عروس الجحيم الجزء التاسع

بقات مزيرة ليها على ايدها..مافهماتش علاش قالت ليها "بديتي خيرك من جيهة باك كمليه" حسات بيها تهديد ولا حشيان هضرة...صرطات ريقها وهي تحرك راسها ببطء طبطبات ليها توريا على ضهرها ورجعات كتشوف معاها الخاتم...عيطات لذهايبي شرحات ليه بالي كبير وتافق معاها ينقصو ليها...تا شوي دخلات مليكة هي وناديا مخليين حسام دا تمر لطوموبيل...شافو معاها الخاتم عجبهم..وزيدوها تختار ليه خاتم ديالو هو...حبيبة قلبها زاد تزير عليها..حاسة براسها غاديا لعافية وسط البراكين...غاديا ل "زفة المجهول" الرابح فيها هو باها الي غايتهنى من الكريدي الكبير...و توريا وعيدة الي قدرو يواطيو راس بشار على قولتهم...بهاد المعنى بيدقووه...زادتها مليكة سلسلة من ذوقها هدية ليها جمع ليهم داكشي عطاتو تسبيق وواعدهم يرجعو لخاتم والباقي ملي ينقص ليهم الخام على قدها...خرجو من المحل وزاد بيهم حسام غير تما دخلو لعند واحد كيعرفوه خذاو ليها تقاطع توب زوج تكاشط وقفطان...وقفطان حطوه يتخيط على ذوقهم وزوج جلالب..كملو المقدية حتى عياو ووصلهم حسام لدار عيات فيهم ناديا يتغذاو....

توريا : لا منصيبوش الحاجة...تاانتشاوفو نهار الملاگا...

تسالمو غير هما مشاو طلعات حبيبة مع دروج بان ليها ايوب نازل بغات تهضر معاه شدات فيه..

ايوب : بعدي مني تقيصيني ناكل مك بلا ملحة...

حبيبة"عينيها غرغرو تا بغات تبكي" : عاافاك علاش كدير ليا هاكا...

ايوب : سيري فحالك غاديا لعند واحد ماتعرفيه مايعرفك...غاديا لعروبية بيتي تقت.لي راسك...حساب ليك ماعارفش لاش قبلتي..

حبيبة : وااا ايوب والله حتى مقتانعة...نتا هييي ماعجبكش الحال حيث بنتزوج ونتا بتبقى باير...

ايوب"حط ايدو على صدرو" : باااير ؟!...ههههههه اللهم باير ولا نلوح راسي ل تيخيدة ديال هادوك...واااا ربي كاين شي حد كايسمي عيدة وااااربي الي سميتها عيدة يفرحو ليها ناس...

حبيبة : دابا اش قرب عيدة لهضرة...

ايوب : الي سميتها عيدة هي الي خارج منها العيد وهي الي غاتخليك تجيبي العيد...وعلى رقبتي الى صدقت هضرتي كذوب وااا بربي تانحس لحيتي وندوز لحية باك تاهي بنحسنها ليه...سيري حيدي بعدي مني ماتبقايش تهضري معايا درتي ليا العقس...

خلاها وهبط كيبرگم تنهدات وخلاتو على راحتو عارفاه غير من خوفو عليها حيث باقيا صغيرة غاتزوج ودغياا غايرطاب ويتهدن...طلعات كتجر فرجليها وحالها مايعجب...مهولة دايع عقلها وغير كتنهد وتسوط...حابسة البكية وماباغية تخرجها حتى كتصرطها وتزيد هم على هم..حيدات سبرديلتها و.دخلات لبيتها ونصلات جلابتها رماتها بعشوائية بقات غير بديباردو وبيرميدا اونسومبل ديال جلالب من تحت...دخلات لدوش وتحنات على لافابو كتغسل فوجهها ولايحة كل حاجة تخليها تفكر فالهم...عاطية راسها امل انه يكون هو شخص مزيان معاها وتاهما مزيانين خصوصا من شافت تعامل ديالهم معاها حاطينها فوق سحاب وهي لالة ومولاتي تامر ومولات ري وشوار...تنهدات وغسلات ايديها وجهها بجيل حيدات ليكخون ووسخ الجو برا..حكات سنانها ونشفات وخرجات كتجمع فشعرها بقراصة وهي تلاح فوق ناموسية كتشوف فالسقف...رجعات كتفكر فهضرة توريا ...

توريا : نتي الي غاترجعيه لبلادو ونتي الي غااخليني نشوفو بزاف...گلبي مشوي عليه (دموعها نزلو)..هو البكر ديالي..

صرطات ريقها مرة وتنين وثلاث...غمضات عينيها شحااال...جمعات نفس تا جمعاتها وطلقاتها وهي تسمع صوت ميساج جاها فالتيليفون وصونا وقطع....

ناضت جبداتو من صاك تشوف شكون صونا وهي تلقى توريا راسلة ليها صورة واوديو ومصونيا ليها باش تدخل تشوف...حلات تيليفون ودخلات الواتساب...كانت صورة فلول مزال متشارجاتش دخلات اوديو حطاتو على وذنيها وبدات تسمع...

توريا : االو بنتي (اوديو كتقول فيه الو هههه) هانتي هاني عطيت لاشراق ترسل ليك صورة ولدي بشار...راني خليت ليه اوديو يحل تيليفون باش يشوف صورتك وعطيتو نمرتك باش الى صاب وقت يهضر معاك...هضرو وتفاهمو وعرفو سميات بعضياتكم..دي وجيبي معاه فالهضرة ماهضرش راه تال نهار تكاتيبة وشوفيه...شوفي صورتو را زييييين تبارك الله وصحيح..نتوما البناات راه يعجبكم هاد صحيح وطويل بزاف ومگضر وحرش...وزيدي حتى را سخييييي ابنتي ميخصك معاه خير...

قطعات الاوديو وهي تمشي لصورة غير فتحاتها وهو يبان ليها فصورة داير تيليفون على وذنيه واقف مگضر وكتافو مهزوزين عراض لابس تريكو خزي وسروال فيه جيوبة بزاف فحال سراول صحاب صيد البري...وبروتكان طالع بسيور...داير نضاضر رايبان وحجبانو حرشين وملاقيين مورمين مغوبش واخا يكون عادي يبان مغوبش بيهم...لحيتو كثيفة ومسطاجو قوي و طويل...واحد اللحظة بقات ساااهية فيه كتشوف فيه ماتنكرش ان صورتو بيناتو بجاذبية وهيبة ولكن الافعال واش كاثبت هادشي ؟...بقات تشوف فالصورة وطلع وتهبط وتزومي حتى خرجات منها وهي تمشي لتصاورها رسلات ليها صورتها وكتبات ليها "هاهي صورتي اخالتي" سدات تيليفون وحطاتو على صدرها وعينيها طلعو لسقف ورجعات لدوامة الارق وتفكير...

توريا"شافت فاشراق" : زيدي نتي...شدي قراي اش كتبت ؟

اشراق : كتبات ليك هاهي صورتي اخالتي...

توريا : شدي رسلي لخوك صورتها ونمرتها ...طلقيني خلاص.. وگولي ليه هاهي اسميتها حبيبة وها نمرتها هضر معاها...

صرطات اشراق ريقها وشافت فامها الي بقات تشوف فيها مخنزرة...

توريا. : ياك لباس ؟!...

اشراق : خ خاصني ن نسولو امي والله را مكيبغيش نرسل ليه شي حاجة حتى كنسولو...

توريا"خرجات فيها عينيها المكحلين مبلقاهم" : رسلي نعل جد مك...انا الي كنهضر هنا ماشي هو...مادلاكم عليا...رسلي...

اشراق صرطات ريقها وشدات تيليفون كترعد...رسلات ليه صورة حبيبة كانت دايرة ايديها على حناكها وطالقة شعرها ومبتاسمة...وتبعتها نمرتها وهي تكتب ليه...

"خويا هادي نمرة البنت الي خطبت ليك مي وگالت ليك هاهي نمرتها واسميتها حبيبة..هي الي زيدتني نرسلها ليك اخويا والله ما انا" صرطات ريقها ورسلات ليه نمرة...

اشراق : هاهي رسلتها را طالعة غا شرطة مي باقي ماداخلش...

توريا : مزيان اري تيليفون لهنا رجعي تقراي...

خشات تيليفون فطابلية وناضت خلاتها فالبيت...مع خارجة وهي تبان ليها سعيدة جايا من بيتها تا وقفتها...

توريا : غذا تعاونيني فشي گصاعي ديال كسكسو ؟!

سعيدة : ايه مرحبا اش كاين ؟!

توريا : بغيت نلوح حق الله الي طولت فيها...عرس ولدي بقات ليه ايام قليلة مانصيبش نبقى بالبيض...

سعيدة"تنهدات وهي تحط ايدها على كتف توريا" : واخا خويتي تعطلتي وليني على سلامتك...وان شاء الله تگاد الامور بينك وبين ولدك...

توريا"حركات راسها وهي تنطق" : لهلا يجعلها تگاد لاكان غا فعايلو ديال دروك باقي ماتسگد...غاطس وهاز ليا خنافرو...فين هو دابا ؟ ياكما ناوي يحطني بوجهي گدام ناس وميجيش ؟!

سعيدة : نهاك الله واش عارفاه يخطاك البراكة نتي شفتي ليه فوجهو را يدير الي بغيتي...النهار الكبير الي رضيتي عليه...

توريا"خرجات فيها عينيها" : مافيه تيييقة مافيييهش راني گلتها وعاودتها...يامات صربة مكنت نخلي بوه يديه لا يمشي يجيب البارود فشي حد يصفيها ليه...راني كنت خايفة حيث عقلو مكاينش....والي خفت منو طرا وكلامي صدق صحيح...لو سمع ليا باه لو سمعتو ليا لو سمع ليا هو مكانش يرزيني فبوه...راني عضيت فالصبر وعضيت فگلبي تا شفت جيهتو....سعييييدة راه لا فات تا خلاني ضحكة مع نساب عليا بليمين تا يدي مني سخط جديد وهاد المرة عمر وجهي ميشوفو وتا وجه خوتو...هاني مخلياه على خاطرو....مابقى گد ما فات...

جناوح منخرها فرفرو وفمها بياض وهي كتحلف...خايفة لا يدردها ضحكة ومايجيش ويخليهم ضحكة لنساب ولدوار...خايفة يشمتها حيث ببساطة هو شخص غير مؤهل للثقة...كتقول را مزنزن فمخو يقدر يديرها ضحكة وميتسوقش عندو عااادي...حيث فصغرو مكانش كيتسوق فمراهقتو عانى مشاكيل نفسية سبابها ضغوطات تا رجعات شخص غير مباال...

الشخص الي غير مبال هو فهاد اللحظة عطا لراسو فرصة يمشي لبار يشرب...سمح لراسو يشرب هاد المرة فمكان عمومي ماشي فمكان خاص...بغى يغير جو...فطابلة مقنتة جالس وحدو شاد الكاس بين ايديه كيشوف فيه ويحرك حتى تكا عليه وغمض عينيه عصرهم...هز ايدو شاف فالنادل وشير ليه يجي...شعل تيليفونو وشعل كونيكسيون...بان ليه ميساج من نمرة مو...دخل قرا اش كتبات ليه ختو ...شاف نمرة حبيبة الي رسلات ليه وشاف فصورة حبيبة..بقى كيشووووف فيها...

بشار. : ويااا بنت المشااوري فرعتي ليا كري....

حتى دخل لبااغاميتخ...بلوكا نمرة مو من واتساب ومسح ديك ديسكيسيون بصورتها....ورسل لهاشم ميساج قال فيه اش بغى....

سد تيليفون وشاف فالنادل الي وقف...ضار جيهة الكاس هزو....اتا شير بيه على النادل جاه الكاس فكتفو تهرس وطاح....حفضو الله اما كون جاتو فراس...تا ضار كلشي تم كيشوف والنادل ماعرف باش تبلى...ضربو بيه فنما جاه الكاس....

بشار : نعل بو حياة مك يا ولد الحق.بة....

الشميسة طلات والعيون تحلات فايقة بادية نهارها من جديد وكل نهار وخبيرتو...بان ليها الباب تحل وعرفاتها وشكون من غيرها الي عندو صلاحية انه يدخل لبيتها بدون استئذان...لقاتها يلاه خارجة من دوش مبدلة حوايجها ومستعدة لخروج من بعد الفطور باش تقدا شنو غايخص لنهار تركاب الخواتم...على بالها خطوبة عاد عقد القران...

ناديا. : لبستي ؟!

حبيبة"حركات راسها" : هاني هابطة...

ناديا : وخا هبطي تكلمي لباباك عاد نفطرو ونخرجو...

حبيبة : كاين شي مشكيل ؟!

ناديا : وبنتي ضروري يهضر معاك...لقيتيه تبرزط بمشاكيل المحلات...ضروري بغى يهضر معاك ويفهم شحاال من حاجة..شوفيه شنو بغى.بعدا...

حركات راسها وهزات ماتبقى من لوازمها...خرجات ناديا وتبعاتها هي من بعد مالبسات صنيديلة فرجليها باش كي تفطر يخرجو نيشان...نزلات لقات باها فبيتو..دقات الباب تا هبط فيها عينيه من فوق نضاضر..وشير ليها تجي...

حبيبة"باست ليه راسو وحنكو" : صباح الخير حبيبي..كيف صبحتي اليوم لباس ؟!..

م.حفيظ : ولله الحمد هاحنا مسلكين...نتي هانيا زاكيا !

حبيبة : بيييخير..هاني گالت ليا ماما بيتيني تهضر معايا...

م.حفيظ"حط تيليفون من ايدو وحيد نضاضر شوف..حنحن منضف الحلق باش ينطق بالكلام الجدي" : بنتي واش هادشي ماجاكش فشكل ؟.."هز ايدو" هاني مشيت معاك بالخاطر گلتي ابابا انا قابلة ورا بايجي باش نتفاهمو ونسمع هضرتو ويسمع هضرتي...ونتفاهمو قبل مايزيد بخطوة لقدام ونديرو الحلال ياك هادشي الي گلتي ؟..جاوبي ب اييه ولا لا...

حبيبة"صرطات ريقها" : ايييه...

م.حفيظ : ناس خطبوك كبرو بيك وجابو ليك المخير والخير...ماخلاو ذهب ما خلاو حوايج..مشاو معاك بالقاعدة والعادة وكلامك كان هو الكبير...داروك فعينيهم وطلبوك بالكبرانية وخا كان فكلامهم شي كلام الي ميعجب وليني معندنا منديرو عارفين رحامنة عندنا شوية قجرين وخضرين...الولد انا ماعمري شفتو وليني تنسمع عليه من فم جدو وجداه...يلله ونامس هيلي جا من المانيا...هادشي كامل لحد ساعة عارفينو مزيان...مهندس لهيه بفلوسو على ما وراني الحاج عندو طوموبيل فلوسها تم ماتحرق...راضيين عليه فرحانين بيه..هما ناس كنعرفوهم من عائلتنا وتريكة رحماني معروفة عندهم الخير تبارك الله فايض....ونتي گلتي مقتانعة بيه...ومشيت معاك فهضرتك..وليني ابنتي هاد ولد ناس هذا فين هو. ؟ علاش مزال ماجاش هاهو بعد غذا تركاب الخواتم وبعدو بيديرو العقد...انا را هادشي ماعاجبنيش...هضرتي معاه ؟..

حبيبة"صرطات ريقها حتى ترعد حلقها وحركات راسها" : ااه احم..هه هضرت معاه وليني هييي واتساب وشفت تصويرتو...هي هو باقي ما بايجي حيث تضغط بزاف..حيث هو مهندس كيميائي ابابا تما خدام مع حقول البترول الي كتعرف...

م.حفيظ. : ايناهما راه بزاف كاينين كاينين تا هنا..ممم ؟...نقدر نعرف بالضبط...

حبيبة"الصمت"

م.حفيظ : هضرتي معاه ياك...

حبيبة : بابا عااد كنتعارفو...

م.حفيظ : انا نابيتش نسمع كنتعارفو فتيليفون...بيت نشوفو يجي يهضر معايا...يدير زيارة راه الزواج هذا ابنتي والي طلب الحلال وقصد الباب را منردوش وليني يدير الصواب والعادة..ايييه مشغول بزاف الله يحسن العوان...تيليفون بسيط مادا ماجاب ويتسنى حتى ينزل لمغرب ويقصد الباب ماشي كلشي بيه فيه ابنتي هادشي ممريحنيش...ومانبغيهش لبنتي...

حبيبة"قربات ليه وقبطات ايدو باستها وشافت فيه" : كلامك هو الكبير ابابا...انا "كتوحل ليها فاش كتبغي تكذب حيث ابدا ابدا ماعمرها كذبت والى كذبت غييير لضحك ولا كذبات بيضة بسيطة"..هضرت معاه..وشفتووو ومن هضرتو حسيت بالي غانتفاهم معاه..ماقدرتش نگولها ليك هي حيث حشمت وصافي...عاد البارح هضرنا ملي رسلات ليه خالتي توريا نمرتي...

م.حفيظ : ما گلت ليك تا عيب ابنتي...انا بنهضر مع الحاج ونعلمو بهادشي...

حركات راسها ولا كلام فوق كلامو...الخطبة مفشكلة كلشي هو هذاك مكبرين بيها مقديين ليها هي مولات شي...المخير فتواب جاها المخيرة فجلالب تخيطات ليها...الذهب كايتزرزر عليها بالعشق...العادة والتقليد راها غاديا هي هاديك...وليني فين هو مول هاد الملاحة كاملة...خرجات من البيت ديال باها ساهية. كتفكر فهضرة باها وكترجع تفكر فهضرة توريا الي ترجاتها...بدات كتهز فالهم من دابا وبدا القلب كايتغمم...جلسات حدا عمتها وايوب الي ماهزش فيها العين تا تمات جايا ناديا كتقاد فجلابتها خارجة من كوزينة هي ورقية...

ناديا : وردة بنتي سيري دي لباباك كاس تالقهوة وبشوية لا تهرقيه عليه...

لطيفة"حركات حبيبة تا قفزات" : مالك ساهية اش كاين ؟!

حبيبة : والو هي دويت مع بابا وصافي...

لطيفة : غذا باتجي سناء بنتي وبايجي عمك عزوز..."شافت فناديا" بيتو تعلمو شي حد ؟!

ناديا : مرات خالي صعيب تجي يلاه طلعات لكندا عند ولدها...وخالتي راها فالعمرة...ايوى تا باقي من تريكتهم راهم رحامنة كلشي بيتكب تما...

لطيفة : خير مدارو يتكبو عليهم تما ماعندو ما يجيو يگجدرو هنا...ويلي كايجيو يجلسو بالسيمانات العروسة راحت وبغات تولد وهما باقين تيباركو...ايوى زاااك...

حبيبة : اصلا مكاين والو دابا بيكون هي تركاب الخواتم فاش يجي....

يلاه كيذاكرو وكيفطرو وايوب كان متمر غااا سمعها جبداتو اتا بدا يشوف فضفارو ويمسح عليهم وينفخ....وهو يبدا يدندن ماعرفوها اغنية ولا حشيان هضرة....

ايوب : وااااا ايكوتيااااا...كنتي معااايا عايشة بالسترة..واليوووم خرجتي ليا خرجة وحدة وحدة...غير روحي يااا..راكي مسامحة وراكي حرة...هذا زهريييي وهذااا مااا حلبات البگرة...

واش هاد الكية كواتني يااا عينيا...شفتها والهم زادنيييي والهم زااادنييي كثر عليا...

لطيفة : هههههههه هذا ماخاص...

ايوب : ايوى نغنيو اعمتي...نشط راسي شوية را گلبي با يدير بيييق...

حبيبة : كيفاش با يدير بيييق ؟!

ايوب"مغزف عليها..ماشعرش براسو" : سوق مك ؟

ناديا : يااااك ؟

ايوب : مكنعايركش اناديوش تنعاير مها..."شافها كترمش فيه دغيا دمق عليها..شاف فعمتو"...نتي زعما بيتيها تجوج ؟!

لطيفة : ونصيبها هذا ولدي...هي بغات بخاطرها وفرحانا غاديا لبرا تكون راسها وناس مكبرين بيها اش بيتي كثر ؟...

ايوب : كتعجبك ديك عيدة...

لطيفة : ماشفنا منها هي الخير...مالك معاها...

ايوب"حط صبعو على حلقو وهبطووووو" : من هنا ما بات تصرط...منها هنااا...انا بيت هي نعرف شكون سماها عيدة...

حبيبة : دابا مالك ؟!..مابيتيش تهضر معايا نتا حر اما قراراي بالزواج انا حرة فيه...ماشي سوقك وماشي نتا الي غاتوريني شكون نتزوج وبيمن وايمتا.. "حطات الكاس بالنترة وناضت وجهها مجيف مزير والحال مايعلم بيه غير الله..." ودخل سوق راسك الى ماببيتيش تهضر كااع لا تهضر انا را مكنطلب حتى حد..وسير قطع كلامي بمرة...يلاه اماما نمشيو دغيا را باقي لينا ما ريزيرفيناش ف spa...

سبقات امها خلاتها كترمش غمضات عينيها وتنهدات وهي تشوف ف ايوب وخنزرات فيه حيث كسر فرحتها...تبعاتها ومشاو لقاو شيفور كيتسنا فراس درب...

لطيفة. : ما بيتي دخل سوق راسك يا ولدي ما بيتي...

ايوب : جييييييت نطل يقطع طلي...

الي داها الي جابها فداك البيت اشراق خايفة على راسها لا تبرد فيها غدايدها.....وجهها تجيف بالسم والاعصاب الي دارهم فيها...

توريا : هااايهاي على المسيخيط هاااااي...ولا يبلوكي تاهو...وااخا "كتحرك فراسها ووجهها معالمو مكتفسرس...صافي هنا طاحت ليها النقطة الي فيضات بحر الشك وخلاتو يقيييين...هنا قالت راه غايردني ضحكة خلاني رشمت البنت وخطبت وزگيت ويحطني بوجهي معاهم...والمشكيل دواور ساقو لخبار ل خطبة ولد نور الدين الغايب المهاجر...ناس دواور الي ماعارفينش الخبايا واسرار هاد الدار والي تكتمو على سر مو ت نورالدين وضمصو وقالو انه جات فيه ضربة خطا كيف كيقولو وهو كايجرب فالجويجة.....

بقات تولول وتندب فحناكها بالحس وتحندب...قالت راه دارها بيا وغفلني وسخطي علاش يقلب...معلوم را للا توريا كتفرق فالسخط والرضى مكاينش فقاموسها...

توريا"شافت فيها" : ماعندك تيليفون مرجعوش ليك ؟!

اشراق"خرجات عينيها وهي تحرك راسها ب لا بهيستيريا" : لا لا والله حتى هرسو سولي عمي هاشم...

توريا"صغرات فيها عينيها ب شك" : هرسو ليك ولد لحرااااام هرسو ليك الله يهرس ليه ضلوووع..."ندبات حناكها" هاااااويلي ويلي غدايدي يگطعو عليا...اويلي وفين نعطي وجهي تعطاه فالگلب...باغي رضايا الله يتبعو البلى....

خرجات من البيت ونزلات لتحت لقات عيدة ومليكة جالسين فالصالون وحداهم الحاج وسيحمد و هاشم وسعيدة...هاشم كيصوني عليه فالتيليفون كان طافي...سيحمد صونا بنمرتو باش يجاوب ماعارفش ان بشار لما عندوش نمرتك وخا تخرا واخا تجيه خبار مو ميجاوب الى مكانت مسجلة عندو.. هو المسجلين ومكيجاوبش عليهم اصلا....

عيدة"دايرة صبعها على فمها وتشوف فسيحمد مصغرة عينيها عالله يجاوب" : امضرا واجبك (جاوبك)...

سيحمد"كان داير تيليفون عادي ماشي سمارت مدور عليه بزاف ديال لاستيك شمع باش كيجمع ماصويات الفلوس..حيدو من وذنو وكمش فيه عينيه كيشوف" : والو طافي...

ع.القادر : هاشم ماعليك خبار عليه ؟!..

هاشم"تنهد وحرك راسو" : هو هك داير ابا راك عارفو لاكان مشغول لهيه كيطفيه...الله ماعرفت...

توريا"جهدات صوتها عينيها خرجو" : واش عينو نرجع نگلب عليه وجهي. ؟ البنت ولابد تشوفو عيييت نرقع من هنا وهنا بينما يوصل وقت تكاتيب...فين نحطو وجاهنا !؟...

هاشم : ياك عطاك الكلمة ؟!

توريا : الكلمة بان ليا حريرة...هذاك يحطو عليه ناس راس ويديرو فيه تيييقة ؟!...راني نعرفو ونعرف فعايلو ولد لحرااام من فعلو..جيت نگاد الطريگ...ونسالي الخصام ويهز عليا الحمل..عسفت على گلبي الي تشوا وشواه ليا ونكون ليه رضى گاليا من سخط امي مانصيب ؟!...

هاشم : زعما كنتي راضية عليه ولا واطيتيه باش ميبقاش حاني ليك راس ويطلب. !

ع.القادر"خبط العكاز وغوبش فيه" : هااااشم...دخل بخيط بيض وحشم من مرت خوك...

توريا : الكتاف علاو ولينا گد القب گد سطل ؟!

هاشم"الصمت...غزز سنانو من لداخل وتا بغى يهضر وهي تزير عليه سعيدة..."

ع.القادر : لا يخشيش ليا وجهي فالتراب...ياك بغى تخطبو ليه وقبل بالخاطر وترحاب...زيدني نهدد فراجل عاين باين يعطيني بنتو...لو كان الحاجة شفنا غيرها كاينين ناس دوار ماعندهم غراض مايبان تالعقد باغين غايسترو بناتهم مايسوولو لا شكون ولا اش يدير...

مليكة : خلانا وجدنا كلشي...سبقنا فرحو على سفاار..خليت بنتي وولدي مشاو مع باهم لسيدي رحال (الشاطئ)...وبركت هنا ندور فشموشات وندير لخواطر لهذا ولداك وكبرنا ببنت الناس ووجدنا ضروبات (جات من ضروبة هي عجلة او عجل الي كيدب.حو ل مناسبات)...ماصحابنيش يخلينا معلقين ماحنا مكملين ماحنا واگفين...شلا على هزان الخنافر للسما (منخرها تشتح بالفقصة)...

عيدة : مكان يحساب ليا يدير هوكانيات (هاكا)...البنت عشقتها ليه..بنت زينة وفتية رطيبة وسنان الحليب ومصوابة وبنت الكبرااانية...بنت الاصل والمفصل...وباها را من تريكتي را بوه الله يرحمو نعرفو من كان يجي هو وباه (جد مولاي حفيظ) عند با الله يرحمو..كنا عايلة تجي عند بعضياتها وباقين لدروك...مشاركين د.م واحد...

بقاو على داك الحال ماعارفين اش يديرو كلشي تقريبا وجدوه قادو مسائل الخطبة الخواتم والسي العريس الي بغا يجي باش يقاد وراق عقد القران مكاين ليه لا اثر ولا ساس....حتى من البهايم تعزلو فالكوري باش يكونو دب.يحة للفرح...

هاشم"داير ايدو على ذقنو كيخمم...حتى صونا ليه تيليفونو وحدر عينيه مامسوق لشكو على بالو را القيادة..حتى خرج عينيه وحنحن" : بشار !!!

توريا هزات راسها وسعيدة تگعدات وعبد القادر كيشوف تا جاوب هاشم دغيا...

هاشم : وااا خوييي عالسلامة !!...

بشار"ببرود..ساط دخان الگارو" : شي باس مكاين ؟!

هاشم : لا والو باس...كنعيط ليك تيليفونك طافي...هادي ربعيام اصحبي...

بشار : كنت شاد طريق..

هاشم : علاش جيتي ؟!

بشار : عرسي قرب اهاشم ومنجيش ؟...

هاشم : هااا ؟ لا جي جي غا تشطنو عليك وصافي هههه...

بشار : بنت المشاوري طلقات زابور ديالها ؟!

هاشم"جاب ليه ضحك حبسها بزز". : تهههه...لا لا غير با ومي وتانا نيت تبرزطنا حيث دايرين مع ناس وقرب الوقت را يومين وهانتوما عاقدين...داكشي باش...

بشار"حك لحيتو بصبعو الي متوسطو الكارو...سكت واخذ وقتو فالكيف" : هاني فطريقي لتما...

هاشم : ياك مانجي لعندك لسيدي بوعثمان...

بشار : مكاين لاش..طريگي عارفها...

ماجا فين يجاوب هاشم حتى قطع عليه...هاشم ولفها فيه...

“فرحي يا موكة بلارج دار العرس”

تنفسات توريا الصعداء...تهنات را جاي والاهم ان وجهها باقي نقي...واخا را قلبها مامهنيها وثقتها فولدها منعادمة...ناضت سعيدة دارت رفع فالكنينات هالي بدات تسمن هالي بدات توجد البغرير...والي كتعرف لشي كيكة را وجداتها...خرجات على برا بان ليها زكرياء واقف مع ياسين ولد الحسنية وهو يطيح الما فركابي...

سعيدة : زكريااااااا....

زكرياء"ضار وحرك راسو ل ياسين الي شير ليها ومشى وهو تم جاي داير ايديه وراه ويحرك فواحد العود ففمو.." : مرات العم...ياك لباس..

سعيدة. : مال ياسين ؟!

زكرياء : غير شي مشاكيل الخالة لا ديريش راسك فيهم باقيا صغيرة...

سعيدة"هزات فيه حجبانها" : والله يسمخك...فين حسنية ؟

زكرياء : كوني هانية حسام هضر معاه بطريقتو باش يديها ماتبانش كوني هانيا سي بشار طريقو ورد "ضرب فگرفادتو" على رقبتي ماتيزعزع ليه فكر...

سعيدة : ولسانك كبر منك وهضرتك گارحة...سير عيط لحسام من دار الحليب گوليه يجي را بشار جاي فطريق...

زكرياء"خرج عينيه طاح ليه القلب فالبطن" : واتي هادشي بصح حساب ليا مزاح يالخالة...وراه نغبر تانا ماشي غير الحسنية...

سعيدة"غوبشت فيه وضرباتو لراسو" : كون تحشم الكلب...گرينك هو وفين عمرك هضرتي معاه تاتهز لهم ماتشوفو.. سير نابي على حسام وجي معاه تسلم على عمك بشار را عرسو هاد اليومين ونتا عمرك تا سلمتي عليه...

مخرج ايدو الي فيها الگارو ومطلع ليها الكمام حتى بانت الفاصمة ضايرة على دراعو...ضرب مسافة فالبيست وديك طريق يغمض عينو عليها يسوق فيها...عمرها تنسى ليه وخا يدوزو عليه سنين....راه كيبان عادي وجاي بالخاااطر...وجهو عااادي غير عينيه حتدين وحجبانو المعقودين والي هي نظرته العادية...مع وصل لفيرما لقا هاشم هو وحسام واقفين كيهضرو تا بانت ليهم سيارتو جايا وهما يتقادو واستقبلوه...مع وصل ليهم وهو يشير ليهم بصباعو فاتجاه دار زعما دخلو تبعوني...تا وصل لداخل ووقف السيارة...بقى شوية تا طفى السيجارة جبد من المجر باكية دواه رمى حبة ففمو شربو حيث وصلات وقيتو...ضرب المجر سدو وهز تيليفونو دارو فجيبو وهبط كيسرح فعنقو ويطرطق فيه طرااق طراق تاتشك راه تهرس...سلم على هاشم وحسام...

هاشم. : عالسلامة...

حسام"طل على سيارة من لور بانت ليه عامرة" : جايب باگاج..

بشار"هز حاجبو وحرك راسو..رمى ليه ساروت". : تحرك نتا وشي حد خويوه...طلعو لفوق لبيت الواليدة داكشي ديالها...يوسف ؟!

هاشم : سير حسام عيط ليه...

ع.القادر"جاي خارج ويضحك" : وتا عالسلامة وكان ياا...تا طيرتيها منا خلعة گلت هذا مشى يحطني بوجهي...

بشار"سلم عليه وماردش عليه ابدا..ضار لهيه كيشوف ويحك فلحيتو ويعوج فعنقو...ثلاث ايام وهو يطحن فطريق لان الطائرة شوية خطر عليه وكيخص اذن من طبيب باش يسمح ليه يجي فيها"

غير هو جا حسام جايب معاه يوسف وبان ليه وهي تبان ابتسامتو والبشاشة فعينيه سرح ايديه على مصرعيهما تا تم جاي يوسف كيضحك يضحك ويجري حيث ممولفش يجيه بشار بزاف المرات مولف مرة فسنيييين...فرحتو ماتعطيها لحد تا عنقو ودفن راسو فكرش بشار الي كيطبطب عليه ويبوس ليه فراسو...خذا جرعة من عناقو...وبقا خاشيه تحت باطو كيبوس ليه فراسو ويعاود...خرجات سعيدة فرحانة وتشالي وتزغرت ليه وتصلي عالنبي...كيف العادة سلامها خاص....من بعد قالو ليه يدخل راه جداك كتسنى فيك وتوريا...مع دخل وقفات توريا وهو يقرب ليها...

بشار"باس ليها راسها" : گالو ليا بالك ماهناك عليا...توحشتيني ولا هزيتي ليا الهم لغيابي ؟!...

جات تهضر وهو يبوس ليها ايدها مسكتها باش متهضرش على البلوك ولا الغياب...هز عينيه بانت ليه جداه وهو يمشي ليها تحنى وباس راسها...

عيدة : ينعلك ويخزيك...هذا مسوايا عندك ؟!..عطيتيني الكلمة وغبرتي وجهك...

بشار : عطيتك الكلمة هاني وفيت بيها...علاش غبت داكشي ماعندك بيه غراض...مسواك راك عرفتيه عندي درت ليك خاطرك على جال كنتي مريضة بسبابي رجل فالدنيا ورجل فلاخرى..ماگاد اعيدة على سخط جديد...ماگاد على باطل وسبة تلاح عليا...

مليكة : ولد خويا لباس ؟!

بشار"مجاوبهاش حرك راسو وهو كيشوف فعيدة"...

سيحمد. : سي بشار عاش من شافك على سلامتك...

بشار"ضار مكمش حجبانو فيه" : شكون نتا ؟!

سيحمد : ولواه...

ع.القادر"نغزو" : سيحمد عمك اولدي...

بشار : مزيان...

شوية تا بان ليهم حسام داخل هو وزكرياء هازين شي كوليات وفاليز ومطلعينهم...توريا جمعات حجبانها حساب ليها غايبات عندهم والبيت باقي مادخلوش ليه الاثاث يلاه صلحوه وصبغوه ورجعوه احسن بيت فدوك البيوت الي شافو يقول راه ففيلا...

توريا : فين مطلعين داكشي ؟!

هاشم : لبيتك...

توريا : كيفاش ؟ را بيتك باقي ما وجد...

بشار : تشهيت نجيب لميمتي من غلتي (الغلة كيقصدو بيها ناس العروبية هي رزقي...والمراة فاش كيتوضف ولدها كتفرح وكتباهى بناس بالي را ولدها تقدا ليها من غلتو اي رزقو)...منصيبش ندخل عليها بايديا خاوييين وانا صفيت معاها الخاطر ودرت ليها الخاطر...

توريا : هذا وكان..ههه ايوى الله يقوي خيرك ...

بشار"غير مكيزيد غم وهم..متمني الله يرضي عليك الي شحفاتو عليها وما طالها.." : امييين...

عيدة : ياك ناوي تبات هنا ؟!

بشار"حنحن بداك الصوت الي خلا كريمة وربيعة يبقاو واقفين خايفين منو يسلمو عليه." : لا...نهار العرس نبات هنا...ماعنديش مع البشري...قضيو الغراض...

.جمع الوقفة وجبد من بزطامو واحد ضمصة ديال الاورو...مدهم لتوريا بين ايديها....

بشار : مالحگتش نصرف...هاشم ولا حسام ولا شي حد يتحرك فهاد البلاد يصرفهم ليك...فضل ليك تعطي لهاشم ولا حسام يقضيو ليك...شوفي شنو خاصك..وفرحي ليا ميمتي وعيشي العادة بالعشق...مزيان ؟!...

توريا"هبطات عينيها لدوك الفلوس ماصو نيت..تبسمات وهي تحرك راسها" : مزياان...

تسناها تگول شي حاجة ابدا يااا امراة واش هضرتي...تصدق عليك السخط والمعيور...وتسقرم ليك على الرضى والهضرة زينة ودعاوي الخير.....

بشار : ماتنقصو من عادتكم ماتزيدو...الي حب خاطركم ديروه...الي خصاتك اميمتي "ضرب گرفادتو بجهد تا تسمعات سعيدة غمضات عينيها من دقة اما توريا غير كتشوف فيه وتسمع لاش يگول" رگبتي تحت رجليك...عندك ولد واحد عزري فرحي بيه....

توريا : داكشي الي كاين اولدي...

بشار : فين اشراق ؟!

توريا : فالبيت كتقرا كيف گلتي ليها...طلع عندها...

بشار : لا عيان معنديش جهد نشوفها...

زاد بلا هضرة بلا كلام باش لعيدة راسها وضار ماتسوقش لاخرين خلا مليكة تبرگم....تبعو هاشم تال برا.لقاه ركب وكيتسناه..

بشار : شحاال باقي ل ضريب صداق ؟!

هاشم : يومين...وليني بات البنت كيسول عليك...

بشار : علاش ماعلموهش راني ممساليش ؟!..ياك قضاو الغراض "هز فيه عينيه من تحت نضاضر كيبان مخنزررر واخا كيهضر بشوية وبصوت منخفض"

هاشم : الله ماعرفت اش دايرين معاه...مهم را ناس لباس عليهم والبنت باقيا صغيرة عندها 18 عام...راك عارف مي عشقتها ليك...فرحانة بيها بجهد...

بشار : مزيااان...

هاشم : ياك هادشي راضي عليه بعدا فرحان ؛؟!

بشار : درنا لخاطر لواليدين ماعليش...الوراق تكلفتي بيهم بالوكالة الي مخلي ليك ؟!

هاشم : وراقك راه وجدتهم ليك فنهارهم...تا راك مع القايد ديال ؤحامنة نحرك صباعي يتقضر الغراض...راهم لفوق فالبيت مابغيتش نگول لمك راه وصيتيني داك نهار نوجدهم باش ماتبقاش مبرزطة ليا راسب نعيط ليك ونتا تخدم بخاطرك...

بشار. : تزيرات عندي دعوة تما...

هاشم : ديك بنت الناس اش درتي معاها...

بشار : فضيت معاها...(مازاد كلمة مانقص)...

هاشم"تاهو ماعاودش حكر معاه عليها" : محرك لنفس لوطيل ؟!

حرك ليه راسو بمعنى اه...ومشا.....اما الحاج عبد القادر ماصاب مايقول من غير انه يخرج ويهضر مع مولاي حفيظ فالتيليفون ودار معاه وقيت فين يهضر معاه..

عيط لسيحمد يسوق بيه طوموبيل...خلاهم ناضو كل رجع لشغالو...

ع.القادر : صباح جاي نجار باش يركب داك الماريو وديك ناموسية وداكشي الي معاها...علم زكريا يوگف معاه هو وحسام...ونتا شد ايامات وسبر وگف على ضروبات يدب.حوهم...هاو شوف دجايجي را جايب الدجاج واجد ستة صباح يحطو ليهم فالكوشينة (الكوزينة) الي على برا ينقيوه تم گوليهم يطلقو ايديهم...

سيحمد : كاين شي لعب ؟!

ع.القادر : نزگيو مع المراكشي لا يدير لينا العصا فرويدة تاهو شتو لصق ليا على بشار...

سيحمد : والى مابغاش لهلا يجعلو يبغي...درنا فيه خير ميكنا على الريالات الي نتسالوهم ليه يهز علينا خنافرو...

ع.القادر : مانصيبوش نرجعو البنت بغات ورشمناها ودواور علمات بالي تناسبنا معاه...

مسافة طريق حتى كانو فمراكش ودشو طريق السمارين..دخلو لقاوه فاستقبالهم كيشوف سيحمد ويتبدلو ملامحو من جهيتو..من سلام وكلام والسؤال على الحال والاحوال...دخل فالموضوع...

ع.القادر : الولد را جاي فطريق (كذب عليه)...وراه ميوصل تال نهار الملاگا (عقد القران)..

م.حفيظ"جمع ضحكة وخلا تبسيمة" : ههه..ايه ولكن كيفاش مايجي تال نهار الملاگا...اش هذا الحاج...شنو زعما مايسمع شروط البنية مانسمع هضرتو...كيفاش زعما !!..كيداير هاد جواج الحاج !!

ع.القادر : كي ناس الحاج...علاه فايامنا شفنا عيالاتنا ؟ ياك ماشفناهم تا نهار عرسنا.. العقد تكتب بالوكالة ولا فارق بيناتنا الخوامي ولا الحيوط...ياك المهم هو جواج لاصل وجواج دوام...نديرو ليهم جواج البراهش ؟! اجي يهضرو تشوفو ويضوفها.. ولدي را منعيبوش ليك بفلوسو باملاكو وبرزقو وبغلتو...راه برا وياك هي وياه مفاهمين ياك شافت صورتو وعجبها...الى على الفعل نعطيه العاهد مايخصها خير معاه...راك مشاركين د.م الحاج ماشي غير الطعام...

م.حفيظ."الصمت"..

ع.القادر : وراق البنية واجدين...

م.حفيظ. : لا مزال..ورا بينا يتفاهمو بيناتهم يحطو شروطهم على طابلة را بنتي هاديك ...نعرف فين باتمشي...را دوام هذا الحاج وبنتي ماشايطة عليا لوحها لمن ماكان...نهار گالت ليا ابا قابلة علمتك ديك ساعات...

ع.القادر"غوبش" : بنتك لايحها لجهنام !!؟..هذا مسوانا الحاج عندك...سمحنا ف الكريدي ولگينا معاك حل يعجبك غا باش منخسروكش...فلوس تگال بالفم ماتجمع باليد...تگوليا نلوحها لمن ماكان ؟ ياك هذا مسوانا ؟!

م.حفيظ"تقرص وكتم كيتو.ولا غير يهتهت" : ههه نهاك الله الحاج اش وصلنا لكلام العيب والعار...

ع.القادر"وقف" : هو هذا الحاج ملي ولينا هوك اش بقى...وما بغينا نوصلو لعيب الحاج..را معزتك هي الي جابتنا نتناسبو معاك لزين اصلك وترابي بنتك وزينها.. بنتك مايخصها خير وراه باغيها الولد ويدور ويوصي تهلاو وكبرو بيها...هاهي هضرت معاه هاهي تعرفو من سنين نديرو حنا ورا منهم عداااد مع تلاگاو مع گالو الله يعاون...ناس را تقل عالاصل زين ودوام...خلي فمنا مسك وعارنا بعيد...والفاهم يفهم..

م.حفيظ"حس بصدره تزير..حدر راسو وحركو..وحنحن يرجع صوته الي تقج" : واخا الحاج ميكون غا خاطرك...مرحبا بيكم...

ع.القادر. : الله يجعل كلشي مبارك ومسعود...

الضحك والنشاط خدام واخا غير بيناتهم رجال والعيالات كيتضايقو بالحلاوي لاكريم بييس مونطي والمملحات ...اما العصائر حدث ولا حرج...صونا لمولاي حفيظ تيليفون كان واحد العدول صاحبو وشي رجال جاو...جات ناديا تجري دخلات وهي دوز الخامية على صالون تايدوزو...تا سمعو تحنحينهم وهما دايزين وكيرميو سلام "سلااام عليكم" دخلو وقف عبد القادر تاهو بجلابتو البزيوية وسلهام على ضهرو زادو هيبة ومع طويل ومگضر كمل المنضر...

طلعات سناء بنت عمة حبيبة لعندها وحلات عليها الباب...حركات حبيبة راسها وتنهدات...حاسة براسها كتخطوي فوق العافية...كلشي مقاد قدامها مكبرين بيها وفرحانين بيها عروستهم وعروسة توريا الكنة البكر...تا تلقات ليها لطيفة وناديا عند الباب وبداو يصليو عالنبي ويزغرتو تا دخلوها لصالون حادرة راسها ومزنننننگة...سلمات عليهم وخشاتها عيدة بينها وبين توريا الي فرحتها ماتعطيها لحد...تاهي بتكشيطة فالبيج وتحتي ذهبي ومضمة ديال نقرة مشللة بالذهب...والعينين مكحلين تالجدر...دايرة طوانگ لويز وشال ذهبي فوق من الزيف ديال حياتي بيض وفيه خيوط ذهبية...

مليكة : تبااارك الله بزينة العريسات..."هزات عينيها فتوريا" فين العريس شت هاشم تعطل...

يلاه بغات تهضر تا سمعو صوت هاشم كيحنحن...وقالت سعيدة هاهو...هزات حبيبة عينيها بالحس كتسرق الشوفات وتروي الفضول تا بان ليها واحد دايز وتابعو شي حد غادي بشواايا طوييييل فالظل بزااف ومگضر...صرطات ريقها وهي كتخطط فرسم وجهو من خلال صورتو الي شافت...ايديها بداو يترعدو جا م.حفيظ خذا لاكارط ديالها وجلسوووو تعطلو شحاال شي ساعة وهما فالصالون كيهضرو...فاتت ساعة وغادية فساعتين...حتى عيط ايوب لناديا تخرج عندو...

مولاي حفيظ : سوليها اشمن شروط بغات ؟!

ناديا : بنتي العدول سولك اشنو شروطك ؟!

حبيبة : يديرني فعينيه ويتهلى فيا..ومايتزوجش عليا...ومايبكيش واليديا عليا ومايحطش ايدو عليا...هذا هو شرطي...

م.حفيظ"شداتو البكية" : كوني هانية هادشي گلتو ليه...

رجع دخل وتاني بقى شحااال غاطس تا عيط لناديا وهي تخرج عندو مد ليها روجيستر دخلاتو ليها مع ستيلو...ناديا واحد لحظة تا بغات تقوليها بلاش جاتها شي حاجة فقلبها حسات بيه دخل فيه موس تا توقفت حساب ليها غا بغات طيح وهي تعوذ من شبطان رجيم...وتنهدات وهي تدخل عندها حطاتو ليها فوق طابلة ومدات ليها ستيلو ووراتها بحسب ماقاليها م.حفيظ فين تسني...

ناديا : سني هنا بنتي...

حبيبة"قبطات ستيلو ايدها كترعد توريا ومليكة حاضييينها سعيدة حدرات راسها تلجم ليها الفم وتكبلو ليها ليدين...تا بغات تحبس تاهي وهي تفكر باها ومايتسناه وتقدر تخسرو فدنيتها...هبطات ايدها وهي تلمح الامضاء ديالو...الي كان مميز..امضاء مبعثر، مقاد ،مخربق،قاسي...عاكس شخصيتو القوية...عاكس نفسيتو الغير متزنة...بقات شحال وهي كتشوف فسنية ديالو حتى حطات ناديا ايدها على كتفها...وهي تهبط وسنات مع سنات تقطرات دمعة غفلتها ونزلات تجرييييي تا طاحت بين الامضاء ديالو وديالها...حركات لماماها راسها وحطات ستيلو غير داتو ناديا وهي تجيها نوبة بكااء تا دارت ايديها على وجهها وبدات تنخصص....

مليكة : ولواه لواه ههههه كاع كلنا دزنا من هنا ابنتي...

توريا : الله يعطيك رضى مايخصك خير ابنتي لا تخافي شاااي...

لطيفة"حضناتها وباست ليها على راسها" : الله يرضي عليك دابا تجي ناديا تشوفك تبكي وتكملي عليها...راها واگفة هي بالنية ودعاء...الله يرضي عليك...

حبيبة"صرطات ريقها ومسحات دمعتها وحركات راسها وهي تنهد كتنفس..كتبان صغييييرة وسطهم كي الكميشة وخا عندها ليهونش زايدين بشكل ملفت قصر قامتها ممعاونش...

_دارت العقد عقد القران الورقة الي غاتربطها بيه حتى انها ماشافتوش.....ماعرفاتوش كيفاش داير كيف دايرة هضرتو كيفاش غايكون الحوار بيناتهم..كيفاش غايكونو مخاصماتهم للحظة تبسمات على بلاهتها حيث دغيااا رسمات طريق لحياتهم دغيا دارت بلان ودارت الساس وبنات وعلات وسدات عليهم فبيتهم وهي حتى كلمة سلام ماسمعاتهاش من فمو..وجهو شافتو غير فالوصف الي عطاوها وتصاور الي وراوهم ليها...بحجة را نهار العرس غاتشوفو حيث سااافر لفين وهي مرتو دابا وماعارفاااش...سكتات راسها بهاد الحوارات باش تحط امل وترتاح ولكن الي ممرتاحش را ممرتاحش...تربطات وضحات فسبيل باها ماتشوفش دمعة منو..

~انا نبكي يا بويا ونتا ضحك...انا نواجه مصيري كيما كان غير فرح ياا بويا ولا تمرض...شقيتي عليا وشفتي الويل جيت وفرحتك خليني نفرحك ونكمل فطريقي انا نبرك عالشوك ونتا شد الورد...انا لگا عليك شحط ونتا نشط~~~

الزواج هذا ماعندو ساس ولا راس مبني على النفا.ق والكذوب ورقع من هنا وسد من لهيه...باش يتحفظ ماء الوجه فالقبيلة ودواور...كان ممكن تكون بنت ناس اخرى غير حبيبة لكن المكتاب اختار حبيبة وضحات براسها الى المجهول...هاهي تكتبات على اسمو اسم جناح بلا ريش...وهاهي غذا غادي تزف للمجهول...

فجأة سمعات رنة ميساج فالتيليفون الي مكانتش حاسة براسها مزيرة عليه من بعد ماجابتو ليها سناء من فوق....وايديها عراقو تا بانت شاشة كلها ماء ديال العرق...شعلاتو وهي تلقى نمرة من نهار رسلاتها ليها قيداتها باسمو تما بقات....حلات الرسالة وهي تلقى كلمة حروفها معدودة...

بشار : مبروك....

نمرتو كانت ديال المانيا وخط دولي رسل ليها الميساج فرسالة عادية ماشي واتساب...بقات كتشوف فيها شحااال وهي تقفز على صوت تزغريتة حاااارة من فم ربيعة خلاتها تكمش فتيليفون وتدهى على الرسالة...

ناضت عندها توريا مبتاسمة شادة فجلايل تكشيطتها حيث كانت حبيبة ناضت لجيهة لاخرى فين جابو ليها روجيستر العقد...تحنات وسلمات عليها من بعد ما نغزتها عيدة باش تنوض دير معاها الصواب...

جبدات من صاكها واحد ساشية على شكل كميميسة فيها اسم ذهايبي نفسو الي تقداو من عندو ديك المرة...جبدات منها واحد الدمليج ديال كيقولو ليه عصير صابون...عرييض و مشبك وستيلو ماشي ستيل حبيبة وستيل ماشي شبابي...ركباتو ليها فايدها ومفتاااخرة حيث هما ناس كيمشيو بالوزن ماشي بالرقي فيما يخص الذهب يعني عندهم كيما كانت الحاجة وازنة وطالعة فالثمن فيه را هي المخيرة وتليق بيها...هي حاجة زوينة واخا اختلاف الاذواق...ركباتو ليها وطبطبات عليها...

توريا : الله يجعل كلشي مبارك ومسعود ابنيتي..

حبيبة"تبسمات ليها ماداتها كاع ف الدمليج شافتو وتنهدت..باست ليها ايدها وهادشي عجب توريا وزادها گراد" : الله يبارك فيك اخالتي "بصوت شبه مسموع ومقجوح"

نوضاتها لعندهم جلستها حدا عيدة الي ماقاداها فرحة ودور دورة وتزيد ربيعة تزغرت هي وكريمة...اشراق ماجاتش معاهم بقات فالفيرما هي وشي عيالات كيوجدو لحفل الغذ ليه...

شوي حتى دخلات ناديا تابعينها زوج سربايات بداو يجمعو فطوابل ويقادو دنيا...بانت ليها حبيبة حادرة راسها ومبتاسمة...كتشوف عيدة وتوريا كيفاش دايرين عليها وفرحانين بيها هبطات عينيها لايدها اثار انتباهها دمليج جاها كبير على ستيل بنتها وسنها ولكن تبسمات حيث عارفة انه خذاوه ليها لوزنه ماشي للذوق...

ناديا : بنتي "تنهدات" مبروك اكبيدتي..الله يجعل كلشي مبارك ومسعود..الله يثبت ليكم الغرس ابنتي والله يكمل عليك بالخير..

حبيبة"جمعات شفايفها كاتمة البكية ورموشها كيتلاصقو دغيا لصقو بدموع حيث كثاف..ناضت وقفات وهي تلاح عليها عنقاتها ودفنات راسها فحضن ناديا كتستنشق ريحتها وناديا كطبطب عليها...حاسة بيها زربات على راسها بهاد زواج ولكن اش عندهم مايديرو..بنتهم قبلات وشافت مصلاحتها فهاد زواج...بقات شحاال وهي فحضنها تا تنفسات وهي تفارق عليها مسحات ليها ناديا عينيها وباست ليها راسها.."

ناديا"شافت فيهم" : مرحبا بيكم والف مرحبا...

عيدة : ترحب بيك جنة..والله يقوي الخير ويمتن الوتاد بيناتنا والله يجعلها نسوبية دايمة والله يجيبنا ديما فالصواب...بنتك غاتبقى بنتك..ودارها لهيه دارك..وتالهيه حدا راجلها دارك...راها فعينينا نشاعلاه والله يوالم بيناتهم..وعذرونا اللا ناديا لا جا معطل راك شفتيه يلاه البارح وصل ورتاح وهاهو جا وهاهما دارو الملاگة (العقد) ياك كلشي بالكبرانية الحاجة ولا راني نكذب...

ناديا : الله يعطيكم الخير ماقصرتوش من جيهتها...

مليكة : ايوى را عشقتها مي ومي لا عشقت كنة راها ديرها بنتها..ها كريمة سوليها...وها سعيدة وها توريا براسها عگوزتها نيت...كلهم عيالات خوتي كايدخلو بالكبرانية...

سعيدة"تنهدات واخا ماعاجبهاش الوضع وليني من شافت بشار بغى ليهم احتارمات قرارو..تبسمات وحطات ايدها على حبيبة". : بنتي ثيقي بيا من جيهتي نديرك بحال بنتي را بشار تقريبا حسبيه فحال خويا صغير...

حبيبة"ارتاحت ليها بزاف وهي تبسم وحركات راسها" : شكرا...

جيهة رجال كانو جالسين كلهم...حسام حدا هاشم وهاشم حداه بشار وبشار الي معنق يوسف حداه...يوسف الي مخليه مهدن شوية وخا را مزير بزااااف..عينيه حمرييين...لابس تيشرت كحل وسروال كحل دجين وتقاشر بيضييين...شعرو مرجعو لور منفوخ بحكم الكثافة الي فيه...لحيتو مخليها مخربقة....عينيه فنقطة بعييييدة ماهواش هنا غير عطاوه سنا وصافي حدو ملي دخل سلم على جدو وعلى الحاج عبد القادر الي عرفو عليه هاشم وعبد القادر..

هاشم"ضار عندو وربت ليه على فخدو" : مبارك ومسعود امولاي سلطان...

بشار"باقين عينيه منيرين فنقطة بعيييدة...تبسم مستهزأ...وسكت مجاوبوش خلا هاشم كيرمش مافهم والو"

م.حفيظ"تقدم لناحيتو وحط ايدو على كتفو" : تفضل اولدي مرحبا بيك...

بشار"حول عينيه جيهة ايد م.حفيظ وبقى كيشووووف فيها...غمض عينيه تاتحرك الفك ديالو ورجع حلهم شاف فيه وحرك ليه راسو وناض..غادي ومولاي حفيظ كيطبطب ليه على ضهرو وبشار ماحاااملش يدير ليه هاكاك...علاش ؟ واش مابغاش داك سيد يگدم بنتو ليهم ؟!...واش ماحاملش يتناسب معاهم ولا كاين شي تانيب ضمير من جيهتو ؟!...ملي شافو فرحان بهاد طريقة رجع استهزأ ومشى جيهة طابلة بان ليه سيحمد بلاصة حداه بقات خاوية وهو يدور عند هاشم شير ليه ومشى حسام الي شافو تاهو جلس حدا سيحمد وهو جلس فالبلاصة الي جات عند الباب...تحط العشا الي كان فالاول صالاد رويال فصينيات كبااار...هما كياكلو فرحانين وهو غير كيشوووف عينيه ماشي خوت...شي حاجة فيه لداخل ماهياش...حاس براسو كيضرو عينيه مابقاوش كيشوفو كيف ناس...حاس بالخنقة حاس بالنوبة ممكن تجيه فاي لحظة...حاس براسو كيدور...عقلو رجعو لذكريااات قديمة وعاود رجعو لذكريات جديييدة...دوك الاصوات كيتسمعو ليه فوذنيه...تا هز ايدو ودوزها على صدرو كيحك فيه وكيحل عينيه على جهدهم ويرجع يكمشهم...

هاشم"غمز حسام الي كان حداه وشير ليه عليه"

حسام"ضار عندو" : خويا ياكما نجيب ليك دوليبران...

بشار"هز ايدو موقفو بمعنى سكت"...

كمش عينيه وحط ايدو على ناضرو كيمسد فيه بصبعو..النواضر الي عروقهم تنفخو وبانو خضريييين وسط حمورية الوجه...لاخرين كياااكلو كاااع مامسوقين ليه براكة عليهم جا وماحشمهمش...هاشم وحسام الي حبسو وكيشوفو فيه خايفين تجيه نوبة الصرع تما..ماسوقهمش فاش يوليو هما خايفين ليه على صحتو فقط... هز عينيه شاف فهاشم وحرك ليه راسو كيقوليه بغيت نخرج...

هاشم : ااا بشار خارج لطوموبيل ؟!

م.حفيظ : فين اوا بايمشي يكمل العشا ويخرج ! اش بيتي اولدي اش خاصك...

بشار"تا كان غايخليه بلاكة وهو يرجع نطق" : راسي بغى يتفرگع..نمشي نشرب شي حاجة ونجي...

م.حفيظ : هي رتاح ها ايوب يجيب ليك دوا...ايوب "وقفو بايدو"

بشار : لا لا عندي دوايا..منصيبش نشرب ديال هنا ممولفوش...

م.حفيظ : واخا ولدي سير قضي غراضك...

حرك راسو وناض شير مولاي حفيظ لفيصل يوريه منين يدوز وبالفعل وصلو تال باب وهو يخرج مشا نيشان لطوموبيل حلها ودخل فيها وسد عليه...زييييرررر على داك الفولون...ماصبرش راسو بدا يزنزن وهو يحل المجر جبد دوا ديال راس رمى حبة ففمو وتبعها قرعة ديال الما صغيرة كلها شربها وزييييررر عليها تا خلاها كمشة بين ايدو...وهو يحط راسو على الفولون وتكااا عليه...يلاه بدا يتنفس وهو يتدق زاج عليه...هز راسو شاف ورجع شاف قدامو والزاج كيهبط عليه...

هاشم : ياك لباس ؟ جاتك نوبة ؟"حرك ليه راسو ب لا"...رتاحيتي دخل دير الواجب وسير رتاح..مابغيتيش تهضر مع مرتك ؟!

بشار"كمش حجبانو" : شكون ؟!...

هاشم : هههه العروسة اسي...والله الى نهار كبير هذا ...

بشار"مجاوبوش بقى شي دقيقة وهو ساكت حجبانو مغوبشين وكيشوف فنقطة بعيييدة فدوك دروبة الي عتييقة...شوية وهو يدور شاف فهاشم" : دخل تعشا معاهم دير الواجب ماشي كلشي يخرج من تما...ماسول فيا حد ؟!

هاشم : لا خليتهم كيتعشاو...

بشار"تبسم باستهزاء" : دخل اهاشم هاني جاي..ماتعيقش عالدعوة تما خلي كلشي يمشي كيف بغاو...

حرك ليه هاشم راسو ودخل فالحين...اما هو بقى شحاال فطوموبيل تا كمى كارو وهو ينزل منها كيسوس فحوايجو...ودخل حادر راسو عقل على طريق بانو ليه ناس داخلة خارجة تا تمات ناديا خارجة من الصالون وهو يبان ليها غادي وكيشوف فنقطة بعيدة كمشات حجبانها..كيبان ليها ماشي هو هذاك خصوصا لمحات عينيه حمريييين...تا دخل عليهم لصالون لقاهم سالاو الشلاضة وبدا سرباي يجمع باش يحط البلا ثاني الي متكون من بسطيلة ديال دجاج واللوز التقلييدية الاصيلة المزينة ب قرفة وسكر گلاصي وفوقها بريوات وسيكار معمرين باللوز...ماتسوقوش ليه فينك اش واقع الا هاشم الي جا وحسام الي طمنو باه عليه...شاف فيه يوسف وتبسم ليه وشير ليه يجي...هنا بشار حط كلشي وراه وتعزل غير مع يوسف كيبتاسم ليه فوق قلبو...بداو كياكلو الا هو الي كيوكل ف يوسف...مولاي حفيظ تدهى مع ضياف وناديا مع العيالات هي ولطيفة وسناء مخليين لالة العروسة حدا عگوزتها وعيدة...تحط الپلا ثالث الي هو اللحم مزوق بالبرقوق واناناس طري...و شريحة التركية الكبييييرة معسلة...العشا كان ملكي وضيافة محترمة تليق بالجو...تجمعو طوابل ووصل وقت اتاي الي فيه رجال والعيالات غايتافقو...

عيدة. : ايوى الحاجة شاركين د.م وشركنا طعام وهاحنا شركنا نسوبية...نسوبية زيييينة وفرحتي مانعطيها لحد...الي نطولوه نقصروه...غذا را كاين تركاب الخواتم والفرح نشاعلاه...جيو بكري الحاجة وبلاصتكم الفوق فالدار عندنا...حسبي دار ديالكم والعتبة لينا...

ناديا : علاش غاتمشي غذا ؟!

عيدة : ايوى شنو الحاجة مزال ماساخية بيها هههه...ياك هذا علاش دوينا وزگينا...

توريا. : ماساخياش ههههه...

ناديا : ايوى شنو را هي بكرتي ومنسخاش...

مليكة : ياك حوايجها مجموعين ؟!...

ناديا : كلشي مجموع...هيي بغيتها تبقى معايا شوية...

توريا : ماجايب شاااي معاه فلايام...يلاه يجلس معاها شوية ويمشي لهيه يگاد ليها وريقاتها...

حبيبة. : ياك ملي يمشي غانجي هنا ياك ؟!...

توريا : ههه تجي ؟...ايه نشاعلاه..وليني جلسي معانا شوي من وراه ولابد تبقاي معانا وديك ساعة رجعي...حيث را بغات تكون دار ناسك وواجب عليك تنزلي فيها...

عيدة : تجييييي وتبقاي تا مع واليك...وملي يجي جي عندنا قبل منو وهاكا بقاي تايصايب ليك الامور...هانتي دابا تعرفي عليه ودابا تفاهمو والله يوالم بيناتكم...واش ابنيتي ماعاجبينكش مامرتاحاش لينا !؟..

حبيبة : احم لا لا حاشا...

عيدة : راكي دخلتي لگليبي كي نقيطة العسل...عمرك ماتكوني مخصوصة وعمرك ماتشكي...را هادي هي سنة الحياة...صبري ليه وهزي بهبالو ويهز بهبالك..وازنو الكفة بيناتكم...والله يدوم المودة بيناتكم نشاعلاه...را حنيييييين واخا يبان ليك معصب...الوقت زيراتو ومالگاها كيف بغاها...الي شفتيه منو ديري عين ميكة...

نگولو من الي تكتب الكتاب وتجمعو الحباب وتوطدات ريحة شحمة فالشاقور بالنسوبية...تكتبات على اسمو ودخلات فجناحو الي بلا ريش...حدها سمعات منو كلمة مبروك...ناضو العيالات من بعد ما سمعو صوت رجال على برا...الي كانو واقفين كيهضرو مع مولاي حفيظ...

هاشم كان واقف وكيسمع جا يدور يقلب على بشار الي بقى اللور حتى لقاه طااار..ضار هنا وهنا مكاينش...نغز حسام وقرب ليه...

هاشم : فين بشار ؟!

حسام"ضار هنا وهنا" : الله ماعرفت...

هز عينيه فهاشم الي عرفو او يمكن حس بيه انه رجع راسو ضرو وخاف لا يطيح ليهم تما بنوبة صرع...يلاه بغى يمشي وهو يسمع صوت مولاي حفيظ كيسول عليه...

م.حفيظ : افين سي العريس ؟!...

ع.القادر"ضار كيشوف فالصالون". : يلاه كان هنا !!

هاشم : احم..يمكن خرج يهضر فالتيليفون وصلاتو شي خدمة...انا نشوفو الحاج يدخل...

اش غايدير اش غايقوووول فين هو الى خرج ومالقاهش اش غايقوليهم...وبالفعل خرج على برا لقا غالريح...سيارتو الي كانت وراه سيارة عبد القادر غابر ليها ساس...هز ايديه تالفوق ودارهم فوق راسو...بزربة خرج تيليفون ماحتال يدوي معاه وهما يخرجو رجال على برا مابقى عرف مايدير...

ع.القادر : تا فين العريس هاويلي...

هاشم"ولا يصرط فريقو" : قممم ؟ ا را...ما فداك...

يلاه بغى يقوليهم را خرجت لقيت غالريح والي ليها ليها تا ضربهم شعى الضو ديال سيارتو وقفها بعيييد هاشم النقطة الي بقات ليه طاحت...حسام تنفس...خلا ضواو السيارة شاعلين وهو ينزل وجهو مكتاسيه واحد البرود خطييييييير....برود كيخوف...حتى وصل لعندهم...

ع.القادر : تا فين مشيتي...

بشار : مشيت قضيت شي غراض مع واحد سيد..."شاف فالحاج حفيظ وشد ليه ايدو" الحااج...تعذرني ؟!...عندي دعوة مخلطة نقضي شي غراض خدمتي صعيييبة وصلتني حتى لهنا...خاصني نسلك باش نبقى براحتي فالكونجي..."باس ليه ايدو خلا عبد القادر يتبسم اما هاشم غا تيرمش حسام خلااص حيث يلاه كان ماشي تالهيه دابا كيبان مرتاح ؟!!"...

م.حفيظ : ماعليش الله اودي..

بشار : نتوما ناس الخير وليني هذا المكتاب...ولابد نتحرك دابا نتشاوفو غذا ؟!"ضار عند جدو" ياك غذا العرس ؟!

ع.القادر : وكاين تا تركاب الخواتم يالهبيل ههههه...

بشار : ماكذبتيش فهادي ابا...كاين شي حد كيدير راسو فهبيييل "قالها وشوفتو منيرة حيث قالها بصح وبجدية..خلا عبد القادر يحنحن وسيحمد ضار لهيه وضحك كون شافو بشار حساب خوووور...رجع شاف بشار فمولاي حفيظ...

بشار : كاين شي مشكيل ؟؟؟...

مولاي حفيظ : لا ولدي ماكاين مشكيل..."تنهد" ماعليش...غراضك هو اللول...الله يجعل كلشي مبارك ومسعود..

ضار مشى ركب فسيارتو ورجع مارش اغييغ تا خرج مع خرج ورك حتى تهزت طوموبيل وتسمع صوت روايدها الي تحكو...

خرجو تريكة رحماني فرحااانين ضحكتهم مبينة ضرصتهم...كل ركبات فسيارة ومشاو مخلين وراهم مولاي حفيظ ونسيبو الي هو راجل بطيفة وفيصل... كيف دخل مولاي حفيظ ناضت حبيبة تلاحت عليه عنقاتو وزيرااات عليه فحال كتقوليه بابا ماتهولش عليا انا مزيااانة فرحااانة...مع هزات راسها وهي توريه تيليفون...

حبيبة. : فاش سنيت رسل ليا ميساج قاليا مبروك...

م.حفيظ : ايييه..تبارك الله مافيه مايتعاب وخا مشطون شوية مع الخدمة هضر معايا واعتاذر...اش بينقول الله يكمل بالخير...

كيف طلعات لبيتها مع دخلات سداتو عليها وحيدات داك دبليج حطاتو حيدات القفطان الي لابسة بقات غير بتحتي..مشات نيشان غسلات وجهها وحالتها وخرجات تلاحت فوق ناموسية..خاطرها مزموووط...كتفكر الرسالة الي رسل ليها كانت كلمة حسات بيها ناقصة هذا ما خسر عليها ؟!...واش كيتسنى منها الرد باش يبداو الكلام ؟!...لحد ساعة ماسمعاتش تا صوته وتا وجهو مشافتوش نيشان على امل غذا يتشاوفو فتركاب الخواتم...اش هاد زيجة واش هاد الحالة لي عاشتها وكتعيشها...زواج تقلييييدي ديال زمااان...ماشافتو ما شافها تال نهار عرسهم وليلتهم عاد تشوفو ؟!...هزات تيليفونها ورسلات ليه فنفس النمرة...

حبيبة : الله يبارك فيك...

تاهي ما قل ودل...حتى تحل الباب وهي تدخل مبدلة ببيجامتها وشالها على راسها حيث كاين راجل لطيفة...تبسمات ليها وهي تقرب ليها وجلسات...

ناديا. : مانعستيش ؟!

حبيبة : هء..مزال...ماما ؟!

ناديا : ابنتي...

حبيبة : ش شفتيه ؟ عجبك ؟!

ناديا : على ماشفت من هضرتو وفوجهو را زيين و رزييين تبارك الله...

حبيبة. : رسلت ليه الله يبارك فيك...نسيت مجاوبتوش قبيلة كنت مرفوعة...واحد الوقت حتى مابغيتش نسني ولكن شفت كيفاش مكبرين بيا..كيفاش فرحانين بيا...كنزيد نتاكد انني قبلت ومغاديش ندم...اقتانعت بيه ومانادماش...كنگول اللهم بنختار بهاد طريقة حسن منعرف شي واحد ومنتفاهموش...شفت فراسي نتي وبابا تزوجتو زواج تقليدي وكيموت عليك...علاش منعطيش راسي هاد الفرصة...انا مرتاحة اماما وفرحانة...حتى نتوما رتاحو من جيهتي..

ناديا : هاحنا مرتاحين ياك نتي مرتاحة وباغية ؟ نتي تحملي مسؤوليتك...حنا مكناش مرتاحين حيث كنتي رافضة زواج ابنتي وصغيرة راكي عوينتنا لولة...

حركات غير راسها وسكتات..لجمات فمها وخلات عقلها يسرح...حتى قبطات ليها ناديا ايديها....

ناديا : شوفي ابنيتي راني بحال اي ام..."صرطات ريقها وبدات تنصحها"..بنوريك وبنفهمك بالي زواج راه ماشي هي مسؤولية تمشي معاه وصافي تقراي...بنتي راه زواج داخلة فيه تالمعاشرة...كوني غشيمة وفنفس الوقت زاعمة...سمعي وحني راسك وماترديش الهضرة...الي سمعتيها ضحكي وسكتي...انا كنعرفك سكوتية وليني نهار كتعصبي را فمك مكيسكتش...ملي تكوني معاه ولفي راسك را بتصبحي على وجهو وتباتي عليه...الى وقع الخصام ماتخرجوهش من بيتكم...وماتجيش تعاودي ليا الي كان...الي بيناتكم فداكشي را بيناتكم ماتخرجيه لحد...ماشي بتمشي لدارك راه صافي قطعنا معاك..بيتك راه غاترجعي ليه لوقيتة الي يكون هو غايب حتى يديك عندو ان شاء الله...وبتبقاي نتي هي نتي وفلوسك ديما فجيبك من باك..وخا ديري ولادك...

هابطة لطيفة من فوق لابسة فراشة بتوب جوهرة فالبوردو مخيطة براندة فذهبي بالعقيق فنفس اللون كمايمها حتى لمرفق..دايرة على راسها توربان ذهبي ومحلة عينيها ...يلاه مقادة ضفارها هي وبنتها وصابغة ايديها بالبوردو فمحل ايوب ديال تجميل...نضاهم من كاع نواحي...حبيبة تكلف بيها هو شخصيا واخا هادشي فوق خاطرو من شافها فرحانا وقابلة احتارم قرارها...دار ليها سوان دفيزاج ديال العرايس خلا وجهها يبري ونيت مالقاش فيها مشكيل حيث اصلا هي مهتمة بحالتها ديما نقية وديما كدير عندو سوان فيزاج هي وناديا وديما يبريو...

لطيفة"بانت ليها رقية خارجة من كوزينة هي وناديا وهازة طبسيل فخار عامر بالتمر مجهول طبييعي بلدي ممعمرش" : وصلو ؟!..

رقية : اييه اللا لطيفة وصلو...

ناديا : دخلي جيبي اختي لطيفة صينية را واجدة...

حركات راسها وبزربة دخلات لكوزينة هزات صينية الفضة فوقها ابريق ديال طاوس الازرق الحر وفناجن ديالو فيهم الحليب...غا وقفو عند الباب وهي تدخل سناء بنت لطيفة اي بنت عمة حبيبة وجهها مزنگ بالحمام يلاه جايين من spa ودازو لمحل ايوب تا صاوبو ليها شعرها باش تجي يصايب ليها ايوب المكياج...بدات رقية تصلي عالنبي ولطيفة ترد عليها...كانت معاهم تا واحد المراة لوسة لطيفة اي اخت راجلها...ابتاسمات ناديا من شافت حبيبة جايا وطايح عليها السر فجأة البنت صغيرة ولات كتبان امرأة...وشحال زادت زيااانت كثر وفتنات الي مايتفتن...مدو ليهم حليب وتمر وهما يدخلو..باستهم وسلمات على امها باست ليها راسها وايدها...وتبعتها تا وردة اختها حيث العروسة خاص يمشيو معاها لنات لحمام...ومشاو ل spa حيث الحمام ديالهم مع الاسف تسد حتى يفك مشكيل ضرائب والفواتير...

ناديا.: بالصحة وراحة..دخلي ترتاحي وتنفسي...

حبيبة : فين ايوب گاليا هاهو تابعني...

لطيفة : جااا راه فالبيت..طلعي ترتاحي باش يوجدك شوي بايجي باباك وعزوز عمك وبنمشيو...ياك كلشي واجد اللا رقياااا ؟

رقية : واااجد الحاجة هي قضيو...

ناديا : داك صوبك ديالك ا للا رقية هي ديه من دابا لطوموبيل باش متنسايهش وشوفي اش كاين فااكوف من يجي الحاج منساو تاحاجة...

حبيبة العروس الي غاتزف للمجهول...الي باقي ذكرى البارح بين عينيها...غاديا فزواج حتى من العريس خسر عليها كلمة وماشافها ماشافتو..الفكرة بحد ذاتها كتخوف ومواجهة مصيرها معاه اكثر رعب...حتى انها ناااسية واش غاتكون معاه اليوم واول ليلة ليها معاه...طالعة وسارحة وفنفس الوقت كتشوف فدارهم حاسة براسها غاتوحشها بزاااااف...واش حيث اول مرة تبات بعيدة على دارهم بالرغم من انها كانت كتمشي عند عمتها وتبقى معاها بالشهر وكثر...ولا فاش سافرت مرة ل تركيا مع باها وامها وايوب..يمكن حيث كانت معاهم ماحساتش بالغربة...تنهدات وهي تحل باب بيتها وهي تحس بغصة فصدرها وقلبها بدا يضرررررررب بجهد حتى شدات عليه وحيث كانت سناء غاديا معاها لاحظاتها شدات تم وهي توقفها...

سناء : اهيا مالكي ؟

حبيبة"صرطات ريقها الي جف..وهي تغمض عينيها وحركات راسها ب لا بمعنى" : م ماليش غير سخفني الحمام...

سناء : ايوى را گعدنا بزاف...زيدي رتاحي شوي وبايجي ايوب يصايب ليك...

حركات راسها ومشات تكات فوق ناموسيتها...دورات وجهها على مخدتها..بدات كاتشم فوسادتها وفداك الفراش فحال كتقول ندي معايا ريحة دارنا...بالرغم من انها عارفة ومتاكدة غاترجع فاش يرجع راجلها المجهول ل المانيا وتجي هي حتى يقاد ليها امورها...بقات هكاك على داك الحال حتى دق باب بيتها وهي تنطق مزال على وضعيتها وحالها بكلمة "دخل"...

كان ايوب داخل هاز واحد الصندوقة فايدو واحد لاتخوس...عرفاتو هو وحدها سمعات منو قاليها نوضي...هزات ماهزات من النفس وطلقاتها بتنهيدة حااارة تشوي...ناضت وهي تجلس فالپوفة الي قدام كوافوزها...هكاك شعرها مصاوب بالبروشينغ سامپل تايكمل ليها هو المشيطة باش تسهال القضية مايبقاش يتسنى تا ينشفو ويصايبو...

ايوب : مالك بيديري بناقص ؟!...تا طاح الفاس فراس والستيلو خوا المداد وتزوجتي بداك زين الفتان منفوخ الكتاف وطويل البيدالات...ماعرفتو انسان ولا هولاكو...جيهتو مادزت كاع ليها خفت هي نكحب يسوط فيا...

حبيبة"هزات فيه عينيها" : عجبك ؟!

ايوب"بدا يرش ليها سبراي باش يبرد ليها وجهها وماتعراقش" : واهو زين را زيييييين يحنت ليا عشرين...مانكذب عليك بوگوووص وحرش...ايوى فعلو نتي تعطينا الخبار من بعد ياك بيعيشك معاه لهيه وبيتي تقراي تم وميخصك معاه خير وبفلوسو ؟! ايوى نتسناو منك الاخبار...

حبيبة : ماعجبنيش !!..

ايوب : ويلي ؟ ايوى شنو ياكما بيتي تراجعي ؟ راه وليتي مرتو مرطوووو اجدرة...بيتي تشوهينا والله يا بوك تا يعلقك عمي من قزيبتك...

حبيبة"ماداتهاش فيه كاع" : ماشي ستيل ديالي...ماعرفتش كايخلعني واخا زويين...وماشي مهم المهم هو نعيش معاه مزيان وانا مرتاحة ا ايوب هييير ستريس والخلعة وصافي...

ايوب"بدا يذهن ليها فالبرايمر" : مممم هي الخلعة...مممم.."يلاه بغات تخنزر فيه وهو يحنحن وبدا يطلق فالحلوق" سييير ياودي سيير الله يجيب تيسييير...هذا هو الحماااااق اطاق سماقاطااااق...خالتي مسمارة زوجوها لمسماار ولدو بينيس مشاااو لاسطنبووول قلبوها ليفيرپووول..

ضرباتها ليه بوااااحد تخنزيييرة تا سد ليها عينيها ب بيوتي بلاندر كيطبق ليها فالفوندايشن ليكيد....

ايوب : وطاااسماقاطاااق هذااا هو الحماااااق...سدييييي عينيك بييينتقبهم لمك...

يتبع...