عروس الجحيم الجزء الثامن

جاد : اوكاي..احترم رغبتك واحترم كلامك..ويمكن (كمل كلامو بالانجليزية حيث كتعثر بزاف فالدارجة)..انا طلبتها من باب انني نجاوبك دغيا حيث غانعطيك واتساب بيزنيس اما شخصي مكندخلش ليه بزاف حالو حال انسطاغرام...سو نكملو هنا ومن بعد ممكن نتواصلو شخصيا...انا ف نيكست مانث (اىشهر جاي) عندي مجية لمغرب زيارة العائلة فمراكش نيت..و ففاس..وعندي خدمة ف الدار البيضاء...زيارة احباب وعمل...نقدر نشوفك ؟!

حبيبة"تبسمات بغير خاطر" : زيارة اش انا هههه...

جاد : زيارة صديقة (مع ايموجي كيغمز)...

تنهدات وهي تجاوبو ب "اوكي"...رجعات حيدات الويفي من تيليفونها وناضت استاذنات تبدل حوايجها...دخلات لبيتها لاحت تيليفونها ومشات بدلات ديك فراشة ولبسات تيشرت وشورط ديالو واصل عند ركبة...دخلات لدوش وتحنات على لافابو كتغسل فوجهها وتعاود وتغسل وتعاود مابغاتش تبكي مابغاتش تهبط دموعها...بقى فيها باها وحسكها...ضرها فخاطرها وقلبها...كتشوف فيه محني الضهر ومثقل الكتاف...بقات شحال وهي تخرج مسحات وجهها وخذات شهيييييق وزفرات وهي تخرج من البيت بلا متهز تيليفونها...هبطات كتجر فرجليها لقات عمتها جالسة تراشق مع ايوب كتهز ليه ف ايلاينر وهو يغوت ويسد فمو حيث الحاج فالبيت يسمعو...تبسمات ليهم وشافت فخوتها كل واحد شاد رواية كيقراها بالفرنسية باش يطور ها...طلات على بيت مها وباها..قربات بغات دق تطل على باباها حتى استوقفهاةكلامو مع ناديا...

م.حفيظ : على هو هي كريدي ديالهم !!...راه تلااات بيا امولات العش تلات بيا...ضرائب الحمام من جيه والمحلات من جيه...شي ضرائب قديييمة عاد تجمعت..زيد عليهم كريدي ديالهم...انا الي مني لافوت كنت ساكت كل مرة جمعها مع الحساب جاي الحساب جاي تا تجمع عليا حساب دنيا ودين...."هز عينيه حمرييين مغرغرين فناديا" منين نجيبها ومنين نلگاها !!..

ناديا : الى قسمتي الورث مع لطيفة وايوب را بيعاونوك كل يبيع حاجة وخلص...

م.حفيظ : هههه "ضحك ضحكة الغدايد" بنبيع انا باتبيع ختي وولد خويا...را بداكشي بنخلصو ضريبات الي كيتسالونا. ونلخصو الحاج...اش بيجيبو لينا المحلات را هير تيتكراو بالفم والخلاص..مكريين سنيييين هادي وماليهم را مايبغيو يخرجو لينا من تم والمحكمة ديك الوقت راه حكمات مايخرجوش حيث تيخلصو فالوقت سنيييين...يعني كيعطيونا هي فلوس الكرا البيع متحلمي...الحمام فيه ضرائب وخلاص ضو والما شكون بايشريه من عندنا عامر مشاكيل...را كون هير يصبر عليا الرحماني كون نقاد هير امور الحمام والبازار وبنبدا نعطيه شوي بشوي ميكمل العام حتى نخلص ليه فلوسو ونكون سديييت الحمام...راه املاكنا نافعييييينا ومعيشينا فالخير وليني را لا بعناهم فحال الى شرينا سخط...وتبقى هاد دار راه دار الواليدين لا انا لا لطيفة نگدو نبيعوها...هي صباح مشيت نضرب طليلة على البازار لقيت ضريبة جديدة بانت فلوسها كبر من همها...لى مشى هادشي باش نگد نعيش ولادي كيف كانو ؟!...محل البازار هو الي يعيشنا قانعين وليني عيشة ولادي لفايتة...ولفو الفشوش هي حبيبة كتقام عليا بجوا منجل ومنصيبش نقص ليها من اش كانت مولفة...گطعي ليا ايدي وماتقربي ليا لولادي...والرحماني هاهو قاسني فعينيا مابانت ليه هي بنتي يساومني بيها بالكريدي...اش زعما عطيني بنتك ونساو الكريدي ؟!...بنتي باتگد على دوك الناس ؟...ايييه ماقالو عيب تعيش مع راجلها فالمانيا وليني باتگد على عيشة الغربة وهي صغيرة...ويعلم الله واش بتگد تكمل قرايتها ؟؟...منين نجيبها فين بنعطي راسي الحاجة..."صوته تقج تا دازت دمعة كتجريييييي من عينو وهو كيهضر وناديا كطبطب عليه تا بدات تبكيييي" بنتي هاديك اناديا راها البكرة فرحتي لولة بغات تلوى ليا دراعي بيها....اش هذا ؟!...

ناديا"كتبكي" : والحاج تهدن الله يخليك...را بتمرض تاني..مسح دموعك الحاج تشوفك لطيفة ولا ولادك ولا حبيبة نيييت بتمرض كتر منك...مسح دموعك ويحلها الله كون هاني...هي جلسو بيناتكم وعيط لسمير المحاسب يعطيكم الحلول والى بغيتو تبيعو كلشي بيعو الحاج...بيع تا البازار وخلص الناس ونعيشو معاك هي بالخبز والما...

م.اىحفيظ : الهضرة ساهلة الهضرة ساااااااااهلااااا...."هز راسو للسما" ياااااابي شوف من حالي ولا تكويني فولادي...ياربي حلها من عندك بجاه محمد عليه الصلاة والسلام...

القهرة الي كان كيهضر بيها تهرس الحجر...ونبرة صوته تهد وتردم الجبال...فما بالك بالقلوب المحبة ليه...وما بالك بحبيبة الي كانت كتسمع كلشي وصوته هرس ليها خاطرها حتى تكات عالحايط كتسمع وتنخصص بالحس...باها تحط فمواقف صعييييبة ماشي غير موقف...ربى،، فشش،، كرم..جاد...فرح ضحك...ماخصصهم من تا خير...واش جا الوقت الي يشوف الفرحة من ثماره والي زرعو لولادو يحصدوه ليه...

حبيبة حطات ايدها على صدرها وهي دور قبل ميخرج ايوب الي سمعات صوته قريب يعني خارج وهي طييير طلعات الفوق.وسدات عليها...

مستقبلا....

..الخزاااين وتادها مدگوكة...الزرابي مفرشة...وصوت الخيالة كيضربو فالصربة الي تدارت على جال عرس ولد الرحماني الكبييير...عرس الغايب ساسو والغابر حسو...كلشي فرحان حيث الي دخل لخزانة جيعان يخرج شبعان وهاز معاه...دبي.حة خدامة محابساش...عبد القادر لابس اجود وافخم ماعندو من سلاهم وجلالب ديال بزو المعروفة بالبزيوية المخدومة بليد والي تصايبت بالعشق بعقادها وسفيفتها...اما واحد لالة عيدة را واقفة على رجليها هاد المرة هي الي كانت واقفة وتشطح مع العيالات...هاد المرة سهرات ومزال تسهر تا تسمع الزغاريت الي ناوية تسمع...جايبين ليها البشارة دياال الشرف....البشارة ديال راه ولدها راااجل يحلفو بيه الرجال ويحنت ليا عشرة بشلاغمهم...العشية كاملة وهي كاتشطح وتزغرت حتى ليل الليل ولات عشرينية ب كسدة تسعينية...فرحتهم ماااتعطيها لحد...مكاين غير دوز مرحبا بيك رحماني عارض على كلشي...

زغاريت كان جاي من طوالة عرفات را جايبينها...بالفرحة شادينها ومزينين ليها طريقها بالصلاة والسلام على النبي محمد...بقفطانها الابيض بسفيفتو الملكية ومضمتو البلدية ديال ذهب بحجيراتها الخضرين...وصدرها المزين ببروش بلدي ولد المضمة صغير....وعنقها المزين بعقيق اخضر لاصق فيه وسطو بروش رقيق صغير ديال ذهب...وعلى جبهتها خيط الريح متوسطاه لويزة حرة...ضاير على شعرها الواقف بمشيطة نااعمة من لور مغطين ليها وجهها بمكياج خفييف بزاف...طغى عليه زينها الفتان ...وشادة ليها ناديا فايدها مزيرة عليها...من بعد محاضرة طويييلة بين الام والبنت الي كتعطي فيها الام خبرتها وتنقلها لبنتها...ومن جيهة لطيفة تاهي الي شادة فيها..غاديا بشوي عقلها غااااايب وريقها كيبان كيتصرط من عنقها الي تشنج وفمها الي تلجم..عويناتها الخضرين تعمرو بالدمو.ع...فين غاديا ورا داك الباب فين غاتبدا حكياتها تسرد..وتبدا حياكة خيوطها...فين غاديا ولفين مصيرها مع واحد مكتعرف عليه غير مبروك ف رسالة لا تزادت لا تنقصت...دخلوها بزغاريت...والصلاة على النبي محمد....

بقات شادة ليها حبيبة فايدها...حتى كانت شوي وغاتقوليها ديني معاك مابقيتش بغيت هاد زواج...

خرجات سعيدة من البيت هازة مبيخرتها...وجهها فيه تعابير الفرح...ناشطة وماقداها فرحة وخا جاها قرارو مفاجئ...سدات الباب وهما يبانو ليها جايين بالعروسة الي حادرة راسها ومغطية وجهها بالفوال...حداها عمتها وحداها امها وعيدة قدامهم هي وتوريا...ولور كاينة ربيعة وكريمة كيزغرتو وخواتات توريا زوجات...حتى وصلوها لطوالة وهما يمشيو...مع بغات تحل الباب توريا حبيبة زيرات على ايد ناديا الي رداتها ليها...

توريا : دخلي بنتي راجلك راه لداخل...

عيدة : الله يرضي عليك والله يكمل عليكم بالخير...معزتك ابنتي تبقى فگليبي تانموت...

ناديا"كتشوف فدنيا خاوية تما فديك جيهة..تقريبا المعروضين اغلبهم مشاو...حيث الحال مابقى ليه والو ويصبح".....

ماردات حبيبة ماعطات جواب...عقلها ترفع وقلبها بغى يسكت...على شوي ترجع لعند ناديا امها وتقوليهم يخ...ماعندي مندير بهاد زواج حتى كيتحط باها بين عينيها وتراجع...من برا الفوال راها عروسة ومن تحت الفوال راها متعوسة...حركات سعيدة لسانها بتزغريتة حارة تحنت عشرة..قربات توريا طبطبات ليها على ضهرها وغمزات ناديا الي باستها فحنكها ولطيفة تاهي...حيث عيات حبيبة وخاص تدخل لبيتها الي صايبو ليها تما تولي تنزل فيه ملي تجي مع راجلها من لهيه....ماحدهم كيمشيو وروحها كاتمشي معاهم...حلات توريا الباب وهي تشير ليها تدخل...بخطى مترددة وبخوف تابعو رعب...مصير باها بين ايديها ومصيرها هي مجهووول...

~عينيها فلارض تابعة خطاوي رجليها الي حنتهم باقية كتفرتت...تا قفزت من الباب الي تسد...الفراش ديال بيت من اغلى مكاين...مغطين ناموسية بايزار بيض مطروز بطرز الفاسي الاخضر بمخادو والمزود ديالو...ريحة البخور فايحة فالبيت...

سمحات لعينيها يعلاو شوي حتى بانو ليها رجليه فتقاشر بيضين وبلغة صفرة...بقات تهز فيهم ورموشها كيرمشو بلا وقت وفمها كيترعد...تا استقرو فركابيه المفرقين بجلسة مهيبة ضخمة...بجلابة بيضة المزين خصرها بخنجر...حاط ايد فوق ركبتو غير ايدو الي قشعات زغبها الي فضهر ايدو من جنب وصباعو...حتى هزات عينيها الي مضصرهم الفوال باش تشوفو مزيان براحة...بان ليها داير القب ديال جلابة مغطي بيه راسو كامل..طرف من لحيتو ومسطاجو باينين...سردات الكثافة والحروشية الي فيه...اما كسدتو را بانت قدامها كبيرة...تا رمضو عينيها مقطرين ليها دموعها....كيفاش غاتسلم راسها لهاد الوحش المنظر...ومازال كااع ما هضر...

هز عينيه المكحليين بالطريقة التقليدية ديال رجال دوار والخيالة والعرسان...زادوه زين عربي اصيل...اما لون البؤبؤ كحال كحولية الضلمة وعكسو ما فالقلب من غمة...زادتهم جغمة الد.م الي تكبات عليهم والعقل الي ترفع لساااابع سما...

جسد فتي بريييييىئ وسنان الحليب..وقلب بيض....تلاقاو بقلب كحل د.مو قطران...المضغوط من دنيا وعبادها الي خلاتو ساخي بروحو...ومارحم راسو....

“العروسة فوق الكرسي ما عرفها حد فين ترسي”

والمعنى يا الفاهم ان المراة الي تدخل بيت الزوجية، لا هي عارفة زواجها كامل وزين ولا كامل وعامر بالشين"الخايب"...ولا مكاملش گاااع من بين هاد الاثنين...

حكايتنا ماشي هنا وقفات حكايتنا هنا بدات...كيفاش وعلاش نرجعو شوية لور ولا كيف كنسميوه ب

~~ فلاش باك...

ماولفاتش باها حزين ولا طالع ليه د.م غير الى كان مقاشح على ايوب على خدمتو وتصرفاتو...اما اغلب اوقاتو ديما ضاحك ناشط خالق معاهم الجو او مع حبيبة بنفسها...الى ماخرجاتش مع صحاباتها تخرج معاه هو...حيث علاقتهم تعدات فقط كونها بنت واب وانما حتى الصداقة الي بيناتهم كبيييرة...قلبها تهرس عليه...خاطرها مرض وبالها بداو يدخلوه الهموم وبدات تحس بالمسؤولية من دابا من بعد مكانت بنت همها غير دارهم باها...وحوايج وليمارك والقراية دابا...

كاع داكشي الي سمعات بقا يتعاود ليها ف دماغها حتى رهقها التفكير وهي كتخمم لدرجة تيليفونها ماطلاتش عليه كاع ماعرفات حتى فين حطاتو وفين اراضيه...حاطة راسها على المخدة وعينيها مرة فالسقف مرة راهم يشوفو فالماريو ملي تبدل الوضعية ديال نعاس..مرة فالنافذة الي كطل على طوالة...

ماعرفاتش وماقدراااتش شحال ديال الوقت وهي على داك الحال...تبكي وترجع تنفس...ترجع تبكي وتساراح الي حتى سمعات صوت اذان الفجر وصوت تقرقيب باها خارج من البيت باش يخرج لجامع...ناضت من بلاصتها كتسلل حتى خرجات من بيتها بدون مايسمعها حد فداك الضلام الدامس بالحس طلات عليه مسندة بايديداتها على شبيك الي كيطل على لتحت كتشوف فناديا كتسوس ليه فكتافو وكتربت ليه عليهم عرفات انها كطبطب عليه حتى باست كتفو ونطقات بصوت منخافض..

ناديا. : نوجد ليك الفطور ولا حتى تجي!؟

م.حفيظ : هي فطرو بينبقى شوي فجامع نريح خاطري شوية..

ناديا"تنهدات تا حدرات عينيها..وحركات راسها مهمومة من جيهتو ومن جيهة هاد المصايب الي نزلات دقة وحدة" : الي يريحك ديرو الحاج...كون مع الله يكون معاك ولابد يجي وقت ويحلها الف حلال...

مولاي حفيظ تبسم تبسيمة ديال الغدايد..تبسيمة الي كتقول اش اودي ميتحل اااش...كاع البيبان تسدو الدعوة عندو مشربكة خاص يضحي يا بهادي يا بهادي...المحلات الي مكريين الى غايبيعهم مايقدرش حيث الناس الي كارينهم من عندهم فاتو واحد المدة فالكراء وكانو ملتازمين بوقت الخلاص نهار بغا يخويو ليه مابغاوش وتواصلو لمحاكيم ولانهم ملتزمين وفاتت سنين وهما ملتازمين حكمات ليهم المحكمة يبقاو فيهم ويخلصو مستحقاتهم شهرية كيف كانو وهذا عائق...العائق الثاني ان الحمام وخا يبغي يبيعو مزال فيه مشاكيل ضريبة خاص يخلص الي فاتو ومشاكيل الفواتير الي جات قديييمة...كيفو كيف اي تاجر ولابد يطيح فالمشاكيل تجارية...سد مشكيل هادي وفتح مشاكيل هادي..وزيد اكبر كريدي كيتسالو هو الي مخليه يفكر يبيع ولقى عراقيل..وهو كريدي "الحاج رحماني" هادشي كااامل قدرات تعرفو حبيبة من امها وسماعها لهضرة باها الي هي انه عاجز كليا على سداد...وان رحماني حط ليه الحل هو قبول حبيبة بزواج يلقاو حل لكريديه ممكن جدا يسمح ليه فيه ومممكن بنسبة كبيرة يوصل معاه لتفاهم انه كل عام يحط ليه قدر ممكن حتى يكمل ليه...والا فهاد الايام يعطيهم ليه كاملين ولا يحطو فمشاكيل كبيرة يخسر فيها كاع ورثو وحتى الورثة الي معاه...بخلاصة جواب حبيبة هو الحل...يا تبقى فدار باها تواجه المصير يا تولي عروس وتواجه مصير ااااااخر...

رجعات كتجر فرجليها وعينيها شلال دموع...وقلبها بحر الهموم...وراسها بركان شاعل...رجعات لبيتها وحطات راسها على لمخدة من كثرة التفكييير والبكا ماشعراتش بعيينيها امتا تسدو...

الحال بقى هو الحال...مولاي الحفيظ راه كيمشي كل صباح هو والمحاسب يقلبو على حلول مايساليو حتى يضرب ليل فليل...مولاي الحفيظ مابقاوش كيشوفوه من صباح تايجي ينعس فينما تبغي حبيبة تشوفو مكيجيش ولا خارج ممساليش...رجعات كتمشي لسيارة التعليم كدوز الحصص ديالها وترجع...وجهها ولا شاحب غير بالتفكير من جيهة باها الي حالو كتقهر...غادي وكيدبال وكتافو كيطيحو اما وجهو غادي ويضعاف غير بالتفكير...تحت عينيه كحال...عياو يلقاو حل هو وختو وايوب معاهم تاهو حضر عقلو باش يفكر اقتارح كااع هو يبيع محل التجميل لكن مولاي حفيظ ماخلاهش واخا هكاك مابغاش يخرس ليه خدمتو وحلمو ورزقو الي كيجيب منو فلوس بتمارة...

~~ داز اكثر من اسبوع....

حلات الباب بالساروت...كان يوم الجمعة...تلاوة القرآن الكريم بصوت ياسر الدوسري معطرة المكان اما ريحة البخور فايحة فداك الرياض...صوت الناس على برا غاديين جايين فدروب الرميلة العتيقة...دخلات عياانة وراسها يتبخ بالشمس حيث جات غي على رجليها ماخلاتوش يتلقى ليها لا هو لا ايوب...مافراسهمش را مادخلاتش ومشات تكوانات فواحد جردة حدا جامع الكتبية وبقات عاطياها غير للتفكير...هزات عينيها ذابلين وهو يبان ليها جالس داير نضاضر شوف وكيقرا فشي وراق وداير صبعو على لحيتو كيخمم وقدامو الالة الحاسبة...تا وقفات عليه مبتاسمة باست ليه راسو...

حبيبة : بابا مزال ماغاديش لجامع !!؟..

م.حفيظ : اييه فكرتيني تدهيت..نوض نتوضى يلاه يلاه...

حبيبة : بابا بغيت نهضر معاك فاش نتغذاو...فيك مايخرج يدير معايا شي قهيوة ف الكافي فين كنگعدو انا وياك ؟!

م.حفيظ : اش تما القشة ؟!

حبيبة : هي بخصوص جوابي لهادوك ناس الي جاو من رحامنة..

م.حفيظ"هز فيها راسو وبقى شحال كيشوف فيها..ماحسابش ليه غاتجي تقوليه نعطيك جوابي..مامفكرش انها فكرات ولا غاتعطي رايها..قال را غايسولو على الجواب وصافي غايقوليهم منصيبش نعطيها وهي ماتبغيش.." : كاين شي حاجة تم ؟!...

تبسمات ليه وجلسات حداه...جمعات ليه دوك الوريقات من ايدو وحطاتهم فوق ديك طبيلة الي قدامو ديال زاج...وحطات صاكها ودفتر ديالها...شدات ليه فايدو وباستها وعاودت...

حبيبة : مكاين هييي الخير كيف كتگوليا هههه...بيت هي نهضر معاك نشرح ليك...مادير فبالك والو حيث صراحة توحشت نجلس معاك ماحدك اليوم عندك روپو حيث كثر من سيمانة ماشفتش وجهك وتوحشتك...فيها شي عيب ؟!...وزايدون نهضرو بخصوص دوك ناس نعطيك جوابي ورد عليهم سوا لا ولا اه...مهم بغيت نخرج معاك نفوج قنط..ماسافرتش هاد صيف راك شفتي كانو عندك مشاكيل فالمحلات والحمام ماقدرناش نسافرو..

م.حفيظ : هههه وكااان...صافي ماتعاود هي صلاة عالنبي...

باست ليه ايدو من جديد وقرب باس ليها جبهتها وناض يتوضى ويمشي لجامع فين كيصلي ديال الكتبية...اما هي طلات على ناديا وللاا رقية لقاتهم كقادو فالقصاري فين يسگيو كسكسو حيث وحدة كتمشي لحمام كيجي يديها الشيفور...ووحدة ليهم ووحدة كبيرة كتمشي لخضارة وصحاب ديسير الي فسويقة الي كاينة تما حدا جبل الخضر...طلعات لبيتها دوشات بالخف حيث الصباح كلو وهي فالشمس وعرقات وكان العجاج...هبطات لقاتهم حطوو الغذا. وغرارف كبار ديال اللبن...تجمعو كيف العادة مكانتش لطيفة حيث مشات ل دار ناسها فازيلال دوز معاهم شي ايامات من باب صواب وترجع حيث صيفها كلو كايكون فدارهم هادي فمراكش..وباش ترجع معاها بنتها...

فواحد المقهى راقي ف شارع محمد السادس...جرات الكرسي وشيرات ليه بايدها...

حبيبة : تفضل الحاج الصافي...

م.حفيظ : اش هذا ههههه...يا بسم الله...

كان لابس ضراعة رجالية فالبيض وطاقية صفرة فراسو...اما هي كانت بكسيوة خضرة ساامپل هابطة حتى لتحت بستيل بسييط وراقي بلا كمايم...وصاك شانيل اسود صغير بسميطة مضفورة ذهبية...وصندالة هيرميس كحلة...جامعة شعرها اسفنجة فوق حيث صهد فمراكش كان الحال قريب ياذن المغرب..حطات صاكها فوق طبلة وبدات تنقر بصبيعات ايديها وهي كتشوف فالكافي زوييين اطلالتو كاطل على واحد من افخم لوطيلات الي تما...

حبيبة : تطلب ليا على ذوقك ولا ذوقي...

م.حفيظ : اش بيتي تشربيني سم ههههه...

حبيبة : هههههه لا دوا الطوبة هههه...

م.حفيظ : انا بيت هي واحد نيسبريسو راكي عارفة..وشوفي معاها شي حليوة هكا شي شباكية ولا شي فقاص بنفقصو بيه الوقت...

حبيبة : هههههه لا غانطلب ليك شيزكيك بالفخومبواز باش يهرس الملوحة ابابا بيتي تقفرها على لا طونسيون الي عندك...

حرك راسو كيضحك وهو يجي النادل...عطاهم الموني..

حبيبة : واحد نيسبريسو صون سيكخ..اڤيك تشيزكيك فخومبواز بالنسبة ليه...واناااا "شافت الموني" ممم جيب ليا موكا فراب..وتشيز كيك لوتيس..."هزات فيه عويناتها مبتاسمة تا تبسم سيرفور بزين عينيها" et merci...

حرك راسو خذا طلبيات ومشا...اما هي رجعات كتشوف فالانحاء ناس جالسة مع بعضياتها ليكوبل...ها الي غير وحدو حاط لابتوب قدامو خدام وكيشرب شي حاجة الي كيتغذا معطل كل فهمو وكل وراسو باش كيلغي...تا ضارت لقات باها سااارح تاهو عالم بيه غي الله...طرطقات صباعها قدامو تا ضار...

حبيبة. : افين مشيتي اخا الكبيشي ؟! هههه...

م.حفيظ : خاك الكبيشي مشى عليه الكوتشي..."نفخ صدرو تا تنفخ وفشو"...زيدي هضري اش عندك تم...

حبيبة"صرطات ريقها وحاولات متبينش حزنها قدر الامكان..حدرات عينيها مخليا ابتسامتها على شفايفها وكتلعب بكورميطها المضفور" : عاود هضرات معايا ديك السيدة توريا...

حفيظ : شكون توريا ؟ اااه..ايه وامتى مفراسيش..

حبيبة : كنتي مبرزط ماكتجي حتى ليل معطل...مهم هي ماقالت عيب هي هضرات معايا وعاودت شرحات ليا على ولدها وخدمتو...وحطاتني بالصورة حيث هو مكيجيش بزاف لمغرب..هو خدام مهندس فبرلين...هضرت مع ختو الصغيرة شرحات ليا الخدمة مزيان حيث خالتي توريا ماقارياش ماقدراتش تفهمني...مهم هو ناوي يدخل ويتزوج ببنت بلادو نبقى زعما الى وافقت ههههه...غادي نبقى حتى يدير ليا الوراق ونمشي معاه لالمانيا...هو ماشي شي واحد كبيير وماشي صغير..

م.حفيظ : ايه ونتي على مابان ليا موافقة ؟!...ابنتي الى نتي موافقة انا منبغيش...راكي مزال صغيرة وماعارفة والو فدنيا مفششة بزاف..مع سلام سلام عليكم عليكم سلام نخشي راسي فمسؤلية زواج ؟...ايه هما ناس الخير والجود وخا بيني وبينهم كريديات ماعليش هادي حال تجار (مفراسوش را عرفات شحال كريدي ولا راها سمعات) وليني واعر عليك ابنتي ونتي فهاد العمر...

حبيبة : انا فعمري 18 مابقاش ليا بزاف وندير تسعطاش..بابا موافقتش حيث بيناتكم كريدي انا وافقت حيث فرصة مكتجيش بزاف..تعقل فاش گلت بيت نمشي لبرا نكمل قرايتي ؟..ورا المانيا دولة الصنف الاول فالقراية..مكيمشي ليها هي سيدي ومولاي يكمل فيها قرايتو...وزايدون انا مونسيون ديالي مكافيش باش نمشي فمنحة ونتا مغاتقدرش توفر ليا فلوس الشهر تما...وخاص شحال عاد بنمشي...فكرت فهضرتهم وعرفت عليه من خلال هضرة ختو وامو عليه...الى شفتيني مفششة را ماشي من نوع الي حتى يعرف شي حد عاد بننفكر نتزوج بيه...انا تفكيري قدييم كنامن بالحب بعد زواج...وزايدون كاينة فترة تعارف نقدرو نتخطبو ونتعرفو الى تفاهمنا علاش لا ؟!!..الى ماتفاهمناش كل يمشي فحالو ونتا ماتديش العيب مع ناس رحامنة...

م.حفيظ : منين جبتي هاد الهضرة ومنين طاح عليك هاد العقل...واش نتي حبيبة ولا شكون..."جا نادل حط ليهم طلبهم."

حبيبة"شربات من عصيرها شوي وتبسمات..الابتسامة الي كلنا عارفينها مغطية باب الحزن والالم وهذا اقسى شعور ممكن يعيشو الواحد" : بنتك حبيبة كبراااات ابابا ههههه...را كثر من سيمانة وانا كنفكر مرة نگول لا مرة نگول اه..مازگيتش فشي قرار حتى فكرت مزيان...علمتيني منحط رجلي فحتى خطوة الا وكنت اكيدة منها...راها فرصة كبييرة نكمل قرايتي تما وعلاش لا را غايستقر فالمغرب من بعد هادشي الي قالت ليا...باغي يتزوج باش يرجع يستقر من بعد...

م.حفيظ : ونتي شفتيه هضرتي معاه ؟

حبيبة"حركات راسها بالنفي" : لا...ولكن غايجي فهاد شهر على ما گالت ليا...

م.حفيظ"مزالو مصدوم..مزال خاطرو ممهنيهش..جاتو موافقتها فشكل..امتى هضرات معاها هاد توريا وعلاش عاودت هضرات معاها...ماعلماتوش ناديا بهادشي" : علاش ماماك ماعلمتنيش بالي للا توريا هضرت معاك ؟!..

حبيبة : انا الي مخليتهاش حيث مابغيتش تگولها ليك حتى نفكر فجوابي..را ماشي هي هذا الي خطبني معمري فكرت..بالعكس كنفكر هي هو كنت ديك الوقت مزال تنقرا ومزال مكملتش الباك وماخذيتوش...كانو عندي اسبابي..هذا معندي حتى سبب يمنعني حيث فرصة كبيرة بالنسبة ليا..ايه عارفة قادر ترسلني لبرا هي هو المانيا حسن..بتقدر ترسلني لفرنسا ولكن المانيا طوب فيهم...وعاد راه مستواه المعيشي ميسور بزاف..مغايخليني مخصوصة من والو كاع داكشي الي مولفة غانلقاه تا معاه...

م.حفيظ"الصمت"

حبيبة"قبطات ليه ايدو وباستها" : خليني نفرحك بيا باش نحيد من طريق وتوالى لمعتز ووردة هههههه...

م.حفيظ : ابنتي قلبي ماهانيش...جاتني فشييي شكل...

حبيبة : ياك كتحتارم قراراتي الى كانو فصالحي...وتا دابا هذا فصالحي...

م.حفيظ : هذا راه قرار العمر هذا اه قرار زمان ماشي لعب دراري...انا مانبزز عليك زواج...ومانبزز عليك رفض..."تنهد" واخا نشوف مع الحاج رحماني يديرو شي وقيت ويرجعو وديك ساعة نتفاهمو...

اذان الضهر فجوامع الدوار كاياذن....اليوم يوم عااامر فهاد الدواور ديال رحامنة حيث ناس كتمشي وتجي لسوق الي كيعمر فهاد اليوم ديال الاحد المحرة هو سوق موسمي كيعمر فالنواحي...دخل كاميو الي سايگو سيحمد وقف تا نزل منو الحاج عبد القادر كيرمي سلهامو وراه...نزل سيحمد تا دخل ليه زوج قفات جايبهم من سوق...

سيحمد : يلاه هاني راجع لسوق نهز دوك البگيرات نديهم لحاج الكرفطي نشد من عندو الامانة نجي عگب يدوي العصر...

ع.القادر : دوك الفلوس عطيهم لمك عيدة تصرف منهم لداكشي الي بغاو يتقداو لخطبة...

سيحمد : وايلي جوج المليون ونص ابا كلها...

ع.القادر"خبط بعكازو مغوبش بحجبانو الكثاف" : ونتا اش مشى ليك...ياك رزقك كاتديه فالرباح...ضراتك شي حاجة ؟!..

سيحمد"حدر راسو" : لا با حاشا...واخا كون هاني...

عيدة جالسة كتسبح وعينيها عليها...تا حنحن وهي تجي تجري كريمة باست ليه ايدو وعينيها محدورين طبطب عليها ورضى عليها وتمشى تا جلس جيهة عيدة...

ع.القادر : امضرا الحاجة زگيتو شي وقت مع عايلة المراكشي ؟!

عيدة"تبسمات تا ضحكت..فرحانة وماااقاداها فرحة" : ايييه غذا نشاعلاه نديو الخطبة ونهضرو ونشوفو البنت وشروطها...

ع.القادر"هز حاجبو وشاف فيها بنص عين" : ايوى را گالت ليه تهضر هي وياه...فين هو شفتو غابر...ماهضر ماتكلم ياكما ناوي يدير لينا خاوية فعامرة ويكحل لينا وجاهنا مع نسابو...

توريا"خرجات من الكوزينة مگفضة كمايمها" : وصيت هاشم يهضر معاه باش يعطيه نمرتها ويهصر معاها...

ع.القادر : ايوى تالين يهضر معاه صباح ماشيين نخطبو ليه وراه يسولو عليه...نديو العيب اتوريا ؟!

توريا تلجمات...ماعرفات ماتقول كتسنى فهاشم يعطيها الخبار اش قاليه حيث هو الي غايهضر معاه...ومن الصدف هما كيهضرو فهاد الموضوع هاشم كان خارج من قدام باب القيادة وداير تيليفونو فوذنيه كيصوني كيلقاه طافي او مامكونيكطيش بتاتا...دخل لواتساب كيلقى باقي اخر ظهور ليه فالواتساب قبل اسبوع وزيادة ملي هضر معاه داك نهار هذاك هو النهار الي اخر ظهور ليه فواتساب...لمن غايعيط ومعامن غايهضر يعرف اخبارو...شك انه دار ليهم بصح خاوية فعامرة....شاف فساعة ومشى ركب فالسيارة وانطالق لدار يتغذا ويرتاح ويرجع لخدمتو...وصل لدار مهلوك حيث كان فواحد دوار خدام...مع دخل كيحك فراسو بتعب تا سمع صوت امو كتعيط ليه...

هاشم"باس راسها وايدها وتلاح حداها كيحك فراسو" : ميمتي..

عيدة : تا گوليا البيشير (كتقوليه البيشير شي مرات لا فقصها ههه) ماليه مكان ماليه جواب...ونامسينا عطيت لحسام يعيط ليه مكاين...عطيت لمعگوبة ديال اشراق الي گالت حلف عليها ماتخرج من بيتها نوضتها من وسط كنانشها تاهي مالگاتو...هاو سعيدة تاهي خلاص...ليك عليه شي خبار هاويلي يحلگ فيه "دارت صبعها فوق شاربها الفوقاني" ياكما ناوي يحطنا بوجهنا وسط ناس الي بغينا نخطبو ليه منهم...

هاشم"عض شنايفو اصلا مفقوص منهم" : مي وااااا مي واش عطاكم الكلمة ولا لا ؟!...لا تقويوش عليه امي ولا يحلف عليكم وديك ساعة رجعي مرضي تاني دقة وحدة...تي صبري عليه امي شوية...

عيدة : وشوف فينهو يهضر مع درية يعطيها غا خبار بالي مكاينش...بغيتو تزيدوني نهضر مع حسام ولا شي حد يهضر معاها بلاصتو...

هاشم"ناض من بلاصتو مصدوم" : تي كيفاش يهضر معاها بلاصتو ؟!...تي وصلت بيك تزوري ؟...تي لا درتيها را شيطان يسلم وليهو.دي يسلم والكاف.ر يكف.ر...تي نعلي شيطان...

عيدة : نوض صوني عليه هضر معاه !!..

يلاه بغى يندب حناكو وهو يصوني ليه تيليفونو جبدو من جيبو وهو يلقى سميتو خرج عينيه وضار شاف فمو وناض خرج قبل ماينطح راسو....مع خرج على برا دار تيليفون فوذنو وجاوب...

هاشم : بشار...تا فين غبرتي اصحبي...

بشار : مامساليش...

هاشم : وتا را گالبين عليك دنيا هنا...غذا غاديين يخطبو ليك فراسك ولا لا...

بشار : ماساليتش...حداك بنت المشاوري ؟!

هاشم : بمكن لداخل...

بشار : دوزها ليا نهضر معاها...

حرك هاشم راسو ودخل لداخل كيقلب عليها حتى بانت ليه جالسة فالكوزينة هي وسعيدة كينقيو فشي قمح تما...حتى وقف عليهم شاف فتوريا وعطاها تيليفون...

هاشم : بشار...

توريا : هااا ؟!..عالسلامة... "حنحنات وكحزات زيفها على وذنها" ملي دفنوه مزاروه !! ياك اولد كرشي تخليني نخطب ليك انا وجداك ووغبر ياكما ناوي تحطني بوجهي...

بشار : خطبتي ؟!...ماعندي مايتسالك....

توريا : وعطيتينا ضو الخضر نبقاو نتسناو !؟..جداك بالفرحة بيه فيه خطبت ليك...

بشار : ونتي مافرحاناش ؟! المهم عندي نتي ميمتي...

توريا"هزات حاجبها" : وايلي فرحانا ما گاداني فرحة...راني شفت البنت زينة وصغيرة وفتية...غا زينها يگلب ليك سفى على العلى...عشقتها ليك مك عيدة...وتانا عجبتني...

بشار : شي فلوس دوزتهم ليك فحسابك.."كيحك لحيتو بصبعو" شي بركة قضي بيها بينما جيت تما...

توريا : امتى ناوي تجي...را الخطبة غذا !!...مناويش تشوف البنت ولا تهضر معاها ؟!

بشار : مناويش...وقعو ليا شي مشاكيل هنا تزيرت بالبياان...قضي اش خاصكم الي حبات خاطرك ديريها خاصينك الفلوس علميني ولا گوليها ل هاشم فحالة حشمتي ونفيرسي ليك..."شاف فساعتو" تهلاي ليا فراسك اميمتي...رضي عليا...

توريا"وتقول واش قالت الله يرضي عليك" : امتى ناوي تجي ؟...

بشار : ماعرفتش يمكن غذا نخرج يمكن سيمانة...المهم قضيو غراض...

توريا : واخا نصيفط ليك غا نمرة البنت هضر معاها !!

بشار : لا...

توريا : نصيفط ليك صورتها !؟

بشار "قطع عليها فوجهها خلاها كتبرق"...

هاشم رجع لعند مو وعلمها بالي بشار هضر معاه ومع مو...

عيدة : عنداك اهاشم يحطني بوجهي عنداك يديرني ضحكة عند الناس...الدرية بغاات ورحبات وماگالت يخ نوض نگوليها مكاين شاي...

هاشم : تي هاد بنت المراكشي كي دارت قبلت ؟ جاني فشكل هادشي...مادرتو والو زعما ؟!

عيدة"خرجات فيه عينيها" : كيفاش هاد مدرتو والو ؟ كي بنا ليك اهاشم ؟...لاكون تگاد فهضرتك هاد نيبة (هاد المرة)...مالنا كي جيناك تاتگول علينا لا ؟!"بدات تسعل" كحكح كحكح...

هاشم : صافي نعلي شيطان...

عيدة : هااااشم هاني گدام العباد الي هنا گدااام مرتك وولدك وبناتك...ها مرتك تسمع...الى سمعتك وصلتي شي خبار لدوك ناس على بشار وعلى الي طرا سنيييييين هادي...راني ساخطة عليك الى يوم الدين...

هاشم : اش وصلنا لهادشي...

عيدة : هاااني گلت ليك...علاه مالو ماتجوج علاه مالو اش خاصو...كتاب عليه المكتاب نهار زين ماشافو خليه يتبت فبلادو وخليه يكيل زرع بلادو وخا يكون شعير....خليني نفرح بيه وندير بوصية نور الدين خوك...هاني هضرتي گلتها وها مرتك تسمع وبحلووووفي وگلتو لدوك ناس شي حاجة ولا تداخلتو بيني وبين بشار عمر هضرتي تجي فهضرتك نتي وعمر وجهي تشوفوه...سيرو دخلو سوق راااااسكم وهادشي علم بيه ولدك ..

سعيدة : صافي صافي ميكون غا خاطرك..."خرجات عينيها فهاشم" صااافي ..

هاشم بقى يرمش جا يتغذا ويرتاح لقى راسو تگهم ودوز بديسير...تنهد مزيااان وناض دار كاسكيطتو وخرج هو كاع مخلي سعيدة تعيط ركب وزاد فالبلاصة....

..يوم جديد صبحو دار الرحماني مع بونبر كيوجدو باش يمشيو يديرو الخطبة رسمية ويتافقو على اقرب وقت يديرو فيه عقد القران والعرس...نزلات توريا لابسة جلابة بيج عاد مخيطة وشالها بيج...وصابو تاهو بيج فيه بزيم مذهب...كتخشي فتيليفون فصاكها تالقات سعيدة لابسة تاهي وعيدة خلاااص لابسة احسن ماعندها فجلالب و فشيلان...

مليكة"كطرطق فالمسكة..واقفة دايرة صاكها فدراعها لابسة قفطان جوهرة فالمسكي ومخلية شعرها مطلوق على راحتو مصاوب ودايرة دوك سناسل الكبار فعنقها اما ايديها خلاص.." : هز احسام داك طيفور خليه بلا غطا ديرو فكوفر طوموبيل ديالنا...ونتا زكريا هز ديك الكرطونة الي بقات ديرها فطوموبيل هاشم...

زكريا : مرحباااا...

توريا"قربات عندها كتسد فساعتها" : فين ربيعة...

مليكة : ربيعة مكاين لاش تمشي ها سعيدة غاديا...نتي مزال ماهداه الله يجي ؟!...

هاشم : فوتيه عليك دابا يجي ياك كاتقضيو فالغراض !؛

مليكة : هاحنا فايتينو هاجنا فايتيييييييينو...الله اودي..زيد زيد را با ساير يتسنى لا نتعطلوشاي على ناس كيما كان الحال موصلونا غابالخير...

ثلاثة سيارات مشاو عامرين ب الهدايا ديال الخطبة...اش منك يا تقاطع تواب غير جيدة ماشي كيختارو برقي...انما كيشوفو توب الغالي ويشريو.حيييث غالي.....وداو بيجامات من اختيار مليكة...وشراو ليها حتى ذهب هادي غير البدية باغين يكبرو بيها...ويحلو ليها العينين على انهم ناس عندهم وميسورين بزاااف..

مسافة طريق حتى كانو داخلين لمراكش مع الحداش...شدو طريق المدينة القديمة حتى وصلو لرميلة كان معاهم هاد المرة هاشم وسعيدة الا سبحمد الي ممشاش...مع الدخلة لقاو فاستقبالهم لطيفة و الحاج حفيظ بابتسامتو البشوشة....تسالمو كاملين ودخلوهم لصالون الكبيييير...

فهاد الاثناء كانت فبيتها جالسة جنب ناموسية لابسة قفطان سااامپل جوهرة مخيط سااامپل...مدايرة لا ماكياج لا والو حدها رشات بارفانها ورطبات شفايفها وجلسات تسنا مكتوبها...عينيها كيشوفو فنقطة بعييييدة...قرارها ماجاش غير هاكاك قرارها جا ينقد باها وفنفس الوقت ماتازمش باها عليها مضطرة تبين انها قابلة وضاحكة فرحاااانة باش يتهنا عليها....تخاصمات مع ايوب بسباب قرارها ومتسوقاتش ليه واش حاس ولا لا.... حتى انها ماسولاااتش على العريس علاش ماهضرش معايا لا هي مسوقة لا هو دار بيها...سهات لدرجة ماحساتش ب امها داخلة باش تقوليها نزلي عندهم...

حبيبة"فحال الى قفزات بلا مترد ليها ناديا البال" : اا ؟ جاو هههه مرحبااا...

ناديا : هضرتك ابنتي ماقنعاتنيش فاش هضرتي معايا مورا ماهضر معاك باك...علاش حاسة بيك غييير مدفگة فهادشي...

حبيبة"ناضت وقفات مبتاسمة..وقربات ليها عنقاتها" : وااماما وراني راااضية بالعكس غير مع اول مرة هادشي نعيشو وحيث داخلة على مسؤولية ضرووري نكون خايفة...والله اماما مغانلقى فحال هاد الفرصة ونيييت بابا يتنفس شوية...ومانديوش العيب مع ناس..كوني هانية الى ماتفاهمتش معاه مغانكملوش...سوا خطبنا سوا درت معاه العقد...

ناديا"تنهدات" : واخا..واخا نزلي عندهم...

تبسمات وهي تخشي ؤجليها ف بليغة ذهبية...الوجه يشعل ونااعم...الايدين نقييين وضفيراتهم مقادين يبريييو..كلها نقية وكلها زوينة واي حاجة فيها نااعمة وتلفت...شدات فيها وهبطات معاها لتحت وجهها مكتاسيه الحشمة وتزييرة...مهبطة عينيها تا دخلات عندهم سلمات عليهم وجلسات بين عيدة وتوريا....

تحط اتاي وضيافتو...تحط الغذا الي ماخفاش على عائلة المراكشي اقل من انه يكون فخم يليق بالضياف...وصل وقت الهضرة والجد ونطق الحاج بايد اىكلام اما هاشم را غير حادر راسو ويسمع...

ع.القادر : ايوى سيادنا الي گالوها جدودنا خير البر عاجله...بشرتينا الحاج ب الموافقة فرحتينا بنسوبيتك وفرحتي الحاجة ببنية جديدة تزاد عندنا فالعائلة..وخير نسوبية وخير عائلة بحول الله...

م.حفيظ : مرحبااا...

عيدة : ندوزو لفايدة وبراكة من تعطال...الولد راه فرح ومااا كداتو فرحة...واخا ماجاش معانا راه وكلنا...وعطانا ضو الخطر نتصرفو...هو راه مايجي تانبغيو نديرو ضريب الصداق...

م.حفيظ : ايه مرحبااا...وليني كيفاش مايجي تالضريب صداق..علاه مايجيش يتفاهم بعدا ويشوف شروط البنية...

عيدة : شروطها كلها مجابة...

ع.القادر : عندو خدمة مزيرة الحاج..مايطلقوه حتى لسيمانة هكاك..راه وكلني باش نوجدو الوريقات يديرو العقد وديك ساعة يتفاهمو الحاج...هو ماباغيش خيطي بيطي معاها ماباغي يتفلى...الى كان يناسبكم السيمانة جايا نديرو ضريب صداق نيت يكون جا وديك اليومين قبل يجي ويجلس هو وياها يتفاهمو اشنو هما شروط ونشاااعلاه كلشي مجاب باذن الله...انا نحلف الحاج ونعطي لگلبي الى بنتك مايخصها خير راني نديرها فعيني انا گبل من عينو هو...ولا قلقها نقلقو مثني ومتلت...

توريا"حطات ايدها على صدرها" : دواااا معايا وگاليا راني مزير فخدمتي باش نجي خاص نحيدها عليا وكي شتو خدمتو شوية قويصحة ميصيبوش بلا بيه..هاو وصاااني نكبر بييييك..تايجي وديك ساعة هضرو بيناتكم....

م.حفيظ "سكت ماعرف اش يقول حتى حنحناات لطيفة الي هضرات حبيبة فوذنيها"

لطيفة : خويا البنت موافقة على هضرتهم...المفاهمة حتى يجي ويديرو رؤية شرعية وديك ساعة يقضيو الغراض الى تفاهمو...

ع.القادر"خبط العكاز كيضحااااااك" : ههههه هذا هو المعقووول ههههههه...گبل العقد بيومين يجي يشوفك وهضرو ديك ساعة لا تفرطي شاااي فشروطك..غرقي والديه تالوذنين هههههه

عيدة : هههه اوكيه تستاهل را بنيتي هادي وفعينيا.... الله يجعل كلشي مبارك ومسعود...ما گلتو عييييييب...

يلاه غايهضرو وهما يقفزو تا شدات حبيبة فايد توريا الي تبسمات وغمضات عينيها على اثر تزغريتة حااااارة من لسان مليكة خلاتهم كيضحكو...الا هاشم وسعيدة الي غير مبتاسمين خصوصا هاشم كيشوف فالبنت باقيا صغيييييرة وغايگدموها لواحد مرة بعقلو مرة كيزهق ليه...والمشكيل تحط بين سخط ورضى وتكتفو ليه لايدين ورجلييييييين....حتى موافقة بنت بحالها عايشة فهاد الرياض ووجهها ديال الاميرات ماشي ديال تكرفيص تقبل بهاد سهولة...رجح انه يقدر يكون باها محافض عصامي معندهمش مسالة زواج عن حب...وشوية كيقول الله اعلم....

العشا كاياذن دخلات امها هازة طبسيل ديال شعرية بمطيشة لبيت فين كياكلو...كانت غير هي وياها وواحد ختها صغيييرة الي فالدار حيث باها مسافر لواحد سوق بعيييد مايجي تاياذن الفجر...اما خواتاتها كلهم مزوجات بقات غير هي وختها صغيرة...

عيشة : صابرين سيري عيطي لختك تجي تاكل...

صابرين : مابغاتش تاني امي...

عيشة"غوبشت" : هاويلي على معگوبة ليام هادي بغات تبقى ليا هوك ؟!...هاويلي هادي مال حالها مابقى يعجب ونامسينا رجعات راجل عامزيناتو تاهو رداتو ودابا ماباغيا تاكل...

ناضت مغوبشة ماعاجبها حال تا مشات ليها لبيت مع حلات عليها على غفلة عند بالها مغاتجيش...حتى لقاتها واقفة قدام المري كتعكر وطالقة شعرها وتبكيييييييي...مكحلة العينين....ولابسة واحد قفطان بيض ديال جوهرة وحاطة قدامها زلافة مخلطة فيها حنة.....حاطة قدامها تيليفون حالا فيه واحد صورة كانت لقاتها فانسطاغرام كتفتحو تاهي تشوف فيه اش كاين حالها حال لبنات...كتمشط وتبكي وتهز تيليفون وتبوس فيه...صورة هزاتها من انسطاغرام حسام كان لاحها فيها هو غير من جنب مشدود داير ايديه عند فمو مغووووبش وكيشعل فالكارو ديك الوقفة بجنب هي الي قدرات تلقى وهي الي خلاتها تعرفو حيث كاتب عليها حسام بالي هو وباه مع ولد عمو كاتب اسمو بشار. غير كتابة ممطاغيهش حيث ماعندوش انسطا...تا حلات عليها مها ولقاتها فحالة يرثى لها...تا شهقات وهي توقف...

عيشة : هاااويلي ويلي ويلي على شيخة وييييلي...يا تي مالك اش بيك...يا مالك كي طاري لقدرتك...علاش هادشي ديري فيه من نهار جات تايكة جايبة خبار ولد رحماني ونتي ماعلى برجك..."ندبات حنااااكها على جهدهم تا تقمشو" هاااويلي ياكما بمسبتو الكلبة ؟...هاويلي هادشي علاش ضلي ترجعي فالرجال المنخوية والهمة وشان...هاااااااااااويلي...ياكما الكلبة ليهو.دية داخل عليك داك الوقت (زعما ياكما عشتي معاه علاقة فاش خطبوك ليه)...اودي يااالكلبة...

زكية"كتنخصص" : خطبوني لييييه وخلاوني معلقة علااااااااش علاش ماجاوش ليا اهى اهى اهى...

عيشة : ولا يجيوش ليك ياك عالمينك بوقت البغلة ياك علمونا ماكاين شاي مابقشااااي..

زكية"خرجات فيها عينيها" : واااااا بغيتو بغااااااااايتو هيييييييييي بغيتو امي بغيييييتو وكانمووووت عليه امي واااااااااامي را شوااااوني شوااااااااااوني ياااااا مي شواو ليا گلبي....وعلااااش امي اش خاصني واش ناقصني ياك كلشي فيا شعر وزين علاش حيث فعمري 31 عام صافي مشى عليا تران مابقيت ليق ليه والو...علاااااش امي اهى اهى...

دات ادييها تالفوق ونزلات على الحناك نزلة وحدة وتعاود تا بدات ختها صابرين تغوت وعيشة مشات ليها تجري تلاحت عليها جرتها من شعرها دارتها بين رجليها تنتف وضرب وتعض ولاخرى تبكي بين الحزن وبين الصدمة وبين شمتة...وبين تعلق حتى لتفلق....كتغوت لربي الي خلقها وعيشة تغوت وتعض وتضرب...

عيشة : امسواك القح.بة مسواك هك تبقاي بايرة بلا راجل يقببل عليك الله ينعل والديك ونعل جد بوووك المشوهة...

غا هي طلقات منها وهي تنوض زكية كتغوت لربي الي خلقها وتبكي وتندب وغاديا خارجة وتغوت وعيشة الي لقاتها تشير عليها بيها...زكية عقلها خرج مابقات عارفة اش كدير عقلها ترفع قلبها سكت جهلت واحد جهلة ما فسوقها مايتعاود...واحد الحالة وصابرين تغوت وتشد فامها...

عيشة : سيري شدي بنت لحرااةم سيري لا تخرج تشوهني مع دوار..."كتطرش فحناكها وتندب" هاااااويلي بغات تشوهني هاويلي...هاااويلي...وتي سيري....

مالحقوووش ابدا يشدوها كتطيح فلارض وتنوض شعرها الحريري ولا شاد لفوووق...وجهها كلو تقمش العكر ففمها تجلخ الكحل فعينيها دااااع..كلها ولات حالتها....

زكية : واااا بغيت نموووووت نمووووووت...واااا عذبوني وقهروني.....واااا حسو بيا راني بغيتو مادرت العيب...وراه گلبي يااااااااااااربي تشوااا تشواااا واااااااااااااااااربي راه مشى ليا الغالي على گلبي..."كتهز راسها تالسما وتهبط على عنقها حاسة بالقجة حاسة بدنيا توقفااااات...قدام دارهم فديك الوسعة فتراااب يلاه ساقييين كان الغيس...هزات داك الغيس وطلاتو على حناكها وتمرمغ تا خلعات عيشة ولات غاتندب وتبكي وتقول بنتي مشاااات...ليلة كحلة زحلة عليهم وتا باها مكاين...ماعارفينش راها دخلات فهيستيريا خاصها توگض"

زكية : وراني كنبغيييييييه امي كنبغيه..وراني كنت خدامة عندهم منهز العين غا فشردو هو....وااااااا مول گلبي مشااااا...وخطبو ليه غيري...واااا ميمتي راني حلمت وهي حققات...اهى اهى..وراني منصيييييييييبش امي واااا بغيت نموووووت...

ناضت هكاك قفطانها البيض ولا حموووم بالغيس...دخلات تجري لكوزينة هزات بريكة وخرجات لبرا مشات تجري فين كاين البيت ديال البير...كتقلب بهيستيييييريا وختها تابعاها وتبكي اما عيشة راها سخفات....وطاحت عند الحايط جالسة وتعدد ماعرفات مادير ليها....

زكية بقات تقلب بهيستيريا بان ليها بيدو ديال ليصانص وهي تحلو عقلها مرفووووع...خواتو عليها من فوق ؤاسها شعرها كلو تبلل بليصانص وبدات تشعل فديك البريكة...كتشعل والعساس يلاه داخل يشد العسة تا بانت ليه خارجة ومضاربة مع بريكة...

صابرين : عمي سااالم واااعمي سالم عتق ختي زكية...

يلاه غاينوض تا بانت ليهم شعلات البريكة وهوووووووب العافية شعلات فيها بقات تجري بعافيتها وتغوت لربي الي خلقها.....

الستة ديال الصباح..فهاد الوقت ناس البادية راها كاتقضي فشغالها...خصوصا فالصيف...صوت الفرارج كاسرة دنيا...وصوت البهايم خلاص مع ريحة الغبار وترباني عاطية للبادية لمستها المعروفة والمريحة للنفس...

خرجات كريمة مرات رضوان الكنة جديدة...هازة صينية فيها زوج بروقة ديال القهوة كحلة معطرة بكيسانها حطاتها فوق طابلة فالمراح تما فين جالسة عيدة وتوريا ومليكة كيهضرو ويذاكرو اش يشريو واش يوجدو...

مليكة : وامي تي مناوياش تعلمي الحباب ؟!

عيدة : ماتعلمي حد دابا تانديرو تكاتيبة (عقد القران) هاو نديرو الفرح...العينين علينا كثيرة من جيهة بشار...الحضايا عطاهم الله...

مليكة : تي گولي ليا اش داير لمسخوط لديك لحسنية..تي مالها مسكينة اا بكمة تسمع سميتو تفاوت على عقلها...

عيدة : ماداير شاي..فين شافها هي تبكمت من صغرها..الي دار ليها راه شبه ليها فيه...البراني الي بان ليها تعگدهم...راه يخلعها من صغر ماشي غا دروك...ولا تبينوها شاي فالدار ماخاصنا صداع مع ولادها...شوفو كي ديرو لا تخليوهاش تخالط ولا علموها راه جاي تركن فدارها...تي كي ديري تقنعي وحدة صايط ليها ريح فمخها...

سعيدة"داخلة جايبة سنيدة لقهوة حيث كيشربوها غا هي وحدها عاد كاين فطور تاني هو الي فيه اتاي ومخمار مريح" : تي كي نديرو منخليوها دخل..وراها تبغي تلعب مع بناتي...تبغي تاكل...كي نديرو...

عيدة : الي درتوه ديروه...بعدي علينا المراة ماخاصنا صداع ولا علمي حسام يگولها لواحد فولادها ميخليوهاش تجي ولا علميها نيت راه جاي تركن ف عشها...هاويلي...

تنهدات سعيدة مالقات ماتقول حركات راسها وصافي...ضارت مليكة كتشوف حداها شي حد مغوبي وقاستو بايدها وهو يتحرك....

مليكة : تي شكون ناعس هنا ؟!

توريا : حسام ولد هاشم جا يامس من مراكش معطل ونعس تم...

مليكة : فين يوسف كاع ما بان ليا الكبيدة ديالي...

توريا : داه سيدي معاه لسوق يبدل جو شوية...

مليكة. : اش درتو دابا فالمقدية "كبات ليها توريا كاس قهوة كحلة معطرة..مداتو ليها وبدات دير فسنيدة وتحرك" اش خاص نبداو بيه...

توريا : نديو تقاطع التوب...شوية وينوض حسام يدينا لمراكش نحطو ليها جلالب يتخيطو هما وشي جوج قفاطن...على الله يوجدهم گبل من الضريب...نمشيو عند ذهايبي وليني هي ولابد تمشي معانا تقيس وتخير...

مليكة. : علميها اليوم توجد راسها لغذا تخرج معانا...اليوم نعيط لذهايبي العمراني الي فمراكش يوجد ليها شي خواتم عين وحاجب مزيانين العمراني را جاري ف نيس (ففرنسا) كايجيب ذهب زيييين...داكشي ديال لتحت عطيها فلوسو تبان ليا بعكاكة تعرف لداكشي وتعرف قياسها...وروايح سوليها اش كيعجبها تصدقي شاريا ليها شي ريحة تعيب ليك عليها....وشي حاجة نشريوها ليها حنا...

توريا : صبري نطلع عند اشراق تركب ليا نمرتها ونهضر معاها....

مليكة : هاه وسيري هضري معاها وقريها...علميها باشنو كاين ديرها فبالها...بغات هي هاديك مابغاتش قرصيها شوية...ناس را ساقت الخبار خطبنا ليه تسيق لينا الخبار فركتنا نديو العيب تاني...

توريا : كوني هانيا....

مليكة"شافت فمها" : مي...با وجد الحولي الي بغينا نديو ليهم معانا ؟!!...

عيدة"جبدات طرف من شالها لور لاوياه من تحت عاقداه وجبدات واحد ضمصة ديال 2000 درهم" : واااجد...فكرتيني الله يفكرك فالشهادة ابنيتي... شدي هادي دفعيها ل ذهايبي تالصباح يجيب ليا الحاج فلوس الغلة الي وصيتو عليها...هاو توريا تعطيك من الي رسل ليها بشار...قضي معانا الله يرضي عليك كبري ببنت الناس لا تخليهاشاي مخصوصة...

مليكة : والي فجهدي نديرو امي..."جالسة فخادها مشتحين لابسة واحد بيجامة طويلة غوز" صافي عقد وتركاب الخواتم !؟

توريا"ضحكت مستهزأة" : تركاب الخواتم ههههه...فين هو الي بغى يركبهم..گولي الى جا وداز كلشي بخير ماشمتنا مع ناس انا نشري ليك خاتم...ههههه...

مليكة : وا سخط مديه وشابعو لا بغى يهز خنافرو نهبطوهم ليه...الي عليكم ديروه كبرو بيها وزيدو تا شي سنيسلة خفيفة اما دبليج عصير صابون خلي تاتبغي تروح ليه وعطيه ليها نهار صباحها...(ناسية حسام الي ناعس ههههه)...

توريا : ايوى تايصبحها ولينا هضرة وكلام...

مليكة : تي مي ما گلت ليكش..دهاتني دهوة ونسيت تي عرفتي معامن تلاگيت ف فرنسا... كي شتي مشينا ليدل (lidl مركز تسوق تجاري ف فاوروبا)...هو فين تقدينا المقدية ديال راس سيمانة..وتما تلاگيت بنت الكرفطي هي وعگوزتها يلاه جايبها راجل تاهي ناقشة ليدين ورجلين حنتها باقي حمرة يضهر ليا يلاه كي جات..العگوزة فاطنة لابسة ليك تاهي كبوط وسروال لاحت جلابة ونگاب....

توريا : وراه فاطنة كانت مدسوسة غا هنا فدوار..فمها مزكم لا هي لا ولادها يا العياذو بالله...

يلاه كيهضرو اتا ياااا خووووتي ناض على وقفتو تا شهقت مليكة ماعرفاتو ناض ولا طار..جا واقف قهروووه بالهضرة عند راسو...اش غايقول بغى يبكي بغى ينبد...

حسام"الهضرة تقجت ليه بالفقصة" : تت تا تهاااا هاهاهاها...يااااااا هااا عمتي ياااهاااه...يا تي شوري ياهااه يا قويتي ياااا عمتي يا تي حگلني نگول غليضة...ونتي لحم عباد الله الملج ليك والفخاد ليهم والعضام لا صابو باش يمشيو...

مليكة"شادة على صدرها" : هاناري هذا مالو يگطعو عليا..ياك لباس..

حسام : شتي نتي اعمتي هي الي غاتسخن شي بريريد فداك جهنم وتمديه لعباد الله.."تم غادي ويبرگم خلاهم يرمشو" اسيري بغيت ليك زغب فالضراص...

لحظة سهو منحاتها لراسها...قدام المرايا كتشوف وعقلها سااارح ف الحياة جديدة الي كتسناها مع شخص اشبه بالمجهول بالنسبة ليها...ماكتعرف عليه غير سميتو "بشار الهاشيمي" شكون هاد بشار وكيداير طبعو...واش غاتفاهم معاها ولا تزطم على قلبها وتعيش معاه وخا ممفاهمينش...لان الي قدامها حياة مصيرية مافيها لا نزيد لقدام ولا نرجع بخطاويا لور...الله الي عالم اش مخزون فهاد القلب واش كيعانيه العقل...

من الي خطبوها ومن الي زگاو ورساو الهضرة وتافقو...وهي كل ليلة ب مية تخميمة وتخميمة...النعاس شبه كاين...والارق ولا ملازمها...والقلب بدا يعمر ودخلاتو نار الغمة...الحاصول راها كل ليلة ب لا حولة ولا قوة...وشكون يحس بيها وهي كاسية راسها ومغلفة وجهها ب لباس الراحة وقناع البسمة...

تنهدات وهي ساهية نسات راسها انه خاصها تلبس وتوجد حيث جايين باش يخرجو معاها تختار معاهم...مضطرة تقبل باش ميبانش عليها انها ماراضياش...خذات بادي لوشن ديال ايفغوشي ذهنات بيه لحمها وجلسات فوق ناموسية خذات بيو اويل ذهنات بيه كرشها وسيقانها تا خلاتهم يلمعو...عاد فازلين فيها وصفة منزلية كتديرها مورا العومان ( حكيك ديري فيه فازلين ديال لعبار وعكر فاسي وزيت لوز )...لرجليها ولبسات تقاشر فيساع بينما تلبس وتقاد تحيدهم ويرطبو ليها رجليها...جرات سكة ديال ماريو الي بابها من زاج بقات ساهية فدوك الحوايج اااش تلبس..خاطرها ماباغي يلبس تاحاجة...حتى استقرت على جليليبة مخزانية خياطتها ساامپل سفيفة عادية وقب صغير بالشوشة قصيرة حد الكعبة فالبوردو حطاتها ومشات طلقات شعرها نشفاتو مزيان وخلاتو مطلوق على راحتو فازگ ذهنات ليه غير سيروم balea باش يحميه ليها من شمس وحتى كيحميه الى سشوراتو...ذهنات بستيك البيطان وذهنات ليكخون دشمس ورطبات شفايفها فقط عاد لبسات ديك جلابة وجمعات لوازمها فصاكها..

خشات تيليفون فصاك ومشات جلسات حيدات تقاشر طلات على رجليها بانو ليها حمريين من تحت ورطبيين...سمعاتو كيصوني وهي تخرجو بانت ليها "khalto touria"...

حبيبة. : الو خالتي توريا...اه نتوما لتحت ؟ واخا هاني هابطة...

يلاه ناضت رشات ريحتها وهي تدخل ناديا لابسة تاهي بغات تمشي معاها...

ناديا : واجدة !!...

حبيبة : ويي واجدة...فين جدر ؟!

ناديا : مابغاش يخرج من بيتو..خليه را تانا معاجبنيش هاد زواج..

حبيبة"كشرات ملامحها بقلة حيلة" : وخلاااص اماما..را هضرت معاكم وانا عجبني وعاد عندنا فرصة باش نهضر انا وياه وبنتفاهمو...فرصة اماما هادي مابغيتش نضيعها...وعاد يفك بابا مشاكيلو مع الكريدي...

ناديا"وسعات عينيها" : ويلي ياكما بغيتي على ود الكريدي...

حبيبة : را الى مكانش عايش فالمانيا ومكانوش مزيانين والله اماما منتزوج بيه..."قربات ليها وتنهدات" اماما وااا ماما واش نتي ماعارفانيش عندي نيشان...الى مابغيتش را وخا تلاقى لارض مع سما...ياك گلتي ليا ماشي شي كريدي علاش بينتزوج بسباب كريدي ياك ولا لا ؟!!.."باستها من حناكها" هيييي فرحي اماما را بنمشي لبلاصة زوينة وبنعيش مع ولد الناس غايتاقي فيا الله...الى خفتي نولد وانا صغيرة هي كوني هانيا مغاديش نولد حتى نكون راسي فقرايتي...الى ولدتهم بيبرزطوني دابا وخا مكرهتش نردك جدة...يبان ليا ماراضياش تولي جدة اللا ناديا ههههه...

ناديا"جابت ليها ضحك" : الله يمسخك هههه...زيدي زيدي ماتخليش للا توريا وللا مليكة يتسناو...

تبسمات ليها ابتسامة حنوونة ناااعمة...مشات لماريو الاحذية وهزات صبادرين ذهبية فلون صاك جات مع جلابة بوردو...هبطات بخطى مترددة وتاابتة تابعة امها لقات توريا ومليكة جالسين فصالون ضايفتهم للا رقية ولطيفة عصير وحليوات لوز بزز حيث واقفين خاصهم يتحركو يتقداو ليها...سلمات على توريا من حناكها وتوريا هزات حاجبها ضنات غاتبوس ليها ايدها ساعاك سكتات محكراتش حيث مزال ماعارفاش...ومليكة تاهي سلمات عليها...شكرو لطيفة على ضيافة وخرجو هما وياها وناديا لقاو حسام واقف بسيارة كيتسناهم...هز عينيه وهي تبان ليه حبيبة مع قصييرة بزاف جاتو باقي صغيييرة وصغيرة نييييت.. تنهد وتحسر على هاد البنت الي غايزوجوها لشخص مع راسو ماحاملو...مشاكيلو نفسية كبر من انه يكون انسان ديال الاستقرار...

لحد الساعة كلشي عند بالو را عيدة مرضات وكانت على مشارف الموت بسباب حسرتها على بشار...حتى بشار بنفسو حس بالذنب من جيهتها حس بانه بصح كان غايخسرها اضطر يدير ليها خاطرها واخا يبقى بلا خاطر المهم هي ترجع ليها صحتها...سكتو وكتموها لعل وعسى هاد الاستقرار ديالو او زواجو يخليه يحس انه عندو مسؤولية فالمغرب خاص كل كونجي ولا كل فترة يجي وبهاكا غايوليو يشوفوه بزاااف وموراها العلاقة بينو وبين امو ترجع ترمم والكسور تجبر...دايرين امهلم فهاد العروسة الي غاتجي وتكون صلة الوصل بيناتهم...

مليكة"ركبات حدا حسام" : يلاه حسام زيد...

حسام"تسنى تا ركبات توريا وحبيبة وناديا الي تبسمات ليه وسلم عليها..شاف فمليكة" : فين...

مليكة : دوز دوز عن داك ولد الهم هو لول...

حسام"ماقالتش ليه شكون نيشان ولد الهم ماعرف راسو شكون ولد الهم حساب ليه بشار حيث هو الي مشبعاه معيو" : عاااه ؟

مليكة : ويييل شيطان سطغفر الله واتوب اليه...

حسام : يا راااجل...

مليكة : تا سير ل عند ذهايبي ديالنا "كتهضر وتحشي لناديا زعما را عندها المجوهراتي ديالها كتهضر وتحرك فبراسليات وتدوز على شعرها المصاوب" العمراني...

وصلو بلاصة ذهايبية ركن سيارة فالباركينغ .وبما ان ذهايبي معرفة مليكة فراه هي الي سابقة دافعة ليا صدر وطرفها لور يتهز ويتحط حساام الي طوييل بزاف وغاديا حداه كيبانو كي رقم 10...حتى دخلو لمحل ..

مليكة : واااا داك ولد الهم دياال جاري ههههه واا سي علي..

علي : اهلا ب للا مليكة...كيدايرة هانيا..

مليكة"حطات صاكها فوق الكونطوار وربعات ايديها متكية ومكوزة بطرفها وتضحك مع علي" : هانيا اخا الكبيشي خليتوها يا بهجاوة...

علي : جبتي للا العروسااا ؟!

مليكة"ضارت عند حبيبة وناديا" : زيدي حبيبة هاهو وصيتو عليك..عندو المخير كيدخل عندو هو..غير صحاب نخوة الي كيتقداو من عندو..اختاري والى عجبك شي شكيل وريه ليه وهو يكومونديه ليك بالي حب خاطرك..."جرتها معنقاها مليكة قداش وحبيبة قد نقطة مسيكينة ...دارتها تحت باطها ومع مليكة من نوع الي كايدير sherley لبيطانو شماتها حبيبة وهي تكمش وجهها..."

علي"صغر عينيه فناديا" : واش الحاجة مرت الصافي هاديييي...

ناديا"ضحكات" : ههههه هي هادي الحاج علي...

علي : مرحبااا الحاجااا مرحبا...فين مولاي حفيظ...

ناديا : هييي مع الخدمة والمحلات...

علي : ومابقاش هضر معايا مابقى تقدا من نهار گاليا ولدي جا تقدا واحد الگورميط مضفور گاليه راه لبنتي نجحات...

ناديا : ايييه لهاد العروسة هي لمن بغاه...

علي"جمع ضحكة" : اهياا بايجوج بنتو صغيرة يا الحاجة...

مليكة"فحال ماعجبهاش الحال حساب ليها هي الي كتعرفو تا تصدمات" : وايلي الحاج لا صغيرة...راها بنت تمنطاش العام...العام جاي وبعدو سوقها يخوا...ورينا داكشي الله يرضي عليك را مزروبين باقي عندنا منقضيو...

علي : هههه ايه ماگلتي عيب مرحبا...

شير ليهم باش يجلسو فواحد جليسة فيها فوطويات وطابلة..مشى المتعلم جاب ليهم عصير من حداهم...وجبد من المجر مجموعة من خواتم الخاصة بالزواج...

علي : هانا لالة...والله الى باقي يلاه جاو...وماشي ذهب فرنسا هي باش نعلمكم هذا ذهب هنا وليني را ممخلطش...يلاه خرجو هاد النقيلات والله الى نخوة تاع نخوة...سيري دوري فمراكش كاملة وسيري لفين مامشيتي بالله ماتلقاي فحالهم..مرسومين باليد ومصايبين بليد..جاو من تارودانت...ايوى كي جيتك...

مليكة"كتشوف فيهم عجبووها وتصميمهم كان مميز" : هادشي زييين...

توريا : يلاه شوفي ابنتي اش عجبك..ماتهزيش الهم لواش غالي الي عجبك حطي عليه صبعك وخرجي سوق الفلوس...

حبيبة"صرطات ريقها" : احم..م ماعرفتش كلهم زوينين..."شافت فتوريا" واش غانختار غير ديالي انا ؟...وخاتم ديالو هو...

ناديا : ايه خاص يجي تاهو معاها يشوف الخاتم...

توريا : ماصابش كي يدر...يلاه يجي يومين گبل العقد...حنا بعدا بغينا هادشي لتركاب الخواتم..من هنا ليجي يحن الله المهييم هو تشوف هي اش يعجبها...هو حالو ساهل كيبقى راجل...

مليكة"شافت فيها توريا وغمزتها" : الحاجة تصيبي تخرجي معايا عند واحد سيد هنا شوفي ليا شي تمر بغينا نديوه باش يعمروه..نتي تبارك الله ذواقة فهادشي والي حطيتيها عليها عينيك تبارك الله تحنت... بينما تختار هي وتوريا ؟!...دغيا نلحگو..

ناديا"شافت فحبيبة الي حركات ليها راسها..هزات صاكها وناضت" : اييه يلاه مرحبا على راسي وعينيا...

خرجات ومليكة جرات حسام وبقات غير توريا وحبيبة كيختارو...الذهايبي خلاهم يعزلو على خاطرهم...

توريا : عجبك شي واحد ؟!

حبيبة"بقات تعوج ففمها دايرة راسها كتختار وهي را ماهناش..عينيها مشاو لواحد سااامپل فيه وفنفس الوقت الى ذكزنا فتصميمو غانلقاوها مشات للشبه ديالها ولشخصيتها...نااعم وواثق فسحرو...كيخليك دور على الخواتم كلها وترجع ليه...الوسط ديالو فيه ماسة وتحت منها بابيون محجرة...رقيييق حساس.ونااااعم وفنفس الوقت شااد فراسو..."

حبيبة : هذا زويييين...

توريا"هزاتوو وشافتو عجبها ماعجبها ماتسوقاتش ليه..ركباتو ليها فصبعها جاها كبير حيث صبيعاتها رقاق.." : حتى ينقصو ليك ولا ديري ليه قطن وشكوتش (سكوتش)...

حركات حبيبة راسها وهي تشد ليها توريا ايدها وزيرات عليها...هزات حبيبة عينيها فيها وهي تبان ليها بغات تبكي كحل عينيها بدا يسيح شوي...

توريا : انا راضية عليك ابنتي الي مارديتيهاش فوجهنا وقبلتي تزوجي بولدي...عمري منسى خيرك زينة ونقية ومصوابة ومادبة...غاندير جهدي كلو تكوني فعينيا وبحال بنتي اشراق...

حبيبة : شكرا لهلا يخطيك...

توريا : انا رجايا فيك كبيييير ابنتي...راه نتي الي غاترجعي ليا ولدي يستقر فبلادو بيك غايبقى يجي...

حبيبة : ياك غانمشي معاه ؟!..

توريا"حركات راسها تا دازو دموعها" : تمشييي تمشي غير هو بيك غايصيب يجيبك باش تشوفي داركم...وتخليه يجي يشوفنا...ابنتي راه مكانش كيجي بزاف كنشوفو يومين فالعام والعوامات كلهم غايب...را گلبي مشوي عليه..هو بكري وهو الي عندي من بعد اشراق ويوسف...رجايا فيك ابنتي ماتعلمي حد بالي مغايشوفك حتى العقد الي غاتجي فيه نهار العرس..عافا بنتي فرحيني ومترديهاش فوجهي..

حبيبة : ك كيفاش حتى لعقد؟!! علاش مغانهضرش معاه ونتفاهمو ؟!..مزال ماشفتوش كيف داير اخالتي...

توريا : شداااتو لوقت وليام...تانا را ماهضرش معايا حدو گاليا ميمتي خطبي ليا على ذوقك تايق فيك نتي ومي عيدة...مرتي نديرها فعيني..حدو گاليا رسلي ليا صورتها نشوفها...ماترديهاش فوجهي بديتي خيرك ابنتي من جيهة باك كملي عليه...والى على صورة نوصل لدار رسلي ليا داك اوديو ولا شتگولو ليه ونزيد اشراق ترسلها ليك وشوفيه...

يتبع...