محتوى القصة
.بقا غادي شانق عليه ودافعو حتى زدحو مع واحد السارية تم حس بضلوعو تحلو ورجعو...
ع.القادر : يلاطيف يلاطييف...
مشا هاشم كايزرب بغا يفكو منو لكن بشار كان مزير عليه لاخور غا شاف بشار صغى عينيه حتى هو ورجع وسعهم على جهدهم...كايشوف فداك الولد الي رجعو بالذاكرة لسنوااااات ماااااضية....
"فلاشـباك"...
هز عينيه وهو يحول شوفة فيه عاد بان ليه مزياااان شكوون هو...من ديما كايغوت عليه ويخاااف منو فايام ماكان كايجي من الكوليج...
هو"ضحك بهيستييريا" : ههههههههههه ولد نورالدين اش كدير هنا ههههههههههههههه.....
ناض ليه وهو يشنق عليه وضربو براس تا طيحو بغا ينوض ضار بشار كايقلب على شي حاجة مابانت ليه غا حجرة نزل عليه بيها لراس ماتسوقش ليه واش يقت.لو ولا لا...كان اصلا صاعر غا كابتها جا هو فطريقو...مع غيب بقا يركل فيه برجليه تا خرج ليه د.م من نيفو وفمو...خلاه حتى يفيق راسو ويعلم بيه...تا سمع صوت شي واحد نطق وهو يدور...
هو : سير ابشار لحگها لدارهم انا نتوالا لهاد ولد لحرام...نديه لجدارمية يديرو معاه لازم...
حرك ليه راسو..تحنى هزها بين ايديه وزاد بيها...مابان ليه غا دارهم حطها ليهم عند الباب خلا كلشي كايشوف مافاهمين والو كايشوفو فيه كاينهج....~~~~
"عودة"...
مول الفعلة ابدا واش يتنسى عليه...هاشم كايحاول يهضر معاه يفكو منو...السيد اي البشير باقي لدابا مصدوم مافاهم والو كايشوف ف خالو شانق عليه بشار...حبيبة لصقات فسعيدة تاهي كاتشوف كاتسمع شنو كايقول لكن مافهماتش الهضرة...توريا بقاات كاتشوف من فوق مغوبشة كاتستفسر شكون هذا وعلاش شانق عليه بشار...خرج حسام ورضوان كايطلو حيث سمعو الغوات دياال هاشم وعبد القادر باغين يفكو هذاك من بشار...
بشار الي عقله غاااب لداك النهار الي شافو فيه...باقي حرقة هادوك دراري لدابا فيه من نهار عرف ان الحسنية ولدات توام نتيجة الاغت.صاب...ومن هذاك النهار مابقاش بان....
بشار"ضغط بدراع ايدو على قرجوطة هذاك...جناوح منخرو كايفرفرو" : كانسمع !!!...
البشير(كايسمع فهضرة بشار ويشوف ف خالو الي حادر راسو وعينيه فالارض...البلية ديال شراب الي فيه والزمان خلاو اللون فوجهو يولي سمر...حجبانو كحلييين وحرشين نفس الملامح الي ف التوأم ياسين واشرف فيه هو...)
البشير : خالي مجيد ؟!..اشمن دراري...
مجيد"جامع حجبانو ومنزل عينيه..قرجوطتو مضغوط عليها وماهضررررش..."..
سعيدة ضارت عند حبيبة لقات وجهها صفر شادة فيها وكاتشوف فبشار شانق على هذاك...زيرات عليها...
سعيدة : ماتخافيش ابنتي ماتخافيش...
حبيبة : شك شكون هذاك ؟...
سعيدة"ضارت كاتشوف فيهم بزوج..عارفة القصة ولكن ماكانوش عارفينو هو هذا...عارفين انه شخص سكايري وكايدور فالفيلاج ماكانوش كايعرفوه....و فالوجه كان متشرد فحالتو وموسخ..خلاصة القول ماكانوش منتابهين ليه واخا يتلاقاوه فالفيلاج...لكن بشار كان كايعرفو من ايام الاعدادي...كانو اغلب التلاميذ كايهربو منو فاش كايجي سكران ويخلعهم...كان بشار والبعض من الدراري مكيخافوش منو خصوصا بشار الي كان يا اما يدور معاه من الفلوس الي كايعيطه "نور الدين" ولا كايذوقو من الماكلة كايجيبها معاه ويعطيه منها...كان كايحساب ليه متشرد وماعندوش عائلة.. لكن هو كان مبلي وكايخرج لزناقي ولا الخلاوات يبات فيهم...."...
هاشم"حط ايدو على ايد بشار محاول يفكو منو" : بشااار..تهدن الله يحفظك..غا طلقو حنا نتفاهمو معاه...
بشار"كايغمز بعينو وعينيه ف مجيد" : نسمع كلامو..."ضغط عليه تا ولا يخرخر...والبشير تم غادي لعندهم"...كانسمع يا "عض لسانو حابس الهضرة الخسرة..وزاد ضغط عليه تا شدو هاشم. ومجيد عينيه خرجو".. ؟؟؟؟....
ع.القادر : وا غاطلگو يا بشار...دابا نتفاهمو عماه لا كان هو بو دراري...
بشار"ضار بالعرض البطيء ناحية جدو وعينيه حمريييين بشوفة حادة" : كاتمرگن عليا اعبد القادر ؟!...
ع.القادر : نهاك الله...
هاشم : ورا بغينا نتفاهمو عماه على دوك دراري وفعلتو ماشي كذبناك...وطلق را يوسف ومرتك تخلعو..."خرج تينيه بشويا باش يتبتو ويهدنو"...مرتك ابشار توگض اصحبي...
بشار"دور عينيه ناحية حبيبة بانت ليه مخشية فسعيدة وتقفقف...ويوسف تاهو...نسا مرتو ونسا انه غاتخلع من هادشي...ضار ناحية هذاك ودفعو بجهد ماجا فين يشدو هاشم تا طاح شاد قرجوطتو ويكحب...
البشير"وقف قدام بشار" : السيبة هنا ؟..شفت الحاج جينا ودينا العيب ؟!..
بشار"كان كيسوس فايديه وغادي لعند حبيبة ماداها فيه كاع اش كيقول...وقف عند يوسف الي لصق فيه وحبيبة جرها من دراعها لعندو..باس ليها راسها وعنقها بجنب " : ششش ماتخافيش...(ضار عند يوسف)..يوسف ؟!..
يوسف : خويا اباس اباس انا..حبيبة خلعات...
حبيبة : ش شكوون هذا ؟!..
بشار"الصمت"...
سعيدة : عقلتي عليه بعدا..."ضارت كاتشوف فيه محني عندو هاشم والبشير...وهو كايكحب وحادر راسو ورجعات شافت فبشار"...هذا را كايجي لالة !!..
بشار : كيفاش !؟..
سعيدة : البشير باه ولد عم لالة وهذاك الكيدار ياعوذ بالله را خالو حيث گال جاي هو وخالو...وگول ريحة شحمة فالشاقور...
بشار"معنق حبيبة جنبو وضار ناحيتهم مخنزززررررر."...
هاشم"شدو من الكول وحركو منو محني عليه من بعد ماجاب ليه حسام الما يشرب ويتنفس" : تشرب وتگلع گدامي تشوف دوك دراري...عينك دير ليهم وراقهم ؟!..(كايحرك فرايو بتأكيد مغمض عينيه)...وااااايه عينك عينك...
هزو من الكول مقربو ليه شوية...وخرج عينيه اكثر...
هاشم : يااا والرب المعبود يا تاتخرج منك 17 عام (وصلات سبعطاش على بداية القصة وداراري ولا فعمرهم سبعطاش دابا)..
البشير : كيفاش ولادو ؟!..
هاشم : ماعارفش كيفاش كايجيو دراري ؟!..
البشير : مافهمتش...
هاشم : كايجيو كي كايجيو دراري...ولكن خالك شرا لارض صغيرة وغرس فيها نباتات مضهصص...خالك اشريف را تعدى على بنت عدها 13 عام..وضربها لراسها تا تزيزنت (مابقاتش كاتهضر)..تلفو ليها الحروف وحبس عمرها ف 13 عام بالصدمة... وراه عندها جوج دراري تواااام ماعندهم لا وراق لا والي...ماقراو كي دراري ما كبرو كي دراري...جودوهم نفاوهم ونكروهم...عايشين بالرجلة ودراعهم...وبوهم قليل الرجلة هاهو جاي يدور ويسلم فسيادو...نزيدك ولا مزال ؟!...
البشير"شاف ف مجيد الي ماهضرررش لحد ساعة ساكت" : خالي ؟!..
ع.القادر : نوضو من تم بعدا نوضو...يلاه من هن ونهضرو ناس يشوفو...ياعوذ بالله...
رضوان : دخلو لصالون لداخل....
هاشم : لا...يمشي عند ولادو يشوفهم ويشوف حالتهم كي دايرة...بقات ف (شير ناحية طوموبيل فين جاو)...Audi..
ع.القادر"حط ايدو على كتاف البشير" : زيد دابا يعاود ليك كلشي اش كاين...ولا حسن يعاود ليك خالك نييييت...
هاشم : عاقل على راسك اش درتي ؟!..
مجيد"الصمت"...
كانت واقفة عيشة وربيعة وكريمة فالبيت كايطلو من شرجم...وزكية مكانش انتباهها لمجيد وولد ختو ولكن تركيزها كلو مشا مع بشار... كاتشوف فيه واقف معنق حبيبة ديك ساعات بجنب وكيبوس ليها فراسها...حطات ايدها على صدرها كاتحك فيه...تبرد العافية الي شعلات وهي كاتشوف وتخيل راسها بلاصة حبيبة حتى كاتفيق من الحلم وتلقى راسها فالبيت وحبيبة هي الي معنق بشار...ماتنكرش وماقدرتش تحبس الدموع يتشكلو فعينيها...غمضاتهم شحااااال حتى صرطت ريقها بالغصة وكتمات الحرقة والالم وحلتهم كاتشوف كيفها كيف الي كايتفرجو فاشنو واقع....
وعلى برا بعد بشار هو وحبيبة حتى لحدا طوموبيل...جات منار جايبة معاها قرعة الما وكاس عطاتهم لسعيدة كبات لحبيبة الما وعطاتها باش تشرب شدو من عندها بشار وشربها هو بايدو وعينيه على ملامحها كايتفحصوها...كايدوز بابهامو على حنكها حتى شربت وهزت ايدها...
حبيبة. : براكة...اه مابيا والو والله...
بشار"كايشوف فيها بشك"
حبيبة"شافتو شاك" : والله ابشار...هي تخلعت فاش مشيتي ليه وصافي...انا لباس دابا...هي بيت نعرف شكون هو ؟!..
سعيدة"تنهدت" : داكشي كثييير ابنتي...تعقلي على الحسنية ؟!..
حبيبة"حركت راسها" : اه...الي كاتجي تلعب مع منار وريهان وتاتگولي ليا را كبيرة وهي مامات هادوك التوام ؟؟..
سعيدة : واااه...وكنت عاودت ليك معدي عليها شي حد وهي صغيرة...عقلتي شحال بكيتي عليها...ورا هذاك الراجل حاشا واش يكون راجل هو الي تعدى عليها وهو بات دوك التوام...
حبيبة"وسعت عينيها" : ويلي...ولكن (شافت ف بشار)..باش عرفتيه نتا ؟!..
بشار"رجع غوبش وضار مخنزر ناحيتو لقاه غادي مع هاشم ولاخور ومعاه جدو ضارو الفيرما لور"...
سعيدة : بشار هو الي لگاها ولگاه كايتعدى عليها وفكها منو...
حبيبة"بصدمة" : كيفاش ؟؟؟؟ (ضارت عند بشار ورجعت شافت فيها ثاني).. فين لقاها ؟!..
سعيدة"هزات عينيها ف بشار ورجعت نزلتهم حيث تفكرت الايام الي عاشها من الي خرج من المصح...الايام الي كان كايبات فالخلا والغابة وحدو...رجعات للايام الكحلة الي دازت عليه...كان انسان عندو عائلة لكن بدونها...عندو مأوى عايش فالخلا الي لقا فيه راحتو مبعد من داك المكان الي من نهار الكحل الي وقعت فيه الواقعة مابقى رجع لدارهم...سكتت سعيدة ومابقات هضرت...وبشار عينيه فسعيدة ولكن عقلو مع دوك الايام...
بشار : يوسف..دخل مع سعيدة هاني جاي...
طلق من حبيبة ومشا لهيه كايجبد فالكارو باش يكميه مخلي حبيبة كاتشوف مافاهمة والو...رجعات شافت فسعيدة ورجعت ضارت عند بشار...
حبيبة : مالو ثاني ؟!...
سعيدة : تعصب ومشا يكمي...سيري حداه ابنتي...اجي يوسف ولدي معايا...
مشات حبيبة كاتزرب حتى لحقات عليه..حتى خشات ايدها فدراعو نزل راسو بانت ليه وضار ساط دخان ودور عليها ايدو محاوط كتافها معنقها عندو بدون اي كلمة منو...مشا بالها انه حيث حضر لواقعة الحسنية داكشي باش معصب واخا تصدمات...هزات فيه راسها..
حبيبة : ماديرش فبالك..دابا ياخذ الله حقهم منو...نتا درتي هي الي عليك...
بشار"نزل عينيه ليها كايسمع كلامها"..
حبيبة : عاودات ليا خالتو سعيدة ديك المرة فاش كنت هنا عليها...ولكن ماكنتش عارفة نتا الي لقيتيها...كانت تتگوليا اه تتخاف منك واخا ماعرفتش علاش...
بشار"نتر من الكارو بتفكيير ونطق عينيه فنقطة بعيدة لهيه" : دماغها مصور ليها انا...
حبيبة"وقفات" : كيفاش نتا...
بشار"عض على شفايفو من بعد نزل عينيه ليها وبدا يعاود ليها كيفاش لقاها...طبعا بدون ذكر القصة الكاملة علاش كان خارج فداك الخلا والخ"...
حبيبة"رجعات تاتفكر" : واحد المرة كانو ذكرو سميتك و "سكتت كتفكر تاني" كانت خالتي توريا الي ذكراتك وهي تبدا تغوت..اه انا شفتها تاتغوت ولكن حساب ليا هي تتخاف منك حيث تا انا كنت كانسمع سميتك وتانخاف..
بشار"جمع حجبانو فيها"...
حبيبة"نزلت عينيها كاتلولب فيهم" : واا دييييك الوقت هياتاا...
فهاد الاثناء..ورا الفيرما جالسين فواحد الطبلة فين كايجلسو الخدامة تما...البشسر كايشوف فخالو بشوفة ديال اشمئزاز من بعد ماعاود ليه...
البشير : ودابا نتا راجل نتا ؟!..17 عام يا صحبي وساكت..
مجيد"حادر راسو..كايمسح فحاجبو من د.م بكلينيكس " : البلية وعقايبها البشير...
رضوان : تا درتيها يزلگ فيها جمل..وتگول عقايب البلية..وتا را ظوزنا شلا وشلالي ومادرنا عيبك...تكرفصتي على درية وعرفتي كي تكرفصتي...
هاشم : عاقل اش درتي ياك ؟!..
مجيد : شي تشاش..
هاشم : شكون داك البوليس ؟!..(بغا يشوفو واش عاقل)..
مجيد : المعطي..المقدم ديال صربة الي كان كايخدم مع نورالدين خوك...
هاشم"تگعد مقرب ليه" : وفخبارك كون ما هو كون بشار الي دا التهمة ؟!..(مجيد رجع نزل عينيه)..
ع.القادر : وتا درتي لديك طفلة ديك الحالة !!..نفاوها دارهم وتنعتو ولادها بولاد لحرام...وخليتي دري على شوي تلبق ليه تهمة هكاك...ونتا دور وتسكر عاجبك راسك هكاك بديك الحالة يخ منك وياعوذ بالله منك...
مجيد : فين هي دروك...
هاشم : تعاود لييها باش تفهم ؟!..
ع.القادر : كون تحشم ينعلك تانت...
هاشم"حدر راسو وحسام كمش عينيه"...
ع.القادر : دويتي حسام عما ياسين ؟!..
حسام : كاينين ف مراكش مايجيو تال غذا...
هاشم : وكي نديرو دروك...
مجيد : صباح نجي...
هاشم : ماكاينش ثقة اولد عمي...
مجيد"هز فيه عينيه" : نجي ا هاشم...الزمان ه..لك ليا صحتي..الذنوب تقلو على رقبتي وذنب ديك الولية (ضرب قرفادتو بجهد" هنا محفور...
حسام : وعلاش ماقلبتيش عليها ؟!..
مجيد : دوزت خمس سنين وخرجت من الحبس...رجعت للبلية وضاربت مع واحد خونا ضربتو بموس ورجعت الحبس حكمو عليا ب عشر سنين...خرجت بالعفو الملكي حيث مريض...
هاشم : باش ؟!..
البشير"غا ساكت وكيسمع باقي مصدوم..عارف بلي كان فالحبس بسباب اغت.صاب بنت قاصر لكن مكانش عارف ان البنت كايعرفوها هاد ناس"...
مجيد : مريضة ليا الرية...
ع.القادر : لا حول ولا قوة إلا بالله...
هاشم : الله يشافي...واخا...عطيني لاكارط ديالك بعدا..
مجيد : لاش ؟!..
هاشم : عطيني اصحبي ماتخافشااي..عطيني بعدا...نوريك...لا تگابحش عما المخازنية ولا نحضرو قايد القياد..
حسام : نعماس...
جبد مجيد لاكارط ديالو كايشوف ف هاشم...حطها ليه شدها هاشم دارها فجيبو..
هاشم : سير تاتجي صباح نفكو هادشي وديها..."غمض عينيه كتيحرك فراسو" الله يشافي وكلنا ليها وانا لله وانا اليه راجعون وليني دوك دراري حقهم فعنقنا...حسام عاود عيط لياسين اكد عليه انا راضي عليك اولد هاشم...
صونا هاشم لبشار وعلمو بلي مشاو يهضرو مع البشير ومجيد ويتواصلو مع اشرف وياسين ولاد الحسنية باش يجيو يشوفوه...
بشار : هو ؟!!..
هاشم(واقف بعيد) : گاليك نشوفهم...ماكانش عارف واش ولدات منو...هاهو كايهضر ونعرفو اش وقع ليه من بعد...شتو تايبان ليا مدمر تاهو...على الله يترجل ويدير ليهم الوراق...
بشار : لا يديرهم "بتأكيد بنبرة صوت كاتخلع"..نخليوه يديرهم ابا هاشم ؟!..
هاشم : نكرطو شلاغم لما دارهم...
قطع معاه وهي تم جايا سعيدة حتى لعندهم معنقة ريهان بنتها...تبسمات ليهم وشافت ف بشار...
سعيدة : لالة تسول عليك اولدي...
بشار"حرك راسو وشاف فحبيبة" : اجي معايا نتي...
عنقها بجنب قدام العادي والبادي تما...رضوان مشا مع باه وهاشم وحسام ومجيد...دخلو ديريكت مامدينها فحد لداخل خصوصا بشار غادي مخنزر وعينيه فالارض داز ديريكت لبيت جداه والبرد ديالو وصل ريحتو لنيوف زكية الي غمضت عينيها من ديك الريحة الي خلات قلبها يضررررب...
عيدة : ياك لباس..اش هادشي سمعت ؟!..
بشار"جلس جنبها فالسرير مفرق رجليه بجلسة رجولية"..
عيدة : گول صدق هو مجيد خو فضة ام البشير ؟!..وداك الوقت كاع ما كان معروف...
سعيدة : وفضة را كانت تگول عندها خوها مبلي وليني ماكنا عارفين هو قليل الرجلة...
عيدة"تنهدات" : الله ياخذ فيه الحق...كرفص الام وولادها...ياعوذ بالله منو ياااعوذ بالله...
حبيبة"كاتسمع ليهم متأثرة"...
بشار"ضار عندها" : شوية دابا نتي ؟!..
عيدة"حركت راسها متنهدة" : شوية وليدي..
بشار"مد ايدو شدها من ايدها وزير عليها...هز فيها عينيه بشوفة خلاتها تحل فمها حيث بان ليها نور الدين بشوفاتو...خلا قلبها يتكمش عليها لهاد كمية الشبه لبيناتهم" : تحركي معايا...
عيدة"بنبرة حنينة" : وفيين...
بشار"سكت"...
حبيبة"طلات عليها حيث عارفة لانه بضار تشاور معاها" : معانا لدار..بقاي معانا شي يامات هي بدلي عليك الجو...
سعيدة"تبسمات" : هانتي ها بشار الي كان يجيك غا نهار فالعام هاهو باغي يديك عدو يامات كاع تاتشبعي منو...
عيدة"عينيها دمعو ليها ونطقات بصوت مذبذب" : عمري خليت مكاني ولا حطيت راسي من غير مخدتي..
بشار : بدلي المكان وديري بالوجه اعيدة...
عيدة : وبابت اش (وعلاش زعما)...
بشار : هازة هم ؟..
عيدة"حطات ايدها لاخرى فوق ايدو المزيرة على ايدها" : الهم الي كان عدي من جيهتك راني حيدتو(شافت فحبيبة) تهنيت عليك مع بنت الناس الي بغيت ليك...
بشار"هز حاجبو"...
سعيدة : وسيري عماه يا لالة بدلي الجو...سيريش واخا غا يومين...
بشار : ماكنتشاورش معاك عيدة...تحركي معايا...
عيدة"الصمت"..
حبيبة : وهي يلاه بايعجبك الحال..باتجي ماما باتجي اللهم تجي ونتي عندنا..نيت باش نشوفها بيك هههه حيث توحشتها شحال مامشيت عندها...
بشار"عقد حجبانو ودور عينيه لعند حبيبة"...
حبيبة"لولبت عينيها"...
سعيدة : ههههههه ماكتديش مرتك تشوف دارهم ؟!..ماشي حشومة عليك...
حبيبة"هزات ايديها كاتشير" : لا لا تانشوفهم تانشوفهم...هي تنضحك...خالتووو...
سعيدة : خفتي نشريها ليك ههههه...
بشار"طبطب على عيدة وناض"..
ضار ناحية حبيبة حرك ليها راسو وهي توقف...دار ايدو على كتافها وتمشاو قرب لعند سعيدة هضر معاها غا بالعينين وهي تحرك راسهم زعما فهمتك...خرج هو وحبيبة وخلاوها مع عيدة...فهاد الاثناء كانت مباركة جايا من الكوزينة وهي توقف وشافت عند حبيبة...
مباركة : حبيبة !!..
حبيبة"ضارت شافت فيها وشافت فبشار الي كان غادي بيها كاع ماشاف ناحية مباركة وهي توقفو" : بلاتي...(ضارت عند مباركة)..اه..نتي مرات عمي الحاج ؟!..
مباركة : ههه واه انا...
حبيبة : متشرفين اختي...سمحي ليا بايخص نمشي...مبروك عليك اختي وسمحي ليا ديك المرة ماباركتش ليك...كنت مزروبة..
مباركة : ماشي مشكيل اخويتي...
ضارت بزربة لحقات على بشار الي كان واقف تايتسنى فسها عند الباب...خشات ايدها فدراعو...وقفو عند السيارة...الطوموبيل بعيدة شوية على الدار...زكية مرة مرة كدور تشوف من الشرجم...دغيا وصلو ليهم را غير مشكيل مع شي واحد...صونا ليه التيليفون كان هاشم المتصل تاني...
هاشم : قضينا الغراض...لاكارط ديالو عندي... تكون معانا ؟!..
بشار : ولابد نكون تم...نطرق عليا مسمار دوك دراري...
هاشم : يتوب عليك.. صباح نتلاگاو..مشيتي نتا ؟!..
بشار"ضار ناحية باب دار" : شوي ونتحرك...
قطع معاه...خشا تيليفون فجيبو وشاف فحبيبة قاليها تدخل لسيارة بينما جات عيدة...ركبات بلاصتها وهو يصوني تيليفونها بان ليها اسم واحد البنت كاتقرا معاها...جاوبتها تعرف اشنو كاين حيث همة كروب...كان هو كايتسنى يكمل سيجارتو باش تجي عيدة ويدخل..حتى تمات جايا ولعندو قربات بابتسامة عريييضة زعما...
زكية : بشار لباس عليك ؟!..
حبيبة"كانت كاتهضر وهي تغوبش خلات البنت كاتهضر ليها فوذنيها نعل الي داها فيها"...
زكية : ماعقلتيش عليا...
بشار"ساط دخان وعينيه فالارض عاقد غوباشتو" : لا...
زكية"تنهدات" : ديك المرة ماسمعتينيش...اودييي غالمكاتيب وصافي... مبروك زواجك..."تبسمت منزلة عينيها" كا نعقل عليك ملي كنا صغار..كنا لعبو بجوج فااش كنت نجي عدكم وانا صغيرة...نتفرجو فالصربة هنا حداكم...گالت ليا مي كنتي ديتيني عماك لصربة ديال عمي نور الدين...(اييييييوى وذنين حبيبة مع خرجت جاو مع اخر جملة قالت)...
يلاه ضربها بتخنزيرة حتى لقى حبيبة وقفات حداه وتأبطات ليه دراعو...شافت ف بشار ورجعات شافت فزكية...كان باين على وجهها رد الفعل حيث ولات مزنگة دغيا...الشي الي خلا بشار صغر عينيه فيها...ونسا زكية وهضرتها...
حبيبة : زكية لباس عليك...
زكية"من لداخل كاتغلي..تبسمات ليها" : ختي حبيبة لباس عليك..علاش مادزتيش تسلمي علينا انا ومي كاع ما شفناك فاش دخلتي عند لالة مي عيدة...
حبيبة"بابتسامة" : ماشفتكمش...مزروبين جينا هي نشوفو مي عيدة...
زكية"هزات عينيها فبشار لقاتو كايشوف فحبيبة كاع مامسوق ليها" : يلاه لگيتيني گلت ل بشار...
بشار"هز حاجبو من ديك "بشار" حرفية بطريقة كأنه مدي وجايب معاها فالهضرة"..
حبيبة : اه سمعتك..گلتي كان تايديك معاه لصربة ؟! (زيرات على دراع بشار تا تغرسو ضفارها وهو ينزل عينيه لايدها)...
زكية : ههههه وااه وكنا صغاار كاع ما عقل عليا هههه..
حبيبة : هه بصاااح..ولكن هو كايعقل بزاف على شي واحد الى كان كيعرفو من صغر علاش ماعقلش عليك...
زكية : وكان باقي صغير ديك ساعة ههه..ولا ماگالش ليك...
حبيبة : نتي كبر منو ؟!..
زكية : لا..و..
لاح بشار الكارو حس بالفريع فراسو بهضرتهم خصوصا ديك زكية مابغاش يدير فيها راسو اصلا...ماعطاهاش حتى خو جوابها...شد حبيبة من ايدها ودورها...
بشار"شاف سعيدة جايا مع عيدة" : دخلي لطوموبيل حبيبة...
حبيبة : اابلاتي نتا...(كاتشد ليه فايدو وتشوف فزكية)..
بشار"غوبش فيها"...
حبيبة : ماشي مشكيل..اه ماعقلش عليك حيث بايكون دا بزاف تالبنات ودراري معاه لصربة فديك الوقت ماشي هي نتي..بتكوني مشيتي مع شي فوج ولا لصقتي فيهم (وركات على ديك لصقتي)...داكشي باش نساك...يلاه نخليك بسلامة سلمي على خالتي عيشة..ان شاء الله نشوفك مرة اخرى فشي فرح علاش مايكون ديالك...
طلقات من بشار وضارت لجيهة لاخرى...بقى حاضيها وعاقد غوباشتو تا بانت ليه ضارت لبيبان لور وهي تحلو بغات تركب لور...
زكية"تبسمات بغيض وفنفس الوقت حست براسها عصبتها خصوصا من شافتها بغات تركب لور ساعاك حبيبة ماخلاتهاش تفرح سكتات ليها القلب فالبلاصة بهضرتها دابا والي هي...
حبيبة : حشومة تركب مي عيدة لور...خليها تركب حداك...
عض على فمو بطريقة على شوي يطير شواربو وهو منير فيها الشوفة...حتى نطقات زكية...
زكية : غادية مي عيدة معاكم ؟...
لحظة الي نطقات دور عينيه نصف ظورة بتخنزيرة غا شافتها وهي ترجع خطوة لور... صهد ديال تخنزيرتو وصلها بلا مايهضر لان شوفاتو ولاو يخلعو...اصلا فاللول ماعطاهاش اهتما ولا وقت من غير فاش سولاتو جاوبها بكلمة مختاصرة كلشي وهي "لا"...من غير هادشي مازادش معاها ضربة بحال هضر معاه البرد...وصلات سعيدة الي كانت شادة فعيدة...شافت زكية..
سعيدة : زكية اش مخرجك..بغيتي شي حاجة ؟!..
زكية"نولت عينيها ماقدرتش تشوف فيه حيث خلعها" : ل لا (صرطت ريقها)...
مباركة"من عند الباب" : زكيااااااا واااا زكيااا...
زكية"ضارت عندها"...
مباركة"خرجت فيها عينيها" : زيدي لهن مي تاتنابي عليك (كاتعيط ليك)..
هزات عينيها بشوفة مخطوفة فحبيبة الي ركبات لور ومنزلة راسها شادة تيليفونها...وحولت شوفة لسعيدة الي حركت ليها راسها بمعنى سيري...نزلت راسها وضارت دورة ومشات...مخليا سعيدة متبعة ليها العين وضارت شافت فحبيبة الي بانت ليها جلسات لور وتنهدت عرفات غايتكون وقعات شي مشاحنة...شافت فبشار لقاتو ضارب واحد تخنزيرة وكيشوف فالارض فنقطة مبهمة...
عيدة : بركيني ابنيتي راني عيييت (جلسيني)...
سعيدة : بشار حل الباب اولدي...بشار وااا بشااار...
بشار"هز راسو وشاف فيها شحال وهو مخنزر حتى غمض عينيه ورجع لشوفتو العادية..قرب لعند عيدة وشدها معاها دورها حتى لبلاصة لقدامية ركبها وقادها فبلاصتها"...
سعيدة : كاين شي بلاصة ليا هههه...
بشار : تحركي معانا ؟!..
سعيدة : وااه مانصيبش نخليها وحدها حبيبة تبغي تمشي لقرايتها هي خاص الي يگابلها ويداوي رجلها والي يعطيها توضى وشلا..داكشي باش مابغاتش تمشي عماك فاللول وگالت ليك نبرك فخيمتي...
بشار"ماهضرش فقط قرب سعيدة ليه وباس ليها راسها وطبطب عليها...حرك ليها راسو بمعنى ركبي..ضارت وركبات لور حدا حبيبة...يلاه ساس ايدو بغا يركب حتى تم جاي عبد القادر ورضوان اما هاشم وحسام عرفهم فين مشاو داكشي باش ماجاوش...وقف خاشي ايديه فجيابو تا لحق لعندو...
ع.القادر : تا غادي ولا...
بشار"حرك راسو"...
رضوان"كمش عينيه" : هاديك مي عيدة ؟!..غاديا عماك ابشار ؟!..
بشار"اف فجدو مخلي ل رضوان vu" : تريح معايا شي يومين ونرجعها...
ع.القادر : وغا هوكاك..هادشي مافراسيشاي...
بشار : هاهي فراسك دابا نيت...
رضوان : وليني ناس الي جايين يسلمو فيها...
ع.القادر : ماكاين باس ماكاين باس كي هنا دار ولد ولدها...
سعيدة"طلات من الباب الي حلات" : هاني عماها ا سيدي..يومين ونرجعو لا تهز هم...
ع.القادر : يومين هاو رجعو را ناس يجيو يسولو عليها...
باس ليه بشار راسو وضار ركب بلاصتو...وعبد القادر ضار ناحية عيدة غير شافو بشار وهو يهبط عليها زاج باش يهضر معاها...
ع.القادر. : لا طوليشاي على خيمتك...
عيدة : ممم...
ع.القادر : واش خاطرك مريض...
عيدة : الساعة الله...
ع.القادر"شاف فحبيبة وسعيدة" : وردو ليها البال...
عيدة : يااا الحاج البال مردود بلا وصية ليهم...انا راضية عليهم..الخير الي لگيتو فالبراني لجم ليا فمي..."هزات ايدها وشيرات بحركة كاتقوليه سير"...لحگ عد مرتك ونسابك راهم وحدهم وجبهم (دير معاهم الواجب)...
فهاد اللحظة عبد القادر كايسمع لعيدة بشار عينيه فالمراية حاضي حبيبة الي منزلة عينيها لتيليفونها وعاقدة غوباشتها...هزات سعيدة عينيها فيه بغات تهضر معاه تسولو حتى بان ليها مفيكسي شوفة وعرفاتو فين كيشوف فحبيبة نيشان...عاقد واحد مولاتي الغوباشة..لدرجة ماداهاش فعبد القادر الي مشا...حتى نغزاتو سعيدة...
سعيدة : بشار يلاه اولدي..."شاف فيها وهي تخرج عينيها كاتأكد عليه"..يلاه اولدي...
رجع تاني شاف فحبيبة شحااال قبل مايكسيري ويقلب دورة خارج من الفيرما...اما هي وتقووول واش هزات فيه راسها ولا شافت فيه..شدو طريق نيشان لمراكش...
سعيدة"ضارت عندها بانت ليها مزيرة وعرفات وقع شي فلاش مع زكية تاني..حطات على ايدها قابطة فيها تا هزت عينيها وشافت فيها.وغمزتها بمعنى اش كاين"...
حبيبة"حركت راسها بلا وغمضت عينيها زعما ماديريش فبالك مابيا والو...وهادشي كامل داز تحت شوفات بشار الي ركزو اكثر على حبيبة...عرفها بلي تقلقت بزاااف من زكية...غيرتها قاصحة بزاف..عض على لسانو وزاد كسيرا..
دخلات زكية حتى بغات تدخل لصالون وهي تسمع عياط مباركة باسمها...ضارت لعندها شيرات ليها براسها تجي لعندها ومخنزرة فيها...تنهدات ومشات لعندها عارفاها غادي تعاتبها...حلات الباب حتى دخلات وتبعاتها وسدات الباب...
مباركة : واش تي مناوياش ديري عقلك ولا...
زكية : اش كاين امباركة ؟!..
مباركة : واش هبلتي ولا مالك غا علميني ؟!..اش خرجك لعدهم واش مهضرك عماه..واش هو تا عمامو ماشاف جيهتهم بقا عايشوف جيهتك ؟!..
زكية : عادي هضرت عماه وصافي ديت وجبت عماه فالهضرة اش فيها ؟!..
مباركة"تبسمت ليها بغيض" : ودا وجاب معاك فالهضرة ؟..اش صورتي يا بنت مي وبويا غا دل الي رضعتي مارضعو حد غيرك...
زكية"خرجت فيها عينيها" : مباااركاااا...
مباركة : زكياااااا...انا الي خاصني نغوت عليك ماشي نتي...وعلى رقبتي وماجمعتي راسك يا زكية تا تلحگ لبويا وخويا تهامي الى ما دارو معاك شرع ايديهم وحكامهم راني ماشي مباركة...زكية نساي عليك هذاك را مادياالك مايشوف فيك...
زكية"شافت فيها بعينين دغيا غرغرو بحرقة" : وعمري الي مشا بمسبتو...
مباركة : نتي الي حطيتي راسك فهادشي...عمرك ضاع بمسبتك نتي وبمسبة دماغك الناقص...عمرك ضاع حيث نتي الي بغيتي اما را علموووو فالعام لول مابقاشاي ونتي والو واش بغيتي تدخليها لراسك..."قربت ليها تال عند وجهها"...تعلمي من مباركة ختك ديري لعز لراسك وقيمة...
زكية : نتجوج بشارف !!؟..
مباركة : شارف ومول شي فرحامنة...عيدة غذا ولا بعدو تودع ونبقى انا...
زكية : باش تبقاي ونتي ماعندك تريكة...
مباركة"حست بقلبها تغرس فيه موس..واخا هكاك بقات محافظة على صلابة وجهها كانه ماقالت والو" : شلا ماندير باش يكون ليا العز...لا مادرت تريكة ندير تحتي ملك ولا جوج ولا نترهط ونخدم كيد العيالات وهاني من مالين الاملاكات...الاراضي تعديها عندهم ويعيا ليك الفم...البيار تروي قبايل...زيتون غا منشور...الفلاحة موجودة...المطاحن والمعصرات والگمح والشعير يخليني نشري عمارات نكريهن بديورهم...ماشي ديالي هادشي وليني نگد نكون مولاتو غا حيث مرت شارف الي ماعمرك ليك العين...تبعي ليا واحد هو ومو كي المش مع الفار وداعيها من لفوگ...تصبحو بالمسخوط وتبيتو بيها...
زكية : كاااع هادشي يا مباركة...
مباركة"ضربت ناضرها" : مخدمة عقلي الي يعيشني ماشي گلبي الي يقت.لني..."ضربتها حتى هي لناضرها"...خدمي هذا وحيدي عليك هذا را جايب ليك دل بلاصة العز...خرجي را مي تاتعيط...
صرطات ريقها وهي تخرج خلات مباركة كاتنفس باقي مانساتش الهضرة ديال "منين غاتجيبي تريكة"...يعني ماغاتولدش الي يورث عبد القادر ويبقى ليها العز حتى هي...تنهدات كاتمة الحرقة فقلبها وخرجات حتى هي لحقات على ختها...لقاو عيشة بغات تمشي هي وبناتها...
عيشة : مزيان الي مشات تبدل الجو شوية...
توريا"يلاه نزلت" : غا سمحي لينا وكان اعيشة راكي عارفاها مقلقة ماعرفناها مالها...
عيشة"تنهدات" : والحرگة صعيبة وهي مراة كبيرة ماعليش خليها..را طلبت منا سماحة...
خرجات عيشة وزكية وخواتاتها من بعد ما تسالمو معاهم ومشاو...تم داخل زكريا هاز شكارتو قال سلام وهو يتم غادي...حتى وقفاتو توريا...
توريا : فين اشراق...
زكريا : هاهي جايا ورايا يلاه حطها طرونسبور...
مسافة طريق حتى كانو داخلين لمراكش ووقف سيارة قدام العمارة...خرجات سعيدة وحبيبة وضار هو حل على عيدة وشدها من ايدها تا نزلات وسعيدة كاتعلي ليها فجلايل جلابة على الحرقة الي فرجلها...
سعيدة : نطلعو فسانسور ياك ؟!..
بشار : لحگي نتي مع حبيبة لفوگ...
سعيدة : ويلاه نطلعو كاملين عماكم...
بشار : لا ماتگدش طلع فيه حبيبة...
شد عيدة من ايدها ومشا بيها وتبعاتو سعيدة وحبيبة الي هزت فيه عينيها من هضرتو عليها حيث عارفها من اخر حادث ليها فسانسور وهو واخذ هادشي بعين الاعتبار...تفصيل ماكينساهش عليها كيف اي تفصيل كايخصها...رجعت نزلات عينيها وطلعات هي وسعيدة مع وصلو لقاوه كايحل فالباب قربت سعيدة شدات عيدة ودخلاتها تبعاتها حبيبة الي دازت من حداه وهو حااادر ليك عينيه فيها حتى مشات لصالون تابعة سعيدة وعيدة...سد الباب وحط الصاك فوق طابلة الي فيه حوايج عيدة ومشا ديريكت لبيت نعاس يكمي ولا يصدق مخلطها تما بلا موجب شرع...داكشي علاش ساكت ماهضرش معاها....
وقفات حبيبة عند باب الصالون حتى جلسات عيدة وهزات ليها سعيدة رجلها حطتها فوق سداري وعراتها باش ماتعگرهاش...عاونتها حتى حيدات جلابة وتقادت فبلاصتها...
حبيبة : هي شوية ونديك لبيت نعاس فين ترتاحي...
عيدة : خليني غا هنا بنيتي مانشد ليكم بيتكم نتي وراجلك...
حبيبة : لا لا كاين واحد اخور من غير بيتنا...
سعيدة"قربت لعندها وقبطتها من حناكها" : واهيا ربي وفين نحط هاد الزين هذا..واهيا ربي راه غا بشار الي مجوج الالة ههه..
عيدة : هههه اوكيه...
حبيبة"تبسمات فوجه سعيدة وحطت ايدها على ايد سعيدة"...
حبيبة : لهلا يخطيك اخالتي...احم..هاني مشيت نبدل حوايجي ونجي..
حركت راسها وخرجات من الصوالون..دخلات لبيت ووقفات حتى دورات راسها ناحية البالكون عارفاتو غايكون فيه...تنهدات وهي تمشي لماريو جبدات بيجامتها الي تلبس هزاتهم فايدها وخرجات مخلياه باقي واقف كايكمي...دخلات لدوش بدلات حوايجها وجددات الوضوء حيث دوا عليهم المغرب وهما فالطريق...غا خرجت من دوش وهو يبان ليها خارج وهاز فايدو كونطاكت...وقف وشاف فيها...
بشار : شنو خاص نجيبو معايا ؟!..
حبيبة"بلا ماتشوف فيه" : ماعرفتش...يمكن بايخص شي حاجة لگوتي هادي هي الوقيتة...خوذ هي اشنو تاتاخذ من مخبزة ودير بحساب المسوس حيث مي عيدة تتاكل مسوس بزاف بلا سكر..
حرك راسو وزاد خلاها واقفة كاترمش حساب ليها غادي يجي يحزرها ويقوليها مالك ساعاك خلا ليها مشي هههه...زفرت لا ساطت بعصبية وضربت رجلها مع الارض ومشات لصالون دايرة ايديها على عنقها تا قالت ليهم بلي غاتصلي وتجي...ناضت حتى سعيدة دات عيدة لدوش توضى اصلا عندهم دوش الما فيه سخون اوطوماتيك وتحكم بدرجات الحرارة ديال الما...دخلات حبيبة لبيت حتى صلات وناضت ديريكت دارت فونوتان باش غطات دوك ليطراس ديال عضاتو ومصانو فعنقها...جاب الله عندها ميكاب من ليمارك الغاليين الي كاتكوموندي حيث نصهم خلاتو فدارهم....مشات لكوزينة ردات القهوة طيب عارفة وبقات عاقلة بلي فالعروبية كايشربو قهوة ضروري فالگوتي...وردات اتاي حتى هو تا دخلات سعيدة كاتگفض...
سعيدة : اري نعاونك ابنتي...
حبيبة : هيي رتاحي يلاه جيتي ويلي...
سعيدة : وايلي تانتي حيدي حيدي...اش نديرو...
حبيبة : خرج يتقدا من المخبزة...
والو الي فيها ماهناها...عاونتها فتوجاد الگوتي...وجدو داكشي وهو يدخل حط ليهم ساشيات ديال المخبزة خلاهم ليهم ومشا وفايدو ساشية اخرى ديال صيدلية.... دريريكت لصالون لقى عيدة يلاه كملات صلاتها صلات جالسة وشادة تسبيح فايدها كاتسبح...ريح حداها وحط ديك ساشية...
بشار : شوية ؟!...
عيدة"حركت راسها مثقلة" : شوية شوية وكااان...
بشار"حرك راسو وهو يدور هز ديك ساشية جبد منها واحد بومادة ورشاشة....وجبد القطن شاف فيها...
بشار : لوحي ليا من صبرك !!...
عيدة : داويها ليا ؟!..
بشار"حرك راسو"...
عيدة : صابرة لما كثر نحير فجلفة طارت من جلدي (تحير فحرقة زعما)..الله يرضي عليك...
رش من ديك رشاشة ليها فالحرقة طالينها ليها بالبومادة...مشا هو الفرماسيان وعطاهم اسم الدواء الي مزياان بحكم خبرته فتركيبات الدواء...مسح ليها داك شي ونضفها ليها مزيان...وبدا يدير ليها فالبوماد...وهي تدخل حبيبة هازة صينية وشافتهم...مايخفاش عليها حنية بشار فهاد الامور...كاتشوف غير معاها هي وكيفاش كايفليها ولكن واخا هكاك باقي مقلقة حقاش الغيرة مزال لاعبة عندها...حطات صينية فوق طابلة وتبعاتها سعيدة هازة بلاطو تاهو...
سعيدة : جبتي ليها دوا خور ؟!..
بقا حتى كمل ليها ذهين وجمع داكشي وناض من حداها وخرج باش يغسل ايديه...خلاها كاتنهد وترضي عليه...ذهن ليها بواحد الخاطر ديال الخاطر من شخص ماعندوش الخاطر لكن المحنة الي فيه غرييبة...جلسات سعيدة كاتكب وحبيبة مشات لكوزينة تجيب ماتبقى من الاكل...حتى دخل عليها وهي دور بغات تمشي لقاتو واقف...
حبيبة"هزت فيه عينيها" : بيتي شي حاجة ؟!..
بشار"الصمت"..
حبيبة"نزلت عينيها وتمات غاديا حتى وقفها بصوته"...
بشار : مالك نتي ؟!..
حبيبة : م مالي ؟ مماليش...
بشار"وسع عينيه" : مامالكش ؟!..
حبيبة"بقات تاتشووووف فيه ورجعت نزلت عينيها"..
بشار"غوبش" : حطي داكشي تم وقربي عندي نشوف..
حبيبة"حطات طبسيل وقربات لعندو قلبها كايضرررب"
بشار : هزي عينيك نشوف...
حبيبة"عضات شفايفها وهزات عينيها ببطء"...
بشار : گولي نسمع اش كاين...
حبيبة"دخلاتو نيشان" : كنتي بصح تاتديها لصربة ؟!..
بشار : شكون ؟...
حبيبة : هاديك زكية...ففف...صافي صافي هي عصبتني...
حك لحيتو بشوياا....وقاليها قربي كثر...يلاه كي قربت حتى جبدها لعندو تالصقت معاه...هبط ايديه لجنابها كايطلعهم ويهبطهم قبل مايهزها منهم ماجات فين تغوت تلاح على فمها ببوسة عن.يفة تا رجع راسها لور خنق فيها النفس...دورها ولصقها مع الحايط وفمو على فمها ماتسوق لكااع هادوك الي كاينين تما..ماسالا حتى جر ليها جلدة ديال شفايفها بسنانو تا طوشات ليها بالد.م...غوتت ليه في فمو...حطها كاتنهج وتمسح في فمها...
بشار"خرج فيها عينيه وقرب تالصقت مع الحايط تاني كاتنهج" : گلت لعدو ربك ماتمشيش معايا تم ؟!..
حبيبة"تخلطت ليها البكية والعصبية خرجت فيه عينيها" : تمشي وحدك باش تشد معاها الجماعة ياااااك...(شافتو خنزر فيها بوااااحد مولاتي تخنزيرة بركت ليها الما فركابي وهي تغوت) خالتي سعيداااااااا اهئ اهئ....
هزات سعيدة راسها بمجرد ما سمعت حبيبة كاتعيط عليها بصوت مرتفع خلعتها وقالت "حبيبة مالك"...ماجاوبتهاش وهي تحط البريق وناضت...دخلات لكوزينة....
سعيدة : هاويلي مالكم ياك لباس...
حبيبة تحنات من تحت ايديه وتلاحت مخشية فيها ماعرفت سعيدة باش تبلات...
سعيدة : ياويلي مالك...
حبيبة تنخششات فيها ماهضرت ماتكلمت عارفة اش دايرة واش قالت وحتى أنها دخلت تا الفشوش عليه ساعاك الي خضر كايبان ليه الفشوش تاهو خضر هههه...بقا كايشوف فيها مخنزررر هز عينيه فسعيدة الي غمزاتو كاتقوليه غا خليها ماوقع باس واخا ماعرفت كاع اش واقع...قرب غا شوية وهي تقفز حساب ليها جاي ليها ساعاك خلاها هي وسعيدة وخرج من الكوزينة...
سعيدة : اش وقع بيناتكم مالكم ؟!..
حبيبة"شافت فيها يلاه بغات تعاود ليها وهي تقشع سعيدة جنب فمها"...
سعيدة : مال فمك..."حبيبة وسعت عينيها نسات العضة الي دار ليها وهي تحط ايدها تم..سعيدة فهمت دغيا جابت ليها الضحك" ههه ياعوذ بالله...اش طاري بعدا مالكم كنتو صحة سلام...
حبيبة ماشي من العاگزين بدات تعاود ليها واصلا سعيدة كانت حاسة من الي لقات زكية واقفة قبيلة وملي شافت حبيبة جلسات لور وماشي لخاطرها عرفات الامر داخلة فيه الغيرة والماضي...تنهدات سعيدة وهي تربت على كتف حبيبة...
سعيدة : هو تخافي على راجلك ماشي عيب وليني تاني يا حبيبة دويت عماك فهادشي وگلنا اش كاين...
حبيبة : عااارفة هضرنا ولكن اه عصبتني..ماصبرتش ليها ولهضرتها...واش هضرتها بصاااح ؟!..
سعيدة : لا ما بصح والي..هو فصغرو كان مديها عا فقرايتو و الصربة را فين وفين كان يمشي تا يشد العطلة...ماعمرو عرف صحاب من غيير صحاب بوه الله يرحمو والي قريب ليه بزاف كان هو هاشم عمو حيث قراب فالعمر...
حبيبة"كاتحك فجنب فمها بحرج" : هففف...
سعيدة : هههه هناري هنشرك...
حبيبة : صافي خالتي عافاك...اش ندير بتشوفني مي عيدة...
سعيدة : ماترد البال والي ومتقشعش شوفها على گد الحال... ونتي يا بنيتي خاصك ماتعطيهاش فرصة فين تدخل ليك را من هادي تدخل بيناتكم...ديك المرة گلت ليك حضري عقلك...كوني مراة وگادة لراااسك قبل كلشي...
حبيبة"تفكرات هضرة ماماها ديال عطي قيمة لراسك ماتخليش وحدة طيح منك كوني نتي فالمستوى الاعلى وهي لتحت..ماتنزليش لمستواها وتعطيها الجواب الي باغية باش تبيني ليها انهزامك امامها"...
سعيدة : زيدي يلاه نخرجو من هنا...
تا باات تمشي وهي ترجع هزات داكشي علاش جات...عطاتو لسعيدة ومشات لدوش بزربة غسلات جنب فمها الي ورمو ليها تاهو تنهدات على زواقات الي ولا مزوقها ومشوهها وهادشي ماكانت حاسبة ليه حساب ههه...نشفات وخرجات...دخلات عليهم لصالون لقاتو جالس مشتح شاد كاس القهوة كحلة فايدو وتيليفون فالايد لاخرى عاقد غوباشتو...
عيدة : ياك ماكاين باس ابنيتي...
سعيدة : والي باس الالة غا عيطت ليا سولت على شي حاجة فالكوزينة...
عيدة"طبطبت حداها" : بركي حدايا كبيدتي...
جاب الله هو لهيه الوسط جالس وهي جلسات حدا عيدة...كبات ليها سعيدة اتاي هزات كاسها وهي تحطو على فمها بغات تشرب حرقها فديك العضيضة الي فشفايفها...تألمت بتأوهات خفيفة خلاتو يهز عينيه فيها لقاها مكمشة عينيها وحاطة صبعها على جنب فمها...
سعيدة : جاك سخون ؟!..
حبيبة : ها..ل لا لا...
حنحنت ورجعات هزت الكاس كاتشرب بحذر...وهو عينيه عليها من الي هزهم فيها وهو حاضيها وهي ردات ليه البال وتوثرات اكثر حتى ولات تاتشرب وديك جغمة الي خايفاها تقيص الجرحة كاتمشي ليها نيشان وتكمش عينيها...حط الكاس وحط تيليفون ووقف كايقاد فتيشرت ديالو مع سروال...نطق بسميتها...
بشار : حبيبة...
حبيبة"هزات فيه راسها"...
بشار"تم غادي وقال" : تبعيني...
خلاها وخرج من صالون شافت ف سعيدة بخوف وهي طمنها بعينيها وضحكت من فوق زعما غا سيري...
سعيدة : هاني هنا تعييطة وحدة تلگايني عدك هههههه...
صرطات ريقها وساست ايديها وناضت...خرجات من صالون بان ليها واقف تسناها حتى جات وزاد قدامها حتى لدوش وهي توقف عند الباب...
حبيبة : ع علاش بيتيني...
بشار"ماجاوبهاش حل البلاكار ديال الاسعافات جبد منو لالكول وقطن سد الباب" : قربي هنا...
حبيبة : ها...علاش...صافي هي خليني اه حشومة يبقاو وحدهم فالصالون و...
بشار"هز عينيه وهو يجرها من ايدها لعندو تا نقزت شاهقة..لصقها معاه ودور ليها ايدها ورا ضهرو...شد داك القطن رش عليه لالكول وحطو على جنب شفايفها وبدا يمسح عليهم بشواااااااااايا بواحد الحنية حتى غمضت عينيها وبعدت حيث حرقها شوي"...
بشار : شششش...
حبيبة"بصوت منخفض بزاف" : حرقنييي...
رجع نزل الوتيرة ديال المسيح حتى نقى ليها تما وعقمو...ودار واحد قطيرة ديال بيطادين حطها على تما وبقا مورك وعينيه كايفحصو ملامح وجهها..كيفاش مكمشة عينيها..نزل عينيه لفمها ونزلو لعنقها ..
حبيبة : علاش درتيها ملي تاداويها ليا "بصوت مغنغن"...
بشار : درتي علاش...
حبيبة"وسعت عينيها" : ياااك...
بشار : دايرة راسك فالبشري الي فراسو البرد..دوينا فهاد الزعت ديك المرة ؟!..
حبيبة : عصباتنييي..(حيدات ليه ايدو)..صافي بايخص نمشيو حشومة نخليوهم وحدهم...وماتبقاش تعاود ليا هاكا حشومة عليك...
حيد القطن لاحو فالسلة وقبل مادور هزها تاني من جنابها لعندو تا ولاو رجليها يلعبو فالخوا..وسعت عينيها حساب ليها غايعاودها ساعاك قرب وباسها بشوييية في فمها ورجع شاف فيها وجهو فوجهها خلاها تنهج تاني...ونطق بكل برودة...
بشار : نعاودها...(حطها فالارض كاترمش)..
خرج هو وياها من دوش..دخلو لصالون وجلسو معاهم..حتى جبدات عيدة الموضوع ديال الحسنية...
عيدة : ودروك امتى يشوفهم...
بشار : غذا...
سعيدة : گال هاشم غايجيبو لعندهم لفيرما...عدنا...
حبيبة"هزات راسها بلاما تحس" : بترجع لفيرما عاوتاني ؟!..
بشار"حرك راسو"...
حبيبة : معاش فالصباح ؟!..
بشار"هز عينيه وهز حاجبو" : علاش ؟!..
حبيبة"لولبت عينيها" : هيي سولت...
بشار : نلحگك لقرايتك ونتيسر من تم...
حبيبة : بتمشي هي وحدااك ؟!..
بشار"حرك راسو"..
ميلت فمها لجنب ورجعات كتاكل وسعيدة حاضياها جابت ليها ضحك عارفاها مالقات جهد اما تمشي معاه...
عيدة : عماكم الحاج ؟!..
سعيدة : ضروري الالة...
عيدة : ياكما تكون هي ؟!..
بشار "كان كاينقر (كايضرب بصبعو) فوق طابلة وعينيه كيشوفو لهيه وايد كايحك بيها لحيتو" : لا...
"الفيرما"...
شادة توريا التيليفون فايدها دايرة اتصال فيديو مع مليكة الي عرفات ان عيدة مشات مع بشار وهي طلع ليها القردة...وعاتبتهم علاش خلاوها مشات...
مليكة : هاويلي تي كيفاش مشات عماه ؟ ولاش خليتوها تمشي تم...
توريا : گالت ليك بغات تبدل الجو...شلا فين بغات تبدلو ليا...
ربيعة : وتي را خلات الناس كايجيو يطلو عليها كي بقات ومشات...
مليكة : هاويلي وشكون بغا يگابلها وهي تبغي كلشي يكون فالوقت وتفيق مع الفجر...تي بغات تگابلها (تقابلها) مرت ولدك ؟!..
توريا : ماعندي ولد...
مليكة : ديك المبعككة گابلت تا راسها بقا عا مي...
ربيعة : وتي را مشات عماها سعيدة تقابلها راسها...يا دلي را عارفة اش كاين داكشي لاش مشات...
مليكة : يا مگابلة سعيدة يا بلاش...حايدي عليا طلعتو ليا الخز بهاد الخبار...ماشية ليا عد هبيل يگطعو عليا يخ...
ربيعة"غمزتها" : تي هني الوقت اطفلتي الوقت ماهانياش (زعما كاين الغاشي اي البراني الي هما حاسبين مباركة برانية على هاد الخبار)...
مليكة : فين هي...
توريا : فبيتها...
مليكة : اش دير فالبيت ؟..هذا وقت شي بيوت ؟!..ماعندها مايديار من شقا ...
كريمة : گالت ليا عيات بتصبان...وطويان الحوايج دخلات تنعس كي مشاو دارهم...
مليكة : وشكون وجد اتاي وضيافة؟..
كريمة : سعيدة...
مليكة : هااااكاوااا..ايوى وهي اش دير...محنية ولا..."خرجت عينيها" توريااااا...انهار لول يم.وت المش اخويتي...لا ضصروهاش وزيدوها دير نوبة عما العيالات حالها حالهم...جبناها تقابل با وتعاون ناجبناها تيتي تنيني لينا هنا...هاكيلي هاكاوا...گول مي داكشي لاش مدية فقصتها عماها...شافت الي ماشافتو شوافة...
ربيعة : والله يعلم لالة من ديك الوقت وهي مغيرة...
مليكة : گادو ليها الضلوع...ديك البسالة وداك الفشوش ودير لينا فيها مولات دار ماعندناشاي...مي هي مولات شي وتبقى واخا تم.وت الله يحفظها ليا ياربي...
كملو معاها ومن بعد قطعو..حطات توريا تيليفون فوق طابلة وهي تدخل مباركة كاتفوه...قالت سلام عليكم وهي تجلس...شافت فكريمة...
مباركة : ديك تليكومند عيشك ديري ليا واحد مسلسل تايبدا فدوزيم متبعاه...(عطاتها كريمة تيليكوموند شعلات تلفازة وهزت واحد رجل طواتها فوق سداري وتسندت عالمخدة عاطية انتباهها للمسلسل حتى نطقات توريا الي سمعات اذان المغرب قبيلة)...
توريا : خاصنا ردو العشا يلاه يوجد...
مباركة : وايه الحاج يبغي غا اللبن..تايجي ونعطيه ليه...ونتي ا كريمة نصبي الشعرية...
كريمة شافت ف ربيعة وربيعة شافت فتوريا حيث هي الكبيرة فالكنينات ديما هضرتها هي الي تكون من بعد عيدة...
توريا : دايرين نوبة ا مباركة...نوضي نصبيها نتي..ربيعة ماتصيبش كاتوحم..وكريمة من صبح ربي وهي فالشقا حكات دوك الماعن وخملات البيت الفوگ...
مباركة : ونصب وليني مانوض ليكم تانشوف هذا اش دار مع ديك الي كان عماها راهم بغاو يتفرقو...
توريا : الوقت غايتعطل امباركة وهنا كايتعشاو بكري ناس فايقة لشغلها على بونبر...
خلات ليهم مشي من بعد وخلاتهم شي كيشوف فشي...توريا تبدل اللون فوجهها حسات بحال الى كشمتها وهي الي قالتها ليهم يقولو عالاقل واخا ختي توريا نساليو هادي ولا واخا...ولا متبعين نوبة اصلا...زمات شفايفها بغيض وهي دور عند ربيعة وحركت راسها بشوايا وهي تهز تيليفونها وناضت خرجات من البيت غا هي خرجات وقفات عند الدروج وهي تعيط "اشراااااااااااق" بصوت مجهد تا خلاتهم يقفزو الا مباركة كاع ما داتها فيها عقلها مشا مع المسلسل....
اشراق كانت شادة تيليفونها تا تحل عليها الباب ديال البيت هي وبنات سعيدة طارو ونزلو ماعرفو باش تبلاو...مشات ليها ديريكت عينيها خارجين كاع سمها بغات تبردو ف اشراق دابا...
توريا"زيرت ليها على دراعها" : اش مجلسك هنا من الي جيتي طلعتي مانزلتي تا الماكلة ماكلتيها ؟!...
اشراق : مم ماففياش ماياكل امي...
توريا : ولهلا يدوگو ليك ويطيرك عليا...مافيك ماياكل فيك مايقضي شغال...عطيتي لخوك ياكل ؟!..
اشراق : ع عطاتو كريمة...
توريا"دفعتها فدراعها ضاغطة عليها تا تألمت" : ويگطعك ابنت لحرااام يگطعك ويعطيك مصيييبة طيرك عليا...واتريكة خارجة ليا عوجة من الكبير لصغير...وا تبرية تبريت ووالو واش ربي شوفني فيكم...
منار وريهان كايسمعو لدعاها ويشوفو فبعضياتهم...قتلاتهم بالخلعة تاهما واخا ماوصلاهمش...تا بانت ليهم دفعتها بجهد..
توريا : نوضي يا الخانزة نزلي لتحت وديري ليا طيسة وشان ونتي باركة ليا هنا تايخنز سليبك وينعتو عليا والدة دراع الحافي..نوضي براكة غا شوهتك مع الخطاب طلع فيا وتنزل مع عباد الله الله يتبعك البلا...اتفووو...
وفي الصباح يأتي يوم جديد...الصباح الباااكر والساعة كانت تشير الي السابعة ونصف...حلات عينيها لقات راسها موسدة مخدتو...يمكن فاش بغا يحيد ليها راسها من فوق صدرو حطو ليها فمخدتو وناض...كاتسمع تقرقيب خفييف حتى تحل الباب ودخل لعندها لابس حوايج ديال الخروج...شعرو ممشوط وباين باقي فازك بالدوش...تحنى لعندها باسها فعنقها بوسة تسمعات وخلاتها تبورش وتهر...
حبيبة : ممم ههه...
بشار : وجدي راسك...
حركات راسها وناضت من فراشها كاتفوه وتشبح... لبسات عليها بينوار وخرجات فطريقها لقات سعيدة فالكوزينة صبحات عليها ومشات لدوش دارت روتينها وخرجات موضية...دخلات تا صلات وناضت لبسات حوايج الخروج حتى هي...لبسات سالوبيط فالكحل ديال توب وتحت منو بودي بيض...والفوقي كاب مزركش توبه خفيف حيث الجو ربيعي...مشطات شعرها وجمعاتو كوب شوفال...ذهنات عاوتاني عنقها بالفوندايشن خبات البقايا ديال الاثار...رشات رشيشات خفاف من بارفان خفيف غير الي كاتستعمل كان جايبو ليها من لهيه نيت وعجبها وذهنات بيه حوايجها حطاتو فالكوافوز ودارت مرطب شفايف مطمطاتهم مزيان تا ولاو حمرين...هزات صاكها دارت فيه بوليكوب ديالها وادواتها وخرجات لابسة غير بانطوفة مشات لصالون سلمات على عيدة وصبحات عليها ودخلات لكوزينة لقات سعيدة حطات اخر ابريق وجدات...
حبيبة : فقتي بكري ودرتي هادشي..سمحي ليا بزاف...
سعيدة : عاوديها لراسك سيري سيري لا نتخاصم عماك سيري...
هزات معاها حبيبة ونقلو الفطور لصالون...شوية حتى خرج بشار من البالكون ريحتو تعطعط بالكارو...داز تا رش تاهو بارفانو وخرج لعندهم...سماو الله وبداو يفطرو...
سعيدة : معاش تخرجي...
حبيبة : الوحدة...
بشار"عينيه فالتيليفون كايدوز رقم هاشم" : تلگاي باك تم...خرجتي بكري علميه...
حبيبة : بابا !!...صافي احسن هههه (هز فيها حاجبو خلا الخط دايز وشاف فيها)...ههه اهب توحشتو ماتنويهاش خايباا ههه..
سعيدة : قفرتيها هههه...
سمع صوت هاشم هضر معاه ودار معاه امتى يجي...كملو فطورهم وناض هو وحبيبة من بعد ما تأكد انه ماخاصهم حتى حاجة وقبل مايخرجو من دار ضار عند سعيدة...
بشار : ديرو بحساب العشا برا...
سعيدة : مزية تفوج شوية نيت تشوف دنيا...
حرك راسو عنق حبيبة وخرجو...مسافة طريق حتى كان قدام لافاك تسناها حتى دخلات وكسيرا مباشرة حتى لسيدي بوعثمان وصل لقيادة عند هاشم ركبو معاه وشدوها نيشان لفيرما...
هاشم"طل من شرجم وشير لعساس" : وبا عروب وتا حل الباب يا...
عروب"سمع العياط وناض يجري حل الباب" : وتا راني كنت نفطر...
هاشم : تا يلاه لحگو ليك الفطور ولا...تا نوض من القوالب شاد فيديو شيخة سارة طيارة تاني...
عروب : ههههه باغي تشريها ليا عما خديجة (مرتو هي الي كاطيب لفلاحة الي فالارض تما والخماسة ورباعة)...
دخل بشار بطوموبيل حتى لداخل...لقاو عبد القادر و ورضوان واقفين ومعاه جوج دراري الي هما اشرف وياسين ولاد الحسنية...غا ضارو بانت ليهم طوموبيل بشار وهو يكمش اشرف عينيه حيث فايت ليه شافو ديك المرة قبل مايوقع ليه الحادث...نزل هاشم من طوموبيل وبشار بقى تما كايكمي فالكارو حدو شير ل جدو ورد ليه تحية...
هاشم"شد ياسين من كتافو" : افين ابا ياسين...شتكم طولتو فديك مراكش ولفتو شي...
ياسين : بقينا حتى كمل اشرف الكونطرول ودوا وشديتهم يبقاو عمايا مع القرايا يلاه ولفت...
هاشم : فين كريتو ؟!..
ياسين : واحد البيت ف ازلي فين كنقرا بزز باش خلاه ليا مولاه ب تمنلاف للشهر بزز....(كايشوف ف بشار من لهيه ويكمش فحجبانو)..
اشرف : شكون هذاك اهاشم ؟!..
هاشم"ضار ناحية بشار ورجع شاف فيهم" : هذاك هو بشار ولد خويا...الي تجوج العام الفايت فالصيف تعقل...
ياسين"غوبش فيه حيث كايشوف مو فينما تسمع سميتو تخاف منو..كايبغي يعرف علاش ومكيقولوش ليه..زاد خجوة لقدام وهو يشدو اشرف ضار لعندو شير ليه براسو بحركة هو فهمها ونزل عينيه ورجع وقف فبلاصتو...واخا توام ياسين كايحتارم اشرف بزاف...
ع.القادر : يلاه دخلو لداخل تايجيو ناس...
هاشم : يلاه ياسين..."ضار عند بشار هز ليه ايدو وشير ليه" نزل...
نزل بشار من سيارة رما الكارو وعسف عليه...قاد تيشرت الي لابس وسمطة ديال سروال الميليتيغ...نفس ستيل ديال ديما والبروتكان...دخل ياسين واشرف ورضوان والحاج وتبعو هاشم الي تسنى بشار حتى لصالون الي عند الباب ديال دار طوييل والكبير...ريحو تما...
شوية تمات داخلة سيارة ديال حسام...ومعاه نفس الشخص واللور كاينة سيارة البشير ومو الي هي اخت مجيد...تا وقفو دخلهم حسام...بانو ليهم لاخرين جالسين و "ياسين واشرف" جالسين لهيه مافاهمين والو...
دخل مجيد هز عينيه وهما يبانو ليه هو وختو الي غا شافتهم شافت خوها مجيد فنسختو من غير اشرف الي شوية ماجي فالشبه للحسنية...شهقات ام البشير وحطات ايدها على صدرها تا غرغرو عينيها...قالو سلام..
ع.القادر : زيدو مرحبا بيكم جلسو...(دور راسو نصف دورة ناحية الباب وقال بصوت مرتفع اكثر)..العيالات شي حد فيكم يجيب صينية والضيافة...
مشات مباركة كاتزرب هزات الصينية الي اصلا وجدتها...وكريمة وراها هازة طبسيل الفاكية و ربيعة طبسيل ديال الحلوة...وصلو حدا الباب وعيطات ربيعة...
ربيعة : رضوان...
ناض رضوان هو وحسام خرجو عندهم وشدو داكشي دخلو وحطوه فوق طابلة وقابلة صينية مع عبد القادر...
اشرف : والحاج واتا علمنا اش كاين بعدا هههه...
هاشم : وسميه صابر شرب كويسك بعدا...
ياسين : يلاه غانشربوه عدكم...واكلين كعامكم من نهار حلينا عينينا ونتوما معيشينا فخيركم ههه...
مجيد"نزل عينيه اكثر"...
اختو"شافت فولدها ورجعت شافت فمجيد ونزلت عينيها ودموعها دارو فرررررر وجهها تزنگ"...
كب ليهم عبد القادر اتاي ناض رضوان فرق عليهم اتاي واحد واحد وصل عند بشار ماهزش فيه العين خلاه ماد الكاس وبلاكة من فوق...شدو من عندو هاشم ومدو ليه شدو من عندو بشار شرب منو جغمة وحطو فوق طابلة...سمع صوت ميساج فتيليفونو جبدو من جيب وشعلو بان ليه من حبيبة...
"حبيبة : اشنو درتو ؟!"..
شاف تا عيا وعارفها قارية دابا وغايبقى بالها رسل ليها فالبلاصة...
"مازال...ديها فقرايتك ".
خشا تيليفون فجيبو...وهز عينيه كايتسنى اش غايقولو...شربو شوية من اتاي وضيافة...وهي تنطق ام البشير المسماة "سميرة"..
سميرة"بصوت متأثر" : هادو هما دراري ؟!..
ياسين"شاف فخوه ورجع شاف فهاشم" : شكون نتوما...
مجيد"جاه شلل ففمو"...
البشير : اسميتك...
هاشم"شير لياسين" : هذا ياسين...و هذا اشرف...
اشرف : ههههه جاو فينا الخطاب ولا كفاش ههههه...
سميرة : 17 عام ياك...
ياسين : وااه...علاش هادشي...
ع.القادر"تنهد ونطق هو لول حيث هو الكبير" : سمعني ولدي...هادشي الي نگوليك هو الي كاين...المكتاب هاهو تصرف وكتاب هاد النهار تلاگاو..."شير لمجيد" شتي هاد سيد را يعرفكم...ووقع الي وقع وجابتو صدفة باش بلا منكذبو عليك را ماكانش عارف بيكم وكي عرف هاهو جا يشوفكم...
ياسين"هز حاجبو وشاف فمجيد الي حادر راسو" : شكون تكون نتا ؟!...
سميرة : عارفين قصة مكم ؟!..
ع.القادر"كمش عينيه" : لا تهزي هم وتعاودي..عارفين وكي كبرو عاودنا ليهم كلشي...
اشرف : نتا هو البو ؟!...
غاااا هو حرك راسو وهو يطيييييير ياسين على وقفتو تلاح عليه بشتقة تا غوتات سميرة والبشير تاهو ناض...هاشم ورضوان ناضو يجرو فيه واشرف جااالس مامحركش...مغوبش ف مجيد وكيشوف فيه شانق عليه ياسين...حسام يفك وهاشم يفك بززز باش تفك ليهم تا دفعو هاشم تلاح فسداري...طلقو كلو مجرتل وسميرة دايرة ايدها على حنكها وعينيها دايزين بالدموع...
ياسين : طلگني ندفن مو...تعدى على مي وخلا دارهم ينكروها...تكرفص عليها وخلاها مريضة لدروك...بغيتي نسمح فحق مي ؟!..لاش جاي جاي باش نقت.لااااااااك اقليل رجلة...
بغا يتلاح عليه تاني يعطيه العصا شدو هاشم وحسام جروه...كاينهج كاينقز تال سما يتلاح عليه وشدوه....داكشي الي بداه بشار باغي يكملو ياسين...
هاشم : تهدن اصاحبي...جا باش يدير عماكم لازم...
اشرف(بكل ثبات) : اشمن لازم ؟! ..
ع.القادر : يدير ليكم وراقكم...
ياسين"بغا يهضر ووقفو اشرف"..
اشرف : اشمن وراق ؟..زعما نكونو على سميتو ويولي عندنا بو تاحنا ؟؟..
هاشم : يحول وراقكم من سميتكم على مكم لسميتو هو...
ياسين"كاينهج كي ثور ويشوف ف باه باغي فين يتلاح عليه يقت.لو"...
اشرف : وليني اخويا هاشم سولتينا ؟!..
هاشم : مابغيتوش ؟!..
اشرف : الوراق داخلين بسمية الحسنية...ماكاين ماحسن من سمية الحسنية فوراقنا...وكنيتها..واخا نكبرو منبدلوهاش...الى هادشي علاش جا مسامحين ليه فالسمية والكنية ونسب كااع...
سميرة : والى كان شي ورث ؟!..را نتوما الي عندو...
اشرف : من نهار حلينا عينينا وحنا مامخصوصينش...من الزيادة وحنا لبسو المخير فالحوايج وديال برا...الشهرية تجينا من الليف للبا...الكتوبة جدااد يطردگو...الادوات الى ماجاو من برا يتشراو بالغالي من هنا...الماكلة الثلاجة عمىها خوات...يجيو الكوليات وكولية (صيكان ملككين) ولاد حسنية وحدها تاتوصلنا...درت كسيدة وكون عولت على خدمتي كانو يلوحوني بلا دوا بلا وااالي...لاصيرانص ماعندي ومول الفيرما باغي فين يزبگني (يرميني)..مول الشهرية هو نفسو صيفطني لكلينيك وخلص ليا العملية الي كون ماهو كون راني يا مي.ت... يا هاد ناس يتهلاو فيا تاهما يكثر خيرهم مانقصينا من والي...الخير الي شفناه فيهم ماديروش نتا الي واخا تعتارف بينا من نهار لول...(شاف فياسين) حساب ليك مي سعيدة الي كانت تعطينا..."دور ايديه ناحية بشار"...هاهو موول خلاص تكوين ديالك..وهاهو مول خلاص قرايتك وحوايجك...وهاهو مول الكوليات ديال برا الي فيهم الشكلاط الي كنتي تخاطف عليه نتا ومي...وهاهو الي صلح دار ديالنا هنا..."شاف فهاشم" حساب ليك ماعارفش واخا خبيتو تا عيييتو...
اشرف"وقف شاف ف بشار وضرب قرفادتو بايدو" : نهار تگاد ليا الوقت...خيرك مانساهش واخا نم.وت...ونهار طيح بيك الوقت تلگاني راجل معاك..."شاف ف مجيد" ونتا الله ياخذ فيك الحق...
يتبع....
التعليقات
لا توجد تعليقات بعد، كن أول من يعلق.