محتوى القصة
لوؤي : راه انا ودوخني ... هضر بزربة ماخلاش بنادم تايركز ... مافهمتش منين جاب هاد 75 فالمية .....
جود : وهذااا هو الماركوتينغ ابن عمي .. عندنا جوج بريكات .... كاينة قدامك فالسوق بريكة كدير درهم وانا غنبيع ليك بريكة اخرى بعشرة دراهم .. علاش ؟ حيت ديالي زايد فيها الپيل .. الى توضرتي مثلا فالغابة غاتعتقك ضوي ليك .. والى توضر ليك كارو والضو مقطوع تعتقك تقلب عليه وغاتشري ديال عشرة دراهم فاش يبهروك لي زوپسيون واخا نتا مغاتمشي لا لغابة مغاتوضر فيها مغايتقطع عليك ضو ..
لوؤي :اعود بالله ... الطلااااميس
جود : الاحتيال التجاري ... مهم عندنا هو لكليان يكون مرتاح ويخرج ضاحك ... ( شاف عند اسد لي غير متبع ليه شوفة كايشوف العجب لي ولد ) اولا لا الواليد ......
اسد : اهاه يخرج الكليان ضاحك ... موراها قلب فين تهرب حيت لاسرا معاه القالب غايجي يشعل فيك داك ابريكة ...
جود : داك الساع نبيع ليه عصا اخر الى مالقى باش يضرب ههه .... أكيجاك البلان ديالي الواليد ...
اسد : ( تنهد ) هادشي خصو الهضرة مزال .... خصو گلسة وورقة وستيلو ... ماشي هاكا كايتناقش
جود : ( ناض وقف ) وصافي دابا تفاهمنا ماتبقاش تقوليا نجي لهنا ماعندي هنا مايدار ... انخدم من دار نهار نوجد التصميم كامل .... وهانا معاك ...
اسد : ( شاف عند سلطان ولوؤي وربع يديه فيهم ) ونتوما اش باليكم من هاد الاجتماع ... توضح ليكم شي طريق .... !! خرجتو بشي حاجة من هاد الجلسة ...
لوؤي جلس على الفوطوي وجبد من جيبو دوك لي كارت فيست حطهم ليه على طبلة
لوؤي : ها باش خرجنا هاد الساعة ....
سلطان : ( حط ديالو تاهو ) استفدنا الصراحة ......
اسد بقا يشوف لدوك ليكارت فيست ... وعلا فيهم عينيه كايحاول مااااااا امكن يبقى محافض على صبرو .... تانطق لي غايكمل عليه
جود : ( جبد ديالو ) هنا راااجل كاع ....
اسد : ( مزير على عينيه يصبر راسو ةشاف فيهم ) بلااا صداااع ... بالهدووووء غاتشدو داك لباب تخرجو عليا ... مساااامحكم انا غاماتخدموش ....
سلطان : اهانيا اعمي الله جميل ويحب الجمال ..
اسد كيضور فراسو وناض يقلب على شي كينة دالراس ... وتاهوما تبعوه طلعو لبيرو ... جبد ليهم داك الصفقة وبدا كيراجع معاهم بنودها باش يفهمو طبيعة العمل .. رغم انهم قاريين الى انهم مامرسينش ..
ااما لوؤي غير كايلعب بواحد الستيلو مكانش فداك العالم ... ماعمر عالم البزنس قدر يجدبو .. من لول هو باغي مجال الامن ...خدا الاجازة ديالو فادارة الاعمال .. والوقيتة اللي باه ضن انه دفع للماجستير هو دفع للامن ... تقبل فالامن وقال لباه راني منجحتش فالماستر وماخديتوش ... باه معارفش انه قرا حاجة اخرى فامريكا ماشي ادارة الاعمال لي وهمو انه مانجحش فيها .....
كملو خدمتهم وخرجو اسد مشا لدار اما دراري شدو طريق اخرى يمشيو يفرغو هاد الستيريس راه خدموا بزااااف زعما ....
وصل لدار كان الكل فالخارج ... لامار فخدمتها وقسم تاهي فالجمعية وقدس نزلات تتمشى حدا البحر ...
دخل لجناحو وكلس على الفوطوي مهدود كايشوف للفوق وكتيفكر فهضرة ولدو والحماس لي كان فعينيه وهو كايشرح .. واش لهاد الدرجة الهيكلة واخدة ليه دماغو كامل ! .. ملي غير الهضرة وكايهضر بهاد الحماس ... الخدمة كيفاش غاتكون .... !!! عارف ان هادشي ماشي للعب ، ولكن على قبل يشوف نياب ولدو هو مستعد يضحي بهاد الصفقة ..... مهم بتعلم ليه
اول مرة كايحس بهاد النوع دالارتياح على جود ومستقبلو لي كان غامض بالنسبة ليه كايحمد الله فنفسو لانو اخيرا بدات تبان ليه طريقو بعد ما حفا معاه راسو بالهضرة ، نهار جاه لشوية دالخاطر كسبو ، اسد تنازل انه تقبل ليه المجال ديالو فنفس الوقت جود تنازل وتقبل يدخل للادارة والاعمال ...حسن من الزكير اللول .....
وهو يرجع يحل عينيه تاني فالسقف .. فاش تفكر انه حيد عليه الهم غير ديال واحد ...بقاو تلاتة اخرين ....
الايميل لي وصل بخصوص معلومات اصيل لي قالب ليه حياة قسم مزال ماقراه ... الاجوندا ديال قدس باقي كتنساه حتى هي .... ووسيم لي توصل هاد النهار بانه سالا كاع حصصو ... اذن خاصو يعلمو يرجع .... ورجع قاد جلسو يبدا فالحرب تاني ......
اول حاجة بدا بيها هي خدا دوش ترولاكسا فيه مزيان .. لبس السيرفيت ديالو وطلب قهوة .. هز الاجوندا د قدس وهز البيسي لي فيه الايمايل وهز تييلفونو وخرج للبالكون .... جابو ليه قهوتو وبدا يصوني لوسيم ... وكايشوف لساعتو بلى عاتكون عاد ثمنية دصباح عند وسيم .... وحتى هو جاوبو بصوت ناعس
وسيم : بابااا ... كود مورنينغ
اسد : ( كاشرب من قهزتو ) كود مورنينغ ماي برنس .... " أميري "
وسيم : هههه يو ار ذا كينغ داد ... " نتا هو الملك ابابا "
اسد : الامتحانات سالاو
وسيم : ياس .. كولشي ساليناه .. داكشي علاش راني ناعس دابا
اسد : و بيلسان
وسيم : باقي ليها سيمانة
اسد : اهاه وشنو مخططات العطلة
وسيم : ماعرفناش بضبط باقين مبرزطين مع لينوط ... عندك ديجا شي بلان؟
اسد : اهاه ... ديما كاينين البلانات ... غاترجع دابا تنعس بشوية عليك ... غاتفيق تاخد فطورك وتبدا تجمع حوايجك .... الاثنين غانسيفطليك الطيارة
وسيم : ( تنفض على فراشو وناض ) وات ؟؟ ا .. زعما يلاه ساليت !!! ن نرتااح شوية بعدا
اسد : علاش اولدي هنا غانهزو عليك الحجر ....
وسيم : بابا .. ماباااغيش نرجع ، ياك نت لي قلتيلي لاكانت نوط مزيانة غاتبقى هنا .. وانا داير جهدي كامل باش نجيب نوط مزيانة
اسد : واش انا قتليك غاتجي فخطرة ؟ راه ساليتي امتحانات مفروض انك تجي لداركم .. ماتوحشيتش ماماك .. خوتك ؟ عمامك ....
وسيم : فهمت فهمت ... يعني غانكلس غير العطلة ؟؟؟
اسد : غير العطلة آلهراااب غير العطلة ...
وسيم : وضرووري الاثنين .. كاين حفل دنهاية السنة وبزاف دالبلانات موجدهم مع الدراري
اسد : عادي ، لغي كولشي ..
وسيم : ( بتذمر ) علاااش
اسد : بيكوز ، ذفاميلي .. ابوڤ آل ( حيت العائلة قبل كل شيء)
قطع على وسيم بعد ماعلمو انه غايجي ... عارف انه مكيبغيش يرجع لمغرب حيت كايلقى الراحة ديالو فامريكا وكيدير مابغا .. هنا كيتربط خصوصي انه جود كايبقى حاضيه بلا قياس ... ولكن هو توحش يشوف ولادو كاملين على الطبلة ... واخا غير هاد ثلت شهور دالعطلة ...
تنهد ومشا لداك الاجوندا دقدس ورجع تكا لور طاوي رجليه على كرسي اخر ....
وفتح الاجوندا فالجيهة لي كان فيها الستيلو ... كانت غير جملة وحدة بالانجليزي مكتوبة بالخط العريض " I want to leave " اريد الرحيل"...
كمش على عينيه ... ورجع بدا كيقلب فالصفحات بعشوائية حتى طاح فواحد الصفحة ....مكتوب فيها
"كم اتمنى ان يتوقف الوقت وانا بجانبه ... "
ثم صفحة اخرى فيها " شيئان لا يمكن طلبهما و لا شراؤهما ، الاهتمام و العاطفة "
ثم صفحة اخرى : "انا حقا مشتاقة لتلك الطفلة التي بداخلي ... "
ثم صفحة اخرى : " انا متى تعلمت ارتداء الكعب العالي ؟ انه لا يناسبني .... اظن انني لازلت طفلة في اعين الجميع ..."
ثم صفحة اخرى .. "واحيانا يكون لدينا كابوس على صفة ابن عم ".... وراسمة حداه ايموجي غاضب
ثم صفحة اخرى : "اخبرتني أمي .. انه سيكون في قدري رجلا يحبني بصدق ... يحبني بكل عيوبي ... ويحميني من الجميع .. انا حقا في انتظاره بفارغ الصبر ... لا بل اصبحت احلم به .... اريد فعلا كتفا حميميا يفهمني جيدا و استند عليه "
ثم صفحة اخرى : "حب عائلتي لا يوصف ... لكنني لازلت احس انه شيئا ما في حبهم لي مفقود ! هل هي الثقة ؟ ...."
ثم صفحة اخرى : " كلما كبرت شهرا ..كلما تأكدت انني انسانة أُنجبت للتعاسة فقط ... اليس هناك في هذه الحياة من يمكنه فهمي ! ..."
ثم صفحة اخرى .. : " أقام لي حفل شواء لمجرد انني كنت في المستشفى ، هل اسميه اهتماما ام شفقة ! لكن صدقا ..... احببت الموقف .. "
ثم صفحة اخرى : " احيانا اتمعن داخل عينيه .... جذابتين .. عنيفتين ..اتمعن بؤبؤه كأنني اول مرة اكتشف اللون البني ... ، نحن نحمل نفس الدم .. ونفس العينين ... هل لدي مثل تلك العينان ايضا !! ام انه فاز بهم ابن عمي فقط ...."
اسد سد داك الاجوندا لاحها على الطابلة وغير كايفكر ويتنهد .... كاع هادشي هازاه فدماغها ؟! .... واش حتى هي كتميل للوؤي ؟ .... زعما مواقع بيناتهم والو ؟ .... ويرجع تاني ينفض راسو ز يتفكر الثقة لي عندو فلوؤي ...
كان كيضن غيلقى كتابها على مدرب التنس ... على ااشباب اخرين .. ماشي غير على لوؤي ! ... اذن هذا واخد دماغها بلا ماتحس ؟ ورجع ثاني هز داك الاجوندا وفتحها على صفحة " اريد الرحيل " وانها اخر ماكتبات ....
هي علاش مكافيهاش حب واليديها ؟ هي اشمن نوع دالحب بغات ! مراهقة فالسن ديالها .. اشمن نوع دالحب كتقلب عليه .... واش لوؤي غيقدر يروي عطشها فعلا !؟ ....
ورجع تاني كينفض عليه هاد الافكار من راسو ...
بعد ماقرا كتاباتها ... قرر انه يلغي نهائيا داك الرقابة لي داير ليها .. يراقبها من بعيد فقط .... يحاول مايخنقهاش بالاسئلة .. حتى تفهم هي اشنو طاري و الخطر لي كاينة فيه الا تهورات فشي تصرف ....
حط داك الاجوندا حتى يرجها لبلاصتهت وخدا نفس عمق من جديد وحل لبيسي يمشي لمشكلة اخرى تااااني .... لقا ايمايل وصلو لباارح ومزال ماقراه .. ودخل ديريكت حلو ..
كان فيه جميع معلومات اصيل ... لي ثار انتباهو انه كيمارس " القتال الحر " فالنوار بطريقة غير قانونية .... عاد عرف هذا علاش قبل يقري ختو بلا منحة ... هو غايعرض حياتو لهاد الخطر كامل ! القتال الحر قبل مكيدخلو ليه كايوقعو على حياتهم لاوقعات ليهم شي حاجة تاحد مامسؤول عليهم ..... ورجع ثاني كيقلب فمعلوماتو لقاهم معلومات عادية تحركاتو وروتينو ... عندو تحركات جد عادية وكايعيش حياة طبيعية .... ولكن كيحس ببزاف دالغموض مزال فقصة هاد الولد ! ... ختم الايمايل هو يلقى تأكيد شكير على اسم جد اصيل .. وكان فعلا " المختار الشريف " .....
اسد علا حاحبو كتر ..... واش فعلا يكون هذا حفيدو !!!!! ... اش هاد الدنيا الصغيرة !!! ....مدام دايرين الاب متوفي ... اذن حسن الشريف مات ! داكشي باس انقطعو اخبارو .... بقى غير كيشوف فهاد الصدف !! ... وداكرتو كتمشي بيه للماضي وكايتفكر بزاف دالتفاصيل لي كتخليه يشوف الحياااة تااافهة و الدنيا صغيييييرة !! وغير منوخلال اش عرف عليه واش عاودات عليه قسم وانه قبل يقري ختو وماقبلش المنحة وهاد النفس وهاد الكبرياء ...ميمكنش يجيو من شي حد من غيرالرايس المختار الشريف .... الاستاذ ديالو لي علمو ان البحر روح قبل مايكون ماء ....
باقي شاد البيسي كيفكر حتى سمع باب الجناح تحل ... طفا دغيا الصفحة دالايمايل وسدو ... ولاامار حطات صاكها ودخلات كتقلب عليه حيت قالو ليها راه لفوق ...
لامار : اسووووودي ... اساااد ( طلات عليه فالبالكون وهو خبع داك لاجوندا ... وجات كلسات ليه على رجليه وهو حاوطها بيديه ) قوووليا كيف داز النهار مع جود ..... ؟؟؟ ها !!!
اسد : سوبر ....( حك مور ودنو) دار خطوة كبيرة صراحة ....
لامار : ( وسعات عينيها وشدات فوجهو ) حلف ؟؟؟؟ مدار حتى مشكل
اسد : ماعرفتش هادشي لي دار واش مشكل ولا اش كايتسمى .... ولكن نفضل اني نسميه خطوة ... وخطوة جرييييئة بزاف ...
لامار : اش دار !
اسد : التفاصيل حتى يجي هو يشرحهم ليك حسن مني .. على العموم وافق يخدم برسمية
لامار : ( بفرحة ) ياااا على خبااااار ( عنقاتو ) متصووورش فرررحتي .. اخييييرا .... ( شافت فيه وهو مبتسم ليها ) عرفتي هم قد الجبل تحيد عليا
اسد :يتحيد داك الهم باش يطلع هم اخر تاني فبلاصتو غاوجظي ليا ظهرك
لامتر : اعووووذ يالله .... اشمن هم تاني
اسد : مكايتسالاوش اروحي ( كيرد شعرها مور ودنيها ) باش متنسايش ديري فبالك وسيم غايجي نهار الاثنين .....
لامار : وي كنت بغيت نقوليهاليك ..راه الاثنين وبزاف ... توحشتتوو كنت كنحسب لهاد لعطلة ، تنين بزاف يجي جمعة بعدا
اسد : بين مارتاح شوية .. هو الاثنين وراه مابغااش ...
لامار : وپيلي مافخبارك عليها والو .. مغاتنزلش حتى هاد العام لكندا
اسد : ماعرفتش منقدرش نحكمها راه عندها باها ، ديجا هوما جايين نهار الخميس الجاي ... وحتى ماماك وراجلها ... دونك غالبا غاتجي ... مغايخليوهاش بوحدها تما ...
لامار : وي حتى خوتي .. كولشي بغاو يديزو العيد هنا .. سولت ماما قالت ليا مروان غايجي معاهم اما امين واسماعيل تايقرب العيد لان ولادهم باقين كايقراو ... عرفتي شحال تووووحشت نتجمعووا كيف شحال هادي ....
اسد : ان شاء الله ، قسم فين هي
لامار : كنت معاها فالجمعية ... انا جيت وهي باقي ماسالات معاهم ....
اسد : شفتك ساليتي خدمتك بكري !
لامار : ( هبطات شفايفها بالفشوش ) ياك ليووما لاااربع .... كنخرجوو انا وياااك .. مالك نسيتييييه
اسد : ففففف ( رد شعرو لور ) والله تانسيت شنو ليوم ..... ولادك غايخليو ليا شي عقل
لامار : الا عيان خلينا غير هنا ماعنديش مشكل
اسد : قدس نزلات لبحر ... يلاه نمشيو لعندها ....
لامار : ( ابتسمات ) حتى هذا نظر زوين هههه غانمشي نبدل ....
ناضت ورجعات ضارت عندو
لاامار : احقا فين جود
اسد : ( حل لبسي كايهضر باستهزاء ) جود ودراري گاليك خدمو بزاف خاصهم يرتااااحو ، ماعرفت كيفاش وقع ليهم ماطلبوش ليا كونجي ...
لامار : هههه تا دراري كانو معاه ؟ ههههه ... واقلة غيكونو قلبو داك الشركة ..
اسد : الفتنة .... كنتسنى الولاد يخرجو بدي زانفو يزيدوهم فالفوكابيليغ ديالهم ... هوما خارجين ليا بليكارت موبيل دالبنات
لامار : هههههه اوييييلي هههه ...
اسد : سيري سيري تلبسي .. ماعرفت نحضي مع البنات ولا مع الولاد ..... التحرش لي تعرضو ليه دراري هاد صباح كاع ماتعرضو ليه لبناات ومكاينش لي يدوي على حقوقهم ....
لامار : باش تعرفو راسكم راكم دااايين الزين ، راه شااابهين فموااااتهم احبي ...
اسد : فالعكس و الكواريث ايه والله منردها فوجهك .... دوزي تلبسي دغيا قبل مندير بناقص
يوم الاحد 8 يوليوز
كيف جرات العادة وككل صبيحة احد ، الباركينغ دالاسماعيلي كايكون مصفوف فيه سيارات العائلة كلها ....
مرسيديس عدنان ، پورش سفيان ، جيب دلوؤي ، لومبرجيني د سلطان ....والباقي السيارات داصحاب المنزل ....
جو كان هاااادئ ، صيفي بامتياز والحال سخووون ... كانت العشرة ديال صباح ولكن الهدووووء والصمت بحالا مكاين حد منغير صوت العصافير والنوارس و مواج البحر ... بحكم انهم قصرو بزاف فلليلة السبت كولشي صبح ناعس ...
المنزل حتى هو كان هادئ من غير الخادمات لي كايوجدو الطاقم ديال الفطور على الطبلة ورجاء كتعطي فتعليماتها ...
قسم كانت يلاه لبارح جات من الفواياج ديالها هي لولة لي نعساات فيهم بكري حيت جات مسخسخة ... داكشي علاش مبكرة هي لولا هاد الصباح فايقة فالمود كدندن يلاه خارجة من الدوش ....
اما البقية كولشي ناااعس ....
∆ الحومة ...
كتحل سلمى الفران على كيكتها كاتشوف واش واجدة .... فنفس الوقت عينيها على الحليب باش مايفيض وكل مرة تشوف لدروج واش نزل حيت سمعاتو فاق ....
اصيل كان فالسطح شاعل كارو وكايشوف للتحت وعقلو ساهي كيف ديما الهم لي كايهزو مكيبغي تاحد يتقاسم معاه حملو بمعنى متايشكيش وعمرو يقدر يشكي على شي حد .... فلخر تنهد وطفاه فالطفاية ... ودخل لبيت يهز كاسكيطتو هو يضرب فالطابلو لي رسمات ليه قسم كان دار ليه كادر ومعلق فبيتو .... بقى كيرمش فيه مدة وهو كايتسائل ، شنو خلاها تغبر هادشي كامل !!! ....
واش فعلا هي كانت كدوي بصح ! هو مغايعاودش يشوفها ؟ .... هي ماشي كانت غير كتهضر وصافي ! ..... هي فعلا دارتها بصح !!! ....
جاتو غريبة وقاسحة تولفو واحد العادة انه يفيق كل نهار على تزنزينها ....ودابا ماتبقاش ! ....
كل مكيخرج فصباح كيحل لباب وهو على امل يلقاها واقفة ... ومكتكونش .. .بعد المرات كايوصل بيه الامر يقلب فالارجاء .... مكايناش ! ...
فعلا مغتعاودش تجي ! ... ولكن ياك هو لي بغا هادشي ! او هو غير قالو فقط مابغاهاش ! ...
اش هاد التناقض فالمشاعر ! ... كيحاول يحدد مع راسو فكرة وحدة ... واش هو باغيها تجي .. ولا لا ! ... واش هو ولفها ولا اش واقع ؟ واش هادا هو الولف ....
بلاا هواه جبد تيليفونو وطلع الصورة ديالها لي كان صوررها من تيليفونها وبقى يشوف ليها مدة وهو كايتفكر ...
🔙اصيل : هانا كلست ودرت ليك خاطرك ... داباا واش ممكن مانشوفكش قدامي
قسم : ( مصغرة عينيها فالشمس ) مغااتشووفنيش غير تهنى ... ولكن بغيت نسولك. ... اشنو المشكل لي خالقة ليك انا !! تاماباغيش تبقى تشوفني !؟؟ !!!! 🔙
فعلا !! هي اشمن مشكل كانت خالقة ليه تامايبغيهاش !! .... ولكن ميمكنش تتخلى بهاد السهولة !!! واش بصح هي كانت باغا منو غير يقبل على المنحة وصافي !!! مكانش كتجي على ود شي حاجة أخرى !!! .....، مغاتعاودش تجي !
شوية وسع عينيه فاش بداو كايتسربو لدماغو افكار خايبة على غيابها ... تكون واقعة ليها شي حاجة لي خلاتها متجيييش !!؟؟؟!
اسبوع هو كايتسناها ... اسبوع هو كايقول نحل لباب ولقاها .. اسبوع هو كايتسنى سلمى تقول ليه راها جات .... وبلا حتى خبار .....
بقى تايضور فالبيت وكل مرة يشوف لداك الطابلو ... مايمكنش يكون هاد الطابلو مكيعني والو ! اشنو زعما ....هي كترسم اي واحد كتللاقاه بهاد الدقة ! ... الامر زعما بهاد السهولة كاملة !!
هبط بزربة فدروج ... طل براسو كايقلب على سلمى بانت ليه فالكوزينة وتيليفونها فوق طبلة ... كانت عاطية بظهرها مشغولة ومشا لصالة بزربة هزو وبعد من حدا باب الكوزينة .. وكل مرة حاضي معاها ....
حمد الله انه ماعندهاش لكود دخل ديريكت ل ليكونطاكت ديالها ، قال غالبا غايكون رقمها مسجل عند ختو ....
بدا كيقلب حتى طلع ليه وجبد تيليفونو قيدو دغيا ورد ليها تيليفونها فين كان وطلع ....
رجع لسطح وبقى كايمشي ويجي شاد داك تيليفون فيدو وكل مرة يشوف لنمرة .... واش يتصل ! اشنوو يقول ؟ ..،وهو لي قال ليها مانشوفكش قدامي ولا نخوي الحومة ! تكون خدات كلامو بجدية ! ولكن هو كان غير معصب ! واش كان خاصها تعاشرو كتر باش تعرفو انه فاش كيتعصب مكيقصدش كاع اش كايقول !
تردد خطير شدو كل مكيبغي يصوني كيتراجع ... بحجة اشنو بيناتهم!! ...يشكرها على الطابلو مثلا !!!! ....
اه .... هو خاصو يشكرها على الطابلو ... مايمكنش تعذبات فيه ورسماتو واسبوع هادا ملي رسلاتو ليه ومقالش ليها تا كلمة شكر ! .....،
اه خاصو يتصل ....
هادو هوما الافكار لي كانو كايتساطحو فدماغو تاقنع راسو انه خصو يشكرها على الطابلو هادشي علاش غايعيط او بالاحرى هادي هي السبة .... هو يدوز الرقم .....
بدا كايوصني ليه فودنيه وهو مع كل تييييييت ولا كايتمناها متجاوبش مزير على عينييه كيف شي مراهق اول مرة غايتصل بشي وحدة ومخلوع من كيفاش غايهضر معاها !!!! ......
قسم كانت لبسات غير غوب خفيفة دوز بيها نهار الاحد أليز ... نشفات شعرها وكلسات قدام المرايا كتضفرو ضفيرات لقدام وهي كدندن معاهم تاسمعات تيليفونها كايصوني ...
تلفات ليه وطلات بان ليها رقم مكتعرفوش ! مامولفينش يصونيو عليها ارقام من طرف ! اغلبية كدخل فيهم صفاء ؟ ....،شكون كيتصل !! ...
يلاه هزاتو غتجاوب وهو يقطع !!! ...،علات حاجبها كاتشوف فالداك الرقم ديالمن يكون ! ...
أصيل غير مجاوباتش حمد الله وتنفس بحالا كان كايتصل بسيف .... يلاه كايقنع دماغو انه هاهو اتصل ودار ماعليه هي لي مجاوباتش ، هو يسمعو كايصوني .. بانت ليه هي كتعاود ليه ....
بقى كايشوف وكايسرط فريقو وكل مرة يرد شعرو لور متوتر ....
اما قسم كاتصوني مستغربة ديالمن هاد الرقم لي صونا عليها فنمرتها الشخصية ! .....
الاتصال طوّل ولا مجيب ..يلاه غاتحيد تيل من ودنيهاا تقطع وهي تسمع
اصيل : قسم ....
وسعات عينيها على جهدددهم باقا فنفس وضعيتها شادة تيليفون ماااامتيقاش الصوت لي كتسمع !!!!!!!!
قسم بقات مفيكسيا مامتيقاش واش هذا فعلا
صوتو ؟ وهي ترجع تردو لوذنها باستغراب ...
قسم : أصييل !!! ...
اصيل عض على شفتو فاش سمعها لثاني مرة كاتقول سميتو بهاد الشكل وطلع داك النفس وبدا يحك فشعرو كيتعصر باش يخرج الحرف
اصيل : صاڤا ....نت ... لاباس !!
قسم حطات يديها فوق فمها كتحس بكرشها كترعد وناضت وقفات بززربة والابتسامة على فمها مامتيقاش بلي عيط ليها ... عينيها لمعووو وجاوبات بحماس وفرحة ماعرفاتش شنو سببها
قسم : لابااااس بيخيير ... ونتا ؟ .. ل .. لاباس !!!
اصيل تبسم تاهو وكلس عاد رخف فيه شوية النفس ...
اصيل : لاباس .... اأ... امورك مزيان ؟
قسم بدات كتضحك بالحس شادة على فمها متسمعش ضحكتها وقلبها كيضرب وتمشي وتجي فالبيت كيف شي حمقة ودور مع الجوايج وتقيس فيهم وكتهضر
قسم : مزيااااان ....
اصيل : ( غمض عينيه مدة ثم حلهم ) اتصلت باش نشكرك على البوغطخي ....
قسم عضات على شفتها كتتتنققققز وتحاول تتهدن وهي ضحكة مشرعة على فمها تالقات راسها نعسات فوق ناموسية كتهضر بحالا كتجري ويديها كايلعبو فضفيراتها كتلوي فيهم
قسم : عججبك ؟؟؟؟
اصيل : هممم ... بزاف
قسم : ( حلاات فمها كتحححنقققز بالفرحة ورجعات ثاني تهضر جامعة راسها متبينش ) ف فرحت .... فرحت حيت عجبك ...
اصيل : قولي ليا آقسم ...
قسم : ( وسعات عينيها كاتقول فنفسها ااااااه كييييف خرج سميتي ووقفات كتسرط فريقها ) اا . اه اه ... هانا كنسمع
اصيل : ( بعينين تايهين ) شنو لي خلاك ترسميني !
قسم : ( طلعات عينيها فالسقف اش غاتقول ليه بدات كتجبد غير بوحدها داك ضفيرات كاع حلاتهم ومعايقاش براسها عدباتهم العداب الاليم) ااا ... م ماعرفتش .... ص صراحة ماعرفتش .....
اصيل : ( بصوت ساحر قريب للهمس ) وامايمكنش !
قسم : ( مشات كلسات على السرير كتحاول تتنفس تعرف تهضر ورجليها كيترعدو ) اا ... و واحد صباح فقت ... ولقيت راسي باغا نرسم ... ورسمت نص وجه ... و وداك نهار ملي شفتك ... ورجعت لدار .. ولقيت راسي كملت على داك الوجه و جا كيشبهك ..... كيفاش ؟ منعرف ...
اصيل : يعني بقيت فدماغك !
قسم : ( عضات على شفتها كاتسوط على راسها كاتحس بالحرارة ) اا اه .... غالبا داكشي لي وقع .... ك كانت مرسومة و واجدة ... غير لون عينيك ... كان صعيب شوية نلقاه ... حاولت يجي كيشبه ليك باش وجد ليا الطابلو .... ( اصيل غير ساكت وهي تضيف ) فرحت حيت عجبك ... حيت اول مرة غانرسم شي حد ونعطيها ليه
اصبل : اول مرة !
قسم : آه والله !!! اول مرة ..
اصيل هبط راسو مدة وكااايتتنفس خربقااااتو ورجع طلعو دايرها فيد الله ، قلبو غادي يخرج من بلاصتو كايطلبو ويترجاه يجيبها ليه باغي غير يشوفها ورغبة قوية تملكاتو .... وهو يقول بلا مايحس
اصيل : مزال مافطرتش .... غانتسناك نفطرو بجوج
قسم كانت كااالسة ووقفات بزربة كاتشوف قدامها موسعة عينيها فللخر تاني رجعات كلسات والضحكة و التبسيمة غلبات عليها و ملامح الفرحة كانو واضحييين ، ناهيك على الضحكة البلهاء
قسم : ن نجي ... ا الا بغيتي زعما نجي غاااانجي ....
اصيل : علاش مانبغيش تجي !
قسم : ح حيت ... ( كتنهج وتقاد صوتها ) حيت نتا لي آخر مرة قلتي ليا .. ماباغيش تشوفني
اصيل : فاش كنت معصب قلت ليك مابغيتش نشوفك ... ودابا وانا كاااالم ... تانقوليك نشوفك ... شكون غاتيقي فينا ! لكالم .. ولا المعصب ؟
قسم : ( شدات على فمها عينيها قربو يبكيو بالفرحة ) ا اه ... ن تيق .. نتيق الكالم .... غانجي ( وقفات وقالت بعفوية ) بغيتي داااباااا !!!!
اصيل : ههه !!! ( قسم سخفات على السرير دوباتها هاد الضحكة لي سمعات ) مكرهتش ...
قسم : ( كتنش على راسها بواحد الكتاب ) ش شوية ونجي .... ل لدار ؟
اصيل : لا ... غاتلقايني فالخرجة ديال الحومة كنتسناك ...
قسم : صافي .. صافي واخا ... ( بحماس ) مغاااانتعطلش .... ( كتنش على راسها وكتقيس فجبهتها كتحس سخانة طلعات )
قطعات عليه تيليفون وهي تخرج للبالكون شدات فالحديدات بجوج يديها كتنفس والضحكة مشررعة على فمها والحرارة طالعة ليها من صباع رجليها ... ياكما باقا كتحلم !!!!! واش اصيييل ؟؟؟؟ اصيل عيط !! ... واش تاهو يكون كيحلم بيها بحال كيفما تا هي كتحلم بيه ؟؟؟؟؟ واش هادشي متبادل ... بمجرد فكرات هاكا حسات مصارنها كيتلواو فكرشها وخرجات كاتجري وقفات قدام المرايا زادت قادات شعرهاا لي كان منفوش بالضفيرات لي حلات فوق كتافها وكضور وكتشوف مع داك الكسوة ... فلخر قلبات شفايفها متقدرش تمشي بيها لان مكتوب اسم الگوتشي فالسمطة وهي باغا تلبس شي حاجة تبان عاااادية ... جبدات غير من الحوايج لي كايجيبو ليها لنهار الاحد .. لقات سروال بوي فرند .. ودارت معاه تيشورت بيضة ساااااامبل وجلسات على سرير كتلبس سبادرين بيضة كتلبس بتوتر و زررربة والضحكة على فمها وناضت تاني قادات شعرها مزيان على كتافها ... هزات صاك طويل دارت فيه نضاضرها وسوارتها و تيليفون وكلشي خرجات بززربة نازلة فدروج حتى تسطحات فرجاء لي شداتها كانت قربت تطيحها ...
قسم : سوووريي سووووووري ( باستها ) بسلاااامة مزرووبة ....
تخطاتها بزربة خلات رجاء غير كاتشوف باغا تقول ليها لفطور واجد ماخلاتهاش تااتهضر وخرجات بززربة لباركينغ تلاقاها السيد المكلف بسياراتهم
- ماادموزيل طموبيل مزال ماااا غس( قاطعاتو )
قسم : باااا كغاااااف ...
ركبات دغيا بالفرحة ورجليها تيترعدو كتحاول تتنفس باش مديريش شي كسيدة بهاد الحماس الزايد ...تززززنكاااات بالحشمة والتوتر وكاع اش ركب فيها هاد الصباح بهاد الاتصال الغير متوقع ... وشدات طريق غير خرجات على المنطقة طموبيلات الكارد تبعوها ... شافتهم فالمراية وهي تلعن زهرها
قسم : شششيت ... كيغاندير تانتفك من هادو دابا ......
ماتسوقاتش تاتلقى ليهم شي سبة وزادت للحومة ...
اصيل تاهو دخل خدا دوش ... وخرج جبد كايقاد لحيييتو وتاهو واضح انه ناشط وفالمود ديالو ...خصوصا ملي كيتفكر انه قالت ليه بلي هو اول واحد ترسم ... والفرحة لي جاوبات بيها وانها بغات تجي لعندو ... حس بانه كايشاركها احساس متبادل
قاد لحيتو و شعرو غير نفشو بيديه كان شعرو اسود قااتم منفوووش وحجبانو تاهما قويييين كحلين من غير زرقة عينيه لي عاطية حكاية اخرى لملامحو الغامضة لي ميمكنش تكون عند شي واحد من غير بالوراثة الناذرة ..
تلفت لبلاكارو .. فين ماكاين شي تيشورت جبدها على السرير تاطاح فلي تيجيه على كانتو ... كانت تيشورت كحلة .. لبس سروال دجين ولبس سبردينتو ... حل المجر جبد الفلوس دارهم فجيبو لور هز سوارت الموطور وتيليفونو ... رش برفانو ودار اخر طلة قاد فيها شعرو ، معقلش على راسو امتى اخر مرة وجد راسو بهاد الشكل ! موالف يلبس قبية يخشي يديه فجيابو ويخرج ! هو لمن كايقاد ؟ ....
نزل فالدروج وهي تلاقاه سلمى بانليها خارج للكولوار
سلمى : اصيل صباح الخير ...اء ؟ خارج ! راه فطور واجد
اصيل : ( كيحل على الموطور ) غير فطري مزروب ...
خرج الموطور من واحد بلاصة كايديرو فيها تحت الدروج ... ودار عندها لعب ليها فشعرها بيديه وزاد خرج وهي بقات غير واققة كاتشوف ! هادا فين ماشي فهاد الصباح وبهاد النشاط !
ركب على الموطور تاخرج من الحومة لي عارفها عامرة تبركيك مابغاهاش تجي لتما ، عاد وقف قدام الطريق الرئيسي ونزل متكي على الموطور شاد تيلي كل مرة يشوف لساعة كايتنساها .....
قسم قرربت لحومتهم تفكرات انه غايكون برا الحومة غايشوف الطموبيل والكارد ، وهي تدخل لواحد الباركينغ تما نزلات للتحت للاكاف وتبعوها الكارد پاركاو حداها نزل واحد فيهم عندها ...
قسم : عندي شي غرض هنا فهاد العمارة ... تسناوني هنا حدا طموبيل ، الى بغيتو خودو شي قهيوة غانتعطل شوية ....
خلاتهم وطلعات وهوما ركبو فطموبيل وبقاو فيها لان ماعندهومش اوامر يتعقبو تحركاتها ..... قاتلهم يبقاو خاصهم يبقاو ..
خرجات من الباركينغ والريح كايضرب فيها لبسات نضاضرها ولبسات كاسكيط باش ميعرفها حد كتحاول ما امكن تمشي بزربة ولي شاف فيها كتنزل راسها وتهبط الكاسكيط على عينيها ... قطعات الطريق كانت الحومة قدامها هو يبان ليها موطور اصيل .. واصيل متكي عليه كايشوف لتيليفون .... وقفات مدة كاتشوف فيه والضحكة بانت على فمها وهو مشغول مع التيليفون ... كتطلعو وتنزلو و تتأمل جميع تفاصيلو ! طولتو الجذابة .. وقفتو وشخصيتو ... ومتكدبش انه حمقها بالنواغ ! ...
طلع اصيل عينيه كايشوف واش جات ولا مزال هو يلمحها قدامو كايفصل بيناتهم غير الطريق الرئيسي .. وحاول يبتسم ليها واخا الابتسامة مكتبانش كاع ولكن عينيه فاضحينو .... تاهي ضحكات كاع تابانو سنانها وتمشات تقطع طريق لعندو وهو عينيه عليها .. ميكذبش انه تووووحشها بزاف وتوحش عنادها و كلامها وكدوبها المفروشين ... تاقطعات عندو طريق ووقفات قدامو متوترة وكتحاوول تخبي توترها وكترمش بعينيها هنا ولهيه حمد لله لي لابسة نضاضر مكيبانوش عينيها
قسم : ي ياكما تعطلت ...
اصيل : ( كايشوف فيها وفشعرها لي كايديه ريح وكتقادو بيديها ) شوية .... ( طل عليها براسو تحت الكاسكيط ) فين العوينات !؟ ...
قسم : اا ؟ ... ( ضحكات وحيدات نضاضر عاد شافت فيه )
اصيل : دابا مزيان .... ( مدة كيشوف فعينيها وهي تززززنكات ) عينين بحال هادو متيتخباوش اقسم ...
قسم وسعات عينيها كتر ماهوما واسعييين !!!! واش كتحلم ؟؟؟ اما اصيل كان كيهضر تابع قلبو اش كايملي عليه ومداير حتى شي فران على راسو هاد المرة ... وضار جبد ليها الكاسك مدو ليها
اصيل : مشينا !
قسم تفلاشات غير كاتشوف وحركات راسها بآه ولبساتو .. وتاهو لبس ديالو وططلع للموطور وهي ركبات من موراه وشدات غير فتيشورت ديالو وهو مراقبها من لمرايا ، عينييها غير كيضووروو بالتوتر عرف انه حششمها .... هو يزيد وهي تلاح كلها على ضهرو شدات فيه بكل قوتها تاتبسم غير بطراف شفايفو وهي عضات عليهم حشماااانة ....
∆فالقصر ...
بدات كتفيق لامار على صوت تيليفون دأسد وطلعات راسها لعندو كتفيقو راسها مقلوب بصونغي خاسر فيها النعاس
لامار : اسااااد ..طفي عليااا داك تيليفييييون ...
حل فيها اسد نص عين مخنزر النعاس ضاع فيه وقلب عينيه لطابل دونوي مصغر عينو فساعة الالكترونية لقاها الطناش وربع .. وحاول يسلت يديه من تحت لامار لي تقلبات لجنب تكمل نعاسها ... وحاول يحل عينيه فشكون كايصوني ، بانليه الكارد دقسم ....وجاوب بصوت ناعس كايحك فشعرو
اسد : ياس ..
الكارد : ( بالانجليزي ) حنا مع ميس قسم ... وقفات طموبيل فالباركينغ لي رسلنا ليك ... وطلعات قالت عندها غرض فهاد العمارة ... وحنا فالباركينغ كنتسناو ....
اسد : عمارة !
الكارد : ماعطاتناش شي معلومة اسيدي ...
اسد تنهد وقطع عليه ودخل لقا مسيفطين ليه لوكاليزاسيون دالباركينغ ... شاف سمية العمارة ودخلها فالجي بي اس لقاها قريبة للحومة لي كتمشي ليها ! .... حل عينيه بجوج فسقف .... هادي رجعات لعندو !!!!! ......
∆عند قسم ...
قسم : ( تتهضر بجهد يسمعها وهي معنقاه من لور ) فيين ماااشيين !
اصيل : ( كايشوف فيها فالمراية ) فين بغيتي تمشي !؟
قسم : داك البلااصة لي فطرنا فيها داك نهار ... عجباااتني ...
وما ليها براسو بمعنى واخا ... وهو كان هاد المرة باغي يديها لكافي زوينة ... مي غير من هاد ليام لي دوز معاها عرف انها كتبغي البساطة .. ربما داكشي طالع فراسها باغاها تجرب معاه حوايج جداد منها تتعرف على محيطو .... وصلو قدام داك المحلبة ونزلات عطاتو الكاسك وهي كتمشط شعرها بيديها تقادو لي تعنكش بالكاسك وهو كيحاول ميطولش فيها الشوفة باش مايوصلش لمواصل مباغيهمش عارف راسو زيرو فالصبر ... لبسات كاسكيطتها ودخلو كالعادة فطرو ... هو غير شاد قهوتو وهي كتهضر وتعبر وتعاود ليه خصوصا طفولتها لي كتحاول تخبي منها الجانب البرجوازي .... كملو الفطور وخلص اصيل وشاف لعندها ....
اصيل : نمشيو ولا عجباتك لكلسة !!
قسم : ( كانت ساهية فداك العيالات كاتشوفهم كيف كيديرو لطوية دالمسمن وشافت عندو ) صراحة الفطور هنا كايشبع ماعرفت علاش هههه (وقفات) يالاه هه ... ..
ناض تاهو وخرجو للموطور يلاه ايعطيها لكاسك ورجع شدو عندو
اصيل : علمتي واليديك ! ... ولا غايكونو كيتسناوك ؟
قسم : ( شافت فيه مطووولة عجبها الحال لي فكر فواليديها واش يتقلقو تبسمات محركة راسها بآه وابتسامة على فمها ) فعمري 28 عام آ اصيل ...
اصيل : واخا 28 عام .. البنت عمرها كتكبر فعينين واليديها ... غيبقاو يخافو عليها حتى تولي جدة ( عوج معاها راسو ) عندي شي شغال فالمدينة القديمة ... تمشي معايا ! ...
قسم ضحكات تاتقوسو عويناتها كيف الهلال و حركات راسها بآه وتاهو تبسم ليها وعطاها الكاسك .. وركبات من موراه ، شوية بشوية تطلقات معاه هاد المرة كيف ركبات كيف عنقات ظهرو .... وهو زاد بيها ... كتحس بواحد الفرحة رهييييبة ، احساس غريب عليها وهي معاه ! علاش هو بالضبط ! علاش كتلقى راسها بحالا عايشة حلم ملي كتكون حداه ! ....
وصلو للمدينة القديمة ودخل لواحد بلاصة فين كايحطو المواطر .. وحط الموطور ونزلو هو وياها وهي غير كتشوف بعويناتها فرحانة لي غتدخل لهنا واخا فايت ليها دازت منهاد طريق لكن عمرها دخلات لهنا...
وهو اصيل بلعاني جابها لهنا .. عرف ذوقها انه كيميل للبساطة وقال هاد البلاصة غاتحس فيها راسها مرتاحة .... شي لي خلاها تدخل لقلبو كتر هو هاد التواضع ديالها وهاد البراءة و حبها للحوايج البسااااط ...
عطاتو الكاسك وعطاها الكاسكيط ديالها ... لبساتها كتقاد فيها وهو كديرونجيه ملي كتكون لابسة شي حاجة كتخبي عليه عينيها لي سطاوه من اول نهار ... وقرب عندها خلاها غير جامدة فبلاصتها وقلب ليها الكاسكيط لور ...
اصيل : هاكا حسن ....
قسم بقات غير كترمش ووما ليها تزيد وزادو وهي كتشوف مع جنابها لقات راسها فساااحة كبيرة و قدامها القواص .. كاتشوف بعض الاجانب من السياح .. وهي تقرب عندو كثر بعفوية تاقربات تشد دراعو
قسم : اصييل .. هادي هي المدينة القديمة دابا
اصيل : اهاه ... هادي لي خلينا مورانا كتسمى ساحة ماريشال ...
قسم : هاكداك ( كتشير بيديها للقواص ) لهيه شنو كاين سوق !!!!
اصيل : تما كاين كولشي ...
قسم : ( بضحكة ) وااو .... واحد الريحة زوينة هنايا .. شبهات لي لساحة جامع الفنا ...
اصيل : ردي لبال مع تيليفونك ولا عطيه ليا
قسم : ( بلا متحس) خليتو فطومو ( سرطاتها ) خليتو فالدار .... نسيت ماجبتو ماعنيدش اصلا
اصيل : داكوغ ...
قسم بقات واقفة فبلاصتها مسمرة كتشوف الارض وهو حس بيها مكتمشيش قدامو وضار براسو
اصيل : قسم ؟؟
قسم : (علات فيه راسها ) اا.. هانا ... ( زادت عندو ) غير ولفت بابا تايقولها بزاف
اصيل : شنو هي؟
قسم : داكوغ !
اصيل : داكووغ !! كنضنها كلمة فرنسية كايتسمعلها العالم كامل لا !
قسم : ( زادت كتمشي معاه ) لا .. غير شي مفردات كيكثر منهم بابا ... كايثيرو انتباهي ... عرفتي ا اصيل علاش عندي 28 عام ومزال مابغيت نتزوج ؟
اصيل : ( السؤال لي ماعرفش كيفاش يدير يطرحو عليها فرح لي قالتو هي نيت ) اهاه ! علااش
قسم : حيت من نهار عقلت على راسي .. وانا باغا راجل كيشبه لبابا .... بكولشي فيه ... كان كيحسابتني حتى كلماتو مفرداتو مكيقولهمش شي حد من غيرو ... سمعتك ليوم كلتيها ... بحال باباا دوا معايا ! جاتني فشكل اول مرة نلقى شي حد شبعو فشي حاجة ...
اصيل : بغيتي تقولي كنشبه لباباك !
قسم : اا ... بابا كبير عليك طبعا ههه .. غير هو فكرتيني به وصافي فاش قلتيها ...
اصيل : داااكووغ الالة ( بضحيكة ساحرة نوضات فيه الهبال بهاد الهضرة) هه !!!
قسم : ( بعفوية شافت فيه وعينيها مقوصين بضحيكة ) وااطلعتي ضضرييييف .. مكانش كيسحابلي نتا هاكا
اصيل : ( تبسم حاس بواحد السعادة زماااان ماحس بيها ) يااك !!! علاش كيف كنجيك
قسم : كتخلع ههه ماعرفت كيف نوصفك ولاكن صارم وديما داير هاكا ( كمشات ملااامحها مخنزرة ) وحجبانك مهزوزين ومكضحكش ههه ساعة صدقتي كتعرف تضحك
اصبل : مجاتش تاني نبقى ماشي وكنضحك اولا ؟؟؟ ملي نشوف شي حاجة تضحكني راه غانضحك
قيم : اا لا ... طلعتي عكس توقعي .. مؤخرا اكتشفت عليك شخص هااااادئ واخا مرة مرة كتت.... ماعلينا هههه
اصيل : قسم .... جابتها المناسبة ... كنعتذر الى ديك المرة غوت عليك بداك الطريقة ... ماعنديش لي كايدخل فحياتي الخاصة ... داكشي علاش هاجمتك هاكاك .. حيت انا مامولفش شي حد كيشاركني قرارات حياتي
قسم : مبغيتش نهضر فداك الموضوع ... ديجا نسيييت ...
يلاه كايهضرو هي تجي واحد المرا وقفات عليها فيديها ألبوم صور ديال النقش
- آ البنيييتة ننقش لييييك احبييييبة ؟؟؟؟؟
قسم بدات كاتشوف لداك المراة وكاتشوف فاصيل
قسم : ااء .. حنة !! .... ( رجعت شافت فيه )
اصيل : خودي راحتك ...
ضحكات قسم ومشات معاها ، كلسات على واحد الكرسي حداها وهو واقف عند راسهم ....
- فنيييييونة مشاء الله ( شافت عند اصيل ) مرااااتك هادي
قسم وسعات عينيها واصيل حرك ليها راسو بلا ...
- اااه .. اوا الله يكمل علييييكم بالخييير الله ويجعل هاد الحنينة منها لحنة العرس يااااااربي
قسم : ااء ؟ لاا لاااا ... لا حنا غير ديزامي وصافي يعني صحااااب بغيت نكول
- ااااه .. لاديوش عليا كنهضر بلا فرانات ... ولكن راكم مواااااتيييين مشاء الله عليكم ....
قسم غير سكتات ولات حححمررررة ولحمها تبورشات واصيل دار راسو ماسمع والو .... قسم بدات كتبع معاها النقش ... وضاحكة شحال هادي منشقاااات من عرس زياااد فاش جابو الحناية لدار ... توحشات ريحة الحنة وزواقتها فيديها ... واصيل هبط بشوية لعندها وهي تحس بنفسو فنعقها تاتهزاااات كاملة ضيعات للمراة النقشة
اصيل : ( بالهمس ) هانتي معاها ... انا عندي واحد الشغل مع واحد السيد ونجي ...
قسم : ( سرطات ريقها بوورشها بداك الهمس لي دوا بيه فعنقها ملور ) و واخااا ....
مشا اصيل وهي بقات مع داك المراة كتنقش ليها .....
قضا شغالو بزززربة باغي غير امتى يتفرغ كليا ليها .... كان واحد السيد كيخدم ليهم الشبكة ديال الصيد ... لقاها مزال ما وجدات ... ورجع عند قسم لقاها سلات ليها كترش ليها السقلي ... وشاف مع يديها كانت النقشة زوينة ويدين قسم البويض وصبيعاتها الطوال زادو للنقشة جمال ....
قسم : ( علات يديها كتوريه ) زوييييين !!!
اصيل : ( كايشوف لعينيها الفرحانين كاع ماشاف النقشة ) ممممم زوين .....
رجع ضار عند المراة ...
اصيل : شحال اختي !
- غييييير عشرة دراهم مابغاتش تنقشهم بجوج .....
جبد اصيل عطاها ليها ووما لقسم تزيد وهي حالة عينيها فالارجاء ...
كانو بعض السياح والبازارات مع جناب وكل واحد واش كيبيع ... كتكتشف بعينيها كانها داخلة لشي دولة غريبة .... هي علاش متخصصش وقت دخل لبلايص بحال هادو ! علاش ممكتاشفاش بلادها ! .. علاش عمرها فكرات تجي للمدينة لقديمة .... مطلعة راسها فيه كيبان ليها غادي معاها وهااادئ كتبتسم ليه وترجع تشوف وهو كل مرة كيقوليها سمية البلايص كانه مرشد سياحي حتى وقفات قدام واحد الطبلة كاتشوف فيها مصغرة عينيها
قسم : اش داكشي كياكلو ؟ ... ليزيسگاغگو !!!!؟؟ "الببوش"
اصيل : اه
قسم : اويلي !!! كايتنكل ؟
تصيا : وي كياكلوه ... ذوقيه !!!
قسم : ( شافت فيه ) زوييين ؟؟؟
اصيل : ماعنديش معاه صراحة مفايتش كليتو ... الا بغيتي تجربي تاخدي فكرة ذوقيه
قسم : ( كتشوف فالناس كياكلو وكيزيدو عاد ) باينة بنين مدام مجموعين عليه كاع قد هاكا ( بحماس ) نجججرب ....
اصيل قرب لعندو وقال ليه يدير ليها
اصيل : ردي لبال حار شوية
قسم : نو ماعنديش مشكل كيعجبني الحار ....
عطاها زلافتها وكوغدون وبقات تشوف الناس كيف كياكلو
قسم : كيغاندير لهادشي دابا ويدي فيها الحنة ..
اصيل خدا عليها الزلافة وخدا ليها الكوردون بانتليه معنكشة ، وهي غير كاتشوف فيه ماتصوراتش انه يوكلها ... واصيل واخد خاطرها فكولشي باش دوز نهار زوين تعقل عليه ، معارفش علاش باغيها تكون فرحانة معاه .. باغي يزيد يكتشف ذوقها وشنو كتبغي .. كيشوف انها ماشي من النوع البعكاك ومكتعيفش مدام قبلات تاكلو وهو براسو مكيحملوش ... عمرو قرب ليه وكيشوفوا فالزنقة كيبدل طريق حيت كايغيلفو ودابا باغي يجبدو بيدو وباش يوكلها هي ... باتت ليه بنت رغم براءتها الى ان جوهرها صلب ومرأة حرة خاطيها التبوزيق ، هامو دابا غير تذوق وتجرب شي حاجة جديدة عارفها وحاس بيها اول مرة غاتشوف هادشي .... جبد ليها وعطاها لفمها واها ماقادش يشوف فيه وهي كلات عليه وبدات تممضغ كتبنن وشافت فيه
قسم : سي بووووون !!!! والله واعر ( شافت عند مول طبلة ) زييدني زيييدني مزال
اصيل : ههه كملي هادي بعدا ونزيدك ههه
بدا كايوكلها وهي ضاااحكة غاطير،بالفرحة ، سعادة غريبة كايحسو بيها كجوج قلوب عمرهم جربو الحب كيف داير ....
وكولشي الانظار عليهم .... كيفاش كايوكلها وهو رغم انه ديما راد البال مع الناس وهضرة الناس ولكن دابا مكايشوف تاشي حد قدامو من غيرها ..
كاين لي كايدوز كيشبهها وكايقول لا غير شبه نع بنت الاسماعيلي وكاين لي كايقول شوف شحال زويييينة وكيوت سعداتو بيها ... البنات كايشوفو فيه كيفاش كيوكلها ويتفقصو ... كانو محط الانظار وهوما مارادينش البال ...كانو عايشين لحظتهم ....
كلات الببوش وبدا تشرب حتى فداك الما .. 3 دزلايف لي شربات عاد شبعات واصيل مسايرها ...
وزادت تاني كتمشى حاضية مع حنتها ...كاضور وتدخل لكاع لبلايص وتشوف وتكتشف ... غير تشوف شي حد كايشوف فيها بشي نظرات غريبة كتحاول تخبي وجهها باش ميفضحوهاش حداه .... تالقاو رجليهم داوهم للمرصى التجارية ووقفو حدا واحد الحيط قصير كايطل على البحر وقسم ربعات يديها على داك الحيط كتستنشق نسيم البحر وكتشوف للسفن التجارية لي لتحت ... كتحمد الله ان الميناء لي فيه باطوياتهم مكاينش فكازا اما هي كانت هنا غاتضفح .. الباطويات دالسلعة لتحت كانو تايعمرو يخرجو ... وهي كاتشوف فيهم وفطريقة خدمتهم ... واصيل تاهو حداها حاط يديه على الحيط القصير ... هبطات عينيها عند يديه وهي تلمح واحد الخيط حمر فيديه معقود ... كمشات فيه ملامحها بفضول وعلات فيه راسها
قسم : اشنو تيعني هدا ااصيل ! ...
اصيل شاف ليدو داك الخيط عمرو رد ليه البال واش كاين فيدو بقوة ما ناسيه ورجع تبسم واحد الابتسامة بااااهتة وشاف للبحر
اصيل : كيعني الماضي ديالي ....
قسم : ( كترمش) كيفاش !!
اصيل : الناس لي كيكون عندهم ماضي مازوينش .. تايخبيوه .. انا لا ، كنبغي نشوفو قدامي كل نهار .. باش عمرني نساه .
قسم مدة صمت سرطات ريقها ثم تكلمات
قسم : مدامو فيديك ... اذن داك الماضي مولاه كان عندك عزيز لهاد الدرجة لي ماباغيش تنساه ....
اصيل : ممكن ...
قسم : وااش مراة ؟
اصيل حرك راسو بالايجاب مع ضحكة باهتة مستهزأة بالوضع
قسم : كنتي كتبغيها ! ...
اصيل : ( شاف فيها) ربما ....
قسم : ( حسات بغصة ماعرفاتش سبابها وسرطات ريقها كتحاول تبين مواقع والو ) وباقي كتبغيها!
اصيل : ماعرفتش .... ماشي ديما الشعور لي كنهزوه فخاطرنا لشي واحد ... كايكون بداك الفكرة لي عندك
قسم : مدام مزال محتافض بهاد الخيط فيديك .. راه الفكرة لي فراسي هي لي كاينة
ضورات راسها لجنب وتنفسااات واصيل قلب راسو لعندها بانت ليه تقلقات وتبسم حيث عرف دماغها فين غايكون مشا .... ولكن الامر ماشي لهاد الدرجة لي يحمارو عينيها كاع !؟؟؟؟ قرب راسو لعندها كتر تايطل عليها ، وقال بأمر
اصيل : شوفي فياا !
ضورات قسم راسها لعندو ، غصتها بانت على ملامحها .. عينيها الحمرين فاضحين كولشي ، وهي كتحاول تبين انها عادي ، بقوة ما انها كتحاول ترسم ملامح جداد على وجهها بقوة مكيبان داك التعب على وجهها كتر ، وهو تبسم ليها جانبيا تاتسدو عينيه و خربق ليها فشعرها كيف شي بنية صغيرة ضحكاتو بداك رد الفعل او بالاحرى خلاتو يحس باحساس زوين ....
قسم : ( قربات تبكي ) ما .. مافهمتش علاش كضحك !
اصيل : ( شاف عندها ) ماحسابتنيش هاد الخيط يأثر فيك كاع قد هاكا
قسم : ( سرطات ريقها وتكلمات بلا متحس ) ملي مخلي خيطها فيديك .... غير سير رجع ليها !! علاش معذب راسك نتا كاع ؟ ....
اصيل : ( كمش فييها ملامحو باغي يعصبها ) بلاتي ! تعصبتي ولا جاب ليا الله !!
قسم : انا ؟ علاش غانتصعب ؟ .... شنو دخلني اصلا ؟
ضربات شعرها لجنب كاتشوف فالبحر حتى سمعات اصيل قال والمرارة واضحة فصوتو رغم ابتسامتو الباهتة
اصيل : كنهضر على الوالدة اقسم ....الوالدة ...
قسم قلبات راسها دغيا لعندو موسعة عينيها وهي تخرج ليها ضحكة بلهاااء عفووووية بلا متحس بحالا رجّع فيها روح
قسم : هه !!!!!!
حسات ان داك الضحكة ماشي وقتها اصلا والموضوع ماكيضحكش وهي تجمعها وأسفات ملامحها
قسم : ك كنعتذر .... م مابغيتش زعما نفكرك .... فففف ككنعتذر والله ... غير شفت الخيط وعجبني داكشي علاش سولت ! ( كتحاول تقول اي حاجة تبرر بيها هاد الموقف الغبي لي جبدات ليه ) ش شفتو مربوط فيديك ونا واحد المرة كنت فاسبانيا .... شفت واحد المراة كتبيعهم ... ملي سولتها عليهم قالت ليا كايعنيو الامان ... الا ربطهم ليك شي شخص فيديك كأنو كيقوليك بغيت تكون ديما بأمان ... خصوصا دراري صغار ... داكشي علاش سولتك واش تكون كتآمن بهاد نوع من الروحانيات .....
اصيل : ( كايشوف فيه ) معارفش انا اش كيعني
قسم : الأمان ... ( بصوت حنين ) مدام ركباتو ليك ماماك ... بغات تبين ليك من خلالو ... اني بغيتك تكون بأمان فينما كنتي ....
اصيل : ( دار ضحكة مستهزأة بالوضع وشاف فالبحر ) تخربيق ... لي كايخاف عليك كايبقى حداك ... ماشي يربط ليك خيط حمر فيديك .....
قسم : ولكن قيمتو الرمزية زوينة !! باينة ماماك كانت كتخاف عليك ... ( اصيل شاف فيها ) ماتشوفش فيا هاكاك .. مدامها أم راه ميمكنش تكون خايبة ... مكاينش شي أم خايبة ... الام احسن حاجة فالدنيا ..... مدامها دارت معاك شي حاجة لي ضراتك من جيهتها غايكون عندها ضروف اكيد ..الام مكتآديش !!!!
اصيل: ماشي غير لي ولدات كتسمى أم اقسم .... ديريها فبالك
قسم : ( غير كترمش فيه عرفاتو مقققسح بزاف ) ااء اه بصح .. ولكن را ( قاطعها بحدة )
اصيل : اااااخر حاجة نبغيها دابا نهضر فيها هي هاد الموضوع .....
قسم سكتات وهبطات راسها وتاهو شاف للبحر حتى بانت ليه نقزات تكلس فوق داك الحيط تاخلعاتو وشدها بزربة من رجليها خافها طيح لور
اصيل : عندااااك
قسم : متخااافش ( قادات كلستها على داك الحيط )
اصيل : ردي لبال عنداك طيحي ( شادها من رجليها )
قسم : ههه مغانطيحش هههه ربط ليا تانا شي خيط حمر باش منطيحش ههههه
اصيل : ( جابتليه ضحكة بهاد القهقهة الدلوعة لي دارت وشاف معاه شاد فرجليها باش ماطيح ) عجبك !!
قسم : سي والله ...جيست زوين ... يخلي ليك شي واحد شي حاجة تعرف من خلالها انو كايخاف عليك !! اهتمام من نوع اخر .....
اصيل تنهد وبدا يفسخ فيه فيديه وهي وسعات عينيها يلاه غاتهضر بانليها جر ليها يديها يلبسوا ليها وهي كتنكر
قسم : لااااا اش كدييير لااا !!!!! هدا دياااالك
اصيل : شششش غاطييييحي متحركيش ... ( ربطو لييها وشاف فيها ) خليه عندك
قسم : اء ؟ (كتشوف فيه فيديها وشافت فاصيل ) ولكن هدا را ذكرى من عندك ماماك
اصيل : مكنتشرفش بداك الذكرى
قسم : ( هبطات راسها باسف رجعات تبسمات وشافت فيه ) انحاول نبدل ليه المفهوم .. .بلاصة مايبقى كيفكر بشي حاجة خايبة يولي كايفكر بشي حاجة زوينة هههه .. ياك !
اصيل : ( عوج معاها راسو ) بحالاش هاد الحاجة الزوينة !!
قسم : بحال هاد الصباح هذا ! احسن صباااااح دوزتو صراحة ( طلقات يديها وعلات راسها لفوق كتستنشق نسيم البحر ) صباااح مخخختلف .....
اصيل غير تبسم ليها ورجع كايشوف للبحر كل مايغفلها كايسهى فيها وهي كاتشوف لداك الخيط الحمر فيديها فرحانة بيه ... تالقى راسو توحش دوك الملامح المشاااكسة ديالها ، بغا يجبدها تتوتر تاني هو ينطق
اصيل : فوقاش مشيتي لاسبانيا اقسم !!!!!
اقسم : ( ساهية مع الخيط ديالها ) اسبانيا انا راه كنمشي لتما ديما فاش كن ( شوية هي توسع عينيها مدة سرات معاها طلعات فيه راسها بزربة ) اسبااانياااا ؟؟؟؟؟ ماااامشيتش ؟؟ فين مشيت انا لسبانيا !!!!!
اصيل : ( جابت ليه ضحكة واخا معجبوش الجيست ومسايرها ) المراة لي قالت ليك هاد الخيط كايعني الامان ، قلتي انها فاسبانيا
قسم : انا قلتها ؟؟؟؟ ( مكرهاتش تضرب فراسها وهي تضحك ضحكة بلهاااء مقسمة بمعنى فضحتي راسك اقسم ) هه هه هه ههه .... انا قلتها ؟ اناا !!! هه ....
اصيل : ( مسايرها مبتسم ) اهاه
قسم : وي هي سبنيولية ولكن انا لا .... يعني تلاقيتها فالشمااال ديالنا هنا ... شمال المغرب زعما ...
اصيل : اااااه .. هاااكداك ...
قسم : هاااكداااك .....
سرطات ريقها وكتلعن فراسها وضارت للبحر كتغزز فشفايفها قربات تبكي وهو جمع تبسيمتو ... ماعرفش علاش تقلب عليه المود ورجع تنهد مابغاش يبين وبغا يكمل هاد النهار مزيان وبداو يتفرجو فداك السفن لتحت تاسمعها نطقات
قسم : كيعجبك البحر ااصيل !!
اصيل : خدمتي فيه ( شاف فيها بواحد الحدة فصوتو ) انا صيااد اقسم
قسم : عارفة .... ( علا فيها حاجبو ) قالتها ليا ديجا ختك ... ( رجعات تاني علات عينيها ) لاااا زعما انا .. انا سولتها قتليها فشا خدام خوك ماشي غير جات وقالتها ليا
اصيل : وعلاش سولتي على خدمتي
قسم : ف فضووول ...
اصيل بقى كيشوف فيها مدة بحالا كيلومها علاش مزال مصارحاتوش حتى هي بحياتها .. هو يبدا يسسول باني أمل انها تعترف ....
اصيل : ونت .... خدامة !!
قسم : ( كاضور عينيها هنا ولهيه ) ااء ....اه فالبيتزااا .. ر راك ديجا عارف كنليڤري بيتزا .....
اصيل تنهد بقوة وضور راسو لجنب علاش باقا مطولة فكذوبها .... علاش مزال مخبعة عليه هويتها ....مكرهش دابا يشدها ويقول ليها راني عاارف كولشي غير بلا براكا من الكذوب وصارحيني .... ماعجبوش الحال علاش هو صفحة بيضة قدامها ومامخبي عليها والو ...كان فامكانو يقول ليها الخيط الحمر خيط عادي دايرو فيدو و ميعاودش ليها تفاصيلو .....وهي مزال مخبية عليه حقيقة قد هاديك ! حقيقة الفرق الشاسع لي بيناتهم .... يعني باغا غير تتسلى !! .... زاد تغير ليه المود فاش تفكر الفرق لي بيناتهم وانه خاصو ينهي هادشي و مايخليهش يطول مزال .... هو علاش طالبها لهاد الخرجة ؟ علاش اصلا اتصل !!! ....واش بحال هادي ديالو ؟ هو علاش سمح لراسو يتعجب بيها ؟ واش نسى راسو شكون ؟ نسى مرضو ! كيفاش ضعاف لقلبو لهاد درجة ؟؟؟؟؟؟ .....ورجع بعد على داك الحيط مغير ...
اصيل : تعطل الحال ..... خاصنا نمشيو ...
قسم بدات غير كترمش مال هذا تبدل فدقيقة و نزلات على داك الحيط كتنفض فسروالها وكتشوف معاه مصغرة عينيها فالشمس
قسم : قلت شي حاجة ماشي هي هاديك
اصيل : لا ( شاف عندها ) مااااگلتي والو ....ومغااتگولي والو .... يلاه نوصلك
قسم : ( غير كترمش مفاهمة والو) لا صبر .. حسيت بيك تبدلتي فدقيقة ؟ يلاه كنتي صافا !!! اش واقع ؟؟؟؟؟
اصيل : تعطل الحال وخصنا نمشيو مكاينش شي حاجة اخرى من غير هادشي ...يالاه !!
خلاها وزاد قدامها وهي كاتشوف معاه كاتقول واش هذا مريض !! ورجعات تبعاتو وهو غير ساكت وهي مازعمات تقول حتى كلمة .... دخلو ناشطين وخارجين مقلقين ، علاش تبدل بهاد السرعة ... كتسول راسها واش هذا كايلعب عليا ! حتى جيت لعندو وفرحانة كينكدها بحال هاكا ! اخر مرة جرا عليا من حدا الجمعية ومع ذلك نسيت وجيت .. دابا غايعاود ليا نفس الشيء . ماشية بالأسئلة حتى لقات راسها قدام الموطور وهو فسخ ليه السنسلة وعطاها الكاسك وواضح مادو بالزعفة ... وهي تردو ليه
قسم : ( مقلقة ) بلاش.... نمشي بوحدي ...
يلاه جات تمشي وهو يشدها من ذراعها
اصيل : ركبي باراكا من تبرهيش
قسم : تبرهييييييش !!!! تبرررهيش هو لي كالس كدير فيه داباااا
اصيل : (كايشوف مع جنابو ) ششش ... الناس كيسمعو ركبي بلا شوهة
قسم : دابا انا دايرة ليك الشوهة ! واش نتا شووووية لاباالس .... ماااابغيييتش نركب ومغاديش نركب وببببببعد مني نتا راك واحد المريض .....
خلاتو ومشات مقلقة غاااطرطق وهو متبعها بعينو وكيتنهد .... دخلات وسط دااك الناس فداك الساحة كتبخ الدخان من نيفها على هاد القلبة لي دار ليها ... وكلمات الغزل تابعيتها من عند الدراري لي كيدوزو حداها " الغزالة "" كتيكتية " فين ازين " تيتيز " "الكاورية" ... جميع المصطلحات سمعاتهم تاضارت عند واحد جوج بززززعفة
قسم : ماااالناااا ياااااك لااااابس ؟؟؟؟؟؟ سيييير تبعد مني رااااه نووولد قدددك ....
ضارت قدامها و مشات مقلقة واصيل تابعها من لور باغي يشوفها شنو غاااتصنع .... غادا وكتلللعن مخنزرة كي شي بنت صغيرة قالو ليها لبسي صباط هاحنا نتسناوك ولبساتو بفرحة وفاش لبساتو لقاتهم مشاو وخلاوها ....
ماشيا وعينيها حمرين باغا تبكي لدرجة ماعارفاش راسها تا فين هي ولا فين ماشيا ... ولا فين غاتصد واصيل غير موكل امرو الله وتابعها بالموطور خصوصا ملي تفكر انها قالت ليه ماهازاش تيليفون .... كضرب فالكتاف دعباد الله وحتى الاعتذار مكتعتذرش طالعة ليها قنديشة ... قطعات الطريق وبقات تابعة واحد الشارع طويل ... تاشوية وقفات عاد سرا معاها البلان .. وعلات راسها كتشوف مع جنابها فين هي ؟ تيليفون ماعندهاش .. ماعندها والو عندها كاغط بونكيغ كاينة فجيبها لور .... ماعرفات كيدير تتصرف ولا فين تمشي ولا فين تعطي راس !!! ... طاكسي مغيتخلصش ليها بالكارط ؟ .... واقفة كتفكر واش تقلب على شي بانكة تيري لفلوس ... هوما كايبانو ليها طوبيسات شي طالع شي نازل .... يلاه كاتشوف معاهم هو يوقف بالموطور حدا رجليها ... وعلا الزاجة دالكاسك على عينيه
اصيل : ركبي باركا من العكس راه ماعندك فين تمشي
قسم : ( كاتشوف فسما بالنفخة ) عندي علاش معنديش قالو ليك جاية من القمر خصني صاروخ باش نطلع ؟؟؟؟؟؟
اصيل : فين غاتمشي ونتي واقفة هنا ! غاينزل عليك شي حد من السما
قسم : انا اصلا ديما كنركب من هنا فطووووبيس ... راني مولفة بطوووبييس .. اساسا انا واقفة هنا كنتسناه دابا غير سير فحالك
اصيل : طوووبيس !!! ... اهاه تاهو مزيان ... غير هو طوبيس البلاكة ديالو راه هي
ضارت براسها لفين اشار بان ليها فين واقفين الناس وهي تلعن فزهرها وشافت فيه
قسم : عاااارفة .. انا عيطت ليه يجي لعندي لهنا ..... كاااين شي مشكل !!!؟
اصيل : باش عيطتي عليه !!!! .... ( شافها غير كترمش ) اهاه ... مكاين تاشي مشكل ... كاين مشكل واحد وصافي ....
قسم : ؟؟؟
اصيل : جججري الا بغيتي تلحقيه راه غيدوزك ...
قسم ضورات راسها بانليها واقف حداا البلاكة وهي تعطي رجليها للرييييح واصيل غير كايضور راااسو ... معارفاش راسها اصلا علاش ماشية لطوبيس الله يجعلها غير تركب وتنزل مهم تبين ليه راه ركبات .... لقات الصف طويييييل قدااام الباب وهي لور ... الشيفور يلااااه حل لباب على خاطر خواطرو وكولشي بدا يتجاارا ويتداااافع والبراهش كيغوتو ها اللي مباغيش يركب ها اللي مزال ماباغيش يرجع لدار .. كل واحد هاز مصاصة لاسق ليه فجلابة دشي وحدة اخرى هالي هاز صاك مخرج منو راس فروج وقسم غير واقفة دهشانة تاحسات دفعوها ملور وزادت يلاه حطات رجليها فوق درجة حسات بشي حد زطم ليها على سبرديلتها البيضة ولات ككككحلة ... هبطات راسها كتشوف لسبرديلتها هي تسمع موراها
المراة : ( تتدفعها ) دفعي ابنيتي قداااامك و طلعي
قسم : ( نفس تقطعات ليها جاتها البكية ) ااء . ب بغغيت نزل ... غااانرجججع مغانركككبش اش هااااادشي
المراة : ( تتدفعها ) تي زيدي تركبي راه طوبيس جاي يكون مطرطق ... رررركبي خلينا نركبو
دفع فيا ندفع فيك طلعاات الطوبيس باغيا تقيااااا ، شعرها تشنتف ليها وحالتها حالة ... ودراري لي سبقو شادين البلايص كالسين و تيضحكو هو واحد يهضرها
ولد : التتتيز الكاااوري .... تعالي تجلسي هناااا
قسم : ( بدهشة ) لا لا .... شكرا
ولد : تي تعالاي راك باينة فيك برانية
جلسات تما و الولاد لي حداها ناضو عطاو بلايص لشي عيالات ببزهم ، ها لي شاد ذرة ياكل !! لي تيبكي جاه صهد ، لي جابدة بيجامة باغة تشوف كي دير تقيصها .... وهي كتشوف بعينيها ، لحظات و الطوبيس تبلوكا و تسد لباب و طلع روسوفور تيهضر مع شيفور
روسوفور : شتي خونا دخل فطاكسي ؟
شيفور : شفت غير كري هاد ساعة !( دفع ليه ااوراق) قطع قطع
روسوفور : ( شد الوراق و بصوت عالي هضر ) ارااا البااااب آ جوااااد ( بدا يقطع للناس ..بنوبة تاوصل عندها مد لها ورقة )
قسم : ( شداتها ) شكرا
روسفور : ( طلع كاسكيطة بضحكة ) على واااجب ازييييين ... اريلنا اختي خمسة دراهم لاجات على خاطر التيتيييييز .. لامجاتش على خاااطرو لهلا يجججيب بوها ....
قسم : ( رجعت تصفار و تخضار) هاا !!! ( جبدات من جيبها لور الكارت ) تتخلصو بكارطة !!! ( بعوينات القطة كتترجى ) هي لي عندي دابا
المراة : ( طلعاتها هبطاتها و غمزت صاحبتها ) نبصم عليها صحيبها خدمها
المراة تانية : تي خلصي عليها فسبيل الله
المراة : بقات ليا جووج دارهم زيدي ستين ريال
روسفور : ( كيضحك على داك الكارطة ) انا كنعرف غا من الحمارة لطيارة ... اول مرة نشوف من طيارة للحمارة ..... حل الباب اجواد حل ....
المراة : ( تتقاتل مع صرف ) تاشد مابقيتو ترحمو . الدرية مسكينة باينة عليها غشيييييمة وبنت لخير مغاتسرقكش ..
روسفور : ( شد ورقة تيكتب فيها نمرتو ) تي شدي عندك دراهمك ( مد ورقة لقسم ) شدي و قراي نمرة مزيان
قسم : ( بعدم فهم ) اء .. علاش !!
روسوفور : ( كمل تقطاع تيضحك ) باش ملي تمشي لداركم ازين كتبي ليا ميساج فااواتساب قولي ليا شكراااا مضورتيش الطوبيس لكوميسارية ....
قسم : ( عاد فهماتها و رجعات ليه نمرتو ) لا شكرا ... غااانزل انا كاع ( وقفات ) حلو ليا لبااااب عافاك
روسوفور : زييين تقلق ... تي اجي والله تادوزي فاابببور
قسم : انا اصلا معارفاش هاد طوبيس فييين غاااادي .... حلو ليا لباااب ....
روسوفور : آحححل لباااب اجواد ... التيتيز تغالطنا ليه مع الخطوط الامارتية ..... ( قسم نازلة وهو تابعها بالهضرة ) الله يعطييييينا مناااااش عطااااك .... زيييين وترفييييحة كولشي كاين ( شاف عند المراة ) خلصي اميمتي خلصي ... حتى نتخلصو كلنا لهيييييه ....
نزلات قسم من طوبيس .. عاد تنفسااااات كانت قاطعها بسبب الصهد و الزحام حتى قفزات ملي سمعات مورها فششششششش ديال طوبيس قلع هزاتها من بلاصتها ..
قسم : ( شادة على قلبها ) يلاااه اقسم يلااااه شنووو مزال ماااتجربتييهش شنووو باقي عااااد ...
ضارت موراها هو يبان ليها اصيل مربع بيديه على المووطووور متبع معاها الفيلم ..
اصيل : ساليتي !
قسم بقات غير كترمش وهو قاد ركبتو على الموطور .....
اصيل : يلاه طلعي ....
قسم نزلات راسها كتشوف ماعندها تاشي حيلة اخرى وهي طلع بالنترة والنفخة ركبااات محمالاااااش راسها ...... غير ساكتة مابغات تقول تاكلمة .. وتاهو مبادلها الصمت حتى وصلو للحومة لبلاصة نيت لي تلاقاها فيها ووقف ...
نزلات مدات ليه الكاسك وواضح من ملامحها مقلقة وهو كيشوف معاها .. شدو عليها ردو لبلاصتو وهي كتلبس كاسكيطتها
قسم :انا غنمشي ...
كانت ماشية هو يجبدها من يديها وضارت عندو
اصيل : كان نهار زوين .. مابغيتوش يساليي بحال هاكا
قسم : ياك غاييساالي اصلا ! فاش كتهم النهاية !
اصيل : قسم ... انا غانهضر ونتي ضوري هضرتي فدماغك .... الحاجة فاش مكنبغيوهاش تسالي .. خاصنا نكونو كنفكرو ليها ف غدا وبعد غدا .. ماشي غير فنهار واحد ...... ملي كنشوفو ان غدا ولا بعد غدا مغتكونش فيها هاد الحاجة كنساليوها فنهارها اللول .... قبل مانولفو ...
قسم : ( كتشوف فيه ) مافهمتش و مغانفهمش وعمرني غنفهم ...مواااضحش !!!
اصيل: ونتي واضحة ؟
قسم : اش قلت ليك خلاك تبدل لينا المود فدقيقة !!! ( قربات عندو كتر ) نتا علااش عيطتي عليا اصلا ... علاش قلتي ليا نتلاقاو .. علاش دوزتي معاياا نهار .. ( علات يديها ) علاش رطبتي ليا هدا فيدي
اصيل : حيت انا فكرت فغدا وبعد غدا ... ونت ملي شفتك فكرتي غير فنهار واحد .. كولشي طفا ....
قسم : مفهمتش !
اصيل : كون كنتي باغا تفهمي كون فهمتي .... نتي راك تتغاباي اقسم كولشي واضح وباين ... متعاوديش تستحمري بنادم حنا مواكلينش التبن ....
خلاها ومشا وهي بقات واقفة فبلاصتها متبعاه تاغبر على انظارها ودخل لحومتو ... وهي بقات واقفة فبلاصتها كترمش بعينها ... يلاه ضارت تمشي وهي تحس بشي طموبيل وقفات عند رجليها وطلعات راسها فيها .. وهي تلقاها ديال باباها لي هبط الزااااج تالمحاتو قربااات تسخف ...... كان هنا !!!!!!! من امتى وهو هنا !!!!!!! ..... كان تابعني ؟؟؟؟؟
قسم : ب ..... بابا !!!! ..
أسد وما ليها بعينيه بمعنى طلعي ... ملامحو ماقدات تقرا منهم لا غضب لا رضى ... سرطات ريقها وحنات راسها و مشات ركبات ...غير سدات لباب كان زاد ... بدات كدير سانتير وهي كتخطف ليه الشوفة كان كايبان عادي .. ماضاحك مامخنزر ... ملامح مبهمة ماقدات تقرا منهم والو ولكن حسات أن الجو فسيارة مكهرب والتزمات الصمت .... عارفة راسها شنو دايرة ... وعارفة دابا غايكون مقلق حيت خبات عليه .. ولي متأكدة منو راه عارفها كانت معاه .... مدامو جا لعندها تالحومة هنا .... كتفرك فصبعانها منين غاتبدا ليه .. طريق كلها تفكير تالقات راسها قدام فندق من فنادقهم لي عارفة كايرتاح فيه ... نزل للباركانينغ ... حط طموبيل ونزلو هو كايتمشى وهي موراه ... خطواتو فيها عشرة من خطواتها ..... دخل لجيهة الكافي كايومي للجميع محييهم براسو .. تادخل للكوان الخاص بيه ... وجر الكرسي جلس وهي غير تابعاه ملتزمة الصمت .....
ججلسو وهو يدير رجل على رجل وخشا صبعو الصغير ففمو وصوب نظرو ليها مباشرة ......
وهي جالسة كتفيفري فبلاصتها كتحس بقلبها غايخرج من بلاصتو .. كطلع عينيها بششششششوية تشوف فيه غير من تحت شفارها غير كاتشوفو لامحها بداك النظرات كتهبط راسها دغيا ... تاسمعاتو .....
اسد : يالاه .... هانا كنسمع
قسم علات عينيها شوية وبدات ترمش فيه بحال شي قطة
قسم : ها !!
اسد : بانليا عندك بزاف ماتعاودي ليا .. نو !
قسم : اااء ء ..
جمعات تلعثيمها و عينيها كايضورو ....تنهدات وقادات جلستها و ردات شعرها لجنب كتحاول تحط راسها امام هاد الموقف و شافت عندو
قسم : ه .. هو .... هو لي عيط ليا
اسد : اهاه ....
شافت لفوق كاتنفس بمعنى غانهضر غانهضر واصلا هادشي لي خصو يكون بابا خصو يعرف كولشي ورجعات شاف فيه
قسم : بابا .... انا فاش قبل انه تقرا ختو ... كشكر مني ليه .. لي ماعرفاش اصلا علاش .. رسمت طابلو ... فيه وجهو .. يعني بوغطخي ...
اسد : امتى ترسم هاد الطابلو .. حتى بغا يقري ختو و لا قبل ؟
قسم : بابا .. ( قربات لطبلة ) باش منخبي عليك تاحاجة وباش تانتا تحط فالصورة .. انا غانعاود ليييك كااااااع لي كنحس وكاع لي كاين ......
اسد : اهاه ... هادشي لي بغيت .. ( قاد جلستو ورجع لور بالكرسي )فازي
قسم تقلبو ملامحها للجدية .. خدات نفس عميق ثم قربات لطاولة وتكلمات .....
قسم : نهار اول مرة شفتو ... كانت فدارهم ... منكدبش انه كأي بنت تعجبت ( اسد طلع حاجبو ) ولكن مافتش حدود الاعجاب بالمرة .. لا وكتر انا نفيييتو كانه مكاينش هاد الاعجاب .. انا كنت كنقنع راسي انه انا ف مهمة وهي نخلي داك البنت تقرا ماشي شي حاجة اخرى وهادشي لي كان فعلا ... ولي كان خصو يكون .... ( سهات فالمجهول وتبسيمة غريبة بانت على وجهها ) ملي كان نازل لعندنا البنت خافت وتوترات وقالت ليا مانقولش ليه انو انا مولات المنحة حيت مزال مافاتحاتو فالموضوع وتتخاف من صرامتو ... ملي قاليا شكون نتي ... هه! نتا عارفني كولشي كنتقنو الا الكذوب .. ماعمرني ضنيت راسي غانكذب بداك الشكل ابابا ... قلتها بلا منحس براسي .... ( شافت عندو بضحكة حزينة ) انا كنليفري البيتزا ... ( تنهدات وشافت لجنب كتحاول ترتب نبرة صوتها ) من داك نهار انا خشيت راسي فكدبة بلا مننحس ... بلااا منحس ابابا .... قتليه انه انا لي جبت خبار المنحة لختو يعني انا غير وسيط ماشي انا مولاتها وانا غير بنت درب عادي حداهم تما و كنلفيري للبيتزا ... وطنوبيل مادياليش وشي تخربيق بحال هاكا ونتا عارف ملي كنتوتر مكنعرفش اش كانقول مهم نسلك راسي .... ماعرفتش راسي كيفاش ولا علاش تلقيت راسي وسط داك الكدبة ..... هربت وجيت بلا منقدر نقنعو .... ورجعت ثاني .... نشوف محاولة اخرى ، تما فين انا عشت يمكن ليييلة من احسن لياالي ديالي ....( تبسمات بعنين حومر ) نهار الفرماج ، نهار سمعت أحسن دلع فحياتي .... منكدبش عليك ابابا كنت فعلا خايفة ... لولد كان مخدر ... و الكارد بعاد .. ماعرفتش اش داني لبابهم ودقيت بحر جهدي ... بحالا عندي تما الامان ! من كاع ديور انا دقيت بابهم ...( اسد مكمش معاها ملامحو ) وفعلا ... كان تما االامان .... غير دخلت وتخبيت ورا ضهرو حسيت براسي ورا ضهرك نتا ابابا .... دافع عليا بطريقة كلها عقلاااانية .... شفت الاحترام لي كيكن ليه داك الدرب .. وكيفاش جوج كلمات قدر يحرج هداك الولد ومشا وهدئ القضية بلا حتى ضرب او جرح .... ودخلو هو وختو كايحاولو يهدنوني واخا مكيعرفونيش .... من تما .... قال انه يوصلني لانه ضلام الحال ..... ( شافت عند باباها) فين غانقوليه يوصلني ! ... واش لمنطقة الروكان البحرية ؟ انا الكابتين قسم الاسماعيلي !!! .. هه!! لقيت راسي قدام خيرية بلا منحس .. تما فين وصلني النعت لي عطيت ليه ... حسيت كدوبي كبرو شوية بشوية .. منكدبش عليك مكنكونش راضية على راسي ... بغيييت نقول ليه ها انا شكون ... لكن خفت يتقلق على ختو بسبابي .. كنت كانتسنى غير يوافق ونساليو هادشي ونمشي فحالي ... الكدبة زادت ..وماحبساتش فالخيرية .. داتني حتى لحوايج البال ... للبست حوايج مقطعين وخانزين بريحة غير باش نزيد نبان انني فعلا مكنكدبش و نزيد نقنعو كتر .... ( تبسمات تاني باسى ) داك نهار دوزتو كولو عطيس وحساسية تانسيت كاع علاش مشيت لعندو ... فطريقي نقنعو لقيت راسي قدام مقشدة ... فطرت بمسمن و ووو .... تنساتلي سميتو...( صغرات عينيها كتفكر غير تفكراتو ضحكات) رااايب ... سميتو رايب ... الذ ماكليت فحياتي كاملة ... من تما شرا ليا حوايج باش منبقاش بهادوك لي كنت لابسة .... نهار ضاع فوالو ! واخا ماشي فوالو ... بالنسبة ليا اكتاشفت حوايج جداد ...وخرجت بلبسة !!
.. ولكن ماقنعتوش ....وررجعت تااني ... ( اسد غير ساكت وكايشوف فيها ) هاد المرة كنت عاااازمة نقنعو ... كنت عاااازمة نسالي هاد المهمة دغيا ... دخلت لدارهم لقيت ختو كتوجد فطور . ماعرفتش كيفاش تاني تالقيت راسي كنوجد اتاي ! مكنعرفش حتى منين كايشعل لغاز قتليها عطيني نصاوب اتاي !.... قالت انو كايعجبو ! كان كافي بالنسبة ليا نقوليها انا نصاوبو ..... علاش ماااعرفتش .... ( ضحكات ملي تفكرات ) جا حلوووو بزاااااف ... حلو ابابا .... حلو كراااميييل .. عطيتو يدوق ونا كنتسنى رد فعلو وفرحانة ومتظاهرة اني كنعرف نصاوب اتاي ( اسد مصغرر فيها عينيه) حتى كانشوفو بدا يكحب ... وقاليا كاع لي لقيتيه دالسكر فكوزينة درتيه ( اسد كمش ملامحو كانه دارت ليه ديجا ڤي ) ... من بعد ....( تنهدات ) قنعتو يمشي معايا لجمعية دالامهات العازبات .. كانت داك نهار واحد الكوتش تما غاتعطيهم درس .. وصيتهم باش يكون الدرس على اهمية الدراسة للانثى ... كان كايتسنط ونا حاضياه .... كان كايبان ليا متأثر .. فرحت لي غايقتنع ... ولكن ملي خرجنا .... ( حسات براسها تزيرات وحبسات شحال عاد كملات ) قاليا .... خرجي من حياتنا ابنت النااااس ( شافت فباباها وعينيها تعمرو بدموع ) هاكا قاال ليا .... ( اسد تفكر نهار عاودات ليه ) ... وفعلا .... خرجت من حياتهم ... هاكاك كنت مقررة ...
رجعت فحالي وانا كلي خيبات ... مهمة فشلت فيها والوعد ماوفيتش بيه .... ملي وصلني ميساج انه قبل .... ماعرفتش منين جاتني داك لفرحة كاملة ! داك الفرحة انا ابابا كاع مافرحتها حتى فاش نجحت فالباك .. حتى فاش تخرجت حتى فاش شديت اول فواياج ....فرحة كانت بحال شي شمس شرقات من بين لغيوووم ابابا ... كاع معرفت واش فرحت غير حيت البنت غاتقرا ولا حيت وفيت بوعدي ولا كانت شي حاجة اخرى ! .... وتما فين قتليك كنت راسمة ليه ديجا طابلو .. تاهو ماعرفتش كيفاش رسمتو غير ماتسولنيش ... ماااعرفاش كااااع .. تالقيتو مرسوم بادق تفاااصيلو كيف محفور فدماغي .... مشيت لداررهم وعطيتو لختو انو تعطيه ليه كشكر ... كامتنان ... كاي حاجة ... غير مايبقاش عندي ويوصل لمولاه .. هاكاك كان كايملي عليا قلبي وهاكاك تصرفت ..... ( تنهدات ) ورجعت تاني لحياتي ... وسمعت منك جملة " الحاجة لي ماشي ديالنا ماتربيش عليها الكبدة * ... تيقني ابابا .. حااااولت نمحي القصة من دماغي وماقدرتش .. حتى كنبغي ننسى كانلقى دماغي كيفكر فيه بلا منحس ..... ماااقدرتش ابابا ننسى ... ماقدرتش ننهي الحكاااااية .... ماقدرتش نتقبل نهايتها ... مالقدرتش نتقبل انه صافي مغانبقاش نمشي لداك الحي ! والمسمن ؟ والرايب ! والدرب و العرس والجيران و واتاي و الموطور والخيرية .. تاحاجة مابقات ! داك العالم لي كنت كنمشي ليه بتخبية مابقاش ! كانت صعيبة باش نتعايش مع داك الحقيقة تيقني ابابا . كانت صعيبة بزاف انني نقطع ولفي ...
منبعد مابديت كنحاول نرجع حياتي ونقنع راسي انه المشاعر لي عندي ليه من طرف واحد ... كايجيني اتصال منو .... ملي سمعت صوتو ! ماعرفتش واش رجعت ل18 عام ولا واش انا عاد كنعيش 18 عام! ..متيقتش راسي وهو كايعرضني للفطور ! .. فرحت بلا قياس ... فرحت لي الحكاية مسالاتش وماوقفاتش عند المنحة ... مشيت بلا عقل ..... ولكن ... ( هبطات راسها ) لقيت راسي باقا فداك الكدبة ... ياك المنحة قبل بيها انا علاش باقي كنكذب ونخبي طموبيلتي بعيد ونهرب للكارد ! .... فلول كنت خايفة انه يتقلق من سلمى ودابا ! واش خيفاه يتقلق مني ! ماعرفتش صراااحة .... خفت نفقدو ! انا فعلا خفت نفقدو ... ماااابغيتش نفقدو ابابا ... حشمت وحدة فلااج ديالي تتكدب هاكا !!
( ردات شعرها اللور) وربما كدبة انا من الدرب بحالهم كانت مريحاني وكنت كنقد نعيش حياتي فداك العالم وأنا مرتاحة ... ماشي بحال كون عرفني شكون ، كان غايكون راد معاياا البال داير بيناتنا الحواجز ومغايدينيش لبلايص بحال هاكا .. كان غايرغم على راسو يديني لبلايص غاليين ... او يتصرف معايا بشي طريقة اخرى .. داكشي لي خلاني نكمل فكذوبي ... ( تبسمات وطلعت ليه يديها ) نقشت الحنا ..... كليت ليزيسكاغكو ... شفت الحمام ..شفت المغرب ديال بصح .. انا راه هاد الصباح شفت رااااسي . شفت قسم فالمرايا .. قسم على طبيعتها قسم محررررة من الكابتين واللبسة واللقب ... قسم الحرة ... ضحكت وفرحت وتصرفت على طبيعتي بلا حتى شي بروتوووكل .... ا نا طليت ابابا على الباااطويات ملفوق ... وشفت فيهم بطريقة اخرى ... بالكريقة لي كايشوفوهم بها كاع الناس وبالطريقة لي كايشوفونا بيها الناس ..... بالطريقة ديال بنت عااادية كاتشوف المرصى لاول مرة ! وكتخيل الباطو كيداير من داخل ..... مكنتش ابدا تما ك قسم الكابيطان ... انا كنت غير قسم ..... ( هبطات عينيها ليديها وتبسمات وهي كاتشوف الخيط وحطات يديها فوق طبلة بدات دوز يديها عليه ) هدا كان مربوط فيديه ... سولتو عليه وقاليا ربطاتو ليه ماماه ملي كان صغير ... ( شافت فيه ) واضح كان عندو مشكل مع ماماه دوا عليها بطريقة خايبة ..... ملي شافو عجبني ... وعرف معناه كايعني الامان .... ربطو فيدي ..... ( ابتاسمات ) حسيت باحساس فشششكل .... تخالط عليا كولشي .. وانا نختصرها باببتسامة وواعدت اني غانحافض عليه ... كنا فرحانين هانيين مناقشين كأي جوج بعقلهم ....حتى كلقاه تقلب فتانية ! ..... ملي كنرجع نتفكر اشنو هي اخر حاجة هضرنا عليها ، كانلقى هضرنا غير على خدمتو وقال انا صياد وسولني تانا فاش خدامة ، قتليه كنليفري البيتزا كيف هو عارف اصلا .... حتى تبدل فدقيقة وقال ليا نمشيو تعطل الحال ..... سكت ومابقاش كايهضر طريق كلها هو مكهرب لينا الجو .. حتا انا صراحة نفاعلت شوية مع الوضع وتعاندت وقلت غانمشي بوحدي .... فلوسي فطموبيل ...تيليفوني فطنوبيل ماعندي والو ..كالقى راسي فطوووبيس .. كااااع لي عمرني شفتو شفتو معاه .... كنولي معاه مراهقة ساذجة هاربة من الليسي .... خرجوني حيت ماعنديش باش نخلص وكانلقاه حدايا بالمطور كايتنسى كانه كان عارفني من لول ! .... وصلني لفين لقيتيني وتما فييين قااليا( اسد قاطعها مقاد جلستو )
اسد : قال ليك كون كنتي باغا تفهمي كون فهمتي .... نتي راك تتغاباي اقسم كولشي واضح وباين ... متعاوديش تستحمري بنادم حنا مواكلينش التبن .... ( تنهد ) هاكا ياك
قسم : ( وسعات عينيها ) ك كنتي... كنتي حااااضر !؟ ش شتييييه ؟؟؟؟؟
اسد خدا تنهيدة طويلة وقرب عندها لطبلة ...
اسد : قسم ! .... واش نتي مفاهماش اش واقع .. ولا غير مباغاش تفهمي؟
قسم : ( بدات كترمش بعنيها ) عايق بيا !!!!
اسد : واش باليك ؟ ....
قسم : وو ... ولكن انا ابابا ... مبينت ليه والو .... مابينت تاحاجة باش غيعرفني !
اسد : ديري فبالك ان اقبح حاجة عند الواحد ... هو يجي واحد اخر يستغبيه .. يستحمرو .... ونتي استحمرتيه ... وتستحمري راسك معاه دابا ....
قسم غير ساكتة عاضة على شفتها وشافت فيه
قسم : انا غير بغيت زعما نبان ليه بنت عااااادية
اسد : علاش نتي مالك ! ماشي عادية ؟ فيك شي حاجة ديال الايكسطخا اوغدينيغ ! شي حاجة خارقة للعادة ! شنو تايفرق بينك وبينهم
قسم : لا ابابا ماتهزهاش بحال هاكا ... نتا عارف نظرة المجتمع للطبقات .. الى عرفني بعيدة عليه مغايدينيش للمقشدة اباابا ... مغايدينيش للمدينة القديمة مغانعيش ديك الاوقات الزوينين
اسد : علاش نتي مكنتيش عارفة انه كاين مقشدة فالمغرب ! مكنتيش عارفة كاينة مدينة قديمة ... ملي باغاهم كنتي تمشي ليهم بوحدك علاش حتى تقلبي على واحد اخر يديك ! .... واش نتي كان غرضك منو غير يديك للعالم ديالو !! لي هو عاااالمك تانتي اصلا ....
قسم : بابا سمعني انا ( قاطعها )
اسد : انا لي غاااتسمعيني .. هضرتي بزاف وسمعت ليك ... وااحلي معايا ودنيك دابا ... انا من هاد الخبير ديالك كامل شديت حاجة وحدة من هضرتك ... نت اقسم واخا كتبيني لراسك انك ممهتماش لفرق الطبقات راك نتي اكتر وحدة مهتمة بيه على هاد الحساب ....نتي لي كتشوفي راسك غريبة عليهم وهما غراب عليك .. كوم كان العكس كون بان ليك الامر ميستدعيش تكذبي .. ايه فلول خفتي على ختو ... ودابا كان عليك تقولي كلشي .. زيد ان كدوبك راهم مفروشين بنادم راه ماشي مكلخ لهاد درجة لي مايردش ليك البال ونتي غير الماسة لي كاينة فسنسلتك راه باينة شحال ( هبطات عينيها لعنقها ) .... ملي نتي متعلقة بهاد الولد لهاد درجة .. وقلتي حتى هو عيط ليك .. يعني كاينة خطوة بيناتكم .. بغيتي طلعيها على الكذوب ! .. فآخر تجي ديري ليا انا جنازة !
قسم : والله ابابا مابغيتها طلع على الكدوب كنت كتسنى الوقت المناسب
اسد : بحالاش هاد الوقت المناسب ! تايجي واحد النهار يطلعليه كولشي فراسو ويطلع ليه هاد الاستغباء فراسو ويجي يواجهك بالحقيقة و طيحي عليه جوج دمعات وتقلبي كولشي على راسو وتقولي ليه كنتي عارف ومخبي وكتلعب عليا .. ياك ! هاكااا غاديري
قسم : ( غير كترمش ) م ماعرفتش
اسد : لا هاكا اديري .. هادشي دايز عليا وحافضو ... وعرفت حتى هاد خينا باش حس .. غير الفرق انه لي حس بيه هو كتر .... هو راك خلطتي ليه معاها الاهانة للطبقة ديالو رغم مكنشوف تافرق بيناتكم .. نتي خدامة وهو خدام .... نتي كتشوفي هو كيشوف نتي كتسمعي هو كيسمع ... لي عندك راه عندو تاهو وجيرانو ناس الحومة والعالم كامل ..... الافكار لي عندك ماخصهمش ييقاو اقسم .... يعني بصريح العبارة نتي ميصلحش ليك واحد بحال هذا ..... هاد الخطوة كاملة لي درتي راها جرأة .... تعلقتي فشخص صعيب تتفاهمو .... حاولي تنهي هادشي اقسم ....
قسم : بابا منقدرررش ( تعمرو عينيها بدموع ) بغيييت نكون معاااااه
اسد : ملي بغيتي تكوووني معاه اقسم علاش تتكدبي ؟ واش مغايعرفش شي نهار ؟ واش مافكرتيش فيه هو باش غايحس ؟ راه اهاااانة هادي ... ايه نت بنتي ومنحملش لي يقلقك ولا يبكيك ومزال متزاد ولكن فنفس الوقت راه منبغيكش نتي لي تهييني شي واحد ....
قسم : بابا مقصدتش الاهانة بالعكس انا ممسوقاااش كاع .. صافي بغيتو ولي عطى الله عطاه بغيتو هااكاك كيفما هو .... كايكافح على مستتتقبلو انا عارفاه .... وهدا هو الراجل لي انا بيه كنحلم .. كنحلم بواحد كيشبه ليك اباباا .... لقيتو كيشبه ليك .. هاكاك حسييت .. منقدرش ننكر هااادشي
اسد : ( ساط بقوة ورجع شاف فيها ) واش نتي كتحسي براسك غترتاحي مع هاد السيد اقسم؟
قسم : ااااه ... متصورررش بابا شحال كنكون فرحانة وانا معاه .. كينسيييني الدنيا
اسد : شنو لي كيفرحك معاه
قسم : العالم ديالو
اسد : داك العالم لاكملتي فيه شهر غاتولفيه ويولي يبان ليك بحال عالمك تانتي .... صافي غاتلوحيه ! ...
قسم : لاااا لاااا !!!
اسد : وانت مرتاحة غير لعالمو ماشي ليه ..... يعني حددي اختيارك اقسم ... راه مانبغيك لا نتي تتآداي لا تآدي شي واحد ...انا قلللبت عليه .. مصارنو راني عرفت اش فيهم ( قسم وسعات فيه عينيها ) انا كنعرفو كثر مكتعرفيه نت .... مكنشوفوش راه شي واحد لي يستاهل تهينيه بهاد الشكل اقسم .......
قسم : فييين هي الاهااانة اباباا واش حماقيتي !!!
اسد : ماشتيهاش نتي فين هي ؟ .... كاتقولي ليا انا كيعجبني عالمو ... مالو العالم ديالو شنوو فيه غريب راه داك العالم كبرات فيه مك وجداك .. كبرت فيه انا واحد نهار .... مالك استغربتي منو بحالا منعرف منين جااايا .... شي واحد فاش كنبغيوه .. خصنا نبغييوه هو نيييت .. ماشي نشفقو عليه لشي حاجة او شفتي شي حاجة فيه مامولفاهاش ... و نهار تولفيها مغايبقاش يبان ليك و هو غايكون تعلق ولي عطا الله عطاه ...... قسم ردي لبااال و ضوري هادشي لي كديري فدماغك ولا سمعي ليا ووقفي هادشي .... مزال متحيدو منك الفوارق الاجتماعية ابنتي واخا كبرتي ... غير شحال هادي كان بالغرور .. ودابا بلاستعباااط !!!
قسم : ( بعيون باكية ) حراااام عليك ابابا ... والله حتى ماشي اهااانة بالعكس ....
اسد : كون جيتي قلتي ليا ابابا داك سيد رتاحيت ليه على ودو هو ... مزيان ... نتي كتهضري ليا غير على عالمو وشنو شتي معاه ... كيف غانفهم موقفك ؟
قسم : ماعرفتش حيت انا براسي مامعترفاش بدوك المشاعر لراسي ... حاجة وحدة لي كنعرف كنكوز فرحانة وانا معاه كنحلم بيه بليل وباغا يصبح الصباح نشوفو
اسد : واخا ... ( قرب عندها لطبلة ) لنفترض هاد الولد شي نهار ولا لباس عليه جاه ورث ولا شي حاجة منعرف مهم ولا لباس عليه .... يمكن كثر منك كاع ....غاتبقاي تبغيه وهو لابس كوستار بحال هادوك لي جاو خطبوك من قبل ورفضيتهم.. الا العالم الصغير لي شتي عندو مبقاش فيه .... اتبقاي معاه ؟
قسم : ااء !!! ... ك كيفاش ؟ ...و ولكن راه واخا يلبس كوستار بحال هادوك هو مغايوليش بحالهم ... اصيل معقول ابابا .... وحنين واخا مكيبينش ... اصيل كانحسو راجل معول على كتافو ماشي على باباه ... اصيل كنحسو الا بغاني يبغيني انا ماشي حاجة اخرى .... هادشي علاش اصيل ... يعني واخا يلبس كوستار واخا يطلع للقمر ... غايببقى فعيني اصييل لي شفت .. والله ابابا مارابطني بيه عالمو ..... غير حاجة وحدة كنفرررح وانا معاه .. انا بغيتو بيه بالعالم ديالو ....
اسد : كنخاف اقسم .... كنخاف نشجع هاد العلاقة و نكون سبب فانو ياكل الدق او تاكلي معاه الدق تانتي .... ونتي عارفاني مغنرحموووش لادار ليك شي حاجة واخا راك غالطة كتبقاي بنتي .....
قسم : ( تبسمات وسط دموعها لي كانو كيسيلو وحطات يديها على يدو ) متخافش اببابا ... راني بعقلي وعارفة اش كندير
اسد : داكشي علاش تانا معاك هنا ... كنشوفك بنت كطل على التلاتينات .. كون كانت ختك لي كدوي هاكا فهاد المواضيع نت عارفة جوابي شنو غايكون ... انا باغيك تلقاي نصك الثاني واش انا غنرفض سعادتك ؟ انا عارف سعادتك مغانقدرش نوفرها ليك غير انا .. كايخض انا .. ولي غاتكملي معاه حياتك باش نكيليبريو ليك هاد السعادة .... و كنشوفك وصلتي للسن لي غانقبل ليك فيه تقلبي على حياتك مع واحد اخر ... مهمتي معاك سالات ... كبرتك قريتك ضمنت مستقبلك وشخصيتك ... دابا كاي اب كنتمنى نحط يديك فيد واحد اخر .... لي تكوني مستقرة معاه..... واخا غتكون صعيبة عليا نحيدك مني .. ولكن واجب عليا ..... هادشي علاش عرفي مزيان فين كتلوحي الخطوة ديالك اقسم .. وحاجة وحدة تعلميها ابنتي راك مزال مكتعرفيش ليها ... وهي بقاي تفكري فمشاعر الناس الاخرين .... فشنو غيحسو ... ماشي غير شنو كتحسي نت ...
قسم : بابا .... انا فهمت كلامك .... فهمتو مزيان كون هاني .. وبصح واقلة عندك الحق .... غايكون تقلق الى كان عايق بيا !! فففف حتى انا كدوبي كانو مفروشين بزااااف .... ( شافت فيه ) الا قلت ليه انا شكون ؟ مغايمشيش ويخليني
اسد : ( طول فيها الشوفة ) تعلقتي بيه كاع قد هاكا ؟
قسم : ( هبطات راسها وحركاتو بآه )
اسد : باغاه اقسم
قسم : باغاه ابابا
اسد : مرتاحة معاه
قسم : مرتاحة ابابا
اسد : غاتكوني فرحانة معاه
قسم : ( بضحكة و دموع كايهبطو ) غانكون بزاااااف فرحانة ابابا
اسد : ( تنهد كايدوز يدو على وجهو ) منين خرج ليا هدا منين ....
قسم : هههه تانا معرفتوش منين خرج .. يمكن هدا هو لي كنت كنقلب عليه 28 عام هادي لقيتو ...
اسد : دابا حبسي عليا هاد الهضرة الخاوية .. مكاين لا لقيتو لا والو ... ماتبقايش تعلقي بزاف ونتي مزال مامستقراش .. تصرفي شوية بعقلانية وبلا عااااطفة .... اول حاجة غادي ديري قولي ليه شكون نتي ... واخا هو راه عارفك .. ولكن ريحيه .. تيقيني .. تيقي باباك الى قاليك بلي راااه كاايتمنى نهار لي تصااارحيه وتقولي ليه اش كاين ومطوليش فكدوبك ... هكا بحالا كتوضحي ليه طريقكم ... وغايعرف اش يدير ...منبعد مايعرفك نتي شكون ... غاتجيبيه ليا ... .هاد الولد انا بغيت نجلس معاه ( قسم وسعات عينيها بغات تهضر قاطعها ) شششش ......ماشي ضاحك ليك غتقولي بابا كاوري فعقلو نوض ندير اش بغيت .... آطوووونسيون اقسم .... راه عيني عليك
قسم : ( تحرجات ) بابا .. ا ا اش كتقول
اسد : انا هضرت .... هاد الولد بغيتو يجي لداركم .. وبغيت نمشي لدارهم .. بغيت هاد الفوارق يتوضحو ......
قسم : بابا ... نتا معندكش مشكل ياك !
اسد : اشمن مشكل
قسم : انو غير شاب على قد حالو .. فقير زعما
اسد : قسم .... اجي ابنتي نفهمك اشنو هو بنادم غني ... وشنو هو بنادم فقير ... واقلة مزال مكتعرفيش الفرق .....
قسم : ( دارت يدها على حنكها ) كنننسمع ليك ابابا
اسد : كاين جوج انواع ديال الناس ... واحد فقير و واحد غني ... المعنى النمطي ديالها راكي عارفاه ولكن المعنى الحقيقي هو لي ماعارفاهش .. ممكن يكون واحد عندو بزاف دالفلوس وفقير .. وممكن واحد يكون ماعندو والو ولكن لباس عليه .... انا ابنتي كنفضل واحد يكون ماعندو وااالو ولكن عندو دماااغ وعندو طموح و عندو كفاح انه يوصل ....على واحد عندو بزاف دالفلوس ومعارف مايدير بيهم والو ومعارفش يستغلهم ويطور منهم ..... مدامو كيخدم على راسو .. مدامو عمرو وقف على شي حد .. مدامو قادر يحط راسو قدام ااموت ومايمدش يديه .... راه انا كنحسبو من الناس الاغنياء ...لانو موفر لراسو العيش الكرييييم ... والعيش الكريم هذاك هو الغنى ابنتي ....الغنى هو تكون عندك كراااامة ودماغ خداااام باااغي يتطور .... وباغي يوصل .... اما الفلوس كتسالا ابنتي يقدر فاي لحظة واحد عندو الفلوس ميبقاوش عندو ... ايه الفلوس او العملة هوما الثراء ... ولكن ماحددش واش هاد الفلوس يكونو فجيبك ولا فدماغك ! ..... الشخص الفقير هو لي كايتسنى لي يصرف عليه ومداير حتى حاجة فحياتو .. وفلوسو ماشي من عرق كتافو ... والشخص الغني هو لي كايحط راسو على المخدة ويطراسي مستقبلو .. الى حطيتي قدامي جود وهاد السيد ... غايبان جود هو لي ماعندوش .. حيت الى طلتو نهار بلا فلوس مغايلقى مياكل مغايعرفش منين جيبها عكس داك السيد ....للفقر هو المال و الثراء هو طرق اكتساب تطوير المال ...... فهمتي شنو هو الفقر وشنو هو الثراء !
قسم : ( طولات فيه الشووفة مفتخرة بأب بحال هذا وتبسمات وخرجاتها من قلبها ) كنبغييييك ابابا ...... كنبغييييك بزااااااف
هبطات دمعة من عينيها وقربات منو عنقاااتو بحرااااارة وتاهو طبطب على ظهرها بحنية غير حس براسو غاتبكيه هو يبعدها عليه وبدا يملح الجو
اسد : اوودي كون كنتي تبغيني كلسي حدايا .... اش دانا كاع حنا لهادشي
قسم : ههههه على أنا فين غالقى ماحسن منك ابابا ، 28 عام وانا كنقلب على واحد لقا فيه غير الرررربع منك عاد نقبل عليه .... ( ربعات يديها سكتات مدة خو كايشرب قهوتو وقالت ) بابااا .... قول ليا احساسك .... نتا كأب .. باش حسيتي ملي عرفتيني كانبغي هاد السيد .... قلبك مرتاح ابابا من جيهتو ! ..
اسد : انا اقسم عمرني تمنيت ليك شي واحد يكون خارق للعادة .. أنا بغيت ليك غير واحد كيبغيك نتي كا قسم ماشي كا قسم الاسماعيلي .... انا كون كنت من ااالآباء لي غايبغيو لبننتهم راجل يصرف عليها مزيان .. مكنتش غانقريها .. مكنتش غانبني مستقبلها .. مكنتيش غاتكوني كابيطيان .. كنت غانقوليك تسناي يجي لي يصرف عليك ....انا مباغيش لي يصرف عليك انا قاد بيك طووووول حياتي نتي وخوتك .... انا باغي واحد لي يحترمك لي يقدرك ... لي يخليك فرحانة .. لي تتبني معاه اسرة .... لي تلقايه فوقت الشدة ... لي يدعمك ... لي ينورك ماشي يطفيك ....
قسم : اذن نتا مرتاح ليه ابابا ؟
أسد : ( تنهد ماعارف مايقول ..... هي تجي عينيه على الخيط لي فيديها وتكلم ) داك الولد ابنتي واكل الدق ...
قسم : م مافممتش
اسد : كنت كنعرف باباه .. وعارف اش دارت ليهم داك المراة .....
قسم : ( وسعات عينيها وقربات لطبلة ) ححلللف؟؟؟؟؟؟؟ فييين
اسد : ملي دخلت لامارين كنت فالتدريب .... كان الراجل لي رباني الله يرحمو قال ليا لابغيت ندرب بصح ونعرف قواعد البحر ... خصني نخرج مع البحاااارة ديال بصح لي تايتقاتلو بوسائل بسيطة .... ماشي نتدرب غير عندهم
قسم : اه كيما درتي معايا دربتيني نتااا ماخليتنيش نتدرب عندهم
اسد : فوالا .. قاليا خصك تعرف البحر على حقيقتو ماشي البحر لي كيقريوك فالوراق .... داني للمرصى كان تما واحد الرايس كانت سميتو المختار الشريف .... كان واحد الراجل معقول بزاااف كان صاااحب ااواليد الله يرحمو ... وقاليه غتخلي عندك ولدي امانة يتعلم للبحر راه غايولي كابتن ان شاء الله.... رحب بياا داك السيد ابنتي واخا كان كايخلعني كان صاااارم بزاف .... ضرب ليا على كتفي بجهد تاقرب يهرسو ... كان رجل قوي فالبنية ديالو... قالييه كوون هاني .. هاهو هنا مع ولدي نحكهم مزيااااان تايعرفو شنو هو البحر ....داز الوقت كنت باقي صغير مكرهتش نرجع فحالي الانو خلعني بداك الصرامة كاملة ، ياويل يشوف كايديك النعاس فالباركو ... كان صعيييب معانا .... وكان ولدو تاهو معانا لي هو بات هاد الولد لي كتعاودي عليه دابا ... كان سميتو حسن ... كان كبير عليا شوية ولكن تاهو كان يلاه كايخرج مع باه للصيد ... المختار الشريف كنت كنحسو هو البحر ... هو المواج .. كان شرس بحاالهم قوي بحااالهم كان كايفهم للبحر .... الى خرجنا باليل وحس بينا خيفانين ... كان كايقول لينا البحر مكيحملش الخوافين .. البحر كايغرق الخوافا ... تعلمت منووو وبزاف عندو فضل كبير على شنو عليه دابا كرجل بحري ... وهو لي سماني الروكان ... حيت كانت اول حاجة كنصيدها وشبهني حتى بيه ، قال ليا الروكان هو لي حاكم البحر لتحت .. ونتا حكمو ملفوق ....
قسم :واااااو !!!!!!! جدو هااادا ..؟؟
اسد : كان معاناا داك وولدو تاهو كان كيحكر عليه بزاف .. الى شفتيه من بعيد غاتقولي هاد السيد مكيحنش فولدوو و هو راه غير تاااايحكو .... الان البحر مكيبغيش العاطفة ..تقريبا داك السيد واخا كان كبير عليا شوية كنا صحاب .... ملي ساليت تدريبي بقاات علاقتنا غادية مزيان منين كنجي كنسول فيه وهو كذالك لاني مور تريب كملت برا ... فوق منحي للمغرب ننبدا بيه .... حتى نهار عرض عليا لعرسو .... مشيت انا والواليد حضرنا ليه ولبينا الدعوة وحنا مامخبين لا شكون هما حنا لا طموبيلاتنا حيت مامآمنينش بداك الفارق .... من بعد بقيت معاه على تواصل ... حتى طلب واحد نهار يشوفني .... داك نهار كنت ديتك نتي ليكول وكان معايا جود صغير ... ديتو معايا باقي عاقل على داك النهار مريان ...تلاقينا فلوطيل عندي هو قال ليا انه مرتو هربات ... وخلات ليه بنت عندها شهراين يمكن وولدو عندو 13 عام ... هو هاد اصيل نيت ( قسم وسعات عينيها )وقالي نقلب ليه عليها حيت ماخلا فين قلب وفين سول ... قاليا الى كانت واقعة ليها شي حاجة خايبة قوولها ليا ... كانت لابااااس وعايشة مرتاحة وهي سامحة فولادها وبنت باقا كترضع ... غير قوليا مااتت حسن .... باقي عاقل كان كاااايبغي مرتو بزااااف ... وصلتو حتى لدارو بغيت نشوف داك الولاد لي سمحات فيهم ... لقيت هاد اصيل كان كايرضع ختو بالبيبرون .... عاقل كانو عينيهم زوينين بزاف .... وحاط كتوباتو حداه كان كايحفظ ... المنظر كان أزمني .. تانا اب وتخيلت لامار تمشي وتخليك ليا نتي وجود .. كيغاندير !.... كان واخا ولد صغير كان عارف شروط الضيافة وضايفنا ... جود تاهو كان صغير وخصو باش يلعب ومشا جاب ليه فاش يتلهى .... وكايلعب معاه وداير ليه خاطرو .... كانشوف لداك الولاد وهاد الولد بالذات كانقول هو براسو محتاج للحنان وكالس يعطيه لواحد اخر .... كرهت داك الام داك نهار .... كانو أزموني .....
قسم : ناااااااري ( دموع كايسيلو ) كااااع هادشي !!!! .. اوا لقيتيها !! لقيتي ماماهم ؟
اسد : قلبو عليها وقالو ليا راها كتعاطى للدعارة فشي قنت ماعرفت كنديرر نقولها ليه ... تالقيت الخبار وصلو تاهو .... موجودين موالين الخبارات .. تما ضرب عليها ضربة وحدة ... كنت قتليه ماتقولهاش لولادك وخلي نزرتهم زوينة على ماماهم ولكن الولد كان كبير .... غايكون كان فاهم اشنو تما والمجتمع مكيرحمش والحومة ديالهم كلها كانت ساقت الخبار انه خرجات الطريق ...
قسم : حشووووومة عليها والله... عليها هضر بداك طرييييقة .. فففف !!!!!!
اسد : منبعد تقطع خبارو مابقيت عرفت عليه والو كاااع ...دازت شحاااال من سنة تلهييت مع مرض جود مع مستقبلكم حتى لمؤخرا هادي واحد خمس سنين ولا ست سنين كنت تفكرتو وسولت عليه وعلى داك الولاد سمعت انه مابقاوش فداك الحومة ..... تااكتاشفت غير هاد الليام انه توفى فالصيد مدة هادي ... يعني ابنتي داك الولد لي نت معاه دابا راااه كااافح بوحدو .. وعلم الله اش داز عليه فتربية ختو بوحدو ... واااضح يخاف عليها ......ربما باقا فيه لفوبيان ديال ماماه لي تبعات داك طريق وخايف تاعلى ختو ..... ماتقدريش تحكمي
قسم : د دابا نتا كتتعرف اصيل .. يعني داكشي عللاش مرتاح ليه هاكا !!!
اسد : انا كنعرف باه وكنعرف جدو ... وكنعرف ان داك الجدع من داك الشجرة منلي كايكون النسل والاصل ثابت مكنخااافش من الولد ولا الحفيذ كيف غايكون...
قسم : ( كاتشوف لداك الخيط فيديها ) ماعرفتش شنو كانو ضروفها و لكن مكتستاهش تكون ام
اسد : ضروفها هو كان عاجبها زينها .. غرها راسها مشات لهاوية و خسرات جوج ولاد و راجل ..... هي لي خاسرة ماشي هوما ....
قسم : داكشي علاش هو هاكاك ... فشكل مكيضحكش كاع قليييييل .. كايبان معقد وهو بلعكس قلبو كبير .... ففففف على صدف ! شفتي على دنيا ابابااا !!!!
اسد : ( شافت لساعتو ) تعطلنا على الدار ....كنضن الامور توضحات .... الكدوب ممزيازش وكايخبي علينا الطريق .... غااصارحيه بشكون نتي ... وعلى ردة فعلو نتي غاتبني خطوة اخرى ... سوا غاتزيديها .. سوا غاترجعيها
قسم : ( بضحكة ) يعني نتا قااااااابل ابابا
اسد : زعما لاماقبلتش غاتسمعي ليا
قسم : لا خصوووصا من بعد شنو عاودتي ليا دابا ... تهلا ليا فخوووويا نهار جا عندو ضيف ومنبغييييهش ....
اسد : ضسرتي لا ....
يتبع...
التعليقات
لا توجد تعليقات بعد، كن أول من يعلق.