محتوى القصة
_ لحظة الوداع! دموع و حزن ، قبل راس والديه و ايديهم و عانقهم بحنية هو تيقول
_سمحو ليا لا قصرت من جيهتكم
هما جاوبو : الله يرضي عليك آمْمّي ( ولدي )
_سلم على خوتاتو و بناتهم وإسراء بكات عليه لأنه تتحس بيه حنين وتسنيم كذلك فهو مدللها
تيجاني : تهلاي فالحاج والحاجة و قراي مزيان
تسنيم : ( تتمسح دموعها ) وراه انقرا اخالي ...
_ودع حمزة وخرج راكب فسيارة مع شاكر يوصلو المطار حل الباب وكريم جاي جيهتو بخجل نزل تيجاني يسلم عليه
كريم : ( منزل راسو ) خالي تيجاني الله يوصلك على خير
تيجاني : ( حضنو بمعزة ) تهلا ولد ختي فراسك وقرا مزيان تبع تكوينك شنو ما خصك صوني عليا
كريم : ( بخجل شديد ) شكرا بزاف راه امّي ما مخلياني نحتاج والو
_ هكدا كان آخر واحد يودعو وركبوا سيارة شادين طريق المطار
شاكر : ولد ختك ياسين اسلم عليك ؟
تيجاني : فاش كنت راجع من عند بثينة ! سلم عليا فتلفون ! و حسن و عبدالله سرباي وحمادنة وكريم خليت ليه وصاية راه جا عندي مسكين
شاكر : هادشي بتلفون ؟ غير وصلاتو أخبار الكتابة ضرب على الفيلا
تيجاني : وانقصو عليكم هاد المشاكل !
شاكر : هاد ساعة ماعندي مشاكل الحمد لله، مقابل خدمتي والديا وأولاد خوتي لي مربي! تنتسنا راس العام نتجمع مع ديك بنت الناس نخلي والديا يشوفو وليداتي فالحياة! أما كن جات عليا ؟ بناقص من شي زواج
تيجاني : و سنة الحياة !
شاكر : سنة الحياة تجي مع لي ديال راسو اخاي تيجاني ، أنا راه كامل مشاكل شي نهار توصلك خباري أنا ولد ختك ياسين !! زعما فهاد زواج نكون هاني ؟ الله يدير تاويل الخير دوام الحال من محال
تيجاني : وتفائلو بالخير تجدوه ! البنت على ماشفت مزيانة ، وقضية ياسين راه دبا يتكالما ، وهو على مافهمت بيه الكراج ؟
شاكر : ( حرك راسو بأصابع الهدف ) هانت فهمتي ! داك نهار لكحل ، راك كنتي وراك عاقل ، أولى تسنيم تلفت لينا ، ونفس نهار البروصي وصل لاختك ، الحاج تما كان جامع لسيهم حسن ! غير كيرديات ؟ غير كل مرة محصلاه مع وحدة ، أخرتها ديك ختنا لي من خنيفرة جابتها ختك دير فيها خير وطاحت لها مع راجل تما ريحتو عطات
تيجاني : اوا الله يهديه
شاكر : الله يهدي سيهم ياسين ! أما باه ؟ لهلا فين يهديه، هما دايرين فراسهم الحاج يمد ويعطي! الحاج راه والد فاطمة ماشي حسن شرايبي ونهار باع لكراج عطاني الحاج الفلوس وقالي سير فك الكلب ( تيشرح بيده ويصوك) تما يلاه الكراج أول خدام فيه مني من لخدامة و جامع باش نشري لكاميو أول ! منين شفت اختي تتبكي على مستقبل أولادها شريت لكراج بفلوسي وحطيتو بسميتي!
تيجاني : ( ضرو راسو ) دبا إلا لقيتي ماتفك افك
شاكر : ( بقطع ) ماعندي مانفك ! أنا ختي فاطمة عيني نعطيهم ليها ولكن راجلها وزيد ولدها مابقات عائلة معاهم! من لاخر ضاسرين ، نهار ابا شرا حق بنتو ( تيحرك أصابعو بمعنى نقود ) شرا حقها فلوس فالقهوة ! شنو سي حسن تيقول لخوتنا لي تيوصلو ليا الهضرة ؟ راه الكراج يشريه الحاج و نرجعو نورثو فيه
تيجاني : هو قالها؟
شاكر : قالها لدوك القح__اب لي تيسلفوه بشيك ! وحدة فيهم راه قالت ليا فوجهي فاش جبت لها لفلوس ! قالت ليا اختك ماشي ديال وجهو، راه مزال تيقول لنا سلفوني راه نسيبي ملعق يشري حق مراتي بفلوسو
تيجاني : وعلى وجه اختك
شاكر : وعلى وجه اختي ! على وجه فاطمة مزاال تنجلس معهم فطبلة وحدة و نشد معاهم طريق ! على وجه الحاجة و تسنيم ماتنبغيش طلع معقدة ولو راها فاهمة كولشي ! أما كون جات على الحاج داك حسن هو أول يقاود وإلا ولدو بقى فيه باه يتبعو
تيجاني : نعلو شيطان ! هادشي راه داز
شاكر : هو راه داز ! ولكن أنا تنشرح لك سبب مشاكل و شكون سبب فيها ! لا أنت اخا ياسين باغي لكراج يرجع لكم ؟ اجي جلس اطابل ! اجي نتفاهمو ، ولكن هو تيقول انا قولبتهم فيه ! و أنت لي باغي ترجعو بسمية باك ؟ زعما تتعرفنا حنا مزيان؟ راه درنا فيك غير الخير لا أنت لا لقواد ديال باك !
_عز الدين : ( جالس تيلبس صباط و تيسمع كلام أمو فوق راسو ) صمت
الأم : نسيبك راه جاب ليا وراق مراتك ! ضوسي خاصك دفعو ، و العشية خاص ندوزو نشوفو بيت نعاس ( بنظرة شك ) الولد معاك تنهضر
عز الدين : ( وقف تاجه لافابو يغسل يديه و تواجه مع أمو وختو تتشوف فيه من بعيد تترضع ولدها ) امي !! شتي هاد تزويجة؟ ( طولها) مااااااااااا مكملهااااااااش؟ شتي داك شماااااتة ديال صاحبي لي داير فيها باغي مصلحتي جالسين تقراو على ظهري؟ ربي يخلصكم ( بنبرة مجروحة) راني ولدك امي( ضرب فصدرو بنظرات قهر ) لحمك ودمك وبكرك امي!
الأم : ( بنظرة عناد و طاغية ) والله اوليدي راه كلامي مايطيح الأرض و الفقيه مانتحاشم معاه و أخبارك يوصلوها تالين
عز الدين : اش ديري ؟ شاف ديالي رجعتيني قدامو برهوش ؟ اش مزاال آديري و مادرتيه؟
الأم : ( بنظرة تواضع مزيفة ) أنا غير ولية آوليدي ماعندي ماندير ! سير راك تعطلتي على شلحة مو بِيريكْ
_نزل راسو وخرج وقلبو تيحس بيه تيضرب بقوة من كلام أمو لي رعدو ، دخل سيارة و تيحس
بجو مشحون و مكهرب ، يديه على مقود السيارة أنفاسو تتصاعد ومراقب الطريق وكل لحظة تيدور راسو بنفي كأنه يسأل نفسو و يجاوب نفسو فنفس الوقت حتى توقف جنب الطريق محني براسو لباب العمارة مراقبها
عز الدين : يلاه هادشي غير قالك معطلة !!
_على ماكمل كلامُ ، خرجت من باب العمارة بخطوات سريعة و شعرها شديد السواد تيتمشى معاها طلعها من رجليها لراسها ، مراقب لباسها و زينتها و حركات يديها لي تترجع بيها خصلات شعرها للوراء حتى فتحت باب السيارة و استنشق عطرها الدائم خلاتو يحك أنفو مديماري فنفس الوقت
إسراء : صافا !؟
عز الدين : ( بتنهيدة حارة خارجة من الأعماق ) صافي هادشي علاش قدرك الله ؟ ( التقو عينيه بعينيها و كأنه أصابو تيار كهربائي ) درتي لي بغيتي ؟
إسراء : ( ببرود ) شووف الله يرحم لك الواليدين ! لا تبقاش تفرع ليا راسي ، لي فيااااا كاافيني ! با و امي ومشاكلهم خويا و مشاكلو ، أنا راه تنتقاتل باش نستقل براسي
عز الدين : ( حرك راسو ببطئ مغمض عينيه للحظة ) يلاه بداي ، نفس الكاسيطة ، أناااا وأناااا وأنااا (ضرب يديه على الفولون ) أنااا زعما راني عايش فوق فكيييك ؟ حتى أنااا مقاتل ! حتى أنا عيشتي عيشة لي حاكمين عليه بالمؤبد ، نهار لول أ بنت الناس قلت ليك هااااا طريق !!!هاااااا البلان المكاد ابنت شلحة ، ونتي طرطقتي مرارتي باش تردعتي
إسراء : ( لوات لسانها ففمها كأنها تتبلع مرارة كلامو تتفكر ذكرياتهم ) صمت
_كمل الطريق سايق متأكد أن صمتها هو نهاية الكلام، مرة مرة يخطف نظرو ليها ، يلقاها مع ظفارها أو شفايفها أو خصلات شعرها ، حتى توقف بالسيارة
إسراء : ( تحنات مادة حنكها ليه ) يلاه باي
عز الدين : ( سلم عليها حتى تسمع صوت القبلة ) تهلاي ! ليل وندوز ليك العشا ، آخر مرة لقاك بايتة مع لكوافورة
إسراء : ( بمزحة عجبها الحال وهيا نازلة ) أحببببك
_خلاتو مبتسم ليها وهي مكملة طريقها داخلة للمصحة أول ابتسامة بتاسمت كانت لرجل الأمن ودخلت مباشرة للاستقبال وقفت عندهم
إسراء : بونسواغ
مسؤولة استقبال : جيتي اختي؟! طلعي طلعي راه نايضة ف كلينيك
إسراء : اويلي !؟ اش وقع ؟
م ا : داك آغشي ميلياردير لي دخل باه هادي تلتيام يدير اوبيغاسيون حصلو معاه حصلة الكلاب
إسراء : ( بتاسمت بخبث ) يعطي لدلمهم الغرق !
_مباشرة طلعت للغرفة خاصة بيهم، غيرت ملابسها و حذائها و جمعت شعرها حاطة عليه بوني طبي و جلست تتشوف جدول الليلة و هما يدخلو عليها ثلاثة لبيغسونيل من ميدانها القاو التحية و مباشرة دخلو فالموضوع
فرملية1 : وكاااارثة واشمن كارثة
فرميلة 2 : الالة ! شتي نبصم عليها لي خرج الهضرة منهم
فرميلة 3 : شكون منهم ؟! راه مولات لكلينيك راجلها لي مشارك معاها
_سمعت لي سمعت و لكن هيا البلان كولو فراسها من مصدرها الخاص بتاسمت هازة بلاطو حديدي فيه آلة الضغظ و السيروم
إسراء : اوا اختي أنا بعدا ما فهمت والووو ! يخليونا ندوزو ليلة لاكاغد هانيين ماشي ماحيلتنا لسيرفيس ماحيلتنا لإدارة ، تهلاو
_ساعتين وهي فسيرفيس ! من غرفة لغرفة مرة مرة تتهبط للبلوك إلا حتاجوها حتى دخلت سلمى صديقتها
سلمى : وصلك بوليسي؟
إسراء : طبخ ليا راسي ! ولد كلبة عرفني بايتة عندكم و ناضت فيه البيضة
سلمى : شنو عجبك سيد البارح ؟
إسراء : ( نقصت صوتها ) هاهو عجبني؟ اصاحبتي راه عزالدين ايجي يخطبني
سلمى : اختي! ( تتويل ) ااااختي تتموتو على زلط! ( حركت راسها بامتناع ) شتي أنا ؟ إلا زواج برب لا عقدت مع شي ولد قح_بة ! خصوصا صحاب بوليس و جدارمية ، شفتي بزناز ونسلك معاه جرة
إسراء : واش ربع سنين اسلمى نخوي عليها سطل الما؟ واش عاد نبدا من أول مع شي قواد من أول؟ سمية باك! فين مك ! شمن لون تتبغي
سلمى : ختي هادو علاقات مزاليط ! هاد أسئلة علاقة مراهقين لي تيسهرو ! أما علاقات ديال صح ؟ علاقة لي تتربحي منها وتفيدك؟ هي ناس صحاب لعاقة و لمهمين ! شفتي بارح؟ شفتي بتلفون واحد جاب لنا أخبار فوق طبلة! خبار كلينيك كامل فدقيقة !
إسراء : اااه ختي شفت ...( حطت صبعها فمها تتفكر ليلة بارح و السهرة لي دوزت بصدفة)
🔙🔙🔙🔙
_فاتحة ليها مريم الباب و تتهضر فتلفون و سلمى كذلك تتهضر فتلفون، هازا العشا لي عطاتها خالتها فاطمة وحطاه فوق طبلة زاج باللحم بالخبز بديسير بقرعة موناضا
سلمى : شكون وصلك؟
إسراء : صاحب فداء بنت خالتي ! زيدي تاكلو
مريم : ( جلست بفرحة تاكل ) ديك صفريطة مزالة مع ولد غرباوي ؟
إسراء : ( تتاكل وتشير براسها ) ختي تيبغيها و تيموت عليها ولكن خالتي مابغاتش قالك تريكتو نصابة
مريم : فين خوتك؟ اقيمتو وخرجتو؟.
إسراء : شاكر مشى وصل تيجاني المطار و ياسين مسافر و لبرهوش راه خليناه فدار!
سلمى : ( مسحت يديها ) دجاج بنين ولكن راني معروضة
مريم : ( تتدخل ففمها و تهضر ) ديني ختي عيشك
سلمى : مريم خليك مع الفلاحة و شيافرية صحابك! هاد السهرة فيها أطباء ودكاترة كادر
مريم : ( بنظرة تعالي ) سيري تقاودي نتي و كوادرك
سلمى : زيدي آ إسراء تمشي؟
إسراء : نتي صاحبك دكتور يخليك؟
سلمى : صاحبي لي داير هاد سهرة ! داكشي ناضي فيها واحد فنانة شلحة و شوا
مريم : المميييييمة اااسلمى ماتديني
سلمى : ماغاديش نديك ! نتي تتشوفي شراب تترجعي بحال هيام سطار! طلق افم وقول( شافت فإسراء ) نوضي تلبسي من حوايجي و تقاد ليك مريم
إسراء : هداي عليا صاحبتي! أنا حدي حد لانيف ولا سهرة فكلوب اش داني لجلسة دكاترة
سلمى : أنا نديك ! ويعجبك الحال داكشي فوق سلك
_إسراء : ( بتفكير ) زيدي نمشيو ( رن هاتفها وشافت أبيل فيدو واتساب من عز) طفيو ضو اري ليزار
_فالبلاصة رمات عليها ليزار و طفاو ضو و دارت راسها متكية وتجاوبو بعياء
عز : تنقوليك فرقي عليك كوافورة ونتي بايتة معاها
إسراء تتشوف مريم تتصبع لها و تتجاوبو: يلاه أنا نعس راني عيانة ( قطعت الخط )
مريم : ( شعلت ضو ) ولد قح_بة داي ذنوبي فابور يجي يطل على سلمى مولات فولار تقود قبيلة
سلمى : فايت ليا قودتك ؟
مريم : لقيتيني ماعنديش مع لفورنسي أما كون قودتيني
إسراء : شوفي إلا مشى حتى جا ولا مشى عيط ليا يقولي طلي من شرجم ؟ طلي نتي
سلمى : طفي عليا داك تلفون خلينا ندوزو سهرة طرانكيل
مريم : يطلو عليه جنون ! ماعندي زهر مع لبشرية
_دخلو غرفة سلمى بداو يختارو فالملابس ! سلمى لبست كسوة بيضة حجابية مع صندالة وصاك ورماات شال مثل خليجيات و ماكياج شبه خليجي مع شفار و إسراء لبست كسوة فأسود لاصقة على اللحم تحت ركبة و بلا صماطي جاتها منحوثة خدمت شعر بوكلي و نفس ماكياج سلمى قلبت لعينين بالمساكارا و غوج اليفغ برز شفايفها دوشو بريحة عاد خرجو رامين عليهم عبايات مفتوحين ركبو سيارة سلمى متجهين منطقة بعيدة بساعة عن المدينة...
سلمى : وصلنا قادي حالتك
إسراء : هدا أوطيل ؟
سلمى : أوبيرج ! شوفي ؟ عينيك مع عينيا شفتيني قلبت عيني بضحك قلبي على أي واحد قرب ليك شفتيني رمشت راها اوك
إسراء : سمعي قولي لصاحبك راني مخطوبة
سلمى : ( أشارت لها بصبعها لداخل ) شتي هنا ؟ راه مزوجات و جاين يقصرو مع دكاترة هما يضبرو لهم على ليزافيغ لا هما لا رجالهم
إسراء : آويلااااي؟
سلمى : شتي دلمك الجلسة مع مريم تتعربن بنادم ! طلقي ليا لسانك فالفرونسي و ضحكة بالعبار و هبلي ليا بشرية بدوك العينين
_المكان كان عبارة عن أوبيرج ! فدخلة الأمن استقبلهم و رحبو بسلمى لأنها معروفة عندهم ! مرو بممر طويل مزين بالورود حتى وصلو ساحة الحفل مبنين فيها خزانة و جلسة شاي تترحب بضيوف و سرباية واقفين للخدمة دخلو مبتسمين كانت أنظار عليهم حتى استقبلهم دكتور صاحب سلمى رجل خمسيني
ص س : مرحبا! ( بحرارة ) مرحبا بإسراء ( تحية باليد ) الالة خاصني نخوي لورد على زرابي
إسراء : ( بخجل ) اوا لاتزيدش فيه ! عاد كتاب
ص س : زيدو جلسو لهيه شوية ونجي عندكم
_جلسو جنب بعض ! كانت لخزانة فيها جلسة أمازيغية زرابي مزوقين والحنادر مفرشين كل جلسة ماتتعداش اربعة ناس وطوابل مسربين فيها شراب و مملحات والما
إسراء : دكاترة لمدينة كلهم هنا ؟ تي شكون خلاو للمرضى؟
سلمى : ( تتكلم تحت سنانها ) تنقول لمك وجه الفقر تتقولي ليا لا ( صاحبها رجع جلس معاهم )
ص س : راها نايضة فكلينيك ( عمر كاس شراب )
سلمى : مالهم ؟ شي فرميلة شفرت شي احد ؟
ص س : واحد السيد دخل هادي تلتيام لإنعاش ! اليوم واحد مصمكة من لفرمليات صدقت تتعرف ولد هاد السيد لي فالإنعاش تلاقاتو قبيلة
داخل عزاتو فباه لي فبالو راه حي
سلمى : ويلي ويلي! فوقاش مات هو ؟
ص س : سيد مع دخلة راه مات سكتة دماغية هما جالسين يحلبو فيهم! دبا تفرشو ولد السيد قلب كلينيك بالغوات
إسراء : ماشي أول مرة يديروها! راه واحد السيدة ولدت خرجاتها روح وبقات يومين فإنعاش وهي راه ماتت قبل ، دابا اش يديرو معاهم ؟
ص س : فلوس دخلت لاكيس والراجل مات اوا ولدو يغوت ساعة يمشي يدير لجنازة لباه فلوس تمشي وتجي باه لي راه مايرجعش
سلمى : شحال خديتي فلافيغ ؟ كنتي حاضر؟
ص س : باش تتسهري دبا ، أنا يومين مادخلت لبلوك ( لمح شخص وقف ) هانا جاي ..
_غادي مبتسم تيقاد ملابسو و إسراء و سلمى متبعينو بالعين حتى سلم على شخص واضح أنه دو مكانة عالية ، كان فخريف العمر بين أربعين و الخمسين دو ملامح صلبة و شقراء إلى برونزية و عضلات قوية بابتسامة خشنة سلم على صديق سلمى لي مرحب بيه بحرارة و جابو جلس معاهم تيذاكرو بينهم ومرة مرة عينيه تتمشي إسراء لي تتشوف فالفنانة لي داخلة تحت تصفيقات الجميع
إسراء: ( مبستمة من رؤيتها حتى تلاقات عيونها بعيونو بتاسمت ليه ) صمت
الشخص بنصف ابتسامة تحنى تكلم فوذن صديق سلمى وقف مشى الخارج ومعاه صديق سلمى حتى رجع لعندهم جلس تيضحك هضر فوذن إسراء.
ص س : شنو نتي مزالة مخطوبة ؟
إسراء : ( تدندن مع أغنية ) راك عارف شنو كاين!
سلمى : شكون هداك ؟
ص س : ( دور راسو بمعنى كن تعرفي شكون ) ماتسوليش بزاف ! بحال هادوك تيبانو مرة فالعام
سلمى : مالو خدام فالمخابرات ؟
ص س : ( بنظرة إصابة الهدف ) صمت
إسراء : ( تتدور فعينيها) اويلي خدام فالمخابرات ؟ شحال يكون تيتخلص ؟
ص س : الشلحة الناس فاش كانو يفهموها طايرة نتي فين كنتي ؟ سؤال الأصح هو ! شحال يكون تيعرف من كراد فالبلاد
إسراء : ( بحسرة) كنت فخيفرة امي تصبن وأنا نشر و حنا تغسل زرع وأنا نقيه و ليل تتنتفني عمتي و با مامسوقش ، ما حمدت الله تادخلنا مكناس و قربت لحنا دقلبي
ص س : ( مركز معاها ) شوفي أنا داي وجايب فزمان !! نقولك واحد نصيحة بحال نقولها ختي صغيرة ! ديري فبالك حتى حاجة مادايما و عمرك تكلي على أحد ، (أشار لعقل ) تكلي على هدا( طلعها وهبطها ) منين نتي ناقصة فالعقل ركزي ليا على هدا ( أشار لوجه بفخر ) فكي عليك بوليسي هانتي اليوم ضيعتي عليك همزة
سلمى : نووووو! عجباتو ؟
ص س : بغاها دوز معاه ويكاند مايخصها خير
إسراء : يمشي يقاود ! أنا باغة لحلال نتزوج
🔚🔚🔚🔚🔚
_بصباح اليوم ، ساعة تشير الثامنة صباحا ، كروبات فرمليات تتغير ! خارجة هي و سلمى ملامح وجهم واضح عليهم تعب من سهر الخدمة يلاه خارجين من الباب هي البنت لي فالاستقبال تنادي عليهم بجوج
ب س : توصلوني معاكم ؟
سلمى : إسراء تشد طاكسي ! وأنا ماشي فطريقك
ب س : اوا صافي نمشي أنا و إسراء فطاكسي
سلمى : ( غمزت إسراء ) يلاه نتشاوفو....
سوكيريتي : إسراء! هاد السيدة تتسول فيك
_إسراء وقفت تتشوف ببرائة ف سيدة شكون ! رجعت خطوتين لوراء تشوف وجه السيدة
إسراء : نعام الالة !!
_جاوبتها بصوت منخفض لكن بنبرة عدائية وهي تطلع وتهبط فيها
أم عز : لالة ولاللاك بنت النبي ! ( تقادات فالوقفة هازة جلابتها تحت باطها و بنتها حاطة جوج يدين على خصرها باغة منين تبداها ) اوا يا بنيتي ماحشمتي ماراعيتي ؟
_إسراء كحلت بالأعمى! مدة أربع سنوات عارفة شكون أمو وختو و خوه ! هو كذلك عارف عائلتها ، وقفت إسراء مسمرة تستوعب الصدمة وسلمى فهمت مافهمت بقات مبعدة
إسراء : علاش الشريفة نحشم ؟ لقيتي يدي فجيبك ؟ فين تتعرفني بعدا
أم عز : ( بنبرة تعالي) لقيت يديك فجيب ولدي ! ( تتعلي فراسها وتقلب عينيها) ولددددددي ! زايدون مايحصلش ليا شرف نعرف ملقطة بحالك
إسراء : سمعي الشريفة ! مزالة مابغاش نخرج معاك لعيب ! ولكن باش تقولي ليا ملقطة ؟ حدك تما
بنتها : ( تتهز فيديها ) نتي لي حدك تما و تفرقي مع خويا
إسراء : ( تتحاول تبرد قضية ) شوفي الشريفة! دبا جاية مصبحة عليا على صباح ! و فخدمتي؟ علاش تتقلبي ؟
أم عز : تفارقي ليا من ولدي ( حطت صبعها فوذنها بالعداو ) هاااااا حجر العافية تفارقي ليا من ولدي
إسراء : هاد ولدك صغير؟ هاد ولدك شفرتو لك من حجرك ؟ ولدك الشريفة راه مجرجرني معاه سنين ! أنا عاري علامن ؟
أم عز : عاااارك على راسك ! أنا ماجيت خطبتك من عند والديك مارشمتك ! تباغيتو فزنقة اوا فرقيه عليك، ولدي ماشي ديال وجهك اشايطة ، ولدي خاطبة ليه لالاك! ولدي دافع ضوسيه قريب يطيح العقد ولدي مرضي ومهدي ونتي باغة تخرجي عليه
أخت : ( باغة طير عليها ) تفااااارقي على خويا السحاااارة
سلمى : ( وقفت وجها ) جمعيي يديييييك
إسراء : ( تتحس براسها طيح ) خاطب؟
أم عز : ( بحركة جامعة صبعها لكبير مع صغير بمعنى ها منين تخرجي ) خطبت ليييييه ! ولدي مزوج مزوج دهازو مجموع و فراشو واجد كية لي دايعة فشوراع
بنتها : ( بصوت عالي ) والله تنشوهك مع داركم والله تنشرط لك وجهك السحارة إلى ما تفارقتي على خويا
سلمى : ( تتجر إسراء ) هااهيا حطي فيها يديك نشوفو شكون تبات فالبنيقة
بنتها : خوياااااااا بوليسسسسسي ! خويا يجمعكم كاملين
أم عز : ( تابعها من لور وهي تتبكي و كولشي تيشوف ) والله ودوري ليا بولدي يا كل نهار تلقايني هنا
بنت الاستقبال : حشومة الالة هادشي راه عندك بنتك
أم عز : بزااااف عليها ابنتي ! بنتي مشات فشان ولمرشان راجلها شافها فالعدول وضرب عليها طرقان
بنت الاستقبال : نعلي شيطان الالة
أم عز : شيطان هو بنادم ( تتشير لإسراء تتركب فسيارة ) هاديك هي شيطانة
_وتقول ديك المراة واش سكتت ! واش قالت بركة ! لاهي لا بنتها!! غير تحركت من سلمى بسيارة عاد شدو طريق لعودة
إسراء : ( تتبكي وتشهق بجنون ) ولد الحراااام الله يلكيها لو فهاد نهار ! أنا تعايرني امو( تترعد تترعد تجبد تلفون ) كنت حاااااسة! كنت حااااااااااسة ديك سميانا لي قالب وجهو راه شي بلان وراه
سلمى : ( تتاكل ريتها ) سرررررك! سررررك ابنتي ، دبا أنا رْضى تكون هادي عكوزتي ؟
إسراء : ( تلفون طاح لها صبعانها تجمدو) وااااااااااولد لقحبااااااااااااا ! جرجرني ربع سنننننننين ( تتضرب وجها ) اااااش نقول لخالتي؟! ( تتويل وتبكي ) تقت فييييه وتنقول عز الدين أنا ليه هو ليا
سلمى : ( وصلت عمارة ) مسحي كمارتك نزلي
_كأنها غادة فشوك ! جوج خطوات البرطمة طوالو عليها ، مع دخلة رمات صاك غادة جاية وسلمى جلست شادة تلفون ومريم خارجة من بيتها
مريم : مالكم ؟
إسراء : ( ترمات فحضنها تتبكي بصوت مجرووووح ) تزوووووج امريم عز الدين تزووووووووج ( مريم تتعنقها بقوة تتسمع وهي تنهار بين يديها شادة فقلبها تتحس بيه موس ودخل فيه ) ااااااااااااااااااااااه ( بكاء شديد ونخسة عالية ) اااااااااه اربي وشنو مزاااااااال تحيد ليا( طاحت أرض تتشوف فمريم وسلمى لي دموعهم نزلت معاها بنظرات ألم ) عز الدين تزووووووج البنات( حاطت يديها على وجها راكعة على ركابيها كأنها تتحضن ألمها وصرخت بأعلى صوتها ) اااااااااااااااااه
مريم : (تتبكي بحرقة ) الله ياربي
سلمى : ( تتنخصص ) بكي باش تعقلي عليها ابنتي راه اولاد قحا___ب هما هادو
_إسراء : ( بصوت باح ) قلبي تيتحرق( تتشد فمريم بنظرات ترجي ) شفتي حب قلبي شنو دار فيا؟ شفتي عز الدين تزوج؟ ( ماقدراش تصدق ) كذبيني امريم ! ( بتوسل ) صوني عليه امريم وكذبيني
سلمى : ( تتحبس دموع وينزلو ) إسراء ! حسبيها جنازة و دفنتي قلبك فيها ! راه امو قالت لك تزوج راه تزوج ولا راه خطب مهم راه غدرك
إسراء : ( بغصة تتسرط لكلام لكن رافضة تصدق ) هو لي تيحن فيا ! هو لي تيخاف عليا كثر من با ! هو لي مفششني كثر من امي ! هو لي تنحط عليه راس كثر من والديا، هوووووو لي تيغير عليا كثر من خويا ( تتضرب فوجها بجنون ) عيطي ليييييه !
مريم : كاين الله! ( تتمسح دموعها وتجرها تعنقها لكن تتجبد لها باغة تلفون ) رجوع الله إسراء
إسراء : شوووهاااااتني امو قدام كلينيك وهو شواااااني فقلبي قدام عيني ! ( بنظرات تائهة ) شمن ذنب درت؟ ماتنآذي احد ! مااااا تبليت على احد ؟ علاش ربي ماكتبوش ليا
مريم : لمكتااااااب ! تستاهلي حسن منو
_إسراء : ولكن عمرني لقى بحالو ! رضيت معاه بالقليل وباعني! ولد اموووو ، كيتي أنا ما بنت امي مابنت ابا !! بنت راسي ، وراسي راس المحاين
_فحياتنا منين تاتجيك دقة القلب كما كان نوعها تتحرقك ! تتخلي قلبك تيتشوا و عقدة بين ضلوعك حتى النفس ماتتقدر طلعها و عينيك تتحس بيهم فيهم شوك هدا جسمانيا أما عقليا الله وحدو لي مطالع عليك ! الجو كان ناقصو بعض العزايا ويكتمل عزاء ، وحدة تتشوف فوحدة ويشوفو فيها ناعسة منها أرض تتشوف فالفراغ ، لحظات ورن هاتفها و هي تهز من بلاصتها
إسراء : ماتتجااااوبوش
سلمى : ( هزت تلفونها تتشوف ) اسمهان هادي !
_شدات منها تلفون فاتحة المكالمة فيديو واتساب مع ألو مع دموعها نزلوا وبدات تعاود من جديد وتعد خلات اسهمان حاطة يديها على فمها تتشوف
سلمى: ماعيتيش من لبكا ؟
إسراء : ( تتمسح دموعها ) خليني! ( تتشوف فاسمهان ) ختو بغات تنتفني
اسمهان : سلمى زعما نتي معاها وتنتفها ؟
سلمى : فهمي هضرة فين غادة أسمهان ! قالت لك بغات تنتفها!! أما كن حطت فيها يديها كن سلختها هي ومها ! دبا هضري مع بنت خالتك تفك عليها زبل
أسمهان : إلا مافيها نفس ( شدت تلفون اخر طالعة نازلة ) أنا دبا نيت نتبرا فدلمو
إسراء : ماتهضريش معاه ! يمشي يقاود
أسمهان : انتي دبا لي سكتي تقاودي ! ( بفقصة ) شحال و أنا نقري فيك ! شحال وأنا نضيع الحجرة معاك ونتي شادة ليا فواحد تيصرف علي قبيلة ( دارت ليها بإصبعها سكتي ) الو !!
_كانت إسراء و سلمى ومريم جاية من كوزينة تيسمعو وحدة تتشوف فوحدة مقربين من تلفون تيسمعو صوتو مسموع بهوت باغلوغ
عز الدين : الو شكون معايا
أسمهان : أنا اسمهان بنت خالت إسراء هادي
عز الدين : أهلا ختي صافا أمورك بخير
اسمهان : إلا غير أموري هاد ساعة أحسن منك ! عيطت لك باش نقول شي هضرة ديرها حلقة فوذنيك
عظ الدين : ( وقف بانتباه ) شمن هضرة ؟! مالكي تتهضري هاكا ياك والو باس ؟
أسمهان : لاوالو !!! غير امك واختك شوهو بنت خالتي فلكلنيك قدام أمة لا إلاه إلا الله ماخلاو فيها غير لي نساو ! شفتي وخ تكون هاد إسراء تلاقيتيها فبار ولا هزيتيها من أوطوسطوب ماتكونش نهايتها معاك هاكا ، مااااصدقتيش راااااااجل مااااصدقتيش اعز الدين، أما حتى زواجك مايهمش بنت خالتي راه هي لي كانت مجرجراك وماباغة زواج وأنت لاصقها
عز الدين : ( عينيه خرجو هو تيسمع كلامها ) واااااايرزييييني فصحتي ! وااااايطير عليااااااا عينينا باش تنشوف ما مزوج ولا تزوجت
اسهمان : ( بنبرة عاليا ) سوووووقك هداك! أنا تنتبرا فيك على امك وختك ، تنقسم فمي بالله تنشد طيارة على بنت خالتي و نرونوها تما ، إلا تيقول راسك راها ماعندها عائلة راك غالط ! ونت عارف شكون جدها وخوتها ! دبا تبريت فيك وإلا كنتي بصح راجل بعد من بنت خالتي وسير تزوج بلي بغات مك، بنت خالتي بزاف عليك( قطعت وشافت فيهم ) سمعتي ؟
إسراء : ( حلقها جف ) صمت
مريم : ولد كلبة ضربها بنكرة ! أنا اليوم نمشي صالون نجيب خبارو من جيرانهم
سلمى : أحق مولانا إلا غير لهبيلة لختها دايرين بيا ! دبا حتى هداك نخسر وقتي و دماغي باش نجيب شكون تزوج ؟ باااااش نتبع أخبارو ؟ شتي نتي وإسراء عمركم تقدمو
مريم : كفاش نتقدمو ؟ مالنا نمشيو نعيشو فميريكان؟
سلمى : ( هزات حواجبها بسؤال ) تقدي نتي على عيشة ميريكان؟ ولا هاد لخطية لي حداك ؟ شحال من مرة قلت ليك خوي ديك لحومة وشدي محل فسونطر وخدمي مع الناس الكلاص و ناس الفلوس ونتي لاصقة ليا فكليان بروشينك عشرين درهم !
مريم : أنا ماقرياااش ! أناااا تفوتي ليا وي ولا نو بالفرونسي نتلف بقى ليا نخدم مع داك نوع! خليني اختي
سلمى : هانا مخلياك ( دخلت تنعس ) إلا جا داك لقواد بوليسي ماتفيقونيش باش مانزل نسب امو
أسمهان : تسبو لي تزوج وخلاها ( تتشوف فإسراء ) سمعي إلا رجعتي معاه ولا زدتي معاه راكي ماشي خنيفرية بصح ! راه ماولدو فيك والديك غير لخلا ، ديها فخدمتك و زيدي لقدام كما قالت ليك سلمى إلا غير رجال راه عطا الله !
إسراء : ( غير تتشوف ) صمت
أسمهان : تهلاو أنا قارية لي كور بليل!
مريم : بسلامة زين ( غير قطعت هو يرن عز ) هاهو تيصوني
إسراء : ( قلبها طاب ) صمت
مريم : نجاوبو؟ ( قبل ما تجاوبها فتحت الخط ) الو
عز الدين : دوزي ليا إسراء
مريم : ربي وماحشمتي ماراعيتي ؟
عز الدين : ( بجنون ) مرياااااااام!! ( بهمس ) مريم ختي! ااااااختي مريم دوزي ليا إسراء ، راه مابقيتش نقشع
مريم : مابغاتش تهضر معاك ! سير بدل ساعة باختها
عز الدين : نتوما فدار سلمى ؟! ياكي ؟
مريم : سير بعد لتيساع راه إلا جيتي تهبط ليك نيت سلمى تشوهك
عز الدين : مشوه مشوه مهم نهضر معاها....
_من الدار الكبيرة داخل صالون ، دار فاطمة ! ديما ضياف قاصدينها ، ولي جاها على الغدا تشدو العشا ، ولي جاها ضيف على نص نهار تشدو نهار ! معروفة بالصواب والكرم و بنت الأصل ، عمرها خيبت لي قصدها ولا رداتها فوجهو لا الصغير ولا الكبير وأكبر مستفيد من هاد رابطة هو مرت لوسها حليمة ومشاكلها مع ولدها عثمان....
_فاطمة : ( حطت صبعها على عينيها منزلاها) اويلي أستغفر الله العظيم عليها كلمة! حاااملة ؟
حليمة : ( تدور فراسها بفقصة ) راه بحال رماد ورميتيه ليا فحجري ! ولد الحرام فعايلو محمل ليا درية و جاي يقولي مي زوجيني هو خايف من الحبس وأنا يجيب ليا شوهة
فاطمة : ( شداتها ضحكة ضربت فخدها) اويلي على عثمان مزال صغير اش بغى بشي أولاد! اوا دبا هاد عرس يرجع سبوع؟
حليمة : أنا نهز جلابيتي ومايعرفوني فين مشيت ! ها ولدو ها عروستو و زيدو البنت
فاطمة : اش تتكولي احليمة فين عندك تمشي! ( دخل ياسين وراه عمو وعثمان ) سلام
الكل : السلام.....
فاطمة : اعثمان اولدي مسبق العصا على البهايم
عثمان : ( نزل راسو وسكت ) صمت
الأب : (بطنز ) وايلي آفاطمة اختي نتي ماشي برانية ! اوا دبا مدرسة الحكومية بناو وحدة جديدة و داك العمارات بناو عشرة جداد و طبيب الحومة بناو واحد جديد ودروبة خاوين ! اوا ولدي عثمان بغى يدير كثافة سكان
حليمة : ( تتنذب وجها ) اوااااااااالعداو اعبااااااد الله ، لولد جايب الكرش وهو ساير يضحك
الأب : تربيتك ! ( محرك يديه كأنه هاز رضيع ) ولدي ولدي ولدي( أشار ليه ) هااا ولدك ! بروصي مسكد
حليمة : ولدي جبتو من دار با ؟ ولدك حتى أنت
الأب : أنا ماعندي أولاد ! ( هز يديه فوق راسو ) أنا يعطيني ضو الأخضر راه نبات مانصبح
حليمة : حط الخلصة و سير
الأب : أنا معطي لكم فالدية ؟ عشرين عام والصرف آبنت لعرج ونتي تشفري ليا فلوسي وتجمعي بليل و نهار و مزال طامعة ليا فخلصتي ؟
حليمة : مشفراك ؟ جامعاااااك قالك
الأب : لا جامعة ! ( دور راسو بمحنة ) جاااامعة مع راسك ( وأشار لعثمان ) اخر مرة كشط لك لكونط زيدي جمعي
عثمان : الوااااليد !! آلوااااليد
ياسين : ( تيتفوه ) دبا اعمي نفكو مشكلتك أنت ومرات عمي ولا نحلو مشكلة ولدكم ؟
فاطمة : دبا خطبتو البنت ؟
الأب : تي اشمن خطبة اختي فاطمة ؟ ماين البنت قالت لينا إلا فسيمانا ماطيحوش العقد ؟ هاد الكيضار يتقدم لوكيل الملك
فاطمة : اوا شنو ؟
الأب: يطيح العقد و ينوض يخدم على راسو ! أنا مانصرف عليه ما نعرفو ، منو لأمو
حليمة : أنا منين نصرف عليهم ؟ هاد لعروسة دخل كي صامطة ؟
الأب : ديري لها الخميرة ! وزيديها سكر و هزي قدامها لعلام و بداي زغاريت من دورة الدرب ، داير مزية ؟ الأولاد وصلو والديهم لعند الملك وأنا من نهار شم تحت بيطانو ماخلا فين وصلني ؟ لكوميسارية ! لجدارمية ! للمستعجلات ! هاهو دبا موصلنا العرس بلا وقتو
ياسين : ( شد فراسو من هضرتهم ) وااااعمي ! سمعني دبا الله يرحم والدين
الأب : هانا ولد خويا
ياسين : عرس هاد مسخوط نديروه هنا عندنا ! موافقة أمي ؟
فاطمة : اوا ولدي عثمان راه ولدي حتى هو
ياسين : ها المسمار أول ! المسمار ثاني ختك لي فصحرا صيفطت ليا مليون باش دوز هاد العرس ، إلا خاص شي حاجة أنا نتكلف
حليمة : بزاف عليه مليون اولدي ! صيرو مياات ألف و اراو ليا ميات ألف نصير بيها
ياسين : مرات عمي نعطيك مليون وتاخذي ولدك وديري عرسو عندك؟ ونتي تكلفي؟
حليمة : لا اولدي!
الاب : بانت لك فميات ألف؟ امااتحشميش ( شاف ياسين ) الله يرضي عليك اولد خويا
عثمان : ديك مليون شريو لمراتي خاتم
ياسين : نوووووض لدلمك تكعد من قدامي! ( وقف خارج ) دبا تافقو على نهار و كولو ليا شنو خاص
فاطمة : شكون تعرضو ابعدا؟
حليمة : أنا هناك الله ! منين ديرو ليه ليلتو هنا مانحضر احد من غير امي وختي
الأب : لا لا مامامتش اقتلوه ! ديك دعاية ديال مك و شوافة ختك
حليمة : بزاااف عليك ! حارين عليك
عثمان : ( واقف جنب ياسين تيشوف فيهم ) صمت
ياسين : ( شاف فيه ) شتي زواج والديك ؟ اوا وجد كرك الحمار معاهم ، زايدها بالأولاد
عثمان : راه نوض نخدم ونكري
ياسين : تخدم بزناز ؟ فين عند مك تخدم ؟
عثمان : ( تيهضر ومبعد وجهو ) دبا ! دبا!
ياسين : ( تبث فيه شوفة ) تمشي تخدم مع خالي شاكر ؟
_كل ماتيصبح صباح فحياتنا تنبداو روتين العادي ، لي تيقرا لي خدام لي جالس فدار ! لكن عند البعض الصباح متوقف عندهم ! متوقف عندهم بالذكريات و غدر زمان ، ماكرهوش الوقت أما ترجع للوراء أو الوقت يطير بمرة للنسيان ....مع آخر لمساتها أنثوية أمام مرآة دارت عند خالتها بتساؤل
سندس : طاطا كي جيت ؟
خالة : ( بعيون محبة ) تتحمقي ابنتي ! ( هزت صاكها ) صافي نمشيو؟
سندس : ( تتشوف فأرجاء ) صافي مانسيت والو !
_ بلباسها أنيق ! لابسة سروال دجين مفضفض مع بيل ماركة فابيو وصبادريل فرجيلها وجامعة شعرها لأعلى بستيل شبابي خارجة مع خالتها راكبين سيارة شادين طريق لفاس ومتبادلين الكلام حتى رن هاتف سندس
سندس : الو
شاكر : آلو ! فين وصلتو ؟
سندس : يلاه قلعنا بواحد نص ساعة ، أنت فالشركة ؟
شاكر : وي ! مهم راه الحاجة موجدة الغدا عارضة عليكم ، باش تشوفي الصباغة لي درت
سندس : ( بخجل ) لالا خليها مرة أخرى! أنا ضربت حساب نشوفك غير فشي بلاصة
شاكر : كفاش؟! أنا تنقول لك الحاجة موجدة نتي تتقولي ليا فشي بلاصة ؟
سندس : ماشي مابغيتش نجي ! ولكن راه ...( تلفت فهضرة ) راه ...( شداتها ضحكة ) لابسة كي عزري دوار وحشمت
شاكر : هداك سوقي أنا! لبسي لي بغيتي وكيف مابغيتي ! الحاجة تتمشي مع ساهلة ، كلها تينعس على جنب لي يريحو
سندس : اوا صافي ! نكونو راجعين و نتصل بيك
شاكر : فاش دخلو مكناس نتلاقاكم و نديكم لفاس ورجعكم
سندس : راه مانتعطلوش ! غير ناخدو لقياسات ، مالهيكش على خدمتك
شاكر : الآلة غير لهيني
سندس : ( بضحكة استحياء ) الله يخليك لي لي ! نوصلو نتاصل بيك ( قطعت) خالتي هو يدينا
خالة : اوا بنتي الله يتاويكم ! شاكر جانتل مان و تيهتم بيك
سندس : ( بفرحة ) اااه عندك صح اطاطا ! عرفتي فأول كنت تنقول هدا تيتفلى وصافي، ماكانش تيتفهم ليا ، وتيشد فيا بضحك و يحطني ويهزني ببنت الرباط ولكن هو هكاك ضحكو واعر بحالو
خالة : هداك هو راجل ابنتي ! ضحك فحدود ، مهم تتحسي بيه هو مسير راسو ماشي شي احد مسيرو
سندس : لالا هو ماتيحكم فيه احد! بالعكس هو الولد الكبير فالعائلة شاد شركة و مسير أمورها
خالة : حتى نتي ابنتي مور زواج ماتهمليش راسك و تنساي راسك ، مدام هو مامعترضش كملي قرايتك و خدمي ولو معاه ! هانتي أنا خير مثال خدمتي وداري وطموبيلتي و فلوسي فالبنكة هو سندي مصاب غير صحة أما راجل صدق ؟ مرحبا ماصدقش ماعندو مايحيد ليا ولا يخليني بلاش
سندس : لالا شاكر ظريف وبينا حب اطاطا ! بشوية عليا، دبا نقرا ونكمل!
خالة : شتي ابنتي سنين علماتني كلمة لا !! وجملة تقة فالشخص بحال هداك مايديريهاش ولا هاديك ماديريهاش ؟ سنين علماتني مانقولهاش ! دوام الحال من المحال ، من هنا غدا ماعرفنا شنو يوقع ابنتي
سندس : ( بعدم استعاب ) وايه اطاطا ولكن شاكر ظريف و تيبغيني و باينا متفاهم
خالة : الله يدومها ابنتي ! شوفيه فين يتلاقانا راه بقات لنا عشرة دقايق ونوصلو
_عشرة دقايق بضبط كان عندهم شاكر بسيارة ديالهم ! سلم على سندس بالوجه وعلى خالتها باليد و طلعو سيارة معاه شدو طريق فاس و سندس غير تضحك و تكلم على تحذيرات العرس بفرحة حتى وصلو المصممة صديقة خالتها دخلو شدو القياس ورجعو بطريق العودة للفيلا
سندس : ممكن توقف فشي باتيسري ندخلو شي حاجة فيدينا
شاكر : ( بابتسامة ) الالة نتي كلك حلوة غير مرحبا
سندس : ( بخجل ) لاااا لا وحشومة وقف
خالة : وقف اولدي الله يرضي عليك أنا أول مرة ندخل عند الحاجة
شاكر : مايحتاجش الالة والله !
_أصروا عليه حتى وقف لهم أمام محل حلويات و تقضاو ضيافة هماوية هو غير تيشوف فيهم و يعبر بعينيه رجعو الفيلا داخلين لي كانت الحاجة فاستقبالهم داخلين صالون جالسين مع بعض سندس احمرت خجل والخالة عجبها الحاال برؤية عائلة شاكر
شاكر : ( لمح تسنيم مرت ) تسنييييييم ( رجعت داخلة ) سلمي
_بتاسمت بحياء سلمت على سندس وخالتها و رجعت خارجة عند الحاجة فالمطبخ وحمزة ورائها
حمزة : شكون كاين ؟
تسنيم : مرات شاكر ! ( شافت فالحاجة ) ديرو لنا طعام ؟
الحاجة : سيري اتسنيم عندهم قولها تجي خلاص راه تعطلت الناس بوحدهم جالسين
تسنيم : ( بسرعة الكلام ) مانمشيش أنا ياسين تيقتلني بالتسلام وغير دبا سلمت على هادو الداخل راه وجهي حساس ما تنحملش نسلم على البشار
حمزة : مصنوعة من الكارطون ا الصفريطة
تسنيم : دخل سوق راسك اعزي !
الحاجة : ( شيرت عليهم بزيف الماعن ) خرجووو عليا
حمزة : ( خارج تيهضر تابع تسنيم ) ياكما صحابك دوك المونيكات للي تتفرجي فيهم تلقايهم فالمطار كوريا تيتسناوك ؟
تسنيم : ( داخلة للفيلا تتجاوبو ) ألقاهم ! والقى حسن منهم ماشي بحالك اعزي ماتشوف فيك الموحمة
_حمزة راجع ليها يشدها و هي تتجري والحاجة تنادي عليهم ينقصو من الصداع و قي نفس الوقت الحاج داخل هو و فاطمة سامع غواتهم هما اللحظة لي شافوه عوض يدورو للجردة اتجهو للداخل جنب الصالون فين جالسن الضياف ماتسمع غير هضرة الحاج عندهم
الحاج : داك بني كلبون ماتهداوش عليا من صداع ؟
شاكر : ( نزل راسو عاض شفايفو ) الصمت
سندس : ( بتوتر تخشات فخالتها تتشوف فشاكر ) مالهم ؟
شاكر : غير مع أولاد ختي الصغار ! انا جاي ( ناض خارج عندهم ) الحاج راه عندنا الغاشي
الحاج : ( هز يديه بعصبية ) منك ليهم !
فاطمة : سير ابا توضى تصلي سير ( جرت شاكر معاها ) زيد
شاكر : ها الصداع لي ما تنبغيش ولكن تنشد البراهش بجوج
فاطمة : ( بهمس ) راه ترجع مراتك وتعيش معاك واش نبقاو نزوقو من دبا ! الحاج هو هادا ..
شاكر : دخلي اختي سلمي عليهم
_دخلت فاطمة بابتسامتها سلمت عليهم و تترحب بيهم و عطاتهم وقتهم بعد دقائق انضمت لهم خدوج و فداء بوحدها و الحاج لي سلم ورجع للبيت ديالو و حطو الغدا وجل كلامهم كان على توجاد العرس ، كانت سندس تتحكي لهم التجهيزات وهما تيحكيو لها التقاليد ديالهم و العرس لي ناوي الحاج يديرو لشاكر فخنيفرة حتى نزلو اتاي و شاكر و سندس طلعو للفوق مع بعض
سندس : ( تتشوف فالصباغة ) جات مزيانة ! راه كبير بعدا
شاكر : ( تيشير لها جهة الحمام ) حتى الحمام نعاودو ! ندير لك كولشي لون ابيض كما طلبتي
سندس : و لكن حتى نتا عاجبك ؟ ( ابتسم شاد لها فيديها وقفو فالبالكو تتشوف فناء الفيلا) هنا كبرتي ؟
شاكر : ( قبلها فحنكها واضعها امامو ) كبرت فخنيفرة ! اما الفيلا نهار سكنا هنا؟ ( تيشير لها جهة المطبخ الخارجي ) تما فين كنا ساكنين ، تما فين كبرت و نعست وكليت مع الوقت الحاج بدا يبني دقة دقة ! حتى كملنا الفيلا
سندس : تبارك الله ! الله يطول فعمرو ، بنى لكم فين تعيشو مجموعين
شاكر : آمين! داكشي لي كاين ، زادو عمروها اولاد اختي ( دورها عندو ) شنو ماتوحشتينيش ؟
سندس : ( بحياء احمرت بسرعة ) توحشتك ! ( نزلت راسها وتعلات على رجليها قبلاتو فمو ) وبزااااف
شاكر : ( بخفة جرها حاضنها بقوة) هادشي لي طلع معاك ابنت الرباط بوسة ؟
سندس : ها نتا رجعتي تاني تشد فيا ! ( تتهرب منو ) طلق مني تعطلت
شاكر : ( جرها بقوة لعندو) دخول الحمام بحال خروجو؟ هنا تبقاي
سندس : والله بابا حتى يجي يحيح ! يقوليك بنتي بنتي
شاكر : هي ديك الفاتحة لي قرينا و الخطبة اضحك ؟ راكي ديالي
سندس : ديالك وي ! ولكن ماتشدني حتى نخرج من من دار بابا عروسة! ( بنظرة فخر) تما ارا ماتشد
شاكر : تستاهلي ! كولشي موااتيك
_الوقت خداهم و هما بين ضحك و قبلات و حديث ! حتى نزلوا مع بعض والفرحة واضحة على محياهم ودعو عائلة اليعقوبي وصلهم شاكر حتى لسيارتهم و رجع للفيلا مع الدخلة شد تسنيم لي حاشية وجهها فالحلوة تتاكل
شاكر : شنو ديك الشوهة قبيلة ؟
تسنيم : ( النفس تقطعت ) راه حمزة لي جبدني
فاطمة : براكة عليك من الحلوة براكة ! شوفي راكي كي القطيب ما كتفلاضي ما والو
شاكر : حطي من يديك و تحركي طلعي غسلي سنانك ومن بعد نجبد لك دوك الوذنين
تسنيم : ( عقدت حواجبها تترد الكلام بسرعة ) هضر مع حمزة انا ماتنجبدوش وانا بغيت نكون ضعيفة ماتنحملش الغلض
فاطمة : ( سدات عيونها بتعب وهي تتشوف فتسنيم طالعة ) غادة و كتصعاب هاد البنت
شاكر : اللهم تصعاب ولا تسهال ! البارح مابنتيش ؟
فاطمة : مع ولد لوسي عثمان ندير ليه العرس عندي ! المشاكل وصافي
شاكر : راه جاني اليوم الصباح على الخدمة، وصيفطتو للكراج عند الحاج يفهم شوية الخدمة الا عينو فيها نقاد ليه الاوراق ! ماعينوش راه نصيفطو ترونسفيري يجلس حدا امو
فاطمة : المهم اخويا راك تما ! الولاد غادين و تيصعابو، زايدينها بالمشاكل ، هاهو عشرين عام محمل وحدة
شاكر : قلة مايدار و الدماغ الخاوي راه يوصلك لهاد المواصل ! ما يمكنش نتا تتقرا ولا خدام ودماغك مشغول ماتتلقى حتى فين تحك راسك تنوض تجبد المشاكل من تحت الأرض ! لا حمزة كون ما الحاج وانا مزيرينو ؟ فين يكون واصل ؟ يلاه هادي شهور وصلنا للكوميسارية وعاد لي ماتنسيقو ليه خبار
فاطمة : راه ماتنعس ماتنشوفو اخويا ! لا الولاد لا البنات مشاكلهم كبر منهم
شاكر : داكشي لي تتزرع راه تتحصدو اش ديري لهم أكثر من داكشي لي درتيه ليهم ؟!
_بعد مرور يومان ! يومان مرو عليه عذاب و تفكير ليل ونهار ، الإنسان بعض الأحيان تيحس أن حياتو كلها مكتابة عليه شقاء لدرجة تيمل و يستسلم ! هدا هو منبع مشكل عز الدين مع الأم ديالو ! من نهار عرف أنها نفذت تهديدها عقلو حبس و جل تفكيرو فالحل ....شاعل كارو مرة مرة تيشوف فساعة و عينيه على باب كلينيك منتظرها تخرج ، مرة مرة تيشوف وجهو فالمراية ويمسح بيديه بحسرة ، مابقى فيه مايتشاف، لا نعاس لا ماكلة لا راحة غير لكارو و قهوة كحلة ! رمى كارو نازل من سيارة أنفاسه تتزايد هو تيشوفها خارجة وهز يديه شير لها وقفت بلاصتها تتشوف و هي تقلب طريق و تبعها
عز الدين : إسرااااااء ( بخطوات سريعة ) إسراااااء
إسراء : ( بقى لها غير تجري ) صمت
عز الدين : ( تابعها مواكب مشيتها ) حبسي البنت
_هي تتزرب هو تابعها واحد لحظة وقفت بتساؤول و عصبية تشوف فطريق حتى دارت عندو بنظرات كره
إسراء : اجي اخويا علاش تابعني ؟ شكون لي خاصو يجري على لاخر أنا ولا أنت ؟
عز الدين : زيدي نهضرو فطموبيل
إسراء : ( مزيرة على صاكها ) تقلب بيك إنشاء الله ! من لآخر ماعندك ماتقولي ( تتهز راسها برفض ) ماعندك مادير لي ! سير الله يسهل عليك وعليا !
عز الدين : ( شدها من ذراعها بقوة باغي يجرها هي تجار معاه ضارباه بصاك ) غير ضربي وعاودي مهم زيدي نهضرو
إسراء: ( هزت يديها لفوق ضاربة فخدها ) اويلي مزال تيقول لي نهضرو ! ( تتشير لراسها ) واش نتا مسطي ولا تتسطى عليا ؟ سااااااليناااااا ، فنيتوووو ابناااادم فرقني عليييييك
عز الدين : ( شد راسو بوجع ) هاد سنين لي ضربنا وشنو دوزنا ولي درت عليك مانستاهلش نهضرو فمشكلتنا ؟
إسراء: ( بصبعها تتشير ليه ) صحح هضرتك وعرف اش تتقول ! مشكلتك أنت ! مشكلتك أنت بوحدك !! أما على لي دوزنا راني صدقت معاك المراة وشديت فهاد العلاقة بسناني راه أنت لي ماصدقتيش ! أنت لي طلعتي شماتة ! أنت لي خاطب من مورايا؟ ( تتحسب ليه بأصابعها) و داي جهازك و مفرش دارك و دافع ضوسي ديالك وأنا كي لهبيلة تنتسناك تجي تخطبني من دارنا (حطت يديها على خصرها بسؤال ) شكون لي ماراعاش لشنو دوزنا أنا ولا أنت ؟ شكوووون لي سيمانااا هو غابر ؟أنا ؟ غادي تخطب مع سي راسك وأنا جاي تذكرني بالخطبة؟ جاي تقولي توحشتك ماعنديش عليك لاين ؟ أناااااا لي درت هادشي؟
عز الدين : دبا طلعت خايب ؟! طلعت مانسواااش ؟ تفرقت على خطيبتي من نهار شفتك ، وحطيت ليك سلاحي آ إسراء وقلت ليك ابنت الناس راه باغيك و تنشوف فيك مراتي ! وبقيتي عليا هاد العام ! هاد العااام ، قريتك ! و وقفت معاك فسير واجي للمدرسة ! لي حليتي عليها فمك آ إسراء نجيبها ليك بالكريدي بالواجد ، مهم نتي تلبسي و تقراي وتنقول ماعليش راها قلبي هاديك والبنت لي باغي ! ثلث سنين و نتي تتجري فيا و أنا صابر ( تيتنهد من أعماق قلبو ) وشديتي ديبلومك ! وبديتي عليا بالكذوب، شحال من مرة لقيت نوامر داراري عندك ؟ شحاال تخرجي من مورايا؟ تبعتك حتى لعند شوافة وتنقول دبا دير عقلها
إسراء: ( بنظرة لا مبالاة ) أنت خلاص كنتي الوفي ؟ شحال كنتي ضربها بسكرة دوز على لقح_^اب تبات عندهم ؟ واجي خويا اش دانا القديم نجبدوه ؟ خلينا فديال دبا ! ( بقهرة تتشير لصدرها ) عرفتي لي حزني فقلبي و حسيت بيه شمتة ؟ هووو أنك كنتي عارف امك ماباغيااااانيش ! أن امك مخيراااك بين الرضى والسخط عليا وأنت مزال جار فيا ! ماااضركش خاطرك عليا ؟ ولا كنتي تتسنا تتزوج وتولد ونبقى أنا صاحبتك للأبد ؟ اوا سيدي يلعن بو هاد الحب لي يذلني أنا ! ويزيدك؟ إلا أنت سمحتي فخطيبتك و قريتيني؟ أنا سمحت فزواج بأوروبا و خليت غير أنا وأنا تابعيني على كلمة وبقيت معاك أنت
عز الدين : ( بانفعال ) علاش أنا شنو عزيت فيك ؟ باش آذيتك ؟ خاصك تفهمي أن امي لعبت ليا قالب و يرزيني فصحتي مادفعت شي ضوسي درت لها خاطرها ومشيت ولكن نذمت
إسراء: مبروك عليك والله يسهل عليك! مهم امك تبعد مني و ماتجيش تشوهني
عز الدين : راه ماغاديش نتفارق معاك آ إسراء ، راه عمرني نبغي وحدة غيرك ولا نعرف ندخلها لحياتي ، سمعي غير شنو بغيت نقول؟! ( تدور وجها ) إسراء!!
إسراء : ( تتحس قلبها تيتعصر من داخل ) داكشي لي باغي تقولو ؟ ماهامنيش ، عرفتي علاش ؟
عز الدين : سمعيني !!
إسراء : ( بنبرة باكية ) أنت لي غادي تسمعني ! شتي ولو العالم يوقف معانا و نتزوجو؟ بسبب امك انطلقو ! بسبب امك عمرنا نشوفو نهار الأبيض! بسبب امك غادي نبانو فشي شوهة وأنا مانقصاش فحياتي ! وشتي إلا بقيتي تابعني؟ بربي تنخوي هاد المدينة
عز الدين : نخويوها بجوج ! فين باغة تمشي ندير انتقال وندفعو ضوسي زواجنا ونتزوجو ونبداو آزيرو ! هدا هو الحل لي عندنا ( بنظرة جدية ) شنو قلتي ؟!
_شمس ضاربة فيها و قلبها ايسكت بالفقصة ! الفقصة عند العنصر أنثوي قاصحة ، تقدر البنت تمشي فيها نفسيا ، تتكحال لها الدنيا فعينيها و تنقص لها الثقة فنفسها و تتحرق روحها من الداخل كأنها تتنفس فأعماق البحر لا هي قادرة تخرج منو ولا قادرة تعيش فيه !! كانت هادي هي حالة إسراء وهي تتشوف فيه منتظر جوابها
إسراء : ( بنبرة هادئة ) سير وكلت عليك الله ! إلا فيا ديفو ولا فكرت نخون العشرة راه ربي تيشوف وإلا أنت لي خنتي منك لمولاك هدا مانقول ليك ! أنا نهار وافقت على زواج منك، بغيت نعيشو بجوج فيما يرضي الله و نحط عليك راس و تحطو عليا أما أنا أكثر وحدة عارفة بحق زواج شنو تيطلع منو، والديا و ماين ابا اكبر دليل عاد رجع نعيشو من جديد؟ ماشي حاكمين عليا بالمؤبد ! نقولها ونعاودها؟ تفارق مني اعز الدين
عز الدين : عمرني نتفارق معاك ! ماتفرقني معاك غير الموت
إسراء : سير موت حدا امك ( تيليفونها تيرن جاوبات ) الو خالتي
فاطمة : آلو إسراء ! ابنتي الله يرضي عليك راني بغاك تقضاي ليا شي مسائل لعروسة ديال ولد لوسي راه عرسو عندي
إسراء : ( بعدت على عز ) اويلي اخالتي شمن عرس ؟
فاطمة : اوا خليها على الله! نتي فكلينيك راه ياسين جاي لعندك
إسراء: ( لون هرب من وجها راجعة بسرعة جهة كلينيك و عز تابعها ) اه أنا فالباب،
فاطمة: راه كتبت ليه لاليست شوفي خودي على ذوقك ! شري منين مولفين نشريو داكشي هماوي ونقي وخلي تلفون بيناتنا! الله يرضي عليك المرضية راه مايفكني احد غيرك
أسراء : صافي خالتي كوني هانية ( قطعت ) عز الدين هضرتنا سالات ولد خالتي جاي عندي إلا ماباغي تكمل لي بداتو امك واختك هي بقى واقف عند راسي
عز الدين : عمرني بغيت ليك شوهة ! هضرتنا ماسلاتش آ إسراء ! باغيك وتنموت عليك
إسراء : ( سمحت فيه لمحت سيارة ياسين لوحات ليه وقف عندها راكبة وعز تيشوف من بعيد ) أهلا
ياسين : ( تيشرب فكوكا ) صافا ؟
إسراء : سلاك وصافي ! شكون يتزوج فأولاد عمك ؟
ياسين : برهوش ديال عثمان ! حمل شي وحدة راه تيزربو يورنجيو قضية والوليد تكلف
إسراء : اخويا خالتي ماعينها لدياولنا ولا ديال باك
ياسين : أنا من عندي لا ديال امي لا ديال ابا ! امي عيات ، فين دبا تقضاو هادشي ؟
إسراء : المدينة ! اوا الصبر وصافي ، حتى واحد مالقاها كي بغاها
ياسين : اودي طلع ليا هادشي فراسي ! قوة مشاكل قوة البلا لبلا بلا فايدة
_مكملين حوارهم مع بعض ! من صغرهم لكبرهم تيتعاودو ، ياسين يشكي من عائلة امو و هي تشكي من عائلة باها ! وصلو لمدينة وإسراء تتقرا الورقة وتتصل بخالتها تشاور ! خداو ساعتين دياال دوران باش كملت تقضية وحطو كولشي فسيارة و دخلو للقهوة ياخدو مشروبات
ياسين : ( طالع نازل فتلفون ) صمت
إسراء : ( مرفوعة تتفكر وتعاود فحوارها مع عز الدين ) صمت
_كلها فين عقلو خدام ! كلها فين قلبو مربوط ، إسراء مع حكايتها ماتيقاتش أنها نتهت و ياسين لي الحنين دخلو لصور حسنا وبقى يتفرج فيهم وتفكر آخر شجارهم ومن تماا تقطعت الهضرة ! ماعرفها واش فعلا العلاقة نتهت ولا تنتظر منو المبادرة ولا ولا ولا ولا لدرجه إسراء تتكلمو هو مغيب
إسراء : اويلي واش مبوق ؟
ياسين : داكشي لي خاصني مع هاد تريكة ! مالكي ؟
إسراء: نوض نمشيو راه خاصني نعس خدمت ليل ، راسي كي البيضة
ياسين : ( حرك لها راسو ) زيدي ابنت خدوج زيدي
_ركبو سيارة راجعين للمنزل فاطمة! ياسين تيصوك منتبه للطريق وإسراء منزلة راسها حتى شد فران بقوة فجأة مخنزر مطلع حاجب ومنزل حاجب تيحقق شوفة
إسراء : ( شدت فقلبها ) اش واقع !؟ مالك
ياسين : ( كسيرا تابع سيارة لي مرت جنبو ) صمت
إسراء : ( بدموع ) ياسين قولي اش واقع ؟ شكون شفتي ؟! شكون تابع
ياسين : ( بصعوبة تنفس ) اليوم نفني دلمها إلا كان داكشي لي فبالي
إسراء : ( بعدم فهم ) شكوووون ( لكن بمجرد لمحت سيارة لي تتعرفها مزيان وراكبة فيها ومسافرة فيها لإفران وهي تكحل بالعمى فداخلها مترددة ) اويلي على لمسخوطة فداء اويلي....
_فعائلة اليعقوبي و شرايبي ممكن بناتهم يلبسو لي بغاو ! يعريو الشعر يغطيوه يصبغوه ؟ يديرو ماكياج يحيدوه ؟ حريتهم هاديك ، بالعكس عندهم ثقافة الأناقة واللبس و الدراسة و أن كي البنت كي الولد فالحقوق و الدراسة لكن حريتهم تنتهي عند مس شرف العائلة ...جالسة جنبو تترعد و تويل وشادة فباب طموبيل مالقات كي دير تهضر ولا تهز تلفون تتسمع صوت أنفاسو حارة و ضرب ديالو على فولون حتى وقفو أمام الدار و الكراج محلول فيه طيابة و المراة تيغسلو دجاج و سرباي عبد الله تيدخل لهم فالتقضية ودخل ياسين مدرم ماتيقشعش قدامو لا سلام لا كلام وإسراء تابعاه تتجري فدروج وتنادي على خالتها
إسراء : خااااالتي ( زايدة تابعاه لطابق الفوق ) وااااااا خاااااالتي
ياسين : ( دفع الباب على بيت فداء بجهد ) فين كنتي ا لالة فداء ؟
فداء : ( تترعد كلها بالخوف وتتنزل راسها وترجع تشوف فيه بنظرات خوف ) راه ما....
_رجع خطوة وراء و دور وجهو تيمسحو ورجع متقدم لها وهي تترجع وراء مسبقة دموع هما لولين و تتشوف فإسراء لي تتويل لها بيديها
فداء : راه غير وصلني ..مممم ماااشي شي حاجة
ياسين : ( عطاها وذنو بمعنى كرري كلامك ) عاودي اش قلتي ؟ ( وقف فوجها بغضب شديد جمع معاها بطرشة حتى مشات وجات ) يوصلك ؟! ( جرها من شعرها بقوة تيدي فيها ويجيب ) خلاه ليك الوااااالي؟ ( تتنخصص فيديه حاس بدموعها تيتقطرو عليه ) جاااااوبي نسمع ! جااااااوبي آمولااااات العقل ! ( قرب لها كأنه يضربها براسو ) هضري نسمع! سمعيني قبل مانمشي نسمع عند لبراني
فداء : ( تتنين فقط وتتحاول ترجع لوراء) اننننننن
إسراء: ( شدت فذراعو بتوسل تتحاول تبعدو وهي لخوف راكبها من ساسها راسها) أنااااا مزااااوكة فيك اخووووويا ماضربهاش ! هانت خويا راه غير وصلها! راه غير ولد لحومة
ياسين : ( بضحكة فقصة) ولد لحومة؟ ( تيشير لهم بجوج) عارفها معامن تتهضر ؟ ( فغفلة شد إسراء من شعرها رجع شدها باليد لي شاد بيها فداء شرك بيها راس إسراء بجوج شدهم بقوة ) ولد لحومة دلمك اعنين لبكرة ؟ ياك نتي حومتك فخنيفرة؟ كابرة هنا؟ قريتي فين قراو ولاد شركتنا؟ تتركبي طرونسبور ديال شركة ؟ هضرررري !!
إسراء : ( تتصرخ بألم ) وااااا غير طلقني اخويا ! اش عرفني أنا هي اي قالت اخويا ، أنا مادرت والو
ياسين : ( طلقها ضاربها بركلة و مزال شاد فيد فداء ) نتسنااااك حتى ديري؟ داااار لدلمكم كااااااملين !!
_فلحظة فقد السيطرة على نفسو نزل على فداء بضرب ونص ضربة تاتجي فإسراء لي تتدافع عليها ! لا صراخهم لا بكائهم ماقدرو يوقفوه حتى دخلت فاطمة وقفت فوجهو تتصرخ باش يتوقف لكن كانو وذنيه مصمكين حتاج لثواني أنه يستوعب شنو دار عاد هز يديه للفوق وأشار للبنات تينهج وجهو مكتسي بلون أحمر و عروقو خارحين
ياسين : هادي لي موصلها صاحبها للدار ؟ علامن تتقلب ؟! اااه !! ( بحرقة ) نق_تل دلمها ؟
فاطمة : (بعدم فهم ) شكوووون فيهم ؟! شكووووون
ياسين : ( بصراخ عالي ) بنتتتتتتتك ! بنتتتتتك مولات العقل ! بنتتتتك لي دايرين فيها ثقة وتنقول اختي بعقلها ماتهضرش مع لي مااااايسوااااش ! اش خلات لخوتها صغار ؟ ااااه ؟
فاطمة : ( حطت يديها على حنكها تتشوف فيها بحزن ) سكووووت ! شوهتوني ، اويلي دار عامرة والناس تتسمع
ياسين : تبريت فيك ؟ تبريت فيك منهم ! قلت ليك لي حصلت تودي ؟
فاطمة : ( تتحس بأرض تتمشي وتجي تحتها ) واااااميمتي وااااربي ( تتشوف فيهم معانقين تيبكيو ) وإسراء اش دارت ليك ؟
ياسين : هي تطاكي عليها ؟! ( خنزر فإسراء ) أنا قلت ليك طاكي عليها ؟
فاطمة : ( تتدفعو يخرج ) خرررج علياااا ! اويلي على شوهتي مع فاسة
ياسين : ( واقف لها حسكة تيشوف فداء ) شحال من مرة تانجي نوصلك ؟ شحال من مرة لا أنا لا باك تنخليو ليك طموبيل ؟
فداء : ( تتخشى فإسراء و تتبكي ) صمت
ياسين : ( تيضرب فصدرو ) على ودك باغي رجع كراج ندير ليك مشروعك ! باغي رجعك همة وشان وبخدمتك و حرفتك ؟ ولكن منين نتي تابعة ليا خانز لخلا ديال ولد غرباوي لي مصيفطينو ريفولي للمغرب ؟ أنا نوريك لوجه لاخر ديالي
فاطمة : كفاش ريفولي ؟!
ياسين : ( تيسرط ريقو و يمسح وجهو ) ريفولي هي من الحبس للمطار بحوايجك لي لابس ! هي ديك البلاد جرات عليك على أصلمك بسبب جنايات ولا حشيش منين هو نص رويجل راه بسباب الحشيش
ريفولي كلمة تتثير الرعب فالمهاجرين سوا بأوراقهم سوا حارك !! غير هي ريفولي تتمشي على ناس بلا أوراق، يعني شدوك البوليس لقاوك بلا وراق راه تيرجعوك ريفولي لبلاد هما تيقطعو ليك طيارة و لكن ممكن ترجع من بعد بطريقة قانونية ! أما لي بالأوراق وتيرحلوه تيتسمى اكسبلوزي يعني مج_رم ! يعني بداريجة ديالنا داير زبلة ، غالبا الحشيش و المخدرات ولكن العرب باش تيتفاداو ديك نظرة إجرام رجعو كولشي ريفولي وتايجي يدمع على أولاد بلادو و عائلتو بالمقولة المشهورة
_الكٌور ولاد لحرام رجعوني زكارة....
_فدار فاطمة العرس غدا ! ولكن أولادها سبقو العرس بليلة ، عطات الناس كلمة وهي تسير العرس ماجاتش تحبس ولا تجمع يديها ولا تراجع ! من هنا المراة المغربية تتعلم تجاوز المحن بصمت، القلب عالم بيه الله و لكن واقفة طيب و تصبن و تقابل دراري وضياف حتى هما إلا جابتهم ضرورة وعلاش لا ماتسيرش عرش....من داخل بيت نعاس ديالها واقفة أما حسن لي جالس تيكمي و شاد جورناال
فاطمة : واش تضحك عليا ؟ واش ماتنوضش تهضر معاهم
حسن : ( بتحذير) شوفي دوك لي عندك نتي أولاد؟ راه راجل و المرأة !! صافي الالة خوها قاد بيها واش نوضو هايلالا على ولد الغرباوي ؟
فاطمة : راه امو صيفطات واعاودات تخطب البنت !
حسن : ( طفى الكارو ) تقد هي تعاشر ولد غرباوي وامو واباه ؟ واش هي هضرة جوج تدمع عليا وباغة تزوج داك طويل المعارج و زايدها ريفولي؟ شمن مستقبل عندو ؟
فاطمة : هادشي اخويا كولو لبنتك ! جلس معاها وقريها و فهمها ! أنا راه جهدي تسالا راه شي عرق غيطرطق ليا
حسن : دوزي غدا العرس ويكون خير ! (خارج من بيت ) أنا عندي زاوية لي بغى يتزوج يجي هنا لي بغى يطلق يجي هنا !
فاطمة : شكون تايجي عندك غير العائلة ! ودير الخير ونساه
حسن : الخير فهاد القوم سيئات ! ( تيسمع ضحك لتحت ) تهجروه( رجع عندها ) دوزي شوفي حليمة راه نمشيو لعدول يعقدو دبا
فاطمة : راها سبقاتكم هي و عثمان ! خوك حلف لا حضر
حسن : تفوووو !! عرس براهش الله يخرجو على خير
_تنهدت بحرارة ! نزلت تشوف طيابات فالكراج فين وصلو ،عينها هنا و لهيه وعقلها مع فداء لي الفوق مع إسراء وجهم مزرق وحالتهم حالة
إسراء : ( تتشوف فالمراية ) صفر جلدة زرقني
اسمهان : ( تتقرب لكاميرا ) ويلي ويلي ( تتخاطب فداء ) غير كولي ليا واش واكلة مخ ضبع ؟ واش نتي جايباه يوصلك لدار فنهار لقهار وباغية ماتحصليش
فداء : ( بصوت منغنغ ) ماشي تنديرو لوعاوع؟ راه باغيني بالمعقول
إسراء : ( ضربت فخادها ) آويلي افداء ؟ ( تتشوف فاسمهان ) ختي هادي ملغجة
اسمهان : سيد ريفولي! واش تاتفهمي ؟ أنا نشرحها ليك بالخشيبات ! شتي دوك لبزنازة لي عندنا ملاوحين فادروبة ؟ رااااااه هكاك ولد غرباوي فطاليان ! بزنااااز وشدوه بوليس دوز حبيبيس نهار سالا ركبوه فطيارة
إسراء : اوا شكون تيصرف عليه؟ ديك طموبيل لي ضارب مشينا بيها إفران ؟
فداء : داير مشاريع تما ! فلوسو تتوصلو
اسمهان : ( شدت فراسها ) القحا_ب مشيتو إفران ؟! ( بعصبية ) سمعي أنا تبريت فيك فاش كنا فتطوان ودبا ختي تنتبرا لا فيك لا فبنت خالتك ، مااااتبقاووووش تعيطو ليا! ماااااابغيتش نسمع حتى خرية منكم ! ( قطعت فلحظة هو يرن ياسين ) الو
ياسين : ( بنبرة حادة ) آسمعي القضيب الخيزران ! اسمعي ابنت شرايبي !! اسمعي اسمهان ماحدي تنهضر بفمي ؟ لحقاش كن كنتي قدامي كنتي تاكلي حقك
اسمهان : شوووف ! اااسمع
ياسين : تشوفو الاعمى لا نتي لا ديك بابا عجينة داختك ولا ديك عينين البكرة ديال بنت خالتك؟ أقسم بالله ! أقسم برب الكعبة !! إلا جاني خبارك؟ اودعي ديك إسبانيا
اسمهان : صمت
ياسين : هكاك الله يرضي عليك ! سمعي الهضرة وقراي على راسك و عزيها تعزك
اسمهان : واخة
ياسين : دبا نشووفو !! ( قطع الخط حول مكالمة أخرى ) آفين الفردة ؟
شخص : با ياسين هانية ؟!
ياسين : داك ولد غرباوي؟! كنتي معاه فطاليان ؟
شخص : ( بنبرة كارهة ) صبحنا عالله اصاحبي ! كنت معاه شي شهرين ، وسخنا صاحبي و سامح فمراتو وبنتو
ياسين : مزوج ؟!
شخص : هاء ؟! شكون تيصرف عليه دبا ؟! منين دخل تزوجو بالأوراق باش طلعو ليه و مراتو راها خانزة فلوس تدير داكشي د الأزياء ماشي ديال وجهو ! أنا راه خدمني فسبعة مليون
ياسين : ( غمض عينيه بحقد ) شمن افيغ دخلتي معاه؟
شخص : على واحد أرض ! نصاااب اصاحبي ، تقول هاز معاه طلاميس ! ولكن والله لا طفرو أنا ربي عوضني وهو راه تاني تلقاه تينصب جهة أخرى، ( بشك ) ياكما ؟!
ياسين : لالا غير بغى يدخل مع واحد صاحبي فواحد لافيغ وطحتي ليا فالبال
شخص : كول لصاحبك ارااااان ااااهرب ! وبا ياسين نتشاوفو إلا هبطت المغرب وسلم عليا على خالتي فاطمة
ياسين : مبلغ الفردة ( قطع ) ولد قح___با طاح فين يتقلى
_اليوم كان بحرارة عالية ولو فأواخر الصيف !! فاطمة على صباح واقفة فالكوزينة معاها إسراء و بعض بنات عائلة حسن تيحطو الفطور الضياف لأن العرس يتقام بالنهار وليس بالليل
إسراء : خالتي نسخن هاد رزيزة كلها ؟
فاطمة : غير سخني ابنتي يلاه تقد ! ها حنينك نصيفط ليه الفطور و حمادنة فالحانوت و عبد الله سرباي مع العساس اوا الفرح دايراه دايراه أسبقية ليهم
إسراء: ( بهمس ) فداء تبقا فبيتها؟
فاطمة : خدمي و اسكتي ! اللهم فبيتها ولا يتشادو ليا ثاني ؟ ( تتشوف فأرجاء) غير يتهز الفطور باش تدي العروسة لعند مريم تصاوب ليها شي مشطة العرايسات و تخرج من تما لابسة
إسراء : شكون نكافة ؟
فاطمة : ( بانزعاج ) أنا فيا نكافة وطيابة و لي بغيتي ! ( مسحت يديها تتحسب لها فلوس ) وصاوبي حتى نتي وجهك
إسراء : شكرا اخالتي !
_ هكدا مر توجاد ! ياسين واقف فباب كراج تيشير لدراري فين يحطو الخبز و الموناضا و تريتور وراهم مدخل الماعن و كريم تيعاون! هدا هو فرح المغربي، من أول صباحو حتى نهايتو وهو جري عليا نجري عليك ...لابسة جلابتها خارجة تتهضر فتلفون حتى قفزها صوتو
ياسين : فين غادة نتي ؟
إسراء : ندي العروسة لكوافورة
ياسين : ( فتح سيارة عن بعد ) ركبي نتي وياها نوصلكم
إسراء : راها داها عثمان لعند مريم نيشان
ياسين : ركبي نوصلك نتي ( جات تهضر ) ركبي و سدي فمك
_شاريع ودرب وصلها بسيارة حطها أمام صالون حلاقة عاد رجع وهي دخلت تتسلم على لعروسة و ختها وخالتها والبنات لي خدامين مع مريم
مريم : ( تتهمس ) منين ضبرتي ليا على لقح_اب بلا فلوس ؟
إسراء: ( تتهضر تحت سنانها ) مالهم ؟
مريم : ( منزلة راسها تتهضر ) خالتها تتهضر بزاف أنا لعروسة تنبغي نخدم ليها فخاطري
إسراء : شحال بعدا تحسبي ليها ؟
مريم : والله ماندير ثمن مع خالتي فاطمة !
إسراء : لا خالتي عطاتني فلوس لعروسة يعني راه تخلصي تخلصي
مريم : مايكون غير خاطرها ولكن راه مانخدمش مع هادو
إسراء : ( بصواب ) حبيبة فطرتو ولا مزال ؟ خالتي دايرة على حسابكم
خالة عروسة : لا حبيبة شكرا ! ختي وصاتني نجلس مع لعروسة نشوفو كي طلع
مريم : شوفي اختي! أنا مامولفاش نشد عرايسات بلا رونديفو بلا ثمن هادي أولا ! ولكن على وجه خالتي فاطمة قبلت نخدم لها و داكشي لي طلبتوه ليا نديرو لها ولكن الله يجازيك بخير راه تنبغي نخدم فراحتي.
خالة عروس : اوا ضروري يبقى معاها شي احد ! زايدون نصاوبو
مريم : سمحيلي ماغاديش نشدكم ! البنات عندي يلاه دخلو جداد لصالون خدمتهم بديكور و يروشينغ مايعرفو لا يصاوبو لكم لاوالو
خالة : ( وقفت بعدم إعجاب شافت فالعروسة لي مدوخها الوحم ) نوضي نوضي عطا الله فين تصااوبي
إسراء : سمحيلي ولكن خالتي كلفاتني بالعروسة وهنا تصاوب! نتي إلا بغيتي تصاوبي جهة أخرى بصحتك
خالة : ( تتحول اتصال ) شمن عرس هدا ؟ أنا تنعرف بنت ختي وراجلها ( الووو ) شنو هادشي دبا ؟ واش الكوافورة تتجري علينا
مريم : ختي ماجريتش عليييك
إسراء : ( حولت اتصال لياسين ) الو ياسين قول عثمان يجي اخويا يشوف مع نسيبتو
_فلحظة صداع ناض ! العروسة تتبكي وختها غير تتشوف و مريم وخالتها تشادو بالهضرة مني منك حتى دق عثمان واقف تيضحك خرجت عندو إسراء تعاود ليه
عثمان : ( دفع لباب داخل ) شوفي ا لالة ؟! بلا مانبقى نفرتت فالهضرة مراتي مكلفة بيها مرات عمي نتي دخلي سوق راسك
خالة : ماشي عاطينها ليك فالدية ! ( وقفت العروسة ) نوضي مك قالت ليا رجعو
_زواج براهش هو هدا ! ماقاليه عقلو خرج أمام صالون هز الحجر و هما خارجين غادين بدا تشير عليهم و إسراء ومريم تيشدوه هو تيطوع
عثمان : وااااطلقي لياااا مراتي و الباااايرة
خالة : ( تتدور تهضر وتزيد ) شمااات _ة
عثمان : أنا شماتة لي مزوج بنت ختك لي كانت توصلني بوليس كن ماديتهااااااش ( تيشير و يسب ) تريكة البايرااات
_شوهة قامت فرمشة عين و حليمة جاية بفواطتها و الأم عروس كذلك وقفو كلهم أمام صالون مشادين بالهضرة وإسراء ومريم تيبردو هنا ولهيه وعثمان تيتحلف
عثمان : بررررربي ديك خالتها لا حضرت لشي عرس
حليمة : ( تتنذب وجها ) اويلااااي على الفلوس لي مشات فالعرس
عثمان : حاطة شي ريال نتي ؟
أم عروس : بنتي قاهرها و معذبها وخرجتي عليها اسيدي ماتصاوبش عند هاد لكوافورة؟
عثمان : تديو مراتي لشي كوافورة من غير هادي سيري ضبري لها على عريس من سويقة
حليمة : ( قلباتها رغيب ) أنا مزاوكة ! رجعي العروسة وسيري نتي وختك قابلو شغلكم
أم عروس : وختي لي حلف عليها ؟
حليمة : العرس ما فدار باه ما فدار با فدار مرت لوسي هضرتها ماتنزلش أرض
عثمان : ( محني براسو تيتحلف) والله لادخلت ! ديك ختك باغة تشتت ليا شمل مزاال مابدا؟
الام : الهضرة ماشي دبا ! الهضرة مور العرس
عثمان : شتي مور العرس نتي بعدا ولا ديك ختك ؟ تبقاو تشدو رونديفو تشوفو بنتكم
الام : لهلا يحييك اابنتي نشوفها الوقت لي بغيت
عثمان : نشوفو شكون تيحكم ! ( أشار لوراء) سيري جيبيها ( أشار اسراء ) هادي بنت عمي راها بحال ختي راها تبقى معاها
مريم : سمعي الالة ! انا ختك من دخلة مازال ماهضرت ماتكلمت ماعاجبها حال
الام : ندوزو هاديك اوا لي هو جالس يضرب بالحجر؟
اسراء: وسمحيلي هي شادة العروسة مخرجاها بسيف عينا رغبو و نزاوكو وهي زعما ضربات فينا كاملين؟
الام : انا رجعها ولكن ولدك هضري معاه
_رجعت العروسة للصالون وفقط هي وإسراء ومريم والبنات ! خدمو لها. لوك عروسة و إسراء حتة هي دارت ماكياج مع بالبيز للشعر على طولو لبست قفطان فالاسود !
عروسة : ختي إسراء ندوز لك الخط هضري مع يجيب ليا دوا بقى فطموبيل ديالو (دوزت لها الخط ) ماقدراش نهضر نتي تنعثي طريق
إسراء : واخة حبيبة
_تكلمت فالهاتف للحظات وقفت سيارة أمام صالون خرجت عندو إسراء شدات منو دوا وهو بقى غير تيشوف فيها بإعجاب
الخال : أنا غير هنا نتسناها نوصلكم الا كانت عيانة بزاف
إسراء : ( طلعاتو وهبطاتو وشافت طموبيل ماتريكول أوروبية هي تبدل نبرة صوت ) مرحبا ماكاين حتى مشكل واحد شويش نكونو واجدين
خال : ( تلف فيها ) شكرا بزااف
إسراء : ( بابتسامة ساحرة ) الله اودي
_رجعت داخلة عطات العروسة دواها وجالسة تتقرا هي و مريم بنظرات وخلاوها ترتاح شوية
مريم : ( تتحقق فوجها جهة الحاجب ) ويلي ويلي ضربك تما
إسراء : ليلة كحلة دازت اختي بارح ! جمعني معاها ضربة فيا ضربة فيها
مريم : ( عضت على شفايفها بإغراء ) ميييمتي على زرق العينين فقصتوه ! صافي يزوجو الخرا
إسراء : واش خالتي فنات حياتها باش تزوجها واحد نصاب
مريم : ختي ديك بنت خالتك نية مسكينة
إسراء : صحابك ديك لهايلالة قالت نحشم ؟!
🔙🔙🔙
فداء : ( تنتخصص بالبكا تتشوف إسراء واقفة شادة الباب ) علاش ماصارحتينيش؟ علاااش
أنوار : ( بغصة فقلبو ) فداء نقول على راسي الظلم ؟ والله وحق ربي المعبود حتى لعبو ليا قالب و كنت داخل داخل على ودك منين جات منهم سمحت فكولشي ودخلت المغرب
فداء : كان عليك تقولي ( تتبكي بشدة من حر ضرب ) دبا ياسين سول وقال بلي أنت مزاال مزوج علاش أنا مطمعني؟
أنوار : فدااااء ديك طاليان عمر دلمها انعاود نمشي لها ! وهاذيك طليقتي أم بنتي واش حنا مفارقين جاية عامين و تقولي ليا مزوج؟
فداء : عندك نسخة طلاق؟ باش نعرف نجاوب عائلتي؟
أنوار : أنا شاد محامية افداء شنو ذنبي إلا هي رافضة طلاق؟ ولكن من حقنا نتزوجو هنا ! أنا تنبغيك افداء و كل ماتنملك كاتبو فسميتك و أنا كولي ديالك واش تسمحي فيا؟
فداء : دبا ماتجبدش ليا زواج ا أنوار! ياسين ساخط علياااا مابغيتش صداع
أنوار : مستعد نتسناك عمري كولو مهم كوني معايا! أخرتها نخويو المغرب بجوج، ياك ضوسيك د الفيزا جامعاه؟
فداء : ( بارتباك ) من بعد و نهضرو
🔚🔚🔚
إسراء : ختي تتبغيه معمية ! أنا با يقريني بحالها و يلبسني وخويا يدير ليا العز ؟ مانعقلش على تاقواد
مريم : نتي بعدا راه عندك و لو بالسمية أنا عمري كولو ماشفتو
إسراء : ( سمعت دقان غمزت مريم ) حيدي ها زماكري جا
_خرجو العروسة بزغاريت راكبة فسيارة وإسراء جنبها وعثمان أمام لابس كوستيم تيضحك من وذنيه ، تاجهو الدار استقبلوهم بزغاريت مدخلين العروسة و بدا العرس نهاري شي ماحامل شي ! شي تيخنزر فشي و الحاجة وخدوج مع تسنيم لي غير دخلات وخرجات شافت راسها تبقى تسلم هي ترجع بحالها وفداء لابسة قفطان جالسة جنب خدوج غير إسراء لي تتسخر حتى تسالا العرس وراحت العروسة ناضو يجمعو و يوجدو العشا للرجال والعيالات تجمعو الفوق
حليمة : ( حاطة يديها على فمها تتهضر ) فاطمة راه بنت ختك جاوها الخطاب
فاطمة : منين اختي ؟ ياك غير دياولنا لي كاينين
حليمة : خال مرات ولدي شافها هبال عليها ولكن راكي تشوفي صباح نوضناها معاهم فصالون نزيدو مع بنت ختك حرب تنوض
فاطمة : اسكتي عليا ندوز روينة! إلا فالمكتاب راه يرجعو يهضرو بالمعقول
_بلباسها الأنيق! سروال توب و فيست ديالو مع صباط كلاص ومكتافية بساعة فيديها خارجة من سونطر للغات و تتكلم فالهاتف بهدوء
بثينة : آمي ! غير تغداي أنا راني دايرة مع واحد السيدة
الام : اوا بنتي لي بغيتي ! فاش تكوني جاية جيبي معاك الحليب
بثينة : لبسي جلابتك وسيري جيبي لي خاصك واش أنا ندخل عاد نعاود نخرج ؟ ( بقبول ) يلاه الله يعاون
_رجعت تلفون الصاك و تمشات مسافة حتى دخلت مكتب محامية و سلمت على البنت لي فالاستقبال ودخلت لداخل سلمت بحرارة على محامية لي مبين أنها صديقتها
م ص : اوا غبرة هادي !! كيف عاملة الواليدة
بثينة : حمد لله ! راكي عارفة مع مشاغل و الخدمة يلاه بدينا كولشي مرون
م ص : مزال إضرابات على حسب صاليغ ؟
بثينة : دائما ! شوفي صاليغ طالبين زيادة من شحال هادي ماشي عاد ولكن لي رجع إضرابات هو القرارات الوزارية الأخيرة
م ص : هادا وزير جديد ؟
بثينة : اياه !! الجديد هو الالة مدير يرجع عليك مفتش مايبقاش مدخل بينك و بين الإدارة ؟ لا الالة يدخل ليك فالقسم ، زائد العطل البنية نزيدو سوايع تكوين !! و عطلة صيفية الالة تحدد فقط فاثنا وعشرين يوم والوزارة لي تحددها ليك ! يعني نتي تولي مرهونة ! بلا مانذكرو قضية خمسين طفل فالقسم و قلة الشي طباشير ولينا نشريوه
م ص : سلاما على هدا الوطن ! إلا أسس البلاد لي هي صحة و تعليم و الأمن تفسدات راه نطلعو جيل فاسد و مجر _م السجون و المحاكم تزيد تعمر ! ياك نتي تزوجتي مؤخرا؟
بثينة : ( بنفس طويل ) وي ! شنو مانخرجوش نتغداو ؟
م ص : ( تتجمع مسائلها ) زيدي يلاه نبدل الجو
_خرجو بجوج من المكتب ! عادة محيط أساتذة تيكونو ناس مثقفين و ذو مناصب عالية كل مهنة أو حرفة أو صنعة تتجرك لمحيط خدمتك ! دخلو مطعم طلبو الغدا فجو هادئ
م ص : حلفي بالله !! منين وصل كندا يلاه مرة وحدة لي تكلمتو ؟
بثينة : مانحتاج للحلف !! فارق الوقت و خدمتي مع خدمتو صعيب الوقت يبقى لينا اون بليس واحد سكوتي منو ماكان
م ص : إلا سكوتي هضريه ! ويلي راه رجال قلالو
بثينة : ( بكبر ) لا اسمحيلي هو لي يلقى لوقت ويتصل بيا ! علاش زعما أنا نبقى مقابلاه ؟
م ص : بثينة !! نقصي شوية من جهد ديالك ! راكي ماشي فحرب ؟ راه راجلك
بثينة : ( جمعت يديها بقوة و نزلت راسها دموع نزلوا لها ) قلبي تيتحرق ! ( مسحت وجها ) نتي لوحيدة لي تنصارحك و نتكلم معاك ! أسبوع هدا وحالتي تشفي العدا !! درت لي يدار باش نساه والو والووو
م ص : ( شدت فيديها بمساواة ) بثينة نعلي شيطان !! ( تتحرك يديها تنتابه ليها) ياك أنا شهدت على زواجك وطلاقك و شهدت على كولشي ؟ كن لقيت فين رجع علاقتك معاه انتردد ؟! راه بفمو قالي مستعد نحط لها لي بغات مهم نتفاكو
بثينة : ( حطت يديها على فمها ) بصدفة طلعو ليا تصاور سبوع ديالو والكروب ديال أساتذة تيباركو ليه ! ( شدت فعنقها بحرارة ) سيمانا وأنا مرفوعة ( بدموع ) كان يكون هداك ولدي هداك سبوع ولدنا
م ص : بثينة رجوع الله !! شنو ذنب راجلك ؟ شنو ذنبو ؟!!
بثينة : جربت نبرك على راسي ! جربت نننن ( تلف لها كلام ) هو ظريف ولي قلتها تيديرها ، البارح دوز ليا مصروفي بلا مايقولي لا صيفطت ليك لا والو ! مزالة مصدومة على تصرف ديالو ولي كنت مزوجة بيه كان فلوس حمام مايعطيهاش ليا
م ص : سخرية القدر ! مخلية لي شاريك و تابعة لي باعك بأبخس ثمن
بثينة : قلبي لي دارها ليا ! عرفتي شكون تيقولو من مورايا فالكروب ؟ تيقولو ماعنديش القلب ؟ و متكبرة !! يجيو يطلو على قلبي تيبكي دم ! يجيو يشوفو شنو كان مدوز عليا هو وامو وبنت خالتو لي طيراتو من يدي و دخلت لداري ولقيتهم ناعسين ففراشي وأنا مع امي فطبيب !! مارحموونيش !
م ص : نساااي ! ربي عوضك ، راجلك سيد قاري و مثقف و ولد الناس ولو ماحضرتش لخطبتك من كلامك عرفت نوعية ديالو
بثينة : بغيت نتقرب منو ! بغيت نعوض راسي و نبين لطليقي ديت أحسن راجل و بغيت نولد فأقرب وقت..
م ص : فيزتك مزالة عندك ! نضرب شوبينك دايزو لكلام و نقاد راسي ونشد طيارة لعندو ! ياك مزال مابدات قراية نيشان؟
بثينة : ( بتفكير ) تظني ؟
م ص : شدي فراجلك ! بغيه بسيف عليك
بثينة : ( شدت فراسها ) الله ياخد فيه الحق هو وامو خرجو ليا على حياتي! ماخلاوش ليا ثقة لا فالناس لا فراسي
_وراء كل طلاق حكايات ! و حكاية بثينة كانت أصعب ، وصلت الدار دخلت بيتها ! خدات دوش خفيف وخرجت تتنشف شعرها و دارت ليه بلاك حتى رجع رطب و دارت ماكياج خفيف لابسة بيجامة ستان بشورط و ديباغدوغ واستلقت شادة تلفون تترسل مساجات لتيجاني حتى حولها اتصال مكالمة فيدو
تيجاني : ( بنظرة إعجاب ) سلام ! صافا
بثينة: صافا حمد لله ! كي بقيتي أنت ؟
تيجاني : بخير ( سرح حلقو ) يلاه فقت شوية دبا ! كي غادة مع لخدمة
بثينة : مزيان ! وأنت
تيجاني : مزير شوية ! غدا مسافر ليابان عندنا شي ندوة تما
بثينة : امتى ترجع ؟
تيجاني : تلتيام وصافي! فيها لفول و كولشي
بثينة : إلا قلت ليك العطلة جاية نطلع عندك ؟
تيجاني : ( بحب ) مانخليكش ترجعي ! تدوي بالمعقول ؟
بثينة : وي ! قلت نشاورك
تيجاني : حددي الوقت باش نقطع ليك طيارة و نقاد وقت خدمتي ( بابتسامة ) توحشتك
يتبع...
التعليقات
لا توجد تعليقات بعد، كن أول من يعلق.