محتوى القصة
الرواااج فالدار الداخل والخارج ماحابسش...دنيا عمرات والخبار وصلات توريا بنت المشاوري راها مرضاااات وفالسبيطار نعسات...هادشي كامل ماحساش بيه حبيبة وماسمعاتو وراها فبيتها ناعسة لقات راحتها فنعاسها حيث عياات بجهد وكابرت فالمرض...بدات كترمش فعينيها وتحرك كتحس بايد على شعرها كتدوز عليه بحنان واحد الثانية ولا اكثر ضنات راها فحلم وبالي هي فداارهم معززة مكرمة. وبالي متزوجات ماغصبات راسها فهاد زواج وهي دابا عادي وغادي تبدا قرايتها فلافاك...حتى كتحل عينيها كاتلقى الواقع المر ولكن ليدين لحنان ابدا ماااااشي حلم...
حبيبة"حلات فيها عينيها منفووخين بالمرض والنعاس..ونطقات بصوت مبحوح" : مامااا...
ناديا"تبسمات بحزن على حالتها على بالها جاتها سخانة وزاد حتى الي وقع لعگوزتها خربق ليهم الموازين والفطور ماجاش كسف العادة وخا را ماشي فطو ديال ال صباح العرس حيث مداروش العادة كاملة...خرج ليهم كلشي من جنب وخربق ليهم الموازين" : كبيدتي...
حبيبة"عوجات راسها فيها كانها كتاكد" : واش ماما نتي ؟!!
ناديا"تبسمات جابت ليها ضحك" : ههههه ولا بيتي هههه (يلاه بغات تستوعب وهي تسمع صوت لطيفة) على هي مك يا المجدامة الي كاينة ؟!
حبيبة"غمضات عينيها كتبسم كتنغم بصوت عمتها وماماها كتنغم بداك الامااااان كانها رجعات لوطنها وخرجات من مستنقع بداتو بالويل" : الله..مااااما عمتي مااااامااااا
ماشعراتش حتى ناضت وهي ترمى فحضن ماماها معنقاها من كرشها ومخشية فيها تا بداو دموعها كيدوزو...تخشات فيها وزيرااااات عليها توحشاتها فضرف 24 ساعة حسات براسها غايبة عااام وزيادة عليها..كتعنق وتجر فنفس باغيا تسنتنشق عبير ماماها..وتا ناديا خلاتها مزيرة عليها وكتدوز ليها على شعرها وتعاود شي عشرة دقايق ولا كثر كاع وهما هكاك تا بعداتها بزز غا باش تشوف وجهها وتقيس سخانتها واش باقا...
ناديا"كتفلي ليها فوجهها بعينيها" : شوية دابا ؟!
حبيبة"حركات راسها محاولة تغطي حاليا بينما تعرف اش دير باش تمشي فحالها وتضارح دارهم بالي وقع" : هممم..شوية...
ناديا : كي وقع ليك..
حبيبة : ماعرفتش احم..ي يممكن ضربني البرد فاش جيت من الحمام.."حطات ايدها فوق ايد ناديا محاولة تبدل الموضوع" فين بابا...فين معتز ووردة ؟!
ناديا : لتحت مع سناء فالصالون منصيبوش نبقاو بزاف هنا نهبطو لتحت باش نمشيو نشوفو عگوزتك كي بقات...
لطيفة : فين راجلك...
فين راجلك !؟ فييييين راجلك ؟ فين فيييين فين...جملة بقات كتردد فوذنيها فحال الصدى..ضربها ضو وبلاصة متغوت تقول ماتجبدووووهش ليا مابغيتوش كنكرهو الله ياخذ فيه الحق..وركات صحة على صوتها الحقيقي وزطمات على نفس وهادشي را بااان فوجهها وعينيها واخا تعيا تخبي...خذات نفس وهي تنطق بصوت اشبه بالمسموع...
حبيبة : ي يمكن مشى عند خالتي توريا...
لطيفة : وكي وقع ليها ؟؟ كنا معولين على الفطور تا گالت لينا للا سعيدة راها طاحت ووقع الي وقع...صدقنا جايبين ليك حوايجك الي تحتاجي هنا والكادويات هييير بسكات...
ناديا : ماعليش وقع المكتاب...الله يشافيها...
حبيبة : غاتمشيو ليوم فحالكم ؟!
ناديا : حتى لعشية...وضروري بنجيو عندك..تاتبغي تجي لدار..هانتي هنا تايمشي راجلك ياك..
حبيبة"دارت ضحكة مستهزأة ردات ليها البال لطيفة وحساات بيها كاينة شي حاجة اصلا من لول لطيفة ممرتاحاش وتاهما غييير دارو لخاطر لبنتهم الي بينات ليهم وجه الفرحة بامتياز...حركات راسها وصافي...
ناديا : بيخصك تهبطي ناس لتحت وكيسولو فيك...
حبيبة"بغات تحرك وهي تحس بوخز". : اااا...فففف
لطيفة : مالك ؟! "بسؤال وشك" ياكما صبحتي !!
حبيبة"حدرات عينيها ووجهها تزنگ"
لطيفة : وييييييل شيطااان البرهوشة ولات مرااااة هههههه...
ناديا : على سلامتك ابنتي..ياكما توعتي ؟!
حبيبة"رجعات كتفكر ديك الليلة وهنا بصح ماصبراتش ماقدراتش تبان عادية ماقدراتش تكتم الي ضرها حيث بصح عمرها تنسى ديك الليلة الاشبه بالرعب...هما كيضحكو معاها تا بانت ليهم كتبكيييي بالحس وتنخصص...خلعاتهم تا ولات لطيفة تقول اش قلت وناديا حسات بيها وقعات ليها شي حاجة...كتهز ليها فوجهها بغات غير تعرف اش وقع والو جمعات تنخصيص كااامل وحطاتو قدامهم الي حتى حسات بالسخفة وهي تلاح عنقات ماماها بجهد...
ناديا : يا بنتي مالك اش واقع راه مااامرتاحاش والله مامرتاحة واخا تتشوفين هي تنضحك معاك...
بزز باش قدرات تسكت وخلاوها تا تهدنات على خاطرها وهي تهز ليها وجهها...كتمسح ليها دموعها وتتشوف فيها وتاكد..
ناديا : ياكما كرفصك بزاف ؟!..
حبيبة"بقات شحاال كتشوف ف ماماها فحال كتحفظها..تا نطقات كتحرك فراسها" : اهء لا لا...غييير ماعرفتش خفت هاديك الليلة اهى خفت بزاف وخا "عصرات عينيها وهي كتكذب" واخا تعامل معايا مزيان فلول (هادي حقيقة) من بعد مابقيتش عرفت خفت خفت اهى...
لطيفة : دابا هي گولي واش صبحتي ولا باقي ؟!
حبيبة"حدرات راسها تا شوي قفزات على زغاريت لطيفة وعصرات عينيها كتغمض فيهم باش تسكت حيث كتحس بزاغاريتها كيفكرها بيه كيفكرها بالوحش الي تزوجات بيه وهاهي دابا على ذمتو...مراتو وهو غااايب ماشافتو من ديك الليلة لداااابا والي اراضيه مجهوولة تا من نمرتو طافية فاش كيعيطو ليه...واش مشى واش شاد طريق ولا كيفاش الله اعلم..
"بعد اسبوووع"....
سيمانة ديال ايام الله سبمانة داز فيها شلا وشلااا...مصيرنا نعرفو اش وقع فيها قبل ماشي ب فلاش باك وانما بلسان كل شخص عاش داك الاسبوع بالس داز فيه اش وقع واش عرفو على بشار وكي طرا ليه واش عرفو عليه شي حاجة ولا ما عرفو عليه...واش بصح دارها وقد بيها وخا را يشهد ليه الى قال الحاجة كيقد بيها...يوسف تماثل للشفاء وحبيبة واخا باقيا مابراتش من تحت الا انها غاديا مزيان..كيفاش قنعو دارهم بغياب بشار واشنو الاسباب الي تاني عطاوهم وكيفاش رقعو واشمن تنوفيق دارو واش نوعرو ولا ناس بدات تعيق بالغياب ؟!....
خرج من دوش لاوي على نصو فوطة بيضة كيقطر بالما سخون وشعرو هابط على عينيه كيقطر داير فوطة ورا عنقو كينشف بيها حتى دوز على العضة الي بقى اثرها فوق كتفو حط عليها صباعة كيقيص فيها وجهو مخنزررر ماااكيبشر...هز سبارادرا وحطها فوق منها...
تگولي خلات ليه لاثر ديالها فيه...يتفكرها ويبدا يسب فالي جرا ويتفكر ما جرا ليه...ومادار فيها...لا هو ناسي ولا هي ناسية...لبس سروال دجين كحل...رش ديودرنت عليه ولبس تريكو قطن فيه صديقات لفوق خلاهم محلولين على صدرو...صونا ليه التيليفون هبط عينيه ببرود وهي تبان ليه نمرة باسم "عباس"....خلاه تا صونا على خاااطرو تا قرب يسكت وهو يطلق الخط ونطق واحد صوته مشحرج...
عباس"بالفارسية" : وصلتي ؟!
بشار"بالفارسية" : دخل فالهضرة...
عباس : التسليم غايكون ليوم..وجدتي ليهم داكشي...
بشار : توصل الوقيتة نكون تما...ماباقيش تبرزط عدو ربي...نفرگع لملة مك راسك...
قطع عليه ومشى كمل اش كيدير لبس تقاشر وبروتكان كحل رش بارفان ديالو الي مولف...مشط شعرو رجعو لور وقفو وفيكساه ودوز على لحيتو الكثيفة بريحة...داز لكوزينة دار ليه قهوة كحلة مقطرة...هز الكاس ومشى لبيرو ديالو او المختبر الصغير...هز الملف الي فيه تخطيط باش يعطيه ليهم يرسلوه لمختبر عابادان ديال مصفاة البترول...هزو وجلس تا شرب قهوتو وهو كيشوف فالمخطط وكيتنغم بالقهوة وزاد تا السيجارة الي شعل...نمرة بدلها فاش وصل لبرلين...ماساق لخبار لحد ماتسوق لحد كانه تولد من شجرة وماعندو حد...تا من تفكير ماكيفكر فيهم...كانه صفحة وتقطعات فحياتو...كمل القهوة على خااطرو وطفى الكارو فالطفاية...وهو ينوض كيهبط فتريكو كحز الكرسي ومشى الكوفر فور..حلو بالكود والبصمة تا جبد منو فردي مرخص دارو ورا ضهرو ونزل عليه تريكو...هز الملف وخرج عندو دار سفلية بجريدة صغييرة قدام الباب...دخل لسيارة وتگعد تا جبد الفردي لاحو فالمجر هو والملف وسدو...ديمارا وكسيرا غير هو زاد بشوية وقفات سيارتها قدام دارو..كانت كتهضر فالتيليفون مع ختها...
هانزاده. : مازال ما قطعتش فريال...
فريال : الموسم راه الاسبوع جاي..راكي عارفة الذكرى ديال الحسين...
زاد مع طريق گلبو كحل من جيهة المغرب وتريكتو...خلا ليهم مراة فعنقهم وعينيه مزال حاقدين...شربوه المرار رجعو بزز ونكسوه فمرضو...هادشي كامل را ميشفع ليه وفنفس الوقت ممكن تنصفيه...گرحتو ما يعلم بيه غير الله...صفاها لباه وراه واقف على رجليه...الي تحن عليه كحلات القلوب عليه...الي تحط عليه ايدها وتظعي ليه فمرضو بالدعاوي زادت عليه...بحر شمتة رجع راسو شيطان فسيفة انسان وتعدى على البريئ والمشرار وجمع كلشي دقة وحدة...هزهم تللسما عيشهم الفرحة وخبطهم مع لارض عيشهم القرحة....
هز فيه عينيه كان شخص فعمر خمسين سنة...طبيب نفسي اختصاصو وخبرتو خلاتو كفء انه يبقى فالمانيا ويمارس مهنتو فيها قرا فيها تاهو وبقى فيها...حيث مغربي الاصل والماني الجنسية....ربع ايديه وشابك صباعة كيشوف فيه من نضاضر شوف...
هو"كيهضر معاه بالدارجة" : كاتحس براسك مزيان هاد الاسبوع ؟!...
بشار"حاط رجل فوق فخدو مفرقهم..كيسمع ليه ويحك فحليتو..تا حيد ايدو نطق هو لول" : مزياان..."وهبط ايدو بجهد فوق ركبتو"
هو : ماحاسش براسك باغي تگول شي حاجة كيف عاودتي ليا اخر مرة ؟!...
بشار : نگول الي مبرزطني ؟ مكاينش...نگول الي فارع ليا راسي.. Nur Epilepsie(الصرع صافي)...
هو : جيتي هنا بمرة ؟!...
بشار"حرك راسو وربع ايديه تا زادو تنفخو درعانو"...
هو : مزيان..خوك ؟!
بشار"ضربو فالعرق..تا تورمو نواضرو وعينيه ولاو حمرييين..وخرج لسانو طواه وعض عليه بجهد تا حس بمذاق.د.م في فمو...وسكت مجاوبش"...
هو"حدر راسو ودار ايدو على ذقنو كيشوف فيه وكيتسناه هو يهضر..ماهضرش خلاه على راحتو عطاه وقتو الكااامل الله يجعلو مايدوي تالغذا...حتى نطق بشار وعينيه كيشوفو القدام وكيحك فلحيتو ببطء وبختووورية ثقيييلة"
بشار : گول نتا واش يجي فبالك هادشي ؟.."غمز بعينو" خوذ مني الهضرة وعطيني المفيد كيف ديما...
هو : اتيني...
بشار : تزوجت...جابوها ليا صغيييرة بزاف.."عوج راسو وهو كيحك بلحيتو وغمز تاني"...
هو : عجباتك ؟!..
بشار"ضحك بجنب مستهزأ" : ماعاقلش عليها...شي تشاش فراسي من جيهتها...شي حاجة فبالي ملي رسلات ليا كحلة الگلب الي ولدتني...(سكت تاني ورجع كمل)...وازنة بالزين..حسب درت ليهم الخاطر "بقى شحال ساكت واحد صمت ساااد غير معقول..عينيه فنقطة بعييييدة شي حاجة كتجي فوذنيه "عافاك راين باقة صغيرة" الجملة الوحيدة الي عاقل عليها...وهو يعاود نطق....
بشار : وتخيل معايا نتا (شير بصبعو جيهة صدرو معنى لراسو) ....تكرفصت على مرتي "سرح كف ايدو وهو فنفس الشوفة..تا هز فيه عينيه مخرجهم بالغدايد على الي وصل ليه " ومانادمش. ؟...
هز الطبيب عينيه فيه كيتاكد من كلامو وهو كيشوف فيه...حجبانو وشوفاتو بواحد طريقة يخلعو كتقول هذا تقيسو يتيري فيك..وفنفس الوقت كيتصرف ببرود ويهضر ببرود عكس شنو فلداخل ديالو...متناقض بزااف لدرجة ماثيقش بيه مكتوقعش شنو ردود الافعال ديالو واش معصب ولا عادي...واش هادئ ولا هايج...شخصية معقدة صعيبة قوية. وغاااامضة بزاااف...
محمد"الاخصائي النفسي" : علاش مانادمش ؟!..مكاينش شعور الندم ك رد فعل مثلا !؟..فسر ليا شنو المعنى بالنسبة ليك ك بشار..
بشار"داير صباعو زوج تحت فمو كيحك بيهم ب بطئ وكيسمع اش كيقول ليه..حرك راسو ب نفي بطريقة بطييئة" : ماعنديش علاش ندم..الي وقع كان بلان من بلاناتي.. هي ولا غيرها كان بلان واحد...شكون گاليها تقبل بواحد ماعارفة عليه والو من غير "مبروك"...ماعلى باليش بيها ولا بغيرها....درت الي درت ولحتو ورايا...مانادمش "الندم" مكنعرفش ليه ماشي فالقاموس ديالي...وماعندو باش ينفعني...و قااصح حسن من كذاب...
محمد"كيحرك راسو" : وعلاش نتا درتي هادشي شنو سبب ؟!..
بشار : عدو ملتي الشمتة والكذوب....
محمد : بهاد البساطة كاملة !!..
بشار"حرك راسو...سكت لبرهة ورجع استانف كلامو" : دارو ليا علاش...الربع من عمري وانا كنترجى رضى الي ولدتني..جات بين يومين تشهيت ليك العادة...
محمد. : على حسب مكنعرف فالعادة عندنا فالبلاد..تخطب ليك ولا تشوفك مع مراتك !؟..
بشار : شي عادات عندنا فديك البلاد نص فيهم مسلكاهم...
محمد : وشنو ناوي دير تخليها تما !؟..
بشار"عاود ربع ايديه ورجل فوق رجل" : اشنو گلت ليك على مجيتي لهنا ؟!
محمد : لحتي كلشي وراك مرة وحدة يعني رجوع مكاينش بالمرة...
بشار"عوج راسو ببطء بمعنى تماااما"
محمد"سكت شحاال كيحرك فراسو وكيوزن هضرتو..خلاه عاود ليه شحال ما قد..شوية عاود هضر وهو كيكتب" : ماكرهتش تفكر فبعض القرارات الي خذيتي..نتا كانسان باغي يكون طبيعي شوف شنو الي طبيعي وواجهو حاول ما امكن تستعمل اسلوب "المواجهة" باش تقدر تولف وتعايش مع المشاكل الطبيعية والحياة الطبيعية...لانه حتى احساس "الندم" تقريبا شبه منعدم عندك وهادشي ماشي طبيعي...نتمنى تحاول تفكر شنو الي خاص بشار شنو خاص يتبدل ف حياة بشار..غانعاودو اعادة الهيكلة ولكن غير انا ولا الصديقة الي كانت معاك ماهي الا شخص كيدير شنو بغيتي ماشي عكس الي بغيتي...غادي تحاول تدخل مع ناس جداد "الانعزال" ماشي فصالح ديالك وصالح صحتك لان حاليا او انا حاليا كنشوف شخص يااائس من الحياة من نهار الواقعة عايش على سبب واحد وهو "رضاة الام" حاول دير اسباب تكون اهدافك..ماعليش مزيان الي عاودتي رجعتي عندي من بعد غياب سنوات...وهادشي مفرح فنفس الوقت..
ماجاوبوش قال الي قال وهو ينوض كيقاد فحوايجو من اثر الجلاس...حرك ليه راسو وضار خلا الطبيب كيشوووف فيه...طبيب براسو بعض المرات كتهرب ليه الحقيقة معاه....
نزل من العيادة الي كانت فاحد الشوارع المركزية...ركب فسيؤاة واول حاجة قبل ميديماري شعل سيجارة يهدن بيها راسو الي حس بيه بدا يفرفر ليه حيث خذا ساعة من وقتو وهو كيعاود وهو ك شخص قليل الكلام الهضرة الكثيرة كضرو فراسو...تا ضرب فالكارو نص وهو يديماري وزاد شاف فساعة فالمعصم ديالو لقاها ربعة ونص...خرج من برلين المدينة وشد الطريق لمدة ساعتين وهو غادي حاس براسو كيضرو ومتمني متجيهش النوبة ثاني حيث لا جات ممكن جدا تمنع عليه السياقة وهادشي لحد ساعة ماعالمش بيه طبيب ديالو الي متابع حالتو...مد ايدو لمجر جبد فنيد ديال راس شربو دغيا ماكاملاش دقيقة راسو بدا يتهدن من صداع...
وصل لواحد المنطقة بعيدة بساعتين على فين ساكن..دخل مع واحد البيست والضلام بدا كيطيح شمس غربات حتى وصل لواحد الفيلا صغييرة..واقفين قدامها ربعة ديال ليگاركور..وقف سيارة وهي تبان ليه سيارة هانزاده ماعارش اهتمام عادي بحكم ولفها خدامة معاه عندهم نفس تخصص فالهندسة وبزوج بيهم خدامين حتى خارج القانون..
تحل الباب وهو يخرج شاب فعمر 32 سنة طوييل ملامح حروفو كحليين وشعرو كذلك داير غير مسطاج فقط طويل...الاصل ديالو اير.اني من طه ران...شاد التيليفون فايدو شافو وصل وهو يتبسم وحرك ليه راسو...
مد بشار ايدو لمجر جبد الفردي دارو وراه فضهرو وغطات بتريكو..جبد الملف وواحد USB..خذا وقتو الكااافي مثقل بزاف فحركاتو..عاد نزل من طوموبيل وتم غادي كيهز فكمايمو عند المرفق..حرك راسو ل عباس ودخل وراه تا وصل لواحد البيت فيه مكتب كبييير وطابلة دائرية ديال الاجتماعات...غير سافتو هانزاده وهو يضرب قلبها بجهد تا تزنگو حناكها..توحشاتو بزاف من نهار فضى معاها وجا لمغرب ماشافتو...
هانزاده"نطقات بهمس معوجة راسها فيه شويي" : عزیز دلم (حبيب قلبي)..
بشار"لاح ملف ويو.اس بي عاد جلس فالكرسي وشد تيليفونو كيبقشش فيه ماعلى بالوش بشكون كاين..واثق فراسو اش جايب واش غايعطيهم...كونه نااابغة من نوابغ الي تهزة وتختارو لذكاء ديالهم فهاد المجال ديال الهندسة الكيميائية...بشار منهم وهو تقريبا العقل المدبر فهاد تخصص فهاد الخدمة الي خدامها خارج خدمتو العادية فشركة ديال وقود الطائرات.."
بشار : خدمتكم كتوصل فالايمايل ولا مع عباس ولا مع السيدة "شير لهانزده"..قويتو عليا الاجتماعات..نقصو عليا من هادشي ديالكم مامساليش للغيط ديال خدمتي العادية...فهمتيني ولا نحبس عليكم هاد الزبل كامل..بغيتي تبدا دير على جد مي تمشغيل المافيات ديال اورو (€)..حياتي ساخيا عليا خلوق...
الاسبوع الي داز طرا فيه الي مكانش يطيح عالبال...من داك النهار بقات معاها ناديا نهار كلو هي وعمتها بقات شوية فالبيت حتى ناضت بحجة تمشي تبدل وتدوش لانها عرقات بزاف بالسخانة ومنها نيت تهرب من امها ماتعيقش بالي جرا ليها واخا را تقريبا حسااات بيها بالي بيها شي حاجة نيييت.. ..
"فلاش باك"...
ناديا"تسناتها تا دخلات من دوش" : حسيتي براسك شوية ؟!
حبيبة"حركات راسها بتعب...ودازت ل فاليز ديالها حلاتها وخلاتها محلولة كتهز منها زيف لشعرها حيث باقي فازگ"
ناديا : مابيتيش ديريهم ف الماريو ؟!
حبيبة"بنفي" : لا هي خليهم هنا...فحال والو نرجع هاد اليومين...
ناديا : ويلي علاه ؟!
حبيبة"تنهدات بحرقة ماقدراش تقول اش كاين حاليا" : يمكن نرجع باش نمشي لافاك...ب (تا بغات تنطق سميتو وهي تسكت) هو مغايكونش هنا وبيخصني نرجع...
ناديا : حبيبة !! "صغرات فيها عينيها وجلسات فوق ناموسية وطبطبات ليها حداها" اجي بنتي هنا نهضر معاك...
حبيبة"غمضات عينيها ماقادراش على شي جواب حيث مغاتقدرش تعرف تكذب مزال..بنت فسنها كتعيش مسؤليات كبار عليها بزاااف..مع قالت بسم الله بدات كتواجه فيهم !!..صرطات ريقها وناضت لعندها" : نعام اماما...
ناديا"حطات ايدها على حنكها كتمسح عليه...لحد ساعة ما انتابهاتش ل لصاقة الي بين عنقها وكتفها ديال العضة والاثر حيث مغطية ب البيجامة". : حبيبة اش واقع ابنتي راكي مامهنيانيش...ياكما دار ليك شي حاجة ولا متفاهمتوش !!!..
حبيبة"سكتات شحااال..وجهها تقريبا طفى...ماشي حبيبة الي كيعرفو..ماعرفوش راها مكتمة على ماوقع ليها حيث خايفة يطيح باها وهادشي ابدا ماتقدرش تحملو..تحمل الي جرا ليها وباها متقدرش حتى تفكر...تنهدات تنهيدة كبيييرة عليها..وبدات تهضر فحال الى كتهضر بثح مكتكذبش" : م ماولفتش اماما..ماولفتش هنا ومغانقدرش نولف..هاد البلاصة ماشي ديالي..واخا رضيت بقراري انا واقتانعت مكانش يحساب ليا غانجي لهنا ويوقع ليا هاكا..
ناديا : علاه بتبقاي هنا بزاف ؟ را هيي يمشي راجلك وبترجعي..وزاديون را دار ناسك هادو ونتي الي قبلتي بيهم حيث كبرو بيك وقنعوك...ياك نتي الي بغيتي وحنا ملي شفناك فرحانة ومقتانعة موقفناش فطريك وخا را باباك ماساخيش بيك...
حبيبة : ماولفتش وماولفتوش..مغانتفاهموش حيث هو فشكل كبيير عليا بزاف...كنت حاسبة شكل وصدق شكل اخور...كايغبر بزاف مكيبانش باش نولف عليه ونهضرو...(بكذبة) كيخدم بزاف كيف غاندير نتفاهم معاه ؟..."سكتت وعاود نطقت كتحرك فراسها" ...وخا هكاك غانحاول نولف غانحاول...انا هييي گلت ليك باش متبقاش ف قلبي اماما..وعاافاك هادشي ميعرفوش بابا اه بيمرض تاني ويهز ليا همي وهو كيتقلق الى غير كحبت عاد الى شافني هاكا...
ناديا"تنهدات" : اودييي باباك هاز الدقة من شحاال هادي..را هييي دار ليك خاطرك وموقفش فسعدك وكاان...اما تاهو دقتو هازهاااا...مسحي دموعك ولبسي عليك شي حاجة وهبطي ناس لتحت كاينين بيقولو عگوزتها طايحة فالفراش وهي لفوق سادة عليها...
شافت تا عيات وحركات راسها...لبسات عليها ونشفات شعرها مزيااان وجمعاتو وهي تنزل هي وياها لتحت ماقادراااش تهضر مع شي حد لبسات قناع الجمود وغير مخشية جنب امها الي داتها لبيت فين جالسة عيدة ومليكة وغير مالين دار...بانت ليها ختها جات تجري لعندها عنقاتها بجهد توحشاتها بزاااف..
مليكة"هزات فيها عينيها شافتها مخشية ف ناديا وهي تمطمط ب فمها ورجعت حدرت راسها."
عيدة"شافتها وشيرات ليها حداها...هازة لهم تاهي لانهم لحد ساعة ماعارفينش اش واقع" : دوزي كبيدتي دوزي حدايا..
حبيبة"فحال الى مابقاتش حاملاها كتحس بيها كتكذب ولا تنافق شي حاجة فيها لداخل هربات منها..جات تجلسها حداها وهي تسبق امها جلستها وجلسات هي حدا امها وهادشي داز على عينين مليكة وكريمة الي شافو فبعضياتهم وهي تنطق مليكة بالحس"
مليكة : اويلي تحلگ فيه..."نغزتها عيدة من لتحت تسكت حيث سمعتها..مطمطات بفمها وهي تدور عينيها وسط راسها وضارت لهيه وعاااود نطقات" ايوى شلا على تبعكيك...
عيدة : سمحوو لينا الحاجة على هاد المجية مكان هادشي عالبال..الله يحد الباس وكان...
ناديا : الله يالحاجة شهاد الهضرة...الله يشافيها راها عگوزة بنتي وبلاصة ميمتها ماشي هضرة هادي الحاجة...
حبيبة كتسمع لهضرتهم ومع كانو فالصالون لتحت وكانو تا شي عيالات جاو يسولو وهي تهز عينيها ب لا شعور بان ليها باها داخل مع عبد القادر ورضوان...ماحساتش براسها تا ناضت بجهد وهي توعت تا غمضات عينيها...
حبيبة : ااااا...ممم...
سعيدة"جايا داخلة هازة صينية اتاي" : الله يا بنتي غا بشوية عليك...
لطيفة : مالك ؟ (معارفينش بالي دايرة غرزة)...
سعيدة : ناضت بجهد واقلة...بشويا عليك..
حبيبة"حسات بموس داز فيها من تحت تا بقى توزويييز من تحت..وهي تحرك ليهم راسها وشدات فايد امها كطمنها" : هييير دخت اماما..ففف..بغيت نمشي عند بابا...
مليكة : ويضهر ليا راه مع رجال ابنتي جلسي دابا تشوفيه...ولا يعيط ليه حسام وخرجي شوفي فشي صالون...
عيدة : نوضي دروك نابي عليه ا سعيدة ولا صيفطي حسام وديها تشوف باها ماعليش الواليدين وحشهم صعيييب...سيري بنيتي شوفي باك....
مليكة : نوضي ودي ليهم اتاي لصالون هنا مكاين الي يشربو همنا هم وغم تسدات لينا شهية...
ناديا : لا مكاين لاش مشاركين طعام فالفرح وفالقرح نتشاركو معاكم تاحنا الهم والغم اللا مليكة...
العلاقة الي بين حبيبة و مولاي حفيظ علاقة قوية بزاف..علاقة وصلات لدرجة تضحي براسها باش باها مايتضررش...حيث تضرر وبزاف..مرص فصحتوو وزاد حتى الحمام سدو نظرا لكثافة الديون الي تراكمات عليه...وباش مايضيعش ليه كلشي حيث غايمشي فيها..قدمات راسها ضحية لهاد الزواج باش يخففو عليه لان الدين من جيهتهم كبييير الى نقص غايتخفف على باها النص واكثر....
عناق داز بينها وبين باها طوييييييييل...طويل لدرجة حس بيها مغيرة بزااااف...ولدرجة حسات براسها اعوام ماشافتو...طول المدة الي جلسها وهي مخشية فيه مابغاتش تحيد من حضنو غير مزيرة عليه وحداها خوها...هو كيهضر وهي كتحرك راسها بدون متجاوب...
م.حفيظ : اهيا القشة شفتك بيتي تندميني عطيتك...
ع.القادر"ضحك بلا خاطر" : هههه والحاج تا ماعجبناكش شاي..
م.حفيظ : حاشا ههههه هي هو شفت بنتي هي بعدات على دارهم مرضات ليا...و ماسخيت تبعد عليا...
ع.القادر : وهادي هي سنة الحياة...
م.حفيظ"ضحك كيحرك راسو وكيقلب فالارجاء" : فين هو بشار...ماشفتو من العقد...ياكما مشى عند الواليدة الله يشافيها..
حبيبة"قلبها سكت تا حدرت عينيها وعصراتهم مزيرة على راسها ماتنهارش..."
ع.القادر : ويضهر ليا ياك ابنتي "شاف فيها كانه كيترجاها ماتقول والو حتى يفكو هاد الحريرة"..
حبيبة"بقات تشوووف فيه بشوفة غريييييبة...ورجعات حذرات عينيها ومانطقات بوالو فقط حركات راسها مكرهة بالمعقول.."
بقات هاكاك مع باها نهار كامل حتى ناضو مستاذنين كاملين باش يمشبو عند توريا حيث قرب وقت زيارة معاها غير ربيعة فالسبيطار....
داز داك النهار بالكشايف عند حبيبة بزز باش قدرات تكتم فخاطرها ولكن الي فبالها فبالها..تعيا تكابر قرارها واحد وخذاتو حيث صعيييب تبقى مخبية هادشي كامل صعيب على وحدة فسنها...يوسف طلعات عندو سعيدة وبقات معاها ومعاها ملي مشاو دارهم اما لاخرين كلشي رجع ثاني عند توريا الي ماهضراات ماتكلمات دارو ليها جبيرة وخلاوها فالانعاش تاتاكدو ان الضغط استقر...
حلات عينيها على صوت الرواج على برا صوت البهايم وصوت الكرارس دايزين حيث هاد نهار ديال السوق الاسبوعي ناس تراوج تما..هادشي هي مولفاتوش جاها فحال الانزعاج..مولفة الهدوووء التام مولفة الفياق بالخااطر...يلاه جات تستوعب راسها وهو يتحل الباب...ودخلات كريمة بلا موجب شرع...
كريمة : ازغبية باقيا ناعسة !!
حبيبة"بصوت مبحوح" : كيفاش !؟
كريمة : نوضي هههه نوضي را عدوزتك جايا دابا فالطريق..
حبيبة"بقات ترمش فيها" : علاش خرجات ؟!
كريمة : اويلي عدوزتك (كيقولو عدوزة ماشي عگوزة) خارجة من بيت الخطار (الانعاش) ونتي ناعسة..نوضي دابا يعيبو عليك هاد القوم ديال هج گج..عندنا عيب الكنة تبقى ناعسة والعدوزة مريضة...
حبيبة : مافهمتش ؟ حتى انا باقا مريضة...
كريمة : ياويلي را داكشي عااادي انا فصباحي نضت ندك وندردك..."دفعتها بمزاح ولكن دفعة كانت مجهدة تا وعتاتها فدراعها" تي نوضي لبسي ووجدي تجي خالتي تصيبك ناعسة يبقى فيها الحال...نوضي را عيب راني فحال خويتك ديريني صحيبتك كاااع هههه...
بقات حبيبة كتحك فدراعها ماداتهاش فهضرتها بكثرة ماحرقها دراعها حيث بصح وعتتها وكريمة باسلة شوية ومزاحها ناقص...ماحاملاش تهبط ولا تشوف شي حد ولكن هي حد ساعة كتشوف راسها خاصها تهبط ودير الواجب ومنها نيت تشوف الوضع كيف داير باش تقوليهم اش بغات...قلبات تيليفونها الي جابت ليها ماماها لقات ساعة السبعة باقي الحال وهادي صابحة عليها كتقول متصبحيش ناعسة !!..فهاد الحالات كتعصب وتعصابها خايب ولكن هي حالتها اصعب من انها تعصب..همها هم...ناضت بشويا تا توكضات كتحك فعينيها خرجات لدوش دنيا خاوية تما كتسمع غير رواج لتحت ديالهم...غسلات وجهها بجيل نيطوايون وحكات سنانها وطرفات حالتها مزيان بالمعقم وتوضات بدوا وخرجات لبسات بيجامة ساتان فالبيض فيها وريدات حمرين كتمشى بشويييية ووجها شاااحب...لبسات بانطوفتها وهي تهز تيليفون دوزات لسعيدة...
سعيدة : ابنتي...
حبيبة"كتحك فعينيها ونطقات محرجة بصوت بح" : بغيت نهبط وحشمت...
سعيدة : غا هبطي بنيتي الى قدرتي كاينة غيير انا و كريمة و"شافت الحسنية داخلة شحال هادي مشافوها حيث كان مسفرها ولدها عند واحد سيدة من عائلة هي الي حنات فيها وكاتجي عندها واهتمات بولادها فاش تولدو" وها حسنية جااات ههه...
حبيبة : شكون حسنية !!
سعيدة : واحد الفنة تعجبك تعجبك...وكاينة لالة هاهي حدايا هبطي شربي اتاي گالت ليا ماماك كتشربيه فالفطور...
قطعات معاها وهي تبقى واقفة مترددة...شافت تا عيات وهي تخرج كتجر فرجليها ومشيتها عيانة...تا وصلات لداك البيت الي دخلات ليه عند يوسف الي هو بيت توريا...حتى تحل وهو يخرج منو غير سافها وهو يبتاسم واحد الابتسامة كان كيديرها غير لبشار ابتسامة عريييييضة تا بانو ضراصو تا ضحكات ليه تاهي بلهلا يطريه ليها...
حبيبة : يوسف !! صباح الخير..كيف صبحتي ؟
يوسف : اباس اباااس...شكرا شكرا..على الما شكرا على بزاااف..
حبيبة"عينيها غرغرو" : ماشي مشكيل...غير كون لباس الله اودي..
ماحساتش بيه غير وهو مقرب حط ايدو على كتفها وطبطب عليها كيضحك كانه رتاااح ليها بزاااف...تبسمات ليه فعز حزنها وهمها وبادلاتو تاهي وهما ينزلو بجوج تا وصلها لصالون فين جالسة عيدة وسعبدة اما لاخرين كلشي مشى لشغالو والبقية عند توريا جايبينها من سبيطار...
الصباح مكان تقريبا تاحد حيث ناس كل فشغالها...كاين الي كيجي تا يوذن العصر ولا الي يسالي شغالو وكاين الي يجي يديرها حجة وزيارة يتغذا معاهم...هاد الصباح كانت دنيا خاوية فاللول مرتاااحة حبيبة لحد ساعة..عقلها مكيفكرش يسول على داك "المجهول" بالنسبة ليها و "بشار" بالنسبة لينا حيث فقرارة نفسها وفبالها انها صافي النية كاينة والقول كاين خاص الفعل...تا شوية سمعو صوت سيارات وحدة ديال راجل مليكة وثانية ديال هاشم...ناضت كريمة كتولول وتلالي على خالتها الي خرجها هاشم وربيعة شادين فيها هازة ايدها ب سمطة دايرين ليها جبيرة ديال الفدع...
كريمة : واخالتي هاااا وما ديالك يا كبيدتي...وتي كي طرا ليك وجرا ليك ياا خالتي اهى اهى...
توريا"حركات راسها كتربت عليها وجهها كيما هو خال من اي تعبير" : ماعليش كتاب...وتكتاب عليا الهم مع ولاد لحرام..ماعليش..سكتي كريمة من اللغيط وتعداد..راني باقيا برجليا لا تفايلي عليا..."بجهد تا قفزو ورضوان جر مرتو" سكتييي...
صرطات كريمة البكية وتكحازت...جات تشدها ربيعة بعدات بلباقة وخلاوها تدخل على خاطرها...لقات عيدة جالسة وسعيدة الي واقفة سلمات عليها...جا يوسف سلم عليها عنقاتو كتبوس ليه فراسو وتقيس ليه فنفس الوقت سخانتو..دخلو كاملين وراها...هزات عينيها ف حبيبة الي وقفات دير الصواب وعينيها دابلين...قربات لعندها سلمات عليها من الحنك وباست ليها ايدها حيث تربية حبيبة الي كتخليها دير هكاك ماشي خوف..حدها حركات ليها راسها وغمضات عينيها وحلتهم...
عيدة : سيري رتاحي فبيتك ابنتي سيري الي كانت يكون ليها الله...
توريا"تنهدات" : خليني غا هنا النعاس هلك ليا جنابي...فين اشراق...
اشراق"قربات لعندها" : هاني مي...
توريا : سيري علمي خوالك گولي ليهم راني جيت لداري لا يعودو يلحگو عليا لسبيتار (سبيطار)...
حركات اشراق راسها وطلعات بزربة لبيت تعيط لخوالها...جلسات توريا فالبيت هازة ايدها وحبيبة لهيه ماداويا ممكلمة..الحسنية شافتها ورجعات خرجات فحالها تلعب برا...بقاو جالسين معاها ويسولو فيها كاملين تا ناضو كل يتدهى فشغالو...
توريا"شافت فحبيبة" : كي بقيتي نتي شوية ؟!
حبيبة"حركات راسها"
توريا"بقات تشوووف فيها وتعض فحنكها من لداخل..هضرة ولدها مزال كتزنزن ليها فراسها...عرفاتو حلف ودارها ولكن كي غادير تواجه مع الناس واش دير تخبي شوهتها...عيدة قشعتها ساااهية فحبيبة وهي تنطق.."
عيدة : الي كانت يكون ليها الله توريا...تبتي ورزني ويكون خير...طلعي لبيتك لا تبقايش هنا...تايجيو وهبطي عندهم...
توريا : الي نطولوه نقصروه الالة..."شافت فحبيبة" طلعي بنتي لفوق هاني جايا عندك نهضر معاك...
حبيبة لقاتها من الجنة وناس...خافت يكتر بنادم ويجيو وهي متدعق...ناضت مستاذنة ومشات بشوية عليها..حاسة بشي حاجة ومتمنية انهم يقولو ليها ماكاين نصيب وتمشي فحالها...مهنية من جيهة الوحش الي عمرها تشوفو ومهنية وفرحانة على باها الي غايتهنى من هادشي...
توريا"ضارت عند عيدة ومليكة" : ولد لحرام راه هضر معايا البااؤح فالصباح...زاااد مع طريگ وخلا ليا علكة فعنگي..وحل ليا مرتو وزاد ورضني ضحكة وبغى يردني شوهة وسط دوار وحبابي وتكتر عليا الهضرة...كي طرا وجرا تا عرف بحيلتنا انا وياك ؟! ماهامني...دارها بينا وشمتنا وزاد تكرفص عليها صبحها وزاد مع طريگ وحلف بحلوفو مايرجع لهنا..."خرجات عينيها وفمها يبس" على اخر ايااامي يرجع يديرها بيا المسخوووط...على اخر ايااامي نرجع ضحكة ثاني...على اخر ايامي واحد فولاد كرشي وماخرااات يگوليا واخا يشهدو ليك مانجي نشوفك...قراااو حسابي الالة وعلموني باشمن وجه نشوف فخوتي وعلى حالة دار ليا "دموعها نزلو" باشمن وجه ؟!..
عيدة"عارفة حيث علماتهم فاش سافوها فسبيطار...سكتات ماهضرت حدرت راسها هكاك"
مليكة : گلتها ليك وماسمعتو ليا...الي دارو فيكم غزا...هبجتو ليا راسي وحدرتو ودرت ليكم خاطركم فالخطبة وجواج !! ياك گلت ليك شوفو ليه وحدة من بنات دواور تا لا خلاها ليك واليها مايكون ليهم كلام مولفييين بهادشي...عارفين بحق الجواج والهم ديالو صبارات..نضتو خضتو ليه هاد المبعككة شوفي تا البيجامة الي لابسة مصاطتها تهز وتحط فيها والعزارا غا موجودين هنا...وليتو تحسبو حساب ل واليديها اش يگولو !!..
عيدة : نگول ليهم اش كاين نيشان...والبنت ماعندها فين ماشا (ماشيا)...دير وقت عام ولا عامين وصيفطوها فحالها...اش نگول دارها بيا وانا مقصودي زين امليكة بغيتو غا يتجوج ويدير وتادو ...كذبت ؟..."عينيها غرغرو اصلا ديما كيدوزو ليها بدموع" الي قصدو شريف ولا عايب فهاد الوقت !!...
توريا : وجهي فضل ليا من ولد لحرام الي حطو ليا فتراب...لهلا يجعلو يرجع وجهي تانا ماساخي عليا نوريه ليه..."ناضت وقفت" ماحد دنيا خاوية لالة زيدي نهضرو مع مرتو نشوفو حل معاها...
ناضت مليكة معاونة امها وطلعو ل بيت عند حبيبة وهما عارفين اش يقولو وهادشي فخبار حتى عبد القادر وخا مكاينش...حلات توريا الباب بايدها صحيحة ودخلات لقاتها جالسة...غا شافتهم وهي تنوض...
توريا : جلسي بنتي جلسي نهضرو معاك...
ريقها نشف وهي كتشوف فيهم باغين يهضرو يقولو اش كاين....
عيدة"جلسات حداها ومليكة جابت كرسي ديال كوافوز...لتوريا جلسات عليه" : بنيتي الي دارو فيك ولد ولدي مافيه ما يتلبق..مانجي عليه مانجي ضدو..وكي گلت ليك مسحيها فيا انا راااضية عليك...
توريا : عارفاك ماباغيا تشوفيه ماتسولي عليه...وهذا حقك الي درتيها حقك...شحاال شكرنا فيه وشحال زيناه وهانتي تشوفي هادشي الي عطى الله...
حبيبة"نطقات بصوت مشحرج" : مافهمتش...ومابغيتش نعرف فين هو...مابغيتش هادشي الي وقع ليا يعرفو بابا وماما حيث غايمشيو فيها..."هزات فيهم عينيها مدمعين" وانا عييييت اخالتي نخبي..عيييت نغطي على غيابو كل مرة يسولوني فين هو اش بنگول ليهم ؟!...اش غادي ندير فاش يعرفو...
مليكة : ماشي واجب يعرفو ابنتي...نتي راكي وليتي مراة..والمراة خاص تكون صبارة وتغطي على راجلها...الديور فيهم مشاكيل وتاوحد ماخطاوه فهاد زمان...لجمي فمك على عيبك وعيب راجلك...
حبيبة : مافهمتش...
توريا : ولدي خطبناك ليه وهو مزير بززناه بهاد جواج...ولدي سنييييين وهو غايب...سنيييييين وهو مغبر علينا وجهو...جوجناه يدگ وتادو ونهار گلت ليك وجيتك نيشان تصبري وتكوني ليه مراة زمان ويحط عليك راس باش يتبت هنا فبلادو...
حبيبة : يعني ديك يديني عندو تما مكايناش !!"نزلو دموعها يجريييييو بلا متحس"...
مليكة : وهو يديك داكشي شوفي معاه هو...انا براسي راني مالحگت راجلي تا حملت ب الصغيرة...تا صبرت وعضيت فالنفس وبركت مع ناسي...هادشي را كاين وها كريمة هاهي هنا تبقى تايشوف واش يديها ولا لا وماهاضرة مامكلمة...الصبر ابنتي ديك البلاد ماشي دغيا تمشي ليها...
حبيبة"بقات تشوف فيهم وتبكي"
توريا"تنهدات" : نجيك نيشان...ولدي را مشااا ملي تكرفص عليك زاد...نحيد هاد الهم على رقبتي وهادشي علاش طحت ومرضت وهانتي تشوفي حالتي...لا كنتي ناوية تفرقي عليه نتي تدي شوهتك معاك نهار صباحك رجعوك ناسك لداركم !! فين تعطي راسك من باك ومك...ولا ماهامك حد غا جيرانكم يديو ليك العيب سوقك يخوا لا بغيتي تجوجي وراه صعييب سخطبك شي حد...
حبيبة : كيفاش !!...انا ماشغليش اخالتي فيه يمشي ولا يجلس...مابقيتش بيت نشوف وجهو الى نتي كثر انا كثر منك...ماقدرتش نهضر معاك حيث يلاه جيتي من سبيطار مابغيتش نهضر..ولكن ملي جبدتي هادشي نيت بغيت نگوليك بغيت نجمع حوايجي ونمشي فحالي..مابقيتش بغيت تاحاجة منو ولا منكم...علاش كذبتو عليا علاش ؟...علاش ماعلمتونيش بالي هو ماباغيش اهى اهى علاش درتو ليا هاكا وكذبتو عليا..كرام عليكم...
عيدة : شفت فيك بنيتي وشفت فيك زينة البنات...انا راضية عليك سمحي ليا بنيتي ومسحيها فيا...
حبيبة : مانسمحش ليكم ضحكتو عليا..جالسين عليا ب حنييين ما ت حنين...ضريف وبفلوسو وهو حتى سلام ماخسرها عليا...
توريا : ماعندك فين غاديا...هنا دارك وهنا فين تسكني معانا تادوز وقيتة انا نترجاك بقاي معانا عام عامين تا نضرگو شوهتنا فدوار...
مليكة : مزيانة ليك تانتي سعدك مايكحالش..ترجعي فنهارك اش بغاو يگولو عليك ؟!
حبيبة : ماسوقكمش فيا...بغيت نمشي اهى اهى "صعرت بجهد والي حاولات تخبيه ماقدراتش تخبيه...ناضت بجهد وخا توعتات صبرااات وهي مغمضة عينيها مشات لفاليز وبدات تجبد اش تلبس" غادي نعيط لبابا يجي يديني ماغاديش نبقى هنا اهى اهى ماولفتش اخالتي..هادي ماشي بلاصتي الى هو مشى تانا نمشي...دارنا مغاديش يصبرو لكذوبي غادي يعرفو..."رجعات حداهم كتهضر وتغوت...كريمة مقربة عند الباب هي وربيعة كيتصنطو"
عيدة : وحنا مغانخليوهم فدار غفلون..نرمي ليهم العار اكبيدتي عايشك غا مسحيها فيا "جات تحط عليها ايدها وهي تدفعها ليها بجهد تا غوتات مليكة وطارت لعندها شدتها من دراعها مزييييرة عليها"
مليكة : ولاكون لا ضصرتي يا البرهوشة ؟!..تمدي ايديك على مي يا قليلة ترابي...شلا ما عشقو فيك واخذينك لهبيل ال"جات تكملها نطقات توريا بصوت مرتافع"
توريا : ملييييييكاااا...لاكون هدني سوق خلينا هامدين...
مليكة : تمد ايدها على مي نتخاراو سوايع هنا...شلا وشلالي عليا...
دفعتها من دراعها خلاتها شاداه ودموعها دايزين قلبها بغى يسكت بالاعصاب والخلعة....
حبيبة : انا مسامحة ليكم مسااامحة لكلشي غير خليوني نمشي..ماغاتبقاااش هنا اهى اهى ياااك تزوجت بيه وهاهو مشى مابقاش بان..اش غانبقى ندير انا اصلا مكنعرفوش وكيخلعني ومكرفص عليا...بغيت نمشي فحالي..كذبتو عليا ونافقتوني الله ياخذ فيكم الحق الله يااااخذ فيكم الحااااااااااااااق...الكذابات المنا.فقات اهى اهى...بغيت نمشي فحالي...
مع قالتها ربيعة وكريمة شهقو وخرجو عينيهم ودارو ايديهم على فامهم...هنا وقفات توريا وبان وجهها المشرار عياات تحبس قراسها وتقبل الاهانات وهي توقف..مقربة ليها مزياان ..
توريا : وصلنا لكلام العار من فمك ؟...بغيتي نخرجو لعيب جملة ؟!..سمعيني مزيااان رجوع لدراكم مكاين هاد ساعة...بغيتي تصبري تا دوز وقيتة وتغبري عليا وجهك زيدي مع طريگ نعل بو الي يشدك ويزاوگ فيك..مابغيتش عيبنا قرييييب غذا ولا بعدو نعلم شيخي يهز دوك شيكات وينوض يغرق بوك فالحباسات وديك ساعة تعرفي بحق تنوفيق مزيااان...تگلعي عليا من رهوط وتركني فبيتك ودار ناسك ميخصك خير..."دفعات الكرسي بغدااااايد تا طاح وتمات خارجة" ايوى لاااش نطلبو ونزاوگو هزات علينا خنافرها عادت بغات ضرب ليا مراة گد جداها....
حبل النفا.ق والكذوب قصيير...واصبح اقصر مع توريا والبقية...توريا وخا شخصية ديكتاتورية قلبها حجر الا انها شخص مكيعرفش ينا.فق ولا يكذب..كتحبسها تاتعيا ويبان عيبها...ماعاوداتش معاها كلمة زوج لاحت ليها الهضرة هاد المرة نيشان هاد المرة تهديد مباااشر عيني عينك..
هنا حبيبة تأكدات انها فعلا داخلة لمستنقع ناس فيه قااصحة ودخلات على مسؤلية كبر منها وشديدة عليها وزمان غايبدا يشتد عليها ويحكها...تگد تكمل وتگد طج..تگد تصبر حتى دوز وقيت الي تخلي الفام تلجم وعيبها ميكونش كبييير...هذا هو مجتمعنا الحقييقي الي مكيرحمش "المرأة" ب صفة خااصة...هذا هو تفكير اغلب ناس البادية القداام...وخا تحضرات دنيا الا ان تفكيرهم ف سمعة العائلة اهم...وهادشي علاش تربات توريا من الاصل...
خرحات وخلاتها ف صدمة وبكاء وهلع...ضارو بيها وربطو ليها لايدين ورجلين وماخلاو ليها فين تزيد...بقى غير صدرها الي كينهج بالاعصاب والخوف وزادتها تا صدمة ديال التهديد من توريا عيني عينك...خلعوها وفشلو ليها ركابي من جيهة باها...
مليكة"بنفخة وهي مخنزرة ف حبيبة..تا هبطات عينيها ل عيدة ": دوزي مي هبطي دوزي...
عيدة : هبطي نتي خليني معاها تا نبغي نهبط ونابي عليك..
مليكة"بعصبية" : تي فاش بغيتي تهضري فاااش...دوزي مي تركني..
عيدة"بصوت مجهد" : اگلت لييييك هودي وخليني معاها انا عارفة اش باغياها ندوي معاها..هودي تانبغي نهود هاو ونابي عليك...
مليكة : فاش بغيتي دوي ؟!..
عيدة : ما شغلك..هودي گلت ليك...
بقات مليكة طلع وتهبط فيها الي كانت حادرة راسها وصدمة مخلية دموعها نازلييين وصدرها ينهج...مطمطات بفمها ب سم وغل وهي تخرج لقات كريمة وربيعة دايرين راسهم يلاه خارجين من بيوتهم مادات ماجابت...اما عيدة بقات شحال وهي مهبطة راسها وتسمع فيها تنخصص...حتى قربات ايدها وشداتها ليها بغات تحيدها وهي تزير عليها...
عيدة : الي درتيه اكبيدتي ماتلامي عليه..والي جاد بيه فمك لا عتاب عليه..يشهد عليا مولانا يا بنيتي لا گليبي بغاك ليه..بالي وگلبي مايتهناو غير وهو فبلادو يتبت فيها..راني بنيتي ماكنت نشوفو غير مرة فسنييين زمان..اشمن شوفة هاديك واشمن شوق يبرد من جيهتو..تسوالنا غير ورا سلوكة (كيهضر معاها غا فالتيليفون)..نهار شفتك فالعرس ديال ولدي رضوان كي عيني جات عليك گلبي تهز من جيهتك وعشقتك ليه هو...
حبيبة"الصمت"
عيدة : والله يا بنيتي مابغيت ليك الخايبة..والله يا بنيتي لا عشقتك ليه كي بغيت كنيناتي بالعشق لولادي..ماضنيت يدير هاد الحالة ولا جات فبالي يتكرفص عليك..نلومو ومانلومو..نلومو حيث مبغيتهاش ليك ومالومو حيث درناها بيه...حنا وانا نيت الي وصلتو لهاد الحالة تا برد فينا حر شمتة من جيهتو...
حبيبة بقات كتسمع ليها وهي فعالم اااخر..عالم الصدمة ديال انها تبقى معاهم تاتهدن الوقت...صدمة ديال اش تقول لواليديها على هاد الحالة الي فيها...
عيدة"رجعات زيرات عليها ونطقات بصوت حنييين وعاامر ندم حيث هي بصح كانت غايتها يتزوج وتهنى عليه مكانتش كضن غايشمتهم كيف شمتوه وخا حيلتها كانت نوعا مقرفة...سكتات سحاااال وهي تمهد وعطات لسانها الضو لخضر يبدا يعاود كيفاش دارو ليه الحيلة ديال مرضها وكيفاش حتى قبل وكيفاش عرفو انه عرف بالحيلة...تهضر وتساراح وتاهي قلبها مشوي..."
عيدة : نهار گلت ليك را حنين الله شاهد عليا ماكذبت عليك..واخا صعيييب ووعر منو ما شفت وليني المحنة الي فگلبو انا الي عارفاها..الزمان وراس الكحل بركو عليه وكحلو ليه الگلب...شلا ماداز على راسو وعلينا تاحنا...
حبيبة : بغات دخل ليا بابا الحبس يااك..علاش هادشي كامل حيث بغيت نمشي فحالي حيث تكرفص عليا وخاصني نسكت ؟ هادي هي يتهلى فيك وتمشي معاه وتقراي تما ؟؟..ياااك اهى اهى...
عيدة : خلينا بنيتي من بوك شوفي غا نتي لا مشيتي من نهارك لداركم وتفرتك هادشي ؟ يحساب ليك ناس ترحم وتنسى. ؟ غذا ولا بعدو الهضرة دور والفام يتحلو فلانة بنت فلان نهار صباحها خلاها راجل...عطيني وذنيييك وحضري معايا عقلك...بغيت تعمري الفام بالس لگاوك فايتة وبفهامتك ابنتي هي ماشي بنت وعليا بليميييين لا حيدتيها ليهم من فمهم...بوك يصبح بيها ويبات بيها وفين بغيتي يوصل فصحتو لا كمدها فگلبو ؟!..هي هي يا بنيتي اللهم صبري هنا تا يدير الله خير...
حبيبة"بصوت مقجوج بالبكا" : مابغيت منو والو ياك غير بغيتوني ن نبقى هاني غانبقى حتى نشوف فين غايوصل هادشي...
عيدة : عايشك ابنيتي عايشك لما مسحيها فيا وصبري...عايشك لاما بيضي گلبك من جيهتو..شحال ما جلس يرجع يرجع...ونفكو هاد الحجاية ويكون خير عايشك ابنيتي لا تمشيش را نبقاو وتبقاي ضحكة فالفام..وسوقك ابنيتي يتحط ليه تقاف ويتسد عليه الباب...ونديو العيب مع بووك وميمتك...عيشك ابنيتي صبري معانا...عيش كبيدتي وعطيتك عهد الله ميخصك خير معانا كيفك كيف سعيدة وربيعة وكريمة...لبس عيدك بحالهم ويالالة نتي فضل منهم...مقديتك عندك والي كنتي لاگياه فدار بوك تلگايه هنا...الله يرضي عليييك ابنيتي صبري معانا "دموعها هبطو تاهي"
هبطات راسها بغات تبوس ليها ايدها وهي تخطفها حبيبة بسرعة...تنهدات عيدة وبقات شحال كدوز ليها على ضهرها وطلب فيها حتى ناضت وخرجات من البيت كتعكز لقات ربيعة عاونتها تهبط...توريا مشات لبيتها وسدات عليها مزاال شمتة ولدها تاكل فيها وطلع فيها وتهبط...
تاحد مابقى حرك ساكن كلشي بقى كيما هو عليه..بقات حبيبة سادة عليها البيت ودموعها على خدها ماحاساش براسها انها تقدر تصبر وكتطلب الله يفيقها من هاد الكابوس الي هي فيه وتلقى راسها غير فبيتها الوردي وعيشتها المرتاااحة وتسمع صوت ماماها كينادي باسمها تهبط تفطر وبالي باباها جاب ليها الاميريكان رولز الي كيحمقوها ولا يوصلها لثانوية ويمشي لرزقو،، رزقو الي على وشك يخسرو وضحات براسها باش يبقى ليه الارث والمحلات الي فنا فيهم عمرو وعصيب عليه يتقبل خسارتهم...كل مكتفكر هادشي كتزييييد فحدة البكاء تا بغات تنطح راسها مع الحايط...
دازت ديك الليلة عليها كحلة...ليلة مافيهاش حس النعاس كلها تفكير وبكى حتى طلع ليها د.م من عينيها الي محبسوش كونها شخص كيكره يبكي...ولكن ماعندنا مانديرو المشاعر الي كتكون متحكمة فينا...الفجر اذن وهي جامعة رجليها عندها وخاشية راسها بيناتهم وتنخصص...الصبح بان وهي على نفس الحال...كدخل عندها سعيدة تواسبها وطبطب عليها مالقات ليها جهد وهي براسها ماعارفاش بشار فين هو تيليفون طفى بالمرة مافراسهمش بالي داك الوقت راه شااااد طريق رجعة لفحالو...حتى من هاشم مالقى جهد تا عيا وطلع ليه د.م وخرج سوق كامل حيث صبر الانسان مؤقت شحاال ما جلس كيتقادا...كل مرة تهضر مع ماماها كاتجاوبها عادي بدون متبين ليها بالي مكاينش داك "المجهول" بالنسبة ليها...
حتى داز اسبوع وهنا انتهى "الفلاش باك"....
الساعة السابعة صباحا سمعات صوت الدقان وبدات كتكمش فعينيها تحلهم وتعاود تسدهم..من بعد نوم عمييييق اول مرة تنعس من ورا ايااام كلها بلا نعاس...وبلا خروج من داك البيت الي دفنات فيه راسها ضنا منها انه مغايوصلها حد وغاتبقى تما وخا قنطاااات وتفقصات ولكن كيف مكان الحال قالت را هكا حسن تايحلها الف حلال...لكن العكس غايوقع وعكس توقعاتها وقعو وهو ب صوت الباب الي كيتدق عليها...
حبيبة"بصوت مبحوح بنعاس الكثيير الي نعسات..خاشية راسها بين مخدات وهي تهزو شعرها مخربق" : ش شكوون...
كريمة"حلات الباب بدون اذن ودخلات مدرمة" : حبيبة گالت ليك خالتي هودي تكلمي...
حبيبة : لمن !؛؟
كريمة : لخالتي توريا ولالة و ختي مليكة وختي ربيعة وختي سعيدة اليوم سبوع ديالك وشي عيالات جاو باش يحضرو...
حبيبة"تگعدت كتحك فعينيها وحجبانها طالعين ولون عينيها كيبان مشعشع واحد لون كيصبح فيهم كيحمق..بقات كريمة غا كتشوف فيهم خصوصا معسلاهم ورموشها كثاف كملو الباهية. " : سبوع ديالي ؟ م مافهمتش...
كريمة : سبوع فاش العروسة كتكمل سبعيام كيحزموها ويديرو عراضة لقرااب وشي جيران هنا...گالت ليك هبطي حوايجك عومي فالحمام لتحت وتعاونك سعيدة وسيري عندهم هما يحزموك...را مك وعمتك واقلة جاييين...
ماجاوبتهاش وتا كريمة لاحت ليها الكلام وخرجات خلاتها كترمش باقي الحقيقة هاربة ليها بالنعاس...شي نص ساعة وهي كتفكر فين هي وشكون هي واش كدير واش قالت كريمة عاد توگضت وناضت كتنفض ففراشها...تا تحل الباب وهي تدخل سعيدة ببشاشة فوجهها...
سعيدة : جمعتي حويجاتك احبيبتي...
حبيبة : فين كاين الحمام ؟ وهادشي ماعارفاهش وماما ماگالتش ليا بتجي لهنا على قبل سبوع وهاد تخربيق..."بنرفزة"
سعيدة"تنهدات على حالها..وتبسمات فوجهها باش طمنها وتحس انها فامان وخا هكاك" : الحمام لتحت على برا...لا بغيتي تعومي فيه باش تحكي وتكمدي عظيماتك را مزيان ليك..مابغيتيهش دوشي غير هنا فدوش الما سخون موجود الي بغيتيها وريحاتك ابنتي ديريها...
حبيبة"زفرات بجهد ماحملاتش تعصب..دوزات على جبهتها وعينيها كتحك فيهم" : سمحي ليا خالتي غير معصبة ومعنديش الخاطر وقنطت وفففف..."شدتها البكية".
سعيدة"قربات ليها وهي تجرها حطات ليها راسها على صدرها كتبان قد بناتها مع قصر قامتها..باش ليها راسها" : ماعليش ماعليش ابنتي من حقك...
حبيبة"دورات ايديها ورا ضهر سعيدة وزيرات عليها..شحاال وهي معنقاها فلاخر تنهدات وفصلات العناق حركات راسها وهي تمشي جبدات ماتلبس...فضلات تعوم غير فدوش تما حداها هزات ماعنها وبرودويات ديالها وبينوارها خشات رجليها فبانطوفة زهري ديال فوطة ومشات لدوش لقات سعبدة وجدااتو ليها سدات عليها وخلاتها ونزلات...لقات ناديا ورقية جاااو الا لطيفة الي اضطرت ترجع ل سمارة...كملات حبيبة العومان وخرجات لابسة بيجامة ساتان غوز وفوطة فوق شعرها وجهها مزنگ بالسخونية..شادة راسها بايد وشادة لاتخوس بايد. غاديا بمشبتها العادية ولكن مع ليهونش وطرف لور كتبان مشية فشييي شكل خصوصا كانت ربيعة تما وقفات حاضياها كيفاش غادية ولبيجامة الي لابسة وكيف كتبان بزين هبطات عينيها لراسها كتعبر فراسها وتشوف فراسها اش لابسة هي واش لابسة حبيبة...هي مخشية فبيجامة خزية ديال توب عادي فيه وريدات صغار والعنق ضاير بدونتيل بيض والزيف حياتي فالحمر وايديها منفوخين بتيد وجافيل...وحطات ايدها على حناكها الي تشققو وخا مزنگين وخا تا ربيعة زويينة تاهي حيث اصلا دار رحماني من شرط كنيناتهم ولا عريساتهم يكون زيييين فيهم هو لول...بقات مستوهة تا قفزات بصوت مليكة...
مليكة : واااا ربييييعة وتي هبطي شوفي الطيابة اش بغات...
ربيعة : وابغات الربيع...
مليكة : ياويلي واش طلعك ملي بغات ربيع...هاويلي توما حولتو المونة لفوگ وثلاجة ؟!
ربيعة : وهاني نازلة اختي مليكة...
مليكة : جيبي معاك واح شوية البخور من بيتك هذا الي عند مي تقادا...
دخلات نشفات شعرها عاد مشطاتو بالبروص ديالها...خلاتو مطلوق على راحتو وتقدمات ل موافوز كانت فوقو واحد لاتخوس ديال لي برودوي الي كدير...جبدات مرطب ذهنات وجهها حيث نشف ودبال بجهد...وبوماد صغيييرة ديال ليسيغن تاهما ذهناتهم...دارت ستيك ديال العرق ورشات ريحة...حتى صونا تيليفونها هبطات عينيها بان ليها اسم باباها...تبسمات تا شهقات دير اي حاجة غير تشوف هاد الاسم كيصوني عليها وتسمع صوت باها وتشوف ضحكتو عندها دنيا ومافيها مستعدة تدخل الحبس على قبلو غير يكون مرتاااح...
حبيبة : حبيب ديالييي توحشتك...
م.حفيظ : كون توحشتيني كون دويتي معايا...يومين ابنتي بلا هضرة اش نتسالوك ههههه....هانيا زاكيا...
حبيبة : هانيااا...فينك ماجايش مع ماما ؟!
م.حفيظ : واش بيتي منجيش نشوف القشة ؟!...اهيا راجلك سافر وما گلتيها ؟!
حبيبة"عينيها خرجوو تا سلمو عالمرايا ورجعو وقلبها بدا يضرررررب تا مشى د.م من وجهها" : ااا ؟..ششش شكون گالها ليك ؟!
م.حفيظ : الحاج عبد القادر هاهو حدايا را جينا شوية هذا هاحنا فالصالون لتحت...
حبيبة"ريقها نشف مافهمت والو". : اا ااه مسسافر...واخا انا شوية ونازلة وبنشوفك...
قطع معاها عاد تنفسات حاسة براسها تزنزنت بالخلعة...بقات شحاال كتنهج عند الكوفوز مسندة عليه حتى صونا تاني تيليفونها كانت امها كتقوليها تهبط متعطلش وناس كيتسناو فيها...كملات شغلها وجمعات شعرها اسفنجة مهملة هزات تيليفونها ولبسات بانطوفة وخرجات من البيت ب شوية..تا هبطات لتحت كتسمع صوت شي عيالات فالصالون دورات عينيها هنا وهنا باقيا مكتعرفش الدار مزيان باقيا مكتعرف تاحد...تا بانت ليها سعيدة جايا وتضحك..قالت ليها بالصحة وداتها لبيت فين جالسين تقريبا كلهم...وكانت هادي اول مرة من بعد داك النهار تشوف توريا عينها فعينها...غير شافتها وهي تدور وجهها جيهة مليكة كتهضر معاها وماعاجبها حال...
ناديا"وقفات" : اصباح الخييير ابنتي...عمتي ؟ بالصحة وراحة..
حبيبة"عنقاتها مخشية فيها كتحاول تستمد الامان والحنان الي افتاقداتو فهاد سيمانة...عاد مشات لرقية الي توحشاتها بزاااااف تا غرغرو عينيها تعنق فيها وتبوس تا ما قدت.." : توحشتكم بزااف..."سلمات على ختها" وردة توحشتك احبيبتي...
وردة : حتى انا توحشتك احبوبة ديالي...
مليكة"كطلع فيها وتهبط وتشوف فديك بيجامة ساتان الي مزيرة عليها من تحت وليهونش باينين..ضارت عند توريا ونطقات بصوت منخفض" : علميها تلبس تشاميرات كي العيالات هاويلي اش ديك الحالة مزيرة والعزارا ورجال بعيالاتهم موجودين...
توريا"حركات راسها"
حبيبة"مضارتش تاهي لا جيهة توريا ولا جيهة مليكة ماشافت فيهم كاااع بقات مخشية غير ف امها"
عيدة : نزضي بنيتي اجي لهنا عندي الله يرضي عليك لبسي هاد القفيتين (قفطان) الي صاوبت ليك ف حوايج الدفوع باش نحزمك وديري اش نگوليك...
حبيبة"ضارت عند ناديا تبسمات ليها وحركات ليها راسها بشوية...تنهدات بضيق وقنط وناضت مخلية ليها تيليفونها ومشات عند عيدة عطاتهم امر باش يهبطو الخوامي وبدات تحيد فالبيجامة الفوقي ديالها وهو يبان صدرها تحت ديباردو صغير و موقفاه غير بستويان بونج مليكة غمزات ربيعة وبداو يضحكو بالحس...تا لبستها توريا الي هازة خنافرها الفوق وهادشي كتشوووف فيه ناديا وممطمناش لبنتها وخا هكاك كتشوف عيدة كيدايرة عليها كتهنى شوية عليها...حتى لبساتو وحيدات سروال كلشي شداتو ناديا طواتهم...وجابت حزام الصم رقيق حزماتها وهما يبانو جنابها اكثر حليمة شهقات وخرجات عينيها بغات دور تشوف زكيكتها دارت بناقص خافت تبكي...مدات ليها الكحل ومرود وقالت ليها قربي كحلي...
حبيبة. : مكنعرفش لهاد الكحل اخالتي...
مليكة : ديري غا الي عرفتي دوزيه على عينيك وصافي..
عيدة : ديري بنيتي غا باروك يشموه عينيك...
تنهدات وشداتو دوزات علاش عرفت وصافي...تجلخو ليها شوي جناب مسحاتهم ليها ب قطن فيه ما ورد تا تصاوبو بان فيهم كحل واخا غير شوية وزاد بان لون عينيها..شوية وهي تدخل سعيدة هازة صينية فيها طبسيل عامر بيض مصلوق بقشرتو...ووراها كريمة الي مشات جابت طبسيل مطلوع او بطبوط...و طبسيل ملوي...وطبسيل تمر...عاونو عيدة تا وقفات وحبيبة مافاهمة والو...جات توريا عطاتها شال كبيييييير وطويل...
حبيبة. : اشنو هذا...
عيدة ضحكت وحركات راسها وطلبات منها دور...ضارت حبيبة مكرهة وخاصها دير الخاطر صحة...كتشوفهم اش كيزعلكو تما... دوراتو ليها على ضهرها وعقداتو ليها عند صدرها فحال بغات دير ليها ركاب الي كيركبو بيه وليدات صغار...ودارت ليها فوطة على ضهرها باش ميتقاسش ليها قفطان جوهرة...
سعيدة : سيري كريمة عيطي لحسنية ولبناتي والبنات الي عيطنا ليهم يوقفو عند قاع دار...
جابت ربيعة طبسيل ملوي خواتو ليها بين شالها وضهرها..وخوات ليها بطبوط تما وحبيبة غا كطلع فدوك الحجبان على شوي تلوح ليهم زمر كامل...وخوات ليها طبسيل البيض وطبسيل تمر تا ولات فحال مركبة رزمة قداش وراها...
حبيبة : اش هادشي ؟! اش تديرو ؟؟
عيدة : ودابا بنيتي بعد نگوليك جري جري ونتي كتفكي هاد العگدة الي هنا ولوحي هادشي وراك والبنات والعيالات يتبعوك ويجمعو فهادشي الي دا شي غايديه هههه...
حبيبة"گرنات حجبانها" : نعاااام ؟!...
عادة اول مرة تكتاشفها اول مرة كتعرف على هاد الناس الي دخلات لدارهم وولات كنتهم...العروسة راها دير فالتقاليد وراجل را غايب والعقول بدات تشك والفام لجامهم بدا يتفك...بقات كترمش فيها مافهمات والو...
حبيبة : كيفاش نجري ؟!
توريا : كي سمعتي..ديري اش گالت ليك دغيا باش الناس تجمع الي جاها فحقها...
مليكة : العادة هي هادي راك كملتي سبعيام ديالك...
ناديا"حركات ليها راسها" : ديري ماعليش ابنتي...
حبيبة بقات كترمش بغات تفقص وهاد العادة لو كانت فرحانة عادية مزوجة براجل كتبغيه ولا راجل مزيان معاها كون طبقات اش قالو ليها وهي ضااحكة ولكن هي عروس بلا عريس...وحالتها ماشي طبيعية هادشي جاها فشكل وكيفقص وكتزيد تكره فهاد تريكة...غمضات عينيها بنفاذ صبر شافتها ناديا ورقية عرفوها طلع ليها الخز وكيعرفو هاد شوفات ولاو خايفين تبدا طلق سم من فمها يلاه غاتمشي عندها ناديا تهضر معاها وهي تنهد وحلات عينيها وضارت..بقات غاديا غاديا تا بدات تزرب فمشيتها ماجراتش كيف قالو ليها غير كتزرب فحال بغات تجري وخرجات وهي كتفك فديك العقدة تا كبات ليهم كلشي وضارت بانو ليها بنات كيترامكو كيجمعو فداكشي والحسنية كتجمع وتخبي ف عبونها (عنقها حضنها الخ)...الا ختها الي مابغاتش لصقات حدا امها....و وقفات كتشوف فيهم حتى تمات غاديا راجعة لبيت عندهم وفنفس الوقت...بثات غيييير كتشوف ورجعات دخلت جلسات حدا امها...
تجمعو العيالات الي عيطو ليهم فالصالون ودخلوها هي وناديا ورقية بزغاريت وهي غااا مهمومة حادرة راسها وداخلة شادة فماماها...العيالات سمعو زغاريت وباد يهزو فريوسهم ويشوفو العروسة كنة توريا كيدايرة...تا بانت ليهم داخلة قصيورة ولكن زييينة بزاف كيف خلاها بشار "وازنة بالزين"...وجلسات فالراس هي وياهم كانو دايرين زوج طوابل كل طابلة فيها عشرة العيالات...حطو ليهم طباسل كبااار ديال بركوكش بالزبدة والعسل الي بغى يديرو...كلاو الا هي غير نقبت وهمها هم...تجمعات دنيا وجات واحد سيدة كبيرة فرشو ليها فلارض وجابو ليها صينيا بالمجامع ديالهم وبرارد وكيسان ملونين...جابو ليها مقراج كبيييير يزاف طااايب كتعمر وتقوليهم خويو هنا وحبسو هنا..تا عمرات دكة رحمانية دايزها الكلام غير هما اتاي كيحليوه كثر وكاين طبعا المسوس...
ناديا"قربات ليها كيهضرو بيناتهم" : فين سافر راجلك ؟!
سؤال سؤاااال ابدا مكانش فمحلو فوسط هاد دوامة ديال الافكار الملخبطة عندها...سؤال فضروف صعيييييييبة وسط تهديد مباشر لباها...صرطات ريقها وجات تجاوب حتى نقداتها مليكة الي وجهات كلامها لحبيبة...
مليكة : گاليك با دوزي عند باك لصالون يشوفك...
حبيبة ناضت بزربة بغات غير تفك..حركات راسها ومشات معاها تا داتها لصالون كان فيه مولاي حفيظ وهاشم وعبد القادر اما رضوان رجع فحالو وسيحمد مشى بلاصة باه لسوق...مشات ديريكت عنقات باها بجهد تا بغات تبكي...
م.حفيظ. : ساليتي ههههه...دنيا هانيا ؟
حبيبة : توحشتك ابابا
باستو فحنك وحنك لاخور وتبوس ليه فايدو وراسو كلو باستو بالشوق للامان تا هبط هاشم راسو بحزن على حالة هاد البنت والي ماقادرش تا يفكها وتربط تاهو بسخط الواليدين وزاد تقلق بزاااف من بشار وهز منو...
م.حفيظ : كون تشوفي انا يا كبيدتي...خليتي عليا بلاصتك خاوية دار ولات كي القهرة بلا بيك...
جات تهضر وهو ينقز عبد القادر كي بولة صباح...
ع.القادر : ودابا ترجع عندك دوز معاك شي ايامات مالنا بغينا نصرطوها ليك ههههه...
م.حفيظ ؛ وراه صرطتوها ليا...وليني ملي فرحانا ومرتاحة ماعندي منگول...اجي اش بيتي ديري فلافاك ؟!
حبيبة : دابا نشوف امتى نمشي نبدا..باقي مابداوش هما كاع...
هاشم : لا بغيتي شي نهار نديك علميني ابنتي نتي لولة...
حبيبة"تبسمات حشمانة وحركات ليه راسها" : شكرا عمي لهلا يخطيك...
بقات شحاال جالسة مع باها تا دخل خوها معتز الي كان مع حسام وزكريا سلمات عليه وبقات معنقاه حداها..ماكرهاتش تغوت وتقوليهم ديوني فحالي..ماكرهاتش ميكونش هادشي وتفيق..حابسة البكية بغات ترجع من هاد الغربة الكحلة القاسية عليها...ماكرهاتش مايوقع والو لباها الي بصح غايتشواااا عليها وميرحموووهش هاد القلوب الكحلة...
م.حفيظ : كي طرا ل بشار تا مشى ؟!
حبيبة"داكشي الي فلتات منو عند ماماها لقاتو دوبل عند باها" : ج جاتو خدمة و"نقز تاني عبد القادر تا هز حسام راسو هو وهاشم"
ع.القادر : هذاك هو حالو شلا خدمة عليا تم...دابا يرجع...
حسام"كان داير رساو بين ايديه وحادرة كيسمع تا هزو وضار عند باه كيقوليه تا سمع اش هادشي"
هاشم"عض حناكو من لداخل مع باه ومو وتوريا..زفر نفس طااايبة كون كان حدا باه يحس بيها ويشويييييه..حدر راسو مالقى جهد"
م.حفيظ : واخا هكاك حاول تعلمو يدير شي وقيت يهضر معايا ولا فاش يجي يجي لدار عندنا يتغذا معانا ولا يتعشا من ديك الليلة ديال العقد ما شفتو..بان ليا ماشي هو هذاك تا علمني بالي جا مريض وطلب سماحة...ياك دعوة هانيا ؟
ع.القادر : لا لا هااانيا اش بغى يكون الحاج..."شاف فحبيبة" سيري بنتي علمي العيالات يجيبو المجامع لحاج يدير لينا دكة مراكشي عند رحامنة..."خبط ايدو فوق فخد مولاي حفيظ" اش گلنا النسيب العزيز ؟؛
م.حفيظ : وجد المسائيل وانا معاك ههههه...
السبوع ديال العروسة حتى هو داز شبه عادي وخا كاينين بعض الشكوك حيث وجه حبيبة كان باااين ماهواش ورجحو انها ماولفاتش...الكذوب مزال مستمر حتى يلقاو حل ل "بشار" الي زاد وخلا رويييييينة كحلة وراه بلا ميتسوق...برد فيهم الحر وحرو من خيبااااتو وخلا وراه ناس ابرياء ماتستاهلش هادشي...
وصلات العشية من بعد ماتغذاو غذا كان دجاج محمر ولحم بالبرقوق...غذاو العيالات ورجال وسالا سبوع العروسة..وصل وقت مشي مولاي حفيظ و ناديا ورقية ومعتز ووردة...تصيفطات معاهم بالبكا كتبكي واحد بكاء يطيح عليك ضيم...حتى كانت شويييي وتقوليهم ديوني وتخلي الزمر كامل واحل نيييت والي ليها ليها حتى كيجي بين عينيها باها فالحبس وطايح مريييض...بزز باش سكتات ومشاو خلاو وراهم قلب مكسوووور مضيوووم وباغي يطرطق بالاعصاب والفقصة...
دخلات لدار وتمات غاديا طالعة حتى وقفاتها سعيدة وهي دور عندها...
سعيدة : اجي بنتي جلسي حدانا فالبيت ماتبقايش وحدك الفوق.
حبيبة"كتشوف فالبيت كاينة ربيعة وكريمة شادين شي تشاميرات كيخدمو ليهم كروشي...توريا مكايناش لفوق واشراق تاهي الفوق." : خاصني نبدل هاد القفطان...
سعيدة : واخا سيري بدليه واجي..غير مبغيتكش تبقاي وحدك تقنطي تما...
حركات راسها وضارت طالعة...فدروج بدات كتحفظ طريقها لبيتها...يلاه وصلات لفوق وهي تم جايا توريا كتگفض كمايمها وتقاد طابلية ديالها...شافتها جايا وهي توقف...
توريا : فين غاديا !؟
حبيبة"مكتشوفش فيها" : غاديا نبدل هاد القفطان..
توريا : ولا بدلتيه ابنتي لبسي شي حاجة مستورة...ديك بيجامة را مزيرة عليك وهنا كاين العزارة زكريا حسام يوسف ولدي..كاين راجل ربيعة سيحمد وكاين تا شيخي..عيب ابنتي بدليه ولبسي تشامير ولا بيجامة طويلة بسروالها..
حبيبة : ماعنديش فحال هاد لبس..
توريا : الحوايج الي تقدينا ليك حنا تلقاي فيهم..وهبطي اجي حدايا لكوزينة نعطيك بلاطو دخليه ل لالة فيه عشاها...
قالت ليها هاد الهضرة وزادت خلاتها واااقفة..غززات سنانها وتكرهات كثر...مشات تزرب لبيتها فاليز ديالها باقيا تما محلولة فيها حوايجها...كانها مابغياش ترتب حوايجها حيث غاتاكد انها بصح غاتبقى...مالقاتش اش قالت ليها ومابغاتش دير اش قالت ليها..بانت ليها بيجامة قطن تيشرت ديالها طوييلة تال ركبة كم ديالها حد المرفق...وكولون ديالها كحل..لبساتها وهزات تيليفونها وخرجات..هبطت لتحت ومشات لبيت نيشان نسات را توريا قالت ليها تجي عندها...جلسات حدا سعيدة ومرة مرة ربيعة كتهز عينيها فيها تعبرها وكريمة تاهي خلاص..كيشوفو فدوك رجلين المسيگين ولهونش الي فاضو فاش جلسات..ولبسها مختلف عليهم...مليكة مكانتش مشات ديك العشية لدوار الي فيه ناسها...
توريا"خرجات عند باب الكوزينة" : اشرااااق..واااا اشراااااق..
اشراق : نعاااام امي...
توريا : عيطي لحبيبة تهبط...
سعيدة : حبيبة طلي على عگوزتك كتعيط ليك..
حبيبة : ها ؟..
ناضت كطل عليها وهي تشوفها توريا هزات حاجبها...
توريا : ياك گلت ليك هبطي عندي ديريكت...
حبيبة : نسيت..
توريا"طلعات وهبطتها بديك بيجامة وتنهدت مابغاتش تحكر ميكااات بزز..شافت اشراق هابطة" : رجعي حداهم..اجي نتي دي لمك حريرتها ودواها..واجي عاونيني نصبي معايا العشا دابا يجيو عمامك وجدك يبغيو يتعشاو..النوبة فيا اليوم و مكاين ليا عوين ؟!...
رجعات حبيبة جلسات حدا سعيدة الي كانت شادة تيليفونها دايرة نضاضر شوف وكتقرا فيه مواضبة على القرايا حيث وخا خرجات من ثالثة اعدادي بقات كتقرا اش كاين فكروبات طبخ كروبات ثقافية...حبيبة جاتها القنطة بغات تكونيكطا لثات كونيكسيون سالات...
حبيبة : ففف"حدرت راسها شداها البكية..تا هزات فيها سعيدة عينيها"
سعيدة : مالك احبيبة ؟!.
حبيبة"هزات كتيفاتها" : مماليش..."دموعها عالطرف..ابدا مولفت ابدااا"..
ربيعة : بغيتي شي حاجة ؟!.
حبيبة"الصمت..تا هزت ايدها كتمسح عينيها مابغاتش تبكي"
سعيدة : غير گولي اش خاصك ابنتي انا معاك...
حبيبة : تسالات ليا كونيكسيون ديال شهر وبابا الي كيمشي يخلصها ليا ودابا ماعنديش باش نهضر معاه يخلصها...
سعيدة : ويييلي على هبيلة هههه ها الويفي فالدار..ها هاشم يخلصها لبنيتي بحالك بحال جدر حسام گد الكلب وكيخلصها ليه باه...ويلييييي هههه دوزي كريمة عطيها الكود من عندك..
كريمة : اجي هاكيه...
هزات حبيبة تيليفونها عينين كريمة قرقشو بان ليها الايفون اخر مكاين...حلفاات بحلوووفها تا طنطن لرضوان رااااسو يجيبو ليها وطير معزة...عطاتها الكود دخلاتو وهما يبداو يوصلوها ميساجات طن طن طن طن..تا درات ليهم طيريري فراسهم...تدهات مع تيليفونها تحيد القنطة بقات تجاوب ها ايوب الي لقاتو مجاااوب حيث كان كيخليها بلاكة باقي مقلق منها وتوحشها وتفقص من جيهتها..جاوباتو وجاوبات صاحبتها وماماها وباباها ودخلات انسطا تا لقات رسالة "جاد"
جاد : habiba .Where are you?I miss your messages( حبيبة فينك..توحشت ميساجاتك)...
قراتو غير من فوق مادخلاتش ليه باش مايطلعش ليه را قراتو..تنهدات وزفرات...يلاه بدات تناسا تا ضربها ضو بين عينيها..رجعات ليها ذكرى ديك الليلة وصوت فراسها كينطق...هرسها من جديد..خربقها وزاد ليها فدقات القلب...المجهول رجع ليها وبان...الكلمات باش نطق وصوته كيفاش خرج...الليلة الكحلة عندها الدخلة الغريبة الي عاشتها..زاد الصوت اكد ليها وجدد ليها الذكرى والي كان
"بشار : ياك نتي عروستي..."
ماحساتش حتى شهقات وحطات ايدها على صدرها وعينيها تحجرو بدموع حسات براسها تخنقااات ونفس تسدت تا بدات تشهق بالحس...
سعيدة : بسم الله عليك مالك ؟؟
حبيبة : ب بغيت نخرج عافاك عااافاك بغيت نخرج...تخنقت..
سعيدة : نوضي گدام دار ابنتي كاينة طبيلة تما وجلسي فيها... نوضي تنفسي..
حبيبة : ماعارفاش فين نمشي..
ناضت سعيدة معاها خرجات هي وياها قدام عينين توريا الي كانت واقفة على بنتها كتشلض فربيع...خرجاتها لديك طبيلة الي فيها كراسا عند الباب بعيدة وهي تجلسها...
سعيدة : نمشي نجيب تيليفوني ونجي نبرك معاك...
حبيبة بقات واقفة كتجبد نفس وكتحاول تطرد الذكرى الي جاتها...حطات ايدها على صدرها. وبقات تنهج حتى بداو رجليها كيمشيو بيها غاديا تابعة الطريق كتشوف فدنيا الليل وضواو شاعلين فالفيرما كاااملة فيرما قد سخط فيها ارض كبيييرة عامرة شجر زيتون واشجار اخرى...وكاين واحد الشاريج كبيييير بعيد كيعمروه بالما ديال البير...بقات تشوف وترد فالنفس...حتى سمعات صوت تيليفون كيصوني بعييييد دورات راسها تشوف فين كاين تا بان ليها طااايح فلارض تحت واحد شجرة مشات ليه كتشوف ديالمن حيث باين طايح لمولاه ماعرفاتوش ديالمن هزاتو وكتقلب شكون كاين تعطيه ليه مابان ليها حد بغات دخلو تعطيه لسعيدة وهو يعاود يصوني بانت ليها نمرة مخبية...
حبيبة : ديالمن هذا...
سكت تيليفون ثاني وعاود صونا...قررات تجاوب باش تعرف ديالمن وتعطيه لمولاه...طلقات الخط حطاتو فوذنييها...
بشار"خبا النمرة باش يعيط ليه..يعيط لنقطة الحليب فحياتو اعز ماعندو...عند بالو يوسف حيث تيليفون خذاه ليه ونمرتو ماينساهاش حافضها فراسو فقلبو...نطق بصوت ثقيييييل هاز الكاس ديال ويسكي فإيدو..عند بالو يوسف" : الكبيدة ...
يتبع...
التعليقات
لا توجد تعليقات بعد، كن أول من يعلق.