محتوى القصة
اريج تبسمات ليها وعطاتها بوسة فالهوا ومشات .... دخلات لبيتها لقات يونس يلاه لبس الفيست ديالو ماشي جهة لي بارفان ضار شافها داخلة من سبور ورجع كيحط بارفان ديالو
اريج : خارج !
يونس : سي ... اخر ميتينغ ندوزوه ونتهناو باش نوجدو نمشيو ...
اريج : داكوغ ... ( قربات لعندو كتقاد ليه الفيست ) حبيبي نتا عارفني خاصني نشوف عمتي والعائلة شوية باش ميبقاش فيهم الحال ... انا غير يمشيو بيلسان واياد ... غنمشي انا ورتاج شوية لعندهم ونمشيو داك ساعة فحالنا ...
يونس : داكوغ ....
اريح : ( تنهدات وتكات حداه على لكوافوز ) كنت عند بيلسان
يونس : ( شاف فيها ) فاقت ؟
اريج : بانت ليا بحالا مزال منعساتش .... ولكن دابا خليتها دخلات لفراشها غتنعس ....
يونس : كيصبحات ؟ سلخها ولد الحرام تاني شفتيها البارح كيدايرة بالدمايات ... واخا نعيا نهضر يجيب ليا بنتي لعندي بيني وبينها خاصو يدير يديه ....
اريج : زعما عاد غنوريك فولادك .... راها صافا شوية دابا .... ماتزيدش عليها تا تتا ايونس صافي ضربها خوها خليها
يونس : شحال قدنا نسكتو ليها ا اريج انا راه عيييت ماااندوز ..... عيت مانقول راه صغيرة وغتكبر وتعقل ..... ياك انا تحرررمت منها غير باش كندير ليها الخاطر تعيش فين بغات .... ياك نبكي انا ومنشوفهاش كتتتبكي .... اش بغات كثر .. راه هاد الفشوش هو لي خرررررج عليها ... حيت كون كنا من لول عاطيينها العين الحمرا مغتخرج ليا هاكا .... حيث عارفاني دير لي دارت مكنهصرش معاها .... اما دابا لااا ... دابا تخطبات لووولد خويا .. مانجيش طيح ليا راسي معاه .... تالهنا والله لاااحنييت فيها مزال .. .
اريج : اودي واش بقات فهادشي راه لي مهدي مهدي وصافي ... هانتاا مكضربهاش ... ولادك كيسكتو ليها ؟ ياك ديماااا عااطبينها ديما سااالخينها دارت عقلها ؟ .. راه لي فيه شي حاجة فيه وصافي ... انا لي قاتلني فيها هي انها هي لي كتبغي تبعد علينا فنفس الوقت فاش كنهضر معاها كنحسها بحالاا عندها الفراااغ ... كنحس بيها مديبريسيا و مكتبينش .... مفهمتش هاد البنت شنوو بغات ..
يونس : هاديك انا عارفها شنو بغات .. هاديك بغات واليدين لي ينوضوو يديوها لحلفة الى شافوها مديبريسيا .. ويصفقو ليها على الفشل ديالها فالقرايا ... ونخليوها دير لي بغااااااات ... عاد غاترتاح .. وهادشي حنايا ماعندناش ... انا نهار لول لي مشينا فيه لكندا وعندنا غير زياد واياد قلت ليك تربية الخاريج ماعندي مندير بيييييها ..... ولكن اش غاندير .... جيت تالعندها وحفات ليا ..... كتبقى فيا .... كنقول خوتها مدوزينها عليها ونتي صعيبة معاها ديما و انا تلقى عندي داك الحنان ... ساعة لي متيحشمش راه متيحشمش وصافي ( قاد الكرافات ديالو ) شنو دابا نعسات .. منشوفهاش ؟
اريج : غير خليها ترتاح العشية وشوفها ....
اشار ليها يونس بداكوغ وباسها وخرج وهي دخلات تدوش ....
اما بيلسان تكمشااات ففراشها ...وهزات بشوية تيليفونها وهي تبان ليها تصويرة خطابتهم كاينة عندها فشاشة ..سالت ليها دمعة على المخدة .... وبلا متحس دخلات كتبات ليه مسج .... فيه فقط سميتو " ! Joud " كأنها كتعيط ليه .. كأنها بغاتو يكون معاها دابا .. بغات تعنقو وتبكي فصدرو وتحس بيديه على شعرها .... وحطات تيليفون وتكمشات تنعس ...
فالقصر ....
جناح جود ...
جالس على واحد كرسي كيلبس الكاط ديالو .. .كان بدجين كحل وتيشورت كحلة .... وروكسي تايضور بيه ..
هز معصمو شاف لساعتو كانت كتشير للعاشرة ..
بقات ساعة وغيجيو تقنيين الكهرباء لي دار معاهم على ود الكهرباء لي غايحتاج فالهيكلة خصها تكون قوية على الكهرباء العادية لي دايزة وغايخصو يدخل كابليات جداد للپوطويات لي تما وهادشي غايخليه يخسر اخر السنتيمات لي بقاو ليه ... ولا كيحس بحياتو عاامرة منهار دخل ليها هاد الكاراااج .... ولا كايحس بمسؤولية كبر .. وحيت عارف ريڤاي واخا تفيقو غيكون ناااااسي علاش باغي يفيق غيطفيها وغينعس .. داكشي علاش نعس معاه روكسي لي كيفيق بكىي ومكيطلق منو حتى كيفيقو .. ولا كيقلب على طرق لي يعوض بيهم ذاكرتو التالفة وكيف قال باباه واخا يعرف يصنع وحدة جديدة ويحاول يعيش ..
كيحس براسو بحال داك الشخص لي فقارب صغير وسط محيييط كيير وكيحاااوووول يجدف بكل قوتو باااش يعيييش ... باش يزييييد .. باش يوصل لبر الامان .. واخا كولشي مخربق قدامو وكولشي مباينش .. ولكن كيحاول يصنع الطريق ....
شاف لمرايا وقاد شعرو بيديه وخرج وروكسي مع رجليه ... هز تيليفون من شارج باش يصوني على دوك التقنيين ... هو يلقى ميساج منها .. دخل ليه هو يلقى غير سميتو مافهم والو !!!! ... شاف لجنب شحااال كيتذكر البارح شنو وقع فيه بالتفصيل حيت لي عرف هو تخاصمو ولقى راسو نسا علاش .. حتى تفكر وبدا كيحاول يتذكر واش هضرو ولا مزال !!!!! غير تقادو الامور فراسو هو يسبق بيها هي لولا صونا عليها حيت الميساج لي كتبات ليه خلعو .... فنفس الوقت غادي كيقلب على سوارتو ..... تيليفون بدا كيصوني بدون جوااااب .... مافهم والو معوج شفتو لجنب ...وصل لثلاتة دالاتصالات والشك بدا يدخل ليه مع دماغو ! ..
ملامحو تجمعو ... ورجع كيشوف الميساج لقاه ترسل مع ثمنية ديال صباح ؟ هادي اش فيقها فهاداك الوقت ! .... ملامحو تقلبو للحيرة وللجدية هو يدخّل روكسي بزربة لبيت ديالو وسد عليه بقا يبان غير راسو من الحديد لي فالباب .... وخلاه وهبط بزربة ، كانو يلاه طالعين ليه بالفطوور وداز حداهم ونزل فالسانسور لباركينغ .. يالاه وصل لطموبيل هو يلقى راسو ماعندوش السوارت وضرب فيها بركككلة
جود : فااااااااك ... اشرااااف .. اشراااااف ( بدا يعيط على لي كيقابل الطموبيلا ) اشراااااف ... ( جا عندو كيجري )
اشرف : وي موسيو جود
جود : ضوبل كونطاكط ديال هاد الطموبيل مافيا مانطلع ...
مشا بزربة يجيبو ليه وهو رجع جبد تيليون كيعاود يعيط ولكن لا مجيب تا دخلات ليه التناوي ديال بصح .. تاجاب ليه الكونطاكط عاد ركب دغياا وطلع لفوق خرج من باركينغ شاد طريق ديريكت لدارهم مكسيري مخلوع وماباغاش يصوني عليهم خايف يكون مواقع والو ويخلعهم فنفس الوقت كايقنع راسو بهادشي انه مواقع والو واخا قلبو بدا يخبط ....
عند قسم ...
خارجة فكولوار طويل لابسة سبور ، سروال كولون زرق لاصق على طايتها ... و لي سوتيان ديالو مزيرين على بطنها المشدوووودة و فوقها جيلي لابسة غير القب ديالها تاهي محلولة .... البانضة فيديها وسبادرين .. كتمشى وتشرب من قرعتها دالما و الكاسك دالموسيقى فعنقها ... و صفاء تابعاها بطابلييط كتجري موراها باش يلاه توصل نيشان مع خطاويها ..ذاااتها كلها عرررقااانة وواضح بلي طرينات بزاف غير من النهيج ديالها ...
صفاء : صافي امادموزيل تقدري دابا تمشي ترتاحي ... موسيو اسد راه عيط ليا ولغا ليك كاع المواعيد لاخرين حيت غيخصك تنعسي باش بليل تكوني اون فوغم ....
قسم. : ( هزات عليها الفوطة لي هازة ليها وبدات تمسح جبهتها وصدرها كولو كيلمع بالعرق والما لي خوات عليها ملي كانت كتشرب بسبب الحر لي كتحس بيه ) لا .. وجدي ليا الكوستيم غنخرج من دوش نلبسو ... داك الاجتماع لي هضرت عليه لبارح مع السيد خاصو يتعقد دابا ...
صفاء : ولكن امادموزيل راه نقدر نأجلو ليك
قسم : ( وقفات مخنزرة فيها ) واش انا قلت ليك أجليه ؟ انا باغا نخدم اليوم ماعندي مانأجل ونسطوكي عليا .... عقدي داك الاجتماع ...موراها قادي الامور دشوتينغ لي مكملناهش البارح ...
صفاء : ( وسعات عينيها وهي مشات بقات شحال واققة فلخر تبعاتها كتجري ) ووولكن امادموزيل بزاااف عليك غتسالي حتى لثلاثة ديال للعشية ونتي ربعة خاصك تسااافري ..
قسم : ساعة كافياني نلبس حوايجي ....
صفاء : ووولكن ( قاطعاتها بانفعال معلية حاجبها )
قسم : صفااء غنبقاو نعاودو فالهضرة ؟؟؟؟؟؟
صفاء : ااء ... ا ان اقلت زعما ...و .... ومعاياش تنعسي ؟؟؟؟
قسم : واش انا مولفة نعس ؟؟؟؟؟
خلاتها وزادت وصفاء ضربات الطم حيت هي زاعمة عليها وكضحك معاها بزاف ولكن ملي كتكون فهاد الحالة مكتقدرش تزيد معاها الهضرة بزاااف حيت صرامتها كتخلعها كثر من صرامة اسد .. ورجعات ثاني تبعاتها كتجري لطموبيل ....
عند جود ...
وصل بطموبيل حدا الفيلا ... ونزل وهو باقي تايصوني تادخل لدار وهي تلاقاه المدبرة ديالهم ...
- بونجوغ موسيو جووود
يلاه غيجاوبها جود كانت نازلة اريج فدروج حيت شافت طموبيلتو من البالكون وضحكات ليه وتاهو تبسم والمدبرة رجعات لور وقربات عنقاااتو وتاهو بادلها العناااق
اريح : صبااااح الخيييررر ... مرررحبا بيك اولدي ...
جود : صباح نووور ... ( رد ليها شعرها لور ) صافا؟؟؟؟
اريج : لابااس اولدي .... زييييد دخل ....
جود : لا ( شاف لساعتو وشاف فيهم ) مزروب شوية .. ( وراها تيليفون ) كنصوني على بيلسان مكتجاوبنيش ... ياك لاباس ؟
اريج : لااابااس اولدي راها لفوق ناعسة يمكن تيليفونها راه صيلونص ....
جود : ناعسة ؟ ( عوج شفتو لجنب ) صيفطات ليا ميساج مع تمنية ديال صباح .. مفهمتش ! واش راها صافا ؟؟؟؟
اريج : ( بدات كتضحك بتوتر وتحك فعنقها من لور ) ا .. صاافا ... ي .. يمكن .. غير تفكراتك وصافي ...
جود : ( مصغر فيها عينيه ) واقعة شي حاااجة انا مفخباريش !!
اريج : ( تنهدات وشافت فيه ) مهم ... هي لبارح تضاربات شوية هي واياد ( جود وسع عينيه ) و .. صبحات شوية عيااانة ... هذا مكان ...
جود : ( بقلق ) كيفاش ضاربات مع اياد ؟؟؟؟ علاش ؟؟؟؟
اريج : وراك عارفها هي .... البارح خرجات شوية ومكانتش كتجاوب فتيليفون ... و ... وضاربو شوية وتخاصمو هذا مكان ... راهم ديما هااكااا داباا يتصالحو
جود : ( جا فلاش لبالو فاش صونا عليه كيسولو عليها ) علاش فين خرجات بلا ماتجاوب فتيليفون ؟ مكانتش قالتها ليك ؟؟؟؟؟ ...
اريج : واش حنا عاد غنعرفو بيلسان .. هي شوية مولفة الحرية واياد راه ولد عمك مغنوريكش فيه ....
جود : واش ضررربها ؟؟؟؟
اريج : ا . لا .. م ماشي ... و ولكن ( بدات تدخل وتخرج فالهضرة ) مهم ... راك عارف حالهم ...
جود : ( غمض عينيه مزير عليهم ورجع شاف فيها ) نقدر نطلع ؟
اريج : عندها ؟ راها ناعسة اولدي ...
مجاوبهاش وطلع فدروج كأنه علمها ماشي طلب الاذن ... يلاه وصل لكولوار وبقا كيشوف بعينيه وهي تبان ليها عاملة النظافة جارة الشاريو يلاه خرجات من واحد البيت وكتشوف لعندو
جود : بيت بيلسان فيناهو ؟
- بونجوغ موسيو جود ... هو هاااداك لهيه اسيدي ...
خلاها ومشا باتجاهو .. حل لباب كان قدامو غير كلوار طويل فيه بيبان د الدوش و الدريسنغ ... سد موراه لباب ودخل هو يبان ليه سريرها وهي مكمشة وسط مخاد وكوفلرلي حتى مابقاتش كتبان .... مكمشة من البرد لي مخلية لاكليم شاعل تا جمد البيت و من الشعا لي داخل من الزاج ...
مشى بشوووية حتى وصل لعندها كايشوف معاها .... هو يبان ليه تيلبفونها فوق طابل دونوي شعلو هو يشوف لي زابيل دياالو و بانت ابتسامة خفيفة على عينيه هو كايقرا اسمو " my brown man " , بان ليه تيل صيلونص عاد هدا بالو حسابتو غير مكتبغيش تجاوب كان غايجي ينحرها حيت خلعاتو ....
شافها مكمشة ومغطية راسها وشعرها نازل عليها .... هز يديه بشوية باش مايفيقهاش نزل عليها الغطا بشوية على وجهها وهي تضرب الشميشة فوجهها وملامحها الزعرين ... ماقدش يتأملها بسب الاثار لي بانو ليه فوجهها ... وشد دقنها بزربة وضور ليها وجهها كايشوف فيه وححبانو تعقدو .... وهو كايتفكر المسج لي كتبات ليه كانها كتستنجد به ... حس بقلبو تعصرر عليه .... وملامحها واضح عليهم شحال بكات ....
تنهد بعصبية ... وضار لريدو نزلو عليها من شعا وهز تيليكوند طفا لاكليم لي جمدها ... وغطاها وقادها على المخدة وخرج ميزير على قبضتوو وسنانوو .. يلاه خرج من البيت هو يبانليه اياد يلاه خارج من بيتو .... غييير شافو مشااا بزربة لعندووو ماجا فين يستوعبو تاكااان نزل عليه ببونية نزلااات راسو للتحت .. يلاه علااااه يبدا يسسب تا كان عطااااه لوخرا تااتزدح فالحييييط وررجع شدو من حوااايجو كارززز عليه ملسقو مع الحيط واياد كايشوف فيه يلاه كاااايحاول ييييفهم .....
جود : هااااادي بااش مرة اخرى تمد يديك على شي حاااااجة من مسؤووووليتي اناااا ... ( عطااااه روووسية تااااادوخو ) هااادي هااانا دووزتها ليك .... ووبرررربي و تمد يديييك علييييها مرة اخرى تاااا نننهرررس ممملتك ..... وهاد المرة تاداك الحديييد فالظهر ومغااينفعكش معايا ....
لتخو مع الحيط ونزل سااعر واريج طالعة و مموسعة عينها و هو تخطاها و نزل فدروج مكيشوف تاحاجة قدامو بسبب العصبية لي ركباتو ملي شاف طبايع لي فوجهها ...وشافت عند اياد لي كايمسح دم من شششفتو وييضور فراسو .....
اريج : اوييييييلي ماااااالكم ...
وصل جود للكاراج لقى التقنيين كايتسناوه و انهمك فخدمتو معاهم ... وسيم دوز لليلة كلها غير طالق موسيقى الروك فالكاسك مجهد ليها ومغمض عينيه كايقنع راسو انه ناااعس .... غير باش شوية الضو وصبح لحال ... نزل لطابق الارضي هز البلانشا دااسورف ونزل للبحر .. كيف عادتو غضبو كولو كايخويه مع المواااج ....
اما وقسم ترأسات اجتماعها بكل جدية مخلية موراها صفاء شادة طابليطها عندها وكاتشوف فيها اش رجعها لهاد الحالة تاني !!!! بعد مكانت بدات تعطي شوية وقت لراسها ... رجعات تاني تخدم بهاد طريقة الهيستيرية ....!!!
سلات اجتماعها و مشات ديريكت لدارهم كاتشوف للساعة فمعصمها كانت جوج ونص ... غير دخلات لقات لامار تما كاتسناها تلاقاتها و القلق فوجهها مخلط بالانفعال ....
لامار : دابا عااااد جايا ؟؟؟؟ واش عارفة شحال فااسااعة ؟؟؟؟؟
قسم : عاارفة اماما ، مزال الحال غانطلع دابا نبدل حوايجي وونزل .. فين بابا ؟
لامار : راه لفوق .. تسنيناك نتغداو على الاقل قبل ماتسافري مجموعين ؟؟؟؟ علاش عقدتي اجتماع لي ماشي مهم اصلا ؟؟؟؟؟ مغانكلسش معاك انا دابا ؟؟؟
قسم : ماما ... راه غا سميانة وغانجي ... بغيت نحيدو عليا ....
لامار : لبارح ماشفتكس نهار كامل .. وليوم هانتي مسافرة وسيمانة مغانشوفكش ؟ علاش مادوزتيش معايا ليوم؟؟؟؟
قسم : نت اصلا اماما راه كنت خدامة
لامار : جيييييت ...جيييت بكري كنتسناك .....
قسم : وصافي تادابا غانتغداو ... اما غانطلع غير نبدل ونقاد حوايحي وننزل. .. مزااال الحاال
لامار : فيين هاد مزال الحال فين !!! ونت ستة خاصك تكوني تما
قسم : صاااافي اماما ماتحكريييش ...
خلاتها وطلعات فالدروج ولامار تابعها بعينيها .... وتلفتات كاتهضر مع رجاء تقاد الغدا وهي تنزل قدس ...
قدس : ماما ! قسم جات ؟؟ واش نسات ليوما غاتسافر ولا مالها ؟
لامار : ( تنهدات ومشات لصالون كلسات دايرة رجل على رجل والعصبية باينة فملامحها) منعرف ليها ....
قدس : ( كلسات حداها ) ياك لاباس ؟؟؟؟
لامار : انا قسم وليت مكنفهمش ليها واخا راني عمرني فهمتها ... ماتعطيكش راس الخيط ... راسها كي باها ...عاد الينت كانت ناشطة ... وداابا تقلبات ....
قدس : ياكما تخاصمات مع سهيل ولا اش سميتو ....
لامار : هادشي بدا كايعصببني .. واش البنت غايولي يتحكم ليها لهاد الدرجة فحياتها ولا ؟ كانو مزيانين راها مزيانة يتخاصمو تنوض تحبس راسها فالخدمة؟؟؟؟ زعما راه بعقلها مغاديش دير ليا شغل المراهقات .... !!!! راه غاتبقى تقلب على باباها تايرجع ليها تاني داك الحبس لي كانت فيه ملي كانت صغيرة .... حنا اه مساندينها وباغينها تلقى معامن ترتاح ولكن مااااشي هاكا ....
قدس : ( حسات بيها معصبة وبغات تبرد ) واانت قسم مكتعرفيهاش !! راه بيه ولا بلا بيه لاكانت عندها غير شي حاجة ضارها راها كاتقلب علينا كاملييين ... ياك الى تخاصمات غير مع جود ولا مع بابا ياك ماكناش كانشوفها ... زعما ماشي عااااد غايجيب ليها هو هاد الطبع !!! راه هاد القاعيدة فيها من زمان ... ماشي بسبابو ...
لامار : خاااصها تولي تعرف تفرق عصبيتها على واجباتها العائلية .. تاحنا كايكون ربي عالم بينا بسطريس دالخدمة والمشاكيل ديالكم لي مكيساليوش ... وماتشوفش هادشي على الطبلة .. كنحاولو ما امكن مانخليوش داكشي يأثر علينا معاكم ... عندها فواياج فيه سيمانة مكلفاتش راسها تا تأجل خدمتها و تكلس هاد النهار مع خوووتها ومع والديها نتغداو مجموعين قبل ماتسااافر كون كااان هو لي بغاها تأجل على قبلو خدمة دشهر ماشي غااا دنهار ... مشات خزنات راسها فالخدمة وجاياني ساعة قبل السفر قاتليك غانتغداااو ....
قدس : وصافي اماما بردي عافاك غايشوفك بابا معصبة غايتعصب تاهو... و حشومة اول طراجي ديالها بوحدها ومستريسية غير مع راسها تسيفطوها بحال هاكا .... ( قربات حداها كتماسي ليها على كتفها ولامار كاتشوف لجنب معصبة ) وصااافي على قبلي .... مااااماا
لامار : خلييني اقدس .. خليني حتى نت
قدس : ماما ... راه لاتعصب عليها تا بابا والله تاغاتمشي تقلب بيهم داك الباطو راكي عارفاها ملي كاتعصب تاهي .. واااصااافي عافاك .. وصافي هدني الجو .... عافاااااك ...
لامار : ( تنهدات ) نوضي قولي لرجاء تحط الغدا نوضي ....
قدس : ( ضحكات وجبدات ليها حناكها ) اااجمل لاماااارر لي كاتسمع الكلااام في الدنياااااا هههه
لامار : ( بعدات ليها يدييها ) ببعدي مني .... شي نهاار تسطيييونا عاد تهناو
قدس : ( طلعات راسها لفوق ) يااااربي ياااربي وقتااش تعلمو ماتبقاااوش تجمعونا كاااملين .... انا اش درت .. انا اش درت ؟
خلاتها ومشات صونات على رجاء علماتها تنزل لغدا ... يلاه راجعة للصالون وهي تشوف باباها نازل ... كان بدجين وبودي كحل وفيست من فوقو رسمية وابتسمات ومشات عندو عنقاتو جا راسها فكروشو وتاهو عنقها وكتحاول تخلق الجو وترطبو باش مايلاحظوش قسم ...
قدس : صباااااح الخيييير ....
اسد : صبااح نور ( طلع ليها راسها ) عاد فايقة ولا ؟
قدس : لاااا فقت قبيلة غير يلاه شفتك ههه ( زادت عنقاتو ) عمرني قلت ليك ابابا كتعجبني ريحتك ؟
اسد : ( علا حاجبو مع ابتسامة وعنقها عندو ماشين بجهة صالون ) دابا غاتقوليلي جوج حوايج ....يا اما شنو مصبحك ناشطة ... يا اما شنو باغا طلبي ؟
قدس : حرااام عليك زعما مايمكنش نتغغزل انا ببابا غير لاكنت باغا شي حاجة ؟؟؟؟
اسد : هههه ( زاد عنقها عندو ) تتغزلي ابنتي تتغزلي ( شاف جهة لامار وكلس ) نيييت شحااااال هادي ماتغزل بينا شي واحد ...
قدس : ( عنقاتو ) انا كااااينة ابابا ....
لامار : وبااااز .... باز لا نتي لا هو ....
اسد شاف فقدس بغمزة بمعنى مالها ؟
قدس: مقلقة مني ( لامار شافت فيها ) قالت ليا علاش نقول لقسم بلاا ماتجي لدار بكري مكاين تاحد ...( لامار كاترمش فيها وهي شافت فباباها ) ولكن راه بصح شفت مكاين تاحد. جود خرج بكري وماجاش وسيم نزل بكري تاهو للبحر .. نتوما كنتو فااخدمة .. ملي سولاتني شكون فالدار قتليها تاحد غير بلاا متجي ... واش درت شي غلط !
اسد : امم .. دابا قسم .. تشاورات معاك نت واش تجي ولا لا .... وقلتي ليها بلاش !
قدس : اااه .... س ... سولاتي شكون فدار قتليها تاحد ..
اسد : ( كايشوف فلامار لي قالبة راسها لجنب وشاف فقدس ) مكتشبهيش للماماك ابنتي غافلوجه .. كتبشهي ليها تافالكدوب ...( قدس بقات ترمش ) قسم كون بغات تجي كتعيط لينا باش لامكناش فدار كنجيو ...مكتسولش شكون كاين ابنتي .... ولكن ماعليش .... داير بعين الاعتبار هادا الفوايج اللول ديالها وخصها تكون اونفورم .. غاندوز هادي .... والى تعاود هادشي عاد غاتكون لعضرة ديال بصح ...
قدس : م ..... ماشي هاكا ... غير ( قاطعها)
اسد : زوين تكونو حنان و كتخبيو على بعضياتكم وكاتخافو على بعضياتكم .. غا هو قادو دوك الكدوب مزيان وصافي ... ( خربق ليها فشعرها ) واخا احبييتي !
قدس : ( نزلات راسها ودوات بغنج وكيوتنيس ) و .... تانا داكشي لي قلت ... فواياج ديالها اللول ... ب بلا ماتعصبو عليها ....عافاك ابابا .....
اسد : ( ابتسم ليها ) واخا نكون مععععصب .... ( جبد ليها حنيكاتها بحال فاش كانت صغيرة ) تجي بنتووووتي تقووليا ماااتصعبيش .... غااانطفى .... ( باسها وهي ضحكات ) يلاااه طلعي عيطي لختك تنزل قولي ليها مشا الحال ...
ناضت قدس طلعات وهو شاف فلامار لي كاتشوف لجنب دايرة رجل على رجل وغير كاتفكر ...
اسد : مغاندوزهاش ليها الامار غاتهناي ... والله مغااادوز ...
لامار : ( شافت فيه ) اسد ... قسم خاصها تعلم تبعد مشاكلها على العائلة .... هادشي ماشي اول مرة كانشوفوه .. الى تسطريسات غير فالخدمة مكنشوفوهاش .. الى وقع شي مشكل معاها فشي فواياج تااااني كتخزن راسها فبيتها و مكنشوفوهاش . . تخاصمات مع خوها كتنوض تسطوكي راسها بالخدمة ... وحنا شنو ءنبنا ؟ انا لي اجلت كاع شغالاتي وكالسة هنا كانتسناها تجي بكري باش نشبع منها .... قلت ليهم يوجدو السپا قلت دير مساج ترتاح قبل ماتمشي .. من قبيلة وانا كنوصب فرجاء دير داكشي لي كتبغي للغدا ... فلخر خلاتني تابقات ساعة عاد جات .... غاتاكل جوج دغمات بزربة وغاتنوض ..... وحنا شنو دنبنا ؟؟؟؟؟ ( اسد كايدوز يدو على جبهتو ) انا مكنهضرش على شنو عندها ماباغاش نعرف .... هاد المرة باغاها تعلم تفرق مشاكلها .. على الفاميلي ....
اسد : هاد الدرس .. غاتاخدو ... غير تهناي .... طلعي ترتاحي ..
لامار : خليني تانزل ....
اسد : لا ... كون بغاتك كون جات بكري ... طلللعي
لامار : اسد .. منقدرش نخليها تمشي لاا منقوليها بسلااامة ...
اسد : الى بغاتك هي غاطلع عندك ...( بحدة ) قلت ليك ططلعي ....
لامار بقات غير كتمرش ندمات كاع لي هضرات وطلعات لفوق حيت عارفة قسم غاتجي عندها .... وهو بقى كالس تاجات رجاء....
رجاء : الغدا واااجد اموسيو
اسد : غاتسمحو لينا ارجاء ولكن تغداو نتوما بلاصتنا ... قيغم مشا عليها الحال ..... غايخصنا نمشيو ، وقدس ولامار طلعو ليهم للفوق ....
رجاء : حااضر موسيو ...
خلاتو ومشات وهو بقى غير كايتنهد اما قدس طلعات دقات ودخلات كاتقلب عليها ...
قدس : ققسااام ... قسووووم ....
دخلات عندها لدريسينغ لقاتها كاتقاد وراقها .. كانت غير بالكاجوال خفيف ، سروال دجين مطوي من تحت مع صبادرين كحلة و تيشورت كحلة ....
قسم : ( عينيها على الوراق ) قددس ... ( علات عينيها فيها ) هانا غانزل دابا ....ساليت
قدس : ( طلات عليها متكية على لحيط ديال المدخل ) امممممم ... و اشهاد تغووبيشة ؟؟؟؟ هادشي ماشي ديال لفرحة د اول فواياج !!!!
قسم : اينا تغوبيشة ! ( كتسد الكارطابل دالوراق وشافت فيها ) بالعكس ( مشات بجهة صاكها صغير ) مسطريسية شوية وصافي ...
قدس : (يلاه غاتهضر وهي تشوف اللبسة ديالها معلقة وعلات ححبانها ومشات كاتقيس فيها) واااااو ، بيوووورفل ... ( شافت فيها ) بحال ديال باباااا ...
قسم : ( شافت فيها ) سي .... لافيست شوية حسيت بيها كبيرة عليا فاليدين من تحت .. قلت ليهم يقادو لوخرين اما هادي غانقضي بيها فهاد السفر ....
قدس : مككرهتش نشوفك بيها
قسم : يلاه معانا ...
قدس : مكرهتش ... ولكن غايخصني نمشي هاد العشية للشركة عيطو ليا الصباح على ود نوقع الوراق ديال هاد العام ...شي شهر هوما كايسيفطو ليا وكنسى ... وغايخصني ندوز لشوتينغ ديال التينس .... راك عارفة انا لي دايرة ليه الدعاية .....
قسم : ( دازت كاترش بارفانها ) هي العشية عااامرة عندك ...
قدس : ايييه ( كطل عليها وتحاول تتبسم ) قسوووم .... مقللقك سهيل ؟؟؟ اممم !!!!
قسم : ( ضارت عندها شادة مرطب الشفاه فيديها ) كاانقول ليك سيميتو اصيل !
قدس : اييه هاااداك .... مقلقك ؟ هو لي داير ليك هاد الحالة!!!
قسم : (كترد كولشي لبلاصتو ) مالها هاد الحالة اقدس مافهمتش !! ... ( ضارت عندها وهزات صاكها وصاك الوراق اما حتى لافاليز نزلوها لمساعدات لطموبيل لي علمهم اسد يوجدوها ) راااني صااافااا .. غي تايجيب ليك الله
قدس : لا .... را دبصح معجبتنيش .... ( قربات عندها ) قسم ... هادا اول فواياج ليك اختي .... وشحال ونتي كتسنايه .. ملي كانت عندك 18 عام .... ونتي كاتسناي هاد النهار .. عشر سنيييين ديال القراية والتدريب .... وتفكري غير شنو داز عليك فداك العسكرية .... وشنو داز عليك ونتي سو كاپيطين ... ودابا ... نتي هي الكااابتن ديال هاد الطراجي ... مخصكش تكوني هاكا .... غايكونو كايتسناوك فحفل الترحيب ... حشومة يشوفوك مغوبشة بحال هاكا ...
قسم : ( شدات وجهها بحنية ) انا صافا اختي والله ... غسوية دالحوايج مبرزطيني وصافي .... ولكن متخافيش ... ( ضحكات ) غانخليك تعلي راسك ونقولي لكولشي ختي داااارت احسن فواااياااج واحسن طراااااجي بحري بووووحدها .. واحسن كااابتن ..... ( بغرور ) ونفووووت داك باباك كااااع
قدس : هههه .. هاحنا غااانشوفو ....
خلاتها ومشات للبسة ديالها هزاتها وهزات صاك صغير معلق وكارطابل دوراقها ... ونزلو هي وقدس كايهضرو وقدس كتحاول تحيد عليها السطريس بمواضيع التنس والماتش ديالها تاوصلو لصالون لي كان خاوي !!!!!
قدس : هاء !!! خليتهم هنا ( طلات براسها على فين كاينة صال ا مونجي ) فين مشاو هادو ؟
قسم : ( كاتقلب بعينيها تابان ليها اسد واقف حدا الزاج داير يدو فالجيب دسروالو ) بااابااا ...
اسد ضار لعندهم ، شاف فيهم وجا باتجاههم ....
اسد : ( كايشوفها شنو هازة ) مانسيتي والو ؟ وراقك ڤريفيتيهم ؟
قسم : سي ... مراقبة كولشي . فين ماما ؟؟؟
اسد : طلعات ترتاح راسها ضارها ( بداات كترمش ) يلااه سربي .... مشا الحال ....
قسم : اء ؟ مغانتغداوش ؟
اسد : واش هدا وقت الغدا بنتي ! شوفي شحال فالساعة معاش باغا توصلي و معاش باغا تقادي اومورك ومعاش غايدري ديبار ؟؟؟ صافابا ؟
قدس : (بحزن) بااباااااا
اسد : ششش ... كون بغات تغدى معانا كون جات بكري ... ( مد ليها الكونطاك ديال بورش ديالها وهي كترمش فيه ) راه قلت ليهم يشارجيوها ليك راه فيها الپلان .... هدا اول فواياج ديالك خاصك تعتمدي فيه على راسك فكووووولشي ...
قسم : ( كاتشوف فالكونطاكط شداتو عليه وعلات راسها فيه ) اء ؟؟؟؟؟؟ ك كيفاش ؟؟؟؟ مغاتمشيش معايا ؟؟؟؟
اسد : لا ابنتي ... عندي اجتماع كنت مأجلو لبارح نمشي معاك ولكن بانليا غير نقضيه نحيدو عليا حسن .... ملي نساليه انا غادي نشد طريق نوصل عليك بعدا داك نص ساعة قبل ديبار باش نقاد ليك طراجي ..... اما نت راه خاصك توصلي بكري ..... يلااااه ماااتعطليش .. .( شاف فقدس ) وماتعطليش تانت على دوك الوراق المحامي غايتسناك مع الستة .....
خلاهم وخرج وقسم كاترمش شادة داك الكونطاكط وكاتشوف للباب لي خرج منها .... وشافت فقدس ... وعينيها حمريييين
قسم : غانمشي بووحدي!!!!
قدس : ق قسم ... دد ابا ... ففف .... ( نزلات راسها كاتقلب على شنو تقول ورجعات شافت فيها ) دابا هوما تقلقلو شوية منك ..... وراك عارفة بابا .. مكيعجبوش ديري شي اولوية لشي حاجة من غير عائلتك واخا تكون الخدمة .... سي نورمال .... دابا غير ساااعفي هاهو قاليك غايوصل عليك لتما ....
قسم : ( دمعو عينيها وحمارو ) ماما مغاتقولش ليا بسلامة ؟؟؟
قدس : تاهي مقلقة منك شوية ... طلعي عندها ....راك دغيا تقدري ترطبيها ....
قسم تنهدات وحطات حوايجها وطلعات فالدروج وقدس غير متبعاها بعينها ...بقااات فيها ..... وقسم طلعات لجناحهم ....
دقات ماتسمع ليها والو. . وحلات لباب دخلات كاتقلب بعينيها تابانت ليها فصالون صغير شادة كتاب عندها ولابسة نضااضر ... بقات واققة شحال كاتشوف فيها. .. كايعجبها منظرها من صغرها منين كدخل وتلقاها منهمكة مع تفاصيل شي كتاب ... تنهدات ودخلات بشوية ولامار حسات بخطواتها وطلعات راسها وهي نزلات تاجلسات على ركابيها فالارض قدامها وشافت فيها ..
قسم : مايغيتيش تقولي ليا بسلامة ... هم !
لامار: ( تنهدات وحطات لكتاب على جنب وبقات كتشوف فيها ) بسلامة ديال سيمانة مغانشوفك .. ماكتقالش فساعة دالمكانة .....وباش نموتيڤيك فاول فواياج ديالك بوحدك .. مغاتكفينيش ساعة .. باش نشوف اللبسة ديالك وتقيسيها قدامي .... مغاتقدناش ساعة .... باش نتغداو مجمووعين وسط خوتك ....ونسيفطوك ضاحكة ناشطة ... مغااتكفيناش سااااعة .....( قسم نزلات راسها وطاحت دمعتها ) هاد الساعة لي تواضعتي وخصصتيها لينا ... ماكافية فوالو ابنتي ....
قسم : ( مسحات دمعتها وشمرات بنيفها وشافت فيها ) سمحي ليا اماما ... عافاك .... ( حطات راسها على رجليها ولامار كاتشوف فيها ) كنت مخنوقة .... ونتي عارفاني البلاصة الوحيدة لي كنقد نتنفس فيها .. هي الخدمة ....
لامار : مكاينة تاحاجة اقسم . . تاحاجة لي تخليك تفوتي عليك وقيتة مع عائلتك .. كوووولشي كااايتعوض .. كووولشي .... الا الوقت لي كندوزوه مجموعين هداك مكايتعوضش .. والى مشى مكاايرججعش .... ( قسم كاتبكي ولامار عينيها دمعو ) اللمة ديالك مع ماماك وباباك و خوتك على الطبلة .... خااااصك تبروفيتي منها .. خاصك هي لي تكوني كاتنفسي فييييها ..... حيت يقدر الظروف تجيب شي وقت لي تتمناااااي هاد الكلسة وماتلقايهاش ... ( لامار تغنغن صوتها وقسم بدا يتسمع شهيقها ) حيت ابنتي انا لي عارفة مزيان بحق هاد الكلااام لي كانقول ... وكون لقيت الزمان يرجع بيا لور .... نبقى شادة فيد ببابا صبح وعشية ومنطلللقش منها تانشبعو وخا عمرني نشبعو ... ندمت حتى على الليل لي كنت نعس فيه بوحدي ومكنمشيش نعس حداهم وماشبعتوش .. ماعرفت بحقو تالقيتو تهز فوق الكتاف و جداك لابسة عليه البيض . .. ( تزير صوتها بلبكا ) انا عارفة بحق الزمان ملي كايتبدل .... داكشي علاش كنحاول انا وباباك مااااااا امكن اننا ناخدو الماكسيموم دالوقت معاكم ونستغلو فهاد الصيف ساعة بسااااعة ... الى نتي جاك فواياج دسيمانة ساااااهل .... حنا سيمانة عندنا طوييييلة ابنتي ... حيت حنا دقيقة وحدة معاكم كنوزنوها بالذهب .... خيت عارفين غايجي واحد الوقت نتي غتمشي لدارك وقدس غاتمشي لدارها ووسيم وجود غايمشيو لديورهم تاهوما ...وغااانبقى انا وياه بوووحدنا وسط هاد القصر ...حنا كنستغلو كل دقيييييقة ..... ونتي اقسم ... عاطيانا ساعة !!!!! سااااعة ابنتي .....؟؟؟
قسم : (كتبكي فوق رجليها ) ماما عافاك ماتقوليش هاد الهضرة ... نتي عارفاني شحاال كانمووت عليكم وعارفة المرتبة لي عندي فيها لفاميلي .. المرتبة لولا ومكيانش لي غايحيدها .... نتي عارفاني شحال كنقدس العائلة ... ولكن اماما .... مورالي مكانش ديال نكلس وسط العائلة ... مورالي كان ديال نقلب على فين نتشغل و فين نخرج عصبيتي ..... العائلة مكنجيوش ونكلسو وسطها وحنا معصبين .
لامار : لا .. هي لي كانجيو ليها وحنا معصبين حيت هي بوحدها لي قادة تطفيييينا .... الشوفة فواليدينا والضحكة مع خوتنا... هوما لي كايطفيونا ....
قسم : انا عارفة راسي غلطت وكنعترف ..... غي سمحي ليا ..... ( طلعات راسها فيها ) سمحي ليا عافاك .... ( نزلات راسها كتبكي تاني ولامار كاتشوف فيها وقلبها كايتعصر ) انا عارفة السبب اااه تااافه .... ومامانحقيش ندخل مشاكيلي العاطفية وسط الامور د العائلة ... ولكن اماما هاداك الراجل مكيعنيش غي راجل دخل لحياتي .... هداك راه كايعني مصييير حياتي الجديد كااامل ... هداك احلامي الجداد ... و مستقبلي الجديد ... ماما راه كنحط راسي على المخدة وكنرسم طرااااجي لي غتمشي عليه حياتي منهنا لقدام معاه ... كنرسم اهداف جداد وطريق جدييدة .... كانرسمها فالرملة .... وكانفيق الصباح كانلقلى داك الطريق جات الريح ومسحاتها ليا كاااااملة وكنتوضر تاااااني ..... راه مكايعنيش غير راجل تخاصمت معاه .... راه كايعني حياتي كاتقلب ليا ..... كايعني طريق كايتخربق ليا ... كايعني مستقبل كااايكحال قدامي .... انا ... قسم لي كاتعرفي .. لي حياتها كلها خدمة وقراية ، فاش كتحط راسها على المخدة كاتفكر غير فغدا والبروغرام لي عندها وشنو غايخصها دير غدا ... عمرها فكرات انها غاتبدا حياة جديدة ومغاتبقاش دير داكشي ..... حتى جا اصيل ... لي خلاني نشوف بلي هاد الخدمة لي كنت كنخدمها يمكن مغاتبقاش .... يمكن غاتولي عندي وحدة اخرى ... يمكن ..... يمكن ... يمكن ... بزااااف دالحوايج ... ماما ... راع حيااااتي كللها هادي لي كتتتخربق ......
لامار : حيت معلقاها بيه .... نتي راه فامكانك تبدلي حياتك غير بوحدك .. ماشي ضروري ييكون هو
قسم : هاشدي انا عارفاه ... ولكن حنا كنحتاجو هدف .... ويد كتدفعنا نتجرأو نلوحو داك لخطوة .... شنو دفع جود يرسم طريق جديدة كون مكانش تفيكرو فالزواج ببيلسان! .... ماما هدفنا بصح مخصناش نعلقوه بشخص .. ولكن داك الشخص راه هو لي كاااايدفعنا وكايشجعنا نتحركو حيت كالقاو علااااامن غانوضو نتحركو .. وكالقاو لي غاايتحرك معانا ويكون معانا فهاد الطريق جديدة .... انا كنت محتاجة يد تدفعني فنفس وقت تشد فيا وتتمشى معايا حتى للافان ... وهاد اليد كانت ديالو ... بغيت ولا كرهت كولشي متعلق بيه ... هاد الحياة الجديدة فكرت فيها على قبلو باش نعيشو فيها بجوج ... الى مابقاش هو ماعندي ماندير فيها بوحدي.....
لامار : ابنتي انا ماقلت والو ... انا بغيت ليك غييير تكوني لاباس وفرحانة مع راجل بغيتيه .. انا بغيت نشوف ولادي غير لابس وفرحانين .. ولكن باش يكون هاد الراجل كايرون ليك حياتك لهاد الدرجة ....هادشي راه مغانقبلوش ليك .. وهادشي راه مامرونش غير حياتك نت .. راه تلقاي حياتو تاهو مرونها معاك ..... هادشي لي كاديرو فيه راه مامسلكش .. ياا لقااو طريق نيشاان .... ياحطو داك القصبة من يديكم وباراكاو ماتخططو فالرملة ..... حيت الرملة موجة وحدة وغاتمسح ليكم كولشي ... طريقنا عمرنا نرسموها فوق الرملة .... نهار كنبغيو نريمو طريقنا .... ( شدات وجهها كاتشوف فيها وقسم كاتبكي ) كانرسموها فوق الحجر ابنتي ..
قسم : ( حركات راسها باه متفقة مع هضرتها ، وضورات راسها لجنب باست يديها وباقين دموع تايسيلوو ) سسمحي ليا .. غي نجي من السفر ... غاندوز معاك الوقت كامل ... ( كتحاول تبتسم وسط الدموع ) نسافرو ان وياك نمشيو لشي بلاصة ... والله تا نعوضك ....
لامار : ( جبداتها عنقاتها مزيرة عليها وقسم كتنخصص ) طريق السلامة .... ان شاء الله يكون فواياج سااالم ... تمشيو فااسلامة وتجيو فالسلامة ....
قسم : ( مزيرة عليها ) امييييين
لامار : ( جابتها قدامها كاتمسح ليها دموعها ) صافي ... غايمشي عليك الحال مسحي دموعك ..... كوووني كابابل .... ياك نتي ديما كاتقولي باغا نكون كابتن على قبل بابا .. عشر سنين ونت كاتقوليها .. يلاه وريه بلي نتي كااابتن وحققي ليه حلمو يشوف بنتو لي حط ليها لشابو دلامارين فوق راسها فأول عيد ميلادها ، كاااابتن ناجحة دبصح.....
قسم : والله حتى على قبلو كاندير هادشي كااامل .. على قبلكم تكونو فخورين بيا ونهز راااسكم .... عمرني فكرت باش انا لي نحلم ... حيت احلااامكم هوووما لي باغا نحققق ..... حيت انا نقدر نغلط وونحلم بشي حاجة مافيهاش الخير ليا .... ولكن حيت عارفة طريق رضاة الواليدين عمرها تكون غااالطة .... تبعتها .....
لامار : الله يرضي عليك ... الله يوفقك اينتي ...
وقفات قسم كتحاول تسمح دموعها وتبتسم ولامار بعينين دامعين وحومر كاتشوف فيها ... ضحكات ليها ومشات لباب اشارت ليها غير بسلامة ولامار كدعي معاها تاخرجات ...
نزلات فالدروج كاتمسح دموعها وباقا كتنخصص وهي تلقى قدس فنهاية الدرج بملامح حزان كانت عارفها اصلا غاتنزل باكية .....
قدس : احم ... رجاء قالت ليا بابا قاليها طلع ليا غدايا لفوق ... ولكن انا بغيت نتغدى هنا .... تغداي معايا ؟؟؟؟؟
قسم : ( وققات كاتشوف فيها وابتسمات عاضة على شفايفها والدموع كيانزلوو لي مخلطة فيهم البكا على كووولشي ) نتغداا معاك .....
قدس تبسمات وجراتها من يديها غادين بجهة الصال مونجي
قدس : زيدي كاين غدا زوين ... ماما قالت ليهم يديرو ليك كاع داكشي لي كتبغي واخا انا حاطين ليا غا جوج ورييقات ديال الكرااافص و الحبق وولكن ماااعلييش ... قالك باغيني ندير الرجيم نضعاف باش منبقاش قد البكرة ، ماعارفينش الى البكرة اصلاااا كاتاااكل غير الربيع ..... مافهمتش هاد المنطق هادا ...
قسم بدا تضحك فعزز بكاها ومشات تابعها لطبلة كلسو ...الدموع باقين فعينيها كتاكل وتمسحهم ... وقدس كتحاول ضحكها باش مااا كاااان حيت حاسة بها مكتبكيش غير على حاجة وحدة .... .... كلات بزربة كتمضع والدموع كاطيحو ليها وسط الماكلة .... وقدس غير كتنزل راسها كايتقلبو ملامحها للحزن وغير تشوف فيها تضحك ..وتنقب ليها من طبسيلها تانساتها فالبكا ....
خرجات معاها للباركينغ وودعاتها ...... وقسم ركبات فطموبيل ولامار كاتشوف فبهم من البالكون ودموع فعينيها .....
قدس : يلااااه ورينا علاش قادة هههههه
قسم : ههه حتى نت ... بغيت نشوف تصويرات نزوين للدعاية دالتنس ....
قدس : ( رجعات شعرها لور بغرور ) كتتتشكي فجماااالي ؟؟؟؟
ضحكات ليها قسم ورجعات مارشاريار خارجة من الباركينغ و قدس كاتشير ليها ب بايباي تاخرجات من بوابات لقصر عاد تنهدات وطلعات لبيتها ......
قسم شدات طريق كاتشوف لساعة عاد حسات براسها بصح تعطلات ...... وهي تكسيري خارجة بطريق لوطوروت ...... واخا خاطرها باقي مزير وهادي اول مرة غاتمشي ف فواياج بوحدها بلا باباها ولا جود ولا ولاد عماماها ولكن حسات ببابا بحالا عطاها درس باش تحس بقيمة وجودهم وقيمة غيابهم .... وفعلا .... خدات الدرس وفهماتو مزيااااان .... غير من هاد الطريق لي شاداها لطنجة بوحدها بلا موتيفاسيون ديالو حسات بحالا عطاها نبذة صغيرة على الحياة بلا والدين ....
عند قدس ...
طلعات لجناحها وتلاحت فوق سرير طالقة يديها كتنهد .. وهي تقلب ملامحها بحزن وحاطة يديها على كرشها كتحس بالجوووع ....
تاسمعات تيليفونها كايصوني وهي تقفز من بلاصتها عرفاتو هو .... الصباح كامل وهي كتسناه يصوني ومكتبغيش هي لي تصوني ... مشات هزاتو على شارج وهي طلع ليها سميتو .. كانت متأكدة بلي هو حيت حظرات الاتصال لكاع هادوك لي كانت كاتعرف لسبب كاع ماقدات تشرحو لراسها .... رجعات شعرها لور وكلسات مربعة رجليها على السرير وتقلبو ملامحها من الحماس للا مبالاة وجاوبات. ..
قدس : الووو ....
لوؤي : سميتي لوؤي .. ولد عمك عدنان ...
قدس : هه ! عااارفة سميتك لوؤي وولد عمي عدنان ...علاش هاد التذكير ؟
لوؤي : واقلت زعما تكوني نسيتيني هاد صباح نفكرك وصافي ...
قدس : نووو علااش غانسى ؟ غير كنت مشغولة مجاش على بالي نعيط ...
لوؤي : اهاه ! .. مزيااان ..
قدس : وصلتي ؟
لوؤي : وصااالت ( غادي بجهة طمويل خارج من ستارباكس كايجغم من قهوتو ) جيت خديت قهوة وغانمشي نكمل شي خدمة ... قالوليا غاتمشي لشركة ؟
قدس : اممم غانمشي ..شكون قالها ليك ؟
لوؤي : اكرام ....( مديرة اعمال قدس )
قدس : وشكون قال لاكرام تقوليك انا فين غادا ؟
لوؤي : ( طلع فطموبيل ) انا .... بلاصة ما كل مرة نسولك باش نعرف بروغرامك .... قلت ليها تسيفط ليا الاجندا ديالك كلا صباح ....
قدس : وبصفتك اش ؟
لؤي :ولد عمك .... لي قال لباباك ... انا دايرها بين عيني ....
قدس : كاينين شي بلايص نقدر نمشي ليهم وماراهمش عندك فداك الاجندا ومعارفاهمش اكرااام ... يعني هادشي لي كادير ماشي ايفيكاس باش تحضيني اولد عمي ....
لؤي : انا قلت مورا ماعرفتي خدمتي ... غاتكوني حيدتي هاد الاحتمال ديال مغانعرفكش فين نتي من راسك ....
قدس : ( علات راسها للفوق وتنهدات) باقا كنحاول نوووولف بلي نتا...( قاطعها )
لوؤي : صااافي غاتسكتي ... انا والو .. انا غا ولد عمك ..
قدس : رااااني بوحدي ....و مزال كنحاول نفهم علاش بغيتي الاجندا ديالي !
لؤي : ماتحسبيهاش قلة ثقة .. ولكن حسبيها خوف ...
قدس : مناش خايف
لؤوي : مكيانش شي حاجة محددة .. انا كنخاف من كولشي ....
قدس : هادي قلة ثقة الؤي بلا متزوقها ...
لوؤي : هي تا باباك مكايتيقش فيك ؟ ياك تاهو كاتوصلو لاجندا ديالك كل صباح حيت خاايف عليك وباغي يعرف فين كاينة الى تعطلتي ولا وقعات شي حاجة ومجاوبتيش على تيليفون. ... كذلك انا ... اما الثقة كون مكنتش دايرها فيك .... كنتي غاتشوفي حوايج خرييييين ....
قدس : مورالي صابح زوين ..وهاد لابيل بانليا عيطتيها باش تعصبني ....حيت مافيا لي يتراد معاك دابا فالهضرة ....
لوؤي : نوووو ... عيطت باش نسول فيك .... ومنها نيت تقولي ليا شنو خلا مورالك يصبح زوين ؟
قدس : ماعرفتش ( كاتحك فراسها ) ماعندي تاحاجة سبيسيال... صبحت فالمود وصافي
لوؤي : هااكاك .. هي غايخصني ديما نخرجك للبحر وصافي ...
فدس : هه !!!! ياكما حسابتك صبح مورالي زوين حيت مشيت معاك للبحر وحيت عطيتي ليا كادو فيه لي زيطوال لي كايعحبوني ! تيقتي راسك ؟؟؟؟
لوؤي : هههه لااا شكون قال هادشي ههه ... اودي نتي بووحدك ... يلاه احبيبتي غادي نخليك دابا هاڤ اگود داي .... وماضحكيش بزاف فالشوتينغ ... حيت كاتجي زوينة ونت ضاحكة ....
قدس : ( علات حاجبها ) صااافي غاتقطع ؟
لوؤي : هه ! وانتي اصلا كاتهضري معايا بحالا مجاوباني بزز شنو زعما غاتكوني ماسخيتيش نقطع !!!!!
قدس : هه!! منييييتك علاش مغانسخاش وانا اصلا تاابعني مايدار ... كنسول وصافي ...
لوؤي : هههه .. مكرهتش نبقى نهضر معاك تالصبح ولكن غايخصني نقطع حيت خدام و غانطلق صونفيل ... ملي تاني نسرق شي وقيتة انا غادي نعيط ليك ....
قدس : امممم .. واخا .... ( فوق نيفها ) ب بالتوفيق .. ف فخدمتكم .. زعما بالتوفيق ليكم كاملين فهادشي لي كاديروه ماشي غير نتا ...
لؤوي : ههه امييين اميييين هههه ... امين لينا كاملين ههه
قطعات عليه كضحك ودخلات لدريسنغ تبدل حوايجها فرحانة لي غير سمعات صوتو .... لبسات حوايجها لي كيف العادة ديما بنوتيين لا فالالوان لا فالقصات ..... وكلسات قدام طاولة المكياج يلاه كتقاد مكياجها وهي تسمع دقة فالباب وعلات حاجبها مافاهماش .. حيت ماماها مكديريش دقة بحال هادي ... تاسمعات الباب تحل وكتسمع طالون داخل ... وريحة بارفان ... وهي ترجع تمااكي ....
قدس : بيييلي ...دخلي انا هنا ....
رجعات كتكمل الكونسيلر تاسمعات صوتها " هاد بيلي بان ليا نساتك واش كاينة وحدة اخرى سميتها ماجدة هنا !! " ... علات راسها فيها بزربة وهي تعلي حجبانها معاها كانت متكية على المدخل بغوب خضراء على طايتها و طالون وشعرها مطلوق ومكايجها كيف العادة مرتب ومواتي عينيها الكبار ...
قدس: ( وقفات ) مااااجدة !!!! ( قربات سلمات عليها ) فييين هاد الغبور ؟؟؟ كانو خاطفينك!!
ماجدة : ههههه توحشتيني زعما ههه قادي قادي داك الكونسيلر وخرجي عندي توحشت الهوا دالازون ...
خلاتها وخرجات للبالكون كلسات ... و قدس قادات الكونسيلر تحت عينيها وخرجات لعندها كلسات مقابلة معاها وماجدة كاتشوف للتحت و غمضات عينيها كتسمع لصوت الطيور وريحة الشجر لي مخلطة بالجو ديال لبحر. ..
ماجدة : والله حتى توحشت هااااد الكالم ...
قدس : حقا ماماك كيبقات ؟ كنت سمعت جاتها كورونا ... وهي صحتها على قد الحال قبح مني غاتكون هلكاتها !!!
ماجدة : ( شافت فيها ) وايييه مسكينة ولكن دغيا فاتها الحمد الله ... راه رجعات دابا لخدمتها ولكن باقا مكتزعمش تلاقا مع ناس بزاف وتحيد البافيط ... قالت بعدا تاتأكد كومبليطمون بلي برات .. صباح قلت ليها نمشي عند عمي اسد كااانت باغية تجي معايا ولكن باقا خايفة تعادي شي واحد ...
قدس : اااه اوا ماعليش حتى تبرا بشوية عليها .. ونت ؟ فين كنت غابرة !!!
ماجدة : انا كنت فالمااليزيا .... عطلة راك عارفة نستغلوها شوية .. عرفتي دااااازت واااااعرة ....
قدس : ( هبطات شفايفها وشافت لجنب ) ممم ... بصصحتكم
ماجدة : مع غير حنا البنات عرفتي التسسسطية ديال بصح .. لوطيل واااعر ... وناس عاملونا مزيااان ... عرفتي بقوة ماعجباتني فكرت نولي نقرا فيها كاع هههه ...والله تاكنتي ناقصة غير نتي ... كليكة كلها مشييينا ... ماعاودوش ليك لبنات ؟
قدس : ( نتهدات ) لا ....
ماجدة : تخاصمتو تاني ؟ راه قالو ليا بلوكيتيهم ؟ مالك اصاحبتي درتي بحال هاديك لي غاتزوج وبلوكات كاع صحاباتها
قدس : مابغيت يبقى يطلع ليا تا سطوري دشي وحدة .. يمشيو يعاودها لكرهم ..... سافرتو بصحتكم ...
ماجدة : نااااري على محسادة !!!!,
قدس : ( شافت فيها ) ااااه محسااادة .. حيت ايمان ملي كان باباها فداك لازمة وحنا كنا مساافرين ماااااحطيت حتى شي تصويرة باش ماتشوفهاش ويضرها خاطرها ... وليليا ملي كانت ماماها مريضة انا كنت فاليونان وماااحطيت حتى شي صوووورة بالمرة منغير لي خرجو فالجورنال . .. علاش زعما تاوحدة ماقالت قدس مات جدها وشافو خويا ولوؤي اش وقع ليهم بسبب داك صحافي .... من مشكل لمشكل عطلة دازت ليهم كلها مشاكل و مسافروش علاش نجننو فيها ؟؟؟؟ اصلا هاد القاعدة دالسطوريات مابقاتش عاااجبااانبي واي واحد كايديرها بلوكيتو وسااالينا .. حيت داكشي غا مظاااااهر وبان عليا نبان عليك ( شافت لجنب )الفوحان دوالو ....
ماجدة : ( كتفرقع صبعانها حداها ) هيييي .. واش دابا نتي حااطة راسك براااسهم ؟؟؟ نتي غيييير هاد القصر لي عايشة فيه راه سفر بنسبة ليهم ....غايجننونك بدوك جوج تصويرات فاوطيل كاط ايطوال !!!!
قدس : ( شافت فيها بزربة ) نت عارفاني اماجدة اخر وحدة كاتشوف للخرجات بعين مادية .. انا مغانتفقصش لاشفت تصاور ماليزيا حيت شفتها كللللها .. ومكنتفقصش بتصاور ديال الدول ولي كلوب ومنعرفت شنو . . انا كنتفقص على الحرية لي عندكم وماااعنديش .... على داك الوقت الزوين لي كادوزوه وانا دوزتو كله مشاكل فعائلتنا نهزو راسنا من حاجة نطيحو فحاجة ...حتى انا عطلتي تمنيت نسااافر فيهااا مع البنات ونتي عارفة هادشي ممنوع علياااا وعمرني سافرت بلاا عائلتي وكنتمنى شي سفر غا غنع صحاباتي وماعنديش .. هادشي لي كايفقصني انا .... اما فين مشيتو راه متايهمنيش الله يجعلها تكون غا بيتزيريا .... بلوكيتهم باش مانبقاش نشوووف بنادم عااايش حياتو بالطول والعرض وشبعان حرية وانا لا ... كنبقى غير كنحقد .. ماااالي على حالتي ....انا اختي تقبلت الوااااقع ديالي ( شافت لجنب فجردة ) ووورضيت بييه ... لاش تجيو تحقدونا تاني ....
ماجدة : ( حطات يديها على رجليها بنوع من المواساة) وصااافي سمحي ليا تانا جاية كنعاااود ليك .... وكي الهبيلة جاية نقوليك واش تحضري لحفل توديع العزوبية دايمان راها تخطبات ..
قدس : ( شافت فيها ) بصااح ؟؟
ماجدة : سي .... بغات تواصل معاك ولقات محيداها من كولشي وقالت ليا نقولهاليك لابغيتي تحضري .. بارتي تودع فيها عزوبيتها وصافي وبغات صحاباتها يكونو معاها وراك واخا ديما مبلوكياها وقامعاها راها تفكراتك ....
قدس : فوقاش عندها ؟
ماجدة : ااسبت الجااي ... مع ديك العشرة دالليل غاتبدا الحيحة ... هادي فرصة بعدا تعيشي غا ليلة وحدة قبل لقراية
قدس: لا واش حماااقيتي ؟! نتقبلها من لبراني ولكن نتي ا ماجدة ؟ ماااكاتعرفيش بابا ؟؟ مكتعرفيييش جود ؟؟؟ مكتعرفيش ماما واقلة ؟؟؟؟؟
ماجدة : ورااه غاصاحبتك هادي وكايعرفوها
قدس : واش منبتك يخليوني نمشي لبارتي مع العشرة ديال لليل وعلم الله فوقاش تسالي بوحدي ؟؟؟؟ راه مستحيل تانحلم بيها ونا ناعسة بقا غانحلم بها ونا فايقة ... رررربي مانوضي بعدي مني جااااية غااتعصبني تاااااكنت نااااسية ومتقبلة واقعي جاية تقققلبي عليا تاني المواجيييع ....( وقفات) خليني نمشي نكمل مكياااجي غايمشي عليا الحال ...
خلاتها ومشات وماجدة حطات يديها على الحديدة دالبالكون وحطات عليها راسها كاتشوف للتحت تاهزات راسها بزربة ملي شافت طموببلتوو داخلة وهي تضحك حيت ملي جات وسولات عليه وقالو ليها مكاينش حسات بالمجية كلها تضربات ليها فزيرو ... خدات وقت كبير كتجمع شجاعتها تعاود تلقى بيه منبعد الانهيار لي جاها نهار سمعات بخطوبتو .... ورجعات تاني قوات راسها حيت شبه متأكدة انه مغاتعجبوش عقليتها ....على الاقل هي كدير ليه خاطرو اما بيلي عارفاها معكسة وكتبغي هضرتها لي تمشى وهي متأكدة ان جود هو لي كايبغي يكون المسيطر .... وهي تنوض لعند قدس ....لقاتها كالسة كتماكي ...
ماجدة: اجي بعدا نتي .... مزال ماعطتنيش جواب يقنعني على داك الحالة مع لوؤي ؟ همممم !!!! كاينة شي حاجة انا معارفاهاش !!
قدس: ( كدير البلاش ببرود كتهضر ) بحالاش؟؟؟؟
ماجدة : وانتي عارفاني اش قصدت ....
قدس : ( شافت فيها ) واش منييييتك نت ؟؟؟؟؟ ولد عمي وجاتني عليه النفس .. مالقيت تاطريقة يتفك من دوك المدلولات منغير هاااديك.. قالتها ليك وهاودتها غاتبقاي كل مرة تفرعي ليا كري !
ماجدة : ماقنعتنيش ....
قدس : اوا وشنو المطلوب مني ! نوض نجدب ليك ونحلف باش تيقيني ؟
ماجدة : اممممم ..اينيواي .... انا مشيت دابا .... جيت غير نشوفك ....وعنداك تبلوكيني حتى انا هههه ...
خلاتها ومشات وقدس بداات ضور فراسها ... ومشات ديريكت لدروج طلات بان ليها باقي ماوصل لظار ومشات بزربة لبيتو وحلات ودخلات ...
بدات ضور عينيها على الجناح وهي تتبسم .... شحال توحشات تفاصيل هاد الجناح ... وريحتو لي مالياه ... وهي تشوف لجهة البار ... وعضات على شفتها من اكثر البلايص لي كان كايسيطيها وهو واقف فيهم تما كايخلط كاسو .... مشات بشوووية تاوصلات وهزات واحد من دوك الكيسان كدورو فيديها وقرباتو لفمها بشوية وهي تسمع لباب تحلات وضارت وهو سدها وجا داخل تاستوقفو منظرها قدامو وعلا حاجبو وهي تبسمات وحطات داك الكاس بهدوء وجات كاتقرب ليه وهو علا حاجبو و لاح الفيست ديالو وسوارتو على الكنابي حداه كايشوف معاها بملامح حادين وواضح فوجهو بلي ماعندوش الخاطر ....
ماجدة : ( قربات عندو كتر وبدات طلع عينيها مع عضلات بطنو البارزين من داك تيشورت لصدرو تاطلعات عينيها فيه وهزات يديها حطاتها على صدرو وهو معلي فيها حاجبو ) توحشتك ...
جود : ( حيد ليها يديها ورجع بلور ) مغاااتقوديش شوووية من طرريييقي نتي ؟؟؟؟؟؟ مغااتفهميش كرررك !!!
ماجدة : ( علات راسها فيه ودوات بتهكم ) شنو زعما !!!! باغي دير فيها راجل خاطب ؟؟؟
ماحسات تاكان دفعها تاقربات طيح ووسعات عينيها وجرها من يديها دفعها تاني جهة لباب تاتلتخات مع البااااب ....
جووود : مابااااغيش نضررربك الخراااا خرجججي قوووودي عليا ....
خلاها ومشا باتجاه دوش معصب وهو يسمعها ..
ماجدة : واش عرفتي بلي بسبابك انا كنكره كنيتي !
جود : ( ضار عندها ) والله تا مريضة فراسك نت بالله ....
ماجدة : ( مسحات دمعتها بظهر يديها ) انا متأكدة .... متأكدة اجود كون كانت كنيتي حتى انا اسماعيلي ومنكم .... والله حتى كنتي غاتعطي فرصة لهادشي لي بيييناتنا وبلا متنكرررر ... بلا متنكر بلي داك الليلة حسيتي بشي حاااجة من جيهتي ...
جود : ( ضار كايكمل طريقو وكايحاول ما امكن مايقولش شي حاجة لي دير مشاكل وسط العائلة ) حسيت بالردة ....
ماجدة : ها ؟؟؟؟ الردة ... حيت انا ماشي منكم .... شنو الفرق بيني وبينها ؟ ها ! ياك حتى هي كاتبغيك بوحدها ... بلا متكدب وتقول حتى نتا ...
جود : ( ضار عنها معصب ) دابا واش بكاممل قوايك العقلية .... كتسنايني نتناقش انا وياك فهاد المواضيع ؟؟؟؟( نتهد ) ماجدة راه بررربي مغانعاود الهضرة مزال .... حاجة وحدة لي غانقوليهاليك حيت انا هاد التقحبين ديالك مليتو .....مرة اخرى .. نلقاك مزال هنا ... بلا متاخدي الاذن ديالي .... غاانحلف الى رجلييييك مااايعتبووش هاد الدار كاملة ومغانبقى عاقل لا على عائلتك لا على والو .... حيت هادشي ديالك فرع ليا كري .... ونا نابقيتش قادر ليه ..... عيت مندير بوجه عائلتك .... وصافي الخرا جمعي راسك
ماجدة : ( شافت لفوق وخدات نفس وشافت فيه ) غير تهنى هانا غادا فحاااالي .... ومغانعاودش نجبد هاد الموضوع مزال .... ولكن غااانبقى متأكدة بلي نتا رفضتيني انا وقبلتي بيها هي رغم اننا بجوجنا بحال بحال ... حيت انا ماشي منكم ...واخا تانا راني بنت دااااارهم
جود : ( بانفاعل) بنت دارهم مغاتجيش عندي فنصايص لليل للبار دلوطيل تحل رجليها ( غضمات عينيها مزيرة عليهم ) .. راه حاجة وحدة لي ماعطيتهاش ليك حيت مكنيتكش اسماعيلي هي ماااسللختكش .... ماخليتش دار بوك حيت باك مغايبغيش نضربو بنتو ونربيوها معاه .....
ماجدة : ( حلات عينبها فيه حومر ) اي واحد كايغلط وهاديك كانت مراهقة لي ديفرجيت فيها وندمت .... انا عمرني بغيت شي واحد كيفما بغيتك نتا .... وبلا متسمي الشرف والتربية هو لفيغجينيطي .... حيت الى كنت جيت للبار فنصايص لليل ... هاديك لي خاااطب راه دخلات ليهم كتر مني و(قاطعها)
جود : سمعتني شنو قلت قبيلة يااااك ؟؟؟؟؟ ( ماجدة كاتشوف فيه وهو شاف جهة لباب بمعنى خرجي ) يلااااه ....
ماجدة : واااخا ( شافت ليدو لي فيها الخاتم ورجعات شافت فيه بابتسامة باهتة ) واخا اجود ... هانا غانمشي .. غير دير فبالك .... بلي مكاااااينش لي غاتكون معاها فرحان من غير لي كاتبغيك دبصح ..... ماشي لي كنتيها اسماعيلي .....
خلاتو وخرجات للدروج شادة فدوك الحديدات .... عينيها حمرييين وكاتفكر النظرات لي كان كايشوف فيها بيهم عامرين اشمئزاز ...وكيفاش نعتها انها مامربياش حيت نعسات معاه ..... كيفاش كايشوفها قحبة وغير هوما لي ملائكة الرحمان ..... وهي تززير على سنانها وعلى دوك الحديدات كاتشوف للتحت ....
ماجدة : هاحنا ... هاحنا غااانشوفو .. واش الاسماعييلين .. عندهم ... القحاب تاهوما .. ولا ... لا ..... واش غير بابا لي ماعرفش يربي .... ولا تانتوما ......( نازلة فدروج مفقوصة باقا كتبركم ) باش تعلم اجود تضرب فشرف بنات ناس و تمجد دياولك .....
نزلات من دروج وجبداات كونطاكط طموبيل من صاكها وخرجات من القصر نازلة فالدروج ديال المدخل وهي تعلي عينيها وتعلاو تاحجبانها ملي شاااافتها ....
كانت جاية لابسة سروال سبور بينك بجيوبا وتيشورت بيضة وصبادرين وشعرها ظافراه لجنب كتحيد النظاظر من عينها وهي تعليهم فيها تالقاو راسهم وجها لوجه فالدروج ... وبدات كاطلعها وتنزلها وشاف فيها ....
بيلي : ميجو .... ( بنظرة استفزازية ) عاش من شافك ازين ....
ماجدة : ( بنفس النظرة ) و ملي شافك نت مات .....
بيلي : بالفقصة احبيبتي ... ( بغمزة متسائلة ) اش جيتي ديري هنا !
ماجدة : هه ؟؟؟؟ منيتك !!! راه دار خاااالي هادي واقلة .. نجي ليها وقتما بغيت ونمشي منها وقتما مابغييييت .....
بيلي طلعاتها ونزلاتها والخاطر كيبان ماعندهاش وتخطاتها ومشات طالعة و تسمعها من وراها .....
ماجدة : .... انا منك نتسنى خطيبي هو لي يجي عندي لدااارنا ... ماشي انا لي نجي عندو لدااروو ...
بيلي : ( ضارت عندها براسها ) الى نت هادي داار خووو ولد عم مك من مو .... انا راه دار عمي ... كانجي ليها بجود ... ولا بلا جود .....
خلاتها وطلعات مكملة طريقها وماجدة زيرات على يديها ومشااات كتتتبخ الاعصاااب لي كايركبوها بمجرد مكتشوفها قدااامها .....
دخلات بيلي لداار ومشات جهة الفوطوي وتلاحت عليهم معلية راسها للفوق شادة عليه بقوة ماتيحرقها وبقوة اابكا لي بكاتو لبارح ...تاوقفات عليها رجااء
رجاء : ماموزيل بيلسان .. مرحبا بيك .. تشربي شي حاجة ؟؟ .
بيلسان : كوفي بليييز .. مكاين حد ؟؟
رجاء : وي ... من غير مدام لامار فبيتها ناعسة .. وموسيو جود حتى هو لفوق ...
بيلسان ومات ليها براسها ومشات .... ورجعات راسها لوور كاتفكر .... وهضرة خوها ملي فاقت وهي كاتعاود فودنيها حتى جابتها لهنا بلا متحس ... """ واخا .... نقولو بصصصح الالة غااايعيشك فالفقر .... واهو داك كيوريك مشروووعو ... واقلة خوتو مزال ماداهمش ... كبر بيك ونتي قلتي ليه غتعيشني فالفقر وغياجيتي بحال هاكا !!!!! ماشي حشووومة ..... تبغي نتي لي يطيح ليك بخدمتك ولا احلامك .. نتي بقى فيك حال لي استهزئ بقرايتك وهو مايبقاش فيه لحال لي ططحنتي ليه الخاااطر .... كتفكري غا فراسك ؟ """
ردات راسها لقدام تاني غير كاتسوط عاد سرا معاها كولشي .... جابو ليها قهوتها .... شداتها عليهم وقادات فيها السكر وهزاتها وطلعات بجهة جناحو كل درجة كاتغزز فيها شفايفها كيف غادير تصلح الوضع ... تالقات راسها قدام بابو ....
خدات نفس ودقات .... بقات واقفة شحال كتتسنى ، تاسمعات الباب تحلات وعلا حاجبو فيها باستغراب ....
جود : بيلسان !!!
بيلسان : ( بابتسامة وعيون عيانة ) نقدر ندخل !
جود رجع بجسمو لور حال ليها لباب وهي زادت دخلات ... غير دخلات للجناح هوو يبان ليها ... ضحكات وحطات الكاس دالقهوة على طبلة ومشات عندو وتاهو تلاح عليها وطاحت على ركابيها كاااتلعب معاه
بيلسان : تووووحشتك الكللللب .. تووحشتك ...( كلسات فالارض كاتلعب معاه ودوز يديها على الفرو دبالو هو كايضور بيها ) كايتهلا فيييك هاد جود ولااا والوو .. همممم ... ( خشات راسها فيه ) ماااتوحشتنيييش .. عطيني شي تعنيقة بحال لي تعطييييني ( عنقاااتو ) ... هااااااكا ههههه
جود بقى واقف كايشوف فيها كاتلعب مع روكسي فالارض وداز للدريسينغ لبس تيشورت ديالو حيت كان غير بشورط وشعرو باقي فازك من الدوش لي خدا .... وخرج عندها وهي باقى كالسة فالارض وروكسي حداها كداعبو ... وعلات راسها فيه ...
بيلسان : خارج ؟؟
جود : سي .... ( قرب كتر وكلس على واحد الكنابي حداها وهي فالاراض مع روكسي وهو كاشوف معاها ومع وجهها لي واضح مخبي بالمكياج اثار العيا وضرب ) صافا ؟؟؟
بيلسان : ( علات راسها ) صاافا..... ( تنهدات وشافت فيه ) قالت ليا ماما .... جيتي صباح .... وضاربتي نتا واياد ..
جود : باش هادي دير ليك العقل شوية ... حيت داك التبرهيش لي درتي لبارح غايجيب غا لمشاكيل ....
بيلسان : ( نزلات راسها كاتشوف فروكسي ورجعات شافت فيه ) غانمشي فحالي غدا ... وغاتهنى شوية مني انا ومشاكيلي ههه
جود : مشاكيلك غانتهناو منهم نهار ديري عقلك .... ماشي الى سافرتي .... حيت كيفما كاديريهم هنا ... غاديرهم تما ... وكيفما غايضربك خوك هنا .. غيضربك حتى تما ....
بيلسان : ( بابتسامة مرهقة ) ماعرفتش ... ماعرفتش اش كايوقع ليا اجود .. يمكن حيت شخصتي هاكا ... مكنفكرش بزاف فالحاجة قبل مانديرها ... كنت معصبة .... ومكنت كانشوف والو قدامي .....
جود : سيري شوفي طبيب ديال العينين ... ديري نظاظر ... و ولي تشوفي مزيان قدامك ....
بيلسان : ( بقات كاداعب فروكسي شحال كتجمع الهضرة فراسها وهو كايشوف فيها عاد علات راسها فيه ) جيت نتعدر على لبارح الى قلت شي حاجة جرحاتك فلحظة عصبية بلا منحس ..... ( جود كايرمش فيها) مكنتش فااهمة ... و .. وبحالا ماعطيتش للامر اهمية ولكن تيق بيا راه انا اول ناس لي غاايشجعوك فهادشي ... ربما قلت هاكاك حيت كنت محتاجة ندوز وقت كتر معاك فشي بلاصة حيت قربت نمشي ... وهاديك البلاصة مكنتش كنضن عنها أهمية كبيرة عندك قد هاكاك .... حيت فايت وريتني ديك المرة فين باغي دير اول معرض ديالك فهاداك البارك ... يعني راه ماشي أول مرة كاتوريني لبلايص ...قلت يمكن كيفها كيف كاع البلايص لوخرين .. انا عارفة راسي خضرة وعارفة راسي كنهضر بلا فرانات وعفوية بلا قياس ..... داكشي علاش ... ( شافت فيها ورمشات بعويناتها مع ابتسامة) ماتبقاش دي عليا وصافي ....
جود : ( رجع بظهرو لور كايشوف فيها ) امم ..اهاه ...
بيلسان : انا هضرت شوية مع اياد البارح وقدر يفهمني خدمتك ... وفهمني بلي ماشي بحال كيف كنت متخيلة ... انا تعصبت اجود حيت مكنتش فاااهمة .. حسابتنب باغي تعيش كتخدم طموبيل وحدة وتبعيها ، هه ! عارفة راسي غانبان ماقارياش ولكن والله حتى هادشي لي جالبالي باش منافقك مانزوق معاك .... داكشي باش جاتني صعيبة نوافق ... حيت انا كاع مكنعرف نصطنع اجود .. والله مكنعرف .... عفوية ولي فيا لي داخل دغياااا كايبان فردود افعالي .... خدمتك و احلامك اااه .... مشجعاك فيهم ولكن كان يحسابتني ان العيشة غير بيهم صعيب ة حيت مفاهماهمش .... مهم .... منبعد فهمت كولشي .... واخا كان خاصني نعرف من اللول انه مادام قررتي تعيش بيهم الا وضامن مستقبلك .... راني عاد كنتعرف عليك اجود .... عطيني شوية دالوقت وغانوليلو نفهمو بعضياتنا كتر ...
جود : وزعما شنو كان غايطرا كون قلتي ليا نفهمك وحنا تما !!! مكناش غانوصلو لهادشي كامل اولا !!!ومكنتيش غتساي تا يجي اياد يشرح ليك خدمة هاداك لي غاتزوجي به ....
بيلسان : تصرفت بعفوية بلا منفكر ، وكنت كنتسنى نخرجو وقلت نمشيو لشي بلاصة ونهضرو . .. ماعرفتش كيفاش تالقيت الاومور وصلات بينا لداك الدرجة .... (تنهدات) ولكن ماااااعليش اصلا الخصام وهو ملح العلاقة هو لي كايزيد يقرب جوج كتر من بعضياتهم وحنا اصلا يلاه كنتعارفو ... نتا كتعرف عليا ونا كنتعرف على جود الجديد ....
جود : انا مامعصبنيش انك مافهمتيش خدمتي وماعطيتيهاش وقت ....كتر ماعصبتني البارح الطريقة باش كتفكري ومقتنعة بيها .... وباغا تعيشي حيااااة خاااوية و مبنية على لخاوي ابيلسان .....وكتجابهي من لفووق !!!! راسك حجرة مكتعطيش فرصة تسمعي لاخر اش كايقول ليك ...
بيلسان : ماشي بحال هاكاك ....( تنهدات ) ولكن صراحة اه .... باااغا نعيييش ... فقط نغيش تكون عامرة ولا خاوية بغيييت نعيشها .... نعيش تفااااصيلها . نعيش الحياة لي نحس بيها ونكون فيها فرحانة ..... بغيت نعرف راسي راني عايشة اجود .. ماشي غير مسايرة طبيعة بيولوجية. ...نطلقها تتتسرح !!!! نعيش بلا تعقيييدات. ..... ومغانعرفش نعيشها بوووحدي داكشش علاش ختاريتك تكون نتا لي عايشها معايا منهار كانت عندي 15 عام ...
جود : وشنو هي هاد الحياة بنسبة ليك ؟
بيلسان : نعيش لياااام ونا مكنفكر فوالو .. مااباغاش نهز لهم ... حيت الحمد الله موفر كولشي ....بغيت نعييييش ألييييز .. كيف كنا انا وياك شحال هادي .....
جود غير تنهد كايشوف فيها ويضور فراسو وهي ناضت كتنفض راسها من الزغب دروكسي ....
بيلسان : مهم انا غايخصني نمشي ... وصلت ماما عند صاحبتها وجيت هنا عندك بينما سالاو حيت خاصنا نخرجو انا وياها ناخدو شي حاجات .... ( شافت فعينيه ) جيت غير نعتدر حيت هاد المرة انا لي غاالطة ...
جود : ( طوول فيها الشوفة و ناض تاهو ووقف وقرب عنها شد يديها حاوط راسو بيهم وتاهي عنقاتو وشد وجهها بين يديه ) فوقاش غاتمشي ؟
بيلسان : غدا ...عندي طيارة مع الخمسة ديال العشية فطنجة ...خويا قطع تما .... هو سافر ليوم كان داير نمشي انا وياه ساعة مقلق مني مشى بوحدو هههه ... غدا فصبح نمشي انا ...
جود : داكوغ .... ( رد ليها قصيصتها لور ) انا غانسالي شي شغال عندي ... وغاندوز موراك ... ندوزو هاد الليلة انا وياك ...
بيلسان : ( وسعات عينها ) ريييلي !
جود : ياه! ..
بيلسان : ( بضيحكة ) فين غانمشيييو ؟
جود : فين ما عجبك .... ياك نتي باغا تعيشي .... خليينا الالة نعيييشو .....
بيلسان : ( عضات على شفتها فرحانة ) جوود كاتهضر بصصح ( جود حرك ليها راسو بأه وهي نقزااات عننقاااتووو وهو تايضحك على عفويتها )واااش عاااااارف شحااال كنموووت عليييك ( رجعات كاتشوف فيه كتنقز بالحماس ) صاااافي .. غاتلقاااني واااجدة ... نيت اياد مكااااينش . يلاه نقدر نخرج بخاطري . ...
جود : ( علا حاحبو مع هضرتها اللخرا ورجع دغيا تبسم ) سي ... حسن ...
بيلسان ضحكات ومشات بجهة الباب كادير ليه بايباي ... ونزلات فالدروج فرحانة وهو بقى غي كايتنهد وكايضور راسو بلااا ... كايحس باقي ليه شرررطة وتهبلو .... عقليتها صعيب يتقبلها فنفس الوقت مقادرش يتفرق عليها ولفها بلا قياااس وكاتعجبووو ببزاف دالحوايج منهم صراحتها وعفويتها واخا كاينين تالحوايج لي كايعصبوه ولكن غايدير جهدو كامل يبدلهم ليها .....غير بالهداوة والخاطر ..... وهز سوارتو و ونزل من الجهة لاخرى للباركينغ الارضي ....
عند قسم ...
السادسة والنصف مساءا ...
وصلات لباركينغ ديال لپوغ ..... المكان المخصص ليهم ....يلاه نزلات من الطموبيل لقات صفاء كاتسنى تما وصلات ساعة قبل منها .... وشعرها كلو كايديه الريح بنظاظرها الطبيين وحوايجها لي ديما كونفوغطابل باش تجري وراها .... هو يجي المساعد حل الكوفر و هز حوايجها .... وهز لبستها ... وهي هزات صاك ديال وراقها وتمشات وصفاء وراها ...
صفاء : الحمد الله ماتعطلتييش بزااااف .... خفت فاش قلتي ليا يلاه خارجة من كازا .... ومشيت درت بحساب الروطار وعلمتهم بلي الفوايج تأجل للعشرة ديال لليل باش يلاه يقدك الحال تقادي كولشي .... محسابتنيش غاتوصلي بكري ....
صفاء كاتهضر وهي غير زااايدة وساااهية كاتفكر .... هضرتو كتخلط ليها مع هضرة ماماها و باباها والضجيج واقع فدماغها ... حياتها فعلا بقد ما انها وضاحت معاه بقد ما انها ساهل باش تتبعثر ..... هضرة جداها كان شوية من داكشي لي كايتسناوهم مزاااال فهاد العلاقة ...هضرتها جات باش تبين ليها بلي اصيل مكيدير حتر شي تنازل على قبلها من غي انه كايتقاتل باش يولي فمقام واحد يطلب بنت الإسماعيلي .... اما باش يتنازل مسسستحيل ...
حسات بالنفس بدات كتخنق فيها وهي تحل عينيها مخلوعة هاد مرة حسات انها نسات واااسها وضغطااات بزاف على دماغها وهي تابعها اول طراجي ديالعا.... وشي كريز دالربو ولا يضياق صدرها اببدا ماشي وقتهم .... ووهي توقف وضارت عند صفاء لي موراها .....
قسم : سيري سبقيني ... غانبقى هنا شوية بغيت نشم الهوا ....
صفاء : داكووغ مادموزيل ... نيت بينما جا موسيو اسد..
خلاتها ودخلات وقسم شدات فدوك الحديدات كتتنفس وكاتفكرو نهار جا هنا لبور و فاجأها .... تمنات حتى دابا لو ضور وتلقاه موراها .... دارت ضحكة مستهزأة ملي حسات براسها باقا معلقة سعادتها كلها بيه ومقاداش تفرح بطراجي ديالها وهوما مخاصمين ويمكن غايتفارقو كاع ...... الهوا دالبحر كايضرب فيها مغمصة عينيها ومعلية راسها لفوق كاتاخد شهيق وزفير ترخي بيهم اعصااابها ... تبدا تايليفونها كايصوني ..... هزاتو عندها وهي تبتسم وجاوبات ....
قسم : جوود
جود : الكابيطين ديالنا .... تحرك هاداك الباطو ولا جاك ثقيل .... ياكما نديرو ليك شي دفيعة ....
قسم : ههه ... اشنو دابا ! بحالا عمرني حركت باطو ....
جود : بوحدك ! .. لا ...
قسم : غاانحركو .. بوحدي هاد مرة حيت انا لكااابيطان وهانتا غاتشوف ....
جود : هههه بالتوفيق .. واخا ماقلتيش ليا بسلامة ....
قسم : واش تافقتو كلكم تقلقو عليا ولا كيفاش !!!
جود : هادشي كايعني حاجة وحدة .. ان السيمانة الجاية لارجع داك الباطو على خير ..... عندك كريدي كبير ....
قسم : ههههه ... اسيدي انا قابلة بيه ..... ( تنهدات ) دعي معايا اخويا
جود : ال ذا بيست .... راك قدها ماتخافيش ، واش نتي يغلبك باطو دالقزدير !! .... و نت المراة الحديدية هههه
قسم : ههههه لا اخويا لا ... والله حتى راني غااا واحد القشششة ساااهل يهزني المااا
جود : على شنو تايصدي الحديد منغير الما .. الما سهليتيه ولا ! ....
قسم : هه والله الى عندك الحق ... سسهلتو صراااحة ...
جود : سيري تخدمي سيري ونت مانعرفت اش جاك على الدراما .. هادا وقت الدراما دابا !
قسم : ههه لا .... اه نسيت .. بيلي غدا غاتمشي.. حاول تدوز معاه اليوم باش ماتبقاش فيك الفقصة هههه
جود : على انا غانتسناك حتى تجي نت تقوليها ليا ولا شنو ؟
قسم : ههههه الله يخليكم لبعضيااتكم ...
جود : امين ... ديري ليااا سيلفي باللبسة الجديدة نشوفك ..يلاه سيري تخدمي على ولادك ....
بدات تضحك وقطعات تيفون يلاه غاتردو لجيبها لور وهي تسمعو صوونا تاني .... حسابتها غير جود نسا شي حاجة ماقالهاش !!! ... وهي تلقاها نمرة ديال اصيل !!! بقات كترمش بعينيها مافهماتش علاش هاد الاتصااال دابا ؟ " تاااااالدا ؟؟؟؟ " هي الحاجة لي نطقات بها بلا متحس ملي شافت نمرتو ..... فين كااان لبااارح .... غمضات عينيها مزيرة عليها كتنفس وكتهضر مع راسها ...
قسم : ديري عقلك اقسم ديري عقلك ... صافي جاوبيه شوفيه اش بغا .... مغانتبرهشوش هنايا دابا .... غايكون بغا يدير فيها شوية دااصواب بغا يقول بسلامة بحال ناس .... سمعبه اش بغى وققطعي .....
خدات نفس عميق وجاوبات .. .يلاه غانقول الو وهي تسمعو ...
- هادي ماشي مسؤوولية اكابيطين !!! ... قلتو لينا التسعود ولات العشرة !! .... ديرو معانا شوية دالانضباط عفاكم ...
وسعات عينها كاااتشوف مع جناااابها ... وشافت للجهة الاخرى للمرر لي كايطلعو منو الركااااب واش يبان ليها ... مافهمات حتى حاجة وبقا كاتقول واش هدا جا ؟؟؟؟؟؟
قسم : اصييييل !!!
اصيل : كاين على برا .... قادي الاومور باش ندخل ....
قسم : ( وسعات عينها كاتحاول تستفق وتوعى بلي راه كايهضر بصح وهادي المرة التانية على التوالي لي كايديرها بها ) كيفاش على برا ؟؟؟؟؟
اصيل : راه غاتسد لباب اقسم ومنبعد وفكري اشمن برا راني فيه .....
قسم : واش نتا على برا ااصيل ؟؟؟؟ فالجمارك ؟؟
اصيل : اه .... مابغيتش ندوز باش بلا مايحرجوني بلا مانحرجهم .. قادي الاومرو عاد نمشي نعطيهم لباسبور ....
قسم: اا .. و واخا .. سيفط ليا باسبورك دابا فواتساااب .....
قسم قطعات تييلفون بزربة وهي مزيرة عليه مافهماش وماعرفاش كيفاش ترسمات ابتسامة غغغبية على فمها وحنيكاتها .... لي دغيا تحكمات فيها وجمعاتها وهي توصلها صورة و سيفطاتها لصفاء لي طلعات لفيو فلابلاصة بحكم خدامة وتيليفونات فيديها وبدات تصوني عليها تاجاوبات
قسم :خرجي للجمارك ددخليه ... بزربة غايسدو
صفاء : ( كاتشوف لصورة دباسبور ) بويفراند ديالك هدا ولا كدبت !!!!!
قسم : صفاااااء .....سيري للجمارك .. دخليه .. قولي ليهم مامحتاجش الفيزا دايطاليا حيت مغاينزلش من الباطو وماشي معايا انا .....
صفاء : كيفاش ؟ كييفاس امادموووزيل ؟؟؟؟؟ كيييفاش غايمشي معاك
قسم : هضرتي رااها باينة ... قولي ليهم يخليوه يدوز ... راه مغاانزلوش ... بلا مايطبعو ليه باسبور غير يشوفوه .. قوليلهم راه مع الكاااابتن .... واااااسربي
صفاء : اه يعني مغااينزلش !! حيت راك عارفة مستحيل بلا فيزا
قسم : راه قلنا ليك غانبقاو فالباطو .... قولي ليه هدا من موالين الباطو سرررببي مغانبقاش نعاود لهضرة ......
صفاء : صااافي ... صافي واخا .... وهادشي فخبااار موسيو اسسسد ؟؟؟؟؟
قسم : صفااااء !!!!! غانبدا نغوووت
صفاء : واخا واخا مادموزيل دااباااا ..
قطعات عليها وضارت كاتشوف فالبحر شادة فالحديدات .... يلاه كاتستوعب الى بصح راه هنا !!!!! بقااات كاتشوف فالبحر عاد ردات لبال للونو ؟ عاد ردات لبال لفين هي وشنو ضاير بيها وبلي هي دابا غتبحر بأول فواياج رسمي ديالها ؟؟؟ عاد ردات لبال لشنو واقع وعاد قدرات تحل عينيها ... التفكير كان منسيها كووولشي ... بكلمة منو كايقد يطفيها وبكلمة كااايشعلها ..... قدر يغيرها وييقلبها تا من ملامحها ولون بشرتها تبدل كلووو فثاااانية وحدة ... خلاها تشوف لبحر لونو رزق بعد ماكن كايبن ليها كولشي كحل ..... شافت لجنب بانت ليها صفاء خارجة كاتجري باش تدخلو .... وهي عضات على شفتها كاضور فراسها ففلخر ضارت شادة فدوك الحديدات كتحاول تجمع داك الضحكة البلهاء باش ماتبانش بلي ميتة عليه .... واخا هي مزال مقاداش تاااتستوعب بالفرحة بلي غايكون معاها سييييمانة هي وياه !!!! وبلي رغم كولشي تنازل ودار ليها الخاطر ؟؟ اتصالو كان بحال داك الشمس لي شرقات وسط الغيوم .... بحال داك الامل لي جا بعد جبل دالتشاؤم ...
بقات شحال واقفة غير فبلايصها ..... تاسمعات خطواتهم حيت المرر خاص بالكابتن و الفريق ديالو .. كان ممر من الحديد كايوصل بين لبوغ و السفينة ..... الخطوات كايتسمعو عليه ... قدرات تميزهم راهم جاين .... ضارت لجنب وهي تبان ليها صفاء وهو جاين .... عينيها جات غير عليه بحالا مزال خاصها دليل تتأكد .... كان بسروال دجين كحل وتيشورت كحلة وكويرة وكاسكيط كحلة وهاز صاكادو جلدي على واحد الكتف .... خلاتهم صفاء ومشات بزززوربة راجعة للباطو تكمل خدمتها قبل ماتبدا قسم الاجتماع مع الفريق خصها هي توجد كولشي .... وقسم بعد ما تأكدات منو هو لي جاي مبتسم ابتسامة خفيييييفة فيها باينة غير فعينيه ..... رجعات راسها كاتشوف لجنب فلبحر وهو جا ووقف حداها وغمضات عينيها كاتزيد تتأكد من ريحتو انه كاين تما ....
اصيل : روطار فاول فواياج .... هادشي مكيشجعش نتيقو فخطوطك اكابيطين ....
قسم : (بنفخة) مابزز عليك تاشي واحد تجي .....
اصيل : ( ضار شاف فيها تايقرا تفاصيلها لي فيهم الغضبة مخلطة مع شوية دالفرحة مخبية ) صافا !!!
قسم : صااافااا ... ( ضارت كاملة شافت فيه ) شنو كادير هنااا ؟ ياك قلتي مغاديش تجي !!!
اصيل : ( علا حجبانو وعوج شفتو وعلا كتافو خاشي يديه فجياب سروال ) راه نقدر نرجع ماعنيدش مشكل ......
قسم : ( نترات ليه باسبورو لي باين من جيب لكويرة وزادت ماشية بجهة مدخل الباطو ) سيرررر ......
خلاتو ودخلات وهو كاايشوف معاها هزات باسبورو ومشات !!! ودار ضحكة خفيفة وتبعها .... واصلا واش قادر يدير شي حاجة اخرى من غير يتبعها ..... عارف بلي هادشي لي كايدير فيه غير مكايزيد يغرقو ولكن باغي يغرق .... الى كان الغرق غايخليه معاها وحداها وقريب ليها كايشوف فوجها وتفاصيلها ..... باغي يغرق ، ماعندو مايدير بالبر لي غايكون فيه بوحدو بلا بيها ...
كانو غاديين فداك الممر حتى وصلو لمدخل الباخرة ومدات ليهم باسبورو بوانتاو ليه وتحناو عاطينو تحية وهو علا حجبانو !!! .. كان المدخل مخصص للقبطان و الفريق ديالو فقط ..... كولشي تما كان كايقدم ليها التحية وهو داير يدو فجيابو وكايشوف ... كانت اول مرة غاايطلع فباطو قد هادا واخا هو ولد البحر ! ... ولكن اكبر حاجة ركب فيها هي باركو ....مقادرش حتى يتخيل ان هاد المدينة المتنقلة المسماة بالباخرة كلها ديالها هي !؟؟؟؟ .... وكلهم هادو خدامين عندها ؟؟؟؟ وهو كايتقاتل على قبل بنت بحال هادي .... الكل كايحيوها وهي كتومي غير براسها وهو كايوشف مع الارجاء .... قالت ليه بلي لاجا معاها لبلايصها غايرتاح ولكن كايحس براسو غير مكايزيد يتوتر !!!
وصلو لواحد الكافيتيريا لي كانت قريبة من قامرة القيادة .... غي من الناس القلال لي كانو فقط لي لابسين لباس البحرية وخدامين تما قدر يعرف بلي هاد البلاصة مخصصة لموالين السفينة والطاقم ديالها ....
جرات كرسي وكلسات وتاهو جرو وحط الكارطابل ديالو على واحد اخر ... كايشوف مع المكان .. كانت الكافيتيريا عامرة غير بالعاملين تما كياخدو قهوتهم قبل الانطلاق ..... وهي كاتشوف فيه هو ....وكاتشوف ميفاش كايتفحص المكان .... تابان ليها حيد نضاضرو حطهم كايحك فعينيه
قسم : شنو خلاك تبدل رأيك وتجي !!!!
اصيل : ( عوج راسو معاها كايشوف فيها مصغر عينيه من البروجيكتور لي ضااارب فيه .... وهي شافت لجنب باش ماتزيدش تغرق فعينيه وشوفاتو ) كاين جواب واحد ... وراك عارفاه ...
قسم : ( كاتشوف لجنب وتماسي عنقها لور ) بغيت نسمعو ...
اصيل : نتِ
قسم : مزال ماااقتنعتش ....
اصيل : ( كايشوف مباشرة فيها )بغيت نعطي فرصة اخرى لهاد الحماق نشوف فيه غايوصلنا انا وياك ...باش كيفما كانت النتيجة .... مايبقاش فيا الحال على الاقل غانكون درت محاولات ..... ودرت لي عليا .....
قسم : ( كاتشوف لجنب ) مزال ماااقنعتنيش .....
اصيل : ( كايشوف فعنيها ) ماقااادرش ... نتفرق عليك .....
قسم : ( قلبات راسها شافت فيه ) ولكن باااغي .....
اصيل : اااه ... باغي نحبس هادشي .... ولكن مقادرش ...(حرك كتافو معوج شفتو ) راك فوق طاااقتي نتي .....هدا جهدي
قسم : (بجدية ) تااانا باغا نحبس ... حيت هادشي كيفما كايضرك ... كايضرني تا انا ... حتى انا بعدني على عائلتي .... نهار كنكون فرحانة وسيمانة لا .... ديما انا وياك مخاصمين .... ولكن مكنقدرش ..... تانا مكنقدددرش ااصيل ....
اصيل : ( تنهد ورجع بظهرو لور شاد بيديه على جناب لكرسي كايشوف مع الكافيتيريا وشاف فيها ) قلتي ليا .... نعطي لهاد العالم ديالك فرصة اخرى .. ونشوف المجتمع ديالك حتى نت كيداير .... ولا بالاصح ... باش نولفو .... ومايبقاش يبان ليا شي حاجة لي صعيبة .... واخا .... ( شاف فيها ) غمضت عيني وهانا جيت ... خلصت سيد يبقى عساس على داري وجبت صاحبة سلمى تبات معاها بينما جيت ...خلصت لي يرومبلاصيني فالخدمة و اجلت الخدمة د الريسطو .... وجيييت.... جيييت نعطيك هاد الفرصة لي بغيتيها ... واخا عارف عالمك بقد مغانجي نتقرب منو ... بنقد مغايزيد يبان ليا شحال صعييب غير من الدخلة ديال لباب ..... ولكن مااااعليش ..... نسد تاني عيني .... حيت انا لي مخليني لايح معاك الخطوة ونعطي فرصة اخرى ...ماشي هو مجتمعك لي خاصني نولفو ... انا لايح الخطوة حيت ووولفتك نت ... اما هاد المجتمع ديالك عمرني غانولفو حيت مكنتاميش ليه .... وماعندي فيه والو وغير ضيف فيه .... أما نتي لا .. نت كنححسبك ديااالي اقسم .... سي حاجة لي كاتخصني .... ( قسم كاتشوف فيه ) انا درت ليك خاطرك وجيت حيت مكنبغيش نشوفك مقلقة ومابغيتش تسيفطك فاول فواياج ديالك مورالك نازل ومابغيتش نضيع هاداك الحماس لي جيتني بيه كاتقترحي عليا نجي معاك ... وحيييت باغي نكون معاك فنهار مهم عندك بحال هادا ..... ماشي على ود نولف هادشي حيت كوني متأكدة بلي عمرني غانولفو وعمرو غايعجبني ...... انا واعدتك باش ندير جهدي كامل باش تكوني فرحانة وهانا كنفد وعدي وخا نزطم على راسي ونجي بلا فيزا ودوزيني نتي ....
قسم : ( ساهية كاتشوف فيه بببكل حب ) واش عارف .... نتا شنو درتي فحياتي ولا معارفش ؟
اصيل : ( بابتسامة طانزة ) خرربقتها ......
قسم : ( بابتسامة خفيفة ) اصلا السكر كنحتاجو نخلطوه فالطاس ونخربقوو داك القهوة باش يلاه يحليها مزيان ....
يلاه غايجاوبها وقفات عليهم صفاء كاتشوف فيه وكاتشوف فيها
صفاء : مادموزيل قسم .... هذا هو الوقت باش تلبسي حوايجك ... وباش تقادي الامور .... حيت ليكيب كتسنى فقاعة الاجتماعات .....
قسم : داكوغ ( شافت فاصيل ) هاهي غاتوريك صفاء بيتك ... رتاح ... وانا غانسالي وغانجي نتلاقاك هنا .... واحد جوج سوايع هاكاك .... ( وقفات و هضرات فودن صفاء على السويت لي تديه ليه)
اصيل : داكوغ ( وقف تاهو) سيري لخدمتك انا غاتلقايني هنا ....
مشات قسم من الجهة لوخرا وهو هز كارطابل ديالو وتبع صفاء لي كل مرة ضور تشوف لعندو وتتبسم ليه وتاهو كايبادلها الابتسامة باسغراااب ... حتى وصلو لهاداك الجناح ..... وشافت عند المسؤولة مدات ليها لكارط ...وحلاتو كان جناح فالممر الملكي حدا الجناح ديال قسم ... والاجنحة الاخرى لي كايكونو vip ...
عطاتو الكارطة ومشات باتجاه قسم كتجري باش يقدها الوقت تقضي كااع هادشي لي فوق راسها ...
دخل اصيل كايشوف مع الجناح ... حط الكاغطابل ديالو فوق السرير ... كان الجناح غالب عليه اللون البني والبيج ... فيه سراجم مضورين عااليين .... وشرفة بعيييدة على السرير ... كان بابها ديال الزاج مغطي بريدو ... وحمام حتى هو مطل على البحر .. كان جناح راااقي ... قدر يفهم انه سويت ملكي مخصص ليهم ...
الى كان هدا الباطو ... الدار لي كبرات فيها كيفاش غاتكون! سؤال بليد طرحو على راسو باش يبدا يتخيل هاد البنت شنو المستوى لي كبرات فيه وشنو لي ولفات تعيش فيه وواش قااادر يوفر ليها بحالو ؟؟؟؟ الجواب بزربة جا لدماغو .... لي هو لا .... مستحيل ....
كلس فوق السرير كايتنهد ... وكايفكر فهاد المحيط لي داخل فيه .... وفهاد الباخرة لي غاتصوگها هي بيه .. وهو تابعها فطريقها ... واش غايوصلو لبر الامان سالمين ! .... ولا غايغرقو بجوج ! .. ولا غيغرق غير بوحدو ! .....
عند جود ....
الساعة الثامنة والنصف ..
كان الحال بدا يظلام شوية وهو كالس فالطموبيل حدا الفيلا دأريج ويونس ... كايكمي الكارو ديالو وكايشوف قدامو فالبحر لي كايبان بعييييد فنهاية طريق طويلة بين الفيلات .. توحش هاد الجو ديال الظلام فهاد الوقت ... هاد الظلام خلاه يفكر فحاجة وحدة ان الصيف مشاااا ... دااز صييف طوييييل بزااف !!! ... دااا منو بزاااف وعطاه بزاف ... وبدل ليه حيااااتو كاملة عاد مشى ... ودابا غايدخل فصل جديد .... غايدخل الخريف ! اشنو غايجيب معاه تاني ... الصيف جاب معاه كاراج وخطبة واحلام جديدة .... ودا منو جدو .. ودا منو موناكو ... والخريف اش غايدير !
بدا يضحك وهو كايشوف هاد ليام لي غادا وكترتب ليه حياتو على هواها .... كايشوف لراسو كيفاش رجع كايفكر تاهو فاليام !!!! ... بعد مكان معارفش فوقاش كايصبح الحال وفوقاش كايغرب ... معارفش شنو ليوم وشنو غدا . .. كاين هااايم ... موضر .... وتايه ....نفس الحياة لي بانتليه دابا بيلسان كاتقلب عليها .... وهادشي لي باغي يبين ليها ... انها ماشي هي الحياة الصحيحة وماشي هي القرار الصحيح ... وانه بقوة مكتبان لينا راه هي لي صحيحة .. بقوة ما انها كتجرفنا للحضيض ...
سمع الباب تحلات وهي تبان ليه بيلسان خارجة .. كانت بغووب بيضة قصييييرة يسميطات وحد ركاابيها ... وصندال ليلية عاالية فضية بالحجيرات .... طالقة شعرها ودايرة ميكاب ليلي مع حلق فضي ... الاوتفيت ديالها لبساتها فدريسينغ وهي عارفاه غاايعلق عليها ولكن ماعرفاتش علاش بغااات تسمع داك تعليق وغيرتو عليها .... فنفس وقت بغات تجابه معااه تاني ولا كاينغمها خصامهم لي كايزيد يقربهم من بعضياتهم .....
جاااية والضحكة مزينة وجهها وهو طفى لكارو فبااصتو فطموبيل وتسدات لبواطة ونزل مشى باتجاهها مبتسم ليها ..... وشدها من يديها طلعاها ليها كايضووورها ....
جود : اش هاااد زيييين عندي انا !!!!
بيلغستن : ( كاتشوف فيه بإستغراب لي ماعلقش على لبسها وجاوباتو مستغربة كاتشوف للكسوة ) عجباتك ؟؟؟
جود : سي ... زويييينة ... ( حل ليها الباب )
ضحكات ليه وطلعات فطموبيل وهو سد عليها لباب مبتسم فيها غير عطى بظهرو تنهد ومشا وركب .... وهي بقات كاتشوف مستغربة !!!! .. علاش ماقال ليها والو على لكسوة واخا صدرها كايبان منو ! ياك قاليها متعاودش تلبس بحال هاكا ؟ مابقاش عنو مشكل !!! .... قلبات شفتها لجنب و هي اصلا لبساتها غير ضد فيه .... دارت سانتيير وشافت لعندو وهو ديمارا وزاد .... تابان ليها شعل المووسيقىى وجهد ليها وهي غير كاتشوف مسغغغربة !!! .. اخر مرة ركبات معاه ماشعلهاش كاع وماعندوش مع صداع !!! .... بقات غير كاتشوف فيه وهضرات بجهد باش يسمعها
بيلسان : كتحاااول ترد جوود لقدييم ولا كيفاش ؟؟؟ ههههه
جود : قااالووو ليا تووحشتيه .... ..
بيلسان : ( كاتهضر بجهد ) صرااااحة ااااه ... ولكن راه بديت نولف جووود لااااخر ....ونسيييت القديييم ...
جود زاد جهد للموسيقى ضاحك تايشطح معاها غير براااسو وهي كاتشوف فيه باستغراااب مامخليهاش تستمتع بهاد لخرجة ... وهو شاف فيها متوترة وشد يديها عندو باسها .... وهي حطات راسها على كتفو وقربات لودنو كاتهضر باش يسمعها بسبب الموسيقى ....
بيلسان : فييين غااادين ؟؟؟؟
جود : ( مد يدو ليتيفون وعين على الطريق وعين عليه .... تالقى داك الانونص ديال واحد لبارتي فواحد الكلوب نايت وراها ليها ) غانمششيو هنا ....
بيلساان : ( كاتشوف لداك الانونص لي كانت مكتوبة فيها ان الحفلة غاتبدا مع العشرة ديال الليل حتى للجوج دصبح ... وشافت فيه ) جود كضحك معايا ياك؟
حوك : لا .... ( حط تيليفون وشاف فيها ) ماعجباتكش ؟؟؟؟
بيلسان : ونتا عجباااتك ؟؟؟
جود : الى عجباتك نتي .. غاتعجبني تانااااا ...
بيلسان : ( مدات يديها نقصات الموسيقى وشافت فيه ) واش كادير هادشي باش دير ليا الخاطر ولا سنو مافهمتش ؟؟؟
جود : سي ! ....بغيتك دوزي ليلة زوينة قبلما تسافري ( مد يدو جهد الموووسيقى )
بيلسان بقات غير كاتشوف فيه وهي ترجع تاني يديها نقصااات الموسيقى وشافت فيه ....
بيلسان : جود ... خلينا نمشيو لشي بلاصة غير انا وياك .... كنحس بيك ماباغيش غير داير ليا الخاطر بزز ... انا هااانية خصني نكون غا معاااك واخا نبقاو نضورو غافطموبيل .....
جود : نوووو .... قلتي ليا بغيتي تعيشي وان الحياة زوينة بلا تعقيدات ....وبلا مانفكرو فيها بزاف. ... بغيت نجرب معاااك هاد الحياة حتى انا .... ياك هادشي لي بغيتي نعيشو حياتنا انا وياك ؟ .. اولا ؟؟؟
بيلسان : ااه ... و ولكن ماشي بحال هاكا !
جود : وبحالاش؟ ... ياك هاكا كنتي نتي وجود القديم ؟؟؟؟,
بيلسان : اااه هاكا ... ولكن .... فففف ( شافت لزاج ) صاااافي ... ديرني ما قلت والو ....
جود شاف لعندها هو يزيد يكككسيري وهي كاتشوف من الزاج تاحساتو حاضيها وضارت عندو وابتسم ليها ....
جود : مال حب تقلق ؟ ... ودابا حنا غادين ندوزو وقيتة زوينة ماشي باش نتقلقو. ....علاش تتفكري ... طلقيها تسرح كيف كاتقولي .....
بيلسان : عارفة ... و ولكن ... ماباغاش نعاود لغلط ديال لبارح ماما وبابا غايتخاصمو معايا لاتعطلت بزاف . حيت انا قلت لماما مغانتعطلوش ....
جود : وهانتي دابا كاتعقدي الجو بالتفكير .... ماماك دابا ترطبيها بشي حاجة .. ياك كاتخافي غا من اياد؟ اياد مكااااينش ...
بيلسان : ياك نتا لي كاتقول ليا ديري عععقلك !!!!!
جود : وياك نت لي فاش كانقوليك ديري عقلك كاتقولي ليا لا انا باغا غير نعيش .. اووووكااااي .... نعيشو بجوج .. بغيت نتبع طريقك شوية وهادشي لي ديما كاتقوليه ... يمكن يكون عندك فيه الصح .....خلييينا نشوفو طريقك كيدايرة. .... مالكي دابا مقلقة؟؟؟؟
بيلسان : نوووو .. انا صااافاا ( ضارت كاتشوف للزاج )
جود : داك البلاصة شكروها ليا الدراري صحابي بزاف .. فيها ڤايب زوين ... قلت ليهم يتسناوني تما ....
بيلسان : ( شافت فيه بزربة ) غانتلقاو صحابك تما ؟؟؟؟؟
جود : سي .... منها تعرفي عليهم ....
بيلسان : كيفاش ؟؟؟ ... انا قلت زعما راه غاندوزو هاظ الليلة غير انا وياك ... لدرجة جيت لابسة هاد لغوب بحال هاكااا .... غير باش تقول ليا معرية نقوليك بلي باغا نمشي لشي بلاصة نكونو غير بجوج داكشي علاش !!!!! مامعولاش على بارتي اجود ....؟؟؟؟؟؟
جود : ( شاف معاها للكسوة ) مزيانة مالها .. كون بانتلي فيها شي حاجة ماهياش كون قلتها ليك .... عندك الحق بنادم راه خصو يعيش شوية بلا قوة التفكير .. غانشرفو بلاا وقت. ..
بيلسان : كيفاش مزيانة ؟؟ .... جوووود قول ليا عافاك بلي راك دابا غا كضحك معاياااا .... حيت مايمكنش تكون هدا نتا ؟؟؟؟؟؟ مابقاش كايهمك لباسي ؟؟؟؟؟
جود : وااااشتي دابا كيف باغا تخسري علينا الجو ؟؟؟؟ انا والله مافهمتك ياهاد البنت .... ياك هادشي لي نت باااغااا ؟؟ ياك هادي هي لي الحياة لي فارعة ليا راسي بها ... ولاكاينة مزال شي وحدة اخرى انا ماعارفهاش ؟؟؟؟؟
بيلسان ضورات راسها للجنب وسكتات ملي مالقاتش ليه جواب .... مزال كاتحاول تقنع راسها بلي كايضحك معاها ولكن كايبان ليها جدي ! ... زاد جهد للموسيقى تاني وهاد المرة بدلها ودار وحدة صاااخبة كتر منها ومكسسيري وهي حسات بتووتر .... اه هي بصح هادشي كايعجبها .... ولكن علاش معاه حسات هاكا ؟ علاش ملي قاليها الكسوة جاتك مزيانة و وغانمشيو حدا صحاابي ماعجبهاش لحال مع العلم كانت كتخرج معاه شحال هادي بحال هاكا ؟.... هي علاش نهار قاليها اخر مرة تلبسي هاكا نهار بان شوية صدرها كان عجبها الحال !!!!! وعلاش دابا معجبهاش الحال ؟ واش شنو باغي قلبها ماشي هو نفسو اش كايمليه عليها دماغها ؟؟؟ علاش هي دابا معصببة وكتحس بالعافية شاعلة فيها ..... ؟؟؟؟
واش مابقاش باغيها ؟؟؟ واش غايرجع يلعب بيها تاااااني ؟؟؟
بيلسان : ( ضارت شافت فيه ) جووود ... مابغيتش نمشي لداك لبارتي .. ماراشقاش ليا ... بغيت نتعشاو فشي بلاصة غير انا وياك بجوج ونمشي فحالي ننعس .... ماعنديش لخاطر دابا ...
جود : علاش ؟؟؟؟ انا قلت غاتكوني باغا دوزي زعما لليلة زوينة تنسيك شوية المشاكيل .. نردو فيها دكرياتنا لقدام ...
بيلسان : ( بانفاعل ) هاااد الليلة زوينة راااه كاافياني ندوزها معاااك بوحدنااا .... هادوك الدكريات لقدام حتى للبارح وكانو كايبانو لياا زوينين .. ولكن مور ماكلست شوية مع دماغي وفكرت فهضرتك وفهضرة خويا وفداك الليلة ديال افرااان .... قدرت نفهم بلي شحال هادي كنتي غير كاااتلعب بيا .... جود لي عرفت دابا وكنحاولو نولفو بعضياتنا .... مغايدينيش لبارتي وما لابسة هاد لاغوب وسط صحااابووو ..... ماتبقاش تلعب ببيا بين هادا وهاداك ..... ماشي تانسى واحد ونبدا نولف عقلية لاخر وتبدا تعجبني تنوض ترجع ليا لقدييييم ..... واش كاتلعب بيا ولا شنو !!!!!
جود : ( تنهد وحبس الطموبييل لجنب وشااف فيها ) دابا قولي ليا نت ... اش بغيتي .... انا بااغي نعرف دابا .... انا بااااغي نفهم ... شنو باغاااا ؟؟؟, ... واش كانكلسي شوية مع راسك طرحي هاد السؤااال ؟؟؟؟؟ ( بيلسان نزلات راسها كتلعب بصبعانها ) بيلسان .... راه نتي لي كل مرة كاااتقولي ليا خصني نعيش .. خصني ناخد الحياة ببساااطة ... نعيشها بلا تعقيدات .... بحال كيف كنا .... هااانا ... هانا خديتها معاك دابا ببساااااطة و مادرت حتى شي حدود .... طلقتها تسسرح كيفما بغيتي وكيفما كنتي كاديري نتي وداك جود القديم ديالك .... علاش دايا ماعبجكش الحال ... اشنو باغا مني ندير ليك ؟؟ نزير لا ... نرخف لا ... شنو ؟؟؟؟؟ شنو باغا ابيلسان ؟؟؟؟؟؟
بيلسان : ( بانفعال ) واااتصصصرف معايا غييير على طبييعتك وصافي
جود : ( بانفاعل اكتر ) تصصصصرفت ماعجججبكش .... تصرفت معاك انا جوووود .... ماااعجبتكش .... واش جووود ابيلسان غايتسنى خوك يساافر باش يجي يخرجك بلا خبارو ؟؟؟ واش جود ابيلسان لي كااايرسم طريقوو وسط العااافية على قبل مستقبلو معاك كاتجي تقولي ليه انا باغا نيعش ببسااااطة !!! .. مووووت نتا وتفركع انا باغا نعيش آآآليييييز ..... هاااهي الحياااة لي بغيتي .... مالك معصبة دابا ؟؟؟؟ مااعحباااتكش ؟؟؟ هي كتفرعي لينا راسنا بهضرة نتي مامتأكداش تا منها و كتجاااابهي .... واش باغا تسطييييني نت ؟؟؟ واش بااغا تطرطقي لديلمي شي عرق عاد تتهناااااي
بيلسان : ( هزات فيه عينيها نلي شافتو تعصب وهو مريض وشدات فيديه ) جووود .... صافي نسى كاع اش قلت .... انا راه غاااكنهضر ..... انا راه لبست هاد الكسوة هاكا باش الى قلتي ليا علاش لبستيها غانقوليك ماشي سووووقك وغانتقلق.. ولكن لا قلتي ليا جاتك زوينة غانتقلق تاني حيت ماغرتيش عليا .. انا هاكا دااااايرة واش كادي على هضرتي قووول اه وصافي .. ونتا ختاريتي هبيلة اش غانيدر ليك .... اه باغا نعيش حيااااتي .... ولكن ماشي بحال هاكا ... مغانمشيش مع واحد يديني لبارتي فيها صحابو ومايغيرش عليا ..... والله تااانضررربو بهاد لخااااتم .... اه كااايعجبني نعيش ولكن عرق الاسماعيلي راه تانا فياااا ......
جود : ( هد عليها بيديه يضربها وهي خبعات وجهها ) غاااالي يجمع دييييلمك ...... تتتعصبي الواحد وتجي تقوليليه انا غا هبيلة ....لقيتيها مسلكااااك ....
بيلسان غي كاتشوف فيه بعيون بحال لقطة ... وهو كانعل شيطان ورجع ديمارا ورجع فطريقو كايتمنى تكون فهمات الدرس...وهي ضورات راسها للزاح وتبسمات بشووووية وشافت لعندو وهي تقول ليه بصووت كيووووت ....
بيلسان : كنتي غي كضحك معايا ياك ؟؟؟؟ مكنتيش غاديني لبارتي بهاد الغوب مع صحابك يااااك ؟؟؟
جود : ( شاف قدامو كايضور فراسو ) لاا الاه الا الله .... .
بيلسان : هههه ( قريات لدراعو وعنقاتو نعسات على كتفو ) وااااادابا اااااه .... دابا حلات الركككبة ... قوولياا فين غانشميووو. .... هم ؟؟؟؟
جود : لداركم .....
بيلسان : هاء ؟؟؟؟
جود : درت مع باياك نص ساعة ونرجعك ... راه لليل هدا ...
بيلسان : . ( قلباات شفايفها ) مادوزتش تانص ساااااعة مقاااادة .....
جود : على نتي كدوز معاك شي ساعة بلا صدااع !!!, لاااااا هادو العادات والتقااليد دياولك ......
بيلسان غير كاتلعب بصبعانها فوق دراعو ساكتة قالبة شفايفها بحال شي طفلة .... وهو مقابل طريق ونزل عينو شاف فيها وبدا يضور فراسو ....
جود : تالغدا وغانجي موراك .... غانمشي معاك لطنجة غاجمعي عليا داك التغوبيشة
بيلسان: ( وسعات عينيها وتكعدات دغيا شافت فيه ) ححلف بالله
جود : ( شاف فيها ) ماااعرفتش كييفاش ... ولكن اديلمك راه غانتوحشك ..... نتي وهاد الاعصاااب لي كاتركبي فيااااا ...
بيلسان غي ضحكات وعنقاااتو ناعية على كتفو فرحااانة وهو مبتسم وباس ليها على راسها و كمل صوكان ...
يتبع..
التعليقات
لا توجد تعليقات بعد، كن أول من يعلق.