محتوى القصة
_بعد آذان المغرب كانت سيارة ياسين واقفة فباب الفيلا شاد التلفون فيديه مركز معاه حتى تفتح الباب و ركبت فاطمة جنبو و خدوج وراه مع إسراء وفداء
ياسين : فين تيني ؟
فاطمة : راها مع شاكر مشاو يجيبو مراتو من خميسات
ياسين : اهاه !! الحاج مايعطيناش الحاجة زعما؟ ( ديمارا شاد الطريق ) راها جداتنا هاديك
فاطمة : ازيد وسكتنا ! داري بعيدة عليهم بشاريع وعمر امي باتت عندي
فداء : شمن ريسطو غادين ليه
ياسين : مولاي رشيد قالك الشوا ! نمشيو فين بغى هو ( بطنز ) باش لالة فاطمة ماتسخطش علينا
فاطمة : ( بتحذير ) يااغادي تسكت ! ياحط السورات انا نصوك ونت سير عند صحابك
ياسين : شتي حنان امي ! ( شاف فإسراء وفداء ) غادي مخرج خواتاتي! وهو يخرج خواتاتو
خدوج : راه خواتاتو امك وخالتك
ياسين : نتي اخالتي راكي بايعة الماتش من زمان غير سكتي
إسراء : ( تتحس بتلفون الصغير تيفيبري فجيب السروال ) صمت
فاطمة : براكة من الطنز ياهاد الولد !!
ياسين : ( بعناد ) دبا هادا لي داي ليا اختي الصغيرة يجيب مراتو ماشي الضد زعما ؟
فاطمة : بنتهم ! وانت دور دور و رجع لتسنيم
ياسين : ( بتأكيد ) ختتتتتتي !! ( بمزحة ) تقلقيش الواليدة راه تنضحك ، مزال خوك يدير الوليدات ويجي يقولك ديو بنتكم ! لخميسية راها تتبلاني ليه ، مع هو فيه شوية البخ ! الا طلبت مليون يعطي ربعة!
إسراء : خاصها غير تولد ليه ! تيموت على الاولاد
فاطمة : اسيدي رزقو هداك و مراتو هاديك ! الله يعطيه ويزيدو ، لمرضي المهدي، ال..
_هي تتعد و ياسين تيحرك فراسو من فخرها بيه ! دائما العائلات تتكون عندها واحد الضحك موحد ، وغالبا تيكون التنمر على أحد اقارب الام او الاب ! وصلو للمطعم و نزلت فاطمة وخدوج زايدين لقدام و فداء رادة البال مع إسراء لي واضح التعب على وجهها و التزنيكة طالعة معها، دخلو متابعين ختارو طاولة عائلية وياسين مع فاطمة مشاو يدومونديو اللحم لي يتشوا مع لي سلاد و الفريت و المشروبات ، ورجعو جلسو حتى نظم ليهم شاكر مع سهام و تسنيم لي نوضاتها مع ياسين من قوة القبل لي تيدير ليها بقوة
تسنيم : ( تتسمح وجهها ) البشااار ! تبقاش تزم....( حبست الهضرة ) تبوسنيش اخويا مالي جاية من الحج
ياسين : ( تيضحك ) جاية من الشينوا ! شحال جبتي هاد الدورة ؟
تسنيم : خويا انا خارجة نتعشى ونفوج القراية ماشي وقتها دبا
ياسين : صافي باين العربون
_ كلها معامن مشارك الحوار! شاكر جنب سهام واضح انهم عرسان جداد النظرات و الابتسامات و خدوج مع فاطمة جابدين حديث قديم و فداء تتسمع لهم من غير إسراء لي جالسة فوق الجمر فالاخير دارت سبة بالحمام باش تجاوب فالتلفون
إسراء : الو
فهد : ( بنبرة غاضبة ) ثلث ساعة باش تجاوبي ؟
إسراء : ماسمعتوش !
فهد : ( ركز مع ترددات الصوت ) تتهضري معياا من الدوش ؟ فين راكي ؟
اسراء : مع لافامي ! خارجين نتعشاو
فهد : ( ثواني من الصمت ) مع لافامي !؟ كذبة جديدة ؟ فين بضبط ؟
إسراء : ماعنديش علاش نكذب عليك !
فهد : ختاري ياااا تقولي بالخاطر ؟ ياااا نلقاك بالسيف، ونتي عارفة الا درت الحاجة بسيف تتجيبيها نتي فراسك
إسراء : ف**** !! كاع لاتيق ( قطعت شادة فذراعها ) ويلي ويلي اش درت ؟ قطعت عليه
_تتحس بقلبها تيضرب و السخانة زيراتها، رجعت مكانها ولقات الأكل وصل وياسين تينزل لها فصحنها ومرة يهضرو مرة يضحكو مثل أي عائلة، وكل دغمة تتحطها ففمها ماتتبغيش تسرط لها وعينيها تالفين مع أبواب المطعم، واحد لعقل تيقولها :
_ عز الدين شحال من مرة عرفني فين كنت ، مالو تبعني ؟
العقل التاني تيقول لها وجدي راسك راه جاي وتفكرت هضرتو ديال : انا اقود منو! ماجات تلغي الفكرة حتى دخل بطولو وعرضو والوسامة ديالو البرونزية معاه نزار جالسين اونفاص معاهم وجات عينو فعينيها وحست بروحها بغات تخرج و فجنبها ياسين منزل راسو على الطبسيل تيقطع الكفتة و تيهضر مع فاطمة وهي تتسوط من هضرتو حتى هز طرف مادو لفمها
ياسين : ديري ااااه !!
إسراء : ( تتحس بالوجع وعرق فراسها تيزدح ) شبعت
ياسين : ( بإصرار ) برب تتاكليه( وكلها ودار عند فداء) اجي نوكلك ابابة عجينية
فداء : ( بتغبن ) ماما سمعي ولدك
فاطمة : اوا ابنتي داكشي ماعطانا الله ! الصبر ( تنهدت مفكرة كريم )
ياسين : ( فهمها ) غير كولي الواليدة راه يوصلو سخون مع حمادنة يتعشى بيه
شاكر : ( تيدوز يدو على شعر تسنيم ) ماكليتي والو ؟
تسنيم : ( بتآوه ) شبعت
شاكر : كن دبا ماكدونالد كن تتحشي فوجهك ؟ ( شاف سهام مبتسمة ليهم ) بغيتي شي حاجه ؟
سهام : شكرا الحب شبعت حمد الله
_اما اسراء كانت تهرب عيونها قدر الامكان و الشوفة لي تتسرق تاتجي فيه مباشرة ! دار ليها باصابعو حركة الهاتف وجبدت التلفون تتقرا المساج كاتب لها بالحرف
: نوضي WC
_رجعت التلفون لجيبها و وقفت ! مابغاتش تزيد معاه فالهضرة و دير ليه احتمالات ، مجيئو الليلة للمطعم ذوب لها شكوكها من ناحية القدرة ديالو ...
إسراء : (بتوتر ) انمشي لحمام !
ياسين : ( هز فيها راسو ) عاد مشيتي ؟
إسراء : احم !! فيا الوجع
ياسين : سيري سيري ....
_وقفت شادة فذراعها متجهة جهة الحمامات لي خارجين على المطعم ! من نهار رجعت تلاقى بفهد كلامها رجع كلوو دعاوي
_ياربي يدوز النهار بخير
_ياربي مايشوفنيش شاكر ولا ياسين
_يلاه ادخل الحمامات وهي تشوفو واقف منتظرها هزت عيونها تتأكد واش جهة الرجال ولا النساء لقات جهة النساء، جرها من يديها الصحيحة داخلين لحمام واحد دفع الباب سدو وهي مخرجة عيونها من الجرأة ديالو
فهد : ( عاقد حواجبو بنظرة ساخطة ) عارفة شحال ضريتني فراسي فهاد النهار ؟
إسراء : ( بصعوبة فنطق تتحاول ترجع شعرها من على عيونها) عفاااااك ! اي هضرة اجلها من بعد راني مع عائلتي
_كان مستمتع بخوفها ! هز أصابعو الخشنة رجع شعرها وراء اذنها ونزل بلمسة بطيئة على حنكها المحمر لشفايفها عامرين
فهد : شكون جالس تما ؟!
إسراء : ماما وخالتي واولادها وخالي ومراتو ! ( تتدفعو بحذر ) خاصني رجع
فهد : ( نزل عيونو ليديها حتى جمعاتهم وزاد بوجهو لوجهها طابع قبلة على شفايفها ) تتعرفي تاكلي من يدين ولد خالتك
إسراء : خوووويا ! راه خاطب قريب يتزوج
فهد : تتمشي بعيد فالهضرة !
_جات تجاوبو هي تسمع صوت فداء تتنادي عليها وبسرعة حطت يديها على فم فهد وتتوسل ليه بعيونها يخليها تمشي وصوت فداء تيقرب للباب عندهم وهي تتصفار و تخضار ! حتى نطقت مرعودة
إسراء : فداء انا خارجة
فداء : واش عيانة ؟ خاصك شي حاجة ؟ ياسين قالي فيك لوجع
_عمر إسراء دعات فياسين ولا كان انها تتشرح لشي لحد ان علاقتهم أخوية ، ربع سنين مع عز الدين عمرو قدر يتكلم ولايحتج حتى لفهد دار ليها اليوم اكبر علامة استفهام وهي تتشوف يديه حطها على بطنها بفحص و دور وجهو مبعد يديها
فهد : شنو ضارك ؟
إسراء : ( تتشير بيديها انه لاشيء ) انا مشيت
_فتحت الباب خارجة وفداء منتظرها ومشاو بجوج للحظة تتحس برجليها تيخويو بيها ، غير مصدقة المشهد لي جمعهم بجوج وخرجو مجموعين من المطعم تاركة فهد خارج وراها متبعهم بعينه و رجع عند نزار
نزار : صاحبي جالسين فريطسو مافيهش شراب ؟!
فهد : ( هز التلفون تيشوف فيه ) صمت
نزار : ( اشار لباب ) اش تما ؟ إسراء هاديك لي تابع ؟ على قلتهم
فهد : قالك لوالة ! قرطاسة خبعها للحجلة الحرة، اما الحمام تشدو غير بحفنة د الزرع
نزار : ( شداتو الضحكة ) زيدني !! البنت راها بنت عائلة و مزالة صغيرة واش تقد عليك
فهد : ماعنديش مع الهضرة تعاود جوج مرات ! مشينا ؟
نزار : بسيف عليا ! راه خاصني لvin نقاد الدماغ ، عندي خدمة بليل ...
ركب هو و نزار سيارة متجهين للمكان المفضل ليهم هو البار ! كل مرة فين تيشربو ، ضربو كويسات وصل نزار وهو رجع لمكان الإقامة ديالو ، فارقى حي فسونطر بإحدى الشقق الفاخرة دخل رمى السوارت و تلفون ، غير ملابسو و عمر كاس ويسكي واستلقى تيصفي دماغو هز الصورة جنبو فيها ابن نسخة منو فالشبه حاضناه شقراء جميلة بابتسامة مشرقة ، بتسم للصورة و هز الهاتف متسقبل المكالمة
فهد : وي
الشخص : على حسب داك خينا لي فسربيس البوليس راه يحولوه لداخلة
فهد : دفع ليه الشاف ديالو الضوسي ؟
الشخص : الصباح دخلت امو تترغب وتزاوك دوزوه ليه، سمعت شي تنقنيقة راه المرا عندو فدار بقى لهم العقد..
فهد : مهم ، راك تما !! ( قطع تينتفس بغضب ) تعلم تلعب مع سيادك
_الجلسة فالبار و الشراب رجع اسلوب حياة الفقير و الغني، لي خدام ولي ماخدامش ، لكن جلسة صحاب المخزن تتكون محضية ، مول البار و سرباية و بار مان و السكايرية الباطرونات كلهم عارفينهم بوليس ! جالسين مع بعض عز الدين و جوج من الزملاء ديالو فالسربيس تيشربو و دايرينو الوسط بحال سماسرية لي باغين يبيعو العجل لشي گْلٍّي ! تيشرب و يعاود و ملامح وجهو نصها مجروحة وعينيه ليمنية منفوخة داير صبارادرا على حاجبو
الزميل الاول : اصاحبي ربع سنين وحنا تنقراو عليك سباحة ، تفارق مع القلا وي !! وانت مضبع و هي تتسد بيك غير الثقابي
عز الدين : ( تيحس بشراب تيحرق ليه ريتو ) ماااعمر شي واحد فهمني فيكم ! ( شعل كارو شاد فراسو ) واا تنبغيهاااا
الزميل الثاني : وااابغي امك اصاحبي !! واش شفتي امك وهي تترغب فالشاف ؟ داخلت عليك بالله كن درتي لي فدماغك لمن كنتي غتخلي مك ؟ هااااربة دالخلا لقيتيها طايحة مع كولونيل اصاحبي و مخسر لمك وجهك كن ماجينا كن وقعات كارثة اصاحبي ؟!
عز الدين : شاريها بالفلوس ! ( بسكرة) كنت نخسر عليها ايطرو ليصانص
الزميل الأول : كنتي تخرج على كرك ! بنت القح_بة غدراتك و ماتستاهلش
_بين السكرة و اليقظة صورة إسراء تتبان ليه فالكيسان ، و سكايري الا قالك تنشوفك فالكاس غير تيقيه ! الصباح لي كان واقف منتظر اسراء يعطيها تلفون استقبل مكالمة من فهد
🔙🔙
عز الدين : اش باغي اولد القح __بة تتعيط من البارح ؟ قلت ليك نسى هاد النمرة
فهد : ( زير بيديه على الفولون ) دبا كولي غير فين راك نشوفو شكون فينا ولد القح _بة ؟!
_فلحظة عز الدين ظن انه يجمع إسراء و السيد لي خانتو معاه فبلاصة وحدة ، لكن فالحقيقة هو تيجمع صاحب دعوتو ! نعث ليه المكان ماكمل النعث حتى وقف عليه بالسيارة ديالو ! اول مقارنة كآنت سيارة فهد ساوية الملاين صحاح مقابل سيارة داسيا ببعض الملايين ، فهد طلعو وهبطو والوقفة لي يوقف امامو جمع معاه بضربة لراس كانه ثور نطحو
فهد :بقات فالهضرة اولد القحبة ؟!
_جمع قوتو قاصد يرجع ليه الضربة لكن الخصم كان قوي و بقى تيدخل ليه فضرابي حتى طاح لرض تيقطر بدمايات
فهد : فين تلفون إسرا ؟!
عز دين : ( تيحاول يوقف لكن الضربة فراس كانت قوية ) اننننن
_تخطاه غادي لسيارة تيبحث على التلفون لقاه فوق فالكرسي عرفو بالكوك ذهبي و لقى جنبو قرعة د ليصانص و رجع غادي لسيارة ديالو مخليه تيتقاتل يوقف
عز الدين : و الله لا دوزتها ليك
فهد : ( بنبرة ساخرة ) السلاح لي نافخك بيه تموت نهار يقولو ليك شكون انا ( بتاكيد ) آو لد القح _بة ..
عز الدين : ( وقف تيتقاتل محول اتصال ) الووو ! عتقني اصاحبي راني فواد ويسلان
صاحبو : دخيسي عارك طموبيلتي تكون وقعت لها شي حاجة
عز : اااا عتق اصاحبي ( تيلهث وتيكح ) اااااه
_بصطافيط وقفو عليه نفس الزملاء ديالو متفاجئين من الحالة لي هو فيها ! واحد تيفحص السيارة ديالو ولاخر تيهز عز الدين ماد ليه قرعة د لما تيغسل وجهو
الزميل الأول : مالك اصاحبي دخل فيك تران ؟
عز : ( بصعوبة تيهضر) ولد القح _بة غفلني ! بربي تنخرج عليه
الزميل الثاني وصلو اتصال ورجع عندهم فحالة شوك ونطق بسرعة
الزميل الثاني : الشاف باغيك ! اش درتي اصاحبي ؟
_المغرب تأسس سنة 788 على يد إدريس الاول ! من تماك و تاريخ المغرب يقوم بمؤسساته الامنية و العسكرية و الدركية لي هما البوليس و المخزن و الجدارمية و على رأسهم المخابرات !! و كأبسط مثال فحراسة القصر الملكي تتقلى عسكري و بوليسي و جدارمي ! لان هاد المؤسسات عمرهم تافقو بينهم ولكن متافقين على ولاء الوطن ! هاد المقدمة ماهي إلا شرح لمقام عز الدين مع فهد ! بوليسي مع كولونيل دكتور مدوز الحرب و السلام ، الا كان الجدارمي منصبو أقوى من البوليسي اش جابو للكولونيل !!
عز الدين : ( تيمسح وجهو ) مااادرتش اصاحبي !
زميل : قوة البلا بلا بلا فايدة زيدو تحركو
_مسافة الطريق كانو فالكوميسارية لي تطيح وتنوض بالمواطنين وهما بثلاثة داخلين قصدو غرفة التغيير عطاو لعز الدين قميص آخر بدل لول لي مطلي بالدم و عالجو ليه الجروح وطلع لعند الشاف
عز الدين : ( بتحية ) شااف
الشاف كان شاعل اكثر من الكارو لي بين يديه ! أشار ليه يجلس وهو مزاال تيهضر فتلفون حتى قطع
الشاف : واش نت ماديرش عقلك ؟ شحال باش جات امك ترغب و تزاوك على الضوسي ديالك ؟
عز الدين : اشاف راه ول لبارح حطيت الضوسي، لمرا عندي فدار راه الامور غادة مزيانة
الشاف : ( ضرب يديه فوق المكتب ) نعستي حتى شبعتي عاد دافع الضوسي ؟ والا هاد المرا صدقت ليك حاملة ؟ تنوض عاد تتجري على الحالة المدنية ، اصاحبي راك شرطي ! راااه انت لول خاصك طبق القانون ، واش هاد لونكيط لي تنديرو زعما ديكور ؟ رجل الامن خاص يكون رجل القانون والمحيط لي داير بيه يكون نقي ! وانت راك غرقتي بسبب بضاض
عز الدين : ( تيسرط ريقو ) صمت
الشاف : جااوب !! ( اشار ليه لوجهو ) عرفتي معامن طحتي ؟ عارف شكون عيط ليا دبا فتلفون؟
عز الدين : ( زير على يديه ) اشاف راه مشاكل قديمة
الشاف : جوج حوايج عندك !؟ ياااا غادي تنوض تعقد وتجمع راسك يااا غادي يحطك هاد خونا فعقلو وتبقى يد لور ويد القدام وماتتعاود غير الصلاة على النبي
عز الدين : بغيت نعرف غير شكون ؟
الشاف : عز الدين نوض خرج عليا ! راك طايح مع كادر فالمخزن ، طايح مع كولونيل داخل القصر و عندو يد طويلة
عز الدين : ( عطاه التحية وخرج ) صمت
_دخل للمكتب عند الزملاء ديالو و بقى غير تيشوف ! ولكن الهضرة كانت وصلت لصحابو ، وبقى شي تيشوف فشي حتى هز الجاكيطة ديالو وخرج و الدموع فعيونو ! بعض الأحيان تنصنعو مشاكلنا بيدينا ، الوقت لي إسراء بين يدين فهد يداوي ليها يديها كان عز الدين تيشعل كارو ورا كارو وشاد طريق الغابة غير آبه بالبرد ولا الرياح والذكريات تترجع ليه بالجملة مع إسراء ، اول يوم شافها عند الكوافورة ولا نهار لي قبلت تصاحب معاه ولا اول مرة قبلها ولا اول مرة قطعت علاقتها معاه وحس كأن الاوكسجين مشى ليه ! الذكريات من قوة جماليتها خلات دموعو تنزل و قلبو يضرب بقوة
عز الدين : شنو ندير فقلبي ؟ ( بحسرة ) درتها لراسي ! ماعرفت نتزوجك ولا نغضب امي
_فكرة ان إسراء طارت بين يديه خلاتو عاجز و مشلل ! فكرة ان شخض آخر ضربو بسبابها و حامي ليها مخلي قلبو يتقطع بالوجع ! وجع حب سنين وجع أحاسيس كان يفيق بيهم وينعس بيهم، وجع الوداع بدون كلمات! شكون الظالم وشكون المظلوم ؟ شكون الخائن وشكون الوفي ! شكون العاشق وشكون الكاره !! ظلمت الدنيا فعيونو ! إسراء مشات و الام مخيراه بين السخط والرضى و الشاف ديالو غسل ليه وذنيه ! شكون لوصلو لهاد الحالة ؟ الحب أو ضعف الشخصية ( مسح دموعو )
عز الدين : ( بكسر خاطر ) كن يقولو ليا نقطعو ليك يد ولا نحيدو ليك إسراء ؟ ( بهمس ) نقولهم حيدو يدي ...ولكن.....(بآهات ) ولكن إسراء ختارت الفلوس
_ممكن يكون عز الدين بغى إسراء كثر من نفسو لكن بغاها بضعف، ممكن إسراء تكون بادلاتو الحب ولكن سبق لها الاذى وانسحبت ! ممكن القدر لعب لعبتو معاهم ! ممكن ان حبهم كان فقط "سعادة مؤقتة"
عز الدين : ( دخل لدار و جلس فدروج ) صمت
الام : وليدي ! عيط ليا الشاف ، قالي من هنا ليومين نمشيو للعدول ( صمت ) آوليدي
عز الدين : ( غمض عينيه ) سمعت امي سمعت !!
_يشاع ان أكثر بلد مقدس لشهر رمضان هو المغرب !! لست أغازل مملكتي ولكن تاريخنا يشهد ! المملكة المغربية بكل جهاتها و تنوعها الفلكلوري و لهجاتها و تقاليدها رمضان تيجمعهم بالعبادة و التراويح الليلية وقيام الليل و طقوس ليلة سبعة وعشرين و تجهيز لغاية ليلة العيد !! من داخل المطبخ الخارجي للحاجة مجموعة مع خدوج و فاطمة و إسراء وفداء بعدما دارو الزميتة فالسطولة و الشباكية كدلك و بريوات اللوز و جالسين يعمرو كاس اتاي والحاجة جالسة تفرق وتحسب ! الحاجة بنت الدار الكبيرة و عطائها ليس وليد اليوم بل من زمان، كانت تكون عندها خبزة تقسمها معاك ، مع الوقت ربي فيض لها الخميرة فرزقها و ما زادت غير عطاء..
إسراء : (شدت فراسها ) ناري خالتي الزميتة كثرتو فيها التقاوت
فاطمة : اوا ناكلو الطحين؟ اللوز موجود و الزنجلان خوك شاكر جاب بالزايد
فداء : فين سهام ؟
فاطمة : راسها ضارها ، تروحت شوية
خدوج : لقاو علامن يتفششو ! كنا حنا نقدرو فأيامنا نعسو ونخليو العكوزة فالكوزينة؟
الحاجة : ابنتي يخلي ليا ربي غير صحتي ، راني قادة بشغلي ، ( تتحسب ) إسراء ابنتي هاد الطاسة ذوقي صاحبتك الكوافورة فسبيل الله
إسراء : لهلا يخطيك احنا ! تتفرح مسكينه منين تنذوقها
الحاجة : ماشي عيب ابنتي ! لي تشهات ولا بغات نوجدو ليها، خير ربي موجود ( شافت فاطمة ) هاد الطويسة لحمادنة و و الآخرة لطيابة الحمام و بنتي فاطمة فكريني نعطيك شي حوايج تسنيم لبنتها ! اوا بقى سطل لصحاب خنيفرة و مرات خوك
فاطمة : شكون فمرات خوتي ؟
الحاجة : التيجاني ! اوا مسكين هو مغرب وحالف علينا مانصيفطو ليه، نذوقو مراتو
فاطمة : ( بتفكير ) الصمت
خدوج : احّي !!! علاش شكون فيكم العروسة و العكوزة؟ هي لي تجي تسول فيك و تبارك ليك العواشر عاد ذوقيها ولا حنا لي نمشيو ندقو عليها و نباركو لها العواشر ونزيدوها بالذواقة ؟ ما ضربت فيها تمارة نيت
الحاجة : على وجه خوك
خدوج : خويا راه فكندا ما تيعرف الليل من النهار !! ماهي حاملة نقولو واحلة فروحها ؟ ماهي نفيسة نقولو راها معذبة مع التربية؟ ماهيا غادة شادة الطريق لعند خويا نقولو الذواقة توصل ليه ؟ وحدة بينا وبنيها ربع ساعة ديال الطريق من عرس شاكر ماشفنا وجها
فاطمة : خدوج بركة من الهضرة !
خدوج : نتي بعدا راك زايدة لها فيه ! أما نتي الكبيرة، نتي تهضري و ضربيها فالوجه
فاطمة : اخدوج راه إلى نتي عندك بنت وحدة ! انا عندي ثلاثة !! وتندير لبنات الناس فين يديرو لبناتي ، إلى هاد مرات تيجاني ما تسوا ما تصلاح راه نيتها تخرج فيها ! إلى طبيعتها هكاك راه خوك باغيها
خدوج : اش يبغي فيها ؟ لا زين لا قبول ، النهار الكحل نهار خطبناها ليه، خرية وطليناها معاه
_ على ذكرو كان هو بنفسه تيرن فهاتف فاطمة فالواتساب كاميرا فيديو وجاوبت فاطمة مبتسمة تتشوف فخدوج تبدل الموضوع و لقى تحية عليهم كلهم
تيجاني : الحاجة صونيت فالفيكس الداخل ما جاوبني تا واحد ، عرفتكم راكم مجموعين فالكوزينة برا
الحاجة : اياه امْمي !! كي داير مع الخدمة اولدي، الصحيحة؟
تيجاني : الحمد لله و الشكر لله ! اوا وجدتو شي شباكية؟
الحاجة : موجود الخير اولدي ! راه سالينا غير دابا وجالسة نفرق شوي للحباب ! و نتا اولدي ما خليتينا نصيفطو ليك
تيجاني : لالا الواليدة ما تعذبيش ! الواليدة ديال الصديق ديالي جابو كولشي من المغرب
فااطمة : وصلو على خير ؟ صباح العرس مشاو ما بغاوش يجلسو
تيجاني : ايوا الكونجي محسوب ! راه شكروكم و عجبهم العرس و عجباتهم العائلة و الشلوح دياولنا، وقالو ليا فين عرسك ( بنبرة سخرية ) قلت ليهم فين المرا بعدا
خدوج : ( تتشوف في فااطمة باغة تهضر و فاطمة تتبعد التلفون وفداء و إسراء غير تيشوفو....
فاطمة : اوا اخويا عراسات البلاد بحلاوتهم ! كي دايرة بثينة إلى تتصل بيك ؟ راه خلينا لها حقها من الشباكية اخويا
تيجاني : اوا إلى جابوها رجليها تاكلها عندكم، إلى ما جاتش صدقو حقها
خدوج : اوا مالها ما تجي تشوف عكوزتها ؟ تسنى نعرضوها؟
تيجاني : شكون قالك عرضيها اختي خدوج ؟
خدوج : اوا اخويا هادشي بزاف، ديك المرأة عندك ما حاسبناش ، ما صرفنا فيها غير الخير ! بنادم يحي صلة رحم و نتشاوفو ما فهيا باس
تيجاني : ( نزل راسو بصمت ) اوا يدير الله خير ! فين واحد الفلوسة ؟
فااطمة : راها تتحفظ اخويا ! نقصت شوية من القراية
تيجاني : واخة عليها ! فين البنات؟
_طلو عليه بجوج سلمو عليه و بانت ليه يد إسراء مهرسة بدا يسولها
تيجاني : كي طرا ليك اخالو
إسراء : طحت واحد طيحة قاصحة ، الحمد لله دازت
تيجاني : تهلاي فصحتك ! وانتبهي على راسك ، الهرس راه صعيب، وقولي الحاجة تعطيك ايلان مزيان للعظم و شنو ما خاصك اخالي قولي ليا.
إسراء : شكرا اخالي لهلا يخطيك
تيجاني : فداء ؟! فين الخطاب
_فداء رجعت حمرا وتزنكت بالحشمة و تخبعت! حتى جاوبات فاطمة
فاطمة : اوا إلى كتاب مور العيد اخويا ! دبا العواشر و دازو شي مشاكل ما لاق لينا
تيجاني : كولشي تيبقى غير معاودة ! يالله رمضان مبارك سعيد وتهلاو وسلموا عل الحاج وشاكر وسهام
الكل : مبروك رمضان
_قطع الخط و بقى ساهي تيفكر ! ناض توضى وصلى صلاتو وطول فالدعاء من بعد لبس ملابسو متجه للعمل إلتقى بصديقو و في نفس الوقت زميلو فالعمل
ص : قالو غدا رمضان ؟
تيجاني : ( بسهو ) الصمت
ص : اسبحان الله ! فين ساهي
تيجاني : في العائلة وصافي ! كرهت هاد الغربة، عيييت فصحتي و عقلي و المرأة لي تخفف عليك و تساندك ما كايناش هنا
ص : ( بحنق ) الزواج المفهوم ديالو عميق !! ( بهدوء ) الزواج راه سنة شرعية و فطرة إلاهية
تيجاني : اوا سبحانه وتعالى قال و خلق لكم من أنفسكم أزواجا !!
ص : تماما ! يعني خلقنا من نفسك ، لتسكنو إليه، هاهو ذكر السكنة ! يعني واجب الزوج يأمن للزوجة السكن ولو يكون بعيد بسبب العمل ! وقال سبحانه وتعالى و جعلنا بينكم مودة ورحمة ، إلى شفتي هاد الزواج فيه شي حوايج لي ناقصين كملهم ! ولا ماشي بلاصتهم صححهم!!
تيجاني : ( اشار براسو بنعم ) نظرتي للزواج راها ثابتة ، انا واحد الإنسان لي باغي يعيش بشرع الله وسنة حبيينا رسول الله ، ممكن ما تنزيرش على قضية الحجاب ولا الخدمة و نسمح فخاطري و ندير الخاطر للطرف الآخر ولكن منين تنرجع نحس بعدم الراحة راه تنشوف الأصح ليا قبل طرف الآخر لأني تنكون درت لي عليا
ص : لقيتي ماتسلك سلك ! أنا فصغري عشت مع الواليدين فواحد الصراع مرير ، الواليدة كيما عارف مغربية فاسية و الواليد ماليزي تلاقاو فالعمرة هي و والديها هو فواحد البعثة اوا ضرب الطرقان و تزوجو وهي علماتو الداريجة و هو علمها الماليزية و ولداتني أنا الأول وخويا الثاني وختي الصغيرة تحولنا للإنجليز وعاد جدتي قالت ليه والو تزوج ماليزية بنت عمك وتخليها فالبلاد
تيجاني : ( تيضحك ) الله أكبر !! اوا ؟
ص : تما عرفت بحق المغربية! قالت ليه اولادي و ورقة طلاقي، الواليدة كانت عندي زاعمة و مسلحة بقرايتها ، كانت مترجمة اللغة عربية في السفارة مع الواليد ، اوا الواليد من تما ما عاود رجع لماليزيا حتى جدة فقدت الأمل! من هادشي كولو اخويا تيجاني تعلمنا معنى الزواج و الإحترام للمرأة والوليد تاهو صدق ظريف وغادي مع الساهلة
تيجاني : نفس الجو كبرت فيه !! الحاج والحاجة بيناتهم واحد الحب سبحانك يا عليم وكبرنا مع خواتاتي وبناتهم ما مزيرينش، وتنشجعوهم للقراية والخدمة ! ولكن المراة لي طحت فيها ما باغاش عائلتي بالمرة ! و أنا عيت نميك عليها
ص : زيد صبر ! ربما تغير
تيجاني : هو العليم بالقلوب !
_حوار الرجال ! حوار دون المس بالخصوصية، حوار نصائح بما شرع الله، حوار الصداقة الرجالية ! لا شتم لا قذف ! كملو عملهم و رجعو للمنزل كانت الساعة آنذاك الرابعة صباحا فالمغرب و اتصل بيها كما العادة لكن ما من مجيب
تيجاني : ( غمض عيونو بتعب ) حتى باش تخلي ميساج و
تقول لك راه نعس ولا عيانة ما كاينش، صوني نتا ولا طرطق...
_لبست المونطو ديالها ودارت التلفون ديال الو فالجيب و خرجت قاصدة صالون مريم لكن لقاتو مسدود ! تمشات حتى لآخر الشاريع و شدت بتي طاكسي مقاتلة مع الصاشي لي فيه الذواقة لمريم حتى وصلت وخلصت وطلعت للعمارة تتدق حتى فتحت لها مريم وحطت يديها على فمها بألم
مريم : داكشي لي كان خاصك كملتيه بهاد التهريسة
إسراء : ( جلست تترد نفس ) منين مامتش ولا مالين الدار ساقو الاخبار كيف والو !
مريم : اوا ؟! التلفون ماتتجاوبيش ؟ ماجيتيش ؟! كفاش بلانك ؟
إسراء : زعما سلمى ماقالتش ليك ؟ راه دفعت ملاضي لخدمة و فهد بيديه جبرني و وصلني للكلينيك حطيتها ومن تما هو داير عليا عساس ( بهمس ) فين سلمى؟
مريم : مشات تجيب الحشيش !!
إسراء : مهم !! انا نهار لي ندير الكسيدة عيط ليا ياسين نوض فيا الرعب ، كنت خايفة لا نتفرش على قضية فهد ولا البوليسي ولا المسافرة لطنجة مهم جميع البلانات دازو فراسي وداك ولد للقح _بة موصلني بلا عقل حتى جمعت معانا طموبيل من الجنب وجات الدقة فذراعي ولكن ماعرفتها مهرسة حتى لصباح
_مع هاد الكلام دخلت سلمى سلمت عليها و جلست تتبرم جوان قدامهم مع قرعة مونادا كحلة وتسمع تتمة
سلمى : نتي مروناها فتلفون و هو بايت عندو جبد مصارنو و غادة لغد ليه تجيبه منو ؟ راه تتقلبي على خلا دار بوك
إسراء : وقف عليا فهد فالخرجة ! فين وصلت عندو ! وتلفوني لقيتو عند فهد و عصر عليا واحد العصرة من الصباح حتى العشية
سلمى : راه تورق البلان !! تلاقى البوليسي وخلا دار بوه ، خلي دلمو يستاهل مابغاش يحشم الزلط و تفرعين ، صافي من تما ماسقتي خبارو؟
إسراء : لاوالو !!
مريم تتضرب فشباكية حتى وحلت لها بدات تكح اتموت وجمعت معااها سلمى بواحد الضربة حتى خرجت الشباكية من نيفها
سلمى : اتجيفي لدلمك خارجة عليك كرشك
إسراء : ناري اصاحبتي على ضربة عطيتها
مريم : ولد العطاية وقفها ليا ! البوليسي راه تزوج وعقد ول البارح
إسراء : ( حست بقلبها تعصر ) شكون قالها ليك؟
مريم : راه قلنا ليك داك صاحبو لي خدام معاه مراتو كليانة ديالي !
إسراء : ( بشمتة ) يتزوج ولا يجلس ! احسن حاجة دار فهد هناني من كمارتو
مريم : اوا الالة ديك العاقيسة ديال امو دارت عشية وعرضات الجيران وقالت لهم العرس مع السبوع وقالك العروسة ضاربة فواطة فالكوزينة
سلمى : ناري الشلحة فين كنتي غطيحي ؟ مع تريكة لافار
إسراء : الله يسترني اختي !! الحب بعد مرات تيعمي لينا العينين
سلمى : ( تتكمي و تبخ ) انا الزلط لي تيعمي ليا العينين ، الحب ولا القلا وي غير هضرة
مريم : نيشان !! واش بنادم ماقاد يصرف على كرو ويزيدها بالحب ، سيد معيش عائلة على قدها ومطمعك ؟
أسراء : شتي الا على عز دين ؟ عمرو ينساني ولا عمر شي واحد يبغيني بحالو
سلمى : ماتتوبيش !! شتي بحالنا لي مضروبين من والديهم؟ عمر سعدنا يتكعد ، واااش والديك ماحنووش فيك ؟ يجي بوقلا وي يحن فيك ؟ خدمي على راسك والا لقيتي ماتفتخي فتخي !! ( اشارت لمريم ) ماشي فتيخ مريم ديال كول وخرا ؟ فتخي فتيخ صحيح ديال علامن ترجعي ، باش نهار يقاود تلقايك مصورة مصيريف ، طويمبيلة ، بريطمة !! شي عشرة دالمليون فالبنكة
مريم : ( رجعت لشباكية تاكل ) تي فين تلقى هاد فارس النقود ؟
سلمى : راه الكولونيل يتسطى عليها ! تفتخ الا عرفت ليه ، دبا فنظرك واحد شافك من زمان فسهرة وبقى قاني عليك ؟ وسمعك فطنجة شد الطيارة عليك و رجع خدم فالمدينة لي نتي فيها و فكك من البوليسي و داير عليك عساس، ماشي باغيك
إسراء : أنا اختي مانقدرش نعيش بحال لي نتي عايشة مع خوه !! ولا نبقى نشد منو الفلوس و ياكل ليا الحلوة وشي نهار يبات ما يصبح ، انا دياه على عقلو حتى يغبر تاني ! اصلا معرفتش شنو بيناتنا ، مصاحبين ولا معرفة ولا شنو ؟
_ضحكت سلمى باستهزاء و مريم كذلك من كلامها، منين تتكوني جالسة مع قح _اب بروفيسيونيل وتهضري خارج نطاق الرزيو ديالهم تيضحكو ! تيضحكو على أنفسهم لي استسلمو ليها بشهوات ، تيضحكو على الظروف لي ماحاربوهاش ! تيضحكو على راسهم ولكن يعترفو ؟ ابداا !! بل تيرجعو انواع إسراء هما لي غالطين و مامقدرينش النعمة لي قاصداهم وأن الزواج أو المصاحبة البريئة زمن ونتهى
سلمى : اوا احبيية نتي تعرفي ( غمزت مريم ) هي غادي تخلي الكلونيل يجي يخطبك
إسراء : شكون قالك باغاه لزواج؟! ( هزت صاكها ) خليتكم على خير
مريم : صافي تمشي ؟ وقولي لامي الحاجة الله يكثر خيرها
إسراء : بصحة ازين ! ومبروك عواشرك ( خرجت نازلة فدروج ) الطعام لي شركنا بغيتو يوقف ليكم فركابي الا ناوين ليا على الغدر ولا انا ناوياه
شدت طاكسي راجعة لدار وعقلها تيدي و يجيب حتى نزلت من الطاكسي داخلة لفيلا و فاطمة خارجة
فاطمة : فين مشيتي بديك اليد ؟
اسراء : ديت لمريم حقها ! فين غادة ؟
فاطمة : ( فتحت السيارة عن بعد ) زيدي معايا نشوف الخياط، الا قالو غدا رمضان يسمح ليا فالحوايج
_ركبو فسيارة مع بعض تيهضرو حتى وصلو للخياط وجلست فاطمة مع إسراء لاقين عليه التحية ، و بدات فاطمة تتشوف الثواب و الخياطة و تأكد عليه الفصالة
إسراء : هدا لفداء ؟
فاطمة : اوا مرو العيد راه جايين الخطاب تخرج عندهم باليجامة ! ( تتشوف فالخياط ) انا حيد عليا
ديك ايفازي، كولشي نبغيه فصالة مخزانية هماوية
الخياط : كوني هانية الالة فاطمة ، يطلعو شي حاجة ديال الفريع !
فاطمة : ( تتحسب ليه الفلوس ) هانت قيد عندك الف درهم تسبيق! الباقي نهار نجي نديهم ( اشارت لثوب مليفة اميرة فالبوردو ) شوفي ا إسراء هدا
إسراء : زوين اخالتي
فاطمة : جبدو وخود ليها القياس وعطيها تختار الموديل
_رفضت فالاول كنوع من المجاملة ! لكن إسراء فداخلها من النوع لي تيموت على الشراوط و اللباس و الماكياج و تكون ديما ضاربة الحطة !! ختارت الموديل و خرجو من عند الخياط قاصدين القيسارية مخلطة بين الأواني و التجميل و الملابس!! ديما فالخرجات فاطمة تتفضل إسراء و إسراء تتفضل خالتها ، بجوج عندهم الذوق و بجوج عزيز عليهم الشراء عكس خدوج و بنات فاطمة تيقنطو خصوصا الصغيرة تسنيم ماتشركش معاك الطريق فالخرجة !
فاطمة : زيدي شوفي شنو خاصك فصيكان
إسراء : ( تتشوف فالمحل ) بغيت اغميس اخالتي فلون فوشيا والو ماكاينش
فاطمة : شوفي شكل اخر ! راه قرب العيد ماتلقاي والو ، ولا خلي الا طلعت لفاس
إسراء : حتى فاس رجع بحال مكناس مافيه والو ! دبا رجعت مراكش هي امهم فالجديد
_ كملو التقضية راكبين السيارة راجعين لدار ! حطو السيارة امام الجردة طلعو لمنزل فاطمة مع الدخلة بدات تطفي فضواو ! الضو يقدر يبقى شاعل يومين ماكاينش شكون يطفيه لقاو فداء تتوجد العشا و جلسو مجمعين تيشوفو شنو شراو و اسمهان معاهم فالواتساب ابيل فيديو حتى دخل ياسين مباشرة طلع الفوق
فاطمة : ( بنغزة فالقلب ) كفاش هدا طلع لاسلام لا كلام ؟
البنات وحدة تتشوف فلاخرى ماعارفاين والو ! لكن قلب الام تيحس ، رجليها ماحست بيهم حتى طلعوها عندو لقاتو جالس شاد فراسو
فاطمة : ياسين!! ماالك اولدي ؟
_تنحنح ساكت ! مسح وجهو ، وجهو من شدة البياض تياخد لون الاحمرار بسبب المرض او شمس او الاعصاب ! وهو مامريض ماكاينة شمس
ياسين : والووو ( هز الفوطة و دخل لدوش ) صمت
_نزلت فاطمة تتغلي وهزت تلفونها تتقلب على رقم مولود و البنات تيسولوها ، مالو ! مالو
فاطمة : ( بشلحة ) آلو مولود ! مايتعنيت ؟ شوي الحال ؟
مولود : حمد الله ابنت عمي ! كي داير حسن والبنات
فاطمة : يسول فيك الخير ! كولي اولد عمي ماتكذبش عليا !! ولدي طلع لمريرت عند غنو ولا عند بنتها ؟
مولود : ابنت عمي فين هيا غنو ! راه ماتت ختها لغد ليه ديال العرس و هادي سيمانا طلعت أوروبا مع بنتها و واقيلا واقيلا تزوجت
فاطمة : ( براحة ) الله يسهل عليهم ! وانا الله يهدي ولدي ، والله ياخد الحق فلي كان سباب ! اوا اولد عمي الله يرحم الوالدين ( قطعت ) اوا قالك تزوجت مشات مع مها لخاريج
اسمهان : ( بعدم تصديق ) اجي وسير لأوروبا وبزواج ؟ هادي ياحركاتها ياااا حطت عليها الملاين طلع لها فيزا توريست
فاطمة : يضبرو راسهم ! ( تنهدت ) المهم ولدي تحتي وقدام عيني
إسراء : واش اخالتي ياسين يبدلك ؟
فاطمة : الزمان يبدلو ! ياسين كن ماشدات فيه تربية الحاج والحاجة من الصغر كن راه عندي عثمان ولد حليمة ثاني
إسراء : سولتيه اخالتي؟
فاطمة : لا هو تيجاوب !!
_تنهدت و هو يتسمع صوت الغياط فالتلفزة و شريط عاجل تيعلن أن غدا هو أول ايام رمضان، مع هاد الإعلان الناس الليلة ما تينعسوش ، كاين لي عاد تيسهر على الشباكية، و عاد للي كاتيتقضى و يخمل و يدير كولشي فديك الليلة و ختامها التدواش
فداء : ماما اليوم يبداو التراويح
فاطمة : الليلة، الله يعطينا من البركة ديالو و يهدي وليداتنا ( تتسمع صوت تسنيم تتنادي ماما ) تسنيم هادي؟
إسراء : هي ! ( طلت على الباب ) جيتي !!
تسنيم : لا مزال ! ماما قالت ليك حنا اجي راه مرات تيجاني جات هي وامها
فاطمة : ( تتحك حاجبها ) مالهم جاو حتى لدابا ؟
تسنيم : ( دارت خارجة ) انا ندي السخرة ونمشي !
فاطمة : ( مزالة بجلابتها ناضت تمشي ) جلسو نتوما هنا ! فداء ديري بنتي السحور لباك وكريم تيبغيو المخمار و ياسين جبدي ليا الدجاج فوق مارجعت نصبو ليه
فداء : ولكن نعجن فالعجانة
فاطمة : نصبي الدجاج وخلي ليا المخمار ! واش العجانة طرطق ليك العجينة ؟ راها غير تتجمع، هانا مشيت
_خرجت فاطمة متجهة للفيلا مع الدخلة لقات شاكر داخل وفيديه التقضية بالكراطن تيحط و يرجع يدخل سلم عليها ودخلت الداخل سلمت على بثينة و امها لي بخمارها و أذان العشا تيوذن و الحاج تينكر على الحاجة الما سخون بزاف و سهام مزالة فبيتها ما نزلاتش غير الحاجة لي تتسخر وتحط
فاطمة : اوا اش هاد المجية على غفلة؟
بثينة : اوا مع الوقت و صافي ! راكي عارفة الخدمة و تا نجي عيانة
فاطمة : اوا الله يحسن العوان ! غير بغيناكم تجيو بكري و نجلسو شوية مجموعين
بثينة : إن شاء الله ! كي دارو بنياتك و خدوج و إسراء
فاطمة : الحمد لله! يسول فيك الخير و الربح، ( شدت الصينية من الحاجة ) مرحبا بيكم
بثينة : الحاجة عذبتي راسك والله راه غير دايزين
فاطمة : اوا تخلصو الحق !! دار حباب راجلك ماشي للدوازة، اجي بكري وجيبي الواليدة و نجلسو اشنو فيها ؟
امها : لهلا يخطيك العزيزة ربي خليك !!
_مدت ليهم اتاي و بلاطو الحلوة و فاطمة تتبتسم بالسيف وهي تتسمع الحاج تينكر ! وعاد نزلت سهام ضاربة بيجامة العرايسات سخونة طروا بياس ببنطوفتها و خاتم الذهب فيديها تيضوي وضاربة الوجه بكريم مخلي وجهها مرطب وراشة ريحة باردة سلمت عليهم و جلست جنب فاطمة تتشرب اتاي مثل الأميرة و تتسمع حوارهم وتنزل عين و تتحط عين
الأم : ايوا رمضان غادي و جاي، الإنسان إلى مشى ما يرجع
فاطمة : اوا سنة الحياة !! الإنسان إلى ما خرج من الدنيا ما خرج من عقايبها
الأم : داكشي لي كاين الحبيبة ! انا الموت دايراها بين عيني دائما وابدا، لي حازني هاد البنت فوقاش تجمع مع راجلها و دير وليدات
فاطمة : اوا الحاجة شكون مأخرهم؟ راها مشات عندو كونجي ، كان بإمكانها يدفع ليها الأوراق تما وتجلس مع راجلها
بثنية : ( قطعت النفس ) اوا ماشي بديك السهولة !! راه خاصني نسالي خدمتي
فاطمة : الحقيقة نتي وتيجاني تعرفو علاش تافقتو !! انا وضحت للواليدة ديالك
_الجو تكهرب فرمشة عين وسهام غير تتسمع ، حتى جمعو الوقفة تيودعوهم والحاجة تتحصرهم للعشا ولكن رفضو، فالأخير عطاتها الذواقة ديالها و مشاو
الحاجة : بنتي كن غير وصلتيهم ، الليل و الدنيا عامرة
فاطمة : امي !! واش نرغبها ؟ راه قلتها ليها ، قالت ليا ما نعذبكش
سهام : نجمع الصينية ؟
الحاجة : خلي ابنتي للحاج مزال يشرب اتاي ( ياللع كملت الجملة و هو يدخل جلس، كبت ليه سهام كاس ) نتا ماجاك النكير غير نساب الولد كاينين ؟!
الحاج : ( ببرود تيشرب اتاي ) الصمت
الحاجة : اوا حشومة كاع
الحاج : الحشومة هي لي دار داك الكلب ديال ولدك مزوج وحدة هي ومها
فاطمة : با ما دخلتي ما سلمتي؟!
الحاج : نسمح فالصلاة باش نسلم عليهم؟ الله يتبعهم البلا ( تيقاد ساعتو ) فين شاكر ؟
شاكر : ( دخل وجلس ) مالكم ؟
الحاج : غدا طلع للراشيدية داك السيد راه مريض وصل ليه شي بركة و طل عليه وشوف شنو خاصو !
شاكر : ( جبد التلفون تيشوف مواعده ) ناعس فالطبيب؟
الحاج : خرج من الطبيب ! الخدام لي دايرو معاه هو لي وصل الأخبار ، فسبيل الله داك الراجل شريف
شاكر : ما قلناش الحاج العكس ! ولكن غدا راه نتكاتب على الأرض المعلومة
الحاج : المهم هاد السيمانة طلع
شاكر : يكون خير ! اراو لنا العشا ؟ فين تسنيم؟
الحاجة : خرجت تسخر اولدي مزال ما رجعت
شاكر : ( وقف خارج ) الحاااجة الوقت خيابت فين تتسخريها و فالليل؟
تسنيم : ارا نشوف هداك
حمادنة : ( مدو لها ) ها هو
تسنيم : ( حلت تتشمو ) هدا راه شمبوان الكلاب ! (حطاتو ) واا جيب شمبوان مكاد و نتا تتجيب شمبوان مخلط بريحة الخل
حمادنة : ( رجعو لبلاصتو ) تندير الشركة ديالي و نخلطو بآملو
تسنيم : لقيتيها تصور معاها ( وقف كريم عليهم ) اجي نتا ! ما تشدش واحد الكاضو جاك؟
كريم : ( تيزير على سنانو تيشوف فيها ) شراتو ليا امي ؟
تسنيم : تنكوليك كاضو و نتا تتكولي ليا امي؟ راك عارف شكون تتموت عليك
حمادنة : وما الحب إلا للحبيب الأولي ! كولي لبنت الأستاذ راه غير صالح للحب
تسنيم : لا نتا عاد تقولها لينا ؟ راه طبخت لنا راسنا من السادسة وقلنا لها ما يصلاحش ليك
كريم : ( بخجل ) الصمت
حمادنة : وصل هادي تابعنا التورايح
كريم : يالله زيدي
تسنيم : سير بعد مني قالك توصلني ؟ انا راه عندي الصمطة الكحلة ، والله تنطوي بنادم ! شتي بنادم ؟ دياال الطويان، دلمو البشار ....
وقف عليها شاكر بنظرة وحدة مشات عندو ! لقى التحية عليهم ورجع هو وياها تيخاصم عليها من التأخير و تعشاو مجموعين وتفرقو فالغرف و فاطمة رجعت لدارها...
سهام : ( بدلع ) حبي شكون من العائلة عندنا فالراشيدية؟
شاكر : واحد المعرفة ديال الحاج قديمة و ريحة الشحمة فالشاقور، كان خدام فمرزوكة اوا ماتت ليه بنتو وتبعها راجلها وبقات ليه حفيدتو بوحدها فالراشيدية و الحاج فتح ليه فرع صغير لشركتنا يبيع ويشري فمواد البني منو يتعاون بيه و منو راه خدام
سهام : اااه مسكين !! الله يجعلها للحاج فميزان حسناتو ، وغدا اشمن ارض تاخد ؟
_هز نظره فيها قرا ملامح وجهها ! مولف انه ولو الحاج يتكلم على البيع ولا الشرا امام العائلة ما كاينش شكون يقدر يعاود يسولو !! لكن بسؤالها توقف لثواني وفهم أنها باغة تعرف الصغيرة و الكبيرة و ان السؤال الأول ما هو غير تميهد للسؤال الثاني و جس النبض وإذ يجاوب أو يرفض !!
شاكر : مسائل الخدمة ما عندك ما تفهمي فيها ! اليوم نقدر نشريو ! غدا نقدر نبيع ، وزيدي دخلي فيها الخسارة و الربح والله يجعل البركة فرزق الحاج
سهام : الله يطول فعمرو !! راه رزقو باين تبارك الله على العائلة
_دار راسو ما سمعهاش !! اي عائلة عندها الكواليس، و كواليسها تيكون ليه تاريخ قديم، و بدا بالگاراج و إنتهى بكتابة الحاج للشركة لشاكر و من هنا بدات الحساسية، رفض يدخل معاها فالماضي و يشرح لها بالتفاصيل، لي فيه كافيه دخل يدوش وخرج لبس ملابسو وكما العادة تيضرب دورة شرفية على الفيلا و يشم الهواء وهي بقات فالبيت تتهضر مع مها اوديوات
سهام : ( تتسجل ) امي، واش نوض نهز بلا خبار مالين شي؟
الأم : ( تتجاوب ) مرات تيجاني جات دات حقها و راها ساكنة مع مها ونتي يطنزو عليك يديرو الصواب !
سهام : ( تتسجل ) شمن زواج ديال تيجاني و اشمن مراة ، الحاج حتى السلام ما خسرها عليهم ، ( نقصت صوتها ) امي سيري تنعسي سيري، اليوم عرفت شي حوايج غير بالصدفة، الملاين تيمشيو ونتي تتهضري على الشباكية
الأم : ( تتسجل بسرعة ) اميمتي على الملايين !!؟ بنيتي خييك مسيكين مجلوق فالخليج
سهام : امي سولي ليا الجارة على ديك الوصفة لي دارت باش تحمل ديال الخزامة
الأم : تاتجيك حق شهر عاد ديريها ما عرفتي شنو كاين، راها مجهدة شوية ديك لوصفة
سهام : ماكرهتش امي نحمل ! دعي معايا
_المعذبون في الارض من هم ؟ هما لي لاهيين مع الناس و ناسين راسهم ، هما لي ربي متعهم بخمس حواس والعلم و زداهم رزق العمل و رزق الزوج و رزق العائلة و تابعين المكر و الحسد و الطغيان !! منين دخلت هي وامها لدار وهي تتسوط و ماعجبها حال و امها تتبرد فيها ولكن بدون جدوى
بثينة : ماتهضرررررريش الالة ماااااتهضريييييش ، نتي عارفاهم ماحاملنيش وخاصهم منين يدوزو ليااااا
الام : الله ابنتي !! واش تتشوفي شي حاجة من غير لي تنشوف انا ؟ ناسك ديما مكبرين بيك ، ديما عارضين عليك ، فين عمر العكوزة وصلك صهدها ولا لوايساتك ؟
بثينة : ( تتكتب فالميساج وهزت حاجبها فيها بتحدي ) انا ساهلة ليهم ؟ انا نهار لول شرطت عليه و قبل بشروطي!
الام : ( بود ) ابنتي ! اابثينة ، راه هاد الجهد تيرجع بضعف و سوليني انا ، راكي ماشي صغيرة شوفي شحال بقى ليك لربعين ؟ سيري عند راجلك و خليه يحط عليك الراس و شوفي الطبيب واحد وجوج و ربحي بشي وليد ولا بنية اما ابنتي على الزواج راكي ممطولة فيه ، يا بقيتي مع هاد ولد الناس يا واحدا اخور ! الحق نقولو ابنتي ، نتي لي ممزيناش
بثينة : ( بنظرة سوداء ) مابغيت ولاد ! شفتي مرات شاكر كي دايرين ليها ؟ كي الأميرة، محيت هاديك بنت اخو الحاجة ، شلحة ديالهم وانا غير مرات تيجاني ! اصلا هما ماحسبيش راجلي باش يحسبوني ، هما مبرعين فالفيلا و الشركات د باهم وانا نتنفى فديك كندا معاه !
الام : اوا اش نقول ليك ؟ ديري لي بغيتي ، الناس فهاد الشهر المبارك يسامحو و يطلبو الخير ونتي ابنتي طالبة الجهد الله يهديك
_طوات مها كمامها دخلت توضى تصلي وهي بقاات مع تلفون مغددة غير بوحدها ، حلفت لاقاست ديك الشباكية و لا البريوات غير مها على شرفها تتوجد العشا والسحور فنفس الوقت وملتزمة الصمت ، تعشاو فصمت وكلها دخلت لغرفتها وحدة نعست و بثنية تتجاوب فتلفون على تيجاني
بثينة : بقات ساعة و يأذن !
تيجاني : الله يقبل ، قلتي ليا مشيتي عند مالين الدار ؟
بثينة : مشيت ! و شفت الحاجة و فاطمة وجلسنا شوية عاد مشينا
تيجاني : اوا مزيان ! ( بهدوء ) راه دوزت ليك لحسابك واحد لاسوم ، دوزي رمضان فخاطرك و تهلاي فالواليدة
بثنية : شكرا لهلا يخطيك ! نت ماعندك مجي ؟
تيجاني : ( حرك راسو بلا ) عندي طخوا فواياج بين جابون و فرنسا و هونجوج من هنا لصيف وشوف تشوف! ( تنهد ) بالي تيبقى مع الواليدين بزاف
بثنية : ااممممم !! اوا خاصك تفكر كفاش تستقر فالمغرب
_كان باغي يهضر و يزيد ! ولكن اكتشف ان الزوجة ديالو لي استاذة فالاصل جاهلة مسار زوجها، كفاش تطلب منو الاستقرار وهو فاوج التعليم ديالو ؟ هاد السيدة واش تتشوف غير راسها؟ واش غي هو لي تيفكر ليه وليها ، شنو ناقصها هي تستقر معاه ، فلوس!! تيصرف عليها و متسعد يخلص ليها دار و يامن ليها مستقبل معاه ! شنو خاص لزواجهم و غفل عليه ؟ تنهد و وكل امرو لله فهاد رمضان
تيجاني : ماعلينا ، خدمة السونطر حبستيها ؟
بثينة : راه علمتهم ! سمحت فثلث شهور
تيجاني : ماغاديش يعطيوك لي ماكاينش ، المهم مراتي تخدم فحدود المعقول ولقا وقت نهضرو ، ماشي الغربة و نزيدو نهضرو مرة فشهر
بثينة : ( سمعت الفجر ) الله اكبر ! اوا تصبح على خير ( توادعو قطعت الخط ) صمت
_تتسمع أذان الفجر و تتدعي ! بدون إدراك كانت تتدعي بالذرية ، داخلها و باطن عقلها باغة الدراري ، لأن حرقة طلاقها الاول من غير الخيانة كان الاولاد ..فصلاتها جسدت تتبكي وتطلب الله...
بثينة : ربي لا تذرني فردا وانت خير الوارثين!!
_سلمت و أنهت صلاتها تتختم بدعاء و دموعها طايحين و تمتمت بقهر
بثينة : الله ياخد فيك الحق( طليقها) دمرتيني و ضيعتي ليا حياتي (مسحت دموعها ) ندفع الاستقالة نمشي عند راجلي ندير اولادي ، اش نبقي ندير هنا ، امي راه مخلية لها الدار و الخلصة
_اليوم الأول في رمضان !! الصمت فعموم المملكة ، المقاهي ، المطاعم و المحلات لي عندهم تجمع الناس معظمهم مسدودين ، لي خدام راه خدام ولي قاري راه قاري !! من داخل المؤسسة و بضبظ في قسم مادة الرياضيات ، استاذ تيشرح ولكن تلاميذ عندهم رأي آخر ، لي جالس ناعس ، لي تيتفرج فماتش ولي جاي بسيف عليه بحال تسنيم
نجمة : ( تتشوف قدامها وتتهضر مع حكيم جنبها ) دبا هاد الاستاذ كفاش قابلة عليه مراتو ؟ ( تتطلعو وتهبطو ) شووو على انسان
حكيم : ياااا هاد البنت راكي صايمة
نجمة : واكلة !
حكيم : أعوذ بالله
نجمة : سيدي ربي عطاني رخصة ( شافت فتسنيم ) نتي فوقاش تاكلي ؟
تسنيم : لاهي تاتجي بعدا ؟ ( تنهدت ) وايلي على ساعتين ديال الماط ؟
حكيم : انا نكملهم ونخرج ، بربي لازدت ساعة ، القراية فرمضان مالي انخرج دكتور ، انا راه نضبر على ميريكانية نعيشو لافيدا انا وياها
_عقل المراهق !! السهل الممتنع ، الا دخل فدماغو فكرة سيئة او لاتناسب السن و المجتمع والدين كان الشيطان له مساعد او رفاق السوء او تبعات السوشل ميديا ، كملو ساعتين وخرجو! نجمة ماعطاتش اذن لان والديها غير منتبهين ليها وكريم هضر مع الحارس العام انه عندو كنترول ديال الطبيب و تسنيم عطات عذر المرض وخرجوا بشكايرهم
حكيم : نمشيو لفاس ؟
نجمة : نمشيو
تسنيم : أنا راه عندي غير خمسين درهم !
نجمة : الفيلا و الشركات و جوج بوات وجوج موات و خمسين درهم ؟
تسنيم : جمعة الا نتي ماصايماش انا صايمة !! راه نسبك
نجمة : صافي اصاحييبة خبعيها لمور الفطور
حكيم : اراو لنا الفلوس اعباد الله !
مدت ليه تسنيم خسمين درهم و نجمة ربعمية درهم و كريم مية وثلاتين درهم و قطعو التران وجلسو يتنمرو على الناس حتى جا التران وركبو تيبحثو على ارقامهم وجلسو مع بعض حاضين مع الطريق حتى وصلو للمحطة و نزلو مع بعض
حكيم : نمشيو لمركب ؟
نجمة : ااه نمشيو!
تسنيم : نمشيو لمولاي دريس !
حكيم : لاجلابة لا شال وباغة مولاي دريس! راكي ملسمة زعما ؟
_تحركو مع بعض يلاه بغاو يشوفو الطاكسيات ، ولكن تقافة فاسة صحاب الطاكسيات مايوصلكش مكان قريب ، يوصلك فين بغاو هما، ضطرو يكملو على رجليهم و البرد تيضرب فيهم تيهضرو شادين فنجمة تتعاود ليهم على كريم ماحسو حتى وقفو عليهم جوج شماكرية باينين من وجهم هازين المضى و شاريع شبه خاوي لول شد فتسنيم قالها بالحرف
: ختي حطي ديك السبرديلة من رجليك
ولاخر حط الموس على وجه كريم وطالبو يحط شنو فجيبو وللاسف الدراري الصغار والخوف تكمن منهم حط ليهم كريم الفلوس لي فجيبو وخلاو تسنيم بالحفى و كملو بتلفون نجمة و كريم من غير تلفون تسنيم لي كان فشكارة و زادو كانهم مادارو والو خلاوهم مصدومين ونجمة تتشهق بالبكا ماوقفت عليهم غير واحد السيدة لي شافت المنظر من بعيد ولكن ماقدارتش دخل نزلت تترعد
للسيدة : الله اوليداتي مالقيت ليكم جهد ! ( تتعنق نجمة لي تتبكي وتتسكتها)
تسنيم : خالتي عندك شي صندالة ، راه داو ليا سبرديلة عرفوها دوريجين
سيدة : نديكم ابنتي لداري ، عندي بنيتة قدك ابنيتي لبسي لي بغيتي ولكن خاصنا نديكلاريو هو لول
_يالاه يعترضو بثلاثة لان عارفين شنو تابعهم ولكن من زهرهم وقفت عليهم الصطافيط بصدفة من وقفتهم لي دخل الشك
البوليسي : اش تما الالة ؟ وليداتك ؟
السيدة : لا سيدي ماشي وليداتي ولكن تشفرو غير دبا نيت فهاد الموطع
_نزل البوليسي ساد الباب ،و بدا فالاسئلة و سونفيل كل مرة يتكلم فآخير طلعهم لصطافيط لأنهم قاصرين و تسنيم عطاوها ميكات كوحل ديرهم على مايلقاو لها ماتلبس حتى وصلو لكوميسارية يعطيو اقوالهم و وصف المجرمين وكما العادة ارقام حمادنة تتعطى واسم ياسين شرايبي و نجمة تتعطي رقم عمتها وكريم تيعطيهم رقم باه القديم وحتى قالو دازو ولكن رقم ياسين جاوب على مكالمة الشرطة و مسافة الطريق كان عندهم
حكيم : هدا داك زرق العينين ماشي داك لي تيخلع من الشوفة ؟
تسنيم : الا عاااودت تبعتكم ؟ راني كلبة
حكيم : ندوزو هادي ويكون خير...( شاف فنجمة ) جمعة شوية لخلعة؟
نجمة : ( وجها صفر ) مانا بتمنلاف مانا بتلفون !
_مر بليلة بيضاء ، زائد الحمى لي تتغزل فالجسد ديالو و الحلق مجروح مع القطعة ديال اول رمضان وشاد الطريق لفاس لعند تسنيم وصحابها ! برك على لكلاكصون بشدة لشخص معرقل الطريق
ياسين : اخوي الطريق ابنادم واش ديال باك !!
_فقمة المرض والأعصاب ماوصل لمركز الشرطة حتى راسو تهرس عليه ، نزل من السيارة و وغلق الباب ورجع فتحو هاز البزطام فيه اوراقو ودخل تيسول حتى طلعوه الفوق لقاهم جالسين بحال اليتامى معنقين شكايرهم و تسنيم ميكات فرجليها وغير شافوه ناضو تسنيم وحكيم ساكتين ونجمة تتبكي و تشكي
نجمة : ( كتنخصص ) اااسرقونا اخويا ياسين و جبدو علينا الموووس
ياسين : جلسي جلسي اسرقونا
_دخل للمكتب كمل الاجرائات ، البلاغ عن الشفرة فالبلاد غير اشاعة ، الا ماكان عندك معرفة صحيحة فالمخزن ولا عارف شكون سرقك بسمية و الوجه عوضك عند الله ! أمضى على خروجهم و ركبو السيارة وملتزمين الصمت غير نجمة لي تتبكي حتى ضراتو فراسو
ياسين : اااابنت الاستاذ قطعي الحس !
نجمة : ( تتجمع البكية ) هانا
ياسين : ( شاف فتسنيم ) فالكوارث تتحضريني! فالافراح تتحضري خوك شاكر ؟
تسنيم : ( لوات لسانها داخل فمها ) صمت
ياسين : وانت اسي حكيم ؟ ديرش شي حركة ؟
حكيم : اخويا راني قاصر بحالي بحالهم وخونا جبد المضا !!
ياسين : المضا !!؟ مخليين مكناس كولو و طالعين لفاس ؟ ( ضرو راسو ) بيناتكم مع واليدكم نتوما ضسرتو وشبعتو فلوس ، كن غير قد خصايلكم قد فمكم، خرج فيكم شفار رعدكم
حكيم : آجوووج اصاحبي
ياسين : دير خير فراسك و اسكت ! أما حتى داك باك مامسوقش ، كثر من شرايبي
_شادين طريق الرجوع و المغرب بقات ليه بضع ساعات ، النهار قصير ، فهاد الاثناء الفيلا كانت مثل اي بيت مغربي ، الحريرة طايبة و الطواجن موجدين و الطبلة مسربية و مغطية ، الفرق ان طاولة الحاجة شلحة لابد من بعض الشهيوات خاصين بناس خنيفرة لي كلها اكل صحي ، الفطور لول الكل مجموع ناقص فقط خدوج و راجلها و الاحفاد لي فالخاريج أسمهان و حمزة ! أما الباقي حاضر منهم اسراء ولو بيد تتسربي مع الحاجة و فداء و سهام لي عمرها حسات بهاد الراحة فرمضان مولفة تخدم فالخارج ودخل تعاون مها وتزيدها بالمصروف
شاكر : ( جالس جنب الحاج تيقرا فتلفون ) صمت
الحاج : ( تيتفرج فالاخبار ) صمت
ياسين : ( دخل وجهو شديد الاحمرار وراه تسنيم منزلة راسها ) السلام
شاكر : ( شاف فساعة ) فوقاش خرجتي نتي ؟
ياسين : هاد المؤسسة لي تتحط لهم كل شهر علاين الفين درهم ، فين المراقبة ؟
شاكر : ( جمع الوقفة تيتفحصها بعيونو بخوف ) مالها ؟ ( قرب لها ) مالكي ؟
_شخصية تسنيم اسوء ما تتكره هو تحط فالمراقبة من طرف واحد كيفاش تحمل طرفين !! نزلت راسها تتشوف فياسين يزيد يهضر وفاطمة داخلة تتسولهم وياسين تيحكي القضية من اول هروبهم لغاية اتصال الشرطة ، هو تيعاود وشاكر الاعصاب تيشدوه ! ممكن تكون تسنيم اعز وحدة ليه فخواتاتو ولكن فهاد الحالة راه مايخبيش عليها ولا يغطي عليها ، اليوم فاس ! غدا الدار البيضاء
شاكر : هادي هي الثقة ديالي فيك ؟ ياك غير هادي سيمانا تنوصيك على قرايتك ؟
تسنيم : ( تتسمع ومنزلة راسها ) صمت
شاكر : ( بصوت قوي ) جاااوبي !! شنوووو باغا بضبط ؟ مافيك لي يقرا ؟
تسنيم : راه تنقرا
شاكر : ماشي قرااااية ! ماااااشي قرااااايتك هاديك ؟ ( تيهز فيديه وعينيه خارجين فيها ) فسانكيام القليلة ضربي سبعطاااش ديالك ، هادي أضعف الايمااااااااان!( هز التلفون تيتصل بالمديرة ) الو وي !
المديرة : مسيو اليعقوبي ، كيف الحال
شاكر : الحال مايعجبش امدام ، باااااشمن حق تسنيم تخرج من ليسي بلا اخباري ؟ شنو تكلمت معاك آخر مرة؟ والنهار لول تنظن طرقت معاك هاد المسمار، قلت ليك عشرة الدقايق ديال الروطار تعلموني ، اما الغياب راه نوض عليه روينة
المديرة : سي اليعقوبي خاصك تقدر موقفنا ، راه المؤسسة كبيرة والا جينا ندققو على كل تلميذ مانساليوش ، والبنت بررت بالمرض و اكدت ترجع الدار
شاكر : هضرة جديدة هادي ؟ منين تجي تلميذة عندكم ( تيحسب بااصابعو ) مريضة و تخليوها تخرج بوحدها راه السيبة امدام، انا علاش تنخلص ليها لاسورانس ؟ علاش كل شهر تدققو مع كل تلميذة ماخلصاتش ؟
المديرة : فهمتي سياق هضرتي غلط اسي اليعقوبي !
شاكر : لا فهمتك صحيح ! هضرتنا من بعد امدام
ياسين : ( تيحس براسو يطيح على وقفتو مع ذلك واقف تيسمع) بنت الاستاذ و حكيم شمن شعبة دايرين العام الجاي ؟
تسنيم : بحالي !
ياسين : العام بقى فيه ربع شهور ! العام الجاي تفرقها مع دوك الجوج هدا هو الحل
شاكر : راه بنتنا لي مزعماهم !
الحاج : براكة عليها! المغرب تيوذن
شاكر : طلعي لبيتك ! والبيسي و التلفون يتحيدو ليك تنشوفو المعدل، و العطل الجايين تبقاي تمشي لشركة ، مابقيناش غنتسناو الباك
فاطمة : ديري عقلك ابنتي !
_طلعت مامطيحاش دمعة ولا دافع على نفسها باي كلام !! واخدة شخصيتها من شاكر و ياسين وحمزة بلا ماتحس ، تدير الخصلة وتستقبل الكلام ، دخلت لبيتها و فتحت الشكارة حيدت تلفون وجمعت البيسي حطاتهم فوق البيرو ودخلت لحمام غسلت رجليها ولبست تقاشر و بانطوفة و لبست فيست سخونة وجلست تتنهد وتتشوف فسقف بملامح صلبة حتى طلعت الحاجة تتاخذ بخاطرها و مادة لها التلفون فيكس حمزة باغي يتكلم معاها
تسنيم : امممم
حمزة : الو تيني ! صافا
تسنيم : معيط باش تقولي صافا ؟ سير بعد مني
حمزة : ( شداتو الضحكة ) غير صدفة عيطت وانا لقا خوك محيح ، اش داك لفاس ؟
تسنيم : واش انا طوير مشدود فقفص ؟ صافي يقلب عليا شوية !! كرهت ديك القراية بريفي من الصغر ,قربت نعيش فالمدرسة ونقرا فدار بقوة ما الآية مقلوبة ! زاد كملها ليا بشركة
حمزة : شكون يشدها من غيرك ؟
تسنيم : ماشي بوحدي لي حفيدة الحاج ؟ راه كاين انت واسمهان! ماشي الكبار هربو وأنا الصغيرة نتشد ، واش يبقى خانقني هاكا ؟ راه بزااااف
حمزة : صبري ! شدي الباك ديالك ، و كولي الوراق ضربي لينوط ديالك
تسنيم : ماااداخللاش ليا ديك القراية لراسي ! صافي قريت لي رشق ليا عليه ، فاش تقرر ليا الشعبة والخدمة لاش نحمق راسي؟ صافي باش ما دزت راه مزيانة !! شكون عرفني انا شنو بغيت وفين بغين نخدم ولا فين نكمل قرايتي
حمزة : داك الهيت ديال كوريا راه مامنوش اتسنيم ، راه افلام شكل والواقع شكل اخور ، راه تيقراو معايا كوريين السم تيقطر ويضربو غير الحلوف و البيرا
تسنيم : انت وخوتي لاخرين درتو لي بغيتو وانا تنسمع فالمحاضرات ؟ ( بعدم إعجاب ) سير قلب عليا حتى انت ( قطعت ) بفف
شاكر : ( دق ودخل ) نزلي تفطري ! ( هز البيسي و البورطابل ) وغادي تزيدي السوايع فسونطر
تسنيم : ( بقهر ) واخة !!
_الا جينا نديرو مقارنة بين المراهقين!؟ تلقى وحدة فسن تسنيم تتمنى عيشتها ، جوج والدين وقوة الاهتمام و المصروف الصحيح و الدارسة بمستوى عالي ! والا جينا نطلعو سلم المقارنة لقاو طبقة اعلى من تسنيم تقدر دير لي بغات وتخرج فوق مابغات والفلوس مشتتة ولكن تلقاها تتبحث عن الاهتمام ولهذا الدنيا عمرها تقاد
الحاج : ( بجبر خاطر ) اجي ايلي فطري معايا ! اجي فطري مع الرجال
تسنيم : ( جلست جنبو ) صمت
شاكر : الحاج ! تنقاد من جهة ما تخسرش ليا من جهة آخرى
الحاج : ( تيهز فيديه ) اسيدي بعد ليا من بنتي ! هاد الكلب جالس ماخدام ماوالو يديها ويجيبها
ياسين : ( صرط الهضرة مدور وجهو ) وشحال قدنا نحضيوها ؟ راه الا وصلت تمنطاش العام مزال صايط لها الريح فراسها غير قرا عليها السلام على المشاكل ، تنهضرو معاها و نزيروها باش تعيق وتفيق وتفرق بين الصح و الغلط وتعرف حدودها
الحاج : مزالا صغيرة
شاكر : الا صغيرة راها تتكبر ! منين نكون انا تنهضر معاها مايزيد يهضر حتى واحد
_كولشي سكت وراء كلام شاكر، بقى تيتسمع غير صوت المعالق مع الزلايف وصوت التلفزة
سهام : ( تتفطر فطاولة مع الحاجة والبنات وتتسمع ) مالها ؟
فاطمة : ( تنهدت ) وقفو عليهم الشفارة ففاس ! حيدو لها السبرديلة والجاكيطة عرفوهم دروجين
سهام : اوا صافي مايزيدش عليها الخلعة تكفيها
اسراء : ( تتاكل و تتسمع وتتوشوش هي و فداء ) تتقلب يدور ليها
فداء : ( تتشوف فسهام وترجع تشوف فشاكر ) مزال ماناضش لها شي نهار !
فاطمة : امي كولي
الحاجة : منين يدوز ليا و تسنيم ماكلات والو ! غير تيغوت! يغوت الصباح و يغوت بالعشية
فاطمة : راه هي لي ماساهلاش !! مابقات بغات تقرا بالفلوس ، هادشي كولو باش تخرج تقرا فالدولة
سهام : اوا لا !! شكون كره يقرا بريفي ؟
فداء : هي وحمزة راه جنونهم البريفي ! (ضارت عند إسراء) شوفي ياسين نعس
إسراء : نوض نزيدو الدوا ثاني ! منين رجع البارح قاطع الضو وهو مريض
_وجدت ليه الدوا الثاني وعطاتو يشربو وطلب منها تزيدو غطا ثاني وتطفي عليه الضو ! نعس جسديا من قوة التعب لكن فكريا ماقادرش ينعس ومزال الكلام تيتكرر فاذنو
_ماتت امها وهي تزوجت مشات مع راجلها لخاريج ......
_
_ماتت امها وهي تزوجت مشات مع راجلها لخاريج ...هاد الخبر بقى تيحفر فيه حتى مرضو !! شكون قال الراجل فالعلاقات تيمر مرور الكرام؟ شكون قال انه ماتيضررش من الفراق ؟ شكون قال انه ماتيولفش وما تيبغيش ؟! ياسين وحسنا كن بداو العلاقة بخطوة صحيحة كانو يكونو احسن كوبل ، حسنا تتبغيه و تتشوفو غير هو وقابلة بزوين و بالخايب ديالو وهو حنين فيها و داير لها الخاطر ! لكن لكل بداية بالغلط لازم تتم النهاية ديالها ، الفرق ان بعض النهايات السعيدة تتصلح الغلط بالصحيح و نهاية حسنا وياسين كان الفراق هو نهاية القصة لان الأسس العائلية اقوى من اي حب ! شكون هدا لي يخسر احسن ام فالدنيا من اجل بنت صاحبة باه ؟ ماشي اي صاحبة كانت باطرونة فزمانها ! كي دايرة هاد النسوبية ؟ كي داير هاد الزواج لي شي ماحامل شي وشي حاشم من شي ؟ هي طول عمرها تشير لها بالاصابع وهو طول عمرو داير عين ميكا حتى يوصلو للفراق بطريقة ممكن تكون اسوء من هادي
إسراء : ( تتحركو ) ياسيييين ! يااااسيين
_فتح عيونو بانزعاج ورجع نعس تيحس بالذات ديالو عرقانة و دفع عليه الغطا
إسراء : نوض راه بديتي تهضر بوحدك ( شادة الضحكة هي و فداء ) نووض راه قرب يأذن الفجر
ياسين : ( بصوت باح) الا نضت راه لاقي ليكم الريوس نتي وديك بابا عجينة
إسراء : ( طبطبت عليه ) الحمد الله فاتك الحاال ! وانوض دوش يخفافو عليك عظامك راه طناش دليل هادي
_جر الغطا جالس تيمسح فوجهو و هز التلفون تيتاكد من الساعة كان فعلا نصف الليل و هز راسو تيفكر !
ياسين : فينهم ؟
إسراء : كولشي نعس !! راه شوية ينوضو يتسحرو ، وانا و فداء جلسنا حداك منين بديتي تهضر بسخانة ولكن ماعرفناك شمن لغة تتهضر
ياسين : ( تيلبس جاكيطة وهز السوارت ) اللغة ديال بلاد باك
_تركهم مكملين السهرة وهو خرج راكب السيارة متجه للدار ! مباشرة خدا دوش و لبس الملابس ديالو ونزل يبحث على كوكا فثلاجة ورجع للغرفة ديالو يكمي كارو وشاد التلفون تيتصل و يعاود برقم حسنا لكن كان دائما خارج التغطية ورجع ربط الاتصال بأحد الاصدقاء
ياسين : وعاد فقت كنت عيان ماشكيت عليك ! سولتي ليا داك بنادم ؟
الشخص : مايكون عندك باس ! نفس الكاسيطة ، قالك تزوجت ومشات لاوروبا ،كفاش الله و اعلم
ياسين : ( تيسف كارو بقوة ) دارت جنحين وطارت ؟ اصاحبي الفيزة هي التالية خاصك ليها القليلة شهر ديال الطلوع والهبوط !! (بعصبية ) ماتحطش يديك زيد سول ، الفيس لي فيا باغي يعرف معامن تزوجت وفين مشات
الشخص : صافي اولد شرايبي قلب ، فيها خير !!
ياسين : شفتيني داير جنازة ؟ راني قالب منين عرفت هي بنت من ، ولكن باغي نعرف فين وصلت وصافي! ( بتاكيد ) باغي نعرف ، وخ نعرف توصلني خبارها على عشر سنين باغي نعرف ، تلاح دبا من بعد ونهضرو
_كمل الكارو لول وزاد الثاني واحد النار داخلو مازال مابردت ، اسوء رجل هو لي يكون واخد قرار الفراق لكن مزاال تيبحث وراك ، مزاال متشوق يعرف خبارك ، وبكل جرأة تيربط الاتصال بيك !! وهنا نصف الغلط تتخلصو البنت ، لانها لو تعقد قرار البعد مثلما تيعقدو الراجل بين قلبو و عقلو تربحو فكل المعارك العاطفية بل تقدر تخليه يعاود حسابو معاها ، لكن البنت أو الأنثى عند الفراق بأبسط حركة من الرجل اهتمام او بحث سؤال تتحط سلاحها وتقول
_مزاال تيبغيني !!
_سول فيا ! وشاف السطوريات ديالي !! شفتو اليوم فالبلاصة فين عارفني تنكون !!
ياسين : ( سمع الحس ) كريييييم
كريم : ( طل عليه ) نتسخر ليك ؟
ياسين : دخل تنعس اشمن تسخار
كريم : حتى نصلي الفجر فجامع مع حمادنة عاد رجع نعس
ياسين : سير تصلي الله يقبل !! انا ماناعسش تترجع لدار
كريم : ( حرك ليه راسو ) صافي راه ارجع نعس هنا ( خرج ورجع ) امي ناعسة لهيه ؟
ياسين : ماعرفت! وقيلا ( رجع شاف فيه) راه مانعس تترجع!!
كريم : ( خرج بدون جواب ) الكارو فيديه ومقطوع
_هكدا مر اول يوم من سيدنا رمضان ! و المغاربة كيضيفو له كلمة سيدي لتعظيم و تقدير هاد الشهر الحرام ....يوم ورا يوم حتى وصل النصف و الحاجة كل النهار نفس البرنامج طيب و تعطي فالصواني فسبيل الله و بناتها مرة معاها مرة يفطرو فديورهم لغاية آخر رمضان لي باقي العيد الصغير بضع ايام قليلة ! من داخل دار فاطمة على طاولة الفطور ياسين و فاطمة و حسن وفداء تيفطرو و تيتكلمو فموضوع القهوة
فاطمة : شهر داز بلا متصلحو القهوة و سادينها مدة و الضريبة تتحسب
ياسين : الواليدة واش خمسة دالمليون هي لي تصلح ليك ؟
حسن : فين هي خمسة دالمليون بعدا ؟ راها مشات مع قراية اسمهان
فاطمة : كفاش مشات ؟ خمسة دالمليون راها سلف من عند ختك الله يجعلك ماتصدقها من عندي ! اصلا الفلوس لي ماتنشدها بيدي تنعرفها غادة فالخوا
حسن : ختي شكات عليك ؟ قالت ليك ردي ليا فلوسي؟
ياسين : صافي غير عمتي دايرة عين ميكة ضمسها فيها !! انا راه موقف الصليح تنشوف كي ندير لداك القادوس المشروك مع شاكر
حسن : ( بنبرة استفزاز ) اسيدي القهوة ديال اليعقوبي فاطمة ! والكراج ديال اليعقوبي شاكر ؟ وانا شرايبي اش حرق شطاطتي معاهم ؟ منها لخوها
فاطمة : الصليح عليك ! ولدك لي يتكلف بالمشروع
ياسين غمض عينيه بعصبية و ملل من نفس الموضوع وفداء ناضت تتجمع الطبلة راسها ضرها من هضرتهم و مخلية حسن وفاطمة تيناكرو حتى تنهد بقوة
ياسين : الوااااليدة !! الوااااااليدة واش انا عدوووك ولا ولدك بغيت غانعرف ؟ ( سبقها فالجواب ) القهوة راه نصلحها نصلحها باش ماتشديش فالهضرة ونبقاو انا وياك هنا نترادو كي ضريرات ! والكراج تاني راه تنفكر ليه فشي مشروع لي يكون كولو فلوس و لكن كنا باغين خوك يرجع لينا زمرنا باش نجمعو الرزق ونديرو اصلاح واحد
حسن : لا هيا تتفمها هاكا ! تتفهم خوك نبيعوه العجل فالكراج ونخليوه على الضس
فاطمة : خويا عندو كل خير
حسن : هانت معامن تتهضر ! (تيقلدها ) منين عندو كل خير ؟ يرجع لولدك الكراج ، راه ولو نوضو نشريو عقار اخر ونديرو فيه مشاريع ، ماشي بحال موقع دارنا ، راه جينا فالبوك
ياسين : انا الا رجعو راه ندير فيه اوبتيسيان لفداء
فاطمة : ختك نهار العيد جاييين فيها الخطاب ، و الناس ميسورين مايتسناش من ختك تخدم ، و ماعرفناش شروطهم
حسن : الالة يعطيني شبر التساع ! سبعة وعشرين عام و انانقري باش توصل يجي واحد راسو مربع يقولها جلسي
فاطمة : ماكاينش لي خارج على أولادك قدك ! دبا هادي هضرة تقال ؟
ياسين : ( شاف فحسن ) خلي نشوفو الأمور كي دوز الواليد ، وانت كن جات عليك يبقاو بايرين
حسن : ( تفكر موت ام كريم ) اسيدي شكون تتزوج خوها ولاباها ؟ كلهم حسابهم فراسهم ، ماتعذبتش انا باش يجي واحد راسو مربع يحكر ليا بناتي ! خصوصا فداء درويشة ، اما حتى اسمهان وتسنيم راهم العافية الكحلة
فاطمة: اوا هاد ولدك لي قرب لكدا و ثلاثين عام؟ امتى يتزوج ؟
حسن : بشوية عليه !! خوتك لي واصلين الربعين ويلاه تزوجو بغيتي ولدي نزرب عليه ؟
ياسين : شوووف فين كنا وفين رجعنا !! عندك هاد بنت الناس لي تزوج بيا ؟
فاطمة : موجودين ! راه فاش خطبنا سهام بنت خالها تتحمق بزين و الدين و الحجاب ، بنت الطبيبة صاحبتي لي فالشاريع راه عندها بنت قد إسراء تتقرا الطب الصواب والاداب ، كوطابلية لي عند شاكر باها عدول الله يعمرها سلعة
ياسين : ( تيلبس الجاكيطة تيشوف فتلفزة وحسن كذلك ) صمت
فاطمة : اش قلتي ؟
ياسين : نديرو فاش نخدمو ونشوفو المراة ( دخلت إسراء تتضحك ) البقرة جيتي
اسرا ء : سلام عليكم ! ( جلست تتهضر فوذن فاطمة ) حلفي ؟
إسراء : ( بهمس تتوريها ميكة دالفرمسيان فيها تيست الحمل ) والله ! (وقفت ) انا مشيت تتدوزي اخالتي جيت نقول ليك شنو كاين
_الحاجة القليل القليل فين تلاقاها جالسة ترتاح ، أغلب الوقت الكوزينة او الشقى، تا ترتاح فجوج حوايج الصلاة و الشقى و الغرس !! جالسة تتطوي الحوايج والحاج تينكر كما العادة فوق راسها وهي تتسمع و تسرط
الحاج : ماشي معقولين ! الخدمة بغات المعقول و الصبر ، اش باغي ساكن واكل، خدام، فوقيتة الزيتون انا تنجيب ليه الخدامة وهو داير عليهم كابران
الحاجة : لي دار شي حاجة دارها فسبيل الله ، إلى شبع خبز الله يعرض ليه السلامة
الحاج : ( سد الباب جبد غلاف تيحسب الفلوس ) أما ما نجري على احد ! ( تلف فالحساب ) الفطرة هاد العام تخرجيها زرع؟
الحاجة : اوا زرع ! ولكن نزيدو الحاج الصدقة ، و بنت بنتك راها مريضة وخاصها تكسى و طيابات الحمام راه عندهم اليتامى و دياولنا د خنيفرة و بنت السيد لي فالراشدية نصيفطو لها الكسوة
_هي تتحسب وتعد الناس، وهو تيحسب لها الفلوس ، حتى مد لها مبلغ مهم وخرج للخارج و إسراء داخلة عندها
الحاجة : تسخرتي ليها آيلي؟
إسراء : حطيتو لها راه لقيتها فالحمام تتقيى وتجي على فمها
الحاجة : الله يسخر ليهم ! ( حسبت لها ألف درهم ) شدي آيلي شري لي خاصك
إسراء: ( بمنع ) لا حنا، راه خالتي كساتني ليلة رمضان
الحاجة : ( بشدة ) شدي آيلي ديريها تحتك، عندي ماعز منكم؟ الله يرضي عليكم كاملين
_حضناتها إسراء تتقبل راسها وفرحانة بيها ! إسراء علاقتها مع جداتها اكثر من خدوج ، أبدا ماشي بالمادة او عطاء اانقود ، لكن بالاهتمام والحب و الابتسامة! جلسو مجمعين انضمت ليهم فاطمة و فداء وعاد نزلت عندهم سهام ببيجامة جديدة و وجهها صفر وشادة التلفون تتكتب الميساجات
فاطمة : مريضة ولا ؟
سهام : ( بحماس ) شوية المعدة ! وشكيت فحق الشهر تعطلت عليا و درت تيست
اسراء : شنو طلع ليك فيه ؟
سهام : جوج شرطات
فاطمة : اوا مبروك الله يسخر
إسراء : إلى بغيتي تأكدي ديري ديال الدم ! ولا سيري للطبيبة
سهام : يجي شاكر و نشوف !
فاطمة : مزاال ما رجع ؟
سهام : قالي الصباح عاد يرجع، تيسربيو شي ارض
الحاجة : الله يصاوب ليكم ابنيتي ! لي تشهيتي و لي بغيتي ابنتي طلبيها
سهام : ( بفرحة ) لهلا يخطيك اعمتي ! مصاب غير الفكاك وصورة مكمولة، توحشت غير ماما
فاطمة : ( شافت الساعة بانت لها التسعود ) بغيتي نوصلك عندها، نوصلك!
سهام : شاكر ما قلتهاش ليه، وهو غدا راجع ، نصبر وصافي
فاطمة : المهم لي بغيتي، الطموبيل موجودة
_مراعين ليها، مهتمين بيها !! تعشات معاهم و طلعت لبيتها ترتاح وبقات الحاجة و بناتها مجمعين حتى وصل وقت النعاس وكلها مشى للغرفة ديالو حتى طلع الصباح دخل شاكر هاز فيديه الضواسة طل على والديه و تسنيم و دخل للغرفة ديالو لقاها ناعسة مغطية بالملاية من ساسها لراسها
شاكر : ( تيتحسس شعرها ) سهاااام !! ( نزل الملاية على وجهها )
_حست بيه وفتحت عيونها مبتسمة وجلست شادة فيديه تترحب بيه وهو تيدوز يديه على راسها
شاكر : شوية؟ رجعتي تقيتي ؟
سهام : لا ! شوية الدوخة
شاكر : توصل التسعود ونشدو الرونديفو عند الطبيبة
سهام : ( بدلع ) ما فياااااش ! نمشيو غير لابوراطوار نديرو تحاليل الدم ومن بعد ديني نشوف ماما
شاكر : نو ! هادشي ما فيهش التحاليل ولا لابو ، الطبيبة تشوفك و نطمن عليك ( شد فراسو ) من بعد نوصلك للخميسات من تما نكمل الطريق لكازا تسنيم خاصني ناخد ليها الحوايج
سهام : ااه !! اوا نخلي ماما من بعد، نمشي معاكم !
شاكر : لي بغيتي ، انا غير عليك لا تشدك الدوخة !
_ما جاوباتوش ! لأنه باغة تمشي وتشوف هاد الكسوة لي تتشرا من كازا ، رجعت تدخل راسها غير بالضحك واللعب، دخل دوش و لبس ملابسو و اتصل بالعيادة اكد حضور الطبيبة و فيق تسنيم تلبس ملابسها و شدو الطريق للعيادة
شاكر : تسنيم طلعي معانا؟
تسنيم : ( بعياء ) حتى تسالي ورجع جيبني!
شاكر : نبقى نلعب فالطريق؟ ( بأمر ) نزلي
_دخلو بثلاثة للعيادة، الفرملية دخلت سهام تاخد لها المعلومات و تقيس ليها الضغظ و الوزن ودخلتها عند الطبيبة دير الكشف
الطبيبة : ( تتشوف فالتلفزة ) مدام شحال باش مزوجة ؟
سهام ؛ جاية لشهر ونص
الطبيبة : ( مبتسمة ) الحمد لله كولشي عندك مزيان، والحمل غير هو باش نتأكدو ديري تحليل الدم و ترجعي عندي بعد شهرين إلى مشات الأمور نورمال
سهام : ( بفرحة ) شكرا دكتورة ! ( مسحت كرشها والفرحة متمكنه منها ) الصمت
_خرجت الإبتسامة على وجهها تتعلن عن فرحتها بالحمل و شاكر قبل راسها كتعبير عن الفرحة ديالو و خلص اتجهو للمختبر دير التحاليل و شدو الطريق للدار البيضاء أما تسنيم ما مسوقاش لا الحمل لا سهام لا طبيب، خاصها غير فوقاش توصل وتشري لي بغات
شاكر : علامن تتوحم المدام؟
يتبع...
التعليقات
لا توجد تعليقات بعد، كن أول من يعلق.