محتوى القصة
فالمكتب ...
قسم : ( شادة عندها فنجانها دالقهوة ) اهاه ... وشنو الكلمة لخرااا زعما من هاشي كامل ؟؟!
اسد : ماعطاوش شي حاجة واضحة ... بمما انه الغلط لول عطاو غير تحذير .... مقالوش غايسحبو الوسام ولكن قالو لاتعاودات المرة جاية يمكن يسحبوه ...
قسم : .... يعني صافي مطلبو والو ؟؟
اسد : كاينة ندوة ... غدا ... باش نسكتو الناس وباش تتبرأ سمعتها من دوك الاشاعات لي طالعين عليها .....
عدنان : هوما أقسم مكرهوش مانديرو والو وتايقييين فينا... علاش كايديرو بحال هااكا .. حيت ماعندهمش غير حنا .. حيتاش الحكم لي كاايتنفد على لوخرين تايتنفد تاعليك .... يعني مايمكنش العائلات لوخرين يشوفو قدس وقع ليها هادشي ومتسحبش منها وسام وهوما سحبوه منهم فشي موقف ....غايشكو فالمصداقية دالبروتوكول ... وغاتنوض هضرة كتيييرة ... القانون فوق كولشي ، وكايبغي الادلة ماشي غير تهضر معاه فتيليفون وتبرر ليه، تايقولك حنا تايقين والرأي العام تاهو خصو يتيق ... يعني دابا ملي حشمو وتساااهلووو شوية وعطاو غي تحذير .. دونك ضروري تخرجو للصحافة بندوة صحافية توضحو فيها ان البنت كانت مظلومة .... وان هادشي لي تقال عليها ماشي صحيح ونصصححو هاد الاخبار لي تنشرات عليها .. باش يسكتوو .. وعلى الله مايطولش هادشي باش مايتاخدوش شي اجراء اخر ...
اسد : غدا نيت فصباح غادي تمشي ديريها نتي ... جود غدا عندو رونديفو مع القنصلية ... سيري نتي راه قلتها لصفاء تقادها ليك فالبروغرام ... ردي الاعتبار لختك ورجعي ...
قسم : واخا ماعنديش مشكل ، ولكن ماشي من الصحيح تخرج معايا تاهي للناس ؟؟
سفيان : من الاحسن بلاش ... هي باقي متأثرة بلي واقع ليها واخا تشوفيها مهدنة يقدرو يطرحو عليها سؤال مايعجبهاش غاتجاوب بشي طريقة غاتجبد عليها النحل كتر .... من الاحسسن سيري بوحدك ...
قسم : واخا ( شافت فباباهاا ) السبور ديالها اش درتو فيه ؟؟
سفيان : مشيت عندهم قبيلة ... هضرت مع الكوتش ديالها قال مايمكنش تلعب وغايقلب علا لي يعوضها تا لماتش جاي وتلعبو ... على ماتبرا ..
قسم : اهاه ... وعندهم شي غدا واقلة !
سفيان : تا هوداكشي لي قال ليا ، قالك خصها تحضر على حساب التغطية الصحافية دالمباراة غاتكون ورا داك الغدا ... وغاتكون ندوة ... انا هضرت معاه باش متحضرش ليها ... باش متحولش الأسئلة لحياتها الشخصية ... ونهار الماتش قالك ضروري تكون مع الجمهور باش مايتلاحظش غيابها . ..
قسم: نهار المااتش نمشيو معاها كاملين انا وماما وجود وتا بابا الى كان مسالي باش يعرفوها انو معاها عائلتها ومايبقاوش يتفلسفو بززاف .... واش دويتي مع الكوتش السعيدي ؟
سفيان : اه .. داك لي غليض شوية و صلع ...
قسم : ااه هوو لي كاياخد القرارات ، لوخرين كايكونو غير مساعددين و لي كوتش دليشووفمون ... السعيدي هو الكوتش اوفيسيال ديالها ... يعني مادام قال بحال هاكا .. يعني صعيييب تلعب ....
سفيان : اه ، ملي دخلت للعند المدير ، عيط ليه هو ، هو لي جا عندنا ....وراه باينة صعيب تلعب ، واخاا كون بغااو هوما حنا منخليوهاش ...
عدنان : ( حس باسد تزير ) ودابا بدلووو علينا هاد الموضووووع .....صاافي ، راسنااااا ضرنا . .
قسم : ( حطات فنجانها ) واايه اعمي ، والله راسنا تتقب ... مهم ( وقفات ) انخرج نكلس شوية مع اسبرو توحشتو ....
حركو ليها راسهم وهي خرجات .... وعدنان حط فنجانو كايشوف فاسد لي محني كايشوف فشي وراق مهبط نظاظر على نيفو ..
عدنان : اسد
اسد : امم ..
عدنان : مزال كنتسنى نعرف شكون داك السيد ؟
سفيان : اينا سيد ! الصحافي ؟
عدنان : لا ...لي شد الصحافي !
سفيان : كيفاش ؟؟
اسد : ( تنهد وسد داك الملف وحيد نضاضر حطهم وشاف فيهم ) وليييتو قبح من العيااالاااات ...
عدنان : ونتا لي مخبي على خوتك بنادم كاتعرفو ... هادو ماشي خصايل لعيالات !!!
فالخارج ....
مربع اسبروو رجليه على لفوطوي .. على يمينو حياة وعلى شمالو رتاج وقدامو قسم ولامار وقدس ناعسة فالفوتوي فجنبهم كتاكل من الشوكولا لي باقاا ليها من لي جاب أصيل وتتفرج فيهم ضاحكة عليهم وعلى الموقف لي محطوطة فيه قسم ....
اسبرو : ( مصغر عينيه ) اهااااه ، يعععني .... صافي ختو دابا غااااتقرااا ؟؟؟
قسم : اه ... كدوز باك ليبر دابا
اسبرو : اوا .... صافي يعني اش خصك ديري راه درتيييييه ... قنعتيه ترجع تقرا ....وهو رجعها ... اش وصلناااا حنااااا تايطنطن رااااااسي فسااانسوورااات ؟؟؟
قسم: ( شافت لفوق كتنهد ورجعات شافت فيه ) فالوقيتة لي كانقنعو بالقراية دختو .... لقينا راسنا تقربنا انا وياه !
اسبرو : وبحالااااش هاد القرب مثلااا !!!!! ( مصغر عينيه) تاااالفيييين قرب كااااع همم !!!!! رااااه كنعرفكوم يااااا ولااااد لامار !!!
حياة : سسسعيد !!!!
لامار : ماااالها لاماار ؟؟
اسبرو : سكتي نتي .. فين قررررب كاااع ؟؟
قسم : اسبروو ... راه قتليييك تقاربناا حنا ... اش غايقرب يهديك الله ... !!
اسبرو : ( مصغر فيها عينيه ) هممممم .... لا لا ... ماااامتاااافقش .... لاااااا ... هادشي مااعجبنيييش ...
قدس : هادي لاتبعتوها غاتبقى عليكم هنا نهار كامل كتعاود ليكم على ختو وحومتو ... والله لا عاودات ليكم عليه شي حاجة حيت راها مضااااارية معاه .... نهار عاودات لينا حنا كانت كتهضر بيديها ورجليهاااا ... كانبغييه اماماا كنبغيييييه ....
قسم : وراه دبصح ... دابا راه مابقاش عندي اصلا علاش غانقول هادشي ... حيت كانت غير علاقة ودابا سااالااااات !
اسبرو : ( شاف فيها وشاف فقدس ) علاش ضاربو !
قدس : كاتسنى تعاود لينا علاش ضاربو ؟ هههه حلمم ..هي كتعاود غا لبابا...
اسبرو : لا لا لا .... انااااا مااامتفااقش .... ماعحبنيش .. صوووڤاج وكااا( تفكر ملي وصاه اسد مكايقول والو ) مهمم صوووڤاااااج وحنا مناقسينهمش فهاد العائلة ....
رتاج : انا مزال مافهمت والو ... اول مرة فتسعود وعشرين عام كلها ....اول نرة هاد البنت كنسمعها تعرفات على شي حد .... كيفاش هادشي غايسالي دغيا مايمكنش نتي هاد المدة كاملة وونت كتختاري ومحفظة باش مادخلي فتا علاقة .. ونهار دخلتي فيها غاتسالي قبل ماتبدا كاع !!!!
حياة : دابا واش سالات نيشان ولا غي مخاصمين ؟؟؟!
لامار : سمعي ليا انا .. هادي راه غاتتخربق ... نهار عرفات هاد ولد الناس قالتهاا لباباها ....
اسبروو : ويلي ويلي ويلي ... ماااااامتافقش
لامار : وهي راك عارفها كيدايرة مع باباها ... ناض اسد كاتعرفوه ناض قلب عليه شكون هو كااايصدق ولد صاااحبو دشحال هادي ( رتاج هزات حجبانها هي وحياة ) وجد هاد الولد هادا هو الرااايس لي دوز عندو اسد العسكرية والرايس لي سما اسد الرووكان ...
اسبرو : ( انتفض ) لا لا لا صافي اتااافقت ... متاااااافق ... صافي هدا ولد الناس هدااااا ، دخل لخااااطري دغيا سبحان الله .. لا لا هادشي ملي داخل فيه سي اسد ... لا ....منقدر نقول تا كلمة واخا تقولي ليا دابا يهودي نقولك نطهرو ليه ... واخا تقولي ليا كاااانيبال نعطيه يدي ياااكلها هاااانية ... بالهناء و الشفاء ( رجع لور ) الروكان داخل فالمعمعة .... انا منزييييييد غا الصلاة على النبي ....(وسع عينيه وشاف قسم) عنداك يمشي يقول لسي اسد راه قلت ليه الواد يديك ؟؟؟؟؟ لعااااار اقسم ديريني سبة وتصالحي معاه على قبل توصيه مااايقولهاش ليه .... غايمشي يشريها ليا معاه وانا يلاه جيت ( قاطعاتو حياة)
حياة : واااااربي سكت شووووية غاانفهموو سكت ... ( شافت فلامار ) اييييوا ......
لامار : مهم .. الولد راه باه ميت ملي كان صغير ، ومو تاهي ماتت. .. عندو غير ختو هو رباها هو مكبرها.. خدام فالمرصى كيف باه و جدو تاهو ولد البحر بحالها .. خدام صياد ...ودابا ملي عرفها (شافت فيها وضرباتها لكتفها ) ملي عرررررف هاااد الدرگة لي دابا كالسة تقوليكم تفارقنا .. شرااا شي ريسطوو قديم وراااه كااايعاودو ... باش يدخل لمجال الاعمال ويتقدم ليها ومايقولوش راجل قسم الاسماااعيلي صيااااد ...
قسم : راجل قسم الاسمااااعيلي !!!!!!!! رااااااجل !!!!
لامار : وماالو ماشي رااااجل ؟
اسبرو : سيييييد رجال ... حفييد رااااايس سييييدي ..
قسم: رااااجل .. غا هووو ماااشي دقسم .. باااقي شريف ..
اسبرو : على هو شريييييف ؟؟؟؟؟( باس يدو ) شااايللااه امووولاي دريييييس .... بهرني ببببهرني .. حبيييتوووو ...
قسم : كنييييتو الشريييف .. ( ربعات يديها كاتشوف للجنب ) اما هو منين جاتو ..
لامار : اوا هادي منهار عرفاتوو وهي موضرة القبلة ... لاضحك ليها ضحك لينا ، خاصم عليها ، تقلب لينا الدار ....
رتاج : وابسييييف ياختي ، غزااااااال .... الوقفة وقفة .. والهضرة هضرة .. والكتااااف كتااااف ...
اسبرو : كتااااااااف ... سوووليني يااااانا نقولييييييك على كتاااافووو ....
قسم : واش بقات فداكشي اخالتي. ... راه العلاقة لي جامعاني بيه صعيييييبة ، وانا ضحييييت فيها بكوولشي ولكن هو مكاايتحناااش ... درت جهدي كااامل .. سيمانة انا وياه فهاد الفواياج للخر فالباطو ، شحاااال وانا نرغب فيه يمشي معايا باش يتقرب من المجتمع ديالي يشوفو كيدااااير باش مايبقاش هاكا كايتخيلنا منعرفت كييييفاش .... سيمااانة كلها وانا هازة ليه الخاطر وهو تاحاجة ماعجباتو.. مكييخرجش من بيييتو .. كنقوليه غيير خرج وضور باش متقنطش انا كنكون فلاكابين تايقوليا هادا ماشي مجتمعي .. مغااانرتاااحش فيه .... كايبقى كالس بوحدو فشي قنيييتة .... ونهار كاع بغينا نرجعو .. جاو داك زمرررر ديال دااااك الفاميلي لي مشاركين مع بابا فالخط داسبانيا .. وكان خاصني نحضر معاهم فاالعشا وقتليه يمشي معايا ، فاللول مابغاش وخليتو على خاطرو .. فلللخر هوووو لي بغا وقاليا نمشي معاك مااابززتش عليه .. ملي لقاني وجدت ليه كوستاار دااار لياااااااا حااااالة .. وانا واش بنتليك غالبس هادشي واش انا بنت ليك غالبس كوستار باش نمشي نتعشا .. نتي بغيتي تشبهيني بهاد المجتمع وانا غير ولد الحوووومة وشي هضررررة كاااتعصب ..وانا نيتي كانت انني ماعالماهش بالعشا قلت نوجد حوايجو حيت مغايكونش جاب معاه .....قلنااا ماشي مشكل. ...لبس حوايجو هو قلت ماااشي مشكل . ملي نزلنا .. راكم عارفين داك العائلة كيدايرة ..
رتاج : ااااه مع نتي تبارك الله شحال من مرة رديييتي ليهم الخطابة دولدهم ...وغايشوفوك مع واحد غاايرحبووو بيه مزيااان ..
قسم : صافي ملي كلسنا نتعشاو بداو كايلوحو الهضرة ويسولو فيه .. انا عارفاه غايجيهم نيشان غايقوليهم انا صياااااد ولد حومة شعبية ..تاداك ريسطو لي كايبني فيه مغايدكروش ... عارفة نفسو كيدايرة وعارفاه كايعتز بالطبقة ديالو ولكن هوما لاااااا غاايحگروه وغايكولوو شي كلام ماهواش .. ونا بغيت نجاوب بلاصتو و قتليهم فالبزنس (حيااة حلات فمها ) وبقى فيه الحااال .. فللخر بدا كايهضر معاهم تاهووو برد ليااا شوية جنوووني .. ولكن جا داك البرهوش دولدهم هو يهضر معاه بلوونگلي بلعاني باش زعما يحرجوو .. ونااا معارفاش واش هووو كايهضر مزيان بيها وقلت ليه دوي بالعربية .... وجاوبهم بلونگلي ووناض مشا غضبان .. ملي تبعتو قالك السيد جرحتوووو ومكانش عليا نجاوب بلاصتو وانا باااااش غااانعرف كايعرف يهضر بيها ؟؟؟ عمرو عاود ليا على مستواه الدراسي ، وقاليك انا لي حگرتو ماشي هوما صافي طلع ليا الدم وتفرتتك هادشي كامل هو شد طريق وانا طرريق . تاجا دابا عند ختي ..
اسبرو : ( كايرمش فيها بعينيه تا هوما كلهم تحت تأثير الاستييعااب دهادشي لي قالت و هو يشوف فلامار ) عارفة علاش نت وبناتك ( مقدرش يخسر الهضرة حدا قدس و قسم هو يحط يدو على مؤخرتو ) عندكم هاااادي كبيرة !!!!!!( كايشوفو فيه باستفهام ) حيت تماااااك فين حاطييين عقلكم ..... ( شاف فقدس ) غا هي هادي حاطة تما العقل و المعدة وكوووولشي جمعاتوو..... ( شاف فقسم ) دابا نتي لي يشوفك فالندوااااات ولي يشوووف قراااايتك ولي يشوفك فالبرااامج يقوول هنا نباااااات ، الذكاااااء والدهاااء من عندك كااايتفرقووو ...جييييتي تاااالحوووب ... ونتي تولي ذبااانة ..داك ذباانة الكحلة لكبييييرة لي كنحلو ليها سرجم فيه جوج ميترو منين تخرج .... و هي كدخل فالحيط !! هاااااااديييك هي نت .... ( حط مخدة على رجليه تكى عليها ) قابك مستوى ... تي اينا مستوى ... يعياااا يولي بنادم لاباس عليه راه تجيه غير لادياااغي تبببهدلوووو .... كللنا كنحطوها بحال بحال فطواليطات ، بحال لي تعشى بالكافيار بحال لي تعشى ب العدس ، الوحيد لي مكايحطهاش بحالنا ، هو لي تعشى بالباربا ....
قسم : ورااااه دبصح هادشي ماااايمكنش نطولو فيه لابقى بداك عقلية ..
حياة : سمحيلي اقسم ، انا مزال مفاهمة والو ولكن فهادشي راه عندو الحق ... منحقوو مايعجبوش هاد المجتمع حيت ماشي ديالو ... ومكانش عليك توريه ناس لي خدامة معاهم تما حيت لاا علاااقة بيك وبحياتك ، هانا مزوجة تمنية وعشرين عام بعمك وعمرو عرف شكون خدام معايا ولا خدمتي كيدااايرة ، مايعرفني انا اش غايدير بخدمتي ! .. هو مغاتزوجش بيهم .. هو خصو يعرفك نت وعائلتك ...
لامار : اودي هادي الفكرة ديالي صرااحة ....قلت يتقرب من العالم ديالها تاعي باش يرتاح ...
اسبرو : ونتي من امتى تاااايديو عليك الناس ؟؟؟؟؟ نت راه كتعرفي ديري كولشي إلا تفكري ...
لامار : عندك الحق اسعييييد ....كاع القرارات لي خديت فحياااااتي كي الخرا ... منها القراااار ديال نجيبك للدار وها انا كنأدي ثمنو ......ماااااكتسكتش ااسبرووو مكاااتسكتش
اسبرو : كون مكننش انا كون راك فرررتكتي داك الداااار شحااال هادي ورجعتي عند الكبيرة جارتكم لي تتبخ على الحلاقم وبوزلوم تخدمي معاها سوكريتيرة تخلصك بحفنة دشريحة والزبيب و الف ريال مكمشة ......اناااااا لي رديييتك الفوووورست ليييدي ... سكككتي ماااتهضضضريش فقصتك ( اشتر لحلقو ) باقا واااقفة لياااا هناااا ...( لامار شادة على راسها وهو شاف فقسم ) كملي نتي ..
قسم : صافي هاااادشي لي وقع ...
رتاج : ماعرفتش ....والله ماعرفت منقول انا ...انا جااني خاص غي شوية دالتفاهمم .... هادشي لي عاودتو عليه دابا زوين ، صدفة زوينة يكون ولد صاحب اسد ...وجدو الرايس ديالو .... يعني الاصل ديالو معروف ...وكايبان ولد مكاافح من هادشي لي قلتو ، ومصوااااب انا راه شفتو متايهزش عينو فينا حنا العيالات وهو كايهضر ، صوتو خفيف فالهضرة متايهضرش بجهد ... كايبان نقي وراجل صراحة ... ولو في ديال كيفاش جا طل على ختك فهاد الظروف واخا مخاااصمين ...كيفاش بقى مع اسبرو واخا سخفااان .. بقى معاه تافاق ومشى بحالو. .. واخا مزال مافهمنا والو فداك البلان ولكن ماعليش دابا نشد عدنان فبيت نعاس بليل راه واحد شوميز دونوي فالكحل يلاه وصلني مزال ماشااافوو.. ولكن نديروو برااااسنا فهمنااااا .... مهم انا من هادشي .؟ كنشوف ماتجيش وتعطي علاقتك دغيا شي قرار ... زيدي تأكدي ... هدا ماشي لعب ، وبحال هاد السيد مغاتلاقايش معاه ديما ...
حياة : قولي ليا .. واش تتبغيه ؟ ولا غي اعجاب ؟؟ .. واش كتحسي برااااسك تتبغيه؟؟ .... نساي دابا خصاااامكم .. وجاااوبني
قسم شافت لطبلة .... كانت كاتشوف فالزواقة الذهبية لي كاينة فالكاس ديال اتاي .... شحال كبااار دوك الاحاسيييس لي كايجيوك ونتا ساااهي فشي حاجة صغيييرة !!!! بحال زواقة دالكاس ...
بلا خاطرها ، بلا متخمم لقات ابتسامة صغيرة تتشق جنب شفتها وهي تتفكرو كايلبس ليها فهاديك السلسلة نهار عيد ميلادها ، لي هزات دابا يديها شدات عليها فعنقها ولي عمرها حيدااااتها منهار لبسها ليها ....تفكراااتو وهو محنىي على رجلو قدامها فاضعف حالااتووو كاايواعدهااا يتعاااالج وهي تجمع هاديك الابتسامة و ترسمو ملامح القلق على وجهها .... تفكراااتو وهو تايضور بيها فالريسطو ويوريها كل حاجة تارجعات تاني كتبتاسم بشششوية ... توسع بؤبؤها وهي كتفكر أول قبلة معاه ! اول لمسة ..اول نظرة لعينيه هو نازل من دروج شعرو فاااازك وصدرو عريااان .... اول لخبطة قدامو " كنوصل للبيتزا ! " .. أول عطسة قدامو .... أول قضمة فالمسمن بالجبن ...
سرحااات تانسااااات شنو ضااير بيها وهي تجمع راسها بزربة وشافت لعندهم تجاوبهم وهي تلقاهم مجمعييييين مكايشوفوش فيها ...
اسبرو : لا نتي لحمر مكايجيش معاك ... الكحل حسن ...
رتاج : اويلي ديما نلبس هاد الكحل عيقت بيه .. هاد المرة نلبس للقفطاااان فالخضررر ..
حياة : اش بالكم الخطابة ديالهم نديرووها فاافراااان ...تجي حسن ياااااك ؟؟؟؟
قدس : مايبغييش بابا ، بابا قالك كاع مناسبااتنا يكونو هناااا باش هنا يبقااو ذكرااياتنا فبلاصة وحدة مااانوزعوهمش ...
قسم : علاش داوين ؟ اشمن خطابة !
اسبرو : ديالك ...
حياة : اوا ياك سولتك واش تتبغيه .. قلتي كتحمااااقي عليه .... اوا بدينا نفصلو فقفاطنا وتكاشطنااا ....
قسم : انا !!!!
اسبرو : وعلى لي نسولوه يبدا يضحك ويبكي معااا راااسو ماشي لحماااق هدااااك ؟؟؟ ( شاف فحياة واشار جهة الصدر ) غاديري العقاااادي هنا ؟؟؟ ولا تخليه سامپل
فالمكتب ...
عدنان : وهاد الريسطو ....مسائلها قانونيين !!! منين جاب فلوسو مدام قلتي السيد صياد بسيط ....
اسد : ( شرب قهوتوو و حطها ) نقولو تسلف شوية ..
سفيان : ( مصغر عينيه، ) شكون سلفووو !!! النوار !
عدنان : وايلي !
اسد : ريسكا شوية .. ولكن انا غانحل داكشي ...
عدنان : واش هادشي رسمي أ اسد ؟؟؟؟
اسد : غانحل داكشي مكيعنيش عطيتو بنتي رسمي ، غانحلو بصفتو ولد واحد الناس كايعنيو ليا بزاف ، بصفة واحد الولد عجبني .... واحد الولد مغنبغيش نشوفو كايلوح راسو للهاوية حيت مايستاهلهااش .. عندو اينيرجي زوينة باغي يخدم .. نفسو حاااارة ... تزوج هو وبنتي ولا متزوجوش هادشي مكيعنيش غادي نسمح فيه ... معزة باه وجدو كبييرة صراحة ماغايدينيش نعاس وانا عارف ولدهم طاح فريسك على قبل بنتي ونخليه ... انا اومورهم بيناتهم ، ماشي فللخر مايتفاهموش يلوموني أنا. ...
سفيان : اوا اش غانقوليك أ اسد .. مغانعرفوش حسن منك فهادشي ... و هاديك بنتك ومغانعرفوش ليها المزيانة كتر منك ... غا هو الزواج خصو شوية ديال التأني .. قسم راه بعقلها وراه ناضجة و عارفة اش كاديير وعارفة شكون غادي تختار لحياتها .. اكيد مغيكونش شي برهوش لي يرون العائلة ...
اسد : لا هاد السيد ثقييل ودمو حار و بحال جدو .... الى توافقو بيناتهم انا ماعنديش مانقول ...
عدنان : او ايكون خييير ان شاء الله .... الله يجيب لي فييييها الخير .....
فاالخارج ...
قسم : ودابا رجعتو كووولشي عليا انا !!!!!
حياة : شوفي من واحد ناحية عندك الصح ولكن عرفتي الغلط شنو هو هنا ، هو ماكانش خصكم تفارقو كان خاصكم تحطو الاومور على طبلة حيت نتي نيتك فشكل وهو نيتو فشكل خاصكم تحطوها تناقشوها .. حيت هادشي غا سوء فهم .. هو ظن بلي حگرتيه ولكن نتي لا .... ونتي كتتشوفيه مامضحيش علا قبلك ولكن هادشي لي عاودات ماماك تاني دبااااا راه بان دار على قبللك تاهو بزاف .. منهم مشا خدا هاد الريسطو لي قلتي ....
اسبرو : متاااااااافق ....
قدس : ناري وتعرفي اخالتي حيااااة الطريقة باش كايهضر وشحال ثقييييييل ومرززن بزاااف ماتقديش تحيدي عينيك عليه ...
رتاج : (شافت للجنب) لوووؤاااااااي ....
قدس : لاااااا لا لاااااا صافي لااا ، هاااانا سااااااااكنة والله مااااندوي ... خوويا مسسسكين خوووووويا .... خوووياااااا سهيل .....
حياة : ههههه ...هاد الزهوانية هادي .....
اسبرو : والله تاخصني فينما نجي عندكوم نوجد الگلية ، افلااامكم ماكايسالييوش ...
رتاج : ( شافت فقسم وهاد لمرة بجدية ) قسم ... كولنا دزنا من هاد الحيرة والتردد لي كاتهضري عليه دابا ....والمشااااكل لابد منها وهوما لي كايقويو العلاقة .... ملي تتعرفي على شي شخص ...ماتشوفي لتاشي حاجة اخرة من غير جوج حوايج ...واش كتبغيه ويبغيك .... وواش راااجل .... الى كان الحب متبادل بيناتكم وتتبغيه كيفما كايبغيك ... و كان رااااجل معاك فالمواقف ديالو كيفما شفنا اش دار ليوم وجا وقف معااااك واخا مابينش ليك ... ولكن بين ليك بلي كاااع اش تكتب على ختك ماهموش .... هو جا يطمن علييييها ... ماشي ماااامسوقش ليك ... ملي كايكونو هاد جوج حوايج متتتهمك تا شي حاجة أخرى كولشي كاايتصلح مع الوقت .... المجتمع ديالنا ابنتي راااه صعيب وعاااامر مظاهر ، حنا ونتوما وولادنا مكنعرفوش نعييشو فيه فما بالك واحد جا من حومة شعبية .... ولكن حنا منغالقين بزاااف على هاد المجتمع ماتنحتكوش بزاف معاه من غير الخدمة لي تاتدينا .. حنا كنعرفو غير العائلة وانا متأكدة وسط العائلة هو غايرتاح ... عرفتي علاش ؟؟؟؟ حيت أنا دخلت لهاد العائلة رتاحيت .. وحياة تاهي ... واسبرو ..... وعمك عدنان ..وسفيان ويونس ...وكوووولنا .. حيت حنا عشناا عطشااانيين للعائلة مليي لقيناااها فرحنا. ..كذالك هو .... مدام كيفما قلتي ماعندو حد ....ملي غايلقى راسو وسط عائلة غاايرتاح .. وشوية بشوية غايولي واحد من الاسماعييليين ...يعني هادشي كامل غاااايبقى غير تعاااوييييد ... حيت حنا هنا ماجامعناش غير الدم جامعييينا الموااقف ابنتي .. وهاد الولد بان المعدن ديالو من اوووول موووقف. .... لقيناه معانا .... ( قسم كتتشوف فييها ) مشكل لي بيناتكووم بسيط خصو غي التفاهم ولغلط الكبيير كان ديالك ابنتي .. مانديهش قدام واحد الفاميلي انا عارفة خطبوني لولدهم شحااال من مرة وهارفة شحال بعكاكين وكايطيحو بينادم ونتنسى داك العشا يسالي بيخير ... نمشي نأدي واحبي بوحدي ونرجع عندو ، ولكن مزيااان تاهاداك اختبار زوين تعلمتي فيه ماتهضريش بلاصتو وماتقلليش منو حيت يقدر يكون عارف كتر منك .... هو ايييه صعيية انه يكون مكايتنازلش وراسو قاااسح ولكن الغلط لي درتي ماهواش ومايبغيه تاواحد من خوتك وعمامك وجبد .. ااراجل واخا يكون كااااايموت على مراتو ... مغايلغيهاش تگيديه ... حيت بصح غايحس بخالا تحت منها وهادشي كااايعصبهم .. غير لو في ديال مشى معاك للباطو سيمانة راه تضحية اقسم ماتقوليش مكايدير والو على قبليي ...
حياة : هاد للهضرة راه تتخرجها غير بسباب مخاصمة معاه .. عادي كتبرد على قلبها .... انا كايتخاصم معايا سفياااان كنولي نشوفووو بحال شي شيطااااان كايبانو ليا غا حوايجو الخااايبين عااادي ...
قسم : ودابا علاش كاتقولو ليا هادشي ؟؟ .. واش نمشي عندو نخطبو ؟؟؟؟ صافي انا راه درت لي عليااا درت كوولشي ( عينيها دمعو ) الكرة فالملعب ديالو دابا .. لابغااااني راه كايعرفني فين يلقاني ...
حياة : حنا ماقلناش ليك سيري ليه ولكن لا بادر متقمعيهش !
يلاه غاتهضر و هوما يسمعوهوم واسبرو دغيا قاد جلستو ولامار وقفات ...
لامار : اخييييرا .. أخيييرا غانتعشاااو ...
اسد : ( عنقها لجنبو ) مولات شي جااعت ؟ وكون عيطيتي لينا ..
لامار : مابغيتش نقاطعكم ، قسم خرجي نتي وعيطي لدراري يلاه نتجمعو نتعشاو نطلعو نرتاحو راسي غادي يتفرگع ...
رتاج : واييه ...
مشات رتاج كتنوض قدس بشوية .. ومشاو تجمعو على الطبلة .... ودخلو جود ولؤي تاهوما ورتاج بقات تهضر مع المربية د انس واش نعس عاد ترجع تتعشى معاهم ..
عدنان : صافي الطبلة خواااات .. ( شاف فجود ) واحد شوية ويبان لينا تاني الكرسي ديالك خاوي تانتاا ...
جود : واياااه .. ولكن غانجي مرة مرة غير فورماسيون خفيفة وصافي ..
سفيان : تما فجابون تايطلبو لحضور اجباري ولاد الحرام .. ماهو كون درتيها اون لااين حسن ليك ...
جود : اصلا هاد النوع دليفورماسيون مخاصهومش يكونو أونلااين حيت خاصك تخدم بيديك مكتشدش ستيلو وورقة ... داخلة فيهم الميكانيك ...
قسم : ( حطات راسها علا كتف جود ) غاااكنتفكر غاتمشي الضييييم كاينزل عليا ...
جود : يلاه تمشي معايا !
قسم : مكررهتش
اسد : مالو گال العيب ؟ سيييري معاه.. ودي معاك هادي تاهي .. ( اشار لقدس)
قسم :ههههه واش طلعنا ليك فراسك لهاد درجة ابابا ههههه ..
سفيان : هههه فوقاش غاتمشي أ جود ؟؟
جود : ماعرفتش ... يخرجوو الوراق دالفورماسيون ونمشي ... سيمانة جاية يمكن ....
عدنان : ان شاء الله ....
حياة : حنا ولفنااااكم فالشتا مكاينيش ... كولكم كاتمشيو لقرايتكم ... واخا حدانا مكنشوفوكمش ، حنا را ملي دخل شهر تسعود ماشفنا آية .... غاهي والبريباراسيون .... تالصييف عااد كنرجعو لهاد القصارات ، دابا راه جمعاتنا غا قدس . .
عدنان: ماعليش عندها غير وقيتة وغاتسالي .. خليهم يديرو مجهودهم القصارات مغايهربوش ... ( شاف لاسبرو) اوا اسعيد... مفاجاة زوينة هادي ..
سفيان : ولكن كون كملتي على خيرك وجبتي شيماء تاهي ...
اسبرو : ( كياكل ويتكلم بلباقة ) بسبب ديك الاوبيراسيون ( اطفال الانابيب ) مامسموحشوليها تشد طريق دابا ... انا كنت داخل تاللخر دالشهر ، وملي شفت هاد سيمانة ماعندي فيها مايدار قلت ندخل ، غير حطانني طيارة شفت داك روينة عرفت علاش هزاتني خاطري نجي ليوم
رتاج : وايه عيط ليا كايسول اش واقع ، انا عند بالي راه تما ، وهو هنايا فكازا ....
عدنان : اوا ماعليش ، مزيان حيتي فهاد وقيتة خواو علينا يونس وولادو والحاجة.. يلاه دير ليا شوية دالنفس قهروووونا المشاااكيل
اسبرو : اودي دابا لي جيت انا ، لي غايبداااو نيشان ....
فمكان اخر ...
سيارة فأحد الاحياء.... راكب اصيل و حداه الكوتش ديالو كايهضر فالتيليفون ... وقطع وشاف فيه ..
الكوتش : واااابسييف اوللدي باش لقيت ليك كومبا غدا ....كونتي تعلم سيييمانة قبل نقااادها ليك حسن ...
اصيل : معاش غدا ؟
الكوتش : الحداش دالليل ...
اصيل : شحال فيها ؟
الكوتش : واهادي فيها غا عشرة ...
أصيل : مزيانة ....
الكوتش : ماشي شي حاااجة تسني عليها حياتك اولدي.... بيتر لي عندو الكومبااات الواعرين راه مكاينينش غدا .... هادي صراحة ماشي ديال وجهك ....
اصيل : ماعليش ... صافي رصي ليا معاهم ...عشرة دابا نكون تمااا ....
الكوتش : ( سلم عليه ) بالتييييسيييير ..اللهم يسر
∆فالقصر ....
سالاو عشااهم فجوهم العائلي و غادرو كولهم ... منغير لامار وقسم وقدس لي مجموعين حدا اسبرو فبيتو كايوريهم اش جاب ليهم و يهضرو .... كايحاولو يحيدو شوقهم منو ولامار حسات بيه انه جا فأنسب وقت هي محتااااجااه فييه ...
اسد بالعياء ديال اليوم طاح فالنعاس ماعقلش على راسو ، داه نعاس مرتاح حيت وصل مع البروتوكول للحل ديال الندوة الصحفية ، ولكن هاداك التحذير حس بيه مصييري وانه لاااا مجال للخطأ وممكن يكون عقاب اكبر من سحب الأوسمة .....
تابدا يجيهوم النعاس تاهوما عااد قسم جرات قدس ولامار تاهي مشات لجناحها ... لقات اسد نعس .. حيدات غير بينواراها ودخلات حداه ... حطات راسها فصدرو ...
اما قسم عاوناات قدس تادخلات فراشها ومشاات لجناحها ....
قدس غير تخشات ففراشها غمضات عينيها كاتشوف ان هاد النهار الطويل عليها اخيرا سالااا ... انو اصعب نهار دوزااات فحياتها ... وانه اي حاجة خايبة ، شحال ماكولات كاااتسالا زاحد الوقت ، كيما تسالاوهاد النهار تاهو ....
نهار واحد كان كافي يحل ليها عينيها على بزاااااف دالحواايج فحياااتها ... نهار كاااان كافي بزاااف ...
حسات هاد المرة انها مدينة لماجدة !!! .. بسبباها يمكن غايتغيرو كاع مفاهيمها لحياتها!!!!! وبسبباها عرفات شكون الناس لي تعطيهم طااااقتها ، وشكون هي المعركة لي كتستحق لمعة سيفها !!!!! وشكون كايستحق تعطيييييه وقتها كاااامل !!!!!
تقلبات بشوية لتيليفون وهزاتو ... كانت الساعة الوحدة ونص ....
تبسمات وهي تتفكر فيه .... مساندتو ليها !!! رغم انه عااارفها مشات برحليها وكدبت عليه ... الى انه وقف معاها فازمة بحال هادي تاتخطاتها فوقت وجيييييز !!
تبسمات كتر ملي عاودات ليهم لامار فاش كانو عند أسبرو شحاال كان مخلوع عليها و كيفاش حيدها من يد اسد ...
لقات راسها مشاات لديسكيسيون ديالو ... خدات نفس كبير .... وهي تكتب ليه ..
"" You invaded my life against my will, and now whether you like it or not, you must stay with me always ""
""اقتحمت حياتي رغما عني ...اما الآن فرغما عنك ستبقى معي للابد"""
حطات تيليفون على قلبها وشافت فالسقف مبتسمة ومندماناس على هاد الميساج ... اخر حاجة ظناتها هي هاد الليلة غاتسالي بهاد الرااااحة كاااااااملة !!!!!
هي عارفة ان عائلتها كاتبغيها ، ولكن مظناتش يكون حب بحال هدا ؟؟؟؟؟؟ حسات براااسها محظووووظة بزاف ..
يلاه غاضور على جنبها تحاول تنعس وهي تسمع تيلي صونا ... غير شافت نمرة وهي تبتاسم كضور فراسها ودارتو فودنيها ..
قدس : باقي فايق !
لؤي : ( بصوت فيه النعاس ) اممم ... مابغيتش نصوني عليك قلت غاتكوني مع سعيد ...
قدس : سي ، يلاه جيت للبيت ..
لوؤي: آشنو دابا .. نخرج هاد الميسااج ونديرو فشي طابلو نعلقو قدامي ! حيت ماشي ديما كانشوف هادشي هههه
قدس : غاتبقى تهضر عليه مزال وتفكرني بيه غادي نمسحووو ..
لؤيي : دابا انا من البنات كاملين ختاريت هاد المريضة نبغيها .. مافهمتش !
قدس : مريضة ... ومنحوسة وسمعتهاا خاااااايبة ، كايشدوها الباباراتزي فالبيران سكرانة ...
لؤي : ماتبقايش تمرضي فراسك بزاف .... دازت ... لوحيها ورا ظهرك. ....
قدس : هي بصح دازت ...ولكن بدلات فيا بزااااف دالحوايج ...عرفتي حاسة بلي غدا ... وبعد غدا وسيمانة جاية كلهم غايكونو يااااام جدااد فحياتي ...كنحس بواحد الاحساس فشكل الوؤي مافايتش حسيت بحالو ..
لوؤي : بحالاش
قدس : عرفتي هاداك الاحساس فاش كنكون كاتفرج فشي سيري وكاتشوف الاحدااث لي واقعين لهاديك البطلة علمووها بزااف وقسحوها وخدات الدرس ! ..وكتحس بلي النهاية السعيدة صاقي قربات .... داكشي باش كنحس ...
لوؤي : مافهمتش !
قدس : غير فيك النعاس هههه ، يعني كاع اش داز عليا ، يمكن كانت الغاية هي نتعلم منو .. يعني كنحس براسي ان الحياة غاتعطيني داك النهاية السعيدة دابا .. حيت صافي تعلمت ! ....ولا يمكن ..... غااتعطيني next level " المستوى التالي " مهم شي حاجة فحياتي غاتتبدل .....انا متأكدة ....المكتاب راه سيناريو محبوك مزيان ، مايمكنش نبقى نضور فنفس الاحداث !!! اكيد موجد ليا شي حاجة اخرى من بعد هاد لحظة الادراك لي وصلت ليها ليوم ....
لوؤي : ولكن حنا بنادم ماشي سيريات ، النهاية ديالنا كتكون نهار كنموتو .. مدامك عايشة .... راكي يلاه دزتي من اول ليڤل ... دابا غير غا دخلي فواحد آخر .... داك نهاية السعيدة كتكون غافالسيريات .... فالواقع راه هي الموت ... اذن نساي شي حاجة سميتها نهاية ، ووجدي راسك لليڤل جديد ....
قدس. : غايكون قسح من هاكا ؟
لوؤي : ماعرفتش ... لي عارف هو هادا لي داز غايكون علمك بلي الدروس مكايتخادوش ساهلين . .ضروري تبكي شوية ...تمرضي شوية ، تعدبي شوية .... يعني غاتكوني عارفة تحاربي ...
قدس : وغاتكون معياا نتا فيه ؟؟؟؟؟ غاتكون معايا فهادوك اللڤيلز لي باقي غانعيش !!
لوؤي : غانكون معاك حتى لهاديك النهاية السعيدة .....
قدس : ( تنهدات بصوت مسمووع وقالت بانتشاء ) لوؤي ...
لوؤي : آحبي ..
قدس : كنبغيك ....
لوؤي : ( بصوت ناااعس وبحوح ) شييييييت !!!!
ضحكات قدس وقطعات عليه ماتقدررش تسمع اشنو غايكول مزاال .. تصرفات غير بلي ملاه عليها قلبها بسبب الارتياح لي كتحس بيه ... وضارت على جنبها وغمضات عينيها وحاولات تنعس ....
رغم كاع اش طاري وعارفة البروتوكول غايولي صارم معاها كتر .... وسمعتها خاسرة فالمجتمع ومغاتقدرش تمشي وتتلاقاا ناااس فخاطرها .. ولكن نظرة عائلتها كانت كبر و كولشي ماتبقى ماكيهمها تاواحد .. لاكانو عائلتها وباباها راضييين عليها وعارفينها اش كاتسوا .... البقية مكتهمش نظرتهم ....
اما قسم كالسة فالبالكون على الكرسي مغطية بمانطة رقيقة رمادية كاتشوف فالنجووم ، حديثها ليوم مع عائلتها وحماسهم غير مازاد صعب عليها الاومور ، كتحس يراسها انها مستحيل تقدر تتخطاه وتكمل حياتها عادي من بعد هادشي كاااامل !!! صورتو بين عينيها وهي كاتشوف فدوك النجوم وصوتو كيتعااود فودنييها ...
""نتي كتستاهلي شي واحد يكتب هاد النجوم فسمييتك اقسم .. ماشي واحد بحالي أنا ''''
""- انا مبغيتش لي يكتبهم ليا فسميتي ، بغيت لي يتكا حدايا تنتفرجو فيهم انا وياه """"
رجعات بذاكرتهاا ودمعتها نزلات ومسحتها ..
غمضات عينيها معلية راسها لفوق ورجعات علاتهم فالنجوم ....
واش بصح ...هي وياه ديال بعضياتهم ؟؟؟؟ ولا العائلة سبقات الفرحة على والو !!!! الامل لي تعطى ليه اليوم يخيب ؟؟؟؟ واش شي نهار غاتكون بصح هي واصيل تحت سقف واحد ؟؟ ، ولا غاتلقى راسها مع راجل اخر وكل ما شافت النجوم فالسماا تتفكر ملي تتكات حداه على سطح الباطو فالساحل الايطالي كايتفرجو فيهم ! ......
اليوم الموالي ...
الساعة 11:30 ...
كانت مرسيديس اسد .. وراها رنج روفر كحلة فيها ربعة من الگارد ... وراها راف كاط طويوطا د اصيل و طوموبيل ديال موالين ضو ...
كانو مصافين حدا الريسطو ديال اصيل ، لي كلو اصلاحات ورملة و القطع د الرخام كبار محطوطين حدا الباب والسلوكة والحديد ... روينة مكانتش غير على برا .. كانت لداخل كتر ...
كانو المعلمين كايركبو فالسلوكة ديال الضو وسط الحيط ووحدين بالسلوم فالسقف كايقادو المسالك دالكهرباء .... واصيل واقف محيد جاكيتو ، فقط بتيشورت زرقاء مغبرة وسروال ددجين فاتح وسبردينة تاهي مغبرة ... ليوم من صباح ووهو معاهم تما ... وحداه اسد لي يلاه جا تاهو واقف .. بسروال ديال دجين وتيشورت كحلة بالكول وساعة فضية فيديه .. داير يدو ورا ظهرو كايشوف معاهم ...
اسد : زيييييد طلع زيييد ( المعلم كايوريه الحد ) لا مزااال .. حتا تقرب للسقف .. بعدووو على فين يقدر يتكا بنادم .... ( شاف عند اصيل ) مزيان لي فكرتي فالضو قبل ماتبدا تلبس الحيط .. كون راك ضوبلتي الخدمة ..
اصيل : داكشي لي قالو ليا ... قالو ليا نبداو بالضو ..
اسد : ( شاف للدروج ) زيد يالاه نشوف لفوق ...
زاد اسد واصيل تابعو تاطلعو لاطيراس لفوق لي كانت مزال مابداو فيها الاشغال ... واسد تايضور فهاديك البلاصة ويشوف ...
اصيل فهاديك اللحظة ... كان شبه غايب على الوعي .. كان عايش غير فللداخل ديالو كايقرا هاد الأحاسيس لي فاقو فيه ... ولي كانو نفسهم ملي كايوصل ساعي البريد النتيجة ديالو لباب الدار ويهزها ويجري لعند باباه يمدها ليه ويبدا يشوف فيه كيفاش غايوليو ملامحو ملي يشوف نقطو المرتفعة ... هاديك النظرة ديال الافتخار لي غايدير فيه .... كان هاداك الاحساس مستعد يدفع عليه حياتو كلها كاايقراااا باش يشوفو واخا غير يربت على كتفو و يقوليه برااافو أولدي ...
هاداك الاحساس فاش كايوحل فشي تمرين ويجي يكلس حداه ... يقوليه مالك ؟ ماعرفتيش تصاوبو ؟ ... واخا باباه مكانش متمدرس بحالو وكان خارج غير من الاعدادي ... ولكن كان كايحاول يفهم التمرين وكان كايحاول يحل معاه هاديك المعادلة .... وغير وجودو وهو كالس حداه كايشرح ليه كان كايخليه يحس بشي حاجة استثنائية ... كان كايخليه يحس انه محظوظ عندو شي حد كايفكر فيه فهاد الدنيا ...فالسنة د الباك ديالو ماكانش كاينعس .. كان كاااايقرا صباح والليل ... باش ياخد هاديك المونسيون لي تفرح باه ...طريق كااااملة وهو هاز هاديك نتيجة فيديه من عند نيابة ولي كانت أول نقطة فالجهة .. وجاي باش يزف هاداك الخبار ويشوف هادوك الملامح دباباه الفخورة بيه ويشوفو كايرد لبال للمواد الخرين شحال جاب فيهم تاهوما ، شي لي كايعني ليه شحال مهتم لتفاصييييلو ماشي غير للنتيجة .... حتى كاايلقى العزايا فباب الدار ، جايبين ليه خبر باباه لاحو البحر ... من تما ... قطع هاديك النتيجة ديالو .... وكره القراية ... وكره اي حاجة غاتفكرو بداك الاحساس لي تسناه وبقى ليه فحلقو ...
من بعد 16 عام .. كايعااااود يحس بيه هاد صباح!!! .... جابو لهنا باش يهضر هو وياه على برا .. حتى كايلقاه كايسلم عليه وعينيه فالاشغال ... فاااتو و زاد دخل وسط الخدامة يقرا فالبلان و لعبارات ويفتي عليهم اش يديرو ... من بعد 16 عام ... كايتولد ليه أب آخر .... جا باش يعيشو هاداك الاحسااااس لي بقى ليه فحلقووو نهار نتيجة الباك .... كان كايتمشى وراه بحال داك الطفل د 14 و 13 عام .. تابعو بحمااااس كايشوف ردة فعلو وملاحظااتو وواش عاجبو هادشي لي كاااايدير !!!!
نسى قسم ... نسى الموضوع لي بغاه فيه .. نسى مجتمعها نسى كولشي ... هو مركز فقط عليه ...
هو .....
مركز على كيفاش دنيا بهاد السرعة ولدات ليه أب !!!
و رغم هاد عواصف الافكار كلها ... وأحاسيسو الطفولية لي حياات فيه ، إلا أن وقفتو ثااااابتة وكااايتكلم عادي بحالا مكاين والو وهاد السيد لي قدامو غير شخص عادي قدامو كايقدم ليه شوية دالاحترام !!!
اسد : هاد البلاصة ... من الاحسن ردها ترفيهية اكثر .. طيراسات كايبغيوهم الشباب .... نت عارف ولاد الوقت شنو كايبغيوو ...
أصيل : قسم اقترحات يكون هنا پيسين ، شبهاتها بالطيراس ديال الباطو ( كايشير ليه ) هو هاداك لي طراساوه تما ..
أسد : مزيااان .. غا هو كبير ... زيدو صغروه شوية ماياكلش ليسباااس ... بحال داك جهة لي لهييه غاايضيقها ... خاص تبقى شوية ديال مسافة د السلامة باش مايطيحش شي واحد .... ( ضار عندو وحيد نضاضرو دالشمس كايضور بعينيه ) مزيان مزيان ... الى تخدمات طريق ... البلاصة غادي تروج .. مية فلمية هادشي دار فاايييت غا من طريق لي تهرسات ... بنادم راه ماغايهرسش طوموبيلتو باش ياكل الپايلا ...
اصيل : بصح عندك الحق ..
اسد : شوية بشوية ... ماتزربش على هادشي .. عطيييييه الخاطر .... البلان عطاوه ليك ؟
أصيل : ديال الريسطو ولا دالاصلااح ؟
أسد : بجوج !
أصيل : اه راه فالبيرو لتحت ..
أسد : ملي نكون غادي عطيهوملي نشوفهم لابانليا شي حاجة اخرى ....
اصيل : اهاه الله اودي ...
صونا تيليفون د أسد بعد و جاوب شكييب ... عااد رجع عندو ، دار نظرة اخيرة فالمكان ورجع شاف فيه ..
أسد : المجية لهنا خصها وقتها مزال غانخوي شي عشية نجي نشوف اش كايديرو هنا ....
أصيل : ( بابتسامة ) فوق مااابغيتي ...
أسد أشار براسو وضاار بعينو باقي خصو يشوف حوايج اخرين تما ... ولكن مزروب خصو يمشي لاجتماع ديالو .. ومشاو نزلو فالدروج ...تاخرجو لبررا حدا طوموبيل عاد وقفو ...
أسد : عشية الجمعة هاكاك كتكون عندي مرخوفة ونجي ... بانوليا شي حاجات تما خصهم يتبدلو ... بحال دوك السواري غير يتحيدو .. غاايضيقو .... وبحال هاد الايسباس لي ضاير هنا بالريسطو خصنا نشوفو مواليييه باش يتشرا تاهووا ولا يتكرا ... لان خاصك باركينغ ...
أصيل : انا ماعنديش خبرة بزاف صراحة فالبني والاصلاح ... داكشي علاش جبت شركة تتكلف .. داكشي علاش ايلا بانتليك شي حاجة غانكون فرحااان ايلا قلتيها ليا ..
أسد : ( كايشوف مع الريسطو ورجع شاف فيه ) ان شاء الله .. هادشي خصووو الوقت وخصو يتقااااد بالعقل .. بلااااصة واعرة كاع وزوينة ... مخصهاش ضيع ... ( رجع شاف فيه ) كنتي بغيتيني فشي حاجة لا !
أصيل : ( أصيل شاف مطول ف الارض ورجع شاف فيه كايستجمع شجاعتو ) سي أسد .... كيفما كاتعرف ... خدينا وقت شوية أنا و قسم نتفااهمو .. وبعدنا شوية نرصيو قراراتنا .. قلتيها ليا داك مرة براسك فتيليفون زواج ماشي لعب ....( أسد تكا على طوموبيل مرربع يديه وأصيل تنهد مكمل) الحمد الله تفاهمنا .. مكاين تاشي مشكل كبيير لي يخلينا نوقفو هادشي ، كولشي كايتحل مع الوقت .. داكشي علاش بلا ماانزيدو نطولو ... لي كاين هو هادا أسي أسد ... أنا باغي بنتك على سنة الله ورسوله ... ( أسد تايشوف فيه ) وان شاء الله غدا بالليل غادي نجي أنا وختي ... كيفما كتعرف ( طول الكلام وهو كايشوف ف الارض مايقدررش يشوف فيه ) عندي غير هي فهاد دنياا .. كون كان شي حد آخر كون جبتو معايا ... عائلة كبيرة تستااهل تتناسب مع عائلة اخرى ( علا عينيه فاسد وجفونو حمارو ) ولكن الله غالب .. مكرهناش ... ( تنهد ) هي بصح ماعنديش عائلة غانجيبها ، ولكن ... ( علا عينو فيه) باغي نأسسها معاها .... الى وافقتو عليا ....
أسد : ( تنهد كايشوف شحااال لللجنب وهضر) تانا واحد نهار كنت بوحدي ...هزيت معايا غير خويا لي كان عندي داك ساع (بابتسامة ) ومشيت خطبتها ... ( شاف فيه) وهي لي دارت ليا العائلة ....هي بصح غاتجي غير نتا وختك ... ولكن انا فين مااكنشوفك كانشوف باك وجدك واقفين حداك .... لي كايجيب عائلتو ، كايجيبها باش نتعرفو عليهم ، اما انا كنعرفهم هوما قبل تا متزاد.... دابا خصني نعرفك نتااا ( شد على كتفو وزير عليه ) مرحبا بيك ... وسط منا اولدي ... نتا وختك ....
أصيل : ( هز يدو شد على يد اسد لي فكتفو بتربت ... وقلبو حاس براحة ماعمرو حس بيها من قبل ) الله يكبر بيك أسي أسد ...
أسد : غير هو أولدي لي عارف ... هو أوموركم مؤخرا ماشي هي هاديك نتا وياها ! يعني شوف معاها هي واش موافقة ... انا ماعندي مانقول ليك ... !!
أصيل : نسولوها فدار باها وسط من عائلتها ... وافقات توافق وسط من دارهم .. رفضات راه الشوار ديالها .. هي لي تختار معامن تكمل حياتها ...
أسد : ان شاء الله ....
تبسم ليه أصيل و أسد ركب فطوموبيل وديمارا .. ودعو بيديه ورجع مارشاريار ومشا والكارد ديمارا تاهو تبعو ...
أما أصيل داير يديه فجياب سروال وعلا راسو لللفووووق كيتنفس ... احساسو نفس احساس طفل فالخيرية قدموه للعائلة جات تتبناه !!! شافت فعينيه الحرمان وفتحات أحضانها ليه !!!!! وكانت معاهوم بنيتة زوينة واقفة حداه عجباتو بزااااف !!! ....
ملي تتقرر حياتك تتصالح معاك على لي دارتو فيك ... وكتقدم ليك العائلة والحب فآن وااحد !!! فاكيد غااااتسماحها وتبدا معاها صفحة جديدة !!
أسد كمل الطريق ، وخرج لطريق الوطنية ...و تيليفون كايصوني على لامار .. تا جاوباتوو ...
لامار : أسد !
أسد : صباح الخير .. فينك ؟
لامار : كاانفطرو أحبيبي ....
أسد : يلاه فقتو أ نعاسييين !!
لامار : والله تاااكنا عياااانين ، لبارح سهرنا أسبرو ههه
أسد : راكم بوحدكم ؟؟
لامار : قسم فطرات بكري و خرجات قالت عندها اجتماع و غاطلع للمقر ددالمؤتمرات عندها شي ندوة على حساب قدس ولقاء مع شي مجلة على ود هادشي ... وانا واسبرو ووقدس كنفطروو ..
أسد : الندوة عندها تاليل مع التسعود الى بغيتو تفرجو ..
لامار : لا راني عارفة سولتها ....ضرووري نتفرجو ... مور الفطور الى مغتجيش تغدا غانزلو للبحر انا واسبرو ...
أسد : ديو معاكوم تا قدس تفوج شوية ..
لامار : مابغااااتش قلتها ليها ...قاتلك باغا غاتنعس . ..
أسد : ماعليش على خاطرها ... أحبيبتي بالليل جمعيهم للعشا كلهم ...صافي !
لامار : شكون !!! تا خوتك ؟ كولهم !
أسد : اه ... عيطيي على عدناان وسفيان والدراري ...
لامار : علاش ؟ زعما يلاه كانو هنا لبارح .. ياك لاباس !
أسد : نتي غي جمعيهم للعشا .. ويكون خير بغيت نهضر معاهم ..
لامار : واااخا صافي ....
أسد : يالاه راني صايك ... تا لليل ..
قطع عليها وهي شافت فأسبروو باستفهام ..
لامار : ماعرفت علاش بغا يجمعنا !!
اسبرو : سمعتو ... (شاف فقدس ) ياكما البروتوكول عطااو شي قرار؟
قدس : ( بخوف) ولكن قسم البارح قالت لي عطاو غير انذار !!! اويلي ياكما شي حاجة ؟؟
لامار : كايهضر وصوتو مرتااااح ، هادي غاتكون شي حاجة مزياااانة ...
قدس : اوا الله يسمعنا خييير ...
لامار : لا لا نكونو بوزيتيف ، باركا عليييينا من المشاكيل
اسبرو : انا فاش كنجي عندكم الحاجة الوحيدة لي كتبقى فيا بوووزيتف هي الفصيلة دياااالي دمي ...
المساء - الساعة 20:30 ...
كانو الخادمات واقفات على سفرة العشاء تايستفو الطقم العائلي ...
أما لامار جالسة فصالون ... حداها اسبرو بلباس رياضي مريح رمادي نايك ... وقدس تاهي بلباس مريح عبارة على هودي طوييلة تال ركابيها لابسة معاها غير سبادرين بيضة ، ونازلة ليها على كتفها كانت اوفر سايز ويديها باقا فيها البانضة ووجها كانت مغطية كدماتو بالكونسيلر واخا باقين واضحين ... لابسة نضاضر طبين كادر ديالهم كحل وشادة أيباد فيديها كاتلعب وتحاول تشغل راسها باي حاجة حيت ماحملاتش تدخل لتاشي منصة فالميديا .. كتحس بلي كولشي كايدوي عليها وهي هربانة من كولشي ... لامار دايرة رجل على رجل بعبايتها السوداء شادة تيليفونها واسبروو كايتميساجا مع شيماء تا جات رتاج بزربة داخلة ...
رتاج : لامار شعلي شعلي اصاحبتي تلفازة غاتبدا دابا ندوة دقسم ...
لامار : ( شافت الساعة ) مزال تالتسعووود ....كلسي بعدا
رتاج : ( سلمات عليهم و كلست كانت بجلابة مخزانية قصيرة مع طالون ) وشحاال دابا ؟ جييييت طااايرة فطريق ، خفت تفوتني تعطلت فالكلينيك ....
لامار : باقي شي عشرين دقيقة هاكاك .. ياختي تسخسخات مسكينة من تمنية دصباح وهي تما ، شحاااال دالاجراءات .... وماغيطلقو البث تال دابا ...
رتاج : واختي هادا راه سميتو البروتوكول غايقهروها بالأسئلة والاجتماعات عاد يطلقو داك الندوة ... فاش كتكون ندوة بأمر منهم راهم بزاااف دالاجراءات والتحفظ ...
اسبرو : ( هز تيليكوموند شعل تلفازة وجبد القناة ) خليوها مشعولة ملي يبدا هاهو قدامنا ... نتوما ملي كاتبداو فالكوتوكوتو كتنساااو راسكم
قدس : ( تنهدات ووناضت ) مهم ... انا غانطلع لبيتي فاش يجي بابا عيطو ليا نشوف اشنو بغا ....
رتاج : مااتكلسيش تفرجي !!
مارداتش عليها ومشات ولامار شافت فرتاج ..
لامار : غير خليها ( ضارت متبعاها طالعة فدروج وشافت فيها ) انا لي كنعرف طبعها كيدااييرر .. هادي راه ماشي بحال قسم لي تتقلق وتسد عليها .. هادي تكلس معاك وتضحك معاااك تاتقولي راها بيييخير ... ولكن لي فيها لداخل ربي لي عالم بيه ..
رتاج : وراااه صعيييبة بسييف اصااحبتي ، هي انساااانة اجتمااعية وعندها صحااب بزاف. .. راه ماتبغييش تولي عليها الهضرة ... نت عارفاها لاطرطقات ليها غا سخانة فشفتها مكااانتش كتمشي لافاااك ... بقا غا هادشي ! راها ساكتة غاخيت دارتها بيديييها ....
لامار : من قبيلة وانا حاضياها لاتمشي دير شي حاجة لماجدة ، راه هاااادي كترد دقتها والله مكتخليها ... ولكن لااا لاحت تيليفون وهزات الايباد من لعبة للعبة من فيلم لفيلم ... تالهضرة ولات مكتبغيش تهضر فالموضوع ... كنجبد الهضرة انا و سعيد وهي تقلب وجهها .. وراه واخا تبان ليك كاتهضر و تتضحك ....راه كنحس بيها لاقستها غااا شوية تفرگع بالبكا ..... دابا حتا غااااااتبرد القضية عاااد نشوفها اش غااادير
رتاج : حاولي متبعدييييش عليها .. خلي عليها عينيك ...
لامار : انا ماااخدمتش هاد النهار كاااع .. كنا ناويين نهبطو انا واسبرو للبحر فاش شفناها هاكاك مابغاتش تمشي معانا مامشيناش بقينا معاها ... قالك سعيد انا باغيها هي تخرج ، ملي ماتخرجش خليني حداها ....
أسبرو : هي داباااا سااااكتة ... تشوفيها تقولي هادي ماااعندها والوووو ... ولكن راه راسها تاايبنيي ويريييييب ... شادين معاها الخاطر نهار كامل ... بحال شي قنبولة غاااتفركع
رتاج : وغاتجيها قاسحة .. لا قرايتها لا صحاباتها ...راه السمعة ديالها هادي ...
لامار : ماعندها مادير بيهم .. ناس لي تايبغيوها دبصح راه غايعرفوها هي نقية وماشي من داك نوع و لي ظنها من داك النوع معندها ماديير بيه ....
رتاج: اوا الله يدير تاويل دالخير ... والله الى من هادي لهدي ، منعرفت اش هادشي سلاااط علينا
بقاو مجمعين تادخلات تا حياة وسفيان ... وجا موراهم عدنان ... غير تجمعو بدات الندوة ... وهو يجهد اسبروو لتلفاااازة كايتفرجو ... كانت قسم والمنادجر دقدس ومدير العلاقات العامة فالبروتوكول البريطاني داخل المغرب .. والمحامي دالعائلة دالاسماعيلي .... قسم كانت وسطهم بلباس رسمي .. سروال شيبي و كوستيم ديالو و طوپ فالبيج شعرها مصاوب ليس ، جنب مرجعاه للور وجنب طايح على كتفها مرتب ، نظاظر طبين .... ملامحها كانو حادين وباين فيها العياااء .... كانو كاع لميكروات د القنوات الإخبارية حداها فالمنصة .... وصحافة مستفين قدامهم ، تلاتة على الكرسي جالسين والبقية كلهم واقفين ورا كاميراتهم ....
وبدات الندوة ...
الندوة الصحفية :
الصحافي : السيدة الاسماعيلي... أولا متأسفين على كل ما جرا للسيدة قدس الاسماعيلي .. كلنا تصدمنا بالخبر ... كيف استقبلنااه بشك كذالك كل من يعرف عائلة الاسماعيلي حُسن المعرفة غايستقبل الخبر بشك وحيرة .. لأن مابين التكدييب والتصديق كايكون مجال للشك أكيد .... لذا كنتمناو من سيادتكم وسيادة جورج ميغال المدير العام للعلاقات العامة والخاصة للبروتوكول BRFW انكم تزيحو مجاال الشك باجوبتكم على الاسئلة دهاد الندوة (قسم كتحرك ليه راسها ب اه ) اذن سؤالي اللول .... هو كيفاش استقبلتو الخبر نتوما كعائلة أولا .. ؟؟؟
قسم : ( حنحنات قربات للمايكروفونات والفلاشات كايضربو فيها ) بسم الله الرحمن الرحيم... و الصلااة على نبينا الكريم ...، أكيد ان الفجوة لي بين التصديق والتكديب كااايمليها الشك .. والشك أقوى من التصديق بحذ ذاتو ... وهادشي علاش هيئة البرتوكول حكمات علينا بهاد الندوة لي غانقدمو فيها اليقين لهاد الازمة ، او الابتلاء لي صابنا إثر هاد الإفشاء الكاذب .. كنتشرف نترأسها بالنيابة على الأسرة الإسماعيلية .... شكرا للحضور والاستماع ... حاضر معايا السيد جورج ... السيدة إكرام .. مديرة أعمال الأخت ديالي المعنية بالأمر ... الميطخ قباج .. المحامي دالأسرة الاسماعيلية ... ( تنهدات ) أما بالنسبة للسؤال ديالك ... استقبلنا الخبر بالتكذيب طبعا كعائلة كتعرف بنتها مزيان .. ولكن التكذييب كان مرافقو بزاف دالقلق من الرأي العام ... الحمد لله خمسة وعشرين عام هادي ملي دخلنا لغمار لبريتيش بروتوكول.... والحمد الله ماعمرنا خدينا حتى تحذير فيما يخص الشرف ... ماعمرو تسحب منا وسام ومحافظين كل التحفظ على أخلاقنا وسط المجتمع ... كيما كنأثرو فأي واحد كايتبعنا فالمنصات الرقمية ... باغين نأثرو بما هو إيجابي ... واجبنا كعائلة فالبرتوكول البريطاني .. نقدمو صورة زويييينة على بلادنا ...وعلى تربيتنا وثقافتنا .... وهادشي علاش حنا حريصين كل الخرص ، حنا كصغار الاسماعيلين باش نقدمو صورة زوينة للشباب .....
الصحافي : هادشي معروف والكل متفق عليه ولكن واش ممكن نعرفو تفاصيل الحادثة ! وشنو تعليقكم عليها ؟؟
قسم : (تحنحنات ) الأخت الصغرى ديالي كانت معروضة لحفلة فهاديك البلاصة ... حفلة توديع العزوبية دوحدة من صحاباتها ديال الدراسة .. أكيد حشمات أنها متلبيش الدعوة ... ختي باقا صغيرة ماعندهااش تجربة فأنها تعرف الماهية ديال دوك البلايص ، هي ضناتو كلوب كيف كاع النوادي لي كاتلاقا فيهم نع صحاابها ... حتى لقات راسها فباب البار .. قالو ليها أنه محجوز فقط لصديقاتها ... داكشي باش قدرات تدخل دير واجب العراضة ديالها كواحدة عارفة ان صديقاتها مغاديوهاش لشي حاجة تآذيها .. قدر الله وما شاء فعل .. صديقات السوء ، ماشي اي واحد يبغي ليك الخير .... ( شافت لعند المحامي ) طبعا مكندويوش من فراغ ونبرءو بنتنا غير هاكاك .. تسجيلات الكاميرا وكولشي ها هو بين يدين الميطخ قباج .... ( شافت فيهم ) وحدة من صحاباتها دارت ليها لالكول فالعصير ديالها ، وهي نفسها لي كانت جابت وعيطات للصحافية تما .. كيفما كايبان فالتسجيلات كلهم ولي غايبانو دابا شوية فالبث .... تحفظااا على الخصوصيات حنا غطينا الوجوه ... ولكن راه باين اش كانت كاتدير تما واش كانت كاتدير لختي لي مشاات دير واجبها لا اقل لا اكثر ... منبعد ختي فقدات الوعي بالثمالة ....ومحساتش بتصرفااتهاا ، والصحافية خدات هاداكشي لي بغات ....
الصحافي : يعني نتونا كتعترفو انه دوك المشاهد لي تداولوهم المنصات حقيقين و ماشي مخدومين !
قسم : الحقيقة الوحيدة لي تما هي ختي ، اما تصرفاتها كانو تحت تأثير الثمالة .... هادوك المشاهد هوما فيلم الاخراج ديالو ضعيف بزااف وخلا موراه بزاااف ديال الاخطاء لي كاينين دابا بين يدين المحامي .... والاهم منهم هو المخرج ماردش لبال للكاميرات .....
الميطخ قباج : نشوفو البث بعدا .. وللحديث بقية ..
بقا الساكت فالشاشة ، ماتسمع غير صوات تحنحيناتهم و قراعي دالما تايتحلو كايتسناو من القناة تدوز الفيديوهات ، تاااتلاحو .. كانو فيديوهات فيهم ماجدة وهي كاتخوي ليها لالكول ، وهي كتتهضر مع صحافية والكواليس كلها ، واضعين ضبابة على الوجوه حيت مابغاوش يقولو انها بنت عمتها على ود سمعة باباها فالعلن .. رغم البرتوكول لي عااارف بضبط شكون ... ولاكن اسد مابغاش الوجه يبان ....
سلاو المشاهد وهو يرجع البث للندوة .. حطات قسم قرعتها د المااا لي كانت كتشرب منها وقربات المايك ..
قسم : صورة غاتكون شرحات راسها براسها .... وغاتكون تكلمات ووضححات كتر مني ... ختي ... كانت ضحية ... ولكن بالنسبة للرأي العام مابغيتهمش يشوفوها ضحية .. بغيتهم يشوفوها درس ... درس لأي واحد كايوضع ثقتووو فااصدقاااء السوء ... ( ربعات يديها على طاولة المنصة ) ختي الحمد الله سمعتها طيية والعائلة كاملة كاتعرفها ... واحد البنت لي كاتقرا قرايتها ومزال صغيرة على هادشي وعلى تعرف المجتمع على حقيقتوو ... حنا كبرنا فوسط عائلة علمتنا نعطيو بزاااااف دالحب وناخدوه .. داكشي علاش صعيب علينا اننا نحددو الصالح من الطالح فالناس ، ولي ضحك لينا شوية كنضنوه غايقدم لينا الحب تاهو ....
الصحافي : وبالنسبة لهاد الصديقات واش غايتم فحقهم شي إجراء ؟
قسم : حنا لي تايهمنا فالصف الاول .. هو ختنا .. الحمد الله دازت طريفة .. كانت أزمة خلاتها تعرف الوجه الحقيقي ديال الصديقات ديالها باراكا غي هاد الندوة الى سمعوها .. وباراكا غير يسمعوها أنها محاطة بعائلتها والناس لي تايبغيوها تايقين فيها وعمرهم يقدرو يطيحوها .. وباركا غير يشوفو انهم ضربو تمارة على والو .... هادا هو الإجراء لي اتخدناه فحقهم .. أسرة الاسماعيلي ماشي هي لي غاتعاقب مراهقات عقلهم مزال مناضجش .. اكيد التحذيير ترسل لعائلاتهم .. هوما ايتكلفوو بتربيتهم ... وكل راع مسؤول على رعيته ...
الصحافي : كاين خبر اخر ، كنحتاجو التأكيد ديالو. .. سعنا أنها دخلات للمصحة ... نقدرو نعرفو علاش مادموزيل قسم ! باش نحيدو مجال للاشاعات الاخرى ...
قسم : تاخاجة من هاداكشي لي تقال على دخولها للمصحة وتشكيكهم فالشرف دالاخت ديالي ما صحيح ....كيفما كاتعرفو ختي كانو عليها اثار الثمالة ... خرجها البوديگارد ديالها ولكن مخلاتوش يكمل معاها طريق وصاگت راسها .... دارت حادثة صغيييرة .. الحمد الله دازت طريفة ولكن يديها تضررات شوية ... مي ماعليش ... الوقت كايعااالج كولشي ...
الصحافي : الحمد الله على سلااامتها .. وبالشفااءء العاجل.. سؤال آخر .... اشنو كيقول السيد أسد الاسماعيلي فهاد الواقعة ؟؟؟
قسم : قبل مايكون أسد الاسماعيلي .. هو راه أب .. وكأي أب مغايبغيش يسمع شي حاجة خايبة على ولادو .... قام بالواجب لي خاصو يتقام فانه يقدم نصائحو فالثقة و اختيار الصديقات ، واجبو فانه يرسل التحذيرات و انه يقدم الدعم ليها ... والحمد الله .. دازت طريفة وحنا بيخير .. ختي بيخير تاهي ...
المنادجر : المادموزيل قدس فصحة جيدة ، وعندها بعد غدا غذاء رياضي خاص بمباراة التنس لي كاينة على الابواب غاتشوفها كااملين .... هو صحيح انه بسبب إصابة فيديها فالحادث ... مغاتقدرش تلعب ... ولكن غاتكون حاضرة كيما قلت ...
الصحافي : واش نفيستها غاتسمح ليها بالخروج فهاد الازمة ؟
قسم : أكييد !!!! غاتخرج براسها مرفوع بريئة من كل هاد الاشاعات .... الاسماعيليين متايهمهم حتى شي حاااجة ... مدامنا عارفين راسنا مادايرين والو وعارفين أصولنا وحدودنا الحمراء .... غانبقاو رافعين راااسنا فكل المحااافل افتخارا بنسبنا ... بثقاافتنا ... بتربيتنا وبتمغرااابيت ديالنا ....
الصحافي : شكرا ليك السيدة قسم على جميع هاد التوضيحات .... نتمنااااو أنها تكون آخر الاحزان ان شاء الله ... سؤالنا موجه لمستر جورج ( كمل بالإينجليزي باش يفهمو ) شنو هما الإجراءات لي كايتاخذ البرتوكول فبحاال هاد الحاالات الخاصة بالشرف للعائلات المسلمة...
جورج : ( تحنحن وقرب للمايك ) اولا كنحددو بلاد العائلة و تعاريفها الدينية من خلال مذهبها ، بنسبة للمغرب ، فحنا كنركزو مزيان على المالكية ... كناخدوها بعين الاعتبار ... فاي تجاوز فحدودها .. كاكون عقاب كتقرر فيه الهيئة العليا الخاصة بالبريتيش بروتوكول .. بنسبة للحالة دميس قدس.. فخدات انذار فقط بسبب تواجدها فمكان كااايخالف القوانين ... اما حالة سكرها فالعلن تبرءات منها كل البراءة بسبب تسجيلات الكاميرا دالمراقبة ... وفحالة مكانتش البراءة ... كايتم سحب وسام الشرف ، شي لي كايخلي الشابة او الشاب محروم من بزاف دالمزايا كايقدمها ليه البروتوكول... وكتبقى وصمة عار على جبينو داخل الهيأة ... كايتسحب منو جواز السفر و رخصة القيادة ، تقريبا نفس قانون السوابق ....
الصحافي: شكرا بزاف مستر جورج على التوضيحات و على الحضور ( شتف فقسم وكمل بالعربية ) كلمة أخيرة آنسة الاسماعيلي ...
قسم : بسم الله الرحمن الرحيم .. ياأيها الذين آمنوا إن جاءكم فاسق بنبإ فتبينوا أن تصيبوا قوما بجهالة فتصبحوا على ما فعلتم نادمين .. صدق الله العظيم ....
وقفات جمعات الوراق لي حداها و تيليفونها وانصرفات وتبعوها هوما ... وسالا البث فالشاشات ....ورجعو لمنصة البلاطو الاخباري...
∆فالقصر ...
حياة : برااافو عليها .. ما قل ودل ...
عدنان : اوا داباا يسكتو شوية. ..
رتاج : وغير لا مابغاوش اسكتو راه كولشي بااااان ... شفتو بنت الحراااام كيكانت متربصة .. كي شي لفعة .. دابا هادي هي لي كلات طعااامناااا وكلسات معانااا وترباات مع ولااادنا ... بسم الله الرحمان االرحيييييم على قلب عند هاد الناس .... بغيت غااانشوف وجه مها وهي كاتشوف هادشي .....
حياة: والله الى خسااارة ... كانت عزيزة عليا صرااااحة ...ولكن دير هادشي فالبنت لا
سفيان : فين هي دابا ؟
لامار : طلعات .. مابغاتش تفرج ..
سفيان : خلييييوها على خاااطرها ، كيف قالت ختها الوقت كايصلح كووولشي ...
لامار : انا كنخاف هاد الغدا وماتبغيش تمشي ليه ..
حياة : ألاا ضرووووري ، هاد الغدا هو لي غاايزيد يبين بلي ماوااقع والو ...
سفيان : ( تنهد وشاف لساعتو ) مزال ماجاي أسد !!!
لامار : هاحنا كنتسناو ....جمعناااا وخلانا ....
سفيان : والو مقالش علاش !!!
لامار : والله الى بحاالي بحالكم ....
___________
گاراج جود ...
وصلات جيب دلؤي حدا بيبان الگاراج ... ، غير سكت طوموبيل بقا شاد فالفولون شحاال كايشوف قدامو ... فلخر رجع حل لباب ونزل ....
تقدم العساس سلم عليه وزاد قرب للبيبان دالگاراج لي كانو غير مردودين , دفع وحدة منهم ودخل ...
الإضاءة كانت شاعلة غير للتحت ... واصوات الاصلاحات كايتسمعو تحت وحدة من الطموبيلات لي كان خدا من نوار ... كان كايبان من جود غير رجليه وبطنو ناعس على الأرض أما نصفو العلوي كان تحت الطوموبيل ... لابس غير سروال دسرفيت كحل و كولو رجع بيض بالغبرة ... وصدرو كان عاري عامر بلاگريس وعرقااان ...
تقدم بشوية تاوقف حداه وجود شاف الگاط دلوؤي تحط حداه .. ورجع كايكمل ..
لوؤي : عرفتو منين كايجيب الفلوس ....
جود : ( خرج من تحت طوموبيل وشاف فيه باقي ناعس فالأرض ويديه فيهم سوارت لي كايحل بيهم الموطور ) منين ؟ !!!
لوؤي : كايدير كومباات فالنوار ...
جود علا حاجبو ، كايحاول يستوعب واش هادشي لي سمع هو نفسو لي كايعرف !! الكومبا فالنوار !! يا تربح ياتموت !! تحط حياتك فرهان يقمرو عليه القمارا !!! واش هادشي علاش كايهضر لوؤي ؟
تخطاه لوؤي ومشا لواحد الكرسي و جلس .. وجود خرج من تحت طوموبيل ، لاح دوك السوارت من يديه وهز سربيتة كايمسح فيها يديه من لاكريس وملامحو مستفهمين .. وبصرو مركز على لؤي ...
لاحها و مشى بجيهتو وجر كرسي و گلس حداه كايشوف فيه ...
جود : كيييفاش كومبات فالنوار !!!
لوؤي : ( كايطقطق بصبعانو على جناب الكرسي وشاف فيه بعد تنهيدة ) هومااا نفسهم هادو لي فكرتي فيهم دابا أجود ... نفسهم ...
جود : ونتا باش عرفتي هااادشي !!!
لوؤي : ماكان عندي تا شي شغل ليوم من غيرو ... ( كايدوز يدو على وجهو بعياء وشاف فيه ) اه بصح ... هادشي فيد عمي أسد ... ومكاين تا شي كلمة فوق كلمتو ... ولكن تانا باغي نطمن على ختي ولا لا !! راه ماغايدينيش نعاس .. راه فاميلتي هادي لي غايدخل فوسطها ...
جود : ( بقلة صبر زعف ) دابا فهمني ... فهمني من لللول !!! واش كايلعبهم ولا كاينظمهم ولا كيفاش !!! واش يدو فشي عصابة ؟؟؟
لوؤي : ( قرب عندو كايشوف فيه) الضوسي ديالو القانوني ... نقى من وجهو ... ماعندو تاشي سوابق وعمرو فايت تشد ... والسمعة ديالو فالحومة ديالو كذالك .. كايقولو بلي راه واحد بنادم لي داخل سوق راسو .. عايش غير هو وختو منهار مات باه ... متايديرش المشاكل ... تقدر تقول بنااادم مبعد على الصداااع .... عايش بالصيادة ... كايخرج مع واحد الباركو ديال واحد خينا عندو ريسطواات ديال الحوت فتطوان وطريفة و هنا فكازا ... خدام معاه , ماخدامش مع صيادة ديال السوق .. يعني ماكايبيعش ويشري .. هو على كل طراجي كايتخلص ... وداكشي قلييب ماشي شي حاجة ... ولكن كنضن كاافية لواحد هو وختو ماكاريين ماوالو .. الدار ديالو .. كاينة ف **** *** .. ( جود متبع معاه ) ولكن مؤخرا .. خدا واحد الريسطو كان قديم دار فايييت .. مشيت شفتو .. كبييير .. وباديين فيه الإصلاحات .. وموقع كايبان العقار فيه غالي .. على الأقل غايكون بمليون درهم ولا كتر .... ضررررني راااسي منين جاب الفلوس ( جود مصغر فيه عينيه حيت هاد السؤال هو لي مزال مالقاش ليه جواب ) ... قلبت على المستوى الدراسي ديالو ... قرا حد الباك .. ولي مافهمتش ( كايشوف فجنب بشك ) كيفاش واحد واخد لباك بتمنطاااش خمسة وستييين فيزيك ... ومادار من موراه واااالو !!! ماعندوش الصحااب .. ماعندوش العائلة ... !! ولكن حاجة جراتني لحاجة وانا كانقلب على صحابو .. طحت فواحد الكوتش .... خيط بخيط ... لقيت بلي هاداك الكوتش ، هو كوتش ديال Illegal fights ... عندو لاعب واحد حاليا سميتو الوانس ... ( صغر عينو فجود لي كايسمع ليه بتركيز ) وهاد الواااانس ، لقيتو هو هاد السيد ..... بحد ذاااتو .. !
جود : أهاه !!!! يعني !!
لوؤي : يعني راه كاااايلعب ... ماعنديش التاريخ دهادشي كامل ، كاتعرف هادشي راه كامل نوار تحت الدف ، ولكن عندي ريبيرطوار ديال 3 سنييين ... طلع مع شي نگليزي كاينظم هاد الكومباات .. وهاد نگليزي كاايجيب اللعابا من العالم كااامل ، بحالا قلتي داكشي معليين ليه النيڤو خاااصو غالوراااق ... ولكن مايمكنش يكونو لوراق حيت ماكايتنظم تا كايسني على حياتو فالقمااررر ... خصهم ديما يبقاو فالنوار ... ( جود كااايركز فكل كلمة خارجة منوو ) هاد تلت سنين لخرا تشهر فيها فهاد الهيت ديالهم بهاديك السمية .. سميتو دبصح تاحد تما مكيعرفها .. واقيلة تالكوتش ديالو مكايعرفهاش .... يعني هو حياتو لولا لي هضرت ليك عليها .. بعيييييدة على هاد البلانات ..بحالا بغيتي تقول عندو جوج شخصيات ... واحد دالنهار واحد داللييييل ... ( جود رجع ظهرو لور متكي على الكرسي كايرمش وكايستوعب هادشي ) لي عرفت ... هو تقريبا .... مدة طويييييييلة مالعبش ... حتى قالو اعتاازل ... غير تااارجع مؤخرا ... تاريخ لي رجع فيه ... هو نفسو لي خدا فيه هاداك الريسطو ... وهو نفسوووو ... لي عرفاتو فيه قسم .... فهمتي البلان !!
جود : ( كايضورها فراسو ) اممم .. شحال لعب من قبل ؟
لوؤي : راه قتليك كثر من تلت سنين ماعارفش .. ماعندي تاشي حاجة تأكد ليا واش كان كايلعب ولاا عاد بدا !! ... أنا ماعارفش .. عندي ريبرطوار غير ديال تلت سنين هي لي جمعت خيوطها ... فهاد تلت سنين قبل من هاد الكومبا لي قتليك تاريخها كان نفسوو لي خدا فيه هاداك ريسطو .. لعب جوج دلمرات خرين مع هاد النگليزي ...
جود : عندو شي عقد عبودي !
لوؤي : كنت خايف منو .. ولكن مالقيتوش .. ماعندوش كايلعب فري ...
جود : و ماعارفش دوك جوج كومبات آش دار بيهم ! وشحال تخلص فيهم ؟؟
لوؤي : شحال كايتخلص مكنعرفش ... ولكن لبارح أنا قلبت على سميتو وجبدت أي ورقة و أي نشااااط عندو مع الدولة حتى من ورااق ليكلينيك ... ولقيت فاتورات ديال واحد المصحة تمات فيها عملية حيدو الما من الرية لبنت كانت عندها 18 عام سميتها ..... سلمى الشريف ... غاتكون ختو ... ، والتاريخ دهاد العملية كان غير يوماين قبل ماطراات الكومبااا اللولا ... ومنبعد غير بشي عشرين يوم طرات كومبا أخرى ولكن ماقدرتش نعرف سببها ... حتى جااات هادي للخرا لي قلت ليك نهار ديالها مع نهار شرا ريسطو .. والريسطو مزاااال مكاااملش بالخلاص .. تواصلت مع محامي ديال موالين تاداك ريسطو وقال ليا خلص النص ....
جود : بلاتي بلاتي ( ناض وقف ) واش نتا كتخدم بشي سيرفر ماشي ديالك ؟؟؟ أشمن صلاحيات درتي بيهم هاد لونكيط و نتا موقف !!!
لوؤي : ( كايفرك جبهتو ) عندي سيرفر ديال واحد خدام معايا ..
جود : كادير لونكيط بسميتو !!! ويلا درتي ليه شي مشكل !!!
لوؤي : ماغايكونش هاد المشكل مهم بنسبة ليا كتر من بنت عمي !
جود بقا غير كايرمش و مافهموش علاش دوا بهاد البرود !! ولؤي شاف الأرض كايتنهد ...
لوؤي : دابا أنا ماعرفتش .. حررررت .. ماعرفتش أشمن خانة نحط فيها هاد السيد ... !! والله تااا تلفني .....
جود رجع تاني جالس على الكرسي غير ساكت كايشوف قدامو ولوؤي علا فيه راسو ..
لوؤي : جمعت آش عاودتي ليا عليه .... وشي حاجات خديتهم من عند قدس قبيلة فتيليفون ، منهم سبب خصامهم ... ومنهم أنو خذاا هاديك الريسطو على و ودها وعلى ود يطلع درجة لعندها ... عرفت أنه مابغاش يجي لدار وهو غير صياد بسيط ...بغا تاايحل هاداك ريسطو ويخطبها على اساس عندو مقاولة ديالو ... جمعت هادشي مع كيفاااااش خدا هاد الريسطو .. مادارش كريدي .. ماخداش وورث ... ماخرجش يطلب .. هووو .....هووو راا باع حياتو .... ( علا عينو فجود لي كايشوف فجنب كايمشط فلحيتو للتحت بتوتر ) ونتا عارف شنو هي دخل فكومبا نوار .... يا تربح ... ياتموت ... كنت خايف من حاجة وحدة .. ملي سمعتو فهاد العالم ... هو يكون مبلي ... ولكن بان ليا كايلعب غير ملي كايحتاج .... ( جود غير ساكت كايشوف لجنب ولؤي عض على شفتو مدة وشاف فيه ) جووود ( جود ضور راسو لعندو كأنه عارفو آش غايقول ) هاد السيد .... راه كايبييع حياتو ... على ودها آجود ... واش واعي بهااادشي !!!
جود طول فيه الشوفة كايرمش ورجع تاني شاف للجنب مزير على قبضة يديه ...
لوؤي : ( تنهد وشاف لتيليفون شحال الساعة وتفكر بلي جامعهم أسد ورجع شاف فيه ) أنا عارف هادشي مامزيانش ... عااارف هادشي خطير .. وعارف مزيااان بلي عمي أسد كيما عرفت أنا ببساطة غايكون تاهو عرف .... وعاارف بلي ماعنديش حق ندخل فهادشي .... ولكن واااحد يشري الطريق لعند قسم بالروح ديالو ! .... ( وقف ) واخا يوقف العالم كااامل ضدو .... أنا نشهد ليه فعرسو معاهااا ... ( ضار جيهة باب الگراج) يلاه باش مانتعطلوش ... ونسمعو شي محاااضرة تاني ....
جود : لوووؤااي ... ( وقف وجود ناض لعندو ولؤي ضار ) واش عارف هادشي لي قلتي شنو هو ؟؟؟ واش عارف شنو هوما هاد الكومبات !!!! نتا هزيييتيها هاكاااا خفيفة .... ولكن أنا لا .... أنا لي شفتتتها شحال حاااافر فيها .. وشحال تعلقات بيه .... وإيلا وقعات ليه شي حاجة !! ويلااا مات !!! وإيلا بقى ديما هاكاا كل درجة يخلص عليها بحياتو .. شحااال عندو دالرواح فهاد الحياة !!! شحاال بقااااو !!! الى حتى ندخلوه وسطنااا .. ونعطيوه قسم .... ونولفووه .. و يولي واحد منا .. ويتقتل فالنوااار .. تامن الكسدة مايعطيوهاش ليك .... أشمن زواج هادا ؟ .. !!!!!!
لوؤي : واش فنظرك عمي أسد غايخليه فهادشي ؟؟؟؟؟ واش منييييتك !!!!! واش فنظرك عمي أسد معااارفش هادشي لي كالس كتگول فيه داباااا تاهو !!!! ( شد ليه فكتافو ) جود .... بلا منزوقو الهضرة بزاف ... كلنا ملي كنبغيو شي حاجة كنريييسكييو .... ولي مايريسكيش على حاجتو خوااف .. والخواافين ماعندهمش بلاااصة وسط مننااااا ... أنا نفضل قسم تمشي عند واحد كااايريسكي على ودها .. و ماتمشيش عند واحد يريسكيييي بيييها على ود مصلااااحتو ... ونتا عاااارف مزيااان الأشكال لي تقدموا ليها فهاد 28 عاام كاملين كييدايرين ... كون كان مبلي أنا معااااااك ... كون كان عندو شي عقد عبودية أنا معاك .... هاداك واحد بنادم ماعندو منين يجيب لفلووس .. كاااايسني بحيااااتو ... ياربحة يا دبحة .... وكااايربح ... هاداك واحد بنادم لي ماعندو مااااايخسر فهاد دنياا ... ونهار يبغي يهز يدو غايهزها ، راه كااايلعب حر ..... متابع لتاشي عصااابة .... وبلااا متكدب على راسك راه تانتا عجبك هادشي لي قتليك .... ايلا كنتي غتقولي هادشي ماشي قانوني انقوليك ( ضورو من كتافو ) ضورررر وشووف هاد طموبيلات لي قدامك ... وغاتعرف راسك أنك تااااانتا كااااتريسكي على قبل حاااجتك ، غا نتا عندك حلم ... وهو عندو ختك ...... ( طلق منو وزاد للباب ماشي وكايهضر ) ودابا لي عرررفت منين كااايجيب لفلووس .. أنا مرتاااح .. كيما رتاحيتي تانتا داباااا .... ( ضار عندو ) حيييت عارفين عمي أسد مغاايخليهش يحتااج علاش غايبيع حيااااتو مزاااال .... يعني المشكل الوحيد لي كاين .. مااابقاش ..... ( غادي لجهة الباب ) يلااااه غانتعطلو ... وخلي التفكييير للي غااايتناسبو معااهم الشمااايت ... ماشي حنا ....
ضحك و ضور راسو خرج لبرا مبتاسم ... قلب فجيابو على گارو شعلو وزاد لطوموبيل راشقة ليه .... تاينغموو مزيااااان بنادم لي هبييييل بحالو ... بنادم لي ماتيمشيش على الطريق السااااهلة ... بنادم لي متاايتبعش الروتين ... وبنادم لي تيتجرأ على الممنوع .... تنغم مزياااااان إلى كان غايدخل واحد بحال هاكا للعائلة .... كايخاف بزاف من الشماااايت لي يقدرو يبيعوهم فأي لحظة ... غاي للطموبيل كايكمي وكايتفكروو فالكلينيك مع الصحافة كيفاش كان !!!! وكايحرك راااسو بإعجااااب ..... هدا هو لي غاايصلاح لعائلة بحالهم ... بخالا مفصل على قيااااسهم !!!!
جود لي خلاه لداخل بحال المقطوع راسو .... تايغسل فوجهو ويعاااود ....
ماعرفش مالو من لداخل .. مجرد متايفكر فيه هو وختو .. تايحس بشي حاجة ماشي هي هاااديك .. تايكره عندو هاد الحاسة لي كتخليه ديماااا هاز الهم .... مقالش لوؤي العيب فيه بالعكس ... هو منهار سمع مشاعر ختو وهي تتبكي فباحة الإستراحة وشنو تتحس من جهتو .. كان خايف تكون ختو لي تتبغيه بوحدها بهاد الحماس كامل .. كايخاف بزاف من العلاقة لي فيها البنت كتعدب بوحدها ... مايبغيهاش تكون بحال بيلسان وحدة أخرى مع واحد مامسوقش ! .. ولكن اش سمع عليه ... و أشنو عرف عليه ... خلاه يتأكد أنه تايبغييها تاهو بنفس الحمااااس .... واحد كايشبه ليهم فكولشي ...
ولكن هو علاش مامرتاحش ليه ... واخا هاد الموضوع فيد باباه وهو عارف مزيان باباه كايسبق الكل بخطوة وكايعرف حسن منهم .... ولكن مامرتاحش لشي حاجة .. كتحرق فيه للداخل معارفهاش وماباغيش يعرفها وماباغيش يبينها .. و ماباغيش تايعطيها وقت ويركز فيها ....
ايلا كانو تايبغيو بعضياتهم ... وغايجي ليها من البااااب .... والعائلة موافقة وكولشي رااااضييين .. اذن ماشي هو لي غايعكس هادشي !! ... علا عينو فالمرايا ورجع سد عينيه مدة مزير عليهم جامع شفاايفوووو ... راااسو بدا تايعطيه الشقيقة .. ورجع تاني خشا راسوو فلاڤابو تايغسل وجهو و لوؤي قالب دنيا بالكلاكسوووون عليه ينزل يمشيو ...
_________
∆فالقصر ...
كالسين كلهم على أعصااابهم تايتسنااو ... كل شوية لامار تشوف لساعة وتشوف للباب ... ورتاج كاتهضر مع لوؤي فتيليون ، وقطعات ...
رتاج : هاا لوؤي وجود فلباركينغ ... جاو ..
لامار : و هاهو جاا لوؤي وجود .. راه خصنا أسد يجي ...
عدنان : ( شاف لساعة ) إوا اجتماع واحد لي عندو دابا غايكون سالا .... غايبقى ناشرنا هنايا !
أسبرو: ودابا سيييير فوقاش يتجمعو كاملين .. و فوقااش تجي قسم ... بقييينا هنا ....
حياة : والله تا معدتي ضراااتني .. مامولفش يجمعنا بحال هاكا ...
سلطان : ( دخل من الجردة وتلاح حدا حياة دار مخدة على رجليه ) دابا مزال غانبقااو معلقين !!!
لامار : هاحنا بحالنا بحالك .... عمرو ما دار فيا بحال هاد السترييييس ... ولكن غاابلااتي عليه ....
سفيان : وغاا تكاالمااو دابا يمكن شي حاجة مزيانة .. الحااجة الخايبة مايجمعناش عليها بحال هاكا ... !
رتاج : إوا راه هاد الحاجة المزيانة بغينا نعرفوها .. راه الحوايج الخاايبيين صاافي گهموووونا ...
باقين كايهضرو و هو يدخل لوؤي وجود .. لاح جود الڤيست ديالو ، ولوؤي عينو كانت كاتقلب عليها تا بانت ليه جالسة حدا ماماها .. طلعها و هبطها واش راها صافا .. وغمز ليها عاد جلس .. وهي تبسمات وتخشات فماماها كتر كاتشوف فيه ... وجود جاا گلس حداه ...
جود : فين الواليد !
لامار : هاحنا كنتسنااااووو .. مزال ماجا .. كنصوني مكايجاوبش !!
لوؤي : ( شاف فرتاج ) و ملي مزال ما جا علاش مصدعاااني بليزابيل جااي بمية وثمانين ... !!
رتاج : واراه خفنا يجي و نبقاو نتسناوكم نتوما ... هاهي تا قسم معطلة ...
باقين كايهدرو و هوما يسمعو تنحنيحتوو عاد رخاااو النفس ولامار وقفات غادة باتجاهو بسرعة...
لامار : وااااعلى سلااااااامتك .. ياكما نجيبو دقاااايقية .. أويلي آش هاد تعطييلة ؟؟
أسد : ( هاز فيديو بواط كحلة صغيرة ) مالكوم ياك لاباس ؟؟
لامار : أويلي على ياك لاباااس .. حنا جامعنا هنا على أعصابنا و كاتقول ياك لابااااس !!! ياك لاباس نتااااا !
أسد: ( تبسم وحل هاديك البواطة لي كانت كحلة وفيها تمر معمر بريستيج وعطاها ) خووودي أ مولات شي خودي ....
لامار : ( نزلات عينيها لداك بواطة ورجعات شافت فيه هو لي راشقة ليه ) آش هادشي !!!!
أسد : تمر !!!
لامار : و أشمن مناااسبة !!
أسد : واااخودي بعدااا طلقينااا ..
هزات لامار وحدة باستغراب وهوما كولهوم متبسمين مفاهمين والو تادخل عندهم كايفرق عليهم واحد بواحد وهوما كايهزوو ضاحكين ليه ... داير يد ورا ظهرو ويد فيها لبواطة محني عليهم واحد بواحد ..
عدنان : لا لا هاد الصواااااب مااعجبنيييش !
سفيان : داير شي كارثة نتا ياك !!!
لوؤي : ( شاف للامار ) ياكما غايتزوج عليك ؟؟؟
لامار : ( واقفة شادة على نصها كاتشوف فيه مستغربة ) وااابحااال والووو ...
أسد : ( خشا ليه تمرة ففمو سكتوو ) تشششريها ليااا ماحشمتيييش !
لووؤي : ( كايمضع فمو عامر خشاها ليه كاملة ) وراااه هادشي كايدخل التناوي أعمي ( وحلات ليه تايكحب وحياة كتمد ليه الما )
سلطان : عمي ... ( مسح يدو من تمر ) تمر راه كليناه .. عنداك تكون عييتي منا و داير لينا فيه شي سم بغيتي تصيفطنا جملة ... !!
أسبروو : ( بخوف ) هاااااا !!!!
أسد : ( حط البواطة فاش عطاهم كاملين وجلس ) فكرة مزيانة درتيها ليا فباااالي ....
أسبرو : صبرو غاانمشي فحااااالي .. وانا نسيفطلييك أسي أسد دوا دالبرغوث من تما ...
أسد : واش هادو غايقضي فيهم دوا دالبرغوث .... هادو خصني معاهم دبابة روسية والقنابل ( شاف فقدس لي مبتاسمة بعياء ) صافا ؟
قدس : ( ابتسمات ليه وتخشات فصدروو معنقاه فرحاانة لي مامقلقش منها ) صافاااااا ...
أسد : ( عنق عندو قدس ) قسم مزال معطلة !
لامار : ( كلسات حداه من جهة للخرى ) أسد والله لا تسنينا شي واحد .... هضر قووول لينا
جود : غاتزيد شوية د سيسپاانس هاد العرق لي باقي فراسي غايتفركع .. گولينا آش كاين ؟؟؟ ...
أسد : ( كايشوف فيهم و عينو عليهم راشقة ليه ) عندنا غدا ضياااف ..
حياة : اهاه!! شكون ؟
أسد بابتسامة كايلعب على أعصااابهم وكايهضرر ومعلي حجبانو وعينيه للفوق راااشقة ليه .. و شنو كايريح الاب من غير يتزااح هم ولادو ويتحطو مع شرييييك يرضى عليه ويفرح بيه ... ويدخل ليه لخاطرو ....
أسد : الخطاب ...
لامار : ( بصدمة ) فيييييمن ؟
أسد : فماماك ..
لامار : ( بصدمة حلااات فمها) شنوووووووو ؟؟؟؟؟؟
رتاج : أويلي !!!!!!
أسد : وانتي كاتقولي ليااا فيييمن !!! على فنظرك شكون بقى لينا هنا غاايتخطب !!!!
رتاج : ( بفرحة ) واش قسم ؟؟؟؟؟ ( أسد علا حجبانو بالإييجاااب راشقة ليه )
لامار : ( بفرحة ) ححححلف بالله!!!
أسد : وعلاش غانحلف ؟
سلطان : شكووون !
قدس : ( بابتساامة ) وارااا بااااينة سسسهيل ...
أسد : شكون سهيل ؟
لوؤي : ( شد على جبهتو ) يااربي تصبرني ياااربي ..
لامار : ماتديش علا هاد لمگلوبة راه أصيل كاتعيط ليه سهيل ...
أسد : و شكون قاليكم راه هو !
لامار : ( علات حجبانها بصدمة ) ماشي أصيل ؟؟؟؟ ( أسد حرك راسو بلا ) وشكووون ؟
أسد : مكتعرفوهش ...
جود : ( علا حجبانوو ) آش كترووون داباااا الواليد ؟؟ شكوون هادا تاانيي ؟
لوؤي : تاضحك معانا ياك !!
سلطان : ياك سمعنا بهاد خينا هدا لي غايخطب.. علاش غادي تتخطب لواحد آخر !
قدس : ( قربات تبكي ) باباباااااا عندااااك تمشي تدييييرها بصصح وتعطيها لشي واحد .. والله تانحمااق ليك هنايااا .. هي د أصييييييل وماديال تاااشي واااحد آخرررررر ( لوؤي مصغر فيها عينيه ) هو الوحييييد لي غادي تدي ختي .. أنا عججبني هووووو ...
أسد : وراه خصو يعجبها هي... علاش غايعجبك نتي ؟!!
قدس : وعاجبني هووو حيت عااجبها هي .... ختي أصلا مغاتبغييش ( بعصبية ) ومااااااا ما غايديهااش شي واحد آخر .. هي بااغااااا أصيل .... متروووونش أباباا .. تالزواااج لااااااا !!!!
عدنان تنهد مرجع راسو لور كايعرفو ملي كيبدا إطنز وسفيان كايشرب كاسو د القهوة وكايتفرج فيهم ..
لامار : ( ضوراتو لعندها ) شووووف اه .. ماغايجي تا شي واحد للدار ... هاداااك السيد هو لي عاااجبني أناااا .. هضرت معاه ووزنتو وعبرتو وطلعتو و هبطتووو .. عججبني و بنتيي بااغااااه .. وتاهو بااااغيييها ... بيناتهم المشاكيل يصلحوهم .... الصلاة على نبي .... هداااك ولا بلااااش
رتاج : واابصح أخوياااا ... حنا دخل لخاطرنا هاداك ....
حياة : رتاحينا ليه الصراحة ....
أسد : ( تنهد ورجع بلور داير رجل على رجل ) اوا صافي ملي عجبكم هداك .... يديييها أسيدي هو .. ماانعطيوها لحد ..
قدس : ( مصغرة فيه عينيها ) بابااااا !!
لامار : ( شداتو من دقنووو ) راااك كاااتلقب علياااا أ أسد ..
أسد : ( حيد ليها يدييها كايضحك ) ططلقي يا هاد المرا هه ( مد يدو هز فنجان دالقهوة ورجع بلور ) هاد الولد مسكين ماعارفش واش غايدي البنت ولا غايديكم نتوووما ... أسييييدي عندووو الدفااااع مجهد ....
عدنان : واش هو لي جاي !
أسد : امممم ( حط فنجانو) هو .. ( لوؤي علا حجبانو وجود غير كايتنهد ) .... كنت معاه قبيلة نشوفو فين وصل فداك المشروع ديالو وقاليا غايجي غدا هو وختو يخطبووها ...
سفيان : ( حط فنجانو ) اوا الله يكمل بالخييير ... بالتيسير ان شاء لله .... الله يسهل عليهاا ....
حياة : ( بحماس) غدااااا ؟؟؟ أويلي ماموجدين واالوو ( شافت فلامار ) يقققدنا الوقت ؟؟؟؟
لامار : يقد يقد ... ( شافت فأسد ) شكون جاي معاه گاع ؟!!
أسد : تاحد ... ( شاف فيهم ) هو راه ماعندو تاااواحد ... باش نتافقو و تعرفو لي كاين .. باه كان صديق عزيز علياااا بزااف .. وجدو راه إنسان مغايتعاااودش .... أصلو طيب .. وتاهو بنادم لي ثقيل وماااخفيفش .. كبر جنب الحيط هو وختو .. وماعندوش مع المشاكيل بزاااف بنادم مكالمي ... الله يعمرها سلعة صراااحة ... أنا ماعندي ماندير بعائلتو ، قاليا قبيلة عندو غير ختو .... وغايجي هو وياها ... ( شاف فلامار ) فكرني فراسي نهار مشيت نخطب أنا ويوونس .... ( تنهد ورجع شاف فيهم و عدنان شاف فلارض ) قتليه مرحبا بيك ..
أسبرو : شي حمار هدا مات ، ملي تلاقيت مع زردة .. غاااااا الله اخرجها على خير زهري كنعرفو ...
حياة : يااااعووذو بالله سكتنا ...... ان شاء لله مايكون غا الخير ويدوووز كولشي مزيااااان ... كون كانت هنا الحاجة كون قلبات دار بزغاريت هههههه ..
أسد : ( شاف فجود لي غير سااكت ) أشنو بانليك اجود !
جود : ( تنهد و علا راسو ) لي بالك ألوالييد .. مغنعرفش حسن منك .. الحياة ديالهم هاديك والقرار ديالهم وديالك .... أنا معندي غير يتهلا فييييها ويقد بيها ... ماعندي مانحيد ليه أنا ...
عدنان : داكشي لي كاين ...
لوؤي : غاتوكلو عالله أعمي ... السيد باينة مزيااان ..
أسد : وحنا دابا غير كانهضرو .... تايبقى الشوار ديالها بيناتهم ...
رتاج : ومشات وجات للمكتاب تاني .. حنا صراحة دخل فخااطرنا واخا شفناه غا شوية .... ولكن بنادم كااايحس ... صراحة الخاطر هانية من جهتو ، قلتها لعدنان لبارح ...والله تامرتااااحة ....
قدس : ( بضحكة ) والله تااكنت حااااسة بلي غايجي فهاد لللياااام والله هههههه ..
قسم : وشكون هادا لي غااايجي ؟
كلهم هزو راسهم فيها هي لي داخلة ضاحكة من آخر جملة قالتها قدس .. فرحات لي شافتها ضاحكة فرحانة .. حطات كارطابل دالوراق ديالها وبقات بنفس الكوستيم لي كانت بيه فالندوة .. جامعة شعرها للفوق ... وجات گلسات حداهم كتحيد طالون من رجليها وتعوجهوم بالوقوف و العياا لي باين فوجهها ...
قسم : ضحكوووني معاكم !!
رتاج : ( عنقاتها ) جاااينااا الخطااااب أبنتيي ..
قسم : ( هزات حجبانها ) خطااااب ؟؟؟ ( شافت فباباها ) إينا خطاااب !!!
لامار : ( بفرحة و حماس ) غايجي ااااصيييل غدا هو و ختووو ...
قسم : ( بصدمة هزاااات حجبااانها وطرطقات عينيها وبلا ما تشعر وقفات ) كييييفاش !!!! ع .. علااش غايجي ؟؟؟ لهنا !!!!!
لاماار : ( وقفات معاها خلعاتها بهاد ردة الفعل ) اااه .... مالوو بغيتيه يبقى ديما مخبي !!!! راه باينة واحد نهار غايقصد البااااب ...
قسم : ( شافت فباباها وفالعائلة ورجعات شافت فيها ) علاش هادشي مافخبااااريش !!
قدس : ماگاليك واااالو ؟؟؟؟
قسم : آش غادي يقووولي ؟؟؟؟؟ أنا وياااه تفارقنا أصلا !!!! ( شافت فأسد ) بابا زعمااا راك عاااارف كوووولشي !!! منين جات هاد الخطبة ؟؟؟؟؟؟
أسد : جات من عندو ... ( دار رجل على رجل ) قاليا جاي غدا أنا و ختي ... آش نكوليه ؟ ماتجيش ؟ باش تنتااحري ليا هنا !
قسم : ( بعصبية ) غاااانتااااحر إلى جاااا !!!!! كيييفاش أنا مفاااارقة معااااه وهو جاي يخطب بلا خبااااري ؟؟؟؟
أسد : بخباااااري أنا ..
قسم : إوا يديييييييك نتا ... يكمل علا خييييرو و يخطبك نتااااااا ....
أسبروو: ( وسع عينو ) ا رسووول الله !!!
كولشي طرطقو عينيهه فيها وهي هزات كارطابل ديالها بنفخة و غادة جيهة دروووج مكشكشة ..
قسم : مزيااان تبااارك الله السييييد بغااا بابا كترررررر مني ... ( ضارت موراها ) ملي ولااا كاايشااااورررر و يهضر غير معاك نتااا .. يدييييييك نتاااا مايدينيييش أنا .. يجي يخطب ونعطيوك لييييه ... هاااادشي لي بقى .....
أسد : ( متبعها بعينو معلي حجبانو والكل كايحاولو يشدو ضحكتهم ... وهي طلعات فدروج مفقوووصة وجود كايضور فراسو .. و أسد رجع شاف فيهم كايشير بصبعو لصدرو ) بلااتي ! واش هادي كاتغييير مني !!!! ...
عند أصيل ...
الساعة 00:15 ..
بدا كايتسمع صوت المفتاح تايحاول يتخشى فالباب .... من الصوت تايبان بحال شي شخص لاقي صعوبة باش يلقى ثقب المفتاح ...
بعد ثواني ... تحلات لباب ودخل منها بخطوات بطيئة ... كولو كاينهج ... ، مكانش كايبان وسط الضلام ....
دخل بخطوات عيانة وسد لباب وتكا عليه مزير على سنانو من الألم لي فضلوعو ....
وعاد رجع دخل للدار طل غير براسو بانليه كولشي ضلام ، عرفها غاتكون نعسات ....
ورجع طلع فدروج شاد فالحديدات تيلوح الخطوات غير بزز ...بمشقة الأنفس باش وصل لبيتو ....حل لباب وشعل الضو وتلاح على السرير كاينهج ...
كان غير بشورط أسود كولو مغبر ... رجليه كانو باقين فيهم الباانضااات وسبادرين كحلة ... لابس بيل كحلة ويديه كولهوم بانضات ... وجهو مكانش فيه بزاف دالكدمات من غير عروقو البارزيييين .. وضربة خفيييفة تحت شفتو باقي سايل منها الدم ..
علا راسو للفوق كل ماتحرك كاايحس بالحريييق .. الدم ملي كايبرد كايرجع عليه بالحريق فضلوعو لي تسحقو بالضربات ... كايعوج عنقو شوية بشوية كايحس براسو كااامل تاايضرووو ...
حاول يتگعد بشوية .. وتحنى لسبردينتو كايفسخ ليها السيور و لاحها من رجليه ... وبدا كايفسخ فدوك البانضات ... كل حركة كايدير كايتأنن معاها ...
رجع گلس وسلت الپيل ديالو تاهي لاحها فالأرض .. وتعراا صدرووو لي عاامر كدماات حمرييين ولي واضح غايزرااقو ... كان صدرو باقين بارزين فيه عضلااتووو بالدم السخون ... وعليه حبييات العرق ... والعروق فعنقو باارزييين ... ورجع تاني نعس على ظهرو مقااادش ينوض للدوش ... دار دراعو على جبهتو بأنين .. وهو يسمع تيليفون كايصووني ...
بدا تايحاول يمد يديه بشوية لجيب الشورررط .. وكيتأنن مع كل حركة ... هزو و علاه قدامو يشوف شكون وهي تبانليييه نمرتها !!!! ...
ضحكة قمة فالعيااااء بانت على شفاايفوو .. تابدا يتأنن .. تا من الضحك حرقو ....
و دار تيلي فودنيه وهي تنهاال عليه قبل تا ما يهضر ..
قسم : كيييييفاش جاي تخطب ؟؟؟ كيفاااش جااي تخطب وانا ماافخباااريش !!!! واش منييتتك أ أصيل ؟؟؟ ياك قلنا كل وااااحد يشد طريقو !!!
أصيل : ( نطق بصوت مدعدع وابتسامة على شفااهووو بعيااااء ) وراه شديت طريقي ...
قسم : راك جااااي للدارررر أ أصييل !
أصيل : و .. وهادييك ... ( كايتأنن بصمت ) هي طريقي ...
قسم : اصيييل ... واش كضحك عليا ؟؟؟؟ علاش قلتيها لبابا وانا لا !! كيفاش أنا وياك مضاربين ونجي لدار لقى خطبة !!!!
أصيل : ياك ( عض على شفتو كايحس بالحريق ) ياك غانجي لداركم ... ماشي غانتلاقاك نتي باش نعلمك ... جاي لداركم .. علمت داركم ...
قسم : أصييييييل ...
أصيل : ( طلع راسولفووق بألم ) مممم ..
قسم : واش كاتسطااا عليا !!!!
أصيل : ( بألم وصوت عياااان ) بزاااااف ...
قسم : ا .. اصيل ؟ ؟؟ واش نتا بيخييير !!
أصيل : ( شد على كتفو لي عاطيه الصداع ) لا ...
قسم : أصيل ؟؟؟ أصييييل !!!
أصيل : آقسم ..
قسم : مالك ؟؟؟؟ مال صوتك ماعجبنيش !!
أصيل : را .. را كنت ناعس ..
قسم : راك بحالا سكراان !
أصيل : ( عض على شفتو من الألم لي تايهزو من فوق سرير مكمل كلامو ) هه !! ممثلااا ! ...
قسم : أصيل راك ماعاجبنيييش ؟؟؟ مالك !!!
أصيل : ت .. تا حاجة أ قسم غي ناعس .... ( كايحاول يتحكمم فالأنيين ديالو ) خليني نعس دابا تال غدااا ..
قسم : كيفاش تال غداا أ أ صيل واش باغي تحمقني !!!! انا وياك مازال ماتصالحنا باش نتخطبو !
أصيل : قسسم ! ... انا غذاا جاي نخطبك ... بغيتي هو هاداك .. مابغييتيش راه غانهز والديييييك من شششعرك للعدول ... بربي لا عقلت عليييك .. غاااابقاي تمررررضي فديلمي .. ( كايتأنن بألم ) سييري تنعسي خليني نعس .. تالغدا ...
قسم : ( قربات تبكي ) اويلي اويلي غاااااادي نحمااااااق !
أصيل : فوتي (مزير على سنانو) ... فوتي غا غداا وحماقيي ....
قسم : ( تنهدات ) قلتيها لسلمى ؟
أصيل : تت ... ( زير عل شفتو وكايهضر بزز) تال غدا ونقولها ليها ..
قسم : و علاش لي مشيتي قلتيها لبابا ... علاش لي كولشي كاتقولو لبابا ونا لا ! .. علاش بابا كاتعيط ليه وانا لا !!!! أصيل واش غاتديني انا ولا باباا ؟؟ كيفاش انا مضارب معايا ، وبابا كاااتهضر معاه
أصيل : هه ! واش منييتك ؟
قسم : م م مااااعرفتش ... (مهبطة شفايفها ) كنحس بيك كاتبغي باباا كتر مني .. وباغي تزوج بيا غير حيت عجبك بابا .... علاش شحال وانا معاك مافكرتيش تجي تخطب .. ولكن ملي تعرفتي على بابا دغياا جيتي !!!
أصيل : ( جابت ليه الضحكة وسط الحريق بقا كايضحك ومزير على سنانو من الألم ) هه ... ههه .... و .. وااا جديييدة هادي ههه ... !
قسم : تانهضر معاك بصح ا اصيل علاش كضحك داباااا ؟
أصيل : واش منيتك ؟
قسم : اه ... عندي لحق ولا ماعنديش ؟
اصيل : اه عندك .. عزيز عليا باباك ... ( كايجاوب ويتحكم فالألم ) كنحتارموو بزااااف .. وكنعزو .. وعندو مكانة كبيييرة عندي ... و و لكن نتي اقسم (معلي راسو للفوق كاتأنن بصمت ) نتي راك حاجة أخرى ...
قسم : ( كتغزز فشفايفهاا ) بحالاش هاد حاجة أخرى ؟؟ ..
أصيل : ( مزير على عينيه ) نتي ... نت هي لي .... لي الروح ديالي .... م ماتغلاااش عليك .... اقسم ...
قسم : اصيييل ماعجبنيش صوتك !
أصيل : غدا غايكون صافا ...
قسم : ( بابتسامة ) أصيل ... بغيت جواب واحد .. ماشي بزاااف ...
أصيل : شنو هو !
قسم : واش هادشي ... غاييبقى ديما ؟؟
أصيل : اليدين لاكانو شادين ... ( كيتأنن بصمت ) بجوج فبعضياتهم ... ممكاينش لي يفرقهم .. من غير لاطلق واحد فيهم ... ( علا راسو لفوق كتر كايتجبد بالحريق فضلوعو لي كايتكسرو ) وما غااااديش نطلق يدك اقسم .. منهار نطلبها ... تالنهاااار نمووت ....
قسم : ( بابتسامة حنينة ) صافي ... هادشي لي بغيت نسمع ..
أصيل : دابا تخليني نمشي ننعس !
قسم : ممم .. ( بابتسامة) بشرط !
أصيل : ( بألم ) شششنو أقسم أششششنو تاني .. ؟
قسم : غدا ملي تجي تخطبني من بابا ... بين ليه بلي تتبغيني كتر منوووو ....
أصيل : ههه .. ههه قسم ... هه قسم خليني نعس مقادش نضحك والله .. خليني نعس هههه ...
قسم : هههه واخا ... سير تنعس .. تصبح على خير ...
قطعات عليه حاطة تيليفون على قلبها مغمضة عينيها وهو عض على شفتو علا راسو لفوق متأنن بألم والإبتسامة على شفايفو ...
فاس - الساعة 01:30 ...
الدار كانت كلها مضلمة وساكتة ، إلا ضوو واحد متسلل تحت الباب دالكوزينة ...
كانت باقا سهرانة فيها ... كتوجد فالكوموندات لي عندها ... كونطوار كولو عامر بالمكونات و أي حاجة كتحتاج .. لابسة غير بيجامة ، شورط وتيشورت ديالو ، وطابلية طويلة رمادية منقوش عليها إسمها جاتها هدية من خالها ... شعرها مجموع كولو لفوق بقراسة ومدليين منو خصلات كيرلي ...
محنية على الكونطوار وسادة عين وحالة عين كتحاول تحط آخر نوتيف فوق من هاديك السلطة لي قاداتها فالبواط ديالها ...
سالاتها وشدات على جنابها كاتشوف فالكوموندات ديالها فرحانة ....
ومشات لطبلة كتجهز كراطن بيضين وتقادهم ... مشروعها الصغير ولي القراية كتخليها تهملو بعد المرات ... وهو الغذاء الصحي ويكون لذيذ ... عصائر ، سلطات ، ديطوكس ، مملحات ...
عاطية للمشروع اسم " Healthy & delicious " وفوق منو جناح فراشة ...
مشروع لي بداتو بحب و كاتقوم بيه بحب واستمتاع كبير .. وواضح حتى من التعليب والتغليف ... وضعاات كولشي فالكراطن وحطاتهم فواحد صاك كبير عليه لوغو دمشروعها وسداتو بسينتة پينك ...
كتخدم بحب كبير ومتعة ... واخا العياء وكتافها كايضروها وكل مرة تعوج فراسها و عنقها ... ولكن ملي كتسالي وتشوف النتيجة مرضية كاااتفرح ....
يلاه غاضور تكمل على واحد لاصوص محتاجاها فقرايتها ...وهي تحل لباب وضارت براسها ...
كانت ماماها واقفة كاتشوف باستغراب واش هادي باقا فايقة ! ... لابسة غير كسيوة دالنعاس خفيفة ومصغرة عينيها فالضو ..
أسماء : يااسمين !!!! نتي باقا فايقة ؟ مزال ماساليتيييش ؟؟
ياسمين : ( ضارت كتكمل ) يلاه ساليت الكومونضات .. بقا ليا غير هاد لاصوص وماااابغااااتش تطلع عصباااتني ..
أسماء : قريب جوج دالليل هادي أبنتي ! ونتي غدا قارية بكري !
ياسمين : غدا الحد أماااامااا ... ( ضارت عندها وربعات يديها على الكونطوار ) وكون مكانتش هادي صامدي سوار ... كون را بابا ناعس حداك دابا اصلا ....
أسماء تنهدات ودخلات جرات كرسي و گلسات كاتشوف قدامها و ياسمين كتكمل تقطاع دوراق نعناع على واحد قطاعة صغيرة ..
أسماء : قبيلة كان كايصوني التيليفون ديالو ... دابا طفاه كاع !
ياسمين : يطفييييه .. وماايجييش كاااع إيلا بغا .. مالو آش زاااايدنا ؟
أسماء :ياسمين .. ياك كانقوليك مشاكيلي بيني وبين باباك مادخلييش فيها نتي .. باباك تاايبغيييك .... داكشي بييني وبينو .. وغايكون بايت غير فالخدمة ... خالك راه مزيرو بزاف
ياسمين : ( ضارت عندها بزربة ) كيفاش بينك وبينو ؟ كيفاش هاد تايبغييك !!! تايبغينيي بالشفوي ! واش عارفة لي كايبغي ولادو آشنو كايدير على قبلهم .... ؟؟؟
أسماء : واابنتي راه ماعندو زهر .. راه لي دارها ماتتصدقش .. وااااش نشنقوه !
ياسمين : لا .. شنقي راااسك اماما ... شنقي راسك نتي ( ضارت كتكمل )
أسماء : ( باغا تبدل ليها الموضوع ) دابا شنو كاديري تما ؟
ياسمين : ( مركزة كتخلط ) واحد لاصوص ... عدباااتني .. سيمااانة وانا معاها وهاداك المذاق لي كنقلب عليييه .. مزال مالقييييتوش ...
أسماء : أشمن مذاق هادا !
ياسمين : ( ضارت عندها كاتشوف لبعيد ) بغيت مذاق يكون نووستااالجيا .... بغيت هاد لاصوص .... ملي ديريها فوق لسانك وتذوقيها ... تحسي بطعم الطفولة ... بمذاااق كليتيه ومعقلتييش فين ... لي عارفة هو .... ( مبتاسمة ) هو كايعطييك مشاااعررر زوينين ...كايفكرك بشي مذاق كليتيه شي مرة ونتي فرحااااانة .....
أسماء : إوا أبنتي ... أنا تفوتي لياااا الطواجن والبساطل .. مااانعرفش نفعك ....
ياسمين : ( تنهدات وضارت كتكمل ) عاارفة أماما عاااارفة ... واخا إلى ذقتي دابا هاد لاصوص غاتجيك عااادية ... ولكن لي كايتبنن المذااق فلسسااانو غادي يفهم أشنو كانگول .... كاينين مداقاات كايهضرو اماما،كاين مذاق تايوصل تصاااور لدماغك .... بغيت هاداك لمذاق لي ملي تحسي بيه فلسااانك .. يخليك مدة كتفكري فخوايج زوينين عشتييييهم ...
أسماء : إوا أبنتي الله يعاونك على شغااالك .. أنا بان ليا الكوووزينة داااااتك وقلباتك على القبلة ... خلي شوية دالمشاعر لداك ولد الناس لي غايجي .. ماتعطيش كوولشي لهاد ليصوص والماذاقات أبنتي ... خلي ليه شوية ...
ياسمين : ( علات عينيها قدامها شحال ودارت ضحكة مستهزأة .. ورجعات كتكمل وتزيد قطرة قطرة من الحامض ) ممم .. شي ولد الناس بحال بابا ؟؟؟ نعطيه مشاعري كاملين ويستااغللهم ياك ؟
أسماء : دابا علاش كاضوري وضوري وترجعي ليا لنفس الموضوع ... كتندميني لي كنجي نهضر معاااك .. نمشي ننعس حححسن ليااااا .... ( وقفات مزرفزة ) كملي شغاااالك ... وسيري تنعسي .... يصبحو عينيك منفوخين .... يلااااه ...
يتبع...
التعليقات
لا توجد تعليقات بعد، كن أول من يعلق.