...عاد فاق وهو ينطق" : نتي باغيا تشهدي معايا ؟!..
حبيبة"شافت فسعيدة الي حركات ليها راسها ورجعات حدرات راسها ونطقات بصوت عيان" : انا جيت عندك باش تفهم علاش تزوجت بيك اش الي وصلني لهاد الحالة وعلاش لحت راسي لهاديك زوبيا كيف گلتي...وعلااش مانقدرش نشهد معاك ..لى عاونتيييني غادي نعاونك..انا كون ماكانش هادشي كنت غانعاونك حيث بصح يوسف خاصو الي يتهلى فيه..يوسف عزيز عليا بزاااف وهو الحنين فيكم كاملين...انا نشهد بالحق كيما بغا يكون الحال هي ضروفي كانت صعيبة وباقيا صعيبة...
بشار : مزيان...باش نجيك من لاخر ماعندش جد مي الزيگزاك..تسمعي مني اش غانگوليك بالحرف...ماتفلتيش شي حاجة...
حبيبة"الصمت"..
بشار : هزي راسك وشوفي فيا.."هزاتو شوي" مزياان...الشيكات حالهم سااهل..الشهادة ديالك محتاجها ماعرفتش واش فهتد الجلسة ولا الي وراها...نتي من هنا لبعد غذا كوني على بال وماتعلمي حد بلي بغيتي تشهدي معايا..."شاف ف سعيدة"... سعيدة تعطيني نمرتك ولا تعطيك نمرتي مهم الليلة تكون عندي نمرتك...باش مكان نعلمك..حاااولي حاولي ياا حبيبة ماتعلمي حد بالشهادة ديالك سمعتيني ؟!..
حبيبة"حركات راسها" : و المشكيل ؟!..
بشار : المشكيل دابا رميه ليا..ولا مشكيل ديالي...الشيكات حسبيني انا مولاهم...
سعيدة. : كيفاش ؟!..
بشار : گلتي شيكات عند الرحماني براسو ؟!..
سعيدة : واه...
بشار : كلامك مأكدة منو ؟!..
سعيدة : اه متأكدة..حيث هو الي كان كايمشي عند باها يدي ليه العواد وفيتور ديال زيتون...
بشار : مزياان..."خشا ايدو فجيبو وجبد تيليفون كايشوف شيحاجة"...على الله ماتحتاجيش تشهدي هاد الجلسة سي نو من ورا الجلسة...ولابد نتحرك لبرلين..."شاف فيها" بقاي فداركم ماترجعيش لهيه...
حبيبة : غادي تجي خالتي توريا تبغي تديني...
بشار"خرج فيها عينيه تا كحازت" : شكون مزوج بيك ؟!..
سعيدة : واه سمعي منو...
حبيبة"الصمت"..
بشار"ناض وقف" : ديري اش گلت ليك ماتعكسيش مع عدو ربي النقشة ماعنديش ومامساليش لفشوش ديال الحبس..تنغمي هضرتي وتبعيها تربحي...نزلي سيري فحالك...
يلاه ناضت وحركات راسها وهي تم غاديا تا وصلات الباب وهي تفكر نسات صاكها وتمات راجعة تا سمعاتو كايقول ل سعيدة...
بشار : وصليها وسيري سبقيني ماتعلمي حد راك شفتيني..."يلاه تمات غاديا سعيدة وهو يوقفها" شكون كاين لهيه فالفيرما ؟؛
سعيدة : يادلي راه كلهم تم..
بشار : مزيااان داكشي الي بغيت..
سعيدة"خرجات عينيها" : اويلي علاش ناوي ؟ ياكما تحيح عليهم على قبل شيكات ؟!...
يلاه غايجاوبها تا ماحسو بيها امتى نقزات كاتغوت وعينيها خارجين...
حبيبة : لا لا لاااااااااااا ماتگوليهم والو عاااافاك اهى اهى عااااافاك ماتنوضش معاهم صدااااع عاااافاك الله يحفضك..حرااام عليك علااااش خليتيني تا گلت ليك كلشي وغاتمشي ليهم علااااش "عينيها خرجو" غادور فيا خالتي توريا غاتفقص تاني وتجي ليا تبرد فيا غدايدهااااااااا اهى اهى...عااافك لا لا...
سعيدة : الا يا بنتي تهدني مايديرهاش...بسم الله عليك...
بدات كاتغوت وتركل وتنقز تا مشات ليه كاااع ماحسات تا شداتو من دراعو وزيرااات عليه كاتطلب فيه وترجى فيه...ولا كايبان ليها تهديد توريا بين عينيها جاتها واحد الهيستيييريا صافي ولا كايبان ليها باها ساق الخبار وطاح وحالتو حالة...كاتغوت وتطلب فيه حيث عارفاه فاش كايجي كاينوض صداع نييييت اما لا ساقت توريا بالي قالت ليه عالشيكات وبالي غايمشي يحيح صااافي....
بشار كيشوف فيها مزيرة ليه على دراعو وتكبي عينيه هبطو لايديها الي شادين فيه وهي كاتبكي وتغوت...
حبيبة : عااافاك كدماتگول والو بابا غايمشي فيها عااافاك ابشار..."اول مرة تنطق سميتو" عااافاك عااافك اهى اهى حرااام عليك...
بشار : تهدني...
حبيبة : ولا لا لااااااااااا...غاتمشي تخاصم مع خالتي توريا تاني اهى اهى حرااام عليييييييييييك...واباااااااباااااا اهى اهى..
سعيدة ماعرفت باش تبلات تا شافتها بدات كاتنزل لارض كانت شادة فيه..تا هبط معاها من شافها غاتسطى شد ليها حناكها بايديه وزييير عليهم....وهو يخرج عينيه فيها وحط صبعو على فمو..
بشار : شششش...تهدني.."بدات كتسكت وتنخصص" مزياان...سمعييني مزياان....عاطيك ونعطيك كلمة وحدة يا حَبيبة نعاونك وخا ماتشهديش معايا....
عرف الخبث الي واصلين ليه دارهم..وشاف مدى خوفها الشديييد من انه يحبسو ليها..خصوصا الطريقة كيفاش كانت كتهضر على باها بواحد الحرقة وواحد الخوف ورعب من توريا ك شخص...عارف مو خايبة وطبعها قاصح بزاف وديك.تاتوري...لكن ماضنش انها توصل بيها لهاد درجة من الخبث...يمكن بدا يكتاشف ان مو خايبة مع كلشي ماشي غير معاه ؟!..ولا بسبابو كاتخياب مع كلشي ولا هي طبعها قاصح بزاف...
بدات كاتحرك فراسها وكاتهدن حتى نزلات سعيدة لمستواها...
سعيدة : نوضي بنتي جلسي وتنفسي..مايكون غير الخير ماعندك مناش تخافي...
بشار"نوضها تا وقفات وباقيا كاتنخصص..شاف فسعيدة وحرك ليها راسو بمعنى شديها...غير شداتها مشا هو الكوزينة اما سعيدة جلساتها فوق سداري كاطبطب عليها وتهدن فيها...
سعيدة : ياك گلت ليك ماتخافيش هو غايعاونك...
حبيبة"شافت فيها" : غايمشي ينوض صداع مع مو..ماتخليييهش عافاك..
سعيدة : ماعندك مناش تخافي خليه يدير خدمتو هو عارف اش غايدير..راه عطاك الكلمة..ديري اش گاليك وسمعي منو وكلشي غايكون هو هذاك..انا كون ماعارفاهش مزيان مغانخليكش تجي عندو وتعاودي ليه هادشي...ومابغيتش نگوليه انا خليتك تعاودي نتي راسك..سمعي مني وسمعي منو الله يرضي عليك...
مزال كاتهضر معاها حتى بان ليهم جاي ووقف هاز فايدو كاس ديال الما وكايرش بايدو لاخرى الما منها مدو ليها...
سعيدة : شدي بنتي الما...
حبيبة"هزات عينيها فالكاس وشداتو منو شاداه بايدها كاترعد حتى تخوا منو شوية الما وزيرات عالكاس بايدها ثانية تا شرباتو"...
بشار"جبد تيليفونو" : نمرة تيليفونك ؟...
حبيبة"كاتهضر وتمسح دموعها وبدات تفتيها عليه..قيدها عندو وهو يصوني ليها طلعات ليها نمرتو ديال المغرب...حركات راسها كي سمعات تيليفونها صونا فالصاك...بقات شوي تا تنفسات وهي تنوض شادة ف سعيدة خرجو من دار قدام عينيه وتاهو تبعهم نزلو كاملين لتحت لقى حسام واقف حدا طوموبيل غير شافو وهو يقرب لعندو من بعد ما ركبات حبيبة وسعيدة...
حسام"سلم عليه" : خوويا لباس...
بشار"كانت الشمس باقي ماغربات..دار نضاضر شمس..كايجبد فالباكية ديال الكارو من جيبو" : هانية الدعوة ؟!..
حسام : والله الى بيخير يحفظك..
بشار : ماتعلم حد بلي جبتيهم عندي...باك لاخر ماتعلموش.."حرك ليه راسو" سمعتيني ؟!..
حسام"رمش عينيه" : ولكن را هضر معايا وگلت ليه انا عند بشار تحت العمارة...
بشار"بقى كيشوف فيه وهو يدور لهيه وزفر" : ماتعلم حد سولك باك جبتيهم تفاهم معايا على الطلاق شي عجب فحال هادشي..نتا دابا ماعارف والو..خليك معارفش عرف اش گلت ليك وصافي...
حرك ليه راسو وضار بشار شاف جيهة سعيدة وحبيبة بانت ليه حادرة راسها وكاتمسح منخرها بكلينيكس...ضار لهيه كيشوف والكارو ففمو..دار ايديه على نصو واخذ وقت للتفكير...حتر ضار وربت على كتب حسام ومشا ركب فسيارتو تما...تسنى حسام تا ديمارا وزاد وتبعو خرجو من المنطقة عاد كل واحد شد طريقو...حسام شد طريق المدينة القديمة بالضبط رميلة وهو خذا طريق تما قريب بالصبط لمصحة الاطلس...قبل مايوصل ليها توجه لواحد المحل خاص بشوكولا خذا ليه شوية حيث عارفو عزيز عليه بزاف...صايبو ليه داكشي فساشية وباكاجين كان راقي...عاد توجه للمصحة...
ملي هضر معاه طبيب خبرو بالي يوسف حاليا غايكون وحدو كانت الوجهة ديالو هي عندو...وقف سيارة فالباركينغ..وقصد الغرفة ديال يوسف حل عليه الباب لقاه حال عينيه وكيتفرج فالبلازما مقابلة ليه..غير شافو وهو يوسع يوسف ضحكتو تا بانو ضروصو وعينيه تسدو بغى ينقز لعندو وهو يسرح ايديه...بشار تاهو غير شاف ضحكة خوه وهو يبتاسم ليه بفرحة مشا لعندو بزربة غا هو قرب ليه وهو يعنقو يوسف بجهد وخشا راسو فصدر بشار الي بدورو حاوطو بايديه كايبوس ليه فراسو ويعاود....
بشار : لباس عليك "شد ليه راسو كايشوف فيه"..
يوسف"حرك راسو" : باس بااااس...وحشتك انا خويا...
بشار"غمزو" : بزااف ولا شوية ؟!...
يوسف : بزااااااف بزاااااف ههههه...
بشار"باس ليه راسو" : كثر منك كثر منك...
يوسف"جمع غوباشتو وبان الحزن فعينيه" : مي مي بغاتنيش شوفك..كانگوليها بغيت نهضر معاه هي بغاتش..ماكتحملنيش كتحملكش...
بشار"جمع حجبانو" : ماعليش..غير مقلقة مني حيث مكنجيش نشوفك بزاف.."طبطب ليه على حناكو" ماتقلقش منها راك عزيز عليها ماكاينش شي ام مكتحملش ولادها با يوسف "حط جبهتو على جبهة خوه" سمعتيني...
يوسف"حرك راسو"
بشار : كيف بقيتي شوية !؟...باقي راسك مبرزطك بصداع ؟!
يوسف"حرك راسو. بلا" : لا زوييين دابا زوييين...
بشار : گول شنو جبت ليك ؟!..
يوسف"تبسم مزيااان" : شكلاااط ههههه...
بشار : عندك ما عز منو !؟.."هز ساشية وحطها ليه" تنغم ليا مع راسك ابا يوسف...
يوسف"شد ساشية بالفرحات..عاونو فيها تا جبد منها حبة من شوكولا كانت معمرة بالكوك..كال منها وهو كيشوف فيه ويضحك..كايشوف بشار كايولي عندو العيد..كايحماق عليه وصايب معاه الخاااطر وراحة...بالفرحة عنقو من كرشو وحط عليها راسو" : شكرا...
بشار"دوز ليه على شعرو" : مرحباا...
جلس حداه كايهضر معاه ويسول فيه ويوسف كياكل فالشكلاط..حتى خذا من عنظو ساشية علمو بالي غايخليها لفرملية فينما يتشهاه تعطيه منو بلا علم توريا...كيضحك معاه..بشار غير دخل عند خوه حيد اي حاجة تبرزط ليه تفكيرو وعزل راسو غير مع عالم يوسف الي كلو صفحات بيضاء...حتى حس بيه عيا بغا ينعس قاد ليه المخدة على راسو وغطاه مزيان دخل ليه الغطا مع جنابو وطبطب عليه باس ليه راسو وخرج...
وصلات حبيبة لدارهم...
حبيبة"بانت ليها رقية خارجة من كوزينة هازة كاس فيه عصير نص حامضة مع سكينجبير معيلقة وعسل حر مخلطاهم مزيااان وغاديا بيهم" : لمن هذا. ادادا...
رقية : ل باباك ابنتي هي ضربو البرد...
حبيبة"وسعات عينيها" : كيفاش ؟!..
لاحت صاك فوق طابلة تم ومشات بزربة لبيت باها وامها دقات الباب تا سمعات صوت ناديا كيقول دخل وهي تحلو دخلات كتزرب لعند باها لقاتو جالس كيشوف فتيليفون ويكحب...
حبيبة : بابا !! ياكما عيان بزاف...
م.حفيظ : بييينموووت ابنتي..."شاف عينيها غرغرو" اديك القشة را هي البرد خسر معايا الهضرة ههههه...
ناديا : هههههه...
حبيبة"تبسمات فعز حزنها" : بابااااا هههه واش مابيتيش توب من هاد ضحك الحامض !!
م.حفيظ : ااه نتي الي حامضة يا المصيرة..."شد الكاس من عند رقية" اري داك الس.م القاتع اري لهنا...
ناديا : ايييه عطيه يتكوفر هنا...
م.حفيظ : الله يمسخك هههههه...
شرب من داك الكاس تا غمض عينيييه حس بيه حر.قوو بزاااف فصدرو وهذا دليل على انه تعرض لنزلة برد...عطاها الكاس دعات معاه بالشفاء...بقات حداه حبيبة تا جاو التوام جلسو حداه جمع معاهم...وهو يهز عينو فحبيبة...
م.حفيظ : اهاي كيبقى راجلك...
حبيبة"هزات عينيها بزربة فيه حتى توثرات مامولفاش كلمة راجلك" : هاا ؟ ..ل لباس عليه ش شوية..يلاه احم..جيت من عندو...
م.حفيظ : ومالك مابقيتي معاه خليتيه وجيتي...
حبيبة : هو الي گاليا سيري حيث بايشوف طبيب ديال يوسف شنو بايگوليه...راك عارف المشكيل الي بينو وبين خالتي توريا..
م.حفيظ"تنهد" : انا هادشي ماعاجبنيش ومابيتش ندخل بيناتهم وليني را هادشي مايبغيه ربي ولا عبدو...كيفاش هاد العلاقة الي خسرات بينو وبين مو تا وصلو بمحاكم !!..وهو را مافيها عيب يدي خوه يتهلى فيه وليني مايوصلوش لهاد الحالة..
حبيبة : ماعرفتش ابابا...
م.حفيظ : عطيني نمرتو ابنتي...
حبيبة"وسعات عينيها" : علاااش ؟!
م.حفيظ ؛ كيفاش علاش ؟ ماتعطينيش نمرة نسيبي مانهضرش معاه مانعرض عليه ؟ عاجبك هادشي هو غابر ديما مسافر وملي جا نتي هنا ؟ نگولو من كيكون لهيه را بتجي هنا ولا فدار ناسك وليني هو هنا هي فمراكش ونتي فداركم ؟!
حبيبة : راه حيث كيكون نهار كامل خارج مدهي مع المحامي وشي خدمة وكيجي معطل...
م.حفيظ : ايييه واخا يجي معطل بقاي معاه...كيبقى راجلك ابنتي..داركم هادي وانا مادا بيا تبقاي حدايا وليني را سنة الحياة هي هادي ووواجب عليك تبقاي حداه خصوصا مريض دابا وانا بنتي ماكنعيبش المرض المؤمن مبتلى...عطيني نمرتو نسول فيه راه عيب وبنهضر معاه يشوف شي وقيت يجي يتغذا ولا يتعشا معانا..."خنزر فيها"...
حبيبة"كاتحط فمواقف صعييييب تخرج منها راسها...جاب الله عطاها نمرتو ودابا..حتى انها ماسجلتهاش باقيا بالنمرة بدون اسم...جبدات تيليفونها وهي كاتصرط فالريق...مشات لاخر نمرة صونات ليها كانت ديالتو نيت...بدات كاتفتيها عليه حتى قيدها عندو"...
خرجات من بيت باها كتافها طايحين لدرجة ماشافتش ايوب فاش دخل ماخلا عايرها س.ب ليها طاسيلة ماداتهاش فيه وطلعات لبيتها لفوق..
ايوب : اييييوى لا بقيت عيطت ليك سميني ايوبة...
ميق فيها ومشا لكوزينة سول على ناديا قالت ليه راها مع الحاج فالبيت وهو داكشي الي بغى نيييت...كي علماتو را عيان مشا حتى هو دق فالباب تا سمع اذن الدخول لقاه جالس مع معتز ووردة فالارض كيوريوه فطابليط وكايضحك معاهم....
م.حفيظ"شاف فيه" : جدر جيتي...زيد دخل تانتا بتعطيني حقك.
ايوب"تحنى تا خبش ليه مولاي حفيظ فايدو" : واش تمااا..هانيا عمي بالشيفا...
م.حفيظ : امييين...هي شوية تالبرد...
ايوب : ضار فيك ولا خصر معاك الهضرة...
م.حفيظ : علمني نصليها معاك اولد الهم...
ايوب : هههههه باينة...مهم جيت بيت نهضر معاك...
م.حفيظ : يسمعنا خبار الخير من عند جدر الي بلاني بيه سيدي ربي...ارا ولدي زيد اش تم...جلس..
ايوب جلس فوق كرسي حداه فين جالس هو فالارض...جبد من شكارتو واحد الشيك فيه 100 الف درهم يعني عشرة المليون...ومدو ليه...
م.حفيظ"لقى شيك بسميتو هبط نضاضرو يتأكد وهز فيه عينيه" : لاش هذا ؟!
ايوب"حك ورا راسو" : هذا باش تفك بيه هي شوي من الكريدي الكبير ديال عمي عبد القادر...
م.حفيظ"جمع حجبانو وهو يمدو ليه" : شد شد ما خصنيش جمع فلوسك اجدر...
ايوب"شد شيك وحطو ليه فوسط ايديه وكمش عليها تا ضارت ناديا كتشوف فيه وتبسمات" : والله اعمي حتى تشدو...انا هادشي الي گديت نخرج من البنك كانجمع فيهم هادشي من عراسات صيف الي دازو عندي...را باقي عندي ماتخافش وليني هادشي را عتيتو ليك باش تعاون حيث المشكيل ديال حمام وانا راه من الورثة منخليش كلشي عليك..وعمتي لطيفة را باتجي تاهي هاد الايام باتعطيك شي حاجة عنداك تعلمها گلتها ليك را تبيتني فزنقة حدا الكتبية تاتمشي...
م.حفيظ"طرشو لحنكو بخفة" : امتى كبرتي اجدر امتى...
ايوب : هههههه نهار حصلتيني داخل من عرس مع خمسة صباح مرة وحدة...
م.حفيظ : راه مراات هما ماشي وحدة حساب ليك لوالديك ماشفتكش ملي تسنيتني ديك المرة تا خرجت لجامع ودخلتي ورايا..حساب ليك ماكنحسش بيك فاش كدخل ؟ را لواالديك تا كانسمعك دخلتي عاد نعس البالا...راك ولدي ماشي ولد خويا هي جمع عليا راسك...
ايوب"باس ليه راسو وايدو" : لهلا يخطيك غا ملي ما سلختينيش الخير والبركة صافي هاد المرة نولي ندخل مع ستة.."شافو هز حاجب" تمنية ؟!.."مجاوبوش" نوض نبدل ساعة باخرى...
م.حفيظ : شحاال من درجة عندنا
ايوب : سبعتاش ونص..نص ديال حبيبة...
م.حفيط : ايوى جري حسبهم..
الثامنة صباحا بمصحة الاطلس...حل الباب حرك ليه راسو وهو يبتاسم وشير ليه باش يدخل لعندو...
طبيب : تفضل...
بشار"جلس مقابل ليه" : فين وصلات حالة يوسف...
طبيب : حاليا راه غادي مزيان..تقريبا مابقاش بزاف سيمانة ويخرج لكن ضروري مايتبعو ليه تخيطمون الي غانعطيه طبق مزيان...يحاول يبعد على البلاصة سخونة يعوم فحمام سخون..
بشار"حرك راسو" : مزيان...
طبيب"كان تحت ايديه واحد ملف وواحد فاكتيغ..كحز ليه الملف هو لول" : هذا فيه تقارير وشواهد طبية الي طلبتي بحسب شنو شرحتي ليا هنا كاين شنو بغيتي..وبالنسبة لفاكسان الي ماخداش كاملين هنا كاين كلشي تحتاج...
بشار "حل الملف وقرا داكشي مزيان وفهم كلشي بديطاي" : يتوب عليك...
طبيب"كحز ليه فاكتيغ" : هادي فاكتيغ اللولة...ماعرفتش واش فخبارك حيث علمنا الام ديالك بيها وماعطاتناش شي تأكيد..الجد ديالو گالينا هي مكلفة بيه..."باحراج" ضروري خاص تخلصو الاسبوع الاول الي دوزو هنا وضروري خاص يتخلص espèce...حيث رسلنا les analyses ل فرنسا و ضروري كان خاص حتى يتحطو لفلوس على قبل دوا الي تعطاه فاللول ديال les trois antibiotiques مي حيث كانعرف السي هاشم خليتهم يديروه واخا ماشي ف قانون المصحة...
بشار"شاف الفاكتيغ لقى مبلغ ديال 40 الف درهم يعني ربعة المليون..جبد تيليفونو شاف فالحساب الي عندو ديال BMCI هنا فالمغرب" : پوسيبل صباح يكونو عندكم ؟!..مانصيبش نخرج شي حاجة دابا اليوم le dimanche..راك عارف ..
طبيب : سي سي ماكاين حد...خوذ راحتك هي باش نعلمك وصافي...
بشار : تدهيت بشلا تبرزيط..
طبيب : راه الدفعة لولة خلصتيها الوغ الحساب لول مقيد..هي هذا الي ضروري بيتخلص باش نكملو ليه فالعلاج...
بشار : نخلصو هو ونزيد نخلص الي بقى كامل غذا..."ناض وقف هاز الملف والفاكتيغ وسلم عليه" يتوب عليك..
طبيب : الله اودي...
بشار"غمزو بجنب حنكو" : تهلى بلا منوصي ؟!
طبيب : وايلي را خدمتنا هادي..كون هاني من جيهتو...
حرك ليه راسو وخرج نيشان فاتحاه المصعد مامشاش عند يوسف يمكن حساب ليه تكون توريا تما وهو مامساليش لصداع راس معاها وهضرتها الي كلها س.م وقطران...نزل نيشان لسيارة توجه لواحد ريسطو طلب ليه فطور ديالو وقهوة كحلة باش يحل بيها دماغو...فطر عاد جابو ليه قهوتو تنغم بيها مع سيجارة...وعقلو كلو تفكير فالي جاي..جبد تيليفونو من جيبو فور ما سمع صوت نوتيف وصول ايمايل من "هانزاده"...
هانزاده"بالالمانية" : اليوم مع الثانية زوالا كاين اجتماع عن بعد خاص بالشركة "اسم الشركة الي خدام معاها قانونيا"...
بقى كيشوف ويقرا فالميساج...ورجع دخل ل جيهة حسابو فالبنك تأكد من المبلغ الي عندو وشحال غايخرج غذا...يمكن هاد الخلاص الي غايخلص على خوه غايكون فالصالح ديالو فالقضية...وهادي خطوة مزيانة...بقى كيشرب فقهوتو ويكمي حتى داز ل كونطاكت مشى لاسم "حبيبة" هز عينيه فالساعة لقى الوقت باقي شوي بكري...داز لنمرة ختو "اشراق" الي شحال ماهضر معاها...صونا ليها فتيليفونها حيث رسليها واحد مع حسام جديد ماشي اخر مكاين كيف مولفة انما واحد سمارت لكن عادي.باش يقدر يتواصل معاها فيه...كايصوني ويقطع تما عرف انها بلوكاتو ومايجيهش غريب حيث عارف منين جا البلوكاج....
فهاد اللحظة الي كان هو كايتاصل بنمرتها هي كانت مستغلة غياب توريا ومستغلة انشغال الي لتحت وبداعي انها بغات تدخل تدوش هزات تيليفون الي جايب ليها "حميد" الشخص الي مستغلها فكاع الحالات...
اشراق : شوووف غير نسى هاد الايامات راه كاين خويا ونايض شي صداع فدار بينو وبين مي...
حميد : وتي شوري يا..واش بغينا فيهم خليك غير نتي معانا..مزيان الحبسة هادشي را تخدمي بخاطرك...
اشراق : مابقيتش غانقدر على هادشي...ندمت على النهار الي تبعتك وتبعت كذوبك حتى وصلتيني لهادشي..."بداو دموعها كايدوزو" انا الي ثقت فيك حساب ليا كاتبغيني حتى دخلتيني فهادشي علاش علاااش...
حميدة : انا ماتبعتكش نتي الي لصقتي فيا..شكون الي گال ل صفاء كايعجبني حميد ؟!..ياك نتي شديتي نمرة ورسلتي ليا فواتساب ؟ را كلشي عندي بالدليل..ودابا خدمي لا ندوفر مك فشي زوبيا مايجيب ليك حد الخبار...الفلوس جايا من وراك كي روز...طلقينا بشي فيديو نديبانيو بيه بينما رجعتي تاني...
اشراق : ماغاديش نقدر ندير من ورا هاد الفيديو..."سكتات كاتجمع الهضرة ونيت تلوحها ليه يمكن يحس بالغيرة"..ج جاو فيا الخطاب وغاتجوجني مي...
حميدة : هااااكاك..وامبروووك..ومن هنا لتم نشوفو اش نديرو..وديك ساعة كثري فيديوات نعدي بيهم بينما ضبرت فشي ساطة حسن فيها مواصفات ناضيين حسن منك وسيري تقااا.ودي عليا نتي وتريكتك...الليلة يكون عندي الفيديو باش نمونطيه وصباح لوحو...
غير قطع معاها وهي تغمض عينيها تا قطرو دموعها على خدها فررررر...دخلات لدوش لداخ ودارت سطل يعمر...حيدات حوايجها كاملين ومشات هزات سترينغ كحل وسوتيان مخبياه لبساتو..دارت التيليفون على وضع فيديو دارت ليه الكرونو...طلقاتو وبقات كاتكحاز تكحاز تا بان جسمها بدون راسها...وبدات كاتشطح باغراااء وكل مكتلوى كاتحيد حاجة حتى مابقات بوالو...وضارت ورات مؤخرتها كتلوز بيها حتى كملات وضارت رسلات ليه الفيديو ومسحاتو ومسحات كلشي..كاتمسح وتبكي ومشات كدوش وتغسل فراسها وتدوز بالشبكة ديال صابون تا كتبغي طير لحمها...
"لا ينفع الندم بعد فوات الاوان..."...
كمل فطورو ومشى حتى لدار دخل دوش مزيان حيث غير فاق غسل وجهو وسنانو ولبس عليه وخرج حيث كان داير معاه طبيب ديك الوقت ومافاقش قبل باش يدير دوش...خرج نشف حالتو ورش ديودرنت ولبس عليه حوايج جداد فضل يمشي غير بتيشرت بلومارين وسروال سورفيت الحال واخا بدا يبرد شوية كايجيه هو باقي سخون حيث ولف البرد ديال المانيا الي كاتكون فيها درجة الحرارة فالبرد تحت الصفر والثلج المغرب كايجيه دافي واخا يبرد الحال...مشط شعرو ورش بارفانو...مشى لكوافوز عقلو غااايب كايفكر اش يدير فالخطوة الي فراسو...هز ساعتو الجلدية دارها فالمعصم ديالو وعينيه كيشوفو لتحت حجبانو المورمين زادو تجمعو فاش غوبش وهو كيفكر وعينيه منيرين...اش فبالو اش باغي يدير ؟!..اش تحت راسو !!!...هز داك الملف دارو فالماريو وسد عليه...
خرج من البيت لبس سبرديلتو ومشا لتيليفونو حيدو من شارج دارو فجيبو هز كونطاكت..خرج من البارطما ونزل ديريكت لسيارة كيف دخل دار سانتيغ تا بدا يصوني ليه تيليفونو...شاف رقم ماعرفوش !!..هو ماشي من نوع الي مكايجاوبش على ارقام غير معروفة بحكم طبيعة خدمتو كايجاوب واخا كايتعطل باش كيرد على الاتصال...تا بغى يتقطع وهو يرد...تسناه تا نطق فور ماسمع صوت رجل ماعرفش شكون...
م.حفيظ : ولدي بشار هذا...
بشار"رد بصوته الخشين" : شكون معايا ؟!..
م.حفيظ : هههه الحاج حفيظ بابات حبيبة...
بشار"واحد لحظة تا بغى يقوليه شكون حبيبة هههه..غمض عينيه ومسدهم بصباعو الي متوسطاهم سيجاة عاد باغي يشعلها" : الحاج...
م.حفيظ : ياكما فيقتك ؟!
بشار"شاف فساعتو لقاها عشرة ونص صباح" : شكون مزال ناعس فهاد الوقت !!
م.حفيظ : القشة مرتك ههههه "بشار هز حاجبو..بحال الى كايهضر معاه باليابانية هههه"...يلاه شديت نمرتك البارح من عندها..بيت هي نسول فيك اولدي كيف بقيتي شوية...
بشار"حك لحيتو بصبعو..ماعرف اش يگول هادشي كايجيه فشييي شكل" : لباس الحاج لباس..شكرا...
م.حفيظ : عفوا هههه...اللهم لك الحمد...المهم اولدي الى عندك شي وقيت غذا بحول الله راك معروض عندنا العشاء ان شاء الله...ماتردهاش ولا بنتقلق منك...
بشار"هز ايدو وشير بمعنى كي ندير اسي ههه" : الحاج نتا مول الخير عفيني يتوب عليك مانصيبش عندي شي دعاوي مبرزط معاهم..عذرني...
م.حفيظ : اشمن دعاوي فالعشا..بتعشى وبتشرك معانا طعام وتيسر...ولدي بيتي تردها فجهي ؟! انتقلق منك...
بشار : لا لا...تت "ضار جيهة نافذة سيارة ماعرف اش يقول" مانصيبش غير عفيني...
م.حفيظ : اوالله اولدي تاتجي تعشى...هي جي ويكون خير...لا تهضر والو لا تهضرشااااي هاني جاوبتك برحمانية...مرحبا بيك راه دار مرتك وداركم هادي...
بشار"الصمت"...
م.حفيظ : سكوت علامة رضى هههه...يلاه ولدي فامان الله...
قطع معاه خلاه كايشوف...جاب الله ماضارش فيه ماقال شي حاجة فوجهو كيف دار تا سكت الله اعلم واخا را لداخل دالو شوية صاعر حيث غادي لواحد الوجهة فيها غا طلوع الخز وال.د.م...لاح تيليفونو بالنترة وديمارا السيارة فاتجاه الوجهة ديالو....
نزلات من دروج هازة فايدها صاكها ولاوية عليها شالها مع جلابة...تا هبطات لقات ربيعة كاتقاد فشي ميكات فيهم ماكلة ليوسف حيث غاتمشي معاها هي...شافت ف سيحمد الي تم داخل وكايفرنس غا شافها وزاد وسع ضحكتو...
توريا"شافت ف ربيعة" : هاني مشيت لطوموبيل تاتلحگي عليا..
ربيعة : واه صافي..
شافت ف سيحمد ومشات خرجات...بقى سيحمد تا هز دوك المياكي خلا ربيعة مشات تلبس عليها وخرج تاهو دارهم فالكوف وركب فطوموبيل كانت توريا راكبة لور حيث ربيعة غاتركب حدا راجلها...ضار عندها...
سيحمد : ختي توريا داكشي الي بغيتي حسبي تنين جاي يكون عندك...غذا الى ماطرا والي فالجلسة را تقضي بيه غراض فالثانية...
توريا"طبطبات ليه على كتفو" : نتا هو تربية ايدي الله يرضي عليك...مزيان وحلاوتك الي بغيتي...
سيحمد : نتي هضري ليا غا عما (مع) خوك يشوف لينا داك سيد فداكشي الي بغيت...
توريا : عبد الرحيم حسبو عليا غا كون هاني..
"هزات مناخرها بافتخار ونفخة وقادت شالها كاتشوف بشوفة تعالي...جات ربيعة ركبات حدا سيحمد وهو يزيد خرج من الفيرما فاتجاه مدينة مراكش...
كانت واقف سعيدة كاتهضر فالتيليفون مع حبيبة..بانت ليها الحسنية دخلات كاتجري شافت ف منار وريهان وهي توسع ضحكتها وتا سعيدة فرحات بالي الحسنية جات عندهم حساب ليها ولدها مابقاش غايخليها تدخل من اخر هضرة قال...طبطبات ليها على راسها وشافت فكريمة...
سعيدة : شوفي كريمة حطي ليهم من هربر (قمح مفرتت بالحليب)...
كريمة : واخا ختي سعيدة...
سعيدة : صافي بنتي..مزيان ودابا نشوف اش غايدير واش يجي انا نهضر معاه يمشي...
كريمة : حسنية سيري غسلي ايديك واجي...
حسنية : ابببب ابااا...
حركات راسها ومشات كاتجري لافابو الي جا عند الباب.....غسلات ومسحات ايديها بفوطة وهي تخرج مع خرجات تزدحت مع شي حد داخل تاهو عند الباب.. غا هي هزاااات عينيها ماتهزهم فعينيه نفس العينين الي شافت قبل ماتغيب نفس الشوفة الحاااادة..زاد بدلهم اللون الاحمر الي طغا عليهم...نفس الشخص "بشاااار"...عمرها تنسى الشخص الي اغت.اص*** وكرفصها حتى نتج على هادشي زوج وليدات بدون اب يعتارف بيهم...خرجات عينيها على جهد جهدهم تا شهقات وهي طلقها بواحد الغوتة تا كلشي خرج...والمواجهة ثانية من بعد اقل من 17 سنة...
يتبع..
التعليقات
لا توجد تعليقات بعد، كن أول من يعلق.