عروس الجحيم الجزء 91

الانسان راه يعيا يصبر غايجي واحد الوقت ينفاج.ر...كاين الي صبرو قليل وكاين الي عاض فالصبر وكاين الي متعرفيه واش صابر ولا غير مدوز عادي حيث فايت عايش ما كثر من هادشي وكايجيه عادي..يمكن هنا نجيكم كانعني بشار شخصيا ويمكن كنعنيك نتا يالي حال عينيك وكاتقرا هاد الحروف...وكاتعيش مع هاد الحدث او الاحداث يا حاط راسك بلاصتهم يا عايش فحالهم يا عندك فضول تعرف اش غايكون...

شوي بشوي بداو عينيه كايتحلو...ضبابة مغممة ليه عينيه...كايقشع غير خيال شي شخص قدامو...وصوت بعييد...مع الوقت بدات كاتوضاح الرؤيا حتى قدر يميز شكون وصوت اش كيقول...ماعرفوش كان غير شخص داخل يصلي حالو حال اي واحد بغا يصلي تما...

هو"شخص مسن شوية" : هانيا اولدي ؟!..

بشار"بقى كيشوف فيه حتى غمض عينيه وحرك راسو تا حس بمخدة تحت راسو دارها ليه ملي لقاه طايح"..

هو : كنت داخل نصلي لقيتك بهاد الحالة...اه عيطت لسيدة الي تادير الميناج هنا هي الي مشات تعلم شي حد يجي يشوفك...درت ليك هاديك المخدة تحت راسك ماعرفتش هي درتها وصافي...الله يشافي..

مازال كايهضر وهي تدخل سيدة مع واحد الفرملي جايب نقالة باش يهزوه لمستعجلات حيث فاش دخل سيد لقاه فاخر ثواني النوبة...يلاه تحنى الفرملي وهو يوقفو بشار بايدو...

بشار : crise épilepsie...ديجا Diagnostiquée..

الفرملي : داكوغ موسيو...الله يشافي...

رجع الفرملي منين جا وبقا بشار هكاك مجبد...السيد الي حداه رجع كايصلي غير كمل وبقى كايسبح ومرة مرة كايشوف فبشار الي بقى هكاك حتى بدا تيليفونه كايصوني جبدو بزز ايديه فاشلين وصل وطلق الخط تا جاوب بصون مدعدع باين عيان...

هاشم : فينك هاني فالكلينيك...

بشار : لحگ عندي لجامع هنا...

هاشم : واخا...

قطع معاه وداك سيد كمل وهو يقرب عندو تحنى وطبطب عليه على كتفو...وقال...

هو : الله يجيب الشيفا...

بشار"شد ليه ايدو وطبطب عليها ماعرفش اش يقول من غير " : شكرا...

هو : مرحبا ولدي...حتى حاجة ماتستاهل فهاد الدنيا من غير تكون صحيحتك لباس الباقي يتحل والى ماتحل لهلا يحل والديه كون غا نتا هاني فصحتك...الله يشافي والله يعطيك على گد نيتك...كانت زينة ولا خايبة...

قال هاد الكلام ومشا راه مكيعرفو ما حضر ليه ما تاحاجة فقط ملي لقاه فالمسجد شاداه لاكخيز...الى كانو ناس فحياة بشار اقرب ناس ليه خايبيين بزاف ماشاف منهم غير العذاب النفسي...فكاين ناس لاقاهم بيه الله فهاد الاونة الاخيرة وراوه الوجه الثاني ديال الانسانية...عرف وتأكد انك راه غاتلقى الخير فالبراني...وماشي غير البراني الي تلاقاه خايب راه كاين تالعكس تلقى البراني مزيان والي ليك خايب...

هاشم"حط صباطو وهو يدخل طل براسو تا لقاه مجاابد وداير دراعو على عينيه" : سلاام عليكم...اتا مالك ؟ ياك لباس ؟..

بشار"حرك راسو وصافي مافيهش مايجاوب عارف هاشم غايتفهمو"..

هاشم : لكريز !؟..يارب السلامة.."تحنى لعندو وقاسو بايدو"..شوية دابا ياكما عيان بزاف نعاونك طلع لفوگ ترتاح شوية ؟!..

بشار : لا.."سكت شوية وعاود كمل"..ناعسة حبيبة لفوگ..مايمكنش تشوفني مكرفص...

هاشم : وراك تاتبان عيان خاصك ترتاح...

بشار : ماشي مشكيل مولف...

هاشم : كي بقات..ياك هانيا هي بعدا...

بشار"حرك راسو"..

هاشم : لا حول ولا قوة إلا بالله...

حيد بشار دراعو بغا ينوض وهو يوقفو هاشم زعما تسنى تانصلي ونخرجو...هاشم مصلي غير بغا يزيد ركعات لله ونيت باش يزيد يرتاح شوية...داكشي الي دار صلى تحية المسجد عاد تبعهم زوج ركعات اخرين...عاد مشا لعندو لقاه ناض وقف كايمسد فعينيه شعرو تخربق شوية وباين فيه العيا نيييت...حط ايدو عالحايط تسند...

هاشم : بشار سير ريح مع راسك..مرتك دروك خاصها تكون ناعسة ونتا كذلك..

بشار : لا..باغي نتحرك لدار نجيب ليها باش تبدل..مزيرة الوقت اهاشم...مزيرة...

هاشم : يلاه نديك ونجيبك...

بصح جاب الله هاشم الي غايعاونو حيث هاد ساعة وحدو ماغاديش يقد ماشي حيث عيان ولكن حيث مخربق فراسو...تالف ومعصب وعاد طايح بكريز...قدرة تركيز وجهد مكايناش...مشا حتى سول عليها فالشومبر قالو ليه راه متكية وسمكن نعسات وراها مستقرة خلا ليها ميساج عند يعلموها بلي مشا يجيب ليها ماتلبس...حاليا مايقدرش يدخل عندها وهي ولات حافضاه كيف كايولي ملي كاينوض من الكريز...مشا لطوموبيل هز سوارت دار ورجع ركب مع هاشم...داه ديريكت لدار دخل هاشم كايتشناه وهو مشا لبيت مع دخل بان ليه الفراش مخربق داز لماريو الي مقابل مع بلاصتها بانت ليه ديك البقعة حس بقلبو مشا وجا تا جاتو دوخة...

ضار دغيا حل الماريو مشا لجيهة بيجامات ديالها جبد وحدة باقي جديدة نيت كان جايبها ليها هو نيت...هز ليها ملابس تحتية غير قلب ولقاهم ماعارفش فين كتحطهم اصلا...كاع الي تحتاج هزو دارهم فواحد صويك صغير ديالها...حط صاك لهيه وهو يمشي لفراش جر داك تحتي كامل جمعو حتى كان غايخرج يديه لماكينة صابون وهو يجلس بجهد فوق ناموسية بالعيا...هز ايدو كايدوز على وجهو وعينيه وايد باقي شاد بيها ليزار...كيفاش كان غايدير كون عاود طاح تاني هاد البيبي ؟!..

جبد تيليفون من جيبو شاف الساعة وقت الفطور خاصها تفطر وخاص فيتامنات ديالها ودواها...ناض بزربة جمع داكشي..شرب دواه تاهو وخرج عند هاشم نزلو من الدار وزادو مع طريق حتى..

بشار : بلاصي هنا...

هاشم : اش بغيتي انا نجيب غا ريح اصحبي...

بشار"رجع حط راسو على الكوسان وجبد من جيبو فلوس عطاهم ليه بعد ليه هاشم ايدو"..

هاشم : مخبزة نيت ؟..

بشار : زيد معاك رايب تم...

حرك هاشم راسو ونزل حيث كان وقفو قدام مخبزة نيت مع كانو يلاه باقين حدا العمارة...تقدا اش خاص وزاد نيت هاشم من عندو...ورجع ركب توجهو ديريكت لمصحة...جاي على عينيه حيث خلاها وحدها...غير وصلو طلع ديريكت لعندها...حل الشومبر وهو يدور عند هاشم...

هاشم : قضي الغراض انا هنا ماندخل عندها تاتجي سعيدة وحسام...

بشار"حرك راسو ودخل...مايقدرش هاشم يدخل حتى تلبس ماعرفش واش مستورة ولا لا...اما بشار غير دخل لقى صقييل واحد الهدوء زوييين فالغرقة...قرب لعندها بانت ليه مغمضة عينيها...حط صاك فوق طابلة الي حداها بشوي ومشا جلس حداها...وهي تحل عينيها وشافت فيه...

حبيبة"بنبرة منخفضة" : بشار...

بشار"عاقد غوباشتو" : شوية ؟!...

حبيبة"حركات راسها"...

بشار"بعدم ثقة" : حبيبة !!؟..

حبيبة"فيكسات فيه شوفة" : ماثقتيش بيا...

بشار"ماجاوبهاش"..

حبيبة"تنهدات" : والله حتى بيخير...ماحاسة بوالو هي فيا نعاس ومابيتش نعس حتى تجي...بايخصني نبدل حوايجي ونغسل...تبرزطت...

حرك راسو وهو يوقف مد ليها ايدو...كان مسول طبيبة قالت ليه ماشي مشكيل الى ناضت دابا الى غير طواليط لكن مع الحدر...اصلا كانت قالت ليها غير ساعتين وتقدر تمشي...عطاتو ايدها وهو يتحنى وهزها بين ايديه...قاد ليها سيروم ودخلها لدوش حطها فوق لاشاص وخرج جاب ليها صاك الي فيه حوايجها...حطو ومشا لعندها بدا يهز ليها ف حوايجها حيد ليها العباية ووصل لتحتي وهي تحبسو...

بشار : ؟؟...

حبيبة : حشومة..مابيتش نعذبك...

بشار"دار فيها ديك شوفة ديال يا راجل ههه" : لا مرتاح مرتاح..ماشي مشكيل..(بغا يحيد ليها شورط وهي تشدو هز فيها عينيه مخنزر طالع ليه الخرا فوق خرية)..تركني على عدو ربي لارض يا حبيبة...

حبيبة"بصوت مغبن" : علاش تتغوت عليا !!..

ماردش عليها...حيد ليها الفوقي كامل تا ولات عريانة من فوق قدامو...واخا نعسات معاه وكاتدور حداه معرية غا كتعرا كلها كاتزنگ...عضت شفايفها وصرطت ريقها خلاتو يكمل...جاب ليها سوتيان قادهم ليها وهي تسدهم راسها...لبسها ديباردو ولفوقي ديال بيجامة واخا بالكمايم كانت مبردة...

حبيبة : بيت ما دافي باش نتوضى...مانقدرش ندوش دابا حتى نولي شوية...

وقفها حتى حيد ليها شورط بكلشي ليه باغيا تقوليه لا خاقت يسوط فيها...جلسها فوق لاشاص ومد ليها التيو ديال الوضوء وهي تشوف فيه وشدات ليه فايدو...

حبيبة : مالك ؟!..

بشار : ؟؟..

حبيبة : وجهك عيان...عارفة مانعستيش مزيان وفقتي بكري والخلعة ولكن وجهك تايبان ليا عيان العيا الي تايكون فيك بسباب الكخيز...(عينيها غرغرو بخوف) جاتك الكخيز...

مايقدرش يكذب عليها ومايقدرش يقوليها راه جاتني...داكشي مناش خاف هو الي وقع...تحنى جبد ليها الجيل انتيم باش تغسل عطاه ليها وخلاها وخرج ماعطاها حتى جواب...دق الباب عطا الاذن وهي تدخل الفرملية جايبة الفطور..حطاتو وخرجات وهو دخل لعند حبيبة لقاها يلاه غسلات لتحت ونقاتو...تحنى جبد ليها فوطة مدها ليها وضار خلاها تنشف براحتها هز باكية ديال فوط صحية عطاها ليها..شداتها وجهها حمر اما هو كاع ماتسوق ليها متبع اش قالت طبيبة حيث قالت ليها ديري فوطة تاتشوفي واش باقي كاتنزفي ولا لا...غير لاحتياط...لبسات كيلوطها بيها وهو يتحنى حطات ايديها على كتافو تا لبسات سروالها...

نقدرو نقولو كاع وسائل راحة بالحرف كايديرهم معاها...واكل دق عيان ولكن صااابر...تا بدلات وغسلات وجهها حكات سنانها بشيتة الي تما كانو حاطينها جديدة مع المعجون اسنان...نشفات وجهها وهو يهزها بين ايديه داها لسرير حطها وقاد ليها المخدة تحت رجليها وغطاها...قاد لاكليم بردها شوي باش ترتاح...جمعات شعرها وقادت حالتها ولات تشعل وفيها ريحة نقا...ومرتاحة هذا هو المهم عندو...قرب ليها طايلة الفطور جاب ساشية حط ليها كرواصون و مع الفطور كانو جايبين ليها عصير وحليب سخون...وتخربيق كلينيكات..هو ماقنعوش زادها من المخبزة...هز ساشية ديال دوا...

بشار"كحز ليها عصير البرتقال" : شربي...

هزاتو تكات عليه كامل كانت عطشانة...عاد عطاها دوا لول...وكحز ليها فطورها الباقي...بقات كتشوف فيه وهي تخسر سييفتها وسكتت باش تقوليه شي حاجة سكتت...حتى ضار هز ساشية جبد منها سطيلة ديال رايب وحطها ليها تقولي شافت جنة ونعايمها...

حبيبة : الله...

بشار"كحز ليها خبز": ماشي وحدو...

هزات كرواصة وبدات دوز بيها الرايب...هز عينيه فالسيروم بان ليه قرب يتقادا...جبد ليها تيليفونها هو وشارجور ديالو دارو يتشارجا حداها ضارت شافتو وهي تشوف فيه ورجعت حدرت راسها...خلاها كاتفطر وخرج كايجبد من جيبو باكية الكارو...بانت ليه فرملية خارجة من المكتب ديالهم هز صبعو طرطقو تا شافت فيه وحرك راسو ناحية الغرفة...

بشار : سيروم...

تبسمات ليه حادرة عينيها ومشات ديريكت لشومبر ديال حبيبة اما هو ضار بان ليه هاشم واقف بعيد وصل عليه طبطب عليه وهما ينزلو باش يشرب قهوة كحلة يقاد بيها راسو ويرتاح شوية حيث النعاس ماشافوش...

هاشم : وكي غادير دروك خاصك تحط راسك شوية...

بشار"كايكمي" : ماشي دابا...

هاشم : ومن هنا لتخرج مرتك را مازال تال عشية..طلع تكا تما فالفوطوي حداها بينما جات سعيدة...علمتي مها بعدا ؟!..

بشار : مانصيبش..حبيبة تكلف..

هاشم : كي دير دابا خاص تبقى راد عماها لبال..ونتا خدام..نصيفط سعيدة تبقى معاكم وتجي كل سبت وحد لدوار ؟!..

بشار : لا..غادي نشد 15 jours...مايمكنش بالي يبقى معاها واخا معاها سعيدة...ولا فيها العكس تغلب سعيدة...

بقى هو وهاشم شوية...حتى حس براسو شوية تنفس واخا خاصو يرتاح من بعد نوبة...ماكانوش فيه اعراض السخانة داكشي باش رتاح نسبيا...الساعة كانت قريبة لعشرة ديال صباح...

هاشم : طلع ريح حدا مرتك تجي سعيدة دابا هي وحسام ونطلعو...

رجع هاشم جلس غير تما فالاستقبال وبشار دخل يلاه غايطلع تا صونا تيليفونه لقاه منير فالبلاصة جاوبو...

منير : هانية الوقت اصاحبي...

بشار : مزيان..

منير : گوليا داك خينا ماقشعتي تا نمرة خرا داوي بيها كايتفلى ولا كيفاش...

بشار : لا...

منير : نحاول فاقرب وقت نجيب ليك بلاصتو فين كاين وشكون هو...

بشار : لاگيني بيه...

منير : كون هاني بالكلمة...تيسر...

قطع معاه خشا تيليفون فجيبو وكمل المشي حتى وصل لشومبر ديالها...لقا الميناج جات حيدات الفطور ونقات ليها دنيا حيدو ليها سيروم..دايرين ليها فاصمة بلاصتو...مغطية ومااااشية فنعاسها...عارف ان العيا والخوف نعسها اما كانت تبقى تسناه حتى يجي وتأكد انه بيخير...ماتخفاش عليه حبيبة الحقيقية الي مكتهنى حتى يكون بيخير قدامها تقدر تقلب دنيا غا باش تعرفو راه مزيان...نعاس مكانتش كتشوفو حتى يجاوبها وهو بعيد...وهادي دابا الي قدامو ؟!..وحدة اخرى..خربقها الحمل..غير ميزاجيتها كل مرة فشكل...مرة تندم مرة تشد ضد...مرة تبغي تاكل مرة تعيف...خلاه ومشا لفوطوي تلاح فوقو بنفس الوضعية ديال صباح هي باش تكا...داز وقت لا بأس به شي ساعة هكاك بقات ناعسة هي وهو تاهو لقى راحتو...حتى دق الباب وصونا تيليفونه...حل عينيه بشوي شاف فالتيليفون لقاه هاشم...

قطع المكالمة وهو يتحل الباب طلات سعيدة مع بان ليها الضو مضلم فالبيت دوات براسها حرك ليها راسو وهي تدخل...بان ليه حسام حرك ليه راسو وتاهو دخل..دخلو كاملين بشوية...

سعيدة"بالحس" : كي بقات ؟..

بشار : شوية...

حطات اش جابت وجلسات حداه...حطات ايدها فوق دراعو طبطبات عليه...

سعيدة : ونتا ولدي كي بقيتي ؟!..

بشار"غا حرك راسو ببطء وصافي"..

شوية تا بدات حبيبة كاتحرك حلات عينيها وهي تحط ايدها على فمها قشعها بشار دغيا نقز واقف تا خلعهم وطار لطواليط جاب ليها سطل مع قربو ليها مع بدات ترجع...حسام كمش سيفتو وهو يقلب دورة خرج...

حسام : نسول على الامتحان ديالي هنا فالادارة ونجي...

هاشم : واخا سير اولدي الله يسمعك خبار الخير...

حتى مشى حسام عاد ضربات هاشم الفيقة...تا انا امتحان فالكلينيك ؟ اينا امتحان اصلا وهو دافع لنقابة المحاميين باش يدوز الكونكور وباقي كاع ماتلونصا الامتحان...خرج يطل عليه لقاه فرتح القضية فيها تقيا...

سعيدة : بسم الله عليك..شربي ميهة (تصغير الماء) باردة تبرد عليك شوية...

بقات ترجع تا خرجو عينيها حسات بحلقها تجرح...هزات راسها..بغا يدي سطل شداتو عليه سعيدة...

سعيدة : غا سير حداها انا نديه...

عارفاه عيان مابغاتوش يتحرك بزاف حيث قاليها هاشم راه طاح بكريز...جلس حدا حبيبة كب ليها الما فكاس عطاها شربات وجبد لانجيت مسح ليها جناب فمها...

بشار : شوية ؟!..

حبيبة"حركات راسها" : ضرتني معدتي..

بشار : دابا نشوف شي حاجة تنقص عليك هادشي..واخا نورمال..

حبيبة"حركات راسها وهي تشوف هاشم تبسمات ليه": عمي هاشم ماشفتكش..لباس عليك..

هاشم : جيت صباح غا كنتي عيانة خليتك ترتاحي..شوية دابا..

حبيبة : شوية...

سعيدة"خرجات عندها سلمات عليها" : كي بقيتي بنيتي شوية...

حبيبة"شافت فيها وهي تنهد وحدرت عينيها وجهها تزير بغات تبكي..بقات تغزز فشفايفها...تنهدات سعيدة مالقات ماتقول وبشار بقى كيشوف فيها تا شدها من ايدها وزير عليها وهي تشوف فيه عطاها اشارة غير بعينيه وهي ترجع تكات قاد ليها مخدة تحت راسها قاد ليها الغطا وناض من حداها وهي توقفو...

حبيبة : ماما مالقاتش كيفاش تجي..بابا كاين فدار ومابغاش يخرج باش تجي..كل شوية تسول حتى خلاتني نعس...عشية بنخرج ياك ؟!..

بشار : سي...

خلاها ومشا..بقات حاضياه حتى رجع جلس فالفوطوي جلس حداه هاشم وبداو يهضرو وهي حاضياه...حتى جلسات قدامها سعيدة حجبات عليها الرؤية وبدات تضحك سعيدة...

سعيدة : توحشتيه هنههه..

حبيبة"تنهدات" : عيييتو...

سعيدة : هاويلي هادي ماديال بشار...

حبيبة : انا براسي وعييت من راسي وهو لا !؟..

سعيدة : هادشي عادي بنيتي غا هو نتي حاولي تصبري بزاااف احبيبة عطي كاع جهدك فالصبر باش يزگا التيلاد فيك..ماشي تحاولي لااا صبري بزز منك..راه غا شهير وشوية وتلحگي لربع شهور ويبدا يحيد عليك هادشي الى ماحيد بمرة كاع...حضري عقلك..

وصلات العشية وهو يخرجها جابو ليها كروسة دارها فيها وساق بيها تبعوهم سعيدة هاشم وحسام...ركبها فسيارة وزادو كاملين لدار...طلعها ودخلها ديريكت لبيت حطها فبلاصتها قادها ليها...

بشار : شنو مشهية تاكلي ؟!..

حبيبة : مافيا ماياكل مروعة ماقديتش ناكل دابا..

خلاها وخرج من البيت... يلاه كي سد الباب مشا لصالون لقا هاشم يلاه قطع الهضرة فتيليفون...

هاشم"شاف فبشار وشاف فسعيدة" : عبد الرحيم خو توريا دار كسيدة فدخلة ديال سيدي بوعثمان تقلبات بيه طوموبيل...

سعيدة : يالاطيف...

هاشم : جايين يشوفوه عيطات توريا لمرت رضوان تبكي وتنوح..

شاف فبشار الي دخل وريح كاع مامسوق لاش قال..

هاشم : بشار... خالك عبد رحيم دار كسيدة..گالو مهرس..ولكن باقي مغيب مازال مافاق بعدا...تمشي تش تشوفو ؟..

بشار"ربع ايديه وبكل برودة نطق" : مازال شي ضلعة مگادة ؟..(زعما نهرسها ليه ههه)...

بقى هاشم غا كيرمش وهو يحدر راسو...شوية وهو يصوني تيليفون بشار وناض خرج من الصالون باش يجاوب على المكالمة حيث ديال الخدمة شي حاجة مهمة وخلاهم...ضار حسام عند هاشم وبقى كايشوووف فيه ديك الشوفة ديال الله يعطينا وجهك...

هاشم : نعطيك تصويرتي...

حسام : حق ربي حااااق سيدي ربي ماكرهت وجهك بصح نشهد بيه ندخل صريف...تمشي تشوفو ؟..واش من نيتك ؟!..

هاشم"هز ايدو تال سما" : راه غالصق جد والديك اداك المسلگم...

سعيدة : گاليك صح فين بغيتيه يمشي يشوفو ونتا عارف تريكة مو كيدايرة وا مو وماعقلت عليه ماسوگرت ليه..علاه هو فين عمر هاد خالو طل عليه شحال من مرة نعس فسبيتار شحال من مرة مرض...تگول شي حد هز تيليفون غا بالغلاط ؟..مالك اهاشم مابقيتي توزن...

هاشم : انا غا سمعت كسيدة گلت المو.ت والحيا...

حسام : وتلگاه غا تقمش وبداو يتلاغطو عليه مكاين هرس ولا كومة...

تسناو حتى دخل بشار الي كمل المكالمة وهو ينوض هاشم...

هاشم : تبقى معاكم سعيدة انا خاصني نمشي لدوار بقاو البنات تما وحدهم...ونيت نرتاح شوية حيث غذا غادي نصد مع زكريا ولد سيحمد"شاف فيه" راك عارف القضية كيفاش...كنت داير معاه اليوم وليني خرجت ليا خدمة هي الي لگاتني هنا فمراكش فاش نابيتي عليا...

لبس هاشم صباطو مشا معاه بشار حتى لباب تسالم معاه عاد مشا...رجع لصالون وريح...

ناضت سعيدة ديريكت ماسولت حيث عارفة اش غاتقضي..حيدات جلابيتها ومشات ديريكت لكوزينة بدات توجد فالعشا حيث عارفة بشار ماكلاش هاد النهار كي ناس وجدات عشا مزياان...وحبيبة دارت ليها خضرة مصلوقة...غير طابت شرملتها حطتها ليها ف بول ديال التقديم ودارت ليها فرماج حمر طريفات كثار حيث كايعجبها وماعافتوش...حطاتو فبلاطو مع قرعة الما وقرعة ديال عصير الليمون والخيار...خرجات من كوزينة هازة بلاطو فايدها شافت فبشار وهو يحرك ليها راسو زعما غا دخلي ماشي مشكيل...حلات الباب بشويييا حساب ليعا ناعسة حتى سمعات صوتها...

حبيبة : خالتو سعيدة هي دخلي فايقة...

سعيدة"حطات البلاطو وجلسات حداها حطت ايدها فوق كرشها" : الخوينز عذبك هههه...الله ييجيبو ليك فصورة كاملة ياربي ويفرحكم بيه سوا ولد ولا بنت...الله يكمل عليكم بالخير والله يتبتو فكرشك...شوية دابا ؟!..

حبيبة"حركات راسها" : ولكن مابقاش عندي حل ولا بديل..."سرحات ايديها لراسها" هاكا باتبقى حالتي حتى نوصل لربع شهور "تنهدات" بنقنط بزاااف فففف...

سعيدة : شهر ونص تصبريها حسن من شهور ابنتي راه كاينة الي لحگات تاسع ولدات عاد ناضت...حمدي الله ابنتي حضري عقلك وتبتي الله يرضي عليك...

حبيبة"حركات راسها وشافت فيها" : فين بشار...

سعيدة : برا..يلاه مشا هاشم لدوار يمكن يصيب يدوز لسبيتار..عقلتي على خال بشار عبد الرحيم ؟!..

حبيبة : اه مالو...

سعيدة : دار كسيدة گبيلة هاو جاو دار يمكن عندهم..ويمكن هاشم يدوز عاد يمشي لدوار...

حركات راسها باسف واخا هكاك تاهي ماتسوقاتش بزاف يمكن حيث عارفة ان تا بشار مكتسوقش ليه واخا تاهي مكتحملوش حيث عندو ماضي مع بشار فالصغر وعارفاه ماعندوش معاه...كحزات سعيدة البلاطو...

سعيدة : بسم الله ابنتي...

حبيبة"خسرت سيفتها" : والله مافيا ماياكل..بيت هي نشرب..

سعيدة"غوبشت" : ولواه وجدتها ليك بالعشق ابنيتي مابغيت كاع نطحنها ليك تشربيها صوبة درتها فحال جريدة وزدت عليها فرماج باش تعجبك...(شافتها والو سيفة خاسرة) اش دروك ؟!..

حبيبة : ماقديتش...

تحل الباب وهو يدخل جا معاها نيشان...قرب لعندها ووقف كايشوف فيها مخسرة سيفتها...

بشار : مالك ؟!..

حبيبة : ماماليش.."نزلت عينيها" مابيتش ناكل..

بشار : ؟؟..

حبيبة : مافياش والله..تانحس براسي مروعة تاني هي ناكل نرجع كلشي ماقديتش..

بشار : داكشي الي كلتي عاودي رجعيه فين المشكيل ؟..

سعيدة"وقفات وتمات غاديا" : هاهي منك ليها..نمشي نطل على العشا ونشوف جدر اش دار...

خرجات وخلاتهم راس فالراس..مادواش قرب لحداها وجلس..جر البلاطو هزو فوق ركابيه...هز فرشيط وعطاها ليها...

حبيبة : مافيااااش...

هز فيها عينيه وبقى مفيكسي شوفة...زفرات وهي تشدها من عندو وبدات تاكل بشوية...خافت يغفلها بشي طرشة دايزها الحتيت..هي عارفاه مايحطش ايدو ولكن شي مرات الشوفة كاتقضي الغراض..بقى مقابلها وهي كاتاكل بشوية حتى كالت علاش قدرات مابقاتش بغات تزيد حطات الفرشيط...هزات القرعة ديال العصير شربات نصها وهو يعطيها كلينيكس باش مسحات فمها ولانجيت باش عقمات ايديها...حيد البلاطو وهي تشدو...

حبيبة : امتى بنرحلو لدارنا ؟!..

بشار : مازال الحال من جيهتك..دار ديجا قضيت غراض..

حبيبة : ملي دخلت ليها رتاحيت بزااف..واخا هادي دوزنا فيها بزاف وعشنا فيها شحاال من حاجة غاتبقى عزيزة عليا ماعمري نساها ولكن هاديك ماعرفتش فيها شي حاجة رتاحيت ليها..

بشار : داكشي بلانو ساهل...

حبيبة : الفراش الي كونفيرميت معاك باقي ؟!..

بشار : مازال مالحگت la date الي داير معاه...

حبيبة"حطات راسها عالمخدة وتنهدات وهي تحط ايدها فوق كرشها" : وبايخص نشوف حتى بلاصة البيبي بايخص نوجد شحال من حاجة...ماعرفتش واش باتكون بنت ولا ولد...

جمع حجبانو وهو كيشوف فيها كاتهضر بحماس..وقف وتحنى كايقاد ليعا فالمخدة الي تحت رجليها ورجع الي تحت راسها صايبها ليها...قرب عند وجهها مزياان تا صرطت ريقها...

بشار : تبتي ليا لارض مع راسك الباقي لاحگين عليه...(باسها في فمها بجهد تا تخشا راسها فالمخدة تا غوتت بصوت منخفض...تقولي مغزف ومشا خرج)...

يوم جديد...

حلات عينيها على ريحة فايحة هي مولفة كاتشمها عادي ولكن اول مرة تحس بيها دايزة ليها مع العروق زوييينة...ناضت بشوي كاتشمشم فيها وتعاود..يلاه بدات كتحك فعينيها وتفوه وهو يتحل الباب ودخل..هاز الكاس نيت ديال قهوة فايدو...لابس تيشرت كحل وسروال سورفيت نفس اللون ولا كايجيها فشكل مبوگص على لول..دخل لعندها حط الكاس الي تبعاتو بعينيها ورجعات شافت فيه...حط ايدو على وجهها...

بشار. : شوية ؟!..

حبيبة"حركات راسها"..

تحنى بغا يهزها بين ايديه يديها لطواليط وهي توقفو...هزات الكاس ديالو ديال قهوة تا شماتو نيييت شبعات فيه شمان خلاتو غير كايشوف مافاهم والو مع هاد خيتي وهاد الوحم وهاد البرهوش الي بغات تولد الي حاملة بيه عام وصرف...خلاها على خاطرها كان بغا يمنعها حساب ليه واش غاتشربها لكن اكتفت غير تشم تحيد لهفتها...عاد خرجها من البيت ماكانش حسام ديك ساعة مشا يتسخر...داز بيها قدام سعيدة الي كانت خارجة من الكوزينة جايبة الفطور...بقات كاتشوف ومبتاسمة وفرحانة ؟..فرحانة بزاااف لبشار ولزواجو الي تعطاتو فرصة كبيرة وكتشوف فيه كايعيش اجواء الحمل بحذافيرها مع مرتو...كاتشوف فيه غادي يعيش حتى شعور الابوة الي كان كايقول ماعمرو يعيشو حيث ببساطة كان كيقوليهم ماكايناش الي غادي تقبل عليا...مريض وعندي ماضي اليم...داكشي باش نهار بغا يتزوج بهانزاده كانت عارفاه كايضرب راسو لكن عمرها ماعرفت انه بسباب شي ماضي...كانت عارفة فيه صرع لكن كان عندها عادي...ولكن مكانتش عارفة العمق ديال هاد الانسان مكانتش شايفة اش شافت "حبيبة"...ماكانتش غاتبغيه كيف بغاتو حبيبة بكل عيوبه بماضيه وعاشت هي وياه مشاكيل قاصحة خرجو منها بحال شعرة من العجينة...

من بعد ما خرج عندهم طبيب عطاهم الحالة الصحية الي هو فسها...طمنهم بالي راه فاق والغذ ليه غادي يخرج من الانعاش...عندو كسر فالرجل اليمنى وفالكتف الايمن تاهو...حالتهم كانت حالة تا قالو راه مول الامانة دا امانتو...خوتو كلهم تكبو فالسبيطار...خوتاتو والبكا ونواح خاصهم غا فين يلوحو تعدادهم...كانت واقفة بعييد شادة تيليفونها ودايرة ابيل فيديو مع مليكة..

مليكة : الله على خويي الله..ماديالو زغبي كلاها مسيكين...

توريا"تنهدات" : مسكين راه كان ماشي خويي يشوف ليا شي محامي يشد ليا ديك القضية..وشوفي كي لگاها...

مليكة : وكي بقى دروك ؟..

توريا : شوية تهرس مسيكين من رجلو وكتفو...لا جينا نشوفو نگولو الحمدي الله الي نجا منها كون تشوفي طوموبيل وراها ليا سمير كي ولات كلها تعجنت الي شافها يگول مولاها موحال ناض منها...

مليكة : ياربي سلامة..على سلامتو خويتي مالگيت ليك جهد كون جيت وليني تربطت هنا...البرهوشة الي خريت من كرشي الكبيرة دارت ليا فين نتربط وليت حاضية عما صغيرة دروك ودابا دخلو لمداريس...

توريا : باقي مابانت ؟!..

مليكة"بدات تحرك فراسها وتلالي وتبكي" : واااخويتي دارتها ليا كحلة زحلة فين يهضرو فيا ناس..ودارت ليا فين نتشوه انا بارية منها...خرجات ليا من جنب وخلاتني مسكة فضراص...مالگاها مابانت وباقي صغيرة صيفطات لينا في واتساب الى قلبتو عليا ندعيكم ونگول راكم ضربوني...

توريا : قلبي عليها نيت وشديها طحنيها عصا نييت تسماي ضربتيها...قلة ترابي هادي..

مليكة : واااخويتي راني فبلاد نصارى...راه عندها عا سطاش لعام الى ساقو الخبار يديوني لحبس ولا يتريو عليا من هنا...علاه الخانزة ماعارفاش اش دير...بغيت غانعرفها عمامن مشات واشكون هذا الي تجوجت بيه الله يعطيه مصيبة يرجع ليا برهوشتي شوهتني...وراني نبات مانعس منشوفو راني نمرض جوج مرات فسيمانة غا بفقصتها...گطعها عليا كون غا ما.تت ولا شوهتنيييي...

توريا"شافت مباركة هي وعبد القادر داخلين" : نخليك اخويتي دروك سيدي جا هو والمجحومة ديال مرتو..

مليكة : گاع لا تعطيها صوابها هاديك دخلت علينا بخطاوي كحلة يالعياذو بالله..

قطهات معاها وهي تخشي تيليفون فالصاك ومشات جلسات حدا مرت خوها...تا قربات مباركة بغات تسلم عليها وهي تحط ليها ايدها على دراعها ودفعتها بلباقة زعما مسالمين مسالمين..حسات مباركة بالما بارد تكب عليها دارت ليها قمعة بنكهة سبيطار...صرطاتها وهي تكمل سلام سلمات على مرت عبد الرحيم تمنات ليه الشفاء وكحزات بعيد وقفات...تا شافت توريا شيخها وهي توقف وقربات لعندو كان واقف مع خوتها..خاشية ايديها فجياب الجلابة..دايرة شال بيض وزيف تحت منو جامعة بيه شعرها الي كايبان شوي منو واخا هكاك كحللل ليلي...

توريا : سيدي لباس..

ع.القادر"حرك راسو" : هانيا بنتي..مايكون باس...

توريا : لهلا يوريك باس..ماجاتش عماك لالة..

ع.القادر"مغوبش" : جات يامس دارت الواجيب براكة عليها عيانة..

هزات توريا حاجبها وهي تحرك راسها ورجعات جلسات لهيه حدا ختها صافية..زمات فمها وطلقات تخنزيرتها الحارة عينيها بيضين..

صافية : اتي مالك جيتي مغيرة...

توريا"ضارت بنص عين هازة خنفارتها" : شتي شيخ كي مابقى مسوق ليا ؟!..شوفي شحال وانا غاضبة فدارنا وتگولي بغا يجي..ملي دوا عماه خويي عبد الرحيم گاليه منجي منجيب بغات تجي ها دارها...

صافية : وخويتي گاليك صح..تي لاش هادشي كلو حيث وگفو عما ولدك يا توريا نعلي شيطانك..هانتي تشوفي هو الي صدق مول شي..حاولي اخويتي تصفي الخواطر وتصالحي عما ولدك راك تولي نتي مولات شي...

توريا"ضارت عندها مخنزررة بجهد" : يرجع نور الدين من قبرو ومانشوف جيهة المسخوط...يگطعو عليا ولد..

بعد مرور ايام...الحال هو الحال عند بشار وحبيبة...كل نهار هو معاها بالحرف حاضي تفاصيل التفاصيل ديالها...مهتم بيها فحاجياتها الشخصية...ماكلتها..الطواليط هي الاخرة كايديها ليها...ناديا قدرات تلقى وقت وجات لعندها تا شافتها وطمنات عليها واكيد مايخفاش انه جابت ليها معاها الماكلة الي وجدات ليها...وتقدات ليها داكشي الي كاتحتاج...وطبعا كانو بعض النصائح منها بحكم التجربة باش تصبر وتحاول تميك على شحال من حاجة الي ممكن تآذي الجنين...

ناديا : الوقت دغيا بايفوت ابنتي...تسع شهور تاهي دغيا بدوز..بروفيتي هاد البيريود ديال الحمل اه تتكون بحلاوتها..ونتي اه معاك راجلك مامخليكش حتى دقيقة..الى جينا نشوفو بعض النسا كاين الي دوزات الويل كثر منك وهي بوحدها مامعاها لا حنين لا رحيم...حاولي تشوفي الامور بايجابية...

حبيبة : ماعرفتش علاش وليت تنقنط بزااف..دابا قنطت بزاف ولكن ماقدرتش نهضر حيث عارفة انتغدي نتحرك فمابالك نخرج..

سناء : شفتي اش وقع ليك حتى جيتي على قاعك جلسي لارض وتبتي...الوحم عرفناه وماشككناش فيك ولكن راه كاين شي وحم خاص مولاتو تصبر عليه...الى مشهية شي حاجة طلبيها تجيك هاد الوقت ولا كلشي موجود ماشي فحال كيف كانت تتقوليا ماما فاش حملات بفيصل بغات مشماش ف شهر 12 كمداتها غير بالمعلب وباقي لهفتو لدابا فينما بان تمشي تشريه تبقى تاكل فيه تتشبع...اما كون حملات بيه دابا غاتلقاه موجود...

حبيبة"سكتت"..

ناديا : بايخصني نمشي..باك اه شتو هاد اليام داير معايا بالو بزاف فين مشيتي فين خرجتي...

حبيبة"نزلت عينيها وبان على وجهها الحزن" : بتبقاي ديما هاكا شي نهار بايعرف ويتقلق وماتبقايش تجي...

ناديا"بجدية" : الى عرف وتقلق تما فين بنبقى نجي...راك بنتي احبيبة مالقيتكش عند الباب ولا ربيتك من شي خيرية..هذا هو الجهد هانتي شوي وبايوصل شهرك غمضي هي عين وحليها دغيا بايدوز الوقت...الشهر جاي بترحلي لدارك وبايخصني نعاونك..باتجي عمتك تاهي..وللا سعيدة تاهي...راه خاصو نيت يعرف تنجي عندك حيث هادشي اه عييت منو...

هزات حبيبة عينيها فيها وهي تبسم ماشعرات حتى تگعدات وتلاحت عليها عنقاتها وحطات راسها على كتفها...

حبيبة : عافاك الى كانت شي حاجة تقلقك ولا تقلق بابا ماديريهاش..ماشي مشكيل هي ماتخاصموش بسبابي...

ناديا"تنهدات" : باباك خاصو يتوگض كيف توگضت انا....ديري مادرتي تاتبقاي بنتنا البكرة الفرحة لولة..ويخليك منك لراسك نتي وقراراتك...خاصو يعطي فرصة لهاد ولد ناس..

ولد الناس الي عمرها تنسى الوقفة الي وقف معاها وعتقها من واحد الشوهة كانت على مشارف انها تنفاج.ر ويعرفو ناس شكون هي ناديا وشنو الماضي ديالها والسجن الي فايت مدوزة...

وقف قدام الشرجم ديال الصالون خاشي ايد فالجيب وايد شاد بيها تيليفون كايهضر مع اشراق ختو...من الي قاليه منير مازال ماخدمش هذاك نمرة باش يعرفوه فين حيث كايخدم غير بشكل شخصي ماشي عن طريق البوليس لانه خاص يدير محضر باش يقدرو يعرفو...

اشراق : انا دابا فالثانوية كانتسناو الاستاذ يجي باش ندخلو..

بشار"هز ايدو شاف فساعة" : عشية رجعي لدار رسلي ليا شنو عندك تم نفيرسي ليك فالكونط...

اشراق : واخا...

قطعات معاه وهي دور بان ليها جوزيف واقف كايهضر فالتيليفون مع شي حد مشات لعندو ووقفات..حتى سالا وهو سدور لعندها تحنى باسها جنب فمها تا خرجت عينيها وضارت هنا وهنا كانو واقفين فواحد الخلا خارج سيدي بوعثمان تا قربو يدخلو لمراكش بقات ليهم غا عشرة كيلمتر...

اشراق : غادي يشوفنا شي حد...

جوزيف : كومااان بايبي "ضار هنا وهنا" كاينين غير حنا..

اشراق"جلسات فوق السيارة وربعات ايديها" : اشنو رجعك لعندي وفكرك فيا ؟!..

جوزيف"حك ورا شعرو" : ماعرفتش...يمكن صورتك بقات في بالي يمكن بغيتك...je ne sais pas...

اشراق"عوجات فمها مركزة مع هضرتو" : علاش ديك المرة درتي هاكاك ومشيتي مابقيتيش رجعتي...(وراتو تيليفون باش يقرا اش كتبات حيث كترجم ب شات)..

جوزيف"تنهد" : حيث طلع ليا د.م من نفس السيجي..دارنا مكيتقهموش دارنا دارنا...واااو فهمت ولكن نتي الى بغيتي نكملو حتى نتي ضحي...

اشراق : ماشي غير دارنا كاين واحد خويا (دورات صباعها على راسها زعما هبيل)..مريض يقدر يقت.لني انا وياك...

جوزيف : ههههه اوكاي...يلاه نمشيو غير هنا نبروفيتي معاك هاد دوزوغ ؟..

بقات كاتشوف فيه وتفكر...من ناحية خايفة بزاف حيث كاين بشار ويمكن تلاقا بيه ومن ناحية مابغاتش ضيع تاني جوزيف !!..بعد تفكير طوييل قررات تمرد هاد المرة وتجرب تمشي معاه الى دار عند بالهم راها كتقرا خصوصا خوها...ركبات معاه كسيرا سيارة فاتجاه مراكش ديؤيكت لواحد نفدق رياض..دخلو بزوج لواحد ريسطو تغذاو تما..وهما يخرجو لسيارة شد ليها فايدها وجرها لعندو...

جوزيف : بغيتك تكوني معايا..ايشخاك..

اشراق : ماكرهتش..نبعد من دارنا ونمشي معاك..

جوزيف : قاصحين معاك ؟!..

اشراق : عيشتنا صعيبة..عندنا مشاكيل بين ماما وخويا..

تنهد وهو يحرك راسو...نزلت راسها وهو يهزو ليها من ذقنها..البلاصة الي هما يمكن عندهم عادي حيث مولفين الگور يجيو...تحدر لعندها وهو يلثم شفايفها بقبلة صدمتها حيث وسط الناس ماتسوقش..يلاه فرقها كايشوف فيها حتى جاءه الرد سريعا بواحد دقة من جنب تكب لهيه...غوتات بالخلعة هزات راسها وهي تجيها طرشة من حيث لا تحتسب تا طوش نيفها بد.م...

حسام"بالفقصة من جهة بشار" : والله يغرق لجد مك الشقف الكلبة..

غا سمعات صوت حسام وهو يطيح ليها الما فركابي تا توقفاات عندها الدنيا فواحد اللحظة...علاش حيث حسام ماغاديش يعقل عليها يوصلها لبشار يا خايبة يا زينة كيما كانت...والى وصلات لبشار تعول على راسها يا تهرب ماعمرها باقي تبان يا تستسلم لشنو غايدير فيها والى هربت الحل الوحيد لانه غادي يقت.لها...

بداو ناس كايطلو وشي بوديكارد كايشوفو لا يقربو لقدام رياض حيث كانو بعاد عند فين مركونة سيارة...جوزيف ماشي من العاگزين غا ناض وضار لعندو وهو يمشي ليه جمعها مع حسام ببونية تا ضار لهيه...لحد ساعة باقي جوزيف ماعارفش شكون هذا الي تجرأ وضربو...

اييييوى يا خوتي تا حسام ماعطلوش ومشا ليه وبدات المضاربة عطيني نعطيك...وجاو ناس يفكو فيهم...دوك بوديكارد جاتهم تعليمات يمشيو يفكوهم يحيدو جوقة من تما...جرو حسام وواحد جر جوزيف كايطير لسما وينقز وجهو دغيا بانو فيه كدمات مع شهب...حسام غا جنب فمو وجنب عينو...اشراق بقات واقفة كاتغزل بالخلعة ماعارفة اش دير كاتسنى مصيرها كيفاش غايكون...بعدوهم بوديكارد تا فرقوهم وهما يطلقوهم...كان جاي جوزيف لحسام وهي طير لعندو اشراق وجهها كلو تخلط بالد.م ديال نيفها والدموع...

شداتو من حوايجو كاتحبس فيه بكل جهدها باش مايدير حتى تصرف اخور لحسام..كلها كاترجف بالخلعة وعينيها خارجين حيث اول مرة غاتحصل...

اشراق : c'est mon frère joseph..(خويا)..

تا جرها حسام من سالفها بجهد ودفعها قدامو...

حسام : c'est mon frère ?. لا را نيت خاص يتعرف على هاد طون فخيغ ديالك باش يعرف الفخيغات كيدايرين...بقات لجد بوك غا الفرونسي ماتعرفي تاتهضري بيها..من نهار دخلتي تقراي ونتي جايبة فيها 4 تحلگ دلگ..

اشراق"كاتغوووت" : ايييي...حسااام عافاك طلق راك فهمتي غلاط...واعععععع...

جوزيف غا سمع را مون فخيغ وهو يزيد يجعر حيث شافو كايضرب فيها وهي معاودة ليه عتدها مشاكل فدارهم بين خوها ومها وبزاااف...وهو شاف العن.ف بغا يدافع عليها شدها من دراعها جرها بجهد ومشا لحسام الي غا ضار وهو يغفلو بواحد بونية وسط الوجه حسام داخ واخا هكاك بقا شاد فراسو قاس منخرو وهو يدور ليه هز رجلو وجابها ليه وسط الكرش جابو طايح...اشراق بدات تغوت تاني....ماحتال ينوض جوزيف تا عطاه حسام...ناس تجوقات كايشوفو فيهم كايضاربو واحد الحالة...وهو يشدها من شعرها جرها ناس سمعو فيه كايسب فيها عرفو ديريكت راه كتجيه شي حاجة...لاخور داخ ولا تمغط تما مابقاش ناض خلاها منها ليه...

حل طوموبييل ودفعها بجهد تدخل...ماشي تعصب حيث شافها كاتباوس مع هذاك..طبعا كاتبقى بنت عمو بمثابة الاخت صغيرة ليه بحالها بحال اي وحدة من عائلة خصوصا انهم كبرو فدار وحدة...والاكثر هو الفقصة الي ركباتو من جيهة بشار...كيفاش داير عليها مايخصصها من والو...اللباس كان كايجيها غير المخير وكانت ديما معروفة فين كاتقرا هي الي كتلبس مزيان...كل مكانت كتحل فمها كاتجيها الحاجة عمرو مافكرات انه شي نهار غاتولي مخصوصة...كونط الي فاتح ليها ومكلف بيه هاشم او حسام ديما عامر...الى جا كايجيبها هي ويوسف ويخرجهم لافخم البلايص..تقدر تسافر معاه...اشنو خاصها حتى دير هاد الحالة...مابغاتش تزوج بداعي القرايا وقف فوجه مو فوجه ناس نعتو فيه غير بالخايب اشنو بغات ؟!...طبعا العروبية هاد الحالة عندهم عيب بزاف غير يشوفوها كاضحك مع واحد فما بالك ب تباوس معاه ؟!..

ركب فالسيارة كاينفر كي ثور..ماكانتش هاماه هي اكثر ماهاز الهم ل بشار...وزاد كمل عليه خونا الي ضارب معاه عطيني نعطيك...كسيرا سيارة طاير تا تهزت وتم غادي...

اشراق : ف فين غادين ؟ عنداك تديني عند بشار احسام عافاك غايقت.لني...(كاتبكي)..

حسام : مايخصك عليها الخصاص..الكلبة مصيفطك خوك تقراي ونتي جايا تمعشقي ليا مع الگور...ياااا جد بوك الى گلتها غا لهاشم يقتدلك عساك خوك...ونااااااااري على الكلبة ناري...ونااااري راه مابقى فيا غا خوها يا عباد الله فين داير بالو كاينة وهي فين كاينة...

جر حوايجو من عليه جبدهم بالفقصة بغا ياكل راسو بقى فيه بشار بقى فيه بحالاش اما تا توريا كايشوفها كاع مكتسوق اصلا الى عرفات غاتقت.لها تاهي ولكن ماهماتوش توريا حيث مكسضوفهاش كدير دورها ك أم...

اشراق"شداتو من دراعو كاطلب فيه عينيها خارجين قلبها بغا يسكت" : عاافاك احسام ماتوصلهاش ليه عافاك...هذا بغاني بغا يتجوج بيا احسام ماتخافش...والله تا مواعد..

ماحسات تا نزل عليها بطرشة لوسط وجهها تا ضربها ضو وغوتات...هز ايدو بغا يدير راسو غايضربها خبات وجهها كاتنخصص..

حسام : يتجوج بيك ؟..ممم..واخا نشاعلاه..صبري يجي غا خوك باش يستقبلو فالصالون..

بغات تهضر وهو يهز ايدو عطاها لراس...وحلف عليها تسكت ولا يدير كثر من هاكا...طريق كلها وهي كاترعد كاتسنى تشوف فين غايمشي حتى بان ليها خذا طريق خارجة من مراكش..ماعرفتش واش ترتاح ولا تبقى تسنى مصيرها ثاني اشنو هو ؟!...

شدها طوالة وحدة تا وصل لسيدي بوعثمان...دخل لفيرما وهو يفراني بجهد تا طارت الغبرة...

حسام : نزلي من كمارتي..

اشراق : حسام..عافاك ماتگولهاش لبشار عافاك...

حسام : كنتي هازة ليه الهم ؟..كنتي هازة لخوك لهم ياك داكشي باش خارجة مع واحد ممسوقاش لخوك ياك ؟..نزلي انا عارف شغلي اشناهو...الخفة راه كانت باينة فيك كون كي ناس كون شادة فقرايتك ومحمرة وجه خوك الي گالع حوايجو وعاطي لحمو لشحط فشردك نتي ويوسف...نزلي..نزلي الله يرحم باك راه وجهك كانشوف فيه باغي نخسر مو..نزلي مابقيتش حامل كمارتك يخ تفوو...

دفل ليها فوجهها...نزلات كاتجري وجهها كلو مجخلط دخلات طايرة ماضارت لا هوك لا هك...بقى هو واقف كاينهج العروق تنفخو ليه بالغدايد..شاف فيها خواتاتو كون شافهم فداك المنظر كون صلاو عليهم فبلاصتهم...ولا ينهج ماقدرش يرجع دابا..نزل من سيارة حتى يضربو الغربي شوية...سد الباب وتكا عليها حتى بدا تيليفونو يصوني..جبدو من جيب وهو يبان ليه اسم بشار...

يجاوبو ؟..ماقدرش يجاوبو كايشوف فراسو دابا غايقوليه كلشي...خاصو يقوليه خاصو يحطو بالصورة..ولكن كايشوف غادي تنوض كارثة ويمرضو...ومن ناحية الى ماقاليه والو وهو موصيه ومأمنو يحس براسو غدرو...اش غايدير ؟!..

دوز على شعرو ووجهو بتعب وعصبية تا بدا ينفخ...تقطع الاتصال ومابقاش عاود..حتى تم خارج يوسف الي غا شاف حسام بحال بان ليه الرباح...

يوسف : حسام..جيتي..(جمع ضحكة وحط صباعو على وجهو مشير لحستم لضربات الي فيه) كون ضربك كون ؟!..

حسام"ابتاسم ليه واخا من فوق الخاطر" : لا غا طحت ماوقع والو (عاد تفكر ضربات فوجهو كيف غايدير يبررهم دابا)..نتا لباس هانيا...

يوسف : لباس..بغيت خرج معاك كاين وحدي...هاشم لا كلشي مكاين انا بغا يخرج...

بقى حسام كيشوف فيه مسكين بقى فيه كيفاش مستحمل يبقى وحدو..مو مخليا صدقات منوضة مع بشار الحر.ب عليه على والو وهاهي مخلياه...تنهد بجهد وهو يشد ليه وجهو بين ايديه وقرب باس ليه راسو..حاول ما امكن يبتاسم ومايبين والو...

حسام : تمشي معايا عند بشار...

يوسف"الفرحة بغات تنقز ليه من عينيه" : اه اه...

حسام : دخل جيب تيليفونك وشارجورك..غادي تبات معاه وصباح نجيو انا وياك..انا نمشي نغسل وجهي ونتحركو...

بالفرحة نقز باسو تا ضحك حسام بلا مايحس...دخل يوسف يجري يدير اش قاليه وحسام مشا غير لداك روبيني الي خارج من شاريج ديال الما غسل وجهو مزيان...مابغاش يدخل لدار لا يشوف وجهها يصدق معصيها تاني واصلا تكون طلعات تخبات...ركب فالسيارة هبط المري شاف وجهو كانو شي كدمات جنب فمو وعند عينيه اش غايدير وهو مسخر لبشار تا صدق جاي لفيرما على عينيه...ماعندو مايدير من غير يمشي ويحاول يقول شي حاجة...جا يوسف كايجري ضحكتو تنوغش القلب...ركب حدا حسام وانطالقو راجعين لمراكش...

خريبگة...

بعد مسافة ديال الطريق دخلو لخريبگة...كان زكريا وهاشم ومعاهم حتى سيحمد...وصلو لواحد الكافي و دخلو ليها...

زكريا : جاوباتك ؟!..

سيحمد"حرك راسو" : شويا وتلحگ هنا...

سيحمد : فخريبگة نيت ؟!..

سيحمد : فقيه بن صالح...البنات جاو عند مهم هنا..."غا كيتفكر عتيقة كايتفكر الشمتة الي مالقا ليها جهد..اصلا خاطرو باقي مريض من جيهة "عبد الله"...

زكريا شاف فسيحمد الي هز حجبانو وحطهم...جا سرباي دومونداو اش بغاو هاشم جبد كارو يكمي...تسناو تقريبا شي ساعة لاروب حتى عيطات ليه أم عتيقة وبلغاتو بلي وصلات لفين داير معاها...

سيحمد : دوخلي...

قطع معاها ضار عندهم قاليهم راه جات...زكريا كان جالس مسكين على اعصابو قلبو كايضرب عمرو شاف خوتاتو كيف دايرات...حتى وقف سيحمد وهو يشوف زكريا فين كايشوف باه تا بانت ليه جايا امرأة كبيرة شوية لابسة سورفيت طويلة ديال محجبات فالگري ودايرة صاك جنبها...وشادة فايدها زوج بنيات دايرة ليهم ضفيرة على شكل گرينات...وحدة كاتدي فالشبه لعتيقة حروفها كحلين وبيضااا ووحدة كاتدي لسيحمد واخا تاهي بيضا...تا وقفات عليه كاتشوف فسيحمد بشوفة ناقصة...

هي : السلام عليكم...

هاشم : عليكم سلام...

هي"شافت فسيحمد" : البركة فراسك من جيهة الوليد...

سيحمد"حرك راسو وتحنى عند بناتو" : اجي بوسو بابا...

طلقو منها ومشاو لعندو تلاحو عليه عنقوه...جمعهم فحضنو كايبوس فيهم وهادشي قدام عينين زكريا الي كان كيشوف غير فدوك البنيات...هز سيحمد راسو وضار عند زكريا...

سيحمد : تعالى..

حرك راسو وقرب لعندهم تا تحنى عندهم...شاف فيهم بزوجات مخشيات فسيحمد وكايشوفو فيه...مد ايدو وشد ايد وحدة منهم...

زكريا : اسميتك..

رباب"ردات بصوت طفولي منخفض" : لبااااب (رباب)..

زكريا : لباب ههه فين مشات ل..."شاف فلاخرى" ونتي ؟!..

لطيفة : لطيفة...

زكريا : عرفتو شكون انا ؟!..

ماردوش عليه بقاو غير كيشوفو...تا جرهم من سبحمد شد ايديهم بزوج..جداهم بقات تشوف فزكريا ومبتاسمة دخل ليها لخاطرها...مشا بيهم لواحد طابلة وشاف فهاشم...

زكريا : العميم عطيني عماك ديك الساشية...

جر كراسا قدامو وجلسهم فيهم مقابلين معاه...وقف سيحمد جنب جداهم كايشوف فيه...شد لكل وحدة ايدها...

زكريا : انا خوكم الكبير...هذاك الي لهيه حتى هو با بحالكم...كل مرة غادي نجيبكم عدي فاش تكون العطلة ولا نجي عدكم...صافي ؟!..

جا هاشم هاز ساشية كبيرة...حطها ليه وتحنى باس ليهم راسهم...طبطب عليهم ورجع خلاه معاهم...حل ساشية كانت ديال مرجان كبييرة...وبدا يجبد..باكيات ديال بيمو بحال ميراندينا...وشي سقاطة...وساشية لداخل فيهم زوج لعب خاصين بالبنات عطا لكل وحدة ديالها...

زكريا : عجبوكم ؟!..

لطيفة : ااه...

زكريا : تبقاو تعيطو ليا من عند ميمة ؟ انا لگا وقيت ونجي عدكم انا وبا..ومازال نجيب واحد ولد عمي طويييل كي سلوم..هذاك اسميتو حسام هو الي كنشوفو بيه الهلال ديال رمضان الى وحلنا شي وقت...

هاشم : ههههه...

زكريا : صافي ؟!..

حركو رويساتهم وفنفس الوقت كايقلبو فدوك لعب ديالهم...بقى حاضيهم حتى جرهم عندو وعنقهم بزوجات...وحدة حطات ايدها على كتفو من هنا ولاخرى نفس شيء...واحد لوحة كانت زوينة صادقة بريييئة...

خرجات سعيدة من الكوزينة كاتهضر فالتيليفون مع هاشم دخلات لصالون وجلسات كاتهضر حتى خرج بشار من البيت هاز البلاطو الي كانت كاتغذا فيه حبيبة داه لكوزينة وهي تدخل وراه...

سعيدة : خليتيها فايقة ؟!..

بشار"حرك راسو"..

سعيدة : نمشي نبرك حداها نحيد عليها القنط بينما جا حسام شتو تعطل..

خرجات هي وياه من كوزينة هو مشا لصالون جلس تقابل مع لابتوب ديالو وهي دخلات لعند حبيبة لقاتها شاعلة تلفازة كاتفرج فنيتفليكس تلاهي الوقت..جلسات حداها..بقات جالسة هاد اليومين مع حبيبة غير تحيد عليها القنط شوية وتاني ترجع فحالها...كل شوية تجي عندها...حتى تقرب ترحل لفيلا ديالهم عاد تمشي معاها باش تعاونها فرحيل حيث ماتقدر دير والو بسبااب الحمل...غير جلسات جبدات حبيبة تيليفون وبدات كاتوريها...

حبيبة : هذا فالجردة...وهاد زربية باتكون من دخلة ديال باب...خاص نگول بشار يديك تشوفيها قبل ماتفرش...

سعيدة : نشاعلاه...واهو الفراش كلشي زين تبارك الله وراتو ليا الحاجة ناديا ذوقها زييين مايتناقشو عليه تنين...

حبيبة"تبسمات" : ماما هي الي نفعتني حيث كايعجبني ذوقها هماوي...كنا بينفرشو هي صالون واحد ولكن ملي شافني بشار بيت حتى لاخور حيث مقابلين مع بعضياتهم گاليا نختار حتى لصالون وهو يتكلف...

سعيدة : وشتي ههه...

تسمع صوت السرسار ديال الباب...خرجات بغات تحل لقات بشار خارج من صالون هو الي مشا يحل..مع حل الباب مع بان ليه يوسف ماتسناش تايستوعب طار عليه عنقو بفرحة واشتياق كذلك بشار...بادلو العناق وتحنى باس ليه راسو وطبطب ليه عليه...هز عينيه ف حسام يلاه غايسولو حتى صغر عينيه فيه...حسام حدر راسو وهو يدخل ماهضر ما تكلم...بقى بشار كيشوف فالاخير دخل هو ويوسف وسد الباب...

سعيدة : حسام تا فين م..."خرجت عينيها" هيا ناري مال وجهك ؟!..

حسام : احم..والو غا طحت فاش كنت جاي...

بشار"هز حاجبو"..

سعيدة : هاويلي على طحت ؟ (قربات كاتقيس ليه فوجهو وهو كيبعد) فين طحتي وكي طرا..

حسام : وغا تعكلت ا سعيدة فواحد طريطوار وجيت على وجهي غا سترني الله...

بشار : كنتي محرك هنا اش لحگك لدوار ؟!..

حسام : غا دويت عما ختي منار گالت ليا يوسف جالس وحدو ها وجيت لعندو گلت نجيبو عمايا اصلا كنت غادي لدوار نيت نجيب شي حاجة وجيت...

بشار"ماجاوبوش علاش حيث ببساطة هضرته ماقنعاتش تا سعيدة عساك تقنع بشار...دعقو يوسف الي كان كايهضر وولا تشغل معاه داه لصالون وجلسو...كان فرحان حيث جا يلاهي راسو ونيت يشوف بشار حيث كايحماق يجي عندو وبشار نيت عجبو الحال الي جابو معاه واخا هكاك مرة مرة كايهز عينيه فحسام بشك...جاه هادشي ديال مضاربة ولكن راه ماطايحش فبال بشار ديالمن هاد المصاربة اصلا...

يوسف : حبيبة...

سعيدة : ديه يشوفها...

حرك بشار راسو وناض تا مشا عند حبيبة طل عليها...وقاليها تقاد فبلاصتها حيث غايجي يوسف...عاد خرج راسو وعيط ليه وجا لعندو حل الباب ودخل كايطل عليها فرحان...

حبيبة : يوووسف ههه اجي توحشتك...

يوسف"سلم عليها" : لباس..امو لباس...

حبيبة : امو ؟..

سعيدة : عمو ههه راه داوي على الي فكرشك..

حبيبة"شافت فبشار الي عض شنايفو من هاد الكلمة الي نوغشات ليه القلب وشحال خرجات من فم يوسف زوينة...من احسن الكلمات الي سمع هي هادي...تبسمات ليه ورجعات شافت فيوسف شدات ليه ايدو" : احسن عمو ههه...

بقات مجمعة هي وياه وسعيدة...بشار خلاهم جالسين بيناتهم وهو يخرج من البيت خاشي ايديه فجيابو وجاي بشويا عليه بختوووريا حتى وصل لصالون...ودخل ريح هز حسام راسو شاف فيه ورجع نزل راسو خشا وجهو فالتيليفون...بقى هكاك ولكن تقلق حس بعينين بشار عليه مامرتاحش وبالفعل هز عينيه لقاه داير صبعو على حنكو وكيشوف فيه بدون مايتكلم...

حسام : د داكشي علاش سخرتيني لگيتو ساد..غذا صباح يكون عندك...

بشار"حرك راسو" : كمل..

حسام : اش ن كمل ؟!.."ماجاوبوش وهو يكمل" على ضرب الي فوجهي ؟!..راه گلت ليك طحت اخويا وكون تشوف طيحة خاي..

بشار : معامن ؟!..

حسام"حدر راسو وجاه نيشان" : مع واحد خينا تشاديت معاه فطريگ مني منك مني منك وهانتا تشوف...

بشار : منين ؟!..

حسام : هنا فمراكش..

ربع بشار ايديه وبقى حاضيه..كان عارف الى راه ضارب مع شي حد...طلق ايديه وناض كاسوس فسروالو..حرك راسو ببطء وخرج من صالون خلاه كايصرط فالريق...وكاياكل فيه الندم الي ماقدرش يقوليه اش كاين...رجع بشار دخل عندهم لبيت..بقات حبيبة مجمعة مع يوسف وسعيدة...

وصلات العشية قرب اذان المغرب بالضبط...كان بشار خارج ودا معاه يوسف منها يونسو ومنها يبدل يوسف الجو...رجعو لدار هازين فايديهم ساشيات ديال مقدية...يلاه غايطلعو لدار تا بان ليهم حسام نازل شافهم وهو يوقف بشار...

حسام : يوسف طلع نتا لدار...

يوسف حرك راسو وطلع مشا حسام ورك على لانتيرفون وصى سعيدة توقف ليوسف عند باب دار...ورجع لعند بشار الي كان واقف..

حسام : بشار...خويا الى شي نهار خبيت عليك شي حاجة ماعمرك تقلق مني..ياك ؟..

بشار : ؟؟..

حسام"حدر راسو" : انا غا گلت ليك..نتا راك خويا الكبير...ماعمري شفت منك العيب الى شي نهار ماصبت نگوليك والو غا سمح ليا..

بشار حرك راسو بتفهم واخا حاس بلي مخبي عليه شي حاجة...ماجاش فبالو شي حاجة متعلقة بختو...طبطب ليه على كتفو بحركة رجولية..وتم غادي داخل حتى وقفو حسام الي تزير ماقدرش يصبر حس بتأنيب ضمير تا كان غايخشي ايدو فطوموبيل...وعيط ليه..

حسام : خونا الي ضاربت معاه صباح...ضاربنا هنا فمراكش حيث لگيت اشراق ختك معاه...

يتبع....