محتوى القصة
عند قسم ...
التاسعة مساءا
سلات الاجتماع لي كان طويييل وكولو تفاصيل بسبب انه اول طراجي مع هاد الفريق .. ختارت لي سو دياولها " مساعد قبطان " ومشات باتجاه قمرة القيادة .... كان الظلااااام خيييم على الميناء والما تحول من الازرق للاسود ..... ولكن لبوغ كولوو كان مضيء بالمنارات الصغار ديال الباطو ....
غير دخلات وهي تلقى اسد تما عاطي بظهرو كايقاد ليها الطراجي حيت مزال محافظاش الطريق البحرية كيف حافظها هو ..... كاتشوف لظهرو وهو محني كايقاد داكشي فاالشاشة ... والفريق حداه مساعدو .... كاتشوف فيه ببفخررر كبيير لي ماعرفاتش علاش عينيها دمعوو ....
عينيها دمعو ملي قدارت توصل لداكشي لي كان كايتمناها تكون فيه ....وباقي واقف معاها فكل خطواتها رغم انه مقلق منها الى انه ماقدرش يسمح فيها بمرة .... . غمضات عينيها كتحمد لله لي باباها بقى تاعاش معاها هاد اللحظة .... و يشوفها قبطانة حقيقية غاتسد اول رحلة .......
بلا ماتحس مشات بزربة تلاحت عليه وعنقاااتوو من اللوور وحاطة راسها فوق ظهرو ...وهو شاف ليديها لي محاوطينو وضار لعندها ،غير لمحها بهاديك البذلة ... بدا كايطلعها وووينننزلها. .. وهي داك دمعة لي حبساتها نزلات ملي شافت الفخر فعينيه وانها اخيييييرا قدرات تحقق حلمو .....وهو كايشوف قدامو بنتو قسم ..... لي عاد لبارح دارها بين يديه وسط هاد البحر كاتاخد اول انفاسها فهاد الدنيا ..... عاد لبارح وهي شادة فيديه دايها للمدرسة ..... فوقاش كبرات بهاد السرعة فوقاش!!!! تبسم ليها بعينيه وهو كايشوف فالشارات لي عندها فاللبسة ... وهز يدو للفوق بتحية القبطان ....لي نفسها داروها لفريق فاش دخلات ......
اسد : ممرحباااا كااابتن ....
قسم : ( هزلت تاعي يديها عطاتو تحية ) غاتبقى الكااابتن الكبير ديما ...
اسد : ( شد هلى كتفها مزير عليه ) كوووغاج .... كووغاج ابنت الرووووكان ....
قسم : ( هزات يديها مسحات دموعها) لي كايولد ... مكايموووتش ابابا .... ( قربات منو و عنقاتو وهو زيرها لعندو كأنو كايحظن فالكبدة ديالو بين يديه ) دعي معايا ابابا .. . برضاك باش غادي يمشي هاد الباطو ... الاكسبيريونص ديالي غيييير شوووية قدام الرضى ديالك وايمانك بيا ..... هادشي كامل على قبلك .... بغيتك تفتخر بيا ... تفتخر ببنتك .... وتهز راسك بيا
اسد : ( هز ليها راسها كايشوف فيها ) انا ديما هاز راااسي بيكم اينتي ..... ديما ....
قسم : ( مسحات دموعها وشافت لطخاجي لي وجد ليها بملامح دغيا حولاتهم للجدية ) الووووغ .. الوووغ كااابتن روكان .... هادا هو الطخاجي ... مممم .. مزيااان ... دونط عندي ربعة ديال ليزيسكال ...مممم وماشي بزاف ؟
اسد : لكابيطين مبتدئة بحالك .. ماشي بزاف ....
قسم. : امم نعتابروها اهانة وندوزوها بجغيمة د الدما كيف كاتقول جدة ..... كايبان ليا لي بوان لي هنا هوما لي غادي نطلع فيهم لافيتيس ..... وهادو غادي ننقصها .... هنا غانحاول نخدم بالمحرك الرابع ..وهنا غانخدم بجوج محركات حيت كان الغرق بزاف .....
اسد : تماما
قسم : ملي نقرب نوصل لشي بوغ نخدم اللول بوحدو ونريح الرابع .... اما الثاني نخليه هو اللخر حيت ديغا كايعيا ...
اسد : تماماا
قسم : عمال الصيانة قالو بلي الاومور كلها غادة مزيان ... وغانطلق الصافرة مع العشرة ..
اسد : دااكوغ ..
قسم : ( علات راسها شافت فيه ) شكرا كابتن على الطرااجي وعلى نصائحك .... غانكو قد المسؤوولية ونوصلهم للبر الامان ....
هزات الميكرو وقرباتو لفمها وهي كاتشوف فباباها لي متكي وداير يدو فجيابو .... وقلبها تايضرب حيت هادي خمس سنوات ديال التدريب كمساعدة قبطان كانت كاتشوف القبطان كايقول هاد للجملة فالمايك وتمنات وقتاش تاااهي تهز هاداك المايك وتخاطب ركابها .... كان كايبان ليها حلم بعييييد .... صبرات عليه تاجاااا فالوقت لي مخطط ليه الله ... ا اسد كايشوف فيها وهي بدات تهضر فالمايك بالانجليزية و كتعاودها بالفرنسي واللغة العربية .... "" ركابنا الاعزاء ..... اوركا ترحب ييكم داخل خطوطها البحرية .. تقودكم في الابحار القبطانة قسم الاسماعيلي .... السفينة ستبحر على الساعة العاشرة .... بابسمي وباسم الفريق البحري والتقني والميكانيكي ، نتمنى لكم رحلة ممتعة والوصول للبر بسلااااام ...... ""
شافت فاسد لي حرك ليها راسو بآه واصيل كان فالكافيتيريا مبتسم وهو كايسمع صوووتها وكايرشف من قهوتو وفرحااان ليها رغم كولشي .... فخوور وفرحااااان بهاااا .....
اما قسم ضارت باش تشوف الطراجي تاني وهي تووسع عينيها ملي تفكرات شكووون كاين فهاد فالباااطو ... عقلها فففعلا كايتسد وسط الخدمة تانسات كاع اش ضار بيها ..... وهي ضور بشوية عندو لي كان كايشوف مع السو كابتن الوراق وبقات كارتمش .... وبدات تقربات عندو ...
قسم : اا .. ب بيابا .... صافي غير سير .. لاومر مزياااانة ... كولشي هو هداك
اسد : ( بلل صبعو قلب الصفحة ملهي مع الوراق ) اممم ....
قسم : ..... ق قلت زعما غير باش توصل بكري ....
اسد : ( شاف فيها ) كتجري عليا ولا جاب ليا الله ؟؟؟؟؟
قسم : ( بتوتر وخوف), لااااا ….. حاشاااا .... غ غي قات .. زعما راه كوولشي مزياان ....
اسد : ( وقع على الوراق وشاف فيها ) غانشرب قهوة وغانشمي .... راسي تايضرني
قسم : ااء ؟؟؟ ااه .. شربها آ بابا برااا ... عرفتي جو زوين دااااياا والريح محررررك ...
اسد : لا ماباغيش نشربها برا .....
قسم : ( معلية حاجبها كاتشوف لعند صفاء تفكها لي كاتومي ليها بمعنى ماعندي ماندير ليك ) اا .. ااه .. مزيان .. ت تاهادا هنا مزياااان ... ( كلها متورتة ) ن نمشي نقوليهم ييوجدو ليك قهوة تلقاها واجدة هم، ؟؟؟؟؟؟؟
اسد : ( دار يدو فجيابو وكايشوف فيها ) امم .. سيري
قسم : ( مشات بببزربة جها لباب ) حاااضر .... ..... ( سمعاتو وراها )
اسد : قولي ليهم يجدو جوج ...
قسم : هااا ؟؟؟ ( ضارت عندو وكلها متوترة مخلوعة ) ا انا وياك ؟
اسد : لا .... انا وياه ......
تمشات الناذلة بلباسها الرسمي و صينيتها الفضية حتى لعندو ، وتحنات كاتحط ليه فنجالو دالقهوة وهو جالس مقرب لطبلة و كيلعب بتيليفون بين يديه وساهي قدامو فالزاج لي كيطل على البحر و على شفايفو ابتسامة خفيفة و عامرة فخر بيها ملي كان كيسمعها وهي كتهضر بهاديك الثقة فالنفس كاملة ... الصوت ربع ساعة ملي سكت ولكن هاديك الابتسامة باقا مرسومة على شفايفو .....علا عينو فالناءلة بابتسامة شاكرها على لقهوة و مشات ....
نزل عينو لفنجالو يلاه غايهزو يشرب منو هو يشوفها جاية بزربة باتجاهوو....
علا عينو فيها .. تجاهل التوتر لي فعينيها وركز على داك اللبسة!!!!
وقفات قدامو متوترة وهو باقي كيطلعها و ينزلها .... هادوك الشارات لي فكتفها ... لوغو دلاماغين و دالباطو .... اللون الابيض ... الصدايف الذهبين ... شابو لي هازاه فيديها ... الشخصية لي زادتها ....
عاد علا عينو فيها هي ...كانت متوترة ومبتسمة بزز ليه حيت شافتو كيفاش كيشوف فيها وبحالا باغا تقول شي حاجة ليه وكتسناه يسالي الشوفة فلبستها ومعارفاش حتى منين تبداها .... سالا من جولتو عليها و استقر على عينيها بابتسامة مرجع ظهرو لور براحة ....
اصيل : آشنو اكاپيطين!!! .... غتخلي الباطو وتجي تشربي معايا قهوة !!!!
قسم : ( كتحك ورا عنقها بتوتر معرفاتش كيفاش تجبد معاه الموضوع ) اا .. اه .... ه هو .... غتشرب قهوة .... غ غا هو .... ماشي معايا ....
اصيل : ( علا حاجبو باستغراب ) ومعامن ؟
قسم : ( تنهدات وجرات الكرسي دايراها فيد الله كلسات قدامو متوترة وشافت فيه وخايفة من ردة فعلو حيت حطاتو امام الامر الواقع ، جمعات النفس وخرجاتها ) مع بابا ....
اصيل : ( علا حاجبو كتتر ) م... مفهمتش ؟
قسم : ( كتشوف فيه وتغزز فشفايفها ) شوف .. اصيل .... والله ماكان فخباري شي حاجة .. دابا ...( نزلات راسها جاتها البكية) ففففف ( علات راسها فيه دايراها فيد الله) .... راه بابا هنا .... و .. وبغا يهضر معاك ....
اصيل : ( بصدمة ) ك كيفاش ؟؟؟؟؟؟ ... امتى !!
يالاه غتجابوو هو يتجر الكرسي لي حداهم وشافو عندو بجوج .... جلس .. وطوا رجل فوق لوخرا وشاف فقسم ورجع شاف فيه ....
اسد : دابا نيت .....
اصيل فهاديك اللحظة بضبط تمنى لو كان غير كتخيل ليه !!! لحظة ابداااا مكانتش فمخططاتو وابدا مضاربش ليها الحساب ، كايشوف فيها ويرجع يشوف فيه ....
وهو جالس قداااامو .... بنفس جلستو دهادي عشرين عام ..... بنفس هاداك الوجه لي كيشوفو فالاخبار و تصاور ... بنفس هاديك الهيبة ديال الروكان لي غير اسمو كافي .... اللحظة لي كان خيفان منها وكايخطط ليها كيفاش تكون .... لقا راسو فيها صدفة بلا مايدير ليها تااااا حساب مسبق ....
تعنكش ... حس بالخنقة .. ومعرفش كيفاش يدير يتصرف واش يوقف واش يجلس واش يسلم عليه واش لا .... وهو جالس داير رجل على رجل مربع يديه وكيشوف فيه بهدوووء ..... مهليه يستوعب الاومور على خاطرو ....واصيل سرط ريقو وحاول ما امكن انه يبتسم ويتصرف طبيعي ... واخا مقادرش يحط عينيه مباشرة فيه ....
اصيل : ا .. اهاه الله اودي ....
قسم عينيها دمعو مزيرة على يديها تحت الطبلة ... حيت عارفة الاحراج لي حطاتو فيه وعارفاه باش غيكون كيحس ... واسد شاف فقسم
اسد : هذا ماشي وقت تجلسي ابنتي دابا .. سيري ضبطي اومورك راه مابقى والو .....
قسم : ( كترمش بتوتر وخوف ) اا غ غير خليني
معاكم ابابا ...صافي راه كولشي وا....
سكتات ملي شافتو كيشوف فيها بنظرات ديال مغنعاودش الهضرة ...وشافت عند اصيل لي حرك ليها راسو بالايجاب باش تنوض ... وخدات نفس عميق .... ومشات .. وكل شوية ضور براسها لعندهم ملي باقين كيشوفو فيها غادية ... تاغابت على عينيهم عاد رجع اسد شاف فاصيل لي بان ليه متوتر وجاه على غفلة ..
اسد : ( خدا تنهيدة وتكى براحة على الكرسي وربع يديه خاشي صبعو الصغير ففمو كيشوف فيه ) اصيل يا اصيل .... عشرين سنة هادي ! .... والو اولدي متبدلتيش كاع .... غا كبرتي .... ( اصيل اكتفى فقط بانه حنى راسو بابتسامة ) كيف دايرة ختك لاباس عليها ؟ ... غتكون كبرات تاهي ....
اصيل : (بحشمة) وااضروري ... راه عشرين عام هادي ...
اسد : ( كيحك تحت فمو راجع بذاكرتو ) خليييتها واقلة داك الوقيتة كانت باقا صغيييرة بزاااف ... خليتها باقي كديرو ليها البيبرون
اصيل : هه، لا دابا كبرات ... ( حاس باحراج كبييير وكيحاول يتحكم فيه ) راه عندها عشرين عام ....
اسد : اهاه داكشي لي غيكون عندها راه خليتها باقي مادارت تالعام .... شنو كادير دابا .. كتبريباري شوية ؟ قالت ليا قسم راها غترجع تقرا ...
اصيل : ( كياخد نفس يهضر مرتاح وينسى انه بابات قسم ) اه داكشي لي كاين .. بدات كتوجد للباك ليبر .. الباك ديالها مغيفيدها بوالو .. كولشي كيطلب الباك جديد ...
اسد : اهاه داكشي لي كاين دابا .. تا باك ليبر لاكان عندها الشغف دالقراية راه غادي تنجح فيه ان شاء الله ...
اصيل : ( كايحاول ينسجم ويقدر يعلي راسو يشوف فعينيه ولكن كيلقى راسو باقي حشمان ) لا غادي تنجح هي عزيزة عليها القراية ..
اسد : الله يوفقها .... العائلة كيسولو شوية فيكم ولا والو ؟ كنعرف باباك كان عندو خواتاتو .... وواحد خوه تاهو ... ولا يمكن جوج ...
اصيل : العائلة موجودة .... غا هو ما واقفين على حد ...
اسد : ( حطات قدامو النادلة القهوة ديالو ) شكرا ابنتي ... ( كيخلطها بمعقلة مكمل كلامو ) وهي راه دابا فهاد زمان واحد مايوقف على واحد .... غا هو الدعم المعنوي كنوقفو عيله .... مكيسولوش فيكم ؟
اصيل : ( تنهد كايشوا لجنب ورجع نزل عينو على فنجالو كايضورو فوق طبلة ملهي فيه ) كيسولو مرة مرة لاكانت خاصاهم شي حاجة ...
اسد : جدك كان الله يعرمها سلعة .. انا نعيا نعرف الناس فحيااااتي مغنعرفش بحال جدك ... جدك واحد بنادم لي مغيتعاودش .... وحتى الواليد ديالك كانت فيه واحد النية وواحد المعقول لي قليييييل فين تلقاه فشي واحد .. كيمشي بنيتو وكان كيمشي غير جنب الحيط ومعزيزش عليه الصداع وكيهرب من المشاكيل ... قلت يمكن غيكونو العائلة تاهومااا مزيانين .... ( جغم من قهوتو ) ولكن على ما بان ليا .... مكاين حد ...
اصيل : لا والو اسي اسد .... كاينين غا حنا هاد الساعة ....
اسد : ( تنهد ) مااعلييش ....و الدار لي كنتو ساكنين فيها !! الى ماخفت نكذب كانت ديال الواليد ديالك ... ودابا على ما عرفت مابقيتوش ساكنين فنفس داك البلاصة .... واش بعتي داك الدار ؟
اصيل : ( كيحك فوق حاجبو متوتر ) ااه .... بعتها كنا تزيرنا شوية شحال هادي .. وخديت وحدة رخص فبلاصة اخرى ...
اسد : مزيااان .... الحمد الله بعدا خلا ليكم دار استنفعتو منها ... راه كاينين كيبقاو الله كريم كيضورو فالشوارع متشردين .. لي جا يحگرهم ..... نتوما راه باكم دمر عليكم مسكين تاوفر ليكم شوية باش تعيشو .. واخا غا دار تبيعوها تنفعكم .....
اصيل : ( خدا تنهيدة عمييييقة وهو كيتفكر باه وعض على شفتو التحتانية ومتحكم فدوك المشاعر ) اه .... لا مسكين دار لي عليه .... خلا الدار .. وخلا لينا سمعة مزياااانة .... كبرت لقيت فالمرصى الخدمة دغيا حيت خلا بلاصتو نقية .... السمعة ديالو عشت فيها وباقي كنعيش فيها لدابا ... خلا لينا احترام كبير .....
اسد : ( عض على شفتو وتتهد ) الله يرحمو ويوسع عليه .. مكيموتش لي ولد .... مكيموتش اولدي ... كاع لي ولد مكيموتش ..... الى هو مات .. راه خلاك نتا .... ( اصيل نزل راسو ) قول ليا اولدي ... شنو درتي من بعد ما مات ... شحال كانت فعمرك ؟ شنو كنت كدير باش عشتو نتا وختك ؟
اصيل نزل عينيه ودموع تجمعو فجفنو ... وبطريقة هو ماحاسش كيفاش لقا راسو بغا يبكي ....حيت هنا اكتشف ان هاد الكلسة وهاد القهوة مغاضورش على موضوعو هو وقسم. . .. هو كان كيظن اسد غيجي يهضر معاه على بنتوو ، على موضووعو هو وياها ويطلب منو يردو الاومور رسمية .... مظنش بلي غايهضر معاه عليه هووو ..... مظنش كاع بلي غيجي على هيئة واحد الشخص لي غيجبد منو داك المراهق اليتيم لي عمر قدر يجبدو منو شي واحد .... ماظنش بلي غيجي على هيئة داك الشخص لي حتاجو حيااااتو كاملة .. داك الشخص لي باغي يعرفو شنو كان كيدير تاااكبر وكبر ختو .. داك شخص لي مهتم يعرف تفاصيلو وحياتو .. واش خاصو ولا ماخاصوش ..... واش كان عايش مزيان ولالا ... مظنش اسد يجي على هيئة باباه لي كايحلم بيه فوق ما نعس مقلق بلي كالس حداه وكايسولو مالك اولدي؟ ...
داك الشخص لي يطبطب على كتافو العيااانييييين بالثقل ... داك الشخص لي تسناه وهو عندو غير تمنطاش لعام كيبكي تحت من البوطو ديال الضوو دالدرب ..... داك الشخص لي تسناه وهو عندو عشرين عام كيلوح الشبكة دالحوووت ويسمع السبان من عند الراايس الى غلط فشي حاجة .... داك الولد لي كانت عندو خمسة وعشرين عام نهار تلاح للبلية وجوانات و تا الغبرة فجنب السكة دتران كيتكيف مع صوت البوم .... داك الولد لي عندو سبعة وعشرين عام ملي اكتشف القتال الحر وتايطيحوه فالارض كولو دمايااااات ويهرسو فضلوووعووو .... ويخرج كايعرج وكيمسح الدم بكمااامو باش يهز الفلوووس لي كلهم مطلييين بدموو ويمشي يشري الدوا لختو ويعمر الثلاجة .....
شريط حياتو كووولووو داز قدام عينيه بمجرد هاد السؤال لي عمر شي واحد سولو ليه ... ولا تسوق ليه شنووو دار تا عاش هو وختو ... بلا باباهم .. وبلا ماماهم .... بلا عااائلة .... وبلا حتى واااااحد .... وهضرة اسد كانت بحال داك الطبطبة على ظهر داك اليتييم ......
سرط هادوك الدموووع بزز الداخل باش ماايبانوش ويكسرو جدار رجولتو ... وشاف فاسد ولكن زرقة عينيه كانت كتبري وكتلمع بزاااف كتبين لاسد شحال ديال الدموع مجموعين فداك العين وشحال ديااال الالم مجموووع تحت دوك الشفاار .... ونطق بصوتو الخشن و الثبااات غالب على ضعفو ..... مختصر الآلام ديالو كلها فبحة صوتو .....
اصيل : قضينا بلي كان ... ( كيتحكم فراسو والانكسار ضعف ليه صوتو واسد كيشوف فيه ) خدمت فالمرصى كولشي كان كيعرفني بسبب الواليد .... تعلمت للحرفة واخا هو الله يرحمو مكانش باغيني نخدم فالبحر .... كان كيقول ليا ( قاطعو اسد )
اسد : كان كيقوليك البحر باش تلاح ليه خاصك تكون نتا هو مول الباركو .....
اصيل : ( علا فيه عينيه وتبسم باشتيااااااق ) اااه .... هاكا كان كيقول .. وكان كيقول باش نكون مول الباركو خاصني نقرا ... كان باغيني نقرا ( تنهد ) ولكن مكتابش ..... تلاحيت للبحر واخا انا ماشي مول الباركو ....
اسد : اهاه ... ومنبعد .... اش درتي ؟
اصيل : ( حس براسو بدا كايرتاح شوية بشوية) كنت خديت واحد طموبيل ... بغيت ندير طاكسي .. شفت داكشي ماخدامش ليا بزاف ... حاولت نبريكولي ببزاف دالحوايج باش نهرب من البحر .. ولكن مالقيت غير البحر لي قابل عليا .....
اسد : اهاه .. !!
اصيل : كنت صراحة كانفكر ناخد كونطرا لبرا .. ولكن ختي باقا صغيرة ماعنديش معامن نخليها ....( رد شعرو لور وحك جبهتو) مؤخرا خديت واحد الريسطو قديمة راني كنعاود فيها شوية بشوية .....المرصى كانت معيشاني شوية انا واختي .. ولكن مغاديريش ليا اسرة ...
اسد : ( علا حاجبو) علاش هادوك لي تما معايشينش منها ؟ الواليد ديالك مكانش عايش منها ؟ ....تا البحر راه ببراكتو اولا !...
اصيل : هو ايه بصح ناس كيعيشو منها .. ولكن العيشة لي بغيت انا .. مغنلقاهاش فالمرصى
اسد : حيت نتا باغي قسم ... ( اصيل نزل عينو ) وحيت كتقول قسم ... مغتعيشش من المرصى ...اما نتا راه غتعيش منها كيفما عشتي منها داك العوام لي فاتو ..... ولا لا ؟
اصيل : ( سرط ريقو وشاف فيه ) لا .. ماشي غير على قبلها لا .... بالعكس هي مسكينة ماعندها مشكل فوالو .... و ولكن انا مبغيتش نخليها تحس بشي حاجة ناقصة .... واخا غير ريسطو بسيطة ولكن شوية بشوية يتحسن الوضع ... واخا مغيتقادش مع ديالها ...
اسد : دابا نتا اولدي .. ماقدكش التقل لي هاز .... بغيتي تزيد تهز واحد اخر.. ؟
اصيل : لا حاااشاااا .. قسم والله ما تقل بالعكس ..... تاواحد مكره يعيش مزيان ... هي جات غير باش تزعمني ندير .... كانت خاصاني شوية دالزعامة وجات عطاتها ليا ....
اسد : مممم .. ( تنهد وقاد جلستو ) ودابا شنو كتحاول دير ؟....غتسمح فالمرصى .. وتخدم فهاداك الريسطو .. وقلتي من بعد يتحسن الوضع .. يعني حاط فبالك دير حوايج اخرين مزال ؟ ...
اصيل : اه ... علاش لا ....غاندير جهدي كااامل .... باش على الاقل .. مايخصها والو ....
اسد : ( جغم من قهوتو وحطها وعلا راسو فيه ) لا اولدي لا ... ماشي بحال هاكا .. مزيان الواحد يكون طموح ... ولكن ماشي بالشكل لي يخليه يقلب على المثااالية .... حنا كنتزادو باش نكونو حقيقين ... ماشي مثااالييين .... واصيل الحقيقي .. هو لي يقلب على الخدمة لي غااايرتاح فيها ويكون فيها هو ... اصيل ... وقسم .. تاهي .. غتقلب على فين تكون قسم .... تكونو حقيقين ...... ( قرب عندو للطبلة ) مزيااان تكون طموح هاد الطمووح عجبني .... مزيان تبغي دير حوايج يزيدو بيك للقدام تحقق لراسك ولولادك لي غيجيو الاستقرار و العيش الكريم .. مزيان دير ... ولكن بالعقل ...... خاصني منكونش عارف غير شنو كنربح ... خاصني نكون عارف .. تا شنووو كنخسر !....( اصيل كيشوف فيه دهشان من هضرتو كيفاش دايرة ) ملي نلقى بلي لي غادي نخسرو كبر ملي غادي نربحو .. وأهم منو ... بلاش ... اه هو الواد كيعمر قطرة قطرة ... ولكن خاصني نعرف داك القطاري منين كيجيو ..... الا كانو كيجيوني من الشتا قطرة قطرة ... مزياااان ... اما لاكانو كيجيوني من شي بحرررر كبييير منقدش عليه ...راه داك الواد غايعمر دغياااا و الا مشى حتى عمر ... غيغرقني فيه .... انا وكاع اش بنيت ... ( اصيل نزل راسو ) انا مغنحيدش ليك قسم أولدي .. ولكن .. مغنخليكش تغرق نتا وياها ......
اصيل : ( سرط ريقو ) متخافش اسي اسد .. يكون خير ان شاء الله .... ( علا راسو فيه ) .. وماعرفتش واش قللت الصواب حيت جيت لهنا .... لعندها لباطو ... واش غنكون خلقت شي مشكل ..... كنعتذر .. انا مكنتفلاش وماعنديش دماغ ديال التفلية .. انا دبصح باغيها ونكملو حياتنا بجوج .. واخا هي بعيييدة علياا بزااف وكبيرة عليا بزااف .. ولكن كندير جهدي كامل نتقاااادو .. وخا مغانطوالش تالعندها ولكن تاهي غا
تحنى شوية لعندي حتى نتلاقاو فشي نطقة لي ترضيها وترضيني .... ( بحشمة كبييرة ) الى كنت قابل عليا .. ومكانش عندك مشكل مع خدمتي ...( كيهضر متوتر ) وانا ا ... ( بصدق خرجها من اعماقوو تاحمارو عينيه ) انااا والله تا بغيت بنتك ......طلب لي بغيتي ... من حقك تكبر ببنتك .. ونحاول نوفر كووولشي ...... ( نزل راسو حشمان ) مهم ر را ... را بغيتها .....
اسد : ( خدا تنهيدة عميقة كيشوف فيه وللصدق لي كيدوي بيه ورجع تكا براحة مربع يديه ) امممم .. دابا نتا ...بغيتي قسم ... بنتي انا ... قسم لي فالبروتوكول ..... كنعيطو ليها .... الپرينسيس ..... عارفها ياك ؟
اصيل : ( نزل راسو لتحت وضياق صدرو ) امم .. عارف ....
اسد : وباش تدي البرينسيس ....ماخصكش تكون غير لاباس عليك ولا عندك قد اش عندها ولا قدها فالطول ولا ملاقين فشي نقطة ....... ( بجدية ) خاصك تكون پرينس بعدا .....
اصيل : ( علا عينو فيه بخيبة ) مفهمتش
اسد : هذا هو البرتوكول ..... البرينسيس خاصها تاخد البرينس .... وداك الريسطو مغايديرش منك برينس ..... ( اصيل كيرمش فيه )
اصيل : ( بتوتر ) وشنو المطلوب اسي اسد؟
اسد : ( ببساطة ) تولي پرينس ....
اصيل : ههه ( جاتو الضحكة بخيبة وانكسار كايشوف للجنب وشاف فيه ) وكيغاندير ؟
اسد مربع يدو وكيشوف فيه مصغر عينو .... كيقرا هاد الصدق لي فعينيه .. كيقرا شحال بزاااف دالظلم والانكسار .. كيقرا المعقول ديال باه وجدو .. كيقراا الطموح كيقرا النفس والكرامة ..... حس بقلبو تزير وهو كيتفكر باه شحال كان فرحان بيه نهار تزااااد وشحال كان فرحان وهو كيعاود عليه ويوصفو ليهم فالباركو كيداير ونهار قال بابا كيفاش قالها .. كيتفكر باه كيكان متحمس لولدو ومستقبلو .... وكيشوفو هو دابا قدامو راجل كبير .... وتماما كيف بغاه يكون .... وقال بتنهيدة كايحاول يوريه كيفاش يولي پرينس ....
اسد : تولي ولدي ... تانتا .....
اصيل : ( علا عينو بزربة فيه كيرمش ) م مافهمتش !!!!!
اسد : هادي الحاجة الوحيدة لي غادير منك برينس بحالو بحال قسم وقدو قدها .... حيت باش نعطيك بنتي .. خاصك تكون ولدي ..... تسمع لهضرتي ... لآش كنقوليك ... حيت انا لي عارف كثر منك ... بغيتك ديرني فمقام الواليد ديالك .. وكون كان عندك فالحياة مغانطلبش منك هادشي .... بغيتك متحشمش مني ... متخبيش عليا ... ترضى بهضرتي ومتعكسش معاها ... لاكان الواليد ديالك لي غيوقف ليك على مستقبلك توفى .... غنوقف عليه انا حيث دابا ولات فيه بنتي وانا باااقي حي ... ( اصيل كيرمش فيه ) ماكاين تااااشي حاجة اخرى مطلوبة منك من غير هادي بالضبط .... مكنطلب منك لا ريسطو لا تنوووض تخشي راسك فحوايج كباااارر عليك ومعقدين باش تجيب الفلوس ... مكنطلب منك تاحاجة .... كنطلب منك ديرني فمقامو ويكون عندك طمووح وباغي توصل .. وتبع هضرتي .... انا لي غنوصلك ...
اصيل : ( كيحك فوق حاجبو متوتر ) سي اسد راه هاد الهضرة لي كتقول راه فووووق راسي وعينيا .. واش كاين شي واحد يكره لي يشد بيديه فهاد دنيا ... ولكن .. نتا درتي لي عليك وكبرتيها مكاين لاش تاني نزيدك همي تا انا ... بغيت انا نحقق مستقبلي بووحدي ... الله يكثر خيرك ..
اسد : باش تحقق مستقبلك ... خاصك واحد الظل اولدي ... تانا ملي كنت صغير .. كنت بحالك ... وللكن لقيت الظل .... لقيت لي ينفعني بخبرتو فهاد دنيا .. تاوصلت لكاع اش بغيت وحققت هاداك المستقبل بالجهد ديالي انا .. ضروري كنحتاجو للظل اولدي حيت الحرارة دالدنيا صعيييبة ماتقدش عليها بوحدك .. وداك الظل الى كان نتا داه ليك الله .... ( اشار لصدرو ) انا باقي كاين ... ( اصيل نزل راسو ولحمو كلها اقشعرات ) انا جيت لهنا .. ماشي باش نهضر على علاش جيتي لباطو ولا شنو بيناتكم ولا اش باغين ديرو .. انت مكيهمنييييش هادشي كامل .. انا عارف نتوما جوج دناس بعقلهم ... كيهمني نشوف الاومور المهمة فحياتكم بحال هادي .. لي طالع ليكم عليها هاد الفيلم كامل ..... شي لاخر بينك وبينها انا مادخلنيش .. راكم بعقلكم .. ( تنهد) اوااا منغير لابغيتو تبرهشو منعرف ....
اصيل : ( باحراج ) حاشا اسي اسد ....
اسد : ( شاف لساعتو ) مابقى والو .... انا غيخصني نمشي .. ضور هاد الهضرة فراسك ..... وباراكا ماتبقى تبني وترييب فالخاوي وتنوض دخل راسك فشي حوايج كباااار عليك متقدش عليهم .. كنمشيو دقة دقة وعلى قد استطاعتنا ... وهاداك المستقبل لي باغي توصل ليه وحتى هاد طموح راهم كبااااار .... وخاصهم الظل .... نهار ترضى دخل تحت هاد الظل ....( اصيل منزل راسو للارض) وتحسبني بحال الواليد ديالك ..... غانعطيك قسم دلك الساعة .... منغير هادشي ...مايمكنش اولدي نلوحك للهاوية ونلوحها معاك ... خليها فدار باها و نتا المرصى راها معيشاك بلا مدخل راسك فالمشاكيل .....
اسد وقف خدا اخر رشفة من الفنجان وقاد الفيست ديالو كيستعد يمشي وقسم لي كانت غير ورا الحيط كتسنط تخبات دغيا ... واصيل منزل راسو للتحت وعينيه حمريييين .... وهضر بدون شعور ......
اصيل : طحناااتني دنيا بزاااف اسي اسد ..... بزااااف .... طحناتني وعييت نقلب على الظل وملقيتوش .. انا راه ولفت نعيش تحت الشمس .. تحت الشتا .. تحت الرعاد .... ماعمرني قلبت على الظل .... حيت ولفت نكون انا هو الظل ( اسد جلس بشوية على الكرسي راجع لبلاصتو كيشوف فيه وهو كيشوف لتحت وكيهضر بلا شعور ) ولفت نكون انا هو الحيط واخا انا لي باغي نتكا .... انا راه وليت نحشم نطلب الظل ! ... انا لي خاااصني نكون ظل ...
اسد : اصييييل ... ( علا عينو فيه لاااامعيين ) انا اولدي .... خدمت على هاد الظل حياتي كاملة تاااشرفت .... كبرتو تاوليت قادر ندير ولادي كاااااملين تحت منو .... بولاااادي وبلي غاايديو ولادي .... ( اصيل كايشوف فيه ) انا الكبيرة ديالي هي قسم .... وقسم ماعلمتهاش دير الظل علمتها هي تخبى فيه ..... وعارف نهار غنمشي انا اولدي .... ولادي غيبقاو بلا ظل .....بحااالك نتا ..... الاب كيخلي ولدو الكبير هو لي يظلل على العائلة من موراه ... ولكن انا الكبير ديالي ماشي ولد ... الكبير ديالي بنت ... وانا فششتها مزياااااان وعاااارف ومتأكد لا خطيتها انا مغااتعرف مادير ( قسم زيرات على عينيها ) كاين خوها تاهو جا وراها ..... ولي تاهو عااارفو لامشيت انا غيتلف ..... انا حامد الله على ولادي ولكن كنت كنتمنى لو كان شي حد كبر من قسم .. يكون ولد ..... ولد عارف بحق الزمان ويقدر يدير الظل تاااهو من مورايا .... ( عينيه دمعو واصيل كيشوف فيه وقسم كتشهق بالبكا ) ماجانيش قبل من قسم ولكن قسم جاابتو ليا .....فاش كنقول ليك حسبني بحال الواليد .. هادشي راه ماشي غير ليك ... هادشي حتى ليا انا .... غيتزاد عندي ولد كبييير .... يدير الظل من ورايا .... ولد ظلو باقي صغييير يلاه مغطي ليه ختو .... نعلمووو مزيااان كيفاش يكبر هاداك الظل تايهز ليه عااائلة كبيييرة تاهو ...... حنا ماعندناش اولدي لي يدي واحد من الاسماعيلين .... ياتديهم كاملين يا ماتدي تااااااحد ..... وباراكا متكون حيط ... (ضرب ليه فكتفو بحنية ) تكى شوية اولدي .....
خلاه وناض مشا ..... واصيل منزل راسو ماقدرش يطلعو .. حيت غيفضحوه دوك دموع لي تجمعو فعينيه واسد تنهد ومشا بزربة واصيل ضور راسو لجنب بدا يشمر بنيفو مسح دوك الدموع اما قسم مشااات كتجري فالكلوارات لاكابين كتبكي وتششهق .....
سمعات قسم النداء فالسماعة لي فوذنيها : كابيطان هذا هو الوقت ...
كتجري فالكولوارات وتمسح فدموعها وتشهق ... وصفاء شافتها وتبعاتها كتجري مخلوعة ... وصلات للاكابين وكتمسح فدموعها وكضرب الصااافرة وكلها كتنخصص وهي كتفكر هضرة باباها وهو كيقول ليه الى خطيتهم انا يتلفو وماعندهم تا ظل من غيري وتمنى كون كانت قسم ولد ... بمجرد مااسمعات هاد الهضرة وتخيلات شي نهار تعيش بلا باباها بغات تحمااااق .... كضرب الصافرة وكتبكي وتنخصيصها مسموع .... ولي سو ديالها غير كيشوفو فيها .... مسحات دموعها ولبسات الشابو ومشات كتستعد تحرك الباطو وكتعلمهم يسدو البوابة وكتمسح دموع بكمامها .....
اما اصيل حل الباب ديال الجناح ودخل جلس على السرير كيتنهد ... كيشوف قدامو وكتعاود ليه هاديك الجلسة مع اسد كلها قدام عينو ثاني بكاع تفاصيلها وكاع اش قال اسد ، وعاد كيستوعب ويفهم كل كلمة .... غرس راسو بين يديه وهو كيفكر فهاديك النظرة لخرا لي شاف فيه بيها .. شحال كانت كتعبر على بزااااف دالحوايج .. منهم انه حسو بحالا عطاه مسؤولية كبيرة ..... كتر ما خففها عليه ....
ناض لدوش حل الما وخشا راسو تحت لافابو كيغسل وجهو يتوكض شوية .. عاد علا راسو كيشوف فالمرايا فاتح شوية فمو كينهج .. شعرو كاع فزك هبط على جبهتو وبعض الخصلات نزلو على عينيه .. شفارو كيقطرو ولحيتو تاهيا .... نتر الفوطة وخرج كيمسح تالبالكون ....
كان الباطو بدا كيتحرك شوية بشوية ..... كيحاول يتنفس وشد فهادوك الحديدات مصغر عينيه .....
هضرة اسد كانت كبيييرة عليه بزاف .. بقد مارتاح ليها بقد ماتخلع منها ...
بقد مافرح حيت اسد موافق و طلب منو غير يحسبو بحال باه .. بقد ماتخلع من هاد المسؤولية ..... بقد ما خاف ميكونش عند حسن الظن ..... بقد ما خاف بزااااف يدير شي غلط .....
علاش اسد حكر بزاف على منين كيجيب الفلوس ؟ جاه احساس بحالا عارف ولكن هو متأكد هادشي معارفو تاحد ومتأكد بلي اسد غير دخلو الشك فمنين كيجيب الفلوس ، وشك فالحشيش ولا شي حاجة غير قانونية داكشي باش قال داك الهضرة ... ورجع ثاني كيتفكرو وهو كيقوليه خاصك ترضى تكون تحت ظلي .... كان كيظن بلي بابات قسم مغيبغي يزوجها لشي واحد حتى يكون هو واجد ومكون راسو .... ماشي ايقوليه اجي عندي انا نكونك !!!!! واش هوما كاملين بحال هاكا .. مكيهتموش لهضرة المجتمع ؟ حيت كان سحاب ليه غير قسم .....
كيتفكر هاديك الحنية كاملة لي كانت فعينيه .... هاداك المعقول .... هاديك الهبة وهاديك المسؤولية ..... خلاه يحس براسو بحالا بصح جالس قدام باه .... فهاديك الجلسة هو عطاه تما اكتر حاجة كيتمناها فحياتو .. شحال حلم انه بااباه باقي عايش وباقي كاين وجلس معاه وعاود ليه هو كيفاش دوز حياتو بلا بيه ..... شحال حلم بباباه كيسولو شنو درتي فاش مكنتش ..... حتى جا على هيئة اسد داك السؤال .... داك السؤال لي كان حاااجة حساتو براسو شحال ضعيييييف .... دار جهدو كامل يبقى واقف صلب قدام اسد .. ولكن هاداك السؤال هزمو ... قاسو من داااااخل .. وطبطب على شي حاجة فيه مجرووووحة وعياااانة ومريييضة .... واش بصح كاين شي واحد فهاد دنيا لي يقدر يجي بلاصة الاب ؟؟؟؟ ...
راسو حس بيه حرقو وتنهد وجلس على الكرسي وحط داك الفوطة فجنبو ورد شعرو لور بيديه معلي راسو للسما لي كانت صااافية ونجوم باينين والباطو غااادي بشوية .....
هو نهار شاف قسم اول مرة بغاها .... هو كيبببغي قسم .. ولكن علاش دابا حس براسو كيبغي حتى باباها ... بطريقة اخرى ... معرفش علاش جاه هاد الاعجااااب كامل ليه ؟ .... فواحد اللحظة حس براسو بغا يعنقو .... كان الشخص لي قدر يحس براسو طفل قدامو .... مجرد طفل ..... هاديك الحنية لي كانت فعينيه وفصوتو هزماتو ..... احتاجها حياتو كاااااملة ...
فلحظة مكرهش يتكا عليه ويقوليه كاع اش عانا ويبكي ويكسر هاداك الجدار الصلب لي دارو قدام كوووولشي ... لقاه هو الوحيد لي قادر يكسرو حداه .....
كان بنفس هاديك الحنية د هادي عشرين عام ملي دخل لدارهم ..... حس بفخر كبييييير لي غايدي بنتو .. وغيكون حداه وغيتلاقاه وغيهضر معاه مزال .....
ملي كان كيشوفو فتصاور كان كيخلعو ... ولكن فاش تلاقاه لقا بلي كل شخص فينا محتاج واحد بحالو فحياتو .. وكون كان عند كل شخص فينا واحد بحال اسد فحياتو .. عمرو غيحتاج لشي حاجة مزال ...
ولكن رغم كولشي .. حس بخووووف كبير .... حس بمسؤولية لي ميقدش عليها .... هو ياربي قاد يهز مسؤولية ختو ... واخا قسم عائلتها كلها تكون بحال هاكا كيبقى هاداك المجتمع صعييييب عليه ....
هو كان كيظن غياخد قسم ويبعد ... ولكن تأكد فهاد الجلسة بلي اسد مناويش يخليهم يبعدو ..... غيدخل وسط هاد العائلة بغا ولا كره .....
وكيفما قال هو ... خاص يولي برينس ... الا بغا يدي البرينسيس ... وباش غيولي برينس ضروري غيدخل وسط هاديك العائلة .....
رد راسو لور والبرد كيدي شعرو كتر ملي الباطو زاد شوية فالسرعة .... ابتسامة خفييييييفة متناقضة مع افكارو تشققات على جنب فمو كتوحي بحالا فكر فشي حاجة زوينة وسط داك روينة كاملة ..
فعلا .... ملي حس بسرعة الباطو زادت تفكر بلي قسم لي محركة هاد البااااطو ... حس بفخر لا يوصف بيها .. وبهادشي لي وصلات ليه .... وصاگت باطو قد هذا ..... وهزات مسؤولية قد هادي .... أرواح ورا ظهرها وهي صايكة بيهم ف غياهب البحر فالليل .....
استحلى هاداك البرد لي كيضرب فيه وكيحسو بحالا كينعشو ويوكضو شوية بشوية تا استقرات سرعة الباطو .... ومابقاش الريح عنيف بزاف .... وهو غير متكي على الكرسي وساهي ..... كانت دازت شي جوج سوايع وهو على داك الجلسة .. حس براسو تشنج .. وعنقو ضرو ... وبحالا كان فشي كومة وفاق منها ...دخل لغيبوبة التفكير .... فلخر نفض راسو وقال ربي كيفما دايرها ييسرها ... وناض ...
مشا باتجاه الدوش كيحك فذرعانو لي باينين من تيشورت بسبب البرد لي كاين وسط البحر ...ودخل لدوش طلق الما كيغسل وجهو يتوكض تاني وينسى الگارو حيت كايحاول يقلل منو باش يقطعو .....
يلاه كيغسل هو يسمع الدقان فالباب .... رد شعرو لي فزك ليه بصبعانو لور وهز فوطة مسح وجهو ونشف شوية لحيتو وخرج باتجاه الباب .. حلها وهو يعلي حجبانو ملي شافها .....
كانت واقفة متكية على السارية لي مقابلة مع جناحو .... عينيها منفوخين من تحت لي باين فيهم البكا رغم هاديك الابتسامة لي مزيناهم ... ونيفها تاهو باقي حمر ... وكتشوف فيه بنظرات فيهم بزااااف ديال الحب ومخلطين بالفرحة ....
خدات نفس وقربات لعندو ورجع بلور فاسح ليها مجال تدخل وسدات الباب بيديها ووقفات كتشوف فيه وهو منزل راسو لعندها .. ومن عينيها لاحظ انها كانت كتبكي وهزات يديها بشوية كترجع ليه خصلات شعرو الفازكين لور متبعاهم بعينيها .. ونزلات ثاني يديها للحيتو كتقادها ليه ... عاد علات عينيها فيه ....
قسم : ماملاحظش بلي الطريق .. بيني وبينك غادا و كتقصار ؟
اصيل : ( خذا تنهيدة وهو هايم فيها ) ولكن انا مباغيهاش تقصار ... الى قصارت ... غتسالي ...
قسم : اه ... غتسالي بيا انا وياك ... مع بعضياتنا ( بابتسامة ) وهادشي لي بغينا ... ولا لا !
اصيل : ( عوج فمو لجنب ) اممم ... هادشي لي بغينا .. ولكن هادوك المشاكل لي كانو مطولينها كانو مزينينها .... مابغيتهاش طيح فالرتابة
قسم جمعات تخنزيرتها وضرباتو بحر جهدها لكتفو وهو تبسم كيضحك
قسم : المشاااكيييل لاااا ...تكون مزيااان لاااا ....واش بغيتي نتا اش بغيتي ؟؟؟؟
بدا كيضحك وجبدها من يديها جابها قدامو معنقها من لور وحاط راسو على كتفها
اصيل : الا سالاو هادوك المشاكيل غاندير وحديييين جداد ..... ( باسها فععنقها ) بحال مثلا ..... نخلي باباك يغير مني شوية ....
قسم : ( جابليها ضحكة ومبورشة من لمساتو ) هههه وعلااش؟
اصيل : قبيلة على داك الكرسي كثر عليا بزاف .. بنتي بنتي بنتي ....اوا منببببعد ..... تا انا تانبغيها ماشي غا نتااا .....
قسم : ههههه ( ضارت عندو كتشوف فيه ضاحكة ) كنصحك بلا مدخل فهاد الحرب مع بابا هههه غاطلع خاسر هههه
اصيل : ( حرك راسو بالايجاب ) امممم .... ( حيد ليها داك الشابو دالكابيطان لاحو موراه فالسرير ) عجباتني بزاف علاقتكم نتي وياه والطريقة باش كيبغيك ... ( كيفسخ ليها البانضة والفيليلات باش مجموع شعرها لور متبعهم بعينيه وهي كتشوف فيه) لدرجة غرت كاع ... حيت اول مرة ... كنكتشف شي واحد كيبغيك كثر مني ....
قسم : راه بابا ا اصيل ... وتانتا الا بغيتي غايكون با.....
قاطعها بلا متكمل كلامها وجبدها عندو بعد ماترخى شعرها موراها يد محاوطها بيها ويد كيردو ليها لور ونزل راسو لعندها كيشوف فيها معنقها
اصيل : كيف داز ديپار ديال اول فواياج ؟؟؟
قسم : ( عرفاتو قلب الهضرة وشافت فيه ماشية معاه فالحديث ) داز زوين ..... ماشي بالصعوبة لي كتتخيل .. فيكسيتو دابا فخط واحد ( هزات يديها فيها سويعة رقيقة ) نص ساعة وغنمشي نبدل ليه الڤيتاس ..... هاد النص ساعة نورمالمون كايكون خاصني ندوزها كنشرب شي حاجة باش نركز كثر .... ( علات عينيها فيه ) ولكم اختاريت نجي فين نزيد نتشتت .... ( ساهية فتفاصيل لحيتو) كتر ....
اصيل : لا .... مغنتشتتوش هاد المرة .. هاد المرة غاانركزو مزيان ..... وغنخدمو مزيااان .. وغيووصل هاد الباطو مزيااان .... حيت باباك يستاهل تفرحيه شوية .... هو لي كان باغيك تكوني كابيطين ... وريه بلي راك كابيطين .... ردي ليه شوية من اش كايدير على قبلك ....
قسم : ( تنهدات ) انا اصلا على قبلو دايرة هادشي كامل .. على قبل نشوفو فرحان وفخور بيا .....
اصيل نزل عينو لشفايفها وهي غمضات عينيها ... يلاه غينزل عليهم هوما يسمعو الدقان وتحلات الباب وهي باقا فحضنو .... كانت صفاء كتشوف فيهم ....
صفاء : مادموزيل قسم ..... بقات ليك ربع ساعة
قسم : ( جاتها الضحكة ) عاارفة اصفاء .. عااارفة ....
صفاء نزلات عينها ماقداتش تشوف فيهم معانقين وسدات الباب مشات وقسم علات عينيها فيه لقاتو باقي كيشوف فيهم مازعزعش نظراتو ... يلاه غاتوقف على صبعان رجليها تطلع عندو ....وعاود تحلات الباب ثاني ونزلات راسها واصيل عض على شفتو كيتنهد
صفاء : ولكن موسيو اسد قاليا منخليكش بوحدك ون ( قاطعاتها )
قسم : صفاااااااااء
صفاء حنات راسها ومشات بزربة ... وقسم علات راسها فيه وهي ترجع تحل البااب ثااني
صفاء : ولكن غير باااش ننن.......
صفاء وسعات عينيهااااا حيت مجات فين تهضر قسم تا كان اصيل غاص وسط شفايفها شاد راسها من للور .... وصفاء حلات فمها على قدوووو وقسم نسات كاع اش ضاير بيها وحاوطات يديها على عنقو ....وهي بقات مصدومة حالة فمها ورجعات خرجات بزربة سادة عليهم الباب وكتنهج ....
واصيل غريق فهاديك القبلة لي ماقطعهاش ومتنفسش من وراها جارها بشوية تاوصلات للحيط وشد بيديه بجوج فالحيط وراها وهي يديها ضوراتهم على كرشو تحت يديه ... غير حس براسو غادي يغيب تااااني على وعيو وراسو ثقال عليه .... هو يقطعهاااا بزربة وشاف فيها ......
اصيل : ( كينهج ) سييري عليا فحااااالك ...
قسم : ( كتشوف فالارض كتلتقط انفاسها وشافت فيه بعينين معسلين وكلها كتنهج ) صافي داكشي لي كان خاص كملتيه ليا دابا .. غنمشي نغرق بيكم هاد الباطو و ندير زردة للحوت هاد النهار .....
اصيل : ههههه ( هبط باس على جبهتها ) سيري كملي خدمتك كلها .... نتي كابابل متخافيش .... ( مشا بجيهة السرير هز بانضتها والفيليلات ديالها وقرب عندها ضورها وبدا كيجمع ليها شعرها ) صبري نردو هادشي كيف كان ....
قسم غير كتشوف وهو كيجمع ليها شعرها لور وهي مبتسمة وكتشوفو كيقادو بصبعانو .. واخا التسريحة قاداتها ليها لي مكلفة ولكن حسات بلي ديال اصيل غتكون احسن وحدة .... جمع ليها شعرها واخا ماشي كيف كان مهم رتبو ليها ومد ليها الشابو ديالها
اصيل : يلاه اكابيطين .... مافيا لي يتشد بشي تهمة ديال ازعاج موظف اثناء مزوالته لعمله ....
قسم : هههه ( قربات عندو وتعلات عنقاتو من عنقو وهو هبط راسو شوية عندها ) هانا غادا ... بصح غنتعطل شوية ... نعس ولا رتاح .. حيت ملي غايوصل دابا لباطو لسبانيا عندي اجتماع فالبوغ قالك ترحيب فاول فواياج ..... يمكن مغانسالي تالربعة دصبح .... ( علات كتفاها بقلة حيلة كتنهد) دونك تالغدا ونتشاوفو ....
اصيل : سيري لخدمتك نسايني انا دابا .... ديريني مكاينش ( كيقاد ليها لبستها ) ملي تسالي هانا هنا ... ( تنهد ودار يديه فجياب سروالو ) راه ماعندي فين نمشي اصلا ....
قسم : هههه ... هبط ضور شوية اكتشف الباطو ديالي كيداير وعطيني رأيك كيجاك ولا شي حاحة بانتليك خاصها تبدل ( اصيل علا حجبانو ) غناخد ملاحظاتك بعين الاعتبار كبحار محترف كيف كايقول ليا بابا .. حيت انا واخا قارية لامارين بابا كيقوليا الصيادة هوما اكتر وحدين محترفين ورجال ديال البحر كتر مني انا ...... ( اصيل حدو حرك ليها راسو بآه ) يلاه انا مشيت ( تعلات على صبعانها باستو فحنكو ورجعات كمشات ملامحها وتبسمات وقربات لوذنيه بهمس ) واحد الحاجة ديما كنبغي نقولها ليك وكنسى ..... ( اصيل علا حاجبو باستفهام ) كتعجبني ريحة لحيتك ......
اصيل : ( زير على عينيه وعيط عليها بنبرة التهديد حيت بقا ليه شوية ويفقد سيطرتو عليها ) قااااسااااام ...... ( ضورها لجهة الباب ) سيري تخدمي حيت انا مغنعرفش نحرك داك الباطو نكمل الطريق الى مشيت حتى كليت ليهم الكابيطين ديالهم ولا درت فيها شي كارثة .....
قسم بدات كضحك وهو دافعها للباب وقادات الشابو ديالها ومشات راسها ضاحكة ... قاست البواني وضارت لعندو هو لي واقف كيشوف فيها ..... ودوات بحنية
قسم : بصح ... مغتعرفش تحرك الباطو .... ولكن كون ماجيتيش ..... مستحيل كنت غنعرف نحركو وانا فداك الحالة فاش كنت قبيلة .... ( اصيل جمع ملامحو ) مستحيل كنت نعرف نخدم وانا دماغي كامل معاك وانا كنظن بلي تفارقنا صافي .... ( حمارو عينيها ) نتا معارفش ا اصيل كيفاش كتحكم فحيااااتي ولاشمن درجة نتا مهم فيها .. ( تنهدات ) تصبح على خير ( حلات الباب خرجات وضارت عندو باش تسدها وابتسمات ليه هو لي باقي غير كايشوف ) هاف آكود نايت ...( بضحيكة) پريينس ....
اصيل : ( علا حاجبو فيها ) كنتي كتسنطي الفضولية !
قسم : لااااا ... شكون قالها ليك ؟
اصيل : ( وعوج معاها راسو ) ظلك لي كان باين فالحيط .. هو لي قالها ليا
قسم : ( تنهدات كتشوف فيه بجدية شادة فالباب ) اصيل ..... ( اصيل مركز معاها وهي دمعو عينيها ) عطيني الحياة لي ماعنديش ..... وغاانعطيك الفاميلي لي ماعندكش .......
غير مشات تنهد ورجع تلاح على السرير على ظهرو معلي راسو للفوق .....
واخا وهو وسط عالم غريب عليه ... باطو قد هاداك ... وسط ناس غراب عليه ... مستوى ماشي ديالو ...... مكانتش الاومور خايبة لداك درجة .... حيت على الاقل كاينة هي ... وكاين باباها لي جلسة وحدة معاه عادلات ليه عمر كامل كون عاشو وهو كيعرفو ... رتاح نسبيا على علاقتو معاها واخا مجتمعها عمرو غيرتاح ليه ... ومحاسش براسو مرتاح من غير انه باغي يكون معاها وصافي وضحى براحتو فمجتمع ماعندوش معاه .. على ودها ..
هز معصمو شاف لساعتو كانت تقريبا الوحدة ديال الليل .... النعاس مافيهش .... حاس بالملل ....
ناض وقف شوية فالبالكون كانو وصلو لپوغ ديال اسبانيا .... والباطو حابس .... مكان كايبانليه والو من البالكون ديالو من غير الباطويات الصغار لي تما و الحركة لي واضح الناس كاينزلو .......
خدا نفس من نسيم البحر ومشا بجهة الباكية دالكارو ديالو بعد مالقى راسو عيا يصبر واحتاجو قبل مايطرطق ليه راسو بالحريق .....
هزو و لبس كويرتو ....اماا تا تيليفونو مشاعلش فيه ريزو و لاحو تما ... وخرج من الشومبر كيستكشف هاداك طابق .. لي كان عبارة على فندق فوق الما .... غير الاجنحة والغرف وكولوارات ضيقين وشراجم دائريين .... طابيات فالارض گرونة ... وبيفيهات مختلفة .... وكل بيفي واقف وراه واحد ولا وحدة بلباس رسمي كيقدم للناس المشروبات لي بغاو والمقبلات ....
طلع فالدروج حديديين لي كانت فيه الحركة كتيرة شي كاينزل للبوغ يمشي وشي يلاه طلع يمشيو للفرانسا ...
الطابق الفوقاني كان عكس لتحت .... كان عامر بالناس والدراري صغار تقريبا كولشي على السطح .... كان پيسيين دائري صغير ضايرين بيه طبالي و رولاكسات .... كان عامر بدراري صغار تايعومو ...كانت حياة ليلية بامتياز ... تقريبا غير العائلات ...
كيتسارا داير يديه فجياب الكويرة .. كانو مقاهي محلولين .... و على الجوانب دااسطح الناس كطل على البحر وتتفرج فالميناء لي عوما واقفين فيه ....
بقى كيشوف بعينيه شي بلاصة تبان ليه كالم ....ولكن كولشي كان عامر و اكتفى انه قرب لحافة الباطو وتكى على الحديدات عاطي بظهرو للبحر .... كيشوف لهاداك السطح لي كان اشبه بالمنتجعات .... باطو سياحي بكل ماتحمله الكلمة من معنى ... فخم ... و مجهز مزيان .. عاد قدر يفهم علاش الخطوط د شركة الروكان البحرية غاليين لهاد درجة!!!!! حيت الباطو سياحي و ترفيهي ...
كيشوف عند جميع العاملين لي تما .... وكيقول واش هادشي كولو ديالها غير هي ؟ واش هي لهاد درجة كبيرة عليه بهاد السنوات الضوئية كاملة ؟؟؟؟؟ واش هدا هو المجتمع لي قالت ليه قرب ليه باش ميبقاش يخلعك ؟ حس براسو كون غير بقى خالعو كان غيكون حسن ما كون عرفو !!!! ...حيت كلما عرفو كتر كتزيد تبان ليه هي شحال صعيبة ....
هو شاف حياتها وقدر يفهم ان عائلتها متواضعة غير من باباها كيف كيتعامل ... ولكن كيخاف شي نهار تتقلب عليه !!! الطابع كيغلب التطبع ... كيخاف شي نهار تخرج منها شي كلمة تجرح كبريائو .. هو عارف مزيان بلي قسم ماشي بحال هاكا ولكن كيخاااف من ليام وشنو غيجيب المستقبل ... لان البدايات ديما زوينين .. الثبات هو لي صعيب ....
ضياق صدرو تاني .... لقى راسو محتاج لشي بلاصة يكمي فيها يالاه غيتحرك يقلب فين يمشي وهي توقف عليه صفاء هازة طابليطتها .....
صفاء : موسيو اصيل .. محتااج شي حاجة ؟؟؟؟
اصيل : ( جاتو الضحكة وهبط راسو شاف فيها وهي قصييرة قدااامو بدوك النظارات الطبية واشار ليها بلا براسو ) لا .. شكرا
صفاء : الى حتاجيتيني ... غير ضور راسك تلقاني ... المادموزيل قسم غتخدم هاد الليلة حتال الربعة دالصبح عنها غينيون و عنها التوقيع فالبوغ داسبانيا ... داكشي علاش وصاتني نوريك الباطو باش تعرف على كولشي ....
اصيل : ( تنهد ) ماعليش .... خليها تاتسالي ونشوفوه بجوج ....
صفاء : داكوغ موسيو ... تبغيني فشي حاجة !
اصيل : بغيت بلاصة فين نكمي .. هنا دراري الصغار .....
صفاء : تقدر تاخد راحتك ممانعينش التدخين .... ( شافتو كيشوف فيها ) اه .. مكتبغيش تكمي حدا دراري صغار ... داكوغ ... هانتا .. تقدر تنزل للبار لتحت .... اصلا كاينة سواغي تما لابغيتي دوز وقيتة .. حيت كاع البلايص لي هنا من غير البار كلهم فامييليغ .. يعني فين مامشيتي غتلقى دراري صغار والعائلات ... لبار للتحت بوحدو لي تاخد فيه راحتك كتر .....
اصيل : ننزل ؟ يعني كاين للتحت !
صفاء : اه .. الطابق لي تحت من فين كاين الجناح ديالك .... تبعني انا غنوصلك ليه
اصيل : لا غير خليك غنزل بوحدي ....
ضرب ليها على نيفها بابتسامة وزاد ..... وهي وسعات عينيها على حجمهم.... تاتفتحو شفايفها حالة فمها ... هو مشا وهي ضورات راسها بشوية لعندو وبدات تبسم بغباء على الحركة لي دار ليها ... ردات نضاضرها غير بشوية بسبابتها .. وهي تنفض راسها وجمعات دوك الملامح ومشات بزربة تكمل خدمتها .... شتت ليها تركيزها بابتسااامتووو ....
نزل اصيل فالدروج تاوصل لهاداك الطابق ، دخل من جوج بيبان كباااار ..... لقى راسو فكولوار طويل عامر بالمارة ... والموظفين بلباسهم الرسمي هازين ملفاتهم غير كايشوفوه كايبتسمو ويخويو ليه طريق منزلين راسهم بالتحية ..... مافهم والو ؟
كيشوف مع جنابو حيث شاف بلي الناس لوخرين كيدوزو عادي غير هو لي كايديرو ليه هاكا مبتسمين فيه منزلين راسهم تاكايفوتهم عاد كايمشيو !!! واش كاايعرفوه ؟؟؟؟؟ واش عندهم شي تعليمات يتحناو ليه بحال هاكاااا !!!!! ...
جاتو غرابة كبيرة وخاطرو ضياق بزاف بحالا باغي يتخنق ... ومشا مكمل لقى بيبان اخرين هاد المرة مسدودين .... حلهم تاني هو يلقى ىاسو لكولوار آخر قصير كايدي لواحد الاسپاس قدر يفهم انه مطعم حميمي بعض الشيء ...كان غالب عليه اللون كرونة ، طبالي مربعين عليهم شموع وورد ... جالسين فيهم ناس قلال لي باينة عليهم ليكوبل فعشاء رومانسي ، رجال ببذلات ونساء بليغوب .. وواحد الشخص كيعزف الغيتارة من طاولة لاخرى .... بقى كايشوف معاهم وبعض العيلات تما شادين گارو تايكميو .... وضحكاتهم مسموعة خفيفة مع صوت الغيثارة و الفراشط و نخب الكيسان ....
خلاهم وزاد خارج من هاداك المطعم ....فكولوار آخر ... دريجات صغار نزل فيهم وكاقلب بعينيه فين كاين هاد البار .... علا راسو هو يلقى الپانو ديالو و السهم على ليمن ... تبعو تابانو ليه بيبان كبار كوحل قدامهم جوج فيادر غير شافوه حناو راسهم تاعوما وهضرو فسماعاتهم وحلو ليه البيبان بلباقة منزلين راسهم ..... بقى غير كايرمش باستغراب و تنهد دخل ....
وهي تسمع الموسيقى .... قدر يفهم بلي راه بار ريسطو .... كانو كيبانو ليه بزاف دالشباااب لتحت كيشطحو مع الديدجي ... نازل فالدروج حديديين وعامرين مع جناب بالبنات كيتمايلو مع الموسيقى كيشطحو هازين كيسانهم ....
حاجبو مهزوز وباين القنطة وقلة الخاطر فعينيه .... نازل مع دوك دروج وكل مرة كايحاول يسول راسو فين هو؟ واش خاصو يولف هادشي .... البيران ماغرابش عليه .... هو خدم فيهم كاع ... ولكن باش يحس براسو فبار فخم بحال هدا ويحس براسو كولشي منتبه ليه هي لي جاتو غريبة !!!!!! ....
نزل من دروج ....كانو جليسات مفرقين بفوتويات حمرين و كحلين .. الطبالي عليهم كؤووس و نقبلات خفاف ... ولاحظ ان ناس هنا نقييين بزاف وريحة البرجوازية عااااطية ... والناذلات بلباس رسمي كيتمشاو ببلاطواتهم ويفرقو على طبالي .... كانو اغلب الرجال لي جالسين فليفوتوي رجال الاعمال جابدين صفقاتهم .... اما لي كانو بعاااد وقراااب لمنصة الديدجي كانو غير الشباااب كيشطحو ....حيت تما فين الموسيقى مجهدة و صاخبة ......
مشا هو باتجاه البار كانو تما كراسى طوال ولي جالسين عليهم ناس قلال .... الناس لي بوحدهم بحالو ....
جلس على واحد الكرسي هو يقرب عندو البارمان ...
البارمان : مستر اصيل ... تشرب شي حاجة ؟
اصيل علا فيه حاجبو معارفش الا صفاء بمجرد مادخل عطات صورتو فالكاميرات لكاع الموظفين وهو مع اسد وعطات تعليماتها انه واحد من موالين هاد الباطو .. واصيل بقى غير كيحك ورا وذنو بانزعاج ... ورجع تبسم ليه وجاوبو
اصيل : شي حاجة باردة .... Sans alcool " بدون كحول"
البارمان : (باقتراح) صودا كوكتيل ؟
اصل حرك ليه راسو باه ومشا البارمان وهو شعل الكارو ديالو وتقلب كيشوف قدامو ..... وهاد المرة بلاصة مايفكر بلي هادشي كامل ديالها ويزيد يتخلع ... فكر بايجابية .....بلي هي بوحدها لي غاتصوگ بهادشي كامل وسط هاد البحر مجارية المواج فهاديك لاكابين ...... هاديك الانثى الرقييقة لي كتكون بين يديه بحال شي مربع دالزبدة فاي لحظة ممكن تذوب وتختافي ...... هي لي هازة هاد المسؤولية كلها ....كيزيد يفتخر بيها ...
حط البارمان قدامو الكوكتيل وهو منسجم مع الكارو ديالو كيكميه والتبغ كايخدم فيه شوية بشوية ويرخف فيه النفس ....
فالجهة لي فاليمين ديالو ..قرييب ليه ..... كانت جالسة واحد البنت كتكمي .... دايرة رجل على رجل وجالسين معاها مجموعة دالشباب .... لابسة جيب دالكوير كحلة لاااصقة على ليهونش ديالها الكباااار .... ليباموس كحلين مع سبادرين كحلة مستيلية بسناسل فضية ... وپيل شيبية مخشية فلاجيب ومزيرة على صدرها حتى بيناتو كاملو على برا ... عنقها مزين بسلاسل رقاق ... شعرها كحل كاري قصير شاداه ورا ودنيها معري على الحلقات الرقاق لي فوذنيها .... بيرسيغ فجنب نيفها .... مكياج عيووونها فيه فقط ايلاينر لي باين مع شفار كبار .... وعكر حمر فرنسي ... وبشرة بيضة .... كاتشوف فيه مطولة و نفتات الدخااان .... وطفات الكارو فالطفاية قدامها و هزات تيليفونها بشوية صوراتو .... دخلات اكتيفات ريزو د اسبانيا .... وخدماتو مع الكاطجي و سيفطات هاديك الصورة مرفوقة بمسج مكتوب فيه "هو هذا " ...
اصيل منسجم مع الكارو ديالو ومرة مرة كيجغم من كاسو وهو كيشوف فالناس وهاد المجتمع لي قالت عليه قسم ديالها .... هادوك الكوستاراات الفخمين هادوك السيغارات .... المشروبات لي فالكيسان لي غير من لونهم وكاسهم كيقدرر يحدد اشمن ماركة هوما بقوة ما خدم فالبيران ملي كان صغير .... وكيقدر يعرف شحال هوما غاليبين ... لي قرعة وحدة فطبلة من هادوك .. قادرة تحقق احلام شاب فحومتو هو ..... الشبااب هنا متحرر لاقصى دررررجة !!!! عايشين حياتهم بلا حدود !!! ماعندهم حتى شي حاجة كتشبه لعقليتو هو لي كبر فيها فحومتو ومجتمعو ... تاحاجة هنا مكتشبه ليهم .....
نفت الدخان نافت معاه تنهييييدة طوييييلة تاسمع الكرسي تجر حداه ..... كانت جلسات نفس البنت لي غمزات للبارمان وغير بحركة بيديها قدر يفهم المشروب لي بغات ... وشافت عند اصيل لي جالس فجنبها ولي كيشوف قدامو ....
كاطلعو وتهبطو وتوزن صدرو العريض ....وبلا متحس ضحكات ضحكة كلها شهوة ورغبة فانها تقيسو !!.... بدات كتشوف لوجهو عن قرب .... هاديك الحروشية لي بانت ليها من الكرسي ديالها قبيلة غير مزادت بانت كثررر وهي قريبة ليه بإنشات قلال .. لا وزادت تخلطات بريحة هاداك الكارو .....
سهات فعينيه تاعضات تحت شفتها ... كتقول ميمكنش يكون واحد ببحال هاد الشخصية كاملة حقيقي !! ....
حط البارمان مشروبها حداها ... خداتو كضورو فيديها وتخلط الثلج ... رشفات منو .. ومسحات بسبابتها تحت شفتها ونطقات مخاطباه .......
- علاش گالس هنا بوحدك ؟!
ضار براسو عندها طلعها ونزلها وهز يدو لي فيها الكارو بمعنى راه كنكمي !!!!! مادواش ولكن الحركة والنظرة كانو مسموعين وهي تبسمات باغراء ....
- اممممم .... ( ردات شعرها ورا وذنها بفضول فين غيمشي مور مغايكمي ) ومنبعد !!!!
اصيل : ( كيشوف قدامو ) كيجي واحد بحالك كيقاطعني ....
البنت عضات على شفتها ومعدتها تقلصات من نبرة صووووتوو شحال ثقيييلة ورخمة وبحوحة بالتدخين ... حساتو رجل بكل معنى الكلمة ... فلحظة مكرهاتش تكون تحتو ويمارس عليها سيطرتو كللللها ..... لاول مرة كتشوف راااجل بحال دوك الرجال لي كانو كيعاودو عليهم وكااااانو فالحرب والاستعمار ... بنفس هاديك النخوة والهبة والحروشية .....
- شفتك جالس بوحدك .... وقلت نونسك ....
مجاوبهاش حيت هاد الحركات بنسبة ليه شي حاجة ملها فالبيران .. الحاجة الوحيدة لي خلاتو ميحسش براسو فعالم غريب هي هادي .... حركة كيديروها بنات البيران الرخاص .. وحتى بيران الباطوات الغالين .. وداك البنت ضحكات وشافت عند البارمان
- جيب ليه تاهو بحاالي ..... ( شافت فاصيل لي كيكمي مشغول مع الكارو كيشوف قدامو وتبسمات غارقة فعينيه ) وعلى حسااااابي ....
البارمان حرك ليها راسو بواخا وهي قادات جلستها على داك الكرسي وشافت لكاس ديالو .....
- مكتشربش ؟
اصيل هز كاسو جغم منو وحطو وشاف فيها بنظرات فيهم الانزعاج ....
اصيل : اش باليك ؟
البنت تبسمات تابانت حفرة فحنكها وجاوباتو
- قصدت .... مافيهش لالكول ....شنو مخليك ماباغيش تسكر ؟؟؟
اصيل شاف بعينيه للبارمان لي حط قدامو كاس دالبيرة بالرغوة ديالو ... وشاف فيها ....وهي نظرة لي علاها من الكاس لعندها بهاديك الثقالة ....فشلاتها من داخل وحاولات تتحكم فراسها
اصيل : وشنو لي غيخليني نبغي نسكر ؟
- هاد الهم لي راك هاز دابا مثلا !!! ( اصيل علا فيها حاجبو ) ماتشوفش فيا هاكاك .... راه اي واحد يرد ليك البال شحال من تنهيدة درتي ملي جلستي على هاد الكرسي غيعرف بلي راك هاز شي مشكل فراسك ... ( حطات صبعانها الرقاق لي مزينين بخواتم وجيل ازرق فوق من رجلو ) نقدر نعاونك ..... تيق فالغريب ... حسن من القريب .....
اصيل نزل عينو شاف ليديها ورجع تنهد وناض تاطاحت يديها و جبد من جيبو لور بزطامو وحط الفلوس " خلاص الكوكتيل وخلاص هاداك الكاس " حطهم تحت من كاس البيرة وهي كتشوف معاه ورد البزطام لجيبو لور
اصيل : كاين واحد بنادم سميتو پسيگولوك ... حسن من هادو بجوج لي قلتي ... وداخل سوق راسو ملفوق .....
طفى الكارو ديالو فالطفاية وخلاها وزاد طالع فدوك الدروج وهي تابعاه بعينيها ذايبة فكل تفصييييل منو ، ونزلات عينيها للفلوس لي تحت الكاس لي لقات يد البارمان هزاتها وشافتو رجع تبعو بعينيه فين غادي باستغراب لي جات الفلوس نيشان وواخا مقاليهش شحال !! .... ودخل وهي عينيها باقين عاالقين على دوك دروج لي طلع منهم .... منين جا راجل بحال هذا ؟ شكون هاد الراجل لي ملفت وفنفس الوقت مكيلتفتش ! شكون هاد الراجل لي ثقيل فنفس الوقت طاااغي !!! شكون هاد الراجل لي كيكمي كارو عادي وكيشرب كوكتيل بلا ألكول فنفس الوقت عارف ثمن البيرة شحال ! شكون هاد الراجل لي قال جوج كلمات بحالا قال بزاااااف !!!!
حسات براسها كولو تخربق معاه ....وهي تسمع وصلها مسج فيه " واش متأكدة ؟ " وهي تطلع فهادوك دروج تابعدات على صداع وبدات كتصوني وهي تجاويها .....
- اه متأكدة .... وزدت تأكدت ....
- باش عرفتيها ؟ راه هادشي لي كتقولي ميمكنش ...
- الباطو كااامل عارف بلي الكابيطين عندها ضيف هنا ... وهو الوحيد لي البارمان هضر معاه بسمييتو .... سميتو أصيل .... وخا كون مشفتش هادشي كامل .. غير نشوفو نعرفو بلي هو ضيفها .... الكابيطين مغتبقاش ثمنية وعشرين عام وهي كتقلب بين الرجال باش تدي واحد عاااادي .... ( كتفكرو ) اليوم انا عرفت علاش الكابيطين تسنات ثمنية وعشرين عام .....
- ونت باش عرفتي بيناتهم شي حاجة ونتي كتقولي ضيف .. راحنا كنهضرو على قسم لي كنعرفها كتر منك .... مستحيييل دير علاقة مع شي واحد
- ختي سمحيلي ولكن هدا ماشي اي واحد ... هذا يخلي الرا•هبة تحط الص•ليب وتبعو .... يخلي السكران يصحى اصاحبتي ....
- دابا واش انا مخلصة عليك باش تبعيه ليا هو ؟؟؟؟ درتي اش قلت ليك ؟؟؟؟
- مدرت والو .... درت راسي قبيلة بغيت نتصور فلاكابين مخلاونيش ... وسولت هاديك صفاء فوقاش تجي حيث زعما انا معجبة باغا نتصور قاتليا تالربعة دصباح .... دابا نشوف كيف ندير .. وغالبا مدام غتسالي مع ربعة دصباح غتمشي تنعس ... والا ماشي اليوم راه غذا .. متخافيش ....راه مغانزل فايطاليا تاندير خدمتي .....
- راه والله لادوزتليك شي ريااال لكونط ديالك تاتصيفطي ليا تصاور لي بغيت .....
- وصافي متفرعيش ليا كري على جوج دريال .. راه غناخد بيها غير صاك اصلا ....
اصيل طلع ديريكت لشومبر لقى راسو ماعندو مايدير لفوق ومشى دخل لجناحو حيد الفيست لاحها ولاح الباكية دالكارو فوق طبلة صغيرة .... ودخل لدوش بروصا سنانو ومشا للسرير ينعس ... حس بعينيه ثقالو خصوصا انه دوز ليلة البارح سهران فالصيادة .. واستسلم للنعاس حسن ميستسلم لافكارو السلبية ......
قسم وصلات الربعة دالصباح دخلات مسخسخة للباطو ... مشات ديريكت للاكابين قادات خطوط فرنسا لي غايقلعو ليها مع تمنية دصبح .... وخلات غير السو كابطين وخرجات كتعوج فراسها وعينيها باين فيهم العيا ... الشابو فيديها واليد لخرا كترخي شعرها غادا فالكولوار وهي تجي صفاء تابعاها كتجري موراها .....
صفاء : لادوش واجد .... دخلي خوديه ورتاحي نعسي .... غذا غيخصك تكوني مع السبعة والنص فلاكابين ... الفطور مع ستة ونص ....
قسم : فين اصيل !
صفاء : موسيو اصيل هادي ساعتين باش دخل لسويت ديالو معاودش خرج غالبا غيكون ناعس دابا ....
قسم : فين كان ملي مكنتش ؟
صفاء : قلت ليه نضورك الباطو كيف قلتي ليا ورفض ... بغا بلاصة يكمي فيها وقتليه يهبط لبار ... جلس تما تقريبا نص ساعة ومشا لسويت ديالو ...
قسم : جلس بوحدو ؟؟؟؟
صفاء : مادخلتش للبار امادموزيل ... ماشفتوش .. واش تبغيني نتبعو ليك ؟؟؟
قسم : ( وقفات مدة كتفكر و رجعات تنهدات وكملات طريق ) لا ....
خلاتها ودخلات لكولوار ديال لي سويت ومشات مباشرة باتجاه السويت ديالو ... عطاتها صفاء الكارطة الثانية حلاتو وصفاء بقات برا وهي دخلات بعد ما سدات الباب .... مشات بشوية باتجاه الابجورة عند راسو شعلاتها وهي ترخي ملامحها بابتسامة ملي بانليها ناعس على كرشو ... ظهرو عرياااان وقالب وجهو لجنب .. شعرو كولو مرررربل والكوفرلي غير على نصو .... المنظر لي قادرة تعطي لي قدامها ولي وراها وتصبح عليه كل صباح ....
خدات نفس وجلسات بشوية فجنبو كتكسل على داك السرير .. العياء كان كبيير فعينيها لي لدرجة بداو يبانو هالاتها ... وهزات يديها كتخلل خصلات شعرو بين صبعانها مبتسمة وفرحانة لي راه معاها ....
قسم : ( بهمس ) واخا نبقى نقوليك كنبغيك حياتي كاملة ... عمرني غنقدر نوفي حق داكشي لي كنحسو من جيهتك ..... نتا مكنتيش غير راجل دخل لحياتي ... نتا كنت الراجل .. وكنتي الحياة .... نتا بجوج .... خليتيني ليوما نحس براسي بحالا اول مرة ناخد شي طراجي ( تكات كثر على الكادر دالسرير وتنهدات ) بغيتك تكون فخور بيا حتى نتا ونوريك بلي انا كيفما قادرة نهز مسؤولية هاد الناس كلهم ... قادرة نهز اي مسؤولية تعطات ليا .. بغيتك تعرف بلي .. فجنبك مراة ... غتبقى تحارب معاك حياتها كاملة .... بغيتك تعرف بلي فجنبك مراة كتعرف تجابه المواج شحال ماعلاو وصعابو ... بغيت خطوة منك وخطوة مني ونرسمو مستقبل كيبغينا بجوج .. بيدينا بجوج .....
خدات تنهيدة وهبطات بشوية باستو فكتفو .... تقلبات للابجورة وطفاتها .. وناضت مشات حلات الباب ومشات باتجاه جناحها .... لقاتهم موجدين ليها الدوش بالورد والخزامة ... حيدات حوايجها ودخلات فالبينوار معلية راسها لفوق طالقة يديها للجنب مغمضة عينيها كتحاول تترخى من كترة الوقوف لي واخا مخصصين ليها كرسي مابغاتش تجلس بقوة الستريس .. تاتشققات وسط هادوك الملامح العيانة ابتسامة حمااااسية كتناقض داك العياء كامل .... ابتسامة ان غدا مغتخدمش بالليل وغادوزو مع اصيل هنا .... بوحدهم.....
∆فالقصر
الساعة العاشرة صباحا
مكتب أسد ...
جالس قدام البيسي ... بسيرفيت خفيفة سروال غري وتيشورت بيضة نايك .... لابس كاسكيطة وغير من قرعة دالما لي محطوطة فوق البيرو كان واضح يلاه طلع من لاصال .... داز يشوف الايمايلات عاد يطلع يدوش ... يدو كطابي على الكلافيي وكيشوف فالشاشة مركز ، تاسمع دقة فالباب ... موراها تحلات وعلا عينو .. يلاه غينزلهم على البيسي هو يرجع يعليهم فاش شافو داخل ....
كان شعرو فازك نازل على عينيه ولابس غير بيل سماطي و شورط كحل وعينيه زرقين من تحت ودخلو فجفونهم بقوة السهير ...
وسيم : بابا ... مسالي ؟ نقدر ندخل !
اسد تنهد ورجع بالكرسي لور كيشوف فيه
اسد : دخل اولدي دخل ....
سد وسيم الباب وجلس على الكرسي مقابل معاه ولكن مكيشوفش فيه كيشوف غير قدامو مرة فالارض ومرة فالصورة لي على البيرو
اسد : كنتي فالبحر !
وسيم : اه، سورفيت شوية ... ( قرب لبيرو حط عليه يدو وهز عينو فباه شاف فيه ) ساليتي ليا الانسكريبسيون فافران ؟
اسد : ( كيشوف لملامحو كيفاش دايرين وكيجاوب منهد ) تقريبا
وسيم : بغيت نمشي .... ( اسد علا حجبانو ) يلاه نولف الجو تما قبل ماتبدا القرايا ....
اسد : ( علا حاجبو كتر ) اهاه ... ونتا اولدي ... مكتعرفش افران ؟؟
وسيم : كنعرفها فاكونص معاكم .. ماشي نعيش فيها .. ( كيلعب بعينيه فكاع الاتجاهات ) مكنعرفش البلايص لي فيها .. كنعرف غير الدار .... بغيت نعرف ليكلوب ديالها لي غيسطو لي كافي ... فين نقدر شوية نتنفس ونخرج ونلقى راحتي واخا مدينة قد بيتي ... ولكن ماعليش ( تنهد ) غنتعايش شوية بشوية ....
اسد : وسيم .... ( وسيم هز عينو فيه ورجع نزلهم ) علي راسك نشوف .... ( علا راسو فيه ) مالك ؟ مناااش هرربان ؟؟؟؟ مزال مفهمتش شنو لي كيخليك تهرب .. شنو دايرين ليك حنايا تاكدوز هاد ثلت شهور دالعطلة بحالا دايرين ليك عقوبة !!!!
وسيم : ( كيلعب بعينيه فجوانب ) لا ... م مكاين والو .. غ غي غير قنطت .. قنطت بين الدار والبحر ..... ( علا فيه عينيه ) بابا انا راه توحشت الليل .... ملييييت النهار والشمس ....
اسد : ( علا حجبانو بجوج ) الليييل .... علاش هنا مكتغربش الشمس !!
وسيم : كتغرب عليا وسط دار .... بابا انا تاحد مكاين هنا فلاج ديالي باش نتفاهم انا وياه رااااه قنطت .....
اسد كيرمش فيه ... هو عارف ولدو مراهق وداز من هاد الفترة مع جود ، وبدا غير كيحك فجبهتو ويتمنى فوقاش دوز هاد المراهقة على خير وشاف فيه
اسد : واخا ... واخا اولدي ..... غا هو ملي غادوز ليك هاد المراهقة لي كنبانو ليك فيها مكنفهموكش ..... عنداك ماتلقى تاحد هنا ..... ( وسيم علا عينيه فيه واسد رجع لكرسي لور براحة ) سير لافران ..... ضورها تساراها .. قلب اسيدي على هاد الليل عندهم كيداير .... غا هو ... بلا ميقول ليك دماغك .... غانديرها ببابا ..... ليليميت ديالك راك عارفهم شنو هوما ... عيش الليل انا مادخلنيش .... ولكن تلاتة حوايج ... ثلاتة حوايج لي غنركز عليهم ..... والباقي سوقك هاداك .... ( بدا يحسب بصباعو ) لول .... الأوسمة ديالك مايضيع فيهم تاواحد ... الثاني .... الڤاليداسيون ديال لي موديل ... الثالث .... هو ادمانك ..... والبقية اولدي .. الله يجعلك نتا مادخل لدار تالعشرة دصباح ... الله ينعل لي يهضر معاك ... الا كانو هاد الخطوط الحمرة بثلاثة ماكاتفوتهمش شغلك هاداك ..... انا ماتجيبليش مشكل مع البروتوكل و ڤاليدي ليا ليمودل .. ومنشمش ريحة لادروگ فحياتك .... وعيش الليل كييييييف بغيتي ....
وسيم : ( نزل راسو كايتنهد مزير يديه) كون هاني ...
اسد : انا هاااني ... مدام غيكونو الكارد معاك ... ومدام غنعرف كولشي عليك ... ومدام غندير ليك تيست كل سبت ملي نجي عندك ...... ( وسيم مهبط عينيه محاملوش يناقشو فهاد الموضوع وحشمان منو ) ومدام كيوصلني اي حاجة عليك من داك لينيڤيرسيتي .... انا هااااااني ....
وسيم : ( علا فيه عينيه بذبوول بحالا باغي يبكي ) فوقاش نمشي ؟؟؟؟
اسد : بعد غذا ....
وسيم نزل راسو واشار ليه بالايجاب وناض ماشي بجهة الباب يلاه قاس البواني هو يوقفو
اسد : وسيم ( وسيم وقف فبلاصتو عاطيه بالظهر ) هادشي لي راك عايش فيه اولدي .. سميتو اكتئاب المراهقة ودزنا منو كااااملين .. عنداك يمشي يقولك عقلك غير بوحدك لي كتعيشو ولا غير بوحدك لي حياتك منعرفت مالها ..حياتك بيرفكت ... وعينيك ملي كنتي صغير كانو زوييينين اولدي ... الا زراقو ليك من للتحت دابا ..غا حيت نتا كتبانليك حياتك معذبة ومافيها تاحاجة زوينة وباك صعيب معاك وخوك مكيتفاهمش وخواتاتك بعاد على عقليتك وماماك خوافة بزاف ..... ولكن نهار تفوت هاد المرحلة ... غيبان ليك باك شحال كيخاف عليك وخوك شحال راد ليك البال و خواتاتك شحال كيبغيوك وماماك شحال كتهتم بيك ..... راه غير المراهقة هادي اولدي ..... على الله دوزها على خير وترجع ليا داك وسيم لي كان قالب ليا الدار بالغوات ( وسيم غمض على عينيه مزير عليهم ) ولي كان غير كيسمع الطموبيل ديالي كيخرج عندي كيجري يشوفني اش جبت ليه .... ولي كان كيدخل بتخبية مني عند رجاء تعطيه يصاوب بيسكوي ويجي يعطيهليا فالبيرو ناكلو وميقولش ليا هو لي صاوبو ..... رجعلي ولدي لي كيسحابليه بلي باباه مغيبغيهش يدير شي حاجة بغاها .. معارفش الا باباه محتم عليهم يقراو المناجمنت اصلا غااا باش ينجحو فااااي حاجة هوما بغاوها .. حيت المناجمنت هو الساروت لكاع احلامكم لابغيتو تححقوهم ..... الواليدين هوما لي كيعرفو مصلحتكم .. داكشي علاش ... ختاريت نبكيكم .... قبل متبكيوني ..... ( كيشوف فيه كيفاش واقف عاطيه بظهرو وكتافو كاتحركو ) غابكي اولدي دابا بكي .. اللهم تبكي دابا .. حسن ماتبكي ونتا عندك ثلاثين عام وحياتك ضايعة ورا نزوات المراهقة .....
وسيم حل الباب وخرج بزربة مشا كيجري لدروج واسد تكى راسو على الكرسي مغمض عينيه بتنهيدة ورا لوخرا .. وكيحس براسو ثاني تعمممررر بزاف .... قسم واصيل .... ماتش دقدس ... قراية جود الجديدة والسفر ديالو لليابان .... ووسيم ..... مشاكل الخدمة ..... الخبار لي جاتو من الدورية على لؤي ولي دار جهدو كامل يصلحها ومبغاوش ..... حاس براسو تنفخ ليه بلا قيااااس تاسمع الباب تحلات وخدا تنهيدة اخيرة كيحاول يجمع بيها ملامحو حيت الوحيد لي غيحل بلا مايدق هي لامار ....
طلع فيها عينيه وهي سدات الباب وجايا باتجاهو بكسوة خضرة طويلة خفيفة يديها حريريين وثوب رقييق كيبين درعانها ....وصدايفها ذهبيين ... وجلسات على طرف البيرو مقابلة معاه.....
لامار : صباح الخير .. حسابتني باقي ماطلعتي تاقالت ليا رجاء راك هنا فالبيرو .....
اسد : ( طول فيها الشوفة وهي كتشوف فيه بابتسامة وهو هز يديها كيعلب بصبعانهم وهي مراقباه تاعلا عينو فيها ) حبيبتي .... نسافرو ؟
لامار : ( جاتها الضحكة ) هههه .. فين ؟
اسد : ( عوج فمو لجنب ) معرفتش .. لشي بلاصة غير انا وياك ... طيط اطيط .... محتاج ديري ليا تاني داك المساج ديالك لي كينسيني فالدنيا كلها ..... فشي بلاصة بعيدة على هنا .....
لامار : ( تبسمات ليه بحب وزادت شدات فيديه ) حبيبي ماعندي تامشكل ... نقادو ليها شي نهار ان شاء الله
اسد : مبغيتش نهار مقادنيش .. بغيت ثلتيام ولا ربعيام يالااااه نرتاح شوية
لامار : مالك ؟؟؟؟ طارية شي حاجة !!!
اسد : ( تنهد ) لا .. مشاكل دالخدمة ....
لامار : اوا نمشيو مجموعين حسن .. نتسناو قسم تجي ونمشيو قبل ميبداو وسيم وقدس القراية
اسد : واش انا كنقوليك باغي نتهنى من المشاكل ونتي باغاني نديهم معايا ؟؟؟؟؟
لامار : ( ضرباتو لكتفو ) دابا انا ولاااادي مشاااكييييل ياك
اسد : ولادك نتي ماشي غير مشاكيل ... هوما داك التخربيييييل ديال المشاكيل ..... ( رجع للكرسي لور وحيد الكاسكيط لاحها كيمشط شعرو بيديه للقدام ) قسم راغه ففواياج ... وسيم باغي يمشي لافران ... جود غيمشي لرباط يقاد وراق قرايتو الجديدة والفيزا ديالو لآسيا ... وقدس راه مغتساليش هاد السيمانة من ليشوفمون ..... ولادك مشغولين ممساليينش ليك .... ياتبعيني يانمشي نجيب شي سكريتيرة ديالي
لامار : ( ميقات فيه ) واباااااز ... سييير دييها نشوف يلاه .. سيييير ...
اسد : هههه اش غاديري كاع ؟
لامار : مغاندير واااالوو والله منوسخ يدي .. ( ردات شعرها لور بغرور ) الحمد الله كبرروووو ولادي لي يدافعو عليااااا ...
اسد : ههههه .. وشنو دابا تمشي معايا ولا تجلسي مع ولادك ؟
لامار : قوليا بعدا ... علاش وسيم غيمشي لافران دابا ؟؟ ياك مازالا القراية
اسد : وسيم قنط .... مكتعرفيهش هو كيداير .. بغا شوية دالحرية ...
لامار : مالنا شنو محيدين ليه ؟ ياك مكايقوليه تاحد تا فين ماشي ؟
اسد : مامحيدينش ليه ولكن يمكن كيحس بينا خانقينو .. منعرف كيفاش كيفكر دابا ..
لامار : الله على جود الثاني .... ماقلت تاكبر جود حيد منو هاد القاعيدة .... هذا بعدا كيشاور هداك كان كيصبح غا كلبو كينبح بوحدو ..... يطفي تيليفون ويزيد
اسد : انا مبغيتش نخنقو بزاف ... حدودو راه عارفهم .. غذا عندي شي شغال ونتي قضي اومورك .. وبعد غذا نديوه لافران .... نجلسو معاه داك نهار نأسطاليوه ونمشي نهضر مع لينيفيرسيتي فاص افاص .. وبعدها نسافرو انا وياك نمشي نقلب فين نحييد شوية ديال الطاقة السلبية نكمل هاد القراية ديالهم لي غاتبدا تاني ....
لامار : ( علات يديها لشعرو كتمسدو بصبعانها لور ) لي عجبك انا معاك ... فين مابغيني نمشيو نمشيو ..... وداك الهراب غير بلاتي عليه
اسد : خليه على خاطرو متهضريش معاه فهادشي .... خليه يمشي يرتاح شوية .. وتا باش منزيدش نخنقو فالويكاند نمشيو حنا عندو بلا مايجي هو .... وسيم راك عارفة طبعو وملي جا وهو كيلقى الدار عامرة وتخزن فداك البيت بزاف تاقنط ... موالفين كنسافرو ونتحركو وهاد الصيف داز مشارجي بزاف ...
لامار : تانا لاحظتو بزاف قنط هاد ليام لخرا .. كندخل عندو ايما كنلقاه ناعس ولا كنلقاه فالبحر ... صباح عاد شفتو شوية هضرت معاه ولكن كيعطي الكلمة بالعبار ... وكيف كتقول نتا ديما .... ثلث سنين دالمراهقة ولادنا مكيكونوش ملكنا .. كيكونو ملك افكارهم و هرموناتهم لي كيبداو يتبدلو ..... دازت منها قسم ( جاتها ضحكة ) عاقلة قسم مراهقتها دوزاتها فلاطوليي كترسم هههه لي جاها جاها على الصباغة ... جود دازت ليه غير موناكو و بيران كيدخل تالربعة دصباح كيميل و يقلب الدار بالضحك .... و قدس دوزاتها موسيقى وقوة الصحابات وراه باقا فيهم يلاه كنحس بيها هاد الصيف بدات تقرب شوية لينا وبدات تفوت منها .... ووسيم هاهو جا دورو غا وسيم حسيت بيه جاتو ديپريسااااتو بزاااف .. طفااااتوو
اسد : ( تنهد كيدوز يدو على لحيتو ) دابا يدوز كولشي .. دابااا يدوز ......
فجناح قدس ....
ناعسة مخشية بين المخاد .. الكاسك مليوح حداها وشعرها كولو مزلع حداها مربل .... بيجامة حريرية زرقة لاصقة على مؤخرتها لي كتبان كلها تحت الشورط القصير .... رجلها مليوحة ومدلي منها خلخال فضي بنجيمات صغار ....
تحلات الباب .... ودخلات رجاء كيتسمع غير طالونها مع انفاس قدس .... هزات التيليكوموند وعلات هاداك ريدو وبدا يوضاح الجناح وقدس بدات تكمش فعينيها وتنين وتخشى ففراشها ... و رجاء بكامل اناقتها .. تسريحة مرتبة لور خلات بشرتها تتجبد ويتخباو شوية دوك تجاعيد ... شوميز كري مخشية فهاديك لاجيب وقوام رشيق .. جايا باتجاهها
رجاء : مادموووزيل قدس ... ماااادمووووزيل
قدس. : ( كتزيد تخشا فالمخاد وتنين بغضب باغا تنعس) اممممممممم
رجاء : هاد المرة طلعت انا شخصيا حيت مبغيتيش تفيقي للسيدة .. مادموزيل راه عندك ليشوفمون خاصك تنوضي .... الكوتش كتسنى ....
قدس : ( بصوت ناعس من وسط المخاد ) قوليلها تاااالعشية
رجاء : مايمكنش امادموزيل ...... راها لتحت كتسنى ....
قدس : ( بتذمر ) رررجااااااااء
رجاء : مادموزيل .... الى مبغيتيش راه غادي نضطر نقولها لمادام لامار ...
قدس بدات غير كتنفخ وعلات راسها مصغرة عينيها لي باقين كيتصلقو بنعاس وشعرها كولو مربببل فوق وجهها وكتشوف فيها
قدس : صافي ..... انا نضت .... نضت
رجاء : الفطور راه واجد ... متعطليش امادموزيل والا غنعاود نطلع .....
خلاتها وخرجات .. غير تسدات الباب قدس طاحت ثاني على المخاد كتكمل نعاسها تابدا يقلب صوت تيليفون هاداك الجناح وناضت ثاني مخسرة ملامحها وشافت لطابل دونوي هزاتو وهي طلع ليها سميتو وجاوباتو ولاحت تيلي فوق المخدة وتلاحت تاهي فوق المخدة مخلياه تحت وذنها
قدس : ( بصوت ناعس ) اااش بغيييييتي
لوؤي : ( كيضحك وكيضور فراسو ) بغيتك غير تصبحي على صوتي باش يبدا نهارك زوين .....
قدس : امممم قول نتا لي بغيتي نهارك يبدا زوين
لوؤي : لا .. نهاري انا راه قرب يسالي ... بديتو مع الستة دصباح .. مبغيتش نفيقك وبديتو بلي عطى الله ....
قدس : ( بصوت ناعس ) امممم
لوؤي : ماشي هاد الوقت خاصك تكوني مع الكوتش لا ؟
قدس : ( بغضب ) واش سوقك سووووقك ؟؟؟؟ يااااا على !!
لوؤي : ههههه ... حلفي بالله تاكتصبحي ديما بحال هاكا ؟؟؟؟؟
قدس : مالي كيجيتك؟
لوؤي : قطييطة بظفارها .... حلوة ديلمك ......
قدس : داباا اش بغيتي اش يغيتي ؟؟؟
لوؤي يلاه غيجاوبها هو يلقى دوبل ابيل من عند نيكولاس عارف اتصالاتو فصباح الا وكتكون شي حاجة مهمة ....
لوؤي : انا احبيبتي شوية ونعاود ليك ..
قطع عليها وقدس كمشات ملامحها وناضت بزربة كتشوف للحيط قدامها .. هذا علاش قطع بهاد زربة ؟؟؟؟ مالو ؟؟؟
لوؤي قطع على قدس هو يلقى نيكولاس قطع .. وشد ليمن وقف وبدا يصوني عليه تاجاوبو ...
لوؤي : نيك !!!!
نيكولاس : يلاه لقيتيني غنعاود نعيط ... ماعلينا .. اش درتي ؟؟؟
لوؤي : تاجديييييد ... درت شوية دلونكيط لبارح فواحد البار كيجلس فيه هنا ... وهانا كنتسناه يجي ......
نيكولاس : غاخلي كولشي ورجع لواشنطن
لوؤي : علاش ؟
نيكولاس : موصلكش الايمايل ؟
لوؤي : لا ... مزال ماحليتش اصلا انا لابواط الصباح
نيكلاوس : اوا حلها .. راه العميد جمعنا فاجتماع غذا فصباح مع العشرة خاصنا نكونو فالدورية .....
لوؤي : ياك قلتي ليااا مزال اصاحبي ؟؟؟؟
نيكولاس : وداكشي لي كان .... ولكن دابا قالك ضروووري غدا فصباح مع العشرة نكونو تما كلنا حنا لي وصلو لينا ليزيمايل .... ومدام كاين انا وياك فقسم الجنايات .. راه غتكون تانتا مدام انا وصلني لايمايل ....
لوؤي : هاد الاجتماعات لي على غفلة مابغاوش يساليو !!!! واش واشنطن انا عندي فالضورة !
نيكولاس : اوا راه صيفط الايمايل البارح واخا تكون فالسما غتوصل ...
لوؤي : عارف علاش !
نيكولاس : ماقال والو ... ولكن روزي قالت ليا على ود سلفادور وعلى ود المافيا لي شاد حتى انا .... يمكن الوالي تعطلنا عليه و غيكون ضغط على العميد ...
لوؤي : ( تكا على الكوسان لور ) فففف مشاكيييييل ....
نيكولاس : مهم .. نتشاوفو غذا .. انا براسي راني فنيويورك غايخصني نسافر ....
لوؤي : واخا .... ( تنهد ) واااخا ....
قطع عليه وبدا يرد شعرو لور ورجع ديمارا طموبيل ومشا .....
اما قدس بقات كتمشي وتجي فالجناح نعاس طار عليها .. ملي دار ليها داك القطعة وهي كتسنى فيه يعاود يصوني وماصوناش والفضول قتلها ومشات دغيا هزات التيليفون بدات كتصوني عليه ..... لوؤي شاف سميتها فالشاشة عاد تفكرها .. الاجتماع نساه .... وهو يجاوبها من الشاشة يد كتصوك ويد كتشوف الايمايلات فتيلي لي وصلوه تاهو ....
لوؤي : قدس
قدس : فين مشيتي ؟؟؟؟ قطعتي عليا ومشيتي بلا تاحاجة . ... معامن هضرتي ؟ شكون جا عندك ؟؟؟؟
لوؤي : هه !!!!! فقتي ههه
قدس : وااهضر !!!!! ...
لوؤي : وفنظرك ؟
قدس : كون كنت عارفة غانسولك ؟؟؟ قطعتي عليا دغيا ومشيتي .. اش واقع ؟
لوؤي : جاتني دوبل ابيل داكشي باش قطعت
قدس : وشكون هذا لي أهم مني ؟
لوؤي : راكي عارفاها بعدا
قدس : شنو ؟
لوؤي : بلي فحياتي غير نتي لي كاينة لفوق ...
قدس : ( علات راسها بغرور ) والا مكنتش غنكوون لفوق غاااا بلاااااش .....
لوؤي : حاطك حدا عمك ومراتو وولادهم متخافيش ... ماتما حد براني ههههه
قدس : ودابا هضر ماتنسيش فياااا
لوؤي : صاحبي لي خدام معايا علمني باجتماع وغيخصني نمشي لواشنطن دااااابا ..... هذا مكان ... يلاه بردي
قدس : وقووول ليا قدس صبري نهضر مع السيد صاحبي .. نتا قطعتي عليا بحال هاكا وخليتيني كنبني ونريب
لوؤي : ( كيضحك على غيرتها العفوية ) زوين مرة مرة تخرجي منك هاد المغيارة لي كتقول ليا شحال كتبغيني ... واخا مكتقوليهاش ليا نتي ... هي مكتحشمش ....
قدس : منيتك ؟؟؟؟؟؟ اشمن غيرة !!!!
لوؤي : ههه سيري سيري ليشوفمون ديالك راه كان خاصهم يكونو بداو مع تسعود خليني نمشي نقلب على شي بييي ايغجون لواشنطن.... هاف اگود داي ماي اوكسيجين .....
قطع عليها وهي بقات غير كتنهد ... وكضرب بتيلي فراسها كضحك كي الهبيلة على كلامو اللخر ..... فلخر لاحتو على السرير ودخلات لدوش .....
فالباطو
الساعة 13:00
بدا كيحل عينيه وسط فراشو ... علا عينيه بشوية لباب البالكون كان ريدو كيديه الريح بزاااف حيت بات مخلي الباب محلولة .... تكعد ونعس على ظهرو كيتفوه ومد يدو هز تيليفونو هو يلقاها الوحدة .... ورجع لاحو كيحك فشعرو .. وشاف للجنب كيبان البحر من البالكون وتنهد كيقول كيغايدوز هاد النهار تاني مامولفش بهاد الفراغ كامل !!! ..... ينعس فدولة ويفيق فدولة .....
ناض راسو كيضرو وكيعوج فعنقو ومشى لدوش دخل ديريكت خدا دوش خفيف يتوكض شوية حيت مكرهش يرجع ينعس بسبب الفراغ .... ولكن خاطرها فوق من كولشي ....
خدا دوش خفيف وخرج لاوي عليه غير فوطة حل الكارطابل ديالو جبد دجين كواحد مكيحملش شي حاجة سميتها شورط كيلقى راحتو غير فسروال ... مكيعرفش يلبس شي حاجة اخرى ، ستيلو رووتيني دجين وتيشورت و فيست و لا كويرة .. جبد معاه تيشورت كري سامپل ... لبس وقاد شعرو لور ولبس ساعتو .. دار بزطامو لور وهز نضاضرو ....
قاد فراشو و خرج لبالكون كيشوف واش يشد ليه تيليفون يسول فسلمى ولكن ريزو لقاه طافي كاع .... خدا نفس من نسيم البحر لي كيضرب بقطرات صغاار مالحين فوجهو .... لقى راسو محتاج قهوة وخرج من الشومبر يلاه سد الباب هو يلقى صفاء واقفة قدامو كيف العادة بكامل نشااااطها تاخلعاتو ..... كانت بسروال دجين أليز وشوميز بمربعات كحلين وحمرين اوفر سايز طاوية ليها كمامها تالدرعانها محلولة كاملة كاتبان تحتها پيل زرقة موسخة بشي طبايع فصدرها خاشياها فسروال كتبان منو سمطة كحلة .... ساعة الكترونية فمعصمها .... نضاضر طبيين وطابليط وتيليفونات فيديها والكيت فوذنيها .. سبرديلة مريحة و بزطام معلق فالسمطة ديالهاا عامر غير شارجورات وخيوط .. وشعرها مجموع لور كوتشوفال غير الگصة طويلة لي مطلوقة على جبهتها
صفاء ( كتشوف فاصيل ) ... كنتمنى تكون نعستي مزيان مووسيو .....
اصيل : ( بابتسامة لبقة ) لا مزيان .. ( شاف معاها ) صافا ؟
صفاء : بييخير موسيو اصيل ( ردات گصتها ورا وذنها ) واخا مموالف حد يسولني هاد السؤال
اصيل : هه!! ( شاف مع جنب الكولوار نافخ صدرو بتنهيدة ورخاها وشاف فيها ) فين قسم ؟ خدامة !
صفاء : وي موسيو ... تفضل معاياا ، قسم وصات على فطورك ... متقدرش تجي حيت راها خدامة دابا ...
اصيل حرك ليها راسو وزاد وصفاء زادت معاه طريق كلها وهي كل مرة تجاوب على اتصال فشكل ..
اصيل : اشمن ريزو خدام هنا ؟
صفاء : هنا خدامين بريزو ديال اوروبا .. البارح كنا خدامين بريزو د اسبانيا ودابا راه قلبنا لريزو دفرانسا ....
اصيل : فين نقدر نلقى لي كارت !
صفاء : فالشوپ ... كاين لفوق ....
حرك ليها راسو تادخلو لنفس الكافي لي شرب فيها قهوة مع اسد يلاه غادي جهة الكونطوار وهي تستوقفو طابلة مقادة جنب الزاج لي كيطل على البحر .. وصفاء مشات لتما ووقفات مبتسمة كتشير ليه بلي هادي طبلتك .....
كانو واقفين ثلاتة ديال ليسيرفور بلباسهم الرسمي وليگات بيضين غير شافوه بداو يخويو القهوة والعصير ... كانت طبلة فطور مشكلة من جميييع النواحي ... ليكيك ... الاجبان ... الفواكه .... المخبوزات ...
صفاء : كيفاش كتبغي قهوتك موسيو ؟؟؟؟
اصيل بقى غير كيرمش بعينيه .. وشاف مع دوك الرجال كيف واقفين متوترين كيتسناو جوابو ورجع شاف مع طبلة لي يمكن ياكلو فيها عشرة ديال الناس محطوطة ليه بوحدو ... ضور عينو على المطعم كان خاوي ... جاتو الضحكة ! واش هادي هي الحياة لي كتقوليه اجي ولفها معايا !!! .... واش فعلا هاكا كيعيشو ... !!!!!
خدا تنهيدة ومشا جر كرسي وجلس وشاف فداك السيرفور
اصيل : غير سير اخويا لخدمتك انا غنقادها راسي ....
هداك السيد شاف فصاحبو باستغراب واشار ليه براسو ومشا وصفاء قربات عندو كتهضر بهمس
صفاء : واش مديرونجينك اموسيو نقوليهم يمشيو ؟ ..
اصيل حرك ليها غير راسو بآه وهي اشارت ليهم يمشيو ووققات عند راسو
صفاء : تبغي شي حاجة اخرى ؟؟؟؟
اصيل : ( علا عينو فيها كيشير ليها تجلس قدامو ) كلسي تفطري ...
صفاء : ( وسعات عينيها ممصدقاش ) ها ؟؟؟؟ انا !!
اصيل : ( جغم من قهوتو كيذوقها كيف دايرة ومن ملامحو واضح معجباتوش مكمل كلامو ) اه معاك نت ... ( علا عينو فيها ) گلسي....
الساعة 13:30
طنجة
فمطعم هادئ باطلالة على البحر .... غداء خفيف و موسيقى هادية ... صوت المواج والنوارس مخلطين بريحة بارفانها وبارفانو ...
قالب راسو للبحر وهي عينيها عليه وحطات كاسها دالما لي جغمات منو وتبسمات ...
بيلي : ثلت شهور وانا هنا ... خليتي تااالنهار لي غنمشي عاد كادوز معايا نهار !!!!!
جود : ( ضور راسو عندها ) راك شفتي بعينيك هاد ثلت شهور كيف دازت
بيلي : شفتي اجود ( قربات لطبلة وهو مركز معاها ) واخا فهاد الصيف طرات ليا اكتر حاجة ماستحملتهاش لي هي موت جدي ومزال لدابا ممتيقاش راه مات ومزال معارفاش كيغاندير ندخل لهاديك الدار وهو مكاينش ... وغانحاول بشي طريقة نقنع راسي بلي راه خليتو هنا فالمغرب مع جدة .... ولكن فالمقابل .... طرااااو بزاف دالحوايح زوينين بنسبة ليا ( بلمعة فعينيها مخلطة مع ضحيكة ) معرفتش واش غتشاركني فيهم تانتا ولا لا.. ولكن انا نقدر نقول على هاد الصيف ... احسن صيف دوزتو ( رجعات لور وربعات يديها ) غتجيك غريبة حيت صيف عامر بالصداع .. ولكن طراو ليا فيه كاع الحواااايج لي كنت هازة ليهم الهم ... دابا غنبدا هاد العام وانا وحدة اخرى .... هم جديد ومشاكل جداد هههه ... ( عضات شفتها كتشوف فيه ) واخا صراحة ماعندي تا مشكل دابا ....
جود : ( حط يدو فوق يديها فطبلة وعينيه مركزين معاها ) هادي فرصة باش تركزي فعامك اللخر وتاخدي لاليصونص ديالك ... نساي عليك دابا كولشي ... فكري فقرايتك ... القراية دابا فكندا مبدلة على امريكا .. راك عارفة كندا مفيهاش شي حاجة سميتها راطراباج .... وتاني ، فرصة تقربي من عائلتك شوية ... التغيير راه زوين ...
بيلي : وفرصة يالاه نستوعب ونقنع راسي بلي الصيف جاي لي غنجي فيه غاتبدل ثاني حياتي لحاجة اخرى .... ( تنهدات) فنظرك اجود شنو هي اكثر حاجة ملي غنتزوج بيك العام جاي خاصني نتخلى عليها ؟
جود : ( خدا فنجالو جغم منو ورجع لور كيشوف تاني لبحر ) الفيغجينيطي ديالك .... " العذرية"
بيلي : ( علات حاجبها وضرباتو لدراعو ) كنهضر معاك دبصح
جود : ( شاف فيها معوج شفتو لجنب) معرفتش ... الحوايج لي كنتخلاو عليهم كيبداو نهار كنقررو نتزوجو داك بنادم ونمشيو نخطبوه .... اما فالعرس مكيتبدل والو .... ونتي مغتخلاي على والو كوحدة مولفة تعيش بعيد على واليديها .. وديجا راك مزوجة غير وسط عائلتك يعني مغدخليش لعائلة اخرى .. مكنشوفش شي حاجة اخرى غتبدل ...
بيلي : ( تنهدات كتشوف فيه ) انا كنشوف بزاف دالحوايج غيتبدلو .... منهم اني غنشارك حياتي معاك نتا ... منهم غنولي نفطر ونتغذا معاك .. منهم نقدر شي صباح نصبح وانا حاملة ! .... منهم اني خاصني نهز مسؤوليتي .. حياتي كلها غاااتبدل اجود الا نتا كتشوف مغيتبدل والو .... واش نتا مامحمسش ولا جاب ليا الله!!!
جود : ماشي قضية حماس ابيلي .. هادي قضية عقليات نتوما مكتفكروش بحالنا .. انا هادشي لي كتهضري عليه وقع ليا نهار الخطبة .. اما دابا راه عندي بحال تزوجتك بحال مزال .... مادامك نتي هي لي غاندي .... فعقلي راني ديتك صافي ....
بيلي : وماكتقولش زعما هاد البنت ممفاهمش معاها بزاف والحياة غتكون صعيبة معاها فالمستقبل !
جود : ( كيضور راسو جاتو الضحكة ) انا ابيلسان واحد بنادم لي عندو شرطة فالعقل .. منين مكيكونش عندي شي مشكل طاري مكنبقاش نجبدو على راسي ونتخيلو ونوض نهز ليه الهم وهو مكاينش ... ومكنفكرش بزاااف شنو غايطرا من بعد حيت ولفت راسي ياربي يهز ليا غا شنو طاري ليوم ... داكشي علاش .. كااالم داااون وعيشي أليييز ....
بيلي : فخبارك بلي كنتمنى شي نهار تعاديني ونولي بحاااالك ؟؟؟ والله تاكنحسدك
جود : وانا مكنتمناش ليك تولي بحالي .... ومكنتمناها لتاواحد ....
بيلي : ( بحنية زيرات على يديها لي كان غايرخيها) مابغيتك تعرف تاحاجة اخرى ... من غير هاد البنت لي قدامك ولي فالصيف الجاي غتخلى على الفيغجينيطي ديالها ههه .... ( بحب كتشوف فعينيه ) كتبغيييك بزاااف .....
جود تبسم بحب .. وهز يديها بشوية لفمو باسها ، ورجعو تايكملو غداهم مناقشين فكاع مواضيع لي غتخص قرايتها وقرايتو هو لي غيبداها فاليابان وهاد العام لي غيودعو فيه بعضياتهم تالصيف جاي ...
سالاو فطورهم وناضو يضربو ضورة فالمدينة بينما وصلات الربعة دالعشية باش يوصلها للمطار .... شادين فدين بعضياتهم ومرة مرة كايسرق الشوفة فيها مبتسم ... كل مرة يشوفها ساهية ويسهى فيها تاهو كايسول راسو واش هاد الشقراء مولات العينين الزرقين .... ديالو ؟ ....
شي حاجة لي كتخصو هو ! كايحسها ان هي و الكاراج ديالو هوما جوج حوايج الوحييييدين لي فملكو .... زير على يديها مواعد راسو ان غايدير لي فجهدو .... ويحافظ عليهم .... يعيا مايصعاب الحال ويطراو المشاكل .... غايحارب تا لآخر نفس .....
عند أصيل
صفاء : ( ضحكات ببلاهة وجمعاتها ) واش متأكد اموووسيو ؟؟؟ مكاينش مشكل ؟؟؟؟ ( اصيل مجاوبهاش غير كايشوف فيها وهي تضحك وجرات الكرسي حداه ) اااهاه علااااش لا ... ( حطات الطابليط وتيليفوناتها حداها كتهضر بزربة على عادتها) اصلا فيا جوع .. فطرت مع ستة ونص مع المادموزيل قسم لي خلاتني نشرب قهوة وانا كنجري موراها ( وراتو حوايجها ) كفحتها كلها عليااا ... ومزال ملقيتش الوقت فين نجلس نتغذا حيت كلفاتني نتسناك فوقاش تفيق ( كتخوي العصير وتهضر ) عرفتي جاا فوقتو والله شكرااا ( عضات فالكيك كتمضغ )
اصيل كيجغم من داك القهوة غير باش ترد ليه مزاجو اماهي بعيدة على لي كيشرب ، وكيشوف فيها مبتسم على عفويتها وطريقة باش كتاكل ... وكل شوية يصوني ليها تيليفون وتجاوب كتاكل وتمضغ وكولشي عندها بزربة .....
صفاء : وي موسيو .. ااه .. اهاه كاينة .. لا ( كتشرب العصير) .. لا لاربع ماكيناش لا .. موسيو ... لا مكايناش ... ( كتكحب وحل ليها الكيك ) ا .. وا خا .. ص صيفط ليا .. صا في صافي نشوفو
اصيل مصغر فيها عينيه على ستريس عايشة بيه وخوا ليها الما مدو ليها وهي كتكحب وحلات ليها الماكلة وشداتو عليه كتشرب
صفاء : شششكرا ....
اصيل : ( هز ليها داك تيليفون وطفاه ) كولي ... منبعد .. وخدمي ....
صفاء : ( وسعات عينيها ) لا مايمكنش ..... راه كيعيطو والا لقاوه طافي ولا دوزت عليها شي حاجة راه تاااكلني
اصيل : الا قالت ليك شي حاجة قوليها ليا .. ( بقات فيه طريقة باش عايشة وخدمتها شحال صعيية ) فطري على خاطرك ....
صفاء ضحكات ليه وبدات كتاكل بشهية وهو اكتفى غير بقهوتو حيت تا حاجة من لي على داك طبلة مكياكلها ومولف كيشرب قهوة هي لولة ... مرة يشوف للبحر مرة يشوف فيها وهي كتاكل وتهضر
صفاء : قوليا اموسيو .. امتى العرس ؟ باش نشوف واش عندها شي حاجة
اصيل : ( جاتو الضحكة بدا غير كيضور فراسو وشاف فيها ) ملي نقرروه غنقادوه معاك وخوي لينا واحد النهار ...
صفاء : واخا موسيووووو .. تاهاكا مزيان ( شافت جيهة كاب كيك محطوط حداه وشافت فيه ) تاكلو ؟؟؟؟؟
اصيل : ههه ( قربو ليها ) لا .. بصحة ...
صفاء ضحكات وهزاتو كتاكل وهو كيتفرج فعفويتها ... كيجغم من قهوتو وكيشوف فالبحر .. كيسول فراسو .. هاهو مجتمعها لي قالت ليه عليه ... وكون كان مشى على خاطرها وهضرتها فلول وماخداش هاديك الريسطو ومضعافش لمشاعرو وفكر بمنطقية ... كون راه دابا هو يكلس فالدار ويضورو بيه الخدم من كل جيه وهي تبقى خدامة تالجوج دليل وتجي عندو !! ..... هادي الحياة لي كانت باغاها معاه ..
بدا كايحمد الله لي منجرفش لعواطفو فلول وفكر فالمستقبل كيفاش غيكون وشافو بعينو قدامو قبل ميدخل فيه ... هنا بالضبط حس بهادوك الكومبات لي كيسني فيهم على حياتو بلي هوما لي نقدو ليه حياتو ، حيت الى مربحهمش هو بصح غايخسر حياتو حتى الى بقى حي !!! .....
حيت هو راجل لي مستحيييييل يقبل على راسو يتقلبو الادوار .. راجل تقليدي كيعرف هو يخدم والمراة تجلس وتدلل عليه ماشي العكس !!!! ... حس بالخنقة وصدرو كل مرة يتنفخ ليه بتنهيدة ويعاود يرخيها .. وشاف فصفاء ....
اصيل : علاش هاد البلاصة خاوية ؟
صفاء : حيت هذا كافي خاااص ... يعني غير ديال فاميلي الاسماعيلي .....
اصيل بقى كيشوف فيها " غير ديال فاميلي الاسماعيلي " !!!! و هو من امتى ولا من هاد الفاميلي بهاد السرعة !!! علاش الاومور كتجر من تحت رجليه دغيا بلا مايحس !
سالا فنجالو وحطو وناض وهي علات معاه راسها وبدات تمسح فمها دغيا بزربة باش تنوض .....
اصيل : خليك .... غنطلع غير لفوق نقلب على الكارطة ....
صفاء : وي موسيوووو انا ناخدها ليك غير خليك
اصيل : .. فطري ... ومنبعد طلعي جيبيها ليا ....
اشارت ليه براسها مبتسمة و هز نضاضرو لبسهم ودار يدو فجيابو ومشا وهي بدات كتاكل بزربة وبشهية كبيرة .... طلع فدروج تاوصل لسطح والريح ضرب فوجهو .... كيف البارح كيف اليوم السطح عامر .... غير هو تبدلو الركاب .. بانو ليه كراسا وطبالي قراب للحديد دجوانب السفينة وجر كرسي وجلس .... واخا داك البلاصة كانت عامرة بالهاراج ديال دراري الصغار والناس ....
جلس تما تاجابت ليه صفاء كارطة وتبع تعليماتها على قبل الارقام ديال السرفيس ... خداها ركبها فيتيلفونو وربطها بالكاطجي ودخل لواتساب ديركيت عند سلمى اتصل بيها يطمن عليها .. لقاها مع صاحبتها كتراجع معاها للباك ... وهضر تا مع الولد لي خلاه فالباب واش ماجا حد .. ورجع حط تيلي والفراغ قتلو بالملل .... كيقول غير فوقاش تسالي هاد السيمانة يرجع لروتينو ....
تاجات عندو صفاء تاني .....
صفاء : موسيو ... شنو تبغي فالغذا ؟
اصيل : ( غير كيضور راسو كيحاول شوية يتعود على هادشي وشاف فيها ) قسم معندهاش بوز ؟
صفاء : معرفتش موسيو .. على حساب داكشي ديال الخطوط ولا منعرفت اش كيسميوه
اصيل : فين لاكابين ؟
صفاء : ( ضارت كتشير ليه وهي ضور عندو ) بلاتي ! واش باغي تمشي عندها ؟
اصيل حرك ليها راسو باه ووقف وهي زادت معاه نزلو مشاو ليها اشارت ليه للكابين وحل بييان جوج كحلين ودخل .... كانت عامرة بناس لابسين اللبسة بحالها بنات وولاد ... ورجال كبار بخبرتهم ... وكل واحد و الرتبة ديالو والشارات ديالو .. كلهم تنحاو للجنب مبتسمين ليه وحانيين راسهم وهو غير كيضور راسو وكيشوف المكانة شحال كادير دالاحترااام !!!!! ولكن هو هاد الاحترام ممقتنعش بيه حيت كيحسو ماشي ديالو وماشي هو لي صنعو ..
تابانو ليه كراسا كبار القدام كحلين جلديين قدامهم بزاااف ديال الاجهزة و البوطونات و الاجهزة اللاسيلكية و السلكية والزاج ديال الباطو كايبيت الطريق كلها قدامهم ... بانت ليه هي الوسط جالسة دايرة كاسك كحل فوذنيها كبير وجارة عندها جهاز لاسلكي صغير مقرباه لفمها كتهضر .... وعلى جنبها جوج خرين جالسين وكرسي لي فليسر خاوي ... ومشا جلس فيه وهي ضارت بزربة عندو .... غير شافتو ضحكات وحيدات الكاسك من وذنيها هبطاتو لعنقها وحطات الجهاز ....
قسم : ( بفرحة ملي شافتو ) اصييييل !!
اصيل : ( كيشوف فيها بفخر وشاف قدامو ) راني عارف ممنوع التكلم مع السائق .. ولكن اش نديرو ( قرب عندها براسو بصوت منخفض ) الا توحشنا هاد السائق !
يتبع..
التعليقات
لا توجد تعليقات بعد، كن أول من يعلق.