محتوى القصة
الكوتش تنهد بقلة حيلة قدامو .... راسو عارفو من ديما قاسح وماشي ديما غاتسلم الجرة ..... دابا راه ولا ماتش مور ماتش وهو طالع فالنيڤو ديالو .. مابقاش داك لي كايتقتال مع المصارعين العادين على خمسالاف درهم ... ماتش من مور ماتش مسيرة اربع سنوات وكل ماتش صعب من لاخور .... تاوصل انه يقاتل واحد بحال ذ بلاك على عشرين مليون مغربية .... بنسبة لكوتش دابا ولا خاصو يتمرس كتر ويتواضع كتر باش يسمع نقط ضعف الخصوم ديالو ولكن من ديما رافض ... الكوتش كايظنها ثقة فالنفس .. ولكن بنسبة لاصيل مكانتش ثقة ... مكانش كايبغي يسمع مهارات خصومو باش مايطلعش للقفص موتر او باش مايحكمش بشي حاجة غلاط وفالقفص يتفاجأ بحاجة اخرى لان مقاتلين الشوارع كل مرة كايجيبو مهارات جداد ...
المدرب: ( تنهد و قرب جلس قدامو على ركابيه ) هو راه عرف عليك كلشي .. تلقاه تفرج فالقتالات ديالك شحال من مرة و درس حركاتك كلها .. يقدر يبان ليك طايش و ماعندوش استراتيجية بحالك و لكن راه كيعرف كيفاش يتحكم ذهنيا بالمقاتل لي قدامو ...... شكلو وضخامتو كايلعبو دور ... واخا تشوفو غايدير منك زوج ولا تلاتة ماتوترش ......
تسنا أصيل يتحاور معاه و لكن مانطقش كمل كيلوي البانضة على يدو الثانية ...وهادشي ماغريبش عليه ... المدرب تنهد و وقف كايدوز يدو على وجهو ...
المدرب: واش عارف شكون مقمر عليك ؟؟
أصيل: ( الصمت )
المدرب: بيتر رايموند و لوكاس هنري و شريكو ابراهيم مرحب ... واحد مراهن بتسعين مليون و لاخرين بحياتهم ... ايلا ربحتي هاد القتال بثلاثة غادي يكونو سخيين معاك .. خصوصا بيتر راه معروف فهاد القتالات و كينظمهم فأمريكا و روسيا ... ايلا عجبتيه يقدر يديك معاه و حياتك كلها تتبدل 180 درجة ...غاتولي تلعب فاالنزالات ديال الملاين ااصحاح .... غاتشهر .. واخا ماشي قانونيا ولكن فلوووسك فجيبك شري بيها داك القانون كامل ..... غانزيد.و لقدام .....
حط يدو على كتف أصيل و عاود جلس قدامو ...
المدرب: بزااف ديال لفلوس و الشهرة كتتسناك ايلا ربحتي ... متخلينيش نندم نهار خليتهم كلهم. ختاريت ندربك نتا ...
اصيل : ( علا فيه عينيه ) حيت نتا تابع الجهة الرابحة ... مكدربش فيا حيت مخليين ليك عليا وصية .. كدرب باش تاخد فلوسك .... مقمر كيفما حنا هنا كولنا مقمرين ....
المدرب : ( غلا راسو لفوق وعينيه باقين عليه وبانت شبح ابتسامة على شفافو ) مكدبتيش .. كلنا مقمرين .... ولكن على الاقل دير جهدك باش نربحو .. دير جهدك طلع فنيفو وتلعب مع الشداد .... خلينا نلعبو بالفلوووس .... ربع سنين .. مكتعرفكش شكون نتا ... ولا علاش كتلعب ..لي متأكد منو .. هو راك محتاح فلوس ... فلووووس بزااااااف .....
زير ليه على كتفو واصيل هاد الهضرة كانت من قبل كدخل من ودن وكتخرج من ودن كايلعب فقط نهار يتززير بزاف فمصاريف ...وديما فاي قتال كايقول هدا هو الاخير ... ولكن هنا كان الامر مختلف ... هنا هو فكر مزيان وقرر مزيان حياتو كيفاش غايمشيها منهنا لفوق .. كان عايش بلا هدف .. ودابا هو لقى هدف ... القتالات حظ .. وهو غايلعب ضد الحظ ديالو ..... وقدام الهدف حط اكثر من عشرة دالماتشات قدام عينيه يلاه يحقق الهدف لي بغا ... ومع كل ماتش يقدر يموت ... او يتأهل للموالي .... حتى يوصل للماتش العاشر لي باغي يعتزل من خلالو ويكون جمع الفلوس كلها لي باغي .... تنهد معمق ونزل راسو كايجمع صاكو ... والكوتش و وقف كيردد عليه الهضرة لي ديما كيقولها ليه قبل أي قتال ...
المدرب: يدك ماتفورصيش عليها .. ماتعطيش كلشي فالروند لول خليه حتى يتهلك .. معروف عليه كيعطي كلشي فالروند حيت حاس بكـ*رو .. خصوصا معاك نتا لي ذ وانس وكطيح فروند لول ... غايدير جهدو معاك فااروند الاول ... لابغيتي تربحو غدرو وربحو فالروند التاني .ولا نتا كاع سير معاه حتال للروند الثالث ولا الرابع ... انا متأكد بلي ماغاديش توصلو للخامس ... غادي تطيحو قبل ( هضر بثقة ) تايق فيك و فشنو ممكن تدير ... هاد الليلة الوانس غادي يكتب تاريخ جديد فعالم القتال المظلم ... المعلقين هاد المرة كاينين تلاتة .. واحد خاص ببيتر كايمشي معاه.. واحد خليجي على ود ناس لي مكفهموش دارجة .. راك عارف ديب ويب عامر بصحاب البيترول و عشر ناگات ... ولاخور ماعرفتش ... ماتوترش واخا البلاصة جديدة عليك وموالف تقاتل غلى برا ودابا هدا بار ... راه نفس القوانين ..
وقف أصيل و المدرب هز بينوار كحل خفيف لبسو ليه .. اصيل بقوة ماسرسر عندد ودنو كايحسو هو لي متوتر ..عكسو هولي مرتاح قبل اي نزال كايبغي يكون مكنسونطري ومدرب مزيان ومرتاح ... واخا هدا ماتش مكانش متوقعو وعيطو ليه فدقيقة ستعين حتى كان غايرفض وي قطع .. هو يفكر مزيااااان وقاليهم " انا جاي " وهز واحد قطعة الثوب كحلة صغيرة من فوق الكرسي كانت حدا أصيل و مدها ليه .. خداها أصيل و لبسها على راسو .. كانت قناع كيخلي غير عينيه و نيفو و فمو لي عريانين منين يشوف و يتنفس و البقية كلشي مغطي .. جميع المقاتلين كيغطيو وجاههم قبل أي قتال ... هداهو القتال. ديال النوار .... دار القب على راسو و بدا كينقز بشوية فبلاصتو و كيحرك الذراع ديالو بحالا كيدير تسخينات ...
حل المدرب الباب و أشار ليه بيدو يخرج هو اللول ... و تقدم أصيل و على ظهرو مكتوبة بخط أبيض كبير "ONCE" ....
قريب للحلبة و على طابلة مستطيلة مغطية بإيزار أسود وعامرة ميكروات وقراعي دالما ..... كانو جالسين فيها جوج رجال بكوستيمات كحلين و الكاسكات على ريوسهم .ومعاهم مراة فالوسط ... قدام كل واحد فيهم مايك و بجوج بيهم كيعلقو بحماس كبييير فأصواتهم ... البنت كتكتب التعليقات كتابيا .. و واحد بالانجليزية و الاخر باللغة العربية .... اصوات تبحات كايحاولو يخلقو جو باش مايخلقوش الملل للجمهور المتوتر قبل مايدخلو للقفص بلاك و وانس ... الجمهور كولو كايقرص فيديه وصبعانو ومتوترين وكاين لي شااااارب ضارب الكاو عينيه معسلين ...
المعلق 1 : بلاك المقاتل الأمريكي من أصول صومالية قبل قليل صرح بأنه لن يقاتل بكل قوته و سوف ينهي المباراة في الروند الأول .. استهزأ تماما بخصمه وانس و وعد معجبيه بأنهم سيعودون لمنازلهم باكرا الليلة !
المعلق 2 : ( كيضحك ) هذا هو بلاك ... مشهور بغروره و ثقته المفرطة و وعوده المبالغ فيها ... لاكن اظن انه حقا سيعودون باكرا مادام هناك وانس ....
المعلق 1: لكنه لم يسبق أن أخلف بلاك بوعدٍ قطعه من قبل ..
المعلق 2 : ( هز حجبانو بابتسامة ) و لم يسبق أن قاتل وانس أيضا ...
المعلق 1: ( كيشوف فوراقو لي قدامو ) المقاتل الغامض .. 7 مباريات في مسيرته على اربع سنوات فاز بها جميعها و انتهت كلها بضربة قاضية ..K.O ... لم يتجاوز الروند الثالث أبدا ... خصم قوي ... لكنه مجرد مبتدئ .. سأكون صريحا معك صديقي أنا لا أعتقد بأنه سينجو الليلة ...
المعلق 2 : بلاك مقاتل قوي جدا و واثق ... لكنك لا تعلم أبدا ما قد يحدث ... ربما نتعرض الليلة لصدمة حين يكتب تاريخ جديد في اللعبة !
المعلق 1 : ربما ( عوج شفايفو ) و ربما لا ...
سكتات المزيكا لي كانت خدامة و الأضواء تحولات من البيضاء لإضائة حمراء و انطلقت أغنية راب أمريكية كيعرفها الجمهور مزيان حيت غير بدات و كلللشي وقف كيغوتو بالججججهد ...عرفو لاقرباااات ساعة القتال .....
المعلق 2 : ( شاف جهة الباب لي كيقود لغرفة بلاك و وقف هاز معاه المايك ) و الآن سيداتي آنساتي ساادتي .... بوزن المئة و الثلاثين كيلوغرام ... بـ 23 فوز مقابل هزيمة واحدة طوال مسيرته القتالية ... نقدم لكم ... الوحش الشرس ... الكابوس الأسود الذي تسبب بالأرق لخصومه ... The BLACK ....
تعالت الصيحاات و الأضواء تركزات على الدروج لفوق فين كان واقف بلاك مهبط القب ديال البينوار الأحمر على وجهو كامل و هاز يديه لفوووق و كيحرك راسو لفوق و لتحت مع اللحن ... باغيهم يزيدو يغوتو عليه و يرضيو الغرور ديالو ... وراه واقفين المدربين بجوج ديالو لي لابسين بدلات رياضية سوداء و معاهم الطبيب ديالو هاز حقيبة الإسعافات الأولية ... و جوج بنات غير بالدوبياس واقفين فجنابو ... على بطونهم موشومة THE BLACK كبيرة كيوزعو ابتسامات على الحضور و كيحثوهم يزيدو يغوتو و يشجعو ..
بحركة سريعة و عنيفة منو حيد القب ديال البينوار و غوت بوحشية كبيرة ... حتى هو وجهو كان مغطي بقطعة ثوب سوداء مغطية كلشي مخلية غير عينيه و فمو و نيفو لي يبانو ... حل البينوار ديالو بالنترة و بدا نازل على الدروج و هو كيحرك يديه للمعجبين ديالو لي مقمرين عليه يغوتو ولي كانو هوما لي غالبين تما ... بشرتو كانت سوداء و الجسم ديالو كلو عضلات ، ضخم وعملاق .. خلا الكوتش فالزاوية كايشوف فيه بقلل على الوانس .. ... كان طويل بزاف و كتافو عراض .. عضلات بطنو و صدرو مطراسيين و منفوخين ولامعين بالجيل ...و هو كيزير على ذراعاتو باش يزيد ينفخهم و كيغوت ملي كيضرب على صدرو بالجهد ... ويضحك بهمجية وريوگو سايلين بحال شي ذيب جيعان .....
البنات حلو ليه باب السياج لي ضاير بالقفص و سبقوه بمشياتهم المتمايلة وضحكاتهم الثملة باش يحلو ليه حتى القفص بحركات استعراضية ... و قبلما يدخل للقفص تقدمات وحدة و حيدات ليه لبينوار عاد رجعو بجوجات وقفو جنب القفص مع المدربين و الطبيب كيشجعوه ...
دار بلاك ضورة على القفص كاامل كيضرب السياج و يغوت بصوتو العميق و حماس الجمهور معاه كيزيييد ...
كان بحال شي حيوان مفترس كيستعد للقتال فالغابة على شي فريسة ولا أنثى للتزاوج ... المنظر ديالو كان يقدر يزعزع قلب أي خصم و يخليه يخسر ثقتو حتى قبلما يبدا القتال ...
شعلو ربعة ديال الشاشات كبااار كل وحدة فجهة من القاعة ... تحطات فيهم صورة بلاك و سميتو بخط انجليزي كبيير و معلوماتو و كلمة VS بينو و بين واحد الظل ... غير ثواني و بانت صورة الوانس بلاصة الظل و تكتبات سميتو و معلوماتو ملي تبدل ضوء المصابيح للأزرق قاتم و تبدلات حتى الموسيقى لأغنية أخرى لا تقل حماس على الأولى ... و وقف المعلق الثاني هاد المرة كيشوف فالباب لاخر لي من الجهة الثانية ....
المعلق1 : و في الزااوية اليمنى ... بوزن 110 كيلو ... بـ 7 انتصارات في سبع مباريات دون أي خسارة ... المقااتل الغامض الذي ما زال في بداية مسيرته ... يقولون بأنه يحتاج ضربة واحدة لإنهاء أي قتال ... The ONCE ...
كان أصيل واقف أعلى الدرج و الهتافات مزال بنفس الصخب واخا لبلاك و ماشي ليه ... كان واقف معاه غير المدرب ديالو و الطبيب ... المدرب قرب منو كثر حط يدو على كتفو و قرب راسو منو كيهضر قريب لودنو باش يسمعو ....
المدرب: دير لي كان ... و لكن ماتموتش ...نتا راك الوانس .. راك عارف الضرابي دالقوة ديالك ...
طبطب ليه على كتفو .. و أصيل مازادش وقف باش يتباهى بعضلات صدرو و كتافو ... ماغوتش باش يخلع الخصم و مادارش استعراض ... نزل من الدروج و عينيه كيشوفو فحاجة وحدة و هي بلاك ... مافبالوتاحاجة منغير يسمع جرس النهاية ويهز الجوا ديالو ويخرج منها .. حل الباب ديال السياج و هو كيحيد البينوار فطريقو لاحو للأرض ولبس الكوتياغ ففمو ... و مشا نيشان حل القفص و دخل خابط الباب وراه ... و بلاك وقف فواحد الزواية كينقز بلاصتو و يدير فالتسخينات و عينيه عليه حتى هو بابتسامة استهزاء على فمو .... كيتسنى غير جرس البداية .. باش ينقض عليه ...
كيحرك الكاس دالويسكي فيدو و كيتسمع صوت اصطدام مكعبات الثلج بالزاج ... عينيه على الشاشة الكبيرة لي قدامو لي كتصور القفص مباشرة و بصورة واضحة .. قناع البرود مزال على وجهو مغطي بيه التوتر لي حاس بيه .. و لكن لوكاس ماكانش كيخبي .. وجهو عرقان و أنفاسو مضطربة .. كيحرك رجلو بسرعة و كيسوط الهواء من فمو .. جامع يديه قدامو كيصلي بهمس باش وانس يربح هاد النزال .. حيت عارف مزيااان شكون هو بيتر و بلي داكشي لي قال ماشي غير تهديد كاذب ... عارفو مغايعصبوش غير خسارة الفلوس انما تا خسارتو قدام العدو ديالو ....
أما ابراهيم واخا كان تايق فوانس و لكن هضرة بيتر زعزعات ثقتو واحد الشوية و خلاتو يخاف .. مزير على سنانو و عينيه على وانس فالشاشة و كيطلب الله أنه يشوف الصباح ديال غدا ...
عند اصيل ...
فالحلبة الأجواء كانت مزال شاعلة .. الطابلة لي كان عليها هاداك الرجل لي كيقيد الرهانات والبنت لي كتفرق التذاكر صافي خوات حيت الوقت ديال الرهان صافي سالا و النزال غايبدا ..
و تجار الممنـ..ـوعات لي كيعتبرو هاد المناسبات سوق ليهم بداو خدمتهم كيبيعو سلعتهم للجمهور ... والشخص لول لي دخل كان مراقب .. كان هو جاسوس بيتر باش يخبرو بشنو واقع تافعين المكان ....
تحل باب القفص و دخل واحد الرجل شعرو كامل بيض و التجاعيد باينة فوجهو .. سروال كحل و سبادغين فنفس اللون .. تيشورت مخطط بالأبيض و الأسود خاشيه فالسروال و معلق صفارة فعنقو ... وقف وسط الحلبة و أشار بيديه بجوج للمقاتلين يقربو منو ... جاو كل واحد وقف فجنب ... عيون بلاك كلها غرور و استفزاز على وانس .. بينما اصصيل عيونو كلها ثقة و برود ... بلاك كان مهتم بوانس و بااغي يستفزو .. و لكن اصيل كانت كتهمو حاجة وحدة هي يربح .. ماسوقوش فشكون هو بلاك و ماباغي حتى حاجة تربطو بيه من غير القتال .. الحرب الذهنية ماشي ديالو هو كيعرف غير الحرب الجسدية ... وخصو يخرج منهنا رااابح ....
الحكم: ( شاف فوانس لي على يمينو ) Your hands ... " يديك "
مد وانس يديه قدامو ملويين بالبانضة و الحكم بدا كيقلب فيهم لايكون داير فيهم شي آلة حادة ولا شي سلاح .. تحنى كيقيس حتى جناب الشورت و البانضات لي على الركبة و فرجليه .. ملي كمل ضار عند بلاك و قال ليه نفس الكلمة و بلاك مد ليه يديه و حتى هو قلبو بنفس الطريقة .وهو عينيه غير على اصيل كايقراه ...
بصح هادا قتال شوارع غير قانوني و ماعندوش قواعد بحال الرياضات القتالية لأخرى .. و لكن غير مسموح للمقاتل أنه يستعمل شي حاجة من غير الجسد ديالو .. ممكن يقاتل بأي طريقة ... البوكس ولا الكراطي ولا المصارعة ... جميع أنواع القتال مسموح بيها داخل القفص .. المهم هو يكون بدون أسلحة ...
الحكم شاف فباب القفص و دار إشارة بعينيه لواحد البنت بدوبياس كحلين حفيانة .. ابتسمت و حلات الباب دخلات و هي هازا لوحة الكترونية مكتوب عليها بضوء أخضر " Round 1 " ( الجولة 1 ) ... و بدات كتدوور عليهم بمشية العارضات و هي هازا اللوحة لفووق كتبينها للجمهور ... و فهاد الأثناء الحكم كان مميل جسمو شوية للقدام و ماد يدو بينهم بجوج و كيهضر معاهم و هوما مزال عينيهم على بعضياتهم ...
الحكم: ( بالانجليزية ) راكم عارفين القانون ، ضرب على الأرض ثلاثة المرات ايلا بغيتي تستسلم و تسالي النزال ...
بلاك: ( قاطعو و هو قارن حجبانو فوانس ) أبدا ...
الحكم: ( كمل ) كلشي مباح و حتى حاجة ما ممنوعة ... الطريقة الوحيدة باش تربح هي تطيح الخصم ديالك حتى ما يبقاش قادر ينوض يكمل .. ولا تخليه يستسلم ... واضح ؟
بجوج قد قد : واضح ...
الحكم: ( شاف فبلاك ) مستعد ؟
بلاك: ( حرك راسو بآه ) مستعد ...
الحكم : ( شاف فوانس ) مستعد ؟
أصيل طرطق عنقو يمين و شمال و بدا كينقز بشوية فبلاصتو و الحكم فهم بلي حتى هو مستعد ... تقاد فالوقفة و مشا خرج من القفص و البنت كملات الضورة الأخيرة و حتى هي خرجات من القفص ... الحكم سد الباب بالقفل و هز الساروت لفوق و الجمهور كيغووت بالججهد بحماس ...
الشاشات لكبار لي تماك بدا عليهم عد تنازلي من 10 هابط للصفر .. و الجمهور كامل بصوت واحد كيحسب معاه حتى المعلقين بجوج ... مدرب وانس كيشوف فالشاشة و يرجع يشوف فوانس لداخل القفص .. كان مرافقو من أول مباراة ليه و لكن هادي أهم وحدة بسبب الخصم ديالو .. كان متوتر و خايف عليه و فنفس الوقت متحمس لشنو ممكن يوقع ايلا ربح !! اما اصيل كان فزاوية القفص كايشوف ف ذ بلاك وكايقرا خطواتوو وحركاتو .... كيطلعو و ينزلو بنظرات دقيقة .. قبلما يقرا طريقة القتال ديالو هو بغا يقرا الجسم ديالو .. كيبانو ليه عضلاتو كلهم منفوخين .. و لكن لافونطاج لي عندو عليه هو الطول .. كان طويل بزاف على بلاك و هادشي خلاه يفكر بلي يمكن يكون صعيب عليه يوصل ليه لوجهو .. و لكن فكر تاني بلي ايلا ماوصلش ليه لراسو يمكن يركز ليه على رجليه و صدرو .. و هاد الفكرة خلاتو يدير توقعات لكيفاش ممكن بلاك يتقاتل ! شاف لرجليه وفخادو بانليه تقال فحركتهم هادشي لي كايعني انه مغايكونش خفيف بزاف ....مامتفاوتش معاه بزاف فالوزن ولكن ذ بلاك كايبان عملااااااق على اصيل خلاه يعرف السبب انه متقل باللحم كتر من العضم ... اما اصيل العضم لي تقيل واللحم قليلة كاتخليه يبان يلاه فالوزن ديالو تمانين ... عكس بلاك .. هادشي لي خلاه انه غايكون حركاتو ثقال ولي كيركز عليه هو الكتلة ديالو ... يعني كايتقاتل بالقوة عكس اصيل لي كايتقاتل بالخفة ......
4 ... 3 ... 2 .... 1 ...
صرخة من الجمهور و صوت الجرس دق ... و حمااس المعلق افتتح النزال ... عكس النزالات القانونية لي كاتكون التحية والروح رياضية .. هاد نوع من النزالات مافيهاش هادشي ... الهصوم اعداء وسط القفص. ..
المعلق1 : و نبددأ النزااال المنتظرر بهجووووم مباااشر لبلااك على خصصمه وااانس ...
تقاد وانس فوضعية الدفاع و بلاك من أول ثانية هجم عليه مكيضيعش الوقت ...حيت قراه الكوتش ديالو انه كايطيح من ضربة لولة وبغا يكون اسرع منو .....
جمع اصيل يديه قداامو بحال الدرع على وجهو و بلاك جامع قبضات يديه و كيضربو بقبضات قوية و قاسية للبطن ديالو و صدرو !! واصيل مكنش على ملامحو مستحمل دوك ضربات لي بسبب التسخينات لي دار من قبل مأثروش فيه بزاف ....مدافع فقط مابغاش يهجم .... ومستحمل الضربات ....
كيف العادة كيتسرع و مكيعطيش فرصة للخصم ديالو من اللول كيهاجم .. باغي يحطم الرقم القياسي ديال مقاتل اخر كان سالا القتال ف 3 الدقايق ...
لوكاس عاض لسانو و قلبو غادي يسكت .. و ابراهيم مزال مرتاح نسبيا حيت عارف وانس و عارف بلي ديما كيبدا بالدفاع ماشي الهجوم حتى يقرا الخصم ...
المعلق2: في قتال بدون قوانين .. كل ضربة تحسب .. كل حركة و كل نفس .. لماذا لا يهاجم ؟
المعلق 1 : لأن بلاك لا يعطيه فرصة لذلك !!
المعلق2 : بل لأن وانس لا يريد الهجوم ... انظر إلى وضعيته .. منذ أول ثانية و هو في وضعية الدفاع و لم يغيرها أبدا !! هو لا يملك أي نية هجومية !
المعلق: نحن إما أمام مقاتل ذكي يحاول قراءة خصمه .. أو أمام مقاتل استنزف كل حظه في السبع مباريات الماضية و سيتلقى هزيمة مذلة الليلة ...
بلاك ما كانش كيعيا ... مقاتل ومحافظ على ضحكتو المستفزة لي كايحاول يلعب بها على نفسية الخصم .. كيوجه الضربات لجسم اصيل بدون انقطاع و أنفاسو هايجين بحال الثور .. للرجلين و البطن و الصدر كيفما توقع اصيل كيحاول يوصل للراس و لكن كان ساد عليه من هاديك الجهة ...
المدرب ديال وانس كان شاد بيديه على الگرياج و مزييير على سنانو وجهو حمر ..والمدرب د بلاك كايضرب فالقفص ويقوليه " زبييد مزاااال زيييييد " كانت خطتو هي " قتل الاخطبوط " كتعني انه خصو يضربو بزاااااف دالمرات يهد قوتو باش ضربة القاضية تجي ساهلة حيت هاكا كاقتلو الاخطبوط .... وبهاد طريقة كيربح الخصوم ديالو ... عكس اصيل لي استراجيتو مختلفة ..... الدقايق كيدوزو و هو ما عياش و ماتراجعش نهائيا !! كايحاول يستنززفو بضرابي ...
كيمشي بيه بالضرب حتى يتلاقا ظهر اصيل السخووون مع الگرياج الباارد ديال القفص ... كيتهرب منو و يرجع لوسط الحلبة و بلاك كيتبعو و يحاصرو بلكماتو تاني ماعاطيهش فرصة يتنفس ...والمدرب د اصيل كايضرب فالكرياج وكايقوليه هههجم راه غايفرعك و الجمهور د ذ بلاك كولو كااايغوت اما لي مقمر على اصيل فحالة شبه احباط ....
دم اصيل كان حامي ماكانش كيحس بالألم .. واخا مركز على الدفاع كان مركز حتى على حركات بلاك وكيقراهم .. و لاحظ بلي مكيخدمش الرجل اليمنى ديالو نهائيا غير مرجعها اللور مع أنه ماشي عسري ... توقع بلي يمكن عندو فيها شي إصابة ..
كان خاصو يتأكد ... خدا نفس عميييق ... تراجع اللور بسررعة و قبلما يتبعو بلاك باش يضربو .. رجع اصيل رجلو اليسرى و ضرب على رجل بلاك اليمنى بجهدو كاااامل حتى بلاك زييير على سنانو و طاح للأرض على ركابيه من حر الحرييق لي حس بيه فرجلو واخا دمو سخون ... بحال شي برج و ريبتي له الساس !
الجمهور ديالو لي كان كيغوت بحماس تصدم ... كلشي وسع عينيه و هاد المرة رجعو كيغوتو بغضب ... حاطين لفلوس عليه مجرد التفكير فأنه يخسر كيشحنهم !! يقدرو يدخلو للقفص يقتلوه قبل من اصيل الى خسر ....كلشي كيسب يا إما فبلاك لي طاح ولا فاصيل لي طيحو بضربة وحدة خفيفة ....
ابراهيم بعدما طاح بلاك جمع قبضو بحماس و غير حشم ينوض يغوت ... لوكاس غمض عينيه كيتمنى النزال يكمل هاكا و واصيل يسيطر من هنا للقدام .. و بيتر مزاااال بنفس البرود كيشرب من كاسو و غيير كيرااقب وعاقد حجبانو .. هو ماشي غير خبير فالكازينوهات و تجارة المخد-رات .. خبير حتى فهاد القتالات و كيحاول يدرس استراتيجية وانس و يفهم الطريقة لي كيقاتل بيها ... والجمهور لي ذ بلاك لي مافهمهوش هو كيداير طيحو فضربة وحدة ! عاد تفكرو انه سميتو واااانس ....
مدرب اصيل ابتسم بالجنب حيت عارف مزيان شنو فراس المقاتل ديالو ... بينما مدرب و فريق بلاك وجاههم صفارو حيت نقطة ضعف المقاتل ديالهم لي عيااو يتسترو عليها تعرات و بانت للخصم ديالو !!
المعلق1: سقط بلاك على ركبتيه .. أول مبادرة يقوم بها وانس ...
المعلق 2 : و أتت بنتيجة .. ربما من هذه اللحظة سنشهد تغيرا في النزال !
المعلق1 : بلاك مصاب الآن .. يجب على وانس استغلال هذه النقطة لصالحه .. بإمكانه انهاء النزال من الروند الأول !!
الشاشة كتبين العد التنازلي للروند الأول .. بقاو غير جوج دقايق ...
تحنى اصيل باغي يهز بلاك يوقفو باش يضربو حيت صافي مابقاش محتاج يزيد يفهمو .. خصو دابا يهجم .... بغا يسالي هاد النزال و يمشي فحالو ... فاللحظة لي تحنى فيها اصيل بلاك هز راسو .. غير بان ليه نازل لعندو بلاما يغطي وجهو استغل الفرصة و ضربو بروسية قووووووية خلات كللللشي لي تماك يشهق و يغوووتووو بحمااسهم اللول ملي بان ليهم وانس كيتزعزع !! وخطواتو غير موزنين وقريب يطيح ......
حاول يبقى اصيل واقف .... بقى شاد على جبهتو من فوق الماسك و كيميييل بالدووخة !! راسو ثقااال عليه و الأصوات ولاو كيوصلوه متداخلين ... كيشوف قدامو كلشي مضوبل و دقات قلبو كيحس بيهم بطيئين و أنفاسو كيسمعها ثقييلة ! وكايحس بالفزوكية تحت الماسك عرفو راه الدم !! وكايحس بيه فالحاجب ديالو .....
مدرب بلاك: ( كيضرب فالگرياج و كيشوف فبلاك لي مزال جالس على ركابيه شاد فخضو لي مقسح .. و كيغوت عليه بعصبية ) GET THE FVCK UP AND END THIS SSSH!T RIIGHT NOOOW ...
( وقف و كممممل هاااد ال**لاااااااوي دااابا )
زير بلاك على سنانو كيقاوم الألم و بدا كيوقف باش يستغل دوخة اصيل و ضعفو باش يسالي النزال ... ومزال ماقادرش يتخيل كيفاش باقي واقف من بعد داك ضربة كلها! عضمو صحيح لهاد درجة !!
اصيل وصل للگرياج شد فيه بصباعو و تكا عليه بجنبو كايحاول يتنفس ويسرط فريقو ... حاس برجليه كيخويو بيه و بلي قريب يطيح .. غمض عينيه و بدا كيحرك راسو يمين و شمال بالزربة باغي يوعى ويزعزع فراسو ... و بدا كيوصلو صوت المدرب ديالو لي جا وقف وراه بيناتهم غير الگرياج و كيغوت عليه ...
المدرب: 40 ثانية أ وانس .. صبر غيير ربعين .... ربعيييين لي بقات .....
القناع لي على وجهو كان كحل ماغاديش يبان فيه الدم و لكن بدا كيلمع مع الإضاءة ... و الدم ديالو سخووون هابط من الماسك و كيجري على صدرو و ظهرو و كتافو مع العرق .. نازل حتال الشورط لي لابس و كيقطر على أرضية الحلبة البيضاء !! كان دمو سخون و حامي داكشي علاش نزف بزااف ...والمدرب وسع عينيه ملي شاف انه كاع داك دمايات ... ماستغربش بزاف حيت دم كان سخون وجاري و لكن خاف تكون شي ضربة غريقة لي تنهي مسيرتو ويقطع رزقو تاهو ....
اصيل : ( صوت باطني ثقيييل و عميق بدا كيحسب فراسو لداخل ببطئ و بعياء الثواني لي بقاو باش تسالي الجولة اللولة ) واحد ... جوج ... ثلاثة ....
تحطات يد بلاك على كتفو و ضورو عندو ... مزال الرؤية ماواضحاش و مزال أصوات الجمهور و المعلقين لي كيغوتو كتوصلو مخربقة و داخلة فبعضياتها ...
طلع يديه مغطي على راسو و بلاك كيضرب فيه بقوة كبر من اللول من حر الحريق لي فرجلو .. رجلو اليمنى ماكانش حاطها على الأرض تماما حاط غير الصباع ...
البانضات البيضين لي فيدين بلاك تغطاو بالدم و تزوقو بالأحمر .. و هو كيغوت بعصبية كبيييرة باغي وانس يطيح ...
لوكاس حدر راسو و خشا وجهو بين يديه صافي مابقاش كيدعي وانس يربح النزال .. دابا ولا كيدعي اليسوع لي كايآمن به يسمح ليه على گاع شنو دار فحياتو حيت حس بلي النهاية ديالو قربات ...
قلب ابراهيم تقبط عليه و عينيه بداو كيرعشو .. هاديك الثقة لي جلس بيها على هاداك الكنابي فبداية السهرة غادية و كتنقص بسرعة كبييرة و كيجي بلاصتها خوف كبيير من الموت !!
اما بيتر قناع البرود لي كان مغطي بيه وجهو طاح .. شرب گاع شنو فكاسو و حطو على الطابلة .. و مال للقدام مشابك يديه قدامو كيتفرج و هو قارن حجبانو .. و كيحس بلي فأي ثانية .. فأي ثاانية غادي يخسر تسعين مليون دولار !!!
« ثلاثة و عشرين ... ربعة و عشرين ... خمسة و عشرين ....... »
الصوت الباطني مزال كيحسب .. جسمو كيقطر بالدم و الحلبة كتعمر من كل بلاصة داز منها ... الدوخة مكتنقصش بالعكس كتتزاد ... حيت بلاك ماعاطيهش فرصة يرتاح ... كللشي فهاديك القاعة على أعصابو كيتسناوه يطيح قبلما يسالي الشوط الأول !! واادم كايحسو كايغطي عينيه وكايحس بحاجبو تفلق ليه ....
و لكن عكس شنو كلهم كانو كيتمناو ... تطلق الجرس بصوت مرتفع و معاه تنهيدة عميييييقة من مدرب وانس و لوكاس و حتى ابراهيم ... و لكن بلاك مزال كيضرب فيه !!
ناض الحكم كيجري للباب حلو و دخل هو و جوج رجال طوااال و عراض شدو بلاك كيبعدوه على أصيل و هو كيف الثور الهايج لي شاف لحمر !!!
المدربين و الأطباء دخلو للحلبة بالجرا هازين كراسي كل واحد حط كرسي فزاوية من زوايا الحلبة ... الاطباء د اصيل تجمعو عليه كايحاولو يداويو الجرح بعد ماغطاو بيزار بيض باش مايبانش وجهو .... والجاسوس دبيتر تسل بين الجمهور ومصغر عينيه تابان ليه وااااحد ششششوية كايبان زحبد تيليفون صورو غير بالجنب و لكن دغيا غطاو .... بلاك جلس على كرسي أحمر و نتر واقي الأسنان حيدو من فمو لاحو و هز قرعة الماء كيشرب منها و هو كينهج معصصصب ... الطبيب مد الفوطة باغي يمسح ليه و بلاك ضرب ليه يدو ..
بلاك: ( بلهجة أمريكية معصب ) get the fvck off me ... ( شاف قدامو مباشرة فوانس ) I will kill him ... I WILL KILL THAT FVCKING ASSHØLE ...
( حيد عليا يدييك ماتقيسنيييش ... غانقتلو ... غانقتل هاداك ولد القحـ. ..بة )
المدرب: ( تحنى شد ليه وجهو بين يديه كايهضر بزربة قبل مايتطلق روند التاني ) خااصك تضربوو للراس ... واخا تعرف تطييير عليه .. ضرربة وحدة لرااسو و غادي تطييحو كاااو ...
بلاك : بغييت نقتتل القحـ...حببة مووو ...
المدرب: اذن خلي قبضة يدك تكون قوية ...
فالجهة الثانية من الحلبة كان جالس اصيل على الكرسي و مرجع راسو اللور و مغمض عينيه ... المدرب شاد كيس ديال الثلج حاطو ليه على ذراعو فالبلاصة لي عندو فيها الإصابة بينما الطبيب واقف عليه كايغطي جرح بالفاصمة بعد مدار ليه ربعة دالغرزات بزربة ... وعاود لبس ليه ماسك اخر
المدرب: حالتك صعيبة ماعندكش الوقت لي تضيعو ... غادي يستهدف راسك تاني و ايلا عاود ضربك فيه غاتطيح بمرة ... وانس .. خاصك تسالي النزال فالشوط الثاني ...
اصيل ماكانش كيجاوب مزال مغمض عينيه باغي غير شوية الراحة غير تحيد الدوخة لي مشوشة عليه الرؤية و التفكير ..ولكن دماغو ماعطاهاش ليه بالمرة .... صورة قسم كاتراقص بين عينيه غير يطردها .. فرحة سلمى كاتجي تشد بلاصتها ....
المعلق1: ( شاف فصاحبو ) أي توقعات للجولة الثانية ؟؟
المعلق2: بصراحة .. لست متأكدا ممن سيفوز بهذا القتال .. لكنني واثق بأننا لن نصل للروند الثالث ...
المعلق1: أنا لا أعتقد ذلك .. أظن بأن بلاك سيواصل الهجوم و وانس سيواصل الدفاع و لن ننتهي إلا بروند خامس حاسم ...
دقايق الإستراحة سالاو ... و الحكم أشار للمدربين و الأطباء باش يخرجو من القفص ... الأطباء هزو الكراسي و الفوطات و القراعي و كلشي و مشاو .. واصيل خشى الگوتييغ ففمو ... المدربين ديال بلاك كانو كيضربو على كتافو و كيوصيوه اخر وصايات ... و مدرب وانس حتى هو كذلك طبطب ليه على كتفو ...
المدرب: راك عارف اش تدير ...
اصيل حرك ليه راسو بآه و المدرب مشا خرج تابع فريق بلاك .. واصيل رجع كينقز شوية على رجليه ماباغيش جسمو يبرد .. مابقاش دايخ و لكن مزال ماخرجش تماما من أثر هاديك الضربة لي عطاه ... و بلاك حتى هو كينقز بلاصتو برجل وحدة و رجلو الثانية مكيفورصيش عليها و كيحرك فيديه و كتافو و عينيه على اصيل بتخنزيرة قاتلة ...
دخلات هاديك البنت كتدور باللوحة و هاد المرة مكتوب عليها ( راوند -2 - ) ... و الحكم وقف بين بلاك و وانس حتى سالات البنت و خرجات .. عاود سولهم واش مستعدين و بجوج حركو ريوسهم بآه من بعد مشا خرج من القفص و سدو و هاد المرة بلا قفل .. هز يدو للفوق و دق الجرس كيعلن بداية الجولة الثانية ...
اما بيتر تنهد وبدا كايأس خصوصا ملي وصلاتو صورة اصيل كايخيط فوق حاجبو فتيليفونو عرف الى مغايقدش يكمل واي ضربة ضدو غاطبحو بالكاو والى مشى حتا طاح كامل غايقدر يزطم عليه بالكتلة ديالو يهرسو مدى الحياة .... غاتجيه ساهلة ... بدا كايحاول يستعد لخسارة تسعين مليون وكايفكر باشمن طريقة يحرق هاد الكازينو ... و شاف لعند داك الق___بة لي جالسة و وما ليها بعينيه تبدا توجد ليه كاس حيت بان ليه هااااادشي باقي مطول .....
ثانية .. جوج ... ثلاثة ....
هز بلاك يدو و قصد اصيل بسرعة باش يضربو لراسو حيت بان ليه مامغطيهش كيف قبل ... الصخب المزعج .. الأضواء الساطعة .. صوت المعلق كيعلن بداية الشوط .واصيل كايشوف انه جهد مابقاش ليه ومافيه مايزيد عاد خصو يسالي دغيا هادشي باش يمشي ينعس ..
المعلق حل فمو يقول الجملة ديالو ...قبل حتى ماينطقها .... و قبلما يوصل بلاك لاصيل ... اصيل جمع القوة ديالو كلللها فقبضة يدو ... هزها للفوووق و وجهها لوجه بلاك ....من تحت فمو هرس ليه الفك تاتعلا راسو للفووووق .....
أول قبضة منو من بداية القتال ...
أول ضربة كيوجهها بيدو ...
أول هجوم مباشر و صريح ...
ضربة وحدة للفك السفلي لبلاك خلاتو يدووور فبلاصتو دورة كاااملة وحيت عارف ضربة دالفك واخا يطلع راسو جسمو تلقائيا غاينزل ليه راسو للتحت .. غير بان ليه تحنى بحالا تجيف ملي تهرس ليه الفك نزل اصيل بالمرفق ديالو لوسط العمود الفقري ضربة وحدة هوووو يطيح على كرشو مززززلع على الحلبة !!!
لحظة صمت ...
كلللللشي فالحلبة سكت .. و حيت ماكانش المزيكا شاعلة مابقى كيتسمع واااااالو غير السقييييل !!! تامن المعلق جملتو باقا واقفة فحلقو و بيتر باقي عينيه نازلين على لكاسلي كايتخلط ليه وعاد كايعليه بشوية يشوف فين وصلو .....والجمهور مزال كايشوفو واش بدات الجولة لا مزال .....
اصيل ماوقفش يتفرج فبلاك و هو طايح .. و ماتسناهش يوقف حيت متأكد أنه ماغاديش يعاود بنوض ... مشا نيشان قصد باب القفص حلو وسط دهشة كللللشي و هاداك السكات و خرج من تماك و مشا طالع الدروج !!!!! ......
حتى واحد ما فهم شي حاجة .. المدرب ديالو براسو ما استوعبش و وقف حال فمو فالمنظر ! مدربين بلاك ماتحركوش تجمدو بالصدمة ! وبيتر علا راسو فالشاشة والكاس فيديه هو يوووسع عينيه ... غيرفرمشة كان بلاك واقف وماشي يهجم على اصيل !!!!!!ا امتى طاح وامتى اصيل خرج !!!!!!!! تتتصدم وجمد فبلاصتو كتر من لوخرين معارف يفرح ولا يستوعب
غير ثلاثة فقط لي تحركو فهاديك اللحظة ... ابراهيم و لوكاس لي وقفو كيغووتو بفررررحة فقاعة الڨي اي پي و كيتعانقو ... و بيتر لي شوية بشوية بدا يوقف بدهشة كيشوف فالشاشة بعدم تصديق لشنو شاف !! صدمة ماعمر شي واحد قدر يخليه يحس بيها !!!!!!!! اووووول نزاااال غاتجي ضربة الكاو بهاد سرعة كاااااملة !!!!!!!!!! عاد عررف علاش سمييتو ذ واااانس والضحكة كتشق شوية بشوية على فمو ....
الجمهور مزال مصدوم شي كيشوف فشي و كيرجعو يشوفو فالحلبة فين بلاك طايح ماعارفينو واش مغيب ولا ميت !
المعلق1: (بلاما يحس نطق بشوية مخاطب راسو و لكن تسمع صوتو فالقاعة كلها حيت قدامو المايك ) ما الذي حدث بحق الجحيم !!!!
أخيرا الديجي خرج من الصدمة و طلق أغنية وانس و تقني الإضاءة شعل اللون الأزرق فالمصابيح كااملين ... و بانت صورة وانس و سميتو فالشاشات كاملين تحت منها كلمة WINNER ( الفائز ) ...
المعلق 1: ( غوت بحمااس وجنوووون ) And the winner iiiis ... Theeeee ONNNNCE ....
« و الفائز هوووو ..... الـ واااااانس. »
الجمهور الـ 95 فلمية منهم لي صوتو على بلاك تقسمو لجوج ... شي كيغوت بعصبية و يسب و باغي يدابز .. و النص شد على راسو مزال مامتيقش بلي بلاك خسر بهاديك الطريقة ! وبهاديك السرعة فرمشة غين اصيل قضى على مسيرتو .....
بينما الخمسة بلمية لي صوتو على وانس تجاوزو الصدمة و بداو كيغوتو بالجهد فرحانين ماخايفينش يستفزو لي خسرو و يتشابكو معاهم .. كيفكرو غير فلفلوس لي ربحو ...و الاطباء كايتجاراو بالسرير لبلاك ....
المعلق2: ( ضحك ) و يااا لهااا من صدمة ... ياا لها من ليلة خرااافية !!! اليوم ...
( شاف فساعتو ) على الساعة الرابعة و عشرين دقيقة ... شهدنا ولادة نجم !!!
المعلق1: ( حتى هو عينيه لمعو و وقف ) لهذا هو الوانس ... أول ضربة دائما القاضية !! فوز مستحق ...!!
الاطباء بداو يفحصو فبلاك باش يعطيو النتيجة للخبراء ....ملي وصلو كان باقي فايق كايتألم ودابا غيب ..... كسر فالعمود الفقري .. غايتهز اشتاتا لشلل كلي حياتو كلها .....
واصيل غير وصل لبلاصة فين كايبدل لتخ الباب ودخل بزربة لدوش حيد داك الماسك لاحو وتقابل مع المرايا كايشوف فوجهو لي كولو حمممرر و دم باقي عالق فلحيتو والفاصمة ففوق حاجبو مزييير بيديه على لافابو فكل نزال كايكره راسو كتر من الارواح لي كتخسر واخا هوما مقمرين بيها و منتحرين .... ورجع حل الما وبدا يخبط وجهو والمدرب كايدق بجهالة فرحان يحتفل به .......وهو مغايحتفل حتى يحقق هدفو ويخرج من هاد المستنقع لي غارق فيه .....
اما بيتر ناض واقف بههيستيييرية بقى غير يقطع حوايجو بالفرحة وكايشوف ف ابراهيم بجنوووون ماد صبعو ليه
بيتر : بغييييتو .... هاااااداك غايولي المقااااتل الرسمي ديالي .....
ابراهيم جمع بشوية داك ضحكة وشاف فلوكاس .. خيت عارف بيتر شنو غايبغي منو .. وعارف اصيل مسسسستحيل يقبل بعقد العبودية .......
اليوم الموالي .....
القصر على غير عادتو هاد اليام د لكنازة صابح هادئ نوعا ما .... المنصات و المظلات و التفريشات لي كانو على برا كلهم تهزو ورجع القصر للديكور ديالو الروتيني ... ولكن مزال ماخواش من الاقارب ....
كانت العشرة ونص ديال الصباح ....
الصالون الرئيسي جالسين تما نساء الاسماعيلي متوسطاهم رقية بلباسها الابيض و تسبيحها فيديها وتنهيداتها على فراقو لي مزال خضر فقلبها وكتجمع مع بهيجة و مت عمران .. اية حداهم فكرسي متحرك ملاهيا فتيليفونها كتسنى باباها يكمل اجتماعو مع عمامها وتمشي للترويض .... جالسين ومعاهم بعض الاقارب لي بقاو من خواتات المرحوم و عائلتو .. أم عمران لي مافرقاتهمش طيلة الجنازة و باغا تمشي لدارها وولدها مابغاش بحكم انها تما معوضاهم هوما لي فخدمتهم ....
تحل باب البيرو وخرجو الرجال بلباسهم الرسمي ومعاهم بعض رؤساء الاقسام لي كانو فالاجتماع فالمكتب دأسد .... سفيان اتاجه عند آية و شاف عند حياة لي ملي فاق جا ديريكت للاجتماع خلاها ناعسة ....
سفيان: (شد وجهها الشاحب بالوحم ) شوية دابا فاتك الحال !
حياة اكتفات تبسمات ليه وهو جر بنتو وخرج .. ويونس طلع لجناحو وعدنان غير شافتو رتاج خرج مشات عندو على ود دواه لي هدا وقتو .... و اسد خارج باتجاه الباب الكبيرة و هي تبعو لامار وقفاتو ...
لامار: اسد فين غادي !!
اسد علا حاجبو وضار عندها بشبه ابتسامة
اسد : هه ! كبرنا على هاد السؤال لا !
لامار : (ربعات يديها) اه بصح !!!! .. كبرنا كتعني نخليك دايع فيين بغيتي ؟
اسد: (علا حجبانو ومهبط راسو فيها معاود كلمتها )دااايع !
لامار : ( بانت ابتسامة على فمها دغيا جمعاتها بقات باينة غير فعينيها) غير ضحكت ... سولتك حيت محتاجاك ...
اسد : ( ضار عندها كامل ) هانا الحب ... مولات الشي كاملة تحتاجني و منكونش حاضر !
لامار : ( تنهدات ونفضات على الكوستار ديالو ) ماشي مولات الشي لي محتاجاك ....
اسد : ( عض على شفتو التحتانية ) بعدي يديك الى مبغيتيش ترجعي عندهم حمرة ....
لامار : ( بعدات عليه عارفاه غيدير ليها شي احراج ) هاااانا ...
اسد : وشكون محتاجني !
لامار : مشاكل ولادك
اسد : ( عوج شفتو لجنب ) يالاه هاد صباح سالات الجنازة .. مغيعطيوناش نهار دالراحة زعما ! ... محتاج كونجي من ولادي ....
لامار : ( ضحكات بالجنب ) هه !! نكدب عليك ... والله ماكرهتو
اسد : راه غانبقى حتى نديرها غنهزك ونسمح فكولشي ....
لامار : غانجي غانلقى الدار رجعوها كازينو .... سمعني دابا ... ولدك قرر يتزوج .... وحنا اخر من يعلم ...
اسد متبدلوش ملامحو فقط تنهد وهي تعلي حاجبها
لامار : واقلة انا لي اخر من يعلم ... ماشي حنا
اسد : ماكانش الوقت المناسب ... وكنظن مزال حتى دابا ماشي الوقت المناسب
لامار : بيلي هضرات مع واليديها واريج عاودات ليا كولشي .... وهو غير بلاتي عليه .... على هاد القيمة لي عاطي لماماه
اسد : راه قالها ليا
لامار : ( بجدية ) موالدهمش بوحدك ا اسد ...
اسد : هدا ماشي موضوع غيتناقش حدا الباب ....
اسد هبط راسو لبس نظاظرو وطلعو فيها وهي ملامحها معصبين ..
اسد : انا غنمشي نقضي شي شغال عندي مهمين ... وملي تخوا الدار .... غنهضرو فهادشي ....
لامار : نقدر نعرف شنو هوما هاد الشغال المهمين !
اسد طول فيها الشوفة وكيتنهد .. مكرهش يشارك معاها ولكن مستحييييل يخلي النعاس يطير من عينيها ... ملي كيكون طاير عليه هو ويشوفها هي ناعسة كيرتاح .. ماشي بجوج يهزو الهم .. وحاول يتبسم وقرب راسها لعندو باسو وشاف فيها .....
اسد : غير خدمة اروحي .. راك شفتيني خارج من اجتماع ..
لامار : ممم داكوغ .... رد لبال لراسك
اسد : راد الباااال لراسي ومزال باغي نعيش ( هز يدها باسها ) معاك .....
تبسم ليها وتاهي بادلاتو ابتسامة عيانة ومشا وبقات متبعاه بعينيها بخاطر ومورال زيييييرو ملي سمعات اريج شنو قالت ليها وهي لي ولدها ماقال ليها والو وموضوع بهاد الاهمية وتطور لهاد درجة .... ماقالش حتى ياخد رأيها وزادت تعصبات فاش شافت تا من اسد عندو الخبار وهي ديما ولادها مخليينها اخر صفحة .... ورجعات تنهدات ودخلات راسمة قناع اللباقة تكمل واجبها مع ضيافها لي وسط دارها .... يالاه جلسات وهوما يسمعو حس سارة كتهضر مع فيصل و انس لي خارجين وضارو رتاج واريج وحياة ولامار براسهم بانت ليهم داخلة هي وماجدة ... واريج بدات طلع فماجدة وتنزل على داك اللبسة المزيرة لي جات بيها وهوما باقين فجو الجنازة ....
سارة : اللسلاااام وعلييييكم .... كييي بقييييتو ...
دخلات كتسلم على رتاج واريج وحياة ولامار ورقية وعكوزتها و جنان بالوجه والباقي مدات غير يدها وجلسات حداهم وهوما كيحاولو يتعاملو عادي واخا فالداخل ديالهم مراضيينش على تصرفها فالجنازة وانها موقفاتش معاهم كما يجب .... وماجدة غير كضور بعينيها وشافت عند لامار ...
ماجدة : خاااالتو ... جود هنا !!!
لامار : ( جاوبات فوق الخاطر ) راه ناعس ابنتي مزال مافاق ...
سارة : هاد صباح صبحات علينا .. نمشي عند جود نمشي عند جود .... اوا رغبت عمران يخليني نجي هاد صباح ...
اريج : مرحبا ... هي خاصنا نشكرو ماجدة جابتك هاد الصباح ( رتاج زطمات عليها تسكت )
سارة : والله اختي تا تمارة حتى لراسي راكم عارفين مع المركز الجديد لي تحل باقي ديزاين ماوجد وعمران بغاني نبقى فالادارة وراني درت فورماسيون نعرف شوية فهاد الامور ....
رتاج : عارفين لي كاين .. مرحبا بيكم فكل وقت ....
ماجدة : نطلع نفيق جود !!!!
لامار : ( تنهدات ) منظنش يفيق احبيبتي راك عارفاه ...
حياة : ( باستفزاز عايقة بها غير لوخرين لي كايديرو راسهم مفاهمينش ) سبحان الله ملي كانت صغيرة وهي تموت على جود ...
سارة : وايييييه تعقلو كانت مهبلاني ... تقرا فين كايقرا .. تلعب فين كيلعب ... باقين لدابا عزاز على بعضياتهم تاهو كيدير ليها الخاطر ... عندها عزييييييز .... تانقول لعمران ماعطاهاش ربي خوها عطاها جود .... ( دوك عمامات اريج ورتاج كيتبسمو ليها حيت كتهضر مع كولشي )
حياة : آآه اوا الله يدومها محبة ....
جدة ماجدة : ( تنحنحات وقربات لعندهم وهضرات فالوسط مامهتماش لشكون جالس حيت معجبهاش الحال ) ولكن ابنتي اماجدة راه الولد عزري ودابا راكم كبرتو .. ما هي فالاصول ما هي فالترابي ندخلو لبيوت العزارا هكاك .... ايه كاملين تربيتو مع بعضياتكم ولكن بنادم راه كبر والشيطان كيحضر ( لامار غير كتشوف وحياة حسات بقلبها برد مكتبغيش تعلق غير باش متخسرش سارة ... وماجدة طرطقات عينيها ولات حممممرة وسارة تنحنحات )
سارة : اويلي الحاجة واش غاتوريهم راهم بعقلهم .. راهم كي الخوت .. عزيز عليها من الصغر
ماجدة : ( بحدة ) مافهمتش اجدة انا اش فيها لابغيت نواسيه ونوقف معاه .. راه مات جدو واقلة لا !
سارة : ( بزعاف ) ماااااجدة ..
ماجدة زمات شفايفها وقلبات راسها لجنب ملول مكتحملش جداتها ودابا كملات ودوك العيالات غير كايشوفو فبعضياتهم ورقية تدخلات متنهدة
رقية : جييييل ديال دابا مغااانعرفوش ليه ... تعياي ماتهضري كيجيب ليهم الله حنا لي مكنعرفوش ... هوووما لي يعرفو وهوما لي يفكرو .. غاشوفي يا الحاجة وسكتي .. انا حفاايدي علموني نولي نشوف بعيني ونضرب الطم ...
جدة : هانتي تشوفي راهم قربو يسوطونا ...
سارة حسات بجبهتها عرقات ... وكسات بلامار واريج ورتاج وحياة بحالا معاجبهمش الحال عاطيينها غير ضحكة صفرة عرفات راسها مكبتاها معاهم و زادت كملات عليها عكوزتها بهاد الهضرة على بنتها ... وهي توقف ماجدة ...
ماجدة : غنطلع عند قدس ....
خلاتهم بلا متسمع الاذن وطلعات فدروج كتلتخ فرجليها وتنگر طالونها قرب يتهرس .... يالاه طالعة فدروج وقسم نازلة لابسة الرسمي حيت عندها اجتماع غترأسو بلاصة باباها فوحدة من الفروع البحرية نازلة فدروج وراسها نازل على الصاك الكبير هازة فيه البيسي ديالها ووراقها كتراقب واش منسات والو .. بكوستيم كلاص اخضر و شوميز بيج وطالون بيج ووجهها خالي من المكياج مكتفية غير بنظارات طبية وواقي شمسي ... غير هزات عينها وهي تقابل مع ماجدة وعلات حاجبها محاملاهاش ومكتعرفش ابدا انها تسطنع ملامح اخرين .. الى محملاتش شي واحد مكتعرفش تشوف فيه وتخبع غضبها ...
ماجدة : قسم صباح الخير !
قسم ومات غير براسها ونزلات فدروج خلات ماجدة متبعاها بعينيها ومعوجة شفتها
ماجدة : مال هادي !!!!! ...
حركات كتافها بعدم اهتمام وطلعات فدروج باتجاه جناح جود وماشي قدس كيف قالت ليهم .. يالاه غتوصل ليه وهي تسمع صوتها ...
- جا معاك الحححممر .....
علات حاجبها وتنهدات تنهيدة عميقة وتبسمات ابتسامة عريضة وضارت عندها كانت مكتية على الشباك ديال داك الكولوار لي كيطل على القصر ولي موراهم الاجنحة ... كانت لابسة بودي نازل على كتفها وجينز وسبادرين بيضة وشعرها مطلوق على راحتو و وجهها على طبيعتووو ...
ماجدة : صبااااح الخييير .. ( شافت للكسوة ديالها وشافت فيها ) عجباتك ياكما نسلفها ليك !
بيلي : ( طلعاتها ونزلاتها ) كنت غنحتاجها فجوج حالات ..... كون مكانتش ماما ستيليست .... وكون كنت كنمشي للبيران الرخاااص .... ( ماجدة جمعات ابتسامتها وبانت شرارة غضب فعينيها من استهزائها بيها لي كتمارسو عليها من منين كانو صغاااار وهي كتقرب عندها وشافت فجناح جود ورجعات شافت فيها بابتسامة كتلوي لسانها ففمها ) داخلة عند ثور ولابسة الحمر ! ( طلعاتها ونزلاتها ) كتقلبي عليه يخلي دار عشتك !!!!!!
لتحت
قسم وصلات لنهاية الدروج وشافت للصالون الرئيسي لي كان فالمنتصف وبعيد ببضع الاقدام ولكن كيبان وبانت ليها سارة كتهاود معاهم جمعات نفسها وزادت وقفات عليهم وقادات سنسلة دصاكها البيج على كتفها و هازة فيديها صاك وراقها الابيض لي عليه علامة الابل ...
قسم : صباح الخير .....
الكل وما ليها وردز عليها مبتاسمين وهي مشافتش عند سارة كاع وباست ماماها فخدها
قسم : ماما عندي اجتماع ... ( شافت لسويعة ذهيبة رقيقة فيديها ) بقات ليه جوج سوايع غنمشي قبل منتعطل ...
لامار تبسمات ليهم وناضت عندها جراتها بشوية لجنب
لامار : علااااش مستلمتيش على المرا حماقيتي
قسم : ماما راني مزروووبة ( جات ماشية وشداتها )
لامار : وقفي .... المراة كبيرة عليك احتارميها ....
قسم : احتارماتنا هي !
لامار : هادشي شغل الكبار مدخليش فيه نت ...
قسم : انا بكر الاسماعيلي وعائلتي كضربني عيلها النفس ...
لامار : ( تنهدات مبقاش عندها فين تزيد مشاكلهم ) اشمن اجتماع عندك !
قسم : ماشي ديالي ديال بابا .. وغانترأسو انا حيت مشغول
لامار : ( علات حاجبها ) علاش باباك مراهش فالخدمة !!!!!! اصلا يلاه خرج وقاليا عندو خدمة مهمة !
قسم : ( عوجات فمها لجنب ) ماعرفتش .. يمكن عندو خدمة فبلاصة اخرى مكتعرفيش نت بابا ... انا عندي ف ل MERC
لامار : داكوغ بون كوغاااج ... مغنديروش بحسابك فالغذا !
قسم : نو .. ديجا دايرين انا وجود نتغداو على برا ....
لامار : ( علات حاجبها تاني ) نت وجود !
قسم : وي .. البارح قالها ليا
لامار : بلا مناسبة !
قسم : ماما حبيبتي ( جبدات حنكها ) ولاو فيك الاسئلة بزاف لا! ههه واش انا اول مرة غنتغدا مع جود !
لامار ردات البال لراسها ورجعات شافت فيها : مقال ليك والو جود !
قسم : بخصوص زواجو ؟ ( بابتسامة ) لا قاااالها ليا
لامار تنفخ صدرها بتنهيييدة وقسم قربات لحنكها باااستها
قسم : باااي مووووم ... متوقفيش بزااااف ....
خلاتها وخرجات ولامار عينيها حماااارو ونظرة غضبت استوطنات ملامحها على جود ورجعات تاني دفناتها ومشات تجلس .. ولات كتحس براسها كدير مجهود كبيرررر فهاد البروتوووكل وفهاد المشاكل لي خاصها تخبيهم والملامح لي خاصها تستأجرهم ..... وجلسات تاني معاهم كتسنى فوقاش تشششدو موياااان ما تاداباا عارفة مغايحلش ليها الباب ملي يكون ناعس خصوصي ملي كتكون دار عامرة كايسدها عليه ....
*لفوق ...
ماجدة : شنو دابا ؟ واقفة هنا شادة العسة على السويت ديالو ؟ ( دارت ضحكة مستهزأة ) امتى جود عينك سيكيرتي ديالو وانا مفخباريش !!!!!
بيلي : نو ماي هوني ( مدات يديها دارت ليها شعرها مور وذنها وماجدة بعدات راسها بغضب ) ماعينيش سيكيريتي ديالو .. حيت هو لي قايم بهاد الدور .. اما انا .. عيّني .... ( قربات ليها كتر ) الماالِـكة ديالو .... وعطاني سوارت قلبو .... ( رجعات لور ) يعني داك السويت ..... شي حاجة كتخصني ... شي حاجة ديالي ....
ماجدة : (خبات غضبها ) مممم .. يالاه ... وريني كيفاش غاتحبسيني ...
بيلي : لا .... نت لي وريني ... كييييفاش غادخلي ....
رجعات بيلي تكات على الشباك بظهرها وحاطة درعانها على الجوانب وضاحكة وماجدة تنفسات مزيان ومشات لجناحو حاولات تحل ولكن مسدود وبدات كدق
ماجدة : جووود .... (كتقرب لباب وتهضر حيت لباب هو الوحيد لي معازلش للصوت ) جود هادي انا .. حل بغيت نهضر معاك ....
اما جود كان يلاه خارج من الدوش وخارج كيهضر فالتيليفون وحال المجر
جود : علاش فينك نتاا دابا !!
لوؤي : فالمتحف ... صافي مابقاش بزاف ....
جود : ماعنديش كيفاش ندير ليك الوؤي .... راه ماعندي كيندير .. الى مشيت دابا لشي قنت بلا خبارو غيحساب ليه رجعت لرالي
لوري : غايخصني ضرووووري نكون فواشنطن ....
جود : مغتقولش لينا خلاص فين كتمشي و تسافر معلي راسك ماشي مخبي ورا ظهرنا انا وسلطان !
لوؤي : ماشي وقتو ...
جود: مافهمتش انا اش كدير كل مرة فهاد واشنطن ! وماباغيش تگول لينا ملفوق .....كون مكانش شعرك كحل كنت غانگول راك نتا هو جو بايدن اصاحبي !
لوؤي : دابا واش غتسافر ولاا ..
جود : واش نتا مسطي ... نمشي عند الواليد ، سلام راني باغي نمشي توريست وجدي يلاه دفنتو .. واخا نكون يهو•دي اصاحبي ... ( كيسمع الباب كدق ) شكون غيفرع ليا كري هاد صباح تاني .... سير سير تانجي عندك ...
قطع عليه وحط تيلي وشاف لعند الباب وبدا يقرب هو يسمع صوتها ودوز يدو على جبهتو كيفكررررها ويحك فراسووو ... حل الباب بجهاااالة وهي تووسع عينيها ملي حل الباب عريان لابس غير شورط قصير بيض بسيور وصدرو كامل كيقطر بالما لي نازل من شعرو ولي مزال كيردو لور بيدو ولحيتو فازكة وريحة الجيل والشامبو عاطية منو
جود : اش كاين صباح هدا !!!!!
ماجدة باقا مشوكية كطلعو وتنزلو وبيلي رامقاها بنظرة وضحكة شريرة على داك الزعفة لي دار ليها وحسااات بالرضى والفخخخر لي جود ديالها بوحدها وحنين غير معاااهااا عارفاه مكيحملش فيها الشعرة وهي مليوحة عليه ....
ماجدة : ( كتمتم ماقاداش تبعد عينيها عليه ) اا .... ج جود . .. ب ب غيت غييير ( حاولات تقاد فالوقفة وشافت فوجهو باش ميتشتتش نظرها على جسمو وعضلااااتو وسموريتو وردات شعرها لور ) ماقدرتش نهضر معاك ملي مات جدك ... بغيت غير نسول كيبقات نفسيتك .....
يالاه غيجاوبها معلي حاجبو شافها دفعاتها لجنب وجات تعلقات فعنقو واقفة على صبعان رجليها وباستو فقمو بوسة خفيفة وماجدة رجعات لور مطرطقة عينيها
بيلي : گوووود مووورنيييينغ مااااي برراون ماااااان ....
ماجدة ضورات راسها لجججنب بزربة وكتسرط فريقها مقداتش تشوف وقلبها كيضرب بجهد وجووووود ماحملش الموقف وعلا راسو حس براسو بحالا مراهق كاقرا فليسي بهاد الحركات .... وماجدة هبطات كتجري فدروج .... ورجع شاف عند بيلي لي ضاحكة وكتجمع ضحكتها شوية بشوية مع تخنزيرتو ....وهو حيد يديها من عنقو ...و تنهد بغضب ودخل لجناحو وهي تبعاتو وسدات الباب معلية حاجبها على هاد نترة لي دار ! وهو ضار عندها
جود : هاد التبرهيش هدا راه اخر حاجة نبغيها تكون فالمراة لي غنحطها فجنبي حياتي كاملة !
بيلسان علات حجبانها بجوج مصدومة ...
بيلسان : ييااااك !!!!!! ششكون لي فيه تبرهيش ! انا ولا نتا لي حال لوحدة مكتجيك والو عريااااان وعاطيها الوقت ملفوق
جود : ( كيقرب لعندها ) اااششمن وقت عطيتها انا ؟ اشمن وقت !!!!!
بيلسان : ( بحدة ) سمعتي صوووتها علاش حليتي ليها !!!!!!
جود : اخر حاجة كنتسناها هاد صباح .... هي نتخاصم على ود ماجدة ....
بيلسان طلعاتو ونزلاتو ورجعات قربات ليه بجدية كتشووف ليه فعينيه
بيلسان : كيفما نتا مامناسباكش ان المراة لي تكون فجنبك يكون فيها التبرهيش ..... حتى انا ممناسبنيش ان الراجل يكون فجنبي .... يكون فيه تزهواااانيييت .... ( عوجات معاه راسها ) ولا محملتيهاش تشوفني بستك !
جود : ( بحدة كتر كيشوف فيها مزير على سنانو باقي المنظر معصبو ) التبرررررهيش لي قصدت انا .. هو تجي تبوووسيني ضد فشي وحدة .... نهار تبغي تبوسيني .. بوووسي حيييت نت باغا .. وحيت انا باغي .. ماشي على ود وحدة تشوف .... تحطيني انا وسيلة تعصبي بيها شي واحد .... لا ......
بيلسان حمرات فيه خرجات معصصصبة ولتخات عليه الباب ومشات لجناحها وهو بقا كيضور وكيرد شعرو لورررر و ضررب بركلة فالسرير
جود : فاااااااك !
بعد اربع ساعات ....
عند قسم .....
ابتسمات للجميع وومات ليهم يتفضلو ... غير وقفات تاهوما كلهم على طاولة الاجتماعات وقفو كينصرفو واحد واحد ... وهي رجعات جلسات على الكرسي دباباها .. الفيست ديالها معلقة موراها بقات غير بشوميز بيج مربوطة فعنقها وهزات تيليفونها تشوف واش تلقى شي ميساج منو مدام دوزو نهار زوين بحال البارح ... ووصلها تالدار ... كتمنى ميكونش داك الحلم صافي سالا تاني وخاصها شي صدفة لي تلاقيه بيها من جديد وهي دخل الكاتبة دباباها كتعلمها بالتقرير هي كتهضر وقسم عينيها كتقلب فكاع لي كونط دسوشل ميديا كاتقول ممكن يصيفط ليها فيهم لا مشات ليه نمرتها ... تا من جيمايل قلباااتو ومالقات والو .. فلخر تنهدات ولاحت تيلي على طابلة الاجتماعات كتأفف تاقفزات الكاتبة لي فوق راسها لي كانت مراداش ليها البال
الكاتبة : اا ...مدموزيل قسم !!!
قسم : ( علات فيها عينيها عاد شافتها ) هم !!!!
الكاتبة : كاين شي مشكل !
قسم : ( بابتسامة لبقة وعينيها باقين معصبين ) لاااا ...
الكاتبة تبسمات وغادارت وقسم تنهدات ورجعات ثاني هزات تيلي وبدات كتصوني تاجاوبها كان صايك يلاه خرج من الكاراج وماشي عند لوؤي شاف النمرة فالشاشة دطموبيل وجاوب
جود : قسوم
قسم : ( شافت لساعة فمعصمها قريبة التلاتة دالعشية ) فيا الجوع ...
جود : عطيني واحد الساعة دالمگانة ....
قسم : داكوغ ... فين نتلاقاو
جود : فين تشهيتي تغداي
قسم : ممممم .... مكرهتش فالمدينة القديمة
جود : ( معلي حاجبو باستغراب ) ايز دات ا جوك ! " واش هادي نكتة ؟ "
قسم : نووو داوية دبصح .... مالها اش فيها .. نمشيو ناكلو باربيكيو
جود : داكوغ ... ختاري وصيفطيلي لوكاليزاسيون وحضي من لميديا ....ماعنديش لخاطر لمحاضرات سي الاسماعيلي ....
قطعات عليه وناضت هزات الفيست ديالها و شانطة ديالها وصاكها لي كانت سنسلتو ذهبية نازلة على كتفها وتمشات باتجاه المصعد معلية نظاظرها الطبيين جامعة بيهم لافرونش لي كانت طايحة على عينيها .... نزلات حتى للطابق تحت الارضي لي فيه غير السيارات ومشات بجيهة المكان المخصص ديالهم .. كان الباركينغ خاااوي كيتسمع غير طقطقات طالونها حتى وصلات لطموبيلتها لي كان الباب محلول والشيفور واقف ومنزل راسو حالو ليها باش تطلع .... وهي منزلة عينيها على التيليفون كتقلب على شي ريسطو زوينة يلاه غتطلع لطوموبيل وهي توقف مدة ويديها باقين فتيلي وعلات عينيها كتشوف فالفراغ ..... وقلبات راسها بززززربة تشوف شكوون حال ليها الباب هو يعلي عينيه لي كان منزل عليهم الكااااسكيييييط ووسعات عينها تاطاح التيليفون من يديها وشدات على فمممهااا مامتيقااااااش .... كانت شاكة انه حلم !ولكن ملي هضر قطع الشك باليقين
اصيل : سي الروكان خاصو يرد البال كتر .... ( عوج راسو معاها وهي مصدومة فيه ) حيت هنا شي ناس كيحاولو يخطفو ليه بنتو ....
قسم : ( حلات فمها ممثيقاش والضحكة بدات كتشقق رغما عليها عكسات الفرحة لي حس بيها قلبها وفرفر ) اصييييييل ؟؟؟؟؟ ( شافت مع جنابها وشافت فيه ) اش كدير هنا ؟؟؟؟؟ و فييييين الشيفور ؟؟؟؟؟
اصيل تقاد فوقتو كانت لصقة بيضة فوق حاجبووو وبدا يتسمع لقسم صوت " امممممم امممممم " جاي من الكوفر وهي تشوف فيه مصدومة حالة فمها وهو داير نظرة براااااءة معلي حجبانو بجوج وزام فمو ومعلي كتاافو وصبعان يديه فجياب السروال مخليين كتافو يبااانوووو مفتوووولييييين وعراض
اصيل : مكانتش شي طريقة اخرى ......
عند أسد ....
كانت طاولة كبيرة مستديرة من الخشب العتيق ضايرين بيها دكاترة بطابلياتهم البيضاء و تقاريرهم وتحاليلهم وجالس معاهم أسد ... كيناقشو نتائج تحاليل اللعاب ديالو لي تهز من المخدة ديالو ....
الدكتور : كيف خبرتك اسي الاسماعيلي .... منقدروش نعرفو ابدا واش وصلات الحالة للادمان وحنا مكنتعاملوش مع المريض مباشرة .... نتا بوحدك لي غتقدر تعرف لينا اشمن حالة تطور عندو المرض ...
الدكتور 2 : فقط تأكد انه مكيتعاطاش و معندو حتى شي حاجة .. ولاحظ تصرفاتو واش فيها تغيير !واش فيها عنف! ... لان ادمان الستيرويد الى ماتخادش كيولي الشخص عصبي وسريع الغضب وكيميل للعزلة ... طبعا هادو خصايل المراهقين غيجيك الامر صعيب تميز ولكن الى لاحظتي ان هاد العلامات زادو على حدهم عاد تقدر تحدد واش ولدك وصل لحالة الادمان ....
اسد : شحال دالمدة وغيبان عليه الاحتياج الا كان مدمن !
دكتور 1 : بنسبة لستيرويد ... عطيه كتر من شهر .. لان شهر لول غيقدر يتحكم ولكن منبعد لا .. وكنزيد على كلام الدكتور انه مغتلاحظش غير العنفية ... غتلاحظ تاقلة التركيز وممكن حتى النقط فالدراسة يضعافو ليه .... غتلاحظ انه كينعس بزاف وكيهرب من الانشطة البدنية و معكااااز ... بصورة لي وااااااضحة و كتييييرة ....
دكتور 3 : بصفتي فالطب النفسي و مرافق المرضى فالعلاج ... خاصني نعرف شنو خلاه يلتجئ لستيرويد .... و من المعلومات لي عندي .. انه اول مرة خدا الستيرويد ... كانت نهار جاه اجهاد بسبب الدراسة ... سي الاسماعيلي .. واش نتا فايت انك ضغطتيه بالدراسة !!!!!
اسد: ( قرب للطاولة شابك يديه كيتنهد ) درتها .... حيت وسيم كان من صغرو من ولادي لي كيتمشاو بالتهديد وبالمقابل .. ديما الى جبتي هاد لانوط غتاخد هادي والا مجبتيش غتعاقب بهادي ...بهاد الطريقة باش كان كيتمشى من صغرو ديما خاصو المقابل لي غياخد ... وانه يقرا قدامي فالمغرب كانت هي الحاجة لي مكانش باغي بحكم داك الفترة مكانش كيتفاهم ليا بزاف هو وخوه وكانت دقة ديما كتجي فيه واخا كان هو الصغير كنا هو لي كنقولو ليه ميعصبوش بزاف بحكم داك الفترة خوه كان يالاه كيحاول يتشافى من داك الكومة لي كان داخل ليها ومرضو كنا كنحاولو نشدو بنفسيتو .. ونخليو وسيم لي يتصرف بالعقل عليه هو .... شي لي كيخلي وسيم ميبقاش حامل العيشة معانا ... كانت منرفزاني القضية ولكن كنت كنقول انه شوية ديال البعد ... يقدر يخليه يتوحشنا .... ملي خدا العام لي فات البكالوريا وهو كيرغبني باش يمشي عند جداتو لامريكا يدخل الجامعة ... وحيت بغيتو يجيب دي نوط مزيانين على ود مستقبلتو خلعتو بالمغرب وقلت ليه الا مجبتيش مزيان غترجع للمغرب .... وداكشي علاش ضغط على راسو فالدراسة حتى كان جاه اجهاد ومشا ليزيغجونص وكانو وصفو ليه الستيرويد مع الطريطمون .. وكنظن خداه شهر .... داكشي لي كان حاطين ليه فالوصفة ...
الدكتور 3 : فهمت موسيو الاسماعيلي .. هادشي كيعني انه من بعد ماذاق الستيرويد وعطاه نتيجة وخلاه ديما مركز وكيخدم مزيان .... غيكون داكشي لي خلاه يقلب عليه .. حيت لقاه ورقة رابحة باش ينجح بمونسيون و مايرجعش للمغرب .. وطبعا حيت هو فامريكا مغيعطيوهش ليه فليفارماسي بلا اوردونونص ... وغايكون بقى كيقلب عليه فالنوار .. غالبا غيكون التجأ للانترنيت .. وكنظن لي باع ليه باعو ليه مخلط حتى ولا عندو ادمان هلوسي .... ( اسد نزل راسو كيتنهد ) دابا حنا معارفينش اشمن درجة واصل ليها ولكن متبعين حالتو وضوسي ديالو .... ادمان الستيرويد الى خرج المريض على سيطرتو راه يقدر يقتل ... داكشي علاش خاصو متابعة دقيقة .. منظنش ولدك وصل لهاد الدرجة مدام غير شهور قلال .....
اسد : ( دوز يدو على جبهتو ورجع علاه فيهم ) انا غنجبد شكون كيبيع ليه داكشي ونتأكد مزيان بلي مابقى تاشي واحد غيعطيه شي حاجة ... والا شفت شي حاجة ماشي هي هاديك راه غنعلمكم ....
وقف اسد وشكيب من موراه وزاد للباب بعد ماودعوه ونزل فالمصعد للباركينغ يلاه غيحل ليه الباب شكيب هو يحيد السوارت لشيفور و ركب بوحدو .. عرفوه محتاج يبقى بوحدو و بقاو بعاد .....
عند قسم ....
باقا مصدومة غير كتشوف ممثيقاش وعينيها فيهم لمعة و ضارت براسها كتسمع انين الشيفور وهي ترجع شافت فيه ...
اصيل : غير مربوط ... ( علا يديه ) مدرت ليه والو ....
قسم : ( حابسة ضحكة ) مااعندكش الععععقل ....
اصيل : ( علا راسو مدة كيشوف فيها ورمش بعينيه مع ابتسامة جانبية بانت فعينيه ) مزال ماشفتيش ..... ( قرب عندها براسو وحط فمو فودنها وهي عضات على شفتها وغمضات عينيها وزيرات على قبضة يديها ولحمها كلها تشوكات بالهمس ديالو ) شنو نقدر ندير الى حطيت شي حاجة قدام عيني .....
علا راسو وبعد وهي عاد خرجات تنهيدة وحلات عينيها هو مراقبها شافت عندو بعينين قربو يدمعو بقوة داك الاحساس لي جاها ملي قرب لوذنيها ...
قسم : ا ا .. ( ضارت موراها وكلها كتمتم ومامسكدة حتى شي جملة وكلها محرجة و مشتتة ) خ .. خاصني نطلق السيد غادي يتخنق .... ( رجعات شافت فاصيل ) كنت تعيطلي عادي وغنجي عندك فين نتا ....علاش هادشي كامل ههههه
اصيل : (علا حجبانو ) على ماشي نت لي طلبتيها !
قسم : ( ضحكات ملي تفكرات طلبات منو يخطفها ) قققلتها بالضحك ا اصيل .. مقلتش ليك ديرها بصح ...
اصيل غير كيشوف فيها مبتسم وهي بدات ضور فراسها ومشات بجيهة الكوفر حلاتو وهي توسع عينيها كان مكمش تما ورابط ليه يدو لور بسمطتو وخاشي ليه صندوق المنادل الورقية ففمو ... شافت فيه عاضة على شفتها ورجعات شافت فالشيفور وفكاتو ووهو خرج كاينهج وهي كتحاول تنفض على حوايجو وتعتذر ..
قسم : مسسسحها فييييياااا مسحها فييييا ....
الشيفور : ( مخنزر كيشوف فيه ) وااااش عارف راسك معامن نتا ( اصيل على فيه حاجبو )
قسم : معاياا .. معاياا .. هذا معااياا انا .... شوف ... ( كتحاول تضحك وحتى فالداخل اصلا فرحاااانة ) ششوف .... نتا عارفني ياك .... بيناتنا غيبقى هادشي
الشفور : وولكن ؟؟..( قاطعاتو )
قسم : مكاينش ولكن .... بابا مااايعرفش بهاااادشي .. ولا راه والله لطموبيلتي لااااركبتي ..... ( داك الشيفور بقى يشوف فيه مخنزر واصيل مبادلو بنظرة عادية داير يديه فجيابو وهو شاف عند قسم ووما بآه عارف غيخرج على خدمتو اللهم يضرب الطم ) سير دابا من هنا ....انا غانمشي بوحدي ...
الشيفور : و ولكن ( قاطعاتو)
قسم : الكارد راهم لفوق راهم غيتبعوني غير سير .....
مشا وهي شافت عند اصيل واصيل علا حجبانو بجوج معوج فمو بمعنى معندي مندير ليك .. نتي لي بغيتيني .. وهي تضحك كضور فراسها ومشات لطموبيل ركبات فين كان حال ليها الباب وهو شدها ومشا من الجيهة لوخرا .....
عند اسد ....
وصل قدام القصر .... وباركا الطموبيل .... يلاه حل الباب باش ينزل رجع سدها وبقى كيشوف غير فالفرااااغ .....
عينيه تقالين فالرمشات ديالهم .. عيان حتى يرمشهم ... ضربة وسيم مكانتش ساهلة بنسبة ليه .. خلاتو يشوف هو شحال كيغلط فتربيتهم ... بينما كيحساب ليه راه كيدير الصواب ... وهو فكل لحظة كيكتشف انه مكانش بداك المثالية لي باغي يكونها كأب .... فلول قسم لي دكس عليها الخدمة والقراية و عطاها كاع اش كاين على وجه الكرة الارضية حتى ولات ليه بنت رمادية فاقدة الحياة والشغف فكولشي وشبعانة من كولشي وتاحاجة مكتفرحها .... لجود لي بسبب الخوف الزائد محروم من حلمو وكيشوفو عااايش بحال شي جثة بلا روح من نهار منع عليه الرالي .. عارف جود واخا كيضحك من لداخل ديالو ابدا محاسش بالسعاااادة حيت عارف وجه ولدو كيف كيكون نهار كيرجع من الرالي ... قدس لي قال هي لي يصحح فيها اغلاط قسم وعطاها الحرية ومبغاش يشنقها صدقات كتحس بالوحدة وانها مامهتم بيها حد ومشات كتقلب على الاهتمام من البراني .... ووسيم دابا !! قلبو تزييير عليه تاحس النفس كطلع بزز ... مكانش باغي هادشي يوصل ليه .. هو كان داير جهدو باش يربي ولادو بمثالية .. نسى ان المثالية ماشي هي التربية .. التربية هي التواااازن ...
علا راسو شحال مرجعو لور ... فلخر تنهد وحل الباب وخرج .... مع وصل للقصر سمع باقي الهراج زاد نفخ صدرو عيا باغي غير فرصة فين يرتاح شوية .... داز حداهم ولامار طلعات معاه عينيها شافتو ماشي جيهة الدروج وخلاتو ورجعات انغمسات فحديثها لي تاهي غير دايرة الخاطر والصواب اما هي محتاجة لشي بلاصة بعيدة غير هي وولادها تكلس وتشبع منهم فالهدوء ... اسد وصل قدام جناح وسيم وبقى واقف شحال فلخر حل عليه الباب ... كيقلب بعينو هو يبانليه فالبالكون ... ومشا باتجاهو كان كالس على الكرسي وطاوي رجليه على طاولة زجاجية قدامو ...وقدامو كانيطة دصودا وداير الكاسك فوذنيه وبيسي على رجليه وطل معاه براسو على البيسي ...
اسد : ڤامبير ! ....
وسيم علا راسو وتبسم ليه واسد مشا لكرسي لاخور وجلس ....وهو حيد الكاسك من وذنيه وجمع رجليه تقاد فالجلسة
وسيم : آه ...باقين كيعجبوني .... ( رجع شوية بعينيه لجنب مرجع تما ذاكرة طفولتو ) باقي عاقل كنت باغي نكبر ونولي بحالهم ... ( شاف فيه بابتسامة ) وملي كبرت لقيت بلي داكشي خيالي ....
اسد : ( جلس براحتو مربع يديه كيشوف فيه ) غير شفتي عندك نيابهم صافي باغي تولي بحالهم .... ( عوج راسو معاه ) وشنو خلاك واخا كبرتي وعرفتيه غير فانتازيا ... باقي كتفرج فيهم
وسيم : ماعرفتش ( معوج شفتو لجنب ورون فشعرو الكيرلي ورجع شاف فيه ) يمكن حيت مكنخدمش فيهم دماغي بزاف ... المسلسلات الواقعيين كتبقى تربط مشاهدهم مع حياتك ... الفانتازيا كتفرج مرتاح عارف داكشي مكاينش فالواقع وعاجبك واخا ماشي منطقي ...
اسد : مكتعجبكش المنطقية !
وسيم : لا ولكن كتعييني ... كنحس براسي كندير مجهود باش نلقى كاع الحوايج لي قدامي منطقين ...
اسد : وشنو المنطق بنسبة ليك
وسيم : شي حاجة دخل لدماغي .... نحس انها قنعاتني ....
اسد : هادي حاجة مزيانة .. علاش غتهرب منها للفانتازيا !
وسيم : قلتها ليك فلول .. حيت كنعيا ....
اسد : كتقلب على الساهلة .. اللهم نعيش فالخيال .. واخا نشوة دالخيال مؤقتة .. ولا نعنكش راسي مع المنطق ! ياك ؟ .... واخا هاداك هو الدايم
وسيم : حياتنا اصلا ابابا مؤقتة .... علاش نعيشوها عيانين مع شي حاجة غادوم بوحدها على هاد الارض وحنا غنموتو ....
اسد : الموت منطقي بالنسبة ليك !
وسيم : منطقي
اسد : ومآمن به
وسيم : مدامنا فجنازة .... آه
اسد : علاش غتعيش حياتك فالخيال الا كانت النهاية غتكون منطقية ! .... واش باغي نهايتك تكون خيالية !!! .... اكيد فلخر غيجي المنطق يهرس كولسي .. ويبين ليك ان داك الحياة لي عشتيها تابع نشوات مؤقتة .... ماعشتي فيها والو ... ماعشتي تاشي حاجة حقيقية فحياتك ... كولو وهم .... ومشيتي ونتا ما داي معاك حتى شي حاجة ....
وسيم : ( عوج راسو مع باباه ) بابا ! مكنظنش الفراجة فالفامبير خايبة لهاد درجة
اسد : ولكن تهرب ليهم من واقعك ... خاااايبة لداك الدرجة اولدي ....
رجع تنهد وابتسم ليه ووقف مشا رون فشعرو خداه بين صبعانو ...
اسد : خاصو ينقص شوية ...
وسيم : (خربقو تاهو بيديه تانزلو بعض الخصلات المجعدة على عينيه ) لاااا عاااجبني
اسد بقى يشوف فيه شحال مبسم ووما ليه بالايجاب ورجع خرج ووسيم متبعو تامشا ورجع خدا البيسي ديالو كيكمل تفراجوو ....
واسد خرج يلاه غادي لجناحو هو يشوف جود طالع كيضور سوارتو فيديه وضار عندو
اسد : جود !
جود : ( علا راسو فباباه عاد شافو ) الواليد ..
اسد : فين كنت !
جود : غير مضيع الوقت ...
اسد : نتا عارف ملي غيسالي هادشي عندنا ميدار ... خاصك تبدا وخاصني نشوفك بديتي
جود : كون هاني .. بديت قبل حتى مايبدا هادشي ومغنتسناش تايسالي هادشي ... التصاميم شي وحدين واجدين ملي تبغي تشوفهم انا معاك ....
اسد : ( بنظرة استغراب لاجتهادو ) بيييزاغ !
جود : هادي هي فاش كتكون كدير شي حاجة عاجباك ... مكضيعش فيها الوقت ومكتأجلهاش ...
اسد : ماماك هضرتي معاها على زواجك
جود : ( علا حجبانو ) نو علاش !
اسد : وعلاش لي نو ؟
جود : قلت حتى لمنبعد ...راك عارف هي مغنقدر نقوليها شي حاجة تاتكون رسمية
اسد : اجلتي الهضرة فالزواج حيت مزال مباغيه يولي رسمي ..... ( عوج شفتو لجنب وجود عرفو اش كيقصد ) مزياااان الواحد يدير الحاجة لي باغيها ومايأجلهاش ....
خلاه ومشا لجناحو وجود بقى كيشوف فلخر مشا تاهو باتجاه سويت ديالو تاداز على ديال بيلسان وبقى واقف شحال كيتفكر دبازهم دقبيلة .... والطريقة لي تعامل بيها معاها وهو يلاه قالو بسم الله ... اخر حاجة باغيها دابا هي شي خصام معاها فالوقت لي هو محتاج يتعرف عليها كتر ويتقرب منها كتر .... وقرب للباب ودق جوج مرات بدون اجابة .... هو يحل وطل غير براسو بان ليه الجناح خاوي ... وحتى باب الدوش محلول والضو طافي فيه .... ورجع دخل كيشوف بعينيه ويقلب عليها ... تاسمع شي حس فالدريسينغ ....
ومشا بشوية لتما طل براسو كانت جالسة فالارض ووجهها حمر بالبكا وفيديها فيست .. ملي صغر عينيه عرفها ديالو حيت جاكيت حمرة ديال الرالي ... واخا معارفهاش ومعاقلش عليها غير من علامة الرالي دموناكو عرفها ديالو .... كانت شاداها بيديها وجالسة ... مكتبكيش ولكن باينة بكاااات وكتشوف غير قدامها لدرجة ماحساتش بيه كاع واش واقف حداها ... ومشا بشوية تاكلس حداها فالارض وهي تخططف كاملة بحالا فيقها من سهوتها وهو كيشوف قدامو فالتجاكيطة لي فيديها ورجع هزها عندو جالس حداها تاهو كايشوف فيها....
جود : بغيتيني نرجع لرالي !
بيلسان : ( مسحات عينيها لي اصلا نشفو وعند بالها باقي فيهم دموعها وباقي نبرة الغضب فصوتها ) حياتك هاديك .... مغنقررش ليك فيها ...
جود: ( ضور راسو شاف فيها وعوجو لجنب مهبطو على عينيها الزرقين لي بداو يتعمرو بالدموع تاني ) واقلة راحنا كنخططو تولي جزء منها لا !
بيلسان : هانتا قلتيها .... ( شافت فيه ) جزء .... ديما غايبقاو حوايج اخرين مداحسيني فحياتك
جود : ( علا حاحبو بطنز ) وبغيتيها كاملة ! باغا ديري خدمة عزرايل ( بيلسات غير ساكتة وهو كمل ) بحالاش هاد الحوايج لي مداحسينك فحياتي ...
بيلي : ( شافت فمنتصف عينيه ) ماجدة مثلا ...
جود : فحياتي بزااااف دالجوايج لي عاطيهم الاولوية .... ومكنظنش ماجدة وحدة منهم ..
بيلسان : ( علات حاجبها ) اوا علاش تقلقتي حيت شافتني بستك
جود : ماعرفتش واش تا شحال هادي مكانش كيعجبني نعاود الهضرة جوج مرات ولكن دابا مكيعحبنيش نعاودها ( شاف عندها ) نوطي عندك هادي ..... قبيلة قلت ليك لي عصبني ماشي هو الكيس لي داز قدام عينيها .. لي عصبني هو بغيتيها غير باش دوز قدام عينيها ، عطى الله باش تقاتلي معاها ... ولكن .... Don't use my lips as a weapon to fight with " متستعمليش شفايفي سلاح باش تحاربي بيه "
بيلسان : عاجبك نتقاتلو عليك ! راضي غرورك ؟
جود : ( مد يدو عنقها وقربها لعندو وهي معلية راسها كتشوف فيه وهو كيلعب بصبعانو فعنقها وكيشوف قدامو ) لسوء حظك ناسي غير مرحلة من حياتي ومناسيش الصغر .. باقي عاقل بلي منين كنتي باقا صغيييييييرة بزاف ونت كتقاتلي معاها على المونيكات ... على الحوايج ... على الالعاب ... عداوتكم راها قدييييمة ابيلي ماشي انا سبابها ....
بيلسان : كدافع عليها !!!!!!!
جود : كنوضح .... ( رجع هبط راسو لعندها ) بيلي ... بين كولشي ختاريتك .... مختاريت تاشي وحدة اخرى .... كارت ديال تيليفوني و بدلتها ... حياتي القديمة كلها وقفتها .... ومسحتها .... وبغيت نبدا وحدة جديدة معاك ... باغي نبداها حيت باغيك ... ماشي حيت بغيت نوري لشي حد بلي شووووف راحنا كنبغيو بعضياتنا ولا باغي نفقص بيك شي واحد ..... باش ديريني وسيييلة تلبي وترضي داك الجانب لي كيتقاتل مع ماجدة من الصغر ولي كبرتيه معاك .... لا .... الى كنا غنديرو خطوة الزواج والجدية .. مباغيش مزال التبرهيش يدخل وسط هاد العلاقة ..... انا حمق ... وعزيز عليا حبيبتي تاهي تكون حمقة ... ولكن باغيها تحمااااق معايا بعقلها ..... تكون حمقة بعقلها .....
بيلسان : ( كتشوف لتحت وتفرك فيد داك الجاكيط لي باقي على رجليها ) ماجدة كضور بيك اجود ... انا عارفة كولشي ... و (قاطعها)
جود : ... تانا مناويش نخبي ... وحو•يتها كاع ( بيلسان عوجات شفتها حيت عارفة ديجا ) وماشي غير هي **ويييييت بنات بزاف تامببيقيتش قادر نحسب .... ولكن ملي حبست .. راه حبست كولشي .. وماجدة كتبقى بنت العائلة ومها كنيتها الاسماعيلي وغتشوفيها فالدار بزاف دالمرات ... ماعندي كيندير ليها .... داكشي علاش تيقي فراسك قبل ماتيقي فيا انا .... راه ملي بغيتك نت .... راه مغنبغيش شي وحدة اخرى ونت كاينة ...
بيلسان : وانا مكايناش !!
جود : انا ماشي ملاك لداك درجة
بيلسان : ( عوجات شفتها لجنب. شافت فيه ) انا عارفاك زهواني من شحال هادي .... داكشي علاش كيجيني صعيب نتيق فيك ...
جود : *بي بوحدو لي زهواني .... انا قلبي راه واحد المععععقد مامنو ..... ومكنطلبش تيقي فيا ...طلبت تيقي فراسك ....
بيلسان : ( جاتها الضحكة على التعبير وجمعاتها وشافت فيه ) وداك القلب المعقد ....تحل ليا !
جود : ( هبط عينو كيشوف فعينيها الزرقين لي بحال السما ولي دغيا كتبان فيهم الفرحة وتبسم تاهو ) وفنظرك هاد العينين .. يبقى شي قلب مسدود قدامهم !
بيلسان : بزاااااف لي عينيهم زووورق غتكون عرفتيهم اجود
جود : ولكن غير وحدة لي سميتها بيلسان الاسماعيلي ......
بيلسان تبسمات ليه وفداك اللحظة لي هو كيشوف فيها بديك الطريقة ظنات انه غايبوسها .... خصوصا ملي شافتو نزل عينيه وهي تغمض عينيها ملي حسات شفايفو على جبهتها ..... قبلة عميييقة وداافية .. ورجع بعد منها ووقف ....
بيلسان : ( تبعاتو بعينيها ) فين غادي
جود : غنبدل حوايجي تكرفصو بالغبرة ( سروالو كان فيه الغبرة من الكاراج ) وغنخرج غنتغدا انا وقسم ....
بيلسان : اذن غتعشى معايا !
جود : منظنش واش فكرة تعجب العائلة .. مبغيتش شي خطأ اخر يريب كاع اش كنبني فيه ......
بيلسان : (عوجات شفتها لجنب)عندك الحق ......
ابتسم ليها ومشى وهي رجعات تنهدات وتبسمات كتشوف لداك جاكيط ديالو لي كان دفاها بيها واحد نهار وقرباتها لنيفها شماتها مطوووولة ودغيا وجهها ولات فيه الاشراقة غير بشوية ديال الكلمات منو .....
عند قسم ...
صايك أصيل وهي مرة تشوف فطريق مرة تشوف فيه والضحكة مزينة وجهها بابتسامة عريضة .....
قسم : واش نقدر نعرف فين غادين
اصيل فقط ضور ليها راسو بلا ....
قسم : واغير لمح ليا ! .... ( اصيل ضور ليها راسو بلا تاني مبتسم )
بقات ساكتة كضور راسها مبتسمة وهو حس بالكاسكيطة صهداتو حيدها لاحها يد فالفولون ويد كيمشط بيها على شعرو كيهبطو على جبهتو وهي كتشوف فيه عاضة على شفتها التحتانية تاشوية قشعاااات اللصقة لي فجبهتوووو
قسم : اصيييييييل !!!!!!!
اصيل ضار عندها وهي كتشوف لداك لصقة
اصيل : غير ضربة خفيفة ...
قسم : ( مدات يديها وهو عين فالطريق عين فيها ) تاعينيك منفوخة شوية من لتحت ؟؟؟؟ ( بخلعة ) اش واقع
اصيل : اكسيدون صغيرة بالموطور
قسم : اويلي !!! مالك نتا وسلمى دعا فيكم شي حد !!!!.... واش شي حاجة غريقة
اصيل : راه قتليك بسيطة مديريش فبالك ....
قسم عوجات شفتها تالقاتو دخل فواحد المنعرج كان طريق خارجي كولو اوطيلات وريسطورات قراب للبحر .... وبقات معوجة شفتها مفاهمة والو ....
قسم : واش نتغداو !
اصيل : ( ضار عندها ) فيك جوع !
قسم : فيا ولكن ... واش جينا هنا نتغداو! ...
اصيل : شي حاجة اخرى ... والى فيك جوع نزلو نتغداو هو لول
قسم : لاا اااا .... تا نشوف هاد الحاجة بعدا
اصيل غير ساكت وصايك وهي كتسنى وكتفرك فيديها تالقات راسها بعدو على دوك لي غييسطو ولوطيلااات وماشين غير لواحد لابيست على واحد الجرف تحت منو البحر ..... تانزلو فواحد العقبة وبداو يبانو بعض البنايات بعااااد .... تالقات الطموبيل وقفات قدام واحد الايسباس كببييييييير وبعيد شوية على البحر لي دازو عليه ... كانت كتبان بناية غير ارضية و كلها ضايرة بالزاج وصباغتها سوداء و بالرخام الاسود ..... والزجاج عليه علامات اكس بالصباغة بيضة لي واضح كانو فيه الاشغال وحبسو .... مافهمات والو غير معوجة شفتها لجنب حتى حبسات طموبيل ..... وهي مقادراش تهضر غير كتحلل ... هو حيد سانتير وشاف لعندها
اصيل : نزلي وغتفهمي ...
حل الباب ونزل تاريح طيررر شعروو وعراا على عينيه الزرقيييين لي بحال البحررر .... حجبانو كانو غلااض كحلين مخربقين وشعرو كذالك .... تاسمع خطوات طالون دقسم لي كتعوج بيه فوق داك لابييست لي كان الحجر بزاف هو يمد يدو شدها ودايرة يديها على عينيها من الشمس كتشوف قدامها كانت البناية باقا شوية بعيدة بعض الاقدام
قسم : اش هادشي !
اصيل : (جرها بشوية باش مطيح راد معاها البال ) قققربي .... ردي لبال فين كتزطمي
قسم بقات غادة وعينيها على داك البناية حتى وصلو للارض مواطية مخدومة خارجة من داك البناية عاد طلقها حيت الارض مزيانة ومشات بشوية كتشوف كانو جوج بيبان زجاجيين مسدودين وحداهم بعض المزهريات من الطين كبااااررررر اشجارهم دبلات .... وعلات عينيها كانت بلاكة عوجة قديييييمة ومغطية بميكة كحلة تآكلات بالشمس ومع جناب كان الزااااج .... ورجعات شافت فاصيل
قسم : كتبان بحال شي ريسطو قديمة ! علاش جينا لهنا .....
اصيل ضور راسو كيشوف فيها وعلاه كيشوف مع السطح لي تاهو فيه بعض الطبالي والكراسي لي مجموعين ورجع شاف فيها ...
اصيل : هاد البلاصة .... غنشريها ....
قسم وسعات عينيها مفاهماش والبلاصة على الاقل غتكون بمية مليون لفوووق .. منيييين غااااايجيبها !!!!!!! كتشوف فيه وتشوف فالبناية مفاهمااااش والخوووف تملكها من فكرة منين غايجيب اافلوس !!!!!
قسم غير واقفة مصدومة .. عين فيه وعين فداك البلاصة ... طولات فيها الشوفة بهدوء ومشات بشوية تاقربات لداك البلاصة وقربات لزاج .. مسحات بيديها ودارتهم بجوج يديرو الظل كتحاول تشوف لداخل مصغرة عينيها كان كيبان لداخل كولو خاااوي غير كراسي لي مبعثرين شي مجموع شي مهرس وطبالي وبعض التريات فالارض وخيوط الضوو والقوادس والكراطن ...ورجعات ضارت لعندو وهو واقف كيشوف ونزل راسو لتحت كيخطط برجلو فالارض ...
قسم : م ... مافهمتش !!!! ( قربات عندو جوج خطوات ) انا مزال مفهمتش ! كيفاش غتشريها ....
اصيل : ( علا فيها عينو لي لمعو فالشمس ) مكنضنش واش بنت الاسماعيلي مغتكونش عارفة كيفاش كتم عملية البيع والشرا ...
قسم : ( عوجات راسها معاه كترمش وجاوباتو ) حسبني مكنعرفش ... وقوليا هاد العملية كيفاش كتم عندك نتا !!!! ( ضارت براسها شافت فالبناية ورجعات شافت فيه ) حيت لي كنعرف انا .. هو هاد البلاصة مستحيل تكون قل من مليون ديال الدرهم .... وخاص الشاري يكون عندو هاد لاصوم ويخلص عاااد يشري !! ياك هاكا لا !
اصيل : ( دوز لسانو على شفتو وضور ليها راسو بآه ) هاكاك ....
قسم : ( تقادات فالوقفة والجدية بانت فعينيها ) اهاه ! وكيدرتي ليها ؟
اصيل خلاها وزاد قرب للبناية كيشوف معاها وتنهد ورجع ضار عندها
اصيل : من ديما فاش كنت كندوز من هنا ملي كتكون عندي شي حاجة فالمرسى لتحت ... كنت كنشوفها .... كانت كافي وبليل كانت كدير لي سواغي... ( قسم متبعة معاه ) كان مولاها مسيرها مزيان .... من بعد ما مات .. ولادو ماعرفوش يجيغيو هاد البلاصة وحطوها للبيع .... ( حك فشعرو وعلا راسو فالديزاين ديالها ) قلت يمكن انا نعرف نجيغيها حسن ..... الا رجعتها ريسطو وحيات من جديد ....
قسم : ( علات حاجبها ) اهاه !!!!
اصيل : ( شاف فيها ) هضرت مع السمسار .... ( حك فوق حاجبو مدة منزل راسو عاد طلعو فيها تاني ) طالبين مية وطناش ( عوج شفتو لجنب ورجع كيشوف فيها ) باعوها رخيصة بزاف بنسبة للمداخيل لي كانت كدخل والموقع ديالها لي قريب للبحر ...
قسم : ونتا باغي تشريها ؟؟؟؟ ( اصيل حرك راسو بآه ) اهاه ؟ ومنين غتجيك نتا مية وطناش !
اصيل : ( رجع شاف فيها ودار يديه بجوج فجيابو ورفع كتافو ) ملي كيكون شي هدف قدام عينيك .... الغاية كتبرر الوسيلة .....
قسم : ( بخوف ) اصييييل !
اصيل : ( دار ابتسامة جانبية ) هه ! متخافيش ....( رجع ضار كيشوف معاها ) هضرت مع السمسار ودوزني للمحامي لي مكلف بيها اما الورثة ديالها برا البلاد وكلهم مسلمين البيع .... اقترحت باش نشريها بشرط مغنعطيش الخلاص كامل ... غنبدا غير بمبلغ بسيط ... ولكن مغانكملش ست شهور غنكون كملتها .... ( قسم وسعات عينيها ) ودرت معاه ملي نكمل 56 مليون سنتم ... يعني نص د الفلوس .. يعطيوني سوارت نبدا الاصلاحات .... ( رجع شاف فيها ) ودابا عطيتهم غير ربعين الف درهم باش تبقى ليا ومتباعش
قسم قربات لعندو لظل ديال داك البناية
قسم : صبر صبر .... غير بشوية عليا ... السؤال الاهم فهادشي كامل ! منين غتجيب مية وطناش فست شهور ! ( تنهدات ) متشوفش فيا بحال هاكداك كنهضر واضحة ... كنعرف مستواك المادي وناقشناه .... كيفاش درتي ليها !!!
اصيل : ( كيفكر ماجات فبالو من غير هادي وخرجها عفوية ) غاندير كريدي
قسم : ( وسعات عينيها كثر ) وااااش تسطيتي !!!!
اصيل : عادي ... ( كيحك فشعرو وكيتفادا يشوف فعينيها باش ميتفضح ) ملي غاتحل وتدخل فلوسها .. راه غتخلص كريدي ديالها راسها ....
قسم : والبنكة اشمن ضمانة عندها تعطيك كريدي
اصيل : ماشي البنكة ..
قسم : ( بخوف ) اصيييل رااااك تسطيتي ديال بصصصصح ... هادشي لي كتقول فيه راه فيه الريييييسك بزاف .. فيه الخطر .... ..
خلاها ومشا بشوية تاوصل حدا البيبان كانت تما درجة عالية وجلس وتكا ظهرو وشاف فيها مطول وتبسم جانبيا وهي باقا كتشوف فيه ... وهو مطالع عينيها الواسعين لي بؤبؤهم العسلي كيسبح وسطهم براحتو ورموشهم الطوال عينين العزال بكل ماتحمله الكلمة من معنى ... بشرتها لي تحت الشمس كتولي كتلألأ ... وملامحها الخيفانة زادتها لو شاغم ... وعوج راسو جانبيا مع ابتسامتو لي نصف منها اعجاب ونصف منها استسلام لجمالها ....
اصيل : بنت الاسماعيلي .... كتستاهل الريسك .....
قسم اللسان باش ترد تلجم ليها مع هاد النبرة دالصوت لي خرج بيها هاد الجملة .. نبرة كلها مشاعر ... وهاد النظرة لي كيشوف بيها خلاتها تنسى كاع اش قال ... ملي استوعبات عاد علات حجبانها ...
قسم : اصيل ... لاكنت غانكون معاك ونتا فالخطر ! راه غا بلاش !!! .. ( كضور راسها بالنفي ) ماشي هاكا اصيل ... ماشي هاكا ....
اصيل عوج شفتو لجنب عرفها غاتبدا دابا عليه بالمحاضرات وهو تكا ظهرو كتر وراسو مع الحيط ورجليه مطلوقين ونظرتو تقلبات ورجعات جدية كتر ..
اصيل : متخافيش ... هاد البلاصة بيك ولا بلا بيك راه كنت غناخدها .... وماشي اول كريدي ليا .. الدراري لي كنتعامل معاهم راه صحابي غير هني راسك ....
قسم قلبها بدا يضرب بجهد كتحس براسها هي السبب فهادشي كامل .... حسات براسها عاد تحلات على الواقع ... فاش كانت كتسناه يكون معاها ويعاملها زوين كانت كظن الامور غادوز زوييينة !!!! .... وغاتكون فرحانة معاه بعد مالقات شخص لي يعجبها وسط مليون شاب قدامها ... نسات الى باش يكون معاها خاصو يقرب لمستواها شي شوية ويثبت راسو وهي كتعرف النفس ديالو كيدايرة .... عاد تفكرات الواقع ديال راه يقدر يعرض حياتو للخطر بسبابها وبسبب منين يجيب فلوس ! .... شدات على راسها وبدات كضور وهو مراقبها .... وهي تشوف فيه كتهرب بعينيها ماحاملاش راسها بغات غاتهرب منهنا لشي للاصة فين تقدر ترصي أفكارها ......
قسم : عرفتي .... غيخصني نمشي ....
جات ماشية لطموبيل هو يوقفها بتعيطيتو
اصيل : قسم ....
ضارت عندو براسها هو يشير براسو لبلاصة حداه
اصيل : اجي هنا ....
قسم : ( تنهدات وشافت لجنب ورجعات شافت فيه ) اصيل خليني نمشي عافاك ... .. محاساش براسي مزيان ...
اصيل : هضرت معاك ... ( شاف لداك البلاصة وشاف فيها ) آجي .....
خدات نفس عميق وسرطات ريقها ومشات بشوية كلسات حداه تما وهو كيشوف معاها وهي مبعدة عليه وجامعة يديها عندها وكالسة وواضح خاطرها تهرس و بالها مشغول بزاف ودموع واقفين فعينيها خايفة انه شاب كان عايش حياتو عادية هو وختو تسلط عليه تقلبها ليه سفاها على علاها .... النفس كتخرجها بزز وحاسة بخاطرها غاضيق خيفانة تجيها شي نوبة ربو حداه وتا البومبا فصاكها فطموبيل ....
تاوسعات عينيها ملي حسات يدو فوق دراعها وجرها بشوية لعندو وهي كلها يبساااات .. شعور ديال القرب ديالو كيشتتها ويوترها ... هز يدو عند راسها ونزلو بشوية حطو على كتفو ... وبدا كيدوز يدو على شعرها وهي غير كترمممممش مزيرة وغمضات عينيها مزيرة عليهم وزيرات على شفايفها باش متشتتش كتر من هاكدا قدامو وتزيرات كتحاول تبان طبيعية ومقادراش تخبع مشاعرها ...
كيحس بيها مزييييرة ومخليها على خاطرها كيدوز يدو بشوية على شعررررها .... تابشوية بشوية كيحس بيها بدات كترخف ... كانت الحركة ديال يدييه وهو كيمشط على شعرها كتخلي التزييرة دعينيها ترخف شوية بشوية وشفايفها كتطلقهم والنفس بدات كتنتظم ... يديه وهي كتمشط فشعرها خلاتها تحس بحالا راها فحظن باباها و لا ماماها ... اقرب الاحظان ليها واكثرهم دفئ وحب .... انفساها تنظمات وداك الحالة لولا بعدات منها ... بحالا خدات شي مهدئ .. ريحتو لي كتشمها وراسها لي فوق كتفو العريض وانفاسو المنظمين ....
غمضات عينيها كتر ولكن هاد تلمرة مغمضين براحة كتحاول تغوص فهاد الاحساس وتعيشو الله يجعلو يكون غير حلم وغتفيق منو .. مهم تعيشو .. ماحساتش براسها تاهزات يديها وضوراتها على صدرو وزادت كتر نعسات على كتفو .....
تعنيقة لي دارت ليه خلاتو يتبسم جانبيا .... وهي من خلال داك التعنيقة لي دارت تلقائيا بحالا كتقوليه بقى ديما حدايا ..... استحلاااات النعسة على كتفو مغمضة عينيه وانفاسها تنظمووو وصوت مواج البحر قريب ليهم ..... مدة وهي على داك الحال تاسمعاتو بصوت خفيف هادئ ..
اصيل : دابا مزيان !! ....
قسم حلات عينيها بزربة موسعاهم ... كتقول غير فراسها لا ميمكنش ! ... هذا لي دوا باباها ولا اصيل ! هاد العبارة بضبط عندها معاها ذكريات ... كانت ديما ماماها فاش كتجيها سي كريز او نوبة اعصاب او فاش كتجي من الخدمة عيانة .. كان كيحظنها اسد بتطنفس الشكل حتى كتهدا ويسولها " واش دابا مزيان " كانت من ديما كتقول واش يجي شي نهار يبغيني شي واحد بالشكل لي كيبغي بيه بابا ماما ..
طلعات راسها فيه وهو منزل عينيه لعندها وهي كترمش والابتسامة كتشقق على فمها بحالا كانت كتقلب على شي حاجة من زمااان ولقااااتها !!!!! الشخص لي كانت كظن كاين غير فباباها لقات شوية منو فأصيل ..
اصيل علا حاجبو باستغراب لهاد الضحكة لي معرفش سبابها وهي جمعات ملامحها وبعدات عليه بتوتر ملي حسات بلي قلبها بان على وجهها .. وبدات كترجع شعرها مور ودنيها وشافت عندو بخجل ...
قسم : اممم ... مزيااااان ....
اصيل : ( عوج راسو معاها منزلو عليها كيشوف فمها وشاف فيها ) وشنو هاد الضحيكة ! ...
قسم : هم !!! .. ااء .. ( توترات ورجعات تبسمات ) والو .... غير ضحكت ...
يلاه كملاتها حساتو شد يديها عندو وشافت فيه لقانو كيشوف فيديهم وكيشبك صبعانهم مدة هو غير سكات وهي كتشوف فيه جامعة ابتساماتها بتوتر تانطق ...
اصيل : كنت محتاج لهدف .... مكانش شي هدف فهاد الحياة من غير ختي تعيش مزيان ونزوجها لشي واحد لي يحترمها ويقدرها ... ونشوفها مستقرة فحياتها .. عمرني فكرت فحياتي انا كيفاش غتولي من بعد ماتخوي عليا هي الدار .... عمرني فكرت فشي هدف نوصل ليه كايخصني أنا .... كنت عايش حياتي نهار بنهار ... ( معوج شفتو لجنب ) مخصنيش ومعنديش .. كنت كنقول الحمد الله انه ملي كتمرض هي قادر نخلص دواها ونديها لعند اطباء مزيانين ... قادر نوفر ليها كاع اش غيخليها متحسش بالنقص المادي ... يعني بخلاصة قادر نعيشها فالمستوى المتوسط لي عايشين فيه كاع المغاربة .. مكانتش كتهمني شي حاجة اخرى .... ( شابك صبعانهم وهي كتشوف فيديه السمراء الكبييييرة وسط منها يديها البيضة الرقيقة لي مزينة السبابة بخاتم خفيييف رقيق ماسي ) من بعد جيتي نت ... جيتي توريني انه كاينة واحد الطبقة ارستقراطية خاصني نزعم ندخل بيبانها .... والى مزعمتش ورجعت بلور .... غانكون ضيعت ( شاف فيها معمق فعينييها وهي كترمش ) أكثر بنت عجباتني حياتي كلها ... اكثر بنت تفاعلت معاها من لداخل .... ( زاد زير يديها عندو وهي كترمش فيه ) والتشبت ديالك بيا غير مزااااد خلاني نزعم ..... ( تبسم غير بعينيه كيشوف فيها كيفاش خدودها حماارو ويديها سخنات فيديه ) ملي كنكون بوحدي .... ونشوف فتصويرتك ... كنحسك كتستاهلي الريسك .... كتستاهلي نتحرك على قبلك ونوقف على رجلي ونريسكي....
قسم : ( قاطعاتو ) انا ماشي بغيت ن ( قاطعها)
اصيل : عارف .... ولكن الحياة كنشوفها من واحد الزاوية مكتشوفيهاش منها نت .... ومبغيتش نهار تشوفيها من داك زاوية يكون طرو طار .... ( قسم غير سكتات كتشوف فيه ) معرفتش واش كتعرفيني مزيان ولا باقي ماوصلناش لداك المرحلة .. ولكن انا من الناس لي مستحيييييل .. كنت نفكر ندير شي وحدة فحياتي .... مستحيييل .....
قسم : اء ! ... و ... ( توترات فلخر خرجاتها بفضول ) واش زعما .. عمرك كانت شي وحدة فحياتك !!!!!
اصيل : ( تبسم وضور ليها راسو بلا بشوية ) لا ....
قسم : ( بذهول كتشوف فيه ) فرجن ! ( بكر)
اصيل : ( جابت ليه الضحكة النبرة باش خرجاتها والنظرة وجمع داك الضحكة وعوج شفتو لجنب ) لا ....
قسم عضات على شفتها وقلبات راسها كتحركو بالايجاب : اممممم ... ( رجعات شافت فيه ) وملي عمر شي وحدة كانت فحياتك .... معامن نن ... زعما معامن !! ... ( اصيل غير كيشوف فيها وعينيه لي مبتسمين فيها كاتعحبو بزاف بعفويتها وهي علات حجبانها بجوج ) ففهمت .... فهمت ....
اصيل : خلي دابا هاد الهضرة نحطها على جنب مزال يجي وقتها ..... ( قسم شافت فيه باهتمام ) لي جبتك لهنا باش نهضر معاك فيه ... ماشي هو هاد الريسطو .... وماشي منين غنجيب الفلوس وماشي شنو باغي ندير وماشي حتى شحال من وحدة نعست معاها ... ماشي هادو هوما الامور لي جبتك نهضرو فيهم ..... ( بجدية ) قسم .... كنعرفك كبيرة وبعقلك .... هادو هوما الحوايج الزوينين لي جروني ليك .... من الحوايج لي يخليوني غنتفاهم معاك مزيان .... مباغيش انا علاقة طوكسيك مبرهشة لي غتمرضني فحياتي .... باغي مراة فجنيي ... بعقلها .... ( قسم غير كترمش مفهماتش وقلبها كيضرب بجهد بالتوتر ) لي جرني ليك هو هاد الجانب .. اني منين كنقلب فعينيك على داك الطفلة الصغيرة وحلاوتها كنلقاها .. وملي كنبغيك ناضحة كنلقاك ... اپار وجهك اپار الموغفولوجي ديالك اپار شكلك ديال برا ... لي ماغنكدبش كيعجبني وبزاف .... ولكن مكانش كافي لراجل بحالي باش يتجر ... كون مكانتش عقليتك .. كون مكانتش عقليتك لي مكتعرفش شنو هي نحشم نقول شنو عندي لداخل .. عقليتك لي ماشي ديال باغا شي حاجة وندير راسي مباغاهاش ... كتبغي شي حاجة كتقوليها ... وهادشي لي عجبني بزاف وخلاني نلوح خطوة بهاد الحجم معاك ....
قسم : اا !! ( تنحنحات حاسة براسها بحالا فشي بييير غارق والاصوات مكيوصلوش ليها بالتوتر والسخونية لي طلعات معاها) م م افهمتش بضبط .. ا اش .. اش كتقصد ... !! ( ردات شعرها لور كتعري عنقها يبرد شوية ) ولا عرفتي تقدر تقول .... مباغاش نفهم باش مانبنيش شي فرحة تاني على والو ... ( عوجات شفتها بضحكة مستهزأة ) حيت ولفت هاد الامور معااك تتا بالضبط...
اصيل : على كنت كتسناي شي هضرة لي تفرحك من واحد مكانت بينك وبينو والو اقسم !
قسم : ( علات فيه عينيها بحالا ) .. شفتي ... شفتي اش قلت ليك !!! .... ها علاش ( بعدات شوية من حداه ) صافي ديرني مفاهماش ... مفاهماش انايا زيد شرح ....
اصيل : ( كيشوف مبتسم كتقتلو بعفويتها ) انا قلت ليك ... كااانت مابينك وببنو تاحاجة ....
قسم : على دابا شنو !
اصيل : ( رجع شد يديها لي كانت سلتاتها منو وشاف فيها ) باغيها تكون .....
قسم بقات غير كترمش فيه مامستوعباش وهو كايشوف فيها بابتسامة خفيفة باينة فعينيه اكثر .. وهي بحركة عفوية معرفاتش علاش دارتها ناضت وقفات كاااع ... صدرها كيطلع وينزل وخدودها حمااااارو .... معدتها حرقاتها وكيجيب ليها الله غير كتخيل ... وهو ملي وقفات تكا على الحيط موراه كيتفرج فيها معوج راسو مبتسم ... وهي ضارت عندو بملامح خجلانة ...
قسم :ااء !! ... م .. مافهمتش !!!
اصيل : ( مطول فيها الشوفة ) واش باغا تكوني معايا اقسم !
قسم حسات بالصهدة طلعات معاها .. احساس اول مرة تجربو قلبها كتحسو كيضرب بجهد ... وكمية احراج كبييرة مغطياها .. بحال شي حاجة تسناتها زمان وجات فوقت مضارباش ليه حسابو ...جاتها مفاجأة ... علاقتها بيه وانها تكون معاه .. كانت باغاها من اول نهار شافتو تخيلات يديها فيديه وكانت كظن بلي صعيب يتحقق هادشي .. شوية ولا يبان ليها مستحييييل .. ومع الوقت ولا يبان بعيييد .... حتى فلحظة كتلقى يدو مدودة ليها .. بدون سابق انذار ...
علات عنيها بشوية من الارض لي كانت حاطاهم فيها وشافت فيه هو لي باقي بنفس الابتسامة غير تخلطات بملامح التساؤل من مور سؤالو لي طرح ...وكيتنسى جوابو .. ولي باين فعينيها ولكن بغاه يسمعو ..... وقسم دارت شعرها مور ودنيها وحاولات تبت راسها وتبقى انسانة راشدة ومتحولش لمراهقة فالخمسطاش ....
قسم : أصيل .... ( اصيل علا فيها حجبانو بمعنى نعام وهي تمشات بشوية حتى جلسات حداه بعيدة عليه شوية وشافت فيه كتحاول تبان جدية ولكن ملامح الانثى الخجولة باقين عالقين على وجهها ) كنظن الجواب راك عارفو .... وعارف بلي تعلقت بيك نتا والحومة ديالك وطريقة عيشتك عجبوني الايام لي دوزت معاك .. وحسيت اني مرتاحة معاك ... هادشي راك عارفو ... ولكن الى كان شي واحد خاصو يطرح هاد سؤال .. هو انا ! ... مغنسولش واش باغي تكون معايا ... مي بغيت نعرف ... شنو لي خلاك تزعم !!! تزعم باش تكون معايا .... ونتا كنت رااافض فلووول لدرجة كانت من المستحيل نتخيل ان بحال هاد النهار غيوصل ....
اصيل : وفنظرك انا علاش كنت رافض
قسم : قلتي ليا ديجا المشكل كان عندك فالفوارق الاجتماعية
اصيل : لي خلاني نزعم .. هو الحيط لي متكية عليه ( قسم ضارت بعينيها للبناية ورجعات شافت فيه ) هاد البلاصة هي الدرجة اللولة لي غتخليني شوية نطلع بيها لعندكم .... اكيد مغنوصلكمش ...ولكن على الاقل ... ملي غنطلبك ويسولني باك على خدمتي ... غنجاوب اني خدام خدمة مستقرة وسطابل .. ماشي صياد نهار اه ونهار لا عند الناس ... حيت انا اقسم ماشي برهوش لي نتسارا بيك الشوارع والمدينة القديمة فوق الموطور وتبقى علاقتنا معلقة عمرها تتطور بحكم مجامعش راسي ...وماشي طماع لي نقول لقيت دجاجة بكامونها ، مراة غتصرف عليا ....وماشي ضعيف ( ابتسم ليها وشد يديها عندو ) لدرجة نستسلم .... ونضيع عليا البنت لي بغيت .....
قسم : ( بانت ابتسامة فرحانة وفخورة على وجهها ) واخا كنتي عارف بلي انا مكانش عندي مشكل فيهم بتلاثة !!... مهم عندي هو تكون معايا ....
اصيل : ونتي واش عارفة بلي هاد الهضرة مكتعجبنيش .. وكنحس مباغانيش انا .. باغا غير الحومة ! وهاد العيشة البسيطة !!! ونهار طلع ليك فراسك وتشبعيها ... تخليني انا وياها وترجعي لقصركم ...
قسم : ( وسعات عينيها ) لاااا ...لا والله ما هاكا ... كون كان بحال هاكا وعجباتني غير الحومة وهدفي غير نجرب الحياة البسيطة لي كنتمناها ... فاول رفض ديالك ليا كنت غنقلب على واحد اخر فحومتكم .... واش فنظرك كاين شي واحد غيرفضني !!!!!!
اصيل : ( كيشوف فعينيها ) وشنو لي خلاك باغاني انا بضبط ...
قسم : جرني الشكل فلول ... كيفما اي وحدة ولكن ماشي لدرجة نتجر كيف قلتيها نتا .... منبعد ... لي خلاني نتعلق .. هو انك الشخص لي كنظن كنقلب عليه ..
اصيل : وشكون هذا لي كنت كتقلبي عليه
قسم : بابا .... ( اصيل علا حجبانو بجوج باستغراب ) متقدرش تخيل انا شحال متعلقة بيه .. ومكنتش باغا ندي تا واحد لي مايكونش كيشبه لبابا .. فرجولتو .. فحنانتو .... فمعقولو ... فرزانتو ... فالطريقة لي كيتعامل بيها مع الاومور ... منكدبش اني لقيت فيك شوية منو ... ( ابتسمات ) وغير لو في ديال نرجع لدار نلقى راسي كنفكر فيك راه كافي ... واخا مالقيتش ليه تفسير لي غانشرح ليك .. ووو ( نزلات راسها كتحك فشعرها وفلخر طلعاتو فيه بجدية وجاتو من اللخر بلا قوة الكلام ) باغا نكون معاك .....
اصيل : ( شوية بشوية توسعات ابتسامتو وهو كيشوف فيها ) حتى لخر !
قسم : ( بابتسامة وحب كبير فعينيها ليه ) حتى لخر ......
جبدها عندو عنقها وتاهي ضورات يديها حاوطات ظهرو العريض وراسها فصدرو وهو باس على راسها وقرب لودنيها فوق من شعرها ..
اصيل : غاندير جهدي كامل .... واخا نعرف نتقاتل ليل ونهار ... ونكون فمستوى لي تستاهلو بنت الاسماعيلي ....
يتبع...
التعليقات
لا توجد تعليقات بعد، كن أول من يعلق.