محتوى القصة
الجلسة كلها وهي جالسة على شوك وتفكر واش تصارحو ولا تسكت حتى يجي كيف كانت مخططة...حسام ماوصاتوش باش مايقوليه والو...عاد فهمت علاش كان كيقول ويأكد عليها اش دارت وديك "مزيان مزيان" احساسها ماخيبهاش فيها..تأكدات انها غاديا وكاتحفظ ليه وفيه طبعو مزيااان...
سعيدة : ماعندك مناش تخافي يعاود يدوي عماك گولي ليه فين كنتي ولا گولي ليه تاتكون هنا ونعاود ليك...مالو اش بغا يدير ليك گاع ماعندك مناش تخافي يخياب تايعيا را مايدير ليك والي...
حبيبة"الصمت"...
طبطبات عليها سعيدة وهي دور عند حسام خنزرت فيه ولا يهز فعينيه ويحسب فتريات شحاال من وحدة فوت فالحساب الي فات...ومشا لفسيفساء ديال الحيط تاهو بانو ليه شي نوارات مفاردات كمش فيهم عينيه غا باش ميرجعش يشوف فسعيدة حيث غا تخنزيرتها كايحس بيها وكلاتو عصا الكلاب فخيالها جهدها غايوصلو...
دخلات ناديا ببشاشتها ترحيبية شافت فحبيبة وغمزاتها وهي تنوض فالبلاصة بلا ماتقوليها عرفات انه خاص تمشي تعاونهم فتوجاد طابلة...وهادشي لاحظاتو سعيدة وعجبتها تربية ناديا لولادها الي منهم حبيبة الي مكتعاودهاش معاها بلا حس ناضت تقدي...اما التوأم دخلو سلمو عليهم بادب ومشاو لبيت لاخور ممخالطينش مع الضياف....حتى تعيط ليهم ناديا عاد يقدرو يدخلو...شوية حتى دخلات حبيبة هازة بلاطو فيه شلايض ستفاتهم وهي تسمع حسام نطق بالحس...
حسام : سس ختي حبيبة...
حبيبة"حركت ليه راسها بمعنى مالك"..
حسام : داك طبسيل ديال فول مشرمل كحزيه لهن...
حبيبة : هههههههههه واخا...
سعيدة"خرجت عينيها فيه كاتحاول تفهم وتعض ففمها باش يحشم وهو مصغر عينيه مافهمش"..
حسام : مالك !!..ضراتك شي حاجة ؟!..
سعيدة"كمشت فمها كاتنطق بحروف متقطعة بزز باش كاتسمع" : ك و ووووو نننن تتتتتحششششششششمممممم...
حسام : جاك القبط !!؟..
سعيدة : واي گطعععككككك...
حسام : هيي ؟!..
سعيدة دارت ايدها على حنكها مالقاتش منين دوز ليه وتاهو هبل ليها تقوليه عمرو شاف شي حاجة اصلا ملي دخل لرياض وهو حال فمو ديما كايدخل ليه يحل فمو...اما من كيحطو ليهم الماكلة مع كاتحطها بتاويل وف ديكورات زويينين مثل الحلوة كاتحطها فديكور فيه طبقات ولا فاكية ف فراقات ديال زاج ولا مذهبين ديكورات كاتحط فبهم غزالين...ولا شي شهيوة هو من نوع الي غلاق بحال العروبية اصلا كيغلقو فاالماكلة خصوصة تغماس...وشرمولة ديال فول كان ديجا عندهم دايقها وعجباتو ودابا شافها عينيه حوالو...تا دخلات حبيبة الي يمكن قالتها لامها وهي تحط ليه طبسيل كبر من هادوك فين حاطة وهي توسع سعيدة عينيها...
سعيدة : اويلي ياكل غا من هاد طباسل...
حبيبة : هيي خليه...اماما الي صيفطاتو ليه وگالت لا خاصك باقي بتزيدك وبصحتك...
حسام : گولي لخالتي ناديا واخا تبناني...
سعيدة"ضارت عندو بزربة"..
حسام : سيري اسعيدة فحالك...
سعيدة : ايوى لا باقي حليت ليك شي باب فنصاص ليل نكرط لهاشم لحيتو...
حسام"تايخشي فوجهو الماكلة ويهضر" : اهاشم مكرط خلوق...باقي شي تكراط خور...
سعيدة"بقات تشوف فيه"...
حسام : الفول اسعيدة مشرمل عامزيناتوو..كون جا زكريا وتشوفي اش يگوليك...
مشات حبيبة كاتضحك وجابت باقي الاكل...حطو بزاف انواع شلايض فيما يختصر من خمسة الانواع عاد الفريت...وعاد تمات داخلة لطيفة هازة صينية طويلة فيها ضلعة ديال اللحم محمر فالفران..مزوق من فوق ببيض سمان و بريوات ديال الكفتة والخضرة مفورة ومسوطية فشرمولتها ومحطوط فوقها االضلعة...حطتها وهي تنطق سعيدة اما حسام را فمو تحل تقولي عايش فالفقر وترمتو كاتصفق وتقول فينك ازكريا اجي تشوف زرود....
سعيدة : الله يا لطيفة عذبتو راسكم بزاف...
لطيفة : راكم حبابنا ماشي هي نسابنا...مرحبا بيك اسعيدة والف مرحبا..والله الى نهار كبير الي تجي عندنا وتگعدي معانا...
سعيدة : الله يكبر بيك....
دخلات تاني حبيبة هازة بلاطو ديال كيسان غير كيسان كانو متولين ووراها رقية هازة مونادا و والماس...حسام هز تيليفونو وصور الطبلة ورسلها لزكرياء وهاشم...وخشا تيليفون وسما الله وبدا ياكل...مخلي تيليفونو كايتسمع طررر طررررن طرن طنطن صونيط على ميساج على نوتيفيكايسيون...
زكريا : وتا فين بارك امسخوط...
هاشم : مامونية تم ؟ مشيتي بلا بيا ؟
اسير يبرك ليك فالركابي...
زكريا : بغيت ليك السهال ثلثيام ويتگطع الما وتخنز ليك ترما...
هاشم : والله ماراجل بالله الي مصور ليا هادشي وانا وسط واحد دوار منوضها عماهم والله كاس الما مايمدوه ليا....
زكريا : وحسااااام جاوب يگطعك...وشو جيب طريف غاندوق اصحبي ورا تايديروه هنا فالفيررما وليني بيض مافيه زواق ما والي غا مليحة وكمون هو كبيرو...هذا شتو بان ليا مسرار...
هاشم : رسلتي لزكريا تفقصو ولا صيفطتي غا لبوك تدي سخط...
خلاهم يتلاغطو ليه تم وتيليفون فجيبو وهو را دخل فديك صينية مخلي سعيدة ماعرفت تاكل ولا تندب زوكها معاه اما لاخرين عاجبهم حيث ماحشمش وهما مكيبغيوش ضيف البعكاك عزيز عليهم بحال حسام عندو هانيا ياكل ماشي بالقياس وناديا تضحك وتكحز ليه وهو يدور عند سعيدة يقلي ليها سم...تا جاب ليها ضحك وحبيبة خلاص ميتة بضحك بعدا قدرات تنسا شوية ما وقع قبيلة...
زكريا : تا جيب غاندوق بانت ليا ديك صفورية بحال كراميل...وتا شو الضلعة كي طايح عليها سر "صيفط ليه ايموجي شفاه عاضة فمها"..تاع شي كوية فوسط ضراصك...تا گوليا داك خونا الي قايسو الغيس الي كايجي لختي حبيبة ماكاينش ؟!...(على ايوب ههه)...
وصل وقت المشي ناضت سعيدة مستاذنة...ناض تا حسام...
حسام : حق ربي لا ندير هوك ونسلت من هن ونجي عدك امي ناديا...
ناديا"طبطبات عليه" : الى ماجيتيش بنتقلق منك والله تانديرها...الوقت الي وحلتي ولا بيتي تغذا انا موجودة هي صيفط ليا فواتساب لا نكون ماكايناش نوصي عليك للا رقية...
سعيدة : نتي مولات الخير الله يكبر بيك اللا ناديا...
حسام : تي ريحي امرت الحاج عليك لامان...
حبيبة : علاش ماجاش معاك زكرياء ؟!..
حسام : باش تفقص ليه المرارة.. اجم لا را قاري مايصيبش يجي...
حبيبة : ههههه هاكاك...ايوى سلم عليه مرة جايا جيبو معاك...
تسالمو متوادعين ومواعدين بعضياتهم...حتى خرجو وكانت واقفة حبيبة مع سعيدة قبل ماتمشي..تسنات حتى دخلت ناديا وبقاو وحدهم وهي تخرج معاها تال نص درب لابسة عليها كاب لا يصدق محصلها مع الثقة مابقاتش ممكن يخرج ليها من شي قادوس ولا شرجم ولات كلشي تتوقعو منو...
سعيدة : سيري وهضري عماه...وتانتي رطبي وديري قواعد العيالات وكيدهم...ورا غا ضحكي ليه نتي يرطاب...
حبيبة"تفكرت توحشتك بزاف ماگرت فيه وهي تضحك باستهزاء تا رحعو تزنگو حناكها من جديد...تنهدت وهي تحرك راسها وصافي...تسالمت مع سعيدة ومشات...هزات راسها الفوق كاتشوف راسها بغات واحد شخص الي بغاه قلبها بلهلا يطريه ليها...حاولات مرارا وتكرارا انها ماتبغيهش وماتخليييهش يدخل لقلبها...مرضات وهي محاربة مع قلبها انه يخسر وعقلها يربح...وكاترجع تفكر اشنو دوز عليها من حر.ب باش تسمح ليه وكيفاش ندم ومستاعد يصبر كثر من هادشي وكيفاش انتصر قلبها بعد جهد جهييييييد وغير كاتسمع سميتو قلبها كيرفرف ويطلع فدقاتو...وكيفاش هي دابا حاسة بفراغ كبيييييير وهو ماكاينش وحاسة بالغربة بدونه...غمضت عينيها ونزلت راسها وهي دور دخلات لدارهم...
وصل الليل...كانت متكية ففراشها الوردي وشادة تيليفونها داخلة لفيس الي مكدخلش ليه بزاف لكن هاد المرة كانت داخلة ليه..طالعة هابجة كاتقرا مشاكل الكروبات SOS..وكانت داخلة لواحد الكروب فيه نصائح للمتزوجات وهي كتقرا بعض الافكار على الله تعلم وتستافذ من بعض التجارب...وعقلها فنفس لوقت كايفكر واش غايدوزها ليها بشار ولا تسكت حتى تشوف اش غايدير...من غير هادشي فكرات بلي علاش ماتقولش ليه ؟ هي علاش مخبية عليه اصلا واش حيث حشمات ؟!..غايعرف يعرف اللهم تقوليه حسن مايصدقو فالي مايعجب...خرجات من الفيس ودخلات لواتساب عندو بان ليها داخل قلبها ضرررب ماكتعرفش علاش فاش كيبان ليها داخل كايخفق قلبها بجهد...من بعد تردد طويل رسلات ليه...
حبيبة : مسالي بيت نهضر معاك...
شي زوج دقايق باش رسلات عاد باش بان ليها قراه تا قالت را ماغايعطيش وهو يخيب ضنها ههه وعيط ليها فالبلاصة كيف قراه...وسعات عينيها على جهدهم ماشي حيث صدمها لكن حيث عيط ليها مكالمة فيديو !!...بشار عمرو عيط ابيل فيديو لشي حد من غييير يوسف واشراق الى كانت مع يوسف كاتهضر معاه...ولات كاترعد ضارت هنا وهنا وهي تگعد جالسة صرطت ريقها وهي تجاوب وجهها مزنگ...حتى بان ليها جالس فالبيرو ديال لابوراطوار كان عاطي بجنب كاطابي فشي حاجة ماشافهاش امتى جاوبت حيث تدهى مع شي حاجة...دارت ايدها مسندة حنكها وكتشوف فيه حتى بانت ليها لحيتو بجنب وكتسمع فيه كايهضر بالالمانية بطريقة خااترة وصوت مدعدع ثقييييل...وكتسمع شي تقرقيب...عضات شفايفها وهي كتشوف فيه..ماتنكرش انه كاريزما بزاف غير انه جدي فوق القياس...مازال كاتكمل اعجابها وهو يشوف فيها...داير نضاضر شوف زادو كملو على جاذبيتو خصوصا انه تغوبيشة ودابا كيشوف فيها وهو يحرك راسو وقال...
بشار : ياك لباس...
غمضت عينيها عاد فاقت للواقع ديال بشار الخضر...
حبيبة : ماماليش..حساب ليا فدار...
بشار : لا..واگف على شي خدمة مزيرة...شنو المشكيل! بيك شي حاجة ؟!..
حبيبة"حركت راسها ب لا" : لا..بيت هي نگوليك فين مشيت انا وخالتي سعيدة گبيلة...
بشار"رجع شاف فيها وبقا كيشوووف مطول وهو يحرك راسو بشوي" : كنسمع...
يلاه بغات تعاود ليه حتى سمعات صوت انثوي عيط ليه ب herr bachar (موسيو بشار)..كمشت عينيها كاتأكد واش هو هذا صوتها...بان ليها هز عينيه وبدا يهضر معاها هي ماداتهاش فيه بقات مركزة مع الصوت واش هي نيييت...حتى بانت ليها جات عندو عطاتو شي حاجة وهي دور وجهها بانت ليها حبيبة فتيليفونو...وشيرت ليها بايدها مبتاسمة ليها...غوبشت حبيبة تا شوية بانت ليها نزلت راسها كاتهضر مع بشار وشعرها طاح ليه على كتفو...وسعات حبيبة عينيها وهي تقطع عليه تيليفون...ماهضرررش ماتحرك...هانزاده بزربة حيدت شعرها وطلبات سماحة..وهي تحيد من حداه حطات ليه ضوصي...
هانزاده : Ich entschuldige mich (اعتذر)..
ماجاوبهاش وماشااافش فيها عينيه كانو مركزين مع التيليفون الي قطعات عليه حبيبة...هز عينيه بانت ليه غاديا مع لابوراطوار كبير كاتخدم مع وحدة تما...حيد نضاضرو بشوااايا وطواهم حطهم بلاصتهم...حيد تيليفون وكحاز بالكرسي بشواااايا...ووقف.. كايقاد فحوايجو هز واحد القرعة ديال المحاليل حتى شافها خاوية....ماردش البال كيداير زاج ديالها..جاب الله زاجها رقييق ماشي غليض...نواضرو تنفخو عروقهم...وعينيه صغارو بواحد شوفة كاتخلععع....وهو يشير عليها بهاديك...ماسوقوش كااع واش هو فبلاد الحق والقانون...جاتها فالناضر تشااااخ تا غوتات على حر جهدها...
فنفس اللحظة لكن فدولة اخرى...كيف قطعات عليه بقات شادة تيليفون وعينيها خارجين..حيث غا شافتها وشافت الطريقة باش شيرات ليها كانت طريقة مستفزة واي انثى فينا غاتفهم دوك الحركات لاش تدارو اصلا...مايخفاش علينا حنا النساء فعايلنا وكيف كيقولو عدو المراة المراة نفسها فهاد المسائل ..خصوصا ان حبيبة باقي ماناسياش داك الحلم الي حلمات بيهم وغيّرها وغير نفسيتها لمدة طويلة...ناهيك على ان هانزاده هي المراة الي كانت غاتكون بلاصتها هي...مزوجة بيه...
طلعات ليها السخانة تا شعلات العافية فيها من لداخل...نارالغيرة كاتح..رررق فيها..ماحملاتش داك المنظر ماحملاتش تحنى حيث كانت باينة انه تحنات بطريقة مستفزة لحبيبة...خصوصا من الي ترمى شعرها الطويل الحريري الليلي على كتاف بشار...تعاود المنظر ثاني فمخيلتها لدرجة عصرت عينيها وولات كاتهضر غير وحدها فداك البيت...حتى شيرات بالتيليفون بجهد ماعرفاتش تا تلاح لهيه وتدفع طاح فالارض....
حبيبة : المشعككة لوخرااا...برهوووشاااا حمااااراااا...محشرة...حولة...هي تحنى عليك عاادي وترمي عليك شعرها وانا....
"شوية حتى بدات كاتعيب فيه بالفقصة بدلت صوتها لصوت غليض على الله توصل لمستوى صوته ساعاك الله غالب ولا كايتسمع صوتها بالفقصة بحال صوت عجل مقجوج"...
حبيبة : جمعي عليا زغبك...
ماشعرتش حتى نفضت عليها الغطا وهي تنوض من بلاصتها ماتسوقت لا لتيليفون فين ترمى ولا لتاحاجة...
حبيبة : اش باقي مازال مخليها دير هكاك..اش بااااقي...علاش اصلا باقي تتخدم معاك...
لبسات عليها واحد الضراعية فوق ديك البيجامة حيث كاتلبسهم عريانين ودابا حيث غاتخرج وتنزل من البيت خاصها تستر لا يخرج باباها ولا ايوب..خرجات من البيت ونزلات كادردب مع دروج...مشات ديريكت لكوزينة حلات ثلاجة بقات كاتشوف فيها اش بغات منها الله اعلم...بقات حالاها وواقفة...كاتحس براسها كاتغلي من لداخل...الافكار كاتدي وتجيب وتفصل وتخيط وتلاقي فالي كاين والي ماكاين...خيالات خدامين وحكايات لا علاقة كايتنسجو فيهم...كلشي هادشي بسباب الغيرة الي كاتخليها محروقة من لداخل ومفقوصة...مابقاتش تسوقت ليه هو..كثر مامسوقة لكيفاش تحنات بديك الطريقة يعني را مضصرها عليه وخصوصا انه كاتشوفها دييييما كاتصوني ليه وديما كايهضر معاها واخا يعياو يشرحو راها خدامة معاه نائبة ديالو...
سمعات شي حركة خرجاتها من الخيال...حتى سمعات صوت تحنحينة وهي دور لقات مولاي حفيظ واقف عند الباب كايشوف فيها...
م.حفيظ : حبيبة !! اش تديري هنا...
حبيبة : والو..بيت هي نشرب...
م.حفيظ : الما فالثلاجة اه متنديروهش فهاد الجو..
حبيبة"ضارت كاتشوف فثلاجة الي حلتها دقائق هادي ماعارفاش حتى اش باغية منها...سدتها وضارت هزات كاس من البلاكار ومشات لروبيني عمراتو...تسندات على لافابو كاتشرب جغمة بجغمة وبين جغمة عرام دالوقت بسباب تفكيرها تاني الي سرح وهادشي ماراضاتش البال لباها الي كان حاضيها وعرف ان بيها شي حاجة مقلقاها...حط القرعة الي علاش كان جاي فوق بوطاجي...وقرب لعندها...
م.حفيظ : مال بابا...
حبيبة"هزت فيه عينيها" : همم ؟!..ماماليش...
م.حفيظ : الوجه الجميل اصابه النكد...هههه...
حبيبة"نزلت عينيها وبدات تبسم حتى ضحكت ضحكة خفيفة من فوق خاطرها لهضرة باها" : ياك ههه...باش عرفتيني مقلقة...
م.حفيظ"تسند تاهو على بوطاجي حداها وربع ايديه" : اه والد هي النگعة تالزين...من حبيبة لمعتز بالله لوردة...كل واحد فيكم بنشوفو مقلق تايخسرو ليه الملاح توجهو...و نهز ليه همو...اش مقلق القشة تبنتي...
حبيبة"بقات محتارة واش تقوليه حيث هي مولفة تقول ليه الي كيضرها وحيث هما مقربين بزاف علاقتهم تخطات كونها علاقة اب وبنتو...بيناتهم صداقة قوية الي بسبابها حبيبة ضحات باش تنقدو من الكريدي الي وصلها لهاد الاحداث..لكن هادشي الي كيوقع بينها وبين بشار خصوصا الى عاودت ليه بلي كان كايعرف وحدة قبل منها وكانو على وشك الزواج..ماقدراتش تقولو ليه...فضلات تحدر راسها وتهز كتافها وتقول....
حبيبة : وااالو...
م.حفيظ : الحالة الي تتجي من شهر للشهر ؟!...
حبيبة"تزنگت واخا مولفاه هو الي كان كايتقدا ليها الفوطة صحية فاش كاتقرب تجيها.." : لا...احم...
بقا كايشوف فيها...كان باين عليها انه مقلقة بيها شي حاجة الي مغيرة ليها ملامح وجهها ومهبطة ليها المود ديالها...حرك راسو بشوية وهو يمد ايدو حاوط كتافها معنقها كانو ماقبلين مع الباب ديال الكوزينة كايشوفو فقاع الرياض...
م.حفيظ : فاش تتفيقي فالصباح لا نتي لا خوتك. فوقيتكم تانكون ناشط...فاش كاتعجلو فنعاس ونتوما عندكم قرايتكم تانهز الهم...خصوصا نتي تانعرف راه نعاس مازاركش وشي حاجة قلقاتك مخلياك بايتة تخممي...اما لا كانت العطلة ماعنديش مشكيل تانعرف راه كنتي سهرانة مع شي فيلم..ولا كنتي مريضة تتعلمني ماماك ولا نتي تتعلميني...ايوى دابا فوقيتة القرايا ونازلة فهاد الوقت واقفة وساهية فيدك الثلاجة مسكينة الي بيتيها تولد ليك شي عجب ووجهك مغير اه باين مقلقة...مابيتيش تگولي لباباك اذن شي حاجة بينك وبين راجلك !!...
حبيبة"الصمت"..
م.حفيظ"طبطب عليها" : هنا بنتي لا كانو مناوشات عادية داكشي بيناتكم كانت شي حاجة بيزاغ..الوقت الي احتاجيتيني هاني موجود..."باس ليها راسها" تصبحي على خير...وماتعطليش هنا بضربك ليا شي عيشة قنديشة...
الضربة كانت صادمة كثر ما كانت مضرة...ماعرفاتش باش تبلات ومنين جاتها الضربة اصلا...مع شدات ناضرها مع طاحت لارض كاتغوت...الي معاها مافهمت والو منين جاتها دقة هزت عينيها وهو يبان ليها واقف كايشوف فهانزاده ومخنزر لواحد درجة هاديك تخلعت...
الي كانو فالبلاصة فين كاين هو البيرو ديالو بعيد على فين كايديرو الاختبارات ديالهم واخا را نفس الجناح...كان معاه فقط ديك المهندسة والي نائبة عليه تاهي و كانت هانزاده....الحركة الي دارت مادوزش عليه...مامضصرهاش عليه لدرجة انها دير هادشي قدام مرتو وتشير عليها من تيليفونو...تكون كيف ماكانت ماعندهاش الحق انها دير هاد تصرف سوا معاه او مع غيرو من غير لا كان شي حد مضصرها عليه ماشي غير حيث تكون قلقتها...الى عصباتو شي حاجة مكايعطيكش راس الخيط مباشرة كايبان ليك التطبيق وهادشي هو الي دار ماعقلش على هانزاده شكون هي ولا فين هو اصلا...عينيه تعماو فالبلاصة وشير عليها بداك الانبوب ديال المحاليل الي جاب الله انه زاج ديالو رقيق ماشي قاصح او غليض...واخا الاصابة را خلفات ليها جرح فناضرها الي نزف فاش حيدات صباعها وبان ليها د.م فصباعها وهي تغوت تاني على جهدها خلات ديك البنت تخرج عينيها اصلا كانت باقية مصدومة حيث عمرهم ماشافوه معصب بهاد طريقة ديما شخص اشبه بمتوحد مكيهضرش بزاااف كيهضر فاطار العمل وهما كانو مزيانين معاه وتاهو وبيناتهم حدود حيث هو اصلا هاد الخدمة عزيزة عليه داكشي الي كيبغي وهو جيه لشي حاجة كاتعجبو بحال قراية ماط خدمتو شي حاجة متعلقة بضومين ديالو كايلقى فيها خاطرو بزاااف....
البنت من شافتها هكاك تهزت من بلاصتها ومشات ديريكت تعلم الاسعافات الي عندهم فالخدمة...اما هو رجع لبلاصتو وجر كرسيه وجهو مازالين عليه علامات الغضب...ماداهاش فيها ومابقاش شاف جيهتها كايسمع فيها كاتبكي وشادة ناضرها...هز تيليفونو وفالبلاصة دوز ليها الخط بقا كايصوني يصوني بدون اجابة منها...ولا رمى تيليفون وجر لابتوب ورجع لخدمتو عادي هاديك بقات تبكي وترعد وهو ماعلى بالوش بيها...واخا رجع يخدم عقلو رجع تبرزط ماشي مع بكا هاديك وغواتها وانما على حبيبة الي ماعرفش اش غاتكون فهمت واخا متأكد انه تقلقات حيث شافتها معاه وهو عارفها كاتقلق وكتغير من هانزاده بزاف...سد لابتوب وهز باكية الكارو وتم غادي خارج ل بهو المدخنين كانو الاسعافات طلعو يجريو معاهم البنت لاخرى دازو من حداه خلاهم معاها ومشا خرج فين يكمي...
نزل عندها الفرملي حيد ليها ايدها كايقلب ف الضربة...مسحها ليها بلالكول كايقلب فيها...
البنت : ? Tiefe Wunde (جرح عميق)...
الفرملي : ich denke nicht (مكنضنش)...ولكن خاصها تمشي لمستشفى ضروري من الفحوصات على راسها...
هانزاده"كتبكييي"
قلبها ليها لقا بلي تفلحت ليها نييييت ود.ماياتها ماحابساش...لكن الجرحة ماتحتاجش لغراز حيث الزاج تهرس كيف ضربها ومع رقيق مكانش بالصعوبة الي غايخليها تدير القطب...بقا يداويها ليها ولكن من شافها كاتغمض فعينيها علم ديك البنت تجيب ليها الما...ورجع هو كيكمل ليها الاسعافات...كمل ليها داكشي وهي مازال على بكاء مستمر...ماقدرتش تشوف جيهة بشار نهائيا...والبنت لاخرى بقات كاتشوف فالمكتب...باقي لحد ساعة مافاهماش اش وقع بينها وبينو حتى دار ليها هاكا...ولكن هادشي الي طرا ميمكنش يدوز مرور الكرام...ضروري الرؤساء لاخرين مايعرفو....
الهضرة وصلات للشاف ولكن ماكانش فالخدمة حيث الليل والي كايخدم فالليل غير لابوراطوار عندهم والي مناوبين تما...كان واقف قدام البالكون الي كايطل على برا والبرررد...حتى صونا ليه تيليفون حساب ليه هي لكن كان الشاف الكبير...هز راسو لفوق تا ساط الدخان وطلق الخط حتى كايسمع صوته كايسول اش واقع....
بقات شحال وهي جالسة فالكوزينة والغدايد تقت.ل فيها...عينيها بغاو ينقزو منهم دموع بالفقصة والنشهد كايتعاود بين عينيها...جات تهضر معاه وتعاود ليه على اش دارت وشنو قررات وفين مشات بالتفصيل باش تشاركو قرارها حتى وقع الي وقع خلاها كلها كاتغلي...ماتحملتش انه تكون قريبة ليه وشعرها يتطلق عليه على كتافو..حسات ولا تأكدات انها دارتها ليها بلعاني وهادشي را مكيخفاش علينا حنا نساء فعايل بني جنسنا...
طلعات لبيتها..كي دخلات حيدات اش كانت لابسة...سمعات صوت تيليفونها الي بقى مرمي جمعات حجبانها وهي تمشي اتجاه الصوت تا لقاتو مليوح فالارض...هزاتو بانت ليها "BACHAR ❤️"...بقات كاتشوف فيه كايصوني وتقول واش جاوباتو...حتى قطع وعاود صونا وثاني نفس القضية...مشات لفراشها وتخشات فيه وتيليفون بين ايديها...حتى بدات تهضر تاني مع راسها وتشكي...
حبيبة : برهوشة...بلعاااني بلعاااني...وحتى هو عاجبو الحال...كنتو ناويين زواج ملي مابقيتوش علاش باقية معاك..علاش اصلا تكون قريبة ليك...كون مكنتي مضصرها بادير اش دارت...طالقة شعرررك المشعككة الحولة...
كون ما صونا ليها تيليفون فايدها كانت غاتكمل المعيور الي اصلا مكتعرفش ليه وهي براسها تصدمات انها كاتعاير !! ايه كاتعاير مع ايوب ولكن انها تكون انسانة ديال المعاطيا هاديك عمرها عرفتها ولا تعرف ليها...الى كان غير دابا فهو فقط ردود افعال لغيرتها القوية...وتعبير على اشنو شافت...باقي الحكاية واشنو وقع معارفاش...
شافت تاني بانت ليها سميتو...هاد المرة قطعات عليه وباش تفادا يعاود يعيط ليها دازت l power وطفات تيليفون بخطرة كاااع....حطاتو عند راسها فطابل دونوي...
صبح الصباح...كانت متكية والفاصمة مديورة ليها على ناضرها...الحمد لله ماكانوش اضرار وخيمة...لكن واش هادشي غايدوز مرور الكرام ؟!...طل عليها من بعيد وهو يسد الباب بشوييييا وضار جيهة الممر بانت ليه المهندسة الي كانت حاضرة تما...
هي : ناعسة ؟!..
هو"حرك راسو" : اشنو قالت ليك ناوية دير...
هي : ماقالت والو..ملي جات لهنا درنا لفحوصات ماعندها والو وسولوها اشنو وقع ليها قالت ليهم حادثة وصافي...هو علاش ماجاش يشوفها...اشنو غادي نديرو ؟ هذا را مامسموحش بيه هنا..الى بغات تشكي من حقها...
هو"هز ايدو موقفها" : قال كلشي...الى بغات دير شكاية ماغاديش نوقفوها...ماعندناش الحق..."زفر بقلة حيلة ومسد عينيه بتعب...عارف طينة بشار ماعندوش زيكزاك..هضر معاه وعاود ليه اش دار ومن هضرتو كايبان ليه ماعندوش سوق دير الي بغات دير...
واخا شم انه متأكد بلي ماغاديش دير بيه شكاية...وحتى هو ماخلاش البنت او الفرملي يعلمو البوليس وحاول ما امكن ان الامر يبقى فداك المحيط ومايخرجوش الي وقع...حيث غايوقعو ليهم مشاكل تم...هز راسو الفوق ورجع شاف فيها محرك حجبانو بقلة حيلة...
هو : نتمناو تخرج الامور على خير..."تنهد" مشكيلة هادي...Es ist unglaublich (لا يعقل)...
"مراكش الرميلة"...
مازال يلاه عندهم تمنية ونص...واقفة قدام الكوافوز وعاقدة واااحد مولاتي الغوباشة عينيها صبحو منفوخين ووجهها شاحب بالبكا والفقصة ديال البارح...تعصبت بزاف وماكانش كايحساب ليها غاتوصل لهاد المواصل...العافية لدابا باقي شاعلة...عقلها صور ليها انه مضصرها عليه وعندهم عاادي داكشي...طفات تيليفون وخلاتو كايصوني ليها تا لقاه طافي...كانت دايرة القراصة ففمها تا جمعات شعرها ومشطاتو مزيان...بالفقصة خلاتو مطلوق وقالت...
حبيبة : تعرف هييي تگوليا جمعي شعراااك..والله لا جمعتو وسير عند هاديك...
لاحت القراصة بجهد جناوح منخرها كايفرفرو...اصلا مخربقة عندها الوقت العادة فاش كتقرب تجيها كاتولي كي الهبيلة بعض المرات...الهرمونات مخربقين ومعصبة وكمل عليها حتى هو جهلت بالمعقول...ضارت هزات فيست ديالها فحالة تحرك البرد تلبسها...هزات صاكها وشي بوليكوبات...وقفات حتى رشات بارفانها...تا بغات تخرج وهي ترجع لكوافوز هزات كلوص غوز ماط دارتو لشفايفها ودارت بلاش خفيف لحناكها تخبي شحوبة الي بانت عليها وضد تاني فيه...هزات تيليفونها حتى كانت بغات تشعلو وهي تخليه طافي...خرجات من بيتها ونزلات ديريكت لبيت لقات عمتها كاتكب اتاي...وجالسة ناديا ومولاي حفيظ ورقية كاتجيب من الكوزينة وتحط...خوتها مكانوش قاريين حيث كان السبت وهي كاتقرا السبت عندها حصة وحيييدة...حيدات صباطها ودخلات حطت صاكها ولوازمها فالشرجم (حيث رياضات القدام فيهم شراجم على شكل دخيلات)...
لطيفة : صباح الخير ورباح...
حبيبة"بابتسامة باهتة" : صباح الخير...
ناديا : اهيا شفتك مقندشة...
حبيبة"الصمت"...
ناديا شافت فمولاي حفيظ نيشان حيث عارفة علاقتهم ديما كايسولوه مالها..حركت راسها وغمزاتو غمض عينيه وحلهم بمعنى خليها"...
كبات ليها عمتها كاس ديالها..شداتو وبدات تشرب وتاكل بوتيرة بطيييئة...ساااهية وكتاكل وتقول شي واحد فيهم هضر معاها...حتى كملات او وصل وقت باش تمشي لافاك وهي تسمع صوت باها الي ناض وهي كاع ماحاسة بيه كايقوليها...
م.حفيظ : يلاه ابابا نوصلك...
حركات راسها وناضت كاتسوس فايديها تا سمعات صوت تيليفون باها الي جبدو من جيب جلابة وقربو عند وجهو وقال...
م.حفيظ : بشار هذا !!...
قلبها بدا يضرررب بجهد عارفاه غايكون صاعر عليها حيث طفات تيليفون...لطيفة شافت فيها هي وناديا كاتبان ليهم مغوبشة...مافهمو والو حسو بلي مخاصمة معاه لكن اش واقع ماعرفوش...تا سمعات باها كايهضر معاه ويسول فالاحوال شوية وهو يقول...
م.حفيظ : اه بيتي حبيبة !!...
حبيبة"وسعات عينيها وشيرات لباها بايديها وكتقول" : مابيتش نهضر...
هزات صاكها ولوازمها وخشات رجليها فصباطها وخرجات كتسوط..لطيفة جمعات فمها وخرجت عينيها...ناديا دارت ايدها على حنكها وحركت راسها بلا حول ولا قوة إلا بالله ههه...خلات مولاي حفيظ حال فمو تاهو...ماعرف مايقوليه....
م.حفيظ : ا بلاتي شوية بنقوليها تشعلو بيكون ديشارجا داكشي باش...
حدو سمعو قاليه "ماشي مشكيل" وهو يقطع...ديك ماشي مشكيل مولاي حفيظ حس بالدخان ديالها من تيليفون...خشا تيليفون فجيبو وشاف فيهم لقاهم مصدومين...خرج كايردد (لا حول ولا قوة إلا بالله)...ومشا تبعها...وصلها لافاك...
دوزات حصتها بالسكااات واخا عقلها را كان مشغووول والحصة كلها وهي مقندشة ...كملات الحصة وخرجات وداك تيليفون حلفات لا شعلاتو...لقات باها واقف ركبات وسلمات عليه...
م.حفيظ : علاه ماشاعلتي تيليفونك ؟؟..
حبيبة : نسيت ماشارجيتو تانوصل لدار...
سدات عليه بهاد الهضرة خلاتو كايحرك فراسو...كسيرا مباشرة لدار...تسناها حتى نزلات ومشا هو لرزقو...كيف دخلت رمات سلام وطلعات لبيتها...وهي تدخل عليها ناديا وتيليفون فايدها...
ناديا : هاكي تكلمي...
حبيبة : لمن ؟!...
ناديا : وشدي...
غوبشات واحد تغوبيشة خلات ناديا خرجت عينيها وحلت فمها...شدات من عندها تيليفون ودارتو فوذنيها...مازال كاع ما هضر وهي تنطق...
حبيبة : مابيتش نهضر معاك..ومابقيتش بيت نهضر معاك...بعد مني..."قطعات عليه تيليفون وطفات تيليفون حتى لمها"...
خلات ناديا حالة فمها وكاترمش...هي عارفاها مكتعصبش بزاف ولكن الى تعصبات كاتولي كأنك حطيتي شخصية اخرى غير الي كاتعرفي...وهادشي الي شافت دابا أكد ليها انه شي حاجة وقعات مع المعني بالامر الي عطاتها باش تهضر معاه...مدات ليها تيليفون وقالت بانفعال...
حبيبة : منين جاتو نمرتك...
ناديا"رجعت لوعيها من الصدمة" : شكون هو ؟!...
حبيبة : هذاك...
ناديا"بقاات تترمش هي را عرفت شكون لكن الصدمة لجمت ليها فمها...مابقات حبيبة كاع عاودت سؤال ولا تسناتهاةتجاوب خلاتها فبلاصتها مصدومة وضارت كاتجبد ماتلبس مخليا مها باقي تاتشوف...
ناديا : علاش مابيتي تهضري مع راجلك ؟!..
حبيبة : حيث مابيتش ومابيتش يبقى يهضر معايا..وماتشعليش تيليفونك "بصوت مجهد" ماتبقاااوش دوزوه ليااااا...
ناديا"رفعات صوتها اكثر وقلبات ملامح وجهها لجدية بالغة خلات حبيبة تفيق من هضرتها" : حبيبااااا !!!.. اش هاد الاسلوب وليتي كاتدوي بيه ؟!..نقصي صوتك وحني عينيك ملي تكوني تتهضري مع واليديك والى مابيتيش نحيدهم ليك راه عامرين هي بالما...
حبيبة"صرطت ريقها وحدرت راسها"...
ناديا : كاتعصبي قليل ايه كانحتارمو وقتك ونفسيتك وليني تجاوزي حدودك مع ماماك ولا باباك وتجهدي عليا صوتك نعرف شغلي معاك...
حبيبة"بصوت منخفض" : س سمحي ليا ماما...
ناديا"بقات كاتشوف فيها مخنزررررة" : مخاصمة مع راجلك ؟!
حبيبة"حركت راسها حساب ليها غاتفهمها ههه"..
ناديا : وحنا مالنا ؟!..
ماقدرتش تهز راسها عينيها فالارض سمعات قمعة مها وغمضت عينيها...الغيرة عماتها لواحد درجة ولات كاتخربق ومعصبة وزادتها حتى البيريود...وناديا حدها قالت ليها هاد الهضرة وهي تخرج من البيت بلا ماتزيد معاها حرف اخر خلااتها واقفة هكاك...تاتنفس وتسترجع اشنو قالت وشنو تصرفات فعصبيتها الي كتكون خايبة وهادشي ماشي كاينطابق غير على حبيبة فقط...حتى الناس..العصبية فالنقاش مكتوصل لفين اغلب النقاشات والانسان معصب كايخرج كلام العار ويبقى محفور فالواحد...لهذا فينما كان الواحد معصب او حاس براسو مورالو ماشي تال تم...يبعد على الاماكن الي فيها تجمعات سواء عائلية او اي تجمع كان حتى يتنفس مع راسو عاد يتجمع...
بقات واقفة شحااال وهي تنهد عاد استوعبت انه ماعندهمش دخل فغيرتها وبشار...عينيها غرغرو...عاارفة بلي ماخاصهاش دير هادشي لكن الله غالب هاكا داير الطبع وهاكا دايرة غيرتها الي بصح لو عاودات اشنو واقع كان ممكن شي حد يفهمها ويفهم احساسها...يلاه بغات تمشي تلبس حسات بوجيعات خفااف لتحت تا كمشت عينيها...عرفات بلي العادة غادي تجيها وهي الي مكملة عليها النص فالعصبية وزايدة ليها دوز فتضخيم الامور...زفرت بجهد..حيدات الحوايج بقات غير بدوبيس...مشات لدوش حيدات الكيلوط لقات شوية الوسخ...جبدات من البلاكار فوطة صحية ومشات تا جابت كيلوط اخور دارتها فيه وحيدات لاخور صبناتو بايديها كاتصبن وتفرك بجهد على شوي تقطع الكيلوط ههه...نشراتو ودازت غسلات حالتها وطرفات وخرجت لبست بيجامة ديال موبرا فوقي بيض وبلومارين وسروال كولون بلومارين باش تدفا مع ليغيگل كاتحس بالتبوريشة شاداها...دازت لكوافوز مشطت شعرها وجمعاتو اسفنجة وكل مكتزيد كايزيد الوجع...واخا هي من نوع الي مكيجيهمش الوجع بزاف لكن الى جا ممكن يكون عادي وخفيف عند البعض هي كايبرزطها ويقلق راحتها..
المورال والو هابط وهبط بالغيرة والهرمونات...ماحست حتى جلست على البوفة ديال كوافوز وحطت ايديها عليه مربعاهم...
حبيبة : فففف...كون ما مضصرها وباقي ضاصرة بتخليها تحط عليك شعرها..اهء..ياك تزوجتي اش قربها باقي ليك اااش...
هزت راسها لفوق ورجعت هبطاتو خاشيا وجهها بين ايديها...بقات شحاال وهي هكاك ماتسوقتش لواش يكون معصب حيث قطعت عليه ولا يدير الي بغا...
نزلات ايدها لكرشها لتحت وبدات تتماصي فيها وتنين...شويييي بقا شادها الوجع وولا مشا....هزات راسها وهي تنوض من تم...مشات ناحية التيليفون هزاتو كاتشوف فيه...قليييل فين كاتطفي تيليفونها حتى الى طفاتو مكطولش دغيا تشعلو...حتى دارت صبعها عالباور وهي تزفر ولاحت تيليفون ماشعلاتوش...
لتحت كي نزلت نزلات وباقي بتخنزيرتها ديريكت للبيت تحت نظرات لاخرين....تسنات تيليفون تا شعل مع شعل مع صونا مولاي حفيظ فالبلاصة كانت نيت باغية تهضر معاه...
ناديا : الحاج...
م.حفيظ : امضرا...اه عطيت لبشار نمرتك يهضر معاك تعطيها ليه...
ناديا : قطعات عليه وطفات ليا تيليفون حتى يانا...
م.حفيظ : واهيييلييييي...فيها ديك العصبية تخزيت ثاني ؟!..
ناديا : ولات تتهز عليا فصوتها...
م.حفيظ"غوبش ماعجبوش الحال" : ولواااه يا...اش يجيك مليح تانسالي ونجي فالليل نهضر معاها...
ناديا : هي خليها تاتجي راسها...
م.حفيظ : والي بيتي...
ناديا : واش عندو شي مشكيل ؟!..
م.حفيظ : ايييه را موقف الخدمة حتى يفك شي مشكيل على ما گاليا وليني عمارة الدار تبنتك مولات الخيمة الراس علاش يتوسد ريشو خاوي...ماعليه هي يحط راسو عالضص ولا راس بنتك...لا اله الا الله...ا بعض المرات وتايبان ليا والدين هي المسن على خوه (مسن هز حجرة كبيرة ملسة ههه)...
ناديا"جاب ليها ضحك" : ههههه...
قطع معاها وحطات تيليفون وهي تخرج من البيت مشات ديريكت لكوزينة فين كاينة لطيفة ورقية...وهما يسمعو صوت خطوات نازلة من دروج..تا وقفات عليهم كلهم ضارو عندها الا ناديا ماضارتششش لعندها...
"برلين"...
شاد التيليفون فايدو كاينقر بيه فوق المكتب ديالو...عينيه مفيكسيين فنقطة محددة وشوفتهم كانت حادة...دغيا تشكلو العروق فنواضرو وتورمو حجبانو اكثر بفعل التغوبيشة الي ضرب ...عمر شي حد ما قطع عليه ولا تصرف بحال هاد التصرف الصبياني الي دارت هي...يمكن هادشي ما يخليهش يصعر بجهد كثر من كلمة او جملة سمعها فوذنيه وهي "بعد مني"...هاد الجملة شعلت فيه الجهد ديال العافية...
بقى ينقر ينقر ينقر حتى حط تيليفون بجهد وناض بحال شي ثور كايوجد ينطح شي حد...ركب فسيارتو وكسيرا بجهد شاعل سيجارتو... صونا ليه تيليفون فطوموبيل شاف النمرة وطفا عليهم داك التيليفون يعيط الي بغا يعيط الله يجعلو يكونو البوليس لهلا يرد مهم جملة على قولته...وصل لدار وداز ديريكت لثلاجة جبد منها قرعة الما وجلس تا شربها كاملة على الله طفي او تروي داك العطش الي سبابو العافية الي شعلت فيه من لداخل...غمض عينيه شحاااال ووجهو مزيييرر...سنانو عض عليهم من لداااخل وبقا عاااض عليهم بحال شي حد كايبرررد اعصابو بديك العضة......
الفك ديالو كايبان كايمشي ويجي وهو مغمض عينيه تا حلهم لقا القرعة تكمشت فايديه والعرق نزل ليه....رمى القرعة ودفع الكرسي وناض ديريكت لفارماسي جبد منو المهدئ الي بقا عندو و الي حبسو عليه طبيب حتى يخرج ليه التقرير لحالتو واش ينقص ليه لادوز او يحيد ليه المهدئ بمرة...شرب ربع حبة وتكا مسند على لافابو حادر راسو كاينهج تا حس بالمفعول سرى ليه مع ذاتو...
اعدى حاجة عندو هي هاد التبرهيش الي سوقو خاوي بالنسبة ليه وتضخيم الامر وعدم فهم الحاجة...فالاخير حيد داك تريكو وسروال لاحهم فسلة الاوساخ وخرج لبيت جبد وحدين اخرين تا حس براسو مهدن شوية حيث راسو تبخ بالصداع وتبرزيط وعاد ماناعسش كاااع من ليلة امس لدااابا...وتلاح ففراشو خشا راسو بين زوج مخاد ونعااااااس....
"مراكش"...
تبسمات ليها رقية وعمتها وقالو ليها "دخلي"..كانت بسمتها باهتة وعينيها كيشوفو غير ناحية ناديا الي ماضارتش لعندها...واقفة على شغالها فالكوزينة ورامية ليها مشي...نغزات لطيفة ناديا الي ضارت شافت فلطيفة و قالت "لطيييفااا"..بنبرة صوت خلات حبيبة تحدر راسها ولطيفة تنهد وتغمز حبيبة لمن بعد يمكن فهمو انه مقلقة منها ودارو خمسة ففمهم وخرجو السوق...
لطيفة : اهيا تايبان ليا وجهك مسقطر...
حبيبة : ماماليش هي فيا شوية تالوجع...
رقية"شهقت" : هييي العادة هي الي مخلياك بلا عقل...
حبيبة"بحزن" : ياااك ادادا يااك...حتى نتي...
بقاو يرمشو وضارت لطيفة شافت ف رقية الي ماعرفت باش تبلات ورحعو شافو فيها مدلية شنيفاتها...هزت كتافها وشافت شوفة اخيرة فماماها وخرجت من الكوزينة مشات ديريكت لبيتها طلعات وسدات عايها...تلاحت ففراشها تاهي غير الفرق واحد جبد عليه وهي عيطات للدموع يتسابقو على وجهها...مافهمها حد او بالاحرى هي ماعاوداتش لشي حد باش يفهمها ويفهّمها...بقات هكاك عاطياها لبكاوات تا بردات...
وصل وقت الغذا وتقول واش طلع عندها شي حد قبل مايوصل الغذا...خلاتها فبيتها تا تفش على خااطر خاطرها ما نفنفتهاااش معاها...تا خوتها مخلاتهمش يطلعو عندها...
حلات عينيها من بعد تغميضة خفيفة..فقيها غير الباب الي تحل كانت رقية داداها قربات لعندها وجلسات جنب سرير...حطات ايدها على شعرها كدوز عليه بحنية...حنان ام رباات وكبرات...رقية بالنسبة لحبيبة الام الثانية حلات عليها عينيها وهي الي ساهمات فتربيتها...
حبيبة"تفوهاات ونطقات بصوت منخفض" : دادا...
رقية : ابنتي...هودي تغذاي...
حبيبة : مافيا ماياكل...
رقية : لا فيك..بتهبطي قبل ماطلع لماماك لقردة تاني وبدوزها عليك...اااهياتا...
حبيبة"عينيها غرغرو" : تخاصمت معايا...
رقية : هودي وبتصالحو...
بقات كترمش فيها شوي وهي تحرك راسها وناضت من فراشها تسناتها تا لبسات فرجليها ونزلات معاها البيت فين حاجين الغذا كانو دايرين طاجين البصلة وزبيب وشليضات وعصير الليمون وخيزو...دخلات رقية ودخلات وراها حبيبة منزلة عينيها جيهة ماماها ماقدراتش تشوف فيها خافت منها..وعارفاها مقلقة منها...
لطيفة : دخلي اعميتو دخلييي هههه...
وتقول ديك ناديووش خلاها ايوب واش هزات فيها الراس...ناديا حاااسة بيها بلي بيها شي حاجة ولكن مافيها باس تقرص ليها وذنيها باش تعلم تبقى ف مستوى احترامها ليها...جلسات على طابلة الغذا سماو الله وبداو ياكلو الا حبيبة الي الندغة عندها فيها عام...سالاو الغذا وهي تنوض رقية بغات تجمع شداتها حبيبة وكملات هي جميع تا مسحت طابلة وعطراتها ومشات الكوزينة حطت الماعن فالماشين والطاجين غسلاتو..يلاه قلباتو يتسقطر وهي تبان ليها ناديا داخلة بغات تهز كاس دير فيه فنيدة ديال راس...بقات حبيبة تشوف فيها تشووووف تا بانت ليها باغية تخرج...ماحست ناديا تالقاتها مرمية ليها على ضهرها معنقاها وتبكي...
حبيبة. : عاافاك اماما سمحي ليا..."دموعها على خدها"..
ناديا"الصمت"..
حبيبة : انا نگوليك ونتي حكمي..عافاك عاافاك هي هضري معاياااا..
زادت فنبرة البكاء حتى سمعوها لاخرين الي فالبيت عرفو بلي بغات تهضر معاها هما اصلا صيفطو ناديا بلعاني حيث شافو حبيبة تزيرت ماتصبرش وترما عليها...
لطيفة"فالبيت ضارت عند رقية ومدت ليها ايدها" : خبشي لباباك هنا هههه...
بقات معنقاها وتبكي...حتى هزات ناديا راسها وتنهدات كاتلعن فالشيطان...ضارت عندها حطات ايدها كطبطب عليها...
ناديا : سيري سبقيني لبيتي...
حركت راسها وهي كتنخصص وبعدات منها كاتمسح فدموعها بحركة قطعات لناديا قلبها خلاتها كاتنهد... قلب الام ديما هشيش الا من رحم ربي...سبقاتها لبيت هزات ناديا الكاس دارت فيه فانيدة راس شرباتها وخرجات..دخلات عليها لقاتها جالسة جنب السرير كاتفرك فصباعها...جلسات حداها وربعت ايديها كاتشوف فيها بشوفة جدية..وقالت "هضرييي"..
حبيبة"مسحت دموعها وحنحنت منضفة حلقها.وبدات كاتعاود ليها على الاتصال وعلى اشنو شافت والطريقة ديال هانزاده"..
ناديا : شكون هي هادي ؟!..
حبيبة"قالتها والعافية شاعلة فيها" : خدامة انجينيوغ معاه..وكانو بايتزوجو...
ناديا : ودابا ؟!..
حبيبة : مابقاش وتزوج بيا انا...
بقات تعاود تا وصلات ليغيگل الي جاتها تاهي قالتها ليها...قدرات ناديا تفهم انه الامر هرموني اكثر وتزامن مع الغيرة كمل الباهية...د
ناديا : ونتي هي وصلتي وقطعتي لداابا !!
حبيبة"حركت راسها"...
ناديا : ممم..."سكتت شوية ورجعت استانفت كلامها"..دابا لنفرض نتي شافك مع ايوب نسا وضحك معاك داك ضحك الباسل..بلاتي نبداو هيي شوي بشوي...وقطع عليك بلا ماتشرحي ليه اش كاين..بايعجبك الحال ؟.
حبيبة"حركت راسها ب لا"...
ناديا : بايعتيك فرصة وتشرحي ليه اش كاين وتفهميه ياك"حركت راسها"...ودابا ندوزو ليطاب تانية...الى شفتها دارت حركة ماعجباتنيش ولا مستقصدة تخرج غيرتي..منسمحش ليها..انا كبر من انني نخلي وحدة كادير فعايل البراهش وقلالات ترابي تغيرني وتخليني ندير حتى انا فعايل البرهوشات كثر...قيمتك اكبر من انك تخليها تغيرك بهادشي...يعني هنا را وصلات لمرادها اذا كان هذا هو المراد...دابا بقا لينا بشار...ماغاديش نگوليك نجي من جيهتو ولكن الي كايبان ليا هنا انه الفقرة الي مفقودة هي ديالتو...اشنو دار !؟..علاش خلاها ضصرات عليه ولا بصح ماردش البال حيث بعض العيالات ابنتي الى كان عندهم هادشي عادي وماتحط ليهم حد بتكون بسالة...كان عليك تجاوبيه وتشوفي اش بايگوليك...فهمي منو عاد حكمي وگولي شنو عندك ولا متگوليش بيني بطريقة حضارية وبعقلها بلا غوات وبكا وتهرنين...ولا گولي ليه خلي ليا وقتي وهو بيفهم راسو...تفاهمنا لحد هنا...بالنسبة ل بشار ك شخص انا كنشوفو قاصح بزاااف بتصرفاتو معاك وعلى قبلك ماكايبانش ليا بلي شي واحد الي عقلو صغير ويسمح لوحدة دير هاد التصرفات و عادي عندو...ماشي واحد الي يضصر عليه شي حد كيما كان فمابالك ب العيالات....
حبيبة "تنهدت" هففف...
ناديا : ماتبقايش تسرعي فبحال هاد الامور...هضري ولا علمي بلي بيتي تاخذي وقتك فحالة ماصبرتيش...وعلى كل الله اعلم بكل واحد...نوضي شعلي تيليفونك حتى يهضر معاك ولا هي يهضر سلكي وخلي الما منين يدوز وثقلي ثقلييي احبيبة وماتبينيش للواحد الضعف ديالك راه من تم منين يشدوك...فهمتيني..."حركت راسها"..واقلة عندو شي مشكيل على ما علمني باباك..موحال بايهضر معاك...
حبيبة"وسعت عينيها وقلبها طااح فكرشها مشاات الغيرة والتقليقة وناضت حبيبة الحنينة..حتى وقفات على طولتها " : ويلي اش واقع ليه ؟!...
ناديا"جاها ضحك وهي تحرك راسها ب لا حول ولا قوة" : ههه اييييه...
حبيبة"قوست حجبانها" : مامااا عفااك ماتبدايش...
ناديا : واخا مانبداش..ماعرفتش تا باباك ماعرفش گاليه عندو شي مشكيل موقف ليه الخدمة...
فالبلاصة خرجات من البيت كاتزرب طلعات مع الدروج تال بيتها مشات ديريكت لتيليفوونها وشعلاتو فالبلاصة غا شعل وهو يبدا قلبها كايضررررب...حست بحال الى خافت وتراجعت كاتصرط فريقها...خافت يصوني ليها ويصمكها معاها من تيليفون...تخراج العينين الي كان قبيلة تبخر فالسما...غا تكونيطا مع الويفي وهما يبداو الميساجات طن طن طن طن طنننن...ولاااات تحس بيهم كايضربو ليها فقلبها بالخلعة...جلسات جنب سريرها دايرة صبعها ففمها كاتكدد..واخا هكاك غا سمعات انه عنظو شي مشكيل قلق بالها...
نزلت عينيها لتيليفون بانت ليها البواط فيها نمرتو معيط اكثر من مرة...والواتساب خلاص...لكن بدون رسالة منو لا فالواتس لا فالعادي...دخلات ديريكت لمحادثة تشوف واش داخل...ماداخلش ليه اكثر من اربع ساعات وزيادة...صرطات ريقها مترددة واش تهضر ولا تسناهوتايصوني !!..بالها مامرتاحش ملي عرفت را عندو مشكيل...خلاها تورك ودوز الاتصال..لقاتو داخل وكيصووني يصوووني والو بدون مجيب...مشات الاتصال العادي تاهو صونات فيه ماجاوبهاش...رجعت صونات فالواتس والو مجاوبهاش...ماقدرتش ترسل ليه وهي عاد كانت مقررة ماتهضر معاه...قلبها للمرة الثانية كاينتاصر على عقلها انتصار ساحق...
وصل الليل...مشات لطابل دونوي وجلسات وهي دوز ليه الخط لاتصال عادي...فهاد اللحظة هو كان جالس وشاد تيليفون فايدو كايشوف فاسمها على شاشة ببرود...ورجع نزل عينيه كيشوووووف...طلق الخط كايسمع صوتها من بعيد...
حبيبة : بب بشار !!..الو بشار.."دارت صباعها على فمها عينيها غرغرو" الو كتسمعني...بابا گاليا عندك شي مشكيل...اش واقع ؟!..واش كتسمعني...بشااار...
خلاها كاتهضر تهضر تا ولات تشوف واش كايسمع...وهو يقطع عليها وطفا تيليفون بمرة...لاحو فالمجر وسد عليه....
كان خوفها اكبر من اي كرامة...كيف عرفات اش واقع ليه واخا ماعارفاش نوع المشكيل بالضبط خلاها تنسى اي خصام ومشكل و غيرة...قلبها ماهناهاش عليه...ماسمعات حتى صوت منو الشي الي خلاها تفهم فالاول او حسب اعتقادها وفهمها لشخصيتو انه شخص كايبغي تهضري نيشان بلا زواقات فالهضرة من لول داكشي باش هضرات هي كيف تطلق الخط لكن ملي مكانتش حتى اجابة شافت فالتيليفون لقاتو قطع الخط...عاودت الاتصال من جديد لقاتو طافي...تزدحت على طرف السرير والي فكرات فيه ماشي انه مقلق منها اول حاجة مشات ليها نيشان وحيث قلبها صافي وعليه شكات انه بيه شي حاجة مامشاش لبالها بلي دار ليها خو تصرفها نهااائيا...
حبيبة"عاودت الاتصال تاني نفس الشيء طافي...دارت ايدها على حنكها بقلق" : علاش قطع !! اش بايكون واقع ؟!..
بزربة خوفها تضاعف ماجاش لبالها ان المشكيل غايكون بسباب هانزاده كااع...مابقاتش كتفكر وتستنتج اي حاجة من غير انه خافت عليه..وخافت حتى لا يكون تعصب وطاح بكريز...ممكن يكون شكها فمحله وممكن يكون اكثر من هادشي...
سمعات دقان فالباب تا سمعتها قالت دخل عاد دخلات ناديا نيت ماقدرتش تدخل خافت لاتكون كتهضر معاه داكشي باش دقات من باب الاحترام...شوحيث طلعات بديك طريقة كاتجري مارتاحتش...شافت ناديا وجهها مبدل فيه اللون وعينيها تحتهم حمر بسباب البكا...
ناديا : دويتي معاه ؟!..
حبيبة"حركت راسها ب لا" : تطلق الخط بقيت كنهضر وقتع عليا..عاود صونيت ودابا طافي...
ناديا : بايكون مشغول لا ؟!..
حبيبة : ولباارح گاليا على اليوم عندو روپو...بايكون فالدار "حطت ايدها على قلبها ووسعت عينيها شوي"..عنداك يكون جاتو كريز ؟!..
ناديا شافتها خافت بزاف وهي طبطب عليها وجلستها وجلست حداها...حتى ناديا خافت لا تكون جاتو كريز بناءا على اشنو قالت حبيبة وقع كلشي غايشك بلي را جاتو...لكن ناديا كونها ام دورها تهدنها وتفقهها لبحال هاد المواقف خصوصا انه شافتها مخلوعة بزاف ونسات اي خصام وقع بينها وبين بشار...
ناديا : ان شاء الله مايكون والو...واصلا هو مولف وحدو يعني عادي بلا ماتخلعي...
حبيبة"هزات فيها عينيها مغرغرين ونطقات على نيتها" : هو دابا مابقاش وحدو...
ناديا شافت القضية ممسلكاش بهضرتها جربات المزاح باش تنسيها وتريح ليها البال على الله ترتاح...
ناديا : اييه هي صباح كنتي تحلفي بحلوفك ماتهضري معاه وبعد مني..ودابا ماشي وحدو..لا بنتي وحدوو اه بعد منك ودارها ليك على گد فمك هههه...
حبيبة"هزات صبعها كتحركو ب لا بزربة" : لا لا...ماگلتهاش بخاطري والله والله كنت معصبة اماما..."نزلت دمعة شاقة طريقها على خدها"...
ناديا"تنهدات" : حبيبة..ماما خليك ديما مسبقة الايجابية وبعدي من اي حاجة تخليك مأزمة فنفسيتك..ديما سيري بمبدأ الغايب حجتو معاه...شحاال ما تعطل بايعيط ليك ولا يسول فيك وتفاهمو ديك ساعات...نتي ابنتي تتباني ليا فحال الى وصلات نهاية العالم...كوني ايجابية شوية وكوني قااادة ماشي هي شوية المشاكيل بايخليوك تشكي ولا تخافي...اه تنعرفك من باباك فاش تيمرض تايتقلب ليك المورال ديالك...
"برلين"...
خشاه فالمجر وسد عليه...سند بايديه على المكتب وكحز بالكرسي شوية...عينيه حمريييييييين ومعسلييين بالشراب....صوتها الوحييييد الي كايدور ليه فدماغو دابا...صوت البنت الي تفتح ليها قلبه وعشقها عشق كبيييييير مخليه يضغط على راسو ويتحدى راسو فشي حوايج عمرو مادارهم ولا فكر يديرهم حيث ببساطة كانت حياتو فيها روتييين وحيد وهو الخدمة دار سفر لاجل الخدمة والشراب والمرض...حاول يطلق الخط ويجرب يجاوبها لكن ماقدرش يجاوبها حيث ببساطة اللسان الي يهضر معاها بيه مكاينش بفعل الشراب...الى قدر يهضر ممكن تفهم انه بيه شي حاجة وممكن تعرف انه شارب...ويمكن يقوليها شي حاجة ضرها وماتعجبهاش...خصوصا لا بدات تشكي وتبكي على ماوقع وهو ماشي فمورال انه يشد لخاطر لشي حد واخا تكون هي....
حتى نزل عينيه وكمش حجبانو بطريقة خلات عينيه زادو صغارو...حتى دفع بالكرسي مرجعو اللور وناض من تما ماشي بخطاوي ثقااال بزاااف...توقف عند الباب ديال البالكون الي مطل على واحد جريدة فيها الگازون فقط وشي غريسات كايتسقاو غير بالشتا...نزل ايدو بغا يخشيها فجيب السروال كاتفلت ليه ويعاود...عقلو مهزووووز بالشراب وبالحالة الي فيه...حتى لخاطى لداك الجيب ماعندو ليه...نزل عينيه مغووببش تا خشا ايدو حساب ليه غايلقى الباكية لكن مالقاهاش...زفر بجهد وضار جيهة المكتب وهزها من تما...هز سيجارة شعلها بين ايديه نتر منها نترة طوييييييلة...وهز عينيه كايشووووف قدامو فالعدم...حيث العقل غايب ماهواش هنا...جملة وحدة الي منها خلاتو يرجع لوووور فنفسيتو ويرجع يفكر فهاد الجملة بالضبط....
"بعد مني"...
يمكن هي تجينا جملة عادية تتقال بضحك بالغلط بالغضب لكن عند البعض جملة كاتجرح...انما بالنسبة ليه هي جملة شاف فيها نظرة مستقبلية...الى عرفات بالمرض ديالو والى عرفات بالحادثة الي وقعات وانه قت.ل باه...اول حاجة غاتكون هي تبعد منو...مامستاعدش يخسرها ماكيشوفش راسو انه يخسر حبيبة وتبعد من حياتو الي ولا كيشوفها بيها...الي ولات هدف انه يتعالج ويتمم علاجو باش يولي انسان سوي...مامستاعدش يعاود من جديد...مايقدرش يبعدها عليه...
كمش عينيه شوية بفعل الالم ملي كايتني صباع واحد الايد...ماعرفش مالها حس بلي بقات كتضرب مع الارض فاش جاتو الكريز ملي فاق من النعاس بنهار....
هزات البويواغ خوات منو الما مغلي فاالكاس فيه عرش وريقات دياال اللويزة...حطاتها فبلاطو وهزاتو خارجة من الكوزينة فطريقها تلاقات ب بطيفة كاتجمع فشعرها وخارجة تاضحك من البيت مع ايوب ورقية...
لطيفة : اهيا لمن هاديي...
ناديا : لحبيبة...
لطيفة : مالها...
ناديا : هي مبرزطة شوية راكي عارفة...والمورال طايح وليغيگل...
لطيفة"عضت شنايفها" : الحبيييبة...واخا زيدي نطلع معاك نشوفها...
طلعو بزوجات لبيت حبيبة كيف دخلو عليها مالقاوهاش حتى سمعو صوت الما فالدوش...حطات ناديا اللويزة فطابل دونوي وجلسات هي ولطيفة حتى خرجات حبيبة غاسلة وجهها وكتنشف شافت عمتها وحركت راسها...شيرات ليها حداها...وجلسات...
لطيفة : شوية كبيدة ديالي..
حبيبة : شوية..."تنهدت"...
ناديا : شربي شوية تالويزة وهبطي گعدي معانا...
حبيبة : والله مافيا عيانة اماما والله....
لطيفة : وهي هبطي دابا يعيط ليك...ولي حارة شوية اه تنعرف رحمانيات حارات وصبارات...
حبيبة"تبسمت بحزن" : انا هشيشة هه...
لطيفة : ودابا يحجرك الزمان هههه...
ناديا"وقفات" : هبطي يلاه ماما...
تنهدات بقلة حيلة وناضت هي وعمتها...هزات تيليفونها ونزلات معاهم...لقات ايوب فالبيت مع رقية وخوتها...جلسات بين معتز ووردة معنقينها ومخشيين فيها تقولي حاسين بيها حزينة...حطات راسها على راس وردة...
وردة : كي بقيتي احبوبتي...
حبيبة"باستها" : شوية حبيبة ديالي...
معتز : امتى يجي عمو بشار...
حبيبة"قلبها ضررررب بجهد حط ليها العسل على الجرح..شافت فناديا الي غمزتها وشافت فعمتها وهي تنزل عينيها لعند خوها" : ماعرفتش...
وردة : تعطل بزااف كان كايجي دغيا...
حبيبة"تنهدات" : حيث خدام وممساليش..."سكتت شحااااال تا سهات وهي تنطق تاني"...يمكن معطل...
جلسات معاهم حتى جا باباها حطو العشا الي كالت فيه زوج معالق بالحساااب...وناضت مستاذنة باش طلع لبيتها...ترجع تصوني عليه...لكن نفس الشيء كاتلقى تيليفون طافي...دخلات لدوش تبدل الفوطة الصحية...وخرجات سمعات تيليفونها كايصوني مشات منقزة من بلاصتها لعندو حساب ليها هو لكن كانت غير صاحبتها الي معاها فلافاك كاتأكد عليها تحضر غذا ل خيث عندهم اكسبوزي مع الصباح...حدها قالت ليها واخا واخا من فوق خاطرها حاسا براسها حتى هاد الاكسبوزي صعيب تمشي ليه وهي ماعارفاش اشنو واقع لبشار واخا باها طمنها بلي مشكيل وغايتحل على حسب ما قاليه لكن هي خاطرها مايهناش الى ما سمعات صوته واخا يتعصب عليها المهم مايكونش طايح بكريز...واحساسها فمحلو هاد المرة النوبة جاتو فالصباح....
صبح الصباح وكل مازال على حالو وهنا نخص الذكر حبيبة الي مانعساتش بتقلاب كل مرة تنوض تصوني واخا معطل الوقت جربات تصوني بدون مجيب...وصلات الساعة الثامنة صباحا ناضت من بلاصتها ودخلات لدوش بدلات عليها وغسلات حالتها غسلات وجهها مزيان باش توگض راسها...خرجات من دوش ومشات لفاليز الي باقي لدابا مفتوحة هزات منها قبية وسروالها فالاسود لبساتهم مشطات شعرها وجعاتو...ضارت ناحية صاكها هزاتو ودارت لوازمها فيه وهزات اوراقها وتيليفون دارت فوذنيها على الله يصوني لكن نفس الشيء حتى تعصبت واخا قلبها ماهانيش عليه لكن حاولت تجمد قلبها تا يعيط....
حبيبة : انا نبقا هيييي نتفقص ونبكي...عييييت انا كاااع...
لاحت تيليفونها فصاكها وخرجات من البيت نزلات ديريكت لتحت تلاقات باها فطريق خارج كايتمتم بالباقيات صالحات حيث صلى الصبح...سلمات عليه ودخلات البيت تسناه...تا دخل هو وناديا هازة صينية فايدها وهو وراها هاز البلاطو فيه الفطور...
حبيبة"يصوت مبحوح" : دادا فين هي...
ناديا : مشات صباااح مع عمتك لبلادها...باتشوف معاها بنتها وتزررها تالعشية وبتجي....
حبيبة"حركت راسها ونزلت عينيها كاتعضعض فشفايفها عرفوها رجعات تتفكر حتى نطق باها"
م.حفيظ : معاش خارجة ؟!...
حبيبة"هزت عينيها" : ممم؟..مع الثلاثة...ماعرفتش واش بنكمل اكسبوزي ونرجع ولا لا "تنهدات"...مورالي ماشي تال تم...
م.حفيظ : اهيا اه هضرنا البارح...
كملات او كمل هو فطورو وناضو بزوج سلمات على ناديا وخرجات هي وباها...فالطريق هزات تيليفونها تاني كان يحساب ليها غاتلقاه طافي حتى سمعاتو كايصوني وهي تغوت مخرجة عينيها تا فرانا باها ماعرف راسو باش تبلى...
حبيبة : تايصوني ابابا...
م.حفيظ : وليني راك...
هز ايدو بالخلعة على شوي يصمكها معاها ههههه...بقات موسعة عينيها كاتسناه يجاوب بقا يصوني تا قطع على خاجرو...زفرات وحطت تيليفونها...
م.حفيظ : اخليه دابا يصوني...
حبيبة.: نعرف هي اش واقع...
م.حفيظ : ياك صونا ايوى هنا عرفيه شعل وبلي بيخير...الباقي دابا عليه را بايصوني عليك..
وقف السيارة قدام لافاك وضار عندها...
م.حفيظ : يلاه ابابا نزلي...بيت نمشي دغيا عندي شي خدمة فدار دباغ تاني...
حيدات سانتيغ وقربات لعندو باستو فحنكو وباست ليه ايدو...طبطب عليها تايضحك على هبال بنتو وعقلها الي باقي طري وماعارفش بحق الدنيا وناسها...
"الرحامنة"...
مع اذان الظهر...وقفات سيارة ديال عبد الرحيم اخ توريا فالفيرما لداخل...وهو ينزل منها وفالجيهة الاخرى نزل المحامي ديال توريا والباب الي لور نزلات سيدة فالستينات من عمرها هي الزوجة ديال المحامي...لقاو عبد القادر فاستقبالهم هو ورضوان...
ع.القادر : مرحبا بسي القرافلي زارتنا البركة...
القرافلي : الله يكبر بيك الحاج...
سلم على رضوان تاهو وسلمو على مرتو غير بتحية الرأس...تقدم قدامهم وتبعوه كاملين تا دخل بيهم لصالون الكبير وجلسو...رحبو بيهم وهو يخرج رضوان علم كريمة تجيب تعلم توريا وتنزلها معاها...ورجع جلس حدا باه مرحب بالناس الي جاو زيارة لتوريا ومباركة لعبد القادر زواجو...
شوية وهي تم نازلة كريمة ومنزلة معاها توريا الي مزال كاتمشى بشويا واخا كاتتماثل للشفاء...حتى مشات معاها...دخلو لصالون...
توريا"مبتاسمة" : مرحبا السي القرافلي...
القرافلي : الله يكبر بيك الحاجة كي بقيتي شوية...
توريا : اللهم لك الحمد..."سلمات عليها مرتو" الحاجة سميرة لباس عليك..زارتنا البركة...
سميرة : ترحب بيك جنة الحاجة كي بقيتي شوية...اه ملي علمني الحاج وانا بيت نزروك يلاه كتاب...
توريا"كدور فراسها" : وبخير بخير...الله يجيك الخير الحاجة...بكري رتاحي...
ع.الرحيم : واحد الحاجة عيدة لباس ؟!..
ع.القادر : وبخير...لگيتوها مشات مع مرت ولدي عد طبيبة ونيت تعبر سكار طلع ليها يامس بالليل...
ع.الرحيم : مايكون باس...
هضرة تدي وهضرة تجيب...دخلات ضيافة عن طريق رضوان كاتمد ليه كريمة ويدخل...
توريا : ايوى كي نديرو دروك ؟!..
القرافلي : داكشي تاتجي عندي لمتكتب ونهضرو فيه...الخبرة ضروري منها...ماعندك ماديري...وداكشي الي وراه يكون خير نحاولو نستعطفو القاضي...
توريا : بحالاش...
القرافلي : تاتجي عندي ونهضرو...
ع.القادر"كمش حجبانو وضار لهيه ماعاجبو حال لهادشي...في حين فنفس الوقت كانت اشراق طالعة لبيتها يلاه جات من الكوليج...وبدلات حوايجها وهو يصوني ليها تيليفونها بنمرة غريييبة...كمشات حجبانها وهي تهزو وجاوبت مع قالت الو وهي تسمع صوته...
حميد : يا بنت القح***...ضصرتي ؟!...
اشراق : شكون معايا...
حميد : الي غايح** مك ابنت الكلب...علاش مابغيتي تجاوبي ؟!
اشراق : راني مخطوبة الزمر عطيني تيساع ياك هادشي علاش متافقين ؟!..
حميد : متافقين تخطبي نعطيك تيساع...
اشراق : ايوى را مخطوبة...
حميد : الخرا الي مخطوبة...علاش مافراسيش را تفرتكت جقلة ؟!..
اشراق : شكون گالها ليك ؟!..
حميد : ديريها زينة توصل...
اشراق"غمضت عينيها بغات تبكي" : اش بغيتي دابا..مابقيتش بغيت ندير داكشي احميد عافاك..
حميد : بغيتك نشوفك توحشتك داكشي مابقى عندي بيه غراض..
اشراق : علاش تشوفني تاني...
حميد : وتوحشتك مانشوفكش ياك مابقيتيش مخطوبة.. وا صافي اجي عندي انا الي ليك احبي...
اشراق"الصمت"...
حميد : تجي ولا ندير شي عجب حدا داركم...غا مرة مرة ماشي بزاف...ادلمك را مقودة عليا باغي نتكوانا فشي قنت وفكرت فيك...
اشراق"صرطت ريقها" : م ماشي دابا...
حميد : نديرو شي وقيت ؟!..
اشراق : مابغيتش احميد...
حميد : وبغيتك..باغي نزيد نتعرف عليك عيني فيك مشهيك ومشهي نعيش معاك دوك ليام لولة...ماعرفتي نتفاهمو ونتزوجو...
اشراق : غادي نقطع غاديا نقرا عما جوج...
حميد : نوصلك احبي...
اشراق : لااا..غادي يوصلني عمي رضوان...وياك تبان ا حميد....
حميد : واخا تالليل ونهضرو...تقطعي عليا نقطع لمك البزازل....
قطعات عليه ماعطاتوش راس الخيط...من ناحية خافت منو الى مابغاتش يشوهها ومن ناحية كاتقول لا مانمشيش معاه ورا تاحد ماغايعرفني من الفيديوات حيث وجهها مكتبينوش....
وصلات الثلاثة ديال العشية...من بعد ما سالات اخر حصة ليها...خرجات من لونفي راسها بغا يطرطق....زفرات بضيق باغية امتى تخرج...شعلات الكونيكسيون تشوف شكون متاصل بيها واش هو رجع عيط...كيف دخلات لقات نوتيفيكاسيون بزاف واحد منهم هو الي بان ليها خلا عينيها يخرجو...لقاتو متاصل بيها مرة وحدة فالواتساب...
حبيبة : هييييييي...ويلي..
ماتردداتش فالبلاصة دوزات ليه وبعدات من حدا الناس الي خارجين...لقاتو ماداخلش اصلا...عيطات ليه فالعادي لقاتو طافي...
حبيبة"بالفقصة" : واش ولينا لاعبين قاشقاش هنا ؟؟!...
خبطات رجليها فالارض ماعرفت فين ولا امتى تشدو...كاتغبر يبان يبان تغبر هي...خرجات من لافاك لقات باها كايتسنى فيها ركبات معاه تاني...
م.حفيظ : عيط ليك بشار ؟!..
حبيبة"حركات راسها" : لا..لقيتو مصوني ليا وكنت داخلة لونفي عندي اكسبوزي حيدت كونيكسيون...بففف...
م.حفيظ : ماوقع باس دابا يعيط...
حبيبة"كاتشوف فيه" : عيط ليك ؟!..
م.حفيظ"كايشوف فطريق" : اوهووو يا...اشاوا بيتو ولا باني..
عوجت فمها ورجعات تقادت فبلاصتها...حطات راسها على الزاج كاتشوف فطريق...وتفكر فهاد الحياة الي ولات عايشاها...او حب حبات كان من نصيب هاد الانسان...ظروف غريبة تلاقاو فيها..ظروف مشكلة بغاو فيها بعضياتهم...مقاتلين باش يكونو فحياة عادية مافيها لا مشاكل لا عقد...مقاتلين باش يكونو ازواج طبيعييين...
تنهدات بالصوت وربعات ايديها كاتشوف فطريق حتى وصلو...تسناها تا دخلات ومشا هو لخدمتو...كيف دخلات لقات غير ناديا وحدها فالدار...
ناديا : تغذاي ؟!..
حبيبة : مافياش...
ناديا : وانا تسنيتك حتى تجي ماتغذيتش...
حبيبة"بقات فيها" : واخا هاني جايا...
تبسمات ليها بحنية...طلعات حبيبة لفوق بدلات عليها كلشي وطرفات حالتها وخرجات هزات تيليفونها ونزلات ديريكت لكوزينة لقات ناديا كاتحط...
حبيبة : نتغذاو هيي هنا بلا ماتدي لبيت...
ناديا : يا دلي داكشي الي بندير...
حطات الغذا ومرة مرة حبيبة كاترمي وذنيها لتيليفونها لا يصوني عليها ولا يرسل ميساج...حطو الغذا الي كان عبارة على مرقة بدجاج وزيتون والفريت فالاير فراير وصالاد...جرات الكرسي وجلسات هي ومها...بدات كاتاكل غير بنقيب حتى هزات ناديا عينيها وقالت ليها "كولي"...
حبيبة : هاني تناكل...
ناديا : وماكلة هادي ؟!..
حبيبة"بقات تحرك ففمها لداخل حتى حطات فرشيط" : لقيت بشار مصوني ليا...
ناديا : ايوى ؟!..
حبيبة : صونيت ليه لقيتو طافي...مافهمتش علاش تايدير هاكا..الى بيه شي حاجة نعرف...ولا مامساليش يخليها ليا فواتساب...ماخلا ما صونا..صونا بحال تگولي تايقطر عليا...
ناديا : كون واقعة شي حاجة توصل توصل...
حبيبة : عرفت وهادشي الي مخليني مرتاحة شوية..ولكن "سكتت"...
ناديا : مالكي...
حبيبة : ماعرفتش...وليت تندير شي حوايج بلا منشعر اماما...
ناديا : بحالاش ؟!..
حبيبة : بحال گبيلة ملي لقيت تيليفونو خدام ماحسيتش حتى غوت وبابا حدايا "تزنگات"..حتى طلعات معايا عاد عرفت اش درت...
ناديا : ههه ويلي ومالها اش فيها...
حبيبة"نزلت عينيها" : عيييب اماما..قدام بابا اه حشومة...
ناديا : هادشي عادي..راجلك وخايفة عليه..تصرفات ناتجة من ردود افعال...باباك ماغاديش تجيه عيب حيث هازة الهم لراجلك...بالعكس هادشي غادي يعجبو...الي ماغاديش يعجبو هي الى قللتي الادب ولا الاحترام بصفة عامة..."حطات ايدها على ايد حبيبة مطبطبة عليها"...من الاخطاء نتعلم اماما...تفاهمنا...
حركات راسها مغمضة عينيها...كملو وناضت جمعات هي طابلة والكوزينة...استاذنات من ماماها وطلعات ...تكات ففراشها شادة تيليفون فايدها عاودات صونات ليه تاني طافي...حاسة بتعب شديييييد...مانعساتش الليل كلو..وتعب القراية والتفكير وشلا ماتجمع...كاتحس بعينيها كايلصقو بالنعاس...شافت حتى عياات وهي تستسلم للنوم...مافيقها غير صوت التيليفون ناضت شاهقة شادة على صدرها وكاترمش كانت كاتحلم شي حلم ماهواش كون ما تيليفون كون عقلها خرج...
بزز باش توضحات ليها الرؤية وجاوبت ماشافتش شكون حساب ليها هو حيث بقا بالها معاه غايرجع يصوني...
حبيبة : الو بشار...
لطيفة : هو هذا ههه....را العشا قرب ياذن ويلي...
حبيبة : العشا ؟. "شافت ساعة لقات بصح قرب العشا ياذن"..نعست بزاااف !!!...بفففف...
لطيفة : وغيبتي جا بوغطاط ورجع...
قطعات معاها وبقات شحال كاتحك فعينيها ووجهها وتفوه...اكيد مشات لواتساب تشوف واش صونا ولا خلا ليها ميساج مادخلش من صباح...زفرات بتعب وقلة حيلة وناضت من فراشها بدلات تاني وتوضات وغسلات وجهها وخرجات...جاها البرد لبسات عليها قبية ديال دار...دارت القب على راسها...خشات رجليها فبانطوفة وخرجات من البيت..نازلة وتحك فعينيها وتفوه...حتى وقفات عند راس دروج..كاتحس بدار مافيها حد...جمعات حجبانها وبدات تعيط...
حبيبة. : ماما !!..
عاودات عيطت والو دار كايتسمع فيها غير صوتها...هزات عينيها جيهة صالون بان ليها ضو شاعل..مشات ليه يلاه حطت بانطوفتها ودخلات مع ضارت وسعات عينيها وشهقت حاطة ايدها على صدرها وقلبها بدا يضرررب...
كان جالس مفرق رجليه حاط ايدو على ركبتو كايدور فتيليفونو ومسند عالحايط...الغوباشة ماخاطياش ملامح وجهو...
بشار"هز حاجبو..عينيه كانو كيشوفو فالارض غا حس بيها دخلت.." : لحگي عندي لهنا..."هز عينيه فيها" نشوف بلان ملتك كيفاش...
يتبع...
التعليقات
لا توجد تعليقات بعد، كن أول من يعلق.