محتوى القصة
يمكن هذا اجمل منظر فاقت عليه حبيبة...اول مرة تشوفو كايصلي واول مرة تسمعو كايقرا القرآن..وهذا ان دل فانه دل على انه اولا رتااح ملي بدا يصلح علاقتو مع الله...رتاح ملي قرا القرآن...رتاح ملي تقرب من الله...ثانيا غريزة الابوة تحركات فيه خلاتو يتقرب من الله الواحد الاحد الي قادر يحمي ليه هاد البيبي الي فخطر هو ومو...
مسحات عينيها الي دمعو من المشهد وبقات مبتاسمة حتى بان ليها كايسلم...بقى شحال عاد ناض كايطوي فسجادة وهي تبان ليها بغات تنوض...
بشار : شش...فين ؟..
حبيبة : بيت نمشي نتوضى..اه مايمكنش نبقى هي ناعسة..طواليط ماشي ممنوعة...
بشار : تهدني فخطوايك...
حبيبة : ههه واخا ماتخافش...
مشات كاتحرك فراسها وتضحك حيث ولا داير ليها كثر من الما القليل حسات بخوفه عليها وعلى ولدو فشي شكل...مشات بخطوات بطيئة حتى لطواليط...حيث قالت ليها طبيبة ترد لبال حتى لخطاويها ماتمشيش كيف كانت نولفة بزربة ولا تنقز ولا..خصوصا فهاد الفترة الي مورا شهر كاتولي اكثر حساسية وخصوصا ان البيبي عليه خطر...توضات وخرجت من دوش لبيت لبسات عبايتها صلات صلاتها تاهي...غير كملات شد من عندها صلاية طواها...وهي حيدات لعباية وتخشات ففراشها حيد الفوقية وتخشا حداها جرها عندو معنقها...
حبيبة : تانتا بايخصك تنعس...
بشار"شاف فالساعة كانت الخمسة" : شوي ونتحرك برا نشوف شي خدمة...
حبيبة"بدات كاتفوه" : ماكتعياش ابشار..الى بيتيني نحاول على راسي حتى نتا دير نفس شي..تايبقى بالي معاك السهير نتا عارفو مامزيانش ليك..والستريس حتى...
بشار : نخلي الخدمة واگفة ؟!..
حبيبة : ماكاينش الي يشد عليك..هي نهار عطي لراسك راحة..اه واخا نبعد على ستريس هي هاد الحالة باتخليني نتسريسا من جيهتك..عافاك رتاح شوية...
مجاوبهاش وهي تنهد بقلة حيلة عارفة ان الخدمة عندو دابا مزيرة حيث خاص يبقى حتى توقف عالصح من ناحية ديباغتومون الي هو مكلف بيها حتى يمشي سيستيم متماشي مع ديال برلين وبهاكا يرجع لتما...
حبيبة"هزت راسها شافت فيه" : غذا باتعطيني الطبيبة لادوز الي بايخصني نشرب فهاد الشهورة...باتمشي سناء تجيب ليا لوغدونونص..
بشار : بلاش..نتحرك انا عندها..مزيان نسمع من عندها لي ديطاي راسي...
حبيبة : صافي دابا نگول سناء متمشيش...
بشار"حرك راسو وهي تنغزو من دراعو تا نزل عينيه لعندها شافت فيه ببرائة"...
حبيبة : بنگوليها بلي بيت نمشي معاك لداك الاجتماع..و..
بشار : لا..ماعندك فين محركة تم..
حبيبة : ويلي ماغاديش ليه ؟!..
بشار : سي غادي..
حبيبة : ايوى نمشي معاك..ماتگولش ليا لا هي تهنى انمشي..
ماردش عليها ديك ساعة..هز تيليكوموند لاكليم قاد الدرجة ديال البرد...وقاد ليها الغطا والمخدة تحت راسها...وتخشا فالفراش تاهو..
بشار : لا...(وطفا الضو)..
خلاها موسعة عينيها وترمش فيهم...هي عاد معاودة ليه على المخاطر الي خاصها تبعد منهم..بيما فيهم كثرة الحركة...التوثر وهذا اكثر حاجة ممكن تواجهها وهي معاه فالاجتماع خصوصا انه فيه ناس عقلهم عامر غير بالخدمة والصفقات وهو خاصو يبقى مركز غايبقى بالو غير معاها تكون مرتاحة واش بيها شي حاجة وعاد الحركة...زفرت بجهد وهي دور ونعسات بلهلا يحزقو ليها متمنية غذا تعاود تفاتحو ويبغي ليها حيث بغات تحضر معاه منها تبدل الجو ومنها تكون معاه كزوجة بواجب...
صبح الصباح...تسللات اشعة الشمس تا غمضات عينيها لكن بسرعة حيدات وجا ضل الستار الي كحز بشار حاجب عليها الاشعة...قرب لعندها خاشي ايديه فجيابو...
بشار : هانيا...
حبيبة"حركات راسها ونطقات بصوت بح" : صباح الخير...
ناضت من بلاصتها وهي تشد تحت كرشها وتمات جايا حتى تقد غوباشتو وقرب عندها بزربة حط ايدو فين حاطاها...
بشار : ياك لباس ؟!..
حبيبة : لا ماكاين والو هي بيت نشد وصافي.."شافتو كايشوف فيها بشك"..والله ماتخافش...اصلا بتمشي عندها سولها بتگوليك عادي...
طلق منها وهي تم غاديا خارجة....غير خرجات مشا هو لكوزينة هز داك البلاطو حطو فوق طابلة الي قدام فوطويات...جلس تما حتى خرجات وهو يبان ليها جالس قربات عندو وهو يبان ليها بلاطو حاطو تما...شد ليها ايدها وجابها جلسات حداه...قاد ليها مخدة ورا ضهرها..
حبيبة : شكون صاوب هادشي ؟...
بشار : انا...
حبيبة"حلات فمها" : هء ؟..تتعرف طيب ؟!..
بشار : youtube..
حبيبة"بقات ترمش فيه" : ها ؟!..
بشار"گرن حجبانو وضار عندها بشوي" : ؟؟..
حبيبة : يوتيب "شيرات بصبعها" باش تعلم دير اومليط...
بشار"غمض عينيه وبدا يمسد فيهم بصباعو تا نفخ" : يا حبيبة فطري...
حبيبة : واخا..ولكن ؟..(هز حاجبو) هههههه...شكرا...
حطات راسها على كتفو بشكر ورجعات تاتشوف فالبلاطو...فيه مقيلة ديال اومليط...فرماج جبلي زيت زيتون كومير وكرواصة الي كاتعجبها..وكاس ديال الحليب بارد وكاس عصير...وهو حاط كاس ديال القهوة كحلة بلا سكار...شوية تا بان ليها هز واحد لاتخوس عطاها ليها...
بشار : فيها دواك..شوفي باش تبداي نشوف معاك تم..
حلات لاتخوس الي لاحظت انها لاتخوس الي كانت فالاصل ديال دواه تبسمات وهي كاتجبد فدواها جبدات زوج باكيات وراتهم ليه..
حبيبة : هادو ولكن حتى نفطر...
هزات كاس ديال الحليب سدات منخرها وهي تكا عليه تا بدات تخرج نفس باش تحيد ريحتو اصلا مكتحملش الحليب بلا حمل.. غا هي حيدات صبعها من نيفها وهي طلع معاها تبويعة..دارت ايدها على فمها وشدات فيه وهي تنوض...ماجات فين تمشي لطواليط حتى خوات داك الحليب الي شربات ماخلاتوش تا يطل على المعدة كيدايرة لوقت تم...
كمش عينيه كايشوف فداكشي...و ياا هلا بالاعراض ويا هلا بالوحم الي ممكن غايجي من بعد الى بقا الجنين وماوقع ليه والو...ويا سلام عليكم يا هرمونات مخربقة...وهاهو غايعيش تجارب جديدة...شافت فيه بعينين مغرغرين بسباب ترجاع...عنقها بجنب ومشا بيها لطواليط حتى غسلات وجهها وحالتها...بان ليه وجهها صفار...
بشار : ديجا وقع ليك هادشي...
حبيبة : البارح الي بدا تايجيني ردان..دابا فاش شربت الحليب اصلا متنحملوش ماعرفتش حسيت بريحتو فشكل...
بانت ليه كاتهضر سخفانة وهو يغفلها وهزها بين ايديه موسعة عينيها...داها لفوطوي تكاها تما مشا لبيت جاب مخدتها...وقرب ليها طابلة...
حبيبة : اومليط...
بشار : ؟؟..
حبيبة"حركات راسها بغات تبكي" : مابيتوش...
بشار : et alors ?..
حبيبة : ناكل كرواصة اصلا مشهياها وداك عصير...
مد ليها كرواصة شداتها فايدها وبدات تاكل وتنتش...عطاها العصير ديال البرتقال عصرو راسو فديك الماشين ديالو...كاتاكل وكايشوف فساعتو واخا تعطل على الخدمة...هز كاسو كايشرب فقهوته...
حبيبة : هي سير ماتعطلش على خدمتك...
بشار : ديجا علمتهم شنو يديرو گبل مانجي...مازال نسبق gynéco ديالك نشوف البلان ديالك كيفاش...
حبيبة"حركات راسها ورجعات كاتاكل حتى كملات عاد عطاها دواها شرباتو ولي فيتامين ديالها..شوية وهي تع
نطق"..
حبيبة : بشار..."ضار شاف فيها"..فنظرك ب..
سكتات شوية ورجعات كملت تقولي الهضرة كاتد.بحها من لداخل الى دوات فهاد الموضوع لي لحد ساعة باقي كايجيها غريب انه توصل بيها لهاد درجة تولي ترجى من الله باباها يحن فيها وترجع علاقتهم كيف كانت"...
حبيبة : بابا الى عرف بلي حاملة باعرف راني بيخير ويرتاح من جيهتي...ويقدر يهضر معايا...
بشار"ماجاوبهاش حيث ماعرفش واش ممكن ولا لا"...
حبيبة : ماما فاش عرفات فرحات ولكن مقلقة من جيهتي..عرفتي هاد اليومين فينما لقات فرصة تاترسل ليا اوديو واش مكنحس بوالو واش مزيانة (كاتهضر وعينيها مغرغرين)..سناء حتى هي عميتو خويا ايوب تايسول عليا من عند ماما...خوتي حتى هما من نماريهم...كاملين معايا وفرحو ليا وكاملين كانو تايتسناو باش نگولها ليك...
بشار : شنو البلان دابا ؟!..
حبيبة : ماما تايبقى بالها معايا باتجي عندي تجيب ليا شنو تشهيت..
بشار : مشهية شي حاجة ؟!..
حبيبة"نزلت راسها" : مشهية نعنق بابا ولا هي نسمع صوتو..مشهية نگوليه بلي حاملة وبايجي البيبي الي كان تايگوليا بنشدو ليك ونربيه نتي بتكوني مع راجلك صافي داك ليا خلي ليا خليفتك (ضحكات تا نزلو دموعها هزات كفها كاتمسح فيهم تقولي كاتمسح فالجمر الي فقلب بشار)...بيت نعيط ليه ولا نرسل ليه الايكو..عندي pdf...ولا نمشي عندو ؟!..
بقا كايشوف فيها كيفاش كاتعاود..كايسمع فنبرة صوتها الي مرة كاترعد كاتحسك ليه خاطرو...ولا الحماس الي كادوي بيه باش تمشي عند باباها ولا تعيط ليه...كانه هذا هو الخيط الرفيع الي غادي يصلح علاقتها مع باباها هو هاد "البيبي"...هز نفس من صدرو مابغاش يقول شي حاجة دابا...مسح ليها عينيها من دموع...
بشار : ماعنديش جهد مزال نشوف هاد البكا..ماتبرزطينيش من جيهتك..مزيان ؟!..
حبيبة : انا هي بيت نتشاور معاك...
بشار : لا..
حبيبة : علاش ؟!..
بشار : مازال الوقت مكسحة عندو...يگد يگوليك شي حاجة تكسحك ونتي عندك des problème فصحتك..مانصيبش نغامر بيك...
حبيبة. : نجرب ماشي مشكيل ولفت...
بشار : يا حبيبة لا..."خرج عينيه بتأكيد تا خلعها" وصيتك..
تنهدات وهي تحرك راسها...مشا معاها تال بيت تكات فناموسية...تحنى باسها فشفايفها بوسة مطولة حتى غمضو عينيهم بزوج وتعمقات ديك القبلة الي كملات بتبادل قبل بيناتهم تا ختمها بلسانو الي ضار على فمها من لداخل عاد مشا بشفايفو كايبوس تال عنقها باسو بوسة مسموعة خلاها تنهج...باسها فراسها ومشا تا وصل لبيت وهو يدور عندها...
بشار : نشوف شي حد يبقى معاك...
حبيبة : باتجي سناء تبقى معايا حتى تقرب تجي وتمشي...
بقى كايشوف شحااال فالاخير حرك راسو وهو يخرج خلاها متكية ففراشها واخا بالو غايبقى معاها اكثر من العادي...نزل من العمارة كايشعل فالگارو ديالو...ركب فسيارتو ومشا لاشغالو...
فنفس الوقيتة لكن فغير مكان...بالضبط فالفيرما...كان واقف الحاج ومعاه حسام ويوسف...حتى دخلات واحد البيكوب نزل منها اشرف ولد الحسنية...
اشرف"باس ايد عبد القادر" : الحاج بخير...
ع.القادر : الحمد لله...مضرا المقدية هي هاديك...
اشرف : بانيوات ديال دجاج ناضيين داكشي علاش وصيتيني...واللحم جايبو بن عگيدة من الفيلاج...خاص شي خور..
حسام : الخبز انا غانجيبو مع هاشم...
اشرف"حرك راسو وضار هنا وهنا" : الواليدة فين ؟!..
حسام : مع الواليدة فالكوزينة سايرة تفطر غا خليها مدهية...
اشرف : مزيان نيت مامساليش هاد نهار عايشك رد ليها البال لاحفظك...
ربت ليه على كتفو...جاو شي خدامة هزو البانيوات كبار فيهم دجاج داوهم لكوزينة الي لور فين كاتكون الطيابة فاي مناسبة يدخلوها تما...شوية صونا تيليفون يوسف وهو يبتاسم تا بانو سنانو بالفرحة دور تيليفون لحسام كايوريه...
يوسف : بشار خويا...
حسام : هههه جاوبو دغيا...
حرك راسو وجاوب فالبلاصة بدا كايهضر معاه...اما فالدار لداخل كانت واقفة مباركة كاتنصب فالغذا وناس العزاية فالصالون معاهم عيدة...جات كريمة حطات صينية ديال اتاي...وهي توقفها مباركة...
مباركة : تي خالتك ماناوياش تجي ؟!..
كريمة : لا مابغاتش يلاه عيطت ليا نجمع ليها شي حوايج غايجي ولد خالي يديهم ليها...
بقات غير عيدة وسعيدة وشي عيالات من العائلة طلبات منهم عيدة يبقاو تاتسالي صدقة الي دايرين ورا صلاة العشاء...ضارت عيدة لعند سعيدة ودوات غير بينها وبينها....
عيدة : توريا ماجاتش ؟!..
سعيدة : لا الالة...مابغاتش هادشي الي گالت لكريمة فتيليفون...
عيدة"غوبشات وهي تحرك راسها وسكتات"..
سعيدة : فخبارك الخبار زينة والي گاليك الالة لا تگولي ليه هههه...
عيدة : گولي بنيتي فين بينا وبين شي خبيرات زينة...
سعيدة"بفرحة" : مرت بشار راها تولد (حاملة )..
عيدة"دارت ايدها على فمها" : اللهم ليك الحمد..
سعيدة : ولبارح فراسي..وماصبت وقت نعاود ليك راكي شتي العزو كنا مدهيين عما المو.ت...
عيدة : الله يابنيتي خبيرة زينة هادي (عينيها غرغرو)..الله يفك وحايلها..ماعرت كيداير وليدي بشار وفرحتو گداش..."حطات ايدها على صدرها" غا نسالي هاو نمشي عدها انا ونتي نشاعلاه...
سعيدة : ضروري...
عيدة : لا مشهية شي حاجة گوليها نجيبوها ليها منين ماكانت...
سعيدة : هاد ساعة غا العيا عندها مشكيل الالة مشروط عليها تبقى بلاصتها وماتحرك..الحمل صعيب عدها تاهي غا خليها على الله...
عيدة : الله ياربي على بنيتي..شوگتيني عليها...
سعيدة : يسالي هادشي ونمشيو وليني لا تعلمي حد تا كريمة الالة..حسن مايعرف حد تايزگا داكشي الي فكرشها...
عيدة : اوكيه...
طبعا هادشي مايخفاش على عيدة ولا سعيدة فهاد الامور ديال يخبيو هاد الموضوع خصوصا فاش المراة كايكون عندها مشاكيل فالحمل ولا فاش كاتحمل المراة بعد عناء طويل ديال العقم كايقوليك مايقولوها لحد حتى دوز فترة ويتبت الجنين..مخلطين بين العين حق وبين الحضية وبين انه يطبقو قضية الكتمان باش تقضى الحاجة...رجعات كاتهضر مع دوك العيالات تا جاو وحدين اخرين...اما ربيعة ف خلاتها عيدة على خاطرها فدارهم تا دير ليها مجية خاصة تجيبها معاها...اما سيحمد ملي علمو بوه يرجع ماقاليه والو وخلاه على راحتو لكن وصاه باش يحاول يجي لانه فالصدقة خاص يكون حاضر حيث العزايا كايسولو عليه...
مراكش...
قرب الظهر يأذن جات سناء لعند حبيبة وجات جايبة معاها طاسات فيهم الغذا الي صايباتو ليها ماماها بتخبية...تا حطاتهم ليها وبدات توريها شنو صايبت ليها...
سناء : هادي فيها صالاد ديال الخضرة وبلاصة طون دارت ليك لاداند طريفات...وهنا كاين دجاج محمر فالفران وهنا دغميرة الى قدرتي تاكليها مزيان ماقدرتيش را دايرة بحساب گالت ليك الموحمة غالبا مكتحملش المرقة...
حبيبة : دابا متنحس بوالو ماعرفتش حيث يومين هادي درت طاجين مابرزطاتنيش ريحتو...
سناء : مزيان ها دغميرة دارتها واعرة...وهنا كاين صالاد فخوي وهنا عصير باربا خضرة مزيان ل فقر د.م...
حبيبة : ههه بزااف ويلي هاد دجاج اه ديال عراضة...
سناء : راكي عارفة خالتي ناديا...نوضي توضاي صلي ها ظهر يلاه سكت..انا غيگلي احبيبة...انمشي ندي هادشي يوصل الغذا نسخنو...
حركات راسها وهي تنوض معاها بشوية مشات لطواليط توضات وخرجات صلات الظهر...وبقات جالسة فوق صلاية حتى صونا تيليفونها ناضت بشوية عليها جلسات فوق ناموسية وهي تجاوبو عرفاتو غايكون هو حيث كل شوية يرسل ليها ميساج يسول عليها حتى غبر ساعة وزيادة عرفاتو غايكون فشي اجتماع...طمناتو عليها عاد قطع وهي تدخل سناء مسكينة هازة طابلة من برا حطاتها قدامها...
حبيبة : اويلي غانخرج علاش معذبة راسك...
سناء : عافاك خلينا شادين معاك الخط تاتولدي والى باقي فششتك جري عليا...
ضحكات حبيبة تسناتها حتى حطات طابلة وهي تشد فيها تا ضارت عندها ماجات فين تسولها حتى تلاحت عليها عنقات عناق بلا مادوي فهمات سناء بالي شكراتها...بادلتها سناء العناق وهي تبعدها...
سناء : غاتبكيني ازمر..راكي ختي اصاحبتي..جلسي لارض هاني جايا...
حركات راسها..خرجات سناء من البيت ومشات جابت الغذا كاع داكشي الي صيفطات ليها ماماها حطاتو...وحطات ليها واحد ديسير ديال باناكوطا شراتو ليها سناء من برا...تغذاو واخا حبيبة كلات غا شوية ماقدراتش تكمل ولات كاتحس بترويعة غاتجيها وحبسات هزات غير داك صالاد فخوي هي باش دبقت...جمعات سناء داكشي ونقات وهي تجي جلسات حداها كايتفرجو...
حبيبة : سناء...
سناء : نعااام...
حبيبة : بابا كي صبح اليوم...
سناء : اوييلي صبح ناشط...تقادو شي امور فدار دباغ وجا البارح فرحان و واحد من دوك الي كاريين عندو المحل بغا يطلق الكرا فرحتو ماتعطيها لحد...
تبسمات حبيبة وهي كتسمع ...شوية وهي تنوض سناء تجاوب الحيبان ديالها مشات لصالون تاخذ راحتها...وبقات حبيبة كاتفرج لكن سااهية..ضارت ناحية تيليفون هزاتو وهي تدخل لواتساب بقات طالعة هابطة حتى استقرات على المحادثة ديال باباها...شي حاجة فيها لداخل فرحاتها ورتاحت ان باها ناشط ومرتاح...دخلات لتما كاتصرط فريقها..ماعرفتش مالها تابعا قلبها حيث توحشاتو بزاااف...ماعقلاتش على راسها تا مشات لصورة الايكو الي عندها فالتيليفون وهي ترسلو ليه..وكتبات تحتو...
حبيبة : هذا بيبي ثاني..ربي كتبو عليا باش تولي جد ههه وتربي الخليفة ديالي كيف كنتي تتگوليا ههه...
شوية حتى بانو ليها شريطات زرقين...عرفتو المعنى ديال قلبك يتهز بالمعنى الحرفي هو ما وقع معاها تا حسات بيه غايسكت حسات بوجيعة فكرشها من التوثر..لكن هادشي مايجيش قدام الصدمة ملي شافتو تعطل وكتبات ليه
حبيبة : بابا جاوبني عافاك..
لكن لقات صورة البروفيل تحيدات وهنا عرفات انه بلوكاها..
خاطرها تهرس مية شقفة وشقفة فالثانية الي عرفاتو بلوكاها...قاصحة بزاف على الخاطر انك تلقاي اعز انسان الي معزتو فايتة القياس يبلوكيك خصوصا انك جايا تقولي ليه شي حاجة بحماس وفرحة و "امل" كبيير انه يفرح..حبيبة وماقاليها راسها ومازيدوها هرموناتها وشوقها لكبير لباباها...فجأة طفا ليها داك الحماس وهرس ليها ديك الفرحة شقاف...فاللول ماثيقاتش انه بلوكاها..خرجات من الواتساب وعاودات حيدات صفحة الواتس وعاودت دخلت رسلات ليه بابا بابا بابا شي عشرة المرات...دوزات ليه الخط والو...هزات راسها بلا عقل وعيطات...
حبيبة : سنااء...سناااء...
سناء"جات لعندها" : نعام هاني...
حبيبة : عافاك دخلي واتساب ديالك وسيري لنمرة بابا...
سناء"باستغراب" : علاش...
حبيبة : وا هي (صوتها تقج) ديري اش گلت ليك...
سناء : واخا...(مشات لنمرة بابات حبيبة) هاهي...
حبيبة : اشمن صورة داير ؟!..
سناء : هاديك الي تصور مع معتز ووردة فالصالون...
حبيبة قلبها تعصررر حيث اصلا كان داير صورتها هي وخوتها ف صورة البروفيل ومن الي حبيبة اختارت ترجع لراجلها موراها بشحال حيد صورة ودار غير الي قالت ليها سناء...هاديك اول غصة كاتواجه ديك الوقت كانت عاطياه كامل الحق ودايرة بهضرة راجل عمتها ونيت عمتها توقع اي حاجة لكن حاليا الغصة كانت قوية على قلبها...
سناء"كاتحرك فايديها قدام وجه حبيبة" : هيي حبيبة مالك...
حبيبة"حاولت ما امكن تحبس دمعتها طيح حاولت ما امكن ماتبينش لسناء واخا را باين انه تزيرات حتى حطات ايدها تحت كرشها مصدومة حالة فمها عينيها مارمشوش...هزت عينيه فسناء وحركت راسها"..
حبيبة : بابا ب بلوكاني...
وديييك الدمعة الي عياات تحبس نزلات بسلاسة منزلة معاها حرقة كبيييرة هي عنوان لحرقة القلب وكسر الخاطر من اقرب شخص لحبيبة الي عمرها فحياتها ماكان كايجي لبالها هادشي...وهي الي كانت دايرة وحدو فالواتساب فقائمة المفضلين...ديما كايبقى هو فالقائمة وديما هما كايهضرو مع بعضياتهم واخا فالدار هي فالبيت الفوق وهو فالبيت لتحت ويتراسلو بفيديوات الضحك ولا اوديو ولا...
~~~
حبيبة : بابا حبيبي...(صونات ليه باش دخل لواتساب)..
م.حفيظ : اش تما ؟!..
حبيبة : باقي فايق...
م.حفيظ : لا سارح عجول لاخرة هذا هي القرين الي تايدوي معاك...
حبيبة : هههههه واخا فيق بيتك...
م.حفيظ : يسمعنا خبار الخير...
حبيبة : انصيفط ليك واحد الفيديو بتش فو ياك وبتعيطيني رأيك فيه...
م.حفيظ : فيه مايتحنجر ؟ (مايتكال)...
حبيبة : ويييلييي داكشي الي تايعجبك....
م.حفيظ : سربي صيفطي...
بدات كاصحك وهي ترسل ليه الفيديو كان عبارة على جناوح دجاج مطيبين بوصفة كورية بين الحار والعسل المنظر كان كايشهي بزااف...تسناتو تا وصلو وشافو وهو يصيفط ليها اوديو...
م.حفيظ : افين هاد الخير ؟!...
حبيبة : عرفتي الدورة تگيليز من عند لاگار ديال تران كاين واحد دخاشش تما اه نديرو هي المابس ولقاوه...
م.حفيظ : اهياتا فين تتعرفي دخاشش الي تم...
حبيبة : واره محل من ماحالاتنا كاين حداه انا عاقلة على سمية فايت شفها تم هي ممأكداش...
م.حفيظ : مممم...الحاجة ناديا امتى عندها كونطرول طبيب ؟!..
حبيبة : غذا ولكن باتبقى تسنى على حسب نوبة...وغذا خوتي مغديين فالمدرسة...انا عندي خاوي فالعشية ودادا ماكايناش حيث تنين روپو ديالها...وايوب راك عارفو ماتيجي تالليل..ونتا بدير واحد الوقيت مع الغذا نمشيو نجربوهم !!؟..
م.حفيظ : يعني مهندسة ليا الوقت النت الهم...
حبيبة : هههههههه...اش گلنا ؟..منها نيت نخرجو بيت نهضر معاك على التوجيه الي درت واش نكمل فيه راك عارف الباك عندي العام جاي...
م.حفيظ : يا بنت الهم تتعرفي تاكلي ليا الدماغ...شوفي بتزمتي القضية ومايعرف حد...ناديا بندور معاها تمشي تاكل لوبيا فدرب ضباشي...
حبيبة : ههههههه صافي مشات...يخليك ليلي...
م.حفيظ : يلاه دوبي بيت نعس فيقتيني البالا...
~~~
قالتها ليها بصوت مكسور وحسرة وقهرة على راسها وعلى علاقتها ب باها كيف كانت وكيف ولات...لهاد درجة باباها ماتفهمهاش وهو الي كان اقرب شخص واكثر شخص كاتعاود ليه غير حيث كايفهمها ومصغر عمرو باش يواكب تفكيرها...علاش مافهمهاش دابا هاهي فرحاتو بخبر حملها باش تبين ليه راه هي دابا بيخير وغادي تجيب ولد من بشار الي خافو منو عليها..
هزات ايدها ومسحات دوك دمعات وسكتات مابغاتش تبكي مابغاتش تستسلم للانهيار...حركات راسها وحدراتو وهي تنهد تنهيدة بحال شهقة ...سناء ماعرفات باش تبلات تاهي تصدمات بحالها لهاد درجة وصلات بيه يدير هاكا ؟!..مالقات مادير من غير تجرها لعندها وتعنقها...
سناء : حبيبة عافاك ماتقلقيش..حاولي على راسك راكي عارفة خطورة التوثر على البيبي...
حبيبة : لا ما مقلقاش...ياك گاليا عمي العربي توقعي كلشي..ياك..
سناء : وي توقعي كلشي وصبري...
حبيبة : اه انا صابرة هي دموعي على سبة وصافي هههه ماعرفتش مالي..(كاتهضر وصوتها كايتقج مرة مرة بحال الى كاتحاول تزير ديك البكية ماتخرجها)...تانا تانطير گاليا بشار هي صبري راه باقي مقصح وماسمعتش...
سناء : ودابا سكتي وميكي راه عارفة غير معزتك الكبيرة عندو خلاتو يتقلق بحال هاكا حتى انا ماما راه فايت مبلوكياني (كذبت عليها باش تريحها)..حيث مابغيتش نكمل فواحد تخصص ودرت الي بغيت وبلوكاتني شحال من يوم ماهضراتش معايا وماشافتش كاااع فوجهي...
حبيبة اكتفات بالصمت ماشي حيث مالقات ماتقول وانما الخاطر الي تهرس خلاها تسكت سكتة وحدة وتكتافي بديك الجرح الي كاينزف من لداخل...
وصلات العشية...الساعة الخامسة والنصف..خرجات سناء من الصالون حيث مخلية حبيبة ناعسة فالبيت لاقية راحتها...دخلات لكوزينة تشوف شنو تصايب لگوتي...صونا تيليفونها وهي تجاوب...
سناء : خالتي ناديا...
ناديا : كي بقات ؟ حيث ماجاوبتنيش فالواتساب...
سناء"تنهدات باسف" : خليتها نعسات ودخلا لصالون...غير شوية وصافي حاولات ماتبكيش ولكن راه مقصحو اخالتي ناديا...
ناديا : علاش صيفطات ليه الله يهديها تسولني هي انا ونگوليها اش كاين راه قاصح ومقصح "عينيها غرغرو" بغات تخلي بالي مشطون عليها دابا ومالگيت كيف ندير عيط ليا گاليا شوي وبايجي لدار عيان...
سناء : عيان ؟!..
ناديا : بايكون تعصب...ففف...اربي دخلي شوفيها واش ناعسة مرتاحة ولا لا...راه هي تحس بيك دخلتي بادير راسها ناعسة ومابيها والو انا الي عارفة بنتي كيدايرة...
سناء : واخا شوي ونعيط ليك...
ناديا : الى فايقة دوزيها ليا...
قطعات معاها وخرجات من الكوزينة لبيت حلات الباب بشوييية ودخلات لعندها...طلات عليها لقاتها ناعسة كانو عينيها مغمضين بقات حاضياها وكانت باينة بلي ماناعساش...لكن سناء ماقدراتش تقول راها فايقة يمكن حسات بيها بغات خلوة بينها وبين راسها...قادت ليها المخدة تحت راسها وهي تلمح ايدها الي محطوطة تحت كرشها...تنهدات وهي تخرج وعاودت عيطات لناديا قالت ليها راه ناعسة...رجعات كاتوجد گوتي حتى سمعات تيليفون حبيبة كايوصني من البيت...بقى كايصوني يصوني شحال وقطع...عاود صونا من جديد وهي تدخل لبيت لقاتها ضايرة عاطية بالضهر وتيليفونها حداها كايصوني..لمحات المتصل كان بشار...
سناء : حبيبة...حبيبة جاوبي راجلك غادي يتقلق عليك...(ردات عليه بصوت مبحوح)..
حبيبة : هي جاوبيه...ناعسة...
بقات كاتشوف تا سكت تيليفون وعاود صونا تقولي جاه جهل عليها وحس بيها...هزات التيليفون غا سميتو خلاتها تقفقف...جاوبات بصوت خافت...
سناء : الو...
بشار"عرفها ماشي هي نيشان من القلق" : فين حبيبة ؟!..
سناء : احم..ن ناعسة اخويا داكشي باش جاوبتك..حيث كاتقوليا كاتقلق عليها الى ماجاوباتكش ووصاتني باش نجاوبك قبل ماتنعس...
بشار : مكرفصة ؟!..
سناء : لا غير جاها نعاس وبغات ترتاح...
بشار : تغذات ؟!..
سناء : تغذات وشربت فيتامين ديالها...
بشار : ديري بالك معاها...ماشي مشكيل ؟..
سناء : لا ماشي مشكيل خويا كون هاني...
قطعات معاه الخط وهي تطلق النفس هههه...حطات التيليفون حدا حبيبة وخرجات كاتسحب تا سدات الباب ومشات كملات اشنو كانت كادير....
الرحامنة...
دخلات سيارة هاشم لفيرما ونزل كايحيد فالكاسكيط ويحك فشعرو...سد السيارة وتقدم لعندهم كانت دنيا عامرة عند الباب ولداخل...
هاشم : سلام عليكم...
حسام : على سلامتك...تعطلتي...
هاشم : خدمة مزيرة...شت بنادم كثير هن...
حسام : ماكتعرفش رحامنة...
هاشم"بان ليه باه من بعيد كايهضر فتيليفون ويشالي" : مالو ؟!..
حسام : دوا مع عبد الرحيم خو مرت عمي نورالدين...
هاشم : توريا...مالو...
حسام : گاليها ترجع ومابغاتش ودوا مع خوها...گاليه تجيو طلبو ترجع...حيث كلشي ضار فيها ووقف مع بشار...
هاشم : بشار الي هو ولدها ياك ؟!..ههههههه وليني كمامر هادو...
حسام : با مابغاش تعصب وطار ليه حيث كلشي كايسول لداخل عليها...
هاشم"هز راسو وحركو ببطء..تا شوية جا عندهم عبد القادر ووقف باقي كشاكشو خارجة" : با هانيا...
ع.القادر : خلاك شي حد تهنى...
هاشم : الامور مظبوطة لعشية...
ع.القادر"حرك راسو" : عيط لخوك گوليه يجي...
هاشم : وراه عيطت ليه ماعطاني خيط من مخيط...
ع.القادر : ناس يسولو عليه اهاشم مانصيبش نبان غا وحدي...العيب اهاشم العيب يبان...يحضر غا لصدقة وديك الساعة يمشي يصد فين بغا...
هاشم : ماصاد فين راه غا عند نسابو...
لداخل فين نايضة روينة العيالات يتلاغطو بالهضرة غالا غالا غا فواحد صالون...العزياة عندهم كتار لا فالمو.ت ولا فالمرض كايجيو...دقان فالباب ديال بيت نعاس...
مباركة : دخلي...
حلات الباب وهي تدخل...شافت فيها كانت كاتلبس فواحد تزارة باش ترجع لكوزينة تعاون العيالات...
مباركة : تي شتك لابسة تشامير بيض...
زكية : واش بغيتي لبس...
مباركة : تي شافتك مي بهاد اللبس ؟
زكية : لا باقي ماجات سبقتها وجيت عما ليلى ختي وصابرين..هي جايا عما با وخويا...
مباركة : تي لبسي شي تشامير يكون عادي هاويلي على البيض وفالمو.ت...
هزات زكية كتافها مامسوقاش...جلسات جنب ناموسية كاتدوز بايديها فوق كوفرلي وهزات عينيها كاتشوف هنا وهنا ورجعات شافت فمباركة...
زكية : شكون جاي لصدقة...
مباركة"كاتدهن وجهها بليكخون زعما غاتعطي وجهها لطياب" : كلشي..تا سبحمد واقيلة جاي ربيعة ماصابتش تجي...
زكية : هاكا..."عضات شفايفها وبتردد بغات تسول وخافت ختها دور فيها"...ناس مراكش ؟!..
مباركة"غوبشت فيها" : لا ماجاييينش...كان غايجي بشار ولكن مايصيبش مرتو عيانة...
زكية : هاد مرتو شت شد عليها العيا بزاف...واخد مراة مراضة يا خويتي...
مباركة : وراه مي.ت عليها...كون يصيب يهز عليها المرض ويلصقو فيك غا حشم ونتي ماحشمتي..نوضي خرجي لبسي شي حاجة خبي تشامير يگطعك عليا...تي ديري گلب الكلبة واش نتي باقي لدروك طامعة فراجل مجوج عمرو تا ماعرفك واش تخطبتي ليه شحاال هادي ونتي عينك فيه..ديري گلب ولا سيري لوحي راسك من شي زوبية عالله تهناي حيث هادشي الي فيك مايعجب...وكثر بزاااف اخويتي كثر...
زكية : ياك ؟..
خرجات سناء من الكوزينة من بعد ما وجدات الماكلة ...دخلات عندها لبيت ولقاتها عكس كيف خلاتها...جالسة فوق فراشها جامعة رجليها عندها وكاتشوف فنقطة بعيدة...عرفتها مقصحة بزاف...
سناء"طبطبات عليها" : حبيبة...شوية...
حبيبة"هزات راسها شافت فيها" : الحمد لله علاش اش كان بيا...
سناء : ها ؟..والو...احم..دوزي تاكلي غايكون فيك جوع ستة وشي حاجة...
حبيبة"تبسمات ليها" : واخا شكرا...
تبسمات سناء ببلاهة مستغربة من ملامح حبيبة تعبيرية...حيدات حبيبة ليزار وهي توقف بشوية...تا حسات بدار مشات وجات بيها وهي تشد فدراع سناء وزيرااات عليها...شدات فيها سناء بخوف...
سناء : مالك بسم الله عليك...
حبيبة"مغمضة عينيها تا كمشتهم شحاال وهي تحل عينيها" : والو هي دوخة...
سناء : نمشيو عند طبيبة ؟!..
حبيبة : لا گالت ليا طبيبة عادي فهاد البيريود...
سناء : متأكدة ؟!..
حبيبة : واش بنت ليكم كانكذب ؟ علاش كلشي تايبقى يسول فيا واش متأكدة لهاد درجة كانتفلى واااه...
سناء : لا لا غا خفت وصافي تهدني ماگلت والو...فين غاديا...
مارداتش عليها طلقات منها ومشات بشوية وسناء تابعاها من لور حالتها ماتعجبش...مشات لطواليط وبقات سناء واقفة مخلوعة عليها كاتسنى فيها تا خرجات ومشات لبيت تبعتها تاني حتى بانت ليها كاتلبس فعباية وفرشات سجادتها عاد رتاحت وخلاتها تصلي...جلسات فوق الفوطوي كاتسنى فيها تا خرجات لعندها وجلسات عااادي...شافت فالطابلة وتبسمات...
حبيبة : هههه وجدتي هادشي كامل...
سناء : هههه ومالي كي جيتك...
حبيبة : زوييين...هي هاد الاومليط مابيتوش صايبو ليا بشار صباح وماگديتش عليه عيفني...
سناء : هذاك ديالي...ها ماكلتك...زيت زيتون و فرماج ومسمن...وشي كرواصة سخنتها ماقدرتش نخرج لمخبزة...وهذا عصير والحليب...
حبيبة : توحشت اتاي...
سناء : ممنوع عليك ازين...عندك شي دوا ؟!..
حبيبة : لا...
سمات الله سناء وبدات تاكل اما حبيبة هزات العصير كاتشرب فيه وتهز فكرواصة قطعات منها ندغة...رجعات سهاات فنقطة بعيييدة وهي تهز سناء راسها فيها لقاتها شادة الكاس لكن كان مايل بزاف كان غايطيح تا قاداتو ليها وهي تقفز حبيبة شادة على صدرها...
سناء : سهيتي والكاس شوي ويطيح...كولي مالك...
حبيبة : ماماليش...(حطات الكاس والكرواصة وبدات تسوس فايديها وتكات فالفوطوي) مابيتش مافياش...
سناء : اويلي على مافيكش احبيبة راكي بزوج رواح...عتقي راسك وداكشي الي فكرشك راه غاتكرفصو بزوج...
حبيبة"وسعات فيها عينيها وبصوت مجهد" : وماااا بيييييييتش مابيييتش ماتبززيش عليا...واش بزز بازاااااز...
سناء"ولات تقفقف" : لا لا بخاطرك...صافي غير رتاحي...
حبيبة : ماتبقايش دايرة بالك معايا عادي اسناء انا الي قلبت عليها ماوراني حد هي تهناي...ماشي مشكيل...اووووف...
سكتات سناء حساب ليكم عاودتها معاها.. خافت لا تعصب وماشي فصالحها..رجعات كاتاكل وهي ساكتة...حتى وصل الوقت عيط بشار علم حبيبة بلي جاي فطريق وهي تنوض سناء جمعات داكشي دارت ليها ماعن فماشين وجمعت ليها كوزينة ودار...
سناء : انا غانمشي...
حبيبة : تسناي حتى يوصلك بشار !!..
سناء : لا غا خليني نمشي..(قربات ليها) حبيبة...
حبيبة : اه..
سناء : هضري مع ماماك فاوديو راه من قبيلة وهي تتسول عليك..
حركات حبيبة راسها وصافي بدون اجابة شفهية...تنهدات سناء وهي تقرب لعندها سلمات عليها...وطبطبات عليها...خرجات سناء مشات فحالها وبقات حبيبة جالسة تما...ماهي الا خمس دقائق حتى سمعات الباب تحل دورات راسها بان ليها داخل وهاز فايديه شي ساشيات...حط سوارت بلاصتهم وكونطاكت...وقرب لعندها حط ساشيات قدامها...
بشار : هانيا ؟!..
حبيبة"تبسمات ليه" : هانيا...هههه...
هز حاجبو وجلس حداها...جرها لعندو باسها ف شفايفها وحط لبها راسها فوق صدرو...نزل ايدو لكرشها لتحت دوز عليها بايدو وطبطب عليها...
بشار : شوية ليوم...
حبيبة : شوية...جاتني دوخة گبيلة ولكن دغيا مشات...بلا ماتخلع باتكون شرحات ليك طبيبة اش كاين...
بشار"حرك راسو..وجر وحدة من ساشيات جبد منها الدوا الي خرجات ليها طبيبة شراه ليها" : شونجي لاخور بهذا...بداي گبل ماتفطري... حسن تشربيه مع jus d'orange...
حبيبة : اه على قبل الحموضة ديال ليمون كاتخلي المعدة تمص الحديد من كثر هادشي الي شرحات ليا طبيبة...
بشار : مزيان...
باس ليها راسها وناض كحز ليها ساشيات تشوف اش فيهم كانو اغلبهم من مخبزة وكاين فيهم ديسير مشكل...دخل البيت وخرج لابس غير شورط مشا ديريكت لدوش دوش وخرج لاوي عليه فوطة...جمعات رجليها عندها وبقات كاتفكر بقلب مكسور بجهد...تنهدات وهي تنوض ...دخلات عليه البيت وهي تلقاه كايصلي شافت ساعة باقي المغرب...اذن كايصلي العصر الي فاتو...تكات ففراشها حتى كمل وناض طوا سجادة وضار عندها..
حبيبة : اش بيتي لعشا...انا بيت هي صالاد فخوي صيفطاتها ليا ماما مع سناء...والدجاج راه باقي حقك نسخنو ليك فالعشا ولا بيتي هي صالاد...
ماجاوبهاش خشا ايديه فجيابو وقرب لعندها.. تحنى لمجر جبد باكية الكارو وبريكة خشاهم فجيبو باش يخرج لبالكون يكمي...بقى واقف كايشوف فيها عاقد غوباشتو...
حبيبة : مالك...
بشار : شنو گلت ليك...
حبيبة"بعدم فهم" : مافهمتش...
بشار : علاش لحگتي باك ؟!...
وسعات عينيها على جهد جهدهم تا تكمشت عليها كرشها...ياناري راه تعيا تولف عمرها تولف غفلاتوو الي من هاد نوع...
نسات انه ماتخفى عليه حتى حاجة...لكن انه يعرف اش دارت بالضبط ماتوقعتهاش...حيث لو شاك غايقوليها قولي مالك وبلا ماتفكري تكذبي لكن هنا جاها للموضوع ديريكت...حتى قالت راه دازت عليه ويمكن ما انتابه لحتى حاجة لكن نسات انه هذا بشار ...
داكشي الي كانت حابسة وضاغطة على راسها باش ماتبين والو بدا كايخرج شوية بشوية...قدامو كاع الاقنعة كاتحيد..قدامو كاتكون على طبيعتها... جاوبت نيشان...
حبيبة"حدرت عينيها وكمشت حجبانها حابسة بكيتها" : ماصبرتش..توحشتو بزاااف...
بشار : شنو وصيتك ؟!..
حبيبة"عضات شفايفها مزيرة وسكتات"...
بشار : كانسمع يا حبيبة..
حبيبة"تنهدات وبصوت مقجوج" : مانوصلوش حيث باقي المشكيل جديد...
"سكتات كاتاخذ انفاسها باش تقدر تكمل..وهو واقف عاطيها كامل الوقت وبوجه بااارد مامبين معصب مامبين مقلق ما والو"..
بشار : كملي...
حبيبة : عارفة وصيتيني باش مايوقعش ليا هادشي...گلت اكثر حاجة باتكون هي مايجاوبنيش وو..."شهقات بشوية"...
بشار : اشنو دار.."سكت وحك شنايفو بسنانو كايشوف فيها كاتحاول باش ماتستسلمش لبكا"..ليك ؟!..
حبيبة"بصوت مغنغن" : ب بلوكاني...
ايوى دوك الدموع الي ضلات حابسة نزلو يجرييييو كي الغيث..ماقدراتش تكمل حيث الامر وهي كاتعاودو من بعد غصة جاها بحال الى عاودت المشهد...حيد ايديه من جيابو وقرب لعندها..هز ليها ذقنها تا قابل وجهها معاه وقرب وجهو لوجهها تا بقى بيناتهم سنتمتر...انفاسو لفحوها...حط صبعو على فمو...
بشار : ششش..
حبيبة"زمت فمها كاتشوف فيه وصرطت البكية كايبان غير راسها الي كايتحرك"...
بشار : ديجا گلت ليك اش كاين ؟ "حركات راسها"..علاش ؟..(بقات تشوف فيه وتنخصص بشوي)..سكتي من البكا خليني مكونسونطري معاك يا حبيبة النقشة ماعنديش "خرج عينيه"...تهدني...
سكتات وهي تهز ايدها بغات تمسح دموعها حيدها ليها ومسح ليها هو دموعها...شافت فيه بحزن وحركات راسها...عاد رجع تقاد فالوقفة...بقا ساكت حتى حس بيها تهدنت عاد استأنف كلامو...
بشار : عارف situation مزيااان...عارف بلان واليديك صعيب...مصيفطة لباك l'échographie نيشان ؟!..
حبيبة"حدرت راسها" : گلت بايفرح ويبدا يرطاب من جيهتي...
بشار : مايمكنش..ماغاديش يفهم هاد البلان وهو باقي مكسح من جيهتك "هز صبعو دورو على نواضرو"...روي البلان فراسك مزيان...شنو گلتي نهار شفتي بدل photo de profil ؟..
حبيبة : بقى فيا الحال حيث حيدني..."هزات عينيها شافت فيه وهو بقى كايشوف فيها كاع مادوا خلاها دورها فراسها" يكون تاهو بقى فيه الحال مني ؟!..
بشار : اجي يا با عندي نوريك راني مخيرة بلا بيك ؟!..
حبيبة"وسعات عينيها وحركات راسها ب لا" : لا لا والله مانويتها هاكاك "هازة صبعها وكاتحركو ب لا"...
بشار : سي..هادي فهامتو هاد ساعة...الوقت باقي جديد باش وقع المشكيل..صعيب الحال بجهد...
حبيبة : ولكن (دلات شنايفها) و مم..انا مانويتش هاكا..ماعرفتش اشنو وقع ليا ماحسيتش براسي حتى صيفطت ليه داكشي...توحشتو بزاف عارفة اش كاين وديجا درت بحساب هادشي فاش رجعت ليك...ولكن "سكتات وعوجات راسها"..
بشار : تكاي رتاحي...
مازادش معاها باقي شي كلمة...ضرب دورة وخرج من البيت كاع...هو كان عارف ان باها باقي غاضب غضبة شديدة...من اخر مرة قبل يومين تفيرسا فحسابو مبلغ ديال 100 الف درهم...يعني راه كايرد ليه شوي بشوي وباقي شاد فالامر حتى يكمل ليه...
خلاها فالبيت غير كتشوف...هضرته دوراتها فراسها...هاكا غادي يفكر باها حيث العلاقة الي كانت بينها وبين باها كانت قوية بزاف وقراب بزاف...ومن حجم المعزة كايتقلب الامر للعكس بالحجم ديال ديك المعزة...فيها خوف عليها من شخص يآذيها...وفيها غضب منها حيث اختارت شخص عاشراتو غير فمدة قصيرة على فهامة باباها وفضلاتو عليه واخا عرفاتو مشاكيلو النفسية ومشاكيلو مع مو ومرضو وبزاف الامور الي خاف ان بنتو تعيشهم مع بشار وهي ماشي قدهم وهشيشة...والى دققنا فالامر واخا يتفهم قرارها غاتكون حتى الغيرة لاعبة عليه حيث اختارت بشار وهو ماتسوقاتش ليه...بزاف ديال الاسباب دفعات مولاي حفيظ يتضرف هاد التصرف الي يبان لينا حنا مبرهش وخايب بزاف لكن هو العكس نابع من المعزة الكبيرة ديال بنته عندو..هادشي ماغاديش نفهموه حنا حتى نتحطو فنفس الموقف ديال مولاي حفيظ...ويمكن نديرو كثر...
نفضات الغطا وهي تنوض وتمشات بخطى بطييئة...حتى خرجات من البيت كاتقلب عليه وهي تلمحو واقف فالنافذة ديال الكوزينة...قربات عند الباب سمع حسها وهو يدور...
بشار : وگفي تم..لاش تحركتي ؟!..
حبيبة"تنهدات وحطات راسها على الباب" : عرفت راسي غلطت..هي بقى فيا الحال...
بشار : نساي عليك داك البلان...
حبيبة : مايمكنش...
بشار"دور راسو جيهة ضرجم ساط دخان ونطق" : لا يمكن...(طفا الكارو فطفاية وكحب باش خرج دخان الي بقى...شرب من قهوتو وهو يمشي لعندها..شدها من دراعها ودورها وهو يهزها بين ايديه تا حطات ايدبها على كتافو...مشا بيها لبيت حطها ففراشها"..
حبيبة : العشا ؟!..
بشار : دابا نجيبو ليك...
حبيبة : فيا العطش بزاااف...
بشار"حرك راسو وضار باش يمشي يجيب ليها الما تشرب وهي تشدو من ايدو"...
حبيبة : تقلقتي مني..حيث ماسمعتش ليك..
بشار"هز حاجبو" : وشنو الفايدة دابا ؟!..
حبيبة"حدرت عينيها مالقات ماتقول شوية وهي تفكر وشافت فيه" : سناء الي گالت ليك ياك ؟!..
بشار : لا..الواليدة ديالك...
خرجات عينيها ماحتال تسولو تا ضار وخرج من البيت...
الفيرما...
الطوابل فالخزاين تقادو ورجال بداو كايجيو كاين الي جاي بعيد وكاين الي غير قريب تما كايتسناو تا يودن العشاء عاد يجيو نيشان مع الطلبة...ريحة طياب فايحة والقرآن مطلوق فالدار لداخل...عند العيالات الغالا غالا...الكنينات الي بقات فيهم غا كنة والي هي سعيدة داخلة لكوزينة ماخرجات منها هي تعمر فاتايات ومباركة وكريمة وحدة تغسل الماعن ووحدة كاتسخر وترحب بالعزايا...والبنات كايتقداو تاهما...بنات هاشم واشراق حتى هي...اما برا واقف هاشم هو وحسام وزكريا الي جا مسكين حضر وتمنى لو يجي باه تاهو يحضر وترجع الامور كي كانت...
حسام : تا رخف على راسك اصحبي...
زكريا"بوجه حزين" : والي غا تنشوف...
هاشم : دابا يجي الى ما جا اليوم غذا تانتا را الوقت مكسحة...
زكريا"تنهد وهو يقرب لعند عمو" : نصيب نطلبك...
هاشم "شاف فحسام حيث ماولفوش زكريا يتشاور ههه" : تا شكون دوا ؟!..
حسام : الطالب الي صارط ولد خوك...
زكريا"بقى يرمش حتى جاتو ضحكة" : ههه مايتگاد عماكم حد..
هاشم : خيري خيري ضحك..."خبطو لكتفو وداه وجابو" والله تا ضحك...
حسام"وسع عينيه" : حليييلي فرنس...
هاشم غذا تصبح الشتا على رقبة مليكة عمتك...طلب اش بغيتي اولد...
زكريا"بردد ضار شاف ناحية الخزاين وناس داخلة خارجة ورجع شاف فيه" : ماعندكش شي وقت تديني لخريبگة...
حسام : نويتيها بصح ؟!..
هاشم : خريبگة كايمشيو ليها على جوج...يا تخطب الزين يا باش تلگى الي يديك لطلين (طاليان هه)...
زكريا"حرك راسو ب لا" : بغيت نشوف خوتاتاي من بويا...
هاشم : وايلي !..
"ضار شاف فحسام الي اكد ليه بعينيه حيث فايت قايل ليه را زكريا شاد فالفكرة ديال يمشي يشوف خوتاتو ورجع شاف فزكريا وحرك راسو ببطء"...
هاشم : كي دير تشوفهم..علمتي بوك ؟!..
زكريا : خليني نشوفهم راسي...هزيت نمرة من تيليفونه بلا مايعرف ديال هاديك خيتي الي كان معاها...وماكرهتش حسام يمشي معانا ويشد ليا نمرة ديك المراة جداهم الي جابها ولد عمي نورالدين عماه...
هاشم : واش ماكد من هادشي..
زكريا : وااه مالي نبسط عماك..باغي نمشي هاد ليام حيث مابقى غا سيمانة وشي حاجة وتفتح المدرسة ونتدهى...الى ماصبتيش نمشي راسي فالكار...
هاشم : لواه نديك ...نهار الي مانخدمش فيه نعلمك گبل ونتيسرو نشاعلاه..
حرك زكريا راسو وابتاسم بشكر حيث ماردوش بالعكس...شوية وهو يتم جاي عبد القادر خارج من الدار نبدل حوايجو بحوايج اخرين باش يمشي لجامع ويستقبل العزايا والطلبة...يلاه وقف معاهم وبدا العشا كايوذن...شوية وهو يبان ليهم ضو جاي من بعيد...صغرو عينيهم كايشوفو شكون حتى لمحو الكاميو ديال سيحمد الي داخل...
ع.القادر : شكون جا (ماقشعش مزيان مع الكبر والنظر قليل)..
هاشم : كاميو ديالنا هذا..بقى عد سيحمد...
زكريا : هو نيت...
دخل الكاميو تال داخل وضار جيهة فين كايبلاصيه...بقاو حاضينو حتى حل الباب ونقز نزل...عاد تنفس زكريا ورتاح من لداخل حيث كايبقى باه وباغي الامور ترجع كيف كانت...وعبد القادر تبسم واخا هكاك عرفوه تكسح هاد المرة فوفاة الوليد الي تزاد عندو...قاد حوايجو وساسهم وهو يتم جاي...غوفل بزااف لا من شعرو ولا من لحيتو...بوجه شاحب ومبدل غالب عليه الحزن وصل لعندهم وتحنى باس ايد باه وقال "سلام عليكم"...
ع.القادر : وهاكا نبغيك..دير عقلك اولدي الله يرضي عليك دير عقلك...
سيحمد"تنهد تنهيدة طويييلة وحرك راسو دار ايديه وراه وضار كايشوف الخزاين وناس...تا شوية جاو شي ؤجال شافوه وتبعوه سلمو عليه وعزاوه وهو كذلك رد تعزاية...وهو يدور عند زكريا"..
سيحمد : لباس ؟!..
زكريا : الحمد لله...
ع.القادر : موضي تمشي عمانا لجامع ؟!...
حرك راسو وهما يمشيو بربعة بيهم ومشاو معاهم تا شي رجال لجامع وكاين الي غايصلي غا تما وكاين الي مع الاسف مامسوق كاع لصلاة باغي غا يزرد فالصدقة وهذا واقع مؤسف...
الرميلة...
واقفة قدام الكويزينييغ كاتحرك فالگميلة ديال الحريرة ديال البلبولة وشادة تيليفون فوذنيها كاتسمع لاوديو ديال حبيبة...سلاه كي كملاتو وهي تنهد كليكات على الاوديو بغات تسجل ليها وهي تسمع مولاي حفيظ عيط وهي تقفز...حطات المغرفة وخرجات شافت فسناء الي كانت جالسة حدا دراري فديك الجليسة فقاع رياض...
ناديا : بنتي عافاك حركي معاك الحريرة...
سناء : واخا...
مشات هي لبيت حلات الباب لقاتو جالس داير نضاضر شوف وكايشوف فالتيليفون...اصلا من الي جا وهو مغير وبزاف ماقدراتش كاع تسولو مالك حيث عارفة اش كاين وخافت تفلت ليها شي حاجة من فمها ويعيق راه مصالحة مع بنتها...
ناديا : هاني الحاج بيتي شي حاجة ؟!..
م.حفيظ"عطاها التيليفون" : شدي شوفي...
ناديا : ها..
صرطات ريقها وهي تشد التيليفون لقاتو فاتح المحادثة ديالو مع حبيبة وكاين اخر حاجة هي الايكو الي صيفطات ليه ووراها الكتبة الي فيها بلي بلوكاها...ايديها بداو يترعدو اولا بقات فيها حبيبة من الي قرات اش رسلات نيشان وخايفة لا يعرف شي حاجة تلفات بيها دنيا غمضات عينيها وسكتات...
م.حفيظ : اش بات دابا هادي عندي ؟ ااا...
ناديا"الصمت"..
م.حفيظ : ياك مرتاحة معاه صحة ياك مزيانة وماخاصها خير بلا بينا ياك عتاتنا تيساع ؟!..اش بات مزال ؟ (خرج عينيه وجهد صوته تا تقج فواحد لحظة)..ياك حنا متنسواو والو قدام راجلها ؟..شنو زعما هاد الشي ؟؟..
ناديا : هي تهدن الحاج هانتا بنتي ليا بلوكيتيها..ص صافي..
م.حفيظ : صافي..تعتيني تيساع الله يعاونها ما انا بوها ماهي بنتي..علمي سناء توصلها ليها...
دازت الصدقة كما يجب..كملات بحظور سيحمد الي واخا يكون كيما كان كايبقى وجودو ضروري حيث ناس ماعارفاش اش كاين وماعارفاش داك شخص اش داير كل مكيهمهم هو يعزيو المعنيين بالامر...
خبات الكية فقلبها على بنتها وزادت تأكدت ان مولاي حفيظ غضب ديك الغضبة الحارة الي كاتجي من بعد معزة كبيرة وهي اصعب غضبة ممكن يعيشها الواحد (بالتجربة)..رجعات لكوزينة بخاطر محرووق عليها كمداتها حتى ماصبرتش خلات سناء مقابلة هزات تيليفونها وطلعات لفوق لبيتها وسداتها عليها ودخلات لدوش وعطاتها لبكا...بقات فيها حبيبة بزااف خصوصا هي فهاد المرحلة الحساسة والوحم وخطر الحمل الي واقع ليها...كيفاش غاتكون حالتها...مسحات دموعها ودخلات دوزات ليها الخط...
حبيبة : ماما "صوتها باقي حزين"...
ناديا"بصوت مبدل" : حبيبة...مال صوتك ؟..بكيتي تاني ياك ؟!..
حبيبة"سكتات شحال عاد جاوبتها وهي تسمع ناديا تنهيدتها القوية" : لا..عادي اماما هي انا الي متنسعمش...
ناديا"بضيم عوجات راسها" : هي صبري...
"بغات تعطيها امل باش ماتبقاش كاتفكر وتمرض راسها وتصدق فمشكيل كبير لصحتها"...
ناديا : راكي عارفة معزتك گداش كانت..راكي البكرة ديالنا بجوج..ماولدنا من وراك حتى كبرتي هي باش نعيشو معاك مدة طويلة واخا كنت تالقى مشكيل فالحمل ولكن كنتي معمرة لينا العين كنا تنگولو هي نتي وبراكة...نهار تزاديتي سماك ضو العين..ماكانش هي باباك كان خوك وصديقك...كان مصغر عقلو هي باش يفهمك ويمشي معاك فوقتك...ياك كنتي تتعاودي ليه هو بلاصة ماتعاودي ليا...
حبيبة"دموعها هابطين..وبشار حداها" : عارفة اماما والله...
ناديا : هي مسالة وقت ابنتي كيف ما توحشتك انا بايتوحشك هي شاد ضد راكي عارفة عمرو كبير ومريض بايجيك مقصح بزاف راه ولا داير كي دراري صغار خاص هي نصبرو ليه تا يشد الخاطر...عافاك ابنتي ماتشديش فخاطرك راكي مريضة...اه قصحنا معاك وضرنا فيك وبعدناك على راجلك هي خايفين عليك وماعرفناش نتصرفو مالقينا حتى حل من غير هذاك...واخا بيتي راجلك واخا تحملي مسؤوليتك بنبقى خايفة عليك حتى على صحتك ردي لبال لراسك راني بعيدة عليك وعارفة راجلك بايكون شاد ليك الخاطر ومهلي فيك...ولكن خاطري بايبقى ماهانيش عليك فينما لقيت وقيت بنجي عندك..وكل نهار تجي سناء ولا نصيفط ليك مع ايوب ولا نجي انا نيت ونجيب ليك اش تشهيتي...
حبيبة"مسحت دموعها وحركات راسها" : واخا اماما هي نتي الي ماتقلقيش من جيهتي...وتهلاي فبابا راني عارفاه تقلق مني بزاف..ردي ليه البال لصحتو وبقاي حاضياه ماتخليهش يفكر بزاف اه داك تفكير الي تايضرو...
ناديا : توصيني على راجلي هههه (سمعتها ضحكت) هاكا ابنتي..مشهية شي حاجة ؟!..
حبيبة : لا مابيت والو هي فيا العطش بزاف...
ناديا : بقاي تشربي الما...الى مشهية شي حاجة خليها ليا فميساج ونشوفها ليك...
قطعات معاها واخا هكاك مرتاحة شوية عالاقل ماماها فاش هضرات معاها فهمتها...بشار كذلك...سناء صراحة هي محيطة بناس فيهم الايجابية بطاقتهم...
بعد يومين...
دخلات لدوش كاتزرب حاسة بالترويعة من داكشي الي كلات والي كان غير صالاد ديال الفخوي عجباتها حيث باردة كتبرد ليها العطش...تبعها لقاها محنية على لاشاص وكترجع ديك صالاد كاملة...عاونها تا وقفات ومشات لافابو غسلات وجهها وهي كاتنهج..عينيها خرجو ولاو حمريين..هز شوية الما دارو فقرفادتها باش تبرد...مسح ليها وجهها وتحنى هزها بين ايديه داها لفراشها وحطها قاد ليها المخدة تحت راسها...
بشار : اليوم deux fois !!..(جوج مرات)..
حبيبة"حركت راسها" : گالت ليا طبيبة الى كثر بزاف فهاد البيريود جايا ناخذ واحد دوا كتباتو ليا..حيث فلول مكانش بزاف گالت ليا شوية بشوية بايقدر يجيك بزاف..
بشار : l'ordonnance فين درتيها ؟!..
حبيبة : فالضوصي الي عندي...
بشار : خاصك تاكلي شي حاجة مايمكنش تبقاي بلاش...
حبيبة : عافاك والله مافيا بيت هي نشرب..تعطل الحال بايخصك تنعس راك فايق بكري لخدمة...غادي هي ناكل ونرجع...اه مزيان بقات ليا ماكلة نهار كامل ورجعت هي هاد صالاد...
بقى كايشوف وهو يحرك راسو خرج من البيت حتى جاب قرعة الما عطاها ليها تحطها حدا راسها...حيد تيشرت وشورط بقى غير بالبوكسر وتخشى حداها جرها عندو عنقها تحنى باس ليها راسها...
حبيبة : اليوم بنتي ليا عيان..مالك..
بشار : نورمال...عيا الخدمة..
مابغاش يقلقها حيث ضرو راسو بزاف وخايف لا تجي نوبة قدامها وتخلع داكشي باش غبر نص نهار كامل مادواش معاها خاف يطيح ويمرض حيث مكيبقاش قادر يهضر...حركات راسها وسكتت حتى بدات كاتكمع ونعسات دغيا اصلا مسبة...بقى وراها شوية قاد ليها راسها وضار ناحية المجر هز دوا ديال راس فيه نسبة مهدئ...شربو دغيا وتخشا حداها تاهو نعس...
حتى ضرباتو الفيقة هز على صوت تنخصيص...كمش حجبانو وهو يدور تالقاها جالسة مربعة رجليها وكاتبكي..ماعرف يا خوتي باش تبلى تا نقز جالس شدها من دراعها قلبو سكت عينيه خرجو...الصوت كان شوي ويمشي ليه...
بشار : مالك مااالك ؟؟؟..
حبيبة"دموعها دايزين ضار شعل ضو وضار شاف فيها كملت ليه الباهية" : فيا العطش...
بشار"بالخلعة تلفت ليه جرية وبدا يخربق فالهضرة" : كيفاش ؟؟..علمي ملتي نتحرك نجيب ليك الملاوي..علاش البكا الحبس ؟!..
حبيبة"حركات راسها بلا" : مافياش العطش ديال الما...
بشار : ؟؟...
حبيبة : بيت رايبي...
بشار : كيفاش رايبي ؟!..
حبيبة"رمشات برموش يقطرو بدموع" : جميلة...
دابا عاد بداو التقلبات المزاجية كايبانو ليه كما يجب...دابا عاد غايبدا يعيش تجارب جديدة عليه ويكتاشف حوايج اخرى فهاد الحياة حوايج تستحق تعاش وتجرب...من بينهم انتظار ولد من صلبو وباش يجي هاد الولد كاين واحد المرحلة الي هي مرحلة الحمل الي مقسمة على فترة كل فترة وشنو فيها من بينها فترة الوحم...
مع باقي الخلعة كاتنخض فيه بقى كايشوف فيها جاتو واحد اللحظة مابقاش كايعرف علاش كاتهضر اصلا..ماشي حيث ماعارفش رايبي جميلة طبعا راه عاش فترة فالمغرب تا ولا شاب عاد هاجر عارف رايبي جميلة وكبر معاه واخا ولد البادية...
واحد اللحظة عض لسانو وسط سنانو وهز ايدو تلفات ليه الحقيقة ولات كاتبان ليه حبيبة شي راجل بغا يخلطها و يقسمها على ربعة على هاد الخلعة...
حبيبة"بضيم طايح عليها" : شربت الما شربتووو هاهو (وراتو القرعة) وعاودت هزيت قرعة اخرى باااردو ووالو فيا العطش كاتجي فنيفي هي ريحة رايبي بيت هيي جغيمة "وراتو بصباعها" گد هاكا ولا هي حك صافي..جربت ناكل دانون ماعجبني فيه فريز ولكن مازوينش اصلا ماعنديش مع دانون...ماعرفتش بيت هي باش يبرد عليا عطش وحرقة برزطتني...
بشار"كايحاول يبرد باقي قلبو كايضرب" : وشنو نفهم دابا ؟..تحركي نعسي صباح نجيبو ليك...
حبيبة : ماكرهتوش دابا (حدرات راسها ورجعو دموعها ينزلو دارت ايدها على حنكها وتنهدات وهي تكمل)...واخا تخرج دابا ماتلقاهش الحوانت سادين...هفففف...صافي ماشي مشكيل هي رجع نعس شوية وبينعس تانا...(هزات كتافها) ماشي مشكيل..
بانت ليه خسرات سيفتها كاتحاول ماتبكيش وهو غا كيشوف فيها...واحد ليد عندو راه مزيررر عليها على قد واحد الجهد الي خلاها تولي مسقوطة من د.م...حيث تخلع حساب ليه وقعات ليها شي حاجة..كاع سيناريوهات طاحو فبالو...مابغاش يهضر ولا يرد عليها حيث غادي غير يبدا يخربق ويصدق معاها فشي طاب وشي ماطاب ومايعجب وهو كايحاول مايرجعش لراسو لديك الحالة النفسية الي كاتجيه ويولي خارج الطبيعة...ناض من حداها لبس تيشرت وسروال الي كان حاط وهي كاتشوف فيه وترجع تنزل عينيها تاهي خافت لا يصفگها معاها تا طير خنونتها هههه...مشا لمجر الي حداه جبد باكية الكارو وبزطامو...لبس فرجليه كلاكيط وتم غادي خارج وهي توقفو...
حبيبة : فين غادي ؟!..خارج ؟ اه ماغاديش تلقاه واخا تخرج...
بشار"ضار عندها وببرودة جاوبها" : وعلاش فايقة دمعي على ملتي تم ؟!..
حبيبة"غوبشت فيه وهي تحدر راسها...وهو يدور بغا يخرج رجعت نطقات" : الى لقيتيه جيب الحكاك ماتاخذش ديك القرعة الكبيرة...جيب شي عشرة باش يبقاو عندي...
ضار عندها هاز حاجبو وهي تحدر راسها تكمشت...اتزيد حرف يشير بيها من داك الباللكون هادشي الي ولات كاتحس بيه كايوصلها منو....خرج من البيت هز سوارت وخرج من دار نزل على قلبو وسعدو ووعدو...تحل المصعد على لاكاف ركب فطوموبيل وديريكت لفين ممكن يلقاه ليها...الكارو في فمو شاعل يلاه يقاد ليه الراس الي تخربق مع المدام ووحمها...كان عارف ماغاديش يلقى حوانت فلونتوغاج حداه...لكن عارف ومتأكد فين غايمشي حيث هو الي عارف ماعارفش مراكش مزيان باش يمشي يقلب فاماكن معينة لكن عارف فين غايمشي بلا دوران ...شدها نيشان تا خرج من مراكش وشد طريق اكادير تقريبا خمسة كلمتر باش خرج على مراكش حتى وقف قدام واحد الحانوت كايكون حال 24/24 على قبل الطريق كايكونو مسافرين دايزين وكايبقى حال بالمناوبة... طريق كلها والهضرة ديال طبيبة فراسو تعاودت...
~~~
منال : bien sur غادي يكونو تغييرات هرمونية... غادي تكون فترة ديال الوحم...نتا وزهرك يقدر يدوز عندها عادي ويقدر يدوز فشكل...اي حاجة بانت ليك غريبة راه عادي...
~~~~
نزل من سيارة وتوجه لداك المحل...ومتمني يلقى اش بغات حيث الى مالقاش فيه ماغاديش يعرف فين يمشي...سولو عليه وطبعا لقاه حيث موجود فاغلب المحلات...
هو : واحد اشريف !؟..
بشار : جمع ليا داكشي الي عندك تم...
هو : كلشي ؟؟
حرك راسو وهو كايشعل فالسيجارة الثانية...تا جمع ليه مول الحانوت كاع رايبي الي تما...كانو شي تمنية الي بقاو عندو اصلا...حطهم ليه فساشية وهو يجبد واحد شاف تاريخ صلاحية لقاه باقي بعيد...خلصو والباقي خلاه ليه صدقة وصافي...رجع ركب فالسيارة وديمارا ديريكت لدار...شاف فالساعة لقى بلي قرب ياذن الفجر...زاد كسيرا حتى وصل لعمارة ركن سيارة فالباركينغ وطلع فالمصعد حتى لبرطما حلها ومشا لكوزينة حط داكشي فالثلاجة وهز ليها واحد دخل عندها لبيت لقاها جالسة كيف خلاها دايرة ايدها على حنكها...غا شافت فيه وهي تنزل عينيها لحك الي هاز ويااا خوتي على ابتسامة دارت تا بانو ضروصها ديال العقل الي مازال كاع ماناضو حيث ماكاين عقل...
حبيبة : الله هههههه ارا اارااا...
قرب عندها وعطاه ليها شداتو عاضة على شفايفها وهو كايشوف فداك الحماس الي فيها...حلاتو وهي تكا عليه كايسمع ديك گر گر گر...تا ماخلات فيه نقطة تدي عليها التقليد عاد شافت فيه...حطات رايبي حداها مسحات فمها وهي تقرب وقفات على ركابيها وهي تلاح عليه عنقاتو وحطات راسها على كرشو...
حبيبة : شكرا شكرا...
بشار : هانيا دابا ؟..
حبيبة"كتنخشش فيه" : مزيان...
بشار : ماتكثريش من هاد العجب...
حبيبة : واخا..."تنهدات" سمح ليا...
دوز بايدو على ضهرها وتحنى باسها فراسها...شافت فيه وهو يلمح ليها بعينيه تمشي تكا...حركات راسها وهي ترجع بلاصتها وتكات...
حبيبة : اجي تنعس...
بشار"دلك عينيه بصباعو" : لا..قضي غراض نتي قضي...
خلاها وخرج من البيت وهي بقات متكية...عاد قدرات تبرد الشوق وعاد حسات راه العطش برد...وعاد ضميرها انبها عليه خرجاتو فالفجر بلهلا يحزقو ليه واخا عارفة خاطرها ديما عندو فالمرتبة اللولة لكن فكل موقف كاتزيد تبهر اكثر...كمشت حجبانها ونفخت فمها بغات تبكي حيث ندمت لاش فاقت تبكي وخلعاتو وهو على سبة مع الخوف لا يخسرو البيبي للمرة تانية...دارت ايديها على وجهها وبدات تسوط بزز وهو يجيها نعاس وغمضات عينيها ومشاات...اما هو مشا لكوزينة وشعل كارو تاني كماه مع قهيوة كحلة باش قدر يكالمي راسو مابغاش يمشي لمهدئ على شي حاجة تافهة اصلا ولف المهدئ غير لا عرف راسو غايمشي لشي بلاصة غايصدق معصب فيها وداكشي الي قاليه طبيب لكن مؤخرا قاليه باش يحاول يبعد منو نهائيا...
مشا لصالون جبد لابتوب ودخل يشوف الخدمة فين واصلة فالمختبر عندو...حتى داز وقت وهو يسمع اذان الفجر الي من الي بدا كايصلي وهو كايفيق ليه مرة تفيق حبيبة وتصلي هي وياه مرة يلقاها ناعسة وتا دابا نيت مع دخل توضى وخرج لقاها غارقة فنومها مرتاحة..قاد ليها الغطا مابغاش يفيقها...ومشا فرش سجادة وصلا الفجر...كمل ومشا لحداها خاشي ايديه فجيابو وكايشوف فهاد الكتلة الصغيرة الي قدامو...الي هي مرتو وهازة روح فكرشها...معذبها وعاجبها الحال...مكرفصة وكاتقنط فدار واخا هكاك مسكينة كاتحاول تصبر...تاهي خايفة تفقد الي فكرشها كيف لول...هز تيليفونه شاف الساعة كان باقي الحال شوية وباغي يرتاح نيت حيث عيا هاد الفترة...مابغاش يمشي هاد النهار لخدمة بغا يبقى معاها شوية...حيد تيشرت وتخشا حداها دار دراعو تحت راسو وبقى كايشوف فيها نااعسة ماجايبة خبار...ماشي هادي هي الي ناضت تبكي وتهرنن على رايبي..مد ايدو كايمرر على حنكها بصبعو...حتى قرب وحط فمو على فمها بقى مفيكسي وكيبوس بوسات خفاف حتى خسرت سيفتها حيث تكها زغب مسطاجو ولحيتو...باسها بوسة كبيرة وحط ايدو ورا ضهرها كايدوز عليه وينزل حتى لمؤخرتها ووقف كايشوف فوجهها فوجه الانسانة الي عرف معاها معنى الحياة وطعمها كيفاش داير...عرف معاها جوانب اخرى من الحياة تستحق تعاش بحلوها ومرها...رجع بايدو من مؤخرتها حتى دورها وحطها تحت كرشها نوغشها وبقى حاطها تم...هاكا وهاكا والعيا حتى نعس تاهو حداها...
أصبح يوم جديد...
الساعة الثامنة والنصف صباحا...راكب فالسيارة وجاي فالطريق حيث كان جايب الفطور قبل ماتفيق وعيط ل ناديا علمها بلا ماتجي سناء تعذب تاني غادي يبقى معاها هاد النهار...حتى صونا ليه تيليفونه وطلق السبيكر ديال سيارة حتى سمع صوت سعيدة...
سعيدة : ولدي صباح الخير...لباس عليك..
بشار : هانيا...
سعيدة : راك تبان ليا سايگ واقيلة...المهم را واحد شوي هاو نجيو عدكم..بينما وجد ليا الحليب من كوري نجيو...
بشار : يوسف واشراق ؟!..
سعيدة : واه جايين غا تهنى...
بشار : شنو خاص ناخذو معايا ؟!..
سعيدة : ماخاص والي...راه معايا حسام وجايبة عمايا تا زكريا مزيان الي دويتي معاه وحشم منك...الى خاص شي حاجة يخرجو يتقداوها...ياك علمتي حبيبة ؟!..
قطع معاها وزاد كسيرا حتى وصل لدار طلع ودخل حط ساشيات فالكوزينة وهو يمشي عندها لبيت مالقاهاش لقى فراشها مصايب...مشا لدوش دق الباب اتا حل الباب ودخل عليها لقاها يلاه ناضت من طواليط وهي تقفز شادة على صدرها...
حبيبة : خلعتينيي...هفف...
بشار"قرب لعندها وشد وجهها بين ايده كايقلب فيها بعينيه وهو راه عاد خلعها هادي كاع ماشافها" : رجعتي ؟!..
حبيبة"حركات راسها ب لا" : لا ولكن حاسة بترويعة شوية...وفيا العطش...
بشار"حرك راسو وهو يبوسها فجبينها" : خرجي فطري...
حركات راسها و خلاها كملات الوضوء مشات لبيت صلات عاد خرجات لعندو جايا بشوي حتى خرج وهو يجرها معنقها وداها لفوطوي جلسات عاد مشا لكوزينة جاب الفطور...الامليط خلاه ليه وهي حط ليها كومير وزيت زيتون وزيتون مشرمل وداكشي الي قال را تبغي تاكلو...شافت الحليب وهي دير ايدها على فمها وضارت عندو حركات راسها ب لا...
بشار : ؟؟...
حبيبة : عافاك مابيتوش عاافاك...(جاتها البكية حيث خافتو يبززو عليها)..
بشار"بقى كايشوف فيها تاني بغات تبكي..ضار هز كاس عصير الليمون..وعطاه ليها...شداتو من عندو وشرباتو حسات بيه برد عليها وحيث فيه الحموضة شوية عجبها..عاد جبد دوا ديالها ديال فقر د.م عطاه ليها شرباتو هو لول عاد باش كحز ليها الماكلة تختار اش بغات تاكل...هزات كرواصة صافي"...
حبيبة : خلات ليا خالتو سعيدة اوديو بلي جايا..."حرك راسو" گالت ليا البارح اش بيتي نجيب ليك اش تشهيتي هي ومي عيدة..گلت ليها بيت جبن ماعرفتش واش باتجيبو ليا..
بشار : بلانو ساهل تم...ماشي مشكيل...
حبيبة : اليوم مامشيتيش لخدمة...ماتمشيش نهار كامل...
بشار : لا..
حبيبة : الاجتماع مابقاش ؟!..
بشار : سي باقي..
حبيبة : ياك غانمشي معاك...
بشار"الصمت"...
حبيبة"حطات ايدها على دراعو وصرطت ريقها" : سولتك ابشار...
بشار"حط كاس القهوة وضار عندها شد ليها ايدها باسها وشاف فيها بواحد شوفة هي الي كاتعرف معناها ديك شوفة الباردة ديالو" : ماكنعاودش هضرتي يا حبيبة...
بغات تهضر وهو ينوض هز باكية الكارو ومشا لكوزينة خلاها كاترمش...قاليها لا هي لا...حسات بيه بحال الى تعصب من نفس الهضرة هي عارفة الحركة صعيبة ولكن توثر اصعب...غوبشت فيه وهي تحط كرواصة وربعت ايديها بغات تفگس...
يتبع...
التعليقات
لا توجد تعليقات بعد، كن أول من يعلق.