محتوى القصة
اما حبيبة مابقاتش قدرات تخرج من ديك الكافي لان الشتاء مابقاتش بغات تحبس وصوت الرعد خدااام كانت الخمسة ديال العشية..اتاصلات ب باها فالبلاصة...
حبيبة : بابا حبيبي...
م.حفيظ : القشة...ابنتي اكبدي...
حبيبة : تگد تجي ليا لافاك ؟
م.حفيظ : اخفتي ههههه حسيت بيك الله تاحسيت...فينك بالضبط...
حبيبة : انا ف واحد كافي فلافاك كنت كانراجع حيث عندي ساعة ونص خاوية بين حصة وحصة ولكن مابقيتش دخلت حيث كانت شتا بزاف والعجاج (عطسات ثلاثة العطسات وحدة تابعة لاخرى) الحمد لله...
م.حفيظ : ارحمك الله رحمك الله...ياكما باتبدى الحساسية ؟ قويتي العطيس...
حبيبة : ممم تحرك العجاج گبيلة وليني منضنش هي عادي..
م.حفيظ"شاف قالمتعلم عندو كايهضر مع اجانب سياح طاليانييين ورجع نطق" : بتسنايني تم هاني شوي ونجي عندك..
حبيبة : وخا حابيبي...
كيف قاليها كيف وقع بقات كاتسناه حتى جا لعندها وخرجات بزربة من بعد ماخلصات الكونصوماسيون الي خذات...ركبات دغيا فسيارة كان جايب معاه نيت فوطة مسح ليها وجهها وكتافها وحالتها وكيضحك عليها كاتمسح وتعطس...دارت سانتيغ وتوجه بيها نيشان ل "رميلة"...قرب سيارة شوية لدرب وكانت شتا سحات تقريبا بقاو غير زخات خفيفة...تسناها تا دخلات ورجع هو لرزقو....دخلات لدار مع ريحة المسمن عاطية...
حبيبة : الله واش مسمن معمر...
ناديا"جمعات حجبانها" : مال منخرك حمر...
حبيبة"عطسات" : والو هييي الغبرة تاع گبيلة...
ناديا : سيري بدلي ودوشي بتحيد منك الغبرة...
حركات راسها وطلعات لفوق بيتها...حيدات حوايجها ودخلات ديريكت دوشات حيدات عليها الغبرة من شعرها ووجهها بسباب داك العجاج خرجات حناكها ومنخرها بغاو يطرطقو بالحمورية...ذهنات لحمها بالخف...لبسات بيجامة خريفية مناسبة للفصل ودافية شي شوي على حساب ان الجو تبدل وبرد...نشفات شعرها ب سيشوار وجمعاتو ذهنات وجهها بكريم مرطب ديالها ذهنات ايديها رشات سبراي وديدورنت..كلها ولات تضج بريحة الفانيليا...هزات تيليفونها وخشات رجليها ف كروكس بيض فيه نونوسات صغار...هبطات لتحت وريحة المسمن معمر بالشحمة وفلفلة خضرة والبصلة تعطييي كاتحماااق عليه. وجايا جيعانة نيت..لقات رقية يلاه حطات صينية اتاي تحنات عليها وباستها من حناكها...
حبيبة : يخلي ليا دادا ديالي...
رقية : ههههه هي بروفيتي بروفيتي يا بنتي مابقا بزاف وبايجي راجلك وبتمشي تاني وتخلينا...
فحال الى هزاتها تالسما وزدحاتها رجعات للواقع الي عارفة راسها غاديا ليه...للمجهول الي غاتواجه فالعيشة مع بشار...قلبها تجيف فديك اللحظة تا بانت على وجهها الشي الي خلا رقية تجمع البسمة وناديا تهز راسها من بعد ماكانت منغامسة فالهاتف كاتسمع اوديو مولاي الحفيظ فالواتساب...
ناديا : مالك ؟!..
حبيبة"هزات فيهم عينيها تا تحرك البؤبؤ ديالهم..حاولات تصرط ريقها بدون ماتبين..هزات ايدها كاتحك جبينها وصوتها كانت فيه نبرة فشكل" : ها ماماليش..هييي جعت...
ناديا : واقع شي مشكيل مع راجلك ؟!
حبيبة"حركات راسها ب لا"
باش ماتحسش ناديا اكثر تنهدات وهي تجلس حداها تابطات دراعها وباست ليها كتفها...
حبيبة : هي ولفت هنا...ولفت دارنا من الي رجعت من الفيرما مابقيتش قدرت نرجع تاني...
ناديا : هادشي عادي ابنتي..عااادي جدا...الي ماشي عادي هو وجهك والي ماشي عادي هو هضرتك فاش كنسولك تاتلوني عليا تم...كاين شي حاجة بينك وبين راجلك..
حبيبة"وسعات عينيها" : اش بيكون اماما..الى متيقتيش سوليه هضري معاه...
ناديا : ماعندي نمرتو..وهو واحد الي مكيشركش الهضرة باش يتشارك معايا ويعطيني نمرتو...نمرتو را عند باباك وبيجي باباك وبيسولو...
حبيبة"الصمت"
ناديا : تگدي تجاوبيني على هاد سؤال ؟!
حبيبة : ش شنو هو...
ناديا : علاش عگوزتك لحد ساعة ما سولات فيك ؟...
حبيبة : ماعرفتش...كانهضر هي مع خالتي سعيدة وكاتدوز ليا خالتي عيدة...
ناديا : ونتي عمرك گلتي ليها نهضر مع خالتي توريا ؟ عمرك سولتي فيها...
حبيبة"كاتلولب فعينيها بتوثر"
ناديا : دويييييت معاك جاوبي...
حبيبة : ل لا ع عمري هضرت معاها...
ناديا"هزات حاجبها تا حدرت حبيبة عينيها" : وعلاااش ؟!
حبيبة : د دابا نهضر معاها...
ناديا : هادي هي ترابينا ؟ هادي هي نعيط نسول فالي كبر مني نسول فالعائلة ونصيل الرحم الي علمناك ؟...توريا عگوزتك فمقام مك وعيب انك متسوليش فيها...علاش گلتي ليا را تتدوي معايا...
حبيبة : م.ا..
ناديا : علاش كذبتي بديتي تعلمي فالكذوب احبيبة ؟...بغيتي نتقلق منك مانبقاش نهضر معاك...
حبيبة : لا لا لا...را ماما هانتي را فاش هي تخاصمت مع ولدها..."حدرت عينيها...سميتو كاتجيها ثقيلة بزاف" بشار...
ناديا : من الي مشيتي لكلينيك تشوفي يوسف لقيتيها تم..
حبيبة. : لا...
ناديا : يومين هكاك وعلمي راجلك باش تمشي معانا لدار ناسك..
حبيبة"خرجات عينيها" : عع علاااااش...
ناديا"خنزرات فيها" : ويل شيطان ؟ كيفاش لا ؟ ولوسك الي خرج من الكلينيك مابيتيش تمشي تشوفيه ؟ مابيديريش الواجب ؟ راجلك مشكل مع مو ونتي مالك ؟ خرجي من باب واسع وسيري سولي وسلمي عليه وسلمي فمو عليه...را واجبك هذاك غذا ولا بعدو يتصالحو وبتدي نتي العيب...ديري وهضري معاه علميه را بيتي تمشي...يلاه سيري جلسي تاكلي...
الشهية تسدااات ليها...العقل ترفع تاني وبدا فمرحلة التفكير...تمشي ل رحامنة تاني تحط رجليها عندهم ؟...مشكيل كبيييير وطبعا مكاينش الي غايفكها من غير شخص واحد والي حاطة فيه ثقة كبييييييرة وهي "سعيدة"...
خرجات من الحمام الي على برا الفيرما من بعد تحميمة دارتها حسات ب عضامها خفافو عليها...كان العشاء كايوذن ديك الساعة...مع خرجات دخلات سيارة هاشم ديال الخدمة جا معاها قدقد يلاه بغات تدخل متحاهلاه وهو يكلاكصوني عليها وشعل ضو وطفاه ساني عليها...ضارت ووقفات حدا الباب مكمشة فحوايجها حناكها بغاو يطرطقو...تسناتو تا خرج وهي مغوبشة فيه تا وصل لعندها ب لبستو ديال القايد....
هاشم"بابتسامة وشوق ليها حيث من نهار دور وجهو على بشار تقلقات منو ومابقاتش معاه كيف كانت واخا كايضهرو..." : بالصحة وراحة مدام...
سعيدة"بجفاء" : يعطيك صحة...بغيتيني ف شي حاجة...
هاشم : ملي شفتك خارجة ملكمة هاكا بغيت نشوفك ساعاك كنتي تعومي...
سعيدة : ممم...
هاشم : طالعة لبيت ؟!
سعيدة : اه..
هاشم : واخا طلعي لا يضربك البرد..هاني لاحگك ...
ماجاوباتوش ماتسوقاتش طلعات لبيت نيشان حيدات الفوطة ومشطات شعرها من بعد ما نشفاتو وضفراتو وجمعاتو بقراصة دارت عليه زيف حياتي عقداتو ودارت شالها...حتى تحل الباب وطلع هاشم كابحك فراسو...شاف فيها وتبسم...
هاشم : الله ماكرهت شي تحميمة دايزها الكلام...
نعيمة : سير عوم شكون شدك...
هاشم"وقف كايشوف فيها كانت ولاااازالت وستبقى اجمل النساء ف عينيه...حبو ليها كبيييير وهي مخليا راسها عزيزة عند كلشي...حنييييينة وعقلها وقلبها كبيييير..نهار خطبوها ليه يمكن كان احسن اختيار وقع عند دار الرحماني...احسن الكنات واعقلهم...توحشها توحشها بزاااااف وماكرهش يشرك معاها الفراش بحب كيف لول لكن الفترات الاخيرة كانت كاتعطيه حقو وصافي كا زوج خاصو حقو باش ماتلعنهاش الملائكة كيف كتقول...قرب شوي لعندها من ضهرها لور وحط ايديه على كتافها وهبط لعنقها استنشق ريحتها حتى تغمضو عينيه وهي تحبس الدهين الي كانت كتدهن وجهها...
سعيدة : هاااشم...
هاشم"باسها بين كتفها وعنقها" : ريحتك اسعيدة عمرها تبدل..
سعيدة : ايوى الله يخلينا فصباغتنا..."قالتها بواحد نفخة هو فهمها كاتحشي ليه الهضرة نيشااان"
هاشم : فوووگ خاطري اسعيدة فوووگ الخاطر...
سعيدة"حيدات ليه ايديه من فوق كتافها وبعدات منو وهي دور عندو" : اش وقع داك النهار اهاشم..علاش مكملتيش ليا الهضرة..."شافتو ساكت" هضر ؟ علاش حشمتي من توريا فاش عاوناتك بسلامة ؟...
هاشم : ماشي هي...
سعيدة"جهدات صوتها تا هز حاجبو مستغرب ومصدوم من صوتها الي علا عليه !!" : عااااااود ليا اهاشم عاود ليا بغيت نعرف كلشي..ماشي تگول غا الي بغيتي..بغيت نسمع..كانتسنى..
حدر راسو وعينيه فلارض..مدة وهو هكاك حتى تنهد وهز راسو الفوق مغوبش تفكر داك المشكيل...
هاشم : تعقلي دوك شهورة الي كنت بركتي فيهم فداركم...فاش كنتي توحمي ب منار...ديك الوقت "سكت كايعض شواربو" ديك الوقت وقع ليا مشكيل لقاو بالي حطيت فالوراق ثمن المتر مربع ديال واحد الفدان شراه با...باش مايخلصش الضريبة بزايد...ملي عرفو توقفت سيمانة بينما يعطيو القرار...
سعيدة. : تبعتي باك ف خلاك اهاشم ؟!
هاشم : حط ليا سخط والرضى سعيدة...غلطت وبنادم را بنادم خطاااء اسعيدة..ندمت فيها وهاني باقي نادم...را هو سبابي حتى باقي قايدة ممتاز اما كون راني باشا ويتحسب ليا حسااااب كثر ...
سعيدة : و توريا اش خلاها تكون سباب سعادتك فالخدمة...
هاشم : خوها مرافگ مع الباشا الكبير الي عندنا فمراكش...سولها وهي جات سولاتني حيث سكت ماگلت وااالي (والو) لدار كمدتها ديك سبمانة تنشوف اش غايديرو ليا...گلت ليها اش كاين حيث بغا يتأكد...وهي هضرات معاه تدخل ليا مع ناس كبار تما حيث كايعرفهم مزيااان تاجر وكايتعاملو معاه وقاضي ليهم شلا غراضات...ناس ديال المعارف وضرصة صحيحة هما خوت توريا...بغيتي ولا كرهتي قضات ليا الغراض...
سعيدة : تا ولات تهدد فيك بيه...ولات دايراه ليك سواكة الحنك دابا...ودابا اش قضيتي ؟...
هاشم : ما هدداتش وليني وجهي حشم...عرفتي اشناهي ترجعك ل خدمتك الي دمرتي فيها...را كنت عمري مزال نخدم فالمخزن...فين كنتي بغيتي تعيشي ؟ فين نلقى خدمة مزال...
سعيدة : نعيش معاك بطرف الخبز نتلاوح معاك ومانحني راسي ل ناس يحنيوه ليا بزز...تحنى راسك تحنى..حشمتي منها ؟ وبقى حشمان اهاشم...
هاشم : دابا سعيدة غاتبقاي معايا هوك ؟ ماشي عيب عليك ؟ خليني مني لراسي خليني الالة خايب ممزيانش نتي باس وصلتك ؟ غاتبقاي منشفة عليا وجهك وصوتك اسعيدة...
سعيدة : خليها ليام...مقلقة منك ونتا عارف تقليقتي خااايبة..خليني تانتنفس...صحاب المعقول وكلام الحق ماكيجيوش ويسامحو دغيا..خاصك وقت على مانصرط اش سمعت منك واش درتي...."سكتات تا سكتااااات وهي تنهد وشافت فيه" سير تعوم دابا لحگ عليك حوايجك...
هاشم"تبسم ببلاهة" : هههههه تحكي ليا ضهري...
سعيدة : الكيس طويل ديال ضهر را بقى معلق..حك راسك ولا دابا نصيفط ليك حسام يحك ليك..راك والدهم يقومو بيك...
الي وقع لحبيبة هو انها اضطرات تكذب للمرة ثانية باش تقدر تعاون بشار ف يوسف.....
من الي مشا ماتاصل بيها...متكية ففراشها..دخلات لواتساب شافت الكروب ديالهم الي وزعو فيه البحوث شافت البحث الي خاصها تقدم على طريقة exposé...خذات المعلومات الي بغات باش تبدا حيث غادي تقدمو هي بنفسها...دخلات لانسطا كادور فيه وتجاوب الميساجات...حتى طلع ليها ميساج هزات عينيها بان ليها الاسم ديالو jad1985...
جاد : حبيبة...
ماجاوباتوش شافت الميساج لكن بدون جواب...عاود رسل ليها وكانت رسالتو...
جاد : حبيبة كاين شي مشكيل ؟ علاش مكتجاوبينيش...
طبعا الحوار بالانجليزية حيث العربية عندو صعيبة شوي ومعكلة...شافت ميساج ديالو عاوتاني وهي تزفر ورجعات جاوباتو...
حبيبة : عندي مشاكيل مايصلاحش ليا نهضر معاك..حاليا...
جاد : خاصة ؟!
حبيبة : yes...
جاد. : سااادلي...كنت بغيت ندير معاك وقت ونتلاقاو حيث جيت المغرب..بغيت نهضر معاك فواتساب...ماشي مشكيل كانتمنى تحلي مشاكلك ونهضرو نكون جيت ثاني لهنا...حيث دابا انا ف لندن...
ماجاوباتوش فاللول شوي دارت ليها طن...كيفاش نهضر معاك فالواتساب ؟...منين جاتو نمرتها اصلا ؟؟..رسلات ليه...
حبيبة : منين جاتك نمرتي ؟؟!...
تسناتو يجاوبها لكن مع الاسف كان خرج ومابقاش دخل...مافهماتش منين جاتو نمرتها وهي ماعاطياهاش ليه ومابغاتش تعطيها ليه...يلاه غاترجع تاني تصفح الانسطا من جديد حتى صونا تيليفون فايدها...كانت سعيدة...
سعيدة : ابنتي...صونيتي ليا كنت كنعوم ماشهيتك هههه...
حبيبة"تبسمات" : بالصحة خالتي...
سعيدة : الله يعطيك صحة...بغيتيني...
حبيبة تنهدات ورجعات للواقع...فاش تفكرات هضرة ناديا قبيلة...بدات كاتعاود ليها الحوار الي ضار بينها وبين ماماها حتى كملات وهي تنطق سعيدة بدون شعور...
سعيدة. : من احسن حتى تكوليها ل بشار...
حبيبة. : داكشي الي گالت ليا ماما بنعلمو عاد بنمشيو...انا مابيتش نمشي مابييييتش...خفت هي تبدا تلوح فالهضرة وماما اه مايعجبهاش الحال...
سعيدة : ماماك معقولة ابنتي وبغات دير غا الواجيب ديال زيارة حيث را مازالين نسابنا...وماعارفاش اش واقع هي باش غادي تحكم ابنتي...ديري اش گالت ليك وهضري معاه...
حبيبة : كانصوني ليه نمرتو طافية...
سعيدة : يا دلي را مايخدمش نمرة المغريب تما...
حبيبة"ضربات جبينها لشعورها بالغباء" : وييييليييي تنعيط ليه فنمرة المغريب وتنصيفط ليه فالواتساب ماكيطلعش ليا كاع...
سعيدة. : عنظو نمرة وحدة مخدم بيها واتساب وخدام بيها...من الي وقع المشكيل حيدها كاملة ودار وحدة جديدة كايعيط بيها مخبية لا معايا لا مع هاشم من ديك الوقت ولكن فاش جا مابقاش عيط...دار نمرة ديال المغريب هي باش كان بعيط لينا..النمرة الاصلية تاواحد ماعارفها...ماعيطش ليك كاع من الي مشا ولبارح ؟
حبيبة : لا...
سعيدة : وتانا ماعيط ما والو خوه الي يسول عليه ماعيطش ليه سولتو فاش جا اليوم فالصباح وتدهيت مع الناس الي جاو يسلمو فيوسف راكي عارفة دنيا كاتعمر عندنا...
حبيبة : ودابا اشنو ندير...بتسولني ماما واش هضرت معاه اش غاندير...
سعيدة : يمكن مشا غير يومين ويرجع ملي يرجع را يعيط ليك بديال المغريب وديك ساعة هضري معاه على نمرتو الاصلية...
حبيبة : كون بايعطيها ليا را يعطيها راسو منگولهاش ليه...
مالقات سعيدة ماتقوليها...شدات من عندها نمرة يوسف حتى تتاصل بيه فالصباح تسول عليه...مالقات مادير من غير انها تستسلم حتى تشوف اش غايدير معاها بشار وامتى غايرجع باش تمشي تعيش معاه تحت سقف واحد حيث علمها انه فاش غايرجع ياخذ دار كبر من هاديك...بقات كاتفكر اش غادير فاش تمشي لرحامنة مع دارهم او اش غايقول بشااار ليها...ماحساتش بالعيا الي تمكن منها حتى غفااااات...مافاقت غير على صوت تيليفونها الي كايصوني ليها تعنكشات فالفياق حيث اليوم ماقاريا حتى لعشية...كايصوني وهي كتقلب عليه حيث ترمى ليها بين المخاد مع نعسات وتيليفون فايدها..كايصوني ويقطع وهي كتقلب حتى لقاتو لقات الاتصال تقطع...شافت النمرة بانت ليها ديال برا ماعرفاتش اشمن رقم هذاك ديال اشمن دولة...ماطاحش فبالها تاحد من غير "جاد" هو الي يمكن يكون عيط ليها...
عينيها كانو لاصقين بالنعاس وفمها منفوخ ومبلوز على شكل بوسة بالنعاس...حالة عين بزز على شكل غمزة... وسادة لاخرى ماعرفاتش اشمن نمرة...وصلاتها رسالة اشعار من الواتساب هزات عينيها ودخلات لواتساب لقات رسالة من ديك النمرة...مافيهاش صورة دخلات لرقم فيه salut ! j'utilise WhatsApp...والرسالة محتواها كان "habiba ?"...
حبيبة"رسلات" : ؟؟؟
بان ليها الميساج تقرا تسنات يجاوب والو كان اونلاين لكن بدون مايجاوبها...بدات كاتسترجع الهضرة ديال جاد معاها وهي توسع عينيها ورسلات ليه باش تعرفو واش هو...باش تبلوكيه حيث ماعرفاتش منين جاب نمرتها اصلا...
حبيبة : جاد ؟!
من بعد مارسلاتها مابقاش بان ليها را دخل...تسنات حتى بان ليها الميساج تقرا..لكن بدون اجابة..بقى اونلايين خمسة دقايق وهي كاتسناه...شوي خرج من واتساب كاع....شافت الساعة كانت العشرة ديال صباح..ناضت كتفوه وحطات تيليفونها يتشارجا...دخلات لدوش تغسل...هي لداخل وتيليفون فوق طابل دونوي برا..كااان طااافي طاااافي...حتى تشعل وبان الميساج...الي كان فيه كلمة وحدة كاتبين شكون الي فالنمرة..
بشار : " Bachar "....
خرجات من دوش غاسلة وجهها ودايرة روتين ديالو ومنشفو ومطرفة حالتها...مشات نيشان لماريو كحزات الباب واختارت شنو تلبس فالعشية فاش تمشي لافاك...اختارت شنو تلبس وعزلتهم فوق الناموسية...مشات لكوافوز مشطات شعرها وجمعاتو عاد رجعات لطابل دونوي شافت تيليفونها واش رسل ليها صاحب الرقم الجواب الي باغاه...جلسات على طرف ناموسية وشعلات الهاتف دخلات الواتساب وهي تلقى الرسالة...غااا هي قرات "bachar" وهي توسع عينيها على جهدهم تا ولات تبان ليها الكتبة مدوبلة فحال حوالت فديك اللحظة هههه....كاتقرا وتعاود تأكد وتقرا واش "بشار" وتعاود تقرا اش رسلات هي سولاتو واش جاد وهو كان بشار...اش غاتقول باش غاتجاوب...بقات مصدومة شي شوية وهي كاتقرا وتعاود...
حبيبة : اوييييييلي بيت نطيييير يا وعدي...
هزات عينيها ل تاريخ vu لقاتو خرج ديك الساعة فاش رسل ليها الرسالة...شافت حتى عيات وهي تجاوبو نيشان...
حبيبة. : ا اه حبيبة...ماعرفتش نمرة داكشي باش...
رسلات هاد الرسالة وماعرفااااتش علاش حسات بالاحراج والخلعة فاش قرات سميتو وفاش غلطات هي فسميتو...يمكن حيث هي على ذمتو وانها تعرف شخص اخر من غيرو...ماعرفاتش علاش كاتحس مزال قلبها كايخفق بشدة من هاد الموقف الي طرا دابا...حسات بحناكها سخنوووو حتى نملو عليها...حطات ايد على خدها وايد باقي شادة الفون...
زفرات وهي تخرج من الواتساب وطفات تيليفون حطاتو يتشارجا وناضت وقفات بقات واقفة وكتغزز فشنايفها...ورجعات جلسات وعاود تاني وقفات بقات كاتمشي وتجي...شوي وهي توقف...
حبيبة"صعرت غا وحدها" : وهو ماااالو في نعرف جاد ولا زمر..اش بيني وبينو كاااع...
شوي وقفت وبقات كاتفكر غا وحدها حطات صباعها على جبينها وهي تزفر...
حبيبة : هففففففف....اش بيني وبينكم بجوج لا نتا لا هو...يخ...
سمعات صوت تيليفونها وهي طييير هزاتو حساب ليها هو...ساعة كانت ناديا كاتصوني عليها فالواتساب باش تنزل الى فاقت...قطعات معاها وهي ترجع تيليفون يتشارجا باش تنزل..بدات طلع فكمايم بيجامتها من الايدين وخشات رجليها فكروكس ديالها تمات غاديا حتى صونا ليها التيليفون كانت علاين تخرج من باب بيتها...رجعات بخطواتها ناحية تيليفونها هزاتو وهي تبان ليها نفس النمرة ترددت للحظة انها تجاوب...علاش ترددات واش خافت ولا تحرجت ولا اش ؟!...علاش هاد تصرفات الي كيوقعو معاها...واخا تعيا تقول را هو ماسوقوش او ممسوقش ولكن را كايبقى "زوجها"...واخا مايكونش بينها وبين جاد تاحاجة الي اصلا ماكاين بيناتهم حتى حاجة وهي براسها ماكتعطيهش اهتمام سوى انه صديق ف موقع تواصل اجتماعي...
حبيبة"عضات فمها وهي تطلق الخط ونطقات بصوت مشحرج شبه مسموع" : ا الو...
بشار"رد عليها بصوت خشن حساات بيه فشي شكل...مكمل بتزعزيعة والبحة.." : ناعسة ؟!...
حبيبة"حركات راسها بالنفي ونطقات" : اهء لا...
بشار"كايشوف قدامو مخنزر وحجبانو ملاقيين" : مزيان مزياااان...
حبيبة : احم..فاللول غلطت حساب ليا نمرة واحد الولد كا"قاطعها بواحد طريقة خلاتها تصقل"...
بشار"كسيرا خارج من قدام دارو تم" : ماساليتش باش نهضر معاك بهاد النمرة...
حبيبة : هادي هي نمرتك ؟!..م حيث بغيت نهضر معاك صونيت فهاديك الي كنتي كاتهضر معايا بيها لقيتها طافية...
بشار : مزيان الواحد يحضر عقلو...زعما بعقلك...
حبيبة : مافهمتش...
بشار : شنو بغيتي تهضري معايا ؟ شنو عندك...
حبيبة : ففف..ماما بغات تمشي لهيه لفيرما باش نشوفو خالتي توريا ونسلموها ف يوسف...
بشار : اش بان ليك نتي ؟!..
حبيبة : خايفة..خايفة خالتي توريا تگول شي حاجة وماما تقلق ولا تفهم وتعرف...ما مرتاحاااش..مابغيتش نمشي حيث مامرتاحاش...ماعرفتش ماعرفتش...هذاكشي علاش صونيت ليك باش نعلمك اش ندير...حيث نتا گلتي ليا دارنا ماتمشيش ليها حتى نفكو مشكيل شيكات...
بشار"كايسوق وسااااكت داير صباع ايدو على فمو ولحيتو كيحك فيها مرة مرة وكيسمع ليها...عارف اشا مشات تما توريا مغاديش دير شي مشكيل حيث مغاتبغيش شوهة...لكن هي ممكن تآذيها ممكن تمعها شي حاجة او ممكن تهددها بالشيكات الي ماعارفاش توريا براسها واش تفكو...سكت هو وسكتات هي الي تحل عليها الباب وكانت امها ناديا شافت فيها ووقفاتها بايدها حتى سمعها كاتقوليها "كانهضر مع بشار"...شوي سمع كاتقوليها واخا...حتى نطقات حبيبة وقالت...
حبيبة : س سلمات عليك ماما...
بشار : شكرا...(ماشي يسلم عليها الخير هههه)...
حبيبة : اشنو ندير...
بشار : سيري...
حبيبة"وسعات عينيها" : كيفاش ؟ ع علاش ؟..
بشار : سمعي هضرتي...
حبيبة"عضات حناكها من لداخل وزيراات على صباعها" : والى دارت شي حاجة...و "قاطعها"
بشار"عض لساانو ماباغيش وماحاملش يعاود الهضرة...يمكن هي ماعارفاهش بالي اذا قال شي حاجة را متأكد...غمض عينيه وحلهم ورجع نطق" : سيري...قضي الغراض مع داركم و بقاي كي نتي...ديري الواجب معاهم ورجعي فحالك...شوفي يوسف الي بغيتي تشوفيه راك غاديا فالامان...حلي دماغك شوية داركم مابغيتيش يعرفو شنو وقع ؟...سيري معاهم ورجعي...
حبيبة : ممم..
بشار : مزال عندي مانقضي هنا..نسالي ونرجع نديك...ديك ساعة...نرجع نهضرو نيت..."نطق بصوت كاتحسي بيه مزير عالكلمة"...نهضرو نيت...
قطع معاها..وبقات شادة تيليفون فايدها كاتفكر كيفاش تمشي وكيفاش هو قالها بهاد سهولة...واخا عارف ان توريا ممكن تحشي ليها الهضرة او دور فيها...رجعات خدمات دماغها كيف قاليها وفهمات انه اذا مامشاتش دارهم غايعرفو ان بيها شي حاجة تما و فكلتا الحالتين يعيقو يعيقو....اما هو كيف قطعات معاه وقف جنب طريق وبقا شحاااااال كايفكر وكل مكيفكر كايبان الفك ديالو كايتحرم وحجبانو غير مكيزيدو يتورمو من فوق تا ولاو عينيه من كثرة ماخنزر وغوبش بيهم كحليييييين....اش وقع ليه؟!!...
نخليو مدينة مراكش ونتوجهو ل وحدة من اراضي الرحامنة الشاسعة...في الفيرما الي ماخطاهاش بنادم الي جا من معارف توريا كايسلم فيها ف يوسف الي خرج من الكلينيك والي فاش بغات تخلص تصعقات وراسها جمد من الي عرفات ان كلشي تخلص خصوصا من الي عرفات ان بشار هو الي خلص وهنا بلغات المحامي الي اكد ليها ان هادي حتى هي دليل او شهادة تعاون بشار ف الشكاية الشي الي خلاها تصعر واخا حاول ما امكن انه يهدنها باش تبان طبيعية وتفادا اي مشكيل ديرو باش مايرجعش عليها بالسلب...
دخلات لكوزينة كاتگفض كمايمها..لقات سعيدة كاتعمر فاتاي للناس الي جاو و كريمة حداها كاتستسف فالحلوة هزات كريمة راسها وشافت فيها مبسمة...
كريمة : خاصك شي حاحة خالتي...
توريا : بغيت نرد شوية صوبا ل يوسف...كاين شي گرعة هنا...
كريمة : واه كاينة غا سيري انا نصبها ليه...
توريا"كاتشوف ف سعيدة ماهازاش فيها راسها" : لا سيري دي صينية لناس انا نردها...
حركات كريمة راسها ورجعات تكمل حدا سعيدة...بدات توريا كاترد فصوبا حتى شوي سمعو صوت ربيعة داخلة وكتسلم على شي عيالات عرفوها غا من صوتها...تا دخلات عليهم لابسة جلابة جدييييدة فالمسكي و شال فنفس اللون مكحلة عينيها تا بغا يسكت ليهم الحس ومبسمة تا بانو سنانها صفرييين و شنايفها من لداخل ليمونييين بالسواك اما لايدين باقين حمرين وفيهم تفرتيت الخضر ديال الحنة ورجليها دايرة ليهم قطن ولابسة عليهم لباموس باقيين محنييين...ريحة دايراها تعطعط تا دخلات عليهم هازة صويك فايدها وضحك...
ربيعة : ياااا مسا الخير هههه...
توريا : عالسلامة..تي بركتي تم مابغيتي تجي هن...
ربيعة"سلمات عليها هي اللولة عاد دازت لخرينات تسلم وتنطح بسلامها" : غا سكتي ولفت خوتي على رقبتي لا بزز باش خلاوني نجي كون ما سيحمد حلف عليا...
سعيدة : وسبحمد مالو تاهو عزيز عليه يقوي..يخليك تايمشيو خوتك ويولي باك شوية...
ربيعة : وراه توحشني هههههه"بخجل خلا سعيدة تحرك راسها ودور لهيه تضحك مستهزأة وفنفس الوقت كايضرها خاطرها بجهد على ربيعة"...
كريمة : تي بصحة نقيش هههه...
ربيعة : الله يعطيك صحة..البارح عمت واليوم صبحت نقا.شة عدنا هاو كي ساليت جابني خويا عدنان..را خليتو عيط ليه سيحمد يبرك تم حيك (حيث) صابو جاي نيت هنا لدوار داخل من فيلاج..."شافت ف توريا" تي كي بقا يوسف على سلامتو...
توريا : الله يسلمك..راه الفوگ تا تسالي ولحگي عندو شوفيه...سيري بدلي عليك وشوفيه من تم...
ربيعة : داكشي نيت...
خلاتهم ومشات لبيت عند عگوزتها وشي عيالات جلسات معاهم شوي دارت الواجب ديال ضيافة تا ناضت مستاذنة وطلعات لفوق توجهت عند يوسف لقاتو ناعس باستو فراسو وخرجات لبيتها...حيدات جلابتها بقات غير ب بودي بيض وبيرميدا نفس اللون علقات جلابتها وحلات الماريو باش تجبد البيجامة الي غاتلبس...حتى تحل الباب وتسد بشوية وهو يوقف عليها جا وراها ضهرها مع صدرو ماجات فين تهضر تا لصقها مع الماريو...
سيحمد" خبط ليها جنابها" : قويتي الغبور انوارة ؤحامنة...
ربيعة"صحكت تا تزنگت" : غلبك الوحش...
سيحمد : ورا الوحش ديما غالبني جيهتك الكبيدة..."كايضغط عليها مع الماريو.." هممم...
ربيعة : ومالك ما جيتي ديتيني لاش مصيفطني عما خويا...كنتي تكبر بيا وتجي تجيبني...
سيحمد"دور ايدو وعبز ليها وحدة من بزا..ز.لها وزيررر عليها تا غوتت بشوي" : باش تعلمي لمك تبركي تم وتخليني بلايام...
ربيعة : وتا زگا دروك يسمعنا شي حد...
سيحمد : بغيت نتكي مك هن..توحشت نحرك فيك السواكن ونهز ليك العلام مانتي مغنية مانتي مغوتة مانتي مزغرتة...ماكرهتشااااي تخرجي بشي كرش مع سلام عليكم نحتاجوش حنا طبة ولا فقهة...خلي غا الفقيه الي فقهم نهار لول "شد ليها ايدها وحطها فوق حجرو تا ضحكت...عرفاتو قصد المعلم"...
ربيعة : وا سيحمد تا نعل شيطان...
سيحمد : وتي نعلتيه الي جيتيني مكحلة وناقشة وعايمة...نخليو هادشي يتيم مانزروش ليه القنات...
ربيعة : تاليل ينعس الغاشي وهاني ليك...
سيحمد"سكت تا سكت وهو ينطق مبعد منها كايحك فلحيتو" : ديري بحسابك بغد (بعد) غذا نمشيو عد طبيبة الي بغيتي تمشي عندها تشوفي هاد تعطال الولاد مناش...
ربيعة"وسعات عينيها تا دمعو ليها" : حلف يا سيحمد حلف لا نتا داوي بصح...
سيحمد : كانتفلى...
ربيعة : وديما تگوليا واخا ومتديني...تشوگني (تشوقني) وتخلي فرحتي گداش وتگطعها فيا...اش كرا وجرا تا تبدل رايك ونويتيها..
سيحمد : الوقت كايدوز ونتي باركة وتكبري هاو نديرو الحيلة گبل لا يفوت الفوت....وجدي راسك نديك لمراكش وديك ساعة يكون خير.. الي بغيتيها يا لالة گلبي نديروها تبقا لينا ربيعة بخاطرها....
ناس الي جاو يسلمو ف توريا خرجو...والليل وصل وكل واحد بدا كايدخل لعشو...طمنات على يوسف من بعد ماعطاتو اشراق يتعشا بنفسها...اما توريا كانت جالسة ف قاع دار وكاتهضر مع خوها الكبير...حتى كملات معاه وهي تقطع يلاه...دخلات لبيت كاتقاد فزيف على راسها لقات عيدة كاتسبح وحداها الكنينات كل وحدة شادة تيليفون تبقشش فيه...
توريا : غذا يمكن بغا يجي خويا عبد الرحيم و صافية...
كريمة"هزات راسها" : واه بغات تجي كاتسنا غا خالي عبد الرحيم يلحگ عليها حيث بغا يجي مع مرتو زبيدة...
عيدة : مرحبا بالي جاي والي طل يطل عليه الخير...ديرو بحسابكم بعد غذا را جاييين نسابك ا توريا...
توريا"غوبشت" : اشمن نساب ؟!..
سعيدة"هظات راسها فيها ورجعات هبطاتو فتيليفون وفنفس الوقت كاتسمع"...
عيدة : هاويلي يا بنيتي تي فين مشا عقلك...نسابك..دار مرت ولدك...
توريا"زمات فمها وخنزرات بجنب ماعاجبها حال" : شلا شكون بغا يجي...فين هي ياك مشات مابقات صدت لهادجيه مابقات سولت...شكون سبق العيب دروك...
عيدة : سولااات وعاودت وسولات فيوسف وديك الوقت نتي تدهيتي مع مشكيلك مع ولدك...هاهي جايا وبغات دير الوجيب...لجمي فمك ابنيتي وخلي الما منين يدوز...ناس ماخرجو معانا لعيب ومابغينا نتعايبو مع حد...
سعيدة : كاااتسول اتوريا كاتسول...شحاال من مرة جات تشوف يوسف وماصابتكش...نتي تدهيتي مع المشكيل...
توريا"خرجات فيها عينيها" : وعلاه تيليفون مناش يشكي...
عيدة : تورياااا هدني الوقت ابنيتي ..ناس جاييين يسلموك فولدك...ديري الصواب وهني الوقت الله يرضي عليك...
توريا"زمت فمها تا زماتو وتعوج فيه وتزفر جناوح منخرها يفرفرو..شوي هزت عينيها ف سعيدة" : وياك هو باغي يطلگها ماتلاشاي ولا فاش عينو...
سعيدة : والله وعلم بيناتهم...
ربيعة : تاتجي وسوليها...
توريا : ممم...
لا هي بقات دوات لا هما بقاو جبدو الموضوع...طاب العشا وناضو الكنينات حطوه كان عبد القادر يلاه كي دخل مع الشيفور كان غايب مسافر...تعشاو وكل طلع صد لبيتو...
داز الليل وصبح الصباح داز نهار بنهارو وباحداثو لا فاليفيرما ولا فمراكش نيت الي كانت واقفة ناديا كاتقاد فلباسها وترش فبارفانها كاتسنى الحاج مولاي حفيظ يكمل لباسو باش يخرجو...ضارت عندو...
ناديا : هاني برا على ماتسالي...
م.حفيظ : وا عليه...
هزات صاكها فايدها كبير وكحل...خرجات لقاع دار كاتقاد ف جلابتها المخزانية فلون الخزي المخدومة بالدبانة خدمة ليد بنفس اللون وتقاد فشالها فنفس اللون تاهو عقداتو ببروش ذهبي باش تبتاتو وتسوس فوق صدرها وتقاد فجلابتها تا وقفات..كانت رقية جالسة حدا دراري...
ناديا : بتوكليهم قبل مايمشيو..وعطيهم لانش بوكس ديالهم...ونتي ا وردة كولي ماكلتك اه كاترجعيها هي هي...سمعتيني...
وردة : واخا ماما...
حركات راسها ووقفات كاتقاد فساعتها...تا خرج مولاي الحفيظ من البيت كايقاد فطاقيتو لابس فوقية بيضة بالكمايم وطاقية بيضة تاهي...كايدوز على لحيتو البيضاء الكثيفة بايدو ويتمتم بذكر الله...
م.حفيظ : اه فين هي حبيبة...
ناديا"هزات عينيها لفوق ونادات باسمها" : حبيباااااا..."تسمع صوتها من ورا مابسمت الباب كاتقول "هاني جايا"...
م.حفيظ : هاني فطوموبيل الله يرضي عليك لا تعطلوش...
حركات ليه راسها ومشا هو بقات هي كاتسنا تا سمعات صوت خطاويها هزات عينيها بانت ليها نازلة وحادرة راسها كاتحسي بيها وكاتبان انها ماحاملاش تمشي او ماشي لخاطرها...لابسة جلابة شيبية بالقب مخزانية بفصالة مراكشي واصلة حد الكعبة...ومعاها صباط موكاسان فنفس اللون ديالها كيف خيطتها خذاتو ليها...وصاك صغير ديال لوي فيتون..مادايرة لا ميكاب جامعة شعرها لور وريحة بارفانها واصلة...نزلات عندها ووقفات وقالت بغير خاطر....
حبيبة : هاني...
ناديا : يلاه...
حركات راسها وهي تمشي باست رقية وخوتها وتبعاتها لقاو مولاي حفيظ مديماري طوموبيل...ركبو معاه وتوجه بيهم نيشان ل "سيدي بوعثمان"...غا خرجات من مراكشي وهي تحس بقلبها مقبوووووط بزااااف ماحاملاش ترجع لديك البلاصة..ماحاملاش تدخل عندهم وتشوف توريا تاني...خايفة فنفس الوقت تلوح ليهم شي هضرة او ماتعاملش معاهم ب صواب...غاديا فطريق وتنش وتصرط فريقها...غمضات عينيها باش تنعازل على الواقع وتلقى راسها غييير كتحلم....حطات راسها على زاج وفلداخل ديالها كاتغوت رجعوووني...كاتشوف فطريق وكاتمناااها تطوااااال لكن فاش حنا كنبغيو الحاجة كايوقع لعكس...ماعارفينش انها حكمة من الله...الي بغات وقع عكسو دغيا وصلو ودخلو للفيلاج وشدو البيست الي كاتدي لدوار...مسافة الطريق حتى كانو دخلو وشدو طريق الفيرما الي جات منعزلة على ديور تما...قلبها نقز وطاح فكرشها من سمعات باها كايقول "الحاج علمهم يحلو الباب ههه"...حلات عينيها ورجعات لواقعها المر فاش شافت بالي دخلو لفيرما ورجعات تاني لهاد الدار الي عاشت فيها ايام عمرها تنساها....
وقف السيارة وحل الباب نزل هو وتبعاتو ناديا الي ضارت عندها وقالت ليها "نزلي"...
ع.القادر : مرحبااا مرحبا الحاج...وتا زارتنا البركة يااا...."تسالم معاه وشاف جيهة ناديا حرك ليها راسو"...
م.حفيظ : على سلامة سي يوسف...
ع.ااقادر : الله يسلمك وكااان..دخلو دخلو "شاف ف حبيبة" زيدي بنتي تي كي طرا وجرا غااا عگبتي لداركم ماتليتي رگبتي لهاد جيه ههههه ادوي يا...
ناديا"نغزتها ونطقات بين سنانها" : تحركي سلمي عليه...
حبيبة"حدرت راسها...قربات باست ليه ايدو تا طبطب ليها على راسها وتمتم بجملة "الله يرضي عليك"..وضار عند مولاي حفيظ كايفرنس ليه...شوي وهي تخرج سعيدة لاستقبالهم بابتسامتها المعهودة وبشاشة وجهها كان تابعها حتى هاشم الي خذا نص نهار باش يكون فاستقبالهم...سلمات على ناديا وهي تبان لحبيبة الي وسعات ضحكتها وعنقاتها طبطبات عليها ونطقات فوذنها...
سعيدة : كلشي اايدوز مزيان ابنتي...
حبيبة"حركات راسها وتنهدات ليها فوذنيها تا زيرات عليها سعيدة
تقدم مولاي الحفيظ من بعد ما ضار لكوفر جبد شي ساشيات فيهم حليب ودانونات و شي كراطن فيهم الحلوة التقليدية موصى عليها...ومشا مع عبد القادر الي سلم عليه هاشم وسلم على حبيبة وناديا...الي دخلوهم لصالون...لقاو عيدة جالسة حاطة ايد على ايد وكاتسنى فيهم..كانو حداها شي عيالات جاو تاهما يسلمو...تقدمات ناديا سلمات عليها وباست ليها راسها...
عيدة : الله يجيك الخير ابنيتي يجيك الخير..."حطات ايدها على ايد ناديا" فين هي زينة الكنينات...
ربيعة"عوجات فمها ومطمطات بدون مايشوفها شي حد"...
ناديا : هههه "ضارت لقاتها وراها حادرة راسها" اويلي زيدي سلمي..
عيدة"كمشت فيها عينيها" : تي زيدي حبيني هاويلي شتك مبعدة...ياك ابنيتي...
حبيبة"شبه ابتسامة وقربات ليها حاكرة راسها باستها من ايدها وهي تقربها عيدة وباست ليها راسها وطبطبات عليها" : لباس عليك...
عيدة : الحمدي الله ابنيتي...
ناديا"جلسو وداو وجاوب فالهضرة" : فين للا توريا...على سلامة يوسف نقزها بعدا...
عيدة : سيري ربيعة نابي على توريا تجي....
يلاه بغات تمشي تا بانت ليها جايا داخلة وهازا حاجبها ومخنزرة شوية...قالت "سلام" وهي تهز حبيبة عينيها فيها ورجعات حدراتهم قلبها كايضررررب بجهد...وقفات ناديا سلمات عليها وقربات عندها...
توريا : ماكتسلميش ابنيتي...
ناديا : ههههههه حشمانة منك غا سمحي لينا اللا توريا مادارت فيها مايصلاح...
توريا : يااك بعدا"طلعتها وهبطتها وهي تبسم وبدات تضحك تا استغربت حبيبة وربيعة وسعيدة الي جمعت غوباشتهت"...ههههه وماعليش باقا صغيرة..زيدي بنتي سلمي زيدي...خليتي بلاصتك هنا...
حبيبة"هزات حاجبها وقربات سلمات عليها وتوريا كاتطبطب ليها على ضهرها" : على سلامة احم.."نضفات حلقها" يوسف...
توريا : الله يسلمك...بغيتي تشوفيه ؟!
حبيبة : اه بغيت...
توريا : ديها سعيدة تشوفوو راه الفوگ متكي...
حركات راسها وتبسمات ل سعيدة الي جراتها معاها...غاديا طالعة فدوك دروج وقلبها مقبوووط...ضارت عندها سعيدة وهي توقف تالحقات عليها وعنقهاتها بجنب غاديا وكطبطب عليها باش تهدنها حيث عارفاها بالي ماشافتش اي ذكرى ليها زوينة هنا شافت غير تهديد وحشيان الهضرة...وقفات عند بيت يوسف دقات الباب وهي تدخل طلات عليه لقاتو ناااعس...
سعيدة : نااعس مسكين...
حبيبة"بصوت منخفض" : خليه صافي...
سعيدة"ضارت بقات كاتشوف فيها وهي تنطق" : جايا على عينيك ياك هههه...
حبيبة : راكي عارفة "ضارت كاتشوف وهي تهز عينيها جيهة باب بيتها الي بقا مسدود تاحد ما وصلو ورجعات ضارت لهيه وزفرات"...
سعيدة : مزيان الي جيتي..خلي كلشي طبيعي تاتقاد الامور وديك الساعة تفاهمو بيناتكم وكل يشد طريقو...راه گاليك جي حيث قرا الحساب لداركم وليك...الى ماجيتيش تما داركم يعرفو كلشي وتصعاب الوقت عليكم...خلي كلشي يمشي عادي...
حبيبة : كانعيش شي حوايج فوق جهدي...كل نهار كل مرة كنكذب على دارنا...هاني غادي نمشي نعيش معاه ماعارفاش راسي فين بيت نمشي وكيفاش بنعيش معاه...غاديا عند واحد مكرفص عليا ومرحمنيش فاش كنت تنطلب فيه يرحمني...كون ما يوسف وبابا كون ماشفتش حتى وجهو...
سعيدة"تنهدات" : هضر معاك ؟
حبيبة"حركات راسها" : عطاني نمرتو ديال لهيه...گاليا يسالي شي حاجة ويجي هاد الايام...
سعيدة : ايه تانا هضر معايا...هضر معايا البااارح ووصاني عليك..
حبيبة : كيفاش ؛!!
سعيدة : گاليا بلي غاتجيو ووصاني عليك ووصاني نهضر مع لالة تدوي مع توريا تلجم فمها...وهضر حتى مع سيدي باش تحشم منو...يعني را قاااري الحساب حتى هو كوني هانية غير رتاحي ابنتي...
يلاه غايمشيو حتى بانت ليهم توريا طالعة وكاتشوف فحبيبة وهي تبتاسم ابتسامة خفيفة تا لحقات عليهم ووقفات شافت فحبيبة وهي تعوج راسها فيها...
توريا : علاش گطعتي اللغا مابقيتي تسولي...
حبيبة"مكتشوفش فيها" : كنسول هي نتي متتكونيش..جيت عند يوسف مالقيتكش...
توريا : ايييه مكنتش مسالية.."طلعت فيها وهبطت" مابقاش بغا يطلگك هذاك ؟!
حبيبة"الصمت"
توريا : وراني سولتك...
حبيبة : حتى يفك شي مشاكيل..."سكتت"...
توريا : مممم...لقيتي يوسف فايق ؟..
حبيبة : ناعس...انا نهبط عند ماما تايفيق ونشوفو...
تمات غاديا وهي تبعها سعيدة تا نزلو فدروج وتوريا متبعة ليهم العين...
توريا : اسيري الله يگطعك عليا نتي وياه...
بقات حبيبة جالسة على شوك لاصقة فناديا ومابغاتش تحرك من حداها وكريمة وربيعة كايحنززو فيها تا ناضو لكوزينة يقضيو شغالهم ويصايبو الضيافة....هزات ربيعة تيليفون ودوزات الخط لمليكة الي لقاتها مصونيا عليها...
مليكة : تي فاين غطستي ياناري...
ربيعة : جاو شي ناس هاو مسمعتوش كنت مخلياه يتشارجا...
مليكة : جاو هادوك نساب رباح وجات العروسة المتعوسة...
ربيعة : جااات..جايا وتخنزر شوفي ليك البرهوشة...
مليكة : ياكما خنزرت فمي على رقبتي تا نگطع عليها طيارة ليلة باشما تقامت عليا...هاكيلي...
كريمة : هههه لا ماخنزرت شاااي...
ربيعة : باغيا امتا تمشي...
مليكة : وتوريا شتگول...
ربيعة : را دايرة الخاطر على عينيها...هازة منها ما سولت عليها ما طلت...
بقاو كيهضرو معاها ويعاودو ليها اش واقع وكل جديد فالدار خصوصا من عرفات ان دار حبيبة جاو وهي معاهم...اما هي بقات جالسة وكتشوف وتسمع هضرة ناديا مع عيدة وسعيدة الي شادين معاها الهضرة ...ناديا حسات بتوريا ماحاملاهمش يجيو لكن تصرفتت بطريقة عادية مابغاتش تبين انها حسات بيها...خصوصا منوشافت عيدة فرحانة بيهم...كانت كاتهضر وتضحك حتى نطقات عيدة موجهة كلامها لحبيبة.
عيدة : بنيتي ديري وجي نهار لحد نشاعلاه تمشي معانا لواحد دوار...
حبيبة"صرطات ريقها" : ها علاش...ق قارية منقدرش...
ربيعة : هاويلي كاين شي قراية نهار لحد...
حبيبة"الصمت"..
عيدة : بغيتك اكبيدتي تكوني عمانا...تايخرجو ناس هاو نعلمك اش كاين...
مابغاتش تقوليها را غادييين يخطبو ل عبد القادر حيث كانو شي عيالات جالسين لهيه...تبسمات ليها ناديا ونطقات "ان شاء الله تمشي علاش لا"...حبيبة تزاد معاها زايد وقلبها بدا يضرب بغات تنغزها تقوليها لا بغات تقوليها مابغيتش لكن اجلات حتى تمشي وتلقى شي سبة...حتى جاتها رسالة فيها السبة الي غاتخليها تقولها نيشان بلا ماتحس براسها انها قوات فالكذوب...من بعد يومين ماهضر معاها من داك نهار...حلات تيليفون من شافت اسمو فنمرتو كاتب ليها....
" بشار : وجدي راسك نهار سبت نجي نديك..."
كانت هادي رسالتو الي زادت فخفقان قلبها منها غاتلقى سبة انها ماتمشيش ومنها انها غاتمشي للمجهول الي هي خايفة منو...ماعارفاش كيفاش غاتعيش معاه كيفاش غايكون معاها...واش غايحتارم شروطها واش غاتعيش معاه الحوار الي مفتاقداه منو...كيفاش غاتواجه المصير "المجهول" للمرة ثانية...وذلك بعد يوميييين...
اما هو كان جالس فالفوطوي...مقابل مع الطبيب الي كان كيسمع ليه او كايتسناه يجاوبو او يهضر...كان هو رسل ليها ديك الرسالة وهو وسط الحصة الاخيرة قبل مايرجع تاني لمغرب...حك شنايفو بسنانو كايفكر وكيشوف فنقطة فااارغة...حتى هز عينيه وشاف فالطبيب الي نطق وخلاه يوجه شوفة فيه...
محمد : شكون هي "اشراق"...
بشار : ختي الصغيرة...معزتها من معزة يوسف..گول يوسف كثر...شوي...
محمد : علاش حيث حالتو ضعيفة صحيا ومعنويا ونفسيا ؟!..
بشار : يوسف مالقاش المعاملة الي تگد بيه وعليه...
محمد : واشراق ؟...علاش معزتها قل من يوسف...
بشار : تعديت على اشراق...تعديت عليها بزاااف...
محمد"هز حاجبو" : بحالاش...
بشار : رزيتها فعز الناس عندها...طفيت عليها الضو فالنهار الي ضوات فيه..."عينيه ولاو حمرييييين"...
محمد"سكت وهو كيشوف فيه ويرجع يلملم الهضرة الي قاليه" : اشراق معزتها عندك كثر من يوسف...اشراق الذنب الي حاسو من جيهتها مخليك تخاف منها وعليها...مخليك تشوفها ديك التربية الي تزادت فداك نهار...كاتحاول تعوضها بالماديات اما المعنويات نتا مفتاقر ليهم من جيهتها حيث نتا براسك دوك الكعنويات الي غاتعطيها خاصك تكسبهم ف طبعك نتا عاد تعطيهم ليها...
بشار"الصمت"...
محمد : امتى راجع ؟
بشار : zwei Tage (يومين)...
محمد : تعيش معاك الزوجة ديالك فنفس الدار ولا تبدل ؟!
بشار : وصيت باش نبدل السكنى..بلاصة قريبة لدارهم...
محمد"تبسم" : باش ترتاح هي تكون قريبة لدارهم ؟!..
بشار هز فيه حاجبو...وحرك ليه راسو ب لا..وتا طبيب ماقال والو واخا را عرفو وفر ليها وسائل راحة وبدا باول حاجة هي يسكنها قريب لدارهم...بدا كايكتب فلاجوندا عندو...وبشار رجع تاني سهااا وعينيه حمريييين كايدور فداك تيليفون ويعاود...حتى وصلو ميساج منها بزربة دخل يقراه لقاها كاتبة " ok"...بقا كايشوووف فيه ويعاود حتى طفا تيليفونو ورجع حطو بمجرد ما سمع سؤال الطبيب...
طبيب. : تقدر تجاوبني بالاسماء شكون اقرب ناس ليك ؟!..
بشار"حرك راسو مثاااااقل" : يوسف،، اشراق،،سعيدة،، هاشم،حسام...جدي..
محمد : ابعد ناس ليك...
بشار : الي ولداتني...
محمد : وحدها ؟"حرك ليه راسو"..و مراتك ؟!..
بشار : ماعندك لاش تعرف...
كمل معاه وخرج من العيادة...مشا لدار دوش ولبس عليه..وجد ليه كاس القهوة وجلس مقابل مع لابتوب..كايحاول يخدم لكن خاطرو معصب...علاااش معصب ؟....هز واحد الورقة صغيرة كايقيد فيها اسماء الحوايج الي برزطوه او عصبوه الي او محملهمش بدوون شعوور ...سواء حوايج او اشخاص...فينما يسمع شي حاجة عصباتو كايكتبها فورقة واخا غير بسمية...ماحسش براسو اش كايدير فور ماتفكر قبل يومين...وبدا كيحك فشعرو وراسو ولحيتو بطريثة غرييبة...وحجبانو بداو يتجمعو وعروق نواضرو يتنفخو لييييه ولا وجهو كايخلع ويرعب الى شافو شي حد..هز ماركور حمر وكتب اسمو فديك الورقة البيضا بدون شعور...والاسم الي كتب كان يحمل اسم....
... "جاد"....
داز الوقت ودازو احداثو الي كانت خفيفة عند البعض وثقيلة عند البعض الاخر...والاخيرة المقصود بيها "حبيبة" الي عارفة راسها فالاخير غايوصل الوقت وتزف من جديد للمجهول...وتبدا حياة جديدة فبلاصة جديدة ثاني وهاد المرة واخا فمراكش الا انها غادي تعيش الغربة من جديد...
"غريبة في وطني"
حطات اخر ماتبقى من ملابس ف فاليز ديالها...كانو ثلاثة ديال الفاليز بالترتيب من الاكبر للاصغر...سداتها وهزاتها حيث كانت اخر وحدة هي صغيرة دغيا غلبات عليها...بقات واقفة وكتشوف وعقلها رجع غاب من جديد...حاسة ب حجرة كاتمة صدرها..الراحة بدات تنقص عندها والتخمام رجع يزور عقلها...بقات هكاك حتى ضارت وهي كاتشوف ف الكارطابل ديالها الي فيها لابتوب ديالها وفيها الايباد وكل ماتحتاج...تأكدات منها ومن كلشي حتى تدق الباب...
حبيبة. : ايووب ؟ (حيث ايوب هو الي كايدق ولا مولاي حفيظ).
رقية : انا بنتي...
حبيبة : ويلي وعلاش كدقي..دخلي دادا...
رقية دخلات مخلية البسمة مزينة شفايفها والحنية تقطر منها...لقات حبيبة باقي واقفة ببيجامتها ساتان الفوقي نص كم وتحتي شورط قصير زايد بارز ليها ليهونش اكثر ورجيلاتها الي يقطرو بالحليب واخا قصيورين كلها فاتنة وكلها كياتة...قربات حداها رقية الي عنقاتها بجنب ودارتها تحت باطها حيث رقية طويلة...عنقاتها تاهي بدورها وتنخششات فيها كأنها كاتاخذ معاها مايكفي باش يسد شوقها لدارهم...كأنها بغات تعاود ليها كلشي وتقوليها دادا ها اش واقع ليا واش طاري...بغيت نتفك بكن ما باليد حيلة انا مازال مقيدة....
رقية : هي صافي جمعتي القش هههه...
حبيبة"تبسمات فوق الخاطر وحركات راسها" : اه صافي ..
رقية : معاش بايجي ليك...
حبيبة"عضات شنايفها لثواني وهي تحرك راسها عاود ونطقات" : ماعرفتش معاش جا اصلا...گاليا سبت بالعشية بينجي وديك ساعة الى قرب را بايعيط ليا نلبس...
رقية : ايوى عالله يجي بكري شوي هي يتعشا معانا...
ماجاوبتهاش حبيبة واخا متمنية يجي معطل باش تبروفيتي مع دارهم اكبر قدر ممكن...عاونتها فحميع كملات داكشي وحطاتو عند باب البيت ودخلات لدوش هي خلات رقية نزلات...اما هي كي دخلات لدوش طلقات رشاشة نازل منها الما سخووون تا طلق الفوار وبدا دوش يتغمم وهي تنصل حوايجها رماتهم فالسلة ودخلات تحت رشاشة غسلات شعرها مزيان وغسلات جسمها حيث نهار كامل وهي فلافاك وكان العجاج عاوتاني...خرجات من دوش تقطر بالما..نشفات حالتها وكيف العادة هذا روتين عندها انها تذهن جسمها وترطب مزيان والا ماكتحسش براسها عامت...يلاه كاتذهن حتى صونا تيليفونها وهي دور جيهة طابل دونوي هزاتو لقاتو هو نيت "bachar"..الشخص الي حتى كاتنسى ويرجعها للواقع المر الي هي فيه...طلقات الخط ومع كلمة "الو" تسنات الرد منو...كان الرد عندو معطل نيييييت...شكاات واش كايسمع ولا تقطع الخط من جديد يلاه غاتشوف واش باقي الخط...حتى سمعات صوته كايهضر واخا البحة واخا تخين واخا خشين الا انه كانت نبرة باينة عيانة...
بشار : لباس !!..."كايشوف فساعتو ويهز عينيه لناس الي غاديا جايا حيث كان فدام باب المطار"...
حبيبة : اه...
بشار : واجدة ولا مزال ؟!...
حبيبة : معاش غادي تجي...
بشار : مزال..نسالي ونجي لعندك...
حبيبة : ب بابا بغا يشدك تعشا...
بشار : لا بلاش مايحتاجش..نجي نديك فالبلاصة..."عاود شاف فساعتو" حسبي ساعتين ونكون عندك...
حبيبة"سكتات تاهي لثوان..كأنها باغيا تقولبه زيد اجل مزال ماتجيش تديني زيد فليام...صرطات ريقها وخرجات الكلمة بحروف متباعدة " : و و اخة...
ماسولهاش مالك واخا التامس من صوتها انه بيها شي حاجة لكن ماسولش...ما اهتمش ولا مابغاش يعرف مالها او عاااارف وماباغيش يتسوق او...كمية الغموض الي فالمشاعر ديالو كاتخليك صعيب بل مستحيل توقعي فاش كايفكر ولا شنو يدير...خشا تيليفون فجيبو وجبد الكونطاكت وتوجه ل باركينغ ديال المطار مشا جيهة السيارات الي باتو فيه اسبوع...وداز جيهة لاكيس خلص المستحقات وكسيرا خارج من المطار توجه نيشان ل بارطما الي دار مع السمسار الي عرفو عليه هاشم باش يلقاها ليه والي جات ف گيليز فعمارة فيها غير ثلاث طوابق وكل طابق فيه زوج برطمات..وكلهم ماليهم مكاينينش الا برطما الي خذا هو غايسكن فيها هو وحبيبة بخاطرهم دون تواجد سكان بزاف وصداعهم...دخل لبرطما كبييرة كايسمع ل سمسار الي كايوريه وكانت نيت مفرشة...
سمسار. : اه بتسكن فالسكااات اولدي..هانتا ها البيت لول فيه دوش لداخل..وها تاني مافيهش دوش كان فداك الكولوار تم قريب لكوزينة...وها كوزينة..وكاين صالون والبالكون را فكل بيت فيه بالكون...مزيان اولدي..
بشار"كايشوف فدار كلشي فيها مجهز كيف بغا مفرشة نااضية...ماجاوبوش ولاخور مابغا يسكت كايوريه وهو عقلو مكاينش غير كيشوف وصافي راسو بغا يطرطق عليه بالطيارة والسفر وشلا انتظار فالمطار واخا كان مقطع ف درجة رجال الاعمال...
سمسار : الصالون اه بلديييي وهانتا تشوف را بالطلامط ديال الموبرا الحرة اللولاااا هههههه...
بشار"غا ساكت اصلا ماعارف لا موبرة لا طلامط غا كيشوف حس براسو بغا يبدا يفرع ليه راسو الى ماسكتش"
سمسار : اجيب المدام نوريها طليمطات الي باتبدل...
بشار"كان كايشوف لهيه تا ضار عندو بالعرض البطيء شاف فيه بواحد شوفة سمسار جمع ضحكة"...
سمسار : هو هذا..المضمون را وصل والسكنة نشاعلاه فالقصر..سلام عليكم...
لبسات غير سورفيت بالقب كحلة...هبطات لتحت لقات باها داخل بكرييي...جايب فايدو ساشيات كبار باين عليه مقدي...شافتو وهي تقرب ليه مبتاسمة فرحااانة انها شافت الضحكة رجعات لباها الي غابت لاشهر...تبعاتو لكوزينة حتى حط دوك ساشيات وهو يدور عندها وجمعها تحت باطو كاينزل عليها بايدو تا بداو خوتها من قاع دار كايضحكو...
م.حفيظ : القشة بنت القش...هانيا...
حبيبة : اييي هههه هانيا...
م.حفيظ : راجلك مزال ماوصلش...
حبيبة"جمعات ضحكة مكتحملش ديك راجلك" : احم وصل هي بايمشي تايدوش ويبدل يمكن ويجي..گاليا ساعتين وبنكون عندك...
م.حفيظ : حاولي تخليه يتعشا عاد سيرو بنتي...
حبيبة"ماكرهاتش تبقى كثر" : واخا انشوف...
باسها فراسها وخرج يدوش حتى هو من تعب المحلات والعجاج الي كان تاني...تبعاتو ناديا تعطيه الحوايج مايلبس اما هي بقاات واقفة حدا رقية كاتشوف فيها كاتصايب وتقاد فطاسات...
حبيبة : اه كثرتو ليا...
رقية : اش بيتي نتي ؟ هادشي ماشي ديالك...
حبيبة : لمن...
رقية : لراجلك ههههه....
حبيبة"غوبشات" : وانا ؟!...
رقية : گوليه الى بايدوقك هههه...راه يادلي لدارك هادشي...
رجعات هي لبيت جلسات حدا خوتها عيطات لايوب لقاتو وسط واحد العرس خدام فالعروسة كايصايب ليها قالت ليا بالي بغات تمشي...بقات كاتخرج فتمارين مع خوتها وتشرح ليهم الفرنسية حيث كاتفهم ليها مزيان وكانت عندها النقطة الاولى من نهار دخلات تقرا...خرجات معاهم حتى تمات جايا رقية هازة تيليفونها وشافت فيها سولاتها بعينيها وهي تعلمها ب الي المتصل "بشار"...صافي هنا الريق نشف ووصلات اللحظة الي غاتحد فيها اولى خطواتها نحو المجهول الي غاديا ليه...شدات من عندها التيليفون وهي ترد عليه...
بشار : خرجي...
فالفيرما تمات جايا ربيعة هازا فايدها ميكة كبيييرة عامرة بالفاكية مشكلة حلات باب بيت عيدة وعبد القادر ودخلات كانت جالسة نيت سعيدة حداها هي وتوريا وكريمة كايقادو فالمقدية ديال الخطبة...واخا عندهم عادي فحال عيدة تخطب لراجلها خصوصا فضروفها انها امرأة متقبلة شرع الله الي تعطا لراجل لكن صعيبة عليهم هما كلهم كنيناتها واخا هكاك...
توريا : ونتي دويتي مع مها اش گالت نهار لول...
عيدة : گالت مرحبا...
ربيعة : عندها ولد هي الي بغيتو تخطبو ؟ گالها ليا سيحمد حگ كايعرف خوها العرابي دا ليه شي مرة البال (الفصة او تبن مجموع)...
عيدة : والدة ولد وليني عگرت وراه...
توريا : ايييه مسكينة حيدو ليها الوالدة..والراجل معامن ولدات الولد كي شتي را طلگها وزاد لصبليون تجوج شي نصرا.نية تما من تم الولد را عندو علاين خمسطاش سطاش عام...يبان ليا كبير والله وعلم
سعيدة : وهي شحال فعمرها ؟!...
عيدة : باقي ليها ثلث سنين وتكمل بلاطو...(بلاطو ديال البيض فيه ثلاثين هههههع)...
سعيدة : ونتي يا لالة لخطتي وخطبتيها ؟ سولتيها هي واش تبغي ؟ راه واخا مطلگة واخا مايجيبش ليها ولاد...راه باقيا صغيرة وتجوج ب سيدي راه گد جدها ويفوت يضهر ليا...
توريا : وهي تلگا حسن من سيدي ؟!
كريمة : لا لگات الي يسترها علاش لا...هاهي بنت خالي هاجر كي شتي را فعمرها 25 عام مات ليها راجلها لول راهي مجوجة ب ولد الخبراوي ديك ساعة عدو سبعين عام ولدات معاه ثلاثة وراه...وراهم كل واحد تشرا ليه لبسة فسيمانة...ومشات هي وياه لعمرة ما مرة ماجوج ولعام جاي راهم ناويين يمشيو لحج...
سعيدة : اكريمة ااابنيتي لا تهضريشااااي غالي سمعتيها تگوليها بنيتي ولهلا يطيحك بلاصتهم طلبي ستر ابنيتي راكي يلاه باديا فدنيا ويلاه عندك 17 عام اش عرفك فهادشي...
كريمة"وسعات عينيها" : راه حضرت ليهم اختي سعيدة ماسمعتشاي...
سعيدة : واخا ماسمعتيش لا تهضريش...حنا لا دوينا راه جربنا والى مجربناش نگولو الله يستر...
توريا"هزات حاجبها فيها" : لا تقويش اسعيدة ماگالت عيب...راها بنت ختي ونعرفها قانعة ودرويشة وهضرتها معقولة وهادشي علاش تربات..ماسمعت ما رات راها عاشت وشافت...
سعيدة"الصمت"
توريا"قلبات عينيها بعدم رضى وهي تشوف ف عيدة" : الى مابغاتش اش ديري الالة ..
عيدة : نشوفو بنات ناس غيرها مالها هي وحدها الي بقات فدنيا...الحاج را عيا وهو يتسنى..ونامس را جاه سهال كال شي ماكلة فسوق جرات ليه كرشو بايت الليل على گدو الي داه الي ردو لكابينة (طواليط)..مالگيت ليه جهد بغيت غانوض نعطيه شوية الكمون بلدي يهمد عليه الوجع ما صبت كي ندير وكلشي ناعس دك الوقت...هاهي هادي اوى لا عيا نيت كي نديرو ؟ تگدو عليه ؟ را عيب ابنيتي راني واكلاها وليني را هذا الي عطا المعطى والى عطاك العاطي ماتحرث ماتواطي...
ربيعة : وتانتي را الشرع عطاه ربعة ماعليش الالة يكون خير..
سعيدة"بدات صحك بلعاني" : ههههه هي ربيعة لا جاك سيحمد بغا يتجوج ولا تجوج اش تكولي ليه...
ربيعة : اههههه لا مايديرهاش سيحمد قانع بيا انا عاطياااه الي يقنعو...
توريا : داك شلاهبي ماتعرفي اش تحت راسو (على نيتها)...
سعيدة : يديرها ويفوتها واخا تقنعيه تي...
ربيعة(لاحت ليها الهضرة) : لا مقنعاااه انا عارفاه قانع بيا وبزكريا شوفي نتي وطالعي ليا على هويشم ديالك اما انا بزاااف عليك ههه...
سعيدة"جمعات الصحكة وهي توقف" : ايوى لا بزاف عليا الله يطليكم ببعضياتكم...لالة تصبحي على خير...تصبحو على خير...
خلاتهم شي يشوف فشي وربيعة ماعجبهاش الحال تاهي...خرجات من البيت وطلعات كاتحرك ف راسها ب لا حول ولا قوة الا بالله...ومشات لكوزينة ترد العشا يطيب...وتحطو ليهم وتطلع تنعس...
فنفس البلاصة ..واحد الدويرة صغييرة مبينة غير بالبريك والمرطوب فيها بيييت كبيير وفيها كوزينة وطواليط بلدية...تلفازة بلازما قديمة معلقة فالحايط وشاعلة متكي حداها كايتفرج وهي شادة تيليفونو وكتفرج فيه وتضحك حتى سمعو صوت الباب دورات راسها وضحكات وهي تنغز ولدها...
حسنية. : ابببب بااباببببببن...
ياسين"ضحك" : ههههه ااايه اشرف العزيز عندك ياك..انا غا لگيتين حداه نونس فيه...
دخل محمل فايدو ميكات وجا مع هضرتو وهو يضحك صوته يلاه غلاص ليه وباينين فيه علامات البلوغ ..عينيه كحلييين وحرشييين...بدا يضحك...
اشرف : راك مشري بالرخا وانا قايم بالغلا..راني عزيز كيتك المجدوب عههههه...
ياسين : ياك الكيدار...
حسنية"عطات ل ياسين تيليفونو الي داير فيه العرض نجمة ستة باش كاتفرج فالفيديوات الي كاتبغي ديال رسوم خصوصا طوم وجيري..وناضت اعند اشرف عنقاتو بجهد تا لاح الميكات وباسها فراسها" : بببب اباببببب...
اشرف"كايقيص ليها فحناكها وجبهتها وعنقها" : نزلات ليك سخانة شي ...
ياسين : يلاه توگضت...من بارح وهي تهتهت من الي عيطت ليك...
اشرف : مالك ماديتيها لمستوصف علم غا عمي هاشم دك ساعات ولا حسام يقضيو معاك غراض...
ياسين : ماتليت بغيت نگوليهمش..مي وگاد بيها...واخا جات خالتي سعيدة جايبة معاها دوا وش مقدية حشمت نردهم ليها..
اشرف : خالتي سعيدة ودار رحماني مهلين فمي ماشفنا منهم غالخير...
حسنية : ابببب "كاتعبر ليها بايدها وتضحك وتنقز وتصفق بايديها" ابببببيااااا بببب...هههههههه
اشرف : واخا دوزي بركي نوريك اش جبت ليك بعدا...
حسنية"حركات ليه راسها"...
دخلها وهز ميكات وياسين شاد تيليكوموند ويشوف فيهم ومبسم تاهو...تا جلسها وجلس حداها وهز ميكة جبد منها دانون الي كايعجبها بيرلي جاب ليها ربعة...وجاب ليها قرعة ديال شكلاط ديال دهن و كاشير كبيرة لانشون كايعجبها...وجاب ليها قرعة كوفيتير...
اشرف : هادو را من سوق ديال الخميس العطاوية...
ياسين"مد ايدو داها وجابها بضحك" : واش بغيتي شكون بحالك عههههه ..
حسنية"باست ل اشرف كتفو وباستو فحنكو وهو كيضحك..عزيز عليها بزاااف هو وياسين لكن اشرف بزاف حيث ياسين كان كايمشي لمراكش يقرا واشرف الي كايبقى مقابلها فكلشي لباسها حتى دوش...الى مرضات يجلس عند راسها علاقتو بيها ف شكل..." : هههههه...
عاود تاني جبد ليها مايونيز وكيتشاب عزاز عليها...وباكية فرماج نوع عادي رخيص داكشي علاش قد مسكين جابو كاع ديك الخلصة ديال الكانزة الي شد فخدمتو فالفلاحة خسرها عليها (كانزة هي خمسطاش اليوم كايتخلصو فيها كل خمسطاش ليوم مثلا)...جاب ليها زبدة...
اشرف"شاف فيها وطلع حاجبو وهبطو" : عرفتي اش هنا ؟!
حسنية"كتشوف فيه ماعرفاتش"...
اشرف"جبد خنيشة صغيرة فيها حلوة معسلة بحال شباكية ديال سوق كاتحمااااق عليها غا شافتها وهي طيرها ليه وبدات تنقز فبلاصتها وتضحك" : ععهههههههههههه...
ياسين : هههه تا شو كي نقزت...واااا الميمة تي شوري را بان ليا مقدي ليك غا تي...
اشرف : لا جبت ليك تانتا...
ياسين : واااااااااهيييييييلي...تا كيفاش...
اشرف : اوكيييييه شد شد "لاح ليه ساشية شدها"
ياسين : ابسم الله هههههه...
حل ساشية تا جبد منها سروال سورفيت وباكية فيها ثلاثة تقاشر..وسع ضحكتو وهو يشير عليه بتيليكوموند تا غوبشات فيه الحسنية...
ياسين : تا را بالفرحة نفلق ليه راس...زيد لهن حب خوك...
مد ليه ايدو ضربو ببونية بالضحك بيناتهم...الي شافهم يقول تبااارك الله توام متكامل بمعنى الكلمة والي زاد نغزة هو اهتمامهم ب امهم واخا مساكن دازت عليهم حيث ولاد "الحرام" بعلاقة اغت..صاب كارثية دازت عليها...عاود مد ايدو لواحد ساشية كان جايب فيها ديسير تفاح وليمون وبنان...وساشية فيها ملابس داخلية ل حسنية باقين جداد شراهم من سوق...فرحان بمجيبتو لمو ولخوه كايحس براسو رجل يعول عليه...
اشرف"عاود مد ايدو لراس الحسنية" : رايك دافي امي ياكما بغات ترجع ليك سخانة...
حسنية"حركات راسها ب لا"
اشرف : نوضي عاونيني نستفو هادشي فثلاجة وندير العشا نوضي...
ناضت هي وياه عنقها بجنب وهز دوك ساشيات داهم لكوزينة الي كانت غير طاجيرات بالبريك وفيها خوامي مغطيين بيهم لتحت...وفيهم ماعن على قد الحال...جلسها فوق الكرسي وقرب ليها طويبلة ديال الميكة حط ليها شوية من ديك الحلوة تاكلها ..
اشرف. : هادي نخبيها ليك ماتكتريش منها دير ليك الوجع كي ديك المرة فكرشك..تعشاي وسيري را حطيت ليك الويز جبتها ليك راها فالبليصة فين كنخليها ليك...
تبسمات ليه وحركات راسها بطفولية...بدات تاكل وهو كايستف فداكشي..هز مطيشة وبصلة وفلفلة قطعهم مزيان وردهم يتشحرو دار ليهم تطرية وتومة وخلاهم يطيبو على عافية مهيلة فوق بوطة الصغيرة...هز بطاطا نقاها وقطعها باش يقليها...بقات حداه كاتاكل وتعاون فيه الى قاليها مدي ليا...جا ياسين غسل شي ماعن كانو باقيين نقا دنيا تما...طابت التكتوكة زاد عليها البيض خلاه تا طاب وطفا عليه كمل بطاطا فالقلي حيث عزيزة على مو....حط داكشي مقاد وداه لبيت حط فيه طابلة ديال ميكة...كان البيت نصو فيه سدادر بطلقان ونص لاخور مفرش فلارض فين كاينعسو نيت...سماو الله وبداو ياكلو..كانت باقية عيانة مرة يوكلها بايدو مرة تاكل هي...ويضحك معاها هو وياسين وهي كتكرشخ بضحك حتى كاتبغي تكور...اشرف كايبقى يشووووف فيها ويصحك تا نسا راو وبقا شاد ندغة فايدو وكيشوف فيها فرحان فرحان بزااااف بزاااف تا قلبو فرفر ليه....
كيف قاليها "خرجي"..حسات بالي صافي وصل الوقت باش تبدا ديك الحياة معاه......حنحنات منضفة حلقها وهي تجاوبو...
حبيبة : ك گالت ليك ماما دخل تعشا...
ناديا"غمضات عينيها بغات تاكلها حيث بغاتها هي تقوليه دخل تعشا"...
بشار"دوز على وجهو ولحيتو بتعب..سكت شحاال عاد جاوب" : لا...لا حبيبة عيان ماعنديش جهد لشي عشا...ماشي مشكيل...
حبيبة : اوك...
بشار : عندك الثقل ؟!..
حبيبة : اه...هاهما هنا لتحت...
بشار : حلي الباب...
.شافت جيهة باها وهي تبسم ومشات اعندو كاتزرب تلاحت عليه عنقاتو تا تنهدات ليه فحضنو ماكرهاتش تبقا معنقاه حياتها كلها....بقا شحاال وهو محاوطها بايديه ويطنز عايها حتى سمعات صوت لانتيرفون...
ناديا : سيري حلي ليه ابنتي...
حبيبة"غمضات عينها وجمعات البسمة وهي تنفخ" : ففف واخا...
مشات بخطى ثقيييلة حتى لباب وهي تاخذ نفس عميييييق وتنهدات وهي تحل الباب لقاتو واقف عاطي بالضهر خاشي ايد فجيب وايد فيها الگارو ودخان كايبان خارج من جنب فمو...لابس تيشرت گري مطرطق على درعانو وايديه المكتاسيين بالزغب حرش وكثيف...وسروال عامر جيوب فالكحل وبروتكان كحل..غير سمع صوت الباب وهو يلوح الكارو عسف عليه وساط اخر نفخة...وهو يدور شاف فيها وحرك راسو مثقل...
بشار : فين الڤاليز ؟!؟..
حبيبة"حلات الباب مزيان" : هاهما هنا...
م.حفيظ"خرج كايضحك" : اهلا اهلا بولدي نهار غليض هذا ههه
بشار"قرب لعندو وتحنى نصو تا باس ليه راسو" : يتوب عليك..
م.حفيظ : مابيتيش تعشا..
بشار : لا لا عيان... ماعليش...
م.حفيظ : واخا ولدي را باينة فيك نيت..الله يبيتك فراحة الله...هانا ولدي بلا منوصيك الله يرضي عليك بنتي ديرها فعينيك را هي البكرة وهي عينيا اللولة..معزتها وحدها ولدي الله ينورك...ماتخليهاش تبكي انا راضي عليك...
بشار"الصمت"...
م.حفيظ"ضار عند حبيبة باس راسها ومشات تسلم على امها وخوتها...قرب ليه الفاليز الي هزهم وداهم لطوموبيل كاينقل فيهم حيث موقفها فشارع...ودار زوجات فالكوفر ووحدة لور...حتى تمات جايا هازا شكارة فالبيج ومارون فيها نونوس فسنسلة فيها بوليكوب وداكشي ديال القرايا وجنب كتفها فيه شكارة لابتوب والايباد...قرب وشدهم من عندها حطهم لور تاهما...ضارت تبسمات لباها ودمعة فطرف عينيها...حتى حدرات راسها وباها عينيه ولاو حمرييين كايتوحشها بزاف....حطات راسها على زاج...لا هي داتها فيه ولا هو داها فيها....الضواو كايسنيو فعينيها وهي كاتشوف فالطرق وساااهية ودمعة على طرف غا هي غمضات وهي تهبط دمعة كاتجريييييييييييي...وديك دمعة فحال الى قالت ليه دور شوفني تا دور راسو وشاف ليها جنكها الي نازلة فيه ديك الدمعة ورجع شاف قدامو..!!...
ماحسات حتى وقفات بيها سيارة قدام عمارة سكنية كاتبان من برا راقية...الباب ديالها قدامو سيكيريتي...بقات كاتشوف حتى سمعات صوته...
بشار : نزلي...
ديك "نزلي" بصوته خلات قلبها يضررررررب...مدات ايدها لبواني حلات الباب وهي تنقز نزلات...بقات واقفة كاتفرك فايديها وتشوف قدامها ف نقطة مبهمة...حتى حسات بيه جا حداها...وقاليها تزيد... طلعو لفوق بالمصعد تحل على البارطما الي جبد ساروتها وحلها قدامها ووقف شير ليها براسو باش تدخل...بقات واقفة كاتشوف وخطواتها تقاااال بزااااف...
بشار : تبقاي ليا هنا ؟!
حبيبة"شافت فيه وهي تغوبش" : لا...
بشار : تحركي...
دخلات قدامو حتى لداخل وهي توقف كاتفرك فايديها وقلبها كيضررررب...مسألة يبقاو فدار تحت سقف صعيبة عليها لكن الضروف حكمات وخلاتها تقبل وتبقى معاه...دورات عينيها ناحية المكان ماتنكرش ان دار زوينة ستيلها راقي وديال الفريع..لكن اش يجي هادشي قدام الخوف والغمة الي فقلبها...
بشار : هاني جاي...
مجاوباتوش سد الباب ونزل لتحت تا طلع ليها حوايجها دخلهم ليها.كاملين وهو يوقف خاشي ايديه فجيابو...
بشار"شير بعينيه الي مخنزرين بلا وقت ناحية البيت" : دخلي تما فيه شنو تحتاجي..en tout cas دارك هادي مايحتاجش نوريك شي حاجة..."شاف فساعتو" هاني جاي شوفي شنو ديري واش بغيتي تگادي قضيه...
خلاها وخرج من الدار...بقات واقفة شحاال وهي دور لبيت الي وراها...دات ليه الفاليز وهي تدخل ليه كان زوين مفرش باتات باقي جديد كلو بيض وماريو فالحيط كلو زاج وفيه باب الي كاين فيه دوش...حطات شكارتها وصاكادو...وجلسات فطرف ناموسية باقي خاطرها مقبوض ابدا واش رتاحت....بقات شحاال كاتهضر مع ناديا حتى كملات وجلسات كاتشوف فالبيت..شوي هزات تيليفون كاتبقشش فيه باغيا تنسي الغمة الي فصدرها...حتى قفزات من صوت دقان فالباب تا شدات على صدرها...
حبيبة : ن نعااام..
بشار : خرجي...
بقات شحال وهي جالسة...حتى عاود عيط ليها وهي تخرج بخطى ثقيلة تا لحقات عليه كان واقف عند طابلة حاط فيها ساشيات...ضار شاف فيها ورجع شاف قدامو خاشي ايديه فجيابو كايحك فشنايفو الي غالبة عليهم لحية والمسطاج الكثييف..
حبيبة"هبطات عينيها لساشيات قرات اسم محل السوشي الي كايعجبها..ورجعات كاتشوف فيه عاطي بضهرو.."
بشار : جبتك بلا عشا..."كايحك فلحيتو وجبد تيليفون كايشوف فيه ويهضر ويعبر بايدو ناحية الساشيات" المحل الي كاتاخذي من عندو ديما...
حبيبة"هزات حاجبها ونطقات بصوت شبه مسموع" : باش عرفتيه ؟؟..
بشار"هز راسو ضار شاف فيها ورجع شاف فتيليفونو عاقد نفس الغوباشة حتى نطق تاني بنفس نبرة الصوت الخشين" : الي تعجبك ماشي مشكيل نسولو عليها.. بقاي ليا على خاطرك...
يتبع...
التعليقات
لا توجد تعليقات بعد، كن أول من يعلق.