محتوى القصة
واخا عارفة اش كاين لكن مافهماتش علاش دار هاكا بهاد رد الفعل...تا ولا وجهو مزنگ وعينيه خارجين ولات هزات ايدها حطاتها على كتفو...كاتهدن فيه...
ناديا : صافي صافي الحاج هي تهدن...
م.حفيظ"كايشوف فيها مخنزر"..
ناديا : صافي ماوقع والو...
م.حفيظ : اش خلاك تگولي هاد الهضرة ؟ اش وقع ؟!..
ناديا"كتحرك راسها" : ما وقع والو هي ماعرفتش مالي وصافي...صافي نسا عافاك الحاج...ما گلت والو...هي مبرزطة وعيانة شوية طايح عليا ضيم وصافي...
م.حفيظ : شربي دوا تالراس وسيري نعسي...
حركات راسها غا باش يسكت خافتو لا يمرض...كمداتها فخاطرها وقلبها وسكتات...تخشات ففراشها دارت نضاضرها هزات تيليفونها ودخلات تلاهي راسها بشي رواية ولا شي اخبار تقراهم...كاتقرا وعقلها ساهي...قلبها كاتحس بيه مضيوم بزاااف...كاترجع لداكشي الي داز ملي عرفو كلشي على بشار وعائلتو حتى كاتبدا ترجع ليها حر الشمتة والصدمة والخوف شوية تفكر هضرة بنتها...شوية تبدا تبرط فالامور وترجع لهضرة بشار وتعاود ترجع لهضرة مولاي حفيظ...تنهدات دايرة ايدها على جبهتها كدوز عليها بتعب وقلق...كاتحس براسها حابسة البكية....الخوف متمكن منها بزاااف على بنتها تعاود ترجع دور هضرة بشار فمخها وترجاااااع تاني تبرط الامور...وحاجة وحدة كادور وصط هادشي كااامل سوا شمتة غضب خوف ندم كاتلقى نفس الحاجة كاتمشي وتجي وهي "اشتياقها لبنتها"...لدرجة ماحساتش ب مولاي حفيظ امتى جر الفراش وتكا حداها مافيقها تا طفى الفيوز الي حداه وعطاها بالضهر...ضارت تتشوف فيه تنهدت تاني ورجعات طفات فيوز الي حداها...جات بغات طفي تيليفون لقات راسها دخلات لمحادثة فواتساب بينها وبين بنتها...خرجات بزربة من تما وطلقات غوباشتها حاولات ترجع قلبها لقصوحيتو الي بنات هي...
صباح يوم جديد...صباح الخير...ربما جايب احداث وربما الحال غايبقى كيما هو عليه...فاقت معطلة شوية حيث ملي رجعو من العشا ديال البارح الي كان فواحد ريسطو طبعا كااالم بمواصفات باغيها بشار باش يتعشا معاها اليز...كاتحس براسها مدگدكة بسباب علاقة الامس..شافت ساعة وهي تنوض من فراشها كاتفوه وتقاد فيه...ماكانش فبلاصتو حيث فاق بكري بزاف خلا ليها ميساج بلي عندو خدمة مبكرة شوية...حتى من لفطور ماخلاهاش ديرو...دخلات لكوزينة ردات الما يطيب ومشات لدوش غسلات وجهها وحكات سنانها كانت ديجا مدوشة ومصلية الفجر...خرجات عمرات برادها وحطات فطورها...لقات سعيدة مخلية ليها ميساج جاوباتها وهي كتفطر...شوية هضرات مع سناء حتى قالت ليها بلي بشار جا لعندهم وسعات عينيها وهزات تيليفون دوزات ليها الخط...
حبيبة : كيفاش جا عندكم ؟!..
سناء : جا البارح باش يدوي مع خالتي ناديا...
حبيبة : م "ريقها نشف خافت لا يكون حضر تا باها وسمع شي حاجة تضرو منهم" مافهمتش..ع عاودي ليا...
بدات سناء كاتعاود ليها اشنو قالت ليها لطيفة...بالحرف..وحبيبة قلبها كايضرب ومستغربة علاش بشار ماقاليها والو !!..
سناء : من تما وخالتي ناديا مغيرة واصلا ديجا كانت مغيرة ماعرفناش مالها...
حبيبة"عينيها مغرغرين" : ياكما مريصة بيها شي حاجة ؟!..
سناء : لا لا مانضنش مرض جسدي..
حبيبة"سكتات شحال وهي كاتفكر فهادشي..قلبها كيضرررب...شوية وهي تنطق" : م ماقالت والو لبشار ؟!..
سناء : بحالاش...
حبيبة : ياكما لاحت ليه شي هضرة ماشي هي هاديك..انا تنعرف ماما فاش تتعصب ماتتبقاش توزن هضرتها...
سناء"مابغاتش تقوليها" : لا لا ماقالت والو غير رتاحي...
كملات معاها وحطات تيليفون كاتخمم...ماقاليها بشار والو كاااع..واخا هادشي عجبها وفنفس الوقت ماريحهاش...كل مرة كاتزيد تأكد ان اختيارها لبشار قرار صحيح وكيف كيقولو " القرار الصحيح قد يؤلمك في البداية لكن سيريحك للابد"...
الرحامنة...
مع اذان الظهر دخلات مليكة لفيرما لقات عيدة جالسة فالبيت مع شي عيالات جاو يشوفوها...رمات سلام وجلسات مكونة...تا خذاو ضياف صوابهم وضيافتهم ومشاو فحالهم حيث هادشي علاش متعوذين ناس العروبية بزاف...
عيدة : ماجات عماك توريا ؟!..
مليكة : لا بقات تما ماتجي تالغذا...
عيدة : هاد كثرة المشي والمجي لدارهم كثر...
مليكة : ومالها اش عدها..راجل الي دير بحسابو تغدر على بكري..
عيدة : صباحات الله (بصوت مرتفع)...
مليكة"ميقات وهي تبدل الموضوع" : ورا الغذا امي غانمشي عند ربيعة...گالو الوجع بدا يزاورها واخا باقي شهرها مادخل...
عيدة : مزيان...
مليكة"بقات ساكتة بتردد حتى رجعت نطقت" : يلاه تمشي عمايا تشوفيها...
عيدة"صغرت عينيها فيها" : بابت اش ؟!..
مليكة : هاويييلي وراها كنتك فوگ 18 عام ولا كثر...تكون كيما كانت ومهما دارت راها منا وفينا والانسان كايغلط امي ماشي ملايكة حنا...
عيدة : حطي هادشي الي گلتي على راسك...
خرجت فيها عينيها حيث عرفتها معنات ليها عليها مع بشار...حتى قاطعهم دخول عبد القادر...رما السلام وجلس..
عيدة : شتك جيتي بكري...
ع.القادر : عيط عليا عبد الرحيم..سولني على دوك ناس الي جايين فاشراق...
عيدة : امتى درتي عماهم دروك...
ع.القادر : ماعطيتو خبار تا دويت فالتيليفون وأكدت...شحال وانا نهضر عماه بزز...هاو درنا عماهم نهار سبت حيث ماعندو خدمة يكون مسالي...
عيدة : بعد غذا...
ع.القادر : نحيدو علينا هادشي وديك ساعة يكون كلام...
مليكة : معامن دويتي ؟!..
ع.القادر"ضار عندها" : مع بشار...خوها الكبير معامن ندوي ؟ على بغينا نتيسرو وخوها مافراسو والي ؟...هو اللول...
ماقدرات مليكة تزيد كلمة مع باها...فالاخير وهي تنوض جمعات الوقفة وجلعات لبيت لفوق وقفات شوية كاتشوف ناحية البيت الي كان اصلا داروه لبشار وحبيبة فزواجهم...بقا مسدود الساروت ولات شداتو سعيدة كلفاتها عيدة...بدات تنگر وتبغم على كلشي وهي تدخل لبيت فين كاتنعس هي...جبدات تيليفون ودوزات لراجلها...
مليكة : امضرا اش درتو ؟!..
المعطي : موحال نجيو...لينا عندها دي كوغ ف ليكول الي تقيدات فيها...واليزيد قطع مع صاحبو يانيس غادين croitia et Grèce...
مليكة. : هاناري اشناهما هادو فين جاو...
المعطي : مليكااا اليونان وكرواتيا فاوروبا نيت...ماتناقشيش معاه هذاك واخذ قرارو ماعندك ماديري...
مليكة : والبرهوشة صغيرة ؟ تاهي بغات تخرج ليا من ايديا !..
المعطي : لا هي الي غاتجي معايا ولكن ديريكت كي نقطعو نتلاقاو فجديدة ونمشيو لاكادير...دوار عندنا حتى نبغيو نمشيو ونمشيو ليه...
قطعات معاه وجلسات معصبة لا من ناحية ولادها الي خرجو من طاعتها حيث كبرو وكل واحد فيهم باغي يهز راسو وماعندهاش الحق تحكم فيهم حيث زوج لكبار وصلو لسن ماتقدرش تقوليهم فيه لا بحسب القانون تما ومكيسمعوش ليها واخا كاتحاول تجمعهم فدارهم كيف ولفات هي وولفات فترابيها البدوية....ومن ناحية اخرى ولات كاتحس براسها جالسة ضايفة مثقلة فدارهم ملي عرفات الفيرما ديال "بشار" كاتحس بتكومة فقلبها بحال كالسة عندو نيييت...ناضت بدلات ديك الكسوة ولبسات جلابة فالصفر باردة جمعات شعرها ورشات ريحتها بدلات صاك ونزلات لقات باها واقف...
مليكة : تمشي عمايا نشوفو ربيعة ؟! عيانة شوية با...
ع.القادر : ماجا عندها الكيدار ديال راجلها ؟!..
مليكة : لا مالحگهاش...
ع.القادر : سيري نتي مع شيفور تقداي ليها مادخلي تانشوف حريرة راجلها فين لاحگة...
حركات راسها وخرجات باغية فين تمشي تفوج...بينما فبلاصة اخرى فمراكش بالضبط گيليز...سالات مراجعتها لدروس البيرمي وتغذات ومشات لبيت تفرج فين تلاهي...مرة مرة كاتدخل تهضر مع سناء ايوب تاهو ولا البنت الي معاها فلافاك سماح شي مرات تراسل معاها ولا تشد شي فيلم تفرج فيه...كاتحاول تلاهى حيث هاد الايام بشار غايكون مزير بالخدمة ديال فرع شركتهم جديد الي تكلف بيه فالمغرب فهاد الاشهر القادمة...ومع العطلة صيفية ماعندها مادير بينما توصل قرايتها...
تغذات واخا فوقت معطل شوية...بقات متكية تا نعسات مافاقت غير على ايدين بشار كايدوزو على حنكها...ريحتو ضربات فنيفها تاتبسمات وعينيها معسلين بنعاس...جاوبات بصوت ناااعس...
حبيبة. : جيتي...
بشار : عيانة ؟!..
حبيبة"حلت عينيها" : لا هي نعست...علاش...
بشار"شاف فساعتو كان قريب لمغرب يأذن..ضارت ناحية تيليفونها شافت ساعة وهي تقفز"...
حبيبة : ويلي كاع ماحسيت...فففف..
بشار"باسها فشفايفها تا رجع راسها لور" : ماشي مشكيل..
حبيبة : كليتي تغذيتي ؟ بايكون فيك جوع انوض ندير كسكروط دوش تلقاه واجد...
بشار : شش تهدني..بشوية عليك..
حبيبة : ماحسيت كاع براسي كنت كنراجع فدروس بيرمي الي گلت ليك...
بشار"جمع حجبانو تفكرها" : باغية ترجعي ليه ؟..
حبيبة : تنفكر...
بشار : la semaine prochaine نديك فين كنتي بادية...
حبيبة : صافي حسن تانقنط بوحدي هنا..بينما رجعت لقرايا لافاك..
بشار : نساالي تبرزيط الخدمة ونتحرك نشوف شي دار مزيانة لينا...من بعد نبدا نگاد ليك لوراق مرة مرة تحركي معايا تما...
حبيبة : واخا ولكن قرايتي ماعرفتش واش نكملها هنا !؟..
بشار : شوفي نتي شنو فبالك..مانصيبش نفرض عليك شي حاجة فوگ خاطرك وطاگتك...
بقات كاتشوف فيه وتاتفكر...حطات راسها على كتفو ودورات ايديها على دراعو...وبدات تهضر...
حبيبة : ماعرفتش..ماكنتش عارفة بينوصلو لهادشي...كنت تنفكر نكمل هنا وناخذ ليصونص قبل مانتزوج بيك كنت بيت نكمل هي هنا وفاش خطبوني داركم حاولت نقنع راسي نكمل لهيه...ولكن مع هادشي الي وقع لينا وباقي واقع...تنفكر فيك ولفتي لهيه حياتك لهيه مبعد من صداع وحتى انا بديت تنفكر هاكا نعيشو لهيه بعيد على صداعات والحقد ديال ناس هنا...بيت نعيشو مرتاحيين هانيين..ماعنديش مشكيل الى كملت هنا مزيان الى كملت لهيه مزيان حتى هو وحسن...مهم مانبقاش جالسة بلا شهادة...بيت نكون معاك فينما كنا...
كملات هضرتها وبقات متكية عليه وهو كيسمع فيها...هضرتها زوينة ومريحة فاش كادير عقلها ومكتكونش مبرزطة...كايشوف انه لا هضرت معقول هضرتها تاهي تتكون موزونة...وديما كاتلمس فكلامها تضحية...هز ايدو وعنقها عندو خاشيها فيه كيبوس فراسها ويعاود...
حتى ناضت لكوزينة وخلاتو كايحيد فحوايجو بقا غير ب بوكسر مشا ديريكت لدوش وهي بدات توجد ماياكلو...حتى كمل ودخل عندها كايهضر فتيليفون مع هاشم وشاد الكارو كايكمي...قطع معاه حط تيليفون وريح...طفا الكارو فطفاية وجلس...ناضت جابت ليه كاسو ديال القهوة كان عمر حطاتو ليه...ورجعات جلسات بلاصتها بدات تاكل تاهي...تا نطق...
بشار : هاد اليومين"سكت كايعض حنكو من لداخل عينيه كيضوفو فنقطة بعيدة گارن حجبانو باين عليه مكره"...عندي مشية لبلاد..."شاف فيها" بلان اشراق ختي...
حبيبة : بتمشي ؟!..
بشار"حرك راسو" : بلا مانهضر معاك نتي تبقاي هنا"قاطعاتو"..
حبيبة"وسعات عينيها" : اكيييد لا بشار (هز حاجبو مخنزر) بنمشي معاك والله مانخليك تمشي وحدك...هاني حلفت بالله...
ماقدراتش تشوف تخنزيرتو خشات راسها فكرواصتها تنتش وتشرب...وفنفس الوقت كترمش كاتسنى يقلب عليها طابلة هههه..
صلات المغرب جمعات صلايتها وخرجات من الصالون كاتمتم بالباقيات صالحات...دخلات لبيت الي فيه رقية وداري ومعاهم سناء قلبات بعينيها عليها...
لطيفة : فين ناديا ؟!..
سناء : فالكوزينة...
حركات ىاسها وخرجات توجهت لكوزينة لقاتها كاتجبد فشي طاسات وتحط هنا وهنا...كانت حاطة واحد طاسة كبيرة مسدودة...
لطيفة : اش تديري مالكي...
ناديا"وقفات وحطات واحد القرعة كبيرة جديدة..جابت شي عشوب موجداهم خواتهم فبها وسداتها" : شوفي هاد العشوب مع هاد طاسة فيها الذرة مهرمشة...بيتك تديها لفين تتمشي عند هاديك عتيهم ليها تشربهم مزيانين لفقر د.م...
لطيفة"جاتها ضحكة وحبستها" : عندمن ههه...
ناديا"وقفت تتشوف فيها وغوبشت" : علاش تضحكي...
لطيفة : لواااه...هي مافهمت لمن...
ناديا"خرجات عينيها" : عطيها هادشي وياااك تگولي مني ليها بنتقلق منك ونقلب عليك وجهي...هادشي هي بقى هنا مانفع اللهم نعطيه صدقة...
لطيفة"شدات ليها ايدها" : هضري معاها...مافيها حتى عيب هضري وعايريها وعاودي تفاهمي معاها وسمعي منها...را تبعدي تاتعياي والله ماتگدي تفوتيها ولا تنسايها ولا تحيد ليه من قلبك..."بتأكيد" بيتهضري معاها ؟!...
ناديا"خرجات عينيها على جهدهم" : لاااااااا لطيفة لااااا...ضربت عليها...صافي..هادشي هي مابيت ذنوب...يبقاو...على رقبتي...
"دفعات طاسة بجهد وخرجات" هادشي مايشوفو الحاج مابيت يتجبد ليا صداع...ماتبقايش تعاودي ليا هاد الهضرة...
خرجات وخلات لطيفة دايرة ايدها على فمها وحنكها وتاتشوف فيها كيف مشات وضارت شافت فالطاسات...جابت ليها ضحك وفنفس الوقت بقات فيها حيث كاتشوف فيها ضاغطة على راسها باش ماتستسلمش للمحنة وترطاب ...المهم محاولة ماتلينش على بنتها لكن العقل تايقول والقلب لاكان باغي را كيغلب العقل سواء اليوم او غذا او مستقبلا...
على انغام الاغنية الشعبية الي طالقين فالرموك سايق وكايدندن ومرة مرة يضرب كلاكصون يقفز بيه راگد...مد ايدو لمنخرو ساسو ولاح داكشي من شرجم وبدا يكحب تا ضار عندو...
عزيز : شتك جايب صاكك...ناوي تبرك عرام فخريبگة...
سيحمد : ممم...
عزيز : عند الخطية ديال عتيقة ؟!..
سيحمد"ضار خنزر فيه" : جمع كرك اولد القح**..
عزيز : هههه حق الرب تا خطية حيد عليا من الهضرة...تبتاتك بتريكة خرجت عليك...ياك گلت ليك داك العام مطولش عماها ونتا ترمتك لصقت عليها وز** كرم بين فخادها...ولگا...
ماحس تا عطاه سيحمد ببونية تا مشا راسو لهيه وفلت منو الفولون ديال رموك تا بدا يزيكزاكي فطريق على شوي يتقلبو...
عزيز : الله ينعل بو مك القواد...
سيحمد : بالرب المعبود تانوگف هنا نح** مك ونزيد...جمع فمك اولد الخانزة...
عزيز : مالي كذبت ؟ ماعارفهاش شيخة وديك ساعة دير بيها رسم ونتا عجبك تقحبين والفسا.د ونوض تگعد...
ماجاوبوش رجع تكون بلاصتو ولاخور بقا ينگر ويبغم مسافة طريق كلها من رحامنة حتى لمدينة خريبگة...دخلو ليها وتوجه بيه حتى لراس الدرب ووقف تا نزل ونزل معاه صاكو...بقى شحال واقف كايشوف...حس براسو مافيه مايدخل لدار دابا...رجع وشد طريق لقهوة ودخل...تا وقفات عليه سرباية لابسة سروال دجين مطرطق عليها عندها لور كبيير وصدر مبندر ولاو هاد القضية كايديروها اصحاب المقاهي...وشعرها مصبوغ بالكحل وسبحان من صور فيها داك زين وديك البيوضة وجهها صافي وفيه واحد l'éclat زوييييين كايلمع...تبسمات ليه...
هي : رحماني لباس...
سيحمد : فدوى...لباس..
فدوى : لباس غبرتي عليا...
سيحمد : توحشتيني ولا...
فدوى : ضروري هههه هي نص نص ؟!..
سيحمد : بغيت عصير لافوكا وواحد ميلفوي...
حركات راسها وضارت عطاتو بترمتها خلاتو كايشوف فيها باعجاب...زوينة بزاف وباقي صغيرة لكن ضروف حتمات عليها تخرج تخدم...جبد تيليفون من جيب الفيستة ودوز الرقم ديالها...كايتسناه يصوني لقا نمرتها محيدة كاااع...عاود وعاود و الو نفس الحاجة...
سيحمد : نعل أصلمك القح.بة...
حط تيليفون ودار رجل على رجل تايضوف فدنيا تا شوية جابت ليه فدوى الطلب شاف فيها وغمزها وهي تمشي كاضحك...شرب من داك الكاس برد بيه العطش شوية...وتگعد جبد شي سوارت كايقلب فيهم...لقى ساروت دار عزلو فجيب لاخور ورجع كايكمل عصيرو حتى رتاح شوية وناض خلص الكونصوماسيون...تواعد هو وفدوى يضوفها من بعد...وناض مشا لواحد الهري تقدا من عندو شلا سلعة لبنات ولدار وعتيقة...تقدا كل ماتحتاج من زيت دقيق فرماج كونفيتير شكلاط لبنات كلشي تقداه وشد واحد طالب معاشو باش هز ليه داكشي وداه تال دار...هز راسو لشرجم تا بغا يعيط ويصوني فلانتيرفون وهو يبدل رأيو وجبد سوارت حل الباب الولاني تا دخل ليه سلعة فدخيلة ديال باب مع واسعة خلصو مشا فحالو وهو خلا داكشي تم..وتم طالع عياان باغي غير يحط راسو...مشا لطبقة لولة فين كاينين بيوت نعاس بغا يحل الباب لقاه محلول ولكن كايسمع صوت الموسيقى خدامة...جمع حجبانو كايسمع حساب ليه فلول مكاين حد..حل الباب ودخل والموسيقى غاديا وتجاهد من جيهة بيت نعاس...بدا يعيط ماسمعو حد..مع غايسمع ضحكة عااالية ديال عتيقة...مشا ديريكت لبيت حل الباب اتا لقى الي ماعمرو حساب ليه غايلقاه...واش هي خيانة ؟..
لقاها هازة رجليها باقي نقيشهم جديد مدوراهم ورا ضهر واحد خونا مگضر وصحييح سميمر وصليعتو تبري....
يمكن هادي نسميوها "الكارما" اي بالمعنى الي كنفهموه بالدارجة ديالنا هي "السمطة كدور"...هادشي الي يمكن نقولو وقع مع سيحمد...عاش حياته كاملة كايخون مرتو مع عدة نساء ماشي غير وحدة...وهاهي ضارت وذاق نفس الطعم لكن بطريقة اخرى...واخا كان عايش مع عتيقة فالحرام لكن كانت مميزة عندو عندو معاها زوج بنات من لحمو ود.مو...تقريبا عايش معاها حياة زوجية غير هي فالحرام...
شنو شعور ديالو فهاد اللحظة..شعور الصدنة بطبيعة الحال على هو كان يجي فبالو غايلقاها بهاد المنظر...خرج عينيه على جهدهم بلاصة مايضربها بصقلة بدا بالمعيور نيشان...
سيحمد : يااااا بنت القح..باااااااا...
ماعرفو باش تبلاو شهقات وهي طل براسها مخرجة عينيها ماشي حيث حصلها ولكن حيث دخل على غفلة مكانتش متوقعاه يجي...بدات دور فعينيها وراسها تقلب على باش تستر...كان كلشي مليوح عشوائي...
عتيقة : شياضمي سترني سترني...
ماجا فين يدور لاخور تا خرج سبحمد يغوت ويعرعر ويردد...
سيحمد : يا بنت القح...اليوم نق.ت.ل عدو ربااااااااااااك....
ناض هذاك من فوق عتيقة الي طارت لوات عليها ايزار ومشات سدات البيت بساروت وهذاك كايقلب هز شورط لبسو بالخف...
عتيقة : ويلي ويلي على هذاااا...
الشياضمي : تي لاش سديتي الباب ؟!..
عتيقة : بغيتيه يقت.لك...
الشياضمي"خنزر فيها" : ساهل لكلبة مو هنا...
دفعها بجهد كان ديك ساعة جا سيحمد كايدفع فالباب باغي يفرعو عليهم وهي كاضرب فحناكها وتعاود خايفة من شوهة اما سيحمد كاع ماهمها...هذاك الشياضمي حل الباب بكل سهولة تا نقز سيحمد هاز واحد المقدة غوتات عتيقة لربي الي خلقها...
عتيقة : واااااااااااكوااااااااك بغا يطيح عليا روح وااااكوااااك....
سيحمد : يا بنت الهزة يحرق اصل مك....بيدقتيني يا بنت القااا.حبااااااااا.....
هز المقدة يلاه بغا ينزل عليه بيها شد ليه ايدو بسرعة البرق وزير عليها ولواها ليه تا حس بيها بغات تقسم وتم غادي دافعو بجهد تا لصقو مع لحيط وجو دار زدااااااف وزاد بغجو ليه من ورا راسو تا تبقجو ليه شنايف والمنخر ولا غاينفت بالنفس كاينج...
شياضمي : عاد لمكن گلتي بنت القح...
سيحمد"باقي يهضر ضاغط عليه" : ففف...ططلااااااق...
شياضمي"عاود زدحو بجهد تا بانو ليه نجوم" : دويت معاك ؟...هااا.. عرفتي فين جاي ؟ راك جاي لمكاني هاجم عليا وسك بيت نعاس انا ومرتي...نعيط لبوليس يا ولد القاف يهزو طبون مك...
سيحمد"كايهضر فمو لاصق عالحايط" : ددد داااررررييييي...ومرررررتييي هاديك...
عتيقة"هزات حاجبها" : عام اش كنت مرتك ؟...رسم حلفتي ماديرو معايا...ايوى جا سيد رجال وسيدك دارو معايا...ودار راها داري بسميتي بيع وشرا وسير جري طوالك المحاكيم راها مگرعة بشار وتگول زيدوني...
خرج عينيه على حر جهدهم تا رخف ايدو وجاحت منها المقدة...ريقو حس بيه نشف ماجا فين يستوعب هضرتها بلي راها تزوجات على سنة الله حتى كان جارو الشياضمي من قرفادتو وشاد ليه ايدو لور...خرجو من البيت وتم غادي نازل بيه وهي تابعاهم هكاك ملوية فليزار...كلها تقلقل بداك الغلض الي مقاد فيها...وزينها الي باقي يعشعشع بلقاااا...هبطو تال عند الباب...سبحمد مابقاش تحرك خلاه كايجرجر فيه كيف بغا...حل الباب ودفعو بجهد....وهي بعييد واقفة فدرجة لفوق كاتشوف فيه ناض كايسوس فحوايجو واخا باقي مصدوم...
عتيقة : بناتك بغيتي تشوفهم علم مي وتجيبهم ليك بالقانون...ولا نكون انا وراجلي وجي شوفهم...حقك مانمنعك منو..وليني تعتب هاد دار المرة جايا البوليس يفك بيناتنا....سيبة هادي...
سد الشياضمي الباب عليه وطلع فحالو هو وياها خلاوه هكاك كايشوف...للحظة جات ربيعة بين عينيه...جا بشار بين عينيه جاو الناس الي من تريكتو بين عينيه...عاش عزيز عليه الفس.اد وهذا فيس ماشي ساهل يتحيد منو...
مراكش...
طلات عليه كان جالس فالبالكون حاج قدامو لابتوب ديالو داير نضاضر شوف وخدام فيه حاط حداه كاس القهوة كحلة والكارو شاعل فايدو...مشات لكوزينة جبدات ماطيشة وخيار وخس قطعاتهم نص طرونش...حطاتهم فبول صغير ودارتهم فثلاجة ودازت لعشاها هي تشهات ليباط الي تعلمات ليهم مزيان دارت الما يسخن فكسرونة صغيرة تا بدا يغلي ورمان فيه سباگيتي...حطات صوص الجاهزة الي تحتاج وحك طون خلاتهم وخرجات لعندو لبيت...ماحس بيها كاع واش جايا خاشي راسو فخدمتو كايصيقط شي ضواصا فايمايلات ليزانجينيور الي معاه جداد هنا فمراكش...ماحس تا حطات ايدها على كتفو...هز راسو شاف فيها ورجع شاف فلابتوب ديالو...
حبيبة"بنبرة منخفضة" : درت ليك صالاد..تعشا بيها...
بشار"بنبرة خشنة" : كون مادرتيهاش...
حبيبة : علاش..خفيفة ماثقلش عليك..
ماجاوبهاش فيييين هو خاشي راسو فداكشي...وبقات هي واقفة مرة تشوف فالشارع مرة تشوف فيه اش كايخدم مافهمات فداكشي والووووو...كاتشوف فبلانات مرسومين...ارقام فوق بعضياتهم...خاصها دماغ ديال جن ولا دماغ واحد داير بحال اختصاصو...شوية تاهز راسو وضار بالعرض البطيء هاز حاجبو بانت ليه ببيجامة ديالها سميطات وشورط مع صهد ماردات كاع البال...كانت ساهية ماحسات تا تهزت بزربة من كرشها شهقات مخرجة عينيها ماعرفت باش تبلات...حطها فالبيت لداخل...
حبيبة : مم مالك ؟!..
بشار"قرب عندها مخنزر وجر ليها سميطة لواها على صبعو قربها ليه تا طلع وجهها حسات بسمطة حفرت ليها لحم وقالت احح" : ماعند ملتك كتان تستري عليا هنا ؟..(كتان هو توب هههه)...
عاد فهمات وهي تعض شفايفها...بقا شحال كايخنزر فيها عاد طلق منها ورجع لبالكون رجع عليه الباب وفرق رجليه حطهم فوق كرسي وهز لابتوب يكمل خدمتو...تفكرات سباغيتي وطارت لكوزينة لقاتها دغيا نشفات وحيث كاتعجبها رطبة( بحالي هه).. زادتها الما..دارت صوص فمقلة زادت عليها اضافات ثوم وعطرية...غير تبخت شوي طفات عليها ورمات فيها طون...صفات سباگيتي..دارتها فطبسيل وزاد عليها ديك صوص بطون..حلات ثلاجة جبدات فخوماج rapé..دارتو فوق منها...وحطتها فطابل هزات داك البول الي فيه صالاد ديالو مادارت فيها والو غير خل صافي...حطاتها فبلاطو مع قرعة الما معدني وكاس وفرشيط...هزات البلاطو ودخلات لبيت لبشات بينوار تاتسترات عاد هزات بلاطو ومشات لعندو دقات عليه وهو يدور كان داير ايدو على ذقنو كايكتب فشي ورقة شي معلومات...ضار غير بنص شاف بنص عين ورجع دور راسو مغوبش تا سكاناها بانت ليه هازا بلاطو عاد ناض حل عليها الباب وكايضوووف فيها بنص عين تا حطات داكشي...
حبيبة"بصوت خفيف" : بالصحة...
ضارت غاديا وهو يشدها من دراعها دورها عندو...عاطي بضهرو لبالكون وشارع وهي قدامو عاطية بضهرها لبيت كاع مكاتبان قدامو...خشا ايدو من كول بينوار وهبط بيها لصدرها كايدوز عليه بايدو وهي كاتقفز حيث كايبرك ليها على راس ديال بزازلها...شداتو من دراعو كاتزير عليه...
حبيبة : اييي...
بشار : عشاك ؟!..
حبيبة : فالكوزينة انهزو ونمشي نتعشا فالصالون...
بشار"كايدوز بصبعو على راس" : علاش...
حبيبة"قلبها كيضرب" : باش منبرزطكش ونتا خدام وانا بيت نتفرج فواحد الفيلم...د احح..داكشي باش...
حرك راسو وتحنى باسها فعنقها بوسة مسموعة تا لوات عنقها حيث هرها...ورجع شاف فيها باقي كايلعب فصدرها...
بشار : بالصحة...
حبيبة"شافت فيه" : صافي بتخليني نمشي معاك نهار سبت..."بعدات بزربة حيث شد ليها فراس كان بغا يزير عليه"...ابشااار...
بشار"نزل راسو لعندها بملامح باردة" : اشنو دويت معاك ؟!..
حبيبة : مانمشيش...
بشار : نبقى نعاود معاك الهضرة ؟..عندي جهد ؟..ماعنديش يا حبيبة...روي عليا الهضرة...
زيرات ليه على دراعو عضات شنايفها وقربات لعندو لصقت عليه...وهزات راسها فيه تترمش فيه بعويناتها...ولات تتشوف فيه بحال شي فرخ صابة عليه شتا ( كتسناو نقول مشة)..
حبيبة : انا بيت نمشي معاك حيث مراتك...مابيتكش تمشي بوحدك واخا عارفاك گاد انا ماهامنيش تاواحد تما من غير نمشي معاك ك مرتك...وواجب عليا حيث ختك هاديك الي باتخطب...وهي تتسمى لوستي كيف تنعرفو...عافاك خليني نمشي معاك أنا مكنخاف من تاحد اصلا...وبيت نيت نشوف خالتو سعيدة ومي عيدة تاهي كانت تتسول فيا فاش مكنتيش هنا...عافاك...
بقى ساكت كايشوف فيها بنفس شوفة.. ماتعرفيه مخنزر ولا ناوي على تخنزير خزيت...كاتشوف فناضرو كايتحر وعينيه مغوبشييين اصلا مكتركزش فيهم شوفة...واخا حلفات عليه مابغاهاش تمشي...هزها بجهد من دراعها وقربها اكثر عندو تا تعلات على رجليها...
بشار : ماتسلمي على حد تم...سلام ناس الي تعرفي قاضي غراض...داك الحبس الي على بالي وبالك فوتيه...
حبيبة : هي من صواب وصافي...
بشار : صوابك شديه عندك..."خرج عينيه" مانصيبكش عاطية قمونتك لشي حد من غير سعيدة واشراق ختي وعيدة...هانيا ؟!..
حبيبة"حركات راسها" : واخا صافي...
طلق منها وضار حيد داك لابتوب عاد جلس...حضاتو تا بان ليها بدا ياكل عاد هي دخلات لكوزينة هزات طبسيلها وعصير...وخرجات لصالون شعلات تلفازة دارت فيلم من نيتفليكس وريحات كاتعشا وتفرج...بقات هكاك تا كملات عشاها وكملات الفيلم بدات كاتفوه عيات...طفات تلفازة وناضت لكوزينة غسلات ماعن وخرجات لدوش حكات سنانها وغسلات وجهها بصابون ديالها دخلات لبين ذهنات وجهها بكريم مرطب حيث حسات بيه بدا ينشف رجعات لداكشي...ذهنات شفايفها كذلك حيدات بينوارها ووقفات من بعيد عيطات ليه...
حبيبة : بشار..."دور راسو نصف دورة" باقي مابيتي تنعس ؟!..
بشار : لا..نسالي تبرزيط الي عندي..نعسي...
حركات راسها وتخشات ففراشها البيت مبرد بلاكليم...هزات تيليفونها كاتبقشش فيه حتى ماحسات براسها امتى غفات حدها حست بيه حيد ليها تيليفون وقاد ليها الغطا وتخشا حداها معنقها من لور...حسات بالبوسة فعنقها مجهدة...ورجعات غفاااات...
الصباح الباكر...طبعا عند صحاب البادية تمنية صباح كايقولو عليها را تعطلو...هزات كاس ديال الحليب دارت فيه شكلاط وحركاتو وعطاتو ليه تبسم ليها وقال شكرا بابتسامتو الحنينة...
سعيدة : بصحتك اكبيدتي...
مليكة : داك شكلاط الي كنت جت ليه انا !؟..
سعيدة : لا هذا جابو ليه بشار حيث عزيز عليه هاد الماركة..
مليكة"ميقات وقالت" : شلا..."بصوت منخفض"...
خرجات عيدة من البيت شادة فيها كريمة تا جلسات فبلاصتها...كانت كتفطر معاهم غا مشات لبيت ورجعات...جبدات جوا صغير وحطاتو لعبد القادر ومباركة تشوف...
عيدة : فلوس دجايجي الي جاب دجاج يامس...وفلوس اللحم...قوي الحاج راك عارف...
ع.القادر : نتي مولات الخير...
مباركة وسعات عينيها زادتها فقصة عيدة انها هي كاتعطيه لفلوس وفقصة الفيرما ديال مولاها...قشعات مليكة اللقطة وبقات تشوف وهي دور وجهها وضحكت...حنحن عبد القادر وناض..
ع.القادر : فين هي توريا ؟...
مليكة : جايا فطريگ عما خوها داز بيها لفيلاج تا تقدات شي حوايج هاو تصد لهنا...
ع.القادر : هاد كثرة المشي والمجي لدارهم مابقات مسلكة..تشد ركنتها شوية وراه محكومة بسورسي مابغينا مشاكيل...
اليومين دازو تقريبا عادييين مافيهم حتى جديد يذكر من غير توجاد الفيرما لخطاب الي جاييين...اشراق تزاد معاها الحال والضغط غير مازايد عليها وهي مكرهة هاد العريس...عندها امل ف بشار لكن بشار مابقاش بغا يتدخل فيها فقط غايحضر غييير حيث طلبو منو جدودو يحضر بصفته الاخ الاكبر وهادي نقطة مزيانة باش يكبرو بيه واصلا البنت عندها خوها الكبير هو المسؤول عليها واخا بعيد...
ريحة طياب عاطية ديال دجاج حيث واخا ماشي خطبة رسمية غير يفتحو الموضوع وتعارف كايبغيو يكبرو بالناس خصوصا انه جاي فوقت الغذا...خرج عبد القادر كايقاد فسلهامو بانت ليه مليكة وعيط ليها جات تزرب لعندو لابسة تشامير فالبيج مطروز بالمارون وطالقة شعرها مصايباه مجموعين غير خصلات لور بمقبط...
مليكة : نعام ابا...
ع.القادر"مغوبش" : خوك سبحمد ماعليه خبار ؟!..
مليكة : والي يا با...فاش مشيت عد ربيعة لگيت زكريا صونا عليه ماجاوبوش كايصوني ولكن والو يا با...
ع.القادر : بقاي تعيطي تايواجبك...وديك ساعة گولي ينابي عليا نهضر عماه نشوفو مشكيلتو ويعلمني فين حاط الفلوس را ناس واگفين عليهم...
حركات راسها وخلاها وزاد خرج...تنهدات وهي تمشي لكوزينة على برا فين كاينة توريا واقفة على تباخة وتعطيها فالمعلومات...شافت فيها...
توريا : طليتي على الكلبة ؟!..
مليكة : دويت معاها راها تكونت...طلبي سلامة من لاخور الي جايبينو ليك اما هي حالها ساهل...
توريا"زكما فمها بغيض" : را هذا الي فاقصني ومكردد ليا صحتي تالمرارة الي تلگا عليا حيدها ليا...هذا الله...
مليكة : وغا كوني وصبري مايدير والي داوي عماه با...مكان كاع باغي يجي ومابغا يدخل هادشي الي عاود ليا با يامس...
توريا"حركات راسها ب احياااني" : سيري لبيتي راه فيه رشاشات عمرتهم ب ما زهر وريحة...كاينة واحد الوحدة لگيتها طالقة صدا عداك تهزيها..
واقفة قدام الكوافوز كاتمشط فشعرها...هزاتو فوق شوي وجمعاتو اسفنجة..هزات جيل ديال شعر دارتو عليه باش لصق ومايخرجوش ليها شناتف...كانت لابسة سروال توب كحل عريض وفوقو تيشرت كحل لبسات فوقو فيست فاللون الكريمي باردة وطويلة...ذهنات وجهها بليكخون ورشات بارفانها وهزات صاكها سلسلتو طويلة..وخرجات لعندو لقاتو جالس فالفوطوي لابس لباس الخروج...كايهضر فالتيليفون واخا هكاك بقى كايفلي فيها بعينيه اش لابسة...وهو كان لابس سروال فيه جيوب فالبيج وتيشرت كحل...كمل المكالمة وتگعد وقف عاود شاف فتيليفونه كان شي حد رسل ليه العنوان...شاف فيها ورجع شاف فتيليفونو...
بشار : غذا تحركي معايا نشوفو دار..
حبيبة"بابتسامة" : لقيتيها ههه..واخا...
مشا لكرسي ريح فيه تالبس صباطو عاد وقف عنقها بجنبو وخرجو من البرطما فاتجاه الفيرما...شدو طريق وهو يصوني ليه تيليفون كان حسام...طلق الخط وجاوب...
حسام : شديتي طريگ ؟!..
بشار : علاش...
حسام : لا كنتي باقي فمراكش تعطل شوية باقي ماجاوش وانا عارفك ماتصيبش تبقى جالس وتسناهم..حساب ليا با گالها ليك...
بشار"حك شواربو بسنانو...وهو يقلب دورة" : تيسر...
ضرب دورة ورجع بيها لواحد لكافي بعيد مافيهش بشر بزاااف...دخل هو وياها هي شدات عصير وهو شد ليه قهوة مقطرة...بالفعل غير قالو ناس راهم شادين طريق جايين وهو يعلمو عاد شد طريق ديال سيدي بوعثمان...زيرات حبيبة على سماطي صاك متوثرة بدات ترجع معاها ندامة يمكن هههه ولات غاتدور فعينيها لكن بمجرد ماتفكرات لاش جايا وبغات تكون معاه وتفكرات هضرة طبيبة انها خاص تكون ديما جنبو يا فرح يا قرح يا فاضعف حالاتو تكون معاه تعطيه داكشي الي مكانش كايعيشو من بينو هاد المشيات الي عرفات قبل مايتزوج بيها مكانش كايجي كاع غير فديك الفترة فاش بغاو يخطبو ليك كان كايجي كايحس براسو منبوذ....
مسافة طريق حتى كانو قدام باب الفيرما وكان محلول لخط ودخل كسيرا بطوموبيل مافرانا تال عند رجلين هاشم حيث قشعو من بعيد واقف هو وحسام وسعيدة...تبسمات حبيبة الي شافتهم ونزلات هي لولة مشات سلمات عليها وعنقاتها....
سعيدة : الله ياربي الفيرما نورات بيك تاني...
حبيبة : توحشتك مابقيتيش تاتجي عندنا...
هاشم : ويا بنيتي راجلك جا بغيتي تبقاي شادة ليا مرتي...
حبيبة"تزنگات وبدات تضحك" : هههه...
هاشم ضار عند بشار الي كان عاطيهم بضهر حيث كايشعل الكارو..نفت منو جرة طويييلة وضار عندهم...حرك هاشم راسو لسعيدة وهي تعنق حبيبة بغات دخلها...
بشار : فين ؟!..
سعيدة : معايا بشار ومع لالة...حدانا بجووج تگول سلام من بعيد وتبرك حدايا كون هاني...
بقا كيشوووووف وهو يحرك راسو هادشي داز قدام عينين مليكة من بعيد مخنزرة الجن الي فيها مابقاش حمل حبيبة حيث هي الي فازت ببشار والحمام فسميتها ودابا راجلها مول الفيرما...طلعات لفوق ورجعات نزلات لقاتها جلسات حدا سعيدة..تبسمات وهي تدخل كاترحب وتعاود بناس..
مليكة : مرحباا مرحبا بحباب حفصة مرحبا بحفصة نورات الفيرما..مرحبا وزيد لكدام...زيدي كريمة رشي ليهم فايديهم يتريحو...انا نرش لمرت ولد خويا ههههه (حبيبة)...
عطات لكريمة مريشة وهي شدات مريشة...مع غاترش على حبيبة هي لولة طار عليها داكشي كلو صدا خسر ليها الفيستة كاملة تطبعات بيه نزلات عينيها وهي تخرجهم وغوتات...
حبيبة : لا لااااا.... ااش رشيتيييييي..اااش..."بلا ماتحس" تفووو...(مليكة عينيه خرجو ولاخرين دارو ايديهم على فامهم وعضو شواربهم زعما ويلي ويلي)...
ناضت سعيدة بزربة هزات كلينيكس من الي محطوط تما هزات عريمة جابتو ليها باش تمسح غا هي مسحات بيه زاد تجلخ داكشي...مليكة قلباتها تخنزيرة وديك "تفو" تهز فيها وتحط من لداخل...نقزات حفصة الي هي مرات عبد الرحيم اخ توريا...
حفصة : غير بدليها تاتديها لمصبنة...ماعليش ابنتي ماطرا باس...
مجاوبتهاش حبيبة كانت معصبة مطلعة حجبانها ماحاملاش مليكة وزادت كملت...بقات تقلب بايدها...
سعيدة : مستورة من تحت ؟!..
حبيبة"حركات راسها ب لا معصبة" : لابسة تيشرت منقدرش نبقى بيه...فففف...
تأففت ماعاجبها حال حيث فيست ترشات بداك صدء وتخسرات ليها...مليكة بقات كيما هي واقفة ومخنزرة فيها تا دخلات توريا ترحب بالناس وهي دور ناحية حبيبة حيث كريييمة مشات طايرة وصلات ليها الخبيرة سخونة...دارت ايد فوق ايد وسافت ف سعيدة...
توريا : اش طاري اسعيدة...
حبيبة ماهزاتش فيها العين غا مازادت غوبشات...تنهدات سعيدة...
سعيدة : ماوقع والي اتوريا غا مريشة كان فيها صدا هاو ترش على حبيبة...
توريا"خرجت عينيها تفكرات المريشة وصاتها ماتهزهاس حيث فيها صدا وضارت عند مليكة بديك شوفة ديال ياك وصيتك ماتهزيهاش"...
مليكة : سويعيدة "شافت فيها سعيدة ومليكة بقات ساكتة كاتخنزر فيها بعينيها هزت حاجبها" مادرناهاش بلعاني....(تبسمات بلعاني منها تبينها ضحك ومنها تحشيها)...ورا تگالينا تفو اش بغيتي هههه...
حبيبة"هزات راسها بزربة" : ماگلتهاش عليك حاشا نگول تفو على مراة قد ماما ويمكن كبر كاع...ماشي ترابيا انا گلت تفو على فيست الي تخسرت ونتي مادرتيهاش بلعاني ياك ؟!..
مليكة : هااا ؟..وعلاش نديرها بلعاني يا بنيتي مالي ما صبت شغل...نرش على عباد الله الخز...ايوى لاش...
حبيبة : حتى انا داكشي الي گلت اطاطا مليكة...
مليكة"بصوت شبه مسموع" : طاطا...
عيدة : ماوقع باس...سيري مليكة شوفي نتي والبنات اش خاص عاونيهم ونتي توريا دوزي بركي عما ناس...
مطمطات فمها وقلبات عينيها وهي دور وخرجات من الصالون كاع...ضارت توريا فالعيالات الي كانو ثلاثة منهم حفصة...أم الخطيب الي هي أم حفصة نيت حيث الخطيب اخ حفصة...وعمتهم...وعيدة وسعيدة طبعا حيث غير تعارف ماجاوش ناس بزاف ورجال كاين هو وكاين راجل عمتو حيث باه متوفي...رحبات بيهم بوجه محرج كاتحاول ماتبينش كرهها لحبيبة الي تاهي بدورها ماحملاتش تشوف فيها كاااع خاطيها صوابهم كيف قاليها بشار...واصلا ماعمرها تنسى شنو دارت لباها وكيفاش صيفطاتو مريض داك اليوم الاسود الي طاح فيه بكريز كون ما تبعو هاشم...عاودت ترحيب واستأذنت منهم تجيب غا شي حاجة وترجع تجلس معاهم...
لقات مليكة جالسة فالكوزينة فوق واحد كرسي وتمشي وتجي بضهرها باقي تنهج عرفتها الى شبعات فحبيبة معيور ودعاوي...
توريا : صافي بردي سوق اخويتي غا تايمشيو ناس...دابا يسمع داك الي جا بارك عماهم ينوض تاني يجري ليا على ناس ويشوهني...
مليكة : گطعهم عليا...
توريا : وراني وصيتك زعما ماتهزيش ديك المريشة الخاسرة...
مليكة : خليها غزيت فيها...
توريا"هزت حاجبها شكها صدق فمحله" : تي قصدتيها...
مليكة : حووو فيها...(ضارت تشوف فين مباركة حيث كانت غا هي وكريمة حيث عطاتها تشرب)...راني طلعت على قبلها تا جتها بغيتها فيها نييييت...ساعاك خاطري مابرد...شوفي ليك بنت القح.بة صدقت من مالين شي الحمام "شيرت بصبعها لارض" ومالين هاد المكان...
توريا"هزت مناخرها لفوق وباستهزاء نطقات" : مممم...ماتسال فيه والي...غذا راه تشدها من عندو كي شتي...تنفسي شوية ودوزي بركي عمانا تانتي راك عمة البنت...(طبطبات عليها)...نوضي...
بقات حبيبة جالسة ومفقوووصة مرة مرة كاطل على ديك الفيست وتزيد تعصب...كل شوية تقيس فسها بصباعها وتحاول تمسح زعما تشوف واش غايتحيد والو...تعصبات وتقلقات وتبرزطات...
سعيدة : بلاتي حوايجك الي بقاو فالبيت الفوگ العام الفايت فسن يلاه تجوجتي ماجبتهمش ليك كلهم...
حبيبة"كتفكر" : باقي منهم شي حاجة...
سعيدة : ساروت راه عندي تواليت انا بيتكم...نطلع نشوف ليك شي حاجة...
حبيبة"بخوف" : ماعرفت مابيت بشار يعرف هادشي الى سولني خفت يعيق...
سعيدة : انا نگوليه رشيت عليك وماشتهاش غاتهناي مابغينا صداع...
حركات راسها بغات تنضو سعيدة وهي تشدها شافت فيها طبطبات عليها وقالت ليها انا بزربة نجي...بالفعل داكشي الي دارت كحزاتها حدا عيدة وطارت تجريييي لبيتها جابت ساروت وخرجات تجريييي لبيتها هي وبشار اللولاني...حلات الماريو كاتقلب تقلب...لقات كاب بيض طويل صيفي جابو الله جبداتو وخرجات من البيت سداتو بزربة ونزلات...لقاوها مكمشة حدا عيدة وحادرة راسها....دخلات توريا كاتهضر مع حفصة ودخلات تا مليكة...وقفات قدامها تا حيدات الفيست ولبسات داك الكاب طوات الفيست حطاتها حداها...
حفصة : عطيها ليهم يديوها ليك لصبان ابنتي...
حبيبة"بابتسامة" : ماشي مشكيل اخالتي بنديها معايا حدايا مصبنة بتحيدهم دغيا...بلا منعذبهم...
ردات ليها الابتسامة وحركات راسها واخا هكاك عجباتها حبيبة بقات تشوف فيها حيث اصلا حبيبة زوينة بزاف وعاطية لعين كثر...هزات ام حفصة عينيها فيها وقالت...
هي : نتي مرت ولد توريا (توريا غوبشت)...
حبيبة"حنحنت بحرج وحركات راسها"...
هي : تباارك الله زينة وسبحان من صور زينك...
عيدة"حطات ايدها عليها" : عز من عز عليا الحاجة كبيرة...بنت الاصل (ضحكات توريا باستهزاء شافت فمليكة تاهي نفس الشيء)...تربية وصبر الله يرضي عليها والله يسمح ليا منها...
هاد الجملة الاخيرة بالضبط نغصات فقلب حبيبة حيث عرفات عيدة اشنو قصدات...جملة لخصات اش دارت عيدة حتى وصلات حبيبة لهاد المواصل كاملة لحدود ساعة... تمات داخلة كريمة هازة صينية كبيرة فيها كيسان وبرارد خاوييين ووراها مباركة هازة المجامع الي فيهم تعامر اتاي....ووراها بنات هاشم كل وحدة واش هازة....تا شوية دخلات حسنية ووقفات عند الباب كاطل براسها...شافتها حبيبة وهي تبسم ليها وشيرات ليها بايدها تجي...بدات تضحك ونقزات بزربة لعندها جلسات....
حبيبة : حسنية غبرتي بزاااف..لباس عليك...
حسنية"كاتحرك راسها" : اببب بببب...هههه...
حبيبة"كادو بايدها على حنكها" : كيف دايرين ولادك...
حسنية : اابببباس...ههههه...
ضارت حبيبة جيهة طبسيل حلوة هزات ليها بريوة وحلوة بشكلاط عطاتها ليها...وحسنية فرحااات شداتهم من عندها وبقات تشوف فيها وتضحك...ضارت عندهم وتضحك ورجعات بقات تشووووف فيها حتى نقزات عليها بزربة باست حبيبة فحنكها ورجعات شافت فيها كاتحط صبعها على منخرها...
حسنية : اببب زو..ابببب (تشمشم بمنخرها وتغمض عينيها)...
حبيبة : مافهمتش...
سعيدة : خهههه عجباتها ريحتك...
حبيبة : بصاااح هههه....
حلات صاكها وجبدات ريحة كتخليها عندها رشات ليها منها شوي شوي ولاخرى تشمشم وتحرك زعما الله...وهي تنوض حيث شافت فمليكة خلعتها وناضت تجري تبعات البنات باغيا تلعب معلهم ولا تجمع وتضحك معاهم...عالمها مسكينة وحدو....
حبيبة"بشوي لسعيدة": عارفة كاين بشار ؟!..
سعيدة : عارفة وليني كاتحاول تبعد ماتصادفش بيه والى تصادفت تبعد وصافي مابقاتش تاتخلع كي كانت من نهار وقفها وزيرها بقات مرة مرة حتى بدات تهدن شوي من جيهتو وليني را يجي وقت وترجع لحالتها وصافي...ماعندو مايدير...
حبيبة : مسكينة كون هي كانت عارفة راه هو الي عاونها ولكن قصتها هي هادي...
عمرو اتاي عن طريق عيدة واخا مكتشوفش مزيان حاولت...المسوس تفرق والعادي تفرق...كريمة كانت تتفرق فاتاي ومباركة الحلوة....وصلات مباركة عند حبيبة مدات ليها طبسيل وبقات طلع فيها وتهبط...كلشي تصدم فالفيرما الا البعض الي دوزها عادي ولكن الي فقلوبهم الحقد وكيهمهم غير مال دنيا راه باينين...منهم مباركة الي تبدلات شوفتها لحبيبة دابا وتتقول شوف هي قداش واش كان عندها واش ولا عندها...حبيبة قابلت مباركة بابتسامة عادية لا غير وشكرتها على الحلوة...ماردات عليها مباركة بحتى حاجة فقط كملات تفراق وزادت...
اما عند الرجال كان هاشم وحسام...ومعاهم بشار الي جالس جنبو الحاج عبد القادر...وفالمقابل الخطيب ومعاه راجل عمتو...ومعاهم عبد الرحيم الي ماكيشوفش كاع جيهة بشار...كايهضرو معاه وهو حادر راسو حشمان ويرد بالادب والصواب...لابس جلابية فالخرشوفي باارد...وداير طاقية بيضة عندو لحية طويلة بدون مسطاج...
ع.الرحيم : ماعندك ماتسالو دوز جوج عمرات تبارك الله...
ع.القادر : تبارك الله ماكتاب ليك الحج...
ع.السميع : مازال الحاج ان شاء الله مع المكتاب...
ع.الرحيم : نشاعلاه يمشي ليه هو والمراة...
ع.السميع : المرأة تبقى في بيتها اسي عبد الرحيم ههه...الحج تقدر ديرو غا هنا فبلاصتها...تصدق...
بشار"كمش حجبانو كيشوف فيه مادوا ماتكلم غا كيسمع وصافي...وهاشم ضار كيشوف فحسام الي هز ليه حجبانو ورجع تكمش داير ايدو على حنكو....شوية بشار جبد تيليفون ودخل كتب ليها ميساج...سولها عن طريق " ؟؟؟"...بقا كيشوف فتيليفون عاقد غوباشتو حتى بانت ليه دخلات...قرات علامات الاستفهام الي رسل فهمات بلي كيسولها واش هانيا...رسلات ليه بلي مزيانة وكتهضر هي وسعيدة وعيدة...وبلي عاد دخلات حسنية ضحكات معاها شوي وصافي...هي كتكتب ليه وعينين حقودة حاضياها طلع فيها وتهبط ها مليكة ها مباركة اما توريا مامدياها فيها كاع حاسباها مكايناش حيث ببساطة كتكرهها...واخا حاسة براسها ممرتاحاش باغية تبقى جنب راجلها حتى يدوز هادشي...داكشي الي طرا قبيلة حمدات الله الي داز بسلام ربما تعاودها لبشار وربما تحاول متقوليه والو تقوليه كيف قالت ليها سعيدة انها هي وصافي وتقول حادث عادي لا غير...
حطات حفصة الكاس وشافت فتوريا وبدات تضحك حاطة ايدها على كتف توريا...
حفصة : فين هي لالة اشراق هههه...
توريا : دابا نجيبها الله اودي...
ناضت توريا كاتقاد فكمايمها مبتاسمة ومشات ديريكت لبيت تا دخلات على اشراق لقاتها كاتهضر فالتيليفون ماعرفت اشراق باش تبلات كانو عينيها حمرين عرفتها باكية...
توريا"طلعتها وهبطتها بعدا لابسة اش عطاتها تشامير فالغوز مطروز باش تبان كبيرة وديال زمان..وهزات فيها عينيها" : باكية ؟!..
اشراق"الصمت"..
توريا : مابغيتيهش ؟!...
اشراق"حركات راسها ب لا ايييوى ماحسات تا طارت عليها توريا شداتها من شعرها ومخرجة عينيها...زيرات عليها تا حساات اشراق بجلدة بغات طير ليها" : ااايييييي....
توريا : وعلى رقبتي يا بنيتي وماتنزلي عند ناس وتبركي وتحدري راس..يا تندير فيك الي عمري درتو وراني مشدودة مشدودة مدوزاها حبس نيت نفوتك عمايا...كلشي الا شوهة ( حطت صباعها فعينين اشراق ضغطات عليهم بحال بغات تقبهم ليها)...عينيك نحيدهم ليك...(دفعتها بجهد)...دوزي غسلي وجهك ونزلي مگادة...وهانا هانتي ومتنزلي...الله ينعل جد والديك يا الخانزة وماخرات كرشي...ناس يولدو الي يهز بيهم وانا والدة الي يخشي ليا وجهي فالحما...( الحما اسيادي هو داك الخز الي كايخرج من قوادس واد الحار)...
من موضوع لموضوع الي مشارك الحديث مشارك والي ساكت وكيسمع راه ساكت...داز وقت وبدات تعطي ريحة تحمار دجاج...الضياف كايحسو بالكبرانية وترحاب...وحبيبة كون ما سعيدة وبنات هاشم كون قالت الباب الحباب وزادت مع طريق ههه...شوية وهي تدخل اشراق الي لحقات عليها مليكة جابتها معاها حادرة راسها ومكرهة وباغيا تغوت وتقول راني مابغيتوش...
سلمات عليهم وحدة بوحدة وصلات عند الام سلمات عليها وشداتها من ايدها بقات تشوف فيها عاد مشات جلسات...وضارت الام وعمة العريس كايشوفو فيها ويطلعو ويهبطو ويعبرو فيها...اشراق ماينكروش انها تاهي زوينة بزاف زينها عربي وفورمتها مقادة صدر والمؤخرة طايتها كبر من عمرها شوي وتاهي عاطية العين وطويلة...العمة تعبر فالكتاف ولتحت والام تشوف فالوجه...فلاوها فليااان وهادي راه عادة ديال تعارف فاش كايجيو يشوفو البنت ضروري يفليو كاين الي مكيعيقش وكاين الي مفروش وماعندو سوق...
كبيرة"الام" : تبارك الله...
حفصة : اشراق امي زينة تبارك الله وديالت گلبك ومن جيهة توريا راكي تعرفي رحمانيات عدنا صبارات...
حركات راسها وعينيها كايمشيو ويرجعو لاشراق...وترجع دور عند العمة وتغمزها شوفي...ايييوى وصل وقت الغذا...تقادو طبالي لا عند رجال ولا عند العيالات...مباركة جات تا بغاو يحطو الغذا وهي تبرك حدا عيدة ومدات ايدها لطاس الي هازة كريمة خلاتها كاتبرق هي ومليكة هههه...مابقاو لقاو ميقولو...غسلات ايدها وجلسات حداهم....تحط الغذا دجاج محمر ديال العراسات ومونادا "Ice" المساند رسمي لصحاب البادية هي ووالماس...دجاج كلات منو حبيبة تا شبعات عجباتها دغميرة كلهم عجباتهم حيث طيابة جابوها معروفة طيابها زين...تحيد دجاج وتبعوه لحم بالبرقوق لحم كان كثيير تاهو كلاو تا شبعو...وتبعوه ديسير عاد تجمعو طوابل وتحط المقراج يطيب لاتاي ما بعد الغذا....وهنا حنحن راجل عمة العريس بادي كلامو...
هو : ايوى الحاج الي نطولوه نقصروه راك عارف مقصودنا ومجيتنا...وداوي ليك سي عبد الرحيم على سي عبد السميع...
ع.القادر : ايه مرحبا اسي ناصر...
عند العيالات...
كبيرة : تبارك الله البنت عجباتنا...وعاجبنا نسبكم واصلكم...ان شاء الله الى تيسرات الامور را نديرو عقد ديك ساعة...غا هو ابنيتي راك غاتسكني عمايا واحد الشهرين...على مايصلح ديك دويرة فمراكش عندو فيها شي مشاكيل من المراة لولة...
عند الرجال...
ع.السميع"حنحن باش ينطق" : الى سمحتو ليا ندوي...
ع.القادر : تفضل...
ع.السميع : الى تيسرت الامور ان شاء الله وبحوله...غادي تسكن الكريمة ديالكم مع الام ديالي حتى نصلح دار لي فمراكش..غير شي شهرين هكاك...الي خصتها مانحرمهاش منها...ولكن غادي نشرط عليها دير النقاب...وعندي شي شروط حتى هما الى سمحتو ليا ولا شي واحد فيكم يعلمها بيهم وديك ساعة تفكر...و....
يلاه غايكمل حتى سمع تحنيحنة ضارو شافو فيه بشار الي كان مربع ايديه وكايسمع...حرك ليه جدو راسو زعما دوي...
بشار : شروط ؟!..
ع.السميع : نعم اخي...حيث الزوجة الاولى بسباب هاد شروط ماتفاهمناش...وانا مانقبلش تكون زوجة ديالي مخالفة لهاد شروط...
بشار : الي هما ؟؟...(هاشم بدا يصرط ريقو)...
ع.الرحيم : مافيها باس...تكلم اولدي...
ع.السميع : كي گلت ليك دير النقاب وغادي تبقى مع دار...عايشة معانا عمتي والزوج ديالها وعمتي هي الكبيرة والواليدة الله يطول فالعمر...وعايش حتى عمي معانا والزوجة ديالو...بغيتها تصبر تبقى فالدار بالنقاب ولا تجلس بلاصة مافيهاش رجال...وتسمع لهضرة العمة هي لولة راك عارف هي الكبيرة كاملين كناخذو شوارها...وماتخرجش الى بغات شي حاجة انا نجيبها ليها ولا تقدا ليها الواليدة...
بشار : ماتلحگش زنقة ؟ (حرك ليه راسو)..فالمرض ؟!..
ع.السميع : تانجي ونديها ولا تديها الواليدة ومعاهم راجل العمة...
بشار"هز حاجبو وتگعد دور صبعو على ناضرو" : ديني على گد عقلي...ديرني ماعند ملتي عقل...ختي واحد نهار طاحت ب "صغر فبه عينيه" prof ?..
ع.السميع : نعم...
بشار :.Elle a eu une crise maladie. (طاحت بكريز مرضية)..ماكان حد..السيدة ته.لكت تكرفصات بالبيان...تسناك ؟!..
ع.السميع : الواجب تسنا ولا تعيط حتى نجي ولا تعيط ليهم...نجي نديها...
بشار"رجع ربع ايديه ودوا ببرود" : لگيتيها ماتت تحسبها مكتاب والله يرحم !!...
ولا يدور فعينيه...ضار عند راجل عمتو ولاخرين شي يشوف فشي...شوية وهو يحنحن ورجع كمل هضرته...
ع.السميع : الله يحفظ..ان شاء الله مايكون غالخير...المهم هادو هما شروطي فانتظار تقبل...
بشار"هز ايدو موقفو" : عارف بينك وبين الله...مانجيوش گدامك ياك ...
ع.السميع : حاشا ولله...
بشار : لا مانجيوش گدامك..على بالك الشروط اشريف من حقك ومن حق البنت..."هز صبعو"...ماكاينش دليل شرعي گايل الحق معطي لرجال وحدهم...لا ؟!..
ع.السميع : طبعا من حقها تشرط...نگد نسمع شروطها...
بشار"بنبرة خاترة وثقييلة كايهضر بحال شي واحد كايدوي بشواايا واخا را ثوته مدعدع" : ديهم من عندي"حط ايدو على صدرو" ختي ديال گلبي...
ع.السميع : اكيد اسي بشار...مرحباا...
بشار"رجع تسند عالمخدة..واخا مكانش بااي يتدخل لكن شاف ختو فين غاتمشي واخا غايعطيوه رفض من بعد حيث ممناسبش ليها" : ختي عندها شرط واحد...
ع.السميع : الي هو...
بشار : ماتشرطش عليها هادشي الي گلتي...(زعما را ماغاديرش اش بغيتي يعني رفض بطريقة لبقة)..
من ناحية الشروط كيف قال بشار من حق الطرفين...من حق الي جاي يخطب ومن حق البنت...يمكن لو اي واحد حط شروط قبل الزواج يكون احسن وكل واحد يعرف راسو فين غايحط اول خطوة من هاد الرباط...ويعرف واش داك شخص مناسب ليه او العكس...لكن على ماكيبان ان هاد "الخاطب" جاي وموجد شروطو لراسو شروط الي صعيب اي وحدة تقبلهم قاصحين بزاف...ومانستغربوش بلي كاينين الي كايقبلو بهاد شروط كاينين بعض البنات كايهمهم فقط الزواج وسترة مايهمش اذا كانو هاد شروط مزكمة وقاصحة...وكاينين الي عايشين بهاد الطريقة وحامدين الله...
هز عبد السميع راسو وتبسم كايحرك فيه بشوية زعما رد عليه ببشاشة وهو را الريق نشف ليه فهاد اللحظة حيث كان يحساب ليه ملي قالو ليهم جيو اذن را قابلين بيه....حسام وهاشم وعبد القادر ولاو دايرين كي جمهور تينيس معاهم بجوج...اما خالو ماحامل كاع يشوف جيهة بشار جيهتو الى ضار يغوبش فيها...
ع.السميع"باحراج " : من حقكم...
سكت بشار مابقى كمل...حتى تسمع صوت عبد القادر..
ع.القادر : مجيتكم على راس والعين...العتبة لينا والقاع ليكم...غا هو وليدي هادشي الي نتا داوي عليه ماعلمني بيه سي عبد الرحيم...
ع.الرحيم : سي عبد السميع ونعم الرجل..ماشي حيث ولد خت المراة عندي راه تگوليه خويا وهو يگوليها ختي...عمرها حسباتو ولد ختها وعمرهو حسبها خالتو...كابر عماها وعلى يدها...وراه معرفة وعشرة معايا انا...والله الحاج منفضلو گدام نسابي الي واخذين بناتي وهانا على رقبتي كون ماعزيز مانجيبو ونگدم بنت ختي...ولد الخير ومايخصها خير عماه الي حلت عليها فمها تجيها...هاد شروط ماهما عيب ماهما حرام...
ع.القادر : واشمن شرع ودين يبغي هاد شروط...راني امي ماقاري وليني واليدينا رباونا على الدين گبل الحرف...من ايمتا اسي عبد الرحيم نخنق المراة ونسد عليها ماتشوف زنقة وماتنفس...سي عبد السميع راني نعرفو الله يعمرها دار من ناحية المعيشة ولد الخير مايعيشها فجوع... وليني ماعلى بالي بهاد شروط...كي گال خوها وهضرتو هي لولة انا جدها وليني والي امرها هاهو حداك ويسمع ودوا عماك وعطاك المفيذ...مايصيبش لختو بحال هاد العيشة...
ع.السميع : ماگلتو عيب...
عند العيالات...
كبيرة : غاتكون من سهم بناتي حفصة وتاجة...والله يا الحاجة مايخصها خير غا هو كي گلت ليك تبقى بنقاب ديالها فاش يكونو رجال..والي خصتها يتقداها ليها عبد السميع...والي بغاتها تحضر...
اشراق"وسعات عينيها حسات بالخنقة ديال بصح...بغات تنوض تغوت تشتف عليهم ماكرهاااتش زيرات على ايدها"...
عيدة : ويا الحاجة سمحي ليا وماتديها مني عيب وماتهزيها من جيهتي...
كبيرة : گولي الحاجة الي بغيتوه نديروه...
عيدة : هاد المشروط (شروط) الي سايرة تگولي فيهم راه ماتبغيهم مراة وماتقبلهم...وبنت ولدي اشراق ماولفت هادشي...واخا بنت العروبية...هادو انا الي مراة كبيرة وبنت زمااان مانصيب نعيش هاد المعيشة...
(نقزات العمة الي تگردفت وبغات تبان هي الامرة دابا نغزات الام الي تسوخرت لور وضربت طم حيث العمة بغات تهضر)..
العمة : ولد خويا عبد السميع واحد الراجل حقاني...وليني من جيهة مرتو كايحاول يلتازم بالدين ديالو ويحافظ على الحرمة ديالو...
عيدة : ماگال عيب...وليني البنت هاهي گدامكم لا بغاتو ماعلينا غا نگولو مبارك ومسعود...
توريا : مالها الي ماتبغيه..تبارك الله استاذ كبير ومرضي عمرو هز فيا العين الله يرضي عليه...اش بغات المراة غا مرضي الواليدين...
بغات تكمل وهي تسمع واحد ضحكة زلقات لحبيبة بلا ماتحس وهي تجمعها فالبلاصة تا ولا وجهها مزنگ...مليكة عاودت خرجت عينيها الي تقهرو بدخل خرج ودارت ايدها على حنكها تتولول بالحس...اما توريا حاولت ماااا امكن دير براسها ماسمعتهاش واخا را لداخل ماكرهت يخرجو ويخليوها معاها فبيت تبقى تاكل فيها بسنانها كاتحس بلداخل كايغلي من جيهتها غا عاضة فالصبر....
حفصة"تداركت الموقف" : ههههه ربي يخليك اختي توريا راكي عارفة الي كاين...شوفي عبد السميع ماعمري حسبتو ولد ختي ديما كنقوليكم خويا كبر معايا را قريب ليا فالعمر...والى ماقبلاتش بهاد الشروط ماعليها لوم من حقها تانا مانبغيهمش صراحة وليني خويا هو هذا مابغينا نخبيو عليكم والي...نعطيوكم وقت فكرو فيه مافيها عيب ؟!..
عيدة : المعقول من فمك خرج ابنيتي...
العمة"ميقات" : ايوى مافيها باس..الخبار نعرفوها من عند سي عبد الرحيم...ان شاء الله خير كان نصيب الله يجعل كلشي مبارك ومسعود ماكان شاي الله يصوب لكل واحد فيهم...
ناضت توريا وغمزات كريمة الي ناضت هزات البلاطو دارت فيه كيسان ديال اتاي وبدات تفرق عليهم تاني...وصلات عند العمة وهزات ايدها بمعنى لا مابغيتشاي...وتوريا رجعات استغلت انشغالهم وهي ضربها لحبيبة بتخنزيرة الي ماحركات فحبيبة حتى شعرة حيث كرهها لهاد سيدة من داكشي الي دارت فبشار وباها ودارهم وهي مابقاتش كاتهمها كاااع...ضارت عند سعيدة وبدات تضحك معاها مخليا لاخرة تنغل...
عند الرجال الي ناض حسام فرق عليهم اتاي...حتى نطق هاشم الي خلاهم تا كملو ودواو المعنيين بالامر...
هاشم : سي عبد السميع مضرا داك المشكيل الي وقع ليك ف لافاك فكيتيه ؟!..
ع.السميع : اينا مشكيل اسي هاشم...
هاشم : سقت لخبار لشي نقط ما نقط...على ماعرفت من العميد صاحبي الي تم گاليا كنتي خربقتي نقط تم...
ع.السميع : ها..لا لا تفك المشكيل اسي هاشم...وايلي غلط وقع ودغيا قاديت الامور..نسأل الله أن يغفر لنا وصافي...
هاشم : الله يغفر ليك...
الجلسة كاملة وبشار كايحس براسو جالس وسط شوك...وضايرين بيه "بعض الناس" الي فيهم ماحملوش وفيهم ماشي مكيحملوش وانما ماحاسش بيه كاع واش كاين هنا القصد عبد الرحيم...حس براسو باغي يكمي وهو يدور عند هاشم...حرك صباع ايدو بطريقة فهمها هاشم الي اصلا تاهو باغي يكمي...وناض..
ع.القادر : فين اولدي...
بشار : تيليفون...
هادي هي الي قال حرك ليه راسو بتفهم...ناض هو وهاشم وبقى حسام ولاخرين كايهضرو منهم راجل عمة لاخور...خرجو شوية برا حيث صالون جا هو لول فدخلة حدا الباب ديال برا نيشان...مشا ديريكت لسيارة حل المجر وجبد باكية المهدئ تا بغا يجبد حبة يشربها وهو يحبس...بقى مزييييييرررر على ديك الكرطونة مقااات.ل بجهد باش مايحلهاش ويلجأ ليه...شوي وهو يلوحها وسد الباب ولا جبد الكارو شعلو بدا يكمي هو وهاشم وهو يدور عندو...
بشار : شكون جاب هاد الملاوي ؟!...
هاشم : ملاوي ؟ موحال عاجنين (حساب ليه قصد ملوي ههه...بقا بشار كيشوف فيه بشوفة فشييي شكل عاد فهم را قصد ق.لاوي يعني الخطيب هههههه) هاااا...ورا گلت ليك ولد خت مرت خالك عبد الرحيم...كايگول خوها ولكن را ولد ختها الكبيرة را هي الي جات دايرة نگاب (داك نگاب الي كيلبسوه مع جلابة ديال زمان) حيث مربية مرت خالك كاتگوليها مي..حيث ما.تت مهم بكريييييي...داكشي مخربق حق الله شي ولد خت شي ويقول راني خو شي.شلاضة وصافي....ههههه شوف من لاخر سيد ممسلكش داكشي الي سولتو غا يامس صاحبي گاليا كانو شوي ويوقفوه لقاوه مخربق نقط فلافاك شي عاطيه اش بغا وشي ماعاطيهش...
بشار : هاد زعت ماعندي بيه غراض...سيد گد باها ويفوت...بارك يتشرط علينا ياك لباس ؟! (خرج عينيه)...الحبس هذا اشريف...
هاشم : ياك ديجا با گاليك ماقابلينش غا مابغاش يردهم وصافي راك عارف العادات وتقاليد عندنا...
ماجاوبوش كمل الكارو وزادو تاني تا حس براسو تهدن شوية عاد دخلو يعطعطو بريحة الكارو...كل رجع لبلاصتو...وهو ينطق ع.السميع...
ع.السميع : الى سمحتو نتيسرو فحالنا...
ع.القادر : باقي الحال اولدي..
ع.السميع"كيجبد تيليفونه" : لا الحاج نتا مول الخير...
ع.القادر : داركم اولدي مرحبا فاي وقت...
ع.السميع : جازاكم الله خيرا...الو سلام عليكم...الواليدة نتيسرو دابا ان شاء الله...سلام عليكم...
حنحن وهو ينوض وناضو كاملين الا بشار الي بقى جالس مربع ايديه...مد ايدو سلم عليه مدها ليه وبزربة حيدها حيث ماحملو ماقبلو ومن طبيعة بشار ماعندوش ديك القضية ديال نخبي انني ماحاملكش كلشي عندو مفروش هي طبيعة زوينة ولكن خايبة فنفس الوقت...سلم على عبد القادر باس ليه راسو...هو من ناحية نقا عاطية منو ريحة نقا وريحة المسك فايحة...
خرج بشار ديريكت لطوموبيلتو كايجبد فتيليفون باش يعيط ليها تخرج ويمشيو...جا عندو عبد القادر...
ع.القادر : برك اولدي شوية بغايت ندوي عماك الله يرضي عليك..
عض شواربو وهو يخشي تيليفون تايشوفو اش بغاه...بقى واقف مربع ايديه ومعاه هاشم وحسام...لداخل عند العيالات كانو واقفات كاملين كايهضرو الا سعيدة وحبيبة ومباركة واشراق واقفين فتيساع....
توريا : نشااعلاه مايكون غالخير...كوني هانية الحاجة كبيرة...
كبيرة : نشاعلاه عز نسوبية اتوريا...
العمة : شفتي والله ولد خويا ماتلقا بحالو...وتاحنا مالقاو بحالكم الحاجة مانكذبو...
عيدة : يجيك الخير ابنيتي...
تسالمو كاملين...وناضت مليكة هي وتوريا مشاو معاهم تال عند الباب خرجات الحاجة و العمة بقات غا مرات خو توريا...
حفصة : شوفي اتوريا لا تبززي عليها شي حاجة خليها تفكر...الى مابغاتش انا متايباك اختي توريا ماتبززي...راني كنعرفك قاصحة مع بنتك...
مليكة : ولا لگات ماحسن غاتگول لا نيت...هاويلي هي الي جا تگول عليه لا تايطير ليها السعد...را سوق العيالات دغيا يخوا...
حفصة : باقي صغيرة امليكة...را واخا خويا نگولها ليكم شروطو هما هادو انا ماكرهت ليه اشراق وتاني حاجة بزز را متكملش وخويا بغينا ليه دوام ماشي يتفارقو تاهما ونديو عماكم العيب...فكرو مزيااان انا طلبتك اتوريا لا تحاشميني...
توريا"تنهدات" : يكون خير نشاعلاه...
تسالمت معاها وخرجو معاهم كاملين.. عبد السميع حدر راسو وعينيه وقال سلام عليكم ماقدرش يهز عينيو...تسناهم تا ركبو وسلم على البقية...بقى غا عبد الرحيم ومرتو اما لاخرين مشااااو...
ضار عبد الرحيم عند مرتو وحرك ليها راسو رمات ليهم سلام وهي تركب فالسيارة كاتسنى فيه...
ع.الرحيم : واش حنا فين ما نجيبو ليك ناس ينوض داك الكيدار ديال ولدك يحطنا بوجهنا ؟!...
توريا"دارت ايديها على راسها" : الله ياربي اش دار تاني هذا الله راني تشهمت...حط ليا المكروهة ديال مرتو تحشي ليا الهضرة گدام ناس...ودفلات على المراة...
ع.الرحيم : اينا مراة...
مليكة : انا خوييي...ماشتها شاي رشيت عليها زهر ومريضة مصدية وناضت دفل عليا...
ع.الرحيم : واشتي فين وصلنا ؟!..
مليكة : ومالها جات عليها تبورد عليا راه الملك فين باركين ديال راجلها كية الي جات فيه...
ع.الرحيم : دروك لا صبتي دوي عما بنتك لا فات تا مابغات هذا الي جاها على رقبتي لا باقي جبت ليها شي حد..ماعرفتها اش بغات...جبنا ليها القاضي وكيل الملك صاحبي تاهو...ديك المرة الي بغات داك ولد صاحبي اليزيد ناس مخيرة فالعيشة ماعرفتها اشمن تبرهيش دارت تا تشوهنا...هضري عماها تقبل واخا خوها مابغاش (توريا خرجت عينيها) را صدر لينا سيد بالفن ولا غايبرق فعينيه.. خليها تجوج تستر ونسدو فام ناس الي خرجت من ديك شوهة الخطبة...
بقات حبيبة هي وسعيدة لداخل مع عيدة كاتسنى بشار يعيط ليها باش تخرج عندو ويمشيو حيث قاليها وأكد عليها تايعيط ليها عاد تخرج عندو...فرحات عيدة بزاااف بمجية حبيبة وماكرهاتش كون تحولو وعاشو معاها ولكن ما باليد حيلة...المشاكيل كاتحوم من كل صوب وعايشين معاها ناس عندهم حشيان الهضرة كي شريب الما...
عيدة : ومرة مرة بنيتي خليه يجي هنا نشوفو ماشي فينما كانت مناسبة يجي عدنا بزز...
حبيبة : ماكرهتش ولكن اه تتعرفيه كيف داير ماتنبيش نتدخل ولا نبزز عليه...
سعيدة : كي بقى شوية من ديك الكريز...
حبيبة : لا لا حمد لله ماجاتوش كاع ملي جا...
مباركة "ناضت وتما خارجة وهي توقف عند حبيبة" : مبارك ومسعود...
حبيبة"هزت حاجبها" : الله يبارك فيك اختي..علاش...
مباركة : هههههه وراك صدقتي مرت مول شي هنا ههه تي عانضحك عماك...مبروك رجوعكم لبعضياتكم الله يكمل بخير...
حركات حبيبة راسها كترمش مافهمت والو وسعيدة غوبشت ماحملاتش مباركة فهاد اللحظة وعيدة خلااااص...خرجات مباركة وبقاو شي يشوف فشي...اما برا بعد شوية عبد القادر ملي مشا عبد الرحيم ومرتو...شاف فبشار حط ايدو على كتفو...
ع.القادر : مابغيت شاي اوليدي نبسل عليك..ومابغيت نحك عليك راني عااارف الي فوت فيك والي درتيه گلييييييل (قليل)...
بشار هز فيه حاجبو مافهمش شنو كايقصد بهضرتو وفين باغي يوصل.. يمكن هاشم عارف حيث من ردة فعلو حدر راسو وسكت كايسمع...
ع.القادر : مانصيبش نقجر عليك اولدي...لا مابغيتيش والله مانعاودها وراك...
بشار : المشكيل ؟!..
ع.القادر"تنهد وزاد غوبش حيث اضطر يوصل لهاد المواصل يطلب عليه" : غا سمح ليه وخليه يرجع لفيرما...مادير شاي بوجهي انا...انا عاطيك ضو الخضر دير فيه مابغيتي مانبغيش الي يتعدا على شي حد ومانبغي الي يتعدا عليك نتا كثر معزتك عندي وحدها ونتا عارف هادشي...غا على وجه ولدو...
بشار عض سنانو من لداخل تا ولا الفك كايبان يتحرك من برا...ماجاوبوش فالاول بقى ساكت كيشوف مغوبش تا نزلو حجبانو على عينيه خلاو ديك نضرة تبان حادة...دور راسو وعينيه لهيه شحاااال ورجع ضار عندو حط ايدو على كتفو وحول شوفة لشوفة باردة...
بشار : با (بغا يعيط ليه با)..ماتقجرش عليا دابا...
حرك عبد القادر راسو باسف...بصح مايطلبوش عليه دابا...يمكن على شحال حيث حلفها فيه بشار وماينساش شنو دار ليه...مابغاش يكذب عليه ومابغاش يتزير...
دخلات توريا ومليكة مشاو ديريكت لكوزينة...عاودات ليهم كريمة اش شافت من مباركة مع حبيبة...خرجو من تم لبيت فين كاينة حبيبة لقاوها واقفة هي وياها وعيدة كايهضرو هازة فايدها ساشية دايرة فيها ديك الفيست وواقفة كاتهضر مع سعيدة ومع البنات تاهما وحتى اشراق كانت واقفة وهي تخرج ديريكت عند بشار وقفات حداه وهي تعنقو...تا هز حاجبو...
اشراق : شكرا اخويا بزاااف...
بشار"شد ليها راسها بايديه كيشوف فيها" : ديري عقلك...تسمعي شي عجب ديري عين ميكة...مانسمعش ملتك تهازيتي مع مك هانيا ؟..(حركات راسها)...
اشراق : بغا يشوفك يوسف...
بشار : تحركي جيبيه...
حركات راسها ومشات تجري تعيط لخوها...اما فالبيت كيف دخلات توريا ديريكت وقفات مقابلة مع حبيبة...
توريا"قربت وبشوفة سم وغل" : هاد المجيات الي وليتي تجي نتي وراجلك ديرو ليا شوهة مع ناس را بداو يحكو ليا فالراس...انا ماني من الي يحشي الهضرة.. نجيك نيشان...
سعيدة : توريا نعلي شيطان...
توريا"خرجت عينيها" : سعيدة دخلي سوق راسك...
سعيدة : توريا انا الي غاندور فيك...بعدي منها مابغينا صداع عطيها الوقر ا توريا...
عيدة : توريا ياك لباس ؟!؟...فوتيها عليك ولا نغضب عليك ليوم دين...عطيها الوقر اتوريا..الى عندك مشكيل را عما ولدك ومايدوي عماك حد...قويتي شلا فوويها عليك...
توريا : هههه ايوى يا لالة ملي وليتي تجي عما المساخيط وعما البراهش الي يقللو ترابي على الي كبر منهم اش بقى...فوگ ماهي جارية عليا من دارها بقات ليها غا هادي راني نتسنى فنوبة توصلني...
سعيدة"جهدات صوتها" : اتوريا راني سمعت اش گلتي نجي عما الحق قلبتي عليها...هدني الوقت ماخاصنا صداع اتوريا راكي عارفاه يگلب دنيا هدني الوقت را عييينا بهاد صداع الي مابغيتو تحدوه...فوتيها عليك هي غا بنت ناس مالاحگاك بوالي...
عيدة : بسعي اتوريا وخرجي عليا من البيت ولا انا الي نجري عليك وعمر بابك منوصلو...
بقات توريا مخنزرررررة تنغل بالفقايص ماتصرطش ليها هادشي وماتصرطش ليها اش دار بشار ولا حبيبة الي كانت جرات عليها من دار...ماتصرط ليها والو من جيهتها...نترات بايدها وهي تخرج من البيت ومليكة ضارت مخنزرة فيهم وتبعتها...حبيبة حسات بالبكية شاداها حيث تعصبات وكثر عليها حشيان الهضرة صونا ليها تيليفون وهي تجاوبو واخا صوتها مغير...
حبيبة : بشار...
بشار : خرجي عندي...(تا بغا يقطع) مال صوتك ؟!..
حبيبة : والو هي كنت تنضحك مع خالتي سعيدة هههه...
بشار"بشك" : تحركي خرجي...
قطعات معاه هزات صاكها دارت فيه تيليفون...خرجو من البيت حسات بعينيها بغاو يغرغرو وخاصها تحاول ماتبينش..تما خارجة هي وسعيدة حتى تنفسات وهي تخرج مبتاسمة دازت من حدا مليكة وتوريا الي بدات تنگر...
توريا : وشتي فين وصلت ؟ شتي فين لحگوني قلالين ترابي يا خويتي يا مليكة (بغات تبكي وهي تجهد صوتها بالفقصة باش تسمعها حبيبة الي كانت غاديا خارجة)...شفتي البرهوشة "تبسمات بغيييضض"...بالسيف را بنت خانزة ديال سواعدة...
يتبع...
التعليقات
لا توجد تعليقات بعد، كن أول من يعلق.