محتوى القصة
اسد تبسم ليه تاتوسعات ضحكتو وجرو عندو ضرب ليه على كتتتفووو بحركة كلها فخخرر بولدو لي اخيرا استقر و غيخدم رسميا وميبقاش غير طايش فافكار عشوائية .. اخيرا توضحات ليه طريقو ...
وخرجو بجوج بيهم من تما وجود كيشد الكاراجات
جود : بغيت نجيب لامار ولكن قلت مع راسي تانسالي الاصلاحات وتشوفو كامل
اسد : بالعكس .. خليها تاهي تشوف مشروعك من اللول ديالو ... غااتفررح معاك تاهي
جود : ان شاء الله ... غانمشي عند لوؤي كلفو عمي عدنان بالمتحف وراه واحل .. غانمشي نشوف اش ندير معاه
اسد : داكووغ بون كوغاج ...
خلاه ومشا لطموبيل وجود متبع ليه العين تامشا و ركب فطموبيلتو .. هاز كانيط دريدبول شربها ودوز لسانو على سنانووو الحادين فرحان بمشروعو الجديد ... وفرحان بنظرات الفخر لي كانو فعينين اسد .... ورجع شد الطريق .....
اسد تاهو كمل طريقو حتى كان غادي لشركة هو يلقى راسو محتااج شوية لراااحة وقلب طريق يمشي للمنطقة يريح راسو عاد يرجع يكمل ....
الخدمة كلها تجمعات لانه جايهم البوز لي كليرتاحو فيه فالعام ، كايرتاحو فالبوز ديال العيد لي مابقا ليه غير حداش ليوم .. خاصهم يساليو خدمتهم كاملة باش يرتاحو .... والخدمة لي غاتبقى برا غايقضيها عدنان لي غايسافر ليها غدا ...
وصل للمنطقة يالاه غايدور الفولوون يدخل للمدخل ديالهم هي تبان ليه طموبيل قسم على برا ... علا نضاضرو مصغر عينيه باناتليه تاهي متكية على الطموبيل و الكارد تاهو تما .... وباركا فجنب الطريق و شار للكارد يمشيو ... وهو زاد لعندها ، سمعات الخطوات وضورات راسها بانليها اسد وهي تجمع وقفتها وشمرات بنيفها كتحاول تمسح دموعها وعينيها حمرييييين وهو مصغر فيها عينو خلعاتو
اسد : قسسسم !!!!! ....
قسم : ب ب بابا !!!
اسد : كتبكي !!!!! ( بخلعة ) اش واااقع !!!!!!.
قسم بدات كتمسح دموعها كتحاول تبتسم
قسم : اا .. و والو .. وااالو غييير ... غيير ( كتحاول تجيب جملة مفيدة من الداخل ديالها كتلقى غير الشتات )
اسد بانتليه غاتنهار ، هو يجبدها لعندو عنقها وهي طلق داك البكية بجهد ، عاارف مزيان ولادو وحافضهم .... حافض لحظة غضبهم ولحظات سعادتهم وحتى لحظات انهياراتهم .. عارف كيف يدير يهدنهم وعارف كاع الشيفرات ديالهم .... مدة وهو معنقها ترتاح فحضنو لي ديما كتلتجئ ليه فضعفها وقوتها .....
كتافو لي قادين يهزوهم كاملين بيهم بريوسهم العيانة بمشاكلهم بمستقبلهم .. حياتو كلها وكل نبضة كينبض قلبو غير على ولادو وعائلتو ..... غير من بكاها عرف الموضوع اشنو غيكون ... خلاها تاتهدنات فكتافو لي رضاتهم كلهم فازكين بالدموع والخناين .. وبعدات راسها هو يعطيها كلينيكس بدات كتمسح وتشهق وتحاول تحبس بكيتها ...
اسد : صاڤا !!!!!!
قسم : ( مسحات دموعها وضارت شافت فيه مزيرة فمها باش متنهارش تاني وهي تجاوبو وسط دموع وصوت محروق ) لا .... لا اباابااااا ... لااااا
اسد : واخا ... تقدري تهدني شوية .... وتعاودي ليا اش واقع .... تقدري تولي صافا لا هضرتي
قسم : ( شافت قدامها كتسمح دموعها وصدرها كولو كيتهز ) والله ابابا والله .. تييييقني والله كندير جهدي كااااامل غير نرجع قسم لي كانت قبل ماتمشي لداك الحومة ... واش الامر صعيب لهاد الدرجة !!!! انا ابابا .... انا ابابا بحال هاداك لي شاف الكوكايين اول مرة وقال يدوق واستهن به قال نقدر نقطعو ... نقطعو فاي لحظة .. انا غير غنجججرب .. جرب شوووية ... عجبو ... ورجع تاني قال ندوووق .. وجرب شووية وعجبو كثر من لول .. لاحو عليه ... . ولقا راسو محتاجو ورجع ليه غدا و وبعدو وبعدو وبعدووو .. حتى ولا كايحس براااااسو غيموت الى مداقوش ... مكانش حاس براسو الى راه ولا ادماااان .... هااكاك واقع ليا ..... مقادراش ننسى مقداراش نرجع نعيش عادي مقاداش نخرجو من ذاكرتي ... مقادراش ندخل لدماغي الفرق لي بيني وبينو .. مقادرة ندير والو .. انا محتاجة غير نوقف ونبقى نشوف منتحركش .. الخطوة كنزيدها القدام كنحسها كترجع بيا لور .. كنرجعها لور غير مكنزيييد نندم .......اش غااندير ابابا اش غااااانديييير
اسد تنهد مطول وتكا حداها فطوموبيل مربع يديه وهي كتمسح دموعها بكلينيكس ومكلمة كلامها كتهضر بجهد وبزربة كتخوي كاع اش عندها لداخل وهو كيف عادتو كله آذان صاغية ..
قسم : مشيييت .. مشيت درت كاع اش قلتي ليا ... مشيت لبلاصة خدمتو وسط من عالمو .. قلت ليه الحقيقة وقلت كاع اش عندي ..... عرفتي ابابا ... بحال واحد السيد لي كان كيتسنى منك الحقيقة وخايف يسمعها تخيل ! قاليا كلام معقول ابابا وانا كأي بنت طبيعية خاصني نكون اقتنعت ونرجع لدارنا ولخدمتي ولحياتي ونسى هادشي كامل ومنزيدش نغرق مزال ... قال ليا مندخلش لعائلة تتهان فيها رجولتي حيت هو قل منا .. قاليا مايقدرش يشري ليا صاك لي لابسة والطموبيلات ديالي والكارد لي مورايا .. قال لي هو صياد بسيط ولد الحومة وانا بنت الروكان .. قاليا نمشي نقلب على شي واحد فمستوايا .. حيت هو كاع ميصلاح ليا ....بابا تخيل كيقوليا هاد الكلام وانا كنحس بيه مخرجو بزز .. عينيه كااانو حمريييين .. انا راه مكاينش لي مبكيني دابا قد نبرة دالصوت لي هضر معايا بيها .... حسيييت بيييه ابابا ... انا حسييت بيه .... انا اش رابطني بهاد السيد تانحس باحساسو ... انا حسييت بييه لداخل هنا (اشارت لقلبها كتبكي بجهد ) قلبي حرررقني وهو كايهضر بهاديك الطريقة ...فهمتو انه ماعندوش الجهد ليا .... فهمتو انه واخا انا ماعنديش مشكل فالطبقات هو لي عندو ... قالي واش انا غانقبل نسكن معاه فحومة هو وختو .. ملي قتليه هو لي يجي يسكن معايا ضحك ! عرفتي على ضحكة دار ابابا ؟ ماكيفرق بيينها ويين البكا غير الدموع !!!!! .... علاش ابابا هاكا علاش .. علاش لي حسييت براسي بغيييتو يوقع ليا معاه هاكا .. علاااااش دنيا صعابت معايا كاع قد هاكا ومانبغيش شي واحد ساهل ؟ علااااش .... ( هبطات راسها تاني كتبكي واسد غير كيشوف قدامو ) ايه تانا كنشوف راسي كبرت ، ماما ضاغطة عليا وجدة مصغوطة من كل النواحي ، تانا باغا نولد ولادي صغيرة .... تانا مكرررهتش ابابا ... مكرهتش نفرح ماظا ونحيظ ليها همي ونتهنى من اسئلة الصحافة كل مرة على علاقاتي لعاطفية .... ولكن لي كرا ليا هو من بين هاد اولاد الناس كاملين انا قلبي غيميل لولد الحووومة ... من قبيلة ونا كنحاول غير نفكر .. غير نفكر فشي طريقة لي تجمعنا فالحياة بلااا مايحس براسو انه قل مني .... واش نتخلى على كولشي ونمشي عندو !!! ميمكنش ... واش نجيبو لعندي .. ميمكنش ....
اسد : قسسم ..... ( قسم شافت فيه ) فين غايجي هندك ؟ ....
قسم : للعالم ديالي ابابا !
اسد : ديالك ؟ ..... منين ديالك ! درتيه ؟ ( شار ليها للمنطقة لتحت ) داك المنطقة بنيتها نتي !
قسم : ( كترمش فيه ) م مفهمتش !
اسد : هذا عالم باباك وعماماك ماشي عالمك ...وهو العالم لي فيه .. ديالو ؟
قسك : م م معرفتش
اسد : الخدمة لي خدام فيها .... دارها هو !
قسم : ب باباه .. باباه خلا ليه البلاصة
اسد : ونتي ... شكون دار ليك شابو د الكابيتين فوق راسك
قسم : نتاا ...
اسد : لا نتي .. لا هو ... عندكم عالم ... لي تجيبو ليه بعضياتكم ، الحومة لي ساكن فيها والدار لي ساكن فيها وخدمتو مادارهمش هو ، ونتي كذلك ... نت وهو لاخدمتو شوية عقلكم غاتكخييو عالم جديد خاص بيكم بجوج ، لاهو غايكون فيه قل منك لا نتي قل منو ميت بجوجكم مدايرين والو ! كمجهود ذاتي ..... غاتصنعو عالم ليكم لي غاينصفكم ولي مغايحس فيه تاواحد هو قل من لاخور ... اما باش تحطيه هو فمقارنة مع واحد ربعين عام هو خدام ... مجاتش !
قسم : مم .. ماعرفتش ابابا مافهمتش كيفاش !!!!!!!
اسد :العلاقة ملي كتفكرو فيها للزواج وللدوام .. كتوليو ديال بعضياتكم ماشي ديال واليديكم .... هاد الولد الى كان باغيك غايضحي على قبلك .. والى كنتي باغاه غضحي على قبلو ... نتي بنت البحر وهو ولد البحر .... لقاو لي يجمعكم ....
قسم : بحالااش
اسد : ربيتك وكبرتك وسط عائلة تجارية مايمكنش تكوني ماهزيتيش دماغنا تاهو .. متعرفيش ديري لراسك مشاريع ؟ ....
قسم : تبغيني نكون ماشي كاابيطاااان ابابا !!!!!!! ماشي هادا هو حححلمك ؟؟؟؟؟؟؟ تبغيني نتخلى على حلمك ونتبع اىحياة لي بغيتها ؟؟؟؟
اسد : احلامي انا حققتهم و ساليييتهم و وصلت لاش بغيت .... كل واحد فيكم كخييت ليه مستقبلو .. قريتو و كبرتو و تأهلتو لسوق الشغل .. ختاريت ليكم خدامي نهار كنتو تالفين ... الى لقيتي راسك مباغاش تكوني كابيطان وغادي تعطي بنفس الجهد ونفس القوة فخدمة اخرى انا معااااك .. غير مترضايش ليا بالقليل .. بغيتك فين ماتكوني تكوووني بنت الاسماااعيلي .. باباك مكيرضاش بالقليل ولا يقوول لا كلها ورزقو وانا قانع .. لا باباك كيقنع نهار كيوصل للقمة وباغي ولادو بحالو ... الى كنتي غاديري مشروع و تنجحي فيه كتر من قبطانة ... ماعنديش مشكل
قسم : م .... م ماعندي تاشي فكرة ابابا صدمتيني دابا .. انا من صغري وانا عارفة راسي كابيتين ماشي شي حاجة اخرى ..
اسد : خوك ليوما دار الخطوة لولا فمشروع احلامو اقسم
قسم : ( شافت فيه ) جووود !!!!
اسد : ممم جود ... الحماس لي شفتو فعينيه وهو كيخطط معايا قبيلة .. كاع ماشفتو فعينيك نهار لبستي لبسة الكابيطان اقسم .. واش حسابتك باباك غافل ! باباك راه حافض نظراتكم ابنتي .. باباك كيميزكم من غواتكم ونتوما صغار اش بااااغيين بلا متهضرو.... ومنعرفكمش دابا لي كبرتو !!! .....
قسم : م ماكذبتيش انا بصح يمكن مافرحتش بزاف نهار وليت كابيطان ولكن فرحتي كانت هي حققت حلمك
اسد : راه قتليك انا احلامي حققتها .. شوفو نتوما احلامكم
قسم : بابا ياك غير لبارح نتا لي كتقول لينا نتبعو هضرتك ونتا لي عارف مستقبلنا
ايد : ومزال عند كلامي وكون يرجع بيا زمان لور كنت غانرد منك كابيطااان .... انا ابنتي كنعطيكم غير الخبرة والتأهيل .. هانا كابتن ولكن كنرتاح فالاعمال والادارة كتر من البحر وعطيت فيهم كتر من قبطان .... ولكن لبسة دالقبطان هي لي عاطياني القوة لي غادي بيها دابا ، البحر هو الانطلاقة .. انا أهلتك وبغيتك تاخدي تجربة لي تزيدك درجة تحت من دروجك لي واقفة فوقهم كطلي على مستقبلك ملفوق ... الى كنتي غتهضري ليا على جود ... جود ماوقفتش معاه فأحلامو حيت كاين مريض ، اما انا كنت غنكون من اول المساندين ليه ..... الرالي عمرني غنقبلو ليه شي نهار مادمت حي ..... الحاجة لي متكونش كتآديكم ولي غتحسو براسكم فيها مرتاحين .. انا اللول فيها معاكم ...... امتى رفضت افكاركم !
قسم : و ... و و دابا مافهمتش .... واش كتقول نقلب لراسي على مستقبل اخر
اسد : نتي عندك مستقبلك ديجا ... ولكن ماعندكش طريق ..... غتمشي تقلبي على طريق ..... طريق لي كتحسي براسك مرتاحة فيها .. الا كنتي كاتشوفي هاد السيد لي كدوي عليه معاك فداك طريق وواقف معاك فيها وغايعاونك توصلي وتوصلو بجوج .... توكلي على الله .... كنتي كاتشوفيه لا .. ومكاينش فمستقبلك بعدي ، متختاريش ليا الزواج بسبة راك كتكبري فااسن ! لاكنتي غاتزوجي على العمر غير بقاي حدايا .... اما باش تقولي ليا عالمو وعالمك .. نتوما مزال ماعندكم حتى شي عااااالم انتوما مزال مدايرين والو .... نتي عندك الفلوس ومادرتي بيها والو .. وهو معندوش و مداير والو .. باش تعرفي الى المشروع متيحتاجش الفلوس .... محتاج لضمييير ومحتاج لطريق ... ومحتاج للهدف ... غنفيقو ضميرنا . . غنقلبو على طريق وغنقلبوا فيها على الهدف ..و نلوحو الخطوة .....
قسم : الخطوة كيخصها ضروري راس مال صحيح ابابا ! كيغايدير ليها هو ؟؟؟؟
اسد : هاداك شغلكم ....
قسم : واخا ... دابا انا اش ندير .. انا حايرة وتالفة ماعرفت كاع اش ندير ابابا
اسد : واهم حاجة الا عاودت مزااااال شفت داك دموع كاعما تححححلمي مزال تشوفيه ... ولا تحححلمي نقبل ليك بيه شي نهار ( قسم وسعات عينيها ) تاني حاجة .... نتي شفتي العالم لي كبر فيه .. هو مزال مشافش فين كبرتي ... غايجي لعنندك ... غيشوف خدمتك .... وغايكلس معايا قبل كوووولشي وقبل من اي خطوة ... حتى نكلس معاااه عاد نعطيك الفو ڤيغ واش تلوحي الخطوة ديالك ولا لا
قسم : ابابا !! ل لا لا ماشي بهاد السرعة
اسد : لحد الان راني مساير معاك اقسم بالخاطر وصاااااابر حييت تايق فيييك ... ومرتاح نوعا ما له الولد وغاند ( قاطعاتو )
قسم : ب .. بابا ... ( ضحكات وسط دموعها ) واش نتا بصح مرتااااح لييييه
اسد : ( جمع ليها التخنزيرة ) شكون قال هاد مرتااح ليه !!!!!
قسم : ن نتا ابابااا
اسد : اش غنرتاح لييييه انا ! ... انا غادي معاك فهادشي تانشوفو فين غيخرج .. علاش قاطعتيني علاش ؟؟؟؟
قسم : صافي هانا ساكتة ابابا .. خليتيها ف يجي يشوووفك .. يجي ييييجي شوفك علاش ميشووفكش .... يجي
اسد : الى لقيتيه قاد يضحي ويدير ليك عااااالم ديالك ويتقااتل باش توصلوو لقمة حتى نتوما ومايرضاش بباركو صغير خدام فييه مع الناس ويطور من راسو ... انا موافق عليه ... كان غايبقى واقف فبلاصتو ...... ماموافقش وعمرني نوافق .....
قسم : بابا ماشي غانزيروه !!!!!
اسد : تانا تزيرت واحد نهار باش وصلت لهادشي .... خاص غير لي يدفعو راه غايوصل .. حيت هذاك الولد كون كان ولدي .. مكنتش غنخليييه فباركو صياد عند الناس ! .... والى دخل لعائلتي راه غيولي واحد من ولادي .... كيف كنزيركم غايتزير تاهو .... اما داك الهضرة ديال هو فين ونتي فين مواكلاش معايا انا .. يا زيرو راااااسكم وقدوو بهادشي لي دخلتو فيه راسكم .... يارجعو لوووور وهنييييني من صدااااعكم ....
قسم : لا لا .. فيين غنرجعوا فيين ( ضحكات ) نتا عندك الحححق ( طارت عنقاتو ) عندك الحححق اباابا مافكرتش بحاااال هاكااا .. كنت كنفكر كيندير ندخلو لعالمي نسيت الى قادة نرسمو انا وياه عالم آخر .... ( شاف فيه ) الله يخلييييييك ليا ياربي
اسد : مانبغي حتى حاجة تكون قبل ماانشوووفو ممنوووووع .....
قسم : ص صافي متخافش ... ا. انا انقنعو ولكن ماشي دابا ... منقدرش مزال نهضر معاه دابا خليه يراجع تاهو راسو وشوية ...
اسد : علاش كنتي ناوية تمشي تهضري معاه !
قسم : هاء !! .. و واش غاندير اباابااا !!!!! هههه كيغاندير نقوليه يهضر معاك ويتلاقاك
اسد : وااااش عندك شي عقل ولا منعندكش .. الو اجي تهضر مع ابابا ! نعطيك ابنتي جوج قوالب دسكر سيري خطبيييه بلاش عليييك نتي كاع !
قسم : بابااا يهدييييك الله ياك نتا لي قلتي عاد دابااا نلوح الخطوة وكاع هادشي
اسد : هاااادشي في حالة لا جا هو ... وبان ليك سيد مشبت بيك ...اما لاطالق هو يديك علاش نتي اتشديهم صافابااا !!!!!
قسز : ا ا !!! ي يعني نخليه الى اتصل هو !!!
اسد : ابنتي .... تعلمي تصرفي شوية راسك وتكبري عقلك واش ديما غتحطيني انا فهاد المواقف !!! واش انا نشرح ليك اش ديري ماحشمتيييش !!! راااني باااااك ماشي صاحبك اهاد البنت
قسم : هههههه (عنقاتو مخشية فصدرو ) ماعنديش صاااحب عندي غيييير نتا فيك بابا وصااااحبي وكووووولشي .... منقدرش نتصرف من عقلي بلا بيك ... ومنقدرش ندير حاجة بلا متكون فخبااااارك .... غير تهنى ابابا .. بنتك مكدير تاحاجة غالطة .. بنتك غييير بغات اول مرة من قلللبها ... وبغات بطريقة معقولة وجدية مابغيتش تفلية ولا نضيع الوقت .. انا قلبت معامن ندير معاه اسرة اباباااا ماشي معامن نضيع وقتي ومبادئي لي تربيت عليهم .... يعني تهنى من جيهتي ......
اسد : ( شاف لساعتو ) فففف ! واش لي والد غيرتاح ... كنت جاي نرتاح ودابا ساعة دالمكانة هاهيا مشات ليا غير معاك ، غانرجع لخدمة ......
قسم :غير سمح ليا ابابا شديييتك
اسد : شوفي فيا نتي .. منعاااااودش مزال نشوف شي دمووع بسبب هادشي .. الا بكاك مرة اخرى كنقسم بالله متعاااااودي تشوفيه ... هادشي غايتسد عليا هنا .... هضرتي لي من قبيلة ونا نخبرها عليك ماشي تشجيع على هاد العلاقة ليىموالةماعطيت فيها موافقتي .. هي غير باش تعرفي اش واقع ولامور كيف خاصها تكون ومتمشيش غالطة .... هاد السيد مزال ماموافقش عليه قبل مايكلس معايا .......غاتحبسي عليا دابا هادشي ومنعاودش نسمع شي تخربيق حيت هاد الموضوع بالذات بدا يعصبني
قسم : ل لا ، لا ص صااافي ابابااا والله منعااااودش صافي
اسد : نزلي لدار حيدي منهنا ..... ( ماشي بطموبيل) دراما دوالو
قسم : بابا واش عندك خدمة كثيرة ... تبغيني نمشي معاك نعاووونك !!!! ديجا ماعندي مايدار هاد العشية .... خليني نمشي نعاونك نتلهى شوية
اشار ليها براسو بمعنى يلاه وتبسمات وعينيها باقيين فازيكن بالدموع وهو سابقها لطوموبيل وركبات معاه وزادو
عند لوؤي وجود
كانوا فالمتحف لداخل والمسؤول معاهم كايشوف اش كايشرحو ليه زهو كيقيد كولشي ويزيدهم افكارو ... وفهموهم كاع اش غيتبنى وفين يكونو لي كاج ديال التحف ... ومشا المسؤول بقاو غير جود و لوؤي
لوؤي : صافي هنا سالينا ... غايبقى ليا تصميم دلوغو تاندوز نشوف اش دارو فيه .....
جود : وراك غادي مزيان .. فوقاش الافتتاح
لوؤي : مور لعيد ، مزال متحدد النهار
جود : داكوغ ... غاتكون ساليتي ان شاء الله ....
لوؤي بدا تيليفونو كيصوني شاف للنمرة وبدا يتحنحن و جود كان كيشوف مع الارجاء ...
لوؤي : مهم راه سالينا هنا ... يلاه نشربو شي قهيوة
جود : لا .. درت مع واحد السيد يجي لعندي لكاراج ياخد العبارات
لوؤي : وايلي بديييتي !!
جود : كانلعبو هنا ....
لوؤي : سير قضي شغالك تاليل ونتشاوفو كيما ديما .... ( ضرب ليه على كتفو بمعنى شكرا على مجئيك ) العززز
جود اشار ليه براسو ولبس نضاضرو وخرج ديمارا ومشا ولوؤي هز تيليفونو رجع دوز لابيل ..
لوؤي : أجون لوؤي ... ياس .... نو مادار حتى شي نشاط اخر راه قدام عيني ....كيفاش هاد نسربي ! يسربي هو يدير شي حاجة انا علاش ! نوض نشدو غير هاكاك بتهمة تدريب فملعب تنس ولا كيفاش ! ... هانا غادي معاه ، تالقى كيفاش نحط ليه لبروكرام فتيليفونو تاهو نسمعو اتصلاتو .... صافي كون هااااني راني عارف اش كندير .....منهارر شديت هاد الملف ونا قاد به ....
قطع عليه اما جود يلاه ركب فطوبيل غايديماري هو يسمع ميساجات فتيليفون كيوصلوه متابعين علا حاحبو شكون كيصيفط ليه هاكا .. بان ليه فالواتساب غير دخل لقاها نمرة دماجدة فيها غير عتقني عتقني كاتباها سبعين الف مرة .... هو يدوز لابيل دغيا
ماجدة : ( بالبكا ) جوووود .. جوود عتتتقني عتتتتقني عااافاااك......
جود : اش كاااين يااااك لاااباس ؟؟؟؟؟
ماجدة : بابا وماما مكاينينش وانا سادة عليا فبيتي شي واحد داخل لداااار اجووود عتتتقني
جود : راني بعيد اماجدة عيطي لواليديك لي قراااب ولا لپولييس .. صوني على العساس ديالكم
ماجدة : كنصوووني مكيجاوبش ، ماباغاش نخلع واليديا اجججي عافاااك راني مخلووووعة .. عنداك تصوني عليهم
طلقات غوتة وطفات لابيل وهو رد تيليفون لعندو كايشوف فيه ...
جود : اش تاتخرااا عليا هادي دابا !!!!
بقا غير كيشوف قدامو ... هادشي مدخلش ليه لراسو كيفاش دار عندها العساس واخا تعيط ليه غير من البالكون .... كيفاش متخلعش واليديها و تصوني عليه هو لي بعيييد عليهم بساعة دطريق ....
بقى غير كيضور رراسو مدخلش ليه هبالها لراسو قال هادي غاتكون غاكتبوحط عليا ديمارا راجع مارشريار وهي ضرب ليه فراسو عنداك يكون بصح !!! تقول ليهم صونيت لجود وماجاش يصدق تاني معايب مع واليديها
جود : ففففففف فرييييييع الكررر ....
رجع قلب الفولون ومشا فطريق دارهم ... وهو عايق انها غتكون غير كتمثل ، بصح داير فرضية فعقلو يحيد الشك ....
اما هي غير قطعات لابيل بدات ضحك ، عارفة واليديها ليوم مغايرجعوش بكري .. ضارت لمرايا وقادات شعرها مزيان عاضة على شفتها ، لابسة غوب سيكسي و طالون عالي ، بقات شحال كتمشي وتجي تاتشوف لساعة تاحسات بيه قرب يوصل ... ونزلات لتحت لصالون بانو ليها الخادمات ديالهم كانو كايخملو
ماجدة : ابييه !!!! ليوم ماما و بابا مجايينيش غير سيرو لابغيتو .... حتى لغذا ، حتى انا غانخرج
- واخااا الالة ... الى محتاجة شي حاجة نصاوبوها ليك عاد نمشيو !
ماجدة : لا مبغيتش غير سيرو
جاتهم من الجنة والناس وهي خرجات لبرا بان ليها العساس
ماجدة : حميييييييد ... ( شافها وناض من على الكرسي جا ) حميييييد عندي واحد صاحبتي فأنفا .. خليت عندها شي كتب كنحتاجهم .... سير عندها تعطيهوم ليك
العساس : اء ؟ ولاكن ااالالة ماجدة منقدرش نخلي لباب بوحدها
ماجدة : انا هنا احميييد انا هنا . مغنخرجش من الدار تاترجع غير سير ، الغرض ديال كتوباتي هو اللول ... يلاااااه احمييييد ....
حميد : واخا الالة ماجدة .....
ماجدة : عطيني تيليفونك نقيد ليك لادغيس ...
عطاها قيدات ليه العنوان ، وخرج وهي تهز تيليفونها وكضحك بشر تاجاوباتها
ماجدة : هبة صافا احبيبة ، سووبييييغ ماتصوريش مورالي شحال زوين ... ففففف غير سكتي اصاحبتي هههه ماعلينا جاي عندك العساس ديالنا صدرتو حيت حبيب القلب جاي لعندي باغا نبقاو شوية انا وياه راس فراس مكيبغيش الزايد ياختي خصو غير أنا ... قتليه يجي عندك تعطيه شي كتوبا .. فاش يجي لهيه شوية بينما دخل هو لدار ... ونكتب ليك ميساج طلقيه داك ساعة يرجع الى بغا غايكون حبيبي دخل ... بيييييزوااااات ازين ديالي ... يخليك ليلي ...
قطعات عليها وهي كضحك عاضة على شفتها ودخلات لدار باتجاه بيت النعاس ديال الضياف لعندهم لتحت وبقات جالسة على السرير كتلعب برجليها .ً. وكل مرة تطل من السرجم تشوفو واش جا ....تاسمعات الباب اوطوماتيك كتحل وهي تقفز من بلااصتها طلات دغيا بانت ليها طموبيلتو داخلة طارت من بلاصتها ...
جود باركا طوموبيل كيشوف من المرايا كيقلب على العساس مابانش ليه ... نزل كايشوف مع الجردة واش مكاين حد وعلا عينيه لفوق كايشوف مع سراجم الفيلا .....
بدا كيسوط بتأفف و رجع نزل ... مشا دخل لدار كايشوف مع جنابو مكاين حد ! ....
جود : ماااجدة !!!!
ماجدة خدات نفس عمييق وخرجات عندو كتحلون فالمشية ضاااحكة وطالونا كايتسمع
ماجدة : انا هنااا احبيبي ... ( وصلات لعندو وه ومتبع ليها العين وعنقاتو كاتشوف فيه )شوف اش وليت ندير باش نشوفك ! شتي فين وصلتينا ( باستو فعنقو ) تووووحششتك ....
جود بقى غير كايرمش فيها بعينيه بنظرة باااردة حيت عارف راسو متايتضحكش عليه .... وهي معلقة فيه تاسمعات طوموبيل وهي تبعد عليه دغيا موسعة عينيها ..... ومشات كتحري لزاج بانتليها طوموبيل باباها وصلات ونزل باباها وماماها كيجريو .. وهو ضور معاها راسو وعلا حاجبو بمعنى واشنو دابا ! ..
ماجدة : ( تبدل فيها اللون ) حمااااقتيييي علاش عييييطتي علييييهم ...
جود قرب لعندها بششسوية تاجات عينو فعينها وهز يدو شد على فكها تاقرب يهرسو ليييها
جود : اتعااااودي مرة اخرى تفرعي ليااا ررراااسي نفررررع ليك كرك ....
لتخها من يدو ورجع لور كيحك تحت لحيتو وتادخل عمران كيجري وسارة كتشوف فيها
عمران : فييين حمييييد !!!!! ماجدة اش واقع دخل عليك ابنتي شي واحد فين مشا حميد
سارة : ابنتي خلعتييينا واش متأكدة و لا غير تخيلتي ؟ وحميد فين مشا ! فين البنات مال الدار خاوية
ماجدة : (جاتها البكية ) ل لا ... ا انا ....
عمران : ( كيصوني فتيلفون تاجاوبو ) حميييد فيين مشيييتي ... شمن كتووبااا مخلي دار بوحدها ؟؟؟؟؟ ( ماجدة كتسرط فريقها ) دابااا تكون هنااا ... ( قطع شاف فيها بغضب ) نتي سيفطتي العساس وااش بعقققلك ؟؟؟؟؟ ( جود دار فيها داك نظرة ديال ياااك ) فيييين لبنات !!!
ماجدة : ب بابا .. اانا انا قلتولي غتعطلو متجيوش قلت مكاين لاش يبقاو وصيفطتهم يمشيو .. و حميد احتاجيت الكتوبا ... وووو فففف صافية انا راه غير تخيييلت مواقع والو مادخل حد..
سارة : وعلاش ماصونيتيش لينا حنا علاش معذبة الولد شووف منييين جا ( ضارت عندو ) مسحها فيييا اولدي مسحها فيا .....
عمران : ( مطلع فيها حاجبو ) اتصيفطي مرة اخرى العساس من بلاصتو وقت خدمتو مغيعجبك حال ...... ( شاف عند جود ) صافي اولدي راه ماواقع والو ....
جود علا حاجبو وبدا يضور فراسو ودور عينو عندها بتحذيير .. وحك تحت ذقنوو و حرك راسو بمعنى ماشي مشكل .....
ورجع خرج كيضور راسو كان متأكد من هادشي غير الشك ديالو كان خاااصو يقطعوا وركب فطوموبيلتو ومشا وماجدة طلعات كتجري لبيتها ......
شد الطريق لدارهم يبدل عليه يخرج يسهر ينسى التبرهيش ديالها .... مع الدخلة تلاقى رجاء
رجاء : موسيو جود ... شنو تبغي فالعشا ؟
جود : علاش فين لوخرين !
رجاء : مدام لامار علماتنا انها ( يلاه كتهضر تيليفون دجود صونا وهي تسكت باش يجاوب ) ...
هز تيليفون لقاها ماماه
لامار : جود ... احبيبي فين راك
جود : يلاه داخل للدار .. فينكم نتوما
لامار : اجي عندنا لليخت اولدي غانتعشاو ونباتو هنا .... وسيم توحش البحر
جود : بصحتكم .. مافياش الامار مرة اخرى
لامار : نوو .. انا بغيت ولادي كاملين ..
جود : مرة اخرى نعوضها ليك والله مافيا ... بصحتكم غانطلع ندوش ونخرج نقاد دماغي مرون شوية ...
لامار : قال ليا باباك على مشررروعك فرررحت ليك اولدي ولكن بلااااتي عليييك ... ابلاتي .. انا هي لخرة لي تمشي ياك ....
جود : ههه غدا انديك الله اودي ... داكشي علاش دماغي مرون بزاف التخربيق عندي فراسي ... نتوما دوزو ليلة مزيانة تاغدا ونتشاوفو ...
قطع عليها وطلع فدروج غير وصل لبيتو سد لباب برجليه و حيد تيشورت لاحها على السرير ، داز حدا الكيس الرملي لي معلق فمنتصف بيتو ضربو تاتزعزع ودخل لدوش يلاه ماشي لجهة البينوار وهو يوقف مدة ..... هو علاش دخل لدوش !! شاف لصدرو العاري مصغر عينو ، واش باغي يدوش فين ماشي ؟ هو فين كان !! .. كولشي تخربق عليه تاني ، راسو كيضروا و الدوخة شداتو ... زهو يمشي لافابو كايضرب بالما على وجهو مزير على عينيه يتفكرررر شي تفصيييل وذاكرتو ولات صفحة بييييضة .....
بقا مزير على عينيه كيحاول يتذكر هو يووووقف كيشوف لفوق ممدة مصغر عينيه كااايتقاتل يتفكر شي تفصبل ووالو ... خرج لبيتو .. بيتو عارفو .. عارف راسو شكون وحتى شنو ليوم ... ولكن شنو كان باغي يدير !!!!! فين كان ماااشي .... ماعقلش !!!!
كلس على السرير شحال شاد على راسو وبعض الاصوات كتطرق فراااسو كيف ديما مكيعرفش مصدرها .... " جووووود ايييييلافيوووو سووو ماااتش " ... " جووود نتا مغاتمشيش وتخليني ياك ؟ مغاتمشييييش ... " " ماتحركش من حدايا خلي يديك فيدي .. نخاف نفيق ولقاك مشيتي " " يا انا يا موناكووو اجووود " ..... " قول ليا شحال كتبغيني "
حل عينيه للسقف وناض كيمشي ويجي والدوخة والضجيج فراسو وهاد الصوت مكيبعدش منو ... صوت مكيميزوش ديالمن ومفايتش سمعو عند شي حد .. شكون كانت كتقول ليه هاكا !!!! واش كايعرفها ؟ .. واش تكون شي وحدة من لي كان كيعرفهم فالماضي لي نساه ! ...
دماغو بغا ينفجر تابدا يتفكر انه كان مع لوؤي فالمتحف ... عاااد بان ليه كولشي وتفكر ماجدة وتفكر اتصال ماماه وتفكر الى راه خارج دابا يسهر مع الدراري ... عااااد تهدن وبقا شاد على الحيييط بيديه مصغر عينيه فهاد الصوت لي جاه لذاكرتو لمرات عديدة .. واش عندو علاقة بالماضي ديالو ! ميمكنش يكون صوت دشي بنت عااابرة وصافي !!!! ميمكنش يلصق فدماغو الا مكانش مول هاد الصوت كيعني ليه بزااف !!!!!! ..... خدا نفس عميق ملي حس بذاكرتو ترتبات ، ودخل لدوش حيد السمطة دالسروال سلتو ودخل تحت الرشااااش .. واخا راسو باقي كيحرقو وودنيه كيصوطو كايحاول يتحكم فراسو ....
خرج لبرا لاوي عليه فوطة كايرد فشعرو السارد لور ودخل لدريسينغ روم لي كانت كلها اضواء زرقاء ... ظهرو كيبان من لور سمر ذكوري مفتووووول وحروف هابطة مع العمود الفقري ديالو صغيرة بشكل عموي فيها عبارة " you can win if you want " ( غانتجح لى نتا بغيتي ) ..... لبس سروال كحل مع شوميز كحلة ..... علا ليها كمامها ورخف الصدافة الفوقانية .. كانت كتبان مطرطقة على البنية ديالو .. ركب ساعة فضية فيديه و سمطة دفيرساسكي ...قاد شعرو غير بيديه وهز سوارتو وبزطام ليكارط ديالو وخرج ....
نازل فالدروج وهي تلاقاه تاني
رجاء : موسيو واش مغاتعشاش هنا
جود : لا ...
خلاها وخرج لباركنيغ ديالو قلب على ڤولڤو رباعية الدفع وركب شد الطريق للوطيل ديال احد مناطقهم لي موالف كيسهر فيه .....
الطريق كلها وداك الصوت كايطرق فراسو ، موالف يسمعو ملي كتجيه داك الحالة ولكن اول مرة يسمعو بوضوح كأنه يلاه تقال حداه لبارح .... طريق كلها تفكير تالقى راسو حدا لوطيل ...
نزل وعطا سوارت للسيد لي جا يرحب به ودخل لداخل كيحييهم غير براسو بحكم انه ولد مول شي ، وهبط فسانسور للبار لتحت ....كانت ساعة الحداش دليل ....
غير دخل لتحت داز لبار دخل سلم على لبارمان لي تما غير ببونية ومشا هز جوج كيسان طوال لي كيخلط فيهم المشروب ديالو ... وحطهم على الكونطوار كيصاوب فيهم كاسو قطرة قطرة من كل حاجة مع روح الفواكه لي كيبغي ... سلطان ولوؤي كانو فواحد القنت كيشوفو فيه كل واحد شاد كاسو وشادين تيليفوناتهم ضاحكين منغمين مع كيسانهم والموسيقى ....الكل كان شاد كوان ديالو البنات اشكال انواع واغلبيتهم اجنبيات كلهم بليغوب سواغي وكل وحدة كتنسي فلخرا بالنقا ولاطاي والاناقة .. غالبيتهم كيكونو عراضات و المؤثرات دااانسطا لي داخلين يصورو و البعض جاي يدير خدمتو " الدعارة الراقية " ....
بدا كيمخض فكاسو يقادو وعينيه كدور على المكان يشوف هاد النهار القضية كيف دايرة والبنات كالسين فاالبار مرة مرة كايطلعو فيه الشوفة ويتغامزو .... مكيانش لي مكيعرفوش هنا .. لي عمرو شافو غايكون سامع بيه لا هو لا لوؤي وسلطان ....
قاد كاسو وخواه مرغوي فكاس دزاج ، وهز عينو على واحد البنت تاهي شافها كتشوف فيه كانت طوييييلة ونحيفة بشعر حريري واصل للمؤخرة ومكياج صارخ وسنينات بييضين .... شد كاسو ودار فيه الثلج وداز حداها ضرب ليها فالكاس ديالها بمعنى راه راد ليك لبال ..... تابدات كضحك ومشا لجيهة الكوان ديالهم تلاح حداهم ....
سلطان : ( كان متبع ليه العين ) ماابيييهاش
جود : ( جغم من كاسو ) ماعنديش الخاطر ... ( شافو كيشرب العصير ماخداش لالكول ) عندك ماتش
سلطان : نهار الجمعة ....
لوؤي شاد كاسو وساكت ، كلهم ساكتين كايخويو طاقتهم ....اما هو دماغو خدام وقاد جلستو وشاف فيهم
جود : بلااا تلاوي فالهضرة بلا متكذبو عليا .. بلا متلونو عليا ، قبل من لاكسيدون دموناكو لي درت داك المرة ونسيت كولشي .... كانت عندي شي وحدة فحياتي !؟
لوؤي شاف فسلطان وقادو معاه الجلسة كيلعبو بعينيهم و سلطان كيحك فلحيتو ، وشاف عند لوؤي معنى القضية حامضة
لوؤي : علااااش !
سلطان : اش جاك تاني ؟
جود : دابا انا لي سولت ....
لوؤي : ( قرب عندو لطبلة حط كاسو ) ودابا غابلعقل ابنعمي .... واش نتا كتجي تعاود لينا على لبنات لي فحياتك !!! باش غانعرفو !!!
سلطان : فوالا .....نتا فين كانت عندك غير وحدة !
جود كيشوف فيهم ورجع هز كاسو وتكا لور
جود : واحد الصوت كيسوط ليا فودني ... دار ليا التشاااش فراسي .... ملي انا ماعنديش غير وحدة علاش كنسمع صوت غير وحدة !
سلطان : ( شافو نزل على داك الكاس ) زيد كاس اخر تقدر تشوفها كاع ....
جود شاف لكاسو بان ليه خوا .. ورجع ناض لبار كيتنهد و لوؤي قرب عند سلطان
لوؤي : واااشتي دابا ....
سلطان : اصاحبي والله حتى خاصو يعرف ... شهاد الخرا هدا
لوؤي : باش يشدك باه يعقلك ...تاقال تهنينا من الصداع لقديم انجبدوه ، ماخصنا صداع يتفكرها راسو ماتجيش سبة علينا
سلطان : تخربيق حق الرب .... يقولوهاليه اصاحبي تاهاديك لهيه تلقاها واكلة العصا ، كانو مخطوبين رسمي نساها خصهم يفكروه ... هاهو تايتفكرها دابا بربي تانوحلو معاه .....
لوؤي : غااايتفكرها اصاحبي ، ميمكنش ينساها ....
رجع سلطان لور هو يطلع عينيه فوحدة كالسة مقابلة معاه كتخطف فيه الشوفة ، غير شاف فيها ضحكات ليه ولعبات بشعرها ورجع شاف فلوؤي
سلطان : آولد العم ... سحرو ليا
لؤي : ( كيجغم من كاسو بنظرة ديال الله يعفو ) اودي تنغمنا معاكم بكري !
سلطان : راه يا سحرو ليا يا خسر لوالديا الطاكتيل ....
لوؤي شاف لعند البنات لي حداهم والبنت كيف كتشوف فيه لاغراء ، فهمو كيهضر انه ماتجدبش ليها ومحركاتوش ... وبدا يضور كاسو فيدو
لوؤي : ماخسرش ليك الطاكتيل ... رااه حنا ملينا ...
سلطان : هاد ال**وي مكيتميزاجوراوش ... نفس للاشكااااال ..... مكاينش لي تبان ليك فيها الضو مبدلة شوية
لوؤي : كتقلب على المبدلة فالبار !!
داك البنت حسات بيه كيهضر عليها وبدات تتعوج وتلعب بشعرها ودوز لسانها على شفايفها . وسلطان قلب عينو كيشرب من كاسو شاف عند لوؤي
سلطان : ديجا عندي ماتش .... ممنوع نفوت الربعين .....
لوؤي : ( شاف ليه لكاس العصير وشاف فيه بضحكة خفيفة ) شرب شرب .... خلي شوية دالجهد لداك بنت الناس لي غتوقفها قدام العدول ....
جود قاد كاسو والبنت لي فالبار حاطة عليه العين وهي ترن فالجرس لي فالبار وتلفت ليه البارمان
- لا .... بغيبييت لاخوور ...
دار شاف عند جود لي كان عاطي بالضهر وهضر فودنيه بسبب الموسيقى المجهدة
البرامان : سي جود ... .
جود ضار وهي تبان ليه كتشوف فيه والبارمان رجع لخدمتو .. علا حاجبو وقرب عندها لكونطوار وهي ضحكات وشافت للكيسان لي كيمخض فيهم وهضرات بصوت كله انوثة
- بغيييت كاس ....
جود : ( طلعها وهبطها ) باش !
- ( دوزات لسانها على شفايفها كتطلع مع صدرو العريض ) الفرييييز .....
جود طلعها ونزلها وخوا داك شي فكاس دزاج ولاح فيه مورصوات دالمانغو ... وهي علات حاجبها
- نوووو .. قتليك الفريز ...
جود تبسم بجنب شفايفو وحرك راسو تايضحك ... وهز كاسو عندو خرج من البار وداز حداها
جود : مابقاش عندنا الفريز ....
غمزها ومشا وهي شافت عند صاحبتها وشدات فيديها
- غاااانموووووت ....
هز كاسو ومشا تكا حدا صحابو
سلطان : ها واحد اخر خسر ليه الطاكتيل ...
جود : ماعنديش الخاطر .....
بداو يهضرو جابدين مواضيع مختلفة و لوؤي عينيه حمارو طلعات معاه السكرة ، وناضو واحد الرباعة كيشطحو حداهم ... معروف عليهم كل ليلة بحال هادي كيختموها فلوطيل لفوق مع شي وحدة .... ولكن ليوم حاسين براسهم ملو .. عياو .. تكهمووو .. جاو غير ينشطو ويتنغمو كيسانهم ..... كيشطحو حداهم بطريقة سكيسي يجدبوهم بلا جدوى جود غير معلي راسو لفوق داك الصوت كيطرق ليه فراسو وسلطان شاد تيلي عارف راسو ممنوع عليه علاقة جنسية حاليا ... ولوؤي كيدور كاسو وكيشوف بعيد وعينيه مصغرهم كيفكر كيدير يفك حريرة سلفادور ..
تاحس بشي وحدة جلسات عليه تاطلع يديه لفوق موسع عينيه ... ودراري حبسو الضحكة
لوؤي : اوه اوه اوه .....
- ( جالسة عليه سكرانة وعلات يديها عنقاتو جيهة عنقو ) ماعيييتيييش بالجلاااس
لوؤي : لا اختي مرتااااح ....
- ( غمزات ليه ) لاشومبر خالصة
لوؤي : يعني !
- ( ضحكات وضرباتو لصدرو ) ورااااك فاااهم .... راك راجل زعما كيبان ليا
لوري : لا انا ز*امل هاد الساعة ... اتكعدي
داك البنت وسعات عينيها وناضت كتشوفيه
- لا مايمكنش !!!! ( شافت عند جود وسلطان لي علاو ليها حجبانهم بمعنى هادشي لي عطا الله ) ففففف خساااارة والله ....
مشات وهو شاف عند ولاد عمامو لي ضاحكين عليه وجود عينيه مجبديييين طلع معاه داك الكاس منغير سلطان لي موكض
لوؤي : كلللمة وحدة نقو*دو السوايع ...
وماو ليه بمعنى هاحنا ساكتين وكلسو متنغمين كاسهم .. تاكمل جود وناض هز سوارتو وداز حدا داك البنت لي كانت فلبار جرها من يديها وخرج وهي تابعاه فرحانة ....
وسلطان ولوؤي كانو جاو فطوموبيل دلوؤي .. وصل سلطان لدارهم تاكانت ربعة ونص دصبح ومشا تاهو لدار .. وجود طلع للجناح ديالو تما فلوطيل يكمل سهرتو ...
بعد يومان ...
الخميس 12 يوليوز
خَدم قصر الاسماعيلي كلهم على قدم وساق .... فرشو البيوت دالنعاس كل واحد وبيتو ، بيت زياد ومراتو و دخلوا ليه سرير الاطفال ، بيت الحاجة والحاج ، بيت مروان ، بيت اريج ويونس ...
و فوج لتحت كيقاد فالبيفيه ديال الاستقبال ...كانت الساعة العشرة ونص نازلة لامار فالدروج بعباية تقليدية و صندالة عالية شعرها مطلوق على كتافها وشال حريري فوق منو لايحاه لجنب ...
لامار : الو حياة ... فينك ! واخا هانا كنتستاك متعطليش دابا هوما جاو
يلاه نزلات لتحت لقات قسم كانت طالعة من لاصال بلباس السبور
لامار : اويييييلي مزالة مدوشتي طلعي دغيا بدلي عليك
قسم : ماما كون غير مشينا للمطار حشومة والله
لامار : اشمن مطار راهم نزلو قبييييلة مع سبعة دصباح ، الحاج خاصو يدوز لدارو هي لولا عاد يجي داكشي باش جداك البارح قاتليك بلا متعذبو للمطار ...يالاه قطعت مع خالك راهم فالطريق سيري بدلي عليييك دغيا وقولي لختك تنزل عندي وفيقي وسيم وجوود والله تااايعيقوووو بهاد النعاس .....
قسم : واخا اماما واخا تتتهدني بببشوية عليك تهدني ....
لامار : واشووفي حالتك نتي باقا مامدوشاش .. ختك فيقتها غير بزز ولوخرين سادين عليهم البيبان .... اسد مزال ماجا ... ( شافت عند رجاء ) نتوماا باااقيييين معطليييين الفطور واجد كامل
رجاء : كولشي واجد امادام ... لباقي مطلعناهش دابا باش يبقى سخون حتى يجيو
طلعات قسم لبيتها دوشات وهي تلقى لبستها معلقة واجدة ديال ليوم ... غوب كحلة طويلة مفتوحة من جيهة الرجلين .... وصندال طالعة بالخيوط حتى للركابي ... لبساتهم وطلقات شعرها على راحتو مع حلقات كوحل طواااال ... وهزات تيليفونها كتصوني على وسيم تافيقاتو من نعاسو وصونات لجود تاهو طفا عليها تيل ... وخرجات تلاقات مع قدس حتى هي نازلة بسروال دجينز و شوميز مربوطة عند الكرش كيبان دباردور تحتها جامعة شعرها كرينات على كتافها مضفورين ...ونزلو لتحت لقاو لامار متوترة كتسنى لانه عاماين مجاو وتاهي مامشاتش حسات انها توحشاتهم .... كل مرة تصوني تتأكد تادخلات حياة ورتاج ..
حياة : صباااح الخيير .... هاحنا جييينا مالكي مقفزانا ، صونينا ليهم مزال تااامدخلو للمنطقة .... صبري شوية
قسم : ( قربات سلمات عليهم ) خالتو رتاج ؟ مسافرتيش مع عمي عدنان !!! قاليا بابا لبارح مشا لالمانيا
رتاج : لا مجاتش تاني عماين مجاو نمشي ونخليهم ، نشوفهم بعدا ونهار السبت غنلحق عليه
قسم : هاء ؟ والعيييد
رتاح : غنجييو ليلة العيد ان شاء الله ... ( شافت لساعتها ) ياك نزلو مع سبعة فين تعطلو هادو
لامار : باباك قالك يدوز لداارو هي لولا ههه توحش حيوطو .... عاد جايين ..
قدس : خالتو اريج معاش توصل
رتاج : خالتو اريج احبيبة ديالي فالعشية
قدس : الله يجيبهم على خير
لامار : اسد تعطل
قسم: ماما رخفي فيك شوية النفس ... دابا يجي وغايجيو هما وغايكونو كولشي هو هداك ، حنا عارفييينك توحشتي ماماك اااصبري عليييينا
لامار: خووتك فاقو
قسم: وسيم راه فاق وجود طفا عليا تيليفون واش فاق واش مزال منعرف . .....
لامار : شششششش ، شي طموبيل داخلة ، جررررري شوفي واش هوما ولا باباك
طلات قسم من زاج لقاتها طموبيل اسد نزل هو وسفيان ودخلو لدار ولامار غير كتمشي وتجي شادة تيليفونها
سفيان : مزال ماجاو!
حياة : نووو مزال هاحنا كنتسناو ...
اسد شاف عند لامار كتمشي وتجي متوترة هو يجبدها عنقها عندو معنكشها
اسد : شششكوون لي تووحش ماماااه هههه
لامار : اساااد
قسم : هههه خصك تشوف نوضات لييينا الرعاااد .... ماما باقي كتخاف من جدة يمكن هههههه
سفيان : وداك جداك شكون مايخافش منها
لامار : ( دمعو عينييها وتخبات فصدر اسد تبكي على خاطرها ) والله تااااتوحشتهم كاملييين
اسد : يلاااه .. هاهي على سبة ( شد ليها وجهها ضامها عند صدرو ) واسكتيينا ....
طلعوا عينيهم بانليهم وسيم لي نازل بشورط بيض فيه شي تقيطعات وتيشورت زرقة وكاسك فعنقو وسبادرين وشعرو الكيرلي مخربقو على وجهو وبشرتو تبرونزات لبارح دوزو غير بحر ...
وسيم : كود مورننينغ ... مزال موصلوا !
قدس : مزال ...
لامار : جود فااااق !!
قسم : اماما عارفاه مايفيقش دابا راه مغايجاوبناش صافي خليه .... واشنو زعما مكتعرفيش جود كيداير ....
رتاج : ( كطل من الزاج ) هاااهووما وصلو،..
لامار تخطفات من صدر اسد وخرجات بزربة للباب وكلهم تبعوها ....
مروان داخل كااايكلااكصوووني ضاحك ليهم راكب حداه الحاج و رقية لور .... باركا طموبيل ولامار ورتاج ماشين بجيهتهم ببزربة .. غير نزلات رقية بجلابيتها طارت عليها لامااارر معنقااهااا مزيرة علييها ... ورتااج نزل باباها تاهي عنقاااتووو .... كان عناق حار كلو اشتياق للوالديين لي شحاال ماكبرو ولادهم كايبقاو محتاجييين ليهم ..... وقسم وقدس قربو تاهوما ....
قسم : واا مامااا طلقي تا حنا توحشناها
رقية طلقات من لامار وضارت لعندهم عينيها دامعييين
رقية : اجيييييو اكبدتي المعاااودة اجييييو ( عنقات قدس وقسسسم فخطرة وحدة مزيرين عليها تايبوووسها )
قسم : ممممم شحاال تووووحشت رييييحتك اجدة ....
قدس : ( جبداتليها حنيكاتها ) كتصغااااري الميييمة كتصغااااري ...
قسم تلفتات عند الحاج ومشات تاهي عندو معنقاه وتاهو معنقهم ضاحك ولامار كطل على مروان لي مزال ما نزل
لامار : اتباااات تمااا ماتوحشتيييينيش
مروان : ( بضحكة ساحرة ) حتى تسااااالييييو على خاطركم ..... I don't have any problem
لامار : هههه نزززززل نزززل توحححشتك ...
مروان حل الباب هو ينزل عنقها عندو راااسها لي يلاه واصل عند صدرو ، خوها الصغير لي يلاه لبارح كانت كتشري ليه فالشوكولا دابا ولا طول منها !!! ...
كان بسروال بيض و بودي بيض وكوستيم مارون ... بشووووش وملامح جدابة وسنينات بويض مسسسطرين وشعر كحل منفوش وبنية جسدية ريااضية ، عنقهاا عندوو وهي كضحك وتبكي فرحاانة بخوها لي كاتشوفو ولا راااجل ... قربات حياة تاهي عند ررقية لي طلقات من رتاج وعنقاتها كتزززغرررررت تاقلبات ليهم الدنيا
رقية : الله يتتتبتوووو ياااااااربي ياالحبييب ويكبرو فعزززز بااااه وميميييييتوووو
حياة : امييييين االحاااجة ربي يخليييك ...
رقية طلعات عينيها وشافت فاسد لي واقف داير يدو فجيابو مبتسم ليهم وهي تمد يديها لعندو .. طالما كان السبع ديالها والشخص لي ديما كاتقول ليه الفضل فهادشي لي واصلة ليه كاااامل ..
رقية : الحبيييييييب ... وليييييدي
اسد توسعات ضحكتو وهي قرباات عندو عنقاتو هو كيطبطب على ظهرها
رقية : الحبيييب الغاااالي توووحشششت وليييدي .....
اسد مكتفي غير بالصمت وبعناق كانه كايقدمو للام ديالو .... وضارت تاني عند سفيييان لي جا عندها ببشاشة ضااحك معنكشهاا عنقها تاهو كايلعب معاها كيف ديما ... وقربوا الحاج تاهو سلم عليهم ومروان .... وهي رقية تقشع وسيم لي تايتخبا مور ضهر باباه
رقية : طططلقووو ليااا طلللقوو الجددررر مشاا بلا مايقوول بسلااامة .. طلقققوو ليا
وسيم : لاااا اجدة القرييص لا ماقلتش بسلامة عارفك غاتلحقي علياااا لااا اجدة عافااااك
رقية : تا اججججي عندي لهنا ...
ضحك ومشا عنقها
رقية : خليييييتيها عليااا خاااوييية
احمد : سسسخيتـي بيينا اوسييم
وسيم : ( طلق منها ومشا عندو ) حاشاااا اجدي .... ( عنقو سلم عليه ومشا عند مروان تاهو ) خااالو احسن مادرتي جيتي تانتا ....
مروان : الله اودي ...
مدة دالعناق حدا الباب والخدم هزو ليهم لي فاليز ودخلو للدار .. لامار معنقة رقية و رتاج معنقة باباها شادة فيديه وهو شاد فعكازو ..ومروان داخل معنق قدس تحت يديه تادخلو للدار وسط من ترحبيات رجاء والمساعدات لي واقفين مستقبلينهم وجلسو فصالون وسط الضحك و الترحاب وعبارات الاشتياااق و مرارة الغربة .... المساعدات تايقدمو ليهم الضيافة ، حليب بالزهر و بلاطويات التمر والحلويات الشرقية و المغربية و صواني مزخرفة ومذهبة ديال اتاي .... و طالع من المبيخرات دخان فواااح بريحة المسك والعنبر ....
رقية : ( كتنش بواحد شال على وجها ) الله عللى راااااحة الله ... مكااااااينش ياولدي ماحسن من المغريب ديالنا وماحسن من هاد الجمعيية هادي الله يدددومها ياااااسيدي ياربي
مروان : راه هاكا دييما ، فوقاش نرجع فوقاش نرجع فوقاش نرجع .... من الكونفينمو وهي تدعي ....
لامار : حتا حنا توحشناكم والله ... كنتجمعوا وولكن الجماعة ناقصة بلا بيكم و بلا يونس ولادو.... الله يجمعنا بالخير
رقية : اجيو ؟ فيييناهو داااك جووج ميييطرووو ... فييين جووود
لامار : هههه واجوج ميطرو نيييت ... اهو غاينزل دابا اماما ....
مروان : ماقلش ليكم عمي يونس امتى ايوصل
رتاج : غايكونو دابا ركبو ....
مروان : جاييين كاميلين ؟ بيلي غاتبقى بوحدها !!!
رقية : وراها مزااال باقي ليها قاليك شي حاجة فالقراية تسااليها هاوو تجي راني ووصيتها
رتاج : وي غاتعاود جوج دالموديلات .... وتلحق عليكم
مروان : تبقى بوحدها ! كون بقى معاها بعدا خوها
رتاج : نو مكاين مايطرا ليها العساس راه فالباب ونيت غير سيمانة وغاتجي ... غادوز تاهي العيد هنا
مروان : متأكدين بعدا غاتجي
رقية : اوا لااااهداااها الله راحنا دوييينا ....
حياة : لا لا مدام قالت غتجي راها غاتجي
وسيم : يس ، تانا قالت لياا تكمل وتجي .. غير هي ماتكلسش بزاف ... قالت يدوز العيد وصافي
رقية : اووودي عاااااتجي ...
باقين داويين وهي رقية تقشع شي واحد مخبع ليها مور السارية مسسسلت .... غوتات تاقفزاتهم
رقية : هااااااهو عمووووود الضووو هااهوو لي مايعرف صواااابة ما يعرررف اداااااب .. هاااهو جوج مييطرو ، هاهو الطراااان واقف .....اجججي لعندي لهنااا ( وقفات ) زيييييد اماخلات كرش كرشي .....
جود ضحححك عىى قوافيها ... وقرب عندهاا وهي عنقااتوو بجهد وتاهو خشا راسو فعنقها كايشم ريييحتها لي كتفكرو بطفوولتو كوولها مخشية فصدرو العريض كيف النملة معنقاه بحرارة تابداات تبكي ..
رقية : وليييدي حبيييبي لي زهرو فالمصاااايب والكساااااايد ولييييدي لي داوه علييينا الحديد يعطيييهم الهرررس
جود : والااا والا اجججدة واشتي دابا غاتخسسسريها ( جابها قدامو كايمسح دموعها ) اشمن كساايد اجدة هانا واقف قدااامك ..
رقية : ( كتبكي ) شششتك ياوليدي ياااحبيبي ورراوك لييا داك نهااار فالمشقووف ... قققلبي كان غاااايسسسكت ....
جود : ( ضار عند وسيم ) ششستي البسااالة
وسيم : مااااشي انااا لي ورتييها خالو اميييين ....
جود : ( كيمسح دموعها معنقها ليه ) وصااافي ماطرااا والووو هانتي غاتنفخي هاد العينين ماتبقايش قادة تشوفينا بالدموع ... مسحي عينيك شوووفي فيا مزيان واش زيااانييييت ولا والو ....
رقية : ههههه ( كضحك وتبكي وتمسح عينيها ) ياااااودي زيييين زيييييين خصك عااا العقل
جود : هههههه ( شاف عند الحاج ) قققمعاااتني الحااااج ياااك .... كنضرب بالحجر اجدة ......
طلق منها ومشا عندو باس ليه راسو ويديه وعنقو بحنية ...
الحاج : الله يرررضي عليييك اولدي الله ييصلحك ويييحفظك
جود : اللهم امين الحاج الله يخليك لينا .. كييدرتي مع الصحيييحة
الحاج : اوا هاحنا كنسلكو يامنا اولدي ...
جود : ( زير ليه على كتفو ) مزااال شبااب الحاج ههه
جود ضار عند مروان لي وقف وسلم عليه بعناق رجووولي
جود : خااالووو العزييييز .... قلنا صافي غاتكون نسيتي طريق للمغرب
مروان : حاشاا .. غير الخدمة شادانا اخالو ....
كلسو مجموعييين كايتجمعو من غير مروان لي مركز مع تيليفون ماحملش يسمع بيلي بقات بوحدها فالدار ، عارفها كاطير ، مستحيل تبات هاد الليلة فالدار .. لاقاها مجاوباتش فليميساج و ناض وخرج لجردة كايصوني عليييها تاجاوبات بصوت ناعس بالانجليزي
بيلي : مرواااان !!!! سسستة د صباااح اصاحبي مالك
مروان : سمعت بقيتي بوحدك .... ديري عععقلك
بيلي : واش مريض ولا مالك .... علاش اش غانديير مثلا ! نرجع دار ديسسكو
مروان : علاش مكنعرفكش ! غاتجيبك صعيبة .... فوقاش غادوزي
بيلي : هاد صباح ... وصلتوا راكم فالمغرب ؟
مروان : يس يلاه دخلنا .... تسالي كولشي واجي عنداك تبقاي تما ...
بيلي : ماعرفتش امروان والله ... دابا راه فيا النعاس بعد مني تانفيق ونعرف راسي اشنو كانقول
مروان : ردي لبال لرااااسك ....
بيلي : واخااااا واااخاااا .. خليوني نرتاح منكم شوية .....
مروان : فيقي صوني ليا
بيلي : قول ليا ... كلهم تما !
مروان : كلهم ... من غير عمك عدنان مسافر وواليديك تالعشية ويجيو
بلي : ( مدة صمت ) جود لابااس علييييه ....
مروان : ( طلع راسو تنهد ورجع هضر ) لابااااس عليييه .....
بيلي : ممم ... مزيان ... بسلااامة . .
قطعات عليه وهو خسرات ليه المود بهاد السؤال ورجع جمع التننهيدة ودخل .... عطاوه كاسو داتاي والنقاشات والضحك ماالييين المكان ... خصوصا تنوغيش جود ورقية لي دايرين كي القط والفااار وقدس حاطة راسها على كتف مروان بحكم انه اقرب خوالها ليها ... وهو كايدوز يدو على شعرها
فجلستهم ولمتهم العائلية ، تاسمعوا شي حد داخل ... وضارت رقية وهي تضضضحك من عييينييها كان لوؤي وسلطان لي جار اية فالكرسي و فيصل وانس ... وهي توقف لعندهم
رقية : هااا العصااااابة كملااااات ..... يلاااه غانسووول عليييكم
لؤي : ( عنقها ) على سلامتكم الحااااجة ....
سلطان : ( عنقها تاهو ) توحششناااك ... مرررحبا بيكم
رتاج : فين تعطلتوا
سلطان : ( جر بآية الكرسي ) هااا لي عطلاااتنا .. تعطلو ليها هاد المرة فالكيني
رقية : ( نزلات عندها واية عنقاااتها ) العميييرة ديالي الوريييييدة دياااالي ( كتبوس فيها ) وهاااد الغزيييولة غادااا وكتزيااااان الله يشافيها ليااااا ياربي نشوفها برجييلاتها
اية : ( بصوت كيوت والضحكية ) توووشحنااك اجدة والله ...
جر بيها سلطان الكرسي ومشاو لعند الحاج لي كان معنق لوؤي و سلم عليهم تاهو نزل لعند اية لي مكتقدرش توقف تسسسلم بااسها تاهي كايدعيو معاها بالشفاء و رقية شدات انس و فيصل تاني بالتعناق والبوسان عاد دازو لجدهم ومروااان وقف سلم عليهم وجر اية لعندو كايسولها على الكيني وجلسو جمييع
رقية : ( معنقة لؤي ) ونتا فيييين تعطلتي
لؤي : كنا بغينا نسبقوكم اجدة والله ...ولكن اية تعطلات شوية فالكيني .. وانا دزت جبت هاد العصابة من المعلب كانو معاياا ....
رقية : ( شافت عند اية) الله يشااااافيييك يااسيدي ياااربي فهاد النهار ( طلعات يديها لسما واية نزلات راسها ) يااااااربي لامتوووقفها على رجليها اياسدي ياربي ونشووووف بنيتييي كتمشى ياسيدي يااااربي ، صحيييحة غدارة ياولادي غدااااارة
حياة نزلات راسها جاتها البكية مابغاتش تبين وسفيان غير كيتنهد ....
رتاج : امين .... غاتمشى ان شاء الله الكيني كتستجب ليييه ...
اية بقات غير ساكتة مهبطة راسها ولات ححمرة مكتحملش يجي هاد الموضوع فالوسط ولكن مكتعرفش تعبر و تقولها ليهم .... وبقات غير ساكتة
ماحسوش بالوقت كيفاش داز تاجات وقيتة الغدا وتجمعوا على السفرة لي كانت مزينة بكل الاصناف .. غالبة عليها المطبخ المغربي ... كانو طواجن دالبديع فالالوان متسوطين الطاولة و كل واحد واش فيه من الأطباق المغربية ... جنبهم كل انواع المقبلات والسلطات والمشروبات ...
الجو ولا صاخب فالدااار كلهم حيوية وحماس .... تاتحط الديسير لي تبعاتو قهوة لصالون
غير كملوها كل واحد وقف يكمل شغالو ...
اسد وسفيان خرجو و مروان والدراري هبطو للبحر ورقية والحاج طلعوا يرتاحوا بقاو غير البنات فالصالة ...
رتاج : ( كتميساجا مع عدنان ) هانتي هاهو نسا دواه
حياة : وراااه ملهي مع شغاااالو الله يحسن العوان ... اريج مكتجاوبش
رتاج : لا غاتكون فطيارة ....
قدس : قسم يلاه نزلوا تاحنا البحر... قنطت
قسم : مافيااااش ولله باغا غيرر نعس راسي تايضرني
حياة : مالكي !!!! ياكما حيت ولفتي داك تمارة دالخدمة ودابا كلستي ...
قسم : لا لا .. غير راسي تايضرني وصافي .... ( لعبات فشعر قدس ) نعوضوووها غدا اختي و الله الى عيانة
خلاتها وطلعات وقدس دارت بناقص وهبطو هي واية لسينيما دارو فيلم ...
قسم غير طلعات لبيتها مشات لتيليفونها لي خلاتو كيتتشارجا طلات عليه مالقات حتى اتصال طفاتو كتنهد ..... منهار لي تشاوفوا فالمرصى وهي كتسنى منو اتصال ولا غير ميساج ولا غير شي حاجة توحي ليها انه مزال متشبت بيها ... ملي مكتلقى والو كتزيد تتعصب .... تكمشااات فلفراش بحوايجها وصندالتها طايح عليها الضيم ..
الثامنة مساءا
بدات السما كتدكن لونها لازرق غامق ... الجو دالغروب خالق سحر فالسما لايوصف ..
كانو جالسين فالجردة كلهم على كيسان اتاي والعصير وحلويات مغربية من غير الرجال لي باقيين فالخدمة و دراري لي عاد جاو من البحر وطلعو يدوشو ....
كانت سارة انضمات ليهم هي وماجدة شادين حديثهم ونميمة النساء ورقية وسطهم بقفطان ابيض وزيفها عاقداه لور و لويزات فودنيها مدليين .... حداها حياة ناعسة على كتفها و لامار ورتاج وسارة .. اما قدس و ماجدة و اية جلستهم بعيدة بتيليفوناتهم ، اية عينيها غير على لباب فوقاش يخرج وسيم لي كتحس براسها مكتسخاش بوجودو .... تاصونا تيلي درتاج
رتاج : وي اريييج وصلتوو !! صافي حنا كلللنا هنا ....( بفرحة) مرحبااااا بيييكم
لامار : وصلو !!!
رتاج : وي جاااين ....
لامار: صبري نكتب لاسد ....( كتبات ليه مسج ) حبيبي راه خوك وصل ماتعطلش ....
اسد هاد نهار ماعرف يخدم ماعرف يستقبل كولشي تجمع عليهم كيخرج من اجتماع ويدخل اجتماع ، هو وسفيان خاصهم يساليو كولشي على ود يرتاحو فعطلتهم ....
رقية : لا غزيييييولة بسلااامتها .. كي شكل قدس ملي كانت صغيييرة مههههدنة تبارك الله
رتاج : انا غي فالكاميرا كتجننني .. ولكن مها غير مسخرة اختي زييييينها كولو من زيااد
حياة : شوف كيف كتشكر فولد ختها .. تا مهااا غزاااالة زعييعرررة وشعر حرير مالكي
رتاج : بيااان مازعراااش بيان شبهات فباها ماعندك ماااتقولي عينيها مجبدين بحالو .... جنان عينيها مبلقبيين
رقية : يعطيكم الجهل خليو المرا فتيقار ديو ذنوبها دريوشة مسكينة
لامار : وايلي على درويشة
رقية : انا جاتني دريوشة مافيهاش قوة الهضرة ومقابلة بنتها وراجلها ... ياودي ياك راجلها بااااغيها نتوما مالكم
سارة : قوليييهالهم الحاااجة ..
رقية : ما نتوما الرررربح ... يا عوّاااات ....انا بغيت غا نعرف كيغاديرو مع لعرايساااات . اشوفو آه ، دييو غااا منكم ماتجيبو عليكم براااني تغامزو عليه .. نتوما ماديالش البراني .... قسمو الخبزة بيناتكم فكو الجرة
لامار : ههههه كيغانديرو ليها والولاد عندنا كتر من لبنات
رقية : الله يحضرني على عرايساتكم وعلى نسابكم ... فييييناهي قويييسم مزال مكاينشاااي ؟؟؟ هاد رجال هادو تقطعوو ولا تعماااو مال حد طواسل بوهم
رتاج : بقاا فرجال ! بقات فيها هي تقبل ....
لامار : هضري معاها فكولشي الا الزواج غتقلب علينا الطبلة
رقية : بخخخرتي ليها !!!! ياكما العييين اصكعة ولا شي حد دايرليها شي دياااار
رتاج : اعوذ بالله ... لا الحاجة غير مزال ملقات لي ترتاح ليه
رقية : هاااااوييلي گرانها بولادهم احااا ؟؟؟؟؟
رتاج : حتى انا واريج تزوجنا تقريبا قدها وهاحنا ولدنا وربينا وشاط الخير ، خلييييها تاخد وقتها الكااااافي بشوية عليها يلاه بدات خدمتها ....
جماعتهم مكانتش كتسالي تادخلات طوموبيل اسد لي حاس براسو غيطرطق بالعيا هو وسفيان طريق يجييبوها وطريق يديوها .... العشا بدا يوذن وطلعو يصليوه اما دراري دوشو ، مروان نعس ولوؤي وسلطان وجود نزلو ... ووسيم وفيصل وانس خرجو للملعب ، شافتهم اية دايزين للملعب هبطات شفايفها منقبيلة وهي تسناه يخرج من دار فلخر مشا ديريكت للملعب ! علاش ميكلسش معاهم ؟ علاش ممسوقش بحالها .. وهبطات راسها تاحسات سلطان خربق فشعرها وحاولات تتبسم ليه بسيف وجود حط عينيه فعين ماجدة بنظرة قاتلة ديال مزال منسيتاهاش ليك ومشا هو وسلطان جيهة الخيول كيهضرو او بعبارة اخرى بغاو يكميو .... و لوؤي عنق رقية جالس حداها
لوؤي : الحاجة مصدقتييييش .. داك المرة قلتي ليا المجية الجاية تجيبيلي عروسة .. وافييييناهي ، قويتي علينا غاابالشفوي ( قدس طلعات فيه عينيها )
رقية : يااااوووودي هداك هو النهار المبااااارك والمسعووود نهار تقبلو على جداتكم تجييبلكم العراااايس والله وماتسالني حلوووف تانزوجكم المفطحات المجلجلات لي تااياقطروووو بالزيييين ....
لوؤي : توكلي على الله
رقية : ( ضارت عندو بزربة ) ياااااربي كدوي بصح باغي تزووج !!!! ( شافت عند رتاج) غتزووجوووه
رتتج : هههه هاهو حداك الى بغا لييييك حنا علاش
لوؤي : ودابا علاش تاتشوفي فيها شوفي فيا انا اللي غانتزوج ...
رقية : قووولياا عاا كيييبغيتيها ومتلقى جداك رقية غاا منزلاها ليك من السمااااا ، حور العين ياااااوليدي
لوؤي هبط عينو عاض على شنافتو ضحك وهز عينيه غير بشوية لقدس لي كالسة كتشوف فتيليفونها بحالا مامسوقاش وهي وذنيها على القرص .. طول فيها الشوفة وشاف فرقية
لوؤي : بغيييتها يكون كايجري فيها دمي الحااااجة .......
قدس وسعات عينيها ولامار بقات تشوف فيها وفيه ورتاج طلعات راسها فيه مافاهماش ..
رقية : ياااا زگي معاياااا بلا حجااياااات..... طويلة قصيييرة بيضة سمممرة ، شنو حب خاطر ولدي
لوؤي : نعزلو باطاطا اجدة ... راه زواج دوام ماشي غانجيبها دير ليا ديفلي .. ( قدس غير كاتشوف بين شفارها مهبطة راسها بزز كطلع شوية فيه عينيها )
رقية : ايييييه ماقلتي عيب يا نقيطة العسل فقلبي .. غا هو عارفاكم يا زهوانيين عزيز عليكم الزييييين
لوؤي : راه واخا تكون مافيها مايتشاف ، الى بغاها القلب اتبان ليك احسن وحدة فهاد الدنيا
قدس وسعات عينيها بمعنى اش كيقول هذا ، دابا انا مافيا مايتشاف !!! حماااارت وودنيها ساطو عليها هذا كيحشي الهضرة ولا شنو .....
شادة فيه رقية وشاد فيها تاجا جود وسلطان كاضحكو عليه
جود :زيرووك اولدي ... تعلم تجلس وسطهم
لوؤي : ماعندهم حتى شي موضوووع فحيااااتهم من غير الززواج .... حتى الى مهضروش ليك على الزواج يقطعو ليك فعيالات د وحدين اخرين
سلطان : ( جلس طالق رجليه ضاحك عليه ) على هو باش حنا قد هاكا تبارك الله ..... ماعندهم
ميدار منغير يزوجو بعضياتهم ويولدو
رقية : والله يقوي الخيير والله يكبر المجمع ان شاء الله نرررجع نلقااا هاد الكلسة ولات لهيييييه بالطوووول ببراهشكم ياربي ياسميع ياكريم ، لامووولدتوش كتر من ستة لواااحد مانااااشي رقية
جود : ( هبط راسو كايحك فشعور ضاحك عليها ) دابا نتي ولدتي ربعة حنا بغيتي تزرفينا فستة
لامار : واااتبعي هادو تبعيهم الى ماسطااااوك ....
لوؤي سمع وصلو ميساج لواتساب و جبد تيليفونو لقاه من قدس علا عينو فيها قبل مايحلو بانتليه منزلة عينيها على تيليفونها كتلعب برجليها كأنها مامسواقش
" دابا انا ماافيا مايتشاف ؟ "
لوؤي غير قراه تبسم تاتجبدو عينيه ... وبدا يضور فراسو و رد عليها
- وضروري نكون قاصدك نت !
طلعات عينيها فيه بزززربة قلبها كايضرب ، هي كيفاش كتبات داك المسج بلا متحس ؟ هي كيفاااش قالت هاكاك ... حسات بداك القمعة اختارقاتها لداخل ... و لوؤي ضاحك عليها .... كتعجبو عصبيتها كتولي كيوت كتر وهي كتحلف اردها ليه ، يلاه غاتجاوب حتى سمعو كلاكصون قوووي هاز الدنيا هما يقفزو كاملين ورتاج بلا متحس دمعو عينيها
رتاج : ااااربيييييج
كلهم ضارو جيهة الباب و جوج طموبيلات دخلو .... ميرسيديس و پورش ....
كانو كيلمعو بالاضواء لي تشعلات فالجردة مع اجواء الغروب .... ورتاج كتجري باتجاه الطموبيلات فين غيحبسو ولامار وحياة وسارة تبعوها ...
باركات ميرسيديس كلاص كحلة اريج كانت غااتلاح منها قبل ماتحبس نزلات كاااتجري لعند رتاج عنقاتها بحراااارة كيضحكو ويبببكييييو .... وتلفتات تاني عند لامار لي مكتقلش معزة على رتاج ختها ، وطارت عليها معنقين بعضياتهم بقوة وعينيهم دمعاينين بدموع الفررررحة وحياة عنقاتهم بجوج بيهم تاطلقات اريج من لامار وعنقات حياة ورتاج جات موراهم
حياة : توووحششششسناك يالهبيلة توحشنااااك ....
اريج غير كتبكي .... وتسلتات منهم كتمسح فدمووعها بمنديل كان فيدها كضحك وسط الدموع.... كانت سيدة خمسينية ، لكن مظرها يخليك تحسها انها تلاتينية لا اكثر .... شعر كاري متخللاه بعض الخصلات خفااااااف من الشيب و غوب حد الركبة سوداء بسميطة دهبية ويدين مشبكين و صباط عااالي كيبانو رجليها بحال رجلين العااارضات بليباموس سوداء ... مجوهرات راقية وبسيطة عقد خفيف و خاتمو دايراه فالسبابة وضفيرات مصبوغين بالبوردو .... ملامح بشوشة جداااا وقمة فالرقي والجمال الهادئ .... طاي نحيفة بعض الشيء بالرياضات والحميات .... شي لي خلاها تبان اصغر من عمرها ....
نزل من موراها الزوج ديالها ..... رجل فمنتصف الخمسينات ... اول ماتشوف لسموريتو ، عينيه حجبانو وحروفو كاتقول عليه انه اسمااااعيلي .... فيه ملامح من سفيان من عدنان ومن اسد ... كيف ولا هو الاخ الوسط ... الاخ الحنيييين و القلب الكبير والسمّاح ولي مكيعرفش الحقد شنو هو ... لي رغم انه ديما بعيييد الى انه عمرو نسى العائلة وحب الاخوة .... لي فالسراء والضراء كيلقاوه وااااقف مجند .. يواسي و يدافع و يضحك ويبكي .... حنيتو كاتبان على وجهو وملامحو الهاااادئين .. لي واخا بعض التجاعيد البسيطة و بعض خصلات الشيب فالشعر واللحية الى انه محافظ على جادبيتو ووسااامتوو من شبابو لمشيبو ... بسروال دجين و تيشورت بالصدايف فالعنق وبجيب صغير فجهة الصدر اليمنى ... ساعة انيقة فيديه و سبادرين بيضة ... رغم تقدمو فالسن مقدرش يتخلى على الستيل الكاجوال ... وبقا مرافقو حتى للخمسينات لكن بملابس تليق بالسن ديالو ولي موالمة ايضا بينيتو لي مزال محافظ عليها رياضية رغم التقدم فالسن ....
نزل بضحكتو تجاههم ... بفرحة والضحكة فعينيه واشتياق ليهم ولهاد الاجواء ولهاد القصر وللدفئ الاسري لي مكيلقاهش فكندا بسبب العمل والمسؤوليات ..... موراهم پورش بيضة نزلات منها سيدة عشرينية عطرها الشانيل حااوط المكاااان .... بسروال دجييين فيه بعض الخبيشات و مطوي من تحت واتا رجليها الطوال الرقاق من تحت ... و سبادرين مريحة بسبب انها أم وتتحتاج لملابس مريحة ... وشوميز بيضة محلولة من الفوق و نازلة على واحد الكتف شعر اشقر طوييييل حد المؤخرة حريري منساب بسلاسة .... ملامحها كايشبهو لملامح القطة .. عينيها كبااار والايلاينر زاد جبدهم للفوق... فم صغييير و انف مسبووك ... وجه ممكن يترشح لملكات الجمال ويفوز بجدارة .. طويييلة القااامة و ممشوقة القوام .... مؤخرة متوسطة و مشدودة بالتمارين الرياضية و صدر صغير .... حلات الباب الخلفية لي كان تما كرسي اطفال فيه بنيتة فسن عامين بغوب صفراء فوق منها فيست دجين و تقيشرات وسبادين و بابيون صفرة شادة بيها شعرها لي يلاه بدا يطوال شوية .... لكن لي يشوفها يكدب انه بنتها بقوة ما غير مسخرة ليها ، البنت كانت بشعر بني غالق وعينين مهدبين ومشفرييين كيف عيون المونيكات ... فم صغير وخدود وررردية غااااية فالكياااااتة .. هزاتها عندها و هزات صاكها كتومي لراجلها ينزل لي كان مراقب الاجواء من السيارة ، اجواء الترحاب والتعناق والاشتياق وتيشوف مع القصر لي توحشو وهاد الوجوه كلها .....
نزل من السيارة ثم بان شاااب طويييييل القااامة مقارنة بالسيااارة .... عريض البنييية وهاااادئ الملامح .... عيون بنية شرسة كعيون النمور و حجبان غلاااض وشعر بني مرتب ... ملامحو حتى هي مابعيداش على ملامح الاسماعيلي ... كيف لا وهو شبل من اشبالهم .... لباسو كان نوعا ما كلاص بحكم العمل ديالو لي ديما كيتطلب الاناااااقة .... كان بسروال بيج و شوميز مارون معلي ليها كمامها ومحلولين الصدايف الفواقا .... وبالغين مريحة على حساب السفر وساعات الطائرة ... بشرة خشنة سمراء وملي تبسم كمل القمر ....اسنان بيضااء مستفة وفالابتسامة كايتشكلو غزامات صغااااار فحناكو و عينيه كايتجبدو ، ضحكتو كتدينا فقط لضحكة الاب ديالو ....ضار براسو تأكد ان مراتو هزات بنتهم و قرب تاهو عند العااائلة ، رتاج تعلقات فيييه وهو نازل لعندها معنقنا ضاحك
رتاج : حبيييييب ديالي توووحشتتتك ... توحششتك ( جابتو قدامها كتشوف فيه شادة وجهو ) ضحكتك هي ضضضحكتك ...
زياد : ( باس يديها ونطق بعربية معكلة بعض الشيء ) آنت ( خالتي) .. هتا آنا توهشتك ، توهشت كوشي ..
تخطاها مشا عند لامار عنقها ، الام الثانية بنسبة ليها فحنانتها واهتمامها ، و رتاج علات عينيها فجناااان وبيان ..
رتاج : ويييينووو ويييييينوووو مرحححبااا ببيااان مرحباا مرحباااااا بحبيبة دياااالي اووووول مرة فالمغغغغرب اول مررررة فدااارررر عائلتها ....
جرات لعند بيان هزاتها عليها و مدات وجهها لجنان كتسلم عليها وجنان كترد بلباااقة
رتاح : مررحبا بيك اجناااان ... ( كتبوس فبيان ) يخلي ليااااا هاااااد الزين هاااد الجمال هدااااا .. هاد الكتكوووتة اول مجيتها لعندنا ....
لامار : ( شافتها ) بيااااااان ... اش هاااد الزين لي نور ليناا الداااار هااا !!! ... عطييها ليا عطيها ليا ....توحشنا لي بيبي ...
مجات فين تشدها تاكانت تلاحت قدس ، كلهم شدو فبيان نساو زياد وجناااان ... دابا جات لي تدي معزتهم ... يونس قرب للجليسة لي كانو فيها الدراري واقفين تاهوما بترحيييب لعمهم ... سلم على الجمييع بعناق حااارر مشتاق ليهم كايعنكش فيهم مزال كايشوفهم صغار فعينيه .... هو يشوف خارجين سفيان واسد للجردة .. مايكدبش انه فهاد اللحظة تضاعفو نبضاتو .... وهو كيشوف لجوج وجوه لي من الركاااائز دحياتو رغم ان واحد ناقص ... ضحك من قلبو وتاهوما فرحو لمجيتو، مكيحسو براسهم تاهما مكتملين حتى كيجي هو ......
كأنهم اسود ! عناااق الاسود تماما فالعرين ... عناق كولو فحووولة ورائحة الرجولة كتشم من بعيييد .. اما النساء صوت مرتفع بعيد جيهة الطمووبيلات ، اصوات رقااااق كتغزل ببيااان و اصوات الترحيب والاستقبال ... رقية شادة تسبيحها وكتشوف فيهم وتحمد الله على هاد اللمة ...
هازة قسم بيان لي شاداها قدس من اليديدة ديالها كاتبوس ....و اريج مخشية وسط سارة ولامار وحياة ورتاج توحشاتهم و توحشات نميمتهم ، و زياد شاد فيد مرتو داخلييين ....
زياد غير شاف عند لوؤي و سلطان وجود وضحك .... طالما كانو المشاغبين دالعائلة فاش كيتلاقاو تفكر هبالو و مراهقتو ونزواتو ملي شافهم .... كان لوؤي فالمقدمة عنقو بحرارة ثم جود ثم السطان ... ثم الولاد الصغار فيصل وانس .. بانتليه آية وهبط عندها عنقها كيرون فشعرها
زياد : ( بالانجليزي ) هاد الزيييين والو مايخليش لينا حقنا زعما .... ديتيه للاسماعيليين كامل
اية : ( كضحك بانجليزي تاهي ) توووحشنااااكم اخويا والله .. عطييييني بيااااان عطيني
زياد وقف وعطاتها ليه قسم لي سمعاتها و حطها عندها على رجليها وبيان غير كاتشوف وتضحك هادئة ومُحبة ومولفة اليدين واية كتلعب معاها قرب زياد عند ماجدة تاهي سلم عليها بعناااق .... ثم التفت عند عمااامو .... لي فوق مشاف فوجوههم كايحس بالفخررر ويشم فيهم ريحة النسل والاصل النقي وشاف عند عمو اسد لي كان مساندو فجميع خطوات حيااااتوو وقرايتو كاملة والشخص لي فين مايوحل يصوني عليه .... هز سفيان بيان عندو لي مشات من يدو ليد أسد ، كلهم توحشو الولاد الصغار وبيان اول حفيذ لنسل الاسماعيلي ... محبوبة الكل
لامار : والو ازيااااد ماداها فيك حد دابا ، بيان دات كولشي ...
زياد : ههههه ياااا ، نساااوني كاع ههه ...
اجواء الترحيب والعناق مابغاتش تسالي عندهم حتى نزل مروان و الحاج تاهوما انضمو ... جلسو جلسة عاااائلية كلهم ، لي ماشي بزاف ووصل عليهم عمران تاهو .... الجردة ولات تتهز بالهضرة و الضحكااااات وبيان منشطة ليهم الجو كامل من يد ليد كاع مكتطلق ... جنان جالسة ومزال كتحس بالحشمة وانها مزال ماطلقات معاهم غير كتشوف فيهم وتتبسم وهوما مكيسكتوش من الهضرة خصووصا النساااء اما حتى الرجال والولاد صوتهم منخفض .... حتى نطقات رتاج لي عاد ردات لبال
رتاج : اجييييو .... فييين اياااد !!!
لامار : وانا كنقول شكون ناقص
يونس : اياد ماقطعش معانا لكازا ... گاليك بغا يمشي ديريكت لفاس شي صاحبو عندو حفل التوقيع ، غدا ان شاء الله يكون هنا
رتاج : ومزاااال هاد البلية دالكتوبا مابغات تحيد منو
اريج : خاصك تشوفي المكتبة لي دار ليا فالدار ، عرفتي فين كانت عندي صال امونجي لي كانت حدا جردة عقلتي
رتاج : ايييه
اريك : داك البلاصة هو دارها مكككتبة
رتاج : اويلي ههه كبر من دالجامعة هههههه
عمران : بالعكس القراية راه شي حاااجة زويينة ، احسن ونيس للانسان هو كتابو ، ااش بغيتو تبلا ليكم بالكتوبا حسن من شي حاجة اخرى
رتاح : عندك الحق ، تووحشششتو .. كون غا جا ديريكت ... ( سمعات تيليفونها كيصوني ) هدا عدنان ... غايكون بغا يعرف واش وصلتو .. سمحو لياااا (ناضت تتكلم )
يونس : قولي ليييه ابلاااااتي عليك .... تااااتجي
رتاج : هههه واااخا .....
لؤوي وزياد وسلطان كانو كايتحدثو من غير جود لي مزال حاس بالغرابة لانه من اخر حادثة لي فقد فيها جزء من ذاكرتو شاف زياد غير جوج مرات مزال مكافيينش باش يتعود عليه كابن عم بعد مانسااااه ... كيعقل عليه انه مراهق صغير فقط صعيب يتعود عليه انه شاب كبير وأب .....
مروان كذالك عين معاهم وعين فالتيليفون كيعاود لبيلي على الاجواء وقدس غير السلفيات كل مرة تصور مع واحد وتصور العائلة ...
فرحانين بهاد اللمة وقسم كتلعب مع بيااان هي وآية وماجدة .. قسم نساااات كولشي وسط هاد الهاراج كاااامل .....
الخادمات بداو يفرقو الضيافة من جديد .. هاد النهار كان عالمي للترحاب .....
ماحسوش بالوقت تاكانت العشرة دليل هوما باقيين فعبارات الاشتياق و كيعاودو لبعضياتهم الاخبار لي فاتوهم .....
العاشرة والنصف
∆مدينة فاس ....
وصلات سيارة اودي اخر موديلاتها ... رمادية براقة رباعية الدفع ...
كانت فيلا ابوابها مفتوحة و سيارات كتاااار محطوطين تما ... فالباب كانت لافتة الكتاب لي كيتوقع لداخل .....
المؤلف فضل انه يعقد حفل التوقيع فحديقة الفيلا ديالو ....
كان الضلام وضو خفيف جاي من داخل ضارب فعينيه ... عينين شرسييين وبؤبؤ بني كيف لون القهوة محصن بين رمووش كثيييفة كرموش الحيوانات البرية .... لحية مرتبة وبشرة برونزية ،حجبان غلاض مقرونين .... من ملامحو كيبان انه شخص غاضب او معصب ، لكن هو شخص عاااادي ، فقط ملامحو لي ديما معصبين .... كانت سيجارة فجنب فمو ...جبد منها اخر جبدة وحيدها من فمو ظارها فالمكان المخصص بالسجائر ..ويدو كتمشط على لحيتو ....حركاتو ثقال وكلهم كاريزما ، باقي فالسيارة شاد على الفولون وكيشوف فالسيارات المصافين لداخل ، كايقول واش يتراجع ! من ديما كايكره االاماكن المكتضة لانه غير اجتماعي بالمرة ، لكن الصديق ديالو مقرب ليه حشومة يرفض العراضة المُلِّحة لي دار ليه وانه اصلا عقد فهاد النهار بالضبط و أجل فقط انه عارف مغايجي لمغرب تالهاد النهار .... باقي فالتررد ديالو سمع تيليفونو كيصوني هو يشوفو رقم صاحبو ... تنهد وردو للجيب بدون مايرد لانه صافي وصل ....
حل الباب ونزل .... شاااب طوييل ولي شاف فملامحو مايقولش انه اخ توأم لزياد !!!! ملامحهم بعاااد على بعضياتهم رغم التشابه الى ان ملامح اياد اكثر حدة وحاجبو طالع وعيون كيف الصقر ، اما زياد بشووووش وحنين واخد ملامح الاب ديالو .... كان بسروال اسود و شوميز سوداء تاهي وفيست فنفس الون ... لباس رسمي يوالم هاد الحفل .. طلع صدرو ورخاه ورخف فيه النفس ، داير يدو فجيبو وزاد كيشوف مع الارجاء وقف مدة طويلة قدام لافيش شاف غلاف الكتاب مفتاخر بصديقو .... ورجع تقدم دخل .. فور ماوصل لحديقة شافو صديقو وتبسم باتجااااهو والكل ضار بعينيه كيشوف شكون هادا لي داخل !!! كان خاطف لاضواء بالكاريزما ديالو ....
كانو هارب من البراري بملامح خشنة كلها رجولة وفحولة و اللون البني الطاغي على ملامحو وشعرو ، وعينيه زادوه حدة وشرااااسة ......
هاديك الحفلة و هاديك الحديقة ماكانوش كافيين باش يستوعبو رجل بحالو ... بهاديك الوقفة و الكاريزما كلها ...
العيون كلها عليه و سرعان ما بداو كيتهامسو .... اللي عرفوه كيهمسو للناس اللي ماعرفوهش ... والاغلبية تعرف عليه لانه الحفل كايضم غير التجار و رجال الاعمال لي متبعين اخبار بعضياتهم ..... و كلهم حتى واحد فيهم ماكان متوقع يشوف إياد الإسماعيلي تماك فهاداك الحفل ديال التوقيع ...!! وسؤال كايتلاج بيناتهم " محمد فين كايعرف ولد الاسماعليين ؟ "
ابتسامة صغيرة بزاف هادئة ترسمات على وجهو بالكاد كاتسمى ابتسامة لانه واضح كايشوفها غير هو ..... كيشوف فمحمد صاحبو جاي لعندو باش يستقبلو بابتسامة فرحة واسعة مبينة سنانو ...
قرب منو عنقو بحرارة كيرحب بيه ... من بعد بعّد و شاف فيه بعتاب ...
محمد: أصاحبي خلعتيني كنصوني و نعاود قلت هادا صافي مشا لكازا موحال يحضر !
إياد كان هادئ .. مرزن و صوتو حتى هو بحالو ... كتحس بالحروف الإنجليزية خارجة من فمو أنيقة و فخمة ... هو غير واقف و كيهضر بطريقة عادية (بالنسبة ليه) و لكن اللي شافو يحس براسو كيتفرج فشي لقطة من شي فيلم من هوليوود عندو الأوسكار ... ولا شي مسرحية موسيقية انجليزية راقية ...
إياد: (بالإنجليزية) لا ... غير وقع واحد المشكل فالمطار that's all ...
محمد: ماشي مشكل أسي إياد ... أنك تتعطل و تحضر حسن من أنك ماتجيش .. أجي معايا راه الوالدة من قبيلة كتتسنى و تسول عليك ...
مشا معاه دايز من وسط الناس و العيون كلها عليه ... ملامح وجهو مكيشوفوهاش كل يوم و فأي بلاصة ... كان بحال الهدية اللي كتجي بلا مناسبة فيوم عادي و كتخلي الشخص اللي خداها بصح يتفاجئ حيت ماكانش متوقعها نهائيا ... ماشي كل ليلة غادي يحضرو لحفل توقيع و يلقاو فيه إياد الإسماعيلي .. !!
وقف معاه ورا واحد السيدة عاطياهم بالظهر بفستان بلومارين قصير حد الركبة و كمايمو قصار ... شعرها قصير أسود و لابسة كعب عالي كحل و منسجمة فالحديث مع واحد البنت ...
محمد: (حط يدو على كتفها) الحاجة ... شوفي شكون جا ...
استأذنت من البنت و ضارت عند ولدها بابتسامة و غير شافت إياد ابتسامتها توسعات و هزات حجبانها ...
هدى: مرررحباااا ، مرحبا بيك اوولدي
هدى كانت امرأة خمسينية عصرية ... الشعر مصبوغ و مهلية فالحالة كتنافس الأربعينيات و الثلاثينيات فالجمال و الأناقة ... وجهها بيض و عينيها عسليين ... حاطة ميكاب كيناسب عمرها و لون بشرتها الفاتح مخليها تبان أنيقة و هادئة و زوينة ...
محمد: اييه .. (شاف فإياد) الوالدة راه من أكبر المعجبات بماماك و المجموعات ديالها و تصاميمها .. و من نهار سمعات بلي نتا لي لهمتيني فهاد الكتاب و هي كتوصيني باش نجيبك لهنا و تتعرف عليك ... (رجع شاف فماماه) هو راه ماغاديش يعرف يهضر معاك بالداريجة ... و لكن راه كيفهمها ....
إياد: (مدو سلم عليها بنفس الإبتسامة الخفيفة و هضر بالثقالة) It's a pleasure to meet you ma'am ... (شرف ليا نتلاقاك أمدام) ..
هدى: (بنظرات إعجاب) الشرف ليا أنا مستر إياد ... نهار كبير هادا ملي جيتي لعندنا ... كنت متشوقة نشوفك عن قرب ....
اكتفى بأنه غمض عينيه و أومئ براسو بإمتنان لترحيبها بيه و هضرتها و البشاشة اللي شاف فوجهها...
هدى: (شافت فولدها) ولدي .. جاوباتك؟
محمد: (جبد تيليفونو و رجع اتصل بيها) لا مزال مكتجاوبش ... و لكن ماتخافيش .. غير الزحام فالطريق اللي غايكون عطلها ...
شاف فإياد و ابتسم باغي يطمن ماماه و مايبينش ليها بلي راه خايف باش حتى هي ترتاح ...
محمد: هادي واحد ختي عندها واحد العادة خايبة .. ديما كتجي معطلة باش تسرق من خوها الأضواء ... (ضحكات هدى بشوية و هو كمل) و لكن اليوم ماغاديش تنجح ليها الخطة ... جا قبل منها إياد و خدا الإهتمام كامل ...
هدى : ولدي اياد ، حسب راسك فداركم ... متنساش توصل سلامي ومحبتي الخالصة للعائلة كاملة ، بالخصوص السيدة اريج الباني ، فخورة بالفاسية ديالنا لي مشرفانا فكندا .....
اياد حدو وما ليها براسو بمعنى يوصل سلامك ...بقاو واقفين تماك كيهضرو بثلاثة ... معظم الحديث كان من هدى و محمد و هو غير كيسمع و الأجوبة ديالو كلها مختصرة او بالايماءات ... هاكاك شخصيتو ... انسان كيسمع كثر مكيهضر .. خصوصا فالمواضيع اللي مكتهموش ... كيلقى راسو كيجاوب غير بكلمة ايلا كان السؤال موجه ليه ... و إلا غادي يبقى غير كيسمع و كيشوف ... مكيقلقوش الصمت و مكيخافش منو ... كيآمن بقوة الصمت و بأنه أقوى من الكلام و كثرة الهضرة الخاوية ...
و هاد العادة ديال الصمت كسباتو عادات اخرى .. بحال أنه يفهم حركات الإنسان و يعرف يقراهم ... يفهم ايمتا كيكون الانسان بصح متوتر ولا مشوش ولا خايف واخا مايبغيش يبين ...
لاحظ بلي محمد مرة مرة كيشوف فشاشة تيليفونو مشوش و لكن ماباغيش يبين ... و لكن ماعلقش على الموضوع نهائيا حيت مكيهموش ... ااه ربما كان ختو !! .....
بعد دقائق
خارج الفيلا
وصلات سيارة رنج روفر سوداء كتلمع وقفات قدام الفيلا ...
تقدم الحارس بخطوات سريعة حيت السيارة كيعرفها ... مد يدو حل الباب و تحنى شوية لاستقبالها ... حطات كعبها العالي الأسود على الأرض أولا عاد خرجات كلها ...
فستان أسود حد الركبة مزير ملتحم بتفاصيل جسمها من فوقو ڤيست فنفس اللون ... بحالا كتغطي تفاصيل جسمها اللي فضحها هاداك الفستان ... شعرها القمحي الفاتح سلس و أملس نازل على ظهرها و شوية من كتافها ...
أكثر حاجة كانت كتلفت الإنتباه فوجهها كانو عينيها الخضرين ... لونهم كان مميز بزاف ... بحال جوج كرات من مثلجات الشوكولا بالنعناع ... وسط وجهها الأبيض الصغير ...
بهادوك العيون الفاتنة شافت فمدخل الفيلا و زمات شفايفها الحومر ثواني بتفكير ... مدات الكونطاكت للحارس و تقدمات ... كتتمشى بهدوء و أناقة و كاريزما ... عيونها ربيع بينما شعرها حصاد ... كيتحرك مع خطواتها و يتمايل بحال حقول القمح الذهبية ...
رفعات يدها و حركات خصلات شعرها للخلف و لمعت قلادة ذهبية رقيقة فعنقها ... قلادة من تصميمها هي ليها هي ... هدية قدماتها لراسها .. قلادة مميزة غادي تلبسها غير هي دون باقي النساء ...
وقفات فالمدخل ديال الحديقة كتشوف فالحفلة و كتقلب على خوها و ماماها بعينيها وسط الحضور ... وقفو عينيها على واحد الجسد عاطيها بالظهر واقف على مكتبة الكتب الكبيرة اللي محطوطة فالجانب الآخر من المسبح ... لي كانت عامرة بالنسخة دالكتاب لي تنشر ...
واقف تماك بوحدو بعيد على الناس ... غير من ظهرو و كتافو و طولتو و وقفتو هي عرفاتو ...
ابتسامة جانبية ترسمات على وجهها و ضيقات عينيها شوية عليه بحالا غادي تعنقو بشفارها ولا تحبسو فعينيها ... و همسات بصوت منخفض كتسمعو غير هي و راسها ...
- إياد الإسماعيلي ... والله الى جا !!!!! ... ( بفرحة ) منتسالكش امحمد ....
اياد استغل الفرصة أن هدى انشغلت مع بعض الضيوف ديالها و محمد مع واحد الصحفي ... و هرب لهاديك المكتبة الوحيدة اللي تماك باغي ينفرد براسو شوية و يهرب من ضجيج الناس ...
وقف قدام هادوك النسخ من الرواية الجديدة اللي على قبلها تدار هاداك الحفل ... مد يدو كيدوز صبعو على حواف الغلاف بشوية ... مافاهمش علاش الحفل تدار للرواية و الرواية مهجورة فهاداك الركن ؟ واش ماشي المفروض تكون هي سيدة الحفل ؟ واش ماشي من المفروض هاديك الجهة هي الي تكون عامرة بالضيوف و الصحافة ؟
بحال شي عروسة جالسة بوحدها فركن مظلم فقاعة العرس اللي من المفروض يكون ديالها ..
حل اول صفحة لي كانت " اهداء " هو يعلي حجبانو ، كانو اسمو بالخط العريض !! تنهد .. لانه اصر باش محمد مايدكروش ... ومع دلك كتب سميتو مع قائمة الناس لي لهموه فهاد الرواية ...
قاطع جلستو مع داك الكتاب صوت كعب عالي و صوت أنثوي ناضج كيقرب منو من اللور بهدوء و ببطئ ... وببارفان غااالي ، و هو بقى واقف على نفس الحركة و عينيه على الغلاف كيسمع ليها و لكلامها بلاما يدور ...
- سنة و ثمانية الأشهر من الإنقطاع على العائلة و الأصدقاء ... شهور طويلة من الإنعزال و الوحدة و صراع الذات باش يخترع هادوك الشخصيات و يصنع هادوك الأحداث حتى كملها ... ضيع سنة و ثمانية أشهر من حياتو الثمينة باش يكتب رواية ممكن تنجح و ممكن لا ... رواية تتحط هنا ومايعريها تاحد الاهتمام ! اه .. هو حفل توقيع الكتاب ... ولكن كانشوف حفل تةقيع صفقات وتعارف .... رهان غبي فاشل خاسر فكل الحالات ... ايلا فشلات خسارة ... و حتى ايلا نجحات حتى حاجة ماغادي ترجع ليه هاداك الوقت الي ضيع باش يكتبها .... محمد مكيعرفش يستغل الوقت مزيان ...
وقفات جنبو مع آخر كلمة نطقات ... هز عينيه بفضول هادئ باش يشوف منين خارجة هاد الهضرة و تلاقاو بعينيها ... القهوة الساخنة و مثلجات الشوكولا بالنعناع ... الملامح الرجولية الخشنة التقت بملامح أنثوية رقيقة ...
- واش كتشوف بلي هاد المأساة كتستاهل يحتفلو بيها و يفرحو بيها هاكا ؟ بالنسبة ليا حنا خاصنا نديرو جنازة و نوقفو وقفة صمت حزنا على كل دقيقة فقيدة ضاعت باش تكمل هاد الرواية و تخرج تشوف النور ...
ماكانش عارف على شنو خاصو يركز ؟
على كلامها و يجاوبها ... ولا على عينيها و يمارس عليهم الهواية ديالو الثانية و هي التأمل ؟
عيونها بوحدهم كانو خاصينهم سوايع ديال التفكير العميق باش يقدر يولفهم و يركز على شي حاجة من غيرهم ...
شاف فالرواية كأنه كياخذ فاصل يراجع فيه نفسو و يرجع لعقلو ... عاود هز راسو شاف فيها و هضر بنفس الهدوء و الرزانة و الثقالة و الانجليزية اللي كتخرج من فمو بلكنة خاصة ...
إياد: الكتّاب غرباء الأطوار ... كيعجبهم يحتفلو بالمآسي و يديرو جنائز للأفراح ...تايصنعو من الشئ لاشئ ومن اللاشئ شئ .... وفالاخير هوما تايصنعو ليك فاش تشدي الثرثرة ! ..
- (رفعات وحدة من زوايا فمها بابتسامة جانبية بإعجاب بانسجامو معاها فالحوار و كملات معاه و لكن هاد المرة بالإنجليزية) غرباء الأطوار .. و كذابين محبوبين ...
هزات نسخة من الرواية شافت فيها لثواني و رجعات كتشوف فيه ....
- إيلا قريتيها غادي تظن بلي الكاتب مجرب الحب و لوعة الفراق ... بلي حب شحال من مرة و تفارق شحال من مرة و تعذب و بكى فسبيل الحب ... و في الواقع ... هو ماعمرو فحياتو كلها ماكان حبيب ... عمرو عرف اصلا شنو هو الحب وماعندو تاوحدة فحياتو (سكتات شوية و عينيها لعينيه) هوما كيحتفلو بالمآسي و حنا بالكدوب !!! ...
إياد: و مايشفعش ليهم عندك "الخيال" ؟
زمات شفايفها بتفكير لثواني و هو استغل صمتها مراقب عينيها .. رجعات الرواية لبلاصتها و كملات ا بتسامتها
- ماغاديش يبدل رأيي بأن كتابة الروايات و قرايتها ضياع للوقت ...
إياد: و شنو كتدير lady (سيدة) مكتهتمش بالروايات و الكتاب فحفل توقيع لرواية ؟
تسمع صوت موراهم ...
محمد: جات تدعم خوها ...
حيد عينيه من عينيها و شاف فمحمد اللي كيقرب لعندهم و كيشوف فيها ...
محمد: و شنو غايوقع فالكون ايلا جاوبتي على التيليفون ؟
- (عينيها على إياد) كنبغي نركز على حاجة وحدة و ماشي جوج ... (شافت فخوها) كنت كنسوق ...
محمد: (حط يديه على كتافها و شاف فإياد) كنقدم ليك صاحبة عقدة الـVIP ... اللي قلت ليك كتبغي تسرق مني الأضواء ..
- ( مدات يديها الرقيقة لمزينة بخاتم ماسي ) سجى ... سجى بنجلون ...
اياد نزل عينيه ليديها وسلم عليها تاهو وتلاقات يد شرسة قوية مع يد رقيقة انثوية ، كون ماخطفش يدو مكانش عندها مشكل تبقى مصافحاه حتى مئة سنة ....
محمد : سجى ختي ... مصممة مجوهرات .... (شاف فسجى) و نتي إياد را كتعرفيه ...
سجى: (شافت عندو بعيون كايلتهموه ) أكيد .. و شكون مكيعرفوش؟
محمد: و لكن تبارك الله عليك ... غير فهاد الدقيقة خليتيه يهضر كثر ما هضر فالحفلة ملي وصل ...
ربعات يديها غير كتشوف فإياد بلاما تجاوب ....
محمد جرهم معاه لوسط الحضور تاني ... إياد فيدو كأس كيشرب منو و غير ساكت كيسمع للناس اللي معاه ... و سجى بعدما مشات مع ماماها و سلمات على الضيوف اللي كتعرف رجعات باش توقف حدا المكتبة فين كانو فالأول ... واقفة تماك و مراقباه من بعيد ... كل حركة صغيرة صدرات منو و كل تفصيل ... إياد فالواقع كان مختلف على إياد اللي كانت كتشوف غير خلف الشاشات وفالتصاور ... الصورة ديالو على الزاج مافيهاش هاديك الريحة و مكتتحركش بهاديك الطريقة ... الزاج ديال الشاشة كيبرد عينيه و يطفي لمعتهم ... كيظلم وسامتو و الكاريزما ديالو و صوتو و كلشي فيه ...
استمرت الحفلة هاكاك ...
و وقفو بثلاثة فالأخير قريب للسيارة ديالو باش يودعوه ... مد يدو و سلم على هدى بلباقة ...
هدى : ماااااسخيناش بيك اولدي ، كون غير زدتي معانا ليوم ... مزال متعرفناش عليك ... ومزال بغينا نعرفوك بفاس .....
إياد: مرة اخرى ....
هدى : واعندي المرة الجاية الى جيتي لفاس بدا بينا حنا الاولين ...
اياد : واخا ...
هدى : هههه لي يشوفك مايقولش ماماك فاسية ، حنا فينا الهضرة بزاف ههه
اياد بانت ضحكة غير على عينيه اما فمو متحركش ، عينيه فقط لي تجبدو بعض الشيء و سجى كاتشوف فكل تفاصيلو ومراقباه ....
من ديما و هي مهوسة بالعائلة كلها ، ولكن هو كان كاببان ليها المختلف بينهم ، انسانة بحالها عزاز عليها الناس لي كايكونو كاريزما وغريبين الاطوار ... بحال اياد تماما ...
نظراتو فالصور العائلية و اجوبتو للصحافة ... حبو للقراءة والثقافة ... تكلمو بكثير من اللغات ، كايخليوها تشوفو بحال شي نجم فاعالي السماء وكنية الاسماعيلي زايداه هبة فوق هبة ... منهار خبرهم محمد انه تلاقاه فاحدى الندوات فامريكا وانه شخص متواضع وكايحب القراءة وانه لهمو ببزاف دللافكار ، وهي كتنسى الفرصة لي غاتشوفو مباشرة .... 4 سنوات انتظار ، ثم تحقق حلمها ليوم ....
هدى: مرحبا بيك فأي وقت مستر إياد ... الدار دارك ، غاتشرفنا ... نعاود نأكد عليك باش توصل سلامي للعائلة كلها ....
شاف فسجى و مد ليها يديه كيسلم عليها ... ماهضرش گاع معاها ... حوارهم حدا المكتبة كان كافي و قال فيه بزاف ... مابقى بيناتهم مايتقال بالنسبة ليه ... سلام جد جد عادي بنسبة ليه مصافحة ايادي لا غير ، لكنه كان كايعني ليها الكثير ....
محمد: (كيسلم عليه) واش ماتقدرش تزيد غير نهار هنا ففاس؟ غدا تجي لعندنا تتغدا معانا و سير فلعشية ...
إياد: مانقدرش ... راني مضيع نهار فنظر العائلة ... خصني نمشي لكازا ....
سجى: سويعات قلال ماغادي يديو مايجيبو ... علاش متكلسش ؟ .... هم !
إياد: (شاف فيها و نطق بلغة جنتلمانية) because family above all ...
سجى حدها حدرات راسها باقتناع ، فنفس الوقت ماساخياش !! سير فين غاتلاقا معاه مزال .. ولكن غير مجرد سماعها انه العطلة ديالو مزال مطولة فالمغرب رتاحت ، على الاقل راهم فبلاد وحدة ....
مشا معاه محمد حتى للسيارة ديالو وهي وهدى فالباب كايشوفو من بعيد ...
هدى : تبارك الله .... بحال شي سبع ، عاد فهمت علاش الصحافة كايعيطو ليهم الاشبال
سجى : ( باعجاب متبعاه ) مممم ... بحالو تماما .....
ركب اياد فطموبيل ، وعطا الضو لهدى بمعنى بسلامة ورجع مارشاريار مشا ..
شد طريق ديريكت لوطيل باش يفيق بكري يمشي لكازا ....
اما العائلة الاسماعيلية دوزو عشاهم بالضحك و الجو الحميمي الدافئ ....
كتحس بجدران القصر تاهوما فرحانين ! الاضواء والجردة و لابيسين والخيول ومواج البحر ... كولشي فرحان ... القصر الاسماعيلي مكايولي عندو معنى حتى كايجمع كاع الخوت وولادهم كاملييين ... قوافي رقية مكيساليوش .. وتنوغيش بيان خالق ليهم الجو .. كتهز من يد ليد خصوصي فيد البنات لي ولاو كيلعبو معاها فالارض كاع ..
سالات قصارتهم فالصالون على فناجل القهوة ورقية والحاج طلعو ينعسو ...
الكل كان مرتاح و أليز ....
من غيرها ...
جالسة على كرسيها وكاتشوف فيه ، كيفاش كايضحك وكيفاش كايهضر ، كيفاش كايبتسم ....
هو علاش معطاهاش وقت ! علاش مكيتكلمش معاها رغم انه كان جالس حداها فطاولة العشاء !!! ... واش حيت هي مقعدة على داك الكرسي مايمكنش تجدب انتباهو او اعجابو .....
فلخر تنهدات ودوات فودن باباها
اية : بابا ... فيا النعاس ، مزال مانمشيو !!
سفيان : دابا ابنتي .... ( شاف فحياة ) حياة ... يلاه
اريج : فييين غااديين !!!!
سفيان : هههه ( كايدوز يدو على لحيتو ) غير قنطنا قلنا نمشو لهوا ... غانمشيو لخيمتنا آلحاجة
اريح : اوييييلي !!! على انا شبعت منكم بعدا .. بقاااو معانا
يونس: هاهي جات تعرض ليك فدارك تاني ....
لامار: قالت الحق ... خليونا مجموووعين ... ياك اية عطلة دابا .. وحياة تاهي ماخداماش غدا ... نتا تتقيل فالخدمة وسلطان مسافر اش غايبقاو يديرو بوحدهم ....
حياة غير تتشوف فسفيان حشمات تقوليه خليني واخا من عينيها باغا وهو بدا يضور فراسو
سفيان : زعما العيااالاااات ..... هاهي معاكم ... انا غانمشي حتال غدا ان شاء الله ....
اريج : غيييير سيير .... دي معاك تا ولدك يونسك
سلطان : الله اودي امرات عمي .... هاهو غاااادي ....
اريج : ( شافت عند زياد ) تمشي معااهم !!!!
رتاج : امالك بديتي تسربي فيهم !!!
يونس : هاديك انا لي عاااارف ليها ....
لامار غير حدرات راسها كضور فعينيها عارفة لبلان .... وغمزو لرتاج عاد فهمات
رتاج : تجيييبو النقااااشة حتى لنهاار لي غااانساافررر انااا !!!! ماااحشمتوووش
سفيان : هااااكداااك
اريج : ( ربعات يدها وشدات على وجهها بيد ) اللقوة ...
اسد.: ( هز يديه بمعنى التسليم ) الله يعاااون .. تصبحو على خير ...
لامار : بيااان اول مرة تجي عندنا ومانديروش ليها حنييينة !!!!!
اسد : ( عاطي بضهرو ماشي فحالو ) يااااااودي شغلك هداك .. ماحدي مكاينش فالدار جيبي لي عجبك .... وباتي عند ولادك .....
لامار : انا مافهماش مالكم مع الحنة ... اسيدي حنا كتعجبنا
سفيان : ياودي بصحة ...( كالبس الفيست ديالو ) قلبو غير فين تنعسو ...
طلع اسد وسفيان وسلطان خرجو لي تاهو فايق بكري مساافر .. ويونس حط فنجالو
يونس : التسليييييم .. هو هذا ، تلاتة دالصباح هادي طلعو ترتاحو ... تصبحو على خير ( شاف عند بيان فيد قسم كتفرج معاهاةفاتيلبفون ) جدو مزااالة حالة داك العوينات متنعسيييش
جنان : لقيتني غانطلعها دابا ... غاتكون عيات وعيّات معاها تالبنات ....
قسم : لا بالعكس ...( وقفاتها عى رجليها ) فنكووووشة ديالي متشبعش منها غانديها ليك
اريج : ياودي البنت د مها ، نتي نبغيوك تجيبيها لينا من داك الكريييشة شي فنيكيشة بحالك ملي كنت صغيرة ....
لامار : لقينا تا بااااه ....
قسم : ( مدات لجنان بيان ) ختي شدي بنتك ... انا غانطلع نعس قبل مايشدو بيا لقصااااارة ... تصبحو على خييير ( طلعات )
لامار : شتي كيكاااديير .....
لوؤي كان جالس بعيد هو وجود فصالون اخر وجا باتجاههم
لوؤي : الوالدة تمشي ولا تبقاي !
رتاج : لا غير سير اولدي ..
لامار : فييين غادي تانتا اويلي نشدوكم بسلاااااسل ، تا طلع تنعس لفوق ...
لوؤي : غدا ان شاء الله نجي ، خاصني نمشي فايق بكري على ود المتحف خاصني نكون قريب للمحمدية ... ماخصنيش نتعطل غدا ....يلاه تصبحو على خييير ....
لعب لبيان فشعرها وخرج تابعو تافيصل ، بقى غير انس ناعس على رجلين ماماه ...
بداو كينساحبو ، اولهم وسيم من بعدو قدس .. وجنان وراجلها وبنتهم طلعو حتى هوما لبيتهم و جود تاهو طلع بحالو .. سارة وعمران كانو مشاو .. بقاو غيبر العيالات على النميمة تاطلع الصباااح عاد طلعو ينعسو .....
يتبع..
التعليقات
لا توجد تعليقات بعد، كن أول من يعلق.