أشبال الأسود الجزء 63

خلاها وخرج للباربكيو وسلطان تبعو .... وجود عنقها وخرجو

قسم : بابا كاااييخلع فهاد الأمور وحق الله

جود : غايكون غابغا يهضر معاه فشي حاجة ، يمكن داك السيد مباغيش حنا نعرفوها ...

قسم : هاد السيد سميتو أصيل اجود .. و ماعندوش شي حاجة يبغي يخبيها عليا

جود : منقدروش نعرفو حسن من الواليد

قسم : (علات عينها فيه ) كيييجاك اخويا ؟

جود : مزيااان .. حاليا را مزيان

قسم : ومالك كاتقولها بحال هاكا !

جود : ( وقف ) نتي عاجبك ؟ فرحانة معاه ( قسم تترمش فيه ) اوا صافي هاااادشي لي كايهم .... انا لي غانكمل معاها حياتي سميتها بيلساااان ... أما هاد سيد بينك وبينو ... انا ماعندي مانگوليك اختي ( شد ليها وجها ) كوووني غااا نتي فرحانة

قسم : مايمكنش نكون فرحانة اجود ونتا بحالا ماعجبكش !! قوووليا مالك ؟؟؟

جود : ( بضحكة باش يقاد ليها المورال ) واش كاين لي غايعجبو شي واحد جاي يدي ليه ختووو !!!

قسم : هههه جوووود ( عنقاتو ) شكوون غيديني عليك ألهبييييل !

جود : ههه دابا نشوفو

قسم : راه نتاااا لي غااادي علينااا ... انا هنا ماعندي فين نمشي

جود : ( تنهد ورجعها قدامو وشد ليها وجهها ) قسوووم ... ختي ... ( علات عينها فيه ) واش مرتاحة لهاد السيد ؟ ( قسم حركات ليه راسها بالإيجاب بعيون لامعة ) بغيتيه ؟ ( قسم حركات راسها بالايجاب) اوا شنووو مايكون اختي .. ضااااربي وحاااربي معاه تااالخر .... حيت مايمكنش تبغي جوج دالمرات فحياتك ... تانبغيو غا مرة وحدة .... ياتكملي معاه ... ياغاتكملي مع شي حد متاتبغيهش .... ( مسح ليها دمعة سالت مع آخر كلامو ) هاد دموع وهاد الضحكة وهاد الحماس كايجيو غيييير مرة وحدة ... حااااربي معاه ...

قسم عنقاااتووو كتبكي وتاهو كيتنهد كايدوز يدو على شعرها .... ونطق كايشوف لبعيد

جود : مااابيهش .... عجبني .... ( قسم ضحكات وعلات عينيها فيه ) تقيل ... مكيبانش فيه شي واحد لي غدار .. عينيه ماتيضوروش بزاف ... كايركز مع الواحد وهو تايهضر معاه .. مكايجاوبش تاكيخلي بنادم يكمل هضرتو .... وبنادم بحال هاكا .... كاتطوال معاه العشرة ....

قسم : غاتزيد تعرفو مزال .... وعندو نفس حارة وحنين بزاف اخويا .... الحياة مرمرداتو وباقا كتمرمد فيه واخا هاكاك كايضارب ويتحاااارب ... ماااجيتش وختاريتو غير هاكاك .....

جود تبسمليها وعنقها وزادو عندهم هي مشات كلسات معاهم و جود مشا عند لوؤي وسلطان لي واقفين على الشواية ..

جود : بدا بالكوطليط ... كاياخد الوقت خليه من تحت ...

لوؤي : بيه غانبدا ( كايحطو فالشواية )

فالمكتب ...

كالس أسد فالكرسي ديالو وأصيل قدامو يدو فوق لبيرو كايشوف فهاداك التسجيل من البيسي لي مسجلاه الدرون .... تنهد وشاف فأسد ...

أسد : اهاه ..... ( سد لبيسي وربع يدو على المكتب ) وممكن نعرف دابا اش وقع !

أصيل نزل راسو للأرض .. ليوم اكتاشف سلبيات أنه يكون عندك شي حد فحياتك .... كان كايحسابليه انه يكون عندك شي حد فحياتك تايهتم بيك هاديك هي السعادة .. ولكن دابا هو شاف السلبيات وأنه مستحيل يقدر يدير دابا غير لي فراسو ... أسد كان متأكد مغايقولش ليه الصراحة .... ولكن مع ذالك سولو .... وبغا يعرف اش غادي يقول ... وأصيل تنهد كايفرك فجبهتو ورجع شاف فيه بعينين حمرين

أصيل : النهار كااامل ... ملي صبح الصباح ونا تنتسنى شنو هي هاد الحاجة لي مغاتخلينيش نجي نطلب منك بنتك ليوم اسي أسد ... ( أسد علا عينيه وهو عوج شفتو للجنب ورجع شاف فيه ) يمكن زهري فالدنيا هاكا داير ... ماديماراتش ليا طموبيل فصباح ونا خارج مع ختي قلت يمكن طموبيل غاتشدني عند الميكانيك ومانمشيش ...( نزل راسو كايمشط فلحيتو للتحت بفقصة ) دييمارات وزادت ... فالرومبوان دعين دياب كنت غاندخل فواحد مول الموطور ... وقلت راه هااادشي لي غايعكس ليا هاد اليلة .... وحفظ الله فرانيت ... غادي فطريق أنا وختي كانقول كل شوية غادي طيح ولا تفدع ليها رجلها ولا غاطرا شيحاجة ... ماطرا والو ... رجعت للدار كانقول غانسى شي ورقة .... غاتوقع شي حاجة ، ماوقع والو .... شدينا طريق ... جاو هااادو ... قلت صافي .... هادشي لي غايعكس هاد النهار .... وجا سلطان وتفكات لقضية وجينا .... ( علا عينو فيه ) ومزاال كانقول شنووو ليغايعكس هاد النهار ....( أسد غير ساكت كايسمع ليه ) سي أسد ..... أنا منهار تزاديت زهري هااااكدا داير ... اي حاجة كنتحمس ليها مكتصدقش .... مااايممكنش كاع هادا زهر عندي غانتزوج أنا وقسم عادي بحالا مكاين والو ؟ انا ! ..( دار ضحكة مستهزأة ) والله تاااكنت عارف هادشي غايطرا بالله .... ( علا عينو فيه تاني أسد مربع يدو تيشوف فيه ) سي أسد ... انا ماعندي منخبي عليك انا واحد بنادم لي هاكا تزاد .. منحوس . .. لي دارها متتصدقش ليه ... تامبقااا باغي يدير والو ... مابقاا باغي وااالو .... بغيييت حاجة وحدة ... ( بجدية وضعف فعينيه ) بغيت بنتك ... ( نزل راسو وأسد تنهد وهو رجع طلعو وعينيه حمرين ) طريق ديالها صعيييبة انا عارف ... ولكن غاا نتحمل مسؤوليتي ... وهادشي لي تتشوف هنا دابا ولي طرا هاد ليلة كانقسم بالله مغانخليه يتعاود .. عندي معاهم غير حساب انا غادي نمشي نقادو ....

أسد : باش غاتقادو ... ؟ بحياتك ! ..

أصيل وسع عينيه وعلاهم فيه كايرمشو وأسد تنهد قرب عندو على البيرو شابك يديه ..

أسد : أصيل ... هاد الطريق ممخرجاش اولدي ... هاد الطريق كاتدي للهلااااك (أصيل غير كايشوف فيه هدا باش عرف حس بالاحراااج قدامو ) ساكت وكنشوف من بعيد تانقول هدا بعقلو عارف آش كايدير .. ولكن هادشي لي كادير فيه .... عندو نهاية وحدة راك عارفها ...( اصيل نزل راسو ) هادشي خصو يسااالي .....

أصيل : ( علا عينو فيه ) كنواعدك غايسااالي ... ولكن خليني أنا نساليه ...

أسد : هااانا ....هااانا مغاندخلش ... ولكن راني كنشوف!!! .... وريني آش غادي دير !!

أصيل غير تنهد والحرارة طالعة لجسمو ... تيحس براسو دخل فحرب وخصو يقد بيييها .. كولشي مرون عليه بسبب ظروفو لي حابسيين ليه اي طموح كايفكر ليه ...

اصيل : متخافش

أسد : بغيتي قسم هاهي ... تقاااتل نتا وياها على الزمان وديرو مستقبلكم ... طيحوو ونوضو .. ولكن باش تقوليا نشوفك كتسني على حياتك فالنوار وداير يديك فيد ناس بحال هادو راه مغانبغيهاش ، ليوم ختك غدا بنتي ... الى غاديرني فمقام الواليد ديالك ... راه كون كان حي مغايبغيش هادشي.... ( شاف فيه بجدية واصيل محرج) هااانا دابا ماااقلت والو .. ولكن ... ررراه لاسمعتك رجعتي لداكشي ولا سمعتك سنيتي على حياتك مرة اخرى ... ماشي غير قسم لي غانحيد ليك .... راه تا هاديك البنية لي حطو المضا فعنقها مغااانخليكش تدييها معاك للهاوية ( اصيل نزل راسو عارف راسو مايقدرش يواعدو والريسطو مزال مكملو بالخلاص ) كووون دابا ماجاش سلطان ومكانش مسلح فين كنا غانوليو هم ؟؟؟؟ ( اصيل مقادرش يجاوبو) شوف فياااا ( اصيل علا عينو فيه ) اخرررر مرة ..

اصيل : ( نزل عينو لرض ) متعاااودش اسي اسد ...

اسد : هاحنا غانشوفو .... يلاه ( وقف ) ... بلا منخليوهم يتسناو مزال ... وهاد الموضوع راه مسالاش ... مزااال غاانهضرو .... غا هادا ماشي وقتو

أصيل تهد وناض وأسد زاد قدامو وهو تابعو ...

----------

فلخارج ..

واقف لوؤي وسلطان وجود حدا الباربكيو كايشويو واقفة عليهم قسم مربعة يديها وكاتشوف فالباب فوقاش يخرجو ، فالجليسة القصبية كانت جهة فيها سلمى مع النساء مضورينها بالاسئلة وهي شوية بشوية كتطلق معاهم .. مابقاتش كتحس بيهم انهم هوما دوك العائلة ليكتعرف من قبل ... لقات راسها كتعرف على عائلة اخرى .. بينما جهة الاخرى كالسين رجال واسبرو داير يدييه ورا ظهرو وكايمشي ويجي قاتلو الفضول علاش بغاه ... وقسم كتر منو ...

قسم : زعما اش غايكون بغااه ؟؟ تعطلو

سلطان : ايكونو كايتفاهمو على الصداق واش كاش ولا شيك !

قسم : طنززز على راسك بعد مني انا .... ( شافت لباب ) ففففف .... غايزيدو شوية غانمشي عندهم

جود : مالكي تترعدي علينا دابا .... مناش خايفة ؟

قسم : بابا راه واخا مااااتكون دايررر والوووو كتخاف

جود : وايخاف هو نت علاش ! سيري تكلسي

قسم بقات غير كاتنهد يلاه غاتمشي وهي تشوف موراها كانو جايين أسد غير شافهم بتاسم وأصيل كان باين الضياع فعينيه ولكن تبسم لقسم لي كاتشوف فيهم وقربات عندهم ...

قسم : بابا ( شافت فاصيل ورجعت شافت فباباها ) ياك لاباس !

أسد : علاش !

قسم : لا ز زعما ... مشيتو و و معرفتش ... واش كاين شي مشكل ؟

أسد : واش دابا انا الى هضرت شوية معاه خاص يكون مشكل !

قسم : لااا ههه ... ولكن ابابا انا راه كنعرفك هههه ( شافت فيه ) وكنعرفو تاهو ... عندكم شي حااااجة انا ماعرفاهاااش ياك ؟

أسد : بيني وبينو ..

قسم : ( جا ماشي وهي تمشي بزربة شداتو من دراعو ) بابا ... يعني كاينة شيحاجة ؟

اسد : ( هز عينو فأصيل ) سوليه هو ... ( اصيل نزل راسو ) انا مابقيتيش غاندخل اولادي ... مشاكلكم مايقد عليهم غا ليخلقكم ...

قسم : بابا ( شافت فاصيل لي دار يديه فجياب سروال منزل راسو وشافت فيه) انا عارفاك كاتعرف اصيل كترررر مني .... وغايكون عندك الحق فكولشي .. ولكن شنو مكان ابابا وشنو ما عرفتي عليه انا باغاه .... ( أسد علا حجبانو على جرأتها وهي كادوي بلا متحس بكل صدق وأصيل علا عينو فيها ) وشنووو مكان هادشي لي عطلو حيت انا عارفاه ماشي لفران ديال الطموبيل و شايفة عينين سلمى منفوخين وشايفة ضربة حدا فمو و كنشم فيه ريحة لالكول ميديكال وراني قست بانضة فدرااعو .... وشفت سلطان جا صااايك بيه ... والباب لوراني ديال طموبيلتو مفروع ... ( اصيل موسع عينيه ) شنووو مكان طرا ابابا مزال غادي نعرفو وغااادي يقولو ليا ملي يجي وقتو .... ( اصيل علا عينو للفوق كاايتنهد) ومكيهمنيييش .... متاتهمني تااااحاجة ابابا ..... ( شافت فيه ) منغير أش بنيت معاه يكمل .( شافت فباباها بعينيها دامعين ) وحياتي لي خططت معاه .... نعيشها .. مابغيت تاشي حاجة خرا ابابا منغيرو .....

أسد غير تنهد وحط دراعو على كتف اصيل جارو معاه وقسم ضارت كاتشوفيه غادي بيه معنقو ويد لوخرا كايمشط بيها لحيتو لتحت وهوما كايشوفو فيهم شحال جاو زوينييين راجل ونسيييبو وكيضحكو .....

أسد : مزال عندك فرصة تهرب ....

أصيل : ( باقي مصدوم منها ) غانحاول

أسد : المرا الهبيلة نعمة .... لي تتنبش بزاف غاتلقى معاها العداب ...

اصيل : ( تنهد ) عارف ...

أسد : اوا ملي عارف منهنا لفوق يا متخبيش عليها .... يا خبي مزياان ...

زاد هو وياه عند الگلسة ديال الرجال ... الجو كان غامراه الضحكات والهضرة ... لامار لقات أن جود اقترح أحسن فكرة ولي هي للباربكيو خلات جو هادئ وحميمي فالجردة بيناتهم ... قسم كان واضح على حركاتها الحماااس والفرحة ... وهو كذالك .. رغم كااااع آش كايمر منو فهاد الليلة إلا أنه غير كيعلي عينيه فيها كاااينسى كوولشي ...

حياة كانت مغرمة بسلمى غير كاتشوف فتفاااصيلها ... وآية كذالك ! ماعرفاتش كيفاش دغيا تسللات لقلبها ... هي لي مكيتسلل لقلبها حد وكتبعد من الناس ومنظرات الشفقة ديالهم... لي مشافتهمش فسلمى ..

تاسمعو دراري كايعيطو عليهم وتجمعو كاملين على طبلة .. سلطان لي كان ممنوع ياكل بزاف بقى مقابل ليهم الشواية ...

سلمى لقات راسها أنها غير ضيعات الوقت فدوك الفيديوهات دالاتيكيت لي كانت كاتشوف .. لقات راسها كالسة وسط عائلة شعبية وطبيعية وكولشي عندهم بضحك والطنز ... كل ماتسالي طبسيلها كاتلقاه عمروه ليييها ...

أصيل كان منزل راسو على طبسيلو مبتسم .. عمرو تخيل واش شي نهار غايكون گالس وسط عائلة قد هادي ! كايعلي مرة مرة عينيه فيهم ... مكانش عارف واش باقي فهاد زمان عائلة شادة فبعضياتها بحال هاكا ! .. كايبانليه شحال كايموتو على بعضيااااتهم .. شحال متلاحمين ومترابطين .... حس بلي كااع داك التصور والتوقع ليكان داير عليهم صدق غااالط ! ... هادو عائلة دارت راسها براسها ....

ضحك تاهو لحديثهم لي كولو نگير لوؤي وسلطان محليين الجلسة .... ولي شوفتو لولا للوؤي مظنوش غايكون بهاد الروح زوينة ، عكس سلطان لي تسلل لقلبو بلا استئذان....

حياة : سسسكت مااتكدبش عليه .. نتا للي كنتي كتقمش ماشي هو ...

سلطان : ياك هو لي قلتو لينااا كان كايقمش !!

لوؤي : ياااودي بببعد مني ... ( حيد ليه بروشيت من يديه ) وحط هادي غدا غاتلقاك كاااتجري فتيران كي المرا الحاملة ..

رتاج: والله الى لاح ليا الباطل على ولدي قالك كان كايقمش ... وخنا كنا نقيلو نحيدو ليك فالظفار ، كنتي بحال شي قط فدار ...

حياة : لوؤي ماكانش كايتحرك بزاااف .. كان مسكين فين ماحطيناه كايگلس ... نتا أولدي لي كنتي عااافية ....

سفيان : و باااقي ...

لامار : غاتاضلموه لاعساك أولدي تانتا مكنتيش صعييب ... غا هو مكنتيش كتحمل يقيسك شي حد .... ولكن الاخلاااااق تبارك الله ، تهضري معاه يقول شكرا ، سمحيلي ، امين ..

لوؤي: لا تادابا راه كلع گرااااااد فالاخلاق

جود: طلعووو تابقاوش كايبانو كاااع

سلمى كانت كاتشوف معاهوم كضحك وهوما عينيهم كايلمعو فاش كايذكرو ليهم طفولتهم عكس أصيل لي منزل راسو بابتسامة خفيفة وقلبو كاايتزيير ...

حياة : ولكن مع احتراماتي أختي لامار ... المنتوجات ديالك أختي زااااايدين نغزة ههههه ....

أسبرو : مهوم لامار كيييبغيتيهم يطلعوو ؟

لامار : ( شافت عند أصيل ) إوا شوووف أووولدي كي كاايتعداااو ليا على ولااادي ( شافت فحياة وأصيل ضحك ليها ) فيييين كانو ولادي صعاب أنا فين !! جود كان كي الأمااااانة ماكيحرك تاحاجة .. خلاص قدس كانت كتعرف غا تنعس ... وسيييم مهددددن .. قسم مسكينة غا دارت عشر سنييين بحالا مكايناش فدار ....

قسم تبسمات وعلات عينيها فأصيل لي حسااات بيه تزير .. وسلمى كانو عينيها لامعين بدمووع .... كاتشوف حب الواليدين شحال زوين وشحال رابطين معاه ديال ذكرياات هي لي ماعندها تاوحدة ....

حياة : ( شافت فأصيل ) سلمى خلاااص بااينة كانت مهدنة ياااك ....باينة فيهاا

أصيل : ههه ( شاف فسلمى وهي شافت فيه بعينين دمعانين ) بزاااف گاع ... ( كايتفكر طفولتها وعينيه تايلمعو ) كانت دغيا تايبقى فيها الحال إيلا زعف عليها شي واحد ولا غوت عليها واخا كانت صغيرة كانت كاتعرف ... تتبقى تبكي حتى نحزرها ... ( سلطان شاف فيها هي لي كاتشوف فيه ببراءة ضاحكة ملي تذكرات طفووولتها تاهي ولقات عنظها ذكريات لي مكتعرفهومش كون ماجبدوهش .. أما أصيل كان كايشوف لوجها داك الوجه الصغيير لي رباه على يدوو وحس بيها فاش كانو هاضرين على طفولتهم ) وكانت كتخاااف .. ولكن كانت مكتحشمش ... تانقوليها بعدي من الحاجة تاطلق منها .. وغير نضور بضهر تمشي ليها ...

لامار : ههههه وهاد العناد راه زوييين ، ششخصيتها قوية ههه

أسد : ( مربع يدو على طبلة كايشوف فيهم ) أنا عاقل عليها كانت مهددنة .. كنت طليت عليها فالكونة ديالها ... واقلة كانت عندها شي ربع شهور مكاملاش ... غي شافتني ضحكات .. ( سلمى بدات كضحك بفرحة ) أما نتا أولدي لا ... راه باك مسكين كنت ديما كانلقاه عينيه منفوخين .... مكنتيش كتبغي تنعس ليهم منين كنتي صغير .. ( شاف فلعائلة وأصيل نزل راسو ) كان الله يرحمو قال ليا عنداااك تزوج راه الولاااااد صعااااب .... راه مكنشوفش معاه النعاااس ... كوون سمعت ليه كوون راااني مهني دابا مع راسي ...

قدس : ياااااك اباابا ...

سلمى : هههه بصاااح ؟ خوويا كان صعييييب !! ههه ( جاتها فشكل أول مرة شيحد يعاود ليها على طفولتو )

قسم : ( كاتشوف فأصيل لي ضاحك ) بااااينة فيك هههههه ...

أسد : واحد المرة كان كينبتو ليه السنااان وطلعات السخانة ... كنتي خلعتييييه بزاف وداك لسبيطار ومشيت لعندو أنا حساابتني منعرف شنو واقع ...ولكن الله يرحمو كااان كايخاف ( شاف فرتاج ) كان داير بحال عدنان ( سلمى شدات على وجهها كاتشوف ففيه بفرحة كتسمع شي حاجة على باباها وأصيل عينيه دمعو ) كانقوليه راه قالوليك كايطلع غير سنان .. وهو تايقوليا لا مكااايعرفوووش ... ولدي واش لهاد درجة طايب بسخانة وهوما كايقولو ليا سنان هههه كان غادي و وضارب داك النهار ... كاع لي خدامين تما ضارب معاهم .... تماك أنا عرفت الكبدة شنو هي .....

سلمى : ( بعفوية ) عندنا واحد التصويرة ديالو فالدار ، وديما فاش كانشوفها كانقول لأصيل أنا راه كنشبه لبابا ... وأصيل تايقول ليا ماشي بزااف .. يااااك كنشبه ليه أعمي ؟

أسد : هههه كاتشبهي ليه أبنتي .. كتشبهو ليه بجوج .. تا إيلا ما مشبهتوش ليه بزاف فالوجه .. راه تاتشبهو ليه فالقلب ... كان عندو واحد القلب زويييين وكان صباااااار ... عمرني شفت شي واحد بالصبر ديااالو .... كان جدكم صعيب معاااه ... واخا هاكاك مكانش كايرد عليه الهضرة .... ماشفتش بحال هاداك بنااادم فحياتي كاملة ...

لامار : الله يرحمو مسكين ...

أسد : كان تايقول ليا أنه ماباغي تاحاجة من غير ولادو يعيشو حسن منو ويكون عندهم مستقبل حسن من مستقبلو ... ( شاف فأصيل وسلمى ) وأنا متأكد غاايكون هادشي إن شاء الله ... ( شاف فسلمى ) وغادي تنجحي لييينا وغانشوفوك ان شاء الله بمستقبلك ( شاف فأصيل ) وغاايكمل أصيل مشروعووو وغايدير مستقبلووو كيف بغاه .... غيير بنادم مايقنطش من الرحمة دالله .... كوولشي كايتعووووض ...

سلمى نزلات راسها ودمعة نزلات دغيا مسحاتها وأصيل تنهد برااااحة على كلامو كيفاش تغلغل ليه بين ضلوع وقسم لي كانت كالسة حداه حطات يدها على يدو تحت طبلة بابتساامة حنينة ....

لامار : ان شاء للله كووولشي عند الله قريب ...

سفيان : تمنينا أسيدي كون عرفناه تاحنا ولكن ماشي مشكيل ... عرفنا ولادو بحالا عرفناه تاهو ...

لامار : سلمى .. وازيييدي أبنتي مكليتي والو ( شافت عند أصيل ) آش هاد الماكلة عند هاد البنت !

أصيل : را عاد كلااات اليوم ههه

لامار : لا لا ماشي ماكلة هاديك .. هادي خصها واحد سييمانة مع قدس هههه ....

لوؤي : غابقااوو تابعين هاد قدس فالماكلة ديالها تالشي نهار تقطعها ليكم فخطرة ووكلوهاا داك الساع بيليبااااري ....

قدس : واخا أنا عارفة راسي يممكن نقطع كولشي إيلاا الماكلة ولكن مزياااان ديرها فبااالهم باش يميكو عليا شوية ....

شافت لامار عند أسبرو لي ملي بدات الهضرة على الولاد وتربية و هو منزل راسو على طبسيلو وتنهدات وشافت فيه ...

لامار : سعيييد .... قبيلة قلتي ليناااا أنا لي نوجد بلاطو ديال خواتمهم ... إوا آش كاتسنى !!

أسبرو طلع راسو بزربة وضحك بحماس ...

أسبرو : داابااااا .... عطيييوني نص سااااعة يكون كولشي واجد ....

سلطان : دغياا أ سعييييد تابعاني طيارة دغياااا ...

ناض أسبرو بحماس ولامار شافت فيه بعينين دمعانين وقلبها تيدعي معاه يجرب تاهو هاد الأحاسيس .... وشافت فيهم ...

لامار : ملي كانت صغيرة وهو تايقوليا غنزوجها بيدي ... داكشي باش راه واقف على كولشي بيديييه هههه ... وسبحان الله دوزنااا خطابة جود .. دوزنا قدس .. وماااجا غير فقسم هههه ، تقول حس بيها ... الله يفرحووو تاهو ياااربي ....

حياة : آمييييين ياربي ...

قسم : أصلا أنا مكانتش غادوز ليا بلا بييييه ههه ...

ناضو من على طبلة د العشا مشاو لجهة الگليسات القصبيين والمساعدات جاو كايجمعو طبلة ...

لامار : قدس ... نوضي أبنتي ضوري سلمى شوية ووريها بيتها واش يعجبها ... نوضي ضوري شوية ابنتي ... ماتحشميش داركم هادي ...

سلمى نزلات راسها كاتحاول تستوعب كلمة بيتها ووقدس وقفات ووقفات معاها تاهي .. وهو يشوف فيها أصيل من جهة لوخرا وقفات وشافت فيه تاهي ...

سلمى : انمشي مع قدس اخويا !

لامار : غييير هنا أولدي فدار غي هنا ...

أصيل حرك ليها راسو باآه ...

سلمى : ( شافت عند آية ) يلاه معاناااا ..

آية : ااء ..اا ( شافت فماماها ورجعت شافت فيها ) أنا ؟؟

سلمى : آه .. نجرك ؟

آية : ل لا ... هه ( شافت تاني فماماها فرحانة لي تفكراتها جاتها غريييبة شيحد يهتم بيها بحال هاكا من غير عائلتها ) لا كانتمشى بوحدي ...

قدس : صبررري نقادو ليك ( تحنات قادات ليها لفران )

زادو وتحركات آية من ورهم وزادت تاهي معاهم ضاحكة .. وسلطان متبعهم بعينيه وكيرجع تاني يشوف عند رجال مركز مع حديثهم باش متشتتوش تاني ... كايشوف بلي العائلة كلها بغاتها ، تامن ختو لي قليل فين كترتاح لشي حد رتاحت ليها ، حس بلي من عذرو تعجبو !!!! .. انسانة كتعجب وكدخل للخاطر .... ورجع تاني كايشوف فباباه لي كايهضر واخا عقلو غايب معاها ....

حياة : هاد البنت حمقااااااتني ماخلات ليا عقل حق لله ..... ما شاااااء الله عليها ....

رتاج : فنة تبارك الله .... جاتني حشومية بحال بناتنا مع البراني ...

قسم : هي راه حشوووومية ... وضريييفة وبكاااية هههه نهار تلاقيتها فلول فينما تشوفني تبدا تبكي ...

حياة : سينورماال أبنتي .. باش تكبر بلا حنان الواليدين راها قاسحة ... بااااااز لهاد الكبدة لي عند مهم ..

رتاج : واش جا شي خبار عليها ولا والو ؟ تكون واقلة ماتت ...

لاماار : داكشي لي قال ليا أسد .. قاليا يمكن تكون ماتت ولا راها برا البلاد .. حيت هو فللول فاش عيط ليه يعاونو وقاليه يقلب عليها كانت خرجات من دار بشي شهرااااين ... وبقى تايقلب عليها أسد شي تسع شهوور عاااد لقى خبارها فداكشي راكم عارفين ...وفاش وراه تصاورها هو صافي تما قطع الياس منها وقاليه صافي هادي راه خرجات من طاعتي .... وطلقها غيابي وقاالك حيد حوايجها من الدار كولشي

رتاج : واقلة مسكين كون لقاها غير هربانة مامشاتش فداك طريق كون ردها لدار وبداو من جديد ...

لامار : ااااه .. كون ردها .. كان باقي عندو أمل .. ولكن صافي قاليا أسد ملي وراه تصاورها فداكشي .. وأسد قاليا ماابغااااش يشوفهم غير احتراما لصاحبو غير رجالو لي قالو ليه راها فشي حاجة مازويناش ... وماشافش تصاورها كاع ... قاليا كان عطاها شي صورة صغيرة دلاكارط ديالها باش يقلب بيها ... تاهي عطاها لعادل ديريكت ، قاليا ماااحملتش نشوفها ..حيت كان كايعرفو شحال طلع معاها راجل وهي ماصدقاتش ....

حياة : بفففففف .. هادي أم دابا هادي ! ... تولد وليدات بحال هادووو وتمشي وتخليهم ... كون غير شي طريق تفرح ... ماشية لدعارة ... ففففف !!!!

لامار : وايييه كان جابو تصاورها داك ساع من تركيا .. مشااات لتركيا قالك داتها شي صاحبتها كواافورا ولا منعرف كايخدمو تما داك الوقت ....

قسم : داباا هي أماما ملي خرجات من دار شحال كانت فعمر سلمى ؟ تكون ماعاقلاش عليها ياك !

لامار : اويلي سلمى مسكينة مصاب تعقل غا على باها ... لا لا قاليا أسد نهار خرجات من دار خلاتها عندها شي شهرااااين واقيلة ... ولكن نهار جا خبارها و باها طلقها غيااابيا صافي خرجات من حياتهم يمكن كان عندها شي عام .. هادشي لي قال ليا أسد ...

قسم : وما بين داك الوقت لي مشات و قبل مايطلقها زعما مرجعاتش كاع قلباااات عليهم ؟؟؟؟ .....

لامار : موووحالل كون جات كون شدها راجلها مايطلقهاش ...

قسم : والله تااكررررهتها بالله .. على اللله تكون ماااتت على أنه تكون حيية وسامحة فولادها بحال هاكا ... نقولو أصيل راجل كايتحكم فالعاطفة ديالو ولكن سلمى بنت حساااااسة .. غير تهضري معاها زوين تبدا تبكي .... دابا هادي فييين غادير وجهها مع الله ...

حياة : إوا ابنتي راه باش تولد ساااااهل ولكن باش تكوني أم .... هي لي صعيييبة ... صعييييبة باش تكوني أم صالحة ليهم ..

رتاج : أصلا وحدة بحال هادي واخا كون بقات مغاتربيهمش مزيان .... حفظهم الله منها .... هاهوما كبرو معززيين مكرررمين .... ربي كايعطي الرزق ديالو لأي واااحد ....

حياة : وباينة مربيييها خوها نيشان ... شفتوها كيف غير وقفات شاااف فيها ...

قسم : لا ... هو راه تااايخاااف عليييها بزاااف ... انا راه دوزها عليا غاااا باش قنعتووو غير أنها تقرااا ...

حياة : بااااينة فيه صعيييب ههه غاااالله يصبرك ابنتي هههه

قسم : ههههه لا اخالتي متخافيش قااااادة بيه هههه

لامار : ما هادي عاد هههه انا نخاف عليه منها هههههه

رتاج : لا لا باينة فااارض شخصيتو ... والله ماتقد عليه هههه

قسم : وصراحة هو فارضها ولكن ماصعيبش لداك درجة ... حنين وكاايساعف شوية ...

حياة : اوا الله يخلييييكم لبعضيااااتكم ابنتي

عند قدس وسلمى وآية ...

ضوراتها ووراتكها اركان القصر من داخل ... وسلمى غير مبهوووورة بيه ..حتى وصلو حدا السانسور باش يطلعو ليه حيت آية متقدرش تطلع فدروج ووركات قدس على الزر ...

قدس : لفوق تقريبا كانعرفوه غير إيلا بغينا نعسو ههههه كاين غير بيوتنا ....

آية : درتو فيا خير نهز شارجوري ... هداك هو لي كيشارجي ليا مزيان خليتو هنا ...

قدس : وانتي ديما ناسية حوايجك ....

تحل بيهم السانسور فكلوار طوييييل بطاپي گرونة وذهبية ... غادين فيه على يمينهم غي أبواب الأجنحة بحال الفندق ... وعلى شمالهم شباك ذهبي مطل على وسط القصر ...

سلمى كانت هايمة فالتفاصيل ... النقوش لي كانت فالساريات ... بين جناح وجناح طاولة زجاجية بأرجل ذهبية عليها مزهريااات كايبانو بلي أثرييين .... ومساعدة خرجات من واحد الجناح جارة عربة ديال التنظيف وحياتهم براسها ومشات وسلمى ضورات راسها متبعاها بعينيها وكاترجع تشوف دهشانة ! واش هدا فندق ؟ ولا دار ولا شنو ! ... تحل تااني السانسور من جهة الاخرى وبانليها خرج منو سيد لابس كومبيلوزون زرقة و فيدو ماليطة دالاصلاحات وتاهو حياهم براسو ومشى وقدس وآية زايدين كايهدرو وهي موراهم تاالفة فروعة هادشي ... علات شوية راسها للفوق وهي تلقا ثرياات كبار نازلين ... وهي ضور عندها قدس حاولات دغيا تشوف قدامها و تبسم ...

قدس : هادا هنا بيتي ... و لي حدايا د قسم .... ( هوما زايدين وهي تتوريها ) هادا دوسيم ... هدا حداه هنا ديال جود ... ( ضارو من جهة الاخرى حيت بانلييها داك كولوار سالاوه كان حناح جود اخر واحد ... ولقات راسها فكولوار اخر فيه البيوت من يمينهم وشمالهم ) هادو هنا ديال خوالي ... ولي منهنا غير ديال الضياف .... ( وقفات قدام واحد البيت ) ولي من جهة لوخرا كاينين غير د عمامي ) واخا يبانو ليك كتار راه دغيا غادي تحفظيهم ايلا عشتي معانا شوية مزال هههه

آية : هنا بيتها؟

قدس : آه هو هدا ...

سلمى كانت غير كاتشوف سارطة لسانها .. كيفاش تعيشي شوية معانا مزال ؟ وكيفاش بيتها ! ..

باقا متخطات استيعابها كانت قدس حلات لباااب وتشعلو اضوائو. .. وهي تابعاها مفاهمة والو .. كان كولوار طويل بانت ليها باب أخرى كانت مسدودة ... تالقات راسها وسط بيييت أقل مايقال عليه أنه قد الايطاج فين عايشين .... حلاات عينيها مفاهمة والو .... دهشة كانت معمرة نظراتها لي مطلعاهم مع الحيوط ليكانو بالابيض والاعمدة ديالهم فالذهبي ... سرير فالوسط واونفاس ليه كانو ليفوطوي وتلفاز فالحيط .... ومراية طويلة وباااب كايخرج لبالكون غادين ليه قدس وآية وهي تابعاهم كاتشوف مفاهمة والو !

آية : عرررفتي راه كنضاااربو على شكون بيتو يطل على هاد الجهة ... حيت هنا كيبان البحر حسن .... راك خديتي أحسن إطلالة .. عههههه

سلمى شافت البعيد واخا كان ضلام ولكن باينة تماك كاين البحر ... جردة للتحت كانت هادئة وبعييدة على فين كالسين هوما .. حيت تما طريق الاسطبل ..

كانت غير نافورة والأشجار وبيت زجاجي دالورود ديال الظل ... ورجعت شافت فيهم مفاهمة والو وقدس متكية على الزاج دلبالكون ...

قدس : كيييجاتك الڤيو ! واخا هي بالليل مغاتبانش ليك مزيان ولكن فالصباح غاتعجبك ...

سلمى : ا .. م مافهمتش !( جاتها االضحكة ) و .. واش هدا بيتي ؟ زز عما انا !!!

آية : ههههه وشنو كالسين كانقولو هههه

سلمى : اء ( بعدم استيعاب ). و ولكن .. و واش حنا غانسكنو هنا ؟

قدس : ( شافت فآية ) ههههههه ( شافت فيها ) لا اختي لا هههههه شوفي كيييف خافت هههه !!!

آية : ههههه راه كلنا مساكنينش هنا غي عندنا بيوتنا هنا حيت هادي بحالا قلتي الدار لي كنتجمعو فيها هههه متخافيش ههههه ...

سلمى : هه ! لا لا ماشي خفت غ غير ... م ماعرفت منقول ( عينيها تعمرو بدموع )

قدس : ( شدات فيديها ) سلمى ... حنا عندنا بيوت الضياف بنسبة للناس لي كايجيو عندنا ضياف .. ولكن العائلة عندهم بيوتهم الخاصين ... وخوك غايتزوج ختي ... واش عارفة الرابط لي غايجمعكم معانا؟؟؟؟ راكم ماشي واحد ناس لي غانشوفوهم مرة فالعام وصافي ... نتوما غاتوليو وحدين إلى مكلسوش على طبلتنا مغاتكملش لينا السهرة ( سلمى علات عينيها فيها دمعانين ) حيت حنا غانزوجو قسم بخوك آه .. ولكن راه مغانعرفوش نعيشو بلا بيها .. وهي مابقاتش بوحدها .. عندها أصيل ... وأصيل ... عندو نتي .... يعني ضروري ييكون عندك بيتك هنا ....

آية : حنا مامولفينش يكونو عندنا ناس من غير اسماعيلييين .. حيت تاولد عمي زياد ملي تزوج مرتو راها معاه فبيتو يعني ماحتاجش بيت اخر ... ولكن أصيل أول واحد غايدخل وسط عائلتنا ... ماشي ضروري يكون اسماعيلي باش يكون عندكم بيتكم تانتوما .... هو دابا غايكون مع قسم ... ولكن نتي هدا هو بيتك ...

قدس : تاهو راه كايقادو ليه بيتو فهاد الفترة لي مزال ماتزوجو .. راه مابعيدش عليك بزاف .. كنضن راه فجهة لوخرا ... غير مزال ماسلاوهش .. طيكنيسيان لي شفتي قبيلة كان غادي لجيهتو ... مهم ... نتي شوفي الى بانليك شي حاجة خصها تبدل .. ولا ليكولوغ .. حيت ماما كتبغي كولشي يكون فالبيض باش مولاهم يختار اللون لي بغا على خاااطرو ... ووصاتني ماما قبيلة باش تقولي ليا ليكولوغ لي كايعجبوك وهي غادخلهم ليك فالديزااااين ...

سلمى : ( بدهشة ) اا .. انا راه .. انا راه ماعرفت مانقووول ....

آية : ههه قولي لينا غي كيجاك واش عجبك ؟ إيلا ماعجباتكش الڤيو بدليه ...

سلمى : اويلي هههه ( شدات على فمها بفرحة كببيييرة ) البيييت كاااااايحمق .... ( طلات على برا ) هادي احسن ڤيوووو شفت فحياتي ... ولكن ( شافت فيهم ) ر راه .. راه صدمتوني ههههه ز ز عما .. م مكانش عليكم .. ( قاطعتها قدس )

قدس : سلمى ... خوك غايولي راجل ختي ... يعني ... حيدي بيناتنا هاد الرسميات ... خوك راه غايولي خونا دابا يعني تانتي خصك تولي بحال ختنا ....

سلمى : ( بعفوية عنقاتها وقدس بدات كضحك ) واييييلي بالفرحاااات عليا تكوووون عندي ختي .... ( مزيرة عليها ) شششكرا راه حححمقنيبي البيييييت .....

قدس : هههههه ( جات قدامها ) بصصصحتك ... مع الوقت لابانتليك شي حاجة وقوليها لينا باش ترتاحي فيه ... دخلي نوريهليك كتر ... ( جراتها معاها وآية تابعاهم ) هاد البلاصة فين كاينين الريمودات ، تلفازة لا لكليم الضو الريدوات ... ( وراتها جيهة السرير ) مهم ماما راه دارت كولشي بيض على ماتقولي ليا الكولوغ لي كايعجبك ...

آية : ماعرفت علاش تخيلت يكون كايعجبك الپينك !

سلمى : ( جاوبات حمرة وضاحكة ) ا اه ... كايعجبني الپينك ... الازرق كولشي .. هههه كولشي كايعجبني ...

آية : بحااالي تانا كايعجبني البلو ...

قدس : لي طاپي غدا غادي يفرشوهم ... اجي معايا ( جراتها من يديها للكولوار وحلات باب أخرى وسلمى تابعاها دهشانة ) هنا كاين لادوش .. هاهي ...

حلات ليها ليها الباب وسلمى وسعات عينيها فاش شافت الرخام الاسود وتناسق ديالو مع الذهبي ... بينوار كبير و لافابو ولاشاس كانو قراب لبعضياتهم وقدس كاتجرها وهي باقا ماشبعاتش الشوفة وكل مرة كاتقول غاتفيق من نعاس وتكون غير كتحلم !!

قدس : هنا دريسينغ .... وهاد لبلاصة فيها لفراش ...

آية : فيين لافيطخين دليزاكسيسواغ ؟؟

قدس : ( حلات وواحد لباب من لحيط كيتجر بحال مجر كبير ) واقلة هي هااادي .... اااه هي ... مهم تاتجي شي مرة وتاخدي وقتك تستفي فيها اشنو بغيتي ... جيبي هنا غير حوايج خفاف وبيجامات حيت بعض لمرات كنقصرو معطلييين بنادم كايعگز يرجع لدارو طريق بعيدة ... زيدي اجي ( جراتها تاني من يديها خرجو وهي باقا مافاهمة والو ) شوفي هاد لبلاصة هنا ... كاين غير الفيكس لابغيتي شي حاجة ... هانتي ( حلات مجر تحت من داك كوموند وجبدات كتيب صغير ) هنا كاينين الأرقام ... د تيكنيسيان إيلا خسرات ليك شي حاجة فالضو و لا لاكليم ... هنا كاين فام دميناج ، هنا كاينة خالتي رجاء تقدري تقولي عليها حنا كااااملين هنا ساكنين عندها هههه .. وهادي للتحت إلى كنتي باغا تصبين دشي حاجة دغيا.. وهنا الكوزينة ولكن الكوزينة هانتي شتي مكتوب غير حد الطناش دلليل ... حيت ورا طناش دالليل كولشي كايمشي ينعس منغير لاكانت عندنا شي سواغي.. دونك ملي تبغي تاكلي شي حاجة هنا عيطي عليهم .... وهنا عندك نمرة دلماسوز .. ( سلمى وسعات عينيها ) هنا لاكوافيغ و ليستيتيك ، مهم هانتي راه كولشي مكتوب ... ( علات عينيها فيها ) وبلاااااا متحشمي وتقولي مانعدب حد .... حيت هاد الناس كاياكلو طرف دالخبز معااااك .. يعني شي كايعاون شي ..... حيت عارفاك مغااتعيطيش هههههه

آية : فخبارك حيدتيها ليا من فمي ... يلاه غا نقوليك راها ماغاتعيط لحد ههههه باينة فيها حشومية ...

قدس : وتانا داكشي علاش درتها ليها فوذنييها هههه حتى مرت عمي سعيد فاش كتجي بحالك .. كتحشم تعيط ليهم وكاتقضي كولشي راسها ولكن لا .. تاني هوما راهم أڤيك گغون پليزيغ كا يخدمو ...

آية : عندنا جدة فاش كتجي فالصيف وتطلع فام دميناج عندها فالصباح كاتبدا دير الميناج معاها هههه

سلمى : حتى انا داكشي لي باليا غاندير ههههه

قدس : ههه مهم كنضن كولشي باين ، لهيه ماينة تلاجة صغيرة حطي فيها النا و لا الماسكات ديالك ...... ( لقات كتاب اخر ) ديالاش هادا ؟ اااه هادا الخارطة الصغيييورة على اي حاجة فيناهي ... السپا ولاصال و الجامع وداكشي ... مهم هادشي لاتحتاجيه هاهو هنايا تاتشوفيه على خاطرك ....

سلمى : ( ضارت كاتشوف موراها ) هادشي راه زويييين بزااااف ..

قدس : مزياان ملي عجبك ... ماما ختارتو بذوقها ... وختارت ليك الڤيو ... أما أصيل ( غمزات بعينيها ) دارت شوية دالغش وقرباتو لبيت دقسم هههه

آية : ههه موهيم أنا غانمشي نجيب شارجوري ....

قدس : ( بغات تخليها تكتاشف براحتها ) أنا غانمشي نبدل الصباط راه ضرني مزيير .... ونتي هانتي شوفيه على خاطرك على ما نجيو ...

سلمى : ( شاداها الحشمة ) ل لا غ غير .. صصافي شفتو ... ن نمشي معاكوم ...

قدس : ههه مالكي خيفانة هههه راه ماغايجي حد غانسد عليك الباب .. ومكايجي حد لهنا وهدا راه بيتك ... ولفيه شوية هههه انبدل دغيا ونجي ...

خرجات قدس وآية وسدو عليها الباب عاد ضارت بشوية وشدات على فمها بييييديها بجوج وغوتاااات غير فخاطرها ودخلات كاتشوف مامتيقاااش واش هادا بيييييتها ؟؟؟؟؟ كلسات على السرير كاتشوف قدامها فليطابلووو و ديزاين دالبيت و ثريات مامتيقاش واش ولا عندها بيت فالقصصصر ؟؟؟؟ قصر لي كانت كاتشوفو فتصاااور ؟؟؟؟؟

جاتها الرغبة تهبط تعنقهم كااااملييين ... أحاسيس فشكل تجمعو عليها واحد ورا لاخررر ... امتنااااان و دهشة و صدمة .... كاتشوف بعينيها وضور على لبيت مقاداش تصدق إلى راه ديالها !!!

كيفاش واحد المراة كانت معجبة بيها فالصور .. فكراات فيها ووجدات ليها بيتها بحال هاكا!!! واش هاد الناس لهاد ددرجة ظريفين ومضيااافييين ... لهاد الدرجة اثرياااء ؟؟؟

ناضت كاضور فالبيت عاضة على شفتها .... حتى لو ان قاليها أصيل بلي غايدير مستقبل هو وقسم مفروق على أسد ... وقاليها أنه مغايسكنوش و يعيشو تما ... ولكن كاتحس براسها من اليوم ... حياتهم غادي تبدل .... حيت ... ولات عندهم عااااائلة !!!!

سلمى : نتمنى تعجبو ...

قدس : غاتعجبوووو هو كايعجبوه بحال هااادو .. وأصلا كادو دخطيب ختوو سينوغمال تعجبوو ...( هزات صاك آخر وهي تلقاه مكتوبة فيه لوؤي وقدس ) اوومايگااااااد انا علاش خاشييييني مع لووووؤي بغيت ديااالي بوووحدي ....

سلمى : هههه حيت ماكتابش نكونو نهار تخطبتو نتي وياه ... و و اعتابريه كادو دالخطبة ( علات فيها صبعها ) وضروووري ييعجبك حيت ختاريتو أنا هههه

قدس حلات هاديك البواطة وهي تعلي حجبانها كانو جوج براصليات ، واحد أسود رجالي والآخر أبيض پلاتين .... ومن لداخل د الأبيض منقوش لوؤي و فالأسود قدس ، بقات غير حالة فمها كاتشوف فيهم وآية كضحك عليها ...

قدس : اووو!!!! .. مااااي!!! ... كوووووود !!!!؟

سلمى : سولتو على شي ديزاين زوين لجوج يلاه تخطبو ... وعطاني لي بغاصلي وخواتم .. قلت خواتم غايكونو عندكم .. دونك لي بغاسلي ...

قدس : سوووو بيوووورفل ...بلااتي دباا ديالي هو لي منقوش عليه لوؤي ياااك !

آية : وراه بااين هو لي فيه لحجررر ...

أسبرو : ( هزو كايشوف ) اووو واعرررر ...

قدس : ماشي غير واااعررر .. أصلا أي حاجة تجي من عند سسسهييل غاتعجبني ( علات عينيها فسلمى ) وداابااا تاسلمى ....

سلمى : سهيل خويا ؟ ههههه كاتقولي ليه سهيل ؟

قدس : هههه سميتو متتبغييش تقاد ليا ههه

سلمى : ههه فرحت حيت عجبك ... حتى جود وبيلسان درنا ليهم بحالكم غير شوية ديزاين مختلف ...

قدس : غير مااتلبسوش فاش نكون لابساه أنا وصافي ...

آية : ههه حرااام عليك ... هي مسكينة مكتجيش كااع ...

قدس : أنا نلبسو فالبرد وهي تلبسو فالصيف هههه غااااتفرح لاعرفاتكم تفكرررتووها ...

سلمى : الى هضرتي معاها .. قوليييلها انا راه تنمووووت عليها .. كاتعجبني بزااااف ....

قدس : ( شافت فآية ) دابا لاسمعااات هادشي غاااتزييييد تنفخ عليييينا ههههه غادي تزيدي فيها الضلوع وصافي هههه ( حلات الصاك لاخر ) ااه هنا جود وبيلسان .. صافي بلا منحلها ليهم تايحلها راسو .. ( حلات صاك آخر وشافت فآية ) ااااااااية !!!

آية : ( شدات على فمها متوقعهتاش ) تفكرتوني حتى انا ههههه شكرااااا ( قربات بالكرسي عندها وسلمى تحنات عنقااتتها ) علاااش كلفتو راسكم بزااااف ههه أنا حساابتني غي لافامي الصغيرة دقسم ههههه راه حنا قشلة لابغيتو تفكرونا كاملييين هههه ...

سلمى : ههه لا .. أصيل سول قسم شكون غايكون حاضر ... باش منساوش تاحد ...

اسبرو : هي تانا كايييين ...

سلمى : الله أودي ...

أسبرو : واااايلي ! حححلي نتي .. دغيااا ححلي ...

قدس : بلااااتي نشوفو د آية هههه سلمى ختي ماديش علينا راحنا مهاوشين على الكاضوات هههههه

سلمى كانت كاتفكر راسها هي وخوها عند المجوهراتي .. وكاتشوف داكشي لي كايشريوه مايسوااش حتى صفر فاصلة واحد على شنو عندهم هوما وشنو كايلبسو وكانت حشمانة أنها غي مارك دالمجوهرات لي عادية مقارنة مع ليمارك والبراندات ديالهم ولكن جاها فشكل فاش شافت هاد الحماااس كااامل حسات بأن قلبهم نظيييييف وشبعاانييين ...

آية : وا دغياااا ....

قدس : بلااتي مبغاتش تحيد ( جبدات هادييك لبواطة لي كانت طويلة وحلاتها ) ااااه وااااعرة ... فيييها ايييطوال ...

آية : ( شدات عليها كانت سلسلة رقيقة معلقة فيها نجمة محجرة ) واااااااو !!!! كاااتحمق .. سووو كيووووت ...

سلمى: حيت عقلت واحد النهار كانو سولوك الصحافة فواحد العيد كون ماتخلقتيش بنت شنو كنتي بغيتي تكوني وقلتي ليهم بغيتي تكوني نجمة فالسما ... ( آية تفكرات داك لهضرة وكولهم تفكروها ) حيت النجمة كاتشوف كولشي من لفوق ... بلا متحتاج تحرك ...

آية : ( نزلات راسها كاتشوف فسلسلة وعينيها دمعو ) عاقلة ( طلعات راسها ) هدا اااحسسسن جيست طرا ليا .... ماشي غير علا ود الكاااضووو .. ولكن تا على ود شيحد عقل على شي حاجة قلتها انا ...وبصح مكرررهتش نكون نجمة

سلمى : ههه نتي رااااك القمررر كااامل

اية: اووووووو ( قربات بالكرسي و سلمى هبطات عنقاتها ) غاااااانديك معايا لدااارررر يااالااه عييييشي معااااياااا

سلمى : ههههه واااخا هههه

قدس : مع البواط ديالك كاين هنا سلطان ... وخالتو حياة وعمي .. واقيلة بلا منحلو ليهم ليبواط ديالهم حشومة ..

آية : وباش مايبقاش فينا الفضول قوليلينا غاشنو فيهم ؟ هههه

سلمى : ههه م مادام .. ( خرجاتها بعفوية مزال مامولفاش ) بغيت نقول خالتي حياة .. ف فيها بروش ... ووع .... عمي سفيان وو و سلطان ماگانات ... وحتى عمي عدنان و خ ... خالتي ..رتاج بحالهم كولشي تقريبا بحال بحال حيت مالقيناش بزاف دليشوا ... و وعمي أسد .... مول المحل قاليه بلي كايديرو واحد موديل زوين .. و وهو كاياخدو هادوك الساعات القدام لي عندهم سلسلة تايتسدو عرفتوهم ( حركو ليها راسهم بالإيجاب ) وفهاداك الغطا .. بلليزر تاينقشو شي اسم ... و أصيل ع عجباتو لفكرة .. و هي غير شي حاجة بسيطة رمزية .... مهم نتمنى يعجبوهم ....

قدس : وواااو .. غاااتعجبووو .. شنو نقشتو ؟

سلمى : انا قلت ليه نديرو الاسماعيلي و ولا الروكان .... ولكن أصيل قاليه ينقش اسم لامار ....

آية : اووو .. سووو روووومانتييييك هههه...

أسبرو : سي أسد راه واخا تنقشو ليه لامار غااا فتقشيرة تعججبوووو ....

تحلات عليها الباب دخلو آية وقدس .. وهي مسحات دموعها بزربة لاحظوهم ومبغاوش يحكرو و وقفات ضاحكة ...

قدس : يلاه نزلو ... ماما عيطات ليا غايركبو دابا الخواتم ...

سلمى : ا ا واخا .... واخا ...

جات عندهم وآية عوجات راسها معاها ماكرهاتش تعنننقهااا .. جاتها بريئة وفرحات من قلبها ... ومشاو كاملين تاني لسانسور نازلين لتحت ...

أما للتحت كانو الخادمات فوسط القصر كولشي وقف عليه أسبرو وقادو فوق طبلة ... واخا مكانوش معولين على تركاب الخواتم ولكن وجد ليهم كولشي على طريقة مغربية .. الحليب بالعسل وزهر ... وتمر معمر ... وصينية ديال خواتمهم و آش جاب ليها ... خدم موسيقى هادئة رومانسية ... وشاد على جنابو كايشوف فداكشي واش هو هاداك .... و هو يتحل السانسور وشاف البنات جااييين ...

أسبرو : جااابكم الله ... اجي ابنتي اجي ( شاف عند سلمى ) ششنوو سماك للله راه نسيييت سبحان لي مايسهى ....

سلمى : س .. سلمى ...

أسبرو : اااه ... اجي ( قربات عندو و هو يعنقها كايوريها ) ياك هادشي هو هاداك ؟

سلمى : اا ..( بفرحة ) م مغانعرفش حسن منك ههه و لكن هااادشي زوييييين ....

أسبرو : ودابا هضرتي ... اه حقااا ... لقيت مع ليبيجو ديال قسم ، بواطات اخرين عرفتهم غايكونو كاضوات.... ولكن حشومة نسول خوك اجي نتي قوليلي فين كل حاجة و مولاها ...

سلمى : ر راه .. راه مكتوبين سميات فليبواط ..

أسبرو : ااااه كاع مافكرت فيها ( شاف عند رجاء ) جييييبي ليا داكشي ماحد قدس هنا ...

قدس : اوووو ؟؟؟؟؟ حتى حناااا !!!

سلمى : ( نزلات راسها بلطافة ) ضروري هه

قدس : فيييين ورييني ( شافت فرجاء لي عاد جاية هازة لي صاك ) سسسربي اخالتي سربي ههههه

سلمى بقات غير كضحك وهي تحيدهم ليها من يديها ومشات كلسات .. وأسبرو شاد على راسو ...

أسبرو : هادي راه تمووووت على الكاضواات .. عنداك تهزي شي حاجة ديال ختك ...

قدس : بلاااتي نشوف لي حسن ....

آية : وراه باينة لي حسن غايكون جابها لخطيبتو علاش غااايجيبها ليك نتي ..!

قدس : هاديك خطيبتو وانا راه ختها ، مالو غايديها بوحدها.. ( جبدات صاك لول وهي توسع عينها فبواطة كحلة منعند نفس المجوهراتي لي خدا منعندو الخواتم ، وبدات تقرا الاسم المنقوش ) وسيييم ..( علات عينيها فسلمى لي واقفة ) غاايفرح لاصورررتها ليه .. ( حلاتها لقاتها ساااعة ) اووووو واعرة ...

سلمى : هههه .. و و مادام .. م .. ز عما خالتي لامار ... ك كانشوفها .. كادير بزاف ... سلسلة لنظاظر ديالها .. و ولقينا عندو موديلات زوينين ديال السلسلات ديال النظاظرر ... هي لي خدينا ليها .. نتمى تعجبها ....

قدس : اويييلي راه تحمقها .. حيت اسلمى الكادو ماشي اش فيه .. الكادو هو شكون جابو هههه

أسبرو : وافيييين أنا ؟؟؟

قدس : بلاتي نشوووف ... هااااهي ... اوووو هادي بواطة د راي بان ...غايكونو نظاظر ياك ؟

سلمى حركات راسها بالايجاب و هو يخطفها ليها من يديها كانو نظاظرر فالمارون الغالق ...علاااا حجباااانو بإعجاااااب ....

سلمى: ن نظاظر حيت ... حيت قاليا أصيل ا أنه ملي تلاقاك ...( أسبرو شاف فيها ) ق قلتي ليه هههه .. قلتي ليه بلي هو سمر .. و وعينيه زرقين ... و شعرو كحل هههه

أسبرو : البنج .. هداك غا البنج ... راه كانو داگين ليا البنج ..

سلمى : ههه موهيم هادوك النظاظر قاليك غاتولي تشوفو دابا فلون واحد هههههه مارون ....

قدس : هههههه وا طنااااااز مع راسو تاهو ههههه ولكن واعريييين ....

أسبرو : ( لبسهم فعينيه وشاف فيهم معلي راسو لفوق بغرور ) كيييي جاااوني ؟؟؟

سلمى : زوييينيين ...

آية : ههه والله تاجاوك فنيييين أعمو ...

قدس رجعات لبواط لصاك من غير آية لي بقات شادة عندها سلسلتها ...

آية : لببسيييها ليا ...

سلمى : واخا اجي ..

علات آية شعرها وسلمى لبساتها ليييها وآية ضارت عندها

آية : عممرررني غانحيدها .... حيييت الجيييست لي درتي زوين بزاف .. بقيتي عاقلة على هضضرتي ... ( قربات كتر عندها عنقاتها غير فبطنها حيت واقفة ) شششكرا ....

سلمى : احبيبتي بالعكس هدا غير كادو صغييييور .. محسابتنييش غايعجبك هه ...

آية : لاااا حمقني والله .. حيت هاد ليطواااال كاتعني ليا بزاااف ....

قدس : ( باقا كاتقلب ) بواااطة اخرى هنا ماعرفتش ديالمن ....

سلمى : دقسم ...كادو ديالي انا فخطبتهم هه ..

اسبرو : اااااه نسيييناها اراي نزيدها هنا مع الخواتم ....

حلوها كانت مگانة و بغاصلي ديالها ...وحطها ليها على طبلة ....

قدس : ششكرا اسلمى ولله ... ليكادو زوييينين ومماكانش عليكم تعدبو راسكم قد هاااكااا ....

سلمى : بالعكس. .. مكاين بو عدااااب .. ونتي لي قلتي ليا لفوق ماخصش يكونو بيناتنا رسميات ولا لا هه

قدس : اجي نعنقك اجي ( قربات عندها سلمى وقدس وقفات عندها ) زوييينيين أحبيبتي و الله كولشي زوييين ..

أسبرو : شششفتي لخوااتم ... ؟

قدس : لا مااشفتش ... بلاتي نشوف ...

ضارت لطبلة كانو محطوطين وقرباات تا آية ... كانو خواتمهم محطوطييين وكوليي فيه سلسلة .. و حلقاات وخاتم وبراسلي كان بالذهب الابيض پلاتين وحجرات خضرين ... مع الساعة لي زاد ...

قدس : واااعر .... كلاااص تاهي تايعجبها هادشي لخفيييف ....

سلمى : أصيل هو لي اختارر .. قتليه ختارو نتا كيف ماكان غايعجبها ههههه ..

قدس : لا لا ذوق قسم هو هدا .. هي عزيز عليها الخفييف .. وحتى الكووليي زويييين ... دوووقكم غزااال ...

أسبرو : رجاء ... خرجي عيطي عليهم صافي راه كولشي واجد راه قرييبة تلاتة دصباح هادي ( جبد تيليفونو ) بلاتي نصور هاد الطبلة لشمشووومتي ...

قدس : واحيد غانضاضر بعدا ...

أسبرو : ( محني راسو وكايصور ) لااااا .. حفيذ رايس سيدي قاااليا شوفني فكولور واحد ... نطيح انا كلمتو ؟ بغيتي يشريهااليا مع بااااك ....

سلمى : هههه راه غير كايضحك ههه

اسبرو : اببببدااااا واش نحيدهم ....

قدس : بلااتي راه هنا صاك اخرررر ( هزاتو كان بواطة كبيرة بييضة فيها مصحف ولباس الصلاة وسجادة ) واااو ديالمن هادا ؟

سلمى : اه .. هادا ديال جدااات قسم ز زعما جداتكم .. واخا مكايناش مقدرناش نساوها هههه

قدس : ااااوووو ... غااادي تفرح لاعرفاات ههه .. لبااارح بدات تزغرت لينا فتيليفون هههه هي نهار الكبييير فوقاش تزوج قسم هههه

سلمى بدات غير كاتضحك تاتمو جااييين كاملين وهي ضغط آية على الزر غادة بحماس عند باها ومااماها ..

آية : مااماااا شووووفي شنووو جاابتلي سسسلمى ....

حياة : اوووو ( تحنات شافتها ) غزاااالة يا بنتي ( وقفات شافت فأصيل ) علاااش عدبتوو راااسكم ....!!

آية : شكرااا اخوياااا ..عجبااااتني بزاف .. ( شاف فباباها ) عرفتي سلمى عقلات على نهار لي قلت فلمؤتمر بلي بغيت نولي ايييطوال .. داكشي علاش جابتها ليا فييييها ايييطوال .....

سفيان : ههه بصصصحة أبنتي زوييينة .. اوا شششتي تفكروووك ماعندك ماتساليهم ... ( شاف فاصيل ) مكانش علييك تعدب راااسك ...

أصيل : الله أودي ...

سلطان : وااانااا ؟؟؟؟

آية : ههههه تانتا .. عرررفتي راااه تفكروونا كااامليييين ( شافت فأسد ) ولكن نتا أعمي .. ديالك سبييييييشل ...

أسد : واايلي !!! فيييناهو نشوف ؟؟ ( شاف فاصيل ) حيتي تحيد ليا الجفاف.. كنقيل نقل ليهم فالكضوات .. انا واقلة شي عشر سنين ماشفت شي كاااضووو

لامار : وباااااااز ... ياك يلاااه جبت ليبيك ترييكو

اسد : تلت سنيييين هادي

قسم : ياك حبت ليك كاكو فلانيفرسير ديالك للخر ابابا .. نكرتييينا

اسد : وعرررفتي شحال دااز عليه ...

رتاج : هههه اوا هاهو جا يعووضك هههه بنادم غير يصبر تااايفرج عليه الله ههههه

قدس : ( جات عند لوؤي ) شششوف شحال زوييييينييييين ( وراتو ليبراصلي ) هاديي ديالك وهادي دياااالي ....

لوؤي : ( باعجاب ) وااعرين ...

عدناان : ههه وزيديو تكلسو بعدا من بعد وشوفوو ( شاف فأصيل ) وااشوووف معامن غاتنااااااسب ....!

أصيل غير كيضحك وزاد مع عدنان و كلسو كاملييين ..

لوؤي : لا زعما ملي تفكرتيينا كاملييين ماعندي مايتساااالك ...

أصيل : بصحة ...

أصيل غير منزل عينو حشمان وقسم كاتشوف ففيه بكل حب تادمعو عينيهااا ... عارفة بلي هادشي كتير بزاف عليييه ولكن كبرر بييييها .... وهو علا عينو وشاف فيها وعرف يقرا نظراتها وتاهو بادلها نظرات عرفات تقراااهم .... ورجعو نزلو عينيهم .... وسلطان لبس الساعة ديالو ...

سلطان : واشوووف دابا ضييعنا علينا براسلي ، كون تزوجنا تاحنا كون راه عندنا بواطة مشروكة .... ( وراهم البواطة ) سميتها مسكينة بوووحدها تاتجيب البرررد ..

لوؤي : واخوويا توكل على الله شكون حيدليك ..غاهو نتا موحال تقدك غابواطة دجوج ... نتا راه سميتك سلطان على الاقل خاص شي ربعة و لا ستة دسميات حداك .. سلطااان ووحدة مااااجتش

سلطان : ( شتف فاصيل ) والحمد الله لقيتيني باااقي دراسي ماهو ميزانية تمشي ليك غا مع الحريييم ديالي

جود : هههه ( شاف فأصيل ) شكرا ... غايعجب بيلسان حتى هي لي تفكرتيها ...

أصيل : بصحة ...بلغ ليها السلام ....

جود جبد تيليفون صورو ليها وسيفطو وهوما كولهوم شافو كادواتهم وشكروووه .. مكانوش كايتسناو منو هاد لجيست وهو جاتو الغرابة كيفاش فرحو بيهم قد هاكااا واخا هوما شي حاجة بسيطة بالنسبة ليهم .. معارفاش إلى هوما كايهمهم أنه جاو من جيهتو ماشي شنو فيهم بضبط .. وسلمى فررررحااانة حيت عجبوهم بحال هاكااا .. وأسد حل ساعتو و هو يعلي عينيه بإعجاب كايوريها لامار واسبرو واقف متكي على لكرسي موراه حاط يدو على جبهتو ولوخرا على تكاااية دكرسي ومعلي راسو فوق كيف شي عاارض ....

لوؤي :وووااا بصحة بصحة راه شفناااهم غا حيد باش ماتعتر فشي حاجة ....

لامار : هههههه ونا ككانقول مال هادا لابس نضاضر فليل هي قول ليا كاضو ديال خطييب بنتوووو ....

أسد خشا هاديك الساعة فجيبو كان نفس إحساس أنه جابها ليه ولدو وعجبو إسم لامار لي نقشو فيها وأصيل كالس حشمااان وسطهم .. وبيلسان صونات على جود وبعد باش يجاوبها ...

جود : الزعيعرة ! ... عجبوك ؟

بيلسان : كااايحححمقووووو ... ناااري طلع ضريييف مسكييين تفكرنا ...

جود : سي .. تفكر كولشي .. تا من سعيد راه كيضور علينا بنضاضر فتلاتة دصباح ههه

بيلسان : عرفتي فرررحت فاش شفتو فالفوطو .. قولييه شكرااا .... شكرو فبلااصتي .... ركبو الخواتم ولا مزال ؟؟؟؟

جود : مزال ..

بيلسان : عنداك تنسى تصوور ليا .. راه عارفة غااتنسا هههه راني موصية تا قدس ...

جود : ههه لا ... فكريني بشي ميساج .. راك فلافاك ؟

بيلسان : ليوم الاحد احبيبي هههه خارجة نتغدى

جود : دابا ؟ عندك تسعود واقلة لا ! عاد عاتغداي ...

بيلسان : العشرة وربع عندنا ... داز نهار طويل مع ماما كتوجد لواحد لكوليكشن وبفيت معاها تما كنعاونها تاعييييت .. وماقديتش ناكل هانا دابا عاد غادي نمشي ناكل .. جنان كتتساينيي غانتغداو بجوج تاهي يلاه سالات الخدمة ..

جود : داكوغ ... بصحة وسلمي عليهم ...

بيلسان : تانتا سسسلم عليييهم كاااملين ... وششوف كيف دير تسيفط ليا براسلي ديالي هههه

جود : ههه هاهو عندي هنا حتى تجي ...

بيلسان : هههه حتى تجي نتا .. ياك قلتيليا غاتجي عندي !

جود : ان شاء للله ....

بيلسان : يلاه سير منشدكش دابا .... ملي نحس بيك مشيتي تنعس غانصوني عليك نكملو ...

جود : واخا غانتسناك ...

بيلسان : سلم عليهم وقوليه شكرااااا بزاف ...

قطع عليها وقرب لعندهم هوما لي كلهم ضاحكين كايشوفو كاضواتهم ولامار كتصور لرقية البوكس ديالها وقسم دايرة رجل على رجل قالبة شفايفها ...

قسم : والله تااحااااسة كولكووم ديتو مني الاضواااء هاد النهار ...

رتاج : ( مشات حداها عنقاتها ) هههههه لا لا لاااواه هههه راه نتي علامن طالعة هاد الليلة ....

قسم : وتااحد فيكم مقاال نشوفووو غي خواتم قسسسسم .. كاتشوفو غي كاضوواااتكم .... !

جود : مالنااا نتي على هاد للغيييرة تاني .... ررراه عرفناا غااتخطبي عررررفنا ....

قسم : إوا شوووووية د الاهتماااااام ...

لامار : ههههه اجي ابنتي عندي اااجي ... حشووومةة عليكم ديييتو منها الضو هاد النهارررر ... اجي احبييتي عندي هنا اجييي ....

قسم : غييير بعدو مني داابااا ....

أصيل غير ضاحك وهي قالبة شفايفها وناضت لامار على سعدها ووعدها كلسات حداها ...

لامار : مااال الغزاالة ديالي .. شكون غايدي الضو من هاد الزييين كااامل ... ( عنقاااتها ) حبييييبة دياااالي ...

قسم : وا قووولو لياااا غييييير كيجااااكم خااااتمي ؟؟؟

لامار : هههه غزااااال كايييحمق ... ( عنقاتها ) اااجيي عندي ..

قسم عنقاتها تاهي ولامار دموعها على سبة و مسحهاتهم بزربة وبقات تقاد ليها شعرها ....

لامار : كبرااات لياا الغزاالة ديالي و ختاارت تاهي معااااامن تكمل حياااااتها .... ( شافت فاصيل ) وللد الناااس تاااهووو الله يحفظووو .... والله يكمل ليكم بالخير ويييجمعكم بالخيير وتيسير و نشوفكم بوليييداتكم ... ويعمرو علياا قنااات هاد الدااااار ....

قسم : ( رجعت عنقاتهاا) آمييييين ...

الكل دمعو عينيهم ومبغاوش يبينو وأسد شاف للجنب كايتنهد .... وأصيل حاااس بيهم ...

سفيان : صافي تاحد ما يهضر .. هضرو غير على قسم هاد الليلة ...

سلطان : وغاسربيييو نمشيو فحاااالاتناااا ...

سفيان : نووض سيير فحالك ... أنا مافهمتش آش كاتسنى !!

سلطان : أنا مااغاادي تااانشوفها تخطباااات ...

سفيان : وهاهي تخطبات سير راك غاتعطل ...

حياة : خلييك تالصباح أسلطان ...

سلطان : لا خليني نصبح تما ...

رتاج : وراك مناعس ماوالو ...

سلطان : دابا نعس فطيارة .... غاسربييييييو دغيا شربو داك الحلييب رانا مامحركش تانتصور معاكم ...

قسم : هههه ولد عمي الغزاال .. الله يحححضرني تااانتا فخطبتك وفعرسك ونأجل كوولشي على قبلك ونكون معاك ....

سلطان : داابااا نشوف ... ( شاف فسلمى ورجع شاف فيها ) راه ماابعييييداااش ....

قسم : نتا غييير گول بسم الله وغاتلقاني انا لووولااا ...

سلطان : وانوضي دغيا شربي داك الحليب نمشي فحالي ...

قسم : أويلي على نوض نشرب الحليييب ...

سلطان : ااااا ه .. زعمااااا ... خاص داكشي ديال الخطبة .. و طالبين راغبين ياك ! ( أصيل علا حجبانو وسلطان ناض و كلس حدااه ) بلاتي نفكك ليكم هادشي دغياا رراه تعطلت .... ( شاف فأصيل لي معلي حجبانو جاتو الضحكة ) اعتبرني ولي أمرك ...

أصيل : هههه أهاه واخا ...

جود : لا لا لا متحاااوولش ( شاف فأصيل ) آخر مرة خطب ليا .. كون مكانش عمي كانو غايجريو عليا أنا وسكااااري .. وايااااك ...

سلطان : وا حييت نتا أصلا غا ديال لي يجري عليييك .. لقيتيه عمي مسكين ديااالناااا .... ( شاف فاسد ) ماعلينا أعمي ... انا راه مزروووب ... ال ... هاد اسميتو ... ااا .. كيكايقولو ليه .... اا .. اااه ... القصد ديالنا زعما راه معروووف وشريف .... باغين نخطبو لسي أصييييل ... ( شاف فيه ) ولدنا .... من عندك ... حيت مغالقاوش ماحسن منكم وماحسن من قسم .. ونتوما مغاتلقاوش ماحسن منا حيت أصلا مابقاوش .... كاع الرجال دالكرة الأرضية قالت ليهم لا ...

أسبرو : لاااا ... باااقي نتا ماجربتي حظك معاها ..

سلطان : لااا حيت أنا لي غانقول لا .. انا منديش وحدة شارفة عليا ( شاف فأصيل ) غا خودها خووودها ...

أصيل : هههه واخا

سلطان : مهم اعمي ( أسد مربع يديه وداير صبعو صغير فمو وجاري معاه ) منبعد بزاف د المحاولات معاه يهرب مااابغاااش .... ماعندنا مانديو منغير نعطيو ليه البنت ويتحمل مسؤوليتو ... وندعيو معاه التسيير

لوؤي : التييسير .... اشمن تسيير

سلطان : بحاااال بحال .. مهم ولدناا راه متاايكممي ( شاف فيه بالهمس ) ياكما كتكمي ! ( أصيل غي محرك ليه كايضورو مبتسم على خفة دمو و رجع شاف فأسد ) لا متايكميش ... متاييشربش ... الصلاة والديييين والعبااادة ...

لوؤي : فااايت صليتي معاه التراوييح ؟

سلطان : سكت نتا راه حنا مزروبين .. مهم اعمييبي ماعندك ماتعيب فيه .... أصلا اعمي بلا منعييو راسنا حيت لاقلتي لا غاتنوض هاد خيييتي تقلب علينا هاد طبلة ...

قسم : ههه ويلا قلتها انا ؟

سلطان : غانقلبها أنااا .. ماشي عييييقتي شوية لاااا ! باغا دخلي لموسوعة جينيس ! هدا راه هو البياسة لخرااا لي بقاااات ليك فالرجال كولشي سيفطتيهم ....

قدس : هههههه دابا شكون سخط عليك اخويا تاكلفتيه يخطب ليك ههههه

أصيل غير كايضحك وسلطان مكمل و شاف فأسد ..

سلطان : مهم ... راحنا طالبين راغبين فيد بنتكم المصونة لالة قسم .. هي و ولدنا سييدي أصيل غايعيشو فالخفاااء ول(قاطعو) ...

جود : فاش غايعيشووو ؟

سلطان : الخفاااء ييعني ... يعني البروسبيريطي .. يعني بحالا قلتي السعاااادة ...

حياة : الرخااااء اولدي الرخااء شوووهتيني ....

لوؤي : ولاباس لي جات غا فالخفاااء ماقالش شي عجب اخر...

سلطان : مووهيم فهمتو ( شاف فأسد ) وراه ولدنا خدااام علا راسو .. رجل أعمال صاعد فمجال المطاعم وداكشي ( شاف فأصيل ) لاقلت شي حاجة مهيااااش صحح ليا ...

أصيل : ههه لا لا كولشي مزيان ...

سلطان : وراه كايصلح ريسطو ديالو وراه غاايبداا ان شاء الله فطريق الانحراااف ...

جود : الاحترااف اولد اللدينة الاحترااف غاتخرج عليه ....

سلطان : ...لمووهيم ( سلمى كتموت بضحك هي وآية ) ااا .. اشنو كنا كانقولوو( ضرب جود بمخدة ) مااتقاااطعنيش ابنادم هااانتا نسسييييتيني ... اه .... وراه لي بغييتوها ولي شرطتووها على راس والعين ( شاف فأصيل ) ياك !

أصيل غير كايحرك راسو بالإيجاب ضاحك حاس براسو عمرو ماااضحك قد هاكا ...

سلطان : مهم راه قابل على كاع شروووطك ... بنتكم غالية شرطو كيف بغييييتو .... وراه غايعيشها فالهنا والسعااادة وهاديك لي صححاتها ليا الواليدة ومااايخليها يخصها والو.. ويحتارمها ويصونها .... والسلام عليييكم ( شاف فقسم ) اجي تشررربي الحليب ....

عدنان : ههه ( شاف فأصيل ) لا زعماااا تبارك الله جججبتي شكون يخطب ليك ههههه انا قنعني ....

أصيل : ( شد على كتفو ) لا راه قال لي كاين ..... ( شاف فأسد ) عندو الحق فأي حاجة قالها .... ( شاف فيهم بجدية مخلطة باللطافة ) بصح. . جيت ب باش ... باش نخطبها نديرو أسرة صغيرة ديالنا انا وياها ح حيت ... كيف كاتشوفو انا ماعنديش عائلة ، كاين غير انا وختي ... ولكن مور ماشفتكم كاملين ... بغيت الأسرة ديالي تكون وسط منكم ...

عدنان : مرحبااا اولدي .... يمكن دخلتي على داك البااااب بوحدك نتا وختك .. ولاكن راك مغاتخرجش مزاااال من تما بوحدك ....

أصيل : الله يكبرر بيييك ...

سفيان : ملي دخلتي مع داك الباب ونا حاااس بيك .. عنداك يمشي يقوليك راسك راه مجبتش عائلة معايا راه مغاتكونش عندي خطبة كاااملة ولا راني ناقص ... شتي كااع هادو لي كالسين قدامك تاهوما واحد نهار كانو بحالك ولكن الحمد الله طحنا فبنااات الناس .... ودرنا عائلة ... ( أصيل كايحرك راسو بالإيجاب مريحاه هضرتو) بعد لمرات العائلة ماشي هي لي كاديرك .. راه نتا لي كاااديييرها .. هادشي علاش ديما تانوصيو ولادنا يتهلاااو فيها و يشدو فيها بسنيهم ويديهم .. ربيناهم على هاد الاسااااس ... حيت عارفيين مزيان شنو هي ماتكونش عندك .. وحتى انا متأكد غاتربي ولااادك بحال هاكا .... كووولنا لي تاتشوفنا هنايا .. ماعندنا عمام ماعندنا خوال ماعندنا عمات هههه عندنا ولادنا وعيالاتنا ونسااابنا ... يعني بلااا متحس بشي حاجة ماهياش غير حيييد داكشي من رااااسك ... حنا تايييهمنا تكون نتا ولد الناااس .. وتتهلى لينا فبنتناا ... قسم راه بنتنااا حنا كااملييين .. كولنا تناوبنا عليها كلنا ربينها كووولناااا هزييناها .... وصعيب علينا باش نقبلووو ونعطيوها لشي حد ... ولكن الحق يقال ( شاف فخوتو ) رتاحينا ليييك .. والاهم هي مرتاااحة تاهي فماعلينا غا نقولو ليك الله يكمل بالخيييير ...

أصيل : ا. انا .. والله ماعرفت مانقول ... كلامك كولو على الحق ( شاف فأسد وحرك راسو بالايجاااب) عرفتي دير الظل أسي أسد ....

أسد : ( تنهد بعد مكان متكي لور قرب لعنهم ) مرحبا بيييك .. تحت منو ... حتى نتا ....

لامار : نديرو شي زغروووتة ؟ ( شافت فقسم لي معنقاها ) باش ماتغضب لييينا هاد الببريهيششة ديالي ...

طلقاتها حياة بتزغريتة واخا متتعرفش مزياااان وهوما كلهم ضاااحكيييين وأصيل كايشوف فيها ...

سلطان : اوا نوووضي تشربي الحلييب ...

قسم : ناري راني غانخويه عليك ا سلطان .. شوف كييف زرررب لياا خطوبتي .. نتا لي عطلتيييه باش جيتو ...ودابا كتزرب عليا ...

سلطان : وراه تلاتة دصباح هادي راه غا نت والفيران لي تاتخطبوووو دااباا ... نوضي تشربي الحليييب ...

سلمى : ههههههه

سلطان : ضحكي نتي ...

لوؤي : بلاتي مكتكونش الفاتحة لا ! ماتنقزوش المراااحل للسيد ...

عدنان : ماشي غير فاتحة وحدة هاد المرة .. غانقراو جوج .. لولة على المرحوم ( شاف فاصيل ), الواليد ديالكم الله يرحمو .. وتانية نباركو فيها خطوبتهم ...

حلو كولهم كفوفهم موافقين هضرتو وقراوها وقسم هزات عينها بشوية لعندو كان منزل عينيه كيقرا ... ورجعت تاهي كاتقرا وفرحاااانة ..... تاقالو امييين مجموعيين وعلات عينيها فيه هو لي بتاسم ليها بروجولتو المعتادة ...

حياة : اجي اقسم هنا اجيو... اجي تانتا أوولدي ...

أصيل حشم من هاد الشكليات ماعرف مااايدير وكولهم خواو ليه طريق ومشى لجهة الاخرى فراس الصالون عند قسم لي ضحكات لييه تاتسدو عييينيها .. واسبرو قرب وجود بعد كايصورهووم ..

أسبرو : ( مد تمر لأصيل ) هاك .. عنداك تاااكليه كامل خلي شوية د البريستيج ملي يشوفوه ولادك مااايضحكوش عليك ....

قسم بقات كضحك وعلات عينيها فأصيل مامتيقاش واش راها فحلم ولا فحقيقة ... وهو كايمد ليها هاديك تمرة لفمها و حلات ليه فمها عينيها فعينيه ....

عضات على التمرة وهو كايشوف فيها ... كانو نظراتهم كاتكلمو فمكانهم .... وداز حدييييث طويييييل ....

______________

•تعقلي على اول كدبة ؟

{{قسم : أنا ... أنا كنوووصل البيييتزاااا

اصيل : مممم بيتزا !! .. كتوصلي بيتزا فالفيراري ؟؟؟؟ }}}

___________

•هههه عقلت ... وتعقل نتا على ثاني وحدة ؟ ههه

{{ اصيل : ( اشار ليها بيديه ) كتسكني تما !!!

قسم : آآه ... تما ( نزلات تاهي وحطات الكاسك )

اصيل : علاش فين واليديك ؟؟

قسم : ها ؟؟؟؟ ( باستغراب مافاهماش ) فالدار !! علاش ؟؟اصيل : حيت هاديك خيرية ... كتسكتي فخيرية ؟

قسم : هااااا !!!!! }}}

_____________

•ولكن هاادي ... كانت اول حاجة غاتقوليها ليا بلا كدوب ....

{{{ اصيل : ايييه ..

قسم : ( ضارت عندو ) قسم ...سميتي قسم ....}}}

____________

•وهنا .... بلا منحس . رجعت نكدب تاني ... وكانت هادي اكبر كدبة كدبت عليك وعلى راسي ....

{{{ قسم : اااه تابعاك دابا .. ولكن ... ولكن حيت مامخليش ليا فرصة نهضر .. عطيني فرصة نهضر .... سمعني شنو بغيت نقول ... من بعد ... سير .. بغيت نققول انا غانمشي.... متعاودش مزال تشوف وجهي ... }}}

_______________

•حتى انا كدبت عليك ...وعلى راسي ......

{{{ اااخررر مرة ... نشووووفك قدامي مزااااال ... ... اانااااا مواعيش ...انا الاااالة متتتتخخخخلف انا مقااااارييييييش ومغانقررييييش ختي ....خخخخرجييي من حياااااتي ولا اناااا لي غانخلي ليك ديك الدااررر وغانمشي .... راس مالي ختي ماعنديييش غلا منها .... منشوووفكش مزال معاها ولااا بررررب حتى غااانخوي المدييينة فمسبتك ...( بالغوات تاغمضات عينيها) خرررررجتي حياااتنا ابنت النااااااااس}}}

_________________

•ههه ، راه خرجت من حياتك ... ولكن نتا ... لي عاودتي دخلتي ليها .....

{{{ اصيل : قسم ؟؟؟؟ اش كاديري هنا ! ( كيطلع معاها ويبهط وركز فعينيها الباكيين ) واش نت بيخير !!! "}}

• وفكرتي حتى فكيفاش ممكن نكونو انا وياك بجوج !

{{{ اصيل : كنت كنفكر فشي طريقة تخليينا نتزوجو .. وقلت نخطف ماماك ونقوليه الى رجعتليك مرتك زوجني بنتك ..... ( قسم ضحكات ) ولكن ملي مكيزوجش بزز بناتو .. مغتصدقش ليا ... نتعذبو على والو ....

________________

•بصح .. حيت فهاداك الوقت .. باش نكونو وياك بجوح شي حاجة لي صعييييييبة بزاااااف !!!

{{{ اصيل : قسم غير فهميني .. نتي بنت الناس ... وزوييينة و واصلة وكابيتين كيف قلتي كاع ... حاولي تختاري لراسك واحد لي بحالك ... انا ماااعندي ماااانعطيك اقسم ... انا غي صياد وولد الحوووومة !!! .... ونتي شووفي شكون

قسم : ( بغضب ) شكوووون انا شكوووون !!!! نتا اصيل الشريف وانا قسم الاسماعيلي .. فييييين هو الفرق

اصيل : غير الكنيات يجاوبوك ... }}}

_____________

•ولكن انا كنت بغييت غيييير .......

{{{ قسم : انا ا اصيل .... بغيييت نكون بحال هاديك لهيه ... لبسات جلابتها وهزات قفة فصباح وخرجات .... وتاحد مارد ليها البال حيت هي ماشي بنت الاسماعيلي وتا كاميرا مغتصورها وتاكارد مكاين من موراها ... عاااايشة اليز تقدر تمشي فيين بغات ماشي غير لبلايص محددين .... تقدر دير لي بغات متخافش من شي كاميرا تصورها وتوصل خبارها لهيئة البروتوكول ويسحبو منها وسااام ديال السلوك ....}}}

_____________

•وانا كنت مزاااااعمش .....

{{{ اصيل : نت عارفة لو كانت شي طريقة نولي بيها غدا فمستوى عائلتكم كنت انا لي غنديك ومكنتش غنخيك لحتى شي واحد اخر .... ياك عارفة هاددشي ! }}}

_________________

•ولكن تعقل على فاش سوليتني شنو عاحبني فيك هههه ؟؟

{{{ اصيل : دابا بكككل تواضع .. اقسسم زعما ... بغيييت نعرف .. اش عجبك فيا !!! }}}

____________

•ههه ....حيت دبصح .... مكنتش عااااارف !!!!

{{{ اصيل : لا والله بغيت نعرف .. زعما عييت نفكر شنو فيا كيعحب مالقيت والو .. واحد مريييض فراااسو ماعندو فلوس ماعندو طموبيييلات ماعندو عائلة ماعندو زهررر ماعندو تاااااشي حااااجة ... اش عجبك فيه }}}}

______________

•حييت .....

{{{ قسم : انا بغيتك .... حيت لقيت عندك داك الاهتمام لي كنت كنقلب عليه .... }}}

_____________

•وحتى انا كنت سولتك ....

{{ اصيل : انا شنو لي خلاني نتعلق بيك !!!!!! ....هم ؟؟ ... }}}

_____________

•كنت عارفة الجواب .. ولكن كنت بغيتك نتا لي تقول ليا ...

{{{ اصيل : ضحكتك لي بحال البنيتة الصغيرة ... هاد العينين لي ماعرفتش واش سرقيتهم للغزال ولاهوما لي سرقوهوم منك .... الا نت تعلقتي بيا تاعرفتيني .... انا تعلقت بيك قبل مانعرفك قبل حتى ماتعرفيني نت ..... قبل حتى مادخلي لداري .... قبل حتى مانلقى وجهك فوجهي ونسول راسي كيف الهبيل واش حيت كنبات كنلحم بيها كنشوفها دابا ..... تعلقت بيك من هاد الضحكة ومن عينيك لي قريت فيهم الصفى .... ولكن ..... الطريق ليك كنشوفها مسدودة ..... خزنتها عندي وسكت ... }}}

__________________

•وتا لهنا .... وماقديتش نزيد نخزن عندي مزال ونسكت ...

{{{ اصيل : متخافيش انا طالبها كبيرة .. ( شاف فيها ) عيني على الكاپيطان .... }}}

• فخبارك عجبني الحال نهار قلتي ليا .....

{{ اصيل : خلي مجيتي لداركم حتى تجي بحلاوتها .... }}}

____________

• وهاهي جات بحلاوتها ...

{{{ عدنان : نهار كبير هدا تعرفنا فيه عليكم

اصيل : الله اكبر بيك شكرا }}}

______________

•اوا شتي .... فقدتي كرامتك دابا ؟

{{{ اصيل : مغانقدرش ندخل لعائلة لي نفقد وسطهم كرامتي ... وتتهان رجولتي ..... غير سمحيلي ابنت الناس ..}}}

_______________

•واااحيت نتي ، لي ماعرفتيش شنو توريني بالضبط ....

{{{ اصيل : كنت قلت ليك .... بلي المجتمع ديالك متايعجبنيش وعمرو غايعجبني ....وعمرني غنبغي نكون وسط منو... !

قسم : ( علات حجبانها ) اهاه !

اصيل : ( شاف لكلينيك ورجع شاف فيها ) كان عليك توريني هادا .... ماشي لاخر .... }}}

______________

•ولكن عرفتي شنو هي الواعرة ؟ هي من نهاااااار قلنا

{{{ اصيل : واش باغا تكوني معايا اقسم !

قسم : باغا نكون معاك .....

اصيل : حتى لخر !

قسم : حتى لخر ......}}}

____________

•والمصايب كوووولها جات ههه

{{ اصيل : ( نازل فالدروج ) انا متفهماتش ليا البنت منهار عرفتها وهي تصبح عليا هنا فالدرب على تمنية دصباح بحالا غندير ليها السوايع فالماط ( قسم كضحك) ونهار درتها ديالي وبغيت انا نعيط عليها طفات تيليفون هي كاع وبغات تنعس تالوحدة وناضت عندهم روينة فالدار .. هذا كامل نحس هاا ! }}}

____________

• تعقل نهار فلت ليك

{{{ قسم : غاتزيد شوية غنولي نبغيك }}}

_______________

•عاقل تافاش قلتي ليا ..

{{{ قسم : أصيل ..... ( بحب كبييير وكتحس بعقلها بدا كيترفع ) تااانبغيبييك كتر من راسي ....}}}

___________

•ماتغشش ... كنت سكرااانة .....

{{{ اصيل : راك غتسحاي وغتفهميني ... دابا خليني نفك هاد الكارثة لي طيحتي فيها راسك ونشوفو شي لاخر }}}

____________

• ودابا ! غاتنكري ؟

{{{ قسم : ( بهمس ) واخا نبقى نقوليك كنبغيك حياتي كاملة ... عمرني غنقدر نوفي حق داكشي لي كنحسو من جيهتك }}}

____________

• ونتا تنكر؟

{{{ اصيل : ( بحب كايشوف فيها ) كانبغيك .....}}}

______________

• لا ...

{{{ اصيل : اااه ... باغي نحبس هادشي .... ولكن مقادرش ...(حرك كتافو معوج شفتو ) راك فوق طاااقتي .....هدا جهدي }}}

_______________

•وغااانبقى فوق طاااقتك ... شوف كيف دير تحملني .... حيت .....

{{{ قسم : مكاينش شي بلاصة فالدنيا غتقدر تهرب ليها من بنت الاسماعيلي ..... }}}

__________

•وانا مكنقلبش نهرب ...حيييت

{{{ اصيل: بنت الاسماعيلي مكنهربش منها لدنيا ..... هي لي كنهرب ليها من دنيا }}}

• كان كايبان ليك .....

{{{ اصيل : كيبان ليا طريق معاك طويييييييل }}}

_____________

• ولكن ...

{{{ اصيل : شوية بشوية كتقصريه ...}}}

•وشنو درت باش قصرتو عليك ؟؟؟

•قصرتيه ...حيت ....

{{{{ اصيل : حيت نتي ماشي رفيق الطريق ....نت .. الرفيق ... والطريق .... بجوج بيهم }}}

_______________

•تعقل فاش كنت قلت ليك داك الليلة ......

{{{ قسم : مبغيتش لي يشريلي النجوم أصيل ..... ( رجعات كتشوف فالسما ) بغيت لي يتكا حدايا ونتفرجو فيهم انا وياه ....}}}

____________

•ولكن بالنسبة ليا نتِ

{{{ اصيل : هي داك نجمة لي كتلمع فيه .....نت هي لي مخلياني لايح خطاويا فالظلام ..... }}}

• حيت نهار قلت ليك

{{{ اصيل : والى كان هاد المرض لي عندي غايآديك نت ؟ }}}

_____________

• تماك قلت ليك أنا ...

{{{ قسم : غير تهنى ... راني ينت عائلة علماتني الحاحة العوجة نصلحها ومانلوحهاش ... }}}

_____________

•كنت خاايف بزاف داك الليلة .. تمشي وتخليني ...

{{{ اصيل : الطبييب قال غادي نبرا الى تبعت الدوا والعلاج النفسي .... قال ليا ممكن واحد النهار ينقص هادشي بالتدريج ... ممكن نقدر ننعس معاك بلا منقتلك ..... بلا منكون غايب على الوعي الكااامل .... كناخد الدوا ( ناض ومشاا بززربة للمجر حلو وهز دواه ومشى حطو قدامها على طبلة ) هاهو .... ( كايوريها بهستيرية و عينيه حمرين كايلمعو بدموع لي حابس وكايهضر بضعف ) ه ...هدا .. هدا ( كاشوف فيه ) ااه هدا كانشربو فصبااح ..نص حبة قبل فطور .. (هز واحد اخر ) وهدا فلليل .. قبل منعس ... بعد العشا ..... ( بهستيرية كايشرح خايف يخسرها) هدا هدا لي كاتشوفي هنا ..... مرة فتلتيام ... كانديرو فالما .... ( لاح دوك دوايات من يديه وشد وجهها علاه ليها كايشوف فيها وعينيه مضببين بالدموع ونبرة الترجي فصوتو ) قسم ..... مغاااتخلينيش فهاد الطريق الطويلة بوووحدي يااااك ؟؟؟؟؟؟ ( بخوف ) مغااتخلينييييش ؟؟؟؟ }}}}

________________

•ولكن .....

{{{ قسم : هضرت دابا مع الطبيب دياالك لقيتك مقيد نمرتو .... فيقتو من النعاس و قلت ليه غانجيو عندك انا واصيل السيمانة جاية ...}}}

______________

•تماك انا عرفت ....

{{{ اصيل : هاد الصباح اقسم ... انا عرفت ان بنادم متايطيحش فشي واحد لي خلاه يبغيييه ...تاطيح فهاداك لي تايخليه يبغي راسو .... عمرررني ضنيت شي نهار غانكون بنادم طبيعي تانهار عرفتك .... فكرت فزواج وفكرت نولد معاك كاع ...... }}}

_____________

•متخافش ..... حيت حنا ...

{{{ قسم : غاانتزوجو ... وغانبنيو هداك العالم لي حلمنا بيه .. وغانولدو دوك الولاد فيه .... و وغا .. وغايكونو زوينين بحالي ... وبحالك ... غ .... غايكونو ضايرين بعمتهم سلمى ... ( دموعها نازلين ) و جوج خوال ... . وخالة ... غايبغيهم جددهم بزاااف .... وجداااتهم تاااهي غاتربيهم ....حيت غانلوحهم مرة مرة على ماما باش نكلس معاك بووووحدنا ملي نتوحشك ...... }}}

____________

• تيقي بيا .... على قبل نححقو هادشي ... غاندير جهدي كامل ....

{{{ اصيل : حياااتي كلللها حطيتها فالحافة ..... ( برجفة ) يا نعيش معاك ... يا نمووت .....}}}

______________

• طلبتك داك نهار .. ومزاال مجاوبتنيش .....

{{{قسم : عطيني الحياة لي ماعنديش ... وغانعطيك الفاميلي لي ماعندكش ... }}}

شرب من الحليب لي مادة ليه مبتسمة وعينيه فعينيها قرا منهم آخر سوؤال ... وضور عينيه على الفاميلي ديالها لي كولهم واقفييين كايشوفو فيهم بعيون دامعة وقلب فرحاااان وكولشي ضاااحك ... ورجع شاف فيها محرك راااسو بالاييييجااااب .... عرفاتو الى تفكر اخر هضرتها فالباطو .. وتاهي اصلا كانت قاصداها فآخرة نظرة دارت ليه ......

مد ليه أسبرو بواطة ديال الخاتم وهز منها خاتمها وهي مدات ليه يديها و هو يلمح الخيط الحمر لي باقي معقود فيديها وعلا عينو فيها مدة و هي كاتشوف فيه مبتسمة كأنها كانت تاااايقة فهاد اللحظة غاتجي وااحد النهار .... وبدا تايلبس ليها الخاتم .. ولامار عاضة على شفتها أما أسد كان گالس وكايشوف الأرض .. ماقدرش يشوف فيهم ماقدرش يشوف البكر ديالو وأول فرحة ديالو فهاد دنيا صافي كبرااات وغاتزوج لواحد آخر و غاتمشي لعندو .... كاع السنن دالحياة راضي بيهم إلا هادي .. كاتجيه أصصصعب وحدة ...

قدس تاهياا كانو عينيها باكيين لكن الضحكة عريضة حيت ختها فرحانة كتخطب للي بغاتو .... ولوؤي واقف حداها كايصورهم ... سلطان كانو عينيه على سلمى لي كانت بنفس ملامح قدس بالفرحة لخوووها وعينيها كااايلمعوووو كايحس فأول رمشة ممكن ينزلوو دموع .. نييفها حماررر وعاضة على شفتها ....خيت ماااصدقاااتش واش خوها صافي غايتزوج!!! .... حياة كانت كاتشوف فيهم و كاتشوف فولدها كيفاش كايشوف فيها .. وعدنان كان كايحاول يشغل راسو بالخيوط ديال المخدة كايجبد فيهم ويقااادهم باش مايعليش عينيه ... وسفيان كايشوف فخوتو كيفاش كايشوفو لجنب و تيضور فراسو و رجع كايشوف فيها هي كيفاش الوقت طاار .... طارو اعوام بزربة ... يلاه كانت طفلة صغيرة بييين يديه كاتقوليه عمو شوفيان !!! ...

مد ليها أسبرو بواطة تاهي وخدات منها خاتمو ولبساتو ليه ... وكلهم صفقوو وهو شاف فيه فيدو ورجع طلع نظراتو مباشرة فيهم بتبتسامة لطيفة وخجولة ... قسم قلبات بنظراتها على باباها كان مغطيه سفيان وسلطان لي واقفين قداامو وهو كالس .. عوجات راسها تاشافتو وهوما يتلاقاو عينيهم ... غير شافتو حسات بزربة بدموع تجمعو فعينيها وهو بتاسم ليييها بحنااان .... وعلات عينيها فأصيل ورجعت شافت فيه وهو حرك ليها راسو بالإيجااب .... من ديما ملي كانت صغيرة كانت كتحاور معاه غير بالعينين ... وفاش كتبغي تاخذ شيحاجة غير كاتشوف ليها وتشوف فيه وإلى حرك ليها راسو كتاخذها ... من بعد ما عطاهاا إشارة بالايجاب شدات فيد أصيل و أسد بدا كيضور فراسو ورجعات قلبات عينيها كاتقلب على ماماها .... لي غير شافتها سالو دوك دموع لي حبسات و مسحاتهم بزربة... ولامار عطاتها بوووسة فالهوااا ... كاتفكر شغبها وبسااالتها كيفاش دغيا كبرااات وتعقلاات وواقفة كتخطب قدااامها متحمسة وفرحااااانة مع الراجل لي تتبغي .... شي لي مخليها تابثة وفرحانة هي انها هادي غير خطبة ومغاتمشيش عليها دابا وباقا معاها و أصيل دخل لخاطرها .... ضورات عينيها عند جود ... لقاتو واقف بابتسامة ونظرات حناااان .. غير شافتو ضعااااف كلما فيها .. تمنااااات ليه الفرحة من كل قلبها .. حيت هي حاسة بيه شحال مكتئب ومهرس و مضور على رااااسو .... تمنااات ليه تكون بيلسان هي العوض د حياتوو ... ويشد فيديها بنفس طريقة لي شادة هي فأصيل .. بنفس الحدة و القوة .... و ضورات عينيها لعند قدس .. وهي تلقاها ضاحكة بحمااااس ولكن العينين باكيين وشافت للوؤي لي فجنبها .. فررررحات حيت حتى ختها جربات هاد الشعوورر و كاتعيشو ... وبدات ضور عينيها على آباءها الثاانييين .. عدنان .. سفيان أسبرو ... فهاديك اللحظة هي حسااات بأن مكاينش شي حاجة فهاد دنيا غلا من العائلة ... الحب لي عاطيين ليها فعينيهم جاها كبيييير بزاف على إطار قلبها الصغيير ... وعلات عينيا لعند أصيل وهو بشوية ضحك و مد يديه كايمسح ليها دموعها لي نازليين ..

سلطان : ( تسلت من بينهم ومشا لعندهم ومد ليهم بواطة كحلة متوسطة وقسم طلعات حجبانها حلاتها كانو فيها صدايف ماسييين ديال الرجال ومعاهم حلق نسائي كايشبه ليهم ) واحد الكاادو بسيييط لختي الغزااالة ونسييبنا الجديد ... ( أصيل ضحك ليه وهو جا قدامهم وتحنااا متكي على صدرهم باش يبانو وراه وعلا تيليفون ) ويلاه شي ضحيكة باش نمشي فحااالي ....

قسم : ( عنقااتو من لور وشداتو من شعرو ناتفاه) ماااسخييييتش بيييييك ...

سلطان : ( شد صورة بحال هاكاك ضاحك وضار عندهم ) مكرهناااش و لكن البيلوط راه شرف مسكين وهو كايتسنى .. بلا منزيد نعيق عليه كثر ... ( مد يدو لأصيل ) تشششرفنا بيييك نتلاااقاو فساعة الخيير ان شاء الله ....

أصيل : ( سلم عليه تاهو )الشرررف ليا ... طريق السلااامة ...( شد على كتفو ) وشكرا على الوقفة ...( ورا ليه البواط ) وهاد الكاااادو الزوين ...

سلطان : الله اووودي .. نهار يوحل لييك شي فراان عيط ليا وصافي ههههه عزازين عليا بحال دوك المشاكيييل ...هههه

غمزو وضار عند سلمى و مد ليها يديه كيتحلف فخاااطررو عليها إلى ماااسلماتش عليه .. ساعة مدات يديها بالخف سلمات عليه وسلتاتهااا ..

سلطان : تشششرفنا بيك حتى نتي أ البكاااية ...

سلمى نزلات عينيها بضحكة وهو داز سلم عليييهم كاملين من غير حياة وسفيان وآية لي ماشين معاه لبرااا ... وجر لوؤي بعيد شوية وحيد السلاح من السروال وعطاه ليه ...

سلطان : عطيه لعمي أسد وقوليه راه واحد قرطاسة خرجات يشوف كيدير معاهم .. أنا جبت ليه غااانسييبو ...

لوؤي خباه دغيا ورا حوايجو كايضور فراسو ورجع تاني لعندهم ودعهم ... ومشى بزربة .. و سلمى متبعاه بعينيها .. تمناتو كون بقى مزال ... كان عاطي جو زوين للكلسة وكان اكثر واحد تقربات شوية منو ... ولكن رجعات تاني محركة كتافها بمعنى راه انسان ضريييف كايعطي الصواب لكولشي .. وباينة عليه مربي مزيان ... ورجعات تاني كاتشوف فقسم و خوها لي كلسو ..

أما سفيان وحياة وآية تبعو سلطان لبرا كايودعوه ...

رتاج : وتا لعشا مكلاااش مزيااان ...

لوؤي : وراه غا دار االخااااطر راه مخصوش ياكل ...

عدنان : فيين غايشوفوه كوون غا تعشااا نيشان ... وعلى الله ينعس شوية فطيارة ...

لامار : الله يوفقوو ياربي ...

قسم كانت كضحك مع أصيل كتوريه الكادو لي جاب ليها ...، ورجعت حطاتهم فوق طبلة واسبرو كايضور عليههم الحليب والتمر وبلقي لابس نضاضرو ..... و هو يقرب لوؤي وقدس كلسوو حداهم ، وعلا لوؤي تيليفون و ابتسم اصيل وقظس عنقات قسم وضحكو خداو سيلفي التذكاري ديالهم .. ومدات ليهم قدس صاك صغير كانت فيه بواطة فيها مكانة ليه وبراسلي ليهااا ...

قدس : أنا ختااريتهم ... وااياااااك تعيييبيهم !!

لوؤي : راه هبلاااتني قبيلة فلواتساااب شي خمسة دالمرات ونا كنصور ليها ....

أصيل : حشوومة واش الكادو كايتعيب بالعكس ... زوييين شكرااا كون ماعدبتوش راسكم ....

قسم : فيين هاااد زويييين !!!! .. جايبة ليا براااصلي عااامررر حجر نتي عارفاني كنلبس بحااال هاكاااا !! ...

قدس : والله تاااتلبسسييييه ... راه هادشي لي خارج دابا مالكي على الذوق الملاااوط ....تعرررفي ليه نتي هادا ....

أصيل : غااتلبسو بسيف عليها ( حيدو ليها من بواطة ) غالبسو ليها دابا كاع ....

قسم : ههه اراني غيررر كنفقصها راه زوييين ههه ( مدات ليها يديها لبسو ليها )

قدس : لقييييتي لي يخرج فيييك ... هادي راه مكتحشمش اخوياااا .. غا خدم اساالييب العنف لي كاتعرف فحياااتك ... راه ماتتعرفش للهداوة ...

قسم شافت فيه بنظرة شريرة وغمزة عرفها آش كاتقصد بدا غير كايضور فراسو ويضحك ....

قسم : ( علات عينيها فجود ) فييين كاااادووويا ؟؟؟؟

جود : نسييييت !

قسم : كاتنسى غا ليبغيتي نتااااا ....

قدس : نگوووول !!!!

قسم : آشنووو ....

هي تتهضر مع خوتها وأصيل هز راسو لعند أسد ... وأسد تبسم ليه محرك ليه راسو بالإيجاب وتا هو تبسم ليه براااحة مخلي كاع همومو ومشاكيلو على برا وعااايش لحظتو معاها ومع هاد العائلة لي شوية بشوية لقا راسوو تايتجرررر ليهم ..

قسم : ( حلات فمها وشدات عليه ) ححححلفي بالله ....

لامار : ولكن راه ماااايييينزلش للدار ....

قسم : والله مااانزززلوووو .. ( ضارت عند أصيل بفرحة ) ملي كنت صغيييرة كنت مربية واحد نمر صغييير ( سلمى علات حجبانها وهو متبع معاها حيت فايت قالت ليه هادشي وكايسمع ليه بحال أول مرة مركز مع حماسها ) وكانو غير تايكبروو و كايبغيو يرجعوهم لمحمية كنكون ربيت عليه الكبدة وكنمرض من وراااه .. كندير ليهم گنازة فدار وحلفات ماما ماااانربي شيحاجة مزااال ( شافت فجود فرحانة ) ودااباااا جاااب ليااا جود وااحد آخرررر ( شافت بزربة فماماها ) وصافي دابا راه درت عقلي مانبكييش علييييه ....

رتاج : ههههههه ماابااالييييش هاد العقل أنا هههه

لامار : إوا مانعرف ...

جود : ( مد واحد ورقة بيضة مرولية ومسدودة بشريط أسود لأصيل ) مبروووك عليكم والله يكمل بالخير ...

أصيل : ( شدها عليه بابتسامة ) اللهم آميين .... ( كايشوف فيها بابتسامة ) شنو هادا .. ههه عدبتوو راااسكم هاد الليلة والله ههه

حل سينتا وهوما كايشوفو بفضول حيت معارفينش شنو فيه ومقاليهم والو من غير نمر صغير لي جاب لقسم وخلاه فبيتها .... وهو حل داك ورقة كان تصميم ديال سيارة خشبية استعراااضية ، المقدمة على شكل سفينة ، وشاف فجود مفاهمش ووقسم كاترمش ...

جود : بروجي قديييم كان عندي ديال الطموبيلات لي كايكونو ديكوررر .. فالدخلة دليزوطيل والريسطوات ... سمعت كتوجد لريسطو ديالك ومغالقاش ماحسن من الريسطو د لفيونسي ديال ختي ياخد الموديل اللول ...

قسم : ( كاتشوف التصميم وشدات على فمها وأصيل كايرمش كايشوف فجود مامستوعبش واش صصممو هو ) اوماايگاااااد .... واااااعرررر ( شافت فأصيل بحماس ) عرررفتي كيغادي تجي فهاداك لييسبااااس لي فليييمن لي حدا لبااااب ...وااااااو ....

أصيل : ( شاف فروعة داك التصمييم وخصوصا أنه مصصمو بيدو ) اا .. ص صراحة .. م ماعرفت مانقول ...

جود : بصحة و الراحة ... عطيني واحد تلتيام نقاد ليه شي روتوشات صغار وقول ليا اسم الريسطو و لا اللوغو ديالك .. وغانسيفطو ليك تالفين كاين نتا يركبوه ليك .. وراه أونتي لو ... متخافش عليه من الشتااا ...

أسد : ( بإعجاب كايشوف لداك تصميم فيد أصيل ) وعلاش انا عمرك وريتني هادشي !!!! وا صااوبلي وحدة تا أنااا ...

جود : وانتا غاا طلب آلواليييد ونصاوبها ليك ...كولشي ديالك

قسم : والله تاااافكرة واعرة اجووود ... عندك شي حوايج فراااسك غا نتاااا .. حنا ليكااين ولي درناه كانقولوه ليك و نتا وااالووو ... مكنعرفوك علاش طاااوي

جود : هه يلاه كتاااب يباان ...

قسم : عرفتي راه ماموالفش يييقبل كادوات بحال هاااادو ... راه غير منعرررفت كيييفاش وقع هههه

أصيل : لا بالعكس ... كون كانت خداها من شي بلاصة اخرى يمكن .. ولكن يكون مقادها بيديه والتصميم ديالو راه شرررف ليا ....

جود : بصحة والراحة ...

عدنان : اسيدي الله يكمل بالخييير .. والله يجيب التيييسر ....( تنهد ) العائلة كاملة كاع هادو لي ضايريين بيك ولي غايبيين .. كلهم شفناهم كبرو .. إلا قسم ... فعينينا عمرررها غادي تكبر ( قسم كاتشوف فيه مبتسمة وأصيل متبع تاهو مبتسم ) حيت هي كانت الفرحة لووولة ... أول وحدة تزااادت عندنا صغيييرة .. علماتنا كاملين نربييييو ... علماتنا شنو هي الكبدة ... مكناش حنا كنعرفو الدراري الصغاار .... داكشي علاش مكتكبرش فالعينين ديالنا ... باش ااننا نعطيوك الفرررحة لولا دياالللناااا ... ( أسد منزل راسو و لامار تاهي ) ررراه حيت دخلتي لينا لخاطرنا ... حيت شفناها مرتااااحة معاك ... حيت سمعنا اصلك طيب .... حنا كاملين هنا لي كالسين قدامك مامتمنيين تااشي حاجة ... من غير هاديك البنت تتهلا فيييها ....

أصيل : ( ضار بابتسامة شاف فيها هي لي عينيها دمعو ورجع شاف فيه هو وأسد لي كالسين حدا بعضياتهم ) نهار جا عندنا سي أسد للدار هو (وشاف فجود ) وجود .. كان قاليه الواليد فالمرة الجاية جيب معاك البنت تاهي ...

أسد : ( كايحرك راسو بالإيجاب) مم .. كنت قلت ليييه راها باااسلة غاتبرزطكم ههه ....

أصيل : قاليك غير جييبها .. را غايدير ليها الخاطر ويتهلا فيها ... ( شاف فقسم ورجع شاف فيهم ) واخا تعطلات 21 عام باش جات ... ولكن الكلمة لي عطاك الواليد ... مغانقدرش منوفيش ليك بيها .... ( منزل راسو للتحت شابك يديه وهوما كلهم كايشوفو فيه ) أ انا .. انا مجايش ليوم باش ندي منكم بنتكم ولا شيحاجة بحال هاكا ... تانا عندي ختي و .. ومغانقدش نشوفها تتبعد عليا ... ( سلمى نزلات عينيها وهو علاهم فقسم) انا بغيت غير ندير عائلة صغيرة أنا وياها ( شاف فيهم ) وتكونو كولكم معانا ... وراضيين عليها ... كنت تالف ... وكانت تالفة .. لاقانا المكتاب .... كنتمناو ربي يدير الخير ... أنا ماعندي منخبي عليكم يلاه بادي ... شوية بشوية ... كانت صعييييبة باش نتقدم لهاد الخطوة معاها .. هي الحمد الله كولشي موفر ليها .. كانقول علاش غادي تصبر مع واحد يلاه بادي بحالي ... ولكن بينات ليا أنها تاهي باغة غير تكون عائلة ماباغاش شي حاجة أخرى ... وهادشي علاش انا كانقلب ... تلاقيت معاكم والله شاهد أنه أي واحد يبغي يتخالط معاكم ... درناها فيد الله ... ونويينا الخييير ..وكنتمنااااو الخير .....

عدنان : والله يكمل كولشي بالخييير ... تاحنا تنتمناو ليكم غير تفاهمو وديروو مستقبلكم ونشوفوكم فرحانييين ...

أسد كان غير كيتنهد ... حاس بقلبو كيضياق عليه ومابغاش يبين ، حيت هادي سنة الحياة و واحد نهار كانت غايديها شي واحد .... و قدس شافت فماماها لي تاهي كتر منو ... وشدات فيديها بابتسامة حنيينة ...

يتبع...