محتوى القصة
كلنا كيكون عندنا ذكرى مع شخص سواء كانت زوينة او خايبة او صادمة...كلنا كيبقى فعقلنا دوك الاحداث ب اصواتها...حبيبة الصوت او الحوار الي ضار بينها وبين بشار كان حوار غالب عليه الخوف والمشاعر المجهولة من جيهتها...و غياب العقل والانتقام والوصول لهدف وغاية من جيهتو هو...مشاعر كانت راكباه غير طبيعية فالوقت الغلط ومع الشخص الغلط وضحية بريييئة...
حبيبة ابدا ماتنساش داك الصوت ولكن فاش سمعاتو فالتيليفون وسمعات صوته انتابها شك واش هو ؟ يمكن ماشي هو لانها يلاه تفكراتو وحسات بالخنقة وهي تخرج باش تنفس..معقول وصلها صوت تا فتيليفون وماسمعاتش مزيان وغلب عليها صوته...
ما تأكدت حتى عاود الكرة ونطق عاوثاني مجدد ليها نبرة ديال صوته كيقوليها ااااه هو انا...
بشار"هز حاجبو" : يوسف !!!
هنا قطعات بلا ماتشعر كأنه عيط ليها هي..كأنه تيليفونها هذاك ماشي تيليفون لقاتو طايح وماعرفاتو لمن...عينيها وساعو وقلبها زادو دقاتو...المشاعر الي كنحسوها فاش كنتخلعو ونتصدمو هما الي حسات بيهم دابا مع ذبذبات الشك فيها عرق كيقول را ماااشي هو..حيث واخا عاقلة على صوت ماعاشراتوش باش تاكد منو...بدات كترعد حيث تضهشرت وتخلعت...ماجات فين تستوعب تا تحطات على كتافها ايد وهي طير لسما ونزلت تا غوتات وقفزاتها معاها...
حبيبة : مم مامااااا..."حطات ايدها على صدرها"
سعيدة : بسم الله عليك مالكي يا بنتي اش طاري ليك ؟ قلقتيني عليك...
حبيبة"كتحرك راسها ب بلا" : ه هو عيط صونا..فالتيليفون..
سعيدة : هاا ؟ اش ..شكون عيط ابنتي..تهدني بعدا شوفي وجهك كيف ولا صفر...
داتها لديك طبيلة وجلساتها كبات ليها كاس الماء كتشوف فيها كيفاش مصدومة ومخلوعة...مافهمتهاش ماعرفاتش انها تصدمت وتدهشرت من صوته...بقات معاها شحال تا عاود صونا تيليفون يوسف الي فايديها والي معارفاهش هي ديال يوسف...
حبيبة"رمات تيليفون فوق طابلة بجهد" : ه هو...
سعيدة"شافت تيليفون كيصوني بنمرة مخبية" : هذا تيليفون يوسف اش جابو لعندك ...بلاتي..(ضارت كتشوف فالارجاء وهي دور راسها جيهة الباب ديال دار الكبييير وبدات تعيط) يووووسف...منااار بنتي طلعي شوفي يوسف ولا عيطي لخالتك توريا تشوفو تيليفونو كيصوني...
ضارت كتشوف فتيليفون كيصوني وتشوف فحبيبة الي فمها كيترعد وعينيها ولاو حمرييين وتنهج...
سعيدة : شكون عيط ليه ؟ فين لقيتي تيليفونو...
حبيبة : مم هو هو هذاك كيعيط ليه...
سعيدة : شكون هذاك ؟!."بقات شحال مافاهمة والو وهي دير ليها طن..عرفاتو بشار الي كيصوني..حيث يوسف ناس قلال كيصونيو ليه..منهم واحد خالو (اي خو توريا) عزيز عليه يوسف ومتقرب منو..و هما و بشار...بما انه حبيبة قالت هو اذن جاوبات وعرفاتو وفسرات وجهها الي تخطف لونه...وهي تمد ايدها بزربة بغات تجاوب...ماجات فين تجاوب حتى قطع وطفى تيليفون بمرة لانه كان مديشارجي...
سعيدة : اوييلي حي طفى..."هزات عينيها ف حبيبة" هضرتي معاه ؟!
حبيبة"الصمت مزال قلبها كيضرب بجهد"
سعيدة : حبيبة !! بنتي الله يرضي عليك توگضي..بسم الله عليك حبيبة !!
"مالقات اش دير خوات شوية الما فايدها ورشات عليها الما حتى شهقات ودموعها دارو فررر...فيقتها من صدمة الي دخلات فيها بالخلعة من صوته وهي تجلس حداها نسات كاع يوسف وتيليفونو فين لقاتو حبيبة...جراتها وعنقاتها خشات ليها راسها فحضنها وحاوطاتو كتهدن فيها وهي ماكتهضرش غير دموع دايرين خدمتهم كتحس بقلبها بغى يخرج من بلاصتو...بقات هكاك حتى حست بيها تهدنت وهي تهز ليها راسها...
سعيدة : شوية ؟!
حبيبة"كترمش فيها وشفارها منديين بدموع تا لصقو" : هو هو ياك ؟!..
سعيدة : انا لدابا مازال ماعرفتش كيفاش وقع ليكم..ومابغيتش نزيدك تهضري حتى تعاودي ليا راااسك وبخاطرك تگدي ترتاحي..وليني نسولك ابنتي واش هضرتو شي حاجة ماهياش ديك الليلة ؟. ولا گاليك فالتيليفون شكوون ؟!
حبيبة : ص صصصوته صوته عمري نساه..عمري نسى هاديك الليلة وعمري نسمح ل ليه..مابغيتوش يجي وبغيتو ي جييي..بغيتو يجي يفكني يطلقني ولا يدير حل ونمشي فحالي اهى..نمشي فحالي وعمر وجهي متشوفوه انا مسااامحة ليه غير يهنيني منو..ب ببب....
بدات كتهضر وشفايفها كيترعدو تا مبقاتش كتسيطر على الكلام وهي تعطيها الكاس تشرب تاني وتا الكاس مابغى يتشد ليها فمها ولا بيض...سكتات سعيدة مابقاتش سولت..خلاتها تاني شحااال تا حست بيها تهدنت...وباش تهدنها بدلات الموضوع هي كاع...
سعيدة : منين جاك تيليفون يوسف ؟!...
حبيبة"عينيها على طابلة وايديها مشابكين فوق رجليها كتفرك فيهم" : لقيتو تحت ديك شجرة لهيه "هزات صبعها وشيرات ليها لفين" حدا هذاك الي داير فحال لاپيسين...
سعيدة : شاريج !!..واش وصلو تم..."ضارت كتعيط" مناااار..
جات منار من لداخل كتجرييي وقفات عليها...
سعيدة : فين يوسف ؟! ياك گلت ليك سولي خالتك توريا ؟
منار : گالت ليا خالتي توريا واقلة مشى مع حسام وزكرياء وبابل لجامع يصليو العشا...
سعيدة : شدي دي ليها تيليفونو ديرو يتشارجا وگولي ليها را كان طايح ليه حدا شاريج غير حبيبة لقاتو...
ضارت عند حبيبة لقاتها موسعة عينيها كتشوف فنقطة بعيييدة جاها فحال سهو..وتحت عينيها ولا حمرررر...مابغاتش تقوليها تقول لتريا را بشار كان كيصوني..فضلات حتى يجي هاشم وتقولها ليه ويعرفو اش يديرو...
دخلات منار كتجري شادة تيليفون فايدها نيشان لكوزينة لقات توريا كتحرك فمرميطة ديال شعرية بمطيشة واللحم تشهاوها حيث عياو بالدجاج وماكلة العراسات والعراضات لناس الي جاو يباركو... مدات ليها تيليفون يوسف..
منار : گالت ليك را طفى ليه تيليفون لقاتو ختي حبيبة حدا شاريج...
توريا"جمعت حجبانها" : واش دا حبيبة لتم ؟!
منار"عوجات فمها" : منعرف..معاها مي..."ضارت مشات"
اشراق : دابا نتي موقفاني هنا نعاونك وهي جالسة برا..ياك سبعيام كتولي تشقى العروسة...وهي سبعيام وهي فالبيت مكتخرج مكنشوفوها ودابا خرجات جالسة برا وشادة تيليفون هي حيث مرتو وانا مخليني بلا تيليفون وهرسو ليا من فوق..الحگرة هادي امي ياااك...
توريا : ..فعايلك جابوها ليك...ونهار باقي نسمع من فمك خويا ما خويا داك نهار كحل زحل عليك..ماعندك تا خوك من غير يوسف..وديك الي غاديري ليا راسك براسها دير وقيت هنا ورا تمشي عليا فحالها مغانشد عندي بنات ناس لصقهم فعنگي...غسلي معاك دوك الماعن زجمعي عليا الكوزينة...وسدي عليا فمك..."بجهد" تا قفزات" يلاااااه...
شدات تيليفون فايدها وخرجات من كوزينة طلعات نيشان لفوق لبيت فين كينعس يوسف زكرياء وحسام...عرفاتهم خارجين حلات الباب ومشات لمجر الي عند راسو جبدات شارجور ودارتو ليه يتشارجا...
فهاد اللحظة تحل الباب ديال الفيرما وهو يدخل كاميو سايقو سيحمد وحداه الحاج عبد القادر الي تلاقاه فطريق جاي من جامع وهزو...نزلو بزوج وتوجهو لباب لقاو سعيدة جالسة هي وحبيبة الي بدات كتنفس ولكن باقيا حادرة راسها...رماو سلام وسيحمد طلعها وهبطها كتبان ليه صغيورة كينسى راها فعمر 18 سنة وبلي هي مرااات بشااار العروس الي وقع عليها الاختيار لزينها ولصغرها و لنسبها كونها بنت واحد من تجار الكبار فمراكش ولباس عليهم...عبد القادر حدو گاليهم دخلو من تم مكاين لاش تجلسو برا والرباعة داخلين خارجين فالفيرما كيخدمو فالسقي بالليل والي كيطل على الكوري والعساسة تم...
سعيدة : واخا سيدي نتسناو غايجي هاشم وحسام ودراري..
سيحمد : زكريا تاهو خارج ؟!
سعيدة : مشى يصلي مع حسام وهاشم معاهم تا يوسف...
حرك ليها راسو ودخل غا بان لربيعة وهي تنوض سبقاتو لفوق تعطيه يبدل ويغسل حالتو من سواق وشووووف لما شدها تاني فشي علاقة حميمية هههه...
في بيت عيدة وعبد القادر...سد الباب ديال ماريو كيعقد فصديفات تريكو بيج قطن وسروال قندريسي مبرد فيه...كيردد "الله اكبر" " لا اله الا الله" وحيد طاقية حتى حك راسو شعرو قوي وبيض ورجع طاقية هز تسبيح وجلس حدا عيدة الي كانت كتصلي جالسة كملات وبدات تحي...
ع.القادر : العشا معطل شي ؟
عيدة"كانت كتمتم الباقيات صالحات" : وراه ساير علاين..جعتي ولا عيييتي ؟!
ع.القادر : واكل شي بركة عند سملالي فالمحل ديالو..غا نقبت وكان المعدة بدات دير خدمتها...وعياان يضهر ليا منصيبش نتعشا..نابي على شي وحدة فكنيناتك تجيب ليا كاس ديال اللبن نبرد بيه ونتكى...
عيدة"كتمتم وتحرك فراسها" : هدك الزمان الحاج...
ع.القادر : ولا غا هد را هد ودار خدمتو..غادين فالشرف الحاجة..خاص الي يگابلنا نعول على كنيناتي ؟...هاو نهار نمرض يطالعو ليا على عراضي ؟!
عيدة : اوهوووي...راني عند كلمتي مناسياكش...
عبد القادر : ياك درت ليك خاطرك وجوجت ليك الي بقى ؟! اش تساليني...
عيدة : وخا دارها بينا وحطنا بوجاهنا تا ولينا نرقعو من هن وكذبو من هن ومصفيو الخواطر الي يسوا والي مايسوا..نسمعو فكلام العيب ونگولو زين وكلام زين نگولو شين..."حركات راسها مثقلة" ماعليش ماااعليش دارها بينا والي عطا الله عطاه...
ع.القادر : درت برَيِّك وصبرت على الكريدي الي مايجمعو غالفم ودرنا معاه حل يحط شوي بشوي كل عام وعلاش گد..هو مايبيغي نسمحو فحقنا وانا منصيبش نسمح فالكريدي...
عيدة. : عينا فنسوبيتو..نسوبية زينة والبنت عشقتها تكون وحدة من كنيناتي..على بالي يتهد ويرجع لبلادو وهادشي يحبس گلوبنا طابت وكبدتنا تشوات ولات رماد...
ع.القادر : ياك گاليك بغى يتجوج شي بنت تم كون درتي ليه خاطرو كنتي تاكليه بحوايجو...شديتي ضد وحيلتك وصلاتك لهن..ودير علاش تلگى فاش..هو هذا...
عيدة"الصمت"
ع.القادر : ماعلينا...امتى ناوية تشوفي ليا شي بنت من بنات دوار حاطة عينيك على شي وحدة ولا نشوف معارفي ؟!
عيدة : معارفك باغيين يلصقو فيك بناتهم...عينهم على طمع نسوبيتهم شينة...
ع.القادر : ماصبتشاااي نزيدك تشوفي ليا..درنا بالعشة من جيهتك الحاجة...
عيدة : مادايرة غالي شرعو ليك الله...مانكذبوشاااي الحاج صحتي گليلة مانگد نقوم بيك..هانتا تشوف غا ولادي الي يخطويو بيا نزيد راسي من هنا لعند الباب نطيح...عاد نهزك نتا ونقوم بيك...عراضك (عيبو يعني العورة ديالو) را ميطالع ليك بيه غا مرتك...
ع.القادر : عشرين عام وزيادة باش ماتت فاطنة الله يرحمها ويواليها برحمته ماصبت ناخذ وراها..ماكان غراضي شااي بعيالات وليني كبرت الحاجة ونبغي الي تقوم بيا...تا شغلي يكون حلال (زعما نعاس هو شغلو ههه) مانخرج نفسد على شيبي...
عيدة"تنهدت" : سيمانة جايا لا طولنا نهبط لدوار صبايطية نشوف ليك بنت مَسور الصغيرة..
ع.القادر"موقف رجل تانيها فوق ناموسية كيحك فركبتو وحجبانو ملاقيين بتغوبيشة" : شحاال عندها ؟!
عيدة : وكبيرة گد الگد..ونامسينا (ولبارح) سولت ميمتها گالت ليا عندها ستة وعشرين هكاك..
ع.القادر : الي يدار ديريه والي يخص قومي بيه...العرس ميكونش نديرو غا تكاتيبة ودوز لدار...
كيف تقطع الخط عاود اتاصل ومالقاش جواب...مافهمش كيفاش تطلق الخط وماسمعش صوته...ملي لقا تيليفون طافي رجح ان مو توريا هي الي جاوبت ما ضنش ؤاها حبيبة..وهنا بالو مشى ان توريا عرفاتو وطفات تيليفون عليه...ديما كان كيعيط ليه ديما كيتوحشو يتاصل بيه...ولانه بدل النمرة مابغاش يعرفوها ويضدقو متاصلين بيه...بما انه حافض نمرة "يوسف" خباها وتاصل بيه لان شوق من جيهة خوه قت.لو وخاص يسمع صوته حيث ببساطة يوسف هو عينيه وهو نقطة ضعفو اذا لخصنا...
كيف قطع حط تيليفون بشوية وناض حط داك الكاس تا بغى يخوي ليه تاني وهو يوقف كيمسد فعينيه مزيااان بمساج وفنفس الوقت كيزفر...راسو باقي كيتبخ من اخر الاحداث...شي حاجة فيه كتقوليه خاصك تعاود ترجع عند طبيب ويرجع يكمل ليك...
لابس غير شورط قصير والفوق عرياان...كمل خدمتو العادية غير تما وخذا ليه وقت يتنغم فيه مع كاسو حتى لقى راسو باغي يهضر مع خوه يعرف صحتو وصافي..تسند بايديه فوق البوطاجي ديال كوزينة كينهج ويفكر فهاد الحالة الي واصل ليها..حتى قال را بدا كيعيش حياتو وولف روتينو فالمانيا حتى رجع رجعة من بعد غياب لمغرب ورجع تنكس من جديد. رجع داك الشخص الي كيخرج قرارات خايبة رجع داك الانسان الغير متزن نفسيا...ماعارفش بالي هو واخا بعيد ولا قريب را غير متزن وكان خاص يبقى يتعالج عند طبيب نفسي..لكن ملي شاف راسو مزياان طلع ليه طبيب نفسي فراسو...كايدور دورة ويرجع يتفكر داك "تشاش" كيف سماه هو..تشاش ديال صوت الي كانت كتقوليه "عافاك راني باقا صغيرة على هادشي"...كان ماعاقلش ولكن تبعات الليلة كيبقاو محفورين...بعض الاشياء الي كيلتاقطها العقل كتبقى...
حك شنايفو بسنانو ودفع داك الكاس بجهد كركبو فلافابو تاتهرس فيه بشرابو...خلا زمر تما ومشى ديريكت لدوش حيد ماتبقى من حوايجو وطلق الما دافي ينزل عليه...
خرجات توريا من كوزينة لقاتهم فالبيت جالسين....
توريا : حبيبة..."هزات فيها عينيها" دوزي بنتي هزي مع اشراق الگصاري وحدة تديها هي لقاع دار نتعشاو فيها رجال و گصرية جيبيها نتي هنا نتعشاو فيها حنا...
سعيدة"وقفات" : غا خليها انا نجيب مع اشراق...
توريا سكتات ماقالت والو...اشراق دات القصرية ل قاع دار دخانها خارج ودات المعاليق وطباسل صغار ديال هريسة...وسعيدة جابت القصرية لعندهم لبيت وحطات معالق وهريسة...جات توريا كتشمر على كمايمها وكتعيط ل بقية يجيو...بان ليها هاشم داخل هو وحسام ودخلات حساب ليها معاهم تا يوسف...يلاه تجمعو ياكلو وهما يدورو عند حبيبة لقاوها غا كتاكل شعرية ب شعرية هههه...
سعيدة. : كولي بنتي...
حبيبة : ها واخا..احم.."ماعندهاش جهد وطاقة باقي قلبها كيضرب باقيا شادة فيها الخلعة..."
ربيعة : مال وجهك مسقوط من د.م ؟!...ماعجبتينيش گبيلة واش ضاراك شي حاجة ؟!
حبيبة"حركات راسها ب لا"
توريا : جاوبيها عيب تردي الجواب براسك...
حبيبة"صرطات ريق بحال العافية.." : ل لا ماضارني والو "حنحنت منضفة حلقها حيث نطقات بصوت مشحرج"...
اشراق : كتباني فحال معاجباكش الشعرية مكتاكليهاش...
حبيبة"حركات راسها ب لا" : اهء ماعنديش معاها...
كريمة : وخاصك تولفي تاكليها هههه كاتگوليا مي عيب داكشي الي ولفتيه فداركم حيديه فدار راجلك...انا كسكسو كاع مكنت نحملو هاو ملي تجوجت شهرين هادي وليت نطيبو كااع فنوبتي هههه...دابا تعلمي تاكلي وتولفي على شحال من حاجة خصوصا لاكان راجلك كيموت عليها تولي طيبيها وتاكليها بزز هنن...
حبيبة غا سمعت راجلك وهو يرجع تهز قلبها من جديد تا بغات تبكي تاني وهي تزير على معيلقة تا صباعها بياااضو فيها...حسات بيها سعيدة وهي تحط ايدها على ضهرها...بلا مايحسو وهي تزير ليها على جنبها...كتحس بسعيدة هي داك البلسم الي كيتحط عند اول جرح...
ربيعة : ونوضي طيبي ليك شي بيضات صلقيهم ولا قليهم ولا قلي ليك بطاطا...ولا ديري كاشير فخبيز...
كريمة : بغيتي شي دجاج بقى من العرس فالفريگو ؟!
حبيبة"حركات راسها. ب لا"
اشراق : ايوى كولي شعرية على گلبك ههههههه...غا كنضحك عماك را كاين فرماج تاحنا عندنا كلشي...ولا مولفة سوشي و شاورما...
حبيبة"صرطات ريقها ونطقات بزز" : مافياش مياكل...احم..عافاك واخا نطلع لبيت ؟!
توريا : صبري تانتعشاو وطلعي عيب طلعي ولواسك تاحد فيهم ماطلع...
حبيبة حسات بالنقطة سخوونة تلاحت على قلبها بغات تنوض تقلب عليهم طابلة بغات تغوت بغات تمشي فحالها تهرب على رجليها فداك الليل بغات تخشي لتوريا راسها فديك القصرية...تزيرات واااحد تزيييرة مافسوقها مايتعاود...يلاه غاتهضر حتى سمعات صوت عبد القادر من بعيد...
ع.القادر. : وتي فين يوسف اتوريا ؟!
توريا"هزات راسها وضارت كتلحس فايدها حيث كياكلو بايديهم غير حبيبة الي بمعيلقة" : و را نابيت عليه علموني راه مع حسام...
حسام"هز راسو كان هو وزكريا خاشيين راسهم كي دجاج" : تي لا مامشاش معانا...
كانت جالسة لهيه ناضت على وقفتها وضارت غاديا .خرجات من البيت لعندهم لقاع دار...
توريا : هاويلي فين يوسف احساااام ؟؟!..
هاشم : شفتيه الفوگ ؟!
توريا : مكاينش گااااع فدار...
سعيدة"خرجات غسلت ايدها فلافابو تم دايرينو حدا الباب الكبير ديال دار كتمسح وتهضر" : تيليفونو لقاتو غا حبيبة گبيلة..
توريا"ضارت عندها" : فين لگيتيه ؟!
حبيبة: م ف حدا لابيسين...
اشراق : شاااريج امي هو شاريج...گالت ليك حدا شاريج گبيلة مي...
هاشم : ونتي عرفتيه تلگا تم ما فكرتي تسولي ولا تهزي الهم ؟!...
توريا : هااااااشم !!! اش هاد الهضرة.؟؟ فييييين يوسف خرجو قلبو عليه...."ضارت كتعيط عليه بسميتو تا بح صوتها" يوسسف يووووووساااااااااااف.....
سيحمد"ضرب ولدو لراسو تا شوي يجي على فمو" : شتكم باركين ليا هنا . خرجو قلبو على دري نعل ليكم جدود...
"جهد صوته على كرتو وكريمة والبقية تا قفزت حبيبة مخلوعة كملو عليها الباقي وبدات ترعد وراجعة باللور خافت وبدات تنهج بالخلعة....
خرجو اغلبهم لبرا تا من عبد القادر خرج...سيحمد طلع الفوق هو وربيعة يقلبو ومخلييين توريا جلسات فسداري وحطات ايدها على حنكها كتسنا فيهم هما يقلبو عليه...كتراري براسها...ماطاحش فبالها ممكن تكون واقعة ليه شي حاجة او مابغاتش يطيح فبالها يوسف هو الابن الوحييييد الي معزتو وحدها واخا تقصاح تتعيا مكتقصاحش عليه عزيز عليها بزاااف...وخا فولادتو ملي عرفاتو من متلازمة داون فحال مارضاتش وماكانتش كترضى بيه ولا يخرج يشوفو شي حد ويعرفوه ولدها...لكن مع مرور الزمن ولا اقرب واحد ليها والولد مناعتو ضعيفة دغيا كيمرض وداكشي علاش مكملش فالمدرسة...عندو احسن تيليفونات واحسن الحوايج كيوصلوه من خوه..محبوب عند كلشي وتاحد ما كايقدر يخسر ليه خاطرو...حيث هو نقطة البيضاء فهاد العائلة ونقطة العسل على قلوبهم....
خرج حسام وزكريا وحتى هاشم وسيحمد وعبد القادر كلهم مشاو يقلبو وعلمو الربَّاعة(الفلاحة الي كيقابلو الفيرما)...يقلبو معاهم عليه لا يكون تودر ولا تالف...مشاو جيهة الشجرة فين وراتهم حبيبة لقات تيليفون مالقاوش ولاو شعلو ديجانكتورات كاملين وولات الفيرما فحال النهار...ضواو بيضين تا ضرو حبيبة فعينيها...
هاشم"جا عند سعيدة" : هاني اش كاين ؟!
سعيدة : غا باش تعرف حبيبة لقاتو كيصوني وجاوبت كان بشار هو الي صونا ليه بنمرة مخبية...
هاشم : وايلي ؟..كيهصر معاه ؟ وعلاش گلب علينا اش درنا ليه انا وياك ؟ ..
سعيدة ؛ ماشي وقت هاد الهضرة سير لگا يوسف وديك ساعة نشوفو هادشي...
رجع كيقلب معاهم وحيث الفيرما كبيرة تعجبو وهما كيقلبو...سعيدة كدور هي و اشراق ومنار وحبيبة وريهان بقاو وحدهم على برا فديك طبيلة...
حبيبة : اشنو كاين هنا ؟!
منار : تما بيت المونة كبييير فيه كوشينة كنگولو ليها كوزينة خارجة على برا...
حبيبة"ضارت كتشوف لهيييه فين لقات تيليفون ورجع لبالها تاني صوته فاش نطق وجاوب...رجع لبالها تاني نفس الاحساس تا شدات على صدرها وهبطات راسها...الحالة الي نااايضة على يوسف نساتها فيه شوية حتى رجعات تفكراتو تاني...حسات براسها غاتنهار وهي تنوض وقفات شافت ف ريهان الاخت لاخرى..." : اجيو نقلبو عليه تما ؟!
ريهان : واخا...
....
فهاد اللحظة كان ناعس على ضهرو ملي خرج من دوش لبس تيشرت و شورط قصير وتلاح فوق ناموسية شعرو منفوش..هز لابتوب ديالو ودخل لايمايل الي رسلات ليه هانزاده على الخدمة فيه تا شرح مفصل لشنو خاص يدير باش يخدم عليه كونه مهندس كميائي كادر صحيح صناعة وقود طائرات...شوي صونا ليه تيليفونو هزو ببرود كيشوف شكوون بانت ليه هانزاده بقى شحاال عاد جاوب...
هانزاده. : ناعس !!؟
بشار : لا..
هانزاده.: رسلت ليك كلشي تما...عندنا 15 يوم يوجد باش نعطيه ليهم ف عابادان..حيث غانمشي ليها احسن نديه انا شخصيا..."ماسمعات منو تا جواب" بشار ؟
بشار"عقلو مشاااااا مع يوسف...ماعرفش علاش بدا كيفكر فيه وخاطرو تزير من جيهتو...تا سمع صوتها وهو يخنزر ": نهار يوجد هاد زعت يوصلك...
هانزاده. : نجي عندك دابا نتعاونو ؟!
بشار"نطق بدارجة" : بابت اش ؟
هانزاده : نعم ؟ مافهمتش...
"تا سمعات تيليفون تقطع..شافت فتيليفونها لقاتو قطع وهي تزفر وبدات تحك فشعرها."
كيف قطع عليها رجع لخدمتو كيمل فيها باش يشغل بالو ويشغل راسو بيها ومايرجعش يشرب...واخا كيخدم عقلو كيمشي بعييييييد...تاني بداو يرجعو ليه ذكريات هاد المرة مخلطين وزيد على خاطرو الي مزير من جيهة خوه وكيفاش طفى عليه تيليفون...وعقلو كيمشي حتى لديك بنت الناس الي خلاها ليهم وزاد رمى كلشي وراه...حالو حاااال فالمانيا وحالهم حاااال فالفيرما....مشاو بعيييييد يقلبو وتوريا مرة توقف مرة تجلس...حبيبة قلبات مع البنات حتى هي مسكينة دايرة حقها وخا الي فيها كافيها..عز عليها يوسف...
حبيبة : اشنو تما
منار : بيت البير هذاك...
بيت غاديا وتخطوي..تا دخلو بنات شعلو ضو تما...مشاو كيقلبو مالقاوهش...خرجو من البيت وهي تهز عينيها بانو ليها رجلين مشات كتخطوي تا وصلات وهو يبان ليها طايح بين البيت ديال البير والحايط الي حداه...هبطات عينيها ليه بان ليها مغيب مشات تجري لعندو...
حبيبة"بخوف عينيها وساعو" : يوسف !! يوسف يووووسف. يوووسف...اويلي مالك...."ضارت عند البنات"...سيري عيطي ليهم جرييييي...
هبطات عينيها ليه كتقلب فيه دورات ليه راسو...بان ليها غاااايب... ومنخرو خارج منو الد.م....
"يوسف"
يوسف اهم شخص واهم فرد فهاد العائلة اكثر واحد محبوب وسطهم والوحيد الي داخل سوق راسو غير كيضحك وساكت صوته قليل فين تسمعيه...ومن الافراد الي خاص يكون عليه مراقبة لان صحتو قليلة ولانه ماخاصش يتغفل عليه ابدا...الاهمال جا من الام توريا الي غفلات عليه وتدهات فالمشاكيل الي وقعات فالاونة الاخيرة مع "بشار"...
"مستعجلات" احدى اقرب المصحات فطريقهم ف مراكش...
جالسين هما بربعة فوق الكراسا تما ديال الانتظار...سيحمد وسعيدة وعبد القادر وتوريا اكيييد الي كانت دايرة طرف زيفها على فمها وتراري عينيها فنقطة بعييييدة ودور دورة وتنهد تا كتحط عليها سعيدة ايدها طبطب عليها...وهاشم الي كان واقف بعييييد كيهضر مع حسام الي بقى معاهم فالفيرما...
حسام : كلشي هنا جالس تا مي لالة جالسة...
هاشم : رد ليها البال يمشي يطلع ليها طونسيو نصدقو فجوج...
يلاه كيمسد عينيه ويهضر تا تحل الباب وخرج الطبيب المناوب تما...قطع على حسام ومشى كيزرب لعندو البقية هزو ريوسهم شي وقف وشي بقى جالس كيتسنى يسمع اش غايقول...
هاشم : امضرا دكتور مكاين باس !؟
طبيب : كان الطونسيون هابط ليه بزاف داكشي باش غاب على الوعي رجحنا انه يكون قلة الماكلة وبسباب السخانة الي كانت طالعة ...مهم علقنا ليه سيروم وهبطنا ليه سخانة..بالنسبة لنزيف الي ف الانف الى استمر مرة اخرى وعاود خاص يرجع ضروري نديرو ليه سكانير باش نعرفو اش كاين بالضبط.....يسالي ليه سيروم وتقدرو ترجعوه..غانكتب ليه اوغدونونص يتبع دوا الى عاود رجعات سخانة من جديد لانه بحسب ما شرحتي ليا سيمانة باش كانت فيه ؟ "حرك هاشم راسو" الى عاود طلعات ومابغاتش تنزل رجعوه فالبلاصة لهنا...الله يشافيه...
تنهد هاشم وهو يسمع صوت توريا
توريا : اش گال مافهمتش...
هاشم : الى عاود طلعات ليه سخانة ولا عاود رعف علمييني باش مكان نرجعوه لهنا...علاش مكانش كياكل ؟!
توريا : ماعرفتشااي اهاشم كنحط ليه معاكم ولا راسو ماكلتو قليلة واش من المرض باقي ماشدش فراسو...
هاشم : عطيه ياكل عطيه ردي ليه البال اتوريا راه هشيش يوسف ماشي فحالنا عاضين فالصبر وواگفين غا بالنية والدعا...
ع.القادر"شافو انفاعل وهو ينطق بغى يهدن سوق" : ماوقع باس اهاشم...الله دار تاويل..
هاشم : با يوسف كلنا دايرين معاه البال وليني حنا ماجالسينش فالدار بزاف كيف لاخرين...يردو ليه البال هاهي ختي توريا نگولو تدهات وايدها باقيا ضاراها(حيث توريا باقيا دايرة ديك الباندة ديال الفدع.) وختو فين كان عقلها ؟!
توريا"الصمت"
سعيدة : وانا نيت كنت نرد ليه البال وماعرفت كي طرا ليا..تاواحد اهاشم مادارهت زينة غا هدن السوق...
سيحمد : شحال يخصو باش نمشيو من هنا ؟!
هاشم"هز فيه عينيه" ؛ سير دابا نيت ديهم معاك انا نبقى مع سعيدة ولا توريا نيت ونجيبوه معانا....
سعيدة : تصيبي تمشي اتوريا وانا نبقى مع هاشم ؟
توريا"حركات راسها ب لا" : غا سيري نتي عماهم (معاهم) لازمني نبقى معاه..سيري علمي اشراق تگاد الفراش فناموسية فبيتي تما ينعس نبات حداه لا تعود طلع ليه سخانة...وشوفي لاكاين شوية المخينزة وليمون تانجي ونطحنها ليه...هاد سخانة الي كثرات عايه ماعجبتني..."تنهدت دايرة صباعها على فمها بتفكير"
سعيدة مالقات ماتقول مايمكنش ليها تاكد عليها تمشي حيث كتبقى مو...طبطبات عليها وناضت مشات مع سيحمد وعبد القادر فطوموبيل ديالو الي سايقها سيحمد...
بقى هاشم وتوريا كيتسناو حتى علموهم بالي كمل سيروم وبدا كيحل عينيه وخا واكلها فصحتو ملي طاح...دخلات عندو طبطبات عليه وباست ليه راسو..عاونو هاشم تاا وقف جابو ليهم كرسي متحرك جلسوه فيه تا خرج هاشم خلص زبالة ديال لفلوس تا بغى يخلص من گيشي الي مخليها ليه بشار فيها حساب غير ليوسف و اشراق يصرف عليهم منها..وهو يخشيها وجبد ديالتو خلص من فلوسو هو حيث يوسف عندو فحال حسام...ماتهمش كاع لدوك المصاريف...وصل عند الباب ديال المصحة من لداخل لقاها واقفة دايرة ليه راسو عند كرشها معنقاه...غا بان ليها وهي تدور وهبطت صاكها بدراعها حطاتو فوق ركابية يوسف وجبدات بزطام فيه لاكارط گيشي ديال حساب توفير باسم البريد بنك فين فاتحة حسابها...مدتها ليه..
توريا : هاك شد خلص سبيتار...
هاشم"شاف فلاكارط ورجع شاف فيها" : كاتعايري فينا اختي توريا ؟..يوسف بان غا ولد خويا ؟ ماشي ولدي تاهو ؟ هاد المرة انا الي غانتقلق منك بزاااف عايريني وماديري هاد الفعايل...زيدي دخلي دري را عيان...
خلاها وتحنى لعند يوسف هزو بين ايديه تاهو كي الكميشة...عنقو وحط مسكين رويسو على كتف هاشم الي حط عليه راسو وحس براسو دااافي....حلات ليه باب لور ودخلو تما قادو مزيان وغطاه بواحد غطا جابوه معاهم فاش كانو جايبينو...ركبات حداه القدام وزاد كسيرا ل دوار...طريق كلها وعقلو مع يوسف الي حاس بيه مريييييض واش بيه شي مرض واش مرض وهملوه ولا نفسيتو مريضة ولا كيفاش وقع ليه وكيفاش طاح ليه تيليفون فجيه وهو لقاوه طايح فجيه...فضل يسكت حتى يتوگض يوسف ويسولو نيشان....
مع وصلو الفيرما كانت الساعة الربعة ديال الصباح حيث تعطلو بزاف فالكلينيك...لقاو كلشي نعس تقريبا الا حسام وسعيدة وعيدة وعبد القادر واشراق....حبيبة وحدها الي كانت فالصالون قلبها عليه واقفة كتشوف فالشرجم تا بانت ليها سيارة هاشم داخلة ماحساتش براسها تا خرجات كتزرب ناسية همها..تبعات سعيدة وحسام الي خرجو عندهم برا....
هاد المرة هزو حساام بين دراعو عياااان مغمض عينيه ماهواش هنا...طلعو كاملين وراه تا دخلو لبيت توريا الي وجداتو اشراق كيف طلبات منها...غطاتو سعيدة ودوزات ايدها على جبهتو لقاتها دافية...
سعيدة. : يلاه سيرو رتاحو الفجر هو هذا...
حبيبة"نغزات سعيدة ب ايدها تا ضارت عندها" : كيف بقى ؟!
سعيدة : شوية بنتي هانتي تشوفي...
حركات حبيبة راسها وبقات تشوف فيه...عز عليها وعمرها تنصى فاش لقاتو طايح وقاستو لقات راسو طايب وكيفاس حل عينيه واحد اللحظة كينين...شوية جراتها سعيدة وخرجو مشات هي لبيتها الي اخيييرا غاتسد عليها وترتاح ولاخرين كذلك...مع دخلات حيدات الفوقي حيث قهرها صهد تما وكلها عروقات متكرهاتش تدخل تدوش كيف مولفة ولكن حشمات وفضلات تال صباح عاد تدوش تحيد العرق..اكتفات غير بواحد لي لانجيت ديال الجسم مسحات بيهم منعشين..وتكات ففراشها حاطة راسها على مخدتها كل مكتخلوا بينها وبين راسها كترجع ليها ومضات الذكرى ديال ديك الليلة...وكيفاش خاصها تصبر صحة تاتحل الامور وتخرج باقل اضرار من هاد زواج الجحيم الي دخلات فيه راسها بقرار منها وبخاااطرها قصد تخليص باها من مشاكل الكريديات...
صوت الديوك كاااسرة دنيا فالدوار وفالفيرما نييييت بحكم عندهم حتى بلاصة فين مربييين الدجاج البلدي و القنان والبط وحتى صوت الطاوووس الي فرش ريشو فور ما شاف الانثى كيف العادة مخلي لوحة فنية مزينة بريشو...دورات راسها بغات تكمل نعاسها حيث عاد غمضات ليها عينها بالسهييير والي ختمات سهرتها من بعد الي وقع بالتفكييير الي كيقهر وطبعا الغمة الي فحلقها والبكا الي عيات تحبس...حتى بدا الباب يتدق وهي تزفر بنفاذ صبر ضنات انها كريمة تاني وهو يتحل الباب وهاد المرة اللوسة اشرااق الي دخلات تاهي حاقدة مفيقاها امها على بونبر...
اشراق. : ختي حبيبة گالت ليك مي نوضي تفطري...
حبيبة : مافياش والله بغيت نعس را مناعساش...
اشراق"تنهدات" : تاحد مناعس وليني ماعندك ماديري كلشي فاق...وهبطي بغاك عمي هاشم يسولك...
لاحت ليها هاد الهضرة ومشات خلاتها كترمش بغات تبكي راسها كيفرفر بنعاس...شافت تا عياات وهي تنوض هزات تيليفون كتفوه وتحك فعينيها لقاتها سبعة ونص ديال صباح...لقات اوديو من ماماها جاوباتها طمنتها عليها وناضت كتعگز غاديا خارجة لدوش وهي بديباردو نسااات راسها تا شوي تخرج وهي توسع عينيها حطات ايدها على صدرها ورجعات تجري لبسات الفوقي ديال بيجامة هزات غير جيل نيطوايون واتخوس شيتة سنان ومعجون وباندبوش...مشات لمجر هزات كيلوط جديد كلكماتو فايدها وخرجات...حكات سنانها عاد غسلات وجهها وتوضات بالماء المطهر بدلات كيلوط وصبنات لاخور كيف ولفاتها امها بايدها راسها بصابون كلشي جابتو ليها فاش رجعو لعندها كاع حاجياتنها روتينها خذاتهم ليها...وخرجات بزربة دخلات لبيت جبدات بيجامة ساتان عريضة شوي وطويلة على لور حيث بصح حشمات تنزل وهي لور وليهونش كيبرزطوها مع ناس ورجال...مشطات شعرها بالبروص وجمعاتو لفوق رشات بارفان ديال الفانيل ديال دار وخرجات..كتحس براسها كترتاااح وهي كتنقي راسها كتنقص شوية على نفسيتها المضغوطة بزاااف..هزات تيليفونها وهبطات لتحت بخطى ثقييييلة لثاتهم جالسين فقاع دار كيكبو فالقهوة ومعاهم مليكة الي جات من دار ناسها على بونبر كي ساقت لخبار ليوسف...
حبيبة"جلسات حدا سعيدة حادرة راسها ومخشية وراها كتفرك فايديها خصوصا من بانت ليها مليكة كتهضر وتلالي على يوسف الي بقى فيها...قالت صباح الخير بشوية تا شكات را ماسمعها حد" : صباح الخير...
عيدة : كبي ليها اتاي...
مليكة"هزات عينيها تشوف بانت ليها وهي طل عليها بشوي" : تي امتى جيتي كاع ما شتك..
سعيدة : يلاه جلسات..
مليكة : هاويلي يا بنيتي وگولي غا صباح الخير...
حبيبة"حنحنت منضفة حلقها الي تزمط" : ك گلتها ماسمعتينيش..
ربيعة : دوات فحوايجها ههههه گالتها گالتها ههههه..
مليكة : هااا وماسمعتشاااي...
هاشم : مليكة امتى ناوية تصدي لديك البلاد ...
مليكة"هزات فيه حاجبها" : شتك باغي تصدرني اولد مي وبويا ؟
هاشم : لا شتك طولتي وكان...وهذا وقت المدارس اختي مليكة دوك دراري عندكم را شحال هادي دخلو....جاتني عجب ولا ياكما دايرين مع ليزيكول تم...
مليكة : وزييكولات لاكان شي لينا هي الي بوها داوي معاهم..هاو اليزيد را عندو معهد ولا شي يگولو ليه تاهو شوف اش داير معاهم..والمشي را تنين نشاعلاه نصدو فالليل عدنا (عندنا) الباطو نهار ثلاث مع ربعة من طنجة...
هاشم : هااااكاك...
كبات سعيدة اتاي لحبيبة ومداتو ليها جاها سخون وحطاتو كحزات ليها طبسيل فيه الحلوة دواز اتاي...
سعيدة : تالفطور تاني هاو نريحو بطبوط والمسمن...
حبيبة"حركات راسها وسكتات كتشرب جغييييمة فحال نقطة من اتاي وحادرة راسها..تا هزاتو وهي تسول على يوسف" : كيف بقى يوسف "بصوت شبه مسموع"
سعيدة : شوية شوية را ناعس لگى راحتو...
هاشم"هز عينيه فحبيبة الي كل مكيشوفها كيتعصر خاطرو من جيهتها وميكرهش يعرف فين كااين بشار ولا يضبر فنمرتو ويهضر معاه يجي يدير حل لهاد الحالة الي خلاهم فيها رون كلشي وراه وزاد...تنهد وهو يتگعد كيقاد فقميجتو لابس غير مدني مالابسش لباس القيادة" : بنتي حبيبة كنتي گلتي بغيتي تشوفي لافاك لا ؟
حبيبة"حركات راسها ونطقات بصوت شبه مسموع" : ا اه..
هاشم : تمشي غذا ؟!
حبيبة : اه اه نمشي..شكرا بزاااف...
هاشم : الله اودي راكي بحال حسام وبناتي...وقت الي احتاجيتي شي حاجة انا موجود حسام موجود الخير موجود هههه
تبسمات ليه حسات بعدا بالراحة والحب المتبادل والامااان من جيهة سعيدة وحسام وهاشم..ويوسف الي طريح الفراش الفوق...كمل هاشم قهوته الكحلة المعطرة تنغم بيها حل بيها عينيه بادي صباحو...ناض على وقفتو...
هاشم : وجه الكرشة ديال ولدي...
حسام : كفاش اهاشم وجه شهادة بالزور ديال بويا...
هاشم ؛ نعل جد بوك...نوض تگعد وصلني القيادة ودي طوموبيل لا بغيتي طلع بيها لمراكش لكلية تم...
حسام : هااا المعقول..شوف غانتعطل هاد نهار...
هاشم : معاش راجع ليا بسلامة...
حسام : الليل هكاك..شووووف بلا ماتفنفن عليا تم وترعد وتركل وتخنق وتلوح راسك من سطح..عندي اغرااااض ضرووورية..وعيب تسول ولدك عندو 25 عام بلا حيا بلا حشمة فين غادي...سبقتها ليك وحشم...
مليكة : هاويلي حي فين غادي اسلگوط..
حسام : ملييييكة !!
سعيدة"ضرباتو لراسو" : مليكة حرفية البغل مليكة عشيرتك ؟
مليكة : وتي شوفي ليك المسلگم...هادي هي عمتي الي جايبة ليك دييك تخوتينيت ولا اش گلتي ليها..
حسام : trottinette électrique اعمتي...فين هي شناك تي ماشناها..الهضرة عندك عشرة لضص...كون گلت ليك عاودي ليا على مرات فلان اش دارت ملي تلاگيتي معاها ف ليدل كون جبتيها ليا هي وماكارون يعاودو ليا...
مليكة : هههههه نعل بوك البغل..راها جايا فطريگ عاد يامس المعطي عيط ل الي كايجيب لناس حوايج فالفاركونيط(.fargonet سيارة كبييرة كيهزو فيها سلع وهادو ناس كيجيبو فيهم الي بغى يرسل شي حد شي حاجة من برا لمغرب ولا من مغرب لبرا كيخلصوه بحسب الكيلويات فالصاك ويدي ليهم اش بغاو يرسلو..)..
حسام"وقف تابع بوه الي كلاكصونا عليه يخرج" : هاحنا غانشوفو مابعيدة غا تادلة...
خرج حسام...كملات حبيبة كاسها ديال اتاي بزز ماعندهاش الخاطر باقي فيها نعاس وباقي مأزمة من لداخل...يلاه غاتنوض وهي تنقز مليكة كتشوف فيها بفضول...
مليكة : تي ناوية ترجعي تقراي ؟! ..
حبيبة"حركات راسها"
مليكة : مازلتي ماكملتي تا شهر فدار ناسك وغاديا ؟!..
حبيبة : غاديا غير نشوف وناكد تسجال...حيث رسلو ليا فتيليفون خاصني نمشي وعاطين اخر اجل...
مليكة : تي فين تمشي هاويلي اشمن قراية فهاد الحالة...لوسك مريض وعگوزتك هازة ايدها..وخاصها العوين...هاويلي لاجاو ناس الي بغاو يسلمو فعدوزتك على ايدها والي جرا ليوسف ويسولو فين عروستك..اش يگولو ليهم ؟...بركي الله يرضي عليك معدك فين غاديا دابا مزال يلاه بادييين... ها زكريا مشا يامس ورجعوهم تالسيمانة جايا...
حبيبة"وسعات عينيها تا بياضو" : ميمكنش خاصني نمشي ناكد تسجيل عاطينا اخر اجل نهار الثلاث..
مليكة : ايوى تال ثلاث وسيري...هزي هادشي وجيبي زيف الله يرضي عليك ومسحي طابلة دروك يدخلو خوت عگوزتك يلقاو هادشي محطوط هنا نوضي...
القدر حكم عليها توصل لهاد الحالة..وحكمات على راسها توصل راسها لهاد الحالة...هادي هي نتيجة التعلق فالاوهام الي بعييييدة على الواقع الي نفاتو بقلبها وعقلها...جالسة جنب الناموسية كتراري وعينيها كيشوفو بسهو....كانت حداها ختها صغيرة صابري كتدهن ليها حنكها وعنقها بالبوماد..تمكنات العافية منها وتمكنات حتى من شعرها الحريري الي كان طولو مبهر وملفت فايت المؤخرة ببزااااف...حتى قطعوه ليها لفوق ضهرها حد فين حبسات العافية..الزين الي كان يبهر العين تخبا نصو بالحرا.ق....لحد ساعة الي عارف بالي جرا ليها هما امها وختها الي وصاو بعضياتهم ميعلموش باها وخوها علاش وقع هاكا حيث لو عرفو مصيرها الموت على ايديهم ولا يتبراو منها ولا يزوجوها لاقرب واحد يخطبها الله يجعلو يكون ماعندو تا باش ياكل...
صابرين : ماتغطيش بزيف تاتنشف ليك...
زكية"الصمت"
دخلات ماماها لبيت لقات صابرين كتجمع فالدوا وهي تمد ليها واحد طبسيل فيه غبرة ليمونية فحال طباشير...
عيشة : شدي هادي طيرنت (عشبة ديال الحراق جميع درجات كتشنف الحرقة وتجمعها دغيا) جابها بوك صباح من سوق...دردريها ليها فوگ ديك بومادا..."شافت فيها" نوضي تگعدي فطري...
زكية"هزات فيها عينيها ورجعات هبطتهم" : دابا نوض...
عيشة : تا تفطري وديري هادي...
ماعاودتش معاها الهضرة...هبطات عينيها وهبطو دموعها يقطرووو...مسحاتهم بالخف والله الي عالم بداك القلب والخاطر..سلمات امرها لله هو اعلم بحالها..هزات ايدها وهي تنوض بشوية خرجات من البيت لقات طابلة ديال فطور باقيا من الي فطرو باها وخوتها خرجو وخلاو الفطور..جلسات صابرين كبات ليها اتاي ولزكية القهوة مخلطة فكاس صغير وطويل...حطاتو ليها فطرات غير شوية..غير كتنقب وصافي...حتى شوية صونا تيليفون عيشة سامسونغ صغيييور..
صابرين : ااامي تيليفونك...
عيشة"جات تجري تتمسح ايدها فطابلية ديال شقى..صغرت عينيها تا ولاو كي النقطة ووركات عالبوطونة وهي تنطق بصوت مجهد زعما باش تسمع المتصل مزياان" : هاااالو...
مليكة : هالو عيشة هادي ؟..هاكي ها مي بغات دوي عماك...
عيشة : وتي الحاجة عيدة هادي "زكية وسعات عينيها وهزات راسها تتسمع" وااالحاجة خويتي كيدايرة لباس عليك..وتي كي بقى يوسف وختي توريا...
عيدة ؛ وااالي باس نحمدو الله...
عيشة : عذرييييني يالحاجة راكي عرفتي ماجرا ماصبتشاااي ندوز وليني هاد اليومين ولااابد ندوز نطل عليهم والله الى بقات فيا توريا بحالاش...
عيدة : مااكاين باس مكاين باس..تانا نيت شلا ما جرا ماصبناش نجيو ..كي بقات زكية...
عيشة"كتدور فراسها بحزن دايرة صبعها فوق فمها" : واااش نگوليك يا الحاجة...هذا مكتاب سيمانتين وحنا فالهم سيمانة وهي فسبيتار بالكشيفة باش داوات..الوجه تقاس ليها الحنك والعنگ...كلها تالعند المرفگ...تبات تلالي بصداع وتصبح تلالي..وليني نحمدو الله شوية وكان الحاجة يسول فيك الخير ورباح...
عيدة : الله يشافي الله يشافي وكان...يلاه لگينا وقيت تاحنا شلا ماداز علينا...
عيشة : مبروك مادرتو "زكية حسات بالعافية كتهبط ليها مع قرجوطتها وقلبها تعصررر" كي صدقات الكنينة جديدة !
عيدة : زينة زييينة تبارك الله..الله يفرحك ببناتك والله يجيب ليهم سعد حسن منهم...هذا المكتاب ا عيشة المكتاب..
عيشة"تنهدات" : اللهم لك الحمد "هزات عينيها فاش سافت زكية ناضت ودموعها على خدها"
عيدة ؛ ولا نكتر شاي عليك..ورا الغذا نشاعلاه هاحنا عندكم نجيو نشوفو كي بقات زكية ونديرو الواجيب...
عيشة : مرحبااا والف مرحبا الحاجة مجيتكم بالكبرانية نتوما مالين الخير...
قطعات معاها وتنهدات عيشة دايرة ايدها على حنكها..كيف مكان الحال عزات عليها بنتها وهذا الله هذا مكتاب تكتاب عليها وهادشي دارتو لراااسها...هزات عينيها ف صابرين....
عيشة : نوضي جيبي ليا تعبية (تعبئة روشارج)..ديال الف فرانك دخليها ليا هنا نعيط لبوك يصيفط مع سمير خوك شي مقدية ونعلمو بمجية عيدة مرت الرحماني...نوضي خلاص شتك تبحلگي فيا...وجمعي معاك دار وسيقي وجبدي الفراش المخزون فرشي الصالون..وسيري عيطي لختك ليلى من دار ناسها تجي تعاوني...يلاه...
فدار الرحماني من بعد ما كملات المكالمة...ناضت مليكة طلعات لفوق عند يوسف لقات معاه توريا كتقلب ليه فراسو وشادة كريمة كاس ديال المخينزة مطحونة ف الليمون...
مليكة. : ياكما كلعات ليه سخانة تاني ؟ هادشي مايعجب اتوريا...قربت نمشي قحالي وبالي يبقى معاه !!
توريا : شوية شوية ماشي كي البارح...اري ليا داك الكاس نعيطه يشربها..هادي سخانة شمش ديال سيمانة الي كان فيها العرس ديال داك ولد لحرام الي حطت كرشي..جا من وراه غالبلا الله يعطيه مصيبة طيرني عليه...خلا ليا روح (فرد او شخص) فعنگي وكلت فيه الله...
لتحت كانت واقفة سعيدة فالكوزينة وحداها وحدة فبناتها كتعاونها...وحاطة كرسي لحبيبة حدا طبلة محطوطة تم جالسة فيه حبيبة جالسة حداها محيوزة ليها دايرة ايدها على حنكها وكتخمم...حتى دخلات عيدة مسندة على ربيعة طلات عليهم..
عيدة : الله عوينكم ابنياتي...
سعيدة : امييين الالة..خاصك شي حاجة !!
عيدة : نصبي الغذا وديري بحساب تمشي معايا نتي وحبيبة لعند دار عيشة فدوار الي حدانا..."شافت فحبيبة" تمشي معانا كبيدتي ؟
حبيبة"هزات راسها وشافت فيها" : م ماعرفتش..
عيدة : يلاه معايا منها تفوجي ملي جيتي لهنا ما شفتي شمش ربي..يلاه باش تولفي لا مشات عدوزتك (عگوزتك) تمشي معاها عند ناس...
الي ولف شي عادة را ولفها...هاكا دايرة عيدة مع كنيناتها...يشهد الله انها عدوزة مزيااانة معاهم وخا تفكيرها قجر..واخا امرأة بدوية تفكيرها قدييييم..تبنا وعلاو سواريه على العادات...رجعات لقاع دار وجلسات شادة تسبيحها وربيعة مشات لشقاها فين كاينة نوبتها اليوم حيث اليوم الطياب على سعيدة...
حبيبة : واش ضروري نمشي ؟!!
سعيدة"ماقدراتش تقوليها على زكية..ماتقدرش..تنهدات" : ماعليش يلاه فوجي شوية انا كاينة معاك...عاجبك تبقاي فالدار تقنطي ابنتي...
حبيبة"حطات ايدها على حنكها وبدات تزفر " : فففف...توحشت دارنا "دموعها على الحافة"
سعيدة"حطات القرعة ديال زيت الي كانت كتخوي فاالطاجين وهي تمشي عندها جرات كرسي وجلسات حداها" : داركم دابا تمشي عندهم ابنتي..حاولي تصبري على قبل داركم ماتصبري على قبل حد...لا رجعتي ليهم دابا تهوليهم عليك...الله يرضي عليك...هانتي دابا ترجعي تقراي وتنساي هادشي...
حبيبة"نزلو دوك دميعات يجريييو..هزات فيها عينيها الي ولاو حمريييييين" : بيتي ننسى التكرفيصة الي تكرفص عليا هذاك ؟..نسى فاش خلاني مرمية وماعقلش عليا اهى.."سعيدة ضارت عند بنتها وشيرات ليها تخرج حيث شافتها بدات كتهضر من تلقاء نفسها"...اش بنسى اخالتي اش اهى...الله ياخذ فيه الحق...كون ما الكريدي ديال بابا كون كااع مانوصل هنا...ماكرهتش نهرب من هنا والي بغى يوقع يوقع... "شهقت لا اراديا"...
سعيدة : اشمن كريدي ؟!
حبيبةجمعات شنايفها كيترعدو كتحبس فالبكية وتصرط فيها تا حسات بصدرها كيحرقها...حركات راسها ب نفي وهي تنوض من تما وخرجات خلات سعيدة مافاهمة والو...دخلات لبيت كتنهج حاسة براسها عايشة وبدات كتعيش الجحيم ديال بصح...ماكرهاتش لو كان قدامها تقت.لو...كرهات راسها الكريدي الي وصلها لهاد الحالة هاد العائلة الي معيشينها حوايج جداد عليها...حاسة براسها باغيا تهرب وفكؤة الهرب بدات كتروج ليها فدماغها...كتهبط الكول ديال بيجامة بالخنقة الي فيها...تاحاجة ماولفتها تا هضرة ماقدرات تستحملها...هضراهم كتجيها قاصحة قجرة وهي ولفات الخاطر وولفات تعطي الخاطر...ولفات الحنان وولفات تعطي الحنان...هادو ابدا ماشي محيطها ولا جوها...وخاصها تصبر وتعض فالنفس تااااني من جديد...شي حوايج كتعيش ماتصيييييبش تستحملهم....حتى تلاحت فوق ناموسية تاتهزات بيها هزات عينيها فالسقف شحاااااال وهي كتفكر وتخمم...حتى حسات براسها نوعا ما تهدنااات...وهي دور سمعات صوت تيليفون ضارت كتشوف لقات رسالة من ايوب...
ايوب. : الى بغيتي تهربي عيطي ليا نجي نهربك من تم...
جاب ليها ضحك فعز لفقصة كانه حاس بيها وهو را غير صدفة ولا شوووف اش تم...
حبيبة"مخلطة ليها فقصة وضحكة " : ماكرهتش ا ايوب ماكرهتش والله...
رسلاتها ليه وعينيها مشاو على رسالة جاااد الي بقات معلقة فانسطا...بقات شحااااال كتشوف فيها..حتى دخلات وهي تجاوبو....
حبيبة : ماكنتش مسالية...كانو عندي شي مشاكيل...
كان مكونييكطي ديك ساعة واش تاهو صدفة او كان كيتسناها شي مرة تدخل...فالبلاصة قراه وجاوبها...
جاد : ولفت نلقاك مخلية ليا ماسجز (رسائل)...كنت انا الي كنغبر وليتي نتي الي كتغبري !!!...مشاكيل عائلية ؟
حبيبة : yes...
جاد. : على هاد الحساب غانشك انك تكوني مرتبطة ههههه...
حبيبة : باش عرفتيها ؟!
جاد : البروبلمز (المشاكل) كتجي بزااف من الارتباطات اكثرية الى كنتي مزوجة....سو شنو حالتك ؟ "بمزاح" Are you married ? (ياكما مزوجة) ..وانا كنصدعك !؟...
حبيبة"تنهدات شحاااال كتقرا ف رسالتو...كتحس بيه فحال الى يدل ليها المود ديالها...فحال الى دهات الوقت بيه ونسات همها...لقات راسها كتراسل معاه ومرتاااحة !!...شي زوج دقايق وهي كتقرا وساااهية تا فاتو ثلاثة ربعة خمسة تا عاود رسل ليها"
جاد : ؟؟...
حبيبة"رجعات كتكتب ليه" : لا...لا مامزوجاش...
رسلاتها ليه وسدات تيليفون وناضت فور ما سمعات صوت توريا كيعيط عليها..رجعات للواقع المر الي عايشة فيه....
شحال من واحد فينا سااااكت ساكت بزاااف على الهم الي عايشو...كل واحد فينا وكيفاش عايش ومتعايش مع همو....
وقف السيارة ومد ايدو لمجر ديال سيارة جبد واحد الملف وهز عينيه كيشوف فسيركيلاسيون كيفاش دايرة فهاد البلاد...تسنى حتى خفاف سير فشانطي ونزل من سيارة كيقااد فحوايجو...مشط على شعرو بصباعو...وتم غادي بخطى بطيييئة حتى وصل لواحد الشركة جات فالسفلي...ودخل...
_ ربع ايديه كيحك فدراعو..كيشوف قدامو فالنافذة على برا...ساااااكت مكيهضرش...كيسمع ليه اش كيقووول والهضرة كاتوزن فراسو...السؤال الي تطرح كان مباشر جوابو ليه عااادي..السؤال الي تلخص ف
" من امتى وصلتي لهاد الحالة..."....
مجاوبوش ماعطااااهش راس الخايط...حتى نطق...بجملة خلاتو يعاود يفكر فسؤال...سطؤحو ليه بصيغة خرااااا....وتعاود ثاني ف ...
"حرك راسو وربع ايديه متكي على الكرسي كيدور بيه...عوج فمو ب استغراب....وعاود هز راسو " : اش ناوي دير "...
خرج لسانو طوااااه عاااض عليه شحاااال...ورجع نطق متأكد من هضرتو....
"ناوي نرجع لهيه...نعطي لهاديك الي بقات ورايا حريتها....(.سكت شوية وعاود نطق ببحة)...نطلقها ونرجع نشوف حياتي مع وحدة غيرها"...
"ناوي نرجع لهيه ونعطي لهادي الي بقات ورايا حريتها..ونبدا حياة جديدة مع وحدة غيرها"...
يمكن كان عارف انه مغايكلموووش فزواجهم...عارف وماتصدمش شي صدمة لانه عارف انه عيا وهو مع ديك مراتو فالمشاكيل وخا زواجهم كان مبني على حب لسنييين...سنين وهما مع بعضياتهم ونهار قررو الزواج تزوجو خلال اسبوع...يمكن فاش سدو عليهم باب واحد تما تاكدو انهم ماشي ديال سقف واحد فاش كانو غير مرتبطين كانو مزيانين وفاش ترتابطو وتكلل حبهم بالزواج حسو بالقيود ديال بصح وانهم ماتفاهموش فدار وحدة...هادو كااااع الي دوزو حب سنييين وتفاهم...
هز فيه عينيه كيتأكد من هضرتو وهو يدور عندو....
سليمان : جاد !!
جاد"دور غير عينيه وربع دورة" : what شنو ؟؟ (الحوار بالانجليزية اي البريتيش اكسنت يعني اللهجة او اللكنة ديال الانجليز وليس اميركا)...
سليمان. : يعني نتا و غنى وصلتو لمرحلة الفراق رسميا ؟!
جاد"رجع شاف قدامو وتنهد كيحرك راسو" : عامين ديال الفرص..عامين ديال مشاكيل وصداعات مابقيتش قاد على شي مشكيل..شحال قدي نتنازل وشحال قدها تنازل.."ضار عندو هاز فيه حاجبو وشاف فيه..عينيه زرقييين" ملي نرجع لندن نبدا فالاجراءات وخا غادي يطولو شوية...
سليمانحرك لبه راسو ببطء..سكت وجاد ضار جيهة النافذة كيشوف فالشارع...حتى عاود نطق سليمان نيت...
سليمان : كاتعرف شي وحدة ؟!
جاد"جمع حجبانو" : باش عرفتيها ؟!
سليمان"تبسم بجنب وعوج راسو ورجع نطق" : قلتي غادي تبدا حياة مع وحدة اخرى...يعني بهاد سهولة مورا ما طلق غنى فالبلاصة تفكر تبدا حياتك !!..ماعرفتش جاتني عجب من غير لا بثح حاط عينك على وحدة...بصح ؟!
جاد : لا..مكاين والو هاد ساعة...
حك شنايفو بسنانو ورجع تنخد وضار مشى لطابلة الي قدام المكتب ديال سليمان وهز سوارت السيارة الي استأجر وتيليفونو ...لابس قميجة كحلة نص كم وسروال فصالة گري... دارهم فجيبو وجبد بزطامو من جيبو حلو وجبد ليه واحد كارت فيزيت ديال واحد الشركة...
جاد"رماها ليه فوق المكتب" : هضر مع هذا وشوف معاه وقت محدد للاجتماع من هنا يومين حيث ضروري خاصني نرجع لهيه نبدا شنو قلت ليك...
سليمان"شاف فاسم شركة حرك راسو ورجع شاف فيه": فين غادي نتا دابا ؟!
جاد : راجع لفيلا عند جدة وجدي فطريق اگفاي...(جات ف مراكش)...ندوز معاهم هاد اليومين معاهم بينما وصل وقت الميتينغ...
سليمان. : تاندير وقيت وندوز عندك نشوف مي هاينة...
ماجاوبوش جاد...رجع البزطام لجيبو وقف بقشش فالتيليفون شي شوية ورجع دارو فوذنو هز صبعو ناحية سليمان دار ليه بايباي وزاد كيهضر فالتيليفون مخلي سليمان كيشووووف...تأكد ان جاد واكلها بصح من جيهة الزوجة ديالو "غنى" وحتى غنى متأكد تاهي خارجة من هاد العلاقة باضرار لانها ماشي عاد تعرفات على جاد را سنييين وهما مع بعضياتهم...وحتى جاد كذلك ولكن مكايناش المفاهمة وهنا يمكن تسالا الرزق بيناتهم...واخا را طلاقهم غاياخش وقت وغايكون تقسيم الممتلكات بيناتهم...خاصو يرجع يقاد معاها الامور ويوصلو لاتفاق بيناتهم...
خرج جاد ركب فالسيارة وقبل مايديماري دوز الاتصال من شاشة السيارة حاط ايدو على الفولون ولايد لاخرى فوق دراعها...كيطرطق بصباعو وعينيه على شانطيان الكبار الي متوسطاهم رومپوان جات وسط گيليز..كيشوف فالمحطة ديال تران مقابلة معاه وقهاوي فجيهة لاخرى...والمسرح الكبيير...حتى تطلق الخط وسمع صوت نسوي...
جاد : ميمة لباس ؟
هاينة : ولدي جاد..فينك ؟ ياكما بيتي تخليني نتسنى وقيتة الغذا هادي...
جاد : هاني جااي..هي "كمش عينيه باش يلقى الكلمة صحيحة حيث كيهضر بدارجة معكلة" هاذا هنا بزاااف ناس وبزاف كاارز (طوموبيلات) وانا مواالفش يسوگ من ليمن (حيث الانجليز كيسوقو فليسر هههه)...بفففف..هنا بزاااف بنادم كيبرزط ميعرفش يسوگ...اش كيگولو تسناني انا جاي...ال بي ليتل ليت..
هاينة : بتعطل بتعطل هههههه...
جاد"ضرب فولون بجهد" : يس هاديك هاديك...
هاينة : والله يا باباك تنردك مغريبي صحة هههه..هي جي انا نتسناك انا جدك مولاي المدني...جي را داداك العالية وجدات ليك داك تويجين (طويجين) ديال الجلبانة والقوق الي كيعجبك...نقز جدو...
م.مدني : القوق الذي لا يموت....
جاد"تبسم": دابا جاي ههههه....
قطع معاهم وديمارا سيارة كيتسنى الضوء الاخضر يعطيه الانطلاقة...زاد مع طريق وبالو كلو مع "غنى" كيفاش غايتم هاد الطلاق واش غايقسمو املاكهم ولا يكون تفاهم...عارف ومتأكد ان مرتو ماشي من نوع الي طماع وتاهو ماشي من النوع الي غاينكرها فحقها...وماعندووش اشكال يقسم معاها حيث تاهي تستاهل وخا متفاهموش وعندهم قناعة تامة انه واخا يتفارقو الى وقع الفراق رسمي مغايكونش بيناتهم كره..جربو يبقاو عامين بدون مشاكل ولكن متفاهموش كل واحد وكفاش كيفكر جاد تفكيرو شرقي واخا عايش فلندن وتزاد فيها تفكيرو مغريبي ولكن غنى تفكيرها متفتح بزاف...ماكتبغيش القيود الي كيكونو متحكمين فالعلاقة...وخا هي ماشي مغربية ولكن "اردنية" الاصول...طول الطريق وهو تفكيرو غير فهادشي وفالخدمة...حتى لقى راسو مدخل "حبيبة" فالتفكير ديالو...مينكرش ان زينها خلاه يبقى يفكر فيها...زينها جدبو وخا مزال متعرفش عليها...ك بنت زوينة بزاف ولكن مزال باغي يعطي فرصة يشوف حتى تفكيرها كيفاش داير...وتاهو باغي يعطي فرصة انه الى تفاهمو يعطي فرصة ل "بنت البلاد" يعني كيف تذكر المثل فالاول كاااااع....
"كيل زرع بلادك وخا يكون شعير"
تحط الغذا الي كان من طياب سعيدة الي النوبة فيها اليوم ديال الطياب والي تحمد الله بالي ماجا حد حيث ممكن يجي اي حد ممكن يدخل الحاج جايب معاه رجال ويقوليهم وجدو شي كسكسو ولا طاجين ولا غذا يكون بالكثرة باش ميتحاشمش مع رجال ويعرفو ان دار رحماني دار الجود والكرم...الكنينات ولفووو هاد القاعدة والي عند اغلب العروبيات وحتى المدن الي ولفوها...
دارت زوج طواجن كباار دياال اللحم مخضر باللوبيا الخضرة...واحد خلاتو تايجيو يتغذاو البقية واحد حطاتو. ليهم هما الي كاينين حيث عيدة خاصها تاكل باش تشرب دوا...وواحد صغييير ل يوسف الي غايتغذا هو وتوريا حيث غاتوكلو هي...تغذاو كاملين كانت حتى مليكة هاد المرة مادواتش محطات حتى تعقيب حيث حبيبة عجبها طياب سعيدة وخصوصا طاجين عزيز عليها باللحم...كلات علاش قدات وواخا عجبها ولكن نفسيتها مغممة عليها شي ماكلة براحة مكايناش...ناضت ريهان جمعات طابلة ومنار مسحاتها مكيعاودوش الهضرة مع سعيدة مكتشقيش راسها وتقوليهم نوضو جمعو كينوضو راااسهم يجمعو فنوبتها وكاينة الي كتعاونها فنوبة تسياق كاع. واخا عمرهم 8 سنين مابقا ليهم والو ويديرو 9 وحدة دارتها ولاخرى باقي حيث بنات الغيال بيناتهم عام قدقد...
عيدة : نوضي بنيتي لبسي نتي وسعيدة باش نمشيو...
حبيبة"هزات عينيها فيها وهي دور شافت سعيدة الي غمزاتها" : احم..وواخا...
تنهدات بقلة حيلة ماحاملاش تمشي ل تا بلاصة خاطرها ماهانيش نفسيتها فالحضيض...ناضت وتمات غاديا وكتافها طايحين طلعات نيشان لبيت كتزفر وتسوط ونفخ..لاحت تيليفون فوق ناموسية بالنترة ومشات لماريو جرات سكة جيهة المعالق بانت ليها جلابة مخزانية ديال بنات الي ف سنها فالبيييج وفيها رسومات بالكومبيوتر وحدة فصدر من جيهة ليمن وثانية لتحت عند رجل من جيهة ليسر...رسمة ديال وريدات فالمارون وذهبي...لبسات سوتيان ديال بونج وقفات صدرها وديباردو قطن بيض هو وكولون حد ركبة اونسومبل كيتلبس تحت جلالب...رمات عليها جلابة..مشطات شعرها جمعاتو بقراصة صغيرة نحاسية من لور وخلاتو مطلوق..ذهنات وجهها ببوماد شمس وزادت كوش اخرى حيث شمس ديال رحامنة كتشوط نييييت... ليكخون سبراي الي كترش بيها ايديها ورجيلاتها الي نقى ميخطاهمش ورطبين بزاف بحكم الاهتمام الي كتهتم بيهم والوصفة الي كانت متبعة ليهم وخا شوية هاد الاونة الاخيرة من العرس لحد الان هملتهم لان نفسية تدمرات بسباب ليلة دخلة...ضارت كتقلب على صندالة ماتلبس من داكشي الي خذات ليها ماماها ليها نص بقى فمراكش ونص جابتو ليها لهنا...مشات ل بلاكار الي شراتو ليها ديال صبابط...
حبيبة : موجدة ليا حتى بلاكار..تانتي اماما معولة نبقى هنا بلا متحسي..ياااك..كلكم باغيني نبقى هنا صحة "حسات بالعافية شعلات فصدرها تا غرغرو عينيها.." فففففف...
مسحات دمعة بطرف ايدها ومشات لواحد صندالة لحسن الحظ كانت هيرميس مارون جاتها مع جلابة...دارت تيليفون فصاكها صغير ديال لوي فيتون..وقفات قدام المري هزات بارفان ديالها فانيل رشاتو عليها...مادات حتى نقطة ديال ماكياج فوجهها وتا داك مرطب الشفاه مدارتو...خرجات وجهها بيض وفمها بيض...وخرجات من البيت هبطات نيشان لتحت لقات عيدة لابسة جلابتها ودايرة شال فوق زيف حياتي وحداها صاك كبير كحل ديال الخروج..كتسنى فسعيدة...
عيدة : زيدي كبيدتي جلسي تاتجي خالتك سعيدة...
توريا"هابطة فايدها صينية الي فيها طاجين صغير والخبز" : صافي لالة غاديين لعند عيشة ؟
عيدة : ونگولو نشاعلاه...
توريا : ولا صبتي لالة لا تعطلوشاي جاية ختي صافي ومعاها خويا عبد الرحيم كي شتي را علموني...
عيدة : گبل الموغرب (المغرب) بتصيبنا هنا لا بغى مولانا...
توريا"قربات ل حبيبة وهضرات فوذنيها" : من حدا لالة متفاوتي بركي حداها والى سولوك على راجلك مسافر..سلمي وسكتي...
حبيبة"الصمت"
مليكة : وسلمي على عيشة وبلغي سلامي لمزغوبة ليااام ديال زكية..."تنهدت كتدور فراسها" اييييي من گال يوقع هادشي وحنا الي كنا راشمينها ماكتابش ليها...
عيدة"جهدات صوتها" : المكاتييييييب امليكة مكاتييييب..رخي سوق وسدي مجگامك (فمك) الي فات مات وحنا عيبنا ماخرجناه علمناهم بكري گبل ميطيح الفاس فراس ونديو ذنوب...
مطمطات مليكة فمها وسكتت ما هضراتش مزال...تا شوي نزلات سعيدة كتقاد فشالها وتعقد ف بروش صغيييير كيدار ل شيلان..لابسة جلابة كرونة وشال بيج وصابو فالبيج وصاك گرونة كبير ديال خروج...وقفات عليهم وريحة بارفانها عاطية ديال "أميرة العرب" جابو ليها هاشم كادو يا لالة..مكحلة عينيها...
سعيدة : يلاه الالة المعطاوي برا (شيفور ورباع فنفس الوقت كيخدم فالفيرما ولا بغاو يتحركو لشي قنت كيوصلهم بالطوموبيل كيخليها عبد القادر لضروريات)
بغات تنوض عيدة وهي تنطق مليكة كي الحزقة قايلة ل حبيبة تعاونها تا جات كريمة تبين حداگتها وعاونتها تنوض وتا حبيبة عاونتها..مشاو بيها لبرا حل ليها المعطاوي الباب لوراني ركبات حداه حيث هي الام الكبيرة ومولات شي...ركبات حداها سعيدة وحبيبة القدام...
طريق كلها وحبيبة غير كتشوف فالدنيا تما وصافي عقلها غيييير ساهي وماحامل تا حاجة وتقووول...كتشوف فطريق غادي داخل فالبيست ويخرج فشانطي الي حتى وصلو لدوار فين ساكنة "زكية" وعائلتها .....
يتبع...
التعليقات
لا توجد تعليقات بعد، كن أول من يعلق.