عروس الجحيم الجزء 14

دخلو البيست جنابها كلهم اشجار ديال زيتون من عند الباب الكبير الي حتى وصلو لوسط واحد البقعة ارضية مزروعة وفيها دار كبيييرة الوسط محاوطة بحايط قصير مدورين عليه السدر (شوك ديال النبگ) والصبار اي الضرگ ديال كرموس النصارى...دار مصلوووحة وكبيرة وقدامها عامر بالما حيث كيسقيو وكانو كيصبنو قدام دار...

عيشة"لابسة تشامير زرق مدورة عليها طابلية شقى ولابسة بوط ديال ميكة خاشية فيه رجليها" : وااا سمييييرااااو..وتي علمي حادة تبدا ترد فالمقراج يطيب را جاو الناس...صابرييييين دوزي ستفي الفاكية فطبسيل الي حطيت ليك...

وقفات سيارة الي خرجات منها سعيدة مهبطة راسها كتعاون ف عيدة وفنفس الوقت علمات حبيبة تنزل والي نزلات دايرة ايديها على عينيه حاجبة شمس الحااارقة الي ضراتها ومابقاتش كتشوف كاااع مولفة دير نضاضرها نساتهم نسات شحاال من حاجة كانت مولفاها...قربات حدا سعيدة تلبطات كتبان كي بنية صغييييرة بالقصر الي فيها...مزيرة على جنب جلابتها..تا نزلات عيدة مسندة على سعيدة...قربات لعندهم عيشة سلمات على عيدة تسلم وتعاود وسعيدة...

عيشة"شافت فحبيبة" : تي هادي عروستكم جديدة ولاو هههه

عيدة"فرحااانة ترمتها تصفق" : اييييه هييي...حبيبة هي هادي مرات ولد ولدي...

حبيبة"ماحستش تا زيرات على دراع سعيدة الي حسات بيها وضارت عندها"

عيشة : زيدي قربي بنيتي مرحبا بيييك...

قربت عندها حبيبة بغات تسلم عادي اتا جرتها عيشة كتبوس وتسلم عليها حست بيها كتنطح فيها وهي را غير فرحتها بزيارة كتخليهم يسلمو هاكاك فحال فرحانين بمجيات ضياف...بقات ترحب بيهم وحبيبة بقات مخشية حدا سعيدة تا ضارت عيشة شدات فعيدة باش دخلها...

عيدة : المعطاوي دخل اولدي داكشي عند الباب...

عيشة"ضارت تشوف بان ليها هاز كرطونة فيها كراطن الحليب..وكرطونة ديال سكر وشي خناشي عامرين دانون وبيمويات...جايبة داكشي بالكبرانية ماعندهم ايترو حليب...حطات عيسة صبعها فوق شنافتها لفوقية" : ياااااويلي يا الحاجة مالك معذبة راسك...هاويلي حنا بيناتنا شي مجيبات...

عيدة : الويلي تغيسي فيه اعيشة تي شدي وسكتي هادشي گليل (قليل) فحقكم..زكية راها بحال بنتي والي جرا ليها را مسني تانا واش نفوتها يا عيشة ؟...شدي دخلي وسكتي...

ضارت عيشة غمزات بنتها صابرين وليلى شدو من عند الشيفور وتمو داخلين حبيبة كدور وتشوف فالبط كيعوم فواحد شاريج قصير ودجاج يدور تم...وحتى شي بقيرات طالقينهم وجالسين يلاه بداو كيجرو (الاجترار..يعني البقرة كتبقى تجمع العشب وتصرطو حتى كتاخذ الكمية الي بغات وتمرح فلارض عاد تبدا ترجع فالعشب من معدتها تندغو وتمتص منو اش بغات...)..مرة مرة كترمي عينيها وهي لاصقة ف سعيدة وتشوف فداكشي متكذبش انه كيعجبها هاد الجو البدوي ولكن باش تعيش فيه صعيييييب متقدرش عليه...وهادشي كااامل داز تحت عينين زكية الي كانت مكحزة الخامية ديال الشرجم ديال بيتها شوي وكتشوف فيها من بعيييد...حاضياها وحاضية كيفاش لابسة وكيفاش زوينة متنكرش انها زويييينة وكتبان صغيييرة وكيووت...هبطات عينيها لنصها تحتي بان ليها ليهونش الي طاغييين من جلابة...كطلع فيها وتهبط وهي تحط ايدها على عنقها الي تقاس بالعافية ونص فحنكها وايدها الي مطلييين بالبومادا والعشبة الي خذات ليها عيشة...كمشات حجبانها وصغرااات عينيها مابغاتش تبكي ومابغاتش تستسلم لبكا تاني حيث هادشي هي اختارتو راسها...سهات ومتحساتش بيهم بالي دخلوووو حتى فيقها صوت عيشة كتعيط...

عيشة : وااا زكيااا وااا زكية وتي اجي عند الحاجة عيدة...

غمضاات عينيها مابغاتش تمشي مابغاتش تدخل عند عيدة وتشوف شوفات الشفقة..مابغاتش تشوف فوجه عييييدة الي عطاتها واحد الامل انها "الكنة" المختااارة ديال دار الرحماني ل "بشار" الشخص الي بنات عليه حب كبيييير وقوي فقلبها...والي رفضات بسبابو عرسااان بزاااف والي بسباب حبها ليه تقسم قلبها وفكرات تنهي حياتها حيث شافو ليه وحدة غيرها وهي دابا كتفصلها سنتمترات بينها وبينها...قفزات على صوت عيشة من جديد كينادي عليها وهي تغطي وجهها وخرجات من البيت راسها فلارض وقلبها كيتحرق...تا وصلات عند باب الصالون الكبير الخاص بضياف الهماااويييين...والي مفرش فراش بلدي بلا سداد ستيل صحراوي محطوط صينية كبيرة فيها برارد اتاي كبار وطبسيل عامر بالفاكية وبلاطو ديال الحلوة وزيت وفراقات ليدام فيهم زيت زيتون و زيتون كحل مشرمل بزعتر...وزيتون بيض ديال دار محمض...وزبدة بلدية. و جبن...

سعيدة : بنيتي زكية على سلامتك "قلبها تقسم عليها...حتى وقفات" كي بقيتي ابنتي...

زكية"حركات راسها وصافي مابغاتش تهضر باش متبكيش...باستها سعيدة من حنكها المزيان وقرباتها لعيدة تحنات عليها وشدتها عيدة من حنكها الي مافيه والو وزيرات ليها على ايدها صحيحة..كتشوووف فيها وتحقق وخا مكتشوفش مزيان مهم كتشوف على قدها..نطقات بصوت منخفض"

عيدة : كي بقيتي بنيتي ؟ شوية شي ؟

زكية"تنهدات وهي توقف ليها دمعة على طرف وحركات راسها...قربات حدا عيدة وهي تبان ليها حبيبة الي كانت كتشوف فيها بحزن...حبيبة على نيتها كتشوف فيها وبقات فيها ماعالماااش بالخبايا واش واقع..كانها اطرش في ززفة..."

حبيبة"وقفات على نيتها تسلم عليها تا بغات تبوسها فحنكها المزيان وهي تحرك زكية راسها ودارت شبه ابتسامة ومشات جلسات خلات حبيبة بلاكة تا تعصر قلبها"....

الصواب را قامو بيه زيارة المريض دارتها عيدة وسعيدة كما يجب...فرحات بيهم عيسة وفرحات بالمجية حتى جا بات زكية الي ساق الخبار بالي مرات رحماني جات لزيارة وحيث رحماني همة وشان عند رحامنة را كاع تجار تايديرو ليه حساب...كبات ليهم اتاي...

عيشة"شافت فحبيبة غير حادرة راسها ومخشية ف سعيدة..طلات عليها" : بنتي زيدي بسم الله...هههه"شافت فعيدة" تبااارك الله عروستكم من زيناتها ياربي...

عيدة : هههه واشنو حنا نصيبو منجيبوش زين هههه...كي بنتك زكية وكي صابرين تشوفيهم فسعد مسگم نشاعلاه....

عيشة"تنهدات ودارت ايد فوق ايد وبدات تلولب فراسها بهم" : امييين الحاجة امييييين...

زكية"مكتهضرش واحد الجنب فيها را تحفر بصباعها...نفسها تخربقت مابقاتش منتاظمة..بدات كتحس بتزيييرة والخنقة كتشدها خليييي العافية الي سعلات وهي كتشوف فحبيبة من تحت لتحت...ولات كتشوف فيها شوفة العما ماكرهاتش لو تنوض تقجها دير فيها شي مصييييبة..ماكرهاتش تنوض لعيدة وسعيدة وكاااع الي حرقو قلبها تقت.لهم وماتحنش...تا بدات تزييييير على جنبها وايديها ولاو مسقوووطين من د.م...تا بدات تنهج وتنهج وهي تغمض عينيها وصرطاااات ريقها بقات شحاال مغمضة ومخبية وجهها بزيف تا حلات عينيها وهي تنهد تنهيدة طوييييييييلة وهي تهمد بقات غير كتشوف وصافي ...

بين اخذ ورد فالحديث...صونا تيليفون سعيدة كان العصر اذن وفااات ناضت عيدة صلات ورجعات جلسات...وسعيدة مكانش ليها حق تصلي حيث فيها العادة شهرية....

سعيدة : واخا هاحنا جاييين..."ضارت عند عيدة" لالة خوت توريا جاييين وخاصنا نمشيو...

حركات عيدة راسها وناضت معاوناها سعيدة وحبيبة الي كانت حاسة براسها جالسة عالشوك...مانساتش الفرطة الي دارت ليها زكية والي مافهماتش علاش دارتها ليها اش واقع مالها معاها ولا زكية هكاك دايرة ولا غير هي تحسسات...رجحات انه غير تحسسسات حيث الجو جديد عليها وهادشي ضافتو لهاد العيشة الي عايشاها مع هاد النسيم والي بدات تبان ليها جحيييييييم...سلمو على عيشة وزكية الي حركات غير راسها مادواتش وتاهما ماحكروووش...توادعو مع عيشة على امل انها هي تزورهم وتبارك لتوريا وتسلمها بمرض يوسف و ايدها حيث كان خاص هما يجيو لولين يسلموها فزكية عاد هي تمشي هكا دايرين الحسابات وهكا معروف...

ركبو فالسيارة وعاد قدرات حبيبة تنفس شوية من الخنقة الي حسات بيها حطات راسها على شرجم ومشات خرجات سيارة تحت عينين زكية الي عامرين بالالم والحزن والحقد....

دخلو الفيرما لقاو زوج كاميوات واحد ديال سيحمد وثاني الي عرفات من سعيدة انه ديال خو توريا كان رموك كبيير كيهز الرملة...دخلو لدار كيسمعو صوت الغالا غالا وصوت رجالة كيهضرو مجهد بزاف هادشي ممولفاهش حبيبة وهما عندهم را كيهضرو عااادي وضحكهم واصل تالين....

توريا"خرجات كضحك من صالون" : واخا خوييي واخا هذا مسوايا...

ع.االرحيم ؛ وعلى رقبتي لا تسالي الحق هههههه..

توريا : هههه "وقفات كتشوف فعيدة جايا هي و سعيدة وحبيبة الي وصلاتها عند الباب وتمات غاديا وهي توقفها" سيري لبسي بيجامة طويلة وزيف حياتي على راسك ودخلي سلمي على خويا وختي صافية را سولو فيك...

حبيبة : واش ضروري نلبس زيف حياتي ؛

توريا"تمات غاديا وتتهضر" : اوكيييه بغيتي دخلي بشعرك عريان..

خلاتها كتشوف ومشات لكوزينة بقات حبيبة غير كترمش بغات تغوت بغات تققصصصصص...زفرات ومناخرها فرفرو وهي تحدر راسها ومشات طلعات لبيتها سدات الباب بجهد تا تسمع عندهم لتحت...حيدات جلابة لاحتها ولبسات بيجامة دوبييس فوقي ديالها فايت المؤخرة ديال قطن باارد...فالبيض وسروالها غوز...جمعات شعرها ومشات لدوش غسلات وجهها من ليكخون والوسخ ديال الجو. والغباريات غسلات ايديها وحكات سنانها وخرجات دخلات البيت نشفات حالتها خلات تيليفونها كيتشارجا وهي تهبط كتجر فرجليها فصندالة صبع...

توريا"واقفة عند الباب شاداه بايدها كتضحك مع خوتها وهي دور طلعاتها وهبطاتها ماعجبتهاش بيجامة وماعارفاش ان حبيبة ماعندهاش بيجامة بمواصفات الي بغات توريا" : زيدي سلمي..

حبيبة"تزنگات وحشمت تدخل..حدرت راسها وتمات جايا بخطى بطيييئة..دخلات لصالون كانو فيه صافية وعبد الرحيم وبنت صافية الكبيرة اسميتها مريم الي هي اخت كريمة مرات رضوان وكريمة نيت الي شافت مها ولصقت تم..نطقات بصوت منخفض مكيتسمعش گاع" : سلام عليكم..احم...

عبد الرحيم : تي هادي هي مرت ولدك ولاو ههههه...

توريا : ممم "هزات خنافرها" هي هادي...بنت الحاج المراكشي تاجر الكبير فمراكش..راك تعرفو الصافي...

ع.الرحيم : اييييييه نسمع بيه...تبارك الله...

صافية : زيدي بنيتي زيدي حبيني تبارك الله...زينة العرايس هي هادي زيدي...

سلمات عليها وسلمات على بنتها مريم الي هازة وليد صغير فحجرها وهي تقرب ل عبد الرحيم مد ليها ايدو...سلمات عليه بالخف...

كان كيحساب ليه غاتبوس ليه ايدو كي تيديرو ليه كنيناتو ساعاك سلمات خفيييف بالحشمة وتزنيگة وتزييييرة....ومشات وقفات حدا توريا...

توريا : سيري عيطي لاشراق ردو الما يطيب وجيبو المجامع لعبد الرحيم يعمر لينا اتاي...

سيحمد : جيبي ليه طاس والما يغسل ايديه هو لول بعدا...

حدرات راسها ماحاملاش تقدا عليهم...ماشي حيث مابغاتش وانما طريقتهم المستفزة فانهم يسخروها هي مولفتهااااش...خرجات من صالون مغوبشة خلات توريا هازة حاجبها ماعجبتهاش طريقة باش خرجت ولا باش سلمات على عبد الرحيم....

عبد الرحيم : وتي يضهر ليا كنتك ماهكاكش ولا كيفاش...

صافية : ولا تحكرش اخوييي وراها ماشي بنت دوااو ممولفشاي..ماشي عيب..مالها على مزيناتها...

توريا : يگطعها عليا هي والي حطت كرشي...راني لاجمة فمي وكااان...ساكتة لا تجيني شوهة. اخوييي ونتا عارف خويا المحجوب وختي دامية وخويا العالامي فامهم مايتسدو عليا...يوصلوها لدواور نسابهم وهاني وليت ضحكة...

ع.الرحيم"موقف رجل فوق سداري كيفلي ف صبعو ويخبط فوق رجلو ويهضر...حرك طاقيتو حك راسو ورجعها.. عبد الرحيم هو الكبير فخوت توريا والكبير فيهم كلهم فعمرو سبعين عام تابعاه اخت توريا لاخرا عاد توريا وعاد صافية ووحدة صغر من صافية" : واش ديري ليهم الله يهديهم..مزيان لجمي فمك...وهو فين غبر مابقاش دوا كاااع ؟!

توريا : يدويه من جنابو..لاباقي تجبدوش ليا عبد الرحيم تبريت منو ليوم الدين...

عبد الرحيم. : ياااعوذ بالله...نعلي يا شيطان خلي الما منين يدوز الله يرضي عليك...هانتي خلا ليك مرتو فعنگك كي بيديري يا بنت مي وبويا...

توريا"هازة ايدها" : دارت ليا دااارت ليا...

فهاد اللحظة حبيبة بقات واقفة فالكوزينة ماعارفة مادير...شكون تسول سعيدة طالعة الفوق ربيعة مشات لدارهم حيث نهارها فين تمشي لدارهم...ماعارفاش تشعل البوطة ولا تعمر المقراج...هزات راسها وهي تخرج من كوزينة وطلعات نيشان لفوق بقات تقلب فالبيوت تا عرفات البيت فين كاينة اشراق حيث تلاقات ب منار وراتو ليها دقات ماجاوبتهاش عاود دقات ووالو وهي تحل الباب لقاتو مسدوود كدق تدق حتى تحل الباب بجهد قفزات وهي ترجع بلور كي شافت اشراق مخنزرة...

اشراق. : مكتعرفيش دقي ؟!

حبيبة : نعام ؟؟؟...

اشراق"تداركت راسها اش كتقول وطريقة باش هضرات معاها تنفخات عليها...خافت دير شي حاجة وتوصلها لماماها وهي ف غنى انه يرجعو شكوك عليها...حنحنات وهي تبدا تصحك" : ههههه اكنضحك معاك...واخا هاني جايا...سيري عند خالتي سعيدة راها فالبيت مع يوسف هي توريك بينما بدلت ونهبط...

حركات حبيبة راسها باقيا مغوبشة فيها وضارت مشات اشراق هزات كتافها وهي تدخل وسدات البيت عليها مشات نيشان لتيليفون رجعات الكاميرا وبدات تسجال من جديد....

حبيبة مشات نيشان لبيت توريا الي فيه يوسف يلاه بغات تحل الباب وهي تسمع صوت توريا عند راس. الدروج لتحت...

توريا. : حبييييبة !!!...

حبيبة"بينها وبين نفسها" : ياااااربي صبر يااااربي غانزيد شوية والله تا نهرب اهى اهى..."قربات عند راس الدروج" نعااااام هاني ...

مليكة"سمعاتها وهزت حاجبها حيث كانت حدا توريا كيقلبو عليهم كلشي غبر وخلاو كوزينة خاوية" : هادي شتها تجهد فصوتها...

توريا : شتك طلعتي وخليتي الكوزينة خاوية ؟ فين هو المقراج الي گلت ليك عمري ؟؟؟...

حبيبة : ماعرفتش نشعل البوطة وطلعت نعيط لاشراق...

توريا : هبطي لهنا نوريك واشراق دروك تلحگ عليك...

زفرات ونفخات بغات تبكي وهادشي سمعااااتوو توريا على وذنيها...هبطات حبيبة وتبعات توريا تالكوزينة وهي تلقى كريمة معمرة المقراج ورداتو يطيب....

مليكة : الله يرضي عليك ابنت ختي...العيالات الحارات هما هادو الي دراعو حافي را حااافي..

كريمة ؛ هههه وايلي ختي مليكة عادي تانتي....

توريا"قربات صينية بايدها لحبيبة" : هزي هادي دخليها لصالون...

بانت ليها صينية كبيييرة عامرة كيسان ديال بلار و برارد كبااار صينية خاص واحد صحيح يهزها...عندها رجلين من تحت باس يحطوها ويعمرها خو توريا...هزتها حسات بروحها بغات تخرج تمات غاديا بيها وكيتسمعو الكيسان كيتقلقلو بيها وتوريا وراها كتشوف فيها ماكاداش تهزها ومليكة تنغز وتوريا تلولب فراسها...

توريا. : كنة الويل...دراع حااافي الله يا لالة والي يتبع ريك...

مليكة : عنداك طيحها...

حبيبة وصلات لواحد الحد ماقدراااتش على تقل ديك صينية دخلات لصالون بالكشايف تعصباااات بثقل وحبستها البكية...جات بغات تحطها وهي تعكل فزربية تهزات صينية على جهدها وطاحت كلها تا غوتات مليكة وكريمة وجات اشراق تتجري هابطة من فوق وتوريا خرجات عينيها كاع كيسان البلار ديال توريا تهرسوووووو....

توريا"شدتها صعرة ديال دنيا ودين تا خرجت عينيها وشهقات كيسانها مشاو وكانت مغددة عليها..." : يااااااويلي ياااااويلي حي الكيسااااان مشااااو...ياويلي...

حبيبة"جاتها البكية" : م ماشتهمش اهى والله مادرتها بلعاني...

توريا : بسييييييف بسيييييييف ونتي غاتنفخي عليا بسييييف ونتي حافية گادية...دعيتكم للله الله يگطعكم عليا...طلعي غبري غا وجهك عليا...لصقتي ليا فعنگي كي الويل الكحل...ماني گادة نصيفطك من شوهتي ماني گادة نخليك فرقبتي...غبري عليا يخ...

صافية : ياربي سلامة يا توريا داو الباس...

توريا : الباس جابو ليا ما خراات كرشي مشا وخلا ليا باسو...

توريا لسانها ولا يلقط السم الي عمرو سمعاتو حبيبة فحياااااتها..ماشعراتش براسها حتى ضارت كتجرييييي ودموعها على خدها قلبها كيبكي د.م...مشات لفوق وكتمسح فدموعها وهي تساطح مع سعيدة جايا هازة صينية فايدها عاطية دوا ل يوسف...

سعيدة : مالك ؟

حبيبة : مم ماليش اهى.."كتمسح فدموعها" مادرتهاش بلعاني مادرتهاش اهى والله ماقصدت نهرسهم...

سعيدة : سمعت شي كيسان تهرسو..ياكما كيسان توريا ؟!"حركات حبيبة راسها تنهدات سعيدة" سيري بنتي بقاي مع يوسف هاني جايا سيري ندي هاد صينية ونجي نهضرو انا وياك...ماتمشيش لبيتك باش ميبداوش يحلو عليك فامهم تاني اللهم بقاي مع يوسف حسن...

مشات حبيبة لبييت فين كاين يوسف وسعيدة هبطات تقاد الوضع...جلسات حبسبة حدا يوسف الي كان مغمض عينيه باقي عيااان بزاااف كتطلع سخانة وتهبط شحال....بقات كتبكي وتنخصص ماقدراتش ابدا على هاد العيشة ماقدراتش تصبر لحياة هاد العقارب الي دخلات وسطهم..

حطات ايدها على جبهة يوسف الي كان مغيب نااااعي عياااان...

حبيبة : نتا هو الحليب وسطهم اهى اهى...نتا هو الحنين ونتا هو الي ماتستاهلش تعيش هنا معاهم...ماكرهتش نهرب من هنا...بغيت نمشي فحالي اهى اهى...ندمت علاش تزوجت وجيت هنا...بنمشي فحالي بيت نمشي فحالي اهى اهى...

مزال كتبكي حتى تشعل تيليفون يوسف كان محطوط عند ايديه فوق ناموسية الي تصادف حدا ايدها هبطات عينيها المورمين بالدموع محيطهم ولا حمرررر بالبكا...بقات كتشوف فالتيليفون كيصوني بنمرة مخبية تاني...هةد نمرة كانها كتعاود تفكرها شكووون هي وفين جات وبالي تزفات للمجهول...المجهول الي هو دابا كيتاصل نيييييييت....وهي تشهق...تعاودت ليها نفس النمرة المخبية نفس الاحساس حسات بيه وعرفاتو هو...من حرقتها وبكاااها ومن فقصتها قشعاتو بالي هو ثاني الي كيعيط...هزات تيليفون وخا ماشي ديالها جاوبات بلا متعير اهتمام لاي احد كانها باغيا تبرد فقصتها وحرها فالي وصلها لهاد الحالة...مع حلات الخط وسكعات صوته الي فزع ليها قلبها وعصرااااااتو وبركات على نفسها....

بشار"بنفس النبرة الي عمرها تنساها البحة الممزوجة بصوت مدعدع بالكارو والتخييين" : يوسف !!!

حبيبة"عاضة على سنانها بفقصة وغيضض...بغات تسخف بالغدايد والحرقة الي فقلبها واخا را غير سيرتو كتجيب ليها الرعب والهلع وذكرى اكفس ليلة عاااشت فحياتها...ضغطااات عليهم تا حسات بضبابة بين عينيها" : حبيييييييييبة الي تكرفصتي عليها حبيييييييييبة الي كرهاااااااتك وكرهات تسمع سميتك...كرفصتيني ولحتيني كيتكرفصو عليا الله ياخذ فيك الحق المريييييييييييض...المرييييييييض.....الله يعطيكم مصيبة نتا وداركم الله ياخذ فيكم الحق حسبي الله ونعم الوكيل فيييييك...وفيييييهم...."قطعات عليه ولاحت تيليفون لهيه كتنهج تا طاحت على عينيها ضبابة.."....

كلاام خارج من الاعماق ديال قلب بدا كيهز وبعييييد على الصبر..بعيد على انها تبدا تصبر على ما كيخرجوه ليها من سم فكلامهم الي بالنسبة ليهم عااادي جدا يقولوه وهذاك هو الكلام الي خاص يتقال ليها...كيفها كيف الكنينات خاص الكبار يهضرو والصغار يحدرو راسهم حيث الكبار قايتينهم بالتجربة وهذا مبدأ ماشييين عليه بزااااف...لكن فهاد العائلة فكلامهم مكيعرفوش بزاااف الكبمة طيبة ديما والخاطر...خاص المرأة عندهم تحك بالهضرة طالعة ونازلة باش تسگد اي تقاااد وتكون حااارة وحادگة..."حبيبة" كانت هي الاختيار الغلط ليهم...شافو فيها الجمال والنسب ونساااو انها كابرة مفششة بزاف الكاس فاش شربات هو لاخر ماتغسلو...

حسات بالضباية كاتغشي ليها على عينيها...اطرافها كتسح بيهم بردوووو عليها ورعدة شداتها. كتشوف جيهة يوسف كيبااان ليها كيحل عينيه ويرمش فيهم وكتحل عينيها على جهدهم باش توضح لراسها الرؤية ووالو تا مابقاتش شعرات بتاحاجة وهي طيح متكية حدا يوسف....

هبطات سعيدة لتحت هازة داكشي الي شربات بيه دوا ليوسف حطاتو فوق بوطاجي لقات كريمة واشراق كيجمعو فطروفة زاج ويلوحوهم فالزبل وكريمة تولول واشراق كتبغم حيث تا هي خذات حقها من معيور توريا...

سعيدة : اش وقع لهادشي ؟!..

كريمة : كانت هازاه حبيبة وتعكلات وشيرات بيه لهيييه اويلي على شوي يجي فوجه خالي عبد الرحيم...غا حفظو الله...

سعيدة : لوجه خالك كااااع يا كريمة !!!..."هزات فيها كريمة عينيها كترمش" وهانتي گلتيها بفمك حفظو الله..را الله الي كيقسم والله الي كيحفظ...

كريمة : انا ما كلت وااالو...

سعيدة"زفرات" : سيري اشراق لصالون لاخور طلعي لفيترينا فوق جبدي ديك زينة الي كنحط انا ستفيها هنا...ونتي كريمة عطيني ديك قرعة الما من كراطن الي شراو نطلعها ليوسف عطشان...ونشوف هاديك بنت الناس الي لفوق الي مسحو فيها ليدين ورجلين...حمدي الله نتي الي كتهضري كون وقعات ليك تانتي را ماشي غا هي الي دارتها بلعاني...الله يرضي عليك اكريمة وزين طرح شوية...

كريمة"وسعات عينيها" : ياك انا مالي !!

سعيدة"بادلتها نفس النظرة" : مامالك والو..سيري ديري اش گلت ليك الله يرضي عليك...

ماعاوداتش معاها لهضرة خرجات كريمة كتفرفر مارضاتش دافع عليها...اما فالصالون كان واقف عبد الرحيم وعبد القادر الي بدل ووصل عليهم وسمع اش طرا...والعيالات جالسين توريا تلالي وتبكي وصافية تنش عليها هي و مريم وعيدة كتنهي فيها...

ع.الرحيم : وتي نعلي شيطان راك قويتي يا توريا...صافي ما وقع باس المرة جايا تعود ترد البال من امتا دار المشاوري يهموهم شي شقوفة ياك كل سوق نجيب ليك زينة نتي وخواتاتك...اش خاصك...

توريا : ما خاصنييييش بو زينة اخوييي خاصني الي يهز ليا بوجهي راني مالگيت الخير فتريكتي الي حطيت واحد راه الفوگ كل نهار مريض الصغيرة راها كلمة جوج تبغي تخرج فيك العينين...الكبير الي تحط عليه راس خارج ليا مسالي ماعولت عليه فصغر نعول عليه فكبر...رزاني فما عز عندي و."سمعات صوت عيدة الي خلاها تسكت"

عيدة : تووورياااااا....ولاكون سكتي شي...لا تقويش وسدي البزيم حد هنا...

توريا"كتبكي وتلالي براسها"

ع.القادر : ونتي عاطياها صينية گداش وهي گداش ماعلمتيها ما وكضتيها...لخطتي وعطيتيها ليها..عطي بالخف وشوي شوي وهاهي تعلمت ليك...نعلي شيطان وسكتي دابا يجي شي حد من ناس..ونوضي شوفي اش خاصك لعشا الحاج المشاوري جا عندنا ومنقوموش بيه...نوضي الكيسان يخلفهم الله الالة عليا غذا فالسوق نجيب ليك ما فضل منهم...

توريا"عصرات عينيها تا نزلو دموعها" : زيييينة منهم يا سيدي زينة منهم جابها ليا الحنييييين الغالي...رزاتني فيهم كي رزاوني فييييه...الله ياخذ الحق...

ع.القادر : تت...لا حول ولا قوة الا بالله...

ع.الرحيم"جهد صوته وهي تصهط" : ولاكون نوضي نعلي شيطان ولا نرجع منين جيت لا تقويش اتوريا وايلي...

بقاو كيهدنو فيها وكلهم تقريبا معاها..دخلات سعيدة تأكدات انه كريمة جابت كيسان وقفات عليهم تا قاداتهم اشراق وهي تم جايا توريا كتمسح فعينيها وتنهج بالبكا والغدايد...بانت ليها اشراق كتمختر تا الما مادارتو يطيب ومع جايا مغددة على ولادها ماعقلاتش على راسها تا طارت عليها بايدها صحيحة حتاتها عليها بجرة بشعر تا غوتات اشراق لربي الي خلقها ودخلات سعيدة من الباب الي كيخرج برا فالكوزينة كتجري شافتهم ومشات تفك فيها...

اشراق : اااعععععع اهى اهى اش درت امي اااش درت...

توريا"فمها ولا زرق" : ياك گلت ليك الكلبة ردي الما يطيب...ساعتين يا ليهووو.دية ساااعتين وباقيا تمختري ليا فالكوزينة يا شيخة اااا ؟!"كتجرررر فيها وضربها لحنكها بايدها الي فيها جبيرة تا كيبان لاشراق ضو ضربها وتغوت"

سعيدة : وااا توريا خويتي نعلي شيطان ما وقع باس را انا الي صيفطتهم يتقداو ومرديتوش...

توريا"ضارت جيهة سعيدة وخنزرات فيها" : دخلي سوق رااااسك اسعيدة دخلي سوق راسك يلاه...

سعيدة : دابا ندخل غا نعلي شيطان انا راميا عليك العار...

بزز باش فكتها منها ومشات اشراق كتحك فشعرها وتبكي وحنكها ولات فيه واحد بلاصة مورمة حمررررة...مشات سعيدة ردات المقراج دغيا يطيب وهزات القرعة الي كانت غاديا بيها....

سعيدة : خرجي برا يضربك البرد ورجعي كملي وماتحاديهاش ما گادين على صدراع وشوهة مع عباد الله...خلاتها تبكي ومشات طلعات بزربة لفوق مع حلت الباب لقات يوسف كيعيط حبيبة وحبيبة طايحة حداه مغيبة....

مشات تزرب مخرجة عينيها لعند حبيبة الي كانت طايحة حدا يوسف وعوجة ويوسف مسكين كيعيط ليها بصوت عيااااان كان هاز تيليفون فوذنيه وكيعيط ليها....

سعيدة : اويلي بسم الله عليك ابنيتي...مالها ؟!

يوسف : عرفتش مريضة حبيبة ختي مرييضة...

سعيدة"هزات ليها رويسها وبدات تطرش فيها بشوي" : حبيبة بنتي توگضي معايا..مالك ابنيتي كي طرا ليك...حبيييبة بسم الله عليك...

ضارت حداها خوات شوية الما من قرعة فايدها ورشات عليها شوية حتى شهقت بصوت منخفض وبدات ترمش ترماش ثقييييل تاتحسي بيها عيانة ديال بصح...

يوسف"حيد تيليفون من وذنيه وحطو حداه" : فاقت فاقت !!

سعيدة : واه فاقت..حبيبة شوية ؟!

حبيبة"كتشوف فيها شحااااال حتى حطات ايدها على جبهتها حاسة براسها كيدور" : ب بغيت نمشي لبيت فففف...

سعيدة : بلاتي توگضي مزيان وسيري...تسناي هاني جايا...

ناضت سعيدة لبيتها بزربة جابت بواطة فايدها ودخلات حلاتها وهي تجبد منها لاباراي ديال قياس ضغط...هزات ليها كمايم ايدها تالفوق سنداتها مزيااان عالكادر وعطاتها تشرب...وبدات تعبر ليها تا عطاتها القياس ان الضغط هابط ليها....

"الرميلة مراكش"...

خارجة من البيت كتسد فبينوارها...لقات الحاج جالس وحداه معتز ووردة كايوريوه فشي حاجات فايباد...شافت فيه وهي غاديا لكوزينة بان ليها غيييير ساهي ماشي هو هذاك كيشوف معاهم ولكن ماشي معاهم وليه يومين وهو على هاد الحالة...جابت غراف كبييير عمراتو بالما وكيسان كبار حطاتهم فالبلاطو وخرجات كاينة غييير هي وياه ودراري وايوب الي الفوق فبيتو كيكونفيرمي شي مواعيد...حطات البلاطو...وجلسات مقابلة ليه...

ناديا : حفييظ...

م.حفيظ"الصمت"

ناديا : واالحاج...

والو ماجاوبهاش...كيشوف معاهم فالايباد ولكن العقل غااايب...طاحو ليه الكتاف وضعاف فصحتو...وجهو ولا لونه غااامق..حسات بيه انه توحش بنتو حسات بيه انه بييييه شي حاجة متعلقة ب "حبيبة" كاتحس بيه فاش كيبقى فالليل يدعق ويهضر فنعاسو...هز معتز عينيه وهو ينغزو تا قفز من سهوته...

معتز : بابا تكلم لماما...

م.حفيظ"ضار عندها" : انعام...

ناديا : فييييين سارح اوا الحاج فيييين...

م.حفيظ : تا فين هييي مع الوليدات وصاف...بيتي شي حاجة..

ناديا : معتز وردة سيرو لبيتكم حتى يوجد العشا ونعيط ليكم...وجدو حويجاتكم الي بتلبسو غذا را غذا بايجي طرونسبور ليكم...

حركو راسهم وطفاو طابليط وناضو لبيتهم يجريو اما هي خوات الما فكاس وناضت هازاه وجلسات حداه ومداتو ليه...

ناديا"شد من عندها الكاس..ودارت ايدها ورا ضهرو كاتدوز عليه بحنان" : اش بيك يا الحاج بزاااف على سهو وبزاااف على بوغطاط بالليل...مالك ؟

م.حفيظ"تكا على داك الكاس تقولي شحفاااان وحطو بقى شااد فالكاس ورجع تاني سهاااا..شوي وعاود نطق" : خلات عليا ركنة خاوية اناديا...خلات عليا دار خاوية مهجورة...لا جيت نگوليك اش بيا تعطيني لحق ولا تجي ضدي...

ناديا"تنهدات تاهي كثر منو..عينيها غرغرو وهبطات عينيها لصباعها الي بدات تفرك فيهم وتاهي بدات تلوح همها" : على هي خوات علينا ؟...بلاصتها گداش الحاج..."رجعت تنهدت تاني" دابا ترجع وقيتة القرايا هنا نستغلو گعادها معانا هنا تاتمشي عند راجلها...

م.حفيظ ؛ وهاد راجلها ما بان ليك شي قوا المشيان..."حدر راسو" بان ليا زربت بزاااف وعطيتها ليهم وهادشي الي مخليني بلا نعاس...ماكانش عليا نسمع ليها وندير ليها خاطرها اناديا..ونعطيها ليهم...

ناديا : اش خلاك تگول هاد الهضرة !!..

م.حفيظ"هز ايدو وحطها وحرك كتفو اش غايقول ؟" : شلا..شلا يا ناديا..باقيا صغيرة..واخا كبرو بيها ومشات بالكبرانية كيف كنگولو داكشي مريحنيش وماهنانيش...ضغطو عليا بالهضرة وهي بالهضرة...بانت ليا فرحانة مابغيت نغص عليها فرحتها..دخلني شوية الخوف من جيهتهم...ااانا الحاج مولاي الحفيظ لجمو ليا فمي وخلاوني تابعهم ونگول واخا...عطيتها ليهم هكاااك وانا ضاحك...راجلها شفتو جوج مرات ثلاثة...واخا را تبارك الله گاد يعيشها مزيااان ويتهلا فيها وليني شي حاجة فيه ما هناتنيش...

ناديا"حدرت راسها" : غلطنا الي عطيناها دغيا وصيفطناها بكري...تاهما را عطاونا الكلمة ترجع لهنا وتبقى معانا تايگاد ليها شغلها...

م.حفيظ"تنهد وهز راسو شوي وعينيه فلارض" : واش بايرجع ؟!

ناديا : گالو مشى يصايب شي مشكيل وبيرجع...

م.حفيظ : اذن بيخصني نهضر معاه مزياااان...بيني وبينو...وبيخصني نشوف الى بايخليها معانا تاتقرا هنا وتشد اجازتها ويديها معاه تم...بنتي مامولفاش ليا جو البلاد وماشي ديال تعيش مع دار فيها مية راس...

ناديا : وراه هادشي الي گالو لينا بايديرو...

م.حفيظ : وماتمشي تاندير ليها عرس نجمع الحباب...ماشي تمشي ليا بسكات..راني ماشفتها تا گلت ايخ موحال نشوف تريكة...راني والدها ماشي لاگيها فالزبل...

كتسمع ليه ناديا وكتحس من هضرتو انه ندم بزااااف لاش ساير حبيبة ودار الخاطر تا مشات بديك الطريقة...حسات بيه باغي يعوضها وباغي يعوض تا شنو دار حيث بصح مرض بزاااف كل ليلة كيبقى يحلم وينوض ينهج وعرقااااان...توحشها بزااااف وهاز ليها الهم وحاس بالي بيها شي حاجة وهو ممرتاحش وكذلك ناديا الي كثر منو غير مضطرة تصبر وتسكت باش ميمرضش هو مستعدة تهز الدق غير ميبانش عليها تاهي همها ومرضها...شي مكالي على شي وشي هاز دقة وشي ممسوق لحد والاهم عندو هي حفاظ ماء الوجه....

بقات شحاال مسندة حاطة راسها فوق مخيدة صاوبتها ليها سعيدة الي كانت كتتطيها تشرب كاس الما فيه سكر باش توگض...

سعيدة"قلبات ليها ايدها لقاتها باقي باردة". : شوية ؟!

حبيبة"حركات راسها"...

يوسف"كيشووف فيها عينيه حمرييين ومعسلين بالعيا وسخانة" : شوية وييية ؟!

حبيبة"تبسمات وهي مغمضة عينيها وحركات ليه راسها"

سعيدة : هههه وهانتي اش بغيتي تا يوسف خلعتيه ههه...

حبيبة"مسحات عينيها وهي تنوض بشوي شادة الكاس كيترعد فايدها..نطقات بصوت منخفض" : بن بينمشي لبيت...

سعيدة : گادة تنوضي ؟ نعاونك ؟

حبيبة : ل لا نمشي راسي..

تنهدت وناضت كتعكز شدات فيها سعيدة وناضت معاها ماخلاتهاش وخا قالت ليها ماشي مشكيل...خرجاتها لبرا وداتها تال بيتها جلساتها فوق ناموسية...

سعيدة"كتسمع صوت اذان العشاء" : الله اكبر...انا شوي ونجيب ليك عصيري وشي حاجة تاكليها...

حبيبة : خ خاصني نهبط لتحت..

سعيدة : غا بركي هنا لا تهبطي والي...خليهم تايمشيو وتهدن توريا ونزلي..لا تعودي تسمعي تاني شي هضرة ماتعجبش..والى گالو شي حاجة خليهم يتفرگعو تم...اويلي شوفي وجهك كيداير فين نازلة...

حبيبة"الصمت"

خرجات سعيدة من البيت ونزلات ديريكت لتحت لقاتهم كيخرجو صواني ديال اتاي ورجال خرجووو لجامع تايرجعو لعشاء حيث حلف عليهم عبد القادر يجلسو يتعشاو ووصى على كفتة باش يشويوها هي ولحم....

مليكة : فين هي هاديك العوجة...

سعيدة : شكون ؟!

مليكة : مرت ولد توريا فين هي ؟!

سعيدة"تبسمات ابتسامة صفرة" : حبيبة...الفوق..شكون حس بيها راها سخفات بزز باش فاقت ليا...

عيدة. : اويلي حي..تي كيفاش سخفت...

توريا"مطمطات فمها وضارت لهيه دايرة ايدها على حنكها" : ايوى الي خاصو يسخف را كمدها فگلبو كي ديما...

عيدة : نوضي ديني عندها هاويلي على سخفت ؟ هاويلي على كيسان نعل جد بوهم..مال كيسان ميتخلفوش ؟!

سعيدة"عجبها الحال واخا هكاك عيدة حنينة وبنت الكبرانية" : زيدي لالة زيدي...

مليكة : تي لا ضصريهاش امي دابا تعود دير مابغات ماتبينوش ليها وحكوها مزيان...

عيدة ماجاوبتهاش...داتها سعيدة اما كريمة واشراق فالكوزينة كيقادو فالكفتة فالبانيو هي واللحم الي كتگرض فيه كريمة باش تجي توريا تعطيها شرمولة وتشلض ليها البصلة واش يخص حيث متقدرش هي دير هادشي مع ايدها المجبرة...طلعاتها الفوق حلات عليها الباب لقاتها متكية وكتبكي...

عيدة : ياعوذ بالله...يا تي كي طرا ليك يا بنيتي...

حبيبة"مسحات دموعها بالخف وضارت عندها" : ما درتهاش بلعاني اخء..علاش كتغوت عليا اش درت ليها انا گاع...اش درت..اخالتي انا ممولفاش هادشي وبشوية عليا ماشي كلشي دقة وحدة...ياك بغاتني نبقى هنا ونصبر ؟! تخليني باش نصبر اخالتي...

عيدة : وراه هي هكاك دايرة هضرتها قجرة ومتوزن شاااي...توريا هذاك هو طبعها تا مع ولادها تبغي كلشي يكون مگاد وتبغي الدراع الماضي..تا مع خوتها ومع كلشي...

حبيبة"حادرة راسها وتبكي وتفرك فايديها" : بغيت نمشي لدارنا اهى اهى...

عيدة : ياك اكبيدتي ياااك..هذا مسوايا عندك دغيا طلعت ليك فالراس...

حبيبة"دون رد"

سعيدة"تحل الباب وهي تدخل بنتها ريهان فايدها ساشية فيها خنيشات عصيري و شي بيمويات..شداتهم من عندها وحركات ليها راسها تخرج مشات فالبلاصة..قربات عند حبيبة ومدات ليها ساشية" : هاكي بنتي شربي هذا تحيد منك سخفة...هاو شوي يوجد العشا ونجيبو ليك..

عيدة : لا تبرك عمانا..حالها حال الكنينات..مالها كلبة نسدو عليها..

حبيبة"حطات ايدها على ايد عيدة" : عافاك غير خليني هنا هاد ساعة والله ماگادا نهبط عافاك اخالتي...

عيدة : لا بنيتي هبطي حداايا وبالعز والي ساوم جيهتك ماهو فخير..."عاقدة حجبانها" هاويلي على تبركي وحدك هنا...هانتي شربي هادشي وغسلي وجهك وهبطي...الله يرضي عليك..ديري غا بوجهي الي طلعت عندك وانا عيانة دروج قت.لوني فركابيا وصحتي وجيت تالعندك...

سعيدة : هههه هانتي اش بغيتي...

حبيبة سكتات ماقدراتش تهصر حيث اصلا عياانة مابقاش فيها الي يتجاحد وحشمات منها....وفنفس الوقت مابغاتش تهبط حيث كتحس بحشيان هضرة وماشي حشيان انما هضرة معيووور نيشان...حركات ليها راسها وهي تقرب عيدة طبطبات عليها...

.فهاد اللحظة دخل هاشم ومعاه تا حسام...وحتى زكرياء الي كان دالح يلاه طلقاتو الوقت والجواد قاليك...

هاشم"داخل يحك فلحيتو تا بداو جناوح منخرو يفرفرو كيشمشم" : اهيا ريحة الفاخر يا...

حسام : شي زندة مليحة هادي..

زكرياء : كاينين شي ناس فحال وجاهكم دايرين ليهم شي بركة..

هاشم"طلعو وهبطو" : ونتا فين عرفتي هادشي ؟!

زكرياء"دار ايديه وراه وشير ليه براسو ناحية برا وهضر خاااتر" : وتا ش نگوليك يضهر ليا ثقلك الزمان والهم تا مابقيتي ترسي بعينيك وتعميتي..ماعليش عاذرك ابا هاشم...

هاشم"كمش عينيه وحجبانو مدهشر" : هاا !!

حسام"حرك راسو يمين شمال ولف عليه حيث قهرو تا هز راية البيضة"

زكرياء : را رموك سي عبد الرحيم نسيبكم خو مي توريا على برا..وايلي العميم رموك گداش ماقشعتيه...هاو لا حط شي حد شي بريكة گدام دار مايعرفوك منين تسلطتي عليهم اساعادة القايد...

هاشم"ضار عند حسام" : تا هذا قصدني انا ولاو ؟ تا واش حشى ليا الهضرة ولا وذنيا هرب ليهم النو ماتلاو يسمعو ماتلاو يلگطو...

حسام"حك نيفو" : عاير ليك مك ا هاشم...

زكرياء"خرج عينيه من شاف هاشم عاقدهم وجاي ليه...وهو يمد رجلو لووور مسبقها ماحتال يوصلو تا عطى رجليه للريح"...

ولا داو العشاء عااادي جدا..تهدنو النفوس وبداو يوجدو فالشوا جاو رجال جابو ليهم اتاي عمروه عندهم..ضحكهم وهضرتهم كتسمع تال لفوق عند حبيبة الي بززات عليها سعيدة تشرب عصيري باش تحيد منها سخفة..حتى تعشاو الضياف ومشاو فحالهم على امل يجي خوه توريا لاخور وختها لاخرى الكبيرة....

رجعات سعيدة والبنات غسلو الماعن ماخلاتش حبيبة تمد ايدها بقات غير حدا عيدة تا قالت ليها تطلع لبيتها ترتاح حيث شافت وجهها باقي صفر...

هاشم : كي بقيتي بنتي شوية (عاودات ليه سعيدة)..

حبيبة"حركات راسها" : مم شوية شوية شكرا.."عينيها فلارض"

هاشم : ياك ناوية تمشي غذا ؟!

حبيبة"هزات راسها وهي تحركو" : اه بغيت نمشي..ولكن گالت ليا خالتي مليكة خلي تالغذا !! حيث غايجيو ناس يشوفو خالتي توريا...

هاشم"كمش حجبانو" : وخالتك مليكة اش ليها ؟..صباح وجدي راسك نديك ونرجعك انا..انا الي غادي بيك ماشي مليكة...

حركات راسها وتبسمات ليه عالاقل عطاها امل وامااان تاااام...مابقاتش تفكرات تاحاجة ونسات حتى داك الي هضرات معاه فالتيليفون وعطاتو الهضرة...دخلات لدوش غسلات وجهها وحالتها وهي تخرج بغات تعيط لسعيدة من حسن الحظ لقاتها جايا عندها...

سعيدة : لگيتيني جايا عندك...

حبيبة : عافاك واخا ندوش دابا ؟!."كتحك جبهتها وايدها كترعد" غذا غانمشي لافاك وخاصني ندوش كنحس براسي عرگانة بزااف...

سعيدة : واخا الليل هذا كان عليك دوشي گبيلة..واخا ماعليش بلاتي نصيفط منار تجيب شوية الملحة رشيها فجناب دوش ودوشي...

رجعات حبيبة لبيت هزات شنو غاتلبس وبرودوياتها...ورجعات لقات منار جايبة ليها مبيحة ف طبسيل مافهماتش علاش ولكن دارت شنو قالت ليها سعيدة...دخلات لدوش رشات ديك الملحة وطلقات الما سخون يعمر فسطل كيف تعلمت عندهم حيث واخا دوش مجهز ولكن رشاشة ماخداماش تسدات بالكالكير مولفين غير يعمرو سطولو وصافي...حيدات حوايجها ودخلات كدوش وتفرك فلحمها مزيااان وتعاود تفرك وتفرك حتى لقات راسها كتبكيييييي وتنخصص...كتبكي على حالتها وجحيمها الي بدات تعيش وتبكي على شخص خلا ليلة من الليالي تعيشها جحيم...كتفكر صوته كيرجع جسمها ينتافض ورعدة تشدها..ماكرهاتش تحط مزاال ليه..مغددة عليه وكارهاه وخايفة منو...لحد ساعة كيبان ليها فشخص ضلام...وجه عمرها تنساه وصوت عمرها تنساه...شحاال وهي هاكاك حتى حست براسها بغات تسخف وهي تكمل العومان لبسات بينوارها وفوطة كتعقد فوق راسها بييضين وخشات رجليها فبانطوفة ديال فوطة خاصة بدوش...حلات الباب طلات بعينيها منفوخين بالبكا ودوش...مابان ليها حد وهي تمشي تجري لبيت حلاتو وهي تبان ليها سعيدة جالسة ودايرة ايدها على حنكها وتخمم...

حبيبة"نطقات بصوت مغنغن" : خالتي !!

سعيدة"هزات فيها عينيها وهما يبانو ليها عينيها منفوخين" : مال عينيك تنفخو ؟ كنتي تبكي تاني ابنتي ياك ؟

حبيبة"حدرت راسها وكمشات حجبانها وجلسات حداها"

سعيدة : اشمن كريدي قصدتي احبيبة ؟!

حبيبة"بدات تحك فشنايفها مابغاتش تهضر ومابغاتش تبكي...حيث البكا الي بكاتو فالدوش وبرا والغوات الي غوتات على "بشار" حسات براسها تنفسات شوية حسات براسها رتاحت...داكشي علاش بكات وخلات راسها تبكي باش تنفس وماتبقاش تبان عليها حزينة وترجع تلبس قناع القوة والصبر الي هي مغاتقدرش عليه..." : غير بابا كانو عندو شي مشاكيل وصافي..

سعيدة"جمعت حجبانها" : اشنو الي خلاك تقبلي بهاد زواج الملاوط ؟..

حبيبة : اقتانعت..كان كيحساب ليا غايوقع كيف گالو ليا..ماوقع والو من هادشي..ضحكو عليا وتفلاو عليا...

سعيدة بقات شحاال ساكتة فلاخر ناضت وعطاتها حوايجها الي كانت حاطاهم فوق الكوافوز...خرجات خلاتها تلبس بخاطرها...ذهنات لحمها ورجليها ولبسات بيجامتها شورط وديباردو ديال قطن فالغوز والبيض جمعات شعرها فزيف باش ينشف وميضربهاش البرد...يلاه دات بينوار تنشرو وهي تدخل سعيدة تاني...

سعيدة : لبستي...

حبيبة"عينيها منفوخين ذابلين..ومنخرها حمررر..حركات راسها ب معنى اه"

سعيدة"جرات الكرسي قدامها وجلسات" : خليتك تلبسي على خاطرك..وخليتك تهدني من گبيلة فاش سخفتي...وسولتك على كريدي گلتي مكاين والو..سولتك علاش قبلتي بهاد زواج گلتي نيت باش طمعوك...ودابا غانسولك وتجاوبيني نيشان الله يرضي عليك..انا حاسباك فحال بنتي وماعمرك تشوفي مني الوجه الخايب..انا كنخاف الله فناس قبل ولادي ونتي حاسباك فحال حسام والبنات...

حبيبة"كترمش فيها وخا حاسة براسها كيضرها وقلبها كيضرب يجهد.."

سعيدة : فايت هضرتي مع بشار ؟!..."ناضت لعندها وشدات ليها ايدها زيرااات عليها حيث شافتها تصعقات وعينيها وساعو" ششش سيري معايا فالهضرة را لا هضرتي ابنتي غاتنفسي..ماشي كل مرة تسمعي سميتو تولي تلوني وتسخفي...ششش تهدني ابنتي انا معاك مكاين حد من غيري...

حبيبة"صرطات ريقها الي نشف اما قلبها بغا يسكت"

كان واقف قدام الماريو جبد منو تيشرت بيض وحط القاميجة فبلاصتها عقلها يلاه لبس عليه تيشرت وهي تدخل سعيدة وجهها مجيف بالفقصة تا بغات تبكي...حيدات طابلية وحيدات زيفها بنترة تا تطلق شعرها الذهبي حيث تحل ليه الفيليل...

هاشم : اححح على شعكاكة شاعلة اااح..

سعيدة"الصمت"

هاشم : اش كاين مالك ؟!

سعيدة"ضارت عندو مشربنة واول مرة يشوفها هاكا من داك النهار ديال الكارثة فاش شنقات عليه يعتق بشار" : ولد خووووك ضلم اهاشم ضلم وماتسوق لحد !!..

فاقت بكري !! ..ليل كلو وهي كتقلب وتفكر...وفنفس الوقت شبه مرتاحة وفرحانا انها لقات ناس قراو فيها وجه الله منهم هاشم الي دابا لتحت كيتسنى فيها تنزل مخلي مليكة تبرگم...

مليكة : مي ديك نقاشة كاينة هنا ؟ بنت الگلاف...

ربيعة : سميرة ؟ كاينة هاهي حسنية تمشي تعيط ليها...حسنية سيري عيطي لسميرة...

حسينة"كانت كتشرب قهوة صبحت عندهم مع بونبر وصلها اشرف دخلات ومشى هو ف طريبورطور كيخدم بيه فالسواق...هزات فيهم عينيها" : اببب بباا...

مليكة : تي شتعرف تگول..صيفطي شي واحد فدراري صيفطي ولدك نيت...

ربيعة : صافي..امتى بغيتيها ؟!

مليكة"كتبرد فالكاس وسط ايديها" : هاو گولي ميعاد العاصر..وراني الليلة نزيد نشاعلاه...المعطي راه مشى يعمر طوموبيل والباگاج الفوك...

عيدة : را شي بيدوات ديال زيتون مسلالة راهم ملككين بشكوتش (سكوتش) وبرامل زيت ديال عشرة عشرة تاهما فالبيت ديال مونة...وجوج بيدوات ديال حامض مصير صايباتو ليك ربيعة تاهو تم..يلخط ويهز...

مليكة : الله يعطيك الخير امي...

شوية تا بانت ليهم حبيبة نازلة لابسة تريكو قطن بالكمايم طوييل وعريض فالبيض وكحل..وسروال دجين سليم مطوي من تحت وسبرديلا بيضة Balenciaga وصاك طوييل فيه تيليفون وبزطامها و وراقها وشعرها مضفور لور ونضاضر شمس فوق راسها...

توريا"كانت دايرة حنكها فوق ايدها المريضة وكتشرب فقهوتها حتى هزات عينيها من عطاتها ريحة البارفان الي كان واصل تال عندهم لدرجة ربيعة بقات تشمشم عجبها بزاف...بقات شحاال كطلع فيها وتهبط" : فين غاديا ؟!

سعيدة : هاشم غايديها لافاك تكمل تسجال وترجع...

توريا"طلعتها وهبطتها تاني ماكرهاتش تجلسها" : مممم..وداك اللباس ماهكاكش بان ليا...

حبيبة"هبطات راسها كتشوف فحالتها ورجعات شافت فيها" : مالو لباسي ؟!

مليكة : وا بنيتي..والمرأة من كتجوج راها تاتستر..شي جليليبة شي عباية...

كريمة : ولا سيرفيت طويلة...

مليكة : ايييه وليني جليليبة حسن...حاولي بنيتي تنقصي من هاد لباس هنا دوار عدنا حدودي هاو شوفي نتي اش يبان ليك...

عيدة : ماعليش خليوها تلبس كي بغات دابا تقنع وتحيدو...لا تقويوش...دوزي تفطري...

سعيدة : مكتشربش قهيوة هي كتبغي اتاي...

توريا : لا تعطلوش...

حركات راسها ومشات بزربة هاربة من نضرات لاخرين الي كتحس بيهم فلااااوها..توريا شافت تا عيات وهي تمص الحامض بفمها وقلبات عينيها كتنهد...اما مليكة عوجات فمها ماعاجبها حال خصوصا كتشوف فجناب حبيبة فايضين ليهونش عندها كيبانو من بعيييييد...تنهدات ورجعات تشرب قهوتها..ركبات مع هاشم الي حسات براسها راكبة مع باباها...غير وصلات لمراكش حسات بالنفس رجعات ليها حتى شقهات وقالت..

حبيبة : الله...

هاشم : گاااااع ههههههه...

حبيبة"بصوت شبه مسموع" : توحشتها بزاااف...

هاشم : والله كون ما عندي خدمة تا نديك لداركم بركي معاهم تال عشية ونجي ليك..وليني دارتها بيا...

حبيبة"تبسمات وحدرات راسها ماجاوباتش حيث لا جاوبت غاتنهار وهي حابسة راسها بزز"...

داها لكلية العلوم الاقتصادية كملات اش خاص دير فيها وبتدخلات منو هو نيت كيعرف ناس تما دغيا سرباوها ودخلات هي لمكتب العميد كلو قضا معاها الغراض وخرجات فانتظار يتلاحو اللوائح واستعمال زمان وفانتظار ترجع لدارهم باش تبدا تقرا براحتها..ما عندها علم بالي جاي والي مكتبو ليها الله واش مخبي ليها المستقبل من جحييييييييييم.....

العشية تعاشات كانت فبيتها كتهضر مع ناديا وباباها لقات باش تسكتهم وهو انها مشات لافاك حيث حسات بالي بداو يشكو ان بيها شي حاجة..وهي من فرحتها نسااات شوية وبدات تعاود بحماس الشي الي خلاهم يرتاحو نوعا ما من جيهتها...كملات معاهم ودازت لايوب الي نص هضرتو معيور معاها...

ايوب : اسير اتا فحالك بغيت ليك قاتا نتي ودوك ناسك...اجي بيت نسولك واش ديك توريا ماتبيش تجوج بيا ؟!

حبيبة"خرجات عينيها" : اويلييييي...

ايوب : يغيس فيه ابليس..بلاتي قطعي تانسالي وبنعيط ليك...

قطع خلاها كترمش تا سمعات العياط باسمها وهي تخرج من البيت ونزلات لقاتهم كيتسالمو مع مليكة الي كانت واقفة لابسة جلابة جدييييدة گرونة مخيطة بسفيفة ذهبية وطالقة شعرها الي صايباتو وايديها ورجليها يتحرتتو بالحنة الي نقشات ودوك ليدين عامرين وعامرين حتى ب ذهوبات والعينين مكحلين وريحة ديال alien تعطعط منها اما طوابقها خلاص ريحة شيرلي تضرب...لابسة صندالة ذهبية عالية فرجليها ليباموس طخونسباغون كيبان فيهم..القطن الي لصقو ليها فوق صقلة على الحنة باش تبقى النقشة تاتشد مزيان فرجليها..كتسلم وتبكي ماساخياش زعما...سلمات على مها وكلشي سلم راجلها وولادها وهي دور بانت ليها حبيبة...

مليكة. : زيدي سلمي زيدي هههه..

حبيبة"قربات عندها سلمات عليها وهي تنطحها بالبوسان وطبطبات عليها" : وديري عقلك وسمعي لعدوزتك الله يرضي عليك...كوني مراة وگادة وحادگة وتعلمي هزي لعدوزتك راسها وسط الناس..سولي عالعيب والمزيان وراه تعلمي نشاعلاه...هاو را دابا تگاد الوقت كوني هانية...هاو فشهر 12 بغا يجي واحد سيد غانرسليك معاه شكلاط وشي حليوات وبيموات راني نعرفك نتي صغيرة يعجبك داكشي ههههه....

حبيبة حدها تبسمات وصافي محاملاهاش ومكتحملش هضرتها...سلمات عليهم مليكة وسلمات على باها باست ليه ايدو وولادها سلمو عليهم ووصل وقت المشي ركبات حدا راجلها كتنخصص وتشير بايديها الطوموبيل هابطة تالتحت بالباكاج والفوق خلااص فالبورطباكاج تال زداكاداك...

تقريبا داز تقريبا "اسبوع"

اليوم الاحد خرج هاشم من الحمام الي قدام دار كينشف فراسو وشعرو...طلع لفوق لبيتو هز تيليفونو كيبقشش فييه بينمت يهبط حتى كيصوني ليه فايدو....

سعيدة : هاكي بنتي دي هاد صينية لقاع دار...

هزات منار صينية وهي تم داخلة حبيبة لقات ربيعة كتگرض فالربيع وكريمة كتعجن فالخبز واحد بانيو كبيييير كتنهج فوقو وهي كتعجن...

توريا"هزات فيها راسها ورجعات كتشوف ف ربيعة وتوريها اش دير..حتى سمعات صوتها منخفض وهي تهز فيها عينيها" : اش كاين...

حبيبة : بغيت نمشي لدارنا "عينيها مغرغرين ومعصبة وعيات كل مرة صابرة لحاجة.."...

توريا : ماشي اليوم...ممسالينش جايين شي ناس..سيري شوفي اش ديري لهي عليا راسك.

خرجات من الكوزينة بغات تاكل راسها باطي عليها امتى ترجع لدارهم وترجع تقرا وتحاول تمر بحياتها...لقات هاشم هابط كيجري لابس وخرج نيشان تا من سعيدة ماداها فيها لقى حسام عند الباب جرو ومشاو كسيراو بسيارة حتى تحكو روايد...وصل الظهر وحطو براد اتاي يدوزو بيه بينما يطيب الغذا...اتا تمات هابطة سعيدة كتجري وجهها مخلوووع تا دخلات عليهم لكوزينة...

سعيدة : توريا ولدك خاصو يمشي لسبيتار..

توريا"لاحت الموس من ايدها" : م ماااالو !! "ربيعة ناضت تاهي"

سعيدة : سخانة مابغاتش تهبط اتوريا ماخليت كي درت وهانتي تشوفي ماخلينا كيدرنا...والو يا خويتي سخانة مابغات تهبط..

لاحت كاع داكشي الي فايدها ومشات تجري تبعاتها ربيعة وسعيدة وحبيبة الي تاهي سمعات اش قالو حلات عليه الباب لقاتو مغيييييب حطات ايدها عليه لقاتو طااااايب يغلي...وراتها سعيدة المحرار لقات ربعيييين وهادي وصاهم طبيب الى مابغاتش تهبط يديوه بسرعة لسبيطار....

توريا : علمي هاشم هاااشم فينهو...

سعيدة"دايرة تيليفون فوذنيها" : هاااشم فينك ؟ رجع را يوسف مريييض بزاف محن...

هاشم"خرج عينيه" : وايلي...كيفاش محن "هز عينيه اصلا مصدوم وزاد تصدم...تلفات بيه الوقت ملي جاه تيليفون وهو مصدوم وممثيقش وزاد دابا"

رجعات كتقلب فيه لقات توريا كتحيد ليه تريكو وتخشي ليه فزيوفة مبرديييين...ووجهها صفر حيث الدري مابغاش يبرا عياو من دويان وتبراد والو...حبيبة واقفة وقلبها بغى يسكت خافت عليه وهو عزيز عليها بجهد...مخلاو ما طلاو ليه والو..شي ساعة وزيادة وهما كيتسناو الي حتى وصل هاشم وحسام الي هزوه بزربة هبطوه لطوموبيل كلو مخلخل مسكين يقطع فالقلب...دخلات توريا حداه وهاشم وحسام القدام...

عبد القادر : دوز اسيحمد ركب وصلنا وراهم...

ركب سيحمد سعيدة الي جرات حبيبة معاها لصقات فيها ماردوش ليها البال خلاو اشراق وكريمة وربيعة مع عيدة الي هزات كفوفها وتدعي معاه...داوه نيشان لاقرب كلينيك فين داوه ديك المرة...وصلو ودخلوه نيشان لحسن الحظ لقى نفس طبيب ديال ديك المرة...

طبيب : كيف گلت ليك الى رجعات ليه سخانة مابغاتش تهبط غايخصنا نزلوه لفحص لتحت باش نتاكدو..معاودش رجع ليه نزيف فمنخرو..

سعيدة : لا مرجعش...حتى ولا لباس وهي ترجع ليه سخانة البارح فالليل ومابغاتش تهبط تاليوم تاني فصباح والو بقات فربعين...

حرك ليهم راسو وخلاهم كيتسناو...بقاو هكاك شي ساعتين وهما كيتسناو حتى عيط الطبيب لهاشم الي عطاه نمرتو وقاليه يهبط عندو المكتب...

هاشم"دخل هو وسعيدة..شير ليهم يجلسو وقدامو فحوصات يوسف" : ادكتور...

طبيب : يلاه كيف ساليت باش نعلمك..مهم داكشي الي شكيت فيه الحمد لله مكاينش...ولكن الي توصلنا ليه هو بسباب هاد السخانة الي مابغاتش تهبط الشك الاول كان بسباب نزيف الي وقع ليه...درنا ليه سكانير وتوضح لينا انه عندو la méningite(التهاب سحايا..كتبقى سخانة طالعة مكتهبطش وعندها علاج خاص)..

سعيدة : كيفاش ؟ هي سالمة عندنا

طبيب"حرك راسو" : غايخصو يبقى معانا هنا كثر من سيمانة باش يتعالج وتحت المراقبة المستمرة لان مناعتو اصلا ضعيفة وكيبان ليا مواخذش الفاكسان كاع ماشي تا بشكل صحيح...المهم دابا ميدخل عندو حد حتى نبداو فالعلاج..الى بغيتيه يبقى هنا تقدر تبدا الاجراءات بغيتي تديه لمستشفى عمومي لك كامل الحق...

هاشم قلبو تقسم على يوسف الي ماعندوش ذنب فهاد الاهمال الي هو فيه...بصح يوسف ماخذاش مسكين الفاكسان حيث داك الوقت كانو المشاكيل وكانت الكارثة الي وقعات والقلوب الي تهرسات بموت نور الدين وتعرض للاهمال وهو ضعيييف البنية والمناعة...

الوحدة ديال الليل السكووون فديك البلاصة فين ناعس يوسف...بالكشيفة باش رجعات ليهم توريا الي غادوز ليلتها البيضااء بالتفكير فحال "يوسف"...يووووسف الي هو دابا بين الحياة والموت...ضعييييف مسكين ضعييييف ومايگد جسمو وذاتو تحمل..ضحية اهمااال من طرف الام الي عاشت حرزنها وعدتها ومخلياه يتلاوح بينهم...يوسف الي دابا ناااعس وعينيه ماشافوش النور طيلة فترة المرض حتى كيولي لباس ويرجع يتنكس...حتى الحرارة مابقاتش بغات تنزل...يلاه خرجات من عندو الفرملية قاست ليه سخانة وعلقات ليه سيروم القوة...تطفى الضو وبقى غير ضو خاااافت فالكلوارات وبيتو...حتى تحل الباب وهو يدخل بقى غادي حتى وصل عندو وهو يتحنى عليه وحط شفايفو على جبييين يوسف الي رمش عينيه ورجع مشاااااا....جلس حداه وشد ليه فايدو زير عليها وقربها باسها ليه...ونطق بصوت خشيييين وخا منخفض كيتسمع قوي...

بشار"مغوووبش ومخنزر حاقد" : خليتوني نحنت بحلوفي.."عض لسانو من لداخل"...نعل بو حياة مها حياة لا كنتي ولد الرحماني...

يتبع...