محتوى القصة
مروان كيشوف فيه كيفاش كيتغببين وحس بقلبو مكره من جيييهتو وكرهو وكره النهار لي قال عليه صاحبي وناض وقف وحسام بدا كيحاول ينوض على ركابيه كيشوف فيه شحال معصب ... و خلاه ومشا هارب بجهة الطموبيل ودمايات كيسليو من فمو على عنقو تاكيووووقف كولو موسع عينيه ملي شافو متكي ليه على الطموبيل وكيشوف فيه ...
اياد : فين غادي ! ( علا حاجبو ) حنا جايين عندك ضياف ونتا تمشي وتخلينا ! هذا هو الصواب لي فارع لينا بيه كرنا !
حسام : ( ضار براسو هو يبان ليه مروان واقف ورجع شاف فاياد ) اياد .. ا انا المشكل عندي مع جوود .. ماشي معاكم ... م مع جود .. وداك ولد عدنان
لوؤي : هلااااو !!!
حسام ضور راسو بزربة كان متكي على الباب دالزاج لي تشخشخات كيكمي معلي يدو بالتحية مع ابتسامة تاتغمضو عينيه ....
لوؤي : يمكن مسبقش لينا تعرفنا .. ولكن را سسسميتي لوؤي ...
يالاه كيشوف فيه تاكان اياد جبدو عندو من حوايجو خانقو بيييديه تابداو رجليه يعلبو فااالارض
اياد : معاااامن قلتي عندك مشكل ( مقربليه ودنو)
حسام : ( كيترررعد ). مم .. م مع . ت .. تاحد
اياد : قققلتي جوووود !!! جوود شنو كنييييتو ؟؟؟
حسام : ( كيترعد ) و و ..
اياد : ( ضربو بروووسية تاداخ ليه الرااااس ورجع ثاني مقرب لعندو ودنو ) شششنو كنيييييتو ؟؟؟؟
حسام : ( كيترعد ) ا ا اس اسماعيلي
اياد : وحنااااا؟؟؟؟؟
حسام : ا .. ( شفايفو كيترعدو ) ا اسماعيلي
اياد : يييعني معاااامن نتا عندك المشسشكل ؟؟؟؟؟ ( حسام غير كيترعد وهو غوت عليه تاغمض عينيه ) معااااااامن
حسام : ( بزربة بالغوات ) م م عاكم ... معاااكم
اياد لاحو من يدييه دغيا تاجا فالارض على راسو لي حس بيه تقسم ليه ولوؤي كيبتسم كيتنغنم الكارو وكيحس بقلبو كيبرد شوية بشوية واياد شاف فييه بتساؤل
اياد : علاش ؟ شنو درناليييييك ؟؟؟؟؟؟
حسام بقى يشوف فدوك الكارد شافهم ماتحركوش مافهم والو ومشى كاييييزحف هربان للعدم .... تاحس بشي قبضة قوووية بزربة جرراتووو من العنق دالبينوار مجرجرو فالارض غادي بيه للداخل ديال فيلااااا وهو جسمووو كايتكرط مع داك الزااااج لي مهرس فالارض وبدا يغوووت بججهد
حسام : زز .. زز ااا .. زااااااج .. زاااااج
لوؤي مامسوقش لغواتو مجرجرو فالارض على داك الزاج والدمايات كيسيلو ودافيد كيشوف ومروان واياد داخلين ....لاحو وسط داك الصااالون وهو كولوو كاااينهج والقوة مشات ليه بالخلعة والعصا و الروسية ديال اياد لي دوخاتو ... وعلا عينيه بشوية كيشوفو فوق الفوتوووي كيشرب قهوة لي جابت ليه الخادمة مستمتع .... كان حسابلو غيكون جود لي باقي مظنش الى جود ماجاش! ... وهو يوقف سلطان وحط داك القهوة ومشا بجيهتو وهو دايخ فالارض ... علا ىاسو بشوية وشاد بيديه فالارض باغي يتكعد ... وسلطان علا سروالو بيديه وتحنى لمستواه حاط مرفقو على ركبتو المثنية ....
سلطان : داك نهار متلاقيناش وبقا فيا الحال ( كيضربو بسقلات خفاف لوجهو ) فرحت لي تشاوفنا ... واخا معجباتنيش قهوتكم ....
وقف وحسام كيشوف معاه تاكان ضربو بركككلة بقووووة تامشا كولو كااايتزززحت وتضرب فالحيييييط بببقوة ... ورجع شاف فلوؤي
سلطان : گوول ولا مااشي گول يا سيدي الحكم !!!!
لؤي : ( حيد كارو من فمو معوج شفتو ) مطلوب الاعادة للتأكد !!!
سلطان عوج راسو ومشا جبدو وهو عضامو كاع مدكدكين باغي يفلت تاكان ثاني هبط عليه برككلة اخرى تاتلتخ فالحيط بدماياتو وضار عند لوؤي
سلطان : واااااضح سيدي الحكم !!!!!
داك دافيد كيحك فلحيتو تيشوف فيهم باقي كيحاول يستوعب ان هادو ماشي مافيا !! وغير اشخاص عاديين تابعين للبروتوكول البريطاني ! منين جابو هاد القساوة كاملة ! معارفش على الاسماعيليين قلبهم كيولي حجرة الى تقاس دمهم ! واياد جبدو بسرعة من لور قلبو على ظهرو وسطهم ....وهو عضامو كولهم كايحس بيهم كااايتسحقو ..... واليد لي كان مهرس منها كيحسها كتتقطع علييييه ...وراسو دايخ باللتيخ مع الحيط وكيعلي عينيه فمروان .....
حسام : ( كيهضر بزز ) ن نتا ماش ي راجل ... م م اشي راجل ... ل لي يديرو فصاحبك .. ه ه هادشي وو نتا كتفرج
سلطان : ( علا حجبانو وشاف مروان ) قاليك ماشي راجل ( مروان مغزف فيه وسلطان لقى ليه الحل ) حويه ..... ( مروان شاف فسلطان ) على حسابي ... حوييييه ...
لؤي : هه ! ( كيشوف فمروان ) القحبة كتقول نتا ماشي راجل فحالة وحدة ... الا محواهاش مزيان .... راه مزاااال هاد صاحبتك ماشبعات ....
مروان : ( كيقرب لعندو وحسام كيشوف فيه وصدرو كاتعلا وتحنى عندو) دابا نتاا !!! كدوي على الرجلة ! نتا !!!!!
حسام غير ساكت كيشوف بعينيه لي كيشدهم ويحلهم بدوخة هو يهزو مروان فيديه ولاحو على واحد طبلة خشبية تابعد دافيد باش مايقيسوه .... وحسام غوووت بجججججهد كيحس بظهروو تقسم على جوووج وطاح وسط من داك الخششششب ورجع تاني هزوو من حوايجو ولاحووو الارض وهو قرب يغيب على الوعي .....
مروان : يلاه وقف ... وقف وريني شكون لي راجل فينا ... وقااااف ...
حسام يلاه كيحاول ييييزحف تاكان قلبو لؤوي برجليه جا على ظهرو كايلفظ انفاسووو وكيتقطع بالحريق والجهد دالغوات مابقاش ليه وتحنى عندو وخشى ليه الكارو مكمشو ليه فموو وهو كيتحرق ويبعد راسو ولوؤي شادو ليه ...
لوؤي : اش دخلك نتا فسوق الرجال ! كون كنتي عارف فالرجلة ... كنت غااااتعرف انك كنتي مصصصاااحب مع راااجل اولد القححححبة لي مغيرضاااش تقول على ختو شيخة .. الى نتا عندك عااااااادي .. هو ماعندوش .... كنتي غتكون عارف مصااااحب مع واحد دااافع عليييك وجاتو النفس عليييك آالقحححبة ....حيت كايعرف الصحبة شنو هي ( حسام كاااييبعد رااسو ويغوت خايف وهو كايحرق ليه فشفايفو بالكارو وخشاه ليه ففمو ) كان خاصو يوريك شنووو هي الرجلة ديال بصاح هاد الليلة ولكن مشايطش عليه زززبو .... ( رجع شدو علاه وحسام كيبزق داك الكارو لي فررتتو ففمو ... وشفايفو حمرييييين وكيشوف فيه مغزف ) نتا توصل ليا ولد عمي للانعااش ؟؟؟؟؟؟ نتا تقلب ليا عائلتي ؟!!!!!
حسام : ( كيضور راسو بلا وكيهضر بزربة ولسانو محروق وهضرتو متقطعة بالالام ) لا .. م م .. م اكنتش باغي هادشي .. ا انا ... ط ط ط لقوني .. ي ياك يااا ياك .. ض ضرببتووني .. اا .. آديتكم .. و . وآديتيوني .. ص صصافي ... طلقوني
لوؤي : لا اولدي ... الفلسفة ديال العين بالعيييين قدييييييمة .. حنا كانعرفو .... ( ضربو بروسيية تاتلتخ راسو مع الارض ) الدم بالدم .....
سلت ليه داك البينوار لاحو وبقى غير ببيل سماطي بييضة وقلبو قادو مزيااان على ظهرو وهو مقادش يتحرك كيف شي سلحفاة قلبوها على ظهرها .... وشاف فيه مطوووول و دراري كايشوفو وهي كايتفكر كيفاش كان كايهضر عليها مع مروان .... وكيفاش نعت لامار بشييبخة .....وصوت جود تايقوليه بغيت دمو .. زير على سناااانو ... و هز رجلو الفوق ووضررربو لكرشوووو بضربة قوووية زاطم عليه بالكاط ديالو هو يتقياا الدم كوولووو لي فرييتووو على حوايجو ... ورجع تاني قلبو برجلييييه وعلى ليه يديه قلبببها هرررسها مغزززف عليييه و زاد ليه لثااااانية مكرهش يقققطعو طراف ومايبردش كااايخس بالعرررق كاااتصبب معاااهوزاد زطططم ليه على ظهههروووو ... ورجع ضربو بركلة مع الحيط .... وحسام مبقاش قادر حتى يتنفس كيتمنى الموووووت فهاد اللحظة تديه دغيا وتهنيه .....
و مشا بجيهتو اياد هزو من شعروووو وقلبو على ضهرو جاا متكي على الحيط وراسو معوج للتحت ودمايات كتسيل من فمو على صدرو وسلطان واقف شاد تيليفون كيشوف فيه ...
سلطان : تبسم شوية اااصاحبي لكاميرا ( حسام عينيه كيتقلبو ) ...
اياد : ( معلي ليه راسو مزير على شعروو كايبينو للكاميرا ) شششكون هي الشيييخة ؟؟!!!! ... ( لتخ ليه راسو مع الحيط ) دددوي ششششكون هي الشيخة
لؤي : ( كيهضر معاه بشوية بحالا كيعطيه الاجوبة فالامتحان مغطي على فمو ) قول انا ... قول ليه انااا اصاحبي .... انا
حسام : ( كيحس براسو كيلفض انفاسو الاخيرة وعينييه كايتقلبو ) ا .. ا انا
اياد : .... ماسمعتش ؟؟؟ هضر بجهد
حسام : ا اا اااناااا ....
اياد : شششنو غتقول لجوودد ؟
حسام : سس .. سس سمحللللي
اياد : مااااااسمعتش
حسام : س سم .. يسمح .. يسمحليا ...
اياد يلاه غيهضر هو يسمع شي صوت وشاف تحتو وطلقو من يدو وناض بزربة مخيب سيفتو كان بايل تحتو
اياد : شييييييييت ؟!!!!!
سلطان : مدرتيش ليكوش !
اياد كيبعد عاايف و سلطان طفا الفيديو ودار تيلي فجيبو لي مخدمو بمود افيون ... و لوؤي قرب عندو حيد ليه داك البيل البيضة العامرة بدم وشدها فيديه وبقا كيشوف فيه وهو كيييصارع الموت وكولو مدكدك وحسام علا عينيه بششششوية كانت اخر نظراتتووو فدافيد لي واقف كيشوف غير شوية بالضبااابة .... كيحل عييينيه وكيحاول ينطق بشفايفو وماقدش يخرج لهضرة ......
دافيد : علاش كتشوف عندي انا ! هادشي فكر فيه قبل ماتورطنا مع البروتوكول اولد القحبة ..... ناقصين حنا مشاكل .....( شاف فلوؤي ) قال لينا مخبي من شي صحاب شيكات تابعينو
لوؤي : وغا مفهمكمش مزيان اشمن نوع دالشيكات ( طل عليه كيشوف معاه وحسام مستسلم للموت ولؤي معوج شفتو ) تشهيت نقتلك ! ....
مروان : متوسخش يديك ..... (كيطلعو ويهبطو ) مايستاااهلش
دافيد : ( كيوجد سلاحو ) متححقوش احلامي ... ولكن كيعجبني نحقق احلام الناس ....
لوؤي خلف برجلو على داك البول مباغيش يزطم عليه عيفان ولاح تيشورت فجيب لي كانت باقا لور محلولة ... تسمعات طلقة درصاصة مستمتع بيها سلطان واياد مخنر فيه ... اما مروان قلب راسو لجنب مبغاش يشوف مغمض على عينيه مزير عليييهم ، موتو غارق فدماياتو وغارق وسط قدارتو !!!! هادي هي الموتة لي كيتعرضو ليها كل من تجرأ على الاسماعيليين ! منذ الازل و الى الآن !!! ....
ضار لوؤي براسو كيشوف فمروان لي عارف باش غيكون كايحس ! كيتعصبو كيتخاصمو تيقبلو دنيا ولكن كيبقى ولد دمو لي حسو مكانش مستاهل صاحب بحال هدا !! ... ونهاية بحال هادي....
بربعة بيهم حسو بقلبهم لي كان كيضرب بسررررعة بررررد وتبعث فيه واحد الهدوووء رهيييب مع داك الجثة الممدودة .... بحالا حقدهم وعصبيتهم ماتت معاها تهي !! كأن الدم لي كان كيتدفق فعروقهم هدات عاصفتو ...
غير فكرة ان بسبب واحد بحالو كان غايموت اعز ماعندهم واقرب اخ وصديق ليهم .. وفكرة ان بسبب واحد كانت غتقلب عائلتهم كاااملة وعاشو ليلة فالجحيم بالخلعة والسطريس ....ان شخص بحال هذا دخل حتى لوسط دارهم وقلل احترامو وملي مشا بكل جرأة قد يقول على السيدة لي استقبلاتو اقبح العبارات ... وهادشي فمقابل اش ؟ فمقابل شخص بعصبية قال ليه جملة لي ميكونش قاصدها حيت جود عمرو عرف مو شكون ولا اش كادير .. كتكون جملة خارجة عن غير قصد بسبب عصبية وهوما مولفين كايقولوها تالبعضياتهم .. من العدل انه فقط فساعتهم العصبية يجاوبو ببحالها ويهني بالو ! .... ميكونش الجواب بهاداك الشكل لي نزل بحال الصاعقة على عائلة كلها بصغيرها وكبيرها وكولشي تآذى !!! ... كيحسو ان شخص بحال هذا الا بقى بدون عقاب غايزيد يتمادى ويصغر بعائلتهم ! .. غير فكرة ان شخص بحال هذا حي يرزق كانت كتخليييهم بييحماقو ... هادي نفسها الافكار لي كانت كتجول فدماغهم كاملين من الرجال حتى لاولاد .... ماعندهم تاحد من غير بعضياتهم ... والا تقاس واحد فيهم .. مستعدين يعلنو الفناء !
اسد غير وصلو خبار انه مات برصاص العصابة رجع لور مغمض عينيه مهبط الكاسك لي كان على وذنيه لعنقو وكيحس بلي دابا عاد فعلا غتشرق عندو الشمس ! نفس الحال لعدنان وسفيان ويونس .... عاد قدرو يخرجو النفس ويطمنو ان ولادهم غيرجعو بدون مايكونو قتالين وبدون مايكونو كيحطو راسهم فالمشاكيل .....
ركب لوؤي فالطموبيل وزاد سلطان تاهو ركب حداه .. واياد بقا يشوف فمروان لي واقف مزير على قبضة يديه وعييينيييه حوومر كيشوف فيه ودم مزال كيتدفق من فمو وكيحس بقلبو كيتعصر بمجرد فكرة ان صاحبو حسام مابقاش ! ... هو يجرو اياد وركبو لور وبقاو فطموبيل كيتسناو ينظفو ليهم الزاج لي مهرس لور باش مايتقب الروايض .. و لوؤي جبد دفتر شيكات كتبو ومدو ل دافيد لي قرب ليه للسرجم .. ودافيد شدو عليه قراه وشاف فيه مستفهم ..
لوؤي : خلاص هادشي لي هرسناه .....
دافيد بانت على شفتو ضحكة فيها من الاستهزاء وفيها من الاستغراب وطوا داك الشيك
دافيد : نقبلو ... عربون معرفة جديدة ( دارو فجيبو لور وشاف فيهم ) متفكروش دخلو لمافيا ؟ .... مستقبلكم بعيييييد ... ( كيضور عينو عليهم ) المافيا كتبغي رجال لي بلا قلب
لوؤي : ( كيشوف فيه وبانت تبسيمة على جنب شفايفو باستهزاء ) وشكون قاليك حنا بلا قلب !
دافيد : هه !!!! راه شفت كولشي بعيني !
لوؤي : كون مكانش عندنا القلب ماتلقاناش هنا ..... حنا ماشي مافيا .. ولكن نهار يتقاس واحد منا ....عاد كنوليو مافيا .... ( ديمارا الطموبيل ملي شاف حيدو ليه باش يدوز )
دافيد : ( فسح ليهم طريق يخرجو ) كانت زيارة خفيفة ضريفة .... نتمنى تعاودوها
لوؤي : ( شاف فيه مطووولها وقال وهو متأكد ) مانردهاش فوجهك ....
غمزو باش يبقى عاقل على وجهو ورجع مارشاريار خرج من تما ودافيد داير يدو فجيابو متبعهم بعينيه .. رجال المافيا من ديما كيكونو معجبين بالناس لي كيكونو غراب ! ....
خرجات الجيب ديال لوؤي من اسوار داك الفيلا باتجاه الطريق الغابوي ودافيد كيعلم البوس ديالهم بان المهمة سالات ..... غاديين فالطريق والصصصصمت فالطموبيل بسبب انه كيشوفو مروان ماشي هو هاداك .... هو ينطق لوؤي مكسر داك الصمت ...
لوؤي : ( كيشوف فيه من المرايا ) كنت جاي وناوي نقتلوو ... وحتى كاع كون مقالش عمي داك الهضرة وحتى كاع كون مكانتش هاد المافيا ... ماكنتش غانديرها امروان .... وتاحد فينا مكان غايديرها .... ( مروان غير ساكت ) كنا معصبين اه ... مكرهناش نكرهوه فنهار لي تزاد فيه ... مكرهناش نوريوه كنية الاسماعيلي لي استصغرها شحال كبيرة عليه .... ولكن مكناش غانبغيو نشوفوك هاكا .. ومكناش غنقلتوه .... .
مروان : ( تنهد ) هاديك هي الموتة لي يستحق ... ( بعد صمت ) كان صاحبي .... بعييوبو كان صاحبي ... واخا كنت نشوف عليه شحال من حاجة ماهياش .. راه صاحبي .... منفوتوش ... ( كيشوف فزاج وكيهضر) منقدرش نعايرو بداكشي لي فيه ... وقف معاياا .. تربى معاياا .. واخا كنت عارف هادي هي الموتة لي غيموت بيها شي نهار الا بقا تابع هاد العالم دالشبهات والعمليات الغير قانونية .. وبيع الاعضاء ... و شيكات لي على ظهرو ....
اياد : وهادشي كامل عارفو عليه .... وكتقول عليه صاحبي ! واش طايح على راسك نتا ..
مروان : صاحبك بغيه بكاع داكشي لي فيه ولا بعد عليه ..
سلطان : لا اشريف لا .... صاحبك العوج ماقلناش ليك لوحو .. ولكن سرحو ! هاكا كبرونا حنا .... صاحبي كنشوفو غادي للهاوية ماندافعش ليه ونزوق ليه طريق ونمجد فيه .. وانا عارفو اش كايدير .... نجرو منها واخا نعرف بالعصا والقرطاس .... لاكان صاحبك دبصح جبدو من تما .... ماشي زوقها ليه ....
مروان : ( تنهد ) تاحد ما مسرح اسلطان .... كلنا عندنا عيوب .. الى ماتقبلناش الناس بعيوبهم .. كيغايديرو يتقبلونا ! بحالا انا ملاك !
سلطان : العيوب الصغار .. ماشي هاد الكوارث العضمى !!!! هاداك ماشي صاحبك ... هدا راه خلا دار بوك ! قحبة خلاها لوؤي
لوؤي : اذكروا امواتكم بيخير يا هاد الولد
سلطان : ( ضار كايشوف فيه وكايرمش صدمو ) دااااخلنا عليك بالله !!!!!!!!
مروان غير تنهد ... وهوما رجعو لصمتهم ولوؤي صايك بهدوء ... الطريق كلها تاخرجو للطريق الرئيسي ومشاو لداك السطاسيون دالكازوال لي انطالقو منها وحبس لوؤي الطموبيل ورجع راسو لور مغمض عينيه كيحسو بالعياء كيرجع معاهم .... ومروان طلع يديه نصل التيشورت ديالو وهاديك جيلي حطها على الكوسان وحط السلاح ورجع لبس التيشورت ديالو واياد كيشوف معاه .. قال ممكن يكون بغا ينزل للحمامات ...
نزل من الطموبيل كيقاد سروالو وكيرجع شعرو لور .. ومشا باتجاه الزاج دلوؤي لي طلع فيه تاهو عينيه ..
مروان : غير سيرو .. غادي نبقى مزال هنا ....
لوؤي : ( تكعد من علا الكوسان شد الفولون مقاد الجلسة كيشوف فيه ) علاش !
مروان : غنتكلف بجنازتو .....
لوؤي ضار شاف فسلطان وفاياد لي فالمرايا لي وما ليه يخليه على خاطروو وشاف فيه
مروان : غير سيرو ....ماتقول ليهم والو ... انا غنطلب جثتو منهم ونتكلف بيه .. بلا متشوفو مو فداك الحالة ....
سلطان : مغيسولوش عليه ؟
مروان : غانمشي نشرح ليها .... انا هنا غنكتلف ... غير سيرو
لوؤي : ( طول فيه الشوفة ) هادشي غيريحك ؟
مروان حرك راسو بالايجاب ولوؤي تنهد
لؤوي : دير لي يرييحك ....
خلاهم مروان ودار يديه فجيابو وزاد ولوؤي متبعو بعينيه وسلطان حس براسو بحالا ندم على اش كان قال ليه ومحملش راسو علاش ماعذروش .. هو يخرج وخبط عليهم الباب ولوؤي جابليه الضحكة .. سلطان من ديما مكيبغيش يعتارف لراسو انه حنين .... وخرج دخل لسطاسيون واياد مرجع راسو لور كيحاول ينعس مربع يديه ... ولوؤي خرج من الطموبيل وطل على اياد من زاج ..
لوؤي : تشرب قهوة !
اياد وما غير ب"لا" مغمض عينيه ولوؤي دخل لسطاسيون خدا قهووة وخرج لبرا كيرتشف منها تالحق عليه سلطان كيقاد سمطة ديال سروالو مدليه طاس ديالو ووقفو كيرتاحو ...... هو يبدا يصوني تيلي عند لوؤي بآذان الفجر ...
سلطان : ( شاف لسما لي بدات تزراق ) الفجر هذا ..
لوؤي : قلتها ليك ملي كنا فالطيارة ... قلت ليك راه قبل مايطلع الفجر خاصنا نكونو قضينا غراض...
سلطان : نمشيو نصليو !
لوؤي : ( شاف فيه مطوووول كيرمش ورجع تنهد وشاف قدامو ) باش من وجه دابا نتا غتقول يا ايها الكافرون ؟
سلطان : ( حلا حجبانو كيشربه من قهوتو ) مالي انا لي قتلتو ! ( حط القهوة على واحد الحبط ) نمشي نصلي وندعي معاه ....
خلاه ومشا بجهة الحمامات ولوؤي تبعو بعينيه وكيضور فراسو فلخر هز تيليفونو الشخصي وبقى مدة كيشوف فيه هو يحيد ليه المود آفيون وصغر عينيه مبعدوو بحال شي قنبلة غاتنفجر ...
تاشوية بداو كيدخلو الميساجات مندفعيييين واحد ورا لاخر وهو شادو فيدو كيتسناهم يهداو .. داخلين بحال شي جيييش .... وهو حال عينيه بغمزة كيشوف فيهم .. تاهذا ليه تيليفون بششششوية عليه .... عاد مسحهم دقة وحدة من نوتيفيكاسيون ودخل نيشان ليزابيل ... وبرك على نمرة فيها " lion " ودارو فوذنيه تاسمع صوتو
اسد : بردتو ؟
لوؤي : ( كيحك فوق حاجبو مدة عاد نطق ) الواليد معصب ؟
اسد : ( ضور راسو لعند عدنان لي جالس حداه فالطموبيل ضور راسو لزاج ملي سمعو و بدا يتحلف عليه ) حتى تجي ... وسولو
لوؤي : ( كيحك فلحيتو) غنجيو دابا ....
قطع تيلي ودارو فجيب و مشا لجيهة لكافي لب جاب منها قهوة .... وجبد الكارط باش يخلص مدها ليه باش يدوز لسوبر ماركت يجيب ماياكلو ويشدو طريق للمطار .... هو يتم جاي عندو الموظف
الموظف : سيدي .... لاكارط ماخداماش !
لؤي : ( علا حاجبو ) كيفاش ماخداماش !
الموظف : ماخداماش اسيدي .. تخلص اسپيس !
لوؤي بقى غير كيرمش و حل بزطامو جبد كارتة اخرى مدها ليه .... وبقى كيتسناه ونفس شي جاوبو غير باماءة كتعني لا .. وبدا يجبدهم كاملين وعينيه كيزيدو يتوسعو مع كل مرة كايقول ليه لا !!!!!! ...
الموظف : ماخدامينش اسيدي !
لؤي بقى غير كيرمش وراسو سخن عليه ... هو يتفكر بلي باقي شوية ديال الفلوس كاش عند سلطان حيت صرفو الفلوس لي قطعو بيهم البيي ولي تقضاو بيهم ماياكلو فاش وصلو لفرسنا باش مايخدموش الكارطة .... وبدا يصوني عليه فالتيليفون كان مكيجاوبش عرفو تايصلي وبقى مدة كيتسناه وداك الموظف كيشوف فيه ... وهو مفاهمش كاع ! مزال كايستوعب ....كاياعض فيديه بالفقصة لي عمرو فكر يخرج كارطة لارباح حسابو الفيديرالي ... تاجا سلطان ....
سلطان : امالك على داك ليزابيل كاملين خلعتينا اصاحبي !
لوؤي : عطيني لاكارط ديالك اسلطان !
سلطان : علاش ( كيسولو وكيمد يدو لجيبو لور يجبد بزطامو مدها ليه ) اش واقع
لؤوي : شوف هادي ( داك الموظف هزها ومشا دوزها وهو يعلي راسو فيهم بمعنى " ماخداماش ")
سلطان : اش واقع !!!!
لوؤي خلاه تما وخرج بزربة باتجاه اياد حل عليه الباب واياد حل عينيه
لوؤي : عطيني لاكارط ديالك
اياد : علاش !
لوؤي : غير عطيني
اياد خرج من الطموبيل ومدها ليه وبقى كيشوف فيهم مفاهمش ولوؤي رجع لريسطو بزربة ... و وعطاها ليه ... وتاني نفس المشكل تاهيا ماخداماش !!!!
لوؤي : no f*ucking way !!!!!!!!!!
اياد : ( جا موراهم ) اش واااقع !
لوؤي : ( شاف فيهم وقالها وهو مستسلم ) ختارو لينا فرنسا هاد المرة ....
اياد : كيفاش !
لوؤي : نتنفاو فيها ....
سلطان : ( معلي حجبانو وموسع عينيه كيفهم ) شييييييييت !!!!!!!!
عند اسد ...
وصّل عدنان حدا باب دارو حيت هو اللخر لي بقى .. ولي باين فيه شحال عيان وشحال معععصب ومفقوص .... نفس شي كانو خوتو تاهوما .... طريق كلها هوما غير ساكتين .. كيحسو بلي محتاجين عماين ديال الراحة يلاه يرتاحو من هاد المصيبة لي دازت عليهم ...
اسد : عدنان ( كان نازل وضار عندو ) دازت اعدنان . . دازت ...
عدنان تنهد واشار ليه بالايجاب ونزل بشوية وهي تبان رتاج خرجات تالبرا تتلاقاه بقوة ماقلبها كان غيسكت ومقداتش تنعس خصها تتيجي يطمنها .... وعنقها عندو ودخلو
واسد كمل طريقو لدارو تاشاف فطابلو " My third son " " ابني الثالث" ، هو ببتسم بشوية وجاوبو ..
اسد : نسيتي شي حاجة مزال ماقلتيهاش !
لوؤي : ( واقف حدا داك كونطوار هو ودراري كيشوف فيهم وحاول ينطق بزعامة كايمشي ويجي ) ا .. ع ...عمي اسد ..... والله منعااااااودو .... غااا هادي غاهاااادي ......
اسد : لا غا عاودو .... علاش انا حيدت ليكم شي حاجة ؟ عاودووو الا مزال باقي ليكم شي جهد لي يعاود .....
سلطان : ( تدخل فالحديث ) هانتا .. هانتا اعمي .. غير هاااادي ... دوز لينا غير هادي ... راه عندي ماتش نهار 11 فشهر اعمي ...
لوؤي : ااااه اعمي عندوووو ماتش ضرووووري راك عاااارف ... حنا ماشي ماشي مشكل ولكن سلطان را عندو مااااتش
اسد : ياك النادي كايسيفط ليه طيارة .... !!!
لوؤي : وحناااا ؟؟؟؟
اسد : ونتا علاش ؟ تتهز ليه التييفو ؟
سلطان : ورااه غا تداااريب اعمي مغايسيفطوهاش ....
اسد : ااااه ! ... واسير على رجليك .... يلاه تلحق ....
سلكان عض يدو وبعد كااايغزل بالفقصة ولوؤي حط تيل بالسبيكر غلى الكونطوار وكايمشي ويجي هو يقرب اياد
اياد : عمي .... راه ماعندناش كينديرو نجيو .... خمسين اورو لي بقات عند سلطان غنخلصو منها كازوال وقهوة ....
اسد : واشتي لي مكيجمعش لدواير زمان ....
لوؤي : ( كيحسو براسهم غيحمقهم ) واااعمي ااااعمي ... والله منعاااااااودو .... هانتا .. ماتطلقش الكارطات .... صيفط لينا غير طيارة يلاه !
اسد : مال فرنسا ماعجباتكمش ؟ دغيا قنطتو فيها
سلطان : ( كيضو ويرد شعرو لور ) انا غنحمااااق .... ( قرب لتيل ) اعمي العزيييييييز ... اعمي خلي يفوت الماتش ونفينا تا فمدغشقر ينعل لي يدوي .....
اسد : دابا انا علاش محفين ليا راسي مفهمتش ؟ شنو المطلوب مني !
لؤي : صيفط لينا غير الطيارة اعمي .. لااااجااات على خاطرك زعما
سلطان : ( قرب بزربة ) وتا الى مجاتش شوف كيييدير ليها تجي الله يييطول ليك فعمر مولات الشي اعمي .. الله يشااافي جووود ...
اياد : سيفطلنا طيارة نرجعو اعمي يهديك الله
اسد : علاش انا لي ديتكم لتما ؟ .... كون ديتكم انا كون رجعتكم .....
سلطان : ( كايحس براسو غاينتف شعرو ) واااااعمي .. و اااااعمي
اسد : ملي كنتو كتصرفو الفلوس ايسپيس كنتو تصرفو تا فلوس الرجعة .... ولا غتلقاو مشكل غير فالمشية الرررجعة زعما قلتو راه مضمونة ؟؟؟؟
لوؤي : ياك قلتي لينا غير ماطيحش الروح ...
اسد : إي آلوغ ! " ومنبعد "
لوؤي : كيفاش الوغ ؟ ( حبد تيشورت ديالو ) واااغنحمااااااق انا .... ياك قلتي ليا لا طيحتي روح مادخلش لداري .. وراه مطيحتهاش برررب تاهوما لي قققتلوه
اسد : وعلاش دابا انا قلت ليك مادخلش لداري ... دخل .. اجي ليها ..... شكون حيدها ليك
لوؤي : ( جاتو البكية كيضور بالفقصة وكيعععض فحوايجو ) واااعمي... وكييييييييغاندير نجي ليها اعمي ... غاااانركب على بساااط الريح ؟؟؟؟
اسد : انا قلت ليكم طيحو روح مادخلوش لداري .... ماطيحتوهاش اجيو مرحبا بيكم .. غا هو شوفو كيف ديرو تاتجيو .. هاداك شغلكم ....
لوؤي شاف فسلطان بمعنى غااااننتااحررر انا وسلطان كيمشي ويجي
اسد : يلاه .. سيرو رتاحو ولا ديرو كازوال .. ولا سيرو قلبو على شي خدمة جمعو بيها فلوس طيارة واجيو ....
قطع عليهم التيليفون ولؤوي شاف فاياد لي غايموت بالاعصاب ودار قبضة يدو ففمو عاض عليها وسلطان كايمشي ويجي وحبد كارو يلاه غايشعلو هو يحيدو ليه لؤي
لوؤي : طططلق هذا لهنا ( دارو فجيبو ) هدا ومزال غانوقفو عليه. ....( شاف فيهم ) دابا غااا بردو ... برردو ... انلقاو لحل مايمكنش نبقاو هاكا
اياد : ( تفركع فيه ) اناا باااااقي نجي لمغرررب نشوف كمااامركم ؟؟؟؟؟ انا باااقي نجي لمغررب ( بدا كيضور وكولو كيغزل بالفقصة ورجع دار عنهم ) رررربع سنييين وانا مممهني كرررررري ... منهار جيت انا فالكواريييث الكحلة معاااااكم ... توووحشت غاااا ننعس ..... ( كايحسب ليه بصبعانو مغدد ) وصلت ل ايف بي اي مااقلت والو .. دخلتي بيا فحيييط كون مانزلت راسي كون وجهي تعاودات لي فصالة ... ماااقلت والو شربت قهوة عند المافيا تااااهي ماقلت والو ... ( ضررب لوؤي بركلة تاااعواج شاد على ركبتو مقسح ) توووصلوني اولاد القحااااب للمزييييييرية ؟؟؟؟؟؟ الميييييزرية ؟؟؟؟؟ نتناوب على گااااااروو ...
سلطان : ( بقى شحال كايشوف قدامو كايفكر ورجع شاف فلؤي ) داك صاحبك ميبغيش يسلفنا !
اياد : ( سمع يسلفنا وووسع عينيه حس بالدنيا ضارت بيه وتوخرات بيه هو يخرجها بالداريجة هاد المرة شاد على راسو ) ويييلي ويلي ويلي وييلي
الصباح الموالي .....
∆قصر الاسماعيلي
جناح جود ...
محطوط صاك ديال الظهر جلدي صغير فوق السرير محلول وجود خارج من دوش غير بشورط كحل نايك وتيشورت ديالو ... هاز فيديه ليزر ديال سنانو خشاه فداك كارطابل وحل مجر هز دواه تاهو دارو تما وبدا يجمع فالكابلات ديال الكاميرا والبيسي وكاع ليكلي ديالو ... ملامحو كانو صابحين شبه منرفزين واخا كيبان الهدوء عليه .. عينيه واضح فيهم العياء وحجبانو الغلاض جامعهم ... بقى واقف شحال كيشوف مع الكارطابل كيحاول يتفكر واش نسى شي حاجة ... هو يهز معصمو كيشوف لساعة لقاها العشرة ونص .... ومشى باتجاه تيليفونو هزو .. ركب نمرة لوؤي وبدا يصوني ...
فرنسا ....
قدام واحد من الفنادق دمجموعة الروكان ... كانت طموبيل دصاحب لوؤي مركونة حدا لباب ... سلطان منزل شوية لكرسي وقالب راسو لجنب نااعس و لوؤي مربع يديه ومرجع راسو لور وتاهو ناعس و اياد لور مجبد غير نصو ورجليه فالارض و تاهو غارق فسابع نومة .... بالعيا وقلة نعاس طاحو كاو واخا فطموبيل معنكشين ... تابدا يتسمع الفيبرور ديال التيليفون فجيب ديال لوؤي ... علا حاجبو وحل عينو بغمزة من الشعا لي داخل من الزاج ، كانت الحركة ضاااايرة وطموبيلات شي نازل شي طالع .. بدا كيحاول يتوكض و يقاد جلستو كينين بحريق دعنقو لي طلع يديه شدو من لور ... وجبد تيليفون كيشوف فيه مصغر عينيه لي منفوخين بالنعاس ... حاول يحلهم مزيان هو يلقاه جود ...
لوؤي : ( بصوت بحوح ) جوود ..
جود : ( كيجمع البيسي فالكارطابل ) صباح الخير .. ناعس ؟
لوؤي : ( كيلوي فعنقو ) اممم
جود : مزال مغاتجيو ؟؟
لوؤي : ( بصوت مدعدع عامر فقصة ) فييين غنجيو فين .. خلا لينا باك فين غانجيو ولا باش نجيو ...
جود يلاه غيجاوب تحلات الباب ديال جناحو هو يشوف فاسد داخل ... دغيا قطع تيليفون باش ميشوفش الا عندو نمرة دلوؤي الثانية لي مخبيها ... واسد شافو حيد تيليفون من ودنيه لاحو فوق سرير ونزل عينيه كيسد الكارطابل ...
اسد : ( داخل بسروال رياضي وتيشورت ) صباح الخير ...
جود : ( علا راسو فيه وهز داك كارطابل لاحها على الفوطوي ) صباح نور
اسد : معامن كنتي داوي !
جود : ( حل المجر كيشوف واش نسى شي حاجة من ليكلي ديالو ) ماعقلتش .....
اسد : ( علا حاجبو ) ماشي ديما غاتصدق ليك اولدي ... ( شاف فكارطابل ورجع شاف فيه ) فين غادي ؟
جود : ماعقلتش ... ( رجع ضار وقف قدامو ) حاول معاها تصدق هاد المرة .... حيت دبصح .... ( غمض عينو مدة وحلهم فيه ) معاقلش فين كنت مقرر نمشي ....
اسد تنهد ومشا جلس على الفوطوي وهز الكارطابل ديالو وحل جيب لقدامي كيقلب تاجبد الكارتة لي كيحل بيها الكوفرات لي عندو فدريسينغات ديالو .... ولقاها خشبية عرفها دريسينغ ديال الفيلا دافران ورجعها لجيب وسد سلسلة وشاف فيه وهو كيدير رجل على رجل يتقاد فالجلسة
اسد : راك كنت غادي لافران ....
جود علا حاجبو تايتذكر راه بصح كان مقرر يمشي لافران حيت مور الاتصال دلوؤي جاب ليه الله بحالا كان نازل للجنوب ولا تغازوت ... ورجع شاف فيه ...
جود : حتى افران مزيانة ....
اسد : معامن غادي ...
جود : ( محني كيلبس سبرديلة ) بوحدي ...
اسد : وفهاد الحالة ؟
جود : ( علا راسو فيه معلي حاجبو ) مالها حالتي ؟
اسد : بحالا البارح عاد خرجناك من الانعاش لا ؟
جود : ( ضور راسو لجنب بضحكة مستهزأة بالوضع ورجع تايربط السيور ) البارح .. كان ان عاش .. واليوم راه عاش .. .راه بيخير ( علا راسو فيه كينفض يديه ) وقاد يسافر بوحدو ....
ناض جود ماشي باتجاه تيليفونو كاقلب عليه هو يوقفو صوت اسد معيط عليه ( جوود ! ) ..وقف وضار موراه هو يلقى اسد واقف وداير يديه فجياب سروال دسيرفيت .....
اسد : فين كاين المشكل تاني هاد الصباح مم!!
جود : ياك نتا لي ديما كتقول لينا ملي تكون ماكلتكم سخونة .. خليوها تاتبرد عاد كولوها ...... تانا داكشي لي كندير ملي تشوفني هاز صاكي وسط المشاكيل وباغي نسافر ....
اسد : اش كادير راني عارفو .... المشكل هو لي معارفوش ...وهو لي باغي نعرف .....
جود نزل عينيه مدة ساكت واسد كيتسناه وهو يعليهم فيه حمرين
جود : المشكل آلواليد ..... هو مكرهتش كون كنت كنسى دوك الحوايج الكبار كيفما كنسى الحوايج الصغار .... بحال فين حطيت سوارت .. فين حطيت تيليفون .. فين غادي مسافر .... فين هو الفران ددطموبيل .... ( كيشوف فعينيه مباشرة واسد رامقو بنظرتو الجدية ) علاش الحوايج لي كنبغي نساهم .. هوما لي كنبقى عاقل علييييهم مزيان ... كنفيق من النعاس ناسي اليوم شنو وشحال فشهر ولكن مفكر مزيااااان داك الحاجة لي نعست على ودها معصب .... مكنساهاش هاديك ....
اسد : ( تنهد معمق وقرب لعندو وهو حاس بيه ماشي بيخير ) حيت الحوايج الصغار ... كيدخلو غير لميموار .... اما الكبار ... كاين لي كيدخل لدماغ ... وكاين لي كيدخل للقلب .. وقلبك ودماغك ... خدامين مزيان ... الميموار لي فيها لمشكل ...
جود غمض على عينيه مدة عاض على شفتو ورجع جلس على السرير كانه لايح الجسد ديالو كيتنهد وحدة ورا لوخرا واسد عوج راسو معاه
جود : عرفتي فين كاين المشكل آلواليد ... هو ان لداخل هنا ( كيشير لراسو ) داير بحال شي مجر مرووون ... داك المجر لي تنحطو فيه الحوايج لي خسرو لينا باش نصلحوهم من بعد .... وحيت انا واحد مريض .. كنسى شنو حطيت فداك المجر .. شحال من حاجة كتخسر ليا فحياتي كنحطها تما وننساها باش نصلحها .... ونهار كنفكر نهز من تما شي حاجة باش نصلحها .. كنلقا تماااا بزااااف مزال كيتسناوني وعاد كنتفكرهم .. وعااد كنتروون .. كنكون فحاجة كنصدق مفكر كاااع داك الحوايج لوخرين ... ونتشتت ومنعرفش منين نبدا ... ( طلع راسو فيه ) كيجي مشكل واحد .. كيخليني نتفكر شحال من مشككل اخر .. كيخليني نتفكر حياتي ... .شحال معكسة .. وشحال مافييييها تاحاجة مصلوحة ... وشحال صعييييب تتصلح ....
اسد : ( طول فيه شوفة وتنهد ومشا جلس حداه كيشوف قدامو فنفس النقطة الفارغة لي كيشوف فيها جود وهو كيهضر وكيحس بالغصة فحلقو ) ومن هاد الحوايج .... كاينة موناكو ...
جود : على ااالاقل ملي كنت نفيق فصباح وانا معارفش مشاكيلي من نبداهم ... وباغي نهرب منهم ... كنهرب ليها .. دابا كنحس براسي بحالا معنديش فين نهرب .. وحتى داك البلايص لي كنهرب ليهم .... مكينفعوني فوالو .. ماشي بحال موناكو ... موناكو كنت كنمشي نتولد فيها من جديد ونجي .... كانت واحد من الاحلام .... لي عمررهم غيتحققو ...
اسد : هادشي كيعني كاينين احلام اخرين من غير الرييس ! ( جود غير ساكت ) ملي كاينين وحدين اخرين علاش تخلي حلم واحد يضيييع كاع هادوك لوخرين ... ( ضور راسو شاف فيه ) موناكو اجود ... ماشي كل مرة غتبقى غير تعطيك حياة جديدة ... يقدر فالمرة الجاية .. تديها ليك فخطرة وحدة .... وغتولي على قبل حاجة وحدة ... خسرتي بزاف دالحوااااايج .... وبزاف دالاحلام لي فامكانك تحققهم من دابا
جود : هه ! من دابا ! ... ( ناض كيمشي ويجي ويرد شعرو لور ) كل ليلة ... كل ليلة كنبات نخطط اشنو غندير واخا عارف راسي غنصبح ناسي .... البيسي ديالي عااامر بالبروجيات ... راسي عامر بالافكار .... ولكن .. انا راه .. دبصح ..( شاف فيه ) معارفش منين نبدا .. تااالف .. تالف ومشتت ..
اسد : اول حاجة كايخصنا نديروها باش نححقو احلامنا ... ( شاف فيه جود ) هي نفيقو بعدا .... ( وقف ومشا باتجاهو واقف قدامو ) فييييق من دوك الاحلام هو اللول عاد قلب كيفاش تحققهم ... واول حاجة كنديرو من مور منكنفيقو هي كنخدمو ... كنخدمو ديال بصح .... مكاينش بروجي تعكس ونلوحو لا .... نبقى عليه حتى يكمل ... داك البيسي انا راه شايفو وشايف بروجياتك كل مرة بروجي وبروجي وتاواحد ما كااااامل .... رررتب الافكار فراسك اجود رتب حياتك .. رتب اولوياتك .... قاااااد طريقك اولدي .... عرف اش كدير وشنو باغي دير ....وعرف نتا شكووون ... ( جود كيرمش فالارض ) دوك الحجر لي حدا البحر لي ديما كتمشيو توقفو حداهم .. شفتيهم كيف متقوبين ؟ محفرين كلهم ... عرفتي شنو تقبهم هاديك راه غير الشتا ... فنضرك نتا .. الشتا كيدارت حتى تقبات الحجر .... ( جود كيشوف فيه ) غتقول ليا بالقوة .. لاااا .... تقباات الحجر .. بالتكرااااررر .... حيت دييييما كاطيح عليهم .... حتى الخدمة .... متخدمش بالقوة وتسالي جهدك .. خدم بالتكراااررر الولدي ... خدم وعاود ... خطأ وعاود ... مسح وعاود .... جات زوينة عاااود بحالها ...... وعمرك تحكم على مستقبلك من دابا .... خود عبرة غير من الانبياء ديالنا ... رعاو الغنم .. منبعد قادو الامم .... ( هز يدو دارها على وجهو تماما بحال لمسة اسد بري على الشبل ديالو ) سير خلي ماكلتك تبرد ..... وملي ترجع ..... غناكلوها مجموعين .....
جود تنهد وحرك ليه راسو بواخا وهز الصاك ديالو وبدا يقلب على تيليفونو فالمجورا والبلايص ديال شارج ... واسد تنهد ومشا هزو من فوق ناموسية ومدو ليه ... وجود نزل عينو مدة محاااااملش راسو يلاه غايشدو ليه هو يقربو عندو اسد وورك عليه تا طفا عاد مدو ليه
اسد : ودابا .... سير صفي دماغك مزيان .. هدا غايربلك وصافي ...
جود حرك راسو بالايجاب ودارو فجيبو يلاه غايمشي هو يجبدو عندو اسد وعنقو. ... كان عنااق خفيف من اسد حتى شوية هز جود يدو وحاوطو تاهو وتحول لعناااق حااااار .. خلا جود عينيه يحمااااارو واسد باس ليه راسو وتكلم
اسد : راه مكاينش ماقوا منك فهاد دنيا .. لي وسط هادشي لي واقع ليك كامل مزال واقف على رجليك وباغي تعيش اولدي .... مكاينش ما قوا منك ......
جود غمض على عينيه مدة هو يبعد عليه وبزربة عطاه بظهرو وخرج كايمسح فدموعو و اسد تاهو تنهد ومسحهم بدراعو متبعو بعينو ... فلخر كلس على سريرو و هز تيليفون من جيبو وهو كايشمر بنيفو ... ركب رقم وبدا يصوني ......
بعد ساعة
عند لامار ...
لبسات كاب حريري كحل طويييل وواسع من فوق غوب فالكرونة بلا يدين ... وهزات تليفونها وخرجات من جناحها كتعلي نظاظرها فعينيها لي معلقين فعنقها نازلة فدروج وكتشوف لتيليفون .... تاكتبان ليها رقية جالسة فصالون كتسبح وكاس داتاي قدامها وتبسمات بعياء وعينيها واضح عليهم منفوخين بالكا ومشات باتجاهها ...
لامار : ( تحنات باست ليها راسها ) ماما صباح الخير .... ( جلسات براحة باقا كتشوف لتيليفون )
رقيية : صباح الخير .... صبحتي ناعسة ماعندك خدمة
لامار : واش بقى ليا شي راس للخدمة اماما
رقية : اوا وهاد الراس ديالاش ؟ غا دالمشاكيل ؟ غا دالهم ؟
لامار : هادشي لي عطى الله
رقية : ( شافتها دارت تيلفيون فودنها ) علامن كتصوني
لامار : اسد ...فقت ملقيتوش وشكيب قاليا ماخرجش ( جاوبها ) الو .. فينك ؟
اسد : ( جلس على واحد الكرسي جلدي كيلهت ) فلاصال ( كيمسح بفوطة بيضة العرق على عنقو ) علاش ياك لاباس
لامار : والو غير بغيت نعرف ... اسد قوليا ( ردات شعرها لور كتخللو بيديها ) صافي نطلع عند جود ؟؟؟
اسد : جود را هو لي خاصو يجي عندك ماشي نتي الامار
لامار : وراه غيكون غير صابح ناعس نمشي نشوفو غير كيف بقا
اسد : مراهش فبيتو .... سافر
لامار : ( موسعة عينيها ) ششششنو ؟؟؟؟ ( رقية حطات تسبيح وشافت فيها ) كيييفاش سافررر ا اسد واش باغي تحمقني
اسد : مشا معاه الشيفور راني صيفطتو معاه .... خليه يمشي يبرد شوية راك عارفاه .... مغيتعطلش
لامار : ( حزن صوتها وعضات على شفتها ) واش لهاد الدرجة هو مقلق مني؟ لهاد رجة ياك
اسد : جود ممقلقش غير على ودك نت .....جود عامر تراكمات كتجي قطرة كتفيض ليه الكاس كامل، نت عارفاه عقلو على قد الحال .. خليه يدير فيدونج خفيف ودابا يجي عندك مرتااااااح ... واش حنا عاد غنعرفو طبعو كيداير .... فطري وسيري لبسي سيرفيت ديالك وهبطي عندي للاصااال يلااااه
لامار : ( تنهدات ) مافياش ااسد
اسد : اشنو لي فيك نت .. تبقاي جالسة كتحسبي ليا فالمشاكيل ؟ .... عندك نص ساعة لقاك قدامي نشوف داك الكريشة مالها ....
لامار : ماماالها والوووو بعد مني
اسد : لا مااالها شي حاجة هاد ليااااام بحالها عندها شي مشششكل .... نزلي هانا كنتسناك ... ( قطع )
رقية : اش قاليك
لامار : ( حطات تيلي ) جود سافر ...
رقية : كنا نقولو زمان .. ملي يقواو عليك السرابس شد الارض .. وولدك ملي كيقواو عليه السرابس كيشد الطريق ... ( رجعات تكات وشدات تسبيح ) اوا مااافييييها باس .. خليه يبدل ساعة باخرى .... يضهر ليا راه رونها مع باه لبارح .... اييييه ولييدي مسكين شحال قدو يييهز فهبال ولادو .....
لامار : ( علات حاجبها ) ولدك ؟؟؟؟؟؟ انا مكنهز والو
رقية : هاااازة ابنتي هاززة ... غا هو ولييدي لي الله يحفظو ليا .. هازك نتي وياهم .... ( ناضت وقفات ) نوضي مصارني لواو بهاد الكاس من الصباح وانا كنتسنى شكون يهبط يفطر معايا .. نووووضي ...
ناضت لامار تابعاها لطبلة ورجاء غير شافتهم ناضو بدات تعلم فالخدم يبداو يطلعو الفطور يلاه غاديين لطبلة هوما يسمعو شي حد دخل وضارو بجوج بيهم وهي تبانليهم بيلي بشورط ديال دجين قصير وديباردور بيض و جاكيت ديال دجين نازلة على كتافها وسبادرين ولابسة كاسكيط وهازة صاكادو صغير فالبينك فوق ضهرها داخلة وضاحكة ...
بيلسان : صبااااح خير
لامار : ( ابتاسمات وقربات عندها ) صباااااح نور البيلسانة ديالي ... ( عنقاتها ) كيصبحتي ؟
بيلسان : ( ضاااحكة فرحانة ) صااافاااا والله الى بيخير ... نتي لي كيف صبحتي ( طلات على جداتها لي مشات تجلس ) ججججدة .. ونت كيصبببحتي ( رقية اشارت غير براسها كتشوف لطبلة شنو كيحطو )
لامار : صبحنا لاباس احبيبتي ... اجي تفطري معانا فقنا شوية روطار اليوم
بيلسان : لا لاااا .. مزروبة ... فين جود ؟
رقية قلبات راسها بزربة ولامار ابتسمات
لامار : سافر احبيبتي
بيلسان : اا صافي مشا ؟؟؟ تتتعطططلت واقلة ....
رقية : تعطلتي؟؟؟؟ شادة المركوووب لتلات سيدي بنور ؟ فين غادا تا نت !!!
بيلسان : ( كاتجننها عارفاها مغتبغيش ) عموو اسااااد .. كتعرفي عمو اساااد ؟؟؟؟ داك لي منقدروش نقوولو ليه لا !!! .. عييييييط ليا ( هزات سمارت فون كتوريه ليها ) فتيييييليفون ... قاليا كووووود مووورنييييغ لييييتل وووولف .. مااااي صااان نيييييد يووو .. لي كتعني بلي جوووود محتاااجني .. ( رقية علات حجبانها ) عموووو اساااد لي مكتقدرييييش تقولي ليه لا .... قاااليا نمشي نساافر معاه ومنخلييييييهش بووحدو ... وباااباااا لي تاهو ماتقديش تقولي ليه لا ... خلااااااني ... حيت اكييييد جود مريض وانا الخطيبة دييييالو ( كتقولها وتعوج كتقلي ليها السم ولامار كضحك فوجات عليها ) يعني خاصني نتبعو ومنخليهش بوحدوووو ..... ( عطاتها بوسة فالهوا ورقية موسعة عينيها باغا تنوض تشتف عليها ) يلاااااه باااايباااي .. خاصني نمشي يلاه لحححق عليييييه لافرااااان .. لاافيووو گرااااني ... ( باست لامار فخدها ) لاافييييييو اججحجمل مراة عم فالدنيا .....
خلاتهم وخرجات بزربة ورقية شافت فلامار بزربة ؟
رقية : يييييفرن ؟؟؟؟؟؟ ( شافت لباب ) ودااااك النععععععجة البلقة .. تييي رجججعي لهنا .. كوني تسمعي .. اوااااخا واااخا على والدييييييك واخا ..... كتخرجي فيا بلاااالطك .... ( كتنهج بالاعصاب وتقلدها بصوتها رقيق كتعوج بيديها وعينيها ) عموو اساااااد ... خطيييييبة ديالو ( خنزرات ) نت الخطططية ديالو نت ....
لامار : ( ماشية كضحك باتجاهها ) ههههه يهديك الله اماما خليها تمشي معاه ههههه ( جلسات على الكرسي كاتشوف لشنو محطوط ) راه دبصح خاصو لي يبقى معاه .... ومغيبغي يكون معاه تاحد منغيرها هي
رقية : ( واقفة مخنزرة باقي عينيها على لباب لي خرجات منو وشافت فيها ) وعلاااش لي مايبغيش ..... كاين لي يقول لااا لحرااااام ؟؟؟؟؟؟
لامار : ولااااواه اماما هههه ... جلسي تفطري كلسي
رقية : فففطري نت .. فططري نت يااا بااردة الگلب .... ( بعدات على الطبلة كتمشي وتجي وتغزل بالفقصة ) ياويلي ياويلي على جيييييل اويلي على البراهش ولااااااو يمشيوكم كيف بغاووووو .. ( ضارت شافت فلامار كتعض فتوست ) يااانوووضي يااانووووضي يااااا المرضية لي خليت نوضي نوحدو سسسسسليلو ... نوضي نوجدو الحلوة للسبوع نوضي .... نوضي نوجدو الخرووق ..
لامار : ههههههه والله الا فوجتي عليا اماما ههههه اشمن سبوع يهديك الله راه بعقلهم
رقية : ييييييه بعقلهم ... تعقلو تا الواليدين لي مصيفطينهم بقاااو غا هووووما
لامار : ههه ودابا شنو ؟ ( ضارت عنها ) شنو نديرو .... ياك اسد لي صيفطهم .. وخلاتها هي نيت .. تقدري تقولي ليه لا ...
رقية زمات شفايفها عندها بالفقصة من قلة الحيلة وبدات تمشي وتجي وتغزل بالفقصة
الفوق ...
جناح قسم ...
واقفة قدام مرايتها كتقاد شعرها ديل حصان ... كانت بسروال بويفراند فالدجين الرمادي وتيشورت بيضة اوفر سايز فيها كتبة بالكحل وسبادرين بيضة قادات شعرها وجبدات التيليفون هزاتو على الشارج لي محطوط عليه وبدات تعض فشفتها من داخل كافكر واش تصوني عليه قبل ماتمشي عندو ولاتاتوقف عليه ....
علات عينيها لفوق .. فلخر طفات التيليفون ودارتو فجيبها لور كتحرك فشفايفها بعدم اكتراث كتقول نمشي نوقف عليه ولي ليها ليها ...
عارفاه غيكون مقلق منها خصوصا ملي حلات البواط وبانو ليها شحال دليزابيل ..... مشات باتجاه واحد المجر حلاتو جبدات الكونطاكت دطموبيل لي غتحرك فيها ، ونزلات فدروج بزربة كتشوف لسويعتها فيديها وكتحاول تفكر فهاد الوقيتة فين غيكون واش فريسطو ولا فدار اما تا المرصى عارفاه ميكمشيش ليها ...
رقية كانت باقا واقفة كتمشي وتجي غير شافتها نازلة بحالا شافت درهم الحلاااال وهي تمشي تلاقاتها للخر ديال الدروج وقسم شافتها وضحكات ...
قسم : جججدة . .صباااح الخيير ( وصلات عندها وباست ليها يديها وحنكها )
رقية : صببااااح الخيييييرات ( ضحكة واسعة خلات لامار ضور براسها كتشوف فيها باستغراب وهي شادة فيدين قسم كطلعها وتهبطها ) صبااااح السعد والررررربح ... صبااااح الوووورد لي فالجناااااين .. صباح السر لي يتشاف من لاااين تااا لااااااين .....
قسم : هههه لا واقلة بزاف عليا اجدة هههه
خلاتها ومشات باتجاه ماماها باست ليها راسها ملفوق ورقية واقفة وسط دار كتشوف فيها
رقية : تبااارك الله ونت فحرررم الله ونبي رسول الله .... غا قوليلي منين هاد زيييييين ... من الجدووود ولا من الواااليدييييين؟؟؟؟؟
قسم : ههههههه ايهااايهاي اجدة صدقتي مساهلااااااش .... ( شافت فلامار والخدامة كتخوي ليها قهوة وهي واقفة متكية على الكرسي ) باينة جدة كانو كيتعنبو عليها فزنقة وهزات النويطات
رقية : ( كفضات على دراعها ودارت يدها على خصرها مميقة فقسم ) كاااااانو ؟؟؟؟؟ باااااقين ااابنتييييي .. ( علات عينيها لسما ) باااااااقين
لامار : ( كتشرب قهوتها ) ولاواااه لاواااااه
رقيو : ومااالكي تتتلووووهي ؟؟؟ ( بتحدي) يلاه نخرجو انا ويااااك .... يلاه نخرررجو دابا وتشوفي واش ميقولولكش هادي واش ختتتك ولا مك ...
لامار : لا بنتي .... بنتي ..
رقية : قوووليها ليا ( جايا باتجاهها ) قوليلها داك نهار لي كنت انا وياك وقال ليك المعلم على هادي مك حساابتني ختك ... قوليلها
لامار : ( شافت فقسم لي ضاحكة كتشرب قهوتها واقفة ) هادشي فاش كانت عندي تسع سنين ابنتي .... كانت مشات معايا لمدرسة ....
رقية : وماالها غاا مازدت زياااانيييييت .... كييتك نتي لي شرفك الهم ..... ( وقفات كتقاد قفطانها ) امااا انا باقا ندك وندردك ..
قسم : ههههههه نموووت على الصباح لي نصبح فيه عليك اجدة ههههه ... ( حطات فنجالها وقادات الوقفة ) انا غادا اماما ... نتشاوفو ورا الغدا ... متسناونيش لغدا
رقية : تيييييي اجي فين غادا ( ضارت قسم لي كانت غادية باتجاه الباب ) تي اجي لهنا .....
قسم : شنو اجدة ؟
رقية : ( كاتقاد فورانتها ودوات بصوت منخفض بحالا خيفانة تقولها ) فييين غادا ؟
قسم : ( ردات شعرها لمور ودنيها ولامار كتفطر وضور راسها ) عندي شي شغال اجدة غنمشي نقضيهم ...
رقية : ايه جداك كتاكل الفصة ... كتنقب الزوااااان .... الشغال كتمشي ليهم بداك السروال دگاطيفة ولا دتوب ولا ديالاش هو .... وداك الصباط المقمقم وكتربطي داك زيف فعنگك .. ماشس بهاد الحوايج .... توريني انا ....
قسم : وهادوك حوايج الخدمة .. دابا عندي شغال اخرين ....
رقية : مكااااين شغااااال اليوم .. اليوم عندك جدااااااك
قسم : ( بدات كاترمش .. وضارت كاملة عندها قادات الوقفة ) هانا اجدة آممممري ...
لامار ضارت براسها كاتشوف فيهم وكتمضغ ورقية بدات دمع وهزات طرف دالزيف كتمسح بيه وتنخصص .....
رقية : البااارح .. غا الباااارح .... وگف عليا فالمناااااام ... وقااااالي .... ( انهارت كتبمي وتمسح بزيفها دموع لي مكينزلوش و نيفها وشافت فيها ) قالي بغاااا يشوووفني .... بغاني نمشي عنندووووو ( بدات تنخصص كلها )
قسم : ( علات حاجبها ) جدي ؟؟؟؟
رقية : ( وسعات عينيها وشافت فيها مخلوعة دغيا جمعات البكية) برااااا والباس عليا فمك لاحسووو كلب ....بااغيين تصيفطوووني بلا أجل باش تخوا ليكم طريق آ الي""هود
قسم : وشكووووون ؟؟؟
رقية : ( رجعات تنخصص تاني وتبكي ) السبع .. السبع ديال يفرن ...( قسم وسعات عينيها ولامار بدا تضور راسها ورجعات تاكل ) وووگف عليااااا .. وهاااكا وجهو ووومنوووووررر والبيااااض عاطي منو .... وسبحان الله حلمتو عندو اللحية ( اشارت لصدرها ) تاااا لهن ..... وقاليا ررررررقياااااااا ( قسم عوجات معاها راسها وهي كتهضر بصوت مرعب ) رقياااااااا بنت عبد سلااااام ..... زوووووريني ... انا بااغي الزياااااارة .... وقليل نية ... تخرج فيييييييييه
قسم : ( كترمش بعينيها ) السبع ؟؟؟ ... السبع ديال افران فخبارو قال هادشي ؟؟؟؟ السبع عندو اللحية وكيهضر !
رقية : وااااقولي سبحان الله
قسم : ( بنرفزة ) ا سبحااااااااااااان الله
رقية : وانا مجدوبة .. منررردش الزيارة دمواليها ...... ( كتقلب مع جنابها تالقات شال بيض كتحطو على كتافها وهزاتو كتغطي بيه كتافها ) هي دابا نيييت طريگ وحدة ليفرن .....
قسم : ( علات حجبانها بجوج ) نعاااام ؟؟؟؟؟ نعاااام نعام؟؟؟؟؟؟
رقية : واااكفة وااكفة ديني معاك ليفرن .....مالها قلت شي عيب
قسم : واكفة واكفة ؟ غانزل لكوزينة نجيب ليك كاس دالما ؟؟؟؟؟ .... راه افران .... را 290 كلمتر اجدة ....
رقية : ومااالكيي عزيتيها فيا .. ولااااا حديدكم ماتركب فيه جداكم ...
قسم : ( تنهدات وشافت فيها ) واش باغا تمشي لافران ؟
رقية : اييييييه .. مانردش زيارة دمواليها يمشيوو يعوجوني من شي قنت
قسم : غا هاكااااك ؟؟؟؟
لامار : لا ابنتي ماشي غا هاكاك .. راه سمعات خوك وبيلسان غيكونو تما وناضت فيها الحراقية ....
رقية : ( شافت فيها ) الله يمسخك شكون جبدهم ... انا باغا نشمي نحيي زيارة مع سبع ديفرن .. فين سوقي انا فداك نعجة وداك طران ديال ولدك
قسم : باغا اجدة تشري ليا مونتيف ؟ هو مشا مع خطيبتو لافران نوض انا تابعاهم ... يجري عليا من تما .. تسطيتي لا
رقية : حنا غاديين عند سبع ديفرن .. مغادييينش عند داك الضبع دخوك
قسم : اوا اجدة ملي نتي باغا ( قلداتها بصوتها ) تمشي عند سبع ديفرن .....( كتعبر بيديها مفقوصة) راه شيفور برا يوصلك تالعندو ويزيد بيك تالليمونة ديال بركان ويمشي معاك تاللعود ديال السطات ودووزي شوفي الحمامة ديال تطوان .. حيي معاهم صلة الرحم كاااااملين واجي فحالك ... اما باش تقوليلي اجدة نوض نشد طريق انا لافران دابا باش نتبع خويا لي بغا يمكن يسافر مع خطيبتو راه ميمكنش .... عندي الوجه لي كنحشم عليه
رقية : كووون كان عندكم الوجه لي تحشمو عليه كوون حجبتو البنت وسترتوهااا تايسني عليهاااا القاااعيييييط وتمشي بعزها ماشي تصيفطوها ليفرن راسها فراسو والشيطان يسگي ليهم فالما ..... ( شارت لباب بيديها ) زيييييدي گوووداااامي منعاودوش الهضرة
قسم : ( شافت عند لامار وعينيها غيبكيو ) مااااامااااااا
لامار : ( تنهدات وضارت عندها ) سير ابنتي ديري ليها خاطرها راه مغتجلسش ...سيري
قسم : يييييديها الشيفور ماما والله تاا حشومة والله ( جاتها البكية )
رقية : بزاااف عليييييك والبلغة كبييييرة علييييك قالاك رقية تمشي مع الشااايفووورر راس فراس حسابتكم بحالكم ماعندكم علاش تحشمو .. انا نحشم نركب غا انا وراجل راس فراس مالي ماعندي عز ماعندي الدار الكبيرة ؟ الصغييير دحفايدي عندو ربعطاااااش رحدييييدة ورقية تمشي مع الشااايفووور مزيان تبارك الله .....
قسم : ( كضور بالفقصة ) ياوييلي يااويللي غااتحمقني ... ( شافت فيها ) جدددة راه عندي مايدار
رقية : ياك لابسة غا سوال دجيييين ... ماشي ديال الخدمة راني نعرف حوايج الخدمة .. وحتا لاكان بصح عندك مايدار ... صووووني لداك البروالة دصافا ...قوليلها راني غادة مع جداتي نوصلها دير الزيارة مع السبع ديفرن ...... زييييدي قووودامي رالحال كيمشي وهادوك مافيهم ثييقة .... راه قالك ملي كاتجي العشية كولها كايحوز حبيبو ......
لامار : قسسم .. وصافي ديري ليها الخاطر راه مغتجلسش هانية .... سيري ديها غير تشوفوهم ورجعو .. يلاه .... وماتعصبيش جداتك ..
قسم : ( جاتها البكية ) مااااااما
لامار : قساااااام .. راه يقدر يتنسى شوية لا ؟
قسم : ( بصوت باااكي ) حررررررام عليك والله
لامار : سيري ديري الخاطر لجداك متخليهاش مفقوصة هنا .... وعندها الحق بقاو معاهم وفوجي شوية على خوك ماخصهمش يبقاو بجوج بيهم .... يلاااااه سييري ...
قسم شافت فيها وشافت فجداتها معصبة وخرجات ورقية قادات داك الشال فوق كتافها مزيان وتبعاتها كتمختر ....
فرنسا
مرجع لوؤي راسو لور كيضور تيلي فيدو وسلطان واياد باقين ناعسين .... كل مكيوشف فيهم كيحسدهم على هاد النعاس الثقيل ديالهم .... وهو لي نعاسو خف من الريشة ديما عينيه مبوقين ... وللمرة الخامسة باقي كيعاود الاتصال لجود ولكن كيعطيييه طاااافي .... بدا يتنهد ولاحو على البواط فيتيس وتكا راسو لور كيشوف فالبوابة دلوطيل ويتفكر فاش جاو ليه البارح باش يباتو فيه على اساس اوطيل ديالهم قالت ليهم الموضفة دالاستقبالات ان اسد صدر اوامرو باش حتى ولادو يوليو يخلصو ..
وهاد الاوامر ماتصدرو حتال البارح .. عرف الى عمو دار ليهم عقووبة من نوع خاص .... حرك طموبيل يقلب على الظل حيت الشمس ضاربة فيهم تاحس بسلطان حل عينيه ملي حس بطموبيل ديمارات واياد تاهو كيتحرك لور ...
لوؤي : ( كيقلب على الكارو فجييبو بيد و يد صايك بيها ) لا لا تجبدو بشششوية عليكم شنو تابعكم ..... تتتجبدو ....
سلطان : ( كيحاول يحل عينيه فالشعا وعنقو ضارو كيعوجو ) فييين غادي
لوؤي : غادي نبدل ليك الاطلااااالة .... ( شعل كارو ودارو بين سنانو وشاف فيه ) تبغي طل على الشونزيليزيه ولا على برجل ايفل ؟ ولا على الاوبيرا ! ختاااار اولد عمي ....
سلطان : ( تكا راسو على زاج كيكمل نعاسو بصوت مدعدع ) طنز على مك ...
اياد : ( شد على الكرسي وقاد جلستو باقي كيحك فعينيه ويعوج فكتافو و عنقو صابح مخنزر ) ال**لاااوي .. صوني على داك بنادم يصيفط لينااا نقودو فحالنا .....
لؤي : طافي تيليفون
اياد : ( قرب للقدام ) راااااه غاااانطفي مك الوؤي
سلطان : ( شاف فيه ) كيفاش طافي تيليفون
جاتهم الصدمة حيت كانو معولين عليه باش ملي يفيقو صباح هو لي يصوفيهم
لوؤي : صونا عليا .. يالاه هضرنا شوية هو يقطع ... قلت يمكن دخل شي واحد عليه وخليتو واحد نص ساعة ملي بديت نعاود لقيتو طافي ... ماعارفينوش هاداك مصممك تلقاه نسى كاع واش هضرت معاه
سلطان : شهاد الخرا دابا .. صوني على قسم ولا على شي واحد
لوؤي : واش دابا نتا روكان لي نافيك غيخلي شي واحد يقطع ليك لبيي ! .... ولادو راه مراقب حسابتهم ....( باركا طموبيل فواحد شارع فيه ظل وشاف فسلطان ) هبط صوني على عمي سفيان تغبن عليه ... نزل .... تغبن شوية باش تبقى فيه .....
سلطان تنهد وجبد تليفونو ونزل من طموبيل وهوما كيشوفو فيه باقيبن عينييهم مبوقيبين ولوؤي كل مرة يعوج فعنقو اما اياد رجع بلاصتو شاد على راسو لي كيحسو غيطرطق عليه خاصو يشرب قهوة ..... وسلطان بعد شوية كيحك فشعرو ورجعو لور وتيليفون على وذنو كيصوني تاجاوبو بصوت ناعس...
سفيان : الوو
سلطان : الواليد .. صباح الخير ( سمع صوتو ثقيل ) ناعس ولا ؟
سفيان : ( كيجاوبو ساد عينيه وناعس على كرشو ) ممم .. شكون معايا
سلطان : هاء ؟ رجوع الله اراجل مي .... سلطان هدا
سفيان : شكون سلطان
سلطان : كيفاش شكون سلطان ؟ السلطان مسعود .... سلطان وووولدك آلواليد
سفيان : انا ماعندي ولد .. راك غالط فنمرة اشريف ...
قطع عليه ولاح تيليفون مكمل نعاسو وسلطان موسع عينيه ...
حياة : ( سمعات الحديث ) سسسسفيان .. واش حمااااقييييييتي .. سفياااان
سفياان : ششششششششش ( كيردها بيديو تنعس ) رررجعي تنعسي
حياة : اويلي على رجعي تنعسي على انا داني نعاس بعدا باش نرجع ....وولدي مسكين مجلي ماعرفتوو شارب ماعرفتو واااكل .... يهديييك الله صيفط ليه يجي .. مغيقولك والو اسد
سفيان : ششششش .. خليه يتربا .. واخا يبغي اسد يرجعو انا ممرجعوش ...
حياة : غاانصيفطليه اناا
سفيان : غااتبعيييييه ...
لاحت عليه المخدة معصبة وناضت ... وسلطان باقي واقف فبلاصتو كيرمش ويستوعب ورجع لطموبيل مافاهم والو ولوؤي كيشوف معاه واياد تكعد
لوؤي : شنو !!
سلطان : ( شاف فيهم بعد تصديق ) نكرني .. والله تااانكرني
اياد رجع تاني نعس بالفقصة ولوؤي قلب راسو
سلطان : قاليا شكون سلطااااان ...
لوؤي : ( شاف فيه ) راه الكارثة ماشي هي نكرك .. الكارثة هي سميتك سلطان وينكرك ....سمية قد السخط بلا فايدة ... ( ضار كايشوف فزاج كايضرب فافولون بالفقصة ) شوف انا لي كايعرفو يسميوني. . منهار تزاديت وانا تابعني غاااا لوييييل .....
اياد تنهد مطوول ونزل من طموبيل ولتخ عليهم لباب تاقفزهم .....
نزل كيصوني على زيااااد ... ولوؤي وسلطان كيشوفو فيه .. عيا يصوني حتى كيقطع ليه ويعاود تاني ... ربعة دليزابيل ومبغاش يجاوب وهو ويوصلو مسج غير حلو لقا كاتب ليه بالانجليزي
" جرب تانتا تصوني وميجاوبك حد " ....
قلب ايااد راسو لججججنب كيتغدد ولؤوي بدا يضور راسو بنفي عرف الى مكاين والو .. وبدا تاني يصوني على اريج تاجاوباتو ....
اريج : ايااد ؟ اش كاين على صباح ؟
اياد : لا والو الواليدة غايبغيت تبدلو ليا الصباغة دالبيت .... كيفاش اش كاين ؟؟؟؟ باركااااو من تخريبيق .... ققططعو لينا الخرااا نجيو فحالنا راحنا مهلوكين ....
اريج : والله تااا غزااا فيييكم نلقاه نبوس ليه راااسو .... عببببر عليكم يلااه ترباااو .. باش تعلمو شنو هي تغبرو بلا خبار بلا حس ... يلاه تجلا دابا ففرنسا قلب شكون يردك ....
قطعات عليه تيليفون وهو غمض عينيه مزير عليهم ورجع لطموبيل ولتخ الباب .....
لوؤي : ( شاف فيه من مرايا ) نكروك حتى نتا ؟
اياد : هادي غا الواليدة .. علم الله الواليد ...
تنهد لوؤي وقلب راسو لزاج .... مدة صمت هو يحس بحالا شي حاجة ماهياش وضار براسو عنهم باليه كايشوفو فيه بحالا كايتسناوه تاهو ... وعلا حاجبو
لوؤي : شنو زعما ؟؟ نعييط انا ؟؟؟؟؟؟
سلطان : الى حبت خااااطرك
لوؤي : هه !!!!!! ( بدا يضور راسو بالفقصة ) انا نعيط لعدنان ؟؟؟؟؟؟ ( شاف فيهم ) .... ماحنوش فيكم حتى نتوما عاد يحن فيا انا الحفار دالجماجم تلقاه عاد تقلب لجنب لاخر فنعااس فرحاااان لي راني مجلي ....هادا راه الحلم ديالو منهار تزااااديت ....
سلطان : صوني غا لخالتي رتاج بعدا
لوؤي : مغخيليهاش كون خلاها كون صيفطات بلا مانقول ليها انا.. راها تلقاها بايتة بلا نعاس كانعرف الواليدة مسكينة ...
اياد : ( لتخ تيليفون ) تا بيلسان طافياه ....الخووووت دتاخير زمان .....
سلطان : وااااشوووووف ليااا دابا الميكانسيان .. شوووف ليا الساروت دالتسعوووود ... حنا سيفطنا لفرررانسا نجيبو ليه الدم بحال الفرامليا .... هو صبح طافي علينا التيليفوووون ....وادييير نتا فهاد دنيا الخير .... ( شاف فلوؤي ) دابا حنا مغنفطروش ؟
لوؤي : كتشوف فيا انا كنعجن المسمن ؟ لقيت مناكل انا وخبيت عليك
اياد : ( ضربو بواحد مخدة جلدية صغيرة ديال التكاية دراسو ) نتا مااادوييييييش .. نتا قطع حسسسسسك
لوؤي : تااارييييييح نضوررر نصليها معاك .. انا قلت ليك تبعني .....
سلطان : ( كيشوف لساعتو فيديه ) دابا هادي بشحال غتكون ساوية ؟
اياد : عرفتي شغادير نتا .. سير لداك ساحة لهيه ونطلقو ليك الموسيقى وشطح .. وحط قدامك داك كاسكيطة يلوحو ليك فيها الصرف .....( قلب راسو لجنب ساخط )
سلطان : دابا طاااشمة لي والدييييين هاد الاسماعيلين كاااملة مكاينش واحد فيهم ينوض يقطع لييينا نقودو فحالنا
لوؤي : داك طاشمة كاملة مگيديها عمك الروكان ... ماعندهم فين يتفنفنو .....
سلطان: واش مكاينش شي واحد فوق هاد الروكان !!
لوؤي : كاين الله ... نزل قلب على شي جامع دعي ... نتا باقي ملائكة دعاويك مقبولين .... ( ربع يديه على الفولون وتكا عليهم ) راه مابقى فيدينا غا الدعاء
∆فالقصر
جناح قدس
بلبسة مريحة فالاسود عبارة على كومبيليزون حريرية بصداف ذهبية وصوندال بلا ذهبية مع خلخال مذهب فرجليها ليسرية كي العادة ديما محافظة على انوثتها ... كتمشي وتجي بتوتر شادة تيلفونها وشعرها ضافراه لواحد جنب ضفرة مرخوفة ... .كل مرة تشوف لتيليفون مشوشة عليه وباغا تصوني ولكن خايفة يكون معاه شي واحد وتتحشم .... غير بانو ليها الميساجات ديالو دارو جوج شرطات عرفاتو شعل تيليفون ولكن خافت تصوني ويكون حداه سلطان ولا اياد ... وهي تصيفط غير ميساج كتكتبو بزربة " واش راك بوحدك ؟ " ...
عند لوؤي ...
وصلو مسج لتيليفون ودار يدو يجبدو من الجيب و كولشي شاف معاه حيت سمعو صوت دمسج .... وهو هز تيليفون غير بانتليه سميتها ابتسم بلا شعور منو ودراري كل واحد فين قلب راسو بالفقصة كيعرفو داك الضحكة معامن كادار ..... غير قراه قال بلا مايحس فراسو
لوري : حتى الى مكنت بوحدي .. غااانووولي بوحدي .... ( شاف فسلطان ) تززززل يضررربك البررررررد ... ( شاف فالمرايا ) نزل تا نتاا تجببببد برا راك تكمشتي تما ...نزل .... نزلو عليا ....
سلطان : ( شاف فيه ) هادي لي غنخرج عليها لبرااا ... قوليها دير البيااان وتقطع لينا نرجعو فحالنا ... ماتبقاش تحوي فابور ...
لوؤي : خررررج فحالك ...خرج عليا ، نتا راااك مشرووع طلاااب من داكشي رفيع ....
نزل سلطان ساخط ونزل تا اياد لي دخل لواحد القهوة وتبعو سلطان يشربو قهوة بداك الشووووووية دالفلوس لي بقاو خداو وحدة تناوبوو عليا .. ودخلو يغسلو وجههم وهو بدا يصوني ليها تاجاوبات ساعرة كلمة ورا لوخرا ....
قدس : علللى سلاااااااامة تفكرتي شي حاجة سميتها تيليفووووون ... ليل كامل وانا كنصوني والبارح نهار كامل .. ميساجاتي وصلوك ومااامحنتي راسك حتى تجاوب غييير بايييموجي ..... مامسوق لحتى شي حاجة لي يعيش يعيش ولي يموت يموت
لوؤي : ( بابتسامة توحش صوتها ) تانا توحشتك ....
قدس : ( علات عينيها وغير بمجرد النبرة لي دوا بيها الهادية وصوتو لي باقي مبحوح بنعاس حسات بوجهها سخن ) مااتبدلش الهضضضضضرة ...
لوؤي : ( ساط دخان ورجع تاني الكارو لفمو ) وماتنكريش بلي عجباتك ....
قدس : فيييينك
لوؤي : فبااريس احبي ...
قدس : واش كادير تما
لوؤي : نتي صافا ؟
قدس : دابا عاد كتسول واش نتي صافا ملي كنت كنصوني البارح كيف الهبيلة فين كنت
لوؤي : وصافي .... نجي نفهمك ... هادشي ماشي ديال التيليفون ....
قدس : هاء ! وفوقاش تجي
لوؤي : وعلى داك باك خلا ليا فيييين نجي ....
قدس : كيييييفاش ؟
لوؤي : راه حبس لينا ليكارط احبيبتي شوفي كيديري لينا راحنا انا وسلطان واياد مجليين هنايا لا ريال لا جوج فراس مالي طموبيل الغازوال ديالها قرب يهبط لزيرو
قدس : هه ؟؟؟؟؟؟ كيفاش !!!!
لوؤي : كاتشفاي؟؟؟
قدس : واش بابا حبس عليكم ليكارط ياكما حيت درتو داك الغبرة هههههههه عبر عليكم
لوؤي : والله الى كضحك ...
قدس : ههه وعلاش لي منضحكش ههههه كنتخيللللك ههه ...
لوؤي : ياااك الموصيبة كضحكي .. انا بايت فطموبيل عنقي معووووج ونت كضحكي
قدس : ههههه اوا انا نقولها ليك من دابا نهار لول يموت المش انا مانديش واحد فراس مالو طموبيل الغازوال ديالها على الزيرو .....
لوؤي : حسبييهم ... حسبيهم وحدة وحدة تانجي ونصرفوهم مزيااااان ....
قدس : ههههه وتا تلقى باش تجي ههههه
لوؤي : مضحكييش بحال هاكاك تجهلينا صباح هذا ...( كيسمعها كضحك كتر ) وشوفي كيديري تقطعي الى كتخدمي الكارطة بلا خبار باك
قدس : واخا نكون كنخدمها بلا خبارو منقطعش ليك هههههه جاتني الفرصة مرة فالعام نتشفى شوية ومنستغلهاش هههه لاااا لا احببيببي لااا ههه
لوؤي : شنو قلتي ؟؟؟؟؟ كيفاش كيفاش ؟؟؟
قدس : ماقلت والو سير بعد مني ...
قطعات عليه تيليفون وهو بقا عاض على شفتو طلعات معاه سخانة فاش قالتها ... واخا هي قالتها بعفوية كيف كتخاطب الجميع وهو خداها من منظورو العاطفي ..... ونزل من طموبيل حاس براسو هو لي خاص يطرشو البرد فهاد اللحظة ... اما قدس بدات تضحك وكدوز لابيل لفيصل ......
سلطان : اش درتي ؟ قضات لينا الغرض !!!!
لوؤي : شكون اصاحبي لي غتقضي ليك الغراض ؟.. سيد مول طموبيل هو لي صونا....
سلطان : داك تفرنيسة ماشي ديال سيد اولد عمي ...غير لاقلبتيها قطاني ....
اياد : ( كايشوف فجنب ) داك العدس كيف كتجي مع الحااار .....
سلطان : ( طول فيه الشوفة ميق وهز القهوة عطاها ليه ) شرب القهوة شرب ......
لوؤي : ( طل ليهم على كاس دالقهوة لي حاطينو على واحد حيط قصير وواقفين حداه ) فيها السكر !
سلطان : ( هزها ) رييييييح .... قهوتي هادي ....
لوؤي : ( ميق فيه ) جوووع !! دوزنا معاكم الزلط بكري ...
يالاه كيهضرو هو يوصل ميساج للوؤي ووصلهم كاملين للايمايلات ديالهم وحلو تيليفون هوما يلقاو البيي تقطعااات بسمية فيصل الاسماعيلي .... ولوؤي ضحك بجنب فمو
لوؤي : ( ورا تيليفون لاياد ) ها لمن كيقولو الخوووووت .... اتريكة كندا ....
سلطان : ( صغر عينيه ) شكون قالها لفيصل ؟ عيطتي ليه !
لوؤي : ( كيشوف تيليفون بلي بقات ساعتاين للڤول وحرك حجبانو بالايجاب ) عيطت ليه
اياد : لا اشريف .... مااباينش عليك كنتي عارف غيقطع ليك ....
لوؤي : ( شاف فيه) ياك البيي تقطعات ؟ واش دخلكم نتوما فليديطاي .... زييدو نقااااااودو ...
مشا قدامهم و سلطان هز قهوتو وتبعو وتبعهم اياد ....ولوؤي كايكتب ليها ميساج مبتسم .... { Day after day, I make sure that I have made DI BEST choice
" يوم بعد يوم اتأكد أنك أحسن اختيار " }
بعد ساعتين ونصف ....
مدينة افران ...
∆ فيلا الاسماعيلي .....
وصلات الميني كوبر ديال بيلسان داخلة بينما الابواب الخشبيين دالفيلا كيتحلو ليها وهي داخلة فوسط اشجار الارز .... تاوصلات لباركينغ وهي تبتسم ملي شافت طموبيل ديال جود تما ... ركنات من موراها ونزلات وهزات الكارطابل ديالها هازاها على كتف واحد دازت من حدا الشيفور ديال جود غمزاتو وزادت ضاحكة فرحانة لي غادوز شوية دالوقت معاه وتحيد وحشها منو لي طال 4 سنوات .... ولي من نهار رجعو بجوج وهوما غير فالمشاكيل مزال ماقدات تجلس معاه تانهار واحد يتحدثو وتعرف عقليتو كيولات ... وتحيد غير اشتياقها منو ... ويتعرف عليها تاهو مزيان ويفوتو كاع الحوايج لي كايخلقو بيناتهم سوء الفهم ....
وصلات للباب ديال الدار حلاتها ودخلات كتشوف مع الارجاء مابانش ليها ... لاحت الصاداكو ديالها وطلعات فدروج كتشم فريح الخشب لي مبنية بيه هاد الفيلا لي توحشاااااتها ....
وقفات مدة فالكولوار كتحاول تتذكر البيوت و بيتو هو فين كاين ... تفكرات بلي هو الاخير فالممر لي من الجهة اليسرى .. ومشات تبعاتو تاوصلات ليه وبدات دق ومبتسمة فرحانة ....
جود كان فالبالكون طاوي رجليه على الطابلة لي قدامو والبيسي على رجليه ولتحت كيتسمع غير صوت ديال الطيور فوق اشجار الارز والجو هااااااادي مخللو نسيم خفيييييييف .. حارو نوعا ما لان الساعة كتشير لثالثة بعد الزوال ..علا حجبانو ملي سمع الدقان ... كيقول شكون لي جا وهو مطلبش الخادمات يجيو ؟! وتالواجهة دالجردة لي كيطل عليها كانت الخلفية ماشي الامامية باش يعرف شكون جا...
باقي كيفكر وتدقات الباب للمرة تانية وهو حط البيسي وناض دخل للجناح وماشي باتجاه لباب .... غير حلو هو يعلي حجبانو بجوج ملي شافها واقفة قدامو دايرة يديها موراها ومعوجة فيه راسها ومبتاسمة ... كانت بالقصيصة الذهبية ديالها وعينيها الزرقين و عكرها الغوووز كتبان شبه دمية باااربي تمااااااما بنفس الكيوووتتنس والجمال .....والضحكة زادتها بهاء ....
بيلسان : تانضن واقلة عندك الضيااااف ...
جود : ( باستغراب ) بيييلسان ؟؟؟؟
بيلسان : اممم بيلسان ( قادات وقفتها وشافت لساعتها ) تلاتة ونص هادي وانا باقا تا مفطرت فيا الموت دجوع .. نطلب شي حاجة ؟ شنو نطلب ليك ؟؟؟؟
جود : ( حل الباب كلها كيشوف فيها ) شكون قاليك انا هنا ؟
بيلي : ( ضحكات وقربات عندو تاوقفات على صباع رجليها وضورات يديها على عنقو كتشوف فيه وهو هبط راسو لعندها ) باباك عيط ليا ... وقال ليا بلي نتا غتجي لهنا ... وماباغي يكون معاك تاحد ... ولكن هو خايف عليك حيت باقي مريض ... وقاليا نت غيبغيك تكوني معاه ..... ( عوجات راسها كتر فيه مع ابتسامة ) اش باليك ؟ زعما باباك عندو الصح ؟ نتا باغيني نكون معاك ؟ ( بغنج ) هم !!!
جود : ( تبسم بجنب شفاهو تايدوز عينو على معالم وجهها وشاف فعينيها ) لا ( بيلسان وسعات فيه عينيها ) ماعندوش الحق فمسألة ييبغيك تكوني معايا غير حيت مريض .....
بيلسان : ( كترمش فيه ) مافهمتش !
جود : الواليد بغاك تجي لهنا .. حيت انا مريض ... ولكن انا كون عيطت ليك تجي لعندي ... مكنتش غنبغيك حيت مريض ابيلسان !!! انا مامريضش انا بيخير .... ( بعد راسو بشوية حيت واضح عصباتو كلمة مريض وهي جمعات يديها كتشوف فيه )
بيلسان : ماعجبكش الحال حيت جيت !!!
جود : كان غيعجبني الحال كتر كون جيتي حيت نت الفيونصي ديالي وغتبغي نبقاو شوية بجوج ... ماشي حيت مريض ....
بيلسان : ( بقات كترمش وهي تبسم بحنية وقربات عندو وهزات يديها حطاتها على وجههو كدوز صباعها على لحيتو ) السبة كانت هي راك باقي مريض ..... ولكن الرغبة حاجة اخرى ......
جود : كون عرفتيني هنا بوحدي تجي !!! ولا خاصو تايقولها ليك !
بيلسان : هه ! واش حماقتي ؟ حبيبي واش عارف بلي حوايجي بداو يتجمعو باش نرجع لامريكا ..... واش عارف شحال انا محتاجة نجلس معاك شوية ... يمكن نتا عاد كتعرف عليا ولكن انا لا .... انا مباغاش نجلس معاك باش نتعرف عليك ... انا باغا نجلس معاك حيييت توحشتك .... حيت كتجيني الفقصة فاش كنشوف شحال وانا هنا ومزال ماااجلسنا تاشوية بووووحدنا .... لدرجة اي سبة مستعدة نديرها ... ( تبسمات ) وحتى هاد السبة ديال مرضك عجبتني .... واخااا كتبان بيخير ومامريضش .... خلي العائلة تعرف بلي نتا مريض وبيلسان مقابلاك باش متلقاش زياد ولا اياد هنا بطموبيل يرجعوني ....( تنهدات وبعدات عليه ودارت صباع يديها فجياب شورط ) وداباااا ... مغااانتغداوش !
جود : ( ضور راسو بجنب تبسم واخا عصباتو دغيا طفاتو .... ورجع شاف فيها ) علمتهم راني جاي .. غيكونو حطو شي حاجة فالكوزينة ... نزلي انا غانتبعك ...
حركات راسها بواخا بابتسامة ونزلات فدروج ولكن دغيا تجمعات داك الابتسامة وتحولات لملاح حزينة وهي كتعاود تتفكر ملامحو كيدايرين وشحال كتبان عليه مكتأب ومقلق وشحال كلمة مريض فعلا كتأثر فيه ....
تنهدات وزادت لكوزينة ... اما هو دخل لبيت هز تيشورت كحل كان محطوط على السرير لبسو حيت كان عا •ري من الفوق وداز لبيسي ديالو اونغوجيسترا الضوسي لي كان خدام عليه باش مايمشي ليه وهز تيليفونو ونزل فدروج ... اما بيلسان مشات باتجاه الكوزينة لي كاينة فطابق تحت ارضي ...حلات البيبان لي تيطلعو لجردة ولي تيدخلو منهم الخدم وعاملات التنظيف واستنشقات داك نسيييم .... و مشات بابتسامة باتجاه الثلاجة حلاتها ولقات فعلا عمروها ... بدات تقلب فليبواط حتى لقات صالاد حيت هداك هو غداها ....
حلات البواط وهي تلقى فيها كولشي لي كيعجبها ناقصها غير دير ليها الجرجير ... وضارت كتقلب عليه فثلاجة تالقاتو فبواط .. حطات على كونطوار مستطيل متوسط المطبخ كولشي اش غاتحتاج ... وتحنات على لاصالاد كتقاد فيها تاحست بيديه حاوطوها من لور وحط راسو على كتافها .... تبسمات وغمضات عينيها مزززيرة عليهم وهي كتستنشف فريحتو لي مكايناش شي حاجة فالكون كتنغمها بحالها .... وثقل راسو لي على كتافها .... مكرهاتش كون كانت عندها شي قوى خارقة توقف بيها الزمان هنا لسنوات ...
جود : ( قبلة خفيفة فعنقها هزات ليها معدتها ) درتيها زوينة ملي جيتي ....
بيلسان : ( عضات على شفتها وكتحس بلحمها كلها تبورشات حيت توحشات لمساااتووو وريحتوو وهضرتوو وبحة صوتو وقالت بصوت هااادئ ) حتى انا محتاجة هاد الوقت لي بقا ليا ندوزو معاك ...
جود : ( حيد شعرها على عنقها ردو لور وقرب لعنقها كيهضر بهمس وهي نسات كاع اش كادير ) فوقاش غتمشي .....؟
بيلسان : بابا قال فهاد سيمانة ...
جود : بوحدك ؟
بيلسان : نو .. ( كتحاول تتلهى مع اوراق الجرجير كتنقيهم وتستفهم فوق صلاد وكتهضر بزز متحكمة فراسها ماضورش عندو وتخلي صالاد لمنبعد ويكونو شفايفو هوما غداها ) انا و وسيم ..... و فيصل ...... ( تنهدات وضارت عندو بشوية وعينيها حمرين ملي كتفكر راسها غتمشي وهو حط يديه على الكونطوار ونزل راسو عندها ) غتجي عندي مرة مرة ياك ؟
جود : ( دوز يدو على وجهها حيد شعرها دارو ورا وذنيها متبعو بعينيه ) نتي غير توحشيني ... ( شاف فيها ) وغتلقايني حداك
بيلسان : ممم .. ( مهبطة شفايفها ) كيفما توحشتك شحال من مرة و مالقيتكش
جود : كنتي كتوحشي داك الاكس ديالك ... ( هبط عينيه ليديها لي شادين فالكونطوار وهز لي فيها الخاتم وقربها لفمو باسها ورجع شاف فيها ) انا مدخلنيش فيه ....
بيلسان : ههه شحال صعيبة نفرق بيناتكم ! ولكن غنحاول
جود فقط كيتسارا بعينيه على معالمها من وجهها لرقبتها الطويلة البيضاء لصدرها لي تيبان تاني شوية تحت ديباردور ... دوز لسانو على شفايفو و نفسو بدات كتبان على صدرو كيفاش كتنهج ..... ورجع شاف فيها ورغبة جامحة كتسيطر عليه يهزها ويطلع لبيتو ...
وكيرجع يغمض عييينيه كيلعن شيطان باش ميعاودش الغلطة جوج دمرات ... هو عطى وعد للعائلة وغايوفي بيه .... غايصونها ويحافظ عليها لاخر نفس ....
ورجع بعد عليها كيحك فشعرو ويحاول يتلهى بحاجة اخرى ويبعدو عليه دوك الافكار و ريحتها لي بقات عالقة فنيفو وشفايفها السيكسي لي قدام عينيه ...
جود : دابا حتى انا راك جبتي ليا جوع .... ( ضار شاف لكونطوار فداك لاصالاد ) اشنو غنتغذاو
بيلسان : ( كتشوف فالارض مبتاسمة حيت حسات بيه بدل الموضوع وضارت عندو ) هاهي قدااامك صاااالاااد ماشتيهاش
جود : ( هز فورشيت كينقب متكي على داك الكونطوار ) لا راه شفتها .... وشنو اخر !
بيلسان : هههه حبيبي هادي راه وجبة متكاملة .. الفيش " الحوت " هاهو ( كتشير ليه لقطع دتونة صغار ) الخضر .... لي فخوي سيك ..... ( هزات واحد خوخة كلاتها ) وتاليفخوي فخيش ..
جود : ( كايشوف معاها ويرمش بعينيه كايحاول يستوعب ) اه دابا نت كاااتسناي جود يتغدا ليك بهادي ؟؟؟ ( جاتو الضحكة وتقلب ضاير لثلاجة )
بيلسان : ( ضارت موراها متبعاه ) اااه .... وشنو باغي تربي لكريشة ؟؟؟؟
جود : ( كيجبد ليبواط دالحوت ) بهاديك راه مغنربي لا كرش لا كتاف لا ركابي ..... ( ضار عندها براسو ) كووولي لاصالاد كولي ....
بيلسان : ( بدات تنقب بفورشيت ) You must change your eating habits, and this will be my task with you in the future
" خاصك تبدل عاداتك الغدائية وهادي هي لي غتكون مهمتي معاك فالمستقبل" .....( بضحيكة كتنقب بفورشيت متكية على كونطوار )
جود : ( كيحيد لفيلي دحوت من ليبواط عاطيها بالظهر ) I don't think you will succeed in this ...because I am not a herbivo.
" مكنظنش غاتنجحي فهادشي ، حيت انا ماشي عاشب .... " ( ضار عندها وهي ضاحكة كتشوف فيه وطلعها وهبطها وشاف فيها بنظرة لعوبة .... ) , I am a carnivore
" انا لااااحم " ......
لاحها ليها وضار كيكمل وهي بقات على وضعيتها شادة الفورشيت ففمها ....وكتشوف لظهرو وكتعاود ليها قدام عينيها النظرة لي دار فيها وكلامو!!!!!! .... غمضات عينيها مزيرة عليهم كتحكم فاعجابها فيه .... ورجعت حلاتهم كتفرج فيه وهو كيتحرك وكيهز دوك شرائح بالملقط كيحطهم فالقلاية الهوائية ... كتشوف كتافو كيفاش كيتحركو فالخلف مع حركاتو ... وظهرو الشاسع لي منهار ارتبطت بيه وهي كتمناه فوقاش يكون سريرها ..... سرطات ريقها وهي كتفكر فراقها عليه لربع سنين وكتفكر حتى انها دابا مع شخص جديد ... حطات الفورشيت بشوية وتقدمات عندو بحركات بطيئة وحاوطات ظهرو بيديها وحطات راسها عليه .... هو حس بحركاتها وتبسم مكمل ... تاسمعها ...
بيلي : توحشتك بزاف ......
مطار الدار البيضاء
حطاتهم طيارة فمطار الدار البيضاء .... غير خرجو منو وضرب فيهم الهوا ديال كازا عاد تنفسو .... اياد كان قاج الفيست ديالو بيديه راخيها ...وسلطان داير يديه فجيابوو وتيشورت كاع تكمشات ليه .... و لوؤي باقي كيعوج فعنقووو لي تشنج ليه بالنعاس فطموبيل وجبد تيليفونو شعلو هو يبدا يصوني لفيصل لي كان وصاه على طموبيل فاش كانو فمطار باريس .... تاجاوبو ....
فيصل : نزلتو ؟ صونيت غير هادي خمسة دقايق كان طافي
لوؤي : ( كيحك فوق حاجبو عيان ) وايه .. يالاه وصلنا .... فين طموبيل ؟
فيصل : راه صيفطت دري صاحبي صايك طموبيلتي .. شوية وغيكون تما .... علاش مبغيتيش نصيفطليك شيفور ؟
لوؤي : بلا مندير ليك المشاكل مع الواليد .... بعد نتا من هادشي وماتگول لتاواحد نتا لي صيفطتي لينا .... تاحنا مغانگولوش ...
فيصل : انا را ماعنديش مشكل الوؤي .... على الواليد الا لقا خوه محبوس مغيفكوش ؟ ... انا مفخباريش اش كايديرو ... ماوصاني تاحد .. خويا مليوح ففرانسا بلا فلوس راه غانعاونو ....
لوؤي : واخا هاكاك غير خرج راسك .... راهم داروها لينا زكارة ...
فيصل : مهم راه صيطت طموبيل كيف قلتي وسيفطت معاها تا لاكارط ديالي ملي قلتي مبغيتيش تجي لدار قلت تبغيو تاكلو ولا شي حاجة .. واقلة راكم باقين بجوووع ... (كيلبس الفيست ديالو ) انا غنخرج دابا غادي لرباط نكمل دوك الامتحانات باش نوجد حوايجي ..
لوؤي : ( بحنية ) آل ذا بيست برادر ....
قطع لوؤي وشاف فجنبو لقى سلطان واياد جلسوو على واحد كرسي وكيبانو مهدوووودييين .. الناس خارجين كلهم بباكاجهم وكولشي جايين لاستقبالهم ناسهم .... وهوما بحال شي متشششردين ... جبد لوؤي كارو شعلو وبقى كيمشي ويجي حداهم تابانت ليهم طموبيل فيصل جايا عاد مشا باتجاهها وسلطان واياد تنهدو وناضو تابعينو كيحسو براسهم غير يسوط عليهم شي واحد يطيحو بقوة العياااا .... نزل صاحب فيصل وسلم عليهم وعطا الكونطاكت للوؤي والكارت ديال فيصل وتبسم ليهم ومشا .. وطلع لوؤي وسطلان واياد وشدو طريق ...
اياد : انا راه لداك الدار مغاااانمشييش ..
لوؤي : بحالا شفتي انا قاد نمشي ....
سلطان : انا فينما كنتو غادين ديوني معاكم ....خوكم انا .... راه مابقى عندي حد انايا .....
اياد : نمشيو لوطيل
لوؤي : اه باش داك ساعة خباري حتى لي مكايعرفونيش يديوها ملي يوقف عليا الروكان ....
اياد : وفين غادي؟
لؤوي : ( بقى ساكت شحال كيفكر هو يتكعد شوية على لكوسان ومد يدو لجيبو جبد سوارتو ماهضرهمش تاشاف داك ساروت وتبسم ورجعو لجيبو وشاف فاياد من المرايا ) واخا تابعينو غير المشاكيل .. وعمر الامة ما تستفد من موراه بشي حاجة .... هاد المرة غينفعنا شوية ....
سلطان : شششكون ؟؟؟؟؟؟
عند فيصل ...
لبس الفيست ديالو فوق تيشورت كانت فيست ديال دجين ... تأكد من وراقو واش كولشي هو هاداك وسد عليهم فواحد لكارطابل جلدية صغيرة لي عامرة غير بوراقيه و الاجهزة ديالو .... يلاه غيخرج هو يصوني تيليفون وجاوبها ...
فيصل : الواليدة ..
رتاج : مشيتي ولا مزال ..
فيصل : هانا خارج ( خرج من البيت باتجاه دروج )
رتاج : وراك معطل افيييصل ....
فيصل : وصافي ماتسطريسينيش .. هانا نازل ...
رتاج : غير توصل صوووني عليا علمني .... باباك معاك ؟
فيصل : راه قاليا كيتنساني فطموبيل فالباركيغ .. هانا نازل عندو بسلامة
رتاج : بتووفيق اوولدي الله يرررضي علييييك ... ياك مبريباري مزيان
فيصل : ( نازل فدروج بزربة وكيشوف لساعة فيدو ) مزيااان مزياااان ....
رتاج: خوك وصل ؟؟؟
فيصل : وصلو .. ماتقولي للواليد والو ...
رتاج : الا مالي تسطيت ... انا حمد الله غا لي رجع ليا ولدي. .
فيصل : باينة فيهم عياااا ....
قطع الهضرة فاش شاف قدامو شكون واقف فنهاية الدرج كيشوف فيه مبتسم ....
فيصل : ا .... ل ...( هربات ليه الهضرة وقال باستغراب كايحيد تيل من ودنيه ) .انوصل ونعيط ليك الواليدة ....
افران
∆فيلا الاسماعيلي
جود جمع ابتسامتو ! ماعرفتش واش تعجبو العبارة ولا تقلقو حيت محاملش تبقى كتفكر شخصيتو الاخرى وهو مراضيش بيها ... تنهد حيث ماعندو مايدير ومغيحدوش من دماغها لامبغاتش هي تحيدو وبدا كيمسح يديه وضار لعندها متكي على الكونطوار وهي علات راسها فيه حاطة يديها على صدرو وكتشوف فعينيه ....
بيلي : هاديك الشوفة لي درتي .... خلاتني نتأكد ... بلي جود لي كنت كنعرف ماماتش كامل ... باقي منو شوية فيك ..... نتا مكتعرفوش ولكن انا كنعرفو مزيان .... كولشي تايقول عليك تبدلتي كامل .... ولكن انا قادرة نلاحظ .. بلي داك الباد بوي ... عمرو يقدر يتبدل ....
جود : امم .. مكيتدبلش ... غير هو .. ( كيطالع ملامحها و هز يدو كيدوزها على شعرها ) ولا كيعرف فوقاش يخرج ... وفوقاش لا ......
علات فيه بيلسان عينيها ولمساتوو فشعرها وريحتو لي محاوطاها ماخلاوهاش تزيد مزال تصبر وهي تعلا على صباع رجليها وهو نزل راسو لعندها مستسلم ليها وشدات وجههو بيديها يلاه غتشرك شفايفهم .... وهي تحل عينيها فدقة وحدة وجود علا حاجبو ملي سمعو الباب الرئيسي كتحل وصوت شي طموبيل داخلة ..... كمشات حجبانها وشافت فيه بزربة
بيلسان : كتسنى شي وااااحد ؟؟؟؟؟؟؟؟
حيد تيليفون ببطئ من ودنيه وهو كيشوف فيها وهي فوق الكرسي ديالها مبتسمة ببرائتها كيف العادة بغوب زهرية يديها غير خيوط مربوطين فكتافها وشعرها مطلوق على راحتو على كتافها مجعد تجاعيد خفاف ... وجهها كيصبح كيف وجه الملائكة بحنيكاتها الزهرين وشفايفها الممتلئين .... كانت المدبرة ديالهم شادة ليها الكرسي من لور مبتسمة تاهي وهو رد تيليفون لجيبو وكمل النزيل فالدروج كيحاول يمسح ملامح الاستغراب من على وجهو حيت متوقعهاش تجي ....
اية : ( كتشوف فيه مبتسمة ) جيت نقوليك بسلامة ... ونقوليك بون كوغاج .....
فيصل : ( جامع حجبانو الغلاض على عااادتو ورد عليها بصوتو الخشن المراهق لي زادتو نبرتو القاسحة لي نطق بيها خشونة ) مكانش عليك ...
المدبرة : (بابتسامة) انا غنخليكم ...
انساحبات ومشات واية تبعاتها بعينيها ورجعات شافت فيه هو لي منزل عينو كيشوف فجنابو بحالا محاملش الوضع .....
اية : من البارح وانا كنحاول نصوني عليك .... ولكن نتا مخليتيش ليا شي خيار اخر من غير نجي براسي لهنايا ...
فيصل : ( شاف فيها ) شكرا ...
خلاها وتخطاها دايز لباب وهي ضارت بالكرسي ديالها ووقفاتو بملامح مستغربة جامعة ابتسامتها
اية : فيييصل .. ( ضار عندها ) واش ممكن نعرف اش واقع بيناتنا ؟؟؟؟؟؟
فيصل : ( ضار عندها كامل ) بيناتنا ؟ شنو لي بيناتنا حنا باش يوقع فيه شي حاجة ؟
اية : بيناتنا الدم ... ولد عم .. وبنت عم ....
فيصل : ( بانت على شفايفو ضحكة مستهزاة وثقييييلة وعينيه بداو تاني كاايحمارو ) ههه !!! .. الدم ... ههههه
خلاها ومشا كيضور راسو وغادي جيهة الباب وهي توقفو تاني وهاد المرة كتهضر بصوت مرتفع بحالا كتزعف
اية : فييييصل ..... يلاه قدرت نشوف جورنال البارح بالعشية .... وشفت الصحافة مصورينك ونتا خارج فازك ... نتا هو لي جبدتيني من لابسين ؟؟؟؟؟ نتا ياك !!
فيصل : ( ضاير كيشوف فالباب عاطيها بالظهر ) وسيييم ...
اية : لاااا نتا ..
فيصل : ( ضار عندها ) ولكن نتي .. مكرهتيهش يكون هووو ...
اية : فيصل عللللاش كدوي بحال هاكا انا شنووو درت ليك انا مزال ماع...
مزال ماكملاتها تاكان قفزها كولهاا بغوتة منو تااشهقات ووسعات عينيها شادة فجناب الكرسي وهو حيد الفيييست ولاااحها بعصبية كااايقرب عندها
فيصل : كييييفاش نتي نزال ماعارفة راسك شنو دايرة ؟؟؟؟؟ على هادشي كامل ومزال معارفاش راسك شنو دايرة ( جبهتو كلها برزو فيها عروووق غلااااض وعينيه حمارو كتر وقرب عندها للكرسي شد فجنابو مزير على يديها لي محطوطين تما ..وهبط عندها براسو وهي رجعات براسها لور مخلوعة وهو كيغووت ماحاسش براسو ) واااااش مكتگلسيش شوية مع راسك تفككككري بااالعقل .. واش ماعندكش العععقل .... واش مكتععرفييش فين غادا ؟؟؟ واش كتشوفي الحاافة قدامك وغادا ليها ؟؟؟؟؟؟ واش كتشوفيييه شنو كايسوا وبااقاا حالة فيه فمك بحال الضبعة ..
اية : ( بخوف اول مرة تحسو معاه ) ف .. فيصل .. م مالك
فيصل : مالي ؟ دابا انا لي ماااالي ؟؟؟؟؟؟ واش مكتشوووفيش لاج ديالك ؟؟؟؟ .... ( اية بداو الدموع كينزلو ) واش مكتشووووفيش هوووو لاج ديالو .. واش مكتشوفيش هووو فاش كيفكرررر دابا وشنو باغي يدير .... وااش مكتشوووفييش عقققليييتو .. مراااهقتوو ... الطيش ديالو ..... واش باغا تعاودي بيلسااان وحدة اخرى ؟؟؟؟؟ .... واش مزال ماتعلمتي من خووه الكبييير .... ( كينهج كامل وبدات كاتخفف نبرتو شوية بشوية ) واش مكتشوووفيش ؟؟؟ واش نتي عمية ....( جمع جوج صبعانو قدامها ) اااابسط مثال .. ابسسط مثااال هوووو نهار طحتي فلابيسين .. بقيييتي تااببعاه بعينيك ... والحافة قدامك ..... حتى طحتي .... حتى كنت غتموتي .... وهو فين كان ؟ هم ... فيييييين كان .. كون مكننتش انا شكون هدا لي غاااايضحي براسو ينزل للما يطلع آية الاسماعيلي ومغيقولوش عليه هو لي غرقها و يطيح راسو فالمشاكل ؟؟؟ .. شكون هذا لي مغيخافش يتاهموه هو لي غرقك ونزل يييطلعك .... تااااحد .. كون ماكنتش , كنت غتكوني دابا يا ميتة ياباقي كيخويو ريتك من المااااا .... وهادشي كامل ( ناض وقف كينهج كيشوف فيها وهي قلبها كيضرب بجهد ودموع نازلين ملي غوت عليها ) حييت تابعة ليا الخوا الخاااااوي ...... حيت فالوقت لي الناس كااايفكرو شنو يديرو فمستقبلهم .. لااالة اية كتقلب على الخوااا .......( شاف فيه بعصبية) الخااااااوي
اية : ( كتشوف فيه ودموع تيقطرو على خدها راسمين طريقهم حتى لعنقها وكايتلاقاو ... كتنهج كلها ويديها كترعد فوق جناب الكرسي وحمريييين بالتزييرة لي كان داير عليهم ) فيصل ...... بغيت نعرف مشكلتك مع وسيم شنو هي ؟؟؟؟؟؟؟ ملي نتا كاع ملاحظ اعجابي بيه لهاد درجة .... علاش هادشي معصبك ؟؟؟؟؟
فيصل جاتو الضحكة وخرجها بعصبية وضار كيرد شعرو لور ويضحك ضحكة مفقوووصة
فيصل : ( بالفقصة ) فييين كنهضر انا وفين كتفكر هي ......
اية : متقولش ليا حيت كاتشوف الخطر حيت هادشي مادخلش ليا لدماغي .. حيت نتا اكتر واحد عارفني انا ماشي هي بيلسان وعارفني اشنو كنسوا وتربيتي .. ونتا اكتررر واحد عارف شحال انا محتاجة لشي واحد فحياتي .... ولي يخرجني من هاد الكآبة لي كنعييييش .....
فيصل : ( ضار عندها بزربة ) ياااك ؟ نتي معندكش هاد الواحد ؟؟؟؟؟؟ مكاينش ... ؟؟؟؟؟ ( كيقرب عندها معصب ) مكاين تاواحد باغي يخرجك من الكآبة ؟؟؟؟؟
اية : كاين نتاا .. ونتا عارفني شحال عندي عزيييييز ( كيرمش فيها ) وعارف مكانتك عندي قدااااش .... عندي سلطان وعندي نتا ( دار ضحكة مفقوصة تاتهز صدرو ) ولكن .... ولكن افيصل انا محتاجة واحد بشكل اخر .....لي يبغيني حيت انا ... . اية .. ( بالبكا وصوت متقطع ) شي واحد لي يحسسني .. ب بلي .. بلي انا انثى .. بنت .... شي واحد لي يبغيني ماشي بطريقة لي تايبغيوني بيها والديا و عائلتي .... لي مانكونش غيررر بنية صغييرة فعيييينيه ... لي يبغيني ماااشي يشفق علياااا ....
فيصل : ( بهدوء ) دابا انا كنشفق عليك ا اية ؟؟؟؟؟؟؟؟
اية : اااااه ..... ( بالغوات كتشوف فيه ) ااااه كتشفق عليا مدامك واحد خايف عليا من الخطرررر .. مدامك واحد كتشوفيني وحدة ضعيفة پيسين قااادر يغرقها .. مادامك واحد دييما تابعني وخايف من الدروج و من العقابي وخايف من الناس يكونو معايااا حيت عارفني غير نية وهبيلة ... فينما كنكون فشي سواري ويجيو ناااس عندي نتا كتهربي وكاتقول ليا مايصلاحوش ليااااا .....
فيصل : ( كيرمش فيها ) دابا هادشي كيديرو واحد كيشفق عليك ؟؟؟؟ ونتي شنو كطلبي .. شنو محتاجة ؟ واحد يمرمدك .. واحد يخليك بوحدك فسواريا ويمشي مع ق ( شدها عندو ) مع صاحبتو .... واحد مايبغيك مايشفق عليك ما يشوفكش كاع واش نتي كاينة ..... هادشي لي باغا نتي ؟؟؟ .....
اية : علاش كتقول بحال هاكا على وسيم .. كون كان بحال هاكا مايجيش داك ليلة مورايا ( جاوبها فالبلاصة )
فيصل : صيفطوو سلطان
اية : واخا يصيفطو سلطان مكانش غايجي .... مكانش غيرفع ليا ثقتي فنفسي لداك درجة ..... مكانش غيوريني وجهي فالمرايا شحال زويني وعيني شحال زوينين ..... هو مكان ممضطررر يدير تاحاجة من هادشي .... سلطان مقالش ليه يدير ليا هادشي ومطلبو منو تاااااحد ...... تاحد مقال ليه فهم اية فاش كتفكر وعرف الطريقة لي تديها بها للسواري ..... مقالوش ليه ( دموع كاينزلو ) يخليني نشوف راسي فالمرايا واخا كالسة على الكرسي زويييييينة ....
فيصل : وهادشي لي كادوي عليه دابا نت ... ماااحسسيتتييهش شفقة ؟ لي جا تايقوليك بلي واخا نتي على الكرسي راك زوينة ماشفقش عليك ..... و لي حاضيك من الهوا باش مايقيسك .. هو لي كيشفق عليك ؟؟؟؟؟؟؟ ( كايضور فراسو ) باشمن منطق كتفكري ااية .. بغيت نعرف باشمن منطق ...
اية : ( بداو دموعها كيطيحو وتسمع تنخصيصها ) دابا نتا شفتي هادشي لي دار غير شفقة ؟؟؟؟؟؟؟ ( زادت كتشهق ) لهاد درجة انا .... انا مثيرة للشفقة افيصل ؟؟؟ هااا ؟؟؟؟؟ لهاد درجة ......
فيصل : ( تنهد ونزل عندها وشد فكتافها كيشوف فعينيها مباشرة .. كانو عينيها فازكين بالدموع ومنفوخين وشفارها طايحين عكسو هو لي كانو عينيه قهوييين شرسيييين وقويين ) ملي كنشوفو راسنا محتاجين للثقة فنفس كنصاوبوها حنا لراسنا عمرنا كنتسناو من شي واحد يجي يعطييها لينا ... حيت هادشي لي غايخلينا دييييما نبقاووو .. مثييييرين للشفقة آ اية .. ( خلاها ورجع وقف ) السن ديالك ا .. ديال تركزي على قرايتك ... ديال تركزي على الكيني وعلى علاجك .... ديال تركزي على مستقبلك واهدافك .. حيت هاد تلاتة دالحوايج ... هوما بوووحدهم لي فهاد دنيا ... قادرين يعطيوك الثقة فالنفس مستقبلا .. ماشي بنادم .... وملي تحققي هادشي وتكون عندك ثقة ذاتية .. داك ساعة غاتعرفي تختاري مزياااان شكون لي غايكمل معاك حياتك ... اما باش تقولي ليا فهاد السن تابعة ليا وسيم لي غارق فنزواتو ولي اصلا عايشهم سطحييا عمرو تعلللق بيهم .. وعمرو عمر راسو بيهم ..حيت راسو دابا عامر بقرااايتو ومستقبلووو مغايعمرو لا بيك لا بغيرك ... حيت عاارف السن ديالو ديالاش ونت كاتسناي منو يحقق هاد الاحلام الوردية لي كالسة تبنيهم مع واحد ضرب دنيا بركلة بحالو ، اية .. نت بنت عمي وهو ولد عمي مغانكره تاواحد فيكم ... هو منخافش عليه عايش حياتو ضارب وكايقيس ... نت لي شفتك طايحة على فمك ... ( بصوت مكسور ) مااابغيتش نشوفك ا اية هاكا ... منهنا واحد خمس سنين بغيت نشوفك بنت قوية محققة داتها واهدافها ومستقبلها ....بفيت نشوف جنيراسيون ديالنا حنا المراهقين كلها ناجحة ..... عيييت ا اية منوريك طريق صحيح من طريق الغالط عييت مانورييك الطريق من الحاافة .... عييت منتبعك .. من صغررك ا اية وانا تابعك .. هادي لا وهادي اه .. هادي ضر وهادي لا ..... عيييت ننصح .... عييييت باش نكون هاداك العكاز لي كتوركي عليه .. درررت جهههدي معاك كااااااامل ... كتكوني غاداا معااااااايا فطرريق مزيان .. غير كيجي هو مكنبقاش نعرفك .. مكنبقاش قادر نتحكم فيك ولا نردك من الخطررر لي كنشوفك غادااا ليه ..... مكنبببقاااش نعرفك ااااية مكنبقاااااش ......
اية : و نتا .... هم ؟ ( هزات يديها مسحات دموعها) شنو كاتحس ..... ؟ كتعزني ديال بصح .... ولا غير شفقة ؟؟؟؟؟؟
فيصل طول فيها الشوفة كيطلعها ويهبطها .... هزها من سبردييلتها الخفيفة الزهرية لكسيوة ديالها لشعرها المدلي على كتافها وجهها لي ولا كولو منفوخ بالبكا .. لعينيها شحال صااافيييين وبريئين .. وكيضور راسو وهو كيتفكر اشنو مقيداه فتيليفونها .....
فيصل : معارفش .... واش تانشفق عليك واش لا .... واش عزيزة عليا واش لا ... ( شاف فيها كينهج بصوت مضطرب ) معارفش واش تنبغيك ......( بعياء اكثر ) واش لا ... ( طول فيها الشوفة ونزل على ركابيه لمستواها بعينيه الحمرين كيشوف فيها هي لي دمعتها قطرات على خدها ) عارف حاجة وحدة ..... هي مبقيتش بغيت مزال هاد الفوووضى فحياتي .... ديري لي عجبك فحياتك نت ...( بصوت محروق ) مدددخلنييش .... تعدبي ولا موووتي ... لعبي بحيااااتك كيف بغيتي ....مامضطرش نكون الملاك الحارس ديما !!!!! خربقي حياتك كيف عجبك .... ولكن حياتي انا .... لا ... انا ماشي ديال السوكور .... وعمرني كنت ديال الاحتياط ....
خلاها ووقف وهي متبعاه بعينيها عاجزة تنطق بحتى شي كلمة و هز الفيست ديالو من الارض وكارطابل ديالو وخرج مخليها متبعاه بعينين كيقطرو بالدموع والصدمة واضحة فاتساعهم ......وهي تبعو بزربة بكرسي تاوقفات فالراس ديال دروج
اية : فيييييصصصل ( وقف فبلاصتو عاطيها بظهر ) كيفاش .. كيييفاش تانبغيك ولا لا ؟؟؟؟؟ فيصل شنو هادشي لي قلللتيه ؟؟؟؟؟
فيصل دار ضحكة مضطربة وعمر صدرو بالنفس وزفرو وزاد غادي باتجاه الباركينغ لي كاين فجهة لوخرا فين كيتنساه باباه وهي واقفة تما مصدومة .....وهو كاتمشى وداك الابتسامة بدات كتختفي ملي كايفكر ان هاد السؤال ماعمر غايكون عندو جواب ..... للابد.........
جود قلب عينيه لزاج واش تبان ليه الطموبيل ديالمن ... ورجع شاف فيها باستغراب ....
جود : نو !
طلقات منو بيلي ورجعات لور معصبة وعينيها حمارو ....
بيلسان : جووووود .... هادي هي مباغي تاواحد يبقى معاك ؟؟؟؟؟
جود : ( كان رجع كيشوف لزاج ورجع شاف فيها مفاهمش هاد ردة الفعل ) آمالكي !
بيلسان : ( قربات عندو شداتو من حوايجو قاجاه معصبة وهو علا حجبااانو يلاه كايحاول يولف هاد الحركات وانه كاين شي واحد كايقدر يقجو هاكا ) معااامن دااير هم ؟؟؟ شكون ثاني هادي لي قلتي ليها تجي عندك لهناااا ... واش مزال مابغيتي تحيد منك هاد القاعدة واش غنبقى تابعاك من بنت لبنت ؟؟؟؟؟
جود : ( مبينش عصبيتو لي ناضت فيه بعد الهضرة ... وهضر بهدوء عكس الشعلة لي شعلاتو لداخل ) واش نتي شوية فعقلك لا ؟؟؟؟؟ شنو هاد غانبقى تابعاك من بنت لبنت ؟ لقيتيني مع شي وحدة مور ما خطبتك وانا معاقلش ؟؟؟؟
بيلسان : هادي قاااعدة فيييك من شحال هادي .....
قفزات بيلي تا لفووق بضربة ضربها موراه فالكونطواااررر دالكوزينة بعصبية وشاف فيها تحت سنانو
جود : ومااااتبقااااااايش تجججبدي ليييااا لي داااااز واش نقوووولها بشي لغة اخرى .... شحااال غانبقى نشششرح ليك فييييييها ؟؟؟؟؟؟؟ نجيب الخشييييبات ....
بيلسان بقات كتشوف فيه وصدرها كيطلع ويهبط وخرجات من كوزينة كتجري معصبة وهو ضور راسو لجنب وبدا ينهج وكيدوز يدو على وجهو ... ورجع قرب لباب ديال جردة وطل براسو وهي تبان ليه طموبيل قسم هو يدوز يدو على وجهو بمعنى لي كان خاص هاهو كمل ...
بيلسان طلعات فالدروج معصصبة كضرب رجليها مع الارض كتقول الا لقيتها بنت هنا غنقققتلها وندفنها .... وصلات للباااب الخشبي الكبير حلاتو بالنترة والعصبية ومستعدة للغوات ..... يلاه غااتبدا تسب وهي توسع عينيها ملي شافت رقية يالاه كانت غاتحل لباب .... وشافت لجنب بشوية مصدومة و بانت ليها قسم جايا مربعة يديها كتحك فدرعانها و واضح ماحاملاش راسها ومبسمة غا بزز ورجعات شافت فرقية .....
بيلسان : جدة !!!!!!
رقية ضرباتها لكتفها بعداتها ودخلات لدار
رقية : بببعدي لهييييه ... .
يتبع...
التعليقات
لا توجد تعليقات بعد، كن أول من يعلق.