محتوى القصة
خلاها وخرج وهي بقات كضور راسها .. معندهمش الخاطر بجوج بيهم حسو بالخنقة فالدار ... ومشات هزات صاكها وتبعاتو تسناو قدس فالطموبيل حتى جات ومشاو ....
وسيم جالس فوق الفوطوي ولايح يديه بجوج على جناب الفوطوي ... كانت داك الحبة ففمووو كيتنغمها تحت لساااانووو لي كتولي رغوة بيييضة ... معلي راسو لفوق مغمض عينييييه كيترررخى .. كيحس براسو جسدو كيتفرق على روووحو ... بحال شي يوغاا بحال شي سفر روووحي ... كيمشي لبعيييد .. كيحس براسو بحالا كيطير وسط الغيوووم و وسط الوان باااااررردة .... كيحس الوزن ديالو بحال الريشة خفييييييف ومامثقل بحتى حااااجة ... عينيه كيتقلبووووو وهو كيتنغم فداك الحبة ...
المنشطات لي بداهم غير باش يتوگض ويحفض مزيان ويقدر يبقى ديما صاحي وميديهش النعاس و الخمول فالامتحانات باش ميرجعش للمغرب . تالقى راسو مدمن علييييهم ...
اسد بلا ميحس دا ولدو للادماااان بسبب الضغط لي دارليه وبسبب التحدي ديال ترجع للمغرب .... كان باغي فقط يزيرو فقرايتو .. معمرو ظن ولا غيظن ان الامر ... يقدر يخرج على حياة ولدو .....
النهار بدا كايدوز ....
كان كئييب .... خصوصا عند بيلي وجود ....
بيلي فيقها اياد وخرجها بزز يفطرو على برا باش ينسيها شوية ولكن كيلقى راسو كيتعامل مع الجماد .... كل ماتلقى الغفلة تسهى ! كتقول علاش مارجعش اتصل ! علاش مكاين تاخبار ؟ واش الهضرة لي قلت ليه ماحركات فيه والو ؟؟؟ فين هو ....
الهم والتفكير كياكلو فيها من داخل وكتحاول متبينش تارجعو للدار وبدات تفتح معاه ليكادو ... كيشوف معاها كاع مافرحاااانة وغير دايرة ليه خاطرو هو يحيدهم من يديها بحجة من بعد حيت شافها عقلها مكاينش تما .. جاتها من الجنة والناس وطلعات فوق ناموسيتها وتكمشات تاني .... وهو شاف تاعيا فلخر خلاها وخرج ....
غير خرج هو ...طموبيل اخرى دخلات كانت ديال مروان پاركا نزل ودخل لدار ....وفالباب تلاقاتو المساعدة
- موسيو مروان .. نعاونك فشي حاجة !
مروان : بيلسان هنا !
- وي موسيو كاينة فبيتها ...
خلاها وطلع فالدروج مخلوع .. حيت النهار كامل كيصوني عليها ومكتجاوبش .. حل الباب عليها . هي غير سمعات حس الباب عرفات اياد رجع وضارت بشوية تقوليه راني لاباس هو يبان ليها مروان ... شافتو بحالا شاااافت فوهة دالاوكسيجيييين .... لطلقات شهههقة كانت عندها مخنوووقة لداخل وهو غير شافها هاكاك ومشا بزربة عندها وهي تعنقوووو
بيلي : تتخنننقت ... تخخخنقت امرواااان ... تخخخنقت .....
عند جود ...
وصلات طموبيل ديالو قدام الگاراج .... لي معارفش اصلا كيفاش دار حتى وصلها لتما .... غلطة اربع سنوات حتى كولشي نساها تجبدات من جديد باش ترجع تعيشهم فداك الهم ... وهاد المرة الهم ديالها كان اكبر .. لانهم دابا ناس راشدين وعارفين شنو هي المسؤولية ... ماشي دوك المراهقيين الطايشين ... شاف للپوش مددة شاد على الفولون كيضور كاع هادشي لي داز فراسو هو يحل داك البوش وجبد اليو ايس بي ونزل من الطموبيل ...
قرب للگاراج وحل القفل ديالو ودخل .... كان لداخل عامر بسطولا دالصباغة والكرررااطن و الخشب .. كانو هاد نهار ماخداميينش ... سد موراه الباب وحل السرااجم باش متخنقوش ريحة الصباغة وطلع فالدروج للطابق الفوقاني .... كان مسالي من الصباغة ولكن باقي مفرش بالاوراق .. الكراطن فكل بلاصة والسطولا ومواد البناء .. واخا المكان مرون مالقاش شي بلاصة غيرتاح فيها كتر من هادي .... مشا باتجاه واحد الطبللة كانت تما ومعاها كرسي .. طابلة فين كيقاد مسائلو مع المهندسين ... جر الكرسي وجلس كان تما بيسي صغير بيض .... حلو قدامو ودخل الباسوورد ... هو يتشعل ليه وصورة السيارات فليكخون ....
ملي عقل على راسو و هو العشق ديالو غير السيارات ... امتى كان عندو عشق اخر ! ... مكيعرفش راسو واش كيبغي شي حاجة اخرى من غير طموبيلات ومجال الميكانيك ... ميمكنش يقدر يتيق راه غيولي عندو عشق واحد اخر ! تولي عندو بنت كيبغيها !!! كتجيه شي حاجة مكدخلش للعقل ... الحب كيجي حيت نتا اختارتيه ولكن فحالة حود جا رغما علييه ومفروووض عليييه ... طلع راسو للفوق كيمص شفايفو .. واش يبرونشيه !.. واش يشوف ! واش يعطي مجال لهادشي ! واش يعطيه فرصة !!!! واش هو فعلا خاصو يهز هاد المسؤولية !!! ... واش هادشي لي غيشوف فهاد اليو اس بي .. غيخليه يبدل رأيو !
برونشا داك اليو اس بي هو يتلاح ليه قدامو فالشاشة .. خدا نفس عمييييييق ..... وضغط عليه .....
تحل محتوى ل USB قدامو ... كانت صفحة عامرة بلي ضوسي ... كيفما قال اسد ذاكرتو كلها تما ....
لكن ملي كان كيگرافي لبارح ... هو سجل ليه فداك اليو اس بي فقط المشاهد لي يقدر يحتاج باش يعرف طريقو ...
كيف معروف اجنحة الاشبال كلها متصلة بالكاميرا ... لكن اسد لخصوصياتهم مكيمشيش ليها فقط للضرورة او فقط لكان شي مشكل وكيمشي ديريكت لتاريخ وساعة المشكل ومكيتجسسش على ولادو ودابا ملي كبرو طفاها بمرة ... لكن ملي كانو صغار كان باغيهم يبقاو تحت الرقابة .. ونهار طرا مشكل جود انه فقد الذاكرة و بيلي قالت ليهم مايقولوش ليه ... من داك نهار و هو مستعد ليه نهار يعرف ... كان عارف و متأكد هاد النهار غيجي ..
داكشي باش حاول يصنع ليه ذاكرة اصطناعية لانه واخا حتى يعاودو ليه ماشي بحال يشوف بعينيه ..
اضطر انه يدخل للكاميرات و اضطر انه يدخل للبيسي ديالو وياخد داكشي لي فيه ويمسح كولشي .... جميع الحوايج لي هو نساهم بخصوص هادشي احتفض بيهم اسد واخا كانو مشاهد ديالو هو بيلي فجناحو احترم خصوصياتهم وماتفرجش فيهم فقط دوز عينيه باش يسجل داكشي .. كيفما كان الحال جود كان انسان راشد ومن المحرج ليه كأب انه يشوف فحياتو الجنسية ..
جود بانو قدامو بزاف ديال الضوسيات .. وكل ضوسي كان تحتو عنوان ، كان ضوسي تحت عنوان : CAM ... وضوسي تحت عنوان : PHOTO والاخر : VIDÉO وهاد اليو اس بي كان تحت عنوان ذاكرة احتياطية .....
بقى كيرمش بعينيه ويديه كتلعب بالسهم لي فالماوس بحركات دائرية معارفش فين يحطو وباش يبدا والتوتر كياكل فيه ..... فالاخر خدا نفس عميق ومشا لجهة الفوطو ....
تحلو ليه بزاف دالتصاور حتى ضيق عينيه !!!! كان ازيد من 500 صورة !!!!! ..... هو من امتى كيعجبو يتصور !!!! عارف راسو مكيحملش شي حاجة سميتها تصااور .. واش كان كايبغي يتصور ؟؟؟؟؟؟ .....
حل اول فوطو قدامو كانت فطموبييل وبيلي دايرة سيلفي وراسها على كتفو وهو مخرج لسانو وهي معيبة ملامحها .... علا حاجبو باستغراب ! هادو حركاتو ؟ ... كان عريان ملفوق ومعلق بيل ديالو غير فعنقو ... هاد الحركة عارفها ! كيديرها منين كيطلع من البحر ! ... شاف لشعرو كان سارد ... واش هو هاكا كان ! كيشوف ومركز فملامحو كتر من الصورة وشنو فيها ، لانه حاليا كايهمو يتعرف على راسو كيفاش كان كتر مكيهمو يعرف علاقتو .. باغي يعرف راسو كيفاش كان كايفكر باش يقدر يصنف هاد العلاقة ... كيحس براسو باغي يشوف هدا لي قدامو فهاد الصورة شكون ! يتأكد واش هو فعلا !!!! كانت يدو على الفولون والاخرى شاد فالفيتاس و بيلي كانت غير بسوتيام دالخيط معقودين فعنقها فالغوز وشعرها مطلوق على كتافها ساااارد مجعد وحلاقات بحال الخيوط نازلين حتال كتافها ... وبشرتها مبرووونزية ولابسة نظارات ..... كون وراو ليه هاد الصورة ومعارفهاش بيلي مكانش غيعقلها !!! ...
لقى راسو اكتر من خمسة دقايق و هو غير فداك الفوطو كيشوف فالملامح ! ... مستحيل يقدر يثيق ان هدا هو ! ... صدرو كان باقي صغير على دابا ! مكانش شعرو قووووي !!! ولحيتو خفيفة ....
رجع تاني قلب للصورة الاخرى وهي طلع ليه هو لي شاد السيلفي وبيلي موراه معنقاه واضح واقفة فوق شي حيط وحاطة راسها فعنقو ... كانو ضاحكين بجوج ... هو بلباس كاجوال و هي بتيشورت بيضة ومعلية شعرها ديل حصان .. ملامحها كانو باقين صغار !!! ولكن الضحكة فعينيها كانت وااااسعة ! وحتى هو ؟ واش هو كان كيضحك هاكا ! ... كان ضاااحك معنقها عندو بيد ويد شاد بيها السيلفي .. !!! قرب للشاشة كيركز فالضحكة ديالو ... ! هو امتى ماضحك بحال هاكا ؟ علاش كيحس براسو هذا غير واحد كيشبه ليه ! شكون هذا !!!!! ....
رجع تاني دوز لفوطو اخرى ... وهي طلع ليه وحدة فالاسطبل ... كانو راكبين فوق الخيل وبحالا مصورهم شي حد .... هي قدامو وهو موراها بلباس الخيل ولصقة بيضة فوق نيفو ولابس نضاضر كحلين ... وحتى المهرة كانت ايفين !
متكية ناعسة على صدررو وهو محاوطها بيديه فوق العود وشاد اللجام .... كيشوف وكيسول راسو .. واش لهاد الدرجة كنا مقربيييين !!!!!! كيفاش ننسى وحدة كنت معنقها بحال هاكا ! ...
مقادرش حتى يستوعب الى هادا اللي فالصورة راه هو ! .. ما دخلاتش لدماغو .... علا عينيه شاف تاريخ الصورة هو يكمشهم !! كان نفس الشهر لي دار فيه لاكسيدون !!! الصورة لقاها تلات ايام من قبل لاكسييدون !!!!!
بدا تاني كيزيد فالصور ... كانو صور كتاااررر حتى مابقاش كيركز غير كيدوز ... فكل مكان مصورين ! مرة ضاحكين مرة مبسمين واغلبهم كايكونو بوش آبوش ....
حتى توقف عند واحد الصورة ... كانت هي لي شادة السيلفي وشفايفهم مشروكين ... هو شاد فيديه ماليط ديال الپلاي .... من امتى هو كان كيلعب الپلاي !!!!! اكثر حاجة مكتعجبوش هي الپلاي !!!!! هو فاقد غير الذاكرة كيفاش حتى شخصيتو تبدلات !!!!! ....مستحيل يقدر يتخيل راسو كايلعب پلاي !! من ديما كايعتبرو وهم ! وهو أي حاجة تقودو يعيش فالوهم مكيحملهاش .. كايبغي كولشي ملموس ....
بدا كيدوز فالصور وكيرد البال للتاريخ لقاهم تقريبا كيضورو غير فعام واحد .... كانو كتار مستحيل يستوعبهم .. مستحيل يستوعب ان شخصيتو بحال هاكا ؟ ... هو مزال لدابا ضارب الدنيا بركلة .. ولكن هنا كيحس كتر ! واش حيت هاد جود كان باقي فيه الحيياة ! كان باقي عندو امل يحب و يتزوج و يدير اسرة !! كان باقي عندو امل يحقق حلمو !!! كان باقي كيعيش !!!! داكشي علاش ضحكتو كانت بحال هاكا !!!! واش الامل كيخلي الواحد يكون مرح وفيه الحياة بحال هاكا ! ...
علاش كيحس براسو دابا طافي !!! من ديما كيسولهم على تصاورو وهو شاب والكل كيقوليه ماعنديش من غير الصور الرسمية ديال الاعياد والمناسبات والنجاحات ديالو ... اذن هو كان كيتصور غير معاها ! ......
كيقلب فالصور .. كانو تقريبا كلهم على شكل سيلفيات .... كل مرة يوقف عند شي صورة خصوصا الا كانو مقريبن فيها بزااااف كيعاود يشوف فيها ويختابر راسو واش غتحرك فيه شي حاجة !! كيلقى راسو جامد وبارد .. بحالا كيشوف فشي كوبل مكيعرفوش ....هو براسو مقادرش يتعرف عليه .. مقادرش يتعرف على هاد الشخصية لي كانت عندو ويقارنها براسو ديال دابا فما عساك يتفكر علاقتو !! ...
تقريبا نص ديال الصور كانت بيلي بلباس قصيييررر خصوصا الصور الصيفية كانو كلهم وهي بستويام وشورطات قصار او بالدوبياس .... واش هو كان عندو عادي لهاد درجة !!! حيت على مكيعرف راسو حاليا تكون عندو وحدة فحياتو مكيتخيلهاش خارجة معاه فالشارع بهاد المنظر !!! مجرد تخيلها تقبطات عليه نفسو !!!! مستحيل يقدر تسمح ليه خاطرو البنت لي يكون باغيها ليه وللحلال تخرج هاكا ! وتلبس هاكا ! ... هو عارف راسو زهواني ودخول وخروج .. ولكن فكرة زوجة مستحيل يتخيلها بهاد الحوايج خارجة معاه ! ...
اش وقع فيه حتى تغير لهاد الدرجة وتغير فيه كولشي !!! واش فعلا كان كيبغيها !!! الى كان بصح .. اذن طريقتو فالحب تغيرات كليا .. هو مافقدش غير ذاكرتو .. فقد حتى طريقتو فالعشق !!!!!! ....
كانو صور فكل مكان وفكل الفصول وملي كيشوف للتواريخ كيلقى كل نهار صورة .. كانو صورهم فالثلج فافران ... صورهم ففرنسا فايطاليا فاميركا ... صورهم فاليخت .. صورهم فالحفلات ... صورهم فالنوادي ! هو من امتى كان كيدخل للنوادي !!! ....
عيا يشوف لداك التصاور و يدوز ماستعوبش الامر بالمرة هو يخرج من داك الضوسي وقال ربما الضوسي ديال الفيديو وصورة كتحرك تقدر تحرك فيا شي حاجة وتحسسو انه هو انا هداك الشخص ....
دخل للفيديو مكانوش كثار بحال الصور ولكن كانو اكثر من 50 فيديو ....
اول واحد جا قدامو برك عليه ..
وبقى يتسناه حتى خدم ... هي تبان ليه ناعسة فوق الفوطوي ديال الجناح ديالو و روكسي من فوقها كتلعب معاه .. روكسي كان صغيييير !!!! كان باقي صغير بالمرة .... وهو لي شاد الكاميرا لان كيسمع صوتو كيهضر ....
جود : روووكسي ... عععضهااا
هو يوقف الفيديو ! وبدا يعاود غير اللقطة لي سمع صوتو فيها ... آه هدا صوتو ! ولكن علاش تبدل ! ... واش بسبب الحشيش ولالكول صوتو تدعدع بزاف حاليا ! عاد تفكر بلي داير 4 عمليات على نيفو ، 3 من تجل الترميم ووحدة تجميل ... وكانو تاهوما سبب فخامات الصوت ديالو .. ورجع طلق الفيديو يكمل ....
پيلي : ( شاداه وكضحك ) ههه لاااا روووكسي متسمعععش ليييه هههه لااااا عنداااااك ( كان كيلحس فيها ) ناااااري كيردني
جود : رروكسي قلنا عضها اصااااحبي .....
تسد الفيديو فوجهوو مخليه غير كيشوف ... ماستووعبوش بالمرة .... سرط ريقو ودوز لفيديو اخر هو يعطيه انهم غاديين فالطموببيييل وموسيقى مطلوقة كانت اغنية راپ امريكية ...
مطلوقة بالجهد وهوما كايغنيو معاهااا ناشطيين وجود شاد كارو فيديه .... غمض عينيه و كيتسنط لهاد الاغنية ... فجأة حسها مألوفة ! فايت سامعها ... طرقات فعقلو بحالا كيعرفها وحافضها كاع !!!!!
ولكن مقدارش يتذكر غير شاف راسو غيدوخ تاني هو يحل عينيه ....
ورجع دوز داك الفيديو هو يتحل فيديو اخر ديالهم غيتلاحو من الباراشوت !
واش لهاد الدرجة كانت حياتو ساااهلة وماعندو مايدار !!!!! لهاد الدرجة كان عايش حياتو بالطول والعرض ! كان عندو الخاطر لهادشي !!!!! ....
علاش حياتو مبقاتش هاكا ! علاش ولا كيفيق حتال الخمسة دالعشية يفطر ويشد بيسي ديالو يتخشى مع الهياكل ديالو وطموبيلاتو ومخططاتو ويرسم ويمسح ويعاود حتى دير الحداش دليل ويلبس ويمشي للبار يسكر حتى يسكر ويدوزها مع شي وحدة ويرجع تاني يعاود نفس الضورة ..... النعاس .. قهوة .. طموبيلات ... الشراب ... الجنس .... وحتى نهار لي يبغي يبدل ... كيهز صاكو و لاطونط ديالو ويمشي لشي غابة هو و معاه روكسي ويشعل العافية ويجلس .. وحتى فالغابة كيكون مرافقو بيسي ديالو كيرسم فطموبيلاتو .... تاحاجة مكيديرها جديدة .... حياتو كضور غير على هوسو بصناعة السيارات وصوگانها وسباقاتها ... و النعاس و الجنس والتريپ .....
رجع خدم الفيديو كان فالكوبببطير هو وياها وهي متوترة كضحك لي واضح اول تجرب وشادة فيه .... هوما يشدوهم بواحد الصمطة وشدات فعنقووو وهو ويتلاح بييها .... حالين يديهم سابحين فالاجواء ....
ماقدارش ابدا يتخيل انه كان عندو الوقت لهادشي ! .... أو بالاخرى كان عندو الخاطر والطاقة .. علاش ولا شاب مهمل هاكا ! ..... علاش ولا شاب رمادي روتيني حياتو بائسة !!!!!!
حل الفيديو الاخر هو يعطيه تاني كيبوسها ... كان تقبيييل هاااددئ وحنين .. واش كان هاكا غير حيت كان كيتصور ولا هو هاكا كانت طريقتو فالتقبيل ! .... حيت هو ماشي هاكا كايقبل ! ولا حيت بيلسان كان كايبغيها داكشي باش هادئ معاها ! لان عارف راسو مع لبنات الاخرين مكيطولش فالتقبيل ..... لانه دغيا كايمل ومكيكونش عندو احساس ....
بدا كيدوز تاني فالفيديوات وكيقلب فيهم على شي حاجة كثبت انه كان باغيها بصح .... كيحس راسو فجميع هادشي لي شاف غير كان مدوز الوقت ! هو كيعرف عينيه ... مكانوش كيلمعو ليها ! وحتى فالفيديوات مكيشوفش مباشرة لعينيها ! .... تنهد وخرج من داك الضواسا .... ما لقى حتى فائدة .... وشد على راسو دافنو بين يديه .....
ماقدارش يعرف راسو ... واش كان كيبغيها ولا لا ... ولا فقط طريقتو فالحب فالماضي كانت مختلفة ....مكيقدرش يحدد ! ....
بقى مدة غارس راسو بين يديه كيحك فشعرو ... فلخر علاه وشاف تاني فالبيسي كان باقي ضوسي مزال ماحلوش ... ضوسي ديال cam ... عرفو تسجيلات الكاميرا .....
عض على شفتوو وهو كيفكر ان هادشي كان عند باباه ! دوك التصاور ودوك الفيديوات لي نصهم الكبير غير بووووسااان !!!!! واش كان منحرف لهاد الدرجة كاملة ! هو عارف راسو باقي تابع نزواتو ... ولكن ماشي لديك الدرجة كاملة ! عقلاني فالتقبيل... كيعرف ان التقبيل عندو وقتو ماشي فاي وقف فاي مكان وفاي زمان !!!! لهاد الدرجة مكانش بحلاوتو !!! ...
ملي عقل على راسو حاليا فهاد الشخصية الجديدة ... وهو عمرو بادر شي وحدة فالتقبيل ! كانو ديما هوما لي كيكونو سباقات عاد كايتجاوب .... ماعمرو هو لي ختار يبوس فلول .. ديما البنات لي كيعرف هوما لي كيتلاحو لولين .... وحتى اخر قبلة مع بيلي كانت هي السبّاقة ! مزال لحد الان ملي فاق من غيبوبتو ماعمرو باس شي وحدة هو اللول ! ...
علاش كان كايبان ليه راسو هو لي كيبوس ! ويعاود يسأل للمرة المئة شكوون هذا !!!!!!
خدا تنهيدة عميقة جبد معاها كارو من جيبو حطو ففمو وبدا يقلب على بريكة ، غطى بيديه شعلو .... سف منو وصاط الدخان ... ورجع شاف للبيسي لداك ضوسي لي قدامو بعنوان CAM ....
أخر امل عندو انه يحرك فيه شي حاجة .... وميبقاش بارد بحال هاكا تجاه هاد العلاقة لي فاق من نعاس لقاها رسمية فحياتو .....
غير حلو هوما يعطيوه تسجيلات دالكاميرا ... صغر عيينو حيت جنب كل تسجيل كانو مكتوبين معلومات بما فيهم التاريخ و رقم الكاميرا .. وكانو بعض التسجيلات مكتوب حداهم انهم " مترجمين ! " والبعض لا .... كانو فقط 3 تسجيلات لي كيطلع ليه انهم مترجمين ... و الخمسة لي بقاو ممترجمينش ...
حل الاول لي كان مامترجمش لي بان ليه تاريخو كان شهور قبل مايمشي لموناكو .... حلو ...
كان جناح بيلي ... عطاه فالساعة انها كانت الحداش ونص ديال الليل ... البالكون كانت ريح خفيفة كطير الريدو .. وهوما كالسين فالصالون الصغير جنب الطاولة .. قدر يفهم انه كان كيخدم معاها التمارين ! كانو كتب محطوطين وهي شادة قلم فيه ريشة ....
كان كيشرح ليها وهي كتشوف فيه وتعض فداك القلم حتى انتبه ليها وبان ليه انه كان كيضحك وهبط راسو ...
طريقة باش هبطو جاتو بحالا كان حشمان ! واش كانت بدات علاقتهمم او مزال ! ماقدرش يحدد .... اابنت كانت صغيرة بزاااااف فداك الوقت نقادرش يتيق كيفاش دار بغاها وهي فداك السن !!!! وحتى هي كتبان مندفعة وزااااعمة ! كانت كتبان طفلة ! صغيرة بزاف انه يتعجب بها .. مطانوش عندها تا مؤهلات الانثى والصدر تقريبا منعدم ؟ كايسول راسو كيفاش دار بغاها ! ياك هو كايميل للمؤهلات الانثوية ! كايقول مع راسو ... مدامها بغيتها وهي هاكا .. اذن طان فعلا حب وماشي نزوة !
التسجيل كان فيه تلاثة ديال الدقايق .. بقا كيدوز فيه لانه حس بالملل ! ماعرفش علاش ماعجبوش يشوف فراسو وهو هاكاك ؟ بشخصية ماعاجباهش هو حاليا .. حس براسو انه كان ساذج !!!
بدا كيدوز بالزربة حتى وقفات ليه فقبلة ! كيفاش وقعات ! رجع تاني كيعاود يتفرج حتى بان ليه انه كيجمع داك الكتب فنفس الوقت كيهضر مقادرش يعرف اش كان كيقول واخا عيا يركز ... روكسي كان حداه صغير كيمشي ويجي وهو كيجمع وواضح كيهضر بجدية ويوصي فيها .. حتى شوية هي حيدات دوك الوراق وبعدات الطبلة وجات فوق رجليه ... كان كيزومي على ملامحو كانو جامعين بين الضحكة والصدمة ... مدة وهي كتهضر وتقيس فسلسة السيرفيت لي لابس .. حتى شوية بان ليه انه قلبها فوق الفوطوي وجا من فوقها كيقلب فيها .... وسع عينيه ملي تفكر هادو كاميرات !!!! باباه شاف هادشي !!!!!! ....
بدا غير كيحك على لحيتو .. ماعرفش علاش حس بالاحراج ! ايه هو عارف ان عندهم ايسباس دالخصوصية والحرية ووالديهم عارفينهم اش كيديرو .. ولكن ماحملش يتحط بوجهو ...
بقى مدة عاض على شفتو ... هو يكمش داك الكارو فالطفاية و حل فيديو اخر ....
كان كاميرا ديال جناحو هاد المرة .... هو يجي ديريكيت فانه كيقبلها ! كيسول راسو ! واش مكانتش شي حاجة فعلاقتنا من غير البوسان !!!!!
كانت علاقتنا تافهة لهاد درجة !!!
هاد المرة عينيه كيبانو ضاسرين ماشي بحال الفيديو لول لي كان فيه حشمان بعض الشيء .. ملي شاف للتاريخ لقاه بعيد بزااااف على اللول يعني هدا واضح قريب لموعد لاكسيدون لي كان فالصيف فشهر 8 .. اما الفيديو لول وهو كاخدم معاها تمارينها كان فشهر 2 .. وهدا لي كيتفرج فيه دابا كان شهر 7 ... يعني قريب لاكسيدون ....
حوايجها لي كانت لابسة فداك الفيديو هما نفس لي كان شاف فداك الفلاش لي داز بين عينيه .. لدرجة اللقطة تعاودات قدامو .... ثم تسلتات تاني من البالكون ومشات ! ...
رجع تاني حل فيديو اخر وتاهو كان فشهر 7 ... تنهد وهو كيقول اخيرا شي حاجة مافيهاش التقبيل ! حيت حس براسو حشم وتحرج وهادشي شافو باه ..
كانو كيهضرو بجدية وبحالا كيتغاوتو !!! ماقدش عرف علاش كيدااابزو .... هو بيانليه صرفقها !!! كمش ملامحو ! ولكن رخاهم ملي شاف راسو دغيا جبدها عنقها .. واضح انه كيطلب السماحة ! هاء ! هدا هو الصوت لي خرج منو و هو كيتفرج ... كانت كتبكي فعنقو وعنقاتو ! لهاد الدرجة دغيا تسامحات ! راه كان ضربها لا !
مكمش ملامحو ماقدرش هادشي كاع يفهمو .. او بالاحرى ماقدارش يفهم هاد العلاقة ابدا كيفاش كانت !!! وعلاش كانت مبنية ؟ هادو ماشي ناس بعقلهم ... كانو براهش لهاد الدرجة !!!!!!
حل فيديو اخر تاني هو يعطيه فجناحو ...
كانت كتبكي ! ومن ملامحو بحالا كان كيواسيها ! كانت بحالا كتلومو ؟ او كترغبو ! مقادرش يحدد .. ماحدو كيتفرج عاد كتبان ليه فعلا كترغبو ... بحالا كترجااااه وتبكي ... قدر يقرا من شفايفها كلمة موناااكوووو ... علا عينيه للتاريخ هو يلقاه 24 فشهر ثمنية .... يعني تلتيام قبل لاكسيدون ! هو عارف راسو كيمشي لموناكو ايام قبل الرالي ! شاف لجنبهم كانت محطوطة فاليز ديالو فوق السرير ... كان مسافر ! واش هدا كان الوداع !!!! ...
رجع تاني كيتفرج وكيحلل مادوز تا ثانية .. الفيديو الوحيد لي لقى راسو كايتفرج بلا مايدوز ولا يمل وهو لي حس يلقى فيه شي خيط ... فيه جواب وفيه معلومات ... ركز مزيان وعاودو من لول ...
كانت شادة فحوايجو كتبكي وكترغب .. وهو معنقها وكيمشط على شعرها وكيهضر .. واضح كلمات مادارو فيها والو .. ومانقصو والو فحزنها ...
كيشوف راسو كيهضر بجدية كانه كيبرر او كيشرح او كيواعد !!!!! تمنى لو هاد الفيديو لقى فيه صوت .... غير يفهم .. كانت سبارادرا فوق نيفو وتحت عينو منفوخ ... يعني هضرة لوؤي بصح .. هو سافر مور مادابزو هو واياد ....
كيتفرج ولقى باباه عندو الحق فاش قاليه صنعت ليك ذاكرة اصطناعية .....
كان كيهدنها وهي كاطير فيديه ... كتبكي بطريقة كضضضر فالقلب !! فهاد الفيديو كانت كتبان ناضجة على الفيديوهات لوخرين .. او جدية كتر
كتبكي بجهد وتتعلق فيه وترغبو .... شوية دخلها لدوش وسد عليها واضح انه قنعها تغسل وجهها ....
شوية كيبان ليه راسو حل المجر فاش دخلات هي لدوش .... وجبد مذكرة وقلم وبدا كيكتب فتفي الوقت حاضي معاها واش تخرج .. عيا يزومي ماقدرش يحدد اش كيكتب تما ... وقطع داك الورقة .. وطواها صغيرة فيديه وسد المجر ... ومشا لدريسنغ ديالو مدة ... شوية كايبان ليه خارج وهاز طموبيل بيضة ديال الالعاب فيديه ... وفتحها من لتحت وخشا داك الورقة ورجع سدها وحطها فوق السرير ...
وبان ليه مشا كيدق عليها ف الدوش حتى حلات الباب كتسمح وجهها ..
جرها من يديها وجلسها على السرير ... كيشوف راسو كيهضر معاها مطوووول .... هضرو جدية كتبان عليه .. حتى هي كانت مرركزة معااااه .... وحتى هي تبسمات ليه وعنقاتو .. . ولكن هو علاش مكانش مبتسم بحالها وكان كايبان فملامحو البؤس ؟ ! اش كان كيضور فراسو !!! ... شوية بان ليه فصل العناق وعطاها داك طموبيل .. غير من حركاتو بان ليه كيقوليها تبقى ذكرى عندك .... بانت ليه باستها .. ورجعات ثاني باااستووو وغرقو فالتقبيل و هو حبس الفيدييو .....
علا راسو لفوق كيشوف وملامحو جامدين ! اشنو مكتوب فداك الورقة !!!!!
بقى مدة كيشوف فالسقف ... ويضور هادشي فراسو .. ورجع تاني شاف للشاشة هوما يبانوليه الفيديوهات لي مترجمين ... كانو تلاتة ديال الفيديوهات ... و شريط صوتي ...
بدا بالفيديو لول بدا كيضور هو يتحل ليه ...
كان الصالون ديالهم ! عرفو واخا تبدل ليه الديكور .... كيبانو ليه جالسين لامار و اريج ورتاج وحياة وقدس كانت صغييرة و انس صغير كيلعب ... كانو جالسيين على كيسان دالقهوة والحلوة .. واضح كيتذاكرو والجو عادي !!! ....
شنو لي ملفت فهادشي !!!! يالاه بدا يمل وهي تبان ليه بيلي داخلة كتجري بفزع .... غير شااافها هو يعرف الفيديو اش غيكووون فيه .. وقبلو بدا يضرب بالجهد ....
شويية بدات تبان ليه الترجمة كتكتب لتحت ... عرف باه لي طرجمو حيت هو بوحدو لي كيتقن لغة الشفايف .. واش باه تعب عليه لهاد الدرجة باش صنع ليه هاد الذاكرة ! وعلاش مترجمش الفيديوهات لوخرين .. واش حيت متفرجش ليهم باش ميحسش جود بالاحراج ! ... قرب وجهو للبيسي وكمل الفيديو ...
پيلي : ( وجهها حمر بالبكا وكتهضر بصوت متقطع ) م مااااااماااااا
اريح ناضت بالزربة لعندها مخلوعة وكولشي وقفو مخلوعسن
اريج : ( بخلعة ) بيلي !!!! مالكيي !!!!
بيلي : ( بصوت متقطع ) مامااا .. ا اياد ... ا اياد و وجود ... ا اياد وجود كيضااااربوووو
لامار : ( بغوتة ) شششنووووو !!!!!
بانتليه لامار خارجة شوية وهي توقف حيت بانليها اياد داخل .... من ملامحو قدر يقرا شحال معصصصب .. كان وجهووو حمر ووالعروق فيديه مزييرييين وباينين .... واريج مشات لعندو هي ورتاج ما فاهمين والو
اريج : اوييييلي مالكم
اياد : ( كيشوف لبيلي وبيلي تخبات مور رتاج مخلوعة وكتبكي بجهد ) داااااك بنتك الى مكاااااينش لي يربييهاااا انا لي غنعاااود لييييها التربية
پيلي : ماااماااا قوليلو يببببببعد مني مااادررررت والوووو
اريج : ( شاداه ) واشوووف لعندي انا ... راه ماماك كتهضر معاك .. اشنو كاين ومالك مع ختك تاني ؟ اااش واااااقع ...
يلاه هوما كيهضرو هو يبان ليه دااااخل ... كان تاهو صااعررر كتررر منووو ... يلاه ايياد كيضور كان ضربو بونية لامار غوتات ورتاج شدات على فمها واريج غير كتشوف وحياة جات كاتجري باغا تشدو
حياة : اويييييلي حماقيييييتو ..جووود دير عقلك
لامار : ( بعصبية ) جوووووود .... حياااة عييييطي لاسد
حياة مشات كتجري لصاكها ولامار شداتو وهو كاااايتنتر فيدها
جود : داااييرررر ليا فيها رااااجل على ختتتك .. ضضضضربها يلاااه هاهيي قدامك ... الى نتا راااااجل قيسها
اياد : ( ضار لعندو هو يعطيه بووونية تاطيحو لارض والعيالات كيغوووتو ) لااا .. لا اخويا ... نتا لي رااااجل .. انا غاااا شماتة بيناتكم هاد الساعة لي نشوف ختي مع ولد عمي عاطيييينها للبووووسان ونسكت
اريج : اوييييييييلي ( ضارت شافت فبيلي ) اوييييييلي
لامار : اش كتقووول نتااااا ...
جود : واااااااااادخل سوووووق *رررررك ... دوووك لي كتقيل تبووووس فالبيران ماعندهمش خوووتهم !!!! ولا راجل غييير نتاااا
لامار : ( بالغوات ) سسسسسكت اووووولد الحرااام سسسسكت احتاررررم عيالات عماماك
جود : هو لي بغا يدخل العيالات شكون قاليه يجي لهنا .. باغي تخبى ورا ضضهررر مك
اياد : ( جا كيجري لعندووو عطاه بونية اخرى تاطيحو ) اناااا مكنتخببى ورا تاشي حد .... ا الششششمااااااتة
جود ناض لعندو هو يعطيه بووونية تاطاح اياد على الفوطوي واريج بدات تبكي وحياة كتحاول تصوني على شي حد فيهم كلهم طافيين التيليفونات وقدس كتبكي
جود : انا غنوريييييك الشماااتة شششكون هووو ... باااغي دير سكووندال انااا معااااك ... باغي الشوووهة انا معااااك ... حسابتك خايف من شي حد .. البنت بااااغيييييها وغنطلبها من باباها وماواقف تاعلى شي حد ...... ماعندكش الحححححق تحكم فييييها ....
اياد : ( وقف لعندو ) باااقي عندك الوووووجه لي ييهضر !!!!!!
رتاج : وااااااسسسسكتونااااا فهمونا اشنو واااقع ... واش لقييتو الرجال مكاينيش دايرين ماعلييييكم ...
اياد : هو لي لقا الرجال مكينينش وداير ما عليه .. كون لقا الرجااال ... مايشدش البنت عند الخيييييل .... ( شاف لعند بيلي ) 16 عاااااام باغاااا طييييييري ومعااامن مع جووود !!!!!! واش عاااارفة هدا شحال من وحدة عندو
باقي مكمل هضرتو كان هبط عليه تاني جود ببونية ولامار كتغوت وكتحاول تشدو ولكن ماقدراتش عليه وهو شدو من حوايجو وزززف بيه
جود : خخخخلييني باقي متاااااقي فيك الله خلييييني باقي كنشوفك ولد عمي ... البنت عندها باااها وبيني وبين بااااهااا خرج نتا هاااااد السووووق
اياد : ( وقف جاي لعندو وجهو كولو دمايات من نيفو ) شششفتي بالرررررررب تعالى وتنطابق السما على الارض لاكاااانت ليييك ختي
جود : ( وقف تاهو قدامو جبهة لجبهة والعيالات ضايرين بيهم كيغوتو اريج شادة اياد ولامار شادة جود وهوما داخلين فبعضياتهم بالريوس ) هااحنااا غاانششوووفووو .. ملي غندييييها قداااام عينييييك اجي داك ساااع حييييدها .....
بيلي : ( بالغوات ) صاااافيي ايااااااد راك غير كتخخخربق ماعندكش الحق دخل ليا فحياتي عندي بابا ... جووود انا كنبغيييه وكيييبغيييييني وعمرو ضحك علييييا
اريج : سسسسسكتي نت سسسسسكتي
اياد : (ضار ماشي لعندها) ... نتي كتعرفيي ليا هادشي ( شدها من شعرها ) نت كاتعرررفي دابا هاااااادشي
اريج : طططططلطق من ختك ايااااد
بيلي : ( كتغوت ) ووطططططططلق مني بببببعد منننننني
جود جرو من ضضهرررو بعدو علييها ولامار شاداه مرة تغوت مرة تررررغب وجمع معاه بببونننية ... واياد تاهووو عطاها ليه للوجه تااااساااالو الدم وضار جود كيمسحو هو يدفعو اياد من مور ظهرو وتضرررررب مع الساااارية بالجججهد ولامار غوتاااات وبيلي سعراات فيد رتاج
بيييلي : جووووووووود ...
طلقات من رتاج ومشات كتجري عند جود واريج تاهي مشات تجمعو عليه وهو مغمض على عينيه وشاد على نيييفووو والدمايات كيسليو بغزارة واريج ضارت بزربة عند اياد لي كينهج
اريج : واااااش حمااااقيتي نتتا وووولد عمممك مرييييييييض ضضضربو هاكا كووون جاتو فرااااسووو وااااش حماققييتي
اياد : انا لي مرييييييض هاد الساعة ماشي هووو .. الشماااااتة .... كتلعب مور ضضضهر واحد كتقوليييه خووووياااا .. هادي هي الرجلة عندك .. هدا هو دم الاسماعييييلي
لامار : جووود .... جووود شوف فياااا
بيلي : ( شاداه من حوايجو كتبكي ) جوووووود
جود بدا كيحل عينيه بشوية والدوخة فيه بسبب الضربة دنييييفووو لي كيقطعو بالحريق و ضبب ليه الرؤية يلاه كيحل عينيه اياد جر بيلي من حوايجهاااا ولتخها مع الارض واريج ناضت تاني بزرية كتفرقهم ....
اياد : زيييييدي نت قداااااامي .... تححححححركي
بيلي : ( ناضت من الارض شادة على دراعها لي تقسحات فيه ) واااببببببعد مني مغنمشي لحتى شي بلاصة تايجي بابا .. شكووون نتاااا شكووون .. .بعد منيييييي الحيوااااان ..
اياد : ( بالغوات ) انا غااااانوريييي لوالدييييك الحيوااااان
شدها من شعرها وهي كتغوووت وهبببط عليها بتتتسرفيقة تاطااااحت للارض ببببجهد تلتخات ولامار طلقات من جود ومشات عندها كتجري واياد كيشوف فيها ... جود ناض بشوية بسبب حريق نيييفو والدوخة لي بين عينيه وهز كرسي كان حدا الشوميني حدييدي ثقييييل ... هزووووو بززز هووو يضضضضرب بيه ظهرررر اياااااد ببببجهددد تاطاح ايااااد على رررركبتو ورجع طاح كامل فالارض على كرشو وتسمعات غووووتة اريج
اريج : اياااااااااااااااااااد
رتاج : اياااد ( مشات كتجري ) اياااااااد جاووووبني اايااااااد
لامار شدات على فمها ورجعات للووورررر وبيلي غوتات ومشات كتجري لعندو وهو طايح للارض مغمض عينيه وجود واقف كينهج وحياة طاحت للارضض كلللللهم مصدومين اريج وبيلي كيغووتوووو بببببجججهد .... وجود بدا كيرمش مدة وهو يطيح عندو تاهو كيضرب فيه يفيق ....
جود : ايااااااد ... ايااااد ( كايشوف فيهم ) مااااتقيييسوووهش ..... عيييطو لومبيلوونص اياااااد ....
تحبس الفيديو وجود كيشوف وقلبو كيضرب بالجهد ... واحا حبس الفيديو عينيه باقي مصدومين ... بحالا هادشي يلاه وقع ! بحالا كيتفرج ففيلم ! شكون هادو ؟ شكوون هاداك لي ضرب .. اش وقع .... و اش واقع ... و وشنو غيوقع ...
بدا غير كيشووووف مصدووووم من هادشي ... الريييييق نشف ليه ففمو .. واخا عاود ليه لوؤي ولكن باش يشوف بعينو .. مااااقدددرش يستوعب !!!! باركا غير تشوف راسك ففيديو كظير شي حوايج بحالا ماشي نتا هاداك راه أكبر ألم !
ناض من تما وقلبو كيضرب بالجهد والنفس تخخخنقات فيه ... حس بحالا راه دابا حاليا فداك المشهد لداخل واخا ما عاقل على والو وبلي راه يلاه وقع وجديد .. ماشي دازت عليه ربع سنين ...
كايفكر فداك ضربة لي دار لاياد ! كيدار باقي حي ! وكون مات !!!! وكون تتشلل !!!
كيمشي ويجي ويدوز يدو على وجهو ... واخا الفيديو كان بلا صوت فقط الترجمة هو سمع داك الغوااات فودنيه ... كينهج ويتخيل اسوء الاحتمالات لي كانو غايوقعو كون ماربي حفظ ....
واش يحمد الله لي ناسي هادشي ولا شنو ! ... ولا يلوم راسو علاش أصر عليهم باش يعرف .. علاش ماااابقااش ناااسي حسن ليه .... لقا راسو قدام الحديديات ديال الدروج وشاد فيهم بجوج يديه كينهج وكيدوز لسانو على شفايفو يبللهم كيحسهم نشفو ليه ... واش فعلا هادشي كامل وقع بسبب حب مراهقة هبيل ! علاش هو ضرب ولد عمو فوقت لي كان خاصو يعتذر ! ... علاش داك الوقت كان كيبان ليه ولد عمو غالط ودابا كيشوفو عندو الحق .! شكون غيقبل على راسو يشوف ختو فداك المنظر ..... واش كون تحط فهاد الموقف حاليا كان غيتصرف نفس التصرف ديال داك جود لي شاف فالفيديو !
فاش سول راسو هاد السؤال لقا الاجابة هي كون تحط فهاد الموقف حاليا .. مستحيل يقرب لبنت عمو ودم الاسماعيلي بدون مايكون هضر مع باها اصلااا....
علا راسو لفوق كيتنهد .. لي كيصبرو شوية هو هادشي داااز .....
تفكر بلي باقين تما جوج فيديوهات .. تمنى تكون فيهم الكمالة يعرف غير شنو وقع مور هادشي .... ومشا للبيسي تاني بزربة ومشا للفيديو تاني ورك فيه ....
كان مكتب باباه .....
جالسين فالفوطوي و القهوة حداهم ....كان اسد ويونس وعدنان وسفيان و زياد واحمد وهو .... تابدات تبان ليه الترجمة واحمد كيهضر
احمد : اش غنقوليكم .... الله يكمل بالخيييير .. لي هرب للزواج هرب للطاعة ...
يونس : الله يكمل بالخير .. غير هو اولدي راك كتشوف لاج ديالكم ... هدا ماشي وقت الزواج .. بيلسان راه باقاااا صغيرة بزاف
جود : عااارف اعمي ... انا غير قلت تبقى فبالك ... وتكون علاقة رسمية بيني وبينها .. ندمان حيت ماجيتش عندك من لووول و ( قاطعو عدنان )
عدنان : ودابا هاااادشي غنطويوه .. هاد الموضوع هضرنا فيه بمااااا فيه الكفاية ...
جود : داكووع اعمي ... ( شاف عند يونس ) كيف قلت ليك ماعنديش مشكل نتسناها حتى تكبر
اسد : وكبرتي نتا بعدا
جود : ههه وصافي الوالييييد ... نكبر ونعجبك ههه .. ( شاف عند يونس ) حتى تتخرج من جامعتها .... ونتزوجو ....
يونس : ان شاء الله اولدي ان شاء الله ...
جود : ( شاف فزياد ) واشنو ا الأخ ....
زياد : انا لي دارها الواليد انا معاه ... كيهمنا رأي ديال بيلسان ومعامن مرتاحة .. مدامها ختارتك ... وماشي شي واحد لي براني علينا راك خونا .. الله يكمل بالخير .. مهم تكونو فرحانين ... وتا اياد راه غنحاولو معاه دابا يرجع للطريق
جود : راه عييت نصوني عليه مكيجاوبنيش ... والى بقى هاكا راه غنشد طيارة نصبح حداه عارف راسي قاسح .....
يونس :خليو تهدى النفوس .... تاهو باقي ملهي غير مع الكيني ديالو ....
سفيان : كولشي غيتصلح .. طويو علينا هادشي دابا .. مرررررضنا حق الرب ....
عدنان : لانيفيغسيغ دقسم مابقى ليه والو ... جمعو فيه خطوبة وكولشي ....
جود : اهاه .. تاهادي مزيانة ماعنديش مشكل ...
يونس : ان شاء الله ....
جود : ( شاف فيونس ) عمي يونس ... أنا عارف غنبان ليك باقي صغير وطاايش ... مسقبلي مزال مابانيهش .. ولكن تيق بيا ... بنتك والله مغتخصها تاشي حاجة معايااا .. والله مغنبكيها ولا نسمح فيها ... غندير جهدي كامل باش تبقى ديما ضااحكة .... غير تهنى عليها ....
تطفى الفيديو فوجهو وهو كيشوف ..... تطفى الفيديو على ترجمة دكلامو لخر .... بدا كيعاود يقراه ...
ورجع بالكرسي لور وعلا راسو لفوق كيتنهد .... علاش لي مقالهوهاش ليه ... من بعد هاد الوعود لي عطى كاملة صدق باقي كيبكييييها !!!! واكثر واحد مبكيييها ..... وسمح فيها !!! من بعد هاد الوعود كاملة هو غايقدر يتراجع ؟ غايقدر يشوف هادشي ويتعداه بحالا عمرو كان !!!! مسسستحييييل .... مستحيل ميوفيش بوعودو لعمو ..... طبعو الى عطى وعد كايوفي بيه ... هداك هو المبدأ ديالو فالحياة .... مستحيل يعدب شي حد ... وهي كتبان ليه واااااكلة الدق بالمعقول ربع سنين هاي وهو عايش حياتو عادي ....
ورجع ثاني شاف لبيسي كان فيديو أخير كيتسناه مترجم ... وتنهد تاني وورك عليه .......
كانت كاميرا دالجردة ومباشرة حدا باب الدار ... كانت بيلي وسلطان ولوؤي واقفين اما هي جالسة فالدروج لي كيطلعو لدار وكتبكي ... ضيق عينيه كيشوف علاش كتبكي تاني .... تابدا الفيديو كيترجم ليه ملي هضر لوؤي
لوؤي : بيلي ... راك غا كترووووني ... راه كلنا نسانا ماشي غير نت ...
مع اش قال لوؤي علا عينو للتاريخ لقاه شهر من بعد لاكسيدون .... هو عارف جاب شهر عاد فاق ....
سلطان : هدا ماشي وقت تقرري فيه .... ريحي دابا للارض غير يخرج بعدا من داك الكلينيك بييخير وقرري
بيلي : ( كتمسح دموعها وضور راسها بلا ) لا .... مغيتبدل والو .... غير خليوني نمشي فحالي
لوؤي : ودابا كون نساك غير نت نقولو اه ... راه نسانا كامليييين يا هاد البنت .. السيد راااه داير اكسيدووون خطيييرة الحمد الله غير لي عاش .... عرفتي شحال غيخصو دابا باش غيخرج من داك لاكلينيك عارفة شحال دالترويض وشحال دالعمليات .... تخليه هاكا وتمشي ؟
پيلي : ( وقفات معصبة ) ماااتبقااااااااش تهضر ونتا معارف والو .... نتا عارفني جوووود نموت معاه .. يطلب مني عيني نحيدهم ونعيطهم ليه .... ياك نهار لاكسيدون السييروووم تعلق لييينا بجوج ... خوويا .. خويا لي خووويااا وسمحت فيه على قبلوووو ...
سلطان : هادشي مكنمنوش بيه ابيلي! ديجا كلنا الى بغينا شي حد غانديرو عليه هادشي علاش غانبقاو نگلوها ! نابوغطوكوا نبقى نقول اش درت على قبل واحد كنبغيه ! درت هادشي حبا فيه ولا باش نتمنن به !
پيلي : شوووف فين مشيتي .. مكنمنش انا غير كنشرح ليكم بلي جود قادة ندير على قبلو كولشي مغايغلبنيش نكلس معاه فلاكلينيك ..... أنا عارفاه ناسي كوولشي .. انا عارفاه عاقل علييينا ولاد عمامو ... ولكن آلوؤي باش يتفكرك نتا ويقولك لوؤي ولد عمي .. ويتفكرك نتا اسلطان ويقول سلطان ولد عمي ويتفكر خوتو وعاارفهم خووتووو .. تالهنا كولشي مزيان ولكن باش يشوف عندي انا ويقولك بنت عمي .. رااااااه مغنتقبلهاش .. انا ماااااشي غير بنت عمو ....واش عارف شنو هي راه ناسي كوووولشي ناااااسي اجمل اووقاااات حياااااتنا .. مسسستحيل نقد نكبح رااااسي مستحييييل نشوف فيه ومنبكيييش .... واش حسابتك غير لبارح فاق قال ليا واش نت بنت عمي صافي انا استسلمت ! .. راه الصباح خليت تا خرج عمي اسد ودخلت عندو .... ( كتبكي بجهد ) جلست حداه ... حاولت نواسيه .. حاولت غير نشوفو كيف بقى .... واش عرفتو على نظرات دار فيا ! مكيعرفنيييييش ... نظرات بااااردين .. جود مكيشوفش بحال هااكاك ... تمنييت يدو غير تهز وتعنقني ... عطيتو يشرب وقاليا شكرا اختي .... ماااقدررررتش مااقدرتش الووووووؤي ماقدرتش نصبر لبرودو فتعاااامل .... ( منهارة بالبكاء)
لوؤي جرها بشوية عنقها وهي كتبكي بجهد وسلطان كيتنهد
لوؤي : وصااافي باراكا من البكا .. شهر هذا ونت كتبكي مزال ماعييتيش ... مشاااكيييييل والله .. ولكن تانتي قدريه تاهو راه شهر مغيب ... ودابا شوفي اش كيتسناه عاد ... مهدد انه ينسى كولشي فاي دقيقة ... مهدد يموووت كاع .. حنا مابقيناش طامعين فانو يتفكرنا ... راحنا طامعييين غير يبقى حي بعدااا
سلطان : فوالااا .. مصاب غير يبقى حي لهلا باش يعرفو علينا حنا نفكروه بينا شوية بشوية .... نتمناو من ربي غير ينجحو دوك العملييااات وميبقاش فالخطر .. واش نت كتحكمي على واحد باقي فالانعاش ! ....
لوؤي : سمعي منا وديري عقلك .. انا معارفش طبيعة العلاقة لي كانت كتجمعكم بتفصيل ولكن كيفما كتقولي نت راه كيبغيك ... اوا راه ماكاين لي غينفع داك الولد يبرا من غير الناس لي كيبغيهم .. خاصنا يكونو حداه ...اولا !
بيلي : ( كتضحك وسط البكا وبعدات منو ) ههه ! واش كضحك عليا الوؤي ؟ واش عرفني بعدا بقا غير يبيغيني دابا !!!! واش انا كرهت نكون معاه .. مكرهتش داك العملياااات نقسمهم معاه الى كان كيفاش .... راه جوووود هداك .. جود لي كولشي فحياااتي مزينوو هووووو .... ولكن راه منقدرشش فهمووووني ... راه الشوفة فيه وهو معارافنيش كتحرقني من داااخل .. راه نقدر نتسطى ولا توقع فيا شي حاجة ... رااااااني كنتحححححرق حسو بيااااا ...
سلطان : وراااحنا عارفين لي كاين .. ولكن تاهو راه مناسيكش بلعااااني
بيلي : واش انا بنت ليك دابا كنلومو ؟ واش انا قتليك الغلط فيه ... صافي انا عارفة المكتاب تصصصصرف وقصوحية راسو خرجات علينا .... ولكن راه مستحيل نقدر نبقى فداك السبيطار .. كنحسو ماشي جووود لي كنعرف .. جووود مشفتوش هادي شششهر مليي كان فبيتو كيجمع حوايجو ... تما خليييييتوووو ....
لوؤي : والله حتى غير كتروني ... مهم راه نت تعرفي حنا عمرنا دخلنا فهادشي ديالكم وعمرنا غندخلو .... هضرة وحدة راه گلناها ... جلسي وملي يفيق غنفكروه شوية بشوية
پيلي : واش سمعتي الطبيب ولا مسمعتيهش ؟ طبيب قال غيبقى هاكا طول حياتو .. الى منجحاتش ليه عملية الارتجاج ... غيبقى هاكا ... يعني فكل لحظة يقدر ينسى كولشي تاني ... واش انا غنبقى كل نهار نقوليه انا بيلي وحبيبتك وكنا كنبغيو بعضياتنا ! ( جود حس بقلبو تتتزززير عليه وجاتو الخنقة ملي قرا هاد الترجمة )
سلطان : ومالها اش فيها !
بيلي : راه منقدرش اسلطاان ... حطو راسكم بلااصتي .... انا راه كنبغيه ماشي غير مدوزة الوقت .. راه صعيب عليا نقلى داك الحب رجع من طرف واحد ... بحالا راني دابا مع واحد مكيعرفني مكيبغيني مواااالو .... وخاصني كل مرة نفرض راسي عليييه ونقوليه نتا مرتبط بيا.... الى مكانش هو لي غايتفكرني مستحيل نقوليه شكون انا ....
لوؤي : واااشتي التخربيق دابا
بيلي : تاواحد فيكم مغيفهم ولا غيحس بيا
سلطان : ( بعصبية ) ختي تتعرفي المطار ؟ قصصديييه والله يعااااون ....
خلاهم ومشا وهوما متبعيونو بعينيهم
لوؤي : سسسلطاااان .... اجي اصاحبي باراكا من التربهيش ...
بيلي : ( كتمسح دموعها ) شششتي ... تااااحد مغيفهم ....
لوؤي : ( شاف فيها ) راه نت براسك مفاهماش راسك .... ققبل ماتقرري جلسي شوية مع راسك بعدا .. راك كاتسرعي وغاتجيبيها غير فراسك تاهو راه ناسي .... ماشي نتوما درتو لينا الگيرة وكنتو غتروونو عائلة على قدها فلخر غاتهزي راسك وتمشي ! علاش لي متحافظيش على هادشي مادامو نوضتو وعليه داك الحرب كاملة !
بيلي : ( بدموع ) وعلاش هو لي محافضش ؟ واش عارف الوؤي شحال ررغبتو ؟؟؟؟ شحال ترجيتو وقلت ليه كلس ومتمشيش ... انا عارفة مرضو ماشي جديد عليا ... عارفة وكنمشي معاه لعند طبيب .. الطبيب بنفسو .. قاليه الى بغيتي تموت سير للرالي ... الرالي كيكون فيه توتر كبير .. وهو التوتر كيخليه يسهى وينسى ... عرفتتي شحال رغبتو وشحال بكيييييت وقتليه ماتشميييش .... كيقول ليا هو عارف اش كيدير .... ( كتبكي بجهد ) وكانت غتكون خطووووبتنا فعيد ميلااااد قسسسم ... قاليا نهار عيد ميلاد قسم كان غيعطيني الخاتم ... باش يجيني داك النهار بضضضضبط راسو خاشيينوو فالزااااج والثلللللج .... ومن بعد شهر يقول ليا شكرا اختي !!!!! ...نتوما كتشوفو الامور غير من جيهتكم .. تاحد ماحط راسو بلاصتي .... رغبتووو وقتليييه حافض على هادشي لي بيناتنا ومابغااااااش .. مشى وخلااااني .... وعلاش انا لي نحافض دابا !!!!
لوؤي : يعني نفهم من كلامك غتمشي غير زكارة فييه حيت مشا لموناكو
ببلي : ( بالغوات كتمشي وتجي كتكبي ) ماعرفتش الوؤي .. كولشي تجمع عليا .. غنمشي زكارة فييه وغانمشي حيت ماقاداش نشوف فيه وهو مكيعرفنيش .. وغنمشي غيررر باش بعدا نعووود راسي ونبني مناعة باش نقد الى شي نهارر رجعت نشوف فيه بلا منضعاااف .. نمشيي غير نقنع راسي وندخل لراسي فكرة انه نسااااني ومبقاش جود فحياتي ..... ( شافت فيه ) والله الوؤي تامحتاجة نمشي .. الى بقيت غتوقع ليا شي جاجة هنايا بالبكا والمرض والاعصااااب .. عييييت شووووف كيفاش وليت اش خرج ليا من هاد العلاقة انا كاااااع ....
لوؤي : وملي يخرج من الكلينيك .. مغتجيش !
بيلي : نهار نقدر نقنع راسي بهادشي لي واقع ونستوعبو ... غنرجع
لوؤي : اهاه ! وملي يعرف .... اشنو نقولو ليه مشات وخلاتك !
بيلي : علاش غيعرف ؟؟؟؟؟؟ علاش !!!!
لوؤي : منيتك !
بيلي : ياك هادشي بيني وبينو !!!... اوا مايدخل حد عافاك ... مابغيييتوش يعرف هادشي الوؤي ... بغيتو هو يتفكرو ... اما باش حنا نقولوها لييييه وتحطوني فموقف محرج قدامو لا .... غنولي داك ساعة وحدة مفروضة عليه ؟؟؟؟ مسسسسستحيل
لوؤي : واااشتي الممممرض دابا ... عمي اسد راه مغيبغييييش هادشي
بيلي : انا غنهضر مع بابا يهضر معاه ... اما باش نهضر معاه انا منقددددرش هو اصلا باقي مزال مقلق مني ... عندااااااك تمشي تخرج ليكم شي حااااااجة الوؤي
لوؤي : شوفي مع واليديه حنا مالنا .... واخا انا جاني هادشي غير تخربيق وتربهيييش والله !
بيلي : دابا كولكم نتوما متفقين بلي هادشي تبرهيش ؟ انا قلبي كيتقطع هنا وليي ناض يوصف علاقتنا يقول تبرهيش.. اياد و نتا و سلطان .. ماما بابا عمي اسد ..... ها علاش قتليك صعيب نلقى شي حد يفهمني
لوؤي : ونعاود نقولهاليك تانا .. راه ابيلي نت ومفاهماش راسك ....
تقطع الفيديو وهو باقي كيشوف .... يد كتحك فلحيو ويد محطوطة على كلافيي دالبيسي ... كيرمش بعينيه !
ماعرف شكون يلوم ... ماعرف علامن يحط الحق !!.. اليو اس بي لي كان كيضن غيلقى فيه طريق غير ما زاد خربقو ! من بعد هادشي لي شاف تمنى لو بقى فااااااقد الذاكرة والا هادشي !!!! لقا عقلو ما قادر يلوم تاشي حد من غير راااسو .. اش داه يدخل فعلاقة فداك السن !!!! فين كان عقلوو تايقلب عائلة كلها !!!! جاه هادشي كااااامل تبرررهيش .... تبرهيش ودفعو ثمنو الكباااار .. وكون دابا داكشي ماتنساش وكون يونس واسد رجعو عديان !!!!! حب مراهقة كان غاااايشتت كنية على قدها !!!!! ..... هو مافكرش لا فبيلي لا فعلاش مشات وخلاتو و لا علاش مشى وخلاها ولا حتى حاجة .. فكر غير فين كااااان عقلو يرتبط ببنت 16 عاااام !!!!!! ...
ورجع تاني شاف للبيسي هو يبان ليه شريط صوتي .. هو لي بقى وورك عليه ....
شوية هو يبدا يسمع .....
اياد : شفتو البارح .. صورو ليا سلطان .... ضعااااف بزاف ....
اسد : الحمد لله غير لي عااش ....
اياد : يبرى ان شاء الله ويرجع حسن ملي كان اعمي .... اتصلت عير باش نگوليك .. نهار تقررو تعاودو ليه ... بلا متعاودو ليه داك تخربيق راك عارف .. خليه ناسي حسن
اسد : اشمن تخربيق !
اساد : داكشي ديالو هو وختي ودبازنا ... بلا مايعرف هادشي مزيان لي نساه
اسد : حياة ختك كانت عندك تخربيق !
اياد : ماشي هاكا اعمي .. ولكن اش دارو راه تخربيق .... ماعلينا .. بلا ماتقوليه ليه ....أنا راه وصيت الدراري ....
اسد : راه خطبها من باها ا اياد .. من حقو يعرف
اياد : ياك هو ناسي ! خليه ناسي .. هو و ختي والله ما ديال بعضياتهم .. انا هو كنعرفو وختي كنعرفها
اسد: غتعرفهم كتر مني انا لي مربيهم !
اياد : نتا راك أب .. وكتشوف الامر غير زواية ديال يكونو فرحانين ... انا راه كنشوفها من كاع الجوانب .. انا راه كنت الاخ وكنت ولد العم وكنت الصاااحب ... ماشي دبعضيااااااتهم اعمي .. لاا هو لا هي يليقو بهاد المسؤولية راه غير غيديرو المشاكيل . مزيااان لي نسى والله فاش قالوها ليا دراري فررررحت واخا صراحة مكنتش باغيه ينسى .. ولكن مزيان لي نسى داكشي بعدا ...... الى كانت عندي شي معععزة ولو شوووووية اعمي عندك ... ماتقولو ليه والو .. باش حتى الى رجعت شي مرة تكون صفحة بيضة ونعرف نعاودها ......
تقطع داك الشريط وهو كيضرب بيديه فوق الطبلة ضربات خفاف ... وتنهد وسد داك البيسي بعصبية وناض شاد على راسو كيمشي ويجي .. الگاط ديالو ولا مغببببرررر ملي كيضربو مع الارض ... كيحس بدماغو ترووون ليه .. ماعرفش فين يرصي ولا معامن يجي ولا علامن يجي .. حاجة وحدة لي عارف ومتأكد منها .. هي خاصو يكمل على وعدو لي عطى لعمو .... ولكن هاد المرة بعقلانية ويحط كنية الاسماعيلي قدام عينيه ..... ورجع مشا لدوك الحدايد دالدروج شد فيهم وكيضور داكشي كامل لرااااسو .. بلاصة ماييبقى يفكر فشنو دار فالماضي .. خاصو يفكر شنو خاصو يدير دابا .... حاجة وحدة لي جات فبالو .. هي يصلح هادشي .... والاصلاح دهادشي يبداه من اكتر واحد بان ليه متضرر .... هو إياااد ......
ڤيلا يونس ...
بيلي جالسة فوق سريرها وعينيها باقين منفوخين بالبكا ومروان واقف قدام الزاج دالبالكون وداير يديه فجيابو وكيشوف للنخل لي قدامو كايبانو من زاج ... وعقلو سارح وهي مزال كتهضر ....
بيلي : ماحسيتش براسي .... عييت نحبس فراسي امروان عييت .. درت جهدي كامل وحسيت بنفسي غلباااات عليا .... مكنتش باغا نفضح هادشي .... ( مروان ضار براسو كيشوف فيها وهي كملات كتشوف فيه ) شفتي فاش كنت بين يدو وهو كيشوف فيا بطريقة لي كان كيشوف بيها فيا من قبل و كون شد ليا فيدي وقاليا يلاه كنت غنتبعو ..... گنت غنسى كولشي و نساه بلي نساااني وكوووولشي ونعاود من جديد ... ولكن ملي مشا ... رجعت لعقلي وقلت اش كندير انا ورجعات معايا الندامة ... وعارفة الى عاود قرب مغنحسش براسي تاني ....
مروان تنهد وبدا يدوز يدو على وجهو وقلبو كيحسو كيتشق ليه بين ضلوع صدرو ومباغيييش يبيين الشي لي كيخلي حريقو يجهد ... وعلا راسو لفوق مدة ورجع شاف فيها
مروان : ووالديك ؟ وخوك ! مغتراعيش ليهم
بيلي : و اش كنخبر عليك دابا امروان .. كنقوليك راسي ماقديتش نراااااعي ليه .. واش تعذب شي حد فيهم كتر مني !!!!!! انااا مراعيتش لنفسي ... راه ماشي لخاطري ....
مروان : وفيناهو دابا ! عاود عيط !! سول فيك ؟ كمل فهادشي !!!
پيلي : ( نزلات راسها ) ماعندي تاخبار ... ملي مشى لبارح معاودتش عرفت عليه شي حاجة وماما قالت ليا غتعيط لخالتي لاماار تقوليها الى قاليهم شي حاجة تبقى تما ... وخاصني نجمع حوايجي ونمشي
مروان : امريكا ! ( بيلي حركات راسها باه بالثقالة وباسف )
رجع نفت تنهيدة اخرى كيحاول يحط حجرة على قلبو ويحط سعادتها قدام كولشي .. ومشا جلس حداها كيشوف فعينيها لي كيتمنى شي نهار يشوفو فيه بالطريقة لي كيشوفهم هو .... وهضر
مروان : بيلي ... واش الى بقيتي معاه ! غتكوني فرحانة !
بيلي : ماعرفتش امروان .... كنحس بسعادتي عمرها غتكون مع جود .. فنفس الوقت نفسي باغا جووووود .. واخا فالتعااااسة انا باغاه ...حتى الى مكنتش غنكون معاه فرحااانة ... باااغااااه ....
مروان : باغاه ! واش عندك نت جود تحدي ولا كيفاش !
بيلي : مغتقدرش تفهم ...
مروان : لا راااني فاهم .. هااااد واخا منكونش معاه فرحانة انا باغاه ! مابغاتش دخل لدماغي ... الواحد لي متكونيش عارفة حتى واش غتكوني معاه فرحانة ولا لا .. هذا كتعرفيه ! نتي مكتعرفيهش على هاد الحساب ! نت راه باقا واحلة فداك جود البوگوص لي قاااالب الدنيااااا وعاجبك فوجهو ولباسو .... معاااجبكش هو !!!! عاجبك قااالبا .. ماشي قلبا ابلي ! وا كتعرفيه من داخل ؟
بيلي : ( كترمش فيه ) اش كتخربق .. واش غاتوريني فجود ؟ انا باغاه هو ....
مروان : كتبغيه يعني !
بيلي : واش باليك !
مروان : واخا .... ( كيشوف مباشرة فعينيها لي حس بيهم تاهوما تلفهم ) أنا ؟؟ ( كيضرب لصدرو بصبعو ) انا مرواااان .... الى قلت ليك غنبقي معاك طول حياتك ... غتكوني فرحانة معايا
بيلي : كـ صدييييق !
مروان : مكيهمش شنو غنكوووون ... لي كيهم واش عارفة راسك غتكوني فرحانة معايا !
بيلي : اكييد ! مالك على هاد الهضرة .. نتا راه هو الوحيد لي كيفهمني فهاد الدنيا وكنقدر نهضر معاه بإرياحية وكيعرف يخرجني من البكية للفرحة .... كنعرفك داخل سوق راسك و مكتآديش وماغدارش و حنين .... كيفاش منكونش معاك فرحانة !!!
مروان : وهو علاش قلتي عليه معارفاش واش غتكوني فرحانة ولا لا ! حيت مكتعررررفي عليه والو على هاد الحسااااب !!!!!!!!
پيلي يلاه جات تجاوبو وهي ترجع غير كاتشوف فيه ...
مروان فهم نظراتها بلي مابقا ليها ماتقول وهي براسها تخربقات دابا كايشوف فيها كاتشوف بعينيها هنا ولهيه وحجبانها كايتجمعو وهو يوقف
مروان : قبل ماتسولي على جود ... وعلى علاش ماسولش منلبارح ... كلسي مع راسك .. وسولي راسك .... جود شنو لي مخليك باغاه ...... ملي تلقاي الجواب غاتلقاي حتى الطريق ..... (رجع تحنى عندها وشاف فعينيها وهي علات عينيها فيه ) وياريت ملي تكوني كتسولي سولي حتى على ... نت شكون كتبغي اصلا ! ..... ( رجع وقف ) مغايفيدك هاد الساعة غير راسك ... تصالحي بعدا مع افكارك ... وشوفي شنو لي مخليك مشبتة بجود .... غاتسهال عليك طريق بزااااف .....
پيلي بقات غير كاتشوف فالعدم ....وهو ضربها لنيفها بصبعو وشافت فيه لقاتو تبسم ليها
مروان : أنوووشة ... أنا غانمشي دابا .. جيت مخلوع عليك .. كنت باغي نخرجك ولكن باليا محتاجة تگلسي مع راسك ... ترتاحي عيطي ليا .....( غمزة )
ومات براسها بمعنى واخا .... وهو مشا وهي كاتشوف غير فالعدم ... كمشات حجبانها كاتقول فراسها " اش كايقول هدا !! " ورجعات وقفات كتضور راسها بلا وكتقول " لا ... انا راه كنبغييييه هو .. اش هاد تخربيق كايقول هدا اش غانكون باغا فيه مثلا ؟ هوووو ... مكاينش شي حاجة أخرى "
ورجعات نفضات راسها تاجهات لبالكون تشم الهوا وكاتفكر .....
بصح ! هو علاش مسولش .. واش عادي بالنسبة ليه يسمع كنا مخطوبين ومايدير واالو !!! ولا يكونو تاهو والديه مخلاوهش !!! .....
ورجعات تاني كاتشوف لتحت مدابزة مع افكارها وهضرة مروان واخا كتجي لدماغها كتحاول تطردها ....
أما جود كالس فوق الدرجة وحاط يديه فوق ركابيه وكايشوف لتحت .... حس بدماغو غاااايطرطق عليه بالتفكير .. صدرو من داخل كايحسو ضياق عليه ... ودوخة مكملة عليه .. كان كايضن ان اصعب حاجة دوزها هي فاش قرر يتخلا على الرالي باش يرضي باباه ! حتى لقى راسو ان أصعب حاجة هي هادي ! هي يتحمل مسؤولية شخص طائش ساذج واعد بنت بزواج وهي عندها 16 عام ... ودابا خصو هو لي يتحمل المسؤولية ديالو وهاد الشخص هو ... هادشي لي كاااايحمقو ويسطيه !!! انه هوو ..هوو نفسو ....
رجع راسو للور بمدة فلخر جبد تيليفون من جيبو .... بقى يضورو مدة فيديه هو يصوني .... حتى جاوباتو
جود : واجدة الدار !!!! ..... أنا جاي
قطع عليها وناض لبيرو حيد الكلي يو اس بي دارو فجيبو ونزل فدروج خرج لطموبيل وصونا لشكيب يعلم پيلوطهم انه عندو رحلة ويوجدو طيارة ......
داز نهار روتيني على الجميع لوؤي لحق على باه للمتحف .. سلطان دخل للتداريب الفردية .... اسد وقدس ولامار فالبحر ووسيم لحق عليهم دوزو نهارهم تما .... أما بيلي دوزاتو فداك البالكون تخخم وتعاود فلخر لاحت داكشي من راسها وطلقاتها تسرح كيف ديما ومشات لكادوياتها تتلهى فيهم ....
الساعة دارت الحداش ديال الليل ... قسم جات من الاجتماع مسخسخة وطلعات لبيتها طاحت كاو فالنعاس ....قدس تاهي طلعات من البحر دوشات ودارت فيلم ... وسيم قصرها پلاي .... ولامار دخلات لجناحها كيف العادة وقيتة تيليفون كتهضر مع رقية ... و مع اسبرو ومراتو ومع خوتها ..... واسد حال بيسي ديالو خدام لان فوقيتة الپوز كايراقب غير من الدار ..... أما رتاج فلاكلينيك وصلوها نتائج مرض باباها شاداهم كترررعددد و سادة لباب دالمكتب وكتبكي بججججهد تخوي هادشي كااااامل باش ملي تشوفوووو ماتبكيش حداااه .... ماقدراتش تستحمل هاد الخبر ... خبر ان باباها مابقاش ليه بزاف ! ..... كانت حاسة وكانت عارفة .. ولكن كيكون باقي الامل !!!!!! ....واليوم الامل تبخر ....
اما جود حتى وصل لمطار جا نازل من طيارة هو يتفكر انه مجامعش حوايجو !!!! بقى مدة غير كايرمش بعينيه !!!! نسى حتى انه خصو حوايج للسفر ؟؟ ورجع نفض راسو وركب فطيارة كايقول ماعليش دابا نشريهم باش مايحسسسش راسو انه مريض ! كانه كايواسي راسو كايقوليه نتتا ماشي نسيتي تجمع الحوايج .... لا، نتا غير مافيك مايمشي للدار دابا نشريو كولشي .... نتا مانسيتيش .....
∆فالقصر .....
لامار حطات تيليفون وضارت عند اسد ...
لامار : اساد .... هضرت مع ماما ودوزات ليا اريج .. المراة دوات معايا عادي بحالا مافخبارها والو!
اسد : ( عينيه فالبيسي وكايجاوبها ) حتى الى كان فخبارها هادشي ماشي ديال يتقال فالتيليفون ...
لامار : كنفكر حتى يجيييو من فاس ... ونتجمعو كاملين ونهضرو على هادشي .. هاد المرة مغانخليوهمش هوما لي يمشيونا ... حنا لي غانعرفو لهادشي .....
اسد : انا هزيت يدي على هاداك ...
لامار : مانعرف فين هو هضرتي معاه
اسد : عيط لبيلوط .. منعرف فين هارب تاني ...
لامار : ياااااربي تصبرني مع هاد الولد يااااربي ...... ياربي تعفو عليه من هاد القاعدة .. ييدير مشكل ويشد طريق ويخلينا واحلين ..... ( شافت لتيليفون ) انشوف رتاج اشنو كايدير وواش قالت ليها ختها شي حاجة
اسد : ( علا عينيه تفكر انه غايكون وصلوها نتائج هاد ليلة حيت هو لي سيفطهم ليها ) غير خليها .... عندهم اجتماع فالاكلينيك مغاتجاوبكش
لامار : فهاد الوقت ؟
اسد : راك عارفة خدمتها ....
لامار عوجات شنافتها لجنب ورجعات شافت فيه
لامار : نعيط لبيلي !
أسد : ( بزعفة) طفيي عليا داك تيليفوووون دوزي تنعسي .... غاتبقاي نتي هازة الهم الكولشي ! عطي شوية دالراحة لدماغك !
لامار : هاااااهي ...
حطاتو ومشات لعندو مبستمة كلسات على طرف الفوطوي حتى جبدها لعندو ووشد البيسي .....
بعد ستة أيام ...
لشبونة " البرتغال "
الساعة العاشرة والنصف
ريسطو الفندق ....
كان الريسطو داك الصباح مخصص واحد الجناح فقط للفرقة لي كتوجد راسها لماتش مصيري مع الستة دالعشية ....
كانو الللاعبين وجميع الطاقم لابسين سيرفيتات كوحل هازين فيهم اللوغو ديال النادي ديالهم .. طبلة طويييييلة كان عليها الفطور لي تقلب كولو وتاحد مكيفطر طالع ليهم الخخخزززز بسبب التشكيلة لي قاليهم المدرب .... عرفو أن بسبب داك التشكيلة لي دار .... هاد نهار الى ربحو خاص تكون معجزة !!!! .. ولكن شكون يقدر يدخل فقرارات المدرب ! ....
كان سلطان بعيد هو والمدرب ومساعد المدرب .... وجهو حمررر بالاعصاااااب معلي رجلين السىوال دالسيرفيت ولابس طربوش نايك .... بعدو مساعد المدرب بزز باش يهضرو غير بيناتتهم بلاا متنوض الجوووقة وماتش مصيري كايتسناهم نفسية اللاعبين هي كولشي حااليا ...
المدرب : غييييير سمممعني خليني نشششرح ليك باش تفهم ... راه هادشي لي كادير منافع الفرقة بوالو .....
مساعد المدرب : وداباا برررررد نهضرو بالععععقل مالك ! ..
سلطان : ( شاف فيه ) اشمن عقل ! .... جاي فنصايص لليل ... ستيام ونا فالتداريب الفردية صباح وليل ... باش هاد صباح هدا .. يجي يقول ليا غااتبقى فالاحتيااااط !!!!!!
المدرب : وراااااه غادددخل اصاحبي غادخل .. ولكن حتى للشوط تاني ....
سلطان : عرفتي شغادير !!!!! انا ملاااااعبش .... سيير قلب على مهاجم بحالي ماركا ليك كتر من ربعين بيت فكل سيزون حطو ف بون دو توش وشوفو واش يبغي !!!!!! ....
مساعد المدرب : واش عارف راسك اش كاتقول ... كيفاش ملاعبش ... ليوووووم الماتش اسلطان .. الفيينال ...
سلطان : هادشي قولوه لراسكم ... نتوما عااااارفيني راها سااااهلة عندي القضية فاليزتي غاانجرهااا ونزيد مع طريق .... داير جهدي كاااامل فالماتشات كووولهم باش يربح هاد الكلوب الكوپا ونمشي بالي مرتاح .... دابا كاتقوليا ليا غانبقى فالبون توش !
مدرب : اسلطااان اولدي .... راه مغاااانغامرش بيك ....
سلطان : لفيييينال هادا ماشي اللعب .. وشوف معاامن لاعبييين !!!! واش نفكرك فيهم !!!! ( قاد وقفتو وشاف فيه ولاعب اخر الكابيطين ديكيپ" قائد الفريق" جاي لعندهم ) راه ياااا ايما .. ندخل لعب .. يا اما طيارتي ترجعني .... ديجا شاد بلاصتي فكلوب اخر انا راه مخاسر والو ...
مساعد المدرب : اهاه ! قاد على الغرامة !!! فلوسك كلها غاتمشي وتزيد الخطية !!!!
سلطان : واش حسابتك انا مدخلني هنا الفلووووس !!!!!! واش بنتليك انا خصني فلوس ؟؟؟؟؟ انا داخل للكرة حييييت هواية .. حيت عاجبانني اما فلوووسكم غاسيرووو كولوووها .... الكونط فين كادوز مكنطلش حتى عليه ، تهددني دابا بالغرامة !!!!
الكابيطين : سلطان .. بشوية هادشي غايتحل .. راه الى مشيتي هاد تمارة لي ضربنا كاملة غانخسروها راحنا فالفينال سلسلة اللاهزيمة غاضيع ....( شاف فالمدرب ) بدل هادشي ... راه فهاد الماتش حنا محتااااجين ليه علاش غاتحطو فالاحتياط حشومة كاع !!!!!
المدرب : اهاه !!! اهاه ( ربع يدو ) نتبعكم فطريقكم ... ندخلو فالشوط لول .. ينوض ليا صداااااع ... يتضرب بالحمرة ويخرج ... اش بالك !
الكابيطين : راه ماشي حمق يتصادع فالفينال
المدرب : غاتوريني فسلطاااان !!!!! غاتوريني فعصبيييتو !!!!! حتى الى متضربش بالحمرة هوما لي غايضربوه غايخرج اصابة .. الفينال هادا .. كايعني القتاااااال .... شكون عندي انا فهاد الفرقة من غييركم ... راه يا اما نتا يا اما هو غايديروكم بين عينيكم .... منغااامرش ... حتى للشووووط تاني ويدخل تسالا الكلام ....
سلطان : ( داير يدو فجيبو كايضرو راسو بالنفي) غيييير كتخرا وتستف ... راك غتخرج على هاد الفرقة
المدرب : ختاريتوني مدرب ! واخليوني ندير خدددمتي ....
خلاهم ومشا وسلطان شاف فالكابيطين طالع ليه الخرا للراس
الكابيطين : غيييير صبر راه مغانعرفوش حسن منو
سلطان : وعلاااااش انا ضارب هاد طرقاااان اصاحبي باش غانتحط فالاحتياااط !!!!!!
الكابيطين : ربما عندو الحق .. شفتي اخر ماتش كيفاش حطو عليك ...
سلطان : واش انا واكل تبن حاضي رااسي اصاحبي ... انا باغي نلعب منقدرش نشوف فلماش كايضيع ونبقى كالس فالاحتياط غانموت غابالفقصة
الكابيطين : حنا غانديرو جججهدنا ونتا صبر شوية
مساعد المدرب : انا انهضر معااه يدخلك فاللول دالشوووط الثاني ماتخافش ... مرربووووووحة ....
ضرب على كتفو ومشا وسلطان شاف لجنب فلخر تنهد ومشا لسانسور دار بالناقص من الفطور طلع لشومبر ديالو ......
فالفندق ...
الرابعة مساءا ...
كانت كاغطابل ديالو محطوطة على السرير وهو كايجمع فيها حاجياتو ... شارجوراتو و الكيت و كوضاسات وكريم الجيوب الانفية و كاع اش غيحتاج وتيليفون شاد عليه بيين كتفو وودنيه كيصوني .... حتى جاوبو ...
لوؤؤي : افين ...
سلطان : فين وصلتي ( كيسد السلسة د الكاغطابل )
لوؤي : يلاه وصلت لسطاد .... باقي فلوطيل ؟
سلطان : غنخرجو دابا .. طالع ليدلمي الخرا لراس .... الشوط لول حاطني فبون دو توش !
لوؤي : وااااايلي !!!!!
سلطان : حشمت نرجع فحالي ... مابغيتش يضيع هادشي .. بربي كون مكانت معزة هاد الكلوب مانبقى هنا دقيقة ....
لوؤي : واا اصاحبي .. غير سايس راه هو المدرب ماعندك مادير ... ياك غيدخلك فلول بعدا ؟
سلطان : فاش عطانا تشكيلة قالك غيدخلني حتى لدقيقة سبعييين ... اللعابة كولشي طلع ليه الخرا لراس ... من بعد هضرنا معاه ندخل فلول ديال الشوط .... والله تا دايرها فيد الله اولد عمي ...
لوؤي : وغير صبر ... مربوحة ... الستريس دابا مغيفيدك بوالو .....
سلطان : مهم تانتلاقااااو ... تهلا ...
قطع عليه وهز الكاغطال ديالو فظهرو ... هز تيليفونو وخرج نزل فالسانسور مشا لباب لوطيل لقا الكار ديالهم واقف ... كان كار كبيييير باللون الاسود و عليه شعار الفريق ... والنادي ديالهم كانت تحت إسم "Clube Atlético Amadora"....
دار القب ديال السيرفيت وطلع فالكار .. كان النص داللعابة والطاقم ركبو ... علق البادج ديالو فعنقو ومشا لبلاصتو جلس طالع ليه الدم كل مرة واحد من اللعابة يهضر معاه بمعنى غنربحو ماشي مشكل .... جلس دار الكيت ديالو فودنيه كيشوف من الزاج ... تاجا الكابيطين ديكيب جلس حداه ....من نهار دخل لهاد الكلوب و هو وياه علاقتهم زوييينة بزاااف ... بيناتهم تناغم كبير فتيراااان و ايلا مكانوش بجوج مكيعرفوش يلعبو ... من دابا هاز ليه الهم فاش غيمشي شكون غيعوض بلاصتو .... كان سميتو پاولو إنسيزو ... برتغالي الجنسية وعندو اقدمية كبيرة فكرة القدم و احترافية كبيرة ... كيلعب ظهير أيمن ... و فالماتش ديما هو و سلطان خاااالقيييين الجووو .. الكرة ايلا دخلات بيناتهم مكتخرجش بسهولة و غالبا ايلا واحد فيهم شد الكورة و لقا الثاني حداه ضروري يجيبو الهدف ..
كيعرفو يمررو الكرات لبعضياتهم ... و اينسيزو كيفهم سلطان و كيعرف يعطيه الكرة باش يسلجها ... ديما ثنائي ديالهم خالق الرعب للفريق لي كيكون الخصم ديالهم ... كيعرفو يخلقو الأهداف ... هادشي علاش المدرب خاف يدخلهم بجوج و هوما لي عندو مجهدين فالفرقة و كيحركو اللعب ... خاف يحطو عليهم و يعطبوهم ولا يستفزوهم ويخرج واحد فيهم بحمرة ...
داكشي علاش حاول يحتفظ بواحد فيهم بطاقة ذهبية للشوط الثاني .. و ختار سلطان حيت هو العصبي دالفرقة عارفو هو لي دغيا كيتستفز و مستحيل يلعب 90 دقيقة كااملة بلاما يدير شي مشكل .. خصوصا أنه الفينال و الخصم غادي يلعب عليه بكللشي ....
ديمارا الكار واتجهو للسطاد لي غيلعبو فيه فلشبونة ضد فرقة برازيلية تحت اسم " Football club do Manaus ” تاهي ماشي أقل منهم فالإحترافية .. واعرة و مجهدة وحاصلة على عدة ألقاب و فايتينهم فالاقدمية .... اللاعبين ديالها معظمهم قدام فالميدان و عندهم تاريخ كبير مع الأهداف و الكؤوس مع نفس الفرقة ولا فرق اخرين .. عندها حتى هي تلاثة دلاعبين لي خطارر و مدرب فرقة سلطان كيفكر فيهم و مبرزطينو .. هوما : "والتر" الكابيتين و المهاجم الإنجليزي .. و "پالي" البرتغالي لاعب الوسط .. و "سالا" المدافع البرازيلي ... حتى المدرب ديالهم كريستوفر معروف ب تكتيكاتو لي مدرووووسييين ....
سلطان ملي سمع الحكم لي غيحكهم فهاد الماتش أنه هو " گاسبا " غير مازاد تكره فهاد النهار هدا لي حسو كامل ضضدو ... هاد الحكم بالضبط كان حكمهم فواحد الماتش هادي تلات سنوات وكان ضارب هو وياه بسبب العنص رية و بقى حاقد عليه .... كيحسها مرونة ليه من جميع النواحي داكشي باش طالع ليه الخز لراس ...
من الصباح و هو حاس بلي الزهر واقف ضدو .. ماعارفش كيفاش غايسالي النهار و شنو غايوقع فالمستطيل الأخضر .. و لكن حالف باش يعطي كلشي و يتقاتل على التوني لي غايلبس .. خصوصا أنه آخر ماتش ليه مع النادي .. كيفما دخل ليه بماتش أسطوري باغي يخرج منو بماتش بحالو ...
... . هاد الماتش كيتعتبر ماااتش عاااالمي لانه جامع بين جوج دالنوادي مشهوووورين اروبيا وافريقيا بالخصوص .... و مشهورين فالخليج العربي و امريكا اللاتينية .... كذلك فالمغرب شهرتهم واصلة و كل كلوب فيهم عندو المشجعيين ديالو .... كلشي كان كيتسنا هاد الفينال و الناس حابسين النفس حول العالم و كيحسبو الدقايق باش يبدا ..
القهااااوي بداو يعمرو يتنساو الماتش ولي مزال ماجا وصا صاحبو يشد ليه بلاصة قدام التلفازة .... صحاب القهاوي زاهيية عنهم القضية اليوم فنفس الوقت مخلوعين .. لأن ديما فهاد الماتش لي كيجمع هاد جوج فراقي كتنوووض الروييييينة .... خصوصا انه الفيييينال دكأس العالم لاندية .... القهاوي الشعبية وما أدراك ما القهاوي الشعبية نهار الماتش .... داك الدرب كولو كاااايتقلب داك نهار و كولشي هاز الهم لايتعطب شي واحد كتر ماهزين لهم لناس لي فسطاد ..... وماشي غير فالمغرب بل حتى فالجزائر تونس مصر ليبيا قطر كويت البحرين وفرنسا ايطاليا وجميع الدول كتسنى هاد الماتش المصيري لي غيكون مع السادسة بتوقيت لشبونة ....
القنوات الرياضية بدا عندها البث .... البعض فيها نقاش على تشكيلة المدربين و تكتيكياتهم ... و البعض كانو دايرين بث للمراسلين من عين المكان والجماهير كتوافد تدخل لسطاد العاااصمة و لي غتجمع هاد العرس الكروي العالمي ... ولي عندو شي شغل راه كيقضيه دغيا يشد تلفازة يتفرج ولا يمشي لقهوة .... تيفويات وتونيات وشعارات تهزو والناس كيتسنااااو ....
كذالك عائلة الاسماعيلي حتى هي مستعدة لهاد الماتش وعلاش لا وهو بطلو ولدهم ! كانت سينيما روم فالطابق السفلي كيوجدوها الخادمات استعدادا للماتش لي غتفرج ليه العائلة كاملة مع السبعة بتوقيت المغرب ... كيوجدو الفشار والمكسرااات والمشروبات .... جود حتى هو رغم انه بعيد الى انه جرا على الروسية هاد نهار باش يركز مع الماتش و طلع لبيت نعاس شعل تلفازة كيستعد .... اما لوؤي حاضر فعين المكان لي دخل لبلاصة vip وشد الكرسي ديالو وشد تيلفيونو ملهي بيه على ما يبداو .....
الجو كاااان صااااااخب فالمدرجاااات لي تقريبا عمراات ... رغم ان الماتش باقي ليه ساعة .... كان المدرج مقسوم لجوج فيراجات ... فيراج باللون الابيض و الازرق لي كيرمز لفرقة " أمادورا كلوب " لي كيتنمي ليها سلطان .... وفيراج باللون الاحمر والاسود لي كيرمز لفرقة " ماناوس كلوب " لي كينتمي ليها الفريق البرازيلي الخصم ....
صوت الابوااااق ودق الطبول وصوت الاناااشييييد ديالهم وكل فيراج منظمو الكاپو ديالهم لي واقف فوق واحد المنصة لقداام عالية شوية باش يشوفو كللشي ..... كانو الجمهور كلهم بتونياااات وهازين الرااايااات وكاينين لي لابسين تونيات فيهم وجوه اللعابة المفضلين ديالهم او سمياتهم .... صابغيين وجاههم بلون الفرقة ولابسين طرااااابش ...
و فالفيراج ديال فرقة أمادورا كاينين مجموعة ديال المشجعين مفرقين هنا و لهيه لابسين أقنعة على ريوسهم على شكل حيوان الأسد .. كانو معجبين سلطان حيت اللقب ديالو هو "الشبل" ... و هازين لافتات كاتبين عليهم عبارات شكر و وداع بالإنجليزية بحكم كلشي عارفو اخر ماتش غادي يلعب معاهم ...
الجماهير كايهتتتتفووووو بأصوات عاالية و قالبييين دنيا كأنها عااااصفة فداك المنطقة واخا راه غير هتافات المدرجات .... الروح الرياضة كانت عااااااليية .... الأدرينالين مدفق فالدم و الأجسام سخونة .. القلوب كتضرب بالجهد ... وكل واحد مقاتل مع فريقو ... كل واحد حاط امالو كلها على هادوك 11 لاعب لي غادي يوقفو تماك ... ناويين يعزلو ريوسهم على الدنيا هادوك ثلاثة السوايع لي غادي يدوزو فالمدرج .. و يعيشو فقط كيتنفسو المستديرة ... يقدر واحد لي مافيهش روح الكرة يجيه هادشي هبال ! ولكن بالنسبة للنااااس ديال الكورة .... فريقهم يفديوه بالروح و الدم !!!! يفرحو معاه و يبكو معاه ! الامر بعد المرات كيوصل انه يمووووت كاع !!!! توتر كان رهييييييب و تشويق اكبرررر .... جوج فرق من اخطر فرق الدوريات الاتينية ... فأخطر ماااااتش .. نهائي كأس العالم للاندية أطفال صغاار و شيوخ كبار .. شبااااب بناات و ولاد ... عائلات .. كلهم جابتهم الروح الكروية ... جايين باش يفرحو ويحققو الحلم .... فوز فريقهم كيعني فوووزهم .... هتافااااات متنااااغمة و أصوات الدك برجلييهم فالارررض خالقة زززلزااااال كيحسو بيه غير هوما و كل من حطات رجليه أرضية التيران !...
وصل الكار قدام السطاد ...
الجو كاااان صاااااخب لدااخل و اصوات الهتافات والمزامير والابواق.... الصحافة كانت معمرة المكان لكن منظمة وراء السياج ....
تحل باب الكار وبداو كينزلو ... كان الطاقم لابس سيرفيتات على شكل سروال وتيشورت فاللون الابيض والازرق ... وفعنقهم معلق البادج ديال الفريق ... كل واحد هاز صاكادو ديالو فظهورو وكاين لي هازها فيديه كيدخلو من البوابة وكيوميو غير بيديهم للصحافة لي كتلتقط الصور .... الهتاف مكانش غير لداخل انما حتى على برا لناس لي مقادرينش يدخلو ... الجو كان مقلووووب فالعاااصمة ككل .. لي مكاينش فالسطاد راه فالقهاوي ....وفالاماكن العامة ايضا البعض طالق شاشات الشوو ...
نزل سلطان و اينسيزو وطلع البافيت السوداء على نيفو وفمو و الجمهور لي كان بعيد كلهم غوتو بسميتهم مسمين عليهم " ثنائي الشباك " .. وسلطان كان ملقب "بثعبان الكرة" بسبب أنه محترف فالمراوغة و صعييييب تتحيد ليه الكورة بحالا كتلسق على رجليه .... اشارو لجميع بتحية غير براسهم ودخلو ....
القنوات الرياضية بدات كترصد دخولهم فالبث .....
المدرجات عمرو على آخرهم والهتافات غير مكيزيدو يتعالااااو ..... دخلو اللاعيبن للفيستيير .... حيدو جاكيطات لي لابسين من فوق ... كان الفيستيير كل واحد عندو تما الركن ديالو ومعلق التوني ديالو باسمو ورقمو ومطوي تحتو الشورط و الحامي ديال الرجلين لي كيلبسوه تحت من تقاشر ..
مشا سلطان للركن ديالو ... حط الكاغطابل ديالو وبدا يفسخ فسيور سبادرين هو يلمح الحامي ديالو محطوط فوق الشورط ... تبسم بجنب شفاهو ملي شاف الصور لي حاط فيه ... وهزو .. كانت صورة باباه وماماه وآية ... قربهم لفمو باسهم .. وواعدهم غير بعينيه غيتقاتل و يربح هاد الكوپا لهاد الفريق لي ازدهر فيه مدة اربع سنوات .... ورجع حطهم وحيد داك سبادربن وجبد وحدة من الكاغطابل ديالو لبسها ... وهز جيلي ديالو كانت جيلي زرقة لبسها كيستعدو باش يخرجو للتسخينات ....
جا " انسيزو " عند سلطان لقاه واجد
-انسيزو : بردتي شوية ! ...
سلطان : ماشي لخاطري .. بزز عليا نبرد ... بغيت نخلي شي حاجة زوينة مورايا ...
انسيزو : ( ضربو بلكمة لكتفو ) هذا هو سلطان لي كنعرف .... عنداك تركز مع گاسبا ... نساه كاااع الى هو الحكم .....
سلطان : ( كيقاد شعرو بيديه ) كولشي تجمع ضدي فهاد الماتش ... ماعلينا .. .يلاااه ...
خرجو وشافو لباب الفيستيير لي مقابلة معاهم دالفريق الخصم لي كانو خرجو قبل منهم للتيران .... فريق ماشي ساااااهل .. واللعابة ديالهم تاهوما ماشي ساهلين .... لكن الامل كبيييير ... ضارو اللعابة شافو فسلطان و آنسيزو بمعنى راحنا معولين عليكم ... وزادو خرجو للتيران .... و مشجعين ل CCA هتفوووو ....
كان الكوتش والطاقم كيتسناهم وبداو التسخينات ديالهم مع المدرب لي يضور يضور ويشوف فسلطان عاقدهم كيخاف يقلب ليه هاد الماتش .... الدنيا مقربلة فالمدرجات ولوؤي جالس كيتفرج فيهم لتحت وعينيه تبعو غير ولد عمو ... رغم ان كاع اللاعبين لي تما متفوقين الا انه كيشوف غير ولد عمو هو لي منور وسطهم وهو البطل ... هذا هو الدم العائلة ....
فالتيران كان الفريق لاخور تاهو كيدرب مع الكوتش ديالو ... غير شافوهم داخلين واحد بدا يشوف فلاخور .. ومدربهم عينيه غير على مدرب فريق سلطان .... هادي ماشي عداوة الماتش ... هادي عداوة قدييييييمة ودفينة بين اللاعبين " كريستوفر البرازيلي " مدرب فريق الماناوس كلوب " ....وكارلوس الانجليزي مدرب فريق "امادورا " فماتش فثمانينات .... بقات العداوة تابعاهم واخا كبرو و اعتزلو ولاو مدربين وها القدر كيجمعهم ففينال كأس العالم لاندية ......
كان كارلوس عارف مزيااااان خبث كريستوفر وعارفو كيلعب على الاعصاب والاستفزاز .. هاكا كان كيريح شحال هادي .. كيستفز اللاعب لي معاه حتى كيخرجو بحمرة .. ودابا ملي ولا مدرب هادشي لي كيعلم لللاعبة ديالو شي لي خلااه يخاف يدخل سلطان ....
عند فرييق FCM ...
كانو كلهم بجيليات فالاحمر ... شي فالارض ناعس على ظهرو ويديه تحت راسو وكايروض رجليه ... وشي كيجري ... والكابيطين ديكيب كان اسمو " والتر " كيشوف ليكيب لوخرا بدات تسخينات و عينيه على انسيزو و سلطان لي كيجريو وضاحكين كايهضرو ... ومشا عند المدرب ديالهم وهو باقي كايشوف فيهم وقف عليه ..
والتر : المغربي غيدخل من لول !
كريستوفر " المدرب " : تسربات التشكيلة .... ماغايدخلو حتى لشوط التاني ...
والتر : هه ! خاف عليه ؟ ... آنسيزو غيتلف عليه اللعب ( دار ضحكة بجنب فمو ) غنطحنوونهم
كريستوفر : ( ضار براسو شاف فيهم وشاف فالمدرب وتاهو هز فيه عينيه ... ورجع شاف فوالتر ) بغيييييت تخليييوهم ياااكلو ( ضرب برجليه للارض ) هاد الكاااازو بالاعصاب ...
والتر ضحك ومشا كيجري و كريستوفر شاف عند واحد اللعاب اسمو " روديغر " لاعب فرنسي ... كان كيتدرب ... كيشوف فيه من بعيد ... كان لاعب جد عادي ... اللاعب لي كيغامر بيه فالماتشات ... هو يصفر ليه وضار بجيهتو... وقرب لعندو .... والمدرب شاف فاللاعبين ورجع شاف فيه
كريستوفر : غيدخل حتى لشوط تاني .... رد لبال
روديغر : ( هز عينيه شاف فسلطان ودوز لسانو على سنانو بضضضحكة شريرة وشاف فيه ) كون هاني ... داك رجلين لي فرحان بيهم ..... الليلة يتهرسو .....
كريستوفر : ( ضرب ليه على كتفو ) معول عليك .... ماااابغييييتوش يبقى فالماتش .... صعيب نخرجو بحمرة .. كارلوس غيكون قراه يتحكم فاعصابو و الفينال هدا مغيبغيش يتاصدع راه باينة غير ملي خلاه لشوط تاني ... الى مغايخرجش بحمرة ... يخرج بإصااابة .... مهم مايبقاتش فالماتش ..
روديغر : متخااافش انا معاك
كريستوفر : نتااا متتفكرش كوررة نسا اللعب نسا راك لاعب ... نتا حضيييه ليا غير هو .. راك فالدفاع وكدافع على كورتك وهو مهاجم عطيه لرجليه عطيه للراس ... ضررررب ... مكيهمنيش تخرج بحمرة غيييير هرسو ليا .. عععطبووو
روديغر ضحك ومشا باش ميلفتوش الانتباه مبغاوش هادشي يخرج خبارو للعابة لخرين ...
وكريستوفر كيف عادتوو داير يديه مور ضهرو واقف .... كان شخص متوسط الطول .. رياضي البنية و صلع ... سن 52 سنة .... وضار كيتفرج فالاعبيين ديالو كيديرو ليشوفمون وكيشوف لسعتو مرة مرة .... والماتش مابقى ليه والو ويبدا .....
عند فريق CCA
المدرب واقف كيشوف ويعطي تعليماتو ليهم ويزيد يحفزهم و شاد معاهم تاهو كورة ... الكوتش حتى هو كيمشي عندهم واحد بواحد ... والكاميرا كضور عليهم.....
فقصر الاسماعيلي كانو جالسين فسينيما روم ...
اية وقدس وانس كانو مصبغين وجههم بالابيض والازرق ولابسين تونيات وقسم وفيصل ووسيم تاهوما لابسينهم وكلهم قدام تلفازة وغير كيبان سلطان الضحكة كتبان على وجههم ... رغم انه فريقهم وهو لي كييشجعو قبل حتى مايدخل معاه سلطان ... الا ان فاش كيشوفو سلطان كيزيد يعزاز الفريق ... اما سفيان منع على حياة تتفرج بسبب توتر .. الفينال وماتش مصيري وهي حاملة ..... وصيفطيها عند رقية واحمد للفوق لي منزلوش ومعاهم تا رتاج لي ماعندهاش الخاطر تتفرج .... خازنة الهبار فقلبها وساكتة فقط قالتها لراجلها وسكتات مابغاتش ضيع الاجواء ويححسو بباباهم انه غايموت خصوصا اريج مكتحكمش فراسها ......وليوم صبح عيان بزاف لدرجة ماقدرش ينوض من الفراش وحتى الهضرة كايخرجها بصعوبة ورقية مكتفارقش راسو ......
دخلات بيلي ومروان واياد لي كانو تغذاو على برا ... دخلو بزربة خافو يكونو بداو ساعة جاو فالوقت وجلسو تاهوما كولشي على اعصابهم كيتسناو .... وجود شاعل تلفازة قدام السرير وجلس شاد تيليفونو كيتميساجا مع لوؤي على الاجواء وكل مرة يهز عينيه فتلفازة واش بداو .....
القهاوي عمرو على اخرهم الماتش مابقات ليه غير 15 دقيقة ويبدا ..... التلفازة كتبين غير التسخينات ....
حتى بداو كيبانو ليهم كينسحبو يدخلو لفيستيير يلبسو تونياتهم ... والسقايات ديال ارضية الملعب تشعلو كيوجدو الارضية لهاد الماااتش المالمصيري ثم بان ليهم الاشهار على ما يبدا الماتش ....
دخلو لفيستييراتهم الفرق بجوج ... كولشي مشاو لتونياتهم بداو كيلبسوهم .. سلطان جلس فالركن ديالو كايربط خيوط الشورط و لبس التوني ديالو لي كان باللون الابيض .. غير نزلو عليه ... بدا كيتضح انه هاد التوووني فاش كان معلق مكان عندو حتى معنى حتى تلبس فوق هاد الصدر ....
رد شعرو لور و جلس كيلبس فالتقاشر .. ووضع الحامي عاد طلع التقاشر .. وبدا يلبس فالكوداس ... مولفين ديما فاش كيكونو فالفيستيير كيكون صداع والصخخخب ... ولكن هاد المرة دابا كلهم ساكتييين بسبب التوتررر ومخلوعين من هاد الفرقة الفيناااال ومع فرقة بحال هاديك التوتر ركبهم ... سلطان وهو بالتوني ديالو ورقم 7 تحت اسم S.El ISMAILY مكيخليكش تشوفو ابدا سلطان الاسماعيلي المدلل وصغير العائلة وابن حياة وسفيان .. بهاد التوني هو كيبان لاعب محترف .. نظرتو حتى هي تبدلات من سلطان الضحوكي و الطناااز .. لواحد مقااااتل ومحااارب وثعباااان الكرة ....ماشي هواية عادية .. هواية كبرات معاه وترعرعات معاه من الصغر من هو طفل صغيييير دخلو سفيان للنادي لي تابع لمدرستهم .. لعب فيه باسم ابتدائيتو .. ثم طلع للاعدادي ولعب باسم اعداديتو وثانويتو .. ثم ولا كيلعب باسم مدينتو .... حتى نهار توسط ليه أسد فهاد الفريق ... تاهوما شافو لعبو وانه شخص محححترف وباقي صغير ويقدر يخلق الفرررق ويخلق شي حاجة كببييييرة .... دخل لهاد الفريق وابدا مكانش مخيب الظنووون .. خلق فرق كبير خصوصا ملي تناغم مع انسيزو ... خلقو ثناااائي ناااار لي زاد بهاد الكلوب للقدام كتر وكتر لان الموسم لي دخل ليه سلطان كانو غادروه بزاف دللاعبة وكان فواحد الموسم لي كانو على المحك انه ينزلو للدور الثاااني وجا نقدهم ونقد الفريق ..... وايضا كيلعب بسمية بلادو فالكؤووس .....وشرف كنية الاسماعيلي احسن تشريف .....
لبس عليه ووقف يالاه ضار يجمع دوك الحوايج هو يدخل المدرب لي تاهو ماناقاصووش التوتر وكيحاول يخفيه على اللعابة باش مايزيدش عليهم ... كارلوس مدرب بريطاني .. كان طوييييل القااامة و رياضي البنية .. وجهو محسن كامل وشعرو كولو بيض ... 54 سنة من العطاااء لكرة القدم وباقي كيعطي ... عطاها هو كلاعب ودابا كمدرب ...
كارلوس : ( كيضرب فيديه ) يلاااه يلاااااه بالتتوفيييييق .... خلقووو ليا الفرق ... خلقوووو ليا الضججججة ... خليوووهم يعرفووو شكون حناااا .....
اللعابة : ( بجهد وبهتاف ) اووووووووولااااي ...
كارلوس : كل واحد فبلاصتو .. ردو لبال مع "سالا " مراااوغاتوو استفزااازية .. و مع الكابيطين "والتر" .. نتوما عارفين هجووماتو كاااااتغفل .. وردو لبال حتى مع "پالي " ركزو غير على هاد الثلاااااثة .. و ماتستاهنوش حتى بالحااااارس ... ( شاف جيهة الدفاع ) مااانبغيكمش تحركو من بلاصتكم .. ( شاف عند الكابيطين ) باولو آنسييييزو ... الشوط لول مكاينش سلطااااان .... غاااتعامل مع "فيرنر" ( اشار ليه ) كأنه هووو سلطاااان ... هو لي غيييعوضوو حتى يوقع التغيير فالشوط التاني .. حنا فماتش مصيري .. غنساو شي حاجة سميتها هدا صاحبي وهدا لا .. راني عارف فيكم هاد الفعاااايل كلكم غاااتلعبو رررررجل وحدة .... عينيكم غير الكوووورة .. كيف تفاهمنا جهدكم كاااااامل غتخليوه لدقيقة ربعيييييين .. عيييييوهم غير بالمراوغة خليوهم تابعينكم على كورة ماطلعوش للشبكة الهجووووم مايخدمش .. يخدم وسط الميداااان ... عيييوهم مزياااااان خليو العررررق يننننزززل على وجوههم .. عطشووووهم .... ونتوما لعبو بحالا كتلعبو مع صحابكم فسطاد ترفيهي .... حتى لدقيقة ربعيييين جبدو ليا الهجوم .. ضهشرووووهم ...
اللعابة : حاااضر ...
المدرب : يلاه اولادي.... ( كيضرب فيديهم ببونيات) متوتروش ..ماتعصبووووش .. ماطيحوش ففخ استفزازاتهم .. غيستفزوكم حيت الفينال هدا وولاد كريستوفر بغاو يربحو باي طرييييقة كااانت .... باليدين والرجلين .. ماطيييحوش فافخاخهم .. لعبو وتقااااتلو ..... ( اشار لشعار النادي ) على هاااادا
ضربهم كاملين ضربات تحفيزية ورجع لور كيشوف فيهم وهوما مستعدين للخروج ....
المدرب : ( صغر عينيه كيشوف فيهم ) داك الكووپااااا .... دياااااالنااااا ...
كلهم اشارو ليه براسهم .. وهو شاف فاللاعبة لاحتياط كان سلطان يلاه لبس جيلي فوق توني ولبس البادج ديالو وخرجو مع المدرب للبون دو توش " الاحتياط " ....
ولوخرين كيتسناو فوقاش يعلموهم يخرجو على شكل صف ....
عند فريق FCM
كانو حتى هوما كلهم لابسين تونياتهم وواقفين جاهزين وكلهم الضحكة مرسومة عليهم .. حيت عارفين راسهم متفوقين عليهم فالالقاب وحتى اللاعبين المحترفين هوما عندهم تلاتة و CCA غير جوج ... حارسهم ايضا مجججهد على حارس الفرقة لاخرا و تايقين فراسهم لابعد حد .... ونافخين صدورهم .. خصوصا المدرب حاس براسو مرتاح ملي غيبقى ليهم غير الكابيطين و الكابيطين مكيعرف يدير والو بلا سلطان حيت اللعابة لوخرين ممعاونينوش فتوصال الكورات لمنطقة الخطر .....
كريستوفر : نوووو ستريس .. غترتاحو بحالا داخلين نلعبو ماتش جد عاااااادي .. غندخلو وحنا ثايقين فراسنا اننا الابطال .. مغيخلعناش نادي بحالهم ... حنا الابطاااال ... حنا لي غناخدو لاكوپ .... تكتيكيات كارلوس انا كنعرفهم ومسربين ليا كولهم فالماتشات القدام ومية فالمية هادشي لي غيكون مخدم حتى دابا .... غتحسوهم كيعييوكم فالاول .. ولكن فاللخر .. غيلعبو .. اللحظة لي يكونو لاعبين بوتيرة بطيئة .. نتوما علييييوها ... هاااااديك هي فررررصتكم .. ماتقولوش ليا يلاه راحنا فدقيقة لولا يااه بدينا يلاه كنسخنو رجلينا ... دقيقة لوووولة سجلو ميهمكمش هاااديك هي فرررصتكم .. ماتقولوش باقي شوط تاني متفكروش اي دقيقة دااازت اعتبروها هي الدقيقة الاخيرة .. سجلو فالدقااائق الاولى وفشلوهم وحبطوووهم .... حااااربو طيييييلة تسعين دقيقة كللللها .....ماتشوفو فحتى حاجة اخرى من غير الكااس .... حنا الابطاااال ....
بداو كايهتفو وكيوجدو راسهم يخرجوو وخرج هو واللعابة دالاحتياط مشا لبون دو توش ديالهم و اللعابة لوخرين جاو كيعلموهم انهم يخرجو تصافو ومشاو امام مدخل التيران وتصافو وفالصف المقابل معاهم كان فريق ل CCA كيتقدمو رقم 1 حارس فريقهم الايطالي " مولانو " ... وفالطرف المقابل الحارس الخصم لي من أصول انجليزية "كين " ... مور "مولانو" واقف "باولو آنسيزو" فكتفو شارة قائد الفريق و مقابل معاه "والتر" لي قائد فريق الخصم من اصول انجليزية ...
"آنسيزو" كان شاب متوسط الطووول شي لي مخلي البعض كيطلق عليهم اسم بينكي و براين بسبب ان سلطان طويل عليه بزاف .... ولكن طولوو ما خالق ليه حتى شي عذر لي ميخليهش يكون لاعب محترف دوليااااا وكيتخاف منو .. لاعب عاااالمي وصاحب الركلات الخطيرة وصاحب اجمل الاهدااااف .... والقتالي الشرس فميدان العمليات ....
الحكم الارجنتيني " گاسبا " كان متقدم الفريق و صفارتو معلقة فيدو و حداه الحكام لاخرين ... بداو كيدخلو رايات شعارات الفرق بجوج ...
الجماهيير كتتتهزززز بالهتاافاااات ودك الطبول و المزاامييير .... سماء السادسة مساءا مابقاااتش كااتبااااان بسبب الدخااان دالمفرقعااات والاضواء .... الكل لي خارج الملعب قاد الجلسة و فيكسا عينيه على التلفازة وهو كولو كيتهز بالتوتر ...... كان حاليا البث كايدوز التشكيلة دالفريقين لي كانت كالتالي :
تشكيلة فريق : CCA
المدرب : كارلوس أوكرينال
---
الحارس : مولانو ، رقم (1) ...
----
الدفاع
توني ، رقم (😎 ، جناح أيمن ...
خورخي ، رقم (5) ، جناح أيسر ..
كييتا ، رقم (9) ، مدافع ...
لوكاس ، رقم (22) ، مدافع ...
----
الوسط:
انسيزو ، رقم (11) ، قائد الفريق و ظهير أيمن ...
بارك سون ، رقم (32) ، ظهير أيسر ...
سيرخيو ، رقم (5) ، لاعب وسط ...
-----
الهجوم:
جابرييل ، رقم (3) ..
محمد ، رقم (2) ...
فيرنر ، رقم (10) ...
-----
الاحتياط:
سلطان ، رقم (7) ، مهاجم
فيليكس ، رقم (43) ، مدافع ..
تيباس ، رقم (88) ، مدافع ...
تشكيلة فريق FCM :
المدرب: كريستوفر بيريالي
-----
الحارس : كين ، رقم (1) ..
----
الدفاع:
ابو بكار ، رقم (5) ، جناح أيمن ..
جبريل ، رقم (6) ، جناح أيسر ...
سالا ، رقم (17) ، مدافع ...
ريكاردو ، رقم (18) ، مدافع ...
------
الوسط:
رِيو ، رقم (24) ، ظهير أيمن ...
كاسو ، رقم (9) ، ظهير أيسر ...
رافاييل ، رقم (7) ، لاعب وسط ...
پالي ، رقم (11) ، لاعب وسط ...
----
الهجوم:
دييغو ، رقم (4) ... مهاجم
والتر ، رقم (10) ... مهاجم وقائد الفريق
----
الاحتياط:
سيمون ، رقم (22) ، وسط ميدان
روديغر ، رقم (25) ، مدافع ...
باركو ،رقم (36) ، مهاجم
وهاكا خرجات التشكيلة لي مشجعين امادورا كلهم كعاااااو لي مكاينش سلطااان وكلهم طلع ليهم الخززز فالقهواي وفالبيوت ااما عائلة الاسماعلي كان فخبارها وسلطان قالها لباباه ....
الماتش فدقائقو الاخيرة ويبدا ....اللاعبين الاحتياط فبون دو توش واقفييين كيشوفو .... وسلطان لابس فوق الجيلي جاكيت دسيرفيت ديالو وشاد السنسلة بسنانو كيشوف ومتوتررر خصوصا انه لاعب حتى لشوط التاني كيحاول مع راسو يتحكم فاعصابو فهاد الشوط .... والمدرب واقف تاهو كيشوف داير يديه فجيااابو ونافخ صدرو .... نفس وقفة المدرب الخصم تاهو فالبون توش لي غير حداهم واقف كيشوف ..... ولاعب لي خدمتو هي يعطب سلطان واقف حداه وعينيه كل مرة تمشي لعندو ورجع يركز مع التيييران ....
عطاوهم اشارة وبداو كيدخلووو .. المدرجااات تاني تهزو بالتيفواااات والااوان الحمراء والسوداء و البيضاء والزرقاااااء معمرة داك الفيراج ... هز الحكم الكرة لي محطوطة فوق رافعة حداهم ودخلو وهوما تابعين الصفوف ونظرات الشراسة على ملامحهم حتى وقفو وسط الميدان وتصافو ....
التعليق بدا وكل قناة اشمن تعليق عندها ... القهاوي تهزوووو بتعليييق العررربي لي كيحمسسسهم لبدايية المباراااة ...
المعلق : شكرا للزملاء في الاستوديو التحليلي .. سيداتي انساتي سادتي اينما كنتممم مرحبا بكم في قمة النهائي .. ليلة من الليالي الكروية التي ستكتب التاريخ للنادي البرازيلي أو لخصمه نادي كلوب اتليتيك امادورا .. هنااا في لشبونة سموه كما شئتم نهائي أو حرب .. لقاء الكبار .. لقااء العمااالقة .... قمة نارية حاااارقة .... قابلة للأشتعال .. لشبونة تستعد للهيييييب .. قد يشتعل في أي وقت الآن .. ناااار نااااار في الانتظار ...
الكل متوتر بحماس كايحركو رجليهم .... الكل مترقب والمعليقين حدا ميكروفوناتهم كل واحد كايعلق بشنو كايشوف قدتمو وبطريقتو
المعلق : هنا ملعب العاصمة في حالة هيجان .... فوهة بركان .... اللاعبين يستعدون للقمة هنا الفريق الأزرق بتعليمات المدرب الايطالي كارلوس صاحب 54 سنة .. لاعب الامس و مدرب اليوم .. و بتشجيعات قائد الفريق انسيزو و في الجهة الاخرى فريق ماناوس بتعليمات السيليساو البرازيلي كريستوفر ... مذا ستفعل يا انسيزو .. مذا ستفعل دون توأمك الكروي ... دون الرقم سبعة دون سطاان ... سلطان الذي يشاهد من الاحتياط ... تشكيلة المدرب الانجليزي كانت هكذا .. نحن لن نستطيع معرفة ما يحيكه لنا كارلوس ... ربما وضعه في نقطة الاحتياط لها كواليسها .. لا ندري ....لا نعلم ... نحن فقط نتابع .. نتابع تكتياتك يا كااارلوس .....
الفرق شافو فبعضاتهم بنظرات كتعني الروح الرياضية ..... وكل فريق مشا لبلاصة فين يقاد خطة لعبو .. شكلو مجموعات ودايريين يديهم فوق كتاف بعضياتهم حتى شكلو دائرة وحناو رااااسهم كيراجعو اخر تكتيكات المدرب ...
قائدان الفريق " آنسيزو " و " والتر " مشاو لاختيار العملة باش يعرفو الكورة عندمن تبدا ... تسالمو بجوج و هوما هازين رايات صغيرة فيديهم كترمز لنواديهم .... الحكم عطا وجه العملة ل " انسيزو " و راس العملة ل " والتر " ...
العملة جات على راسها والكرة تعطات للخصم ... حياو بعضياتهم ومشاو شدو بلاصتهم .....
الثواني متسابقة باش توصل السادسة و تصفر الصااافرة ... القلووووب حتى هي كتضرررب وتتسنى هاد الصفارة ... الجمهور كيهتف والبعض منه سااككككت كايشوف ... هتافهم هو لي كيزيد يعطي الطااااقة للاعبين كل واحد وفين كيدعي ... كتختلف الادياااان لكن الدعاااء واحد .... سلطان جامع يدو حاطها على فمو وكيدعي تاهو .... الثواني كايمرو 17:58 ... 17:59 .. 18:00 تصفراات صاافرة الحكم عااالنة على بدااااية الماتش وبداية الصرااااع على المستديييرة .... و ابواق المقاااهي كتهنزز بالتعليييق على المااتش لي مركزين معاه كتر من الصووورة ...
المعلق : البداية مع ماناوس .. و أول تمريرة من والتر الكابيتان ل دييغو .. الفوز يحبووه .. ها هو ماناوس احذروه ....... هيمنة و كرة برازيلية .. الله يا ماناوس ... يتدددخل يراااوغ القاااائد الكابيتييين آنسيزو ويفووز بالكرة ... مهارات عاالية ....آنسيزو الغدار .... يا ليتيك هنا يا سلطان ... الكرة لا تزال برتغالية .... انسيزو يبحث عن محمد .. محمد الشرس .. التونسي ... وووووو تدخل تددخل سريييييع مرواغة ولا فالاحلااااام ..سالا .. سالا يااا سالا .. يحصل سالا على الكرة وتعود الكرة برااازلية ... هيمنة برازلية وااااضحة مع بداية المباراة ... دقيقة الثالثة والكرة لا تزال برازيلية والهيمنة براازيلية .....هل ستنقلب الامور ... هدا ما سنلاحظه مع دقائق المباراة ... نثق بك يا كارلوس .... نثق بقرارتك .. تمنينا رؤية سلطان لآن لكن لقراراتك رأي اخر ....
يتبع...
التعليقات
لا توجد تعليقات بعد، كن أول من يعلق.