عروس الجحيم الجزء 62

واخا ضحك معاهم قلبو ماهانيش...واخا يبين ليهم البسمة قلبو باكي...واخا يبين انه بيخير...خاطرو مريييض...بنتو بين عينيه....دوزو وقيتهم...شوية جات حبيبة الي وصلها بشار لعندو ومشا مادخلش كاع من الي جا عندو الامس وهضر هو وياه مارجعش...

وصلات العشية وجا طبيب كتب ليه الدوا الي ياخذ وبعض تحاليل يديرهم فاش يرجع لكونطرول...عاد سنا ليه باش يخرج...بقات معاه غير حبيبة وناديا...جابو ليه كرسي باش يجلس عليه وينزل لباركينغ...

م.حفيظ : اشاوا بيتو...

حبيبة : باش ترتاح...

م.حفيظ : لا هي خليه...اجي نشد فيك براكة...

ضحكات ناديا وحبيبة اكثر قربات لعندو عنقها جنبو...وصلو لمصعد وهي تخليه مع ناديا ماقدراتش تدخل ليه من اخر حادث بقات خايفة...سبقاتهم لباركينغ حتى صونا ليها تيليفون باسم بشار...

حبيبة : ويي...

بشار : فينك ؟!..

حبيبة : مع بابا هاهو خارج...واش نتا فباركينغ ؟!..

بشار : لا...برا...لحگي معاه واجي عندي...

حبيبة : علاش مابيتيش تشوفو ؟..

بشار : فالدار نشوفو...تحركي عندي...

قطع معاها مافهمات والو اصلا مافهماتش مال باها تبدل من جيهتو...صونات لماماها قالتها ليها وخرجات هي قدام الكاينيك لقاتو مبلاصي تما...حلات الباب وركبات حداه...قرب لعندها باسها فعنقها...يلاه بغات تهضر حتى نزلات عينيها لكف ايدو الي ماشافتوش البارح مارداتش ليه البال كان مضرگ ومع الوجع والعيا والعصبية ماداتهاش فيه...وسعات عينيها وسرحاتو ليه اكثر...

حبيبة : اشنو هذا ؟؟؟...ويلي اش حرقك...

بشار"حيد ايدو" : ماشي شي حاجة...

حبيبة : بشار !!..كيفاش ماشي شي حاجة ؟؟..واش حرقة ياااك..

بشار"زفر بضيق مغمض عينيه وحرك راسو" : الگارو...

حبيبة : كيفاش وقع..علاش مادرتي ليها والو...

بشار : مااااشي شي حاجة يااا حبيبة..."هز ايدو وسرح كفو"... normal ماديريش فبالك...

حبيبة. : بتمشي وفالدار عندنا ندير ليك بومادا...

حرك راسو مسايرها وصافي حيث مافيه مايتقاشح معاها ماغاتسكتش اللهم يدير ليها خاطرها...قرب راسها لعندو باسو ليها وطلقها كاتقاد فسانتيغ...ديمارا طوموبيل وزاد مع طريق...في حين مولاي حفيظ وناديا مشاو مع ايوب فسيارة مولاي حفيظ...مسافة طريق حتى كانو واصلين لدار...مع دخل طلقاتها لطيفة بتزغريتة حااااارة خلاتهم كايضحكو...

لطيفة"عنقاتو" : الله يا حبيبي الله نور دار...ريحة بويا ومي جاااات...على سلااامتك اخويا على سلااامتك...

طبطب عليها مبتاسم بتعب...سلمات عليه رقية سناء وفيصل...شوية جاو دراري تاهما سلمو عليه...

ناديا : يلاه لبيتك ترتاح...

عنقاتو بجنب ومشات معاه حتى لبيت...تكا بلاصتو عطاتو دواه وتهنات عليه وهي تخرج لقات حبيبة دخلات هي وبشار...دخلات سلمات عليه اما بشار ماقدرش حيث بيت نعاس ماجاش يدخل احتراما وحيث اصلا تربيته فالعروبية مكيخليوهمش يدخلو لبيوت نعاس ماليهم الا بالاذن...و عارف مولاي حفيظ دابا مايبغيش يهضر حيث يلاه دخل خلاه تايبغي يهضر معاه...واخا حاس براسو واقف وجالس عالشوك حيث هادشي خاصو يتحط ليه حد ومايبقاش يحس بالشحنات من جيهتو...غير خرجات حبيبة من عند باها لقات بشار واقف كايتسناها باش يرجعو لدارهم...عارفاه من جيهة فيصل ماحاملوش غا هكاك ههه قالت اللهم يمشيو...وحيث عندها امتحانات الغذ ليه...سلمات عليهم ومشاو...

صبح الصباح فالرياض الي تنور برجوع مولاي حفيظ من بعد ازمة صحية خطييييرة خلاتهم كاملين يعيشو فالحافة والخوف يقضي عليهم وعلى نفسيتهم من جيهته...واقفة ناديا كاتحرك فالحسوة ديال درة الي كاتعجبو....ورقية كاتخبز فالمسمن ولطيفة كاتوجد معاهم....تسمع صوت لانتيرفون...

ناديا : ويلي شكون بايجي دابا...

لطيفة : ياكما القشة...

ناديا : لا عندها امتحانات اليوم...ومتجيش مع سبعة ونص تصباح ويلي هبلات...(خرجات من كوزينة وشافت فالكاميرا وهي تغوبش من شنو شافت)..ويلي هادي اش جابها ؟!..

عوجات فمها باستغراب...هزات شالها لاحتو عليها ومشات تا حلات الباب...تبسمات ليها وقالت مرحبا دخلي...

ربيعة"بوجه منفخ ومخنزر" : خليني غا هنا...

ناديا : علاش ياك ماكاين باس...

ربيعة : جايا نگوليك شي هضرة...واخا فات عليها الفوت وليني خاصك تعرفيها...

ناديا : وا هي دخلي بعدا ماتبقاي واقفة فالباب حشومة...

ربيعة"نزلات فدريجات تا قربات لعندها مخبية عالجيران " : نهار خليتي بنتك ليلة عرسها تدخل عند راجلها...علاش ماسولتي ماتبعتيها... وماجيتيش الغذ ليه...

ناديا : كيفاش ؟..اش وصلنا لهاد الهضرة...

ربيعة : كان عليك تجي...باينة فيك تانتي ضحكو عليك وخباو عليك ومنهم بنتك نيييت...الي تكرفصو عليها ومنهم راجلها الي هو نسيبك الي فرحانين بيه...سيمانة وهي فيها سخانة والمصيبة نهار صبحها غبر ماجاش على شهر...

ناديا"وسعت عينيها" : اش هادشي تتگولي نعلي شيطان...

ربيعة"خرجت عينيها بالجهل" : الشيطان هو الي مناسبين معاه...سولي عدووزتي الي لجمت الفام ومنهم فم بنتك الي تكرفص عليها حتى فاض د.مها وخلاها مليوحة فالفراش...فارعها حتى دارو ليها الغراز...

"جبدات من صاكها داك ليزار وسرحاتو ليها تا بان ليها داك الد.م الي فيييه...حسات براسها تزنزن ووذنيها تصمكو...ماحسات تا كمشاتو ليها ربيعة فايديها..."

ربيعة : ها فراشها لاا ماتيقتينيش وسيري سولي بنتك الي سكتت وخبات عليك...راه ولد لحرام مسخووط مو...البارح ضرب عمو وديك نهار هرس ليه صبعو...غذا ولا بعدو يدوز لبنتك تاني....

إلى جينا نشوفو ف ردة فعل ربيعة طبييعية من ناحية انها تفقصت من جيهة راجلها...كاتشوف انه تحگر من طرف باه الي ماحرك ساكن عليه..وماهزاتوش نفس على ولدو وحتى حد فيهم ماهضر...شي حاجة متوقعة انه تقدر ترد دقة ولا تاخذ موقف...لكن هنا الي ماشي عادي والي ماعندهاش فيه الحق لا من قريب ولا من بعيد وهو انه تعاود على ليلة كانت خاصة بين "حبيبة" و "بشار"...الليلة ديال زوجين سواء كانت زوينة او وقعات فيها كارثة كيف وقع لحبيبة...وشي حاجة الي عيب بزاف انه تجيب " لحاف" عليه د.ماء الشرف واخا كان كلو ملطخ وتكشف السر الاخر الي كان مخبي على واليديها..هادشي كامل كايخلينا نطرحو سؤال واحد لا ثاني بعده...

معقولة يوصل الحقد لدرجة توصل هادشي ؟..هذا ان دل على شيء فانه يدل على انه كاينة نية ديال تشتات الشمل...والمصيبة انه ماكتفاتش بهادشي الي صدم ناديا والي شلل ليها الفم والدماغ فهاد اللحظة...

ربيعة : كاع ماكان باغي يتجوج بنتك...ماكان باغيها ماكان باغي بنات هن...كان ناوي يتجوج من لهيه غا جداه الي لححت عليه...ودارت ليه مسمار جحا..سيري سولي بنتك لاش دار ديك الفعلة وسيري شوفيها علاش سكتت وصبرت...لا يغرك سكاتو ولا يغرك المعقول لي فيه راه غدار...ماعندو عقل من صغرو وهو مريض وملعون من عند مو..."ضحكت بغيض"...هههه على الي داعي مو تسناي منو خير لبنتك...

ناديا"سرسبات ليها كلشي دقة وحدة ماعرفاتش اشنو تستوعب..شافت فيها" : وعلاش ج جايا تالدابا عاد تاتگولي ليا فهادشي...كاع هذا حقد من جيهتو ؟!..

ربيعة : صبرت اخويتي صبرت لحگرة وصبرت لسكات...شلاه ما دار فينا وشلا ما خرج فينا من عجب...غا عمو هرس ليه صبعو...هادشي ماگالوهش ليا خباوه عليا باش ميوصلك وااالي...

ناديا : وكي درتي عرفتي هادشي (قلبها كايضررررب من هادشي الي سمعت والصدمة لاعبة عليها)...

ربيعة : سمعتهم ديك ليام...را خمسطاش يوم وبنتك فالعذاب معاهم...خمسطاش اليوم سيمانة مريصة فيها من تكرفيص الي تكرفص عليها وسيمانة مسكتينها ومزيدينها لكرفي..."ضربت صدرها" يرزييييني فالكبدة ايما كذبت عليك...ملي شتو قوا (كثر) من هادشي جيت نعلمك...(خرجت عينيها) راهم خبااااو عليا ماثاقو فيا وثاقو ف سعيييييدة...عارفيني منسكت على العيب...عارفيييني حقانية والس كانت نگولها ومانبغي الضلم خباو عليا....يرزيييييني فهذا الي فكرشي ما كذبت عليك...

ناديا"نزلت عينيها لكرشها الي بارزة حيث دخلت لشهر سادس ورجعت شافت فيها مكملة كلامها"

ربيعة : الي عليا لحگتو ليك...بغيتي تيقي تيقي بغيتيش نتي تعرفي...

شوية حتى تسمع صوت لطيفة الي شافت ناديا تعطلات وتبعاتها...ناديا من صدمة بقات مكمشة على داك ليزار...

لطيفة : سلام عليكم..."صغرت عينيها" مرت لوس توريا لا ؟!..

ربيعة"حركت راسها" : وايه...يلاه دوزو بخير...

لطيفة"وسعت عيينها" : ويلي على دوزو بخير...اش موقفك هنا فاعگمي علاه مادخلتيها اناديا...

ناديا"ماسمعتهاش وذنيها كايصوطو من هاد الخبار الي ماعرفتها صحيحة ولا تلفيق..."...

لطيفة : ادخلي اتا من الباب...

ربيعة : لا خويتي خاصني نمشي خليت خويا يتسنى فيا ماشية عد طبيبة نعطيها شي تحاليل...

لطيفة : ودخلي هي تفطري معانا...

ربيعة : يعطيك الخير...غا عذريني مزروبة بزاف...الله يشافي الحاج والله يكون معاكم...

ماجات فين تهضر لطيفة قالت لناديا بسلامة وهي دور وزادت فحالها...خلات ناديا باقي واقفة من صدمتها مكمشة فداك ليزار الي الى سرحاتو غاتشوف تاني ابشع منظر...ماحسات غير بلطيفة كاتحرك فيها فيقاتها من سهوة الصدمة...حتى شهقت وهي تشوف فيها...

ناديا : هاا...

لطيفة : بسم الله عليك مالكي...

ناديا : انا !!..و والو والو...

لطيفة"نزلت عينيها لداك ليزار الي فايدها" : اش هذا فايدك...

بقات مستوهة تاني...هضرة ربيعة كاطنطن ليها فالراس...كاتعاود الحوار من لول...مابقاتش داتها ف لطيفة اش تاتقول...تزنزنات...خلاتها كاتهضر معاها ودخلت...غاديا بخطى بطيييئة...مزيييييرة على داك ليزار...وصلات لقاع الرياض عند الخصة ديال الما ووقفات...شحاال وهي واقفة حتى قفزوها لطيفة تاني الي تخلعت عليها حيث منظرها كان غريب....

لطيفة. : يا ناديا مالكي اه خلعتيني...اش واقع ليك ؟؟..

ناديا"بقات كتشوووف فيها...اش غاتقوليها هضرة ربيعة اش غاتوريها..حسات بضبابة جاتها تا غمضت عينيها وحلتهم باش تبعدها" : والو والو يمكن طلع ليا طونسيون...

لطيفة : سيري گعدي نمشي نجيب ليك كاس الما ونعبر ليك...

ناديا : هممم ؟..اه..لا لا انا نمشي لبيت دراري نفيقهم ونجي...

دغيا مشات لبيت دراري غمقت عليها...لقاتهم فاقو راسهم ضيقطاتهم بالخف يغسلو وجاههم ويحكو سنانهم كيف العادة وهي استغلت الوقت ودارت داك ليزار فالماريو فواحد دخيشة مايبانش وسدات عليه...تسندات على الماريو كاتحس بقلبها بغا يسكت...مدخلة لراسها انه هادشي كذووب...حسات بالسخفة وضغط طلع ليها...بدات كاتنهج ووذنيها كايصفرووووو...ماتقدرش تستسلم لضغط ويتخلعو عليها واولهم مولاي حفيظ...ماشي وقت تنهار وتستسلم لهادشي الي عرفات...خرجات من بيت دراري بزربة مشات لدوش غسلات وجهها بالما وخرجات ديريكت لكوزينة تا دخلت عليهم كانو مقلقين عليها خصوصا لطيفة الي بقى بالها معاها...بزربة مشات لثلاجة جبدات نص خيارة وتالفة كاتمشي هنا وهنا وهما كايضوفو فيها وجهها ولا بيض....

رقية : طونسيون...هي كعدي انا نصايبو ليك هي كعدي...

حكات ليها ديك الخيارة هي وزوج فصوص تومة...خلطاتهم ليها فكاس وعطاتو ليها شرباتو دغيا...ماعندهاش دوا ديال ضغط ديما كاتكتافي غير بوصفات منزلية سريعة...عطاتها لطيفة كاس الما شرباتو ودارت جبهتها على ايديها مغمضة عينيها وداك تصفار فوذنيها ماحبس على شحاااال...

لطيفة : شوية دابا ؟؟..

ناديا"حركات راسها"...

لطيفة : كي وقع ليك !!..گالت ليك ديك سيدة شي حاجة !!..

ناديا"حركات راسها ب لا" : لا لا...هي طلع مع ضغط وصافي..

رقية : وراه بسيييف ماناعساش شحال من يوم هذا...الخلعة وصبر الي صبرتي باش بقيتي واقفة هي لا مابايطلع وصافي...

حاولات ما امكن ماتبين والو واخا لطيفة شكات وحسات بلي هادشي بسباب ربيعة الي جات...شوية جاب معتز لاباراي ديال ضغط...

معتز : بابا فاق وباك...

ناديا : دي ليه هاد البلاطو...وعلمو يشرب دوا الي حطيتو ليه عند راسو هاني جايا نجيب ليه الفطور...

عطاتو رقية البلاطو داه ليه ولطيفة بقات تاعبرات ليها لقاتو شوية غادي وكاينزل...وجدات ليها رقية بلاطو الفطور لحاج...هزاتو ومشات معاها لطيفة تا طمنات عليه وخرجات خلاتها معاه...

م.حفيظ"هز عينيه فيها" : الحاجة مالكي ؟؟..

ناديا"كانت كتشوف فيه وساهية فيييه"...

م.حفيظ"حط المغرفة وحط ايدو فوق ايدها" : الحاجة ؟؟...

ناديا : هممم ؟!..

م.حفيظ : مالكي اهياتا ؟!...

ناديا : الحاج...

م.حفيظ : انعام...

ناديا : وليتي شوية دابا ياااك...

م.حفيظ : نعام ؟..اا الحمد لله علاه..

ناديا : مابيتي تگوليا والو ؟!..مابيتي تعلمني بتا شي حاجة ؟!..

م.حفيظ"رخا ملامحه كأنه حس" : بحالاش !!..

ناديا"الصمت"...

نزل مولاي حفيظ عينيه...ماعرفش اشنو عرفات هي لكن حس بيها بلي حاسة بيه عارف شي حاجة الي وصلاتو لهاد الحالة...هي مادخلاتوش بطريقة قاصحة تمرضو...دخلاتو بطريقة ذكية باش هو يفهم راسو ويعاود ليها وتعرف واش الهضرة الي سمعات هي الي عارف ولا لا...واش الي وقع ليه فالرحامنة سبابه هاد الهضرة ولا كاينة شي حاجة كبر ؟!..تاهو الحمل تقااال عليه بزاااف...كل ليلة كايبات يحلم ببنته...كل صباح يصبح يخمم...تقهر بالمزيان وهو مكبل حاليا حيث مريض وحيث بنتو عندها امتحانات....هز راسو وشاف فيها...

م.حفيظ : كاااااين ماتگال...كاااااين الحاجاااا (طولها حتى دبدب ليه صوته بحال الى بغا يبكي)...

ناديا"كمشت حجبانها مركزة معاه وفنفس الوقت كاتربط الاحداث" : بشار ؟؟...

م.حفيظ"حرك راسو"...

ناديا"عينيها ولاو حمرييين بدموع وريق تحبس ليها فحلقها" : ا ش عرفتي ؟!...

كانت كتسنى يقوليها اشنو قالت ليها ربيعة...لكن الي بدا كايقوليها فيه كان حاجة اخرى...الي بدا يعاود ليها خلا وجهها ينشف...عينيها يخرجو...كل ماكايكمل كل ما قلبها وكبدتها كاتكمش...الفطور مابقى حلا ليها...الكلام تحبس ليها...كايعاود ودموعو دايزين وهي حادرة راسها وصدرها كاينهج...هادشي صعييييييب انها تقبلو فالاول صعيب تستوعبه....هادشي كامل وقع وتشمتو شمتة الغدايد....بنتهم دابا مع شخص الي لقاو راسهم عارفين عليه ابشع حوايج...نزلت راسها وعينيها بداو كايقطرو فدموع الي تحولو لدموع غزييييرة...

م.حفيظ"بصوت مقجوج" : كي بيندير دابا ناديا "خفض صوته اكثر" كي بندييييير هي گولي ليا...

ناديا"البكاء ماخلاها تنطق بحرف حاليا...رجع راسها كايزنزن تاني عليها."...

م.حفيظ : اناديا...

ناديا"كاتمسح فدموعها وتنخصص" : ا اششش ااااش كاين مايدار الحاج دابا ااااااش...

م.حفيظ : بنتي بين عينيها الحاجااا بكرة ديالي بين عينيا...

ماقدرتش تهضر تاني..وحتى هو سكت...بزوج بيهم واقعين فواحد الصدمة ماتبغيهاش لعدوك...الي طرا ليهم دابا والي عرفوه كان مخبي عليهم شهووووور حتى لعام...تكب عليهم فايام قليلة تباعا...فين يعطيو راس واش يديرو....هزات عينيها من بعد ماقدرات تهدن شوية...كانت بغات تعاود ليه لكن من خلال هضرته استنتجات انه الي عارفة هي مافراسوش غالبا...

ناديا : باقي شي حاجة ماعارفاهاش انا ؟!..

م.حفيظ : اش باقي كثر من هادشي الحاجة اش باقييييي...ضهري تهرس ليا وشمتة الي شمتووني رجعوها فيا ونعتوني بطمع....اش باقي مخبي عليك كثر من هادشي...

بقى شحال وهو كاينهج ودموعو غرقو ليه لحيتو البيضاء...منظر وجهو يهرس الخاطر...اب مكسور بالمعقول من جيهة بنتو...عينيه فيهم غير هي وكيفاش غاتكون دابا بزز باش صابر ومخليها تبقى معاه ومخلي الامور تبان شبه عادية...زادتهم حتى امتحاناتها وكيف يديرو دابا يصبرو باقي...شوية حتى نطق مفكر شي حاجة...

م.حفيظ : باقي عاقل گالت ليا سول بنتك..."كايحاول يتفكر اش قالت ليه بالضبط توريا"..خلاها ليا فعنقي..."شاف فناديا" اش بتكون قصدات هاا ؟!..اش باقي مازال دار ....

نهنا تاكدات انه ماعارفش..اش دير تقوليه ؟...تزيد تكمل عليه وصحته دابا على المحك...هو ففترة نقاهة الي خاصو يكون بعيد على اي توثر وضغط وصدمة...والا غايرجع للصفر وشوف واش ينوض منها ؟!..حاسة براسها مابقاتش قادرة تصتحمل شي هضرة اخرى...شافت فيه وتكلمات بتأكيييييد...محاولة تخبي عليه اشنو عرفات حيث هاد الامر مازال مامتأكداش منو...هزاات ايدها وشدات ليه فايدو مزيرررة عليه كاتشوف فيه بعويناتها الخوضر الي نسخة من عينين حبيبة حتى فالبكاء...

ناديا : بتعطييني من صبرك الحاج...حتى دوز امتحاناتها منضيعوهاش فعامها...ماتبين ماتهضر حتى تكمل وديك ساعة نتصرفو...

خرجات من بيت مولاي حفيظ ودخلات ديريكت لدوش...غسلات وجهها وبقات شحاااال تا حسات براسها تنفسات وتنفس ليها وجهها...حاسة بغمة فصدرها...حاسة بحجرة محطوطة ليها على قلبها...حاسة بموس ماضي محجوط ليها على كبدتها...اصعب حاجة مكانتش كتوقع غاتعيشها هي انها تصبر ودير كأن شيئا لم يكن حتى تكمل بنتها امتحاناتها...مابغاتش ضيع ليها قرايتها وفنفس الوقت يرتاح الحاج ويعرفو اش يديرو...مابغات دير تاحاجة حاليا حتى تأكد...كاين شي حاجة صعب من هاد الموقف الي محطوطين فيه...

خرجات من الدوش لقات ولادها جا ليهم طرونسبور ومشاو...رجعات تصرف وتحاول تكون عادية...لكن النفسية كاتبان على وجه مولاها...نهار كامل وهي كاتهضر غير بالعبار...ساعة ساهية ودقيقة تجاوبك...مولاي حفيظ غير دوا الي كاينعسو ويرخيه... وصلات العشية وحسبات دقايق وثواني باش تجي حبيبة وتشوفها وترتاح...لدرجة بشار الي واخا وقف غير عند الباب ومادخلش ماشافتش جيهتو...كايخليها تبقى معاهم شوية ويرجع ليها وحيث عرف بلي فيصل ماكاينش هاد الايام...

كاتحس براسها على اعصابها امتى تكمل حبيبة...كل عشية تحسب الوقت فين تبان ليها حبيبة...الهلع الي عايشاه هاد الايام را برافو عليها الي صبرات ولجمات فمها وحاولات تخلي الامور دوز بشكل طبيعي غير باش ماضيعش بنتها فامتحاناتها....مابقا كايبان ليها والو من غير دوز الايام والوقت باش تعرف اش تصرف....

ثلاث ايام بالكشيفة باش دوزات حبيبة وكملات...ثلاث ايام اشنو وقع فيها ؟!..كيفاش دازت عليهم واشنو طرا عند لاخرين ؟...لو ما كانو الضياف الي ملاهييينهم كان تفكييير قت.لهم وعذبهم...لا ليلهم ليل ولا نهارهم مقاد...اصعب ايام هي الي عاشو...ضياف رحامنة تاواحد فيهم ماقدر يجي خصوصا عيدة الي مابغاش مولاي حفيظ تجي عندو...ربيعة رجعات لفيرما وتصرفات كانه ماطرا والو...توريا تشغلات ومشات عند خوها الي كايوجد سبوع ملي عرف اش وقع ليها خلاها تبقى عندو حتى ترتاح...يوسف بقات سعيدة الي مقابلاه مابغاتش توريا تديه معاها...اشراق لهاتها الكوليج حاليا...سيحمد رجع يمشي لسواق واخا باقي داير فاصمة فراسو...علاش ناوي مابين ليهم ماعطاهم راس الخيط...الي قدرات تفهم سعيدة والي هي الوحيدة الي عارفة انه ساكت حيث خايف من بشار يفرشو ويفرش علاقتو ب عتيقة والبنات الي عندو...

اذان الظهر...هزات ناديا عينيها للسما كاتسمع فيه جاي من مسجد الكتبية الي حداهم...غمضات عينيها ودعات فسرها حتى كمل الاذان خرج مولاي حفيظ من طواليط مشات لعندو شدات فيه تا دخل البيت يصلي وخرجات هي لكوزينة لقات لطيفة قلي ف بطاطا...

لطيفة : كي بقيتي دابا شوية ؟!...

ناديا"تنهدات وحركات راسها" : الحمد لله...

لطيفة : اه تانتسنى تگولي ليا اش كاين...هاد الايام مابقيتيش عاجباني لا نتي لا خويا...اش واقع ؟!..

ناديا"يلاه بغات تهضر وهو يتسمع لانتيرفون...الي نقدها من سؤال لطيفة وحيث ماكايناش رقية خرجات هي دغيا مشات تحل عارفاها حبيبة الي دارت معاها تجي ليوم..." : جيتي...

حبيبة"وجهها عيان" : ممم...

ناديا"بقلق" : مالكي ؟!!

حبيبة. : والو هي عيييت..

دخلات حبيبة ديريكت سلمات على عمتها ومشات لعند باباها سلمات عليه وجلسات حداه حتى وقفات ناديا كاتشوف فيها كاتهضر معاه...

ناديا : في احم..فين راجلك ؟!..

حبيبة : هي وصلني ومشا عندو اجتماع مع الخدمة...

ناديا"هزات حاجبها" : رجع لخدمتو ؟!..

حبيبة : لا...خدمة اخرى ماشي فالمانيا...

بقات شحال وهي كاتشوف فيها...وجهها كايبان ليها عيان...عرفات بلي الامتحانات وضغط ومرض باها...رجعات تاني كتفكر كيف كل نهار...الصبر عندها وصل للحد..كانت ضايرة حبيبة كاتقرا فواحد لوغدونونص ديال دوا باباها تا نطقات ناديا..

ناديا : حبيبة..."شافت فيها" اجي معايا بنتي لعند عمتك...

م.حفيظ"هز عينيه فيها وغمزها"..

ناديا"غمضات عينيها وحركات راسها ب لا زعما ماغانقول والو دابا"...

ناضت حبيبة باست باباها وتبعاتها تاخرجو وهي دور عندها ناديا وقالت "طلعي لبيتك انا جايا"...ماتسناتش الجواب خلاتنها ومشات لبيت دراري...حبيبة مافهماتش شافت تا عياات وهي طلع لبيتها...جلسات فجنب سريرها جبدات تيليفونها لقاتو مصيفط ليها ميساج بلي غايتعطل باش يجي ليها جاوباتو ب "اوك"...يلاه حطات تيليفونها وهي تدخل ناديا هازة ساشية فايدها.. سدات الباب وراها وشافت فيها...

حبيبة : ماما بيك شي حاجة ؟!..

ناديا"هزات نفس تا هزتها وتنهدات مطولة...طلعتها وهبطتها مزيااان وهي تدخل فالموضوع ديريكت" : بنسولك وبتجاوبيني نيشان "خرجت عينيها بتخنزيرة خلات حبيبة تخلع حيث عارفة انواع تخنزيرات ماماها"...

حبيبة"حركت راسها" : ممم وو وو واخا...

ناديا : نهار..."سكتت شحاال ورجعت كملت" ليلة الي كان عرسك وخليتك دخلتي لبيتك عند راجلك...اش وقع...

حبيبة وسعات عينيها حتى حسات بقلبها سكت سكتة وحدة ورجع خفق...حسات بالنمل سرح ليها...علاش ؟..حيث فكراتها بابشع ليلة عاشت...ليلة الي تناساتها مانساتهاش...الي شحال وهي مريصة بيها شحال وهي كارهة بشار فيها...شحال كافح وتقاتل باش سمحات ليه شحال تقاتل باش بغاتو وشحال تعالج وكافح باش قدرات تعطيه جسدها...

ناديا : سؤال واحد تجاوبيني عليه...وياااااااك تكذبي وياااك ولا كلامي عمرو يجي فكلامك...تكرفص عليك ؟!...

نزلات حبيبة راسها وعينيها خارجين...حسات بوجعة فكرشها من تحت...ماعرفاتش ماماها منين جابت هاد الاخبار...قربات عندها ناديا وهزات ليها وجهها بجهد حيث غير سكوتها خلاها تفهم ان الامر بصح...

ناديا"عينيها خرجو فيها" : سوووولتتك جاوبينيييي

حبيبة"عينيها تعمرو بالدموع" : شك شكون گالها ليك ؟!

ناديا : دوييييت معاااك...

هزات ساشية الي فيها ليزار ولاحتو ليها تا شهقات وهي كاتشوف فداك ليزار ...الي ماداتهاش فيه نهار صباحها...كلشي بدا كايرجع ليها كاع الي وقع ديك الايام رجع...حلات فمها وصدرها حرقها...هزات عينيها فماماها وهما ينزلو دموعها كايجريييييو نزلات عينيها مكمشة بايديها الي بداو يترعدو فطرف سرير...

ناديا : الهضرة صحيحة ؟؟؟..."غوتات بجهد تا قفزات حبيبة"..هضريييي هضرييي و گولي ليا كلشيييييي...اش وقع ليك ديك الليلة اش طرا ليك وانا ماكنتش عارفة ومخبية علييييينا...علاش تكرفص علييييييك...

قربات لعندها وشداتها من دراعها مزييييرة عليها تا بدات تبكي...نخضتها وهي كاتسنى فيها تعاود...

ناديا : هضريييييي....ولا ماباقي نشوف فوجهك ولا ندوي معاك....

ماكانش عنظها خيار...باين للعما ان ناديا وصلاتها الخبار...شكون قالها ليها...منين جاها هاد ليزار الي غير شافتو ورجع ليها كلشي...هزات عينيها فماماها بانت ليها جاهلة كاتسناها تهضر ..رجعات نزلات راسها وهي تبدا تبكيييي وبدات تعاود ليها من جديد...بدات تعاود اش وقع ليها ديك الليلة مادام عرفات ماماها اذن خاصها تقول....كل مكتهضر كاترجع لديك الليلة الي بزز باش فاتتها...

ناديا"خرجات عينيها على جهدهم بالجهل" : علااااااش صبرتي علااااش...علاااش تسنيتيه حتى رجع ورجعتي معاه...اش وقع ليك تا سمحتي ليه...علاش ماگلتيها ليا علاااااه...

حبيبة"بغات تقوليها بلي هادشي كامل دارتو على قبل باباها...تخالط كلشي كلشي تخربق دابا...تقول را بسباب باها تقولها ليه ناديا ويزيد يلوم راسو هو سبابها...هزات فيها عينيها" : ب بابااا ماعارفش ياااك ؟!..

ناديا"كاتنهج" : حاجة وحدة الي بيت نعرف...الي وصلني صحيح !!؟..من بعد تكرفصو عليك حتى هما...

حبيبة"حركات راسها" : ولكن طلب مني سماحة اماما...بزاااف ما وقع اماما خلاني سمحت ليه وبيتو...بزاااف اماما...

ناديا : مابيت نعرف والو...الي بيت نعرف عرفتوووو...تكرفص عليك وسكتي...علم الله اش داير وساكتة...

حسات براسها ماقادراش تصبر...ماباغيا تسمع والو...بصح تشمتو من جيه وتكرفص على بنتها من جيه...مابقاتش بغات تسمع منها دابا حاجة وحدة بين عينيها دابا...يلاه سدتها حبيبة من ايدها بغات تبوسها باش تسمع منها نتراتها ليها بجهد...وضارت حدها قالت ليها...

ناديا : بتبقاي هنا تانجي...بااااااباااك مايعرف والو سمعتييييي...

ماجات فين تهضر حبيبة سدات الباب بجهد...نزلات كاتزرب بانت ليها لطيفة شافت فيها...

ناديا : لبسي عليك وعيطي لايوب يوقف عند شارع (حيث كان جاي اصلا جايب معاه رقية من المحطة)...دابا..

خلاتها كاتشوف مافهمات والو حركات راسها ودارت اش قالت ليها...دخلات ناديا لبيت نعاس لقات مولاي حفيظ كايسبح...هزات عبايتها ورمات عليها شال دارت نضاضر شمس...

م.حفيظ : فين غاديا...

ناديا"شافت فيه" : نتقدا هي شي حاجة هاهي للا رقية جايا تعطيك تغذا ودواك..نمشي هي نجيب مقدية جايين ضياف عشية وموصية على شي حلوة ...

ماعرفاتش كيفاش هضرات واش قنعاتو ولا لا...كانو عينيها معمييين...لاحظ انها مبدلة وووجها مزير...ماخلاتش ليه تا فرصة فين يهضر...خرجات لقات لطيفة واجدة...خرجو وهي تبان ليهم رقية جايا وصاتها على حبيبة تبقى وماتخليهاش تنزل عند باها لا تكمل عليه...لطيفة وايوب ماعرفو مالها كايهضرو معاها مكتجاوبش وجهها كايخلع...قالت ليه فين يمشي خلاتهم شي يشوف فشي...تا غوتات عليه وهو يقفز وكسيرا بلهلا يحزقو ليه...طرييييق وحدة حتى وصلو لدوار ودخلو مع البيست ماوقفو تالفيرما حل ليهم العساس ودخلو...غير وقف وهي تنزل ديريكت...لقات سعيدة واقفة كاتهضر مع هاشم...

هاشم : الحاجة ناديا !؟..

ناديا"ماشافتش ناحية سعيدة ولا فيه" : ديك توريا فين هي ؟!..

هاشم : ديك توريااا !!..

يلاه غايجاوبها وهي تخليه ودخلات...بانت ليها كريمة خارجة من بيت عيدة هازة شي حوايج...

ناديا : خالتك فين هي ؟!..

توريا"كانت جايا نازلة سمعتها وهي توقف" : ياك لباس ؟!!..

ناديا"خرجات فيها عينيها وقربات لعندها" : سمعتييييهم لراجلي حتى مرضتيه على شوي ويمو.ت لينا وسكت...صبرت...شمتونا وضحكتو علينا حاولت نصبر وليني عمري منساها....تكرفصي ليا على بنتي نتي وولدك...وتهدديها وترديها خدامة ودوزيها عليها ؟."خرجات فيها عينيها تا ولاو يبانو بيضيييين" هادي الي مانبغيهااااش ومنسكتش عليها..."ضربات جيهة كبدتها"..شفت الوييييييل باش ولدتها...ولاااااادي يا توريا ولاااادي ناكل عليهم بسناني...باقي ماتزاااادش الي يتكرفص على بنتي ويرجعها ليا خدامة..بنتي المخير يكون تحت رجليها...بنتي مقيومة غاااالية وبزااااف عليك...الجاااهلة الامية...

توريا"ضحكت باستهزاء" : شلا عليا لا نتي لا هي لا الي عطيتوها ليه يا تريكة الطماعة..."خرجت فيها عينيها تاهي"..نهار اللول مابغيتهااااش غا درت لخاطر لعدوزتي.. اما كون جات عليا ماندي ليه مبعككة خانزة دياال الخلا...

مع اخر جملة هزات ناديا ايدها وصلاتها معاها لحنك حتى غوتات كريمة وسعيدة....

مع طرشتها مع شنقت عليها ماعطاتهاش تا فرصة فين تستوعب...زيرت ليها على الكول ديال حوايجها ونضختها لعندها...لدرجة ناديا تبدلات كلها وجهها كلو ولا كايبان واحد اخور وجه جاهل بمعنى الكلمة...الكبدة ديالها كاتحرق حريييق من ورا ماعرفات كااااع اض طرا من الالف الى الياء...

ناديا : بنتتييييييي لالااااك ومربية عليك...بنتي الي عمرها مادوات فيك بكلمة خااايبة تنعتيها بالخانزة ديال الخلاااا...بنتيييييييي شفت عليها الويييييل باش ولدتها تجي يا الامية تنعتيها بالي كابرة فييييه....

توريا كاتبغي تشدها ماكتلقى ماتشد غلبات عليها ناديا حتى سعيدة دفعات هاشم يطلع يبعدها منها وتبعاتو تاهي...لطيفة الي كانت موراها مازاال مافهمات والو لكن غا سمعات نعت الي نعتات توريا حبيبة كانت غاديا طالعة ليها غا جرتها سعيدة....

لطيفة : ابعدييييي منيييييي نوري الخانزة هي نيت بنات ناس اش تايسواو....ايهااااي خانزة ديال لخلا !!...

هاشم"كايبعد ناديا" : الحاجة يهديك الله...

كايفك ليها ايديها من على كول توريا والو...ايديها تكرفو على عنق توريا الي تزيرات عليها نفس...ضار عند حسام الي كان واقف كايرمش مافهم والو تاهو هادشي جاهم متابع يلاه يهزو راس يطح ليهم تاني...غمزو باش يجي يفك معاه حيث القوة الي كانت مشحونة بيها ناديا بحال شي لبوؤة عرات نيابها الحادين على كل من قرب لاشبالها...تضاعفت قوتها بالفقصة على بنتها...حسام بان ليه وجه توريا ولا مجيف طلع بجرا لعند باه كايفكو فيها حتى بعدوها عليها وهي طيح توريا كاتكحب....لاخرين كلشي ولا كيشوف مخلوع مباركة تاهي دايرة ايدها على فمها الي تحل...عيدة كانت فالبيت سمعات كلشي وحدرت راسها ماقدراتش تهضر حيث هادشي تعرف وهي سباب فهادشي تاهي...ربيعة ماتحركاتش ولا هربت بقات كاتشوف مابقاتش مسوقة يعرفو ولا لا حيث ملي قررات تعاود ليها كانت جايا تشفي غليل وبغرض تشتت الشمل...جاب الله ماكانش عبد القادر الي مشا مع سيحمد لواحد من الاسواق الاسبوعية...

بقات توريا كاتكحب وتقلب عالنفس...وناديا قادت شالها باقي بتخنزيرتها فيها...نترات ايديها من حسام بجهد....

ناديا : كنا حاسبينكم عائلتنا وجامعنا د.م واحد....دارنا ليكم والعتبة لينا... صدقتو غدارين وماگر فيكم تا خير لا من قريب لا من بعيد...الله ياخذ فيكم الحق الله ياخذ فيكم الحق....

عاود قادت شالها كاتنهج قلبها بغا يسكت بالفقصة والغدايد الي ركبتها من جيهة مولاي حفيظ ومادارت ليه فاش جا ومن جيهة حبيبة بنتها واشنو عانات..... وشافت ف لطيفة وقالت "يلاه فحالك"...تمات خارجة وهي تبان ليها عيدة واقفة عند باب البيت حادرة راسها...

ناديا : تاواحد فيكم مايبقى يعرفنا ولا يجي عندنا...من دابا قطعووو الاصل الي جامعنا وصلة...و رزقكم راه بايوصل لمولاه بالسنتييييم...

شافت فسعيدة شحاااااال بواحد شوفة ديال خيبة الامل خلات سعيدة حدرات عينيها بحزن واسف...حركات راسها ببطء وهي تخرج مخليا توريا عاد ؤجعات فيها نفس وبدات تغوت كانت بغات تمشي ليها غا شدها حسام وهاشم تا بدات تركل ليهم بغات طير عليها...مابقاتش تسوقاات ناديا لاش كاتقول ولا تاواحد...وتاحد فيهم ماقدر يهضر معاها حيث كانت جايا بوجه شراااني مغزززززف على بنتها...ركبات فسيارة هي ولطيفة...كايتسناو فايوب يزيد بقا كايشوف فيهم وهما كايتسناو حتى نطقات ناديا بصوت مرتافع طار ونزل....

ناديا : تحرك فحالك...

ايوب بالخلعة بغا يرجع بلور باش يدور ويمشيو صدق غادي لقدام تا دخل فطريق الي كاتدي لشجر الي عندهم لور...

لطيفة : افين غادي نتا فييييين...

ايوب"بغا يسخف حيث تلف وماقدرش يقول...شاف فعمتو ": منين جينا...

ماقدرش يشوف فناديا شافت فيه غير عمتو عاد توگض ورجع مارش اغييغ عاد شد طريق كسيرا بجهد خاف لا دور فيه دشها جرية وحدة مخلين وراهم تاهما الروينة خصوصا توريا الي بزز باش شدها هاشم وحسام وحتى رضوان الي عيطات ليه كريمة....بقات تغوت وتدعي عليها....

هاشم : ورااايحي لارض...

توريا : عليا بليميييييييييييين وباش يحلفو الرحامنة الحرار لا خليتها فيها...بنت لحراااااااام الله يعطيها مصيبة...تمد عليا ايديها الموسخة الخانزة الي حطتهااااا....(تنترات بجهد من هاشم اصلا الي رخف عليها)...حاااايد عليا نتا....

مشات كاتزرب تال عند عيدة وتقابلت معاها عبنيها خارجين...بغات تموووو.ت بالفقصة من ديك الطرشة الي عمر شي حد تجرأ وحط عليها تا صبعو جات ناديا فدقائق معدودة جمعات ليها حب وتبن...

توريا : شفتي الحگرة وفين وصلنا من ريك الي تبعنا ؟...(ضربت صدرها بجهد) گلت لييييييييييييك ماتخطبيهاش هي واخا عجبتني خاطري ما بقى بغاها...خاطري هرب ملي مابغاتناش فاللول...هانتي فين وصلنا (سرحات ايديها)...شفتي فين لحگنا معاهم....

بقات تبرول وتدعي وتعاير حنكها هكاك بقى حمر...وهي عقلها خارج الي بغا يهدنها تدفعو الي كايبغي يسكتها تعايرو....بقات تغوت وتشكي وتلوم فعيدة الي شافت فيها وخلاتها حتى كملات

عيدة : العيب لحگناه حنا والعار خرج منا...ذنوب ديك البنت وعايلتها على رقبتي تال غذا عند الله...ونتي يا بنتي جهدك كثييير وعيبك قريييب....الناس مالحگونا غا بالخير نضتي تنعتي فيهم بكلام العيب....المسوا (المستوى ديال المعيور) الي عطاوك وعطاوني ماجابوه لينا حنا الي جبناه لينا...لا بغيتي تنقصي جهد نقصيه بغيتي تبقاي وتقوي علينا القبح عطيني تيساع فشوشك قوا عليا....نصبر ليك ولا م.ت را مايبقى ليك غا ولادك...

ماخلاتهاش حتى تكمل هزات ايدها ونطقات بصوت مرتفع وقالت بالحرف " ماتزيدي عمايا حرف...الله يدير تاويل ديال الخير"...وهي دور كاتردد فيها وتعاود فاخر جملة...وسدات علييها الباب فوجهها....

طريق كلها وهما ساكتين...لطيفة بانت ليها ناديا مزيرة بزاف .اجلات الهضرة حتى تنفس وتعرف منها اش واقع...غا دخلو لمراكش وهي تنطق ناديا بزعفة...

ناديا. : سير عند للا خديجة مولات الحلوة...

وهو يكسيري تاني بلهلا يحزقو ليه شاد طريق داوديات فين كاينة مولات الحلوة...حتى صونا تيليفون ايوب بان ليه اسم عمو...

ايوب : الواليد (كايقوليه الواليد حيث رباه)...

ناديا"مدات ايدها" : عطيني...(مد ليها تيليفون وهي تجاوب حيث خلات تيليفونها فالدار...حنحنات وهي تبسم من فوق فوق خاطرها ولانها مضطرة) احم الحاج...توحشتيني ولا اهههه...

م.حفيظ : وايلي الحاجة فين تعطلتي...

ناديا : هاني فالدواديات اهي دنيا عندها عامرة شوي راك عارف قرب رمضان...

م.حفيظ : وفين مشات حبيبة...

ناديا : فبيتها الفوق خليتها باتدخل دوش...هاني جايا هاني جايا...

قطعات معاه وهي دوز رقم حبيبة ماجاوبتهاش يمكن حساب ليها ايوب باغي يعيط يطنز ماكانش عندها الخاطر...حتى عاودات تاني وهي تسمع صوتها قبل ماتكمل...

ناديا : بدخلي داااابا دوشي رشي عليك الما فشعرك الي كان بيني لباك بلي دخولتي دوشي...سمعتيني...

قطعات عليها فالبلاصة ماعرفتهاش واش بيخير كانت كاتبكي ولا بيها شي حاجة...ماتسوقاتش عينيها جايين معمييين...وصل بيهم عند مولات الحلوة رسلات غير لطيفة الي شدات من عندها شي تخربيق بالخف ماعرفات تا اش حطات ليها...ركبو ورجع بيهم لدار...مع دخلات ماكانش عندها اي اختيار من غير انها تضغط على راسها وتمشي عند مولاي حفيظ...

ناديا"بدات تحيد فعبايتها وهي داخلة" : الحاج...

م.حفيظ : جيتي...

ناديا : قنطتي ولا...

م.حفيظ"تنهد" : بزاااف...بيت نتحرك اناديا...

ناديا : فين بيتي تمشي...حتى ترجع دير كونطرول ديالك...الى عينك ترجع لمحلاتك هي نسا دابا...ايوب كايمشي يشوفهم ودراري الي مخلي قايمين بالواجب..الكاميرات ديال محلات عندك فتيليفون راك تضل مقابلهم وحاضي رزقك...ها فيصل يومين وبايجي هو الي بايتكلف ليك بيهم...ياك كنتي داير معاه يجي يشد ليك واحد فيهم ايوى ؟!..

م.حفيظ"كمش عينيه فيها شاك" : بيك شي حاجة نتي ؟!..

ناديا"تنهدات وجلسات حداه مابقاتش قدرات تسيطر على دموعها نزلات راسها كاتنهج" : بيييييت نفكو علينا داكشي...بنتي الحاج مزيرة من جيهتها...

م.حفيظ : هذا جهد ناديا...

ناديا"هزات فيه رايها ومسحات دموعها" : اش بان ليك ؟!...

طبطبات ليه على ايدو وشافت فيه بشوفة الي حتى هو بادلها بيها...ناس مرزنين بزاف لكن على كبدتهم قاصحيييين وممكن يديرو اي حاجة...مولاي حفيظ حتى ندم كمل عليه وناديا خلااااص ملي عرفات اش وقع لبنتها...والي زاد طين بلة ان حبيبة ماعارفاش ماضي بشار يعني ماقاليها والو...خلاتو فالبيت وخرجات...وقفات كاتشوف شحال بانت ليها لطيفة حركات ليها راسها بمعنى اجي معايا...بزربة تبعاتها حتى طلعو لفوق ودخلات على حبيبة الي لقاتها يلاه خارجة من دوش عينيها منفوخين بالبكا...

ناديا : جعدي...

جلسات حبيبة فين قالت ليها...هزات فيها عينيها ويلاه بغات تبدا تبكي وتشرح ليها وهي توقفها ناديا بايدها...

ناديا : بتعاودي قدامي...علاش ماگلتي ليا والو ديك الوقت ؟!..

حبيبة"بدات كاتنخصص"...

ناديا : سكتيييييييييي سكتي عليا من البكا...علاش ملي دار ليك هكاك سكتي...علاش سمحتي ليه من بعد...هااا ؟..."خرجات فيها عينيها" مهددك بشي حاجة ؟!..

لطيفة : اش دار ليها وشكون...ناديا طلعتيني باش نفهم فهميني...

بقات ناديا كاتخنزر فحبيبة...شحال وهي دور عند لطيفة...حتى بدات كاتعاود ليها وماحدها كاتعاود ومتحد نبرة البكاء كاتزاد عند حبيبة تا غمضت عينيها حسات بالوجع شدها فكرشها...الاعصاب والضغط يمكن رجع ليها تاني ونفس الحالة !!...

حبيبة : ممممم اهئ اهئ...

لطيفة"دارت ايديها على راسها" : اويلي اوييييييلي على حالااااااا ويلي استغفر الله ويلي...ويلي...."شافت فحبيبة" كاع هادشي اجدرة ؟!...

حبيبة"حركات رايها ب لا" : ماكانش واعي ماكانش...طلب مني سماحة ودار شحاال من حاجة باش نسمح ليه اماما...هي سمعي ليا ماما....

ناديا غا سمعات ديك ماكانش واعي تلغات كاااع الهضرة....وهي توقف على طولتها...داكشي الي قالو ليها مولاي حفيظ ربطاتو دابا...فلول ماقالتش ليها هاكا.. عينيها خرجو تا حسات بالضبابة رجعت ليها...قربات لعندها مزيااان وشدات ليها وجهها من الفك زيرات عليه...

ناديا : كيفاش ماكانش واعي ؟!..

حبيبة"بغات تقوليها كان سكران ماقدراتش فلتات ليها وباش تشرح ماقدراتش" : مممم اهى اهى...

طلقات منها بجهد وهي تبدا دور كانت على شوي طيح كون ماناضت لطيفة شداتها...

لطيفة. : بسم الله عليك اناديا بسم الله عليك...

حبيبة : مم مامااا ...

بقات ناديا مخرجة عينيها...الهضرة ديال كايغيب فاش كايتعصب رجعات ليها الهضرة ديال انه كايشرب دوا ضارت ليها فراسها...تقولها ليها ؟!..هزات فيها عينيها وعاودت سولتها باش تاكد واش عارفا...

ناديا : ك كيفاش ماكانش واعي..."غوتات بجهد تاتسمع صوتها لتحت" دويييييييي....

غمضت عينيها تاني ماقدراتش تجاوب لكن الجواب خذاتو ناديا هو "ماكانش واعي"...هادي اجابة عندها كافية انه تعرف وتأكد بان الهضرة بصح ديال انه "مريييييض"...

خلاوها فالبيت وخرجو...ماقدراتش تنزل دابا لتحت...داتها لطيفة لصالة الي كاينة لفوق تما نيت وجلسو فيها...

حبيبة بقات تبكي حتى حسات بالسخفة...تكمشات ففراشها على وضعية الجنين شادة كرشها وتبكي...حتى صونا تيليفونها بان ليها اسمو على شاشة...اش غادير ؟ كيفاش غاتجاوبو وهي بهاد الحالة...عارفاه الى سمعها كاتبكي ماغايصبرش ويجي لعندها يحيح...حتى الى ماجاوباتوش غايتشطن عليها...قطع راسو وعاود صونا من جديد....وقطع...

كل وحدة فيهم ساهية مصدومة فهاد المصيبة الي نزلات عليهم...شافت فيها لطيفة...

لطيفة : الحاج فراسو...

ناديا"كاتنهج..حركات راسها ب لا"...

لطيفة : ماتعلميييهش اناديا مايعرفش...

ناديا : نزيد عليه كثر ؟!..

لطيفة"هزت حاجبها" : علاش واقع ماكثر...

ناديا"تنهدات تا شهقت..وهي تحرك راسها" : من بعد وتعرفي من بعد...كثيييير داكشي كثيييير..

لطيفة : من جيهتهوووم ؟!..

ناديا : ومن جيهتو هو نيت...

لطيفة : اش دار كثر من هاكا...وكان تايبان معقول ومهلي فبنتك...ماتكونش هضرة حبيبة صحيحة...

ناديا"هزات فيها عينيها بزربة" : لا لطيفة لاااا...داكشي كبييييير على هادشي الي عرفتي...بنتي دروييييشة بنتي سكوتية ماشي حارة...بنتي اه تسكت على حقها وماتگوليكش هي باش ماتقلقيش...بنتي تاتضحي براسها هي باش ماتهزيش همها...بنتي وتنعرفها...الى مهلي فيها ماسديرش فيها هاذاكشي..."سكتات حتى سكتات وهي تهز فيها عينيها تاني"...عرفنا بلي كان مرييييض فمصح عقلي...تايشرب دوا...

لطيفة"حلات فمها ودهشرت اكثر"...

ناديا : زوجوه بزز باش ماتبانش شوهتهم...بانت ليهم فبنتي وحنا سمعنا ليها وعطيناها...تقنا فيهم حيث عائلة ديال الحاج...عطيناها حيث هي بات(بغات)...حساب ليها بايديها لهيه ساعاك ماكاين والو من هادشي...كذبو من هنا ولبقو من هنا حتى لقينا راسنا عاطينها ليه يتكرفص عليها...هادشي ماگالتوش ليا حتى عرفت من ناس خرين...

لطيفة : من ديك الي جات صباح ؟!..

حركات راسها...لطيفة باقي تاهي الصدمة كاتنخض فيها...هادشي الي طرا هاد النهار مايبغيوه لعدوهم واكثر حاجة ناديا...الي شدات دقة ديال هادشي من زوج جوايه...زادت كملت عليها حتى هضرت توريا الي باقي تنغل فيها دابا...بقاو شحال وهما تما حتى تهدنو شوية واخا ماكاين هدنة...واخا تشرح ليها حبيبة تال صباح بلي مزيان معاها كاترجع لهضرة الي قاليها مولاي حفيظ والي اكدوه ليه هما...والي اكداتو ليها ربيعة...والي اكد ليها اكثر حبيبة...

خرجو من تما وهي تحل الباب ديال بيتها طلات عليها لقاتها مكمشة فالسرير ديالها...قبل مادخل شافت ف لطيفة وقالت...

ناديا : هاني جايا هي نزلي...

حركات لطيفة راسها وتنهدات تاهي حالتها حالة من الي عرفات وهادشي عرفات غير شوية...دخلات وسدات الباب وراها...قربات لعندها وجرات البوفة الي فالكوافوز وجلسات مقابلة ليها....ربعات ايديها كاتشوف فيها مكمشة وكاتشوف عينيها تنفخو....حتر صونا تيليفونها من جديد...دورات ناديا عينيها وهو يبان ليها اسم «bacchar ❤️»...مدات ايدها وهزاتو عطاتو ليها...

ناديا : بتجاوبيه...بيتگولي ليه بلي بيتي تباتي هنا...طلبيه ولا شوفي كيف ديري..سمعتيني !؟...شدي..."خنزرات فيها" شديييي..

مسحات عينيها وهي تشدو من عندها...تا بغات تجاوب وهي تشوف فماماها ونطقات بصوت عيااان وباكي...

حبيبة : بايعرفني بكيت...بايحس بيا ويخاف اماما.."شهقات"..اه تاتيخلع عليا بزاااف اماما والله...

ناديا : ايييه بايتخلع عليك كثر من واليديك !؟..جاوبي...

صرطات ريقها وجات بغات تجاوبو قطع...حنحنات باش تقاد صوتها...وهي تصوني ليه هي...مع الرنة الاولى جاوب بصوت مرتفع تا تسمع عند ناديا الي هزات حاجبها...

بشار : مااااااال عدو ربك فهاد الحبس !؟..

حبيبة : ك احم كنت لفوق و وخلييتو حدا بابا..ه هاني...

بشار"نقص سرعة سيارة" : مالك ؟!..

حبيبة : ها "نزلو دموعها يجريييو شافت فماماها الي كانت مخنزرة فيها"..م ماليش هي بكيييت...

بشار : علاش ؟؟..

حبيبة : هي هي مع بابا كنت خايفة عليه وبقيت حداه وراك عارف..كان كايعاود ليا وبكيت...كنت خايفة عليه لا توقع ليه شي حاجة وبقينا تنهضرو حتى بكيت...

بشار : مسبة ليا على دوك العينين يا حبيبة...تبرزطيني من جيهتك تاني ؟..نجي عندك ولا تبقاي شوية ؟!..

حبيبة : لا..واخا نطلبك ؟!..

بشار : ؟؟..

حبيبة : بيت نبات مع بابا اليوم...

بشار : لا...

حبيبة : هي اليوم عااافاك..هاد الايام "كاتمسح فدموعها وصوتها مبدل واخا حاس بيها لكن قال را بكات تاق بهضرتها"..ماكنتش تنشوفو مزيان...

بقا شحال وهو ساكت...هزات عينيها فماماها الي باقي كتشوف فيها مخنزرة...ورجعت نزلتهم...عاد جاوبها وخلاها على خاطرها...واخا ماسخيش يخليها تبات شي نهار بعيدة عليه...قطعات معاه...

حبيبة : علاش بيتيني نبات ؟..

ناديا : هكاك..حتى نهضرو معاه ونشوفو اش نديرو معاه...

حبيبة : اش ش بيتو ديرو ؟!..

ناديا : حنا الي عارفين...

حبيبة"خرجت فيها عينيها ورفعت صوتها" : الي بيتو ديروه اماما هي فوتوني انا وياه...

نادي"هزات حاجبها " : ايييييه الالة اييييه...لا هي جي ضربيني نييييت..."شافت فالتيليفون وشداتو من عندها بجهد...وركات على الباور حتى طفاتو"...

ناديا"قربات لعند وجهها مزيان" : ماولداتكش يتكرفصو ليا عليك...(وراتها تيليفون ) هذا بايبقى عندي..وهي ديري فبالك من دابا تبداي تنساي شي حاجة سميتها بشار...

الي الي سمعاتو حبيبة من ناديا خلاها تخرج عينيها وينزل قلبها حتى حسات بنفس الوجعة فكرشها...حسات بالدوخة وترويعة الخاطر...حسات بالصمك وهي كاتسمع اشنو قالت ناديا....

"بداي من دابا تنساي شي حاجة سميتها بشار"....

كيفاش غاتنساه...واش بهاد السهولة تنساه بمجرد ما قالتها ليها ماماها...وعلاش ؟...اذا هي سمحات ليه وعوضها على بزاف واخا منساتش لكن ولات ذكرى وصافي...تنسى الشخص الي دخل لقلبها والي عرفات معاه الحب والي دايرها بين عينيه...تنسى الاهتمام الخاص ليها...تنسى المواقف الي دار معاها...تنسى "بشار"...لهاد درجة ساهلة ؟!...

حبيبة"خرجت عينيها ووقفات" : كي كيفاش نساه ؟!..علاش اماما نساه ؟؟...اماما واش تتهصري بصح اماما حرام علييييك...

ناديا : كي سمعتي...

ضارت بغات تمشي وهي ترمى عليها شادة ليها دراعها...عينيها خارجين ودموعها نازليييين...كاتحاول تدخل لراسها ان ماماها غير كضحك معاها وحيث خبات عليها بغات تعاقبها...

حبيبة : ماما عافاك هي سمحي ليا ...ماتديش ليا تيليفوني عافاك اه دابا يعيط بالليل يسولني واش نعست واش باقي تا ضرني كرشي...عافاك اماما اه بايتخلع عليا الى ماجاوبتوش اماما عافاك..."بغات تشد تيليفون وبعداتو منها"...عافاك راه مايجيهش نعاس ...الى ما عرف بلي تخشيت ففراشي وتكيت مايرتاحش...عافاك راه ضاربو البرد هاد اليومين وتايضرو صدرو اهء....خليني هي نتأكد واش دار الحليب وهولص الي كنتي تاديري ليا فاش تنمرض عافاك.... اماما واخا هي تانبغي نعس ونعطيك تيليفوني... را كايتخلع بزااااف عافاااااك...اهئ...وماما اش تتگولي علاش نساه اماما ااااااش نسى....مانقدرش نسى "بشار" راه راجلي اماماااااا اهء...

ناديا"شداتها من ايدها وقربتها لعندها" : واقعة شي حاجة من غير الي گلتي ليا ؟!...

حبيبة"حركات راسها ب لا"...

ناديا : الي وقع ليك كبيييير بزاااف...سكتي وماگلتيهش ليا...فين بنتيق فيك من بعد فييييين...علم الله اش داير وساكتة..."خنزرت فيها"...بتركني بلاصتك وتيليفونك هاهو عندي والى سول بايلقاه طافي يعيط لواحد فينا وعطا الله باش نعلموه...وعنداااااك تخرجي قدام باباك بهاد الحالة كملي عليه الي بقى....

حبيبة : وعلاش اماما علااااش اهئ...

ماجاوبتهاش تنترات منها وضارت مخلياها كاتبكي ماعقلتش عليها...خرجات ناديا من البيت وسدات الباب...وقفات شحال مسندة ايديها فدربوز الي ضاير بالفوق كامل...غمضات عينيها وهي كاتنهج...كاتحس بقلبها بغى يسكت كلشي تراكم عليها...الي عرفوه كان قاصح عليهم بزاااااف...والي طرا مع حبيبة اكد ليها...

شداتها الدوخة حتى زيرات على الحديدات مابقاتش قدرات توقف جلسات بزربة فالارض وتكات على الحديد...هزات عينيها الفوووووق وهما ينزلو دموعها يجريييييييو...ماتقدرش وماغايقدروش يثيقو باقي على بنتهم معاه...مايقدروش يأمنو ليه عليها...اي حاجة عرفو دابا رجعو كايربطوها مع الي داز...تفكير الواليدين خصوصا ناديا ومولاي حفيظ الي بالنسبة ليهم الاولاد شي حاجة الي مقد.سة...كبدتهم صعيييبة والي زاد كمل عليهم هو الندم ديال انهم زوجوها صغيرة لشخص ماعارفين عليه والو وخرج منو هادشي...

دورات راسها وغمضات عينيها مابقاتش حسات براسها حتى حلت عينيها وكاتشوف فيهم عند راسها كايطرضو ليها فحناكها بشوي...وكاتسمع بكا ديال شي حد...شوي بشوي عاد قدرات تميز ان حبيبة الي جالسة حداها وكاتبكي مخلوعة عليها...ولطيفة كاترش عليها الما وايوب كاينش عليها...كايهضرو بشوية خايفين لا يسمعهم مولاي حفيظ الي فالبيت...

لطيفة : ناديا تاتسمعيني...ناديا...

ناديا : مممم...

حبيبة"بصوت ضعيف" : ماما ماتخلعينيش عليك...

ناديا"بقات كاتشوووف فيها بلا ماتهضر..شوفة عااامرة ببزاف الحوايج...ماحساتش تاني تا نزلو دموعها جنب عينيها وهي دور ناحية لطيفة"..

لطيفة"شمماتها ريحة" : نديوك لكلينيك ؟!..

ايوب : انا مشيت نقرب طوموبيل لدرب...

ناديا"نطقات بصوت عيان" : لا..لا بلاش...

قلبات على تيليفون بان ليها فايد حبيبة...

ناديا : عطيني....

حبيبة : م ماما...

ناديا "بزعفة عيانة" : اري لهنااااا...

مداتو ليها وهي تشدو...ومدات ايدها لايوب الي عاونها تا وقفات سندها عليه ونزلها دقة بدقة....بقات حبيبة واقفة معوجة راسها وعينيها عامرين دموع...باقي هضرة ماماها كادور ليها فراسها وكل مكترجع لديك "بداي من دابا تنساي بشار" كايتحسك ليها القلب...حاولات توهم راسها انه غير مقلقة منها وبغاو يربيوه...هادشي باش قنعات راسها ماعارفاش الباقي والي الى عرفاتو واش حتى هي غاتقبلو ولا لا....

لطيفة : واش عيانة نتي...

حبيبة"شافت فيها" : عافاك اعميتو هضري معاها وجيبي ليا تيليفوني عافاك...

لطيفة : ابنتي اه الي وقع معاك صعيب اي ام تقبلو...علاش ابنتي سكتي وصبرتي لداكشي الي دار ليك...علاش ماگلتيهاش ليها وخليتيها تسمع من كحل الراس..."تنهدات" ابنتي وجهك ماعاجبنيش...

حبيبة : كان بايديني لطبيب وماخليتوش...اه غايبقى مشطون عليا وهي دات تيليفون...اشنو ندير...والله اعميتو حتى مزيان معايا...والله حتى ندم وطلب مني سماحة...

لطيفة"بقات كاتشووف فيها قطعات ليها قلبها...تنهدات" : سيري لبيتك غسلي وجهك..شوية ونطلع عندك عيطي ليه من عندي...هي باش ترتاحي وباباك مايشوفكش عيانة...حافظة نمرتو...

حبيبة"كاتحرك راسها بهيستيريا" : اه اه...

نزلات لطيفة لاحقة على ناديا تعطيها شي حاجة توگضها وحبيبة دخلات وتنخصيصة باقي فيها...عقلها دابا فيه غير بشار الي صعيب تنساه وصعيب تفكر انه شي نهار تفرق عليه...غير هضرة ماماها وحسات بقلبها بغا يتنزع ليها...دخلات لدوش غسلات وجهها باش تنفس ويتفشو ليها عينيها...شربات الما من روبيني باش تبرد العافية وتروي الشحفة الي فيها...خوات الما على راسها وعلى عنقها وعلى رقبتها...

بدلات الكيلوط والفوطة صحية...وعاودت غسلات وجهها تا حسات براسها شوية بدات كاتنفس لكن تنخصيصة مرة مرة كاتهزها...خرجات من دوش ووقفات حتى جمعات شعرها الفوق...جبدات من الماريو بيجامة ديال دار...بدات كاتلبس وكتافها طايحين...عقلها غايب مع بشار الي هادي يومين شداتو الكحبة حيث ضربو البرد....خذا دوا من فرماسيان وكل ليلة كاتعطيه الحليب سخون دايبة فيه هولص كايشربو غير باش يدير ليها الخاطر اما الدوا ديال فرمسيان كافيه...مسحات عينيها تاني ونشات عليها وهي تنهد مطولة...وخرجات من البيت نزلات لتحت وكاتشوف واش كاين باها تما ولا لا...وقفات وهي دور بان ليها البيت شاعل فيه ضو...سمعات صوت الاذان ديال المغرب...دخلات البيت لقات غير عمتها وايوب جالسين...

حبيبة"بصوت مبحوح" : ماما...

لطيفة : عند باباك فالبيت...

ايوب : مالكي نتي...

حبيبة"الصمت"...

لطيفة : دوزي تگعدي رتاحي...

بقات واقفة وكاتشوف فعمتها باش تفهم وتعطيها تيليفون...لطيفة فهماتها وهي تنهد ووقفات حطات تيليكوموند ومشات حداها...

لطيفة : اجي معايا الفوق نعطيك شي حاجة...

حركات راسها وتبعاتها تا وصلو لعند دروج وهي تخرج ناديا وشافت فيهم...

ناديا : فين غادييين ؟!..

لطيفة : باتمشي هي معايا نعطيها فنيدة تراس...

ناديا"هزات حاجبها" : هاهي فالفارماسي الي فدوش...هزي وحدة لاش بطلعي تال فوق...

لطيفة : انا عندي اوكي هي بات اوكي...

حركات ناديا راسها ومشات لكوزينة عند رقية...ضارت لطيفة عند حبيبة و وومات ليها تبعها...دخلات لبيت وسدات عليها...وقفات وتقابلت معاها....

لطيفة : الى عاونتك هي باش ماتوقعش شي كارثة...وعنداك يحساب ليك عاجبني هادشي الي وقع ليك معاه والي داروه واليديك ماتلوميهمش...بتعيطي ليه دابا تگولي ليه تيليفونك طفا ولا نسيتي شارجور..."مدات ليها تيليفون" ودغيا بتعرف ماماك وتقلق مني...

خذات من عندها تيليفون ودازت ديريكت لميساجات...شافت فعمتها وقالت...

حبيبة : ماتايجاوبش على نمرة متيعرفهاش (كاتزلق ليها شهقة خفيفة)...

حركات لطيفة راسها...رسلات ليه حبيبة ميساج فيه...

"بشار،، انا حبيبة انعيط ليك وجاوبني فهاد نمرة"....

غير صونات ليه فالبلاصة جاوبها قبل مايهضر نطقات هي غامقة عليه حيث عارفاه غليتخلع وبالفعل داكشي الي كان....

حبيبة : تيليفوني ديشارجا "كاتصرط ريقها"...

بشار : مال صوتك نتي ؟!..

حبيبة : مامالوش هي تفقصت نسيت شارجور..."سكتات تا صرطت البكية حيث بغا يسبقها البكا والانهيار وحاولت ما امكن ماتبينش ليه لكن هو حس بيها"...

بشار : هادشي الي كاتبخي عليا فيه...مانغمش ملتي مانغمنيش...

حبيبة"غمضت عينيها ونزلو دموعها كي الحجر..بزز باش ضغطات على صوتها ونطقات بيه منخفض" : والله...والله حتى طافي...هي احم..هي باش ماتخلعش عليا عيطت ليك من عند عميتو...

بشار"الصمت"...

حبيبة : بشااار...

بشار : كانسمع...

حبيبة : ثيق بيا وماتخلعش عليا عافاك...

ماطرباتوش هضرتها وماتيقش...حيث الى تيليفونها طفا غاتعيط ليه من عند ماماها...ولا باباها...حيد باها حيث واخذ منو موقف ولكن ماماها...اذن شي حاجة كاينة تما...لكن نبرة الترجي الي فصوتها باش مايتخلعش عليها خلاتو يميك...حتى سمعها قالت عاوتاني...

حبيبة : بشاار !!..

بشار : كرشك ؟!..

حبيبة : شوية بدا تايفوتني الحال...ونتا صدرك باقي كايضرك ؟ باقي فيك الكحبة (دميعاتها كاينزلو خفاف وعمتها كاتشوف وتحسر على حالتها)...

بشار : شوية...

حبيبة : دير الحليب الي تندير ليك...والى بديتي تكحب حيد عليك الغطا حيث فاش تتسخن تاتجاهد عليك...والى كترات شرب سيرو وتكا على كرشك....

بشار : داكشي مانجمش ليه..ممولفش نديرو...

حبيبة : وعلاش ؟!..تفكر...

بشار : فكريني نتي...هاد المباتة فداركم ماعاجبانيش...نديرو ليك خاطرك صباح انا عندك...

حبيبة"هزات ايدها ومسحات دموعها بطرف كمايمها" : واخاا...

بشار : تهلاي ليا فراسك...

قطعات معاه ومدات لعمتها تيليفونها...حادرة راسها و قواها ضعيييفة...فين تعطي راس واش تسنى ماماها تاتهدن وتهضر معاها...كادور تاتعيا وكاتقول را غير معصبة وصافي...تنهدات وهي طبطب عليها عمتها وخرجو من البيت...دخلو لبيت التحت لقاو سناء الي عاد دخلات كانت خارجة مقدية لماماها...وايوب ورقية...

شوية حتى خرجات ناديا وجايا هي ومولاي حفيظ الي عيا من الجلسة فالبيت...هزات حبيبة عينيها فيه وهي تبسم ابتسامة انكسار وقهر...عقلها غايب مع بشار...وقفات وهي تشوف ف ماماها الي كانت كتشوف فيها حتى هي...

تبسم ليها بانكسار حتى هو...جلس وسطهم فرحانين بيه البعض والبعض همو كبيييير....بقاو مجمعين معاه شوية وهي طلع حبيبة لبيتها مستاذنة منهم....داز الوقت والعشا بدا كايأذن... تسمع صوت لانتيرفون وهي تمشي سناء الي حلات الباب حتى بان ليها واقف عاطي بضهر...غا سمع الباب وهو يدور بانت ليه سناء نزل عينيه ونطق...

بشار"هاز فايدو شارجور ديالها" : حبيبة !!..

شوفاتو مغوبشين وعينيه فالارض...كاتحس بيه مهيب بزاف...يلاه غاتجاوبو وهي تسمع صوت ناديا الي مقربة حتى حلات الباب اكثر كاتقاد فشالها...

ناديا : سناء سيري عند عمك گوليه يجي لصالون الكبير الي لهيه..

سناء : واخا...

ناديا"وسعات الباب وومات ليه" : دخل...

حرك راسو مثقل...يمكن رتاح حيث حس بيهم غايهضرو وهادشي غايحيدو عليه مثقل ليه على كتافو بحال الجبل...لو ماكانش جا كانت غاتعيط ليه باش يهضرو معاه الغذ ليه...تحنى نصو تا نزل فدريجات ودخل...سدات الباب وهي تسبقو وتبعها تا دخلو لصالون ...وقف عند الباب حيد البروتكان من رجليه ودخل ريح تما...شوية وهو يتم داخل مولاي حفيظ شادة فيه سناء...شاف فيه وهو يغوبش وشاف فناديا الي غمزاتو بمعنى هنا الوقت فين نهضرو...تنهد وهو يجلس...

بشار"شاف فيه" : شوية الحاج !!..

م.حفيظ"حرك راسو وصافي بدون مايهز فيه عينيه"..

ناديا : سناء...طلعو لفوق ابنتي الله يرضي عليك...

شافت فيها وهي تحدر راسها وخرجات...بشار كان كايتسنى حبيبة تدخل عليهم لكن ماحسش بوجودها...لاخرين غير بان ليهم جا ودخلوه لصالون كل تشتت بامر من لطيفة باش يهضرو معاه على راحتهم...جلسات ناديا جنب مولاي حفيظ...

بشار : فين حبيبة ؟!؟؟...

ناديا : فبيتها...

م.حفيظ"شاف فناديا ورجع شاف فيه" : كانتسناو منك اش بيتي تگول...حبيبة هاد ساعة ماواجداش باش تكون معانا هنا...

بشار"زير على شارجور الي فايدو من بعد مكان كايدور فيه..شاف فناديا ورجع شاف فيه" : الهضرة كثيرة الحاج وجهدكم قليل عليها...

م.حفيظ : باغين نعرفو...باغي نعرف باش نعرف اش ندير من بعد...

بشار : ديتي مني الشرط ؟ (زعما فوت ليا مرتي الي قاليه)...

م.حفيظ : واقيلة بنتي هاديك...

بشار"هز حاجبو" : شكون گال لا ؟؟...

ناديا"حادرة راسها ومخلية مولاي حفيظ الي يهضر"...

م.حفيظ"سكت وهو حادر راسو...عيا وهو يتسنى النهار بخوه باش يخلي بنتو حداه...كل ليلة كايباتو يخممو...الي عرفوه ماشي ساهل...حيث ماشي شافر شي حاجة فااصغر ماشي كان مدمن وانما كان عندو ماضي قاصح واقصح حاجة خلاتهم يخافو على بنتهم هي مرضه...والحالة الي كاتجيه...ناهيك على ماعرفات ناديا...هز فيه راسو ونطق"

م.حفيظ : اذن بتجاوبني على اش بيت نعرف...

بشار"حرك راسو"...

م.حفيظ : الهضرة ديال المصح الي كنتي فيه صحيحة ؟!...

بشار"ورك اكثر على داك شارجور...شاف فناديا ورجع شاف فيه" : صحيحة...

م.حفيظ : كنتي تاضرب راسك ؟!...

بشار"حرك راسو"...

م.حفيظ : الضربات الي فايديك ديال داكشي...

بشار"عينيه ولاو حمرين حرك راسو"...

م.حفيظ : من امتى اخر مرة حبستي ؟!...

بشار"كمش حجبانو وتزير ليه وجهو..ماباغيهش يعرف وماباغيش يكذب...ايدو من كترة ما وركت على شارجور تسقط منها د.م نطق بصعوبة وبصوت مبحوح" : شي "بدا يكحب وكحبتو كانت مدعدعة"...سيمانة...

ناديا"وسعات عينيها" : سيمانة ؟!..ماعارفاش حبيبة...

بشار"لاح شارجور وهو يسرح كف ايدو فين طفا الكارو...حيث حتى هادي من ضمن الحوايج الي كايآدي بيهم راسو...ماعندوش مع الكذوب شخص صريح صراحة قوية...يمكن هادشي زوين. لكن خايب فنفس الوقت حيث ماكاينش الي غايتقبلو بهاد الشكل...كاين الكذب واخا خايب لكن بعض المرات كاينفع فشي حوايج كيف كنسميوه الكذب الابيض...بشار مكيعرفش يكذب فحاجة كبيرة فحال هادي...يمكن مكيعرفش يكذب كاااع...

م.حفيظ"قلبو تهز تا حس بصدرو كايحرقو...ضار عند ناديا الي بقات مخرجة عينيها فايد بشار"...

بشار : ماشي ديما...

م.حفيظ : علاش هادشي ماگلتيهش نهار جيتو تخطبو بنتي...علاش كنتي ساكت ولدابا ساكت...علاش هي ماگلتي ليها والو...

بشار : ماتگدش هي على هادشي...

م.حفيظ : خفتي عليها ؟!..

بشار"الصمت"...

م.حفيظ : وبيتينا حنا مانخافوش عليها ؟!..على هادشي الي عرفنا ساهل...على مشكيل الي وقع ليك مع باك نعرفوه ساهل علينا ؟!...

بشار"هز فيه عينيه بشوفة غرييييبة" : مادرتهاش بلعاني الحاج...

م.حفيظ : عارف عارف الي وقع ضربة خطا (خطأ يعني)...هي هو هادشي الي فيك ملي تاتعصب غذا ولا بعدو توقع شي حاجة وتوصلها هي حيث مادرتيهاش بلعاني...حيث اولدي ماتتحكمش فراسك وتاضر راسك...وتقدر ضرها هي...راني حضرت ماوقع ف لحفلة ملي ضربتي سيد واخا على ودها...وملي دوات على فيصل اش درتي ليها...

بشار"الثمت"...

م.كفيظ : هادشي الي گلتي ماشي كذوب وبصح...كنت متمني يكون كذوب واخا عرفتو بصح...كنت كنگول هي حلم وهي تايتبلاو عليك وليني ملي ميمتك وشهدات فيك اش بقى لينا مانگولو...واخا تكون خايبة اه مك هاديك وحنا هي برانيين عليك...الكبدة اولدي صعيييبة وبنتي ماشفتها تا شفت الويل...هي وخوتها نعطي عليهم عمري هي يكونو لباس..."عينيه غرغرو وهو كيشوف فيه"...انا مابيت والو اولدي مابيت والو هي تبعد ليا من بنتي مانگدش اولدي نبقى هاني عليها واخا تشرح ليا الي بيت نعرفو راك اكدتيه ليا دابا...كي بيتي ندير نتهنى عليها وهي معاك...غذا ولا بعدو تجيني مضرورة من شي قنت...بيتي نموو.ت (مشا ليه صوته وبدا يترعد تا شدات فيه ناديا)...

ناديا : الحاااج تهدن عافاك...

بشار"الصمت"..

ناديا"ضارت عندو" : الي بيتيه نديروه معاك اولدي...حنا دابا دوينا معاك بالخاطر مابيناش نوصلو لعيب حيث كيما كان الحال راك كنتي معانا مزيان وخيرك سابق وليني الي گالو الحاج هو هذا...

بشار : الي بغيت ؟!..

م.حفيظ : ايييه بيتيه ...

بشار"حط رجل فوق رجل ونطق ببرود لا نقاش فيه زعما" : بغيت حبيبة...

يتبع...