عروس الجحيم الجزء 63

ماعندوش تعقيدات فكلامو ماعندوش تمهيد ولا يرطب الهضرة..عاد يوصل لاشنو بغى...جاه من لاخر وبطلب مباشر بلا لف ولا دوران كيف كيقولو...جملة من زوج كلمات لكن كل كلمة فيها كاتعني بحر....كاتعني اشنو هي بالنسبة ليه....حبيبة الي حتى هو تقا.تل عليها...صعيب عليه بل شبه مستحيل انه يسمح فيها وهما كايطالبوه بيها بهاد البساطة ؟؟...

مولاي حفيظ بقى كايرمش وناديا بقات كاتشوف فيه...فبلاصة ما يرتاحو من هضرتو زاد خوفهم على بنتهم منو....كااااع ديك الحنية والانسانية الي كان كايشوف فعينيهم دابا مابقى كايشوف منها والو...كاع داكشي الي تعلم منهم ولا كايشوف عكسو ولا كايشوف منهم الخوف منو هو...كايشوف راسو انه بدا كايبان فعينيهم انسان منبود ملعون ومسخوووط بصح...هادشي كامل حاول يميك عليه وحط بين عينيه الانسانة الي واخا ماعارفاش كانت معاه فكاع المواقف فاش كتشوف مو كتسخط عليه كايلقى منها الطبطبة...الاهتمام الي عتابرو خاص ليه...شي حوايج كاديرهم معاه غير "حبيبة"...

م.حفيظ : علاش حنا اش بينا منك الى ماكانت هي...

بشار"غير كيشوف فيه وصافي"...

م.حفيظ : گلتي بيتي نهضرو...الي بيت انا هو الي سولتو ليك وعطيتيني جوابه...كيفاش بيتي نتهنى عليها وهي معاك...كيفاش بيتي نعس هاني ومرتاح وهي مع واحد حتى راسو ولحمو مارحمو بايرحم ليا بنتي ؟!..

بشار : نگد نضرب راسي فشرد مانضرهاش الحاج...

م.حفيظ : غييير هضرة غييير هضرة...

بشار : شلاغمي ماكبروش باطل...ضربت فحر دنيا تا گنفت (عمرت ولا تگهمت بحال هاكا)..ماكنعرفش نهضر كانعرف نطبق ونسطر تحت منو...

م.حفيظ : نتا لدابا باقي تتگول يلاه ضربتي راسك ونضرب راسي يعني راه معول باقي من هنا لقدام....منين بيتي نضمن منين...بلا هادشي خبيتي علينا...بلا هادشي الي بيت نعرفو را خذيت جوابه...مابيت والو اولدي ما بيت والو هي تكون بنتي حدايا...ومهني عليها...ومعاك اولدي صعييييب الحال وقاصح...هانتا هي خوك وجيتي على ودو دعيتي الواليدة ديالك فشرد مكتهلاش فيه...شوف فيا من هاد الناحية من جيهة حبيبة...شوف هي من هاد الناحية الواليدة ديالك وماعقلتي عليها غذا ولا بعدو يوقعو مشاكيل بينك وبين حبيبة...غذا ولا بعدو تعصب وتفوت فيها شي ضربة...."وسع فيه عينيه" قاصح حسن من كذاب اولدي وانا جيتك لصراحة ودويت معاك بالخاطر...

- ناديا"حدرت راسها كاتفرك فصباعها...كاتفكر فهضرة ربيعة وهضرة حبيبة وديك الكارثة الي وقعات فليلة الدخلة...وكيفاش كان زواج وتخطط ليه... بعض الحوايج الي حساسين والي الى عرفهم مولاي حفيظ هادي تالية ليه.."..

م.حفيظ"تنهد وبدا يحك فايدو من فوق بتفكير": بالنسبة ل فلوسك والحمام الي كتبتي فسميتها عطيني هي وقيييت ونعطيك فلوسك ونزيدك من الفوق...

بشار شاف حتى عيا وهو يضرب فوق رجليه وناض وقف...تحنى تا هز داك شارجور...هزو فيه عينيهم كايتسناو يعطيهم رد على ما قال مولاي حفيظ لكن سكت وماردش عليه...

بشار : فين حبيبة ؟!..

ناديا"هزات فبه حاجبها حيث خلاهم هضرو وهضرو فلاخر ماعطاهمش حتى رد " : فبيتها الفوق...

بشار : ديري ليا طريگ نشوفها...

ناديا : راه...(نغزها مولاي حفيظ)...

م.حفيظ : ديه لعندها...

تكلم بطريقة كاتعني سلكي معاه دابا...شافت فيه وغمزها بعينيه وهي تفهمو....تنهدات وهي توقف قادت شالها وسبقاتو وهو تبعها...طلعات الفوق دقات عليها وهي تحل الباب بانت ليها ماكايناش لكن سمعات صوت الما فدوش...ضارت عندو...

ناديا : راها فالدوش...

حرك راسو ودخل سد الباب موراه وهي نزلات لتحت ديريكت عند مولاي حفيظ لقاتو حادر راسو وعينيه فالارض...ماحسش بناديا ملي دخلات حتى جلسات حداه وحطات ايدها على كتفو عاد هز راسو وشاف فيها...

م.حفيظ : اش بان ليك فهادشي...

ناديا"حدرت عينيها"...

م.حفيظ : واش نتبع الهضرة وكبدتي مشوية عليها...النعاس اناديا مابقيت نشوفو...واش عرفتي اشنو هي تكون مدوز مدة فمصح عقلي...واش عرفتي اشنو هي مصح عقلي الحاجة راه الداخل ليه مفقود والي خرج منو مكفن...والي خرج را عطاو عليه فلوس كي دارو تريكتو...واش عرفتي اشنو هي تايضرب ايديه...التقرير الي قريت (هز ايدو كايوريها ) تايضرب ايدو بزيزوار الحاجة...شوفي ايديه كيدايرين...وتايشرب من فوق ماراحم راسو من حتى قنت...راسو اناديا راااسو ومارحمو بايرحم ليا بنتي...واخا عام واخا عامين اناديا مافيه ثيقة...واخا عام واخا عامييين...اليوم ضرب فلان غذا ضرب لاخور...

ناديا" كاتفكر حتى عمو الي عرفات ضرب...يعني كاع الحوايج الخايبة كايصبو ليه..."

م.حفيظ هز ايدو وخبطها فوق فخدو بخيبة وقهر...اه كان عزيز عليه ووقف معاه وهادشي مانساوهش لكن المرض ديال بشار مكيرحمش...راسو وذاتو مارحمهاش...العصبية الى تعصب ممكن يدير شي حوايج خايبة...هادشي ملي عرفوه وعرفو الحادثة...

م.حفيظ : علاش هادشي ما گالو نهار اللول...بالحق انا "كايضرب فصدرو بجهد تا شدات ليه ناديا ايدو زيرات عليه" انااا الي ما قلبتش ومسولتش عليه نهار لول...انا الي غالط انا...انا الي طمعت وعطيت بنتي "نزلو ليه دمعات بالخف مم القهر والحزن والخوف على بنتو"...

حلات حبيبة الباب ديال دوش كاتمسح وجهها ومرة مرة كاتكمش عينيها...حتى وقفات موسعة عينيها فيه...واقف داير ايد فجيبه وايد شاد بيها شارجور...

حبيبة : جيتيييي !!..

شاف فيها وكمش عينيه فوجهها...ماجا فين يهضر لاحت الفوطة وهي تمشي تجري لعندو لاح شارجور وتلقى ليها تا هزها دورات رجليها ورا ضهرو وتخشات فيه عنقاتو...

بقات معنقاه مخشية فيه...ومزيرة عليه مابغاتش طلق منو توحشاتو بزاااف غير من صباح لدابا حسات براسها كأنها ماشافتوش عام هذا...اما هو خلاها على راحتها مخشية فيه ...بدا كايدوز على ضهرها بحركات حنيييينة وثقييييلة...حتى خشا وجهو فعنقها وباسها فيه بوسة مطولة عاد حط راسو على راسها...

بشار : مالك...

حبيبة : واااالو...

بشار : حالتك ماعجباتنيش...(هز ليها راسها قابلو معاها..حط صبعو على حنكها كايقلب فيه وعينيه على وجهها...عينيها لون وجهها لفمها ورجع شاف فيها)...عيانة !!..

حبيبة : هيي شوية...

بشار : بكيتي ؟؟...

حبيبة : اا لا لا...

بشار : حبييييباااا (بنبرة خاترة)...

حبيبة"دورات ايديها على عنقو ونزلت عينيها" : ماما... "شافت فيه وعينيها غرغرو حتى بدات تبكي تاني"..ماما عرفات اهئ..

كمش حجبانو وهو ييديها تال سرير وجليها...تحنى لعندها ماقبل معاها وجلس طاوي ركابيه...هز ليها وجهها بايدو من ذقنها...

بشار : شنو ؟؟...

حبيبة"حطات ايدها فوق ايدو الي دورها وشدها ليها مزير عليها..وهي تبدا تعاود ليه اشنو عرفات ماماها...على الدخلة وكل ماكتعاود كان كايشوف بشوفة غريبة...يمكن كان حاس بلي غاتوصلهم تا هادي مادام وصلهم داكشي الكبير....ماينكرش انه قلبو تكمش عليه...خايف !!...نعم كان خايف مرعوب لا تكون عرفات حتى اش عرف باها...واش عرفات ناديا حتى هي...حيث فاش دخلوه وهضرو معاه ماجاتوش عجب ان ناديا عرفات غير من شوفتها وتخنزيرتها فيه قدر يقراها فالسما...دموعها كانو سابقينها حيث فهاد اللحظة مكانش عندها سل.اح من غير دموعها...ماماها هاديك وهي تربات انه ماتردش عليها الكلام ولا تقول لا من وراها !!...كملات وبدات كاتنخصص...

ماقدراتش تسيطر على دموعها وخوفها...ماتسناتوش هو يعنقها هي الي تلاحت عليه هاد المرة ومخشية فيه...كاتقول ليه خليني عندك وخبيني انا مسامحة ليك...كاتفكر الحلم الي حلمات بغاو يبعدوها منو وكاتفكر كلام ناديا كاتحس بروحها بغات تخرج...زيرات عليه وهي تاتنخصص...

حبيبة : هضر معاها گوليها بلي مادرتيهاش بلعاني...شوف كيفاش دير وخليها تسمح ليك حتى هي عافاك ابشار...اهئ...انا عارفة ماما وبابا الى عرفو بايفرقوني عليك والله...كبدتهم خااايبة عليا ومتايبغيوش شي حاجة تقيسني...عافاك ابشار خليهم ينساو انا مسامحاك والله حتى مسامحاك ...

بدات كاتهضر بهيستيريا وشهيق...عينيها خارجين بغات شي حاجة تخليها تفيق من هادشي وتقول غير نفس الحلم الي جاني...لدرجة هو كيف العادة مابقاش مسوق لتاحاحة من غيرها هي...مابغاتش تسكت ليه حتى شدها من وجهها وزيرها كايهضر معاها...

بشار : ششش...تهدني تهدنيييي (جهد صوته وخرج عينيه فيها)...

حبيبة"صرطت التنخصيصة" : همم..اهئ...

بشار"حط صبعو على فمو حتى سكتت" : مزيااان...

بدا يدوز على حنكها...نزل لعند فمها وحط شفايفو على شفايفها تا غمضات عينيها...ريحتو قريبة ليها بزاااف ريحة بيولوجية...وريحة بارفانو الخاص...ريحة الامان بالنسبة ليها ريحة الحب والعشق الي منو ليها...ريحة الاشتياق...شهقات وسط القبلة وزير عليها بصباعو على حنكها كايقوليها بهاد المعنى "تهدني انا معااك"...طولات القبلة نيييييت تا لقات حاجتها للنفس عاد بعد عليها غير باش تنفس...حط جبهتو على جبهتها...

حبيبة"بصوت منغنغ" : اشنو ندييير...

بشار : ديري الخاطر...

حبيبة"خرجت فيه عينيها حساب ليها قصد اشنو قالت مها ليها" : ياااك...

بشار : اشنو فهمتي عليا تم نتي ؟!..

حبيبة : ندير الخاطر لماما ياااك...

بشار : باتي هنا هاد الليلة...يتهدنو الخواطر شوية وصباح نكون عندك..."ضغط على حنكها بصبعو" هانيا ؟!..

حبيبة : ماما الى تعصبت راسها تايولي قاصح...اناا الي تانعرفها...

بشار : ياا حبيبة راني مزوج بيك...لبديها معايا شويا...جهدها ديرو عطيها الخاطر...مزيان ؟!...

حبيبة"حركات راسها"...

باسها في فمها وجلس حداها...عنقها عندو حاط ليها راسها على صدرو وتاهي زيرات عليه معنقاه...شحااال وهما هكاك كاياخذو جرعات من بعضياتهم...حتى نطق...

بشار : شكون لحگ ليها هادشي ؟!..

حبيبة : ماعرفتش.."هزات فيه عينيها"..تكون هي ؟ خالتو توريا ؟!...

بشار"دار ليها راسها على صدرو وهز عينيه كايضوف فنقطة بعييييدة...حتى عض لسانو مزييرررر عليه ومزير على عروق ذاتو حيث غالب الظن مشا ليها هي...شكون من غيرها ماعلى بالوش را شي حد اخور عارف وسعيدة وعيدة مايديروهاش اذن را هي...سكت مابقاش هضر وبقى معاها. شوية وهو يوقف...ماكرهش يبات معاها لكن وجوده فالدار دابا...

"مابقاش مرغوب بيه"...

تحنى لعندها وخذاو من بعضياتهم ثاني جرعة من القبل المتبادلة...هزها عندو تاتحكم فيها كايبوس ويمص رحيق ثغرها...كتيحس براسو ماساخيش ماباغيش يتفرق عليها كايحس بقلبه كايتحيد ليه دابا ماحدو كايبغي يفصل القبلة كايحس بروح غاتمشي ليه حتى كيبعد ويرجع تاني يلصق شفايفو مع شفايفها..عاد باسها فراسها ونزل ابدو حطها على كرشها دغدغها ليها...

بشار : تهلاي ليا فراسك...تزاد عليك هاد تكرفيص علميني...

حبيبة : تيليفوني عندها...

بشار"فهاد اللحظة ماكرهش يشد ناديا يكوغطها بين ايديه...غم ضعينيه ودوز على وجهو ولحيتو ب ديق خاطر...دار ايديه على نصو وضار لهيه وبدا يسوط..."...

حبيبة"حطات ايدها على دراعو" : انشوف بنت عمتي سناء تعطيني تيليفونها...

بشار : ماهانيش يا حبيبة...

حبيبة : قبل مانعس نعيط ليك والله...

كانت ناديا فباب الصالون غير بان ليها وهي تبعو تا خرج وعند الباب وقفاتو بصوتها...وقف عاطي بالضهر فاللول هز راسو الفوق وزفر وهو يدور عندها..

ناديا : الحاج ماعارفش الحوايج لاخرى...ماعارفش راك تكرفصتي عليها فليلة زواجكم...ماعارفش بلي ماكنتيش باغيها وحررتيها عليها وخليتيها فداك صباح ومشيتي...ياك هادشي صحيح !!..

بشار"الصمت"...

ناديا : شحاال هادي گلت ليك الي قاس ولادي نخرج عليه نيابي...مابينا والو مابينا تااااحاجة "خنزرت فيه اكثر"...من غير نشوفو بنتنا بعيدة على الي يضرها...

بشار"قرب لعندها" : الگطران شاربو فحياتي...مابغيض نتفاوت معاك فشي حوايج فشرد العشرة ومرتي...ماتلحگيش وتكوني نتي وزمان عليا...ماتقويوش جهد راني بيها بنادم بيها بنادم...

قبل ماتهضر ضار ومشا مخليها بلاكة يلاه حلات فمها بغات تجاوبو...راسو مشا كايطنطن عليه بزز باش قدر يسكت ويصبر...عرف راسو غادي يخرج الحدود ديال الاحترام دغيا ناض ومشا عند حبيبة...ودابا ملي هضرات معاه عرف راسو وصل لحد وداكشي الي عرفو عليه مابغاش يخلعهم...وكل امره لله وزاد مع طريق واخا غادي وكتيحس بشي حاجة كاتبغي ترجعو تقوليه هز مرتك وغبرها عليهم تهنى...لكن واليديها خصوصا باها غادي يمو.ت فيها...تيليفونو بدا يصوني حساب ليه حبيبة لكن كانت سعيدة...عيطات ليه شحاال من مرة ماجاوبهاش وحتى فهادي ماجاوبهاش...خشا تيليفونو فجيبو وجبد الكارو يكميه على الله يهدن ليه راسو ويكالميه...

دخلات عند مولاي حفيظ...هز فيها عينيه وبقى كايشوووف فيها وحدر راسو بقلة حيلة...

م.حفيظ"تنهد وهو ينوض"..

ناديا : تعشا...

م.حفيظ"حرك راسو ب لا" : بيت هي نعس...

مشات معاه حتى البيت عطاتو دواه وغطاتو...عرفاتو هاز ومامهنيييش على بنتو...وباقي مصدوم من اشنو سمع...حالة عايشينها مايتبغيهاش لعدوك...خرجات من البيت وهي توقف فالوسط تاني...خرجات سناء من الكوزينة ووراها رقية هازة قصرية ديال شعرية بمطيشة دخلات بيها للبيت في حين لطيفة قربات عند ناديا...

لطيفة : شوية ؟!...

ناديا"حركات راسها"...

لطيفة : فاش هضرتو معاه ؟!...

ناديا"بقات كتشوف فيها بسهو...واش تقولها ليها ولا تبقى ساكتة...ممكن هادشي يتكشف وممكن يبقى غير بيناتهم..." : شييي حوايج كثااار على جهدنا يا لطيفة... شي حوايج عرفناهم صعاااب...

لطيفة : الله يا ناديا واش باقي...بيتي طيحي ليا النقطة...

ناديا : نقطة طاااحت وهي الي وصلات الحاج لم.وت...

لطيفة : فخبار حبيبة ؟!..

ناديا"حركات راسها ب لا" : كون كانت عارفة ماتگعد باقي دقيقة معاه...

ضارت طالعة لدروج بخطى مهدووودة عالاخر...عاضة فالصبر بزاااف...حلات عليها الباب ودخلات وسداتو وراها...كانت مكمشة ففراشها ودايرة ايديها تحت حنكها متكية عليهم...وقفات عند راسها وربعات ايديها...قلبها من لداخل مكوي ومكمش عليها...حزينة عليها بزاف لكن ملامح وجهها دابا تايقولو العكس...

ناديا : بيتي تحسبيني خايبة...بيتي تحسبيني كيف ما بيتي..بتنوضي تجمعي حوايجك واشنو ما تحتاجي...مع الفجر بتمشي مع باباك وعمتك وبنت عمتك...

حبيبة"وسعات عينيها على جهدهم وهي تنوض" : فييين ؟..علاش ؟..وبشار اماما فين نخليه ؟!..

ناديا"خنزرت فيها" : علاش انا گلت ليك بتبداي تنسايه هي هكاك ؟..تانتفلى عليك انا دابا...

حبيبة"ماشعراتش براسها" : علاااااااااااش اماما علااااش...ؤاه راجلي هذاك وانا سمحت ليه...علاش بيتي تبعديني عليه راه راااجلي حرام عليك...سوليني واش بغيت سوليني مابقيتش صغيرة..مابيتش نمشي ونخليه...اهئ...حرااام عليك...

ناديا"خرجات فيها عينيها وقربات عندها" : مكنتشاورش معاك...كوني كيف ما بيتي تكوني...جمعي اش محتاجة ولاا سناء تجمع ليك وسيري مع باباك...ماتخلينيييييش نتصرف شي تصرف مايعجبكش...

حبيبة"بخيبة امل" : كثر من هذا !!..اماما راه مانمشيش ونخليه...هي سمحي ليا...

ناديا"ربعات ايديها" : هادشي الي واقع ليك معاه ماعارفة والو عليه ؟!..ماعارفاهش فين كان عايش ومالو مع مو...وعلاش ساخطة عليه مو !!..

حبيبة : مزيان هو معايا انا...الباقي ماشي شغلي فيه..."ضارت كاتقلب على كاب هزاتو بدات تلبس فيه"...

ناديا : اش تاديري...

حبيبة : بيت نمشي عندو...بيت نمشي عند راجلي...

ناديا : هضرتنا انا وباباك ماعندكش سوق فيها ؟!..

حبيبة"ضارت بزربة" : بابا فراسو ؟؟ علاش گلتيها ليه...

ناديا : نگولها ليه باش تقت.ليه نيشان...باش تصفيها ليه دقة وحدة ياك...يزيد ماعرف عليه كثر ولوحيه لروضة اكسبريس...ساخي عليك باك وراجلك أهم منو ؟!..

حبيبة"عوجات راسها فيها بحزن" : علاش تاتگولي هاكا..اش دار بشار اماما الي دارو را سمحت ليه عليه...واش عرفتي اماما اش دار حتى سمحت ليه..

(تمات غاديا بغات تخرج وتمشي فحالها عندو وهي تجرها من ايدها ودفعتها تا تلاحت حسات بكرشها ورجعتها وهي تشدها)...

ناديا : بيتي تمشي عند واحد مدوز مدة من حياته فمصح عقلي...مع واحد عايش بدوا وتايضرب راسو...الي عشتي معاه علاش ماشفتيش ايديه الي مضروبين ؟..منين جاوه ؟..

حبيبة"بالصدمة تلفت فالهضرة وهي تغوت عليها" : اش تتخربقي اااش ؟؟..واش هبلتييي اماماا...

ماحسات حتى جمعاتها معاها بطرشة خلات وجهها يدور لهيه موسعة عينيها...

ناديا : وليتي تتقللي الاحترام على قبل واحد مريييض فعقله...قات.ل باه وماراحم حتى لحم ذاتو بايرحمك نتي...الله ينعل ترابيك الحمار.ة...يلاه هادشي الي بيتي تسمعي...

شكون كان يجي فبالو انه يتحط فهاد الموقف...لا من جيهة حبيبة ولا من جيهة ناديا ولا بشار...شكون كان يظن ان حبيبة تعرف ماضي بشار وحالة بشار المرضية بهاد الطريقة الي نقدرو نصنفوها انها اسوء طريقة يمكن تعرف بيها...لكن من ناحية "ناديا" ماغاديش نعرفو مقدار الصدمة والخوف الي وصلات بيها من جيهة بنتها حتى خلاتها تصرف تصرفات عكس طبعها...

شدات حبيبة حنكها من الصفعة الي مكانتش اقوى من الي سمعات...

ناديا : هادشي الي بيتي تسمعي..هادشي الي بيتي تعرفيييي....عرفتي دابا اش كاين واش واقع !!...اه قات.ل باه..مريض وتايضرب راسو...عشتي معاه هاد الشهور عام وماشفتي ايديه الي مضروبين ما سولتيه ما گاليك والو ؟!..

شافتها شادة حنكها ومصدومة...باقي هضرة ماماها فراسها ماثيقاتش وماغاديش تيق طبعا من اول مرة...حيث الامر صادم وصعيب شي واحد يتقبلو الى كان دارهم وهو براسو لحد ساعة مامتقبلش اش وقع فالماضي كيفاش غادي تقبل هي وتستوعب الامر...حنكها كايزنزن بطرشة الي عطاتها لكن مايكونش قد الي سمعات...غمضات عينيها وبدات كاتنخصص شوية بشوية حتى ارتافع...الي وقع ليها هاد النهار مايمكنش يتحملو شي حد ويبقى واقف وساكت...من الي جات لدابا كلشي تابع حاحة بحاجة فاقل من 12 ساعة...واش الانسان يبقى صابر وساكت...واش الانسان يميك ولا يبقى عادي كأنه ما وقع والو ؟...مستحيل من غير الي ماعندو لا احساس ولا ضمير...كلشي تابع ليها فهاد المدة ديال سويعات القليلة...

حبيبة : ا ااا اش تاتگوليييي ااااش اهئ علاااش تتگولي هاكا اماما...هييي كذووووو ببب كذووب كذوووب...

ناديا : كذوب !! على بالك اش سباب باباك تا طاح بكخيز كاغدياك ؟!..على شوي وكان بايمو.ت...هي بسباب هادشي الي عرف وگلتو ليك دابا....

حبيبة : وكذووووووووب كذوووووب امامااااا....

بقات تعاود فيها حتى تحولات الهضرة لهيستييريا...وقفات تقابلت معاها....وعلى فمها غير جملة "لا كذوب كذوووب"... ودور هنا وهنا ...ولات كلها كاتهضر وترعد وراسها كايتحرك بالنفي مامصدقاش اش سمعات من مها جاها غبر بحال كذبات عليها باش تبعدها عليه...وجاها هادشي بحال الحلم يعني را مامستاهلش تبكي وتدير هاد الهيستيريا وهي علاش كاتبكي ومهسترة بحال هاكا ؟...ناديا فواحد اللحظة حسات براسها زادت فيه وماكانش عليها تقولها ليها بهادالطريقة حيث الصدمة الي فيها حبيبة دابا بدات كاتخلع فيها لكن فلحظات الغضب مكيكونش لجام لتصرفاتنا...حالتها خلعاتها ولات بغات غير تشدها ماقدراتش عليها كاتشدها من دراعها وكتنتر منها وتبعد فيها...

ناديا : حبيبة !!..حبيبة سمعيني حبيبة...

حبيبة : كذوب كذووووب كذووووب...هو باه ما.ت وخلاه صغير...هو باه كايمرض ليه خاطرو الى دوينا عليه...كذوووب كذوووووووب اهئ...نتي هي بيتي تفرقيني عليه...صافي هي حيث تكرفص عليا ؟ عطيه هي فرصة يشرح ليك عطيه الفرصة الي عطيتو انا وبين ليا...عطيه فرصة حتى نتي وبابا يخليكم تبغيوه...شوفي شوفي هي هيييييي هييييي....."غوتات بجهدها" ولااااااااا كذووووب كذوووووووووووووووب....

والو ولات ناديا بغات غير تسكتها ما قدراتش عليها صافي خلعتها بالمعقول حتى غوتات مناديا على لاخرين يجيو لعندها...حيث ماتيقاااتش هادشي الي قالت ليها ناديا جاها غير تلفيق باش تفرقها عليه...ماغاديش تيق وغاتقول غير كذبات ولبقات اي حاجة باش تكرهني فيه حيث عرفات انه تكرفص عليا...واااااالو الي قالتو ليها مادخلش ليها لراس...والهيستيريا الي جاتها كان خاصها غير نقطة تفيض الكاس وتوصل لهاد الحالة...ماقدراتش تصبر وهي تحل الباب وبدات تعيط عليهم بصوت مرتفع....

ناديا : لطيييييفااااااااااا...لطيفة اجي لطيفة....

لطيفة خرجات من البيت مخلوعة وسناء وراها ورقية اما ايوب وقف تالف حتى تبعهم...طلعو يجريو حلو عليهم الباب لقاو حبيبة فحالة كاضر فالخاطر...وجهها حمرررر ومسيق بدموعها ومنخرها خلاص...عينيها خارجين وكاتهضر بنفس الجملة....ناديا شافت فلطيفة وهي ترجاها بعينيها...مشات لطيفة لعند حبيبة كاتشد فيها وهي كتبعد فيها وتبكي...

حبيبة : هيي كذوب اعمتي هي كذوووب...هي باو يفرقوني عليه وصافي...

لطيفة : وا هي گعدي ابنتي وتهدني...

حبيبة : هو ماشي ديال هادشي مايديرهاااش اهئ...

لطيفة : وااايه وايه ماشي ديال هادشي...اگعدي را بيتي طيحي واقفة...ويلي اش هادشي ياربي سلامة...اسناء طيري جيبي كويس تالما تنفس...ويييييليييي على حالة...

مشات سناء كاتكب ليها الما حيث كانت محطوطة القرعة غير حداها...ايوب بقا واقف لهيه كايشوف فيها وهو الي شاف وحضر لمعانات الي دازت منها حتى ولات كاتبغيه لكن ماكانش عارف انه فايت تكرفص عليها بشار هذا السر الوحيد الي احتافظت بيه حبيبة لراسها...مدات ليها كاس ديال الما بعدات عليها وجهها...

ماخلاو كي دارو معاها وهي على فمها هضرة وحدة عقلها ماتقبلش ودخلات فحالة صدمة...لطيفة ضارت عند ناديا الي كانت دايرة ايديها عند ذقنها كتشوف برعب الحالة الي فيها بنتها...

لطيفة : ويلييي اش وصلها لهاد الحالة ؟؟...

يلاه غاتجاوبها ناديا حتى شوية بدات حبيبة تبعد فعمتها والي قريب ليها تقولي خنقوووها...بغات تخرج من البيت تمشي لعندو شوية وقفات وحطات ايدها على صدرها و بداو عينيها كايتسدو شوية بشوية.... وهي تشهق شهقة وحدة من بعدها طاحت طيحة وحدة مغيبة....

جالسة جنب السرير دايرة راسها بين ايديها...دموعها على خدها كاتبكي بالحس وتاواحد فيهم ماقدر يهضر معاها...لطيفة جالسة وكاتقرا فالقرآن وسناء شادة ايد حبيبة وكاتعبر فيها...م.حفيظ جالس حتى هو وحادر راسو حيث سمع الغوات وطلع واخا عيان...

سناء"بصوت منخفض" : بدا كايتقاد...

لطيفة"كملات الاية وهزات عينيها فمولاي حفيظ" : نديوها لكلينيك ولا علمو هي راجلها...

ناديا"الصمت"...

م.حفيظ"خنزر فختو" : اش بايدير ليها اش بايدير ؟..

لطيفة"وسعات عينيها وشافت ف سناء بنتها ورجعت شافت فيه" : ايوا راه راجلها الحاج ويلي يكون الي بايكون اه باقي راجلها نعل شيطان....

يلاه بغا يهضر حتى بانت ليهم بدات كاتحرك وعينيها بداو كايرمشو شوية بشوية حتى حلاتهم نيشان مع السقف...بغا يهضر مولاي حفيظ وهي توقفو لطيفة بايدها بمعنى تسنى خليها تا يشوفو اش غادير...تراجع شوية وبقاو كايشوفو فيها مدة وهي تاتشوف فالسقف حتى تنهدات تنهيدة طوييييلة وهازة بزاااف...غمضات عينيها ورجعت حلتهم وهي دورهم نيشان ف باباها...بقات كاتشوف فيه ويشوف فيها باغي يسولها "واش شوية"...قلبو ماهانيش عليها...

فنفس اللحظة ولكن فبلاصة اخرى...واقف فالبالكون خاشي ايد فجيب سروال باقي بحوايجو حيث معول يخرج.... وايد شاد بيها كاس دالقهوة وفنفس الوقت فيها الكارو الي شاعل...سمع صوت التيليفون كايصوني...حط الكاس ودخل يشوفو...عند بالو هي الي مصونيا ليه حيث قالت ليه غانعيط ليك...لكن كانت سعيدة من بعد ستين اتصال لا هي لا هاشم ولا حسام...هز راسو لفوق وزفر بديق واخا ماعندوش جهد يهضر مع شي حد لكن سعيدة عارفها غاتكون مخلوعة عليه ولا بالها معاه...طلق الخط وهي تنطق ..

سعيدة : الله يا وليدي الله...فينك فيين...

بشار"مسد عينيه وجبهتو وفنفس الوقت تكلم بصوت مبحوح بسباب البرد" : سعيدة مبرزط مبرزط مع مخي شوية...

سعيدة : راني عارفة الي طرا...بغيت غانشوفك لا انا لا هاشم تاحد فينا ما تشديتي ليه...بغينا نهضرو عماك...

بشار"بدا يكحب" : ياك لباس ؟!..

سعيدة" بتردد حيث كانو باغين يشوفوه ويهضرو معاه ماشي فالتيليفون" : ماعرفتش واش عارف وليني راه جات نسيبتك ام حبيبة تالهنا عند توريا وعاماذا خاصمت عليها على شوي يتشادو (ماقدراتش تقوليه را صرفقتها)..غا هاشم الي فكهم هو ودراري...

ماجاوبهاش...غمض عينيه شحاال هي كاتهضر وهو هكاك حتى صافي مابقاتش سمعات منو صوت...كلشي تكب فهاد نهار دقة وحدة...اشمن راس ولا خاطر غايبقى يسمع باقي شي اضافة هاد النهار الي كان طويييييييييل مجبد عامر احداث ومصايب كحلة...حيد تيليفون من وذنيه وحطو فوق الطابلة مخليها كاتهضر غا وحدها وتقول الو الو...هز راسو لفوووق ونفخ ما فجهدو من انفاس حااارقة مخرجة بعض من الي لهيب العافية الي كاتنغل فيه من لداخل...دخل من البالكون وتوجه لدوش تسند على لافابو وحدر راسو...اش غايدير مع هاد الام الي عطاه الله...ماحسلتو ليها معاه ولا ليها مع ناس...ماحيلتو لواليدين حبيبة معاه ولا لمرتو الي على مشارف انها تعرف قصتو...واش وصل الوقت انه يقوليها ولا تعطل بزاااف...كيفاش غادي يشرح انه خبا عليها باش ماتتصدمش فيه وتخاف وتنفر منو...كيفاش غادي يفهمها بلي بيها بصح هو بنادم...بيها هي الي دايرها هدف فانه يستمر فالعلاج ويبدا يسيطر على ردود افعالو العصبية بسباب المرض النفسي الي هو فيه بسباب اش وقع ليه فالماضي...واش غايصبر من هنا لقدام الى حيدوها ليه...واش اايصبر لهادشي الي هو عايش فيه ؟!...فالاول والاخير را كايبقى انسان د.م ولحم وقلب وكبدة...حتى هو عندو احاسيس الي واخا معضمها ماعارفهمش لكن را كايحس...عندو حبيبة الي خلاتو يعرف بزاف الحوايج زوينة ويعرف انه انسان مرغوب بيه ماشي ملعون والسخط نازل عليه...

طلق الروبيني وخشا راسو تحت منو الما باااارد نازل عليه...شحال وهو مطلوق عليه حتى حس براسو برد شوية هزو وبدا يدوز بايدو كايترش الما وهو كايرجع فيه لور..خرج من دوش كايقطر بالما ومشا لبالكون هز تيليفون قلب واش عيطات ليه من شي نمرة مالقى حتى اتصال....لاح تيليفون فوق الطابلة جر الكرسي وريح تما شحل الكارو وربع ايديه كايكمي ويفكر ف ديك الي خلاها فدارهم...الي خلا واليديها غاضبين عليه لدرجة باغين يفرقوه على مرتو...نزل عينيه لتيليفون شاف فالساعة كانت قريبة 12 دياا ليل...حاس براسو جالس على شوك...خاطرو ماهانيش الي نوضو الي ؤجعو تاني يجلس...دور عينيه لبلاصتهم فالفراش الي جمعهم اجساد تلاحمت واجساد معانقة بعضياتها فالشدة وفالفرح...حاس بالدار خاوية بزااااف وهي مافيهاش...طفا الكارو فالطفاية وناض هز تيليفون دارو فجيبو وهز السوارت وكونطاكت وخرج من البيت لبس البروتكان ديالو وخرج من البرطما نزل ديريكت لطوموبيل...وكسيرا مباشرة حتى لقى راسو قدام الدرب ديالهم...دنيا شبه خاوية واخا ناس كايبقاو خارجين فالمدينة لكن تما فديك المنطقة حيث فيها دروبة خاوية شوية...بلاصا سيارة مباشرة مع الدرب سكتها وهو يدور راسو جيهتهم...مد ايدو لمجر جبد الباكية رمى حبة منها في فمو وشرب عليها الما الي جاب معاه...حط راسو على الكوسان وغمض عينيه...كايتسنى باش يتهدن حيث راسو حس بيه كايتبخ بزاااف...الغريب فالامر ان النوبة ديال الصرع ماجاتوش هاد الايام الي كان فيها ضغط كثييير !!...بقى شحاال وهو هكاك حتى بدا كايترخاااا...حل عينيه ودورهم تاني جيهة دارهم وبقى كايشوف فيها...

الساعة السابعة صباحا...خرجات من البيت...كاتقاد فشالها بالزعفة...حتى حلات البيت بجهد ماتسوقات لبنات هاشم ...حركتها بجهد فيقاتها شاهقة بالخلعة ماعرفات راسها باش تبلات...

توريا : انووووضي تگعدي ليا من نعاس..

اشراق : هاني مي مالك...

توريا"خنزرت فيها" : تگلعي بركي حدا خوك تانجي...بلا ماتمشي تقراي بقاي عماه...

اشراق"وسعت عينيها " : هاويلي امي كيفاش منمشيش نقرا..مانصيبش را عندي امتحان امي...

توريا"جرتها من دراعها بقرصة خلاتها تغوت تا فاقو لبنات" : ماعندي سوق لا فيك لا فامتيحان لا فخرا...نوضي عند خوك هي نوضي...تگلعيييي يلاه...

تسناتها تا ناضت وقفات عليها تا دخلات عند يوسف كاتنخصص بالفقصة حيث البلان مشا ليها...عاد نزلات كاتنهج...

كريمة : خالتي كي صبحتي شوية...

توريا : مانولي شوية تا ندير شغلي ونربي الي يمد عليا ايديه...حيدي عليا راني تعطلت...

تمات غاديا حتى وصلات عند الباب وهي تسمع صوت عيدة كاتعيط ليها باعلى ما فجهدها...

عيدة : تورياااا...

توريا"وقفات ضارت نص دورة بدون ماتشوف فيها"...

عيدة : عليا بليمييين وتمشي تدعيها (توريا هزات حاجبها وضارت عندها كلها)...الى باقي دويت عماك ولا وجهي شاف فوجهك الى يوم الدين...واخا ينوض راجلك الي هو كبدتي وولدي وسبق ليا عليك لا لغايا جا فلغاك راني نديرها ونفوتها ونحيد الوجاه (زعما مانبقاش ندير بوجهك ولا بخاطرك)...تصحابيني معارفاش اش ناوية تفعلي...

خلاتها كاتشوف بفقصة وضارت لبيت ودخلات سدات عليها...ولات توريا كلها كاتغزل كانت عارفاها غاتمشي تدعيها...فالاخير ضارت تاهي وخرجات فين دايرة مع خوها...

عينيها كانو كايشووفو فالسقف وعقلها غايب مع الي وقع امس...عياو معاها البارح تهضر كاتجاوبهم غير براسها...السفر مابقاوش هضرو عليه ولا جبدوه يكفي حالتها الي كانت فالحضيض...خلاوها على خاطرها ترتاح منهم ناديا الي حسات بلي غلطات فرد فعلها وشنو قالت ليها وهي الي كانت مأجلة حتى تعاود ليها بالخاطر...لكن حتى حاجة ماكانت معاهم كلشي كان ماشي بالعكس...

صرطات ريقها وحطات ايدها على صدرها...ناضت من فراشها بشوية...وقفات شحااال كاتنهج وجهها شاحب بزاااف...مشات ل كاب الي معلق هزاتو ولبساتو عليها...هزات صاكها دارتو ف كتافها وخشات رجليها ف بانطوفتها وخرجات من البيت...كان صقييييل من غير صوت الما ديال سقاية وصوت شي تقرقيب فطواليط لتحت عرفات غاتكون يا ماماها يا رقية...بزربة توجهات الباب حلاتو بشويييييييا كادور هنا وهنا لا يشوفوها وهي تخرج...غير خرجات ضربها البؤد ديال داك صباح باااارد...تكمشات فالكاب ديالها وتمات غاديا بشوية حتى قربات توصل ل راس الدرب هزات عينيها وهو يبان ليها واقف كايشوف فيها هاز حاجبو تصدم ماتوقعش انها تخرج فهاد الوقت...شاد الكارو فايدو وحاط گوبلي ديال قهوة كحلة فوق طوموبيل...هز معصم ايدو شاف فساعة ورجع شاف فيها...

حبيبة"بصوت مبحوح" : بشار !!...

بشار"قرب لعندها" : اجي عندي هنا...

تقدمات ووقفات عندو شد ليها وجهها لين ايديه..كايفلي فملامح وجهها كيف العادة...بانت ليه ماشي هي هاديك...

بشار : مالك فهاد الحالة ؟؟!..وقعات شي حاجة ورايا...

حبيبة"تنهدات الهم الي هازة وحركات راسها" : يلاه نمشيو ؟!..

بقى كايتصفح ملامح وجهها..حس بلي وقعات شي حاجة كبر من الي خلاها فيها وعرفها...وجهها كان مريييض...واضح عليها شي صدمة حيث طريقة باش كتشوف وباش كاتهضر ماولفهاش عليها هااادية وساااكتة...

حبيبة"حطات ايدها على كرشو دافعاه" : يلاه دابا يخرجو ويرجعوني لبيت...يلاه...

شاف حتى عيا ومع البرد كاين محرك شوية عنقها بجنب وداها تال بلاصتها ركبها خلاها كاتقاد سانتيغ وضار هز الكاس وركب تاهت بلاصتو...ديمارا سيارة وعينيه عليها فيها شي حاجة ماشي تالهيه...كسيرا باغي يشد طريق البارطما وهي تشدو من معصم ايدو...

حبيبة : مانمشيوش لدارنا ماشي دابا...يلاه لديك البلاصة الي حدا المنارة...

حرك راسو وشد طريق البلاصة الي كان هضر معاها فيها شحاال هادي...وصلو ليها ووقف طوموبيل...يلاه بغا يهضر وهي تحل الباب ونزلات...كمش حجبانو فيها وفهاد الجفاف الي ولات فيه...ضار لور بانت ليه واحد جاكيط ديالو هزها ونزل حتى هو تالعن.ها وحطها عليها...

بشار : البرد محرك بجهد...

حبيبة"شافت فيه وعينيها مغرغرين" : انا دااافية ابشار...دااافية..

بشار"حط ايدو على جبهتها لقاها دغيا سخنات" : حبيبة حالتك ماعجبتنيش...باقي كرشك مكرفصاك...

حبيبة"ماجاوباتوش بقات غير كتشوف فيه"...

بشار : حبيبة !!..

حبيبة"قربات بزاااف وحطات راسها على صدرو ودورات ايديها ورا ضهرو وتنهدات تا نزلو دموعها" : ماما باش تفرقني عليك گالت ليا بلي قت.لتي بااك..وبلي نتا مريض وتاضرب راسك... هههههه هادشي كامل هي باش تفرقني عليك حيث تكرفصتي عليا فاش يلاه تزوجنا..

"هزات فيه راسها وشافت فيه....مقابلين مع عينيه الي خرجو...

حبيبة : ياك كذوووب ؟..

ماجاوبهاش...وهي تنزل عينيها جرات ليه ايديه وبدات تقلب فيهم حطت صباعها على دوك شراطي ورجعات شدات ليه فدراعو...

حبيبة : بشار !!...ياك هادشي الي فيك هي لعب فالصغر ياااك.. علاش ماتتجاوبش...بشاااار...

"توقفات وهي تشوف فيه...نزل عينيه مصدووم وسكت بقات كاتحل في فمها وتسد تحل وتسد حتى غوتات بحر جهدها...غوتة طوييييييلة...غرسات ضفارها فدراعو شادة فيه...حتى طرطق ليها منخرها بالد.م وطاحت ليه بين ايديه..

يمكن اكثر قرار كان غالط بنسبة كبيييرة هو الي خذا فاش قرر انه مايقوليها والو على حياته الاليمة السابقة...الي كان خايف منو هو الي وقع وباسوء طريقة...عرفات بطريقة مافيها حتى تمهيد وحتى دقة بدقة كيف كان كيقول هو حيث داكشي مجهد عليها وقاصح عليها...يمكن لو مشى بالوتيرة الي قاليه عليها طبيب...او يمكن لو كانو ظروف معاونة كانت غاتكون عرفات بطريقة احسن...لكن الي قسمو الله عليهم هو هذا...

بين ايديه طاحت خلات عينيه يتفيكساو عليها على وجهها الباكي المقهووور على منخرها الي نزف ولا على اشنو شاف اخر !!...لاول مرة كايحس بقلبه سكت ليه بصح...لاول مرة كايحس بروحو تحركت وعقلو توقف...لاول مرة كايستشعر طعم الرعب على شي حد كايهمو من بعد باه الي ما.ت وقت.ل معاه كل احساس عندو...واش هادي هي نهايتهم بزوج !!...فين مشاو المواقف فين مشات العشرة الي بدات كاتكون...فين مشاو الوعود وفين مشاو الي عاشوه بزوج...واش الي عاشوه ماكانش كافي ؟!..واش هنا فين غايبان الحب ولا غير مجرد حكاية وتعاشت...

"فلاش" "باك"...

تسند على لافابو كايكحب بجهد تا ولا وجهو حمر وعروق نواضرو برزو....كان عاد خارج من دوش باقي شعرو كايقطر...حتى دقات الباب وسمع صوتها...

حبيبة : بشار ساليتي ندخل..

بشار"دور راسو هاز حاجبو" : دخلي...

دورات البواني بشوية وحلات الباب حادرة عينيها وعاضة شفايفها لابسة بيجامة قطن فالخضر بارد معرية من دراعها وفيها دونتيل درجة اغمق فالصدر وشورط ديالها فيه دونتيل من تحت...وجهها مزنك...

حبيبة"مشتتة شوفة حشمانة منو حيث عريان لاوي عليه غير فوطة من تحت": من قبيلة ونتا تاتكحب بجهد..علاش مامشيتيش جبتي سيرو...

بشار : شوي ونتحرك..

حبيبة : احم..اه عندي هولص فصاكي فاش ضربني البرد ديك المرة خذاها ليا بابا من حدا لافاك فاش جابني وبقات عندي منها..نديرها ليك فشوية تالحليب شربها وباتفوتك شوي...هي بيدما خذيتي سيرو...

بدا كايكحب تاني...الكحبة مجهدة وتسمع حتى زعيل فصدرو واكل دقة ديال برد قاصحة...هز راسو الفوووق ورجع شاف فيها نزل عينيه لعنقها...

بشار : اجي هنا...

هزات حجبانها وقربات عندو شدها من ايدها وجبدها لعندو بجهد حتى حطات ايدها باردة على كرشو حس بالضو داز ليه..عض شواربو محاول يتكالما من جيهتها حيث توحشها بزااف غير مراعي ليها وليغيگل الي فيها...دوز بايدو على شعرها وعينيه على عينيها....

حبيبة : م احم..ماطولش هنا خرج لبس حوايجك...

بشار : ششش...

حبيبة : همم !!...

مابغاهاش تهضر...باغيها تسكت باش يبقى يضوف فدوك الملامح الي حشمانين منو وهو عريان واخا عاشو علاقات تلاحمو فيها اجسادهم العارية تمااما...الا ان الخجل ديما كايغلبها وهادي حاجة ولابد منها بيناتهم مازال فين تطوال العشرة ويتعودو او هي تعود عليه عريان فاي لحظة غزل ولا قبل من غير وقت...ولا لقطات الحب الي كايدير ليها فالاوقات الخاصة بيه هو الاوقات الي كاتتخليها مميزة بيناتهم...

نزل لعندها وهز ليها وجهها من ذقنها حتى قربات ليه..عرفاتو غادي يبوسها بلا ماتحس تهزات على روس صباعها تا وصلات ليه...حل فمو شوية حتى خذا شفايفها بين شفايفو وتوقف...كاتسمع نفس ديالو كاتهز وتحط بسباب الكحبة الي بغات تبداه تاني لكن هو مجاهد باش يحضى بديك البوسة فمدة ماتبرزطوش وهو منغم بدوك شنايف المنفوخين الاشهى من الخوخ الباارد فعز الصيف...حس بيها كاتحرك بزاف حيث عياات وهي مهزوزة لعندو على روس صباعها...نزل ايديه تحت باطها وهزها لعندو دور ليها رجليها ورا ضهرو وداها تال حايط بلا مايفرق شفايفهم ولصقها معاه...وتحولات من قبلة هادية لقبلة كاتمشي بوتيرة تسابق كأنه باغي يتسابق مع شفايفها الي اصلا مكيتحركوش حيث ماعرفتش تسايرو...جر ليها شنايفها جرة طويييلة تا كمشت عينيها ونزل بزربة لعنقها حسات بلسانو كايداعب تحت وذنيها زيرات على كتفو تا بدات تنهج بالحس وحسات بمعدتها كاتلوى عليها ولتحت كايضرها....قلبها كايضرب بجهد مكتعرفش اش كايدير فيها حتى كايخليها تنهج غير بالبوسان...يلاه تنغم وهي تشدو الكحبة تاني حط راسو على صدرها وبدا يكحب..بقات معلقة فالحايط نزلات عينيها حيدات ايد من كتافو وحطاتها على شعرو...

حبيبة : بشار راه بايخصك تشرب ليها شي حاجة ماتبقاش هاكا مريض...بيتي تكرفص...وسير هي تلبس بعدا بيدما درت ليك الحليب...

حطها فالارض مشندلة قادت حوايجها...حل الباب وهي تخرج..مشات هي الكوزينة وهو دخل ديريكت لبيت ... لبس سروال سورفيت وتيشرت كحل...الكحبة ماحبساتش..هز سوارت وكونطاكت وبزطامو وخرج لعندها لقاها كاتحرك فالكاس ريحة هولص وصلات لعندو...

حبيبة : بلاتي بلاتي...شرب هذا...

بشار"شد من عندها الكاس ضربات فيه ريحة مجهدة ديال فليو...شربو دقة وحدة خرجات عينيها"..

حبيبة : ويلييي...

بشار"مد ليها الكاس" : مالك ؟..

حبيبة"دارت صباعها على فمها" : ههه انا تنشربها شوية ماتنقدرش عليها كلها...

بشار : ماشي شي حاجة...محتاجة شي حاجة من برا ؟!..

حبيبة"تفكرات فوطة صحية تقادات ليها والي دايرة كاتعمر" : اه اه....لا لا...

بشار"جمع حجبانو" : كيفاش..

حبيبة : ماغاديش تعرف "بدات تحك فجبهتها"..صافي من بعد..

وقف خاشي ايديه فجيبه وكيشوف فيها...هزات فيه عينيها بان ليها كايشوف ديك الشوفة بلا مايهضر عرفات اش قصد نيشان سمعاتها بصوته بلا مايهضر " طلقي ملتي اش بغيتي ههه"...

حبيبة : هي سير حتى نرسلها ليك فواتساب...وصااافي بلا ماتگول تاتمرگني عليا تاني...اه حشمت...

المرايا ديال السيارة كايبانو فيها عينيه منيرييين وحمرييين...حس بالعافية شعلات فيه العرق نزل من جبهتو وذاتو كلها سخونة...تيشرت خنقو وهو يوسعو حتى تقطع ليه من الكول...عرا على صدرو ماداها فتاحاحة من غير ينفس عليه...سايق بسرعة مهولة وغير فيد الله وصافي...العقل را ولف السوگان واخا غايب وجاهل لكن الولف كايخليك تخفظ الطرقان...هز عينيه كايشوف فيها من المرايا كيف حطها وحط ليها راسها على مخدة ديالتها نيت صغيرة كانت حطاتها فالطوموبيل واحد النهار فاش كانو راجعين من افران...

"فلاش" "باك"...

معنقها وراخي ايدو على كتفها...كان كايكمي حتى شداتو من صباعو ضار عندها منزل عينيه فيها...

حبيبة : الجو هنا غزاال..تفكرت فاش كنا كانجيو لاوريكا وستي فادما فايام الثلج مع بابا وماما وخوتي وحتى ايوب..."شافت فيه" ايوب مربيه بابا حيث عمي الي هو باباه ما.ت وخلاه عندو خمس سنين...يعني خويا...

بشار"نتر من الكارو وشاف قدامو" : ماعنديش ديك الهضرة ديال فلان مربي معايا...خويا...

حبيبة : ولكن راه تايعيط لبابا ب با ولا بابا نيت...

بشار"شاف فيها ": مشاركين نفس الكرش ؟!..

حبيبة : لا...

بشار"ورجع هز راسو قدامو" : زيري معايا طرح يا حبيبة...

حبيبة"عوجات فمها" : وهي خليني نكمل ليك بعدا...

بشار : كملي...

حبيبة"وقفات وضارت هنا وهنا" : كان بابا تايفيقنا فالصباح بكريييي كيف تايصلي الفجر تايقولينا نرجع من حامع لقاكم واجدين ونتيسرو...انا ديجا كانكون موحدة حوايجي وصاكادو ديالي...هي تايديق علينا تانوض لبسهم ونتخشا ففراشي نشبع نعاس بيدما جا هههه كان واخذ ليا مخدة صغييرة عارفني هي كايتحركو روايد نديرها تحت راسي ونجبد عليه...حتى ولفتها بزاف...خذاهم ليا فبزاف تالالوان...

رما الكارو وجبدها لعندو عنقها...باسها فحنكها ونزل باسها فعنقها قدام ناس تا خرجات عينيها بغات دفعو وهو يزيرها تا خذا كفايته من عنقها مع كانو عاد بداو كايعيشو علاقة جن.سية كاملة بالخاطر باقي المشاعر متوهجة بيناتهم...تا قاليه راسو شبع وسالي عاد خرج راسو لقاها مزنگة حيث الي داز كايشوف فيهم..

حبيبة : ناااس تايشووفوو...

بشار : الي يتسال شي حاجة يلحگ عندي...ياك لباس ؟!..

ضار بيها حتى حسات بيه هي مبرزط حيث ممولفش البشر لا فطريق لا فالزنقة ولا فحتى اي مجمع...هادشي عرفاتو منو وحتى فخروجاتهم قدات تستنتج وتفهم هادشي...ورجعو فحالهم...الغذ ليه ملي كانو راجعين ركبات ويلاه دارت سانتيغ دخل هو هاز فايدو ساشية تا حطها ليها فوق حجرها...

حبيبة: ديالي !!..

بشار"حرك راسو" : si...

حبيبة : هههه...

خشات راسها فيها تا هزات اش فيها وهي تحل فمها على شكل واااو...وبدات ضحك عرفاتو دارها فراسو وخذاها ليها...حلات الميكة وجبدات مخطة صغيرة شوية معمرة بالريش...وفيها فرو رطب فالغوز...حطات عليها حنكها رطباااا...حيدات الساشية دارتها لور وحطات المخدة بينها وبين زاج وحطت عليها راسها...

حبيبة : واعراا هههه..."شافت فيه بحب" شكرا بزاااف...

بشار"كسيرا بطوموبيل" : بصحتك...

حبيبة : منين خذيتيها ؟!..

بشار"وما براسو لجنب" : واحد المحال هنا..

حبيبة : ههه بقيتي عاقل اش گلت ليك البارح..

بشار : وايلي..

حبيبة : هههههههه....

بقات حاطة راسها على المخدة وعينيها مرة مرة كايمشيو ليه...يمكن فقيير فالكلام الرومانسي لكن عندو افعال كايخليوها طايرة فالسما...كاتحس بيه كايحاول جاهد باش يوفر ليها اي حاجة كانت مولفاها قبل...عندو راحتها وخاطرها كايخليه مرتاح تاهو...عندو هي كلشي هي الحياة فعينيه...عضت شفايفها محاولة تشجع غير باش تشكرو وعلى الله هو كايحكرش ويفهمها ومايحشمهاش...تگعدات وقربات ليه شوي بشوي حتى دور راسو عندها بانت ليه مقربة لعندو..يلاه غايسولها مالك حتى تلاحت عليه باستو فحنكو بزربة ورجعات لبلاصتها حطات راسها على مخدتها وضارت لشرجم متفاديا اي شوفة منو ولا حركة..حتى هو رجع شاف قدامو مابغاش يحكر عليها عرفها حشمات...

هادي هي حكاية المخدة الي حطات عليها راسها هاد المرة وهي غايبة عن الوعي في حالة انهيار تام... قدام الكلينيك الي حفظ طريقو من كثرة ما جاو ليه بزاف مرة هي مرة مو مرة هو مرة خوه...ضرب واحد الفران خلان عباد الله كلها دور بالخلعة...خرج من طوموبيل وحل عليها الباب لور...جرها لعندو وهزها بين ايديه الي كان قايسهم د.م...بالدعقة راسها تدلى لتحت ولات كيف جرتيلة بين ايديه...نزل راسو لعندها عينيه خارجين بان ليه راسها هكاك وهو يقربها ليه حتى تهز راسها وحازها ليه حاط راسو على راسها...مكمشها فيه وكاينهج....

خلا الباب محلول ديال طوموبيل...ودخل بيها كايزرب عقلو هرب ليه فهاد اللحظة ماتسوق لتاحد اصلا حتى واحد ماكايبان ليه من غيرها هي الي بين ايديه ومن غير بلاصة وحدة خاصو يدخلها ليها...السيكيريتي وراه وشي فرمليات مشاو كايجريو وهو غادي بيها بحال هاز ريشة...حتى دخلها عليهم لوسط المستعجلات وحطها فوق واحد البياص بان ليه ماعرفو ديالاش...ضار هنا وهنا مجرتل ليه التيشرت الي قطع وعينيه عليهم ضبابة بدات كاتجيه وتمشي...مابان ليه حد من غير واحد الفرمليات كانو كايبانو ليه كايهضرو ويقولو شي حاجة اشنو هي ماسمعهمش...ولكن ما دارو تاحاجة من غير كايحركو فشفايفهم...قبس بياص اخر برجليه بجهد مشا كايجري مع روايد جابو فيهم تا غوتو...

بشار : وااا تحركو عليا يا ولاد الهازة لعندها هنااااااا (حتى مشا ليه صوته)...

جالس فالبيت حادر راسو دايرو بين ايديه ...وجهها بيض بالخلعة والفقصة...ولطيفة جالسة حدا مولاي حفيظ وحداها قرعة الما وكاس...و ايوب واقف داير ايدو على حنكو تايضوف باقين عينيه مبوقين بالنعاس...رقية دات دراري لطرونسبور يمشي لقرايتهم الي باقي ليها مدة قليلة وتسالي...

ناديا"كاتصوني لبشار...بقا يصوني تا طفا" : طفا طفااا...

سناء : بتكون هي معاه ماتخافيش..

ناديا"خرجات عينيها وجناوح منخرها فرفرو بالغضب" : ااااااش بايديها معاه لاش مشات بلا ماتعلم...لااااااااش...

لطيفة : ناديا يهديك الله...

نادية"ضارت شافت فيها وهي تغمزها باش تهدن حيث مولاي حفيظ مزير" : مهدنة مهدنة...هاهي معاه ايوى هي يجاوب نعرفوها واش معاه...هي يجاوب..مابينا والو هي نعرفوها فين...لا باتمشي معاه منها ليه هي تگولها...

بقات كاتمشي وتجي والتيليفون فوذنيها كايعطيها را طافي ولكن هي ماقتانعاتش باغا تبقى تعيط حتى يولي يصوني...قلبها عند فمها والندامة طالعة معاها وهابطة حيث قالتها ليها بديك الطريقة وفنفس الوقت مفقوصة حيث اغلب حاجة غاتكون مشات معاه موراهم...كلشي تخلط عليها فهاد اللحظة...شوية حسات بالضبابة بين عينيها خواو بيها رجليها وهي طيح جاب الله لقاها سداري حتى شهقات لطيفة...

لطيفة : ويلي ناديااا....

م.حفيظ هز عينيه بانت ليه طايحة وسناء مشات لعندها هي وايوب بسرعة...ناض هو ولطيفة لعندها مخلوعين...سناء دارت ليها لاباراي الي كانت ديجا تما عبرو بيها لمولاي حفيظ...

م.حفيظ"بخاطر مرييييض" : الحاجة وگضي معايا اش هذا...

ناديا : بنتييي الحاج بنتييي فين هي !!...

م.حفيظ : بنتك اه بايضربوها الحيوط وباترجع لينا...بنتك اه ممولفاش على تقليقتنا شوي وبادخل عليك...علاش اناديا گلتي ليها علاااش..هي بشوية عليها وكنا بنوصلوها ليها ولا نفرقو بلا اضرار...

ناديا دغيا نزلو دموعها وحطات ايديها على وجهها وبدات تبكي بقهرة وحزن...لاخرين مافهمو والو لطيفة عارفة كاينة شي حاجة كبر من الي عارفة هي...الوقت دابا مامناسبش انها تسول اش كاين ما كثر...خصوصا كاتشوف حالة خوها ومرتو على بنتهم الي مالقاوهاش فبيتها هازة صاكها ديال دراع وحدو حتى من تيليفونها خلاتو عند ناديا ماتسوقاتش باقي ليه...جاب ليها ايوب كاس الما مدو ليها...

لطيفة : شربي اناديا تنفسي...شربي وديري يقينك فالله...

سناء : باتكون غير معاه...حيث كون مامعاهش غايجي فاش صونات ليه خالتي ناديا...

ناديا"شادة الكاس فايدها" : لا مايصونيش...فعايلو فعايل هذاك ماتيجاوبش هي الوقت الي قاليه راسو...هي براسها كانت كاتعاني معاه...

لطيفة : ويلي ومالو الي مايجاوب...

م.حفيظ"الصمت"...

ناديا : منعرف مانعرف...

هزات الكاس بغات تشرب اتا طاح ليها من ايدها بواحد طريقة خلاتها تشهق وتهرس شقاااف واخا طاح فزربية رطبة وقريب والكاس زاج ديالو قاصح لكن تهرس بطريقة غريبة كلو تشتت...حطات ايدها على صدرها وخرجات عينيها...مولاي حفيظ حس بقلبو تكمش بالخلعة حتى هو تا قال...

م.حفيظ : الله....

قلب الواليدين خصوصا الى كانت كبدتهم صحيحة على ولادهم وخير مثال واليدين حبيبة فهاد اللحظة الي حسو بالفزعة فكبدتهم وقلبهم ملي طاح داك الكاس...حاسين بلي واقعة شي حاجة لبنتهم...الي فهاد اللحظة راها بين يدين المسعفين الي ماعرفو واش يخرجوه ولا يخليوه على راحتو خصوصا ان وجهو كان كايخلع وحالة حوايجو تقطع فالقلب...ايوى يا زمان هادي هي الدنيا وناسها بشر من خلق الله الجبار...الي كتب على واحد من عبادو هاد المكتاب...واقف جامد مامحرك لا هنا ولا لهيه...دخلوها غير تما قدامو فواحد البيت وجرو الستار عليها...واقف طبيب وحداه فرملية عبرات ليها الضغط وهو كايحل فعينيها ويضوي بالبيل...

طبيب"نزل عينيه بان ليه د.م" : دابا علمو دكتوغ منال مرنيسي...

خرجات الفرملية بسرعة لمكتب هزات تيليفون ودوزات لخط لطبيبة الي قال عليها علماتها بزربة تنزل عندهم حيث هي الي عارفين فيها نوبة اليوم...بدا كايدير هو فالاسعافات الي من اختصاصو حتى جات طبيبة الي عاود ليها ونزلات عينيها...

منال : عندها شي مشكيل من ناحيتك...

طبيب : مايحتاجش ل راديو او سكانير...ديري خدمتك نتي...

منال : الوغ دابا طلع عندي للاصال لفوق دااابا..جا معاها شي حد.

فرملية : راجلها امدام...

منال : علموه...يلاه...

خرج الطبيب وهما يخرجوها ودوزوها من قدامو عينيه عليها لكن مكانش معاها عقلا...ترفع وراسو كايزنزن عليه...جات الفرملية كاتحرك فيه وتعلم فيه ماجاوبهااااش...وهما طلعوووها...

بداو عينيه يتغمضو ويتحلو ماحس بيها ما بقى حس بتاحاجة..هاد المرة نوبة ديال صرع جات وطيحاتو وسط المستعجلات ردااااخ تا ضارو الي تما والي كان جاي وقف...في حيث الفوق غير وصلات دخلوها لقاعة الفحص...بزربة وجدات الايكو دارتو ليها تحت كرشها كاتورك عليه وتعاود..كمشات حجبانها ووركات على واحد زر باش تأكد..هزات لاباراي حركاتها بايدها ورجعات دارتها ليها كتورررك مزيااان...هزات عينيها فالفرملية...

منال : حيديهم ليها...

دارت ليگانت وجات لعندها حيدات ليها سروال والكيلوط هزات ليها رجليها فوق دوك رجيلات الي فالبياص...غطاتها بليزار....وهي دخل واحد الماجورة دايرة ايديها فجياب الطابلية شافت فحبيبة...

هي : شنو حالة هاد البنيتة ؟!..

منال"كادير فليگانت" : هادي راه مادام اللا اسمهان...

هي : تاتبان صغيورة...

منال : وعندها fau..sse-couche (اجه.اض)...

«وما ضَرني غريب يَجهلني، وإنّما أوجعني قريب يعرفني»

هاد العبارة يمكن تكررات للمرة الثانية...لانها انسب عبارة وادقها في تلخيص ما وقع ل "بشار" فالاول لكن من بعد الي وقع مؤخرا هنا غادي نقصدو حتى ماوقع حتى ل "حبيبة"...

تقدمات الماجورة حتى لعند البياص الي فيه حبيبة وهزات عينيها فالايكو ...ضارت عند الدكتورة منال...

اسمهان : cas urgent ?...

منال : ويي..جات فحالة انهيار عصبي ولكن الي شفت دابا من ناحية الجنين حاجة اخرى...

اسمهان : وي وي على ماشفت فالايكو الى عقلي ينفعني هههه...

منال : ههه ايوى راه الخبرة...

اسمهان : ماعندها ملف طبي ديال الحمل ديالها...

منال : منضنش عندها على مابان ليا ماعارفاش بلي كانت حاملة...حيث هادشي الي وقع بيزاغ ماتجيش تكونسيلطي...

اسمهان : باقي صغيرة تاتبان ليا وزوينة ماشاء الله...

منال"تنهدات" : دوام الحال من المحال...

اسمهان : اشنو باديرو ليها ؟!..

منال : غادي ندير ليها *** فالسيروم حتى نشوفو من بعد...

لبسات ليگانت وتسنات حتى حيدو ليها الفوقي ولبسوه لباس المشفى...ولبسوها كيلوط ديال فوطة صحية...قلباتها من تحت لا تكون معرضة لشي اغت.صاب او عن.ف...عاد جابو ليها الشوكة داروها ليها فالعرق وركبوها ليها مع سيروم ووقفات حتى عطاوها القنينة خاصة الي بغات عمرات منها فالشوكة وضربتها ليها فالسيروم....عبرو ليها طونسيون...

منال : راجلها الي معاها ؟!..

الفرملية : ماعرفتش ادكتورة خليتهم باش يعلموه مي ماعرفناش واش طلع ولا لا...

حركات راسها وهي تعلمهم باش يراقبو حالتها حتى تعاود ترجع..تابطات دراع ديك الماجورة وخرجو يشوفو بعض المرضى عاد باش ترجع ليها...

هي ممددة فداك البياص وجهها شاحب بزااااف...وحالتها تقطع فالخاطر وضيم القلب وتبكي العينين...وفنفس الوقت حالة الي مشاركها داك الجنين مكرفصة كثر...الوقت ديال نوبة ديالو تسالا...حتى حد ماحركو بامر من واحد الاختصاص شافو غير بالصدفة وعرف حالتو نيشان وهو الي هز واحد المخدة من البياص الي قبسو نيت بشار...ودارها ليه تحت راسو باش مايبقاش يخبط فالارض...حتى تهدن تمااااما...شوية حل عينيه شاف فيه...

طبيب : ça va monsieur ?...

ماعطاهش رد فعل...حتى من عينيه ما حركهمش كانو مفيكسيين فيه...شوية حتى غمضهم...

هاكا بقات حالتهم هو لتحت ماجابش لخبار باقي وهي الفوق.اصلا ماجايباش الخبار...حالتهم حالة وصعيبة بزااااف...خصوصا انهم ماكانوش عارفين بهاد الحمل الي تكون فواحد الليلة من الليالي الحميمية الي بيناتهم...

"فلاش" "باك"...

اهات مرتفعة وانفاس حارقة كاتلخص الشعور الرائع الي كايحسو بيه بيناتهم بزوج...علات راسها الفووق وغمضات عينيها وحطات ايديها ورا ضهرو غارصة ضفارها فيه...ماحيلتها لعنقها الي كلاه ماكلة وماحيلتها لنشوة الي فيها دابا...كاتحس براسها واخا شاربة المهدئ وراخي اعصابها لكن النشوة مفيقة فيها كلشي...تحتها كايطيب بالمهل..حتى كايكون غادي بشوية وشوية كايطلع الوتيرة العن.يفة الي فيه...

حبيبة : فففف...عافاك بشويا...

بشار"طلع راسو لوجهها شاف فيها كلها عرقانة وهو كثر...ماحتال تحل عينيها نزل لشفايفها واخذهم بين شفايفو بمصة طوييييييلة جرات كاع الريق الي فيها وبقى مفيكسي حتى خبط خبطة وحدة وهي تنين ليه بين شفايفو حل عينيه بانت ليه عاصرة عينيها وكلها كاترعددد...عاد طلق من فمها ونزل كايبوس فيها بوسة ببوسة حتى وصل لشحمة وذنها ومصها ليها...خشا ايديه تحت ضهرها وضار جايبها فوق منو وسع ليها رجليها وجاب الغطا عليها بدا كايجمع ليها فخصلات شعرها الي لصقو بالعرق...باقي كاينهج وهي كثر منو...دور عينيه لواحد الورقة محطوطة تما عادية ماشي ديال شي حاجة غير من وراق خدمتو قبل مايتوقف منها...وبدا ينش عليها"..

بشار"بنبرة مدعدعة" : سالا جهدك نتي ؟!..

حبيبة"سخفاانة" : امممم...

بشار : ماسمعتش...

حبيبة : مممممم..ع عافاك بلاتييي...

عض شواربو وخشا ايدو من تحت الغطا وشد ليها فليهوش مزير عليهم تا قفزات...هز ايدو وخبطها ليهم تا طارت ونزلت وبدات تعاتب فيه...

حبيبة : بشااار قصحتينييي...

نعل الي داها فوالديك...كتقوليه قصحتيني كايدوبل ليها دقة تا خلاتو يخبط على خاطرو...حتى حبس ورجع عبزهم ليها...

بشار : ديري معايا بالك حبيبة...

حبيبة"حناكها سخاان ناهيك على تحتها الي كايوزوز" : ممم نعام...

بشار : هاد الزعت الي كاتشربي ماعاجبنيش..غذا نتحرك معاك عند spécialiste الي مشيتي عندها نشوفو بلانو...

حبيبة : نقدر نحاول نحبدو راسي !!..

بشار : ماباينش ليا...

حبيبة : والله نحاول...بيت نجرب راسي...هي صبر معايا شوية بشوية...حيث هي فاللول عطاتو ليا هي باش منخافش المرة لولة وثانية...

بشار"هز ايدو وحطها على دراعها مگعدها حتى شافت فيه" : بنتي ليا بديتي تولفيه..."وسع عينيه شوية" حبيبة هاد المرض هذا ماعندو ماينفعك...ديها من عندي conseil هاد الويل الكحل ديال les calmants en général مامنجمش...اليوم نحيدو غذا نحيدو...بقيتي تما !!..انا الي عارف هاد الحبس فين كايدي البشري...هانيا ؟!..

حبيبة"حركت راسها بزربة" : فهمت...

بشار"ضربها لترمتها بخفة" : تگعدي...

نوضها من عليه وتلوات فليزار...اما هو ناض عريان والله ماحار فيها واش تحشم ولا تلوح راسها من سطح...خلاها متكية فالفراش ومشا هو دوش..بقات شحال متكية كاتفكر هضرتو الي كان كايقوليها وينصحها بيها كاتحس بيه بحال الى مجرب...

وصلات الساعة 12 ظهرا...بدات كاتحل فعينيها شوية بشوية...كاتشوف غير ضبابة وغالب عليها شعا بيض...الي غطاه خيال شخص وقف عند راسها...

الممرضة : مادام !!..صافا ؟!..

عينيها كانو محلولين فحال زغيبة...كاترمش فيهم شوية بشوية حتى رجعات غمضاتهم تاني مغيبة...حالتها حالة وحالة بشار حالة اخرى...الي بدا يحل فعينيه شوية بشوية حتى دور راسو لقى راسو فواحد الغرفة مجبد...تگعد بجهد ونزل من داك البياص كايقلب عليها بعينيه وبقلبو...حتى بدا كايحل فالستائر على عباد الله الي كاينين فديك ليرجونص ماتسوق كاع ليهم كايقلب بجهل من لداخل لكن من برا كايبانو غير حجبانو الي مغوبشين بزاف وعينيه حمرييين...باقي عيان من النوبة الي غيب موراها...مع المستعجلات فيهم بيوتة كل بيت فيه ستار مغطي الناس الي جاو فحالات مستعجلة...حل واحد الستار وهي تبان ليه وحدة مغطيية كاملة وشعرها بني بحال حبيبة يلاه غطاوها بغاو ينزلوها ل la morgue....تلف واحد تلفة تا مشا كايجري ليها تعكل وهو يدفع واحد الجهاز كان محطوط حداها ديال صعقات الكهربائية...وشدها من ايديها ونطق برعب عليها...

بشار : حبيبة !!...

حيد ليها ليزار من على وجهها وهي تبان ليه وحدة اخرى طلق من ايدها بجهد حتى تم داخل واحد من المسعفين الي تما حيث شافو خارج من فين كان ناعس وتبعو....

هو : تهدن اسيدي...ماشي هي المدام ديالك...

بشار"خرج فيه عينيه وقرب لعندو كلو كاينهج باقي تيشرت ديالو هكاك مقطع" : فين هي ؟!..

هو : طلعوها لفوق...اجي معايا نديك عندها...شوية بعدا ؟!..

بشار : تحرك عليا من الهضرة ديال القل..اوي...

لاخور غوبش فيه بغا يبدا يدور فيه وهو يدفعو بشار من كتفو..

بشار : تحاارك الحبس...

شاف تا عيا وهو يميك حيث شافو حالتو ملي جابها ليهم حتى دخلوها وكيفاش طاح وهما عارفين ان اصحاب الصرع من الي يلاه كايفيقو من نوبة كايكونو تالفين وخاصهم غير ينعسو وهو تا داك نعاس منعسوش كي ناس وحيث وصا عليه داك الطبيب المختص الي شهد حالتو...

غادي وراه بلا عقل..مرة مرة كايبقى يتمتم بالسبان وبشي كلمات ما مفهومينش...مابقاش تسوق لدواه ديال صرع ولا اي مهدئ اصلا مادارو ليه والو كانو كايتسناوه حتى يفيق ويعرفو منو واش كاياخذ شي دوا لهاد النوبة...خلا عباد الله الي تما كلشي كايشوف فيه شي يتحسر على حالتو وشي كايضحك وشي غير كيشوف وشي مخلوع...اما هو كان معزول فعالمه وحدو كايتسنى غير حبيبة يشوفها قدام عينيه فايقة...المسعف ماقدرش يطلع هو وياه فالمصعد وطلعو فدروج...حتى وصلو لطابق وبالصدفة بانت ليه اخصائية نساء وتوليد خارجة بحال بان ليه الملاك المنقد....

هو : مادام منال الزوج ديال السيدة الي طلعات عندك قبيلة...

منال"شافت فيه وشافت حالتو كلو ينهج شعرو تخربق وتيشرت مقطع..تنهدات عليه وحركات راسها لممرض" : اجي معايا موسيو..

بشار : فين هي ؟!..

منال : هاهي هنا موسيو...

تبعها فين مشات حتى دخلاتو لواحد البيت بدا كايقلب بعينيه عليها حتى مشات بيه فواحد الجيهة فيها زوج اسرة بيضاء وهي تحيد الستار وحركات ليه راسها...

منال : تفضل اسيدي...

هز عينيه لفين وراتو وهي تبان ليه...اصعب منظر شافو فحياتو من بعد منظر باه فاش طاح مي.ت بسباب الرصاصة الي ضربو بيها هو منظرها وهي طايحة بين ايديه ود.مايات الي كانو نازلين مع رجليها بداك نزيف الي خربق ليه عقله وسكت ليه قلبو...ماعرفش داكشي منين جا واشنو سبابو...ماعارفوش وماكانش غايعرفو حيث عمرو ماعاشو...عاش منظر واحد هو ديال باه ود.مايات فصدرو لكن هذا كان جديد عليه...هادشي كامل داز بين عينيه وهو واقف مفيكسي الشوفة فيها...ناعسة ومغطينها بايزار ابيض والسيروم فايدها جامعين ليها شعرها..الطبيبة بقات كاتشوف فيه كيفاش مصدوم وعينيه عليها كاينهج وهو كيشوف فيها...نزلات عينيها لايدو الي كان مزير عليها على شكل قبضة حتى تسقط منها د.م...شافت حالتو ماشي تال تم ماقدراتش تقوليه اش كاين...

منال : تقدر تبقى معاها حتى تفيق...ولكن حاول تجي عندي لمكتب باش نهضر معاك...

ماعطاها حتى رد..حدرات راسها ومشات خلاتو منو ليها...بخطى بطيئة على غير عادتو فيييين داك الانسان الي عندو ردود افعال غير مسبوقة ولا على غفلة...دابا متقدم لعندها بخوف بحال كايشوف فشي زاج خايف يقرب ليه بزربة ويتهرس...حتى وقف عندها...تحنى شوية بشوية لعندها عينيه عليها كلها..وجهها عينيها فمها الي ولا بيض...ايديها الي وحدة فيهم فيها سيروم...لرجليها الي مغطيين ولشعرها الي جمعوه ليها...قرب لعند وجهها بزاااف وشد ليها ايدها زير عليها بايدو...

بشار"بصوت منخفض مراعي ليها" : حبيبة...حبيبة...مالك ؟!..

غير ما قاليه راسو هضر را غاتفيق وتجاوبك...مافاقتش ومادارت حتى حركة...ماحكرش عليها وهو ينوض دور عينيه لواحد الكرسي تما جرو وهو يجلس فيه ورجع شد ليها ايدها...سرحها وباس كفها مطوووول...مدة وهو حداها شي نص ساعة حتى جات الممرضة وقفات عليهم...نطقات بصوت منخفض...

هي : موسيو الدكتورة بغات تهضر معاك...

بشار"الصمت"...

هي : عافاك اموسيو حاول باش ماكان تمشي عندها..وخليني نهز ليها الد.م باش نديرو des autres analyses...

بشار"هز فيها راسو مخنزر" : علاش les analyses ?..

هي : ضروي اموسيو...فاش تمشي عند دكتوغ غادي تعرف..وخاص تكمل باقي الاجراءات دخول ديالها...

بشار"نزل راسو عند حبيبة دور عينيه على وجهها..ونطق وعينيه باقين عليها" : مانصيبش نتفاوت على مرتي...

يتبع...